To view a copy of the CC BY-SA 4.0 license visit
http://creativecommons.org/licenses/by-sa/4.0/
Notices:
You do not have to comply with the license for elements of the material in
the public domain or where your use is permitted by an applicable
exception or limitation.
No warranties are given. The license may not give you all of the
permissions necessary for your intended use. For example, other rights
such as publicity, privacy, or moral rights may limit how you use the
material.
Mark
Chapter 1
1Itsin oshwong o wuo e Yezu Kristu Mon e Nzeam. 2Oshin emifugni wo n'onkean e ngunsa Esaya: "Lir, ndatum ne nteang eyie longi eme, na ngwong mbug eyie; 3Eli otuba e wur eletsug olie ne buu e ndzum: wongagni mbug e Nkum, dzubagni abulu ne wambug inde.'"4Yoane apwinde, apikinde mbotika na nsuy itura, mpi alongikinde vii a mbotika e ntshima etura, djwi na ndolula e masumu. 5Okiri onkum e Yudea ti vear ankum a Yerusalem atshikiwo etay ende. Aveyikiwo mbotika ne nzey e Yordani mpi akikiwo mfunguna e masumu iwo. 6Yoane ayinde n'eleam e viey e shamo, okaba epuy e gnam n'ikini inde. Alikinde abampay na mpag.7Alongikinde, ndenden: "Wur eley mby eme andenga na biu, mpi me mpikug ve n'ongama eshing e sabata inde. 8Me, ndopeagni mbotika e vay; nde, ayopeagni nde mbotika e Mpeve Santu."9Ne nshuu inagn, Yezu ayum nde Nazarete ne buu e Galilea, mpi ayinde mvey mbotika etay e Yoane ne Yordani. 10Ntangu eyipwinde ne vay, ayen olung etingam mpi Mpeve Santu akr ne dzug inde kamsi nkodima. 11Mby, otuba omog etuba eyum olung: "Ene eli Mon me e nsia, ya nde mitsug ngaagn eme enkum."12Mby Mpeve Santu atum Yezu n'oshwi, 13Mpiog, akie nshuu oning, djwi satana opii mpukumuna. Ayinde ti wagnam okwun, ti banzio eyosarisike.14Ne mby emitshung wo Yoane, Yezu s'ayinde Galilea, alongikinde oshwong o wuo e Nzeam. 15Atubikinde: "Ntangu etikug, mpi ekub e Nzeam etivanga. Tshimagni itura, mpi djiragni oshwong o wuo."16Ntangu eyilegikinde mbeama na nzey e Galilea, ayen Simoni ti Andre, otwung o Simoni, watwomo oshing ne nzey; djwi ayikiwo vear alob nse. 17Yezu atuba nda wo: "Ondjiagni, mpi asikum gnu vear alob vear. 18Ko ne ntangu enagn, wasianga eshing ewo, mby wosodjie nde.19Ntangu emikum Yezu etey, ayen Jaki, mon e Zebede, ti Yoane, otwung onde, ayiiwo ne war wawong eshing ewo. 20Mby s'avinde, mpi wasasianga Tea wo Zebede ne war ti vear otshia, wosodjie nde.21Mby watsa Kapernaum, mby eshuu e sabat Yezu ashwe ne sinagoga, mpi along .22Vear ayen wo ngituka n'along ande; djwi na alongikinde n'ekub, epa kamsi walong i nsiku ve.23Neti e sinagoga ayiwo na wur emog eyi na mpeve epwo, mby atsug olie ndenden: 24"Vii awo nge eli su na wo ti yie, Yezu e nazarete? Ayiyie nendien djwi na ntedjag su? Ndajia nagn eli yie. Oli osantu o Nzeam. 25Yezu s'ogniangi nde, atuba ndenden: "Tshung odzum, mpi pwe ne djuug i wur ene. 26Mpi mpeve epwo enagn epwe ne djuug i wur enagn, ologo ne buu, mpi atsug olie e biu.27Vear ankum wayen ngituka, wasayue wog na wog wuwun: "Ene nge? along a mpa na ekub? Atuba nda wampeve ipwo, mpi walemfuka! 28Mby lokumu ende epagn n'endii enkum eyi pipi na Galilea.29Ntangu emipwewo ne sinagoga, watsa n'evuru e Simoni ti Andre, ndwong emog ti Jaki nda Yoane. 30Mby okiu e Simoni ayinde ngivur, ayinde na jing. 31Mby s'ayinde, akir onkear owo n'ewuo, s'ayiminde; jing eshir ko ne ntangu enagn. Mbiy onkear onagn s'apiinde vim a nda.32Epiekwo, vuna etijie, wojie vear ankum a nkeang ti vear ali na mpeve ipwo. 33Mby vear a wiya enen enkum wayia njuo to ne nteang epfug. 34Avuga vear a nkeang eshin n'eshin; akma mpi mpeve ipwo entsing, akapea nsua e ntuba, djwi walojia nde.35Abiy ne lii-lii, ayiwo mpib etoshir ntete ve; atsa n'ondii onde emog eyitshikinde ndemie djwi na nsama. 36Simoni nda vear ayiike wa nde wosoling. 37Mby ntangu eyoyen wo, watuba wa nde wuwun: "Vear ankum ane waloling ko yie."38Mby nde akeara ndenden: "Nsoagni etay emuu iky, ntsi ndong along mpi. Eli djwi na wo eyipwe me na ngya nendien." 39Mby atsa ne Galilea enkum, alelong ne wasinagoga iwo, mpi alekmi wampeve ipwo.40Wur emog e nkeang i ndwum ayinde etay ende. Afukama ne nteang ende, atuba ndenden: "Yug oleang, osikug nkie djwi djuung ime itiem." 41Yezu, ayug ngy, ashima ewuo, okir, mpi atuba: "Ndaleang, yia ngitiem. 42Ko ne ntangu enagn, nkeang e ndwum elim, mpi akum ngitieme.43Yezu atuba nda nde biu, mby osianga s'akien nde. 44Mpi atuba nda nde ndenden: "Oyakaba ata wur vii ane ve, kansi tshwag etay e wanganga-Nzambi woyen, mpi pea makabu iyie oshin otuba nsiku i Moize, djwi esayia ntiegn djwi na wo."45Kansi wur ene,ntangu eyikiende, abana nkab ya wur enkum vii ayitubiwo ya nde, mby Yezu akafikug ve na nkien ne viya inen imuu. S'asanditsuga nelien, n'endie ende ndemie, mpi vear ayum etay n'etay ayikiwo etay ende.Chapter 2
1Mby ntangu emikea nde ne Kapernaum, ne mby i nshuu , wayug wuwun ali n'evuru. 2Vear entsing wayia kog, mpi ekayia diaka n'ondii ve ata ne nteang epfug djwi na vear ankum wakug. Mby Yezu s'alongikinde wo.3Mby vear aning wayia etay ende, wojie wur emog emibeam wo ewuo n'ekuu elevarikiwo. 4Djwi wakakug nkum ondii oli nde ve djwi vear ayiwo olwi, wagnama otwon evuru ondii oyikinde, mpi n'itunu inagn, wakeya wur emibeam wo ewuo n'ekuu ngivur ne ntir.5Yezu, ayen lukwikilu ewo, atuba nda wur emibeam wo ewuo n'ekuu: "Mon me, masumu iyie itivea ndolula." 6Walong i nsiku imuu ayiwo kog watigneme, mby watubik n'itura wuwun: "Oshin onkagn wur ene etubande ngean? Atitwe Nzeam! 7Wur nagn esikug ndolula masumu, yug epa ko Nzeam ndemie?"8Etean kaku, Yezu ajia ne mpeve ende nginu iwo, s'atubinde nda wo: "Djwi na nge elignu na wa nginu oshin enagn n'itura ignu? 9 Vim nge eli mpay na ntuba ya wur emibeam wo ewuo n'ekuu: 'Masumu iyie itilim', to na ntuba: 'Yima , vey ntir eyie mpi kien'?10Kansi, djwi ojiagni gnugnun Mon-wur ali n'ekub e ndolula masumu i vear ne buu, atuba nda wur enagn: 11"Ndatuba ma yie, yima, vey ntir eyie, mpi tshwag evur eyie." 12Mpi ne mbala emog, ayima, avey ntir ende mpi apwe ne viy a vear ankum, wayen ngituka mpi wakumisa Nzeam, wuwun: "Sitotigni ngyen vii oshin one."13Yezu akea mpwe etay e nzey. Ngrima a vear ankum wayia etay ende, mby Yezu alongike. 14Ntangu eleleg nde, ayen Levi, mon e Alfe, akeanse n'ondie ofutawo ekri. Atuba nda nde: "Ondani." Levi mpi ayima, osodjie.15Yezu ntangu eyilikinde ne mesa n'evur e Levi, vear entsing etsamvey ekri e mpaku ti vear apwo wayia nda ondii omog ti nde, ti walongoki inde. 16Walong i nsiku ti wafarize, eyoyen wo ala ti vear avey ekri e mpaku ti vear apwo, watuba ya wantumwa inde: "Djwi na nge elande mpi egnwa nde veana nda wa vear avey ekri e mpaku ti vear apwo?"17Eyiyug Yezu vii awo, s'atubinde nda wo: "Vear ali djuung biu kaku wo na mfumu e munganga ve, kansi eli vear a nkeang. Nkayia djwi na mvie vear a masonga, kansi na mvie vear a masumu."18Opeane, wantumwa i Yoane ti wafarize wakn okio. Wayia ntuba wa Yezu: ''Djwi na nge wantumua i Yoane ti wantumua i wa farize wakn okio, kansi iyie wala,wapikn okio ve?'' 19Yezu akeara ndenden: "Iwur i wum asikug wo nkn okoio yug wum ali nda wo? Ntangu eli wum ali ti wuo, wapakug nkn okio ve.20Kansi nshuu ileye, ayakuma wo wum mby ayakn wo. 21Kaku wur emog ekug ntsug ipa n'eleam e mpa n'etay eleam e ntama ve, ekalega ngyara eleam e ntama, mpi asiyay wo epwo.22Mpi kaku wur esikug ntsug vean a mpa n'ipfuy i ntama ve; yug kaku veana asibwe wo ipfuy, mpi asipay wo na viana, na ipfuy; kansi ekug na ntsug vean a mpa n'ipfuy impa."23Eshuu emog e sabat, Yezu elelegikinde ne kati ivur i ble. Wantumwa inde, ntangu eleleg wo, wakeaga wunu i ble. 24Wafarize wayia onkaba wuwun: ''Tolir, djwi na nge wantumwa iyie emikiewo vim amipum wo nankie eshuu e sabat?"25Yezu akeara ndenden: "Ototangagni vii ayikii David, ntangu eyiyug nde nziya mpi ayinde na mfunu enda, nde ti vear ayi wa nde, 26Oshin eyishwinde n'evuru e Nzeam, ntangu eyii Abiatari ali nkum e wanganga-Nzambi, mby ala mampa otshia e Nzeam, eyipiwo nswa e nda ko ya wanganga-Nzambi, mby 'apiinde ti ya vear ayii wa nde?"27Mby Yezu atuba: "Sabat akiiwo djwi na wur, epa wur djwi na sabat ve. 28Kog enagn, Mon-wur ali mpi Nkum e sabat."
Chapter 3
1Yezu akea nshwe ne sinagoga. Neti, ayiwo na wur eyii n'ewuo e ngiyum. 2Okwungikiwo nde, djwi na ndir yug asovuga nde eshuu e sabat enagn asivea wo ekum e djwi isofugn wo.3Yezu atuba nda wur eyii n'ewuo e ngiyum: "Yima mpign ne kati kati e vear." 4Mby atuba nda wo: "Ne nsiku, eli wuo na nkie iwuo eshuu e sabat to na nkie ipwo; na mvuga luzingu e wur to na ndjag?" Kansi wo, wayia ko pwoo.5Mby, alir vear anagn na viy a ngy, na mpay djwi n'itura iwo biu, mby s'atubinde nda wur ewo: "Shima ewuo eyie." Ashima ewuo, mpi ewuo ende ekea wuo. 6Wafarize wapwe, mbala emog wakie mpfug ti vear a Erodi djwi na nding oshin nge esodjag wo.7Yezu alim atsa etay e nzey ti walongoki inde. Olwi o vear wodjie, wayum Galilea, amuu Yudea, 8amuu Yeruzalem, amuu Idumea, tii ontinteang e Yordani, ti pipi na Tyri na Sidonia. Emiyug wo vii alekikinde, wayia etay ende olwi n'olwi.9Awigna ya walongoki inde waling war e fioti djwi na nde, djwi olwi o vear wakotag. 10Djwi atigni nde mvuga vear entsign, vear a nkeang ankum alingikiwo mvanga ondii oli nde djwi n'onkir ne djuung.11Wa mpeve ipwo, ntangu emoyen wo, wakr abong ne nteang ende, mpi wa tsug elie: "Oli Mon e Nzeam." 12Kansi nde atuba nda wo biu na nkwon nkab djwi wakojia.13Mby avean n'ombimi; s'avikinde vear aleang nde mvie, mpi wayia etay eli nde. 14Mby ason vear djum n'ipe, eyiviinde wantumwa, djwi wayii ti nde mpi asikug nde antum na ntsa ndong along, 15djwi wayii n'ekub e nkma wa mpeve ipwo. 16Lir vear djum n'ipe iwo: Simon, eyipiinde dzin i Petelo;17Jaki, mon e Zebede, ti Yoane, otwung o Jaki, eyipiinde dzin i Boanergesi, eling ntuba aman a nzar, 18Andre, Filipu, Bartemi, Mati, Jaki, mon e Alfe, Tade, Simoni e Zeloti, 19ti Yudasi Iskarioti, wur Eyisar Yezu.20Mby atsa n'evuru, olwi o vear wayia nsanga mpi kog, kaku mpila elawo ata mampa ve. 21Ntangu emiyug atwung ande wayia djwi n'onkir; wuwun: "Kaku nde diaka na waagn ve." 22Walong i nsiku iyiyum Yerusalem, watuba wuwun: "Ali na Belzebul," Ali na nkum e wa entshung mby s'alekmi nde entshung."23Yezu avie vear anagn mpi atuba nda wo n'itsig: "Oshin nge satana asikug nde nkma satana? 24Yug ekub ekea naam nkeangawo, ekub enagn epayima . 25Mpi yug evuru wemie eli nginam, evuru enagn epayima .26Yug mpi satana atiyug nkier ndemie, aling nam, apakug ngima mpi ve, kansi enagn atikum ne nsuka ende. 27Kaku wur ekug nshwe n'evuru e nkea biu mpi okumi vim ande, yug nteang wakatshung nkea biu eshing mby wavey vim ande.28Ndokabagni e djwidjwi, masumu inkum aman a vear na itii itwewo Nzeam, ayaveawo ndolua; 29kansi wur etwe Mpeve Santu apayasavea ndolula ata eshuu emog ve, kansi atikie disumu e mvwe na mvwe." 30Yezu atubinde ngwign djwi atubikiwo wuwun: "Ali na mpeve epwo."31Mea ti atwung a Yezu wayia, wayima nelien. watum wur n'omvie. 32Oluy o vear watodjing nde ne kati-kati, mby watuba wa nde wuwun: "Lir, mea yie ti atwung ayie wali nelien, waloling yie."33Akeara wo ndenden: "Nagn eli mea me, mpi atwung ame wanagn?" 34Mby, alir vear ayii ngigneme ti nde, atuba: "Lir mea me ti atwung ame! 35Djwi, wur enkum ekie luzolo e Nzeam, wur enagn ali otwung ome ompeam, ti otwung ome onkear, ti mea me."
Chapter 4
1Yesu akea mbana ndong along ne nky e nzey, olwi o vear watodjing nde, avean ne war emog eyike ne nzey, mby agneme neti. Olwi o vear ankum ayiwo ne nky. 2Along nde vim entsign ne bingani, mpi ne along ande atuba nda wo vii ane:3"Yugagni, wur etsa mfuy evur apwinde djwi na mfuy. 4Ntang elefuyikinde, nkab i mbeam ilog ne mbug: wamfuru wayia, wala wog. 5Ndamu emuu elog n'endii atari, endii ekayia na buu entsing ve; mbeam iwo imen eveang, djwi ekavea buu entsing.6Kansi, ntangu eyipwi mbiiy, vim ayimen elunga mpi eyum, djwi akwon wo edzuu. 7Ikab i mbeam imuu ilog ne endii atiene: atiene avean dzug mpi egnege vim ayimen, mpi vim awo ikawur mbeam.8Ikab i mbeam imuu ilog ne buu e wuo: ewur mbeam eveang, etsun, epea mbeam osar, osom, mpi nkam n'oshung omog. 9Mby s'atubinde: "Wur eli n'atii a ngyug ayug!"10Yezu ntangu emisande tsuga ndemie, vear ayodjing nde ti wa ntumwa inde djum n'ipe, wobana onjwe djwi na bingana inde. 11Nde atuba nda wo: "Opeagniwo gnu oziy ekub e Nzeam; kansi djwi na vear ali nelien, vii ankum aleleg ko n'itsig, 12djwi na wo, wayalir , kansi wapiyen ve, mpi wayug, kansi wapijia, djwi wakwon ntshima itura, mpi wakwon mvea ndolula i masumu iwo."13Atuba diaka nda wo: "Opijiagni etsig ene? Oshin nge eyajiagnu itsig imuu ine inkum? 14Wur efuy eli wur efuy otuba. 15Vear amuu wali ne mbug, endii emifuy wo otuba, ntangu emiyug wo otuba, mbala emog satana atiyia ndima otuba oyalong wo.16Eli ti amuu, oshin omog, wativea mbeam n'endii atari; yug watiyug otuba, wayami ntete n'osiang; 17kansi kakuwo n'edzuu ve, watsug ivim i biu itaang, mpi yug mpay to watatesa djwi n'otuba o Nzeam, wakagn ndog ko eveang.18Vear amuu ayiyami mbeam ne atiene, eli vear atsa ngyug otuba, 19kansi, mabanza i vii a buu e ntangu ene, mpuy i mvea otsun, na ileang leang i vim amuu, iledjag otuba o Nzeam, mpi otuba kaku mpila esiwurwo mbean ne kati ewo. 20Amuu, weyami mbeam ne buu e wuo; eli vear aleyug otuba o Nzeam, aleyami mpi alewur mbeam, osar, osom mpi nkam elenga oshin oyifuy wo."21Yezu atuba diaka nda wo: "Atsawo mvara mwinda djwi na ntsug n'adjiu to ne ngie e ntir? Epa djwi na ntsug n'ondii etsa mpiey mwinda? 22Djwi kaku vim e ngizuba ve efwetewo nding na njia, kaku vim e ngiziy ve efwetewo mpur. 23Yug eli na wur eli n'atii djwi na ngyug, ayug.24Atuba diaka ndawo: Yiagni onker na vii aleyug gnu. Ayotesakagniwo ko na vim eleyer gnu, mpi ayatsug wo diaka entsign djwi na gnu. 25Djwi ayapeawo ya wur eli na vim; kansi wur emikwon, ayokumawo ata ivim ilinde na wo."26Akea ntuba diaka: "Ekub e Nzeam eli kamsi wur eyifuy mbeam ne buu; 27ata ali ngivur to ngitien na otshuu na mbiiy enkum, mbeam inagn asifuyewo ata yug wur efuy apijia. 28Buu atsawo mpur vim wemie, etigni mpur nkaya nteang, mby otimi, ne nsuka, mbeam ipwi n'otimi; 29yug ko mbeam ititsun, vear wawong na ntsa, djwi ntangu e ndima mbeam etikug.30Atubinde diaka: "Na nge esitesa su diaka ekub e Nzeam, to asikugsu ontendula na kingana nge? 31Eli kamsi mbeam i seneve, eli okieg ne kati e wambeam inkum; 32kansi yug watofuy ne buu, apwi, akum onen elenga eshung enkum efuy wo, apur atab anen-anen, mby wamfuru i dzug watsi nkuba ne ngie mpio ende."33Eli n'itsig oshin one eyalongikinde, n'oshin eyikugikiwo na ngyug. 34Atubikinde ndawo n'itsig, kansi n'oziy, atendulikinde walongoki inde vii ankum.35Eshuu wo, epiekuo, Yezu atuba nda wo: "Sibagagni nky emuu egni". 36Ntangu epagninde olwi o vear anagn, wovara ne war eyiyikinde, ayiwo mpi na viar imuu djwi na nde. 37Opepe onen ekir ne nzey, vay ashwe ne war, war ebana na ndzig.38Kansi Yezu ayinde ngivur ne dzug i kuse. Wobiya, watuba wa nde wuwun: "Nkum opiyen etura mpay n'oshin owasu ene?" 39Ntangu eyibiy nde, angnianga opepe, atuba na nzey: "Yia pwo! Tshung odzum!" Mpi opepe oshir, vii ankum akea ngya pwo.40Mby atuba nda wo ndenden: "Djwi na nge eyug gnu wom? Oshin nge ekwon gnu lukwikilu?" 41Wankum wayug wom, watuba wog na wog: "Wur nge eli ata opepe na nzey elolemfuka ngean?"
Chapter 5
1Wakum ne nky emuu e nzey, ne buu e wa Gadarenia. 2Mbale emog elepwi Yezu ne war, wur emog ayia ne nteang ende, ayum alum, mpi ayinde na mpeve ipwo.3Wur ewo atsande mpier neti alum, wakokugaka n'ontshung eshing, ata okor o bibende. 4Otshungikiwo ntangu enkum bibende ne nkuu na eshing e bibende, kansi alebagikinde bibende inkum, kaku wur eyi na biu onkir.5Na otshu na mbiiy, ayikinde ko neti alum ti ne dzug embim, atsugikinde elie, mpi abagikinde wampura ne djuung inde n'atari. 6Ntangu eyende Yezu etey, akim etay ende, atsankur abwong ne nteang ende.7Atsug olie n'otuba o biu: "Djwi nge yie ya me, Yezu, mon e Nzeam eli ne dzug? Ndowigna ne dzin i Nzeam, oyampea mpay ve." 8Djwi na Yezu okabikinde: "Pwe ne djuung i wur ene, yie mpeve epwo."9Mby Yezu oyue, "Dzin iyie nagni?" Nde mpi okeara, "Dzin ime Lezio, djwi sili entsign." 10Awigna ya Yezu biu djwi akwon ampur nelien e wiya.11Ne ondii onagn, ayiwo n'olwi e wa mvuy alikiwo pipi n'ombimi, 12mby entshung enagn wawigna ya nde wuwun: "Otetum neti e wamvuy igni, djwi sishwi ne djuung iwo." 13Apea mbug, mpeve ipwo inagn ipwe, watsa nshwe ne djuung i wamvuy, mby wamvuy wakim aveang, watsandog ne nzey: ayiwo etitign e awug ape eyitsu nzig ne nzey.14Vear ayiwungike wamvuy inagn wakim, watsa nkab oshwong etay enkum, ne viya inen ti ne viya ikieg. Vear s'atshiwo ndir vii aleleg. 15Wayia etay e Yezu, mpi wayen wur eyii na mpeve ipwo, nde wur eyii na Lezio, atikeanse, atilwer ileam, waagn etikea, mby s'ayug wo wom.16Vear ayiyen vii ankum ayileg wakab oshin oyileg vii ya wur e mpeve epwo ti ne wamvuy inagn. 17Mby wabana na ngwigna ya Yezu alim ne buu ewo.18Ntangu eveanikinde ne war, wur eyike na mpeve ipwo owigna nswa e mpier ti nde. 19Kansi Yezu atun, mby okabandenden: "Tshwag n'evur eyie, etay atwung ayie, mpi kabawo vii amokie Nkum, ti oshin emoyug nde ngy. 20Akien, mpi abana nkab ne Dekapolisi vii anen emokie Yezu, mpi vear ankum wayen ngituka.21Yezu ntangu emikea nde mbag nky emuu neti e war, olwi o vear wayia ngyuo pipi na nde, ntangu eyii nde n'ikri i nzey. 22Mby, emog ne kati ankum a sinagoga, eviewo Jairusi ayia, mpi ntangu eyiyen nde Yezu, alog ne nkuu inde. 23Mby owigna ngean: "Onkean me onkear ali pipi n'ewa. Movie yie, yag otsug mbwo djwi avug, akey ne luzingu." 24Yezu atsa ti nde, mby olwi o vear wosodjie, mpi walojing ne ngnina.25Kansi ayiwo n'okear omog epurike aluung ekug mvwe djum n'ipe. 26Ayen nde mpay entsign na ntsa etay e wamunganga etshin n'etshin, mpi apiynde ekri enkum eyikinde na wo. Kansi akavea evug ve, nkeang akumikiwo ko entsign. 27Ntangu eyug nde watuba vii a Yezu, ashwe n'olwi o vear, ne mby e Yezu, mby akir eleam e nde.28Djwi atubikinde: "Yug mikir ata ko eleam ende, asivug me. 29Ntangu eyokir nde, aluung aseanga na mpwe, ayug ne djuung inde nde ativug.30Mby ko ne ntangu enagn, Yezu ayug biu emog etipwe ne djuung inde. Mpi atshim ne kati olwi o vear mpi ayue: "Wur nagn eminkir n'ileam?" 31Walongoki inde w'okeara: "Oyen olwi o vear emotsug ne kati kati, mby olayue yiyen: "Wur nagn eminkir? 32Kansi Yezu alir mbeama na nde djwi na njia nagn emikie vii anagn.33Onkear owo, ntangu ejiinde vii amileg ne djuung inde, ayug wom mpi ayia ko ekukuma. Ayia ndog ne nkuu i Yezu mpi okaba vii ande ankum. 34Yezu atuba ya nde: "Mon me onkear, lukwikilu eyie etovuga. Tshwag na ngemba mpi otivug ne nkeang eyie."35Ko ne ntangu eyitubikinde, vear ayum n'evur e nkum e sinagoga wakaba nkum e sinagoga wuwun: "Mon yie onkear atiwa. Djwi na nge epea yie longi mpay?"36Kansi Yezu akatsug onen ve ne vii ayinkab vear anagn, atuba nda nkum e sinagoga ndenden: "Oyayug wom, kwikila kaka." 37Akaleang wur odjiende, avey ko Petelo, Jaki ti Yoane, otwung o Jaki. 38Wakum n'evuru e nkum e sinagoga, mby wayen olwi o vear waliye mpi watsug elie.39Ntangu eshwi Yezu n'evuru, atuba ngean nda vear anagn: "Djwi nge ekiegnu oshuru, djwi nge eliyegnu? Mon atowe, kansi ativur lwong." 40Vear ankum woyue two, kansi Yezu apur vear ankum nelien, avey tea na mea e mon, ti vear ayodjii, watsa ondii oli mon.41Yezu akir mon n'ewuo, mby atuba nda nde: "Talitha koumi!" Eling ntuba: "Mon onkear, yima, ntuba ma yie!" 42Mbala emog, mon onkear ayima, abana nkien djwi ayinde na mvwe djum n'ipe. Vear ankum wayen ngituka. 43Yezu apum vear anagn ankum wakwon nkab vii ane. Mby awigna ya wo wapii mon vim a nda.Chapter 6
1Yezu alim kog, akea ntsa wiya nde, mby walongoki inde wosodjie. 2Ntangu ekum sabat, abana ndong ne sinagoga. Vear entsign eyoyugike wayen ngituka mpi watuba: "Vii ane ayum n'onkagn? Waagn oshin onkagn emopeawo ene?" "Oshin o bidimu nge elekiinde ne mbwo inde ene?" 3Ene epa wur otshia abaya, e mon e Maria, otwung o Jaki, e Joses, e Yudas ti e Simoni? Mpi atwung a nde ankear, kakuwo wa su nendien?" Mby akum nde, djwi na wo, ibag isalogo wo.4Kansi Yezu atuba nda wo: "Ngunsa atsawontun ko ne wiya nde, ondii oli atwung ande, mpi n'evuru ende." 5Akakug nkie kog ata kidimu emog ve, ko mbwo itsugikinde vear a nkeang mpi elavugikinde. 6Ayen nde ngituka oshin okwon vear anagn lukwikilu. Mby s'atshinde ndong along ne viya i pipi.7Mby avie walongoki inde djum n'ipe mpi abana antum ape n'ape, mby apea ekub ne dzug i mpeve ipwo, 8Mpi apum na mvey ata vim emog djwi na mbug eletshiwo, wavey ko etign oshung: wakwon mvey mampa, ata ibwomo, ata ekri ne okori ikini, 9kansi akaba na ndwer sandali, mpi apum na ndwer kazag ipe.10Mby atuba nda wo ngean: "Evuru esishwe gnu, yiagni neti tii ko ntangu eyakien gnu. 11Mpi wiya enkum esitun ongyamagni to ongyugagni, limagni ne wiya enagn, sapubagni okub o nkuu ignu djwi esayia ntiegn djwi na wo."12S'akien wo mby, mpi wantsa ndong na ntshima itura. 13Akmikiwo mpeve ipwo, akwikiwo vear a nkeang vir djwi na nkeang iwo s'alevugikiwo.14Nkum Erodi ayug watuba vii anagn, djwi dzin i Yezu vear awung wo njia wuo. Mby amuu s'atubikiwo: ''Ene eli Yoane atikea mbiy n'ewa mby s'alekiinde bidimu ine.'' 15Amuu watuba wuwun: ''Eli ngunsa Elizea". Mby amuu wuwun: "Ali ngunsa emog e ntama."16Ntangu emiyug Erodi vii anagn, atuba ndenden: "Eli Yoane eyibag me ote, ndug wur emikea mbiy n'ewa. 17Djwi Erodi ndemie atum nde vear na ntshung Yoane nkori wotum bolok. Djwi Erodiadi wear e Filipu, otwung onde, asande kum wear nde.18Yoane atubikinde nda nde: ''Ne nsiku, opikug mvey wear otwung oyie asakum wear yie ve''. 19Erodiadi ayinde na nkier djwi na Yoane, alingikinde oshin nge esokug nde n'odjag. Kansi akaveaka mbug ve. 20Djwi Erodi alurikinde Yoane; ajikinde ndenden ali wur e masonga, wur e santu, mby alowumikinde wuo. Alingikinde ngyug akie bidimu, ayinde n'osiang na onyug nde.21Eta ko n'ibag, elaga eyiwur wo Erodi etikug, mby akie okina, avie ankum, ti wankum ayer-nkuu e Galilea. 22Mon ankear Erodiadi ashwe n'ondii e okina, akangn mpi epea osiang ya Erodi ti vear amivie nde. Nkum ayue mon onkear: ''Wigna vim enkum, asopeame."23Asila nda nde ndenden: "Vim enkum esiwigna yie, asopeame, ata ikab ekub eme." 24Mby mon onkear apwe ntsa nkaba mea nde: "Vim nge esikug me n'ongwigna?" Mby nde okaba: "Ote e Yoane Mbotiki." 25Akea eveang-eveang etay eli nkum, mpi okaba ngean: ''Ndaling ompi ko opeane, ote e Yoane Mbotiki n'ilongo."26Nkum ayug ngy, kansi, djwi na vim emisila nde mpi djwi na vear alinde ti wo, kaku oshin omuu o nkie ve. 27Mby nkum s'atum nde iyer-nkuu emog etsankwung etay ende, n'onjie ote e Yoane Mbotiki. Iyer-nkuu atsa mbag ote ende ne bolog. 28Mby avara ote ewo n'ilongo s'apiinde ya mon onkear, nde mpi s'atshinde mpea meande. 29Ntangu emiyug walongoki i Yoane, watsha mvey djuung inde watsa mpfugn n'aluma.30Watuma emikeawo etay Yezu, wokaba vii ankum ayikiwo ti ayilong wo. 31Mby Yezu akaba ndenden: "Yagagni gnemie n'ondii e ndzum, yoragni neti fioti." Djwi vear entsign ayiwo waleye walekey, wo, wakavea ntangu e nda ve. 32Mby s'ashwi wo ne war, watsa wemie ne buu e ndzum, n'ondii oli kaku vear.33Kansi ntangu emayen vear ne ntangu elelimikiwo kog, wajia, wasatsa mpiog na nkuu, watear ne waviya, wakum ne nteang ewo. 34Ntangu emikum wo, etean kaku, Yezu ayen vear entsign, ayu ngy djwi na wo, djwi akum wo kamsi ameme akwon wur alir. Mby s'abaninde ndong vim entsign.35Ntangu emijie vuna, walongoki wayia ondii olinde mpi watuba: "Ondii ene kaku vear, vuna wean etijie. 36Tum wo, watsu ne viya ili pipi, washum vim a nda asikug wo nda djwi na wo wemie."37Kansi nde, akeara ndenden: "Peagni wo vim a nda." Mby wa nde wuwun: ''Asitsasu nshum mampa nonkagn na nkama ipe i denari djwi sipii ya vear ane wale?" 38Ayue wo ndenden: "Olagni na mampa kwe? Tshwag otoliragni." Ntangu emiyen wo, watuba wuwun: "Mampa itean na ntse ipe."39Mby atuba nda wo watsug vear ankum wagnemi akina-akina ne dzug adjiu. 40Wagneme n'olwong o nkam emok, ti olwong e otean. 41Avey mampa itean ti ntse ipe inagn, alir dzug olung, akeara nsag-na viye, mby, abag mampa itign-itign, mby s'apiinde walongoki inde na mpea vear anagn. Wakab ntse ipe inagn djwi na wo wankum.42Wakum wala mpi wayur. 43Watongo isag djum n'ipe itiyuo n'itign i mampa ti ntse imisatsuga. 44Wankum ayili ayiwo awugu atean a vear.45Etean kaku, atsug walongoki inde ne war, watsu ne nky e Bethsaida, nde, atosakeara vear ankum wakien. 46Ntangu emikien wo, atsa n'ombimi djwi na nsama. 47Mpib etilog, war etikum ne ngnina e nzey, mpi Yezu atisatsuga ko ndemie ne nky.48Ayiwo na mpay na nduka nkey, djwi opepe alekeyikiwo etay eliwo. Etitign e ntangu inign otshuu, s'aleyikinde etay eli wo, alekien ne dzug i nzey, ativanga mbeama na wo. 49Kansi ntangu emoyen wo alekien ne vay, wabansa wuwun eli emono, watsug elie. 50Woyen wankum, mby wayug womo. Etean kaku, atuba nda wo ndenden: "Yiagni na kikesa, eli mug, oyayugagni womo ve!"51Mpi akum etay eli wo, ashwe ne war nda wo, opepe mpi eshir. Wakum ayen wo ngituka. 52Wakajia kidimu e mampa inagn ve, djwi itura iwo ayiwo biu.53Ntangu emibag wo nzey, wakum ne nky, ne Genezarete, washiem neti. 54Ntangu emipwe wo ne war, vear, ntangu emojiawo nde, 55wakien etitign enagn enkum, mby wabana mvara vear a nkeang ne ntir, etay ekum eyiyugikiwo atikum.56Endii emuu eyikum nde, ne kati e waviya inen to viya ikieg, aletsugukiwo vear a nkeang ankum ne alaga. Awignikiwo ya nde na nkir ko nsor eleam ende, mby vear ankum alekirike, avugikiwo.Chapter 7
1Wafarize ti walong i nsiku imuu iyim Yeruzalem wayia mbeama na Yezu.2Wayen walongoki imuu wayala vim a nda kansi mbwo iwo ili mbin, wakasuy. 3Djwi wafarize ti wayuda inkum wapitsinda na mbwo mbin ve, atsawo nsuy yim ko antsuru awo. 4Ntangu etsankea wafarize yim ilaga, atsawo nda ko yug watiyog djuung iwo inkum. Wali mpi na wansiku iwo imuu entsign itsawo nkie, kamsi na nsuy akob, awung ti wampugu i bibende, ti alongo amuu atsawo nda neti.5Wafarize ti ayuda s'ayuiwo Yezu wuwun: ''Djwi na nge walongoki iyie wapitsindana vii a ntama antsuru, atsawo nda ko na mbwo i mbin?"6Yezu akeara ndenden: "Ankea eyang ene!Ezaya abikulinde djwi na gnu, oshin omifugn wo: 'Vear ane wandeang ko n'odzum, kansi itura iwo ili ntama na me. 7Wampea lokumu e mpama, na ndong wansiku, ili ko nsiku i vear.'8Watun Osasiangagni enkwon e Nzeam djwi osalemfukagni ko na vii a vear." 9Akeantuba nda wondenden: "Odjagagni enkwon e Nzeam djwi osawumagni ko vii antsuru agnu. 10Djwi Moize atubinde: 'Lemfuka ya tea yie ti mea yie, mpi nenden: 'Wur eyashing tea nde ti mea nde ayavey nde ndola ewa.'11Kansi gnu, otubagni gnugnun: ''Yug wur atuba nda tea nde ata mea nde ndenden: ''Ayime na vim ompeagni, kansi ntifipea n'evuru e Nzeam (etuba na mpea ya Nzeam), 12enagn osasiangagni, apafikie ata vim ve djwi na tea nde to mea nde. 13Enagn odjagagni otuba o Nzeam djwi na vii antsuru agnu, emitsug gnu. Mpi olekiagni vii amuu entsign oshin onagn."14Mby, akea mvie oluy o vear anagn etay eli nde, nda wo ndenden: "Ongyugagni gnankum mpi jiagni wuo. 15Kaku vim etsanshwe ne kati e wur mby etsug wur mbin ve. Kansi eli vim esipwe nelien e wur, wog enagn etsampea disumu. 16Yug eli na wur eli n'atii, ayug!"17Opeane, ntangu emishwe Yezu n'evuru atisasugn vear anagn, walongoki inde woyue djwi na etsig enagn. 18Yezu atuba ndenden: "Ti gnu kaku waagn o njia ve? Opijiagni ve gnugnun kaku vim emog ve eyim nelien e wur, eshwi ya wur epopea mbin ve. 19djwi vim enagn epashwe n'etura ende ve, kansi n'ipfugn inde, mby watsu mfanga n'ondii oziy?" Emituba Yezu ene, eli ndenen vim a nda ankum ali wuo.20Akeantuba ndenden: "Eli vim epwe ya wur, wog enagn etsampea wur disumu. 21Djwi eyim ne kati e wur, eyim n'etura, nginu ipwo, itaay, vii a mbin, i ndjag vear, 22wumu, nziya ekri, ndeang vim ankagn, nkier, mbeam vear vii, omwong, ibuma. 23Vim akum apwo ane ilapwe ne kati e wur mpi epiy wur."24Ntangu emilim nde kog, akien, atsa ne buu e Tyre ti e Sidonia. Ashwe n'evuru emog, akaleang vear ajiawo ondii oli nde ve. 25Kansi onkear omog, mon nde onkear ayinde na mpeve epwo, ntangu emiyug nde watuba djwi na nde, ayia ndog ne nkuu inde. 26Onkear owo ayinde Greki, itsin inde i buu eli Syria ti Fenisia. Awigna ya nde na nkma mpeve epwo enagn eli ya mon nde onkear.27Mby Yezu atuba: "Tosianga aman watoyur. Djwi, epa eli wuo ve na mvey vim a nda aman na mpea wog ya wamva." 28Mby onkear owo akeara ndenden: "Ee, nkum, kansiwamva atsawo nda mpfuya itsa ndog ne ngie mesa ela aman."29Mby atuba nda nde: "Djwi emituba yie ngwign, osikug nkien. Ontshung atipwe ne djuung i mon yie onkear." 30ntangu emikea nde ntsa n'evuru, ayen mon ativur ne ntir, ontshung ayiwo atipwe.31Mby akea ndim ne buu e Tyre, atsa buu e Sidonia, ne nzey e Galilea, wabag ne buu e Dekapolisi. 32Wojie wur emog atii nkna, atuba mpi na mpay, mby wawigna ya nde djwi oyab mbwo.33Olima ondii oli vear, otum n'ikri, mby oshwer mpign inde n'atii, mby okir n'elim n'asuy ande ndemie. 34Mby, alir viy dzug, agnim, atuba: "Ephphatha", etuba, "Ngama!" 35Etean kaku, atii ande angam, elim ende epub, abana ntuba wuo wuo.36Yezu apum nakaba ata wur emog. Kansi yug alapum na nkwon nkab, wo walega ko na nkaba vear. 37Wayen ngituka entsign, watuba: "Vii ankum alekiinde eli ko wuo. Vear apiyug wayug, vear apitubi watuba."Chapter 8
1Ne nshuu inagn, vear walega nkum entsign, mpi wakayia na vim a nda ve. Mby Yezu avie walongoki inde, atuba nda wo: 2"Ndi na ngy e vear ane; wakie nshuu isar etay ti me, kaku vim emilawo ve. 3Yug makeara ne mvuru iwo na nziya, wapavea biu ne mbug ve. Djwi amuu wayin etey. 4Walongoki inde wokeara wuwun: "Nonkagn esikug su mvea mampa ne buu e ndzum ene djwi vear ane wayur?"5Yezu ayuue: "Mampa kwe elingu na wo?" Wuwun: "Ishiambia". 6Mby atuba nda vear anagn na gneme ne buu. Avey mampa ishiambia inagn, akeara nsag-na-viye, mby s'abag nde itign itignApea wog ya walongoki inde djwi na mpea vear, mby s'apiiwo ya vear anagn.7Ayiwo diaka n'ivim i ntse, mpi ntangu emishir nde mpea nsag-na-viye, atum walongoki na nkeampea wog ya oluy o vear anagn wuo. 8Wala, wayur mpi wavara isag ishiambia etiyuo to n'iting i ntse. 9Ayiwo etitign e vear nkam inign. Mby akeara vear anagn etay ewo. 10Etean kaku, ashwe ne war ti walongoki inde, mby s'atshiwo buu e Dalamanuta.11Wafarize wayia, wabana ntuba wa Yezu mpi wotesa; waling kidimu eyim dzug. 12Yezu, ntangu emikeande gnim ne mpeve, atuba ndenden: "Djwi na nge aman a ntangu ene, waling ko wayen kidimu? Vi-a-vii, mokabagni, kaku kidimu eyavea aman a ntangu ene ve." 13Mby asasugn, akea nshwe ne war, s'atshinde nky emuu egni.14Walogoki wajing na mvey mampa. Ayiwo ko na mampa emog ne war. 15Yezu atuba nda wo ndenden: "Osugagni na levir i mampa i wafarize ti levir i Erodi."16Walongoki wabansa wog na wog wuwun: "Eli djwi kaku su na mampa." 17Yezu tangu emijia nde, atuba ndenden: "djwi na nge ebansa gnu djwi na mampa ikwon su? Opijiagni ata vim ve? Kaku waagn ya gnu ve?18Olagni na viy, kansi opiyenagni ve? olagni atii, kansi opiyugagni ve, nge opikanagni ve? 19 Ntangu eyibag me mampa itign itign eyili vear awug atean, asatongo gnu isag ikwe?" Wokeara wuwun: "Djum n'ipe."20Ntangu eyibag me mampa ishiambia djwi na vear awug anign, atongignu isag ikwe?" Wokeara wuwun: "Ishiambia." 21Mby atuba ndenden: "Opijiagni ata vim ve?"22Wakum ne Bethsaida. Vear ali kog wojie wur emog apiyen ne viy. Wawigna ya Yezu okir. 23Yezu akir wur epiyen enagn n'ewuo, opur ti nelien e wiya. Ntangu emivey nde asuy okwe ne viy ande, mpi oyab mbwo n'ote, mby oywe: "Vim nge eyen yie?"24Alir, mby atuba ndenden: "Ndayen vear kamsi eshung elekien." 25Mby Yezu okea ontsug mbwo ne viy, ntangu emingama nde viy, avug, akea ngyen vim ankum wuo wuo. 26Mby Yezu okeara evuru ende, okaba ndenden: "Oyafikea nshwe ne wiya enen ve."27Yezu akien ti walongoki inde ne viya i Sezarea e Filipu. Ne mbug s'ayuinde walongoki inde ndenden: "Vear atsawo ntuba wo wuwun ndi nagn?" 28Watuba ngean: "Yoane mbotiki. Amuu wuwun: Elia, mby amuu wuwun: Ngunsa emog e ntama.'"29Ayue wo: "Mby gnu, atsagnu mbansa me ndi nagn?" me? Petelo atuba nda nde ndenden: "Yie oli Kristu." 30Yezu atuba nda wo nankwon nkaba ata wur na vii anagn.31Mby abana na nkaba ndenden Mon-wur ayayen nde mpay entsign, ayofanga wo ya antsuru ti ankum a wanganga- Nzambi ti walongo i nsiku, ayodjag wo, mby ne mby e nshuu isar, ayakeande mbiy n'ewa. 32Awung ankaba vii ane wuo- wuo. Mby Petelo ovie n'ikri mby obana n'ognianga.33Kasi Yezu, atshim mpi alir walongoki inde, agnianga Petelo, atuba ndenden: "Ne mby eme, satana! Djwi na yie mabansa Nzeam kaku ve, oliko na mabansa i vear. 34Mby s'avinde oluy o vear ti walongoki ondii omog, akaba ndenden: "Yug wur aling nsadjie me, atun nteang djuung inde, avari kulunsi ende, mby andani me.35Djwi wur eli na mfunu e ngwum luzingu ende, luzingu ende ayatsaow ntu, kansi wur eli, luzingu ende etitsa ntu djwi na me, mpi djwi n'otuba o Nzeam, ayavuga nde luzingu ende. 36Mfunu nge ya wur na mvea okiri opfugn kansi asafanga moyo ende? 37Vim nge wur esikug nde nsongo na luzingu ende?38Kansi wur esingyug me nsogn ti otuba ome ne kati aman a ntangu e lwo ene elekii itaay ti masumu ene, Mon-wur ayoyug nde nsogn, ntangu eyayiande na nkembo e Tea nde ti banzio inde i santu."Chapter 9
1Ankea ntuba nda wo: "Mokabagni, vi-a-vii, amuu ne kati egnu nendien wapayawa ve,yug watoyen ekub e Nzeam eleyena nkembo ewo." 2Ne mby e nshuu isom, Yezu avey Petelo, Jaki, ti Yoane, mby avara n'ikri ko wemie, ne dzug ombim. Elung ende engala ne nteang ewo. 3Ileam inde ilega nkum siiy, siiy emog eli kaku vim emog eli oshin onagn ne buu.4Elia ti Moize wapwe ne nteang ewo, wasula ti Yezu. 5Petelo, akeara otuba nda Yezu ndenden: "Ewong siyiagni nendien; sitwung mvuru isar, emog djwi na yie, emog djwi na Moize, mby emog djwi na Elia." 6Djwi akajia nge etubande, womo etakir.7Ewung emog eyia ndzub. Mby ne kati ewung enagn otuba epwe: "Ene eli Mon me etsame ndeang entsign. Yugagni nde." 8 Etean kaku, walongoki walir pipi na wo, wasayen ko Yezu ndemie nda wo.9Ntangu elekrikiwo ne ngie ombimi, Yezu atuba nda wo na nkwon nkaba ata wur emog vii anagn amiyen wo, tii ko yug Mon-wur atikea mbiy n'ewa. 10Wawum vii anagn djwi na wo wemie, kansi waywe wog na wog wuwun: "Nkea mbiy n'ewa, eling ntuba nge?"11Walongoki woywe: "Djwi na nge walong i nsiku watuba wuwun Elia afwete nkea nteang?" 12Akeara ndenden: "Elia ayakeande nteang, djwi na nkeara vim ankum ne ndwongo. Mby djwi na nge emifugn wo wuwun Mon-wur ayayen nde mpay entsign, ayoyen wo kamsi wur emog e mpama? 13Kansi ndokabagni, Elia amiyia, mpi okiwo kamsi oshin oyileang wo, oshin oyifugn wo djwi na nde."14Ntangu emikum wo mbeama na walongoki imuu, wayen oluy o vear ondii oli wo, ti walong i nsiku wasula ti wo. 15Ko ntangu emiyen wo Yezu, wayen ngituka, wakim aveang djwi n'ompea mbea. 16Ayue walongoki inde ndenden: "Nge esulagnu ti vear anagn?"17Mby wur emog ne kati evear anagn akeara: "Ntijie mon me ompeam etay eyie, ali na mpeve emotshung odzum apitubi. 18Ondii enkum esokir nde, asologo nde ne buu, akama vin, mpi akum epwo. Ntiwigna ya walongoki yie n'onkma mpeve epwo enagn, kansi wapikug ve. 19Akeara ndenden: "Ndwong aman apidjir ane, tii nsuka nonkagn eyayiakame ti gnu? Onjiagni na nde nendien."20Wovara etay eli nde. Mpeve ewo ntangu emiyen nde Yezu, agnug mon ewo, osologo ne buu mby angam odzum. 21Yezu aywe Tea nde: "Ekie ntangu ikwe emikum nde ngean?" Tea akeara ndenden: "Yim ko olieng onde. 22Mpi mbala entsign mpeve enagn atsande ondogo ne tshiya ti ne vay djwi awe. Kansi yug asikug yie na nkie vim, oteyug ngy, otesarisi."23Yezu atuba nda nde: "'Yug okug?...Vim enkum ekug ya wur edjir." 24 Etean kaku, tea e mon atsug olie, ndenden: "Nti djir! Onsarisi n'etura eme e biu ene!" 25Yezu, ayen oluy o vear waleye, agnianga mpeve epwo, atuba: "Yie mpeve epitubi ti mpeve epi yug, ntuba ma yie, pwe ne djuung i mon ene, mpi oyafikea."26Mby apwe, asatsug elie, mpi osognug na biu enkum. Mon akum kamsi atiwa, kansi vear entsign atubikiwo wuwun: "Ali odjuu." 27Kansi Yezu, okir n'ewuo, oyim, mby mon ewo ayima.28Ntangu emikea Yezu n'evuru, walongoki inde woyue n'oziy wuwun: "Djwi na nge sikakug na nkma mpeve epwo enagn?" 29Atuba nda wo ndenden: "Oshin o mpeve ine atsawo mpwe ko na bisamu."30S'alim wo kog, watear buu e Galilea. Kansi Yezu akaleang wur aji etay eliwo. 31Djwi ayiwo alelong walongoki inde. S'akabinde ngean: "Mon-Wur ayosar wo ne mbwo i vear a buu; ayodjag wo. Ntangu eyodjag wo, ne mby i nshuu isar, ayafutumukande. 32Kansi walongoki wakakug njia djwi ilingiki ntuba Yezu ve, mpi ayugikiwo womo n'ongyue.33Wakum ne Kapernaum, ntangu eyi wo ne kati evuru, Yezu ayue: "Nge eyitubikignu ne mbug?" 34Kansi wayia pwo, djwi ne mbug atubikiwo wog na wog na njia nagn elenga amuu n'onen. 35Mby agneme, avie wankeadjum n'ipe, mby atuba: "Yug wur aling ngya ontete, ayii onsuka e vear ankum mpi wur otshia e vear ankum."36Mby avey mon ilieng, otsug ne kati ewo, mpi okir ne mbwo inde, akaba ndenden: 37Wur enkum eyama ne dzin ime emog ne kati aman alieng ane, atingyama me memie; mpi wur esingyama me, atiyama epa ko me ve, kansi ti wur eyintum."38Yoane atuba nda nde ndenden: "Nkum, ayen su wur emog akma entshung ne dzin iyie, mby opum su, djwi apitelani ve. 39Mby Yezu akeara ndenden: "Oyopumagni ve, djwi kaku wur esikug nkie kidimu ne dzin ime, mby asatuba ipwo djwi na me.40Yug apa altetun ve, ali wur esu. 41Mpi wur enkum esopea ikob i vay, ngnua ne dzin ime ogniang oli wur e Kristu, mokabagni vi-a-vii, ifutu inde ipatsa ntu ve.42Kansi, wur esitsug ibag ne nteang emog ne alieng emidjir ya me ene, ekug djwi na nde wotshung oshing ashin odzuru ne nking, mpi wofangi ne nzey enen. 43Yug ewuo eyie elologi yie ne masumu, bag wo. Ewong oshwi ne luzingu e kieleka n'ewuo emog, 44Kansi epa na ngyia na mbwo ipe djwi otsu ne bilungi, ne kati e tshiya epidzum.45Yug ekuu eyie eli, elologi yie ne masumu, bag wog. Ewong oshwi n'ekom ne luzingu, 46kansi epa na ngyia na nkuu ipe djwi wofangi ne bilungi, ne kati e tshiya epidzum.47Yug dziy iyie elologi ne masumu, keaga wog. Ewong oshwi n'ekub e Nzeam na dziy imog, kansi epa oyi na viy ape mby wofangi ne bilungi. 48Ondi onagn tshiya epitsi ngwa, mpi tshiya epitsi ndzum.49Djwi wur enkum ayotsug wo kwa ne tshiya. 50Okwa eli vim emog e wuo, kansi yug nsa okwa emishir, asikearawo nsa ewo na nge? yiagni n'okwa gnug na gnug, mpi yiagni na ngemba gnug na gnug."Chapter 10
1Yezu, ntangu emilim nde n'ondii onagn, s'atshinde ne buu e Yudea, ti ne buu enkum eli etitign e vay a Yordani. Oluy o vear wayia diaka etay ende. Akeyikinde ndong vear anagn, ko oshin omiziga nde na nkie. 2Wafarize wayia etay eli nde djwi n'ontesa, woyue: "Ne nsiku eli wuo djwi n'ompeam na ndjag ivea ti wear nde?" 3Akeara ndenden: "Nge eyitubi Moize nda gnu?" 4Watuba wuwun: "Moize apinde nswa na mfugn onkean e ndjag ivea mby okmi wear yie."5Mpi Yezu akaba ndenden: "Eli djwi n'itura ignu biu mby Moize s'ofugnagni nde nsiku enagn," 6'Kansi n'itsin i buu, Nzeam akinde ompeam mpi onkear.'7Wog enagn, ompeam ayalim nde etay e tea nde na mea nde, ayanaba nde ti wear nde, 8Mby wape wakum djuung imog. Wapafiyia ipe ve, kansi watikum wur emog. 9Kansi wur apikug nama ve vim emitsug Nzeam ondii omog."10Ntangu eliwo wo neti evuru, walongoki woyue diaka na djwi ine. 11Mby akaba ndenden: "Wur eskma wear, mpi akey ntsug emuu, atikie itaay ti nde. 12Mpi yug onkear atisianga wum nde, akey ntsug wum emuu, atikie itaay ti nde."13Mby wojie aman alieng, djwi atsug ewuo, kansi walongoki wa ngnianga vear anagn. 14Kansi Yezu ntangu emiyen nde, akayia n'osiang na wo ve, mby akaba: "Siagagni aman alieng waye etay eme, mpi oyapumagni ve; djwi ekub e Nzeam eli djwi na vear ali kamsi wo.15Mokabagni, vi-a-vii, wur enkum epayama ekub e Nzeam kamsi mon ilieng, apayashwe otshwag neti ve." 16Mby avey aman anagn ne mbwo inde, mpi asakumuni nde, mpi ayab nde ewuo.17Ntangu emibana nde ekien ende, ompeam emog ayia n'iveang, alog n'abwong ne nteang ende mby oyue: "Nkum e wuo, nge efwete me nkie me djwi nsa viya luzingu e mvwe na mvwe?" 18Yezu atuba ndenden: "Djwi na nge emvieyie wuo? kaku eli wuo ve, eli ko Nzeam ndemie. 19Ojia enkwon: 'Oyadjag ve, oyakie itaay ve, oyakama ve, oyayia ntiegn oyang ve, oyakie ipwo ve; pea tea ti mea yie lokumu.'"20Wur ewo atuba ndenden: "Nkum, atsame ndemfuka na vim anagn yim ko olieng ome." 21Yezu olir tii, oleang. Mby okaba ndenden: "Olakwon vim emog. Tshwag, sar vim ayie ankum, pea ya ankea emva, mby asiveya yie otsun ne dzug, mby yag ondani." 22Kansi ko djwi notuba onagn, wur ewo akum ko ngy ngy mby s'akien nde, djwi ayinde na vim entsign.23Yezu , alir mbeama na nde tii, mby atuba nda walongoki inde: "Eli mpay djwi na ankea otsun na nshwe n'ekub e Nzeam!" 24Walongoki wayen ngituka oshin oyitubi Yezu, mpi, akea mvey otuba ndenden: "Aman ame, eli mpay ya ankea otsun na nshwe n'ekub e Nzeam. 25Kansi kaku mpay ve ya shamo na nshwe n'itun i sindani kansi epa nkea otsun ve na nshue n'ekub e Nzeam."26Walongoki wayen ngituka entsign, mpi watuba wog na wog wuwun: "Mby wur nagn esikug mvug?" 27Yezu alir, mby atuba ndenden: "Ya vear, epakug ve, kansi epa ya Nzeam ve. Djwi ya Nzeam, asikug nde nkie vim enkum." 28Petelo abana n'onkaba ndenden: "Lir, sitisianga vim ankum mpi silolani yie."29Yezu okeara ndenden: "Mokabagni vi-a-vii, kaku wur emog emisasianga evuru ende, atwung ande ampeam, to atwung ande ankear, to mea nde, to tea nde, to aman ande, to buu ende djwi na me to djwi n'oshwong o Nzeam, 30mby akwon mvea mbala nkam, opeane ne mvwe ine, wamvuru, atwung ampeam, atwung ankear, wamea, aman ti wa buu, na wambangika, mby ne buu eyasayia, luzingu ekwon nsuka. 31Kansi vear entsign a nteang, ayasawo kum vear a nsuka, mpi vear entsign a nsuka, ayasawo kum vear a nteang."32Ayiwo ne mbug walevean Yelusalem, mpi Yezu atsukinde nteang ewo. Walongoki wakum nginu eshin n'eshin, mpi vear alosodjiike, walosodji na womo. Mby Yezu avey walongoki djum n'ipe pipi na nde, mby abana na nkaba wo vii aleye djwi na nde. 33"Lir, silavean Yelusalem, mpi Mon-wur asopea wo ya antsuru a wanganga-Nzambi ti walong i nsiku. ayobag wo ewu ende ko ewa, mby ayopea wo ne mbwo empaagn. 34Ayoywe wo two, ayotwe wo asuy, ayober wo enuagn, mpi ayodjag wo; mby ne mby e nshuu isar, ayafutumuka nde."35Aman a Zebede, Jaki ti Yoane, wa vanga na nde, mby watuba: "Nkum, sileang otepii vim eling su. 36Akaba wo ndenden: "Nge eling gnu nkii djwi na gnu?" 37Watuba wuwun: "Otepii mbug signemi ti yie, emog ne wum ewuo eyie, emuu ne wear ewuo eyie, ntangu eyashwe yie ne nkembo eyie."38Yezu akeara ndenden: "Opijiagni vim eling gnu ve. Asikug gnu na gnua ikob ifwete me gnua, mpi asikug gnu mvey mbotika efwete me mvey?" 39Wokeara wuwun: "Asikug su."Mby Yezu atuba nda wo ndenden: "Ikob isignua me, asikug gnu na gnua, mbotika esivye me, asikug gnu na mvey. 40Kansi djwi na gneme n'ewuo eme e wum to ewuo eme e wear, enagn epindir me, mpi ayapeawo ko ya vear amiwuma wo endii enagn."41Walongoki djum ntangu emiyug wo vii anagn, wabana na ngyug nkier wa Jaki ti Yoane. 42Yezu avie, mpi atuba: "Ojiagni vear alir wo kamsi ankum n'okiri atsawo mpea vear okiri mpay mpi antsuru wali ne dzug iwo.43Kansi ya gnu, epa eli oshin onagn ve. Wur eleang akum wur enen ne kati egnu ayii wur egnu otshia; 44mpi wur enkum eling ngya ontete ne kati egnu, ayii mpfumi e vear ankum. 45Djwi Mon-wur ayinde, epa djwi wopii ve, kansi djwi na nkie, mpi na mpea luzingu kamsi ifutu ipeawo ya vear entsing."46Wakum ne Yeriko. Ntangu elepwi nde ne Yeriko ti walongoki inde ti oluy o vear, mon ompeam e Timee, Bartime, amibuye viy, otshia ko ngwigna, atigneme n'ikri i mbug. 47Ntangu emiyug nde ndenden eli Yezu e Nazarete, abana na ntsug elie mpi atuba ndenden: "Yezu, Mon e Davidi, ongyug ngy!" 48Vear entsign wopum, watuba wa nde na ntshung odzum. Kansi nde, alega ntsug elie biu, ndenden: "Mon e Davidi, ongyug ngy!"49Yezu ayima, mpi akaba vear wavii wur enagn. Wavie wur emibuye viy enagn, wuwun: "Yia na kikesa, alovie yie." 50Wur emibuye viy asafanga kazag ende, mpi ayima ne mbala emog, aya etay Yezu.51Yezu okeara ndenden: "Nge eling yie nkii djwi na yie?" Wur emibuye viy okeara ndenden: "Rabbouni, ndeang nkey ngyen." 52Mby Yezu atuba nda nde ndenden: "Tshwag, lukwikilu eyie etovuga." Ko ne ntangu enagn akea ngyen, mpi asalana Yezu ne mbug.Chapter 11
1Ntangu eleyikiwo Yeruzalem, watikum mbeama na Bethfage, etay e embimi Olive Yezu s'atum nde walongoki inde ipe, 2Atuba nda wo: Tshwagagni ne wiya eli nteang egnu; ko ntangu esishwegnu, asiyen gnu imon i mpunda emog wamotshung n'oshing, kaku wur emigneme ne dzug iwo ve, pubagninde n'oshing, mpi jiayinde. 3Yug wur amituba ndenden: 'Djwi na nge ekiegnu ngean?' kearagni gnugnun: 'Nkum ali na mfunu ewo. Mpi mbala emog asisianga wo, onjiagni wog nendien.'"4Wakien mpi, wayen imon i mpunda wamotshung n'oshing, nelien, ne mbug, wopuba mpi. 5Vear amuu ne kati e vear ayii kog watuba wuwun: "Nge ekiegnu? Djwi na nge epubagnu mpunda enagn?" 6Wakeara kamsi eyitubi Yezu, mpi wosianga akien.7Walongoki ipe inagn wajie mpunda enagn etay eli Yezu, watwomo ileam iwo ne dzug inde, mby Yezu agneme ne dzug iwo, 8 Vear entsign wayia ileam iwo ne mbug, mpi vear amuu watsug nkaya iyibagikiwo n'ivur. 9Vear ayii nteang ende ti vear ayii mby ende aletsugikiwo elie: "Hozana! lusakumuna eyii ya wur eleye ne dzin i Nkum! 10Lusakumuna eyii n'ekub e tea su Davidi! Hozana n'ondii e dzug dzug!"11Yezu ashwe ne Yeruzalem, atsa ne tempelo, alir vim ankum pipi na nde. Vuna ayiwo etikien, s'atshinde Betania ti walongoki inde djum n'ipe. 12Mpimpign enagn, ntangu emikeawo yim Betania, Yezu ayug nziya.13Ali ko etey, ayen oshung omog e nsuu eyike na nkaya, atsandir yug asiyende ata nsuu; mby emikum nde neti, ayen ko nkaya i mpama, djwi ekayia peanga eta nsuu ve. 14Atuba na oshung onagn: "Kaku ata wur emog eyafila mbeam iyie ve!" Mpi walongoki inde wayug vii anagn.15Wakum Yelusalem, mpi ashwe ne tempelo. Abana nkma vear asarike ti ayishumike neti e tempelo. Apfuma wamesa i vear asongo ekri, ti wankway i vear ayisarike wankodima. 16Akapea ata mbug ya wur emog ve na mpwe na vim esikug wo nsar nelien e tempelo.17Along vear anagn mpi atuba ndenden: "Epa wamifugn wuwun: 'Evuru eme ayaviewo evuru e bisamu djwi n'okiri opfugn?' kansi gnu, okiagni ondii e ankea vimu." 18Antsuru a wanganga-Nzambi ti walong i nsiku ntangu emiyug wo vii amituba nde, waling oshin nge esodjag wo nde. Kansi ayugikiwo womo, djwi along ande akirikiwo wo oluy o vear. 19Wakum epiekuo, s'alim wo ne wiya enagn.20Emikien wo tii ne suka enagn, walongoki wayen oshung o nsuu eyi etiyum ti n'edzuu. 21Petelo, akea nkana, atuba ndenden: "Nkum, lir! Oshung o nsuu eyishing yie wean etiyum."22Yezu akeara ndenden: " Yiagni na lukwikilu ya Nzeam. 23Mokabagni, vi-a-vii, wur enkum esituba nda ombim ene: 'Lim kog, tshwag olog ne nzey, mpi yug akatsug itura ipe-ipe ve, kansi yug adjir ndenden vii atuba nde ane siyiawo ko oshin onagn, enagn vii asikie Nzeam.24Wog enagn, mokabagni: Vim enkum eling gnu ne bisamu, djiragni gnugnun otiveagni wog, mby asiyen gnu asikug wo. 25Mpi ntangu eyima yie djwi na nsama, yug oli na djwi ya wur, ofwete ondolula nde, djwi teagnu eli dzug asololula nde mpi masumu iyie. 26Kansi yug okalolula ve, teagnu eli ne dzug apololula mpi ve masumu iyie."27Wakea ntsa Yelusalem, na ntangu ekienike Yezu ne tempelo, intsur i wanganga-Nzambi, walong i nsiku ti antsuru a dibundu wayia etay elinde. 28Mpi watuba wuwun: "N'ekub e nagn elekiyie vim ane, mpi nagn opi kiyeka na kie wog?"29Yezu akeara wo ndenden: Ndoyueagni djwi ine; onkearagni mvutu mpi. Mby asokabagni me etay eyim ekub elekiime vii ane. 30Mbotika e Yoane eyim dzug, to ya vear? Okearagni mvutu."31Mby watsa mpfug wog na wog: "Yug simi keara susun: 'Eyim ne dzug', asitubande: 'Djwi na nge ekadjir gnu ya nde?' 32Mpi yug simikeara susun: 'Ya vear'..." Ayiwo na womo o vear, djwi vear ankum aveyikiwo Yoane kamsi ngunsa. 33Wakeara Yezu wuwun: "Sipijia." Mpi Yezu avura ndenden: "Me mpi, mpokabagni ve yug ndekii vii ane n'ekub e nagn."Chapter 12
1Mby Yezu abana ntuba nda wo ko n'itsig. Ndenden: "Wur emog akinde evur e vinu. Ajing nde opeang n'evur ewo, atsum ipug iyayamaka nde vinu, mby atwung evuru etitey djwi na ndiraka evur. 2Ne ntangu e ndima vinu, atum wur otshia emog etay e vear ayifuy vinu, djwi wopi ikab i vinu. 3Wokir, wodjag, mpi wokeara kongign.4Akea ntum wur otshia emuu etay ewo; wonag mpura n'ote mpi wotwe. 5Ankea ntum wur otshia otatu, wodjag mpi, oshin omog ti vear ankum a mby ayitumnde, wanag mbor mpi waladjag amuu.6Atum diaka mon nde e nsiya; otum nde wur e nsuka mpi atuba ngean: "Asiyiawo na luzitu djwi na mon me." 7Kansi vear otshia evur e vinu watuba wog na wog wuwun: "Yenagni wur eyasatsuga na oleama-nzo ndean. Yagagni s'odjagagni djwi oleama-nzo esatsuga esusu."8S'okirwo, wodjag, wotwomo nelien n'ikri evur. 9Ntangu ene, nkea evur asikiende esing? Asiyiande mpi asidjag nde vear otshia anagn ankum, asipeande evur e vinu ya vear amuu.10Ototangagni otuba one o masonama? "Itari iyifangi vear atwung mvuru itikum itari ikir ikuu evuru. 11Eli luzolo e Nzeam yug itari iwo itikum nkir ikuu evuru; mpi epa eli kidimu eninen djwi na su?" 12Alingikiwo na ntshung Yezu, kansi alurikiwo oluy o vear anagn. Ajiwo wuwun Yezu atubinde itsig inagn djwi na wo. Mby s'osawosugn mby s'akien wo.13S'atum wo wafarize imuu ti vear a Erodi etay e Yezu djwi wopig ilung n'otuba onde ndemie. 14Wayia ntuba wande wuwun: "Nkum, sijia susun oli Nzeam e djwi-djwi, mpi opitsindur otuba o vear djwi opitsindir oshin oli wur nelien, ye atsayie ndong mbug e Nzeam e vi-a-vii. Ne nsiku, eli wuo to epwo na mbie mpaku ya Sezar? Ekug sifuti to sikwon mfuta? 15Kansi Yezu, eyijiki oyang owo, s'akearinde ngean: "Djwi na nge endob gnu me odzum? Onjiagni ikutu imog ntolir."16Wajie Yezu ikutu imog. Mby Yezu aywe vear awo ngean: "Elung ti vii amifugn wo neti ekri ene eli e nagni?" Wakeara wuwun, "Eli e Sezar". 17Yezu s'atubinde ndenden: "Peagni ya Sezar vim a Sezar, ya Nzeam vim a Nzeam". S'ayen wo ko ngituka djwi na nde.18Mby waSaduse etsantuba wuwun vear wapakea mbiy n'ewa, wayia etay e Yezu mby woywe ngean: 19"Long, yen vii ayifugn Moize djwi na su: Yug otwung oyie ompeam atiwa mpi atitsaky wear, yug mpi wakawur aman, wur enagn afwete ntsavey onkear onagn mpi asawur aman djwi na otwung nde omiwa.'20Ayiwo atwung ampeam ashambia. Mon ompeam onteang atsug wear, awa mpi akasasugn ata mon emog. 21Mon ozole asakr nsakwi mpi awa, akasaky ata mon. Otatu k'oshin omog. 22Wankea ashambia, kaku ata emog eyisasugn mon. Ne mby ewo onkear onagn ko asawa. 23Ne ntangu eyakea mbiy vear n'ewa, onkear onagn ayayiande wear e nagn? Djwi ayinde wear e wankea ashambia."24Yezu akeara ngean: "Epa eli itsin i djwi ilejing gnu, djwi opijiagni ata vii ayifugn wo n'onkean o Nzeam; ata biuu o Nzeam? 25Djwi ntangu eyakea mbiy vear n'ewa, ampeam wapayakea ntsug ankear, ankear ko wapayakea ntsug awum, kansi vear ayayiawo kamsi banzio ne dzug.26Kansi djwi na nkea mbiy n'ewa, okatangagni n'onkean o Moize, vii ayokabi Nzeam djwi na oshung o mvu oyipieyiki tshiya: 'Ndi Nzeam e Abraham, Nzeam e Izak ti Nzeam e Yakob?' 27Nzeam apa ali Nzeam e vear amiwa, kansi e vear ali ne luzingu. Omijingagni vii kibeni."28Long e nsiku emog eyiyugiki asulu awo ayia; ajinde ndenden Yezu atakeara mvutu i wuo. Aywe Yezu ngean, "Nsiku nge emilega onen ne kati e wansiku inkum?" 29Yezu akeara ndenden: "Israel yug, onkwon omilega onen eli ene: Nzeam, Nkum esu, ko ndug ndemie ali Nkum. 30Ofwete ndeang Nkum, Nzeam eyie, n'etura eyie enkum, ne moyo eyie enkum ti na biu oyie onkum.' 31Onkwon ozole eli ene: 'Ofwete ndeang otwung oyie kamsi yie yemie.' Kaku nsiku imuu ve ilenga ine n'onen."32Long e nsiku okeara ndenden: "Eli wuo, Longi ! Otituba vi-a-vii yiyen Nzeam ali k'emog, kaku Nzeam emuu iky. 33Ndeang Nzeam n'etura enkum, na ngindu inkum ti na biu onkum, mpi ndeang otwung kamsi yie yemie eli onen, empeab enkum etsasu nkie." 34Ntangu eyen Yezu ndenden atikeara na waagn, atuba nda nde ngean: "Epa oli etey na ekub e Nzeam." Ne mby ewo, kaku ata wur eyifoywe djwi.35Yezu, ntangu elongikinde n'evur e Nzeam, atubinde ngean: "Oshin nge walong i nsiku atubikiwo wuwun Kristu ali mon e Davidi? 36Davidi ndemie, ntangu emiywo nde na mpeve, atubinde ndenden: 'Nkum atituba nda Nkum eme, gneme ne wum eme ewuo tii ko eyatsugme wambeni iyie ne ngie iyie i nkuu.' 37Davidi ndemie avie Kristu Nkum, oshin onkagn Kristu asifiyiande mon nde?" Oluy o vear s'ayikiwo n'osiang na ngyug vii along nde.38Yezu n'along ande aletubikinde nda wo ngean: "Osugagni na walong i nsiku ine, wamileang nkien ko n'entwum iteytey mpi ko n'endii eli vear entsign, waleang vear wapii mbea; 39mpi ne sinagoga, waleang gneme ko ne nkway inteang ti n'okina to oliu, waleang k' indi inteang. 40 Walekumi mvur i wansakwi, ye waleki bisamu iteytey djwi vear wayen. Vear anagn ayavey wo ndola eninen."41Mby Yezu s'agneminde ne nteang esag epeawo makabu n'evuru e Nzeam, s'alirikinde oshin oletsug vear makabu. Ankea ekri s'atsugikiwo oluy ekri n'esag. 42Mby nsakwi emog, omva onkear, ayia ntwomo akutu ape.43Mby Yezu s'avinde walongoki inde mpi atuba nda wo ngean: "Mokabagni vi-a-vii, omva o nsakwi ene atipea makabu elenga vear ankum amitsug ekri n'esag ene. 44Djwi amuu ane ankum watipea ekri eli kakuwo na mfunu. Kansi nsakwi ene, n'omva onde, atipea ekri ende enkum eyinde na wo djwi na luzingu ende."Chapter 13
1Ntangu emipwe Yezu ne tempelo, longoki ende emog okaba ngean: "Long, lir intieng i mvuru na intieng atari ane". 2Yezu akeara ngean: "Oyen mvuru inen inen ine? Kaku itari imog ve iyasatsuga ne dzug itari imuu, inkum ayalog wo".3Ntangu egnemi Yezu n'ombim Olive, ne nteang e tempelo, Petelo, Jaki, Yoane na Andre s'atsiwo ngywe Yezu n'oziy wuwun: 4"Otekabi, ntangu nge vii ane ayalog wo? Kidimu nge eyateaba sjii susun vii awo ativanga, eling ndog?"5Yezu s'abaninde n'ankaba ndenden: "Osugagni, wur apodjimagni. 6Vear entsign ayayiawo ne dzin ime mpi ayatubakawo wuwun 'me nde Yezu' ye mpi ayadjim wo vear entsign.7Ntangu eyayug gnu watuba vii a mbeagn ti vii oshuru o mbeagn, oyayenagni mpay, vii ane afwete ndog, kansi nsuka ewo etokum ntete ve. 8Djwi buu emuu ayalwawo ti buu emuu, ekub emuu ayalwawo ti ekub emuu. Buu ayagnug wo n'endii entsign, mpi nziya ayayiawo. Ine inkum ayayiawo ko itsin i mpay.9Osugagni. Ayofugnagniwo ne tuminar, ayonagakagniwo akoy ne wasinagoga. Ayosamakagu ne nteang embumater ti ne nteang e wavuy djwi na me, djwi esayia ntiegni djwi na wo. 10Kansi vim enteang wafwete ndong oshwong o wuo ne buu opfugn.11Yug watotshungagni mpi olasamagni ne tuminar, oyayenagni mpay ve djwi na vii asikug gnu ntuba. Djwi ne ntangu enagn, vii ankum asifwetegnu ntuba, asopeagniwo; epa gnu vear asituba ve, kansi Mpeve Santu. 12Vear ayafugnakawo atwung awo djwi wapii ndola ewa, mpi atea ayafugnakawo aman awo. Aman ayayiawo ote biu ya atea ti amea awo mpi ayafugnakawo djwi waadjag. 13Vear ankum ayotunagniwo djwi na me. Kansi wur eyatsug inaagn ti nsuka ayavugnde.14Ntangu eyayen gnu mpay etishwe n'endi epikug wo ngyia ve (wur etanga awung njia), vear ankum ayayia ne Yudea ayakim wo n'ombim, 15wur eyayia ne dzug otwon akwon nkr n'evuru, to djwi na mvey vim nelien; 16mpi wur enkum eyayia n'evur akwon nkea mby djwi na mvey eleam ende.17Kansi ngy ya ankear ayayia na djim ti ayapeaka aman aviyo ne nshuu inagn! 18Samagni Nzeam djwi vii ane akwon ndog ne peang e mpio. 19Djw ne nshuu inagn, mpay ayayiawo entsign, mpay etotigniwo ngyen yum ko n'itsin, ntangu eyikii Nzeam buu, tii lwo, oshin ompay inagn epafikea. 20Tuba ko yug Nkum ndemie amikeara nshuu iwo okieg, kaku wur eyavug ve, kansi djwi na vear ande amison nde, ayakearande nshuu iwo okieg.21Mby yug wur emog amokabagni ndenden: 'Liragni, Kristu ndean!' to 'Liragni Kristu ndwign!', oyadjiragni ve. 22Djwi wa Kristu oyang ti wangunsa oyang ayapwewo mpi ayakiewo bidimu ti vii a ngituka isikug ndjim ata vear ayison Nzeam. 23Osugagni! Mean ntokabagni vii awo nteang.24Kansi ne mby i mpay i nshuu iwo inagn, vuna ayakum nde mpib, ngwon epafipiey ve, 25weer ayalog wo yum dzug, biu inkum ili ne dzug ayagnug wo. 26Mby vear ayayen wo Mon-Wur aleye ne mafuba na biu enen ti nkembo. 27Mby ayatum nde banzio inde mpi ayatshib nde ondii omog vear amison nde ne akuu ankea anign a buu, yum nsuka okiri ti nsuka e dzug olung.28Kanagni ilong itepea oshung o nsuu. Yug atab atilienge, mpi emikea mpur nkaya, jiagni gnugnun elug e mvwe etivanga. 29Oshin omog, ntangu eyayen gnu vim ankum ane atikug, jiagni gnugnun Mon-Wur ativanga, ali n'epfug.30Vi-a-vii, mokabagni, vear azinga opean wapashir ngwa ve ntangu eyapwe vii anagn. 31Olung ti buu ayaleg wo, kansi otuba ome opayaleg ve. 32Kansi djwi n'eshuu to ntangu ewo, kaku wur ejia ve, ata banzio ne dzug, ata Mon, ko Tea ndemie wur ejia.33Osugagni! Oyavuragni lwong ve, djwi opijiagni ntangu eyalog vii awo. 34Ayayiawo oshin omog ti wur eyitsi wiya emuu: asasugn evuru ende, asasugn evuru na vear ande otshia, asapea wur na wur otshia onde. Mby asakaba sentre asalir evuru wuo.35Wog enagn, osugagni! Djw opijiagni ntangu esiyia nkea evuru, mi ntangu ekwo, mi ne ngnina otshuu, mi ne nkogo e nteang, mi ne suka. 36Yug amiyia ne babvuru, osugagni akayia ongyenagni otivuragni lwong. 37Vii okabagnime ene, ndakaba ya wur enkum: Osugagni!"Chapter 14
1Esatsuga nshuu ipe na nkum okina o pake ti okina o mampa ipitsug wo ete e levir. Ankum a wanganga-Nzambi ti walong i nsiku alelingikiwo oshin nge ositshung wo Yezu na waagn djwi wodjag. 2Yo Wog enagn, saletubikiwo wuwun: "Ekwon ngya eshuu okina, djwi vear wakapur oyug."3Eshuu emog Yezu ayinde ne Betania, n'evuru e Simoni eyi na nkeang e ndwum. Ntangu elikinde ne dzug i mesa, onkear omog ayia etay ende n'oleanga omiywo na ananagn a nsuu eli isuu entsign. Angama oleang owo mby amwang ananagn a nsuu ewo n'ote e Yezu. 4Kansi neti e vear ayi kog, ayiwo n'amuu ayiyen ipwo mpi ayiyug nkier. Satubikiwo wog na wog: "Djwi na nge epiy nde ananagn a nsuu ene? 5Anakug wo sisar wog n'isuu isikug ndenga nkam isar i denari, mby sipii ekri enagn ya emva." Mby wayug nkier mpi wangnianga onkear onagn.6Kansi Yezu atuba nda wo ngean: " Siangagni nde pwo. Djwi na nge opeagnu nde mpay? Antikie djwi imog iwuo. 7Ayayiagnu ntangu enkum ti emva ne kati egnu, mpi ntangu enkum eleang gnu asikug gnu nkie vii a wuo djwi na wo. Kansi me, mpayia ntangu enkum ti gnu ve. 8Atikie eyikug nde nkie: antimwamg me ananagn a nsuu djwi na ngwong djuung ime eshuu eyampfugn wo n'alum. 9Vi-a-vii, nmokabagni, etay enkum eyalong wo oshwong o wuo ne buu opfugn, ayokanakawo, mpi ayakeakawo nkab vii amikie onkear one."10Mby Yudasi Iskarioti, emog ne kati e walongoki djum n'ipe i Yezu, satshinde etay ankum a wanganga-Nzambi djwi na nsar Yezu.11Ntangu emishir wo ngyug vii ande, ankum anagn ayiwo nosiang mpi wokaba wuwun asopeawo ekri. Mby s'elingikinde ko oshin o nsar Yezu ya ankum anagn.12Ne eshuu e nteang e nkinsi e mampa ikwon ete e levir, ntangu eyidjag wo imeme djwi n'okina o Pake, walongoki inde woywe ngean: "Ondii nge eling yie sitsu ngwong djwi yie ole oliu o Pake?" 13Satum nde walongoki ipe mpi atuba nda wo ngean: "Tshwagagni ne wiya enen, asisangagnu ti wur emog alevari iwung i vay. Djiagninde. 14Ondii osishwende, djiagninde neti mpi tubagni ya nkea evuru gnugnun: 'Long atituba ngean," Ondii osilame okina o Pake ti walongoki ime eli n'onkagn?"'15Asolagagninde itunu evuru eninen n'evuru e dzug emiwong nde. Wongagni vim ankum mpiug djwi na olio osu o Pake. 16Walongoki sapwiwo mpi wakum ne wiya enen; wayen vii ankum ko oshin oyakabinde, mby sawong wo olio o Pake.17Ntangu emibanda ndjie vun, Yezu ayiankum na walongoki inde djum n'ipe. 18Ntangu eliikiwo ne dzug i mesa, Yezu atuba ndawo ngean: "Vi-a-vii, ntuba ma gnu, emog ne kati egnu vear ala ti me asinsarnde. 19Wakum ngiyngiy kibeni, mby wur na wur sakum nde ongywe, "Epa me?"20Yezu akeara mpi atuba nda wo ndenden: "Eli n'emog ne kati egnu djum n'ipe, emog etsug ntangu opean ewuo n'ilongo imog nda me. 21Djwi-djwi, Mon-Wur asitsande oshin emifugn wo djwi na nde. Kansi mpay ya wur eyosar. Anayiawo wuo djwi na nde wokwon ongwur."22Ntangu eliikiwo, Yezu avey mampa, asampula mpi abag wog. Apea walongoki inde mpi atuba ndenden: "Veyagni wog. Ene eli djuung ime." 23Mby avey mbwung, akeara nsag-na-viye ya Nzeam, aapea mpi wagnwa wankum. 24Atuba nda wo: "Ene eli aluung ame, aluung a lutondo, aluung asitshag djwi na vear entsign. 25Vi-a-vii, mokabagni, mpafignwa diaka vinu tii ko eshuu eyakeame gnwa vinu impa n'ekub e Nzeam."26Ntangu emishir wo nshwe lim i Nzeam, watsa n'ombim Olive. 27Yezu atuba nda wo ndenden: "Gnu gnankum ayatag gnu abag djwi na me, djwi wamifugn ngean: 'Ayadjag me wur elir ameme, mby ameme ayapagn wo tshaga tshaga.'28Kansi ayafutumukame, ayatsame Galilea nteang egnu." 29Petelo s'atubinde nda nde: "Ata yug vear ankum watolur yie, me mpasosugn yemie ve."30Yezu s'atubinde nda nde ndenden: "Ndokaba yie vi-a-vii, otshuu olwo, nkogo na ntovug mbala ipe, asiyiawo ontinsan mbala isar." 31Kansi Petelo ovura ngean: "Ata ekug ngwe ma yie, mposan ve." Wankum ko watuba k'oshin onagn.32Wakum ondii oviewo Getsemani, mby Yezu atuba nda walongoki inde ndenden: "Sagnemagni nendien, me ndetsu nsama." 33Avey Petelo, Jaki ti Yoane djwi na ntsa nda wo. Mby abana ngyug mawa na mpay n'etura ende. 34Atuba nda wo ndenden: "Ndi na ngy entsign tii ko ewa. Satsugagni nendien mpi keamagni viy."35Yezu atsa ontinteang, alog ne buu mby asama Nzeam djwi na nding yug mpila eliko ntangu e mpay ene esikug ndim ne nteang ende. 36Atuba ndenden: "Abba, Tea, okug nkie vii ankum, kaku ekwon yie nkie ve. Ondimi mbwung e mpay eli ne nteang eme ene. Kansi ekwon ngyia oshin oleang me, kansi eyi oshin oleang yie."37Akea etay e walongoki inde mpi ayia, angyen wativur lwong wankum, mby atuba nda Petelo: "Simoni, otivur lwong? Opikug nkeama viy ata ngunga emog ve? 38Keamagni viy mpi samagni djwi okwon ndogagni ne mpukumuna. Mpeve e wur eli biu kansi djuung inde eli olem. 39Akea nam nda wo, mpi akea ntsa nsama, atuba ko otuba omog enagn.40Akea diaka, ayia angyen watikea mvur lwong djwi viy awo ayiwo atilem na lwong. Wakakug omvura ata djwi ve. 41Mbala otatu, akea mpi atuba nda wo ndenden: "Olagni ko ne lwong mpi oyoragni? Etishir! Ntangu etikug. Liragni! Mon-Wur wean watosar ne mbwo i vear a masumu. 42Yimagni, sikienagni. Liragni, wur esinsar ndean atikum pipi."43Etean kaku, ko ntangu eyitubikinde, Yudasi, emog ne walongoki inde djum n'ipe, ayia nkum nda olwi o vear na empien ti mbor ne mbwo. Ankum a wanganga- Nzambi, walongi i nsiku ti antsur vear ayatum. 44Yudasi, wur eyisar Yezu akabinde vear anagn ndenden: "Wur esipeame mwaa, ndug enagn. Kiragni nde, varagni nde wuo." 45Ntangu emikum Yudasi, avanga mbeama na Yezu mby atuba ngean: "Rabi (Long) !" Mby s'opinde mwaa. 46Mby s'akirwo Yezu na mbwo, mpi s'otshung wo.47Kansi wur emog ne kati e vear ayiyimi kog, apur ompien, anag wur otshia e nkum e wanganga-Nzambi, mpi obag itii. 48Yezu atuba nda wo ngean: "Ndi nkea wumu djwi oyagni ntshung me n'empien ti mbor? 49Nshuu inkum ayikime ma gnu mpi alongikime ne tempelo, okantshungagni ve. Kansi ekug wuo eyii ngwign djwi vii ayifugn wo n'Onkean o Nzeam akug. 50Mby walongoki inde inkum s'ososugn wo ndemie, mpi s'alurwo.51Mon ompeam omog aledjikinde Yezu, mpi; ne djuung, alwernde ifunga; wotshung kansi 52asafanga ifunga eyidjing nde ne djuung mpi akim opwopuu.53Wavara Yezu etay e nkum enen e wanganga-Nzambi. Mpiug, wankum ankum i wanganga-Nzambi, antsuru a dibundu ti walong i nsiku ayiwo watisanga. 54Petelo alesedjikinde Yezu ivim etey, tii ko ntangu eyishwiwo n'opeang o nkum enen e wanganga-Nzambi. Asagneme kog ondii omog nda vear otshia ayiyoriki tshiya.55Ankum a wanganga-Nzambi ti vear ankum ayishwi ne mpfug enagn alelingikiwo ko djwi isikug wo mbeam Yezu djwa wodjag. Kansi wakavea djwi ve. 56Djwi vear entsign alefugnikiwo Yezu na vii oyang, kansi vii a vear awo akayiaka ne mbug emog ve.57Vear amuu wayima djwi n'omfugn na djwi oyang, watuba ngean: 58"Oyugsu atuba ndenden: 'Ayabvuome evuru e Nzeam ene eyitwung wo na mbwo i vear, mby ne nshuu isar, ayatwung me evuru e Nzeam iky epayatwung wo na mbwo i vear. 59Kansi ata ne djwi ine, otuba o vear awo ekatsaka ne mbug emog ve.60Nkum enen e wanganga-Nzambi ayima ne kati e vear ankum, ayue Yezu ndenden: "Kaku yie ata na mvutu? Vii nge vear ane ofugn wo yie?" 61Kansi Yezu ayia ko pwo, mpi akakeara ata djwi ve. Nkum enen e wanganga-Nzambi akea ongyue mpi atuba ndenden: "Oli Kristu, mon e Nzeam etsasu nkumisa?" 62Yezu s'akearinde ndenden: "Eli mug. Mpi ayayen gnu Mon-Wur ntangu eyagnemende ne wum ewuo ekub e Nzeam, mpi ntangu eyayiande ne kati e mafuba i dzug."63Nkum enen e wanganga-Nzambi s'ayarinde ileam inde ndenden: "Djwi na nge elingsu diaka wantiegn? 64Otiyugagni oshin omitwende Nzeam. Obansagni nge?" Wankum wakeara wuwun ekug wodjag. 65Amuu wabana n'ontwomo asuy ti n'ondzub ileam ne viy, n'onag mbata, mpi na ntuba wuwun: "Bikula: wur nagn emodjag?" Vear otshia wovey mpi wodjag entsign.66Ntangu eyi Petelo ko neti opeang etay e ngie, onkear omog, wur otshia e nkum e wanganga-Nzambi ayia. 67Ntangu emiyen nde Petelo ayor tshiya, apwung ondir wuo mpi atuba ndenden: "Yie ko ayikiyie ya Yezu, wur e Nazarete ene." 68Kansi Petelo asaan, ndenden: "Mpijia ve, mpi mpijia ko itsin i djwi iling yie ntuba." Mby s'apwinde nelien opeang. Nkog ko avug.69Kansi ntangu onkear otshia onagn emikeande ongyen, akea nkaba vear ayi kog, ndenden: "Wur ene ali nda wo!" 70Kansi Petelo akea nsaan. Etean kaku, vear ayi kog watuba wa Petelo wuwun: "Vi- a- vii, oli ya vear anagn, djwi yie oli wur e Galilea."71Kansi Petelo s'abaninde na nsila na biu ndenden: "Mpijia wur ewo etubagnu ve." 72Nkog avug mbala ozole. Petelo akea nkana djwi iyitubi Yezu nda nde ndenden: "Nteang nkog na mvug mbala ozole, yie asinsaan yie mbala isar." Mpi akum ndiye entsign penza.Chapter 15
1Ne nkeam e vun, wankum ankum a wanganga-Nzambi wasanga ondii omog na antsuru a dibundu, walong i nsiku ti wankum ankum okin onen evuru e Nzeam. Watshung Yezu nkor ne mbwo, mpi wakien wa nde. Watsa ompea ne mbwo i Pilato. 2Pilato s'oywinde ndenden: "Oli Nkum e Wayuda?" Yezu okeara ndenden: "K'oshin omituba yie enagn." 3Ankum a wanganga- Nzambi ayiwo watifugn Yezu djwi na vii eshin n'eshin.4Pilato akea ongywe: "Opikeari mvutu ve? Tolir olwi o vii amofugn wo yie !" 5Kansi Yezu akakeara Pilato ata djwi, wog enagn, Pilato s'ayen nde ngituka entsign.6Mvwe inkum, ne konso okina, Pilato apurikinde wur e bolog emog esileang olwi o vear. 7Ne kati e impumbur iyi ne bolog djwi adjag wo wur emuu, ayiwo na wur emog evikiwo Barabasi. 8Olwi o vear watsa etay e Pilato, mby wabana nding akii djwi na wo oshin otsande nkie mvwe inkum i nteang.9Pilato avura ndenden: "Olingagni mopuragni Nkum e Wayuda? 10Ogniang ajinde wuo ndenden ankum a wanganga-Nzambi watifugn Yezu ko n'etura epwo. 11Kansi ankum a wanganga- Nzambi akabiwo vear wawigni ya Pilato apuri Barabasi.12Pilato akeamvey otuba, ndenden: "Oleangagni nkii esing djwi na wur eviegnu Nkum e Wayuda?" 13Wakea ndzama wankum: "Kwog nde ne kulunsi!"14Pilato akea ntuba nda wo: "Ipwo nge emikiende?" Kansi vear wakea ndzama na biu wuwun: "Kwog nde ne kulunsi." 15Pilato, djwi na mpea kiese ya olwi o vear anagn, s'apurinde Barabasi. Atum vear waber Yezu akoy mpi atum wokwog ne kulunsi.16Ayer-nkuu wavara Yezu neti opeang o nkum, mby wavie ayer-nkuu ankum. 17Walwer Yezu eleam, olobo o kwi, wakie impu atiene mby wolwer n'ote. 18Wabana n'ompea mbea wuwun: "Mbote, Nkum e Wayuda!"19Wakum onag akoy a nkor n'ote, wotwe asuy. Wafukama ne nteang ende kamsi waling onkumisa. 20Ntangu emishir wo n'ongywe two, wolima eleam e kwi mpi wokea ondwer ileam inde, mby wovara djwi n'onkwog ne kulunsi. 21Wur emog alelegikinde kog, ayum evur, dzin inde Simoni e Sireni (tea e Alexandre ti e Rufus); ayer-nkuu s'opiwo na biu penza na mvara kulunsi e Yezu.22Ayer-nkuu wavara yezu n'ondii oviewo Golgota (eling ntuba Ondii ebaay ote). 23Wopea vinu emitshib wo na mira, kansi Yezu akagnwa ve. 24Wokwog ne kulunsi mpi wakab ileam inde ileang, mpi wabug dzeke (to fikofiko) djwi na njia ileang ileam nge esivey konso iyer-nkuu.25Akwog wo Yezu ne kulunsi ntangu eyi vuna etikum ne ngonga otatu o nkateang. 26N'etign ibaya afugn wo itsin i djwi iyodjag wo ngean: "Nkum e Wayuda." 27Wakwog ankea vimu ape anen ondii omog ti Yezu, emog ne wear ewuo, emuu ne wum ewuo. 28Oshin onagn, vii ayifugn wo n'enkean s'akug wo: "Otsug wo n'olwong ankea vimu."29Vear alelegiki ne mbug wakum ontwe, walegnug ete wuwun: "Ee, yie wur eling mvwo evuru e Nzeam djwi okey ntwung emuu ne mby e nshuu isar, 30vug yiemie mpi kr ne kulunsi!"31K'oshin onagn mpi, ankum a wanganga-Nzambi ti walong i nsiku wakum ongywe etwo wuwun: "Avugikinde ko vear amuu, kansi apikug mvug nde ndemie ve. 32Nde Mesiya, Nkum e Israel, akrike opean ne kulunsi, siyen wog, mpi sidjir." Vear ayikwog wo ne kulunsi wa nde ko wakum ontwe.33Emikug ntangu osambanu, mpib elog ne buu opfugn tii ntangu ko ngunga ovwa. 34 Ne ngunga ovwa enagn, Yezu adzama na otuba o biu: "Eloi, Eloi, lama sabatani?" eling ntuba: "Nzeam eme, Nzeam eme, djwi na nge eminsianga yie?" 35Vear amuu ayi kog eyi yug vii anagn watuba wuwun: "Liragni, avie Elia."36Wur emog ne kati ewo akim, atsa ntsug vay ongnign n'inuka, aler n'oshung mpi apea Yezu djwi agnwi. Wur ewo atuba ndenden: "Sitolir yug Elia asiyiande onkra." 37Mby Yezu atsug olie na biu, mpi asug egnim. 38Eleam enen e tempelo eyay itay ipe yum dzug tii ngie.39Nkum e ayer-nkuu eyi ngiyima ne nteang e Yezu, mpi eyiyen oshin omisug Yezu egnim atuba ndenden: "Vi-a-vii, wur ene ayinde Mon e Nzeam." 40Ayiwo ko n'ankear amuu ayiliriki etey. Ne kati ewo, ayiwo Maria e Magdala, Maria (mea e Yakob ilieng, ti e Yoze) ti Salome. 41Ntangu eyiki Yezu ne Galilea, ankear anagn alodjikiwo mpi alopiikiwo vim a nda. Olwi ankear amuu atshiwo Yeruzalem wa nde.42Ntangu emijie vun, oshin oyiwo eshuu ewong wo oliu e obing (Sabat), eling ntuba eshuu eli nteang e Sabat, 43Yozefo e Arimatei, ayia kog. Ayinde wur emog epiiki vear luzitu entsign ne kati antsuru a mpfug eninen evuru e Nzeam, mpi eyikwungiki ekub e Nzeam. Na kikesa enkum, atsa ngyen Pilato mpi aling djuung i Yezu. 44Pilato ayen ngituka na njia ndenden Yezu atiwa, mby s'aviinde nkum e ayer-nkuu s'oywinde yug Yezu atiwa.45Ntangu emokaba nkum ayer-nkuu ndenden Yezu atiwa, Pilato apea Yozefo mbug e mvey djuung i Yezu. 46Yozefo ayiwo atishum marikagn, s'aliminde djuung i Yezu ne kulunsi, s'odzubnde eleam enagn, mby s'atshinde ompfugn n'alum, atsum nkr ewo n'atari. Mby asadzub itari inenen n'itwunu i nkr ewo. 47Maria e Magdala ti Maria e mea e Yoze ayen wo ondii oyipfugn wo Yezu.Chapter 16
1Eshu e Sabat ntangu eyileg wo, Maria e Magdala, Maria e mea e Jaki ti Salome washum ananagn a nsuu djwi na ntsa mwang ne djuung i Yezu. 2Ne suka suka e eshuu elelani Sabat, watsa alum ntangu eyikeam vun.3Wakum ntuba wog na wog wuwun: "Nagn esitelima itari ili ne nteang e nkr?" 4Ntangu esiang wo viy, wayen itari iwo watilima, watitsug n'ikri, djwi ayiwo itari ininen kibeni.5Washwe neti e nkr, wayen onkwo omog atigneme ne wum ewuo, atilwer eleam e sii, mpi wayen ngituka entsign. 6Onkwo owo s'atubinde nda wo ndenden: "Oyayugagni womo ve. Olingagni Yezu e Nazarete, eyikwog wo ne kulunsi. Atifutumuka! Apa ali nendien ve. Liragni ondii oyotsug wo. 7Kansi gnu, tshwag okabagni walongoki inde ti Petelo gnugnun atitsa onkwungagni ne Galilea, asitsagnu ongyen ko mpiug ko oshin oyokabagninde."8Wapwe ne nkr mpi wakim iveang; djwa ayen wo ngituka kibeni, mpi ayiwo na womo entsign. Wakakaba ata wur emuu ve djwi aleyugikiwo womo.9Ne suka suka eshuu e nteang e mposo, eshuu obiing, ne mby e lufutumuku ende, apwe nteang ya Maria e Magdala, eyipurnde mpeve ipwo ishambia ne djuung. 10S'atshinde nkab oshwong owo ya vear ayiki wa nde, walongoki inde iyisatsiga na ntantu mpi iyisaliyeaka ntangu inkum. 11Wayug wuwun Yezu ali ne luzingu, mpi Maria e Magdala atoyen, kansi wakadjir ve.12Ne mby ewo, Yezu apwe, n'oshin iky, ya vear ape amuu, aletshikiwo wiya emuu. 13Vear anagn watsa mpi wakaba walongoki iyisatsiga, kansi wakadjir ve.14Ne nsuka, Yezu s'apwinde ne nteang e walongoki inde djum n'emog ntangu eyiliikiwo. Angnianginde djwi n'oshin ekwon wo lukwikilu mpi eyitshung wo itura iwo, djwi wakaleang ndjir vear ayoyen ne mby e lufutumuku ende. 15Atuba nda wo ndenden: "Tshwagagni buu opfugn, longagni oshwong o wuo ya vear ankum. 16Wur esikwikila mpi esivey mbotika ayavug nde, mpi wur epakwikila ayaveynde ndola.17Bidimu ine ayalanakawo vear ayakwikila: Ne dzin ime, ayakmakawo wampeve ipwo. Ayatubakawo etuba e mpa. 18Ayakirakawo wandjwa na mbwo iwo, mpi yug watignwa ndikila, ndikila enagn epakie vim ve. Ayayab wo vear a nkeang mbwo, vear a nkeang ayavugakawo."19 Ntangu emishir ntuba Nkum Yezu nda wo, s'avean nde dzug olung, amitsa gneme ne wum ewuo e Nzeam. 20 Walongoki watsa ndong itay inkum, ntangu enagn Nkum alekiikinde otshia nda wo djwi na ngyegne ne bidimu inagn ndenden otuba olelong wo eli vi- a- vii.