¹Owon nya obo atulo Olo Rama al anya Elkana lonyo Jeroham, lonyo lonyi Elihu towoyo ono Tohu oto haŋ Sufi. ²Owon nya iko aŋoruo arrihai; anya nya etteri ŋotte Penina buo etarrihi ŋotte anya Hana, owon nya penina iko aduri, buo hana obeŋ issio.³Adahai nya isi aŋasi daŋ imojori iko isioriere esiorita jyo Hollum imiji Silo. Owoni nya lonyirok Eli anya nya lobo Hofi buo lobotie Finihas. ⁴An attu oloŋ honyi ilori isiorriere esiorita honyi jio eŋa nya, isiata inyi eriŋo obo jio Penina ŋoruo honyi, iko jio lonyirok buo ŋariok honyi.⁵Buo jio Hana isiatta nya bai nyo omuno nya inyi Hana, obeŋ duobu Hollum isio inyi aduri. ⁶Odiaha nya ataji hani honyi bebe, nyo omunoi naŋotte on obeŋ to isio.⁷Aŋasi daŋ al afuoi imojori lihaji Hollum imojori tahaŋ honyi daŋ, itaŋalafayo nya hani honyi inyi. Tania oyootio nya inyi bebe buo fe obeŋ oremik inya obo ariŋ. ⁸Ifio nya habi honyi inyi ojio, "Hanna, nyo iyoo iyye nanyo? Nyo ibeŋ iyye iŋiyo? Nyo iloŋojita iyye? Abeŋ ni agalik aduri tomon?⁹Jio nobo oloŋ, odioto nya Hana hinya attohuni isi aŋiyo iko amata to Silo. Itoŋo nya Eli imamaji itoŋi honyi ika haji imojit Hollum. ¹⁰Orroho nya negigilo honyi; ette inyi imojo jio Hollum to namejan buo fe oyoo bebe.¹¹Ette inyi ituŋo jio Hollum ojio, "Hollum, el iruk iyye namojo hoŋ apit hoi to nerre hun odiahai itaji hoŋ, buo fe ibeŋ iguoro, isiarak ani etoo lee, ati enyahi adini amanya lihaji Hollum aŋasi honyi daŋ, obeŋ adi nobo nariŋ itaŋ inyi tuŋ."¹²Hinya harasaa inyi imojo jio Hollum, omijio nya Eli toktok ihutuk honyi. ¹³Omojo nya inyi to ataji. Iyiyebuhita etuk honyi ati obeŋ nya nekiana honyi itaniŋuno. Tania, Ogilo nya Eli jio iwwanyik aŋotte ana aruma. ¹⁴Ette Eli ijiaran, ittulak adi iyye aruma many baya? Itawaja amata balu."¹⁵Ette Hanna itaraŋ jihonyi ojio, "jiai, haboni abeŋ ni aruma, arani aŋotte on awoto iko negigilita bebe, abeŋ ni amat obo abalu, amojo duo ni bebe jio Hollum. ¹⁶Hejio ara ni aŋotte on obeŋ abaŋ Hollum; amojo duo ni to neram an agalik jihoŋ."¹⁷Ette Eli ijiaran jihonyi, "Ilo to nemura; isio adi Hollum olo Isarail ariŋ an imojo iyye jihonyi." Ette inyi ijiaran, ¹⁸"Ijiara ani arumak amuno ihosiere hoi." Ette inyi ileten, ette iyyak inya obo aŋiria; Ette ibiaŋan inyak iloŋojita.¹⁹Odiotoi nya isi berien to ataŋtaŋ motie imojori ihosiere Hollum, ette icohuno ihaŋ hosi imiji ono Rama. Jio nattari nya etaraŋ Hollum namojo Hanna ŋoruoi Elkana. ²⁰Teyya, hinya egigilu inyi Hollum ette Ana ibuŋatio ette siuna letoo lee. Ette ifurana inyi Samuele, on ojio, "Nyo efiyo nya ni inyi jio Hollum."²¹Teyya inyak, ette Elkana iko ŋoruo honyi ifuatan isiaraniere jio Hollum nesiorita iko timojori. ²²Ati obeŋ nya Ana olo noloŋ nya; Iramak nya inyi jio habi ijio, "Abeŋ ni aremik ileten many obiaŋari etoo inyak idasa; teyya oŋida ani eyaru inyi ihaji Hollum imanyari mak dia." ²³Ette habi honyi Elkana ijiaran, "Ana ihana ariŋ an awak taji hoi. Itilai obiaŋari adasari; ittarraŋ adi Hollum namojo hoi." Ette Ana itadasio etoo ihaŋ obolorori.²⁴Hinya abeŋ etoo inya idasa, ette iyaru inyi iko aburruŋa hiteŋ, buo asofiyya hifa arrihai, iko ehulo balu abotie, ette iyaŋuno inyi imanyari ihaji Hollum lifau Silo. Tania homuta nya Inyi. ²⁵Ette isi iŋot eteŋ alia, ette iyaŋuno inyi jio Eli.²⁶Ette Hana ijiaran, "Jiai, haboloni hoŋ! Nani ana aŋotte hinya amotto jio Hollum aŋati jihoye. ²⁷Etoo hinya amojoni jio Hollum etarraŋ nya Hollum namojo hoŋ. ²⁸Esio ni inyi jio Hollum, ijiara amanya lihaji Hollum." Ette inyi itahabuyo Hollum dia.

¹Omojo nya Ana ette ijiara, "Hollum, omuno ataji hoŋ iyye bebe. Ogol ahuan hoŋ daŋ te iyye. Eŋereni ekiana ahana ihiji miororok hoŋ nyo iwon iyye ikoŋ, amunoni neruk hoŋ iyye bebe.²Obeŋ obo atulo ol odua iho iyye, Hollum. Obeŋ obo arari iyye; Obeŋ obo amaji idimi arari Hollum hohoi.³Henyahata itadara; Henyahata ikiana to ajore. ilofioro Hollum bebe, nyo ilofioro Hollum; omijak inyi ehanita hohoi daŋ ababo ababo. ⁴Itariajak adi Hollum amiorok hul ogoli to bebe, ati isiarak adi inyi agolon jio hul ilihi to.⁵Hia hinya owoni iko anyata arai apiti lomuk inyuraniere aŋiyo hosi; hia hinya oniamai to efoŋi, aŋotte hinya iholofi to esiu aduri hattarik ati aŋotte hinya owon iko aduri arriai ejiriŋa abotie nyo ayei aduri daŋ.⁶Ottoho Hollum omuk buo fe isiarak lomuk nesu. Igigilo lobo ijo alo adi inyi iyee buo Hollum ette itusu. ⁷Isiarak Yawe jio lomuk elociaŋ buo jio lomuk Abara. Isiarak jio lomuk anyalami, buo fe akaf lomuk.⁸Akaf Hollum lalociaŋak tafau many ihide. Akafu hia hul omehine to fau many oriamari iko lonyirok hobuok, fe orutani adi aseger en ittok. Arai alala afau ana ahuno Hollum, owotia nafau ana daŋ jihosi.⁹Irrirria adi inyi hia hul iruhi to jihonyi, ati jio hia hul obeŋi itaniŋie eram honyi itaduahi adi inyi isi itua iriohi, obeŋ lobo atulo itatur amiorok honyi to nagolon honyi.¹⁰Hia hul ihari Hollum ikukur adi Hollum isi; abak adi ahilai isi tedou. ikum adi Hollum afau daŋ; Isio adi Hollum agolon jio hobuok buo fe itahuyo adi inyi hia hul onyimu inyi."¹¹Ette Elkana leten , ihaŋ hony oto Ramai. IEtte letoo alia iduloro jio Hollum arabotie iko Eli.¹²Orohoji nya lonyirok Eli. Obeŋi nya isi abaŋi Hollum. ¹³Itoŋoi nya aati iko aboloni ihuna, el iyaŋuno obo atulo esiorita honyi jio Hollum, ottu egiamani honyi iko eduhi hiriŋo buo eriŋo hefuo. ¹⁴Ette irriomonia eduhi hiriŋo ania itua tobok en ifuori eriŋo, eriŋo on iyaŋuno ariŋ ania iyaru aboloni ahononyi. Igiamai nya daŋ ihuo nya.¹⁵Ati, ariŋ hinya orroho to bebe, oremik lonyirok Eli haboloni ittuna hobeŋi oŋotuni asumai on omudani jio Hollum ette jiaran, "Ifahu ani aboloni ojio oŋotonia inyi eriŋo alo inyi imudana! Awak eriŋo onohobeŋ omuda; obeŋ awak en ifuo to." ¹⁶Al ajio atulo ali jio egiamani, "ijiara boloni oŋotu do ahosiere asumai on omudani; teyya iyaru adi en iwak iyye iyaru," buo egiamani ette itarraŋ, "Isiarak, buo al abeŋ attoni iyaru to agua!" ¹⁷Ara nya ania eyau on obolo bebe ihosiere Hollum, nyo obeŋi nya isi abaŋi nesiorita hinya isiorie jio Hollum.¹⁸Tania homuta nya Samuele, igiama jio Hollum, iyafatio nya aboŋo iho an iyafatio aboloni. ¹⁹Iyaŋuta nya honye aboŋo aŋejuk aŋasi daŋ an afuoi isi isioriere esiorita hosi jio Hollum iko habi honyi.²⁰Ajak nya Eli Elkana iko ŋoru honyi ette Ijiaran, "ijiara Hollum isiarak aduri jihoi jio aŋotte ana nyo tenefio honyi Hollum." Teyya ette isi icohuno ahaŋ hosi. ²¹Ette Hollum inyak iluak Hana, ette ibuŋatio. Attu isiuna aduri liawa hunihoi buo aduri ŋoruo arrihai. Buo Samuel arasa igiama ihaji Hollum.²²Hinya emaruak Eli bebe; etaniŋu nerre hun ihanie lonyirok honyi jio aati Isaraili, iko ajotori hosi aŋotte egiamani ette ikat iwwuahi. ²³Ette ijiaran jihosi, "nyo igiamati itai erre hunia? Etaniŋuni epalita daŋ hun ihanata itai ihosiere wati." ²⁴Obeŋi erre hun etaniŋu ni hunia oyiji. Itarrohojieti itai negiama wati Hollum.²⁵En ipal obo jio lobo, ikum adi Hollum inyi; ati el iyau lobo ihosiere Hollum, ŋai adi ikiana jihonyi? Obeŋi oremehini itaniŋio nekiana monye, nyo awak Hollum ittohoro isi. ²⁶Abobolororo nya Samuele, Omuno nya Hollum inyi buo fe aati daŋ omunoi inyi.²⁷To nobo noloŋ attu obo eyani sayo jio Eli ette ijiaran, "Eram ana en iramak ani Hollum: 'Hinya hepitoi hohonyok hoi ifau Masir ihaji Farao, abeŋ nya ni aleyehino Erone? ²⁸Jio elehaŋitek wati Isaraili daŋ, anyimu nya ni awoyo hohonyok hoi ahabalok, ihumari, iko imudiere ehumita, buo fe iyafatio aboŋo habalok ihosiere hoŋ. Esio nya ni jio hohonyok hoi igiamari jio laati Isaraili iko imudire esiorita hosi.²⁹Nyo ibeŋ iyye ibaŋ nesiori hun hinya awak oŋida isiorie jio namaji an amanyari ni? Nyo ibaŋ iyye lonyirok hoi agalihini ani, ofirorik te nesiorita hun isiori aati Isaraili?' Ojio nya Hollum, Hollum olo Isaraili, ijio, ³⁰"Acorok nya ni awoyo hoi iko ono hohonyok hoi, ijio oŋida arai ahegiamak mak.' Ati ihania ojio Hollum ijio, 'Awak ni iramana iyye ahodehode, abaŋ adini hul abaŋi to ani,buo hia hul obeŋi to abaŋi ani abeŋ adi buo fe ni abaŋ isi.³¹Imijite, ofuoni adi noŋitek hun atohori ni monye miji huta haŋ monye hatai, many obiaŋari obo ahouti tahaŋ hatai. ³²Ihawwuati adi itai jio namaji an amanyarini. Ati esio adini namanya on oyu jio lati Isaraili, obeŋ adi lobo ahouti tahaŋ hatai. ³³Jio lomuk tahaŋ hatai hul abeŋ ni eduha adi hehuma, oŋodoi adi, ittulani adi ataariha amanya hosi daŋ. Aati daŋ hul isihini ihaŋ hatai oyei adi.³⁴Ara adi ania etahuti jio lonyirok hoi hul arrihai hulia, Hofi iko Finehas: Oyei adi isi daŋ harihai oloŋ abotie. ³⁵Eduhu adi ni ta ahuan hoŋ aboloni el igiama nerre hun awak ni. Ehuhum adi ni ahaŋ honyi buo fe igiamai adi arabotie iko hobu al anyimuni.³⁶Aati daŋ hul ofitaroi to tahaŋ hatai origoŋoi adi jihonyi, ifiye adi ifiyo aŋiyo iko arobiya jihonyi ifiye adi buo fe inyi ijio, "Isiarak ani egiama iko lobo aboloni oŋida ani arumak aŋiyo.""

¹Homuta nya Samuel hinya igiamari inyi iko Eli. Jio noŋitek hua ibuha; nya Hollum ekiana buo fe ibuha aleyehit. ²Jio noŋitek hua, amijo nya Eli harihari, eliaha nya aŋodo muluk muluk, oferio nya inyi iŋeref honyi. ³Buo fe Samuel oferio ituahaji Hollum, imaji hinya awanari asenuk ono Hollum. ⁴Iloŋ nya Hollum Samuel, ette Samuele, Samuele buo inyi ette iruk ette ijiaran, "Ani olo."⁶Ette Samuel iŋioron jio Eli ette ijiaran, "Ani olo, iloŋo bu iyye ani." Ette Eli ijiaran, abeŋ ni eloŋo iyye obo; acaharo ilo ofrie." Ette Samuele ileten iferio. ⁵Ette Hollum iloŋo inyak, Samuel, Samuele, ette Samue idioto inyak, ette ileten jio Eli ette ijiaran, 'Ani olo iloŋo bu iyye ani." Ette Eli itarraŋ, "Abeŋ ni eloŋo iyye obo, lonyihoŋ, ilo oferie."⁷Tania hobeŋ nya Samuel omijak etuk Hollum, buo fe hobeŋ nya inyi ikiana obo oloŋ iko Hollum hara nya etteri. ⁸Etahunihi, enyak fe Hollum iloŋ Samuele, ette fe Samuel idioto ette ileten jio Eli ette ijiaran, "Ani olo iloŋo bu iyye ani." Tania, agilu Samuele ijio Hollum iloŋo etoo olo.⁹Ette Eli iramana Samuel ijo, "Ilo oferie inyak; el inyak iloŋo iyye, ijiara, Hollum ani lapit hoi el itaira." ette Samuel icaharo ifererit honyi inyak.¹⁰Ette Hollum ittuna ette iwotia, ette iloŋo iho hoduo iloŋori inyi, "Samuele, Samuele." Ette Samuele ijiaran, "Ikianai ani lapit hoi el itaira." ¹¹Ette Hollum ijiaran jio Samuele, "Imijie, eliaha ni ehanio obo ariŋ iwati Isaraili, ililihai adi daŋ aati hul itairuni to eram nya.¹²Jio noloŋ nya egem adi nerre daŋ hinya ekiana jio nerre hun ipal inyi, many tetteri many ticuŋi. ¹³Eramak nya ni inyi ijio ekum adi ni awoyo hoi enya abotie ijiai, nyo laduri honyi iyaŋune nepit ihuatte hosi hama buo obeŋ itawoc isi. ¹⁴Nyo asar nya ni inyi ijio abeŋ adi ni aremik ibusana eyata huto haŋ hoi iyaŋuno duo bu iyye hunani isiorita."¹⁵Ette Samuele iferio many afaŋari; ette inyi iŋaa ekatin haji Hollum. Ati abaŋ nya Samuel eramana jio Eli nerre hinya iramak Hollum inyi. ¹⁶Ette Samuel iloŋuna Samuel ette ijiaran, "Lonyi hoŋ, Samuel lonyi hoŋ." Ette Samuel iruk ette ijiaran, "Ani olo."¹⁷Ette ijiaran, "Iramak ŋole Hollum iyye anyo? Iramak ani luŋa. ihan adi Hollum ariŋ on oroho bebe jihoye el ibeŋ iyye iramak ani erre daŋ hoŋole iramak Hollum iyye." ¹⁸Ette Samuele iramana inyi erre daŋ hun iramak Hollum inyi , obeŋ nya inyi omuanak omuk erre hinya iramak Hollum inyi. Ette Eli ijiaran, "Inyi bu Yawe. Ijiara igem nerre hun oyiji to jihonyi."¹⁹Obolo nya Samuel, owon nya Hollum iko inyi, obeŋ nya Hollum obusak nerre daŋ hinya ojio inyi. ²⁰Amijani nya aati Isaraili daŋ many to miji Dan many Berseba ijio ara Samuel olonyimoto eyani sayo Olo Hollum. ²¹Oleyehino nya Hollum Samuel inya to fau Silo ta ahuan honyi.

¹Etaniŋini nya aati Iasaraili nerre hinya iramak Hollum Samuel. Tania, erumi aati Isaraili ifere iriomori iko aati Falistin. Ette isi ihanana amaji ituhi hosi imaji an anya to Ebenesa, buo Falistin ihanani ono jio amaji an anya to afek. ²Ette aati Falistin ilier aderi irriomori iko aati Isaraili. Hinya aparanie isi, ette Falistin itatur Isaraili, ottohori nya aati alif aŋuan.³Hinya afuoni isi imaji ituhi, ette lahou Isaraili ijiaran, "Nyo aŋatak Hollum emiri Falistin itaturi emiri hohoi? Ijiara efuo ihafuno asenuk an awanari neruk ono Hollum to Silo, nyo oŋida onyiha iko hoi dini, oŋida icaa hohoi tomiorok hohoi." ⁴Ette isi ifahin aati omuk lifau Silo; teyya ette isi ihafuno asenuk ono awanari neruk ono Hollum ol lagoloni, al agalik to angelohien daŋ. Lonyirok Eli hul arrihai, Hofi iko Fenihas, owoni nya dia ihiji wati hinya ahafune to asenuk ono neruk Hollum.⁵Hinya afany asenuk ono neruk ono Hollum imaji ituhi, Iwuwoŋitai nya daŋ aati Isaraili, ittaraŋ nafau daŋ. ⁶Hinya litaniŋuni Falistin newuwoŋita wati Isaraili iko nawoo hosi, ette ijiaran, "Iramak newuwoŋita wati iberei ania nanyo?" Teyya, agiluni nya isi ijio eyaŋune isi asenuk ono neruk ono Hollum imaji ituhi hosi.⁷Abaŋi nya Falistin; Ojori isi ijio, "attu ajok ituhi aati hulia." ⁸Ette ijiaran, "Oroho adi jihohoi! Hobeŋ nya obo ariŋ owonita ihana berien! Oroho adi jihohoi! ŋai adi olo icaa hohoi jio agolon ajohin hunia? Ajohin hunia hinya itaremie to aati Masir to neŋuati gelegele ihidiofo. ⁹Ati itagoloto ahuatek, harata aliawa, itai aati Falistin, al abeŋ ŋadi era moi apiti Iberei, iho hinya ararik isi apiti jihatai. Hawotiati aliawa oŋida erem iko isi."¹⁰Ette Falistin irrem, ette itatur Isaraili. Afuhoi aati daŋ ahaŋitek buo aati abahai arriai bebe; Abahai nya emiri Isaraili alif atomuana hunihoi. ¹¹Ette iko iyaru asenuk ono Hollum, abahai nya daŋ aduri Eli hul arrihai dia, Hofi iko Fenihas.¹²Tati lobo atulo towoyo Benjamin ifuhoruno to maji fere ette ittuna imiji Silo jio noloŋ hinya orriomori nya, afany nya inyi iko naboŋojin honyi hun oguasai buo nahou honyi ibot aboro. ¹³Hinya hafany, Itoŋo nya Eli to aseger honyi aŋati ikoi nyo ilafuho nya inyi nasenuk ono Hollum. Hinya afany atulo alia itua miji ette iramana asayo hunia, ituruhoi nya aati daŋ totua miji.¹⁴Hinya etaniŋu Eli neturuho wati totua miji, ette ijiaran, "Nyo ituruhoi aati?" ¹⁵Tania, arai nya aŋasi atomuana hotoŋuan iko hotohunik, amijo inya inyi harihari.¹⁶Ette atulo alia iramana Eli ijio, "Attu inyi to maji fere. eruatu inyi duahana," Ette Eli ifiyo inyi, "Anyo on oroho to?" ¹⁷Ette atulo eliyaŋuno to asayo itarraŋ, "Etatturi Falistin emiri Isaraili. Attohori emiri arriai bebe, buo omuk eruati alet. Attohori Falistin aduri hoi hul arrihai, Hofi iko Fenihas. Eyarai buo fe asenuk Hollum on odua to bebe."¹⁸Emaruak nya Eli bebe, buo fe ofir nya bebe; hinya etaniŋu inyi jio atulo alia ijo aniafarai iko asenuk Hollum on odua to bebe, Ette ibataru oruaŋai atany akol miji. Ette amurut honyi iwuro ette iko iyee. Aremehini aŋasi honyi atomuana aŋuan hun arari inyi ahaboloni olo Isaraili hobeŋ inyi oyee.¹⁹Ibuŋatio nya ŋoruoi lonyi honyiel iloŋoi Fenihas, eliahai nya noŋitek honyi isiori Hinya etaniŋu inyi ijio abaharai asenuk on awanari neruk ono Hollum buo fe habi honyi iko hamoni honyi ayei, ette ohe honyi itterio adiaha kuak. ²⁰Ette isiuna etoo lee. Ocemi aŋoruo hinya oluahie to inyi ikianari ijio, "Eyaŋuno iyye etoo lee ati obeŋ nya inyi itaniŋo nerre hun ikianai aati hunia.²¹Ette inyi ifurana afure hitoo Icabod, on ojio, "Alo nakuatan addi to wati Isaraili!" Nyo eniafarai asenuk ono neruk ono Hollum, buo fe to naye ono habi honyi iko hamoni honyi. ²²Ette inyi ijiaran, "Alo fnakuatan addi te Isarail, nyo eniafarai nasenuk ono neruk Hollum."

¹Ihuania eniafarai Falistin asenuk ono neruk ono Hollum, eyarai inyi to Ebenesa jio amaji an anya to Asdod. ²Iyarai Falastin asenuk ono neruk ono Hollum ette ihanana inyi ihaji ono najok hosi an anya to dagon, ette ihanana inyi otto hide honyi. ³Hinya ahenyuni aati Asdod, onyurani dagon afer lifau ohosiere senuk ono Hollum. Teyya ette isi iduhuna Dagon ette ihanana imaji hoŋole awanari inyi.⁴Ati hinya ahenyuni isi nyamotie iwanyik berien, onyurani Dagon okuahino ihosiere honyi on okunyo to nomom. Aboŋuno nya nahou Dagon buo fe nahas honyi owurune ibaloroi nya isi daŋ ikahaji. Arasa nya ahuan hama. ⁵Jio neram ania many iko ahana obeŋ aboloni iko aati daŋ oremik irrioro ette ikahaji Dagon on owon to imiji Asdod.⁶Ijoria nya Hollum bebe iwati Asdod. Ittarroho nya Hollum isi ette iyaŋuno oŋoniaha, Imiji Asdod iko abotio gala honyi daŋ. ⁷Hinya egigiluni isi ottu aŋuai ania aŋai, ette isi ijiaran, "Halaha asenuk ono Hollum ono aati Isaraili itoŋo iko hoi dini, nyo ŋadi aani Hollum odiŋorohino hohoi iko ajok hohoi Dagon."⁸Ette isi ifahina eram daŋ jio Hobuok Falastin; iramani isi ette ijiaran, "Ehan adi aŋai asenuk jok Isaraili aŋai?" Ette isi itaraŋ ijo, "Ijiara iyaŋune asenuk jiok Isaraili nya aŋati imiji Gad." Teyya ette isi ihafuno asenuk jiok Isarail imiji Gad. ⁹Ati ihalu hafuno hosi, ijoria nya Hollum jio amiji Gad, ette iyaŋuno eŋiŋalata on obolo bebe imiji jio laati Gad. Ittigem nya inyi aliawa huto bore gala Gad, hul odiha iko hul itaha to daŋ; iyaŋuno nya inyi buo fe naŋua oŋoniai jihosi.¹⁰Teyya ette isi iyaru asenuk Hollum ania amiji Ekrone. Ati hinya hafany asenuk Hollum imiji Ekron, ette aati Ekrone ituruho, ette ijiara, "Eyaŋune asenuk Hollum Isarail hohoi iko aati hohoi daŋ."¹¹Teyya ette isi ifahina eram jio hobuok Falistin daŋ; ette ijiaran jihosi, "Iyatti addi asenuk Hollum Isarail to miji hohoi, Ijiara iyarai imaji honyi, nyo oŋida obeŋ ottoho hohoi iko aati hohoi." Obolo nya abaŋi jio abotio gala hosi daŋ; nyo ijoria nya Hollum jihosi bebe. ¹²Jio laati hinya obeŋi to oyeei, oŋuai nya isi iko noŋoniahien, afanya nya neturuho hosi idou.

¹Itoŋo nya asenuk ono Hollum imiji Falistin ayafajin hattarik. ²Ette aati Falistin iloŋ abalok iko abuana hosi; ette ijian jihosi, "Ehan adi anyo jio asenuk Hollum ana? Iramana hohoi enyaharu adi hohoi aŋai jio amiji hinya iyaŋunerek inyi."³Ette abalok iko abuana ijiaran, "El inyahati itai asenuk ono Hollum Isarail, henyahatti luŋa asai tuŋ; Isiatta luŋa esiorita hun eyata. Buo itai ittata iŋidari, tania iremehina itai imijana nyo odulo inyi ittigemio itai many iko ahana." ⁴Ette ijiaran, "Hunani isiorita hun eyata adi hun eremik hohoi isiarana inyaharai iko inyi? Ette isi ittarang, "Ihuhumata ayeli mien en iyalu to narijori oŋonia iko arijori ono edioro mien buo fe daŋ, mien nyo arai hobuon Falistin miet. Nyo itigem naŋuai ania itai iko hobuok hatai.⁵Oŋida ihuhumata arijori ono eyejit oŋonia, iko arijori ta huno adioro hinya itigemi to afau hatai, buo fe isiata nakuatan jio Hollum Isarail. Kuya oremik ibusana itai iko ajoiohin hatai buo afau hatai daŋ. ⁶Nyo itagolieti itai atajia hatai iho hinya itagolierek aati Masir iko Faro hunosi? Itigem nya Hollum Isarail isi bebe; hobeŋi nya isi obusani aati ofuoi?⁷Teyya, nekafi hirre aŋejuk iko esuŋ ahojiahien arrihai huno hobeŋi obo oloŋ iriatani arabotie. Iriatana ekafit ania, ati iyatti atawa hosi miji. ihanana asenuk Yawe itua honyi. Ihanana iko arrijorita huno nayyeli hunia daŋ itua iho esiorita hun eyyata jio nobo aŋati itua ekafit ania. ⁸Ittata ifuhana esuŋ hunia adiya. Omijete, al afuoi amiji honyi ono Bet Simis, ittata imijana ijio Hollum nya di iyaŋuno aŋua hunia. ⁹Buo al abeŋi, ette imijana ijio obiaŋara nya inyi; otu nya di hama."¹⁰Ette isi ihan erre hunia iho hinya irmanierek isi; iduhuni esuŋ ahojiahien arrihai, ¹¹ette ifita arabotie iko ehafit ania buo ette iyaru atawa hosi ihaŋ. Ihanani asenuk ono Hollhum diya iko asenuk ono arrijori huno oŋonia iko adioro itua daŋ. ¹²Ette esuŋ ittirara amiji Bet Simis. Ottirari to nekoi abotie, ette isuoro, obeŋi nya isi ahani iŋet kuya ahani ihorroŋ. Ottiforoi nya letaha hosi esuŋ hunia many tihorit hosi iko Bet Simis.¹³Odioŋoi nya aati Bet Simis amata hosi itua kut. hinya amiji isi ette igonyuna asenuk ono Hollum, omunoi nya isi bebe.¹⁴Ojiŋuni nya isi otto mana josua to bore gala Bet Simis ette iwotia diya. Owon nya amoruo diya en ittok, ette isi ibbibor eyek ehafi ania, ette isiarana esuŋ hunia esiorita jio Hollum. ¹⁵Ette ehumani iduhuna asenuk Hollum iko asenuk hinya ihananirek arijorita ono oŋona iko edei, ette ihanana isi ihide moruo. Ette aati Bet Simis isio esirita hun omudani iko esiorita omuk jio noloŋ nya jio Hollum.¹⁶Hinya egonyu ni eletaha Falistin, ette icohuno amiji Ikron.¹⁷Arrijorita yel huna huno oŋonia hun isiori Falistinohien esiorita hun eyata jio Hollum, abotie jio Asdod buo nobo jio Gasa, abotie jio Askelon, abotie jio Gat, buo fe nobo jio Ekron. ¹⁸Orriamari nya arijorita hidei iko abotio gala hun owoni to imiji Falistin, jio obuok hosi hula miet, jio amisihi hun itaha to iko amisihi hun idihara to. Arasa amoruo enitokuan hinya itahinerek asenuk ono Hollum etamijani many ahana imana Josua olo Bet Simis.¹⁹Ottoho nya Hollum aliawa 50, 070 to miji Bet Simis nyo omiji nya isi atua senuk ono Hollum. Atarihai nya aati bebe nyo esiarak Hollum ariŋ an agalik to bebe. ²⁰Ette aati Bet Simis ijiaran, "ŋai oremik iwotia ihosiere Hollum, laduarani? Efahi adi asenuk Hollum ana ajia jihohoi tene?²¹Ette ifahina leeyak sayo jio laati hun amanyai imiji Kiriat Jerim, ette ijiaran, "Enyahuni Falistin asunuk Hollum; ifuana iyatti,"

¹Ette aati Kiriat Jearim ifuana, ette iyaru ahaji Aminadab ihide dulet. Ihanani nya lonyi honyi aherrirriani senuk Hollum. ²Many jio noloŋ nya arasa asebuk Hollum imiji Kiriat Jearim, many aŋasi atomuana arihai. Oluahai nya aati Isarail daŋ ette igigilo ayito ajo Hollum.³Ette Samuel ijiaran jio aati Isarail daŋ, "el icahati itai jio Hollum to atajia hatai daŋ, iyara addi ajohin fuanak fuanak iho nobo on ojori astoret ajiok Kananohien, iyara addi tehiiji hata, oyitoti jio Hollum, itahuyete inyi hama, italuahuna adi inyi itai tohas Falistin." ⁴Ette Isaraili iduduhuna ajohin hunia obo en iloŋoi Baal iko Astoret, ette imojo Hollum hama.⁵Ette Samuel ijiaran, ijiara aati Isarail daŋ ofuoni imiji Misfa, awak ni imojo jio Hollum te isi." ⁶Ette is daŋ ittubanio imiji Misfa, ette iwohuna aari ette ijuhonia ihosire Hollum. Oferuni nya isi noloŋ ania ette ijiaran, "Eyau hohoi jio Hollum." jio amaji ania ehuhumak nya Samuele epalita wati Isarail daŋ.⁷Hinya etaniŋuni Falistin ijio Isarail hul ottubai Misfa, ette eletaha Falistin ifuana itarremio Isarail. Hinya etaniŋuni Isarail, abaŋi nya isi Falastin. ⁸Ette Isarail ijiaran kio Samuel, Hetawoj amojo jio Hollum hohoi, oŋida italuahu hohoi jio Falastin."⁹Ette Samuel iduhuna olosobe olo hadasa to ette isiarana esiorita hun omudani daŋ jio Hollum. Ette Samuel iyoo jio Hollum ette Hollum itaraŋ amojo honyi.¹⁰Hinya hesiorio Samuele ¹¹esiorita omudatai, eliahai nya Falastin itarremire Isaraili. Ati abak nya ahilai Falastin oloŋ nya on orroho bebe obeŋ nya isi oremehini igigilo irriomori fere on oyu, ette isarail itatur isi. Ette monyie miji Isarail ifuatan to Misfa, ette itilaŋaro emiri Falastin ototohoroi nya isi many iger miji ono Bet Kar.¹²Ette Samuele iduhuna amoruo ette ihanana ihiji Misfa ik Shem. Ette ifuarana amoruo ania Ebenesa, on ojio, "Aluak Hollum hohoi."¹³Itatturi nya Isarail Falastin, aŋasi arriai obeŋi Falastin ormehini ifuana itarremio isi inyak. Hinya hesu Samuele, Owotia nya Hollum iko aati Isaraili to miorok jio Falastin. ¹⁴Enefuni nya isaraili inyak amisihi hosi hute ihiji Ekron iko Gat hinya inefuni Falastinohien berien. Inefuni nya buo fe isaraili inyak amisihi hinya onyihai to ibore gala hinya inefu emiri Falastin berien. Tania awon nya nemuara imiji Isarail buo fe ette imuara iko aat Amor.¹⁵Otoŋotio nya Samuele amanya honyi daŋ many oyeri inyi. ¹⁶Aŋasi daŋ adaha nya inyi imiji Betel, Gilgal iko Misfa. Oŋoco nya erre wati Isarail imisihi hunia daŋ. ¹⁷Teyya ette icohuno Rama, nyo owon nya ahaŋ honyi diya; oŋoco nya inyi erre Isarail teyya. Oduhuk nya buo fe inyi ahumidia.

¹Hinya emaruak Samuele, ette ihanana lonyi honyi ahekumoni Isarail. ²Anya nya afure lonyi Jowel, buo afure lonyiho etarihi Abija. Arai nya isi ahekumok imijiBeerseba. ³Obeŋi nya lonyirok honyi ottifotie nemanyi monyosi, ati awahi nya isi ebariti to nepali. Omojotutai nya isi arobia hun ibironi ijio oŋida oŋoti neram to pali.⁴⁵Teyya ette ahou Isarail ittubanio arabotie ette ifuatan jio Samuele imiji Rama. Ette ijiaran jihonyi, "Imijie, emarua iyye, buo lonyirok hoi obeŋi otifotie nerre hun igiama iyye. Onyimok hohoi obo lobu ol oŋida ottu iŋoco nerre hohoi iho amisihi hun nomuk."⁶Ati obeŋ nya Samuel omuno hinya ajori isi ohonya, "Isiarak hohoi lobu oŋida ottu ikumio hohoi." ⁷Teyya ette Samuel imojo, Ette Samuel ijiaran jio Hollum, "Iruho nekiana aati hulo nerre daŋ hun ojori isi; Obeŋi isi ihari iyye, aati ehari isi nani ahobu hosi.⁸Ehanie fe ihuania iho hinya eyaŋunere ni isi to Masir,oguoroi nani ette imojo nomuk ajohin, ihuania ehanie daŋ jiohoye. ⁹Ihuania itaniŋoi jihosi; ihuma iramana isi ijiara omijani nekoi on olori lobu ikumiere isi."¹⁰Iramak nya Samuele nerre hhinya ikiana Hollum jio laati hunya awahi to lobu. ¹¹Ette ijiaran, "Ottu adi lobu igiama jihatai ihuana. Ottu adi inyi ihororo lonyirok hatai isuhotiere ahosani arriomok buo isuhiere ahosani honyi, buo fe oŋetie to osiere gala honyi. ¹²Onyimu adi to ahuan honyi eletaha hul aati alif buo fe hul aati atomuana miet. ofuoni adi lomuk iromo jihonyi, buo lomuk ofuoni iraha ahadioŋok mana honyi, buo lomuk arai ahehuhumak hucoli erremiti jihonyi iko jio emiri honyi.¹³Ottu buo fe adi inyi iyaru ŋarriok hatai ihumari eyali on oŋuo girgir, buo nomuk ahemak, buo fe nomuk ahamuk imune ihaŋ honyi. ¹⁴Iyaru adi inyi amatta hatai hun ara to adieli, iyaru adi ayyani iho en iloŋoi olif ette isiarana jio legiamak honyi. ¹⁵Iduhu adi ettubit atatomonita hima hatai iko huno amata hatai isiarak jio emiri honyi iko jio legiamak honyi.¹⁶Iyaru adi legiamak hatai aduri aduri liawa iko naduri ŋoruo negiamak, buo nyarhalu hatai iko asigira hatai; igiari jihonyi. ¹⁷Itatomonita hul edie hatai, irata adi itai iho apiti honyi. ¹⁸Noloŋ nya ituruhoti adi itai lobu hinya inyimuna itai ta ahuatek hatai; ati obeŋ adi Hollum itarraŋ jio noloŋ nya."¹⁹Ati obeŋi nya isi itairai nekiana Samuele; ojori nya isi, "Obeŋ! Ewak hohoi lobu oŋida hohoi era iho hun omuk misihi, ²⁰oŋida ikumio hohoi buo fe olo ahosiere hohoi oŋida buo fe orrem jihohoi."²¹Hinya etairu Samuele ekienita wati daŋ ette inyi inya iramana jio Yawe. ²²Ette Yawe ijiaran jio Samuele, "Iruho neram hosi isiarak obo atulo ahobu hosi." Teyya, ette Samuele iramana Jio Isarail, ijia aati daŋ ababoababo ofuoi iborejin gala hosi."

¹Owon atulo to miji Bejamin, ara nya atulo ol ogol bebe. Afure honyi Kis lonyo Abiel, buo abiel ara olonyi Seror buo Seror lonyi Bekorat buo lonyi Afia buo Afia ara lonyo Bejamin. ²Owon nya lonyi honyi al anya to Saul, atulo al ilaman bebe. Obeŋ nya lobo atulo al agalik inyi to elaman tomiji Isarail daŋ. Ara nya buo fe inyi alasaga Isarail daŋ.³Olitohini nya nedie Kis, monye Saulo. Ette Kis iramana lonyi honyi Saulo, "Ette ifuatta iko iduhu obo egiamani; ottitifiati asigira." Ette Saulo ileten otto hide doŋe miji Efrem ⁴ette ijiŋara atta fau Salisa, ati obeŋi nya isi daŋ orumani. Teyya ette ijiŋara atta fau Salim, ati obeŋi nya daŋ. Ette inyi ileten otto miji Njamin, ati obeŋi nya daŋ oleye.⁵Hinya afuoni atta fau Suf, ette Saulo ijiaran jio egiamani hinya adahai to iko inyi, "wuaŋ, ecaharo, ŋadi monyoŋ obusak asigira ette ilafuho ayuran hohoi." ⁶Ati iramak nya egiamani inyi ojio, "Itaira, owon obo atulo Hollum jio abore gala ana. Abaŋi aati inyi bebe; erre daŋ hun ojio inyi arai ahode. Ijiara efuo jihonyi; hara hara oremik iramana hohoi oŋida efuo talali."⁷Ette Saulo ittaraŋ jihonyi, el efuo jihonyi, eremik adi isiarana nyo? atuhoi naŋiyo hoduo eyaŋuno, buo fe nomuk esiorita obeŋi hun eremik isiarana jihonyi itulo Hollum. Ehan adi aŋai? ⁸Ette egiamani ittaraŋ jio Saulo, "Awon iko omuk anyawo kai esiarak adi ni jio atulo Hollum, oŋida iramak hohoi efuo jio anani ŋati."⁹( Berien te Isarai, an awak atulo ifio ofioro jio Hollum, ojio, "Iko ijiara efuo jio lekilani." Ahana laati hul iloŋoi leyyak sayo Hollum, iloŋoi nyia berien lekilak.) ¹⁰Ette Saulo ijiaran jio legiamani honyi, "Obis eram hoi. Wuaŋ, efuo." Ette isi ifuatan jio abore gala ninya awanari atulo Hollum lia. ¹¹Hinya hodohi isi ahide doŋe attua bore gala, ette iruaŋanio iko nobo aŋotte on olo haari; Ette Saulo iko legiamani honyi ijiaran, "owon lekilani dini?"¹²Ette isi itarraŋ, ijio, "Afe owon, otto hosiere hatai. Ifuata kuak, ottu inyi ahana dini isioriere esiorita jio amaji en ittokuan. ¹³En ijiŋana itai itua miji, inyurana ita inyi, hobeŋ olo ahide imaji inyat en itokuan. Obeŋi aati ormehini iŋiyo many afanyari inyi, nyo inyi al ajahio to esiorita; ihalu hul iloŋuni ofuoi hia iŋiyo iko inyi. Ifuata ahide irumana itai inyi dia."¹⁴Ette isi ifuatan attua miji. Hinya hojiŋari isi, ette is igonyuna Samuele ottu jihosi, ilori ahide jio namaji en ittokuan.¹⁵To nobotie holoŋ hinya hobeŋi isi ofuoni dia, eramak nya Hollum jio Samuele: ¹⁶"Motie asa ihuana efahu adini atulo to fau Bejamin, ajak inyi ahobu olo aati hoŋ Isarail.Italuahu adi isi tahas Falastin. Amehine aati hoŋ bebe, atairu ni neloŋo hosi nani iluahiere isi."¹⁷Hinya egonyu Samuele Saulo, ette Hollum iramana inyi ijio, "Inyi latulo lia alia! inyu adi ottu ikumio aati Isaraili." ¹⁸Ette Saulo ittuna aŋati jio Samuele ikay ette ijiaran, "Iramak ani tani ahaŋ tulo Hollum olo?" Ette Samuele itarraŋ ette ijiaran, ¹⁹"Nani olo. Ilo to osiere hoŋ ahide imaji en ittokon, ahana eŋiyo iyye ikoŋ. Motie iwuanyik ilo adi, eramak adini iyye erre daŋ hun igigilo iyye.²⁰Helafuho asigiria hinya olitohini to holoŋ lia, anyurani nya. Obeŋ ara iyye al awahi Isarail daŋ? Obeŋ ara iyye iko awoyo monyo hoi daŋ? ²¹Ette Saulo itarraŋ, ette ijiaran, "Towoyo wati Isaraili daŋ obeŋ ara awonyo Bejamin omuta? Obeŋ ara awoyo Bejamin ittuttubak daŋ to amutari? Nyo ikiana iyye jihoŋ ihuana?"²²Ette Samuele imijio jio Saulo iko egiamani honyi, ette iyaru isi ituahaji awuahi en itokuan, Ette ititoŋonia isi jio amaji iloŋot, arai nya atomuana hunihoi.²³Ette Samuele iramana qemani, Iyaŋune aŋiyo hoduo esiarak ni jihoiye, hoduo eramak ni iyye, ihumak inyi iger.'" ²⁴Ette emaani iduhuna etihi addi ette iduhuna aŋiria ette isiarana jio Samuele ette ijiaran, "Oŋiye, ihuhuni duo aŋiyo ana jihoiye many ottubari asa, jio hoduo sa ajorini, 'ililloŋu duo ni aati.'" Oŋiyo nya Saulo oloŋ nya iko Samuele.²⁵Hinya afuoni is jio aji otohide attua miji, Ette Samuele iyaru Saulo jio aji otto hide. ²⁶Hinya ajio faa, Ette Saul Ijiaran, ettena, oŋida ani efahi itai." Adioto Saulo, ette ifuatan iko Samuele attua miji.²⁷Hinya afanyi is iller miji, ette Samuele ijiaran jio Saulo, "Iramak egiamani hoi alia ijiara olo to osiere hohoi" Hinya alo inyi ahosiere, ette ijiaran, "buo iyye erasa iyye ikoŋ dini kai, oŋida nani eramak jihoiye asayo Hollum."

¹Ette Samuele iduhuna Ehulo hiyali, ette ijuhonia ihohou Saulo ette iko ijur inyi. Ette ijiaran, "Obeŋ Hollum ajak iyye ahekumoni orutatai honyi? ²en ilo iyye ahana, ilo iyye irumana aati arriha aŋati ilume Racel, ikori Bejamin otto Sela. Asigira hoŋole itifia iyye anyurani. Ihuani abeŋ monyo hoi iyahatio asigiria ilafuho abiaŋan hoi, ojio, "Ehan adi no aŋai eram lonyi hoŋ?"'³El ifany Jio ayani en ittok an iloŋoi oak on owo imiji Tabor, ifuata itai iruaŋara iko omu aati hunihoi hul ofuoi imojo Hollum imiji Betel, Orihotio abotie edie hunihoi, buo lobo iyatio amunio hunihoi, buo lobo ahafatio ehulo balu. ⁴Ifuanyai adi isi iyye ette isarana iyye emunio harrihai, itte imojuna to has hosi.⁵Teyya, itte iyye ifanya idulet ono Hollum, an amanyarik emiri ono Falastin. al ifanyak iyye jio abore gala nya, iruaŋa adi iyye iko lomuk eyak sayo Hollum ifuoni to maji ihummi, ottoŋotie aduŋu, buo lobo, aceheye, buo aciwuali, bue lobo ottoŋotio obo ebalit aduŋu; ikianai isi daŋ eram Yawe. ⁶Ottu adi kuak oloholi on olibo ono Hollum jihoye ette ahuan hoi iho lobo atulo itto iyye ikia daŋ iko isi.⁷El igonyu iyye daŋ etahutita hunia daŋ igiama ariŋ en igigilo iyye obis jihoye, owon Hollum iko iyye. ⁸Oluai to osire many Gigal. Alu adi ni jihoiye isiaraniere esiorita omudat iko esiorita yomo. Itilai oŋitek hattarik many attunere ni iramaniere iyye nerre hun ilo iyye igiama."⁹Hinya alo Saul, esiarak Hollum inyi obo ataji hama, ette inyi igonyuna etahutita daŋ hinya iramak inyi Samuele oloŋ nya. ¹⁰Hinya afanyi isi idoŋe, aruaŋanie iko eyak sayo Hollum, ette Oholio on olibo ittuna kuak jihonyi imojori iko aati hulia.¹¹Hinya egonyuni honya omijani to inyi omojo iko isi, ojori nya isi, "Anyo adi an ajiŋak to jio lonyo Kis? Ara Saulo aheyani sayo daŋ? ¹²Ette lobo hinya owon to dia ijiaran, "ŋai buo monyo nyi? Tania, ara ekieni, "Ara Saulo daŋ aheyani sayo?" ¹³Hinya attohu inyi amojo, ette ittuna imaji ihumi.¹⁴Teyya ette imanyi ijiaran jihonyi iko egiamani honyi, "ifuata ŋole itai ajia?" Ette ette inyi itarraŋ, "ettitifiaro ŋole hohoi asigiria. Hoŋole ebeŋ hohoi eremik inyurana otto hohoi ifuatan jio Samuele." ¹⁵Ette imanyi honyi ijiaran, "Iramak ani ojio Samuele jihoiye anyo?" ¹⁶Ette Saul itarraŋ jio imanyi, "Iramak hohoi ijio arumanie ŋole asigiria hua." Ati obeŋ nya inyi iramak inyi eram abuore, hinya ikiana Samuele.¹⁷Tania, ette Samuele iloŋuna aati Hollum daŋ imiji Misfa. ¹⁸Ette dinyi iramana aati Isarail ojio, "Eram ana on ojio Hollum, ojio Hollum Isarail: 'Iyaŋuno nya aati Isaraili to Masir, atto ni italuahuna itai to wati Masir, iko jio hobuok hul ittigemie to itai.' ¹⁹Ati ahana ehara itai Hollum hatai, hinya italuahu to itai torohoji iko tehawua; ejiata itai jihonyi, "Ewak isi Hobu.' Ihuania iduhuna aati to amisihi iko to ahaŋitek hatai ihosiere Hollum."²⁰Ette Samuele iyaŋuno amisihi Isaraili aŋati, ette inyimuna awoyo Bejamin. ²¹Teyya ette ibubuany amiji Bejamin awoi awoi; Ette inyimuna woyo Matri; ette inyimuna Saulo lonyi Kis. Ati hinya attifiai inyi, obeŋi oremehini irumana inyi.²²Ati awahi nya aati ifiyo Hollum afita omuk arriai, "Howon obo aatulo ol remehini inyimuna." Ette Hollum itarraŋ, "Lie idima itua haranyanya." ²³Ette ifuata irumana inyi dia. Hinya awotia inyi ihiji wati, ohodo jio aati daŋ²⁴Ette Samuele ijiaran iwati, "Egonyuna itai atulo ol onyimu Hollum? Obeŋ obo aatulo al ara ihuo inyi!" Ewuwoŋitai nya isi daŋ ette ijiaran, "Hobu hohoi hatamanyai fur!"²⁵Ette Samuele iramana aati egemita iko nekotia hun amanyari hobu, ette igioronia isi libuk, ette isiarana jio Hollum. Ette Samuele itaturonia aati ahaŋitek hosi.²⁶Ette Saulo buo fe ilete amiji hosi Gilbeya, iko omuk monye miji, hinya otir Hollum atajia hosi. ²⁷Ati ojori nya lomuk hul obeŋi oyiji, "Italuak adi atulo alia hohoi aŋai?" Otabuyaŋi nya isi inyi obeŋi iko iyaŋune omuk esiorita jihonyi. Ati odua nya Saulo.

¹Teyya ette Nahas olo Amor ilete ette ikol Jabes Gileya. Ette monye miji Jabes ijiaran jio Nahas, "Hehana neruk iko hoi, hetoho hohoi buo iyye ikumio hohoi." ²Ette Nahas olo Amor itarraŋ, "El ehan ni eruk ikatai, awolohosu adi ni oŋite hatai hutto hani iŋet, tania itanyahi adi ania Isaraili ariri bebe."³Ette ahou Jabes itarraŋ jihonyi, "Idehi hohoi oŋitek hatarik, buo efahi adi hohoi eram jio iŋacio Isarail daŋ. Teyya, al abeŋ lobo atulo oremik italahuna hohoi, Isio adi hohoi ahuattek hohoi jihoiye."⁴Attu neram Gibeya, imiji an amanyari Saulo ette iramana eram on own jihosi dia. Oyoi nya aati wuoŋ wuoŋ. Oromo nya Saulo imana. ⁵Hinya attu inyi totua mana, ette ifiyo, "Nyo duo oyoi aati?" Ette iramana Saulo erram hinya iramak atulo olo Jabes alia.⁶Hinya etaniŋu Saulo eram nya, ette Oholio On olibo ittuna kuak jihonyi, ijoria nya bebe. ⁷Ette iduhuna etoi haromok hisuŋ, ette iŋuŋut, ette ifahina iko leya sayo amisihi Isarail daŋ. Ojio, "Ol obeŋ to otifotio Saulo iko Samuele, ariŋ ana an igemi jio esuŋ aromok honyi." Teyya attu nabaŋi ono Hollum iwati, ette ifuana ara abotie. ⁸Hinya esiarak Saulo eremiti daŋ jihosi to Besek, ette igonyuna ijo arai aati Isaraili 300,000, bue hulo Juda 30,000.⁹Ette iramana eyak sayo hia, "Iramana aati Jabes Gileya, 'Motie to akil fani, etaluak adi hohoi itai.'" ¹⁰Ette eyak sayo iramana aati Jabes omunoi nya isi. Ette aati Jabes iramana Nahas, "Motie esio adi hohoi ahuatek jihoiye, ihan adi iyye ariŋ an iwak iyye ihan jihohoi."¹¹Nya motie ette Saulo ibuany aati enyahita hunihoi. Ette ifuana imaji ituhi to amotie iwuanyik berien, ette iburanio Amorit ette itatur Amorit many anahari oloŋ. Ikukuronie nya hunya arasai to, oŋida omuk obeŋi adahai harihai.¹²Ette aati ijiaran jio Samuele, "Hahia laati hunya ojorito ebeŋ isi ewak Saulo? Iyaŋunete isi ettoho." ¹³Ati ojio nya Saulo, "Ittalihi ittohoro obo atulo ahana, nyo noloŋ ana en italuahunere Hollum Isarail."¹⁴Ette Samuele ijiaran, "Ifuana daŋ efuo Agilgal iramaniere iijio ara Saulo ahobu hohoi." ¹⁵Ette aati daŋ ifuatan Agilgal ihosiere Hollum. Gilgal dia isiori nya aati esiorita yomo jio Hollum, ette Saulo iko aati Isaraili imuno bebe.

¹Ette Samuele ijiaran jio Isaraili, "Etaniŋuni nerre daŋ hun ijiata itai jihoŋ, esioni lobu jihatai. ²Ihuania lobu al adaha alia ihosiere hatai; emaruak ni; ati owoni lonyirok hoŋ ikatai. Igiama nya jihatai many harani aholo monye many emaruahari ni.³Ani olo; Iramana nani ihosiere Hollum iko ihosiere Hobu ol onyimu Hollum ahoholu ni eteŋ ŋai? ŋai lobo el inyob ni? Etigemio nyani ŋai? ŋai lobo el ibirok to nani arobia iŋocere olokikoi tonepali? Iramana ihosiere hoŋ oŋida ani aduma."⁴Ette isi ijiara, "Hebeŋ igesem jio obo atulo buo fe hebeŋ ihojolu erre lobo." ⁵Ette ijiara jihosi, "Ara Hollum etamijanani ihosiere hatai, buo fe onyimotoi honyi itaniŋu daŋ, ijio ibiaŋata itai rumana nobo epali jihoŋ." Ette itarraŋ, "Ara Hollum asut."⁶Ette Samuel ijiaran jihosi, "Hollum nya onyimu Muse iko Arone, el iyaŋuno to monyatai to Masir. ⁷Ihunia, isiata ahuarek hatai, oŋida ani amojo jio Hollum nerre daŋ hun ihan inyi jihatai iko jio moyne hatai.⁸Hinya Ottunre Yokobo tm'Masir, oyoi nya hohonyok hatai jio Hollum, ette Hollum ifahuna Muse iko Arone, hinya itadihuno to hohonyo hatai te Masir ette itoŋorik jio amaji ana. ⁹Ati aguoroi Hollum; ette inyi itinyaŋana isi lihas Sidera, jio eleittok olo emiri Hasor, lihas Falastinohien, iko ihani hobu olo olo Moab; orrem nya hulia daŋ iko hohonyok hatai.¹⁰Ette isi iyoo jio Hollum ette ijiaran, "Nyo eyau hohoi to naguoro hohoi iyye Hollum iko namojo hohoi nomuk ajohin iho nobo on ojori Baal buo nobo Atoret. Ati ihuania italuahu hohoi tohas mirok hohoi, eruk adi hohoi iye Hollum.' ¹¹Teyya, ette Hollum ifahuna Bal, Bedan, Jefta iko Samuele, ette itatur amiorok hatai hinya ikoloni to itai, ijio oŋida itai imanyati ohiji.¹²Hinya egonyunatai ijio Nahas hobu olo Amon olottu itarremiere itai, ittata itai ijiaran jihoŋ, 'Obeŋ! ewak hohoi hobu oŋida ikumio hohoi' buo Hollum ara ahobu hatai. ¹³Ihuania hobu olo hinya inyimuna itai, hinya ifiyeti itai buo Hollum ette isiarana jihatai.¹⁴El ibaŋa itai Hollum, igiamati jihonyi, buo fe itaniŋoti jihonyi, ibiaŋata ihara ekiana honyi, itai daŋ iko hobu hatai el ikumio to itai, oŋida irata daŋ ahejifak Hollum. ¹⁵Buo el ibiaŋata itai ibaŋata nekiana Hollum, ihanieti itai nerre hun orrohoji jihonyi, igiama adi Hollum jihatai narrohoji, hinya ihaniere inyi jihohonyok hatai.¹⁶Ara duobu ihuania owotiati tene igonyuna adi to noŋite hatai nanyo en igem Hollum ihosiere hatai. ¹⁷Imijana itai ijio obeŋ ahide asayo jio noŋitek huna, ati eloŋ ni ihunia Hollum ijiara ahide asayo. Imijana adi itai ijio aluaji nepalita hatai jio Hollum, hun ihanata itai ihosiere honyi, ifiyere hatai hobu." ¹⁸Tania ette Samuele imojo jio Hollum; iyaŋunere ahide. Tenia abaŋi nya aati daŋ Hollum iko Samuele.¹⁹Ette aati daŋ ijiaran jio Samuele, "Omojoi to laati hoi nyo ŋadi hohoi eyye. Efonik hohoi neyata hohoi to nefiyo hohoi iwanari iko lobu." ²⁰Ette Samuele itarraŋ, "Hebaŋat. Ihanata itai epali, ati heyitonia Hollu orruoŋitek, ati iruhoto inyi to natajia hatai daŋ. ²¹Heyitoti jio nomuk erre hun arai asai, buo fe obeŋi oluahi itai, nyo arai isi asai.²²Obeŋ adi Hollum obusak itai, nyo era hohoi ahulonyi. Ati jihoŋ, ettalik ni itapuak iyauna jio Hollum to netapuahio mojo tetai. ²³Ati ettiyenio adi ni itai nekotia hun oyiji buo fe obisi.²⁴Abaŋata Hollum hama to nahodehode to natajia hatai daŋ. Igigiluna nerre hun oyiji hun ihan inyi jihatai. ²⁵Ati eduloro itai ihanio epalita, ittaroho adi Hollum itai iko hobu hatai daŋ.

¹Ara nya Saulo aŋasi atomuna hunihoi hinya heterio inyi aratan ahobu; Hinya ekumio inyi aŋasi atomuana aŋuan Isarail, ²Ette inyi inyimuna aati alif hunihoi te Isarail. Owoni nya alif arrihai iko inyi Micmas iko idulet miji Betel, buo alif abotie nya owoni iko Jonatan Gibeya imiji Bejamin. Buo hulomuk, ifahi nya inyi hia ahaŋitek hosi.³Ette Jonatan itatur emiri Falastin hinya owon to Geba many itaniŋuni Falastin. Ette Saulo itahut amohuo amisihi Isarail daŋ, ijio, "Oŋida aati Ibirei (Isarail) itaniŋuni." ⁴Hinya etaniŋuni aati Isarail ijio etatur Saulo emiri Falastin, buo ijio afuoi Falastinohien ihara Isarail bebe. Ottubune nya oseŋer daŋ jio Saulo imiji Gilgal.⁵Ottubanie nya Falastin arabotie itarremiere Isarail, iko Ahosani alif hunihoi, buo aati alif ille hul isuhotie to ahusani, buo oseŋer hul obeŋi ihenune iho asuluŋayo oto tua owore. Ette ifuana ittubanio Micmas, otto hideBet Aven.⁶Hinya egonyuni Isarail ijio ewon isi ihiram, obolo nya egigilo iwati bebe, idimai nya aati inomi, itua iurio. ⁷Buo lomuk idimai itua hirita buo nomuk iguli ibbak. Alaŋi nya omuk owore tole ono Jordan otto miji Gad iko Gileya. Tania harasa nya Saulo imiji Gilgal, Ittifotie nya aati inyi hul ikikiroi.⁸Ette inyi Itila oŋitek hattarik iho hinya ojori Samuele jihonyi. Ati obeŋ Samuele ottu imiji Gilgal, Isarratai nya aati tehalu Saulo. ⁹Ati ette Saulo iramana isi, "Iyaŋunete jihoŋ esiorita hun omudani iko esiori yomo." Ette inyi isiarana esiorita hun omudani. ¹⁰Kuak hinya hotuhok inyi esioorio isiorita ette Samuele ifanyan. Ette Saulo ileten iruaŋari iko inyi iko ifuanyari inyi.¹¹Ette Samuele ijiaran, "Anyo en ihan iyye?" Ette Saulo itarraŋ, "Hoŋole egonyuni ijio esarratai aati tehalu hoŋ, buo be iyye ibeŋ ifany jio noloŋ hinya ijio iyye, buo fe Falastin ottubbanie Micmas, ¹²'atto ni ijiaran, Ihuania afuoni Falastin itaremio nani imiji Gilgal, habeŋ ni buo fe ifi nejohiti Hollum, egigiloni, oyu jihoŋ isiaraniere esiorita jio Hollum oŋida oluak hohoi.'¹³Ette Samuele ijiaran, "Igiama iyye asai asai. Ibeŋ iyye ittoŋotio nefahita Hollum hinya iramak inyi jihoiye. Isiarak duo Hollum iyye iko aati Isaraili ikumiere mak. Ati ihuania ibeŋ addi iyye ikumio. ¹⁴Eduhu Yawe atulo al awak taji honyi, anyimu Hollum inyi irari ahobu wati honyi, nyo ibeŋ iye ittifotio efahita honyi."¹⁵Teyya ette Samuele idohon imiji Gilgal imiji Gibeya ono Bejamin. Ette Samuele ihen aati hinya owoni to iko inyi, esiha ille. ¹⁶Arasa nya Saulo iko lonyi honyi buo aaati hinya owoni to iko inyi, arasai Geba imiji Bejamin. Buo Falastinohien ottubai Micmas.¹⁷Ette oseŋer Falastin ifuana. Ette efuri abotie ileten itaremio amiji Ofra, imiji ono Suwal. ¹⁸Buo etarrihi olo atany Bet Horon, buo etahunihi obotie olo ihorit hosi iko Isarail en ilomoyo to akut iko ahidiofo.²⁰Obeŋi nya obo eduoŋoni itua miji Isarail, nyo ojiori nya Falastin, "Ihumata imijio halaha Isarail omijani eduoŋo afiara erremiti daŋ." ¹⁹Adahai nya Isaraili daŋ Falastin, ihayeri afiara, atoluo, ebbua iko hunomuk igemita mana. ²¹Odumai nya isi arobia arrihai ahiyyo ono eromit, buo ebbu ahayye to arobia abotie buo atolu iko etabisio hebu hiteŋ arobia ebonyit abotie etahunihi.²²Noloŋ rem, obeŋi nya omuk ofiara jio laati hinya owoni to iko Saulo iko Jonatan; Saulo iko lonyi honyi, Jonatan nya iniafafie erremiti. ²³Hobeŋi orrem itarrahini nya oseŋer Falastin aati hosi ifirik ono Micmas.

¹To nobo oloŋ, ojio Jonatan lonyo Saulo, jio ejifani honyi, "Iko efuo, imaji oseŋer Faslastin." Ati obeŋ nya inyi iramak aat hul omuk.²Itoŋo nya Saulo iler miji ono Gibeya iwoyani otto Migron. Owon iko aati esiha ille, ³iko Ahiba lonyo Ahitub illa Icabod lonyi Finehas lonyi Eli, Aboloni Hollum hinya owon to Silo, hinya iyafatio to aboŋo balok. Obeŋi nya aati omijani ijio alo nya Janatan.⁴Afiha doŋiok daŋ hinya awak Jonatan ilori, jio oseŋer Falastin' owon nya awualaŋ tolo iko tole. Oloŋoi nya awualaŋ obo Boses buo obotie anya Seneh. ⁵Owon nya obotie wualaŋ awor an atany Micmas, buo obotie atahani ihorroŋ atany Geba.⁶Ette Jonatan ijiaran jio ejifani honyi, "Wuaŋ elaŋ amaji hul obeŋi obosoi hulo. Hara holuak Hollum hohoi, obeŋ riŋ oremik itawoj Hollum isiaraniere hohoi etatur aati hulo." ⁷Ette enyiamani hinya iyatio erremiti to Jonatan ijiaran, "Igiama ariŋ en igigilo iye obis jihoiye. Aluak adi ni iyye."⁸Ette Jonatan ijiaran, "Elaŋ jihosi, efuo isalana ahuatek hohoi jihosi. ⁹Al ajori jihohoi, 'Itilauna efuoni hohoi jihatai' buo ette iwotia imaji hohoi, ebeŋ elaŋ jihosi. ¹⁰Ati al itarraŋi ijio, 'ifuana jihohoi,' buow ette ilaŋ; itahutak ijio eruk Hollum ekiana hohoi. Etahuti adi ania."¹¹Itahutani nya isi daŋ ahuatek hosi jio oseŋer Falastin. Ette Falastin ijiaran, "Imijata afuoni aati iiberei to tua iwurio hinya idimarik isi." ¹²Ette oseŋer iloŋo Janatan iko ejifani honyi, ette ijiaran, "Ifuana jihohoi, etehutak adi hohoi itai obo ariŋ." Ette Jonatan iramana enyiamani honyi, "Ottifotie ani, nyo esiarak Hollum isi ihas Isarail."¹³Ette Jonatan idahan ahide to nahas iko nejek honyi nyo odok nya amaji nya bebe, buo fe ejifani honyi ette ijifana, ¹⁴Etteri irremit on orriomorik isi iko arrihai iko ejifani honyi, ottohini nya isi aati atomuana arrihai imaji abotie ol omuta.¹⁵Obolo nya elafuk jihosi, itua mata iko iwati daŋ. Ikikiroi nya oseŋer daŋ. Iyaŋuno nya Hollum olokitik ijio oŋida ittaniŋ afau iyaŋunere jihosi abaŋi. Iyaŋuno nya olokitik abaŋi jihosi.¹⁶Ette errirriak hulo Saulo hinya owoni Gibeya imiji Bejamin igonyuna; oseŋer Falastin ofuhotie, adi, adi iko adi. ¹⁷Ette Saulo ijiaran jio laati hinya owoni iko inyi, "Ihianata kuak ahuattek baŋai hul obeŋi to." Hinya eheni isi, obeŋ nya Jonatan iko enyiamani honyi."¹⁸Ette Saulo ijiaran jio Abijah, "Iyaŋunete asenuk Hollum dini," Jio noŋtek hua owon nya inyi arabotie iko Isaraili. ¹⁹Hinya hekiana Saulo jio aboloni alia, odulo nya nawoo ihiji oseŋer Falastin buo okukuataro bebe.Ette Saulo ijiaran jio aboloni, "Iyai anihoi addi."²⁰Etterio Saulo iko aati hinya owonito ikonyi aŋioron irrem. Oyitonie nya Falastinohien ahuatek hosi, obolo nya eŋiŋalata nya bebe. ²¹Buo fe aati hinya owoni to iko Falastin berien, hinya owoni to daŋ imaji ifuri oseŋer, etterie hia daŋ iyito ette ittubanio iko Isarail hinya owoni to iko Saulo buo Jonatan.²²Hinya etaniŋuuni aati Isarail hunya idimai to aŋati idoŋiok aŋati imiji Efrem ijo afuhoi nya Falastin, Ette isi idioto daŋ itarracayere isi imaji fere. ²³Ette Yawe Italuahuna aati Isaraili noloŋ nya, orrirriomoroi nya isi many agali Bet Aven.²⁴Noloŋ nya orroho jio Isarail nyo itilifio nya Saulo aati oloŋ nya ijio, "Orroho adi jio lia al anya to obo aŋiyo many otoriai many enienuniere ni amiorok hoŋ." Noloŋ nya obeŋ nya tulo iniŋ obo ariŋ. ²⁵Hinya ajiŋani aati itua mur obolo nya nesio bebe. ²⁶Ojiŋari aati ottotua mur, obolo nya nesio asai, ati obeŋ tulo otirok obo ihutuk honyi, nyo owon nya aati elifo nya.²⁷Ati obeŋ nya Jonatan omijak ijio itilifio nyadi monye aati hoto ihalu. Ette irriomonia afere etoi hinya ottoŋotio inyi ifayan hisio. Hinya ahaf inyi ani honyi ahide illumoniere, ette oŋite honyi inuaha. ²⁸Teyya ette lobo jihosi itrraŋ, itilifio duo monye hoi aati ojio, "Ilifoi duo aati imaji ittubit, ijio, 'orroho adi jio lia al anyatto obo aŋiyo jio oloŋ ana,' Itabanata duo itai iko ahure ihuo nanyo."²⁹Ette Jonatan ijiaran, "Eyaŋuno monyoŋ neram on obolo bebe lifau Isarail. Imija abuarari oŋite hoŋ to eniŋio hoŋ esio. ³⁰Iko ogilo esio el eniŋ alia kai, an anyai nya aati aŋiria ebeŋ ŋole ehum ittohoro amiorok. Ihuania obeŋi amiorok imiatai nyo oniamai aati."³¹Itarremie nya isi Falastin imiji Micmas aŋati iko Aijalon. Ittabani nya aati bebe. ³²Ette isi iŋiŋot kuak edie iko akioro buo nesuŋ hunya anyaune isi to Falastin. Ette iburanio ihuanya ihuo nya iko nooto.³³Ette aati ijiaran jio Saulo, "Imija, eyauni iko daŋ laati jio Hollum." Ette Saulo ijiara, "ehanieti itai nerre ihuo obiaŋara eruhok. Ihunia, hatina osuluna amoruo anitok nya jihoŋ dini." Ette Saulo ijiaran, ³⁴"Ifuata itua miji, 'iramana aati, ijiara iyaŋune esuŋ, ddie iko akioro hosi oŋida ifuana ihuanya dini. Henyahata ihuanya iko nooto, ara eyau jio Hollum.'" En iyaŋuno atulo ononyi isiahata tene.³⁵Ette Saulo iduhonia amaji ihumi jio Hollum, etteri maji ihumi nya ania hinya oduhok inyi jio Hollum.³⁶Teyya ette Saulo ijiaran, "Ijiara efuo ittohio Falastin to attari ihuania many motie iwuanyi; Halaha ebusak obo abotie el isu." Ette isi itarraŋ, "Ihana ariŋ on oyu to jihoiye." Ati ette aboloni ijiaran, "Ijiara efi Hollum anyo an awak inyi hohoi ehan." ³⁷Ette Saulo ifi Hollum, "Alo adi ni itarremio Falastin?" Ati obeŋ nya Hollum itarraŋ inyi oloŋ nya.³⁸Teyya ette Saulo ijiaran, "ifuana dini itai eleitaha; igonyuna ottu eyau ana ahana aŋai. ³⁹Ihosiere Hollum, el italuahu to aati Isarail, ara duobu Jonatan lonyi hoŋ, oyee." Ati obeŋ nya lobo atulo tehiji aati hulia daŋ itarraŋ eram honyi.⁴⁰Teyya ette Saulo ijiaran, "Ijiara itai iwotiati jio obo aŋati, buo ni iko Jonatan to obotie ŋati." Ette aati ijiaran jio Saulo, "Ihana nanyo en igigilo iyye oyu jihoiye." ⁴¹Ette Saulo ijiaran, "Yawe, Hollum olo Isarail! Al ara ani eyau kuya buo fe lonyi hoŋ, Janatan, aii! Hollum, Hollum olo Isaraili, irruoŋonia amoruo, ati itahutani amoruoi hunia ijio obeŋ ara Saulo buo fe obeŋ ara Jonatan iyau. Buo fe aati hutto jio obotie ŋati obeŋi daŋ iyauni obo ariŋ. ⁴²Ette Saulo ijiaran jio lehumani, "Inyahata irruoŋ, "irruoŋoto amoruoi jihohoi arrihai iko Jonatan lonyi hoŋ." Alu nya Janatan to moruoi.⁴³Ette Saulo ijiaran jio Jonatan, "Iramak ani ihan iyye anyo." Ette Saulo iramana ojio, "Eniŋ duo ni esio to ahau hitoi hoduo attoŋotioni." ⁴⁴Ette Saulo ijiaran, "Ottoho adi Hollum iyye, al abeŋ ayye ni."⁴⁵Ette aati ijiaran jio Saulo, "Ijiara Jonatan oyye, atulo hoduo iyaŋuno to jihohoi amuno? Hara duo nanyo! Ihosiere Hollum, ahana owon duo Jonatan iko Hollum." Tania, etaluahuni aati Saulo to yee. ⁴⁶Ette Saulo itapuak etarracayo Falastin, Ette Falastin ifuatan amasik hosi.⁴⁷Hinya hetterio Saulo ekuuumio afau Isaraili, orrem nya inyi iko amirok Isarail daŋ. Orrem nya inyi iko aati Moab, Amon, Edom, hobuok hulo Sobat, iko Falastin. An ayito Saulo imiorok honyi, oniŋie isi daŋ inyi. ⁴⁸Ihanio nya inyi to nagolon taji ette itattur aati Amalek. Italuahu nya inyi Isarail to mirok hinya ottohie to isi.⁴⁹Afuretia lonyirok Saulo huna, Jonatan, Isfi, iko Malkisua. Buo afuretia ŋarriok honyi anyai nya: Moreb, eŋeu hito, Mical, ol odiha to. ⁵⁰Buo afureta ŋoruo honyi: Ahinom; Ara nya inyi aŋarri Ahimas. ⁵¹Afure leitok oseŋer honyi, anya nya Abner lonyi Ner, Imanyi Saulo, ara nya kis amonye; bue Ner, monye Abner, ara nya lonyi Abiel.⁵²Obolo nya narrem iko Falastin bebe jio noŋitek hinya ikumiere Saulo daŋ. En igonyu Saulo obo atulo ol gol to kuy buo fe iŋere, ihanak atulo lia aŋati jihonyi.

¹Ette Samuele ijiaran, "Ifahu nani Hollum ijahinere iyye ahobu wati honyi. Ihuania itairata nekienita Hollum huna. ²Eram ana on ojio Hollum lagoloni, ojio, 'Igonyuni ariŋ an ihani aati Amalek iduri Isarail, hinya hofuni isi to Masir. ³Ihunia ifuata itarremiete isi itarrohojata nerre hosi daŋ. Hebasana isi tuŋ, ati ottohoro aliawa iko aŋoruo daŋ, aduri iko edole, esuŋ iko akioro, buo akonini iko asigiria daŋ."'⁴Ette Saulo itiloŋ aati daŋ ibore gala en iloŋoi Telaim, ette ihen atti, arai nya monye miji arriomok alif esiha arrihai buo hulo Juda esiha tomon. ⁵Ette Saulo ileten itua bore gala Amalek ette itila isi itua firik.⁶Ette Samuele ijiaran jio aati Kenit, "Ifuata addi, hetubati iko aati Amelek, oŋida ani abeŋ ettarrohojak itai ara botie. Ihanata nya itai ariŋ on onyu jio aati Isarail, hinya ofuonerek isi to Masir." ⁷Ette aati Kenit igigeuna ahuatek hosi jio aati Amelek, ette Saulo iburanio Amalek, to Hafila many Sur, on owon to ottohide Masir.⁸Ette inefuna Agak hobu olo Amalek el isu; otuhi nya isi iŋot aati Amalek to ademio. ⁹Ati ibasani nya is Agak hobu hosi, iko akioro buo esuŋ iko atawa hul ofiri to buo fe obusani olobio. Obeŋi nya ittarrohoji erre daŋ hun ilamani to. Obusani nya erre hun omiji hun aŋariji to tohoŋite hosi.¹⁰Ette ekiana Hollum ittuna jio Samuel, ojio, ¹¹"Atarihani bebe to nanyimuna hoŋ Saulo ahobu, nyo aitok inyi ani oruoŋ, abeŋ inyiak ijiafatio efahita hoŋ." Ijoria nya Samuel bebe; ette imojo jio Hollum attari daŋ.¹²Ette Samuele ihenyuna berien ta amotie iwuanyik iruaŋari iko Saulo. Iramani jio Samuele ijio, "Alo Saulo imiji Kamel ette isihina amoruo diya, itahuyere afure honyi, teyya ette iculana ibore gala Gilgal." ¹³Hinya ifanyanSamuele jio Saulo, ette Saulo ijiaran jihonyi, "Ijiara Hollum ajak iyye! Ehan ni dŋ efahi Hollum."¹⁴Ette Samuele ijiaran, "Al ara ihuo nya, anyo malatai akioro, iko aŋua hisuŋ eni itaniŋoni? ¹⁵Ette Saulo itarraŋ, Iyaŋune to miji Amalek. Ibasani duo isi akiro hul oiji huatek iko esuŋ, oŋida isiarani ahesiorita jio Hollum. Hun omuk ettarohojak hohoi daŋ." ¹⁶Ette Samuele ijiaran jio Saulo, "Itilau eramak adi ni iyye nanyo en iramak ani Hollum iyyettari." Ette Saulo ijiaran, "'Iramak yo ani!"¹⁷Ette Samuele ijiaran, "Hode omuta nya egigilo hoi, ati ibeŋ iyye imijak ijio anyimu nya Hollum iyye ahobu Isarail? Ette Hollum ihuhumana iyye ahobu olo Isarail, ¹⁸ette Hollum ifahina iyye, ette ijiaran, 'Ilo ittarohoja aati hul obeŋ hia iruhi eram Hollum, aati Amalek, itarremiete isi many ituhoto iati isi daŋ.' ¹⁹Nyo nya ibeŋ iyye ibaŋ ekiana Hollum, buo ilo iruk erre hinya orrohoji to ihosire Hollum?"²⁰Ette Saulo ijiaran jio Samuele, "Abaŋ nya ni ahode nekiana Hollum, buo fe attiforone nekoi hinya ojio Hollum jihoŋ. Enefuni Agak, hobu Amalek, buo fe etarroho aati Amalek daŋ. ²¹Ati eduduhuni aati erre omuk hun orrohoji, akioro, esuŋ, iko nerre omuk hun oiji to, hinya oŋida nya itarrohooji daŋ, isiaraniere jio Hollum hoi imiji Gilgal."²²Ette Samuele itarraŋ, "Igigilo iyye awak Hollum esiorita, agalik ekiana honyi? Agalik eruk hiram Hollum nesiorita, buo fe netaniŋio hiram agalik aker ol ofir to el iyaŋune ahesiorita jio Hollum. ²³Orriama nehara hiram Hollum iko iko neyata buana, buo nasilara oriama iko nafara buo neyata hun orrohoji to bebe. Nyo iha iyye nekiana Hollum, Eha buo fe inyi iyye ahobu."²⁴Ette Saulo ijiaran jio Samuele, "Eyau ni; awur ni efahita Hollum iko ekienita hoi, Nyo abaŋ nya ni aati atto buo fe ni iruk nekienita hosi. ²⁵Ihunia, Ibasak yoo eyata hoŋ, hacaharo ikoŋ oŋida ani alo itahabuyo Hollum."²⁶Ette Samuele ijiaran jio Saulo, "Ettalik ni icaharo iko iyye; nyo inya iyye nekiana Hollum, buo fe Hollum eha iyye ahobu Isarail." ²⁷Hinya aito Samuel illori, ette Saulo ittoŋ aboŋ Samuele, ette iguas.²⁸Ette Samuele ijiaran jihonyi, "Eguas iyye aboŋ hoŋ, aguasu Hollum ahana nolobie Isarail jihoiye esiarak jio lonyihari hoi, al agalik to iyye. ²⁹Buo fe odulo adi nagolon Isarail buo fe obeŋ adi oito; nyo obeŋ inyi ara atulo iloicere egigilo honyi."³⁰Ette ijiaran, "Amijak ni ijio eyau ni. Ati abaŋata yoo nani to hosiere hou hulo Isarail. Hacahatti ikoŋ, oŋida nani aremik itahabuyo Hollum hoi." ³¹Ette Samuele inyak ittanyan, jio Saulo, ette Saulo inyak isiarana ahumo jio Yawe.³²Teyya ette Samuele ijiaran, "Iyaŋunete Agak, hobu Amalek alia jihoŋ dini." Ette Agak ittuna jihonyi el ifita to aririk ette ijiaran, "Hode, atuhuno nadiha ono nayee jihoŋ berien." ³³Ette Samuele itarraŋ, "Iho on ottohori ademi hoi aduri, Obeŋ adi buo fe honye hoi oremik inyak isio." Teyya ette Samuele iŋuŋut Agag adoŋ ihosiere Hollum lifau Gilgal.³⁴Ette Samuele Ileten Rama, Buo Saulo ette ileten ahaŋ honyi a Gibeya ono Saulo. ³⁵Obeŋ nya Samuele igonyu Saulo many oyeri, nyo atariha nya inyi Saulo. Atariha nya Hollum to nanyimuna honyi Saulo ahobu olo Isarail.

¹Ette Hollum ijiaran jio Samuele, "Itariha adi iyye Saulo many baya, iho ehari ni inyi irari ahobu Isarail? itufutak eyali imuarrati hiyali hoi ilo. Efahi adi ni iyye jio Jessi olo Betlehem, anyimuni lobu tehiji lonyirok honyi."²Ette Samuele ijiaran, "Alo ttadi ni aŋai? En itaniŋu Saulo eram ania, ette ittohorro ani." Ette Hollum ijiaran, "iyaru abuniti hiteŋ itte ijiaran, 'Attuni isiarana jio Hollum.' ³Iloŋu Jessi imaji isiorita diya, eramak adi ni iyye anyo en ilo iyye ihan. Ihuhumak adi iyye el iramak ni jihoiye."⁴Iruk nya Samuele iho hojo Hollum ette ileten Betlehem. Ikikiroi nya lahou bore gala hinya egonyuni inyi ette ijiaran, "Ittu iyye to ayyo?" ⁵Ette inyi ijiaran, "Attu ni to ayomo; isioriere esiorita jio Hollum. Ihuhumata ahuattek hatai ifuana oluahata ani isioriere esiorita jio Hollum." Ette inyi idiarana Jessi iko lonyirdok hoonyi ette iloŋ isi imaji isiorita.⁶Hinya afuoni isi, ette inyi idorio jio Ealiab ette igilo ijio inyi adi al awak Hollum ijiara inyi ehuhumak elo hobu. ⁷Ati iramak nya Hollum jio Samuele, ojio, "Hemijo hemijio aahuan honyi, kuya buo fe ewojit honyi; nyo abeŋ ni awak inyi. Obeŋ Hollum omijio iho emijit tulo; Omijio atulo ahuan, ati omijio Hollum ataji."⁸Ette Sessi iloŋuna Aminada ette ijiaran ijiara olo otto hosiere Samuel. ⁹Ette Samuele ijiaran, "Obeŋ daŋ Hollum onyimu olo." Ette Jessi ifahina Siamma ijiara olo, ati ojio Samuele, "Hobeŋ daŋ Hollum onyimu olo." ¹⁰Ette Jessi ifahina aduri honyi hattarik daŋ ofuoi ette iger Samuele. Ette Samuele inyak ijiaran jio Jessi obeŋ Hollum onyimu lobo jio hulom daŋ."¹¹Ette Samuele ijiaran jio Jessi, "Ottubai lonyirok hoi daŋ dini?" Ette inyi itarraŋ, "Arasa ol odiha to hama, ati iyahatio akioro." Ette Samuele ijiaran jio Jessi, "Ifahi eram ijiara ottu; ettalik itoŋo ifau many afanyari inyi dini." ¹²Ette Jessi ifahina eram ette inyi ifanyan. Onyu nya ahuan honyi buo oŋite honyi ilamani buo fe omom honyi ilaman. Ette Hollum ijiaran, "Inyi alia al anyimu ni, ilo ihuhumak inyi."¹³Ette Samuele iduhuna amuarrati hiyali ette ijuhonia eyali jihonyi tehiji ilarak honyi. Jio noloŋ many ahosiere, ette noloholio on olibo iruhuno kuak jihonyi. Teyya, ette Samuele idioto ette ileten Rama.¹⁴Ette noloholio ono Hollum ileten jio Saulo addi, Ette noloholio on orroho to jio Hollum ittigemio inyi. ¹⁵Ette legiamak honyi ijiaran jihonyi, Imijie, Itigemio noloholio on orroho to jio Hollum iyye. Ette egiamak honyi ijiaran jihonyi, ¹⁶"Aaŋatak hohoi ettittifiaro atulo ol omijak to abala aduŋ. Al attu oloholio on orroho to, buo inyi ette ibala buo iyye itte iŋidari."¹⁷Ette Saulo iramana legiamak honyi, "ijiara onyurani atulo ol oremik ibala aduŋu iyaŋune inyi jihoŋ. ¹⁸Ette lobo anyarhaluti jihosi ijiaran, "Amijak ni lobo letoo, onyo Jessi to Betlehem, ol omijaak to bebe abala, ol ogol, buo fe ara atulo ol ogol taji, ara aharriomoni, buo fe omijak ekiana bebe, el iliman; buo fe Hollum owon iko inyi." ¹⁹Ette Saulo ifahina aati jio Jessi, ette ijiaran, "Ifahu lonyihoi Devide jihoŋ, el iyahat to akiro."²⁰Ette Jessi itufutana asigiria iko nenyati, buo ehulo ono abalu, buo aburuŋati hine, ette ifahina iko lonyi honyi Devide jio Saulo, ²¹hinya afany Devide diya, ette iterio egiama jihonyi. Omuno nya Saulo inyi bebe, ette ihanana inyi ahattoŋoni irremiti honyi (ahejifani).²²Ette Saulo ifahina eramm jio Jessi, ojio, "Ijiara Devide igiama ikoŋ, nyo amunoni inyi bebe." ²³An attu noloholio on orroho to jio Saulo, buo Devide ette iduhuna ebalit ania ette ibala. Buo onoholio on orroho to ania ibiaŋan jio Saulo.

¹Ette oseŋer Falastin ittubanio irriomori iko Isarail. Ottubanie nya isi Sokoh, aŋati ono Yuda. Ittuttubani nya isi ahuattek hosi ihiji Sokoh iko Aseka, otto Efes Dammin.²Ette Saulo iko oseŋer Isarail ittubanio itua Firik ono Ela, ette irra imasik hosi irriomori iko Falastin. ³Owotia nya Falastin ihde doŋe buo fe Isarail to obotie ŋati doŋe buo afirik ihiji hosi.⁴⁵Ette obo atulo ol ogol bebe ituna tehiji Falastin afure honyi Goliat, ara ahodori honyi ahide ille buo irosi. Iyafatio nya atamu arremit, iyafatio nya aboŋ on odiŋ. Ara nya ediŋit aboŋo nya alif miet.⁶Iyafatio nya akalisioni ihejek honyi osufatio nya afere arremit ihoruoŋ honyi. ⁷Alaat nya afeere hony, ilulurok nya aboŋo ifeere honyi oŋida oyu to arremio, ara nya ediŋit feere honyi eiha ille. Ette attoŋoni buhu honyi ittuna ahosiere honyi.⁸Owotia nya ette iwuwoŋita jyo oseŋer Isarail, "nyo ifuana itai ifeere? Obeŋ ara ani olo Falastin, Obeŋ ara itai oseŋer Saulo? Onyimuna atulo hatai ijiara olu jihoŋ. An aremik ilumo ikoŋ, ette ttohoro ani, ⁹buo hohoi ette irahan apiti hatai. Buo attohoni atulo lia, irata adi itai apiti hohoi."¹⁰Ette Falastin inyak ijiaran, "Etatur hohoi oseŋer Isarail ahana. Isiata ani atulo ol oremik ilumo ikoŋ." ¹¹Hinya etaniŋu Saulo iko Isarail nekiana Falastin, abaŋi nya isi bebe.¹²Ara nya Devide lonyo Eferet olo Betelehem to Yuda, monyonyi nya Jessi. Owon nya iko aduri liawa hotohunik. Jio noŋitek Saulo, ara emaruak nya Jessi. Ofuoni nya lonyirok Jessi ahou hunihoi imaji feere. ¹³Afuretia duri hinya owoni to imaji feere anya nya lobo Eliab, buo etarrihi anya Abinadab buo etahunihi anya Siama.¹⁴Ara nya Devide ahito ol odiha jihosi. Ette hul hunihoi iwotia ihalu Saulo. ¹⁵Adaha nya Devide ihiji oseŋer Saulo iko imaji hiyaha hidie monye lifau Betelehem, itaŋiyo isi diya aŋati. ¹⁶Adaha nya Goliat oŋitek daŋ to amotie iwuanyi berien itahucere ahuan hony imaji reem many oŋitek atomuana aŋuan¹⁷Ette Jessi ijiaran jio lonyi honyi Devide, "Iyaru jio illarak hoi eema ofofot huna iko emunio tomon huna, iyaru kuak jihosi imaji ituhi diya. ¹⁸Iyaru iko alee huna jio eletok hosi. Imijune iko ilarak hoi itoŋoi aŋai.¹⁹Owoni ilarak hoi iko Saulo buo oseŋer Isarail daŋ itua firik Ela, orrem iko Falastin." ²⁰Ette Devide idioto beien ette idiaharo edie iko eyahani. Ette iyaru anyata hunia, iho iramak inyi monye. ²¹Ette ifanyan imaji ituhi diya buo oseŋer aderi irriomori, idoloi afureta irremiti. Hinya elieri Isarail iko Palastin, oseŋer iko oseŋer.²²Ette Devide idiaharo erre hinya iyaŋuno inyi jio atulo hinya obusarai ottoŋotio anyata, ette iŋioro jio oseŋer, ette ifony illarak honyi. ²³Hinya hekianai inyi iko isi, ette atulo eletokuan lia, hinya anya to Goliyat, ette ittun alet tehiji oseŋer Falastin, ette ijiaran, ahuattek ikienita honyi hoduo ojio inyi. ²⁴Hinya egonyuni oseŋer Isarail inyi daŋ, ofuhotie nya inyi abaŋi nya inyi bebe.²⁵Ette aati Isarail ijiaran, "Igonyu iyye atulo ol ottu to alia? Ottu itarremiere aati Isarail. Isiarak adi hobu ebariti jio atulo ol ottoho to inyi, isiarak hobu ŋarri honyi oyemu, buo fe ittalik monyonyi iduma amusuru."²⁶Ette Defide ijiaran jio aati hinya owotiai to aŋati jihonyi, "Isiori adi anyo jio atulo ol ottoho atulo Falastin alia, ette iyara ariri Isarail addi? ŋai inyi to Falastin ol oremik itatur emiri Hollum? ²⁷Ette aati idas iramana inyi erre hinya ojiori isi jihonyi, "hun ihani jio latulo ol ottoho to inyi."²⁸Itaniŋuni nya Eliab iko ilarak honyi hul ittaha to ekiana honyi iko aati hia. Iloŋojita nya Eliab jio illa honyi, Defide, ette ijiaran, "Nyo duo ittu iyye dini? Idiehuno iyye akioro hua iko ŋai limur? Amijak ni etadara hoi, iko epali en iwak iyye ihan; ittu iyye dini igonyunere arrem." ²⁹Ette Defide ijiaran, "Ehan ni anyo ihuania? Abeŋ efiyo ifiyo? ³⁰Ette ittanyan jio lobo, ette inyak ikiana erre hua. Ette hia iramana ahuattek erre hua.³¹Hinya etaniŋuni erre hinya ikiana Defide, Ette oseŋer iramana inyak jio Saulo, Ette Saulo ifahina aram jio Defide. ³²Teyya ette Defide ijiaran jio Saulo, halaha atajia wati ilafuhoi atulo Falastin alia; aremik ni egiamani hoi ilumo iko atulo olo Falastin alia." ³³Ette Saulo ijiaran jio Defide, "Ittalik iyye ilumo iko atulo Falastin alia; ira iyye ahito olodiha, buo fe ara ahariomoni many homuta."³⁴Ati idas Devide jio Saulo, "Ara ni aheyahani kioro monyoŋ. Al attu alime ikuararu aker tehiji kioro, ³⁵etarracaro ni inyi, ette italuhuna tohutuk honyi. El iburanio ani, atoŋ ni inyi tomusula, ette ittohoro inyi.³⁶Attohoni eleme iko layir. Arra adi atulo olo Falastin ol obeŋ iruk Hollum alia iho acaŋi hun attohoni hunia, nyo awak inyi itarremio oseŋer Hollum el isu to."³⁷Ojio Defide, "Italuahu Hollum nani to fiala hilewo. Italuahu adi inyi ani jio atulo Falastin alia." Ette Sulo ijiaran jio Defide al ara ihonya, ilo owon Hollum iko iyye." ³⁸Ette Saulo itiyafana inyi aboŋo irrremit. Ette itiyafana inyi attamu an ara abilata, ette itiyafana inyi obo aboŋo on ogol to.³⁹Ette isufana ademi on ohoto iboŋo erremit. Ati obeŋ nya inyi oremik idaha, nyo obeŋ nya inyi omohi isi. Ette Defide ijiaran jio Saulo, "Abeŋ ni aremik ilumo iko erre huna, nyo obeŋi omohini jihoŋ." Ette Defide ihouna isi addi. ⁴⁰Ette iduhuna afeere honyi buo fe ette inyimuna okofio miet; Ette itoŋ. Ette ittoŋ iko eruoŋ moruoi hinya eliaha inyi iko Falastin.⁴¹Ette Goliayat ittuna aŋati jio Defide, iko attoŋoni buhu honyi ahosiere, ⁴²Hinya edor inyi eger ette igonyuna Defide, ette inyi imiana Defide, ara nya Defide ahitoo, buo iŋere, buo fe ilama. ⁴³Ette Goliayat ijiaran jio Defide, ara ni ahiŋok ittu iyye jihoŋ iko etoi?, ette inyi ipita Defide to ajiohin honyi.⁴⁴Ette atulo Falastin alia ijiaran jio Defide, "waŋ jihoŋ, eruoŋok adi ni eriŋo hoi iheny huto idou iko ticaŋi hutto fau." ⁴⁵Ette Defide itarraŋ jihonyi, ojio, "ittu iyye jihoŋ iko Ademi on ohodo, buo afeere buo afeere epuasit. Ati attu ni ji hoiyye to nafure ono Hollum ol ogol to, Hollum oseŋer Isarail, el ibeŋ iyye ibaŋ.⁴⁶Ahana isiarak adi nani Hollum agalik iyye, attoho ni iyye ette iŋutuna ahou hoi tohuan hoi addi. Ahana esiarak ni ayak wati Falastin ihen huto idou iko icaŋi hutto fau, tania omijak adi afau daŋ ijio owon Hollum iko Isarail, ⁴⁷Oŋida buo fe eluluŋ ana daŋ omijak ijio obeŋ Hollum isio agolon to ademi iko afeere. Ara afeere ahono Hollum, Isiarak adi inyi itai ihas hohoi."⁴⁸Hinya eliaha olo Falastin alia jio Defide, ette Defide iŋioro kuak jihonyi. ⁴⁹Ette Defide iduhuna okofee, ette ihanan iruoŋi moruo ette iloiyir, ette iruoŋ Goliyat ette iten ihou, ette ikuahino otto homom.⁵⁰Itatur nya Defide Falastin to amoruo iko eruoŋ. Otee nya inyi olo Falastin alia ette ittohoro inyi. Obeŋ nya obo afeere to hani Defide. ⁵¹Ette Defide iŋioro ette iduhuna afeere honyi, ette isutuna addi, ette idas inti ette iko iŋutuna ahou honyi. Hinya egonyuni Falastinohien ijio ayee atulo hosi ol ogol to, ette isi ifuho.⁵²Ette oseŋer Isarail iko hulo Yuda, idio iko amuno, ette itarracaro aati Falastin alamarai many itua firik Ekron. Oferie nya ayak Falastin ikoi ono Siaraim, many jio nekoi ono Gat iko Ekron. ⁵³Hinya acahai aati Isarail tehalu hosi, ette ibeluno erre daŋ to maji ituhi hosi. ⁵⁴Ette Defide iyaŋuno ahou honyi Jarusalem, buo ette iyaru aboŋo honyi erremit ahaji honyi.⁵⁵El igonyu Saulo Defide olo irriomori iko Isarail, ojio, jio Ebner, Eleitok oseŋer, "Ebner, lonyo ŋai etoo olo?" ⁵⁶Ette hobu ijiaran, "ifiata hul omijani to, lonyi ŋai inyi."⁵⁷Hinya acehuno inyi to maji rrem iko Falastin, Ette Ebner iyaru inyi, ette iyaŋuno inyi jio Saulo iko ahou Goliyat ihani honyi. ⁵⁸Ette Saulo ijiaran jihonyi, "iyye lonyo ŋai? Ette Defide itarraŋ, "Nani lonyi Jessi olo Betelehem."

¹Hinya atuho ekiana honyi iko Saulo, omuno nya nataji Jonatan Devide bebe, Ette inyi imuno inyi ihua nahuan honyi. ²Ette Saulo iyaru Devide imaji inyat honyi noloŋ nyay; Obeŋ nya inyi awak Devide acaharu ahaŋ monye hosi³Teyya ette narriaha hosi ibolori nyo omuno nya Janatan inyi iho ahuan honyi. ⁴Ette Jonatan ihouna aboŋo honyi hinya ilurotio inyi ette issiarana jio Devide iko jio lenyiamani honyi, isiarak nya buo fe inyi ademi honyi, arraŋ iko⁵Obeŋ nya Defide ihha aleten obonamaji en ifahi inyi Saulo, buo e ette inyurana akuatan honyi dia. Ifahi Saulo inyi imaji fere. Omunoi nya aati daŋ iko legiamak Saulo daŋ.⁶Hinyi afuoni afuoni to maji en itaturierek isi amiorok hosi ofuoni aŋoruo daŋ to misihi Isarail, arraŋi is Saulo buo idoloroi buo fe ohihiarai iruaŋari iko inyi, hun omunoi bebe nadoŋi neheti. ⁷Idoloi nya isi obo afure: on ojo, "Attoho Saulo hulonyi alif tomon buo Defide hulonyi alif Tomon."⁸Ijoria nya Saulo bebe, ittarroho nya afure ania ataji honyi. Ette inyi ijiaran, "Eruhoni huno Dafide alif tomon buo iruhoni huloŋ alif ijai." Arasa jihonyi elohobu hama?" ⁹Jio noloŋ nya abeŋ Saulo inyak igigilo on onyu jio Defide.¹⁰Obotie holoŋ ette noloholio on orroto ifanyan jihonyi ikikiana iho olorrohoja itahaji. Buo Defide ette irrib ebaliti honyi, iho an abalatiere inyi noŋitek daŋ. Ottoŋotio nya Saulo afere ihani honyi. ¹¹Ette Saulo irriomoro afere nya, "Igigilo nya inyi ijiara inyi arriomok Defide ilohitir." ¹²Ati arai eruatita Defide hunihoi jio ehani honyi ania. Abaŋ nya Saulo Defide nyo owon nya Hollum iko Defide buo abeŋ iko inyi.¹³Ette Saulo iyara inyi addi ette inyimuna inyi eleitok olo Oseŋer. ¹⁴Tania ette Devide ileten alet ihosiere wati. Ajaio nya Hollum Devide oŋitte¹⁵Hinya etaniŋu Saulo ijio etatur Defide amiorok, ilafuho nya inyi bebe ¹⁶Ati omunoi nya Aati Isaraili iko Yuda Defide, nyo ihan inyi ariŋ on oyyu bebe.¹⁷Ette Saulo ijiaran jio, "Owon ŋarri hoŋ ahouti dini, an anya Merab, essiarak adi ni inyi jihoiye aŋotte. Ati oŋida igol bebe oluaha ani irrimori afere ono Hollum." Igil nya inyi ijio ettalik adi inyi ittohoro Davide to ani honyi, ati ottohori adi Falastin inyi." ¹⁸Ette ati Devide ijiaran jio Saulo, "Ani ŋai, baŋai haŋ hohoi, ŋai monyoŋ jio ahaŋitek Isarail, iyemunere ari hobu?"¹⁹Ati jio noloŋ hinya awahari inyi isiarana Merab, ŋarri honyi, jio Defide, ette isi itayamana jio Adriele olo Meholat ette itoŋo iko inyi aŋotte.²⁰Ati awak nya ŋarri Saulo obotie Defide. Ette aati iramana jio Saulo, omuno nya Saulo. ²¹Ogil nya inyi ijio, "En isiarak inyi etania jihonyi, oŋida inyi etalahu Defide, tania, ottohori adi Falastin inyi. Teyya ette Saulo inyak iramana Defide etarrihi hiram ojio, "Awak ni iyemu iyye ŋarri hoŋ."²²Ette Saulo iramana egiamak honyi, "Ikianati iko inyi hama dee, 'ijiata imija, omuno hobu iyye iko egiamak honyi daŋ. Teyya, oŋida ira ahamoni honyi."'²³Hode eramani legiamak honyi jio Defide eram ania. Teyya ette Defide ijiaran, "Igigiloti itai ofiaha irari ahamoni hobu, iho ani ololociaŋ olo, buo fe ara olofiaha ihua olo? ²⁴Ette lapitti honyi iramana ekienita Defide hunia jihonyi.²⁵Teyya ette Saulo ijiaran, "Ijiata jio Defide, 'Obeŋ hobu awak omuk eyemiti ŋarri honyi, ati awak iyye oŋida ittoho aati Falastin arriai, buo oŋida iŋutuno abinobino huatek hosi oŋida ani amijak ijio ettoho iyye isi ahode."' Tania awak nya Saulo oŋida Defide olo iyee imaji fere. ²⁶Hinya eramani legiamak honyi erre hunia jio Defide, omuno nya inyi irari ahamoni hobu Saulo.²⁷Hinya hobeŋi oŋitek hua otuhoi, ette Defide irum iko oseŋer honyi ette ittohoro aati Falastin esiha arrihai. Ette Defide oŋutuno abinobino huattek hosi, ette isiarana isi daŋ Hobu, oŋida inyi ayemu ŋarri honyi, Mical. ²⁸Hinya egonyu Saulo, buo fe inyi ette igiluna ijio owon Hollum iko Defide, buo fe ŋarri honyi awak inyi, ²⁹Ette Saulo iko ibaŋi Defide. Ati arasa nya Saulo amioroni Defide.³⁰Arasa nya emiri Falastin irumta irriomori iko oseŋer Defide, ati oŋitek daŋ al afuon irrem, agalik Defide oseŋer Saulo daŋ, nyo oŋida afure honyi okuat bebe.

¹Buo ette iramana lonyihonyi Jonatan iko legiamak honyi daŋ ijio oŋida ottohori Defide. Ati omuno nya Jonatan Defide. ²Ette Jonatan iramana Defide eram ania, ijio, "Otifia Saulo ittohori iyye. Ihuania ihuma imijo ahuan hoi motie iwuanyik berien ilo idimai obo amaji ³Alo ni iwotia aŋati jio monyoŋ imaji en dimari iyye, ette ni ikiana eram hoi jihonyi. El itaniŋuni obo eram, eramak adi ni iyye."⁴Ette Jonatan ikiana aijita Defide jio monyonyi Saulo ette ijiaran, "Hetirok ani hoi jio legiamani hoi Defide. Nyo obeŋ inyi ihan obo ariŋ on orroho jihoiye, buo fe iyaŋuno aiji jihoiye. ⁵Nyo iŋere inyi ette ittohoro Falastin. Isiarak nya Hollum namuno iwati Isarail bebe to netaturio Defide Falastin. Nyo iwak iyye ittohoro atulo ol oyu ihualia buo obeŋ iko nobo epeli?"⁶Itaira nya Saulo jio Jonatan. Ette Saulo ittuŋo ojio, "Ihosiere Hollum, abeŋ adi inyi aremik ittohoro Defide." ⁷Ette Jonatan iramana erre hua daŋ jio Saulo, ette inyi itoŋo inya ihosiere honyi ihua hinya berien.⁸Ette narrem ittuna inyak, ette Defide illeten ifere, ette itatur Falastin, ottoho nya inyi aati Falastin arriai. ⁹Ette ifuho ihosiere honyi. Ette noholio on orroho ittuna jio Saulo buo inyi owon ituahaŋ honyi iko afere ihani, hinya habala Defide agitar.¹⁰Awak nya Saulo itattahina irriomonia Defide iko olohitir, ati eger inyi ahuan teyya tohosiere Saulo, ette Saulo idiak inyi ette irrem olohi. Ette Defide iruat to attari idimari. ¹¹Ette Saulo ifahina aati lefahat honyi Ihaŋ Defide imijeri ittohori inyi ta amotie iwuanyik. Ette Mical ŋoruo honyi iramana Defide ijio, "El ibeŋ irruat attari ana, motie iyee ittohori iyye."¹²Ette Mical itilumoro inyi ette ittulit haji. Ette inyi ifuhororo. ¹³Ette Mical iduhuna ajok on owon to itua haji ette itaferihina inyi imaji iferit Defide ette ihanana eluri en ihuhumuni to hofir hine iŋati hou, ette ititihonia to aboŋojin.¹⁴Hinya efahu Saulo aati honyi ahaŋ Defide, Hinya afanyi ette ŋoruo honyi ijiaran, "Oŋuai Defide. ¹⁵"Ette Saulo ifahuna eyak sayo ifoniere imijiere Defide; ette ijiaran, "Iyaŋunete inyi jihoŋ ituahaji attuni ittohoro."¹⁶Ati hinya ajiŋari aati hulia attuahaji, obeŋ nya Defide, ati orumani nya ajok nya hama iko neluri hofir ker owon otto hou honyi. ¹⁷Ette Saulo ijiaran jio Mical, "Nyo inyob iyye ani buo ibusa amioroni hoŋ iruat?" Ette Mikal itarraŋ, "Ojio jihoŋ, 'ijiara inyi eruat. Nyo attohonyi iyye?'"¹⁸Ette Defide iruat, ette ileten jio Samuele imiji Rama ette iramana inyi erre daŋ hun ihan Saulo jihonyi. Ette isi ifuatan itoŋo iko Samuele imiji Nayiot. ¹⁹Eramani nya jio Saulo ijio, "Imija owon Defide imiji Nayiot itua miji Rama." ²⁰Ette Saulo ifahina laati honyi inefunere Defide. Hinya egonyuni isi eyak Sayo Hollum ikianai asayo Hollum, buo Samuele owotia aŋati jihosi, ette noholio on olibo ittuna liwati Saulo, buo fe isi daŋ ette itterio ekiana sayo Hollum.²¹Hinya eramani jio Saulo eram ania, ette inyak ifahina lomuk aati, buo fe hia daŋ ette ikiana neram Hollum. Ette Saulo ifahina inyak omuk etahunihi ifahi, ette fe daŋ hia ikiana neram Hollum ihuo hul omuk. ²²Ette inyi ileten ta ahuan honyi imiji Rama ette ifanyan jio nahirri on oudo on owon to Seku. Ette ifi, "Tali Samuele iko Defide?" Ette lobo atulo iramana inyi ette ijiaran, "Imija, owon Nayiot itua miji Rama."²³Ette Saulo ileten Nayiot itua miji Rama. Teya ette noholio on olibo ituna jihonyi, ette inyi ikikianaru neram Hollum nekoi daŋ many afanyari inyi Naiyot itua miji Rama. ²⁴Ette iguasuna aboŋoji honyitohuan honyi buo hodulo ekiana hiram Hollum ihosiere Samuele. Oferio nya inyi aŋaturoi natari nya daŋ. Inyi en ifiyerek daŋ ijio, ara Saulo daŋ aheyani sayo?

¹Ette Defide iruatuna to Naiyot totua miji Rama ette ittuna ette ijiaran jio Jonatan, "Eyau ni anyo? Nanyo iyata hun ehan ni? Anyo en eyau ni ihosiere monyo hoi, awahari inyi ittohori ani? ²Ette Jonatan ijiaran jio Defide, '''Tuŋ; ibeŋ iyye iremik iyee. Obeŋ monyoŋ itapuak eramana nani obo eram. Nyo omonio inyi eram ania jihoŋ? Obeŋ ara hode."³Ette Defide inyak ituŋo ijio, "Omijak monyohooi ijio imuno iyye ani. Ette ijiaran, 'Halaha iramani iyye erre hunia, kuya buo fe itto iyye ijoria.' Ati Ihosire Hollum, iko ihosire hoi, awon ni ihiiji yee iko nesu."⁴Teyya ette Jonatan ijiaran jio Defide, "Eram en ijio iyye, ehan ni jihoiye." ⁵Ette Defide ijiaran jio Jonatan, "Iduoŋ ayafa motie awak ni ileten iŋiyo arabotie iko hobu. Ati ijia nani alo idima itua mana many etahunihi holoŋ to akikai.⁶En ifiyo monyohoi nani, ijiara jihonyi ijio, 'iramak ŋole Defide nani ijio alo inyi imiji hosi Betelem; nyo noŋitek huna hun isiorierek ahaŋitek daŋ esiorita hosi toŋasi.' ⁷An ajio hatawana, Oŋida, 'Hatawa nayomo iko inyi oyu. Ati en iloŋojita inyi bebe, itte imijana ijio igigilo inyi ahode ittohori ani.⁸Tania ihanie on oŋida jio legimani hoi. Imijak iyye ijioiyye iyaŋuno legiamani omijak neruk ihiji hoi iko Hollum. Ati an awoni nomuk neyata ikoŋ, ottohoi ani; Al ara iho nya nyo ati iyaŋuno iyye ani ihosiere monye hoi? ⁹Ette jonatan ijiaran, "Eramak ni ihosiere hoi! El ilitaniŋu ni ijio awak monyoŋ ittohoro iyye abeŋ duo ni eramak iyye bati?"¹⁰Ette Defide ijiara jio Jonatan, ŋai tadi oremik iramana, el iramak monye hoi iyye?" Ette ¹¹Jonatan ijiara jio Defide, "Waŋ efuo attua mana mana." Ette isi daŋ ibabalaru attu mana.¹²Ette Janatan ijiaran jio Defide, "Ihosiere Hollum olo Isaraili, ara etamijanani hoŋ. En ife ni monyoŋ motie ahana, kuya buo fe oloŋ etahunihi, imijie, al aiji erre hoi, abeŋ adi ni aremik iramana eram jihoiye? ¹³Al awak monyoŋ ahode ittohoro iyye, ihan adi Hollum ariŋ on orroho jihoŋ al abeŋ eramak jihoiyye iko al abeŋ ni etafuhoro iyye, oŋida iyye ilo to nelik taji. Ijiara Hollum hatawana iko iyye iho hinya awanari inyi iko monyoŋ.¹⁴Hesuni omehine jihoŋ iho ono omehinere Hollum jihoiye ara hesuni ihuana. ¹⁵Hetapuak amehino buo fe jio nahaŋ hoŋ daŋ olihu duo bu Hollum amiorok hoi daŋ. ¹⁶El ihan iyye on orroho jihoŋ ihan adi buo fe Hollum ariŋ on orroho daŋ jihoiye.¹⁷Ette Jonatan inyak ijiaran ijiara Defide ituŋo, nyo tonamuno honyi Defide iho nahuaan honyi. ¹⁸Teyya ette Jonatan ijiaran jihonyi, "Motie owon amuno hayafa aŋejuk ilo iyye ibiaŋa nyo olo aseger hoi itoŋo asai. ¹⁹El ituk iyye oŋitek hunihoi, waŋ kuak jio hinya maji idimari iyye, itte irada iwo moruo.²⁰Jio noloŋ etahunihi nya aŋoro adi ni nawwua jio naŋati en iwanari iyye nya, iho el etatirio ni imaji honyi. ²¹Teyya efahi adi ni oloŋiei hoŋ ette ijiaran, 'ilo ohurune awwua hua.' An ajio ni jio iloŋie alia, imija jio naŋati en iwanari iyye, itte ittuna nyo obeŋ nya iko nobo arrohoji, ihosire Hollum.²²Buo al ajio ni ijio letoo alia, 'imija owoni ahosiere hoi,' itte ifuho teyya, nyo awak Hollum iyye ijiara ilo. ²³Iho nerre daŋ hoduo etub arabotie, omijie, owon Hollum ihiji hoŋ iko iyye mak."'²⁴teyya ette Defide idima itua mana. Hinya eduoŋ ayafa, ette hobu itoŋo iŋiyere. ²⁵Ette inyi itoŋo otto ŋati Jonatan iho ottoloŋi, aŋati ilohitir. Ette Jonatan idiotto, buo fe Abenar itoŋo aŋati jio Saulo. Ati owon nya aseger Defide ahania.²⁶Obeŋ nya Saulo ikiana obo ariŋ oloŋ nya, nyo igigilo nya inyi oloŋ ijio, "Iloŋ nya ijio, obeŋ natua honyi ilibo, hode obeŋ olibo." ²⁷Ati oloŋ etarrihi, ihalu holoŋ en iduoŋunere ayafa, itoŋo nya namaji Defide asai. Ette Saulo ijiaran jio Jonatan, "Nyo obeŋ lonyo Jessi ottu imaji ŋio ŋoleŋole iko ahana?"²⁸Ette Jonatan itarraŋ jio Monye, ette ijiara, "Hode ifi ŋole Defide inyi ijio ijiara inyi alo Abetelem. ²⁹Ojio inyi, 'ijiara inyi alo.' Issiorie haŋ hosi ahana esiorita ibore gala dia, iloŋo illa honyi inyi dia.' Al awon namuno hoi jihoŋ idehi inyi alo imijunere ilarak honyi.' Neram ania on obiaŋari inyi ottunere jihooiye iŋiyere ara botie iko iyye."³⁰Ette Saulo ijioria jio Jonatan, ette ijiaran, "Iyye lonyo isomo! Ijio iyye atimoni neram hoi iko Defide an abeŋi nariri jioiye, iho honyo hoi on obeŋi riri nya? ³¹Howon lonyo Jessi jio nafau ana, Ittalihoto ittai iko inyi iwanan iko nolobie dini. Ihuania ifahi aati iyaɓune inyi jihoŋ dini, awak ni inyi oyee.³²Ette Jonatan ifi monyo nyi, "Nyo iwak iyye ifadara inyi? Igem inyi nanyo hiram? ³³Ette Saulo irriomoro afere honyi ijio oŋida inyi attoho Jonatan. Teyya amijak Jonatan ijio awak duadi nyonyi ittohoro hode Defide. ³⁴Ette Jonatan idioto obeŋ iko anya obo aŋiria oloŋ etarrihi ania, igigilo nya inyi neram Defide, nyo obeŋ monyonyi abaŋ inyi.³⁵To amotie, ette Jonatan ileten iruaŋari iko Defide, adahai nya inyi iko obo olo anyar haluti. ³⁶Ette ijiaran jihonyi, "Iŋioro ohurune jihoŋ awwua hun aŋoro ni hua." Hinya aŋier etoo alia ihawwua, ette iŋororo obo inya ahosiere honyi. ³⁷Hinya attu inyi imaji imohi hawwuo oduo oŋoro Jonatan, ette Jonatan ijiaran jihonyi, "Obeŋ awwuo tohosiere hoi teyya?³⁸Ette Jonatan iloŋ etoo alia, waŋ kuak, heliŋia! Ette inyi ihuruna kuak ette iŋieruna jihonyi. ³⁹Ati obeŋ nya letoo alia ogilu obo ariŋ. ⁴⁰Jonatan nya iko Defide omijani hama. Ette Jonatan isiarana afiara honyi inyi affiara honyi ette ijiaran, "Ilo iyaru attua miji."⁴¹Hinya alo etoo alia, ette Defide idioto tomaji hinya idimari inyi, ette illuna, ette ijurru jihonyi enyahita hunihoi. Ette ifuanya ette iyihino, iko Defide many fur. ⁴²Ette Jonatan ijiaran jio Defide, "Ilo to nelik taji, 'Ijiara Hollum hatawana ihiji hoŋ iko iyye, buo fe hatawana jio tiwoyo hoŋ iko onohoi, fur iko fur."' Ette Defide idioto ette ileten, buo Jonatan ette icaharo attua miji.

¹Teyya ette Defide ittuna amiji amiji Nob imijiere Ahimelek hinya ara to ahaboloni. Ikikiro nya Ahimelek hinya aruaŋanie isi iko Defide, Ette Ahimelek ifiyo inyi ijio, "Nyo idaha iyye hama obeŋ tulo tehalu hoi? ²Ette Defide iramana jio Ahimelek ijo, "Ifahu nani hobu, ojio, 'halaha oboatulo ittittifa nyo efahu inyi nani, iko neram en iramak inyi jihoŋ.' Efahi duo inyi monye miji obo amaji.³Anyo ŋio on owon to jihoiye dini? Isiarak ani obo omuk emunio, kuya buo obo aŋio hama on owon to jihoiye dini." ⁴Attati aboloni itasrraŋ jio Defide ijio, "Obeŋ obo emune, ati owon ono on odua to, an ajahino to, Oremehini aati hoi inya al abeŋi isi oruaŋari iko aŋoruo noŋitek huna." ⁵Attati Defidei itarraŋ jihonyi, "Hode eyaru hohoi oŋitek hunihoi hun ebeŋ hohoi eruaŋari iko aŋoruo, Iho ottoloŋi al afuoi aliawa amur. Erre liawa daŋ iho erremiti kuya afiara obeŋi nya iliahai iko aŋoruo. Iho ottoloŋi daŋ ofuoi duobu aliawa obo amaji aŋati. Olibori emata hosi daŋ many hefuoni hohoi, aluaji oŋitek ahana. ⁶Ette aboloni isiarana isi emune an ajahino to. Obeŋ nya obo emune arari hinya on odua hinya awon to ihosiere Hollum, oŋida ihanani emune ono honok to jio noloŋ hinya iyarik allet.⁷Oloŋ nya owon nya lobo egiamani olo Saulo dia, arasa nya ihosiere Hollum. Anyia nya afure honyi Dowek olo aati Edom, eletok heyyak Saulo.⁸Ette Defide ijiaran jio Ahimelek, "Obeŋ obo afere tene kuya buo fe acarakuat? Abeŋ duo ni eyaŋuno afiara hoŋ, nyo oruhita duo hobu bebe." ⁹Attati aboloni ijiaran, "Owon afere dini ono Goliyat hinya ittoho iyye to firik Ela, iluluro to aboŋo otto horuoŋ boŋo haboloni. En ewak iyye iyaru, iyaru bu inyi, nyo obeŋ obo afere tene arari ania." Attati Defide ijiaran, "Obeŋ obo afere ihua ania; isiarak ani."¹⁰Ette Defide iluny attari nya ette ileten jio Acis, hobu olo Gat. Ette ati egiamani ijiaran jihonyi, ¹¹"Obeŋ ara iyye Defide, hobu olo afau ana? Obeŋi idolorik afureta hatai imaji hia, ijio, 'Attoho Saulo alif buo Defide ottoho alif Ttomon.?"¹²Ehanak Defide erre hunia itua honyi buo fe ette iyaŋuno jihonyi alefuho bebe Akis, hobu olo Gat. ¹³Ette itihanio ahuan iho ol orrohoja; ette igigioro ika haji buo fe ette idehina amilak honyi itihitai.¹⁴Ette Akis ijiaran jio legiamak honyi, "Ijijiata, nyo ibusuna itai jihoŋ atulo ol orrohoja olo? ¹⁵Ibusuna itai olorrohoja dini ijiata itai awak ni arrohojarak? Henyahata ibusuna inyak atulo olo lihaŋ dini.

¹Ette Defide ileten teyya ette ifuhororo ihinom Adulam. Hinya etairuni illarak iko aati huto haŋ monye, ette illuara jihonyi dia. ²Buo fe Aati daŋ hinya owoni to iko eram, iko aati hinya ohuruni to anyawwo to wati, buo laati hinya odiahai tajia ette ittubanio daŋ jihonyi. Ette Defide iratan el ittok hosi. Arai nya isi daŋ esiha aŋuan.³Teyya ette Defide ileten Misfa imiji Mowab. Ette ijiaran jio hobu Mowab, "Ijiara luŋa monyoŋ iko honyoŋ ofuoi jikoiye many amijak ni nanyo on oremik Hollum ihan jihoŋ." ⁴Ette ibusaru isi iko hobu Mowab. Itoŋoi nya isi dia noŋitek daŋ hinya awanari Defide itua miyaŋ. ⁵Teyya ette Eyani sayo Hollum Olo Gat ijiaran jio Defide, "Hetoŋo jio amaji en iwanari iyye ania. Ilo lifau Yuda." Ette Defide ileten attua limur Heret.⁶Etaniŋu nya Saulo ijio amaji an awanari Defide, iko laati lomuk hinya owoni to iko inyi. Owon nya Saulo Gibeya imiji Rama itoŋo nya inyi jio obo awoyani an anya to Tamarisk, iko afiara honyi ihani, buo legiamak honyi buo fe daŋ owotiai aŋati jihonyi.⁷Ette iramana oseŋer honyi hinya owoni to ikoinyi, "Itairati, itai aati Bejamin! Isio adi lonyo Jesi itai daŋ amata Fino? Ihanak adi inyi itai daŋ el itak al ara inyi ahobu? Irretiati itai ani daŋ? ⁸Obeŋ tulo jihatai iramak ani ijio adahai lonyi hoŋ iko lonyo Jesi arabotie. Obeŋ obo atulo jihatyai omehino jihoŋ. Obeŋ tulo tehiji hatai iramak ani ijio lonyi hoŋ isusuyo Defide legiamani hoŋ ittohori ani.Ihua nia iruatita buo omijio itohori ani."⁹Attati obo legimani hinya owotia to aŋati iko legiamani Saulo ijiaran, "Egonyuni Dafide lonyo Jessi ottu jio Nob, iko jio Ahimelek lonyo Ahitub. ¹⁰Omojo Ahimelek jihonyi ijio oŋida Hollum oluak inyi buo fe ette isiarana inyi anyata iko afere hinya abahu Defide jio Goliyat olo Falastin.¹¹Teyya ette hobu ifahuna eram ijo oŋida iloŋune Ahimelek lonyo ahitub iko monyonyi tahaŋ honyi daŋ, buo abalok Nob daŋ. Ette isi daŋ ifuana jihonyi. Ette Saulo ijiaran, "Itaira iyye lonyo Ahitub." ¹²Ette Ahimelek itarraŋ, "Nani olo, hobu." ¹³Ette Saulo ijiaran, "Nyo ihanata itai ariŋ on orroho jihoŋ, itai iko lonyo Jesi, isiata itai inyi aŋio, iko afere buo fe imojoti jihonyi oŋida Hollum oluak inyi, oŋida itarremio ani buo fe idima jihatai dini iho hoduo idimari inyi ahana?"¹⁴Ette Ahimelek itarraŋ ette ijiaran, "ŋai tehiji legiamani hatai ol oyu iho Defide, al agalik to hamoni hobu buo fe agalik lenyiamak daŋ, buo fe abaŋi inyi? ¹⁵Ahana ti hama attuni imojo jihonyi oŋida Hollum oluak inyi? Tuŋ abeŋ ni aremik ihan erre iho hunia! Halaha ajore hobu okuahino lihaŋ monyoŋ. Nyo abeŋ ni amijak eram ania."¹⁶Ette Hobu itarraŋ ette ijiaran, "Ahimelek, hode efada ni iyye, iko aati hutto haŋ monyohoi daŋ." ¹⁷Ette Hobu iyito ette iramana lenyiamak honyi, ette ijiaran, "Ifadana aboloni Hollum alia. Nyo ottuba neram hosi iko Defide, omijani isi ijio iruatu Defide iruatuna, buo obeŋi awahi iramana nani." Ati ihari nya lenyiamak honyi attohoro aboloni olo Hollum.¹⁸Ette Hobu ijiara jio Dawek, "Oyitoi ottohoi aballok hulia." Ette Dowek olo Edom iyito ette iburanio abalok; Ottoho nya inyi aati atomuana hottohunik homiet hinya iyafatie to daŋ aboŋo haballok oloŋ nya. ¹⁹Ette buo fe iburanio amiji Nob amiji haballok; ottohio nya aliawa iko aŋoruo buo aduri iko hul hesiuni, buo nanyanay daŋ.²⁰Ati aburusaru nya lobo etoo abotie lonyo Ahimelek, lonyo Ahitub, afure honyi Abiatar, ette iruat jio Defide. ²¹Ette Abiatar iruamana Defide ijio asttoho Saulo aballok Hollum Daŋ.²²Ette Defide ijiaran jio Abiatar, "Amijak ni oloŋ nya, an awanari Dowek dia, ijio olo iramana Saulo. Ani etattoho aati daŋ hutto haŋ hatai! ²³Itoŋoi ikoŋ dini hebaŋ obo ariŋ. Atulo ol ottifia to iyye ottifia daŋ ani. Iboŋ obo ariŋ oremik ihan iyye.

¹Ette aati iramana Defide, "Imija, Falastin hia etarremie aati huto miji Keila ohorotie aati imaji igisi hima." ²Teyya ette Defide imojo jio Hollum ijio oŋida oluak inyi, ette ifi Hollum, "Ijiara ani alo itarremio aati Falasti:?" Etee Hollum itarraŋ, "Ilo iburanie aati Falastin to Keila."³Ette oseŋer Defide ijiaran jihonyi, "Imijie ebaŋ ihua hohoiFalasti many to Yuda tene. Adi buo El efany jihosi imiji Keiladia?" ⁴Ette Defide inyak imojo jio Hollum oŋida oluak inyi. Ette Hollum itarraŋ, ette ijiaran, "Ettena, oluara imiji Keila. Isiarak adi ni jihatai agolon, itaturoto adi itai aati Falasti."⁵Ette Defide iko oseŋer honyi irracara imiji Keila ette irrem iko Falastin. Ette inyauno esuŋ hosi buo imet nya isi bebe. Tania etaluahu nya Defide aati hun amanyai to imiji Keila. ⁶Hinya ofuhori Abiatar lonyo ahimelek jio Defide imiji Keila iruat nya inyi iko aboŋo haballok ihani honyi.⁷Hinya etairu Saulo ijio alo Defide imiji Keila. Ette Saulo ijiaran, "Essiarak Hollum inyi ihani hoŋ. Nyo ajiŋak inyi imiji en igasa to eyanani inyi litua miji. ⁸Ette Saulo iloŋ oseŋer honyi daŋ ifuari irriomori, oŋida oluasri imiji Keila, ikoloniere Defide iko laati honyi iko oseŋer honyi. ⁹Omijak nya Defide ijio oretia Saulo ittohoori inyi. Ette ijiaran jio Abiatar, "Iyaŋune aboŋo haballok dini."¹⁰Ette Defide ijiaran, "Hollum iyye monye Isaraili, etaniŋuni legiamak hoi ijio awak Saulo ittuna imiji Keila, Ittunere itarrohojiere abore gala keila to ni. ¹¹Iniafani adi aati Keila nani jio Saulo? Ollu adi Saulo imiji Keila ihua en itairunere hohoi? Hollum iyye monye Isarail, ebaebani jihoiye, iramak ani lonyi hohoi." Ette Hollum ijiaran, "Olo ittuna".¹²Teyya ette Defide ifi, "Isiarani adi aati Keila nani iko oseŋer hoŋ jio Saulo? Ette Hollum ijiaran, "Afe isiarani adi iyye."¹³Ette Defide iko oseŋer honyi, esiha ille, ifuata to keila, obeŋ nya isi itoŋoi amaji abotie. Eramani nya jio Saulo ijio afuho Defide to Keila, ette itawony ejifatio inyi. ¹⁴Ihanak nya Defide amaji itoŋi honyi itua hidiofo, itua doŋiok ihidiofo Sif. Otifia nya Saulo inyi oŋitek daŋ ati obeŋ nya Hollum awak isiarana inyi ihani Saulo.¹⁵Hinya egonyu Defide ijio ottu nya itifia inyi; howon nya inyi tania itua hidiofo ono Sif many Hores. ¹⁶Ette Jonatan ileten jio Defide ihidio Hores, itagoliere ahuan honyi jio Hollum.¹⁷Ette inyi ijiaran jihonyi, "Hebaŋ. Ittalik Saulo monyoŋ irumana iyye. Ittu adi iyye iratan ahobu Isaraili, buo ni ejifak jihoiye. Omijak Saulo ania ijio ottuba eram hoŋ iko iyye." ¹⁸Ette isi iruk ihosiere Hollum. Arasa nya Defide Horse, buo Jonatan ette icehuno miji.¹⁹Ette aati Sif buo fe idioto ette ijiaran, "Obeŋ soho Defide idima itua hidiofo Hores, idoŋe Hakila, on owon ahide Jesimo? ²⁰Waŋ! Hobu to nawahan hoi, Esiarak adi hohoi ihani Hobu."²¹Ette Saulo ijiaran, "Ijiara Hollum ajak iyye. Nyo imuno iyye nani. ²²Ilo ihuma imi on oyu. Ihuma irrirriuna amaji en idimari inyi buo fe irumak ŋai nya igonyu inyi teyya. Etaniŋuni ijio ogeŋny bebe. Ihuma imijuna amaji iitoŋi honyi on oyu. ²³Teyya itto ti icehuno jihoŋ buo iyye ehum imijana itoŋo inyi aŋai. Al awon ahode ifau hatai, aloni itifia inyi ihiji wati Yuda."²⁴Ette isi ifuatan to osiere Saulo imiji Sif. Tania owon nya Defide iko oseŋer honyi ihidiofo Maon, itua Araba ahide Jesimon. ²⁵Ette Saulo ileten iko oseŋer honyi itifiari inyi. Ati eramani nya Defide, ette illuara itua morioi iwwualaŋa ette itoŋo dia itua mur Maon. Hinya etaniŋu Saulo, ette inyi itua Defide itua hidiofo Maon.²⁶Ette Saulo ilur otto wo doŋe buo fe Defide ette ifuata iko oseŋer honyi otto horuoŋ doŋe. Ette Defide iruharu kuak ifuhoori Saulo. Hinya ekolie Saulo iko oseŋer honyi Defide, ²⁷ette eyani sayo ittuna ette ijiaraan, "Adahati kuak Falastin hie eburanie atua miji."²⁸Ette inyi ibusana etaracayo ette ileten jio Falastin. Tania ette ifurana amaji nya Ebak afuhori. ²⁹Ette Defide ileten teyya ette itoŋo itua Eŋedi.,

¹Hinya acaha inyi jio Falastin, ette iramana inyi ijio, "Eruat Defide ihidiofo ono Eŋedi." ²Ette Saulo inyimuna oseŋer alif hunihoi to misihi Isarail ette ifuatan ittifia Defide iko oseŋer honyi iwwualaŋi hun amanyari ahobio.³Ette inyi ifanyan jio obo abore hide hinya owon to iko enom enitok. Ette Saulo ipal dia ler. Otimo nya inyi ijio owoni Defide iko Oseŋer honyi itua isidi hinom dia. ⁴Ajori oseŋer Defide jihonyi, "Inyi noloŋ ana hinya iramak iyye Hollum ijio 'Esiarak adi inyi lamiorok hoi ihani hoi, ihana iho iwak iyye.'" Ette Defide iliabaro aŋati jio Saulo ette iŋutuna ahou ifiti boŋo honyi.⁵Ihalu, adiaha ataji Defide nyo aŋut inyi aboŋo etok honyi. ⁶Ette ijiaran jio oseŋer honyi, "Abeŋ duo ni ehan eram ana, jio atulo ol onyimu Hollum. Ette Defide iramana oseŋer honyi ijio ipal eram en ijiata itai ania, ⁷Ihha nya inyi isi halaha iburanie inyi ette Saulo idioto ette iculana, ette ileten ekoi honyi owotia nya otto hani ihorroŋ hinoŋ.⁸Ihalu honyi buo fe, Ette Defide idioto, ette ijiŋuna to hinom ette iloŋ Saulo: "Eleitto, eleittok." Hinya afiala Saulo, Ette Ette Defide ijurru afau itahutaniere abaŋi. ⁹Ette Defide ijiaran jio Saulo, "Nyo itaira iyye jio laati hul ojori to, 'Imija oretia Saulo ittohori iyye?'¹⁰Ahana egonyu iyye aŋai iyaŋuno Hollum ihani iyye hoŋ hoduo ewanari hohoi itua hinom. Ojiori lomuk jihoŋ ottohoi, ati ani eha ihara attohoro iyye. Ajoni jihosi ettalik ni itironia ani hoŋ jio eleittok hoŋ; inyi atulo ol onyimu Hollum. ¹¹Iko imija eger boŋo an aŋutuni otto hani hoŋ ana. Aŋutuna hoŋ aboŋo hoi inyi an abiaŋari ni attoho iyye, iremik adi bu iyye imijana ijio olibori ahas hoŋ, abeŋ buo fe ni eehan obo aring on orroho jihoiye, duo bu diliha iyye nani ittohori.¹²Ijiara Hollum oŋot eram hoŋ iko iyye, inienu adi Hollum nani en ehan ni obo ariŋ jihoiye, ati ettalik ni ihanana ani hoŋ jihoiye. ¹³Ojio obo etarriamai ikiena ijio, "Ihanio atulo ol orrohoto nerre narrohojak.' Jihoŋ ettalini ittirani ani hoŋ jijoiye.¹⁴Iŋetio iyye ihalu ŋai? ŋai el itarracayo iyye? Neŋok an ayee to! ameseri! ¹⁵Ijira Hollum oŋot eram hoŋ iko iyye, ihan adi Hollum on oyu jihoŋ aremik ni ifuho tohosiere hoi."¹⁶Hinya atuhok Defide ekienita honyi jio Saulo, ette Saulo ijiaran, "Lonyihoŋ iyye el ikianato alia? attati Saulo iyoo bee on okuat.¹⁷Ette ijiaran jio Defide, "Ibis bebe igalik ani. Nyo ihan iyye jihoŋ ayiji, buo ni aduma iyye to narrohoji. ¹⁸Etahutak iyye ahana nawahan hoi ani, nyo ibeŋ iyye ittoho ani buo Hollum esiarak ani ihani hoi?¹⁹El erumak atulo amioroni honyi obusak adi inyak? Ijiara Hollum olluak iyye to narriŋ en ihan iyye ahana jihoŋ. ²⁰Ihuani amijak ni ijio ittu iyye iratan ahobu buo fe abuore wata Isaraili owon ihani hoi.²¹Ittuŋoi ihosiere Hollum ijio ibeŋ adi iyye ihan epali jio ŋarriok ŋarriok hoŋ, buo fe ijio ibeŋ iyye itarroho afure hoŋ to haŋ monyoŋ. ²²Teyya ette Defide ittuŋo jio Saulo. Ette Saulo icaharo amiji buo fe Defide iko oseŋer honyi ette ifuatan imaji itoŋ ihosi.

¹Hinya ayee Samuele ottubune nya aati Isarail arabotie iyori inyi, ette inuhana inyi ihaŋ honyi otto Rama. Ette Defide idioto ette iluara ihidiofo Paran.²Owon nya lobo atulo imiji Maon, owoni nya ebariti honyi imiji Kamel. Abara nya inyi bebe. Owon nya iko akioro alif hunihoi buo edie alif abotie. Eŋerio nya inyi ofir kioro honyi imiji Kamel. ³Anya nya afure atulo lia Nabal, buo ŋoruo honyi anya Abigel. Ilofioro nya aŋotte nya buo fe ilaman. Ati orrohoji nya ehanita atulo lia bebe buo ihanio nerre hun obeŋi oyiji. Ara nya inyi towoyo bo Kaleb.⁴Etaniŋu Defide to hidiofo ijio oŋerio nya Nabal akioro honyi. ⁵Ette inyi ifahina oseŋer honyi tomon. Iramak nya Defide oseŋer honyi hul atomon ijio, "'Ifuata jio Nabal, ijiata efuanyani iyye. ⁶Ijiatta jihonyi, 'ijiara jihonyi ojo Defide ijira iyye hetebarahi. Ijiara nemuara hatawana iko iyye buo fe lihaŋ hoi.⁷Etaniŋuni ijio iwon iyye iko aŋiarak hofir kioro hoi. Owoni nya leyyak hoi ikohoi, etoŋo nya ikohoi on oyu, itoŋoi nyai isi on oŋida iko anyanya lifau Kamel. ⁸Ifia leyyak hoi, iramani adi iyye. Awak ni ihan iyye ayiji jihosi nyo ewon hohoi iko noloŋ ono neyom. Isiarak ariŋ en iremik iyye isiarana jihosi iko jihoŋ atulo hoŋ lonyi hoi Defide."'⁹Hinya afanyi oseŋer Defide dia, iramani nya isi nerre daŋ hinya ojio Defide jio Nabal teyya ette itila. ¹⁰Ette inyi itarraŋ jio oseŋer Defide ojio, "ŋai Defide, ŋai lonyo jesi? Oluaji aati ahana hul ofuhorune jio eletaha hosi. ¹¹Aremik ni isiarana emune iko aari hoŋ buo ariŋo en isiarak ni jio legiamak hoŋ jio laati hul ofuoni to jio namaji an abeŋ amijak?"¹²Teyya ette oseŋer Dafide icaharo, ette iramana Defide nerre daŋ hinya ojio inyi. ¹³Ette Defide iramana oseŋer honyi, "Ihuhumata erremiti hatai daŋ." Ette isi idiaran daŋ iko erremiti hosi. Arai nya oseŋer esiha aŋuan hinya adahai to ihahlu Defide, buo esiha arrihai arasai imaji itoŋi hosi.¹⁴Ati iramak nya lobo Abigel, ŋoruo Nabal; ojio, "Ifahu nya Defide oseŋer honyi to hidiofo ifuanyari eleittok hohoi, ati amor inyi isi. ¹⁵ati oyiji nya laati hulia jihohoi. Obeŋi nya isi ihani obo ariŋ on orroho jihohoi en efuo ikohoi limaji hiyaha dia.¹⁶Irrirriai nya hohoi attari daŋ iko to oloŋ, noŋitek hua daŋ hinya ebarari hohoi dia. ¹⁷Oŋida imijak aariŋ en iremik iyye ihan, nyo orretia nobo arrohoji eleitok hohoi, iko ahaŋ honyi daŋ. Obeŋ inyi ara atulo el igigilo to."¹⁸Ette Abigel idioto kuak ette iduhuna emunio esiha arrihai, buo akijaja arrihai huno abalu, buo ariŋo kioro miet aŋida nya, buo asofiya hima ofofoi miet, buo naŋak nomuk hun alai to, buo enyaŋana esiha arrihai huno obo ayani en iyalu emureti, ette ifitana isi daŋ ihide Sigiria. ¹⁹Ette iramana jio legiamak, "Ifuatta to osiere, attu adini te ehalu hatai." Ati obeŋ nya inyi iramak habi honyi Nabal.²⁰Hinya adahi inyi lisigiria honyi ette iluna otto wodoŋe, Ette Defide buo fe iluna jihonyi, ette iruaŋanio iko inyi.²¹Hode ajio nya Defide, "Alo Errirria hoŋ anyanya atulo olo asai hinya amanyarik isi ihidiofo, ijio oŋida erre honyi daŋ ottubai obeŋ riŋ anya, buo inyi inyak ihan ariŋ on orroho jihohoi. ²²Oluak adi Hollum ani many motie iwuanyik al abusak ni atulo alia iko ahaŋ honyi daŋ."²³Hinya egonyu abigel Defide, ette iluuna kuak tohide Sigiria honyi ette iruboho ifau en iruŋo ihosiere Defide. ²⁴Oruboho inyi ihejek honyi ette ijiaran, "Omehine jihoŋ hama, Hobu, eyau ni. Ijiara nani luŋa ikiana jihoi, oŋida itaniŋu ekienita hoŋ.²⁵Hehanak erre atulo ol orrohoja to lia itaji hoi, iho tofure honyi Nabal, arari ihonya. Anya afure honyi Nabal, obeŋ omijak ekiana. Ati abeŋ duo ni egonyu oseŋer hoi hul ifahu iyye. ²⁶Hobu ihosiere Hollum iko ihosiere hoi, eyimo Hollum jihoiye enienunu to ahuan hoi, inienu adi Hollum amiorok hoi daŋ, iho Nabal.²⁷Ihuania omoju luŋa nesiorita hun eyaŋuno hohoi jihoiye. ²⁸Obusak luŋa eyata hun ehan ni, Isio adi Hollum nelohobu iwoyo hoi, nyo irrem iyye nafere ono Hollum; obeŋ adi obo narrohoji owon iko iyye namanya hoi daŋ.²⁹Oŋetie duobu aati ihalu hoi ittohori iyye, ati enef adi Hollum iyye imanya adi iyye to Hollum; ati iruoŋo adi inyi amiorok hoi iger iho el iruoŋori amoruo.³⁰Igem adi Hollum jio Hobu hoŋ nerre daŋ hinya ocorok inyi jihonyi, buo fe anyimu inyi iyye ahobu olo Isarail daŋ. ³¹En ilo iyye ifere hegigilo ijio ehan inyi omuk erre to epali kuya ittoho iyye obo atulo to epali, ati iwak iyye italuahuna ahuan hoi. Al aluak Hollum iyye ira ahobu heguoro ani."³²Ette Deefide ijiaran jio Abigel, "Etahabuyoni Hollum olo Isarail el ifahu to iyye jihoŋ eruaŋari iyye ikoŋ dini ahana. ³³Esiarak ni Hollum ahumo to nesiarana honyi iyye elofere abiaŋari ni alo ittohori to ahuan hoŋ.³⁴Hode, ihosiere Hollum, olo Isarail, el itik to nani ihaniere ariŋ on orroho jihoiye, ittunere iyye iruaŋari ikoŋ, obeŋ duo lobo etoo lee arasa jio Nabal ahana jio amotie ana. ³⁵Teyya ette Defide imojuna esiorita hinya iyaŋuno inyi; ette ijiaran jihonyi, "Ilo to namuno ahaŋ hoi; etaniŋu ni nekienita hoi abeŋ adi ni ehan obo ariŋ."³⁶Ette Abigel icaharo jio Nabal; ihanio nya inyi namuno ituahaŋ, iho ono lobu; ottohoro nya inyi iko amuno, oruma nya bebe. Obeŋ nya inyi iramak inyi omuk erre many afaŋari amotie.³⁷Hinya afaŋ to amotie iwuanyik, hinya atturoro abalu tohou Nabal, ette ati ŋoruo honyi iramana inyi eram ania; ette Nabal iluada ittalik iko idioto tafau ara iho namoruo. ³⁸Ati hinya attuba oloŋ honyi jio Hollum ittohori inyi.³⁹Hinya etaniŋu Defide ijio ayee Nabal, ette inyi ijiaran, "Etahuyoni nafure Hollum, el inienu to nemoriti hoŋ jio Nabal buo fe itik ani ihaniere arrohoji. Enyahi inyi narroji Nabal ihuan honyi." Ette Defide ifahuna neram jio Abigel an aremik inyi iruk eyaru inyi, inyi aŋotte. ⁴⁰Hinya afuoni lefahat honyi hulia limiji Kamel, ette iramana inyi ette ijiaran, "Ifahu Defide hohio ijio ijiara hohoi efuoni iyaru iyye jihonyi aŋotte."⁴¹Ette inyi idioto, ette ijurru afau itahutaniere nabaŋi, ette ijiaran, "Imija ani apit hitoo ŋotte ader ni illillayeri nejek etok hoŋ." ⁴²Ette Abigel idioto kuak ette idahina isigiria honyi, buo fe aduri ŋoruo egiak hutto haŋ honyi miet ette ijifana jihonyi; ette Abigel ijifuno lefahat Defide ette iratan aŋoruo honyi.⁴³Tania eduhu nya buo fe Defide aŋotte en iloŋoi Ahinom ono Jesrele anotte honyi; ette is arrihai iratan aŋoruo honyi. ⁴⁴Buo Saulo nya isiarak Micale ŋarri honyi jio Saulo aŋotte; ati esiarak nya inyi jio lonyo Lais al anyato Patiel to bore Gala Gallim.

Ebasak Defide Saulo inyak. ¹To nobo noloŋ ofuoi omuk aati to bore gala Sif ette iramana Saulo ijio, "Idima Saulo itua hinom otto Hakila, hinya owon to jio nobotie ŋati otto bore gala Jesimo." ²Ette Saulo inyimuna oseŋer hul ogoli to bebe to misihi Isarail daŋ 3,000 ette ifuata iko inyi iwaha Sif ittifiari Defide.³Ette Saulo iko ati honyi ifuatan ette ibuahina asik hosi hul adaharik aŋati ikoi Hakila, iŋati iduoŋi holoŋ ono abore gala Jesimon, buo Defide iko oseŋer honyi owoni iyua waha. Hinya etaniŋu Defide ijio otifia Saulo inyi, ⁴ette inyi ifahuna lomuk lefifiak hiram honyi many Hakila.⁵Jio notoriai nya ette Defide ittuna jio namaji on obuahinere Saulo iko gala honyi nasik hun adaharik. Ette inyi igonyuna teger amaji hinya ojotori Saulo iko eletok oseŋer honyi, Abna lonyo Ner. Ojotoi nya oseŋer honyi daŋ hul ikolini inyi.⁶Teyya ette Defide ijiarn jio Ahimelek olo Hite, iko jio lonyo Seruya, illa Jowab, ette ijiaran, "ŋai adi olua jio Saulo imaji on obuhinerek isi nya asik hun adaharik? Ette Abisai ijiaran, "Alua adi ni ikoiyye." ⁷Ette Abisai iko Defide ifuatan to attarijio oseŋer Saulo. Ojoto nya Saulo ihiji oseŋer buo osihi afere honyi aŋati otto hou honyi. Ojotoi nya Abna iko oseŋer honyi hul ikoli Saulo. ⁸Ette Abisai ijiaran jio Saulo, "Ahana esiarak Hollum amioroni hoi ihani hoi. Ihuania ijiara ani arriomok inyi lifau arremit abotie. Abeŋ ni enyak idas."⁹Buo Defide ette itarraŋ jio Abisai, "Herem inyi; ŋai oremik ittohoro atulo ol onyimu Hollum buo obeŋ iyau?" ¹⁰Ette Defide ijiaran, "Ihosire Hollum ottoho adi Hollum inyi hama, kuya buo fe ottu adi noloŋ on oyeri inyi, kuya olo adi buo fe obo oloŋ ifere ette ibaha dia.¹¹Obeŋ adi Hollum isiarak ani atirok ani hoŋ jio atulo ol onyimu inyi to ahuan honyi; ati ihuania, alia luŋa ni jihoiiye, idutu afere honyi iko amiolo hari honyi oŋida efuo." ¹²Ette Defide iduhuna afere iko amiolo hari Saulo to ŋati hou honyi, ette icaha. Obeŋ nya tulo igonyu isi, obeŋ mya buo fe tulo odioto, ojotoroi nya isi daŋ, nyo isiarak nya Hollum isi najo ojotoroi bebe.¹³Teyya ette Defide idahan isifiluk doŋe alamarai; Alamaji nya isi bebe jihosi. ¹⁴Etawuoloŋ oseŋer Saulo iko jio eletok oseŋer Saulo, Abna lonyo ner; ette ijiaran, "Abnar, ibeŋ iyye iremik itarraŋ?"¹⁵Ette Defide ijiaran jio Abenar, "Ibeŋ iyye ira oloŋere? ŋai orriama iko iyye to Isarail daŋ? Nyo ati ibeŋ iyye irrirria eleitok hoi? Orieu ŋole obo atulo ittohori eleitok hoi. ¹⁶Orroho ariŋ en ihan iyye ania. Ihosiere Hollum, osiru jihoiyye iyeeri nyo ibeŋ iyye irrirria eleitok hoi on oyu, hobu ol onyimu Hollum. Ikemija afere iko amiolo honyi hoŋe owon to otto hou honyi!"¹⁷Ette Saulo iheruna etuk Defide, ette ijiaran, "Iyye alia, etukhoi ania lonyihoŋ?" Ette Defide ijiaran, " Afe etuk hoŋ ania, hobu. ¹⁸Ette inyi ijiaran, "Nyo itarracayo iyye ani lonyi hoi? Eyau ni anyo? Anyo hirre hun ehan ni hun orrohoji?¹⁹Tania ajioni eke itaniŋo luŋa jio lonyihoi. Al ara Yawe ojio oŋida iyye ihanio erre huna jihoŋ, esiarak adi ni inyi esiorita nyo oŋida inyi; buo al ara atulo ihanio erre hunia, ipitak adi Yawe isi, efuhuni nani alet, ijio halaha ani arumak nolobie ono Yawe; ojiori jihoŋ, 'ilo omojoi omuk ajohin hoi.' ²⁰Ihuania, hettoho nani asai; itarrracayoo iyye ani iho naciaŋ on ohanyai."²¹Ette Saulo ijiaran, "Eyauni. Defide, lonyihoŋ acaharu; abeŋ adi ni enyak ihan oboriŋ on orroho jihoiyye, nyo imuno iyye nani bebe. Imija, han ni epali on obolo bebe."²²Ette Defide itarraŋ ette ijiaran, "Imija, hobu afere hoi ana dini! Ifahu lobo anyarhaluti ottu iyaru. ²³Oduma adi Yawe laati hul obisi to nayiji honyi; Nyo esiarak duo²⁴Iko imija ahana aremik ni ibasana iyye nyo amijak niijio orroho attoho ni iyye, ijiara duo Yawe ottoŋotio ani amanya, buo fe italahu adi inyi ani torrohojita." ²⁵Ette Saulo ijiaera jio Defide, "Defide lonyihoŋ! Ajak adi Hollum iyye, Ihan adi iyye nerre arriai hun obolori buo fe ette iratan ahode." Teyya ette Defide iculana ekoi honyi, buo fe Saulo ette icaharo miji.

¹Ifwotu lefahata Habakkuk asayio. ²"Yawe, many baya arasa adi ni iyyo jihoye, bwo iye ibeng itayiru ani? Ayyo ni jihoi ta eliliha, arrohojita! Atti, ibeng iye italwak ani!³Nyio ibusak iyye nerre huno orrohoji to ihosiere hong? bwo fe amijyo arohojita! Ibusak iye ani amijyo, bwo fe amijyo arohojita hune ihanie isi. ⁴Arijoro, obeng adi ollo ahosiere elelik eyahatio, nyio, ikoloni arohojak ayijok, atti, arijoro ono obeng to ara ahode, obeng adi owon many." Itarang Yawe jyo Habakkuk.⁵Awak ni ihanyo obo aring, ibeng adi iye iruk oleramani jihoi, omijye jyo amisihi ociama isi to elafuho iko to eliliha olwaha isi. ⁶Arohojak, etarohojak misihi adahai ihiji fau, ohorotye asik waati huno obengi to arrai hunosi omijye, elyahani ikafyere isi ahide. ⁷Nyo, angocio nyia ottu to hwatek hosi, ilfuhorik isi to abangi.⁸Aati husani ofwoni jyo amaji ono alamato, idarratai hiho olowara, oruharai idwongi holong, bwo ahusani hosi ifeji jyo aworu bwo fe ifeji jyo elewo huto otorai, teyya oto ahusani hosi hwa wotia. ⁹Arai isi dang ahetarohojak; elulung hosi nyia asa iho oyami waha; otubani isi eniafat ihwo asulungayo.¹⁰¹¹Obwok iko eyyak, ara jihosi asuhotyere, bwo fe jyo epalak hosi. Ifii efahat Habakkuk Hollum efii obo. ¹¹Oyami ollo adi ittuna, ollo icul jyo leyak hirre, kuya jyo hulo ojorito ajyok hosi.¹²Ibeng iye iwon many beryen, Yawe Hollum hong, ololibo to? Ebeng adi hohoi eyye. Yawe ibusak iyye isi ingocio, nyo iyye, amorwo ihuhumak iyye isi itabisyere.¹³Bwo ibeng iye iremik mijyo ihanita hune ipali to nyo obeng amuno, atti, ongite hoi olibori imijere jyo arohojita kuya arohojak. Nyo, ati imijyo iyye jyo etarohojak to amehino? Nyo idwahino iye bwo arohojak odilori ayijok hosi. ¹⁴Ihwo aham to hari iko aati, iyyeu iyye isi, ati asang hune oretyai to obeng eyahani hosi.¹⁵Nyo iyanguno iye isi dang to ayafohi ham, ito tubana isi iboi, inyi ania onomunoi isi, bwo fe ette iwuwongita bebe. ¹⁶Teyia, ote isi ihuhumana iboyo ham isi, bwo fe oto swahina otogong ono aboi hosi. ¹⁷Arasai adi isi ififeuna aboyo ham hosi, bwo fe odulori ingocyo amisihi, obeng egigilo ono amuno owon jihosi.

¹Atoni iwotia ibeleri hitoi hong, nyio ongida ani ehuhumak ahwan hong imaji iriri nyio, ongida ani amijiere dee imijaniere ojo adi inyi angai jihong bwo teyia ato ni ibusana aring an awak ni.²Yaweh itarang ani oto jiran, "igiorok arigiai ania, igiorok igagar on olibo nyio, el ehenu obo ongida irawt! ³arigiai anyia ini ono amoi icana adi ini manyi icungi, obeng adi opowak. kuya ilingia itilau ini, otu adi ahode, atuna honyi obeng adi ilingiai!⁴Imija! Aijok ofowoi adi imanyia ta aijon hosi bwo arohojak amanyiai ta etadara, nyio itaroho abalu isi ta aruma! ⁵Awahi isi abalu inyi el etaroho toi aati misihi dang elulung ta ahwan honi ayei obeng ifong ara ihwo elume.⁶Manyi baya ibusak adi iye arohoji hun iduhu iye? ⁷Arohojita owon jio hul idasietoi, arohoji obeng iyauno asohotiere ihwo edolo jihonyi. Amowangak obengi adi isi odiotoi ahide kwak bwo fe abangak ohenyuni adi? otoi adi isi irahan a heyrak hosi! ⁸kuya al awon arohoji ila adi itarang ani kuya al awon arohoji, etawou iye otojin wati bwo fe ihanyio isi on oroho ta fau hosi iko hul amanyiai toi ibore gala.⁹Arohoji owon jio ehuhumak rijori hun orumanyerek isi arohojita ihasik hosi, ijara ihanak aji honi a hide, italwahunere ahwan ta hani rohoji!' ¹⁰Iyeu iye ta ahwan hoi ingutoro iye aati aryai, iyauno iye ariri ihwan hoi to nerre hun igigilo iye ta ahwan hoi. ¹¹Abobo yani itarangi adi isi, bwo amoruwoi olwahai a hide to lohitir:¹²Arohoji jio hul oduhoi toi ibore gala ta notoo iko hul ihuhumi toi amasik emanyiti to eboti!' ¹³Obeng ara jio Yaweh etamanyi, nyo, ongida aati hul omuk igiamai ta neema bwo amisihi hun omuk dang omehinei asai? ¹⁴Ihwo imuluhak ariak aari on itokon iko amijana agolon ono Yaweh ifut adi inyi ifau.¹⁵Iye obo ol ifwanak toi aring ono oroho toi manyi orumari, arohoji jio ol ihanak toi jio onyihari honi ongida oruma, oto isi imijio aharumak! ¹⁶Amatai bwo fe italeyehini aruma hosi, otidani adi ariri isi bwo fe akwatan obeng jihosi! Etebek ono Yaweh oto hani inget oito adi jihonyi.¹⁷Amisihi bore gala iko hul amanyai toi dang dia nyo ihanio iye jihosi on oroho bwo fe itawo ooto hosi lifau. Arohoji on ihani jio Lebenan iko ekukurio cangi olo itabang iye.¹⁸Arijori on onguya toi isyarak iye anyo? Ehuhumani rijori to nyahuto inyi etiyanani gesemi, nyio, iruk ini jio egiama hani honi ihuhumiere ajohin hon obengi toi ikianai. ¹⁹Arohoji jio ol ojtoi jio etoi, odiotoi a hide kuya ol ojo toi jio amorwo on odwatoi. Ette! Ihana asang huna ityenyei? Imija ihuhumuni isi to yeli iko abilatai on opipyak toi obeng obo oloiri owon jihosi. ²⁰Otte afau dang idwaru ta hosiere honi. Owon Yaweh ihaji honi on odwa toi.

¹Amojo ono Efahat Habakuk: ²Yaweh, abang ni etairu ni asayo hoi, Ihiji olong ana, italyehi ini jihong. Egigilo on amehino on ajore ho!³Etahabuyo honi afang lidou bwo fe amuno honi ibong lifau dang.⁴Agolon honi nenya idimatoi otu jio efara arihai hunya owoni toi ihani honi. ⁵Angwai on otohio toi olo ahosiere honi, bwo fe angwai obo olo ihalu hejek honi.⁶Otto inyi iwotia ote cem afau; otte ita ning amisihi iko adongiok honya owotia toi otte itanga, adongiok honyia owotiai toi olosiohol otte irafa jihonyi. Ekoi honi ara olosiohol.⁷Egonyu ni atiti ono husan irriafuno, bwo fe nofi huno atiti ata fau Midian ikikiro. ⁸Nyo, ilongojita Yaweh jio owore? Ara nya ajore ilongojita honi jio aari kuya ilongojita ini jio aari on itokon, aledak iye a husani hoi iko a husani elwahiti?⁹Iyauno iye arrang hoi obeng etihi bwo fe obeng ihanak auwa irrang hoi! Ilo iye ibwanyi afau iko aariak. ¹⁰Igonyuni adongiok okukuditai ta adyaha bwo ekoy hari ijuhonyei jihosi to hide hari on itokon on oudo toi olwaha; otte ikap oyami on ipipolyahita hari a hide!¹¹Nolong iko Ayafa 0wotyai abotie maji jyio amasik hun ohodori toi a hide nyio ta afangan hwan honi otte isi idarra, ta afangan iko enwaha ono affiara honi. ¹²Ta ajore hoi igis iye amisihi, bwo fe itik ahide ta fau ta ajore otonohoi.¹³Ilo iye alet italwahunere aati hoi iko italwahunere hul inyimu iye. Itaningu iye amonye hasik hul orohoji toi italeyu iye ewojiti muto hosi.¹⁴Itul iye osi hariomok honi ta awa hosi nyio, offowni ihwa asingit oyami ikukureyre hohoi, oyeji omutto hosi asai ihwa obo ol odilotoi olocang jio amaji on idima toi. ¹⁵Itubak iye aariak abotye maji bwo fe ilo ihide haari on itokon ahusani hoi.¹⁶Etairu ni ote atuwa hwan hong ikikiro! Bwo fe eetuk hong ikikiro ta ekwatit tonya. Bwo emuyak otte tuna jihoye iko ahwan hong attoni ikikiro ta etila dee nyio nolong on oroho toi iko ediahiti hun ofwoitoi ifwana jio aati hul iburanyie toi hohoi.¹⁷Ayani obengi owoni iko anger hun oiji; ayani ono Olive, obengi omuk anger afwoni jihoni otte aati ilongojita nyio, obeng angira ta matta; bwo fe anyanya obengi to bore, inyi anyia an aloni ihan.¹⁸Aloni imuno jio Yawe etalwahani hong bwo fe arasa adi ni imuno jio Yawe hong. Ihanak ejek hong ihwo huno Angonyei! ¹⁹Yawe ini agolon hong. Ini angatak ani alo ahosiere jio amasik hun owotiai toi a hide. Jio eletok iko ofito ring hong.

¹Jyo enga etarihi ninya arari Dario ahobu, iyafa etileji, jyo neteri holong hayafa, ottu nya ekiana Yahweh tonani ono Haggai lekilani jyo elettok olo Yudea, Zerubbabel onyo Shealtiel iko jyo ehumani eletokwan Yosua onyo Zerubbabel icana, ²"Ojyo Yahweh ihwana: otto aati itarang jyo' obiangara ongitek hohoi iduhiere aaji emojit ono Yahweh.³Atati ekiana tuna ono Yahweh to nani Haggai lekilani otejaran, ⁴Arana asa hatai imanyari ihasik huno ngidarito buo aaji hong obeng ongida?⁵Otto Yahweh monye ikiana, iruhoto ekotiahatai, ⁶Iyehinatai enyomo ariai, buo idiongunatai kai, ingiyeti aditai buo ibiangata ifwangata, imatati aditai buo ibiangata irumati.Iyiafana aditai abongojin buo obengi adi itanohi ahuattek hatati, orumak adi egiamani arobiya ariai, buo arobia olilitoroi.⁷Yawe monye ikiana, iruhoto ekotia hatai, odohoto ihidedonge, iyangunete eyek eduhiti ⁸oduhoto aaji hong, ongida nani ayiriari diya, ongida itahabuyei nani? ikiana ⁹Yahweh, itifiatitai erre ariai buo iyangunetitai kai ihang, nyo?ahutani adi, ikiana Yahweh monye, nyo arasa aiji hong ihuonyia buo tai imanyati ihasik hatai hunoyiji.¹⁰Nyio itik Yahweh ahide jihatai tedou buo Nafau otebiangan isuruna. ¹¹Elonguni ameyu lifau, lidonge, iko jyo amat iko jyo abalu angejuk, iko jyo eyali jyo adiongok huto fau, iko jyo aati, iko jyo aciangi, iko jyo erre hune gemuyie.¹²Buo Zerubbabel onyo Shealtiel, iko eleittok ehumani Yosua onyi Jehozadak, iko jyo aati holofitoroi, iruhoto ikiana ono Yahweh hatai, iko ikiana ono Haggai ekilani, nyo ifak Yahweh inyi. Otto aati ibangi omom ono Yahweh Hollum hosi. ¹³Otto Haggai lefahani ono Yahweh iramana jyo aati ote jiran, Awonini ikatai, ikiana Yahweh monye.¹⁴Otto Yahweh itagol oloyiri ono eleittok Yudea Zerubbabel onyo shealtiiel, attati oloyiri ono Yosua ehumani oleittokon onyi Jehozadak, attati oloyiri ono aati hulofituneito, ongida isi ofwoi iduhori aaji emojit ono Yahweh ¹⁵Ongitek atomwana harihai hangwan iyafa etileji, to etarihi hinga henyia arari Dario ahobu.

¹Jyo ayafa etahatarihi ihayafa atomwana harihai habotie, oto ikiana ono Yahweh ituna to nani ono Haggai ekilani otejiran, ² Ikianai jyo eloittok olo Yudah, Zerubbabel onyi Shealtiel, iko jyo ehumani leittokon Yosua onyi Jehozadak iko jyo aati holo fitorotuneito, ijiara,³Ngai addi jihatai alarasato ngai igonyu aaji jyo olohuo etteri? Igonyunatai inyi angai ihwania, obeng addi ara ahire asai tohongite hatai? ⁴Ihwana ogolo lunga Zarubbabel, ikiana Yahweh. Ati itagolo ahuan ehumani oletekon onyo Jehozadak iko aati dang huto fau ikiana Yahweh, ati igiamati awonini ikatai, ikiana Yahweh, ⁵Jyo ecoriti huno emwara henya ifuonietitai to miji ono Masir otto oloyiri hong iwanan ikatai hebangata.⁶Ikiana nyia Yahweh monye jyo, ihwania aloni itaning nedou, nafau, nariak iko nafau onoyohoto. ⁷Ati, etaning adini amisihi dang ongida isi iyangunei erre hunoyijito jihong atoni ittufut aaji to lohuo, Ikiana Yahweh.⁸Arai abariti dang ahunong, ikiana Yahweh. ⁹Agalik adi olohuo ono aji ana eteri, ikiana Yahweh, aloni isiarana nemwara jyo namaji ana, ikiana Yahweh.¹⁰Jyo ongitek atomwana arihai hangwan to nayafa etahotongani jyo etarihi hinga ono Dario,otte ekiana Yahweh tuna jyo Haggai ekilani, otte ikiana, ¹¹Ifia ehumani efahita ati ijira ¹²jyo, alakafatio atulo eringo iloho honyi enne isiarani jyo Yahweh kuyya otir inyi emune kuya amile kuyya afino kuyya eyali kuyya enyati hunomuk dang odwa adi? Otto ehumani itarang jyo obeng.¹³Ette Haggai ijiaran, "Alatir atulo olebotito to ayee erre huna orohoji adi?" Ette ehumani itarang. "Afe iboti adi ¹⁴ Itarang Haggai ette jiaran, "Arra ania jyo aati iko amiji ihosiere hong ,Ikiana Yahweh jyo,erre hun igiamai isi to ahas hosi, iboti erre hune siori isi jihong.¹⁵Igigiloti to osihatai tonere huto hosiere many jyo olong anahana. Hobeng obo amoruo itaferihino jyo obo amoruo ihaji imojit ono Yahweh, ¹⁶Alatu obo icemiere emma atomwana harihai, orumak inyi tomon hama buo alatu obo atulo ibalu iyyari atomwana miet ono amana buo nyi ato rumana atomwana harihai? ¹⁷Epit ni nere hunegiama iko erre hunegemuye dang buo iyyie ibeng iyito jihong, Ikiana Yahweh.¹⁸Iruho many jyo Nolong onohana ahosiere, jyo nongitek atomwana harihai hangwan, ayafa atahotongwani, many jyo nolong ono eteri iduhio haji imojit ono Yahweh, iruhok. ¹⁹Howoni adi enyomo imugu? Kuyia isuri adi anger ifau ? Buo ayiani obengi ongiji, ati many jyo olong anahana aloni jahina itai.²⁰Ette inyiakYahweh ikiana jyo Haggai jyo nolong atomwana harihai hangwan, ette jiran, ²¹Iramak jyo eleittok olo Yudea Sarubabel ijiara aloni itaning nedouhuo iko nafau. ²²Aloni ifuhara etongi olobiehien attatini letten itaroho agolong ono olobiehien huno amisihi, Alodini ataroho asigiria iko epihita hosi buo ayirok hosi dang, asigiria iko ayirok hosi dang, okwaharai adisi lifau, nyio to nanyapala huno ilarak hosi.²³Jyo nolong ania, ikiana Yahweh, aloni iyaru iyyie Zarubbabel onyo Shealtiel irari apit hong, ikiana Yahweh. Anyimuni iyyie ihwo emong olodihatoi, ikiana Yahweh.

¹Igyoroni jyo abuk ana afureta huno hohonyok Yesu Kristo lonyi Davide. Ara fe inyi lonyi Abramo. ²Ara Abramo monye Isako, Isako monye Yakobo, Yakobo monye Yuda iko illarak honyi. ³Ara Yuda monye Perese iko Sera bwo ŋorwoi Yuda Tamara, Perese monye Eserone, Eserone monye Rama.⁴Rama monye Aminadaba, Aminadaba monye Nasona, Nasona monye Salamone. ⁵Ara Salamone monye Boasa bwo ŋorwoi Salamone Rahaba. Ara Boasa monye Obede bwo ŋorwoi Boasa Ruta. Ara Obede monye Yese, ⁶bwo fe Yese monye hobu Davide. Ara Davide monye Solomone bwo ŋorwoi Davide ara nya ŋorwoi Uriya.⁷Ara Solomone monye Rabama, Rabama monye Abiya, Abiya monye Asa, ⁸Asa monye Yosafata, Yosafata monye Yorama, Yorama monye Usiya.⁹Usiya monye Yotama, Yotama monye Ahasa, Ahasa monye Hesekia, ¹⁰Hesekia monye Manase, Manase monye Amosa, Amosa monye Josia. ¹¹Ara Josia monye Yekonya iko illarak honyi iholoŋ inya anyarai laati Israele ifau Babolona.¹²Ihalu anyaro hosi Babolona, ara Yekonya monye Salatiele, Salatiele monye Serubabele, ¹³Serubabele monye Abiuda, Abiuda monye Elayakima, Elayakima monye Asora, ¹⁴Asora monye Sadoka, Sadoka monye Akimi, Akimi monye Eliyuda.¹⁵Eliyuda monye Elasara, Elasara monye Matana, Matana monye Yakobo. ¹⁶Ara Yakobo monye Yosefo habi Maria. Inyi honye Yesu al iloŋoi Kristo. ¹⁷Tania awoi daŋ hulo Abramo many jyo Davide arai nya awoi ’tomon haŋwan. Jyo awoi hulo Davide many iholoŋ an anyarik laati Babolona arai nya awoi ’tomon haŋwan. Bwo fe to oloŋ an anyarik laati Babolona many iholoŋ an isiunierek Kristo arai nya awoi ’tomon haŋwan.¹⁸Ara nya esiuna ono Kristo ihwa ana. Iruk honyonyi Maria Yosefo ayama inyi ati hobeŋi isi ottironie ahwattek hosi, oyedu inyi ta adwaran ono Oloyiri ol Olibo. ¹⁹Ojo habi honyi Yosefo apyaharo jihonyi dee nyo ara nya inyi atulo ol oniŋyo’to Hollum. Obeŋ bwo fe inyi awak itanyahina Maria ariri.²⁰Igigilo inyi erre huna. Ta arwe ottu anjelo olo Hobu jihonyi ta arigya ette jaran, Yosefo lonyi Davide, hebaŋ ayama Maria ŋorwoi hoi, nyo eito ol oyedu inyi oyedu inyi ta adwaran ono Oloyiri ol Olibo. ²¹Isiu adi inyi leito, bwo ifurak adi iye inyi Yesu nyo italahu adi inyi aati honyi t’eyyata hosi.²²Idwoŋi erre huna daŋ itasiruniere ekyana ono Hobu inya ikyanari inyi jyo eyani sayyo jo, ²³“Oyedu adi odwoti ette isiuna lonyi honyi. Ifurani adi inyi Imanuele,” an ojo, owon Hollum jihohoi.²⁴Ahenyu Yosefo ette ihanio ihwa ifak anjelo olo Hobu inyi, ette iyaro ŋorwoi honyi ihaji honyi. ²⁵Ati obeŋ bu inyi ojotoi ikonyi many isiuniere inyi lonyi honyi, ette Yosefo ifurana inyi Yesu.

¹Isiuni nya Yesu imiji Betlehem ono Yudea to oŋitek huno hobu Erode. Ofwonni alofyorojok t’ettedwoŋi holoŋ many Yerusalem ette jaran, ²Tali Hobu olo Yudea lya al hetehi isiuna? Nyo egonyu hohoi elelyef honyi ettedwoŋi holoŋ ette hohoi fwanna itahabuyere inyi. ³Ninya itaniŋu hobo Erode erre huna ette ataji honyi iko huno laati daŋ hutto Yerusalem papaŋi.⁴Al ottubanie ehumak eleittaha daŋ iko legyoroka jihonyi ette inyi ifiyo isi ojo, Ocorok nya Hollum ojo isiuni adi Kristo aja? ⁵Itarraŋi isi jihonyi ojori, Isiuni adi inyi imiji Betlehem ono Yudea, nyo igyorok nya eyani sayyo jo, ⁶“Iye Betlehem amiji ono Yudea, Ibeŋ iye imuta ihiji amisihi hun obolori’to huno Yudea; Nyo tehiji hoi ottu adi aboloni Al itamanyayo adi laati hoŋ Israele.”⁷Iloŋo Erode alofyorojok hama ette ifiyo isi ojo, Oleyo elelyef nya baya? ⁸Ette inyi ifahina isi Betlehem ette jaran, Ifwatta, ottifyati eito. Al inyurana tai inyi ocohuniete jihoŋ iramaniere ani, bwo alo adi ni itahabuyere inyi.⁹Itaniŋuni isi nekyanita huno hobu ette isi fwatan. Afwoi isi ette isi inyyak igonyuna elelyef an adaha ihosyere hosi many afanyari inyi ihide maji an awanari eito ette inyi wotya dia. ¹⁰Omunoi alofyorojok bebe ligonyuni isi elelyef.¹¹Ojiŋani isi ihaji ette igonyuna eito iko honyonyi Maria. Origoŋi isi itahabuyere eito. Ette isi iŋa asenuhi hosi ette isyarana jihonyi esyorita hun arai ayyel iko ottogoŋ bwo mura. ¹²Acaharai isi ifau hosi to obo ekoi hama nyo iramak Hollum jihosi ta arigya jo oŋida isi obeŋi acaharai jyo Erode.¹³Ihalu erre huna, oleyo anjelo olo Hollum jyo Yosefo ta arigya ette jaran, Odyotoi, ofuhoi iko eito bwo honyonyi many ifau Masir. Itoŋoi dia many eramaniere ni iye, nyo ottifya adi Erode eito ittohori inyi. ¹⁴Tania odyoto Yosefo ta attari nya ette iyaro eito iko honyonyi many ifau Masir. ¹⁵Amanyai isi dia many oyeri Erode, jo oŋida itasiru ekyana ono Hobu inya ikyanari eyani sayyo ojo, “Eloŋo ni lonyi hoŋ to fau Masir.”¹⁶Iloŋojita Erode bebe al itaniŋu inyi jo inyobye alofyorojok inyi, ette inyi ifahina laati ittohyere laduri daŋ hulo Betlehem iko afauhyen hutteger honyi. Ottohori isi aduri hul ottubai aŋasi hosi arrihai many jyo hul hetehi isiuna nyo ojori dwo alofyorojok jo allaŋi aŋasi arrihai hunya igonyunierek isi elelyef.¹⁷Ihwania itasiru ekyana ono eyani sayyo Yeremia on ojo. ¹⁸“Itaniŋuni laati ayyo imiji Rama, Ayyo iko atariha on obolo. Oyyo Rakele ta aduri honyi, Iha inyi etadwa nyo abyaŋarani isi.”¹⁹Al aye Erode oleyo anjelo olo Hollum jyo Yosefo ta arigya howon inyi ifau Masir ette jaran, ²⁰Odyotoi, iyaru eito iko honyonyi. Acahatti ifau Israele, nyo aye lya inya ottifya’to ittohori eito. ²¹Teyya odyoto inyi ette fwatan iko eito bwo fe honyonyi many lifau Israele.²²Ati abaŋ Yosefo icahari Yudea nyo itaniŋu inyi jo orutak Arukelo amaji monyonyi Erode ette ratan hobo olo Yudea. Tania ette inyi leten ifau Galilea ihwa itahutak Hollum jihonyi ta arigya. ²³Afany inyi dia ette manya imiji Nasaret jo oŋida itasiruni nekyanita huno eyak sayyo hun ojori, “Iloŋoi adi Yesu Anasaretanani.”

¹To oŋitek hunia ottu Yoane Batista ittittoyere laati imur Yudea ojo, ²Iloitoto atajya hatai, nyo ilyaha olobye ono Hollum attuna. ³Nyo Yoane inyi alya linya ikyanari eyani sayyo Isaya ojo, “Iloŋo obo atulo to mur, Ette jaran, Ihuhumana nekoi Hobu, Itabisana ekota honyi ’tor.”⁴Iyyafak Yoane aboŋo an ihuhumi to nofir konnikonni iko etodit an ara amuhunyo lihuluk honyi. Oŋiyo bwo fe inyi nebeyo iko nesyo huttotwa mur. ⁵Adahatye laati daŋ hutto miji Yerusalem iko hulo Yudea jihonyi. Ofwonni bwo fe laati hutto misihi daŋ hun onyihai’to Yordano jihonyi. ⁶Ibatisyo inyi ihari Yordano laati hul iruhi eyyata hosi.⁷Ofwonni laati arryai hulo Farisei iko hulo Saducehyen jihonyi ifwotuniere batisimo ette inyi jaran jihosi jo, Irata tai ihwa amunok, ŋai ojo jihatai ofuhoti ajore ono hottu’to? ⁸Oŋida ehanita hatai itahutani jo iloitoto tai ahode atajya hatai. ⁹Hejatta ta ahwattek hatai jo, Ara Abramo hohonyi hohoi, nyo eramak ni itai jo, oremik Hollum ’yeuna lonyirok Abramo jyo amorwoi huna.¹⁰Ihwania ihanani atolu ihadde ’yanio. Oyefuni adi ayyanio daŋ hun obeŋi’to oŋijuni aŋer hun oyiji ette rwoŋonia lihima. ¹¹Ebatisyo ni itai ahode ta aari nyo iloitoto tai atajya hatai. Ati lya al ottu’to lihalu hoŋ ogol inyi agalik ani, tania abeŋ ni asiru eyaro amuha honyi. Ibatisyo adi inyi itai ta Oloyiri ol Olibo iko ta neema. ¹²Owon ajani lihani honyi italiboryere ema honyi ette fyehina limugu honyi, ati oswahini adi acono lihima an obeŋ’to oremik dunyari.¹³Tania ottu Yesu to Galilea ette leten jyo Yoane ol owon’to lihari Yordano jo oŋida Yoane ibatis inyi. ¹⁴Ati iha Yoane ette jaran, Oŋida dwo iye ibatis ani, ati ittu iye jihoŋ nyo? ¹⁵Ette Yesu itarraŋ jihonyi ojo, Ihanie so, nyo osiru jihohoi ihaniere efahita daŋ huno Hollum. Ette inyi ihanio.¹⁶Odyoto Yesu kwak ’totwa hari al ifwotu inyi batisimo, ette edou bwanya jihonyi bwo fe igonyu inyi Oloyiri olo Hollum isuru t’edou ihwa awolo ette wotya ihide hou honyi. ¹⁷Ette nekyana ’tuna t’edou on ojo, “Lonyi hoŋ olo, al amuno ni bebe.”

¹Attati Oloyiri ol Olibo rihoro Yesu itwa mur ette etisyahani al anya’to Sitan kemyo inyi. ²Oferuc inyi oŋitek atomwana aŋwan iko arwejin atomwana aŋwan ette inyi niama. ³Bwo fe ottu esuswani ette jaran jihonyi, Kuyya ira iye Lonyi Hollum iloito amorwoi huna heterahi aŋirya. ⁴Ati itarraŋ Yesu ojo, Igyoroni jo, “Obeŋ tulo isu ta aŋirya hama, ati isu adi inyi ta nekyanita daŋ huno Hollum.”⁵Attati etisyahani iyaro inyi itwa miji Yerusalem. Ititoŋok inyi Yesu ihide haji imojit eneitok, ⁶ette jaran, Kuyya ira iye Lonyi Hollum itakwahai ahwan hoi tene, nyo igyoroni jo, “Ifak adi Hollum anjelohyen honyi irrirryari iye.” Bwo fe igyoroni jo, “Itarrauni adi isi iye ta ahas hosi jo oŋida iye ibeŋ isyak eju hoi imorwoi.”⁷Attati Yesu jaran jihonyi, igyoroni bwo fe jo,“Oŋida ibeŋ iye ikemyo Hobu hoi Hollum.” ⁸Iyaro etisyahani inyi ihide doŋe on ohodo’to bebe ette itahutana inyi olobyehyen daŋ hutta fau iko akwatan hosi. ⁹Bwo ojo jihonyi, Esyo adi ni jihoi erre huna daŋ kuyya irigoŋ iye ifau itahabuyere nani.¹⁰Attati Yesu jaran jihonyi, Ilo addi Sitan nyo igyoroni jojo, “Oŋida iye itahabuyo Hobu hoi Hollum bwo igyama jihonyi hama.” ¹¹Tania obusak etisyahani inyi, teyya ofwonni anjelohyen ilwahyere inyi.¹²Itaniŋu Yesu jo ifitani Yoane libabus ette inyi leten ifau Galilea. ¹³Obusak inyi Nasaret ette manya Kapernaum on owon’to iger hari, lifau Sebuluna iko Nafatali.¹⁴Jyo oŋida itasiru nekyana inya ikyanari eyani sayyo Isaya ojo, ¹⁵“Afau Sebulun iko afau Naftali,huttekoi hari enne ittokon, afohor owore Yordano tole,Galilea, afau Lufajak! ¹⁶“Itoŋoi laati hutto fau Sebuluna iko Nafatali idumele Ette isi igonyuna afaŋan on obolo’to. Isi laati hul amanyai aŋati hari tole ono Yordano, Bwo fe paganohyen hutto Galilea. Afaŋ afaŋan ania many jyo hya hul itoŋoi Jyo amaji an ara’to ihwa abali ono naye.”¹⁷Ta asaa ania ittittoyo Yesu ette jaran, Ilyaha olobye ono Hollum.¹⁸To obo oloŋ hadaha Yesu ilotifor hari Galilea ette inyi igonyuna illarak arrihai, Simone al anya’to Petro iko illanyi Andrea. Ibirotyai isi aboyo hosi ihari nyo arai isi ahayafohok. ¹⁹Ojo inyi jihosi, Ifwanna ihalu hoŋ, ehanak adi ni itai ahellilloŋok wati. ²⁰Teyya teyya ette isi busana aboyo hosi ette jifaru inyi.²¹Holo inyi kai alamarai ette inyi igonyuna omuk illarak arrihai, Yakobo iko illanyi Yoane lonyirok Sebedeyo. Owoni fe isi itogol iko monyosi Sebedeyo bwo ihuhumye isi aboyo hosi, ette Yesu loŋuna isi. ²²Teyya obusani isi atogol iko monyosi ette jifaru Yesu.²³Adaha inyi itwa misihi daŋ huno Galilea ittiyeniere ihasik imojiti hosi asayyo huno olobye Hollum. Itaŋida bwo fe inyi arrohojita daŋ iko eŋwati huno laati. ²⁴Itaniŋuni laati hutto misihi daŋ huno Sirya eram honyi ette isi iyaŋuno jihonyi laati daŋ hul oŋwai’to iko eŋwati gele gele, iko omuk hul odyahai hwattek hosi. Iyaŋunie isi bwo fe hul owoni’to iko ajohin hun orrohoji’to, hul isitaji’to, iko hul ogolyori hwattek hosi. Ette inyi itaŋida isi daŋ. ²⁵Ijifarai eluluŋ wati inyi arryai hutto Galilea iko hutto Dekapolis. Ofwonni isi bwo fe to Yerusalem, Yudea, iko hutto ŋati hari Yordano tole.

¹To obo oloŋ igonyu Yesu eluluŋ wati ette inyi dahan idoŋe. Ati ninya hetoŋo inyi dia ofwonni leyiyanak honyi jihonyi. ²Itteryo inyi ittiyenio eluluŋ wati ette jaran: ³Ijara hul omiji tajya ihosyere Hollum ta abyaŋan yiji hosi hotomunohi, nyo ara Hollum a Hobud hosi. ⁴Ijara hul atarihai’to hotomunohi, nyo onyurani adi isi etilihyo jyo Hollum.⁵Ijara hul anyalami’to hotomunohi, nyo ara adi afau ahonosi. ⁶Ijara hul ottifyai’to alibori ono Hollum ihwa ottifyai laati hul oniamai’to aŋiyo hotomunohi, nyo itifoŋ adi Hollum isi. ⁷Ijara hul omehinie tajya hotomunohi, nyo omehino adi Hollum jihosi. ⁸Ijara hul olibori tajya hotomunohi, nyo igonyuni adi isi Hollum.⁹Ijara hul itimorye’to laati hotomunohi, nyo iloŋo adi Hollum isi lonyirok honyi. ¹⁰Ijara hul onyurani ettigemita te ejifatyo hosi efahita huno Hollum hotomunohi, nyo ara Hollum a Hobu hosi.¹¹Omunoti al ipice laati itai, kuyya ittigemye itai, kuyya bu orrosye itai on orroho te eram hoŋ. ¹²Omunoti bwo fe osuhotyete nyo obolo adi aduma hatai lidou, nyo ittigemye nya isi eyak sayyo ihwo nya.¹³Irata tai ihwa amile jyo laati. Al ilik amile, aŋai inyyak adi iye eŋolito honyi? Obeŋ inyi oremik itayyu obo ariŋ, tania ibirori adi inyi addi ette laati ’ryeyo inyi. ¹⁴Irata tai ihwa afaŋan an afaŋ’to jyo laati. Obeŋ amiji oremik dima al owon inyi ihide doŋe.¹⁵Obeŋ tulo oswak allomo bwo imuhoni ta agufa. Ati oyihak adi inyi allomo ihide jo oŋida inyi afaŋ jyo aati daŋ hul owoni’to ihaji. ¹⁶Ijara afaŋan hatai hatafaŋa jyo laati jo oŋida isi igonyuna ehanita hatai hun oyiji’to ette isi itahabuyo Monyatai ol owon’to idou.¹⁷Hegigiloti jo attu ni itapwahyere efahita kuyya bu egyerita huno eyak sayyo. Abeŋ ni attu itapwahyere isi ati attu ni itasiruniere isi. ¹⁸Eramak ni itai ahode jo, many iholoŋ an itatturyerek edou iko afau, obeŋ adi obo egyeri kuyya ekyana on omuta’to ono efahita opwak ’tuŋ ati itasiruni adi daŋ.¹⁹Lya ol omesyo efahi abotye dwadi on omuta’to bwo fe ittiyenio inyi laati ihaniere ihwo nya, itafyaha adi Hollum inyi ilobye honyi. Ati lya al ijifatyo’to efahita bwo ittiyenio inyi isi jyo laati, itabolo adi Hollum inyi ilobye honyi. ²⁰Eramak ni itai jo, al obeŋ ayiji hatai agalik ayiji ono legyorok iko Farisei, ibyaŋata adi itai ijiŋana jyo olobye ono Hollum.²¹Itaniŋuna tai jo, ojori nya igyerita beryen jo, “Hettohoro bwo lya ol ottoho’to onyurak adi inyi aŋoco.” ²²Ati eramak ni itai jo, lya al iloŋojita’to jyo illanyi onyurak adi aŋoco. Lya ol omoryo’to illanyi onyurak adi aŋoco ono okiko. Lya ol ojo’to jo, iye olosita, onyurak adi inyi aŋoco ono eema on osyo fur.²³Tania kuyya iyaŋuno iye esyoryo hoi iklesya bwo igilu iye jo owon eram hoi iko illa hoi, ²⁴obusak esyoryo hoi. Ilo do itabisaniere eram hoi iko illa hoi, bwo ihalu ocohunie isyaraniere esyoryo hoi iklesya.²⁵Opulok eram hoi kwak iko arrosoni hoi hedahati tai te ekoi, ŋadi inyi iye iyaro ihosyere aŋotoni hirre, bwo fe isyo adi aŋotoni hirre iye jyo oseŋer ifitaniere ibabus. ²⁶Eramak ni iye ahode jo ibeŋ adi iye ihouno many idumari iye ahorosi daŋ.²⁷Itaniŋuna tai jo, ojori nya igyerita jo, “Hehaniete erre somon.” ²⁸Ati eramak ni itai jo, atulo ol omijo’to jyo obo aŋotte bwo awak iyyauna ikonyi, iyyau inyi ahode ikonyi te egigilita honyi.²⁹Kuyya itahutak onyek iŋet hoi iye iyyata, ogolotu inyi itto biroro addi, nyo oyyu kuyya oye aŋati abotye ono ahwan hoi bwo obeŋ adi ahwan daŋ ibironi ihima. ³⁰Kuyya itahutak aani iŋet hoi iye liyyata, oŋotu inyi itto biroro addi, nyo oyyu kuyya oye aŋati abotye ono ahwan hoi bwo obeŋ adi ahwan daŋ ibironi ihima.³¹Lya al ifuha’to ŋorwoi honyi ette pyaharo jihonyi, oŋida inyi isyo awaraga an itamijanak’to apyaha honyi iko ŋorwoi. ³²Ati eramak ni itai jo, lya al ifuha’to ŋorwoi honyi to obo eram asai bwo obyaŋara ta eram ono asomon, itaroto inyi ŋorwoi honyi. Bwo oroto lya al ayama’to aŋotte an ifuha habi to obo eram asai.³³Itaniŋuna tai jo ojori nya igyerita jo, “Hepwahata ecoriti hatai hun icoronia tai ati oŋida itai ihaniete ihwa icoronia tai.” ³⁴Ati eramak ni itai jo, Hecoronia asai. Hettuŋoti te edou nyo ara inyi amaji kurus ono Hollum. ³⁵Hettuŋoti ta afau nyo ara inyi ebalori hejek honyi. Hettuŋoti ta Yerusalem nyo ara inyi amiji ono Hobu ol obolo’to.³⁶Hettuŋoti ta osi hatai nyo ibyaŋata tai iremehina iloit ofitti abotye on obwor, emoli. ³⁷Al ijatta tai, Afe, oŋida ara inyi Afe ahode. Bwo fe al ijatta tai, Obeŋ, oŋida ara inyi Obeŋ ahode. Hefonihina omuk nekyanita huno olorroho.³⁸Itaniŋuna tai jo, ojori nya igyerita jo, “Odumati onyek ta onyek bwo fe odumati alai ta alai.” ³⁹Ati eramak ni itai jo, Hehara lya al awak’to itarroho itai, ati al anaŋ inyi amahalyo etteŋet isyara bwo fe ebotye.⁴⁰Al awak inyi iloŋo iye ilokikoi iyari aboŋo hoi, isyara bwo fe agamis hoi. ⁴¹Al orrosok inyi iye iwwahatyere erre honyi many amail abotye, adahati ikonyi amail arrihai. ⁴²Isyatta erre jyo lya ol omojo’to bwo fe heyimoti inyi.⁴³Itaniŋuna tai jo, ojori nya igyerita, “Omunoti hutto lonyihari hatai bwo fe oliwati amyorok hatai.” ⁴⁴Ati eramak ni itai jo, Omunoti amyorok hatai bwo fe omojoti to hya hul ittigemye’to itai. ⁴⁵Nyo te ehanita hunia itahutana tai jo irata tai lonyirok hulo Monyatai ette dou; nyo isyo inyi oloŋ honyi itafaŋyere arrohojak iko ayijok, bwo fe ifak inyi ahide jyo amyosok iko jyo hul oniŋye’to.⁴⁶Kuyya imunoti tai aati hul omunoi’to itai, anyo adi edumit hatai? Obeŋi so arrohojak ihanie ihwo nya? ⁴⁷Al ifonyati tai illarak hatai hama, obeŋi so laati daŋ ihanie ihwonya? Obeŋi so paganohyen ihanie ihwo nya? ⁴⁸Tania ihaniete on oyyu ihwa ihanio Monyatai ette dou.

¹Ihumata irrirrya ŋadi ihaniete tai ehanita hatai hun oyiji ihosyere wati jo oŋida isi omijye. Al ihaniete tai ihwania obeŋ adi Monyatai ette dou oduma itai. ²Al isyatta tai agurusi jyo alocaŋak hesyatta ihwa atulo ol ohut aforojo jo oŋida laati igonyuni inyi. Ihanie enyabak ihwo nya ihasik imojiti iko ikota jo oŋida laati itahabuye isi. Ahode eramak ni itai jo owoni isi iko edumit hosi.³Ati elle isio iyye aluahio jio olociaŋ, isiarak ollokuai, hèlaha obo atulo omijak, ara duadi bu motte hoi. ⁴Ati al isyatta tai agurusi oŋida isyatta an idima jo oŋida aani ihoroŋ obeŋ omijak anyo an ihanio aani iŋet, bwo fe Monyatai al igonyu erre hun idimani oduma adi itai.⁵Al imojoti tai hehaniete ihwa lenyabak, nyo omunoi isi iwotyari bwo fe imojori ihasik imojiti iko ipehiti kota jo oŋida laati igonyuni isi. Ahode eramak ni itai jo owoni isi iko edumit hosi. ⁶Ati al imojoti tai ojiŋana ihaji, ihyanana ekat bwo omojoti jo Monyatai ol obeŋ’to oleyo, bwo fe Monyatai al igonyu’to erre hun obeŋi oleye oduma adi itai. ⁷Al imojoti tai hekyanati asai ekyanita arryai ta abyaŋan igigilo ihwa ikyanai paganohyen, nyo igigiloi isi jo itaniŋu adi Hollum isi ta ekyanita hosi hun olwaji.⁸Hehaniete ihwa ihanie isi nyo omijak Monyatai erre hun iwahata tai hebyaŋata tai ifiyete inyi. ⁹Omojoti ihwa ana: Monye hohoi ol owon idou, Hotokwata afure hoi, ¹⁰Hetettu olobye hoi. Hetehaniehe awahan hoi lifau ihwa ihanie lidou.¹¹Isyara hohoi ahana aŋiyo hohoi ottoloŋi. ¹²Obusak ahorosi hohoi Ihwa an ebusaniere hohoi aati horosi hohoi. ¹³Heyaro hohoi jyo esusuta Ati itahoru hohoi jyo arrohojita. Ijara olobye hatawana, iko adwaran, iko akwatan jihoi fur.¹⁴Kuyya ibusana tai eyyata wati hul ihanie’to on orroho jihatai, obusak adi monyatai ette dou eyyata hatai. ¹⁵Ati kuyya ibyaŋata tai ibusana ahorosi wati, obeŋ adi Monyatai obusak eyyata hatai.¹⁶Al iferunae tai hejiriŋati ihwa lenyabak hul itajiriŋye’to omomite hosi jo oŋida laati omijani jo oferuni isi. Ahode eramak ni itai jo owoni isi iko edumit hosi. ¹⁷Ati al iferuna tai iyyalana osi hatai bwo illillata omomite hatai, ¹⁸jo oŋida laati obeŋi omijani jo iferuna tai, ati igonyu Monyatai ol obeŋ’to oleyo itai. Bwo fe Monyatai al igonyu’to erre hun obeŋi’to oleye oduma adi itai.¹⁹Hettuniete ebariti hatai jyo afau ana nyo otuk adi eyyu iko nelarryoŋolof isi, kuyya bu ojiŋani adi ahahalak ihahalari isi. ²⁰Ati ottuniete ebariti hatai idou nyo obeŋ adi eyyu kuyya bu nelarryoŋolo itatturi isi bwo fe obeŋi adi ahahalak ojiŋani ihahalari isi. ²¹Nyo igigiloi atajya hatai jyo amaji on ottunarik ebariti hatai.²²Ara onyek ihwa afaŋan ono ahwan tania al afaŋ inyi on oyyu ifut ifaŋan daŋ ihwan tulo. ²³Ati al orroho onyek iryok adi ahwan daŋ. Tania kuyya orroho afaŋan on owon’to itwa tulo, iryok inyi ahode ’tir ’tir. ²⁴Obeŋ tulo oremik igyamari jyo eleittaha arrihai. Nyo oliwari adi inyi olobotye bwo fe omuno olobotye, kuyya bu awak adi inyi olobotye bwo fe omyana olobotye. Ibyaŋata tai iremehina igyamari jyo Hollum bwo fe jyo ebariti.²⁵Tania eramak ni itai jo, hehawwati ta nesu hatai, te erre hun iŋiyete tai bwo fe hun imatati tai, ara dwo bu erre hwattek hun iyyafatyete tai. Obeŋ so nesu hatai agalik aŋiyo? Obeŋi ahwattek hatai agalihini aboŋojin? ²⁶Ikemijyete aheny hun idarratai idou; obeŋi bu isi oyehini bwo obeŋi odeŋuni, obeŋi isi ottubani erre imugwo. Ati itaŋiyo Monyatai ette dou isi. Ibyaŋata so itai igalihina isi?²⁷Alali tehiji hatai ol oremik’to itaboboloro ahwan honyi te ehawwa honyi? ²⁸Nyo ihawwati tai ta aboŋojin? Ikemijyete ayaburita isuri on oyyu. Obeŋi isi igyamai, obeŋi bwo fe isi ikaice, ²⁹ati ajo ni jihatai jo, obeŋi nya aboŋojin Solomone ilamani ihwa ayaburita huna dwadi ilamani isi bebe.³⁰Kuyya ibuya Hollum ayaburita hun isuri’to ahana ifau bwo motye ibironi adi isi ihima, obeŋ adi inyi itiyyafak itai on oyyu agalik? Aii, itai laati hul omuta neruk. ³¹Tania helafuhoti bwo hegigiloti jo, Eŋiyo adi hohoi anyo? kuyya, Emata adi hohoi anyo kuyya, Eyyafak adi hohoi anyo?³²Ottifyai paganohyen erre hunia daŋ. Ati omijak Monyatai ette dou jo iwahata tai erre hunia. ³³Ottifyati ahosyere ekoi ono Hollum bwo ottifyati ijifatyere efahita honyi attadi Hollum fonihina erre huna daŋ jihatai. ³⁴Tania hehawwati te erre hun ofwonni adi motye, nyo motye ofwonni adi erre omuk hun ihawwati adi itai. Oremik arrohoji ono oloŋ abotye to oloŋ ania.

¹Heŋototo obo atulo bwo obeŋ adi Hollum oŋot itai. ²Nyo ihwa iŋototo tai obo, oŋot adi bwo fe Hollum itai. Bwo fe te efahita hun isyatta tai obo, ittigemyo adi Hollum itai.³Aŋai adi igonyu obo alatai alle honyek al awon jo illanyi bwo obeŋ inyi igigilo te etoi on obolo’to otto honyek honyi? ⁴Kuyya aŋai ikyana adi obo alatai jyo illanyi jo, Hadi, agorotu ni alle honyek to honyek hoi bwo owon etoi on obolo’to otto ononyi? ⁵Ara olo ahenyabani. Oŋida ahosyere ogorotu inyi etoi on obolo’to otto honyek honyi attadi inyi remehina igonyuna ligorotuniere alle honyek otto honyek illanyi.⁶Hesyatta erre hun odwari’to jyo ebokwo bwo fe hebironia onoroi hun obwori’to jyo afotirak ŋadi irrirrye isi onoroi huna te ejek hosi ette bwo fe yito lirremyere itai.⁷Ifiyete, bwo isyo adi Hollum jihatai. Ottifyati, bwo inyurana adi itai. Inninnaŋata ekat, bwo aŋa adi inyi jihatai. ⁸Nyo lya al ifiyo’to jyo Hollum ifwotu adi. Lya ol ottifya’to onyurak adi, bwo fe lya al inninnaŋyo’to ekat aŋai adi jihonyi. ⁹Obeŋ adi obo atulo tehiji hatai isyo lonyi honyi amorwo al amojo inyi aŋirya. ¹⁰Bwo fe kuyya omojo inyi ahami, isyo adi monyonyi inyi amunu? Obeŋ.¹¹Itai hul irrohojata’to, kuyya imijana tai lisyoryere erre hun oyiji’to jyo aduri hatai, obeŋ adi Monyatai ette dou isyo erre hun oyiji’to bebe jyo hul ifiye’to inyi? Isyo adi. ¹²Erre daŋ hun iwahata tai ihanie laati jihatai,oŋida bwo fe itai ihaniete on orryama jihosi. Nyo igyoroni huna ifahita bwo fe igyerita huno leyak sayyo.¹³Adahati te ekoi ol ottida’to; nyo alat nekoi on orihoro’to laati liye, inyi on olwajarik ladak te ekoi ania. ¹⁴Ati ottida lekoi ol orihoro’to laati lisu inyi ol omutararik ladak te ekoi alya.¹⁵Ihumata mijo ebwanak hul inyobye’to. Nyo adahatye isi jihatai ihwa akyoro, ati litajya hosi arai isi ihwa elewwo hun oniamai’to. ¹⁶Imijana adi itai isi ta aŋer huno ehanita hosi. Ahode ittallihi laati huruna naŋer ajalaŋi to hikwa, bwo fe ittallihi huruna aŋer ŋaboli to laŋi. ¹⁷Tania ayyanio daŋ hun oyiji’to oŋijuni adi naŋer hosi hun oyiji, bwo fe ayyanio daŋ hun orrohoji’to oŋijuni adi hunosi hun orrohoji.¹⁸Ati obeŋ ayyani on oyyu’to oremik nijuna aŋer hun orrohoji’to. Bwo fe obeŋ ayyani on orroho’to oremik ŋijuna aŋer hun oyiji’to. ¹⁹Oyefuni adi laati ayyanio daŋ hun obeŋi’to oŋijuni aŋer hun oyiji’to ette bironia lihima. ²⁰Tania imijana adi itai isi ta aŋer hosi.²¹Obeŋi adi laati daŋ hul ojori’to jihoŋ, Hobu, Hobu, ojiŋani lidou, ati ojiŋak adi lya al ihanio’to awahan ono Monyoŋ ette dou. ²²Iholoŋ ania ojori adi laati arryai jihoŋ ojo, Aii, Hobu, Hobu. Ebeŋ nya hohoi ekikila ta afure hoi? Ebeŋ hohoi efuhak ajohin ta afure hoi? Ebeŋ hohoi ehanio ehanita arryai hun obolori’to ta afure hoi? ²³Attati ni jaran jihosi jo, Abeŋ ni amijak itai ’tuŋ. Ifwatta addi jihoŋ, itai hulya hul ihaniete’to ehanita hun orrohoji’to.²⁴Laati daŋ hul itaniŋuni’to ekyanita hoŋ bwo fe oniŋye ekyanita hwa arai adi isi ihwa olofere ol oduhok’to aji honyi lihide bak. ²⁵Asayo ahide, ohuco oyyami bwo fe aari oŋettyo, attadi ahide ania ibak naji ati ittallik naji ania kwaharo nyo ara awoyo ohitir honyi ebak.²⁶Laati daŋ hul itaniŋuni’to ekyanita hoŋ bwo fe obeŋi oniŋye ekyanita hwa arai adi isi ihwa olosita ol oduhok’to aji honyi lisuluŋayo. ²⁷Asayo ahide, ohuco oyyami bwo fe aari oŋettyo, attadi ahide ania ibak naji bwo naji ette kwaharo an atturo.²⁸Ninya latuhok Yesu nekyanita hunia, illillihai laati, ²⁹nyo ittiyenio inyi isi ihwa aboloni, obeŋ inyi ittiyenio isi ihwa legyorok.

¹To ninya to nya isuru Yesu to doŋe attati eluluŋ wati ijifuno inyi. ²Attati atulo ’tallulu ’tuna jihonyi ette rigoŋi lihomon honyi ette jaran, Hobu al iwak iye iremik iye itaŋida ani. ³Attati Yesu ihalamana ani honyi ette ’tir inyi ette jaran, Ihwa awak ni, toŋidara. Ette attallulu ono atulo alya ’turoro kwak.⁴Ojo Yesu jihonyi, Imijye, heramak obo atulo, ati ilo itahutak ahwan hoi jyo ehumani bwo fe isyarak ehumi ihwa ifak nya Mose jo oŋida laati ihanie ihwa etamijani.⁵Lajiŋak Yesu imiji Kapernaum, ottu jafit jihonyi ette lwaha jihonyi, ⁶ojo, Hobu oŋwai apit hoŋ ihaji iko agolyo hwan on odyaha’to bebe. ⁷Ette Yesu jaran jihonyi, Attu adi ni itaŋida inyi.⁸Attati jafit itarraŋ ojo, Hobu obeŋ osiru jihoŋ ittu iye ihaji hoŋ. Ati ikyanai te etuk bwo oŋida adi apit hoŋ. ⁹Nyo aniŋyo ni eleittok hoŋ bwo oseŋer hoŋ oniŋye ani. Lekyana ni jo obo, Ilo, bwo inyi ette leten; bwo fe lajo ni jo obo, Waŋ, bwo inyi ette ’tuna; bwo lajo ni jo apit hoŋ jo, Ihanie ania, bwo inyi ette ihanio. ¹⁰Itaniŋu Yesu ana, illilliha inyi ette jaran jyo hya hul ijifatye’to inyi, Ahode eramak ni itai jo, ara dwo bu jyo Israele daŋ abeŋ ni anyurak obo neruk on obolo’to ihwa ana.¹¹Eramak ni itai jo, ofwonni adi laati arryai t’ettedwoŋi holoŋ iko t’ettedorro holoŋ itoŋori itteremeja iko Abramo bwo Isako ojo Yakobo jyo olobye ette dou. ¹²Ati ifuhani adi lonyirok lobye limaji ono edumele. Owon adi nayyo iko aŋutta hala dia. ¹³Ojo Yesu jyo jafit, Ilo ati, ihanie adi jihoi ihwa iruk iye. Ta asaa ania ette lapit honyi ŋidari.¹⁴Ojiŋak Yesu ihaji Petro ette igonyuna hamoni Petro oferyo on oŋwai iko anahan hwan. ¹⁵Ottir Yesu aani honyi attati anahan hwan honyi ’turoro. Ette inyi dyoto igyamari.¹⁶Liddorro oloŋ iyaŋunie isi laati arryai hul owoni’to iko ajohin. Ifuha Yesu ajohin ta nekyana honyi bwo fe itaŋida inyi aŋwak daŋ. ¹⁷Ihanio inyi ihwania itasiruniere nekyana heyani sayyo Isaya on ojo, “Iya inyi eŋwati hohoi addi bwo fe olwak inyi elihita hohoi.”¹⁸Ligonyu Yesu eluluŋ wati arryai ikoloni inyi, ojo inyi jyo leyiyanak honyi, Hafata aŋati hari tole. ¹⁹Attati lobo legyoroni ’tuna jihonyi ette jaran, Hettiyanani, ejifatyo adi ni iye imasik daŋ hun idahari iye. ²⁰Itarraŋ Yesu jihonyi ojo, Owoni obeyohi iko ewuryo hosi. Owoni aheny iko asik hosi, ati obeŋ obo amaji jyo Lonyi tulo iferyere.²¹Ojo obo leyiyanani jihonyi, Hobu ijara do ani alo nuhana monyoŋ. ²²Ati ojo Yesu jihonyi, Ijifatye ani. Ijara ayak onuhani ayak hosi.²³To obo oloŋ adak inyi itogol ette leyiyanak honyi jifaru inyi. ²⁴Bwo fe odyoto asiŋit on obolo bebe ihari, ette aari ifolyahita folyak folyak itufutaniere atogol, ati ojoto Yesu. ²⁵Ette isi itaheny inyi ojo, Hobu olwaha hohoi ŋadi hohoi eye.²⁶Ette inyi jaran jihosi, Anyo ibaŋata tai, omuta neruk hatai? Attati inyi dyoto ette itadwayo oyyami iko aari ette aari iŋettyo dee. ²⁷Illillihai laati hulya ojori, Anyo tulo olo ol oniŋye oyyami iko aari inyi?²⁸Ninya allaŋ Yesu tole lifau Gerasa, orwaŋanie inyi iko laati arrihai hul ofwonni t’ehiji lumyo hul owoni’to iko ajohin hun itisitaji’to isi. Iŋereji isi bebe, tania obeŋ tulo oremik adaha jyo amaji ania. ²⁹Ohosohitai isi ette jaran, Yesu Lonyi Hollum, anyo hiram iwak iye jihohoi? Ittu iye ittigemyere hohoi hobeŋ asaa hohoi ottuba?³⁰Owon neluluŋ bataha arryai alamarai kai hun oŋiye. ³¹Olwahai ajohin jihonyi ojori, Al ijo ati iye ifuha hohoi addi, ijara ati hohoi ejiŋak litwajin bataha. ³²Ette inyi jaran jihosi, Ifwatta. Attati isi fwan addi ette jiŋana itwajin bataha, ette neluluŋ bataha daŋ ŋyoron ilotifor, hutu, hutu, hutu, ette kwahino itwa hari ette ye iko dia.³³Ofuhoi leyyak bataha ette jiŋana itwa miji ette iramana erre daŋ hun idwoŋi’to jyo hya hul isitaji’to. ³⁴Ofwonni laati daŋ hutto miji jyo Yesu ette ifuhara inyi addi to fau hosi.

¹To obo oloŋ adak Yesu itogol illaŋari aari ette jiŋana imiji hosi. ²Iyaŋunie isi jihonyi obo atulo te ekafit nyo ogolyo ahwan honyi. Ligonyu Yesu neruk hosi, ette jaran jyo atulo ol ogolyo hwan, Illa, itagolo ataji hoi, ahohinie eyyata hoi.³Igigiloi omuk egyorok ta ahwattek hosi jo, omoryo atulo olo Hollum. ⁴Omijak Yesu egigilita hosi ette jaran, Nyo igigiloti tai on orroho itajya hatai ihwania? ⁵Anani an ilyaha’to, ajaran hoŋ jo, Ahohinie eyyata hoi, kuyya ajaran hoŋ jo, Totte, adahai? ⁶Ati oŋida itai imijana jo owon adwaran jyo Lonyi tulo ihohiniere eyyata wati hutta fau. Tania ojo inyi jyo atulo ol ogolyo hwan, Otte, obubunak ejotit hoi, ilo ihaŋ.⁷Teyya ette inyi dyoto ette leten ihaŋ hosi. ⁸Ninya igonyuni aati arryai eram ana abaŋi isi ette itahabuyo Hollum al isyo’to nadwaran ihwa ana jyo atulo. ⁹Lattu Yesu teyya, ette inyi igonyuna obo atulo al anya Matteyo. Itoŋo inyi lihaji on odumarik amusuru, ette Yesu jaran jihonyi, Ijifunie ani. Bwo ette inyi odyoto ette jifaru inyi.¹⁰To obo oloŋ, al itoŋo Yesu iteremeja ihaji, ofwonni lomuk lamojok musuru iko leyyak iŋiyere ikonyi ojo leyiyanak honyi. ¹¹Al igonyuni Farisei ana ojori isi jyo leyiyanak honyi jo, Nyo oŋiye ettiyanani hatai iko lamojok musuru bwo leyyak?¹²Ati itayiru Yesu nekyana ana ette jaran jihosi, Laati hul oŋidari’to obeŋi bu isi igigiloi ta afwatan jyo akim, ati to hul oŋwai’to, igigiloi adi hya ette fwatan jyo akim. ¹³Ifwatta iyiyanari awoyo hiram ono nekyana an ojo, “Awak ni laati hul omehitai tajya hosi obyaŋara hul isyori’to ehumita.” Abeŋ ni attu iloŋori ayijok ati attu ni iloŋori eyyak.¹⁴Tania ofwonni leyiyanak hulo Yoane jyo Yesu ette jaran, Eferuta hohoi iko Farisei ati leyiyanak hoi obeŋi oferutai, nyo? ¹⁵Itarraŋ Yesu jihosi ojo, Oremehini mottyarak hayamani ijiriŋa al owon layamani ikosi? Ofwonni adi oŋitek hun iyarik ayamani t’ehiji hosi addi bwo to noloŋ to nya attadi isi feruna.¹⁶Obeŋ tulo orifak ettafit boŋo aŋejuk jyo egwasit boŋo amarwani nyo ogwasaru adi ettafit aŋejuk to boŋo amarwani addi, bwo fe obolo adi egwasit ania agalik odwo.¹⁷Bwo fe obeŋ obo ijuhok abalu aŋejuk itwa ihulo amarwani. Al ijuhok obo ihwania obor adi abalu ehulo bwo obyaŋarik abalu iko ehulo. Ati ijuhonia abalu aŋejuk ihulo aŋejuho ette isi rasa daŋ.¹⁸Ninya hekyana Yesu erre huna jihosi, ottu obo eleittok ette rigoŋi jihonyi ette jaran, Hetek ŋarri hoŋ ye. Waŋ, ilo iyyabak aani hoi jihonyi otte adi inyi isu. ¹⁹Odyotoi Yesu iko leyiyanak honyi ijifari inyi.²⁰Teyya ottu obo aŋotte on owouno hoto to hwan honyi ta aŋasi ’tomon harrihai. Ottu inyi ihorwoŋ Yesu ette ’tir esidi boŋo honyi. ²¹Nyo igigilo inyi ta atwa honyi ojo, ara dwo bu attir ni aboŋo honyi hama attadi ni ŋidari. ²²Otte ati Yesu fyala jihonyi ette jaran, Hanioŋ itagolo ataji hoi, litaŋida neruk hoi iye. Attati aŋotte ania ŋidari ta asaa ania.²³Al afany Yesu ihaji leittok igonyu inyi hul ohutai ekaŋata, tut, tut, tut, iko eluluŋ wati hul oyyoi, ²⁴ette jaran, Ifwatta addi. Obeŋ eito ania oye, ojoto joto. Ette isi suhotyo bebe.²⁵Tania ifuhak inyi eluluŋ wati alet ette jiŋana lihaji jyo neito ette inef aani honyi ette inyi dyoto. ²⁶Ette eram ania isarrahina ifau daŋ.²⁷Ninya alatari Yesu tolya ijifarai laŋodok arrihai inyi ette isi lwaha tehalu honyi ojori, Lonyi Davide, omehinie jihohoi. ²⁸Al ojiŋak inyi obo aji, ofwonni laŋodok jihonyi ette Yesu jaran jihosi, Iruhoto tai jo aremik ni itaŋida itai? Ojori isi jihonyi, Afe Hobu.²⁹Attati inyi ’tir oŋite hosi bwo ojo, Ehanio ni jihatai ihwa iruhoto tai. ³⁰Attati oŋite hosi mijo. Iramak Yesu isi ta agolon ojo, Heramana obo atulo jojo, ’tuŋ. ³¹Ati ofwoi isi addi iramaniere eram honyi imasik daŋ.³²Hofwoi Yesu iko leyiyanak honyi iyaŋunie laati atulo ol obeŋ ikyana nyo owon inyi iko ajok. ³³Ifuha Yesu ajok addi attati atulo alya ikyana. Illillihai laati ette jaran, Obeŋ tulo igonyu omuk erre ihwo hunia ifau Israele. ³⁴Ati ojori Farisei, Ifuha inyi ajohin addi ta afure hobu johin.³⁵Adahatyo nya Yesu imisihi daŋ ittiyeniere ihasik imojiti hosi iramyere laati asayyo lobye Hollum. Attati inyi itaŋida aŋwak daŋ t’eŋwati hosi. ³⁶Omehitta ataji honyi al igonyu inyi eluluŋ wati nyo ilafuhoi isi bwo fe ofyahaji. Arai isi ihwa akyoro hun obeŋi’to iko leyyahani.³⁷Tania ojo inyi jyo leyiyanak honyi ojo, Obolo adyoŋo ati omutari legyamak. ³⁸Hamojoti jyo Hobu olo adyoŋo jo oŋida inyi ifahu legyamak imana honyi.

¹Iloŋu Yesu leyiyanak honyi ’tomon harrihai jihonyi ette isyarana jihosi adwaran ifuhari ajohin hun orrohoji’to addi jyo laati. Isyo inyi bwo fe adwaran itaŋidaryere eŋwati wati iko arrohojarita hosi daŋ.²Afureta lefahatg hulo ’tomon harrihai isi huna: ahosyere Simone al anya’to Petro, iko Andrea illanyi; Yakobo iko illanyi Yoane, isi bu lonyirok Sebedeyo; ³Filipo, Bartolomeo, Tomaso, Matteyo lamojoni musuru, Yakobo lonyi Alufayo, Tadeyo, ⁴Simone Seloth iko Yuda Iskariote, letinyyaŋani Yesu.⁵Ifak Yesu hulo ’tomon harrihai ette iramana isi ojo, Hefwatta imisihi paganohyen bwo fe hejiŋana imisihi huno laati Samaria. ⁶Ati ifwatta jyo laati Israele hul arai’to ihwa akyoro hun olitohini’to. ⁷Ifwatta, ittittoyete jo, Ilyaha olobye ono Hollum.⁸Itaŋidarata aŋwak, itubuhuna layak, itaŋidarata laati ’tallulu, ifuhara ajohin hun orrohoji’to addi. Ihwa ifwotuna tai adwaran on obyaŋara te edumit oŋida isyatta jyo laati asai. ⁹Hettunana arobia, kuyya akamisa, hara dwo bu attarifa ikisi hatai. ¹⁰Heyatti akis hifwa te ewatara hatai ara dwo bu agamisi arrihai, kuyya amuha, kuyya bu elluhi, nyo oremik legyamani ifwotuna aŋiyo honyi.¹¹Al ijiŋana tai obo amiji, ottifyeuna atulo ol oyyu teyya. Itoŋoti ikonyi many ifwatti tai. ¹²Al ijiŋana tai obo aji, ifonyata laati. ¹³Kuyya oyiji laati hutto haji ania ijara nelik taji hatawana dia, ati al obeŋi isi oyiji ijara nelik taji harasa jihatai.¹⁴Kuyya ihari omuk laati itai ara dwo bu ihari isi itaniŋuna ekyanita hatai, al ibusana tai aji ania kuyya amiji ania, iddiddyaŋara attuduha to hejek hatai. ¹⁵Ahode ekyana ni jihatai jo, iholoŋ ono aŋoco obolo adi abahyo jyo amiji ania agalik ninya to fau Sodoma iko Gomora.¹⁶Ihwania efak ni itai ihwa nakyoro ihiji lemyo. Itoŋoti iko olofyoro ihwa etojo bwo fe iko anyalami ihwa ahucari. ¹⁷Ihumata ’rirrya nyo iyarai adi laati itai jyo ewwak hirre bwo fe abahye adi isi itai ihasik imojiti hosi. ¹⁸Iyarai adi isi itai ihosyere mandiri iko hobwok te eram hoŋ. Iramana adi itai eram hoŋ jihosi iko jyo paganohyen.¹⁹Al iyarai isi itai helafuhoti jo, efwo adi hohoi jaran aŋai? Nyo isyo adi Hollum nekyanita jihatai ta asaa ania. ²⁰Obyaŋara itai hul ikyanati’to ati ara Oloyiri olo Monyatai al ikyana’to itwajin hatai.²¹Isyo adi obo atulo illanyi iyeri, bwo fe isyo monye eito honyi iyeri. ²²Odyotoi adi bwo fe aduri isyoryere esyok hosi ittohyere. Oliwarik adi itai laati daŋ ta afure hoŋ, ati lya al odihu’to many isidi, italahu adi Hollum inyi. ²³Al ittigemye isi itai jyo amiji ana ofuhoti jyo obo, nyo eramak ni itai ahode jo ibyaŋata tai iremehina ’diddaha imisihi daŋ hutto Israele many ocohuniere Lonyi tulo.²⁴Obeŋ obo leyiyanani agalik ettiyanani honyi, bwo fe obo apit obeŋ agalik eleittok honyi. ²⁵Oremik leyiyanani itoŋo ihwa ettiyanani honyi bwo fe apit itoŋo ihwa eleittok honyi. Al iloŋoi isi monye haji Belsebulii iloŋoi adi isi bwo fe aati hutta haŋ ihwo nya.²⁶Tania hebaŋata laati. Erre daŋ hun imuhoni igonyuni adi laati ihalu, bwo fe erre hun idimani oleye adi. ²⁷Erre hun ekyana ni jihatai idumele, ikyanati lifaŋan; bwo fe erre hun itaniŋuna tai ta ayyaha hatai, iramana ihosyere wati.²⁸Hebaŋata attok hwattek nyo ittallihi isi ’tohoro oloyiri. Ati abaŋata Hollum ol oremik’to ibironia ahwan iko oloyiri ihima on osyo fur. ²⁹Ilahi laati itinyyaŋai aheny arrihai ta attarifa? Ati obeŋ obo ahenyi oremik kwaharo ifau ol obeŋ Monyatai omijak. ³⁰Itai bwo fe, ara dwo bu ofir hutto hosi hatai ihen Hollum daŋ. ³¹Tania hebaŋata nyo igigilo Hollum tetai agalik aheny.³²Aati daŋ hul iruhi’to ani ihosyere wati, eruk adi bwo fe ni isi ihosyere Monyoŋ ette dou. ³³Ati laati daŋ hul ihari’to ani ihosyere wati, eha adi bwo fe ni isi ihosyere Monyoŋ ette dou.³⁴Hegigiloti jo attu ni iyaŋuniere nelik tajya ifau. Abeŋ ni eyaŋuno nelik tajya ati eyaŋuno ni arrem. ³⁵Attu ni italiwahiniere atulo iko monye, bwo ŋarri iko honye, bwo hamoni iko hamoni. ³⁶Bwo oliwarik adi aati hutta haŋ monye haji.³⁷Lya ol omuno’to monyonyi kuyya honyonyi agalik ani, obeŋ bwo fe osiru jihonyi irari ahito hoŋ, bwo fe lya ol omuno’to lonyi honyi kuyya ŋarri honyi agalik ani, obeŋ bwo fe osiru jihonyi irari ahito hoŋ. ³⁸Lya ol obeŋ’to olororo akruce honyi ette jifaro ani obeŋ osiru jihonyi irari ahito hoŋ. ³⁹Lya al onyurak’to nesu honyi italitohi adi inyi, bwo fe lya al isyo’to nesu honyi ta afure hoŋ onyurak adi.⁴⁰Lya al ifwotu’to itai ifwotu ani, bwo fe lya al ifwotu’to ani ifwotu inyi lya al ifahu’to ani. ⁴¹Lya al ifwotu’to leyani sayyo nyo ara inyi leyani sayyo, onyurak adi inyi edumit ono leyani sayyo. Bwo fe lya al ifwotu’to atulo ol oyyu’to nyo oyyu inyi, onyurak adi lya edumit ono ayijon.⁴²Ahode eramak ni itai jo, lya al isyo’to akos hari hun ilihi’to jyo obo eito nyo ara inyi eyiyanani hoŋ, obeŋ adi edumit honyi olitohi.

¹Ninya latuhok Yesu ekyanita huna jyo leyiyanak honyi ’tomon harrihai, ette inyi leten teyya addi ittiyeniere bwo fe ittittoyere imisihi omuk. ²Al itaniŋu Yoane to babus ehanita huno Kristo, ifak inyi lefahat honyi, ³ifiyere inyi jo, Iye alya linya ojori eyak sayyo jo ottu adi, kuyya oŋida hohoi etila obo?''⁴Bwo Yesu ette itarraŋ jihosi ojo, Ifwatta iramana Yoane erre hun itaniŋuna tai bwo fe hun igonyuna tai. ⁵Amijye aŋodok, adahai aŋurak, aŋidari aati ’tallulu, itaniŋye atuhok, ibuhuni ayak bwo fe ittiyenie asayyo hun oyiji jyo alocaŋak. ⁶Omuno adi lya ol obeŋ’to iha eram hoŋ''.⁷Ninya lacaharai hulya attati Yesu jaran jyo eluluŋ wati ta eram Yoane jo, Ifwatta nya itai imur imijyere anyo? Igonyuna nya itai osiholoti on ohuta oyyami? Obeŋ. ⁸Ati ifwatta nya itai imijyere anyo? Kuyya igonyuna tai atulo al iyyafatyo’to aboŋojin hun ilamani? Amanyai hul iyyafani’to aboŋojin hun ilamani ihasik hobwok.⁹Ati ifwatta nya itai imijyere anyo Kuyya eyani sayyo? Afe, ati eramak ni itai jo agalik Yoane eyani sayyo. ¹⁰Nyo igyoroni ekyanita huna tenyi jo, “Imijye efak ni eyani sayyo hoŋ ahosyere hoi, Al ihuhumak’to nekoi ahosyere hoi.”¹¹Ahode eramak ni itai jo, ihiji wati daŋ hul isiuni hobeŋ obo odyoto al agalik’to Yoane Batista. Ati lya ol omutarik’to ilobye ono Hollum agalik adi inyi Yoane. ¹²To oŋitek huno Yoane Batista many iko ihwania ottifyai afiriwajak ijiŋaniere ilobye Hollum ta agolon, iko inefuniere inyi.¹³Iramye nya efahita bwo ikilutai nya eyak sayyo daŋ eram ana many afanyari Yoane. ¹⁴Inyi alya Elija luŋa linya ojori ottu adi. Iruhoto tai eram ana? ¹⁵Lya ol owon’to iko ayyaha ijara inyi hetaniŋu.¹⁶Etarrijohi adi ni laati hulo iko anyo? Arai isi ihwa aduri hul itoŋoi isuk bwo illilloŋoi illarak hosi ojori, ¹⁷Ehut hohoi acuwali jihatai bwo itai ibyaŋata ihyati. Eyyo hohoi atwari bwo itai ibyaŋata iburyete.¹⁸Ottu nya Yoane ol obeŋ oŋiyo bwo obeŋ amata iko aati ati ojori aati orrohoja inyi. ¹⁹Ottu Lonyi tulo ol oŋiyo bwo fe amata bwo ojori isi, Imijyete alaŋaru iko arumani alya bwo fe ara inyi amotte hamojok musuru iko leyyak. Itahutani ehanita Hollum jo obisi ofyoro honyi.²⁰Tania isiŋyo Yesu aati hutto misihi hunya igonyuni’to ehanita honyi hun obolori’to nyo obeŋi laati teyya iloiti atajya hosi. ²¹Ojo inyi, Orroho adi bebe jyo amiji Korasin, ati bwo fe orroho adi bebe jyo amiji Beteseda, nyo hara nya ihanie edwariti imisihi Turo iko Sidon ihwa hunya ihanie jihatai, nya mana iloiti isi atajya hosi beryen te ejiriŋa on obolo. ²²Ati eramak ni itai jo oyyu adi jyo Turo iko Sidon agalik itai iholoŋ ono aŋoco.²³Bwo iye amiji Kapernaum, itadara iye bebe ati ibironi adi iye many Hadese. Nyo kuyya ihanie nya ehanita imiji Sodoma ihwa hunya ihanie jihatai arasa dwo inyi many iko ahana. ²⁴Ati eramak ni itai jo oyyu adi jyo afau Sodoma agalik itai iholoŋ ono aŋoco.²⁵Ta asaa ana omojo Yesu jo, Ajo ni jihoi humo Monye Hobu olo edou iko afau, nyo idimak iye erre huna jyo alofyorojok iko agenyak ette iye itahutana isi jyo odolyo. ²⁶Afe, Monye, oyiji erre huna ihoŋite hoi. ²⁷Isyo Monyoŋ erre daŋ jihoŋ bwo fe obeŋ obo atulo omijak Monye arari Lonyi iko hya hul itahutak Lonyi.²⁸Ifwanna jihoŋ itai daŋ hul omiratyo egyama bwo fe iyuhotyete, bwo esyo adi ni jihatai nayiri. ²⁹Ifwotuna eyeni hoŋ itajya hatai bwo ittiyenuna eram hoŋ nyo anyalam ni bwo fe obi ataji hoŋ ittata adi itai nyurana nayiri jyo oloyirihyen hatai. ³⁰Nyo oyyu eyeni hoŋ bwo fe eram hoŋ ilyaha.

¹To oloŋ sabatok ania adaha Yesu ta atwa matta hima. Oniamai leyiyanak honyi ette isi giluna omuk ema ette ryaja. ²Igonyuni Farisei isi ette jaran jyo Yesu, Imijye, ihanie leyiyanak hoi ariŋ on odwa’to lihaniere to oloŋ sabato''.³Bwo Yesu ette itarraŋ jihosi ojo, Ibyaŋata tai ihenuna erre hunya ihanio Davide iko laati honyi laniamai isi? ⁴Ojiŋak nya inyi ihaji ono Hollum ette ŋiyo bwo fe isyo inyi omuk jyo hul owoni’to ikonyi. Isi emunio hun odwari’to hun obeŋ tulo oŋiyo arari lehumak hama.⁵Ihwa igyoroni ifahita jo to oloŋ sabato itapwahi ehumak efahita huno sabato al igyamai isi ihaji imojit eneittok ati obeŋi isi ipali. ⁶Eramak ni itai jo, owon obo dini al agalik aji imojit eneittok.⁷Itimoti tai awoyo hiram ono nekyana on ojo’to, “Attifya ni laati hul omehinie tajya obyaŋara hul isyori ehumita.” Kuyya imijana tai eram ana ibyaŋata tai iŋototo hul obeŋi ihanie on orroho. ⁸Nyo ara Lonyi tulo Hobu olo sabato.⁹Idyaharo inyi amaji nya ette jiŋana ihaji imojit hosi. ¹⁰Owon dia obo atulo ol oye hani honyi. Awahi laati teyya rasana Yesu ette isi ifiyo inyi ojori, Oyyu al itaŋidari atulo to oloŋ sabato?¹¹Attati inyi ifiyo isi, Owon adi obo atulo t’ehiji hatai ol obeŋ adi akafu aker honyi t’ewure addi kuyya okwaharo inyi dia to oloŋ sabato? ¹²Oyyu atulo bebe agalik aker. Oyyu ehanio jyo laati on oyyu to oloŋ sabato.¹³Ette inyi jaran jyo atulo alya, Onitok aani hoi. Ette inyi nitonia ette aani honyi ŋidari ihwa aani ebotye. ¹⁴Teyya ofwoi Farisei alet iwwahari jo aŋai adi ettoho Yesu.¹⁵Omijak Yesu erre huna ette inyi busaro amaji nya. Ati ijifarai laati arryai inyi ette inyi itaŋida isi daŋ. ¹⁶Ifak inyi isi jo, oŋida isi obeŋi iramani eram honyi jyo laati. ¹⁷Oŋida itasiruni ekyanita Hollum hunya ikyana eyani sayyo Isaya ojo,¹⁸“Imijyete apit hoŋ al anyimu ni, Inyi alya ol omuno ataji hoŋ bebe. Esyarak adi ni Oloyiri hoŋ jihonyi Bwo fe ittittoyo adi inyi nekyana ono aŋoco jyo paganohyen.¹⁹Obeŋ adi inyi aŋalafatye iko aati bwo fe obeŋ ohosohita. Obeŋ adi obo itaniŋu etuk honyi te ekoi. ²⁰Obeŋ adi inyi owur osiholoti on oboina’to, Bwo fe obeŋ adi inyi itaduny allomo on ofurui’to Many agalihiniere inyi ta aŋoco on obis’to. ²¹Bwo attadi paganohyen iyihina ta afure honyi.”²²Iyaŋunie isi jihonyi atulo ol owon iko ajok an itaŋodo inyi bwo obeŋ inyi oremik ikyana. Attati Yesu itaŋida atulo alya ette inyi ikyana bwo fe omijo. ²³Illillihai eluluŋ wati daŋ ette jaran, Atulo alya, inyi ahode lonyi Davide?²⁴Itaniŋuni Farisei ette jaran, Ifuha atulo olo ajohin ta afure Belsebuli hobu olo ajohin. ²⁵Omijak inyi egigilita hosi, ette jaran jihosi, Al orryomonie laati hutto lobye ta ahwattek hosi itatturi adi olobye ania, bwo fe al aŋalafai aati hutta haŋ kuyya bu hutto miji ta ahwattek hosi, obeŋi adi isi itoŋoi arabotye.²⁶Al ifuha Sitan egyamak honyi orryomoro inyi hama, tania, aŋai adi oremik olobye honyi itoŋo? ²⁷Kuyya efuha ni ajohin addi ta afure Belsebuli, ta anani fure ifuhattai lejifak hatai isi? Tania arai isi ahaŋotok hatai.²⁸Ati kuyya efuha ni ajohin addi to Oloyiri olo Hollum ottu olobye Hollum jihatai ahode. ²⁹Obeŋ adi obo atulo oremik jiŋana ihaji lottir liyari asaŋ honyi hobeŋ inyi ifitak olottir alya ahosyere. Nyati inyi ihalu otuhoro erre ta haji honyi. ³⁰Lya el ebeŋ’to egyama ikoŋ ara inyi amyotononi hoŋ, bwo itasarrayo lya al ebeŋ’to esuduha ikoŋ.³¹Tania ajo ni jihatai jo, obusak adi Hollum eyyata daŋ huno laati iko nemoriti hosi, ati lya ol omoryo’to Oloyiri ol Olibo obeŋ adi Hollum obusak inyi. ³²Lya al ikyana’to on orroho jyo Lonyi tulo obusak adi Hollum inyi, ati lya al ikyana’to on orroho jyo Oloyiri ol Olibo obeŋ adi onyurak abusana, ara dwo bu ta afau ana kuyya bu ta afau on ottu’to.³³Oŋerik ayyani on oyyu’to aŋer hun oyiji, bwo fe ayyani on orroho’to oŋerik aŋer hun orrohoji. Tania omijani laati ayyani ta aŋer honyi. ³⁴Irata tai ihwa amunok, ittallihoto tai ikyana on oyyu nyo orrohoji atajya hatai. Nyo ikyana etuk erre hun ofwonni’to to taji. ³⁵Ojiŋuni erre hun oyiji’to to taji tulo ol oyyu’to, bwo fe ojiŋuni erre hun orrohoji’to to taji tulo ol orroho’to.³⁶Eramak ni itai jo iholoŋ ono aŋoco, oŋot adi Hollum laati te ekyanita daŋ hunya ikyanarai isi asai. ³⁷Nyo te ekyanita hun ikyanati tai inyurana adi itai abusana, bwo fe ta omuk ekyanita asai hun ikyanati tai inyurana adi itai aŋoco.³⁸Ojori omuk Farisei iko egyorok jihonyi ojo, Hettiyanani ewak hohoi igonyuna obo etamijani jihoi. ³⁹Itarraŋ inyi jihosi ojo, Orroho nelahaji ana bwo omesye isi Hollum. Ottifyai isi etamijani, ati obeŋi adi itahutani jihosi obo etamijani arari ono leyani sayyo Yona. ⁴⁰Nyo ihwa ninya awanari Yona oŋitek hunihoi iko arwejin hunihoi ihohe hami, owon adi bwo fe Lonyi tulo oŋitek hunihoi iko arwejin hunihoi itwa ilume.⁴¹Odyotoi adi laati hutto miji Ninifa iŋocere nelahaji ana nyo iloiti aati Ninifa atajya hosi ninya ittittoyere Yona jihosi. Ati imijyete owon dini obo al agalik’to Yona.⁴²Odyoto adi nobu otto ŋati ihorroŋ iŋocere nelahaji ana nyo ottu nya inyi to fau an alama’to itayiruniere olofyoro huno Solomone. Ati imijyete, owon dini obo al agalik’to Solomone.⁴³Al obusak ajok on orroho’to atulo adaha inyi ihotohoto ittifyari amaji yiri, ati obeŋ inyi onyurak obo. ⁴⁴Tania ojo inyi jo, Acaharo adi ni jyo atulo odwo edyehuno ni. Al afany inyi dia onyurak inyi ataji tulo ahania, an alibo bebe bwo ilaman. ⁴⁵Tania olo inyi rumana omuk ajohin hattarik hun orrohoji’to agalihini inyi, ette isi jiŋana itwa tulo lya ette manya dia. Tania orroho ihwania jyo atulo alya agalik ninya hosyere. Ihwa ania ottu adi arrohoji jyo laati hul orrohoji’to hulo nelahaji ana.⁴⁶Al ikyana inyi jyo eluluŋ wati, owotya honyonyi iko illarak honyi ilet nyo awahi isi ikyana ikonyi. ⁴⁷Iramak obo atulo inyi ojo, Imijye honyohoi iko illarak hoi owotyai ilet, awahi isi ikyana jihoi.⁴⁸Ati ojo inyi jyo alya al iramak’to inyi jo, Ŋai iyaŋ? Haŋai illarak hoŋ? ⁴⁹Ette inyi ihalamana aani honyi jyo leyiyanak honyi ette jaran, iyaŋ iko illarak hoŋ hulo. ⁵⁰Lya al ihanio’to awahan Monyoŋ ette dou inyi illaŋ iko hanioŋ ojo iyaŋ.

¹To oloŋ ania ojiŋu nya Yesu to haji ette itoŋo ilotifor hari. ²Ofwonni eluluŋi wati arryai jihonyi tania ojiŋak inyi itogol ette itoŋo bwo fe eluluŋ wati daŋ itoŋoi ilotifor hari.³Ittiyenio inyi isi erre arryai ta narryamarita ette jaran, Olo obo atulo yehina enyomo honyi. ⁴Ninya layehi inyi ette omuk enyomo fodoŋoro ikoi bwo aheny ette fwanna ikubuna isi. ⁵Bwo fe omuk ette fodoŋoro ihiji morwoi, tania obeŋi isi onyurani aboro hun olwaji, ette isi isuruna kokwak nyo obeŋ amaji hosi ojon. ⁶Al onok oloŋ ette itayoho afarawa hosi nyo obeŋi nadde jihosi.⁷Ati ofodoŋonie nya omuk bwo fe ihiji hikwa ette isuruna arabotye iko nekwa ette nekwa itabunara isi. ⁸Hun okwahinie’to jyo aboro hun oyiji’to isuruni bwo ihalu ette fwanna ŋerihina ema esiha abotye, bwo obo atomwana ille, bwo fe obo atomwana hunihoi. ⁹Lya ol owon’to iko ayyaha ijara inyi hetaniŋu.¹⁰Ofwonni leyiyanak jihonyi ette ifiyo, Nyo ikyana iye jihosi ta narryamara? ¹¹Itarraŋ inyi jihosi, Italeyehi Hollum jihatai nelahode ninya idimani ono olobye honyi, ati obeŋi italeyehi jihosi erre hwa. ¹²Nyo ofonihini adi erre jyo lya ol owon’to iko erre, tania owoni adi hun olwaji jihonyi. Ati jyo lya ol obeŋ iko erre iyarai adi erre honyi addi.¹³Ekyana ni jihosi ta narryamara nyo igonyuni isi ati obeŋi isi igonyuni ahode. Itayirye isi ati obeŋi isi itaniŋuni bwo fe obeŋi omijani ahode. ¹⁴Itasiruni ekyana Isaya jihosi an ojo, “Itayiryete adi itai ahode ati ibyaŋata adi itai itaniŋuna. Imijyete adi itai ahode ati ibyaŋata adi itai igonyuna.¹⁵Ottuhoi ayyaha huno aati hulya ngadi isi itayirye. Imuti isi oŋite hosi Ŋadi isi igonyuni. Itadwari isi atajya hosi Ŋadi isi itaniŋuni. Tania obeŋi isi iloiti atajya hosi Bwo fe abeŋ ni etaŋida isi.”¹⁶Hotomunohi oŋite hatai nyo igonyuni isi bwo fe hotomunohi ayyaha hatai nyo itaniŋuni isi. ¹⁷Ahode eramak ni itai jo, awahi nya eyak sayyo arryai iko ayijok igonyuniere erre hun igonyuna tai ati obeŋi isi igonyuni. Bwo fe awahi nya isi itaniŋuniere erre hun itaniŋuna tai ati obeŋi nya isi itaniŋuni.¹⁸Hulo, itaniŋuna arryamara ono layani hinyomo. ¹⁹Al itayiryo obo atulo nekyana ono Hollum ati obeŋ itaniŋu, ottu adi olorroho ette kwararu ekyana addi to taji honyi. Ara ana ihwa enyomo hun ofodoŋoroi iger ikoi.²⁰Hun ofodoŋonie imorwoi arai ihwa atulo al itayiru’to nekyana ette ifwotuna ta amuno. ²¹Ati obeŋi nadde honyi. Iruk inyi do ati al ofwonni ettigemita kuyya netahawwata ta neram Hollum ette inyi ipal addi.²²Hun ofodoŋonie ihiji hikwa arai ihwa atulo al itayiru nekyana Hollum, ati ihawwa inyi ta nerre hutta haŋ honyi, kuyya ogori ebariti nekyana Hollum, tania ette lak ŋijuna. ²³Hun okwahinie ifau on oyyu arai ihwa atulo al itayiryo nekyana bwo fe itaniŋu. Oŋiju inyi aŋer esiha abotye, bwo obo atomwana ille, bwo obo atomwana hunihoi.²⁴Inyyak Yesu ikyana jihosi ta narryamara ojo, Ara olobye ono Hollum ihwa atulo ol oyehi enyomo hun oyiji imana honyi. ²⁵Ati al ojotoi legyamak honyi ofwonni amyorok honyi iyehiniere alabali ihiji hima ette isi fwatan addi. ²⁶Al isuruni ema ette bolori oleyo bwo fe alabali.²⁷Ofwonni apiti jyo eleittok ette ifiyo, Leittok, ibeŋ nya iye iyehi enyomo hun oyiji imana hoi? Ofwonni alabali huna tai? ²⁸Ojo inyi jihosi, Amyotononi oyehi huna. Ette apiti itarraŋ jihonyi, Iwak iye hohoi erutu isi?²⁹Ojo inyi jihosi, Obeŋ, nyo ŋadi itai irutuna iko ema al ijatta tai erutu alabali. ³⁰Obusana daŋ obobolororoi arabotye many iholoŋ dyoŋo, bwo ajo adi ni jyo adyoŋok jo, Ahosyere, orutuna alabali, ittittirata isi ittata swahina ihima, ati ottubana ema imugu hoŋ.³¹Inyyak Yesu ikyana jihosi ta narryamara ojo, Orrijori olobye ono Hollum iko aŋeryo bule an iyaro atulo ette dulana imana honyi. ³²Omuta inyi agalik aŋer daŋ, ati al obobolororo inyi obolo inyi agalik ayyani daŋ, bwo owon inyi iko atanata arryai hun oremehini aheny duhori asik hosi.³³Ikyana inyi narryamara obo jihosi on ojo, Orrijori olobye ono Hollum iko abula hun iduhu aŋotte ette iharrwahina iko efwa many ayafutarik daŋ.³⁴Ikyana Yesu erre huna daŋ jyo eluluŋ wati ta narryamara. Obeŋ bu inyi ittiyenio omuk erre jihosi arari ta narryamara. ³⁵Nyo oŋida itasiruni ekyana ono eyani sayyo Isaya al ojo inyi, “Ettiyenio ni ta narryamara. Ekyana adi ni on okwat erre hunya idimani many t’etteri fau.”³⁶Tania obusak inyi eluluŋ wati ette jiŋana ihaji. Ati ofwonni leyiyanak honyi jihonyi ette jaran, Itahutak jihohoi awoyo ono alabali hun isuri’to imana. ³⁷Itarraŋ inyi jihosi jo, Lya ol oyehi’to enyomo hun oyiji’to inyi Lonyi tulo. ³⁸Ara amana ihwa afau. Arai enyomo hun oyiji ihwa lonyirok hulo olobye. Arai alabali ihwa lonyirok hulo olorroho. ³⁹Ara amyotononi ol oyehi’to alabali ihwa etisyahani. Ara adyoŋo ihwa esidi fau. Arai adyoŋok ihwa anjelohyen.⁴⁰Ihwa aharanyuni isi alabali ette swahina ihima, ihanie adi ihwo nya te esidi fau. ⁴¹Ifak adi Lonyi tulo anjelohyen honvi isuduhaniere to lobye honyi addi hya daŋ hul itipalye’to omuk iko hul ihanie’to on orroho, ⁴²ette bironia isi ihima on onok’to. Owon adi ayyo iko aŋutta hala dia. ⁴³Tania afaŋi adi ayijok ihwa oloŋ ilobye Monyosi.⁴⁴Ara olobye ono Hollum ihwa ebariti hun idimani imana. Onyurak atulo ebariti hwa ati inyyak inyi dimana isi. Alo inyi ta amuno itinyyaŋaniere erre honyi daŋ inyyaŋari amana ania. ⁴⁵Bwo fe ara olobye ono Hollum ihwa apoconi ol ottifya’to onoroi hun obwori’to bwo fe ogoli te enyyaŋa. ⁴⁶Onyurak inyi onoro abotye on ogol bebe te enyyaŋa ette inyi leten itinyyaŋaniere erre honyi daŋ ette inyyaŋa onoro ania.⁴⁷Bwo fe ara olobye ono Hollum ihwa aboy an ibironi ayafohok ihari ette yafohuno aham ta awoi hosi daŋ. ⁴⁸Al ifut aboi ipihuni isi inyi addi many ilotifor hari ette isi itoŋo ihuroniere aham hun oyiji’to isahani hosi, ati ibirori isi hun orrohoji’to addi.⁴⁹Ara adi ihwo nya te esidi fau. Ofwonni adi anjelohyen igigyalari laati hul orrohoji’to addi jyo hul oyiji’to, ⁵⁰ette bironia isi ihima on onok’to. Owon adi ayyo iko aŋutta hala dia.⁵¹Itaniŋuna tai erre huna daŋ? Ojori isi jihonyi, Afe, etaniŋu hohoi. ⁵²Ojo inyi jihosi, Tania arai legyorok daŋ hul ittiyenie’to eram ono olobye Hollum ihwa monye haji al iduhu’to erre aŋejuho iko erre amarwahi addi to mugu honyi. ⁵³Latuhok Yesu narryamarita hunia idyaharu inyi amaji ania.⁵⁴Afany inyi ifau hosi ette ittiyenio ihaji imojit hosi bwo fe laati ette illilliha ette jaran, Orumak inyi olofyoro huna aja iko egyamita hun obolori’to huna? ⁵⁵Ilak ara inyi adi olo lonyi hehuhumani bau? Ilak ara so honyonyi Maria? Obeŋi so ho Yakobo, Yosefo, Simone iko Yuda illarak honyi? ⁵⁶Amanyai bwo fe haniarak honyi daŋ iŋati hohoi. Ati orumak atulo olo ofyoro huna daŋ aja?⁵⁷Ette isi ihara inyi. Attati Yesu jaran jihosi ojo, Itahabuye laati daŋ eyani sayyo, ati obeŋi aati hutta haŋ hosi iko hutto miji hosi itahabuye inyi. ⁵⁸Obeŋ inyi oremik ihanio egyamita arryai dia nyo obeŋi isi iruhi jihonyi.

¹To oŋitek hunia itaniŋu Hobu Erode eram ono Yesu, ²ette iramana legyamak honyi jo, Inyi alya Yoane Batista al ibuhu’to to ye tania oleye edwariti arryai tenyi.³Nyo inefu nya Erode Yoane ette ifitana inyi ibabus, nyo awak inyi itamuno Erodia ŋorwoi illanyi Filipo. ⁴Nyo ojo nya Yoane jyo Erode jo, Obeŋ oyyu jihoi imanyari iko aŋotte ania. ⁵Tania awak Erode ’tohoro Yoane, ati abaŋ inyi eluluŋ wati nyo ojori isi ara inyi eyani sayyo.⁶To oloŋ an ihanierek isi akarama igiluniere esiuna ono Erode, ohya ŋarri Erodia ihiji wati, attati Erode muno. ⁷Attati inyi coronia ettuŋo isyoryere jyo odwoti erre daŋ hun awak inyi.⁸Ette inyi jaran ihwa itahutak dwo honyonyi jihonyi jo, Isyarak ani ahou Yoane Batista itwa sahan. ⁹Attati hobu jiriŋa, ati ifak inyi isyoryere jihonyi nyo acorok dwo bu inyi te ettuŋo bwo atamonok itaniŋuni.¹⁰Teyya attati inyi ifahina obo ibabus iŋotuniere ahou Yoane. ¹¹Attati inyi iyaŋuno ahou honyi itwa sahan attati isyo jyo odwoti bwo odwoti ette yaro jyo honyonyi. ¹²Teyya ofwonni leyiyanak hulo Yoane iyari ahwan honyi ette nuhana inyi. Ette isi fwatan iramana Yesu.¹³Al itaniŋu Yesu erre huna idyaharu inyi amaji ania ette leten ta atogol jyo amaji on oyur’to. Itaniŋuni eluluŋi wati to misihi jo alo Yesu, ette isi ijifaru inyi te ejek hosi. ¹⁴Al isuru inyi ilotifor hari igonyu inyi eluluŋ wati arryai, attati ataji honyi mehino jihosi ette inyi itaŋida aŋwak hosi.¹⁵Ojo nya otoryai ofwonni leyiyanak honyi jihonyi ette jaran, Amur ana bwo fe ilyaha noloŋ eddorro. Ifak eluluŋ wati imisihi inyyaŋari aŋiyo.¹⁶Itarraŋ Yesu jihosi jo, Hefuhara isi addi, isyatta jihosi aŋiyo. ¹⁷Ati ojori leyiyanak jihonyi, Ewon hohoi iko emunio miet hama iko aham arrihai. ¹⁸Ette inyi jaran, iyaŋuniete emunio hunia jihoŋ.¹⁹Attati inyi iramana laati hetetoŋohi ifau. Attati inyi duhuna emunio miet bwo aham arrihai ette bonno ahide ette jaran humo jyo Hollum, attati bibeny emunio ette isyarana jyo leyiyanak bwo leyiyanak isyarani jyo eluluŋ wati. ²⁰Oŋiye isi daŋ ette ifoŋ. Attati isi iddudduhuna ofitot imunio hun oremehini ta afejin ’tomon harrihai hun ifuti. ²¹Oŋiye isi daŋ. Arai alyawa hama esiha atomwana miet bwo fe owoni aŋorwo iko aduri.²²Teyya teyya ifak inyi leyiyanak honyi hatadahiniehe itogol hatallaŋahi aari ahosyere honyi, attati inyi ifahina eluluŋ wati hototturorohi. ²³Ihalu efahina honyi isi addi olo inyi idoŋe hama imojori. Nya attari owon inyi dia hama. ²⁴Ette atogol wanan ihiji hari an ifolyahita folyak folyak. Ittigemyo inyi atogol nyo ohuco oyyami bebe.²⁵Ninya ilyaha ataŋatyo motye ette Yesu leten jihosi al adaha ta ahide hari. ²⁶Ati al igonyuni leyiyanak inyi adaha ihide hari, abaŋi isi ette ilulwo, ululululu, aŋarri jok ania. ²⁷Ati ojo inyi jihosi ojo, Itagoloto atajya hatai. Ani alya, hebaŋata.²⁸Ojo Petro jihonyi, Hobu, al ara iye alya ahode, ikejara ani attu jihoi ihide hari. ²⁹Attati Yesu jaran, Waŋ. Attati Petro ’luuna to togol ette daharo ta ahide hari ajyo Yesu. ³⁰Ati ninya igonyu inyi oyyami ette itteryo abaŋi ette dyodyoro ihari, attati lwaha ojo, Hobu etalwahu ani.³¹Teyya kokwak ihalamak Yesu aani honyi ette inefuna inyi nefuna ette jaran, Nyo ikuyya iye? Omuta neruk hoi. ³²Al ojiŋani isi itogol ette oyyami dwa. ³³Bwo fe origoŋi hya huttotwa togol ette jaran, Ahode, iye Lonyi Hollum.³⁴Ninya allaŋi isi aŋati hari tole afany isi ifau Jenesaret. ³⁵Ette laati hutto maji ania mijana Yesu ette isi ifahina nekyana imisihi daŋ heteyaŋuniehe aŋwak daŋ jihonyi. ³⁶Omojoi isi inyi hataŋatak aŋwak ittiryere eger boŋo honyi bwo fe oŋidari aati daŋ hul ottiri’to aboŋo honyi.

¹Tania ofwonni Farisei iko legyorok to Yerusalem jyo Yesu ette jaran, ²Nyo omesye leyiyanak hoi nemohiti huno eleittaha? Nyo oŋiye isi hobeŋi ofiniai? ³Ette inyi itarraŋ jihosi, Ara bwo itai, nyo imesyete tai efahita huno Hollum te emohiti hatai?⁴Nyo ojo Hollum jo, “Itahabuyete monyatai iko honyatai,” bwo fe, “Atulo ol omoryo’to monye kuyya bu honye, ijara inyi hotoye.” ⁵Ati ijatta tai jo, Oremik obo atulo iyimo alwahyo jyo monyonyi kuyya bu honyonyi ta ajaran honyi jojo, Agurusi hun imojoti tai jihoŋ, arai isi esyoryo jyo Hollum. ⁶Tania itapwahata tai nekyanita huno Hollum ta nemohiti hatai.⁷Itai lenyabak, ikilu nya Isaya on oyyu tetai ojo, ⁸“Itahabuye laati hulo ani te etuhe hosi, Ati alamaji atajya hosi jihoŋ. ⁹Itahabuye isi ani asai. Ittiyenie isi emohiti wati ihwa arai isi efahita huno Hollum.”¹⁰Iloŋu Yesu eluluŋ wati jihonyi ette jaran, Itayiryete jihoŋ bwo fe itaniŋyete eram ana. ¹¹Obeŋ obo ariŋ on ojiŋak itwa tulo te etuk honyi oremik itarroho inyi, ati erre hun ofwonni’to to hutuk tulo addi arai isi erre hun itarrohojye atulo.¹²Ofwonni leyiyanak honyi jihonyi ette jaran, Imijak iye jo iloŋojitai Farisei ta nekyana hoi ania? ¹³Itarraŋ inyi ojo, Ayyanio daŋ hun obeŋ Monyoŋ ette dou idulak orutuni adi isi addi. ¹⁴Obusana isi. Arai isi arihok hul oŋodoi’to. Al orihoro oloŋodo atulo ol oŋodo’to okwaharai adi isi daŋ iwure.¹⁵Itarraŋ Petro jihonyi ojo, Itahutak nawoyo hiram ono narryamara ana jihohoi. ¹⁶Ojo inyi, Aii, itai, ibyaŋata tai itaniŋuna? ¹⁷Ibyaŋata tai imijana jo erre daŋ hun ojiŋani ihutuk afanyi many ihohe attati irrituna alet?¹⁸Ati erre hun ojiŋuni’to to hutuk tulo ofwonnitai to taji bwo fe arai isi ahirre hun itarrohojye’to atulo. ¹⁹Nyo to taji tulo ofwonnitai egigilitia hun orrohoji’to, isi: attohyo, aroto, asomon, ahoholyo, amwaŋa, iko etisyaha. ²⁰Erre hunia isi hun itarrohoji’to atulo. Ati al oŋiyo atulo hobeŋ inyi ofinia, obeŋ bu ania oremik itarroho inyi.²¹Attati Yesu busana amiji ania ette leten ifau Turo iko Sidon. ²²Teyya ottu aŋotte Akenenitanani jihonyi ette iloŋo ta adyaha taji ojo, Hobu, Lonyi Davide, omehinie jihoŋ. Oŋwai ŋarri hoŋ bebe iko ajok. ²³Ati obeŋ Yesu itarraŋ jihonyi obo ekyana kai. Ette leyiyanak honyi fwanna ifiyere inyi ifuhari aŋotte ania addi nyo oyyo inyi bebe tehalu hosi.²⁴Itarraŋ inyi jyo aŋotte ojo, Attu ni jyo aati Israele hama hul arai’to ihwa akyoro hun olitohini’to. ²⁵Attati aŋotte rigoŋi jihonyi ette ilolya ojo, Hobu olwaha ani. ²⁶Ette inyi itarraŋ jo, Obeŋ oyyu iduhuniere aŋirya duri ette irwoŋonia jyo aŋohe.²⁷Attati aŋotte jaran jihonyi, Afe, Hettiyanani, ati oŋiye aŋohe ebenyiti ŋirya hul odouni’to to teremeja leittok. ²⁸Attati Yesu jaran jihonyi ojo, Hanioŋ, obolo neruk hoi bebe, ihanie adi jihoi ihwa iwak iye. Ta asaa ania ette ŋarri aŋotte ania ŋidari.²⁹Ojyo teyya ette Yesu busana amaji nya ette leten iger hari Galilea. Ette inyi dahina idoŋe ette itoŋo dia. ³⁰Ottu eluluŋ wati jihonyi hul iyaŋunie aŋurak, aŋodok, attuhok, iko hul oretyai’to. Itaferehini isi aŋwak ihosyere Yesu ette inyi itaŋida isi daŋ. ³¹Tania illillihai aati nyo igonyuni isi aati hunya obeŋi’to ikyanai likyanai, hunya orrohojari’to aŋidari, hunya aŋurai’to adahai, bwo fe hunya oŋodoi’to omijye, ette isi itahabuyo Hollum olo Israele.³²Iloŋo Yesu leyiyanak honyi jihonyi ette jaran jihosi jo, Amehino ni jyo laati hulo nyo itoŋoi isi ihwania jihoŋ oŋitek hunihoi bwo fe atuho naŋiyo hosi. Abeŋ ni awak ifahina isi addi hobeŋi isi oŋiye ŋadi ahure ottoho isi te ekoi. ³³Ati itarraŋi leyiyanak honyi jihonyi ojo, Jyo edyofo ana erumak adi hohoi aŋiyo aja on oremik’to ta aati hul olwaji’to hulo? ³⁴Attati Yesu ifiyo isi jo, Omukaja emunio jihatai? Bwo isi itarraŋi jo, Arai emunio hattarik bwo aham hun omutari. ³⁵Tania ette inyi iramana eluluŋ wati hetetoŋohi ifau.³⁶Attati inyi iduhuna emunio hattarik iko aham ette jaran humo jyo Hollum. Ibibeny inyi isi ette isyo jyo leyiyanak honyi ette leyiyanak harana jyo eluluŋ wati. ³⁷Oŋiye isi daŋ ette ifoŋ. Attati isi iduhuna ofitot hun oremehini ta afejin hattarik hun ifuti. ³⁸Oŋiye isi daŋ. Arai alyawa hama esiha atomwana aŋwan bwo fe owoni aŋorwo iko aduri. ³⁹Ifak inyi eluluŋ wati addi ette inyi dahina itogol lifanyari lifau Madaga.

¹Ofwonni Farisei iko Saducehyen ikemyere Yesu ette ifiyo inyi itahutaniere etamijani on ottu’to t’edou. ²Itarraŋ inyi jihosi ojo, Al iddorro oloŋ ette itado edou ijatta tai jo afaŋ adi motye.³Bwo fe ta amotye hanyik al ado edou bwo edisi owoni ijatta tai jo ottu adi ahide ahana. Imijana tai ahode awoyo hiram ono etamijanita huno edou ati ibyaŋata tai imijana etamijanita huno oŋitek huna. ⁴Awahi nelahaji on orroho’to etamijani, ati obeŋi adi itahutani obo jihosi arari etamijani ono Yona. Obusak inyi isi ette leten addi.⁵Ninya lafanyi leyiyanak honyi aŋati hari tole, ogiluni isi jo eguuno isi emunio. ⁶Ojo Yesu jihosi, Ihumata mijo. Heruhoto abula huno Farisei iko huno Saducehyen. ⁷Attati isi ikikyana ta ahwattek hosi ojori, Ikyana inyi ihwania nyo obeŋ emune jihohoi. ⁸Omijak Yesu ana ette ifiyo isi, Nyo ikikyanati tai ta abyaŋan imune? Omuta neruk hatai.⁹Ibyaŋata tai itaniŋuna?Ibyaŋata tai igotyete emunio miet hun aharak ni jyo laati esiha atomwana miet? Omukaja afejin huno ebenyiti munio hun iduhuna tai? ¹⁰Bwo fe emunio hattarik jyo laati esiha atomwana aŋwan, Omukaja afejin huno ebenyiti munio hun iduhuna tai?¹¹Aŋai ibyaŋata tai itaniŋuna jo abeŋ ni ekyana te eram ono emune? Ihumata mijo abula huno Farisei iko Saducehyen. ¹²Tania itaniŋuni isi jo obeŋ inyi ittittoyo isi ta abula huno emune, ati ikyana inyi te ettiyenio ono Farisei iko Saducehyen.¹³Ninya afany Yesu lifau Cesarea Filipi ette inyi ifiyo leyiyanak honyi ojo, Ojori laati ŋai Lonyi tulo? ¹⁴Ette isi itarraŋ, Ojori omuk ara inyi Yoane Batista; bwo omuk ojori, Elija; ojori omuk, Yeremia kuyya bu obo eyani sayyo. ¹⁵Attati inyi ifiyo isi ojo, Ati ijatta tai ta ahwattek hatai ani ŋai? ¹⁶Attati Simone Petro itarraŋ jihonyi ojo, Ira iye Kristo, Lonyi Hollum leswoni.¹⁷Ojo Yesu jihonyi, Simone lonyi Yona ofwonni adi emuniti arryai jihoi nyo obeŋ tulo itahutak ania jihoi, ati Monyoŋ ette dou itahutak iye. ¹⁸Bwo fe ajo ni jihoi, iye Petro bwo ihide amorwo ana aduhok adi ni eklesyal hoŋ bwo fe obeŋ adwaran ono naye agalik inyi.¹⁹Esyo adi ni jihoi amuhottahyen huno olobye ono Hollum bwo fe erre daŋ hun ifit iye ta afau, ifitanie adi bwo fe isi lidou; erre daŋ hun ihohi iye ta afau, ohohinie adi bwo fe idou. ²⁰Tania iramak inyi leyiyanak honyi hotobyaŋahi iramani omuk laati jo ara inyi Kristo.²¹Ta asaa ania itteryo Yesu itahutana leyiyanak honyi jo oŋida inyi alo Yerusalem bwo fe ittigemye adi amarwak iko ehumak eleittaha bwo egyorok inyi. Ojo inyi bwo fe jo, ottohori adi inyi ati ihalu oŋitek hunihoi ibuhu adi inyi. ²²Iyaro Petro inyi addi kai ette ikyana ojo, Hobu, ijara Hollum olwak iye. Helaha erre huna ofwonni jihoi. ²³Oyito Yesu ette ikyana jyo Petro ojo, Ihuto tehalu hoŋ addi Sitan. Ira iye ahetipalani hoŋ nyo ibeŋ iye igigilo egigilita huno Hollum ati igigilo iye egigilita huno laati.²⁴Ojo Yesu jyo leyiyanak honyi ojo, Al awak obo atulo ijifatyo ani ijara inyi hetehai ahwan honyi, hotolororo akruce honyi, hetejifatye ani. ²⁵Al awak obo atulo italahuna nesu honyi italitohi adi inyi, ati lya al isyo’to nesu honyi te eram hoŋ orumak adi inyi. ²⁶Anyo adi ayiji honyi al opocou atulo erre daŋ hutta fau bwo nesu on osyo fur olitohi? Ta anyo itinyyaŋak obo atulo nesu honyi?²⁷Nyo ottu adi Lonyi tulo iko anjelohyen honyi ta akwatan ono Monyonyi. Ta asaa ania oduma adi inyi laati daŋ te ehanita hosi. ²⁸Ahode eramak ni itai jo, itoŋoi omuk dini hul obeŋi adi igonyuni naye many igonyunierek isi Lonyi tulo ol ottu a Hobu hosi.

¹Ihalu oŋitek ille iyaro Yesu Petro, Yakobo, iko Yoane illanyi ihide doŋe. ²Attati inyi lufaji to homomite hosi ette omom honyi pyapyahi ihwa oloŋ bwo fe ette aboŋojin honyi bwaran ihwa ayafa.³Igonyuni isi bwo fe Mose iko Elija hul ikyanai ikonyi. ⁴Ojo Petro jyo Yesu ojo, Hobu oyyu jihohoi iwanari dini. Kuyya iwak iye aduhu adi ni akukuhyen hunihoi; obo jihoi, obo jyo Mose, bwo obo jyo Elija.⁵Ninya hekyana inyi ottu nedis an afaŋ’to ette tihonia isi. Bwo fe nekyana ette ’tuna totwa idis on ojo, “Lonyi hoŋ olo al amuno ni bebe. Itayiryete jihonyi.” ⁶Itaniŋye leyiyanak nekyana ana ette isi ruboho ifau ta abaŋi. ⁷Ottu Yesu ette ’tir isi ette jaran, Odyototi, hebaŋata. ⁸Attati isi fyalatyo ati obeŋi isi igonyuni obo atulo arari Yesu hama.⁹Ninya isuruni isi to doŋe iramak Yesu isi ojo, Heramana obo atulo erre hodwo igonyuna tai many ibuhuniere Lonyi tulo to ye. ¹⁰Ette leyiyanak honyi ifiyo inyi ojori, Aŋai ojori legyorok jo ottu adi Elija ahosyere?¹¹Itarraŋ inyi jihosi ojo, Ottu adi Elija ahode ihuhumaniere erre daŋ. ¹²Ati eramak ni itai jo, Ottu nya Elija, ati obeŋi laati omijani bwo ihanie nya isi jihonyi ihwa awahi isi. Tania onyurak adi bwo fe Lonyi tulo adyaha ihas hosi. ¹³Ette leyiyanak honyi itaniŋuna jo ikyana inyi te eram Yoane Batista.¹⁴Al afanyi isi jyo eluluŋ wati, ottu obo atulo jyo Yesu ette rigoŋi jihonyi ojo, ¹⁵Hobu, omehinie jyo lonyi hoŋ, nyo inef ajok inyi ette ihanana ahwe. Enyyahita arryai okwahatyo inyi ihima bwo fe ihari. ¹⁶Eyaŋuno ni inyi jyo leyiyanak hoi ati obeŋi isi oremehini itaŋida inyi.¹⁷Attati Yesu jaran jihosi ojo, Aii, itai aati hul obeŋi iko neruk bwo fe hul odwari tajya. Many baya adi etoŋo ni ikatai? Many baya adi adik ni itai? Iyaŋunie inyi jihoŋ. ¹⁸Ifuha Yesu ajok ta agolon ette inyi busana eito. Ta asaa ania ette eito ŋidari.¹⁹Ofwonni leyiyanak jyo Yesu al owon inyi hama ette ifiyo ojori, Nyo ebeŋ hohoi eremik ifuhara inyi addi? ²⁰Ette inyi itarraŋ jihosi ojo, Ittallihoto tai ifuhara inyi nyo omuta neruk hatai. Eramak ni itai ahode ahode jo, al owon neruk hatai ihwa aŋeryo bule iremehina adi itai jaran jyo adoŋe ana jo, Ihuto dia, bwo inyi ette hut. Obeŋ adi obo ariŋ agalik itai. ²¹Ati ittallihoto tai ifuhara inyi arari ta amojo iko ta aferunan hama.²²Hadahai isi Galilea ojo Yesu jihosi, Itinyyaŋani adi Lonyi tulo ihas wati. ²³Ottohori adi isi inyi ati ihalu oŋitek hunihoi ibuhu adi inyi, ette leyiyanak honyi ijiriŋa bebe.²⁴Al afanyi isi Kapernaum ofwonni lamojok musuru jyo Petro ette ifiyo ojori, Obeŋ ettiyanani hoi oduma amusuru? ²⁵Itarraŋ Petro ojo, Afe oduma inyi. Lajiŋa inyi ihaji ikyana Yesu jihonyi ojo, Igigilo iye anyo Simone? Omojuni hobwok hutta fau amusuru jyo haŋai? Omojuni isi jyo lonyirok hosi kuyya bu jyo atamonok?²⁶Ojo Petro jihonyi, Omojuni adi jyo atamonok. Ette Yesu jaran jihonyi, Tania obeŋi ati lonyirok odumai. ²⁷Ati ŋadi hohoi etipal isi, ilo ihari eneittok, irrirryahari aham. Iduhu ahami abotye, aŋa etuk honyi, bwo fe inyurak adi iye arobia. Iyaro, odumai amusuru hoi iko hunoŋ.

¹Ta asaa ania ofwonni leyiyanak jyo Yesu ette ifiyo inyi jo, ?Ŋai adi eleittok ilobye Hollum? ²Iloŋu inyi obo eito on odiha ette ititoŋonia inyi ihiji hosi ³ette jaran, Ahode eramak ni itai jo al ibyaŋata tai iloitoti irari ihwa aduri hun odihara’to, ibyaŋata adi itai ifwotuna olobye ono Hollum.⁴Tania lya al itamuta’to ahwan honyi ihwa eito ana ara adi inyi eleittok ilobye Hollum. ⁵Lya al ifwotu’to eito ihwa ana ta afure hoŋ, ifwotu inyi ani luŋa. ⁶Ati lya al itipalyo’to eito an iruk’to jihoŋ, osiru ifitani amorwo on obolo imurut honyi ette bironia inyi ihari.⁷Orroho bebe jyo afau nyo olwaji etipalita. Ofwonni adi etipalita ahode ati orroho bebe jyo atulo al iyaŋuno’to isi. ⁸Kuyya itipala aani hoi kuyya bu eju hoi iye liyyata, oŋutoi isi ette biroro addi. Oyyu jihoi ijiŋaniere lisu al irrohoja kuyya bu al iŋura agalik ibironi iye iko ahas arrihai kuyya ejek arrihai lihima on obeŋ’to odunya.⁹Kuyya itipala onyek hoi iye liyyata, ogolutu inyi ette biroro addi. Oyyu jihoi ijiŋaniere lisu iko onyek abotye agalik ibironi iye ihima iko oŋite arrihai.¹⁰Ihumata ’rirrya ŋadi itai imyanati eito on odiha’to ihwa ana nyo eramak ni itai jo igonyuni anjelohyen hosi omom Monyoŋ ette dou. ¹¹Nyo ottu Lonyi tulo italahuniere hul olitohini’to.¹²Igigiloti tai anyo? Kuyya owon atulo iko akyoro esiha abotye ati olito abotye, obeŋ adi inyi idyaharo atomwana hottoŋwan hohottoŋwan idoŋe ette leten ’tittifyaru aker ol olito’to? ¹³Ahode eramak ni itai jo, al onyurak inyi omuno adi inyi aker lya agalik akyoro huno atomwana hottoŋwan hohottoŋwan hun obeŋi’to olitohini. ¹⁴Tania obeŋ Monyatai ette dou awak obo eito on odiha’to oye.¹⁵Kuyya iyyau illa hoi jihoi ilo itahutak eyyau honyi jihonyi hama. Kuyya iruk inyi ekyanita hoi, irrehu iye inyi. ¹⁶Al obeŋ inyi itayiru nekyana hoi iloŋo etamijanani abotye kuyya bu arrihai itabisaniere eram hatai ania.¹⁷Kuyya iha inyi isi, iramak eklesya. Kuyya iha inyi itaniŋuna eklesya ijara inyi hetetoŋoi ihwa apagano jihatai kuyya bu ihwa lamojoni musuru.¹⁸Eramak ni itai ahode, erre daŋ hun ifitana tai ta afau, ifitanie adi bwo fe isi idou. Erre daŋ hun ihohina tai ta afau, ohohinie adi bwo fe idou. ¹⁹Enyyak ni iramana itai ahode jo, al omojoi laati arrihai arabotye to obo ariŋ an awahi isi isyo adi Monyoŋ ette dou ariŋ nya jihosi. ²⁰Nyo al ottubanie laati arrihai kuyya bu hunihoi ta afure hoŋ awon ni ihiji hosi.²¹Ottu Petro ifiyere inyi ojo, Hobu, oŋida ani amehitta jyo illaŋ enyyahita omukaja al iyyauta inyi jihoŋ? Kuyya bu enyyahita hattarik? ²²Ojo Yesu jihonyi jo, Ajo ni jihoi, obeŋ ara enyyahita hattarik hama, ati atomwana hattarik hahattarik.²³Ara olobye ette dou ihwa hobu obo al awak’to itabisana ahorosi huno apiti honyi. ²⁴Ahosyere iyaŋunie jihonyi atulo ol ohuru nya arobia alif arrihai. ²⁵Ati obeŋi agurusi jihonyi idumari tania ifak eleittok itinyyaŋaniere atulo alya iko ŋorwoi honyi bwo aduri honyi iko erre honyi daŋ idumari ahorosi hunia.²⁶Origoŋ apit alya ihosyere leittok ette lolya ojo, Omehinie jihoŋ, aduma adi ni ahorosi daŋ. ²⁷Omehino ataji leittok ette inyi hohina atulo alya attati busana ahorosi honyi.²⁸Attati apit alya leten ette rwaŋanio iko obo al igyamatye’to ikonyi ol ohuru nya jihonyi arobia ’tomon. Inef inyi lya amurut ette jaran, Odumai arobia hoŋ. ²⁹Ette inyi rigoŋi ihosyere honyi ette lolya jihonyi ojo, Omehinie jihoŋ, aduma adi ni.³⁰Ati iha inyi ette itifitana inyi ibabus many odumari adi inyi ahorosi daŋ. ³¹Ijiriŋai bebe apiti hul omuk ninya itaniŋuni isi eram ania, ette isi fwatan iramaniere jyo eleittok.³²Tania iloŋo eleittok apit alya jihonyi ette jaran, Iye apit olorroho bebe. Ninya ilolyari iye jihoŋ abusak nya ni ahorosi hoi daŋ. ³³Obeŋ oyyu jihoi imehiniere jyo obo apit al igyamati’to ikoye ihwa inya amehiniere ni jihoi?'³⁴Iloŋojita eleittok honyi bebe ette isyarana inyi jyo polis ibahyere inyi many odumari adi inyi ahorosi honyi daŋ. ³⁵Ihanio adi Monyoŋ ihwo nya jihatai ababo al ibyaŋata tai ibusana illarak hatai ta atajya hatai ahode''.

¹Ninya atuhok Yesu nekyanita hunia idyaharu inyi Galilea ette leten ifau Yudea ihosyere Yordano. ²Ijifaro eluluŋ wati arryai inyi ette inyi itaŋida eŋwati hosi.³Ofwonni Farisei jihonyi ikemyere inyi ette ifiyo inyi ojori, Oremik atulo pyaharo jyo ŋorwoi honyi te erre asai? ⁴Itarraŋ inyi ojo, Ibyaŋata tai ihenuna jo, “Many t’etteri oyyeu ayyani hirre alle iko aŋotte?”⁵Ojo inyi bwo fe, “Te eram ana obusak adi atulo monyonyi iko honyonyi ette manya iko ŋorwoi honyi, attati isi arrihai ratan ihwa ahwan abotye.” ⁶Ihwania obeŋi isi inyyahi rahan arrihai ati arai isi ihwa ahwan abotye. Hul inosok Hollum arabotye helaha obo itapek.⁷Ifiye isi inyi jo, Nyo ati ojo nya Mose, “Oremik habi isyaraniere awaraga an itamijanak’to apyaha honyi iko ŋorwoi ette pyaha ikonyi?” ⁸Ati ojo inyi jihosi, Iruk nya Mose itai ipyahati iko aŋorwo hatai nyo odwari atajya hatai, ati many t’etteri fau obyaŋara ihwo nya. ⁹Ajo ni jihatai jo, lya al opyahai’to iko ŋorwoi honyi arari te eram ono asomon ette yama obo, oroto inyi roto.¹⁰Ojori leyiyanak honyi jihonyi jo, Kuyya ara ihwania jyo alle iko ŋorwoi honyi, oyyu kuyya obeŋi laati ayamai. ¹¹Ojo inyi jihosi ojo, Ittallihi laati daŋ ifwotuna nekyanita hunia arari hya hul onyimuni. ¹²Nyo owoni laati hul ittallihi’to yama ta ahwattek hosi, owoni bwo fe laati hul ittallihi’to yama te ehanita wati, owoni bwo fe laati hul ihari ayama te eram lobye ono Hollum. Ijara lya ol oremik’to itayiruna hetetayiru.¹³Tania iyaŋunie isi aduri hun odihara’to jihonyi jo oŋida inyi iyyabak ahas honyi jihosi bwo omojo tesi. Awahi leyiyanak itik aduri hwa, ¹⁴ati ojo Yesu jihosi, Obusana aduri ofwonni jihoŋ. Hetihoto isi nyo ara Hollum a Hobu hosi. ¹⁵Iyyabak inyi ahas honyi jihosi ette inyi idyaharu amaji ania.¹⁶Ottu obo jihonyi ette jaran, Hettiyanani, ehanio adi ni aŋai inyuraniere nesu on osyo fur? ¹⁷Ojo Yesu jihonyi, Nyo ifiyo iye ani itahutaniere erre hun oyiji’to? Owon abotye ol oyyu. Al iwak iye nyurana nesu, ifahai efahita.¹⁸Itarraŋ inyi jihonyi ojo, Anani efahi? Ojo Yesu jihonyi jojo, “Hettoho, hehanio erre somon, hehoholyo, henyobyo, ¹⁹itahabuye monyohoi iko honyohoi, bwo fe omunoi hutto lonyihari hoi ihwa ahwan hoi.”²⁰Itarraŋ atulo alya jihonyi ojo, Efaha ni hunia daŋ, anyo an ebuha’to?'' ²¹Attati Yesu jaran jihonyi, Al iwak iye abisan ihosyere Hollum, ilo itinyyaŋak asaŋ hoi, isyarak agurusi jyo alocaŋak bwo owoni adi ebariti hoi idou. Bwo ihalu, waŋ, ijifatye ani. ²²Itaniŋu atulo alya nekyanita hunia ette inyi leten addi al ijiriŋa bebe nyo olwaji ebariti honyi.²³Ojo Yesu jyo leyiyanak honyi, Ahode eramak ni itai, ogol adi jyo abarani ijiŋaniere ilobye ono Hollum. ²⁴Enyyak ni iramana itai jo, ogol bebe jyo abarani ijiŋaniere ilobye Hollum agalik ajiŋana konnikonni ittulit libira.²⁵Illillihai leyiyanak honyi bebe al itaniŋuni isi nekyanita hunia ette jaran, ŋai ’tadi al italahuni? ²⁶Omijo Yesu jihosi ette jaran, Obeŋi laati oremehini italahuna ahwattek hosi ta ahwattek hosi, ati oremik Hollum ihanio erre daŋ. ²⁷Itarraŋ Petro jihonyi ojo, Imijye, ebusak hohoi erre hohoi daŋ ette jifatyo iye, ?enyurak adi hohoi anyo?²⁸Ojo Yesu jihosi, Ahode eramak ni itai jo, ta afau aŋejuk itoŋo adi Lonyi tulo ikurus ono akwatan honyi. Itai hul ijifatyete’to ani itoŋoti adi bwo fe itai jyo akurusi ’tomon harrihai iŋocere awoi ’tomon harrihai huno Israele.²⁹Bwo fe lya al obusak’to asik honyi kuyya illarak honyi, haniarak honyi, monyonyi, honyonyi, ŋorwoi honyi, aduri honyi, kuyya bu afau hosi ta afure hoŋ ifwotu adi inyi erre hun olwaji agalihini huna, bwo fe orumak adi inyi nesu on osyo fur. ³⁰Ati laati arryai huttohosyere ofwonni adi ehalu bwo huttehalu ofwoi adi ahosyere.

¹Ara olobye ono Hollum ihwa lamonye haŋ al iwwanyu ta amotye hanyik beryen iloŋori egyamak igyamari imana honyi. ²Ocorok inyi arobia abotye jihosi ababo te egyama ono oloŋ obotye, ette inyi ifahina isi igyamari.³Ta asaa hottoŋwan addaddaharo inyi ette igonyuna omuk laati hul itoŋoi isuk asai. ⁴Ojo inyi jihosi, Itai bwo fe, ifwatta imana hoŋ igyamari bwo aduma adi ni itai on oyyu. Ette isi fwatan.⁵Ta afanni iko ta asaa hunihoi olo inyi ihaniere ihwo nya. ⁶Ta asaa miet olo inyi bwo fe nyurana omuk owotyai asai. Ojo inyi johosi, Nyo itoŋoti tai dini ta afanni daŋ asai? ⁷Itarraŋi isi ojori, Obeŋ tulo iloŋo hohoi igyamari. Ette inyi jaran jihosi, Ifwatta igyamati imana hoŋ.⁸Ta akikai ojo lamonye mana jyo etigyamani ojo, Iloŋu legyamak bwo odumai isi arobia hosi bwo fe itterye jyo huttehalu many jyo huttohosyere. ⁹Ifwotuni hya hul itterye egyama ta asaa miet arobia ababo. ¹⁰Al ofwonni hul igyamai’to ta amotye igigiloi isi jo efwotu adi isi arobia hun agalihini hodwo ifwotuni hya. Ati ifwotuni isi bwo fe arobia ababo.¹¹Al ifwotuni isi arobia omyanai isi lamonye haŋ, ¹²ette jaran jihonyi, Igyamai dwo hya hul ofwonni’to ehalu ta asaa abotye hama, ati itarrijohi iye isi ikohoi hul egyama ta afanni daŋ iholoŋ on onok’to.¹³Itarraŋ inyi jyo obo olosi ojo, Illa, abeŋ ni ehanio on orroho jihoi. Ibeŋ dwo so ho iye iruk igyamari ta arobia abotye? ¹⁴Iyaro onohoi bwo ilo. Awak ni isyo jyo huttehalu ihwa esyo ni jihoi.¹⁵Abeŋ so ni aremik ihanio erre hoŋ ihwa awak ni? Ihain iye nyo ayyu ni? ¹⁶Tania huttehalu ofwoi adi ahosyere, bwo fe huttohosyere ofwonni adi ihalu.¹⁷To obo oloŋ hofwoi isi Yerusalem, ette Yesu wotya iko leyiyanak honyi ’tomon harrihai aŋati ette jaran jihosi ojo, ¹⁸Imijyete, efwo hohoi Yerusalem bwo fe isyarani adi Lonyi tulo jyo ehumak eleittaha iko legyorok bwo fe oŋoti adi isi naye jihonyi. ¹⁹Isyori adi isi inyi jyo paganohyen osuhotyerek inyi ette bahyo inyi ette sihonia inyi, ati ihalu oŋitek hunihoi ibuhu adi inyi.²⁰Ofwonni ŋorwoi Sebedeyo iko lonyirok honyi jyo Yesu ette rigoŋi ette mojo jihonyi. ²¹Ojo Yesu jihonyi, Iwak iye anyo? Attati inyi jaran, Ijara lonyirok hoŋ hulo arrihai itoŋoi lilobye hoi, abotye ihani iŋet hoi bwo obo ihani ihorroŋ hoi.²²Ati itarraŋ Yesu ojo, Ibyaŋata tai imijana anyo ifiyete tai. Iremehina tai mata ta akoso an amatari adi ni? Ojori isi jihonyi, Eremik hohoi. ²³Ojo inyi jihosi, Ahode, imatati adi itai ta akos an amatari ni ati abeŋ ni aremik isyo jihatai itoŋori oŋyatai hoŋ iko arraŋai hoŋ. Ati ihuhumak Hollum amaji ania to hya hul onyimu inyi. ²⁴Ninya itaniŋuni leyiyanak honyi hulo ’tomon eram ana, ette isi iloŋojita jyo lonyirok Sebedeyo hulya.²⁵Tania ette Yesu iloŋuna isi jihonyi ette jaran, Imijana tai jo ilettohorik hobwok hulo paganohyen aati hosi, bwo fe eleittaha hosi ittigemye isi. ²⁶Obeŋ ara ihwo nya jihatai. Al awak obo alatai ’tuna ratan eleittok, ijara hetera do ehegyamani hatai; ²⁷bwo fe al awak’to ratan ahobu hatai, ijara hetera do apit hatai. ²⁸Ihwa ottu Lonyi tulo, obeŋ inyi ottu jyo oŋida laati igyamai jihonyi ati ottu inyi igyamari jyo aati bwo fe isyo inyi nesu honyi idumari ta aati arryai.²⁹Idyaharai isi amiji Yeriko attati eluluŋ wati arryai ijifaro inyi. ³⁰Itaniŋuni aŋodok arrihai hul itoŋoi iger ikoi ojo Yesu ol olo, ette isi illilloŋo ojori, Hobu, Lonyi Davide, omehinie jihohoi. ³¹Itadwaye laati isi ette iramana isi hotodwahi ati arasai isi illilloŋo bebe ojori, Hobu, Lonyi Davide, omehinie jihohoi.³²Owotya Yesu ette iloŋuna isi jihonyi ette jaran, Iwahata tai ani ehanio anyo jihatai? ³³Itarraŋi isi jihonyi jo, Hobu, itaŋidara oŋite hohoi. ³⁴Omehino Yesu ette ’tir oŋite hosi. Teyya teyya omijye isi ette ijifaro inyi.

¹Lafanyi isi imiji Betfaji ilyaha Yerusalem idoŋe Oliveto, ifak Yesu leyiyanak honyi arrihai, ²ette jaran jihosi, Ojiŋana limiji on owon’to ihosyere hatai, inyurana adi itai nobo asigirya an ifitani iko ŋarri honyi. Ohouniete isi, iyaŋuniete isi jihoŋ. ³Al ifiyo obo itai omuk erre, oŋida itarraŋata jihonyi ojo, Awak Hobu isi, attadi inyi busana isi ofwonni.⁴Ihanie erre hunia ihwo nya itasiruniere nekyana ono eyani sayyo on ojo, ⁵“Iramak ŋarri Sion ojo,Imijye ottu Hobu hoi jihoi Al anyalam al itoŋo ihorwoŋ ŋarri sigirya.”⁶Attati leyiyanak fwatan ihaniere ihwa ifak Yesu jihosi. ⁷Attati isi iyaŋuno asigirya iko ŋarri ette fyatana aboŋojin hosi ihorwoŋ sigirya ette Yesu itoŋo dia. ⁸Ofyatani eluluŋ wati arryai aboŋojin hosi ikoi bwo fe omuk oyefuni atanata yanio ette fyatana isi ikoi.⁹Eluluŋ wati huttehosyere iko huttehalu idolo afure on ojo, Ijara etahabuyo hatawana jyo lonyi Davide. Hotomunoi lya ol ottu’to ta afure ono Hobu. Ijara etahabuyo hatawana idou. ¹⁰Lajiŋak inyi Yerusalem illillihai aati daŋ ette jaran, ngai alya? ¹¹Ojori eluluŋ wati jo, Yesu alya, eyani sayyo olo Nasaret otto Galilea.''¹²Ojiŋak Yesu ihaji imojit eneittok ette fuhara laati daŋ hul itinyyaŋai’to iko hul inyyaŋai’to asaŋ ihaji ania. Ette inyi sulara ateremejahyen huno eloitok gurusi, kwalalaŋ, iko akurusi huno etinyyaŋak wolosin. ¹³Ojo inyi jihosi, Igyoroni jo, “Iloŋoi adi aji hoŋ ahaji imojit, ati iloitoto tai inyi ahinom hahalak.” ¹⁴Ofwonni aŋodok iko aŋurak jihonyi ihaji imojit eneittok ette inyi itaŋida isi daŋ.¹⁵Iloŋojitai ehumak eleittaha iko legyorok al igonyuni isi erre hun obolori’to hun ihanio inyi iko aduri hun idoloi ihaji imojit eneittok ojori, Ijara etahabuyo hatawana jyo Lonyi Davide. ¹⁶Ette isi jaran jihonyi, Itaniŋu iye erre hun ikyanai isi? Itarraŋ Yesu jihosi ojo, Afe. Ibyaŋata so itai iheniete jo, “To hutuhe oŋyai iko hun hadasai’to inyurak iye etahabuyo on oyyu’to?” ¹⁷Obusaro inyi isi ette leten imiji Betania ijotori.¹⁸Ta amotye hanyik acaharo Yesu imiji Yerusalem ette inyi niama. ¹⁹Igonyu inyi aŋaboli iger ikoi ati afany inyi iwoyo honyi ette nyurana abene ijai. Ojo inyi jyo ayyani, Hotobyaŋahi omuk aŋer oŋijuni jihoi tulaŋ. Teyya teyya inor ayyani kokwak.²⁰Al igonyuni leyiyanak ayyani ania illillihai isi ette jaran, Aŋai inor inyi kokwak? ²¹Itarraŋ Yesu jihosi ojo, Eramak ni itai ahode jo kuyya owon neruk jihatai on obeŋ iko ekuyya, iremehina tai ihanio ihwa ehanio ni jyo ayyani ania. Ati obyaŋara ania ijai. Dwadi ikyanati tai jyo adoŋe ana ojo, Odyotoi bwo fe irwoŋok ahwan hoi ihari, oniŋyo adi inyi. ²²Nyo erre daŋ hun ifiyete tai ta amojo bwo fe ta neruk, ifwotuna adi itai.²³Ojinak nya Yesu ihaji imojit eneittok bwo ofwonni ehumak eleittaha iko amarwak jihonyi ette ifiyo, Ta anani elaballok ihanio iye erre huna? Ngai isyo jihoi elaballok ania? ²⁴Itarraŋ Yesu jihosi ojo, Efiyo ni itai obo nefi. Al itarraŋata tai jyo onoŋ, eramak adi ni itai bwo fe ta anani elaballok en ehaniere ni erre huna.²⁵Ottu elaballok ono Yoane an ibatisyere inyi laati tai? Ottu inyi jyo Hollum kuyya jyo aati? Attati isi itarisa ta ahwattek hosi ojori, Kuyya ejo hohoi ottu elaballok honyi jyo Hollum, ojo adi inyi, Nyo ibyaŋata tai iruhoto inyi? ²⁶Kuyya ejo hohoi ottu elaballok honyi jyo aati, ebaŋ hohoi eluluŋ wati, nyo iruhi isi daŋ jyo ara Yoane aheyani sayyo. ²⁷Tania itarraŋi isi jyo Yesu jo, Ebeŋ hohoi emijak. Ojo ati inyi jihosi, Ani bwo fe, abeŋ ni eramak itai ta anani elaballok en ehanio ni erre huna.Narryamara ono Lonyirok Arrihai²⁸Igigiloti tai anyo te eram ana? Owon nya obo atulo iko lonyirok arrihai. To obo oloŋ ette inyi jaran jyo oloŋeu ojo, Lonyi hoŋ ilo ahana igyamai imana hoŋ. ²⁹Itarraŋ inyi ojo, Eha ni. Ati ihalu iloit inyi ataji honyi ette leten imana. ³⁰Ette monye ikyana jyo lonyi honyi etarrihi ihwo nya. Ette inyi itarraŋ ojo, Oyyu, alo adi ni, ati obeŋ bu inyi olo.³¹Alali hito t’ehiji hosi ihanio awahan ono monyonyi? Itarraŋi isi jihonyi jo, Oloŋeu. Ojo Yesu jihosi, Eramak ni itai ahode, ojiŋani adi lamojok musuru iko asomok ilobye Hollum ahosyere hatai. ³²Nyo ottu nya Yoane jihatai el ejifatyo’to efahita huno Hollum ati ibyaŋata nya itai iruhoto jihonyi. Bwo iruhi nya lamojok musuru iko asomok ettiyenita honyi. Dwadi igonyuna tai erre huna ibyaŋata tai iloitoto atajya hatai iruhori jihonyi.³³Itaniŋuna obo narryamara ana. Idulak nya obo atulo ajalaŋi imana honyi attati ikolonia amariŋ, ette bohyo ewure imocere aari haŋer ajalaŋi, attati bwahina olobele dia. Iloŋo inyi omuk laati icyari imana honyi ette inyi leten jyo obo afau. ³⁴Ottu ayafa on odyarak aati aŋer ajalaŋi ette lamonye mana ifahina apiti jyo ecyak mana imojuniere aŋer.³⁵Inefi ecyak mana apiti. Abahye isi abotye, ottohori isi obo, bwo fe irwoŋi isi obo ta amorwoi. ³⁶Inyyak inyi ifahina apiti hul olwaji agalihini hyodwo, ati ihanie isi ihwo nya jihosi. ³⁷Ihalu ifak inyi lonyi honyi jihosi nyo igigilo inyi jo abaŋi adi isi lonyi hoŋ.³⁸Ati ninya igonyuni ecyak mana lonyi honyi ojori isi ta ahwattek hosi jo, Arutani alya. Ifwanna, hattohoro inyi oŋida hohoi erutak erre honyi. ³⁹Inefi isi inyi ette pihoro inyi addi to mana ette ’tohoro.⁴⁰Tania al ottu lamonye mana, ihanio adi inyi anyo jyo ecyak hulya? ⁴¹Ojori isi jihonyi, Ottoho adi inyi laati hulya hul orrohoji’to ta naye on orroho’to, ette isyarana amana jyo lecyak omuk hul isyori adi jihonyi aŋer ajalaŋi ladori isi.⁴²Ojo Yesu jihosi, Ibyaŋata tai iheniete egyerita? Igyoroni nya jo, “Amorwop inya ihari aduhok Ottu ratan moi etteri lohitir; Ara ana ariŋ an ihanio Hobu An ellilliha hohoi bebe.”⁴³Tania eramak ni itai jo, Ohoruni adi olobye Hollum jihatai addi ette isyarana jyo laati hul oŋijuni aŋer honyi. ⁴⁴Lya al okwaharo’to jyo amorwo ania, owuro adi inyi; ati al isyak amorwo ania atulo, attad adi ahwan honyi.⁴⁵Al itaniŋuni ehumak eleittaha iko Farisei narryamarita huno Yesu, ette isi mijana jo ikyana Yesu tesi. ⁴⁶Ati al awahi isi inefuna inyi abaŋi isi eluluŋ wati hul iruhi’to jo ara inyi aheyani sayyo.

¹Inyyak Yesu ikyana jihosi ta narryamarita. ²Ara olobye Hollum ihwa hobu al ihuhumak alomone to lonyi honyi. ³Ifak inyi apiti honyi iloŋuniere laati hunya onyimuni jyo alomone ania ati ihari isi.⁴Inyyak inyi ifahina apiti omuk ette jaran, Iramana aati hyodwo anyimu ni jojo, Imijyete, ehuhumak ni aŋiyo, esyak ni eteŋ iko atawwa hul ofiri’to bwo fe aŋidari erre daŋ. Ifwanna jyo alomone.⁵Ati osuhotyerek isi ette fwatan imasik hosi, olo obo imana honyi bwo obo olo igyama honyi. ⁶Attati omuk inefuna apiti honyi ette ihanio on orroho jihosi ette ’tohoro isi. ⁷Al itaniŋu hobu erre huna iloŋojita inyi bebe. Ifak inyi oseŋer honyi ette ’tohoro lattok hulya ette swahina amiji hosi.⁸Attati inyi jaran jyo apiti honyi ojo, Ehuhumak ni alomone ati orrohoji laati hunya eloŋu ni. ⁹Ifwatta ikoi otto homom miji bwo fe iloŋuniete laati daŋ hul inyurana tai jyo alomone. ¹⁰Attati apiti fwatan ikota iloŋuniere laati daŋ hul onyurani isi; laati hul orrohoji iko hul oyiji’to, ette aji ifut ta atamonok lor lor.¹¹Ojiŋak hobu imijyere atamonok hulya ette igonyuna obo atulo ol obeŋ iyyafak aboŋo ono alomone. ¹²Ojo inyi jihonyi, Illa, aŋai ijiŋak iye dini al ibeŋ iyyafak aboŋo ono alomone? Ati ittallik lya itarraŋ.¹³Tania ojo Hobu jyo apiti jo, Ifitata ahas iko ejek honyi bwo ibironia inyi ilet imaji ono edumele. Owon adi ayyo iko aŋutta hala dia. ¹⁴Nyo iloŋuni laati arryai ati omutari hul onyimuni.¹⁵Attati Farisei fwatan iwwahari aŋai adi inefuni isi Yesu ta nekyanita honyi. ¹⁶Ojo teyya ette isi ifahina leyiyanak hosi arabotye iko Erodiahyen jihonyi ette jaran, Hettiyanani, emijak hohoi jo owon nelahode jihoi bwo fe iye ittiyenio ekoi ono Hollum ahode. Ibeŋ iye ibaŋ obo atulo bwo ibeŋ igigya laati. ¹⁷Iramak ati hohoi, Igigilo iye anyo? Oyyu idumari amusuru jyo hobu Cesare kuyya obeŋ?¹⁸Ati omijak Yesu enyobita hosi ette jaran, Jai, henyabak, ikemyete tai ani nyo? ¹⁹Itahutana jihoŋ arobia, ette isi itahutana arobia jihonyi.²⁰Ojo inyi jihosi, Anaŋai arrijori ana bwo fe anaŋai afure ana? ²¹Ojori isi, Huno Cesare. Tania itarraŋ inyi ojo, Isyatta jyo Cesare erre Cesare bwo fe jyo Hollum erre huno Hollum. ²²Al itaniŋuni isi nekyanita hunia illillihai isi bebe ette busana inyi ette fwatan addi.²³Iholoŋ ania ofwonni Saducehyen jihonyi hul ojori jo obeŋ nebuhuna bwo ifiye isi inyi ojo, ²⁴Hettiyanani, ojo Mose jo, “Kuyya oye atulo hobeŋi aduri jihonyi, oŋida illanyi ojuŋori ŋorwoi honyi isiuniere aduri te illanyi.”²⁵Owoni nya illarak hattarik. Oyemu oloŋeu aŋotte ette ye hobeŋi duri, ette illanyi juŋori ŋorwoi honyi. ²⁶Ihanie etarrihi iko etahunihi ihwo nya many isi daŋ hattarik. ²⁷Ihalu aye aŋotte bwo fe. ²⁸Iholoŋ ono ebuhuna ottu adi inyi itoŋo ŋorwoi ŋai? Nyo isi daŋ hattarik ojuŋorik inyi.²⁹Itarraŋ Yesu jihosi ojo, Ipalata tai nyo ibyaŋata tai imijana egyerita kuyya bu nadwaran ono Hollum. ³⁰Iholoŋ ono ebuhuna obeŋi laati ayamai bwo fe obeŋi aŋatani iyamari, ati arai isi ihwa anjelohyen hutte dou.³¹Ati te eram ono nebuhuna ono layak, ibyaŋata tai iheniete nerre hunya ikyana Hollum jihatai? Ojo inyi, ³²“Ani Hollum olo Abramo, Hollum olo Isako, bwo fe Hollum olo Yakobo.” Obyaŋara inyi Hollum olo layak ati ara inyi olo leswok. ³³Itaniŋuni eluluŋ wati erre huna ette isi illilliha bebe ta nettiyenita honyi.³⁴Ottubanie Farisei arabotye al itaniŋuni isi jo itadwa inyi Saducehyen. ³⁵Obo olosi al ara’to ahaŋotoni hirre awak kemyo inyi ette ifiyo inyi ojo, ³⁶Hettiyanani, anani efahi on obolo’to jyo efahita daŋ?³⁷Ojo inyi jihonyi, “Oŋida itai imunoti Hollum Hobu hatai ta atajya hatai daŋ iko to oloyirihyen hatai daŋ bwo fe te egigilita hatai daŋ.” ³⁸Ara ana efahi on obolo’to agalik daŋ.³⁹Ara etarrihi ihwa inyi. “Oŋida itai imunoti hutto lonyihari hatai ihwa ahwattek hatai.” ⁴⁰Arai efahita huna arrihai awoyo hiram ono efahita daŋ iko egyerita huno eyak sayyo.⁴¹Ottubanie Farisei arabotye bwo Yesu ette ifiyo isi ojo, ⁴²Igigiloti tai anyo to Kristo? Inyi lonyi ŋai? Itarraŋi isi jo, Inyi lonyi Davide.⁴³Ojo ati inyi jihosi, Kuyya inyi lonyi Davide, nyo ati iloŋo Davide inyi jo Hobu? Nyo ifut inyi iko Oloyiri ol Olibo bwo ojo inyi, ⁴⁴“Ojo Hobu Hollum jyo Hobu hoŋ, Itoŋoi oŋyatai hoŋ Many ehananiere ni amyorok hoi ebalori hejek hoi.”⁴⁵Kuyya iloŋo Davide inyi jo Hobu, aŋai ara inyi o lonyi honyi? ⁴⁶Obeŋ obo oremik itarraŋ Yesu to obo nekyana ’tuŋ, bwo fe to oloŋ ania abaŋi isi daŋ ifiyere inyi omuk erre.

¹Attati Yesu ikyana jyo eluluŋ wati iko jyo leyiyanak honyi ojo, ²Orutani legyorok iko Farisei imaji Mose. ³Tania ihaniete erre daŋ hun iramani isi jihatai ihaniere, ati hejifatyete ehanita hosi nyo ittiyenie isi, ati obeŋi isi ihanie.⁴Ifitani isi erre hun odiŋi’to, ette italoronia ilohoho wati ati obeŋi isi akafuni obo ariŋ dwadi ta aani abotye. ⁵Ihanie isi egyamita hosi daŋ jo oŋida laati igonyuni. Itabolori isi egyerita hun iyyafanir isi bwo fe italati isi esidita boŋojin hosi.⁶Omunoi isi itoŋori imasik huno etahabuyo ta akarama hosi bwo fe omunoi isi itoŋori ihosyere wati ihasik imojiti hosi. ⁷Bwo fe omunoi isi efonya wati hutto suk bwo fe eloŋo wati isi ahettiyanak.⁸Ati itai, heruhoto eloŋo wati itai ahettiyanak nyo iwanata tai iko ettiyanani abotye bwo fe irata tai illarak. ⁹Heloŋoti obo atulo amonye jyo afau ana, nyo iwanata tai iko Monye abotye ette dou. ¹⁰Bwo fe heruhoto al iloŋoi laati itai eleittaha nyo iwanata tai iko eleittok abotye inyi Kristo.¹¹Ijara eleittok hatai hetera ahegyamani hatai. ¹²Lya al itabolo’to ahwan honyi itamutari adi, bwo fe lya al itamuta’to ahwan honyi itabolori adi.¹³Orroho bebe jihatai legyorok iko Farisei, itai lenyabak, nyo ihyanana tai ekat lobye Hollum jyo aati. Ibyaŋata tai ijiŋana ta ahwattek hatai bwo itihoto tai hya hul awahi’to jiŋana. ¹⁴Orroho bebe jihatai legyorok iko Farisei, itai lenyabak, nyo ihorotyete tai asik ihidahi bwo dwadi ihaniete tai on orroho ihwa ana imojoti tai emojiti hun obolori’to ihosyere wati. Te eram ana inyurana adi itai aŋoco on orroho’to agalik. ¹⁵Orroho bebe jihatai legyorok iko Farisei, itai lenyabak, nyo illaŋata tai arryak idahari ifauhyen daŋ ituruhyere dwadi atulo abotye te ettiyenita hatai. Ati al iruk obo ettiyenita hatai itarrohojata tai inyi agalik itai; itai laati hul osiru eema on osyo fur.¹⁶Orroho jihatai arihok hul iŋodoti’to nyo ijatta tai, Al ittuŋo atulo ta aji imojit eneittok ara inyi ettuŋo asai, ati kuyya ittuŋo atulo ta nayyel ono aji imojit eneittok ara inyi ettuŋo ahode. ¹⁷Itai abuyaŋak hul iŋodoti’to. Anani on odwa’to agalik, nayyel kuyya bu aji imojit eneittok an itajak’to nayyel?¹⁸Ijatta tai bwo fe, Lya al ittuŋo’to te etityek ara ettuŋo honyi asai ati kuyya ittuŋo inyi te ehuma on owon ihide itityek ara inyi ettuŋo ahode. ¹⁹Itai aŋodok. Anani on odwa’to agalik, ehuma kuyya bu etityek an itajak’to ehuma?²⁰Lya al ittuŋo’to te etityek, ittuŋo inyi tenyi iko te erre daŋ hun owoni ihide honyi. ²¹Bwo fe lya al ittuŋo’to ta aji imojit eneittok, ittuŋo inyi tenyi bwo fe to lya al amanya’to itwa honyi. ²²Bwo fe lya al ittuŋo’to te edou, ittuŋo bu inyi ta akurus Hollum bwo to lya al itoŋo’to dia.²³Orroho bebe jihatai legyorok iko Farisei, itai lenyabak, nyo isyatta tai aŋati etattomoni ono ema hatai iko aful bwo anyim, ati itapwahata tai erre hun obolori’to huno efahita; isi huna, aŋoco on obis bwo amehino iko neruk. Oŋida ihaniete erre huna daŋ iko hodwo. ²⁴Itai arihok hul iŋodoti’to. Imituna tai ajaŋati ati idiloro tai akonnikonni.²⁵Orroho bebe jihatai legyorok iko Farisei, itai lenyabak, nyo italiboryete tai orwoŋ kos iko asahan ati ifuti atwajin hosi iko adaya bwo fe ahorotyo. ²⁶Iye olo Farisei al iŋodo’to. Ahosyere italiboro atwa kos iko atwa sahan bwo fe olibori adi orwoŋite hosi.²⁷Orroho bebe jihatai legyorok iko Farisei, itai lenyabak, nyo irata tai ihwa atobwaha hatai hun iyalani te eyali. Ilamani isi to let ati ifuti atwajin hosi iko ahoi hayak bwo omuyahi daŋ. ²⁸Bwo fe ihomomite wati irata tai ihwa laati hul oniŋye’to Hollum ati ifuti atwajin hatai iko enyobita bwo emesiti.²⁹Orroho bebe jihatai legyorok iko Farisei, itai lenyabak, nyo ihuhumana tai elumyo huno eyak sayyo bwo fe iduhonia tai akukuhyen huno ahoi yijok. ³⁰Bwo fe ijatta tai, Kuyya emanya nya hohoi beryen iko hohonyok hohoi, ebeŋ nya hohoi eruk ehanita hosi ninya ottohorik isi eyak sayyo. ³¹Ati itahutana tai ta ahwattek hatai jo irata tai lonyirok hulo lattok eyak sayyo.³²Tania otuhonie erre hunya ihanie hohonyok hatai. ³³Irata tai ihwa amunok, ihwa epakidaŋi; aŋai adi irisata tai ebironio ihima?³⁴Tania efak ni jihatai eyak sayyo bwo alofyorojok iko legyorok. Ittohoro adi itai isi bwo isihonia adi itai omuk. Ibahyete adi itai laati omuk ihasik imojiti hatai, ittata tai ittigemyo isi imisihi daŋ. ³⁵Tania oŋoti adi jihatai naye ono aati hulo daŋ hul oyiji’to. Isi laati to ye ono Abele ayijoni many jyo naye ono Sakaria lonyi Barakia, linya ittohoro tai tehiji itityek iko aji imojit eneittok. ³⁶Eramak ni itai ahode jo ofwonni adi erre huna daŋ jyo elahaji ana.³⁷Yerusalem, Yerusalem, iye amiji an ittohyo’to leyak sayyo bwo fe irwoŋyo hul ifak Hollum jihoi. Ahode ahode awak ni ’tubana aduri hoi jihoŋ enyyahita arryai ihwa on ottubaniere ahohoro akiyehi honyi itwa hiwa honyi, ati iha iye. ³⁸Imijye, idehi Hollum aji hoi jihoi ahania. ³⁹Nyo eramak ni iye jo, ibeŋ adi iye inyyak igonyuna ani many iholoŋ an ijo iye jo, “Hotohwo lya ol ottu’to ta afure ono Hobu.”

¹Obusak Yesu aji imojit eneittok ette leten. Attati leyiyanak honyi fwanna jihonyi ifiyere inyi ta asik hutto ŋati haji imojit eneittok. ²Itarraŋ inyi jihosi ojo, Igonyuna so itai erre huna daŋ? Eramak ni itai ahode jo, obeŋ adi obo amorwo arasa ihorwoŋ obo nyo itatturi adi isi daŋ.³To obo oloŋ hetoŋo inyi idoŋe Oliveto ofwonni leyiyanak honyi jihonyi hama ette ifiyo inyi jo, Iramak hohoi baya adi ihanie erre huna? Bwo fe anyo adi etamijani an itahutak’to hohoi attuna hoi iko esidi ono afau ana? ⁴Itarraŋ Yesu jihosi ojo, Ihumata irrirrya, helaha obo atulo itisyaba itai. ⁵Nyo ofwonni adi enyabak arryai ta afure hoŋ hul ojori jo, Ani alya Kristo, bwo itisyabari adi isi laati arryai.⁶Itaniŋuna adi itai jo owon narrem bwo fe ikyanai laati jo erem adi hohoi, ati helafuhoti. Oŋida erre huna daŋ ofwonni ati hobeŋ esidi fau. ⁷Nyo ofwoi adi laati hutto miji obo jyo obo irryomoniere bwo fe ofwoi adi laati hutto lobye obo jyo obo. Owon adi ahure iko ekikiro fau imasik arryai. ⁸Arai erre huna daŋ etteri ono ettigemita hun obolori.⁹Isyori adi isi itai jyo ettigemita bwo fe ottohori adi isi itai. Oliwarik adi laati daŋ itai nyo iruhoto tai afure hoŋ. ¹⁰To oŋitek huna ipali adi laati arryai to hiruk addi, bwo isyori adi isi illarak hosi ittohori bwo fe oliwarik adi isi illarak hosi. ¹¹Odyotoi adi ebwanak arryai hul inyobye’to ette itisyabara laati arryai.¹²Bwo omumutararo adi namuno wati hun olwaji’to nyo obobolororoi adi arrohojita. ¹³Ati lya ol odihu’to many isidi, italahuni adi. ¹⁴Bwo fe ittittoye adi asayyo hun oyiji’to huno olobye ono Hollum many ifauhyen daŋ te etamijani jyo laati daŋ bwo ihalu ottu adi esidi fau.¹⁵“Igonyuna adi itai ‘Arrohoji anna aŋari 'to bebe’ ninyia ikiana Daniel ekianani Hollum. Owotia adi ariŋ ania jio amaji Elibo.” (Ijiara ehianani omijak awoyo hiram ono ekiana ana!) ¹⁶Al igonyuna tai arrohoji an itamura’to amaji on owotya’to jyo amaji on odwa’to, oŋida hul owoni’to Yudea ofuhoi lidoŋyok. Inyi arrohoji ninya ikyanari eyani sayyo Daniele. Ijara lya al ihenio hetetaniŋu. ¹⁷Ijara lya ol owon’to lihide haji hotobyaŋa isuru ifau iduhuniere obo ariŋ ta haji honyi. ¹⁸Bwo fe ijara lya ol owon’to limana hotobyaŋa acaharu iyamari aboŋo honyi.¹⁹Orroho bebe jyo aŋorwo hun oyeduri’to iko hun itadasye’to to noŋitek hwa. ²⁰Omojoti jo oŋida oŋitek hwa obeŋi ofwonni to oŋitek hacoro kuyya bu to sabato. ²¹Nyo to noŋitek hunia owoni adi ettigemita hun obolori hun agalihini ettigemita daŋ t’etteri fau many iko ahana. Ahode obeŋi adi omuk ettigemita agalihini isi. ²²Kuyya obeŋ dwo Hollum ihanak oŋitek hunia hun omutari obeŋ dwo tulo italahuno, ati ihanani adi isi hun omutari nyo to hya hul onyimuni.²³To oŋitek hwa kuyya ojo obo atulo jihatai jo, Imijyete, Kristo olo, kuyya bu, Kristo alya, heruhoto. ²⁴Nyo odyotoi adi Kristohyen lenyabak iko ebwanak lenyabak hul ihanie adi etamijanita hun obolori iko nedwariti ikemyere hul onyimuni itisyabari isi. ²⁵Imijyete, eramak ni itai erre huna hobeŋi isi ofwonni.²⁶Tania kuyya ojori isi jihatai jo, Imijyete, owon inyi limur, hefwatta dia. Kuyya ojori isi, Imijyete, owon inyi lihaji, heruhoto. ²⁷Nyo al imedek ahilai t’ettedwoŋi holoŋ ette faŋan many iddorro holoŋ, ara adi attuna ono Lonyi tulo ihwo nya. ²⁸Ottubanie adi attaruha jyo namaji an awanari ahwan hayani.²⁹Teyya teyya kokwak ihalu ettigemita hunia oye adi oloŋ bwo fe nayafa ette ilak faŋan, ette elelyefi douna t’edou, bwo fe ikikiroi adi negoliti hutte dou.³⁰Attati etamijani ono Lonyi tulo leyo t’edou. Iholoŋ ania inninnaŋye adi laati daŋ hutta fau asuhyara hosi nyo igonyuni isi Lonyi tulo al isuru t’edou lihidi idisi iko nadwaran bwo nakwatan on obolo. ³¹Ifak adi inyi anjelohyen honyi ta aforojo on okwat’to ittuttubaniere lonyimot honyi to fauhyen daŋ.³²Omijana awoyo hiram to ŋaboli. Al ofwonni atanata honyi janan bwo fe oyisuni abene aŋejuho, omijana jo ilyaha atahas. ³³Ihwania bu al igonyuna tai erre huna daŋ idwoŋi, omijana jo ilyaha attuna honyi.³⁴Ahode ahode, ajo ni jihatai jo, obeŋ adi elahaji ana oye many ihanierek erre huna daŋ. ³⁵Obyaŋarani adi nedou iko afau ati nekyanita hoŋ obeŋi adi olitohini ’tuŋ.³⁶Ati to oloŋ ania iko asaa on ottuniere inyi obeŋ obo omijak, dwadi bu anjelohyen hutte dou iko Lonyi Hollum, obeŋ obo omijak arari Monye hama omijak.³⁷Ihwa ninya ihanie laati to noŋitek huno Noa, ihanie adi bwo fe isi ihwo nya ta attuna ono Lonyi tulo. ³⁸Ihwa ninya to noŋitek hwa hobeŋ ebulyo hari ottu, oŋiye isi, amatai isi bwo fe ayamai, many jo oloŋ ninya ojiŋaniere Noa itogol. ³⁹Bwo fe obeŋi bu isi igigiloi omuk erre many ottuniere ebulyo hari iyari isi daŋ addi. Tania ara adi attuna ono Lonyi tulo ihwo nya.⁴⁰Owoni adi alyawa arrihai imana. Iyarai adi abotye bwo idyaharai adi abotye. ⁴¹Iryeye adi aŋorwo arrihai ibak. Iyarai adi abotye bwo idyaharai adi abotye. ⁴²Tania ihumata mijo nyo ibyaŋata tai imijana anani oloŋ on ottuniere adi Hobu hatai.⁴³Ati omijana ana jo, hara dwo omijak monye haji asaa on ottuniere adi olohoho, omijo dwo inyi bwo fe obeŋ inyi obusak aji honyi owur olohoho ta arwe. ⁴⁴Tania ihumata ’ra nyo ilunyu adi Lonyi tulo lunyuna.⁴⁵Imijyete lapit ol oyyu’to bwo fe ilofyoro. Ihanak hobu inyi ihaji honyi isyoryere aŋiyo jyo laati ta asaa ono aŋiyo. ⁴⁶Hotomunoi lapit alya al ottu hobu honyi nyurana inyi ihanio egyama ania. ⁴⁷Ahode ajo ni jihatai jo ihanak adi inyi apit alya eleittok hirre honyi daŋ.⁴⁸Ati kuyya orroho apit alya ette igigilo itaji honyi jo illiŋya hobu honyi, ⁴⁹ette inyi itteryo bahyo apiti hul igyamai’to ikonyi bwo oŋiye ette mata iko arumak, ⁵⁰ilunyu adi hobu olo apit alya lunyuna ta asaa on obeŋ inyi omijak. ⁵¹Abak adi inyi apit bebe ette ŋotonia jihonyi abahyo ono lenyabak. Owon adi ayyo iko aŋutta hala jyo amaji ania.

¹Inyyak fe Yesu ittiyenio ojo, Orrijo adi olobye ono Hollum ihwa nodwo ’tomon hun iyarai allomohyen hosi irraŋuniere layamani. ²Ati ihiji hosi ibuyaŋai omuk miet bwo huno miet ilofyoroji. ³Iyarai nodwo hun ibuyaŋai’to allomohyen hosi ati obeŋi isi iyarai ajas. ⁴Iyarai nodwo hun ilofyoroji’to allomohyen hosi arabotye iko akarajajahyen huno ajas.⁵Illiŋya layamani lya ette nodwo daŋ ibunyita ette jotoro. ⁶Ta arwe ohosohitai laati ette jaran, Ohenyuna, lattu layamani, ifwanna arraŋuniete inyi.⁷Tania odyotoi nodwo daŋ iswahiniere allomohyen hosi. ⁸Ojori nodwo hun ibuyaŋai’to jyo alofyorojok ojori, Elwahata to obo ajas nyo adunyari allomohyen hohoi. ⁹Ati itarraŋi alofyorojok jihosi ojori, Ara hobeŋ ajas oremik tohohoi ikatai. Ifwatta idukan inyyaŋuniere hunatai.¹⁰Hofwoi isi inyyaŋuniere ajas ottu layamani. Attati nodwo miet hun owulori allomohyen hosi jiŋana ikonyi ihaji jyo alomone ette ihyanana ekat. ¹¹Ojo gaa afwonni huna miet hodwo ette jaran, Hobu, hobu, aŋahi hohoi ekat. ¹²Ati itarraŋ inyi jihosi ojo, Ahode abeŋ ni amijak itai ’tuŋ. ¹³Tania ihumata mijo nyo ibyaŋata tai mijana anani oloŋ kuyya anani saa on ottuniere inyi.¹⁴Ara olobye ono Hollum ihwa atulo ol ojo’to edyaharu ahaŋ honyi ette iloŋuna apiti honyi ette isyarana erre honyi daŋ ihas hosi. ¹⁵Isyo inyi agurusi jyo apiti honyi ihwa oremehini isi ifwotuna ette inyi leten. Isyo inyi jyo apit abotye arobia alif ’tomon homiet, bwo jyo obo arobia alif ille, bwo fe jyo obo isyo arobia alif hunihoi. ¹⁶Teyya kokwak olo lya al ifwotu arobia alif ’tomon homiet ipocouniere omuk ’tomon homiet.¹⁷Bwo fe alya al ifwotu arobia alif ille olo ipocouniere omuk alif ille. ¹⁸Ati lya al ifwotu’to arobia alif hunihoi olo ibwahiniere ifau ette nuhana arobia hun isyo hobu jihonyi.¹⁹Ihalu oŋitek arryai ottu hobu olo apiti hya imijyere eram robia. ²⁰Lya al ifwotu nya arobia alif ’tomon homiet ottu inyi iko omuk ’tomon homiet ette jaran, Hobu isyo nya iye arobia alif ’tomon homiet jihoŋ, ati imijye, apocou ni omuk alif ’tomon homiet. ²¹Ojo hobu honyi jihonyi ojo, Ihanio iye on oyyu, iye apit al iyyu’to, al ittunio on oyyu. Ittunio iye on oyyu erre hun omutari tania ehanak adi ni iye eleittok olo erre arryai. Ojiŋak jyo amuno ono hobu hoi.²²Ottu bwo fe lya al ifwotu nya arobia alif ille ette jaran, Hobu isyarak nya iye arobia alif ille jihoŋ, imijye, apocou ni omuk alif ille. ²³Ojo hobu honyi jihonyi ojo, Ihanio iye on oyyu, iye apit al iyyu’to, al ittunio on oyyu. Ittunio iye on oyyu erre hun omutari, tania ehanak adi ni iye eleittok olo erre arryai. Ojiŋak jyo namuno ono Hobu hoi.²⁴Ottu bwo fe lya al ifwotu nya arobia alif hunihoi ette jaran, Hobu amijak ni iye, ira iye atulo al igol. Ideŋu iye iyo amaji an ibeŋ iye iyehi bwo fe isuduhak iye hun ibeŋ iye igilya. ²⁵Tania abaŋ nya ni ette leten nuhana arobia hoi ifau. Hibe, arobia hoi huna.²⁶Itarraŋ hobu honyi jihonyi ojo, Iye, irroho iye bebe bwo fe iboyo. Imijak iye adeŋu ni jyo amaji an abeŋ ni ayehi bwo fe asuduhak ni hun abeŋ ni egilya. ²⁷Tania oŋida dwo iye ittunak arobia hoŋ ihaji on ottunatarik aati arobia, jo oŋida al attu ni anyurak dwo ni arobia hoŋ iko efoniti hosi.²⁸Iyara arobia honyi addi bwo isyatta isi jyo lya ol owon iko arobia alif ’tomon homiet. ²⁹Nyo ofonik ati Hollum erre jyo lya ol owon iko erre, tania owoni adi hun olwaji jihonyi. Ati jyo lya ol obeŋ iko erre iyari adi erre honyi addi dwadi hun omutari hun owoni’to jihonyi. ³⁰Ibiroro apit ol orroho’to olo addi imaji ono edumele on owon’to ilet. Owon adi ayyo iko aŋutta hala dia.³¹Ottu adi Lonyi tulo ta akwatan honyi bwo fe ofwonni anjelohyen daŋ ikonyi attati inyi itoŋo ikurus honyi ono akwatan. ³²Ottubanie adi laati ta awoi hosi daŋ ihosyere honyi, bwo fe igigelu adi inyi isi ihwa igigelu leyyahani akyoro iko edye. ³³Ottubak adi inyi akyoro ihani iŋet honyi bwo fe nedye ihani ihorroŋ honyi.³⁴Ojo adi Hobu jyo hutto hani iŋet honyi jo, Itai hul omuno Monye, ifwanna ojiŋana imaji an ihuhumani tetai many t’etteri fau. ³⁵Nyo aniama nya ni bwo isyatta tai ani aŋiyo. Ebwoto nya ni bwo isyatta tai ani aari. Ara nya ni atamononi ati ifwotuna tai ani. ³⁶Awon nya ni aŋaturoi bwo isyatta tai aboŋojin jihoŋ. Aŋwai nya ni bwo ifwanna tai ilwahyere ani. Awon nya ni ibabus bwo ifwanna tai imijyere ani.³⁷Tania ojori adi aati honyi jihonyi jo, Hobu nya baya egonyu hohoi iye iniama bwo hohoi etaŋiyo iye? Kuyya bu ibwoto iye bwo hohoi esyo iye aari? ³⁸Nya baya egonyu hohoi iye atamononi bwo hohoi efwotu iye? Kuyya bu awanan hoi aŋaturoi bwo hohoi esyo iye aboŋojin? ³⁹Nya baya egonyu hohoi iye iŋwai kuyya bu ibabus bwo fe hohoi efwo jihoi? ⁴⁰Itarraŋ adi Hobu jihosi ojo, Ahode eramak ni itai jo, al ihaniete tai ihwo nya jyo illarak hoŋ dwadi bu olomuta’to bebe, ihaniete tai bwo fe jihoŋ.⁴¹Tania ojo adi inyi bwo fe jyo hulya hutto hani ihorroŋ jo, Ifwatta addi jihoŋ itai hul irrohojata’to. Ifwatta ihima on osyo’to fur an ihuhumani te etisyahani iko anjelohyen honyi. ⁴²Nyo aniama nya ni bwo ibyaŋata tai isyatta aŋiyo jihoŋ. Ebwoto nya ni ati ibyaŋata tai isyatta aari jihoŋ. ⁴³Ara nya ni atamononi ati ibyaŋata tai ifwotuna ani. Adaha nya ni aŋaturoi ati ibyaŋata tai isyatta aboŋojin jihoŋ. Aŋwai nya ni bwo fe awon ni ibabus ati ibyaŋata tai ifwanna imijyere ani.⁴⁴Tania itarraŋi adi isi bwo fe jihonyi ojori, Hobu nya baya egonyu hohoi iye iniama, kuyya ibwoto, kuyya bu atamononi, kuyya aŋaturoi, kuyya iŋwai, kuyya bu ibabus bwo hohoi ebeŋ elwak iye? ⁴⁵Tania itarraŋ adi inyi jihosi ojo, Ahode eramak ni itai jo, al ibyaŋata tai ihaniete ihwo nya jyo obo olomuta’to bebe tehiji hulo, ibyaŋata tai bwo fe ihaniete jihoŋ. ⁴⁶Ofwoi adi hulo jyo abahyo on osyo’to fur, ati ofwoi adi aati hulo Hollum jyo nesu on osyo fur.

¹Latuhok Yesu nekyanita hunia daŋ ojo inyi jyo leyiyanak honyi ojo, ²Imijana tai jo ihalu oŋitek arrihai owon neyom an ifurani Allaŋan ono Anjelo bwo fe isyori adi Lonyi tulo isihoniere.³To oloŋ to nya ottubanie ehumak eleittaha iko amarwak ihaŋ ehumani ol obolo’to al anya’to Kaifa, ⁴ette isi iwwaha inefuniere Yesu ta enyobyo ittohori inyi. ⁵Ati ojoro isi jo, Obeŋ oyyu inefuniere inyi ta neyom eneittok ŋadi laati iwuwoŋitai bebe.⁶To obo oloŋ owon Yesu imiji Betania, itoŋo inyi ihaji Simone atulo ’tallulu. ⁷Hoŋiye isi attati aŋotte ’tuna jihonyi iko akarajaja ono eyali on ogol bebe te enyyaŋa, ette juhonia ihou Yesu. ⁸Al igonyuni leyiyanak ania, ijoryai isi ette jaran, Jai, nyo ijuhoni eyali asai? ⁹Oremik arya ania itinyyaŋaniere ta agurusi arryai ette harana jyo alocaŋak.¹⁰Omijak Yesu ekyanita hosi ette jaran, Nyo ittigemyete tai aŋotte? Ihanio inyi ariŋ on oyyu’to jihoŋ. ¹¹Iwanata tai iko alocaŋak oŋitek daŋ, ati abeŋ adi ni etoŋo ikatai fur.¹²Ijuhok inyi eyali ana ihwan hoŋ ihuhumaniere ani ta anuhana. ¹³Ahode eramak ni itai jo, imasik daŋ hun ittittoyerek asayyo hun oyiji’to, iramani adi bu odwo hiram an ihanio aŋotte ana itagiluniere inyi.¹⁴Ta asaa ania alo Yuda Iskariote lobo olo ’tomon harrihai jyo ehumak eleittaha, ¹⁵ette jaran, Isyatta adi itai anyo jihoŋ al esyo ni inyi jihatai? Ette isi duma inyi ta arobia atomwana hunihoi. ¹⁶To noloŋ nya ottifyatyo Yuda amaji an isyoriere inyi Yesu jihosi.¹⁷Ofwonni leyiyanak jyo Yesu to oloŋ etteri ono neyom ono Emunio hun Obeŋi Bula ette jaran, Anani maji adi iwak iye ehuhumyo hohoi teye iŋiyere ta neyom ono Allaŋan Anjelo? ¹⁸Ojo inyi jo, Ifwatta imiji jyo atulo lya iramana inyi jo, ojo ettiyanani jo, ilyaha oloŋ hoŋ, aŋiyo adi ni iko leyiyanak hoŋ ta neyom ono Allaŋan Anjelo ihaŋ hoi. ¹⁹Ihanie nya leyiyanak ihwa ifak Yesu isi bwo fe ihuhumani isi aŋiyo ono neyom.²⁰Ta attari oŋiye inyi iko leyiyanak honyi ’tomon harrihai. ²¹Hoŋiye isi ojo inyi, Ahode ahode eramak ni itai jo obo alatai itinyyaŋak adi nani. ²²Ijiriŋai isi bebe ette isi daŋ ababo ifiyo inyi ojori, Hobu ani adi alya?²³Itarraŋ Yesu ojo, Alya el eduto’to ikoŋ arrany abotye itinyyaŋak adi nani. ²⁴Oye adi Lonyi tulo ihwa igyoroni nya tenyi ati orroho bebe jyo atulo alya al itinyyaŋak’to Lonyi tulo. Obeŋi dwo isiuni inyi oyyu dwo jihonyi. ²⁵Ifiyo Yuda al itinyyaŋak’to Yesu ojo, Hettiyanani, ani adi alya? Ojo Yesu jihonyi jo, Ikyana iye ahode.²⁶Hoŋiye isi, iduhu Yesu emune, ette mojo ojo humo jyo Hollum ette beny bwo fe ette isyo jyo leyiyanak honyi ojo, Hibetina, oŋiyete, ara ana ihwa ahwan hoŋ.²⁷Ette inyi duhuna akos ette mojo ojo humo jyo Hollum, ette isyo jihosi ojo, Itai daŋ amatata tenyi, ²⁸nyo ara ana ihwa nooto hoŋ on owouno’to addi ta aati hul olwaji ifufusori eyyata. Itagol nooto hoŋ ecorit aŋejuk. ²⁹Ahode ajo ni jihatai, abeŋ adi ni enyyak mat aari ajalaŋi fur many iholoŋ an amatari adi ni aari ajalaŋi aŋejuho ilobye Monyoŋ.³⁰Idoloi isi afure itahabuyere Hollum ette isi fwatan many idoŋe Oliveto. ³¹Ojo Yesu jihosi, Ibaŋata adi itai daŋ te eram hoŋ ette itai fuho ta attari ana nyo igyoroni nya jo, Ojo Hollum jo, “Attoho adi ni leyyahani bwo fe isarrahini adi akyoro daŋ.” ³²Ati ihalu nebuhuna hoŋ alo adi ni Galilea ahosyere hatai.³³Itarraŋ Petro jihonyi ojo, Ara dwo bu ofuhoi hulo daŋ te eram hoi abeŋ adi ni afuho ’tuŋ. ³⁴Ojo Yesu jihonyi, Ahode eramak ni iye, ahana ta arwe ana hobeŋ ahohoro ilok iha adi iye ani eharita hunihoi. ³⁵Ojo Petro jihonyi, Dwadi ottohori nani ikoye abeŋ adi ni eha iye ’tuŋ. Ikyanai leyiyanak daŋ ihwo nya.³⁶Attati Yesu fwatan ikosi jyo amaji an ifurani Jetsemani ette jaran jyo leyiyanak honyi, Itoŋoti do dini, alo ni dia imojori. ³⁷Iyaro inyi Petro iko lonyirok arrihai hulo Sebedeyo. Ijiriŋa inyi bebe bwo fe ataji honyi odyaha. ³⁸Ette inyi jaran jihosi ojo, Ijiriŋa ataji hoŋ bebe, ajo adi ni aye. Owotyati dini bwo fe omijyete, hejototi.³⁹Ihut inyi alamarai kai ette ruboho ifau imojori ojo, Monyoŋ, al oyyu jihoi, iyai akoss ana addi jihoŋ. Ati obeŋ ara ihwa ani awak, ara ihwa iwak iye. ⁴⁰Ottu inyi jyo leyiyanak honyi ette rumana isi ojotoroi ette jaran jyo Petro, Ittallihoto tai mijo ta asaa abotye? ⁴¹Omijyete bwo fe omojoti jo oŋida itai ibyaŋata iruhoto nesusuyo. Ogol ataji ahode ati ofyaha ahwan.⁴²Inyyak inyi leten enyyahi etarrihi imojori ojo, Monyoŋ, kuyya obeŋ oyyu jihoi iyarai akos ana jihoŋ arari al amat ni, ijara ihanie awahan hoi. ⁴³Inyyak inyi cohuno ette nyurana isi ojotoroi nyo ijoŋitai isi bebe. ⁴⁴Idyaharu inyi isi ette leten imojori enyyahi etahunihi ette mojo ihwa odwo.⁴⁵Ottu inyi jyo leyiyanak honyi ette jaran jihosi ojo, Herasati tai joto bwo fe heyiryata tai? Imijyete, attuba asaa bwo fe itinyyaŋani Lonyi tulo ihas heyyak. ⁴⁶Ottena, attu lya al itinyyaŋak’to ani. Hafatta irwaŋaniere ikonyi.⁴⁷Hekyana inyi ottu Yuda obo olo ’tomon harrihai iko eluluŋ wati arryai iko afyara bwo elluhi. Ofwonni isi jyo ehumak eleittaha bwo amarwak. ⁴⁸Lya al itinyyaŋa’to Yesu iramak jihosi netamijani ojo, Lya al ajur ni, inyi lya, inefuna inyi.⁴⁹Ette inyi boco jyo Yesu ette jaran, Moŋ, Hettiyanani, ette jur inyi. ⁵⁰Ifiyo Yesu inyi jo, Illa nyo ittu iye? Tania ofwonni isi inefuniere Yesu.⁵¹Abotye jyo hul owoni’to iko Yesu inef ademi honyi ette sutuna inyi ette yef apit olo ehumani ol obolo’to ette isaluna neyyok honyi fyal. ⁵²Attati Yesu jaran jihonyi, Oruhok ademi hoi isohobo honyi nyo laati daŋ hul osutuni’to ademi oyei adi ta ademi. ⁵³Ibeŋ iye imijak jo aremik ni mojo jyo Monyoŋ bwo isyo adi inyi anjelohyen hul olwaji bebe ilwahyere ani? ⁵⁴Ati kuyya ofwonni anjelohyen ilwahyere ani, aŋai adi itasiruni egyerita hun ojori jo oŋida ihanie ihwo nya?⁵⁵Ta asaa ania ojo Yesu jyo eluluŋ wati jo, Ifwanna tai iko afyara bwo elluhi inefuniere ani ihwa olohoho? Oŋitek daŋ ewon nya ni ikatai ihaji imojit eneittok ittiyeniere bwo ibyaŋata tai ani inefuna. ⁵⁶Ihanie erre huna daŋ itasiruniere egyerita huno eyak sayyo. Teyya obusarai leyiyanak daŋ inyi ette fuho.⁵⁷Inefuni isi Yesu ette rihoro inyi jyo Kaifa inyi ehumani ol obolo’to, bwo fe ottubanie legyorok iko lamarwak dia. ⁵⁸Ijifatyo fe Petro inyi alamarai, many lihiloŋoni haji ono ehumani ol obolo’to ette inyi jiŋana ette itoŋo iko oseŋer imijyere esidi hiram.⁵⁹Ottifyai ehumak eleittaha iko lewwahak daŋ omuk nerre irrosoniere Yesu ittohori inyi. ⁶⁰Ati obeŋi isi onyurani omuk erre dwadi bu ofwonni omuk etamijanak arryai hul ogesemi’to. Ihalu ofwonni omuk arrihai, ⁶¹ette jaran, Ojo atulo olo jo, Aremik ni itattur aji imojit eneittok ono Hollum ette duhonia inyi to oŋitek hunihoi.⁶²Odyoto ehumani ol obolo’to ette jaran, Ibeŋ iye itarraŋ errositi hosi hun arrasani isi iye? ⁶³Ati odwahino Yesu tania ojo ehumani ol obolo’to jihonyi jo, Ajo ni jihoi ahode ta afure Hollum al isu’to, kuyya ira iye Kristo Lonyi Hollum iramak hohoi. ⁶⁴Ojo ati Yesu jihonyi, Ihwa ijo iye, ani alya. Ati eramak ni itai jo ihalu igonyuna adi itai Lonyi tulo al itoŋo ihani iŋet ono Adwarani, bwo fe igonyuna adi itai inyi ol ottu ihide idisi huno edou.⁶⁵Tania ogwas ehumani ol obolo’to aboŋo honyi ette ŋiŋanya ojo, Onyo monyoŋ nani, ogesem atulo olo. Anyo nyi ettifya hohoi etamijanak omuk? Hetehata bu itai itaniŋuna agesemita honyi. ⁶⁶Igigiloti tai anyo jihonyi? Itarraŋi isi ojori, Osiru naye jihonyi.⁶⁷Tania imimice isi amilak lihomom honyi ette bahyo inyi bwo fe omuk anaŋye inyi, ⁶⁸ette jaran, Kristo ottenu, ŋai al anaŋ’to iye?⁶⁹Hetoŋo Petro ihiloŋoni ottu nobo napit jihonyi ette jaran, Iwon dwo bu iye iko Yesu Agaliletanani. ⁷⁰Ati orisa inyi ihosyere wati daŋ ette jaran, Abeŋ ni amijak anyo ikyana iye.⁷¹Holo inyi ilet igonyu obo odwoti inyi ette jaran jyo hulya hul owoni’to dia ojo, Owon dwo atulo olo iko Yesu Anasaratanani. ⁷²Inyyak inyi risa ta agolon ojo, Abeŋ ni amijak atulo lya ’tuŋ.⁷³Ihalu kai ofwonni laati hul owotyai dia jyo Petro ikyanari ojo, Ahode ira iye olosi, nyo italeyeu nekyana hoi iye. ⁷⁴Tania ipita inyi bwo fe ittuŋo ette jaran, ’Tuŋ ahode, abeŋ ni amijak atulo lya. Teyya teyya ilok ahohoro. ⁷⁵Attati Petro giluna nekyanita huno Yesu hodwo ojo, Hobeŋ ahohoro ilok iha adi iye ani eharita hunihoi. Teyya alo inyi ilet ette ’yo bebe.

¹Ninya afaŋ amotye iwwahai ehumak eleittaha daŋ iko amarwak arabotye ittohori Yesu. ²Ifitani isi inyi ette yaru inyi jyo Pilato al ara’to mandir.³Tania igonyu Yuda etinyyaŋani Yesu jo oŋoti isi aye jyo Yesu ette inyi iloit ataji honyi te ejiriŋa ette inyyaharu arobia atomwana hunihoi jyo ehumak eleittaha iko amarwak, ⁴ette jaran, Eyyau ni nyo etinyyaŋak ni lya ol obeŋ’to iyyau. Ati itarraŋi isi ojori, Obyaŋara eram hohoi ania. Ara eram hoi. ⁵Ibirok inyi arobia ifau haji imojit eneittok ette leten addi ette gororo ahwan honyi hama.⁶Ohuruni ehumak eleittaha arobia ette jaran, Obeŋ oyyu ittubaniere arobia hunia iko huno aji imojit eneittok nyo arai isi nedumiti huno naye. ⁷Iwwahai isi ette inyyaŋa ta arobia hunia amaji ninya obwaharik nefwoto nyo awahi isi nuhatari atamonok dia. ⁸Tania to noloŋ nya many iko ahana iloŋoi amaji nya amaji ewot hoto.⁹Itasirunierek ekiana Yeremia ekianani Hollum, ninyia ojiari inyi jio, “Iduhuni isi arobiyaa atomuana hunihoi, arobiyaa hunyia iduhuni onyiok Israele edumit honyi, ¹⁰Attati nekyana ono eyani sayyo Yeremia itasiruna on ojo, “Iyarai isi arobia atomwana hunihoi inyyaŋuniere amaji ninya obwaharik nefwoto nyo arai isi edumiti hunya oŋocerek lonyirok Israele.”¹¹Itawojihini isi Yesu ihosyere mandir ette mandir ifiyo ojo, Ira iye Hobu olo Yudea? Ojo Yesu jo, Ihwa ijo bu iye. ¹²Arrasatai ehumak eleittaha iko amarwak inyi erre arryai ati obeŋ inyi itarraŋ obo ariŋ. ¹³Attati Pilato jaran jihonyi jo, Ibeŋ iye itaniŋu errositi arryai hun orrosoni isi iye? ¹⁴Ati odwa inyi liŋ liŋ, tania illilliha mandir bebe.¹⁵Aŋasi daŋ to neyom eneittok ohou mandir obo al ifita ihwa awahi eluluŋ wati. ¹⁶Owon nya obo aboloni ibabus al anya’to Baraba.¹⁷Al attubanie laati ojo Pilato jihosi jo, Iwahata tai ani ahohi alali jihatai, Baraba kuyya bu Yesu al iloŋoi Kristo? ¹⁸Nyo omijak Pilato jo iyaŋunie dwo isi Yesu ta nahaini. ¹⁹Hetoŋo Pilato ikurus ono aŋoco ifak ŋorwoi honyi nekyana jihonyi on ojo, Hehanio obo ariŋ jyo atulo ol oyyu’to alya nyo ahana erigya ni on orroho bebe tenyi.²⁰Isusuye ehumak eleittaha aati daŋ ifiyere Pilato jo oŋida inyi ohou Baraba bwo ottoho Yesu. ²¹Ifiyo mandir jihosi jo, Ahohi adi ni alali jihatai? ²²Ojori isi, Baraba. Ojo Pilato jihosi jo, Ehanio adi ni anyo jyo Yesu al iloŋoi Kristo? Itarraŋi isi daŋ jihonyi ojori, Ijara isihoni inyi.²³Ojo mandir jihosi ojo, Anyo ariŋ on orroho’to an ihanio inyi? Ati iwuwoŋitai isi bebe ojori, Isihonia inyi. ²⁴Igonyu Pilato jo ittallik inyi ihanio obo ariŋ nyo iwuwoŋitai laati bebe. Tania omojo inyi omuk aari ette finia ihosyere wati ette jaran, Obeŋ adi oŋoti naye ono atulo ol oyyu’to olo jihoŋ. Ati ara inyi eram hatai.²⁵Itarraŋi laati daŋ ojori, Ijara oŋoti naye honyi jihohoi bwo fe jyo aduri hohoi. ²⁶Tania ohohi inyi Baraba jihosi ati isyo inyi Yesu jyo oseŋer ibahyere iko isihoniere.²⁷Attati oseŋer hulo mandir iyaro Yesu ihaji eneittok nyo owoni dwo isi ilet bwo fe ottubanie eluluŋ jihonyi. ²⁸Ohouni isi aboŋojin honyi ette itiyyafana aboŋo an aryet. ²⁹Oyyiri isi egorya hikwa ette isihonia lihou honyi ette isyarana elluk ihani iŋet honyi. Origoŋi isi ihosyere honyi ette suhotyere inyi ojori, Hobu olo Yudea, moŋ.³⁰Imimice isi amilak jihonyi ette bahyo ahou honyi ta nelluk. ³¹Latuhi isi asuhotyere inyi, ohouni isi nodwo boŋo ette itiyyafana aboŋojin honyi jihonyi bwo fe orihoroi isi inyi addi isihoniere.³²Al ojiŋari isi ilet orwaŋanie isi iko obo atulo Acirenetanani al anya’to Simone. Orrosoni isi inyi hotolororo akruce on ofwoi isi isihoniere Yesu. ³³Afanyi isi jo amaji an ifurani Golgota on ojo amajihou. ³⁴Isyarani isi jihonyi aari ajalaŋi hun iharrwahini iko obo ayyani. Ati al iniŋ inyi iha inyi amata.³⁵Al isihoni isi inyi ette isi hor aboŋojin honyi ta abaha ogumar. ³⁶Attati isi itoŋo irrirryari inyi dia. ³⁷Bwo fe igyoroni ihide kruce honyi nekyana ono nerrositi hosi inyi ojo, Yesu olo, inyi Hobu olo Yudea.³⁸Iholoŋ ania isihoni ikonyi ahahalak arrihai, abotye etteŋet bwo fe abotye ettehorroŋ honyi. ³⁹Omorye fe adahak Yesu ette huco inyi ta afyala ojori, ⁴⁰Iye al ijo’to etattur ni aji imojit eneittok bwo fe inyyak duho to oŋitek hunihoi itahoru nahwan hoi bwo isuru ihwania to kruce kuyya ira iye ahode Lonyi Hollum.⁴¹Osuhotyerek bu ehumak eleittaha bwo egyorok iko lamarwak inyi ojori, ⁴²Italahu nya inyi lomuk, ittallik ati inyi italahuna nahwan honyi. Inyi Hobu olo Israele tania ijara inyi isuru ihwania to kruce bwo fe eruk adi hohoi jihonyi.⁴³Iyihi fe inyi jyo Hollum, ijara Hollum italahu inyi ihwania kuyya omuno inyi inyi, nyo ojo nya inyi jo, Ani Lonyi Hollum. ⁴⁴Ahahalak hul isihoni ikonyi amorye inyi bwo fe ihwo nya.⁴⁵Ta akilfani many iko otoryai iryok afau daŋ edumele ’tir ’tir. ⁴⁶Ta asaa hunihoi iloŋo Yesu on okwat bebe ojo, “Eloi, Eloi, lama sabacani?” on ojo, “Hollum hoŋ, Hollum hoŋ, nyo ibusak iye nani?” ⁴⁷Al itayiruni aati hul owotyai’to dia nekyana honyi ojori isi, Iloŋo inyi Elija.⁴⁸Oŋer bwo fe obo olosi ette ilutonia aboŋo itwa hari hun irwatiŋoi ette ihanana ihide osiholoti itamataniere inyi. ⁴⁹Ojori omuk, Idehi so, hamijyete, kuyya ottu adi Elija itahoruniere inyi. ⁵⁰Inyyak fe Yesu iloŋo on okwat bebe ette ye.⁵¹Attati aboŋo ono aji imojit eneittok gwasa hama aŋaco arrihai to hide many ifau bwo fe ikikiro afau, ette amorwoi bwara. ⁵²Aŋai bwo fe elumyo bwo itubuhuni aati hulo Hollum arryai hunya oyei’to beryen. ⁵³Ihalu nebuhuna Yesu ofwonni isi addi te lumyo ette jiŋana Yerusalem bwo igonyuni laati arryai isi.⁵⁴Abaŋi eleittok olo oseŋer iko laati honyi hul irrirryai’to Yesu al igonyuni isi ekikiro fau iko erre hun idwoŋi’to. Attati isi jaran, Ahode atulo olo, inyi Lonyi Hollum. ⁵⁵Owoni fe dia aŋorwo arryai hun irrirryai alamarai. Ijifatye nya isi Yesu to Galilea ilwahyere inyi. ⁵⁶Ihiji hosi owon Maria Madalena, bwo Maria honye Yakobo iko Yosefo, bwo fe owon honye lonyirok Sebedeyo.⁵⁷Al ara akikai ottu abarani otto miji Arimatea al anya’to Yosefo. Inyi leyiyanani olo Yesu. ⁵⁸Olo inyi jyo Pilato ifiyere ahwan Yesu, attati Pilato ifahina laati isyaraniere ahwan jihonyi.⁵⁹Iyaro Yosefo ahwan ette bubunaro inyi ta aboŋo on olibo, ⁶⁰ette itaferehina inyi ilume honyi aŋejuk an ikyafani ibak. Ittaborok inyi namorwo on obolo ihutuk ilume ette leten addi. ⁶¹Itoŋoi Maria Madalena iko Maria obo hama iger ilume.⁶²To sabato ofwonni ehumak eleittaha iko Farisei jyo Pilato, ⁶³ette jaran, Hobu egilu hohoi jo, ojo nya lenyabani lya hesu inyi jo, Ihalu oŋitek hunihoi ebuhu adi ni. ⁶⁴Tania ifak oseŋer itagolyere elume many jyo oloŋ itahunihi, ŋadi leyiyanak honyi ofwonni hahalaro ahwan honyi addi. Ngadi isi ofwonni jaran jyo laati jo, Ibuhu inyi to ye, bwo fe orroho adi enyobyo ania agalik.⁶⁵Ojo Pilato jihosi jo, Iwanata tai iko oseŋer, ifwatta itagolyere elume ihwa iremehina tai. ⁶⁶Attati isi fwatan itagolyere elume ta amorwo on otyohini dia bwo fe arasai oseŋer dia irrirryari.

¹Ihalu oloŋ sabato al afaŋ amotye ofwonni Maria Madalena iko Maria obo imijyere nelume. ²Ikikiro dwo afau bebe nyo isuru anjelo olo Hobu t’edou itaboruniere amorwo to hutuk ilume addi ette itoŋo ihide honyi.³Opipyak ahwan honyi ihwa ahilai bwo obwor aboŋo honyi bebe. ⁴Abaŋi oseŋer anjelo bebe ette isi ikikiro ette kwaharo ifau ihwa ayak.⁵Ojo ati anjelo jyo aŋorwo, Hebaŋata. Amijak ni jo ittifyati tai Yesu oŋole isihoni ikruce. ⁶Abeŋ tene nyo ibuhu dwo inyi ihwa ikyana nya inyi. Ifwanna, imijyere amaji oŋole itaferehinierek inyi. ⁷Bwo fe ifwatta kokwak iramaniere leyiyanak honyi jo, Ibuhu dwo inyi to ye ette kyomoro jihatai Galilea. Ifwatta adi itai igonyuna inyi teyya. Ihwania atuhuno, eramak ni itai.⁸Ofwoi isi kokwak t’elume addi ta nabaŋi iko namuno on obolo ette isi ŋyoron iramaniere leyiyanak honyi. ⁹Ati orwaŋanie Yesu ikosi ette fonyo, Moŋ, ogoto. Ihutuni isi jihonyi ette rigoŋi ittiryere ejek honyi ette isi itahabuyo inyi. ¹⁰Attati Yesu jaran jihosi jo, Hebaŋata, ifwatta iramaniere illarak hoŋ jo oŋida isi ofwoi lifau Galilea bwo fe teyya igonyuni adi isi ani.¹¹Hofwoi aŋorwo, ofwoi bwo fe oseŋer imiji iramaniere ehumak eleittaha erre daŋ hun idwoŋi’to. ¹²Ottubanie isi iko amarwak iwwahari eram ania ette isi isyarana agurusi arryai jyo oseŋer, ¹³ette jaran jihosi, Iramana laati jo ofwonni dwo leyiyanak honyi ta arwe lejoto hohoi ette isi hahalaro ahwan honyi.¹⁴Bwo fe kuyya itaniŋu mandir eram ana, etilik adi hohoi inyi jo oŋida inyi obeŋ abak itai. ¹⁵Iyarai isi agurusi ette iramana laati ihwa ifahini jihosi. Tania many iko ahana ikyanai laati Yudea ihwo nya.¹⁶Ofwoi leyiyanak ’tomon habotye Galilea jyo adoŋe ninya itahutak Yesu jihosi. ¹⁷Al igonyuni isi inyi origoŋi isi jihonyi itahabuyere inyi. Ati ikuyyai omuk.¹⁸Ihutu Yesu ikyanari jihosi ojo, Isyori adwaran daŋ ono edou iko ono afau jihoŋ. ¹⁹Tania ifwatta ituruhyere aati hutta fauhyen daŋ bwo fe ibatisyete isi ta afure Monye iko Lonyi bwo Oloyiri ol Olibo.²⁰Ittiyeniete isi ihaniere erre daŋ hunya efak ni jihatai. Bwo fe imijyete, awon ni ikatai oŋitek daŋ many isidi fau.

¹Ara ana etteri sayyo hun oyiji’to huno Yesu Kristo Lonyi Hollum. ²Igyoroni nya ibuk ono eyani sayyo Isaya ojo, Ojo Hollum jo,“Efak ni eyani sayyo hoŋ ikyomoro ahosyere hoi. Ihuhumyo adi inyi nekoi hoi. ³Iloŋo obo atulo to mur, Ette jaran, Ihuhumana nekoi Hobu, Itabisana nekota honyi ’tor.”⁴Oleyo nya Yoane Batista to mur. Ittittoyo inyi aati ojo, Oŋida isi iloiti atajya hosi ette ifwotuna batisimo ette Hollum busana eyyata hosi. ⁵Adahatye aati daŋ hutta fau Yudea iko hutto miji Yerusalem jihonyi. Iruhi laati eyyata hosi ette inyi batisyo isi ihari Yordano. ⁶Iyyafatyo Yoane aboŋojin hun ihuhumi to nofir konnikonni bwo etodit an ara’to amuhunyo iyyafak lihuluk honyi. Oŋiyo bwo fe inyi nebeyo iko nesyo.⁷Ette inyi ittittoyo ojo, Ihalu hoŋ ottu adi lobo ol ogol agalik ani. Abeŋ ni asiru lihouniere amuha honyi. ⁸Ebatisyo ni itai ta aari ati ibatisyo adi inyi itai to Oloyiri ol Olibo.⁹To noŋitek hwa ottu Yesu to miji Nasaret lifau Galilea, attati Yoane ibatis inyi ihari Yordano. ¹⁰Ninya lattu Yesu addi to hari kokwak igonyu inyi nedou obwanya bwo Oloyiri ol Olibo ette isuruna t’edou jihonyi ihwa awolo. ¹¹Ette inyi itaniŋuna nekyana t’edou on ojo, “Iye Lonyi hoŋ, al amuno ni bebe.”¹²Teyya kokwak ette Oloyiri ol Olibo iyaro inyi limur. ¹³Ette inyi itoŋo dia oŋitek atomwana aŋwan iko narwejin atomwana aŋwan hun isusuyere Sitan inyi. Owoni bwo fe acaŋi dia attati anjelohyen lwak inyi.¹⁴Ninya ifitani Yoane libabus ette Yesu leten ifau Galilea ittiyeniere asayyo hun oyiji’to huno Hollum. ¹⁵Ojo inyi, Attuba noloŋ bwo fe ilyaha olobye ono Hollum. Iloitoto atajya hatai, iruhoto asayyo hun oyiji.¹⁶Hadaha Yesu ilotifor hari Galilea ette inyi igonyuna Simone iko Andrea illanyi hul ibirotyai aboyo hosi ihari, nyo arai isi ahayafohok. ¹⁷Ojo Yesu jihosi, Ifwanna ikoŋ, ehanak adi ni itai ahellilloŋok wati. ¹⁸Teyya teyya ette isi busana aboyo hosi ette jifaru inyi.¹⁹Holo inyi kai alamarai ette igonyuna Yakobo iko illanyi Yoane lonyirok Sebedeyo. Owoni isi itogol hosi hul ihuhumye aboyo. ²⁰Teyya kokwak iloŋo inyi isi, ette isi busana monyosi Sebedeyo itwa togol iko legyamak honyi ette jifaru Yesu.²¹Teyya ette isi jiŋana imiji Kapernaum. Al ottu sabato,u teyya ette inyi leten ihaji imojit ette itteryo ittiyenio. ²²Illillihai laati bebe ta nettiyenita honyi. Ittiyenio inyi isi ihwa atulo eleittok obyaŋara ihwa legyorok.²³Jyo noloŋ nya owon obo atulo ihaji imojit ol owon iko ajok on orroho’to. ²⁴Ilulwo inyi ette jaran, Yesu Anasaretanani, anyo hiram iwak iye jihohoi? Ittu iye itarroho hohoi? Amijak ni iye, iye Aliboroni olo Hollum. ²⁵Ette Yesu iŋere jihonyi ojo, Odwai, obusak inyi, ilo addi. ²⁶Attati ajok on orroho’to ihanana ahwe jihonyi, ette jiŋuna addi on olwaha.²⁷Illillihai laati bwo fe ahahayai ta ahwatek hosi hama ojori, Anyo hiram ana? Anyo ettiyenio aŋejuk ana? Ifuhak inyi ajok on orroho’to ania ihwa atulo eleittok, ette inyi niŋyo inyi. ²⁸Teyya kokwak ohu eram honyi imisihi daŋ jyo aŋati nya ono afau Galilea.²⁹Hobusak Yesu aji imojit afwoi isi iko Yakobo ojo Yoane ihaji Simone iko Andrea. ³⁰Teyya oŋwai hamoni Simone iko anahan hwan ette feryoro ijotit. Ette isi iramana inyi jyo Yesu kokwak. ³¹Ette inyi leten jihonyi, ette nef aani honyi ette itadet inyi. Attati anahan hwan honyi ’turoro kwak ette inyi itteryo igyama aŋiyo hosi.³²Ta akikai liddorro oloŋ, iyaŋunie laati jihonyi aŋwak iko omuk hul owoni iko ajohin hun orrohoji’to. ³³Ottubanie aati daŋ hutto miji ikat haji. ³⁴Itaŋida inyi aŋwak arryai hul owoni iko neŋwati hosi hun olufaji. Ifuhak inyi ajohin arryai hun orrohoji’to. Ati obeŋ inyi iruk isi ikyanai nyo omijani isi inyi.³⁵Ta amotye hanyik beryen, ohenyu inyi ette leten ihidyofo imojori dia. ³⁶Ati Simone iko mottyarak honyi ottittifyai inyi. ³⁷Teyya onyurani isi inyi ette jaran jihonyi, Ottifyai laati iye daŋ.''³⁸Itarraŋ inyi jihosi ojo, Efwo jyo omuk amisihi hun ilyahai’to ittiyeniere isi bwo fe. Nyo ara te eram ana an attuniere ni dini. ³⁹Teyya ette inyi leten itwa misihi daŋ huno Galilea ittiyeniere ihasik imojiti hosi iko ifuhatari ajohin hun orrohoji’to addi jyo laati.⁴⁰Teyya ottu atulo ’tallulu jihonyi ette rigoŋi, ette mojo jihonyi ojo, Al iwak iye iremik iye itaŋida ani. ⁴¹Attati ataji Yesu mehino ette ihanana aani jihonyi ette ’tir inyi ette jaran, Awak ni, toŋidara. ⁴²Ette attallulu ono atulo alya ’turoro kwak, ette nahwan honyi libori.⁴³Attati Yesu ifuhara inyi addi. ⁴⁴bwo fe ette jaran, Imijye, heramak obo atulo eram ana ’tuŋ. Ilo, itahutak ahwan hoi jyo ehumani bwo fe isyarak ehumi ono aŋidari hoi ihwa iramak nya Mose jo oŋida laati ihanie ihwa etamijani''.⁴⁵Ati olo inyi itteryo itisarrahina neram ania jyo laati daŋ. Tania obeŋ Yesu ojiŋak jyo obo amiji ololeyo, ati adaha inyi ta atwa matta bwo laati adahatye motye motye ta aŋaco daŋ jihonyi.

¹Ihalu omuk oŋitek acaharu Yesu limiji Kapernaum ette laati itayiruna jo inyi atta haji honyi. ²Teyya ette laati arryai ’tubanio jihonyi dia, tania ette amaji byaŋan jyo hul omuk, dwadi hutteger ikat haji. Ittiyenio inyi ettiyenita honyi,³attati omuk aati aŋwan fwanna hul akafunie atulo ol ogolyo hwan. ⁴Ta nalwaji wati obeŋi isi iyarai atulo alya many jyo Yesu tania ette isi ’tulonia ettulit tohide haji, tohide maji an itoŋori Yesu, ette isi ililyofonia ekafit iko atulo ol ogolyo hwan.⁵Al igonyu Yesu neruk hosi ojo inyi jyo atulo ol ogolyo hwan, Illaŋ, ahohinie eyyata hoi. ⁶Owoni bwo fe omuk egyorok dia hul igigiloi ta atajya hosi jo, ⁷Nyo ikyana atulo alya ihwania? Omoryo inyi Hollum. Obeŋ tulo oremik hohina eyyata arari Hollum fe abotye.⁸Teyya ette Yesu mijana egigilita hosi ette ifiyo ojo, Nyo igigiloti tai ihwania ta atajya hatai? ⁹Anani an ilyaha’to, ajaran hoŋ jyo atulo ol ogolyo hwan jo, Ahohinie eyyata hoi, kuyya ajaran hoŋ, Totte, obubunak ejotit hoi, tadahai?¹⁰Ati oŋida itai imijana jo owon nadwaran jyo Lonyi tulo ihohiniere eyyata wati hutta fau. Tania ojo inyi jyo atulo ol ogolyo hwan, ¹¹Ajo ni jihoi, totte, obubunak ejotit hoi, ilo ihaŋ. ¹²Teyya ette inyi dyoto kwak ette bubunana ejotit honyi ette leten tohosyere hosi alet. Tania ette isi daŋ illilliha, ette itahabuyo Hollum ojori, Ebeŋ nya hohoi egonyu obo ariŋ ihwa ana.¹³Obusak inyi amiji ette caharu ilotifor hari Galilea. Ofwonni aati jihonyi bwo inyi fe ittiyenio isi. ¹⁴Hadaha inyi ette inyi igonyuna Levi lonyi Alufayo. Itoŋo inyi lihaji on odumarik amusuru ette Yesu jaran jihonyi, Ijifunie ani. Ette inyi dyoto ette jifaru inyi.¹⁵Lihalu oŋiyo Yesu ihaji Levi iko leyiyanak honyi. Owoni fe dia latamonok arryai iko lamojok musuru bwo leyyak hul ijifatye inyi. ¹⁶Al igonyuni legyorok hulo Farisei Yesu oŋiye iko leyyak bwo fe iko lamojok musuru ojori isi jyo leyiyanak honyi jo, Nyo oŋiyo inyi iko lamojok musuru bwo fe iko leyyak?¹⁷Itayiru Yesu ana ette jaran jihosi, Laati hul oŋidari’to obeŋi awahi afwatan jyo akim, ati hul oŋwai’to ofwoi isi jyo akim. Abeŋ ni attu iloŋori ayijok, ati attu ni iloŋori eyyak.¹⁸Teyya oferutai leyiyanak hulo Yoane iko Farisei ette omuk aati fwanna ette fiyo Yesu, Nyo oferuni leyiyanak Yoane iko Farisei bwo hulohoi obeŋi oferuni, nyo? ¹⁹Itarraŋ Yesu jihosi ojo, Oferutai mottyarak hayamani al itoŋoi isi ikonyi? Obeŋi isi oferutai al itoŋoi isi iko layamani, obeŋ.²⁰Ofwonni adi oŋitek hun iyarik layamani t’ehiji hosi addi, bwo to noloŋ to nya ette adi isi feruna. ²¹Obeŋ obo orifak ettafit boŋo aŋejuk jyo egwasit boŋo imarwani. Kuyya ihanio obo ihwo nya ogwasaru adi ettafit aŋejuk to boŋo amarwani addi ette egwasit bolori agalik odwo.²²Obeŋ obo ijuhok abalu aŋejuk itwa ihulo amarwani. Kuyya ihanio inyi ihwania obor adi abalu ehulo ette abalu iko ehulo byaŋan. Abalu aŋejuk oŋida ijuhoni itwa ihulo aŋejuho.²³Teyya to noloŋ sabato addaddaharai Yesu iko leyiyanak honyi ta atwa matta hima. Hadahai isi itwa matta ette leyiyanak itteryo gila nema. ²⁴Teyya ette Farisei jaran jihonyi, Imijye, nyo ihanie isi ariŋ on odwa’to ihaniere to noloŋ sabato?²⁵Itarraŋ inyi jihosi, Ibyaŋata tai ihenuna erre hunya ihanio Davide iko laati laniamai isi? ²⁶Alo nya inyi lihaji Hollum hara Abiatara ehumani ol obolo’to ette inyi ŋiyo emunio hun odwari’to hun obeŋ tulo oŋiyo arari ehumak hama oŋiye, bwo fe isyo Davide nomuk jyo laati honyi.²⁷Ette inyi iramana jihosi, Isyori nya sabato jyo laati, ati obeŋi isyori laati to sabato. ²⁸Ihwania ara Lonyi tulo Hobu dwadi olo sabato.

¹Ette Yesu inyyak leten litwa haji imojit. Owon dia obo atulo ol oye hani honyi. ²Ette isi kikorihina jyo Yesu imijaniere kuyya itaŋida inyi atulo alya to noloŋ sabato nyo awahi isi rasana Yesu.³Ojo Yesu jyo atulo ol oye hani, Waŋ dini. ⁴Attati inyi ifiyo isi, Oyyu ehanio jyo aati on oyyu to oloŋ sabato, kuyya ehanio jihosi on orroho? Anani on oyyu’to etahoruna atulo kuyya attohoro? Ati odwahinie isi.⁵Omijo Yesu jihosi te eloŋojita bwo ijiriŋa inyi ta nabyaŋan tajya wati hulya mehino. Ette inyi jaran jyo atulo alya, Onitok aani hoi. Ette inyi nitonia ette aani honyi ŋidari kwak. ⁶Teyya ofwoi Farisei alet ette isi ’tubana ahwattek hosi iko Erodiahyen ette itteryo iwwaha ojori, Efwo ’tohoro Yesu.⁷Tania ette Yesu iko leyiyanak honyi fwatan ihari eneittok, bwo eluluŋ wati arryai hutto Galilea ijifarai inyi. Ofwonni aati to fau Yudea, ⁸to miji Yerusalem, to fau Idumea, iko to ŋati hari tolya ono Yordano, bwo fe ofwonni laati huttotwa misihi Turo iko Sidon. Ofwonni jihonyi laati hul olwaji arryai nyo itayiruni isi anyo ihanio inyi.⁹Tania ette inyi iramana leyiyanak honyi iyaunie obo atogol tenyi nyo ŋadi eluluŋ wati osulari inyi. ¹⁰Nyo itaŋida inyi laati arryai, attati laati hul owoni iko eŋwati ifufudaro ittiryere inyi.¹¹Al igonyuni ajohin hun orrohoji’to inyi ette isi kwahatyo lifau liger hejek Yesu. Ilulwoi isi ette jaran, Iye Lonyi Hollum. ¹²Ati isiŋyo Yesu isi ojo, Heramana jo ani ŋai.¹³Ette Yesu leten idoŋe iloŋuniere hul onyimu inyi ette hulya fwanna jihonyi. ¹⁴Onyimu inyi ’tomon harrihai jo oŋida isi itoŋoi ikonyi bwo fe inyi ifahita isi ittiyeniere. ¹⁵Owoni isi bwo fe iko nadwaran ifuhari ajohin hun orrohoji’to. ¹⁶Leyiyanak hul onyimu inyi isi; Simone al ifurak inyi Petro,¹⁷Yakobo lonyi Sebedeyo, Yoane illa Yakobo, ifurak inyi isi Boanerge on ojo lonyirok hul arai’to ihwa ahilai, ¹⁸iko Andrea, Filipo, Bartolomeo, Matteyo, Tomaso, Yakobo lonyi Alufayo, Tadeyo, Simone Selot, ¹⁹iko Yuda Iskariote letinyyaŋani Yesu.²⁰Ette Yesu leten miji. Ette eluluŋ wati arryai ’tubanio dia tania obeŋi Yesu iko leyiyanak honyi oremehini ŋiyo. ²¹Al itayiruni illarak honyi eram ania ette isi fwanna inyyahuniere inyi nyo ikyanatye laati jo isita inyi. ²²Bwo legyorok hunya ofwonni to Yerusalem ikyanatye jo owon inyi iko Belsebuliy bwo fe ifuha inyi ajohin addi ta afure hobu olo ajohin.²³Ette inyi iloŋuna laati jihonyi ette itteryo ikyana jihosi ta arryamara on ojo, Aŋai oremik Sitan fuhara ahwan honyi? ²⁴Al orryomonie laati hutto lobye ta ahwattek hosi obeŋ adi nolobye ania itoŋo. ²⁵Al aŋalafai aati hutta haŋ ta ahwattek hosi obeŋi adi isi itoŋoi arabotye.²⁶Al ihiharak Sitan adwaran honyi obeŋ adi inyi itoŋo. Otuhuno adi inyi. ²⁷Ahode obeŋ obo oremik jiŋana ihaji lottir liyari asaŋ honyi hobeŋ inyi ifitak olottir alya ahosyere bwo ihalu otuhoro adi inyi erre ta haji honyi.²⁸Eramak ni itai ahode jo ohohinie adi eyyata wati daŋ bwo fe nemoriti daŋ hun omoryerek isi Hollum. ²⁹Ati jyo alya ol omoryo’to Oloyiri ol Olibo obeŋ adi Hollum omehino jihonyi, ati odulo eyyau ania jihonyi tulaŋ. ³⁰Ikyana Yesu ihwania nyo arasai laati ikyana jo, Owon inyi iko ajok on orroho’to.³¹Attati illarak Yesu iko honyonyi fwanna ette wotya ilet ette ifahina lefahata heteloŋo inyi. ³²Teyya itoŋoi eluluŋ wati ikonyi ette isi iramana inyi, Imijye, honyohoi iko illarak hoi owotyai ilet. Awahi isi mijo iye.³³Itarraŋ Yesu jihosi, ngai iyaŋ iko illarak hoŋ? ³⁴Ette inyi mijo jyo aati hul itoŋoi’to ikonyi ette jaran, Heyaŋ huna iko illarak hoŋ. ³⁵Hul ihanie’to awahan ono Hollum arai hya illarak hoŋ iko haniarak hoŋ ojo iyaŋ.

¹Inyyak fe Yesu itteryo ittiyenio ilotifor hari. Attubanie aati daŋ arryai hul ikoloni inyi ihiji, tania ette inyi jiŋana itwa togol, ette itoŋo dia ilyaha ilotifor bwo fe laati daŋ ilyeri ilotifor hari. ²Itteryo inyi ittiyenio isi ta narryamarita arryai. Te ettiyenio honyi ikyana inyi ihwania ojo.³Itaniŋyete, olo obo atulo yehina enyomo honyi. ⁴Ninya layehi inyi ette omuk enyomo fodoŋoro ikoi bwo aheny ette fwanna ikubuna isi. ⁵Bwo fe omuk ette fodoŋoro ihiji morwoi. Obeŋi isi onyurani aboro hun olwaji, ette isi isuruna kokwak nyo obeŋ amaji hosi ojon.⁶Al onok noloŋ ette itayoho afarawa hosi daŋ nyo obeŋi nadde hosi isuri ifau. ⁷Ofodoŋonie omuk bwo fe ihiji hikwa ette nekwa hwa isuruna arabotye ikosi ette itabunara isi. Obeŋi isi oŋerihini.⁸Okwahinie omuk jyo aboro hun oyiji’to ette isuruna, bwo fe ette buturi ette obo ŋerihina ema atomwana hunihoi bwo fe obo atomwana ille bwo obo esiha abotye. ⁹Ojo Yesu, Lya ol owon iko ayyaha ijara inyi hetaniŋu.¹⁰Al owon Yesu hama, ofwonni laati iko leyiyanak ’tomon harrihai ifiyere inyi ta narryamara ana. ¹¹Ojo inyi jihosi, Italeyehi Hollum jihatai nelahode ninya idimani ono olobye honyi. Ati jyo lomuk iramani jihosi nerre hwa ta narryamara. ¹²Tania omijye isi mijo ati obeŋi igonyuni, bwo fe itayirye isi itayiryo ati obeŋi itaniŋuni ŋadi isi iloiti atajya hosi ette eyyata hosi hohino.¹³Bwo fe ifiyo inyi isi ojo, Ibyaŋata tai itaniŋuna narryamara ana? Aŋai ’tadi itaniŋuna tai omuk narryamarita hoŋ? ¹⁴Oyehi layani hinyomo nekyana Hollum. ¹⁵Nenyomo hutte koi isi laati hul itayiruni’to ette Sitan ’tuna kwak ihwania ihwania ette kwararu nekyana to tajya hosi addi.¹⁶Nenyomo hun ofodoŋonie hutto morwoi isi laati hul itayiruni’to nekyana bwo fe iruhi ihwania ta amuno. ¹⁷Ati obeŋi nadde jihosi. Iruhi do ati al ofwonni ettigemita kuyya netahawayo ta neram Hollum ette isi ipal addi.¹⁸Nenyomo hun ofodoŋonie ihiji hikwa isi laati hul itayiruni ¹⁹ati ihawwai isi te nerre hutto haŋitek, kuyya ottohoroi isi egigilo te ebariti hosi, kuyya adayai isi ta nerre ette nekyana Hollum bunaro jihosi. Obeŋi ati oŋiji. ²⁰Hun okwahinie liboro hun oyiji isi laati hul itayiruni’to nekyana bwo fe omojuni isi itajya hosi ette ŋerihina aŋer hosi, atomwana hunihoi, bwo obo atomwana ille bwo obo esiha abotye.²¹Ette inyi ifiyo isi ojo, Iyaŋuno atulo allomo itwa haji ette ifihana iwoyo jotit kuyya bu iwoyo gufa? Obeŋ adi inyi oyihak allomo? ²²Onuhani laati omuk erre jo oŋida ihalu inyyahi bwahuna. Imuhoni laati erre jo oŋida ihalu inyyahi isi duhuna. ²³Lya ol owon iko ayyaha ijara inyi itaniŋu.²⁴Bwo inyi ojo jihosi, Ihumata igigilo erre hunitaniŋuna tai. Te efahita hun iŋot iye obo atulo oŋot adi Hollum bwo fe iye agalik. ²⁵Lya ol owon iko omuk erre ofonik adi Hollum omuk jihonyi. Lya ol obeŋ iko omuk erre iyari adi jihonyi addi dwadi hun omutari hun owoni’to jihonyi.²⁶Bwo fe Yesu ette jaran, Orrijo olobye Hollum ihwa atulo ol oyehi’to enyomo honyi ifau. ²⁷Bwo fe ojotoro inyi ta arwe bwo omijo to noloŋ. Ette nenyomo isuruna ette bolori ati obeŋ inyi omijak aŋai isuruni isi. ²⁸Isuruni nema to fau, ahosyere abahala, ihalu nosi, bwo ihalu ema hun aŋidari’to. ²⁹Al odori ema iduhu inyi ademi ette dyoŋori ema.³⁰Inyyak Yesu ikyana jihosi, Etarrijohi adi hohoi olobye Hollum iko anyo? Anani narryamara an etarrijohi hohoi iko olobye Hollum? ³¹Orrijori inyi iko aŋeryo bule an oyehini. Omuta inyi agalik daŋ. ³²Ati al oyehini ifau obolo agalik ayyanio daŋ, bwo owoni iko atanata arryai hun oremehini aheny duhori asik hosi.³³Ta narryamarita ihwa hunia hun olwaji iramata Yesu nettiyenita honyi jyo laati ihwa oremehini isi itaniŋuna. ³⁴Obeŋ inyi iramak isi omuk erre arari ta arryamara hama, ati al owon inyi iko leyiyanak honyi hama itahutak inyi isi awoi hirre daŋ.³⁵Oloŋ ania to otoryai, ette inyi jaran jyo leyiyanak honyi ojo, Efwo aŋati hari tole. ³⁶Tania ette isi busaro eluluŋ wati ette iyaro atogol an itoŋori Yesu. Owoni dia atogoli bwo fe. ³⁷Ette asiŋit on obolo bebe dyoto. Attati aari ifolyahita itwa togol ette atogol ilyaha nefut.³⁸Ette inyi joto al iluro itwa togol. Ette isi itahenyuna inyi ette jaran jihonyi, Hettiyanani, ibeŋ iye igigilo ta aye hohoi? ³⁹Attati inyi dyoto ette ifahina oyyami hotodwahi ette jaran jyo aari, Odwai. Ette asiŋit dwa ette aari ŋettyo dee.⁴⁰Ette inyi ifiyo isi, Anyo ibaŋata tai? Hobeŋ neruk jihatai? ⁴¹Ati abaŋi isi bebe bwo fe ikikyanai ta ahwattek hosi hama ojori, Anyo tulo olo ol oniŋye oyyami iko aari inyi?

¹Attati isi fanyan ilotifor hari tole lifau Gerasa. ²Ihwania al isuru Yesu to togol ottu obo atulo te lumyo jihonyi ol owon iko ajohin hun orrohoji’to.³Ette inyi imanyatyo ihiji lumyo, bwo fe obeŋ obo oremik ifitana inyi ara dwo bu ta aririk. ⁴Nyo oŋitek arryai ifitani inyi ta aririk bwo isyahini abilat ihejek honyi. Bwo inyi ofut aririk bwo aŋany abilat. Obeŋ tulo oremik bwarana inyi ta arrama.⁵Ta arwejin iko noloŋi daŋ itoŋo inyi ihiji lumyo iko idoŋyok. Iwuwoŋita inyi dia bebe bwo fe oŋoco ahwan honyi ta namorwoi. ⁶Ninya igonyu inyi Yesu hottu alamarai, oŋer inyi jihonyi ette rigoŋi ihosyere honyi.⁷Bwo fe oyyo inyi bebe ette iwaha jihonyi ojo, Yesu Lonyi Hollum, Eleittok, anyo hiram iwak iye jihoŋ? Ta afure Hollum amojo ni jihoi hettigemyo nani. ⁸Nyo ikyana dwo Yesu jihonyi ojo, Itai, ajohin hun irrohojata’to, ifwanna addi jihonyi.⁹Ifiyo Yesu atulo olosita ojo, Ngai afure hoi? Bwo inyi itarraŋ ojo, Afure hoŋ Legon on ojo elwaja hohoi arryai bebe. ¹⁰Omojoi isi jyo Yesu bebe oŋida obeŋ inyi ifuha isi alamarai jyo amaji ana.¹¹Ihwania owoni eluluŋ bataha hun olwaji hun oŋiye amiyaŋ itwa doŋe. ¹²Tania olwahai ajohin jyo Yesu ojori, Ifuha hohoi ihiji bataha oŋida ejiŋak hohoi itwajin hosi. ¹³Bwo fe iruk inyi isi hetefwahi. Bwo ajohin hun orrohoji’to ette fwan addi totwa tulo ette jiŋana itwajin bataha. Ette neluluŋ bataha ŋyoron ilotifor, hutu, hutu, hutu, ette kwahino itwa hari ette dyoro bwo fe ette ye iko dia. Arai isi alif arrihai.¹⁴Ihwania ofuhoi leyyak bataha bwo fe iramani laati hutto miji bwo laati hutteger miji daŋ. Attati laati fwanna mijo anyo ihanie isi dia. ¹⁵Al afwonni isi jyo Yesu igonyuni isi atulo odwo isita’to ta ajohin hun orrohoji’to itoŋo ifau. Iyyafak inyi aboŋojin bwo fe obeŋ isita ette isi baŋi bebe.¹⁶Laati hyodwo igonyuni’to eram ania iramani isi eram ono atulo odwo isita’to. Bwo fe iramani isi eram ono abataha. ¹⁷Tania ifuharai laati Yesu to fau hosi addi.¹⁸Al isurok inyi itwa togol ifiyo atulo odwo isita’to Yesu lifwatari ikonyi. ¹⁹Ati obeŋ Yesu iruk afwatan ikonyi ati ojo inyi jihonyi, Ilo imiji hatai, iramak mottyarak hoi erre hun obolori’to hun ihanio Hobu jihoi bwo fe amehino honyi jihoi. ²⁰Attati inyi leten ette itteryo iramana laati daŋ hutto misihi ’tomon erre hun ihanio Yesu jihonyi, attati laati daŋ hul itaniŋuni’to illilliha.²¹Allaŋ Yesu aŋati hari tolya ta atogol ette wotya ilotifor hari. Ofwonni eluluŋ wati hul olwaji bebe ette kolonia inyi ihiji. ²²Attati lobo atulo ’tuna, afure honyi Yario, inyi eleittok olo aji imojit. Igonyu inyi Yesu ette rigoŋi jihonyi. ²³Ette inyi mojo bebe ojo, Ojo ŋarri hoŋ aye. Waŋ ilo iyyabak aani hoi jihonyi oŋida odyoto ette su. ²⁴Ette inyi leten ikonyi. Ijifatye eluluŋ wati inyi ette susularo inyi.²⁵Bwo fe ottu nobo aŋotte on owouno hoto to hwan honyi ta aŋasi ’tomon harrihai. ²⁶Bwo ottohoro inyi ittigemyo iko aŋwai honyi. Adaha inyi jyo akimi arryai bwo fe otuhok inyi agurusi honyi, ati obeŋ inyi oŋida, arasa inyi ŋwai. ²⁷Itaniŋu nya inyi ta neram ono Yesu ette ’tuna te eluluŋ wati ihorwoŋ Yesu ette ’tir aboŋo honyi.²⁸Nyo igigilo inyi ta atwa honyi ojo, Ara dwo bu attir ni aboŋo honyi hama attadi ni ŋidari. ²⁹Teyya teyya ette nooto honyi wotya bwo fe omijak inyi jo aŋida ahwan honyi.³⁰Omijak Yesu ihwania itaŋida adwaran honyi aŋotte ette inyi yito orwaŋai ihiji wati ette ifiyo ojo, Ŋai ottir aboŋo hoŋ? ³¹Ati ojori leyiyanak jihonyi, Igonyu iye eluluŋ wati osusularai iye bwo fe iye ifiyo, Ngai ottir ani? ³²Ati ofyalatyo Yesu oŋida igonyu inyi ŋai dwo ihanio ariŋ ania.³³Ihwania omijak aŋotte ariŋ an ihanio jihonyi. Dwadi abaŋ inyi bwo fe ikikiro, ottu inyi t’ehiji wati addi, ette rigoŋi ihosyere hejek Yesu ette iramana jihonyi erre daŋ. ³⁴Bwo fe ojo Yesu jihonyi, Hanioŋ, itaŋida neruk hoi iye. Ilo ta nelik taji, hotoŋidara ahwan hoi ta aŋwai hoi.³⁵Hekyana inyi ihwania ofwonni omuk laati to haji Yario ojori, Aye ŋarri hoi. Nyo inyyak iye iloŋo ettiyanani? ''³⁶Ati obeŋ Yesu ihum igigilo ta nekyana ania ati ikyana inyi jo eleittok olo aji imojit ojo, Hebaŋ, iruho hama. ³⁷Obeŋ inyi iruk obo ofwoi ikonyi arari Petro iko Yakobo bwo illanyi Yoane. ³⁸Al afanyi isi ihaji leittok olo aji imojit, igonyu Yesu eluluŋ wati hul oyyoi’to bwo fe ilulwoi bebe.³⁹Attati inyi jiŋara itwa haji ette jaran jihosi, Anyo iwuwoŋitati tai bwo fe iyyoti? Obeŋ eito ania oye, ojoto joto. ⁴⁰Ette isi suhotyo bebe. Ifuhak inyi isi daŋ alet. Iyaro inyi monye hito iko honyonyi iko leyiyanak hul ofwonni dwo ikonyi. Bwo fe ojiŋari isi imaji on oferyori neito.⁴¹Ette inef aani honyi bwo fe ojo jihonyi, Talita kumi, on ojo, Ŋarri hoŋ, ajo ni jihoi odyotoi. ⁴²Teyya attati neito dyoto ette itteryo adaha nyo arai aŋasi honyi ’tomon harrihai. Teyya teyya ette isi illilliha bebe. ⁴³Attati inyi ifahina isi ta agolon jo oŋida obeŋi iramani obo atulo eram odwo, bwo fe iramak inyi isi hetesyaraniehe eito obo naŋiyo.

¹Obusak Yesu amaji ania ette caharu imiji hosi bwo fe leyiyanak honyi ijifarai inyi. ²Ninya lattu sabato ette inyi itteryo ittiyenio ihaji imojit, ette laati illilliha bebe al itaniŋuni isi inyi. Ojori isi, Orumak inyi ettiyenita hunia aja? Aŋai omijak atulo alya erre huna? Aŋai ihanio inyi edwariti hun obolori’to? ³Obeŋ ara inyi ehuhumani bau, lonyi Maria, bwo fe illarak honyi Yakobo, Yose, Yuda iko Simone? Bwo fe obeŋi haniarak honyi amanyai aŋati jihohoi? Ette isi ihara inyi.⁴Attati Yesu jaran jihosi ojo, Owon etahabuyo jyo eyani sayyo, ati imiji hosi bwo fe ihaŋ hosi obeŋ etahabuyo. ⁵Obeŋ inyi oremik ihanio obo ariŋ dia ati ottirok inyi ahas honyi jyo aŋwak kai ette isi ŋidari. ⁶Ette inyi illilliha ta abyaŋan hosi iruk. Attati inyi leten jyo amisihi hutteger ittiyeniere.⁷Attati inyi ikyana jyo leyiyanak honyi ’tomon harrihai ette ifahina isi arrihai arrihai imisihi bwo fe isyo jihosi nadwaran daŋ ababo igalihiniere ajohin hun orrohoji’to. ⁸Iramak inyi isi hobyaŋahi iyarai obo ariŋ ta adaha hosi arari elluhi hama; obeŋ aŋirya, obeŋ akis, obeŋi agurusi itwa jafi hosi. ⁹Oŋida isi ofwoi ta amuha hama hutto hejek bwo fe obeŋi iyarai agamisi arrihai.¹⁰Ette inyi inyyak iramana omuk jihosi ojo, Al itoŋoti tai jyo obo aji arasati dia many ibusaniete tai amaji nya. ¹¹Kuyya ihari omuk laati jyo obo amaji efonyo itai, bwo fe ihari isi itaniŋuna ekyana hatai, al ibusana tai amaji nya iddiddyaŋata attuduha to hejek hatai hetera etamijani jihosi.¹²Attati leyiyanak fwatan ittittoyo aati jo oŋida isi iloiti atajya hosi t’eyyata hosi. ¹³Bwo fe ifuhari isi ajohin hun orrohoji’to bwo fe itaŋidari laati hul oŋwai’to te eyali an iyalyerek isi.¹⁴Itaniŋu hobu Erode te eram Yesu nyo elyece laati daŋ afure honyi. Attati isi jaran, Yoane Batista ibuhu to ye bwo fe ihanio Yesu nedwariti honyi. ¹⁵Bwo fe ikyanai omuk ojori, Ara inyi Elija. Bwo fe omuk ojori, Ara inyi aheyani sayyo ihwa eyak sayyo hinya beryen.¹⁶Ati ninya itayiru Erode erre huna ojo inyi, Yoane alya linya oŋotuni ahou addi, inyi al ibuhu’to alya to ye. ¹⁷Nyo inyi Erode alya inya ifak’to oseŋer inefuniere Yoane ette ifitana inyi ibabus. Ihanio inyi ihwania itamunoyere Erodia, ŋorwoi illanyi Filipo, nyo ayama Erode inyi.¹⁸Nyo ojo nya Yoane jyo Erode, Obeŋ oyyu jihoi imanyari iko ŋorwoi illa hoi. ¹⁹Attati Erodia iloŋojita jihonyi bwo fe awak ’tohoro inyi ati obeŋ inyi onyurak obo ekoi ittohori. ²⁰Ati abaŋ Erode Yoane nyo omijak inyi ara inyi atulo ol oyyu’to bwo fe odwa. Attati Erode isiyo Yoane. Al itayiru inyi nekyana Yoane ette inyi ijiriŋa bebe, ati awak Erode itayiryo nekyanita honyi.²¹Attati neyom ’tuna ono oloŋ ninya isiunierek Erode, bwo fe ihuhumak inyi aŋiyo jyo hobwok iko oseŋer honyi bwo fe jyo eleittaha hulo Galilea. ²²Attati ŋarri Erodia jiŋana ette hya ihiji hosi, attati inyi itamuno Erode iko hul itoŋoi’to ikonyi. Ette Erode jaran jyo odwoti, Ifiye ani to omuk erre hun iwak iye. Esyo adi ni jihoi.²³Attati inyi coronia ettuŋo honyi ojo, Esyo adi ni iye erre daŋ hun ifiyo iye dwadi aŋati ono olobye hoŋ. ²⁴Ette odwoti leten ilet ette ifiyo honyonyi ojo, Anyo riŋ adi efiyo ni jihonyi? Itarraŋ honyonyi ojo, Ijara awak ni ahou Yoane Batista. ²⁵Attati inyi caharo kokwak jyo hobu Erode ette jaran jihonyi, Awak ni iye ihwania isyo ani ahou Yoane Batista itwa sahan.²⁶Attati hobu jiriŋa bebe ati obeŋ inyi iha odwoti nyo acorok dwo bu inyi te ettuŋo bwo atamonok itaniŋuni. ²⁷Teyya teyya attati inyi ifahina obo oseŋeritanani hetelo iyauno ahou Yoane. Attati lya leten ette ŋut ahou Yoane ’totwa babus. ²⁸Attati iyaŋuno ahou honyi itwa sahan, attati inyi isyo jyo odwoti bwo odwoti ette isyo jyo honyonyi. ²⁹Itaniŋuni leyiyanak hulo Yoane ette isi fwana ette iyaro ahwan honyi ette nuhana ilume.³⁰Ocohunie lefahatz jyo Yesu ette iramana jihonyi erre daŋ hun ihanie isi bwo fe ittiyenie. ³¹Attati inyi jaran jihosi, Efwo ikoŋ ta ahwattek hatai, efwo jyo amaji on oyur’to iyiryari kai. Nyo adahai laati arryai dia bwo fe obeŋ asaa jihosi iŋiyere aŋiyo hosi. ³²Ihwania attati isi dahina itwa togol ette fwatan jyo amaji on oyur’to.³³Ati igonyuni laati arryai isi ofwoi ette isi ŋyoron to misihi daŋ ilotifor hari ette fanyan aŋati tole ahosyere Yesu. ³⁴Ninya isuru Yesu iko leyiyanak honyi totwa togol igonyu inyi eluluŋ wati owotyai. Omehino ataji honyi tesi nyo arai isi ihwa akyoro hun obeŋi heyyahani, ette inyi itteryo ittiyenio isi erre hun olwaji.³⁵Al ilyaha oloŋ eddorro ette leyiyanak honyi fwanna jihonyi ette jaran, Amur ana bwo fe ilyaha noloŋ eddorro. ³⁶Ifak eluluŋ wati imatta iko imisihi inyyaŋari erre hun oŋiye isi.³⁷Ati itarraŋ inyi jihosi ojo, Isyatta isi aŋiyo. Attati isi jaran jihonyi, Iwak ati iye hohoi efwo iyaŋuno emunio ta arobia omuk hun olwaji oŋida esyo jihosi hotoŋiyehe? ³⁸Attati inyi ifiyo isi ojo, Omukaja emunio jihatai? Ifwatta imijata. Al ihenie isi ette isi iramana inyi ojo, Arai emunio miet bwo aham arrihai.³⁹Attati inyi iramana isi hetetoŋohi ifau jyo amiyaŋ en egara. ⁴⁰Attati isi itoŋo ifau te eluluŋi esiha abotye bwo omuk atomwana miet. ⁴¹Attati inyi iduhuna emunio miet bwo aham arrihai ette ibonno ahide ette jaran humo jyo Hollum, attati ibibeny emunio ette isyarana jyo leyiyanak honyi hataharaniehe jyo laati. Attati inyi harana bwo fe aham arrihai jihosi.⁴²Oŋiye isi daŋ ette ifoŋ. ⁴³Attati isi suduhana ofitot imunio iko aham hun oremehini ta afejin ’tomon harrihai hun ifuti. ⁴⁴Arai aati hul oŋiye alyawa esiha atomwana miet.⁴⁵Teyya teyya ifak inyi leyiyanak honyi hatadahiniehe itogol hatallaŋahi aari, many imiji Beteseda ahosyere honyi, attati inyi ifahina eluluŋ wati addi. ⁴⁶Ifony inyi isi bwo ihalu olo inyi idoŋe imojori. ⁴⁷Ta attari ette atogol wanan ihiji hari attati Yesu wanan ilotifor, inyi hama.⁴⁸Igonyu Yesu isi ittigemye te eguryo hari nyo ohuco oyyami bebe. Ninya ilyaha ataŋatye motye ette inyi leten jihosi al adaha ta ahide hari. Ojo inyi agalaru atogol. ⁴⁹Ati al igonyuni isi inyi adaha ta ahide hari, igigiloi isi jo kuyya ara inyi aŋarri jok ette isi ilulwo. ⁵⁰Igonyuni isi daŋ ette isi baŋi bebe. Ati teyya ette inyi ikyana jihosi ojo, ''Itagoloto atajya hatai! Ani alya! hebaŋata!''⁵¹Attati inyi leten jihosi ette dahina itogol attati oyyami dwa. Ihwania ette isi illilliha bebe, ⁵²ati obeŋi isi omijani awoyo hiram ono emunio nyo ogoli atajya hosi.⁵³Ninya allaŋi isi aŋati hari tole ifau Jenesaret ette isi ifitana atogol. ⁵⁴Isuruni isi to togol ette aati mijana daŋ Yesu. ⁵⁵Ette isi ŋyoron ihaŋitek ikafuniere aŋwak te ekafiti hosi jyo amaji an itaniŋuni isi jo owon Yesu dia.⁵⁶Ninya adaha inyi imisihi iko imatta wati daŋ, itaferehitai isi aŋwak ikoi ette isi mojo inyi ijara hotottirohe eger boŋo honyi bwo fe aati daŋ hul ottiri’to aboŋo honyi aŋidari.

¹To obo oloŋ ofwonni Farisei iko legyorok to Yerusalem jyo Yesu.²Igonyuni isi leyiyanak honyi oŋiye hul hobeŋi ofiniai. ³Nyo Farisei iko laati Yudea omuk obeŋi oŋiye hobeŋi isi ofiniai ihwa omohoroi isi jyo hohonyok hosi. ⁴Bwo fe al ofwonni isi to suk obeŋi isi oŋiye do hobeŋi isi illillai erre. Bwo fe owoni omuk emohiti hun ijifatye isi, isi huna: ellillayo kosi iko ehulo iko atobohin.⁵Attati Farisei iko legyorok ifiyo inyi, Nyo obeŋi leyiyanak hoi ijifatye nemohiti hunya beryen? Nyo oŋiye isi do hobeŋi ofiniai?⁶Ette inyi itarraŋ jo, Igyoro nya eyani sayyo Isaya on oyyu tetai enyabak ojo, “Itahabuye aati hulya ani te etuhe hosi, Ati alamaji atajya hosi jihoŋ. ⁷Ara etahabuyo hosi jihoŋ asai. Ittiyenie isi nefahita wati ihwa arai isi nefahita huno Hollum.”⁸Idehina tai nefahita huno Hollum jo oŋida igotyete tai nemohiti wati ihwa ellillayo kosi iko ehulo bwo omuk erre arryai ihwa hunia. ⁹Attati Yesu jaran jihosi, Ahode ihara tai nefahita huno Hollum jo oŋida igotyete tai nemohiti hatai. ¹⁰Nyo ojo Mose, “Itahabuyete monyatai iko honyatai,” bwo fe, “Atulo ol omoryo’to monye iko honye ijara inyi hotoye.”¹¹Ati ijatta tai jo, Oremik obo atulo jaran jyo monye kuyya honye ojo, Agurusi hun iwahata tai mojuna jihoŋ arai isi Korban on ojo arai isi esyoryo jyo Hollum. ¹²Al ihaniete tai ihwania ihara tai inyi ilwahyere monye iko honye. ¹³Tania itapwahata tai nekyanita huno Hollum ta nemohiti hunya beryen bwo fe owoni omuk nemohiti jihatai ihwo huna.¹⁴Bwo fe inyyak inyi iloŋuna neluluŋ wati jihonyi ojo, Itayiryete daŋ jihoŋ bwo fe itaniŋyete. ¹⁵Obeŋ obo ariŋ on ojiŋak itwa tulo to let oremik itarroho inyi ati erre hun ojiŋuni’to to taji tulo alet oremehini isi itarroho inyi. ¹⁶Lya ol owon’to iko ayyaha ijara inyi hetaniŋu.¹⁷Labusaro inyi eluluŋ wati attati leten ihaŋ honyi, ifiye leyiyanak honyi inyi awoyo hiram ono arryamara ania. ¹⁸Attati inyi itarraŋ jihosi, Itai bwo fe ibyaŋata tai itaniŋuna? Ibyaŋata tai imijana jo obeŋ obo ariŋ on ojiŋak’to itwa tulo to let oremik itarroho inyi? ¹⁹Nyo obeŋ aŋiyo ojiŋak itwa taji honyi ati itwa hohe honyi ijai attati irrituna alet. Ta nekyana ana ojo inyi oyiji naŋiyo daŋ.²⁰Bwo fe ojo inyi, Ariŋ on ojiŋu’to to taji tulo alet inyi ariŋ an itarroho’to inyi. ²¹Nyo to taji tulo ojiŋuni egigilita hun orrohoji’to, arai isi aroto, ahoho, attohyo, ²²asomon, adaya, aliwari, enyobyo, ahaini, amwaŋa, etadara, iko ecaforo. ²³Asaŋ hun orrohoji’to huna ofwonni totwa tulo ette itarrohojuno atulo.²⁴Attati inyi busana amaji ania ette leten ifau Turo iko Sidon. Ette inyi jiŋana itwa haji nyo obeŋ inyi awak obo omijak awanan honyi dia ati obeŋ inyi oremik idimana ahwan honyi. ²⁵Owon obo aŋotte iko ŋarri honyi on odiha on owon iko ajok. Ninya itaniŋu inyi attuna Yesu ette inyi leten jihonyi ette rigoŋi ihosyere honyi. ²⁶Ara inyi apagano. Ikyana inyi ekyana Grik; isiuni inyi to fau Surofenisa. Attati inyi lwaha bebe jyo Yesu ojo ijara hetefuhai ajok jyo ŋarri honyi addi.²⁷Ette Yesu jaran jihonyi, Ijara aduri hotoŋiyehe ahosyere. Obeŋ oyyu iduhuniere aŋirya duri ette rwoŋonia jyo aŋohe. ²⁸Attati aŋotte itarraŋ jihonyi ojo, Afe Hettiyanani, ati oŋiye aŋohe ebenyiti ŋirya huttowoyo teremeja hul itadohini aduri.²⁹Attati Yesu jaran jihonyi, Al ijo iye ihwania ilo ati imiji hatai, obusak ajok on orroho’to ŋarri hoi. ³⁰Attati inyi leten ihaji honyi ette nyurana ŋarri honyi ijotit ette mijana jo obusak ajok on orroho’to inyi.³¹Attati inyi busana nafau Turo ette galaru Sidon ette cul te ehiji fau ono amisihi ’tomon many ilotifor hari Galilea. ³²Attati laati iyaŋuno jyo Yesu atulo ol ottuho’to bwo fe obeŋ ikyana. Attati isi mojo inyi hotottirok ahas honyi jihonyi.³³Attati Yesu iyaro inyi hama t’eluluŋ wati attati ’tuhonia afyala honyi iyyaha lya ol ottuho’to ette mitana amilak ette ’tir aŋadyef honyi ta amilak. ³⁴Attati Yesu ibonno ahide ette yirita ette jaran jihonyi, Efata, on ojo ijara hataŋai. ³⁵Bwo fe ayyaha honyi hataŋahi bwo fe aŋadyef honyi hetekyanai ette inyi itteryo ikyana on obis.³⁶Attati inyi iramana isi hotobyaŋahi iramani obo atulo eram ana. Ati iramani isi laati arryai. ³⁷Attati aati daŋ illilliha bebe ette ikyana ojori, Ihanio inyi erre hun obolori’to. Aŋa inyi ayyaha wati hun ottuhoi’to bwo fe itaŋida aŋadyefa hun obeŋi’to ikyanai.

¹Jyo oŋitek hwa al attubanie eluluŋ wati bwo fe obeŋ naŋiyo jihosi, iloŋo Yesu leyiyanak honyi jihonyi ette jaran jihosi, ²Omehino ataji hoŋ jyo laati hulo nyo itoŋoi isi ihwania jihoŋ oŋitek hunihoi bwo fe atuho naŋiyo hosi. ³Kuyya efak ni isi ihaŋitek hosi hobeŋi isi oŋiye oniamai adi isi ka ahure nyo alamaji amisihi omuk. ⁴Ati itarraŋi leyiyanak honyi jihonyi ojori, Orumani ’tadi emunio aja hun oremehini ta aati hulo jyo edyofo ana?⁵Attati inyi ifiyo isi ojo, Omukaja emunio jihatai? Bwo isi itarraŋi, Arai hattarik. ⁶Tania ette inyi iramana eluluŋi wati hetetoŋohi ifau. Attati inyi iduhuna emunio hattarik ette jaran humo jyo Hollum. Ibibeny inyi isi ette isyo jyo leyiyanak honyi hataharaniehe jyo aati attati isi harana.⁷Bwo fe owoni isi iko omuk aham hul omutari, attati inyi jaran humo jyo Hollum, ette inyyak harana jyo leyiyanak isyaraniere jyo aati. ⁸Oŋiye isi ette ifoŋ. Attati isi iddudduhuna ofitot hun oremehini ta afejin hattarik hun ifuti. ⁹Aati hul oŋiye’to arai isi esiha atomwana aŋwan. ¹⁰Attati inyi ifahina isi addi. Teyya teyya attati Yesu dahina itwa togol iko leyiyanak honyi ette ’laŋan aari many jyo afau Dalamanuta.¹¹Ette omuk Farisei fwanna jihonyi ette ifiyo inyi itahutaniere etamijani on ottu’to t’edou oŋida okemyerek inyi. ¹²Attati Yesu yirita bebe ta ataji honyi ette jaran, Nyo ottifyai laati to oŋitek huna etamijani? Ahode ahode eramak ni itai obeŋ obo etamijani an itahutani jyo laati to oŋitek huna. ¹³Attati Yesu busana Farisei ette inyyak dahina itwa togol ette ’laŋan aŋati hari tole.¹⁴Attati leyiyanak gworo eyaro emunio ati owon emune abotye ijai itwa togol. ¹⁵Attati inyi ittittoyo isi ojo, Ihumata mijo. Heruhoto abula Farisei bwo fe huno Erode.¹⁶Attati isi ikikyana ta ahwattek hosi ojo, Obeŋ emune jihohoi. ¹⁷Attati Yesu mijana ana ette ifiyo isi ojo, Nyo ikikyanati tai jo obeŋ emune jihatai? Hebyaŋata tai itaniŋuna? Odwari atajya hatai?¹⁸Iwanata tai iko ayyaha ati ibyaŋata tai itayiriete? Ibyaŋata tai igotyete? ¹⁹Ninya abenyere ni emunio miet jyo aati esiha atomwana miet, omukaja afejin huno ebenyiti munio hun iduhuna tai? Ojori isi, ’Tomon harrihai.²⁰Bwo fe emunio hattarik jyo aati esiha atomwana aŋwan, omukaja afejin huno emunio hunya iduhuna tai? Ojori isi, Hattarik. ²¹Attati inyi ifiyo isi ojo, Ibyaŋata tai itaniŋuna?²²Attati isi fanyan imiji Beteseda ette laati iyaŋuno atulo oloŋodo’to jyo Yesu ette ilolya jihonyi ijara hotottiro inyi. ²³Attati Yesu rihoro inyi ta naani ette iyaro inyi iler miji. Attati mico ihoŋite honyi ette itafana ahas honyi ihoŋite loŋodo attati ifiyo inyi ojo, Igonyu iye obo ariŋ?²⁴Attati inyi ibonno ette itarraŋ ojo, Egonyu ni aati hul adahai ati oleye isi ihwa ayyanio. ²⁵Ati inyyak Yesu itafana ahas honyi ihoŋite loŋodo attati inyi ŋidari ette itteryo mijo bebe. Oremik inyi igonyuna erre daŋ. ²⁶Tania ette Yesu ifahina inyi ihaŋ ette iramana inyi ojo, Oŋida ibeŋ iye idaha jyo obo amiji ihwania.²⁷Attati Yesu iko leyiyanak honyi busana Galilea ette fwatan imishihi iger fau Cesarea Filipi. Hadahai isi ifiyo inyi leyiyanak honyi ojo, Ojori laati ani ŋai? ²⁸Ette isi itarraŋ jihonyi, Ojori omuk iye Yoane Batista. Bwo omuk ojori iye Elija. Ojori omuk ira iye eyani sayyo.²⁹Attati inyi inyyak ifiyo isi ojo, ''ati ijatta tai ta ahwattek hatai ani ŋai?'' Attati Petro itarraŋ jihonyi ojo, ''Ira iye Kristo''. ³⁰Ati iramak inyi isi hotobyaŋahi iramani eram ana jyo omuk aati.³¹Attati inyi itteryo ittiyenio isi ojo, Odyaha adi ahwan Lonyi tulo te ettigemita wati bwo fe ihari amarwak iko ehumak eleittaha bwo legyorok inyi. Ottohori adi aati inyi bwo fe ihalu oŋitek hunihoi ibuhu adi inyi. ³²Bwo fe obeŋ inyi omwanak obo eram. Attati Petro iyaro inyi alamarai kai ette itteryo isiŋyo inyi ta nekyana ania.³³Ette Yesu yito attati mijo jyo leyiyanak honyi hul omuk ette isiŋyo Petro ojo, Ihuto tehalu hoŋ addi Sitan nyo negigilita hoi obeŋi ofwonni jyo Hollum ati arai ihwa huno aati. ³⁴Attati inyi iloŋuna neluluŋ wati jihonyi iko leyiyanak honyi ette jaran, Al awak obo ijifatyo ani ijara inyi hetehai ahwan honyi, hotolororo akruce honyi, hetejifatye ani.³⁵Al awak obo atulo italahuna nesu honyi italitohi adi inyi. Ati lya al isyo nesu honyi te eram hoŋ bwo fe ta asayyo hun oyiji, italahuni adi inyi fur. ³⁶Anyo adi ayiji honyi al opocou obo atulo erre daŋ hutto fau bwo nesu on osyo fur olitohi? ³⁷Ta anyo itinyyaŋak obo atulo nesu honyi?³⁸Atulo al iloriri’to jihoŋ bwo fe jyo nekyanita hoŋ ihiji wati hul orrohoji’to, iloriri adi Lonyi tulo jihonyi al ottu inyi iko anjelohyen honyi hul olibori ta nakwatan ono Monye.

¹Ette inyi jaran jihosi, Ahode eramak ni jihatai, itoŋoi omuk dini hul obeŋi adi igonyuni naye many igonyunierek isi olobye ono Hollum ottu ta nadwaran. ²Ihalu oŋitek ille iyaro Yesu Petro, Yakobo iko Yoane t’ehiji wati hama ihide doŋe attati inyi lufaji to homomite hosi. ³Attati aboŋojin honyi bwaran bwo fe opipyahi. Obwori isi agalihini aboŋojin hun illillaye.⁴Teyya teyya oleye Mose iko Elija hul ikyanai iko Yesu. ⁵Ojo Petro jyo Yesu ojo, Hettiyanani, oyyu jihohoi iwanari ini. Eduhok hohoi akukuhyen hunihoi, obo jihoi obo jyo Mose, bwo fe obo jyo Elija. ⁶Nyo obeŋ inyi omijak ojo adi inyi aŋai nyo abaŋi isi daŋ bebe.⁷Attati edis ’tuna ette tihonia oloŋ, ette nekyana ’tuna totwa idis on ojo, “Lonyi hoŋ olo al amuno ni bebe, itayiryete jihonyi.” ⁸Teyya teyya ette isi fyalatyo ati obeŋi isi igonyuni obo atulo arari Yesu hama.⁹Ninya isuruni isi to doŋe iramak Yesu leyiyanak honyi hotobyaŋahi iramani erre hun igonyuni isi many ibuhuniere Lonyi tulo to ye. ¹⁰Ifahai isi efahi ania bwo fe ifiye isi ta ahwattek hosi awoyo hiram ono ebuhuna to ye.¹¹Ette isi ifiyo inyi, Aŋai ojori legyorok jo ottu adi Elija ahosyere? ¹²Attati inyi itarraŋ ojo, Ottu adi Elija ahode ahosyere, ihuhumaniere erre daŋ. Ati obeŋi igyoroni to Lonyi tulo jo odihu adi inyi ettigemita hun obolori bwo fe laati ihari inyi? ¹³Ati eramak ni itai ottu nya Elija bwo ihanie nya isi jihonyi ihwa awahi isi, ihwa igyoroni tenyi.¹⁴Al afwonni isi jyo leyiyanak hul omuk igonyuni isi eluluŋ wati ikoloni isi, ati itarisai egyorok ikosi. ¹⁵Ninya ligonyuni laati Yesu illillihai isi ette ŋyoron ifonyere inyi. ¹⁶Ette inyi ifiyo leyiyanak honyi, Anyo itarisati tai ikosi?¹⁷Itarraŋ obo t’eluluŋ ojo, Hettiyanani, eyaŋuno ni lonyi hoŋ jihoi, nyo owon inyi iko ajok on obeŋ’to ikyana. ¹⁸Inef ajok inyi ette bwarana inyi ifau, ette obulal ’tuna to hutuk, ette inyi itisyahina aala ette ahwan golyoro. Ekyana ni jyo leyiyanak hoi hetefuha ajok addi ati obeŋi isi oremehini fuhara. ¹⁹Itarraŋ Yesu jihosi ojo, Aii, itai aati hul obeŋ iko neruk. Many baya adi etoŋo ni ikatai? Many baya adi adik ni itai? Iyaŋunie inyi jihoŋ.²⁰Tania ette isi iyaŋuno eito jihonyi. Ninya igonyu ajok Yesu ette inyi ihanana ahwe jyo eito ette inyi kwaharo ifau ette ibalaŋatyo, attati olobulal ’tuna to hutuk. ²¹Attati Yesu ifiyo monye, Nya baya itteryo inyi aŋwai? Itarraŋ inyi ojo, Hara inyi ahito. ²²Enyyahita arryai obwarata inyi ihima bwo fe ihari jo oŋida inyi attoho, ati kuyya iremik iye itaŋida inyi, omehinie jihohoi. Tolwaha hohoi.²³Ojo Yesu jihonyi, Nyo ikuyya iye? Oremehini erre daŋ jyo atulo al iruk’to. ²⁴Teyya teyya ette monye hito ilulwo ojo, Hobu eruk ni ahode. Ofonik neruk jihoŋ. ²⁵Igonyu Yesu eluluŋ wati omuk oŋeruni ajihonyi ette inyi ifuhara ajok on orroho’to ojo, Iye ajok an ibeŋ’to ikyana bwo fe ittuho, waŋ jihonyi addi. Efak ni iye oŋida ibeŋ inyyak jiŋana itwa honyi.²⁶Attati ajok ilulwo bebe ette ihanana ahwe hun orrohoji bebe jyo eito ette ’tuna addi totwa honyi ette eito mijo ihwa atulo ol oye’to, tania ojori aati arryai aye inyi. ²⁷Attati Yesu inef inyi ta naani attati itadet inyi ahide ette itawojihina inyi.²⁸Ninya afany Yesu itwa haji ette leyiyanak honyi ifiyo inyi hama ojori, Nyo ebeŋ hohoi eremik ifuhara inyi addi? ²⁹Ette Yesu itarraŋ ojo, Oremehini ifuhara ajok ihwa ana ta amojo hama.³⁰Obusani Yesu iko leyiyanak honyi amaji ania ette cul te ehiji fau Galilea ati obeŋ inyi owak obo atulo omijak jo inyi adia. ³¹Nyo iramak inyi leyiyanak honyi ojo, Itinyyaŋani adi Lonyi tulo ihas wati, ottohori adi isi inyi ati ihalu oŋitek hunihoi ibuhu adi inyi. ³²Ati obeŋi isi itayiruni ana bwo fe abaŋi isi efiyo inyi awoyo hiram ana.³³Attati isi fanyan imiji Kapernaum bwo ojiŋak Yesu itwa haji ette ifiyo leyiyanak ojo, Anyo itarisati tai ihiji koi? ³⁴Ati odwahinie isi nyo itarisai dwo isi daŋ likoi ojo alali adi eleittok. ³⁵Tania itoŋo inyi ifau ette iloŋuna leyiyanak honyi ’tomon harrihai, ette jaran jihosi, Al awak obo ’tuna ratan eleittok ijara inyi hetera do ehalu bwo fe ehegyamani wati daŋ.³⁶Attati Yesu iduhuna eito on odiha’to attati ititoŋonia ihiji hosi ette kafuna inyi ihas honyi ette jaran jihosi, ³⁷Atulo al ifwotu’to eito on odiha’to ihwa ana ta afure hoŋ, ifwotu inyi ani. Bwo fe atulo al ifwotu’to ani, obeŋ inyi ifwotu ani hama ati ifwotu inyi lya al ifahu’to ani.³⁸Ojo Yoane jihonyi, Hettiyanani, egonyu dwo hohoi obo atulo al ifuha’to ajohin hun orrohoji’to ta afure hoi ette hohoi itik inyi nyo obeŋ inyi ara olohoi. ³⁹Attati Yesu itarraŋ jihonyi, Hetihoto inyi, nyo obeŋ obo oremik ihanio edwariti ta afure hoŋ bwo ihalu ikyana erre hun orrohoji’to toni.⁴⁰Ati ol obeŋ’to ara amyotononi ara inyi amotte hohoi. ⁴¹Ahode eramak ni itai jo atulo al isyo’to jihatai akos ematit hari nyo irata tai ahulo Kristo obeŋ adi edumit honyi olitohi.⁴²Kuyya itipalyo obo atulo eito an iruk’to jihoŋ, osiru ifitani amorwo on obolo’to imurut honyi ette irwoŋonia ihari. ⁴³Kuyya itipal aani hoi iye liyyata, oŋotoi addi. Oyyu adi jihoi ijiŋaniere lisu iko aani abotye, agalik aleten hoi iko ahas arrihai ihima on obeŋ’to odunya. ⁴⁴Limaji on obyaŋarik ahuru oyerik bwo fe eema obeŋ odunya.⁴⁵Kuyya itipal eju hoi iye liyyata, oŋutoi addi. Oyyu adi jihoi ijiŋaniere lisu iko eju abotye, agalik aleten hoi ihima iko ejek arrihai. ⁴⁶Limaji on obyaŋarik ahuru oyerik bwo fe eema obeŋ odunya.⁴⁷Kuyya itipal onyek hoi iye liyyata, ogolotu addi. Oyyu adi jihoi ijiŋaniere ilobye Hollum iko onyek abotye agalik irwoŋoniere iye lihima iko oŋite arrihai. ⁴⁸Limaji on obyaŋarik ahuru oyerik bwo fe eema obeŋ odunya.⁴⁹Okemye adi aati daŋ te eema. ⁵⁰Oyyu amile ati kuyya ilik amile, aŋai adi inyyak iye eŋolito honyi? Iwanata iko amile. Itoŋoti iko laati omuk te elik tajya.

¹Labusak Yesu amaji nya allaŋ inyi jyo aŋati tole ono Yordano attati jiŋana lifau Yudea. Attati eluluŋ wati inyyak irwaŋanio ikonyi ette ikolonia inyi. Attati inyi itteryo ittiyenio isi ihwa motye motye. ²Ette bwo fe omuk Farisei fwanna jihonyi ikemyere inyi ette ifiyo inyi ojori, Oyyu jyo atulo al apyahai iko ŋorwoi honyi? ³Ette inyi itarraŋ ojo, Ifak nya Mose jihatai aŋai? ⁴Itarraŋi isi, Ifak nya Mose ojo, Atulo al awak’to apyaha iko ŋorwoi honyi oŋida isyo awaraga ono apyaha jihonyi bwo fe ette busana inyi.⁵Ati ojo Yesu, Isyo Mose itai nefahi ania nyo odwari atajya hatai, ⁶ati t’etteri ’yeti oyyeu Hollum alle iko aŋotte.⁷Ta eram ana obusak adi alle monyonyi iko honyonyi ette manya iko ŋorwoi honyi, ⁸attati isi arrihai ratan ihwa ahwan abotye. Ihwania obeŋi isi inyyahi rahan arrihai ati arai isi ihwa ahwan abotye. ⁹Hul inosok Hollum arabotye helaha obo itapek.¹⁰Lafanyi isi itwa haji inyyahi leyiyanak ifiyo Yesu ta neram ana. ¹¹Bwo inyi ette jaran, Atulo ol opyahai’to iko ŋorwoi honyi ette yama obo aŋotte oroto inyi roto. ¹²Bwo fe al apyahai aŋotte iko habi honyi bwo ette obo atulo yama inyi, oroto aŋotte ania roto.Amuno Yesu¹³Ihwania iyaŋunie aati aduri hun odihara’to jyo Yesu oŋida Yesu ottiryo isi ati itihi leyiyanak isi. ¹⁴Iloŋojita Yesu al igonyu inyi leyiyanak honyi ihanie ihwo nya, ette jaran, Obusana aduri ofwonni jihoŋ. Hetihoto isi nyo ara Hollum a Hobu hosi.¹⁵Ahode eramak ni itai jojo ol obeŋ’to iruk Hollum irari a Hobu honyi ihwa an iruhori eito on odiha’to, obeŋ adi bu inyi ojiŋak ilobye Hollum. ¹⁶Attati inyi kafuna isi ihas honyi bwo fe iyyabak ahas honyi jihosi ababo, ette mojo jyo Hollum jo oŋida omuk erre hun orrohoji’to obeŋi ofwonni jihosi.¹⁷Ninya itteryo Yesu adaha, oŋer obo atulo many jihonyi ette rigoŋi ihosyere honyi ette ifiyo inyi ojo, Hettiyanani ol oyyu, anyo adi ehanio ni irumaniere nesu on osyo fur? ¹⁸Ojo Yesu jihonyi, Anyo iloŋo iye ani ol oyijo? Obeŋ obo oyyu arari Hollum hama. ¹⁹Imijak iye efahita: “Hettoho, hehanio erre somon, hehoholyo, henyobyo, hemumunio, itahabuye monyohoi iko honyohoi.”²⁰Ette inyi jaran jihonyi, Hettiyanani, efaha ni nefahita huna daŋ, hara ni ahito many iko ahana. ²¹Attati Yesu mijo jihonyi, ette muno inyi ette jaran jihonyi, Owon ariŋ abotye an ipwak iye. Ilo itinyyaŋak asaŋ hoi daŋ, isyara agurusi jyo alocaŋak bwo fe owoni adi ebariti hoi idou. Ihalu waŋ, ijifatye ani. ²²Tania ette inyi ijiriŋa bebe ette leten addi nyo owoni ebariti arryai jihonyi.²³Attati Yesu fyala ette jaran jyo leyiyanak honyi, Ogol bebe jyo hul owoni iko ebariti ijiŋaniere ilobye ono Hollum. ²⁴Attati leyiyanak illilliha bebe te ekyana ania. Ette Yesu inyyak mijo jihosi ette inyyak jaran jihosi, Illarak hoŋ, ogol bebe jyo hul iyihini’to ibariti hosi ijiŋaniere ilobye Hollum. ²⁵Ogol bebe jyo labarani ijiŋaniere ilobye ono Hollum agalik ajiŋana konnikonni ittulit libira.²⁶Ette isi illilliha bebe ette jaran jihonyi, Ngai ’tadi al italahuni? ²⁷Attati Yesu mijo jihosi ette jaran, Obeŋi aati oremehini italahuna ahwattek hosi ati oremik Hollum, nyo oremik inyi ihanio erre daŋ. ²⁸Attati Petro jaran jihonyi, Ebusak hohoi erre hohoi daŋ ette jifatyo iye.²⁹Ojo Yesu, Eramak ni itai ahode, atulo ol obusak’to aji honyi, illarak honyi, haniarak honyi, honyonyi, monyonyi, aduri honyi, kuyya amatta honyi ta afure hoŋ bwo fe ta asayyo hun oyiji’to, ³⁰ifwotu adi inyi erre enyyahita esiha abotye ta nesu ana. Orumak adi inyi asik iko illarak, haniarak, honyye, aduri iko amata iko nettigemita ta nesu ana, bwo fe ihalu nesu on osyo fur. ³¹Ati laati arryai huttohosyere ofwonni adi ehalu bwo huttehalu ofwoi adi ahosyere.³²Hadahai isi likoi on olo’to imiji Yerusalem attati Yesu daha tohosyere ette leyiyanak honyi illilliha bebe ati abaŋi omuk hul ijifatye’to inyi. Inyyak inyi iyaro leyiyanak honyi ’tomon harrihai aŋati ette iramana jihosi erre hun ihanie adi jihonyi. ³³Ette jaran, Imijyete, efwo hohoi Yerusalem. Isyarani adi Lonyi tulo jyo ehumak eleittaha iko egyorok, ette ŋot aye jihonyi ette isyo inyi jyo paganohyen. ³⁴Osuhotye adi isi inyi ette mita, ette bahyo inyi ette ’tohoro inyi. Ihalu oŋitek hunihoi ette inyi ibuhuna.³⁵Ette Yoane iko Yakobo lonyirok Sebedeyo fwanna jihonyi ette jaran, Hettiyanani, ewak hohoi iye ihanio jihohoi ariŋ en efiyo hohoi jihoi. ³⁶Ojo inyi jihosi, Anyo riŋ iwahata tai ehanio ni jihatai? ³⁷Itarraŋi isi jihonyi, Aharak hohoi itoŋori ilobye hoi, obo ihani iŋet hoi bwo fe obo ihani ihorroŋ hoi.³⁸Ojo Yesu jo, Ibyaŋata tai imijana anyo ifiyete tai. Iremehina tai mata ta akosb an amatari adi ni? Kuyya iremehina tai ifwotuna batisimoc ihwa an efwotu ni? ³⁹Itarraŋi isi jihonyi, Eremik hohoi. Ette Yesu jaran, Imatati adi itai ta akos an amatari ni. Ibatisye adi bwo fe itai ta batisimo an efwotu ni. ⁴⁰Ati itoŋori oŋyatai hoŋ iko arraŋai hoŋ obeŋ ara onoŋ isyoryere. Ihuhumak Hollum amaji ania to hya hul onyimu inyi.''⁴¹Itaniŋuni leyiyanak ’tomon nekyana ana ette isi itteryo iloŋojita jyo Yakobo iko Yoane. ⁴²Tania ette Yesu iloŋuna isi jihonyi ette jaran, Imijana tai jo ilettohorik hobwok hulo paganohyen laati hosi, bwo fe eleittaha hosi ittigemye isi.⁴³Ati obeŋ ara ihwania jihatai. Al awak obo alatai ’tuna ratan eleittok ijara hetera do ahegyamani hatai. ⁴⁴Al awak’to ratan a hobu ijara hetera do apit jyo laati daŋ. ⁴⁵Ihwa ottu Lonyi tulo, obeŋ inyi ottu oŋida aati igyamai jihonyi ati ottu inyi igyamari jyo aati bwo fe isyo inyi nesu honyi idumari ta laati arryai.⁴⁶Attati Yesu iko leyiyanak honyi bwo eluluŋ wati fanyan imiji Yeriko. Obusani isi Yeriko, ette isi igonyuna oloŋodo otileŋita iger ikoi, afure honyi Bartimeo lonyi Timayo. ⁴⁷Itayiru inyi jo ottu Yesu olo Nasaret ette iloŋo ojo, Yesu lonyi Davide, omehinie jihoŋ. ⁴⁸Itterye aati arryai isiŋyo inyi ette iramana inyi hotodwai, ati arasa inyi iloŋo bebe ojo, Lonyi Davide, omehinie jihoŋ.⁴⁹Attati Yesu wotya ette iloŋo inyi ojo, Iramana hetettu. Tania ette isi iloŋo oloŋodo ojo, Hebaŋ, itagolo ataji. Otte, iloŋo inyi iye. ⁵⁰Attati inyi busana aboŋo honyi ette lwara te ejek honyi ette ’tuna jyo Yesu.⁵¹Attati Yesu ifiyo inyi, Anyo iwak iye oŋida ani ehanio jihoi? Attati oloŋodo itarraŋ ojo, Hettiyanani ol oyyu, awak ni mijo. ⁵²Ojo Yesu jihonyi, Ilo, itaŋida eruk hoi iye. Teyya teyya amijo inyi ette itteryo ijifaro Yesu.

¹Lafanyi isi imisik Betfaje iko Betania hutteger doŋe Oliveto, ilyaha Yerusalem attati Yesu ifahina leyiyanak honyi arrihai, ²ette iramana isi, Ifwatta limiji on owon ihosyere hatai, inyurana adi itai nobo aŋarri sigirya dia an ifitani, on hobeŋ nya obo atulo itoŋo ihorwoŋ honyi. Ohouniete inyi, iyauniete dini. ³Al ifiyo obo itai ojo, Anyo ihaniete tai?, itarraŋata ojo, Hobu awak inyi, ati inyyahuno adi inyi jihoi kwak.⁴Tania ette isi fwatan ette rumana aŋarri sigirya iryatani likoi iger ikat haji ette isi houna inyi. ⁵Attati laati hul owoni’to dia ifiyo isi ojori, Anyo ihoyete tai asigirya ania? ⁶Ette isi itarraŋ ihwa iramak dwo Yesu isi ette laati hya ŋatana isi ofwoi.⁷Attati isi iyaŋuno aŋarri sigirya jyo Yesu attati isi fyatana aboŋojin ihorwoŋ honyi ette Yesu itoŋo dia. ⁸Attati laati arryai fyatana aboŋojin hosi ikoi bwo omuk ofyatani atanata ’yanio hun oyefuni isi ’totwa matta. ⁹Hul ofwoi’to ahosyere honyi bwo fe hul ofwonni’to tehalu ojori, Itahabuyete Hollum. Hotomunoi lya ol ottu’to ta afure ono Hobu. ¹⁰Hotomunoi olobye on ottu’to ono Hobu hohoi Davide. Ijara etahabuyo hatawana idou.¹¹Ojiŋak Yesu Yerusalem ette jiŋana ihaji imojit eneittok, ette mijo erre dia. Ihalu ette inyi leten imiji Betania iko leyiyanak honyi ’tomon harrihai. ¹²Nya motye acaharai isi to Betania Yerusalem ette Yesu niama.¹³Igonyu inyi aŋaboli alamarai iko abene arryai ette inyi leten mijo kuyya arumak adi inyi omuk aŋer dia. Lafany inyi iwoyo honyi ette rumana abene ijai nyo obyaŋara ayafa nya on oŋerihiniere aŋaboli. ¹⁴Ette Yesu jaran jihonyi, Ijara obo hotobyaŋa inyyak ŋiyo omuk aŋer jihoi tulaŋ. Ette leyiyanak honyi itayiruna nekyana ania.¹⁵Ette isi fanyan Yerusalem ette inyi leten ihaji imojit eneittok. Itteryo inyi ifuhara laati hul itinyyaŋai’to iko hul inyyaŋai’to asaŋ hosi ihaji ania. Ette inyi sulara ateremejahyen huno atobok gurusi kwalalaŋ, iko akurusi huno etinyyaŋak wolosin. ¹⁶Ati obeŋ inyi iruk obo iyaro omuk erre tehiji haji.¹⁷Ette inyi ittiyenio laati ojo, Igyoroni ahode jo, “Ifurani adi aji hoŋ ahaji imojit ono aati daŋ, ati iloitoto tai inyi ahinom hahalak.” ¹⁸Itayiruni ehumak eleittaha iko egyorok inyi ikyana ette isi ’tifya ekoi ittohori inyi ati abaŋi isi inyi nyo illillihai laati daŋ ta nettiyenita honyi. ¹⁹Ninya ara akikai ette isi fwatan addi to miji ania.²⁰Agalarai isi ta amotye ette igonyuna aŋaboli inor many jyo nadde honyi. ²¹Ogotyere Petro erre hoŋole ette jaran jyo Yesu, Hettiyanani imijye, ayyani oŋole ipitak iye aye.²²Itarraŋ Yesu jihosi ojo, Iruhoto jyo Hollum. ²³Ahode ajo ni jihatai atulo ol ojo’to jyo adoŋe ania, Otte, irwoŋok ahwan hoi itwa hari, bwo fe obeŋ adi ikuyya ta ataji honyi ati iruk inyi ihwa ikyana inyi, ihanie adi.²⁴Tania eramak ni itai jo, erre hun ifiyete tai ta amojo bwo iruhoto tai jo ifwotuna adi itai, ifwotuna adi. ²⁵Al imojoti tai ati iwanata tai iko obo eram jyo obo atulo, obusana inyi, tania monyatai ette dou obusak adi eyyata hatai. ²⁶Al ibyaŋata tai ibusana obo atulo obeŋ adi monyatai ette dou obusak eyyata hatai.²⁷Ette isi inyyak caharo Yerusalem. Hadaha Yesu ihaji imojit eneittok ofwonni ehumak eleittaha iko egyorok iko amarwak jihonyi. ²⁸Ette isi ifiyo inyi ojori, Ta anani elaballok ihanio iye erre huna? Ŋai isyo jihoi elaballok ihaniere isi?²⁹Ojo Yesu jihosi, Efiyo ni itai obo nefi, kuyya itarraŋata tai jihoŋ eramak adi ni itai ta anani elaballok an ehanio ni erre huna. ³⁰Ottu elaballok ono Yoane an ibatisyere inyi laati tai? Jyo Hollum kuyya to wati?³¹Attati isi itarisa ta ahwattek hosi ojori, Al ejo hohoi, Ottu elaballok honyi jyo Hollum, ojo adi inyi, Nyo ibyaŋata tai iruhoto inyi? ³²Ati al ejo hohoi, Ottu elaballok honyi to wati, ebaŋ hohoi aati nyo iruhi aati daŋ ara Yoane aheyani sayyo. ³³Tania itarraŋi isi jyo Yesu ojori, Ebeŋ hohoi emijak. Attati Yesu jaran jihosi, Ani bwo fe abeŋ ni eramak itai ta anani elaballok en ehanio ni erre huna.

¹Attati Yesu itteryo ikyana jihosi to omuk arryamarita. Idulak nya obo atulo ajalaŋi imana honyi attati ikolonia amariŋ ette bohyo ewure imocere aari haŋer ajalaŋi, attati bwahina olobele dia. Oduma inyi omuk laati icyari imana honyi, ette inyi leten jyo obo afau. ²Al attu ayafa on odyarik aati aŋer ajalaŋi, ette lamonye mana ifahina apit jyo ecyak mana imojuniere omuk aŋer ajalaŋi. ³Ette isi inef inyi ette bahyo inyi ette ifuhara inyi ahania.⁴Attati inyi inyyak ifahina obo apit jihosi ette isi bak lya ahou ette ihanio omuk erre hun orrohoji jihonyi. ⁵Ette lamonye ifahina obo ette isi ’tohoro inyi. Ette inyi ifahina omuk arryai ette isi bahyo omuk, bwo omuk ottohori.⁶Arasa jihonyi lonyi honyi ol omuno inyi bebe ifahiniere. Ette inyi ifahina inyi ehalu jihosi nyo igigilo inyi jo abaŋanie adi isi lonyi hoŋ. ⁷Ati ojori ecyak mana hya ta ahwattek hosi, Arutani al attu lya. Hattohoro inyi oŋida hohoi erutak erre honyi.⁸Tania ette isi inefuna inyi ette ’tohoro inyi attati irwoŋoro ahwan honyi to mana addi. ⁹Anyo adi ihanio lamonye mana? Ottu adi inyi ’tohoro ecyak hulya attati isyarana amana jyo omuk.¹⁰Ibyaŋata tai iheniete igyerita? Ojo inyi, “Amorwod inya ihari aduhok Ottu ratan moi etteri lohitir. ¹¹Ara ana ariŋ an ihanio Hobu, En ellilliha hohoi bebe.” ¹²Awahi laati hul itayiruni’to nekyanita iniafatyo Yesu ati abaŋi isi eluluŋ wati nyo omijani isi ahode ikyana inyi arryamara ana tesi. Tania ette isi busana inyi ette fwatan ilet.¹³Ette isi ifahina omuk Farisei iko Erodiahyen jihonyi inyobyere inyi to omuk ekyanita. ¹⁴Tania al ofwonni isi ette isi jaran, Hettiyanani, emijak hohoi jo ibeŋ iye igesem bwo fe ibeŋ iye ibaŋ obo atulo bwo fe ibeŋ iye iwak itamuno obo atulo agalik obo. Ati ittiyenio iye nekoi ono Hollum ahode. Oyyu idumari amusuru jyo hobu Cesare kuyya obeŋ? ¹⁵Eduma adi hohoi kuyya obeŋ? Ati omijak inyi enyobita hosi, ette jaran, Ikemyete tai ani nyo? Iyaŋuniete jihoŋ arobia, ami ni inyi.¹⁶Ette isi iyaŋuno. Ette inyi jaran, Anaŋai arrijori ana iko nafure ana? Itarraŋi isi, Huno Cesare. ¹⁷Ojo Yesu, Isyatta jyo Cesare erre Cesare bwo fe jyo Hollum erre huno Hollum. Illillihai isi jihonyi.¹⁸Ofwonni omuk Saducehyen jihonyi, isi aati hul ojori obeŋ nebuhuna ette isi ifiyo inyi ojori, ¹⁹Hettiyanani, ittiyenio hohoi Mose ojo, “Kuyya oye illa lobo bwo idyaharu ŋorwoi on obeŋ hito jihonyi oŋida illanyi ojuŋori aŋotte isiuniere aduri te illanyi.”²⁰Owoni nya illarak hattarik. Oyemu oloŋeu aŋotte ette ye obeŋi duri. ²¹Bwo fe etarrihi ayama inyi ette ye obeŋi duri. Ihanio etahunihi bwo fe ihwo nya. ²²Isi daŋ hattarik owoni ikonyi. Oyei daŋ, obeŋi duri. Bwo lihalu hosi oye aŋotte. ²³Al ibuhuni aati, ottu adi inyi itoŋo ŋorwoi ŋai? Nyo isi daŋ hattarik ojuŋorik inyi.²⁴Itarraŋ Yesu jihosi, Ipalata tai nyo ibyaŋata tai imijana egyerita kuyya bu nadwaran ono Hollum. ²⁵Al ibuhuni aati to ye obeŋi inyyahi yama ati arai adi isi ihwa anjelohyen hutte dou.²⁶Ati ta neram ono nebuhuna to ye, ibyaŋata tai iheniete ibuk ono Mose aŋati on ojo ikyana Hollum jihonyi to ’yani on owulo’to? Ojo inyi, “Ani Hollum olo Abramo, Hollum olo Isako bwo fe olo Yakobo.” ²⁷Obyaŋara inyi Hollum olo layak ati ara inyi olo leswok nyo dwadi oyei isi, isui isi. Ipalata tai bebe.²⁸Ottu obo olo egyorok al itaniŋu’to isi itarisai. Attati inyi itaniŋuna jo itarraŋ Yesu jihosi on oyyu, tania ifiyo inyi Yesu ojo, Anani efahi on obolo’to jyo efahita daŋ? ²⁹Ati itarraŋ Yesu jihonyi, Efahi on obolo’to daŋ ana, “Itaniŋyete laati Israele, Hollum Hobu hohoi inyi Hollum abotye. ³⁰Oŋida imunoti Hollum Hobu hatai ta atajya hatai daŋ, ta nesu hatai daŋ, te egigilita hatai daŋ, iko ta nagolon hatai daŋ.” Efahi on obolo’to ana. ³¹Efahi etarrihi ana, “Omunoti hutto lonyihari hatai ihwa ahwattek hatai.” Obeŋ obo efahi agalik huna.³²Ojo olo egyorok jihonyi, Hettiyanani, itarraŋ iye on oyyu, ijo iye ahode jo Hollum inyi abotye, bwo fe obeŋ obo arari inyi. ³³Oyyu bwo fe imunori inyi ta atajya hohoi daŋ, te egigilita hohoi daŋ, iko ta agolon hohoi daŋ, bwo fe imunori hutto onyihari ihwa ahwattek hohoi. Oyiji erre huna agalihini ehuhumita hun isyori jyo Hollum. ³⁴Itaniŋu Yesu jo itarraŋ inyi al ilofere bwo ojo jihonyi, Ibeŋ iye ilama to lobye ono Hollum. Ihalu ana abaŋi isi daŋ ifiyere inyi omuk erre.³⁵Hettiyenio Yesu ihaji imojit eneittok ifiyo inyi aati ojo, Aŋai ojori legyorok ara Kristo lonyi Davide? ³⁶Ikyana Davide al ifut iko Oloyiri ol Olibo ojo, “Ojo Hobu Hollum jyo Hobu hoŋ, Itoŋoi oŋyatai hoŋ, Many ehananiere ni amyorok hoi ebalori hejek hoi.” ³⁷Iloŋo Davide inyi ta ahwan honyi Hobu, tania aŋai ara inyi o lonyi honyi? Ihwania omunoi eluluŋ wati itaniŋyo nekyana Yesu.³⁸Hettiyenio inyi, ette inyi jaran, Ihumata mijo egyorok hul adahai’to ta aboŋojin hun ohodori’to, awahi isi laati hutto suk ifonyai isi ta abaŋi. ³⁹Bwo fe awahi isi itoŋori jyo amasik huno etahabuyo ihaji imojit. Awahi isi amasik hun oyiji’to bebe itoŋori al oŋiye isi akarama. ⁴⁰Ohoruni isi asaŋ to hasik obiloŋi ati omwanani isi arrohojita hosi te emojiti hun obolori’to. Ifwotuni adi isi abahyo on obolo bebe.⁴¹Itoŋo Yesu ifau ihosyere senuk imojit gurusi imijyere aati hul ifihye agurusi hosi itwa senuk imojit gurusi. Bwo fe abarak arryai isyori agurusi hun olwaji. ⁴²Ati ottu elocaŋ ihidahi ette itadohina atarifa itwa senuk.⁴³Iloŋo Yesu leyiyanak honyi ette jaran jihosi, Ahode ajo ni jihatai jo obolo esyoryo elocaŋ ihidahi ana agalik daŋ hul ifihani’to agurusi hosi itwa senuk. ⁴⁴Nyo isyori isi daŋ t’ebariti hosi ati t’elocaŋ honyi isyarak inyi daŋ hun owoni’to jihonyi.

¹Ninya labusak Yesu aji imojit eneittok ojo obo olo leyiyanak honyi jihonyi, Imijye Hettiyanani, obolori amorwoi huna bwo fe ilamani asik huna. ²Ojo Yesu jihonyi, Igonyu iye asik hun obolori’to huna? Obeŋ adi obo amorwo arasa ihorwoŋ obo. Itatturi adi isi daŋ ifau.³Hetoŋo inyi idoŋe Oliveto an owon ihosyere haji imojit eneittok, ofwonni Petro, Yakobo, Yoane iko Andrea, isi hama, ette isi ifiyo inyi, ⁴Iramak hohoi baya adi ihanie nerre hunia? Anyo adi etamijani an itahutak hohoi jo ihanie nerre hunia?⁵Itteryo Yesu ikyana jihosi jo, Ihumata irrirrya, helaha obo atulo itisyaba itai. ⁶Ofwonni adi laati arryai ta afure hoŋ hul ojori, Ani alya Kristo, bwo itisyabari adi isi aati arryai.⁷Al itaniŋuna tai jo owon narrem bwo fe itaniŋuna tai aati ikyanai jo errem adi hohoi, helafuhoti, nyo oŋida erre huna daŋ ofwonni ati hobeŋ esidi fau. ⁸Nyo ofwoi adi laati hutto miji obo jyo obo irryomoniere, bwo fe laati hutto lobye obo jyo obo. Ikikiro adi afau imasik hun olufaji bwo fe ottu adi ahure on obolo’to, ati arai erre huna etteri ono ettigemita hun obolori.⁹Ihumata ahwattek hatai, iyarai adi itai ilokikoi bwo fe abahye adi itai ihaji imojit. Iyaŋunie adi itai bwo fe ihosyere mandiri iko hobwok ta afure hoŋ iramaniere neruk hatai. ¹⁰Ati ihosyere esidi fau oŋida iramani asayyo hun oyiji’to jyo laati daŋ hutta fau daŋ.¹¹Al iyarai isi itai ilokikoi helafuhoti jo anyo adi ikyanati tai ati ikyanati ihwa isyori jihatai ta asaa nya ikyanari. Nyo obeŋ ara ekyana hatai ati ara ekyana ono Oloyiri ol Olibo. ¹²Isyo adi obo illanyi iyeri bwo monye lonyi honyi, bwo arrasani aduri monyye hosi naye. ¹³Oliwarik adi itai aati daŋ ta afure hoŋ ati ol odihu’to many isidi italahuni adi.¹⁴Al igonyuna tai arrohoji an itamura’to amaji on owotya jyo amaji on obyaŋari inyi owotyari, oŋida hul owoni’to Yudea ofuhoi lidoŋyok. Ijara lya al ihenio hetetaniŋu. ¹⁵Ijara lya ol owon’to lihide haji hotobyaŋa isuru ifau iduhuniere obo ariŋ ta haji honyi. ¹⁶Bwo fe ijara lya ol owon’to limana hotobyaŋa acaharu iyamari aboŋo honyi.¹⁷Orroho bebe jyo aŋorwo hun oyeduri’to iko hun itadasye’to to noŋitek hwa. ¹⁸Omojoti jo oŋida oŋitek hwa obeŋi ofwonni to oŋitek hacoro. ¹⁹Nyo to noŋitek hwa owoni adi ettigemita hun obolori hun agalihini ettigemita daŋ t’etteri ’yeuna fau many iko ahana. Ahode obeŋi adi omuk ettigemita agalihini isi. ²⁰Kuyya obeŋ dwo Hobu ihanak oŋitek hunia hun omutari obeŋ dwo tulo italahuno, ati ihanani adi isi hun omutari nyo to hya hul onyimuni.²¹To oŋitek hunia al ojo adi obo jihatai, Imijyete Kristo olo, kuyya bu ojo, Kristo lya, heruhoto. ²²Nyo odyotoi adi Kristohyen lenyabak iko ebwanak lenyabak hul ihanie adi netamijanita hun obolori iko nedwariti ikemyerek hul onyimuni itisyabari isi. ²³Ihumata ’rirrya, eramak ni itai erre huna daŋ hobeŋi isi ofwonni.²⁴Ihalu ettigemita huno noŋitek hunia, oye adi oloŋ bwo fe nayafa ette ilak faŋan. ²⁵Ottoi bu elelyefi douna t’edou, bwo fe ikikiroi adi negoliti hutte dou. ²⁶Attati laati igonyuna adi Lonyi tulo, al isuru t’edou lihide idisi iko nadwaran bwo nakwatan on obolo. ²⁷Ifak adi inyi anjelohyen hotottubaniehe lonyimot honyi hutto ŋaco aŋwan huno oyyami hutta fau daŋ.²⁸Omijana awoyo hiram to ŋaboli. Al ofwonni atanata hony janan bwo fe oyisuni abene, imijana tai jo ilyaha atahas. ²⁹Ihwania bu al igonyuna adi itai nerre huna daŋ idwoŋi, omijana jo ilyaha attuna honyi.³⁰Ahode ahode ajo ni jihatai jo obeŋi adi nelahaji ana oyei many ihanierek erre huna daŋ. ³¹Nyo obyaŋarani adi nedou iko nafau ati obeŋi adi nekyanita hoŋ olitohini ’tuŋ. ³²Ati to oloŋ ania iko asaa on ottuniere inyi obeŋ obo omijak, dwadi bu anjelohyen hutte dou iko Lonyi Hollum, obeŋ obo omijak arari Monye hama omijak.³³Ihumata mijo, ihumata ’ra. Ibyaŋata tai imijana baya adi ottu inyi. ³⁴Ara ihwa atulo ol obusak ahaŋ honyi bwo addaddaharu, ati ahosyere isyo inyi jyo legyamak honyi egyama ababo ette inyi iramana errirryani ijara omijo.³⁵Tania ihumata mijo nyo ibyaŋata tai imijana baya adi ottu eleittok hatai. Kuyya ottu adi inyi ta akikai, kuyya bu ta attari, kuyya ottu inyi ilok ohohoro, kuyya bu ta amotye. ³⁶Ihumata ŋadi ilunyu inyi lunyuna bwo orumak itai ijototi. ³⁷Erre hun ekyana ni jihatai ekyana ni jyo aati daŋ, ihumata mijo.

¹Ihwania al allaŋi oŋitek arrihai ottu neyom an ifurani Allaŋan ono Anjelo bwo fe neyom on oŋiyerek isi emune on obeŋi bula. Attati ehumak eleittaha iko legyorok itteryo attifya aŋai inefuni Yesu ta nenyobyo ittohori. ²Ojori isi obeŋ oyyu inefuni inyi ta neyom eneittok ŋadi laati iwuwoŋitai bebe.³Owon Yesu imiji Betania ihaji Simone atulo ’tallulu. Hoŋiye isi ette aŋotte ’tuna iko akarajaja on owon eyali itwa on ogol enyyaŋa honyi bebe. Ette inyi bor akarajaja ette juhonia eyali ihou Yesu pul, pul. ⁴Ati ikyanai omuk atomonok hul owoni’to dia te eloŋojita ojori, Nyo ijuhoni eyali ana asai? ⁵Oremik arya ana itinyyaŋaniere ta arobia esiha hunihoi bwo agurusi olwahyerek alocaŋak. Ette isi iŋuŋunita jihonyi.⁶Ati ojo Yesu, Obusana inyi. Nyo ittigemyete tai inyi? Ihanio inyi ahode ariŋ on oyyu’to jihoŋ. ⁷Nyo iwanata tai iko alocaŋak oŋitek daŋ bwo fe iremehina tai itahutana isi amehino al iwahata tai, ati abeŋ adi ni etoŋo ikatai fur. ⁸Ihanio aŋotte ania ihwa oremik inyi bwo fe ijuhok inyi neyali ana ihwan hoŋ ihuhumaniere ani ta anuhana. ⁹Ahode ajo ni jihatai. Imasik daŋ hun ittittoyerek asayyo hun oyiji’to huna iramani adi bu odwo hiram an ihanio aŋotte ana itagiluniere inyi.¹⁰Ette Yuda Iskariote lobo olo ’tomon harrihai leten jyo ehumak eleittaha itinyyaŋaniere Yesu jihosi. ¹¹Omunoi isi al itaniŋuni isi nekyana ana bwo fe ocoroni jihonyi aduma. To noloŋ nya ottifyatyo Yuda amaji an isyoryere inyi Yesu jihosi.¹²To oloŋ etteri ono neyom an oŋiye isi emune on obeŋi bula, inyi oloŋ ono ettohit ker ono neyom, ifiye leyiyanak inyi ojo, Anani maji an iwak iye hohoi ehuhumyo teye iŋiyere ta neyom ono Allaŋan Anjelo? ¹³Attati inyi ifahina omuk arrihai hulo leyiyanak honyi ette iramana isi, Ifwatta imiji. Irumana adi itai atulo al iwwahatyo atobok hari. ¹⁴Ijifati inyi many jyo aji an alari inyi jiŋaniere. Ijatta jyo amonye haji jo, Ojo ettiyanani, Tani aji tamonok oŋida ani aŋiyere ta neyom iko leyiyanak hoŋ?¹⁵Itahutak adi inyi itai aji an alat iko nerre daŋ huno neyomita bwo ihuhumana aŋiyo tohohoi. ¹⁶Tania ofwoi leyiyanak addi. Lafanyi isi imiji orumani isi erre daŋ ihwa iramak dwo Yesu isi. Tania ihuhumani isi aŋiyo ta neyom ono Allaŋan Anjelo.¹⁷Ninya ara attari ottu Yesu iko leyiyanak honyi ’tomon harrihai. ¹⁸Hoŋiye isi ojo Yesu, Ahode ahode eramak ni itai jo obo alatai adi itinyyaŋak nani. Inyi alya el eŋiyo’to ikoŋ. ¹⁹Tania itterye isi ijiriŋa ette isi daŋ ababo ifiyo inyi ojori, Ani adi alya?²⁰Itarraŋ Yesu jihosi ojo, Inyi olo ’tomon harrihai. Inyi alya el eduto’to ikoŋ arrany abotye. ²¹Oye adi Lonyi tulo ihwa igyoroni nya tenyi. Orroho ati jyo atulo lya bebe al itinyyaŋa’to Lonyi tulo. Obeŋi dwo isiuni inyi oyyu dwo jihonyi.²²Hoŋiye isi iduhu Yesu emune ette jaran humo jyo Hollum ette beny, bwo fe ette isyo jihosi ojo, Hibetina, ara ana ihwa ahwan hoŋ. ²³Ette inyi iduhuna akos ette jaran humo jyo Hollum ette isyo jihosi, ette isi daŋ mat tenyi. ²⁴Bwo inyi ojo jihosi, Ara ana ihwa nooto hoŋ on owouno’to addi ta aati hul olwaji. Itagol nooto hoŋ ecorit aŋejuk. ²⁵Ahode ajo ni jihatai, abeŋ adi ni enyyak mat aari ajalaŋi many iholoŋ an amatari adi ni aari ajalaŋi aŋejuho ilobye ono Hollum.²⁶Tania idoloi isi afure itahabuyere Hollum, ette isi fwatan many idoŋe Oliveto. ²⁷Ojo Yesu jihosi, Ibaŋata adi itai daŋ te eram hoŋ nyo igyoroni jo, “Ojo Hollum jo, Attoho adi ni leyyahani bwo isarrahini adi akyoro daŋ.”²⁸Ati ihalu ebuhuna hoŋ alo adi ni Galilea ahosyere hatai. ²⁹Itarraŋ Petro jihonyi, Ara dwo bu ofuhoi hulo daŋ ta neram hoi abeŋ adi ni afuho ’tuŋ.³⁰Ojo Yesu jihonyi, Eramak ni iye ahode jo ahana ta arwe ana, hobeŋ ahohoro ilok enyyahita arrihai iha adi iye ani eharita hunihoi. ³¹Ati ittuŋo Petro bebe ojo, Dwadi bu ottohori nani ikoye abeŋ adi ni eha iye ’tuŋ. Ikyanai isi daŋ ihwo nya.³²Attati isi fwatan jyo amaji an ifurani Jetsemani, ette Yesu jaran jyo leyiyanak honyi ojo, Itoŋoti do, hamojo ni. ³³Tania iyaro inyi Petro, Yakobo iko Yoane. Itteryo Yesu ijiriŋa bebe bwo fe ataji honyi odyaha. ³⁴Ette inyi jaran jihosi, Ijiriŋa ataji hoŋ bebe, ajo ni aye. Owotyati dini, bwo fe omijyete.³⁵Attati inyi ihut alamarai kai ette ruboho ifau ette mojo, Al oremik ijara asaa ono adyaha allaŋ jihoŋ. ³⁶Ojo inyi, Monyoŋ iremik iye ihanio erre daŋ, iyai akose ana addi jihoŋ. Ati obeŋ ara ihwa ani awak ara ihwa iwak iye.³⁷Tania ottu inyi rumana leyiyanak honyi ojotoi ette jaran jyo Petro ojo, Simone, ijoto iye? Ittallik iye mijo ta asaa abotye? ³⁸Itai daŋ imijyete bwo omojoti jo oŋida itai ibyaŋata iruhoto nesusuyo. Ogol ataji ati ofyaha ahwan. ³⁹Tania inyyak Yesu caharu ette idasyo emojiti hodwo omojori inyi.⁴⁰Inyyak Yesu cohuno jihosi, onyurak isi daŋ ojotoroi nyo ijoŋitai isi bebe. Obeŋi isi omijani anyo adi ojori isi jihonyi. ⁴¹Ottu inyi edasi etahunihi ette jaran jihosi, Herasati tai joto bwo fe heyiryata tai? Aremik, attu asaa. Imijyete, itinyyaŋani Lonyi tulo ihas heyyak. ⁴²Ottena, hafata. Imijyete, itinyyaŋani hoŋ al attu lya.⁴³Hekyana inyi, ottu Yuda lobo olo ’tomon harrihai iko eluluŋ wati arryai iko afyara bwo nelluhi. Isi laati hul ifahini ehumak eleittaha, egyorok, iko lamarwak miji. ⁴⁴Letinyyaŋani Yesu iramak eluluŋ wati netamijani ojo, Al ajur ni omom honyi, inyi lya, inefuna inyi bwo fe iyati inyi ati hebabahati inyi. ⁴⁵Tania ihutok fe Yuda jyo Yesu kwak ette jaran, Hettiyanani, ette jur omom honyi. ⁴⁶Teyya ette laati inefuna inyi ’tid ette iyaro.⁴⁷Ati abotye jyo hul owoni’to iko Yesu osutu ademi honyi on obolo to sohobo ette yef lobo lapit olo ehumani ol obolo’to ette isaluna neyyok honyi. ⁴⁸Ikyana Yesu jihosi ojo, Ifwanna tai iko nafyara bwo nelluhi inefuniere ani ihwa olohoho? ⁴⁹Bwo oŋitek daŋ awon nya ni ikatai ihaji imojit eneittok ittiyeniere, bwo itai ibyaŋata inefuna ani. Ihanie nerre huna daŋ itasiruniere egyerita. ⁵⁰Teyya teyya obusarai leyiyanak daŋ inyi, ette fuho.⁵¹Ijifaro obo eito horwoŋ inyi al iyyafatyo aboŋo abotye an alat ihwan honyi ette laati inefuna inyi. ⁵²Ati obusak inyi aboŋo ette fuho aŋaturoi.⁵³Orihoroi isi Yesu jyo ehumani ol obolo’to bwo ottubanie ehumak eleittaha iko egyorok bwo lamarwak miji dia. ⁵⁴Ijifatyo fe Petro Yesu alamarai, many lihiloŋoni haji ono ehumani ol obolo’to. Itoŋo inyi dia iko oseŋer osujai eema.⁵⁵Ehumak eleittaha iko lewwahak daŋ ottittifyarai bebe lomuk hul arrasani’to Yesu nobo neram on oŋocerek isi naye jihonyi ati obeŋi isi orumani obo. ⁵⁶Ofwonni aati arryai hul ikyanai nerre nerrositi ati ogesemi isi.⁵⁷Owotyai omuk irrosyere inyi ojori, ⁵⁸Etaniŋu nya hohoi inyi ojo, Etattur adi ni aji imojit eneittok ana on oduhoni ta ahas, ati ihalu oŋitek hunihoi aduk adi ni obo on obeŋi oduhoni ta ahas. ⁵⁹Ara bu nerrositi hosi obeŋi orryamarai.⁶⁰Tania odyoto ehumani ol obolo’to t’ehiji hosi ette ifiyo Yesu ojo, Ibeŋ iye itarraŋ errositi hosi hun arrasani isi iye? ⁶¹Ati odwahino Yesu, obeŋ itarraŋ. Inyyak ehumani ol obolo’to ifiyo ojo, Iye Kristo Lonyi Hollum? ⁶²Itarraŋ Yesu ojo, Afe, ani alya, bwo igonyuna adi itai Lonyi tulo al itoŋo ihani iŋet ono Adwarani bwo fe igonyuna adi itai inyi al attu inyi ihide idisi huno edou.⁶³Tania ette ehumani ol obolo’to gwas aboŋo honyi ette ŋiŋanya ojo, Anyo nyi ettifya hohoi etamijanak omuk? ⁶⁴Hetehata bu itai itaniŋuna agesemita honyi. Igigiloti tai anyo jihonyi? Ette isi daŋ itarraŋ ojori, Osiru naye jihonyi. ⁶⁵Itterye omuk imimico amilak jihonyi bwo fe ifitani aboŋo ihoŋite honyi ette naŋyo inyi ojori, Ottenu ŋai al anaŋ’to iye? Ifwotuni oseŋer inyi ette bahyo.⁶⁶Hetoŋo Petro ihiloŋoni ottu nobo negyamani ono ehumani ol obolo’to. ⁶⁷Ette igonyuna Petro osuja eema. Omijo inyi jihonyi ette jaran, Iwon dwo bu iye iko Yesu Anasaratanani. ⁶⁸Ati orisa inyi ette jaran, Abeŋ ni amijak nanyo ikyana iye bwo fe abeŋ ni etaniŋu. Hojiŋa inyi te ekat ette ahohoro ilok.⁶⁹Inyyak egyamani igonyuna inyi bwo fe inyyak itteryo iramana aati hul itaniŋye’to ojo, Inyi alya obo olo leyiyanak. ⁷⁰Inyyak inyi risa. Ojo gaa, ette laati hul owoni’to dia jaran jyo Petro, Ahode iye lobo, nyo iye olo Galilea.⁷¹Ette inyi ipitaro ta nahwan honyi bwo fe ittuŋo ojo, ’Tuŋ, ahode, abeŋ ni amijak atulo lya al ikyanati tai. ⁷²Teyya teyya ilok ahohoro enyyahi etarrihi. Tania ogilu Petro ekyanita hodwo ikyana Yesu jihonyi ojo, Hobeŋ ahohoro ilok enyyahi etarrihi iha adi iye ani eharita hunihoi. Ette inyi ’yo bebe.

¹Ninya afaŋ amotye iwwahai ehumak eleittaha iko amarwak bwo egyorok iko lewwahak daŋ, ette isi iyaru Yesu al ifita ette isyo inyi jyo hobu Pilato. ²Ifiyo Pilato inyi ojo, Ira iye Hobu olo Yudea? Itarraŋ Yesu ojo, Ihwa ijo iye. ³Ati ehumak eleittaha arrasatai inyi erre arryai.⁴Ette Pilato ifiyo inyi, Ibeŋ iye itarraŋ hunia? Imijye, olwaji errositi arryai hun arrasani iye. ⁵Ati obeŋ bu inyi itarraŋ nobo eram, tania ette Pilato illilliha.⁶Aŋasi daŋ to neyom eneittok ohou mandir obo el efita, ihwa awahi laati. ⁷Owon nya obo atulo al ifitani ibabus al anya’to Baraba. Owon nya inyi iko omuk laati hul iŋereji’to okuma bwo ottohye aati. ⁸Tania ofwonni eluluŋ wati jyo Pilato ifiyere inyi ihaniere ihwa toloŋi.⁹Itarraŋ Pilato jihosi ojo, Iwahata tai ani ahohi Hobu olo Yudea? ¹⁰Nyo omijak fe Pilato iyaŋunie dwo isi Yesu ta nahaini. ¹¹Isusuye ehumak eleittaha aati daŋ jo oŋida Pilato ohou Baraba.¹²Itarraŋ Pilato jihosi ojo, Ehan ’tadi ni aŋai jyo Yesu al iloŋoi Hobu olo Yudea? ¹³Ati isi iwuwoŋitai ojori, Ijara isihoni inyi.¹⁴Itarraŋ Pilato ojo, Anyo ariŋ on orroho’to an ihanio inyi? Ati isi iwuwoŋitai an agalik ojori, Isihonia inyi. ¹⁵Tania awak Pilato itilihyo eluluŋ wati ette houna Baraba jihosi ette isyo Yesu al abahi isihoniere.¹⁶Attati oseŋer iyaru inyi iŋati haji ono mandir an ifurani Pratoryo, bwo fe ottubanie eluluŋ oseŋer jihonyi daŋ. ¹⁷Bwo fe ette itiyyafana inyi aboŋo en emoli bwo fe oyyiri isi egorya hikwa ette isihonia lihou honyi. ¹⁸Tania ette isi itteryo ifonyo inyi ojori, Moŋ, Hobu olo Yudea.¹⁹Abahye isi ahou honyi ta nelluhi bwo fe omitai jihonyi ette rigoŋi jihonyi. ²⁰Latuhi isi asuhotyere inyi, bwo isi ette houna nodwo boŋo ette itiyyafana aboŋojin honyi ette iyaru inyi isihoniere ikruce. ²¹Ninya ajiŋari isi orwaŋanie isi iko obo Acirenetanani al anya’to Simone ol ottu’to to mana. Inyi monye Alisandro iko Rufino. Orrosoni isi inyi hotolororo akruce an ofwoi isi isihoniere Yesu.²²Iyarai isi inyi imaji an ifurani Golgota on ojo amaji hou. ²³Ette isi itamatana inyi aari ajalaŋi hun iharrwahini iko ayyani an ifurani mura, ati iha inyi amata. ²⁴Tania isihoni isi inyi bwo fe awahi isi horyo aboŋojin honyi ette isi baha ogumar ojo ŋai adi al iyaro’to isi.²⁵Isihoni isi inyi saa hottoŋwan otto motye. ²⁶Igyoroni ihide honyi nekyana ono nerrositi honyi ojo, Hobu olo Yudea. ²⁷Isihoni bu ikonyi ahahalak arrihai, abotye etteŋet bwo fe abotye ettehorroŋ honyi. ²⁸Tania itasiruni egyerita hun ojori, “Ihyanani inyi arabotye iko leyyak.”²⁹Omorye fe adahak Yesu ette huco inyi ta afyala ojori, Iye al ijo’to etattur ni aji imojit eneittok bwo fe inyyak duhonia to noŋitek hunihoi, ³⁰itahoru bu nahwan hoi. Isuru ihwania to kruce.³¹Ihwania bu ehumak eleittaha iko legyorok osuhotye inyi ta ahwattek hosi ojori, Italahu nya inyi lomuk, ittallik ati inyi italahuna nahwan honyi. ³²Ihwania iye Kristo, Hobu olo Israele isuru to kruce, oŋida hohoi emijo iye bwo fe eruk. Hul isihoni ikrucehyen ikonyi imimorye inyi.³³To saa ’tomon harrihai many saa hunihoi iryok afau daŋ edumele ’tir ’tir. ³⁴Ninya ta asaa hunihoi ette Yesu itakwat nekyana honyi bebe ojo, “Eloi, Eloi, lama sabacani?” on ojo, “Hollum hoŋ, Hollum hoŋ, nyo ibusak iye nani?” ³⁵Itayiruni aati hul owotyai’to dia nekyana honyi ette jaran, Itaniŋyete, iloŋo inyi Elija.³⁶Oŋer bwo fe lobo olosi ette lutonia aboŋo litwa hari hun irwatiŋoi ette ihanana ihide osiholoti itamataniere inyi ette jaran, Idehi so, hamijyete, kuyya ottu adi Elija itahoruniere inyi. ³⁷Inyyak fe Yesu iloŋo on okwat bebe ette ye. ³⁸Teyya teyya ette aboŋo ono aji imojit eneittok gwasa hama aŋaco arrihai tohide many ifau.³⁹Eleittok oseŋer ol owotya dia irrirryari, igonyu inyi Yesu laye ette jaran, Ahode atulo olo, inyi Lonyi Hollum. ⁴⁰Owoni fe dia aŋorwo hun irrirryai alamarai. Ihiji hosi owoni Maria Madalena iko Salome bwo Maria honye Yakobo ol odiha’to iko Yose. ⁴¹Ijifatye aŋorwo huna Yesu to Galilea ilwahyere inyi. Ofwonni aŋorwo omuk arryai to Yerusalem bwo fe.⁴²Ara akikai ono oloŋ an ihuhumyerek isi aŋiyo ono sabato. ⁴³Ette Yosefo ’tuna to miji Arimatea. Ara inyi eleittok olo lewwahak hirre bwo fe itila inyi olobye Hollum. Ette inyi jiŋana jyo Pilato ifiyere ahwan Yesu iyari. ⁴⁴Ati illilliha Pilato ta ataji honyi ojo, Aye Yesu ahode? Ette inyi iloŋo eleittok oseŋer ifiyere inyi kuyya aye dwo Yesu.⁴⁵Al itaniŋu inyi naye ono Yesu jyo eleittok oseŋer, aŋatak inyi Yosefo iyaro ahwan honyi. ⁴⁶Tania iyauno Yosefo aboŋo on obwor ette dutuna ahwan Yesu to kruce ifau ette bubunana ta aboŋo, ette itaferehina inyi ilume an ikyafani ibak. Bwo fe ittaborok inyi namorwo on obolo ihutuk ilume. ⁴⁷Bwo Maria Madalena iko Maria honye Yose omijye amaji an itaferehinierek inyi.

¹Ninya allaŋ sabato Maria Madalena bwo fe Salome iko Maria honye Yakobo iyaŋunie neyali on oŋwo’to gir gir, iyalaniere ihwan Yesu. ²Iholoŋ etteri ono nesabit, ninya ara ataŋatye motye afwoi isi, ette fanyan ilume hetek noloŋ idwoŋ.³Ikikyanarai fe isi ojori, ngai attadi ibolok jihohoi namorwo to hutuk ilume addi? ⁴Ati al amijye isi dia ette isi igonyuna namorwo on obolo’to ania ibolohuni.⁵Ajiŋani isi ilume ette igonyuna lobo leito horwoŋ al isuga’to oŋyatai. Iyyafak inyi aboŋo on obwor aboŋ bwo fe ohodo. Ette isi baŋi bebe. ⁶Ojo ati inyi jihosi ojo, Baŋatina abaŋ. Ittifyati tai Yesu Anasaretanani linya isihoni likruce. Ibuhu dwo inyi, labeŋ tene. Imijyete namaji ania oŋole itaferehinierek inyi. ⁷Ifwatta ati, iramana Petro iko leyiyanak honyi omuk ojo, Yesu likyomoro jihatai Galilea, ittata tai igonyuna inyi teyya ihwa iramak nya inyi itai.⁸Ette isi jiŋuna alet kwak ette fuho t’elume nyo ikikiroi isi bwo fe illillihai. Ette isi ilak ikyana jyo obo atulo nyo abaŋi isi.⁹Ihwania ihalu ebuhuna Yesu ta amotye beryen ono oloŋ etabotye ono esabit, oleyo inyi ahosyere jyo Maria Madalena. Inyi aŋotte ninya ifuhari inyi ajohin hun orrohoji’to hattarik. ¹⁰Alo inyi ette iramana erre huna jyo leyiyanak honyi hul ijiriŋai bwo fe oyyoi. ¹¹Ati dwadi itaniŋuni isi jo isu Yesu bwo fe igonyu dwo Maria inyi, obeŋi isi iruhi.¹²Ihalu ana inyyak inyi leyo ol olufa jyo laati arrihai ladahai isi ihiji koi otto hidyofo. ¹³Isi bwo fe ofwoi iramaniere hul omuk, ati obeŋi isi iruhi bwo fe.¹⁴Ihalu oleyo Yesu jyo leyiyanak honyi ’tomon habotye hoŋiye isi. Ette inyi isiŋyo isi ta nabyaŋan hosi iruk iko ta nagolon tajya hosi, nyo obeŋi isi iruhi jyo hul igonyuni’to inyi libuhu inyi to ye. ¹⁵Attati inyi jaran jihosi ojo, Ifwatta lifau daŋ ittiyeniete asayyo hun oyiji’to jyo aati daŋ. ¹⁶El iruk’to bwo fe ifwotu batisimo italahuni adi, ati ol obeŋ’to iruk, oŋoti aye jihonyi.¹⁷Etamijanita hun owoni adi jyo hul iruhi’to isi huna; ta afure hoŋ ifuhatye adi isi ajohin hun orrohoji’to bwo fe ikyanai adi nekyanita hun olufaji. ¹⁸Kuyya inefuni isi amunok kuyya bu amatai neyyeri, obeŋ adi orroho jihosi, bwo fe ottironi adi isi ahas hosi jyo aŋwak ette isi ŋidari.¹⁹Latuhok Hobu Yesu nekyana honyi jyo leyiyanak ette inyi dahan lidou bwo fe itoŋo dia oŋyatai ono Hollum. ²⁰Attati isi daha limasik daŋ ittiyeniere bwo fe Hobu iŋiŋarata isi bwo itagolyo nettiyenio hosi ta netamijanita hun ihanio inyi.

¹1 Jyo illaŋ Tiopilo: Owoni egyorok arryai hul igyoroni’to erre hunya ihanie ihiji hohoi, ²bwo fe igyoroni isi erre huna ihwa iramani aati hul igonyuni’to t’etteri hul arai ahettiyanak ikyanita. ³Oyyu bwo fe jihoŋ igyoroniere erre huna jihoi, illaŋ ol oyyu, Tiopilo, nyo attifya nya ni erre huna many beryen. ⁴Egyoro ni jihoi jo oŋida iye imijak jo nerre hunya ittiyenie jihoi arai ahode.⁵To oŋitek huno Erode hobu olo Yudea owon nya obo ehumani afure honyi Sakaria otto woyo ba Abaija. Owon nya inyi iko aŋotte honyi an ara’to otto woyo ba Arone, afure honyi Elisabeta. ⁶Olibori nya isi ihosyere Hollum bwo fe adahai te efahita huno Hollum daŋ, bwo obeŋ obo epali. ⁷Ati obeŋi nya bu isi owoni iko obo leito nyo iholofi Elisabeta bwo fe imarwahi isi.⁸Ninya ofwonni oŋitek hun isyoryere Sakaria ehumita jyo Hollum ihwa ihanie oŋitek daŋ, ⁹te emohiti huno laati ehumak, ottu noloŋ on ojiŋaniere inyi ihaji imojit eneittok ono Hobu iswahiniere ottogoŋ. ¹⁰Omojoi nya eluluŋ wati hul olwaji ilet ta asaa on oswahinierek ottogoŋ.¹¹Attati anjelo olo Hobu leyo jyo Sakaria ol owotya ta aŋati iŋet ono etityek on oswahinierek ottogoŋ. ¹²Idyaŋa ataji Sakaria bebe al igonyu inyi anjelo ette baŋi bebe. ¹³Ati ojo anjelo jihonyi, Sakaria, hebaŋ, nyo itaniŋu Hollum amojo hoi, bwo fe isiu adi ŋorwoi hoi Elisabeta leito bwo ifurak adi iye inyi Yoane.¹⁴Iwon adi iye iko netahabuyo iko amuno, Bwo fe olwaji adi laati hul omunoi’to liholoŋ an isiunierek inyi. ¹⁵Ara adi inyi atulo eleittok ihomon Hobu. Obeŋ adi inyi amata abalu kuyya erre omuk hun ayafutai’to. Hesiuni inyi ifut adi inyi iko Oloyiri ol Olibo.¹⁶Iloit adi inyi laati Israele arryai jyo Hobu Hollum hosi. ¹⁷Olo adi inyi ihosyere Hollum to oloyiri iko ta adwaran ihwa ono Elija, Iloicere atajya monyye jyo onyirok hosi. Bwo fe iloit adi inyi hul omesye’to jyo nelofyoro ono abisak, Ihuhumyere atajya wati to Hobu.¹⁸Ojo Sakaria jyo anjelo, Aŋai adi amijak ni ana, nyo emarwak ni bwo fe ŋorwoi hoŋ imarwak? ¹⁹Ojo anjelo jihonyi, Ani Gabriele. Awotya ni ihosyere Hollum al ifahu’to ani ikyanari jihoi asayyo hun oyiji’to huna. ²⁰Ihwania ogoro adi ogolok hoi bwo ibeŋ adi iye ikyana many oloŋ an idwoŋorik nerre huna, nyo ibeŋ iye iruk nekyanita hoŋ hun ofwonni adi rahan ahode to nasaa nya.²¹Itilai nya aati Sakaria attati isi illilliha te elliŋya honyi ihaji imojit eneittok. ²²Ninya attu inyi alet, obeŋ inyi oremik ikyana jihosi, attati isi mijana jo igonyu inyi omuk erre ihwa arigya to haji ania. Bwo ihuhuta inyi jihosi ta ahas nyo ittallik inyi ikyana. ²³Al isid asaa an igyamari inyi acaharo inyi imiji hosi.²⁴Ihalu oŋitek huna oyedu ŋorwoi honyi Elisabeta bwo fe ta ayafajin miet idimak inyi ahwan honyi bwo fe ojo, ²⁵Ihanio Hollum erre huna bwo fe ihwania iya inyi ariri hoŋ t’ehiji wati addi.²⁶Ihalu ayafajin ille ifahu Hollum anjelo Gabriele imiji Galilea an anya Nasaret, ²⁷jyo nobo odwoti on obeŋ’to ottironie iko obo alle on ocorok alle iyamari inyi, afure lya Yosefo. Ara odwoti otto woyo ba Davide bwo anya afure honyi Maria. ²⁸Ottu anjelo jihonyi ette jaran jihonyi, Moŋ, iye an iyyu’to owon Hobu ikoye. ²⁹Ati abaŋ inyi bebe te ekyana ana ette igigilo ta awoyo hiram ono efonyo ana.³⁰Ojo anjelo jihonyi, Maria, hebaŋ, nyo iyyu iye bwo omuno Hollum iye. ³¹Iyedu adi iye ette isiuna leito bwo ifurak adi iye inyi Yesu. ³²Agalik adi inyi daŋ bwo iloŋoi adi inyi Lonyi lya al agalik’to daŋ. Isyo adi Hobu Hollum jihonyi aseger ono monyonyi Davide. ³³Ette inyi ilohobu lihaji Yakobo tulaŋ, Bwo fe obeŋ adi nesidi lobye honyi.³⁴Ojo Maria jyo anjelo, Aŋai adi oremehini erre huna, nyo obeŋ ani ’le? ³⁵Attati anjelo jaran jihonyi, Ottu adi Oloyiri ol Olibo jihoi, Bwo fe idisok adi adwaran ono Hollum iye. Tania ifurani adi eito ol olibo’to al isiu adi iye, Lonyi Hollum.³⁶Bwo fe ayedu soni hoi Elisabeta an imarwak’to leito. Iloŋoi nya inyi eholofi ati ihwania arai ayafajin honyi ille. ³⁷Nyo obeŋi omuk nerre hun ogoli’to agalihini Hollum ’tuŋ. ³⁸Attati Maria jaran jihonyi, Ani apit ono Hobu. Ijara hetehaniehe jihoŋ ihwa ikyana iye. Attati anjelo leten.³⁹To oŋitek hwa odyoto Maria ette leten kwak liŋati doŋyok jyo obo amiji lifau ono Yudea. ⁴⁰Ette jiŋana lihaji Sakaria ette ifony Elisabeta. ⁴¹Inya itaniŋu Elisabeta nefonyo Maria ette leito ididyaŋa ’totwa honyi, ette Elisabeta ifut iko Oloyiri ol Olibo.⁴²bwo fe ette inyi ikyana on okwat ojo, Hotomunohi iye lihiji ŋorwo. Hotomunohi leito otto hohe hoi. ⁴³Nyo ati idwoŋ eram ana jihoŋ jo oŋida honye Hobu hoŋ ottu jihoŋ? ⁴⁴Nyo odwo etaniŋuniere ni nefonyo hoi ette leito ottotwa hoŋ ididyaŋa ta amuno. ⁴⁵Hotomunohi nya an iruk’to jo idwoŋi adi erre hun iramak Hobu inyi ahode.⁴⁶Attati Maria jaran, Itahabuyo ataji hoŋ Hobu, ⁴⁷Bwo fe omuno oloyiri hoŋ Hollum Etalahani hoŋ.⁴⁸Nyo igonyu inyi afyahaji hwan ono egyamani honyi. Tania iloŋoi adi aati daŋ ani ahamunoni Hollum. ⁴⁹Nyo ihanio lya al agalik’to daŋ erre hun obolori’to toni, Bwo fe olibo afure honyi.⁵⁰Owon amehino honyi jyo hya hul abaŋi’to inyi Iko lonyirok lonyok hul hobeŋi isiuni. ⁵¹Itahutak inyi agolon ta naani honyi Bwo itisarrahi inyi etadarak iko egigilita hosi.⁵²Itusuru inyi hobwok hul ittaha’to imasik hosi, Bwo itadet aati hinya ofyahaji’to. ⁵³Itufutak inyi aati hul oniamai’to te erre hun oyiji’to, Bwo ifuha inyi abarak addi ahania.⁵⁴Olwak inyi egyamani honyi Israele Bwo fe obeŋ inyi itapwak ecoriti hunya acorok inyi jyo hohonyok hohoi. ⁵⁵Omehita inyi jyo Abramo Iko jyo lonyirok honyi tulaŋ.⁵⁶Arasa Maria iko Elisabeta ta ayafajin hunihoi many ocohuniere inyi limaji hosi. ⁵⁷Tania ette nasaa ’tuna an isyori Elisabeta, ette inyi isiuna leito ’le. ⁵⁸Attati aati hutta haŋ hosi iko hutto onyihari itaniŋuna jo itahutak Hobu amehino honyi jihonyi ette isi muno ikonyi.⁵⁹Attati oloŋ itahottohunihi ’tuna on oŋocerekf isi leito ette isi jaran, Efurak inyi Sakaria, ihwa monyonyi. ⁶⁰Ati ojo honyonyi, Obeŋ, oŋida ifurani inyi Yoane. ⁶¹Attati isi jaran jihonyi, Obeŋ obo atta haŋ hatai anya Yoane.⁶²Ette isi ihanio etahutita jyo monyonyi imijaniere jo ifurani adi inyi ŋai. ⁶³Attati inyi mojuna egyeri jihosi ette igyoronia, Afure honyi Yoane. Tania illillihai isi daŋ bebe.⁶⁴Kwak ette aŋadyef Sakaria ikyana attati inyi itteryo itahabuyo Hollum. ⁶⁵Teyya ette abaŋi wanan jyo aati hutta haŋ hosi, bwo aati daŋ hutto misihi hutto doŋyok ette ikyanari erre hunia daŋ ifau Yudea. ⁶⁶Bwo fe ihanani nya hul itaniŋuni’to daŋ ekyanita huna itajya hosi ette jaran, Ara ’tadi leito olo ŋai? Nyo owon aani Hobu jihonyi.⁶⁷Ifut nya monyonyi Sakaria iko Oloyiri ol Olibo bwo fe ette ikiluna ojo, ⁶⁸Hotohwo Hobu, Hollum olo Israele Nyo ottu inyi mijo ette italahuna aati honyi.⁶⁹Bwo fe itadet inyi Etalahani ol obolo’to tohohoi, Inyi otto woyo ba Davide egyamani honyi, ⁷⁰Ihwa ikyana nya inyi beryen lihutuhe heyak sayyo honyi hul olibori’to. ⁷¹Ojo inyi jo, Italwahuni adi hohoi to myorok hohoi, Iko to dwaran hya hul oliwarik’to hohoi.⁷²Omehino inyi jyo hohonyok hohoi Bwo fe ogotyere inyi ecoriti honyi hun olibori. ⁷³Ocorok inyi necorit jyo hohonyi hohoi Abramo, ⁷⁴On ojo italwahu adi inyi hohoi to has myorok, Ette hohoi igyama jihonyi ta abyaŋan baŋi ⁷⁵Bwo fe itoŋori awati hul obisi ihosyere honyi To oŋitek daŋ hun eswori hohoi.⁷⁶Leito hoŋ, iloŋoi adi iye aheyani sayyo olo lya al agalik’to daŋ, Nyo ikyomoro adi iye ahosyere Hobu Ihuhumyere nekoi honyi. ⁷⁷Bwo fe iramak adi iye laati honyi jo Italahuni adi isi ta ahohina ono neyyata hosi.⁷⁸Nyo obolo amehino ono Hollum An idwoŋ’to jihohoi t’edou an ara afaŋan ⁷⁹Itafaŋyere hya hul itoŋoi’to idumele iko imaji an ara’to ihwa abali ono naye Ette rihoro ejek hohoi te ekoi ono nelik tajya.⁸⁰Oboboloro leito alya bwo fe ette golon to oloyiri, bwo fe owon nya inyi limur many oloŋ an italeyehinierek inyi jyo Israele.

¹To noŋitek hwa ottu nya neram an ifahu hobu Cesare Agusto jo oŋida igyoroni afureta wati daŋ hutta fauhyen. ²Ara nya ana negyeri etteri an igyororik to ninya arari Kwirino eleittok olo Sirya. ³Ofwoi nya isi daŋ itigyoroniere afureta hosi imisihi hosi.⁴Olo nya Yosefo to miji Nasaret otto Galilea many ifau Yudea imiji Davide an ifurani Betlehem nyo inyi atta haŋ ba Davide. ⁵Afwoi inyi iko Maria ŋorwoi honyi an ilyaha’to nesyo itigyoroniere afureta hosi.⁶Howoni isi dia ette noloŋ idwoŋ an isyori inyi, ⁷ette inyi isiuna lonyi honyi oloŋeu ette bubunana inyi ta aboŋojin attati itaferehina inyi itogol husuŋ nyo obeŋ nya namaji tesi ’totwa haji lojotori.⁸Jyo nafau ania owoni nya lomuk leyyak hidye hul irrirryai nedye hosi ta narwe imur. ⁹Teyya oleyo anjelo olo Hobu jihosi ette afaŋan ono Hobu itafaŋ isi attati isi daŋ baŋi.¹⁰Attati anjelo jaran jihosi, Hebaŋata, nyo eyaŋuno ni jihatai asayyo hun oyiji hun iyaŋunie adi amuno on obolo jyo aati daŋ. ¹¹Isiuni ahana jihatai Etalahani, to miji Davide, al anya Kristo Hobu. ¹²Ara fe ana etamijani jihatai jo inyurana adi itai olodole obubuna ta aboŋojin ol oferyo litogol husuŋ.¹³Teyya teyya oleye anjelohyen arryai iko anjelo lya ette isi itahabuyo Hollum ojori, ¹⁴Ijara akwatan hatawana lidou jyo Hollum Bwo nelik tajya lifau jyo aati hul itamunoye’to inyi.¹⁵Lafwoi anjelohyen lidou, ojori leyyak, Hafata Betlehem, efwo mijo ariŋ an idwoŋ’to ana an itahutak Hobu jihohoi. ¹⁶Attati isi fwatan kokwak ette nyurana Maria iko Yosefo iko leito ol oferyo litogol husuŋ.¹⁷Igonyuni leyyak hidye inyi ette isi iramana neram hito lodwo iramani jihosi. ¹⁸Illillihai aati arryai al itaniŋuni isi erre hun iramani leyyak jihosi. ¹⁹Ati ottunak Maria hodwo hirre itaji honyi ette igigilo tesi. ²⁰Acaharai leyyak hul itahabuye Hollum ta nerre hun itaniŋuni isi bwo fe igonyuni; nyo onyurani isi erre ihwa iramani dwo jihosi.²¹Ihalu oŋitek hottohunik al oŋoti inyi ette isi ifurana inyi Yesu ihwa ninya ifuraniere anjelo inyi hobeŋ honyonyi oyedu inyi.²²Ati inya attubai oŋitek huno etaliboryo ihwa igyoroni ifahita huno Mose, iyaŋunie isi inyi Yerusalem isyoryere inyi jyo Hobu. ²³Nyo igyoroni lifahita huno Hobu ojo, “Iloŋoi adi alyawa daŋ oloŋehwa ahegyamak jyo Hollum.” ²⁴Bwo fe isyori isi ehumita ihwa ojori lifahita huno Hobu jo oŋida isyori awolosin arrihai kuyya amami arrihai.²⁵Owon obo atulo afure honyi Simeona imiji Yerusalem. Ara nya inyi atulo ol obis bwo fe omuno inyi Hollum. Ottifya nya inyi alwahyo ono Israele bwo owon nya inyi iko Oloyiri ol Olibo. ²⁶Bwo fe italeyehini jihonyi jo obeŋ adi inyi oye many igonyuniere inyi Kristog olo Hobu.²⁷Ottu inyi ihaji imojit eneittok ihwa iramak Oloyiri ol Olibo inyi. Al iyaŋunie esyok Yesu ihaniere jihonyi ihwa igyoroni ifahita, ²⁸akafu inyi Yesu ihas honyi ette itahabuyo Hollum ojo, ²⁹Ihwania Hobu ijara yo egyamani hoi hotoye ta nelik taji Ihwa ikyana iye.³⁰Nyo igonyuni oŋite hoŋ etalahuna hoi, ³¹An ihuhumak iye ihosyere wati daŋ. ³²Ara inyi afaŋan on oleyo adi jyo paganohyen, Bwo isyo adi akwatan jyo aati hoi Israele.³³Illillihai nya honye iko monye hito ta nerre hun ikyana Simeona tenyi. ³⁴Bwo fe Simeona ette itajahina isi ette jaran jyo Maria ojo, Imijye, ta leito olo okwaharai adi omuk bwo odetunie adi omuk aati arryai hulo Israele, bwo fe ara inyi etamijani olo Hollum. Ati obeŋi laati iruhi, ³⁵bwo fe italeyeuni adi egigilita tajya hosi. Tania ocuk adi ejiriŋa ataji hoi ihwa ademi.³⁶Owon nya bwo fe nobo neyani sayyo afure honyi Anna ŋarri Fanuele otto woyo ba Aser. Imarwak inyi bwo amanyai inyi iko habi honyi aŋasi hattarik many hayamarik inyi, ³⁷ette habi honyi ye bwo fe ara inyi nolobiloŋ. Arai aŋasi honyi atomwana hottohunik haŋwan. Odulo inyi itahabuyo Hollum ta aferuna iko amojo ette ilak busana aji imojit eneittok. Odulo inyi dia ta attari iko ta afanni daŋ. ³⁸Ati inya attu asaa nya, ottu inyi ette isyo ahumo jyo Hollum ette ikyana te eito jyo hya hul ottifyai’to etalahuna ono Yerusalem.³⁹Ninya attubani isi erre daŋ hun igyoroni ifahita huno Hobu, acaharai isi Galilea, amiji hosi Nasaret. ⁴⁰Oboboloro nya leito alya ol ogol ette wanan iko nolofyoro bwo fe ifut inyi iko amehino ono Hollum.⁴¹Adahatye esyok honyi Yerusalem aŋasi daŋ ta neyom ono Allaŋan Anjelo. ⁴²Inya labolo Yesu aŋasi ’tomon harrihai ofwoi nya isi daŋ ta amojo ihwa amok jihosi. ⁴³Bwo fe ninya lacohunie isi te esidi ono neyom, arasa Yesu imiji Yerusalem. Obeŋi esyok honyi omijani. ⁴⁴Ati igigiloi isi jo owon adi inyi liluluŋ wati. Adahai isi noloŋ abotye bwo fe ihalu ottifyai isi inyi jyo hutta haŋ hosi iko aati hul omijani’to inyi.⁴⁵Obeŋi isi onyurani inyi ette isi caharu Yerusalem ittifyari inyi. ⁴⁶Ihalu oŋitek hunihoi onyurani isi inyi ihaji imojit eneittok ihiji hettiyanak. Itayiryo inyi jihosi bwo fe ifiyo inyi isi nefita. ⁴⁷Illillihai aati daŋ hul itaniŋuni’to nyo ilofyoro inyi bwo fe obisi etarraŋita honyi.⁴⁸Ninya onyurani esyok honyi inyi, ette isi illilliha ette honyonyi jaran jihonyi, Lonyi hoŋ, nyo ittigemyo iye hohoi ihwania? Ettoho ani iko monyohoi attifya iye ta amijan tajya. ⁴⁹Attati Yesu jaran, Nyo ittifyati tai ani? Itimoti tai jo oŋida ani awon ihaji Monyoŋ? ⁵⁰Ati obeŋi nya isi itaniŋuni anyo ojo inyi jihosi.⁵¹Acaharai inyi ikosi ette ruboro Nasaret bwo fe ifaha nya inyi jihosi, ette honyonyi gotyere erre huna itaji honyi. ⁵²Bwo fe oboboloruno Yesu to ofyoro bwo abolori hwan honyi iko ayiji honyi ihomom Hollum iko aati.

¹Ihiŋa etattomoni homiet ono elohobu Tiberio Cesare, owon nya Ponto Pilato amandir olo Yudea, bwo Erode ara eleittok olo Galilea, bwo illanyi Filipo ara eleittok olo afau Iturea iko Trakonito, bwo fe ara Lisania eleittok olo Abilene. ²Anas iko Kaifa arai ehumak hul obolori’to attati nekyana ono Hollum ’tuna jyo Yoane lonyi Sakaria lowonari inyi imur.³Attati Yoane leten jyo amasik hutteger Yordano ittiyeniere aati jo oŋida isi iloiti atajya hosi ette ifwotuna batisimo ette Hollum busana eyyata hosi.⁴Ihwa igyoroni libuk ono eyani sayyo Isaya ojo, “Iloŋo obo atulo to mur, Ette jaran, Ihuhumana nekoi Hobu, Itabisana ekota honyi ’tor.⁵Itarryamahini adi awudorita daŋ, Bwo fe itosotonie adi adoŋyok, Itabisani adi nekota hun okukudoi’to, Bwo fe italiboroni adi nekota hun ogoŋye’to, ⁶Ette adi laati daŋ igonyuna netalahuna ono Hollum.”⁷Tania ikyana inyi jyo eluluŋ wati hul ofwonni’to jihonyi ifwotuniere batisimo ojo, Irata tai ihwa amunok. ŋai ojo jihatai ofuhoti ajore ono hottu’to?⁸Oŋida ehanita hatai itahutani jo iloitoto tai ahode atajya hatai. Hejatta ta ahwattek hatai jo, Ara Abramo hohonyi hohoi, nyo eramak ni itai jo oremik Hollum ’yeuna lonyirok Abramo jyo amorwoi huna.⁹Bwo fe ihwania ihanani atolu ihadde ’yanio. Oyefuni adi ayyanio daŋ hun obeŋi’to oŋijuni aŋer hun oyiji ette rwoŋonia lihima.¹⁰Attati eluluŋ ifiyo inyi ojori, Anyo ’tadi an ehanio hohoi? ¹¹Attati inyi jaran jihosi ojo, Lya ol owon’to iko aboŋojin arrihai ijara hataharak lobo ol obeŋ iko obo aboŋo, bwo fe ol owon’to iko naŋiyo oŋida bwo fe inyi ihanio ihwo nya.¹²Ofwonni bwo fe amojok musuru jihonyi ifwotuniere batisimo ette isi ifiyo inyi ojori, Hettiyanani, anyo adi ehanio hohoi? ¹³Bwo inyi ette jaran jihosi, Hemojuna amusuru hun allaŋi aŋoco ono okuma.¹⁴Ette bwo fe oseŋer ifiyo inyi ojori, Ara bwo hohoi, anyo adi ehanio hohoi? Bwo inyi ojo jihosi, Hehorotyete aati te efiriwa kuyya ta netisyaha bwo fe heŋuŋunitati ta aduma hatai.¹⁵Igigiloi aati ette isi ikikyana ta ahwattek hosi to Yoane ojori kuyya ara inyi Kristo. ¹⁶Ikyana Yoane jihosi daŋ ojo, Ebatisyo ni itai ta aari ati ottu adi lobo leittok al agalik’to ani al abeŋ ni asiru houna amuha honyi. Ibatisyo adi inyi itai to Oloyiri ol Olibo iko ta neema.¹⁷Owon ayyani lihani honyi italiboryere ema honyi ette fyehina limugu honyi, ati oswahini adi acono lihima on obeŋ’to oremik dunyari.¹⁸Bwo fe ta nettittotya arryai ittittohi inyi asayyo hun oyiji’to jyo laati. ¹⁹Ati isiŋyo nya Yoane Erode te eram Erodia ŋorwoi illanyi bwo fe te erre arryai hun orrohoji’to hun ihanio inyi. ²⁰Attati Erode inyyak fwanana obo arrohoji jyo erre huna daŋ te efitana honyi Yoane ibabus.²¹Ninya atuk Yoane ebatisyo wati ottu Yesu bwo fe jihonyi attati Yoane ibatis inyi. Homojo inyi ette edou bwanya, ²²attati Oloyiri ol Olibo isuruna jihonyi ihwa awolo attati nekyana ’tuna t’edou on ojo, “Iye Lonyi hoŋ al amuno ni bebe.”²³Inya itteryo Yesu ittiyenio arai aŋasi honyi atomwana hunihoi. Igigiloi laati jo inyi lonyi Yosefo, al ara lonyi Eli, ²⁴al ara lonyi Matata, al ara lonyi Levi, al ara lonyi Meleki, al ara lonyi Yana, al ara lonyi Yosefo.²⁵al ara lonyi Matatia, al ara lonyi Amosa, al ara lonyi Nahama, al ara lonyi Eseli, al ara lonyi Naga, ²⁶al ara lonyi Mata, al ara lonyi Matatia, al ara lonyi Simi, al ara lonyi Yoseke, al ara lonyi Yoda.²⁷al ara lonyi Yoana, al ara lonyi Resa, al ara lonyi Serubabele, al ara lonyi Salatiele, al ara lonyi Neri, ²⁸al ara lonyi Meleki, al ara lonyi Adi, al ara lonyi Kosama, al ara lonyi Elemadama, al ara lonyi Ere, ²⁹al ara lonyi Yose, al ara lonyi Eliesere, al ara lonyi Yorima, al ara lonyi Natata, al ara lonyi Levi.³⁰al ara lonyi Simeona, al ara lonyi Yuda, al ara lonyi Yosefo, al ara lonyi Yonama, al ara lonyi Elayakima, ³¹al ara lonyi Melea, al ara lonyi Mena, al ara lonyi Matata, al ara lonyi Natana, al ara lonyi Davide, ³²al ara lonyi Yese, al ara lonyi Obede, al ara lonyi Boasa, al ara lonyi Salamone, al ara lonyi Nasona.³³al ara lonyi Aminadaba, al ara lonyi Aruni, al ara lonyi Eserome, al ara lonyi Perese, al ara lonyi Yuda, ³⁴al ara lonyi Yakobo, al ara lonyi Isako, al ara lonyi Abramo, al ara lonyi Tera, al ara lonyi Nahora, ³⁵al ara lonyi Seruga, al ara lonyi Ru, al ara lonyi Pelege, al ara lonyi Ebere, al ara lonyi Sela.³⁶al ara lonyi Kanana, al ara lonyi Arufakasada, al ara lonyi Seme, al ara lonyi Noa, al ara lonyi Lemeke, ³⁷al ara lonyi Metusela, al ara lonyi Enoka, al ara lonyi Yerede, al ara lonyi Malelele, al ara lonyi Kanana, ³⁸al ara lonyi Enosa, al ara lonyi Sete, al ara lonyi Adam, al ara lonyi Hollum.

¹Ifut nya Yesu iko Oloyiri ol Olibo inya lattu inyi to hari Yordano bwo fe orihoro nya Oloyiri inyi itwa mur. ²Ette inyi itoŋo dia oŋitek atomwana aŋwan hun okemyere etisyahani inyi. Obeŋ nya inyi oŋiyo omuk erre to oŋitek hwa bwo fe al isidi oŋitek hwa oniama inyi.³Attati etisyahani al anya’to Sitan jaran jihonyi jo, Kuyya ira iye Lonyi Hollum iloito amorwo ana hetera aŋirya. ⁴Attati Yesu itarraŋ jihonyi ojo, Igyoroni ojo, “Obeŋ atulo isu ta aŋirya hama.”⁵To obo asaa attati etisyahani iyaro inyi ihide doŋe ette itahutana inyi olobyehyen hutta fau. ⁶Attati jaran jihonyi, Esyo adi ni jihoi eleittok itoŋori ahobu hosi bwo fe ifwotuniere akwatan hosi, nyo isyori nya isi jihoŋ, bwo fe aremik ni isyo jyo lya al awak ni isyo. ⁷Kuyya itahabuyo iye ani arai adi isi daŋ ahunohoi.⁸Attati Yesu itarraŋ jihonyi ojo, Igyoroni jojo, “Oŋida iye itahabuyo Hobu hoi Hollum, Bwo igyama jihonyi hama.”⁹Attati inyi iyaro Yesu Yerusalem ihide haji imojit eneittok ette jaran jihonyi, Kuyya ira iye Lonyi Hollum itakwahai ahwan hoi tene, ¹⁰nyo igyoroni igyerita jo, “Ifak adi Hollum anjelohyen honyi irrirryari iye.” ¹¹Igyoroni bwo fe jo, “Itarrauni adi isi iye ta ahas hosi Jo oŋida iye ibeŋ isyak eju hoi imorwoi.”¹²Attati Yesu itarraŋ jihonyi ojo, Igyoroni jo, “Oŋida ibeŋ iye ikemyo Hobu hoi Hollum.” ¹³Latohu etisyahani akemyo inyi te erre daŋ ette inyi leten do addi.¹⁴Ocohuno Yesu ta agolon ono Oloyiri ol Olibo many Galilea bwo fe asayyo honyi ette isarrahina ifauhyen daŋ. ¹⁵Attati inyi itteryo ittiyenio ihasik imojiti bwo itakwace isi daŋ afure honyi.¹⁶Attati inyi ’tuna Nasaret ninya obolorori inyi, bwo fe olo inyi ihaji imojit to sabatoh ihwa ara nya emohit honyi. ¹⁷Attati inyi wotya iheniere abuk ono eyani sayyo Isaya. Aŋa inyi abuk ette nyurana amaji an igyoroni dia ojo,¹⁸“Owon Oloyiri olo Hobu jihoŋ, Onyimu inyi ani ittiyeniere asayyo hun oyiji jyo alocaŋak. Ifahu inyi ani iramaniere ahohina jyo hul ifitani, Bwo fe itamijyere aŋodok, Ihohiniere hya hul ittigemye, ¹⁹Iramaniere neŋa ono amehino ono Hobu.”²⁰Ihyanak inyi abuk ette isyo jyo hul itayirye’to ette itoŋo ikurus bwo fe aati daŋ huttotwa haji ette ikikorihina jihonyi. ²¹Attati inyi jaran jihosi ojo, Ahana itasiruni ekyanita huno abuk ana ihwa itayiruna tai. ²²Ikyanai isi daŋ on oyyu tenyi bwo fe illillihai te ekyanita hun ikyana inyi te etuk honyi ette ifiyo ojori, Lonyi Yosefo olo?²³Attati inyi jaran jihosi, Ahode ijatta adi itai jihoŋ jo, Akim, itaŋida ahwan hoi. Etaniŋu hohoi erre hunya ihanio iye to Kapernaum. Ihanie bwo fe dini erre ihwo nya. ²⁴Ati ajo ni jihatai obeŋ etahabuyo jyo eyani sayyo imiji hosi.²⁵Ahode eramak ni itai jo owoni nya nobiloŋi ŋorwo hun oyei habiak hosi arryai ifau Israele to oŋitek huno Elija ninya obyaŋari ahide asayere ta aŋasi hunihoi iko ayafajin ille, bwo fe attu ahure lifau daŋ. ²⁶Obeŋ nya Hollum ifak Elija jyo aŋorwo hunia ati ifahini inyi imiji Sarefata lifau Sidon jyo obo aŋotte on oye habi honyi. ²⁷Olwaji nya aati ’tallulu ifau Israele ta aŋasi huno eyani sayyo Elisa, ati obeŋ nya itaŋidari obo olosi arari Namana olo Sirya.²⁸Ninya itaniŋuni laati itwa haji imojit erre huna, ifuti nya isi daŋ iko eloŋojita. ²⁹Attati isi dyoto daŋ ette iyaro inyi to miji addi ette rihoro inyi ihide doŋe ninya oduhorik isi amiji hosi jo oŋida isi esulu inyi tohide ’walaŋ. ³⁰Ati ojiŋu inyi tehiji hosi ette leten addi.³¹Ette inyi leten Kapernaum amiji ono Galilea. Bwo ittiyenio inyi laati to sabato. ³²Illillihai isi te ettiyenita honyi, nyo arai ekyanita honyi ihwo huno eleittok.³³Bwo fe ihaji imojit owon obo atulo ol owon iko ajok on orroho’to, ette inyi lwaha on okwat ette jaran, ³⁴Aii Yesu Anasaratanani, anyo hiram iwak iye jihohoi? Ittu iye itarrohojyere hohoi? Amijak ni iye, iye Aliboroni olo Hollum.³⁵Ette Yesu iŋere ojo, Odwai, obusak inyi. Ilo addi. Attati ajok ania ihanana ahwe jihonyi ette ’tuna totwa honyi addi ati obeŋ itarroho inyi. ³⁶Illillihai laati daŋ ette hahaya ta ahwattek hosi ojori, Anyo hiram ana? Ta adwaran iko agolon ifuha inyi ajok ette inyi jiŋuna addi totwa tulo. ³⁷Bwo itisarrahini eram honyi jyo amisik daŋ hun onyihai’to dia.³⁸Odyoto inyi ette dyaharo aji imojit ette leten jiŋana ihaji Simone. Oŋwai hamoni Simone iko anahan hwan bwo isi ette mojo Yesu oŋida olwak inyi. ³⁹Attati inyi wotya iger ijotit honyi ette ifuhara anahan hwan bwo anahan hwan honyi ette ’turoro ette inyi dyoto kwak ette igyama aŋiyo jihosi.⁴⁰Liddorro oloŋ, iyaŋunie aati daŋ aŋwak jyo Yesu, hul oŋwai’to iko eŋwati hun olufaji bwo iyyabak inyi ahas honyi jihosi itaŋidaryere isi daŋ. ⁴¹Bwo ajohin hun orrohoji’to ette fwanna addi to wati ette lwahatyo ojori, Iye Lonyi Hollum. Ifuhak Yesu isi daŋ bwo fe iyimo inyi isi ikyanai nyo omijani isi daŋ jo inyi Kristo.⁴²Afaŋ amotye hanyik ette inyi leten ihidyofo. Ottifyai aati daŋ inyi attati nyurana inyi bwo iyimoi isi inyi aleten addi. ⁴³Ati ojo inyi jihosi, Oŋida ani ettiyenio asayyo hun oyiji huno olobye ono Hollum jyo amisik omuk nyo inyi eram an ifahunierek ani. ⁴⁴Bwo fe ittiyenio inyi ihasik imojiti huno Galilea.

¹Ottidani laati Yesu nyo awahi isi itaniŋyo neram Hollum, ette inyi wotya iger hari Genesaret. ²Attati inyi igonyuna atogoli arrihai ahania nyo ofwoi ayafohok illillayere aboyo hosi. ³Isurok inyi itogol Simone ette leten to otifor kai, attati ittiyenio aati hul owotyai ilotifor bwo inyi itwa togol.⁴Al atohu inyi ekyana ojo inyi jyo Simone, Iyaro atogol hoi jyo amaji on owudo bwo ibironia aboyo hatai iyafohuniere aham. ⁵Itarraŋ Simone ojo, Leittok eyafoho hohoi attari daŋ ebeŋ hohoi eyafohu omuk. Ati te ekyana hoi ebirok adi hohoi aboyo. ⁶Ninya ihanie isi ihwo nya ayafohuni isi aham arryai attati aboyo hosi jaran afuto. ⁷Ette isi itakodo jyo aati hutto togol ebotye oŋida olwahi isi. Ette isi itufutana atogoli many ojarik edyo itwa hari.⁸Ninya igonyu Simone Petro ana ette inyi rigoŋi ihosyere hejek Yesu ette jaran, Hobu ilo jihoŋ addi, nyo ara ni aheyyani. ⁹Nyo illillihai isi daŋ ta ayafohuna hosi aham hun olwaji. ¹⁰Bwo fe illillihai Yakobo iko Yoane onyirok Sebedeyo hinya arai’to hutteluluŋ Simone. Attati Yesu jaran jyo Simone, Hebaŋ nyo ihalu iloŋo adi iye aati. ¹¹Ninya iyaŋunie isi atogoli hosi ilotifor idehini isi erre daŋ ette jifaru Yesu.¹²To ninya to nya owon Yesu jyo obo amiji, ette obo atulo ’tallulu ’tuna jihonyi. Origoŋ inyi lihomon Yesu ette juru ifau ette jaran, Hobu, al iwak iye iremik iye itaŋida ani. ¹³Attati Yesu ihalamana ani honyi ette ’tir inyi ette jaran, Ihwa awak ni, toŋidara. Ette attallulu atulo alya ’turoro kwak.¹⁴Attati Yesu ifahina inyi ojo, Heramak obo atulo eram ana, ati ilo itahutak ahwan hoi jyo ehumani ihaji imojit bwo fe iyaro ehumi ono aŋidari hoi ihwa iramak nya Mose jyo laati ihaniere te etamijani.¹⁵Tania ette eram Yesu isarrahina imasik daŋ attati eluluŋ wati arryai ’tubanio itayiryere jihonyi bwo fe ifwotuniere aŋidari t’eŋwati hosi. ¹⁶Ati olo inyi limur imojori.¹⁷To oŋitek hwa ninya ittiyeniere Yesu owoni Farisei iko ettiyanak hulo efahita aŋati. Ofwonni nya isi jyo amisik huno Galilea iko Yudea bwo fe to Yerusalem bwo owon agolon ono Hobu jyo Yesu itaŋidaryere laati.¹⁸Attati aati kafuna obo atulo ol ogolyo hwan te ekafit, attati isi ’tifya ekoi iyaŋuniere atulo lya jyo Yesu. ¹⁹Ati obeŋi isi orumani ekoi itajiŋaniere inyi nyo ifudai aati. Tania odohi isi ihide haji ette ’tul aji attati ililyofonia inyi te ekafit honyi jyo Yesu ihiji wati.²⁰Ninya igonyu Yesu neruk hosi ojo inyi, Illaŋ, ahohinie eyyata hoi. ²¹Attati egyoroki iko Farisei iŋuŋunita ojori, ngai alya al ikyana’to ekyana ono amoryo? Obeŋ tulo oremik hohina eyyata arari Hollum fe abotye.²²Ati omijak Yesu egigilita hosi ette inyi ifiyo isi ojo, Nyo igigiloti tai ta atajya hatai ihwania? ²³Anani an ilyaha’to, ajaran hoŋ jo, Ahohinie eyyata hoi, kuyya ajaran hoŋ jo, Totte, adahai? ²⁴Ati oŋida itai imijana jo owon adwaran jyo Lonyi tulo ihohiniere eyyata wati hutta fau. Tania ojo inyi jyo atulo ol ogolyo hwan, Ajo ni jihoi, otte, obubunak ejotit hoi, ilo ihaŋ.²⁵Teyya ette inyi dyoto kwak tehiji hosi ette bubunana ejotit odwo oferyere inyi, ette leten ihaŋ hosi al itahabuyo Hollum. ²⁶Tania ette isi daŋ illilliha, ette itahabuyo Hollum bwo fe ifuti isi iko abaŋi ette jaran, Egonyu hohoi ahana erre hun olufaji’to.²⁷Ihalu ana alo Yesu alet ette nyurana lamojoni musuru al anya’to Levi. Itoŋo inyi ihaji on odumarik amusuru, attati Yesu jaran jihonyi, Ijifunie ani. ²⁸Attati inyi dyoto ette ijifaru inyi.²⁹Attati Levi ihanana eyom on obolo ihaji honyi tenyi bwo fe olwaji eluluŋ wati iko lamojok musuru hul oŋiye iteremeja ikonyi. ³⁰Attati Farisei iko egyorok ikikyana jyo leyiyanak hulo Yesu ojori, Nyo iŋiyete tai bwo fe imatati iko lamojok musuru iko leyyak? ³¹Attati Yesu itarraŋ jihosi ojo, Laati hul oŋidari’to obeŋi awahi afwatan jyo akim, ati hul oŋwai’to ofwoi isi jyo akim. ³²Abeŋ ni attu iloŋori ayijok ati attu ni iloŋori leyyak, oŋida isi iloiti atajya hosi t’eyyata hosi.³³Attati isi jaran jihonyi, Oferutai eyiyanak hulo Yoane bwo fe omojoi gagaga bwo fe eyiyanak hulo Farisei ihanie ihwo nya, ati hulohoi oŋiye bwo fe amatai. ³⁴Ifiyo Yesu isi ojo, Oferutai mottyarak hayamani al itoŋoi isi ikonyi? ³⁵Ofwonni adi oŋitek hun iyarik ayamani t’ehiji hosi addi bwo to noloŋ to nya ette adi isi feruna.³⁶Iramak bwo fe inyi isi arryamara on ojo, Obeŋ obo atulo ogwasu aboŋo aŋejuk ette ’tafana jyo amarwani. Kuyya ihanio inyi ihwania ogwasaru adi aŋejuk addi ette ilak remehina jyo odwo.³⁷Bwo fe obeŋ obo ijuhok abalu aŋejuho itwa ihulo amarwani. Al ijuhok obo ihwania, obor adi abalu ehulo amarwani ette abalu iko ehulo byaŋan. ³⁸Oŋida ijuhoni abalu aŋejuho itwa ihulo aŋejuho. ³⁹Bwo fe obeŋ obo atulo al amat abalu amarwani inyyak wahan abalu aŋejuk nyo ojo inyi, Oyyu abalu amarwani.

¹To oloŋ sabato addaddaharai Yesu iko leyiyanak honyi ta atwa matta hima ette leyiyanak honyi giluna omuk nema ette fofo ette niŋa. ²Ifiye omuk Farisei isi ojori, Nyo ihaniete tai ariŋ on odwa’to ihaniere to noloŋ sabato?³Bwo Yesu ette itarraŋ ojo, Ibyaŋata tai ihenuna erre hunya ihanio Davide iko laati honyi laniamai isi? ⁴Ojiŋak nya inyi ihaji ono Hollum ette duhuna emunio ette ŋiyo bwo fe isyo inyi omuk jyo laati honyi. Isi emunio hun odwari’to hun obeŋ tulo oŋiyo arari ehumak hama. ⁵Attati inyi jaran jihosi, Ara Lonyi tulo Hobu olo sabato.⁶To obo sabato ojiŋak inyi ihaji imojit ittiyeniere. Owon dia obo atulo ol oye aani iŋet honyi. ⁷Bwo egyorok iko Farisei ette ikikorihina jyo Yesu imijyere kuyya itaŋida adi inyi atulo to oloŋ sabato nyo awahi isi rasana inyi. ⁸Ati omijak inyi egigilita hosi ette jaran jyo atulo ol oye hani, Otte, owotya ihiji wati. Bwo inyi ette dyoto ette wotya dia.⁹Attati Yesu jaran jihosi ojo, Efiyo ni itai, oyyu ihaniere on oyyu to oloŋ sabato kuyya ihaniere on orroho? Anani on oyyu’to, etahoruna atulo kuyya attohoro? ¹⁰Attati inyi mijo jihosi daŋ attati jaran jyo atulo lya, Onitok aani hoi. Bwo inyi onitok ihwo nya ette aani honyi ŋidari. ¹¹Ati ifuti nya isi daŋ iko ajore ette itarisa ta ahwattek hosi ojori, Ehanio adi hohoi anyo jyo Yesu.¹²Jyo oŋitek hunia attati Yesu leten idoŋe imojori, bwo fe ta arwe daŋ omojo inyi jyo Hollum. ¹³Lafaŋ amotye iloŋu inyi eyiyanak honyi ette nyimuna jihosi ’tomon harrihai hul ifurak inyi lefahatk.¹⁴Simone inya ifurak inyi Petro, iko illanyi Andrea, Yakobo, Yoane, Filipo, Bartolomeo, ¹⁵iko Matteyo, Tomaso, Yakobo lonyi Alufayo, Simone Selotl, ¹⁶bwo Yuda lonyi Yakobo bwo fe Yuda Iskariote letinyyaŋani Yesu.¹⁷Isuru Yesu ikosi ette wotya igum doŋe iko eluluŋ heyiyanak arryai iko eluluŋ wati hul ofwonni’to to Yudea, to Yerusalem, bwo fe to masik hutteger Turo iko Sidon. Ofwonni laati daŋ itaniŋyere jyo Yesu iko itaŋidaryere ahwattek hosi t’eŋwati hosi. ¹⁸Bwo fe hya hul ittigemye ajohin hun orrohoji’to aŋidari daŋ. ¹⁹Bwo fe ottifyai eluluŋ wati daŋ ittiryere inyi nyo ottu adwaran jihonyi itaŋidaryere isi daŋ.²⁰Attati inyi mijo jyo leyiyanak honyi ette jaran, Omunoti itai alocaŋak, nyo ara Hollum a Hobu hatai. ²¹Omunoti itai hul iniamati’to ihwania nyo itifoŋ adi Hollum itai. Omunoti itai hul iyyoti’to ihwania nyo isuhotyete adi itai.²²Omunoti al oliwarik aati itai bwo fe al ihari isi itai; al ipice laati itai bwo al oliwarik isi afureta hatai te eram ono Lonyi tulo. ²³Omunoti to oloŋ ania bwo fe isilihitati ta amuno nyo owon aduma hatai on obolo lidou nyo ihanie nya hohonyok hosi ihwo nya jyo leyyak sayyo.²⁴Ati orroho bebe jihatai abarak, nyo inyurana nya itai edumit hatai. ²⁵Orroho bebe jihatai hul ifoŋata’to ihwania nyo iniamati adi itai. Bwo orroho bebe jihatai hul imunoti’to ihwania nyo ijiriŋati adi itai bwo fe iyyoti adi itai.²⁶Orroho bebe jihatai al itahabuye laati itai nyo ihanie nya hohonyok hosi ihwania jyo eyak sayyo hul ipali’to.²⁷Ati ajo ni jihatai hul itaniŋyete’to jo, Omunoti amyorok hatai, ihaniete on oyyu jyo hya hul oliwarik’to itai. ²⁸Omunoti hya hul ipice’to itai, omojoti to hya hul ihanie’to on orroho jihatai.²⁹Lya al anaŋ’to iye amahalyo isyara bwo fe ebotye. Bwo fe lya al iyaro’to aboŋo hoi isyara bwo fe agamis hoi. ³⁰Isyatta erre jyo hya hul omojoi’to, bwo fe hya hul iyarai’to erre hatai henyyahata mojuna isi.³¹Ihaniete jyo laati ihwa iwahata tai isi ihanie jihatai. ³²Kuyya imunoti tai aati hul omunoi’to itai, anyo adi ayiji jihatai? Ara dwadi bu eyyak omunoi isi hya hul omunoi’to isi. ³³Kuyya ihaniete tai on oyyu jyo hya hul ihanie’to jihatai on oyyu, anyo adi ayiji jihatai? Nyo ihanie eyyak daŋ ihwo nya. ³⁴Kuyya isyatta tai erre jyo hul igigiloti tai jo inyyahunie adi, anyo adi ayiji jihatai? Ara dwadi bu eyyak isyori jyo eyyak bwo fe ofwonni inyyak inyyahuna.³⁵Ati omunoti amyorok hatai, ihaniete on oyyu jihosi, isyatta jihosi bwo hegigiloti jo oŋida isi inyyahunie; obolo adi edumit hatai bwo irata adi itai olonyirok hulo lya al agalik’to daŋ. Nyo omehino inyi jyo hya hul obeŋi’to ojori humo, bwo fe jyo hul orrohoji’to. ³⁶Omehiniete ihwa Monyatai ol owon’to iko amehino.³⁷Heŋototo laati bwo obeŋ adi Hollum oŋot itai. Heŋototo naye jyo laati bwo obeŋ adi Hollum oŋot aye jihatai. Obusana laati bwo obusak adi Hollum itai.³⁸Isyatta erre jyo laati bwo isyo adi Hollum jihatai ekemit on oyyu, an isihi bwo fe osyarai ilet. Nyo ekemit an isyatta tai inyyahuno adi Hollum jihatai.³⁹Inyyak inyi bwo fe iramana isi arryamara ojo, Oremik oloŋodo rihotyo aŋodok? Obeŋi adi isi okwahari iwure? ⁴⁰Obeŋ obo eyiyanani agalik ettiyanani honyi, ati al ihum inyi ittiyenio ara adi inyi ihwa ettiyanani honyi.⁴¹Aŋai adi igonyu obo alatai alle honyek al awon jo illanyi bwo obeŋ inyi igigilo te etoi on obolo’to otto honyek honyi? ⁴²Kuyya aŋai ikyana adi obo alatai jyo illanyi jo, Hadi, agorotu ni alle honyek to honyek hoi bwo owon etoi on obolo’to otto ononyi? Ara olo ahenyabani. Oŋida ahosyere ogorotu inyi etoi on obolo’to otto honyek honyi attadi inyi iremehina igonyuna ligorotuniere alle honyek otto honyek illanyi.⁴³Nyo obeŋ ayyani on oyyu’to oremik ŋijuna aŋer hun orrohoji’to, obeŋ bwo fe ayyani on orroho’to oŋiju aŋer hun oyiji. ⁴⁴Nyo omijani ayyanio daŋ ta aŋer hosi. Ittallihi laati huruna aŋer ŋaboli to hikwa bwo fe ittallihi isi huruna aŋer ajalaŋi te laŋi.⁴⁵Ojiŋuni erre hun oyiji’to totwa taji tulo ol oyyu’to, bwo ojiŋuni erre hun orrohoji’to to taji tulo ol orroho’to. Nyo to taji ofwonni erre hun ikyanai te etuk.⁴⁶Nyo iloŋoti tai ani jo, Hobu, Hobu, bwo ibyaŋata tai ihaniete erre hun eramak ni itai? ⁴⁷Hya daŋ hul ofwonni’to jihoŋ bwo itaniŋye ekyanita hoŋ bwo fe ihanie isi, etahutak ni itai jo arai isi ihwa baŋai. ⁴⁸Arai isi ihwa atulo ol oduhok’to aji. Obwak inyi ifau ette ihanana etteri haji ihide morwoi bwo fe al ottu egura hari, obeŋ adi aji okwaharo nyo oduhoni inyi ihide morwoi.⁴⁹Bwo lya al itaniŋyo’to ekyanita hoŋ bwo fe obeŋ ihanio ara inyi ihwa atulo ol oduhok’to aji ifau bwo obeŋ ara ihide morwoi. Al ottu egura hari ette inyi kwaharu an atturo.

¹Latuhok Yesu ettiyenio honyi jyo aati daŋ, ette inyi leten Kapernaum.²Ihwania owon nya obo jafit iko apit ol omuno inyi bebe. Oŋwai nya inyi ilyaha aye. ³Inya itaniŋu jafit eram Yesu, ifak inyi eleittaha hulo Yudea jyo Yesu jo oŋida inyi ottu itaŋida apit honyi. ⁴Ninya lafwonni isi jyo Yesu ikyanai isi jihonyi ta amehino ojori, Osiru itaŋida iye lapit honyi ihwo awak inyi. ⁵Nyo omuno inyi aati hohoi bwo fe oduhok nya inyi aji imojit hohoi.⁶Attati Yesu fwatan ikosi. Hobeŋ inyi afany ihaji, ifak jafit orryahat jihonyi hul ojori, Hobu hettigemyo ahwan hoi, nyo obeŋ osiru jihoŋ ittu iye ihaji hoŋ. ⁷Bwo abeŋ ni asiru ilari jihoi. Ati ikyanai te etuk bwo oŋida adi apit hoŋ. ⁸Nyo aniŋyo ni eleittok hoŋ bwo oseŋer hoŋ oniŋye ani. Aremik ni jaran jyo obo, Ilo, bwo inyi ette leten; bwo fe jyo lobo, Waŋ, bwo inyi ette ’tuna; bwo ajo ni jyo apit hoŋ, Ihanie ania, bwo inyi ette ihanio.⁹Itaniŋu Yesu ana, illilliha inyi ette yito jyo eluluŋ wati ninya ijifatyo’to inyi ojo, Eramak ni itai, ara dwo bu jyo Israele abeŋ ni anyurak obo neruk on obolo ihwa ana. ¹⁰Bwo hya hinya ifak inyi ocohunie ihaji, onyurani isi apit laŋida.¹¹Ihalu gaa, olo Yesu jyo obo amiji an ifurani Nain bwo leyiyanak honyi iko eluluŋ wati arryai ette fwatan ikonyi. ¹²Ilyaha Yesu ikat miji, iwwaharai aati atulo ol oye. Ara nya inyi olonyi abotye jyo honyonyi, nolobiloŋ, bwo fe ofwonni eluluŋ wati hutto miji ikonyi. ¹³Inya igonyu Hobu inyi, ette inyi mehino jihonyi ette jaran jihonyi, Heyyo. ¹⁴Attati inyi ’tuna ette ’tir ekafit honyi ette ewwak wotya. Ojo Yesu, Illa ajo ni jihoi, totte. ¹⁵Teyya ette ayani alya dyoto ette itteryo ekyana. Bwo Yesu ette isyo inyi jyo honyonyi.¹⁶Abaŋi laati daŋ bebe ette isi itahabuyo Hollum ojori, Adyoto eyani sayyo ol obolo ihiji hohoi bwo fe attu Hollum jyo laati honyi. ¹⁷Isarrahi eram ana ifau Yudea daŋ iko ifauhyen daŋ hun onyihai’to dia.¹⁸Iramani leyiyanak hulo Yoane erre huna jihonyi. ¹⁹Bwo Yoane ette iloŋuna leyiyanak arrihai ette ifahina isi jyo Hobu ifiyere inyi ojo, Iye alya linya ojori eyak sayyo jo ottu adi, kuyya oŋida hohoi etila obo? ²⁰Ofwoi isi jyo Yesu ette jaran, Ifahu Yoane Batista hohoi jihoi ojo, Iye alya ol ojori laati jo ottu adi, kuyya oŋida hohoi ettifya obo?²¹Ta asaa to nya itaŋida Yesu aati t’eŋwati hosi bwo fe ifuhak inyi ajohin hun orrohoji’to. Jyo hya hul oŋodoi’to isyo inyi amijo. ²²Bwo inyi ette itarraŋ jihosi ojo, Ifwatta iramana Yoane erre hun igonyuna tai bwo fe hun itaniŋuna tai. Omijye aŋodok, adahai aŋurak, oŋidari aati ’tallulu, itaniŋye atuhok, ibuhuni ayak bwo fe ittiyenie asayyo hun oyiji jyo alocaŋak. ²³Bwo omuno adi lya ol obeŋ’to iha eram hoŋ.²⁴Acaharai lefahat hulo Yoane, ette Yesu itteryo ikyana ihiji wati te eram Yoane jo, Ifwatta nya itai imur imijyere anyo? Igonyuna nya itai osiholoti on ohuta oyyami? Obeŋ. ²⁵Ati ifwatta nya itai imijyere anyo? Kuyya ifwatta tai imijyere atulo ol iyyafatyo’to aboŋojin hun ilamani? Ahode hul iyyafani’to aboŋojin hun ilamani amanyai isi ihasik hobwok. ²⁶Ati ifwatta nya itai imijyere anyo? Kuyya eyani sayyo? Afe, eramak ni itai jo agalik Yoane eyani sayyo.²⁷Nyo igyoroni ekyanita huna tenyi ojo, “Imijye, efak ni eyani sayyo hoŋ ahosyere hoi, Al ihuhumak’to nekoi ahosyere hoi.” ²⁸Eramak ni itai jo, Ihiji wati daŋ hul isiuni obeŋ obo agalik Yoane. Ati lya ol omuta’to ilobye Hollum agalik adi inyi Yoane.²⁹Itaniŋuni aati iko amojok musuru ekyanita honyi ette isi itahabuyo Hollum, nyo ibatisye nya isi ta batisimo ono Yoane. ³⁰Ati ihari nya Farisei iko eleittaha awahan Hollum bwo fe obeŋi isi ifwotuni batisimo jyo Yoane.³¹Etarrijohi adi ni aati hulo iko anyo? Arai isi ihwa anyo? ³²Arai isi ihwa aduri hul itoŋoi’to lisuk bwo illilloŋoi illarak hosi ojori, Ehut hohoi acuwali jihatai bwo itai ibyaŋata ihyati. Eyyo hohoi atwari bwo itai ibyaŋata iburyete.³³Nyo ottu Yoane Batista ol obeŋ oŋiyo aŋirya bwo fe obeŋ amata aari ajalaŋi, bwo itai ijatta jo orrohoja inyi. ³⁴Ottu Lonyi tulo ol oŋiyo bwo fe amata bwo itai ijatta ara inyi alaŋaru iko arumani bwo fe amotte hamojok musuru iko leyyak. ³⁵Itahutani ehanita Hollum jo obisi ofyoro honyi.³⁶Iloŋo obo olo Farisei Yesu iŋiyere ikonyi. Attati inyi leten ihaji Fariseitanani ette itoŋo iger teremeja iŋiyere. ³⁷Bwo fe owon nya obo aŋotte ono amiji ania an ara’to aheyyani. Itaniŋu inyi jo oŋiyo Yesu ihaji Fariseitanani, ette inyi iyaŋuno arya ta akarajaja an ara’to ahiyali. ³⁸Ette inyi wotya ihorwoŋ Yesu iger hejek honyi ette ’yo. Oyihi inyi eyyo ihejek Yesu ette ifufus to ofir honyi ette jur ejek honyi bwo ette iyalyo ta arya.³⁹Tania al igonyu Afariseitanani linya iloŋu’to Yesu, ojo inyi ta ataji honyi, Ara dwo atulo olo eheyani sayyo omijak dwo inyi anani aŋotte an ottir’to ania inyi nyo ara inyi aheyyani. ⁴⁰Attati Yesu itarraŋ jihonyi ojo, Simone, ajo ni ekyana omuk erre jihoi. Bwo inyi ette itarraŋ ojo, Hettiyanani ikyanai.⁴¹Ojo Yesu, Owon nya obo atulo iko aati horos honyi arrihai, ara ono atulo abotye arobia esiha miet, bwo obo arobia atomwana miet. ⁴²Obeŋi isi oremehini duma ahorosi hosi ette inyi busana isi daŋ. Tania alali adi ol omuno’to inyi agalik? ⁴³Ojo Simone, Egigilo ni jo lya ol obusak inyi hun olwaji. Bwo Yesu ette jaran jihonyi, Iŋot iye on obis.⁴⁴Oyito inyi jyo aŋotte ania ette jaran jyo Simone, Igonyu iye aŋotte ana? Ajiŋak dwo ni ihaji hoi, ibeŋ iye isyo ani aari illillayere ejek hoŋ ati oyihi inyi eyyo ihejek hoŋ ette ifufus to ofir honyi. ⁴⁵Ibeŋ dwo iye ijur ani, ati many hajiŋak ni ihaji, ojuryo inyi ejek hoŋ.⁴⁶Ibeŋ dwo iye iyal ahou hoŋ te eyali ati iyal inyi ejek hoŋ ta arya. ⁴⁷Ihwania eramak ni iye jo ahohinie eyyata honyi hun olwaji nyo omuno inyi ani bebe. Ati lya al ahohinie eyyata hun omutari omuta namuno honyi bwo fe.⁴⁸Attati inyi jaran jyo aŋotte, Ahohinie eyyata hoi. ⁴⁹Attati hya hul itoŋoi’to iger teremeja ikonyi itteryo ikyana ta ahwattek hosi ojori, ngai olo ol ohohi’to eyyata? ⁵⁰Attati Yesu jaran jyo aŋotte, Italahu eruk hoi iye. Ilo te elik taji.

¹Ihalu olo Yesu totwa misik ittiyeniere asayyo huno olobye Hollum. Ofwoi leyiyanak ’tomon harrihai ikonyi. ²Bwo fe ofwoi aŋorwo hunya itaŋidaruni jyo ajohin hun orrohoji’to iko eŋwati ikonyi. Owon bwo fe Maria an ifurani Madalena inya ifuha Yesu ajohin hattarik hun orrohoji’to, ³bwo Yoana ŋorwoi Cusa legyamani olo Erode iko Susana bwo fe omuk arryai. Olwahi aŋorwo huna Yesu iko leyiyanak honyi te erre hosi.⁴Ottubanie eluluŋ wati arryai bwo aati to misihi daŋ ette fwatan jyo Yesu attati inyi ikyana jihosi ta arryamara on ojo, ⁵Olo obo atulo yehina enyomo honyi. Hoyehi inyi ofodoŋonie omuk enyomo likoi bwo aati adak ette ryehina ta nejek hosi bwo fe naheny ette kuba. ⁶Ofodoŋonie omuk ihiji morwoi bwo isi ette isuruna ette oloŋ itayoho afarawa hosi nyo obeŋi aboro ofuji.⁷Ofodoŋonie omuk lihiji hikwa, ette isi isuruna arabotye iko nekwa ette nekwa itabunara isi. ⁸Okwahinie omuk jyo aboro hun oyiji ette isuruna on oyyu bwo ihalu ette fwanna ŋerihina ema esiha abotye. Hekyana inyi ihwania ette inyi jaran bwo fe ojo, Lya ol owon’to iko ayyaha ijara inyi hetaniŋu.⁹Attati leyiyanak honyi ifiyo inyi awoyo hiram ono arryamara ana. ¹⁰Ojo inyi jihosi, Italeyehi Hollum jihatai nelahode ono olobye honyi ninya idimani ati jyo hul omuk ikyanai jihosi ta arryamara jo al omijye isi obeŋi adi isi igonyuni, bwo fe al itayirye isi obeŋi adi itaniŋuni.¹¹Ihwania awoyo hiram ono arryamara ana; arai nenyomo ekyana Hollum. ¹²Nenyomo hutte koi isi aati hul itayirye’to nekyana ette etisyahani ’tuna ette kwararu ekyanita addi to tajya hosi ette isi byaŋan iruk ette ilak italahuno. ¹³Nenyomo hutto morwoi isi aati hul itayirye’to nekyana ette ifwotuna ta namuno ati obeŋi jihosi nadde, iruhi isi do, ati al attu esusuyo ette isi ipal addi.¹⁴Nenyomo hun ofodoŋonie’to itwa hikwa isi aati hul itayiruni’to ati itabunari ebariti iko ehawwata bwo emuniti huno afau ana isi bwo aŋer hosi obeŋi odori. ¹⁵Bwo hun okwahinie liboro hun oyiji, isi aati hul itayirye’to nekyana ette ’tunana itajya hosi hun oyiji bwo fe obeŋi inyobye ette fwanna ŋijuna aŋer ta adihan hosi.¹⁶Obeŋ obo atulo oswak allomo ette muhonio ta agufa kuyya ihanak iwoyo ijotit, ati oyihak inyi allomo ihide jo oŋida hya hul ojiŋani’to igonyuni afaŋan. ¹⁷Onuhani laati omuk erre jo oŋida ihalu inyyahi bwahuna isi. Imuhoni laati erre jo oŋida ihalu inyyahi isi duhuna. ¹⁸Ihumata aŋai itaniŋuna tai; nyo lya ol owon iko erre ofonik adi Hollum omuk jihonyi, bwo lya ol obeŋ’to iko erre, iyari adi jihonyi addi dwadi hun omutari hun igigilo inyi jo owoni jihonyi.¹⁹Attati illarak Yesu iko honyonyi fwanna, ati obeŋi isi oremehini fanyan jihonyi nyo olwaji aati. ²⁰Iramani laati inyi ojori, Honyohoi iko illarak hoi owotyai ilet, owahi isi iye. ²¹Ati ojo inyi jihosi daŋ, Heyaŋ iko illarak hoŋ hulo. Isi hul itaniŋye’to ekyanita hoŋ bwo fe ihanie.²²To nobo noloŋ adak Yesu itogol iko leyiyanak honyi, ette jaran jihosi, Efwo aŋati hari tole, attati isi fwatan. ²³Hofwoi isi ette inyi jotoro. Bwo asiŋit ette dyoto on obolo bebe bwo fe ifut atogol iko aari ette isi jaran edyo itwa hari.²⁴Ette isi itaheny inyi ojo, Leittok, leittok, ejo hohoi eye. Odyoto Yesu ette ifahina oyyami iko afolyak folyak hari hotodwahi. Ette asiŋit dwa ette aari ŋettyo dee. ²⁵Ojo inyi jihosi, Tani neruk hatai? Bwo isi ette baŋi bwo fe illillihai ette ikikyana ta ahwattek hosi ojori, Anyo tulo olo al itadwa’to oyyami iko aari, ette isi dwa?²⁶Attati isi fanyan ifau Gerasa on owon’to ta aŋati abotye ono Galilea. ²⁷Hesuru Yesu ifau, orwaŋanie inyi iko obo atulo olo amiji ania ol owon’to iko ajohin hun itisitaji’to inyi. Ta aŋasi arryai obeŋ inyi iyyafatyo aboŋojin bwo obeŋ inyi amanya ihaji, ati amanya inyi ihiji lumyo.²⁸Ninya igonyu inyi Yesu, oyyo inyi ette kwahino ifau ihosyere Yesu ette lwaha jihonyi on okwat ojo, Yesu Lonyi Hollum al agalik’to daŋ, anyo hiram iwak iye jihoŋ? Amojo ni jihoi hettigemyo ani. ²⁹Nyo ifuha Yesu ajohin hun orrohoji hefwahi jihonyi addi. To oŋitek arryai inefi ajohin inyi bwo dwadi ifitani inyi ta nofi iko aririk ofut inyi isi ette ajohin iyaro inyi litwa mur.³⁰Ifiyo ati Yesu atulo ojo, ngai afure hoi? Itarraŋ inyi ojo, Ani Legon, on ojo olwaji ajohin hun ojiŋani’to ihwan honyi. ³¹Ifiye ati isi Yesu oŋida inyi obeŋ ifuhak isi litwa iwure.³²Ihwania owoni neluluŋ bataha arryai hun oŋiye ihide doŋe attati ajohin lwaha jo oŋida inyi aŋatak isi ijiŋaniere itwa bataha. Bwo iruk Yesu isi hetefwahi. ³³Attati ajohin fwan addi totwa tulo ette jiŋana litwajin bataha, bwo eluluŋ bataha ette ŋyoron olotifor, hutu, hutu, hutu, ette kwahino lihari ette dyoro ette ye iko dia.³⁴Inya igonyuni leyyak eram ana ofuhoi isi ette iramana jyo hutto miji iko hutteger miji daŋ. ³⁵Attati aati fwatan mijo anyo on owon’to dia. Ofwonni isi jyo Yesu ette igonyuna atulo odwo isita’to itoŋo iger hejek Yesu. Iyyafak inyi aboŋojin bwo fe obis egigilo honyi ette isi baŋi.³⁶Bwo laati hinya igonyuni’to ette iyabana omuk eram ono etaŋidaryo ol osita. ³⁷Tania ikikyanai aati daŋ hutto Gerasa ette fuhara Yesu addi nyo owon nya abaŋi on obolo jihosi, tania adak inyi litogol ette caharu.³⁸Ifiyo atulo odwo isita’to Yesu lifwatari ikonyi ati ifak Yesu inyi addi ojo, ³⁹Ilo imiji hatai bwo fe iramak laati erre hun obolori’to hun ihanio Hollum jihoi. Alo inyi ette iramana laati hutto misihi daŋ erre hun obolori’to hun ihanio Yesu jihonyi.⁴⁰Acaharu Yesu ette laati irraŋuno inyi nyo itilai isi inyi. ⁴¹Bwo fe ette obo atulo ’tuna afure honyi Yario. Ara inyi eleittok olo aji imojit. Origoŋ inyi lihomon Yesu ette mojo jihonyi ojo, Waŋ efwo ihaji hoŋ. ⁴²Nyo owon inyi iko ŋarri abotye an ilyaha aye. Arai aŋasi honyi ’tomon harrihai. Holo Yesu ottidani aati inyi.⁴³Bwo fe ottu obo aŋotte jihonyi on owouno hoto to hwan honyi ta aŋasi ’tomon harrihai. Otuhok nya inyi agurusi honyi daŋ jyo akimi ati obeŋ inyi oŋida. ⁴⁴Ottu inyi ihorwoŋ Yesu ette ’tir esidi boŋo attati nooto honyi wotya kokwak.⁴⁵Attati Yesu jaran, ngai ottir aboŋo hoŋ? Ati orisai aati daŋ. Ojo Petro iko hul adahai’to ikonyi ojo, Olwaji laati hul osusularai’to iko hul itittaŋye’to iye. ⁴⁶Ati ojo Yesu, Ottir dwo obo atulo ani nyo amijak ni itaŋida adwaran hoŋ inyi.⁴⁷Inya igonyu aŋotte jo abeŋ inyi aremik dima, ottu inyi an ikikiro ette rigoŋi ihosyere honyi ette iramana jihonyi ihosyere wati daŋ ojo, Attir ni Yesu bwo aŋida ahwan hoŋ. ⁴⁸Ojo Yesu jihonyi, Hanioŋ, itaŋida neruk hoi iye. Ilo ta nelik taji.⁴⁹Hekyana inyi ottu obo to haji Yario ette jaran, Aye ŋarri hoi. Obusak ettiyanani. ⁵⁰Ati itaniŋu Yesu ette jaran jyo Yario, Hebaŋ, iruho bwo oŋida adi ŋarri hoi.⁵¹Ninya afany inyi ihaji obeŋ inyi iruk obo atulo ijiŋaniere ikonyi arari Petro, Yoane iko Yakobo, bwo fe monye iko honye hito. ⁵²Oyyoi laati dia bwo fe iwuwoŋitai. Ati ojo Yesu jihosi, Heyyoti, nyo obeŋ inyi oye, ojoto joto. ⁵³Ati osuhotyerek isi inyi nyo omijani isi aye dwo inyi.⁵⁴Ati inef Yesu aani hito ette jaran, Ŋarri hoŋ, odyotoi. ⁵⁵Attati oloyiri honyi cohuno ette inyi dyoto kwak. Ifak Yesu isi hesyarahi obo aŋiyo jihonyi. ⁵⁶Illillihai esyok honyi ati ifak inyi isi hotobyaŋahi iramani obo atulo anyo riŋ an ihanio inyi.

¹Attati inyi iloŋuna leyiyanak honyi ’tomon harrihai ette isyo jihosi adwaran iko elaballok igalihiniere ajohin iko itaŋidaryere eŋwati wati. ²Bwo inyi ette ifahina isi ittiyeniere laati olobye ono Hollum bwo fe itaŋidaryere aŋwak.³Attati inyi jaran jihosi, Heyatti obo ariŋ ta adaha hatai ara dwadi bu elluhi kuyya akisi, kuyya aŋirya, kuyya agurusi, kuyya agamisi arrihai. ⁴Bwo jyo naji an ijiŋaniete tai itoŋoti dia many ifwatta tai jyo amaji ania addi.⁵Kuyya ihari omuk aati itai, al ibusana tai amiji ania iddiddyaŋata attuduha to hejek hatai itahutaniere etamijani jihosi. ⁶Tania ofwoi isi ette fwatan ta atwa misihi ittiyeniere aati asayyo hun oyiji bwo fe itaŋidaryere aati imasik daŋ.⁷Ihwania itaniŋu Hobu Erode nerre hunya ihanio Yesu ette inyi illilliha nyo ojori nya omuk jo ibuhu Yoane to ye. ⁸Bwo omuk ojori jo inyi Elija, bwo omuk ojori inyi eyani sayyo linya beryen al ibuhu’to. ⁹Attati Erode jaran, Aŋotuni nya ahou Yoane addi, ati ŋai alya al etaniŋu ni erre honyi huna? Bwo awak inyi igonyuniere Yesu.¹⁰Ocohunie lefahat ette iramana Yesu erre daŋ hunya ihanie isi, attati inyi iyaro isi many iger miji Beteseda. ¹¹Ijifarai eluluŋ wati inyi al igonyuni isi isi ofwoi. Attati inyi irraŋuna isi bwo ette ittiyenio jihosi eram ono olobye Hollum bwo fe itaŋida hya hunya awahi’to aŋidari.¹²Inya amuta oloŋ ofwonni leyiyanak honyi jihonyi ette jaran, Ifak eluluŋ wati addi, oŋida isi ofwoi itwa misihi iŋiyere bwo fe ijotori nyo ewon hohoi dini ihotohoto. ¹³Ati ojo inyi jihosi, Isyatta isi erre hun oŋiye isi. Bwo isi ojori, Ebeŋ hohoi ewon iko nobo aŋiyo arari emunio miet iko aham arrihai. Oŋida ati hohoi efwo inyyaŋuno aŋiyo ta aati hulo daŋ? ¹⁴Nyo arai nya laati hulya esiha atomwana miet. Bwo Yesu ette jaran jyo leyiyanak ojo, Iramana aati hetetoŋohi lifau te eluluŋi atomwana miet.¹⁵Attati isi ihanio ihwo nya ette ititoŋonia aati. ¹⁶Attati inyi iduhuna emunio huna miet iko aham arrihai ette ibonno bwo ette jaran humo jyo Hollum ette ibibeny attati isyo jyo leyiyanak honyi hataharaniehe jyo aati. ¹⁷Oŋiye isi daŋ ette ifoŋ bwo isi ette iddudduhuna ofitot hun oremehini afejin ’tomon harrihai.¹⁸To obo oloŋ al omojo Yesu abotye, ofwonni leyiyanak honyi jihonyi. Attati inyi ifiyo isi ojo, Ojori aati ani ŋai? ¹⁹Itarraŋi isi, Ojori omuk iye Yoane Batista, bwo omuk ojori iye Elija, bwo fe omuk ojori iye leyani sayyo linya beryen al ibuhu’to ihwania.²⁰Attati inyi inyyak ifiyo isi ojo, Ati ijatta tai ani ŋai? Itarraŋ Petro jihonyi ojo, Iye Kristo olo Hollum. ²¹Attati inyi ifahina isi hotobyaŋahi iramani obo atulo eram ania. ²²Ojo inyi bwo fe, Ittigemye adi Lonyi tulo te erre arryai, ihari adi amarwak iko ehumak eleittaha bwo egyorok inyi. Bwo ottohori adi laati inyi ati ihalu oŋitek hunihoi ibuhu adi inyi.²³Attati inyi jaran jihosi daŋ ojo, Al awak obo atulo ijifatyo ani, ijara inyi hetehai ahwan honyi, hotolorotye akruce honyi oŋitek daŋ, hetejifatye ani. ²⁴Al awak obo atulo italahuna nesu honyi italitohi adi inyi. Ati lya al isyo’to nesu honyi te eram hoŋ, italahuni adi inyi fur. ²⁵Anyo adi ayiji al opocou obo atulo erre daŋ hutta fau bwo nesu on osyo fur olitohi?²⁶Lya al iloriri’to jihoŋ bwo fe jyo ekyanita hoŋ, iloriri adi bwo fe Lonyi tulo jihonyi al ottu inyi iko akwatan honyi iko ono Monyonyi bwo fe iko ono anjelohyen hul olibori’to. ²⁷Bwo fe ekyana ni nelahode jihatai, itoŋoi omuk dini hul obeŋi adi igonyuni naye many igonyunierek isi olobye ono Hollum.²⁸Ninya allaŋi oŋitek hottohunik ihalu ekyanita huna, iyaro Yesu Petro, Yoane, iko Yakobo ihide doŋe imojori. ²⁹Homojo inyi ette ahwan honyi lufaji ette aboŋojin honyi bwaran bwo fe opipyahi.³⁰Teyya oleye omuk aati arrihai hul ikyanai’to ikonyi, isi Mose iko Elija. ³¹Oleye isi ta akwatan bwo ikyanai isi ta naye honyi on ottu adi inyi iyeri imiji Yerusalem.³²Ati ijoŋitai Petro iko hya hul owoni’to ikonyi bwo al ohenyuni isi, igonyuni isi akwatan ono Yesu iko aati hulo arrihai hul owoni’to ikonyi. ³³Lafwoi isi addi ojo Petro jyo Yesu ojo, Hettiyanani, oyyu jihohoi iwanari dini. Eduhok adi hohoi akukuhyen hunihoi, obo jihoi, obo jyo Mose, bwo obo jyo Elija; nyo obeŋ Petro omijak anyo an ikyana inyi.³⁴Hekyana inyi ottu nedis ette itihonia isi ette isi baŋi al itihok edis isi. ³⁵Attati nekyana ’tuna totwa idis on ojo, “Lonyi hoŋ olo al anyimu ni. Itayiryete jihonyi.” ³⁶Latuhuno nekyana ette Yesu wanan hama. Obeŋi isi iramani obo atulo erre hun igonyuni isi to oŋitek hwa.³⁷To noloŋ an ijifak’to ofwonni isi to doŋe. Orwaŋanie isi iko eluluŋ wati arryai. ³⁸Owon obo atulo ihiji iluluŋ al iloŋo inyi ojo, Hettiyanani, omehinie jihoŋ, imija lonyi hoŋ olo, ara abotye. ³⁹Inef ajok inyi ette bwarana inyi lifau ol oyyo bwo ididyaŋa inyi ette obulal ’tuna to hutuk bwo fe ititoŋosyo inyi. Obeŋ bwo fe inyi obusak inyi. ⁴⁰Bwo elolya ni jyo leyiyanak hoi hetefuhahi ajok addi ati obeŋi isi oremehini.⁴¹Attati Yesu jaran jihosi ojo, Aii, itai aati hul obeŋi iko neruk bwo fe hul ogoli tajya. Many baya adi etoŋo ni ikatai? Many baya adi adik ni itai? Iyaŋunie lonyi hoi dini. ⁴²Ati hottu inyi inef ajok inyi ette bwarana inyi lifau ette inyi didyaŋa. Attati Yesu ifuhara ajok on orroho’to addi ette eito ŋidari attati Yesu isyo inyi jyo monyonyi.⁴³Illillihai isi daŋ ta adwaran ono Hollum on obolo’to. Ati hellillihai isi te erre daŋ hun ihanio Yesu jyo aati, ette inyi ikyana jyo leyiyanak honyi ojo, ⁴⁴Ijara ekyanita huna hotojiŋaniehe liyyaha hatai, nyo isyori adi Lonyi tulo lihas wati. ⁴⁵Ati obeŋi isi itaniŋye ekyanita huna nyo idimani awoyo hiram jihosi jo oŋida isi obeŋi itaniŋuni, bwo isi ette baŋi ifiyere inyi te ekyana ana.⁴⁶Attati isi itteryo itarisa ojori, ngi adi eleittok? ⁴⁷Ati al omijak Yesu egigilita hosi ette inyi iduhuna eito on odiha’to ette ititoŋonia iger honyi. ⁴⁸Ette jaran jihosi, Lya al ifwotu’to eito on odiha’to ta afure hoŋ, ifwotu inyi ani. Bwo fe lya al ifwotu’to ani ifwotu inyi lya al ifahu’to ani. Nyo lya ol omuta’to tehiji hatai daŋ, obolo adi.⁴⁹Itarraŋ Yoane jihonyi ojo, Hettiyanani, egonyu dwo hohoi lobo al ifuha’to ajohin hun orrohoji’to ta afure hoi attati hohoi itik inyi nyo obeŋ inyi ara aholohoi. ⁵⁰Attati Yesu jaran jihonyi, Hetihoto inyi, nyo lya ol obeŋ’to ara amyotononi hatai ara inyi amotte hatai.⁵¹Ihwania ilyahai oŋitek attuba hun ifwotunierek inyi idou, bwo ihwania iyihi inyi ahode iculari Yerusalem. ⁵²Ifak inyi lefahat ahosyere honyi, bwo isi ette fwatan jiŋana imiji Samaria ihuhumaniere amaji tenyi. ⁵³Ati obeŋi nya laati ifwotuni inyi nyo olo inyi Yerusalem.⁵⁴Ninya igonyuni Yakobo iko Yoane eram ania, ojori isi, Hobu, iwak iye hohoi eloŋu neema t’edou iswahiniere isi? ⁵⁵Ati oyito inyi ette isiŋyo isi ette jaran jihosi, Ibyaŋata tai imijana anyo an ikyanati tai. ⁵⁶Nyo obeŋ nya Lonyi tulo ottu lifau ittohyere laati, ati ottu inyi italahuniere isi. Attati isi fwatan jyo obo amiji.⁵⁷Hadahai isi te ekoi ojo obo atulo jihonyi, Ejifatyo adi ni iye jyo amasik daŋ hun ilari iye. ⁵⁸Bwo Yesu ette jaran jihonyi, Owoni obeyohi iko ewuryo hosi. Owoni aheny iko asik hosi, ati obeŋ obo amaji jyo Lonyi tulo iferyere.⁵⁹Attati inyi jaran jyo lobo, Ijifunie ani. Itarraŋ lya ojo, Hobu, ijara do ani alo nuhana monyoŋ. ⁶⁰Ojo Yesu jihonyi, Ijara ayak onuhani ayak hosi ati ilo, ittiyenie eram ono olobye Hollum.⁶¹Bwo fe lobo ette jaran, Hobu ejifatyo adi ni iye. Ati ijara do ani alo imalauno hutta haŋ hohoi. ⁶²Ati ojo Yesu jihonyi, Atulo al itteryo’to adaha bwo ofyala orwaŋai obeŋ inyi osiru igyamari ilobye ono Hollum.

¹Ihalu erre huna onyimu Hobu omuk laati atomwana hattarik ette ifahina isi arrihai arrihai ahosyere honyi limisihi daŋ iko imasik hun ojari inyi alari. ²Ojo inyi jihosi, Obolo adyoŋo, ati omutari egyamak. Hamojoti jyo Hobu olo adyoŋo ifahuniere legyamak imatta honyi.³Ifwatta, efak ni itai ihwa akyoro ihiji lemyo. ⁴Heyatti omuk akisi kuyya abuteni iko amuha bwo hefonyata obo atulo te ekoi.⁵Bwo jyo aji an ijiŋana tai ijatta ahosyere, Ijara nelik tajya hatawana jyo aati hutta haji ania. ⁶Kuyya owon atulo dia al anyalam ijara nelik tajya hatai odulo jihonyi. Kuyya obeŋ inyi teyya, ocohuno adi nelik tajya jihatai. ⁷Oŋida irasati jyo aji ania, oŋiyete bwo amatati erre hun isyori isi jihatai nyo osiru aduma jyo legyamani te egyama honyi. Heculata jyo omuk ahaŋitek.⁸Kuyya jyo obo amiji an ijiŋana tai bwo ifwotuni isi itai, oŋiyete erre hun iyaŋunie isi jihatai. ⁹Itaŋidaryete aŋwak hosi bwo ijatta jihosi ilyaha dwo olobye ono Hollum attuna jihatai.¹⁰Ati jyo amisihi omuk hun obeŋi’to ifwotuni itai, iculata to olofirihi hosi bwo ijatta, ¹¹Ara dwadi bu attuduha miji hatai an eryeu hohoi, edidyaŋak hohoi jihatai jo oŋida imijana tai jo ilyaha dwo olobye Hollum attuna jihatai. ¹²Ati ajo ni jihatai iholoŋ ania obolo adi aŋoco jyo amiji ania agalik ono Sodoma.¹³Orroho adi bebe jyo amiji Korasin ati bwo fe orroho adi bebe jyo Beteseda nyo hara nya ihanie edwariti imisihi Turo iko Sidon ihwa hunya ihanie jihatai, nya mana iloiti isi atajya hosi beryen te ejiriŋa on obolo iko atarihita. ¹⁴Ati oyyu adi jyo Turo iko Sidon agalik itai iholoŋ ono aŋoco. ¹⁵Bwo iye amiji Kapernaum, itadara iye bebe ati ibironi adi iye many Hadesem.¹⁶Lya al itayiryo’to jihatai itayiryo jihoŋ, bwo lya al iha’to itai iha inyi ani, bwo lya al iha’to ani iha inyi lya al ifahu’to ani.¹⁷Attati hulo atomwana hattarik cohuno ta amuno ojori, Hobu ara dwadi bu ajohin, egalik hohoi isi ta afure hoi. ¹⁸Bwo Yesu ette itarraŋ jihosi ojo, egonyu ni Sitan akwaharu ihwa ahilai on odou’to t’edou. ¹⁹Imijyete, esyo ni jihatai adwaran iryeyere amunok iko atone bwo fe jyo egoliti daŋ huno amyorok bwo obeŋ adi obo ariŋ iryafu itai jyo ’tuŋ. ²⁰Ati hemunoti jo igalihina tai ajohin ati omunoti jo igyoroni afureta hatai lidou.²¹Ta nasaa ania, omuno Yesu to Oloyiri ol Olibo ette jaran, Ajo ni jihoi humo Monye Hobu olo edou iko afau nyo te edimana hoi erre huna jyo aati hul ilofyoroji’to iko hul itaniŋuni’to bwo ette itahutana isi jyo odolyo nyo ara ana awahan hoi.²²Isyo Monyoŋ erre daŋ jihoŋ, bwo obeŋ obo atulo omijak Lonyi arari Monye omijak, bwo fe obeŋ obo omijak Monye arari Lonyi iko hya hul itahutak Lonyi.²³Attati inyi yito jyo leyiyanak honyi ette jaran jihosi hama, Imunoti adi itai bebe nyo igonyuna tai erre huna. ²⁴Eramak ni itai jo olwaji eyak sayyo iko hobwok hul awahi’to igonyuna erre hun igonyuna tai ati obeŋi isi igonyuni. Awahi isi itayiruniere erre hun itayiruna tai ati obeŋi isi itayiruni.²⁵Attati lobo al ara’to ahaŋotoni hirre dyoto jihosi ette ikem inyi ojo, Hettiyanani, anyo adi ehanio ni inyuraniere nesu on osyo fur? ²⁶Itarraŋ Yesu jihonyi jo, Anyo igyoroni lifahita?Ihenio iye anyo? ²⁷Bwo inyi ette itarraŋ ojo, “Oŋida imunoti Hollum Hobu hatai ta atajya hatai daŋ, ta nesu hatai daŋ, ta agolon hatai daŋ, iko te egigilita hatai daŋ,” bwo fe, “Oŋida imunoti hutto lonyihari hatai ihwa ahwattek hatai.” ²⁸Ojo Yesu jihonyi, Itarraŋ iye on oyyu, ihanie ihwania bwo isu adi iye.²⁹Ati awak inyi itahutana ayiji honyi jyo aati ette jaran jyo Yesu, Haŋai hutto lonyihari hoŋ? ³⁰Ojo Yesu jihonyi ojo, Olo nya obo atulo to Yerusalem many Yeriko ette irwaŋanio iko ahahalak ette isi houna aboŋojin honyi bwo fe ette ibibahyo inyi bwo ette idyaharu inyi al ataragaŋa.³¹Attati obo ehumani ruboro awor te ekoi ania. Al igonyu inyi atulo odwo icul inyi aŋati tole. ³²Ottu bwo fe obo olo Levitahyen jyo amaji nya ette mijo inyi ette bwo fe icul aŋati tole.³³Attati obo Asamaritanani ’tuna jyo amaji ania ette igonyuna inyi ette mehino jihonyi. ³⁴Ottu inyi jihonyi ette iyal atoŋos honyi te eyali iko ta aari ajalaŋi ette luronia ta arubat ette kafana inyi ihide sigirya honyi ette iyaro inyi jyo obo aji on ojotorik laati bwo irrirrya inyi. ³⁵Nya motye isyo inyi arobia jyo monye haji ojo, Irrirryai inyi bwo fe to omuk erre daŋ hun inyyaŋak iye inyi attu adi ni dumana iye al acohuno ni.³⁶Tania ifiyo Yesu aŋotoni hirre ojo, Jyo aati hulo hunihoi, ŋai adi al ijo iye jo ara olonyihari ol oyyu jyo atulo olo al abahye ahahalak? ³⁷Bwo inyi ette jaran, Lya al itahutak’to amehino jihonyi. Attati Yesu jaran jihonyi, Ilo ihanie ihwo nya.³⁸Ati lafwoi Yesu iko leyiyanak honyi ojiŋak Yesu jyo obo amiji attati obo aŋotte an anya Marta ette iloŋuna inyi lihaji honyi. ³⁹Owon inyi iko hanie an anya Maria an itoŋo iger hejek Hobu itayiryere ekyana honyi.⁴⁰Ati ottohoro nya Marta egyama aŋiyo ette ’tuna jyo Yesu ette jaran? Hobu, ibeŋ iye igonyu hanioŋ abusaro ani egyama abotye? Ifahu inyi hetettu ani lwak. ⁴¹Ati itarraŋ Yesu jihonyi ojo, Marta, Marta, ihawwa iye bwo fe igigilo te erre arryai. ⁴²Owon ariŋ abotye on oyyu’to agalik bwo onyimu Maria ariŋ ania on obeŋ adi ohoro jihonyi addi.

¹1 Ati to obo oloŋ omojo Yesu jyo obo amaji. Latohu inyi amojo, ojori leyiyanak honyi jihonyi jo, Hobu ittiyenie hohoi amojo ihwa ninya ittiyeniere Yoane leyiyanak honyi.²Attati inyi jaran jihosi ojo, Al imojoti tai ijatta, Monye hohoi ol owon lidou, hotokwata afure hoi, hetettu olobye hoi, hetehaniehe awahan hoi lifau ihwa ihanie lidou.³Isyara hohoi ahana aŋiyo hohoi ottoloŋi. ⁴Ohohi eyyata hohoi ihwa an ehohiniere hohoi aati horosi hohoi. Heyaro hohoi jyo nesusuta ati itahoru hohoi jyo arrohojita.⁵Attati inyi jaran jihosi, Kuyya olo obo alatai ihaji motte honyi ta arwe ette jaran, Illa, isyara jihoŋ emunio hunihoi, ⁶nyo hetek motte hoŋ ’tuna te ewatari honyi bwo obeŋ obo aŋiyo an esyo ni jihonyi. ⁷Bwo inyi ette itarraŋ ’totwa haji ojo, Hettigemyo ani, nyo awon ni iko aduri hoŋ ihwania lijotiti hohoi bwo fe ihyana ekat haji hoŋ. Abeŋ ni aremik dyoto isyoryere emunio jihoi. ⁸Eramak ni jihatai ara dwadi bu obeŋ inyi awak dyoto isyoryere motte honyi emunio, al odulo inyi amojo odyoto adi inyi ette isyo inyi erre daŋ hun awak inyi.⁹Bwo fe ajo ni jihatai, ifiyete bwo isyo adi Hollum jihatai. Ottifyati, bwo inyurana adi itai. Inninnaŋata ekat bwo aŋahi adi inyi jihatai. ¹⁰Nyo lya al ifiyo’to jyo Hollum ifwotu adi, lya ol ottifya’to onyurak adi, bwo lya al inninnaŋyo’to ekat aŋai adi jihonyi.¹¹Isyo adi obo monye lonyi amunu al omojo inyi ahami? Obeŋ. Kuyya omojo inyi emune isyo adi monyonyi amorwo? Obeŋ. ¹²Bwo fe kuyya omojo inyi atelyo, isyo adi inyi eitoni? Obeŋ. ¹³Kuyya itai hul irrohojata’to omijana isyoryere erre hun oyiji jyo lonyirok hatai, obeŋ adi Monyatai ette dou isyo Oloyiri ol Olibo jyo hul ifiye’to inyi?¹⁴Ifuhak Yesu ajok jyo atulo ol obeŋ’to oremik ikyana ati al obusak ajok inyi ette inyi ikyana bwo illillihai laati bebe. ¹⁵Ati ojori omuk hulosi ojo, Ifuha inyi ajohin addi ta afure Belsebulin hobu olo ajohin.¹⁶Bwo omuk awahi kemyo inyi ette ifiyo inyi te etamijani on ottu’to t’edou. ¹⁷Ati omijak inyi egigilita hosi, ette jaran jihosi ojo, Al orryomonie laati hutto lobye ta ahwattek hosi itatturi adi olobye ania. Bwo al aŋalafai laati hutta haŋ ta ahwattek hosi itatturi adi awoyo hosi.¹⁸Al ihiharak Sitan adwaran honyi, aŋai adi oremik olobye honyi itoŋo? Ijatta tai jo efuhak ni ajohin ta afure Belsebuli. ¹⁹Kuyya efuha ni ajohin addi ta afure Belsebuli, ta anani fure ifuhatai lejifak hatai isi? ²⁰Ati kuyya efuha ni isi ta adwaran Hollum, oŋida imijana tai jo ottu olobye Hollum jihatai ahode.²¹Al irrirrya olotir ahaŋ honyi ta afyara honyi itoŋoi erre honyi dee. ²²Ati al ottu obo al agalik’to inyi ette bwarana inyi, ohoru adi jihonyi afyara hodwo iyihi inyi jo olwahye adi inyi ette hororo erre honyi daŋ. ²³Lya el ebeŋ’to egyama ikoŋ inyi amyotoni hoŋ, bwo itisarrayo lya el ebeŋ’to eddudduha ikoŋ.²⁴Al obusak ajok on orroho’to atulo adaha inyi ihotohoto ittifyari amaji yiri ati obeŋ inyi onyurak. Tania ojo inyi jo, Acaharo ni jyo atulo odwo edyehuno ni. ²⁵Al afany inyi onyurak inyi ataji tulo alibo bebe bwo ilaman. ²⁶Tania alo inyi rumana omuk ajohin hattarik hun orrohoji’to agalihini inyi ette isi jiŋana itwa tulo lya ette manya dia. Tania orroho ihwania jyo atulo alya agalik ninya hosyere.²⁷Ati hekyana inyi ekyana ana iloŋo obo aŋotte teluluŋ ette jaran jihonyi, Hotomunoi aŋotte an isiu iye bwo itadasyo. ²⁸Attati Yesu jaran jihonyi, Hotomunohi hya hul itaniŋuni’to ekyanita huno Hollum ette niŋyo isi.²⁹Ottubanie aati imaji abotye ette Yesu itteryo ikyana jihosi ojo, Orroho nelahaji ana. Ottifyai isi etamijani ati obeŋi adi itahutani jihosi obo etamijani arari etamijani ono Yona. ³⁰Nyo ihwa ninya arari Yona ahetamijani jyo aati hutto miji Ninifa, ara adi bwo fe Lonyi tulo etamijani jyo nelahaji ana.³¹Odyoto adi nobu otto ŋati ihorroŋ iŋocere nelahaji ana. Nyo ottu nya inyi to fau an alama’to itayiruniere olofyoro huno Solomone. Ati imijyete, owon dini obo al agalik’to Solomone.³²Odyotoi adi aati Ninifa iŋocere nelahaji ana nyo iloiti nya aati Ninifa atajya hosi ninya ittittoyere Yona jihosi. Ati imijyete, owon dini obo al agalik’to Yona.³³Obeŋ obo atulo oswak allomo honyi ette dimana inyi kuyya imuhok ta agufa. Ati oyihak inyi allomo ihide jo oŋida afaŋan afaŋ jyo hul ojiŋuni’to itwa haji. ³⁴Ara nonyek ihwa afaŋan ono nahwan tania al afaŋ inyi on oyyu ifut afaŋan daŋ ihwan tulo. Ati al orroho onyek iryok adi ahwan daŋ. ³⁵Ihwania ihumata jo helaha afaŋan hatai ara edumele. ³⁶Tania kuyya ifut ahwan daŋ iko afaŋan, obeŋ adi obo eryohi. Afaŋ adi inyi bebe ihwa afaŋan ’lomo on olibo’to bebe.³⁷Hekyana inyi iloŋo obo olo Farisei inyi iŋiyere ikonyi ette inyi leten ette itoŋo iger teremeja iŋiyere. ³⁸Ati al igonyu olo Farisei ana illilliha inyi nyo hobeŋ Yesu ofinia ihosyere ŋiyo.³⁹Attati Hobu jaran jihonyi, Itai Farisei, italiboryete tai orwoŋ kos iko asahan bwo idehina atwa an ifut iko enyobita bwo fe arrohojita. ⁴⁰Itai hul isitajata’to, obeŋ nya lya ol oyyeu’to orwoŋ oyyeu bwo fe atwa? ⁴¹Tania italiboroto atwa bwo olibori adi daŋ.⁴²Ati orroho bebe jihatai Farisei nyo isyatta tai aŋati etattomoni ono ema hatai iko aful, bwo erre ihwa huna jyo Hollum, ati ipwahata tai aŋoco on obis iko amuno jyo Hollum. Oŋida imunoti Hollum bwo fe isyatta esyorita jihonyi.⁴³Orroho bebe jihatai Farisei nyo imunoti tai itoŋori imasik huno etahabuyo itwa haji imojit bwo fe imunoti tai efonya wati hutto suk. ⁴⁴Orroho bebe jihatai nyo irata tai ihwa elumyo hun obeŋi’to oleye bwo aati ette daha ihide hosi nyo obeŋi isi omijani.⁴⁵Attati lobo olo aŋotok hirre itarraŋ jihonyi ojo, Hettiyanani, isiŋyo iye hohoi bwo fe? ⁴⁶Bwo fe Yesu ette jaran jihonyi ojo, Orroho bebe jihatai bwo fe aŋotok hirre nyo isyatta tai erre hun odiŋi’to jyo aati iwwahari, ati ibyaŋata tai ilwahata isi dwadi ta aani abotye.⁴⁷Orroho bebe jihatai nyo ibwahati nya itai elumyo huno eyak sayyo hinya ottohori hohonyok hatai. ⁴⁸Iruhoto tai ehanita huno hohonyok hatai nyo ottohori isi eyak sayyo bwo itai iduhoti elumyo hosi.⁴⁹Tania ojo nya Hollum jo, Efak adi ni eyak sayyo iko lefahat bwo ottohori adi isi omuk hulosi bwo lomuk ittigemye. ⁵⁰Tania oŋoti adi jyo nelahaji ana naye ono leyak sayyo hinya oyei’to many t’etteri fau. ⁵¹Isi laati many to ye Abele many jyo naye ono Sakaria linya ottohori tehiji etityek iko aji imojit eneittok. Eramak ni itai ahode ahode jo oŋoti adi nelahaji ana.⁵²Orroho bebe jihatai aŋotok hirre nyo ibyaŋata tai ittiyeniete aati ekoi ono olofyoro. Ibyaŋata tai ijiŋana ikoi Hollum ta ahwattek hatai bwo fe itihoto tai hya hul awahi’to jiŋana dia.⁵³Hojiŋu Yesu teyya ette aŋotok hirre iko Farisei wahan aŋalafa jihonyi bebe ette ikyana jihonyi on orroho te erre arryai. ⁵⁴Nyo ottifyai isi omuk erre to hutuk honyi itisyahiniere inyi.

¹Ninya lattubai laati hul olwaji bebe hul ifudai ette Yesu ikyana jyo leyiyanak honyi ojo, Ihumata irrirrya abula huno Farisei hun arai’to enyobita.²Nyo erre daŋ hun imuhoni italeyehini adi, bwo erre daŋ hun idimani omijani adi. ³Tania erre daŋ hun ikyanati tai idumele, itayiruni adi ta afaŋan. Bwo erre hun ihahayati tai itwa haji iramani adi ihosyere wati.⁴Ajo ni jihatai illarak hoŋ, hebaŋata hya hul ottohori’to ahwattek wati ati lihalu obeŋi oremehini inyyak ihanio omuk erre. ⁵Ati eramak adi ni itai jo oŋida ibaŋata ŋai. Abaŋata Hollum ol owon iko adwaran ibironiere itai lihima ihalu attohoro honyi itai. Ajo ni jihatai abaŋata inyi.⁶Obeŋi itinyyaŋani aheny miet ta agurusi arrihai? Ati obeŋ Hollum ogworo obo olosi. ⁷Ara dwadi bu ofir hutto hosi hatai ihen Hollum daŋ. Tania hebaŋata, nyo igigilo Hollum tetai agalik aheny.⁸Ajo ni jihatai jo, lya al iruk’to ani ihosyere wati, iruk adi bwo fe Lonyi tulo inyi ihosyere anjelohyen hulo Hollum. ⁹Lya al iha’to ani ihosyere wati, iha adi bwo fe Lonyi tulo inyi ihosyere anjelohyen hulo Hollum. ¹⁰Lya ol omwaŋa’to Lonyi tulo obusak adi Hollum inyi, ati lya ol omwaŋa’to Oloyiri ol Olibo, obeŋ adi obusanio.¹¹Al iyaŋunie itai lihasik imojiti ihosyere eleittaha kuyya bwo fe ihosyere okuma hebaŋata jo anyo adi itarraŋata tai. Kuyya anyo adi ijatta tai. ¹²Nyo ittiyenio adi Oloyiri ol Olibo itai jyo nasaa ania anyo adi an ijatta tai.¹³Attati lobo teluluŋ jaran jihonyi ojo, Leittok, iramak illaŋ jo oŋida inyi ehor ikoŋ orutat. ¹⁴Ati ojo Yesu jihonyi jo, Ŋai ihanak ani ahaŋotoni bwo fe ahaharani hatai? ¹⁵Attati inyi jaran jihosi ojo, Ihumata helaha adaya ojiŋak itajya hatai nyo obeŋ amanya tulo owon ta alwaji hirre hun owoni’to jihonyi.¹⁶Bwo inyi ette ikyana jihosi to obo arryamara ojo, Odo amana hasamani bebe. ¹⁷Attati inyi igigilo ta ahwan honyi ojo, Ehanio adi ni anyo nyo obeŋ amaji jihoŋ ihananiere ema hoŋ? ¹⁸Bwo inyi ette jaran, Ehanio adi ni ihwa ana, etattur adi ni amugwo hoŋ, ette duhonia nobo on obolo bwo ejuhok adi ni ema dia. ¹⁹Attati ni jaran jyo oloyiri hoŋ ojo, Olo, owoni erre jihoi ta aŋasi arryai. Itoŋoi dee, oŋiye, amatai bwo omunoi.²⁰Ati ojo Hollum jihonyi, Iye el isita’to, ta arwe ana ottu adi naye jihoi. Tania arai adi erre hun igyama iye hunia ahuno ŋai? ²¹Ara ihwania jyo lya ol ottunak’to ebariti honyi, obeŋ inyi abara ihosyere Hollum.²²jihatai jo, hehawwati ta nesu hatai, ta nerre hun iŋiyete tai ara dwo bu ta aboŋojin hun iyyafatyete tai. ²³Nyo agalik nesu aŋiyo, agalik ahwan aboŋojin.²⁴Ikemijyete olohuresi, obeŋi isi oyehini bwo fe obeŋi odeŋuni, obeŋi isi owoni iko omuk amugwo, ati Hollum itaŋiyo isi. Ati igigilo Hollum tetai agalik aheny. ²⁵Ngai obo alatai ol oremik’to itabobolororo ahwan honyi te ehawwa honyi? ²⁶Kuyya ibyaŋata tai iremehina ihanio erre hun omutari’to, nyo ilafuhoti tai te erre omuk?²⁷Ikemijyete ayaburita aŋai isuri isi. Obeŋi isi igyamai, obeŋi bwo fe ikaice, ati ajo ni jihatai jo obeŋi nya aboŋojin Solomone ilamani bebe ihwa ayaburita huna. ²⁸Kuyya ibuya Hollum ayaburita hun isuruni’to ahana ifau bwo motye oswahini, obeŋ adi Hollum itiyyafak itai on oyyu agalik? Aii itai laati hul omuta neruk.²⁹Tania helafuhoti te erre hun iŋiyete adi itai kuyya hun imatati adi itai. ³⁰Nyo ottifyai aati hutta fau erre huna daŋ, ati omijak Monyatai jo iwahata tai erre huna.³¹Ati ottifyati ahosyere ekoi ono Hollum attati Hollum fonihina erre huna daŋ jihatai. ³²Akyoro hoŋ, hebaŋata, nyo awak Monyatai isyarana jihatai olobye.³³Itinyyaŋana erre hun owoni’to jihatai bwo isyatta agurusi hwa jyo alocaŋak. Ihuhumana akisi hun obeŋi adi imarwahi. Ottunana ebariti hatai idou jyo amaji on obeŋ’to opwak, nyo obeŋ olohoho teyya kuyya bu neyyu. ³⁴Nyo igigiloi atajya hatai jyo amaji on ottunarik ebariti hatai.³⁵Iyyafana aboŋojin hatai bwo ijara allomohyen hatai owulori. ³⁶Bwo fe irata ihwa aati hobu hul omijye ta acohuno honyi to olohomo. Al ottu inyi ette inninnaŋ ekat oŋida isi aŋahi jihonyi kwak.³⁷Hotomunohi legyamak hul onyurak hobu isi arrai ta attuna honyi. Ahode ajo ni jihatai iyyafak adi inyi aboŋojin honyi ette iloŋuna isi iŋiyo ette ’tuna isyarana isi aŋiyo. ³⁸Hotomunohi legyamak hya hul onyurak hobu isi omijye ta acohuno honyi dwadi ara ta arwe.³⁹Ati omijana jo hara dwo omijak monye haji jo ottu adi olohoho lihaji honyi baya, omijo dwo inyi bwo fe obeŋ inyi obusak aji honyi owur olohoho ta arwe. ⁴⁰Ihumata ’ra nyo ta asaa an ibyaŋata tai igigiloti, ottu adi Lonyi tulo.⁴¹Attati Petro jaran jihonyi ojo, Hobu, ikyana iye arryamara ana jihohoi kuyya jyo hul omuk daŋ? ⁴²Attati Yesu jaran ojo, Ŋai ati lapit ol oyyu’to bwo fe ilofyoro? Ihanak hobu inyi ihaji honyi isyoryere aŋiyo jyo laati ta asaa ono aŋiyo. ⁴³Hotomunoi apit alya al ottu hobu honyi nyurana inyi ihanio egyama ana. ⁴⁴Ahode ajo ni jihatai jo ihanak adi hobu apit alya eleittok hirre honyi daŋ.⁴⁵Ati kuyya orroho apit alya ette igigilo ta ataji honyi jo, illiŋya hobu hoŋ, ette itteryo bahyo legyamak lyawa iko negyamak ŋorwo bwo ette ŋiyo ette mata many orumari inyi, ⁴⁶ilunyu adi hobu olo apit lya lunyuna ta asaa on obeŋ inyi omijak. Ette hobu bak inyi bebe ette ŋot jihonyi abahyo ono aati hul orrohoji’to.⁴⁷Bwo apit lya ol omijak’to awahan hobu honyi ette byaŋan ihanio obeŋ bwo fe inyi ihum imijo, abahi adi inyi ta allyoto edasita arryai. ⁴⁸Ati lya ol otimo’to awahan hobu honyi, bwo ette iyyauna erre hun osiruni ta allyoto, abahye adi inyi kai. Al isyo Hollum jyo obo atulo erre arryai awak inyi ifwotuna jyo atulo alya arryai. Al isyo Hollum egyama on obolo jyo obo atulo awak inyi ifwotuna ayiji an agalik jihonyi.⁴⁹Attu ni inohyere eema ifau. Ati oyyu kuyya anyurak ni inyi awulo. ⁵⁰Awon ni iko obo batisimoo an efwotu adi ni bwo fe odyaha ataji hoŋ many atuhoniere ni egyama ana.⁵¹Igigiloti tai jo attu ni ifau isyoryere nelik tajya? Eramak ni itai, obeŋ. Ati eyaŋuno ni abwanya. ⁵²Kuyya owoni miet lihaji abotye obwanyai adi isi. Oliwarik adi hulo hunihoi hulo arrihai bwo fe arrihai oliwarik hulo hunihoi. ⁵³Oliwari adi monye lonyi honyi bwo lonyi oliwari monye. Oliwari adi honye ŋarri bwo fe ŋarri honyonyi, bwo hamoni oliwari hamoni honyi bwo fe hamoni honyi jyo hamoni.⁵⁴Attati inyi jaran jyo eluluŋ wati ojo, Al igonyuna tai nedis ottu t’eddorro holoŋ ijatta tai jo ottu adi ahide, attati inyi ’tuna. ⁵⁵Bwo fe al igonyuna tai jo ohut oyyami otto hani iŋet, ijatta tai jo onok adi oloŋ, ette nahan ahode. ⁵⁶Itai enyabak, imijana tai erre hutte dou iko hutta fau, aŋai itimoti tai oŋitek huna?⁵⁷Bwo fe nyo ibyaŋata tai iŋocete on obis ta ahwattek hatai? ⁵⁸Kuyya iyaro arrosoni obo alatai ihosyere lokiko oŋida lya opulok eram honyi kwak hebeŋ inyi afany ilokiko ŋadi iyaro inyi ihosyere aŋotoni hirre bwo isyo adi aŋotoni hirre inyi jyo oseŋer ifitaniere ibabus. ⁵⁹Eramak ni itai jo obeŋ adi lya ohouno many odumari inyi daŋ''.

¹Owoni omuk laati dia hul iramani jyo Yesu eram ono aati hulo Galilea hinya ifak Pilato ittohori isi ta asaa an isyoryerek isi ehumita hosi. ²Attati Yesu itarraŋ jihosi ojo, Igigiloti tai jo orrohoji aati Galilea hulya agalihini hul omuk nyo ittigemye isi ihwania? ³Ati ajo ni, obeŋ. Ati kuyya ibyaŋata tai irwejata t’eyyata hatai iyeti adi itai ihwo nya.⁴Ara nya hya ’tomon hohottohunik hunya okwahino olobele ono Silom jihosi ette ’tohoro isi. Igigiloti tai jo arai isi aheyyak agalihini aati daŋ hutto miji Yerusalem? ⁵Eramak ni itai, obeŋ. Ati kuyya ibyaŋata tai irwejata t’eyyata hatai iyeti adi itai ihwo nya.⁶Ikyana bwo fe Yesu arryamara ana ojo, Owon aŋaboli limana ono obo atulo ette inyi ’tuna ’tifya aŋer iŋaboli ania ati obeŋ inyi onyurak omuk. ⁷Ojo inyi jyo errirryani mana honyi ojo, Attifya ni aŋer jyo aŋaboli ana ta aŋasi hunihoi bwo abeŋ ni anyurak omuk. Ayafai inyi addi. Nyo itihok inyi afau oboijai?⁸Ati itarraŋ errirryani mana ojo, Hobu, idehi do jyo neŋa ana abotye bwo arom adi ni awoyo honyi ette ihanana aworot jihonyi. ⁹Kuyya al oŋiju inyi aŋer, oyyu; kuyya al obeŋ oŋi, ayefu adi ni inyi addi.¹⁰Ittiyenio nya Yesu ihaji imojit to oloŋ sabato. ¹¹Owon nya obo aŋotte on okudo ahwan honyi ta aŋasi ’tomon hohottohunik, obeŋ inyi oremik itabisana ahwan honyi.¹²Ninya igonyu Yesu inyi, iloŋu inyi aŋotte nya ette jaran jihonyi ojo, Hanioŋ, aŋida ahwan hoi ihwania. ¹³Attati Yesu iyyabana ahas honyi jihonyi. Teyya kwak abis ahwan atulo ania ette inyi itahabuyo Hollum. ¹⁴Ati iloŋojita eleittok olo aji imojit nyo itaŋida Yesu aŋotte to oloŋ sabato ette jaran jyo laati ojo, Owoni oŋitek ille hun igyamarik aati. To noŋitek hunia ifwanna ifwotuniete aŋidari, obyaŋara to sabato.¹⁵Attati Hobu jaran, Itai enyabak, ibyaŋata tai daŋ ihohitati esuŋ hatai to bore to noloŋ sabato ittata tai iyaro ihari? ¹⁶Ijatta tai jo oŋida ŋarri Abramo ana an ifitak Sitan ta aŋasi ’tomon hohottohunik obeŋi ohohini ta aŋwai honyi to noloŋ sabato?¹⁷Likyana inyi nerre huna, ette laati daŋ hodwo iŋiŋyalai’to inyi iloriri. Bwo fe aati omuk ette muno te erre hun obolori’to hun ihanio inyi.¹⁸Bwo fe Yesu ette ifiyo ojo, Ara olobye ono Hollum ihwa anyo? Etarrijohi adi ni inyi iko anyo? ¹⁹Orrijori inyi iko aŋeryo bule an iyaro atulo ette idulana imana honyi. Isuru inyi ette ’tuna ratan ayyani on obolo ette aheny hutte dou duho asik hosi litanata honyi.²⁰Bwo fe inyyak inyi jaran jo, Etarrijohi adi ni olobye Hollum iko anyo? ²¹Orrijori inyi iko abula hun iduhu aŋotte ette iharrwahina iko efwa many ayafutarik daŋ.²²Bwo inyi ette leten ta atwajin misihi ette itittiyenaro aati many Yerusalem. ²³Attati lobo ifiyo inyi ojo, Hobu, omutari adi hul italahunie? Bwo ojo inyi jyo laati daŋ, ²⁴Ottifyati bebe ijiŋaniere te ekat ol ottida’to. Nyo olwaji hul ottifyai’to ijiŋaniere ati obeŋi isi oremehini jiŋana.²⁵Odyoto monye haji ette hyanana nekat haji bwo itai ifwanna inninnaŋyere nekat bwo ijatta tai, Hobu, Hobu, aŋahi hohoi nekat. Itarraŋ adi inyi jihatai ojo, Abeŋ ni amijak itai. Ifwanna tai tai? ²⁶Ijatta adi itai jihonyi ojo, Eŋiyo nya hohoi bwo emata ikoye, bwo fe ittiyenio nya iye lilofirihi hohoi. ²⁷Ati ojo adi inyi ojo, Eramak ni itai, abeŋ ni amijak itai. Ifwanna tai tai? Ifwatta addi, itai hul ihaniete’to erre hun orrohoji’to.²⁸Owon adi ayyo iko aŋutta hala iholoŋ an igonyuniete adi itai Abramo iko Isako ojo Yakobo iko eyak sayyo daŋ ilobye Hollum bwo itai irasati ilet. ²⁹Bwo ofwonni adi laati t’ettedwoŋi holoŋ iko t’etteddorro holoŋ bwo fe ta aŋaco daŋ ette itoŋo ilobye Hollum. ³⁰Ati aati huttehalu ofwoi adi ahosyere bwo huttohosyere ofwonni adi ihalu.³¹Ofwonni omuk Farisei hul ojori jihonyi ojo, Ilo addi, nyo awak Erode ’tohoro iye. ³²Attati inyi jaran jihosi, Ifwatta iramana olobeyok lya jo, etaŋidaryo ni laati bwo fe efuhatyo ni ajohin ahana iko motye bwo ara oloŋ itahunihi esidi hoŋ. ³³Oŋida ani adaha ahana iko motye many oloŋ itahunihi nyo obeŋi oremehini ’tohoro eyani sayyo arari limiji Yerusalem.³⁴Yerusalem, Yerusalem, amiji an ittohyo’to leyak sayyo bwo fe irwoŋyo hya hul ifak Hollum jihoi. Awak ni ’tubana lonyirok hoi jihoŋ enyyahita arryai ihwa on ottubaniere ahohoro akiyehi honyi itwa hiwa honyi, ati iha iye. ³⁵Ahode idehi Hollum aji hoi jihoi ahania. Bwo ajo ni jihoi, ibeŋ adi iye inyyak igonyuna ani many iholoŋ an ijo iye, Hotomunoi lya ol ottu’to ta afure ono Hobu.

¹To oloŋ sabato olo Yesu iŋiyere aŋirya lihaji obo eleittok olo Farisei, attati laati ikikorihina jihonyi. ²Owon nya bwo fe lobo latulo dia ol owon iko obo aŋwai ono abalaco. ³Attati Yesu ifiyo aŋotok hirre iko Farisei ojo, Odwa itaŋidaryere atulo to noloŋ sabato?⁴Attati isi dwahino ette Yesu iyaro atulo alya ette itaŋida ette ifahina inyi hetelo. ⁵Inyyak inyi ikyana jihosi ojo, Ŋai obo alatai ol okwahino asigirya honyi kuyya eteŋ litwa hirre bwo inyi obeŋ ipihu inyi addi to noloŋ sabato? ⁶Bwo isi obeŋi itarraŋi jihonyi ta nerre hunia.⁷Attati inyi ikyana arryamara jyo hya hinya iloŋuni iŋiyere, nyo igonyu inyi isi onyimuni amasik hun oyiji itoŋori. Ojo jihosi, ⁸Al iloŋo obo alatai jyo alomone, hetoŋo jyo amaji ono eleittok ara bwo hottu obo atulo al ara eleittok jihoi. ⁹Ojo adi latulo al iloŋuno’to iye ojo, Isyarak olo amaji hoi. Tania ilo adi iye ta ariri jyo amaji obo.¹⁰Ati al iloŋoro iye, ilo, itoŋoi jyo amaji on ofyaha’to. Bwo al ottu leloŋoni wati, ottu adi jaran jihoi ojo, Illa, waŋ, itoŋoi imaji on oyyu’to ana, tania iwon adi iye iko nolohwo ihosyere hul oŋiye’to. ¹¹Nyo lya al itahabworo’to ahwan honyi, itiloririji adi, bwo lya ol omyana’to ahwan honyi itahabuhini adi.¹²Tania ojo Yesu jyo lya al iloŋu inyi ojo, Al ihuhum iye aŋiyo on obolo heloŋ illarak hoi kuyya bu orryahat hoi, kuyya aati hutta haŋ hatai, kuyya aati hatai hul abarai’to, ŋadi isi iloŋuni iye obo oloŋ iŋiyere ikosi.¹³Ati al ihuhumyo iye akarama iloŋu alocaŋak, arrohojak, aŋurak, iko aŋodok. ¹⁴Bwo ifwotu adi iye namuno nyo obeŋi isi oremehini inienuna iye iŋiyere bwo ifwotu adi iye edumit hoi iholoŋ an ibuhunierek aati hul oyiji’to.¹⁵Ati litaniŋu lobo ol oŋiye’to ikosi neram ana, ette jaran jyo Yesu ojo, Hotomunoi atulo ol oŋiyo’to aŋirya ilobye Hollum. ¹⁶Ati ojo Yesu jihonyi ojo, Ihuhumyo nya obo atulo naŋiyo on obolo bebe ette iloŋuna aati aaryai. ¹⁷Al ara asaa ono aŋiyo, ifak inyi apit honyi hetelo iloŋuno aati nyo attubai nerre daŋ.¹⁸Bwo isi daŋ ababo ette ikyana elyati hosi. Ojo ebotye jihonyi ojo, Enyyaŋu ŋole ni nobo amana tania awak ni leten mijo. Ajo ni jihoi, ilo iramak inyi. ¹⁹Bwo fe lobo ette jaran, Enyyaŋu ŋole ni attamoti husuŋ miet, ajo ni alo mijo. Ajo ni jihoi, ilo iramak inyi. ²⁰Bwo lobo ojo, Ayama ŋole ni aŋotte, tania abeŋ ni aremik leten.²¹Attati lapit cohuno ette ramana eleittok eram ana. Tania ijorya eleittok bebe ette jaran jyo lapit honyi ojo, Ilo lilofirihi miji kokwak bwo iloŋunie dini alocaŋak, arrohojak, aŋurak bwo aŋodok. ²²Attati lapit jaran jihonyi ojo, Leittok, ehanio ni ihwa ikyana iye ati harasa amaji.²³Attati eleittok jaran jyo lapit ojo, Ilo ikota daŋ orrosunie omuk oŋida ofwonni daŋ dini jo oŋida aji hoŋ ifut hiny hiny. ²⁴Nyo ajo ni jihatai jo, Obeŋ adi obo jyo hya hul iloŋuni ahosyere iniŋ aŋiyo hoŋ.²⁵Attati eluluŋ wati arryai fwatan iko Yesu bwo inyi ette jaran jihosi, ²⁶Al ottu obo atulo jihoŋ ol obeŋ oliwari monyonyi iko honyonyi, ŋorwoi, onyirok, hutta haŋ honyi, haniarak honyi iko nesu honyi luŋa, obeŋ inyi oremik ratan aheyiyanani hoŋ. ²⁷Bwo fe ol obeŋ’to olororo akruce honyi ette jifaro ani obeŋ oremik ratan aheyiyanani hoŋ.²⁸Kuyya awak obo alatai duho aji on ohodo’to, itoŋo inyi ahosyere do lifau ette ihen arobia honyi imijyere kuyya oremehini isi ituhoniere egyama honyi. ²⁹Nyo ŋadi al ihanak inyi etawoni haji do bwo labeŋ inyi otuhonio, osuhotyerek adi aati inyi. ³⁰Ojori adi isi, Itteryo nya inyi aduho haji ati obeŋ oremik tuhonia.³¹Kuyya awak obo hobu arrem iko obo, ahosyere do igigilo inyi jo kuyya oremik inyi iko aati honyi alif ’tomon ’rem iko aati alif atomwana arrihai. ³²Kuyya obeŋi isi oremehini, halamaji hya, ifak inyi atulo itimwaraniere isi. ³³Ihwo nya, lya ol obeŋ’to obusak nerre honyi daŋ obeŋ oremik ratan aheyiyanani hoŋ.³⁴Oyyu amile, ati al ilik amile, aŋai adi inyyahini eŋolito honyi? ³⁵Obeŋ bwo fe inyi oremik itayyu obo ariŋ, oŋida ibiro inyi addi. Lya ol owon’to iko ayyaha ijara inyi hetaniŋu.

¹Obo oloŋ ofwonni lamojok musuru iko leyyak jyo Yesu itayiryere nettiyenio honyi. ²Bwo Farisei iko legyorok ette mumwaŋa ojori, Iloŋuta atulo olo leyyak ette ŋiyo ikosi.³Ette Yesu ikyana jihosi ta narryamara ana ojo, ⁴Kuyya owon obo alatai iko akyoro nesiha abotye bwo obo abotye olitohi, obeŋ adi inyi idehi huna atomwana hottoŋwan hohottoŋwan imur ette leten ’tittifyaru aker ania many onyuraniere inyi? ⁵Bwo fe al onyurak inyi naker nya olorok inyi ilohoho ta amuno.⁶Lafany inyi imiji iloŋu inyi mottyarak honyi iko orryahat honyi ojo, Hamunoti ikoŋ nyo anyurak ni naker hoŋ odwo olitohi’to. ⁷Ajo ni jihatai jo owon adi amuno on obolo lidou ta leyyani abotye al iloit’to ataji honyi t’eyyata honyi, agalik jyo hul omuk atomwana hottoŋwan hohottoŋwan hul oyiji’to hul obeŋi’to iloiti atajya hosi.⁸Kuyya owon obo aŋotte hatai iko agurusi atomwana ’tomon, bwo olitohi obo agurus abotye, obeŋ adi inyi inwok neema ette fyeyo afau haji ette ’tifya bebe many onyuraniere inyi? ⁹Al onyurak inyi inyi iloŋu inyi hutto onyihari honyi iko hutta haŋ honyi ette jaran jihosi ojo, Hamunoti ikoŋ nyo anyurak ni agurus hoŋ odwo olitohi’to. ¹⁰Ihwania ajo ni jihatai jo, Omunoi anjelohyen hulo Hollum ta leyyani abotye al iloit’to ataji honyi t’eyyata honyi.¹¹Bwo Yesu ette jaran, Owon nya obo atulo iko lonyirok arrihai. ¹²Bwo alahalu ette jaran jyo monyonyi ojo, Monyoŋ isyarak jihoŋ orutat hoŋ. Attati inyi harana jihosi ebariti honyi.¹³Lihalu omuk oŋitek kai iddudduhu alahalu nerre honyi daŋ ette leten jyo obo afau an alama ette tuhonia erre honyi daŋ ta asilara honyi. ¹⁴Latuk inyi agurusi honyi, bwo ahure on obolo ette ’tuna jyo afau ania ette inyi ilocaŋ.¹⁵Attati inyi leten itoŋo iko obo atulo ette atulo lya isyo jihonyi egyama ono eyyahatyo bataha. ¹⁶Bwo fe awak inyi ŋiyo aŋiyo bataha hun arai erre asai. Nyo obeŋ obo atulo isyo jihonyi aŋiyo.¹⁷Ati ninya attu inyi igigilo on oyyu ojo inyi, Arai legyamak monyoŋ omukaja hul owoni’to iko aŋiyo on oŋiye isi ette fituna nobo, bwo ni aye dini iko ahure. ¹⁸Acaharu adi ni jyo monyoŋ bwo ajo adi ni jihonyi, Monyoŋ, eyyau ni ihosyere Hollum bwo fe ihomon hoi. ¹⁹Tania obeŋ osiru jihoŋ irari olonyi hoi. Ihanak ani ahegyamani hoi.²⁰Attati inyi dyoto ette leten jyo monyonyi. Ati halama inyi igonyu monyonyi inyi ette mehino jihonyi ette ŋyoron ette ifony inyi bwo fe ette hut ayyaha honyi. ²¹Ati ojo lonyi honyi jihonyi ojo, Monyoŋ, eyyau ni ihosyere Hollum iko ihomom hoi tania abeŋ ni asiru irari olonyi hoi.²²Ati iloŋo monye legyamak honyi ojo, Iyaŋuniete aboŋo an ilaman’to bebe itiyyafana inyi, bwo fe ihanak ahatim lihani honyi, iko amuha ihejek honyi. ²³Iyaŋuniete atawwo ol ofir’to bebe bwo oŋototo, haŋiyete bwo fe hamunoti. ²⁴Nyo aye nya lonyi hoŋ olo, bwo ihwania lisu. Olitohi nya inyi, bwo ihwania aleyo. Attati isi muno bebe.²⁵Owon nya lonyi honyi ahouti imana bwo hottu inyi ilyaha ihaji itayiru inyi nedolo iko ahya. ²⁶Iloŋu inyi legyamani ette ifiyo jihonyi ojo, Anyo eram dia? ²⁷Itarraŋ inyi ojo, Attu illa hoi bwo isyak monyohoi atawwo ol ofir’to nyo acohuno illa hoi ol oyyu.²⁸Tania iloŋojita nya inyi bebe ette hara ajiŋana lihaji. Attati monye jiŋuna jihonyi ette iloŋuna inyi. ²⁹Bwo inyi itarraŋ jyo monyonyi ojo, Aii, egyama ni jihoi aŋasi arryai bwo fe abeŋ ni eha efahita hoi bwo iye ibeŋ isyo ani lobo naker an aŋot ni imunori iko orryahat hoŋ. ³⁰Ati lattu lonyi hoi olo ol otuk agurusi hoi daŋ ta amanya iko aati asomok, bwo iye ittu isyahina inyi atawwo ol ofir’to.³¹Attati monye jaran, Lonyi hoŋ, emanya iye ikoŋ aŋasi daŋ bwo fe arai erre hoŋ daŋ ahunohoi. ³²Ati oyyu jihohoi imunori ahana nyo oye nya illa hoi olo, ati ihwania lisu; olitohi nya inyi, bwo ihwania aleyo.

¹Attati Yesu ikyana jyo leyiyanak honyi ojo, Owon nya lobo abarani iko labusuti honyi. Itisyahini laati abusuti jyo abarani jo, Otuk inyi erre hoi asai. ²Bwo inyi ette iloŋuna abusuti ette jaran jihonyi ojo, Nyo etaniŋu ni erre hoi ihwania? Iramak jihoŋ negyama hoi ono nelobusi nyo atuhuno egyama hoi jihoŋ.³Igigilo inyi ta ataji honyi ojo, Ehan ’tadi ni aŋai? Nyo eya eleittok hoŋ nelobusi hoŋ addi. Abeŋ ni aremik romo bwo fe eloriri ni atileŋita ihaŋitek wati. ⁴Amijak ni anyo adi ehanio ni jo oŋida isi omojuni ani ihasik hosi al atuhuno egyama ono elobusi hoŋ.⁵Attati inyi iloŋuna aati horosi leittok honyi ette jaran jyo letteri ojo, Owoni asaŋ leittok hoŋ jihoi baya? ⁶Bwo inyi ette jaran jihonyi, Asofiahyen hiyali esiha abotye. Attati inyi jaran jihonyi, Itoŋoi, igyorok aduma hoi atomwana miet. ⁷Ojo inyi jyo lobo, Arai hunohoi omukaja? Bwo inyi ette jaran, Asofiahyen alif abotye huno ometi. Ojo inyi jihonyi, Itoŋoi, igyorok aduma hoi atomwana hottohunik.⁸Attati eleittok jaran jyo labusuti ol orroho’to ojo, Oyiji ehanita hoi nyo ilofyoroji laduri hulo elahaji ana agalihini lonyirok afaŋan. ⁹Tania ojo Yesu jihosi ojo, Orrehuna orryahat hatai ta ahwattek hatai te ebariti hutta fau jo oŋida al atuhuno jihatai ifwotuni adi isi itai jyo amanya on osyo’to fur.¹⁰Lya al ihanio’to on oyyu te erre hun omutari’to ihanio adi inyi on oyyu bwo fe te erre hun obolori’to. Bwo fe lya al ihanio’to on orroho te erre hun omutari’to ihanio adi inyi on orroho bwo fe te erre hun obolori’to. ¹¹Tania kuyya ibeŋ iye ihanio on oyyu te ebariti hutte fau, ŋai adi isyo jihoi ebariti huno nelahode? ¹²Bwo fe al ibeŋ iye irrirrya on oyyu erre huno obo atulo, ŋai adi ottu isyarana jihoi erre hoi?¹³Obeŋ obo atulo oremik igyama jyo eleittaha arrihai. Nyo oliwari adi inyi olobotye bwo fe omuno obotye. Kuyya bu awak adi inyi olobotye bwo fe omyana obotye. Ibyaŋata tai iremehina igyamari jyo Hollum bwo fe jyo ebariti.¹⁴Bwo fe Farisei hul omunoi’to agurusi itaniŋuni erre huna ette isi suhotyere inyi. ¹⁵Bwo Yesu ette jaran jihosi ojo, Itai hul itahutana’to ehanita hatai hun oyiji ihomomite wati, omijak Hollum atajya hatai daŋ. Nyo oliwari Hollum erre hun itahabuye laati.¹⁶Odulori nya nefahita huno Mose iko egyerita huno eyak sayyo many ottuniere Yoane Batista. Many ta asaa nya ittiyenie asayyo hun oyiji huno nolobye Hollum bwo ojiŋani aati dia ta agolon. ¹⁷Ilyaha jyo nedou iko nafau apwahan agalik apwahan ono obo ekyana abotye ono efahita.¹⁸Iyyau lya al ifuha’to ŋorwoi honyi bwo ette yemuna obo. Bwo fe iyyau lya al ayama’to aŋotte an ifuhari.¹⁹Owon nya lobo labarani ol iyyafatyo’to aboŋojin hun oyiji hun ogoli te enyyaŋa. Bwo fe obolo aŋiyo jihonyi oŋitek daŋ. ²⁰Owon nya lobo atileŋani al anya’to Lasaro inya itaferehini likat habarani bwo owon inyi iko atoŋos. ²¹Awak nya inyi ŋiyo ebenyiti hun odouni’to to teremeja habarani. Bwo aŋohe ette fwanna iddiddala atoŋos honyi.²²Inya laye atileŋani alya, akafarai nya anjelohyen inyi many jyo Abramo; ihalu oye bwo fe abarani ette nuhana. ²³Attati inyi itoŋo Hadese, imaji ono layak, ta adyaha on obolo bebe. Teyya ette inyi bonno ette igonyuna Abramo alamarai iko Lasaro ol oco isuhe Abramo.²⁴Attati inyi iloŋo ojo, Abramo monyoŋ, omehinie jihoŋ. Ifahu Lasaro jo oŋida inyi ottirok afyalai honyi itwa hari oŋida bati iyyak ’tuna itilik aŋadyef hoŋ nyo amuda ni lihima.²⁵Ati ojo Abramo jihonyi, Hito, oŋida iye igilu to oŋitek huno nesu hoi. Ifwotuta nya iye erre hunoyiji’to bwo Lasaro onyurak erre hun orrohoji’to, bwo ihwania omuno inyi bwo iye ittigemye. ²⁶Bwo fe oŋida iye imijak jo owon awudori ihiji hohoi ikoye on obolo bebe. Jo hya hul owoni’to dini obeŋi oremehini ’laŋan dinia. Bwo hya hul owoni’to dinia obeŋi oremehini ’laŋuna dini.²⁷Attati inyi jaran ojo, Monye Abramo, amojo ni jo oŋida iye ifak Lasaro ihaji monyoŋ. ²⁸Awon ni iko illarak miet oŋida inyi olo iramana jihosi ŋadi isi ofwonni jyo amaji hima ana.²⁹Ati ojo Abramo jihonyi, Owoni Mose iko eyak sayyo, ijara isi itaniŋye jihosi. ³⁰Bwo inyi ojo, Obeŋ, monyoŋ Abramo. Nyo al olo atulo jihosi to ye, oniŋye adi isi. ³¹Bwo Abramo ette jaran jihonyi, Kuyya obeŋi isi itaniŋye jyo Mose iko eyak sayyo, obeŋi adi bwo fe isi itaniŋye ara dwadi bu ibuhu lobo to ye.

¹Attati Yesu jaran jyo leyiyanak honyi ojo, Ipali adi laati ahode ati orroho bebe jyo alya al itipalyo’to isi. ²Osiru ifitani amorwo on obolo’to imurut honyi ette bironia inyi ihari an ittok’on, ŋadi inyi itipal hul omutari’to hulo.³Ihumata irrirrya ahwattek hatai. Kuyya iyyau illa hoi isiŋa inyi. Bwo al ijiriŋa inyi obusak inyi. ⁴Kuyya ihanio inyi on orroho jihoi enyyahita hattarik to noloŋ abotye bwo fe ijiriŋa inyi enyyahita hattarik ette jaran jihoi, Obusak ani, oŋida iye ibusak inyi.⁵Ojori lefahat jyo Hobu ojo, Itaboloro neruk hohoi. ⁶Attati Hobu jaran ojo, Al owon neruk hatai ihwa aŋeryo bule iremehina adi itai jaran jyo ayyani ana, Odutunie addi jyo amaji ania, bwo idulanie itwa hari bwo inyi ette niŋyo.⁷Kuyya owon obo alatai iko apit ol oromo limana kuyya eyyahani kyoro bwo al ottu inyi t’egyama honyi, ojo adi eleittok jihonyi ojo, Waŋ, ihwania iŋiye aŋirya? ⁸Obeŋ adi inyi ojo jihonyi, Ihuhumak amaji ŋiyo? Ojo adi inyi bwo fe jo, Iyyafak aboŋo hoi bwo isyarak ani aŋiyo. Al atuk ni aŋiyo hoŋ iko amata, iremik adi iye ŋiyo bwo fe imata.⁹Ojo adi inyi jyo lapit honyi, humo, al ihanio inyi erre hun ifak inyi? ¹⁰Ara ihwania jihatai bwo fe; al ituhonia tai nerre hun ifahini jihatai, ijatta jo, Era hohoi egyamak hul erroho’to, ehanio hohoi egyamita hun ifahini jihohoi hama.¹¹Ati to ninya alari inyi Yerusalem ojiŋa nya inyi te ehiji Samaria iko Galilea. ¹²Ninya ojiŋak inyi jyo obo amiji, orwaŋanie inyi iko aati ’tallulu ’tomon ette isi wotya alamarai. ¹³Iloŋoi isi inyi bebe ojori, Yesu, Hobu, omehinie jihohoi.¹⁴Igonyu inyi isi ette jaran, Ifwatta, itahutana ahwattek hatai jyo ehumak hulo aji imojit. Hofwoi isi ette isi ŋidari. ¹⁵Attati lobo abotye al igonyu aŋida inyi, acohuno ette itahabuyo Hollum on okwat. ¹⁶Ette ruboho lifau ihosyere hejek Yesu ette isyo inyi ahumo bwo ara inyi olo Samaria.¹⁷Attati Yesu ifiyo inyi ojo, Obeŋi dwo hul itaŋidari arai ’tomon? Tahyai hul omuk hulo hottoŋwan? ¹⁸Tahyai hul ofwonni isyoryere ahumo jyo Hollum? Ottu atomononi olo hama? ¹⁹Ojo Yesu jihonyi, Totte, ilo, itaŋida neruk hoi iye.²⁰Ifiye omuk Farisei Yesu ojori, Ottu adi nolobye ono Hollum baya? Itarraŋ inyi ojo, Obeŋ nolobye Hollum ottu on oleyo. ²¹Tania obeŋi adi laati ojori, Imijyete owon inyi dini kuyya dia, nyo owon olobye Hollum ihiji hatai.²²Attati Yesu jaran jyo leyiyanak honyi ojo, Ofwonni adi oŋitek hun iwahati adi itai igonyuniere noloŋ ono Lonyi ati ibyaŋata adi itai igonyuna. ²³Bwo ojori adi isi jihatai, Imijyete dini, kuyya, imijyete dia. Ati hefwatta ittifyari inyi. ²⁴Nyo al imedek ahilai t’edou, afaŋ inyi jyo aŋati abotye ono edou many jyo aŋati obotye. Orrijo adi jyo Lonyi tulo to noloŋ honyi.²⁵Ati ahosyere oŋida ittigemye inyi te ettigemita arryai bwo fe ihari adi inyi laati honyi. ²⁶Ihwo ninya to noŋitek huno Noa, ara adi bwo fe ihwo nya to noŋitek huno Lonyi tulo. ²⁷Oŋiye nya isi bwo fe amatai, ayamai isi bwo isyori nya isi liyamari many jyo noloŋ ninya ojiŋaniere Noa itogol, bwo naari ette ’tuna ette ’tohoro isi daŋ.²⁸Ihwo ninya bwo fe to noŋitek huno Loto, oŋiye nya isi bwo fe amatai, inyyaŋai isi bwo fe itinyyaŋai, oromoi isi bwo fe oduhoi asik. ²⁹Ati to noloŋ ninya alari Loto addi to miji Sodoma ette neema iko abarut douna t’edou ette tuk isi daŋ.³⁰Ara adi ihwo nya jyo noloŋ an italeyeunierek Lonyi tulo. ³¹To noloŋ ana helaha lya ol owon’to lihide haji isuru ijiŋaniere itwa haji iduhuniere asaŋ honyi addi. Bwo fe helaha lya ol owon’to limana ocohuno lihaji honyi.³²Ogotyete ŋorwoi Loto. ³³Lya al awak’to italahuna nesu honyi italitohi adi inyi, ati lya al italitohi’to nesu honyi italahuni adi inyi.³⁴Eramak ni itai jo, ta attari ania ojotoi adi aati arrihai jyo nejotit abotye. Iyarai adi abotye bwo idyaharai adi abotye. ³⁵Owoni adi aŋorwo arrihai hun iryeye eluluŋ. Iyarai adi abotye bwo idyaharai adi abotye. ³⁶Owoni adi alyawa arrihai imana. Iyarai adi abotye bwo idyaharai abotye.³⁷Attati leyiyanak honyi itarraŋ ojori, Hobu jyo anani maji? Bwo inyi ette jaran jihosi ojo, Ottubanie adi attaruha jyo namaji an awanari ahwan hayani.

¹Attati Yesu iramana isi narryamara an itahutak’to isi jo oŋida isi odulori amojo bwo fe obeŋi itabani. ²Ojo inyi, Owon nya lobo aŋotoni hirre ol obeŋ abaŋ Hollum bwo fe obeŋ abaŋ aati.³Bwo fe owon nya nobo nolobiloŋ ŋotte dia on odulo’to adaha jihonyi on ojo, Inienok ani amyotononi hoŋ. ⁴Iha aŋotoni hirre ahosyere do, ati lihalu ojo inyi ta ahwan honyi ojo, Abeŋ bu ni abaŋ Hollum bwo fe abeŋ ni abaŋ laati, ⁵ati ittigemyo ani aŋotte ana, tania enienok adi ni inyi ŋadi inyi ittigemyo ani fur.⁶Bwo Hobu ette jaran jo, Itaniŋyete erre hun ikyana laŋotoni al enyobyo’to. ⁷Obeŋ adi Hollum inienu onyimot honyi hul oyyoi jihonyi ta afanni iko ta attari? Bwo fe odihu inyi isi fur. ⁸Eramak ni itai jo inienu adi inyi isi kwak. Ati al ottu Lonyi tulo ottu adi inyi nyurana neruk lifau?⁹Iramak nya bwo fe inyi narryamara ana jyo lomuk laati hul ojori’to jo elibo isi ati omyanai isi omuk. ¹⁰Ofwoi aati arrihai imojori litwa haji imojit eneittok. Ara lobo olo Farisei bwo lobo amojoni musuru.¹¹Owotya Afariseitanani ette mojo ta ahwan honyi ojo, Hollum ajo ni humo nyo abeŋ ni ara ihwa aati omuk, hul arai’to ahahorok gurusi wati, emumunak, asomok, bwo fe ihwa amojoni musuru olo. ¹²Aferuta ni enyyahita arrihai te esabit abotye. Esyoryo ni aŋaco etattomonita huno erre daŋ hun owoni’to jihoŋ.¹³Ati lamojoni musuru owotya alamarai ol obeŋ ibonno ahide ette naŋ asuhe honyi bwo ojo, Hollum omehinie jihoŋ, ani leyyani. ¹⁴Eramak ni itai, olo atulo olo ihaŋ honyi al alibo agalik lodwo lobotye. Nyo lya al itahabworo’to ahwan honyi itiloririji adi, bwo lya ol omyana’to ahwan honyi itahabuhini adi.¹⁵Iyaŋunie isi jyo Yesu aduri hun odihara’to jo oŋida inyi ottir isi. Ati ninya igonyuni leyiyanak honyi ana, itihi isi aduri hotobyaŋahi ofwoi jyo Yesu. ¹⁶Attati Yesu iloŋo isi ojo, Obusana aduri ofwonni jihoŋ, hetihoto isi nyo ara Hollum a Hobu hosi. ¹⁷Ahode eramak ni itai jo lya ol obeŋ’to iruk Hollum irari a Hobu honyi ihwa iruhori eito ol odiha’to obeŋ adi inyi ojiŋak ilobye Hollum.¹⁸Bwo ottu lobo eleittok ette ifiyo Yesu ojo, Hettiyanani ol oyyu, ehanio adi ni aŋai inyuraniere nesu on osyo fur? ¹⁹Attati Yesu itarraŋ jihonyi ojo, Nyo iloŋo iye ani ol oyijo? Obeŋ obo atulo oyyu arari fe Hollum hama. ²⁰Imijak iye efahita, “Hehanio nerre somon, hettoho, hehoholyo, hegesem, bwo fe itahabuye monyohoi iko honyohoi.” ²¹Bwo eleittok alya ette jaran, Efaha ni erre hunia daŋ hara ni ahito many iko ahana.²²Ninya itaniŋu Yesu nerre hunia ojo inyi jihonyi ojo, Owon ariŋ abotye an ipwak iye. Ilo itinyyaŋak erre hoi daŋ bwo aharak agurusi jyo alocaŋak bwo iwon adi iye iko ebariti hoi lidou, bwo ihalu waŋ, ijifatye ani ²³Litaniŋu inyi erre hunia ette inyi jiriŋa bebe nyo abara inyi.²⁴Tania igonyu Yesu ejiriŋa honyi ette jaran, Ogol bebe jyo hul owoni iko ebariti ijiŋaniere ilobye Hollum. ²⁵Ogol bebe jyo abarani ijiŋaniere ilobye Hollum agalik ajiŋana konnikonni ittulit libira.²⁶Attati hya hul itaniŋuni’to inyi jaran, ngai ’tadi al italahuni? ²⁷Attati Yesu jaran jihosi, Erre daŋ hun agalihini’to aati oremik Hollum ihanio.²⁸Bwo Petro ette jaran jo, Ebusak hohoi erre hohoi daŋ ette jifatyo iye. ²⁹Tania ojo Yesu jihosi, Ahode ajo ni jihatai, atulo ol obusak’to ahaŋ honyi iko ŋorwoi honyi, illarak honyi, esyok honyi, kuyya bu aduri honyi ta namuno lobye Hollum, ³⁰ifwotu adi inyi erre arryai jyo afau ana bwo fe lihalu ifwotu adi inyi nesu on osyo fur.³¹To obo oloŋ iyaru Yesu leyiyanak honyi hulo ’tomon harrihai aŋati ette jaran jihosi, Imijyete, efwo hohoi Yerusalem, bwo ihanie adi jyo Lonyi tulo nerre daŋ hunya igyoroni leyak sayyo. ³²Nyo isyori adi inyi jyo paganohyen bwo osuhotyerek adi isi inyi ette ittigemyo inyi on orroho bwo fe omitai adi isi lihomom honyi. ³³Abahye adi isi inyi ette ’tohoro inyi, ati ihalu oŋitek hunihoi ibuhu adi inyi.³⁴Obeŋi nya bu leyiyanak honyi itaniŋuni nerre huna nyo idimani nekyana ania jihosi bwo obeŋi isi omijani isi.³⁵Ninya ilyaha Yesu imiji Yeriko bwo itoŋo obo oloŋodo iger ikoi al ififiyo’to aati ta alwahyo. ³⁶Itaniŋu inyi eluluŋ wati adahai te ekoi ette inyi ifiyo isi ojo, Anyo eram? ³⁷Ojori isi, Yesu olo Nasaret alya al adaha’to te ekoi.³⁸Ette inyi iloŋo bebe ojo, Yesu Lonyi Davide, omehinie jihoŋ. ³⁹Bwo fe hul adahai’to ahosyere ette iramana inyi hotodwai, ati arasa inyi illilloŋo agalik ojo, Lonyi Davide omehinie jihoŋ.⁴⁰Owotya Yesu ette ifahina isi ojo, Iyaŋuniete inyi jihoŋ. Ottu inyi ette Yesu ifiyo inyi ojo, ⁴¹Anyo iwak iye oŋida ani ehanio jihoi? Ojo oloŋodo, Hobu, awak ni mijo.''⁴²Ojo Yesu jihonyi ojo, Ijara oŋite hoi homijyehe. Itaŋida neruk hoi iye. ⁴³Teyya kokwak omijo inyi ette jifaro Yesu bwo itahabuyo Hollum. Bwo fe laati daŋ hul igonyuni’to erre hunia itahabuye Hollum.

¹Ojiŋak inyi itwa miji Yeriko ette cul teyya. ²Owon lobo atulo al ara’to ahamojoni musuru bwo fe abara inyi, afure honyi Sakiyo.³Ottifya inyi igonyuniere Yesu nyo awak inyi mijana inyi, ati ittallik inyi igonyuna nyo olwaji aati bwo fe osuk inyi. ⁴Ette inyi ŋyoron ihosyere ette dahina ihide ŋaboli nyo ottu Yesu te ekoi ania.⁵Ninya afany Yesu jyo amaji ania ette inyi mijo ahide ette jaran jihonyi, Sakiyo, isuru kokwak, nyo ahana alo ni ihaji hoi. ⁶Isuru inyi kokwak ette rehuna inyi ta namuno. ⁷Igonyuni laati ette isi iŋuŋunita daŋ ojori, Alo inyi itoŋo iko atulo al ara’to aheyyani.⁸Bwo Sakiyo wotya ette jaran jyo Hobu ojo, Hobu esyarak ni anus hirre hoŋ jyo alocaŋak bwo fe kuyya ahoholu ni huno obo atulo enyyak ni jihonyi enyyahita aŋwan. ⁹Ojo Yesu jihonyi ojo, Ahana ottu etalahuna jyo aji ana, nyo ara atulo olo bwo fe olonyi Abramo. ¹⁰Nyo ottu Lonyi tulo ittifyari iko italahuniere laati hul olitohini’to.¹¹Ninya itaniŋuni isi erre hunia ikyana Yesu obo arryamara jihosi nyo ilyaha Yerusalem bwo fe igigiloi laati jo ottu adi olobye Hollum kokwak. ¹²Ojo inyi jihosi jo, Olo nya obo aboloni jyo obo afau ifwotuniere obo olobye, bwo inyi ojo acohuno adi.¹³Ette inyi iloŋuna apiti honyi ’tomon ette isyarana jihosi ababo arobia ’tomon ette jaran jihosi, Opocoti ta agurusi huna many acohuniere ni. ¹⁴Ati oliwarik aati hutto miji inyi ette ifahina omuk laati ihalu honyi hul ojori, Ebeŋ hohoi ewak atulo alya ahobu hohoi. ¹⁵Ifwotu inyi olobye honyi ette cohuno. Attati inyi iloŋuna apiti honyi hunya isyarak inyi agurusi. Ifiyo inyi isi ojo, Anyo an opocouna tai ta agurusi hunia?¹⁶Otto ati obo olosi ’tuna jihonyi ojo, Hobu apocou ni esiha abotye ta arobia hoi hunya ’tomon. ¹⁷Ojo hobu jihonyi, Oyyu, iye egyamani al iyyu. Igyama iye on oyyu ta ariŋ on omuta. Ehanak ni iye eleittok olo amisihi ’tomon.¹⁸Ottu etarrihi ojo, Hobu, apocou ni atomwana miet ta arobia hoi hunya ’tomon. ¹⁹Ojo hobu jihonyi, Oyyu, ira iye eleittok olo amisihi miet.²⁰Ottu bwo fe obo ojo jihonyi, Hobu, hibe arobia hoi huna hunya attunak ni isenuk hoŋ. ²¹Nyo abaŋ ni iye nyo ira iye atulo al igol. Ifwotu iye erre hun ibeŋ iye isyo bwo ideŋu iye jyo amaji an ibeŋ iye iyehi.²²Ojo hobu jihonyi, Aŋot ni iye ihwa ikyana iye nyo ira iye egyamani al irroho’to. Imijak iye jo ara ni atulo al agol al efwotu erre hun abeŋ ni esyo, bwo fe adeŋu ni jyo amaji an abeŋ ni ayehi. ²³Tania nyo ibeŋ iye ittunak agurusi hoŋ jyo aji an ottunatarik aati agurusi? Tania al attu ni anyurak dwo ni arobia hoŋ iko efoniti hosi.²⁴Ette inyi jaran jyo hul owotyai’to dia, Iyara arobia honyi, isyatta jyo lya ol owon’to iko arobia esiha abotye. ²⁵Ati ojori isi jihonyi, Hobu owon inyi iko arobia esiha abotye.²⁶Ojo inyi, Ajo ni jihatai jo lya ol owon’to iko erre ofonik adi Hollum omuk jihonyi. Ati jyo lya ol obeŋ’to iko erre iyari adi jihonyi addi dwadi erre hun omutari hun owoni’to jihonyi. ²⁷Iyaŋuniete amyorok hoŋ hulo hul ojori’to ebeŋ isi ewak ani ahobu hosi. Ottohoro isi ihosyere hoŋ.²⁸Ninya atuhuno ekyana ette Yesu leten te ekoi Yerusalem.²⁹Lafany inyi ilyahai amisik Betfaji iko Betania hutteger doŋe an iloŋoi Oliveto, ifak inyi leyiyanak honyi arrihai, ³⁰ojo, Ifwatta itwa miji on owon’to ihosyere hatai, inyurana adi itai obo aŋarri sigirya an ifitani, on obeŋ obo atulo itoŋori many hesiuni inyi. Ohouniete inyi, iyaŋuniete dini. ³¹Kuyya ifiyo obo itai ojo, nyo ihouna tai inyi? Itarraŋata jihonyi ojo, Awak Hobu inyi.³²Ette hul ifahini fwatan ette nyurana ihwa ikyana dwo Yesu jihosi. ³³Al ohouni isi asigirya ojori lamonye jihosi, nyo ihouna tai inyi? ³⁴Itarraŋi isi ojori, Awak Hobu inyi. ³⁵Ette isi iyaŋuno inyi jyo Yesu. Ofyatani isi aboŋojin hosi ihorwoŋ honyi, ette Yesu itoŋo dia. ³⁶Hadaha inyi ofyatani isi bwo fe aboŋojin hosi ikoi.³⁷Holo inyi te ekoi on orubo’to to doŋe Oliveto attati eluluŋ heyiyanak muno bwo fe itahabuye Hollum on okwat te edwariti daŋ hunya igonyuni isi. ³⁸Ojori isi, Hotomunoi lya ol ottu’to ta afure ono Hobu, ijara nelik taji hatawana idou iko akwatan jyo Hollum.³⁹Owoni nya omuk Farisei hutteluluŋ hul ojori jihonyi, Hettiyanani, Itadwa leyiyanak hoi. ⁴⁰Ati itarraŋ inyi ojo, Eramak ni itai, kuyya odwai laati hulo, iwuwoŋitai adi amorwoi.⁴¹Ninya afany inyi ilyaha igonyu inyi amiji ette iyyo ta amiji. ⁴²Ojo inyi, Kuyya dwo imijak iye ahana eram ono nelik taji oyyu dwo. Ati ihwania idimani isi to hoŋite hoi.⁴³Nyo ofwonni adi oŋitek hun ikolonierek amyorok iye. Ikoloni adi isi iye to olohitir itihyere iye. ⁴⁴Obwarani adi isi iye ifau iko aduri hoi daŋ. Obeŋ adi obo amorwo arasa ihide obo nyo ibeŋ nya iye imijak asaa on ottuniere Hollum jihoi.⁴⁵Ette Yesu jiŋana ihaji imojit eneittok ette itteryo ifuhara hul itinyyaŋai’to. ⁴⁶Ojo inyi jihosi, Igyoroni jo, “Iloŋoi adi aji hoŋ ahaji imojit, ati iloitoto tai inyi ahinom hahalak.”⁴⁷Ette Yesu ittiyenio oŋitek daŋ ihaji ania. Attati ehumak eleittaha iko egyorok iko labolok wahan ’tohoro inyi. ⁴⁸Ati obeŋi isi onyurani obo ekoi ihaniere ana nyo ijifatye laati inyi itaniŋuniere nekyanita honyi.

¹Teyya hettiyenio Yesu asayyo hun oyiji jyo laati ihaji imojit eneittok, ofwonni ehumak eleittaha iko egyorok bwo amarwak jihonyi. ²Ojori isi jihonyi jo, Iramak hohoi ta anani elaballok an ihanio iye erre huna. Ngai isyo jihoi elaballok?³Ette inyi itarraŋ jihosi ojo, Efiyo adi ni itai obo efi, itarraŋata jihoŋ. ⁴Ottu elaballok ono Yoane an ibatisyere inyi laati tai? Ottu inyi jyo Hollum kuyya jyo aati?⁵Ette isi ikikyana ta ahwattek hosi ojori, Kuyya ejo hohoi ottu elaballok honyi jyo Hollum, ojo adi inyi, Nyo ibyaŋata tai iruhoto inyi? ⁶Ati kuyya ejo hohoi, ottu elaballok honyi jyo aati, irwoŋye adi laati hohoi nyo iruhi isi daŋ jo ara Yoane aheyani sayyo.⁷Tania ojori isi, Ebeŋ hohoi emijak. ⁸Ojo Yesu jihosi, Abeŋ bwo fe ni eramak itai ta anani elaballok an ehanio ni erre huna.⁹Itteryo Yesu iramana laati arryamara ana. Idulak nya obo atulo ajalaŋi imana honyi ette inyi duma omuk laati icyari imana bwo olo inyi jyo obo afau ette itoŋo fur. ¹⁰Al ottu ayafa on odyarak aati aŋer ajalaŋi ifak inyi apit jyo ecyak mana imojuniere omuk aŋer jihosi. Ati abahi ecyak apit alya ette fuhara inyi ahania.¹¹Ifak inyi obo apit ette isi bak lya bwo fe, ette ihanio on orroho bebe jihonyi ette fuhara inyi ahania. ¹²Ifak inyi obo apit ette isi inyyak bak lya bwo fe ette fuhara inyi.¹³Ojo lamonye ajalaŋi, Ehanio adi ni anyo? Efak adi ni lonyi hoŋ al amuno ni. Kuyya abaŋi adi isi inyi. ¹⁴Ati al igonyuni ecyak lonyi honyi ojori isi, Arutani al attu lya, hattohoro inyi oŋida hohoi erutak erre honyi. ¹⁵Ette isi fuhara inyi to mana ette ’tohoro inyi. Tania ihanio adi lamonye ajalaŋi anyo jihosi? ¹⁶Ottu adi inyi ’tohoro ecyak hulya ette isyarana amana jyo lomuk. Al itaniŋuni isi ana ojori isi, Helaha ara ihwania.¹⁷Ati omijo Yesu jihosi ette jaran, Anyo attadi igyoroni? Igyoroni ojo, “Amorwop inya ihari aduhok Ottu ratan moi etteri lohitir.” ¹⁸Lya ol okwaharo’to jyo amorwo ania, owuro adi, ati al isyak amorwo ania atulo, atad adi ahwan honyi.¹⁹Ta asaa ania awahi egyorok iko ehumak eleittaha inefuniere Yesu nyo omijani isi ikyana inyi arryamara ana tesi, ati abaŋi isi laati. ²⁰Attati egyorok iko ehumak eleittaha irrirrya Yesu ette ifahina omuk aati hul itoŋoi ikonyi ihwa aati hul olibori itaniŋuniere ekyanita honyi jo oŋida isi arrasani inyi jyo okuma iko hobu olo okuma.²¹Ifiye isi inyi ojori, Hettiyanani emijak hohoi jo ikyana iye bwo fe ittiyenio on obis, bwo ibeŋ iye igigya obo atulo ati ittiyenio iye ekoi ono Hollum ahode. ²²Oyyu jihohoi idumari amusuru jyo hobu Cesare kuyya obeŋ?²³Ati omijak inyi enyobita hosi ette jaran jihosi, ²⁴Iyaŋuniete arobia. Anaŋai arrijori ana bwo fe anaŋai afure ana? Ojori isi huno Cesare.²⁵Ette inyi jaran jihosi, Isyatta jyo Cesare erre Cesare bwo fe jyo Hollum erre huno Hollum. ²⁶Obeŋi isi oremehini rasana inyi ihosyere wati ta ekyana ana, attati isi illilliha te ekyanita honyi ette dwa.²⁷To obo oloŋ ofwonni omuk hulo Saducehyen jihonyi hul ojori jo obeŋ nebuhuna. ²⁸Ette isi ifiyo inyi ojori, Hettiyanani, ittiyenio nya Mose jihohoi efahi on ojo, Kuyya oye illa obo, bwo idyaharo ŋorwoi on obeŋ hito jihonyi, oŋida illanyi ojuŋori aŋotte nya isiuniere omuk aduri te illanyi.²⁹Owoni nya illarak hattarik. Oyemu oloŋeu aŋotte ette ye hobeŋi duri. ³⁰Ihanio etarrihi bwo fe ihwo nya. ³¹Ihanio etahunihi ihwo nya. Attati isi daŋ hattarik ihanio ihwo nya ette ye obeŋi duri. ³²Ihalu daŋ oye bwo fe aŋotte. ³³Iholoŋ ono ebuhuna ottu adi inyi itoŋoi ŋorwoi ŋai? Nyo isi daŋ hattarik ojuŋorik inyi.³⁴Ojo Yesu jihosi ojo, Ayamai aati hutta fau ana, bwo isyori iyamari. ³⁵Ati hul osiruni’to ifanyari idou bwo fe hul ibuhuni’to to ye, obeŋi adi ayamai. ³⁶Obeŋi adi bu isi inyyahi ye nyo orrijori isi iko anjelohyen bwo fe te ebuhuna hosi arai adi isi lonyirok Hollum.³⁷Itahutak nya Mose jo ibuhuni adi layak nyo iŋati buk honyi ehenio hohoi eram ono ayyani on owulo’to bwo iloŋo inyi Hobu, “Hollum olo Abramo, Hollum olo Isako, Hollum olo Yakobo.” ³⁸Obyaŋara inyi Hollum olo ayak, ati ara inyi olo eswok, nyo isui laati daŋ tenyi.³⁹Itarraŋi omuk hulo egyorok jihonyi ojori, Hettiyanani, ikyana iye on oyyu. ⁴⁰Nyo abaŋi isi ifiyere inyi obo ariŋ.⁴¹Ette inyi ifiyo isi, Aŋai ojori laati ojo ara Kristo lonyi Davide? ⁴²Nyo ojo nya Davide ta ahwan honyi ibuk ono Afureta ojo, “Ojo Hobu Hollum jyo Hobu hoŋ, Itoŋoi oŋyatai hoŋ, ⁴³Many ehananiere ni amyorok hoi ebalori hejek hoi.” ⁴⁴Kuyya iloŋo Davide inyi Hobu, nyo ati ara inyi lonyi honyi?⁴⁵Ette Yesu ikyana jyo leyiyanak honyi bwo laati daŋ itaniŋuni. ⁴⁶Ojo inyi, Ihumata mijo egyorok hul awahi’to adaha iko aboŋojin hun ohodori bwo fe omunoi isi laati hutto suk ifonya isi ta abaŋi. Awahi isi itoŋori imasik hun oyiji ihaji imojit, bwo fe imasik huno etahabuyo al oŋiye isi akarama. ⁴⁷Ohoruni isi asaŋ to hasik ihidahi, ati omwanani isi arrohoji hosi te emojiti hun obolori’to. Ifwotuni adi isi abahyo on obolo bebe.

¹Ette Yesu mijo ette igonyuna abarak hul ifihye agurusi hosi isenuk imojit gurusi. ²Bwo fe ette inyi igonyuna obo elocaŋ ihidahi an itadohi atarifa itwa senuk. ³Ette Yesu jaran, Ahode ajo ni jihatai jo, obolo esyoryo elocaŋ ihidahi ana agalik daŋ. ⁴Nyo isyori isi daŋ te ebariti hosi ati te elocaŋ honyi isyarak inyi daŋ hun owoni’to jihonyi.⁵Ikikyanai omuk laati ta aji imojit eneittok jo ilaman inyi ta amorwoi iko ayyel hun isyori laati. Ati ojo Yesu jihosi, ⁶Imijyete tai erre huna ahana ati ofwonni adi oŋitek hun obeŋ adi obo amorwo arasa ihorwoŋ obo nyo itatturi adi isi daŋ.⁷Ette isi ifiyo inyi ojori, Hettiyanani, baya adi idwoŋi erre huna? Anyo adi etamijani an itahutak hohoi ojo ilyahai erre hwa? ⁸Ojo inyi, Ihumata irrirrya, helaha obo atulo itisyaba itai. Nyo ofwonni adi laati arryai ta afure hoŋ hul ojori, Ani alya Kristo, ojori isi bwo fe, Ilyahai oŋitek attuba, ati hejifatyete isi. ⁹Al itaniŋuna tai jo owon arrem bwo fe aŋalafa on obolo, hebaŋata, nyo ofwonni adi erre huna ahosyere ati hobeŋ esidi fau.¹⁰Ette inyi jaran jihosi, Ofwoi adi laati hutto maji obo jyo obo irryomoniere, bwo fe laati hutto lobye obo jyo obo. ¹¹Bwo fe ikikiro adi afau bebe, owon adi ahure on obolo imasik arryai iko eŋwati. Ofwonni adi etamijanita hun obolori’to t’edou hun itabaŋi’to laati.¹²Ati ahosyere hobeŋi erre huna idwoŋi, inefuni adi laati itai ittigemyere. Iyarai adi itai ihasik imojiti iko ababusi, bwo ihosyere hobwok iko mandiri ta afure hoŋ. ¹³Ara ana asiruna ono amiji jihatai iramaniere neruk hatai.¹⁴Hegigiloti ahosyere jo itarraŋata adi itai aŋai. ¹⁵Nyo esyo adi ni jihatai ekyanita iko olofyoro hun obeŋi adi amyorok hatai oremehini itarraŋ.¹⁶Isyori adi esyok iko illarak hatai itai jyo amyorok hatai, bwo fe isyori adi aati hutta haŋ iko mottyarak hatai itai jihosi bwo ottohori adi omuk hulatai. ¹⁷Oliwarik adi itai aati daŋ ta afure hoŋ. ¹⁸Ati obeŋ adi obo ofiti to hosi hatai olitohi. ¹⁹Bwo al odihu’to italahuni adi.²⁰Ati al igonyuna tai oseŋer ikoloni Yerusalem, omijana jo ilyaha atturo honyi. ²¹Iholoŋ ania ijara hul owoni’to Yudea hotofuhohi lidoŋyok, bwo fe hul owoni’to itwa miji hefwahi addi. Bwo fe ol owon’to limana hotobyaŋa acaharu itwa miji. ²²Nyo arai oŋitek huna oŋitek huno enienuna jo oŋida itasiruni erre daŋ hun igyoroni.²³Orroho bebe jyo aŋorwo hun oyeduri’to iko hun itadasye’to to noŋitek hwa. Nyo owon adi ettigemyo on obolo jyo afau ana iko ajore on obolo jyo laati hulo. ²⁴Ottohori adi omuk ta afere bwo iyarai adi omuk apiti ifau paganohyen, bwo fe iryeyere adi paganohyen amiji Yerusalem many ottubarik oŋitek huno paganohyen.²⁵Owoni adi etamijanita liholoŋ iko liyafa bwo lilelyefi. Bwo fe lifau owon adi elafuho iko apapaŋi lihiji wati nyo ifolyahita aari bebe. ²⁶Okwaharai adi laati ta abaŋi al igonyuni isi erre hun ofwonni’to ifau nyo ikikiroi adi erre hutte dou.²⁷Attati isi igonyuna Lonyi tulo al isuru t’edou lihide idisi iko nadwaran iko akwatan on obolo. ²⁸Al igonyuna tai erre huna idwoŋi, owotyati, ibonnoto ahide, nyo ilyaha etalahuna hatai.²⁹Ette inyi iramana jihosi obo arryamara. Imijyete aŋaboli iko ayyanio daŋ. ³⁰Al oyisuni abene aŋejuho imijana tai ta ahwattek hatai jyo ilyaha atahas. ³¹Ihwania bu al igonyuna tai erre huna idwoŋi, omijana jyo ilyaha olobye Hollum.³²Ahode ahode ajo ni jihatai, obeŋ adi elahaji ana oyei many ihanierek erre huna daŋ. ³³Nyo obyaŋarani adi nedou iko nafau ati obeŋi nekyanita hoŋ opwahi ’tuŋ.³⁴Ati ihumata ahwattek hatai bwo fe helaha atajya hatai ifuti iko adaya ojo aruma bwo fe ewahiti huno afau ana, ŋadi oloŋ ania ilunyu jihatai lunyuna ihwa elohit. ³⁵Nyo ottu adi inyi ihwania jyo laati daŋ hutta fau.³⁶Tania ihumata irrirrya ta asahyen daŋ bwo fe omojoti jo oŋida itai iremehina iris jyo erre hun ofwonni’to huna ittata tai wotya ihosyere Lonyi tulo.³⁷Ati oŋitek daŋ ittiyenio Yesu ihaji imojit eneittok bwo fe ta attari olo inyi jototyo idoŋe Oliveto. ³⁸Bwo fe ta amotye hanyik ofwonni aati daŋ jihonyi ihaji imojit eneittok itayiruniere ekyanita honyi.

¹Ihwania ilyaha neyom an ifurani Allaŋan Anjelo bwo fe neyom on oŋiyerek isi emune on obeŋi bula. ²Attati ehumak eleittaha iko legyorok ’tifya aŋai adi ottohori isi Yesu. Nyo abaŋi isi laati.³Attati Sitan jiŋana Yuda al ifurani Iskariote al ara’to olo ’tomon harrihai. ⁴Ette inyi leten iwwaha iko ehumak eleittaha bwo oseŋer, aŋai adi itinyyaŋak inyi Yesu jihosi.⁵Omunoi isi ette coronia jihonyi aduma. ⁶Iruk inyi ette ’tifyatyo amaji an obyaŋarik laati isyoryere Yesu jihosi.⁷Ette oloŋ ania ’tuna ono nemunio iko on ottohyerek isi aker ono ehuma. ⁸Ette inyi ifahina Petro iko Yoane ojo, Ifwatta ihuhumana amaji jihohoi iŋiyere ta neyom ono Allaŋan Anjelo. ⁹Ojori isi jihonyi, Anani maji an efwo hohoi ihuhumyo?''¹⁰Ojo inyi jihosi, Imijyete, al ijiŋana tai itwa miji irumana adi itai obo atulo al iwwahatyo atobok hari. Ijifati inyi jyo aji an alari inyi. ¹¹Ijatta jyo amonye haji jo, Ojo Ettiyanani, tani aji tamonok oŋida ani aŋiyere ta neyom iko leyiyanak hoŋ?¹²Itahutak adi inyi itai aji an alat iko nerre daŋ huno neyomita bwo itai ihuhumana amaji to hohoi. ¹³Ette isi fwatan ette rumana erre daŋ ihwa iramak dwo inyi isi. Tania ihuhumani isi aŋiyo te eyom ono Allaŋan Anjelo.¹⁴Ninya attuba asaa itoŋo inyi iko lefahat honyi. ¹⁵Attati inyi jaran jihosi, Ta awahan on obolo itaji hoŋ awak dwo ni iŋiyere te eyom ana ikatai ihosyere ettigemyo hoŋ. ¹⁶Nyo ajo ni jihatai, abeŋ adi ni enyyak ŋiyo inyi many etaleyehiniere ni awoyo hiram honyi ilobye Hollum.¹⁷Ette inyi ifwotuna akos ette jaran humo jyo Hollum, ette isyarana jyo leyiyanak honyi ojo, Hibetina, ihiharana ihiji hatai. ¹⁸Nyo ajo ni jihatai abeŋ ni enyyak mat aari ajalaŋi many ottuniere olobye Hollum.¹⁹Ette inyi iduhuna emune ette jaran humo jyo Hollum, ette ibibeny attati isyarana jihosi ojo, Ara ana ihwa ahwan hoŋ an esyo ni tetai, ihaniete ihwania igiluniere ani. ²⁰Ninya atuhuno aŋiyo ette inyi iduhuna akos ojo, Ara akos ana ecorit aŋejuk ono nooto hoŋ, on owouno’to addi tetai.²¹Ati imijyete, lya al itinyyaŋa’to ani el ewon ikohoi iteremeja. ²²Nyo oye adi Lonyi tulo ihwa onyimok nya Hollum tenyi ati orroho bebe jyo alya al itinyyaŋa’to inyi. ²³Ette isi itteryo ififiyo ta ahwattek hosi jo ŋai alya al ihanio’to ariŋ ania.²⁴Ette isi ŋalafa jo ŋai adi eleittok ihiji hosi. ²⁵Attati Yesu jaran jihosi, Ilettohorik hobwok hulo paganohyen aati hosi. Bwo fe iloŋoi aati isi ahalwak hosi.²⁶Ati obeŋ ara ihwania jihatai, nyo ijara eleittok hatai hetera do apit, bwo fe ijara hobu hetera do ahegyamani. ²⁷Ngai adi eleittok? Inyi alya al itoŋo’to iŋiyere kuyya lya al isyo jihonyi aŋiyo? Ahode lya ol oŋiyo’to, inyi eleittok. Ati attu ni ihiji hatai ihwa alya al igyama’to.²⁸Ati jihatai hul edulo’to ikoŋ te ettigemyo hoŋ, ²⁹acorok ni jihatai olobye ihwa ocorok nya Monyoŋ jihoŋ. ³⁰Iŋiyete adi itai bwo fe imatati iteremeja hoŋ ilobye hoŋ. Itoŋoti adi itai bwo fe imaji leittok iŋocere awoi ’tomon harrihai huno Israele.³¹Ojo Yesu, Simone, Simone, imijye awak Sitan iye igilyo ihwa ema. ³²Ati amojo ni teye jo oŋida neruk hoi obeŋ opwak. Bwo fe al irwe iye itagolo illarak hoi.''³³Ati ojo Petro jihonyi, Hobu ehuhuma ni ilari ibabus dwadi iyeri ikoye. ³⁴Ati ojo Yesu, Eramak ni iye Petro jo hobeŋ ahohoro ilok ahana, iha adi iye ani enyyahita hunihoi.³⁵Attati inyi jaran jihosi, Ninya efahuniere ni itai ahania ta abyaŋan kis, kuyya ettunit gurusi, kuyya bu amuha, iwahata nya itai omuk erre? Ojori isi, Obeŋ nya obo. ³⁶Bwo ojo inyi jihosi, Ati ihwania ijara alya ol owon’to iko akis heyaro inyi, iko lya ol owon’to iko ettunit gurusi. Bwo fe ol obeŋ’to owon iko afere ijara inyi itinyyaŋak agamis honyi inyyaŋuniere afere.³⁷Nyo ajo ni jihatai, etasiru adi ni ekyana ana on ojo, “Ihyanani inyi iko aati hul iyyauni’to”. Nyo itasiruni adi erre daŋ hun igyoroni toni. ³⁸Ojori isi jihonyi jo, Hobu imijye, afyara arrihai huna. Bwo ojo inyi jihosi oremehini hunia.³⁹Ette inyi jiŋuna to miji ette leten lidoŋe Oliveto ihwa ihanio inyi toloŋi. Attati leyiyanak honyi jifaro inyi. ⁴⁰Ninya afanyi isi jyo amaji ania, ojo inyi jihosi, Omojoti jo oŋida esusuyo obeŋ ottu jihatai.⁴¹Ihut inyi alamarai kai ihwa oremik atulo irwoŋoro amorwo. Origoŋ inyi ette mojo. ⁴²Ojo, Monye kuyya ara awahan hoi iyai akosq ana addi jihoŋ, ati ijara awahan hoi ihanie, obyaŋara awahan hoŋ.⁴³Attati anjelo leyo jihonyi t’edou itagolyere inyi. ⁴⁴Ette ataji honyi dyaha bebe ette inyi mojo ta amijan taji bwo fe opulo omom honyi ahoto ette itihuna many ifau.⁴⁵Ninya atuhuno amojo ette inyi dyoto ette leten jyo leyiyanak honyi. Onyurak inyi isi ojotoi nyo obolo ejiriŋa jihosi. ⁴⁶Ette inyi jaran jihosi, Nyo ijototi tai? Ottena, omojoti jo oŋida esusuyo obeŋ ottu jihatai.⁴⁷Hekyana inyi ofwonni eluluŋ wati iko Yuda al ara’to olo ’tomon harrihai al ikyem osyere. Ihutok inyi jyo Yesu bwo awak inyi jur inyi. ⁴⁸Ati ifiyo Yesu inyi ojo, Yuda, itaminyeyo iye Lonyi tulo ta ajuryo hoi?⁴⁹Ninya igonyuni laati hul owoni’to iko Yesu erre hun idwoŋi’to ojori isi, Hobu, errem adi hohoi isi ta afyara? ⁵⁰Bwo oyef obo olosi egyamani olo ehumani ol obolo’to, ette isaluna neyyok honyi etteŋet. ⁵¹Ati ojo Yesu jihonyi, Obusak, ette inyi ’tir eyyok egyamani ette itaŋida inyi.⁵²Ojo Yesu jyo ehumak eleittaha, iko oseŋer hulo aji imojit eneittok bwo amarwak hul ofwonni’to jihonyi, Ifwanna tai iko afyara bwo elluhi inefuniere ani ihwa olohoho? ⁵³Ati oŋitek daŋ ewon ni ikatai ihaji imojit eneitok bwo ibyaŋata tai ani inefuna. Ati ara asaa ana anatai iko adwaran ono edumele.⁵⁴Inefuni isi inyi ette rihoro inyi many ihaji ono ehumani ol obolo’to. Ati ijifaro Petro isi alamarai. ⁵⁵Inahini isi eema itwa haŋ ette isi suja arabotye. Itoŋo Petro bwo fe ikosi.⁵⁶Ati igonyu obo odwoti inyi itoŋo ifaŋit hima ette inyi yadari jihonyi ette jaran, Owon dwo atulo olo ikonyi. ⁵⁷Ati orisa inyi ojo, Hanioŋ, abeŋ ni amijak inyi. ⁵⁸Ojo gaa igonyu obo inyi ette jaran, Ira iye obo olosi. Ati ojo Petro, Olo, obeŋ.⁵⁹Al allaŋ asaa abotye ette obo ikyana ojo, dwo atulo olo ikonyi, nyo ara inyi olo Galilea. ⁶⁰Ati ojo Petro, Olo, abeŋ ni amijak anyo ikyana iye. Teyya hekyana inyi ette ahohoro ilok.⁶¹Oyito Hobu ette fyala jyo Petro. Attati Petro giluna ekyana ono Hobu, odwo ojo inyi jihonyi jo, Hobeŋ ahohoro ilok ahana iha adi iye ani eharita hunihoi. ⁶²Olo inyi ilet ette ’yo bebe.⁶³Attati laati hul inefuni’to Yesu osuhotyere inyi ette bahyo inyi. ⁶⁴Ifitani isi aboŋo ihoŋite honyi ette isi jaran jihonyi, Ottenu, ŋai al anaŋ’to iye? ⁶⁵Ette isi moryo inyi te erre arryai.⁶⁶Nya motye ottubanie amarwak iko ehumak eleittaha bwo legyorok ette iyaro inyi ihosyere okikoi hosi. Ojori isi, ⁶⁷Kuyya ira iye Kristo, iramak hohoi. Ati ojo inyi jihosi, Kuyya eramak ni itai ibyaŋata tai iruhoto. ⁶⁸Bwo fe kuyya efiyo ni itai obo efi ibyaŋata adi itai itarraŋata.⁶⁹Ati igonyuna adi itai Lonyi tulo al itoŋo’to ihani iŋet ono Hollum adwarani. ⁷⁰Ojori isi, Ira ati iye Lonyi Hollum? Ojo inyi jihosi, Ihwa ijatta tai, ani alya. ⁷¹Ojori isi, Anyo nyi ettifya hohoi etamijanak omuk? Etaniŋu hohoi ta ahwattek hohoi ekyanita honyi.

¹Teyya odyotoi laati hulya ette iyaro Yesu ihosyere Pilato. ²Ette isi ’rosyo inyi ojori, Enyurak hohoi atulo olo isusuyo laati hohoi bwo fe iramak inyi laati hotobyaŋahi odumai amusuru jyo Cesare. Ojo inyi bwo fe inyi Kristor, Hobu.³Ifiyo Pilato inyi ojo, Ira iye Hobu olo Yudea? Tania itarraŋ Yesu, Ihwa ijo bu iye. ⁴Attati Pilato jaran jyo ehumak eleittaha iko eluluŋ wati ojo, Abeŋ ni anyurak obo epali jyo atulo olo. ⁵Ati ikyanai isi ta agolon ojori, Itipalyo inyi laati te ettiyenio honyi ifau Yudea daŋ, to Galilea many jyo amaji ana.⁶Ninya itaniŋu Pilato erre hunia ifiyo inyi ojo, Olo Galilea olo? ⁷Al itaniŋu inyi jo ara inyi olo afau an ilettohori Erode, ifak inyi Yesu jyo Erode ol owon’to Yerusalem jyo oŋitek hunia.⁸Ninya igonyu Erode Yesu omuno inyi bebe nyo awak nya inyi igonyuna Yesu, nyo itaniŋu nya inyi eram honyi bwo fe awak inyi igonyuna obo etamijani an ihanio inyi. ⁹Ifiyo inyi Yesu efita arryai ati obeŋ Yesu itarraŋ obo ariŋ. ¹⁰Attati ehumak eleittaha iko legyorok rosyo inyi ta ajore.¹¹Itafitaŋye Erode iko oseŋer honyi Yesu ette suhotyere inyi. Itiyyafani isi aboŋo an ilaman jihonyi ette inyyaharo inyi jyo Pilato. ¹²To oloŋ ania ette Pilato iko Erode imwara nyo oliwai nya isi.¹³Attati Pilato iloŋuna ehumak eleittaha iko hobwok hulo aati, ¹⁴bwo ojo jihosi, Iyaŋuniete dwo itai atulo olo jihoŋ nyo ijatta tai ara inyi atulo al isusuyo aati. Ati imijyete, efiyo dwo ni inyi ihosyere hatai ati abeŋ ni anyurak arrohoji honyi te erre hun irrasana tai inyi.¹⁵Obeŋ bwo fe Erode onyurak arrohoji honyi nyo inyyahuno inyi Yesu jihohoi. Teyya obeŋ obo ariŋ an ihanio inyi an osiru jihonyi ta aye. ¹⁶Tania aŋot adi ni jihonyi abahyo bwo ette hohina inyi. ¹⁷Nyo oŋida inyi ohou atulo abotye to babus iholoŋ ono neyom.¹⁸Ati iwuwoŋitai laati arabotye ojori, Iyara atulo olo addi, ohou jihohoi Baraba. ¹⁹Ara nya Baraba amyotononi olo okuma ol ottohyo’to aati tania ifitani okuma inyi ibabus.²⁰Ati awak Pilato ihohiniere Yesu ette iloŋuna jihosi. ²¹Ati arasai isi iwuwoŋitai ojori, Isihonia inyi, isihonia inyi. ²²Inyyak inyi jaran jihosi enyyahi etahunihi. Nyo, anyo ariŋ on orroho’to an ihanio inyi? Abeŋ ni anyurak obo ariŋ an osiru jihonyi ta aye. Aŋot adi ni abahyo jihonyi ette hohina inyi.²³Ati iwuwoŋitai isi bebe agalik ojori, Isihonia inyi. Ette isi itarisa iko Pilato fur ette ihara ekyana honyi. ²⁴Attati Pilato ŋot jihonyi ihwa awahi dwo isi. ²⁵Ette inyi hohina amyotononi olo okuma alya inya ifitani ibabus ta attohyo honyi aati, ihwa awahi isi. Ati isyo inyi Yesu jihosi ihaniere ihwa awahi isi.²⁶Orihoroi isi Yesu addi, ette isi inefuna Simone olo Cirene ol ottu’to to mana ette italororo inyi akruce ihalu Yesu.²⁷Ijifarai eluluŋ wati arryai ehalu honyi, iko aŋorwo hun oyyoi bwo fe ijiriŋai bebe. ²⁸Oyito Yesu jihosi ette jaran, Ŋarryok Yerusalem, heyyoti toni, ati oyyoti ta ahwattek hatai iko aduri hatai.²⁹Nyo imijyete, ofwonni oŋitek hun ojori adi laati, Ijara aŋorwo hun iholofiji’to hotomunohi bwo fe hun obeŋi’to isiuni aduri iko hun obeŋi’to itadasye. ³⁰Ojori adi laati jyo adoŋyok, Okwahuniete jihohoi bwo fe imuluhana hohoi. ³¹Al ihanie isi erre huna ta atahas, ihanie adi isi anyo ta ameyyu?³²Orihoroi isi bwo fe omuk aati arrihai hul orrohoji’to ittohori iko Yesu.³³Afanyi isi jyo obo amaji an iloŋoi amaji hou, ette isihonia Yesu dia iko hyodwo wati hul orrohoji’to, abotye ette ŋet bwo abotye ette horroŋ. ³⁴Ojo Yesu, Monye obusak isi nyo otimoi isi anyo an ihanie isi. Awahi isi horyo aboŋojin honyi ette isi bak agumar.³⁵Owotyai laati dia ette iŋiŋyala inyi. Osuhotyerek bwo fe eleittaha inyi ojori, Italahu nya inyi omuk. Ikejara inyi italahu ahwan honyi kuyya ara inyi Kristo onyimoto olo Hollum.³⁶Osuhotyerek bwo fe oseŋer inyi ette isyarana jihonyi aari hun irwatiŋoi’to. ³⁷Ette jaran, Kuyya ira iye Hobu olo Yudea, italahu ahwan hoi. ³⁸Igyoroni isi ihide kruce honyi jo, Ara olo Hobu olo Yudea.³⁹Abotye olo aati hul orrohoji’to hul isihoni ikonyi omoryo inyi ojo, Ibeŋ iye ira Kristo? Italahu ahwan hoi ikohoi. ⁴⁰Ati isiŋyo obotye inyi ette jaran, Ibeŋ iye ibaŋ Hollum? Bwo orrijori aŋoco hoi iko ononyi. ⁴¹Obis jihohoi, nyo efwotu hohoi edumit on osiru jihohoi, ati obeŋ atulo olo ihanio obo ariŋ on orroho.⁴²Ette inyi jaran jyo Yesu ojo, Ogilu ani al ifany iye ilobye hoi. ⁴³Ojo Yesu jihonyi, Ahode ajo ni jihoi, ahana ewon adi iye ikoŋ imaji Hollum.⁴⁴Ta akilfanni many otoryai iryok afau daŋ edumele ’tir ’tir. ⁴⁵Iryok bwo fe oloŋ attati aboŋo ono aji imojit eneittok gwasa hama tehiji.⁴⁶Attati Yesu iloŋo bebe on okwat ojo, Monyoŋ, esyo ni oloyiri hoŋ ihas hoi. Hekyana inyi ihwania ette inyi ye. ⁴⁷Al igonyu eleittok olo oseŋer erre hun ihanie, itahabuyo inyi Hollum ojo, Ahode ara atulo olo atulo ol olibo.⁴⁸Ottubanie aati hyodwo omijye’to ette naŋyo asuhyara hosi ta abaŋi ette caharu. ⁴⁹Bwo fe mottyarak honyi iko aŋorwo hun ijifatye inyi to Galilea, owotyai alamarai imijyere erre huna.⁵⁰Attati obo atulo ’tuna al anya’to Yosefo al ara olo aŋotok wati. Ara inyi atulo ol obis bwo fe olibo. ⁵¹Obeŋ dwo bu inyi iruk aŋoco hosi on orroho. Ara inyi olo Arimatea amiji ono Yudea, bwo fe itilatyo inyi to olobye Hollum.⁵²Attati inyi leten jyo Pilato ifiyere ahwan Yesu. ⁵³Ette inyi dutuna ahwan Yesu to kruce ette bubunana inyi ta aboŋo on obwor ette itaferehina inyi ilume an ikyafani ibak jyo amaji an hobyaŋarik onuhanierek obo atulo.⁵⁴Ara nya inyi oloŋ an ihuhumyerek erre to sabato. ⁵⁵Attati aŋorwo hodwo ofwonni’to ikonyi to Galilea, jifaro imijuniere elume iko ahwan honyi. ⁵⁶Ette isi caharo ihuhumyere eyali on oŋwo’to gir gir. Bwo fe to sabato oyiri isi ifahari efahita.