¹Wani ya inkalista nga mg ngaran na mga karaang tao nga kaapoan ni Hiso Kristo. Ya, si Hiso Kristo kaliwat iza ni Dabid nga karaang hari ya mga Yodayo. Kaliwat isab iza ni Abraham nga karaang tao nga toboan na mga Hodio. ²Na, kawandini pen dogay di ya garing kang Abraham. Kamhan ama si Abraham kan Isaak. Kamhan Ama si Isaak kan Hakob. Kamhan Ama minliwat si Hakob kan Hoda daw ya mga lomon ni Hoda nga podo amaama. ³Kamhan minliwat si Hoda kan Pares daw si Zara. Ya ina nirang dowa nga si Tamar. Kamhan minliwat si Pares kan Isrom. Kamhan minliwat si Isrom kan Aram.⁴Kamhan minsopo si Aram ni Aminadab. Kamhan minsopo si Aminadab kan Naasan. Kamhan Ama si Naasan kan Salmon. ⁵Kamhan Ama si Salmon kan Boos. Kamhan ya ina ni Boos si Rahab. Kamhan minsopo si Boos kan Obid. Kamhan ya ina ni Obid si Rot. Kamhan si Obid minsopo kan Isay. ⁶Kamhan minsopo si Isay kan Dabid nga karaang hari na mga Yodayo. Kamhan minsopo si Dabid kan Salomon. Kamhan ya ina ni Salomon ani primiro peng asawa ni Oriyas piro in-iregan ni Dabid kay ampangasawa iza.⁷Na, kamhan minsopo si Salomon kan Roboam. Kamhan minsopo si Roboam kan Abiyas. Kamhan minliwat si Abiyas kan Asa. ⁸Kamhan minsopo si Asa kan Hosapat. Kamhan minsopo si Hosapat kan Horam. Kamhan minsopo si Horam kan Osiyas.⁹Kamhan minsopo si Osiyas kan Hotam. Kamhan minsopo si Hotam kan Ahas. Kamhan minsopo si Ahas kan Hizikiyas. ¹⁰Kamhan minsopo si Hizikiyas kan Manasis. Kamhan minsopo si Manasis kan Amon. Kamhan minsopo si Amon kan Hosiyas. ¹¹Kamhan minsopo si Hosiyas kan Hikoniyas daw ya toong mga lomon nga podo amaama. Minsopo si Hosiyas kaniran kawandini pen ka pagpanbihag pen na mga taga Babilonya ka mga Yodayo doro ka dapit nga Babilonya.¹²Ka waro pon ya mga Yodayo ka Babilonya minsopo si Hikoniyas kan Salatiel. Kamhan minsopo si Salatiel kan Zorobabel. ¹³Kamhan minsopo si Zorobabel kan Abiod. Kamhan minsopo si Abiod kan Iliyakim. Kamhan minsopo si Iliyakim kan Azor. ¹⁴Kamhan minsopo si Azor kan Sadok. Kamhan minsopo si Sadok kan Akim. Kamhan minsopo si Akim kan Iliyod.¹⁵Kamhan minsopo si Iliyod kan Iliyazar. Kamhan minsopo si Iliyazar kan Matan. Kamhan minsopo si Matan kan Hakob. ¹⁶Kamhan minsopo si Hakob kan Hosi nga bana ni Mariya. Kamhan minanak si Mariya kan Hisos nga inngaranan kan Kristo. Na, ya kahologan na ngaran nga Kristo ani ya hari nga pinili na Diyos. ¹⁷Na, ya mga kaliwatan sokad pen kan Abraham ngaro kan Dabid nga karaang hari napolo may opat ya pagsonodsonod ka mga kaliwatan. Kamhan sokad kan Dabid ngaro ka panahon ka pagpanbihag na mga taga Babilonya ka mga Yodayo ngaro ka dapit nga Babilonya napolo may opat gihapon ya pagsonodsonod ka mga kaliwatan. Kamhan sokad kaiton hangtod ka pagkatao ni Kristo napolo may opat gihapon ya pagsonodsonod ka mga kaliwatan. Ani ini ya lista na mga kaapoan ni Hiso Kristo.¹⁸Na, wani ya panan-og mahitenged ka pagkatao ni Hiso Kristo. Na, kawandini pen si Mariya asawhenen iza ni Hosi. Ka wara pen siran magminze nakabdesan si Mariya na Madazaw nga Ispirito nga garing ka Diyos. ¹⁹Kamhan nakahena-hena si Hosi nga ansabot iza ka ginikanan ni Mariya kay ambelag iza kontana kan Mariya. Silaong ni Hosi nga nakasala si Mariya ambaza kay wara si Mariya makasala kay garing ka Diyos ya toong nakabdesan. Diri si Hosi ampanaba dizan ka howis nga nakabdesan di si Mariya kay basi anhatag kan Mariya ka kasipeg piro gosto iza ambelag kan Mariya kay antoman kontana iza ka balaed ni Moysis nga diri anminjo ka nakabdesan nga babazi.²⁰Kamhan pagkatorog ni Hosi impatag-inep iza na Ginoo. Dizan ka toong tag-inep watoy sinogo garing ka Diyos nga nagalaong nga Hosi nga kaliwat ni Dabid nga karaang hari, diri ko mahaldok ka pagpangasawa kan Mariya kay nakabdesan di iza na Madazaw nga Ispirito nga garing ka Diyos. ²¹An-anak iza ka maimpis nga amaama. Ngaranan mo iza kan Hisos. Na, ya kahologan na ngaran nga Hisos ani ya antabang ka toong mga sakop kadaw malibri siran ka silot ka kanirang mga sala. Ani ini ya inlaong na sinogo na Diyos dizan kan Hosi.²²Na, ya pagkatao ni Hiso Kristo ani ya nakatoman ka mga panaba na propita na Ginoo kay kawandini pen nagalaong iza nga wani ya inlaong na Ginoo mahitenged ka pagkatao ni Hiso Kristo nga nagalaong nga ²³timan-an mazo gazed ini nga may makabdesan kay-an na Diyos nga daraga nga mahaldeken pen iza ka amaama. An-anak iza ka maimpis ngaamaama. Kamhan pagangaranan iza kan Imanyowil. Na, ya kahologan na ngaran nga Imanyowil ani ya minkarimbaba ya Diyos kadaw an-iba iza kantang tanan tao. Ani ini ya daan inlaong na Ginoo mahitenged ka pagkatao ni Hiso Kristo.²⁴Na, pagpakaimata ka ni Hosi mintoman iza ka sogo na sinogo nga garing ka Ginoo. Minminze iza kan Mariya ²⁵piro hangtod ka pag-anak ni Mariya wara iza mag-arani kan Mariya. Pagpakaanak ni Mariya ka maimpis inngaranan matood ni Hosi kan Hisos.

¹Na, pagkatao ni Hisos doro ka Bitlihim nga longsod doro ka lopa nga Huda so Hirodis nga taga roma ani ya hari ka hel-anan na mga Hudiyo doro ka Hudi. Kaman dini ka Hirosalem may mga mindatong garing ka sebezan. Hanas siran ka pagpaniid ka mga dalan na mga bitoon. ²Kamhan nangotana siran daw hain makatenged ya natao nga maimpis nga anhari kay-an ka mga Hudiyo? Mahagdam kami nga natao di iza kay nakakita kami ka pagsebang na makabegwas doro ka sebazan.Timaan nga natao di ya hari ka mga Hudiyo. Agon minkarini kami kay antahod kami kanang-iza. ³Pagpakabati ka ni Hirodis nga hari kaiza nga panan-og nawied iza daw ya mga taga Hirosalem kay basin sopaken iza na bag-ong hari.⁴Kamhan impanipon ni Hirodis ya mga oloolo na mga pari nga Hudiyo daw ya mga maistro ka tinoohan na mga Hudiyo kay nangotana iza kaniran nga daw hain ya dapit nga nataohan na hari nga pinili na Diyos? ⁵Minsambag siran nga natao di iza doro ka longsod nga Bitlihim doro ka Hoda. Kay kawandini pen minsoyat ya propita na Diyos nga wani ya inlaong na Diyos mahitenged ka pagkatao na hari ka mga Hudiyo nga nagalaong nga ⁶kamo nga mga taga Bitlihim nabantog di kamo ka mga iba nga longsod doro ka Hoda kay nataohan na hari ka kanaong mga sakop nga mga kaliwatan ni Israil. Ani ini ya daan sinoyat.⁷Pagpakabati ka ni Hirodis kaiza nga panan-og, dizan ka waray lain tao impatipon naiza ya mga hanas ka pagpaniid ka bitoon. Kamhanimpangotana naiza kon pira ding ka kahabzen sokad ka pagsebang na makabegwas nga nakitan niran. ⁸Kamhan minsogo iza kaniran nagalaong nga karohen mazo ka Bitlihim. Kamhan magsosi gazed kamo kon hain ining maimpis. Pagpakakita ka mazo bomalik kamo dazon ngarini kanao kay ankaro sab hao kay dazaw antahod isab hao kanangiza. Ambaza kay imbakakan siran ni Hirodis kay patazen naiza kontana si Hisos.⁹Kamhan minpanaw ya mga magpaniiday ka mga bitoon ngaro ka Bitlihim. Ka pagpasinged pen niran ngaro ka nataohan na maimpis minhon-a di kaniran ya makabegwas. Kamhan minhon-a iton kaniran hangtod ka pagpakatenged ka hel-anan na maimpis. Kamhan minhenengdi iton. ¹⁰Pagpakakita niran ka makabegwas nga minheneng di dakola gazed ya kanirang kasaza.¹¹Pagpakaseled ka niran ka lagkaw nakitan matood niran ya maimpis daw ya toong ina nga si Mariya. Kamhan nanlohod siran ka pagtahod ka maimpis. Pag-okab niran ka len-anan nga indara niran inhatag niran ya bolawan daw ya dowang ka kalasi nga masarang kahamot nga mahal gajod. Ya isa inngaranan ka insinso ani ya sinonog para ka pagsimba ka Diyos. Ya isa inngaranan ka mira ani ya ihaplasay ka lawas. ¹²Pagkakamhan niran paghatag inpasabot siran na sinogo nga garing ka Diyos pinaazi ka pagtag-inep nga nagalaong nga doro kamo mag-azi ka lain dalan kon mag-oli di kamo. Diri kamo magbalik kan Hirodis nga hari.¹³Pagpamanaw na mga magpaniiday ka mga bitoon inpatag-inep si Hosi na Magbabaja. Dizan ka toong tag-inep watoy sinogo garing ka Diyos nga nagalaong nga Hosi, bomangon ko naa. Dadhen mo ya maimpis daw ya toong ina ngaro ka lopa nga Ihipto nga aro pagdazaw ka Huda. Doro kamo magtagad ka kanaong sogo mag-oli naa kamo. Na, magdalagan gajod kamo kay sin Hirodis ampangita gazed ka maimpis dazaw patazen. ¹⁴Pagkakamhan kaiza minbangon dazon si Hosi. Kamhan indara naiza ya maimpis daw ya toong ina ngaro ka lopa nga Ihipto. Madedeglemay pen ya pagdalagan niran ngaro ka Ihipto. ¹⁵15Doro siran magahela hangtod ka pagkamola ni Hirodis. Na, ya pagdalagan niran ani ya nakatoman ka mga panaba na propita na Mababaja kay kawandini pen nagalaong iza nga wani ya inlaong na Magbabaja mahitenged ka toong Anak nga impapanaw nao ya kanaong Anak ka lopa nga Ihipto. Ani ini ya daan inlaong na Magbabaja.¹⁶Na, ka wara pen si Hirodis mamola mahagdam iza nga imbakakan iza na mga magpaniiday ka mga bitoon agon nazehet gazed iza. Kamhan minsogo iza nga doro ka longsod nga Bitlihim daw ya mga dapit tenged ka Bitlihim pamatazen ya tanan mga bata nga amaama nga bag-ong natao ngaro ka dowang ka toig ya panoigen. Kay nadowahan ding ka toig sokad ka pagsebang na makabegwas¹⁷Na, ya hinang ni Hirodis ani ya nakatoman ka inlaong ni Hirimiyas nga propita na Nagagihit kaykawandini pon nagalaong iza nga wani ya inlaong na Diyos mahitenged ka mga maimpis doro ka Bitlihim nga ¹⁸Nabatian nami ya kabezeng doro ka longsod nga Rama nga arani ka Bitlihim. Masara ya paghaza na mga ina doro kay nawara di ya kanirang mga maimpis. Ya kalised niran singed ka kalised ni Rakil nga karaang babazi kay kawandini pen nga diri magakalinaw ya toong hinawa kay natibe di ya toong mga maimpis pagpatay. Ani ini ya daan inlaong ni Hirimiyas nga propita na Magbabaja.¹⁹Na, pagkadogay kaiza namola di si Hirodis. Kamhan nagahela pen sin Hosi doro ka lopa nga Ihipto. Pagkatorog ni Hosi impatag-inep iza na Magbabaya. Dizan ka toong tag-inep watoy sinogo garing ka Magbabaya nga nagalaong nga ²⁰Hosi, pomanaw ko naa. Dadhen mo ya maimpis daw ya toong ina pag-oli ka lopa nga Israil. Kay patay di siran doro nga mga magpatazay kontana ka maimpis. ²¹Kamhan minpanaw di si Hosi daw ibahen isab ya maimpis daw toong ina ka pag-oli ngaro ka lopa nga Israil.²²Pagkasazod ni Hosi nga ya anak ni Hirodis nga si Arkilaw ani ya ilis ka toong ama ka paghari ka lopa ka Huda nahaldek si Hosi ka pag-azi doro. Agon nangaro siran ka lopa nga Galiliya kay ani ya sogo na Diyos kan Hosi pinaagi gihapon ka pagtag-inep. ²³Kamhan nagahela di siran dizan ka longsod nga Nazarit. Kamhan natoman di ya panaba na propita mahitenged ka insoligan niHisos nagalaong nga taga Nazarit iza. Ani ini ya daan inlaong na Nagagihit.

¹Na, ka nagahela pen si Hisos doro ka Nazarit si Howan nga Magbenzagay nagawali iza doro ka kamingawan doro ka Huda. Minwali iza nagalaong nga ²bizaan di mazo ya maongang batasan kay domatengay di ya hari nga pinili na Nagagihit. Ani ini ya inwali ni Howan. ³Na, ya inwali ni Howan ani ya nakatoman ka mga panaba ni Isayas nga karaang propita na Nagagihit nga nagalaong nga doro ka kamingawan may anhawag ka mga tao nga magalaong nga dazawen mazo ya kamazong batasan singed ka tao nga minhinglo ka dalan kay domatengay di ya Anak na Nagagihit. Ani ini ya inlaong ni Isayas mahitenged kan Howan.⁴Na, ya bado ni Howan nahinang nga bohok na kamiliyo nga bohien na tao. Ya toong bakes anit. Ya toong magakanen mga doron daw Duga. ⁵Na, pagwali ni Howan mataed gazed ya mga tao nga minkaro kanang-iza. Garing siran ka lobohan nga Hirosalem daw bisan hain nga lopa doro ka Huda daw ya mga dapit ka tenged na sapa na Hordan. ⁶Pagpanalinga niran ka inwali ni Howan nagalaong siran nga mga salaan matood kami nga mga tao. Kamhan dizan ka sapa nga Hordan impanbenzagan siran ni Howan.⁷Kamhan waton disab ya mga mataed nga maistro ka tinoohan na mga Hudiyo. Nangaro siran kan Howan kay ampabenzag siran kontana. Parasiyo ya ngaran niran daw Sadosiyo. Kamhan minbaheg si Howan kaniran nagalaong nga kamo nga mga bakaken, nagapasingedsinged kamo ka mga halas pagpandalagan niran ka sonog ka pagharing na tao ka oma. Kay ono sa kamo nangarini kanao? Daw gosto baza kamo andalagan ka pagkazehet na Nagagihit kamazo? ⁸Kon matood gazed ya paghinelsel mazo ipakita mazo ya madazaw nga batasan. ⁹Azaw kamo maghambog ka kamazong pagkakaliwat ni Abraham. Timan-an mazo gazed ini nga bisan ya mga bato dizan ka lopa mahimo iton hinangen na Nagagihit nga mga kaliwatan ni Abraham.¹⁰Pamolinged ini nga andam daan ya Nagagihit ka pagbetang ka silot kamazo kay singed kamo ka liwaan nga diri mamonga ka madazaw nga bonga. Kon diri kon madazaw ya bonga na liwaan deegen iton kamhan sonogon. ¹¹Mindogang si Howan pagtoldo kaniran nagalaong nga hao ya nagabenzag kamazo ka sapa dazaw ipakita nga minhinelsel kamo ka kamazong mga sala piro may ansonod pen kanao nga magbenzag kamazo ka Madazaw nga Ispirito nga garing ka Diyos dazaw paharian kamo naiza nga Ispirito. Silotan sab naiza ya tao nga maongang batasan. Dizan kanang-iza hao ya labing obos kay iza gajod ya labaw ka gahem. ¹²Pagdateng naiza dini kamazo pabelagen naiza ya mga madazaw nga tao daw ya mga maongang tao. Kay singed iza ka tao nga nagasisig ka begas. Kamhan ibetang naiza ya magazong begas dizan ka dapoganan piro ya apa sonogon iton dizan ka laga nga diri mapareng. Ani ini ya inwali ni Howan.¹³Na, ka nagapanbenzag pon si Howan ka mga tao si Hisos minpanaw iza dizan ka lopa nga Galiliya. Kamhan mindateng di iza ka sapa nga Hordan kay ampabenzag iza kan Howan. ¹⁴Piro diri kontana ansogot si Howan nga nagalaong nga iko kontana ya ambenzag kanao ambaza kay ampabenzag ko kanao. ¹⁵Minsambag si Hisos kan Howan nga matood iton piro somogot ko lamang kay ya pagbenzag mo kanao ani ya timaan nga kay-an ka pagtoman na tirmino hao ya andawat ka silot ka mga sala na mga tao dazaw dizan ka pagseleng na Nagagihit matadeng di siran kon hao ya kanirang insakopan. Na, pagkakamhan ni Hisos pagpanaba minsogot si Howan.¹⁶Pagkakamhan naiza pagbenzag kan Hisos singod ka naabri di ya tahaw. Kamhan nakitan ni Hisos ya Madazaw nga Ispirito nga garing ka Nagagihit nga minkarimbaba kanang-iza. Minpasingedsinged iton ka salapati. ¹⁷Kamhan may nabatian niran nga saba na Nagagihit nga garing daked ka langit nagalaong nga wani ya kanaong Maanak nga kanaong naazakan. Nakasaza gajod iza kanao. Ani ini ya inlaong na Nagagihit.

¹Pagkakamhan ni Howan pagbenzag kan Hisos ya Madazaw nga Ispirito nga garing ka Nagagihit ani ya minpakaro kan Hisos ngaro ka kamingawan. ²Keteb ka kap-atan nga ka aldaw daw kahabzen min-anget si Hisos ka pagkaen doro ka kamingawan. Kamhan magabengtasen di gajod iza. Kamhan intintal iza ni Satanas dazaw an-ato ka Nagagihit piro wara gazed si Hisos madaeg kay ingamit naiza pag-ato ya mga panaba na Nagagihit nga inpasoyat daan. ³Pagkadizan ka ni Satanas kan Hisos nagalaong iza ka pagtintal nga kon iko ya matood nga Anak na Nagagihit sogoon mo ya mga bato dizan ka lopa dazaw mahinang nga makaen kay magabengtasen di gazed ko. ⁴Minsambag si Hisos nga diri hao ansogot kay may daan pinasoyat na Nagagihit nga nagalaong nga diri kon makaen ka lamang ya makabohi ka mga tao basta ya tanan mga panaba na Nagagihit ani gajod ya labaw nga makabohi ka mga tao.⁵Pagkakamhan kaiza impaiba ni Satanas si Hisos ngaro ka siyodad nga Hirosalem nga inngaranan ka Siyodad na Nagagihit. Kamhan in-ated ni Satanas si Hisos ngandaked ka taway na binobongan na dakolang lagkaw na pangamozoanan ka Nagagihit. ⁶Kamhan minlaong si Satanas kan Hisos nga kon matood pen nga ikoy Anak na Nagagihit emempag iko ngambaba kamhan diri masakitan ya lawas mo kay may daan pinasoyat na Nagagihit nga nagalaong nga pabantazan iko ka toong mga sinogo. Bohaten iko niran. Kamhan bisan ya paa mo diri andasmag ka bato.⁷Minsambag si Hisos nga diri hao ansogot kay may daan pinasoyat na Nagagihit nga nagalaong nga azaw mazo pansorazi ya Magbabaja nga kamazong Nagagihit. ⁸Pagkakamhan kaiza impaiba ni Satanas pag-otro si Hisos ngandaked ka poro na bobong nga ataas pagdazaw kay paselengan ni Satanas ya tanang mga longsod dini ka haloag nga kalibotan nga madazaw selengan. ⁹Kamhan minlaong si Satanas kan Hisos nga kon lomohod ko pagtahod kanao ihatag o kanmo ya katenged ka pagdomara ka tanan mga longsod kay hao ya nagadomara kaniran koman.¹⁰Minsambag si Hisos nga Satanas, pomanaw di ko dini kay may daan pinasoyat na Nagagihit nga nagalaong nga ya Magbabaja nga kamazong Nagagihit iza gazed ya sazaen mazo. Iza sab ya kamazong alagaden waray lain. ¹¹Pagpakabati ka ni Satanas kaiza nga mga pinaba minpanaw iza dazon. Kamhan ya mga tagalangit nga sogoonon na Nagagihit ani ya minkandizan kan Hisos dazaw magatabangan iza.¹²Pagkakamhan kaiza nabatian ni Hisos nga si Howan nga Magbenzagay napiriso di iza kay imbaheg naiza si Hirodis nga hari. Agon min-oli di si Hisos ka lopa na Galiliya. ¹³Piro diri iza ambalik ka longsod nga Nazarit nga toong insoligan kay minpormar di iza ka longsod nga Kapirnaom. Na, ya longsod nga Kapirnaom arani iton ka danaw daw minsakop isab ka mga longsod nga Sabolon daw Naptali.¹⁴Na, ya paghela ni Hisos dizan ka longsod nga Kapirnaom ani nakatoman ka panan-og ni Isayas nga propita na Nagagihit kay kawandini pen nagalaong iza nga wani ya inlaong na Nagagihit mahitenged ka paghela ni Hisos doro ka Kapirnaom nga ¹⁵doro dapit ka Sabolon daw Naptali tenged ka danaw daw tenged isab ka sapa nga Hordan ani ini ya lopa na mga tao nga diri kon Yodayo. ¹⁶Ka wara pen dateng si Hisos ka paghela dizan kaniran singed ka nagahela pen siran ka kadeglem kay wara pen siran magkilala ka Nagagihit. Magakahaldek sab siran ka pagkapatay niran. Piro pagdatengni Hisos dizan kaniran singed ka minsirak nga sega ya kanirang bayho hasta nagahela disab siran ka kapawa kay si Hisos dizan iza kaniran maghela. Ani ini ya daan inlaong ni Isayas.¹⁷Na, sokad ka pagdateng ni Hisos ka longsod nga Kapirnaom minsogod iza pagwali nagalaong nga bizaan di gazed mazo ya mga maongang batasan kay mindateng di ya hari nga pinili na Nagagihit.¹⁸Na, may isang aldaw nga nagapasinged si Hisos ka baybazen na danaw nga Galiliya. Kamhan si Simon nga indagnazan kan Pidro daw si Andris nga dowa nga maglomon nga mangisdaay ani ya nakitan naiza. Nanimbag siran ka mga lazà pagpangisda. ¹⁹Kamhan minlaong si Hisos kaniran nga somakop kamo kanao kay antoldo hao kamazo dazaw mahagdam kamo ka pagpasakop ka mga tao kanao singed ka pagpanlazà mazo ka mga isda. ²⁰Pagpakabati ni Simon ka sogo ni Hisos kaniran imbizaan dazon niran ya kanirang mga lazà kay an-iba gazed siran kan Hisos.²¹Pagkakamhan kaiza minlargo si Hisos pagpanaw ngaro ka isang baloto. Kamhan si Santiago daw si Howan nga dowa nga maglomon nga mga maanak ni Sibidiyo ani ya nakitan naiza. Dizan ka baloto nagatahi siran ka kanirang mga lazà iba ya kanirang ama. ²²Kamhan pagpasakop ni Hisos kanirang dowa imbilin niran ya kanirang ama dizan ka baloto kay an-iba sirang dowa kan Hisos.²³Pagkakamhan kaiza minsoroy sin Hisos ka tibolos lopa nga Galiliya. Kay dalem ka mga singbahan na mga Hudiyo nagatoldo iza ka mga tao daw nagawali ka sindo mahitenged ka pagpasakop na Diyos ka mga tao. Indazaw sab naiza ya bisan ono nga masakit daw kaloza na lawas na tao. ²⁴kamhan minlekep di ya toong ngaran doro ka lopa nga Siriya. Kamhan in-ated na mga tao dizan kan Hisos ya bisan sin-o nga masakiten nga naga-anget ka nagakalainlain mga sakit. Nalakip ya mga tao nga inharian na mga maonga daw ya mga insawan daw ya mga tao nga diri mahingas ya lawas. Kamhan inbahaw ni Hisos sirang tanan. ²⁵Kamhan mataed gazed ya mga namagsonodsonod kan Hisos. Garing siran ka lopa nga Galiliya daw tenged ka longsod nga Dikapolis daw ya siyodad nga Hirosalem daw ya lopa nga Yoda daw ya mga dapit dipi ka sapa nga Hordan.

¹Pagkakamhan ni Hisos pagtabang ka kataudon na mga tao mintokad iza ngandakod ka pagkahiping na bobong. Paglo-to naiza dizan mindatong disab ya toong mga sakop. ²Kamhan intambag iza kaniran nga nagalaong nga ³Masazaon kamo kon makasabot kamo nga waray mahinang mazo kon wara ya pagtabang na Nagagihit. Kamhan tagan kamo na Nagagihit ka mga madazaw kay iza ya insakopan mazo. ⁴Masazaon kamo kon mawiod kamo pagkita mazo ka tao nga nagahinang ka maonga. Kamhan malinawon na Diyos ya kamazong hinawa.⁵Masmazaen kamo kon diri kamo an-angken ka bisan ono. Kamhan dawaten matood mazo ya madazaw nga insaad na Nagagihit kamazo. ⁶Masazaon kamo kon naazak kamo pagtoman ka mga sogo na Nagagihit. Kamhan tagan kamo naiza ka tanan mga madazaw, diri kamo makolangan. ⁷Masazaon kamo kon malooy kamo ka kamazong kaibahan. Kamhan kaloy-an sab kamo na Nagagihit. ⁸Masazaen kamo kon polos madazaw ya kamazong huna-huna. Kamhan kamo ya ankita ka Nagagihit.⁹Masajaon kamo kon kamo ya magadomara ka kahosay. Kamhan ngaranan kamo naiza nga toong mga maanak. ¹⁰Masajaon kamo kon indaegdaeg kamo pagtoman mazo ka toong mga sogo. Kamhan tagan kamo na Nagagihit ka mga madazaw kay iza ya insakopan mazo.¹¹11Masajaon kamo kon intamay kamo na mga tao kay hao ya insakopan mazo. Kon magadaegdaegen kamo niran daw magabutangbutangan ¹²magsaza kamo pagdakola kay daked ka hel-anan na Nagagihit dakola ya primyo mazo kay bisan ya mga karaang propita naNagagihit siran gihapon ya indaogdaog na mga tao.¹³Kamhan indogangan ni Hisos pagmaymay ka toong mga sakop nagalaong nga pamolinged ini nga dizan ka kataohan singed kamo ka asin kay kamo ya antabang kaniran ka pagbinuutan. Piro kon wara di ya kaparat na asin diri di gazed anbalik ya kaparat. Kamhan itimbag lamang kay wara di ya polos. Sagitnanan di lamang na mga tao. ¹⁴Nagapasingedsinged isab kamo ka segà kay ipakita mazo ka mga tao ya magazong batasan. Ya pagkita niran ka kamazong magazong batasan singed iton ka pagkita ta ka longsod nga inhinang daked ka pongkay na bobong nga diri mahimo ka pagtago.¹⁵Na, kon seg-an na tao ya moron diri pagtakloban. Ibutang hinoa daked ka artal kay dazaw pawaan ya mga minsulod ka lagkaw. ¹⁶Kamhan ya kapawa na segà singed iton ka magazong batasan mazo nga nakita na mga tao. Kamhan sazaen niran ya kamazong Ama nga Nagagihit nga nagahela daked ka langit. Ani ini ya mga pamolingod ni Hisos ka toong mga sakop.¹⁷Kamhan indogangan ni Hisos pagmaymay kaniran nagalaong nga azaw kamo maghuna-huna nga mindatong di hao ka kalibotan dazaw waraon ya daan balaod na Nagagihit daw ya pagmaymay na mga propita na Nagagihit. Wara hao magdatong ka pagpawara kaiza nga mga balaod. Basta kay mindateng di hao dazaw ipasabot nao kamazo ya matood nga kahologan na daan balaed na Nagagihit. ¹⁸Timan-an mazo gajod ini nga kotub ka tirmino ka pagkawara na kalangitan daw kalibotan diri gajod makawa ya bisan isang ka toblok lamang na mga balaod na Nagagihit kay matoman gajod ya tanan.¹⁹Agon bisan sin-o ya diri antahod ka bisan isa lamang nga ka sogo na Nagagihit kamhan ampahaod isab iza ka toong angay diri gajod iza sazaon na Nagagihit kay-an ka pagkahari na Nagagihit. Bisan sin-o ya antoman ka tanan mga sogo na Nagagihit kamhan ampahaod isab iza ka iba nga tao sajaon gazod iza na Nagagihit kay-an ka pagkahari na Nagagihit. ²⁰Kon diri pon kon labaw ya katadeng na kamazong batasan ka katadeng na batasan na mga maistro ka tinoohan na mga hodayo daw ya mga Parasiyo, diri hao ampaseled kamazo ka hol-anan na kanaong Ama daked ka langit kay hopaw ka lamang ya kamazong pagtoo.²¹Kamhan indogangan ni Hisos pagsindo ka toong mga sakop kay ipasabot naiza kaniran ya matood nga kahologan na mga daan balaod na Nagagihit. Minlaong iza nga mahagdam kamo ka naton-an na mga karaang tao nga azaw pagpatay ka tao. Ya makapatay ka tao dadhan ngaro ka hokmanan. Ani ini ya daan balaod ²²piro wani ya kanaong pagmahay kamazo nga bisan sin-o ya mazehet ka toong iba paatobangen iza doro ka hokmanan kay ya kazehet ani ya sinogdan ka pagbono ka tao. Kamhan bisan sin-o ya anlaong ka toong iba nga waray polos ya pagkatao mo dadhen iza doro ka labaw nga hokmanan. Kamhan bisan sin-o ya anlaong ka toong iba nga boang iko mamiligro iza ka laga na inpirno.²³Na, kon andara iko ka kanmong halad ka Nagagihit dizan ka haladanan kamhan nakataremdem iko nga may nazehet kanmo ²⁴bizaan mo ya kanmong halad dizan ka haladanan. Karohen mo dazon ya kanmong iba dazaw maghosay naa kamo. Kamhan magbalik ko ka haladanan daw ihalad ya kanmong halad ka Nagagihit.²⁵kon may ansombong kanmo kamhan dadhen ko naiza ka hokmanan na, magpakighosay ko naa kanangiza ka wara pen kamo makadateng ka hokmanan. Kay kon makadateng kamo ka hokmanan itogyan ko naiza ka maghohokom. Kamhan ya maghohokom antogyan kanmo ka polis. Kamhan ipapiriso iko. ²⁶Kamhan dizan ko maghela hangtod ka pagkaimpas na kanmong molta.²⁷Kamhan indogangan ni Hisos pagmaymay ka toong mga sakop kay ipasabot pen naiza kaniran ya matood nga kahologan na mga daan balaod na Nagagihit. Minlaong iza nga mahagdam kamo ka naton-an na mga karaang tao nga nagalaong nga azaw maghenay. ²⁸Piro wani ya kanaong pagmaymay kamazo nga bisan sin-oy anseleng ka babazi daw malaway ya huna-huna salaan iza ka paghenay bisan huna-huna ka lamang.²⁹Kamhan minpamolinged si Hisos kaniran nagalaong nga kon ya kanmong mata ani ya makaonga ka huna-huna mo ipaheneng gajod ya mata mo pagseleng. Singed ka kaw-en mo ya kanmong mata kamhan itimbag ngaro. Kay bisan isa kang bolos ya kanmong mata waray bali kay diri ikatimbag na Nagagihit ya tibolos lawas mo doro ka impirno. ³⁰Kon anhinang ya alima mo ka maonga ipaheneng gazed ya alima mo singed ka otdon mo iton. Kay bisan pikas ka lamang ya alima mo waray bali kay diri madara ya tibolos lawas mo doro ka impirno.³¹Indogangan ni Hisos pagsindo ka toong mga sakop nagalaong nga mahagdam kamo ka daan balaed nga imbilin ni Moysis kamazo nga bisan sin-o ya ambelag ka toong asawa kinahanglan hatagan ya toong asawa ka soyat para ka pagpamatood nga minbelag di ya toong bana. Ani ini ya daan balaed na Nagagihit. ³²Piro wani ya kanaong sindo kamazo nga bisan sin-o ya ampakigbelag ka toong asawa nga wara makasala ka paghenay nakasala gazed ya bana kay garing ka toong pagpakigbelag inhatag naiza ya sala nga paghenay ka toong asawa pagkaminze na asawa ka laing amaama. Bisan ya ikadowang bana nagahenay sab iza kay naminze iza ka babazi nga daan minze.³³Kamhan indogangan ni Hisos pagmaymay ka toong mga sakop kay ipasabot pen naiza kaniran ya matood nga kahologan na mga daan balaed na Nagagihit. Minlaong iza nga mahagdam isab kamo ka naton-an na mga karaang tao nga kinahanglan tomanen mazo ya kamazong saad ka Diyos, diri kamo magbakak ka pagsaad ka Nagagihit. Ani ini ya daan balaed ³⁴Piro wani ya kanaong sindo kamazo nga kon ansaad kamo ka iba nga tao diri kamo magpaninhaga ka saad mazo nga nagalaong nga kon mabakak ini nga panaba magakaonga gazed ya kalangitan. Na, diri kamo maglaong singed kaiton kay ya tahaw ani ya lo-toanan na nagagihit ka paghari. ³⁵Bisan ya kalibotan diri kamo magpaninhaga maglaong nga kon mabakak ini nga panaba magakaonga gazed ya kalibotan kay ya kalibotan ani ya pahimlazanan na paa na Nagagihit. Bisan ya siyodad nga Hirosalem diri kamo maglaong nga mageba iton nga siyodad kon mabakak ini nga panaba kay itong siyodad ani ya hel-anan na labaw nga hari kay-an.³⁶Bisan ya kanmong olo kon ansaad ko ka iba nga tao diri kamo maglaong nga maobanen gazed ya kanaong olo kon mabakak ini nga kanaong saba. Kay diri kamo mahimo pagpapoti ka bisan isang ka legas nga bohok mazo daw pagpaitem. ³⁷Wani gajod ya kinahanglanen mazo pagsaad. Kon mahimo ya pagtoman mazo maghee kamo. Kon diri mahimo ya pagtoman maglaong kamo nga diri mahimo. Kay bisan ono ya paninhaga mazo ka pagrig-en ka saad garing iton ka maongang batasan mazo.³⁸Kamhan indogangan ni Hisos pagsindo ka toong mga sakop kay ipasabot pen naiza kaniran ya matood nga kahologan na mga daan balaed na Nagagihit. Minlaong iza kaniran nga mahagdam kamo ka naton-an na mga karaang tao nga nagalaong nga ya nagapabota ka tao kinahanglan ibales ya pagpabota. Ya nagapatipo ka ngipen na tao pagsombag kinahanglan ibalos ya pagpatipo pinaazi ka pagsombag. Ani ini ya daan balaed. ³⁹Piro wani ya kanaong pagmaymay kamazo nga kon maghinang ya tao ka maonga dizan kanmo diri ko magbales ka maonga. Magbales ko hinoa ka magazon dazaw makadaeg ko ka maonga nga hinang. Bisan ansampalo iza ka pikas nga pisngi mo diri ko magbales ka maonga, ihatag mo hinoon ya isang pikas nga pisngi mo.⁴⁰Bisan kawsahan ko kamhan ya ipabazad ani ya kanmong bado idogang pen ya paghatag ka habel mo. ⁴¹Bisan ansogo iza kanmo ka pagpaated ka toong mabeg-at nga dara ngaro keteb ka isang kakilomitro ibahan mo iza ngaro keteb ka dowang ka kilomitro. ⁴²Bisan an-azo iza tagi iza. Bisanambeles iza pabelsen mo. Ani ini ya kanaong pagmaymay kamazo.⁴³Kamhan indogangan ni Hisos pagmaymay ka toong mga sakop kay ipasabot pen naiza kaniran ya matood nga kahologan na mga daan balaed na Nagagihit. Minlaong iza nga mahagdam kamo ka naton-an na mga karaang tao nga nagalaong nga mag-angay kamo ka kamazong mga iba. Kamhan mag-away kamo ka kamazong mga kaaway. Ani ini ya daan balaed. ⁴⁴Piro wani ya kanaong pagmaymay kamazo nga mag-angay kamo ka kamazong mga kaaway. Bisan ya mga andaegdaeg kamazo magbales kamo kaniran ka madazaw ⁴⁵dazaw ipakita mazo kaniran nga kamo ya matood nga mga maanak na Nagagihit nga kamazong Ama nga nagahela daked ka tahaw. Kay ya batasan naiza nagapasidlaw iza ka sega dimbaba ka mga maongang tao daw ya mga madazaw nga tao. Nagapadara sab iza ka oran dimbaba ka mga matadeng nga tao ilakip isab ya mga tao nga makasasala.⁴⁶Kay kon anikay pagaazakan mazo ya mga nagakaangay kamazo diri gazed kamo mahatagan na Nagagihit ka primyo daked ka tahaw kay-an. Kay bisan ya mga maongang tao nga magsokotay ka mga bohis siran gihapon ya an-angay ka mga nagaangay kaniran. ⁴⁷Kon an-abiabi kamo ka kamazong mga higara ka lamang diri kamo sazaen na Nagagihit. Kay bisan ya mga tao nga diri pen ankilala ka Nagagihit siran gihapon ya an-abiabi ka mga min-abiabi kaniran. ⁴⁸Na, ya matadeng nga batasan kinahanglan magtoman gazed kamo dazaw mag-anika ya kamazong batasan daw ya batasan na kamazong Ama nga nagahela daked ka tahaw.

¹Indogangan pen ni Hisos pagmahay ka toong mga sakop nagalaong nga pagtoman mazo ka batasan nga matadeng azaw ipakahagdam ka mga tao dazaw sazaen kamo niran. Kay kon ani ya batasan mazo diri kamo mahatagan ka pahinenged na Nagagihit nga kamazong Ama nga nagahela daked ka tahaw. ²Ya, paghatag mazo ka hinabang dizan ka pobri nga tao diri ipakita ka mga tao singed ka batasan na mga garboso nga nagapatihinang nga matadeng dalem ka mga singbahan daw dizan ka kadalanan na longsod dazaw sazaen siran na mga tao. Timan-an mazo gazed ini nga indawat di gajod niran daan ya kanirang pahinenged nga pagsaza na mga tao kaniran.³Piro kamo nga kanaong mga sakop, paghatag mazo ka hinabang dizan ka pobri nga tao diri ipakita ka mga tao. ⁴Hinoa dizan ka waray lain makakita ipanhatag mazo ya kamazong hinabang. Kamhan ya Nagagihit nga kamazong Ama nga makakita ka kanmong inhinang nga tinago iza gajod ya ambales kamazo ka madazaw.⁵Na, kon ampangamozo kamo ka Nagagihit diri kamo maghaod ka batasan na mga garboso nga nagapatihinang nga matadeng dazaw sazaen siran na mga tao. Kay dalem ka mga singbahan nagaazak siran ka pagtindeg ka pagpangamozo dazaw makitan siran na mga tao bisan dizan ka tenga na kadalanan na longsod. Timan-an mazo gajod ini nga indawat di gajod niran daan ya kanirang sohol nga pagsaza na mga tao kaniran. ⁶Kamo nga kanaong mga sakop, kon ampangamozo kamo ka Nagagihit an-oli kamo ka kamazong lagkaw. Kamhan sirahan mazo ya kamazong lagkaw dazaw diri kamo makitan na mga tao. Kamhan ampangamozo kamo ka Nagagihit nga kantang Ama nga diri makita na bisan sin-o nga tao. Kamhan tagan kamo ka pahinenged na kamazong Ama nga nakakita ka kamazong inhinang dizan ka tago. ⁷Pagpangamozo mazo diri mazo balikbaliken ya pagpanaba nga diri masabtan singed ka mga tao nga diri pen ankilala ka matood nga Nagagihit. Silaong niran nga nabatian na Nagagihit kay ataas ya pagpangamozo ambaza kay diri gajod ambati ya Nagagihit.⁸Diri kamo maghaod ka kanirang batasan kay bisan ka wara pen kamo mag-azo mahagdam daan ya kamazong Ama ka mga kinahanglanen mazo. ⁹Agon pagpangamozo mazo maglaong kamo nga Ama nami nga nagahela daked ka tahaw, labaw gajod ya kanmong ngaran. ¹⁰Harian mo kami dini ka kalibotan. Tomanen mo isab ya kanmong naazakan dini ka kalibotan singed ka pagtoman mo daked ka kanmong hel-anan.¹¹Tagan mo kami komang aldaw ka kinahanglan nami nga pagkaen. ¹²Pasaylohon mo ya kanaming mga sala singed ka pagpasaylo nami ka mga nakasala kanami. ¹³Ipaaro mo kanami ya magtintalay daw ya mga maonga. Ani ini ya inhaodan mazo ka pagpangamozo ka Ama daked ka langit.¹⁴Kamhan indogangan pen ni Hisos pagsindo kaniran nagalaong nga kon pasaylohon mazo ya mga nakasala kamazo pasaylohon isab kamo na kamazong Ama nga nagahela daked ka langit. ¹⁵Piro kon diri mazo mapasaylo ya mga nakasala kamazo, ya kamazong Ama nga nagahela daked ka langit diri isab iza anpasaylo ka kamazong mga sala.¹⁶Na, kon nagaanget kamo ka makaen dazaw may logar mazo ka pagpangamozo ka Nagagihit, diri kamo magpakita ka kamazong bayho nga waray kasaza singed ka mga tao nga nagapatihinang ka matadeng nga batasan dazaw long-on siran na mga tao nga madazaw ya kanirang batasan. Siran ya minlimas ka bayho niran ka alibo dazaw mahagdam ya mga iba niran nga nakaanget pen siran ka pagkaen ka pagpangamozo ambaza kay aro ka gazed ya hena-hena niran ka Nagagihit. Timan-an mazo gazed ini nga indawat di niran daan ya kanirang sohol ka pagsaza na mga tao kaniran. ¹⁷Piro kamo nga kanaong mga sakop maghiram-os kamo pag-anget mazo ka pagkaen. Manodlay sab kamo ¹⁸dazaw diri mahagdam ya iba mazo kay anikay mahagdam ya kamazong Ama nga diri makita. Kamhan tagan kamo ka pahinenged na kamazong Ama nga nakakita ka kamazong inhinang dizan ka tago.¹⁹Indogangan pon ni Hisos pagsindo ka toong mga sakop nagalaong nga diri kamo magdapogdapog ka mga mahalen dini ka kalibotan kay magakaonga ka kararing, maketket sab na mga ipos. Bisan ya kamazong lagkaw paniken na tolisan dazaw kawaten ya kamazong mga mahalen nga betang. ²⁰Hinoa mag-andam kamo daan ka mga mahalen daked ka hel-anan na Nagagihit kay diri iton madektan na kararing kon daked di ka hel-anan na Nagagihit. Diri isab maketket na mga ipos, diri sab paniken na mga tolisan pagkawat. ²¹Kay kon hain ya kamazong mga mahalen waro disab ya hena-hena mazo ka pagtaremdem.²²Indogangan pen ni Hisos pagmaymay kaniran nagalaong nga mimpasingedsinged ya kantang mata ka segà dini ka kantang lawas. Kay kon mapawa ya kantang pagkita singed ka mapawa gihapon ya tibolos lawas. ²³Piro kon nabota kita singed ka nagahela kita ka kadeglem. Na, ya kahologan naini nga pamolinged ya kantang hena-hena singed iton ka mata dini ka kantang lawas. Kon sigi kita mag-andam ka mga mahalen nga betang daked ka hel-anan na Nagagihit singed ka madazaw ya pagkita na kantang mata. Piro kon sigi kita antaremdem ka mga mahalen dini ka kalibotan singed ka nabota di kita daw nagahela disab kita ka masarang kadeglem. ²⁴Kamhan bisan sin-o nga tao diri iza makaalagad pagdengan ka dowang ka agaron kay kon dowa ya toong agaron antahod iza ka isa piro magatamazen naiza ya isa. Kon magaazak kamo ka dakolang kowarta diri mahimo ya pag-alagad mazo ka Nagagihit.²⁵Agon diri kamo magkawied pagpangita ka panginabohi mazo kon ono ya pagkaen daw pag-inem daw ya pagabadoon mazo. Ya kinabohi natao mahal iton ka pagkamahal na makaen. Ya lawas na tao mahal iton ka pagkamahal na mga bado. Agon ya Diyos iza ya antabang kamazo dazaw may makaen mazo daw mga bado. ²⁶Paniidan mazo ya mga manokmanok nga nagalepadlepad. Waray mahimo niran pagtanem daw pag-ani daw pagdapog. Hinoa ya kamazong Ama nga nagahela daked ka tahaw ani ya nagapakaen kaniran. Na, mahal ya tao ka pagkamahal na mga manokmanok agon antabang gazed ya Ama kamazo ka pagpangita ka kamazong panginabohi.²⁷Bisan ya kaataas na kamazong panoigen diri kamo magkawied kay garing ka pagkawied mazo diri kamo makaataas. ²⁸Diri kamo isab magkawied ka kinahanglan mazo ka bado. Paniidan mazo ya mga boyak nga tobo ka lamang kay waray mahimo niran pagtarabaho daw pagtahi ka kanirang bado. ²⁹Panabaen ta kamo bisan si Salomon nga karaang hari nga nagabado ka mga mahalen nga bado lopig gajod ka kagazen ya toong bado ka kagazen na mga boyak nga tobo ka lamang.³⁰Na, mahal ya tao ka pagkamahal na mga boyak agon antabang gajod ya Nagagihit kamazo. Geramay gazed ya pagtoo mazo ka Nagagihit. Kay bisan ababa ya tirmino na mga boyak anhatag iza ka kagazon. Agon antabang isab iza kamazo. ³¹Kamhan diri kamo magkawied maglaong nga waray makaen nami, waray mainem, waray bado.³²Kay ani ya kawiedan na mga tao nga wara pon magsakop kanao. Piro ya kamazong Ama nga nagahela daked ka tahaw mahagdam iza ka tanan inkinahanglan mazo. ³³Na, kamo nga kanaong mga sakop wani ya kinahanglanen mazo, ya primiropaharien mazo ya Nagagihit ka kamazong beet dazaw antabang iza kamazo ka pagbineetan. Kamhan antabang iza kamazo ka mga kinahanglanen mazo. ³⁴Agon diri kamo magkawied ka kamazong kalised ka aldaw nga wara pen dateng. Kay kon domateng ya aldaw anipen kamo anhena-hena ka kalised dazaw diri madobli ya kamazong kalised komang aldaw.

¹Indogangan pon ni Hisos pagmaymay ka toong mga sakop nagalaong nga azaw kamo maghokom ka mga iba nga tao kadaw diri kamo hokman na Nagagihit. ²Kay hokman kamo na Nagagihit singod ka paghokom mazo ka iba. Kamhan kon ono ya paghokom mazo ka iba ani sab iton ya paghokom na Nagagihit kamazo.³Na, wani ya pamolinged mahitenged ka tao nga nagaazak ka pagpangita ka sazep dizan ka iba nga tao. Ya sala na tao nga anpangita ka sazep singod iton ka toroso dizan ka mata. Kamhan ya sazep na tao nga inpangitan singod iton ka geramay nga poling dizan ka mata. Kamhan singed ka nabota ya tao nga nagapangita ka sazep kay silaong naiza nga waray sala naiza. ⁴Na, onhon sa naiza pagkawa ka poling dizan ka mata na iba nga tao kon may toroso dini ka toong mata? ⁵Ka pagsagod pen magbiza iza ka pagpagarbo ka toong batasan aniy iza makatabang ka tao pagpabiza ka sala.⁶Indogangan pon ni Hisos pagsindo kaniran nagalaong nga ya pagkamahal na sindo mahitongod ka Nagagihit minpasingedsinged iton ka kamahal na mga motza. Agon dizan ka mga magasorasora kaini nga sindo diri kamo magwali pag-otro kay ya pagsorasora niran singod iton ka batasan na mga baboy daw ido nga magatamaktamakan lamang ya mga motza. Maghamarag isab kamo kay basi bangaen kamo niran.⁷Indogangan pon ni Hisos pagmaymay kaniran nagalaong nga mangazo kamo ka Nagagihit ka inkinahanglan mazo. Kamhan tagan kamo naiza. Magpangita kamo. Kamhan ipakita naiza kamazo ya kamazong inkinahanglan. Maghawag kamo dazaw sambagen kamo na Nagagihit. Kamhan mabatian kamo naiza ka paghangzo mazo. ⁸Kay bisan sin-o ya nagaazo ani tagan na Diyos ka toong inkinahanglan. Ya tao nga nagapangita ani tabangan na Nagagihit. Ya tao nga nagahawag mabatian na Nagagihit ya toong paghangzo. ⁹Kamo nga may maanak, kon an-azo ya maanak ka makaen daw ihatag ya bato? Diri. ¹⁰Kon an-azo iza ka isda daw ihatag ya halas? Diri. Kay ihatag mazo hinoa ya madazaw.¹¹Na, kamo nga mga salaan nga tao mahagdam kamo ka paghatag ka madazaw ka kamazong mga anak. Kamhan ya kagazon nga hatag na kamazong Ama nga nagahela daked ka tahaw labaw pen gajod ka impangazo mazo. ¹²Agon magbatasan kamo ka mga iba nga tao singed ka batasan nga inazakan mazo garing kaniran. Kay ani ya makatoman ka daan balaed na Nagagihit daw ya sindo na mga propita na Nagaginit.¹³Dizan ka masiet nga pirtahan magseled kamo. Kay haluag ya pirtahan daw masazon ya dalan nga nagapasinged ngaro ka impirno. Kamhan dizan kaiton nga dalan mataed ya nagapanaw. ¹⁴Masiet ya pirtahan daw malised ya dalan nganagapasinged ngaro ka Nagagihit nga makahatag ka bag-ong kinabohi nga diri mawara. Kamhan dizan kaiton nga dalan talagsa ka ya matara.¹⁵Maghamarag kamo kay andateng kamazo ya mga nagalaong nga siran koni ya nagadara ka pagmaymay mahitenged ka Nagagihit ambaza kay ya tood niran magapagasto siran kamazo. Magpatihinang nga propita na Nagagihitsiran ambaza kay ani ya tozò niran ya pagdogang ka kowarta. ¹⁶Paniidan mazo ya kanirang batasan dazaw makilalhan nga maglimbongay siran. Kay diri mamonga ya makahilo ka madazaw nga protas. ¹⁷Ya liwaan nga waray kasakit mamonga iton ka madazaw nga bonga. Ya liwaan nga masakiten diri mamonga ka madazaw nga bonga.¹⁸Ya liwaan nga madazaw diri makabonga ka maonga. Ya liwaan nga maonga diri makabonga ka madazaw. ¹⁹Kamhan ya mga liwaan nga diri mamonga ka madazaw pandeegen iton kamhan sonogon. ²⁰Agon makilalhan mazo ya mga maglimbongay nga mga tao kay malain ya batasan niran.²¹Na, diri hao ampaseled ka hel-anan na kanaong Ama ka mga tanan minsabi kanao nga Nagagihit, Nagagihit. Kay anikay makaseled ya mga antoman ka naazakan na kanaong Ama nga nagahela daked ka langit. ²²Agon kay-an ka paghokom na Diyos ka mga tao mataed ya anmahay kanao magalaong nga Ginoo, Ginoo izang dini kaini minsabi kami ka ngaran mo pagtekma nami ka mga kaazi nga domadateng. Minpadalagan sab kami ka mga maonga dizan ka mga tao nga inhabay pagsabi nami ka ngaran mo. Mataed pen isab ya dakolang inhinang nami pagsabi nami ka ngaran mo. ²³Kamhan ansambag hao kaniran nga pamanaw di kamong mga salaan nga tao dini kanao kay wara hao makakilala kamazo.²⁴Kamolinged ini nga bisan sin-o ya nanalinga ka kanaong mga panaba kamhan tomanen naiza singed iza ka tao nga minlagkaw dizan ka lopa nga madazaw ogdokan. ²⁵Pagkakamhan naiza paglagkaw imbagzo ya lagkaw daw madateng isab na baha. Bisan indasmagan iton ka makeseg nga hangin diri madeeg kay marig-en gazed ya in-ogdokan.²⁶Gamhan ya tao nga diri antoman ka kanaong mga panaba singed iza ka tao nga minlagkaw dizan ka dapit nga nag-as. ²⁷Pagkakamhan naiza paglagkaw imbagzo dazon. Kamhan madateng isab na baha. Indasmagan isab ka makeseg nga hangin. Kamhan nadeeg ya lagkaw kay inlenepan ya ogdok. Nageba dazon ya toong lagkaw.²⁸Pagkakamhan ni Hisos pagmaymay kaniran nangabereng gajod ya mga mataed nga tao ²⁹Kay ya toong mga panaba labaw gazed ka gahem ka mga panaba na mga maistro ka tinoohan na mga Hodiyo.

¹Kamhan si Hisos garing ka pagkadulom na bobong. Kamhan mataod magasonod kanangiza nga mga tao. ²Lomaza pomanaw siran insogat ni Hisos ya tao nga kagiron. Paglohod naiza ka paahan ni Hisos minhangzo iza nga nagalaong nga Sinyor, kon somogot ko ka pagpangamozo nao kanmo dazawe mo ya kanaong masakit. ³Kamhan indazaw iza ni Hisos daw nagalaong nga Loy, ansogot hao. Nawara di ya masakit ka kanmong lawas. Kamhan nadazaw matood ya toong lawas.⁴Kamhan minsogo si Hisos nga nagalaong nga diri ko magpanan-og ka mga tao ka inhinang o kanmo. Pomanaw ko naa ngaro ka pari. Magpakita ko ka kanmong lawas diton. Kamhan magtoman ko ka balaed ni Moysis ka paghalad kay dazaw magmatood ya mga kataohan nga nawaraan di ko ka kanmong kagid.⁵Pagkakamhan kaiza minpasingod si Hisos ngaro ka longsod nga Kapirnaom. Pagdatong ka naiza doro may Romanhon nga kapitan na mga soldawo nga minsogat kanangiza. ⁶Kamhan minpakilooy iza nga nagalaong nga Sinyor, kon somogot ko tabangan mo hao ka kanaong sogoonon nga inbilin doro ka kanaong lagkaw. Diri iza makahingas ka toong lawas. magaol-ol gazod ya toong kalawasan. ⁷Minsambag si Hisos nga karohon ka nao iza dazaw ipatambal ya toong masakit.⁸Minsambag ya kapitan nga Sinyor, masipog hao kon ampanik ko doro ka kanaong lagkaw kay diri kon Hodiyo hao. Labaw gazod ka gahom ya kanmong panaba agon panabaen di mo lamang dini ka dalan dazaw mawara ya masakit na lawas na kanaong sogoonon doro ka lagkaw. ⁹Kay bisan hao antoman gazod hao ka sogo na minbaot kanao. Kamhan ansogo osab hao ka mga soldaw. Kon ansogo hao ka isa ka pagpanaw, antoo dazon iza. Kon ansogo hao ka isa ka pagkarini, antoo dazon iza. Kon ansogo hao ka isang oripon ka pagtrabaho, antoo dazon iza. ¹⁰Pagpakabati ka ni Hisos ka sambag na kapitan naborong iza kay bisan diri kon Yodayo ya kapitan dakola ya pagsarig naiza. Kamhan nagalaong si Hisos ka mga magasonod ka toong panaw nga ya pagsarig na kapitan dakola iton ka pagsarig na bisan sin-o nga kaliwat ni Israil.¹¹Timan-an mazo gazod ini nga mataod ya mga tao singod ka kapitan nga diri kon kaliwatan ni Israil. Kamhan ampakaon ya Nagagihit kaniran kay-an ka paghari naiza ka bag-ong kalibotan. Garing siran ka kasobayan daw salpan kay ansaro siran ka makaon iba kan Abraham daw si Isaak daw si Hakob nga mga karaang tao na mga Yodayo. ¹²Kamhan ya mga kaliwatan ni Israil nga diri ankilala kanao, diri ampasolod ya Nagagihit kaniran ka toong hol-anan. Basta iitsa siran ngaro ka kadoglomanan. Kamhan magapangkagot siran ka kanirang ngipon ka paghaza. ¹³Kamhan nagalaong si Hisos ka kapitan nga om-oli di ko ngaro kay natoman di ya pangamozo mo kanao kay mintoo ko kanao. Kamhan doro ka lagkaw madazaw di matood ya masakit na lawas na toong sogoonon.¹⁴Pagkakamhan kaiza minkaro si Hisos ka lagkaw ni Pidro. Pagdatong naiza may bozag nga ogangan ni Pidro nga nagabontag kay imbangkag gazod iza. ¹⁵Pagtagon ni Hisos ka alima na nabedlay inhowasan dazon iza ka toong hilanat. Kamhan minbangon iza kay ampakaon iza kan Hisos.¹⁶Pagkadelem kaiza impaarani kan Hisos ya mga mataed nga tao nga inboang na mga maonga. Pagsogo ni Hisos ka mga maonga mindalagan dazon siran. Imbahaw disab naiza ya bisan sin-o nga may mga masakit ka lawas. ¹⁷Na, ya mga hinang ni Hisos ani ya nakatoman ka panan-og ni Isayas nga karaang propita na Nagagihit. Kay kamhandini pon nagalaong si Isayas nga wani ya inlaong na Nagagihit mahitongod kan Kristo nga makapawara iza ka kaloza na kantang mga lawas. Kaw-en sab naiza ya mga masakit na kantang lawas.¹⁸Ani ini ya inlaong ni Isayas nga propita. Na, pagpakahimaan ka ni Hisos nga masara gazod nga kataod ya mga tao nga minlibot kanangiza insogo naiza ya toong mga sakop ka pagkandipi ka danaw. ¹⁹Na, ka wara pon siran maglood ka baloto may isang magtutudlo ka tinoohan na mga Hudiyo nga nagasogat kan Hisos. Kamhan nagalaong iza kan Hisos nga Maistro, an-iba gazod hao kanmo bisan hain ko magpanaw. ²⁰Minsambag si Hisos nga bisan ya mga miro may mga pogad niran ka pagpahimlay. Bisan ya mga manokmanok may mga haponanan niran. Piro wara gazod ya kanaong lagkaw nga pahimlazanan.²¹Kamhan ya isang sakop ni Hisos minlaong nga Nagagihit, tagadan mo hao naa kay ankaro pon hao ka kanaong ama nga mapatazay di iza. ²²Minsambag si Hisos nga ya mga lomon mo nga diri ansakop kanao ani komay magkaro ka kanmong ama kay singod siran ka mga napatay nga tao kay waray hena-hena niran mahitenged ka Nagagihit. Kamhan iko somakop ko kanao.²³Pagkakamhan kaiza minloon si Hisos ka baloto iba ya toong mga sakop. ²⁴Ka dizan pon siran ka tonga na danaw imbagzo gazod siran. Insapwan dazon na balod ya boloto daw malonod kontana piro natorog si Hisos. ²⁵Kamhan minsinggit ya toong mga sakop pagpokaw kanangiza nagalaong nga Magtutudlo, tabangi kami kay mangalomos di kita!"²⁶Minimata dazon si Hisos daw minlaong nga kay ono sa magakahaldok sa kamo? Goramay ka gazod ya kamazong pagsarig kanao. Kamhan minbangon iza daw minbazed ka hangin daw mga balod. Kamhan nalinaw matood ya tanan. ²⁷Kamhan naborong gazod siran daw namaglaong nga daw sin-o sa baza ini nga taohana? Kay bisan ya hangin daw ya mga baled antoo gazed ka toong pagbaheg!²⁸Kamhan minsangpet di siran ka lopa nga Gadara dipi ka danaw. Kamhan may dowang ka tao nga inhoropan gazod ka mga maonga nga minsogat kan Hisos. Garing siran ka mga lobong nga talangban kay ani ya kanirang hel-anan. Maiseg gazod siran agon nagakahaldok ya mga tao paglabay dizan ka dalan. ²⁹Pagpakakita niran kan Hisos minsinggit siran nga iko nga Manak na Nagagihit, kay ono say inkarini mo? Kontana diri mo kami pagdaegdaegen kay wara pon ya tirmino ka pagsilot kanami. Ani ini ya inlaong na mga maonga.³⁰Na, waton doro may nagapansongad nga kababozan. ³¹Kamhan minpakilooy ya mga maonga nga Hisos, kon magpadalagan ko kanami pahol-on mo kami doro ka lawas na mga baboy. ³²Minsambag si Hisos nga pomanaw kamo ngaro kaniran. Kamhan minpanaw ya mga maonga dizan ka lawas na dowang ka tao. Kamhan minhari siran ka mga baboy. Kamhan minpahidalagan ya tanan mga baboy ngaro ka pangpang nga ataas. Minpatiholog siran ngambaba ka danaw kamhan natibo siran pagkalomos.³³Kamhan nandalagan gazod ya mga magbantazay ka baboy ngaro ka kanirang longsod kay ampanan-og ka mga tao kon in-ono ni Hisos ya dowang ka tao nga inhoropan ka mga maonga. ³⁴Kamhan minkaro dazon kan Hisos ya mga mataod nga taga longsod kay ampakigkita siran kan Hisos. Pagdatong niran minhangzo siran kan Hisos dazaw ampanaw iza dizan ka kanirang lopa.

¹1Pagkakamhan kaiza minloon si Hisos ka baloto kay an-oli iza ka Kapirnaom nga toong holanandipi ka danaw. ²Pagdatong ka naiza doro may mga minkadokoza nga namaglahong ka tao nga diri mahingas ya lawas. Pagpakakita ka ni Hisos nga minsarig gazod siran kanangiza ka pagbahaw kaiton nga tao minlaong iza ka nabodlay nga Loy, diri ko magkawiod kay impasaylo di nao ya kanmong mga sala.³Na, dizan isab ya mga maistro ka tinoohan na mga Hudiyo. Pagpakabati ka niran ka inlaong ni Hisos ka paralitiko minlaong siran ka kanirang hena-hena nga garboso gazod si Hisos pagbakak nga iza ya Nagagihit. ⁴Mahagdam dazon si Hisos nga maonga ya kanirang hona-hona. Agon nangotana iza kaniran nga kay ono sa nga malain sa ya kamazong hena-hena kanao? ⁵Dini ka paralitiko singod ka masazon ya pagpasaylo ka toong mga sala kay diri mazo makita kon dizan pen ya toong mga sala kon wara di. Piro malised ya pagdazaw ka toong lawas kay makita dazon kon madazaw di iton kon diri pen. ⁶Koman ipakilala nao kamazo nga may gahom nao ka pagpasaylo ka mga sala na bisan sin-o nga tao kay hao gazod ya minhon-a ka bisan sin-o nga mahon-ang tao. Kamhan minsogo si Hisos ka paralitiko nga bomangon di ko. Lokoton di mo ya bontagan mo. Om-oli di ko ngaro ka lagkaw mo.⁷Kamhan minbangon matood ya paralitiko daw min-oli ngaro ka toong lagkaw. ⁸Pagpakakita ka na mga kataohan ka inhinang ni Hisos nagakahaldok siran. Insaza disab niran ya Naganihit kay iza ya minhatag ka gahem ka mga tao. ⁹Pagkakamhan kaiza min-azi si Hisos dizan ka opisina nga bayranan ka mga bohis na mga karga. Kamhan ya magsokotay ka mga bohis nga inngaranan kan Matiyo ani ya nakitan ni Hisos kay nagalo-to iza dizan ka toong opisina. Kamhan minlaong si Hisos kan Matiyo nga somakop ko kanao. Kamhan mintindog si Matiyo kay an-iba iza kan Hisos.¹⁰Kamhan ampakaon si Matiyo kan Hisos daw toong mga sinarigan. Min-intra disab dizan ya mga mataod nga magsokotay singod kan Matiyo daw ya mga iba pon nga salaan nga tao. ¹¹Ka nagakaon pon siran inpaniidan siran na mga magtutudlo na mga Yodayo. Na, ya ngaran na mga maistro ka tinoohan na mga Yodayo ani ya Parasiyo nga hopaw ya kanirang pagtoo. Kamhan nangotana siran ka mga sakop ni Hisos nga kay ono sa ya kamazong maistro minpakigsaro ka mga magsokotay daw ya mga salaan nga tao? Ani ini ya pangotana niran kay ya batasan na mga magsokotay ka bohis onay oswagan ya bohis.¹²Pagpakabati ka ni Hisos ka pagmahay niran minsambag iza nagalaong nga pamolingod ini nga ya mga tao nga madazaw ya lawas wara siran magpatambal basta kay ya mga masakiton. ¹³Magtoon kamo ka kahologan na daan pinasoyat naNagagihit nga nagalaong nga ya batasan nga magakalooy ka tao madazaw iton ka kamazong batasan nga onay magahalad ka ihazop paghawag mazo kanao. Ani ini ya inlaong na Nagagihit. Kamhan hao nga si Hisos wara hao magkarini ka pagtabang ka mga matadeng nga tao basta kay ya mga makasasala dazaw anhinelsel siran ka kanirang mga sala.¹⁴Pagkakamhan kaiza minkarini kan Hisos ya mga sakop ni Howan nga Magbenzagay kay ampangotana siran kan Hisos nga kay ono sa wara magtoman ya kanmong mga sakop ka batasan ka pag-anget ka makaon singod kanami daw ya mga Parasiyo? ¹⁵Minsambag si Hisos pagpamolingod nga ya kanaong mga sakop singod siran ka mga magkombitihay. Kamhan dizan kaniran hao ya singod ka banahon kay ka dini pon hao kaniran diri siran an-anget ka makaen. Piro may tirmino nga kaw-en hao garing ka kanaong mga sakop anipon omanget siran ka makaon kay mabog-at ya kanirang hinawa.¹⁶Wani ya pamolingod dazaw mahagdam kamo nga ya kanaong sondo diri makaangay ka mga balaod nga tinoohan na mga Yodayo. Kay ya kanaong sindo singod iton ka bag-ong panapton. Kamhan ya mga balaod na mga Yodayo singod iton ka bado nga nadonot di. Na, pagtopak nita ka nadonot nga bado diri di gamiton ya bag-ong panapton kay basi kay-an ka paglaba ka bado ankozos ya itopakay nga bag-ong panapton. Kamhan magakagisi ya daan bado pagdobli.¹⁷Bisan ya bag-ong bino nga magabora pen diri ihalin ka daan lon-anan nga kindal na kanding kay kon bogkoton ya ba-ba na lon-anan magisi gazod iton. Kamhan an-awas ya bino daw kanogon sab ya len-anan nga magisi. Agon gamiten gazed ya bag-ong lon-anan. Ani ini ya pamolingod ni Hisos ka mga tao dazaw mahagdam siran nga ya toong sindo diri makaangay ka mga balaod nga tinoohan na mga Yodayo.¹⁸Pagsondo pon naiza kaniran may isang oloolo ka singbahan na mga Yodayo nga minkarini kan Hisos. Paglohod naiza dizan kan Hisos minlaong iza nga Sinyor, bag-o pon nga napooy ya kanaong maanak nga daragahay. Kon mahimo ya boot mo ibahan mo hao ngaro ka kanaong lagkaw dazaw mabohi iza kon tagenan di mo ya toong lawas. ¹⁹Kamhan min-iba si Hisos kanangiza. Nangiba disab ya toong mga sakop.²⁰Na, ka nagapanaw pen siran ngaro may nagalopog kan Hisos nga babazi. Nagalisod gazod iza kay sokad ka napolo may dowang ka toig wara maghonong ya toong pagdog-a. Na, pagsonod ka naiza ka panaw ni Hisos mintoldok iza ka pilos na toong bado. ²¹Kay nagalaong iza ka toong hena-hena nga bisan anikay intoldokan nao ya toong bado maolian gazod ya kanaong lawas. ²²Na, pagtoldok naiza ka bado ni Hisos minlingi si Hisos daw minkita ka babazi. Kamhan minlaong iza nga Day, diri ko magkawiod. Basta ya pagsarig mo kanao madazaw di ya lawas mo. Pagkakamhan paglaong ni Hisos madazaw di matood ya lawas na babazi.²³Na, pagdatong ni Hisos ka lagkaw na oloolo nga napatazan nakitan naiza ya mga mataod nga masamok gazod ka paghaza. ²⁴Kamhan minlaong iza kaniran nga lomogwa kamong tanan kay diri kon pooy ya bata. Igo ka lamang iza matorog. Kamhan inkatawhan niran si Hisos.²⁵Pagpalogwa ka niran minsolod si Hisos. Intagonan naiza ya alima na babazi. Kamhan minbangon iza. ²⁶Pagkakamhan kaiza ya panan-og mahitongod ka inhinang ni Hisos mindatong di iton dizan ka mga bariyo nga libot ka longsod nga Kapirnaom.²⁷Na, pagpanaw ni Hisos dizan ka longsod may dowang ka tao nga minsonod kanangiza. Nabota sirang dowa. Kamhan inhawag niran si Hisos nagalaong nga iko nga kaliwat ni Dabid nga karaang hari, kaloy-i intawon kami! ²⁸Pagdatong ni Hisos ka lagkaw mindatong disab sirang dowa nga nabota. Kamhan nangotana iza kaniran nga daw antoo kamo nga makabahaw hao ka kamazong mata? Minsambag siran nga Ginoo, antoo gazod kami.²⁹Kamhan intoldokan naiza ya kanirang mata daw nagalaong nga nadazaw di ya kamazong mata kay dakola gazed ya pagsarig mazo kanao. ³⁰Kamhan nabahaw matood ya kanirang mata. Minsogo si Hisos kaniran nga diri kamo magpanan-og ka mga tao mahitenged ka inhinang o kamazo. ³¹Ambaza kay dizan ka mga bariyo minpanan-og gazed siran nga indazaw siran ni Hisos. Kamhan mindakola di ya ngaran ni Hisos dizan kaiton nga mga dapit.³²Na, pagpanaw ka na dowang ka amaama garing kan Hisos may mga minkandkoza nga nagadara ka amaama nga diri makapanaba kay inharian iza na isang maonga. ³³Na, pagpaiwat ka ni Hisos ka maonga nakalitok dazon ya tao ka pagpanaba. Nangaborong ya tanang mga tao daw namaglaong nga kita nga mga kaliwatan ni Israil, sokad wara pen nita makita ya hinang nga singed kaini. ³⁴Basta kay ya mga Parasiyo min-arig siran kan Hisos. Kamhan minlaong siran nga inharian si Hisos na tag-iza ka mga maonga agon may gahom naiza ka pagbogaw ka mgamaonga.³⁵Pagkakamhan kaiza minbisita si Hisos ka bisan ono nga longsod daw bariyo kay dalem ka mga singbahan na mga Hudiyo nagatoldo iza ka mga tao daw pangsangyaw ka pagmaymay mahitenged ka pagpasakop na Nagagihit ka mga tao. Indazaw sab naiza ya bisan ono nga masakit daw kaloza na lawas na tao. ³⁶Pagsolong pon ni Hisos ka mga mataod nga tao inkaloyan naiza siran kay mataod ya kanirang kalisod. Kamhan waray antabang kaniran. Singod siran ka mga karniro nga nangalaag kay waray nagaaligara kaniran.³⁷Kamhan minlaong iza ka toong mga sakop nga ya mga tao nga gosto ansakop kanao mataod siran piro talagsa ka ya mga ansindo kaniran mahitongod kanao. Kamhan singod siran ka mga homay nga hinog di. Haloag gazed ya homazan piro talagsa ka ya mga magaani. ³⁸Agon hangzoon mazo ya tag-iza ka anihen dazaw dogangan naiza pagpadara ka mga magaani ka pag-ani kaiton.

¹1Na, pagkakamhan kaiza inpatipon ni Hisos ya toong mga sinarigan nga napolo may dowa siran. Kamhan intagan siran naiza ka gahem ka pagpadalagan ka mga maonga nga nagahari ka hinawa na mga tao. Intagan isab siran ka gahem ka pagpanbahaw ka bisan ono nga masakit daw kaloza na lawas na tao.²Na, ya ngaran na mga sinarigan ani ya apostolis. Ya primiro ani si Simon nga indagnazan kan Pidro. Sonod si Andris nga toong manghod. Kamhan ya maglomon nga si Santiago daw si Howan. Mga anak siran ni Sibidiyo. ³Kamhan si Pilipo daw si Bartolomi daw si Tomas daw si Matiyo nga magsokotay ka mga bohis. Kamhan si Tadiyo daw si Santiago nga anak ni Alpiyo. ⁴Kamhan si Simon nga masinopaken ka hari nga Romanhon daw si Hodas nga taga Kariyoti ani ya an-edlaw kan Hisos. Ani ini ya mga ngaran na mga sinarigan ni Hisos nga napolo may dowa siran.⁵Kamhan insogo siran ni Hisos nagalaong nga diri kamo mag-azi dizan ka mga dalan na mga tao nga diri kon Hiduyo daw ya mga bariyo nga hel-anan na mga taga Samariya. ⁶Magsinged di kamo hinoa ngaro ka kamazong angay nga mga kaliwatan ni Israil kay mga masinopaken siran ka Nagagihit. Nangalaag siran singed ka batasan na mga karniro nga bohien na tao. ⁷Agon mangaro di kamo kaniran daw magwali nga magalaong nga mindateng di ya hari nga pinili na Nagagihit.⁸Kamhan panbahawen sab mazo ya kanirang mga masakit. Bohien mazo ya mga patay pagbalik garing ka lebeng. Dazawen mazo ya lawas na mga kagiden. Magpadalagan kamo ka mga maonga nga magahari ka hinawa na mga tao. Pagkakamhan ni Hisos pagsogo kaniran minlaong iza nga intagan kamo ka kanaong gahem nga waray bazad. Agon antabang disab kamo ka mga tao nga waray bazad. ⁹Diri kamo maghabay ka kowarta bisan singko sintabos. ¹⁰Pikit ka lawas ka lamang ya dara mazo, waray lain harominta kay ya tarabahantikinahanglan soholan ka pagkaen.¹¹Na, bisan ono ya datnganan mazo nga longsod kon bariyo mangita kamo ka tao nga an-abiabi kamazo. Kamhan maghela kamo dizan ka toong lagkaw hasta ka pagpanaw mazo doro ka mga laing bariyo. ¹²Paghawag mazo ka tag-iza ka lagkaw maglaong kamo nga magmalinawen kamo ka paghela dini. ¹³Kon ampapanik siran kamazo ibilin mazo kaniran ya magazon nga hena-hena. Piro kon diri siran anpapanik kamazo diri kamo maghatag ka hena-hena nga magazon.¹⁴Hinoa izabzab mazo ya abog dizan ka kamazong paa dazaw mahagdam siran nga silotan siran kay-an kay diri siran an-angay ka sindo na Nagagihit pagpanalinga. ¹⁵Timan-an mazo gazod ini nga kay-an ka tirmino na Nagagihit ka pagbetang ka silot kamga tao, ya silot naiza kaniran labaw pon iton ka silot ka mga taga Gomora daw taga Sodoma nga maongang longsod kawandini pon.¹⁶Manalinga kamo! Pakarohon kamo nao ka mga salaan nga tao. Singed siran ka mga maiseg nga ido. Kamhan dizan kaniran ya batasan mazo singed ka batasan na mga karniro nga waray kaiseg. Agon kinahanglan magpakalaki kamo paglikay ka batasan nga maonga dazaw diri kamo madaeg. Magbineetan kamo. ¹⁷Maghamarag kamo kay dadhen kamo niran doro ka hokmanan bisan waray sala mazo. Kamhan dalem ka mga singbahan na mga Hudiyo pamagbonalan isab kamo. ¹⁸Pansangilan sab kamo niran dizan ka mga lain tao nga magahari ka lopa na mga Hudiyo. Ani ini ya kanirang hinang kamazo kay hao ya insakopan mazo. Agon panan-ogan mazo siran daw ya mga diri kon Hudiyo mahitenged kanao.¹⁹Kamhan diri kamo magkawied kon ono ya isambag mazo kaniran. Kay antandeg ya Nagagihit ka kamazong hena-hena kamhan panabaen mazo ya mga panaba nga garing ka Nagagihit. ²⁰Kay diri kon garing ka hena-hena mazo ya pagpanaba mazo kay garing gazod ka Ispirito na Nagagihit nga Ama mazo.²¹Na, wani pon ya pananog mahitenged ka batasan na mga tao kay-an. Dadhen na isa ya toonglomon dizan ka mga laing tao dazaw patazen. Dadhen sab na ama ya toong maanak dazaw patazen. Masinopaken ya mga bata ka kanirangmga ginikanan. Kamhan garing ka sogo na bata patazen ya ginikanan. ²²Magakontarahan sab kamo na tanan mga tao kay hao ya insakopanmazo. Na, bisan sin-o ya makaanget ka mga pagdaegdaeg keteb ka pagkatapos naiton nga mga kalised, mahatagan iza ka bag-ong kinabohinga diri mawara. ²³Kon magadaegdaegen kamo dizan ka isang bariyo domalagan kamo ngaro ka laing longsod. Panabaen ta kamo nga ka diripon kamo makadateng ka tanan mga bariyo ka lopa nga Israil ambalik gazod hao kamazo.²⁴Panan-ogan ta kamo nga ya tao nga nagatoon diri kon labaw iza ka toong maistro. Bisan ya oripen diri iza makapalabaw ka toong amo. Panan-ogan ta kamo nga ya tao nga nagatoon diri kon labaw iza ka toong magtutudlo. Bisan ya oripen diri iza makapalabaw ka toong amo. ²⁵Agon ya kaazi na tao nga nagatoon singed iton ka kaazi na toong maistro. Bisan ya kaazi na oripen singed iton ka kaazi na toong amo. Hao nga kamazong maistro kon magngaran ya tao kanao kan Satanas nga tagiza ka mga maonga labi pen sab ya pagngaran niran kamazo ka maonga.²⁶Piro diri kamo magkahaldek kaniran kay bisan ono ya kanirang mga tinago mahagdaman gazod kay-an. ²⁷Na, ya pagsindo nao kamazo dizan ka waray laing makabati ipananog mazo doro ka mga tao.²⁸Diri kamo magkahaldek ka mga tao nga ampatay ka lawas mazo kay bisan patazen niran ya lawas mazo, ya ispirito mazo diri gazod mapatay niran. Magkahaldek kamo hinoa ka Nagagihit kay iza ya makapatay ka kamazong ispirito daw lawas doro ka impirno. ²⁹Kamhan dakola isab ya kalooy na Nagagihit ka mga tao. Diri iza malipat ka bisan ono nga inhinang naiza. Bisan ya mga maza, ya pagpalit ka dowang bolos zis sintabos ka lamang. Kamhan waray isa kaniran nga maholog ka lopa kon waray pagtogot na Nagagihit nga kamazong Ama. ³⁰, ³¹Mahal kamo ka pagkamahal na mga maza. Agon diri kamo magkahaldek ka hinang na mga tao kamazo kay aligarahen gazod kamo na Nagagihit. Bisan ya bohok dizan ka olo mazo, imbilang na Nagagihit daan kon pirang ka legas ya bohok mazo.³²Na, dizan ka mga tao bisan sin-o ya ankilala kanao siran gihapon ya makilalhan nao dizan ka kanaong Ama nga nagahela daked ka langit. ³³Piro bisan sin-o ya anlimed kanao dizan ka mga tao, iza gihapon ya inlimed nao dizan ka kanaong Ama nga nagahela daked ka langit.³⁴Diri kamo maghena-hena nga ya pagkarini nao dini ka kalibotan anhatag ka pagpakaangay dizan ka isa daw isa nga tao. Hinoa ya pagkarini nao ani ya sinogdan ka pagkaaway ka isa daw isa kay ya isa antoo kanao piro ya isa diri antoo kanao. ³⁵Kamhan dizan ka isang pamiliya ampakig-away ya maanak nga amaama ka toong ama. Ampakig-away sab ya anak nga babazi ka toong ina. Ampakig-away sab ya ogangan nga babazi ka toong ogangan nga bozag. ³⁶Ya mga lomon na tao ani baza ya toong mga kaaway. Kay ya isa antoo kanao piro ya isa diri antoo kanao.³⁷Kon anpalabaw ya tao ka toong pag-azak ka ama daw ina ka kaazak naiza kanao diri mahimo ya pagngaran naiza kanao nga Magbabaja. Kon anpalabaw ya tao ka toong pag-azak ka maanak ka kaazak naiza kanao diri mahimo ya pagngaran naiza kanao nga Magbabaja. ³⁸Kon diri ampadazon ya tao pagtoman ka kanaong mga sogo kay basi patazen iza diri mahimo ya pagngaran naiza kanao nga Magabaja. ³⁹Kay kon ambiza ya tao kanao dazaw diri iza patazen diri iza mahatagan ka bag-ong kinabohi. Piro kon ampadazon ya tao pagtoman ka kanaong mga sogo bisan kon patazen pon iza, mahatagan gazed iza ka bag-ong kinabohi nga diri mawara.⁴⁰Ya tao nga andawat kamazo andawat sab iza kanao. Kamhan ya andawat kanao andawat isab kanangiza nga minpakarimbaba kanao. ⁴¹Ya andawat ka propita kay nagapasabot iza ka matood nga garing ka Nagagihit mahatagan sab ya andawat ka primyo singed ka primyo ngaindawat na propita. Ya andawat ka madazaw nga tao kay nagabatasan iza ka madazaw mahatagan sab ya andawat ka primyo singed ka primyonga indawat na madazaw nga tao.⁴²Bisan sin-o ya antigis ka kanaong sakop ka matignaw nga sapa bisan labing obos ya sakop nga intigisan, mahatagan isab ya antigis ka primyo.

¹Pagkakamhan ni Hisos pagsindo ka toong mga sinarigan nga napolo may dowang ka tao siran, minpasinged iza ngaro ka mga iba nga lobohan na mga hudiyo kay ansindo pon iza kaniran dawipasabot sab ya mga panaba na Nagagihit. ²Na, si Howan nga Magbenzagay doro pen iza ka prisohan. Kamhan pagpakabati ka naiza ka mga inhinang ni Kristo impakaro naiza ya toong mga laibahan kan Kristo kay ampapangotana ³Kon matood gazod nga iza ya pinili na Nagagihit kon antagad pon siran ka isa.⁴Minsambag si Hisos kaniran nga bomalik kamo ngaro kan Howan. Panan-ogan iza ka mga nabatian mazo dini kanao daw ya mga napaniidan. ⁵Kay hao ya magahatag ka pagkita ka mga nabota. Indazaw sab nao ya lawas na mga napiang. Indazaw sab nao ya lawas na mga kagiden. Minhatag hao ka pagpakabati ka mga bongol. Imbohi sab nao ya mga napatay nga tao. Ipasabot sab nao ka mga pobri ya sindo mahitongod ka Nagagihit. ⁶Kon diri andowadowa ya tao pagsarig kanao panaranginangazed iza na Nagagihit ka madazaw.⁷Pagpakaoli ka na mga sakop ni Howan minpangotana si Hisos ka mga tao mahitongod kan Howan nga nagalaong nga izang mahon-a pon pagkaro mazo dizan kan Howan doro ka kamingawan daw ono ya tozo mazo? Daw anseleng kamo kontana ka tigbaw nga nagapapalidpalid ka hangin? Diri. ⁸Daw anseleng kamo kontana ka tao nga minbado ka mga mahalen? Diri. Kay nagahola ya singed kaiton dalem ka lagkaw na hari.⁹Daw minkaro kamo dazaw anseleng kamo ka barangira na Nagagihit? Matood iton. Kamhan si Howan labaw pon iza ka mga iba nga propita na Nagagihit. ¹⁰Kay iza ya inpanan-og ni Isayas nga nagalaong nga kawandini pon minlaong ya Nagagihit nga may ipakaro nao nga ipahon-a nao dazaw anandam iza ka pagdatong na kanaong Anak. Ani ini ya inlaong na Nagagihit mahitongod kan Howan.¹¹Indogangan pon ni Hisos paglaong nga pasabton nao kamo nga bisan sin-o ya propita nga natao dini ka kalibotan waray nakalabaw kan Howan. Piro dini kanao koman bisan sin-o ya labing obos nga minsakop kanao labaw iza kan Howan kay ya kasabtan naiza ka kanaong mga inhinang dakola pon iton ka nasabotan ni Howan. ¹²Na, sokad ka pagwali ni Howan hangtod koman mataod ya mga ansakop kontana kanao. Piro mataod sab ya mga ambalabag kaniran.¹³Kay ya daan balaod ni Moysis daw ya tanan mga propita na Nagagihit hangtod ka pagdateng ni Howan nagapasidaan siran pagpanan-og mahitongod ka pag-angay na Nagagihi ka mga tao. ¹⁴Kon mintoo di kamo ka kanirang mga panan-og antoo disab kamo nga si Howan ani gazod ya singod kan Iliyas nga impanan-og niran daan nga ambalik ka. ¹⁵Na, kamo nga mga manalingahay, kinahanglan nga masabtan mazo ini nga mga panaba na Nagagihit.¹⁶Kamhan indogangan pon ni Hisos pagsindo kaniran nagalaong nga ya mga kaliwatan na mga Hudiyo singod siran ka kabataan nga nagadegza dizan ka pawa. ¹⁷Kamhan ya isang tipon nagamahay ka isang tipon nga nagalaong nga nagahoyop kami ka bonabon piro wara kamo magsazaw. Nagabaya-baya isab kami paglingaw piro wara kamo maghaza.¹⁸Singod kaiton ya batasan na mga Hudiyo kay izang pagkarini ni Howan nagaanget iza pagkaen, wara iza mag-inem ka makahebeg nga imnenen. Kamhan minlaong ya mga tao nga inboang si Howan na mga maonga. ¹⁹Kamhan hao ya minsonod kan Howan.Nagakaen hinoa hao daw min-inem. Kamhan minbetangbetang ka mga tao kanao nga selengi, waton ya maasap daw palahebeg. Nagapan-iba sab iza ka mga magsokotay ka bohis daw ya mga iba nga tao nga makasasala. Piro nagalaong hao kamazo nga ya mga nakaangay ka pagmaymay na Nagagihit sirankay mahagdam nga matadeng ya kanaming batasan ni Howan.²⁰Kamhan minsogod si Hisos pagbaldeng ka mga taga lobohan nga mga dapit nga inhinangan naiza ka mga madazaw nga kaberenganan kay wara siran magbiza ka mga maongang hinang niran bisan impakita naiza ya toong gahom paghinang naiza ka madazaw dizan kaniran. Minbaldeng iza kaniran ²¹nagalaong nga kamo nga taga Korazin daw taga Bitsayda, magalisod gazod kamo kay-an! Kay bisan minkita kamo ka kanaong inhinang nga madazaw nga kaberenganan wara kamo maghinelsel ka kamazong mga sala. Kon ipakita nao ini nga mga magazong hinang dizan ka mga taga Tiro daw taga pagmaymay nga mga maongang tao kawandini pon, magahinang gazod siran ka batasan niran ka paghinelsel nga ambado ka maongang bado. Kamhan ambo-bo sab siran ka alibo ka kanirang olo ka paghinelsel. ²²Agon kay-an ka tirmino na Nagagihit ka pagbetang ka silot ka mga tao ya silot naiza kamazo labaw pon iton ka silot naiza ka mga taga Tiro daw taga pagmaymay.²³Minbaldeng sab si Hisos ka mga taga lobohan nga Kapirnaom nagalaong nga kamo nga mga taga Kapirnaom, bisan nagahola hao dizan kamazo diri gajod kamo maghona-hona nga dakola ya kamazong ngaran dizan ka Nagagihit. Kay ipaababa gajod ya ngaran mazo kay wara kamo magbiza ka maongang hinang mazo. Madara gajod kamo baba ka inpirno. Kay kawandini pen kon inhinang nao ya mga madazaw nga kaberenganan doro ka maongang longsod nga Sodoma singod ka mga inhinang nao doro kamazo madazaw pon itong lobohan, diri masonog. ²⁴Agon kay-an ka tirmino na Diyos ka pagbetang ka silot ka mga tao ya silot naiza kamazo labaw pen iton ka silot naiza ka mga taga Sodoma.²⁵Pagkakamhan kaiza minlaong si Hisos ka toong Ama nga Nagagihit nga Ama nao nga tag-iza ka katawtahawan daw kalibotan, palad pon kay ya mga tao nga hopaw ya kanirang pagtoo wara mo siran pasabota ka kanaong sindo bisan kon ataas ya kanirang grado. Piro ya mga ansarig kanao bisan geramay ya kanirang kahagdamanan siran ya impasabot mo ka kanaong pagmaymay. ²⁶Madazaw kay iko ya minponto kaiton. Ani ini ya inlaong ni Hisos ka toong Ama. ²⁷Kamhan mindogang iza pagpanaba ka mga tao nagalaong nga hao ya insarigan na kanaong Ama ka tanan mga inhinang naiza. Hosto ya nasabtan naiza kanao. Hosto gihapon ya nasabtan nao kanangiza. Dizan ka bisan sin-o ya impili nao ipasabot nao ya batasan na kanaong Ama.²⁸Kamo nga mga mabeg-at ya hena-hena ka pagkawiod, somakop kamo kanao kay papahimlazen ta kamo. ²⁹Komoo kamo ka kanaong mga pagmahay. Maghaod isab kamo ka kanaong batasan kay mahetek ya kanaong batasan, diri hao ampalabaw kamazo. Kamhan malinaw ya kamazong hinawa. ³⁰Kay masazon ka ya pagtoman ka kanaong mga pagmahay, diri kon malisod ya paghaod ka kanaong batasan. Ani ini ya pagmahay ni Hisos ka mga tao.

¹Na, may isang ka Sabado dizan ka homazan nagaazi si Hisos. Na, ya Sabado ani yatigpahimlay na mga Hudiyo. Kamhan imbongtas ya toong mga sinarigan. Agon nagapangitlo siran ka mga homay kay kanen niran. ²Pagpakapaniid ka na mga Parasiyo kanin Hisos minbaheg siran nagalaong nga paka sulung! Minlapas gajod ya kanmong mga sakop ka balaed na Nagagihit kay koman nga tigpahimlay min-ani baza siran ka homay.³Minsambag si Hisos nga mahagdam kamo daan ka inhinang ni Dabid nga karaang tao na mga Hudiyo. Kamhan pon imbengtas iza daw ya toong kaibahan kay inlopog siran na kanirang mga kaaway. ⁴Agon pagdatong niran ka lagkaw nga pangamozoanan ka Nagagihit nangazo siran ka makaon. Kamhan minkaon siran ka tinapay nga inhalad daan ka Nagagihit. Bisan ya mga pari anikay ankaon kaitong mga tinapay, wara si Dabid maglapas ka balaed na Nagagihit ka pagkaon naiza. Kay ya pagtabang ka kinahanglanen na tao ani say labaw ka kamazong mga balaod nga mabeg-at.⁵Daw wara kamo magbasa ka daan balaed na Nagagihit nagalaong nga dizan ka dakolang lagkaw nga pangamozoanan ka Nagagihit kada aldaw nga tigpahimlay nagatarabaho ya mga pari pagpan-ihaw ka mga ihaladay ka Nagagihit. Bisan nagatarabaho siran ka aldaw nga tigpahimlay wara siran maglapas ka balaed na Nagagihit. ⁶Sabten mazo ini nga mindateng di hao dini kamazo. Labaw hao ka pagkalabaw na mga balaod mazo mahitongod ka dakolang lagkaw ngapangamozoanan ka Nagagihit.⁷Wani ya kanaong sindo nga ya batasan nga nagakalooy ka tao madazaw iton ka kamazong batasan onay nga magahalad ka ihazep paghawag mazo ka Nagagihit. Piro wara gajod kamo makasabot kaini nga sindo kay kazina mindaot-daot kamo ka kanaong mga sakop bisan waray sala ka pagpangitlo niran ka mga homay. ⁸Na, hao ya anponto kon ono ya madazaw nga hinang na tao ka aldaw nga tigpahimlay kay hao ya minhon-a ka bisan sin-o nga mahon-ang tao. Ani ini ya sambag ni Hisos ka mga Parasiyo.⁹Pagkakamhan kaiza minlargo si Hisos ngaro ka singbahan na mga Hudiyo. Kamhan minsolod iza. ¹⁰Na, dizan disab may tao nga diri mahingas ya pikas nga toong alima. Kamhan nagapaniid ya mga maistro ka tinoohan na mga Hudiyo kan Hisos kay awazen iza niran kontana. Agon nangotana siran kan Hisos nga ya balaed na Nagagihit mahitongod ka aldaw nga tigpahimlay daw itogot ka pagbahaw ka lawas na tao kon diri?¹¹Minsambag si Hisos nga simpan may kamazong bohiun nga karniro. Kamhan naholog iton dalom ka gahong. Na, bisan aldaw nga tigpahimlay kaiza batonon mazo gajod ya bohiun nga naholog dalom ka gahong. ¹²Na, mahal gajod ya tao ka pagkamahal na bohiun. Agon gosto ya Nagagihit nga antabang kita ka magakinahanglan ka aldaw nga tigpahimlay.¹³Kamhan minsogo iza ka tao nga diri mahingas ya alima nga Loy, henaten mo ya alima mo. Kamhan inhenat matood naiza ya toong alima kay minbalik dazon ya kabaskog na toong alima singod ka karig-en na isang alima. ¹⁴Pagkakamhan kaiza minpanaw dazon ya mga Parasiyo dazaw nansabot siran nga patazen niran si Hisos.¹⁵Mahagdam si Hisos ka kanirang sabot agon minpanaw iza iba gihapon ya mga mataod nga tao. Kamhan min-iba iza kanirang tanan. ¹⁶Minsogo sab iza kaniran nga diri kamo magpanan-og ka mga tao mahitongod kanao. ¹⁷Na, ya batasan ni Hisos ani ya nakatoman ka panan-og ni Isayas nga karaang propita na Nagagihit. Kay kawandini pon nagalaong iza nga¹⁸Wani ya inlaong na Nagagihit mahitongod ka batasan ni Hiso Kristo nagalaong nga selengi mazo ya kanaong sinogo nga impili nao daw naazakan. Nakasaza gajod iza kanao. Anhatag hao kanangiza ka kanaong Ispirito. Kamhan ipasabot naiza ka mga diri kon Hudiyo nga diri siran masilotan ka kanirang mga sala kon antoo siran kanangiza.¹⁹Ya toong batasan pagpanaba ka mga tao diri magalalis, diri kon maiseg ya toong panaba. Dizan ka mga dalan na longsod diri iza andakola ka toong saba. ²⁰Antabang iza ka tao nga maloza di ya pagsarig kay diri naiza barien ya tigbaw nga baliko di. Diri naiza parengen ya segà nga hapit di maparong. Magapadazon iza ka toong tarabaho keteb ka tirmino na Nagaggihit ka pagsilot ka mga diri antoo kanangiza. ²¹Kamhan iza ya magatagadan na tanan mga tao. Ani ini ya daan insoyat ni Isayas mahitongod ka batasan ni Kristo.²²Pagkakamhan kaiza may mga minkadakoza nga nagaated kan Hisos ka tao nga nabota daw amang kay inharian iza na maonga. Imbahawan iza ni Hisos. Kamhan nakalitok matood ya tao hasta makakita dazon. ²³Kamhan nangabereng gajod ya mga tao daw nagalaong nga si Hisos daw iza matood ya kaliwat ni Dabid nga kantang karaan?²⁴Na, pagpakabati ka na mga Parasiyo minsora siran paglaong nga si Hisos may gahem naiza ka pagbogaw ka mga maonga kay inharian iza ni Satanas inngaranan sab kan Bilsibol nga tag-iza ka mga maonga. ²⁵Mahagdam si Hisos ka kanirang hona-hona agon minsambag iza kaniran nga pamolinged ini nga kon awazon na hari ya toong mga sinogo mapildi gajod ya hari. Kon ampakig-away ya isa daw isa dizan ka isang longsod mapildi ya longsod. Kon ampakig-away ya isa daw isanga lomon dizan ka isang pamiliya mapildi isab ya pamiliya.²⁶Agon kon anbogaw si Satanas ka toong kaogaringen nga ispirito dizan ka tao mapildi si Satanas. ²⁷Minsajop kamo kay bisan ya mga sakop mazo nga mga Parasiyo pagpabogaw niran ka mga maonga mahagdam siran nga garing ka Nagagihit ya kanirang gahom, diri kon garing ka Bilsibol. Agon ansombong siran kamazo ka bakak.²⁸Minsazep gajod kamo kay ya Madazaw nga Ispirito na Nagagihit ani ya mintabang kanao ka pagpabogaw ka mga maonga. Kamhan ipasabot di na Nagagihit kamazo nga dini kamazo mindateng di gajod ya hari nga pinili na Nagagihit. ²⁹Pamolingod ini nga dizan ka lagkaw na kesgan nga tao kinahanglan ektan ya kesgan nga tao anipen kawaten ya toong mga betang. Singod si Satanas ka kesgan nga tag-iza ka lagkaw. Hao kay nakadaeg kan Satanas. Agon papanawen disab nao ya toong mga sinogo dizan ka tao. ³⁰Indogangan pen ni Hisos paglaong ka mga Parasiyo nga kamo nga mga Parasiyo, magtaremdem kamo nga ya mga diri ansakop kanao ani ya ansopak kanao. Ya mga diri antabang ka mga tao ka pagsakop kanao ani ya nakalaag ka mga tao.³¹Bisan ono ya sala na mga tao daw ya pagpanaba niran ka maonga mahitenged ka Nagagihit, kon anhinelsel siran pasaylohon siran na Nagagihit. Piro ya pagpanaba niran ka maonga mahitongod ka Madazaw nga Ispirito na Nagagihit, diri gajod pasaylohon na Nagagihit ya kanirang mga sala. ³²Bisan sin-o ya ampanaba ka maonga mahitongod kanao, kon anhinolsol iza pasaylohon nao. Piro bisan sin-o ya ampanaba ka maonga mahitenged ka Madazaw nga Ispirito na Nagagihit, diri gajod iza pasaylohon na Nagagihit, bisan koman bisan kawanihen ka diri makapasaylo ya Nagagihit. Ani ini ya inpanaba ni Hisos kay minlaong ya mga Parasiyo nga inharian si Hisos na mga maonga.³³Kamhan indogangan pon ni Hisos pagpamolinged ka mga Parasiyo nagalaong nga ya liwaan nga waray kasakit mamonga iton ka madazaw nga bonga. Piro ya liwaan nga masakiton diri mamonga ka madazaw nga bonga. Ya bonga na liwaan ani ya makilalhan ka kahimtang na liwaan. ³⁴Lingod iton kamazo. Nagabatasan isab kamo singod ka mga halas nga polos maonga ya batasan. Diri kamo mahagdam pagpanaba ka madazaw kay maonga ya kamazong boot. Kay bisan ono ya panaba na tao garing iton ka toong hena-hena. ³⁵Kon madazaw ya toong huna-huna, madazaw isab ya toong mga panaba. Kon maonga ya toong huna-huna, maonga gihapon ya toong mga panaba.³⁶Sabton mazo ini nga kay-an ka pagdatong na tirmino na Nagagihit ka pagsilot ka mga tao silotan matood naiza ya mga tao nga minpanaba ka mga panaba nga waray polos. ³⁷Kay kon madazaw ya mga panaba mazo diri kamo masilotan piro kon maonga ya mga panaba mazo silotan matood kamo.³⁸Pagkakamhan kaiza may inlaong pon na mga maistro ka tinoohan na mga Hudiyo daw ya mga Parasiyo. Minlaong siran kan Hisos nga Maistro, ipakita mo kanami ya timaan dadaw mahagdam kami nga garing ko matood ka Nagagihit. ³⁹Minsambag si Hisos nga ampangazo kamo kanao ka timaan kay mga salaan sa kamo nga tao. Imbizaan disab mazo ya pagtoo mazo ka matood nga Nagagihit. Anikay timaan kamazo ya singod kan Zona nga karaang propita na Nagagihit. ⁴⁰Kay kay-an ya pagkabohi nao pagbalik garing ka lobong singod iton ka pagkabohi ni Zona garing dalem ka tinai na dakolang isda. Kay kawandini pen tolong ka aldaw ya toong paghela dalem ka tinai na dakolang isda. Na, kay-an ka pagkapatay nao tolong ka aldaw gihapon ya kanaong paghela dalem ka lebnganan. Kamhan mabohi hao pagbalik.⁴¹Pagwali ni Zona ka mga taga Ninibi nga daan longsod minhinelsel siran ka kanirang mga sala. Agon kay-an ka paghokom na Nagagihit ka mga tao ya mga taga-Ninibi ani ya ansombong kamazo kay bisan mindatong di hao kamazo wara kamo magbiza ka kamazong mga sala bisan labaw ya kanaong pagwali ka pagwali na karaang propita nga si Zona.⁴²May karaang rayna isab nga taga timogan iza. Kamhan aro ya toong pagpanaw ka pagpanalinga ka pagmaymay na karaang hari nga si Salomon. Agon ansombong iza kamazo kay-an ka paghokom na Nagagihit ka mga tao kay bisan labaw ya kanaong pagsindo ka pagkalabaw na pagsindo ni Salomon wara kamo magpanalinga kanao.⁴³Kamo nga mga Parasiyo, ya batasan mazo magadogang gazed ya kamazong pagpakasala. Singod kamo ka tao nga minpanaw di ya maongang ispirito garing kanangiza kay ankaro ka banwa. Kamhan magapanawpanaw ya maonga kay ampangita ka hel-anan. Kamhan waray datnganan naiza ⁴⁴agon anhena-hena iza nga an-oli di hao ka tao. Pagdateng naiza ka tao ya boot na tao singod iton ka lagkaw nga inhingloan di hasta wara di isab ya magahari ka tao. ⁴⁵Kamhan minpanaw ya maonga kay ankawa iza ka toong mga iba nga pito siran nga maonga gajod. Kamhan sirang tanan ya magahari ka tao. Agon nagadogang gazed ya tao ka pagpakasala. Kamo ya singed kaiton nga tao kay bisan minsindo kami ni Howan kamazo diri kamo ampahari ka Magbabaja dalom ka boot mazo.⁴⁶Pagpanaba ka ni Hisos kaniran dizan ka lagkaw impalogwa kontana iza na toong ina daw mga lomon kay bali lamang siran ka gawas. ⁴⁷Kamhan inpakahagdam iza na isang tao nga Nong, bali ka gawas ya kanmong ina daw mga lomon. Maazak siran anlaong kanmo.⁴⁸Minsambag si Hisos nga daw sin-o sa ya kanaong ina daw ya mga lomon? ⁴⁹Minsingyas dazon si Hisos ka toong alima ngaro ka dapit na toong mga sinarigan. Kamhan minlaong iza nga siran ya kanaong ina daw kanaong mga lomon. ⁵⁰Kay bisan sin-o ya nagatoman ka mga sogo na kanaong Ama nga nagahela dakod ka tahaw ani gajod ya kanaong ina daw lomon.

¹Ya, pagkakay-akaiza nga aldaw minlogwa Hisos ka lagbaw kamhan minlo-to dizan ka baybazen na danaw. ²Masara gajod nga kataed ya mga tao nga minlibot kanangiza agon minleen iza ka baloto kay dazaw anlo-to iza dalem kaiza. Kamhan dizan ka baybazen nanalinga ya tanan mga tao.³Kamhan mintoldo iza kaniran ka mga mataed nga pamolinged nagalaong nga wani ya pamolinged ka nagasabwag. Ya, may isang aldaw nga minpanaw ya tao ngaro ka toong oma kay ampanabwag iza ka binhi nga homay. ⁴Pagpanabwag naiza ka mga binhi may mga natanak dizan ka dalan. Kamhan inpanoktok na mga manokmanok. ⁵Pagpanabwag pon na tao may mga natanak isab dizan ka kabatohan. Kamhan mintobo dazon iton kay diri kon ararem ya lopa. ⁶Kamhan pagkaataas na laga nangalaza dazon sirang tanan. Kamhan nangapatay kay diri siran makagamot ka ararem.⁷May mga natanak disab dizan ka lopa nga nanhela pon ya mga liso na sagbot. Pagtobo na binhi mindengan isab ya sagbot nga dogihen. Kamhan inhal-ong gajod na sagbot ya mga tanem. ⁸May natanak disab dizan ka lopa nga magazon. Kamhan mintobo iton daw mataed ya namunga. May mga namunga ka isang ka gatos. May mga namunga ka kan-eman. May mga namunga ka katloan. Ani ini ya pamolinged ka nagasabwag. ⁹Kamhan minsogo si Hisos kaniran nga kamo nga mga manalingahay, sabten mazo ini nga pamolinged ka nagasabwag.¹⁰Pagkakamhan mingkarini kan Hisos ya toong mga sinarigan kay ampangotana siran nga kay ono sang nagapasagisagi sa ko ka kanmong mga panaba ka mga tao? ¹¹Minsambag si Hisos nga ipasabot na Nagagihit kamazo ya mga tinago mahitenged ka pagpadazon naiza ka toong tarabaho. Piro dizan ka mga mataed nga tao wara kaniran ipasabot na Nagagihit ya toong mga tinago ¹²kay bisan sin-o ya antoon ka mga intoldo na Nagagihit padogangan pen na Nagagihit ya toong kasabtan. Kamhan ya tao nga diri antoon kaw-en na Nagagihitya toong geramay nga kasabtan.¹³Na, pagtoldo nao kaniran nagapamolinged hao kamhan bisan magasolong siran ka kanaong hinang diri siran makasabot. Bisan sambingay siran ka kanaong sindo diri siran makasabot kon ono ya kahologan. ¹⁴Ya kanirang batasan ani ya nakatoman ka pamaymay ni Isayas nga karaang propita nga nagalaong nga pagdateng ni Kristo anpanalinga ya mga Hudiyo ka toong sindo piro diri siran makasabot. Anseleng isab siran ka toong mga inhinang piro diri isab siran makasabot.¹⁵Kay singod ka ingahi niran ya kanirang otok dazaw diri siran makasabot. Insampenan disab niran ya kanirang talinga dazaw diri siran makabati. Impizeng disab niran ya kanirang mga mata dazaw diri siran makakita. Kay diri siran maazak nga ambiza ka kanirang mga sala agon diri siran tagan na Nagagihit ka magazong hena-hena. Ani ini ya insoyat ni Isayas.¹⁶Kamhan minlaong si Hisos nga kamo nga kanaong mga sinarigan, madazaw ya pagpanarangin na Nagagihit kamazo kay kamo ya minkita ka kanaong mga inhinang. Nakapanalinga disab kamo ka kanaong pagmahay. ¹⁷Timan-an mazo gazed ini nga mataed ya mga karaang propita na Nagagihit daw ya mga karaang tao nga matadeng nga gosto siran anseleng ka kanaong mga hinang singed ka inselengan mazo dini kanao koman piro wara itogot na Nagagihit kaniran. Gosto sab siran ampanalinga ka kanaong sindo singod ka nabatian mazo dini kanao koman piro wara itogot na Nagagihit kaniran.¹⁸Ya, manalinga kamo naa kay wani ya paghilwas ka pamolinged ka nagasabwag. ¹⁹Ya mga binhi nga natanak dizan ka dalan ani ya singod ka manalingahay ka sindo mahitenged ka pagpasakop na Nagagihit ka mga tao piro diri iza makasabot. Kamhan andatong dazon si Satanas kay kawen naiza ya sindo nga nabatian naiton nga tao.²⁰Kamhan ya mga binhi nga natanak dizan ka kabatohan ani ya singod ka manalingahay nganakaangay ka sindo mahitenged kanao kamhan mintoo dazon. ²¹Ka wara pon madogay magaawazen gajod iza na mga tao kay minsakop di iza kanao agon bizaan dazon naiza ya toong pagtoo kanao kay ababa ka ya toong pag-anget ka kalisod.²²Kamhan ya mga binhi nga natanak dizan ka lopa nga nanhela pen ya mga lisohan na sagbet ani ya singod ka isa pen nga manalingahay. Kay nagapanalinga gazed iza ka pagmaymay mahitenged kanao. Kamhan nawied iza daw ono ya toong panginabohi. Ganahan sab iza ka kowarta. Agon waray polos ya sindo kay singed ka nalipat dazon ya manalingahay. ²³Basta kay ya mga binhi nga napegas dizan ka lopa nga magazong tamnanan ani ya singed ka mga manalingahay ka pagmaymay mahitongod kanao daw nakasabot gihapon. Kamhan singed ka nangaohay ya isa ka isang ka gatos. Nangaohay ya iba ka kaneman. Nangaohay isab ya iba pon ka katloan. Ani ini ya paghilwas ka pamolinged ka tao nga nagasabwag ka binhi.²⁴Mindogang si Hisos paglaong kaniran nga wani pen ya pamolinged mahitenged ka pagpadazon na Nagagihit ka toong tarabaho. Singed iton ka tao nga nagapegas ka magazong binhi dizan ka toong oma nga magazong tamnanan. ²⁵Ya, pagpakatorog ka na mga tao mindateng di ya kaaway. Kamhan nagasabwag iza ka mga liso na sagbet dizan ka tamnanan na tao. Kamhan minpanaw dazon ya kaaway. ²⁶Pagpakatobo ka na mga tanem daw minsogod pagboswak ya mga ohay waton disab baza ya mga sagbet.²⁷Kamhan ya mga sinogo na tag-iza mindateng di kanangiza daw nangotana nga pangulo, polos madazaw ya impegas nami dizan ka oma. Agon hain sa garing ya nakasaket nga sagbet? ²⁸Minsambag iza nga ya kaaway kanao ani ya minhinang kaiton. Nangotana ya toong mga sinogo nga daw bognoton nami ya mga sagbet?²⁹Minsambag ya tag-iza nga pabet-an lamang iton kay basi pamognoton ka gihapon ya mga homay iba ka mga sagbet. ³⁰Pasoligen pon lamang pagdengan kay kay-an ka tigani anipen sogoon nao ya mga tarabahanti nga ipabognot ya mga sagbet paghon-a daw pamegketen kamhan sonogon. Kamhan ya mga homay ipaani naa anipen ibetang dizan ka dapoganan.³¹Ya, mindogang pon si Hisos paglaong kaniran nga wani pon ya pamolinged mahitenged ka pagpaoswag na Nagagihit ka toong paghari dini ka mga tao. Singod iton ka isang bolos nga lisohan inngaranan ka mostasa. Kamhan intanem na tao dizan ka toong oma. ³²Bisan geramay iton ka bisan ono nga lisohan, ka pagsolig di mahinang iton ka dakolang liwaan kay doro ka lopa nga Yoda ya mostasa liwaan iton nga opat nga ka mitros ya kaataas. Agon magapogad ya mga manokmanok dizan ka mga sap-ay naiton.³³Ya, mindogang si Hisos paglaong kaniran nga wani pen ya pamolinged mahitenged ka pagpasakop na Nagagihit ka mga tao. Singed iton ka ipasoligay ka tinapay. Insaktan na babazi ka ipasoligay ya tolong ka takes nga harina. Kamhan minsolig iton kadakola gazed ya pagsolig.³⁴Ani ini ya mga pamolinged ni Hisos dizan ka mga mataed nga tao. Waray lain toldoan naiza kaniran. ³⁵Kamhan mintoman di ya inlaong na karaang propita na Nagagihit nga nagalaong nga pagpanaba ni Kristo ka mga tao gamiten naiza ya mga mahitungod pagtodlo naiza kaniran ka mga tinago nga wara pen kahagdami sokad kawandini pen ka sinogdan pon na kalibotan hangtod koman. Ani ini ya inlaong na karaang propita.³⁶Pagkakamhan ni Hisos pagsindo ka mga tao minbelag iza kaniran kay anseled iza ka lagkaw. Minsonod isab kanangiza ya toong mga sinarigan kay ampangotana siran nga Nong, pasabten mo kami kaiton nga pamolinged mahitenged ka mga sagbet dizan ka oma nga inlaong mo kazina. ³⁷Minsambag si Hisos nga wani ya paghilwas kaiton nga pamolinged nao kamazo nga hao ya singed ka tao nga nagapegas ka mga magazong binhi. ³⁸38Kamhan ya tamnanan ani ya kalibotan. Ya mga sakop na Nagagihit singed siran ka magazong binhi. Ya mga sagbet ani ya mga tao nga sakop ni Satanas. ³⁹Kamhan ya kaaway nga minsabwag ka mga sagbet ani si Satanas. Ya pag-ani ani ya kataposan nga panahon dini ka kalibotan. Ya mga mag-aani ani ya mga sinogo na Diyos nga tagalangit.⁴⁰Basta kay kay-an ka kataposan nga panahon ya mga sakop ni Satanas singed siran ka mga sagbet nga magabognoton daw sonogon. Ani ini ya pagkapatay na mga maongang tao kay-an ka kataposan na mga panahon. ⁴¹Kay hao nga minhon-a ka bisan sin-o nga mahon-ang tao, pakarohon nao ya kanaong mga sinogo nga taga langit dazaw kaw-en niran ya tanan mga magtintalay daw ya tanan mga anhinang ka diri maunga. Kamhan pabelagen siran dizan ka mga sakop na Nagagihit. ⁴²Kamhan ipanimbag doro ka impirno. Kamhan magapangagot siran ka kanirang ngipen ka paghaza. ⁴³Kamhan ya mga matadeng nga tao may kasiraw niran singed ka kasiraw na sega daked ka hel-anan na kanirang Ama. Na, kamo nga mga manalingahay, magtaremdem kamo ka insindo nao kamazo.⁴⁴Kamhan nagapamolinged pen si Hisos ka toong mga sinarigan nga ya pagkamahal na toldo mahitenged kanao singed iton ka pagkamahal na bolawan nga inlebeng dizan ka isang oma. Kamhan nakitan di na tao. Kamhan inlebeng naiza iton pagbalik. Kamhan dakola gazed ya toong kasaza. Kamhan min-oli di iza kay impamaligza ya tanan mga betang kay paliten naiza ini nga oma. ⁴⁵Ya, nagapamolinged pon si Hisos kaniran nga ya pagkamahal na sindo mahitenged kanao singed iton ka magbaligzaay ka mga motza. Pagpakakita ka naiza ka isang motza nga masarang ka mahal impamaligza naiza ya tanan mga betang dazaw paliten ini nga motza. ⁴⁶Pagpakakita ka naiza ka isang motza.⁴⁷Ya, paghari pon si Hisos kaniran nga ya pagpadazon na Nagigihit ka toong tarabaho singed iton ka baling nga inbeklad di doro ka dagat. Kamhan mataed ya mga klasi na isda nga nabalingan. ⁴⁸Pagkapono ka na baling imbohat na mangisdaay ngaro ka baybazen. Kamhan impili niran ya mga isda nga magazon kay impanleen dizan ka seldanan niran. Kamhan ya mga maonga nga isda impanimbag niran ngaro pagbalik ka dagat.⁴⁹Ani ini ya kahimtang na mga tao kay-an ka kataposan nga panahon. Kay ya kanaong sinogo nga taga langit magabelagen niran ya mga tao nga maonga daw ya mga tao nga matadeng. ⁵⁰Kamhan ya mga maonga nga batasan iitsa doro ka impirno. Kamhan magapangagot siran ka kanirang ngipen ka paghaza.⁵¹Pagkakamhan ni Hisos pagpamolinged ka toong mga sinarigan nangotana iza kaniran daw nakasabot kamo kaiton nga tanan? Minsambag siran nga hee makasabot gazed kami. ⁵²Minlaong si Hisos nga agon makasabot kamo nga ya tao nga mahagdam pagtoldo ka mga balaed nga inbilin ni Moysis kon antoo iza ka kanaong sindo mahitenged ka pagpasakop na Nagagihit ka mga tao singed iza ka tag-iza ka lagkaw nga nagakawa ka mga bag-o daw daan mga betang garing ka toong dapoganan. ⁵³Ya, pagkakamhan ka ni Hisos pagpamolinged kaniran minpanaw iza.⁵⁴Kamhan min-oli di iza ka Nazarit nga toong insoligan. Kamhan minsindo iza kaniran dalem ka kanirang singbahan. Nangabereng siran ka pagpanalinga niran. Kamhan nagalaong siran nga wara kami mahagdam kon hain iza magtoon ka kahagdamanan daw onhon sa naiza paghinang ka mga madazaw nga kaberenganan. ⁵⁵Kay anak ka lamang iza na panday. Ya ngaran na toong ina ani si Mariya. Maglomon iza daw si Santiago daw si Hosi daw si Simon daw si Hodas. ⁵⁶Taga dini disab kanta ya toong mga lomon nga babazi. Agon onhon sa naiza pagkahagdam ka paghinang kaiton nga tanan?⁵⁷Ani ini ya kanirang inlaong kamhan diri gazed siran antoo ka toong sindo kaniran. Kamhan minlaong si Hisos nga doro ka mga lain dapit intahod hao na mga tao piro dini kamazo nga kanaong kaibahan waray pagtahod. Bisan ya mga karaang propita na Nagagihit, wara siran tahoda na kanirang kaibahan. ⁵⁸Kamhan talagsa kay mga madazaw nga kaberenganan nga inhinang ni Hisos dizan kaniran kay diri siran antoo kanangiza.

¹Na, ya maanak ni Hirodis ani ya ilis na toong ama ka paghari ka lopa nga Galiliya. Si Hirodis ya toong ngaran singed ka toong ama. Ya, pagpakabati ka naiza mahitongod ka mga madazaw nga kaboronganan nga inhinang ni Hisos kay mindakola di ya ngaran ni Hisos ²minlaong iza ka toong mga sinogo nga si Hisos ani gazed si Howan nga Magbenzagay. Nabohi di baza iza garing ka lobong agon may gahem naiza ka paghinang ka mga madazaw.³Nawied si Hirodis kay izang dini kaini impadakop naiza si Howan. Kamhan impagapos ngandalem ka prisohan. Ani ini ya toong hinang kay imbahegan iza ni Howan kay minpanapaw si Hirodis kan Hirodiyas nga toong ipag nga asawa na toong lomon nga si Pilipo. ⁴Kamhan imbahegan iza ni Howan nagalaong nga minlapas ko ka balaed kay naminze di ko ka kanmong ipag. ⁵Kamhan patazen kontana ni Hirodis si Howan piro nahaldek izaka mga Hudiyo kay mintoo siran nga si Howan ani ya matood nga propita nga garing ka Nagagihit.⁶Na, pagdateng na aldaw ka pagkombiti nga impahinenged ka pagkatao ni Hirodis ya daraga nga anak ni Hirodiyas minsazaw iza dizan ka tanan mga dinapit. Kamhan naazak si Hirodis ka pagsazaw na babazi. ⁷Kamhan minsaad gazed iza ka babazi nagalaong nga bisan ono ya azoon mo kanao ihatag gajod nao kanmo. Mapatay gajod hao kon baribadan ta ko ka azoon mo kanao.⁸Ya, garing ka pag apora na toong ina minsambag ya babazi nga tagan mo hao ka olo ni Howan nga Magbenzagay. Ibetang mo iton dini ka palato. ⁹Ya, pagpakabati ka ni Hirodis ka inazo na babazi mabeg-at ya toong hinawa ka pagkawied. Piro masipeg iza ka pagbaribad kay kazina dizan ka mga bisita minsaad gajod iza ka babazi. Agon minsogo iza ka soldaw nagalaong nga dadhen mo ngarini kanao ya olo ni Howan.¹⁰Kamhan impaotdan matood ni Hirodis ya lieg ni Howan dizan ka prisohan. ¹¹Kamhan imbetang iton dizan ka palato. Kamhan indara ngaro ka babazi. Kamhan inhatag sab na babazi ka toong ina ya olo ni Howan. ¹²Pagpakabati ka na mga sakop ni Howan minkaro siran ka prisohan kay kaw-en niran ya lawas ni Howan. Kamhan inlebeng iton. Pagkakamhan kaiza minpasinged siran ngaro kan Hisos kay panan-ogan niran si Hisos nga impatay di ni Hirodis si Howan.¹³Pagpakahagdam ka hi Hisos ka pagkapatay ni Hisos ka pagpakapatay ni Howan minbogtong iza pagsakay ka baloto ngaro ka dapit nga mamingaw. pagkahagdam ka na mga tao nanlopog siran pagbagtas kan Hison dizan ka baybazen. Agon pagkawas ka ni Hisos ka baloto ngandipi nakitan naiza ya masarang kataed nga tao. ¹⁴Kamhan nalooy gazed si Hisos kaniran. Kamhan inpanbahaw naiza ya mga masakiten nga impandara niran ngaro kanang-iza.¹⁵Pagkadelem kaiza minkarini kan Hisos ya toong mga sakop kay anlaong siran nga delem di wani. Aro pen kita ka kantang panihaponanan. Papanawen di mo ya mga tao ngaro ka mga bariyobariyo dazaw makapamalit siran ka pagkaen niran.¹⁶Minsambag si Hisos kaniran nga diri di lamang papanawen siran ngaro. Magpakaen hinoa kamo kaniran. ¹⁷Minsambag siran nga lima komang bolos ya pan kamhan dowa komang bolos ya isda. ¹⁸Minsambag si Hisos nga iatedlamang ngarini kanao ya pan daw isda.¹⁹Kamhan inpanpalo-to naiza ya mga mataed nga tao dizan ka lopa. Paghawid ni Hisos ka mga pan nga limang bolos daw ya isda nga dowang bolos minhangad iza ka langit. Kamhan minpasalamat iza ka Nagagihit. Kamhan intipaktipak naiza ya mga pan anipen naiza ipanhatag ka toong mga sakop. Kamhan impandohol niran ka mga tao. ²⁰Pagkakamhan niran pagkaen nangabosog sirang tanan. Pagpakahipid niran ka mga salin nga tinipak nga pan daw isda nangapono pen ya napolo may dowang ka alat. ²¹Daw pirang bolos ya tao nga inpakaen ni Hisos? Ya amaama limang ka libo. Wara pen ya labet na mga babazi daw mga bata.²²Pagkakamhan kaiza inpasakay ni Hisos ka baloto ya toong mga sakop dazaw anhon-a siran kawang-iza dipi ka danaw kay paolien pen naiza ya mga mataed nga tao. ²³Kamhan waray iba naiza pagtokad naiza ngandaked ka pagkahiping na bobong kay ampangamozo iza ka Nagagihit. Pagkakahabzen di kaiza isa koman iza doro ka lopa. ²⁴Kamhan ya sakzanan na toong mga sakop doro pen iton ka tenga na danaw, wara pen makadateng ka lopa. Indasmagan sab iton ka dakola nga baled kay nasogatan niran ya makeseg nga hangin.²⁵Ya, pagkakamaaldawen kaiza minpanaw si Hisos dizan ka hopaw na sapa ngaro arani ka kanirang sakzanan. ²⁶Pagpakakita niran nga waton ya minpanaw dizan ka hopaw na sapa nangahaldek gazed siran daw minsinggit nga pooy sa wani! ²⁷Piro minlaong si Hisos kaniran nga diri kamo magkawied kay hao ini. Diri kamo magkahaldek.²⁸Kamhan si Pidro ani minsambag nga Nong, kon matood nga iko ka iton pakatonon mo hao singed ka pagpanaw mo diton ka hopaw na sapa. ²⁹Minsambag si Hisos nga pomanaw di ko ngarini. Kamhan minkawas si Pidro ka baloto. Minpanaw disab baza iza dizan ka hopaw na sapa kay minkaro iza kan Hisos. ³⁰Piro pagpaniid ka naiza ka makeseg sa wani nga hangin nga minsakem ka toong lawas masara gajod ya toong kahaldek. Kamhan magapakatogalway ya toong paa ngandalem ka sapa. Kamhan minsinggit iza nga Ginoo, tabangi hao!³¹Intagenan iza dazon ni Hisos daw inlong-an nga geramay pen gazed ya pagsarig mo kanao. Kay ono sa nga nagadowadowa sa ko? ³²Pagpakaleen nirang dowa ka baloto minheneng dazon ya hangin. ³³Kamhan insaza gajod iza na toong mga sakop dizan ka baloto nagalaong nga iko matood ya Maanak na Nagagihit. Pagkakamhan kaiza doro ka lopa nga Ganasarit mindonggo siran.³⁴Pagkakamhan kaiza doro ka lopa nga Ganasarit mindonggo siran. ³⁵Pagpakakilala ka na mga taga dizan nga si Hisos iton impakahagdam niran dazon ya mga taga doro tenged kaiton nga dapit. Kamhan impandara niran ya mga masakiten dizan kan Hisos. ³⁶Kamhan minhangzo siran kan Hisos nga nagalaong nga Hisos, pahogamen mo lamang siran ka pilos na kanmong bado. Kamhan ya tanan nakahogam ka pilos na toong bado nangabahawan matood siran ka kanirang mga masakit.

¹Pagkakamhan kaiza minkarini kan Hisos ya mga Parasiyo daw ya mga maistro ka tinoohan na mga Hudiyo. Garing siran ka siyodad nga Hirosalem. Kamhan nangotana siran kan Hisos nga ²Kay ono sa ya mga sakop mo minlapas gajod siran ka balaed nga garing ka kantang mga karaan nga nagalaong nga ka wara pon magkaen ya tao kinahanglan hogasan ya alima. ³Minsambag si Hisos nga hopaw ka lamang ya kamazong paghogas kay wara kamo kahingloi ka kamazong mga sala. Kay onosa kamo magalapas ka mga sogo na Nagagihit dazaw anhawid kamo ka mga balaed nga garing ka mga karaan?⁴Kay minsogo ya Nagagihit nga tahodon mazo ya kamazong ginikanan. Bisan sin-o ya ampanaba ka maonga mahitenged ka toong kamalas-an magapatazen gajod iton nga tao. Ani ini ya sogo na Nagagihit. ⁵Kamhan kamo nga mga Parasiyo nagalaong kamo ka ginikanan mazo nga ya itabang nao kamazo waro di nao lamang ihatag ka Nagagihit. Singed ka diri togotan mazo pagtabang ka ginikanan. ⁶Agon nagapakawaray polos kamo ka sogo na Nagagihit dazaw makapadazon kamo ka mga balaed na kamazong karaan.⁷Mga bakaken kamo! Insakto gajod ya panan-og ni Isayas mahitenged kamazo nagalaong nga ⁸dizan ka ba-ba ka lamang ya kamazong pagtoo kanao nga Nagagihit kay ya kamazong huna-huna aro ka gajod kanao. ⁹Wara gajod ya polos ka pagsingba mazo kanao kay nagalaong kamo nga ya pagpanoldo mazo ani ya mga sogo na Nagagihit ambaza kay mga balaed na kamazong mga karaan ka lamang. Ani ini ya panan-og ni Isayas mahitongod kamazo.¹⁰Pagkakamhan ni Hisos pagbaheg ka mga Parasiyo impakarini naiza ya mga tao kay nagalaong iza nga kamong tanan, manalinga gajod kamo kay dazaw masabtan mazo nga ¹¹bisan ono ya inkaon na tao diri gajod iton kon maonga ka tao. Basta kay ya mga panaba nga anlogwa ka ba-ba na tao ani gajod ya maonga ka tao.¹²Pagkakamhan kaiza minkarini kan Hisos ya toong mga sakop. Kamhan nagalaong siran nga Nong, daw mahagdam ko nga ya impanaba mo kazina nakapazehet iton ka mga Parasiyo? ¹³Minsambag si Hisos ka pagpamolinged kaniran nga ya mga diri kon intanem na kanaong Ama pamognoton gazed iton kay-an. ¹⁴Agon pabet-an mazo lamang ya mga Parasiyo kay nabota ya kanirang hena-hena. Singod siran ka nabota nga tao nga anhabit ka iba nga tao nga nabota. Kamhan maholog gajod sirang dowa dalem ka teheb.¹⁵Kamhan si Pidro ani ya minsambag nga hilwasan mo naa kami ka pamolinged mo kazina mahitenged ka makaen. ¹⁶Minsambag si Hisos nga daw wara pen kamo makasabot? ¹⁷Daw wara pen kamo mahagdam nga ya inkaen na tao dizan ka lamang an-azi ka tinai na tao. Kamhan anlogwa ka lawas na tao.¹⁸Piro ya mga maonga nga mga panaba ani gajod ya makaonga ka tao kay garing iton ka toong hena-hena. ¹⁹Kay ya huna-huna nga maonga ani ya sinogdan ka pagbono ka tao daw ya paghenay daw ya paghinang ka malaw-ay daw ya pangawat daw ya pagbakak daw ya pagbetangbetang ka tao. ²⁰Iton nga batasan ani gajod ya makaonga ka tao. Kamhan diri kon maonga ya tao kon angkaen iza ka wara pen iza maghogas ka toong alima singed ka batasan na mga Parasiyo.²¹Pagkakamhan ni Hisos pagtoldo kaniran minpanaw iza ngaro tenged ka dowang ka longsod nga Tiro daw Sidon. ²²Kamhan minkarini kan Hisos ya isang babazi nga taga Kanaan nga nagahela dizan kaiton dapit. Kamhan minhangzo gazed iza kan Hisos nga Sinyor nga kaliwat ni Dabid, kaloy-i intawon hao! Kay ya kanaong maanak nga babazi inharian gajod iza na maonga. ²³Kamhan wara si Hisos magsambag. Kamhan minkarini kan Hisos ya toong mga sakop kay nagalaong siran nga papanawen di mo ya babazi kay magaasang lopog iza kanmo daw magapanhawag²⁴Minsambag si Hisos nga impakarini hao na Nagagihit kay dazaw antabang hao ka mga kaliwatan ni Israil kay nangalaag siran singed ka batasan na mga karniro nga bohien na tao. Mga masinopaken gajod siran ka Nagagihit. ²⁵Kamhan dizan ka paahan ni Hisos minlohod ya babazi kay ampakilooy pag-isab nagalaong nga Sinyor, tabangi intawon hao. ²⁶Kamhan minpamolinged si Hisos pagsambag ka babazi nga ya makaen para ka mga bata diri kon madazaw kon ibahog dizan ka mga ido.²⁷Ya, nakasabot dazon ya babazi nga ya kahologan diri kon madazaw kon antabang si Hisos ka mga taga Kanaan paghon-a ka pagtabang naiza ka mga taga Huda. Kamhan minsambag ya babazi nga Sinyor, matood gajod ya saba mo. Piro bisan ngani ya mga ido diri bogawen pagkaen niran ka mga podpod nga naholog garing ka lamisa na kanirang tagiza. ²⁸Kamhan minsambag si Hisos nga Day, dakola gazed ya kanmong pagsarig kanao. Natoman di ya kanmong inhangzo kanao. Kamhan naolian matood ya toong maanak ka magazong beet.²⁹Pagkakamhan kaiza minpanaw si Hisos dizan kaiton nga dapit. Minazi iza dizan ka baybazen na danaw nga Galiliya. Kamhan mintokad iza ngandaked ka pagkahiping na bobong. Kamhan minlo-to di iza dizan. ³⁰Kamhan nangarini kan Hisos ya masarang kataed nga tao kay indara niran ya mga piang daw ya mga nabarian daw ya mga nabota daw ya mga amang daw ya mga mataed pen nga mga masakiten. Impabentag siran dizan ka paahan ni Hisos. Kamhan impanbahaw naiza sirang tanan. ³¹Pagseleng na mga tao nangabereng gazed siran kay ya mga amang nakalitok di gazed siran, nakapanaba di. Madazaw di isab ya lawas na mga nabarian. Nakapanaw di ya mga piang. Makakita di ya mga nabota. Pagseleng ka na mga tao insaza gajod niran ya Nagagihit nga tahodanan na kanirang karaang nga si Israil.³²Pagkakamhan kaiza impakarini ni Hisos ya toong mga sakop kay inlong-an nga nalooy hao ka mga tao kay ikatlo ding aldaw koman ya pag-iba niran kanao. Kamhan nahodtan siran ka makaen. Kon papanawen nao siran nga waray makaen basi pangetasan siran dizan ka dalan. ³³Nangotana ya mga sakop nga daw hain kami koman mangita ka pagkaen dini ka kamingawan igo ka pagbosog kaiton nga masarang kataed nga tao? ³⁴Nangotana si Hisos kaniran nga daw pira peng bolos ya pan mazo diton? Minsambag siran nga pito komang bolos ini daw ya mga geramay nga isda. ³⁵Kamhan insogo ni Hisos ya mga tao ka pagpanlo-to dizan ka lopa.³⁶Kamhan minkawa iza kaini nga pan nga pitong bolos daw ya mga isda. Pagkakamhan naiza pagpasalamat ka Nagagihit impanipak naiza ya tanan daw impanhatag ka toong mga sakop dazaw panhatagan sab niran ya mga tao dizan nga namaglo-to. ³⁷Pagkakamhan niran pagkaen nangabosog gazed sirang tanan. Pagkakamhan niran paghipid ka salin nangapono pon ya pitong ka alat. ³⁸38Daw pirang bolos ya tao nga inpakaen ni Hisos? Ya amaama opat nga ka libo. Wara pon ya labet na mga babazi daw mga bata. ³⁹Pagkakamhan kaiza impaoli siran ni Hisos. Kamhan minleen iza ka baloto dazaw ampasinged iza ngaro ka lopa nga Magadan.

¹Ka dizan pen si Hisos ka lopa nga Magadan minkarini kanang-iza ya mga Parasiyo daw ya mga Sadosiyo kay amporba siran kan Hisos nagalaong nga ipakita mo kanami ya timaan kadaw mahagdam kami nga garing matood iko ka Nagagihit. ²Minsambag si Hisos nga pagpaniid mazo nga mararag ya langit ka pagsalep na sega nagalaong kamo nga masega ini konsilem.³Pagpaniid mazo nga mararag ya langit ka pagkaaldaw kamhan mindag-em nagalaong disab kamo nga an-oran kaan. Ya, iton nga timaan ka timpo dizan ka kalangitan nakasabot kamo piro ya mga timaan nga garing ka Naginihit mahitenged ka kataposan nga panahon wara baza kamo makasabot. ⁴Ampangan kamo kanao ka timaan kay makasasala sa kamo. imbizaan disab mazo ya pagtoo ka matood Nagagihit. Anikay timaan kamzo ya singed kan zona nga karaang propita na Nagagihit. pagkakamhan ni Hisos pagsambag minpanaw iza dizan kaniran.⁵5Pagdatong niran ngandipi ka danaw waray nadara na toong mga sakop nga pan kay nalipatan niran. ⁶Kamhan minpamolinged si Hisos kaniran nga nagalaong nga maghamarag kamo ka pagmaymay na mga Parasiyo daw ya mga Sadosiyo. Kay ya kanirang sindo minpasingedsinged iton ka ipasoligay ka pan. Kay bisan isaket ya geramay nga ipasoligay dizan ka harina anlekep iton ka tanan. ⁷Kamhan namaglaonglaong ya toong mga sakop nga ani ini ya impanaba ni Hisos kay wara say daradara ta wani nga pan. ⁸Kamhan mahagdam si Hisos nga minhena-hena siran mahitenged ka pan, diri kon pagmaymay na mga Parasiyo. Agon minlaong iza kaniran nga geramay ka gajod ya pagsarig mazo kanao. Kay ono sa nawied kamo ka pan?⁹Daw wara pon kamo makasabot? Daw wara kamo makataremdem kaiza nga pan nga lima kang bolos nga impakaen nao ka mga limang ka libo nga tao ang dini kaini? Kamhan pirang bolos ya alat nga inkatmo mazo ka salin kaiza? ¹⁰Daw wara kamo makataremdem kaiza nga pan nga pitong bolos nga impakaen nao ka opat nga ka libo nga tao? Daw pirang bolos ya alat nga impono mazo ka salin kaiza?¹¹Kay ono sa nga wara kamo makasabot nga diri kon pan ya inlaong nao kamazo kazina? Maghamarag kamo ka pagmaymay na mga Parasiyo daw ya mga Sadosiyo kay singed iton ka ipasoligay ka pan kay bisan isaket yageramay nga ipasoligay dizan ka harina anlekep gajod iton ka tanan. ¹²Pagkakamhan ni Hisos paglaong kaiton anipen siran makasabot nga diri kon ipasoligay ka pan ya magahamaragan niran. Piro ya mga sindo na mga Parasiyo daw ya mga Sadosiyo ani gazed ya kanirang hamaragan. Kay bisan geramay ka lamang ya insindo na mga Parasiyo ka mga tao makadaeg gajod iton ka hena-hena na tao.¹³Pagkakamhan kaiza minpasinged sing Hisos ngaro ka lopa tenged ka lobohan nga Sisariya Pilipos. Pagbagtas pen niran ngaro nangotana si Hisos ka toong mga sakop nga daw ono ya pagngaran na mga tao kanao? ¹⁴Minsambag siran nga may nagalaong nga matod sa koni niran iko koni si Howan nga Magbenzagay. May nagalaong nga iko sab koni iton si Iliyas nga karaang propita na Nagagihit. May iba pen nagalaong nga iko sab koni si Hirimiyas bisan kon ya isa pon nga karaang propita. ¹⁵Kamhan nangotana si Hisos kaniran nga daw sin-o say pagngaran mazo kanao? ¹⁶Minsambag si Simon Pidro nga iko ani matood si Kristo nga hari nga pinili na Nagagihit. Iko ya Maanak na Nagagihit nga bohi.¹⁷Minsambag si Hisos nga Simon nga maanak ni Barzona, panaranginan ko na Nagagihit ka madazaw. Kay ya sambagan mo kanao diri kon tao ya minpasabot kanmo basta kay ya kanaong Ama nga nagahela daked ka langit ani ya minpasabot kanmo kon sin-o sa hao. ¹⁸Agon anngaran hao kanmo kan Pidro kay singed iko ka dakolang bato. Ya sambagan mo kanao kazina ani ya singed ka lopa nga marig-en nga madazaw ogdokan. Ya mga tao nga ansakop kanao singed siran ka lagkaw nga hel-anan na Nagagihit nga hinangen nao dizan ka in-ogdokan nga marig-en. Bisan pagaawazen gazed siran nin Satanas diri siran madaeg kay magahela siran dizan ka marig-en nga lagkaw.¹⁹Pidro, anhatag hao kanmo ka gahem ka pagpaseled ka mga tao ngandaked ka hel-anan na kanaong Ama. Pagdomara mo ka kanaong mga sakop nga nagatipon bisan ono ya diri mo itogot dizan kaniran ani isab iton ya mahinang daked ka hela na kanaong Ama. Kamhan bisan ono ya itogot mo dizan kaniran ani isab iton ya mahinang daked ka hela na kanaong Ama. Ani ini ya inpanaba ni Hisos kan Pidro. ²⁰Kamhan minsogo gazed iza ka toong mga sakop nagalaong nga diri kamo magpanan-og ka mga tao nga hao si Kristo nga hari nga pinili na Nagagihit.²¹Kamhan minsogod iza ka pagpasabot ka toong mga sakop nga an-azi iza ka mga kalised doro ka siyodad nga Hirosalem. Kamhan magasawazen iza na mga malaas daw ya mga oloolo na mga pari daw ya mga maistro ka tinoohan na mga Hudiyo. Kamhan pamagpatazen iza doro kaniran. Pagdateng ka ikatolong aldaw magabohien iza na Nagagihit pagbalik garing ka lebeng. ²²Pagkakamhan ni Hisos pagpanan-og kaini in-ated iza ni Pidro dizan ka waray laing tao. Kamhan minbaheg si Pidro nagalaong nga Magbabaja, diri ko gazed patazen na mga tao. Diri gajod itogot na Nagagihit ya inpanaba mo. ²³Kamhan minliso si Hisos kan Pidro daw minsambag nga iko ya singed kan Satanas. Pomanaw ko dini kanao kay ambalabag iko kanao kontana. Kay ya hena-hena mo nagasopak ka kabebet-en na Nagagihit. Nagaangay ya hena-hena mo ka kabebet-en na tao.²⁴Kamhan minsindo si Hisos ka toong mga sakop nga nagalaong nga bisan sin-o ya ampasakop kanao kinahanglan bizaan naiza ya toong kaogaringen nga naazakan daw angeten ya pagkapatay singod kanao. Ka diri madogay dakpen hao na mga tao kamhan ipalansang ka kros keteb ka mapatay hao. ²⁵Kamhan bisan sin-o ya diri ansakop kanao kay nawied iza nga basi patazen iza mawara hinoa iza. Piro bisan sin-o ya napatay kay hao ya toong insakopan mahatagan iza ka bag-ong kinabohi nga diri mawara. ²⁶Bisan kon maangken na tao ya tanan mga betang dini ka kalibotan kamhan mawara ka ya toong kaogaringen nga kinabohi daw ono ya makawa naiza? Wara gajod. Kay waray ikahatag naiza dazaw mabawi ya toong kinabohi.²⁷Mindogang pon si Hisos paglaong kaniran nga hao ya minhon-a ka bisan sin-o nga mahon-ang tao. May tirmino nao ka pagbalik ka kalibotan. Iba sab kanao ya kanaong mga sogoonon nga taga tahaw. Magabado sab hao ka kalatì na kanaong Ama nga nagagihit. Kamhan balsan nao ya kada isa daw isa ka mga tao angay ka batasan. ²⁸Timan-an mazo gajod ini nga dini kamazo may mga diri mapatay nga tao hangtod ka pagpakakita niran kanao pagbalik nao dini ka kalibotan kay hao gajod ya hari nga pinili na Nagagihit. Ani ini ya insindo ni Hisos ka toong mgasakop.

¹Na, pagdatong ka ikaonom nga ka aldaw impaiba ni Hisos si Pidro daw si Santiago daw ya toong lomon nga si Howan ngandaked ka bobong nga ataas nga waray laing tao. ²Kamhan dizan ka pagsolong nirang tolo singod ka nabag-o di ya lawas ni Hisos piro si Hisos gajod iton. Masiraw ya toong bayho singod ka kasiraw na sega. Masarang kapoti ya toong bado singed ka kalatì na sega.³Kamhan waton disab si Iliyas daw si Moysis nga mga karaang propita na Nagagihit. Namaglaonglaong sirang dowa daw si Hisos. ⁴Kamhan minlaong si Pidro kan Hisos nga Magbabaja, madazaw ya kantang pagtipon dini. Kon somogot ko anhinang hao ka mga tolong bolos nga tal-ob. Kanmo ya isa. Kan Moysis ya isa. Kan Iliyas ya isa.⁵Ka nagapanaba pon si Pidro intamdongan siran ka inarak nga masidlaw pagdazaw. Kamhan nabatian ya saba dizan ka inarak nga nagalaong nga wani ya kanaong Maanak nga kanaong naazakan. Nakasaza gazed iza kanao. Magtoo gazod kamo ka toong mga panaba kamazo. ⁶Kamhan ya mga sakop ni Hisos minpatihapa siran ka lopa kay nangahaldok gazod siran. ⁷Minkandizan dazon si Hisos kaniran. Pagtagen naiza kaniran nagalaong iza nga panindeg kamo. Abay kamo pagkahaldek. ⁸Paghangad niran nawara dizan si Iliyas daw si Moysis. Si Hisos ka ya nakita niran dizan.⁹Na, paglogsong pen niran mintogon si Hisos kaniran nagalaong nga hao ya minhon-a ka bisan sin-o nga mahon-ang tao. Mabohi sab hao pagbalik garing ka lebeng kay-an anipen kon ipanan-og mazo ya kamazong nakitan kazina ka dakod pon kita ka bobong. ¹⁰Kamhan nangotana siran kan Hisos nga kay ono sa nagatoldo sa ya mga maistro nga Yodayo kanami nga si Iliyas ani ya anhon-a kan Kristo ka pagkarini? Daw matood iton kon diri?¹¹Minsambag si Hisos nga minhon-a matood kanao ya tao nga singed kan Iliyas nga karaang propita na Nagagihit. Kay min-andam iza ka kanaong pagdateng. ¹²Si Howan nga Magbenzagay ani itong tao. Piro wara siran mahagdam kon sin-o sa iza. Kamhan indaogdaog iza na mga tao. Ani gihapon ya kanirang batasan kanao kay-an nga magasawazen hao niran. ¹³Na, pagkakamhan ni Hisos pagpanan-og kaniran nakasabot siran nga si Howan nga Magbenzagay ani si Iliyas.¹⁴Pagkakamhan kaiza minbalik sin Hisos ka mga mataed nga tao. Kamhan may isang tao nga minkarini kan Hisos. Minlohod iza dizan ka paahan ni Hisos kay anhangzo nga nagalaong nga ¹⁵Sinyor, kaloy-i intawon ya kanaong maanak nga amaama kay insawan iza. Grabi gajod ya toong kahimtang kay sigi di iza magapatiholog dizan ka laga daw dizan ka sapa. ¹⁶Indara nao iza dizan ka kanmong mga sakop piro wara siran makatabang kanangiza.¹⁷Minsambag si Hisos nga waray pagtoo mazo ka Nagagihit. Mga salaan sab kamo. Daw dogay pon hao magaanget ka kamazong batasan nga waray pagtoo kanao? Daw dogay pen hao magahela dini kamazo anipen kamo makasabot ka gahom na Nagagihit? Dadha ngarini ya ma-impis! ¹⁸Pagated niran ka bata dizan kan Hisos imbaheg naiza ya maonga. Kamhan mindalagan dazon iton. Naolian matood ya ma-impis ka madazaw nga beet.¹⁹Pagkakamhan kaiza minkarini kan Hisos ya toong mga sakop nga waray laing tao kay ampangotana siran nga Nong, kay ono sang wara sa kami makapabogaw ka maonga? ²⁰Minsambag si Hisos nga kinahanglan magtoo kamo kanao. Magtimaan kamo kaini nga bisan singed ka kontana ka liso na mostasa ka kageramay ya pagtoo mazo kanao makahimo di kamo ka bisan ono. Pamolinged ini nga ya bobong dizan kon sogoon mo iton ka pagsibeg ngaro ansibeg matood iton ngaro. ²¹Kamhan ya maonga nga minhari ka bata kazina anikay makapabogaw ya paghangzo mazo ka Nagagihit daw ya pag-anget mazo ka pagkaen.²²Pagkakamhan kaiza namagkatipon si Hisos daw ya toong mga sakop doro ka lopa nga Galiliya. Kamhan minlaong si Hisos kaniran nga hao nga minhon-a ka bisan sin-o nga mahon-ang tao itogyan hao dizan ka gahem na mga tao nga ²³anpatay kanao. Pagkaikatlong aldaw mabohi hao pagbalik garing ka lebeng. Na, pagpakabati ka na toong mga sakop nagalised gajod ya kanirang hena-hena.²⁴Pagkakamhan kaiza mindateng di siran ka longsod nga Kapirnaom. Kamhan may minkarini kan Pidro nga mga magsokotay ka bohis ka dakolang lagkaw nga pangamozoanan ka Nagagihit. Minlaong siran kan Pidro nga matod ambazad koni ya kanmong maistro kaini nga bohis? ²⁵Minsambag si Pidro nga ambazad iza. Na, pag-oli ni Pidro ka wara pon iza maglaong kan Hisos nangotana si Hisos kanangiza nga Simon, daw ono ya hena-hena mo ka batasan na mga hari dini ka kalibotan? Daw azoon niran ya bohis dizan ka angay niran kon dizan ka mga lain tao?²⁶Minsambag si Pidro nga dizan ka mga lain tao in-azo na mga hari ya bohis. Minsambag si Hisos nga kamhan ya mga tao nga angay na hari malibri siran ka pagbazad ka bohis. ²⁷Na, kita nga mga maanak na Nagagihit, kontana waray kinahanglan ta ka pagbazad ka bohis dizan ka dakolang lagkaw nga pangamozoanan ka Nagagihit. Piro bayran lamang dazaw diri magakazehet ya mga magsokotay ka mga bohis. Pidro, magpamingwit ko naa dizan ka dagat. Ya primirong makawa mo ka bingwit abrihan ya ba-ba na isda kay waton ya makitan mo nga palata nga kowarta nga ikabazad ka kantang bohis. Iatod mo iton dizan ka mga magbohisay.

¹Pagkakamhan naiza minkarini kan Hisos ya toong mga sakop kay ampangotana siran nga nong, daw sin-on ya labaw nga tao dizan ka mga sakop mo? ²Kamhan impakarini ni Hisos ya isang maimpis kay patindogon dizan ka tongod na toong mga sakop. ³Kamhan minsambag si Hisos kaniran nga timan-an mazo gazed ini nga kon diri kamo anhaod ka batasan na mga bata diri gajod hao ampaseled kamazo ngandakod ka hol-anan na kanaong Ama.⁴Bisan sin-o ya ampaebes ka toong kaogaringen singed ka batasan na bata, iza gajod ya labaw dizan ka mga tao nga minsakop ka Nagagihit. ⁵Garing ka pagtoo na tao kanao kon andawat iza ka bata andawat gihapon iza kanao. ⁶Ya dakolang bato nga galingan ibitay ka lieg na bisan sin-o ya antintal ka bata ka pagbiza kanao. Kamhan lemsan iza doro ka lawod na dagat dazaw diri makapadazon ka pagtintal ka bata.⁷Kalooy intawon ya mga tao kay mataed gazed ya antintal kaniran dazaw ambiza siran kanao kay ani ya batasan na mga tao dini ka kalibotan. Kamhan ya tao nga magtintalay ka toong iba ka pagbiza kanao magalised gajod iza kay-an kay silotan gazed iza na Nagagihit pagdakola. ⁸Pamolinged ini nga kon anhinang ya kanmong alima daw paa ka maonga ipaheneng gajod ya alima daw paa mo singed ka otdon mo iton kamhan itimbag ngaro. Kay bisan mapiang di ko ka dini pon iko ka kalibotan mahatagan ko ka bag ong kinabohi nga diri mawara. Kay kon diri mo ipaheneng ya maonga ka kanmong alima daw paa ikatimbag na nagagihit ya tibolos lawas mo doro ka impirno nga waray pagkapareng.⁹Bisan ya kanmong mata kon makaonga iton ka kanmong hena-hena ipaheneng gazed ya mata mo dazaw diri anseleng ka maonga. Singed ka kaw-en mo ya mata mo kamhan itimbag ngaro. Kay bisan pikas ka lamang ya mata mo ka dini pen iko ka kalibotan waray bali kay mahatagan ko ka bag-ong kinabohi nga diri mawara. Kay kon diri mo ipaheneng ya mata mo ka pagseleng ka maonga ikatimbag na Nagagihit ya tibolos lawas mo doro ka impirno.¹⁰Diri mazo pagtamazen ya bisan isa nga bata kay sabten mazo ini nga ya mga sogoonon nga taga tahaw nga mga magtabangay kaniran onay siran dizan ka kanaong Ama nga nagahela daked ka tahaw. Agon may logar niran ka pagsombong kamazo kon antamay kamo ka maimpas ¹¹Hao nga minhon-a ka bisan sin-o ya mahon-ang tao minkarimbaba hao ka kalibotan kay antabang hao ka mga salaan nga tao daw malibri siran ka silot ka kanirang mga sala.¹²Wani pen ya pamolinged mahitenged ka tood nao ka pagkarimbaba ka kalibotan. Singed iton ka tao nga may isang ka gatos nga karniro. Kamhan nalaag ya isa. Kamhan inbilin naiza ya kasizaman may sizam nga ka karniro dizan ka samsamanan kay ampangita gazed iza ka isa nga nalaag. ¹³Pagkakiti ka naiza labaw pen ya toong kasaza kaini nga isa ka toong kasaza ka mga kasizaman may sizam nga wara malaag. ¹⁴Ani isab ya batasan na kanaong Ama nga nagahela daked ka langit kay diri iza ansogot kon madara doro ka impirno ya bisan isa kang bolos nga bata.¹⁵Nagasindo pen si Hisos ka toong mga sakop nga nagalaong nga dizan ka kamazong lomon kan Kristo kon magkasazep ya isa kanmo dadhen mo iza dizan ka waray lain makabati. Kamhan panan-ogan mo iza kon ono ya toong sazep kanmo. Kon manalinga iza kanmo mag-inoliay kamo ka beet nga magazon. ¹⁶Piro kon diri iza gosto ampahosay kanmo magpaiba ko ka isa bisan kon dowa pen nga sakop nao dizan kaiton nga tao dazaw magmatood siran ka pagsaksi niran ka mga pagpanaba mazo.¹⁷Kamhan kon diri pon iza magpanalinga ipanan-og mo iton doro ka kanaong mga sakop nga nagatipon. Kon diri iza gosto ampahosay dizan kaniran maglikay iko lamang kaiton nga tao singed ka paglikay mo ka mga tao nga diri ankilala kanao daw ya mga magsokotay ka mga bohis kay maonga siran nga tao.¹⁸iman-an mazo gazed ini nga bisan ono ya diri mazo itogot dizan ka kanaong mga sakop nga nagatipon ani isab iton ya mahinang daked kahela na kanaong Ama. Kamhan bisan ono ya itogot mazo dizan kaniran ani isab iton ya mahinang daked ka hel-anan na kanaong Ama. ¹⁹Dini ka kalibotan bisan kon dowa ka kamo nga nagakaozon ka kamazong pagpangamozo ka Nagagihit bisan ono ya kamazong inkinahanglan ihatag kamazo na kanaong Ama nga nagahela daked ka tahaw. ²⁰Kay bisan kon dowa kon tolo kang bolos ya tao nga mintipon kay hao ya insakopan niran na, dizan hao iba kaniran pagtipon.²¹Pagkakamhan ni Hisos pagmaymay kaniran si Pidro minkarini iza kay ampangotana iza nga Nagagihit, daw kapira makasala kanao ya bisan sin-o nga tao, kamhan pasaylohon nao gihapon iza? Keteb ka pito kon pira? Minsambag si Hisos nga diri kon kapito ka lamang basta kay pito nga ka kapitoan ²²kay ya pagpasaylo na Nagagihit ka kamazong mga sala singod iton ka hari nga nagasosi kon pira ya otang na toong mga sogoonon.²³kay ya pagpasaylo na Nagagihit ka kamazong mga sala singed iton ka hari nga nagasosi kon pira ya otang na toong mga sogoonon. ²⁴Pagsogod ka naiza pagpanokot indara niran ya isang sogoonon ngarini kay napolo nga ka libo nga ka pisos ya toong otang. ²⁵Wara gajod ya toong ikabazad agon minsogo ya hari ka mga iba nga sogoonon nga ibaligza mazo ya otangan doro ka makapalit. Ibaligza sab ya toong asawa daw mga anak daw bisan ono ya toong betang. Kay ya ikabazad kaniran ani makabazad ka otang.²⁶Kamhan minpatilohod dazon ya sogoonon nga otangan kay nagapakilooy nga nagalaong nga Sinyor, omanget ko naa kanao kay bayran ta ko ka tanan! ²⁷Kamhan nalooy ya hari ka toong sogoonon. Impasaylo di naiza ya toong otang. Kamhan impaoli di ya sogoonon ngaro ka lagkaw.²⁸Paglogwa na sogoonon ka lagkaw na hari insogat naiza ya iba nga sogoonon nga may daan otang ka karehan-an pisos ka lamang dizan ka pinasaylo. Kamhan paglabay naiza ka otangan inpitlok dazon naiza ya lieg daw minlaong nga hala koni wani di ko koman bayri di hao koman dazon ka otang mo kanao. ²⁹Kamhan minpatilohod dazon ya otangan dizan ka nagasokot kay nagapakilooy iza nga nagalaong nga omanget ko naa kanao kay bayran ta ko kaan.³⁰Ambaza kay waray kalooy ka nakaotang kanangiza. Hinoa impapriso naiza hangtod ka pagpakabazad ka otang. ³¹Pagpakakita na mga iba nga sogoonon na hari ka hinang na pinasaylo nagalised ya kanirang hinawa ka kazehet. Kamhan minkaro siran ka hari kay pakahagdaman niran iton.³²Kamhan impabalik kasab na hari ya sogoonon nga pinasaylo kay nagalaong nga maonga gazed iko! Kay izang dini kaini minpasaylo hao kanmo ka dakolang otang mo kanao kay minpahihangzo ko kanao. ³³Kontana malooy ko ka nakaotang kanmo singed ka pagkalooy nao kanmo.³⁴Kamhan nazehet gazed ya hari agon impaated naiza ka toong sogoonon ngaro ka prisohan. Kamhan insilotan iza keteb ka pagpakabazad naiza ka dakolang otang. ³⁵Pagkakamhan ni Hisos pagpanan-og minlaong iza kaniran nga singed kaisab kaiza ya hinangen kamazo na kanaong Ama nga daked ka tahaw, kon diri kamo ampasaylo pagtigbeet ka kamazong iba.

¹Pagkakamhan ni Hisos pagmaymay ka toong mga sakop minpanaw iza dizan ka lopa nga Galiliya. Kamhan minkandipi iza ka sapa nga Hordan kay pasinged pen iza doro ka lopa nga Huda. ²Masarang kataed ya tao nga minsonod kanangiza. Kamhan impanbajaw naiza ya mga masakiten dizan kaniran.³Na, minkarini disab kan Hisos ya mga Parasiyo kay amporba siran pagpangotana nga ya tao nga ampakigbelag ka toong asawa daw anlapas iza ka balaed na Nagagihit kon diri? ⁴Minsambag si Hisos nga daw wara pon kamo magbasa ka kasoyatan na Nagagihit nga nagalaong nga kawandini pon ka sinogdan pon na kalibotan ya Nagagihit ani ya minhinang ka amaama daw ya babazi.⁵Sokad kaiton kon anminze ya amaama ambelag iza ka toong ginikanan dazaw antipon iza ka toong asawa. Kamhan sirang dowa nahinang nga isang bolos nga tao kay namag-isa di ya kanirang hinawa. ⁶Kamhan diri di gajod pabelagen siran na bisan sin-o nga tao kay ya mag-asawa in-isa di siran na Nagagihit.⁷Kamhan minpangotana sab ya mga Parasiyo kan Hisos nga kon matood ya inlaong mo kanami kay ono sa imbilin ni Moysis ya kanaming karaan ka sogo nga nagalaong nga kon ampakigbelag ya tao ka toong asawa kinahanglan ihatag naiza ka toong asawa ya soyat para ka pagpamatood nga namagkabelag di sirang dowa. ⁸Minsambag si Hisos nga intogotan kamo ni Moysis ka pagpakigbelag ka kamazong asawa kay mahagdam iza nga diri kamo gajod ampatoo ka pagmaymay na Nagagihit. ⁹Piro kawandini pon ka sinogdan pon na kalibotan waray itogot na Nagagihit iton nga batasan. Sabten mazo ini nga bisan sin-o ya ampakigbelag ka toong asawa nga waray sala na asawa ka paghenay, magahenay ya bana kon anminze iza ka lain babazi.¹⁰Kamhan minsambag ya mga sinarigan ni Hisos nga kon diri ko antogot ka tao ka pagpakigbelag ka toong asawa madazaw kon diri ampangasawa ya tao kay mataed ya kinabido. ¹¹Minsambag si Hisos nga may mga tao nga impili daan na Nagagihit kaniran nga diri siran anminze. Piro ya dalan nga impili na Nagagihit kaniran diri kon ani ya pinili na Nagagihit ka tanan mga tao. ¹²Na, may tao nga diri makaminze kay inkatao nga nakolangan ya toong lawas. May tao nga diri makaminze kay imbot-an di iza. May tao nga diri anminze kay dazaw isahen naiza ya toong henahena ka pagtarabaho dizan ka Nagagihit. Kon angeten na tao nga diri iza anminze madazaw gajod iton.¹³Pagkakamhan kaiza may mga mindara ka mga bata dizan kan Hisos kay ipadampa siran kanangiza dazaw panaranginan ka madazaw daw paampoan. Kamhan inkasab-an siran na mga sakop ni Hisos ¹⁴piro minlaong si Hisos nga pakarinhen mazo siran kanao kay ya singod kaniran ani ya mga in-angay na Nagagihit. ¹⁵Kamhan impandampa matood ni Hisos ya olo na mga bata kay dazaw panaranginan ka madazaw. Kamhan minpanaw iza.¹⁶Kamhan may isang amaama minsogat kan Hisos kay ampangotana iza nga magtutudlo, daw ono kontana ya hinangen o nga madazaw dazaw tagan hao ka bag-ong kinabohi nga diri mawara? ¹⁷Minsambag si Hisos nga kay ono sang pangotanhen sa mo hao mahitenged ka madazaw? Isa ka ya madazaw ani ya Nagagihit. Magtoman ko ka toong mga sogo anipon ko kon mahatagan ko ka bag-ong kinabohi nga diri mawara.¹⁸Minsambag ya amaama nga daw ono sang mga sogoa? Minsambag si Hisos nga azaw magpatay ka tao, azaw maghenay, azaw pangawat, azaw pamakak. ¹⁹Magtahod ko ka kanmong ama daw ina. Mag-azak ko ka kanmong iba singod ka pag-azak mo ka kanmong kaogaringen.²⁰Minsambag ya amaama nga mintoman hao kaiton nga tanan. Daw ono pen ya nakolang dini kanao? ²¹Minsambag si Hisos nga kon mainsakto ya pagtoman mo ka mga sogo na Nagagihit pomanaw ko naa. Ipamaligza di mo ya kanmong mga betang. Kamhan ya bazad ipanhatag ka mga pobri anipen ko kon somakop kanao dazaw sobra pen ya mga mahalen mo daked ka hel-anan na Nagagihit. ²²Pagpakabati ka na batan-en nga amaama ka laong ni Hisos minpanaw iza. Nagalised ya toong hinawa kay diri kontana naiza ibaligza ya toong mga betang.²³Kamhan minlaong si Hisos ka toong mga sakop nga timan-an mazo gazed ini nga ya tao nga kowartahan malised gajod ya pagsakop naiza ka Diyos. ²⁴Pamolinged ini nga ya karabaw kon an-azi ka teheb na dagem masazon iton ka pagsakop na kowartahan ka Nagagihit kay wili ya toong hena-hena ka toong kowarta.²⁵Kamhan nabereng gazed ya mga sakop ni Hisos daw minsambag nga kon malised ya pagsakop na kowartahan ka Diyos diri baza makalangit ya bisan sin-o nga tao. ²⁶Kamhan minseleng si Hisos kaniran daw minsambag nga kon ya tao ka lamang diri makahimo piro ya Nagagihit makahimo iza ka tanan. ²⁷Kamhan minsambag si Pidro kan Hisos nga kami nga kanmong mga sinarigan izang dini kaini minbiza kami ka tanan dazaw makasakop kami kanmo. Agon daw ono pen ya ihatag mo kanami?²⁸Minsambag si Hisos nga timan-an mazo gajod ini nga kay-an ka pagkabag-o na kalibotan hao nga minhon-a ka bisan sin-o nga mahon-ang tao, hao ya anlo-to dizan ka lo-toanan ka paghari nga madazaw selengan. Kamhan kamo nga napolo may dowa nga sinarigan manlo-to isab kamo dizan ka lo-toanan. Kay ampanhokom kamo ka mga kaliwatan na mga napolo may dowa nga anak ni Israil.²⁹Kamhan bisan sin-o ya minsakop kanao pasobrahan na Nagagihit ka pagbales ka madazaw. Tagan isab iza ka bag-ong kinabohi nga diri mawara. Kay minbiza iza ka toong hel-anan daw ya mga lomon daw ya toong ginikanan daw ya mga bata daw oma kay dazaw ansakop iza kanao daw anwali sab iza ka sindo mahitenged kanao. ³⁰Na, koman nga panahon ya mga mataed nga dato mga pobri siran kay-an. Kamhan ya mga pobri mga dato siran kay-an. Ani ini ya inlaong ni Hisos ka toong mga sinarigan.

¹Kamhan minlaong si Hisos ka toong mga sakop nga wani pon ya pamolinged ka pagsohol na Nagagihit ka toong mga sakop. Na, singod iton ka tag-iza ka oma nga intamnan ka obas. Na, pagkabokas minboas ya tag-iza pagpanaw kay dazaw ampangita iza ka mga tao nga makatarabaho doro ka toong oma. ²Kamhan anpakigsabot iza kaniran kon pira ya sohol ka inaldaw. Kamhan patarabahoon naiza siran doro ka toong oma.³Na, pagkaalas noybi di minpasingod ya tag-iza doro ka mirkado. Kamhan dizan di ya mga tao nga nagahela-hela lamang kay waray tarabaho niran. ⁴Agon minlaong iza kaniran nga magtarabaho disab kamo doro ka kanaong oma kay ansohol hao kamazo. Kamhan minsogot siran.⁵Pagkaodto di kaiza daw pagkaalas tris gihapon minbalik iza ka mirkado kay andogang pon iza ka makatarabaho kanangiza. ⁶Bisan ka hapit mag-alas singko minbalik disab iza ka mirkado. Dizan pon gihapon ya mga tao nga nagahela-hela. Kamhan nangotana iza nga kay ono sa nga wara sa kamo magtarabaho komang aldaw? ⁷Minsambag siran nga waray magatarabaho kanami. Minsambag ya tao nga magtarabaho kamo doro ka kanaong oma.⁸Na, pagsalep di na sega minlaong ya tag-iza ka toong sinarigan nga pakarinhen mo ya mga tarabahanti kay panoholan di nao siran. Honahen nao pagsohol ya mga nahori nga minseled. Kamhan horihen di lamang pagsohol ya mga minhon-a ka pagtarabaho. Ani ini ya togon na tag-iza ka toong sinarigan. ⁹Kamhan mindateng dizan ya mga minseled ka tarabaho ka pagkaalas singko. Kamhan intagan siran ka sohol ka inaldaw singed ka nasabotan ka daang tarabahanti. ¹⁰Kamhan mindateng disab ya mga mahon-a ka pagtarabaho. Silaong niran nga dakola pen ya kanirang sohol kay minhon-a siran pagtarabaho ambaza kay anika gihapon ya kanirang sohol.¹¹Agon minmahay gazed siran dizan ka tag-iza ka oma ¹²nga nagalaong nga ya mga nahori kanami pagsolod isang ka oras ka ya kanirang pagtarabaho. Kamhan in-angay mo siran ka kanaming sohol bisan isa lamang nga ka oras ya pagtarabaho niran. Kamhan kami minanget kami ka isang ka aldaw nga tarabaho daw ya kapaso.¹³Minsambag ya tag-iza dizan ka isang tao nga amigo, wara hao maglimbong kanmo kay ya pagsabot nita ka sohol ka inaldaw minsogotiko. ¹⁴Na, dawata ya kanmong sohol kamhan omoli ko naa kay naazak hao kon mag-anika ya sohol na mga nahori ka sohol na mga minhon-a ka pagtarabaho.¹⁵Hao ya magaponto ka kanaong kowarta. Kontana diri kamo mag-arig ka kanaong pagpanhatag. ¹⁶Na, pagkakamhan ni Hisos pagpamolinged ka toong mga sinarigan minlaong iza nga ya mga mahori pagsakop kanao singod ka mahon-a siran ka pagsohol. Kamhan ya mga mahon-a pagsakop kanao singed ka mahorihan siran ka pagsohol. Mahatagan gazed sirang tanan ka bag-ong kinabohi nga diri mawara.¹⁷Pagkakamhan kaiza minpasinged si Hisos ngaro ka siyodad nga Hirosalem. Ka wara pen siran dateng doro impalain pagpatindeg ni Hisos ya toong mga sinarigan kay ampakahagdam iza kaniran ¹⁸nagalaong nga mamanaw di kita ngaro ka siyodad nga Hirosalem. Kamhan doro kaiton nga dapit hao nga minhon-a ka bisan sin-o nga mahon-ang tao, iated hao doro ka mga oloolo na mga pari na mga Hudiyo daw ya mga maistro ka tinoohan na mga Hudiyo kay hokman hao niran ka kamatazen. ¹⁹Kamhan iated sab hao niran doro ka mga diri kon Hudiyo nga nagahari dini ka kantang lopa. Kamhan pagasorasorahen hao niran. Pagkakamhan niran paglatos kanao ilansang hao niran ka kros. Pagdateng ka ikatolong aldaw sokad ka kanaong pagkapatay mabohi hao pagbalik garing ka lubong. Ani ini ya pakahagdam ni Hisos ka toong mga sinarigan.²⁰Pagkakamhan kaiza ya ina na mga maanak ni Sibidiyo minkarini iza kan Hisos iba si Santiago daw si Howan. Kamhan dizan ka paahan ni Hisos minlohod ya ina kay may ihangzo kontana naiza kan Hisos. ²¹Kamhan nangotana si Hisos nga daw ono ya maazakan mo? Minsambag iza nga kon somogot ko kay-an ka paghari mo palo-toon mo ya dowang maanak o dizan ka kanmong saing. Ya isa kontana palo-toon dizan ka too mo. Ya isa dimbali ka wala mo.²²Minsambag si Hisos nga wara kamo makasabot kon ono ya inhangzo mazo kanao. Daw makaanget kamo ka kalised nga singed ka maazihan nao kay-an? Minsambag sirang dowa nga makahimo kami kaiton. ²³Minsambag si Hisos nga ya mga kalised nga andatong kanao andatong sab matood kamazo. Piro ya inhangzo mazo ka paglo-to dizan ka too nao daw dimbali ka wala nao diri kon hao ya ampili ka tao kay impili daan na Nagagihit kon sin-o ya makalo-to dizan ka kanaong sain. ²⁴Na, pagpakabati ka na mga napolo nga sinarigan nazehet siran kan Santiago daw si Howan.²⁵Kamhan impatipon siran ni Hisos kay anlaong iza nga mahagdam kamo ka batasan na mga diri kon Hudiyo nga nagahari dini ka kantang lopa. Magmandaray gazed siran ka mga tao. ²⁶Piro kamo nga kanaong mga sakop, diri kamo maghaod ka kanirang batasan kay dizan kamazo kon naazak ya isa nga iza ya labaw kinahanglan ampangalagad iza kamazo. ²⁷Kon naazak ya isa nga iza ya may katongod nga ataas kinahanglan ampangalagad iza kamazo singed ka pagpangalagad na oripen. ²⁸Kay hao nga minhon-a ka bisan sin-o nga mahon-ang tao minkarimbaba hao dini kamazo dazaw ampangalagad hao kamazo. Wara hao magpaalagad kamazo kanao. Ampahalad sab hao ka kanaong kinabohi doro ka kros kay hao ya ambazad ka mga sala na mga mataed nga tao. Ani ini ya sindo ni Hisos ka toong mga sinarigan.²⁹Pagkakamhan kaiza minpanaw sin Hisos dizan ka longsod nga Hiriko. Masarang kataod ya tao nga minsonod kanangiza. ³⁰Na, dizan ka kilid na karsada may dowang ka tao nga nabota nga nagalo-to. Pagpakabati ka niran nga si Hisos ani ya minlabay dizan kaniran minhawag siran nga Ginoo nga kaliwat ni Dabid, kaloy-an mo kami! Kamhan inbaheg siran na mga tao nga nagalaong nga pahenek kamo dizan. ³¹Kamhan mintoda hinoa sirang dowa paghawag nga Nagagihit nga kaliwat ni Dabid, kaloy-i intawon kami!³²Kamhan minheneng si Hisos. Inpakarini siran naiza kay pangotanhen nga daw ono ya gosto mazo kanao? ³³Minsambag sirang dowa nga Ginoo, ya gosto nami nga makakita ya kanaming mata. ³⁴Kamhan nalooy si Hisos kaniran. Paghogam naiza ka kanirang mata madazaw matood ya kanirang mata. Kamhan min-iba siran kan Hisos.

¹Na, pagpasinged nin Hisos ngaro arani ka siyodad nga Hirosalem mindateng di siran ka lobohon nga Bitpahi dizan tenged ka bobong nga inngaranan ka Olibo. Kamhan minsogo si Hisos ka toong sinarigan nga dowa siran ²nga nagalaong nga komaro kamo naa ka lobohon dizan ka hon-ahan mazo. Pagdatong ka mazo doro makakita kamo dazon ka isang asno nga klasi na kabayo nga in-oktan dizan iba disab ya toong nati. Hobaden mazo siran daw tozokon ngarini kanao. ³Kon may mangotana kamazo magsambag kamo nga inkinahanglanan ini na kanaming oloolo. Kamhan ankalit ya tao pagtogot kamazo. Ani ini ya sogo ni Hisos kaniran⁴kay nakatoman iza ka inlaong na propita na Nagagihit kay kawandini pon nagalaong iza nga wani ya inlaong na Nagagihit mahitenged ka pagdateng ni Hisos ka Hirosalem nga ⁵long-an ya taga Siyon nga selengi mazo, waton di ngarini ya kamazong hari. Bisan hari iza nagasakay gihapon iza ka batan-en pon nga asno nga klasi na kabayo. Diri kon maiseg iza paghari naiza ka mga tao. Ani ini ya panan-og na karaang propita.⁶Kamhan ya mga sinarigan nga insogo ni Hisos namanaw sirang dowa kay kaw-en niran ya kabayo. ⁷Kamhan intozok niran dizan kan Hisos. Inhanigan sab niran ka kanirang mga bado ya likod na kabayo daw ya toong nati kay sakzan koman ni Hisos. ⁸Pagpakasakay ka naiza inhanigan dazon na mga mataed nga tao ya dalan ka kanirang mga bado. Kamhan ya mga iba isab nangotod ka mga paka kay ibetang isab ka dalan kay tahodon si Hisos.⁹Mataed ya mga tao nga minhon-a kan Hisos daw mataed isab ya mga mahori. Kamhan namagdengandengan siran pagsinggit nga sazaen ya kaliwat ni Dabid! Sazaen ya mindateng garing ka Magbabaja. Intagan iza na Magbabaja ka dakola nga gahem. Sazaen, sazaen ya Nagagihit! Ani ini ya pagsaza na mga tao kan Hisos. ¹⁰Pagpakadateng ka ni Hisos ka siyodad nga Hirosalem mabibo gazed ya tanan mga taga Hirosalem daw nagalaong siran nga daw sin-o sa iton nga taohana? ¹¹Minsambag ya mga mataed nga tao nga si Hisos iton nga taga Nazarit nga lobohan doro ka Galiliya. Propita iza na Nagagihit. Ani ini ya pagsaza na mga tao kan Hisos ka pagdateng naiza ka Hirosalem.¹²Pagkakamhan kaiza dizan ka Hirosalem minseled si Hisos ka dakolang lagkaw nga pangamozoanan ka Nagagihit. Kamhan inpamogaw gajod naiza ya mga mamaligzaay daw ya mga mamalitay.Inpandeeg sab naiza ya mga lamisa na mga Hudiyo nga magsilihay ka mga talipid nga indara na mga taga laing dapit. Impanowad disab naiza ya mga siya na mga magbaligzaay ka salapati nga mga ihaladay na mga tao ka Nagagihit. ¹³Kamhan minbaheg iza kaniran nga nagalaong nga may daan pinasoyat na Nagaggihit nga nagalaong nga ya kanaong lagkaw ani ya lagkaw ka pagpangamozo na mga tao kanao. Ambaza kay inhinang di mazo iton ka datnganan na mga tolisan nga nagapanlimbong ka mga tao. Ani ini ya inbaheg ni Hisos kaniran. ¹⁴Kamhan dini ka dakolang lagkaw na Nagagihit minkarini kan Hisos ya mga nabota daw ya mga napiang. Kamhan inpanbahaw siran ni Hisos.¹⁵Piro ya mga oloolo na mga pari daw ya mga magtutudlo ka tinoohan na mga Yodayo nangazohot siran pagpakakita niran ka mga magazong hinang ni Hisos daw ya mga bata nga naninggit nga sazaen ya kaliwat ni Dabid! ¹⁶Agon nangotana ya mga oloolo kan Hisos nga daw wara ko makabati ka kanirang inlaong mahitenged kanmo? Minsambag si Hisos nga nakabati di gajod hao. Daw wara pen kamo makabasa ka daan pinasoyat na Nagagihit nga nagalaong nga ya mga bata daw ya mga nagasoso pen ani ya intoldoan na Nagagihit ka pagpanaba ka matood nga sinaza. ¹⁷Pagkakamhan ni Hisos pagsambag kaniran minpanaw iza dizan kaniran. Kamhan minlogwa iza ka siyodad nga Hirosalem kay ankaro iza ka maghomolo nga Bitani kay ankolang iza dizan.¹⁸Pagkamasiselem kaiza minbalik si Hisos ka maghomola nga Hirosalem. Kamhan imbengtas gazed iza. ¹⁹Kamhan dizan ka kilid na dalan nakitan naiza ya isang tanom ani ngaran ya igira. Kamhan min-arani iza ka tanem piro wara iza makakita ka bonga, mga dahon ka lamang. Kamhan minlaong si Hisos ka tanom nga sokad koman diri ko makapamonga bisan kon-ong aldaw. Kamhan nangalaza matood ya tanem garing ka gamot ngaro ka mga oldot.²⁰Pagpakakita ka na mga sinarigan kaiton nangaborong gajod siran daw nagalaong nga ono sa ya tanem nga nangalaza di sa ya dahon? ²¹Minsambag si Hisos nga timan-an mazo gajod ini nga kon ansarig gajod kamo ka Nagagihit daw diri kamo andowadowa mahimo isab mazo paghinang ka singod ka paghinang nao ka tanom. Pamolingod ini nga ya bobong dizan kon sogoon mazo iton ka pagsibeg ngaro ka dagat, ansibeg matood iton ngaro. ²²Kon hogot ya pagtoo mazo madawat mazo ya bisan ono nga kamazong pangazoon pagpangamozo mazo ka Nagagihit.²³Pagkakamhan kaiza minseled si Hisos pag-isab ka dakolang lagkaw na Nagagihit. Na, ka nagatoldo pen iza ka mga tao may mgaminkarini kanangiza nga mga oloolo na mga pari na mga Yodayo daw ya mga malaas. Kamhan nangotana siran kan Hisos nga daw hain garing ya katongod mo ka pagbogaw ka mga tao kahabi? Sin-oy minhatag kanmo ka katongod ka pagpadazon ka kanmong mga hinang dini kanami? ²⁴Minsambag si Hisos kaniran nga wani sab ya pangotana nao kamazo. Kon makasambag kamo anipen hao magpanan-og kamazo kon hain garing ya kanaong katongod ka paghinang kaiton.²⁵Na, daw hain garing ya katongod ni Howan ka pagpamenzag ka mga tao? Daw garing iton ka Nagagihit kon garing iton ka tao? Kamhan namaglalislalis siran kon ono sa kontana ya kanirang isambag kan Hisos. Namaglaonglaong siran nga kon ansambag kita nga garing ka Nagagihit ya katongod ni Howan basi long-on kita ni Hisos nga kay ono sa nga diri sa kamo antoo kan Howan? ²⁶Piro kon somambag kita nga garing ka tao ya katongod ni Howan pamookon kita na mga tao kay mintoo gajod siran nga si Howan ani ya matood nga propita na Nagagihit. Kamhan minsambag siran kan Hisos nga wara kami mahagdam. ²⁷Kamhan minsambag isab si Hisos nga diri sab hao ampanan-og kamazo kon hain garing ya kanaong katenged ka pagpadazon ka kanaong mga inhinang.²⁸Kamhan nagapadazon si Hisos paglaong ka mga oloolo na mga pari daw ya mga malaas nga panalinga kamo. Pamolinged ini nga maytao nga dowa ya toong maanak nga amaama. Na, may isang aldaw nga minsogo iza ka magorang nga Dong, magtarabaho ko komang aldaw doro ka oma. ²⁹Minsambag ya magorang nga diri hao antarabaho. Piro ka wara pen madogay minhinelsel iza. Kamhan minpanaw iza ngaro ka oma kay antarabaho iza. ³⁰Kamhan inkaro disab na ama ya manghod daw insogo disab nga Dong, magtarabaho ko komang aldaw doro ka oma. Minsambag iza nga hoo, ampanaw di hao. Ambaza kay wara iza magkaro ka oma.³¹Na, dizan kanirang dowa daw sin-o ya mintoman ka sogo na toong ama? Minsambag siran nga ya magorang ani gajod ya minsogot ka sogo na toong ama. Minsambag si Hisos nga sabten mazo ini nga ya mga magsokotay ka mga bohis daw ya mga babazi nga minhinang ka maonga ampasolod hao kaniran ka hel-anan na kanaong Ama paghon-a ka pagpaseled nao kamazo. ³²Kay si Howan minkarini iza kamazo dazaw mahagdam kamo kon ono ya batasan nga matadeng. Kamhan wara kamo magtoo kanangiza. Piro ya mga magsokotay ka mga bohis daw ya mga maongang babazi mintoo siran kan Howan. Bisan minkita disab kamo kaniran ka pagtoo niran kan Howan, wara kamo magbiza ka kamazong mga sala singod ka pagbiza niran. Wara gajod kamo magtoo kan Howan.³³Kamhan indogangan pon ni Hisos pagpamolinged kaniran nagalaong nga may tag-iza ka lopa. Kamhan mintanem iza ka oma nga tamnanan ka mga obas. Inlibotan ya oma ka alad. Kamhan impakabotan naiza ya lopa kay hinangen ya salodanan ka sapa para ka pagkepeg ka mga obas. Kamhan inhinang naiza ya ataas nga lagkaw nga bantazan ka mga tanem. Kamhan nandapit iza ka mga saop. Kamhan minpanaw iza ngaro ka laing dapit. ³⁴Pagkahapit di anihen ya toong mga obas impakaro naiza ya toong mga sogoonon kay pakaw-en di kontana naiza ka toong kabahinan.³⁵Kamhan pagdatong doro indakep di hinoa ya mga sogoonon na mga saop. Kamhan imbonalan ya isang sogoonon. Impatay ya ikadowang sogoonon. Impook ya ikatolong sogoonon ka mga bato. ³⁶Ka wara pon madogay insogo disab pagpakaro ya mga laing sogoonon nga mataed pon ka hon-a nga inpakaro. Piro impamagbonalan daw impamagpatay isab siran. ³⁷Pagkakamhan kaiza impakaro disab na tag-iza ya toong anak nga amaama. Kay nagahena-hena iza nga tahodon gajod niran ya toong maanak.³⁸Kamhan pagpakakita ka na mga saop nga wani di kaan andateng di ya maanak na tag-iza namagsabotsabot dazon siran nga waton di ngarini kanta ya maanak na tag-iza nga magdawatay kay-an kaini nga lopa nga toong irinsiya. Hala, pamagpatazen ta iza gajod kay dazaw kita ka mazoy makapolos ka pagpanag-iza ka lopa. ³⁹Kamhan impamagtagenan matood niran ya maanak daw impamagtimbag niran doro ka gawas na alad na tanom. Kamhan impamagpatay di niran iza.⁴⁰Na, pagdatong na tag-iza ka lopa daw magaono sa koman iza ka mga saop? ⁴¹Minsambag ya mga manalingahay kan Hisos nga patazen siran gajod naiza. Kamhan pasaopan naiza ya tanem ka lain dazaw makahatag kanangiza ka toong kabahinan kada pag-ani.⁴²Pagkakamhan indogangan ni Hisos paglaong kaniran nga daw wara pon kamo makabasa ka daan pinasoyat na Nagagihit nga nagalaong nga ya matimgas nga bato nga inbizaan na mga minhinang ka lagkaw ani ya nahinang nga sinarigan ka pagparig-en ka primirong ogdok na lagkaw. Inhinang iton na Magbabaja kamhan madazaw gazed iton pagpakakita nami.⁴³Agon pasabten ta kamo nga dini kamazo nga mga Hudiyo diri magpadazon ya Nagagihit ka toong tarabaho. Hinoa karohen naiza ya mga tao nga antoman ka toong mga sogo. ⁴⁴Nagalaong pon si Hisos pagpamolinged kaniran nga bisan sin-o ya makadasmag kaiton nga matimgas nga bato mangabari ya toong bekeg. Kamhan bisan sin-o ya madateng naiton nga matimgas nga bato ka pagkaligid magemek gazed ya toong lawas. Kilalhen mazo nga ya dakolang matimgas nga bato nga inbizaan mazo ani hao.⁴⁵Na, pagpakabati ka na mga oloolo na mga pari daw ya mga Parasiyo makasabot dazon siran nga naigo siran ka mga pamolinged ni Hisos. ⁴⁶Agon pamagdakpen niran kontana si Hisos piro mahaldek siran ka mga mataed nga tao nga mga mintoo nga si Hisos aniton ya matood nga propita na Nagagihit.

¹Nagalaong nga Kamhan indogangan ni Hisos pagpamolingod kaniran nga ²ya pagpasakop na Diyos ka mga tao singod iton ka hari nga nagaandam ka pagkombiti ka pagpangasawa na toong mga-anak nga amaama. ³Pagkakamhan naiza pagpakaandam ka kombiti impakaro di naiza ya toong mga sogoonon dizan ka mga tao nga toong dinapit dazaw mangaon di naa siran. Ambaza kay minbaribad siran ka inpanaba na sogoonon.⁴Kamhan insogo disab pagpakaro ya mga iba nga sogoonon dazawlong-on niran pag-isab ya mga dinapit nga kamhan di ya paglamisa. In-ihaw di nao ya kanaong mga baka daw ya mga nati nga mahonlas. In-andam di nao ya tanan. Mangarini di naa kamo ka kanaong kombiti.⁵Piro nagapalingeglingeg lamang ya mga dinapit ka impanaba na mga sogoonon. Nagapadazon siran ka kanirang mga hinang. Ya isa minpanaw doro ka toong oma. Ya isa minpasingod ngaro ka toong tarabahoan. ⁶Ya mga iba mindakep di hinoa ka mga sologoon. Kamhanimpamagbonalan daw inpamagpatay. ⁷Pagpakahagdam ka na hari nazehet gajod iza. Impakaro dazon naiza ya toong mga bataen dazaw patazen ya mga minpatay ka toong mga sogoonon. Inpanonog disab ya kanirang longsod.⁸Kamhan minlaong ya hari ka toong mga sogoonon nga naandam di nao ya kombiti piro ya daan dinapit nao diri di gajod siran makatilaw ka kanaong in-andam. ⁹Agon pangarohen mazo ya mga kadalanan. Bisan sin-o nga makitan mazo dapita mazo siran. ¹⁰Kamhan namanaw ya mga sogoonon ngaro kay dizan ka mga dalan patiponon niran ya bisan sin-o nga tao nga nakitan niran. Bisan maonga ya batasan niran bisan magazon impandapit sirang tanan. Kamhan napono gajod ya lagkaw nga kombitihanan.¹¹Minsolod ya hari kay ansolong iza ka mga tao nga bag-ong dinapit. Kamhan nakitan naiza ya amaama dizan nga wara baza iza magbado ka para ka mga dinapit ka kombiti. ¹²Kamhan impangotana na hari nagalaong nga amigo, daw ono sa ya pagsolod mo dini nga wara sa ko magbado ka para ka kombiti? Wara magsambag ya amaama.¹³Kamhan minsogo ya hari ka toong mga sogoonon nga pamegketen mazo ya toong alima daw paa. Kamhan iitsa iza doro ka kadoglomanan bali ka gawas. Doro kaiton magapangagoot ya mga tao ka kanirang ngipon ka paghaza. ¹⁴Kamhan minlaong si Hisos kaniran nga ini nga hari singod iza ka Nagagihit nga mindapit ka mga mataod nga tao piro talagsa ka ya toong impili. Ani ini ya pamolinged ni Hisos kaniran.¹⁵Pagkakamhan kaiza namanaw dazon ya mga Parasiyo kay namagsabotsabot siran nga magalit-agen kontana si Hisos pagpanaba. ¹⁶Kamhan impakaro niran ya kanirang mga sakop dizan kan Hisos. Iba gihapon ya mga Hudiyo nga minsakop di kan Hirodis nga hari. Pagdatong niran nagalaong siran nga Magtutudlo, mahagdam kami nga matadong ya batasan mo daw matood gihapon ya mga panaba mo. Pagtoldo mo ka pagmaymay na Nagagihit waray pinalabi mo nga bisan sin-o nga taohana daw bisan ono ya kanirang katongod. ¹⁷Agon long-an mo kami kon ono ya kanmong hona-hona nga daw makalapas kami ka balaed na mga Yodayo kon ambazad kami ka bohis kan Sisar nga hari nga nakadaog di ka kantang lopa? Daw ambazad kami kon diri?¹⁸Na, mahagdam dazon si Hisos nga daeten iza kontana. Kamhan minbales iza pagpangotana kaniran nga kay ono sa kamo minporbakamo kanao? Mga bakaken gazed kamo! ¹⁹Pakiton mo hao ka kowarta nga palata nga ibazad mazo ka bohis ni Sisar. Kamhan impakita matood niran si Hisos ka kowarta.²⁰Kamhan minlaong si Hisos nga daw kaninong bayho dini ka palata? Daw kanin-ong ngaran ya insoyat dini? ²¹Minsambag siran nga kan Sisar gazed iton. Minsambag si Hisos nga bayri mazo ya azoon ni Sisar kamazo. Bayri sab mazo ya azoon na Nagagihit kamazo. ²²Pagpakabati ka niran ka insambag ni Hisos nabereng siran kay diri siran makahimo ka paglalis kan Hisos. Kamhan minpanaw siran dini kanangiza.²³Pagkakaan kaiza minkarini isab kan Hisos ya mga maistro na mga Hudiyo ani ngaran ya Sadosiyo. Ya kanirang toldoan ya mga namola di nga tao diri gajod mabohi pagbalik garing ka lobong. Na, nangotana siran kan Hisos nga ²⁴Magtutudlo, ya kanaming karaan nga si Moysis mintogon iza kanami nga kon mapatay ya isang tao nga waray maanak kinahanglan ya lomon na napatay anikay makapangasawa ka toong ipag nga nabalo di dazaw anpanganak. Kamhan mabohi ka ya ngaran na toong magorang nga napatay. Ani ini ya togon ni Moysis kanami.²⁵Na, izang mahon-a pon dini kanami may maglomon nga pitong ka amaama. Naminze di ya kamagorangan. Kamhan napatay di iza ka waray maanak. Kamhan ya toong asawa nga nabalo di impangasawa na primirong manghod. ²⁶Pagkakamhan kaiza napatay kasab ya primirong manghod nga waray maanak. Singod kaiton ya kahimtang na ikadowang manghod keteb ka gipos-an. ²⁷Pagkahorot niran pagkapatay anipon mapatay ya babazi nga nabalo ka pitong ka maglomon. ²⁸Na, Magtutudlo, wani ya pangotana nami kanmo kay mintoldo iko nga may tirmino ka pagbohi ka mga tao nga nangapatay. Daw kanin-ong asawa itong babazi kon mabohi pag-isab ya mga namagsonodsonod nga pitong ka maglomon kay iza ya asawa nirang tanan?²⁹Minsambag si Hisos nga sazep mazo iton kay wara pen kamo makasabot ka daan pinasoyat na Diyos daw toong gahem. ³⁰Kay ka pagpangabohi na mga tao kay-an diri di magkaminze ya mga amaama daw ya mga babazi kay nabag-o di ya kanirang mga batasan singed ka batasan na mga sogoonon nga taga langit.³¹Mahimo gazed ya pagpabohi na Nagagihit ka mga tao garing ka lebeng. Daw wara kamo magbasa kaiza nga inlaong na Nagagihit kamazo nga nagalaong nga ³²Hao nga Nagagihit ani ya hawagenen na kamazong mga karaan nga si Abraham daw si Isak daw si Hakob. Ani ini ya impasoyat na Nagagihit. Kamhan bisan patay di ya mga karaan magahawagen pen niran ya Diyos kay bohi ka siran dakod. Kamhan iza ya Diyos na mga bohi nga tao, diri kon Nagagihit na mga patay. ³³Pagpakabati ka na mga mataed nga tao nangabereng siran ka intoldo ni Hisos.³⁴Na, ya mga Parasiyo pagpakabati niran nga wara di ya ikasambag na mga Sadosiyo kan Hisos minkarini disab siran kan Hisos. ³⁵³⁶Kamhan ya isa hanas iza ka mga balaed na Hudiyo. Iza ya anpangotana kan Hisos pagporba nagalaong nga Magtutudlo, dizan ka kasogoan na Nagagihit daw ono ya labaw nga sogo?³⁷Minsambag si Hisos nga wani ya labaw nga sogo na Nagagihit nga kinahanglan nga pagaazaken mazo pagtinood ya Nagagihit nga kamazong Nagagihit. Kamhan isahon mazo ya kamazong hona-hona ka pagtaremdem kanangiza. ³⁸Ani ini ya labaw nga sogo.³⁹Mag-anika ya ikadowang sogo nga kinahanglan mag-azak kamo ka kamazong mga iba singed ka pagazak mazo ka kamazong kaogaringen. ⁴⁰Kamhan iton nga dowang ka sogo ani ya singed ka toboan na bisan ono ya daan balaod na Nagagihit daw bisan ono ya sinoyat na mga karaang propita. Ani ini ya sambag ni Hisos mga ka Parasiyo.⁴¹Na, ka nagatipon pen ya mga Parasiyo nangotana si Hisos kaniran nga ⁴²daw ono ya kamazong hona-hona mahitongod kan Kristo nga hari nga pinili na Nagagihit? Daw kanin-ong kaliwat iza? Minsambag siran nga kaliwat iza na kanaming karaan nga si Dabid.⁴³Kamhan minlaong si Hisos kaniran nga agon kay ono sa nga minngaran sa si Dabid kan Kristo nga toong Magbabaja pagtandog na Ispirito na Nagagihit ka toong hinawa? Kay minlaong iza nga ⁴⁴ya Nagagihit ani ya minpanaba ka kanaong Magbabaja nga lomo-to ko naa dini ka kanaong too hangtod ka pagpakadaeg nao ka kanmong mga kaaway. Ani ini ya daan mga panaba ni Dabid mahitongod kan Kristo nga hari nga pinili na nagagihit.⁴⁵Kamhan kon minngaran si Dabid kan Kristo nga toong Magbabaja daw ono say toong pagkakaliwat ka lamang ni Dabid? ⁴⁶Pagkakamhan ni Hisos pagpanaba waray isa nga makasambag. Sokad kaiton wara di siran makasigi pagbalik pagpangotana kan Hisos.

¹Daw ya toong mga sinarigan nga nagalaong nga Pagkakamhan kaiza minlaong si Hisos ka mga mataod nga tao ²ya mga magtutudlo ka tinoohan na mga Hudiyo daw ya mga Parasiyo may katenged niran ka paghilwas ka mga balaod ni Moysis. ³Agon bisan ono ya isogo niran kamazo tomanon mazo piro diri mazo paghaodon ya kanirang batasan kay ya inwali niran kamazo wara siran magtoman.⁴Impalisdan niran ya mga tao ka sogo nga mabog-at piro impalabzan lamang niran iton nga mga sogo. ⁵Hinangon niran ya tanan mga magazon dazaw anpagarbo siran dizan ka mga tao. Dizan ka alimpatakan niran daw ya bokton impamogkoton niran ya lon-anan ka sinoyatan ka mga daan balaod ni Moysis dazaw tahodon siran na mga tao. Inlakbangan isab niran ya borda dizan ka sidsid na bado niran dazaw ankilala ya mga tao kaniran.⁶6Kada pagpista daw kada pagsimba naazak siran kon palo-toon siran ka magazong dapit. ⁷Pag-azi sab niran dizan ka mirkado naazak gajod siran nga madazaw ya pag-abiabi na mga tao kaniran. Ansaza siran isab ka pagngaran na mga tao kaniran ka maistro nga labaw.⁸Piro kamo nga kanaong mga sinarigan, diri kamo magsaza nga ngaranan kamo ka magtutudlo nga labaw kay isa ka gajod ya kamazong magtutudlo nga labaw. Kamhan dini kanao singod ka mga maglomon ka gajod kamong tanan. ⁹Agon bisan sin-o ya antoldo kamazo ka sindo mahitongod ka Nagagihit diri kamo magtahod kanangiza singod ka pagtahod mazo ka Nagagihit. Kay ya Nagagihit nga nagahola dakod ka langit iza gajod ya kamazong Ama nga tahodanan nga labaw gajod. ¹⁰Diri kamo magsaza nga ngaranan kamo ka oloolo kay isa ka lamang ya oloolo mazo nga ani si Kristo.¹¹Dizan kamazo ya labaw nga tao ani ya ampangalagad kamazo. ¹²Bisan sin-o ya ampalabaw ka toong kaogaringon dizan ka mga iba ipaobos gajod iza na Nagagihit. Bisan sin-o ya ampaebes ka toong kaogaringon dizan ka mga iba ipalabaw iza na Nagagihit.¹³Kamo nga mga magtutudlo ka mga Yodayo daw ya mga Parasiyo, magalisod gajod kamo kay-an kay mga bakakon kamo kay imbalabagangajod mazo ya mga tao kay dazaw diri siran antoo kanao. Diri kamo ansogot kanao kamhan diri togoton siran ka pagtoo. 14Kamo nga mga magtutudlo daw ya mga Parasiyo, magalisod kamo kay-an kay mga bakakon kamo kay magapanlimbong kamo ka mga balo nga babazi dazaw makaangken kamo ka kanirang mga irinsiya. Kamhan magapaataason sab mazo ya kamazong pagpangamozo ka Nagagihit dazaw komoton mazo ya kamazong mga sala. Agon pahamtangan kamo na Diyos ka silot pagdakola ka silot naiza ka iba nga mga tao nga makasala. ¹⁵Kamo nga mga maistro daw ya mga Parasiyo, magalisod kamo kay-an kay mga bakaken gajod kamo. Kamhan aro ya kamazong pagsakay dizan ka dagat daw ya kamazong pagbagtas dizan ka lopa dazaw ankawa kamo ka .bisan isa kang bolos nga sakop. Pagpasakop mazo ka tao indap-an iza ka kamazong batasan nga nadobli gajod ya kaonga na kamazong batasan. Agon ya silot nga ipahamtang na Diyos kanangiza labaw iton ka silot naiza kamazo.¹⁶Nagalaong pon si Hisos kaniran nga nagalised kamo kay-an kay pagtoldo mazo ka mga tao singed ka nabota gajod kamo. Nasazop kamo ka pagtoldo nagalaong nga kon anpaninhaga ya tao ka dakolang lagkaw nga pangamozoanan ka Nagagihit diri di kinahanglan nga tomanon pon naiza ya toong saad. Piro kon ampaninhaga iza ka bolawan dalem ka dakolang lagkaw na Nagagihit kinahanglan gajod tomanon naiza ya toong saad. ¹⁷Mga nabota kamo daw talatalahon! Kay ya mga bolawan diri kon mahal iton ka pagkamahal na dakolang lagkaw nga pangamozoanan ka Nagagihit.¹⁸Nasazop isab kamo ka pagtoldo nagalaong nga kon ampaninhaga ya tao ka haladanan diri di kinahanglan nga tomanon pon naiza ya toong saad. Piro kon ampaninhaga iza ka halad dizan ka haladanan kinahanglan tomanon naiza ya toong saad. ¹⁹Nangabota di kamo daan! Kay ya halad diri kon mahal iton ka pagkamahal na haladanan.²⁰Agon kon ampaninhaga ya tao ka haladanan malakip isab ya tanan mga halad dizan ka haladanan. ²¹Kon ampaninhaga isab ya tao ka dakolang lagkaw na Nagagihit malakip isab ya Diyos nga nagahela dizan kaiton nga lagkaw. ²²Kon ampaninhaga ya tao ka langit malakip isab ya lo-toanan na Nagagihit ka paghari daw iza nga nagalo-to dizan.²³Kamo nga mga magtutudlo ka mga Hudiyo daw ya mga Parasiyo, magalisod gajod kamo kay-an kay diri kon matood ya pagkaazak mazo ka Nagagihit. Kay bisan nagahatag kamo ka Nagagihit ka ikanapolo nga ka bahin na bisan ya mga klasi na zaman wara kamo magtoman ka mga labaw nga sogo na Nagagihit nga nagalaong nga tadengen mazo ya pagdomara mazo ka mga isa daw isa. Magkinaloy-anay disab kamo kaniran. Magtoo isab kamo ka Nagagihit. Kinahanglan tomanen isab mazo ini singod ka paghatag mazo ka mga ikanapolo nga bahin dizan ka Nagagihit. ²⁴Pagtoldo mazo ka mga tao singod ka nabota gajod kamo kay nawied kamo paghinang ka mga goramay nga sala piro ya mga dakola nga sala waray kawiod mazo.²⁵Kamo nga mga maistro ka mga Yodayo daw ya mga Parasiyo, magalisod kamo kay-an kay mga bakakon gajod kamo kay inhogasan gajod mazo ya gawas na kamazong mga baso daw palato. Piro ya seled napono gajod ka mga maripa kay naanad kamo paglimbong ka mga tao dazaw makakowarta. ²⁶Kamo nga mga Parasiyo nga nabota, kinahanglan hingloan mazo ya seled na baso daw palato paghon-a. Anipon sab kon mahinglo ya gawas naiton.²⁷Kamo nga mga maistro daw ya mga Parasiyo, magalised gazed kamo kay-an kay mga bakaken gajod kamo kay minpasingedsinged kamo ka mga pantiyon nga inpintalan ka mapoti. Dizan ka gawas madazaw selengan piro dalem ka seled polos bekeg na mga namola nga tao nga nadonot di daw mabaho di. ²⁸Singod kamo kaiton kay pagseleng na mga tao ka kamazong batasan singed ka matadeng kamo ambaza kay ya mga paghena-hena mazo polos mga limbong. Naanad sab kamo paglapas ka mga balaod na Nagagihit.²⁹Kamo nga mga maistro daw ya mga Parasiyo, magalised gajod kamo kay-an kay mga bakaken kamo kay minhinang kamo ka mga madazaw nga pantiyon para ka mga inpatay nga karaang propita na Nagagihit. Inpaartihan disab mazo ya mga pantiyon na mga karaang tao nga matadeng ³⁰nga inpatay na kamazong kaapoan. Bisan minlaong kamo nga kon bohi ka kamo kaiza nga aldaw wara kamo magpamatay kaniran, ³¹kamo gajod ya mga kaliwatan na mga minpamatay. Singod kamo kaniran³²agon magtiwas naa kamo ka hinang nga insogod na kamazong kaapoan. Nagabatasan kamo singod ka mga halas nga polos maonga ya batasan agon diri gajod kamo makalayas ka pagsilot na Nagagihit kamazo doro ka impirno. ³³Nabagtasan kamo singed la mga halas nga polos maonga ya batasan agon diri gajod kamo makalayas ka pagsilot na Naginihit kamazo doro ka impirno.³⁴Agon pakarinihen nao kamazo ya mga propita na Nagagihit daw ya mga tao nga dakola ya kanirang kahagdamanan mahitenged ka Nagagihit daw ya mga maistro nga mahagdam pagsindo mahitongod kanao. Kamhan pamagpatazon pon mazo ya mga pirang ka tao kaniran. Ipanlansang sab mazo ka kros ya iba. Dalem ka kamazong singbahan pamagbonalen sab mazo ya mga iba. Kamhan dizan ka bisan hain ya kanirang dalaganan lopogon sab mazo siran. Ani ini ya batasan mazo kay-an ka pagdatong niran kamazo. ³⁵Agon madateng kamo ka silot para ka pagpatay ka tanan mga karaan nga matadeng sokad ka pagpatay kan Abil nga waray sala hangtod ka pagpatay kan Zakariyas nga anak ni Barakiyas nga inpatay mazo dizan ka tonga-tonga na haladanan daw ya dakolang lagkaw na Nagagihit. ³⁶Timan-an mazo gajod ini nga madatong gajod kamo ka silot kay ani ini ya kamazong hinang.³⁷Pagkakamhan ni Hisos pagbahog kaniran minlaong iza nga kamo nga mga taga Hirosalem, nagalisod di gajod ya kanaong hona-hona kay inpatay mazo ya mga karaang propita na Nagagihit daw impamook ya mga sogoonon nga impakarini na Nagagihit kamazo. Kapira hao an-aligara kamazo kontana singod ka manggianak nga nagatipon ka toong mga pise dalem ka toong ampak piro diri kamo ansogot. ³⁸Sabton mazo ini nga pamanawan gajod na mga tao dini ka hel-anan mazo. Bizaan disab ta kamo. ³⁹Sokad koman diri kamo makakita kanao pag-isab hangtod ka pagbalik nao. Kamhan ansaza kamo kanao magalaong nga sazaon ta iza nga impakarini na Nagagihit dini kanami. Ani ini ya pagpanan-og ni Hisos kaniran.

¹Minlogwa si Hisos ka dakolang lagkaw nga nangamojo ka Nagagihit. Pagpanaw naiza dizan minkarini kanang-iza ya toong mga sinarigan kay pasolongon niran si Hisos ka kalagkawonan nga natipon paghinang ka dakolang lagkaw na Nagagihit. ²Minsambag si Hisos nga paka selengi gajod mazo itong mga lagkaw. Timan-an mazo gajod ini nga mageba gajod iton kaan. Basta ya mga bato nga insompazan podo mabogto pagpangadoog.³Na, ka nagalo-to si Hisos dizan ka bobong nga Olibo minkadizan ya toong mga sinarigan nga waray lain tao iba kanang-iza. Kamhan nangotana siran nga panan-ogan mo kami kon kon-o iton magoba iton nga mga lagkaw. Daw ono ya timaan ka pagbalik mo ngarini daw ya kataposan nga panahon dini ka kalibotan? ⁴Kamhan minsogod si Hisos pagsindo kaniran nga maghamarag kamo kay basi magalimbongan kamo na mga tao. ⁵Kay mataed ya mga kandateng nga ampasingodsingod siran kanao magaangken nga si Kristo hao nga pinili na Nagagihit ka paghari ka mga tao. Kamhan malimbongan ya mga mataod nga tao.⁶Diri sab kamo magkahaldek kon makabati kamo nga may gobot na gira nga arani di koni kamazo, may gira disab koni doro ka aro. Matoman matood iton piro diri pen kon ani ya kataposan nga panahon dini ka kalibotan. ⁷Kay ka wara pon matapos ya kalibotan ampakig-away ya isang longsod ka laing longsod. Ampakig-away isab ya isang hari ka laing hari. Madatong ya mga nagakalainlain dapit ka pihit. Mataod isab ya mga linog. ⁸Iton nga tanan ani ya sinogdan ka lamang na mga kalisod dini ka kalibotan.⁹Kamhan pandarhan kamo dizan ka mga madaogdaogon kamazo. Kamhan patazon kamo. Magakontarahan kamo na tanan mga tao kay hao ya insakopan mazo. ¹⁰Kamhan mataod ya ampamiza ka kanirang pagtoo kanao. Mamag-inodlaway siran daw mamagdinemetay. ¹¹Andatong pon ya mga mataod nga tao nga nagapasingodsingod ka mga propita na Nagagihit. Kamhan malimbongan gajod ya mga mataod nga tao.¹²Kamhan garing ka pag-oswag na maongang batasan dini ka kalibotan diri magkinaloyanay ya isa daw isa. ¹³Na, bisan sin-o ya antoo pon kanao kotob ka pagkatapos naiton nga mga kalisod mahatagan iza ka bag-ong kinabohi nga diri mawara. ¹⁴Ya pagmaymay mahitongod ka pagpasakop na Nagagihit ka mga tao iwali pon iton doro ka tibolos kalibotan dazaw mahagdam ya tanan mga tao. Anipen matapos ya kalibotan.¹⁵Kawandini pon may inlaong ni Danyil nga karaang propita na Nagagihit. Kamhan minpanan-og iza daan mahitongod ka isang tao nga masarang kaonga nga makadaot ka mga tao. Na, sabton mazo ya inlaong ni Danyil. ¹⁶Kay minlaong iza nga pagpakakita mazo nga mintindog di iton nga tao dalem ka dakolang lagkaw nga pangamozoanan ka Nagagihit, kamo nga mga taga Hoda mandalagan gajod kamo ngaro ka bobong. ¹⁷Bisan magahayahay kamo dizan ka pawa, dalagan gazed kamo kay waray logar mazo ka pagpanhipid ka kamazong mga botang. ¹⁸Bisan magatarabaho kamo dakod ka kamazong oma dalagan gajod kamo kay waray logar mazo ka pagkawa ka kamazong bado dizan ka lagkaw.²²Kalooy adaw na mga kabdos daw ya mga may pinasoso kay magalised siran ka pagdalagan. ²⁰Maghangzo kamo ka Nagagihit nga kontana diri kon panahon nga tig-oran kon aldaw nga tigpahimlay ya pagdalagan mazo. ²¹Kay ya kasamok naiton nga panahona masara iton ka bisan ono ya kasamok sokad kawandini pon ka sinogdan pon na kalibotan hangtod koman daw kawanihen ka. ¹⁹Kamhan kon diri padalien na Nagagihit iton nga mga aldaw wara gajod ya tao nga mabohi. Piro magakalooy ya Nagagihit ka toong mga pinili agon ampadali iza kaiton nga panahona kay-an.²³Kay-an kaiton nga panahona kon may anlaong kamazo nga paka selengi, mindateng di si Kristo nga hari nga pinili na Nagagihit, diri kamo magtoo. Kon may anlaong sab kamazo nga paka selengi, waton di iza ngarini, diri kamo magtoo. ²⁴Kay andatong pon kamazo ya mga ampasingedsinged kan Kristo daw ya magapatihinang ka mga propita na Nagagihit. Anhinang sab siran ka mga kaberenganan kay kon mahimo malimbongan ya mga tao nga pinili na Nagagihit. ²⁵Maghamarag gajod kay inpakahagdam di nao kamo daan.²⁶Agon kon may anlaong kamazo nga waro di si Kristo ka kamingawan, abay gajod kamo pagkaro. Kon may anlaong kamazo nga nagatago si Kristo dalem kaiton nga lagkaw, abay gazed kamo pagtoo kaiton. ²⁷Kay ya pagdatong nao kay-an singod iton ka kilat nga magalapowasan dazon ya kalangitan garing ka sobazan ngaro ka salpan. ²⁸Kamhan bisan sin-o ya maongang batasan nga tao silotan gajod iza. Singod iton ka pamolinged nga bisan hain ya lawas nga patay magatiponon na mga agila ka pagtoktok ka mga onod.²⁹Ya, pagkatiwas na mga masiet nga kalised andeglem ya sega, anlipsilipsi ya bolan, mangaholog sab ya mga bitoon garing daked ka langit. Magakaonga gajod ya kalangitan kay ipahezenghezeng na Nagagihit.³⁰Anipen makita ya timaan daked ka langit para ka pagdatong nao nga si Kristo. Kamhan anhaza ya tibo nga mga tao pagkita niran kanao iba ya mga gabon. Pagkarimbaba nao labaw gazed hao ka gahom daw madazaw gajod selengan. ³¹Kamhan antanog ya tamboli daw sogoon nao ya kanaong mga sinogo nga taga langit dazaw patiponon niran ya tibo nga tao nga impili nao daan. Garing siran ka mga dapit doro ka sobazan daw doro ka salpan daw timogan daw kanawazan daw bisan hain dini ka kalibotan.³²Na, paniidan mazo ya batasan na igira nga tanem. Kon namag-o ya toong dahon mahagdam di kamo nga ampanhoraw kaan. ³³Singod iton ka inlaong nao kamazo koman. Pagpakakita mazo kaiza nga mga inlaong nao kamazo mahagdam kamo nga arani gajod ya tirmino nao ka pagbalik ka kalibotan.³⁴Matood nga ka wara pen mapatay ya kamazong kaliwatan matoman ya impanan-og o kamazo. ³⁵Mangawara ya kalangitan daw ya kalibotan piro ya kanaong mga panaba diri gajod mawara.³⁶Na, waray mahagdam kon kon-o hao ambalik ka kalibotan. Bisan ya mga sogoonon nga taga tahaw, bisan kon hao, wara kami mahagdam kay ya kanaong Ama nga Nagagihit iza kay mahagdam.³⁷Na, ya batasan na mga tao kay-an ka pagbalik nao ngarini daw ya batasan na mga karaang tao ka bohi pon si Niwi mag-anika siran. ³⁸Kay kawandini pon ka wara pon datong ya lonop nagapadazon ya mga tao pagpangaen daw pagpanginom daw pagpanminze kotob ka aldawa nga minseled sing Niwi ka arka. ³⁹Kamhan ya mga tao diri antoo nga madateng siran ka lonop kaan piro pagdatong matood na lonop natibe siran pagpatay. Ani isab ya kahimtang na mga tao kay-an ka pagbalik nao dimbaba ka kalibotan.⁴⁰Kay kay-an ka pagdatong naiton nga aldawa magatarabaho ya dowang ka tao doro ka oma. Kamhan ibahen nao ya isa piro ya isa ibilin. ⁴¹Magagaling sab ya dowang ka babazi ka mais. Kamhan ibahen nao ya isa piro ya isa ibilin. ⁴²Agon maghamarag gazed kamo kay wara kamo mahagdam kon ono aldawa ya pagbalik nao nga kamazong Magbabaja.⁴³Sabton mazo ini nga kon mahagdam daan ya tag-iza ka lagkaw nga panikon di iza na tolisan, diri gajod iza an-ondang pagbantay kay diri itogot ya kawatan ka pagpanik. ⁴⁴Agon mag-andam isab kamo daan kay andatong gajod hao kay-an ka oras nga wara kamo mahagdam.⁴⁵Wani ya pamolingod mahitongod ka pagbalik nao ngarini nga may isang sogoonon nga masarigan nga pinili na toong amo ka pagdomara ka mga iba nga sogoonon daw tagan sab siran ka makaon ka hostong orasa. Kamhan in-andam naiza daan ka pagdatong na toong amo. ⁴⁶Kon antoman ya sinarigan ka mga sogo na toong amo dakola ya toong kasaza pagdatong na amo. ⁴⁷Kamhan insarigan iza na amo ka toong tanan mga botang.⁴⁸Piro kon maonga ya hona-hona na sinarigan silaong naiza nga madogay pon ya pag-oli na kanaong amo. ⁴⁹Kamhan minsogod iza pagpanbonal ka toong iba nga sogoonon. Minkaon sab iza daw min-inom iba ka mga palahobog. ⁵⁰Lomaza iza ominom daw komaon mindatong di ya toong amo ka waray tirmino nga aldaw. ⁵¹Kamhan insilotan gajod ya sogoonon na amo. Ipalakip gihapon iza dizan ka mga bakaken. Kamhan doro ka impirno magapangagoot iza ka toong ngipon ka paghaza.

¹Kamhan indogangan ni Kristo pagmaymay kaniran nagalaong nga ya pagbalik nao ngarini ka kalibotan dazaw anhari hao ka mga tao singed iton ka pagsogat na mga daraga ka banahon ngaro ka pagkombiti. ²Napolo siran nga ka daraga daw nagadara siran ka tagsatagsa nga lamparahan. ³- ⁴Na, ya mga lima nga daraga boangboangon siran kay waray andam niran ka gas. Piro ya mga lima nga bootan nakaandam daan siran ka gas daw nagadara sab siran ka kanirang mga lamparahan.⁵Kamhan naaban pon iton banahen doro agon nakatorog ya mga daraga ka pagtagad. ⁶Pagkatonga ka kaiza na kahabzon may minhawag nga pangimata di kamo diton kay mindatong di doro ya banahon! Dali kamo, magsogat kamo kanangiza!⁷Nangimata dazon ya mga daraga. Insog-an sab dazon ya kanirang mga lamparahan. ⁸Kamhan ya mga boangboangon nangazo pon ka gas dizan ka mga bootan nagalaong nga tagan mazo kami ka gas kay hapit di mangapareng ya kanaming mga sogà. ⁹Minsambag ya mga beetan nga ya in-andam nami diri maigo kantang tibo. Komaro kamo hinoa ka tindahan. Pomalitkamo ka gas doro.¹⁰Ka doro pon siran ka tindahan mindateng di doro ka lagkaw ya banahen. Kamhan minpaseled iza ka kombitihanan ka mga daraga nga nakaandam daan ka toong pagdatong. Kamhan insirahan ya pirtahan. ¹¹Lomaza kaiza mindatong di ya mga daraga garing ka tindahan. Minhawag siran nga Nong, Nong, pasoldon mo kami. ¹²Minsambag iza nga wara hao makakilala kamazo kon sin-o sa kamo iton. Na, ani ini ya pamolingod mahitongod ka pagbalik nao ngarini. ¹³Agon mag-andam kamo daan kay wara gazed kamo mahagdam daw ono aldawa bisan ono orasa ya kanaong pagbalik ngarimbaba ka kalibotan.¹⁴Kay kay-an ka pagbalik nao ngarini ka paghari ka mga tao singod hao ka amo nga minpanaw doro ka aro. Ka wara pon iza magpanaw impanipon naiza ya toong mga sogoonon dazaw isarig kaniran ya toong kowarta dazaw dogangan niran iton. ¹⁵Ya isang sogoonon insarigan iza ka limang ka libo nga ka pisos. Ya ikadowang sogoonon insarigan iza ka dowang ka libo nga ka pisos. Ya ikatlong sogoonon insarigan iza ka isang ka libo nga ka pisos. Ani ini ya pagbahinbahin na amo kaniran kay andam siran ka paggamit ka kwarta dazaw madogangan iton. Kamhan minpanaw ya amo doro ka aro. ¹⁶Kamhan ya sogoonon nga insarigan ka limang ka libo nga pisos ingamit naiza iton ka pagginansiya ka limang ka libo nga ka pisos.¹⁷Ya sogoonon nga insarigan ka dowang ka libo nga ka pisos ingamit isab naiza iton ka pagginansiya ka dowang ka libo nga ka pisos. ¹⁸Piro ya ikatlong sogoonon nga insarigan ka isang ka libo nga ka pisos minkabot iza ka lopa kay ilobong ya kwarta na toong amo.¹⁹Pagkadogay kaiza minbalik ya amo dizan kaniran kay ansosi kon masarigan siran ka tarabaho kon diri. ²⁰Ya isang sogoonon nga insarigan ka limang ka libo nga ka pisos min-atobang iza ka toong amo daw indara ya anak nga limang ka libo. Kamhan minlaong iza nga Sinyor, insarigan mo hao ka limang ka libo. Kamhan wani pon sab ya anak na limang ka libo. ²¹Minsambag ya toong amo nga madazaw iko. Masarigan iko ka goramay nga kowarta agon isarig pon nao kanmo ya dakola. Magsolod ko ka kanaong hol-anan kay panaranginan ta ko ka mga magazon.²²Kamhan ya ikadowang sogoonon nga insarigan ka dowang ka libo nga ka pisos min-atobang iza ka toong amo daw indara ya anak nga dowang ka libo nga ka pisos. Minlaong iza nga Sinyor, insarigan mo hao ka dowang ka libo nga ka pisos. Kamhan wani pon isab ya anak na dowa mong ka libo. ²³Minsambag ya toong amo nga madazaw iko. Masarigan iko ka goramay nga kowarta agon isarig pon nao kanmo ya dakola. Magsolod ko ka kanaong hel-anan kay panaranginan ta ko ka mga magazon.²⁴Kamhan min-atobang sab kanangiza ya ikatlong sogoonon nga insarigan ka isang ka libo nga ka pisos. Nagabaribad iza nga nagalaong nga Sinyor, nahagdam di hao nga waray kalooy mo. An-ani ko dizan ka wara mo itanom. Anhipos ko dizan ka wara mo ipogas. ²⁵Nahaldok hao agon ya insarig mo kanao inlebeng nao dalem ka lopa. Wani dakoza ya insarig mo kanao.²⁶Minsambag ya amo nga maonga iko nga sogoonon daw poloho. Kon matood ya baribad nga an-ani hao ka wara nao itanom daw anhipos hao dizan ka wara nao ipogas, ²⁷kay ono sa nga wara ko magbotang ka kanaong kowarta dizan ka bangko dazaw may anak di koman pag-oli nao?²⁸Na, dini kanmo koman kaw-on ya kowarta nga isang ka libo daw ihatag dizan ka sogoonon nga may napolo nga ka libo nga ka pisos. ²⁹Kay kon masarigan ya tao ka insarig nao dizan kanangiza magadogangan pen gazed nao ya insarig nao kanangiza dazaw mataod gajod. Piro kon diri masarigan ya tao magakaw-on gajod nao kanangiza ya tanan nga insarig nao. ³⁰Na, ya sogoonon nga maonga iitsa mazo iza ngaro ka masarang kadeglem. Kamhan magapangagoot iza ka toong ngipon ka paghaza.³¹Na, hao nga minhon-a ka bisan sin-o nga mahon-ang tao, kay-an ka pagbalik nao ngarini ka paghari ka mga tao anlo-to hao dizan ka lotoanan ka paghari nga madazaw selengan. Iba sab kanao ya tanan mga sogoonon nga taga langit. ³²Kamhan dizan ka pag-atobang kanao tiponon ya tanan mga tao. Kamhan magabolagbolagon o ya isa daw isa singod ka pagbolag na magbantazay ka toong mga karniro daw mga kanding. ³³Na, ya mga singed ka karniro pantiponon nao dizan ka kanaong too. Ya mga singod ka kanding pantiponon nao dizan ka kanaong wala. Kamhan hao nga anhari anlaong hao ka mga tao dizan ka kanaong too nga intagan di kamo ka magazon na kanaong Ama.³⁴Magsolod kamo ka magazong hol-anan nga naandam daan para kamazo sokad kawandini pen ka sinogdan pon na kalibotan. ³⁵Kay izang dini kaini ka pagbongtasa ka nao impakaen mazo hao. Pag-ohawa ka nao impainem mazo hao. Bisan istranyo hao impapanik mazo hao dizan ka kamazong lagkaw. ³⁶Bisan waray bado nao intagan mazo hao. Izang pagkabedlay naomintabang kamo kanao. Izang impapriso hao minbisita kamo kanao.³⁷Kamhan ansambag ya mga matadeng nga tao nga Magbabaja, kagan-o sa kami makakita kanmo nga inbengtas kamhan inpakaon ko nami? Kon in-ohaw kamhan inpainom? ³⁸Ya pag-istranyo mo kagan-o sa kami magpapanik kanmo? Ya waray ilis mo kagan-o sa kami maghatag kanmo ka bado? ³⁹Magbabaja, kagan-o ya pagtabang nami ka pagkabedlay mo? Kagan-o ya pagbisita nami ka pagkapriso mo? ⁴⁰Kamhan hao nga hari ansambag hao kaniran nga panan-ogan ta kamo nga ya pagtabang mazo ka isa na labing obos na kanaong mga sakop ani ya pagtabang mazo kanao.⁴¹Kamhan anlaong hao ka mga tao dizan ka kanaong wala nga silotan gazed kamo. Pomanaw kamo dini kanao ngaro ka laga nga diri gajod mapareng nga in-andam daan para kan Satanas daw ya toong mga sogoonon. ⁴²Kay izang dini kaini ka pagbongtasa kanao wara mazo hao pakana. Izang pag-ohawa nao wara mazo hao paimna. ⁴³Ka istranyo pon hao doro kamazo wara mazo hao papanika. Bisan waray ilis nao nga bado wara mazo hao hatagi. Izang pagkabodlay nao daw pagkapriso wara mazo hao aligarahi.⁴⁴Kamhan ansambag isab siran kanao nga Magbabaja, daw kagan-o sa kami makakita kanmo nga inbungtas kon in-ohaw? Daw kagan-o sa kami makakita kanmo nga istranyo daw waray ilis nga bado? Kagan-o sa kami makakita kanmo nga nabodlay kon napiriso? Kamhan ono sang wara kami makatabang kanmo? ⁴⁵Kamhan ansambag hao kaniran nga panan-ogan ta kamo nga ya wara kamo magtabang ka isa na labing obos nga tao ani ya wara kamo magtabang kanao. ⁴⁶Kamhan pakarohon nao siran ka silot nga waray paghonong. Piro ya mga matadong nga tao mahatagan siran ka bag-ong kinabohi nga diri mawara.

¹Toong mga sinarigan nga Pagkakamhan ni Hisos pagsindo ka tanan minlaong iza ka ²mahagdam kamo nga kon-isa pon panihawon na mga Hudiyo ya mga nati na karniro kay mamista siran. Kamhan hao nga minhon-a ka bisan sin-o nga mahon-ang tao, dakpon hao niran dazaw ipalansang ka kros.³Na, ka nagalaong pen si Hisos ka toong mga sinarigan nagatipon di isab ya mga oloolo na mga pari daw ya mga malaas doro ka dakolang lagkaw ni Kayapas nga labaw nga pari. ⁴Kay namagsabot siran nga dakpon si Hisos dazaw patazon niran. Piro kanirang tinago iton ⁵kay nagalaong siran nga kay-an ka pagkaliwas na pista dakpon si Hisos dazaw diri magobot ya mga mamistahay. Ani ini ya sabot niran.⁶Na, dizan di si Hisos ka lagkaw ni Simon nga taga Bitani nga nabahawan ka kagid. ⁷Kamhan may minsolod nga babazi nga nagadara ka garapahay nga hininang nga bato. Ya ngaran na bato nga garapa ani alabastar. Ya loon na grapa klasi na lana nga masarang kahamot. Mahal gajod iton kon paliton. Kamhan imbo-boan di naiza ya olo ni Hisos ka nagakaon pon iza. ⁸Pagpakakita ka na mga sinarigan ni Hisos nangazehet siran ka babazi nagalaong nga kay ono sa inhanogon sa mo ya lana nga mahamot? ⁹Kontana ipakowarta mo iton kay mahal gajod kon paliten. Kamhan ya halin ipanhatag ka mga pobri.¹⁰Mahagdam si Hisos ka kanirang pagpanaba agon minlaong iza kaniran nga diri kamo magakasamok ka babazi kay ya toong hinang kanao madazaw gajod. ¹¹Kay ya mga pobri onay siran magaibaiba kamazo piro hao arani di ya tirmino nao ka pagpanaw dini kamazo.¹²Ya pagbo-bo na babazi ka kanaong lawas ani ya naandaman ka paglobong kanao kay-an. ¹³Timan-an mazo gazed ini nga ya pagbo-bo na babazi diri malipatan iton kay dini ka tibolos kalibotan bisan hain dapit ya pagwali na mga tao ka maymay mahitongod kanao ipanan-og sab niran ya toong pagbo-bo kanao.¹⁴Na, pagkakamhan kaiza si Hodas nga taga Kariyoti nga isa dizan ka mga napolo may dowang ka sinarigan ni Hisos minkaro iza ka mga oloolo na mga pari nga Yodayo. ¹⁵Kamhan nangotana iza kaniran nga daw ono ya isohol mazo kanao kon haoy omatod kan Hisos dini kamazo? Kamhan minbazad siran ka katloan nga ka palata. Singod iton ka ikabazad ka isang bolos nga oripon. ¹⁶Sokad kaiton nga aldawa nagapangita si Hodas ka paazi kon onhon naiza ka pag-edlaw kan Hisos.¹⁷Na, pagdatong ka primirong aldaw ka pista ka pagpangaon na mga Hudiyo ka pan nga waray pasoligay minkarini kan Hisos ya toong mga sinarigan pangotanhon kay nga Magbabaja, daw hain ya lagkaw nga andaman nami ka pagkaon mo ka pista? ¹⁸Minsambag si Hisos nga komaro naa kamo ka may nagahola ka siyodad nga Hirosalem. Kamhan long-on mazo iza nga Nong, ya kanaming maistro ani minlaong nga arani di ya toong tirmino ka pagpanaw agon iza daw ya toong mga sinarigan ankaen siran ka pista dizan ka kanmong lagkaw. Ani ini ya pagtogon ni Hisos kaniran. ¹⁹Kamhan mintoman siran ka sogo ni Hisos kaniran. Min-andam sab siran ka pagkaon kaan ka pista.²⁰Pagkakahabzen kaiza dizan ka kananan mintambong si Hisos daw ya toong mga sinarigan nga napolo may dowa siran. ²¹Ka nagapangaon pon siran minlaong si Hisos nga timan-an mazo gajod ini nga wadini kanta may isa nga an-edlaw kanao. ²²Kamhan nagalisod gajod ya hona-hona na mga sinarigan. Tagsa tagsa kaniran minsambag nga Magbabaja, diri gajod kon hao iton!²³Kamhan minsambag si Hisos nga ya tao nga minsaro kanao ka pagkaon iza ya an-edlaw kanao. ²⁴Kay matoman gajod kaan ya daan pinasoyat na Nagagihit mahitongod ka pagkapatay nao. Basta ya tao nga om-odlaway kanao intawon madazaw kon wara iza pakataoha. ²⁵Kamhan si Hodas nga om-edlaway kan Hisos nangotana iza nga Maistro, daw hao ya an-odlaw kanmo? Minsambag si Hisos nga inlaong di mo.²⁶Na, ka nagakaon pon siran minporot si Hisos ka pan. Pagpasalamat naiza ka Nagagihit impanipaktipak naiza iton kay ipanhatag ka toong mga sinarigan. Kamhan minlaong iza nga dawata ini. Kanon mazo kay ini nga pan kilalhon mazo nga kanaong lawas.²⁷Kamhan minporot iza ka baso nga may imnenen nga sapa na mga obas. Pagpasalamat naiza ka Nagagihit impandoholan naiza siran daw nagalaong nga imna ini mazong tanan. ²⁸Kay ini nga imnonon kilalhon mazo nga kanaong dogo nga ipaawas nao kay-an ka pagkapatay nao para ka sala na mga mataed nga tao dazaw pasaylohon siran na Nagagihit ka kanirang mga sala. Ya kanaong dogo ani ya pirmahan na Diyos ka bag-ong saad naiza ka tanan mga tao. ²⁹Timan-an mazo gazed ini nga diri gajod hao an-inom pag-isab ka sapa na mga obas hangtod ka paghari na kanaong Ama ka bag-ong kalibotan. Anipen an-inem hao ka bag-ong imnonon iba kamazo.³⁰Na, pagkakamhan niran pagkanta ka kasaza niran ka Nagagihit namanaw siran ngaro ka bobong nga Olibo. ³¹Kamhan minlaong si Hisos kaniran koman nga kahabzen kamong tanan mandalagan daw mamiza kanao. Kamhan matoman ya daan pinasoyat na Nagagihit nga nagalaong nga ipapatay nao ya mag-aligrahay ka mga karniro. Kamhan mangabelagbelag di ya mga karniro. Ani ini ya daan pinasoyat na Nagagihit. ³²Kamhan pagkabohi nao pagbalik garing ka lebeng anhon-a hao kamazo doro ka Galiliya. Minsambag si Pidro nga bisan bizaan iko nirang tanan, diri gajod hao ambiza kanmo.³³Kamhan pagkabohi nao pagbalik garing ka lebeng anhon-a hao kamazo doro ka Galiliya. Minsambag si Pidro nga bisan bizaan iko nirang tanan, diri gajod hao ambiza kanmo. ³⁴Minsambag si Hisos nga Pidro, timan-an mo gajod ini nga koman nga kahabzon ka wara pon tagaok ya manok ikatolo di mo hao kon ilimed paglaong nga diri kon iko ya kanaong sakop. ³⁵Minsambag si Pidro nga agad kon patazen pen hao iba kanmo diri ta ko gajod paglimod. Kamhan ya tanan mga sinarigan minpanaba isab siran kan Hisos singod ka pagpanaba ni Pidro.³⁶Pagkakamhan kaiza minkaro sin Hisos ka Gitsimani nga tamnanan ka mga liwaan inngaranan ka Olibo. Pagdatong dizan minlaong si Hisos nga maglo-to naa kamo dini kay ankaro pen hao ka hon-ahan kay ampangamozo pon hao ka Nagagihit. ³⁷Kamhan impaiba naiza si Pidro daw ya mga maanak ni Sibidiyo nga dowa siran. Kamhan si Hisos nagalised di ya toong hona-hona. ³⁸Nagalaong disab iza kaniran nga mabog-at gajod ya kanaong hinawa anika daw ikapatazay di nao ini koman. Magtagad naa kamo dini. Diri di kita mazo magkatorog.³⁹Pagkaro naiza dizan ka hon-ahan minpatihapa iza ka lopa kay anhangzo iza ka Nagagihit nga nagalaong nga Ama nao, kon mahimo diri mo hao pag-ipapatay para ka mga sala na mga tao. Piro iko ka say magaponto kanao. ⁴⁰Pagkakamhan naiza paghangzo minbalik iza ka toong mga sinarigan. Nangatorog siran. Kamhan minlaong si Hisos kan Pidro pagpokaw nga daw wara kamo makaanget pagbantay iba kanao bisan isa ka lamang ka oras? ⁴¹Diri kamo magpangatorog. Magpangamozo kamo ka Nagagihit dazaw diri kamo dag-en ka pagtintal na mga maonga. Ansogot gajod ya hinawa mazo nga diri matorog piro ya kamazong lawas maloza gajod.⁴²Pagkakamhan kaiza minbalik si Hisos ka inkarohan naiza kazina. Kamhan ikadowa di koman naiza pagpangamozo nagalaong nga Ama nao, kon diri mahimo nga ipalikay mo hao ka masiot nga kalisod kaan tomanon mo lamang ya inbet-an mo kanao. ⁴³Kamhan minbalik iza ka toong mga sinarigan. Torog ka sab gihapon siran kay mabeg-at gajod ya kanirang mata. ⁴⁴Kamhan minbalik si Hisos ka inkarohan naiza kay ikatlo di koman naiza pagpangamozo ka toong Ama singod ka pagpangamozo naiza kazina.⁴⁵Kamhan minbalik disab iza ka toong mga sinarigan. Kamhan nagalaong iza pagpokaw kaniran nga onosang nagapahikatorog pen sa kamo gihapon? Mindatong di koman ya tirmino nao ka pagkapatay. Magaodlawan di hao koman doro ka mga makasasala nga tao. ⁴⁶Pamangon di kamo. Solongi waton di ngarini ya om-odlaway kanao. Mangaro di kita hinoa pagsogat kaniran.⁴⁷Na, ka nagapanaba pon si Hisos mindateng di matood ya isang sinarigan nga si Hodas. Iba ya mga mataod nga magakagobot nga mga tao nga nagapandara ka mga lodzo daw ya mga ibonalay kay insogo siran na mga oloolo na mga pari daw ya mga malaas nga Hudiyo. ⁴⁸Impakahagdam daan siran ni Hodas nga nagalaong nga ya tao nga pangamostahon nao pag-arok ani ya dakpon mazo.⁴⁹Na, pagkarini ni Hodas kan Hisos minlaong iza nga tinahod ong Maistro! Kamhan min-arok iza kan Hisos ka pagpangamosta. ⁵⁰Minsambag si Hisos nga tomanon mo ya tozo mo dini kanao. Kamhan indakop dazon si Hisos na mga tao. 51Na, waton ya isang sakop ni Hisos nga nagahogot ka toong lodzo daw mintigbas. Kamhan nakawa dazon ya talinga na oripon na labaw nga pari.⁵¹Na, waton ya isang sakop ni Hisos nga nagahogot ka toong lodzo daw mintigbas. Kamhan nakawa dazon ya talinga na oripon na labaw nga pari. ⁵²Kamhan minbahog si Hisos ka toong sakop nga isog-ob ya lodzo mo kay ya tao nga ambono ani isab ya pagabon-on. ⁵³Daw wara kamo mahagdam nga kon ampakitabang hao ka kanaong Ama ipadara dazon naiza ngarini kanao ya pirang ka libo nga kasoldawan nga taga langit? ⁵⁴54Piro ini nga kalised angeten lamang dazaw matoman ya daan pinasoyat na Nagagihit.⁵⁵Minlaong sab si Hisos ka mga mataod nga tao dizan nga onosa wani baza kamo? Daw tolisan hao wani nga dakpon di sa mazo hao koman ka lodzo daw ibonalay? Izang dini kaini dizan ka dakolang lagkaw nga pangamozoanan ka Nagagihit aldaw-aldaw nagalo-to hao ka pagsindo ka mga tao. Kamhan wara sa mazo hao dakpa. ⁵⁶Piro ya kaazi nao koman ani di ya pagtoman ka kasoyatan na mga karaang propita na Nagagihit mahitongod kanao. Pagkakamhan ni Hisos paglaong kaiza namiza dazon kanangiza ya tanan mga sinarigan. Nandalagan siran pag-izaiza.⁵⁷Kamhan ya nandakep kan Hisos in-atod niran iza ngaro kan Kayapas nga labaw nga pari. Namagkatipon di dizan ya mga maistro ka tinoohan na mga Hudiyo daw ya mga malaas. ⁵⁸Na, si Pidro minpaantaw iza ka pagsonod kan Hisos kotob ka pawa na lagkaw na labaw nga pari. Pagdatong ka ni Pidro dizan minlo-to iza iba ka mga magbantazay kay ampaniid iza kon onhon sa na mga oloolo si Hisos.⁵⁹Na, dalom ka lagkaw nagatipon di ya mga oloolo na mga pari daw ya tanan mga maistro daw ya tanan mga malaas kay anpangita siran ka ikabotangbotang nga salaan si Hisos dazaw pahamtangan iza ka kamatazon. ⁶⁰Piro bisan mataed ya minpamakak wara gajod ya sala ni Hisos. Kamhan mintindog ya dowang ka tao. ⁶¹Nagapanan-og siran nga minlaong itong tao nga makagoba iza ka dakolang lagkaw nga pangamozoanan ka Nagagihit. Pagkakamhan hinangon naiza koni ya bag-ong lagkaw ka tolo kang ka aldaw.⁶²Pagkakamhan nirang dowa pagpanan-og ya labaw nga pari mintindog dizan ka tenged niran kay nangotana iza kan Hisos nga daw waray ikasambag mo ka kanirang sombong? ⁶³Nagapahonok lamang si Hisos. Kamhan minlaong ya labaw nga pari nga ya Diyos nga bohi ani ya magapanalinga koman. Magpanan-og naa iko. Daw iko si Kristo nga Maanak na Nagagihit nga hari nga pinili naiza? ⁶⁴Minsambag si Hisos nga ani gajod hao. Timan-an mazo gajod ini nga kay-an di gajod mazo hao kon makitan nga magalo-to hao dizan ka too na Nagagihit kay hao ya minhon-a ka bisan sin-o nga mahon-ang tao. Makitan isab mazo hao pagkarimbaba nao garing ka tahaw iba ya mga gabon.⁶⁵Pagpakabati ka na labaw nga pari kaiton inggisi naiza ya toong kaogaringon nga bado kay nazohot gajod iza nagalaong nga igo di iton. Wara di kita magkinahanglan ka dogang pon nga saksi. Nakabati di kamo nga garboso gajod iza pagbakak nga iza ya Anak na Nagagihit. ⁶⁶Agon daw ono ya kamazong huna-huna kanangiza? Minsambag siran nga salaan gajod iza. Patajon di lamang iton.⁶⁷Kamhan impamagolban iza niran. Impanombag iza. Inlaparo isab iza na mga iba nga tao. ⁶⁸Nagalaong siran pagsora nga iko nga hari koni nga pinili na Nagagihit, tokmaon mo kon sin-o ya minlaparo kanmo koman!⁶⁹Na, si Pidro nagalo-to iza dizan ka pawa na lagkaw na labaw nga pari. Kamhan may babazi nga binolanan nga minkadizan kanangiza daw nagalaong nga iko isab ya nagaibaiba kan Hisos nga taga Galiliya. ⁷⁰Minsambag si Pidro nga wara hao mahagdam. Minlimod iza kan Hisos dizan kanirang tanan.⁷¹Pagsingod ni Pidro ngaro ka azihanan na pirtahan waton ya iba nga babazi nga binolanan. Pagpakakita ka naiza kan Pidro minpanaba iza ka mga tao nga mintindog dizan nga iton nga tao ani gajod ya nagaibaiba kan Hisos nga taga Nazarit. ⁷²Piro minlimod si Pidro pag-isab. Naninhaga iza paglaong nga wara gajod hao makakilala kaiton nga tao nga si Hisos.⁷³73Pagkatoodtood kaiza inkaro si Pidro na mga mintindeg dizan. Minlaong siran nga iko gajod ya sakop ni Hisos kay anika ya tonada mazo ka mga panaba nga mga taga Galiliya. ⁷⁴Basta kay minpaninhaga si Pidro paglaong nga mapatay pon hao kon bakakon hao. Inday kon sin-o itong taohana nga magalong-on mazo. Pagkakamhan ni Pidro pagsambag mintagaok dazon ya manok. ⁷⁵Kamhan nakataromdom di si Pidro ka inlaong ni Hisos nga ka wara pon tagaok ya manok katlo mo hao ilimod. Na, pagpakataromdom ka ni Pidro masara gajod ya toong paghaza kay inlimod sa naiza si Hisos.

¹Na, pagkamasiselem kaiza ya tanan mga oloolo na mga pari daw ya mga malaas na mga Yodayo namagsabot siran kon onhon niran pagpapatay kan Hisos. ²Kamhan in-ektan niran si Hisos ka kadina dazaw iatod niran ngaro kan Pilato nga gobirnador.³Na, si Hodas nga min-odlaw kan Hisos, pagkahagdam ka naiza nga inhokman di niran si Hisos ka pagpatay minbasol gajod iza ka toongkaogaringon. Kamhan minbalik iza ngaro ka mga oloolo na mga pari daw ya mga malaas kay ioli kontana naiza ya toong sohol nga katloan nga ka palata. ⁴Nagalaong iza kaniran nga nakasala gajod hao kay itong tao nga inhokman di mazo ka kamatazen waray sala naiza. Min-odlaw hao kanang-iza. Minsambag siran nga waray labet nami kaiton. Kanmo ka sa lamang iton nga pagpasarig. ⁵Kamhan intimbag ni Hodas ya kowarta dizan ka pirtahan na dakolang lagkaw nga pangamozoanan ka Nagagihit. Kamhan minpanaw iza kay anhikeg iza ka toong liog.⁶Na, ya kowarta nga intimbag ni Hodas inpamorot di na mga oloolo ka mga pari. Kamhan minlaong siran nga ini nga kowarta ani ya inkabazad ka pagpatay ka tao agon kon ibotang dini ka botanganan na mga ihalad anlapas kita ka balaod. ⁷Pagkakamhan niran pagsabot kon onhon sa niran ya kowarta impalit niran ya oma na tao nga maghinangay ka tadzaw. Kamhan inhinang niran ya oma ka lobnganan para ka mga istranyo nga namola. ⁸Hangtod koman inngaranan niran iton nga omaha nga Imbayran ka Dogo.⁹Kamhan ya hinang niran ani nakatoman ka inlaong ni Hirimiyas nga karaang propita na Nagagihit. Kay kawandini pon nagalaong iza nga minkawa siran ka katloan nga ka palata. Kay garing ka pagsabot na mga oloolo na mga Hudiyo ya geramay nga kowarta ani ya inbazad kan Hisos kay nagahona-hona siran waray polos naiza. ¹⁰Kamhan ingamit niran ya kowarta ka pagpalit ka oma na tao nga maghinangay ka tadzaw kay ani ya insogo na Magbabaja kanao. Ani ini ya inlaong ni Hirimiyas kawandini pon.¹¹Na, si Hisos mintindog iza dizan ka pag-atobang kan Pilato nga gobirnador kay pangotanhen di iza nga matod, ey, iko ya hari na mga Hudiyo? Minsambag si Hisos nga itong inlaong mo kanao hao iton. ¹²Piro wara iza magsambag ka mga oloolo na mga pari daw ya mga malaas pagbotangbotang niran kanangiza. ¹³Kamhan nangotana si Pilato kan Hisos nga daw wara ko makabati ka kanirang mga mataod nga sombong kanmo? ¹⁴Piro wara gajod si Hisos magsambag ka bisan isa kang sombong. Agon nabereng gazed si Pilato.¹⁵Na, kada toig ka pagpista na mga Hudiyo ya batasan ni Pilato magapalogwa iza ka isang tao nga piniriso. Kamhan ya mga kataohan anikay magaparagboot pagpili. ¹⁶Na, dizan ka pirisohan may nabantog nga piniriso nga si Barabas nga masarang kaonga nga tao.¹⁷Pagtipon na mga tao nangotana si Pilato nga daw sin-o ya pilion mazo ka pagpalogwa nao si Barabas kon si Hisos nga magangaranan kan Kristo? ¹⁸Ani ini ya toong pangotana kay mahagdam iza nga nagaarig ya mga pari kan Hisos agon in-atod niran iza ngarini ka gobirnador dazaw pahamtangan iza ka kamatazon. ¹⁹Na, ka nagalo-to pon si Pilato dizan ka hokmanan impadara na toong asawa ya soyat nga nagalaong nga kazinang kahabzen nagalisod ya kanaong huna-huna kay may nabatian nao pagtag-inop. Diri gajod iko maghilabot kaiton nga taohana kay waray sala naiza. Ani ini ya soyat naasawa ni Pilato.²⁰Na, ya mga oloolo na mga pari daw ya mga malaas nagaapora siran ka mga tao ka pagpabohi kan Barabas. ²¹Kamhan ipapatay si Hisos. Kamhan nangotana si Pilato kaniran pag-otro nga ya dowang ka tao daw sin-o ya bohian nao kanirang dowa? Minsambag siran nga si Barabas! ²²Nangotana si Pilato pag-otro kaniran nga ono sa ya gosto mazo kan Hisos nga inngaranan kan Kristo? Kamhan namagdongan gajod ya tanan mga tao pagsambag nga ipalansang di iton ka kros!²³Nangotana si Pilato kay ono say sala naiza? Kamhan mindogang hinoa siran pagpaninggit nga ipalansang di iton ka kros! ²⁴Na, mahagdam si Pilato nga waray polos lamang ya pagpadazonpagpanaba kay minsogod di siran pagkasamok. Agon minlaong iza kaniran nga waray labot nao ka pagpatay mazo kaitong tao nga waray sala. Kamazo ka lamang iton. Kamhan impakawa naiza ya palangana daw sapa kay anhogas iza ka toong alima dizan ka pagkita niran kay timaan iton nga waray labet naiza ka pagpatay niran kan Hisos.²⁵Kamhan minsambag sirang tanan nga kami daw ya kanaming mga kaliwatan ani dat-ogi ka silot ka pagpatay kaitong tao. ²⁶Pagkakamhan kaiza imbohian ni Pilato si Barabas ka prisohan. Kamhan impalatos naiza si Hisos daw impaatod iza ngaro ka mga soldaw dazaw ilansang di ka kros.²⁷Kamhan in-atod na mga soldaw si Hisos dizan ka pawa na dakolang lagkaw na gobirnador kay paniponon niran ya tanan mga soldaw dizan kan Hisos. ²⁸Kamhan inhoboan niran si Hisos ka isang ka lapid nga toong bado. Kamhan impabadoan iza ka mararag nga bado singod ka bado na hari piro lain. ²⁹Pagkakamhan niran paglokong ka balala nga mga dogihon inhinang niran ka korona. Kamhan insokbot niran dizan ka olo ni Hisos. Impahawid sab niran ya toong alima ka sogkod kay nagapakahinang ka hari. Kamhan dizan ka toong paahan nanlohod siran pagpatitahod. Nagasorasora siran pagsaza nagalaong nga tinahod ong hari na mga Hudiyo!³⁰Kamhan impamag-elban iza daw impamonalan ya toong olo kaiton nga sogkod. ³¹Pagkakamhan niran pagsora kan Hisos inhoboan dazon niran ka bado nga mararag kay ipabado niran pagbalik ya toong kaogaringong bado. Kamhan in-ated iza ngaro ka gawas na longsod kay ilansang di ka kros.³²Na, ka nagapanaw pon siran dizan ka dalan may insogat niran nga si Simon nga taga Sirini. Kamhan insogo iza na mga soldaw pagpasili pagbathay ka kros ni Hisos. ³³Kamhan in-atod niran si Hisos ka dapit nga inngaranan ka Golgota. Na, ya kahologan na ngaran nga Golgota ani Ya Dapit ka Kalabira kay ani ya dapit ka pagpatay niran ka tao nga impahamtang ka kamatazen. ³⁴Pagdatong ka niran dizan impainom kontana si Hisos na mga sodawo ka bino sinaktan ka masarang kapait nga tambal ka kasakit ka paglansang. Piro pagtilaw naiza wara di iza mag-inom.³⁵Pagkakamhan kaiza inlansang si Hisos ka kros. Kamhan namagriparipa siran kon sin-oy makatag-iza ka mga bado ni Hisos. ³⁶Kamhan namagpanlo-to siran dizan kay imbantazan niran si Hisos. ³⁷Kamhan dapit dakod ka poro ni Hisos intapilan sab niran ya sinoyat nga pasangil kan Hisos nagalaong nga si Hisos ini nga Hari na mga Hudiyo.³⁸Na, dizan ka toong sain inlansang disab niran ya mga tolisan nga dowa siran. Ya isa dapit ka too ni Hisos. Ya ikadowa dimbali ka toong wala. ³⁹Kamhan ya mga tao nga namagpanlabay dizan ka mga kros nagabiaybiay siran kan Hisos ⁴⁰nga nagalaong nga matod sa iton nga nagalaong ko nga makageba ko ka dakolang lagkaw nga pangamozoanan ka Nagagihit. Kamhan baza-baza hinangon mo pag-isab ka bag-o ka tolo kang ka aldaw. Kon matood pen ya panaba mo tabangan mo koman ya kanmong kaogaringon. Kon iko ya Anak na Nagagihit magtona di ko dizan ka kros.⁴¹Inkatawhan sab iza na mga oloolo na mga pari daw ya mga maistro daw ya mga malaas nagalaong nga ⁴²nakalibri iza ka iba nga tao piro diri iza makalibri ka toong kaogaringon lawas. Daw hari baza iza na mga kaliwatan ni Israil? Kon makatena iza dizan ka kros antoo kami nga iza ya Maanak na Nagagihit.⁴³Minsarig iza ka Nagagihit. Kon maazakan iza na Diyos kontana tabangan iza koman na Nagagihit kay minlaong ini nga iza ya Anak na Nagagihit. ⁴⁴Bisan ya mga tolisan nga inlansang iba kan Hisos nagabiaybiay isab siran kanang-iza.⁴⁵Na, pagkaodto di mindeglem gajod ya aldaw hangtod ka pagkabalantang na aldaw ka alas tris. ⁴⁶Kamhan ka hapit di alas tris mabaskog gajod ya saba ni Hisos ka paghawag ka toong Ama ka saba nga Hinibriyo nagalaong nga kanaong Diyos, kay ono sa wani imbizaan di mo hao? ⁴⁷Na, ya mga minsolong dizan pagpakabati ka niran ka saba ni Hisos minlaong siran nga inhawag naiza si Iliyas nga karaang propita na Nagagihit.⁴⁸Kamhan ya isang ka tao mindalagan iza ka pagkawa ka sizepanan. Kamhan inheeman iton ka lon-anan ka bino nga barato kamhan intogsob dizan ka liwaan dazaw idohol ka ba-ba ni Hisos kay dazaw makasizop. ⁴⁹Piro ya mga iba nga tao dizan minlaong siran nga tagad naa kita. Ansolong kita lamang kon ankarini si Iliyas pagtabang kanangiza. ⁵⁰Pagkakamhan kaiza minpahihawag pag-isab si Hisos. Kamhan nabogtoan dazon iza ka toong hinawa.⁵¹Kamhan dizan ka dakolang lagkaw nga pangamozoanan ka Nagagihit nagisi ya kortina garing dakod lapos ngarimbaba ka sidsid. Kamhan minlinog di ya lopa, nanggopak di ya mga bato. ⁵²Kamhan ya mga lebnganan nangaabri. Kamhan ya mga daan mola nga sakop na Nagagihit nangabohi di siran pagbalik garing ka lebeng. ⁵³Kamhan nanlogwa siran ka mga lebnganan. Pagkabanhaw ni Hisos minkaro siran ka siyodad nga Hirosalem. Nakitan siran na mga mataod nga tao.⁵⁴Na, ya kapitan daw ya toong mga soldaw nga nagabantay kan Hisos pagpakabati ka niran nga linog di wani daw ya mga iba nga kaboronganan nangahaldk gajod siran. Kamhan minlaong siran nga itong napatay iza matood ya Maanak na Nagagihit ⁵⁵Na, dizan ka aro-aro may mga mataod nga babazi nga nanolong isab ka pagkapatay ni Hisos. Taga Galiliya siran nga nagaiba kan Hisos .ngarini ka Hirosalem kay mintabang siran kanang-iza. ⁵⁶Ya isang babazi ani si Mariya nga taga Magdala. Ya isa pon si Mariya nga ina ni Santiago daw si Hosi. Waton sab ya ina na mga maanak ni Sibidiyo.⁵⁷Na, pagkadolom kaiza nga aldaw may mindatong nga kowartahan nga taga Arimatiya. Si Hosi ya toong ngaran daw sakop isab iza ni Hisos. ⁵⁸Kamhan minkaro iza kan Pilato kay minbaid iza ka pagkawa ka lawas ni Hisos kay ilobong. Kamhan insogo ni Pilato ya toong mga soldaw ka paghatag kan Hosi ka lawas ni Hisos.⁵⁹Inkawa ni Hosi iton kamhan inkomotan ka mga bag-ong panapton nga mapoti. ⁶⁰Kamhan inlobong naiza doro ka may toong bag-ong hininang nga talangban nga lobnganan. Pagpasira naiza kaiton ka dakolang bato minpanaw dazon iza. ⁶¹Kamhan dizan ka atobang na lebnganan nagalo-to si Mariya nga taga Magdala daw ya iba nga babazi inngaranan kan Mariya.⁶²Pagkaliwas ka na pista minkaro kan Pilato ya mga oloolo na mga pari daw ya mga Parasiyo. ⁶³Kay anlaong siran nga Sinyor, izang mahon-a pen ka bohi pen izang bakaken minlaong iza nga kay-an koni ka pagdatong ka ikatolong aldaw sokad ka toong pagkapatay mabohi iza pag-isab garing ka lobong. ⁶⁴Agon pabantazan mo gajod ya lobnganan kotob ka ikatlong aldaw kay basi kawaten ya lawas na toong mga sinarigan. Basi panan-ogan sab niran ya mga tao nga nabohi di iza garing ka lobong. Kamhan ya bakak dakola iton ka mahon-ang bakak niran ka mga tao.⁶⁵Minsambag si Pilato nga pakarohon mazo ya mga magbantazay dazaw bantazan gajod ya lebnganan. ⁶⁶Kamhan minkaro siran ka lobnganan kay imborit niran ya kilid na sira nga bato dizan ka pirtahan na lobnganan dazaw waray makahilabet. Kamhan impabantazan matood niran ka mga magbantazay ya pirtahan.

¹Na, paglabay ka na aldaw nga tigpahimlay ka hapit mapawa ya aldaw nga Dominggo si Mariya Magdalena daw ya iba nga babazi inngaranan kan Mariya minkaro siran ka lebnganan. ²Ka wara pon siran dateng ka lebnganan minlinog di ya lopa kay mintena ngarimbaba ya sinogo na Nagagihit garing daked ka tahaw. Kamhan inlingan naiza ya insira nga bato dizan ka pirtahan na lebnganan. Kamhan minlo-to iza dizan kaiton nga bato nga toong liningan.³Masiraw gad ya toong bayho singed ka kasiraw na kilat. Masarang kapoti ya toongbado. ⁴Pagkita na mga magbantazay ka sinogo na Nagagihitnagapidpid ya kanirang lawas ka kahaldek. Diri siran makahingas kay singed ka patay di siran.⁵Kamhan minlaong ya taga langit ka mga babazi nga diri kamo magkahaldek kay mahagdam hao nga nangita kamo kan Hisos nga inlansang ka kros. ⁶Wara iza dini kay nabohi di iza garing ka mga patay singed ka toong inlaong kamazo izang dini kaini. Selengi mazo. Wani ya dapit nga pinabentagan kanangiza. ⁷Komaro naa kamo ka toong mga sinarigan. Long-on mazo siran nga nabohi di si Hisos pagbalik garing ka mga patay. Anhon-a iza kamazo doro ka Galiliya. Doro kaiton magakita kamo kanangiza. Ani ini ya mga panaba na sinogo na Nagagihit.⁸Kamhan minpanaw dazon ya mga babazi. Nangahaldek siran piro dakola isab ya kanirang kasaza. Mindalagan siran ngaro kay panan-oganniran ya mga sinarigan ni Hisos. ⁹Na, ka nagapasinged pen siran ngaro inkasogat di baza niran si Hisos. Kamhan minlaong iza nga palinawenya kamazong hinawa. Kamhan mintagen ya mga babazi ka toong paa pagtahod. ¹⁰Kamhan minlaong iza kaniran nga diri kamo magkahaldek.Karohen di mazo ya kanaong mga sakop. Long-on mazo siran nga waro di siran kon somogat kanao ka Galiliya¹¹Kamhan minpanaw ya mga babazi. Minpanaw isab ya mga magbantazay dizan ka lebnganan kay an-oli di siran ka siyodad dazaw panan-ogan ya mga oloolo na mga pari ka kahimtang dizan kalebnganan. ¹²Na, pagtipon niran daw ya mga oloolo na mga pari daw ya mga malaas nga Hudiyo namagsabot siran kon ono ya kanirang hinangen. Kamhan insoholan niran ya mga magbantazay ka dakolang kowarta ¹³dazaw dizan ka mga tao ipanan-og niran ya bakak magalaong nga kazina ka kahabzen ya mga sinarigan ni Hisos siran ya minkaro ka lebnganan kamhan inkawat niran ya toong lawas ka pagkatorog pon nami.¹⁴Kamhan kon nabatian iton na gobirnador kami ka lamang nga mga oloolo ya anlaong kanangiza dazaw diri kamo kasab-an ka sazop mazo. ¹⁵Pagkakamhan kaiza indawat na mga magbantazay ya kowarta. Intoman sab niran ya sogo kaniran. Kamhan mintoo ya mga Hudiyo ka kanirang bakak hangtod koman aldawa.¹⁶Na, ya mga sinarigan ni Hisos nga napolo may isa nangaro siran ka Galiliya doro ka bobong nga intoldo daan kaniran ni Hisos. ¹⁷Pagkitaniran kan Hisos minlohod siran ka pagtahod kanangiza. Piro dizan kaniran may mga nagadowadowa pen nga kon si Hisos iton kon diri.¹⁸Kamhan minlaong iza kaniran nga inkasarig di kanao ya tanang pagbeet daked ka tahaw daw dimbaba ka kalibotan. ¹⁹Agon pamanaw di kamo ngaro ka tanan mga tao dini ka tibolos kalibotan. Sindoan mazo siran kon onhon sa niran pagsakop kanao. Kamhan pamenzagan mazo siran kay timaan ini nga inharian di siran na Ama nga Nagagihit daw ya toong Anak daw ya toong Ispirito nga Madazaw.²⁰Kamhan sindoan mazo ya mga tao nga imbenzagan di dazaw antoman siran ka tanang mga sogo nao kamazo. Magtaremdem kamo nga onay hao an-iba kamazo keteb ka kataposan nga panahon dini ka kalibotan. Ani ini ya inpanaba ni Hisos kaniran.

¹Wani ya pagkasogod na madazaw nga balita mahitenged kan Hiso Kristo nga Anak na Nagagihit. ²Na, kawandini pen mintandeg ya Nagagihit ka bout ni Isayas nga karaang propita. Kamhan minsoyat si Isayas nga nagalaong nga kawandini pen minlaong ya Nagagihit nga may sinogo nao nga ipadara nao kadaw an-andam iza ka pagdateng na kanaong Maanak. ³Kamhan ya nagasinggit doro kamingawan. Anhawag sab iza ka mga tao nga magalaong nga dazawen mazo ya kamazong batasan singed ka tao nga minhinglo ka dalan kay domatengay di ya Anak na Nagagihit. Ani ini ya daan insoyat ni Isayas nga karaang propita.⁴Ya, si Howan nga Magbenzagay ani ya ngaran na tao nga minhon-a kan Hiso Kristo. Doro ka kamingawan minsangzaw iza nga nagalaong nga bizaan di mazo ya maongang batasan mazo. Kamhan benzagan ta kamo kay timaan iton nga impasaylo di na Nagagihit ya kamazong mga sala. Ani ini ya inwali ni Howan. ⁵Kamhan mataud gazed ya mga tao nga minkaro kan Howan. Garing siran ka bisan hain nga lopa doro ka Huda daw ya siyodad nga Hirosalem. Pagpanalinga niran ka inwali ni Howan nagalaong siran nga matood gazed mga salaan kami nga tao. Kamhan dizan ka sapa nga Hordan inpanbenzagan siran ni Howan. ⁶Na, ya bado ni Howan nahinang nga bohok na kamiliyo nga bohi na tao. Ya toong bakes anit. Ya toong magakanen mga doron daw seg-ed.⁷Pagsangzaw na-iza ka mga tao minlaong iza nga may ansonod pen kanao nga labaw pen kanao. Dizan kanang-iza hao ya labing obos kay iza gazed ya labaw ka gahem. ⁸Nagabenzag hao kamazo ka sapa piro magbenzag iza kamazo ka Madazaw nga Lambong nga garing ka Nagagihit dazaw paharian kamo na-iza nga Lambong.⁹Na, ka nagapamenzag pen si Howan ka mga tao si Hisos minpanaw iza ka Nazarit nga toong insoligan doro ka lopa nga Galiliya. Kamhan mindateng di iza ka sapa nga Hordan kay ampabenzag iza kan Howan. ¹⁰Pagkakamhan ni Howan pagbenzag kan Hisos nakitan dazon ni Hisos nga singed ka naabri di ya tahaw. Waza sab baza ya Madazaw nga Lambong nga garing ka Nagagihit minkarimbaba kan Hisos. Minpasinged singed iton ka salapati. ¹¹Kamhan nabatian ni Hisos ya saba na Nagagihit nagalaong nga iko ya kanaong Anak nga kanaong naazakan. Nakasaza gazed iko kanao. Ani ini ya inlaong na Nagagihit.¹²Pagkakamhan ka-iza ya Madazaw nga Lambong nga garing ka Nagagihit ani ya minpakaro kan Hisos ngaro ka kamingawan. ¹³Kamhan nagahela si Hisos doro keteb ka kap-atan nga ka aldaw. Intintal gazed iza ni Satanas kadaw anato ka Nagagihit piro wara gazed si Hisos madaeg. Kamhan magatabangan iza na mga taga tahaw nga sogoonon na Nagagihit ka dizan pen iza ka kamingawan.¹⁴Na, inpapiriso si Howan ni Hirodis nga hari. Kamhan min-oli si Hisos ka lopa nga Galiliya kay minsangzaw iza ka sindo garing ka Nagagihit ¹⁵nga nagalaong nga mindateng di ya tirmino ka pagdateng na hari nga pinili na Nagagihit. Agon bizaan di mazo ya maongang batasan. Magtoo gazed kamo ka pagmaymay nga garing ka Nagagihit. Ani ini ya insangzaw ni Hiso Kristo.¹⁶May isang aldaw nga nagapasinged si Hisos ka baybazen na danaw nga Galiliya. Kamhan si Simon daw ya toong lomon nga si Andris nga mangisdaay ani ya nakitan na-iza. Nanimbag siran ka kanirang mga lazà pagpangisda. ¹⁷Minlaong si Hisos kaniran nga somakop kamo kanao kay antoldo hao kamazo kadaw mahagdam kamo ka pagpasakop ka mga tao kanao singed ka pagpanlazà mazo ka mga isda. ¹⁸Pagpakabati nin Simon ka sogo ni Hisos kaniran imbizaan dazon niran ya kanirang mga lazà kay an-iba gazed siran kan Hisos.¹⁹Pagkakamhan ka-iza minlargo si Hisos pagpanaw ngaro ka isang baloto. Kamhan si Santiago daw si Howan nga maglomon nga mga Anak ni Sibidiyo ani ya nakitan na-iza. Dizan ka baloto nagatahi siran ka kanirang mga lazà. ²⁰Kamhan pagpasakop ni Hisos kanirang dowa imbilin niran ya kanirang ama dizan ka baloto iba ya mga sinoholan. Kamhan min-iba sirang dowa kan Hisos.²¹Pagkakay-an ka-iza mindateng sin Hisos ka longsod nga Kapirnaom. PagkaSabado nga tigpahimlay na mga Hudiyo minseled si Hisos ka singbahan na mga Hudiyo kay anmaymay iza kaniran. ²²Kamhan nabereng gazed siran kay ya toong mga panaba labaw gazed ka gahem na mga panaba na mga magtutuldo ka tinoohan na mga Hudiyo.²³Ya, ka dizan pen si Hisos ka simbahan may tao nga inboang na maonga ²⁴nga minsinggit kanang-iza nga nagalaong nga Hisos nga taga Nazarit, kay ono sa nga hilabtan sa mo kami? Daw ani ya inkarini mo ya pagpatay mo kanami? Mahagdam gazed hao nga iko gazed ya Anak na Nagagihit nga waray maonga. ²⁵Minsambag si Hisos pagbaheg nga magpahonok ko. Domalagan di ko ka tao. ²⁶Na, pagsinggit ka na maonga daw pagkabiribid ka lawas na tao mindalagan dazon.²⁷Kamhan nabereng gazed ya mga naneleng. Namaglaong siran nga ono sa ini nga bag-ong pagmaymay? Labaw gazed ka gahem ya pagpanaba ni Hisos kay bisan ya mga maonga antoo baza siran ka toong sogo. ²⁸Kamhan minlekep di gazed ya ngaran ni Hisos doro ka lopa nga Galiliya.²⁹Na, kamhan di ya pagsingba nin Hisos agon minkaro siran ka lagkaw ni Simon daw si Andris. Iba gihapon si Santiago daw si Howan. ³⁰Pagdateng niran ka lagkaw may bozag nga ogangan ni Simon nga nagabentag kay imbangkag gazed iza. Pagpakahagdam niran kan Hisos ³¹minbisita iza kaiton nga nabedlay. Kamhan intagenan na-iza ya alima na nabedlay dazaw patindegen. Inhowasan dazon iza ka toong hilanat Kamhan minpakaen iza kaniran.³²Pagkadelem ka-iza impaarani kan Hisos ya bisan sin-o nga may mga masakit ka lawas daw ya mga tao nga inboang na mga maonga. ³³Dizan ka pirtahan na lagkaw ni Simon mintipon ya maharong mga taga Kapirnaom. ³⁴Kamhan inbahaw ni Hisos ya mga mataud nga tao nga naga-anget ka mga klasi nga mga masakit. Inpalogwa sab na-iza ya mga maonga. Diri togotan ni Hisos ka pagpapanaba ya mga maonga kay mahagdam siran nga iza ya Anak na Nagagihit. Ani ini ya pagtabang ni Hisos ka mga tao ka dizan pen iza ka lagkaw ni Simon.³⁵Na, pagkaadlawon ka minbangon si Hisos kay ampanaw iza ngaro ka waray tao kay ampangamozo iza ka Nagagihit. ³⁶Kamhan impangitan gazed iza nin Pidro. ³⁷Pag-apas niran nagalaong siran nga Hisos, mataed gazed ya mga ampangita kanmo.³⁸Minsambag si Hisos nga ampanaw di kita mazo ngaro ka mga laing dapit kay ansangzaw pen hao doro kay ani ya tood nao dini ka bakangan. ³⁹Kamhan minsoroy si Hisos ka tibolos lopa nga Galiliya. Kay dalem ka kanirang mga simbahan nagsangzaw iza. Indazaw sab na-iza ya mga tao nga inharian na mga maonga.⁴⁰Lomaza pomanaw siran insogat ni Hisos ya tao nga kagiden. Paglohod na-iza ka paahan ni Hisos minhangzo iza nga nagalaong nga Sinyor, kon somogot ko ka pagpangamozo nao kanmo dazawen mo ya kanaong masakit. ⁴¹Nalooy si Hisos kaiton nga tao. Kamhan inhogam iza ni Hisos daw nagalaong nga Loy, ansogot hao. Nawara di ya masakit ka kanmong lawas. ⁴²Kamhan nadazaw matood ya toong lawas.⁴³, ⁴⁴Kamhan minsogo si Hisos nga nagalaong nga diri ko magpanan-og ka mga tao ka inhinang o kanmo. Pomanaw ko naa ngaro ka pari. Magpakita ko ka kanmong lawas diton. Kamhan magtoman ko ka balaud ni Moysis ka paghalad kay kadaw magmatood ya mga kataohan nga nawaraan ko ka kanmong kagid.⁴⁵Ambaza kay pagpanaw na tao minpanan-og iza hinoa ka tanan mga tao nga indazaw iza ni Hisos. Agon diri di si Hisos makaazi ka mga longsod kay mataud ya an-apas kanang-iza. Bisan minkaro iza ka kamingawan inapas gihapon iza na mga tao garing ka bisan hain nga longsod.

¹Paglabay ka mga talagsa ka nga aldaw minbalik si Hisos ka longsod nga Kapirnaom. Kamhan may minlaong nga dizan si Hisos ka lagkaw. ²Kamhan mataud ya antipon dalem ka lagkaw. Bisan ya pirtahan masiet gazed iton ka mga tao. Kamhan insangzaw siran ni Hisos ka sindo nga garing ka Nagagihit.³Ya, ka nagawali pen iza kaniran may opat nga ka tao nga mindateng nga namaglahong ka tao nga diri mahingas ya lawas. ⁴Piro masiet gazed ya pirtahan ka tao agon minpanik siran ka hagdan ngandaked ka malakbang nga atep. Pagpakaboslot kaniran ka atep nga tenged ni Hisos intonton niran ya bowahan nga inbentagan na paralitiko.⁵Pagpakakita ka ni Hisos ka inhinang niran mahagdam iza nga minsarig gazed siran kanang-iza ka pagbahaw kaiton nga tao. Kamhan minlaong iza ka nabedlay nga Loy, impasaylo di nao ya kanmong mga sala. ⁶Na, dizan ka-iza may minlo-to nga mga magtutuldo ka tinoohan na mga Hudiyo. Pagpakabati niran ka inlaong ni Hisos ka paralitiko minlaong siran ka kanirang hona-hona nga ⁷garboso gazed si Hisos pagbakak nga iza ya Nagagihit kay ya Nagagihit ani ya may gahem ka pagpasaylo ka mga sala.⁸Mahagdam dazon si Hisos nga maonga ya kanirang hona-hona agon nangotana iza nga kay ono sa nga malain sa ya kamazong hona-hona kanao? ⁹Dini ka paralitiko singed ka masazon ya pagpasaylo ka toong mga sala kay diri mazo makita kon dizan pen ya toong mga sala kon wara di. Piro malised ya pagdazaw ka toong lawas kay makita dazon kon madazaw di iton kon diri pen.¹⁰Koman ipakilala nao kamazo nga may gahem nao ka pagpasaylo ka mga sala na bisan sin-o nga tao kay hao gazed ya minhon-a ka bisan sin-o nga mahon-ang tao. ¹¹Kamhan minsogo si Hisos ka paralitiko nga bomangon di ko. Lokoton di mo ya bentagan mo. Om-oli di ko ngaro ka lagkaw mo. ¹²Kamhan minbangon matood ya paralitiko daw minhipid dazon iza ka toong banig. Kamhan dizan ka pagseleng na mga tao minpanaw iza ngaro. Agon nabereng gazed siran daw insaza niran ya Nagagihit nga nagalaong nga wara sa sokad ya nakitan nami nga singed kaini.¹³Pagkakamhan kaiza minbalik si Hisos ka baybazen na danaw. Kamhan mintipon ya mataud nga mga tao dizan kanangiza. Kamhan minsindo iza kaniran. ¹⁴Pagkakamhan ka-iza min-azi si Hisos dizan ka opisina nga bayranan ka mga bohis na mga karga. Kamhan ya magsokotay ka mga bohis nga si Libi nga Anak ni Alpiyo ani ya nakitan ni Hisos kay nagalo-to iza dizan ka toong opisina. Kamhan minlaong si Hisos kan Libi nga somakop ko kanao. Kamhan mintindeg dazon si Libi kay an-iba iza kan Hisos.¹⁵Kamhan ampakaen si Libi kan Hisos daw ya toong mga sinarigan. Min-intra disab dizan ya mga mataud nga magsokotay singed kan Libi daw ya mga iba pen nga salaan nga tao kay siran isab ya nagaibaiba kan Hisos. ¹⁶Ka nagakaen pen sirang maharong inpaniidan siran na mga magtutuldo na mga Hudiyo. Na, ya ngaran na mga magtutuldo ka tinoohan na mga Hudiyo ani ya Parasiyo nga hopaw ya kanirang pagtoo. Kamhan nangotana siran ka mga sakop ni Hisos pagmahay nga nagalaong nga kay ono sa ya kamazong magtututldo minpakigsaro ka mga salaan nga tao? Ani ini ya pangotana niran kay ya batasan na mga magsokotay ka bohis onay oswagan ya bohis.¹⁷Pagpakabati ka ni Hisos ka pagmahay niran minsambag iza nagalaong nga pamolinged ini nga ya mga tao nga madazaw ya lawas wara siran magpatambal basta kay ya mga masakiten. Kamhan wara hao magkarini ka pagtabang ka mga matadeng nga tao basta kay ya mga makasasala kadaw anhinelsel siran ka kanirang mga sala. Ani ini ya inlaong ni Hisos ka mga Parasiyo.¹⁸Na, nagaanget ka makaun ya mga sakop ni Howan nga Magbenzagay daw ya mga Parasiyo kay nagatoman siran ka balaud nga tinoohan na mga Hudiyo. Kamhan minlaong ya mga tao kan Hisos nga kay ono sa wara magtoman ya kanmong kasakopan ka batasan ka pag-anget ka makaen singed ka mga sakop ni Howan daw ya mga Parasiyo? ¹⁹Minsambag si Hisos pagpamolinged nga ya kanaong kasakopan singed siran ka mga magkombitihay. Kamhan dizan kaniran hao ya singed ka banahen agon ka dini pen hao kaniran diri siran an-anget ka makaun.²⁰Piro may tirmino nga kaw-en hao garing ka kanaong mga sakop anipen omanget siran ka makaen kay mabeg-at ya kanirang bout. ²¹Wani ya pamolinged kadaw mahagdam kamo nga ya kanaong pagmaymay diri makaangay ka mga balaed nga tinoohan na mga Hudiyo. Kay ya kanaong pagmaymay singed iton ka bag-ong panapton. Kamhan ya mga balaud na mga Hudiyo singed iton ka bado nga nadonot di. Na, pagtopak nita ka nadonot nga bado diri di gamiten ya bag-ong panapton kay basi kay-an ka paglaba ka bado ankezes ya topakay nga bag-ong panapton. Kamhan magakagisi ya daan bado pagdobli²²Bisan ya bag-ong bino nga magabora pen diri ihalin ka daan len-anan nga kindal na kanding kay kon begketen ya ba-ba na len-anan magisi gazed iton. Kamhan an-awas ya bino daw kanogon sab ya len-anan nga magisi. Agon gamiten gazed ya bag-ong len-anan. Ani ini ya pamolinged ni Hisos ka mga tao kadaw mahagdam siran nga ya toong pagmayamy diri makaangay ka mga balaud nga tinoohan na mga Hudiyo.²³Na, may isang ka Sabado dizan ka homazan nagaazi si Hisos. Na, ya Sabado ani ya tigpahimlay na mga Hudiyo. Na, pag-azi ka ni Hisos nagapangitlo ya toong mga sakop ka mga homay kay kanen niran. ²⁴Pagpakapaniid ka na mga Parasiyo kanin Hisos minbaheg siran nagalaong nga paka selengi! Minlapas gazed ya kanmong mga sakop ka balaud na Nagagihit kay koman nga tigpahimlay min-ani siran ka homay.²⁵Minsambag si Hisos nga mahagdam kamo daan ka inhinang ni Dabid nga karaang tao na mga . Hudiyo Kawandini pen imbengtas iza daw ya toong kaibahan kay inlopog siran na kanirang mga kaaway. ²⁶Agon pagdateng niran ka lagkaw nga pangamozoanan ka Nagagihit nangazo siran ka makaen dizan kan Abiyatar nga labaw nga pari. Kamhan wara iza magbaheg kaniran kay imbengtas siran. Kamhan minkaen si Dabid ka tinapay nga inhalad daan ka Nagagihit. Minpakaen isab iza ka toong kaibahan. Bisan ya mga pari anikay ankaen kitong mga tinapay wara si Dabid maglapas ka balaud na Nagagihit ka pagkaen na-iza.²⁷Kay ya pagtabang ka kinahanglanen na tao ani say labaw ka kamazong mga balaud nga mabeg-at. Kay minhinang ya Nagagihit ka tao paghon-a ka paghinang na-iza ka aldaw nga tigpahimlay. ²⁸Kamhan hao ya ambeet kon ono ya madazaw nga hinang na tao ka aldaw nga tigpahimlay kay hao ya minhon-a ka bisan sin-o nga mahon-ang tao. Ani ini ya sambag ni Hisos ka mga Parasiyo.

¹May isa pen nga ka Sabado nga minseled gihapon si Hisos ka singbahan na mga Hudiyo. Na, dizan disab may tao nga diri mahingas ya pikas nga toong alima. ²Na, ya mga maistro ka tinoohan na mga Hudiyo nagapaniid gazed siran kan Hisos kay kon dazawen na-iza ya alima naiton nga tao awazen iza niran kay singed ka antarabaho iza koman nga aldaw nga tigpahimlay.³Kamhan minlaong si Hisos ka tao nga komarini ko naa. ⁴Pagtindeg na tao dizan ka tenga nangotana si Hisos ka mga Parasiyo nagalaong nga ya balaud na Nagagihit mahitenged ka aldaw nga tigpahimlay daw itogot ka pagkalooy ka tao kon itogot ka pagdaut ka tao? Kamhan wara siran magsambag.⁵Pagseleng ni Hisos kaniran mabeg-at ya toong hinawa ka pagkazehet kay waray kalooy niran ka tao. Kamhan minsogo si Hisos ka tao nga Loy, henaten mo ya kanmong alima. Kamhan inhenat matood na-iza ya toong alima. Kamhan minbalik dazon ya kabaskeg na toong alima singed ka karig-en na isang alima. ⁶Kamhan minpanaw dazon ya mga Parasiyo kay dizan ka mga Hudiyo nga minsakop di kan Hirodis nga hari ansabot siran nga patazen niran si Hisos.⁷Pagkakamhan ka-iza minbalik si Hisos ka baybazen na danaw iba ya toong mga sinarigan. Kamhan nangarini kan Hisos ya mga mataud nga tao garing ka lopa nga Galiliya daw ya lopa nga Huda ⁸daw ya siyodad nga Hirosalem. Nangarini sab ya mga mataed nga tao garing ka lopa nga Idomaya daw dipi ka sapa nga Hordan daw garing ka mga dapit tenged ka dowang ka longsod nga Tiro daw Sidon. Nangarini sirang maharong kay nabatian niran ya panan-og mahitenged ka maharong mga inhinang ni Hisos.⁹Kamhan minsogo si Hisos ka toong mga sinarigan nagalaong nga ektan mazo ya baloto dazaw anleen hao kay basi maheet gazed hao ka mga tao. ¹⁰Ani ini ya toong inlaong kay mataud ya tao nga indazaw na-iza agon bisan sin-o ya may masakit an-arani gazed iza pagheet kan Hisos kay maazak siran antoldok kan Hisos.¹¹Bisan ya mga maonga nga minhari ka bout na tao pagseleng niran kan Hisos minlohod siran dizan ka toong paahan kamhan minsinggit nagalaong nga iko gazed ya Anak na Nagagihit. ¹²Kamhan minbaheg gazed si Hisos kaniran dazaw diri siran ampanan-og kon sin-o sa iza.¹³Pagkakamhan ka-iza minkandaked si Hisos ka kilid na bobong. Inpakandaked disab na-iza ya mga tao nga naazakan na-iza nga pilien. Pagdateng niran dizan kanang-iza ¹⁴impili na-iza ya napolo may dowang ka tao nga toong mga sinarigan dazaw an-iba siran kanang-iza daw pakarohan siran ka pagsangzaw ka pagmaymay nga garing ka Nagagihit. ¹⁵Kamhan intagan siran na-iza ka gahem ka pagpadalagan ka mga maonga nga minhari ka bout na tao. ¹⁶Na, wani ya mga ngaran na mga tao nga inpili ni Hisos. Ya primiro ani si Simon nga indagnazan na-iza kan Pidro.¹⁷Kamhan ya maglomon nga si Santiago daw si Howan. Mga Anak siran ni Sibidiyo. Indagnazan siran na-iza kan Bowanirgis kay diri siran mahaldek ka bisan ono. ¹⁸Kamhan impili na-iza si Andris daw si Pilipo daw si Bartolomi daw si Matiyo daw si Tomas daw si Santiago nga Anak ni Alpiyo daw si Tadiyo daw si Simon nga masinopaken ka hari nga Romanhon ¹⁹daw si Hodas nga taga Kariyoti ani ya an-adlaw kan Hisos. Ani ini ya mga ngaran na mga sinarigan ni Hisos nga napolo may dowa siran.Na, pagkakamhan ni Hisos pagpili kaniran nangoli di siran iba kan Hisos. ²⁰Pagdateng niran ka lagkaw mataud disab ya mga tao agon waray logar niran ka pagkaen. ²¹Kamhan nawied ya mga kaibahan ni Hisos kay silaong niran maboangboang iza kay waray pagberebentagay na-iza. Agon ibahen iza kontana ngaro ka waray tanto nga tao. ²²Kamhan ya mga magtutuldo nga Hudiyo nga garing ka Hirosalem minsora siran paglaong nga si Hisos inharian iza ni Satanas inngaranan sab kan Bilsibol nga tag-iza ka mga maonga. Agon may gahem gazed na-iza ka pagbogaw ka mga maonga.²³Kamhan inpakarini siran ni Hisos kay ansambag iza kaniran nga onhon sa baza ni Satanas ka pagbogaw ka toong kaogaringeng Lambong? Pamolinged ini nga ²⁴kon awazen na hari ya toong mga sinogo mapildi gazed ya hari. ²⁵Kon ampakig-away ya isa daw isa nga lomon dizan ka isang pamiliya mapildi isab ya pamiliya.²⁶Kon bogawen ni Satanas ya toong kaogaringen nga ispirito dizan ka tao mapildi gazed si Satanas. ²⁷Dizan ka lagkaw na kesgan nga tao kinahanglan ektan ya kesgan nga tao anipen kawaten ya toong mga betang. Singed si Satanas ka kesgan nga tag-iza ka lagkaw. Hao kay nakadaeg kan Satanas agon papanawen nao ya toong mga sinogo dizan ka tao.²⁸Timan-an mazo gazed ini nga bisan ono nga sala na mga tao pasaylohon na Nagagihit. Bisan ya pagpanaba niran ka maonga mahitenged ka Nagagihit pasaylohon siran na Nagagihit kon anhinelsel siran. ²⁹Basta kay bisan sin-o ya ampanaba ka maonga mahitenged ka Madazaw nga Ispirito nga garing ka Nagagihit diri gazed pasaylohon iza na Nagagihit. Bisan kawanihen ka waray pasaylo. ³⁰Ani ini ya inbaheg ni Hisos kay minlaong ya mga Parasiyo nga inharian si Hisos na maonga.³¹Pagkakamhan ka-iza dizan ka lagkaw palogwaen kontana si Hisos na toong ina daw mga lomon kay bali lamang siran ka gawas. ³²Kamhan inpakahagdam iza na mga minlibot nga nagalaong nga Nong, bali ka gawas ya kanmong ina daw mga lomon. Naanzak siran anlaong kanmo.³³Minsambag si Hisos nga daw sin-o sa ya kanaong ina daw ya mga lomon? ³⁴Pagseleng na-iza ka mga minlibot kanangiza minlaong iza nga kamo ya kanaong ina daw kanaong mga lomon. ³⁵Kay bisan sin-o ya nagatoman ka mga sogo na Nagagihit ani gazed ya kanaong ina daw lomon.

¹Ya, may isa pen nga ka aldaw dizan si Hisos ka baybazen na danaw kay ansindo iza ka mga tao pag-isab. Masarang kataud siran nga minlibot kan Hisos. Agon minleen iza ka baloto arani ka baybazen. Kamhan minlo-to iza dalem ka-iza. Kamhan dizan ka baybazen nanalinga ya mga tao. ²Kamhan mintoldo iza kaniran ka mga mataud nga pamolinged nagalaong nga³manalinga kamo. Wani ya pamolinged ka nagasabwag. Na, may isang aldaw nga minpanaw ya tao ngaro ka toong oma kay anpanabwag iza ka binhi nga homay. ⁴Pagpanabwag na-iza ka mga binhi may mga natanak dizan ka dalan. Kamhan inpanoktok na mga manokmanok. ⁵Pagpanabwag pen na tao may mga natanak isab dizan ka kabatohan. Kamhan mintobo dazon iton kay diri kon ararem ya lopa.⁶Kamhan pagkaataas na sega nangalaza dazon sirang maharong. Kamhan nangapatay kay diri siran makagamot ka ararem. ⁷May mga natanak disab dizan ka lopa nga nanhela pen ya mga liso na sagbet. Pagtobo na binhi mindengan isab ya sagbet nga dogihen. Kamhan inhalong gazed na sagbet ya mga tanem.⁸May mga natanak isab dizan ka lopa nga madazaw. Kamhan mintobo iton daw mataud ya ohay. May mga nangaohay ka katloan. May mga nangaohay ka kan-eman. May mga nangaohay ka isang ka gatos. Ani ini ya pamolingud ka nagasabwag. ⁹Kamhan minsogo si Hisos kaniran nga kamo nga mga manalingahay sabten mazo ini nga pamolinged.¹⁰Pagkakay-an ka-iza isa ka si Hisos dizan agon nangotana ya toong mga sinarigan daw ya kanirang kaibahan nga Hisos, kay ono sang nagapasagisagi sa ko ka kanmong mga panaba ka mga tao? ¹¹Minsambag si Hisos kaniran nga ipasabot na Nagagihit kamazo ya mga tinago mahitenged ka pagpasakop naiza ka mga tao. Piro dizan ka mga iba nga tao ampamolinged hinoa hao pagtuldo kaniran. ¹²Kay mintoman di ya daan pinasoyat na Nagagihit mahitenged kaniran nga nagalaong nga bisan magaseleng ya mga tao ka kanaong mga inhinang diri siran makasabot. Bisan manalinga siran ka kanaong pagmaymay diri siran makasabot kon ono ya kahologan kay diri siran anbiza ka kanirang mga sala agon diri pasaylohon siran na Nagagihit. Ani ini ya daan pinasoyat na Nagagihit.¹³Mindogang si Hisos pagpanaba ka toong mga sakop nga nabereng hao kay wara kamo makasabot ka kanaong pamolinged ka nagasabwag. Agon onhon sa mazo nga makasabot kamo ka kahologan kon ampamolinged hao pag-otro? ¹⁴Na, wani ya paghilwas ka pamolinged ka nagasabwag. Na, ya inpanabwag na tao ani ya mga panaba na Nagagihit. ¹⁵Kamhan ya mga binhi nga natanak dizan ka dalan ani ya singed ka isang manalingahay. Kay pagpanalinga na-iza ka pagmaymay mahitenged kanao mindateng dazon si Satanas kay kaw-en na-iza ya pagmaymay nga nabatian naiton nga tao.¹⁶Kamhan ya mga binhi nga natanak dizan ka kabatohan ani ya singed ka manalingahay nga nakaangay ka sindo mahitenged kanao. Kamhan mintoo iza dazon ¹⁷piro magaawazen gazed iza na mga tao kay minsakop di iza kanao agon bizaan dazon na-iza ya toong pagtoo kanao kay ababa ka ya toong pag-anget ka kalised.¹⁸Kamhan ya mga binhi nga natanak dizan ka lopa nga nanhela pen ya mga liso na sagbet ani ya singed ka isa pen nga manalingahay. ¹⁹Kay nagapanalinga gazed iza ka pagmaymay mahitenged kanao kamhan nawied sab iza daw ono ya toong panginabohi. Ganahan sab iza ka talipid. Agon waray polos ya pagmaymay kay singed ka nalipat dazon ya manalingahay. ²⁰Basta kay ya mga binhi nga napegas dizan ka lopa nga magazong tamnanan ani ya singed ka mga manalingahay ka sindo mahitenged kanao kamhan mintoo gazed siran. Kamhan singed ka nangaohay ya isa ka katloan. Nangaohay ya iba ka kan-eman. Nangaohay isab ya iba pen ka isang ka gatos. Ani ini ya paghilwas ni Hisos ka pamolinged ka nagasabwag.²¹Kamhan minpamolinged pen iza kaniran nagalaong nga kon segan na tao ya moron diri pagtakloban. Ibetang hinoa daked ka artal kay kadaw pawaan ya mga minseled ka lagkaw. ²²Singed iton ka ipasabot nao kamazo ya mga pamolinged. Impakahagdam sab nao kamazo ya mga intago na Nagagihit. ²³Kamo nga mga manalingahay, magtaremdem kamo kaini nga pagmaymay nao kamazo.²⁴Manalinga gazed kamo kadaw ihatag pen kamazo na Nagagihit ya kasabtan daw pasobrahan pen ²⁵kay bisan sin-o ya antoon ka pagmaymay na Nagagihit padogangan pen na Nagagihit ya toong kasabtan. Kamhan ya tao nga diri antoon kaw-en na Nagagihit ya geramay nga inton-an na-iza.²⁶Na, wani pen ya pamolinged mahitenged ka pagpadazon na Nagagihit ka toong tarabaho. Na, may isang aldaw nagapanabwag ya tao ka toong mga binhi. Pagkakamhan min-oli di ya tao. ²⁷Kada kahabzen natorog iza. Kada masiselem ambangon iza. Kamhan ankaro dazon iza ka toong oma kay ansosi iza kon mintobo di ya tanum. Wara mahagdam ya tao kon onhon sa ya pagpatobo ²⁸kay ya lopa ani ya ingaringan ka tanem. Ka primiro pen waton ya tobo. Sonod ya lawas. Sonod isab ya bagaybay. Mahori ya poso. ²⁹Pagkalahing di na poso sanggien na tao kay mindateng di ya tirmino na mais ka pagsanggi.³⁰Mindogang si Hisos paglaong kaniran nga wani pen ya pamolinged mahitenged ka pagpaoswag na Nagagihit ka toong paghari dini ka mga tao. ³¹Singed iton ka isang bolos nga liso inngaranan ka mostasa. ³²Kamhan intanem na tao dizan ka toong oma. Bisan geramay iton ka bisan ono nga liso, ka pagsolig di mahinang iton ka dakolang liwaan nga may dakolang sap-ay. Kay doro ka lopa nga Huda ya mostasa liwaan iton nga opat nga ka mitros ya kaataas. Kamhan dizan ka katamdenganan na mga sap-ay magapogad ya mga manokmanok.³³Pagmaymay pen ni Hisos ka mga tao mataed pen ya mga pamolinged singed kaiton. ³⁴Waray lain toldoan na-iza kaniran piro dizan ka toong mga sakop inpasabot na-iza ya maharong mga pamolinged na-iza.³⁵Pagkadelem ka-iza minlaong si Hisos ka toong mga sinarigan nga ansakay kita dipi ka danaw. ³⁶Kamhan inbilin niran ya mga tao dizan ka baybazen kay in-ated si Hisos pagsakay ka baloto. Iba gihapon ya iba nga mga baloto. ³⁷Ka dizan pen siran ka tenga na danaw inbagzo gazed siran. Insapwan dazon na balud ya baloto daw malened kontana³⁸piro natorog si Hisos dizan ka olin na baloto. Kamhan minsinggit ya toong mga sakop pagpokaw kanang-iza nagalaong mga Magtutuldo, daw waray kawied mo nga mangalened kita? ³⁹Min-imata dazon si Hisos. Inbaheg na-iza ya hangin daw ya mga balud nagalaong nga magpahenek! Minhenengdazon ya hangin daw nalinaw matood ya maharong.⁴⁰Kamhan minlaong si Hisos ka toong mga sakop nga kay ono sa magakahaldek sa kamo? Daw waray pagsarig mazo kanao? ⁴¹Kamhan nabereng gazed siran. Namaglaonglaong siran nga daw sin-o sa baza ini nga taohana? Kay bisan ya hangin daw ya mga balud antoo gazed ka toong pagbaheg!

¹Pagkakamhan ni Hisos pagpaheneng ka bagzo minsangpet di siran ka lopa nga Girgasa dipi ka danaw. ²Pagkawas ka ni Hisos ka baloto may tao nga inhoropan gazed ka maonga nga minsogat kanang-iza.Garing iza ka mga lebeng nga talangban ³kay ani ya toong hol-anan. Diri di iza madaug pagtagen. Bisan mga kadina pen diri di maektan. ⁴Kapira iza maekti kontana piro nakabogto iza ka lepes daw kadina. Bisan kesgan nga tao diri di gazed makadaug pagtagen⁵Aldaw daw kahabzen dizan iza ka mga lebeng daw mga bobong magasininggit daw magapan-olatan na-iza ka bato ya toong lawas. ⁶Na, pagpakakita na-iza kan Hisos nga aro pen mindalagan iza pagsogat. Kamhan minpatilohod dazon iza dizan ka paahan ni Hisos.⁷Kamhan minsinggit iza nga Hisos nga Anak na Nagagihit, kay ono say inkarini mo? Anhangzo gazed hao nga diri mo gazed hao daegdaegen! ⁸Ani ini ya inlaong na maonga nga minhari ka bout na tao kay si Hisos minsogo nga domalagan ko dizan ka tao.⁹Kamhan nangotana si Hisos ka maonga daw ono ya ngaran mo? Minsambag iza nga hao si Kataudan kay mataud kami. ¹⁰Anhangzo hao kanmo, Hisos, kon malooy ko kanami diri mo kami pagbogawen ngaro ka aro nga dapit.¹¹Na, dizan ka kilid na bobong nagapansongad ya mga kababozan. ¹²Kamhan minhangzo ya mga maonga kan Hisos nga kon malooy ko kanami papanawen mo kami ngaro ka mga baboy. Pahel-en mo kami ka kanirang mga lawas. ¹³Kamhan intogotan siran ni Hisos. Kamhan minpanaw ya mga maonga dizan ka lawas na tao. Minhari siran ka mga baboy. Daw pirang bolos ya baboy? Dowang ka libo sirang maharong. Kamhan minpahidalagan siran maharong ngaro ka may pangpang nga ataas. Minpatiholog siran ngambaba ka danaw kamhan natibe siran pagkalemes.¹⁴Kamhan nandalagan gazed ya mga magbantazay ka baboy ngaro ka kanirang longsod daw ya mga bariyo kay ampanan-og ka mga tao kon in-ono sa ni Hisos ya tao nga inhoropan ka mga maonga. Kamhan minkarini dazon kan Hisos ya mga tao kay maharong siran anseleng ka tao kon in-ono sa iza. ¹⁵Pagdateng niran kan Hisos nakitan niran ya tao nga indazaw ni Hisos. Iza nga inhoropan na mga mataed nga maonga nagalo-to di dizan daw inbadoan kay naolian ka madazaw nga beet. Kamhan nahaldek ya mga mindateng.¹⁶Kamhan ya mga minkita ka inhinang ni Hisos kazina, siran ya minpanan-og ka mga bag-ong mindateng nga indazaw ni Hisos ya tao nga inhoropan na maonga. Kamhan inpadalagan disab ya mga baboy. ¹⁷Kamhan minhangzo siran kan Hisos kadaw ampanaw iza dini ka kanirang lopa.¹⁸Pagleen ni Hisos ka baloto ya tao nga indazaw na-iza minhangzo iza nga an-iba ¹⁹piro diri iza paibahen ni Hisos. Mintogon iza ka tao nga om-oli ko ka mga lomon mo. Maglaong ko kaniran nga madazaw di ya lawas mo kay inkaloy-an ko na Magbabaza. ²⁰Minpanaw dazon ya tao doro ka longsod nga Dikapolis. Minpanan-og iza kon in-ono sa iza ni Hisos. Kamhan nabereng gazed ya mga tao.²¹Pagkakamhan ka-iza minsakay si Hisos ka baloto pag-oli ngandipi ka danaw. Pagdateng na-iza ka baybazen inlibotan gazed iza na mataud ga mga tao dizan ka baybazen na danaw. ²²Kamhan may isang oloolo ka singbahan na mga Hudiyo nga minkarini kan Hisos. Si Hariyo ya ngaran. Pagpakakita na-iza kan Hisos minlohod dazon iza ²³daw minpakilooy gazed nga nagalaong nga nagapinal di ya kanaong Anak nga daragahay. Kon mahimo ya beet mo ibahan mo hao ngaro ka kanaong lagkaw kadaw mabohi iza kon tagenan di mo ya toong lawas. ²⁴Kamhan min-iba si Hisos kan Hariyo. Nangiba disab ya masarang kataud nga mga tao. Minlibot siran kan Hisos pag-iba ngaro ka lagkaw ni Hariyo.²⁵Ya, may nagalopog kan Hisos nga babazi nga sokad ka napolo may dowang ka toig wara magheneng ya toong pagdog-a. ²⁶Bisan nahorot ya toong talipid dizan ka mga mataud nga doktor nadoblihan hinoa ya toong masakit. ²⁷Kamhan nakabati iza nga indazaw ni Hisos ya mga nabedlay. Agon min-iba iza ka mga tao pagsonod niran kan Hisos kay maharong iza antoldok ka bado ni Hisos.²⁸Nagalaong iza ka toong hona-hona nga bisan anikay intoldokan nao ya toong bado maolian gazed ya kanaong lawas. ²⁹Na, pagtoldok na-iza ka bado ni Hisos madazaw di matood ya toong lawas.³⁰Kamhan si Hisos minheneng pagpanaw kay inbati na-iza nga mintambal di iza ka tao. Kamhan minhinali si Hisos pagliso. Nangotana iza kaniran nga sin-o say mintoldok ka kanaong bado? ³¹Minsambag ya toong mga sakop nga Hisos, mataed gazed ya minlibot pagheet kanmo. Kay ono pen nga anpangotana ko nga sin-o say mintoldok kanmo? ³²Kamhan minseleng si Hisos ka mga tao kay gosto ankilala kon sin-o ya mintoldok kanang-iza kazina.³³Kamhan minkarini ya babazi kay mahagdam nga iza gazed ya inbahaw ni Hisos. Paglohod na-iza dizan ka paahan ni Hisos nagapidpid ya toong lawas ka kahaldek. Kamhan minlaong iza kan Hisos nga hao gazed ya mintoldok ka kanmong bado kazina. ³⁴Minsambag si Hisos nga Day, basta ya pagsarig mo kanao madazaw di ya lawas mo. Om-oli ko naa. Diri ko magkawied kay diri ambalik ya kasakit mo.³⁵Pagkakamhan ka-iza min-apas ya mga tao garing ka lagkaw ni Hariyo nga oloolo ka singbahan na mga Hudiyo. Minlaong siran nga Hariyo, abay ko pagaiba kan Hisos ngaro ka lagkaw mo kay wara di ya Anak mo.³⁶Kamhan minlaong si Hisos nga Hariyo, diri ko magkawied. Magsarig ko naa kanao. ³⁷Kamhan diri ni Hisos itogot ya mga tao pag-iba ngaro ka lagkaw naini nga oloolo nga napatzan. In-iba di lamang na-iza si Pidro daw si Santiago daw ya manghod ni Santiago nga si Howan. ³⁸Pagdateng niran nakita na-iza ya mga tao nga masamok gazed ka paghaza.³⁹Pagseled ni Hisos ka lagkaw nangotana iza kaniran kay ono say inhaza mazo? Diri kon naomos ya bata. Igo ka lamang iza matorog. ⁴⁰Kamhan inkatawhan niran si Hisos. Pagpalogwa na-iza kaniran in-ated naiza ya ginikanan dalem ka kowarto nga inbentagan na babazi. In-iba sab ya toong mga sakop nga tolo ka siran.⁴¹Kamhan intagenan ni Hisos ya alima na babazi daw minsogo nga Day, bomangon ko naa. ⁴²Minbangon dazon iza nga daragahay daw minpanawpanaw. Agon dakola gazed ya pagkabereng niran. ⁴³Kamhan minsogo si Hisos kaniran nga pakanen naa ya babazi. Kamhan diri kamo magpanan-og dizan ka mga tao nga indazaw di nao iza. Ani ini ya pagtabang ni Hisos ka Anak ni Hariyo

¹Pagkakamhan ka-iza minpanaw si Hisos kay an-oli di iza ka Nazarit nga toong insoligan. Iba gihapon ya toong mga sakop. ²Na, pagka Sabado nga tigpahimlay na mga Hudiyo minsogod si Hisos pagmaymay ka mga taga Nazarit dolom ka kanirang simbahan. Kamhan nangabereng ya mga mataud nga manalingahay daw nagalaong siran nga wara kami mahagdam kon hain iza magtoon ka kahagdamanan daw onhon sa naiza paghinang ka mga madazaw nga kaberenganan ³kay panday ka lamang iza. Anak iza ni Mariya. Maglomon iza daw si Santiago daw si Hosi daw si Hodas daw si Simon. Taga dini disab kanta ya toong mga lomon nga babazi. Ani ini ya kanirang inlaong kamhan diri gazed siran antoo ka toong maymay kaniran.⁴Kamhan minlaong si Hisos kaniran nga doro ka mga lain dapit intahod hao na mga tao piro dini kamazo nga kanaong kaibahan waray pagtahod. Bisan ya mga karaang propita na Nagagihit wara siran tahoda na kanirang kaibahan. ⁵Kamhan dizan ka toong kaibahan diri makahimo si Hisos paghinang ka bisan ono ya dakolang hinang. Ya mga talagsang nabedlay anikay indazaw na-iza. ⁶Nabereng gazed si Hisos kay diri siran antoo nga may gahem na-iza ka paghinang ka dakolang kaberenganan. Kamhan doro ka mga bariyo libot ka Nazarit nagapasiyo si Hisos kay anmaymay iza ka mga tao.⁷Pagkakamhan ka-iza inpatipon na-iza ya toong mga sinarigan nga napolo may dowang ka tao siran. Kamhan impakaro na-iza ya tinagdowa ngaro ka mga lain dapit. Na, ka wara pen siran panaw intagan siran ka gahem kadaw palogwaen niran ya mga maonga nga magahari ka bout na mga tao. ⁸Intogon sab siran nagalaong nga sogkod ka lamang ya kamazong dara, waray lain harominta. Diri kamo maghabay ka talipid. ⁹Diri sab kamo maglapid ka bado piro mahimo pagsinilas.¹⁰Dizan ka lagkaw nga inpanikan mazo maghela gazed kamo hastang ka pagpanaw mazo. ¹¹Dizan ka bariyo nga diri an-abiabi kamazo izabzab mazo ya abog dizan ka paa mazo kadaw mahagdam siran nga silotan siran kay-an kay diri siran an-angay ka sindo na Nagagihit ka pagpanalinga.¹²Pagkakamhan ni Hisos pagtogon kaniran minpanaw siran kay ansangzaw siran ka mga tao nagalaong nga bizaan mazo ya mga sala mazo. ¹³Kamhan impalogwa sab niran ya mga mataud nga maonga nga magahari ka bout na mga tao. Inbo-boan sab niran ya olo na mga nabedlay ka lana. Kamhan madazaw matood ya lawas na mga nabedlay.¹⁴Ya, ka nagapasinged pen ya mga sakop ni Hisos doro ka mga lain dapit nabatian ni Hirodis nga hari kon ono ya hinang niran kay mindakola di ya ngaran ni Hisos. Kamhan nagatekma ya mga tao kon sin-o sa si Hisos. May nagalaong nga si Hisos ani si Howan nga Magbenzagay. Nabohi iza pagbalik garing ka lebeng agon may gahem na-iza ka paghinang ka mga madazaw. ¹⁵May mga iba nga tao nga nagalaong nga si Hisos ani si Iliyas nga karaang propita na Nagagihit. May mga iba pen nga tao nga nagalaong nga si Hisos propita iza singed ka isa pen nga karaang propita.¹⁶Piro si Hirodis pagpakabati na-iza ka kanirang tekma nagalaong iza nga si Hisos ani gazed si Howan nga Magbenzagay nga inpaotdan nao ka lieg. Nabohi di iza baza garing ka lebeng. ¹⁷Ani ini ya kawied ni Hirodis kay izang dini kaini impadakep na-iza si Howan. Kamhan impagapos ngandalem ka prisohan. Ani ini ya toong hinang kay imbahegan iza ni Howan kay minpanapaw si Hirodis kan Hirodiyas nga toong ipag nga asawa na toong lomon nga si Pilipo.¹⁸Kamhan inbahegan iza ni Howan nagalaong nga silotan ko gazed na Nagagihit kay naminze di ko ka kanmong ipag. ¹⁹Kamhan malain gazed ya bout ni Hirodiyas kan Howan daw patazen kontana. ²⁰Piro diri ansogot si Hirodis kay antahod iza kan Howan kay beetan si Howan, waray sala na-iza. Agon tabangan kontana ni Hirodis si Howan daw anpanalinga ka toong insagzaw piro nagakalibeg gazed si Hirodis kada pagpanalinga.²¹Na, pagdateng na aldaw ka pagkombiti nga impahinenged ka pagkatao ni Hirodis may logar ni Hirodiyas ka pagpapatay kan Howan. Ya, nagapakaen si Hirodis ka toong mga magtimbangay daw ya mga kapitan ka soldaw daw ya mga dakolang tao dizan ka lopa nga Galiliya. ²²Pagpangaen pen niran minsazaw ya daraga nga Anak ni Hirodiyas. Kamhan nagasaza si Hirodis daw ya toong mga bisita ka pagsazaw na babazi. Kamhan minlaong si Hirodis ka babazi nga bisan ono ya azoon mo kanao ihatag gazed nao kanmo.²³Maomos gazed hao kon baribadan ta ko ka azoon mo kanao. Bisan ya tenga na kanaong talipid ihatag gazed. ²⁴Kamhan minlogwa dazon ya babazi kay ansabot ka toong ina nga daw ono ya azoon na-iza kan Hirodis. Minsambag dazon ya ina nga ya olo ni Howan ani ya azoon mo! ²⁵Minbalik dazon ya babazi kan Hirodis daw minlaong nga tagan mo hao ka olo ni Howan nga Magbenzagay. Ibetang mo iton dini ka palato.²⁶Pagpakabati ni Hirodis ka in-azo na babazi mabeg-at gazed ya toong bout ka pagkawied. Piro masipeg iza ka pagbaribad ka babazi kay kazina dizan ka mga bisita minsaad gazed iza ka babazi. ²⁷Agon minsogo dazon iza ka soldaw nagalaong nga dadhen mo ngarini kanao ya olo ni Howan. Minlogwa dazon ya soldaw. Kamhan dizan ka prisohan in-otod dazon ya lieg ni Howan. ²⁸Kamhan imbetang iton dizan ka palato. Kamhan indara ngaro ka babazi. Kamhan inhatag sab na babazi ka toong ina ya olo ni Howan. ²⁹Pagpakabati na mga sakop ni Howan minkaro siran ka prisohan kay kaw-en niran ya lawas ni Howan. Kamhan inlebeng iton. Ani ini ya pagkapatay ni Howan agon pagpakabati ni Hirodis ka mga hinang ni Hisos nawied gazed iza kay silaong na-iza nga si Hisos ani si Howan nga Magbenzagay nga nabohi garing ka lebeng.³⁰Na, ya mga sinarigan ni Hisos nga mga inpili na-iza ka pagsangzaw ngaro ka mga tao min-oli di siran. Kamhan inpanan-ogan niran si Hisos kon ono ya hinang niran. ³¹Kamhan minlaong si Hisos nga ibahan mazo hao ngaro ka mamingaw kay magpahuway kamo kay mataud ya mga tao dini. Waray logar mazo ka pagkaun. ³²Kamhan minsakay siran ka baloto ngaro ka dapit nga mamingaw.³³Kamhan dizan ka inpanawan niran mataud ya mga minkita kanin Hisos pagsakay niran ka baloto. Kamhan garing ka maharong mga bariyo nanlopog ya mga tao pagbagtas dizan ka baybazen kadaw andateng paghon-a kanin Hisos. ³⁴Pagkawas ka ni Hisos ka baloto ngandipi nakitan na-iza ya masarang kataud nga tao. Kamhan nalooy gazed si Hisos kaniran kay singed siran ka mga karniro nga nangalaag kay waray nagaaligara kaniran. Kamhan minsogod iza pagtuldo kaniran ka mga mataud nga pagmaymay.³⁵Pagkadelem ka-iza minkarini kan Hisos ya toong mga sinarigan kay anlaong siran nga delem di wani. Aro pen kita ka kantang panihaponanan. ³⁶Papanawen mo naa ya mga tao ngaro ka mga bariyobariyo kadaw makapamalit siran ka pagkaun niran.³⁷Minsambag si Hisos nga magpakaun hinoa kamo kaniran. Minsambag siran nga daw ono ya ikapamalit nami kay mahal gazed ya pan singed ka sohol ka enem nga ka bolan kay mataud gazed ya mga tao. ³⁸Kamhan nangotana si Hisos nga daw pirang bolos ya pan mazo? Mangita kamo. Pagpakakita niran minlaong siran nga lima komang bolos ya pan kamhan dowa komang bolos ya isda.³⁹, ⁴⁰Kamhan intipon ni Hisos ya mga tao pagpalo-to dizan ka lopa. Ya kada tipon may magtinaggatos, may magtinagkalim-an. ⁴¹Paghawid ni Hisos ka mga pan nga limang bolos daw ya isda dowang bolos minhangad iza ka tahaw. Kamhan minpasalamat iza ka Nagagihit. Kamhan intipaktipak na-iza ya mga pan anipen na-iza ipanhatag ka toong mga sinarigan. Kamhan inpandohol niran ka mga tao. Kamhan dizan kanirang maharong inbahinbahin na-iza ya dowang bolos nga isda.⁴²Pagkakamhan niran pagkaen nangabosog sirang tanan. ⁴³Pagpakahipid niran ka salin nga tinipak nga pan daw isda nangapono pen ya napolo may dowang ka alat. ⁴⁴Daw pirang bolos ya tao nga impakaen ni Hisos? Ya amaama limang ka libo. Wara pen ya labet na mga babazi daw mga bata.⁴⁵Pagkakamhan ka-iza impasakay ni Hisos ka baloto ya toong mga kasakopan kadaw anhon-a siran kanang-iza dipi ka bariyo nga Bitsayda kay paolien pen na-iza ya mga mataud nga tao. ⁴⁶Kamhan waray iba na-iza pagtokad na-iza ngandaked ka pagkahiping na bobong kay ampangamozo iza ka Nagagihit. ⁴⁷Na, pagkakahabzen ka ya sakzanan na toong mga sakop waro pen iton ka tenga na danaw. Doro ka bobong isa koman si Hisos.⁴⁸Kamhan nakakita iza kaniran nga magalised siran pagbogsay kay nasogatan niran ya makeseg nga hangin. Pagkakamaaldawen ka-iza minpanaw si Hisos dizan ka hopaw na sapa ngaro arani ka kanirang sakzanan. Anlabay iza kaniran kontana ⁴⁹, ⁵⁰piro pagpakakita niran nga waton ya minpanaw dizan ka hopaw na sapa nangahaldek gazed siran daw minsinggit nga pooy sa wani! Piro minlaong si Hisos nga diri kamo magkawied kay hao ini. Diri kamo magkahaldek.⁵¹Pagleen ni Hisos ka baloto iba kaniran minheneng dazon ya hangin. Kamhan nabereng gazed ya toong mga sakop ⁵²kay bisan minkita siran kazina ka pagpakaen ni Hisos ka mga mataud nga tao diri pen siran makasabot nga iza gazed ya Anak na Nagagihit.⁵³Pagkakamhan ka-iza doro ka lopa nga Ganasarit mindonggo siran daw in-ektan ya baloto. ⁵⁴Pagkawas niran ka baloto mataud ya minkilala nga si Hisos ini. ⁵⁵Agon mindalagan siran pag-oli ka kanirang bariyo kay ansogo siran ka paglahong ka mga nabedlay ngaro ka bisan hain azi si Hisos.⁵⁶Kamhan dizan ka taboan na bisan ono ya bariyo daw longsod nga indatngan ni Hisos inpabentag niran ya mga nabedlay. Kamhan minhangzo siran kan Hisos nagalaong nga Hisos, pahogamen mo lamang siran ka pilos na kanmong bado. Kamhan ya maharong nakahogam ka pilos na toong bado nangabahaw dazon siran ka kanirang mga masakit.

¹May isang aldaw nga dizan kan Hisos mintipon ya mga Parasiyo. Dizan isab ya mga magtutuldo nga Hudiyo nga garing ka Hirosalem.²Kamhan minpaniid siran ka mga sakop ni Hisos kay minlapas siran ka balaud nga garing ka mga karaang Hudiyo nga nagalaong nga ka wara pen magkaen ya tao kinahanglan hogasan ya alima. ³Kamhan bisan sin-o nga Hudiyo labi di gazed ya mga Parasiyo antoman gazed siran ka mga balaud na kanirang karaan. ⁴Simpan pag-oli niran garing ka taboan kinahanglan bo-boan ka sapa ya kanirang lawas anipen siran makakaun ka pinalit niran. Diri sab siran angamit ka mga imnanan daw tadzaw daw mga bronsi nga betangan ka wara pen bo-boi ka sapa kay balaud iton na kanirang mga karaan.⁵Kamhan siran nga mga Parasiyo daw ya mga maistro nga Hudiyo nangotana siran kan Hisos nga kay ono sa ya mga sakop mo minlapas gazed siran ka balaud nga garing ka kantang mga karaan nga nagalaong nga ka wara pen magkaon ya tao kinahanglan anhogas iza ka toong alima.⁶Minsambag si Hisos nga mga bakaken kamo kay hopaw ka lamang ya kamazong paghogas kay wara kamo kahingloi ka kamazong mga sala. Insakto gazed ya panan-og ni Isayas mahitenged kamazo nga nagalaong nga dizan ka ba-ba ka lamang ya kamazong pagtoo kanao nga Nagagihit kay ya kamazong hona-hona aro ka gazed kanao. ⁷Wara gazed ya polos ka pagsingba mazo kanao kay nagalaong kamo nga ya pagpanoldo mazo ani ya mga sogo na Nagagihit ambaza kay mga pakahagdam iton garing ka mga tao ka lamang. Ani ini ya panan-og ni Isayas mahitenged kamazo.⁸Kamhan mindogang si Hisos pagbaheg kaniran nagalaong nga sazep mazo iton kay kamo hinoa ya magalapas ka mga sogo na Nagagihit kadaw anhawid kamo ka mga balaed nga garing ka mga karaan. ⁹Hanas gazed kamo pagdomiri ka mga sogo na Nagagihit kadaw ampadazon kamo ka kamazong mga sogo. ¹⁰Garing ka Nagagihit minsogo si Moysis nga karaang oloolo nga tahodon mazo gazed ya kamazong ginikanan. Bisan sin-o ya ampanaba ka maonga mahitenged ka toong kamalas-an magapatazen gazed itong tao. Ani ini ya sogo na Nagagihit.¹¹Kamhan kamo nga mga Parasiyo nagalaong kamo ka ginikanan mazo nga ya itabang nao kamazo waro di nao lamang ihatag ka Nagagihit. ¹²Singed ka diri togotan mazo pagtabang ka ginikanan. ¹³Agon nagapakawaray polos gazed kamo ka sogo na Nagagihit kadaw makapadazon kamo ka kamazong sogo. Mataed pen ya kamazong inhinang singed kaiton.¹⁴Pagkakamhan ni Hisos pagbaheg ka mga Parasiyo inpakarini na-iza ya mga tao kay nagalaong nga kamong maharong, manalinga gazed kamo kay kadaw masabtan mazo nga ¹⁵bisan ono ya inkaen na tao diri gazed iton kon maonga ka tao. Basta kay ya mga panaba nga anlogwa ka ba-ba na tao ani gazed ya maonga ka tao. ¹⁶Kamo nga mga manalingahay, magtimaan gazed kamo ka pagmayamy nao kamazo.¹⁷Pagkakamhan ka-iza minseled dazon si Hisos ka lagkaw. Kamhan wara dizan ya mga tao agon nangotana ya toong mga sakop mahitenged kaini nga pamolinged. ¹⁸Minsambag si Hisos nga daw wara pen kamo makasabot? Daw wara pen kamo mahagdam nga ya inkaen na tao diri gazed kon maonga ka tao. ¹⁹Kay ya makaun diri an-azi dizan ka hona-hona na tao basta dizan ka lamang an-azi ka tinai na tao. Kamhan anlogwa ka lawas na tao. Ani ini ya pagmaymay ni Hisos kay magakawa iza ka maharong mga sogo mahitenged ka makaon nga garing ka mga karaang Hudiyo.²⁰Kamhan mindogang pen iza pagmaymay kaniran nga ya maonga nga mga panaba ani gazed ya makaonga ka tao. ²¹Kay ya hona-hona nga maonga ani ya sinogdan ka paghinang ka malaw-ay daw ya pangawat daw ya pagbono ka tao daw ya paghenay ²²daw ya magaarig daw ya mga maiseg daw ya mga malimbongon daw ya mga malaw-ay daw ya magasina daw ya mga pagbetangbetang ka tao daw ya paggarboso daw ya talatalahen. ²³Iton nga maharong mga maongang batasan garing gazed ka hona-hona na tao. Kamhan makaonga gazed ka tao.²⁴Pagkakamhan ni Hisos pagmaymay kaniran minpanaw iza ngaro tenged ka dowang ka longsod nga Tiro daw Sidon. Pagdateng na-iza doro minseled iza ka isang lagkaw. Diri maharong nga mahagdam ya mga tao nga dizan di iza piro nahagdam dazon siran. ²⁵Kamhan minkarini dazon kan Hisos ya isang babazi kay nabatian na-iza nga dizan di si Hisos. Nagalised gazed ya toong bata kay inharian na maonga. Kamhan minlohod ya babazi dizan ka paahan ni Hisos ²⁶daw nagalong paghangzo nga Sinyor, kaloy-i intawon hao! Papanawen mo ya maonga dizan ka kanaong bata. Na, diri kon Hudiyo ya babazi kay taga Siroponisiya iza. Ya toong saba Ginirika.²⁷Agon minpamolinged si Hisos pagsambag ka babazi nga ya mga bata siran ya mahon-a pagkaon. Diri kon madazaw kon kaw-en ta ya kanirang makaen kadaw ibahog ka ido. Ya, nakasabot dazon ya babazi nga ya kahologan diri kon madazaw kon antabang si Hisos ka mga taga Siriya paghon-a ka pagtabang na-iza ka mga taga Huda. ²⁸Kamhan minsambag ya babazi nga Sinyor, matood gazed ya saba mo. Piro bisan ngani ya mga ido nga nagabentag dizan ka salad na lamisa pagkaen niran ka mga podpod nga inhologan na mga bata diri bogawen ya mga ido. Ani ini ya sambag na babazi kay bisan geramay ka lamang ya pagtabang ni Hisos ka toong bata ansosgot iza.²⁹Kamhan minsambag si Hisos ka babazi nga madazaw gazed ya sambag mo kanao. Om-oli ko kay minpanaw di ya maonga dizan ka bata mo. ³⁰Na, pagdateng na babazi ka toong lagkaw nagabentag di matood ya toong Anak kay naolian ka magazong beet.³¹Pagkakamhan ka-iza minpanaw si Hisos dizan ka bariyo nga Tiro. Pag-azi naiza ka bariyo nga Sidon minlargo iza ka danaw nga Galiliya tenged ka longsod nga Dikapolis. ³²Kamhan dizan kan Hisos in-ated niran ya tao nga nabengel daw nagalised ka pagkalitok ka toong saba. Kamhan inhangzo niran si Hisos nga kon somogot ko dazawen mo ini nga tao.³³isos ya toong toldo dalem ka talinga na tao. Indampa sab na-iza ya dila na tao ka toong in-eleb. ³⁴Pagkakamhan na-iza pagseleng ka tahaw mindakola iza pagbout tenged ka pagkalooy ka tao. Kamhan minsogo iza nga abrihi! ³⁵Kamhan naabri matood ya talinga na tao daw magapakalitok di iza.³⁶Kamhan minsogo si Hisos ka mga tao nga abay kamo pagpanan-og. Ambaza kay dizan ka mga iba nga tao mintoda gazed siran pagpanan-og nga indazaw ni Hisos ya tao. ³⁷Nagaberengbereng gazed siran daw namaglaong nga bisan ono ya hinang ni Hisos madazaw gazed iton. Bisan ya nabengel nga tao daw ya diri makalitok ka panaba dazawen gazed ni Hisos.

¹May isang aldaw nga mintibo pag-isab ya mga masarang kataed nga tao dizan kan Hisos. Kamhan waray makaon niran. Agon inpakarini ni Hisos ya toong mga sakop kay inlong-an nga ²nalooy hao ka mga tao kay ikatlo ding aldaw koman ya pag-iba niran kanao. Nahodtan disab siran ka makaon. ³Kon papanawen nao siran nga waray makaon pangetasan siran dizan ka dalan kay may mga garing ka aro. ⁴Minsambag ya mga sakop nga daw hain kami koman mangita ka pagkaen dini ka kamingawan igo ka pagbosog kitong masarang kataod nga tao?⁵Kamhan nangotana si Hisos kaniran nga daw pira peng bolos ya mga pan mazo diton? Minsambag siran nga pito komang bolos ini. ⁶Kamhan insogo ni Hisos ya mga tao ka pagpanlo-to dizan ka lopa. Kamhan minkawa iza ka pan nga pitong bolos. Pagkakamhan na-iza pagpasalamat ka Nagagihit inpanipak na-iza ya maharong daw inpanhatag ka toong mga sakop kadaw panhatagan sab niran ya mga tao dizan nga namaglo-to.⁷May mga talagsa ka sab nga isda nga geramay. Pagkakamhan ni Hisos pagpasalamat ka Nagagihit insogo ya toong mga sakop ka pagbahinbahin ka isda ka mga tao. ⁸Na, pagkakamhan niran pagkaen nangabosog gazed sirang maharong. Pagkakamhan niran paghipid ka salin nangapono pen ya pitong ka alat. ⁹Daw pirang bolos ya tao nga inpakaen ni Hisos? Hapit mag-opat nga ka libo sirang maharong. ¹⁰Pagkakamhan kaiza inpaoli siran ni Hisos. Kamhan minleen iza ka baloto iba ka toong mga sakop kay pasinged siran ngaro ka dapit nga Dalmanota.¹¹Pagdateng niran ka Dalmanota minkarini kan Hisos ya mga Parasiyo kay anlalis siran kontana. Kamhan minlaong siran kan Hisos pagporba nga ipakita mo kanami ya timaan kadaw mahagdam kami nga garing matood iko ka Nagagihit. ¹²Kamhan mindakola si Hisos paghinawa tenged ka pag-anget kaniran daw minlaong nga kamo nga kanaong kaibahan nga Hudiyo, kay ono sa nga ampakigkita sa kamo ka timaan? Magtimaan gazed kamo kaini nga diri hao ampakita kamazo ka bisan ono ya timaan. ¹³Kamhan minpanaw si Hisos. Pagleen na-iza ka baloto minsakay iza pag-isab ngandipi ka danaw.¹⁴Na, waray nadara na toong mga sakop nga pan kay nalipatan niran. Isa kang bolos ya kanirang bahaw. ¹⁵Kamhan minpamolinged si Hisos kaniran nga nagalaong nga maghamarag kamo ka pagmaymay na mga Parasiyo kay ya kanirang pagmaymay minpasingedsinged iton ka ipasoligay ka pan. Kay bisan isaket ya geramay nga ipasoligay dizan ka harina anlekep iton ka maharong.¹⁶Kamhan namaglaonglaong ya toong mga sakop nga ani ini ya inpanaba ni Hisos kay wara say daradara ta wani nga pan. ¹⁷Kamhan mahagdam si Hisos nga minhena-hena siran mahitenged ka pan, diri kon sindo na mga Parasiyo. Agon nangotana iza kaniran nga kay ono sa nawied kamo ka pan? Daw wara pen kamo makasabot? Singed ka magahi ya kamazong otok.¹⁸Bisan may mata mazo wara kamo makakita. Bisan may talinga mazo wara kamo makabati. Daw wara baza kamo makataremdem ¹⁹ka-iza nga pan nga lima kang bolos nga inpanipak nao ka mga limang ka libo nga ka tao ang dini kaini? Kamhan pirang bolos ya alat nga inpono mazo ka salin ka-iza? Minsambag siran nga napolo may dowang ka alat.²⁰Kamhan nangotana si Hisos pag-isab nga bisan pen ya pitong bolos nga pan nga inpakaon nao ka mga opat nga ka libo nga mga tao daw pirang bolos ya alat nga inpono mazo ka salin ka-iza? Minsambag siran nga pitong bolos ya alat. ²¹Minlaong iza nga kay ono sa nga wara kamo makasabot nga diri kon pan ya inlaong nao kamazo?²²Ya, pagdateng nin Hisos ka bariyo nga Bitsayda in-ated na mga tao ya nabota dizan kanang-iza. Kamhan minhangzo siran nga nagalaong nga Hisos, kon somogot ko dazawen mo ini nga tao. ²³Kamhan inhabitan ni Hisos ya nabota dizan ka logwa na bariyo. Kamhan min-eleb si Hisos ka mata na nabota daw indampa na-iza. Nangotana sab daw may nakita mo?²⁴Minhangad ya tao daw minlaong nga nakakita hao ka mga tao piro singed siran ka mga liwaan nga nagapanaw. ²⁵Kamhan mindampa si Hisos ka mata na tao pag-isab. Pagseleng na tao pag-isab naolian matood ya toong mata. Bisan ono ya nakita naiza makalaro gazed ya pagpakakita na-iza. ²⁶Kamhan minsogo si Hisos nga om-oli ko paglargo. Kamhan diri ko mag-azi dizan ka bariyo nga Bitsayda.²⁷Pagkakamhan ka-iza si Hisos daw ya toong mga sakop minlargo siran pagpanaw ngaro ka mga bariyo tenged ka longsod nga Sisariya Pilipos. Pagbagtas pen niran ngaro nangotana si Hisos ka toong mga sakop nga daw ono ya pagngaran na mga tao kanao? ²⁸Kamhan minsambag siran nga may nagalaong nga matod sa koni niran iko koni si Howan nga Magbenzagay. May nagalaong nga iko sab koni iton si Iliyas nga karaang propita na Nagagihit. May iba pen nagalaong nga iko sab koni ya isa pen nga karaang propita.²⁹Kamhan nangotana si Hisos kaniran nga daw sin-o say pagngaran mazo kanao? Minsambag si Pidro nga iko ani matood si Kristo nga hari nga pinili na Nagagihit. ³⁰Kamhan minsogo si Hisos kaniran nga dizan ka bisan sin-o nga tao diri kamo magpanan-og kon sin-o sa hao.³¹Pagkakamhan ka-iza minsogod si Hisos ka pagpasabot ka toong mga sakop nga iza nga minhon-a ka bisan sin-o nga mahon-ang tao an-azi iza ka mga mataed nga kalised. Kamhan magasawazen iza na mga malaas daw ya mga oloolo na mga pari daw ya mga magtutuldo ka tinoohan na mga Hudiyo. Kamhan pamagpatazen iza doro kaniran. Pagdateng ka ikatolong aldaw magabohien iza na Nagagihit pagbalik garing ka lebeng. ³²Pagkakamhan ni Hisos pagpanan-og kaini in-ated iza ni Pidro dizan ka waray laing tao. Kamhan minbaheg si Pidro nagalaong nga Magbabaza, diri ko magpanaba nga patazen iko na mga tao.³³Kamhan minliso si Hisos. Pagkita na-iza ka toong mga sakop minbaheg iza kan Pidro nagalaong nga iko ya singed kan Satanas. Pomanaw ko dini kanao kay ya hona-hna mo nagasopak ka kabebet-en na Nagagihit. Nagaangay ya hona-hona mo ka kabebet-en na tao. ³⁴Pagkakamhan ka-iza inpatipon ni Hisos ya mga mataud nga tao daw ya toong mga sakop. Minmaymay iza kaniran nagalaong nga bisan sin-o ya anpasakop kanao kinahanglan bizaan na-iza ya toong kaogaringen nga naazakan daw angeten ya pagkapatay singed kanao. Ka diri madogay dakpen hao na mga tao kamhan ipalansang ka kros keteb ka maomos hao.³⁵Kamhan bisan sin-o ya diri ansakop kanao kay nawied iza nga basi patazen iza mawara hinoa iza. Piro bisan sin-o ya naomos kay mintoo iza kanao daw ya kanaong sindo mahatagan iza ka bag-ong kinabohi nga diri mawara. ³⁶Bisan kon maangken na tao ya maharong mga betang dini ka kalibotan kamhan mawara ka ya toong kaogaringen nga kinabohi daw ono ya makawa na-iza? Wara gazed. ³⁷Kay waray ikahatag na-iza dazaw mabawi ya toong kinabohi.³⁸Mindogang pen si Hisos paglaong nga hao ya minhon-a ka bisan sin-o nga mahon-ang tao. May tirmino nao ka pagbalik ka bakangan. Iba sab kanao ya mga sogoonon nga taga tahaw. Magabado sab hao ka kalatì na kanaong Ama nga Nagagihit. Na, koman nga panahona ka wara pen hao magbalik ka kalibotan bisan sin-o ya anlimed kanao daw ya kanaong mga panaba dizan ka mga salaan nga tao anlimed isab hao kaiton nga tao kay-an ka pagdateng nao.

¹Kamhan indogangan ni Hisos pagmamymay kaniran nagalaong nga timan-an mazo gazed ini nga dini kamazo may mga diri mamos nga tao hangtod ka pagpakakita niran kanao pagbalik nao ka paghari ka bakangan ka labaw nga gahem. Ani ini ya sindo ni Hisos ka mga tao daw toong mga sakop. ²Ya, minlabay di ya enem nga ka aldaw. Kamhan inpaiba ni Hisos si Pidro daw si Santiago daw si Howan ngandaked ka bobong nga ataas nga waray laing tao. Kamhan dizan ka pagseleng nirang tolo singed ka nabag-o di ya lawas ni Hisos piro si Hisos gazed iton. ³Masarang kapoti ya toong bado singed ka kalatì na sega. Bisan ono ya ikapoti ka bado dini ka bakangan diri gazed ampoti ka singed kaiton.⁴Kamhan waton disab si Iliyas daw si Moysis nga mga karaang propita na Nagagihit. Namaglaonglaong sirang dowa daw si Hisos. ⁵Kamhan minlaong si Pidro kan Hisos nga Magbabaza, madazaw ya kantang pagtipon dini. Kon somogot ko hinangen nami ya mga tolong bolos nga tal-ob. Kanmo ya isa. Kan Moysis ya isa. Kan Iliyas ya isa. ⁶Ani ini ya inlaong ni Pidro kay diri iza mahagdam kon ono kontana ya toong ilaong kay nangahaldek gazed siran.⁷Kamhan intamdengan siran ka inarak daw nabatian ya saba dizan ka inarak nga nagalaong nga wani ya kanaong Anak nga naazakan. Magtoo gazed kamo ka toong mga panaba kamazo. ⁸Pagkakamhan ka-iza minlingi dazon siran piro nawara dizan si Iliyas daw si Moysis. Si Hisos ka ya nakita niran dizan.⁹Ya, paglogsong pen niran ngambaba mintogon si Hisos kaniran nagalaong nga hao ya minhon-a ka bisan sin-o nga mahon-ang tao. Mabohi sab hao kay-an pagbalik garing ka lebeng anipen kon ipananog mazo ya kamazong nakitan kazina ka daked pen kita ka bobong. ¹⁰Kamhan dizan ka mga iba nga tao wara siran magpanan-og kaiton piro dizan kanirang tolo nangotana gazed siran daw ono ya inpanaba ni Hisos nga mabohi iza pagbalik kay-an garing ka lebeng?¹¹Kamhan nangotana siran kan Hisos nga kay ono sa nagatoldo sa ya mga magtutuldo nga Hudiyo nga si Iliyas ani ya anhon-a kan Kristo? Daw gazed iton kon diri? ¹², ¹³Minsambag si Hisos nga minhon-a gazed kanao ya tao nga singed kan Iliyas nga karaang propita na Nagagihit. Kay min-andam iza ka kanaong pagdateng. Si Howan nga Magbenzagay ani itong tao. Kamhan insakto isab ya daan pinasoyat na Nagagihit mahitenged kanao nagalaong nga hao nga minhon-a ka bisan sin-o nga mahon-ang tao an-azi hao ka mga mataud nga kalised. Kamhan magasawazen hao na mga tao. Ani ini ya daan pinasoyat na Nagagihit mahitenged kanao.¹⁴Pagkakamhan ka-iza mindateng di siran ngambaba ka mga iba nga sinarigan nga inlibotan nga mga mataud nga tao. Inlalis sab siran na mga magtutuldo ka tinoohan na mga Hudiyo. ¹⁵Pagpakakita na mga mataud nga tao kan Hisos nangabereng siran kay mindateng di iza dizan kaniran. Kamhan min-apas dazon siran kay an-abiabi kanang-iza. ¹⁶Kamhan nangotana si Hisos ka toong mga sinarigan nga daw ono ya paglalis mazo dizan ka mga magtutuldo?¹⁷Ka wara pen siran sambag dini ka mga mataud nga tao may isa nga minlaong nga Magtutuldo, indara nao ngarini kanmo ya kanaong Anak nga amaama kay diri iza makapanaba kay inharian gazed iza na maonga. ¹⁸Kada paghari na maonga kanangiza magapatiholog dazon iza ka lopa. Kamhan magabora ya toong ba-ba daw magakagetget iza ka toong ngipen. Kamhan angahi gazed ya toong lawas pagsawan. Kazina minhangzo hao ka mga sakop mo kadaw papanawen niran ya maonga piro wara siran makadaug. ¹⁹Minsambag si Hisos nga waray pagtoo mazo ka Nagagihit. Daw dogay pen hao magahela dini kamazo anipen kamo makasabot ka gahem na Nagagihit? Daw dogay pen hao magaanget ka kamazong batasan nga waray pagtoo mazo? Dadha ngarini ya bata!²⁰Na, pag-ated niran ka bata minkita ya maonga kan Hisos kamhan nagakabiribid ya lawas na bata. Naholog iza daw nagalompatlompat dizan ka lopa. Nagabora sab ya toong ba-ba. ²¹Kamhan nangotana si Hisos ka ama na bata nga daw dogay di ya toong pagkasakit? Minsambag ya ama nga sokad ka geramay pen iza. ²²Isahay paeseben iza dizan ka sapa. Isahay palaksohon iza dizan ka laga kay patazen iza kontana. Kon makahimo ko tabangan mo kami.²³Minsambag si Hisos nga kay ono sa nga nagadowa-dowa ko nga makadaug hao ka maonga? Kay bisan sin-o ya ansarig kanao hinangen o ya bisan ono. ²⁴Kamhan indakola na ama ya toong sambag nga Hisos, antoo hao. Hegtan mo ya kanaong pagtoo. ²⁵Pagpakakita ka ni Hisos nga mindogok di ngarini ya mga mataed nga tao minbaheg dazon iza ka maonga nagalaong nga iko nga minpaamang ka bata daw minpabengel, domalagan ko dizan ka bata. Diri ko magbalik bisan kon-o.²⁶Ya, pagsinggit ka na maonga daw pagkabiribid ka lawas na bata mindalagan dazon. Kamhan ya lawas na bata singed iton ka lawas na naomos nga tao. Agon minlaong ya mga tao nga naomos di iza. ²⁷Kamhan intagenan ni Hisos ya alima na amaama kadaw patindegen. Kamhan mabaskeg ya toong pagtindeg.²⁸Ya, pag-oli nin Hisos ka lagkaw nangotana ya toong mga sakop nga kay ono sa wara kami makapabogaw kaiton nga maonga nga minpaamang ka bata daw minpabengel? ²⁹Minsambag si Hisos nga ya paghangzo mazo ka Nagagihit anikay makapabogaw kaiton nga maonga.³⁰Pagkakamhan kaiza minpanaw sin Hisos daw nagapasinged ngaro ka lopa nga Galiliya. Si Hisos diri Anak nga mahagdam ya mga tao kon minkar-in iza ³¹kay nagasindo pen iza ka toong mga sakop nagalaong nga hao nga minhon-a ka bisan sin-o nga mahon-ang tao itogyan hao dizan ka gahem na mga tao nga ampatay kanao. Pagdateng ka ikatolong aldaw mabohi hao pagbalik garing ka lebeng. ³²Na, pagpakabati ka na toong mga sakop wara siran makasabot. Kamhan wara siran mangotana kon ono ya kahologan naiton kay nawied gazed siran.³³Kamhan nakadateng di siran ka longsod nga Kapirnaom. Ka dalem pen si Hisos ka lagkaw nangotana iza kaniran nga kazina ka pagpanaw pen nita daw ono ya inlalislalisan mazo? ³⁴Kamhan minpahenek lamang siran kay ya inlalis niran nga sin-o ya labaw dini kaniran. ³⁵Kamhan minlo-to iza daw inpatipon na-iza ya toong mga sakop nga napolo may dowa siran. Kamhan minlaong iza kaniran nga dizan kamazo kon naazakan ya isa nga iza ya labaw nga tao kinahanglan ampangalagad iza kamazong maharong singed ka pagpangalagad na oripen.³⁶Kamhan inpakarini ni Hisos ya isang bata kay patindegen dizan ka tenged na toong mga sakop. Paghakep na-iza ka bata minlaong iza nga ³⁷garing ka pagtoo na tao kanao kon andawat iza ka bata andawat gihapon iza kanao. Kon andawat iza kanao andawat isab iza ka Nagagihit nga minpakarimbaba kanao.³⁸Kamhan si Howan nangotana kan Hisos nga Magtutldo, kazina napaniidan nami ya tao nga minpadalagan ka maonga dizan ka tao. Pagsogo na-iza ka maonga ka pagpanaw inpanaba na-iza ya ngaran mo. Kamhan minbaheg kami kaiton nga tao kay diri kon sakop nami iza. ³⁹Minsambag si Hisos nga diri kamo magbaheg kaiton nga tao. Kay bisan sin-o ya angamit ka kanaong ngaran kadaw hinangen naiza ya madazaw diri iza ampanaba ka maonga mahitenged kanao.⁴⁰Kay nakaangay kanta ya bisan sin-o nga diri an away kanta. ⁴¹Timan-an mazo gazed ini nga bisan sin-o ya antigis kamazo kay kamo ya kanaong mga sakop mahatagan isab ya antigis ka primyo.⁴²Indogangan pen ni Hisos pagsindo kaniran nga ya dakolang bato nga galingan ibitay ka lieg na bisan sin-o ya antintal ka bata ka pagbiza kanao. Kamhan itimbag iza ka dagat kadaw diri makapadazon ka pagtintal ka bata. ⁴³Kamhan minpamolinged si Hisos kaniran nga nagalaong nga kon anhinang ya alima mo ka maonga ipaheneng gazed ya alima mo singed ka otdon iton. Kay bisan mapiang di ko ka dini pen iko ka bakangan waray bali kay mahatagan ko ka bag-ong kinabohi nga diri mawara. Kay kon diri mo ipaheneng ya alima mo makadara iton kanmo ngaro ka impirno ⁴⁴nga waray pagkapareng daw waray heneng ka pagpangaen na mga olod ka onod na mga tao.⁴⁵Bisan ya paa mo kon andara iton kanmo ka paghinang ka maonga ipaheneng mo ya paa mo singed ka otdon mo iton. Kay bisan mapiang di ko ka dini pen iko ka bakangan waray bali kay mahatagan ko ka bagong kinabohi nga diri mawara. Kay kon diri mo ipaheneng ya paa mo makadara iton kanmo ngaro ka impirno ⁴⁶nga waray pagkapareng daw waray heneng ka pagpangaen na mga olod ka onod na mga tao.⁴⁷Bisan ya kanmong mata kon makaonga iton ka hena-hena mo ipaheneng gazed ya mata mo pagseleng ka maonga. Kamhan singed ka kaw-en mo ya kanmong mata. Kay bisan pikas ka lamang ya mata mo ka dini pen iko ka bakangan waray bali kay ampaseled hao kanmo ka hel-anan na kanaong Ama daked ka tahaw. Kay kon diri mo ipaheneng ya mata mo pagseleng ka maonga ikatimbag na Nagagihit ya tibolos lawas mo doro ka impirno ⁴⁸nga waray pagkapareng daw waray heneng ka pagpangaen na mga olod ka onod na mga tao.⁴⁹Kamhan indogangan ni Hisos pagmaymay kaniran nagalaong nga bisan sin-o ya bakangan kinahanglan an-azi iza ka mga kalised kadaw antoon iza ka pagbineetan. ⁵⁰Pamolinged ini nga ya asin madazaw iton piro kon wara di ya kaparat na asin diri di gazed ambalik ya kaparat. Na, singod ka asin ya kamazong mga hinang kay kamo ya antabang ka isa daw isa ka pagbineetan.

¹Pagkakamhan ni Hisos pagmaymay ka toong mga sakop minpanaw iza garing ka longsod nga Kapirnaom dizan ka lopa nga Galiliya kay ankaro iza ka lopa nga Huda dipi ka sapa nga Hordan. Na, pagdateng na-iza doro nagatipon disab ya mga mataud nga tao dizan kanang-iza. Kamhan minmaymay iza kaniran kay ani ya toong batasan. ²Ya, minkarini disab kan Hisos ya mga Parasiyo kay amporba siran pagpangotana nga ya tao nga ampakigbelag ka toong asawa daw anlapas iza ka balaed na Nagagihit kon diri? ³Minsambag si Hisos nga daw ono sa ya sogo ni Moysis nga kamazong karaan? ⁴Minsambag siran nga dizan ka soyat ni Moysis nga inbilin kanami intogotan ya tao ni Moysis nga ihatag ka toong asawa ya soyat para ka pagpamatood nga minpakigbelag di iza ka toong asawa.⁵Minsambag si Hisos nga intogotan kamo ni Moysis ka pagpakigbelag ka kamazong asawa kay mahagdam iza nga diri kamo gazed ampatoo ka pagmaymay na Nagagihit ⁶Kay kawandini pen ka sinogdan pen na bakangan ya Nagagihi ani ya minhinang ka amaama daw ya babazi.⁷Sokad kaiton kon anminze ya amaama anbelag iza ka toong ginikanan kadaw antipon iza ka toong asawa. ⁸Kamhan sirang dowa nahinang nga isang bolos nga tao kay namag-isa di ya kanirang hinawa. ⁹Kamhan ya mag-asawa in-isa di siran na Nagagihit. Kamhan diri di gazed pabelagen siran na bisan sin-o nga tao. Ani ini ya sambag ni Hisos ka mga Parasiyo.¹⁰Pagkakamhan ka-iza nangoli sin Hisos. Kamhan nangotana ya toong mga sinarigan pag-isab mahitenged ka pagpakigbelag na bana ka toong asawa. ¹¹Minsambag si Hisos nga bisan sin-o ya tao nga anpakigbelag ka toong asawa kadaw anminze ka laing babazi minhenay iza ka toong primirong asawa. ¹²Bisan sin-o ya babazi nga ambelag ka toong bana kadaw anminze iza ka laing amaama minhenay itong babazi ka toong primirong bana. Ani ini ya sambag ni Hisos ka toong mga sinarigan.¹³Pagkakamhan ka-iza may mga mindara ka mga bata dizan kan Hisos kay ipadampa siran kanang-iza kadaw panaranginan. Piro inkasab-an siran na mga sakop ni Hisos. ¹⁴Pagkahagdam ni Hisos ka inhinang na toong mga sakop nagalised ya toong hinawa ka pagkazehet. Nagalaong iza nga diri kamo magbaheg kaniran. Pakarinihen lamang siran kanao kay ya singed kaniran ani ya in-angay na Nagagihit.¹⁵Timan-an mazo gazed ini nga bisan sin-o ya diri ansarig kanao singed ka pagsarig na bata ka toong ama diri iza iangay na Nagagihit. ¹⁶Kamhan inpanhakep ni Hisos ya mga maimpis. Inpandampa ya kanirang olo kay kadaw panaranginan ka madazaw.¹⁷Ya, pagkakamhan ka-iza si Hisos minpanaw iza pag-isab. Kamhan may isang amaama nga mindalagan ka pagsogat kan Hisos daw minlohod dizan ka paahan ni Hisos. Kamhan nangotana iza nga Madazaw nga Magtutuldo, daw ono ya hinangen o nga madazaw kadaw tagan hao ka kinabohi nga diri mawara? ¹⁸Kamhan minsambag si Hisos nga kay ono sang anngaran sa ko kanao nga madazaw? Ya Nagagihit kay madazaw. ¹⁹Mahagdam ko daan ka mga kasogoan na Nagagihit nga azaw maomos ka tao, azaw maghenay, azaw pangawat, azaw pamakak, azaw maglimbong ka tao, magtahod ko ka kanmong ama daw ina.²⁰Minsambag ya tao nga Magtutuldo, sokad ka batan-en pen hao nagatoman hao kaiton nga maharong mga sogo. ²¹Pagseleng pen ni Hisos kaiton nga tao nalooy iza daw nagalaong nga isa koman ya kolang mo. Omoli ko naa ngaro ka lagkaw mo. Kamhan ipamaligza ya mga betang mo. Kamhan ya bazad ipanhatag ka mga pobri. Anipen ko kon somakop kanao kadaw sobra pen ya mga mahalen mo daked ka hel-anan na Nagagihit. ²²Pagpakabati ka na tao ka laong ni Hisos minpanaw iza. Nagalised ya toong bout kay diri kontana na-iza ibaligza ya toong mga betang.²³Pagseleng ni Hisos ka mga tao minlaong iza ka toong mga sinarigan nga ya mga tao nga tallipidon malised gazed ya pagsakop niran ka Nagagihit. ²⁴Nabereng gazed ya mga sinarigan ka inlaong ni Hisos piro indogangan ni Hisos paglaong nga diri kon masazon ya pagsakop na tao ka Nagagihit. ²⁵Pamolinged ini nga ya karabaw kon an-azi ka teheb na dagem masazon iton ka pagsakop na Talipidon ka Nagagihit kay wili ya toong hona-hona ka toong talipid.²⁶Kamhan nabereng gazed ya mga sakop ni Hisos daw minsambag nga kon malised ya pagsakop na kowartahan ka Nagagihit diri baza makalangit ya bisan sin-o nga tao. ²⁷Kamhan minseleng si Hisos kaniran daw minsambag nga kon ya tao ka lamang diri makahimo piro ya Magbabaza makahimo iza ka maharong. ²⁸Kamhan minsambag si Pidro kan Hisos nga kami nga kanmong mga sinarigan izang dini kaini minbiza kami ka tanan kadaw makasakop kami kanmo.²⁹Minsambag si Hisos nga timan-an mazo gazed ini nga ya tao nga minsakop kanao pasobrahan na Nagagihit ka pagbales ka madazaw. Kay minbiza iza ka toong hel-anan daw ya mga lomon daw ginikanan daw mga bata daw oma kay kadaw ansakop iza kanao daw anwali sab iza ka pagmaymay mahitenged kanao. ³⁰Kamhan bisan hain iza magsinged may toong datnganan. Kamhan ya mga antoo kanao garing ka pagsangzaw na-iza singed siran ka matood nga lomon daw ginikanan daw mga bata. May toong oma isab. Tagan sab iza ka bag-ong kinabohi nga diri mawara. Kamhan ka dini pen iza ka bakangnan magaawazen gihapon iza kay kanao iza nga sakop. ³¹Na, koman nga panahona ya mga mataed nga dato mga pobri siran kay-an. Kamhan ya mga pobri mga dato siran kay-an. Ani ini ya inlaong ni Hisos ka toong mga sinarigan.³²Ya, pagkakamhan kaiza minpasinged di sin Hisos doro ka siyodad nga Hirosalem. Si Hisos minhon-a kaniran pagpanaw. Siran nga mga sinarigan nangabereng gazed siran kay Hirosalem hel-anan iton na mga kaaway ni Hisos. Kamhan nahaldek sab ya mga tao nga min-iba kaniran kay basi madatngan siran na maonga. Na, ka wara pen siran dateng ka Hirosalem inpalain pagpatindeg ni Hisos ya toong mga sinarigan. Kamhan minsogod iza pagpakahagdam kaniran pag-otro kon onhon sa iza kay-an na mga tao ³³nga nagalaong nga mamanaw di kita ngaro ka siyodad nga Hirosalem. Kamhan doro kaiton nga dapit hao nga minhon-a ka bisan sin-o nga mahon-ang tao, iated hao doro ka mga oloolo na mga pari na mga Hudiyo daw ya mga magtutuldo ka tinoohan na mga Huidyo kay hokman hao niran ka kamatazen. Kamhan iated sab hao niran dizan ka mga diri kon Hudiyo nga nagahari dini ka kantang lopa. ³⁴Kamhan pagasorasorahen hao niran daw magapanelban. Pagkakamhan niran paglatos kanao patazen hao niran. Pagdateng ka ikatolong aldaw sokad ka kanaong pagkapatay mabohi hao pagbalik garing ka lebeng. Ani ini ya pakahagdam ni Hisos ka toong mga sinarigan.³⁵Kamhan si Santiago daw si Howan nga dowang ka Anak ni Sibidiyo min-arani siran kan Hisos kay anlaong nga Magtutuldo, kon mahimo ya bout mo anhangzo kami kontana kanmo. ³⁶Minsambag iza kaniran nga daw ono sa ya maazakan mazo? ³⁷Minsambag siran nga kon somogot ko kay-an ka pagdateng na kanmong pagkahari palo-toon mo kami dizan ka kanmong sain. Ya isa kontana palo-toon dizan ka too mo. Ya isa dimbali ka wala mo.³⁸Kamhan minsambag si Hisos nga wara kamo makasabot kon ono ya inhangzo mazo kanao. Daw makaanget kamo ka mga kalised nga singed ka maazihan nao kay-an daw kanaong pagkapatay? ³⁹Minsambag sirang dowa nga Hisos, makahimo kami kaiton. Kamhan minlaong iza kaniran nga ya mga kalised nga andateng kanao andateng sab matood kamazo. Ya kanaong pagkapatay ani gihapon ya kamazong pagkapatay. ⁴⁰Piro ya inhangzo mazo kanao ka paglo-to dizan ka too nao daw dimbali ka wala nao diri kon hao ya ampili ka tao kay impili daan na Nagagihit kon sin-o ya makalo-to dizan ka kanaong sain.⁴¹Na, pagpakabati na mga napolo nga sinarigan nazehet siran kan Santiago daw si Howan. ⁴²Kamhan impatipon siran ni Hisos kay anlaong iza nga mahagdam kamo ka batasan na mga diri kon Hudiyo nga nagahari dini ka kantang lopa. Magmandaray gazed siran ka mga tao. Piro kamo nga kanaong mga sakop, diri kamo maghaod ka kanirang batasan kay dizan kamazo kon naazakan ya isa nga iza ya labaw kinahanglan ampangalagad iza kamazo.⁴³Piro kamo nga kanaong mga sakop, diri kamo maghaod ka kanirang batasan kay dizan kamazo kon naazakan ya isa nga iza ya labaw kinahanglan ampangalagad iza kamazo. ⁴⁴Kon naazakan ya isa nga iza ya may katenged nga ataas kinahanglan anpangalagad iza kamazong tanan singed ka pagpangalagad na oripen. ⁴⁵Kay hao nga minhon-a ka bisan sin-o nga mahon-ang tao, minkarimbaba hao dini kamazo kadaw ampangalagad hao kamazo. Wara hao magpaalagad kamazo. Ampahalad sab hao ka kanaong kinabohi doro ka kros kay hao ya ambazad ka mga sala na mga mataud nga tao. Ani ini ya pagmaymay ni Hisos ka toong mga sinarigan.⁴⁸Kon naazakan ya isa nga iza ya may katenged nga ataas kinahanglan anpangalagad iza kamazong maharong singed ka pagpangalagad na oripen. 45Kay hao nga minhon-a ka bisan sin-o nga mahon-ang tao, minkarimbaba hao dini kamazo kadaw ampangalagad hao kamazo. Wara hao magpaalagad kamazo. Ampahalad sab hao ka kanaong kinabohi doro ka kros kay hao ya ambazad ka mga sala na mga mataud mga tao. Ani ini ya pagmaymay ni Hisos ka toong mga sinarigan. ⁴⁶Na, pagkakamhan ka-iza minpasinged si Hisos ngaro ka longsod nga Hiriko. Masarang kataod ya tao nga minsonod kanang-iza. Na, paggaring niran ka longsod nga Hiriko dizan ka kilid na karsada may nagalo-to nga isang nabota nga mang-azoay. Si Bartimayas ya ngaran nga anak ni Timayas. ⁴⁷Pagpakabati ka na nabota nga si Hisos nga taga Nazarit ani ya minlabay dizan kanang-iza minsogod iza paghawag nagalaong nga Magbabaza nga kaliwat ni Dabid, kaloy-an mo hao! 48Kamhan inbaheg iza na mga tao nagalaong nga magpahenek di ko dizan. Kamhan mintoda hinoa iza pagsinggit nga Magbabaza nga kaliwat ni Dabid, kaloy-i intawon hao!⁴⁹Pagpakabati ni Hisos minheneng iza dizan daw minsogo ka mga tao nga pakarinihen mazo iza. Kamhan minhawag siran ka nabota nga magsaza ko kay pakadizanen ko ni Hisos. Tindeg naa. ⁵⁰Mintindeg dazon si Bartimayas daw minpowas ka toong tameng. Kamhan minkandizan iza kan Hisos.⁵¹Kamhan nangotana si Hisos nga daw ono ya maharong mo kanao? Minsambag ya nabota nga Magbabaza, ya maharong nao nga makakita ya kanaong mata. ⁵²Minsambag si Hisos nga omoli ko naa kay madazaw di ya mata mo kay hao ya insarigan mo. Kamhan madazaw matood ya toong mata. Min-iba iza kan Hisos paglargo.

¹Na, pagpasinged nin Hisos ngaro arani ka siyodad nga Hirosalem mindateng di siran ka dowang ka bariyo nga Bitpahi daw Bitani dizan tenged ka bobong inngaranan ka Olibo. Kamhan minsogo si Hisos ka toong sinarigan nga dowa siran ²nga nagalaong nga komaro kamo naa ka bariyo dizan ka hon-ahan mazo. Pagdateng ka mazo doro makakita kamo dazon ka isang batan-en pen nga asno nga klasi na kabayo nga in-ektan dizan. Sokad wara masakzi na tao. Hobaden mazo iton daw tozokon mazo ngarini kanao. ³Kon may mangotana kamazo nga kay ono sa mazo inbadbadan ya kabayo magsambag kamo nga inkinahanglan ini na kanaming oloolo. Kamhan ioli ka pagdali.⁴Na, pagkakamhan ni Hisos pagsogo kaniran namanaw sirang dowa paglargo. Nakitan niran matood ya kabayo nga in-ektan dizan ka gawas na alad. Paghobad pen niran kaiton ⁵nangotana ya mga mintindeg dizan nga onhon sa mazo iton nga kaw-en sa mazo itong kabayo? ⁶Minsambag siran nga togon ni Hisos ini. Kamhan mintogot dazon ya tao.⁷Kamhan intozok dazon niran dizan kan Hisos ya kabayo. Inhanigan sab niran ka kanirang mga bado ya likod na kabayo kay sakzan koman ni Hisos. ⁸Pagpakasakay ka na-iza inhanigan dazon ya dalan nga azihanan na kabayo ka mga bado na mga mataud nga tao. Impanbetangan disab na mga iba nga tao ka mga paka kay tahodon niran si Hisos. ⁹Kamhan ya mga minhon-a kan Hisos daw ya mga mahori namagdengandengan siran pagsinggit nga sazaen, sazaen kay iko ya mindateng garing ka Ginoo! Tagan na-iza iko ka dakola nga gahem. ¹⁰Parig-enen sab na-iza ya kanmong paghari ka mga tao singed gazed ka paghari ni Dabid nga kantang karaang tao. Sazaen, sazaen ya Nagagihit! Ani ini ya pagsaza na mga tao kan Hisos pagdateng na-iza ka Hirosalem.¹¹Pagkakamhan ka-iza minseled si Hisos ka dakolang lagkaw nga pangamozoanan ka Nagagihit. Pagkakamhan na-iza pagpaniid ka batasan na mga magsingbahay minbalik iza ka Bitani kay nadeleman di siran. Iba gihapon ya toong mga sinarigan nga napolo may dowa siran. ¹²Na, pagkasonod nga aldaw ka pagpanaw niran dini ka Bitani imbengtas si Hisos.¹³Kamhan doro ka hon-ahan nakitan na-iza ya isang tanem ani ngaran ya igira. Nandahon di gazed iton. Kamhan min-arani si Hisos ka tanem kay sosihen kon may protas. Ambaza kay mga dahon ka sa. Kay diri pen kon tigbonga bisan min-ataas ya mga dahon. ¹⁴Kamhan minlaong si Hisos ka tanem nga sokad koman diri ko makapamonga bisan kon-o nga aldaw. Na, nabatian na toong mga sinarigan ya laong ni Hisos ka tanem.¹⁵Na, pagpakadateng ka ni Hisos ka siyodad nga Hirosalem minseled iza pag-isab ka dakolang lagkaw nga pangamozoanan ka Nagagihit. Kamhan impamogaw gazed na-iza ya mga mamaligzaay daw ya mga mamalitay. Impandeeg sab naiza ya mga lamisa na mga Hudiyo nga magsilihay ka mga talipid nga indara na mga taga laing dapit. Impanowad disab na-iza ya mga siya na mga magbaligzaay ka mga salapati nga mga ihaladay na mga tao ka Nagagihit. ¹⁶Kamhan diri siran togotan pagdara ka bisan ono dini ka pawa na dakolang lagkaw na Nagagihit.¹⁷Kamhan minbaheg iza kaniran nga nagalaong nga may daan pinasoyat na Nagagihit nga nagalaong nga ya kanaong lagkaw ani ya lagkaw ka pagpangamozo na mga tao kanao. Ambaza kay inhinang di mazo iton ka datnganan na mga tolisan nga magapanlimbong ka mga tao. Ani ini ya inbaheg ni Hisos kaniran. ¹⁸Pagpakahagdam ka na mga oloolo na mga pari na mga Hudiyo daw ya mga magtutuldo namagsabotsabot siran nga onhon sa niran pagpapatay kan Hisos. Piro nahaldek siran kan Hisos kay ya mga tao naazakan gazed siran ampanalinga ka pagmaymay ni Hisos. ¹⁹Na, pagkadelem ka-iza minlogwa sin Hisos ka siyodad nga Hirosalem.²⁰Pagkamasiselem ka-iza nagapasinged sin Hisos dizan kaiton nga tanem nga igira. Nakitan niran nga nangalaza matood iton garing ka gamot ngaro ka mga oldot. ²¹Kamhan si Pidro nakataremdem iza kon in-ono ni Hisos kahabi agon minlaong iza kan Hisos nga Magtutuldo, selengi! Nangalaza di gazed ya tanem nga ingabaan mo.²²Minsambag si Hisos nga magsarig kamo ka Nagagihit. ²³Timan-an mazo gazed ini nga ya bobong dizan kon sogoon mo iton ka pagsibeg ngaro ka dagat ansibeg matood iton kon ansarig gazed kamo ka Nagagihit daw diri kamo andowa-dowa.²⁴Panabaan ta kamo nga kon heget ya pagtoo mazo ka Nagagihit madawat mazo ya bisan ono nga kamazong pangazoon dizan kanang-iza. ²⁵Wani pen ya sogo nao kamazo nga kon ampangamozo kamo ka Nagagihit pasaylohon mazo ya bisan sin-o nga nakasala kamazo kadaw pasaylohon isab kamo na kamazong Ama nga nagahela daked ka langit. ²⁶Piro kon diri kamo anpasaylo ka mga tao ka kanirang mga sala ya kamazong Ama nga nagahela daked ka tahaw diri isab iza anpasaylo ka kamazong mga sala.²⁷Pagkakamhan ni Hisos pagmaymay kaniran minbalik siran ka Hirosalem. Ka nagapanaw pen iza dalem ka dakolang lagkaw na Nagagihit may mga minkarini kanangiza nga mga oloolo na mga pari daw ya mga maistro ka tinoohan na mga Hudiyo daw ya mga malaas. ²⁸Kamhan nangotana siran kan Hisos nga daw hain garing ya katenged mo ka pagbogaw ka mga tao kahabi? Daw sin-o ya minhatag kanmo ka katenged ka pagpadazon ka kanmong mga hinang dini kanami?²⁹Minsambag si Hisos kaniran nga wani sab ya pangotana nao kamazo. Kon makasambag kamo anipen hao magpanan-og kamazo kon hain garing ya kanaong katenged ka paghinang kaiton. ³⁰Na, daw hain garing ya katenged ni Howan ka pagpamenzag ka mga tao? Magsambag kamo kanao.³¹Kamhan namaglalislalis siran kon ono sa kontana ya kanirang isambag kan Hisos. Namaglaonglaong siran nga kon ansambag kita nga garing ka Nagagihit ya katenged ni Howan basi long-on kita ni Hisos nga kay ono sa nga wara sa kamo magtoo kan Howan? ³²Piro kon ansambag kita nga garing ka tao ya katenged ni Howan pamookon kita na mga tao kay mintoo gazed siran nga si Howan ya matood nga propita na Nagagihit. ³³Kamhan minsambag siran kan Hisos nga wara kami mahagdam. Kamhan minsambag isab si Hisos kaniran nga diri sab hao ampanan-og kamazo kon hain garing ya kanaong katenged ka pagpadazon ka kanaong mga inhinang.

¹Pagkakamhan ni Hisos pagsambag ka mga magtutulo ka tinoohan na mga Hudiyo minsogod iza pagpanaba kaniran ka pamolinged nagalaong nga may isang tao nga mintanem ka oma nga tamnanan ka mga obas. Inlibotan ya oma ka alad. Kamhan impakabotan na-iza ya lopa kay hinangen ya salodanan ka sapa para ka pagkepeg ka mga obas. Kamhan inhinang na-iza ya ataas nga lagkaw nga bantazan ka mga tanem. Kamhan nandapit iza ka mga saop. Kamhan minpanaw iza ngaro ka laing dapit. ²Pagkahapit di anihen ya mga obas impakaro na-iza ya toong sogoonon kay pakaw-en di kontana na-iza ka toong mga kabahinan. ³Kamhan pagdateng na mga sogoonon ka mga saop indakep hinoa niran kamhan imbonalan. Impaoli sab wara katagi.⁴Ka wara pen madogay insogo disab pagpakaro ya laing sogoonon piro imbonalan gihapon niran ya toong olo diri tahodon. ⁵In-otrohan pagsogo ya laing sogoonon piro baza-baza nga immaomos di gazed. Kamhan mataud pen gihapon ya mga sogoonon nga impakaro piro impamagbonalan ya isa daw impamagpatay sab ya mga iba.⁶Ya, isa koman gazed ya nabilin. Ani iza ya Anak na tag-iza nga toong naazakan. Na, ya impakaro na tag-iza nga kataposan di gazed ani di izang Anak. Kay nagahena-hena iza nga tahodon gazed niran ya kanaong maanak. ⁷Kamhan pagpakakita na mga saop nga wani di kaan andateng di ya Anak na tag-iza namagsabotsabot dazon siran nga waton di ngarini kanta ya maanak na tag-iza nga magdawatay kay-an kaini nga lopa nga toong irinsiya. Hala, pamagpatazen ta iza kay kadaw kita ka mazoy makapolos ka pagpanag-iza ka lopa.⁸Kamhan impamagtagenan matood niran ya Anak daw impamagpatay. Kamhan intimbag ya toong lawas ngaro ka gawas na alad na tanem. ⁹Ya, daw magaono sa koman ya tag-iza na lopa kaniran? Ankaro pen iza ka toong mga saop kay patazen gazed na-iza siran. Kamhan pasaopan na-iza ya tanem ka lain.¹⁰Pagkakamhan ni Hisos pagpamolinged kaniran mintiwas iza paglaong nga daw wara pen kamo makabasa ka daan pinasoyat na Nagagihit nga nagalaong nga ya matimgas nga bato nga inbizaan na mga minhinang ka lagkaw ani ya nahinang nga sinarigan ka pagparig-en ka primirong ogdok na lagkaw. ¹¹Inhinang iton na Nagagihit kamhan madazaw gazed iton pagpakakita nami. Kilalhen mazo nga ya dakolang matimgas nga bato nga inbizaan mazo ani hao. ¹²Ya, pagpakabati na mga magtutuldo na mga Hudiyo daw ya mga malaas makasabot dazon siran nga naigo siran ka pamolinged ni Hisos. Agon pamagdakpen niran kontana si Hisos piro mahaldek siran ka mga tao. Kamhan namanaw di siran.¹³Kamhan pakarohon niran ya mga Parasiyo daw ya mga Hudiyo nga minsakop di kan Hirodis nga hari. Kay magalit-agen kontana si Hisos pagpanaba. ¹⁴Pagdateng niran nagalaong siran nga Magtutuldo, mahagdam kami nga matadeng ya batasan mo daw matood ya mga panaba mo. Pagtoldo sab mo ka pagmaymay na Nagagihit waray pinalabi mo nga bisan sin-o nga taohana. Na, panabaan mo kami. Daw makalapas kami ka balaud na mga Hudiyo kon ambazad kami ka bohis kan Sisar nga hari nga nakadaeg ka kantang lopa? ¹⁵Daw ambazad kami kon diri? Ya, mahagdam si Hisos nga daeten iza kontana kamhan minbales iza pagpangotana kaniran nagalaong nga kay ono sa kamo minporba kamo kanao? Dadhen mazo ngarini ya isang palata nga talipdi kay anseleng hao kaiton.¹⁶Paghatag niran ka talipid kan Hisos nangotana iza kaniran nga daw kanin-ong bayho ini ka kowarta? Daw kanin-ong ngaran ya insoyat dini? Minsambag siran nga kan Sisar gazed iton. ¹⁷Kamhan minsambag si Hisos nga bayri mazo ya azoon ni Sisar kamazo. Bayri sab mazo ya azoon na Nagagihit kamazo. Kamhan nabereng siran kay diri siran makahimo ka paglalis kan Hisos.¹⁸Pagkakaan ka-iza minkarini disab kan Hisos ya mga magtutuldo na mga Hudiyo ani ngaran ya Sadosiyo. Ya kanirang toldoan ya mga namola di nga tao diri gazed mabohi pagbalik garing ka lebeng. Ya, nangotana siran kan Hisos nga ¹⁹Magtutuldo, ya kanaming karaan nga si Moysis imbilinan sa kami ka soyat kay nagatogon kanami nga kon maomos ya isang tao kamhan imbilin ya asawa piro waray anak kinahanglan ya lomon na napatay anikay makapangasawa ka toong ipag nga nabalo di kadaw ampanganak. Kamhan mabohi ka ya ngaran na toong magorang nga naomos. Ani ini ya togon ni Moysis kanami.²⁰Ya, izang mahon-a pen may maglomon nga pitong ka amaama. Naminze di ya kamagorangan. Kamhan napatay di iza ka waray anak. ²¹Kamhan ya toong asawa nga nabalo di impangasawa na primirong manghod. Pagkakamhan ka-iza naomos kasab ya primirong manghod nga waray anak. Singed kaiton ya kahimtang na ikadowang manghod ²²keteb ka gipos-an. Pagkahorot niran pagkapatay anipen maomos ya babazi nga nabalo ka pitong ka maglomon. ²³Ya, Matutuldo ani ya pangotana nami kanmo kay mintoldo iko nga may tirmino ka pagbohi ka mga tao nga nangapatay. Daw kanin-ong asawa itong babazi kon mabohi pag-isab ya mga namagsonodsonod nga pitong ka maglomon kay iza ya asawa nirang maharong?²⁴Minsambag si Hisos nga sazep mazo iton kay wara pen kamo makasabot ka daan pinasoyat na Nagagihit daw toong gahem. ²⁵Kay ka pagpangabohi na mga tao kay-an diri di magkaminze ya mga amaama daw ya mga babazi kay nabag-o di ya kanirang mga batasan singed ka batasan na mga sogoonon nga taga tahaw.²⁶Mahimo gazed ya pagpabohi na Nagagihit ka mga tao pagbalik garing ka lebeng. Daw wara kamo magbasa ka libro nga insoyat ni Moysis nagalaong nga izang mahon-a pen mintindeg iza dizan tenged ka sagbet nga dogihen nga nagalaga. Kamhan may nabatian na-iza nga saba na Nagagihit nga garing ka sagbet nagalaong nga hao nga Nagagihit ani ya hawagenen na kamazong mga karaan nga si Abraham daw si Isak daw si Hakob. Ani ini ya impasoyat na Nagagihit. Kamhan bisan naomos di ya mga karaan magahawagen pen niran ya Nagagihit kay bohi ka siran daked. ²⁷Kamhan iza ya Nagagihit na mga bohi nga tao, diri kon Nagagihit na mga patay. Kamo nga mga Sadosiyo dakola ya sazep mazo kay nagatoldo kamo ka mga tao nga ya mga naomos nga tao diri mabohi pag-isab garing ka lebeng.²⁸Na, may isang magtutuldo ka tinoohan na mga Hudiyo nga nanalinga kaizang paglalis na mga Sadosiyo kan Hisos. Mahagdam iza nga insakto gazed ya inkasambag ni Hisos. Kamhan nangotana iza nga Maistro, dizan ka kasogoan na Nagagihit daw ono ya labaw nga sogo? ²⁹Minsambag si Hisos nga wani ya labaw nga sogo na Nagagihit nagalaong nga kamo nga mga kaliwatan ni Israil, manalinga kamo. Isa ka gazed ya Magbabaza, waray lain. Ya Magbabaza ani iza ya kantang Nagagihit. ³⁰Kinahanglan nga pagaazaken mazo pagtineed ya Ginoo nga kamazong Nagagihit. Kamhan isahen mazo ya kamazong hena-hena ka pagtaremdem kanangiza. Ani ini ya labaw nga sogo. ³¹Kamhan may ikadowang sogo nga kinahanglan mag-azakan kamo ka kamazong iba singed ka pag-azakan mazo ka kamazong kaogaringen. Ani ini ya dowang bolos nga sogo nga labaw ka mga iba nga sogo.³²Kamhan minsambag ya magtutuldo na mga Hudiyo nga Magtutuldo, insakto iton. Matood nga isa ka gazed ya Magbabaza, waray lain. ³³Kamhan kon ampalabaw kami ka kaazakan nami kanangiza dini ka maharong naming kaogaringen, kon anak sab kami ka kanaming kaibahan singed ka pagazak nami ka kanaming kaogaringen, madazaw gazed iton ka batasan mazo ka pagpansonog ka mga ihazep ka paghawag ka Nagagihit. ³⁴Na, pagpakabati ni Hisos ka insambag naizang maistro nagalaong iza nga madazaw ya kanmong hona-hona. Kon tomanen mo iton nga mga sogo, ya Nagagihit ani gazed ya insakopan mo. Ani ini ya sambag ni Hisos. Kamhan sokad kaiton wara di siran makasigi pagbalik pagpangotana kan Hisos.³⁵Ka nagmaymay pen si Hisos dalem ka dakolang lagkaw na Nagagihit nagalaong iza nga maghena-hena naa kamo ka intoldo na mga magtutuldo na mga Hudiyo nagalaong nga kaliwat ka lamang ni Dabid si Kristo. ³⁶Na, diri kon matood ya kanirang pagtoldo kay kawandini pen minngaran si Dabid kan Kristo nga toong Ginoo pagtandeg na Madazaw nga Lambong na Nagagihit ka toong bout. Kay minlaong iza nga ya Nagagihit ani ya minpanaba ka kanaong Magbabaza nga lomo-to ko naa dini ka kanaong too hangtod ka pagpakadaeg nao ka kanmong mga kaaway. Ani ini ya daan mga panaba ni Dabid mahitenged kan Kristo nga hari nga pinili na Nagagihit. ³⁷Kamhan kon minngaran si Dabid kan Kristo nga toong Magbabaza daw ono say toong pagkakaliwat ka lamang ni Dabid? Ya, ya mga mataud nga tao anak gazed siran pagpangalinga ka toldoan ni Hisos.³⁸Kamhan mindogang iza paglaong nga maghamarag kamo ka batasan na mga maistro ka mga Hudiyo. Kay magabado siran ka mga ataas nga bado. Kamhan an-azi siran dizan ka mirkado kay naazakan gazed siran nga madazaw ya pag-abiabi na mga tao kaniran. ³⁹Kada pagpista daw kada pagsingba naazakan siran kon palo-toon siran ka magazong dapit. ⁴⁰Magapanlimbong sab siran ka mga balo nga babazi dazaw makaangken siran ka kanirang mga irinsiya. Kamhan magapaataasen sab niran ya kanirang pagpangamozo ka Nagagihit kadaw komoton niran ya kanirang mga sala. Agon pahamtangan siran na Nagagihitka silot pagdakola ka silot na-iza ka iba nga mga tao nga nakasala.⁴¹Pagkakamhan ka-iza nagalo-to si Hisos dalem ka dakolang lagkaw na Nagagihit. Atbang iza ka betanganan ka talipid nga ihaladay na mga tao. Kamhan minpaniid iza ka mga mataed nga tao nga minholog ka kanirang mga halad. Matuod ya mga talipidon nga minholog ka dakolang talipid. ⁴²Min-azi disab dizan ya isang balo nga babazi nga pobri gazed iza. Dos sintabos ka lamang ya toong inhatag.⁴³Kamhan minpatipon si Hisos ka toong mga sinarigan kay nagalaong iza kaniran nga timan-an mazo gazed ini nga ya dos sintabos nga inhatag naitong balo nga pobri labaw gazed iton ka tibolos talipid nga inhatag na mga iba nga tao. ⁴⁴Kay dakola pen ya talipid niran piro nawara di gazed ya talipid na babazi kay inhorot di naiza ka paghalad ya toong panginabohi.

¹Ya, paglogwa ni Hisos ka dakolang lagkaw nga pangamozoanan ka Nagagihit minlaong ya isang sinarigan nga Magtutuldo, selengan mo itong magazong kalagkawenan nga natipon paghinang ka dakolang lagkaw na Nagagihit. Magazon gihapon ya mga bato nga hininang nga singbahan. ²Minsambag si Hisos nga paka selengi gazed mazo itong mga lagkaw. Mageba gazed iton kaan. Basta ya mga bato nga insompazan podo mabogto pagpangadeeg.³Na, ka nagalo-to si Hisos dizan ka bobong nga Olibo atbang ka dakolang lagkaw na Nagagihit si Pidro daw si Howan daw si Andris anikay toong iba koman. Kamhan nangotana siran nga ⁴panan-ogan mo kami kon kon-o kon mageba iton nga mga lagkaw. Daw ono ya timaan kon matoman ya inpanaba mo kanami?⁵Kamhan minsogod si Hisos pagmaymay kaniran nga maghamarag kamo kay basi magalimbogan kamo na mga tao. ⁶Kay mataud ya mga andateng nga ampasingedsinged siran kanao magaangken nga si Kristo siran nga pinili na Nagagihit ka paghari ka mga tao. Kamhan malimbongan ya mga mataud nga tao.⁷Diri sab kamo magkahaldek kon makabati kamo nga may gobot na gira nga arani di koni kamazo, may gira disab koni doro ka aro. Matoman matood iton piro diri pen kon ani ya kataposan nga panahon dini ka bakangan. ⁸Kay ka wara pen matapos ya bakangan ampakig-away ya isang longsod ka laing longsod, ampakig-away isab ya isang hari ka laing hari. Linogon isab ya mga nagakalainlain dapit daw madateng isab ka mga pihit. Iton nga maharong ani ya sinogdan ka lamang na mga kalised dini ka bakangan.⁹Na, kamo nga kanaong mga sinarigan, mag-andam kamo ka kamazong hinawa kay dadhen kamo na mga tao dizan ka hokmanan bisan waray sala mazo. Kamhan dalem ka mga singbahan na mga Hudiyo pamagbonalan kamo. Pansangilan sab kamo niran dizan ka mga laing tao nga magahari ka lopa na mga Hudiyo. Ani ini ya hinang niran kamazo kay hao ya insakopan mazo. Kamhan panan-ogan mazo siran mahitenged kanao. ¹⁰Ya pagmaymay na Nagagihit mahitenged kanao kinahanglan iwali pen iton doro ka tibolos kalibotan kadaw mahagdam ya maharong mga tao anipen matapos ya bakangan.¹¹Mindogang pen si Hisos paglaong kaniran nga mapiriso kamo kayan piro ka wara pen kamo magtindeg dizan ka hokmanan diri kamo magkawied kon ono ya isambag mazo kaniran kay antandeg ya Nagagihit ka kamazong hona-hona. Kamhan panabaen mazo kaniran kay diri kon garing ka hona-hona mazo ya pagpanaba kay garing hinoa ka Madazaw nga Lambong na Nagagihit. ¹²Na, wani pen ya panan-og mahitenged ka batasan na mga tao kayan. Dadhen na isa ya toong lomon dizan ka laing tao kadaw patazen. Dadhen sab na ama ya toong anak kdaw patazen. Masinopaken sab ya mga bata ka kanirang mga ginikanan. Kamhan garing ka sogo na bata patazen ya ginikanan. ¹³Magakontarahan sab kamo na maharong mga tao kay hao ya insakopan mazo. Na, bisan sin-o ya antoo pen kanao keteb ka pagkatapos naiton nga mga kalised mahatagan iza ka bag-ong kinabohi nga diri mawara.¹⁴Na, impanan-ogan pen ni Hisos ya toong mga sinarigan mahitenged ka mga masiet nga kalised kay-an. Nagalaong iza nga pagpakakita mazo ka isang tao nga ansopak gazed ka Nagagihit ngandalem ka dakolang lagkaw nga pangamozoanan ka Nagagihit, kamo nga mga taga Huda mandalagan gazed kamo daked ka bobong. ¹⁵Bisan magahayahay kamo dizan ka pawa dalagan gazed kamo kay waray logar mazo ka pagpanhipid ka kamazong mga betang. ¹⁶Bisan magatarabaho kamo daked ka kamazong oma dalagan gazed kamo kay waray logar mazo ka pagkawa ka kamazong bado dizan ka lagkaw.¹⁷Kalooy adaw na mga kabdes daw ya mga may pinasoso kay magalised siran ka pagdalagan. ¹⁸Maghangzo kamo ka Nagagiihit nga kontana diri kon panahon nga tig-oran ya pagdalagan mazo daw ya aldaw nga tigpahimlay ¹⁹kay ya kasamok naiton nga panahona masara iton ka bisan ono ya kasamok sokad kawandini pen ka sinogdan pen na bakangan hangtod koman daw kawanihen ka. ²⁰Kamhan kon diri padalien na Magbabaza ya mga aldaw wara gazed ya tao nga mabohi. Piro magakalooy ya Magbabaza ka toong mga pinili agon ampadali iza kaiton nga panahona kay-an.²¹Ya, kay-an kaiton nga panahona kon may anlaong kamazo nga paka selengi, mindateng di si Kristo nga hari nga pinili na Nagagihit, diri kamo magtoo. Kon may anlaong sab kamazo nga paka selengi waton di iza ngarini, diri kamo magtoo. ²²Kay andateng pen kamazo ya mga ampasingedsinged kan Kristo daw ya magapatihinang ka mga propita na Nagagihit. Anhinang sab siran ka mga kaberenganan kay kon mahimo malimbongan ya mga tao nga pinili na Nagagihit. ²³Maghamarag gazed kamo kay minpakahagdam di hao kamazo.²⁴Nagapadazon si Hisos pagmaymay kaniran nagalaong nga pagkatiwas na mga masiet nga kalised kay-an andeglem ya sega, anlipsilipsi ya bolan. ²⁵Mangaholog sab ya mga bitoon garing daked ka langit. Magakaonga gazed ya kalangitan kay ipahezenghezeng na Nagagihit. ²⁶Anipen makita hao na mga tao kay domatengay hao iba ya mga gabon. Pagkarimbaba nao kay-an labaw gazed hao ka gahem daw madazaw selengan. ²⁷Kamhan sogoon nao ya kanaong mga sinogo nga taga tahaw kdaw patiponon niran ya mga tao nga impili nao daan garing ka mga dapit doro ka sebazan daw salpan daw timogan daw kanawazan daw bisan hain dini ka bakangan.²⁸Na, paniidan mazo ya batasan na tanem nga igira. Kon namag-o ya dahon mahagdam di kamo nga ampanhoraw kaan. ²⁹Singed iton ka inlaong nao kamazo koman. Pagpakakita mazo kaiza nga mga inlaong nao kamazo mahagdam kamo nga arani di gazed ya tirmino nao ka pagbalik ka bakangan.³⁰Matood nga ka wara pen maomos ya kamazong kaliwatan matoman ya impanan-og o kamazo. ³¹Mangawara ya kalangitan daw ya bakangan piro ya kanaong mga panaba diri gazed mawara. ³²Na, waray mahagdam kon kon-o hao ambalik ka bakangan. Bisan ya mga sogoonon nga taga tahaw, bisan kon hao, wara mahagdam kay ya kanaong Ama nga Nagagihit iza kay mahagdam.³³Agon maghamarag kamo kay wara kamo mahagdam kon kon-o iton andateng. ³⁴Na, ya pagbalik nao ngarini singed iton ka tao nga minpanaw doro ka aro. Impabantazan na-iza ya toong lagkaw ka mga sogoonon. Impanhatag naiza ya tarabaho ka tagsa tagsa nga toong sogoonon. Insogo sab na-iza ya magbantazay dizan ka pirtahan nagalaong nga diri ko mag-endang pagbantay.³⁵Ya, singed kaiton ya pagsogo nao kamazo kay wara kamo mahagdam kon ono orasa ya pagbalik na tag-iza ka lagkaw. Inday kon delem kon tenga na kahabzen kon pagtagaok na manok ka pagkamasiselem ya pagbalik nao. ³⁶Diri kamo magpakatorog kay basi ambalik hao pagdali. ³⁷Na, ya inlaong nao kamazo ani isab ya sogo nao ka maharong mga tao nga maghamarag gazed kamong maharong.

¹Pagkakamhan ka-iza minkandizan si Hisos ka bariyo nga Bitani. Kon-isa pen pan-ihawen na mga Hudiyo ya mga nati na karniro kay mamista siran. Kanen sab niran ya pan nga waray ipasoligay. Na, ya mga oloolo na mga pari daw ya mga magtutuldo ka tinoohan na mga Hudiyo nagapangita di siran ka paazi kon onhon niran pagdakep kan Hisos kadaw patazen niran. Piro kanirang tinago iton ²kay nagalaong siran nga kay-an ka pagkaliwas na pista dakpen si Hisos aw diri magobot ya mga mamistahay. Ani ini ya sabot niran.³Ya, dizan di si Hisos ka lagkaw ni Simon nga taga Bitani nga nabahawan ka kagid. Na, ka nagakaen pen si Hisos may minseled nga babazi nga nagadara ka garapahay nga hininang nga bato. Ya ngaran na bato nga garapa ani alabastar. Ya leen na grapa klasi na lana nga masarang kahamot. Waray insaket bisan ono. Mahal gazed kon paliten. Ani ngaran ya nardo. Kamhan in-otdan na babazi ya lieg na garapahay. Kamhan imbo-boan dazon na-iza ya olo ni Hisos. ⁴Ya, pagpakakita ka na mga tao nangazehet siran. Kamhan nagalaong siran ka kanirang hona-hona nga kay ono sa inhanogon ya lana nga mahamot? ⁵Kontana ipalipitan iton kay sobra ka sohol ka napolo nga ka bolan kon paliten. Kamhan ya halin ipanhatag ka mga pobri. Kamhan minbaheg siran ka babazi.⁶Piro minlaong si Hisos nga pabet-i lamang mazo ya hinang na babazi. Diri kamo magakasamok kanang-iza kay madazaw gazed ya toong inhinang kanao. ⁷Kay ya mga pobri onay siran magaibaiba kamazo. Kon ansogot kamo may logar mazo ka pagtabang kaniran. Piro hao diri di madogay ampanaw dini kamazo. ⁸Insakto gazed ya hinang na babazi kanao kay minbo-bo di iza koman ka kanaong lawas dazaw naandaman ka paglebeng kay-an. ⁹Timan-an mazo gazed ini nga ya pagbo-bo na babazi kanao diri malipatan iton kay dini ka tibolos bakangan bisan hain dapit ya pagsangzaw na mga tao ka pagmaymay mahitenged kanao ipanan-og sab niran ya toong pagbo-bo kanao.¹⁰Pagkakamhan ni Hisos paglaong kaniran si Hodas nga taga Kariyoti nga isa dizan ka mga napolo may dowang ka sinarigan ni Hisos minkaro iza ka mga oloolo na mga pari na mga Hudiyo kay an-edlaw gazed iza kan Hisos. ¹¹Pagpakabati ka na mga oloolo ka gosto ni Hodas namagsaza siran. Kamhan insaadan si Hodas ka talipid. Kamhan minpanaw dazon si Hodas kay nagapangita iza ka paazi kon onhon naiza ka pag-edlaw kan Hisos.¹²Ya, koman aldaw ani ya primirong aldaw ka pista ka pagpangaen na mga Hudiyo ka pan nga waray ipasoligay. Pan-ihawen disab niran ya mga nati na karniro kay antaremdem siran nga pagbetang na mga karaan niran ka dogo na nati dizan ka pirtahan na lagkaw niran wara siran maazihi na tagalangit nga insogo na Nagagihit ka pagpamatay ka mga amaama nga panganay na mga taga Ihipto. Ya, ya aldawa ka pista nangotana ya mga sinarigan kan Hisos nga Magbabaza, daw hain ya lagkaw nga andaman nami ka pagkaen mo ka pista? ¹³Kamhan dizan kaniran insogo ni Hisos ya dowa nga nagalaong nga komaro naa kamo ka siyodad nga Hirosalem. Kamhan may magabathay ka tadzaw nga ansogat kamazo. Sondon mazo iza. ¹⁴Pagpakaseled sab na-iza ka lagkaw maglaong kamo ka tag-iza na lagkaw nga Nong, ya kanaming magtutuldo ani ya minsogo kanami ngarini kay ampangotana kanmo kon hain ya seled nga kananan na-iza ka pista iba ka toong kasakopan?¹⁵Kamhan antoldo iza kamazo ngandaked ka ikadowang saleg nga may seled nga haloag nga ipapalastar daan ya mga kinahanglanen ta. Na, dizan kaiton andamen mazo ya kantang pagkaen. Ani ini ya pagtogon ni Hisos kaniran. ¹⁶Kamhan namanaw di siran gazed ngaro ka siyodad. Pagdateng niran doro nakitan gazed niran ya maharong inlaong ni Hisos kaniran. Kamhan namag-andam siran ka pagkaen ka pista.¹⁷Pagkakahabzen ka-iza mindateng si Hisos daw ya toong mga sinarigan nga napolo may dowa siran. ¹⁸Na, ka nagapangaen pen siran minlaong si Hisos nga timan-an mazo gazed ini nga wadini gazed kanta ya an-edlaw kanao nga isa. Namagsaro kami koman na an-adlaw kanao. ¹⁹Kamhan nagalised gazed ya hona-hona na mga sinarigan ka saba ni Hisos kaniran. Tagsa tagsa kaniran minsambag nga diri gazed kon hao iton!²⁰Kamhan minsambag si Hisos nga dini kamazong napolo may dowa, ya isa ani om-edlaway kanao. Ya tao nga minsaro kanao ka pagkaon iza ya an-edlaw kanao. ²¹Kay matoman gazed kaan ya daan pinasoyat na Nagagihit mahitenged ka pagkamaomos nao. Basta ya tao nga om-edlaway kanao kaan intawon madazaw kon wara iza pakataoha.²²Ya, ka nagakaen pen siran minporot si Hisos ka pan. Pagpasalamat na-iza ka Nagagihit impanipaktipak na-iza iton kay ipanhatag ka toong mga sinarigan. Kamhan minlaong iza nga dawata ini kay ini nga pan kilalhen mazo nga kanaong lawas. ²³Kamhan minporot iza ka baso nga may imnenen nga sapa na mga obas. Pagpasalamat na-iza ka Nagagihit impandoholan na-iza siran. Kamhan min-inem sirang maharong. ²⁴Kamhan minlaong iza nga ini nga imnenen kilalhen mazo nga kanaong dogo nga ipaawas nao kay-an ka pagkanaomos nao para ka sala na mga mataod nga tao. Ya kanaong dogo ani ya pirmahan na Nagagihit ka bag-ong saad na-iza ka maharong mga tao. ²⁵Timan-an mazo gazed ini nga diri gazed hao an-inem pag-isab ka sapa na mga obas hangtod ka paghari na kanaong Ama ka bag-ong kalibotan. Anipen an-inom hao ka bag-ong imnenen. Ani iniinlaong ni Hisos kaniran.²⁶Ya, pagkakamhan niran pagkanta ka kasaza niran ka Nagagihit namanaw siran ngaro ka bobong nga Olibo. ²⁷Kamhan minlaong si Hisos kaniran nga mandalagan kaan kamong maharong kay mamiza kanao. Kamhan matoman ya daan pinasoyat na Nagagihit nga nagalaong nga ipapatay nao ya mag-aligrahay ka mga karniro. Kamhan mangabelagbelag di ya mga karniro. Ani ini ya daan pinasoyat na Nagagihit.²⁸Kamhan pagkabohi nao pagbalik garing ka lebeng anhon-a hao kamazo doro ka Galiliya. ²⁹Minsambag si Pidro nga bisan bizaan iko nirang maharong, diri gazed hao ambiza kanmo.³⁰Minsambag si Hisos nga timan-an mo gazed ini nga koman nga kahabzen ka wara pen tagaok ya manok ka ikadowa, ikatolo di mo hao kon ilimed paglaong nga diri kon iko ya kanaong sakop. ³¹Kamhan minpahisambag si Pidro nga agad kon patazen pen hao iba kanmo diri ta ko gazed ilimed. Kamhan ya maharong mga sinarigan minpanaba isab siran kan Hisos singod ka pagpanaba ni Pidro.³²Pagkakamhan ka-iza minkaro sin Hisos ka Gitsimani nga tamnanan ka mga liwaan inngaranan ka Olibo. Pagdateng dizan minlaong si Hisos nga maglo-to naa kamo dini kay ampangamozo pen hao ka Nagagihit. ³³Kamhan impaiba naiza si Pidro daw si Santiago daw si Howan. Kamhan nagalised gazed ya hena-hena ni Hisos ³⁴daw nagalaong disab iza kaniran nga mabeg-at gazed ya kanaong bout anika daw ikapatazay di nao ini koman. Magtagad naa kamo dini. Diri di kamo magkatorog.³⁵Pagkaro na-iza ka hon-ahan minpatihapa iza ka lopa kay anhangzo iza ka Nagagihit nga kon mahimo ilikay na-iza ya masiet nga kalisod kaan. ³⁶Nagapanaba iza ka paghangzo nga Ama nao, iko ya makahimo ka maharong mga hinang. Kon somogot ko diri mo hao pagipapatay para ka mga sala na mga tao. Piro iko ka say magaponto kanao.³⁷Pagkakamhan na-iza paghangzo minbalik iza ka toong mga sinarigan. Nangatorog siran. Kamhan minlaong si Hisos kan Pidro pagpokaw nga Simon, daw torog di ko? Daw wara ko makaanget pagbantay iba kanao bisan isa ka lamang ka oras? ³⁸Diri kamo magpangatorog. Magpangamozo kamo ka Nagagihit kadaw diri kamo dag-en ka pagtintal na mga maonga. Ansogot gazed ya bout mazo nga diri matorog piro ya kamazong lawas maloza gazed. ³⁹Pagkakamhan kaiza minbalik si Hisos ka inkarohan naiza kazina kay ampangamozo iza ka toong Ama pagisab singod ka toong pagpangamozo kazina.⁴⁰Kamhan minbalik iza ka toong mga sakop nga tolo. Tororg pen gihapon siran kay mabeg-at gazed ya mata niran. Kamhan waray sambag niran kan Hisos kay nangasipeg siran. ⁴¹Pag-ikatlo na-iza pagbalik ka toong mga sakop minlaong iza ka pagpokaw kaniran nga ono sang nagapahikatorog pen sa kamo gihapon? Igo di iza nga pagpahimlay mazo. Mindateng di koman ya tirmino nao ka pagkanaomos. Magaedlawen di hao koman doro ka mga makasasala nga tao. ⁴²Pamangon di kamo. Selengi, waton di ngarini ya om-edlaway kanao. Mangaro di kita hinoa pagsogat kaniran.⁴³Ya, ka nagapanaba pen si Hisos mindateng di matood ya isang sinarigan nga si Hodas. Iba gihapon ya mga mataod nga tao nga magakagobot daw nagapandara ka mga lodzo daw ya mga ibonalay. Insogo siran na mga oloolo ka mga pari daw ya mga maistro ka tinoohan na mga Hudiyo daw ya mga malaas. ⁴⁴Inpakahagdaman daan siran ni Hodas nga nagalaong nga ya tao nga pangamostahen nao pag-arek ani ya dakpen mazo. Bantazan gazed mazo pag-ated ngaro. ⁴⁵Na, pagkarini ni Hodas kan Hisos minlaong iza nga tinahod ong Magtutuldo! Kamhan minarek dazon iza kan Hisos pagpangamosta. ⁴⁶Kamhan indakop dazon si Hisos na mga tao.⁴⁷Ya, waton ya isang sakop ni Hisos nga nagahogot disab iza ka toong lodzo daw mintigbas. Kamhan nakawa dazon ya talinga na oripen na labaw nga pari. ⁴⁸Kamhan minlaong si Hisos ka mga gobot nga tao nga onosa wani baza kamo? Daw tolisan hao wani nga dakpen di sa mazo hao koman ka lodzo daw ibonalay? ⁴⁹Izang dini kaini aldaw-aldaw dizan ka dakolang lagkaw nga pangamozoanan ka Nagagihit nagatoldo sa hao kamazo. Kamhan wara sa mazo hao dakpa. Piro ya kaazi nao koman ani di ya pagtoman ka daan pinasoyat na Nagagihit mahitenged kanao. ⁵⁰Pagkakamhan ni Hisos paglaong ka-iza namiza dazon kanang-iza ya maharong mga sinarigan. Nandalagan siran pag-iza-iza.⁵¹Ya, may isang batan-on nga minsonod kan Hisos pagpanaw. Habel ka lamang ya toong bado. Kamhan intagenan kontana iza na mga tao ⁵²piro minlompat iza daw nabilin ya toong habel dizan kaniran. Minpahidalagan gazed iza ka waray bado.⁵³Na, ya mga nandakep kan Hisos in-ated niran iza ngaro ka labaw nga pari. Namagkatipon di dizan ya maharong mga oloolo na mga pari daw ya mga malaas daw ya mga magtutuldo ka tinoohan na mga Hudiyo. ⁵⁴Na, si Pidro minpaantaw iza ka toong pagsonod kan Hisos keteb gazed ka pawa na lagkaw na labaw nga pari. Pagdateng ka ni Pidro dizan minlo-to iza iba ka mga magbantazay kay nagapanarang iza.⁵⁵Na, dalem ka lagkaw nagatipon di ya mga oloolo na mga pari daw ya maharong mga magtutuldo daw ya maharong mga malaas kay anpangita siran ka pagpamatood nga salaan si Hisos kadaw pahamtangan iza ka kamatazen piro waray sala na-iza. ⁵⁶Mataod ya minpamakak kan Hisos piro wara mag-anika ya kanirang mga panan-og.⁵⁷Kamhan mintindeg ya mga iba nga tao kay nagabakak isab siran paglaong nga ⁵⁸itong tao minlaong nga makageba iza ka dakolang lagkaw nga pangamozoanan ka Nagagihit nga hininang na mga tao. Pagkakamhan hinangen na-iza koni ya bagong lagkaw ka tolo kang ka aldaw, waray antabang kanang-iza. ⁵⁹Ani ini ya kanirang panan-og piro wara gazed mag-anika ya kanirang mga panan-og.⁶⁰Kamhan ya labaw nga pari mintindeg dizan ka tenged niran kay nangotana iza kan Hisos nga daw waray ikasambag mo? Ono sa ya sombong niran kanmo? ⁶¹Nagapahenek lamang si Hisos. Kamhan nangotana pag-isab ya labaw nga pari nga daw iko ya Anak na Nagagiihit na-iza? ⁶²Minsambag si Hisos nga ani gazed hao. Basta kay-an di gazed mazo hao kon makitan nga magalo-to hao dizan ka too na Nagagihit kay hao ya minhon-a ka bisan sin-o nga mahon-ang tao. Makitan isab mazo ya pagkarimbaba nao garing ka tahaw iba ya mga gabon.⁶³Pagpakabati ka na labaw nga pari kaiton inggisi na-iza ya toong kaogaringeng bado kay nazehet gazed iza nagalaong nga igo di iton. Wara di kita magkinahanglan ka dogang pen nga saksi. ⁶⁴Nakabati di kamo nga garboso gazed iza ka pagbakak nga iza ya Anak na Nagagihit. Agon ono ya kamazong hona-hona kanang-iza? Kamhan minsambag sirang tanan nga salaan gazed iza. Patazen di lamang iton. ⁶⁵Kamhan impamag-elban iza niran. Impamagbegketan isab ya toong mata daw impanombag iza. Kamhan minlaong siran pagsora nga tekmaen mo kon sin-o ya minlaparo kanmo! Kamhan ya mga magbantazay isab impanombag niran si Hisos.⁶⁶Ya, si Pidro dizan pen iza ka pawa na lagkaw na labaw nga pari. Kamhan may babazi nga binolanan na labaw nga pari nga minkadizan kanang-iza. ⁶⁷Pagpakakita ka na-iza kan Pidro nga nagapanarang nagaselengseleng gazed iza kan Pidro daw nagalaong nga iko ya nagaibaiba kan Hisos nga taga Nazarit. ⁶⁸Piro minlimed si Pidro nagalaong nga wara hao mahagdam. Kamhan minpasinged iza ngaro ka azihanan ka pirtahan. Kamhan mintagaok matood ya manok.⁶⁹Ya, pagpakakita ka na binolanan kan Pidro dizan ka pirtahan minpanaba iza pag-isab ka mga mintindeg dizan nga nagalaong nga iton nga tao ani gazed ya sakop ni Hisos. ⁷⁰Kamhan minlimed si Pidro pag-isab. Pagkateedteed ka-iza minlaong ya mga mintindeg dizan nga iko gazed ya sakop ni Hisos kay taga Galiliya sa ko.⁷¹Basta kay minpaninhaga si Pidro paglaong nga mapatay pen hao kon bakaken hao. Inday kon sin-o itong taohana nga magalong-on mazo. ⁷²Ya, pagkakamhan ni Pidro pagsambag mintagaok dazon ya manok. Ikadowa di ya pagpanagaok koman nga kahabzen. Kamhan nakataremdem di si Pidro ka inlaong ni Hisos nga ka wara pen tagaok ya manok ka ikadowa ilimed di mo hao ka katolo. Na, pagpakataremdem ka ni Pidro masara gazed ya toong paghaza kay inlimed sa na-iza si Hisos.

¹Ya, pagkamasiselem ka-iza ya mga oloolo na mga pari daw ya mga malaas daw ya mga magtutuldo ka tinoohan na mga Hudiyo namagsabot siran kon onhon niran pagpapatay kan Hisos. Kamhan inektan niran si Hisos ka kadina dazaw iated niran ngaro kan Pilato nga gobirnador. ²Kamhan nangotana si Pilato kan Hisos matod, iko ya hari na mga Hudiyo? Minsambag si Hisos nga itong inlaong mo kanao hao iton. ³Kamhan mataed ya ikabetangbetang kan Hisos na mga oloolo na mga pari.⁴Kamhan nangotana pag-isab si Pilato kan Hisos nga daw waray ikasambag mo? Daw wara ko makabati ka mga panaba niran kanmo? ⁵Piro wara gazed si Hisos magsambag. Kamhan nabereng gazed si Pilato.⁶Ya, kada toig ka pagpista na mga Hudiyo ya batasan ni Pilato magapalogwa iza ka isang ka tao nga piniriso. Kamhan ya mga kataohan anikay magaparagbeet pagpili. ⁷Na, dizan ka pirisohan may mga masinopaken ka gobirnador. Nakabono isab siran ka mga tao. Na, ya isa dizan kaniran ani si Barabas. ⁸Kamhan nangarini ya mga tao kan Pilato kay anhangzo siran nagalaong nga ampabohi kami kontana ka piniriso kay ani ya batasan mo kanami kada pagkapista.⁹Minsambag si Pilato nga daw palogwaen mazo ya hari na mga Hudiyo nga si Hiso Kristo? ¹⁰Ani ini ya toong pangotana kay mahagdam iza nga nagaarig ya mga pari kan Hisos agon in-ated niran iza ngarini ka gobirnador kadaw pahamtangan iza ka kamatazen. ¹¹Kamhan ya mga oloolo na mga pari nagaapora siran ka mga tao ka pagpabohi hinoa kan Barabas.¹²Kamhan nangotana si Pilato pagotro kaniran nga ono sa ya gosto mazo kaiton nga tao nga inngaranan mazo ka hari na mga Hudiyo? ¹³Kamhan namagdengan gazed ya mga tao pagsambag nga ipalansang di iton ka kros!¹⁴Nangotana si Pilato kay ono say sala na-iza? Kamhan mindogang hinoa siran pagpaninggit nga ipalansang di iton ka kros! ¹⁵Pasazaen kontana ni Pilato ya mga tao agon imbohian naiza si Barabas. Kamhan impalatos na-iza si Hisos daw impaated iza ngaro ka mga soldawo kadaw ilansang di ka kros.¹⁶Kamhan in-ated na mga soldawo si Hisos dizan ka pawa na dakolang lagkaw na gobirnador. Kamhan inpatipon niran ya tanan mga soldawo dizan kan Hisos. ¹⁷Kamhan impabadoan niran si Hisos ka mararag nga bado singed ka bado na hari piro lain. Pagkakamhan niran paglokong ka balala nga mga dogihen inhinang niran ka korona. Kamhan insokbot niran dizan ka olo ni Hisos kay nagapakahinang ka hari. ¹⁸Kamhan nagasorasora siran pagsaza nagalaong nga tinahod ong hari na mga Hudiyo!¹⁹Kamhan impamonalan niran ya toong olo daw impamang-elban iza. Kamhan dizan ka toong paahan nanlohod siran pagpatitahod. ²⁰Kamhan inhoboan dazon niran ka bado nga mararag kay ipabado niran pagbalik ya toong kaogaringeng bado. Kamhan in-ated iza ngaro ka gawas na siyodad kay ilansang di ka kros. ²¹Ya, ka nagapanaw pen siran dizan ka dalan may insogat niran nga si Simon nga garing ka oma pasingod ngarini ka Hirosalem. Taga Sirini iza daw ama isab iza ni Alihandro daw si Ropo. Kamhan insogo iza na mga soldawo ka pagpasili pagbathay ka kros ni Hisos.²²Kamhan in-ated si Hisos doro ka dapit nga inngaranan ka Golgota. Na, ya kahologan na ngaran nga Golgota ani Ya Dapit ka Kalabira kay ani ya dapit ka pagpatay niran ka tao nga impahamtang ka kamatazen. ²³Pagdateng ka niran dizan impainem kontana si Hisos na mga soldaw ka bino sinaktan ka mayra nga tambal ka pagkawa ka kasakit ka paglansang piro diri iza an-inem. ²⁴Pagkakamhan ka-iza inlansang si Hisos ka kros. Kamhan namagriparipa siran kon sin-oy makatag-iza ka mga bado ni Hisos.²⁵Na, ya paglansang niran kan Hisos malabinazaw ya aldaw ka alas noybi. ²⁶May intapil niran nga sinoyat nga pasangil kan Hisos nagalaong nga si Hisos ini nga hari na mga Hudiyo. ²⁷Kamhan dizan ka toong sain inlansang disab niran ya mga tolisan nga dowa siran. Ya isa dapit ka wala ni Hisos. Ya ikadowa dimbali ka toong too. ²⁸Ani ini ya pagtoman na daan pinasoyat na Nagagihit nagalaong nga dizan ka mga makasasala nga tao makalakip si Hisos pagpatay. Ani ini ya daan pinasoyat.²⁹Na, ya mga namagpanlabay dizan ka kros nagabiaybiay siran kan Hisos nga nagalaong nga matod sa iton nga nagalaong ko nga makageba ko ka dakolang lagkaw nga pangamozoanan ka Nagagihit. Kamhan baza-baza hinangen mo pag-isab ya bag-ong lagkaw ka tolo kang ka aldaw. ³⁰Kon matood pen ya panaba mo tabangan mo koman ya kanmong kaogaringen pagtena ka kros.³¹Paglaonglaong na mga oloolo na mga pari nagasorasora isab siran kan Hisos nagalaong nga nakalibra iza ka mga iba nga tao piro diri iza makalibra ka toong kaogaringeng lawas. ³²Iko nga pinili koni na Nagagihitnga hari koni na mga kaliwatan ni Israil magtena ko ka kros kadaw anseleng kami daw antoo. Ani ini gihapon ya pagtamay kan Hisos na mga matutuldo ka tinoohan na mga Hudiyo. Bisan ya dowang tolisan dizan ka sain ni Hisos maonga isab ya saba niran kan Hisos.³³Na, pagkaedto di mindeglem gazed ya alaw hangtod ka pagkabalantang na aldaw ka alas tris. ³⁴Kamhan ka hapit di alas tris mabaskeg gazed ya saba ni Hisos ka paghawag ka toong Ama ka saba nga Hinibriyo nagalaong nga kanaong , kay Nagagihit ono sa wani imbizaan di mo hao? ³⁵Na, ya mga minseleng dizan pagpakabati ka niran ka saba ni Hisos minlaong siran nga inhawag naiza si Iliyas nga karaang propita na Nagagihit.³⁶Kamhan ya isang ka tao mindalagan iza ka pagkawa ka sizepanan. Kamhan inheem iton ka len-anan ka bino nga barato kamhan integseb ka liwaan kadaw idohol ka ba-ba ni Hisos kay kadaw makasizep. Kamhan minlaong ya tao nga tagad naa kita. Anseleng kita lamang kon ankarini si Iliyas pagtabang kanangiza. ³⁷Pagkakamhan ka-iza mabaskeg gazed ya saba ni Hisos ka paghawag pag-isab. Kamhan nabogtoan dazon iza ka toong bout. ³⁸Kamhan dizan ka dakolang lagkaw nga pangamozoanan ka Nagagihit nagisi ya kortina garing daked lapos ngarimbaba ka sidsid.³⁹Ya, dizan atbang ka kros nagatindeg ya kapitan na mga soldawo. Pagpakakita na-iza ka pagkapatay ni Hisos minlaong iza nga iton nga naomos iza matood ya Anak na Nagagihit! ⁴⁰Kamhan dizan ka aro-aro may mga babazi nga naneleng isab ka pagkanaomos ni Hisos. Si Mariya nga taga Magdala iton daw si Salomi daw ya iba nga Mariya nga ina na batan-en nga si Santiago daw si Hosi. ⁴¹Ka waro pen si Hisos ka Galiliya nagaibaiba siran kanang-iza daw nagapakaen. Waton disab ya mga mataod pen nga babazi nga nangiba kan Hisos ngarini ka Hirosalem.⁴²Ya, delem di wani. Konsilem ani aldawa ka pagpahimlay na mga Hudiyo agon nagaandam di siran koman nga delem. ⁴³Kamhan si Hosi nga taga Aramatiya minkaro iza kan Pilato kay minbaid iza ka pagkawa ka lawas ni Hisos kay ilebeng. Tinahodan si Hosi kay iza isab ya sakop dizan ka hokmanan. Nagatagad isab iza ka pagkahari na Nagagihit. Inkawa na-iza ya toong kahaldek ka pagpangazo na-iza ka lawas ni Hisos kan Pilato. ⁴⁴Kamhan nabereng si Pilato ka pagpakabati na-iza nga si Hisos naomos di baza? Kamhan impakadizan na-iza ya kapitan kay ampangotana nga daw naomos di gazed si Hisos kon wara pen?⁴⁵Minsambag ya kapitan nga naomos di gazed iza. Pagkakamhan mintogot dazon si Pilato ka pagkawa kan Hosi ka lawas ni Hisos. ⁴⁶Pagpalit ni Hosi ka mapoti nga habel minkawa iza ka lawas ni Hisos dizan ka kros kay komotan na-iza ka mga panapton nga mapoti. Kamhan inlebeng naiza doro ka hininang nga talangban nga lebnganan. Kamhan insirahan na-iza ka bato. ⁴⁷Na, dizan disab si Mariya nga taga Magdala daw si Mariya nga ina ni Hosi kay anseleng siran kon hain dapita ya inlebgnan kan Hisos.

¹Ya, paglabay ka na aldaw nga tigpahimlay si Mariya nga taga Magdala daw si Salomi daw si Mariya nga ina ni Santiago namalit siran ka mga pahamot kay dadhen niran ngaro ka lobnganan kay ibo-bo niran ya lawas ni Hisos. ²Na, pagkamasiselem ka Dominggo pagsidlit ka na sega minpasinged siran ngaro ka lebnganan ni Hisos.³Ka wara pen siran dateng namaglaonglaong siran nga daw sin-o kombeet ya anlingan ka insira nga bato ka pirtahan na lebnganan? ⁴Ambaza kay pagseleng niran ka pirtahan na lebeng naabri di sa baza ya pirtahan. Nalingan di matood ya insira nga bato nga dakola pagdazaw.⁵Pagpakaseled ka niran ka talangban nga lebnganan waton di ya batan-en nga amaama nga nagalo-to dizan ka too na mga babazi. Mapoti ya toong bado daw ataas. Kamhan nabereng gazed ya mga babazi ⁶piro minlaong iza nga diri kamo magkabereng. Ya pangitan mazo nga si Hisos nga taga Nazarit nga inlansang ka kros, wara iza dini kay nabohi di iza garing ka mga naomos. Selengi mazo. Wani ya dapit nga pinabentagan kanang-iza. ⁷Komaro naa kamo kanin Pidro nga toong mga sinarigan. Long-on mazo siran nga si Hisos anhon-a iza kamazo doro ka Galiliya. Doro kaiton makakita gazed kamo kanang-iza singod ka inlaong kamazo ka mahon-a pen ka wara pen iza maomos. Ani ini ya sogo na amaama kaniran.⁸Paglogwa na mga babazi dizan minpahidalagan gazed siran. Magapamidpid gazed ya kanirang lawas ka kabereng niran. Wara gazed siran magpanan-og ka bisan sin-o dizan ka kadalanan kay inkayasan siran.⁹Ya, wani ya ikadowang panan-og mahitenged ka pagkabanhaw ni Hisos. Pagkabanhaw ni Hisos ka masiselem ka Dominggo minpakita iza paghon-a dizan kan Mariya nga taga Magdala. Na, si Mariya ani ya inharian na pitong ka maonga izang mahon-a pen kamhan impadalagan siran ni Hisos. ¹⁰Pagpakakilala ni Mariya kan Hisos minlargo iza kadaw panan-ogon ya mga sakop ni Hisos. Pagdateng naiza kaniran nagahaza pen siran. ¹¹Pagpakabati niran nga nabohi di si Hisos kamhan nakitan disab ni Mariya wara siran magtoo.¹²Na, pagkakay-an minsogat isab si Hisos ka dowang ka sakop pagpanaw niran garing ka Hirosalem. Ya pagpakita ni Hisos kaniran diri kon singod ka pagpakita na-iza kan Mariya. ¹³Pagkakamhan ka-iza minbalik siran ka Hirosalem kay panan-ogan niran ya mga iba nga sakop nga nakitan nami si Hisos. Ambaza kay diri siran antoo.¹⁴Ya, pagkakay-an ka nagakaen pen ya mga sakop ni Hisos nga napolo may isa di siran, minkarini si Hisos kaniran. Kamhan minbaldeng iza kaniran kay kolang pen ya pagsarig niran. Magahi sab ya kanirang otok kay diri siran antoo ka saba na kanirang mga iba nga nakakita kan Hisos nga mabohi garing ka mga naomos. ¹⁵Minsogo sab iza kaniran nagalaong nga pamanaw kamo ngaro ka mamharong mga tao dini ka tibolos bakangan. Walihan mazo siran ka pagmaymay mahitenged kanao. ¹⁶Kamhan bisan sin-o ya antoo kanao daw magapabenzag diri pahamtangan iza na Nagagihit ka silot kay-an. Kamhan ya mga tao nga diri antoo kanao pahamtangan siran ka kamatazen kay waton pen ya kanirang mga sala.¹⁷Kamhan ya mga antoo kanao wani ya hinangen niran. Makapadalagan siran ka mga maonga pagsabi niran ka kanaong ngaran. Makapanaba isab siran ka mga lain saba nga garing ka Nagagihit nga diri kon inton-an niran. ¹⁸Kon makaporot siran ka halas diri siran bangaen. Kon may anhilo kaniran diri siran mahilo. Kon andampa siran ka lawas na mga nabedlay maolian ya lawas na nabedlay.¹⁹Pagkakamhan ni Hisos paglaong kaniran nabohat iza ngandaked ka hola na Nagagihit. Kamhan minlo-to iza dizan ka too na Nagagihit. ²⁰Kamhan ya toong mga sakop namagtaligpanaw siran kay minsangzaw siran ka maharong mga tao. Mintabang si Hisos kaniran. Imparig-en sab na-iza ya pagsangzaw niran ka mga timaan.

¹Kan Tiyopilo ini nga kanaong higara, Mataed ya mga minsoyat mahitongod ka mga inhinang ni Hiso Kristo ka dini pen iza ka kalibotan. ²Ya mga minhon-a pagsaksi ka toong mga inhinang siran isab ya mindara ka toong maymay ngarini kanta. ³Na, dogay ya pagsosi nao ka kanirang maymay. Kamhan naazak isab hao nga ansoyat kanmo mahitongod kan Hisos sokad ka pagkatao naiza kotob ka pagkandaked naiza ⁴dazaw mahagdam iko nga matood gajod ya inton-an mo mahitongod kan Hiso Kristo.⁵Na, kawandini pen ka paghari pen ni Hirodis ka lopa nga Hoda may isang tao nga si Zakariyas. Pari iza daw kaliwat sab iza ni Abiyas nga karaang pari na mga Hudiyo. Kamhan ya ngaran na toong asawa si Ilizibit. Kaliwat iza na primirong pari na mga Hudiyo si Aron ya ngaran. ⁶Beetan gajod si Zakariyas daw si Ilizibit. Nagatoman gazed siran kamga sogo na Nagagihit. ⁷Piro waray maanak niran kay diri makapanganak si Ilizibit. Kamhan mga malaas disab sirang dowa.⁸8Na, izang aldaw dizan ka lagkaw nga pangamozoanan ka Diyos nagatoman si Zakariyas ka toong katengdanan ka pagkapari. ⁹Kamhan inhinang naiza daw ya mga iba nga pari ya batasan niran nga namagriparipa kon sin-oy makaseled ka ikadowang kowarto dazaw ansonog ka parina.Ya ngaran naiton nga sinabong ani ya Labaw nga Tinahodan nga Hel-anan na Magbabaja. Kamhan si Zakariyas ani ya makasolod koman. ¹⁰Dimbali ka logwa nagapangamozo ya mga mataod nga Hudiyo kay ani ya batasan niran kada aldaw ka oras ka pagsonog na isa ka parina dalom.¹¹Ka nagasonogpen si Zakariyas ka parina waton di baza ya sinogo nga garing ka Magbabaja nga nagatindeg dizan ka too na lamisahay nga botanganan ka sinonog nga parina. ¹²Kamhan nagalised ya hena-hena ni Zakariyas daw naborong kon sin-o iton? ¹³Kamhan minlaong ya sinogo nga Zakariyas, diri ko magkahaldek kay insambag di na Nagagihit ya kanmong inhangzo. Anak ya kanmong asawa ka maimpis nga amaama. Ngaranan mo iza kan Howan.¹⁴4Kay-an ka pagkatao naiza dakola ya kasaza mo daw kanmong kaibahan. ¹⁵Kay tinahodan gajod iza dizan ka Magbabaja. Diri iza an-inom ka bino daw bisan ono ya makahebeg. Sokad ka pagkatao naiza harian iza na Madazaw nga Ispirito nga garing ka Nagagihit.¹⁶Pabaliken sab naiza ya mga mataod na kaliwatan ni Israil ka Magbabaja nga kanirang Nagagihit kay mga masinopaken gajod siran ka Nagagihit. ¹⁷Iza nga si Howan anhon-a iza kan Hiso Kristo dazaw anandam iza ka toong pagdatong. Kamhan may dakolang gahom naiza singed ka gahom ni Iliyas nga karaang propita na Nagagihit dazaw ipahosay ya mga ama ka kanirang mga maanak. Pabaliken sab naiza ya mga masinopaken ka paghona-hona ka madazaw. Kamhan an-andam siran ka kanirang hinawa ka pagdatong ni Hiso Kristo. Ani ini ya inlaong na sinogo kan Zakariyas.¹⁸8Kamhan minsambag si Zakariyas nga inday kon matood ya inlaong mo kanao kay malaas di gajod hao daw ya kanaong asawa. ¹⁹Minsambag ya sinogo nga hao si Gabril. Dizan ka Nagagihit nagatindeg hao. Insogo hao ka pagkarini kanmo kay ipakahagdam ya madazaw nga panan-og. ²⁰Piro maamang gajod iko kotob ka pagtoman naini nga inlaong nao kay wara ko magtoo kanao. Matoman gajod ini nga tanan ka hostong panahon.Ani ini ya insambag ni Gabril.²¹Na, bali ka logwa nagatagad pon ya mga tao kan Zakariyas. Nabereng gajod siran kon ono ya inkadogazan naiza dalem ka ikadowang kowarto. ²²Ka nagatagad pon siran minlogwa si Zakariyas piro wara iza makapanaba kaniran kay naamang di iza. Kamhan makasabot ya mga tao nga may nakitan ni Zakariyas nga garing ka Nagagihit kazina ka pagkapari naiza dalem ka ikadowang kowarto. Kamhan minsinyas lamang si Zakariyas ka mga tao kay diri iza makapanaba. ²³Pagtiwas ni Zakariyas ka toong pagkapari dizan ka dakolang lagkaw na Nagagihit min-oli iza ka toong lagkaw.²⁴Ka wara pon madogay minkabdes matood ya toong asawa nga si Ilizibit. Kamhan nagahela-hela si Ilizibit keteb ka limang ka bolan. Nagalaong iza nga ²⁵nalooy gajod ya Magbabaja kanao kay keteb koman dakola ya kanaong kasipeg kay wara hao makapanganak piro inkawa di na Nagagihit ya kanaong kasipeg.²⁶Na, enem di nga ka bolan ya pagkabdes ni Ilizibit. Kamhan insogo na Nagagihit si Gabril nga taga langit ka pagkaro ka longsod nga Nazarit doro ka Galiliya. ²⁷Kay dizan may isang daraga nga asawhenen na amaama nga si Hosi nga kaliwat ni Dabid nga karaang hari na mga Yodayo. Kamhan ya ngaran naiton nga daraga si Mariya. ²⁸Pagdatong ni Gabril dizan kan Mariya minlaong iza nga magmalinawen ko. Dini ya Diyos iba kanmo. Kamhan minpanarangin gajod iza kanmo. ²⁹Pagpakabati ni Mariya nagalised gazed ya toonghena-hena. Kamhan nagalaong iza ka toong hena-hena nga ono sa ini nga inlaong naiza kanao?³⁰Minsambag ya sinogo nga Mariya, diri ko magkahaldok kay inkaloyan ko na Nagagihit. ³¹Ankabdes iko kaan. Kamhan an-anak diko ka maimpis nga amaama. Ngaranan mo iza kan Hisos. ³²Dakola ya toong ngaran kay iza ya matood nga Anak na Nagagihit nga pinakalabaw. Tagan izana Magbabaja Nagagihit ka lo-toanan ni Dabid ka paghari ka mga tao kay si Dabid ani ya apo ni Hiso Kristo. ³³Anhari iza ka mga kaliwatan ni Hakob kawanihen ka. Waray pagkatiwas na toong paghari ka mga tao. Ani ini ya inlaong ni Gabril.³⁴4Kamhan minsambag si Mariya nga ono sa ya panaba mo kanao kay wara pon sa hao maminze? ³⁵Minsambag si Gabril nga harian diko kaan na Madazaw nga Ispirito. Kamhan ya pinakalabaw nga Nagagihit anhatag iza ka kadazaw kanmo. Ya maimpis nga kanmong ianak waray sala naiza kay iza ya matood nga Maanak na Nagagihit.³⁶Wani pon ya ilaong nao kanmo nga ya kanmong lomon nga si Ilizibit nga wara makapanganak minkabdes isab iza ka maanak nga amaama. Bisan malaas di iza ikaenem di koman nga ka bolan ya toong kinabdesen. ³⁷Kay ya Nagagihit may gahom naiza ka paghinang ka bisan ono. ³⁸Minsambag si Mariya nga wani hao nga sogoonon na Magbabaja. Gosto hao nga matoman ya inlaong mo kanao. Kamhan minpanaw ya sinogo.³⁹9Ka wara pen madogay min-andam si Mariya ka toong panaw. Kamhan minpanaw iza pagdali ngaro ka longsod tenged ka mga bobong doro ka Hoda. ⁴⁰Pagdateng naiza doro minpanik iza dizan ka lagkaw nin Zakariyas. Kamhan nagasabi iza kan Ilizibit. ⁴¹Pagpakabati ka ni Ilizibit ka saba ni Mariya minlihok dazon ya maimpis dalem ka toong tinai. Kamhan inharian si Ilizibit na Madazaw nga Ispirito nga garing ka Nagagihit.⁴²Kamhan mabaskeg ya toong saba paglaong nga Mariya, dini ka tanan mga babazi iko ya madazaw. Madazaw isab ya maimpis nga kanmong ianak. ⁴³Kamhan masazaen gajod hao kay minbisita kanao ya ina na kanaong Magbabaja! ⁴⁴Pagpakabati nao ka pagsabi mo kanao kazina minlihok dazon ka kasaza ya maimpis dalem ka kanaong tinai. ⁴⁵Mariya, panaranginan gajod iko na Nagagihit kay mintoo iko nga tomanen gajod naiza ya toong panaba kanmo.⁴⁶Minsambag si Mariya nga sazaen gajod nao ya Magbabaja. ⁴⁷Sazaen nao ya Nagagihit nga kanaong Manlolowas.⁴⁸Kay bisan pobri hao nagataremdem iza kanao nga toong sogoonon. Sokad koman dini ka pagsonodsonod ka tanan mga kaliwatan na mga tao antaremdem siran kanao nagalaong nga hao gajod ya impanaranginan na Nagagihit ka madazaw. ⁴⁹Kay isa ka labaw ka gahem mintabang gazed iza kanao. Madazaw gajod ya toongngaran.⁵⁰Dini ka mga sonodsonod nga kaliwatan na mga tao inkaloyan naiza ya tanan mga mintahod kanangiza. ⁵¹Inpakita di naiza nga iza ya gamhanan pagpabelagbelag naiza ka mga garboso.⁵²Inpaebes naiza ya mga hari. Kamhan inpahari naiza ya mga labing obos nga tao. ⁵³Dini ka mga binengtas nga tao may inhatag naiza nga madazaw. Kamhan inpapanaw naiza ya mga dato nga waray dara niran.⁵⁴Intoman naiza ya toong saad ka kantang mga karaan. Kamhan mintabang iza kan Abrahamnga toong sogoonon. ⁵⁵Nakataremdem iza ka pagtabang kan Abraham daw ya tanan mga kaliwatan naiza kawanihen ka! Ani ini ya insaza niMariya ka Nagagihit.⁵⁶Kamhan dizan kan Ilizibit minhela iza ka hapit magtolong ka bolan. Kamhan min-oli iza. ⁵⁷Na, mindatong di ya tirmino ni Ilizibit ka pag-anak. Kamhan min-anak matood iza ka amaama. ⁵⁸Kamhan nakabati ya toong mga songbalay daw mga lomon nga inkaloy-an gazed na Nagagihit si Ilizibit agon namagsaza sirang tanan iba kanangiza.⁵⁹Pagdateng ka ikawalo nga aldaw inhinang niran ya maimpis ka batasan niran nga impatori. Insangay sab niran kontana ka ngaran na ama nga si Zakariyas. ⁶⁰Piro minlaong ya toong ina nga diri! Kay si Howan ya inngaran o kanangiza. ⁶¹Minsambag siran kay ono sa? Waray inngaranan kan Howan nga lomon mo.⁶²Kamhan minsinyas siran pagpangotana ka ama na bata kon ono ya inngaran. Kamhan minsinyas iza kaniran dazaw ihatag ya soyatanan. ⁶³Kamhan minsoyat iza nga si Howan ya toong ngaran. Kamhan nabereng gajod sirang tanan.⁶⁴4Kamhan nakalitok dazon si Zakariyas. Nakapanaba gajod iza ka toong pagsaza ka Nagagihit. ⁶⁵Pagpaniid na kanirang kaibahan nabereng sirang tanan. Kamhan dizan ka tanan kabobongan ka Yoda minlibot gajod ya panan-og mahitenged ka pagkatao ni Howan. ⁶⁶Kamhan nagahena-hena ya mga manalingahay nga dakola ya ngaran naini nga bata kay-an kay aligarahen gajod iza na Magbabaja.⁶⁷Kamhan si Zakariyas nga ama na bata inharian iza na Madazaw nga Ispirito nga garing ka Nagagihit. Kamhan minpasabot iza kaniran ka matood nga garing ka Nagagihit nagalaong nga ⁶⁸sazaen ta ya Magbabaja kay iza ya Nagagihit na mga kaliwatan ni Israil. Kay iza ya minbisita kanta dazaw antabang.⁶⁹Inhatag kita naiza ka Manlolowas nga labaw ka gahem. Kamhan iza disab ya kaliwat ni Dabid nga karaang sogoonon na Nagagihit. ⁷⁰Kawandini pen intandeg na Nagagihit ya hinawa na toong mga propita dazaw ⁷¹siran ya ampakahagdam kanta daan nga malibri kita ka kantang mga kaaway nga mga minkontara kanta.⁷²Nagatoman di iza ka toong saad ka kantang karaan nga ipakita naiza ya toong kalooy kaniran daw ya kanirang mga kaliwatan. ⁷³Kawandini pon minpakamatood ya Nagagihit ka toong saad kan Abraham nga nagalaong nga ⁷⁴iza ya antabang kanta dazaw malibri kita ka kantang mga kaaway. Kamhan diri kita mahaldek ka pag-alagad ka Nagagihit. ⁷⁵Antoman sab kita ka mga balaed na Nagagihit keteb ka pagkapatay nita kay iza ya antabang kanta ka pagbineetan.⁷⁶ranan ko ka propita na Nagagihit nga pinakalabaw kay iko ya anhon-a ka Magbabaja dazaw an-andam iko ka toong pagdateng. ⁷⁷Iko ya ampakahagdam ka toong mga sakop nga domatengay di ya kanirang Manlolowas dazawmalibri siran ka silot ka kanirang mga sala.⁷⁸Kay Maloloy-on gazed ya kantang Diyos. Ya pagdateng ni Hisos singed iton ka pagsirak na sega ka pagkamasiselem. ⁷⁹Kay pawaan naiza ya hena-hena na mga tao nga nagahela ka kadeglem daw magakahaldek ka pagkapatay niran. Sindoan naiza kita dazaw malinaw ya kantang hinawa. Ani ini ya mga panaba ni Zakariyas ka pagkatao na toong maanak nga si Howan.⁸⁰Kamhan minsolig ya bata. Marig-en isab ya toong pagsarig ka Nagagihit. Kamhan nagahela iza doro ka kamingawan keteb ka pagsogod naiza ka pagsindo ka mga Hudiyo nga mga kaliwatan ni Israil.

¹Wani ya panan-og mahitongod ka pagkatao ni Hiso Kristo. Na, ka wara pon matao si Hisos may labaw nga hari nga si Sisar Agosto ya ngaran daw taga Roma iza. Kamhan may sogo naiza nga ipalista ya ngaran na tanan mga Yodayo dazaw ambazad siran ka bohis. ²Primirong lista iton ka pagkagobirnador ni Kiriniyo ka lopa nga Siriya. ³Kamhan namanaw ya tanan mga tao ngaro ka mga longsod nga tagsa tagsa kaniran nga nataohan na kanirang mga ama kay anpalista siranpag-izaiza.⁴Kamhan dizan ka Nazarit nga longsod doro ka lopa nga Galiliya minpanaw si Hosi ngaro ka Bitlihim nga longsod doro ka lopa nga Hoda kay ya Bitlihim ani ya nataohan na toong apo nga si Dabid nga karaang hari. ⁵Doro di si Hosi magpalista ka toong ngaran daw si Mariya nga toong asawhenen nga nakabdesan na Madazaw nga Ispirito nga garing ka Nagagihit.⁶Na, ka dizan pon siran mindateng di ya tirmino ni Mariya ka paganak. ⁷Sirado gajod ya kolanganan kamhan dizan ka sironganan ka mga baka min-anak si Mariya ka panganay nga amaama. Pagpotos naiza ka bata ka lampin inpabuntag dazon dizan ka pakananan na baka kay waradi ya logar dizan ka kolanganan.⁸Na, dizan ka samsamanan tongod ka Bitlihim may mga nagabantay ka mga karniro ka pagkakahabzen. ⁹Kahabzen pon ngani dizan kaniran waton di baza ya isang sinogo nga garing ka Nagagihit. Kamhan nasirawan gajod siran ka kapawa nga garing daked ka Nagagihit. Kamhan nabereng gajod siran kon sin-o iton?¹⁰Kamhan minlaong ya sinogo kaniran nga diri kamo magkahaldek kay nagadara hao ka balita nga madazaw nga makasaza gajod ka tanan mga tao. ¹¹Kay natao di ya kamazong Manlolowas nga si Kristo nga Magbabaja. Kamhan ya nataohan naiza nga bata ani ya longsod nga Bitlihim nga nataohan ni Dabid nga karaang hari. ¹²Na, wani ya makilalhan kaiton nga maimpis. Pangitan mazo iza nga inpotos ka lampin daw nagabentag dizan ka pakananan na baka. Ani ini ya inlaong na sinogo dizan ka mga nagabantay ka mga karniro.¹³Kamhan nagatipon dazon ya mga mataod nga tagalangit dizan ka sinogo. Nagapahisaza siran ka Nagagihit nga nagalaong nga ¹⁴sazaon ta ya Nagagihit nga nagahela daked ka langit kay palinawon naiza ya hinawa na mga mataod nga tao dimbaba ka kalibotan. Nakaangay gajod iza kaniran. Ani ini ya insaza niran.¹⁵Kamhan min-oli siran ngandakod ka langit. Kamhan namagsabot ya mga magbantazay ka mga karniro nga mamanaw di kita mazo ngaro ka longsod nga Bitlihim kay pangitan ta ya bata nga impanan-og kanta na sinogo nga garing ka Nagagihit. ¹⁶Kamhan minpanaw dazon siran. Pagdateng niran doro ka nataohan na bata nakitan niran si Mariya daw si Hosi daw ya bata. Impabuntag di matood ya maimpis dalom ka pakananan na baka.¹⁷Kamhan impanan-og niran ya pakahagdam na Nagagihit kaniran mahitongod kaiton nga maimpit. ¹⁸Naborong gazod ya mga manalingahay ka panan-og na mga magbantazay ¹⁹piro inbutang ni Mariya ya kanirang mga panaba dalom ka toong huna-huna. ²⁰Kamhan nangoli ya mga magbantazay ka kanirang mga bohi. Nagakanta siran ka pagsaza ka Magbabaja. Minsaza sab siran ka kanirang nakitan hasta ya kanirang nabatian garing ka sinogo na Nagagihit.²¹Na, pagdatong ka ikawalong ka aldaw ka pagpatori niran ka bata inngaranan matood kan Hisos kay ani ya insogo ni Gabril kan Mariya ka wara pon iza makabdesi.²²²³²⁴Pagkadogay kaiza minpanaw si Mariya daw si Hosi ngaro ka siyodad nga Hirosalim. Indara niran si Hisos kay ipakita iza ka pari dizan ka dakolang lagkaw nga pangamozoanan ka Nagagihit dazaw isarig iza ka Nagagihit. Ani ini ya inhinang niran kay kawandini pon impasoyat na Nagagihit kan Moysis nagalaong nga ya bata nga panganay isarig iza ka Nagagihit. Kamhan iza gajod ya antoman ka mga balaod na Nagagihit. Inhatag sab nin Mariya ka pari ya isang ka paris nga limokon dazaw ihalad naiza ka Nagagihit kay balaod ini nagalaong nga ya babazi nga bag-o pon min-anak kinahanglan ipahalad ya isang ka paris nga limokon kon ya dowang bolos nga salapati ka Nagagihit dazaw mahinglo di ya lawas na babazi dizan ka pagsulung na Nagagihit.²⁵Na, dizan ka Hirosalem may tao inngaranan kan Simiyon. Nagatoman gajod iza ka mga sogo na Nagagihit. Madazaw gajod ya pagpangalagad ka Nagagihit. Nagatagad iza ka pagtabang na Nagagihit ka mga kaliwatan ni Israil. Inharian sab iza na Madazaw nga Ispirito nga garing ka Nagagihit. ²⁶Minpakahagdam sab ya Ispirito kan Simiyon nga diri iza mapatay kotob ka pagkita naiza kan Kristo nga hari nga pinili na Nagagihit.²⁷Na, pagtandog na Ispirito ka hinawa ni Simiyon minsolod di iza ka dakolang lagkaw nga pangamozoanan ka Nagagihit. Kamhan mindatong disab ya ginikanan ni Hisos nga nagadara ka kanirang maimpis kay inhinang niran ya batasan niran ka pagtoman ka sogo na Nagagihit. ²⁸Kamhan ingool ni Simiyon si Hisos daw nagapasalamat iza ka Nagagihit nga nagalaong nga ²⁹Magbabaja, hatagan mo hao nga kanmong sogoonon ka kalinaw ka kanaong pagkapatay kay mintoman di ya saad mo kanao³⁰kay minkita di gajod hao ka Manlolowas nga makalibri ka kanmong mga sakop ka silot ka kanirang mga sala. ³¹Iko ya min-andam ka toong pagdatong dini ka tanan mga tao. ³²Dizan ka mga tao nga diri kon Yodayo ilawan ni Hisos ya dalan nga minpasingod ngaro ka matood nga Nagagihit. Dini kanta nga mga Hudiyo dakola ya kantang ngaran kay-an kay si Hisos ani ya kantang angay nga Hudiyo. Ani ini ya inlaong ni Simiyon.³³Kamhan naburong gajod ya ama daw ina ni Hisos ka inlaong ni Simiyon mahitongod kan Hisos. ³⁴Kamhan minpanarangin si Simiyon kaniran. Kamhan dizan kan Mariya nga ina na maimpis minlaong iza nga ining maimpit ani ya impili na Nagagihit. Iza ya anpabolag ka isa daw isa nga mga mataod nga Hudiyo. Ya mga ampasakop kanangiza mahatagan siran ka bag-ong kinabohi nga diri mawara. Ya mga ansopak kanangiza pakarohon siran ka silotanan nga diri mapareng nga laga. Bisan iza ya pinili na Nagagihit sopaken iza na mga mataod nga tao. ³⁵Dizan kanangiza impakitaya kanirang mga huna-huna nga tinago. Kamhan, Mariya, masakit gajod ya kanmong boot kay-an singod ka doltan ya kanmong debdeb ka lodzopagsopak na mga tao kan Hisos. Ani ini ya inlaong ni Simiyon.³⁶Kamhan dizan disab may babazi nga propita na Nagagihit. Si Ana ya ngaran. Ya toong ama si Panwil nga kaliwat ni Asir. Malaas di gajod si Ana. Pitong ka toig ya toong pagkaminzu. ³⁷Kamhan nabalo iza. Kamhan kawaloan nga ka toig may opat ya toong pagkamalaas. Kada aldaw daw kada kahabzon nagahola si Ana dizan ka dakolang lagkaw nga pangamozoanan ka Nagagihit kay nagapangalagad iza ka Nagagihit. Ya batasan naiza nagaanget iza ka makaen dazaw ampangamozo iza ka Nagagihit. ³⁸Na, ka nagapanaba pon si Simiyon kan Mariya mindatong disab si Ana. Kamhan nagapasalamat iza ka Nagagihit kay natao di si Hisos. Kamhan dizan ka mga Hudiyo nga nagatagad ka pagpabalik na Nagagihit kaniran ka paghari ka kanirang siyodad nga Hirosalem minpanan-og si Ana mahitongod kan Hisos.³⁹9 Pagkakamhan ni Hosi daw si Mariya pagtoman ka mga sogo na Magbabaja nangoli siran ka Nazarit doro ka Galiliya. ⁴⁰Kamhan minsolig ya maimpis nga si Hisos. Mabaskog ya toong lawas daw dakola isab ya toong kahagdamanan kay impanaranginan iza na Nagagihit ka madazaw.⁴¹Na, kada toig minbalik ya ginikanan ni Hisos ka siyodad nga Hirosalem kay mamista siran. Kamhan inhinang na mga Hudiyo ya batasan niran ka pagpan-ihaw ka mga nati na karniro. ⁴²Kamhan izang toig miniba si Hisos ka toong ginikanan pagpamista niran doro ka Hirosalem kay napolo may dowa nga ka toig di iza. ⁴³Pagkaliwas ka na pista minpabilin si Hisos doro ka Hirosalem. Kamhan wara mahagdam ya toong ginikanan. ⁴⁴Silaong niran nga dizan iza ka mga mataod nga namanaw nga tao. Pagpanaw niran ka isang aldaw dizan ka kanirang mga lomon daw mgakaibahan nagapakigkita gajod siran kan Hisos⁴⁵piro wara niran makiti. Kamhan minbalik siran ka Hirosalem dazaw pangotanhun kon hain sa waro si Hisos. ⁴⁶Pagdatong ka ikatolong aldaw nakitan niran si Hisos dizan ka dakolang lagkaw nga pangamozoanan ka Nagagihit. Nagalo-to iza dizan ka mga maistro ka tinoohan na mga Hudiyo. Nagapanalinga iza ka kanirang sindo. Kamhan may mga pangotana naiza kaniran. ⁴⁷Kamhan naborong ya tanan mga manalingahay kay madazaw gajod ya mga sambag ni Hisos ka mga maistro.⁴⁸Bisan ya ginikanan ni Hisos naburong siran kamhan nagalaong ya ina nga Dong, kay ono sa ya nahinang mo kanami? Kami ni ama nangita gajod kanmo kay dakola ya kawiod nami. ⁴⁹Minsambag si Hisos nga kay ono sa nangita sa kamo kanao? Kay ono sa wara kamo mahagdam nga kinahanglan dini ka hao ka lagkaw na kanaong Ama? ⁵⁰Piro wara siran makasabot ka toong sambag kaniran.⁵¹Kamhan minoli si Hisos ka Nazarit iba ka toong ginikanan. Mintoo isab iza kaniran. Kamhan wara malipat ya toong ina ka mga inhinang ni Hisos. ⁵²Na, pagsolig ni Hisos mindakola ya toong kahagdamanan. Inpanaranginan gajod iza na Nagagihit. Nakaangay isab ya mga tao kanangiza.

¹1 Pagkadogay kaiza si Howan nga Anak ni Zakariyas minsogod di iza pagwali doro ka mga Hudiyo. Na, ka nagasogod iza pagwali si Sisar Tibiriyo nga taga Roma ani ya labaw nga hari. Ilis iza ni Sisar Agosto. Kamhan ikanapolo may lima ding ka toig ya toong paghari. Kamhan may mga katimbang ni Sisar Tibiriyo. Si Ponsiyo Pilato aniya toong katimbang doro ka lopa nga Hoda. Si Hirodis ani ya toong katimbang doro ka lopa nga Galiliya. Si Pilipo nga lomon ni Hirodis ani ya katimbang doro ka lopa nga Itoriya daw ya lopa nga Trakonitis. Kamhan si Lisaniyas ani ya katimbang doro ka lopa nga Abilina. ²Kamhan si Anas daw si Kayapas ani ya mga labaw nga pari dizan kamga Yodayo ka pagsogod ni Howan ka pagwali ka mga tao. Na, ka nagahela pen si Howan doro ka kamingawan mindateng ya mga panaba na Nagagihit dizan kanang-iza.³Kamhan namanaw iza ngaro ka tanan mga dapit nga tenged ka sapa nga Hordan kay minwali iza ka mga tao nga nagalaong nga bizaan di mazo ya maongang batasan mazo. Kamhan benzagan ta kamo kay timaan iton nga impasaylo di na Nagagihit ya kamazong mga sala.⁴Na, ya inwali ni Howan ani ya nakatoman ka mga panaba ni Isayas nga karaang propita na Nagagihit mahitenged kan Howan nga nagalaong nga doro ka kamingawan may anhawag ka mga tao nga magalaong nga dazawen mazo ya kamazong batasan singed ka tao nga minhinglo ka dalan kay domatengay di ya Maanak na Nagagihit.⁵Kon kinabotan ya dalan ibetang mazo ya lopa. Kon antowastowas ya dalan patagen mazo. Kon nagaliko-liko ya dalan tol-iden mazo. Kon mataed ya bato hingloon mazo. Sinden mazo kaiton ya pagdazaw mazo ka kamazong batasan. ⁶Kamhan ankita ya tanan mga tao ka Manlolowasnga garing ka Nagagihit pagdateng naiza ngarimbaba. Ani ini ya inlaong ni Isayas mahitenged ka pagwali ni Howan.⁷Na, masara gazod nga kataod ya mga tao nga minkarini kan Howan kay ampabenzag siran. Kamhan minbaheg iza kaniran nagalaong nga kamo nga mga bakaken, nagapasingedsinged kamo ka mga halas pagpandalagan niran garing ka sonog ka pagharing na tao ka oma. Kay ono sa kamo nangarini kanao? Daw gosto baza kamo andalagan ka pagkazehet na Nagagihit kamazo?⁸Kon matood gajod ya paghinelsel mazo ipakita mazo ya madazaw nga batasan. Azaw kamo maghambog ka kamazong pagkakaliwat ni Abraham. Timan-an mazo gajod ini nga bisan ya mga bato dizan ka lopa mahimo iton hinangen na Nagagihit nga mga kaliwatan ni Abraham.⁹Pamolinged ini nga andam daan ya Nagagihit ka pagbetang ka silot kamazo kay singed kamo ka liwaan nga diri mamonga ka madazaw nga bonga. Kon diri kon madazaw ya bonga na liwaan deegen iton kamhan sonogon.¹⁰Kamhan nabereng ya mga mataed nga tao ka mga panaba ni Howan kaniran. Agon nangotana siran nga daw ono kontana ya hinangennami? ¹¹Minsambag si Howan nga ya tao nga dowang bolos ya bado kinahanglan ihatag ya isa dizan ka tao nga nahoboan. Ya tao nga maymakaon kinahanglan magbahin dizan ka tao nga waray makaon.¹²Kamhan minkarini kan Howan ya mga magsokotay ka bohis nga pabayran na hari nga Romanhon. Kamhan ya batasan niran onayoswagan ya bohis. Na, ampabenzag siran kan Howan agon nangotana siran nga Maistro, daw ono kontana ya hinangen nami? ¹³Minsambag siHowan nga azaw mazo pag-oswagan ya bohis.¹⁴Kamhan nangotana ya mga soldaw kan Howan nga bisan kami daw ono ya hinangen nami? Minsambag si Howan nga azaw kamo magpanapi pinaazi ka pagleges daw pagbetangbetang ka bisan sin-o nga tao.¹⁵Kamhan nangotana ya mga tao ka kanirang hena-hena nga si Howan daw iza si Kristo nga hari nga pinili na Nagagihit? ¹⁶Minsambag si Howan kanirang tanan nga nagabenzag hao kamazo ka sapa piro may ansonod pon kanao nga magbenzag kamazo ka Madazaw nga Ispirito nga garing ka Nagagihit dazaw paharian kamo naiza nga Ispirito. Silotan sab naiza ya tao nga maongang batasan. Dizan kanang-iza hao ya labing obos kay iza ya labaw ka gahem.¹⁷Pagdateng naiza dini kamazo pabelagen naiza ya mga madazaw nga tao daw ya mga maongang tao. Kay singed iza ka tao nga nagasisig ka begas. Kamhan ibetang naiza ya magazong begas dizan ka dapoganan piro ya apa sonogon iton dizan ka laga nga diri mapareng. Ani ini ya sambag ni Howan.¹⁸Kamhan mataed pon ya mga panaba ni Howan pagtambag naiza kaniran daw pagwali ka sindo mahitenged kan Hiso Kristo. ¹⁹Waray kahaldek naiza ka pagbaheg naiza kan Hirodis nga hari nga minpanapaw ka ipag nga si Hirodiyas kamhan mataed pon ya maongang hinang ni Hirodis. ²⁰Kamhan mindogang gajod ya sala ni Hirodis kay minpapiriso iza kan Howan.²¹Na, ka wara pon mapiriso si Howan nagapanbenzag iza ka mga mataed nga tao. Pagkakamhan sab naiza pagbenzag kan Hisosnagapangamozo si Hisos ka Nagagihit. Kamhan singed ka naabri di ya langit. ²²Kamhan minkarimbaba kan Hisos ya Madazaw nga Ispirito nga garing ka Nagagihit. Minpasingedsinged iton ka salapati. Kamhan may saba na Nagagihit nga garing daked ka langit nagalaong nga iko ya kanaong Anak nga kanaong naazakan. Nakasaza gajod iko kanao. Ani ini ya inlaong na Nagagihit.²³Na, pagsogod ni Hisos pagsindo ka mga tao mga katloan nga ka toig ya toong pagkamalaas. Kamhan nagahena-hena ya mga tao nga si Hisos maanak ka lamang iza ni Hosi. Na, wani ya inkalista ka mga kaapoan ni Hosi. Si Hosi ani maanak ni Hili. ²⁴Kamhan si Hili anak ni Matat. Kamhan si Matat anak ni Libi. Kamhan si Libi anak ni Milki. Kamhan si Milki maanak ni Hana. Kamhan si Hana anak ni Hosi.²⁵Kamhan si Hosi anak ni Matatiyas. Kamhan si Matatiyas anak ni Amos. Kamhan si Amos anak ni Nahom. Kamhan si Nahom anak ni Isli. Kamhan si Islianak ni Nagay. ²⁶Kamhan si Nagay anak ni Maat. Kamhan si Maat anak ni Matatiyas. Kamhan si Matatiyas anak ni Simay. Kamhan si Simay anak ni Hosi. Kamhan si Hosi anak iza ni Zoda.²⁷Kamhan si Zoda anak ni Zohana. Kamhan si Zohana anak ni Risa. Kamhan si Risa anak ni Zorobabel. Kamhan si Zorobabel anak ni Salatiil. Kamhan si Salatiil anak ni Niri. ²⁸Kamhan si Niri anak ni Milki. Kamhan si Milki anak ni Adi. Kamhan si Adi anak ni Kosam. Kamhan si Kosam anak ni Ilmodam. Kamhan si Ilmodam anak ni Iri. ²⁹Kamhan si Iri anak ni Hoswi. Kamhan si Hoswi anak ni Iliyazir. Kamhan si Iliyazir anak ni Zorim. Kamhan si Zorim anak ni Matat. Kamhan si Matat maanak ni Libi.³⁰Kamhan si Libi anak ni Simiyon. Kamhan si Simiyon anak ni Hoda. Kamhan si Hoda anak ni Hosi. Kamhan si Hosi anak ni Zonan. Kamhan si Zonan anak ni Iliyakim. ³¹Kamhan si Iliyakim anak ni Miliya. Kamhan si Miliya anak ni Mina. Kamhan si Mina anak ni Matata. Kamhan si Matata anak ni Natan. Kamhan si Natan anak ni Dabid. ³²Kamhan si Dabid anak ni Isay. Kamhan si Isay anak ni Obid. Kamhan si Obid anak ni Boos. Kamhan si Boos anak ni Salmon. Kamhan si Salmon anak ni Naason.³³Kamhan si Naason anak ni Aminadab. Kamhan si Aminadab anak ni Aram. Kamhan si Aram anak ni Arni. Kamhan si Arni anak ni Isrom. Kamhan si Isrom anak ni Paras. Kamhan si Paras maanak ni Hoda. ³⁴Kamhan si Hoda anak ni Hakob. Kamhan si Hakob anak ni Isak. Kamhan si Isak anak ni Abraham. Kamhan si Abraham anak ni Tara. Kamhan si Tara anak ni Nakor. ³⁵Kamhansi Nakoranak ni Sirog. Kamhan si Sirog anak ni Ragaw. Kamhan si Ragaw maanak ni Pilig. Kamhan si Pilig anak ni Ibir. Kamhan si Ibir anak ni Sila.³⁶Kamhan si Sila anak ni Kaynan. Kamhan si Kaynan anak ni Arpahad. Kamhan si Arpahad anak ni Sim. Kamhan si Sim anak ni Niwi. Kamhan si Niwi anak ni Lamak. ³⁷Kamhan si Lamak anak ni Matosalan. Kamhan si Matosalan anak ni Inok. Kamhan si Inok anak ni Zarad. Kamhan si Zaradanak ni Mahalalil. Kamhan si Mahalalil anak ni Kaynan. ³⁸Kamhan si Kaynan anak ni Inos. Kamhan si Inos anak ni Sit. Kamhan si Sit anak ni Adan. Kamhan si Adan anak na Nagagihit.

¹Na, minpanaw si Hisos dizan ka sapa nga Hordan nga imbenzagan ni Howan kanangiza. Kamhan inharian iza na Madazaw nga Ispirito nga garing ka Nagagihit. Kamhan inpakaro iza na Ispirito ngaro ka kamingawan. ²Keteb ka kap-atan nga ka aldaw min-anget si Hisos ka pagkaen doro. Kamhan magabengtasen di gajod iza. Kamhan intintal iza ni Satanas dazaw an-ato iza ka Nagagihit piro wara gajod si Hisos madaeg kay ingamit naiza pag-ato ya mga panaba na Nagagihit nga inpasoyat daan³Pagkadizan ka ni Satanas kan Hisos nagalaong iza ka pagtintal nga kon iko ya matood nga Maanak na Nagagihit sogoon mo ya mga bato dazaw mahinang nga makaen kay magabengtasen di gajod iko. ⁴Minsambag si Hisos nga diri hao ansogot kay may daan pinasoyat na Nagagihit nga nagalaong nga diri kon makaen ka lamang ya makabohi ka mga tao basta ya tanan mga panaba na Nagagihit ani gazed ya labaw nga makabohi ka mgatao.⁵Pagkakamhan kaiza impaiba ni Satanas si Hisos ngandaked ka poro na bobong nga ataas pagdazaw. Kamhan mapaspas ya pagpaseleng ni Satanas kan Hisos ka tanang mga longsod dini ka haloag nga kalibotan. ⁶Kamhan minlaong si Satanas kan Hisos nga kanao gazed ya katengedka pagdomara kaiton nga kalongsoran. Hao isab ya ampili kon sin-o ya magadomara. ⁷Na, kon lomohod ko pagtahod kanao ihatag o kanmo yakatenged ka pagdomara kaiton nga tanan.⁸Minsambag si Hisos nga diri hao ansogot kay may daan pinasoyat na Nagagihit nga nagalaong nga ya Magbabaja nga kamazong Nagagihit iza gajod ya sazaen mazo. Iza sab ya kamazong alagaden, waray lain.⁹Pagkakamhan kaiza impaiba ni Satanas pag-otro si Hisos ngaro ka siyodad nga Hirosalem. Kamhan in-ated iza ngandaked ka taway na binobongan nga dakolang lagkaw nga pangamozoanan ka Nagagihit. Kamhan minlaong si Satanas kan Hisos nga kon matood pen nga ikoy Anak na Nagagihit emempag iko ngambaba ka lopa. ¹⁰Kamhan diri masakitan ya lawas mo kay may daan pinasoyat na Nagagihit nga nagalaong nga pabantazan iko ka toong mga sinogo. ¹¹Bohaten iko niran. Kamhan bisan ya paa mo diri andasmag ka bato.¹²Minsambag si Hisos nga diri hao ansogot kay may daan pinasoyat na Diyos nga nagalaong nga azaw mazo pagsorazi ya Magbabaja nga kamazong Nagagihit. ¹³Na, wara gajod madaeg si Hisos agon minheneng di si Satanas pagporba. Kamhan minpanaw iza hangtod ka may logar pon naiza ka pagtintal kan Hisos.¹⁴Pagkakamhan kaiza min-oli di si Hisos ka lopa nga Galiliya. Inharian iza na Madazaw nga Ispirito nga garing ka Nagagihit. Kamhan impanan-og ya toong mga inhinang doro ka Galiliya. ¹⁵Minsindo sab iza dalem ka mga singbahan na toong angay nga Hudiyo. Kamhan insaza iza na mga mataed nga tao.¹⁶Pagkadogay kaiza mindateng iza ka longsod nga Nazarit nga toong sinoligan. PagkaSabado kaiza minseled iza ka singbahan kay ani ya toong batasan ka aldaw nga tigpahimlay na mga Hudiyo. Kamhan mintindeg iza kay ambasa iza kaniran. ¹⁷Intagan sab iza ka basahen nga insoyatan ni Isayas nga karaang propita na Nagagihit. Paghebad naiza ya linokot nga basahen inbasa naiza iton nga sinoyat nga nagalaong nga¹⁸inharian hao na Madazaw nga Ispirito nga garing ka Nagagihit kay inpili hao naiza ka pagsangzaw ka mga pobri ka madazaw nga panan-og. Kamhan inpadara hao naiza ka mga binihag ka pagpanan-og kaniran nga nalibri di siran. Dazawen nao ya mata na mga nabota. Tabangan nao ya mga tao nga indaegdaeg. ¹⁹Ipanan-og nao nga mindateng di ya tirmino ka paglibri na Nagagihit ka mga tao ka silot ka kanirang mga sala kon ansakop siran kanang-iza. Ani ini ya imbasa ni Hisos.²⁰0Kamhan inlokot naiza ya basahen daw indohol ka magtimbangay nga tao. Paglo-to naiza ka pagsindo kaniran minseleng gazed siran pagdazaw kanangiza. ²¹Kamhan minsogod iza ka pagmaymay kaniran nga nagalaong nga koman aldaw mintoman gajod ini nga nabatian mazo kay hao gajod ya tao nga insoyatan na Nagagihit ²²Kamhan nakaangay sirang tanan kan Hisos. Piro nabereng siran kon hain iza magtoon ka toong pagmaymay. Minlaong siran nga taga dini ka lamang iza. Anak ka lamang iza ni Hosi.²³Na, mahagdam si Hisos nga nagadowadowa ya kanirang hena-hena. Kamhan minbaheg iza kaniran nagalaong nga kay ono sa nagadowadowa sa kamo? Wara kamo magtoo kanao. Kamhan baza kamo kanao ka mga dakolang hinang dini ka kanaong kaogaringeng longsod singed ka kanaong inhinang nga nabatian mazo doro ka longsod nga Kapirnaom. ²⁴Timan-an mazo gajod ini nga bisan sin-o ya propita na Nagagihit kon andateng iza ka toong kaibahan wara iza tahoda.²⁵Na, maghena-hena kamo kaini nga matood nga kawandini pen ka bohi ka si Iliyas nga karaang propita na Nagagihit wara gajod orana keteb ka tolong ka toig may tenga. Nadateng sab ya kantang lopa ka grabing pihit. Na, bisan mataed ya mga balo nga babazi nga Hudiyo wara si Iliyas magtabang kaniran ²⁶kay impakaro hinoa iza na Nagagihit ka isang balo nga taga Siripat doro ka lain lopa nga Sidon dazaw tabangan iza. ²⁷Bisan si Ilaysa nga karaang propita na Nagagihit ka bohi pon iza mataed ya mga kagiden nga Hudiyo piro wara iza magdazaw ka kanirang mga lawas. Ani hinoon yaintambal naiza si Naman nga taga Siriya. Ani ini ya inlaong ni Hisos katoong kaibahan nga mga Hudiyo.²⁸Kamhan nazehet gajod siran pagdazaw kan Hisos kay minpanaba iza nga inkaloy-an na Nagagihit ya mga tao nga diri kon Hudiyo. ²⁹Kamhan mintindeg gajod siran kay bogawen si Hisos dini ka kanirang longsod. Na, ya dapit na kanirang longsod ani ya bobongay. Kamhan imbira niran si Hisos dizan ka kilid na pangpang nga ataas pagdazaw. Kamhan itolod niran kontana si Hisos ngambaba ka pangpang. ³⁰Piro min-azi si Hisosdizan tenged kaniran. Kamhan minpanaw iza ngaro. Wara makapaniid ya mga tao kon ankar-in iza pagsinged.³¹Pagkakay-an kaiza mindateng si Hisos ka longsod nga Kapirnaom doro ka Galiliya. PagkaSabado kaiza nga tigpahimlay na mga Hudiyo minsindo iza kaniran. ³²Kamhan nabereng gajod siran kay labaw gajod ka gahem ya mga panaba ni Hisos.³³Na, ka dizan pen si Hisos ka singbahan may tao nga inboang na maonga nga minsinggit kanangiza nga nagalaong nga ³⁴Hisos nga tagaNazarit, kay ono sa nga hilabtan sa mo kami? Daw ani ya inkarini mo ya pagpatay mo kanami? Mahagdam gajod hao nga iko gajod ya Anak na Nagagihit nga waray maonga.³⁵Minsambag si Hisos pagbaheg nga magpahenek ko. Domalagan di ko ka tao. Ka wara pon magdalagan indagbes na maonga ya tao dizan tenged ka mga tao. Kamhan minpanaw ya maonga. Wara madaet ya lawas na tao. ³⁶Kamhan nabereng gajod ya mga naneleng. Namaglaong siran nga labaw gajod ka gahem ya pagpanaba ni Hisos! Bisan ya mga maonga antoo baza siran ka toong sogo. ³⁷Kamhan minlekep di gajod ya ngaran ni Hisos doro ka lopa nga Galiliya.³⁸Na, kamhan di ya pagsingba ni Hisos agon minkaro iza ka lagkaw ni Simon. Na, ya bozag nga ogangan ni Simon imbangkag gajod iza. Kamhan minhangzo siran kan Hisos dazaw tabangan iza. ³⁹Na, pagkadizan ni Hisos ka nabedlay minbaheg iza ka hilanat. Kamhan inhowasan matood iza ka toong hilanat. Kamhan minbangon dazon iza kay ampakaen iza kaniran.⁴⁰Pagkadelem ka kaiza impaarani na mga tao kan Hisos ya mga mataed nga tao nga nagaanget ka mga lain-lain nga mga inmano. Impandampa ni Hisos ya kanirang mga lawas. Kamhan nabahaw matood ya kanirang mga lawas. ⁴¹Impalogwa isab naiza ya mga maonga ka mga tao. Paglogwa niran minsinggit siran nga iko ya Maanak na Nagagihit! Piro minbaheg iza kaniran. Kamhan diri togotan ka pagpanaba kay mahagdam siran nga iza si Kristo nga pinili na Nagagihit. Ani ini ya pagtabang ni Hisos ka mga tao ka dizan pon iza ka lagkaw ni Simon.⁴²Na, pagkakamaaldawen ka minpanaw si Hisos ngaro ka waray tao kay ampangamozo iza ka Nagagihit. Kamhan impangitan iza na mga tao. Pag-apas niran gosto niran nga diri iza ampanaw. ⁴³Minsambag iza nga kinahanglan doro ka mga iba nga longsod anwali pon hao ka sindo mahitenged ka pagpasakop na Nagagihit ka mga tao kay ani ya tood na Nagagihit ka pagpakarimbaba kanao ka kalibotan. ⁴⁴Pagkakamhan doro ka tibolos lopa nga Huda minwali iza ka mga Hudiyo dalem ka kanirang singbahan.

¹May isang aldaw nga dizan si Hisos ka baybazen na danaw nga Ganasarit. Masara gajod nga kataed ya mga tao nga minheet kay ampanalinga siran ka sindo nga garing ka Nagagihit. ²Kamhan dizan ka baybazen nakita ni Hisos ya dowang bolos nga baloto kay inbilin na mga mang-isdaay kay namaghogas pon siran ka mga lazà. ³Kamhan minleen si Hisos ka baloto ni Simon. Kamhan minhangzo iza kan Simon ka pagpasibogsibog dizan ka sapa kay anlo-to iza pagsindo pen naiza ka mga tao.⁴Pagkakamhan naiza pagsindo kaniran minlaong iza kan Simon nga palawed kamo. Kamhan itaktak mazo ya kamazong lazà kay mataed ya isda dakoza kaiza. ⁵Minsambag si Simon nga Maistro, kazinang kahabzen waray heneng nami ka pagpangisda. Kamhan wara gazed tarai ya kanaming lazà. Piro kon somogot ko kanami, managat kami pag-isab. ⁶Na, pagpanagat niran pag-isab mataed matood ya isda. Magisi kontana ya kanirang lazà kay masara gazed nga kabeg-at ya pagbira. ⁷Agon minhawag siran ka mga iba dizan ka lain baloto dazaw antabang. Pagdateng niran inpono gajod niran ya dowang baloto agon hapit di siran malened.⁸Pagpakakita ka ni Simon Pidro ka inhinang ni Hisos minlohod dazon iza ka paahan ni Hisos daw minlaong nga Magbabaja, madazaw gajod iko. Maonga gajod hao agon pomanaw ko dini kanao. ⁹Ani ini ya toong inlaong kay nabereng gajod iza daw ya toong mga iba ka kanirang inlazà. ¹⁰Nabereng isab ya mga anak ni Sibidiyo nga si Santiago daw si Howan nga mga iba ni Simon ka pagpangisda. Kamhan minsambag si Hisos kan Simon nga diri ko magkahaldek kay sokad koman antoldo hao kanmo dazaw mahagdam ko ka pagpasakop ka mga tao kanao singed ka pagpanlazà mo ka mga isda. ¹¹Kamhan mingozod siran ka kanirang mga baloto dizan ka baybazen. Kamhan imbizaan niran ya tanan kay an-iba gajod siran kan Hisos.¹²Na, may isang aldaw ka dizan pon si Hisos ka isang longsod insogat naiza ya tao nga masarang kagid. Pagpakakita naiza kan Hisos minlohod iza ka toong paahan. Minhangzo iza nga nagalaong nga Sinyor, kon somogot ko ka pagpangamozo nao kanmo dazawen mo ya kanaong masakit. ¹³13Kamhan inhogam iza ni Hisos daw nagalaong nga Loy, ansogot hao. Nawara di ya masakit ka kanmong lawas. Kamhan nadazaw di matood ya toong lawas.¹⁴Kamhan minsogo si Hisos nga nagalaong nga diri ko magpanan-og ka mga tao ka inhinang o kanmo. Pomanaw ko naa ngaro ka pari. Magpakita ko ka kanmong lawas diton. Kamhan magtoman ko ka balaod ni Moysis ka paghalad kay dazaw magmatood ya mga kataohan nga nawaraan di ko ka kanmong kagid.¹⁵Kamhan bisan diri ansogot si Hisos, impanan-og di hinoon ya toong inhinang dizan ka mga mataed nga tao. Kamhan masara gajod nga kataed ya tao nga mintipon dizan kan Hisos kay maazak siran pagpanalinga ka toong mga panaba. Anpatambal sab siran ka kanirang mga masakit piro ¹⁶minpanaw hinoa si Hisos ngaro ka waray tao kay ampangamozo iza ka Nagagihit.¹⁷Na, may isang aldaw nga nagasindo pen si Hisos ka mga tao pag-isab. Kamhan dakoza kaiza namaglo-to ya mga Parasiyo daw ya mga maistro ka tinoohan na mga Hudiyo. Garing siran ka tanan mga longsod ka Galiliya daw Huda daw ya siyodad nga Hirosalem. Kamhan ya gahem na Nagagihit dizan iton kan Hisos ka pagdazaw ka mga masakiten nga tao.¹⁸Na, ka nagasindo pon iza kaniran may mga mindateng nga namaglahong ka tao nga diri mahingas ya lawas. Kamhan pabentagen kontana dizan ka pag-atobang kan Hisos. ¹⁹Piro masiet gajod ya pirtahan ka tao agon minpanik siran ka hagdan ngandaked ka malakbang nga atep. Pagpakaboslot ka niran ka atep nga tenged ni Hisos intonton niran ya bowahan nga inbentagan na paralitiko.²⁰Pagpakakita ka ni Hisos ka inhinang niran mahagdam iza nga minsarig gajod siran kanangiza ka pagbahaw kaiton nga tao. Kamhan minlaong iza ka nabedlay nga Loy, impasaylo di nao ya kanmong mga sala. ²¹Pagpakabati ka na mga Parasiyo daw ya mga maistro ka inlaong ni Hisos ka paralitiko minlaong siran ka kanirang hena-hena nga garboso gajod si Hisos pagbakak nga iza ya Nagagihit kay ya Nagagihit ani ya may gahem ka pagpasaylo ka mga sala.²²Mahagdam dazon si Hisos nga maonga ya kanirang hena-hena agon nangotana iza nga kay ono sa nga malain sa ya kamazong hena-hena kanao? ²³Dini ka paralitiko singed ka masazon ya pagpasaylo ka toong mga sala kay diri mazo makita kon dizan pon ya toong mga sazop kon wara di. Piro malised ya pagdazaw ka toong lawas kay makita dazon kon madazaw di iton kon diri pen. ²⁴Koman ipakilala nao kamazo nga may gahem nao ka pagpasaylo ka mga sala na bisan sin-o nga tao kay hao gajod ya minhon-a ka bisan sin-o nga mahon-ang tao. Kamhan minsogo si Hisos ka paralitiko nga bomangon di ko. Lokoton di mo ya bentagan mo. Om-oli ko ngaro ka lagkaw mo.²⁵Kamhan minbangon matood ya paralitiko daw minhipid dazon iza ka toong bentagan. Pagpanaw naiza ngaro ka toong lagkaw insaza gajod naiza ya Nagagihit. ²⁶Kamhan nabereng gajod ya tanan mga tao kay madazaw gajod ya inhinang ni Hisos. Insaza gajod niran ya Nagagihit daw nagalaong nga wara sa sokad ya nakitan nami nga singed kaini.²⁷Pagkakamhan kaiza minpanaw si Hisos. Kamhan min-azi iza dizan ka opisina nga bayranan ka mga bohis na mga karga. Kamhan ya magsokotay ka mga bohis nga inngaranan kan Matiyo ani ya nakitan ni Hisos kay nagalo-to iza dizan ka toong opisina. Kamhan minlaong si Hisos kan Libi nga somakop ko kanao. ²⁸Kamhan mintindeg si Libi. Impamizaan naiza ya tanan kay an-iba iza kan Hisos.²⁹Pagkakamhan kaiza dizan ka lagkaw min-andam si Libi ka dakolang kombiti kay ampakaen iza kan Hisos. Kamhan may mga mataed nga magsokotay singed kan Libi daw ya mga iba peng tao namagsaro kaniran. ³⁰Ka nagakaen pen sirang tanan impaniidan siran na mga Parasiyo daw ya mga iba nga maistro nga hopaw ka lamang ya kanirang pagtoo. Kamhan nagamahay siran ka mga sakop ni Hisos nga nagalaong nga kay ono sa kamo nga minsaro sa kamo daw ya mga magsokotay daw. mga salaan nga tao? Ani ini ya pangotana niran kay ya batasan na mga magsokotay ka bohis onay oswagan ya bohis. ³¹Minsambag si Hisos kaniran nga pamolinged ini nga ya mga tao nga madazaw ya lawas wara siran magpatambal basta kay ya mga masakiten. ³²Kamhan wara hao magkarini ka pagtabang ka mga matadeng nga tao basta kay ya mga makasasala dazaw anhinelsel siran ka kanirang mga sala³³Kamhan minlaong ya mga Parasiyo kan Hisos nga ya batasan na mga sakop ni Howan nga Magbenzagay daw ya kanaming mga sakop onay siran nga nagatoman ka batasan ka pag-anget ka makaen dazaw ampangamozo siran ka Nagagihit. Kamhan nabereng kami kay ya kamazong mga sakop nagakaen siran daw nagainem. ³⁴Minsambag si Hisos pagpamolinged nga ya kanaong kasakopan singed siran ka mgamagkombitihay. Kamhan dizan kaniran hao ya singed ka banahen agon ka dini pen hao kaniran diri siran an-anget ka makaen. ³⁵Piro may tirmino nga kaw-en hao garing ka kanaong mga sakop anipen omanget siran ka makaen kay mabeg-at ya kanirang hinawa.³⁶Wani ya pamolinged dazaw mahagdam kamo nga ya kanaong sindo diri makaangay ka mga balaed nga tinoohan na mga Hudiyo kay ya kanaong sindo singed iton ka bag-ong panapton. Kamhan ya mga balaed na mga Hudiyo singed iton ka bado nga nadonot di. Na, pagtopak nita ka nadonot nga bado diri di gamiten ya bag-ong panapton kay basi kay-an ka paglaba ka bado ankezes ya itopakay nga bag-ong panapton. Kamhan magakagisi ya daan bado pagdobli.³⁷Bisan ya bag-ong bino nga magabora pon diri ihalin ka daan len-anan nga kindal na kanding kay kon begketen ya ba-ba na len-anan magisi gazed iton. Kamhan an-awas ya bino daw kanogon sab ya len-anan nga magisi. ³⁸Agon gamiten gazed ya bag-ong len-anan. Ani ini ya pamolinged ni Hisos ka mga tao dazaw mahagdam siran nga ya toong sindo diri makaangay ka mga balaed ngatinoohan na mga hudiyo. ³⁹Antiwas pen hao pagpamolinged kamazo. Ya mga balaed na mga hudiyo singed iton ka daan bino. Kamhan ya kanaong sindo singed iton ka bag-ong bino. Ya tao nga naanad pag-inem ka daan bino diri izaan-angay ka bag-ong bino kay magalaong iza nga ya daan bino ani ya madazaw.

¹Sabado ani ya tigpahimlay na mga Hudiyo. Pag May isang Sabado dizan ka homazan nagaazi si Hisos. Na, ya-azi ni Hisos dizannagapangitlo ya toong mga sakop ka homay daw nagapangorokoso. Kamhan kanen niran. ²Pagpakapaniid ka na mga Parasiyo kanin Hisosminbaheg siran nga nagalaong nga minlapas gazed ya kanmong mga sakop ka balaed na Nagagihit kay koman nga tigpahimlay min-ani siran ka homay³Minsambag si Hisos nga mahagdam kamo daan ka inhinang ni Dabid nga karaang tao na mga Hudiyo. Kawandini pon imbengtas iza daw ya toong kaibahan kay inlopog siran na kanirang mga kaaway. ⁴Agon pagdateng niran ka lagkaw nga pangamozoanan ka Nagagihit minkaen si Dabid ka tinapay nga inhalad na mga Hudiyo ka Nagagihit. Kamhan minpakaen iza ka toong kaibahan. Minlapas matood sin Dabid ka kantang balaed kay ya mga pari anikay ankaen kitong mga tinapay. Piro wara sin Dabid makasala ka Nagagihit kay nagalised siran ka kabengtas. ⁵Labaw pon ya gahem nao ka gahem ni Dabid kay minhon-a hao ka bisan sin-o nga mahon-ang tao agon hao yaamboot kon ono ya madazaw nga hinang na tao ka aldaw nga tigpahimlay. Ani ini ya sambag ni Hisos ka mga Parasiyo.⁶May isa pon nga ka Sabado nga minseled gihapon si Hisos ka singbahan na mga hudiyo kay ansindo iza ka mga tao. Dizan disab may tao nga diri mahingas ya pikas nga toong alima. ⁷Kamhan ya mga maistro ka tinoohan na mga hudiyo daw ya mga Parasiyo nagapaniid gajod siran kan Hisos kay kon dazawen naiza ya alima naiton nga tao awazen niran kay singed ka antarabaho iza koman nga aldaw nga tigpahimlay. ⁸Mahagdam si Hisos ka kanirang hena-hena agon minlaong iza ka tao nga komarini ko naa. Tomindeg ko naa dini ka tenga. Kamhan mintoo dazon ya tao.⁹Kamhan nangotana si Hisos ka mga Parasiyo nagalaong nga ya balaed na Nagagihit mahitenged ka aldaw nga tigpahimlay daw itogot ka pagkalooy ka tao kon itogot ka pagdaet ka tao? ¹⁰Pagseleng ni Hisos kanirang tanan minsogo iza ka tao nga Loy, henaten mo ya kanmong alima. Kamhan inhenat matood naiza ya toong alima. Kamhan minbalik dazon ya kabaskeg na toong alima singed ka karig-en na isang alima. ¹¹Kamhan nazehet gajod ya mga Parasiyo kan Hisos. Namagsabotsabot dazon siran nga patazen niran si Hisos.¹²Pagkakamhan kaiza minkandaked si Hisos ka kilid na bobong kay ampangamozo iza ka Nagagihit. Wara iza magheneng pagpangamozo kaizanga kahabzen. ¹³Pagkaaldaw kaiza inpatipon naiza ya toong mga sakop kay pilien naiza ya napolo may dowang ka tao nga toong mga sinarigan. Na, ya ngaran na mga sinarigan ani ya apostolis.¹⁴Ya primiro ani si Simon nga indagnazan naiza kan Pidro. Sonod si Andris nga toong manghod. Kamhan ya maglomon nga si Santiago daw si Howan. Kamhan si Pilipo daw si Bartolomi ¹⁵daw si Matiyo daw si Tomas daw si Santiago nga maanak ni Alpiyo. Kamhan si Simon nga masinopaken ka hari nga Romanhon. ¹⁶Kamhan si Hodas nga maanak ni Santiago daw si Hodas nga taga Kariyoti ani ya an-edlaw kan Hisos. Ani ini ya mga ngaran na mga sinarigan ni Hisos nga napolo may dowa siran.¹⁷Na, pagkakamhan ni Hisos pagpili kaniran min-iba iza kaniran paglegsad. Pagdateng naiza ngambaba ka patag minheneng iza kay mintipon dizan ya mga iba nga sakop naiza nga mataed siran. Kamhan masara gazed nga kataed ya mga tao dizan. Garing siran ka mga tanan dapit ka Yoda daw ya siyodad nga Hirosalem daw ya baybazen na dagat tenged ka longsod nga Tiro daw Sidon kay anpanalinga siran ka mga panaba ni Hisos. Ampatambal isab siran ka kanirang mga masakit. ¹⁸Kamhan mindazaw iza ka mga tao nga imboang na mga maonga. ¹⁹Antoldok kontana sirang tanan kan Hisos kay dakola ya toong gahem ka pagpabahaw kanirang tanan.²⁰Kamhan minseleng si Hisos ka toong mga sakop daw nagalaong nga kamo nga kanaong mga sakop, masazaen kamo nga mga pobri kaymahatagan kamo na Nagagihit ka mga madazaw kay iza ya insakopan mazo. ²¹Masazaen kamo kon inbengtas kamo koman kay bosogon kamo kayan. Masazaen kamo nga nagahaza koman kay ankatawa ka kamo kay-an.²²Masazaen kamo kon nagakontara daw nagabiza daw nagabetangbetang ya mga tao kamazo kay hao ya insakopan mazo. ²³Magsaza kamo kon maazihan mazo ini. Magsazaw kamo ka kasaza kay dakola ya primyo nga in-andam para kamazo daked ka langit. Kay bisan ya mga karaang propita na Nagagihit nga minhon-a kamazo, siran gihapon indaegdaeg na mga kaapoan na mga mindaegdaeg kamazo.²⁴Kamhan kamo nga wili ya kamazong hena-hena ka kamazong kowarta, magalised kamo kay-an kay koman ka lamang ya kamazong kasaza. ²⁵Nangabosog di kamo koman piro magabengtasen kamo kayan. Dakola ya kasaza mazo koman piro magahaza gazed kamo kay-an.²⁶Kamo nga mga insaza na mga tao magalised kamo kay-an kay bisan ya mga karaang propita nga bakaken, insaza gihapon siran na mga kaapoan na mga minsaza kamazo.²⁷Manalinga kamo kanao nga azaken mazo ya kamazong mga kaaway. Dizan ka mga nagakontara kamazo hinangen mazo ya madazaw. ²⁸Kon andaetdaet ya tao kamazo pagpanaba magsambag kamo ka madazaw. Kon ambetangbetang ya tao kamazo magtabang kamo kanangiza ka pag-ampo ka Nagagihit.²⁹Kon ansampalo ya tao ka pikas nga pisngi mo ihatag mo hinoon ya isang pikas nga pisngi mo. Bisan kawsahan ko kamhan ya ipabazad ani ya kanmong bado idogang pon ya paghatag kahabel mo. ³⁰Bisan sin-o ya anpakitabang kamazo tagi iza. Kon kawaten ya mga betang mazo diri mazo pagbawien.³¹Magbatasan kamo kamga iba nga tao singed ka batasan nga in-azakan mazo garing kaniran. ³²Kon anikay pagaazakan mazo ya mga nagakaangay kamazo, diri gajod kamo mahatagan na Nagagihit ka primyo daked ka langit. Kay bisanya mga tao nga diri ankilala ka Nagagihit siran gihapon ya an-angay ka mga nagaangay kaniran. ³³Kon anbales kamo ka madazaw dizan ka mga nagaangay kamazo waray primyo mazo kay anika sab ya batasan na mga diri ankilala ka Nagagihit. ³⁴Kon anpaotang kamo ka mga tao nga an-impas kamazo waray primyo mazo kay anika sab ya batasan na mga tao nga diri ankilala ka Nagagihit.³⁵Mag-angay kamo ka kamazong mga kaaway. Diri kamo magbales ka maonga. Magtabang kamo kaniran bisan wara siran magtabang kamazo dazaw ipakita mazo nga kamo ya mga maanak na Nagagihit nga pinakalabaw. Kamhan dakola ya primyo kamazo kay madazaw ya batasan na Nagagihit ka tanan mga tao bisan maonga siran daw wara magpasalamat kanangiza. ³⁶Agon kaloy-an mazo ya bisan sin-o nga tao singed ka pagkalooy na Ama mazo kaniran.³⁷Diri kamo maghokom ka iba nga tao. Kamhan diri kamo hokman na Nagagihit. Diri kamo maghena-hena ka iba nga tao nga silotan iza na Nagagihit. Kamhan diri kamo silotan na Nagagihit. Magpasaylo kamo ka sajop na tao kamazo. Kamhan pasaylohon kamo na Nagagihit.³⁸Homatag kamo ka mga mataed nga tao dazaw balsan kamo na Nagagihit. Ya hatag naiza kamazo singed iton ka isang ka gantang nga pono gajod ka begas daw pasobrahan pon. Kon dakola ya kamazong hatag balsan kamo ka kadakola. Kon geramay ya kamazong hatag balsan kamo ka geramay.³⁹Minpamolinged isab si Hisos kaniran nga nagalaong nga ya nabota nga tao daw anhabit iza ka ibang tao nga nabota dazaw antabang kapagpanaw? Diri. Kay kon ampanaw siran dizan ka dalan maholog gajod sirang dowa dalem ka teheb. ⁴⁰Kon gosto ya maistro nga madazaw ya batasan na mga antoon, primiro paniidan na maistro ya toong kaogaringeng batasan. Kay ya mga antoon kon makamhan siran pagtoon ya kanirang batasan daw ya batasan na maistro mag-anika iton.⁴¹Na, wani ya pamolinged mahitenged ka tao nga nagaazak ka pagpangita ka sazep dizan ka iba nga tao. Ya sala na tao nga nagapangita ka sazep singed iton ka toroso dizan ka mata. Kamhan ya sajop na tao nga inpangitan singed iton ka geramay nga poling dizan ka mata. Kamhan singed ka nabota ya tao nga nagapangita ka sajop kay silaong naiza nga waray sala naiza. ⁴²Na, onhon sa naiza pagkawa ka geramay nga poling dizan ka mata na iba nga tao kon may toroso dini ka toongmata? Ka primiro pen magbiza iza ka pagpagarbo ka toong batasan, anipen makatabang iza kaiton nga tao pagpabiza ka sala.⁴³Ya liwaan nga waray kasakit mamonga iton ka madazaw nga bonga. Ya liwaan nga masakiten diri mamonga ka madazaw nga bonga. ⁴⁴Paniidan mazo ya bonga na liwaan kay ani ya timaan ka kahimtang na liwaan. Kay diri mamonga ya makahilo ka madazaw nga protas.⁴⁵Singed iton ka tao kay kon magazon ya hena-hena na tao magazon isab ya panaba na tao. Piro kon maonga ya hena-hena na tao maonga isab ya panaba na tao. Kay bisan ono ya panaba na tao garing iton ka toong hena-hena.⁴⁶Kay ono sa nga magasabi sa kamo kanao nga Ginoo, Ginoo, kamhan wara kamo magtoman ka kanaong sogo kamazo? ⁴⁷Pamolinged ini nga bisan sin-o ya nanalinga ka kanaong mga panaba kamhan tomanen naiza singed iza ⁴⁸ka tao nga minlagkaw dizan ka lopa nga madazaw ogdokan. Ararem isab ya pagteheb naiza ka toong mga ogdok. Pagkakamhan naiza paglagkaw minbaha ya sapa. Pag-azi ka na sapa dizan ka toong lagkaw diri madeeg iton kay marig-en gajod ya in-ogdokan.⁴⁹Kamhan ya tao nga diri antoman ka kanaong mga panaba singed iza ka tao nga minlagkaw dizan ka lopa nga mahetek. Kamhan diri sab kon ararem ya pag-ogdok naiza. Pagbaha ka na sapa daw pag-azi ka na sapa dizan ka toong lagkaw nadeeg dazon iton kay diri kon marig-en ya ogdok. Nageba dazon ya toong lagkaw. Ani ini ya sindo ni Hisos kaniran.

¹Pagkakamhan ni Hisos pagpanaba ka toong sindo dizan ka pagpanalingzan na mga tao minpasinged iza ngaro ka longsod nga Kapirnaom.²Na, doro ka Kapirnaom may nagahela nga isang Romanhon nga kapitan ka mga soldaw. Kamhan may isang sogoonon naiza nga pinayangga nga nagapinal di ka toong masakit. ³Pagpakabati ka na kapitan nga dizan di si Hisos impakaro naiza ya mga oloolo na mga Hudiyo dazaw pakarinihon si Hisos dazaw ipatambal ya toong sogoonon. ⁴Pagdateng niran kan Hisos minpakilooy siran nga nagalaong nga bisan Romanhon ya kapitan madazaw kon tabangan mo iza ⁵kay nakaangay iza ka mga Hudiyo kay izang dini kaini dakola ya pagtabang naiza kanami paghinang ka kanaming singbahan.⁶Kamhan min-iba si Hisos kaniran. Na, ka hapit siran andateng ka lagkaw inpasogat ka isab dazon na kapitan ka toong mga iba kay dazawlong-on si Hisos nga Magbabaja, diri di lamang magpadateng ngarini ka lagkaw kay masipeg hao kon ampanik ko dini ka kanaong lagkaw kaydiri kon Hudiyo hao. ⁷Agon kazina impasogoan nao iko ka mga Hudiyo. Na, panabaen di mo lamang dini ka dalan dazaw mawara ya masakit na kanaong sogoonon kay labaw gajod ka gahem ya kanmong sogo. ⁸Kay bisan hao antoman gajod hao ka sogo na minbeet kanao. Kamhan ansogo isab hao ka mga soldaw. Kon ansogo hao ka isa ka pagpanaw, antoo dazon iza. Kon ansogo hao ka iba ka pagkarini, antoo dazon iza. Kon ansogo hao ka kanaong oripon ka pagtarabaho, antoo dazon iza.⁹Pagpakabati ka ni Hisos ka mga panaba na kapitan nabereng iza kay dakola ya pagsarig naiza ka toong gahom. Kamhan minlaong iza kamga magasonod ka toong panaw nga ya pagsarig na kapitan ka kanaong gahem dakola iton ka pagsarig na bisan sin-o nga kaliwat ni Israil. ¹⁰Kamhan minbalik ka lagkaw ya mga sinogo na kapitan. Kamhan nakita niran nga madazaw di matood ya sogoonon.¹¹Na, ka wara pon madogay minpasinged si Hisos ngaro ka longsod nga Nain. In-ibahan gihapon na toong mga sakop daw ya mga mataed nga tao. ¹²Pagdatong ka naiza ka pirtahan na longsod insogat naiza ya mga tao nga namaglahong ka napatay kay ilebeng. Na, ya napatay nga amaama bogtong maanak iza na balo nga babazi. Kamhan mataed ya mga taga Nain min-iba ka balo pagkaro ka lebnganan. ¹³Pagpakakita ka na Magbabaja ka nabalo nga napatzan nagakalooy iza kamhan nagalaong nga diri ko maghaza. ¹⁴Kamhan minkandizan si Hisos ka bentaganan na napatay nga inlahongan niran. Kamhan pagdampa naiza ka binentagan na napatay minheneng siran pagpanaw. Kamhan minlaong si Hisos ka napatay nga Loy, bomangon iko. ¹⁵Kamhan minbangon matood ya tao daw minsogod iza pagpanaba. Kamhan imbalik iza ni Hisos ka toong ina.¹⁶Masara gajod ya pagpangabereng nirang tanan. Insaza sab niran ya Nagagihit nagalaong ngamadazaw kay dini kanta mindateng di ya propita nga labaw ka gahem nga garing ka Nagagihit. Wara gazed magkalipat ya Nagagihit kanta nga toongmga sakop. ¹⁷Kamhan ya inhinang ni Hisos inpanan-og ka tanan mga tao doro ka Huda daw ya mga dapit tenged ka Huda.¹⁸Kamhan impanan-og sab kan Howan na toong mga sakop kay doro pen ka prisohan si Howan nga Magbenzagay. ¹⁹Kamhan impakaro ni Howan ya toong dowang ka sakop kan Hisos kay anpangotana kon tineed gajod nga iza ya pinili na Nagagihit kon antagad pen siran ka isa. ²⁰Pagdateng niran kan Hisos minlaong siran nga Magbabaja, si Howan nga Magbenzagay ani minsogo kanami kay anpangotana kanmo nga dawiko ya pinili na Nagagihit kon antagad pen kami ka isa?²¹ka kanirang mga masakit daw kaloza na lawas. Indazaw sab naiza ya mga tao nga inharian na mga maonga. Minhatag sab iza ka pagkita na mga mataed nga nabota. ²²Kamhan minsambag si Hisos ka mga sakop ni Howan nga pananogan mazo si Howan ka mga napaniidan mazo dini kanao daw ya kamazong nabatian. Kay hao ya magahatag ka pagkita ka mga nabota. Indazaw sab nao ya lawas na mga piang. Indazaw sab nao ya lawas na mga kagiden. Minhatag hao ka pagpakabati ka mga bengel. Imbohi sab nao ya mga napatay nga tao. Ipasabot sab nao ka mga pobri ya sindo mahitenged ka Nagagihit. ²³Kon diri andowadowa ya tao pagsarig kanaopanaranginan gazed iza na Nagagihit ka madazaw.²⁴Pagpakaoli ka na dowang ka sakop ni Howan minpangotana si Hisos ka kataohan mahitenged kan Howan nga nagalaong nga izang mahon-a pon pagkaro mazo dizan kan Howan doro ka kamingawan daw ono ya tozo mazo dizan kan Howan? Daw anseleng kamo kontana ka tigbaw nga nagapapalidpalid ka hangin? Diri. ²⁵Daw anseleng kamo kontana ka tao nga minbado ka mga mahalen? Diri. Kay nagahela ya singed kaiton dalem ka lagkaw na hari. ²⁶Daw minkaro kamo dazaw anseleng kamo ka propita na Nagagihit? Matood iton. Kamhan si Howan labaw pon iza ka mga iba nga propita na Nagagihit.²⁷Kay iza ya inpanan-og ni Isayas nga nagalaong nga kawandini pen minlaong ya Nagagihit nga may sinogo nao nga ipahon-a nao dazaw an-andam iza ka pagdateng na kanaong Anak. Ani ini ya inlaong na Nagagihit mahitenged kan Howan. ²⁸Indogangan pon ni Hisos paglaong nga pasabten nao kamo nga bisan sin-o ya propita nga natao dini ka kalibotan waray nakalabaw kan Howan. Piro dini kanao koman bisan sin-o ya labing obos nga minsakop kanao labaw iza kan Howan kay ya kasabtan naiza ka kanaong mga inhinang dakola pen iton ka kasabtan ni Howan.²⁹Izang dini kaini ka pagwali ni Howan nanalinga ya tanan mga tao daw ya mga magsokotay ka bohis. Kamhan mintoo siran ka mga panaba na Nagagihit. Kamhan imbenzagan siran ni Howan. ³⁰Piro ya mga Parasiyo daw ya mga maistro ka tinoohan na mga hudiyo diri siran ansogot ka gosto na Nagagihit. Kamhan wara siran magpabenzag kan Howan.³¹Indogangan pen ni Hisos pagpanaba nga koman nga panahona pagpanalinga na mga Hudiyo ka sindo nami ni Howan ³²singed siranka mga bata nga nagadegza dizan ka pawa. Kamhan ya isang tipon nagamahay ka isang tipon nga nagalaong nga nagahoyop kami ka bonabon piro wara kamo magsazaw. Nagabaya-baya isab kami paglingaw piro wara kamo maghaza.³³Singed kaiton ya batasan na mga Hudiyo kay izang pagkarini ni Howan nga Magbenzagay nagaanget iza pagkaen, wara iza mag-inem ka makahebeg nga imnenen. Kamhan minlaong kamo nga inboang si Howan na mga maonga. ³⁴Kamhan hao ya minsonod kan Howan. Nagakaen hinoa hao daw min-inem. Kamhan minbetangbetang kamo kanao nga nagalaong nga selengi, waton ya maasap daw palahebeg. Nagapan-iba sab iza ka mga magsokotay ka bohis daw ya mga iba nga tao nga makasasala. ³⁵Piro nagalaong hao kamazo nga ya mga nakaangay ka sindo na Nagagihit siran kay mahagdam nga matadeng ya kanaming batasan ni Howan.³⁶Na, may isang Parasiyo nga minpakaen kan Hisos. Kamhan minpanik si Hisos dizan ka toong lagkaw kay inlamisahan di ka makaen. ³⁷Na, dizan kaiton nga longsod may nagahela nga maongang babazi. Kamhannabatian naiza nga dizan di si Hisos ka lagkaw na Parasiyo kay impakaensi Hisos. Kamhan mindateng di ya babazi. Mindara iza ka garapahay nga seldanan ka klasi na lana nga masarang kahamot. Mahal iton kon paliten. ³⁸Kamhan mintindeg ya babazi dizan ka paahan ni Hisos daw nagahaza. Kamhan nabasà ya paa ni Hisos ka loha na babazi agon intrapohan sab naiza ya paa ni Hisos ka toong bohok. Inhinang sab naiza ya batasan niran pagtahod niran ka bisita nga min-arek ka paa ni Hisos. Kamhan min-otod ya babazi ka lieg na garapahay kay ibo-bo naiza ka paa ni Hisos.³⁹Pagpaniid ka na Parasiyo ka inhinang na babazi minlaong iza ka toong hena-hena nga kon ani ini ya matood nga propita na Nagagihit mahagdam iza nga maonga ya batasan na babazi nga nagatoldok kanangiza. ⁴⁰Kamhan minlaong si Hisos ka Parasiyo nga Simon, may ilaong ta kanmo. Minsambag si Simon nga Nong, long-an mo hao kon ono iton.⁴¹Kamhan minpamolinged si Hisos nga nagalaong nga may dowang ka tao nga min-otang dizan ka magpaotangay. Ya isa nakaotang ka kinintos pisos. Ya isa nakaotang ka singkwinta pisos. ⁴²Pagtoman ka na tirmino ka pagbazad waray kowarta niran piro madazaw kay impasaylo di siran na naotangan. Na, dizan kanirang dowa daw sin-o ya may dakolang pag-azak ka naotangan? ⁴³Minsambag si Simon nga ya tao nga may dakolang otang kombeet. Minlaong si Hisos nga madazaw ya sambag mo.⁴⁴Kamhan minlingi si Hisos ka babazi daw nagalaong nga Simon, selengan mo iton nga babazi. Dakola ya pagtahod naiza kanao kay minhogas iza ka kanaong paa ka toong loha kamhan intarapohan ka toong bohok ya kanaong paa. Piro kanmo goramay ya pagtahod mokanao kay kazina ka pagdateng nao dini ka lagkaw mo wara ko maghatag kanao ka sapa ka paghogas ka kanaong paa. ⁴⁵Wara ko magpangamostakanao singed ka babazi kay sokad ka pagdateng naiza impakita naiza ya toong pagtahod kanao pag-arek naiza ka kanaong paa.⁴⁶Wara ko magbo-bo ka kanaong olo ka bisan barato nga lana piro imbo-boan na babazi ya kanaong paa ka lana nga mahamot daw mahal. ⁴⁷Sabten mo ini nga dakola ya pag-azak na babazi kanao kay nawara ya toong mga sala bisan mataed ya sala. Piro ya tao nga magalaong ka toong hena-hena nga geramay ka ya toong sala geramay ka sab ya pag-azak naiza ka Nagagihit.⁴⁸Kamhan minlaong si Hisos ka babazi nga nawara di gajod ya kanmong mga sala. ⁴⁹Pagpakabati ka na mga ibang dinapit namaglaong siran nga sin-o sa kombeet iton nga tao nga makapasaylo ka mga sala? ⁵⁰Kamhan indogangan pn ni Hisos pagpanaba ka babazi nga ya pagsarig mo kanao ani gajod ya nakawara ka mga sala mo. Om-oli ko naa kay impalinaw di nao ya kanmong hinawa.

¹Ka wara pon madogay minbisita si Hisos ka mga mataed nga longsod daw bariyo kay antoldo iza ka mga tao ka sindo mahitengedka pagpasakop na Nagagihit ka mga tao. In-ibahan na toong mga sinarigan nga napolo may dowa siran. ²In-ibahan isab na mga babazi nga nabahawan di ka mga masakit daw ya mga maonga. Dizan isab si Mariya nga taga Magdala nga izang mahon-a pen inharian iza na pitong ka maonga kamhan impadalagan siran ni Hisos. ³May isa pen nga babazi si Zohana nga asawa ni Koza nga sinarigan ni Hirodis nga hari. Dizan isab si Sosana daw ya mga mataed pen nga babazi nga mintabang kaninHisos.⁴Kamhan dizan kan Hisos mintipon ya mga mataed nga tao. Garing siran ka mga nagakalainlain bariyo. Kamhan mintoldo iza kaniran ka pamolinged nga nagalaong nga ⁵wani ya pamolinged ka nagasabwag. Na, may isang aldaw nga minpanaw ya tao ngaro ka toong oma kayanpanabwag iza ka binhi nga homay. Pagpanabwag naiza ka mga binhi may mga natanak dizan ka dalan. Kamhan insagitnanan dizan. Kamhaninpanoktok na mga manokmanok. ⁶Pagpanabwag pen na tao may mga natanak disab dizan ka kabatohan. Pagtobo na binhi dizan ka dirikon ararem nga lopa nangalaza dazon iton kay waray sapa.⁷May mga natanak disab dizan ka lopa nga nanhela pon ya mga liso na sagbet. Pagtobo na binhi mindengan isab ya sagbet nga dogihen. Kamhan inhal-ong gajod na sagbet ya mga tanem. ⁸May mga natanak isab dizan ka lopa nga madazaw. Kamhan mintobo iton daw nangaohay ka isangka gatos. Ani ini ya pamolinged ka nagasabwag. Kamhan minlaong si Hisos kaniran nga kamo nga mga manalingahay sabten mazo ini nga pamolinged.⁹Kamhan ya mga sakop ni Hisos nangotana siran kanangiza nga Nong, daw ono ya kahologan na pamolinged mo? ¹⁰Minsambag si Hisos nga ipasabot na Nagagihit kamazo ya mga tinago mahitenged ka pagpasakop naiza ka mga tao. Piro dizan ka mga mataed nga tao ampamolinged hao pagtoldo kaniran. Kay mintoman di ya daan pinasoyat na Nagagihit mahitenged kaniran nagalaong nga bisan magaseleng ya mga tao ka kanaong mga inhinang diri siran makasabot. Bisan manalinga siran ka kanaong sindo diri siran makasabot kon ono ya kahologan.¹¹Na, wani ya paghilwas ka pamolinged ka nagasabwag. Ya impanabwag na tao ani ya mga panaba na Nagagihit. ¹²Kamhan ya mga binhi nga natanak dizan ka dalan ani ya singed ka mga manalingahay. Kay pagpanalinga niran ka sindo mahitenged kanao mindateng dazon si Satanas kay kaw-en naiza ya sindo nga nabatian niran dazaw diri siran antoo daw diri sab mahatagan siran ka bag-ong kinabohi nga diri mawara. ka mga manalingahay nga nakaangay ka sindo mahitenged kanao. ¹³Kamhan mintoo siran dazon. Piro magaawazen gajod siran na mga tao kay minsakop di siran kanao agon bizaan dazon niran ya kanirang pagtoo kanao kay ababa ka ya kanirang pag-anget ka kalised.¹⁴Kamhan ya mga binhi nga natanak dizan ka lopa nga nanhela pon ya mga liso na sagbet ani ya singed ka mga iba pen nga manalingahay.Kay nagapanalinga gazed siran ka sindo mahitenged kanao. Kamhan nawied sab siran daw ono ya kanirang panginabohi. Ganahan sab siranka kowarta. Agon waray polos ya sindo kay singed ka nalipat dazon ya mga manalingahay. ¹⁵Basta kay ya mga binhi nga napegas dizan ka lopanga magazong tamnanan singed iton ka mga manalingahay ka sindo mahitenged kanao. Kamhan matood ya kanirang pagtoo. Dogay isab yakanirang pag-anget ka mga kalised. Kamhan singed siran ka tanem nga madazaw ya mga bonga.¹⁶Kamhan minpamolinged pon iza kaniran nga nagalaong nga kon seg-an na tao ya moron diri pagtakloban, diri sab pagsalimdan. Ibetanghinoa daked ka artal kay dazaw pawaan ya mga minseled ka lagkaw. ¹⁷Singed iton ka ipasabot nao kamazo ya kanaong mga pamolinged.Impakahagdam sab nao kamazo ya mga tinago na Nagagihit. ¹⁸Manalinga gajod kamo dazaw ihatag pon kamazo na Nagagihit ya kasabtan kay bisan sin-o ya antoon ka sindo na Nagagihit padogangan pon na Nagagihit ya toong kasabtan. Kamhan ya tao nga diri antoman kaw-en na Nagagihit ya geramay nga inton-an naiza. Ani ini ya inlaong ni Hisos ka mga tao.¹⁹Kamhan minkarini kan Hisos ya toong ina daw mga lomon piro wara siran makaazi dizan kay mataed ya mga tao. ²⁰Kamhan impakahagdam iza na mga tao nga Nong, bali ka gawas ya kanmong ina daw mga lomon. Gosto siran anlaong kanmo. ²¹Minsambag si Hisos nga ya mga tao nga ampanalinga ka mga panaba na Nagagihit daw tomanen ani gazed ya kanaong ina daw mga lomon.²²Na, may isa pen nga aldaw minleen si Hisos ka baloto iba ya toong mga sinarigan. Kamhan minlaong iza kaniran nga ansakay kita dipi kadanaw. Kamhan minsakay siran ngaro. ²³Ka nagasakay pon siran natorog di si Hisos. Ka dizan pon siran ka tenga na danaw inbagzo gazod siran.Insapwan dazon na baled ya baloto daw malened kontana.²⁴Maistro, mangalemes di kita! Minbangon dazon si Hisos. Kamhan minbaheg iza ka hangin daw mga baled. Kamhan nalinaw matood ya tanan. ²⁵Kamhan minlaong si Hisos kaniran nga daw waray pagsarig mazo kanao? Kamhan nagakahaldek siran kay nabereng gajod siran daw namaglaong nga daw sin-o sa baza ini nga taohana? Kay bisan ya hangin daw ya mga baledantoo gajod ka toong pagbaheg²⁶Pagkakamhan ni Hisos pagbaheg ka bagzo minsangpet di siran ka lopa nga Girgasa dipi ka danaw daw lopa nga Galiliya. ²⁷Pagkawas ka niHisos ka baloto may tao nga taga dizan nga inhoropan gajod na maonga nga minsogat kanangiza. Dogay di ya paghinobo naiza. Diri kon lagkaw ya toong hel-anan kay dizan ka mga lebeng nga talangban nagahela iza.²⁸Na, pagpakakita ka naiza kan Hisos minsinggit iza. Kamhan minhapa iza dizan ka paahan ni Hisos. Mabaskeg ya toong saba paglaong nga Hisos nga Maanak na Nagagihit, kay ono say inkarini mo? Anhangzo gajod hao nga diri mo gajod hao daegdaegen! ²⁹Ani ini ya inlaong na maonga nga minhari ka tao kay minsogo si Hisos nga domalagan ko dizan kaini nga tao. Kay dogay di ya toong kalised nga garing ka maonga. Imbantazan iza na mga tao daw in-ektan kontana piro nakabogto iza ka kadina daw lepes. Kamhan impadalagan iza na mga maonga ngaro ka kamingawan.³⁰Kamhan nangotana si Hisos ka maonga nga daw ono ya ngaran mo? Minsambag iza nga hao si Kataedan. Ani ini ya toong ngaran kay mataed ya mga maonga nga minhari kaiton nga tao. ³¹Kamhan minhangzo ya mga maonga nga kon malooy ko kanami, diri mo kami pagbogawen ngaro ka ararem nga teheb nga waray lopa ngakasagitnan.³²Na, dizan ka kilid na bobong nagapansongad ya mga kababozan. Kamhan minhangzo ya mga maonga kan Hisos nga kon malooy ko kanami papanawen mo kami ngaro ka mga baboy. Pahel-en mo kami ka kanirang mga lawas. Kamhan intogotan siran ni Hisos. ³³Kamhan minpanaw ya mga maonga dizan ka lawas na tao. Minhari siran ka mga baboy. Kamhan minpahidalagan ya kababozan ngaro ka may pangpang nga ataas. Minpatiholog siran ngambaba ka danaw. Kamhan natibe siranpagkalemes.³⁴Pagpakakita ka na mga magbantazay ka mga baboy nandalagan gajod siran ngaro ka kanirang longsod daw ya mga bariyo kay ampananog ka mga tao kon in-ono ni Hisos ya tao nga inhoropan ka maonga. ³⁵Kamhan minkarini dazon kan Hisos ya mga tao kay anseleng siran kontana ka tao kon in-ono sa iza. Pagdateng niran kan Hisos nakitan niran ya tao nga indazaw ni Hisos. Iza nga inhoropan na mga mataed nga maonga nagalo-to di iza dizan ka paahan ni Hisos. Inbadoan disab iza kay naolian ka madazaw nga beet. Kamhan nahaldek ya mga mindateng.³⁶Kamhan ya mga minkita ka inhinang ni Hisos kazina, siran ya minpanan-og ka mga bag-ong mindateng nga indazaw ni Hisos ya tao nga inhoropan na maonga. ³⁷Kamhan ya tanan mga taga Girgasa minhangzo siran kan Hisos dazaw ampanaw iza dini ka kanirang lopa. Kay masara ya pagpangahaldek niran kay dakola gajod ya toong gahem. Kamhan minleen si Hisos ka baloto dazaw ampanaw.³⁸Kamhan ya tao nga indazaw ni Hisos minhangzo iza nga an-iba piro diri iza paibahenni Hisos. ³⁹Hinoa intogon nga om-oli ko ka mga lomon mo. Maglaong ko kaniran nga madazaw di ya lawas mo kay inkaloy-an ko na Nagagihit. Kamhan minkaro ya tao doro ka longsod. Minpanan-og iza ka tanan mga tao kon in-ono sa iza ni Hisos.⁴⁰Na, pag-oli ni Hisos ngarindipi ka lopa nga Galiliya mataed ya mga tao nga minsogat kanangiza. ⁴¹Kamhan may isang oloolo ka singbahanna mga Hudiyo nga minkarini kan Hisos. Si Hariyo ya ngaran. Paglohod naiza dizan ka paahan ni Hisos minpakilooy gajod iza nagalaong nga kon mahimo ya beet mo ibahan mo hao ngaro ka kanaong lagkaw ⁴²kay nagapinal di ya kanaong bogtong maanak nga daragahay.Kamhan min-iba si Hisos kan Hariyo. Nagakasiet gajod iza nga nagapanaw kay mataed ya mga tao.⁴³Na, may nagalopog kan Hisos nga babazi nga sokad ka napolo may dowang ka toig wara magheneng ya toong pagdog-a. Nagastohan disab iza ka mga mataed nga doktor piro wara pen mawara ya toong masakit. ⁴⁴Pagsonod naiza kan Hisos mintoldok iza ka pilos na toong bado. Kamhan madazaw matood ya toong lawas.⁴⁵Kamhan nangotana si Hisos nga daw sin-o say mintoldok kanao? Minsambag sirang tanan nga diri kon hao. Kamhan minlaong si Pidro nga Nong, masara gajod nga kataed ya mga tao nga minheet kanmo. ⁴⁶Minsambag si Hisos nga may mintoldok kanao kay imbati gajod nao nga mintambal di hao ka tao.⁴⁷Kamhan minkarini ya babazi kay mahagdam di iza nga diri mahimo ya pagtago. Paglohod naiza dizan ka paahan ni Hisos nagapidpid gajod ya toong lawas ka kahaldek. Kamhan dizan ka nabatian na mga tao minpanaba iza nga hao ya mintoldok ka kanmong bado kazina kay may kasakit nao. Kamhan madazaw matood ya kanaong lawas. ⁴⁸Minsambag si Hisos nga Day, basta ya pagsarig mo kanao madazaw di ya lawas mo. Om-oli ko naa. Diri ko magkawied kay diri ambalik ya kasakit mo.⁴⁹Ka nagapanaba pen si Hisos may tao nga min-apas nga garing ka lagkaw ni Hariyo nga izang oloolo ka singbahan na mga Hudiyo. Kamhanminlaong ya min-apas nga Hariyo, diri ko magpaiba kan Hisos ngaro ka lagkaw kay nawara di ya maanak mo. ⁵⁰Pagpakabati ka ni Hisos minsambag iza kan Hariyo nga diri ko magkawied. Magsarig ko naa kanao dazaw mabahaw ya maanak mo.⁵¹Pagdateng niran ka lagkaw diri ni Hisos ya mga tao paselden. Impaseled lamang si Pidro daw si Howan daw si Santiago daw ya ginikanan na bata. ⁵²Kamhan nagahaza gajod ya mga tao dizan kay nawara di ya bata. Kamhan minlaong si Hisos kaniran nga diri kamo maghaza kay diri kon patay ya bata. Igo ka lamang iza matorog. ⁵³Kamhan inkatawhan niran si Hisos kay mahagdam siran nga wara di ya babazi.⁵⁴Kamhan minseled si Hisos kakowarto nga inbentagan na babazi. Kamhan intagenan ni Hisos ya alimana babazi daw minsogo nga Day, bomangon ko naa. ⁵⁵Kamhan minbalik matood ya hinawa na babazi. Minbangon dazon iza. Kamhan minsogo si Hisos kaniran nga pakanen naa ya babazi. ⁵⁶Kamhan dakola gajod ya pagkaborong na toong ginikanan. Minsogo si Hisos kaniran nga diri kamo magpanaba dizan ka mga tao nga indazaw di nao iza. Ani ini ya pagtabang ni Hisos ka maanak ni Hariyo.

¹Na, pagkakamhan kaiza inpatipon ni Hisos ya toong mga sinarigan nga napolo may dowa siran. Kamhan intagan siran naiza ka gahem ka pagpadalagan ka tanan mga maonga. Intagan isab siran ka gahem ka pagpanbahaw ka mga masakit. ²Kamhan impakaro siran naiza ngaro ka mga tao dazaw anwali siran ka pagmaymay mahitenged ka pagpasakop na Nagagihit ka mga tao. Panbahawen sab niran ya mga masakiten.³Intogon sab siran nagalaong nga pikit ka lawas ka lamang ya dara mazo, waray lain harominta. Diri kamo maghabay ka kowarta. Diri sab kamo maglapid ka bado. ⁴Dizan ka lagkaw nga inpanikan mazo maghela gajod kamo hastang ka pagpanaw mazo.⁵Dizan ka bariyo nga diri an-abiabi kamazo izabzab mazo ya abog dizan ka paa mazo dazaw mahagdam siran nga silotan siran kay-an kay diri siran an-angay ka sindo na Nagagihit ka pagpanalinga. ⁶Pagkakamhan ni Hisos pagtogon kaniran minpanaw siran kay an-azi siran ka mga mataed nga bariyo. Nagawali siran ka pagmaymay mahitenged kan Kristo. Inpanbahawan sab niran ya mga nabedlay.⁷Ya, ka nagapasinged pen ya mga sakop ni Hisos doro ka mga lain dapit nabatian ni Hirodis nga hari kon ono ya hinang niran. Kamhan dakola ya toong kawied kay nagalaong ya mga tao nga si Hisos ani si Howan nga Magbenzagay. Nabohi iza pagbalik garing ka lebeng. ⁸May mga iba nga tao nga nagalaong nga si Hisos ani si Iliyas nga karaang propita na Nagagihit. May mga iba pen nga tao nga nagalaong nga si Hisos propita iza singed ka isa pen nga karaang propita. ⁹Kamhan minlaong si Hirodis nga izang dini kaini inpaotdan nao ya lieg ni Howan agon sin-o kombeet iton nga taohana nga impanan-og kanao na mga tao. Kamhan gosto gajod iza anseleng kan Hisos.¹⁰Ya, pag-oli ka na mga sinarigan ni Hisos inpanan-ogan niran iza kon ono ya hinang niran. Kamhan inpaiba siran ni Hisos doro ka longsod nga Bitsayda kay ampahimlay siran. ¹¹Kamhan dizan ka inpanawan niran mataed di ya mga mahagdam nga waro di sin Hisos agon nang-apas siran. Min-abiabi si Hisos kaniran kamhan min-maymay iza kaniran mahitenged ka pagpasakop na Nagagihit kaniran. Inpanbahaw sab naiza ya mga masakiten.¹²Pagkadelem ka kaiza minkarini kan Hisos ya toong mga sinarigan nga napolo may dowa siran. Minlaong siran kanangiza nga papanawenmo naa ya mga tao ngaro ka mga bariyobariyo dazaw ampangita siran ka kolanganan daw makapamalit siran ka pagkaen niran kay dini kita ka kamingawan. ¹³Minsambag si Hisos nga magpakaen hinoa kamo kaniran. Minsambag siran nga lima komang bolos ya pan kamhan dowa komang bolos ya isda. Daw paliten nami ya makaen para kaiton nga mga mataed nga tao? ¹⁴Ani ini ya inlaong niran kay ya mga amaama dizan hapit maglimang ka libo siran tanan. Wara pen ya labet na mga babazi daw mga bata. Kamhan minsambag si Hisos ka toong mga sinarigannga palo-toon di mazo sirang tanan. Kada tipon may tinagkalim-an.¹⁵Kamhan impalo-to di sirang tanan. ¹⁶Paghawid ni Hisos ka mga pan nga limang bolos daw ya isda nga dowang bolos minhangad iza ka langit. Kamhan minpasalamat iza ka Nagagihit. Kamhan intipaktipak naiza ya mga pan anipen naiza ipanhatag ka toong mga sinarigan. Kamhan inpandohol niran ka mga tao. ¹⁷Pagkakamhan niran pagkaen nangabosog sirang tanan. Pagpakahipid niran ka salin nga tinipak nangapono pon ya napolo may dowang ka alat.¹⁸Na, izang aldaw ka pagpangamozo ni Hisos nga isa ka iza minkarini ya toong mga sinarigan. Kamhan nangotana si Hisos kaniran nga daw ono ya pagngaran na mga tao kanao? ¹⁹Minsambag siran nga may nagalaong nga mated sa koni niran iko koni si Howan nga Magbenzagay. May nagalaong nga iko sab koni iton si Iliyas nga karaang propita na Nagagihit. May iba pon nagalaong nga iko sab koni ya isa pen nga karaang propita nga nabanhaw di.²⁰Kamhan nangotana si Hisos kaniran nga daw sin-o say pagngaran mazo kanao? Minsambag si Pidro nga iko ani matood si Kristo nga hari nga pinili na Nagagihit. ²¹Kamhan minsogo si Hisos kaniran nagalaong nga dizan ka bisan sin-o nga tao diri kamo magpanan-og kon sin-o sa hao. ²²Kay hao nga minhon-a ka bisan sin-o nga mahon-ang tao, an-azi pon hao ka mga mataed nga kalised. Kamhan magasawazen hao na mga malaas daw yamga oloolo na mga pari daw ya mga maistro ka tinoohan na mga Hudiyo. Kamhan pamagpatazen hao doro kaniran. Pagdateng ka ikatolong aldawmagabohien hao na Nagagihit pagbalik garing ka lebeng.²³Indogangan pen ni Hisos pagpanaba kanirang tanan nga bisan sin-o ya anpasakop kanao kinahanglan bizaan naiza ya toong kaogaringen nga naazakan aldaw-aldaw daw angeten ya pagkapatay singed kanao. Ka diri madogay dakpen hao na mga tao kamhan ipalansang ka kros kotob ka mapatay hao. ²⁴Kamhan bisan sin-o ya diri ansakop kanao kay nawied iza nga basi patazen iza mawara hinoa iza. Piro bisan sin-o ya napatay kay hao ya toong insakopan mahatagan iza ka bag-ong kinabohi ngadiri mawara. ²⁵Bisan kon maangken na tao ya tanan mga botang dini ka kalibotan kamhan mawara ka ya toong kaogaringen nga kinabohi dawono ya makawa naiza? Wara gajod.²⁶Mindogang pon si Hisos paglaong nga hao ya minhon-a ka bisan sin-o nga mahon-ang tao. Kamhan may tirmino nao ka pagbalik ka kalibotan. Iba sab kanao ya mga sogoonon nga taga langit. Magabado sab hao ka kalatì na kanaong Ama nga Nagagihit. Na, koman nga panahona ka wara pon hao magbalik ka kalibotan bisan sin-o ya anlimed kanao daw ya kanaong mga panaba anlimed isab hao kanangiza kay-an ka pagdatong nao. ²⁷Timan-an mazo gajod ini nga dini kamazo may mga diri mapatay nga tao hangtod ka pagpakakita niran kanao pagbalik nao dini ka kalibotan kay hao gajod ya hari nga pinili na Nagagihit. Ani ini ya sindo ni Hisos ka toong mga sinarigan.²⁸Ya, minlabay di ya walong ka aldaw. Kamhan inpaiba ni Hisos si Pidro daw si Howan daw si Santiago ngandaked ka bobong kay ampangamozo iza. ²⁹Ka nagapangamozo pon iza nabag-o di ya toong lawas piro si Hisos gajod iton. Masarang kapoti ya toong bado singed ka kalatì na sega.³⁰Kamhan waton disab ya dowang ka tao nga si Moysis daw si Iliyas nga mga karaang tao na mga Hudiyo. Namaglaonglaong sirang dowa daw si Hisos. ³¹Madazaw gajod siran selengan kay nabag-o disab ya kanirang mga lawas. Nagalaonglaong siran mahitenged ka pagkapatay ni Hisos doro ka Hirosalem ka pagtoman naiza ka kabebet-en na Nagagihit.³²Paglaonglaong pen niran nangatorog si Pidro daw ya toong mga iba. Kamhan min-imata siran kay nakakita di siran ka kalatì dizan kan Hisos.Nakita sab niran ya dowang ka tao nga mintindeg dizan kan Hisos. ³³Ya, pagpakabelag ka ni Moysis daw si Iliyas kan Hisos minlaong si Pidro nga Magbabaja, madazaw ya kantang pagtipon dini. Kon somogot ko hinangen nami ya mga tolong bolos nga tal-ob. Kanmo ya isa. Kan Moysis ya isa. Kan Iliyas ya isa. Ani ini ya inlaong ni Pidro kay diri iza mahagdam kon ono kontana ya toong ilaong kay mahaldek gazod siran.³⁴Ka nagapanaba pon si Pidro intamdengan siran ka inarak. Pagkatamdengi ka niran nangahaldek gazed siran. ³⁵Kamhan nabatian niran ya saba dizan ka inarak nga nagalaong nga wani ya kanaongAnak nga kanaong impili. Magtoo gajod kamo ka toong mga panaba kamazo. ³⁶Pagkakamhan kaiza nawara dazon si Iliyas daw si Moysis. Si Hisos ka ya nakita niran dizan. Kamhan wara siran magpanaba ka nakita niran kay dakola ya pagkabereng niran.³⁷Pagkakonsilem paglogsong niran ngambaba nanogat kan Hisos ya mga mataed nga tao. ³⁸Kamhan dizan kaniran may isang tao nga minhawag kan Hisos nga nagalaong nga Maistro, indara nao ngarinikanmo ya kanaong bogtong anak nga amaama. Kaloy-i intawon iza ³⁹kay isahay inharian iza na maonga. Kamhan ampahisinggit iza daw magakabiribid ka toong lawas hangtod ka pagbora na toong ba-ba. Kamhan impangageman ya toong lawas ka paglompatlompat ka lopa. Kamhan madogay maolian iza ka madazaw nga beet. ⁴⁰Kazina inhangzo nao ya mga sakop mo dazaw papanawen niran ya maonga piro wara siran makadaeg.⁴¹Minsambag si Hisos nga waray pagtoo mazo ka Nagagihit. Mga salaan sab kamo. Daw dogay pen hao magaanget ka kamazong batasan nga waray pagtoo kanao? Daw dogay pon hao magahela dini kamazo anipen makasabot kamo ka gahem na Nagagihit? Dadha ngarini ya maanak mo! ⁴²Na, ka pagkarini na bata kan Hisos impalompatlompat iza na maonga dizan ka lopa daw nabiribid ya toong lawas. Kamhan imbaheg ni Hisos ya maonga. Kamhan naolian matood ya bata ka madazaw nga beet. Kamhan imbalik ni Hisos ya bata ka toong ama.⁴³Kamhan nangabereng gajod sirang tanan ka gahem na Nagagihit. Ka nagalaonglaong pen siran mahitenged ka tanan mga inhinang ni Hisos minlaong iza ka toong mga sinarigan nga ⁴⁴manalinga kamo kay hao nga minhon-a ka bisan sin-o nga mahon-ang tao itogyan hao dizanka gahem na mga tao. ⁴⁵Na, pagpakabati ka na toong mga sakop wara siran makasabot kay wara naiza siran pasabota. Kamhan wara siranmangotana kon ono ya kahologan naititonay nawied gajod siran.⁴⁶Pagkakamhan kaiza namaglalislalis ya mga sinarigan ni Hisos daw sin-o ya labaw dini kaniran? ⁴⁷Kamhan mahagdam si Hisos kon ono ya kanirang hena-hena. Kamhan impakarini naiza ya isang bata ka toong sain. ⁴⁸Kamhan minlaong iza kaniran nga garing ka pagtoo na tao kanao kon andawat iza ka bata andawat gihapon iza kanao. Kon andawat iza kanao andawat isab iza ka Nagagihit nga minpakarimbaba kanao. Dini kamazong tanan ya tao nga labing obos iza gajod ya labaw.⁴⁹Kamhan si Howan nangotana iza kan Hisos nga Maistro, kazina napaniidan nami ya tao nga minpadalagan ka maonga dizan ka tao. Pagsogo naiza ka maonga ka pagpanaw inpanaba naiza ya ngaran mo. Kamhan minbaheg kami kaiton nga tao kay diri kon sakop nami iza. ⁵⁰Minsambag si Hisos nga diri kamo magbaheg kaiton nga tao. Kay bisan sin-o ya diri an-away kamazo makaangay gajod iza kamazo.⁵¹Ya, pagkaarani ka na tirmino ni Hisos ka pagkandaked ka langit inisa disab naiza ya toong hena-hena ka pagkaro ka siyodad nga Hirosalem. Agon impahon-a naiza ya toong mga sinogo ⁵²doro ka isang bariyo doro ka lopa nga Samariya dazaw an-andam siran ka toong pagkolang dizan. ⁵³Piro diri ansogot ya mga taga Samariya kay mahagdam siran nga anlargo pen si Hisos ka Hirosalem. Kamhan ya batasan niran diri paazihan ka mga komarohay ka siyodad nga Hirosalem.⁵⁴Pagkahagdam ka na mga sinarigan nga si Santiago daw si Howan minlaong siran nga Magbabaja, kon somogot ko ansogo kami ka laga ka pagkarimbaba kaniran garing ka langit dazaw masonog sirang tanan. ⁵⁵Piro diri ansogot si Hisos. Pagliso naiza kaniran imbahegan siran naiza. ⁵⁶Kamhan minpadazon siran pagpanaw doro ka lain bariyo.⁵⁷Hisos. Kamhan nagalaong iza nga bisan hain ko magpanaw aniba gajod hao kanmo. ⁵⁸Minsambag si Hisos nga bisan ya mga mire may mga pogad niran ka pagpahimlay. Bisan ya mga manokmanok may mga haponanan niran. Piro wara gajod ya kanaong lagkaw nga pahimlazanan.⁵⁹Kamhan dizan ka iba nga tao minlaong si Hisos nga somakop ko kanao. Minsambag ya tao nga Magbabaja, tagadan mo hao naa kay ankaro pen hao ka kanaong ama nga mapatazay di iza. ⁶⁰Minsambag si Hisos nga ya mga lomon mo nga diri ansakop kanao ani komay magkaro ka kanmong ama kay singed siran ka mga napatay nga tao kay waray hena-hena niran mahitenged ka Nagagihit. Kamhan iko pomanaw ko naa. Magtoldo ko ka mga tao ka sindo mahitenged ka pagpasakop na Nagagihit kaniran.⁶¹May iba pon nga tao minlaong kan Hisos nga Sinyor, ansakop hao kanmo piro togotan mo hao ka pag-oli ka kanaong mga lomon kay anbaid pen hao kaniran. ⁶²Minsambag si Hisos nga ya tao nga ansakop kanao kinahanglan isahen naiza ya toong hena-hena ka pagtarabaho ka Nagagihit singed ka tao nga nagadaro ka oma. Kamhan diri madazaw ya toong pagdaro kon anlingi-lingi iza ka toong azi.

¹Pagkakamhan kaiza minpili si Hisos ka mga iba pen nga sakop -a naiza ya tinagdowa ngaro ka tagsatagsa nga longsod daw ya mga dapit ngadatnganan naiza kay-an. ²Minlaong iza kaniran nga mataed ya tao nga gosto ansakop kanao piro talagsa ka ya mga ansindo kaniran mahitengedkanao. Kamhan singed siran ka mga homay nga hinog di. Haloag gajod ya homazan piro talagsa ka ya mga magaani. Agon hangzoon mazo ya tag-iza ka anihen dazaw dogangan naiza pagpadara ka mga magaani ka pag-ani kaiton.³Pomanaw di kamo. Pakarohan nao kamo ka mga salaan nga tao. Singed siran ka mga maiseg nga ido. Kamhan dizan kaniran ya batasan mazo singed iton ka batasan na mga karniro nga waray kaiseg. ⁴Diri kamo maghabay ka kowarta bisan singko sintabos. Pikit ka lawas ka lamang ya dara mazo, waray lain harominta. Diri kamo magheneng ka panaw mazo ka paglaonglaong ka tao kay basi malangan kamo.⁵Dizan ka lagkaw nga impanikan mazo maglaong kamo paghon-a nga magmalinawen kamo ka paghela dini. ⁶Kon ampapanik siran kamazo ibilin mazo kaniran ya madazong hena-hena. Piro kon diri siran ampapanik kamazo diri kamo maghatag ka hena-hena nga madazon. ⁷Pabilin kamo dizan ka lagkaw nga inpanikan mazo paghon-a. Diri kamo magbalhinbalhin garing ka isang lagkaw ngaro ka lain. Ya makaen nga inlamisa niran singed iton ka sohol mazo agon kanen mazo dawinmen kay ya tarabahanti kinahanglan soholan.⁸Kon andateng kamo ka longsod kanen mazo ya makaen nga inlamisa niran. ⁹Panbahawen mazo ya mga masakiten dizan kaniran. Maglaong kamo kaniran nga ansindo kami kamazo mahitenged ka pagpasakop na Nagagihit kamazo kay domatengay di ya hari nga pinili naiza.¹⁰Kon andateng kamo ka longsod nga diri makaangay kamazo mag-azi kamo dizan ka kanirang mga dalan kamhan maglaong kamo kaniran nga ¹¹bisan ya abog dini ka kanaming paa izabzab nami dazaw mahagdam kamo nga silotan kamo na Nagagihit. Magtimaan kamo kaini nga domatengay di ya hari nga pinili na Nagagihit. ¹²Panabaan ta kamo nga kay-an ka tirmino na Nagagihit ka pagbetang ka silot ka mga tao ya silot naiza kamazo labaw pen iton ka silot ka mga taga Sodoma nga maongang longsod kawandini pon.¹³Kamhan minbaldeng si Hisos ka mga taga longsod nga mga dapit nga inhinangan naiza ka mga madazaw kay wara siran magbiza ka maongang hinang niran. Nagalaong iza nga kamo nga taga Korazin daw taga Bitsayda, magalised gajod kamo kay-an! Kay bisan minkita kamo ka kanaong mga inhinang nga madazaw wara kamo maghinelsel ka kamazong mga sala. Kon ipakita nao ini nga mga magazon dizan ka mga taga Tiro daw taga Sidon nga mga maongang tao kawandini pon, magahinang gazed siran ka batasan niran ka paghinelsel nga ambado ka maongang bado. Kamhan anbo-bo ka alibo ka kanirang mga olo. ¹⁴Agon kay-an ka paghokom na Nagagihit ka mga tao ya silot naiza kamazo labaw pon iton ka silot naiza ka mga taga Tiro daw Sidon. ¹⁵Minbaldeng sab si Hisos ka mga taga longsod ka Kapirnaom nagalaong nga kamo nga mga taga Kapirnaom, bisan nagahela hao dizan kamazo diri gazed kamo maghena-hena nga dakola ya kamazongngaran dizan ka Nagagihit. Kay ipaababa gazed ya ngaran mazo kay wara kamo magbiza ka maongang hinang mazo. Madara gajod kamo baba ka inpirno.¹⁶Kamhan minlaong iza ka toong mga sinarigan nga ya tao nga ampanalinga kamazo, hao gajod ya panalingzan naiza. Ya ansorasora kamazo hao gajod ya insorasora naiza. Ya ansorasora kanao insorasora gajod naiza ya Nagagihit nga minpakarimbaba kanao.¹⁷7Pagkadogay kaiza minbalik kan Hisos ya toong mga sinogo nga kapitoan may dowa siran. Nagasaza gajod siran daw nagalaong nga Magbabaja, bisan ya mga maonga mintoo gajod siran ka kanaming sogo ka pagpadalagan pagpanaba nami ka kanmong ngaran. ¹⁸Minsambag si Hisos nga mahagdam hao daan ka pagkapildi ni Satanas kay madali gajod ya toong pagkaholog garing daked ka langit singed ka kadali na kilat. ¹⁹Intagan ta kamo matood ka gahem ka pagsagitnen ka mga halas daw ya mga orang-orang. Intagan sab kamo ka gahem ka pagpakadaeg kan Satanas nga kantang kaaway. Diri di gajod makaonga kamazo ya bisan ono. ²⁰Piro diri kamo magsaza kay may gahem mazo ka pagpakadaeg ka mga maonga. Magsaza hinoa kamo kay nalista di ya kamazong ngaran daked ka libro na Nagagihit.²¹Pagkakamhan kaiza insaza ni Hisos ya Madazaw nga Ispirito nga garing ka Nagagihit daw nagalaong iza ka toong Ama nga Nagagihit nga Ama nao nga tag-iza ka kalangitan daw kalibotan, palad pon kay ya mga tao nga hopaw ya kanirang pagtoo wara mo siran pasabota ka kanaong sindo bisan kon ataas ya kanirang grado. Hinoa ya mga ansarig kanao bisan geramay ya kanirang kahagdamanan siran ya impasabot mo ka kanaong sindo. Madazaw kay iko ya minponto kaiton. Ani ini ya inlaong ni Hisos ka toong Ama.²²Kamhan minpanaba iza ka mga tao nga hao ya insarigan na kanaong Ama ka tanan mga inhinang naiza. Hosto ya kasabtan naiza kanao. Hosto gihapon ya kasabtan nao kanangiza. Kamhan dizan ka bisan sin-o ya impili nao ipasabot nao ya batasan na kanaong Ama.²³Kamhan dizan ka waray lain tao nga makabati minpanaba si Hisos ka toong mga sinarigan nga madazaw ya pagpanarangin na Nagagihit kamazo kay kamo ya minkita ka kanaong mga inhinang. ²⁴Timan-an mazo gajod ini nga mataed ya mga karaang propita na Nagagihit daw ya mga karaang hari nga gosto siran anseleng ka kanaong mga hinang singed ka inselengan mazo dini kanao koman piro wara itogot na Nagagihit kaniran. Gosto sab siran ampanalinga ka kanaong sindo singed ka nabatian mazo dini kanao koman piro wara itogot na Nagagihit kaniran.²⁵Pagkakamhan kaiza may isang maistro nga minkarini nga hanas ka mga balaed na Hudiyo. Kamhan minlaong iza kan Hisos ka pagporba nga Maistro, daw ono ya kinahanglan nga hinangen o dazaw tagan hao ka bag-ong kinabohi nga diri mawara? ²⁶Minsambag si Hisos nga ono say impasoyat na Nagagihit kan Moysis nga kamazong karaan? Ono ya imbasa mo dizan kaiton nga kasoyatan? ²⁷Minsambag iza nga impasoyat na Nagagihit kan Moysis nga kinahanglan nga pagaazaken mazo pagtineed ya Magbabaja nga kamazong Nagagihit. Kamhan isahen mazo ya kamazong hena-hena ka pagtaremdem kanangiza. Kamhan mag-azak kamo ka mga tao singed ka pag-azak mazo ka kamazong kaogaringen. ²⁸Minsambag si Hisos nga hosto ya kanmong sambag. Magtoman ko dazaw mahatagan ko ka bag-ong kinabohi nga diri mawara.²⁹Kamhan amporba pen ya maistro kan Hisos nga nagalaong nga daw sin-o gajod ya tao nga angazen o kontana? ³⁰Minsambag si Hisos nga pamolinged ini nga may isang ka tao nga angay ta nga Hudiyo. Kamhan nagalogsong iza garing ka Hirosalem pasinged ngaro ka longsod nga Hiriko. Kamhan inbanganan iza na mga tolisan. Inhoboan niran iza daw impamagbonalan. Kamhan inbizaan iza nga mapatazay.³¹Ka wara pon madogay may isang Yodayo nga pari nga nagalogsong dizan ka dalan. Pagpakakita ka naiza ka tao nga nagalised minlabay lamang iza dizan ka kilid na dalan. ³²Kamhan may nakasonod nga Hudiyo gihapon. Kaliwat iza ni Libita nga karaang pari. Pagpakakita ka naiza ka tao nga mapatazay minlabay iza dizan ka kilid na dalan.³³Kamhan may nakasonod pen isab nga taga Samariya. Na, ya mga taga Samariya daw ya mga Yodayo diri siran magkaangay kamhan intamay na mga Hudiyo na mga taga Samariya kay diri kon mga kaliwatan ni Abraham siran. Na, pagdateng na taga Samariya ka tao nga nagalised inkaloy-annaiza bisan Hudiyo ya tao. ³⁴Kamhan imbo-boan naiza ya toong mga samad ka lana insaketan sab ka tambal nga mahapdes gajod pagdazaw.Kamhan impandapihan naiza ya Hudiyo daw impasakay ka toong kabayo dazaw iated ngaro ka kolanganan. Kamhan magatabangan iza dizan. ³⁵Pagkakonsilem inhatagan naiza ya tag-iza ka kolanganan ka kowarta daw nagalaong nga pag-aligarahen mo naa ini nga nabedlay. Kamhanpagbalik nao dini bayran ta ko ka kanmong magasto kon kolang pon ya kowarta. Ani ini ya pamolinged ni Hisos ka maistro nga Hudiyo.³⁶Kamhan nangotana iza nga dizan ka tolong ka tao daw sin-o say nakaangay pagtineed ka tao nga intolis? ³⁷Minsambag ya maistro nga ya tao nga nalooy kanangiza. Minsambag si Hisos nga pomanaw di ko. Kinahanglan maghaod ko ka toong batasan.³⁸Pagkakamhan kaiza nagapadazon si Hisos ka kanirang pagpanaw. Mindateng siran ka isang bariyo nga hel-anan na isang babazi si Marta yangaran. Kamhan minpapanik iza kan Hisos kay ampakaen. ³⁹May lomon ni Marta si Mariya ya ngaran. Nagalo-to iza dini ka paahan ni Hisos kaynaazak iza pagpanalinga ka toong sindo.⁴⁰Kamhan nawied si Marta ka pagkaen. Agon minkarini iza kan Hisos ka pagbaid nga nagalaong nga Magbabaja, daw waray pagkawied mo nga impasagdan hao na kanaong lomon ka pagsen-ad? Long-on mo iza nga tabangan mo ya kanmong lomon. ⁴¹Minsambag ya Magbabaja nga Marta, Marta, mataed gazed ya mga kawied Kamhan madazaw gazed ya impili ni Mariya kay minpanalinga iza ka kanaong mga panaba. ⁴²Kamhan diri makawa ya toong intoon dini kanao. Kay anikay inkinahanglan na tao ya pagpanalinga ka kanaong sindo.

¹May isang aldaw nagapangamozo si Hisos ka Nagagihit. Pagkakamhan naiza pagpangamozo minlaong ya isang sakop nga Magbabaja, toldoan mo kami ka pagpangamozo ka Nagagihit singed ka pagtoldo ni Howan ka toong mga sakop.²Minsambag si Hisos nga kon ampangamozo kamo ka Nagagihit maglaong kamo nga Ama nami nga Nagagihit, labaw gazod ya kanmong ngaran. Harian mo kami dini ka kalibotan.³Tagan mo kami kada aldaw ka kinahanglan nami nga pagkaen. ⁴Pasaylohon mo ya kanaming mga sala singed ka pagpasaylo nami ka mga nakasala kanami. Ipaaro mo kanami ya magtintalay.⁵Pagkakamhan ni Hisos pagtoldo kaniran minpamolinged pon iza kaniran dazaw diri siran kapozan ka pagpangamozo ka Nagagihit. Kamhan nagalaong iza nga simpan may isang higara mo. Ka pagkatenga na kahabzen iko ya minkaro ka toong lagkaw dazaw hangzoon nga pari, kon mahimo pabayloan nao ya makaen ⁶kay nadatngan hao na kanaong higara garing pen ka aro. Nahodtan di gajod hao ka makaen nao. ⁷Kamhan minsambag iza garing dalem ka lagkaw nga diri di ko magsamok kanao kay nasirahan di ya kanaong lagkaw. Namentag di kami daw ya kanaming mga maimpis. Agon diri di hao ambangon ka gosto mong pangazoon kanao. ⁸Kamhan mintoda ko hinoa pagpangazo kanangiza dazaw ihatag. Kamhan anbangon lamang iza daw anhatag kanmo ka tanan inkinahanglan mo. Na, ya paghatag naiza kanmo diri kon garing iton ka pagkaamigo mazo basta kay garing ka pagtoda mo ka pagpangazo.⁹Sabten mazo ini nga mangazo kamo ka Nagagihit ka kinahanglanen mazo. Kamhan tagan kamo naiza. Magpangita kamo. Kamhan ipakita naiza kamazo ya kamazong inkinahanglan. Maghawag kamo dazaw sambagen kamo na Nagagihit. Kamhan mabatian kamo naiza ka paghangzo mazo. ¹⁰Kay bisan sin-o ya nagaazo ani tagan na Nagagihit ka toong kinahanglan. Ya tao nga nagapangita ani tabangan na Nagagihit. Ya tao nga nagahawag mabatian na Nagagihit ya toong paghangzo.¹¹Kamo nga may anak, kon an-azo ya maanak ka isda, daw ihatag ya halas? Diri. ¹²Kon an-azo iza ka anak na manok daw ihatag ya orangorang? Diri kay ihatag mazo hinoa ya madazaw. ¹³Na, kamo nga mga salaan nga tao, mahagdam kamo ka paghatag ka madazaw ka kamazong mga anak piro labaw pen gajod ya hatag na Ama mazo nga Nagagihit nga nagahela daked ka langit kay ihatag naiza ya toong Ispirito nga Madazaw dizan ka mga nangazo kanangiza.¹⁴Pagkakay-an kaiza minbogaw si Hisos ka maonga nga nakapeha ka isang tao. Kamhan nakalitok dazon ya tao agon nangabereng gajod yamga tao. ¹⁵Dizan disab ya mga minsora nga nagalaong nga si Hisos may gahem naiza ka pagbogaw ka mga maonga kay inharian iza ni Satanas inngaranan sab kan Bilsibol nga tag-iza ka mga maonga.¹⁶Kamhan nangazo ya mga iba pong tao ka timaan nga garing ka langit kay amporba siran kon garing si Hisos ka Nagagihit kon diri. ¹⁷Mahagdam si Hisos ka kanirang hena-hena agon minsambag iza nga pamolinged ini nga kon awazen na hari ya toong mga sinogo mapildi gajod ya hari. Kon ampakig-away ya isa daw isa nga lomondizan ka isang pamiliya mapildi isab ya pamiliya.¹⁸Agon kon anbogaw si Satanas ka toong kaogaringen nga ispirito dizan ka tao mapildi si Satanas. Minlaong kamo nga garing kan Bilsibol ya kanaong gahem ka pagbogaw ka mga maonga. ¹⁹Sazop mazo iton kay bisan ya mga sakop mazo pagbogaw niran ka mga maonga mahagdam siran nga garing ka Diyos ya kanirang gahem, diri kon garing kan Bilsibol. Agon ansombong siran kamazo ka bakak. ²⁰Minsazep gajod kamo kay ya Nagagihit ani ya mintabang kanao ka pagbogaw ka mga maonga. Kamhan ipasabot di na Nagagihit kamazo nga dini kamazo mindateng di gajod ya Maanak na Nagagihit nga hari nga pinili na Nagagihit.²¹Pamolinged ini nga singed si Satanas ka kesgan nga tao nga nagadara ka bangkaw daw lodzo kay bantazan naiza ya toong lagkaw dazaw diri paghilabtan ya toong mga betang. ²²Kamhan hao kay nakadaeg kan Satanas pagdali kay intagenan nao ya toong bangkaw daw lodzo. Kamhan imbahinbahin nao ya toong mga betang dizan ka kanaong kaibahan. ²³Indogangan pen ni Hisos paglaong nga ya mga diri ansakop kanao ani ya ansopak kanao. Ya mga diri antabang ka mga tao ka pagsakop kanao singed ka nakalaag siran ka mga tao.²⁴Ya tao nga diri magapadazon pagsakop kanao singed iza ka tao nga inharian na maonga. Kamhan minpanaw ya maonga kay ankaro ka banwa. Kamhan magapanawpanaw iza kay ampangita ka hel-anan. Kamhan waray datnganan naiza agon nagahena-hena iza nga an-oli di hao ka tao. ²⁵Pagdateng naiza ka tao ya beet na tao singed iton ka lagkaw nga inhingloan di daw inhipid ya tanan piro wara dizan ya magahari ka tao. ²⁶Kamhan minpanaw ya maonga kay ankawa iza ka toong mga iba nga pito siran daw maonga gazod. Kamhan sirang tanan ya magahari ka tao. Agon nagadogang gazed ya tao ka pagpakasala. Ani ini ya kahimtang na tao nga nagapanalinga ka kanaong sindo. Kamhan diri iza ampahari ka Magbabaja dalem ka toong beet.²⁷Pagkakamhan ni Hisos pagpanaba dizan ka kataohan may isang babazi nga minbaskeg ka toong paghawag nga nagalaong nga masazaen gajod ya babazi nga min-anak kanmo daw minpasoso. ²⁸Minsambag si Hisos nga masazaen hinoa ya mga nanalinga ka mga panaba na Nagagihit daw ya nagatoman kaiton.²⁹Pagheetheet ka na mga mataed nga tao libot kan Hisos minpadazon iza paglaong kaniran nga koman nga panahona mga salaan gazod ya mga tao. Kamhan ampangazo siran kanao ka timaan piro anikay timaan nao kaniran ya singod kan Zona nga karaang propita na Nagagihit. ³⁰Kay kawandini pon pagdateng ni Zona ka longsod nga Ninibi mahagdam gajod ya mga taga Ninibi nga garing iza ka Nagagihit. Koman nga panahona mindateng disab hao nga garing ka Nagagihit. Makasabot ya mga tao kaini kay-an kay mabohi hao pagbalik garing ka lebeng singed ka pagkabohi ni Zona. Kay kawandini pon tolong ka aldaw ya paghela ni Zona dalem ka tinai na dakolang isda.³¹Na, may karaang rayna isab. Taga timogan iza kamhan aro ya toong pagpanaw ka pagpanalinga ka sindo na karaang hari nga si Salomon. Agon ansombong iza kamazo kay-an ka paghokom na Nagagihit ka mga tao kay bisan labaw ya kanaong pagmaymay ka pagkalabaw na pagmaymay ni Salomon wara kamo magpanalinga kanao.³²Kay-an ka paghokom na Nagagihit ka mga tao ansombong kamazo isab ya mga taga Ninibi kay bisan labaw ya kanaong pagwali ka pagwali ni Zona wara kamo magbiza ka kamazong mga sala singed ka mga taga Ninibi kaiza nga mahon-a pon pagpakabati niran ka pagwali ni Zona.³³Na, kon seg-an na tao ya moron diri pag-ileen ka parador, diri isab pagtakloban. Kamhan ibetang daked ka artal kay dazaw pawaan ya mga minseled ka lagkaw. ³⁴Dini ka kantang lawas minpasingedsinged ya kantang mata ka segà kay kon mapawa ya kantang pagkita singed ka kapawa gihapon ya tibolos lawas. Piro kon nabota kita singed ka nagahela kita ka kadeglem. ³⁵Singed iton ka hena-hena na tao. Kay kon madazaw ya toong hena-hena madazaw gihapon ya toong batasan. Kamhan kon maonga ya toong hena-hena maonga isab ya toong batasan. Magbantay kamo kay basi madag-en ya madazaw nga hena-hena ka mga maongang hena-hena. ³⁶Kon polos madazaw ya hena-hena na tao, polos madazaw ya toong batasan. Kamhan singed iza ka lagkaw nga mapawa gajod kay inseg-an naiza ya moron kamhan inbetang dizan ka artal.³⁷Pagkakamhan ni Hisos pagpanaba kaniran dinapit iza na isang Parasiyo kay anpakaen. Kamhan minpanik si Hisos dizan ka lagkaw kay inlamisa di sa ya makaen. ³⁸Kamhan nabereng gajod ya Parasiyo ka batasan ni Hisos kay wara iza magtoman ka balaed nga garing ka mga karaan nga Hudiyo nga nagalaong nga ka wara pon magkaen ya tao kinahanglan hogasan ya alima.³⁹Minsambag ya Magbabaja nga kamo nga mga Parasiyo, singed kamo ka tao nga inhogasan gajod ya gawas na mga baso daw palato piro ya seled napono gazod ka mga maripa kay naanad kamo paglimbong ka mga tao dazaw makakowarta. ⁴⁰Mga boang! Daw wara mahagdam ya Nagagihit ka kamazong hena-hena singed ka pagkita naiza ka kamazong lawas? ⁴¹Magkalooy kamo hinoa ka mga tao. Ipanhatag mazo ka mga pobri ya makaen dizan ka mga palato mazo. Kamhan tigbeet ya pagkahinglo na kamazong lawas daw mga betang.⁴²Kamo nga mga Parasiyo, magalised gazod kamo kay-an kay diri kon matood ya pagkaazak mazo ka Nagagihit. Kay bisan nagahatag kamo ka Nagagihit ka ikanapolo nga ka bahin na bisan ya mga klasi na zaman wara kamo magtoman ka mga labaw nga sogo na Nagagihits nga nagalaong nga tadengen mazo ya pagdomara mazo ka mga iba. Azaken mazo ya mga tao singed ka pag-azak na Nagagihit kaniran. Kinahanglan tomanen isab mazo ini singed ka paghatag mazo ka mga ikanapolo nga ka bahin dizan ka Nagagihit.⁴³ba mazo naazak kamo kon palo-toon kamo ka magazong dapit. Pag-azi sab mazo dizan ka mirkado naazak gazod kamo nga madazawya pag-abiabi na mga tao kamazo. ⁴⁴Kamo nga mga Parasiyo, magalised gazod kamo kay-an kay pagtoldo mazo ka mga tao indap-an siran kakamazong mga sala. Singed gazod kamo ka mga lebeng nga waray timaan nga bato agon insagitnan na tao.⁴⁵Kamhan minlaong ya isang maistro ka tinoohan na mga Hudiyo nga Maistro, ya pagbaheg mo ka mga Parasiyo singed ka magatodaytodazen mo kami isab. ⁴⁶Minsambag si Hisos nga kamo nga mga maistro, magalised isab kamo kay-an kay impalisdan mazo ya mga tao ka sogo nga mabeg-at piro impalabzan lamang mazo itong mga sogo.⁴⁷Magalised gazod kamo kay-an kay minhinang kamo ka mga madazaw nga pantiyon para ka mga karaang propita nga inpatay na kamazong mga karaan. ⁴⁸Agon minpakita kamo nga naazak kamo ka maongang hinang na kamazong kaapoan. Siran ya minbono ka mga karaang propita na Nagagihit. Kamhan kamo ya minhinang ka mga madazaw nga pantiyon.⁴⁹Ani ini ya pagtoman ka mga panaba na Nagagihit nga nagalaong daan nga ipadara nao kamazo ya kanaong mga propita daw mga sinarigan. Kamhan pamagpatazen pon mazo ya mga pirang ka tao kaniran. Daegdaegen sabmazo ya mga iba pen nga sakop nao. ⁵⁰Agon koman madateng kamo ka silot ka pagpatay ka tanan mga matadeng nga tao sokad kawandini pon ka sinogdan pon na kalibotan. ⁵¹Madateng kamo ka silot ka pagpatay kan Abil nga waray sala hangtod ka pagpatay kan Zakariyas nga inpatay dizan ka tenga-tenga na haladanan daw ya dakolang lagkaw na Nagagihit. Matood ya mga panaba nao kamazo nga ya mga tao nga bohi koman siran ya masilotan ka pagpatay kanirang tanan!⁵²Kamo nga mga maistro ka tinoohan na mga Hudiyo, magalised gajod kamo kay-an kay singed ka intagoan gajod mazo ya pagmaymay na Nagagihit dalem ka kaban. Kamhan inkawa mazo ya liyabi. Ani ini ya kamazong hinang kay diri kamo ansogot ka sindo na Nagagihit. Kamhan nagabalabag isab kamo ka mga tao nga gosto makasabot ka sindo nga garing ka Nagagihit.⁵³Pagkakamhan ni Hisos pagpanaba kaniran mintena iza ka lagkaw na Parasiyo. Kamhan malain ya kanirang hena-hena kan Hisos.Nagapakiglaonglaong isab siran kanangiza pagpangotana dazaw ⁵⁴masazep iza pagsambag kaniran.

¹Ya, paglalis pen na mga Parasiyo kan Hisos mintipon di ya mga tao dizan kaniran. Masara gazed nga kataed ya mga tao. Kamhan magakasagitnan di ya kanirang mga paa ka kasiet. Kamhan dizan ka nabatian na mga tao minpanaba si Hisos ka toong mga sakop nagalaong nga maghamarag kamo kay basi limbongan kamo na mga Parasiyo.²Silaong niran nga natago ya kanirang mga sala ambaza kay bisan ono ya kanirang mga tinago mahagdaman gajod kay-an. ³Kay may tirminoka pagpakita ka bisan ono ya inpanaba na isa daw isa dizan ka dapit nga waray lain makabati. Bisan ono ya panaba nga hilemen lamang dalem kalagkaw nga nasirahan mapanaba gihapon iton pagdakola dizan ka mga mataed nga tao kay-an.⁴Mga higara nao, sabten mazo ini nga ya mga an-away kanta ya kantang lawas anikay daeten niran. Agon diri kamo magkahaldek kaniran. ⁵Magkahaldek kamo hinoa ka Nagagihit kay may gahem naiza ka pagpatay ka tao. May gahem sab naiza ka pagpadara ka ispirito na tao ngaro ka impirno. Agon iza gajod ya kahaldekan mazo.⁶Kamhan dakola isab ya kalooy na Nagagihit ka mga tao. Diri iza malipat ka bisan ono nga inhinang naiza. Bisan ya mga maza, ya pagpalit ka limang bolos bayinti sintabos ka lamang. Kamhan bisan barato ka lamang siran diri malipat ya Nagagihit ka bisan isang bolos nga maza. ⁷Mahal kamo ka pagkamahal na mga maza. Agon diri kamo magkahaldek ka hinang na mga tao kamazokay aligarahen gazed kamo na Nagagihit. Bisan ya bohok dizan ka olo mazo, imbilang na Nagagihit daan kon pirang ka legas ya bohok mazo.⁸Sabten mazo ini nga dizan ka mga tao bisan sin-o ya ankilala kanao siran gihapon ya makilalhan nao dizan ka mga taga langit nga sogoonon na Nagagihit. ⁹Piro bisan sin-o ya anlimed kanao dizan ka mga tao iza gihapon ya inlimed nao dizan ka mga taga langit nga sogoonon na Nagagihit. ¹⁰Bisan sin-o ya ampanaba ka maonga mahitenged kanao, kon anhinelsel iza pasaylohon iza na Nagagihit. Piro bisan sin-o ya ampanaba ka maonga mahitenged ka Madazaw nga Ispirito nga garing ka Nagagihit, diri gazed iza pasaylohon na Nagagihit.¹¹Dadhen kamo kay-an na mga tao doro kahokmanan ka oloolo na mga Hudiyo kay hao ya insakopan mazo. Kamhan pag-atobang mazokaniran daw ya mga lain tao nga magahari ka lopa na mga Hudiyo diri kamo magkawied kon ono ya isambag mazo kaniran ¹²kay antandeg ka kamazong hena-hena ya Madazaw nga Ispirito nga garing ka Nagagihit. Kamhan may isambag mazo kaniran.¹³Na, dizan ka kataohan libot kan Hisos may isang tao nagalaong nga Magtutudlo, magpanaba ko ka kanaong lomon dazaw bahinan hao naiza ka irinsiya nga imbilin kanami na kanaming ama. ¹⁴Minsambag si Hisos nga daw sin-oy minpili kanao ka pagpabahin kamazong dowa? ¹⁵Kamhan minlaong si Hisos ka mga tao dizan nga bantazan mazo ya kamazong hena-hena dazaw diri kamo mag-arig ka bisan ono ya betang na kamazong mga iba. Kay bisan manobra gajod ya mga betang na tao, diri iton makahatag kanangiza ka bag-ong kinabohi nga diri mawara.¹⁶Kamhan minpamolinged pen si Hisos kaniran nga may isang tao nga kowartahan. Kamhan min-abet pagdakola ya toong intanem. ¹⁷Kamhan nagalaong iza ka toong hena-hena nga pag-ani nao ka kanaong mga mais daw hain ibetang iton kay min-abet gajod. ¹⁸Kamhan minlaong iza nga gebaen pen nao ya kanaong lagkaw. Kamhan anpahinang disab hao ka lagkaw nga haloag dazaw hipiden nao ya tanan mga mais hasta ya kanaong mga betang. ¹⁹Pagkakamhan pagpahinang kaiton anlaong gajod hao ka kanaong kaogaringen nga dogay mahorot ya kanaong makaen daw mga betang agon anpahayahay pon hao. Anpahikaen hao. An-inem sab hao daw magapahisaza.²⁰Kamhan anlaong ya Nagagihit kaiton nga tao nga nasazep gajod iko kay koman nga kahabzen mapatay di ko. Kamhan diri di ko makatag-iza ka kanmong mga in-andam kay ihatag lamang ka lain tao. ²¹Pagkakamhan ni Hisos pagpamolinged minlaong iza nga singed kaiton ya kahimtang na tao nga wili ya toong hena-hena ka toong mga betang. Kamhan waray hena-hena naiza mahitenged ka Nagagihit agon singed ka napobri gajod iza.²²Kamo nga kanaong kasakopan, diri kamo magkawied ka pagpangita ka panginabohi mazo kon ono ya pagkaen mazo daw ya pagabadoonmazo. ²³Ya kinabohi na tao mahal iton ka pagkamahal na makaen. Ya lawas na tao mahal iton ka pagkamahal na mga bado.²⁴Paniidan mazo ya mga manokmanok. Waray mahimo niran pagtanem daw pag-ani. Kamhan waray lagkaw niran ka paghipid ka kanirang mga makaen. Hinoa ya Nagagihit nagapakaen kaniran. Na, mahal ya tao ka pagkamahal na mga manokmanok agon antabang gajod ya Ama kamazo ka pagpangita ka kamazong panginabohi. ²⁵Bisan ya kaataas na kamazong panoigen diri kamo magkawied kay garing ka pagkawied mazo diri kamo makaataas. ²⁶Agon diri isab kamo magkawied ka makaen daw pagabadoon mazo.²⁷Paniidan mazo ya mga boyak nga tobo ka lamang. Kay waray mahimo niran pagtarabaho daw pagtahi ka kanirang bado. Kamhan bisan si Salomon nga karaang hari nga nagabado ka mga mahalen ngabado lopig gajod ka kagazen ya toong bado ka kagazen na mga boyak nga tobo ka lamang. ²⁸Na, mahal ya tao ka pagkamahal na mga boyakagon antabang gajod ya Nagagihit kamazo. Geramay gajod ya pagtoo mazo ka Nagagihit kay bisan ababa ya tirmino na mga boyak anhatag iza kaniran ka kagazon. Agon antabang isab iza kamazo.²⁹Kamhan diri kamo magkawied maglaong nga waray makaen nami, waray mainem nami. ³⁰Kay ani kontana ya kawiedan na mga tao nga wara pen magsakop kanao. Piro bisan ono ya kinahanglan mazo mahagdam daan ya kamazong Ama.³¹Kamo nga kanaong kasakopan, wani ya kinahanglanen mazo paharien mazo ya Nagagihit ka kamazong beet dazaw antabang iza kamazoka pagbineetan. Kamhan antabang iza kamazo ka mga kinahanglanen mazo. ³²Kamo nga kanaong mga sakop nga inbantazan nao, diri kamomagkahaldek kay bisan diri kon mataed kamo impili kamo na Nagagihit ka paghari ka bag-ong kalibotan iba kanangiza.³³Agon ipamaligza mazo ya kamazong mga betang. Kamhan ya bazad ipanhatag ka mga pobri. Kon tomanen mazo ini nga sogo nao singed ka hinangen mazo ya pitaka nga diri madonot nga betanganan mazo ka mga mahalen daked ka hel-anan na Nagagihit. Kamhan diri madonot iton mga mahalen, diri maketket na mga ipos, diri paniken na tolisan ka pagkawat. ³⁴Kay kon hain ya kamazong mga mahalen waro disab ya hena-hena mazo ka pagtaremdem.³⁵³⁶Mag-andam gajod kamo ka kanaong pagbalik singed ka pagandam na mga sogoonon ka pagtagad niran ka kanirang amo nga om-oliay garing ka kombiti. Pagtagad pen niran imbadoan niran, insegan sab niran daan ya kanirang mga moron kay kon makabati siran ka paghawag na kanirang amo an-abri dazon siran.³⁷³⁸8Bisan kon tenga na kahabzen, bisan kamaaldawen ya pag-oli naiza, kon min-imata pon siran ka pag-abri ka pirtahan madazaw gajod ya toong panarangin kaniran. Kamhan iza hinoa ya ampakaen kanirang tanan.³⁹Sabten mazo ini nga kon mahagdam daan ya tag-iza ka lagkaw kon ono orasa paniken na tolisan diri gajod iza an-endang pagbantay kay diri itogot ya kawatan ka pagpanik. ⁴⁰Agon mag-andam isab kamo daan kay andateng gajod hao kay-an ka oras nga wara kamo mahagdam.⁴¹Pagkakamhan ni Hisos pagpanaba nangotana si Pidro nga Magbabaja, daw kami ka lamang ya inpanabaan mo kaiton nga pamolinged kon sirang tanan mga tao? ⁴²Minsambag si Hisos nga ipamolinged pen ta kamo mahitenged ka pagbalik nao ngarini. May isang sogoonon nga masarigan nga pinili na toong amo ka pagdomara ka mga iba nga sogoonon daw tagan sab siran ka makaen ka hostong orasa. ⁴³Kon antoman ya sinarigan ka mga sogona toong amo dakola ya toong kasaza pagdateng na amo. ⁴⁴Kamhan insarigan iza na amo ka tanan mga betang.⁴⁵Piro kon maonga ya henahena na sinarigan silaong naiza nga madogay pon ya pag-oli na kanaong amo. Kamhan minsogod iza pagpanbonal ka toong mga iba nga sogoonon nga amaama daw babazi. Minkaen sab iza daw min-inem iba ka mga palahebeg. ⁴⁶Lomaza iza om-inem daw komaen mindateng di ya toong amo ka waray tirmino nga aldaw. Kamhan silotan iza na amo iba ka mga tao nga diri masarigan. Kamhan patazen sirang tanan.⁴⁷Silotan gajod iza na amo kay bisan nahagdam iza daan ka sogo na toong amo wara naiza tomana, wara mag-andam ka pagdateng na toong amo. ⁴⁸Kamhan ya sogoonon nga wara mahagdam kon ono ya sogo na toong amo, diri silotan pagdakola. Na, bisan sin-o ya tao kon insarigan iza na Nagagihit ka mga mataed, gosto ya Nagagihit nga magadogangan pen gazod na tao dazaw mataed gajod. Kamhan ya tao nga insarigan na toong kaibahan ka mga mataed, gosto isab siran nga magadogangan pen gajod na tao dazawmataed gajod.⁴⁹Indogangan pon ni Hisos pagpanaba kaniran nagalaong nga ya tood nao dini ka kalibotan singed hao ka tao nga nagaharing ka toong homay. Gosto nao kon magalaga di iton ⁵⁰piro madateng pen hao ka masiet nga kalised. Kamhan mabeg-at gajod ya kanaong hinawa hangtod ka makaazi hao kaiton nga kalised.⁵¹Diri kamo maghena-hena nga ya pagkarini nao dini ka kalibotan anhatag ka pagpakaangay dizan ka isa daw isa nga tao. Hinoa ya pagkarini nao ani ya sinogdan ka pagkaaway ka isa daw isa kay ya isa antoo kanao piro ya isa diri antoo kanao. ⁵²Kamhan dizan ka isang pamiliya nga limang bolos nga maglomon ampakig-away ya tolo dizan ka dowa. Ampakig-away isab ya dowa dizan ka tolo. ⁵³Ampakig-away ya ama ka toong maanak nga amaama. Ampakig-away isab ya maanak ka toong ama. Ampakig-away ya ina ka toong maanak nga babazi. Ampakigaway sab ya maanak ka toong ina. Ampakig-away ya ogangan nga bozag ka toong ogangan nga babazi. Ampakig-away sab ya ogangan ka toong ogangan nga bozag.⁵⁴Kamhan minlaong si Hisos ka kataohan nga pagpakakita mazo ka dag-em nga mingaring ka salpan nagalaong kamo nga an-oran kaan. Kamhan maoran matood. ⁵⁵Pagpaniid mazo ka hangin mingaring ka timogan nagalaong disab kamo nga masega kaan. Kamhan minsega matood iton. ⁵⁶Mahagdam kamo daan kon madateng kamo ka oran kon sega piro ya mga timaan nga garing ka Nagagihit mahitenged ka kataposan nga panahon wara baza kamo makasabot.⁵⁷Kay ono sa kamo diri kamo makakilala ka madazaw? ⁵⁸Wani ya kanaong tambag kamazo. Kon may ansombong kamazo kamhan dadhen ko naiza ka hokmanan na, ka wara pon kamo makadateng ka hokmanan hosazen mo iza kay kon makadateng kamo ka hokmanan itogyan ko naiza ka maghohokom. Kamhan ya maghohokomantogyan kanmo ka polis. Kamhan ipapiriso iko. ⁵⁹Kamhan dizan ko maghela hangtod ka pagkaimpas na kanmong molta.

¹Pagsindo pon ni Hisos kaniran may mga tao dizan kanangiza. Kamhan impanan-og iza niran mahitenged ka mga Hudiyo nga taga Galiliya nga impamono ni Pilato paghalad niran ka mga ihazep dalem ka dakolang lagkaw nga pangamozoanan na Nagagihit. ²Na, ya mga taga Galiliya daw ya mga taga Huda diri magkaangay siran kamhan intamay gazod na mga taga Huda ya mga taga Galiliya. Kamhan minlaong si Hisos kaniran nga nasazep kamo kon anhena-hena kamo nga dakola ya mga sala niran ka mga sala na mga iba nga taga Galiliya. Kamhan nangapatay siran. ³Panabaan ta kamo nga kon diri kamo maghinelsel ka kamazong mga sala mangapatay isab kamong tanan.⁴Bisan ya mga napolo may walong ka tao nga napatay ka pagkasakem na lagkaw nga ataas ka pagkadeeg doro ka longsod nga Siloi, may sazepmazo kon anhena-hena kamo nga impatay siran kay dakola pon ya mga sala niran ka mga sala na mga iba nga taga Hirosalem. ⁵Panabaan ta kamo nga kon diri kamo maghinelsel ka kamazong mga sala mangapatay isab kamong tanan.⁶Kamhan nagapamolinged si Hisos kaniran nga nagalaong nga ka warong aldaw may isang tao. Kamhan dizan ka toong oma may intanemnaiza ani ngaran ya igira. Kamhan minbisita iza kaiton nga tanem kay sosihen kon may protas ambaza kay wara. ⁷Agon minlaong iza ka toongsaop nga ini nga kanaong tinanem tolo ding ka toig ya pagsosi nao ka bonga piro wara gajod mamonga. Hadhaden lamang ini kay kanogonya lopa.⁸Minsambag ya saop nga Nong, pabet-i lamang iton koman toiga kay libonan kanao ya toboan daw bo-boan kanao ka abono. ⁹Kon mamonga iton ka sonod nga toig madazaw gajod piro kon diri hadhaden o lamang. Ani ini ya pamolinged ni Hisos kaniran.¹⁰PagkaSabado nga tigpahimlay na mga Hudiyo minsindo si Hisos kaniran dizan ka isang singbahan. ¹¹Na, dizan disab may babazi ngainhabay sokad ka napolo may walong ka toig. Kamhan nabozokot gajod iza, diri iza makatindeg pagtol-id.¹²Pagpakakita ka ni Hisos kaiton nga babazi minlaong iza nga nawara di ya masakit ka kanmong lawas. ¹³Kamhan indampa ni Hisos ya likod na babazi. Kamhan nahenat matood ya toong likod. Mintindeg dazon iza. Kamhan insaza gajod naiza ya Nagagihit. ¹⁴Piro nazehet ya oloolo ka singbahan kay inpabahaw ni Hisos ya babazi ka aldaw nga tigpahimlay. Kamhan minlaong ya oloolo ka mga tao nga kada simana may enem nga ka aldaw nga makatarabaho kamo. Magpatambal hinoa kamo kaiton nga mga aldaw kay ya pagtambal ka tao singed iton ka tarabaho. Basta ya kantang aldaw nga tigpahimlay diri gajod kamo magpatambal.¹⁵Minsambag si Hisos nga mga bakak ya kamazong batasan! Kay bisan kon aldaw nga tigpahimlay hobaden mazo ya tanan mga karabaw daw kabayo dazaw paimnen dizan ka sapa. ¹⁶Kamhan minlaong kamo nga maonga gajod hao kay inkawa nao ya kasakit na babazi nga kaliwat ni Abraham nga impaanget ni Satanas ka napolo may walong ka toig. Kinahanglan librihen gazjod iza koman aldaw nga kamazong tigpahimlay.¹⁷Kamhan masipeg gajod ya tanan mga kaaway ni Hisos. Kamhan minsaza ya tanan mga tao kay madazaw gajod ya toong pagtabang ka mga tao.¹⁸Kamhan indogangan pen ni Hisos paglaong kaniran nga wani ya pagmolinged mahitenged ka pagpaoswag na Nagagihit ka toong paghari dini ka mga tao. ¹⁹Singed iton ka isang bolos nga liso inngaranan ka mostasa. Kamhan intanem na tao dizan ka toong oma. Bisan geramay iton ka bisan ono nga liso, ka pagsolig di mahinang iton ka dakolang liwaan kay doro ka lopa nga Huda ya mostasa liwaan iton nga opat nga ka mitros yakaataas. Kamhan magapogad ya mga manokmanok dizan ka mga sap-ay naiton.²⁰Kamhan nagapamolinged pon si Hisos kaniran mahitenged ka pagpasakop na Nagagihit ka mga tao nagalaong nga ²¹singed iton ka ipasoligay ka tinapay. Insaktan na babazi ka ipasoligay ya tolong ka takes nga harina. Kamhan minsolig iton kadakola gajod ya pagsolig.²²Pagkakamhan ni Hisos pagpanaba kaniran minpasinged iza ngaro ka Hirosalem. Pag-azi naiza ka mga longsod daw ya mga bariyo nagasindoiza ka mga tao. ²³Kamhan nangotana ya isang tao nga Magbabaja, daw talagsa ka lamang ya tao nga mahatagan ka bag-ong kinabohi nga waraykinateban? Minsambag si Hisos nga ²⁴magpakalaki kamo pagseled dizan ka masiet nga pirtahan. Kay mataed ya anseled kontana piro diri siran makaseled²⁵kay insirahan na tag-iza. Kamhan dizan ka gawas anhawag kamo nga Magbabaja, paselden mo kami, kamhan ansambag iza kamazo nga wara hao mahagdam kon sin-o sa kamo. ²⁶Kamhan anmahay kamo magalaong nga kami nga mga Hudiyo ani ya min-iba kanmo ka pagkaenizang dini kaini. Minsindo iko dizan ka mga dalan na kanaming longsod. ²⁷Kamhan ansambag iza kamazo pag-isab nga wara hao mahagdam konsin-o sa kamo. Mga salaan nga tao, iwat kamo dini kanao.²⁸Pagkita mazo kan Abraham daw si Isak daw si Hakob daw ya tanan mga karaang propita na Nagagihit dizan ka hel-anan na Nagagihit, magapangageet kamo ka kamazong ngipen ka paghaza kay impamogaw kamo na Nagagihit. ²⁹Kamhan ampakaen ya Nagagihit ka mga mataed nga tao nga diri kon Hudiyo nga garing ka sebazan daw salpan daw kanawazan daw timogan. ³⁰Magtimaan kamo kaini nga koman ya mga mahori, mahon-a siran kayan. Kamhan ya mga mahon-a koman mahori siran kay-an.³¹Pagkakamhan ni Hisos pagpanaba kaniran mindateng di kanangiza ya mga Parasiyo. Kamhan minlaong siran nga pomanaw ko dini kay patazen ko kontana ni Hirodis nga hari. ³²Minsambag si Hisos nga hanas gazod si Hirodis paglimbong ka mga tao. Magkaro kamo kanangiza daw maglaong nga koman aldaw daw konsilem palogwaen pen nao ya mga maonga. Pabahawen sab nao ya kasakit na mga tao. Pagdateng ka ikatolong aldaw kamhan di gazod ya kanaong tarabaho. ³³Kamhan minlaong iza ka toong mga iba nga magapasinged pen hao ka dalan ngaro ka siyodad nga Hirosalem koman aldaw daw pagkakonsilem daw pagkakon-isa. Diri mahimo ya pagpatay ni Hirodis kanao dini kay ya siyodad nga Hirosalem ani ya napatzan na mga propita na Nagagihit.³⁴Kamo nga mga taga Hirosalem, nagalised di gazod ya kanaong hena-hena kay inpatay mazo pagpamook ya mga karaang propita na Nagagihit daw ya mga sogoonon nga impakarini na Nagagihit kamazo. Gosto gazod hao an-aligara kamazo singed ka manggianak nga nagatipon ka toong mga pise dalem ka toong ampak piro diri kamo ansogot. ³⁵Sabten mazo ini nga pamanawan gazod na mga tao dini ka hel-anan mazo. Sokad koman diri kamo makakita kanao hangtod ka pagbalik nao. Kamhan ansaza kamo kanao magalaong nga sazaen ta iza nga impakarini na Nagagihit dini kanami. Ani ini ya inlaong ni Hisos kaniran.

¹May isa pon nga Sabado impakaen si Hisos na isang oloolo na mga Parasiyo. Kamhan nagapaniid gazod ya mga Parasiyo kon dazawen ni Hisos ya masakit na tao koman aldaw nga tigpahimlay. ²Na, dizan kanangiza may tao nga nanghepeng di ya toong mga bitiis daw mga bekten. ³Kamhan nangotana si Hisos ka mga maistro ka tinoohan na mga Hudiyo daw ya mga Parasiyo nagalaong nga ya balaed na Nagagihit mahitenged ka aldaw nga tigpahimlay daw itogot ka pagkalooy ka masakiten kon diri?⁴Piro wara siran magsambag. Paghabit ni Hisos kaiton nga tao nadazaw matood ya toong lawas. Kamhan impaoli iza ni Hisos. ⁵Kamhan minlaong iza ka mga Parasiyo nga dini kamazo sin-o ya may anak kon may bohien nga karabaw nga naholog dalem ka gahong. Na, bisan aldaw nga tigpahimlay, batonon gazod mazo ya naholog. ⁶Kamhan wara gihapon siran magsambag kan Hisos.⁷Kamhan minpaniid si Hisos ka batasan na mga iba nga bisita dizan ka lagkaw na Parasiyo kay impili niran ya mga lo-toanan nga madazaw ka pagkaen. Kamhan minlaong iza kaniran nga ⁸kon pakanen kamo na tao ka kombiti, diri kamo maglo-to dizan ka mga madazaw nga lotoanan kay basi may andateng sonod kanmo nga labaw kanmo. ⁹Kamhan panabaan ko na oloolo ka kombiti nga magtindeg ko naa kay iza ya palo-toon nao dini. Kamhan masipeg gazod iko pagsibog mo dizan ka labing obos nga dapit.¹⁰Hinoa kon dapiten kamo maglo-to kamo dizan ka lo-toanan nga diri kon madazaw. Kamhan kon ankita kanmo ya oloolo anlaong iza kanmo nga higara, bomalhin ko naa dini kaini nga lo-toanannga madazaw. Kamhan mahagdam ya mga naneleng nga iko matood ya higara na taglagkaw. ¹¹Kay bisan sin-o ya ampalabaw ka toongkaogaringen dizan ka toong mga iba, iza gazed ya impaebes na Nagagihit. Kamhan bisan sin-o ya mapaebes ka toong kaogaringen, iza gazod yaimpalabaw na Nagagihit.¹²Pagkakamhan ni Hisos paglaong kaniran minlaong isab iza ka mindapit kanangiza nga kon an-andam iko ka kombiti, diri mo dapita ya kanmong mga higara daw mga lomon daw mga kaibahan daw ya kanmong songbalay nga kowartahan kay siran ya anbales pagdapit dazaw makaimpas kanmo.¹³Hinoa dapita mo ya mga pobri daw ya mganabarian daw ya mga piang daw ya mga nabota. ¹⁴Kamhan madazaw ya panarangin kanmo na Nagagihit kay diri siran makabales ka pag-impaskanmo. Mabalsan ko matood na Nagagihit kay-an ka aldawa ka pagkabohi naiza pagbalik ka mga matadeng nga tao garing ka lebeng.¹⁵Na, dizan ka mga tao nga mintambong ka pagkaen may isa nga nakabati kaiton nga inlaong ni Hisos. Kamhan minlaong iza nga dakola ya kasaza na mga tao nga pakanen na Nagagihit kay-an ka pagkahari naiza ka bag-ong kalibotan. ¹⁶Minsambag si Hisos pagpamolinged nga may tao nga min-andam ka dakolang pagkaen. Indapit naiza ya mga mataed nga tao. ¹⁷Pagkakamhan naiza pagpakaandam ka makaen impakaro di naiza ya toong sogoonon ka mga tao nga toong dinapit dazaw long-on nga komaro di kamo kay mangaen di naa kamo doro.¹⁸Ambaza kay minbaribad sirang tanan ka impanaba na sogoonon. Minlaong ya isa pagbaribad nga nakapalit di hao ka lopa nga in-oma nao. Kinahanglan nga sosihen nao iton. Pasaylohon mo hao kay diri hao makatambong. ¹⁹Minlaong ya ikadowa nga nakapalit di hao ka mga karabaw nga napolo nga bolos. Kinahanglan nga porbahan nao pagdaro. Pasaylohon mo hao kay diri isab hao makatambong. ²⁰Kamhan minlaong ya ikatolo ngabag-o pen hao maminze agon diri hao makatambong.²¹Pagkakamhan kaiza min-oli ya sogoonon kay minpakahagdam ka toong amo. Kamhan nazehet gazod ya amo. Minsogo disab iza ka sogoonon nga pangarohen mo pagdali ya mga kadalanan nga haloag daw masiet dini ka longsod. Dadhen mo ngarini ya mga pobri daw ya mga nabarian daw ya mga nabota daw ya mga piang. ²²Ka wara pon madogay minlaong ya sogoonon nga Nong, mintoman di hao ka kanmong sogo kanao piro dakola pen ya makaen.²³Minsambag ya amo nga komaro ko naa ka kadalanan nga aro ka longsod. Legesen mo ya mga tao pagpakarini dazaw mapono ya kanaong lagkaw. ²⁴Kay sabten mo ini nga bisan sin-o ya daan dinapit nao diri di gazed iza makatilaw ka kanaong in-andam.²⁵Pagkakamhan ni Hisos pagbisita dizan minpasinged pon iza ngaro ka kahaloagan nga Hirosalem. Nangiba disab ya masarang kataed nga mga tao. Kamhan minliso iza dizan kaniran daw minpanaba nga ²⁶bisan sin-o ya ampasakop kanao kon palabawen naiza ya toong pag-azak katoong ama daw ina daw asawa daw mga bata daw mga lomon daw toong kaogaringen ka kaazak naiza kanao, diri mahimo ya toong pagpasakopkanao. ²⁷Kon diri ampadazon ya tao pagtoman ka kanaong mga sogo kanangiza kay basi patazen iza diri mahimo ya toong pagpasakop kanao.²⁸Ya tao nga ampasakop kanao singed iza ka tao nga gosto anhinang ka ataas nga lagkaw. Ka wara pon iza magsogod paghinang anhenahena pen iza kon pira ya toong gasto nga ikakamhan ka lagkaw kon igo di ya toong kowarta kon diri. ²⁹Kon diri an-igo ya toong kowarta masazep gazod iza kon ansogod iza paghinang ka lagkaw kay ka wara pen makamhan mahorot matood ya toong kowarta. Kamhan biaybiazen gazod iza na toong kaibahan nga ³⁰nagalaong nga minsogod iza paghinang ka ataas nga lagkaw ambaza kay imbizaan di kay diri an-igo ya toong kowarta nga ikakamhan.³¹Na, ya tao nga ampasakop kanao singed isab iza ka isang hari nga may mga soldaw nga napolo nga ka libo. Kamhan ya hari nga toong kaaway mataed pen ya toong mga soldaw kay karohaan nga ka libo sirang tanan. Na, ka wara pon ya isang hari ampakiggira anhena-hena iza kon makadaeg iza ka toong kaaway kon diri. ³²Pagkakamhan naiza paghena-hena nga diri iza makadaeg ipahon-a naiza ya toong mga sogoonon ka hari nga kaaway dazaw ampakighosay iza. ³³Bisan ya tao nga ampasakop kanao kinahanglan maghena-hena iza paghon-a kon makabiza iza ka toong mga betang daw kaibahan dazaw ansakop iza kanao. Kon diri iza makabiza kanirang tanan diri gazod iza makasakop kanao kay diri iza makaanget ka mga kalised.³⁴Kay ya pag-anget mazo ka mga kalised singed iton ka asin nga madazaw piro kon diri kamo makaanget ka mga kalised singed kamo ka asin nga wara di ya kaparat. Kamhan diri di gazod ambalik ya kaparat. ³⁵Agon itimbag lamang kay wara di ya polos. Kamo nga mga manalingahay,magtaremdem kamo kaini nga sindo nao kamazo.

¹Pagkakamhan kaiza minkarini kan Hisos ya mga mataed nga magsokotay ka bohis daw ya mga iba pon nga salaan nga tao kay manalinga siran kanangiza. ²Kamhan minmahay ya mga Parasiyo daw ya mga magtutudlo ka tinoohan na mga Hudiyo nagalaong nga iton nga tao min-abiabi iza ka mga salaan nga tao daw minpakigsaro iza kaniran!³Mahagdam si Hisos ka kanirang mga panaba agon minpamolinged iza kaniran nga ⁴simpan dini kamazo may isa nga minbohi ka mga isang kagatos nga karniro kamhan nalaag ya isa. Kamhan daw ono ya kanmong hinangen? Imbilin ya mga kasizaman may sizam dizan ka samsamanankay pangitan gazed ya isa nga nalaag hasta ka makita. ⁵Pagkakiti mo ka isa seng-azen dazon. Kamhan minsaza gazod ya hinawa mo.⁶Pagdateng ka lagkaw patiponan disab ya mga kaibahan mo kay magalaong nga magsaza di kita kay nakitan nao ya isang karniro nga nalaag. ⁷Kamhan ya mga salaan nga tao singed siran ka mga karniro nga nalaag. Paghinelsel na isang salaan ka toong mga sala labaw pen ya kasaza na Nagagihit ka toong kasaza ka mga kasizaman may sizam nga tao nga diri anhinelsel kay silaong niran nga waray sala niran.⁸Kamhan indogangan pon ni Hisos ka pagpamolinged kaniran nga may isang babazi nga napolong bolos ya toong palata nga kowarta ngabolawan. Kamhan nalaag ya isa. Kamhan an-ono ya babazi? Ansegà matood iza ka toong lamparahan kay silhigan naiza ya toong lagkaw. Sosihen gazod naiza ya toong lagkaw daw hangwan hangtod nga makitan naiza ya palata nga nalaag. ⁹Kamhan patiponan dazon naiza ya toong kaibahan kay magalaong nga magsaza di kita kay nakitan di nao ya kanaong kowarta nga nalaag. ¹⁰Kamhan ya kasaza niran singed iton ka kasaza na mga taga langit nga sogoonon na Nagagihit paghinelsel na isang ka tao ka toong mga sala.¹¹Kamhan indogangan pen ni Hisos pagpamolinged kaniran nga may isang tao nga dowang bolos ya toong maanak nga amaama. ¹²Kamhan minlaong ya manghod nga Tay, bahinen mo koman ya kanmong mga betang. Kamhan tagan mo hao ka kanaong irinsiya. Kamhan minbahinmatood ya ama ka toong mga betang dizan kanirang dowa.¹³Ka wara pon madogay inbaligza na manghod ya toong kabahinan. Kamhan minpanaw iza doro ka aro. Kamhan kanogon gazod ya toong kowarta kayingastogasto naiza ya toong kowarta ka maongang hinang. ¹⁴Pagkahorot ka na toong kowarta mindateng ya dakolang pihit dizan kaiton ngadapita. Kamhan nagalised gazod iza kay wara di ya toong panginabohi.¹⁵Kamhan anpatarabaho iza ka isang tao dizan ka longsod. Kamhan insogo iza ka pagbahog ka mga baboy. Malised iton kay ya manghod Hudiyo iza. Kamhan ya mga Hudiyo diri ambohi ka mga baboy kay maonga koni. ¹⁶Pagbahog naiza ka mga baboy ankaen iza kontana ka mga parot nga inbahog kaniran kay waray makaen naiza.¹⁷Pagkadogay ka kaiza minlaong ya manghod ka toong hena-hena nga nasazep gazod hao kay hapit hao mapatay ka kabengtas dini. Kamhan doro ka kanaong ama nanobra ya pagkaen na toong mga sinoholan. ¹⁸Ampanaw di gazod hao. An-oli di hao ka kanaong ama kay long-on nao iza nga Tay, nakasala gazod hao ka Nagagihit daw kanmo. ¹⁹Diri di kon angay pen nga maanak pon mo hao. Hinangen di mo lamang hao singedka mga sinoholan mo.²⁰Pagkakamhan naiza paghena-hena minpanaw iza pag-oli ngaro ka toong ama. Ka aro pon iza ka lagkaw nakakita di ya toong ama nga waton di ngarini ya toong anak. Kamhan mintonaw ya toong hinawa ka kalooy. Min-ariari gazod iza ka pagsogat ka toong maanak. Kamhan minkolapot iza daw min-arek ka pagsaza. ²¹Kamhan minlaong ya maanak nga Tay, nakasala hao ka Nagagihit daw kanmo agon diri di mo hao paglong-on nga kanmo peng maanak.²²Kamhan ya ama minhawag dazon ka mga sogoonon nga dali kamo, dadha mazo ngarini ya bado nga madazaw. Kamhan badoi mazo ini daw sol-oti ka kanaong singsing daw sapatosi iza! ²³Kamhan dakpa mazo ya bohien nga pinahonlas. Ihawen mazo kay magapista gazod kita ka pagsaza. ²⁴Kay nabohi ka ya kanaong anak nga silaong nao nga patay di. Nalaag iza piro nakaoli ka kanao. Pagkakamhan kaiza minsogod siran pagpabibo.²⁵Kamhan wara dizan ya magorang kay waro pon iza ka oma. Pagpakaoli ka naiza nabatian naiza ya tanog na mga agong daw ya masamok ka kabibo. ²⁶Kamhan minhawag iza ka isang sogoonon nga nagalaong nga onosa wani nga mabibo sa kamo koman? ²⁷Minsambag iza nga min-oli di ya manghod mo. Agon inpatazan di na ama mo ka bohien nga pinahonlas kay bohi ka ya toong anak.²⁸Kamhan nazehet gazod ya magorang. Diri iza anseled ka lagkaw. Agon minlogwa ya toong ama kay anhangzo iza ka pagseled ngandalem ka lagkaw. ²⁹Kamhan minsambag ya magorang nga Tay, hao ya mintabang kanmo ka pirang ka toig. Bisan ono ya sogo mo kanao mintoman gazod hao. Kamhan wara mo hao hatagi bisan kanding ka lamang dazaw ampamista hao daw ya kanaong mga higara. ³⁰Hinoa ya maanak mo nga nakaosikosik ka kanmong kowarta doro ka mga maongang babazi pagpakaoli naiza in-ihawan mo baza ka bohien nga pinahonlas.³¹Minsambag ya ama nga Loy, iko matood ya masarigan pagtarabaho dini kanao ka mga mataed nga toig. Kamhan kanmo di gazod ya tanan mga betang nao. ³²Madazaw isab ya pagpamista nao ka kanmong manghod kay bohi ka iza nga silaong nao patay di. Nalaag iza piro nakaoli ka kanao. Na, ani ini ya pamolinged ni Hisos dizan ka mga maistro ka tinoohan na mga Hudiyo kay minmahaysiran nga nagaabiabi si Hisos ka mga salaan nga tao.

¹Pagkakamhan kaiza minpamolinged si Hisos ka toong mga sakop nga nagalaong nga may isang tao nga kowartahan. Kamhan inpasarigan naiza ya toong taliped dizan ka timbang nga hanas ka paggamit ka taliped dazaw madogangan iton. Ka wara pon madogay impakahagdam ya amo nga in-osik-osikan na timbang ya toong kowarta. ²Kamhan impakarini naiza ya timbang daw nagalaong nga ono sa wani nga nabatian nao kanmo? Ibalik mo kanao ya tanan mga kowarta kaypalogwaen ta ko kaan.³Kamhan nagalised gazod ya hena-hena na timbang kay matood ya nabatian na amo. Kamhan minlaong iza ka toong hena-hena nga kon palogwaen hao naiza daw magaono di sa hao? Waray mahimo nao ka paghinang ka oma. Masipeg hao ka pagpangazo ka taliped. ⁴Agon anandam hao daan dazaw ampaloon ya mga tao kanao ka kanirang lagkaw kay-an ka pagpalogwa kanao na kanaong amo.⁵Kamhan minpakarini iza ka mga otangan ka toong amo kay ansabot pon iza kaniran. Nangotana iza ka isa kon pira ya toong otang. ⁶Minsambag iza nga nakaotang hao ka isang ka gatos nga ka taro nga lana. Kamhan mintogon ya timbang nga wani ya lista ka otang mo. Dali, isoyat mo naa ya kalim-an ka lamang. Kamhan ipakita nao iton ka kanaong amo. ⁷Kamhan nangotana iza ka ikadowang otangan nga daw pira ya otang mo ka kanaong amo? Minsambag iza nga nakaotang hao ka isang ka libo nga ka sako nga begas. Kamhan mintogon ya timbang nga wani ya lista ka otang mo. Isoyat mo lamang ya walong ka gatos nga kasako. Ani ini ya toong hinang dazaw kay-an ka pagpalogwa kanangiza na amo, siran ya anpaloon kanang-iza.⁸Pagpaniid ka na amo ka paglimbong na timbang bisan diri iza azak ka limbong minlaong iza nga hanas gazod iza pag-andam daan ka toong panginabohi. Ani ini ya pamolinged ni Hisos ka toong mga sakop. Kamhan minpanaba si Hisos kaniran nga ya mga tao nga diri antoo kanao singed siran ka timbang. Kamhan ya pagkahanas niran kapaghinang ka bakak labaw iton ka pagkahanas na kanaong mga sakop ka paghinang ka mga madazaw. ⁹Panabaan ta kamo. Gamiten mazoya kamazong kowarta ka pagpakig-azok ka mga tao dazaw kay-an ka pagpakahorot na kamazong kowarta siran ya an-abiabi kamazo daked kahel-anan nga diri mageba kawanihen ka.¹⁰Kon matadeng ya batasan na tao nga insarigan ka mga talagsa kang betang, matadeng isab iza kon isarig kanangiza ya mga mataed nga botang. Kon limbongan ya tao nga insarigan ka mga talagsa kang betang, limbongan isab iza kon isarig kanangiza ya mga mataed nga betang. ¹¹Kon diri kon matadeng ya kamazong batasan ka pag-aligara ka taliped nga insarig kamazo dini ka kalibotan, waray ampasarig kamazo ka matood nga mahalen daked ka hel-anan na Nagagihit. ¹²Kon diri kon matadeng ya kamazong batasan ka pag-aligara ka mga betang na kamazong iba waray ampasarig kamazo ka pag-aligara ka bisan ono.¹³Kamhan ya isang sogoonon diri iza makaalagad pagdengan ka dowang ka agaron. Kay kon dowa ya toong agaron tahodon naiza ya isa piro magatamazen naiza ya isa. Kon dakola ya kaazak mazo ka taliped diri mahimo ya pag-alagad mazo ka Nagagihit.¹⁴Na, dizan disab may mga Parasiyo nga in-awes ya dakolang kowarta. Kamhan pagkabati niran ka impanaba ni Hisos mahitenged ka talipedintamaytamay gazod niran. ¹⁵Minsambag si Hisos nga dizan ka mga tao nagapatihinang kamo ka madazaw nga batasan kay ampakita kamokaniran nga waray sala mazo piro mahagdam ya Nagagihit ka kamazong hena-hena. Kamhan bisan dakola ya pagtahod na mga tao kamazo silotangazod kamo na Nagagihit pagdobli.¹⁶Sokad kawandini pen dogay di hangtod ka pagdateng ni Howan nga Magbenzagay inton-an mazo ya daan balaed na Nagagihit daw ya sindo namga karaang propita. Sokad ka pagdateng ni Howan inwalihan kamo ka sindo mahitenged ka pagpasakop na Nagagihit ka mga tao. Kamhanmataed ya ampakalaki pagmamay kanao. ¹⁷Kamhan ya daan balaed na Nagagihit, diri gazod makawa ya bisan isang ka toblok lamang kay matoman gazod ya tanan. Masazon ya pagkawara na kalibotan daw kalangitan ka pagkakawa na daan balaed na Nagagihit.¹⁸Kamhan wani ya isang sindo dizan ka daan balaed na Nagagihit nga bisan sin-o ya anpakigbelag ka toong asawa dazaw anminze iza ka laing babazi minhenay iza ka toong primirong asawa. Kamhan ya tao nga anminze ka babazi nga imbelagan na bana minhenay iza kay daan minze ya babazi.¹⁹Pagkakamhan kaiza indogangan pon ni Hisos pagpanan-og ka mga Parasiyo nga nagalaong nga may isang tao nga kowartahan nga mahalya pagabadoon naiza. Madazaw isab ya toong pagakanen kada aldaw. ²⁰Kamhan may isang pobri nga si Lazaro ya ngaran. Masarang kataedya toong mga samad. Impabentag iza dizan ka pirtahan na lagkaw na kowartahan ²¹kay ankaen iza kontana ka bisan ya mga basora nga intimbag na kowartahan. Magalised gazod iza kay magapanilaan na mga ido ya toong mga samad.²²Pagkadogay kaiza napatay ya pobri. Kamhan indara iza na mga tahaw nga sogoonon na Nagagihit ngandaked ka hel-anan ni Abraham nga karaang propita. Kamhan napatay disab ya kowartahan. Kamhan inlebeng. ²³Baba ka inpirno min-anget iza ka masarang kasakit. Paghangad ka naiza nakakita iza kan Abraham doro ka aro daw si Lazaro dizan ka tepad naiza.²⁴Kamhan minsinggit ya kowartahan nga apo Abraham! Kaloy-i intawon hao. Magsogo ko kan Lazaro dazaw patignawan ya kanaong dila ka sapa kay masakit gazod ya kanaong lawas dini ka masarang karangka nga laga.²⁵Minsambag si Abraham nga daw makataremdem iko nga ka paghela pon mo dimbaba ka kalibotan madazaw gazod ya kahimtang mo piro dakola ya kalised ni Lazaro. Kamhan naloy-an si Lazaro dini kanao koman piro mangarohoy iko ka masarang kasakit. ²⁶Diri mahimo ya pagkaro ni Lazaro kanmo kay dizan ka tenga na kanaming dapit daw ya kanmong dapit may bonggawa nga haloag. Kamhan diri makadateng ya taga dindaked ngambaba kamazo. Bisan ya mga taga dimbaba diri siran makadateng dindaked.²⁷Kamhan minhangzo ya kowartahan nga Apo, kon somogot ko pakarohen mo si Lazaro ka lagkaw na kanaong ama. ²⁸Kay limang bolos ya kanaong mga manghod doro. Kamhan pakahagdamen mo siran nga maonga ini nga datnganan nao dazaw maregda siran kay basi andateng siran dimbaba ka masarang kapaso.²⁹Minsambag si Abraham nga mahagdam siran ka kasogoan nga impasoyat na Nagagihit kan Moysis daw ya mga karaang propita. Kontana tomanen niran iton. ³⁰Minsambag ya sapianan nga apo Abraham, diri siran antoman kaiton piro kon may mabohi pagbalik garing ka lebeng kamhan iza ya ambisita kaniran anhinelsel gazod siran ka kanirang mga sala. ³¹Minsambag si Abraham nga kon diri siran antoo ka sindo ni Moysis daw ya mga karaang propita, diri gazod siran antoo ka tao bisan mabohi iza pagbalik garing ka lebeng.

¹Pagkakamhan kaiza minlaong si Hisos ka toong mga sakop nga magtimaan kamo kaini nga mataed gazod ya mga antintal kamazo dazaw ambiza kamo kanao. Kamhan ya tao nga magtintalay kamazo ka pagbiza kanao magalised gazod iza kay-an kay silotan gazod iza na Nagagihit pagdakola. ²Madazaw kon ya bato nga galingan ibitay ka toong lieg kamhan itimbag iza ka dagat dazaw diri makapadazon ka pagtintal kamazo. Kamhan ya kalised naiza pagkalemes geramay iton ka kalised naiza kay-an garing ka pagsilot na Nagagihit kay mintintal iza ka tao nga bag-o pen minsakop kanao.³Agon magbantay kamo ka batasan mazo. Dizan ka kamazong lomon kan Kristo kon nakasazep ya isa bahegan mo iza. Kamhan kon anhinelsel iza pasaylohon mo iza. ⁴Bisan kon kapito iza makasazep kanmo ka isang aldaw kamhan kapito iza magpangazo ka pasaylo, pasaylohon mo iza.⁵Kamhan minlaong ya mga sinarigan ni Hisos nga Ginoo, dakolaen mo ya kanaming pagsarig kanmo dazaw diri kami dag-en ka pagtintal na mga maonga. ⁶Minpamolinged si Hisos pagsambag kaniran nga bisan singed ka kontana ka liso na mostasa ka kageramay ya pagtoo mazo kanao mahimo ya pagsogo mazo ka liwaan nga sikomoro ka pagsibeg ngaro ka dagat. Kamhan antoman iton ka sogo mazo, bisan ararem gazod ya dinoltan na mga gamot.⁷Kamo nga may mga sogoonon, bisan kon nagatarabaho ya isang sogoonon mo dizan ka oma, bisan kon nagabantay iza ka kanmong mgakarniro, pag-oli naiza ka pagkadelem daw ono ya batasan mo? Diri ko ampakaen kanangiza paghon-a kanmo ⁸kay ansogo hinoa nga magsen-adko naa kanao. Mag-ilis ko ka bado mo kay lamisahan mo hao ka kanaong panihapon. Ani ini ya sogo mo kamhan kon makakamhan iko pagkaenanipen kon ampanihapon iza sonod kanmo.⁹Bisan antoman ya sogoonon ka tanan mga sogo mo wara ko maglaong nga madazaw iza kay kanmong tarabahanti ka lamang iza. ¹⁰Kamo nga kanaong mga sinarigan, singed kamo kaiton nga sogoonon. Agon kon makakamhan kamo pagtoman ka tanan mga sogo na Nagagihit kamazo, diri kamo maghena-hena nga kontana sazaen kamo na Nagagihit. Hinoa maglaong kamo nga mga sogoonon kami na Nagagihit nga nagatoman lamang ka kanaming katengdanan.¹¹Pagpasinged pon ni Hisos ngaro ka Hirosalem min-azi iza dizan ka eltanan ka lopa nga Samariya daw ya lopa nga Galiliya. ¹²Pag-azi pen naiza dizan ka isang bariyo ya mga tao nga kagiden nga napolo sirang tanan ani ya minsogat kanangiza. Kamhan mintindeg siran dizan ka aroaro kay diri siran ampaarani ka mga tao kay kagiden sa siran. ¹³Kamhan nanhawag di siran kan Hisos, Magtutudlo, kaloy-i intawon kami!¹⁴Pagpakakita ka ni Hisos kaniran minsogo iza kaniran ka pagpakita ka kanirang mga lawas ka mga pari. Ka nagapanaw pen siran ka pagtoman ka sogo ni Hisos nangadazaw matood ya kanirang mga lawas. ¹⁵Pagpaniid ka na isang ka kagiden nga nadazaw di ya toong lawas minbalik iza dazon kan Hisos. Minbaskeg iza ka toong saba pagsaza naiza ka Nagagihit. ¹⁶Kamhan minlohod iza dizan ka paahan ni Hisos ka pagpasalamat. Taga Samariya iza. Na, ya mga taga Samariya daw ya mga Hudiyo diri siran magkaangay kamhan intamay na mga Hudiyo ya mga taga Samariya kay diri kon mga kaliwatan siran ni Abraham.¹⁷Kamhan nangotana si Hisos nga daw diri kon napolo nga ka tao ya indazaw nao? Minkar-in sa ya mga hudiyo nga sizam siran nga ka tao? ¹⁸Nabereng gazod hao kay ya isa nga diri kon Hudiyo anikay minbalik kanao ka pagsaza ka Nagagihit. ¹⁹Kamhan minlaong iza kaiton nga tao nga tomindeg ko naa. Omoli ko ngaro. Madazaw di ya lawas mo kay hao ya insarigan mo.²⁰Pagkakamhan kaiza nangotana ya mga Parasiyo kan Hisos nga kon-o kon andateng ya pagkahari na Nagagihit dini ka kalibotan? Minsambag si Hisos nga waray timaan nga inpaseleng na Nagagihit kamazo. ²¹Waray makapanaba nga dini di kon dizan di ya pagkahari na Nagagihit. Kay hao nga hari nga pinili na Nagagihit dini di hao kamazo.²²Kamhan minlaong si Hisos ka toong mga sakop nga ka wara pen madogay gosto gazod kamo nga ambalik hao dini kamazo. Bisan isa kang ka aldaw ya pagbisita nao ansogot gazod kamo piro diri pen mahimo iton. ²³Kamhan kon anlaong ya mga tao kamazo nga doro di si Kristo kon dini di si Kristo, diri kamo magkaro. Diri kamo magsakop kaniran. ²⁴Kay ya pagdateng nao kay-an singed iton ka kilat nga magalapowasan dazon ya kalangitan garing ka sebazan ngaro ka salpan.²⁵Kamhan ka wara pon dateng iton nga aldaw an-azi pen hao ka mga mataed nga kalised. Kamhan magasawazen hao na mga tao. ²⁶Kamhan ya batasan na mga tao kay-an ka pagbalik nao ngarini daw ya batasan na mga karaang tao ka bohi pen si Niwi mag-anika siran. ²⁷Kay kawandini pen ka wara pon dateng ya lenep nagapadazon ya mga tao pagpangaen daw pagpanginem daw pagpanminze keteb ka aldaw nga minseled sing Niwi ka arka. Kamhan mindateng matood ya lenep. Kamhan natibe siran pagpatay.²⁸Kamhan ya batasan na mga tao kay-an ka pagbalik nao ngarini daw ya batasan na mga karaang tao ka bohi pen si Lot mag-anika siran. Kay nagapadazon siran pagpangaen daw pagpanginem daw pagpamaligza daw pagpamalit daw pagpananem daw pagpanhinang ka mga lagkaw ²⁹keteb ka aldaw ka pagpanaw ni Lot garing ka Sodoma nga maongang longsod. Kamhan minpaoran ya Nagagihit ka mga bato singed ka polbora nga masarang laga dimbaba ka longsod. Kamhan nangawara gazed ya mga tao nga imbilin dizan.³⁰Anisab ya kahimtang na mga tao kayan ka pagbalik nao dimbaba ka kalibotan. ³¹Agon kon magahayahay kamo dizan ka pawa, dalagan gazed kamo kay waray logar mazo ka pagpanhipid ka kamazong mga betang. Bisan magatarabaho kamodaked ka kamazong oma, diri kamo magbalik ka kamazong lagkaw.³²Magtaremdem kamo ka asawa ni Lot kay kawandini pon imbaloy iza kay minlingi iza paglayas pen naiza dizan ka longsod nga Sodoma. ³³Kon bizaan na tao ya pagtoo naiza kay basi patazen iza, diri iza mahatagan ka bag-ong kinabohi nga diri mawara. Kon patazen ya tao kay mintoo izakanao, mahatagan iza ka bag-ong kinabohi nga diri mawara.³⁴Sabten mazo nga ya kahabzena nga tirmino nao ka pagbalik ngarimbaba matorog ya dowang ka tao. Kamhan ya isa ibahen nao piro ya isa ibilin. ³⁵Magagaling sab ya dowang ka babazi ka mais. Kamhan ibahen nao ya isa piro ya isa ibilin. ³⁶Magatarabaho sab ya dowang ka tao doro ka oma. Kamhan ibahen nao ya isa piro ya isa ibilin.³⁷Kamhan nangotana ya toong mga sakop nga Magbabaja, daw hain ya dapit nga madateng na tanan impanaba mo? Minsambag si Hisos kaniran nga bisan sin-o ya maongang batasan nga tao silotan gazod iza. Singed iton ka pamolinged nga bisan hain ya lawas nga patay magatiponon na mga agila ka pagtoktok ka mga onod.

¹Pagkakamhan kaiza minpamolinged si Hisos ka toong mga sakop dazaw diri siran magmaloza ka pagpangamozo ka Nagagihit basta magapadazon hangtod ka pagsambag naiza kaniran. ²Minlaong si Hisos nga simpan doro ka isang longsod may isang howis nga wara iza magtahod ka Nagagihit. Wara isab iza magtabang ka tao.³Kamhan may balo nga babazi dizan ka longsod nga nagabalikbalik ka howis kay nagapakilooy nga nagalaong nga tabangan mo hao kay may nakaangken-angken ka irinsiya nao. ⁴Kamhan wara magtabang. Pagkateedteed minlaong ya howis ka toong hena-hena nga bisan waray labet nao ka Nagagihit daw mga tao ⁵madazaw kon silotan nao ya kaaway naiton nga babazi nga masamok dini kanao. Kay diri hao makaanget ka toong pagbalikbalik dini kanao.⁶Ani ini ya pamolinged ka batasan na maongang howis. ⁷Kamhan madazaw pon gajod ya pagtabang na Nagagihit ka toong mga pinili nga mga sakop kay diri iza an-alang-alang ka pagtabang kaniran singed ka maongang howis. ⁸Sabten mazo nga silotan na Nagagihit pagdali ya mga kaaway na toong mga kasakopan nga nagapakilooy aldaw daw kahabzen. Kamhan kay-an ka pagdateng nao daw may mga antoo kanao dini ka kalibotan?⁹Pagkakamhan ni Hisos pagpanaba kaniran dizan disab ya mga tao nga silaong niran nga waray sala niran. Intamay sab niran ya mga iba nga tao. Agon minpamolinged si Hisos pagpook kaniran nga nagalaong ¹⁰nga may dowang ka tao nga minseled ka dakolang lagkaw nga pangamozoanan ka Nagagihit. Ya isa Parasiyo. Ya iba magsokotay ka bohis.¹¹Kamhan mintindeg ya Parasiyo kay garboso iza pagpangamozo naiza ka Nagagihit nga nagalaong nga Nagagihit, salamat kay madazaw hao ka mga iba nga tao. Kay siran ya angamit ka kanirang katenged ka pagdogang ka kowarta, mga bakaken siran, mga maghehenay siran. Bisan yamagsokotay ka bohis nga nagatindeg dizan, madazaw hao kanangiza kay in-oswagan naiza ya bohis. ¹²Kamhan kada simana ikadowa ya paganget nao ka pagkaen. Kamhan nagahatag hao kanmo ka ikanapolo nga ka bahin na tanan panapi nao. Ani ini ya pagpagarbo na Parasiyo ka pagpangamozo naiza ka Nagagihit.¹³¹⁴Kamhan nagatindeg ya magsokotay ka bohis dizan ka kilid na singbahan. Masipeg iza ka paghangad ka tahaw ka pagpangamozo ka Nagagihit kay mahagdam iza nga salaan iza nga tao. Kamhan indanegdaneg naiza ya toong debdeb ka paghinelsel ka toong mga sala. Kamhan minlaong iza nga o Nagagihit, kaloy-an mo hao kay mataed gazod ya kanaong mga sala. 14Kamhan napasaylo matood iza na Nagagihit. Piro ya Parasiyo diri mapasaylo. Kay bisan sin-o ya ampalabaw ka toong kaogaringen singed ka Parasiyo ipaebes gazod iza na Nagagihit. Kamhan bisan sin-o ya ampaebes ka toong kaogaringen singed ka magsokotay ka bohis ipalabaw iza na Nagagihit.¹⁵Pagkakamhan kaiza may mga mindara ka kanirang mga maimpisay dizan kan Hisos kay ipadampa siran kanangiza dazaw panaranginan ka madazaw. Piro inkasab-an siran na mga sakop ni Hisos. ¹⁶Minsambag iza nga diri kamo magbaheg kaniran. Pakarinihen mazo siran kanao kay ya singed kaniran ani ya in-angay na Diyos. ¹⁷Timan-an mazo gazod ini nga kon diri kamo ansarig ka Nagagihit singed ka pagsarig na bata ka toong ama diri kamo iangay na Nagagihit.¹⁸Pagkakamhan kaiza minkarini kan Hisos ya isang oloolo na mga Hudiyo. Kamhan nangotana iza nga Madazaw nga Magtutudlo, daw ono ya hinangen o nga madazaw dazaw tagan hao ka kinabohi nga diri mawara? ¹⁹Minsambag si Hisos nga kay ono sang anngaran sa ko kanao nga madazaw? Ya Nagagihit kay madazaw. ²⁰Mahagdam ko daan ka mga kasogoan na Nagagihit nga azaw maghenay, azaw magpatay ka tao, azaw pangawat, azaw pamakak, magtahod ko ka kanmong ama daw ina. ²¹Minsambag ya taonga sokad ka batan-en pen hao nagatoman hao kaiton nga tanan mga sogo.²²Pagpakabati ka ni Hisos ka toong sambag minsambag iza nga isa koman ya kolang mo. Omoli ko naa ngaro ka lagkaw mo. Kamhan ipamaligza mo ya mga betang mo. Kamhan ya bazad ipanhatag ka mga pobri. Anipen ko kon somakop kanao dazaw sobra pen ya mga mahalen mo daked ka helanan na Nagagihit. ²³Pagpakabati ka na tao ka panaba ni Hisos nagalised ya toong hinawa kay diri kontana naiza ibaligza ya toong mga betang.²⁴Pagseleng ni Hisos kanangiza minlaong iza nga ya mga tao nga kowartahan malised gazod ya pagsakop niran ka Nagagihit. ²⁵Pamolinged ininga ya karabaw kon an-azi ka teheb na dagem masazon iton ka pagsakop na kowartahan ka Nagagihit kay wili ya toong hena-hena ka toong kowarta.²⁶Kamhan minsambag ya mga nakabati nga kon malised ya pagsakop na kowartahan ka Nagagihit diri baza makalangit ya bisan sin-o nga tao.²⁷Minsambag si Hisos nga kon ya tao ka lamang diri makahimo piro ya Magbabaja makahimo iza ka tanan.²⁸Kamhan minlaong si Pidro kan Hisos nga kami nga kanmong mga sinarigan izang dini kaini minbiza kami ka kanaming hel-anan dazaw makasakop kami kanmo. ²⁹Minsambag si Hisos nga magtimaan kamo kaini nga ya tao nga minsakop kanao pasobrahan na Nagagihit ka pagbales ka magazon. Kay minbiza iza ka toong hel-anan daw asawa daw mga lomon daw ginikanan daw mga bata kay dazaw anwali iza ka sindo mahitenged kanao. ³⁰Pasobrahan matood na Nagagihit ya pagbales ka madazaw kaini nga tao koman nga panahon. Tagan sab iza ka bag-ongkinabohi daked ka Nagagihit kawanihen ka.³¹Kamhan impalain pagpatindeg ni Hisos ya toong mga sinarigan nga napolo may dowa siran. Kamhan minlaong iza kaniran nga mamanaw di kita ngaro ka siyodad nga Hirosalem. Kamhan matoman gazod ya tanan mga insoyat kanao na mga karaang propita na Nagagihit. ³²Kay doro kaiton nga dapit hao nga minhon-a ka bisan sin-o nga mahon-ang tao, iated hao doro ka mga diri kon Hudiyo nga nagahari dini ka kantang lopa. Kamhan pagasorasorahen hao niran daw magapanelban. ³³Pagkakamhan niran paglatos kanao patazen hao niran. Pagdateng ka ikatolong aldaw sokad ka kanaong pagkapatay mabohi hao pagbalik garing ka lebeng.³⁴Kamhan wara makasabot ya mga sinarigan ni Hisos. Wara niran masabti ya kahologan na toong impanaba kaniran kay singed ka intago sa.³⁵Ka hapit di andateng si Hisos ka longsod nga Hiriko dizan ka kilid na karsada may nagalo-to nga isang nabota nga mang-azoay. ³⁶Pagpakabati ka naiza ka mga mataed nga tao nga minlabay dizan nangotana iza ka mga tao kon namag-ono sa siran dini kaini? ³⁷Minsambag siran nga nagalabay di si Hisos nga taga Nazarit.³⁸Kamhan minsinggit ya nabota nga Magbabaja nga kaliwat ni Dabid, kaloy-an mo hao! ³⁹Kamhan ya mga tao nga minhon-a kan Hisos pagpanaw minbaheg siran ka nabota nga nagalaong nga magpahenek di ko! Kamhan mintoda hinoa iza pagsinggit nga Nagagihit nga kaliwat ni Dabid, kaloy-i intawon hao!⁴⁰Pagpakabati ka ni Hisos minheneng iza dizan daw minsogo ka mga tao nga pakarinihen mazo iza. Pagdateng ka na nabota nangotana si Hisos nga ⁴¹daw ono ya gosto mo kanao? Minsambag ya nabota nga Nong, ya gosto nao nga makakita kontana ya kanaong mata.⁴²Minsambag si Hisos nga madazaw di ya mata mo kay hao ya insarigan mo. ⁴³Kamhan madazaw matood ya toong mata. Min-iba iza kan Hisos paglargo. Nagapasalamat gazod iza ka Nagagihit. Bisan ya tanan mga tao nagasaza siran ka Nagagihit kay minkita siran nga madazaw di ya nabota.

¹Pagkakamhan min-azi si Hisos ka longsod nga Hiriko. ²Kamhan may isang tao dizan nga si Zakiyas ya ngaran. Oloolo iza na mga magsokotay ka bohis kamhan nakowartahan di iza.³Ankita kontana iza kon sin-o sa si Hisos piro ababa ya toong lawas agon imbalabagan iza na mga tao nga minlibot kan Hisos. ⁴Kamhan mindalagan iza ngaro ka hon-ahan kay anpanik iza ka liwaan nga sikamoro dazaw makakita iza kan Hisos paglabay naiza dizan ka dalan.⁵Pagpakatenged ka ni Hisos dizan ka liwaan minhangad iza ngandaked. Kamhan minpanabaiza kan Zakiyas nga Zakiyas, magtena ko pagdali kay ambisita hao ka kanmong lagkaw koman nga aldaw. ⁶Mintena dazon si Zakiyas. Dakola ya toong kasaza ka pagpaiba naiza kan Hisos dizan ka toong lagkaw. ⁷Kamhan ya tanan nakakita kaiton minmahay siran nagalaong nga iton nga taohana minbisita baza iza ka lagkaw na salaan nga tao.⁸Kamhan dizan kan Hisos mintindeg si Zakiyas daw minlaong nga Magbabaja, gosto hao magapanhatag ka katenga na kanaong mga betang dizan ka mga pobri. Kamhan dizan ka bisan sin-o ya in-oswagan nao ka bohis palabwan nao ka opat ya bazad nao kaniran. ⁹Minsambag si Hisos nga koman nga aldaw dini ka tanan inhel-an mo mahatagan na Nagagihit ka bag-ong kinabohi nga diri mawara kay mintoo iko ka kanaong mga panaba. Intagan iko ya matood nga kaliwat ni Abraham kay matood ya pagtoo mo ka Nagagihit singed ka pagtoo ni Abraham. ¹⁰Minpanaba hao kanmo kaini kay ya tood nao dini ka kalibotan pangitan nao ya mga salaan nga tao kay tabangan nao siran dazaw malibri siran ka silot ka kanirang mga sala.¹¹Pagkakamhan kaiza arani di si Hisos ka siyodad nga Hirosalem. Kamhan minlaong ya mga tao nga ka wara pon madogay antabang si Hisos kanta ka pagpaiwat ka mga taga Roma dini kanta dazaw iza ya anhari ka kantang hel-anan. Kamhan minpamolinged si Hisos kaniran nga nagalaong ¹²nga ya batasan nao kay-an ka pagbalik nao ka paghari ka mga tao dini ka kalibotan singed iton ka isang tao nga anak iza na labaw nga hari. Kamhan minpanaw iza doro ka aro kay dawaten naiza ya katenged ka paghari ka hel-anan na toong kaibahan.¹³Ka wara pon iza magpanaw impanipon naiza ya napolong ka sogoonon dazaw isarig kaniran ya toong talipid dazaw dogangan niran iton. Kada isang sogoonon insarigan ka sinto pisos. Kamhan minsogo iza kaniran nga nagalaong nga hangtod ka pagbalik nao gamiten mazo ini nga talipid dazaw madogangan iton. ¹⁴Kamhan ya mga kaibahan naiton nga tao impahon-a niran ya kanirang sinogo doro ka labaw nga hari kay ipakahagdam nga diri kami ansogot nga ini nga tao ani ya anhari kanami. ¹⁵Pagkadogay kaizamin-oli ya tao kay intagan di iza ka katenged ka paghari ka hel-anan na toong kaibahan. Kamhan impakarini naiza ya toong mga sogoononnga insarigan ka kowarta kay ansosi iza kon pira ya nasobra ka toong kowarta.¹⁶Kamhan mindateng ya isa kay anlaong iza nga Sinyor, ya kanmong kowarta nga sinto pisos min-anak di ka isang ka libo. ¹⁷Minsambag ya hari nga madazaw iko. Masarigan iko ka geramay nga talipid agon isarig pon nao kanmo ya katenged ka pagkagobirnador ka napolong ka longsod.¹⁸Kamhan taliped ya ikadowang sogoonon. Minlaong iza nga Sinyor, ya kanmong kowarta nga sinto pisos min-anak di ka kinintos. ¹⁹Minsambag ya hari nga isarig pen nao kanmo ya katenged ka pagkagobirnador ka limang ka longsod.²⁰Kamhan mindateng ya ikatlong sogoonon. Nagabaribad iza ka hari nagalaong nga Sinyor, wani ya insarig mo kanao nga impotos gazed sokad ka pagpanaw mo kay nahaldek hao kanmo kay ²¹nahagdam di hao nga waray kalooy mo. An-ani iko dizan ka wara mo itanem. Nahaldok iko dizan ka wara mo ipegas.²²Minsambag ya hari nga maonga iko. Ya saba mo kanao anikay anhokom kanmo. Kon matood ya baribad mo nga an-ani hao ka wara nao itanem daw anhipes hao dizan ka wara nao ipegas ²³kay onosa nga wara ko magbetang ka kanaong talipid dizan ka bangko dazaw may anak di koman pag-oli nao?²⁴Kamhan minsogo ya hari ka mga sogoonon dizan nga kaw-en mo ya kowarta nga sinto pisos. Ihatag iton ka sogoonon nga may isang ka libo. ²⁵Minsambag siran nga Sinyor, isang ka libo gazod ya toong kowarta!²⁶Minsambag ya hari nga sabten mazo ngakon masarigan ya tao ka mga insarig nao dizan kanang-iza magadogangan pon gazod hao ya insarig nao kanangiza. Piro kon diri masarigan ya tao magakaw-en gazod nao kanang-iza ya tanan mga insarig nao. ²⁷Kamhan ya kanaong kaibahan nga diri ansogot kanao nga haoy magahari kaniraniated siran ngarini kanao. Pamatazen siran dini ka pagseleng nao.²⁸Pagkakamhan ni Hisos pagpanaba kaniran minpanaw iza ngaro ka Hirosalem paghon-a kaniran.²⁹Pagpasinged naiza dizan mindateng di siran ka dowang ka bariyo nga Bitpahi daw Bitani dizan tenged ka bobong nga inngaranan ka Olibo. Kamhan minsogo si Hisos ka toong sinarigan nga dowa siran ³⁰nga nagalaong nga komaro kamo naa ka bariyo dizan ka hon-ahan mazo. Pagdateng ka mazo doro makakita kamo dazon ka isang batan-en pen nga asno nga klasi na kabayo nga in-ektan dizan. Sokad wara masakzi na tao. Hobaden mazo iton daw tozokon mazo ngarini kanao. ³¹Kon may mangotana nga tao kamazo magsambag kamo nga inkinahanglan ini na kanaming oloolo.³²Pagkakamhan ni Hisos pagsogo kaniran namanaw dazon sirang dowa. Kamhan nakitan niran ya kabayo singed ka inlaong ni Hisos kaniran. ³³Paghobad niran kaiton nangotana ya mga tag-iza nga onhon sa mazo iton nga kaw-en sa mazo ya kabayo? ³⁴Minsambag siran nga inkinahanglan ini na kanaming oloolo. ³⁵Kamhan intozok dazon niran dizan kan Hisos ya kabayo. Inhanigan sab niran ka kanirang mga bado ya likod na kabayo kay sakzan koman ni Hisos. ³⁶Pagpakasakay ka naiza inhanigan dazon ya dalan nga azihanan na kabayo ka mga bado na mga tao.³⁷Pag-azi naiza ka dalan logsong ka bobong nga Olibo arani ka Hirosalem namagdengan ya toong mga sakop pagsaza ka Nagagihit kay madazaw gazod ya tanan mga hinang ni Hisos nga nakita niran. Kamhan mindakola siran ka kanirang saba pagsinggit nga ³⁸sazaen, sazaen kay iko ya mindateng garing ka Magbabaja. Iko ya anhatag kanami ka kalinaw ka hinawa nga garing ka Nagagihit. Sazaen gazod ya Nagagihit nga pinakalabaw.³⁹Kamhan ya mga Parasiyo dizan ka kataohan minlaong siran kan Hisos nga Maistro, papaheneken mo ya kanmong mga sakop. ⁴⁰Minsambag si Hisos nga timan-an gazod mazo ini nga kon anpahenek ya kanaong mga sakop ya mga bato dini ka dalan siran ya ansinggit pagsaza kanao.⁴¹Kamhan nakakita di si Hisos ka siyodad nga Hirosalem. Pagseleng naiza kaiton minhaza iza ⁴²daw minlaong nga kamo nga mga taga Hirosalem, koman nga aldaw madazaw kon makasabot kamo nga gosto hao antabang kamazo dazaw magakaangay kamo daw ya Nagagihit piro intawon diri kamo makasabot.⁴³Andateng matood ya tirmino kon libotan kamo na kamazong mga kaaway. Libotan gazod kamo ka andatong mga harominta ka paggira daw mga soldaw. Kamhan diri kamo makalayas. ⁴⁴Madalahig isab ya kamazong mga bata ka pagpangapatay iba mazong tanan. Pangebaen gazod ya kamazong kalagkawenan. Basta ya mga bato nga insompazan podo mabogto pagpangadeeg. Kay impakarini hao na Nagagihit dini kamazo piro wara kamo magkilala kanao.⁴⁵Pagkakamhan kaiza minseled si Hisos ka dakolang lagkaw nga pangamozoanan ka Nagagihit. Kamhan impamogaw gazed naiza ya mga mamaligzaay. ⁴⁶Minlaong iza kaniran nga may daan pinasoyat na Nagagihit nga nagalaong nga ya kanaong lagkaw ani ya lagkaw ka pagpangamozo na mga tao kanao ambaza kay inhinang di mazo iton ka datnganan na mga tolisan nga nagapanlimbong ka mga tao.⁴⁷Pagkakamhan kaiza aldaw-aldaw dizan ka dakolang lagkaw na Nagagihit nagasindo si Hisos ka mga tao. Kamhan patazen iza kontana na mga oloolo na mga pari daw ya mga maistro ka tinoohan na mga Hudiyo daw ya mga oloolo na mga tao. ⁴⁸Piro waray logar niran kay ampanalinga gazod ya mga tao ka mga panaba ni Hisos.

¹May isang aldaw nagatoldo pon si Hisos ka mga tao dizan ka dakolang lagkaw na Nagagihit. Nagawali iza kaniran ka sindo nga garing ka Nagagihit. Kamhan may mga minkarini kanangiza nga mga oloolo na mga pari daw ya mga maistro ka tinoohan na mga Hudiyo daw ya mga malaas. ²Kay anlaong siran kan Hisos nga panabaen mo kami daw hain garing ya katenged mo ka pagbogaw ka mga tao kahabi? Daw sin-o ya minhatag kanmo ka katenged ka pagpadazon ka kanmong mga hinang dini kanami?³Minsambag si Hisos nga wani sab ya pangotana nao kamazo. Magsambag naa kamo. ⁴Daw hain garing ya katenged ni Howan ka pagpamenzag ka mga tao? Daw garing iton ka Nagagihit kon garing iton ka tao?⁵Kamhan namagsabot siran kon ono sa kontana ya kanirang isambag. Namaglaong siran nga kon ansambag kita nga garing ka Nagagahit ya katenged ni Howan basi long-on kita ni Hisos nga kay ono sa nga diri sa kamo antoo kan Howan? ⁶Piro kon ansambag kita nga garing ka tao ya katenged ni Howan pamookon kita na mga tao kay mintoo gazod siran⁷Kamhan minsambag siran kan Hisos nga wara kami mahagdam. ⁸Kamhan minsambag isab siHisos nga diri sab hao ampanan-og kamazo kon hain garing ya kanaong katenged ka pagpadazon ka kanaong mga inhinang.⁹Pagkakamhan ni Hisos pagsambag ka mga magtutudlo minsogod iza pagpamolinged ka mga tao nga nagalaong nga may isang tao ngamintanem ka oma nga tamnanan ka mga obas. Kamhan nandapit iza ka mga saop. Kamhan minpanaw iza ngaro ka laing dapit. Dogay izamakaoli. ¹⁰Pagkahapit di anihen ya mga obas impakaro naiza ya toong sogoonon kay pakaw-en di kontana naiza ka toong mga kabahinan. Kamhan pagdateng na sogoonon ka mga saop indakep hinoa niran. Kamhan imbonalan. Impaoli sab wara katagi.¹¹Ka wara pen madogay insogo disab pagpakaro ya laing sogoonon. Piro imbonalan gihapon niran diri tahodon. Impaoli sab, wara katagi. ¹²Kamhan insogo pon ya ikatlong sogoonon. Piro intigbas iza niran. Kamhan intimbag ngaro ka gawas.¹³Pagkakamhan kaiza minlaong ya tag-iza ka toong henahena nga an-ono sa hao koman? Pakarohen nao ya kanaong anak nga naazakan kay tahodon gazed niran ya kanaong maanak. ¹⁴Kamhan pagpakakita na mga sakop nga wani di kaan andateng di ya maanak na tag-iza namagsabot dazon siran nga waton di ngarini kanta ya anak na tag-iza nga magdawatay kay-an kaini nga lopa nga toong irinsiya. Hala, pamagpatazen ta iza kay dazaw kita ka mazoy makapolos kapagpanag-iza kaini nga lopa.¹⁵Kamhan impamagtagenan matood niranya maanak. Intimbag niran ya toong lawas ngaro ka gawas na alad na tanem. Kamhan impamagpatay niran. Na, daw magaono sa koman ya tag-iza ka lopa kaniran? ¹⁶Ankaro pon iza ka toong mga sakop kay patazen gazod naiza siran. Kamhan pasaopan naiza ya tanem ka lain. Pagpakabati ka niran ka inpamolinged ni Hisos minlaong siran ngaporbida!¹⁷Minseleng si Hisos kaniran daw nangotana daw ono sa lamang ya daan pinasoyat na Nagagihit nga nagalaong nga ya magahi nga bato nga inbizaan na mga minhinang ka lagkaw ani ya nahinang nga sinarigan ka pagparig-en ka primirong ogdok na lagkaw. ¹⁸Bisan sin-o ya makadasmag kaiton nga magahi nga bato mangabari ya toong bekeg. Kamhan bisan sin-o ya madateng naiton nga matimgas nga bato ka pagkaligid magemek gazod ya toong lawas. Kilalhen mazo nga ya dakolang matimgas nga bato nga inbizaan mazo ani hao.¹⁹Pagpakabati ka na mga maistro daw ya mga oloolo na mga pari nakasabot siran nga naigo siran ka pamolinged ni Hisos. Kamhan pamagdakpen niran kontana si Hisos piro nahaldek siran ka mga tao. ²⁰Kamhan inpaniidan gazed niran si Hisos. Impakaro sab niran ya mga iba nga Parasiyo kay magapatihinang ka beetan kay magalit-agenkontana si Hisos pagpanaba dazaw isombong iza doro ka gobirnador.²¹Kamhan nangotana siran kan Hisos nga Maistro, mahagdam kami nga madazaw ya pagsindo mo ka mga tao. Matood isab ya mga panaba mo. Bisan ono ya katenged na tao waray pinalabi mo pagsindo mo kaniran ka matood nga garing ka Nagagihit. ²²Na, panabaan mo kami. Daw makalapas kami ka balaed na mga Hudiyo kon ambazad kami ka bohis dizan kan Sisar nga hari nga nakadaeg ka kantang lopa? Daw ambazad kami kon diri?²³Na, mahagdam si Hisos nga daeten iza kontana agon minlaong iza kaniran nga ²⁴ipakita mo kanao ya isang palata nga kowarta. Kamhan nangotana iza nga daw kanin-ong bayho ini ka kowarta? Daw kaninong ngaran ya insoyat dini? Minsambag siran nga kan Sisar gazod iton.²⁵Minsambag si Hisos nga bayri mazo ya azoon ni Sisar kamazo. Bayri sab mazo ya azoon na Nagagihit kamazo. ²⁶Kamhan minpahenek di lamang ya mga maistro kay nabereng siran kay waray sazep ni Hisos ka pagsambag kaniran dizan ka nabatian na mga tao.²⁷Pagkakamhan kaiza minkarini disab kan Hisos ya mga maistro na mga Hudiyo ani ngaran ya Sadosiyo. Ya kanirang toldoan ya mga namoladi nga tao diri gazod mabohi pagbalik garing ka lebeng. ²⁸Na, nangotana siran kan Hisos nga Maistro, ya kanaming karaan nga si Moysisimbilinan sa kami ka soyat kay nagatogon kanami nga kon mapatay ya isang tao kamhan imbilin ya asawa piro waray anak kinahanglan ya lomon na napatay anikay makapangasawa ka toong ipag nga nabalo di dazaw ampanganak. Kamhan mabohi ka ya ngaran na toong magorang nga napatay. Ani ini ya togon ni Moysis kanami.²⁹Na, izang mahon-a pen may maglomon nga pitong ka amaama. Naminze di ya kamagorangan. Kamhan napatay di iza ka waray maanak. ³⁰Kamhan ya toong asawa nga nabalo di impangasawa na primirong manghod. Pagkakamhan kaiza napatay kasab ya primirong manghod nga waray maanak. ³¹Singed kaiton ya kahimtang na ikadowang manghod keteb ka gipos-an. ³²Pagkahorot niran pagkapatay anipen mapatay ya babazi nga nabalo ka pitong ka maglomon. ³³Na, Magtutudlo, wani ya pangotana nami kanmo kay mintoldo iko nga may tirmino ka pagbohi ka mga tao nga nangapatay. Daw kanin-ong asawa itong babazi kon mabohi pag-isab ya mga namagsonodsonod nga pitong ka maglomon kay iza ya asawa nirang tanan?³⁴Minsambag si Hisos nga ya mga amaama daw babazi dini ka kalibotan magminzeay siran. ³⁵Piro ya mga madazaw nga tao nga inbohi na Nagagihit pagbalik kay-an garing ka lebeng diri di siran magminzeay. ³⁶Kay singed siran ka mga taga langit nga sogoonon na Nagagihit kay diri siran mapatay kawanihen ka. Agon waray kinahanglan ka pagpanganak kay anhela siran daked ka hel-anan na Nagagihit kay mga anak di siran na Nagagihit.³⁷Mahimo gazod ya pagpabohi na Nagagihit ka mga tao pagbalik garing ka lebeng. Kay bisan si Moysis nga karaang tao, minsoyat iza daan nga nagalaong nga izang mahon-a pen mintindeg iza dizan tenged ka sagbet nga dogihen nga nagalaga. Kamhan may nabatian naiza nga saba na Nagagihit nga garing ka sagbet nagalaong nga hao nga Nagagihit ani ya hawagenen na kamazong mga karaan nga si Abraham daw si Isak daw si Hakob. Ani ini ya impasoyat na Nagagihit. ³⁸Kamhan bisan patay di ya mga karaan magahawagen pen niran ya Nagagihit kay bohi ka siran daked. Kamhan iza ya Nagagihit na mga bohi nga tao, diri kon Nagagihit na mga patay. Kamhan dizan ka pagseleng na Nagagihit mabohi ya tanan mga tao, bisan patay di ya kanirang lawas.³⁹Pagkakamhan ni Hisos pagpanaba kaniran minsambag ya mga magtutudlo nga magtutudlo, madazaw gazod ya mga panaba mo. ⁴⁰Kamhansokad kaiton wara gazod siran makasigi pagbalik pagpangotana kan Hisos.⁴¹kamazong intoldo nga kaliwat ka lamang ni Dabid si Kristo. ⁴²Kay dizan ka mga daan insoyat ni Dabid inngaranan ka Salmo minngaran si Dabid kan Kristo nga toong Magbabaja. Kay minlaong iza nga ya Nagagihit ani ya minpanaba ka kanaong Magbabaja nga lomo-to ko naa dini ka kanaong too ⁴³hangtod ka pagpakadaeg nao ka kanmong mga kaaway. Ani ini ya daan mga panaba ni Dabid mahitenged kan Kristo nga hari nga pinili na Nagagihit. ⁴⁴Kamhan kon minngaran si Dabid kan Kristo nga toong Magbabaja daw ono say toong pagkakaliwat ka lamang ni Dabid?⁴⁶Kamhan minlaong si Hisos ka toong mga sakop dizan ka nabatian nga mga taomga tao ⁴⁵nga maghamarag kamo ka batasan na mga maistro ka mga Hudiyo. Kay ambado siran ka mga ataas nga bado. Kamhan anazi siran dizan ka mirkado kay naazak gazod siran nga madazaw ya pag-abiabi na mga tao kaniran. Kada pagpista daw kada pagsingba naazak siran kon palo-toon siran ka magazong dapit. ⁴⁷Kamhan magapanlimbong sab siran ka mga balo nga babazi dazaw makaangken siran ka kanirang mga irinsiya. Kamhan magapaataasen niran ya kanirang pagpangamozo ka Nagagihit dazaw komoton niran ya kanirang mga sala. Agon pahamtangan siran na Nagagihit ka silot pagdakola ka silot naiza ka iba nga mga tao nga nakasala.

¹Pagpanaba pen ni Hisos ka toong mga sakop nakita naiza ya mga talipid nga minholog ka kanirang mga halad dizan ka betanganan ka talipid nga ihaladay. ²Nakita isab naiza ya isang balo nga babazi nga pobri nga minholog ka dos sintabos ka lamang. ³Kamhan minlaong si Hisos nga timan-an mazo gazod ini nga ya dos sintabos nga inhatag naitong balo nga pobri labaw gazod iton ka inhatag na tanan mga iba nga tao. ⁴Kay dakola pon ya kowarta niran piro nawara di gazod ya talipid na babazi kay inhorot di naiza ka paghalad ya toong panginabohi.⁵Kamhan namaglaonglaong ya toong mga sinarigan mahitenged ka dakolang lagkaw nga pangamozoanan ka Nagagihit dizan ka Hirosalem kay madazaw selengan ya mga bato nga hininang daw ya mga arti nga intapil dizan ka dingding. Kamhan minlaong iza nga ⁶madazaw matood itong singbahan piro mageba gazod kay-an. Basta ya mga bato nga insompazan podo mabogto pagpangadeeg.⁷Kamhan nangotana siran nga Maistro, kon-o kon mageba iton? Daw ono ya timaan kon antoman ya inpanaba mo kanami? ⁸Minsambag si Hisos nga maghamarag kamo kay basi magalimbongan kamo kay mataed ya mga andateng nga ampasingedsinged siran kanao magaangken nga si Kristo hao. Anlaong sab siran nga matapos di gazod ya kalibotan kaan. Kamhan diri kamo magtoo kaniran. ⁹Kon makabati kamo nga may ampakiggira nga arani di koni kamazo daw mataed ya mga ansopak ka gobirnador, diri kamo magkahaldek kay kinahanglan matoman iton piro diri pen kon ani ya kataposan nga panahon dini ka kalibotan.¹⁰Kay ka wara pen matapos ya kalibotan ampakig-away ya isang longsod ka laing longsod. Ampakig-away isab ya isang hari ka laing hari. ¹¹Kamhan madateng ya mga nagakalainlain dapit ka dakolang linog daw mga pihit daw mga kasakit. May mga mahangadan isab nga kaberenganan daked ka langit.¹²Ka wara pen dateng itong mga kalised, kamo nga kanaong mga sinarigan, dadhen kamo na mga tao dizan ka hokmanan bisan waray sala mazo. Kamhan dalem ka mga singbahan na mga Hudiyo pamagbonalan kamo. ¹³Kamhan pirisohon kamo niran. Pansangilan gazod kamo niran dizan ka mga laing tao nga magahari ka lopa na mga Hudiyo. Ani ini ya hinang niran kamazo kay hao ya insakopan mazo. 13Kamhan panan-ogan mazo siran mahitenged kanao.¹⁴Ka wara pon kamo magtindeg dizan ka hokmanan diri kamo mag-andam daan kon ono ya isambag mazo kaniran ¹⁵kay hao ya antandeg ka kamazong hena-hena. Kamham madazaw gazod ya impanaba mazo kaniran. Kamhan dizan ka mga kaaway mazo waray makasambag ka pagsopak kamazo.¹⁶Na, wani pon ya panan-og mahitenged ka batasan na mga tao kayan. Dadhen kamo na mga ginikanan mazo daw ya mga lomon daw ya mga azok mazo dizan ka mga laing tao dazaw patazen kamo kamhan patazen ya mga isa kamazo. ¹⁷Magakontarahan sab kamo na tanan mga tao kay hao ya insakopan mazo. ¹⁸Kon diri kamo ambiza ka pagtoo mazo kanao keteb ka pagkatapos naitong mga kalised mahatagan kamoka bag-ong kinabohi nga diri mawara. ¹⁹Bisan ya isang ka legas nga bohok mazo diri magkasonog baba ka impirno.²⁰Na, impanan-ogan pon ni Hisos ya toong mga sinarigan mahitenged ka mga masiet nga kalised nga andateng kay-an. Nagalaong iza nga pagpakakita mazo nga inlibotan di ya siyodad nga Hirosalem na mga mataed nga soldaw, mahagdam kamo nga ka diri pon madogay madaeg gazod itong siyodad. ²¹Kamhan kamo nga mga taga Huda mandalagan gazod kamo ngaro ka bobong. Kamo nga nagahela ka Hirosalem, magbakwit kamo. Kamo nga nagahela doro ka aroaro, diri di kamo magbalik ka Hirosalem. ²²Kay tirmino di ini ka pagsilot na Nagagihit ka mga taga Hirosalem kay matoman di ya tanan mga panaba na Nagagihit nga impasoyat ka mga karaang propita.²³Kalooy adaw na mga kabdes daw ya mga may pinasoso kay magalised siran ka pagdalagan. Nagalised matood ya tanan mga taga kalibotan. Nazehet gazod ya Nagagihit ka mga taga Huda. ²⁴Pagarisen ya mga mataed nga tao. Kamhan pamihagen ya mga imbilin nga tao doro ka bisan hain ya dapit dini ka kalibotan. Madaeg gazod ya Hirosalem na mga tao nga diri kon Hudiyo. Kamhansiran ya magahari dizan keteb ka pagtirmino na Nagagihit kaniran.²⁵Nagapadazon si Hisos pagsindo kaniran nagalaong nga ya pagkatiwas na mga masiet nga kalised kay-an maonga nga hangden ya sega daw bolan daw mga bitoon. Kamhan magalised gazod ya mga taga kalibotan kay nahaldek siran kay ya mga maonga nga inhinang na mga tao singed iton ka pagdagook na dakolang baled na dagat ka pagbagzo. ²⁶Ingetasan ya mga tao ka pagkawied kon ono pen ya kalised kay nalaag di ka dalan ya mga bitoon dawbolan daw sega.²⁷Anipen makita hao na mga tao kay domatengay hao iba ya gabon. Labaw gazod hao ka gahem daw madazaw selengan. ²⁸Kon domateng iton nga impanan-og nao kamazo maghangad kamo, magsaza kamo kay ka wara pon madogay ambalik hao ngarimbaba ka kalibotan.²⁹Na, paniidan mazo ya batasan na tanem nga igira daw bisan ono ya tanem mazo. ³⁰Kon namag-o ya dahon mahagdam di kamo nga ampanhoraw di kaan. ³¹Singed iton ka inlaong nao kamazo koman. Pagpakakita mazo kaiza nga mga inlaong nao kamazo mahagdam kamo nga arani di gazod ya tirmino nao ka pagbalik ka kalibotan.³²Matood nga ka wara pon mapatay ya kamazong kaliwatan matoman ya impananog o kamazo. ³³Mangawara ya kalangitan daw ya kalibotan piro ya kanaong mga panaba diri gazed mawara.³⁴Maghamarag gazod kamo kay basi dakola ya kamazong hena-hena ka pag-osik-osik daw ya mga makahebeg daw ya mga kawied kon ono ya kamazong panginabohi. Kamhan mabereng gazod kamo ka pagbalik nao kay madali ka gazod ya pagbalik nao singed ka kadali na pagbekasna balatik. ³⁵Bisan sin-o ya tao waray mahagdam kon kon-o hao ambalik ka kalibotan.³⁶Agon mag-andam kamo daan. Maghangzo kamo ka Nagagihit nga pabaskegen ya kamazong pagsarig dazaw makaanget kamo ka mga kalised. Kamhan waray kasipeg mazo pag-atobang mazo kanao kay-an ka pagbalik nao. Ani ini ya impanaba ni Hisos ka toong mga sakop.³⁷Kamhan kada aldaw dizan ka dakolang lagkaw nga pangamozoanan ka Nagagihit nagasindo iza ka mga tao. Kada pagkadelem ambalik iza ka bobong nga Olibo kay dizan iza kon kahabzen. ³⁸Kada masiselem ambalik ya mga mataed nga tao ka lagkaw na Nagagihit kay ampanalinga siran ka mga panaba ni Hisos.

¹1Na, kon-isa pen pan-ihawen na mga Hudiyo ya mga nati na karniro kay ampista siran. Kanen sab niran ya pan nga waray ipasoligay. ²Kamhan ya mga oloolo na mga pari daw ya mga magtutudloka tinoohan na mga Hudiyo nagapangita di siran ka paazi kon onhon niran pagdakep kan Hisos dazaw patazen niran. Nawied isab siran kay basi magobot ya mga mamistahay kay mataed ya mga mintoo kan Hisos.³Kamhan dizan ka mga napolo may dowang ka sinarigan ni Hisos, si Hodas nga taga Kariyoti inharian di iza ni Satanas. ⁴Kamhan minkaroiza ka mga oloolo na mga pari daw ya mga magbantazay ka lagkaw na Nagagihit. Kamhan namagsabot siran kon onhon sa ni Hodas pagtogyan kan Hisos dizan kaniran.⁵Namagsaza gazod ya mga oloolo daw minsohol isab siran kan Hodas ka kowarta. ⁶Kamhan minpanaw iza kay nagapangita iza ka paazi kon onhon naiza pagtogyan kan Hisos dizankaniran dazaw diri mahagdam ya mga mataed nga tao kay basi magobot siran.⁷Kamhan pagkakon-isa di primirong aldaw ini ka pista ka pagpangaen na mga Hudiyo ka pan nga waray ipasoligay. Pan-ihawen disab niran ya mga nati na karniro kay antaremdem siran nga pagbetang na mga karaan niran ka dogo na nati dizan ka pirtahan na lagkaw niran, wara siran maazihi na taga langit nga insogo na Nagagihit ka pagpamatay ka mga amaama nga panganay na mga taga Ihipto. Ani ini ya intaremdeman niran. ⁸Kamhan minsogo si Hisos kan Pidro daw si Howan nga nagalaong nga komaro kamo naa kay mag-andam kamo ka pagkaen ta ka pista. ⁹Minsambag siran daw hain ya lagkaw nga andaman nami kaiton?¹⁰Minsambag si Hisos nga komaro kamo naa ngaro ka siyodad nga Hirosalem. Kamhan may magabathay ka tadzaw nga ansogat kamazo.Sondon mazo iza dizan ka lagkaw nga inpanikan naiza. ¹¹Kamhan maglaong kamo ka tag-iza na lagkaw nga Nong, ya kanaming magtutudlo ani ya minsogo kanami ngarini kay ampangotana kanmo kon diin ya seled nga kananan naiza ka pista iba ka toong kasakopan?¹²Kamhan ipakita naiza kamazo ya ikadowang saleg nga may seled nga haloag nga ipapalastar daan ya mga kinahanglanen ta. Na, dizan kaiton andamen mazo ya kantang pagkaen. Ani ini ya pagtogon ni Hisos kaniran. ¹³Kamhan namanaw di siran ngaro ka siyodad. Pagdateng niran doro nakitan matood niran ya tanan inlaong ni Hisos. Kamhan namag-andam siran ka pagkaen ka kaliga.¹⁴Pagkakahabzen kaiza dizan ka kananan mintambong si Hisos daw ya toong mga sinarigan. ¹⁵Ka nagakaen pon siran minlaong iza kaniran nga madazaw gazod ya pagtambong nita dini kay naazak hao ansaro kaini nga makaen ka kaliga dini kamazo ka wara pon hao mag-azi ka masiet nga kalised. ¹⁶Sabten mazo nga diri gazod hao mamista pag-isab hangtod ka paghari na kanaong Ama ka bag-ong kalibotan.¹⁷Kamhan minporot iza ka baso nga may imnenen nga sapa na mga obas. Pagkakamhan naiza pagpasalamat ka Nagagihit minlaong iza ngadawata mazo, bahina mazo pag-inem. ¹⁸Panan-ogan ta kamo nga diri gazod hao an-inem pag-isab ka sapa na mga obas hangtod ka paghari nakanaong Ama ka bag-ong kalibotan.¹⁹Pagkakamhan niran pag-inem minporot si Hisos ka pan. Pagpasalamat naiza ka Nagagihit impanipaktipak naiza iton kay ipanhatag kaniran. Kamhan minlaong iza nga ini nga pan kilalhen mazo nga kanaong lawas nga patazen kay-an kay ikabazad ka kamazong mga sala. Sokad koman maghaod kamo ka kanaong batasan dazaw magtaremdem kamo ka kanaong pagkapatay. ²⁰Ini nga imnenen kilalhen mazo nga kanaong dogo nga ipaawas nao kay-an ka pagkapatay nao kay ikabazad iton ka kamazong mga sala. Ya kanaong dogo ani ya pirmahan na Nagagihit ka bag-ong saad naiza ka tanan mga tao.²¹Kamhan minlaong si Hisos nga timan-an mazo gazod ini nga wadini gazod kanta ya an-edlaw kanao nga isa. Ya tao nga minsaro kanaoka pagkaen iza ya an-edlaw kanao. ²²Kay minbeet daan ya Nagagihit nga patazen hao basta ya tao nga om-edlaway kanao intawon madazaw kon wara iza pakataoha. ²³Kamhan nangotana siran nga sin-o sa baza wani kantang tanan ya magalong-on ni Hisos dini?²⁴Pagkakamhan kaiza minlalis siran nga daw sin-o ya labaw dini kanta? ²⁵Kamhan minlaong si Hisos kaniran nga mahagdam kamo ka batasan na mga diri kon Hudiyo nga nagahari dini ka kantang lopa. Magmandaray gazod siran ka mga tao.²⁶Piro kamo nga kanaong mga sakop, diri kamo maghaod ka kanirang batasan kay dizan kamazo ya labaw nga tao kinahanglan ampangalagad iza kamazo singed ka pagpangalagad na manghod nga gipos-an. Kamhan ya oloolo mazo kinahanglan ampangalagad iza kamazo singed ka pagpangalagad na sogoonon. ²⁷Ya tao nga nagakaen labaw iza ka tao nga mag-ateday kamakaen. Kamhan bisan hao ya oloolo mazo singed hao ka tao nga magateday ka kamazong makaen.²⁸Sokad ka pagsakop mazo kanao min-azi kamo ka mga kalised iba kanao. ²⁹Agon may ihatag nao kamazo singed ka inhatag kanao nakanaong Ama. Kay impili hao naiza ka paghari ka bag-ong kalibotan. Kamhan pilien ta kamo isab ³⁰dazaw magsaro kita ka makaen kay-an ka paghari nao. Kamhan kamo isab ya anlo-to dizan ka lo-toanan ka paghari kay anpanhokom kamo ka mga kaliwatan na mga napolo may dowang bolos nga maanak ni Israil.³¹Simon, Simon, may ilaong ta kamo kay dini kanao intogotan si Satanas ka pagsoray kamazong tanan singed ka tao nga nagasisig ka begas. Kay gosto naiza nga ambiza kamo kanao. ³²Agon nagatabang hao kanmo ka pag-ampo ka Nagagihit dazaw diri magmaloza ya kanmong pagtoo kanao. Kamhan pagbalik mo kanao kay-an tabangan mo isab ya mga kaibahan mo dazaw heget ya kanirang pagtoo kanao.³⁴Minsambag si Pidro nga Magbabaja, waray bali kon prisohon hao iba kanmo basta diri gazod hao ambiza kanmo bisan patazen hao. ³³Minsambag si Hisos nga Pidro, timan-an mo gazod ini nga pagkakamaaldawen ka ka wara pen tagaok ya manok, ikatolo di mo hao kon ilimed paglaong nga diri kon iko ya kanaong sakop.³⁵Mindogang iza pagpanaba kaniran nga izang dini kaini ka pagpakaro nao kamazo ka pagwali ka mga tao pikit ka lawas ka lamang ya dara mazo. Kamhan daw may kolang mazo? Minsambag siran nga wara gazod. ³⁶Minsambag iza nga matood iton kay dakola ya kaazak na mga Hudiyo kanao agon minpakaen siran kamazo piro awazen hao niran koman agon maghabay kamo ka kamazong kowarta, magdara kamo ka kamazong hambag. Kon waray lodzo ibaligza mazo ya kamazong bado dazaw may ikapalit ka lodzo.³⁷Panabaan ta kamo nga kinahanglan matoman ya daan pinasoyat na Nagagihit mahitenged kanao nga nagalaong nga dizan ka mga makasasala nga tao makalakip si Hisos pagpatay. Kay tomanen gazod ya tanan pinasoyat na Nagagihit mahitenged kanao. ³⁸Kamhan minsazep ya toong mga sakop kay silaong niran nga minsogo iza kaniran ka pagtigbas agon minlaong siran nga Magbabaja, selengi! Wani ya lodzo nga dowang bolos. Minsambag iza nga igo di nga sazep mazo.³⁹Kamhan minlogwa iza kay ambalik iza ka bobong nga Olibo ya ngaran. Kamhan nangiba disab ya toong mga sinarigan. ⁴⁰Pagdateng niran dizan minlaong iza kaniran nga maghangzo kamo ka Nagagihit dazaw diri kamo dag-en ka pagtintal na mga maonga.⁴¹Kamhan minkaro iza ka hon-ahan nga aroaro kaniran. Kamhan minlohod iza daw minhangzoiza ka Nagagihit nagalaong nga ⁴²Ama nao, kon somogot ko diri mo hao pag-ipapatay para ka mga sala na mga tao. Piro iko ka say magapontokanao.⁴³Ka nagahangzo pen iza mindateng dizan kanangiza ya sinogo nga garing ka langit kay magatabangan si Hisos ⁴⁴kay mabeg-at gazod ya toong hena-hena anika daw ikapatazay di naiza. Pagtodahi ka naiza ka toong paghangzo impanholasan gazed iza. Pagpanoro ka na toong holas ka lopa singed iton ka dogo nga tibolos.⁴⁵Pagkakamhan naiza paghangzo ka Nagagihit minbalik iza ka toong mga sinarigan. Nangatorog gazod siran kay impanhowozan siran tenged kakabeg-at na kanirang hinawa. ⁴⁶Nangotana si Hisos kaniran nga kay ono sang mangatorog sa kamo? Pamangon di kamo. Magpangamozo kamo ka Nagagihit kay basi dag-en kamo ka pagtintal na mga maonga.⁴⁷Na, ka nagapanaba pen si Hisos kaniran mindateng di ya mga mataed nga tao. Kamhan ya isang sinarigan nga si Hodas iza ya minhon-akaniran. Ka pagdateng ni Hodas dizan kan Hisos an-arek iza kontana kan Hisos ka pagpangamosta ⁴⁸piro minlaong si Hisos nga Hodas, daw an-arek iko ka pag-edlaw kanao?⁴⁹Pagpakahagdam ka na mga sakop ni Hisos nga dakpen di sa baza si Hisos minlaong siran nga Magbabaja, daw antigbas kami kaniran? ⁵⁰Kamhan nagahogot ya isa ka toong lodzo daw mintigbas. Kamhan nakawa dazon ya talinga nga too na oripen na labaw nga pari. ⁵¹Minlaong dazon si Hisos nga igo di iza nga hinang mo! Kamhan minhogam si Hisos ka talinga na oripen kay insompay ka naizaya minhambos.⁵²ka lagkaw na Nagagihit daw ya mga malaas nga ono sa wani baza kamo? Daw tolisan hao wani nga dakpen di sa mazo hao koman ka lodzo daw ibonalay? ⁵³Izang dini kaini dizan ka dakolang lagkaw nga pangamozoanan ka Nagagihit aldaw-aldaw nagaibaiba hao kamazo. Kamhan wara sa mazo hao dakpa. Piro magadakpen sa mazo hao koman kay si Satanas ani ya nagahari kamazo nga nagahela ka kadeglem.⁵⁴Kamhan mindakep matood siran kan Hisos daw min-ated ngaro ka lagkaw na labaw nga pari. Kamhan minsonod si Pidro nga nagapaantaw. ⁵⁵Pagdateng naiza dizan ka pawa na lagkaw minlo-to iza dizan ka mga tao nga minharing kay magapanarang.⁵⁶Dizan disab may isang babazi nga binolanan na labaw nga pari. Pagpakakita ka naiza kan Pidro nga nagapanarang nagapahiseleng iza ka bayho ni Pidro. Kamhan minpanaba iza ka toong mga iba nga itong tao nga dizan ka gabok iza gazod ya iba na tao nga nadakpan kazina. ⁵⁷Kamhan minlimed si Pidro nagalaong nga inday kon sin-o iton. ⁵⁸Ka wara pon madogay nakilalhan disab iza na ibang tao nga nagalaong nga iko ya sakop ni Hisos. Minsambag si Pidro nga diri gazed kon hao iton!⁵⁹Pagkateedteed kaiza minlaong ya isa pon nga tao mahitenged kan Pidro nga sakop gazod iza ni Hisos kay taga Galiliya gihapon iza. ⁶⁰Kamhan minsambag si Pidro paglimed nga wara gazod hao mahagdam kon sin-o itong taohana nga magalong-on mazo. Na, ka nagapanaba pon si Pidro paglimed kan Hisos mintagaok ya manok.⁶¹Kamhan minlingi si Hisos ka pagseleng kan Pidro. Kamhan nakataremdem di si Pidro ka inlaong ni Hisos nga pagkakamaaldawan ka ka wara pon tagaok ya manok katlo mo hao ilimed. ⁶²Na,pagpakataremdem ka ni Pidro masara gazod ya toong paghaza kay inlimed sa naiza si Hisos.⁶³Kamhan ya mga nagabantay kan Hisos nagasorasora gazod siran kamhan imbonalan niran si Hisos. ⁶⁴Impamagbegketan isab ya toongmata. Kamhan minlaong siran pagsora nga tekmaen mo kon sin-o ya minlaparo kanmo! ⁶⁵Mataed pen gazod ya impanaba niran pagsorasora kan Hisos.⁶⁶Pagkamasiselem ka kaiza nagatipon di ya mga malaas daw ya mga oloolo na mga pari daw ya tanan mga maistro. Kay hokman niran si Hisos. Kamhan iated si Hisos dizan ka labaw nga hokmanan. ⁶⁷Kamhan minlaong siran kan Hisos nga kon iko si Kristo nga hari nga pinili na Nagagihit magpanan-og naa iko. Minsambag si Hisos nga kon panabaan ta kamo nga hao si Kristo nga hari nga pinili na Nagagihit diri gazod kamo antoo kanao. ⁶⁸Kamhan kon pangotanhen nao kamo mahitenged ka pagsangil mazo kanao, diri gazod kamo ansambag kanao.⁶⁹Kamhan wani gazod ya kanaong sambag kamazo. Hao ya tao nga impanan-og na mga daan propita na Nagagihit. Ka wara pen madogay an-oli hao ka Nagagihit nga labaw ka gahem. Kay dizan ka toong too anlo-to hao ka paghari kay hao ya minhon-a ka bisan sin-o nga mahon-ang tao. ⁷⁰Kamhan minlaong sirang tanan nga agon min-angken iko nga iko ya Maanak na Nagagihit. Minsambag si Hisos nga ya kamazong inlaong hao iton. ⁷¹Minlaong siran nga wara di kita magkinahanglan ka dogang pen nga saksi kay nabatian di nita ya toong bakak nga iza ya Anak na Nagagihit.

¹Kamhan nanindeg dazon ya tanan mga oloolo na mga Hudiyo kay kamhan di ya pagsabot niran kon onhon niran pagpatay kan Hisos. Kamhan in-ated niran si Hisos dizan kan Pilato. ²Pagdateng niran dizan minsogod di siran pagbetangbetang kan Hisos nga nagalaong nga indakep nami ini nga taohana kay minhagad iza kanami ka pagsopak ka kantang hari nga taga Roma nga si Sisar. Kamhan diri pabayran ya bohis. Min-angken isab iza nga iza gazed si Kristo nga hari na mga Hudiyo³Kamhan nangotana si Pilato kan Hisos nga matod, ey, iko ya hari na mga Hudiyo? Minsambag si Hisos nga itong inlaong mo kanao hao iton. ⁴Kamhan minlaong si Pilato ka mga oloolo na mga pari daw ya mga mataed nga tao nga diri nao silotan ini nga tao kay waray sala naiza. ⁵Mintoda gazod siran pagbetangbetang nga nagalaong nga nagapagobot iza ka mga tao doro ka lopa nga Galiliya. Kamhan in-oswagan ya kagobot ngarini ka Huda daw Hirosalem kay mintoldo iza ka mga tao ka pagsopak ka kantang hari nga taga Roma.⁶Pagpakabati ka ni Pilato kaiza nangotana iza nga daw taga Galiliya ini nga tao? ⁷Pagkahagdam naiza nga garing si Hisos ka lopa nga Galiliya nga inharian ni Hirodis impadara naiza si Hisos dizan kan Hirodis kay magbisitahay si Hirodis dini ka Hirosalem kay ampamista iza.⁸Pagpakakita ka ni Hirodis kan Hisos may kasaza naiza kay dogay di gosto gazod iza ankita kan Hisos kay mataed ya mga minpanan-ogmahitenged ka mga inhinang ni Hisos. ⁹Kamhan gosto si Hirodis ankita ka dakolang hinang ni Hisos. Kamhan mataed ya pangotana ni Hirodis kanHisos piro wara iza magsambag. ¹⁰Kamhan nazehet gazod ya mga oloolo na mga pari daw ya mga maistro pagbetangbetang niran kan Hisos.¹¹Kamhan insorasora iza ni Hirodis daw ya toong mga soldaw. Insoloban iza niran ka ataas nga bado nga magazon selengan dazaw anhaod ka hari. Kamhan ingkatawhan isab nirang tanan si Hisos. ¹²Kamhan namagkahosay di si Hirodis daw si Pilato bisan wara siran magkaangay sokad.¹³Kamhan impantipon ni Pilato ya mga oloolo na mga pari daw ya mga malaas daw ya mga tao nga Hudiyo. ¹⁴Kamhan minlaong iza nga ya pagdimanda mazo kanao kaini nga taohana minlaong kamo nga nagakasamok iza ka mga tao dazaw sopaken niran si Sisar. Na, pagpangotana nao kanangiza dini ka pagpakabati mazo bisan ono ya imbetangbetang mazo, waray sala naiza.¹⁵Pag-atobang isab naiza dizan kan Hirodis waray sala naiza angay silotan ka kamatazen. ¹⁶Agon ipalatos lamang nao. Kamhan bohian nao iza. ¹⁷Ani ini ya impanaba ni Pilato kay kada toig ka pagpamista na mga Hudiyo ya batasan ni Pilato magapalogwa iza ka isang piniriso nga angay niran.¹⁸Kamhan namagdengan ya mga Hudiyo pagpaninggit nga waray labet nami kaiton nga tao. Ani hinoay bohii si Barabas. ¹⁹Na, si Barabasnapriso iza kay inpasopak naiza ya mga tao dini ka Hirosalem. Kamhan nakabono iza ka tao ka pag-away nirang tanan.²⁰Na, minpanaba si Pilato ka mga tao pag-isab kay gosto naiza bohian si Hisos. ²¹Kamhan naninggit hinoa siran nga ipalansang iza ka kros! Ipalansang iza ka kros! ²²Kamhan ikatolo di ya pagpanaba ni Pilato kaniran nga kay onosa kamo kaiton? Waray sala naitong tao. Diri iza silotan ka kamatazen. Ipalatos nao iza kamhan bohian.²³Kamhan mintoda gazod siran pagpaninggit nga ipalansang gazed iza ka kros! Kamhan indag-en si Pilato ka kanirang mga panaba. ²⁴Minhokom iza ka pagpapatay kan Hisos kay pasazaen naiza ya mga tao. ²⁵Kamhan inbohian naiza si Barabas bisan inpasopak naiza ya mga tao kan Sisar nga hari. Nakabono isab iza ka tao. Kamhan minsogo si Pilato ka mga soldaw ka pagpatay kan Hisos kay pasazaen naiza ya mga tao.²⁶Pagpakaated na mga soldaw kan Hisos ngaro ka patazanan may insogat niran nga si Simon nga garing ka oma pasinged ngarini ka Hirosalem. Taga Sirini iza. Kamhan indakep niran iza kay pabathazen ka kros ni Hisos. Pagsili ka naiza pagbathay ka kros minsonod iza pagpanaw kan Hisos.²⁷Kamhan mataed gazod ya mga tao nga namagsonod kan Hisos. Apil kaniran ya mga babazi nga nagahaza kay patazen di kaan si Hisos. ²⁸Paglingi ni Hisos kaniran minlaong iza nga kamo nga mga babazi nga taga Hirosalem, diri kamo maghaza kanao. Ani hazai mazo ya kamazong kaogaringen daw ya kamazong mga bata.²⁹Kay ka wara pen madogay an-azi ya mga taga Hirosalem ka masiet nga kalised. Kamhan anlaong ya mga tao nga madazaw ya kahimtang na mga babazi nga wara makapanganak daw ya mga babazi nga wara makapasoso ka mga maimpis! ³⁰Kamhan ansogod siran paghawag ka mga bobong nga pangatelmagan kami! Anhawag siran ka mga pongtod nga libonan kami! ³¹Mindogang si Hisos pagpanaba kaniran nga kon kasab-an hao bisan waray sala nao, daw ono pen ya andateng ka mga tao nga nakasala?³²Na, may dowang ka tao nga dakola ya kanirang sala. Kamhan in-ated isab siran na mga soldawu kay patazen siran daw si Hisos doro ka patazanan inngaranan ka Dapit ka Kalabira kay ani ya dapit ka pagpatay niran ka tao nga inpahamtang ka kamatazen.³³Pagdateng niran dizan inlansang niran si Hisos ka kros. Inlansang sab ya dowang ka tao nga salaan. Ya isa dapit ka too ni Hisos. Ya ikadowa dapit ka toong wala. ³⁴Kamhan minpanaba si Hisos nga Ama, pasaylohon mo ya mga minlansang kanao kay wara siran mahagdam kon ono ya hinang niran. Kamhan namagriparipa ya mga soldawu kon sin-oy makatag-iza ka mga bado ni Hisos.³⁵Naneleng ya mga tao pagtindeg niran dizan. Kamhan nagasorasora ya mga oloolo na mga Hudiyo nga nagalaong nga nakalibri iza ka mga iba nga tao piro diri iza makalibri ka toong kaogaringeng lawas. Kon iza matood si Kristo nga hari nga pinili na Nagagihit makalibri iza ka toong kaogaringeng lawas.³⁶Impanora isab iza na mga soldawa pagpainem ka bino nga barato ³⁷nga nagalaong nga kon iko matood ya hari na mga Hudiyo libriha ya kanmong kaogaringeng lawas! ³⁸Na, dapit daked ka poro ni Hisos intapil sab ya sinoyat nga nagalaong nga si Hisos ini nga hari na mga Hudiyo.³⁹Bisan ya isang tao nga inlansang dizan ka sain ni Hisos maonga ya toong saba kan Hisos nga nagalaong nga daw diri kon si Kristo iko?Kontana librihen mo ya kanmong kaogaringeng lawas daw kanaming dowa! ⁴⁰Kamhan inbaheg iza na toong iba nga nagalaong nga kay ono sawaray kasipeg mo ka pagpanaba ka Nagagihit? Bisan mag-ani ka ya pagsilot kanangiza daw kantang dowa, ⁴¹waray sala naiza piro kitang dowa imbalsan gazod kita ka kantang sala.⁴²Kamhan minlaong iza kan Hisos nga Hisos, taremdemen mo hao kay-an ka pagbalik mo ka paghari mo ka kalibotan. ⁴³Minsambag si Hisos nga panabaan ta ko nga koman nga aldaw iba iko kanao doro ka datnganan nga madazaw.⁴⁴Na, pagkaedto di mindeglem gazod ya aldaw hangtod ka pagkabalantang na aldaw ka alas tris. ⁴⁵Nagalipsilipsi ya sega. Kamhan dizan ka dakolang lagkaw nga pangamozoanan ka Nagagihit nagisi ya kortina garing daked lapos ngarimbaba ka sidsid.⁴⁶Pagkakamhan kaiza dakola ya pagsinggit ni Hisos nga nagalaong nga Ama, ihatag nao kanmo ya kanaong ispirito. Pagkakamhan kaiza nabogtoan dazon iza ka toong hinawa. ⁴⁷Kamhan ya kapitan na mga soldawa pagkita naiza ka pagkapatay ni Hisos minlaong iza pagsaza ka Nagagihit nga iton nga napatay iza matood ya madazaw nga tao!⁴⁸Kamhan ya mga mataed nga tao nga nagatipon dizan nga nakakita ka pagkapatay ni Hisos nangoli di sirang tanan kay mabeg-at gazod ya kanirang hinawa. ⁴⁹Kamhan ya tanan mga higara ni Hisos daw ya mga babazi nga nangiba kan Hisos garing ka Galiliya nagapaantaw siran ka pagseleng kaini nga tanan.⁵⁰Kamhan may amaama nga si Hosi ya ngaran. Taga Aramatiya iza nga isang longsod na mga Hudiyo. Beetan si Hosi daw naazak iza nga antoman ka mga sogo na Nagagihit. ⁵¹Nagatagad isab iza ka pagkahari na Nagagihit. Sakop isab iza ka labaw nga hokmanan na mga Hudiyo piro wara iza magsogot ka gosto na toong kaibahan paghokom niran kan Hisos ka kamatazen.⁵²Kamhan minkarini iza kan Pilato kay minbaid iza ka pagkawa ka lawas ni Hisos. ⁵³Mintogot si Pilato. Kamhan minkawa si Hosi ka lawas ni Hisos doro ka kros. Kamhan inkomotan naiza ka mga panapton nga mapoti. Kamhan inhinang naiza ya batasan na mga Hudiyo nga inlebeng doro ka hininang nga talangban nga isang lebnganan.Anipen kalebngi ini ka tao.⁵⁴Pagkakamhan kaiza delem di. Pagkasalep ka na sega kaan ani ya pagsogod ka Sabado nga tigpahimlay na mga Hudiyo. ⁵⁵Kamhan ya mgababazi nga nangiba kan Hisos garing ka Galiliya ngarini ka Hirosalem minsonod di siran kan Hosi kay anseleng siran kon hain dapita ya inlebngan kan Hisos. Kamhan nakita niran ya pagpabentag ni Hosi ka lawas ni Hisos dizan kaiton. ⁵⁶Kamhan min-oli di siran kay an-andam siran daan ka lana nga mahamot daw ya inhaplasan para ka lawas ni Hisos kay ani ya batasan na mga Hudiyo. Pagkakamhan niran pag-andam minpahimlay siran kay balaed iton na mga Hudiyo.

¹Ya, pagkabukas ka Domingo pagsidlit ka na sega minpasinged ya mga babazi ngaro ka lebnganan kay dadhen niran ya ihaplasay nga kanirang in-andam. ²Pagdateng niran doro nalingan di baza ya bato nga insira ka pirtahan na lebnganan. ³Kamhan minseled siran ka talangban nga lebnganan piro wara di sab dalem ya lawas ni Ginoong Hisos.⁴Kamhan nabereng siran kon hain iton. Ka wara pon siran magpanaba waton di ya dowang ka amaama nga nagatindeg dizan ka kanirang saing. Masarang kapoti ya kanirang bado singed ka kalati na sega. ⁵Kamhan mindoko dazon ya mga babazi kay nangahaldek gazod siran kon sin-o iton. Kamhan minlaong ya dowang ka amaama nga kay ono sa nga impangitan sa mazo ya tao nga bohidini ka lebnganan? Wara iza dini kay nabohi di iza pagbalik garing ka mga patay.⁶Magtaremdem kamo ka toong inlaong kamazo ka doro pon iza ka Galiliya ⁷nga nagalaong nga iated iza dizan ka mga maongang tao. Kamhan pamagpatazen iza doro ka kros. Pagdateng ka ikatolong aldaw pagabohien iza na Nagagihit pagbalik garing ka mga patay. Ani ini ya impanaba niran ka mga babazi.⁸Kamhan nakataremdem gazod ya mga babazi ka mga panaba ni Hisos kaniran. ⁹Min-oli dazon siran kay panan-ogan niran ya mga sinarigan ni Hisos nga napolo may isa siran daw ya tanan mga kaibahan mahitenged ka kanirang naazihan kazina doro ka lebnganan. ¹⁰Ya ngaran naitong mga babazi ani si Mariya nga taga Magdala daw si Zohana daw si Mariya nga ina ni Santiago. Sirang tolo daw ya mga iba nga babazi nga kaibahan niran, ani ya minpanan-og kaiza dizan ka mga sinarigan ni Hisos¹¹piro wara magtoo. Silaong niran nga binoang ya impanaba na mga babazi agon wara siran magtoo ka kanirang saba. ¹²Kamhan minhinalit si Pidro pagtindeg. Kamhan mindalagan ngaro ka talangban nga lebnganan kan Hisos. Minpongko iza ka pag-irab dalem kaiton. Kamhan nakita matood naiza ya mga panapton nga mapoti nga impotos ka lawas ni Hisos kay anikay nabilin dalem. Kamhan min-oli di iza. Nabereng gazod iza kon naono sa gazod wani?¹³Na, dizan ka dalan nga mingaring ka Hirosalem may dowang ka sakop ni Hisos nagapasinged siran ngaro ka bariyo nga inngaranan ka Imayas. Napolo may isang ka kilomitro ya kaaro garing ka Hirosalem. ¹⁴Namaglaonglaong sirang dowa mahitenged ka pagpatay na mga tao kan Hisos doro ka Hirosalem.¹⁵Ka nagalaonglaong pon siran minkandizan si Hisos kaniran daw min-iba kaniran pagpanaw. ¹⁶Nakita niran iza nga tao piro wara gazod siran makakilala nga si Hisos iton.¹⁷Kamhan nangotana iza kaniran nga ono sa ya inlaonglaongan mazo koman ka pagpanaw mazo? Minheneng siran pagpanaw. Masarangkabeg-at ya kanirang hinawa. ¹⁸Kamhan minsambag ya isa nga si Kolopasa ya ngaran nga nabereng gazod hao kay iko ka sa ya bisita ka Hirosalem nga wara pon mahagdam ka inhinang na mga tao kan Hisos doro kaiza nga mga aldaw.¹⁹Nangotana si Hisos nga ono sa baza wani inlaong mazo? Minsambag siran nga si Hisos nga taga Nazarit propita gazod iza garing ka Nagagihit. Madazaw gazod ya toong mga inhinang. Labaw ka gahem ya toong mga panaba. Minkilala ya tanan mga tao nga garing iza ka Nagagihit kay minpamatood ya Nagagihit ka toong mga inhinang.²⁰Piro in-ated iza na kanaming mga oloolo dizan ka mga taga Roma nga nagahari ka kantang hel-anan. Kamhan impahamtangan iza niran kapagkapatay. Kamhan impalansang iza ka kros.²¹In-alam kontana nami nga iza gazod ya antabang kanami ka pagpaiwat ka mga taga Roma dini ka kanaming lopa. Silaong nami nga iza ya makalibri kanami nga mga kaliwatan ni Israil. Ambaza kay impatay iza. Ikatlo ding aldaw koman sokad ka iton.²²Kamhan may mga babazi nga kaibahan nami nabereng kami ka inlaong niran kazina kay minboas koni siran pagbisita ka lebnganan ni Hisos ²³piro wara dizan ya toong lawas. Pagbalik niran kanami minlaong siran nga may nakita niran garing ka Nagagihit. Dizan ka pagkita niran waton ya dowang ka sinogo nga garing ka Nagagihit nagalaong nga nabohi di si Hisos garing ka mga patay. ²⁴Kamhan min-ariari ya kanaming kaibahan ka paglargo ka talangban nga lebnganan kan Hisos.Kamhan ya nakitan niran dizan singed iton ka inlaong na mga babazi kaywara gazed ya lawas ni Hisos dizan.²⁵Minsambag si Hisos kaniran nga kay ono sang magakalibeg sa kamo? Hasta ono sang magadowadowa sa kamo ka pagtoo ka tanan mga inlaong na mga karaang propita? ²⁶Kay minpanaba siran daan nga si Kristo nga hari nga pinili na Nagagihit kinahanglan an-azi iza ka masiet nga kalised hon-a ka toong pagkahari. ²⁷Kamhan impasabot ni Hisos kaniran ya tanan mga kasoyatan mahitenged kanangiza. Minsogod iza dizan ka mga sinoyat ni Moysis daw ya mga karaang propita na Nagagihit ka pagpasabot kaniran.²⁸Pagkakamhan kaiza mindateng siran ka bariyo nga Imayas nga ka nirang datnganan. Kamhan ambelag kontana si Hisos kaniran ²⁹piroinhawidan iza niran daw nagalaong nga magkolang ko naa dini kanami kay basi makahabzenan di ko. Kamhan minpanik iza iba kaniran dizan ka lagkaw.³⁰Pagpanihapon pen niran minporot si Hisos ka pan. Pagkakamhan naiza pagpasalamat ka Nagagihit minpanipaktipak iza ka pan. Kamhan impanhatag kaniran. ³¹Kamhan singed ka nakaimata dazon ya kanirang mata. Minkilala gazod nga si Hisos ini! Kamhan nawara dazon iza dizan ka pagkita niran. ³²Namaglaonglaong siran nga si Hisos matood iton kay malinaw gazod ya kantang hinawa kazina ka pagpanaba naiza kanta dizan ka dalan daw pagpasabot naiza kanta ka kasoyatan na Nagagihit.³³Kamhan min-ariari siran pagbalik ka Hirosalem. Pagdateng niran dizan minpanik siran dizan ka lagkaw nga intambongan na mga sinarigan ni Hisos nga napolo may isa siran daw ya mga iba nga taodizan kaniran. ³⁴Pagseled niran ka lagkaw inlong-an siran paghon-a nga nabohi matood ya Nagagihit garing ka mga patay kay minpakita iza kan Simon. ³⁵Kamhan inpanan-og nirang dowa ya naazihan niran dizan ka dalan daw ya pagkilala niran kan Ginoong Hisos pagpanipaktipak naiza ka pan.³⁶Ka pagpanaba pen niran minkarini si Hisos tenged kanirang tanan. Minlaong iza kaniran nga palinawen di mazo ya kamazong hinawa. ³⁷Inkelbaan siran ka pagpangahaldek. Silaong niran nga pooy di ini nga minbotho dakoza kaniran!³⁸Kamhan minlaong si Hisos nga kay ono sang nabereng sa kamo? Kay ono sang nagakadowadowa sa kamo kon sin-o sa hao? ³⁹Selengi mazo ya palad na kanaong alima daw paa. Hao matood ini nga si Hisos. Maghogam naa kamo kanao dazaw mahagdam kamo nga kanaong lawas gazod ini. Diri kon singed ka pooy nga waraykindal daw mga bekeg. ⁴⁰Kamhan impakita naiza kaniran ya toong mga alima daw paa.⁴¹Kamhan nagasaza siran piro singed ka nagadowadowa pen siran kon si Hisos ini kon diri. Kamhan nangotana si Hisos kaniran nga daw wadini ya sinen-ad mazo? ⁴²Kamhan inhatagan iza niran ka geramay nga onod na isda nga inhalob niran. ⁴³Pagdawat ka naiza inkaen naiza iton dizan ka pagseleng niran.⁴⁴Kamhan minlaong iza nga mintoman di ya mga panaba nao kamazo ka pag-ibaiba pon nao kamazo kay kinahanglan matoman gazed ya tanan mga insoyat ni Moysis mahitenged kanao daw ya mga sinoyat na mga karaang propita daw mga insoyat ni Dabid inngaranan ka Salmo.⁴⁵Kamhan minpawa si Hisos ka kanirang mga otok dazaw makasabot siran ka kasoyatan na Nagagihit. ⁴⁶Kamhan indogangan pen naiza pagpanaba kaniran nga impasoyat daan na Nagagihit nga nagalaong nga si Kristo nga hari nga pinili nao kinahanglan an-azi iza ka masiet nga kalised. Pagdateng ka ikatolong aldaw mabohi iza pagbalik garing ka lebeng. ⁴⁷Kamhan igsangzaw gazod ya toong sindo maglaong nga bizaan na mga tao ya kanirang mga sala dazaw pasaylohon siran na Nagagihit. Walihan ya mga taga Hirosalem paghon-a kamhan walihan pon doro ka tibolos kalibotan.⁴⁸Na, kamo nga kanaong mga sinarigan, kamo ya nakasaksi ka pagtoman naini nga tanan. ⁴⁹Panabaan ta kamo nga ipakarimbaba nao kamazo ya Madazaw nga Ispirito nga insaad na Ama nao kamazo. Maghela kamo dini ka Hirosalem hangtod ka paghari naini nga Ispirito kamazo. Kamhan may gahem mazo ka pagsindo ka mga tao mahitenged kanao.⁵⁰Pagkakamhan ni Hisos pagpanaba kaniran impaiba naiza siran ngaro ka gawas na siyodad keteb ka bariyo nga Bitani. Pagdateng ka niran dizan minbakzaw si Hisos ka toong alima tenged kaniran kay ampanarangin iza kaniran ka madazaw. ⁵¹Ka nagapanarangin pon iza kaniran nabohat iza ngandaked ka langit pagbelag kaniran.⁵²Kamhan pagbalik niran ka Hirosalem malinaw gazed ya hinawa niran. ⁵³Kada aldaw dizan ka dakolang lagkaw nga pangamozoanan ka Nagagihit insaza niran ya Nagagihit.

¹Kawandini pen dogay di ka wara pen mahinang ya bisan ono, daan di ya inngaranan ka Saba na Nagagihit kay nagapakahagdam iza kon ono ya hena-hena na Nagagihit. Kamhan iza daw ya Nagagihit nagakatibe siran. Iza gazed ani ya matood nga Nagagihit. ²Iza daw ya Nagagihit nagakatibe siran sokad pen gazed ka sinogdan. ³Kamhan iza ya maghinangay ka bisan ono ya impahinang na Nagagihit kay kon wara iza diri mahinang ya bisan ono.⁴Kamhan iza isab ya tag-iza ka bag-ong kinabohi nga diri mawara. Kamhan iton nga kinabohi ani ya makakawa ka kadeglem dalem ka hena-hena na tanan mga tao. ⁵Kamhan iza nga tag-iza ka kinabohi ani isab ya kapawa nga makakawa ka kadeglem dini ka kalibotan. Kamhan diri mahimo pagdeglem ya kapawa.⁶Ya, may tao nga inngaranan kan Howan. Insogo iza na Nagagihit ngarini ⁷kadaw anpanan-og iza ka mga tao nga si Hiso Kristo ani ya matood nga kapawa kadaw antoo sirang tanan. ⁸Iton nga tao nga si Howan diri kon iza ya kapawa kay iza hinoa ya nagapakahagdam ka mga tao kon sin-o ya kapawa.⁹Kay domatengay si Hiso Kristo nga matood nga kapawa kay iza ya makakawa ka kadeglem dalem ka hena-hena na maharong mga tao.¹⁰Pagdateng naiza dini ka bakangan wara makakilala ya mga tao kanang-iza bisan iza ya minhinang ka tibolos kalibotan. ¹¹Pagdateng na-iza ka toong kaogaringeng longsod imbogaw iza na toong kaibahan.¹²Piro may mga iba nga tao nga mintoo nga si Kristo gazed iza. Kamhan minpasakop siran kanang-iza. Kamhan inhinang na-iza nga siran di ya mga Anak na Nagagihit. ¹³Ya pagka-anak niran garing iton ka inhinang na Nagagihit, diri kon garing ka inhinang na tao pagpaliwat.¹⁴Na, si Kristo natao iza kadaw nahitibe iza dimbaba kanta kay dakola ya kalooy na-iza ka mga tao. Kamhan polos matood ya toong panaba. Nakita nami nga madazaw ya batasan ni Kristo kay ya batasan na-iza daw Ya Madazaw nga Balita mahitenged kan Hiso Kristo ngainsoyat ni Howan ya toong Ama mag-anika kay bogtong Anak na Nagagihit si Kristo. ¹⁵Iza ya impanan-og ni Howan kay dizan ka mga tao minbaskeg si Howan ka toong paghawag nga nagalaong nga wani di koman ya tao nga impananog nao kamazo nga ya ansonod pen kanao labaw gazed iza kanao kay ka wara pen hao matao daan ka iza nga bohi.¹⁶Maloozon iza kamhan madazaw gazed ya indawat naming maharong garing kanangiza. ¹⁷Inhatag ni Moysis kanta ya daan balaed na Nagagihit kamhan si Kristo ani nagapasabot kanta nga dakola ya kalooy na Diyos kanta. Kamhan polos matood ya toong panaba. ¹⁸Waray nakakita ka Nagagihit sokad. Kamhan ya toong bogtong Anak ani nagapasabot kanta kon ono ya hena-hena na Nagagihit kay nagakatibe siran daan paghela daked ka tahaw.¹⁹Ya, ka nagapanan-og pen si Howan ka mga tao mahitenged kan Kristo nalibeg ya mga Hudiyo kon si Kristo kon si Howan iton. Kamhan ya mga oloolo na mga Hudiyo dini ka Hirosalem minpadara siran ka mga pari daw ya mga Libita doro kan Howan kadaw pangotanhen kon sin-o sa iza. ²⁰Kamhan madazaw ya sambag ni Howan nagalaong nga si Howan hao. Lain gazed si Kristo nga hari nga pinili na Nagagihit. Diri gazed kon hao iza. ²¹Kamhan nangotana siran daw sin-o sa ko? Daw iko si Iliyas nga karaang propita na Nagagihit? Minsambag iza nga diri kon hao iton. Kamhan nangotana siran pag-isab daw iko ya propita nga kanaming intagadan? Minsambag si Howan nga diri kon hao iton.²²Kamhan minlaong siran nga panan-ogan mo kami kon sin-o sa iko dazaw may ikasambag nami dizan ka mga minsogo kanami. Ono sa ya ikapanaba mo mahitenged ka kanmong kaogaringen? ²³Kamhan minsambag si Howan nga hao di ya maghawagay ka mga tao doro ka kamingawan nga nagalaong nga dazawen mazo ya kamazong batasan singed ka tao nga minhinglo ka dalan kay domatengay di ya Anak na Nagagihit. Ani ini ya pagtoman na daan soyat ni Isayas mahitenged kanao.²⁴Kamhan dizan disab may mga matuod nga magtutuldo ka tinoohan na mhga Hudiyo. Parasiyo ya ngaran niran. ²⁵Kamhan minlaong siran kan Howan nga mated minlaong ko nga diri kon si Kristo iko, diri kon si Iliyas iko, diri kon iko ya propita nga kanaming intagadan agon kay ono sa nga nagapamenzag sa ko ka mga tao?²⁶Minsambag si Howan nga hao ya nagapamenzag ka mga tao ka sapa kamhan dakoza ka tenged mazo mindateng di ya isa nga tao nga wara kamo mahagdam kon sin-o sa iza. ²⁷Bisan mindateng iza sonod kanao iza ya labaw gazed. Kamhan dizan kanang-iza hao ya labing obos kay iza gazed ya labaw ka gahem. Ani ini ya insambag ni Howan ka mga Parasiyo ²⁸ka doro pen iza ka longsod nga Bitani dipi ka sapa nga Hordan nga benzaganan na-iza ka mga tao.²⁹Pagsonod nga ka aldaw nakita ni Howan si Hisos nga nagapasinged ngarini kanangiza. Kamhan minlaong si Howan nga kilalhen mazo iza nga inngaranan ka Nati na Karniro nga impakapatay na Nagagihit kadaw mawaraan ka sala ya maharong mga tao. ³⁰Iza ya impanan-og nao kamazo nagalaong nga may isang tao nga andateng sonod kanao. Dizan kanang-iza hao ya labing obos kay ka wara pen hao matao daan ka iza nga bohi. ³¹Izang mahon-a pen wara hao mahagdam kon sin-o iza. Kamhan impamenzagan nao ya mga tao nga kaliwatan ni Israil kadaw mahagdam siran nga domatengay di ya Anak na Nagagihit.³²Kamhan indogangan pen ni Howan paglaong kaniran mahitenged kan Hisos nga mindateng di matood iza kay pagkakamhan nao pagbenzag kanang-iza nakitan nao ya Madazaw nga Lambong nga garing ka Nagagihit nga minkarimbaba daw minhapon dizan kanang-iza. Minpasingedsinged iton ka salapati. ³³Izang mahon-a pen wara pen hao mahagdam kon sin-o iza piro impanan-ogan hao daan na Nagagihit nga nagalaong nga pagpamenzag mo ka mga tao kay-an makitan mo ya isang tao nga inhaponan na Madazaw nga Lambong nga garing kanao. Minpasingedsinged iton ka salapati. Kamhan ya tao nga inhaponan ani ya magbenzag ka mga tao ka Madazaw nga Ispirito nga garing kanao dazaw paharian siran na-iza nga Lambong. Ani ini ya pagpanaba na Nagagihit kanao nga si Howan. ³⁴Ya, nakitan di nao iton nga tao nga pinili na Nagagihit. Kamhan iza gazed ya Anak na Nagagihit³⁵Pagsonod nga ka aldaw dizan di isab si Howan iba ka toong mga sakop nga dowa siran. ³⁶Kamhan minseleng si Howan kan Hisos nga nagalabay dizan kaniran. Kamhan minlaong iza nga waza ngaro ya Nati na Karniro nga impakapatay na Nagagihit.³⁷Pagpakabati ka na mga sakop ni Howan ka-iza minsonod sirang dowa kan Hisos. ³⁸Paglingi ni Hisos nakakita iza kanirang dowa nga nagasonod kanang-iza. Kamhan minpangotana iza kaniran nga daw ono kombeet ya pagakinahanglanen mazo kanao? Minsambag siran nga Magtutuldo, daw hain ko maghela? ³⁹Minsambag si Hisos nga mamanaw di kita ngaro kadaw mahagdam kamo. Kamhan min-iba siran kan Hisos ngaro ka toong inhol-an. Kamhan namagloon pen siran pagkolang dakoza kay nadelem ya sega.⁴⁰Ya, ya isa nga nakabati kan Howan si Andris ya ngaran. Kamhan min-iba di iza kan Hisos. Maglomon iza daw si Simon Pidro. ⁴¹Kamhan nagapangita iza pagdali ka toong lomon nga si Simon kay inlaong nga nakitan nami ya Misayas. Na, ya kahologan na ngaran nga Misayas ani si Kristo nga hari nga pinili na Nagagihit. ⁴²Pagkakamhan ni Andris pagpanaba kan Simon in-iba pen na-iza si Simon ngaro kan Hisos. Pagdateng niran doro minseleng si Hisos kan Simon. Kamhan minlaong iza nga iko si Simon nga anak ni Howan kamhan anngaran hao kanmo kan Sipas. Ya, ya ngaran nga si Sipas daw si Pidro mag-anika. Ya, ya kahologan na ngaran nga Pidro ani ya dakolang bato.⁴³Pagsonod nga ka aldaw minkaro si Hisos ka lopa nga Galiliya. Kamhan si Pilipo ani ya nakitan na-iza. Kamhan minlaong iza nga somakop ko kanao. ⁴⁴Taga Bitsayda si Pilipo. Anisab ya kaogaringeng longsod ni Andris daw si Pidro. ⁴⁵Pagkakamhan ka-iza nangita si Pilipo kan Nataniyal kay minlaong nga wadini di kanta ya isang tao. Kamhan iza ya impanan-og ni Moysis dizan ka basahen nga mga daan balaud na Nagagihit daw dizan ka mga soyat na mga karaang propita na Nagagihit. Si Hisos iza nga anak ni Hosi nga taga Nazarit.⁴⁶Minsambag si Nataniyal nga geramay ya longsod nga Nazarit kamhan waray polos ya taga dizan kaiton. Minsambag si Pilipo nga mag-iba kita naa ngaro kadaw ankita ko kanang-iza. ⁴⁷Pagkita ni Hisos kan Nataniyal nga minkarini di minlaong si Hisos nga wani ngarini kanao ya matood nga kaliwat ni Israil. Matadeng gazed ya toong batasan. ⁴⁸Minsambag si Nataniyal nga ono sa nga nakakilala sa ko kanao? Minsambag si Hisos nga ka wara pen ko hawaga ni Pilipo nakitan nao iko dizan ka tongod na tanum ani ngaran ya igira.⁴⁹Minsambag si Nataniyal nga Magtutuldo, iko matood ya Anak na Nagagihit. Iko matood ya hari nga pinili na Nagagihit ka mga taga Israil! ⁵⁰Minsambag si Hisos nga Nataniyal, daw mintoo iko kanao kay impanaba nao nga nakitan nao iko dizan ka tenged na tanem nga igira? Labaw pen gazed kay-an ya nakitan mo nga kanaong mga hinang. ⁵¹Indogangan pen ni Hisos paglaong nga timanan mo gazed ini. Ya tood nao ka pagdateng dini kamazo impasabot nao kamazo kon ono ya inhena-hena na Nagagihit. Kamhan singed ka naabri di ya tahaw. Kamhan hao nga si Hisos singed hao ka hagdan dimbaba nga nakadateng daked ka hol-anan na Nagagihit. Kamhan ya mga taga tahaw nga sinogo nao magakandaked siran garing kanao. Kamhan magakarimbaba siran kanao kay hao gazed ya mahon-a ka bisan sin-o ya mahon-ang tao.

¹Pagdateng ka ikatlong aldaw may kombiti ka pagpangasawa doro ka bariyo nga Kana doro ka Galiliya. Kamhan ya ina ni Hisos dinapit iza. ²Mga dinapit disab si Hisos daw ya toong mga sakop.³Ka nagakaen pen siran inkabsan di ya bino nga imnenen na mga magkombitihay. Kamhan ya ina ni Hisos minlaong kanangiza nga nahodtan di siran ka bino. ⁴Minsambag si Hisos nga Ina, hao ka magaponto kon kon-o hao magtabang kaniran. ⁵Kamhan minlaong ya toong ina ka mga sogoonon nga bisan ono ya ipansogo na-iza kamazo magtoman kamo.⁶Ya, dizan ka lagkaw nga kombitihanan may mga dakolang tadzaw nga enem nga ka bolos. Ya leen na tagsa tagsa taglimang ka taro nga sapa. Kay inhinang na mga Hudiyo ya batasan na mga karaang Hudiyo nga ka wara pen makakaen ya mga tao kinahanglan bo-boan ka sapa ya kanirang mga alima. ⁷Kamhan minsogo si Hisos ka mga sogoonon nga pon-on mazo ya mga tadzaw ka sapa. Kamhan nanag-eb dazon siran kadaw ihalin ya sapa keteb ka pagkapono na mga tadzaw. ⁸Kamhan minsogo si Hisos nga tigisan mo ya magsen-aday kadaw iza ya amporba pag-inem. Kamhan intigisan niran iza.⁹Pagtilaw na-iza ka sapa ambaza kay bino di sa baza iton. Wara iza mahagdam kon hain garing ya bino piro mahagdam ya mga sogoonon kay siran ya minsag-eb kazina. Kamhan impakarini na magsen-aday ya banahen. ¹⁰Kay minlaong iza nga ya batasan na mga nagakombiti ani inhon-a pag-inem ya masarang kadazaw nga bino. Kon dakola di ya pag-inem na mga tao anipen ihatag ya matab-ang. Kamhan ya kanmong batasan inmahori di hinoa ya madazaw nga bino.¹¹Ani ini ya primirong dakolang inhinang ni Hisos doro ka bariyo nga Kana doro ka Galiliya. Kay impasabot na-iza kaniran nga dakola ya toong gahem nga garing ka Nagagihit. Kamhan ya toong mga sakop mintoo di siran nga garing iza ka Nagagihit.¹²Pagkakamhan ka-iza minkandilod si Hisos ka longsod nga Kapirnaom. Nangiba disab ya toong ina daw mga manghod daw mga sakop. Diri kon madogay ya pagpabilin niran doro.¹³Na, kada toig antaremdem ya mga Hudiyo ka paglibri na Nagagihit ka kanirang mga karaan ka pagkaoripen pen niran doro ka lopa nga Ihipto. Kamhan ya batasan niran ka pagtaremdem ka pista mangihaw siran ka mga nati na karniro. Agon minkaro si Hisos ka siyodad nga Hirosalem nga ani say logar nga pistahanan niran. ¹⁴Pagdateng na-iza ka dakolang lagkaw nga pangamozoanan ka Nagagihit nakitan naiza ya mga mamaligzaay ka mga baka daw mga karniro daw mga salapati. Kay inhinang na mga Hudiyo ya kanirang batasan nga magahalad ka mga ihazep paghawag niran ka Nagagihit. Nakitan isab ni Hisos ya mga Hudiyo nga magsilihay ka mga talipid nga indara na mga taga laing dapit.¹⁵Kamhan minhinang si Hisos ka ilatosay nga lepes kay bogawen na-iza sirang maharong dizan ka lagkaw na Nagagihit. Impaiwat gazed ya mga karniro daw mga baka. Inzabo sab na-iza ya talipid na mga magsilihay daw impanowad ya kanirang mga lamisa. ¹⁶Kamhan minbaheg iza ka mga magbaligzaay ka mga salapati nga kaw-en sa mazo ya kamazong mga salapati dini! Azaw mazo paghinangen ka taboan ya lagkaw nga pangamozoanan ka kanaong Ama.¹⁷Kamhan nakataremdem ya toong mga sakop ka daan impasoyat na Nagagihit nga nagalaong nga Nagagihit, ya pagbogaw nao ka mga maonga nga tao dizan ka kanmong lagkaw ani ya sinogdan ka pagkontara niran kanao. ¹⁸Kamhan minlaong ya mga Hudiyo kan Hisos nga pakitahen mo kami ka timaan kadaw mahagdam kami nga garing ka Nagagihit ya gahem mo ka pagbogaw ka mga tao dini. ¹⁹Minsambag si Hisos nga ini nga dakolang lagkaw nga pangamozoanan ka Nagagihit geb-a mazo ini. Kamhan hinangen gazed nao ini pagbag-o ka tolo kang ka aldaw.²⁰Minsambag siran nga kap-atan may enem nga ka toig ya paghinang nami kaini nga lagkaw. Onhon sa mo paghinang pagbag-o ka tolong ka aldaw? ²¹Na, ani ini ya pamolinged ni Hisos kaniran mahitenged ka toong kaogaringeng lawas ²²kay kay-an patazen iza na mga tao. Kamhan pagdateng ka ikatlong aldaw mabohi iza pagbalik garing ka lebeng. Kon makamhan iton anipen makataremdem ya toong mga sakop ka-iza nga pamolinged. Kamhan mintoo siran ka kasoyatan na Nagagihit daw ya mga panaba ni Hisos.²³Ya, dizan ka Hirosalem nakapamista pen ya mga Hudiyo. Kamhan mataed ya mga mintoo kan Hisos pagkita niran ka mga dakolang inhinang na-iza. ²⁴Kamhan diri si Hisos ansarig kaniran. ²⁵Kay nahagdam iza daan kon ono ya inhena-hena na tanan mga tao. Kamhan waray kinahanglan na-iza ka tao ka pagpasabot kanang-iza ka kanirang inhona-hona kay nahagdam sa iza daan.

¹Kamhan may isang oloolo na mga Hudiyo si Nikodimo ya ngaran. Parasiyo iza nga nagatoman ka mga balaud na karaang mga Hudiyo. ²Ka isang kahabzen minkarini iza kan Hisos. Kamhan minlaong iza nga Magtutuldo, mahagdam kami nga impakarini ko na Nagagihit ka pagtoldo kanami kay bisan sin-o nga taohana wara iza nakahimo ka mga inhinang singed kanmo kon wara iza tagi na Nagagihit ka gahem.³Minsambag si Hisos nga timan-an mo gazed ini. Kon diri hinangen na Nagagihit ya tao pagbag-o diri gazed magkaangay ya tao daw ya Nagagihit. ⁴Nangotana si Nikodimo nga ya malaas nga tao onhon sa na Nagagihit paghinang pagbag-o? Daw ipaleen pen iza ka tinai na toong ina kadaw matao pag-isab?⁵Minsambag si Hisos nga timan-an mo gazed ini. Kon diri hinangen na Madazaw nga Lambong na Nagagihit ya tao pagbag-o diri gazed magkaangay ya tao daw ya Nagagihit. Iton nga Lambong singed iza ka sapa nga makahinglo ka henahena na tao. ⁶Garing ka lawas na tao inhinang gihapon ya lawas na tao pag-anak. Kamhan garing ka Madazaw nga Ispirito na Nagagihit inhinang gihapon ya kaliwat na Lambong na Nagagihit pag-anak.⁷Diri ko magkabereng ka impanaba nao kanmo nga kinahanglan nga hinangen iko na Nagagiht pagbag-o. ⁸Pamolinged ta ko nga ya hangin ani magabeet kon hain azi. Kamhan pag-azi na hangin dizan kanmo nakabati ko piro wara ko mahagdam kon hain garing. Wara ko mahagdam kon hain andateng. Pamolinged ini ka hinang na Madazaw nga Lambong na Nagagihit dizan ka tao.⁹Minsambag si Nikodimo nga onhon sa na Nagagihit paghinang ka tao pagbag-o? ¹⁰Minsambag si Hisos nga nabereng hao kay bisan iko ya magtutulddo na mga kaliwatan ni Israil wara ko makasabot ka intoldo nao kanmo. ¹¹Ya nahagdaman nami impanaba nami kamazo. Impanan-og sab nami kamazo ya nakitan nami kamhan wara kamo manoo ka kanaming mga panaba.¹²Inpanan-og di nao kanmo mahitenged ka inhinang na tao. Kamhan wara ko magtoo kanao agon onhon sa mo pagtoo kon ampanan-og hao kanmo mahitenged ka inhinang na Nagagihit? ¹³Hao kay mahagdam kon ono ya inhinang na Nagagihit kay garing daked hao. Kamhan ankandaked isab hao pagbalik kay hao ya mahon-a ka bisan sin-o ya mahon-ang tao.¹⁴Kawandini pen ka doro pen sin Moysis ka dakolang nag-as impamanga siran na mga halas nga marara. Kamhan inhinang ni Moysis ya bronsi nga singed ka halas ya hitsora. Kamhan inbetang na-iza iton dizan ka toko kadaw selengan na mga tao. Kamhan nabahaw matood ya mga tao kon anhangad siran ka bronsi. Pamolinged gazed ini ka kanaong pagkapatay ka kros. ¹⁵Kay garing ka kanaong pagkapatay bisan sin-o ya antoo kanao tagan gazed iza ka bag-ong kinabohi nga diri mawara.¹⁶Kay dakola gazed ya kalooy na Nagagihit ka maharong mga tao. Kamhan intagan naiza ka toong bogtong Anak kadaw bisan sin-o ya antoo kanang-iza diri madara ngaro ka impirno basta tagan iza hinoa ka bag-ong kinabohi nga diri mawara. ¹⁷Kay wara ipadara na Nagagihit ya toong Anak dini ka bakangan kadaw silotan ya mga tao. Hinoa tabangan na-iza siran dazaw malibri siran kaiton nga silot. ¹⁸Ya maharong tao nga antoo ka Anak diri silotan piro ya diri antoo kanang-iza insilotan di kay wara iza magtoo ka bogtong Anak na Nagagihit.¹⁹Ani ini ya paghokom na Nagagihit kaniran kay hao nga matood nga kapawa pagdateng nao dini ka bakangan diri siran maazak kanao. Hinoa impili niran ya kadeglem kay anak siran paghinang ka maonga. ²⁰Bisan sin-o nga nagahinang ka maonga diri gazed iza anak ka kapawa. Hinoa minpaaro iza ka kapawa kay basi makitan sa ya toong mga hinang nga maonga. ²¹Ya tao nga nagatoman ka naazakan na Nagagihit minkarini iza ka kapawa kadaw makitan nga garing ka Nagagihit ya toong mga hinang.²²Pagkakamhan ka-iza si Hisos daw ya toong mga sakop minkaro siran ka lopa nga Huda. Nabilin iza doro iba kaniran. Namenzagay sab siran ka mga tao singed ka batasan ni Howan. ²³Nagabenzag pen si Howan gihapon doro ka longsod nga Aynon arani ka longsod nga Salim kay dakola ya sapa doro. Nangaro ya mga tao kan Howan kay ampabenzag siran ²⁴kay wara pen si Howan mapiriso.²⁵Ya, ya mga sakop ni Howan daw ya isang tao nga Hudiyo namaglalislalis siran ka batasan na mga Hudiyo nga kinahanglan bo-boan ka sapa ya lawas niran anipen siran makakaen. ²⁶Kamhan minkandizan siran kan Howan. Minlaong siran nga Magtutuldo, ya tao nga kanmong iba dipi ka sapa nga Hordan nga impanan-ogan mo kanami nagapamenzag di iza ka mga tao koman. Imbizaan iko na mga tao kay masara gazed nga kataud ya minkandipi kanang-iza.²⁷Minsambag si Howan nga waray tao nga makadawat ka bisan ono kon wara hatagi na Nagagihit. ²⁸Izang dini kaini nabatian mazo ya impanan-og nao nga diri kon hao si Kristo nga hari nga pinili na Nagagihit. Hinoa insogo hao ngarini paghon-a kanang-iza kadaw an-andam hao ka toong pagdateng.²⁹Pamolinged ta kamo nga ya tao nga nangasawa iza ya insondan na asawa. Ya maglaongay na nangasawa nagasaza iza kon makaganas di ka babazi kay kamhan di ya toong tarabaho. Singed kaiton ya kanaong kasaza kay mataud di ya nanalinga kan Hisos daw ya mga minsakop di kanang-iza. Kamhan di ya kanaong tarabaho ka pagpakilala kan Hisos dini kamazo. ³⁰Ya pagkabantog ni Hisos an-oswag gazed iton. Kamhan angeramay ya kanaong pagkabantog.³¹Si Hisos garing iza ka Nagagihit. Kamhan iza ya labaw ka maharong. Taga kalibotan ka lamang hao. Kamhan anpanaba hao mahitenged ka bakangan ka lamang. Iza nga garing daked ka Magbabaza labaw iza ka maharong. ³²Impanan-og na-iza ya toong nakitan daw nabatian piro talagsa ka ya mintoo ka toong mga panaba. ³³Kamhan bisan sin-o ya mintoo kanang-iza siran gazed ya ampanan-og nga polos matood ya mga panaba na Nagagihit.³⁴Kay iza nga inpakarimbaba na Nagagihit minpanaba iza ka mga panaba na Nagagihit kay insakto gazed ya Madazaw nga Lambong na Nagagihitdizan kanang-iza. ³⁵Naazak gazed ya Nagagihit kan Hisos. Kamhan inhatag na Nagagihit ya maharong dizan kanang-iza. ³⁶Bisan sin-o ya antoo ka Anak na Nagagihit may toong bag-ong kinabohi nga diri mawara. Bisan sin-o ya diri antoo ka Anak na Anak diri iza tagan ka kinabohi basta kay silotan gazed iza na Nagagihit ka waray pagheneng.

¹Kamhan nakabati ya mga Parasiyo nga mataed di koman ya mga tao nga naangzan ampasakop kan Hisos daw ampabenzag kamhan ya kan Howan geramay ka. ²Diri kon si Hisos ya magapamenzag ka mga tao kay ya toong mga sakop ka lamang. ³Kamhan mahagdam si Hisos nga nakabati di ya mga Parasiyo nga nabantog di ya toong ngaran agon minpanaw iza dizan ka lopa nga Huda kay ambalik iza ka lopa nga Galiliya.⁴Ya dalan pasinged ngaro ka Galiliya minlapos iton ka lopa nga Samariya. ⁵Kamhan nakadateng si Hisos ka longsod nga Saykar doro ka Samariya. Arani iton ka oma nga intagan ni Hakob nga karaang tao ka toong anak nga si Hosi.⁶Kamhan dizan ka pagaazihan ni Hisos may atabay nga kinabotan ni Hakob. Na, pagdateng ni Hisos dakoza nagalo-to iza kay ampahoway iza ka toong pagpanaw ka pag-odto di na sega. ⁷Ya, ka dizan pen si Hisos may nagapasinged ngarini nga babazi nga somag-ebay. Taga Samariya iza. Kamhan minlaong si Hisos ka babazi nga paimnen mo hao. ⁸Minlaong iza kaiton kay nanlargo pen ya toong mga sakop ka longsod kadaw paliten ya makaen.⁹Kamhan nabereng ya babazi kay ya batasan na mga Hudiyo diri angamit ka mga betangan na taga Samariya ka pag-inem. Agon minsambag iza kan Hisos nga Hudiyo ko. Ono sa nga azoan sa mo hao ka sapa? ¹⁰Minsambag si Hisos nga kon nahagdam pen ko ka inhatag na Nagagihit kanmo, kon makakilala pen ko kon sin-o sa hao nga minpangazo kanmo ka sapa, iko hinoa ya anazo kanao ka sapa kay paimnen ta ko ka sapa nga diri di ko ohawen kawanihen ka.¹¹Kamhan minlaong ya babazi nga Nong, waray ikasageb mo hasta ararem ini nga atabay nga ingkabotan. Kamhan daw hain ko magkawa ka sapa nga makakawa ka kaohaw kawanihen ka? ¹²Daw labaw pen baza iko kan Hakob nga kanaming karaan? Iza ya minhinang kaini nga ingkabotan nga atabay. Iza daw ya toong mga anak daw mga bohien nga baka min-inem sirang maharong dini kaini nga sapa.¹³Minsambag si Hisos nga ya tao nga magainem kaini nga sapa ohawen iza pag-isab. ¹⁴Kamhan ya an-inem ka sapa nga kanaong ihatag diri di gazed iza ohawen pag-isab kay kawanihen ka mahinang iton ka singed ka tobod dalem ka toong beet. Diri isab mawara ya bag-ong kinabohi na-iza.¹⁵Minsambag ya babazi nga Nong, tagan mo hao ka sapa nga impanaba mo kadaw diri di hao ohawen pag-isab. Diri di hao an-isab pagbalik ka pagsag-eb dini. ¹⁶Minsambag si Hisos nga pakarinihen mo ya kanmong bana.¹⁷Minsambag ya babazi nga waray bana nao. Minlaong si Hisos nga hosto ya sambag mo nga waray bana mo ¹⁸kay lima di ya nangazi kanmo nga bana. Kamhan ya mintipon kanmo koman diri kon iza ya bana mo. Matood ya sambag mo kanao.¹⁹Minsambag ya babazi nga Nong, mahagdam di hao nga iko ya matood nga propita na Nagagihit kay nahagdam ko daan ka kanaong batasan. ²⁰Wani pen ya pangotana nao kanmo nga kay ono sa kamo nga Hudiyo nagalaong nga kinahanglan doro ka siyodad nga Hirosalem ipahalad ya ihazep ka paghawag ka Nagagihit? Kay ya batasan na kanaming karaan ya bobong nga Girasim ani ya dapit niran ka paghawag ka Nagagihit.²¹Minsambag si Hisos nga toohi hao nga arani di ya tirmino nga diri di anhawag ya mga tao ka Ama nga Nagagihit dizan ka bobong nga Girasim bisan kon doro ka siyodad nga Hirosalem. ²²Kamo nga taga Samariya wara gazed kamo mahagdam kon sin-o ya kamazong pangamozoan. Kami nga mga Hudiyo mahagdam sa kami kon sin-o ya kanaming pangamozoan kay ya Manlolowas ka mga tao Hudiyo ya toong kaliwat.²³Mindateng di ya tirmino nga ya mga matood nga magsingbahay kinahanglan magaangay ya kanirang hna-hona ka Madazaw nga Lambong nga garing ka . Kinahanglan antoo isab siran nga hao ya matood nga Nagagihit. Ya tao nga nagabatasan singed kaiton iza ya naazakan na Ama ka pagsingba kanang-iza. ²⁴Kay ya Nagagihit ani ya Madazaw nga Lambong. Kamhan ya mga anhawag kanang-iza kinahanglan mag-angay ya kanirang hena-hena kaiton nga Lambong. Kinahanglan antoo isab siran nga hao ya matood nga Nagagihit.²⁵Minsambag ya babazi nga mahagdam hao nga ankarini ya Misayas. Inngaranan iza kan Kristo nga hari nga pinili na Nagagihit. Iza ya ampakita kanta ka maharong kay-an ka pagdateng na-iza. ²⁶Minsambag si Hisos nga hao nga nagalaong kanmo koman ani iza si Kristo.²⁷Kamhan nakabalik ya mga sakop ni Hisos. Nabereng siran kay ono ya pagkiglaonglaong naiza ka babazi kamhan wara siran mangotana ka babazi kon ono ya toong naangzan. Wara sab siran mangotana kan Hisos kon ono ya inlaong na-iza ka babazi.²⁸Kamhan imbilin pen na babazi ya toong tadzaw dizan kay an-oli pen iza ka longsod. Pagdateng ka na-iza doro minlaong iza ka mga tao nga ²⁹ibahan mazo hao ngaro kay kadaw makakita kamo ka tao nga minpanaba kanao ka tanan nahinang nao. Ani di iton doro kombeet si Kristo nga hari nga pinili na Nagagihit. ³⁰Kamhan minpanaw siran pasinged ngaro kan Hisos.³¹Ka wara pen dateng siran inhagad kontana si Hisos na toong mga sakop nagalaong nga Magtutuldo, komaen di ko naa. ³²Minsambag si Hisos nga may makaen nao nga wara mazo mahagdami. ³³Kamhan namaglaonglaong ya mga sakop nga daw may tao nga mindara ngarini ka makaen?³⁴Minsambag si Hisos nga singed ka kanaong makaen ya pagtoman ka naazakan na Nagagihit nga minpakarimbaba kanao daw ya pagtiwas ka toong tarabaho. ³⁵Pamolinged ini nga kon anseleng kamo ka bag-ong inpogas anlaong kamo nga opat pen ka bolan maani di iton. Timan-an mazo gazed ini nga mindateng di gazed ya tirmino ka pag-ani. Selengi mazo ya mga tao nga naangzan antoo kanao kay singed siran ka abot nga anihen. ³⁶Ya mga antabang ka mga tao ka pagpasakop kanao soholan nao siran. Kamhan ya mga minsakop kanao matagan nao siran ka bagong kinabohi nga diri mawara. Ya isang tao singed ka nagapogas iza ka kanaong pagmaymay. Ya isang tao singed ka magaani iza ka tanem. Kamhan mindengan sirang dowa pagsaza kay poslanan ya kanirang tarabaho.³⁷Matood ya daan inlaong nga ya isang tao magtanemay iza, kamhan ya isang tao mag-anihay iza. ³⁸Impadara nao kamo dazaw mangani ka wara mazo hagoi. Ya iba ani naghago kamhan kamo ya nagapahimolos ka kanirang hinagoan. Ani ini ya intoldo ni Hisos ka toong mga sakop.³⁹Kamhan doro kaiton nga longsod mataed di ya mga taga Samariya nga mintoo di kan Hisos kay impanan-ogan siran na babazi nagalaong nga iton nga tao ani ya minpanaba kanao ka maharong nahinang nao. ⁴⁰Agon pagdateng niran kan Hisos inhagad niran iza ka pagkolang doro ka lagkaw niran. Kamhan nabilin iza doro kaniran keteb ka dowang ka aldaw.⁴¹Kay nagamaymay iza kaniran. Kamhan mataed pen ya mga mintoo kanang-iza. ⁴²Nagalaong sab siran ka babazi nga mintoo di kami kazina kay nakabati kami ka kanmong saba. Kamhan nakabati disab kami ka toong pagmaymay agon mahagdam kami nga iza gazed ya Manlolowas ka maharong mga tao.⁴³Na, pagdateng ka ikatolong aldaw minpanaw si Hisos kay anlargo iza ka lopa nga Galiliya nga hel-anan na mga diri kon toong kaibahan. ⁴⁴Kay minlaong iza nga bisan sin-o ya propita na Nagagihit wara iza tahoda na toong kaibahan. ⁴⁵Pagdateng ka na-iza doro magaabiabihen gazed iza na mga taga dizan kay izang dini kaini ka pagkaro niran ka Hirosalem ka pista na mga Hudiyo nakakita siran ka toong mga hininang.⁴⁶Kamhan mindateng si Hisos ka longsod nga Kana doro ka Galiliya nga dapit nga inhinang na-iza ya bino garing ka sapa. Kamhan may isang tao nga minkarini garing ka longsod nga Kapirnaom. Sinarigan iza ni Hirodis nga hari. Kamhan masakiten ya toong bata nga amaama. ⁴⁷Pagpakabati ka naiza nga mindateng di si Hisos dini ka lopa nga Galiliya garing ka lopa nga Yoda minkarini iza kan Hisos kay hangzoon na-iza ka pag-iba doro ka toong lagkaw kay ipatambal ya toong bata nga nagapinal di ka toong masakit.⁴⁸Minsambag si Hisos nga kon diri ko ankita ka mga timaan nga garing ka Nagagihit daw ya mga hininang nga kaberenganan diri ko antoo kanao. ⁴⁹Minsambag ya oloolo nga Nong, kon mahimo ya beet mo karohon mo dazon kay basi mapatay ya kanaong bata. ⁵⁰Minsambag si Hisos nga omoli di ko ngaro kay nadazaw di ya bata mo. Kamhan mintoo ya oloolo ka mga panaba ni Hisos. Minpanaw dazon iza.⁵¹Ka nagapasinged pen iza ngaro insogat iza na toong mga sogoonon kay nagalaong nga Nong, nadazaw di ya bata mo. ⁵²Kamhan nangotana iza daw ono orasa ya pagkawara na toong masakit? Minsambag siran nga kahabi ka pagkaala ona nakawa di ya toong hilanat.⁵³Kamhan mahagdam ya oloolo nga ani indenganan izang pagpanaba pen ni Hisos nga nadazaw di ya bata mo. Kamhan mintoo gazed ya oloolo kan Hisos lakip ya tibolos inhel-an na-iza. ⁵⁴Na, sokad ka pagdateng ni Hisos ka Galiliya garing ka lopa nga Hudaikadowang timaan iton nga inhinang na-iza kadaw mahagdam siran nga garing iza ka Nagagihit.

¹Pagkakamhan kaiza minkaro si Hisos ka siyodad nga Hirosalem kay may pista na mga Hudiyo. ²Na, dakoza ka Hirosalem may pirtahan nga azihanan na mga mag-ateday ka karniro nga ihaladay ka Nagagihit. Kamhan may linaw dizan ka pirtahan. Dizan ka kilid na linaw may mga tal-ob nga limang bolos nga pahimlazanan na mga nabedlay nga tao. Ya ngaran naiton nga dapit ani ya Bitsayda ka saba nga Hinibriyo. ³Matuodd ya mga masakiten nga namentag dizan. May nangabota, may nangapiang, may diri makahingas ka lawas. Nagatagad sirang maharong ka pagkotaw kaiton nga linaw. ⁴Kay may panahon nga andateng ya sogoonon nga taga tahaw kay ankotaw ka linaw. Kamhan ya masakiten nga makahon-a pagtena nawaraan matood iza ka bisan ono ya toong masakit.⁵Na, may isang ka tao dizan. Kamhan katloan may walo ding ka toig ya toong pagkabedlay. ⁶Pagpakakita ni Hisos ka tao nahagdam iza nga dogay di gazed ya toong pagbentag dizan. Kamhan minlaong si Hisos nga daw ansogot ko nga mawara ya masakit mo?⁷Minsambag ya nabedlay nga Nong, waray makabohat kanao ngaro ka linaw kon somobosobo di ton. Pagpangalimbasog nao ka pagdateng ka linaw nahon-ahan hao na iba. ⁸Minlaong si Hisos nga bomangon di ko. Lokoton mo ya kanmong banig. Kamhan pomanaw ko.⁹Kamhan madazaw di matood ya tao. Minlokot iza ka toong banig. Kamhan minpanaw iza. Ani ini ya hinang ni Hisos ka aldaw nga tigpahimlay na mga Hudiyo.¹⁰Kamhan ya tao nga madazaw di imbaheg iza na mga Hudiyo nga nagalaong nga diri ko magdara ka banig mo kay nagalapas iko ka balaud na mga karaan nga Hudiyo kay singed ka magatarabaho iko koman nga aldaw nga tigpahimlay. ¹¹Minsambag ya tao nga ya mintambal kanao ani ya minsogo kanao ka pagdara ka banig.¹²Nangotana siran daw sin-o sa iza taoha nga minsogo kanmo? ¹³Kamhan ya tao nga madazaw di wara iza mahagdam kon sin-o iton kay minbelag dazon si Hisos pagpanaw kay matuodd di ya mga tao dini kaini nga dapita.¹⁴Pagkateedteed ka nakitan ni Hisos ya tao nga indazaw na-iza dalem ka dakolang lagkaw nga pangamozoanan ka Nagagihit. Kamhan minlaong si Hisos nga selengi, madazaw di gazed ya lawas mo. Bomiza di ko ka batasan nga maonga kadaw diri di ko matagan ka kalised dakola pon ka mahon-a. ¹⁵Kamhan minpanaw ya tao. Minpanan-og iza ka mga oloolo na mga Hudiyo nga si Hisos ya ngaran na tao nga nakatambal kanang-iza.¹⁶Kamhan minsogod di siran pagdaegdaeg kan Hisos kay indazaw na-iza ya tao ka aldaw nga tigpahimlay. ¹⁷Agon minsambag si Hisos kaniran nga ya kanaong Ama nga Nagagihit wara iza magheneng ka toong pagkalooy ka tao ka aldaw nga tigpahimlay. Kamhan hao ya ampadazon ka toong tarabaho. ¹⁸Pagpakabati na mga Hudiyo kaiza gosto gazed siran ampatay kan Hisos kay minlapas iza koni ka balaud mahitenged ka aldaw nga tigpahimlay. In-angay disab koni na-iza ya toong kaogaringen ka pagkalabaw ka kaogaringen na Nagagihit kay minlaong iza nga ya Nagagiht ani gazed ya toong Ama.¹⁹Kamhan minlaong si Hisos kaniran nga timan-an mazo gazed ini. Hao nga Anak na Nagagihit, waray mahimo na kanaong kaogaringen ka paghinang ka bisan ono. Nagahinang lamang hao ka nakita nao nga inhinang na kanaong Ama. Kay bisan ono ya inhinang na Ama ani isab ya inhinang na toong Maanak. ²⁰Naazak gazed ya Ama kanao nga toong Anak. Kamhan impakita hao na-iza ka tanan mga inhinang na-iza. Kamhan pahinangen pen hao na-iza ka labaw pen nga tarabaho kadaw mabereng kamo.²¹Ya Ama ani ya magabohi ka mga tao pagbalik garing ka lebeng. Kamhan hao nga toong Anak anhatag sab hao ka kinabohi dizan ka bisan sin-o ya pinili nao nga tao. ²²Ya Ama nga Nagagihit diri anhokom ka tao. Hinoa inhatag na-iza ka toong Anak ya maharong katenged ka paghokom ²³kadaw antahod ya maharong tao ka Anak na Nagagihit singed ka pagtahod niran ka Ama nga Nagagihit. Ya tao nga diri antahod ka Anak na Nagagihit singed ka diri isab iza antahod ka Ama nga minpakarimbaba kanang-iza.²⁴Timan-an mazo gazed ini. Ya tao nga manalinga ka kanaong sindo kamhan antoo kanang-iza nga minpakarimbaba kanao, intagan di gazed iton nga tao ka bag-ong kinabohi nga diri mawara. Diri iza silotan ka kamatazen ka toong mga sala hinoa may toong kinabohi nga diri mawara.²⁵Manalinga kamo! Mindateng di koman ya panahon nga ampanalinga ya mga patay nga tao ka saba na Anak na Nagagihit. Kamhan ya mga makabati mabohi gazed siran pagbalik garing ka mga lebeng.²⁶Garing ka kaogaringen na Ama nga Nagagihit ya kinabohi. Kamhan garing sab ka kaogaringen na toong Anak ya kinabohi kay ani ya hatag na Ama. ²⁷Intagan isab na-iza ya toong Anak ka katenged ka paghokom ka maharong mga tao kay ining Anak iza ya minhon-a ka bisan sin-o ya mahon-ang tao²⁸Diri kamo magkabereng kaini nga pagpanaba nao kamazo kay andateng ya tirmino nga makabati ka saba nao ya tanan mga naomos dalem ka mga lebeng. ²⁹Kamhan manlogwa sirang maharong. Ya mga minhinang ka madazaw ka bohi ka siran, palogwaen siran kadaw mahatagan ka bag-ong kinabohi nga diri mawara. Kamhan ya mga minhinang ka maonga palogwaen siran kadaw mahokman siran ka silot nga waray kinateban.³⁰Ya kanaong katenged ka paghokom ka mga tao garing iton ka inpanaba na Nagagihit kanao, diri kon garing ka kanaong kaogaringen. Kamhan matadeng ya kanaong paghokom kay wara hao magtoman ka kanaong naazakan basta kay mintoman hao ka naazakan na Ama nga minpakarimbaba kanao. ³¹Kon hao kay nagapamatood ka kanaong kaogaringen kadaw mahagdam kamo nga garing hao ka Nagagihit anhena-hena kamo nga diri kon matood ya kanaong mga panaba. ³²Ya Ama nga Nagagihit iza ya nagapamatood nga garing hao kanang-iza. Kamhan mahagdam hao nga matood gazed ya toong mga panaba bahin kanao.³³Izang dini kaini insogo mazo ya tao ngaro kan Howan nga Magbenzagay kay impapangotana mazo kon sin-o sa hao. Kamhan minsambag iza pagpamatood nga garing hao ka Nagagihit. ³⁴Bisan wara hao magkinahanglan ka pagpamatood na tao kon sin-o sa hao ipataremdem nao kamazo ya saba ni Howan kay kon antoo kamo kaini malibri gazed kamo ka silot ka kamazong mga sala. ³⁵Izang dini kaini si Howan singod iza ka lati na segà kay nagapakita iza kamazo ka dalan ngaro ka Magbabaza. Nagailaw ya toong pagmaymay ka kamazong hena-hena. Kamhan minsaza kamo ka kadali ka.³⁶Ya, may labaw pen nga nagapamatood nga ya Nagagihitani minpakarimbaba kanao. Kamhan ya mga hinang nga inpahinang kanao na kanaong Ama, ani gazed ya nagapamatood nga ya Ama ani ya minpakarimbaba kanao. ³⁷Kamhan iza nga minpakarimbaba kanao, iza gazed ya nagapamatood nga garing hao kanang-iza. Ya toong saba diri mahimo pagpanalinga. Kamhan ya toong lawas diri mahimo pagpakita. ³⁸Ya toong mga panaba wara gazed makadateng ka kamazong hona-hona kay wara kamo magtoo nga hao ya inpakarimbaba na-iza.³⁹Ya batasan mazo minsosi pagbasa ka mga daan pinasoyat na Nagagihit kay ya hona-hona mazo ya pagbasa mazo ani anhatag kamazo ka bag-ong kinabohi nga diri mawara. Ambaza kay bisan nagapamatood ya mga pinasoyat nga garing hao ka Nagagihit ⁴⁰wara kamo magpasakop kanao kadaw may bag-ong kinabohi mazo nga diri mawara.⁴¹Wara hao magpasaza ka mga tao kanao. ⁴²Mahagdam sab hao nga diri kon matood ya pagkaazakan mazo ka Nagagihit.⁴³Mindateng hao garing ka Ama nao. Inhatagan hao naiza ka dakola nga gahem kamhan wara kamo magtoo kanao. Kon may iba nga tao nga andateng dini kamazo kamhan nagalaong iza nga iza matood si Kristo, antoo baza kamo kaiton nga tao. ⁴⁴Naazakan kamo nga sazaen kamo na kamazong mga iba piro wara kamo gosto nga sazaen kamo na bogtong Nagagihit. Agon onhon sa mazo pagtoo kanao?⁴⁵Azaw kamo maghona-hona nga isombong nao kamo ka kanaong Ama. Si Moysis nga kamazong insarigan ani hinoa ya ansombong kamazo. ⁴⁶Kay kon matood ya pagtoo mazo kan Moysis, antoo isab kamo kanao kay iza ya minsoyat daan mahitenged kanao. ⁴⁷Wara kamo magtoo ka toong mga sinoyat agon onhon sa mazo pagtoo ka kanaong mga panaba?

¹Pagkakamhan minsakay di si Hisos ngandipi ka danaw nga Galiliya. Ya ibang ngaran na danaw ani Tibiriyas. ²Kamhan matuod ya tao nga nagasonod kan Hisos kay nakapaniid siran ka toong mga inhinang pagpakadazaw na-iza ka mga masakit. Mga timaan iton nga garing iza ka Nagagihit. ³Kamhan mintokad iza ngandaked ka pagkahiping na bobong. Minlo-to iza dizan daw ya toong mga sinarigan.⁴Na, iton nga panahon hapit di andateng ya pista na mga Hudiyo nga mangihaw siran ka mga nati na karniro. ⁵Kamhan pagpakakita ni Hisos ka mga matuod nga tao nga nangarini kanang-iza minlaong iza kan Pilipo nga daw hain kita makapalit ka makaun nga an-igo ka pagpakaun kaiton nga mga mataed nga tao? ⁶Na, ya pangotana ni Hisos porba lamang na-iza kan Pilipo kay mahagdam si Hisos ka toong kaogaringen nga makabagat iza ka toong nga ipakaen kaniran.⁷Minsambag si Pilipo nga bisan ya sohol ka enem nga ka bolan diri an-igo iton ka pagpamalit ka makaen ka tagsatagsa kaniran bisan geramay ka ya ipakaen ta kaniran. ⁸Kamhan ya isang sinarigan nga si Andris nga lomon ni Simon Pidro minlaong iza kan Hisos nga ⁹wani dakoza ya bata nga amaama nga may limang bolos nga pan daw dowang bolos nga isda. Piro diri gazed maigo ini kaini nga mataed nga mga tao.¹⁰Kamhan minlaong si Hisos kaniran nga palo-toon di mazo sirang tanan. Na, talagsa ka ya liwaan dizan agon nanlo-to di ya mga tao. Hapit maglimang ka libo ya amaama. Wara pen ya labet na mga babazi daw mga bata ka pagbilang niran. ¹¹Pagkakamhan ka minkawa si Hisos ka mga pan. Minpasalamat iza ka Nagagihit. Kamhan inbahinbahin na-iza iton ka mga tao nga nagalo-to dizan. Inbahinbahin sab na-iza ya mga isda. Bisan kon kapira magdogang, dakola pon gihapon nga isda daw pan. ¹²Pagkabosog di niran minlaong si Hisos ka toong mga sinarigan nga hipiden di mazo ya mga salin nga pan kadaw waray makanam.¹³Pagkakamhan niran paghipid nangapono pen ya napolo may dowang ka alat na salin garing ka lima kang bolos nga pan. ¹⁴Kamhan minlaong ya mga tao nga iton nga tao ani gazed ya intagadan nita nga matood nga propita nga garing ka Nagagihit. Kay nakakita siran kaiton nga timaan nga inpataud ni Hisos ya geramay nga pan daw isda. ¹⁵Na, nakasabot si Hisos ka hona-hona na mga tao mahitenged kanang-iza nga pamagkaw-en iza niran kontana kay hinangen nga hari niran. Agon minbogtong iza pagpanaw pagbalik daked ka bobong.¹⁶Ya, pagsalep di na sega minlogsong di ya toong mga sinarigan ka baybazen na danaw. ¹⁷Na, kahabzen di wara pen gihapon mag-apas si Hisos kaniran. Kamhan minleen siran ka baloto kay anhon-a siran pagsakay ngandipi ka baybazen ka longsod nga Kapirnaom. ¹⁸Ya, ka wara pen siran dateng dipi nandakola ya mga balud kay dizan ka danaw makeseg ya hangin.¹⁹Pagbegsay di niran ka hapit mag-enem nga ka kilomitro anipen niran makiti si Hisos nga nagapanaw dizan ka hopaw na sapa nga nagasinged baza ngarini kaniran. Nangahaldek gazed siran. ²⁰Kamhan minlaong si Hisos kaniran nga diri kamo magkahaldek kay hao ya nakitan mazo. ²¹Kamhan nagasaza di siran nga minpasakay kanang-iza. Kamhan mindonggo dazon siran dipi ka baybazen.²²Pagkaaldaw ya mga tao nga nangabilin dipi ka baybazen, nakapaniid siran nga isa ka ya baloto nga nabilin kahabi. Kamhan nahagdam siran nga wara magsakay si Hisos ka baloto iba ka toong mga sinarigan pagpanaw niran kahabi. ²³Kamhan may mga iba pen nga baloto nga mindateng di garing ka longsod nga Tibiriyas arani ka dapit nga impasalamatan ni Hisos ka pagpakaen ka mga tao.²⁴Pagpakakita na mga tao nga wara dizan si Hisos daw ya toong mga sinarigan nanakay siran ka mga baloto dipi ka Kapirnaom kay anpangita siran kan Hisos. ²⁵Pagpakakita niran kanang-iza dipi ka dagat nangotana siran nga Magtutuldo, daw kagan-o ko dateng dini?²⁶Minsambag si Hisos nga timanan mazo gazed ini. Wara kamo magpangita kanao kay nakakita kamo ka inhinang nao kahabi basta kay nangita kamo kanao kay nakakaen kamo ka pan ka pagkabosog. ²⁷Abay kamo paghena-hena mahitenged ka makaen nga madali ampan-es. Maghona-hona kamo hinoa ka makaen nga diri ampan-es kay makahatag iton kamazo ka bag-ong kinabohi nga diri mawara. Hao ya makahatag kamazo kaini nga makaen nga diri ampan-es kay ya Nagagihit nga kanaong Ama ani ya minhatag kanao ka gahem.²⁸Kamhan nangotana siran nga ono sa ya kanaming hinangen dazaw makatoman kami ka naazakan na Nagagihit? ²⁹Minsambag si Hisos nga ya naazakan na Nagagihit ani ya pagtoo mazo kanao nga toong inpakarimbaba.³⁰Minsambag siran nga daw ono pen ya kaberenganan nga ipakita mo kanami kadaw antoo kami kanmo? Daw ono pon ya kanmong mahinang? ³¹Kay ya mga karaan nami nakakaen siran ka makaen nga inngaranan ka mana ka doro pen siran ka dakolang nag-as kay dizan ka daan pinasoyat na Nagagihit nagalaong nga intagan siran na-iza ka makaen nga garing daked ka tahaw.³²Minsambag si Hisos nga timan-an mazo gazed ini. Diri kon si Moysis nga karaang propita ya minhatag kaniran ka makaen nga garing daked ka tahaw basta ya kanaong Ama. Kamhan iza isab ya magahatag kamazo ka matood nga makaen garing ka tahaw. ³³Kay ya makaen nga inhatag na Nagagihit ani ya minkarimbaba garing daked ka tahaw. Kamhan makahatag iton ka tanan mga tao ka bag-ong kinabohi nga diri mawara. ³⁴Minsambag siran nga Nong, tagan mo kami koman kaini nga makaen nga diri ampan-es kawanihen ka.³⁵Minsambag si Hisos nga ya makaen nga makahatag ka bag-ong kinabohi nga diri mawara ani hao. Kamhan ya tao nga ansakop kanao diri di iza magabengtasen. Ya tao nga antoo kanao diri iza ohawen kawanihen ka. ³⁶Izang dini kaini inlong-an nao kamo nga bisan minkita kamo kanao, wara kamo magtoo kanao. ³⁷Ya maharong mga tao nga insarig kanao na kanaong Ama siran ya antoo kanao. Kamhan siran nga mga mintoo di kanao diri gazed nao pagabogawen.³⁸Kay minkarimbaba hao garing ka tahaw kadaw antoman hao ka pagbeet na Nagagihit nga minpakarimbaba kanao. Diri kon kanaong kaogaringeng pagbeet. ³⁹Kamhan ya naazakan na Nagagihit ani ya paghatag ka bag-ong kinabohi nga diri mawara dizan ka mga tao nga insarig na-iza kanao. Kamhan panbohien nao sirang maharong pagbalik garing ka mga lebeng kay-an ka kataposan nga aldaw. ⁴⁰Kay naazakan na kanaong Ama nga ya maharong mga minkita ka toong Anak daw mintoo kanang-iza tagan gazed siran ka bag-ong kinabohi nga diri mawara. Kamhan panbohien nao siran pagbalik garing ka mga lebeng kay-an ka kataposan nga aldaw.⁴¹Pagkakamhan ka nagamahay ya mga oloolo na mga Hudiyo kay minlaong si Hisos nga iza ya makaen nga mingaring daked ka tahaw. ⁴²Kamhan namaglaonglaong siran nga ini nga tao nga si Hisos anak ka lamang iza ni Hosi. Nakakilala kita ka toong ama daw ina. Kamhan ono sa iza minlaong nga mingaring iza daked ka tahaw?⁴³Minsambag si Hisos kaniran nga diri kamo magmahay. ⁴⁴Kay bisan sin-o nga taohana diri iza ansakop kanao kon diri antandeg ka toong hinawa ya Nagagihit nga minpakarimbaba kanao. Kamhan ya tao nga ansakop kanao bohien nao iza pagbalik garing ka lebeng kay-an ka kataposan nga aldaw. ⁴⁵Kay kawandini pen minsoyat ya mga propita na Nagagihit nagalaong nga ya maharong mga tao pagasindoon siran na Nagagihit. Kamhan ya mga nagapanalinga ka kanaong Ama daw magatoon ka toong pagmaymay siran ya ansakop kanao.⁴⁶Waray makakita ka Ama nga Nagagihit sokad. Hao kay makakita kanang-iza kay garing hao kanang-iza. ⁴⁷Sabten mazo ini nga ya tao nga antoo kanao tagan matood iza ka bagong kinabohi nga diri mawara.⁴⁸Na, ya makaen nga makahatag ka bag-ong kinabohi nga diri mawara ani hao. ⁴⁹Ya kamazong mga karaan nangapatay siran doro ka dakolang nag-as bisan minkaen siran ka makaen nga inngaranan ka mana nga nangatanak garing daked ka tahaw.⁵⁰Kamhan ya matood nga makaun nga impanan-og nao nga mingaring ka tahaw, ya tao nga ankaun kaiton mabohi iza kawanihen ka. ⁵¹Kay hao ya matood nga makaen nga mingaring daked ka tahaw. Kamhan ya tao nga ankaen kanao mabohi iza kawanihen ka. Kamhan ya matood nga makaen nga ihatag nao ani ya kanaong lawas. Ihatag nao iton para ka maharrong mga tao kadaw may bag-ong kinabohi niran. Ani ini ya sambag ni Hisos ka mga Hudiyo.⁵²Kamhan nagalalis ya mga oloolo na mga Hudiyo ka isa daw isa nagalaong nga onhon sa naiton nga tao paghatag kanta ka toong lawas nga ipakaen sa? ⁵³Minsambag si Hisos nga sabten mazo ini nga kon diri kamo ankaen ka kanaong onod, kon diri isab kamo an-inem ka kanaong dogo waray kinabohi mazo nga matood nga garing ka Nagagihit.⁵⁴Ya tao nga ankaen ka kanaong onod daw an-inem ka kanaong dogo may toong bagong kinabohi nga diri mawara. Kamhan bohien ka sab nao iza pagbalik garing ka lebeng kay-an ka kataposan nga aldaw. ⁵⁵Kay ya onod nao ani ya matood nga makaen. Ya dogo nao ani ya matood nga imnenen. ⁵⁶Ya tao nga ankaen ka onod nao daw an-inem ka dogo nao naisa ka kami.⁵⁷Ya Nagagihit nga diri mapatay minpakarimbaba iza kanao. Kamhan garing kanang-iza ya kanaong pagkabohi. Kamhan ya tao nga ankaen kanao mabohi isab iza kay garing kanao ya toong pagkabohi. ⁵⁸Ya makaen nga inlaong nao kamazo mingaring iton ka tahaw. Diri kon singed ka makaen inngaranan ka mana nga inkaen na kamazong karaan kay bisan minkaen siran ka-iza nangapatay siran gihapon. Kamhan ya tao nga ankaen ka makaen nga inhatag nao may toong bag-ong kinabohi nga diri mawara. ⁵⁹Ani ini ya pagpanaba ni Hisos pagsindo naiza dizan ka simbahan na mga Hudiyo doro ka lobohan nga Kapirnaom.⁶⁰Pagpakabati ka na mga sakop ni Hisos ka toong pagmaymay matuod siran namaglaonglaong nga malised iton nga sindo. Daw sin-o ya makaanget ka pagpanalinga? ⁶¹Kamhan bisan waray maglaong kan Hisos mahagdam iza ka kanirang pagmahay. Kamhan nangotana iza nga daw nazehet kamo ka kanaong pagmaymay?⁶²Kay-an ka pagkita mazo ka pagkandaked nao ka daan hela nao andakola pen ya pagkazehet mazo. ⁶³Ya Madazaw nga Ispirito na Nagagihit iza kay makahatag ka tao ka matood nga kinabohi, diri kon garing iton ka hinang na tao. Ya kanaong inpanaba kamazo garing iton ka Madazaw nga Lambong na Nagagihit. Kamhan makahatag iton kamazo ka bag-ong kinabohi.⁶⁴Piro dini kamazo may mga diri antoo kanao. Ani ini ya inlaong ni Hisos kay sokad ka pagsakop niran kanangiza nahagdam iza daan kon sin-o ya diri antoo kanang-iza. Nahagdam sab iza daan kon sin-o iton dizan nga an-edlaw kanangiza. ⁶⁵Indogangan na-iza paglaong kaniran nga ipanan-og nao kamazo nga waray makasakop kanao kon diri ipatandeg na kanaong Ama ya buot na tao.⁶⁶Pagpanaba ni Hisos singed kaiton matuod ya toong sakop nga minbelag di kanang-iza. ⁶⁷Kamhan nangotana si Hisos ka napolo may dowa nga mga sinarigan nga daw anbelag sab kamo kanao? ⁶⁸Minsambag si Simon Pidro nga Magbabaza, waray lain insakopan nami. Iko ka say tag-iza ka mga panaba nga makahatag ka bag-ong kinabohi nga diri mawara. ⁶⁹Mintoo kami kanmo. Nahagdam sab kami nga iko ya isa nga waray sala nga garing ka Nagagihit.⁷⁰Minsambag si Hisos nga kamo ya kanaong impili nga napolo may dowa nga tao kamhan ya isa kan Satanas iza. ⁷¹Ani ini ya inlaong ni Hisos kay dizan ka toong mga napolo may dowa nga sinarigan si Hodas nga maanak ni Simon Iskariyoti ani iza ya an-edlaw kan Hisos.

¹Pagkakamhan dizan lamang ka lopa nga Galiliya minsoroy si Hisos pagwali na-iza ka mga tao. Diri di iza ankaro ka lopa nga Huda kay patazen sa iza kontana na mga oloolo na mga Hudiyo. ²Na, iton nga panahon hapit di andateng ya isang pista na mgaHudiyo .Pagpista niran inhinang niran ya mga tal-ob kay ani ya batasan niran ka pagpasalamat ka Nagagihit ka kanirang anihen. Agon inngaranan niran ka Pista ka Mga Tal-ob.³Kamhan ya mga lomon ni Hisos minlaong siran kanangiza nga pomanaw ko dini ka Galiliya. Komaro ko naa ngaro ka lopa nga Huda kadaw ya mga taga Huda nga mintoo kanmo makakita sab siran ka mga hinang mo. ⁴Kay kon matood nga timaan iton nga garing iko ka Nagagihit ipakita ya kanmong kaogaringen doro ka lopa nga Huda kay kon ipabantog na tao ya toong kaogaringeng ngaran diri iza antarabaho dini ka waray makakita.⁵Ani ini ya kanirang saba kan Hisos kay bisan siran ya toong mga lomon wara pen siran magtoo nga garing iza ka Diyos. ⁶Kamhan minsambag si Hisos nga wara pen dateng ya kanaong tirmino ka pagpakita ka kanaong kaogaringen ka mga tao. Kamo ka lamang ya ankaro ka pista koman kay waray tirmino mazo ka pagtoman ka naazakan na Nagagihit singed kanao. ⁷Diri magakontara ya mga tao kamazo. Hao ya pagakontarahan niran kay minbaheg hao kaniran kay maonga ya batasan niran.⁸Kamo ka lamang ya ankaro ka pista. Diri hao an-iba kamazo kay wara pen dateng ya kanaong tirmino ka pagpakita ka kanaong kaogaringen dizan ka mga tao. ⁹Pagkakamhan na-iza paglaong nabilin iza dizan ka lopa nga Galiliya.¹⁰Na, pagpanaw na toong mga lomon ngaro ka pista anipen iza ankaro nga isa ka iza. ¹¹Kamhan dizan ka pista may mga oloolo na mga Hudiyo. Nagapakigkita siran kan Hisos daw hain sa iza?¹²Namaglaonglaong sab ya mga tao paghilom nga beetan si Hisos. Kamhan minsambag ya mga isang tao nga diri gazed kay nagapanlimbong iza ka mga tao. ¹³Diri ambaskeg ya mga tao ka kanirang saba kay nahaldek siran ka kanirang mga oloolo nga Hudiyo.¹⁴Na, ka hapit di matenga nga ka pista minseled si Hisos ka dakolang lagkaw nga pangamozoanan ka Nagagihit kay ansogod iza ka pagsindo ka mga tao dizan. ¹⁵Kamhan nabereng ya mga Hudiyo nagalaong nga onhon sa baza iza nakalabaw pagsabot ka tanan? Wara iza mag-iskwila dini kanami sokad. ¹⁶Minsambag si Hisos nga ya pagmaymay nao diri kon garing kanao kay garing gazed ka Nagagihit nga minpakarimbaba kanao.¹⁷Kamhan kon anak ya tao ka pagtoman ka ma azakan na Nagagihit mahagdam sab iza nga garing ka Nagagihit ya pagsindo nao, diri kon garing ka kanaong hona-hona. ¹⁸Kon garing ka kaogaringen na tao ya pagmaymay naazakan na-iza nga sazaen iza na mga tao. Kon naangzan na tao ka pagsaza ka Nagagihit nga minsarig kanang-iza ka pagmaymay, matadeng gazed ini nga tao diri kon bakaken.¹⁹Kawandini pen minhatag si Moysis kamazo ka balaud na Nagagihit. Kamhan bisan kamo ya diri antoman kaiton nga balaud, naangzan baza kamo ampatay kanao nga minlapas koni kaiton nga balaud. ²⁰Kamhan minsambag ya mga tao kan Hisos nga inboang ko na maonga! Daw sin-o say ampatay kanmo kontana?²¹Minsambag si Hisos nga izang dini kaini ya hinang nao nga minpakawara ka kasakit na nabedlay nabereng kamo kay minhinang hao kaiton ka aldaw nga tigpahimlay. ²²Na, bisan kon aldaw nga tigpahimlay anhinang kamo ka batasan mazo ka amaamahay nga impatori kay antoman kamo koni ka balaud nga inhatag ni Moysis daw ya mga karaang Hudiyo.²³Kamhan kay ono say pagakazethan mazo kanao pagpakadazaw nao ka lawas na nabedlay ka aldaw nga tigpahimlay? ²⁴Magheneng kamo pagdaetdaet kanao ka pagpanaba mazo mahitenged ka hinang nao ka nabedlay. Basta dazawen mazo ya kamazong hona-hona.²⁵Kamhan namaglaong ya mga isang taga Hirosalem nga iton nga tao ani kombeet ya patazenen na kantang mga oloolo. ²⁶Bisan mabaskeg ya toong pagpanaba wara iza bahegi na kantang mga oloolo. Basi hinoa mahagdam di siran nga ani iza gazed si Kristo nga hari nga pinili na Nagagihit. ²⁷Mahagdam kita daan kon taga diin iton nga tao. Basta kay kon domateng si Kristo waray mahagdam kon hain iza garing.²⁸Pagpakabati ni Hisos kaiton mindakola iza ka toong saba pagmaymay na-iza dizan ka lagkaw nga pangamozoanan ka Nagagihit nagalaong nga daw wara kamo mahagdam kon sin-o sa hao? Daw wara baza kamo mahagdam kon hain garing hao? Wara gazed hao magbeet ka kanaong pagkarini. Ya minpakarimbaba kanao matadeng gazed iza. Kamhan wara kamo mahagdam kon sin-o iza. ²⁹Mahagdam hao daan kon sin-o sa iza kay garing sa hao kanang-iza kay iza ya minpakarimbaba kanao.³⁰Pagkakamhan ni Hisos pagpanaba ka-iza dakpen kontana iza na mga oloolo na mga Hudiyo kay ipapriso piro wara mahimo kay wara pen dateng ya tirmino nga dakpen iza. ³¹Dizan disab may mga mamistahay nga mintoo di kan Hisos nagalaong nga kon andateng si Kristo nga kantang intagadan daw labaw pen ya toong hinang ka mga inhinang naiton nga tao? ³²Na, ya mga Parasiyo nakabati siran ka mga panaba na mga tao mahitenged kan Hisos. Kamhan siran daw ya mga oloolo na mga pari minsogo siran ka mga soldawo ka pagdakep kan Hisos.³³Mahagdam si Hisos ka kanirang hinang agon minlaong iza nga diri pen hao madakep kay an-iba pen hao kamazo ka diri kon madogay. Kamhan an-oli hao daked kanang-iza nga minpakarimbaba kanao. ³⁴Kamhan ampangita kamo kanao piro diri hao kakitan. Diri sab kamo makasonod kanao doro ka kanaong karohan.³⁵Namaglaong ya mga oloolo nga Hudiyo nga daw ankar-in sa baza iza pagsinged nga diri sa kita makasonod kanang-iza? Daw ankaro iza ka mga lain dapit nga inlaaglaagan na angay ta dazaw antoldo pen iza ka mga diri kon Hudiyo doro? ³⁶Nagahena-hena siran nga kay ono sa iza maglaong nga ampangita kami kanang-iza kamhan diri iza makita kay diri kami makasonod ngaro ka karohan na-iza? Ani ini ya kanirang hona-hona kay wara siran mahagdam kon ono ya kahologan na toong inpanaba kaniran.³⁷Pagdateng ka pagkaliwas na pista mintindeg si Hisos dizan ka lagkaw na Nagagihit. Kamhan minbaskeg iza ka toong saba pagsindo na-iza kaniran. Kamhan minpamolinged iza nagalaong nga ya in-ohaw nga tao kinahanglan komarini iza dini kanao dazaw an-inem iza ka sapa nga ihatag nao kanangiza. ³⁸Dini ka tao nga mintoo kanao ihatag nao ya bag-ong kinabohi nga diri mawara. Kamhan iton nga kinabohi ani ya singed ka mga sapa nga diri anhebas. Pamolinged ini nga impasoyat daan na Nagagihit.³⁹Ani ini ya inmaymay ni Hisos mahitenged ka Madazaw nga Lambong nga garing ka Nga Pagpanaba ni Hisos kaniran wara pen dateng ya Lambong dini ka mga mintoo kanang-iza. Kay kinahanglan patazen pen si Hisos. Kamhan mabohi iza pagbalik garing ka lebeng anipen domateng ya Madazaw nga Lambong nga garing ka Nagagihit.⁴⁰Pagpakabati ka na mga tao ka mga panaba ni Hisos minlaong ya mga isa nga iton nga tao ani gazed ya propita nga kanaming intagadan. ⁴¹Minlaong ya mga iba nga iton nga tao ani gazed si Kristo nga hari nga pinili na Nagagihit. Dizan disab may mga nagalalis nga nagalaong nga si Kristo diri kon garing iza ka Galiliya ⁴²kay impasoyat na Nagagihit daan nagalaong nga si Kristo kaliwatan iza ni Dabid. Kamhan matao iza doro ka lobohan nga Bitlihim nga nataohan ni Dabid.⁴³Kamhan nagalalislalis ya isa daw isa kon iza si Kristo kon diri sa. ⁴⁴Kamhan may mga isa nga mahaong andakep kanang-iza piro wara iza madakep.⁴⁵Pagkakamhan minbalik ya mga soldawo ka mga oloolo na mga pari daw ya mga Parasiyo. Pagdateng niran nangotana ya mga oloolo nga kay ono sa wara mazo dadha iza ngarini? ⁴⁶Minsambag siran nga wara sa sokad ya tao nga makapanaba singed kaini nga tao.⁴⁷Minsambag ya mga Parasiyo nga inlimbongan sab baza kamo na-iza. ⁴⁸Dini kanami nga kamazong mga oloolo daw ya mga Parasiyo waray antoo kan Hisos. ⁴⁹Kamhan ya mga tao dini nga inlimbongan naiza wara siran mahagdam ka balaud ni Moysis singed kanami agon silotan gazed siran.⁵⁰Kamhan dini ka mga oloolo may isa nga minbisita kan Hisos izang dini kaini si Nikodimo ya ngaran. Iza ya minlaong kaniran nga ⁵¹ya kantang balaud diri mahimo ya paghokom ka tao kon wara pen ya logar na-iza ka pagsambag ka mga ampangotana kanang-iza. ⁵²Minsambag siran nga kay ono sa ko antabang kanang-iza? Daw taga Galiliya iko singed kanang-iza? Magtoon ko ka kasoyatan na Nagagihit kadaw mahagdam ko nga bisan sin-o ya propita na Nagagihit wara iza garing ka Galiliya.⁵³Na, pagkakamhan ka-iza nangoli di ya tagsa tagsa kaniran.

¹Kamhan minbalik si Hisos ka bobong nga Olibo ya ngaran. ²Pagkamasiselem ka minsazo iza pagbalik ka dakolang lagkaw nga pangamozoanan ka Nagagihit. Kamhan mataud ya mga tao nga nagatipon dizan. Kamhan minlo-to iza kay ansindo pen iza kaniran. ³Ya, ka nagasindo pen iza kaniran minkarini ya mga magtutuldo ka tinoohan na mga Hudiyo daw ya mga Parasiyo. Kay in-ated niran ya isang babazi nga nasakpan nga nanapaw. Kamhan patindegen iza dizan ka tenged na mga tao.⁴Kamhan minlaong siran kan Hisos nga Magtutuldo, ini nga babazi nasakpan nga nanapaw. ⁵Kamhan ya balaud nga inhatag kanta ni Moysis ani nagasogo nga ya minhinang ka singed kaiton kinahanglan pamagbatohan kutub ka pagpatay. Na, ono ya kanmong ikapanaba? ⁶Ani ini ya kanirang pangotana kay naangzan siran anporba kan Hisos kadaw may ikasombong niran. Kamhan mindongò si Hisos ka pagsoyat ka lopa nga ingamit ya toong toldo.⁷Sigi niran baliken ya pagpangotana. Kamhan mintindeg si Hisos daw maglaong kaniran nga dini kamazo bisan sin-o ya wara makasala iza gazed ya anhon-a pagpook kanang-iza. ⁸Kamhan mindongò iza pagbalik ka pagsoyat ka lopa.⁹Pagpakabati ka niran ka saba ni Hisos nagatagsatagsa siran pagpanaw dizan. Ya mga malaas nanhon-a sonod ya mga batan-en. Wara ya minbato ka babazi kay nasakpan ya bout niran ka saba ni Hisos. Kamhan si Hisos ya nabilin daw ya babazi nga nagatindeg dizan. ¹⁰Paghangad naiza ka babazi minlaong iza nga Day, daw hain sa siran? Daw waray minpabilin ka pagsilot kanmo ka maomos? ¹¹Minsambag ya babazi nga wara, Sinyor. Minsambag si Hisos nga diri hao isab ansilot kanmo. Pomanaw di ko. Bomiza di ko ka batasan nga maonga. Ani ini ya impanaba na-iza ka babazi.¹²Kamhan dizan ka mga indonganan pon ni Hisos pagmaymay kaniran mahitenged ka toong kaogaringen nga nagalaong nga hao ya tag-iza ka kapawa. Kamhan makawara hao ka kadeglem dalem ka hona-hona na maharong mga tao. Kamhan ya tao nga antoo kanao singed ka diri kon madeglem ya toong panawan kay ilawan di iza. Kamhan iton nga kapawa nga makawara ka kadeglem ani isab ya makahatag kanang-iza ka kinabohi nga diri mawara. ¹³Minsambag ya mga Parasiyo nga iko ka lamang ya minpananog mahitenged ka kanmong kaogaringen agon diri kon gazed.¹⁴Minsambag si Hisos nga bisan hao ya minpanan-og mahitenged ka kanaong kaogaringen gazed ya kanaong panaba kay mahagdam hao kon hain hao garing daw hain ya kanaong panawanan. Basta kamo wara kamo mahagdam kon hain hao garing daw hain ya kanaong panawanan. ¹⁵Garing ka kamazong hona-hona ya paghokom mazo kanao. Diri hao anhaod ka kamazong batasan ka paghokom ¹⁶kay matadeng ya paghokom nao ka tao kay diri kon isa ka hao ya anhokom basta hao daw iza nga minpakarimbaba kanao.¹⁷May balaud mazo nga nagalaong nga kon mag-anika ya panan-og na dowang ka saksi matood gazed ya kanirang panan-og. ¹⁸Na, hao ya nagapanan-og kon sin-o sa hao. Kamhan nagapamatood ya Ama nga Nagagihit nga hao ya inpakarimbaba na-iza.¹⁹Minsambag ya mga Parasiyo pagpangotana nga daw hain ya Ama mo maghela? Minsambag si Hisos nga wara kamo makasabot kon sin-o sa hao daw sin-o ya kanaong Ama. Kon ankilala kamo kanao makakilala sab kamo ka Ama nao. ²⁰Ani ini ya pagpanaba ni Hisos ka dizan pen iza ka dakolang lagkaw nga pangamozoanan ka Nagagihit. Pagpanaba na-iza kaiton dizan iza ka betanganan ka talipid nga ihaladay na mga tao. Labzanan iton na mga mataud nga tao. Kamhan waray andakep kanang-iza kay wara pen dateng ya tirmino nga dakpen iza.²¹Ya, indogangan pen ni Hisos pagmaymay kaniran nagalaong nga may tirmino nao nga ampanaw hao dini kamazo. Kamhan ampangita gazed kamo kanao piro maomos kamo kay may mga sala pen mazo kay diri kamo antoo kanao. Diri mahimo ya pagkaro mazo ka kanaong datnganan. ²²Namaglaonglaong dazon ya mga oloolo pagsora nga iza gazed ya ampatay ka toong kaogaringeng lawas agon minlaong iza nga diri sa kita makakaro ka toong datnganan.²³Indogangan pen ni Hisos pagpanaba kaniran nagalaong nga taga lopa gazed kamo basta hao taga daked sa hao. Kanang bakangan ya maharonghona-hona mazo piro ya kanaong hena-hena diri kon kanang bakangan. ²⁴Minlaong hao kamazo nga maomos kamo ka wara mapasaylo ya mga sazep mazo. Antoman gazed ini kon diri kamo antoo nga hao si Kristo nga hari nga pinili na Nagagihit.²⁵Minsambag siran nga daw sin-o sa iko? Minsambag si Hisos nga hao ya impanan-og nao kamazo sokad ka pagdateng nao dini kamazo. ²⁶Kamhan mataud pen kontana ya baheg nao kamazo paghokom ka kamazong batasan. Basta koman dini ka mga tao inpanan-og nao ya nabatian nao garing ka minpakarimbaba kanao kay matadeng gazed iza. ²⁷Kamhan wara siran makasabot nga ya Nagagihit nga toong Ama ani ya impanan-og ni Hisos kaniran.²⁸Agon indogangan pen ni Hisos paglaong kaniran nga kay-an kon ilansang di hao mazo ka kros anipen kamo mahagdam nga hao si Kristo nga hari nga pinili na Nagagihit. Kamhan mahagdam isab kamo nga diri kon hao ya ambeet ka kanaong mga inhinang basta ya mga panaba nao garing iton ka Ama nga minmaymay kanao. ²⁹Kamhan iza nga minpakarimbaba kanao onay nagaibaiba kanao. Diri iza ambelag kanao kay onay hao nagahinang ka mga makasaza kanang-iza. ³⁰Na, pagkakamhan kaiza mataud ya mintoo ka toong mga panaba.³¹Kamhan dizan ka mga Hudiyo nga mintoo kanang-iza minlaong si Hisos nga kon tomanen mazo ya kanaong pagmaymay, kamo matood ya kanaong mga sakop. ³²Kamhan mahagdaman mazo nga hao nga si Kristo ani ya matood nga Nagagihit. Kamhan anlibri hao kamazo ka pagkaoripen mazo. ³³Minsambag siran nga mga kaliwatan kami ni Abraham nga toboan na mga Hudiyo. Sokad kawandini pen dogay di waray tag-iza kanami. Kay ono sa ko nagalaong nga iko ya anlibri kanami ka pagkaoripen nami kon ansakop kami kanmo?³⁴Minsambag si Hisos nga timan-an mazo gazed ini nga kon maonga ya batasan na tao singed ka in-oripen iza na maongang batasan kamhan diri iza makabohi ka toong kaogaringen dizan ka gapos. ³⁵Pamolinged ini nga ya oripen nga tao wara gazed ya katenged na-iza dini ka lagkaw na toong amo basta kay ya anak na amo ani ya may katenged kay iza ya kaliwat. ³⁶Kamhan hao nga Anak na Nagagihit kon hao ya anlibri kamazo garing ka pagkaoripen mazo ka maongang batasan matood gazed ya pagkalibri mazo.³⁷Bisan kamo gazed ya mga kaliwatan ni Abraham naazak baza kamo ampatay kanao kay diri kamo ansogot ka kanaong sindo. ³⁸Impanaba nao ya nakitan nao ka daked pen hao ka Ama nao. Kamhan ya nabatian mazo dizan ka ama mazo ani ya inhinang mazo.³⁹Minsambag ya mga Hudiyo nga si Abraham ani ya toboan nami nga mga Hudiyo. Minsambag si Hisos nga kon kamo ya mga kaliwatan ni Abraham ya batasan mazo daw si Abraham mag-anika. ⁴⁰Ambaza kay gosto kamo ampatay kanao kay nagamayamay hao kamazo ka nabatian nao garing ka Nagagihit. Wara si Abraham magbatasan singed kamazo. ⁴¹Inhaod mazo ya batasan na ama mazo. Minsambag siran pag-iseg nga kami nga mga Hudiyo isa ka gazed ya ama nami ani iza ya matood nga Nagagihit. Wara kami magbiza kaini nga tinoohan nami sokad.⁴²Minsambag si Hisos nga kon ani iza ya Nagagihit mazo makaangay kamo kanao kay garing hao kanang-iza. Kamhan diri kon hao ya nagabeet ka pagpakarimbaba kanao kay ya Nagagihit iza gazed ya nagabeet. ⁴³Wara kamo makasabot ka kanaong pagmaymay kay diri kamo ansogot pagpanalinga. ⁴⁴Mga kaliwatan kamo ni Satanas. Kamhan naazak kamo antoman ka toong naazakan nga patazen hao. Talamono iza sokad ka kawandini pen dogay di. Awazen na-iza hao nga matood nga Nagagihit kay wara iza mag-angay ka inmaymay na Nagagihit. Kamhan wara iza magpanaba ka matood kay bakaken iza kay iza ya ama ka maharong mga bakak.⁴⁵Kamhan hao ya minpanaba kamazo ka matood nga mga salaan kamo. Kamhan diri kamo antoo kanao. ⁴⁶Dini kamazo waray makapahamtang kanao ka sala. Matood ya pagpanaba nao kamazo kamhan kay ono sa nga diri kamo antoo kanao? ⁴⁷Kon mga anak kamo na Nagagihit ampanalinga kamo ka mga panaba na Nagagihit. Piro diri kon mga anak kamo na Nagagihitagon diri kamo ampanalinga ka toong mga panaba.⁴⁸Kamhan nazehet ya mga oloolo na mga Hudiyo nagalaong nga matood gazed ya paglaong nami nga taga Samariya iko nga kaaway na mga Hudiyo. Inboang sab ko na maonga! ⁴⁹Kamhan mahetek ya pagsambag ni Hisos nagalaong nga wara gazed hao boanga na maonga. Intahod nao ya kanaong Ama kamhan insora mazo hao.⁵⁰Dizan ka mga tao diri hao ampasaza ka kanaong kaogaringen. May isa nga ampasaza ka mga tao kanao. Kamhan matadeng ya toong panaba mahitenged kanao. ⁵¹Timan-an mazo gazed ini nga ya tao nga mintoman ka kanaong diri iza pahamtangan ka kamatazen ka toong mga sala.⁵²Minsambag ya mga Hudiyo nga nahagdam kami nga inboang ko na maonga. Patay di si Abraham daw ya mga karaang propita na Nagagihit. Onhon sa mo paglaong nga kon tomanen na tao ya sindo mo diri iza maomos? ⁵³Daw labaw iko kan Abraham nga kanaming apo? Iza daw ya mga karaang propita naomos di sirang maharong. Daw sin-o sa ko baza?⁵⁴Minsambag si Hisos nga kon ampasaza hao ka kanaong kaogaringen waray kaposlanan kaiton. Ya Ama nao iza kay magapasaza kanao. Iza ya inlaong mazo nga kamazong Nagagihit. ⁵⁵Ambaza kay wara kamo magkilala kanang-iza. Hao ya mahagdam kanangiza. Kon nagalaong hao nga wara sa hao mahagdam bakaken hao singed kamazo. Mahagdam gazed hao kanang-iza. Tomanen sab nao ya toong pagmaymay. ⁵⁶Kawandini pen ka bohi ka si Abraham nga apo mazo nagapahisaza iza kay in-alam naiza ya tirmino ka pagdateng nao ngarimbaba ka bakangan. Kamhan pagpakakita naiza ka kanaong pagdateng dakola gazed ya toong kasaza.⁵⁷Minsambag ya mga Hudiyo nga wara pon ko magdateng ka kalim-an nga ka toig agon onhon sa mo pagkita kan Abraham nga karaan? ⁵⁸Minsambag si Hisos nga timan-an mazo gazed ini nga ka wara pen matao si Abraham dizan hao daan. ⁵⁹Pagpakabati niran kaiton namorot siran ka mga bato kay pookon iza kontana piro impasalimed iza na Nagagihit dizan ka mga tao. Kamhan minpanaw iza dizan ka dakolang lagkaw nga pangamozoanan ka Nagagihit.

¹Lomaza ka pomanaw si Hisos may nakitan na-iza nga tao nga dara ka pagkatao ya pagkabota. ²Kamhan nangotana ya mga sakop ni Hisos nga Magtutuldo, kay ono sa nga inkatao ya pagkabota naiton nga tao? Daw sin-o ya nakasala iza kon ya toong ginikanan?³Minsambag si Hisos nga ya toong pagkabota diri kon garing ka toong sala. Diri kon garing ka sala na toong ginikanan basta minbeet ya Nagagihit kadaw impakita ya hinang nga madazaw gazed. ⁴Ka aldaw pon magatarabaho pen ya tao. Kon kahabzen di diri mahimo. Pamolinged ini mahitenged kanao kay ka dini pen hao ka kalibotan kinahanglan antoman hao ka tarabaho nga inhatag na Nagagihit nga minpakarimbaba kanao kay diri kita makatarabaho kon naomos di kita. ⁵Ka dini pen hao ka kalibotan singed ka maaldaw pon kay hao ya makapawa ka kadeglem dini ka bakangan.⁶Ka nagapanaba pen si Hisos min-eleb iza dizan ka lopa kay intigmel na-iza ya inelban nga lopa. Kamhan indapi ka mata na bota. ⁷Kamhan minsogo iza nga nagalaong nga komaro ko ka linaw inngaranan ka Siloi. Maghiram-os ko doro. Na, ya kahologan na ngaran nga Siloi ani Darahanan. Na, mintoman ya bota ka sogo ni Hisos. Paghiram-os na-iza nakakita matood ya toong mata kamhan minbalik iza⁸Kamhan ya mga songbalay daw ya mga tao nga nakakita ka bota nga mangazoay ka wara pen iza madazaw nangotana siran nga daw iton ya tao nga nagalo-to ka pagpangazo izang dini kaini? ⁹Kamhan minlaong ya isa nga ani gazed iton. Minlaong ya iba nga diri kay masingedsinged lamang ya kanirang bayho. Kamhan ya tao nga madazaw di minlaong iza nga hao gazed.¹⁰Minsambag siran nga naono di sa nga nakakita di sa ya mata mo? ¹¹Minsambag iza nga ya tao nga inngaranan kan Hisos min-eleb iza ka lopa. Kamhan insampenan naiza ya kanaong mata ka imbasà nga lopa. Minsogo sab iza kanao nga komaro ko ka sapa nga Siloi. Maghiram-os ko doro. Kamhan mintoman hao ka toong sogo. Paghiram-os nao dizan nakakita di gazed ya kanaong mata. ¹²Kamhan nangotana siran daw hain sa iza koman? Minsambag ya tao nga wara hao mahagdam.¹³Pagkakamhan ka in-ated niran dizan ka mga Parasiyo ya tao nga indazaw ni Hisos. ¹⁴Na, izang aldaw ka pagbasà ni Hisos ka lopa ka pagdazaw ka mata na tao ani tigpahimlay na mga Hudiyo. ¹⁵Agon nangotana ya mga Parasiyo pag-isab nga ono sa nga nakakita di sa ko Minsambag iza nga insampenan naiza ya kanaong mata ka lopa nga imbasà ka eleb. Kamhan impahiram-os hao. Kamhan nakakita di ya kanaong mata.¹⁶Kamhan minlaong ya mga Parasiyo nga itong tao diri kon garing iza ka Nagagihit kay minlapas gazed iza ka balaed na Nagagihit kay indazaw naiza ya bota ka aldaw nga tigpahimlay. Kamhan ya pagtambal ka tao singed iton ka tarabaho. Minlaong ya ibang mga Parasiyo nga kon salaan iton nga tao onhon sa naiza paghinang kamadazaw singed kaiton? Kamhan namaglalis gazed siran. ¹⁷Agon minbalik siran pagpangotana ka tao nga daw ono ya hena-hena mo mahitenged kaitong tao kay iko ya indazaw naiza? Minsambag iza nga propita gazed iza na Nagagihit. ¹⁸Bisan ani ya toong sambag diri antoo ya mga Parasiyo nga iza ya bota nga nadazaw di. Agon impakarini niran ya ginikanan¹⁹kay mangotana siran daw iton ya anak mazo nga nabota sokad ka pagkatao? Naono sa nga nakakita di sa iza? ²⁰Minsambag ya ginikanan nga ani matood ya kanaming anak nga nabota sokad ka pagkatao na-iza ²¹piro wara gazed kami mahagdam kon onhon sa na-iza pagkita koman. Wara gazed kami mahagdam kon sin-o ya nakadazaw ka toong mata. Bot-an di iza agon pangotanhen mazo iza kay iza gazed ya ampanan-og kamazo.²²Ani ya pagsambag na toong ginikanan kay mahaldek siran ka mga Hudiyo kay may daan sabot na Hudiyo nga kon may tao nga ampanan-og nga si Hisos ani si Kristo nga hari nga pinili na Nagagihit bogawen gazed ya tao dini ka singbahan na mga Hudiyo. ²³Agon minsambag ya ginikanan nga iza ya pangotanhen mazo kay bot-an di iza.²⁴Kamhan impabalik pag-isab na mga Parasiyo ya tao nga madazaw di. Kamhan nagalaong siran nga sazaen mo ya Nagagihit kay iza ya nakadazaw kanmo. Diri kon si Hisos kay nahagdam sa kami nga maonga iza nga tao. ²⁵Minsambag iza nga wara hao mahagdam kon maonga iza basta kay nahagdam hao nga izang dini kaini nabota hao piro koman nakakita di hao.²⁶Kamhan nangotana siran nga daw in-ono na-iza ya mata mo pagtambal nga nakakita di sa? ²⁷Minsambag nga impanan-ogan di nao kamo piro diri kamo antoo. Kay ono sa nga baliken pen sa ya pagpananog nao kamazo? Daw naazakan isab kamo pagpasakop kanang-iza?²⁸Kamhan nazehet siran pagsora nagalaong nga iza ya insakopan mo basta kan Moysis kami. ²⁹Kay mahagdam gazed kami nga ya Nagagihit ani ya minsogo kan Moysis piro ya tao nga inngaranan kan Hisos wara kami mahagdam kon taga diin iza!³⁰Minsambag ya tao nga nabereng hao kamazo kay wara kamo mahagdam kon hain garing ya tao nga mindazaw ka kanaong mata. ³¹Mahagdam kita nga diri antabang ya Nagagihit ka tao nga maonga ya batasan. Hinoa tabangan na-iza ya tao nga mintahod kanang-iza daw mintoman ka toong naazakan.³²Sokad kawandini pen ka sinogdan pen na bakangan keteb koman waray nabatian nga may makadazaw ka tao nga nabota daan ka pagkatao. ³³Kon diri kon garing ka Nagagihit ini nga tao diri gazed iza makadazaw kanao. Ani ini ya sambag na tao nga nadazaw di. ³⁴Minsambag siran nga inkatao ya pagkabota mo kay iko ya salaan kamhan iko baza ya antoldo baza kanami nga mga magtutuldo. Kamhan imbogaw niran iza dini ka singbahan niran.³⁵Pagpakabati ka ni Hisos minkaro dazon iza ka tao nga indazaw na-iza kay ampangotana iza nga daw mintoo iko nga mindateng di ya tao nga minhon-a ka bisan sin-o nga mahon-ang tao? ³⁶Minsambag ya tao nga Sinyor, ipanan-og mo kanao kon sin-o iza kadaw antoo hao. ³⁷Minsambag si Hisos nga nakakita di ko kanang-iza kay iza ya minpakiglaong kanmo koman. ³⁸Minsambag ya tao nga Magbabaza, antoo hao kanmo. Kamhan minlohod iza ka pagtahod kan Hisos.³⁹Kamhan minpamolinged si Hisos nga nagalaong nga timan-an mo gazed ini. Ya tood nao ka pagkarini ka bakangan dazawen nao ya mata na mga nabota. Kamhan ya mga tao nga madazaw di koni ya mata, siran di hinoa ya mga bota. ⁴⁰Pagpakabati ka na mga Parasiyo ka mga panaba ni Hisos minlaong siran nga ipasabot mo kanami ya kahologan na pamolinged mo. Daw kami disab ya mga nabota? ⁴¹Minsambag si Hisos nga ya tao nga waray kahagdamanan mahitenged ka Nagagihit waray sala na-iza ka pag-away kanao. Basta kay makasasala kamo kay bisan naanad kamo koni ka pagmaymay na Nagagihit min-away baza kamo kanao.

¹Kamhan minpamolinged iza kaniran mahitenged ka batasan na mag-aligrahay ka toong mga bohien. Minlaong iza nga simpan may alad nga inseldan ka mga bohien nga karniro. Na, ya matood nga nagaaligara min-azi iza dizan ka pirtahan na alad. Kamhan ya tao nga minpanik hinoa ka alad ani gazed ya kawatan daw tolisan. ²Kamhan ya tao nga naga-azi dizan ka pirtahan iza matood ya nagaaligara ka mga karniro.³Kamhan abrihan na magbantazay ya pirtahan kadaw makaseled ya nagaaligara. Makilalhan dazon na mga karniro ya toong saba paghawag na-iza ka kanirang tagsa tagsang ngaran. Kamhan magona iza kaniran ngaro ka gawas. ⁴Pagpalogwa ka naiza kanirang maharong iza ya anhon-a kaniran pagpanaw. Kamhan nanonod siran kay nakakilala sa siran ka toong nga hinawag.⁵Diri gazed siran ansonod ka laing tao kay mandalagan hinoa siran kay wara sa siran makakilala ka toong hinawag. ⁶Ani ini ya pamolinged ni Hisos ka mga Hudiyo kamhan wara siran makasabot kon ono ya kahologan.⁷Agon minpanaba si Hisos kaniran pag-isab nagalaong nga sabten mazo ini nga ya pirtahan ka pagpaazi ka mga karniro ani hao. ⁸Kamhan ya mga kawatan daw tolisan ani ya mga mindateng paghon-a kanao daw mintoldo disab ka bakak piro diri antoo kaniran ya kanaong mga sakop.⁹Ya pirtahan na alad hao gazed. Bisan sin-o ya ankilala kanao diri pahamtangan iza na Nagagihit ka kamatazen ka toong mga sala. Insakto isab ya pag-aligara nao kanang-iza. ¹⁰Ya tood na mga kawatan gosto kawaten daw patazen daw daeten ya mga karniro. Kamhan ya tood nao hinoa anhatag hao kaniran ka bag-ong kinabohi nga diri mawara daw madazaw gazed.¹¹Hao ya gazed nga nagaaligara kaniran. Madazaw gazed ya kanaong pag-aligara kay andam hao ka pagpakapatay para kaniran. ¹²Lain ya batasan na sinoholan kay diri kon tag-iza iza ka mga karniro. Agon pagkita na-iza ka maiseg nga ido andalagan dazon iza pagbiza ka mga karniro. Kamhan insakmit dazon siran na ido daw impadalagan. ¹³Ani gazed ya batasan na sinoholan kay sohol ka lamang ya toong henahena, diri an-aligara ka mga karniro.¹⁴Minlaong sab si Hisos nga hao ya gazed nga nagaaligara. Ya pagkaangay nao daw ya kanaong mga sakop ¹⁵singed iton ka pagkaangay nao daw ya kanaong Ama. Kamhan andam hao ka pagpakapatay para kaniran. ¹⁶May mga iba pen nga tao nga ansakop pen kanao nga diri kon Hudiyo siran. Kinahanglan patiponon nao siran isab. Kamhan antoo siran ka kanaong hinawag. Kamhan isa kang ka tipon sirang tanan. Isa ka gihapon ya gazed nga mag-aligrahay kanirang maharong.¹⁷Kamhan hao ya naazakan na Ama kay andam hao ka pagpakapatay kadaw mabohi kasab hao pagbalik garing ka lebeng. ¹⁸Waray tao nga may mahimo ka pagpatay kanao kay hao ya ambeet kon maomos hao daw diri. May gahem nao ka pagtogot ka kanaong pagkapatay. May gahem sab nao ka pagbawi ka kanaong kinabohi. Intagan hao na Ama kaini nga gahem. Ani ini ya pagpanaba ni Hisos kaniran.¹⁹Pagpakabati na mga Hudiyo ka mga panaba ni Hisos namag-inaway ya isa daw isa. ²⁰Matuod ya nagalaong nga inboang iza na maonga. Diri kamo magpanalinga kanangiza. ²¹Minsambag ya mga iba nga ya tao nga inboang na maonga diri gazed iza makasindo singed kaiton. Kamhan waray mahimo na maonga ka pagdazaw ka mata na bota.²²Na, iton nga panahon mindateng di ya pista na mga Hudiyo dini ka Hirosalem. Na, iton nga pista ani pagtaremdem na mga Hudiyo ka pagdazaw niran ka dakolang lagkaw nga pangamozoanan ka Nagagihit. ²³Panahon ka na amihan. Kamhan nagapanawpanaw si Hisos dizan ka inngaranan ka Diskanso ni Salomon nga dapit dizan ka dakolang lagkaw na Nagagihit. ²⁴Kamhan inlibotan iza na mga Hudiyo kay kadaw legsen pagpangotana nga daw dogay pen ya pagpakilala mo kanami? Kon si Kristo iko nga hari nga pinili na Nagagihit kon diri? Magpanan-og ko kanami kadaw mahagdam kami.²⁵Minsambag si Hisos nga impananogan di kamo kamhan wara kamo magtoo. Intagan hao na Nagagihit ka gahem ka paghinang ka mga madazaw. Kamhan ya mga inhinang nao ani nagapamatood kamazo kon sin-o sa hao ²⁶ambaza kay diri kamo antoo kay diri kon kamo ya kanaong mga sakop.²⁷Kon kamo ya kanaong mga sakop makilalhan gazed mazo ya kanaong mga panaba singed ka pagkilala na mga karniro ka tao nga nagaaligara kaniran. Mahagdam hao kon sin-o ya kanaong mga sakop. Kamhan hao kay insakopan niran. ²⁸Anhatag hao kaniran ka bag-ong kinabohi nga diri mawara. Kamhan diri gazed siran madara ngaro ka impirno. Waray makakawa kaniran garing ka kanaong paghawid.²⁹Kay ya Ama nao nga minhatag kaniran kanao labaw gazed iza ka gahem. Kamhan waray makakawa ka kanaong sakop garing ka paghawid na Ama nao. ³⁰Ya Ama nao daw hao isa ka gazed. ³¹Pagpakabati ka na mga Hudiyo kaini nga mga panaba ni Hisos namorot siran pag-isab ka mga bato kay pookon kontana iza.³²Kamhan nagalaong si Hisos kaniran nga impakita nao kamazo ya matuod nga madazaw nga hinang nga inpahinang ni Ama. Kay ono sa nga pookon mazo hao? Daw ono ya inhinang nao nga diri kamo maazakan? ³³Minsambag siran nga diri nami pookon tenged ka bisan isang hinang nga madazaw basta ya pagpanaba mo ka maonga mahitenged ka Nagagihit. Tao ka lamang iko kamhan nagapahinanghinang iko nga Nagagihit.³⁴Minsambag si Hisos nga dizan ka kamazong balaud may sinoyat nagalaong nga ya mga karaang oloolo na mga Hudiyo siran ya mga Magbabaza ka mga tao. ³⁵Iton nga sinoyat diri mahimo balhinen kawanihen ka kay ani impasoyat na Nagagihit nga nagalaong nga ya mga karaang oloolo na mga Hudiyo siran ya intagan ka pagmaymay na Nagagihit. Kamhan siran ya inngaranan ka mga ginoo na mga tao. ³⁶Hao ya pinili daw inpakarimbaba na Nagagihit ka pagtoman ka toong naazakan dini ka bakangan. Kay ono sa kamo minbaheg kanao nga nagalaong nga maonga ya kanaong panaba mahitenged ka Nagagihit kay minpanaba hao nga hao gazed ya Anak na Nagagihit?³⁷Kon wara hao magtoman ka mga hinang nga naazakan na kanaong Ama diri kamo magtoo kanao. ³⁸Kon nagahinang hao ka toong mga tarabaho, bisan wara kamo magtoo ka kanaong mga panaba, toohi mazo nga ya mga hinang nao garing gazed ka Ama kamhan makasabot kamo nga kami ni Ama isa ka gazed kami. ³⁹Pagpakabati ka na mga Hudiyo ka-iza nga pinanaba ni Hisos dakpen kontana niran pag-isab piro min-azi iza dizan tenged kaniran. Kamhan nakalayas iza kaniran dini ka dakolang lagkaw nga pangamozoanan ka Nagagihit.⁴⁰Kamhan minbalik iza pag-isab dipi ka sapa nga Hordan doro dapit kaizang imbenzagan ni Howan. Kamhan nabilin iza doro. ⁴¹Kamhan matuod ya tao nga nangaro kanang-iza. Namaglaong siran nga si Howan bisan wara iza maghinang ka timaan nga garing ka Nagagihit, matood gazed ya tanan mga panaba na-iza kanami mahitenged kaini nga tao. ⁴²Kamhan dizan kaniran matuod ya mga mintoo kan Hisos.

¹Na, may isang tao nga nasakit ani ngaran si Lazaro nga taga Bitani. Taga dini disab si Mariya daw ya toong lomon nga si Marta. ²Na, si Mariya ani ya ambo-bo kay-an ka paahan ni Hisos ka mahamot daw tarapohan ka toong bohok. Maglomon iza daw si Lazaro nga nabedlay.³Kamhan insogo ni Mariya daw si Marta ya isa ngaro kan Hisos kadaw ipakahagdam nga nagalaong nga Magbabza, iza nga kinaazakan mo nabedlay iza. ⁴Pagpakabati ni Hisos minlaong iza nga ya tood na sakit ni Lazaro diri kon ikapatay. Hinoa pabet-an na Nagagihit kadaw ipakita na-iza ya hinang nga madazaw gazed. Kay pasabten naiza ya mga tao nga Hao ya Anak na Nagagihit.⁵Na, maghigara gazed si Hisos daw si Marta daw si Mariya daw si Lazaro. ⁶Pagpakabati ni Hisos nga nasakit si Lazaro bisan dakola ya kalooy na-iza kaniran nagatagad iza ka dowa pen ka aldaw dipi ka sapa. ⁷Pagdateng di na dowang ka aldaw minlaong si Hisos ka toong mga sakop nga mamanaw di kita kamazo pagbalik ngaro ka lopa nga Huda.⁸Minsambag siran nga Magtutuldo, daw ambalik pen ko ngaro? Pamokoon di ko kontana na mga Hudiyo. ⁹Kamhan waray kawied na-iza nga patazen iza kay mahagdam iza nga wara pen dateng ya tirmino. Agon minpamolinged iza kaniran nagalaong nga ka isang aldaw napolo may dowang ka oras ya kapawa. Kon aldaw ya kantang pagpanaw waray makasapdok kanta kay mapawa ya bakangan.¹⁰Kon ampanaw ya tao ka kahabzen masapdok iza kay diri iza makakita kon ankar-in sa iza kay madeglem di. Ani ini ya pagpanaba ni Hisos kaniran. ¹¹Kamhan mindogang iza pagpanaba nga ya kantang higara nga si Lazaro natorog di iza. Karohon di nao kay pokawen nao iza.¹²

¹Ya, enem nga ka aldaw ka wara pen dateng ya pista na mga Hudiyo nga mangihaw siran ka mga nati na karniro minbalik si Hisos ka lobohan nga Bitani nga hol-anan ni Lazaro nga inbohi na-iza pagbalik garing ka lebeng. ²Pagkadelem kaiza nagapakaen siran kan Hisos. Si Marta ya nagaaligara ka makaen. Si Lazaro dizan iza ka mga mintambong ka pagkaen iba kan Hisos. ³Kamhan si Mariya minkawa iza ka tenga na kilo na klasi na lana nga masarang kahamot ani ngaran ya nardo. Waray insaket bisan ono kamhan mahal gazed kon paliten. Kamhan imbo-bo ni Mariya ka paa ni Hisos. Kamhan intrapohan ni Mariya ka toong bohok. Insenep gazed ya lagkaw ka kahamot naiton nga lana.⁴Pagkakamhan si Hodas nga taga Kariyoti nga isang sinarigan nga mag-edlaway kan Hisos minbaheg iza kan Mariya nagalaong ⁵kay ono sa inhanogon sa mo ya lana nga mahamot? Kontana ipakowarta iton kay sobra ka sohol ka napolo nga ka bolan kon paliten. Kamhan ya halin ipanhatag ka mga pobri. ⁶Ani ini ya baheg ni Hodas kan Mariya. Kamhan diri kon kanang kalooy ka mga pobri kay kawatan gazed si Hodas. Dini ka mga sinarigan ni Hisos iza ya maghipesay ka kowarta piro onay iza mangawat kaiton.⁷Minsambag si Hisos kan Hodas nga pabet-i si Mariya kay ya halin na lana nga mahamot gamiten pen na-iza iton kayan ka pag-andam ka kanaong lawas ka paglebeng. ⁸Ya mga pobri onay siran magaibaiba kamazo. Basta hao diri di madogay dini kamazo kay ampanaw hao dini. Ani ini ya sambag ni Hisos kan Hodas.⁹Na, masara gazed nga kataed ya mga Hudiyo nakabati nga mindateng di si Hisos ka Bitani. Kamhan min-apas sirang maharong kay naazakan anseleng kanang-iza daw si Lazaro nga inbohi naiza pagbalik garing ka lebeng. ¹⁰Agon ya mga oloolo na mga Hudiyo namagsabot siran nga patazen si Lazaro isab ¹¹kay tenged kanang-iza matuod ya mga Hudiyo nga namiza ka kanirang oloolo kadaw ansakop kan Hisos.¹²Pagsonod nga ka aldaw masara gazed nga kataed ya mga mamistahay nga mintambong dini ka siyodad nga Hirosalem. Pagpakabati niran nga hapit di andateng si Hisos ka Hirosalem ¹³nangotod siran ka mga paka na palmira nga klasi na nizog. Kamhan ipangamay niran kan Hisos ka pagtahod kay ani say batasan niran kon magasogat siran ka hari nga andateng kaniran. Pagsogat niran kan Hisos naninggit siran nga sazaen, sazaen kay iko ya hari nga impakarini na Magbabaza. Intagan naiza iko ka dakola nga gahem. Sazaen kay iko matood ya hari nga pinili na Nagaihitg ka mga kaliwatan ni Israil. Ani ini ya pagsaza na mga tao kan Hisos pagdateng na-iza ka Hirosalem.¹⁴klasi na kabayo ani nakatoman ka insoyat na karaang propita nga nagalaong nga ¹⁵kamo nga mga taga Siyon, diri kamo magkahaldek. Selengi mazo kay waton di ngarini ya kamazong hari nga nagakabayo ka batan-en pen nga asno. Diri kon maiseg iza paghari naiza ka mga tao. Ani ini ya panan-og na karaang propita na Nagagihit.¹⁶Kamhan ya pagdateng ni Hisos dizan ka Hirosalem wara pen makasabot ya toong mga sakop kon ono ya kahologan. Kay-an ka pag-oli na-iza ngandaked anipen siran nakataremdem nga ya pagdateng na-iza nakatoman matood ka daan pinasoyat na Nagagihit mahitenged kanang-iza.¹⁷Kamhan ya mga matuod nga tao nga min-iba kan Hisos izang dini kaini ka paghawag naiza kan Lazaro ka paglogwa garing ka lebnganan, siran ya minpanan-og kaiton dizan ka mga tao. ¹⁸Kamhan sirang tanan nanogat kan Hisos kay nakabati siran nga inhinang na-iza ya timaan nga garing ka Nagagihit. ¹⁹Kamhan nagalaong ya mga Parasiyo nga selengi mazo. Pildi gazed kita kay insakopan iza na masarang kataed nga tao.²⁰Kamhan may mga tao nnga Magbabaza ya saba Ginirika ya saba nga namista isab siran kay ansingba siran ka Nagagihit dizan ka Hirosalem. ²¹Kamhan siran isab ya ampakilala kontana kan Hisos agon minkarini siran ka isang sinarigan nga si Pilipo nga taga Bitsayda nga longsod doro ka Galiliya. Kamhan minlaong siran nga Nong, kon mahimo ampakigkita kami kan Hisos. ²²Agon inkaro ni Pilipo si Andris kay panan-ogan sa. Kamhan sirang dowa minkaro kan Hisos kay ipanan-og nga ampakigkita kanmo ya mga taga Girika.²³Minsambag si Hisos nga mindateng di ya tirmino nga patazen di hao nga minhon-a ka bisan sin-o nga mahon-ang tao. ²⁴Timan-an mazo gazed ini nga ya isang bolos nga binhi nga homay kon diri itanem daw diri mapatay dalem ka lopa isa ka gazed iton nga binhi. Piro kon itanem maomos daw tomobo. Kamhan matuod ya ohay.²⁵Bisan sin-o ya diri ansakop kanao kay nawied iza nga basi patazen iza, diri gazed mahatagan iza ka bag-ong kinabohi nga diri mawara. Kamhan ya tao nga waray kawied kon patazen iza na mga tao kay hao ya insakopan na-iza iza gazed mahatagan ka bag-ong kinabohi nga diri mawara. ²⁶Ya tao nga ampaalagad kanao kinahanglan antoman iza ka kanaong naazakan. Kamhan ya kanaong inkarohan daw toong karohanan mag-anika. Bisan sin-o ya antoman ka kanaong naazakan sazaen iza na kanaong Ama.²⁷Indogang pen ni Hisos paglaong ka toong mga sinarigan nga mindateng di ya tirmino nga patazen di hao agon mabeg-at gazed ya kanaong buot. Daw anhangzo hao ka kanaong Ama kadaw diri ipaomos? Diri sa kay ya tood nao ka pagdateng ngarini koman angeten nao ya kalised. ²⁸Kamhan minpanaba isab si Hisos ka toong Ama daked nagalaong nga Ama, ipasabot mo kaini nga mga tao nga iko ya labaw ka gahem. Kamhan may saba nga minsambag garing daked ka tahaw nagalaong nga izang dini kaini impakita di nao ya kanaong gahem dizan ka mga inhinang mo. Impakita pen sab nao ya kanaong gahem dizan ka kanmong hinang. Ani ini ya sambag garing daked. ²⁹Kamhan ya mga tao nga nagatindeg dizan nakabati di siran ka tanog na saba. Kamhan minlaong siran nga mindag-ok di sa! Minlaong sab ya mga iba nga impanabaan gazed si Hisos na sinogo na Nagagihit nga taga tahaw!³⁰Kamhan minsambag si Hisos kaniran nga ya saba nga nabatian mazo para mazo itong panaba diri kon para kanao. ³¹Ya tirmino ka pagpanhokom na Nagagihit ka mga tao mindateng di gazed. Bogawen sab si Satanas nga magahari ka mga taga kalibotan. Litsa gazed iza ngaro ka kadeglem.³²Pagkakamhan niran paglansang kanao ka kros mabohi hao pagbalik garing ka lebeng. Kamhan kabigen nao ya maharong mga tao ngarini kanao. ³³Ani ini ya inlaong ni Hisos kay ipasabot kaniran ya kaazi na toong kamatazen.³⁴Kamhan minsambag ya mga tao nga dizan ka kanaming balaud nabatian nami nga diri mapatay si Kristo nga hari nga pinili na Nagagihit. Agon kay ono say pagalaong mo nga kinahanglan ilansang ya isang tao nga inngaranan ka minhon-a ka bisan sin-o nga mahon-ang tao? Daw sin-o sa baza ya tao nga inngaranan ka minhon-a ka bisan sin-o nga mahon-ang tao? ³⁵Minsambag si Hisos mahitenged ka toong kaogaringen nagalaong nga hao ya tag-iza ka kapawa. Kamhan makawara hao ka kadeglem dalem ka hona-hona na mga tao. Ka diri kon madogay ampanaw hao dini ka bakangan. Agon ka dini pen hao kamazo komarini kamo kanao kay basi madaeg kamo ka tag-iza ka kadeglem. Kay ya tao nga magapanaw ka kadeglem wara iza mahagdam kon ankar-in sa iza pasinged. ³⁶Ka dini pen hao kamazo magtoo kamo kanao nga tag-iza ka kapawa. Kamhan makaangay kamo ka kapawa. Pagkakamhan ni Hisos paglaong ka-iza minbelag iza kaniran. Diri siran mahagdam kon ankar-in sa iza.³⁷Bisan inhinang na-iza ya mga matuod nga timaan garing ka Nagagihit diri antoo ya mga Hudiyo kanang-iza. ³⁸Agon mintoman ya panan-og ni Isayas nga karaang propita na Nagagihit kay kawandini pen minlaong iza nga wani ya inlaong na Nagagihit mahitenged kan Kristo nga Magbabaza, waray antoo ka kanaming panan-og mahitenged kan Kristo bisan impakita na Magbabaza ya mga matuod nga timaan dizan kanang-iza. Ani ini ya daan inlaong ni Isayas.³⁹May iba pen nga sinoyat ni Isayas nagalaong nga diri mahimo ya pagtoo na mga Hudiyo kan Hisos kay ⁴⁰singed ka impakabota na Nagagihit ya kanirang mata. Impagahi isab na-iza ya kanirang otok kadaw diri siran makasabot kay diri siran naazakan nga ambiza ka kanirang mga sala. Agon diri siran tagan na Nagagiihit ka magazong hna-hona.⁴¹Ani ini ya inlaong ni Isayas kay kawandini pen minkita gazed iza ka pagka-Magbabaza ni Hiso Kristo nga Anak na Nagagihit. Kamhan minpanan-og si Isayas daan mahitenged ka pagdateng ni Hisos ngarini ka bakangan. ⁴²Kamhan dizan ka mga oloolo na mga Hudiyo matuod ya mga mintoo kan Hisos. Kamhan mahaldek siran ka pagpananog ka kanirang pagtoo kay basi pamogawen siran na mga Parasiyo dizan ka singbahan na mga Hudiyo. ⁴³Ani ini ya kanirang batasan kay impalabi niran ya pagsaza na mga tao kaniran ka pagsaza na Nagagihit.⁴⁴Kamhan si Hisos minbaskeg iza ka toong saba nagalaong nga ya tao nga mintoo kanao diri kon hao ka lamang ya intoohan na-iza basta antoo isab iza ka Nagagihit nga minpakarimbaba kanao. ⁴⁵Ya tao nga nakakita kanao nakakita isab iza ka Nagagihit nga minpakarimbaba kanao.⁴⁶Hao nga tag-iza ka kapawa mindateng hao dini ka kalibotan kadaw bisan sin-o ya antoo kanao kaw-en nao ya kadeglem dalem ka toong hona-hona. ⁴⁷Bisan sin-o ya ampanalinga ka kanaong pagmaymay kamhan diri iza antoman, diri kon hao ya anhokom kanang-iza kay diri kon ani ya kanaong tozo. Hinoa minkarini hao kadaw antabang hao ka mga tao kadaw diri siran pahamtangan na Nagagihit ka silot ka kanirang mga sala.⁴⁸Kay-an ka kataposan nga aldaw may maghohokom ka tao nga diri ansakop kanao daw diri antoman ka kanaong pagmaymay. Ya kanaong pagmaymay nga indirian na tao ani gazed ya maghohokom kaiton nga tao kay-an ka kataposan nga aldaw. ⁴⁹Kay ya impanaba nao diri kon garing ka kanaong kaogaringeng katenged basta ya kanaong Ama nga minpakarimbaba kanao ani minsogo kon ono say kanaong ipanaba. ⁵⁰Mahagdam hao nga ya toong kasogoan magahatag matood ka bag-ong kinabohi nga diri mawara. Agon ya kanaong impanaba mazo si Ama ya minsogo kanao. Ani ini ya pagmaymay ni Hisos ka mga tao.

¹Dispiras iton ka pista nga mangihaw ya mga Hudiyo ka mga nati na karniro. Kamhan mahagdam si Hisos nga mindateng di ya tirmino nga ampanaw iza dini ka bakangan kay ankandaked di ka toong Ama. Ipakita disab na-iza koman nga pagaazaken na-iza pagtineed ya toong mga sakop nga in-angay na-iza dini ka kalibotan. ²Ya, delem di wani. Kamhan nanihapon di si Hisos daw ya toong mga sinarigan. Kamhan impatandeg daan ni Satanas ya hena-hena ni Hodas nga maanak ni Simon Iskariyoti dazaw edlawan di na-iza si Hisos.³Kamhan si Hisos bisan mahagdam iza nga intagan iza na Ama ka labaw nga gahem, bisan iza matood ya mingaring ka Nagagihit daw iza isab ya anoli kaan ka Nagagihit, minpangalagad iza ka toong mga sinarigan. ⁴Kamhan ka nanihapon pen siran mintindeg iza. Minkawa iza ka isang lapid nga toong bado kay ambakes iza ka toalya. ⁵Inhalin na-iza ya sapa dizan ka palanggana. Kamhan minsogod iza paghogas ka kanirang paa. Kamhan impanarapohan ka toalya nga toong binakes.⁶Pagdateng na-iza kan Simon Pidro minlaong si Pidro nga Magbabaza, daw anhogas ko ka kanaong paa? ⁷Minsambag si Hisos nga ya batasan nao dini kamazo koman diri pen mo masabtan. Kay-an ka lamang makasabot ko. ⁸Minsambag si Pidro nga diri gazed hao ampahogas kanmo ka kanaong paa. Minsambag si Hisos nga kon diri ko ampahogas ka kanmong paa diri kon iko di ya kanaong sakop. ⁹Minsambag si Simon Pidro nga Magbabaza, ilakip mo ya kanaong alima daw olo paghogas daw paa!¹⁰Minsambag si Hisos nga pamolinged ini nga ya batasan na mamistahay namarigo iza daan. Kamhan pagdateng na-iza ka pistahanan paa ka lamang ya isaben paghogas kay nahingloan di daan ya lawas. Dini kamazo nahingloan di kamo ka kamazong mga sala kamhan may isa nga wara kahingloi. ¹¹Ani ini ya impanaba ni Hisos kay mahagdam iza daan kon sin-o ya magedlaway kanang-iza agon minlaong iza nga dini kamazo may isang tao nga wara kahingloi.¹²Pagkakamhan ka na-iza paghogas ka paa niran imbado disab na-iza pagbalik. Kamhan minbalik iza ka toong lo-toanan. Kamhan nangotana iza kaniran nga daw makasabot kamo kon ono ya kahologan na pagpangalagad nao kamazo? ¹³Dini kanta ya batasan mazo pagangaranan mazo hao ka Magtutuldo daw Magbabaza. Kamhan hosto gazed kay ani hao. ¹⁴Kamhan bisan hao ya Magbabaza daw ya Magtutuldo mazo minpangalagad hao paghogas ka kamazong paa. Kinahanglan maghinogasay isab kamo ka kamazong paa. ¹⁵Iton nga batasan nao haoden gazed mazo. Magpaubos kamo ka kamazong kaogaringen dizan ka isa daw isa singed ka pagpangalagad nao kamazo.¹⁶Sabten mazo ini nga ya oripen diri kon labaw iza ka toong amo. Hinoa ababa gazed iza. Kamhan ya tao nga insogo diri kon labaw iza ka tao nga minsogo kanang-iza ka pagpapanaw. ¹⁷Kon sabten mazo ini nga pagmaymay nao panaranginan kamo na Nagagihit ka madazaw kon tomanen mazo. ¹⁸Kamhan ya impanaba nao diri kon mahitenged kamazong maharong kay mahagdam hao daan nga maonga ya batasan na isang tao nga pinili nao. Kay kinahanglan matoman ya daan pinasoyat na Nagagihit nga nagalaong nga ya tao nga minsaro kanao ka pagkaen iza ya an-edlaw kanao.¹⁹Impanan-ogan ta kamo koman ka wara pen tongop kay dazaw kon tomongop kay-an antoo kamo nga hao gazed si Kristo nga hari nga pinili na Nagagihit. ²⁰Sabten mazo ini nga ya tao nga nakaangay ka sinogo nao singed ka nakaangay gihapon iza kanao. Kamhan ya tao nga nakaangay kanao nakaangay isab iza ka Nagagihit nga minpakarimbaba kanao.²¹Pagkakamhan ni Hisos paglaong kaniran mabeg-at gazed ya toong buot. Kamhan minlaong iza nga timan-an mazo gazed ini nga wadini kanta matood ya an-edlaw kanao nga isa. ²²Ya toong mga sinarigan namagsinelengay siran kay wara nirang mahagdami kon sin-o ya anedlaw kanang-iza.²³Kamhan dizan ka saing ni Hisos may isang sinarigan nga kinaazak na-iza. ²⁴Kamhan insingyasan iza ni Simon Pidro daw nagalaong nga mangotana ko kan Hisos kon sin-o ya toong impasabot. ²⁵Kamhan inlingi naitong sinarigan daw minpahenek pagpangotana kan Hisos nga Magbabza, daw sin-o ya an-edlaw kanmo?²⁶Minsambag si Hisos nga ya tao nga doholan nao ka pan nga itenleb nao ka sabaw aniton ya an-edlaw kanao. Kamhan pagtenleb na-iza ka pan indohol matood kan Hodas nga anak ni Simon Iskariyoti. ²⁷Pagdawat ni Hodas inharian dazon iza ni Satanas. Kamhan minlaong si Hisos nga ipadazon ya nahona-honaan mo pagdali.²⁸Kamhan ya mga iba nga sinarigan dizan ka lamisa diri siran makasabot kon ono ya impanaba ni Hisos kan Hodas. ²⁹Dini kaniran si Hodas ya nagahipes ka talipid. Kamhan may nagahona-hona nga minsogo si Hisos kan Hodas ka pagpalit ka mga kinahanglan niran ka pista. May nagahona-hona nga tagan na-iza ya mga pobri ka hinabang. ³⁰Pagdawat ka ni Hodas ka inhatag ni Hisos nga pan mindali iza paglogwa ka lagkaw. Na, kahabzen di gazed.³¹Kamhan minlaong si Hisos ka toong mga sinarigan nga koman nga panahon hao nga minhon-a ka bisan sin-o nga mahon-ang tao tomanen nao ya kabebet-en na Nagagihit. Ini nga pagkapatay nao pagbeet daan na Nagagihit kadaw dini kanao ipakita nga iza ya labaw ka gahem. ³²Ya pagkapatay nao ipakita nga dakola gazed ya kalooy na Nagagihit ka mga tao. Kamhan ka wara pen madogay ihatag sab na-iza kanao ya labaw nga gahem. ³³Kamo nga mga sinarigan nao singed kamo ka kanaong mga anak. Na, diri hao magadogay dini kamazo. Kamhan ampangita gazed kamo kanao. Ya impanaba nao ka mga Hudiyo inlaong sab nao kamazo nga diri kamo makaiba kanao ngaro ka karohanan nao.³⁴Kamhan wani ya bag-ong sogo nao kamazo nga mag-angay-angay kamo. Kinahanglan ya kanaong batasan nga maloozon daw ya kamazong batasan mag-anika. ³⁵Kay kon magkinaloy-anay kamo ka isa daw isa makakilala ya maharong mga tao nga kamo ya mga sakop nao.³⁶Kamhan si Simon Pidro nangotana kanang-iza nga Magbabaza, daw ankarin di sa ko? Minsambag si Hisos nga ya karohan nao diri pen ko makaiba kanao piro kay-an makakaro ka ko. ³⁷Nangotana si Pidro nga Magbabaza, kay ono sa nga diri hao makaiba kanmo koman? Dini kanao andam di hao daan ka pagpakapatay para kanmo. ³⁸Minsambag si Hisos nga daw andam iko gazed ka pagpakapatay para kanao? Timan-an mo gazed ini nga ka wara pen tagaok ya manok ikalimed di mo hao ka ikatolo.

¹Indogangan ni Hisos pagpanaba ka toong mga sinarigan nagalaong nga diri kamo magkawied. Hinoa magsarig kamo ka Nagagihit daw kanao. ²Daked ka Ama nao haloag gazed iton. Kamhan ankaro hao dazaw an-andam hao ka kamazong hel-anan. Kon diri kon matood ini diri gazed hao maglaong kamazo. ³Pagkakamhan nao pagandam ka kamazong hel-anan ambalik hao ngarini kay pan-ibahen di kamo kadaw magakatibe kita daked.⁴Mahagdam kamo ka dalan nga magasinged ngaro ka kanaong karohanan. ⁵Si Tomas minlaong kanangiza nga Magbabaza, diri kami mahagdam kon hain ko karo. Onhon sa nami pagkahagdam kon hain ya dalan pag-azi? ⁶Minsambag si Hisos nga ya dalan ka pag-azi ngaro ani hao. Kay hao nga si Kristo ani ya matood nga Nagagihit. Kamhan ya tag-iza ka bag-ong kinabohi nga diri mawara ani hao. Kamhan bisan sin-o nga tao kon diri iza an-azi dini kanao, diri iza andateng ka kanaong Ama. ⁷Kon insakto ya pagkilala mazo kanao, makakilala isab kamo ka kanaong Ama. Sokad komang kahabzen makasabot kamo ka batasan na Ama pagbag-o kay dini kanao impasabot nao kamazo kon ono ya hona-hona na Nagagihit.⁸Si Pilipo minlaong kanangiza nga Magbabaza, ipakita mo kanami ya Ama kay anika iton ya inkinahanglan nami. ⁹Minsambag si Hisos nga Pilipo, dogay di wani ya pag-ibaiba nao kamazo. Kay ono sang wara pen sa ko makakilala kanao? Ya tao nga nakakita kanao singed ka nakakita isab iza ka kanaong Ama. Kay ono sa nangotana pen sa ko nga ipakita nao kamazo ya Ama?¹⁰Daw wara ko magtoo nga kami ni Ama isa ka gazed kami? Ya pagmaymay nao kamazo diri kon garing kanao kay ya Ama nga nagakatibe dini kanao ani ya minhinang ka toong kaogaringeng tarabaho. ¹¹Toohan mazo nga kami ni Ama naisa ka gazed. Kon diri kamo antoo kaini magtoo kamo nga ya mga inhinang nao ani nagapamatood nga naisa ka gazed kami ni Ama.¹²Sabten mazo ini nga ya tao nga ampasakop kanao anhinang iza ka mga hinang singed ka kanaong mga inhinang. Kamhan ya toong mga hinang labaw pen iton ka kanaong mga inhinang kay ankandaked sa hao kan Ama. ¹³Kon hao ya insakopan mazo, bisan ono nga pangazoon mazo kanao ihatag gazed nao kamazo. Ani ini ya kanaong hinang kadaw magasazaen ya Ama dini kanao nga toong Anak. ¹⁴Kon ampangazo kamo ka bisan ono kay hao ya insakopan mazo ihatag nao matood ya pangazoon mazo.¹⁵Kon matood ya pagkaazakan mazo kanao tomanen mazo ya kanaong mga sogo. ¹⁶Kamhan mangazo hao ka Ama daked kadaw tagan kamo ka Magsindoay ilis kanao. Kamhan iza ya an-iba kamazo kawanihen ka. ¹⁷Iton nga Magsindoay ani ya Madazaw nga Ispirito nga garing ka Nagagihit. Pasabten naiza kamo kon ono ya insindo na Nagagihit. Diri mahimo ya pag-iba na-iza ka mga diri ampasakop kanao kay waray kasabtan niran agon wara siran mahagdam kon sin-o sa iza. Piro nahagdam di kamo kanang-iza kay mintineed di iza paghela dalem ka beet mazo.¹⁸Diri hao ambiza kamazo. Ambalik ka gazed hao dini kamazo. ¹⁹Ka diri madogay ya mga diri antoo kanao diri siran makakita kanao pag-isab piro kamo nga kanaong mga sakop ankita gazed kamo kanao. Kay hao bohi sa agon mabohi sab kamo kawanihen ka. ²⁰Kay-an ka pagdateng kamazo na Madazaw nga Ispirito nga garing ka Nagagihit anipen kamo makasabot nga kami ni Ama naisa ka gazed. Kamhan kamo daw hao naisa ka disab kita.²¹Ya tao nga nagatoon ka kanaong kasogoan daw mintoman azaken hao na-iza. Kamhan iza nga min-azak kanao in-azak isab iza na kanaong Ama. Azaken sab nao iza kamhan ipakita kanang-iza ya kanaong kaogaringen. ²²Si Hodas nga diri kon taga Kariyoti minpangotana iza kan Hisos nga Magbabaza, kay ono sa dini kanami ka lamang impakita mo ya kanmong kaogaringen kamhan diri ilakip ya mga iba pen nga tao?²³Minsambag si Hisos nga kon naazakan ya tao kanao tomanen na-iza ya kanaong . Kamhan iza ya in-azak na kanaong Ama. Kamhan dini kaini nga tao magakatibe kami ni Ama. ²⁴Kamhan ya tao nga diri anak kanao diri iza antoman ka kanaong pagmaymay. Kamhan ya pagmaymay nga impanalingahen mazo diri kon garing kanao kay garing gazed ka Ama nga minpakarimbaba kanao.²⁵Ka dini pen hao kamazo impanabaan ta kamo. ²⁶Kamhan ya Magsindoay nga Madazaw nga Lambong nga insogo na kanaong Ama insili kanao. Iza ya antoldo kamazo ka tanan inkinahanglan mazo. Pataremdemen disab naiza kamazo ya maharong impanaba nao kamazo. ²⁷Kamhan ya malinaw nga hinawa ibilin nao kamazo. Garing kanao ini nga kalinaw. Ya taga bakangan waray ikahatag na-iza singed ka inhatag nao kamazo. Diri kamo magkawied. Diri sab kamo magkahaldek.²⁸Izang dini kaini nabatian mazo ya kanaong impanaba nga ampanaw hao dini kamazo. Kamhan ambalik gazed hao. Na, kon matood ya pagkaazakan mazo kanao may kasaza mazo kay an-oli di hao ka kanaong Ama kay labaw iza kanao kay hao ya toong Anak. ²⁹Ka wara pen toman kaiton impakahagdam ta kamo daan kay kadaw kay-an ka pagtoman di antoo kamo kaini nga impanaba nao kamazo.³⁰Diri di hao andogay ka paglaonglaong kamazo kay domatengay di si Satanas nga magahari ka mga taga bakangan piro diri mahimo ya paghari na-iza kanao. ³¹Inhinang nao ya tanan mga sogo na Ama kanao kadaw mahagdam ya mga tao nga ya Ama ani ya kinaazakan nao. Na, hala di manindeg di kita.

¹Kamhan indogangan ni Hisos pagmaymay ka toong mga sinarigan nagalaong nga pamolinged ta kamo mahitenged ka pagtabang nao kamazo ka paghinang ka mga madazaw. Na, hao ya singed ka lawas na tanem ani ngaran ya obas. Ya tag-iza isab na tamnanan ka obas ani ya Ama nao. ²Kamhan ya mga sap-ay na tanem ani ya mga tao. Ya mga wara mamonga impan-otdan na Ama nao. Ya mga bomongahay inhingloan hinoa na-iza kay kadaw homatag ka matuod nga bonga.³Nahingloan di daan kamo kay ya inmaymay na Nagagihit nga inpanaba nao kamazo dizan di iton ka kamazong hona-hona. ⁴Hegeten mazo ya pagsarig mazo kanao kamhan pabilin hao dini kamazo. Simpan may sapay nga in-otod di diri iton makabonga kay in-otod di. Singed iton kamazo kay kon bomiza kamo ka pagsarig mazo kanao waray antabang kamazo ka paghinang ka mga madazaw.⁵Kay hao ya singed ka lawas na tanem. Kamo disab ya singed ka mga sap-ay. Kon hegeten mazo ya pagsarig mazo kanao matuod ya mga hininang mazo nga makasaza ka Naggihit kay hao ya min-ibaiba kamazo. Kay waray mahimo kon wara hao mag-iba kamazo. ⁶Kon bomiza ya tao ka toong pagsarig kanao bizaan disab nao iza singed ka sap-ay nga in-otod di. Kamhan pagkalaza ipanipon ya mga sap-ay nga in-otod di kamhan sonogon. ⁷Kon hegeten mazo ya pagsarig mazo kanao, kon diri kamo magkalipat ka kanaong inpanaba kamazo, makapangazo kamo ka bisan ono kamhan makadawat kamo.⁸Kon antoman kamo ka naazakan na kanaong Ama magasazaen gazed iza kay nagapamatood kamo nga kamo di ya kanaong mga sakop. ⁹Ya pag-azak na Ama kanao daw ya pag-azak nao kamazo mag-anika. Diri kamo magbiza ka kamazong pagsarig kanao.¹⁰Kon tomanen mazo ya kanaong mga sogo magkaangay kita singed ka pagkaangay nao daw ya kanaong Ama kay mintoman isab hao ka toong mga sogo kanao. ¹¹Impanabaan ta kamo kaini nga tanan dazaw ya kanaong kasaza nga garing ka pagtoman nao ka mga sogo na kanaong Ama ani disab ya kamazong kasaza kay mintoman kamo ka kanaong inpanaba kamazo. Kamhan dakola gazed ya kasaza mazo.¹²Wani ya kanaong sogo kamazo nga mag-angay-angay kamo haod ka pagpakaangay nao kamazo. ¹³Ya labaw nga kaazak na tao ihatag ka toong mga higara ani ya pagpakapatay ka lawas pagsili kaniran.¹⁴Na, kamo ani ya kanaong mga higara kon tomanen mazo ya mga sogo nao kamazo. ¹⁵Diri hao anngaran kamazo ka mga sogoonon nao kay ya tao nga insogo wara iza mahagdam ka hena-hena na toong amo. Hinoa ngaranan di ta kamo nga kanaong mga higara kay impakahagdam di nao ya mahrong nabatian nao nga garing ka kanaong Ama.¹⁶Izang mahon-a pen diri kon kamo ya ampasakop kanao imbis kay hao hinoa ya minpasakop kamazo kay impili ta kamo kadaw pakarohon kamo ngaro ka mga tao. Ya pagdara mazo ka kanaong pagmaymay dizan kaniran singed iton ka tanem nga mamonga ka mga madazaw nga bonga. Kamhan inhatagan kamo ni Ama ka bisan ono nga azoon mazo kay hao ya insakopan mazo. ¹⁷Wani ya isogo nao kamazo nga mag-angay-angay kamo¹⁸Pagkontara na mga tao kamazo diri kamo magkabereng kay hao ya inkontara niran paghon-a. ¹⁹Kon nagaangay kamo ka mga diri kon sakop nao, an-angay gihapon siran kamazo. Impili nao kamo ka pagbelag kaniran agon wara kamo mag-angay kaniran. Kamhan kontarahon kamo niran.²⁰Magtaremdem kamo ka pagmaymay nao kamazo nga ya oripen diri kon labaw iza ka toong amo. Hinoa ababa gazed iza. Pinagadaegdaeg hao na mga tao. Kamhan magadaegdaeg sab siran kamazo. Kon intoman niran ya kanaong inpanaba tomanen sab niran ya kamazong ipanaba. ²¹Ani ini ya batasan niran kamazo kay hao ya insakopan mazo. Diri isab siran ankilala kanang-iza nga minpakarimbaba kanao agon nagadaegdaeg siran kamazo. ²²Kon wara hao makarimbaba, kon wara hao magmaymay kaniran nga hao ya kanirang intagadan, may baribad niran ka sala niran nga pagdiri kanao. Piro kay diri di gazed siran makabaribad ka sala niran kay minkarimbabagazed hao. Kamhan diri siran ampanoo kanao.²³Ya tao nga nagakontara kanao nagakontara isab iza ka kanaong Ama daked. ²⁴Dizan kaniran kon wara nao hinanga ya mga madazaw nga wara pen mahinang na tao sokad may ikabaribad niran ka sala niran ka pagdiri kanao. Piro kay minkita siran gazed kaini nga mga inhinang nao. Kamhan magakontara siran kanao daw ya kanaong Ama. ²⁵Ani ini ya kanirang batasan kadaw matoman ya daan pinasoyat dizan ka kanirang balad nagalaong nga inkontara hao niran bisan waray sala nao.²⁶Na, dini kamazo andateng ya Magsindoay nga Madazaw nga Lambong nga garing ka Ama daked. Pasabten na-iza kamo kon ono ya matood. Iza nga inpakarimbaba nao garing ka Ama ani ya ampamatood nga hao gazed si Kristo nga hari nga pinili na Nagagihit. ²⁷Kamo disab ya ampanan-og kaini dizan ka mga tao kay sokad ka sinogdan ka pagmaymay nao ka mga tao kamo ya min-iba kanao.

¹Impanabaan ta kamo kaini nga maharong kadaw pagdateng na mga kalised kamazo diri kamo ambiza kanao. ²Pamogawen kamo ka singbahan na mga Hudiyo. Arani di ya tirmino nga ya amaomos kamazo silaong na-iza tomanen na-iza ya sogo na Nagagihit.³Ani ini ya toong hininang kay wara iza magkilala kanami ni Ama. ⁴Impanabaan ta kamo kaini kadaw kon inhinang niran ini kamazo makataremdem di kamo nga impakahagdam kamo daan. Izang dini kaini ka pagsogod nao ka pagsindo kamazo wara hao magpakahagdam kamazo kaini kay nagaiba pen hao kamazo.⁵Piro pomanaway di hao kay an-oli di hao ka Ama nga minpakarimbaba kanao. Kamhan waray isa dini kamazo nga mangotana kanao kon ankar-in sa hao pagsinged. ⁶Imbis kay dakola ya kamazong pag-awa kay minpakahagdam di hao kamazo ka mga kalised nga domatengay kamazo. ⁷Sabten mazo ini nga ya pagpanaw nao dini kamazo madazaw iton kay kon diri hao anpanawdiri andateng dini kamazo ya Magsindoay nga Madazaw nga Lambong nga garing ka Ama daked. Pagpanaw nao dini kamazo ipakarimbaba pen nao iza kamazo.⁸Pagdateng na-iza pasabten na-iza ya mga tao nga mga salaan siran. Pasabten disab na-iza nga hao ya madazaw. Pasabten sab na-iza mahitenged ka pagpahamtang kaniran na Nagagihit ka kamatazen. ⁹Ya pagdiri niran kanao ani ya sala niran. ¹⁰Pasabten sab siran nga hao ya waray sala kay an-oli hao daked kan Ama. Kamhan diri di mazo hao makita. ¹¹Pasabten sab na-iza nga waray kinateban ya silot ka mga tao nga diri antoo kanao kay minpahamtang ya Nagagihit daan ka silot kan Satanas nga tag-iza kaniran.¹²Matuod pon kontana ya ipanaba nao kamazo piro diri kamo makaanget ka pagpanalinga. ¹³Na, ya Magsindoay nga Madazaw nga Lambong kon andateng iza garing ka Ama pasabten na-iza kamo ka tanan mga insindo na Nagagihit. Kay diri kon garing ka toong kaogaringeng pagbeet ya pagpasabot na-iza kay ya toong nabatian hinoa nga garing daked anikay magapansindo. Kamhan pasabten sab kamo na-iza ya mga kaazi nga wara pen toman dini ka bakangan. ¹⁴Magasazaen hao naiza nga Lambong kay ya pagmaymay nga nabatian na-iza dini kanao ani ya toong ipanan-og kamazo.¹⁵5Ya kan Ama nga pagmaymay ani sab ya kanaong pagsindo. Kamhan ya pagmaymay nga nabatian na Lambong dini kanao ani sab ya toong pagmaymay kamazo. ¹⁶Ka diri di madogay diri di mazo hao makitan. Kamhan diri ka isab madogay nga makakita kamo kanao pag-isab.¹⁷Pagpakabati ka na toong mga sinarigan namaglaonglaong di siran nga daw ono waro ya kahologan na impanaba kanta nga nagalaong sa iza nga diri di madogay nga diri mazo hao makita. Diri ka isab madogay nga makakita kamo kanao pag-isab kay ambalik hao kan Ama. ¹⁸Daw ono ya kahologan na toong magaasangpanabaen nga diri di iza madogay dini? Diri sa kita makasabot.¹⁹Mahagdam si Hisos nga may ipangotana kontana niran agon inlongan naiza siran nga daw ani pagapanabaen mazo ya kamazong kawied ka pagakahologan na impanaba nao kamazo nga diri di andogay nga diri di mazo hao makitan. Diri ka isab madogay nga makakita kamo kanao pag-isab. ²⁰Sabten mazo ini nga kay-an ka pagkapatay nao magahaza kamo ka pag-awa kanao. Kamhan ya mga tao nga diri antoo kanao magasaza hinoa siran. Kamhan ya kamazong pag-awa masilihan ka kay-an ka kasaza. ²¹Pamolingdan ini mahitenged ka pagpamati na kabdes. Ka hapit di iza mataohan na maimpis dakola ya toong pagbati ka masakiton. Kamhan pagkatao di nalipat ka iza ka toong masakiton. Minsaza di iza hinoa kay natao di ya bata.²²Singed sab kamo ka kaazi na kabdes nga dakola ya pag-anget kay nabeg-atan ya kamazong hinawa kay ampanaw di hao piro magkita kita kay-an pag-isab. Kamhan pahangkazan gazed ya kamazong buot. Waray makakawa kaini nga kasaza mazo. ²³Kayan ka pagbalik nao garing ka lebeng diri di kon hao ya azoanan mazo. Sabten mazo ini nga ya Ama nao iza ya anhatag kamazo ka bisan ono ya pagpangazoon kay hao ya insakopan mazo. ²⁴Keteb koman pagpangazo mazo kan Ama wara pen hao malakip ka pagsabi mazo. Na, bag-o di ilakip mazo hao pagsabi mazo kay hao ya insakopan mazo. Kamhan hatagan kamo kadaw dakola gazed ya kasaza mazo.²⁵Izang dini kaini ya batasan nao ka pagmaymay kamazo impaazi nao ka pamolinged. Kamhan arani di ya tirmino nga diri di hao angamit ka mga pamolinged kay ampanaba hao kamazo mahitenged kan Ama ka mga makalaro nga panaba.²⁶Kon domateng di hao ngandaked kan Ama ya mga magapan-azoon mazo kanao ilargo mazo kan Ama ilakip sab hao pagsabi kay hao ya insakopan mazo. Panalingzan gazed kamo ni Ama singed ka pagpanalinga na-iza kanao. ²⁷Kay magaazaken kamo ni Ama kay hao ya in-azak mazo. Nagatoo disab kamo nga inpakarimbaba hao ni Ama kamazo. ²⁸Minkarimbaba hao ka kalibotan garing kan Ama daked. Kamhan ampanaw ka hao dini ka bakangan kay an-oli ka hao ngandaked kan Ama.²⁹Pagkakamhan ni Hisos paglaong ka-iza maglaong ya toong mga sinarigan nga makalaro di ya kanmong pagpanan-og. Diri di kon pamolinged singed ka mahon-a pen. ³⁰Bisan wara kami magpangotana kanmo mahagdam iko daan kon ono ya kanaming hena-hena. Agon nagatoo gazed kami nga garing ko matood ka Nagagihit. ³¹Minsambag si Hisos nga daw mintoo kamo nga garing hao ka Nagagihit?³²Manalinga kamo nga ka diri pen madogay manbelagbelag kamo tanan ngaro ka kamazong lagkaw. Mabizaan hao mazo piro ya Ama an-iba pen iza kanao. ³³Impanabaan ta kamo kaini nga maharong kay kadaw waray kawied mazo kay hao ya insakopan mazo. Bisan magaazi kamo ka mga masiet nga kalised dini ka kalibotan, diri di kamo magkahaldek kay nakadaeg di hao ka tag-iza na mga maonga dini ka bakangan.

¹Pagkakamhan ni Hisos pagpanaba ka toong mga sinarigan minhangad iza ka tahaw ka pagpangamozo ka Nagagihit nagalaong nga Ama, mindateng di ya tirmino nga ampanaw hao dini ka bakangan. Ipakita mo nga pinakalabaw hao nga Anak mo kadaw sazaen disab iko nga Ama. ²Insarigan mo hao daan ka gahem kadaw hao ya anhatag ka bag-ong kinabohi nga diri mawara dini ka maharong mga tao nga inkahatag mo kanao.³Kamhan ya bag-ong kinabohi nga diri mawara ani ya pagkaangay niran kanmo nga bogtong matood nga Nagagihit daw kanao nga si Hiso Kristo nga inpakarimbaba mo. ⁴Dini ka bakangan minpakita di hao ka mga tao nga iko ya labaw ka gahem kay nakakamhan di hao ka tarabaho nga insarig mo kanao. ⁵Kamhan, Ama, pagdateng nao daked kanmo ibalik mo kanao ya katenged nga kanao gazed kawandini pen ka pagkatibe ta ka wara pen mahinang ya bakangan.⁶Impakilala di nao iko dini ka mga tao nga inhatag mo kanao dini ka bakangan. Kamhan kanmo siran. Kamhan inhatag mo siran kanao. Kamhan intoman niran ya impanaba mo kaniran. ⁷Kamhan mahagdam siran nga ya maharong impagmaymay nao nga inhatag mo kanao mingaring gazed kanmo. ⁸Kay inhatag nao kaniran ya mga pagmaymay nga inhatag mo kanao. Kamhan mintoo siran agon mahagdam siran nga hao matood ya garing kanmo. Mintoo disab siran nga iko ya minpakarimbaba kanao.⁹Ama, ini nga paghangzo nao diri kon para ka mga tao nga wara magsakop kanao kay ani hinoa ya inpangamozo nao ya mga tao nga inhatag mo kanao kay kanmo siran. ¹⁰Kay ya kanaong mga sakop anisab ya kanmong mga sakop. Kamhan ya kanmong mga sakop anisab ya kanaong mga sakop. Kamhan dini kaniran insaza hao. ¹¹An-oli di hao kanmo. Diri di hao andogay dini ka kalibotan piro mabilin pen siran dini ka bakangan. Ama, ihangzo nao kanmo kay iko ya matood nga Nagagihit. Iko ya labaw ka gahem. Bantazan mo siran nga mga sakop nga inhatag mo kanao kay kadaw namag-angay siran ka hona-hona singed ka pagkaangay nga hona-hona ta.¹²Pag-ibaiba pen nao kaniran hao ya naga aligara kaniran kay intagan mo hao ka gahem ka pagbantay kaniran nga mga inhatag mo kanao. Imbantazan gazed nao siran kamhan waray isa kaniran nga madara doro ka impirno. Si Hodas anikay ansopak kanao kamhan ya impirno ani ya toong datnganan. Kamhan matoman ya daan pinasoyat mo mahitenged kanangiza. ¹³Ama, arani di ya tirmino ka pag-oli nao kanmo. Kamhan ini nga paghangzo nao inpabati nao kaniran kadaw magsaza gazed siran iba kanao. ¹⁴Inhatag di nao kaniran ya kanmong sindo. Kamhan inkontara siran na mga diri kon sakop nao kay siran di ya mga anak mo kamhan taga daked siran singed kanao.¹⁵Diri mo kaw-en siran garing ka bakangan hinoa panalipedan mo siran kay kadaaw diri siran madaeg ni Satanas. ¹⁶Taga daked siran singed kanao nga taga daked. ¹⁷Gamiten mo ya kanmong mga panaba ka pagtabang kanirang ka pagtoman ka kanmong naazakan. Kay iko ya minpanaba daan ka mga matood nga panaba.¹⁸Inpakarimbaba mo hao ka bakangan. Kamhan pakarohon disab nao siran ngaro ka mga tao. ¹⁹Tenged kaniran inhatag nao ya kanaong kaogaringen ka pagtoman ka kanmong naazakan kadaw tabangan siran ka pagtoman ka pagmaymay nga impasabot nao kaniran.²⁰Ama, ya mga sinarigan nao diri kon para kaniran ka lamang ya inhangzo nao kanmo. Kay ilakip gihapon ya mga mahoring sakop nga inmaymay naini nga mga sinarigan. ²¹Kamhan namag-angay di siran ka henahena singed ka pagkaangay nga hena-hena ta. Kamhan namag-angay disab siran kanta dazaw antoo ya mga tao nga iko gazed ya minpakarimbaba kanao.²²Ya madazaw nga inhatag mo kanao inhatag disab nao ka kanaong mga sakop kay kadaw namag-angay di siran ka hona-hona singed ka pagkaangay nga hona-hona ta. ²³Hao daw siran nagakaangay ka hona-hona. Angay isab ya kantang hena-hena kadaw insakto gazed ya pagkaangay niran. Kamhan mahagdam ya mga tao nga iko ya minpakarimbaba kanao kay min-azak ko kaniran singed ka pag-azak mo kanao.²⁴Ama, gosto nao nga ya mga sakop nga inhatag mo kanao pahelen nao siran daked iba kanao kadaw anseleng siran ka madazaw dizan kanao nga inhatag mo kanao paghon-a kay hao ya naazakan mo ka wara pen mahinang ya bakangan.²⁵Ama, polos matadeng ya batasan mo. Kamhan ya mga diri ansakop kanao wara siran makasabot kanmo. Nakasabot hao kanmo kamhan ya mga minsarig kanao siran disab mahagdam nga iko ya minpakarimbaba kanao. ²⁶Impasabot di nao siran kon ono ya kanmong hona-hona. Kamhan ampasabot pen hao kaniran kon ono ya kanmong hona-hona kadaw mahagdam siran nga dakola ya pagkaazakan mo kanao. Kamhan hao daw siran nagakaangay ka hona-hona.

¹Pagkakamhan ni Hisos paghangzo ka toong Ama minpanaw iza daw ya toong mga sinuladn dizan ka Hirosalem. Kamhan minsinged siran ngandipi ka isang lozo na alog inngaranan ka Kidron. May isang tamnanan ka mga liwaan dizan. Kamhan minseled si Hisos daw ya toong mga sinarigan. ²Si Hodas nga mag-edlaway kanang-iza nahagdam disab kaiton nga dapit kay ya batasan ni Hisos onay makigtipon ka toong mga sinulad dizan. ³Kamhan mindateng si Hodas impaiba disab ya isang ka panen nga mga soldaw daw ya mga magbantazay ka singbahan na mga Hudiyo kay insogo siran na mga oloolo na mga pari daw ya mga Parasiyo. Namagsolò di siran kay kahabzen di. Namagdara siran ka mga iawazay.⁴Mahagdam si Hisos daan kon ono ya tanan kaazi naiza kaan. Agon minsogat iza kaniran daw nangotana nga daw sin-o ya impangita mazo? ⁵Minsambag siran nga si Hisos nga taga Nazarit. Minlaong si Hisos nga wani ka sa hao. Kamhan si Hodas nga mag-edlaway mintindeg iza dizan iba ka mga soldawo.⁶Pagsambag ni Hisos kaniran nga wani ka hao nanibeg siran daw nagapatideeg ka pagkahaldek. ⁷Kamhan min-otro si Hisos pagpangotana kaniran nga daw sin-o wani ya impangita mazo? Minsambag siran nga si Hisos nga taga Nazarit.⁸Minlaong si Hisos nga inlong-an ta kamo nga wani ka sa hao dakoza. Kamhan kon hao ka ya tozo mazo azaw mazo hilabti ya mga sinarigan nao. ⁹Ani ini ya insambag ni Hisos kadaw matoman izang inlaong naiza ka toong Ama nagalaong nga ya kanaong mga sakop nga inhatag mo kanao waray isa kaniran nga nakawa na mga maonga.¹⁰Kamhan si Simon Pidro nga may lodzo minhogot iza daw mintigbas. Kamhan nakawa dazon ya talinga nga too na oripen na labaw nga pari. Si Malko ya ngaran na oripen. ¹¹Kamhan minbaheg si Hisos kan Pidro nga isog-ob ya lodzo mo. Angeten nao ini nga masarang kalised nga garing ka kanaong Ama.¹²Kamhan indakep si Hisos na mga soldawo daw ya kanirang kapitan daw ya mga magbantazay nga Hudiyo kamhan ingapos dazon. ¹³Kamhan in-ated ngaro kan Anas paghon-a kay iza ya ogangan ni Kayapas nga labaw nga pari koman nga panahon. ¹⁴Izang dini kaini si Kayapas ani ya minsogo ka mga Hudiyo nga nagalaong nga magazon gazed kon isa ka lamang nga tao ya patazen na mga taga Roma kadaw diri matibe ya mga Hudiyo pagkapildi.¹⁵Kamhan si Simon Pidro daw ya ibang sinarigan nagasonod siran kan Hisos pagpanaw. Kamhan ya isa nga sinarigan inkilalhan iza na labaw nga pari. Kamhan min-iba iza kan Hisos pagseled dizan ka pawa na lagkaw na labaw nga pari. ¹⁶Minpabilin si Pidro logwa ka pirtahan. Kamhan ya isang sinarigan nga inkilalhan na labaw nga pari minbalik iza paglogwa. Kamhan dizan ka binolanan nga nagabantay ka pirtahan minbaid iza kay paselden kontana si Pidro.¹⁷Kamhan nangotana ya binolanan kan Pidro nga daw iko isab ya sakop naini nga tao nga indakep? Minsambag si Pidro nga diri, ey! ¹⁸Kamhan ya mga sogoonon daw ya mga magbantazay namagharing siran ka pagpanarang kay matignaw gazed koman nga kahabzen. Pagtindeg niran dizan minpanarang si Pidro iba kaniran.¹⁹Kamhan si Hisos impangotana di iza na labaw nga pari mahitenged ka toong mga sinarigan daw ya toong pagsindo ka mga tao. ²⁰Minsambag si Hisos nga pagsindo nao ka mga tao diri hao ansindo dizan ka waray makakita kay dizan hao ka mga singbahan daw ya dakolang lagkaw nga pangamozoanan ka Nagagihit kay tiponanan iton na angay ta. ²¹Kamhan diri ko magpangotana kanao kon ono ya pagmaymay nao. Pangotanhen mo ya mga minpanalinga kanao kon ono ya ingkapanaba nao kaniran kay nakabati gazed siran.²²Paglaong ni Hisos kaiza inlaparo iza na isang magbantazay. Kamhan imbaheg nga azaw ko magsambag ka labaw nga pari singed kaiton. ²³Minsambag si Hisos nga kon maonga pen ya inkapanaba nao ka pari ipanan-og mo dazon dini ka mga tao. Piro kon matood ya impanaba nao ono sang inlaparo sa mo hao? ²⁴Kamhan inpagapos ni Anas si Hisos daw impaated ngaro kan Kayapas nga labaw nga pari.²⁵Kamhan si Simon Pidro nagapanarang pen iza pagtindeg dizan ka pawa. Kamhan inlong-an iza nga daw iko isab ya sakop naiton nga tao? Kamhan minlimed si Pidro nga diri, ey! ²⁶Kamhan inlong-an iza na isang oripen na labaw nga pari nga lomon na oripen nga inkaw-an ni Pidro ka talinga. Kamhan minlaong iza kan Pidro nga iko gazed ya nakitan o iba kan Hisos doro ka intamnan ka mga liwaan. ²⁷Kamhan minlimed gazed si Pidro pag-isab nga diri, ey! Kamhan mintagaok dazon ya manok.²⁸Pagkamasiselem ka in-ated niran si Hisos garing kanin Kayapas ngaro ka kolanganan na mga soldaw dalem ka dakolang lagkaw ni Pilato nga gobirnador nga Romanhon. Kamhan ya mga min-ated kanang-iza oloolo siran na mga Hudiyo. Kamhan diri siran anseled kaiton nga lagkaw kay ya batasan niran ya pagseled na Hudiyo ka lagkaw na tao nga diri kon Hudiyo ani ya makaonga koni ka Hudiyo. Kamhan kon anseled siran diri siran makapamista iba ka angay niran nga Hudiyo. ²⁹Kamhan minlogwa si Pilato pagsogat kaniran kay nangotana iza daw ono say ikasombong mazo mahitenged kaiton nga tao? ³⁰Minsambag siran nga kon diri kon maonga ya toong batasan diri gazed nami ipadateng iza ka pagsombong dini kanmo.³¹Minsambag si Pilato nga kon may sala na-iza dizan kamazo iated dizan ka mga oloolo mazo nga Hudiyo kay siran ya anhokom kay may mga balaed sa mazo. Minsambag siran nga diri kami makabeetbeet ka paghokom ka pagpatay ka tao kay makalapas kami ka balaed mazo nga taga Roma nga labaw kanami. ³²Ani ini ya impanaba na mga Hudiyo kamhan natoman ya mga panaba ni Hisos kay ya pagpatay ka tao ka kros batasan iton na mga Romanhon, diri kon batasan na mga Hudiyo.³³Pagkakamhan ka-iza minbalik si Pilato pagseled ka toong lagkaw. Kamhan impaseled si Hisos kay nangotana nga matod, ey, iko ya hari na mga Hudiyo? ³⁴Minsambag si Hisos nga ini nga pangotana mo kanao daw garing iton ka kanmong kaogaringeng hona-hona kon napanan-ogan di ko hinoa na mga tao? ³⁵Minsambag si Pilato nga diri kon Hudiyo hao. Anika say min-ated kanmo ngarini kanao ya mga oloolo na kanmong kaibahan nga Hudiyo. Daw ono sa ya kanmong inhinang nga maonga?³⁶Minsambag si Hisos nga ya batasan nao diri kon singed ka hari dini ka bakangan. Kay kon singed hao kaiza pagaawazen gazed na kanaong mga sogoonon kay kadaw diri hao madakpan na mga oloolo na mga Hudiyo. Lain gazed ya kanaong batasan ka batasan na hari dini ka bakangan. ³⁷Minsambag si Pilato nga agon hari iko matood. Minsambag si Hisos nga iko ya minlaong nga hari hao. Ya pagpanan-og ka matood ani ya tood nao ka pagpakatao daw pagkarini ka kalibotan. Kamhan ya tao nga an-angay ka matood ampanalinga iza kanao. Minsambag si Pilato nga ya matood daw ono sa ya kahologan naiton?³⁸Kamhan minlogwa si Pilato pag-isab kay anpakahagdam iza ka mga Hudiyo nagalaong nga diri nao silotan iton nga tao kay waray sala na-iza. ³⁹May batasan mazo koni nga kada toig pagdateng na kamazong pista nga mangihaw ka mga nati na karniro palogwaen mazo ya isang piniriso nga mapilian mazo. Daw gosto mazo palogwaen nao ya hari na mga Hudiyo? ⁴⁰Kamhan namagdengan ya mga Hudiyo pagsinggit pag-isab nga diri kon si Hisos palogwaen kay si Barabas hinoa! Na, si Barabas mangazaw iza.

¹Pagkakamhan ka-iza impanlatos ni Pilato si Hisos. ²Kamhan inlokong na mga soldawo ya balala nga mga dogihen kay inhinang niran ka korona. Kamhan insokbot niran dizan ka olo ni Hisos. Kamhan impabadoan iza ka mararag nga bado ³kay nagapakahinang ka hari. Kamhan nagasorasora siran pagsaza nagalaong nga tinahod ong hari na mga Hudiyo! Kamhan indagpi niran.⁴Pagkakamhan ka-iza minlogwa si Pilato pag-isab kay anlaong iza ka mga Hudiyo nga manalinga kamo. Palogwaen nao ini nga tao ngarini kamazo kay kadaw mahagdam kamo nga waray nasaksihan o nga sala na-iza. ⁵Kamhan impalogwa di si Hisos nga pinasokbotan na korona nga dogihen. Binadoan isab iza ka mararag nga bado. Kamhan minlaong si Pilato ka mga Hudiyo nga wani di ya tao! ⁶Pagpakakita ka na mga oloolo nga pari daw ya mga magbantazay kan Hisos naninggit siran nga ilansang di iton ka kros! Kamhan ya pagkasamok niran nakadaeg ka mga panaba ni Pilato. Agon minsambag iza kaniran nga kamazo ka lamang kay waray labet nao kaiton nga tao nga waray sazep.⁷Minsambag ya mga Hudiyo nga minlapas gazed iza ka kanaming balaed nga ya tao nga magapakahinang nga iza ya Anak na Nagagihit patazen iza. ⁸Pagpakabati ka ni Pilato ka kanirang paglaong nga si Hisos ya Anak na Nagagihit masara ya toong pagkahaldek. ⁹Kamhan minbalik iza pagseled ka palasiyo. Kamhan nangotana iza kan Hisos nga daw hain sa ko garing? Kamhan wara gazed si Hisos magsambag.¹⁰Minlaong si Pilato nga magtahod ko kanao pagsambag. Daw diri sa ko mahagdam nga hao ya ambeet kon bohian ko kon ipalansang ko ka kros? ¹¹Minsambag si Hisos nga waray pagbeet mo kanao kon wara ko tagi na Nagagihit ka gahem. Agon siran nga min-ated kanao ngarini kanmo dakola ya sazep niran ka kanmong sazep.¹²Pagpakabati ka ni Pilato ka sambag ni Hisos pabohian kontana naiza piro naninggit ya mga Hudiyo bali ka logwa nga kon pabohian mo ini nga tao diri kon iko ya higara ni Sisar nga hari nga Romanhon kay bisan sin-o ya magpakahari iza gazed ya kaaway ni Sisar. ¹³Pagpakabati ni Pilato ka mga panaba niran impalogwa na-iza si Hisos ngambali ka hokmanan. Kamhan minlo-to si Pilato dizan ka hokmanan. Ini nga hokmanan inngaranan ka Salog nga Siniminto. Kamhan ya saba nga Hinibriyo ka hokmanan ani Gabata.¹⁴Dispiras di wani na pistahanan nga mangihaw ya mga Hudiyo ka mga nati na karniro. Ka hapit di mag-edto minlaong si Pilato ka mga Hudiyo nga wani di ya kamazong hari. ¹⁵Kamhan naninggit siran pagsambag nga patazen iza! Patazen! Ipalansang di iton ka kros! Nangotana si Pilato nga daw naangzan mazo ipalansang nao ka kros ya kamazong hari? Minsambag ya mga oloolo nga pari nagalaong nga diri kon iza ya hari nami kay si Sisar anikay hari nami. ¹⁶Kamhan inhatag ni Pilato si Hisos kaniran kadaw ilansang ka kros.¹⁷Ka nagabathay iza ka kros in-ated niran iza ngaro ka gawas na siyodad ngaro ka may dapit nga inngaranan ka Dapit ka Kalabira kay ani ya dapit ka pagpatay niran ka tao nga impahamtangan ka kamatazen. Na, ya saba nga Hinibriyo kaini nga dapit ani Golgota. ¹⁸Doro niran inlansang ka kros. Iba disab ya dowang ka tao. Ya isa dizan ka kilid ni Hisos dapit ka toong too, ya isa dapit ka toong wala.¹⁹Insoyat disab ni Pilato ya timaan kay tapilen iton dizan ka kros. Ya toong sinoyat ani ini nga si Hisos nga taga Nazarit ini nga hari na mga Hudiyo. ²⁰Mataed ya mga Hudiyo nga nakabasa kaiton nga tinapil kay ya dapit nga inlansangan kan Hisos diri kon aro iton ka siyodad nga Hirosalem. Kamhan tolong ka kalasi nga saba ya sinoyat nga intapil nga Hinibriyo daw Linatin daw Ginirika.²¹Kamhan ya mga oloolo nga pari minlaong siran kan Pilato nga diri mo pagsoyat nga ani ini ya hari na mga Hudiyo. Ilisan mo hinoa nga ini nga tao iza ya minpanaba nga iza ya hari na mga Hudiyo. ²²Minsambag si Pilato nga ya inkasoyat di nao diri di nao ilisan.²³Pagkakamhan na mga soldawo paglansang kan Hisos ka kros inkawa niran ya toong mga bado. Kamhan imbahin niran ka opat nga ka bolos kay kadaw nagatagsatagsa siran ka bado. Kamhan may isa peng nga bado na-iza nga waray sinompazan kay ingaring dindaked ya paghinang lapos ka paa. ²⁴Kamhan namaglaonglaong siran nga diri nita gisien ini nga bado ka pagbahin. Magriparipa hinoa kita kon sin-o ya makatagiza. Ani ini ya hinang niran kadaw matoman ya daan pinasoyat na Nagagihit mahitenged kan Hisos nga nagalaong nga imbahinbahin niran ya kanaong mga bado. Inriparipahan sab niran ya isang bado nao. Kamhan nakatoman gazed siran kaiton.²⁵Kamhan dizan ka inlansangan ni Hisos mintindeg ya toong ina daw ya isang lomon na toong ina daw si Mariya nga asawa ni Kolopasa daw si Mariya nga taga Magdala. ²⁶Pagpakakita ka ni Hisos ka toong ina daw ya isang sinarigan nga toong naazakan nga mintindeg dizan ka saing na ina minlaong iza nga Ina, iza nga dizan ka kanmong sain ani di ya kanmong anak. ²⁷Kamhan minlaong disab si Hisos ka toong sinarigan nga ina di mo koman iza. Kamhan sokad ka-iza impahela di si Mariya doro ka lagkaw naiton nga sinarigan kay aligarahen.²⁸Pagkakaan ka-iza mahagdam si Hisos nga ya maharong insogo na toong Ama intoman di na-iza. Agon nakapanaba di iza nga in-ohaw di hao. Ani ini ya toong inlaong kadaw matoman ya daan pinasoyat na Nagagihit mahitenged ka toong kaazi. ²⁹Kamhan may isang ka kaldohan dizan nga pono ka sokà. Kamhan minkawa ya soldawo ka sizepanan kay heeman iton ka len-anan ka sokà daw tegseben dizan ka liwaan kadaw idohol ka ba-ba ni Hisos. ³⁰Pagkakamhan ni Hisos pagtilaw minlaong iza nga intoman di nao ya maharong insogo ni Ama. Kamhan mindongo iza. Kamhan insarig di na-iza ya toong buot ka pagkabogto di.³¹Na, konsilem ani aldaw ka pagpahimlay na mga Hudiyo agon koman nga delem nagaandam siran. Kamhan ya mga Hudiyo minhangzo siran kan Pilato nga nagalaong nga kon mahimo pamarien di ya bitiis na mga imamatzen nga inlansang ka mga kros kadaw madali siran maomos kay kaw-en sa nami ya lawas niran kadaw diri di mabitay kay mahal gazed konsilem nga aldaw nga tigpahimlay daw nakadengan ka pista. ³²Kamhan nangaro ya mga soldawo ka dapit ka mga inlansangan. Impamarian di niran ya bitiis na dowang ka tao nga inlansangan ka kros iba kan Hisos. ³³Pagdateng di niran kan Hisos nakapaniid di siran nga naomos di iza. Kamhan wara niran pamarii ya toong mga bitiis.³⁴Kamhan ya kilid ni Hisos indosag dazon na isang soldaw ka toong bangkaw. Kamhan min-awas dazon ya dogo daw sapa. ³⁵Na, ya minseleng ani ya minpanan-og mahitenged kaiton nga maharong. Kamhan matood ya toong pagpanan-og. Mahagdam iza nga polos matood ya toong mga panaba kadaw manoo disab kamo.³⁶Kay ini nga kaazi ni Hisos ani nakatoman ka daan pinasoyat na Nagagihit nagalaong nga wara mabarii ya toong bekeg bisan isa. ³⁷Nakatoman isab ya ibang daan pinasoyat na Nagagihit nagalaong nga anseleng ya mga tao kanang-iza nga kanirang indosag.³⁸Pagkakaan kaiza si Hosi minkaro iza kan Pilato. Taga Arimatiya si Hosi. Sakop iza ni Hisos kamhan mintago iza ka toong pagpasakop kay nahaldek iza ka mga Hudiyo. Kamhan iza ya minbaid kan Pilato ka pagkawa ka lawas ni Hisos kay ilebeng. Kamhan mintogot si Pilato agon impakawa ni Hosi iton. ³⁹Kamhan si Nikodimo nga izang bisita kan Hisos ka mahon-a pen ka kahabzen, iza koman ya minkarini daw mindara ka mga kalim-an nga ka kilo nga pahamot sinaketan ka mira daw alosa nga polos mahamot.⁴⁰Kamhan inkawa nirang dowa ya lawas ni Hisos. Kamhan inkomotan iton ka mga bag-ong panapton nga mapoti iba ya mga mahamot kay ani ya batasan na mga Hudiyo ka pag-andam ka namola ka paglebeng. ⁴¹Na, dizan ka dapit ka inlansangan kan Hisos may isang tamnanan. Kamhan dizan ka tenga na tamnanan may bag-ong hininang nga talangban nga lebnganan nga wara pen gazed kalebngi. ⁴²Kamhan inlebeng niran si Hisos dizan kay kinahanglan ilebeng dazon kay aldaw iton ka pag-andam na mga Hudiyo ka kanirang tigpahimlay daw nakadengan ka kanirang pista.

¹Ya, pagkamaaldawen ka ka Dominggo si Mariya nga taga Magdala minsazo iza pagdateng ka talangban nga inlebngan kan Hisos. Kamhan nakakita iza nga nakawa di ya bato garing ka pirtahan na lebnganan. ²Kamhan mindalagan iza ngaro kan Simon Pidro daw ya isang sinarigan nga naazakan ni Hisos. Kamhan minlaong iza kaniran nga inkawat di ya lawas na Nagagihit dizan ka lebnganan. Wara kami mahagdam ko hain di waro ibetang.³Kamhan si Pidro daw ya isang sinarigan minpanaw siran ngaro ka lebnganan. ⁴Pagdalagan nirang dowa ngaro mindateng ya isang sinarigan kan Pidro paghon-a kay mabaskeg iza pagdalagan. ⁵Kamhan minpongko iza ka pag-irab dalem ka lebnganan piro wara di magseled. Kamhan nakitan matood na-iza ya mga panapton nga mapoti nga impotos ka lawas ni Hisos kay anikay nabilin dalem.⁶Pagdateng ni Simon Pidro sonod kanang-iza minlargo iza pagseled ka lebnganan. Kamhan nakitan disab na-iza ya mga panapton nga mapoti ⁷daw ya panyo nga impotos ka olo ni Hisos. Napilo di ya panyo dizan nahilain ka mga panapton.⁸Kamhan ya isang sinarigan nga nakahon-a pagdateng minseled disab iza ngandalem ka linebngan. Pagpakakita ka na-iza ka mga potos ka lawas ni Hisos nga nangabilin mintoo gazed iza nga nabohi di si Hisos pagbalik garing ka lebeng. ⁹Kay wara pen siran makasabot pagdazaw ka daan pinasoyat na Nagagihit mahitenged kan Hisos nagalaong nga kinahanglan mabohi iza pagbalik garing ka lebeng. ¹⁰Pagkakamhan nirang dowa pagseleng nagatagsatagsa di siran pag-oli ka lagkaw.¹¹Kamhan si Mariya mintindeg pen iza dizan ka logwa na lebnganan. Pagpahihaza pen naiza minpongko iza ka pag-irab dalem ka lebnganan. ¹²Kamhan nakitan na-iza ya dowang ka tao nga sinogo nga garing ka Nagagihit. Mapoti ya kanirang bado. Minlo-to siran dizan ka binatengan na lawas ni Hisos. Ya isa dapit ka toong olo. Ya isa dapit ka toong paa. ¹³Kamhan nangotana siran kan Mariya nga Day, kay ono sa nga nagapahihaza sa ko? Minsambag iza nga kay inkawat niran ya kanaong Magbabaa. Kamhan wara hao mahagdam kon hain di waro ibetang.¹⁴Paglingi naiza nakakita iza kan Hisos nga nagatindeg dizan piro wara si Mariya makakilala nga ani iton si Hisos. ¹⁵Nangotana si Hisos kanang-iza nga Day, kay ono sa nga nagapahihaza sa ko? Daw sin-o ya impangita mo? Na, ya hena-hena ni Mariya saop iza dini ka tamnanan agon minsambag iza nga Nong, kon minbalhin ko ka lawas ni Hisos itoldo mo kanao kon hain mo iza ibetang kay kaw-en nao iza.¹⁶Minsambag si Hisos nga Mariya! Na, pagpakabati ka ni Mariya ka pagsabi na tao minlingi iza pag-isab daw minsambag ka saba nga Hinibriyo nga Raboni! Na, ya kahologan na panaba nga Raboni ani Magtutuldo. ¹⁷Kamhan minlaong si Hisos nga azaw hao paghawidi kay wara pen hao makakandaked ka Ama nao pagbalik. Karohon di mo hinoa ya kanaong mga sakop. Panan-ogan mo siran nga ankandaked hao ka kanaong Ama daw kamazong Ama. Anisab ya kanaong Nagagihit daw ya kamazong Nagagiht. ¹⁸Kamhan minkaro dazon si Mariya nga taga Magdala ka mga sinarigan ni Hisos. Minlaong iza kaniran nga nakakita hao ka Magbabaza. Kamhan impanan-og ni Mariya kaniran ya maharong inlaong ni Hisos kanang-iza.¹⁹Ya, pagkadelem ka aldaw nga Dominggo ya mga sinarigan ni Hisos namagtipon siran dalem ka lagkaw nga siniradohan kay nagapangahaldek siran ka mga oloolo na mga Hudiyo. Kamhan minkarini si Hisos tenged kanirang maharong. Kamhan minlaong iza kaniran nga palinawen ya kamazong buot. ²⁰Pagkakamhan na-iza pagpanaba impakita naiza kaniran ya toong mga alima daw ya isang lozo nga kilid na lawas kay ani ya pagpamatood kaniran nga iza si Hisos. Pagpakakilala niran nga iza matood ya kanirang Magbabaza dakola ya pagsaza niran.²¹Kamhan minlaong iza kaniran pag-isab nga palinawen ya kamazong buot. Hao ya inpakarimbaba na Ama dini ka bakangan. Kamhan pakarohon sab nao kamo ka mga tao. ²²Pagkakamhan na-iza pagpanaba minhimoswak iza kaniran daw minlaong nga dini kamazo paharien mazo ya Madazaw nga Lambong nga garing ka Nagagihit. ²³Sokad koman kon pasaylohon mazo ya mga sala na bisan sin-o nga tao impasaylo di iza. Kamhan kon diri mazo iza pasaylohon, diri isab iza mapasaylo.²⁴Kamhan dizan ka mga napolo may dowa nga ka sinarigan si Tomas nga indagnazan kan Kaloha wara iza mag-iba kaniran ka pagdateng ni Hisos. ²⁵Agon impanan-ogan iza na mga sinarigan nga nakitan nami ya Magbabaza! Minsambag si Tomas nga diri hao antoo. Kinahanglan ankita hao ka in-azihan na lansang dizan ka toong mga alima. Kinahanglan anhogam sab hao ka samad dizan ka isang lozo nga kilid na toong lawas anipen hao makatoo nga nabohi di iza.²⁶Na, pagdateng ka ikawalo nga aldaw dizan ka lagkaw mintipon disab ya mga sinarigan iba disab si Tomas. Bisan kon sirado ya lagkaw minkarini si Hisos tenged kaniran. Kamhan minlaong iza nga palinawen ya kamazong buot. ²⁷Kamhan minlaong iza nga Tomas, paka selengi ya palad na kanaong alima. Maghogam ko naa kaini daw ya samad dini ka isang lozo na lawas. Diri ko magdowadowa. Magtoo ko hinoa nga hao matood ini nga si Hisos.²⁸Minsambag si Tomas nga iko gazed ya kanaong Magbabaza daw ya kanaong Nagagihit! ²⁹Minsambag si Hisos nga mintoo ko kanao kay nakakita di ko kanao. Madazaw pen ya tao nga mintoo kanao bisan wara iza makakita kanao.³⁰Kamhan dizan ka pagseleng na toong mga sinarigan matuod pen ya mga inhinang ni Hisos nga wara hao magsoyat dini ka basahen. ³¹Kamhan insoyat nao ini kay kadaw antoo kamo nga si Hisos iza matood si Kristo nga Anak na Nagagihit. Kamhan ya pagtoo mazo kanang-iza ani anhatag kamazo ka bag-ong kinabohi nga diri mawara kay iza ya insakopan mazo.