¹Kùr ju yi ní Yi wɛ̀rhɛ́ dɛ̃̌ ǹdə́ cɛ. ²Cɛ y y’à tɛ̀nɛ́, kaka tɛ̀nɛ́ è yó yé : Wɔ́ cə-byṹ ò y’à ŋwɛ́nɛ́ gɔ́rɔ́ nã́-wɔ̌ w wə́, sə wɔ́ Yi éshirhə́ y è y’à ŋwɛ́nɛ́ nàná bɛ́ yó w è n’ê zhə̀lə̀.³Yi zɛ̃̀ rə wɔ̀ : bə̀ pwẽ̀ yál nɛ́ ! sə pwẽ̀ ré yàl nɛ́. ⁴Yi nyǐ rə pwírí pwẽ̀ ré càn ; Yi zɛ̃̀ rə pɔr pwẽ̀ ré ǹdə́ cə-byṹ w dwã wa. ⁵Yi zɛ̃̀ rə byẽ̀ pwẽ̀ ré bə̀ nə̀nyɔ́nɔ́, rə byẽ̀ cə-byṹ w bə̀ cəcɛ̃. Èta, rə̀myɛ́ wɛ̀rhɛ́ də̀dɛ̀nɛ́ èdù ǹdə́ nəkɔkɔ́lɛ́ èdù : rə̀myɛ́ yàl dɛ̃ nã́yéé ré.⁶Yi zɛ̃̀ rə wɔ̀ : bə̀ jàà yál nàná bɛ́ cəcəl wə, e bɔ̀n nàná bɛ́ dwã nɛ. ⁷Yi wɛ̀rhɛ́ jàà yá, rə m’e pɔr nàná bɛ́ byɛ̀bɛ́ bə̀ ŋwɛ́nɛ́ dɛ̃̌ è yó w mó ǹdə́ byɛ̀bɛ́ bə̀ ŋwɛ́nɛ́ tɛ̃́ è kùr w mó dwã nɛ. Wɔ́ èta rə̀myɛ́ yàl nɛ́. ⁸Yi zɛ̃̀ rə byẽ̀ jàà y èmyɛ́ bə̀ dɛ̃̌-yi. Èta, rə̀myɛ́ wɛ̀rhɛ́ də̀dɛ̀nɛ́ èdù ǹdə́ nəkɔkɔ́lɛ́ èdù : Rə̀myɛ́ yàl dwã nə̀lyè nyǎn rɛ́.⁹Yi wɔ̀ : bə̀ nàná bɛ́ byɛ̀bɛ́ bə̀ ŋwɛ́nɛ́ dɛ̃̌-yi rí kùr w mó bə̀ bə gùlí dwã jàà èdù sásá wẽ́, sə jàà nã́-kùlì yə̀ nɛ́. Sə kɔn yàl èta. ¹⁰Yi zɛ̃̀ rə byẽ̀ jàà y nã́-kùlì y bə̀ cɛ, rə byẽ̀ nàná bɛ́ gə́ gùlí dwã mə̀gã̌ mɔ́ bə̀ nə̀-fɔ̀lɔ̀. Yi nyǐ rə pwírí rə̀myɛ́ càn.¹¹Yi kə́ rə wɔ̀ : bə̀ cɛ y lyĩ vɔ-lyàr ; gɔ ò zhe ò dwí rə̀ n’ê lyĩ ; cèmé nə̀ n’ê ce byǎ, cǒ gakó ǹdə́ ò byǎ dwí bə̀ n’ê lyĩ cɛ yó. Sə kɔn yàl èta. ¹²Cɛ y lyĩ vɔ-lyàr, gɔ gakó n’ô lyĩ ò dwí rí cìcì, cèmé né nə̀ n’ê ce byǎ mɔ́ òdù gakó n’ô ce ò dwí rí cìcì byǎ. Yi nyǐ rə pwírí rə̀myɛ́ càn. ¹³Èta, rə̀myɛ́ wɛ̀rhɛ́ də̀dɛ̀nɛ́ èdù ǹdə́ nəkɔkɔ́lɛ́ èdù : Rə̀myɛ́ yàl dwã nə̀tɔ̀ nyǎn rɛ́.¹⁴14 Yi wɔ̀ : Bə̀ pwẽ̀ wẽ̀ yál dɛ̃̌-yi wə, rə pɔr nə̀nyɔ́nɔ́ w ǹdə́ cəcɛ̃ y dwã wa ; rə m’e byili yə né, ǹdə́ dwã nɛ́ ǹdə́ byinə né yé-shò ; ¹⁵15 rə súlí rə yə̀ dɛ̃̌-yi w rə̀ n’ê yə̌r cɛ yá. Sə kɔn yàl èta.¹⁶Yi wɛ̀rhɛ́ pwẽ̀ wẽ̀ ré nánfwààlɛ rə̀lyè, kɔ̀bɔ́ ò já dɛ̃́dɛ̃́ du mú, wɔ́ nə̀nyɛ́nɛ́ ò n’ô zə ò zhə̀lə̀, námpɔ́lɛ́ y dɛ̃́dɛ̃́ mɔ́, wɔ́ cəcɛ̃ y ò n’ô zə ò zhə̀lə̀ ; rə zɛ̃̀ rə wɛ̀rhɛ́ càmmə́sɔ̌sɛ́ myɛ. ¹⁷Yi cĩ́ ri dɛ̃̌-yi w rə̀ la yə̌r cɛ yá, ¹⁸mùnì ga rə zə nə̀nyɔ́nɔ́ w ǹdə́ cəcɛ̃ rə vò ; sə rə pɔr pwẽ̀ ré ǹdə́ cə-byṹ w dwã nɛ, Yi nyǐ rə pwírí rə̀myɛ́ càn. ¹⁹Èta, è wɛ̀rhɛ́ də̀dɛ̀nɛ́ èdù ǹdə́ cəcɛ̃ èdù : rə̀myɛ́ yàl dwã nə̀na nyǎn rɛ́.²⁰Yi wɔ̀ : bə̀ nàná bɛ́ wɛ̀rhɛ́ wò-nyùr nánjə̀jóló, sə kúmsi zhì cɛ y yó sə zɛ̃̀ sə̀ n’ê zhə̀l dɛ̃̌-yi wə. ²¹Yi wɛ̀rhɛ́ émɔ̌-fwààlɛ́ ǹdə́ wò-nyìr rí rə̀ ŋwɛ́nɛ́ mɔ́, nàná bɛ́ n’ê wɛ̀rhɛ́ nánjə̀jóló w mó, kɔn gakó ǹdə́ rə̀ dwí rí gə́ wɔ́ nɛ́ ; Yi wɛ̀rhɛ́ kúmí dwí tɛ̀bɛ́ gakó è zhe vɔ̀mɛ̀ è n’ê zɛ̃̀ è zhə̀l dɛ̃̌ yi w mú. Yi nyǐ rə pwírí rə̀myɛ́ càn.²²Yi cĩ́ bwəl rə̀ yó, rə wɔ̀ : «lúl-nə, á pù, á sú nə̀-fɔ̀lɔ̀ w nàná bɛ́ ; sə kúmsí myɛ pù sə sú cɛ yá. ²³è yàl də̀dɛ̀nɛ́ èdù ǹdə́ nəkɔkɔ́lɛ́ èdù : È yàl dwã nə̀nu nyǎn rɛ́.²⁴Yi wɔ̀ : bə̀ cɛ y wɛ̀rhɛ́ wò-nyùr, kɔn gakó nyɛrhɛ rə̀ dwí rí cìcì, vwàmá nə nyɛrhɛ nə̀ dwí rí cìcì, ǹdə́ tɛ̀bɛ́ rə̀ n’ê fwàl tɛ̃́ nə̀ pǔrh yó, ǹdə́ vwàmá nyɛ̀bɛ́ nə̀ n’ê zhə̀l cɛ y yó, nə nyɛrhɛ nə̀ dwí rí cìcì. Sə kɔn yàl èta ²⁵Yi wɛ̀rhɛ́ vwàmá nɛ́ nyɛ̀bɛ́ nə̀ n’ê zhə̀l cɛ y yó mó nə nyɛrhɛ nə̀ dwí rí cìcì, nèrh sə̀na wẽ̀ ré, rə nyɛrhɛ nə̀ dwí rí cìcì, tɛ̀bɛ́ rə̀ n’ê fwàl tɛ̃́ mɔ́, nə nyɛrhɛ rə̀ dwí rí cìcì, Yi nyǐ rə pwí rí rə̀myɛ́ càn.²⁶Yi zɛ̃̀ rə wɔ̀ : Bà-nà nə́ wɛ̀rhɛ́ numbyíní e nyɛrhɛ nə́ba, e yə̀ ǹdə nə́ ta, e cìní mɔ́mɔ̌sɛ́ nə̀-fɔ̀lɔ̀ w mɔ́, ǹdə́ kúmsí dɛ̃̌ yi w mú, ǹdə́ vwàmá nɛ́ cɛ yó mó gakó, ǹdə́ tɛ̀bɛ́ rə̀ n’ê fwàl tɛ̃́ rə̀ pǔrh yó cɛ y yó mó gakó. ²⁷Yi wɛ̀rhɛ́ numbyíní e nyɛrhɛ ǹdə rə̀ ta, rə̀ wɛ̀rhɛ́ y ǹdə Yi ta, rə̀ wɛ̀rhɛ́ bal ǹdə́ kɛ̃.²⁸Yi cĩ́ bwəl bə̀ yó, rə wɔ̀ bɛ : lúl-nə, á pú, á sú cɛ yá, á ce e yə̀ á nyǎ ; s’á cìní mɔ́mɔ̌sɛ nə̀-fɔ̀lɔ̀ w w mɔ́, ǹdə́ dɛ̃̌ kúmsí, ǹdə́ vwàmá nɛ́ nə̀ ŋwɛ́nɛ́ cɛ yó mó. ²⁹Yi zɛ̃̀ rə wɔ̀ : Nyǐwə́, à n’â pɛ ába gɔ kɔ̀bɔ́ dwí gakó ò n’ô lyĩ ò dwí rí cìcì cɛ y yó mó gakó, ǹdə́ cǒ kɔ̀bɔ́ dwí gakó ò n’ô lyĩ ò dwí rí cìcì mú : Rə̀ b’a yə̀ á nyí kùjú.³⁰À n’â pɛ gɔ-lyɔ̃̀ dwí gakó ò la yə̀ vwǎm gakó ǹdə́ kumí gakó ǹdə́ tɛ̀bɛ́ gakó rə̀ ŋwɛ́nɛ́ y yó mó ne, ò la yə̀ rə̀ kùjú. Sə kɔn yàl èta. ³¹Yi nyǐ kɔn rɛ́ tɛ̀bɛ́ rə̀ wɛ̀rhɛ́ mɔ́ gakó, rə pwí rí rə̀ càn dɛ̃́dɛ̃́. Èta, è wɛ̀rhɛ́ də̀dɛ̀nɛ́ èdù ǹdə́ nəkɔkɔ́lɛ́ èdù : rə̀myɛ́ yàl dwã nyə̀ldù nyǎn rɛ́.

¹Wɔ́ èta dɛ̃̌ ǹdə́ cɛ y ǹdə́ wẽ̀ ré tɛ̀bɛ́ rə̀ ŋwɛ́nɛ́ rə̀ wẽ́ mó wɛ̀rhɛ́ nɛ́ rə zhɛ̀. 2 ²Wɔ́ dwã nyàlpyɛ̀ dɛ̃ rɛ́ yù w Yi twĩ̀ rə̀ tum rí rə zhɛ̀ : rə zɛ̃̀ rə shǐrh rə̀ tum rí rə̀ wɛ̀rhɛ́ mɔ́ gakó yilə, dwã nyàlpyɛ̀ dɛ̃ rɛ́ yùwə̀. ³Yi cĩ́ bwəl dwã nyàlpyɛ̀ dɛ̃ rɛ́ yó, rə ce rə̀ wɔ́ rə̀myɛ́ nyǎn, bə̀ wɔ́ dɛ̃ rɛ́ rə̀myɛ́ yù w rə̀ shǐrh rə̀ tum rí rə̀ wɛ̀rhɛ́ mɔ́ gakó yilə.⁴Nyǐ-nə dɛ̃̌ ǹdə́ cɛ y gə́ ju kùr rə̀ wɛ̀rhɛ́ nɛ́, kɔn gə́ y’à wɔ́ nɛ́. Yi Bə-zhɔ̌-zhe gə́ wɛ̀rhɛ́ dɛ̃̌ ǹdə́ cɛ y yi ní, ⁵ǹdə́ cǒ òdù ga y’à gwẽ̌ tɛ̀nɛ́ cɛsɛ́ wɛ̃́ cɛ yó yé, gɔ òdù ga y’à gwẽ̌ t’â lyĩ cɛsɛ́ wẽ́ yé : Bə̀ Yi Bə-zhɔ̌-zhe y’ǎ gwẽ̌ yə̀ ce dwà nyɔ̃̀ cɛ y yó yé, numbyíní myɛ y’à tɛ̀nɛ́ è la cɛ y vwál gaga yé. ⁶Rə̀myɛ́ yó zho já o shí tɛ̃́ o zɛ̃̀ o ló nɛ̃̌ tɛ̃́ cə-yala nɛ́ gakó wẽ́.⁷Yi Bə-zhɔ̌-zhe zɛ̃̀ n wɛ̀rhɛ́ numbyíní ǹdə́ cɛ shó, n fùrh nyǔ zho è myə̀lə́ wẽ́, numbyíní jǐrh kɔ̀-nyì. ⁸Yi Bə-zhɔ̌-zhe zɛ̃̀ n báá bɔ́ɔ́ Edɛn nɛ́, yi-púrhí səta, n kwè numbyíní y ń wɛ̀rhɛ́ mɔ́ n cĩ́ gàà mɔ́.⁹Yi Bə-zhɔ̌-zhe zɛ̃̀ rə ce cèmé dwí gakó lyĩ cɛ y yó, nə̀ càn yírh wə, nə̀ nyɛ̀ ǹdə́ jú, rə súlí rə ce nyǔ cǒ lyĩ vɔlɔ w cəcəl wə, rə ce cɛ̀nɛ̀ pár lwar ǹdə́ lwɛlɛ pár lwar cǒ myɛ lyĩ vɔlɔ w wa. ¹⁰Rə̀myɛ́ yi ní, nə̀gɔ̀lɔ̀ òdù shí Edɛn wẽ́ o du ò nɛ̃̌ mɔ́ n’ê ji vɔlɔ wá, o zhì gàà mɔ́ o bɔ̀n nə̀gwàl-vwɛ̀mɛ̀ nə̀na.¹¹Nə̀gwàl-vɔ̃̀ w nã́yóó w yíl Pisəkɔɔnɛ ; wɔ́ òmyɛ́ ò kə́kɛ́lɛ́ Avyilə tənà y sánnə́má mɔ́ gə́ ŋwɛ́nɛ́ mə̀gã̌ mɔ́ gakó. ¹²Tənà y èmyɛ́ sánnə́má mɔ́ wɔ́ sánnə́má páá ; gàà mɔ́ deliyumi ǹdə́ onikisi myɛ ŋwɛ́nɛ́.¹³Nə́gwàl-vɔ̃̀ nə̀lyè nyɔ̃̌ w yíl Jiyɔ̃ ; wɔ́ òmyɛ́ ò kə́kɛ́lɛ́ Kushi tənà y gakó. ¹⁴Nə̀gwàl-vɔ̃̀ nə̀tɔ̀ nyɔ̃̌ w yíl Yədəkɛl ; wɔ́ òmyɛ́ ò nɛ̃̌ mɔ́ n’ê dùr yi-púrhí sõ Ashiri ni mú. Nə̀gwàl-vɔ̃̀ nə̀na nyɔ̃̌ w yíl Efəratɛ.¹⁵Yi Bə-zhɔ̌-zhe zɛ̃̀ rə kwè numbyíní rə cĩ́ vɔlɔ wa, è la w vwál s’e yìlì wə. ¹⁶Yi Bə-zhɔ̌-zhe pə nyí numbyíní ni rə wɔ̀ : ǹ wɔ̌ ǹ jí cèmé né nə̀ ŋwɛ́nɛ́ vɔlɔ w w mɔ́ gakó byǎ bɛ́ ; ¹⁷sə bə̀ká jí cɛ̀nɛ̀ pár lwar ǹdə́ lwɛlɛ pár lwar cǒ w yé, bə̀ dɛ̃ rɛ́ tɛ̀bɛ́ ǹ gə jú w ǹ b’ǎ cì. Yi Bə-zhɔ̌-zhe zɛ̃̀ rə wɔ̀ :²⁰kɔn bə mə̌ sə bal jǒ ń dúdú yé ; à b’ǎ wɛ̀rhɛ́ sɛ̃ɛ̃́ e nyɛrhɛ ǹdə ń ta a pɔ̃. ¹⁹Yi Bə-zhɔ̌-zhe zɛ̃̀ rə fɔ́n cə-shó rə m’e wɛ̀rhɛ́ vwàmá nɛ́ cɛ y yó mó ǹdə́ kúmsí dɛ̃̌-yi w mú gakó, rə ce rə bə̀ numbyíní yé né, rə nyǐ wɔ́ etər numbyíní la rə yilə né né byõ̌, mùnì ga wò-nyù gakó zə yil ré tɛ̀bɛ́ numbyíní la w co mó. ¹⁸Numbyíní zɛ̃̀ e ce vwàmá nɛ́, dɛ̃̌-yi kúmsí ǹdə́ vwàmá nɛ́ cɛ y yó mó gakó yilə né ; sə è gə wɔ́ èmyɛ́ cìcì mú yilə, è yə̀ kɔn nɛ rə̀ nyɛrhɛ y rə̀ b’a sɛ̃ y yé.²¹Rə̀myɛ́ yó, Yi Bə-zhɔ̌-zhe zɛ̃̀ rə ce jan nánfɔ̀lɔ̀ tu bal mɔ́ yó, n dɛ̀ɛ̀ ; rə vùr ń sə-də̀-kúr rí òdù, rə k’a zə ń yala nàmá bɛ́ rə pyi ò jàà y nɛ. ²²Yi Bə-zhɔ̌-zhe zɛ̃̀ rə zə sə-də̀-kú w rə̀ vùr bal mɔ́ yala nɛ mɔ́ rə m’e wɛ̀rhɛ́ kɛ̃, rə zə mɔ rə bə̀ bal mɔ́ nyí ni. ²³Bal zɛ̃̀ n wɔ̀ : nyǐ èlǎsɛ́ myɛ̌, mɔ̀bɔ̀ ń kú w wɔ́ à kúr rí mú, ń yala nɛ́ wɔ́ à yala nɛ́ mɔ́ ! Bə̀ b’a byẽ̀ mo bə̀ kɛ̃, bə̀ wɔ́ bal wẽ́ bə̀ vùr mo né.²⁴Wɔ́ rə̀myɛ́ è ce bal mà n zhǐr n yẽ̌ ń da ǹdə́ ń ná nɛ, n vò n lyẽ dwã nɛ ǹdə́ ń kɛ̃ mɔ́, bə jǐrh yala kùr rə̀dù. ²⁵Bal mɔ́ ǹdə́ ń kɛ̃ mɔ́ ga y’à wɔ́ nánlyèrh, e jà rə̀ cìzhìl y’à bə bɛ zhe yé.

¹Gɔ-wẽ̀ ré tɛ̀bɛ́ Bə-zhɔ̌-zhe wɛ̀rhɛ́ mɔ́ gakó wẽ́ wɔ́ dɔm mɔ́ mə̀ yě sòlò du. Mə zɛ̃̀ mə wɔ̀ kɛ̃ mɔ́ nɛ : Yi wò ába zhə̀n ga : bə̀ bə̀k’á jí vɔlɔ w cèmé né gakó zhə̀n zhə̀n ga ? ²Kɛ̃ mɔ́ lyár dɔm mɔ́ n wɔ̀ : Nə̀ n’é jí vɔlɔ w cèmé né gakó byǎ bɛ́. ³Sə wɔ́ cǒ w kɔ̀bɔ́ ò ŋwɛ́nɛ́ vɔlɔ w cəcəl ré w mó yil Yi wòwə̀ : «Á bə̀k’á jí w yé, s’á bə̀k’á dwə̀rh w yé, mùnì ga á bə̀k’á cì yé»⁴Rə̀myɛ́ yó né dɔm mɔ́ wɔ̀ kɛ̃ mɔ́ nɛ : «À t’á la cú gaga ; ⁵bə̀ Yi yě bə̀ dɛ̃ rɛ́ tɛ̀bɛ́ á gə jú bi mú yù w á yírhə́ né b’a púr á lwar cɛ̀nɛ̀ ǹdə́ lwɛlɛ pár dwã wa ; á jǐrh ǹdə yə ta. ⁶Kɛ̃ mɔ́ pwírí cǒ w nyɛ̀ ǹdə́ jú, o j’a sú yírh, ò càn dɛ̃́dɛ̃́ ò m’a pul surhə ; n zɛ̃̀ n kwẽ ò byǐ y n jí, n kwè y n pə ń byal mɔ́ ń yà ń zhǐ ń ni mú myɛ nɛ n jí.⁷Bə̀ ga yírhə́ né púr, bə̀ zɛ̃̀ bə lwar bə̀ bə̀ y’à wɔ́ nánlwèrh, bə vò bə kɛ́ épyìlú vɔr bə lyẽ bə̀ cěrh ne. ⁸Rə̀myɛ́ yi ní, bə zɛ̃̀ bə nyɛ̀ɛ̀ Yi Bə-zhɔ-zhe cəl ré, rə̀ tó vɔlɔ w wẽ́ rə byẽ̀ byẽ̀ kɔn m’e yí də̀dɛ̀nɛ́ bɔ̀l wa, bal mɔ́ ǹdə́ ń kɛ̃ mɔ́ j’a shèè yé né gaga Yi Bə-zhɔ-zhe yé né, vɔlɔ w cèmé né cəcəl wə.⁹Rə̀myɛ́ yó né, Yi bə-zhɔ-zhe zɛ̃̀ ń nə́ ń byẽ̀ bal mɔ́ ń zhe : Yẽ̀ ǹ ŋwɛ́nɛ́ nɛ́ ? ¹⁰N lyár n wɔ̀ : À nyɛ̀ɛ̀ ǹ cəl ré vɔlɔ w wa, s’a wɔ́ nánlwè, rə̀myɛ́ ce ywẽ zɔ nɛ, a zɛ̃̀ a shèè. ¹¹Yi Bə-zhɔ-zhe zɛ̃̀ n wɔ̀ : Mɔ̌ lò ń byili mú bə̀ ń wɔ́ nánlwè ? Ǹ jú cǒ w à y’à pɔ mɔ́ nyí bə̀ ǹ bə̀ká jí mú nà ?¹²Bal mɔ́ lyár n wɔ̀ : Wɔ́ kɛ̃ mɔ́ ń kwè ń cĩ́ à nyí ni mú ń pɔ nɛ cǒ wə́, a zɛ̃̀ a jí wə. ¹³Yi Bə-zhɔ-zhe zɛ̃̀ n wɔ̀ kɛ̃ mɔ́ nɛ : Wɔ́ bə̀kɔ́n yil ǹ wɛ̀rhɛ́ rə̀myɛ́ èta mɔ́ ? Kɛ̃ mɔ́ lyár n wɔ́ : dɔm mɔ́ mə̀ swèlè ne, a zɛ̃̀ a m’a jí wə.¹⁴Yi Bə-zhɔ-zhe wɔ̀ dɔm mɔ nɛ : Ǹ gə́ wɛ̀rhɛ́ èta mɔ́ ce, ǹ yò zhìlì vwàmá nɛ́ nánfwààlɛ́ ǹdə́ gɔ-nàmá bɛ́ gakó cəcəl wə, ǹ mà ń já ǹ nə́ ǹ fwàl tɛ̃́ ǹ pǔ yó, sə wɔ́ shó ò m’a yə̀ ǹ kùjú ǹ cɛ yó nyǔ mú gakó yilə. ¹⁵À m’a ce zùùri yə̀ ǹmyɛ́ ǹdə́ kɛ̃ mɔ́ cəcəl wə, ń dwí rí ǹdə́ ǹ dwí rí cəcəl wə. Sə ńmyɛ̌ mà n nɔ̀ ǹ yó w ne tɛ̃́ o bɔbwɛlɛ, sə ǹmyɛ́ m’ǎ dɔ̃̀ ń nə̀kúl ne n cɛ̀mɛ̀ rɛ.¹⁶N wɔ̀ kɛ̃ mɔ́ nɛ : À m’a súlí ǹ pwǐsí zal nɔ̀nɔ̀ w dɛ̃́dɛ̃́, ǹ m’ǎ lù ǹdə́ zwini, ǹ byal mɔ́ shil ré m’à n’ê zal mɔ́, sə wɔ́ ǹmyɛ̌ ń mà n cìní mú.¹⁷N zɛ̃̀ n wɔ̀ bal mɔ́ nɛ : Ǹ gə́ cili ǹ kɛ̃ mɔ́ zɔ̀mà nɛ́, n zɛ̃̀ ń jí cǒ w kɔ̀bɔ́ à y’à pɔ mɔ́ nyí rí èta a wɔ̀ : Bə̀ká jí w gaga ! Rə̀myɛ́ ce, cɛ y yò m’a zhìlì ǹmyɛ́ yilə. Wɔ́ nwɛ́ ǹ mà ń nwɛ̀nɛ̀ fòró ń nə ǹ nyí-kùjú dɛ̃ gakó ǹ nyǔ mú cɛ mó yilə. ¹⁸Cɛ y m’a lyĩ sɔr ǹdə́ bǎsɔ̌brɛ, sə wɔ́ cɛ y gɔ w ǹ la jú. ¹⁹Wɔ́ ǹ cícírhə́ né nə̀ m’a du ǹ yé w fòró ń nə ǹ nyí-kùjú, kɔn m’e yí ń ká vò cə-shó w wə, bə̀ gə́ vùr mó mə̀gã̌ mɔ́ ; bə̀ ǹ wɔ́ cə-shó, ǹ b’ǎ k’á vò cə-shó w wə.²⁰Adama zɛ̃̀ n ce ń mɔ́ kɛ̃ yil bə̀ Awa : Bə̀ wɔ́ ńmyɛ̌ ń wɔ́ lyì-nyìsí gakó ná. ²¹Rə̀myɛ́ yó né, Yi Bə-zhɔ-zhe zɛ̃̀ n zə vwàmá tànrɛ n mə n wɛ̀rhɛ́ kàmə̀zǔrh n zù Adama ǹdə́ ń kɛ̃ mɔ́.²²Yi Bə-zhɔ-zhe zɛ̃̀ n wɔ̀ : Nyǐ, numbyíní jǐrh ǹdə nə́myɛ̌ mə̀dù ta, cɛ̀nɛ̀ ǹdə́ lwɛlɛ pár lwar mɔ́ yilə. Rə̀myɛ̀ ce èlǎsɛ̃́, bà-nà nə́ cə̀r y è bə̀k’a zə è jɛ̃̀ e vò e kwẽ nyǔ cǒ w e jí, e zɛ̃̀ è ŋwɛ́nɛ́ byinə nə̀ bə zhɔ̌ yil yé. ²³Yi Bə-zhɔ-zhe zɛ̃̀ n jì numbyíní Edɛn vɔlɔ wa, mùnì ga e vò è n’ê vwàl cɛ y bə̀ gə́ vùr y mə̀gã̌ mɔ́. ²⁴Wɔ́ èta kɔn tó né Yi Bə-zhɔ-zhe mə n jì Adama ; n zɛ̃̀ n kwè shərəbɛ̃́bá n cĩ́ Edɛn vɔlɔ w kɔn zǎ yi-púrhí ǹdə́ búlə́ shù ǹdə́ ò myǐn mə̀ n’ê yə́yɛ́lɛ́ dɛ̃̌, bə̀ m’ê yìlì sɔ́má y kɛ̀bɛ́ è la cǒ w kɔ̀bɔ́ ò n’ô pɛ nyǔ mú sõ mó.

¹Adama zɛ̃̀ n zù ǹdə́ ń kɛ̃ Awa ; n kwè pǔ n lù Kayɛ̃, n zɛ̃̀ n wɔ̀ : À zɔ numbyíní pǔ ǹdə́ Bə-zhɔ̌-zhe sɛ̃ɛ̃́. ²N kə́ n lù Kayɛ̃ nyɛ̃́ Abyəə. Abyəə yà ń wɔ́ vwã̌-ènɔ̀n, Kayɛ̃ yà ń wɔ́ vwàlnà.³Kɔn dɛnɛ námpɔ́lɛ́ rə̀myɛ́ kwã nɛ́, Kayɛ̃ zɛ̃̀ n zə vɔ̀lɔ́ byǎ bɛ́ ń nɔ cɛ y wẽ́ mó n mə n zwə́l vwĩ̀ n pə Bə-zhɔ̌-zhe ne. ; ⁴sə Abyəə wɔ́ ń vwàmá nɛ́ byì-yə́ə́sé ń zɔ n mə n zwə́l vwĩ̀ n pə Bə-zhɔ̌-zhe ne. Bə-zhɔ̌-zhe zɛ̃̀ n zwẽ Abyəə ǹdə́ ń vwĩ̀ rí ; ⁵sə ń yə̀ shɛ̀nɛ́ n zwẽ Kayɛ̃ ǹdə́ ń vwĩ̀ rí yé. Kayɛ̃ lyim j’a dɛ̃́dɛ̃́ ń yé y pɔn.⁶Bə-zhɔ̌-zhe wɔ̀ Kayɛ̃ nɛ : Wɔ́ byè yil n kwè lyim, sə wɔ́ byè yil myɛ ǹ yé y pɔn mɔ́ ? ⁷Zhə̀n zhə̀nà, ǹdə́ n gə wɛ̀rhɛ́ cɛ̀nɛ̀, ǹ yà ǹ b’ǎ zhẽ̌ ń yé y dɛ̃̌, sə ǹdə́ ǹ gə wɛ̀rhɛ́ lwɛlɛ, yə̀-bəlɔ̀lɔ́ w n’ô pyè ǹ étwí-ènyírí ni, sə ò shilə né m’a zǎ ǹ sono, sə wɔ́ ǹmyɛ́, ǹ m’a cìní wə⁸Ǹdə́ rə̀myɛ́ ga, Kayɛ̃ zɛ̃̀ ń nǝ́ ń zɔ̀m ǹdə́ nyɛ̃́ Abyəə ; sə è gə́ y’à wɔ́ gɔ sõ bə̀ y’à ŋwɛ́nɛ́ mɔ́ ce, Kayɛ̃ zɛ̃̀ n tu ń nyɛ̃́ Abyəə yó n mà n gu. ⁹Rə̀myɛ́ yó, Bə-zhɔ̌-zhe wɔ̀ Kayɛ̃ nɛ : Yẽ̀ ǹ nyɛ̃́ Abyəə ŋwɛ́nɛ́ ? N lyár n wɔ̀ : À yə̀l yé ; à wɔ́ à nyɛ̃́ mɔ́ yìlnə nà ?¹⁰Yi zɛ̃̀ rə wɔ̀ mɔ : Etər ǹ wɛ̀rhɛ́ nɛ́ ? Ǹ nyɛ̃́ mɔ́ jal mɔ́ zhì cɛ y yó mə wǔrh, wùrhí y yí à sono. ¹¹Sə èlǎsɛ̃́ ǹ yò m’a zhìlì cɛ y è kǎl è nyí e zwẽ ń nyɛ̃́ mɔ́ jal mɔ́ ǹ zə ǹ jɛ̃̀ y ń ló mo è yó mó yó. ¹²Ǹ gə vwàl cɛ w myɛ è t’â la mɔ́ é nə̀cɛ̀ndɛ́ pɔ yé. Ǹ mà ǹ ŋwɛ́nɛ́ ǹ nə́ ǹ zhə̀lə̀, ǹ yə̀l ǹ gə́ la má yé, ǹ tá ǹ la tum kùr zal cɛ yó yé.¹³Kayɛ̃ zɛ̃̀ n wɔ̀ Bə-zhɔ̌-zhe ne : A còrhò-tum rí já dɛ̃́dɛ̃́ ǹdə́ lò la rɛ zõ. ¹⁴Nyǐ, ǹ nə́ ǹ jí ni zà cɛ y kɛ̀bɛ́ yó ; à la kwã nɛ́ gaga ǹ yé né, a vò à n’â zhə̀lə̀, à yə̀l à gə́ la má yé, à t’â la tum kùr zal cɛ yó yé, nyǐ lò mwə̀l mwə̀l gə nɔ nɛ ń mà n gu ni. ¹⁵Bə-zhɔ̌-zhe wɔ̀ mɔ : Lò gə gu Kayɛ̃, bə̀ b’a cĩ́ ń jim twər tàlpyɛ̀. Bə-zhɔ̌-zhe zɛ̃̀ n cĩ́ kə-kan Kayɛ̃ yala nɛ́ mùnì lò mɔ̀bɔ́ ń nɔ mɔ sə ń bə̀ká n gu mu gaga yé.¹⁶Rə̀myɛ́ yó né, Kayɛ̃ zhǐr n vò kwã nɛ́ gaga Bə-zhɔ̌-zhe yé né, n vò n jòm Node cɛ y yó, Edɛn nɛ́ yi-púrhí sõ. ¹⁷Kayɛ̃ zù ǹdə́ ń kɛ̃ mɔ́, n zə pǔ, n lù Enɔkɛ, n zɛ̃̀ n lù cɔ, n zə ń byǐ Enɔkɛ yil ré n mə n ce cɔ w òmyɛ́ yil ré bə̀ Enɔkɛ.¹⁸Enɔkɛ lù Yəradɛ, Yəradɛ lù Məshijəyəə, Məshijəyəə lù Mətəsəkayəə, mətəsəkəyəə lù Ləmɛkɛ. ¹⁹Ləmɛkɛ jí kana bə̀lyè : Mə̀dù y yà ń yíl Ada, ń dõ mó yà ń yíl Təsəla.²⁰Ada lù Jabalɛ : wɔ́ ńmyɛ̌ ń yàl byɛ̀bɛ́ bə̀ n’ê zwɛ̃̀ kwə̀ə́rhé wẽ́, bə̀ n’ê cə̀r vwàmá nɛ́ mɔ́ da. ²¹Ń nyɛ̃́ mɔ́ yà ń yíl Jabalɛ : wɔ́ ńmyɛ̌ ń yàl byɛ̀bɛ́ bə̀ n’ê dwí harpe et chalumeau. ²²Tǝsǝla myɛ zɛ̃̀ n lù Təbyəə-Kayɛ̃, wɔ́ ńmyɛ̌ ń yà ń nə́ ń lwì kàmɔ w ǹdə́ cɔ̀bɔ́ wẽ̀ ré gakó. Təbyəə-Kayɛ̃ nəkɔ́ mɔ́ yà ń yíl Naama.²³Ləmɛkɛ zɛ̃̀ n wɔ̀ ń kɛ̃ Ada ǹdə́ ń kɛ̃ Təsəla nɛ : Ləmɛkɛ kana, cili-nə à cǝl ré, cili-nə à zɔ̀mɛ̀ rɛ́ ! À gu lò, à cɔ̀mɔ̀ mɔ́ yilə, à gu ébɔ́-dǎl à cɔ̀mɔ̀ mɔ́ yilə. ²⁴Bə̀ b’a cĩ́ Kayɛ̃ jim twər tàlpyɛ̀, sə Ləmɛkɛkɛ wɔ́ twər shí-shàlpyɛ̀ ǹdə́ tàlpyɛ̀.²⁵Adama zù ǹdə́ ń kɛ̃ mɔ́ kə́dò ; n lù byǐ, n ce ń yil bə̀ Sɛtɛ, n zɛ̃̀ ń zhe ; Yi pɔ nɛ byǐ n cĩ́ Abyəə mó Kayɛ̃ gu mú jàà wa. ²⁶Sɛtɛ myɛ lù byǐ, n ce ń yil bə̀ Enoshe. Wɔ́ rə̀myɛ́ yó né, bə̀ zɛ̃̀ bə ji kùr bə̀ n’ê byẽ̀ bə Bə-zhɔ̌-zhe yil ré.

¹Nyǐ Adama nɛ̀mɛ́ nɛ́ yilə né sɛ́bɛ́ rɛ́. Yi gə́ wɛ̀rhɛ́ numbyíní mú, rə̀ wɛ̀rhɛ́ y e nyɛrhɛ ǹdə Yi ta. ²Rə̀ wɛ̀rhɛ́ bal mɔ́ ǹdə́ kɛ̃ mɔ́, rə cĩ́ bwəl bə̀ yó, rə ce bə̀ yil bə̀ numbyíní, rə̀ gə́ wɛ̀rhɛ́ bɛ yi ní.³Adama tú ǹ bə̀ n yí byinə zɔ̌m ǹdə́ shɛ́-ètɔ̀, n lù byǐ n nyɛrhɛ ǹdə ń ta, n ce ń yil bə̀ Sɛtɛ. ⁴Adama dwã nɛ́ ń wɛ̀rhɛ́ ń gə́ lùl Sɛtɛ kwã nɛ́ mɔ́ yàl byinə zɔ̌m lyɛlɛ ; n lù bala byǎ ǹdə́ kana byǎ. ⁵Adama dwã nɛ́ ń wɛ̀rhɛ́ mɔ́ gakó yàl byinə zɔ̌m nə̀bɔ́ ǹdə́ shɛ́-ètɔ̀ ; n zɛ̃̀ n mə n cì.⁶Sɛtɛ wɛ̀rhɛ́ byinə shí-ènu, n lù Enɔshɛ. ⁷Sɛtɛ gə́ lùl Enɔshɛ kwã nɛ́, n zɛ̃̀ n wɛ̀rhɛ́ byinə zɔ̃̌-lyɛlɛ ǹdə́ nyàlpyɛ̀ ; n lù bala byǎ ǹdə́ kana byǎ. ⁸Sɛtɛ dwã nɛ́ ń wɛ̀rhɛ́ mɔ́ gakó yàl byinə zɔ̃̌-nə̀bɔ́ ǹdə́ shí ǹdə́ nə̀lyè ; n zɛ̃̀ n cì.⁹Enɔshɛ tú n nə byinə shə́-nə̀bɔ́, n lù Kəna. ¹⁰Enɔshɛ gə́ lùl Kəna kwã nɛ́ ń wɛ̀rhɛ́ byinə zɔ̃̌-lyɛlɛ ǹdə́ shí ǹdə́ nə̀nu ; n zɛ̃̀ n lù bala byǎ ǹdə́ kana byǎ. ¹¹Enɔshɛ dwã nɛ́ ń wɛ̀rhɛ́ mɔ́ gakó yàl byinə zɔ̃̌-nə̀bɔ́ ǹdə́ nə̀nu ; n zɛ̃̀ n mə n cì¹²Kəna wɛ̀rhɛ́ byinə shə́-shàlpyɛ̀, n lù Mələlyəə. ¹³Kəna gə́ lùl Mələlyəə kwã nɛ́ n wɛ̀rhɛ́ byinə zɔ̃̌-lyɛlɛ ǹdə́ shí-èna ; n lù bala byǎ ǹdə́ kana byǎ. ¹⁴Kəna dwã nɛ́ gakó yàl byinə zɔ̌m-nə̀bɔ́ ǹdə́ shíyə́ ; n zɛ̃̀ n mə n cì.¹⁵Mələlyəə wɛ̀rhɛ́ byinə shə́-shàlpyɛ̀ ǹdə́ nə̀nu, n lù Zhərɛdɛ. ¹⁶Mələlyəə yə̀ nɛ́, Zhərɛdɛ lùl kwã nɛ́, n wɛ̀rhɛ́ byinə zɔ̃̌-lyɛlɛ ǹdə́ shə́-ètɔ̀, n lù bala byǎ ǹdə́ kana byǎ. ¹⁷Mələlyəə dwã nɛ́ gakó yàl byinə zɔ̃̌-lyɛlɛ ǹdə́ shə́-nə̀bɔ́ ǹdə́ nə̀nu, n zɛ̃̀ n mə cì.¹⁸Zhərɛdɛ wɛ̀rhɛ́ byinə shə́-shə̀ldù ǹdə́ nə̀lyè ; n lù Enɔkɛ. ¹⁹Zhərɛdɛ yə̀ nɛ́, Enɔkɛ kùl kwã nɛ́, n wɛ̀rhɛ́ byinə zɔ̃̌-lyɛlɛ ; n lù bala byǎ ǹdə́ kana byǎ. ²⁰Zhərɛdɛ dwã nɛ́ gakó yàl byinə zɔ̃̌-nə̀bɔ́ shə́-shə̀ldù ǹdə́ nə̀lyè ; n zɛ̃̀ n mə n cì.²¹Enɔkɛ wɛ̀rhɛ́ byinə shə́-shàlpyɛ̀ ǹdə́ nə̀nu, n lù mətəsəshəla. ²²Mətəsəshəla lul kwã nɛ́ ; Enɔkɛ vò ǹdə́ Yi byinə zwã̌-tɔ̀ ; n zɛ̃̀ n lù bala byǎ ǹdə́ kana byǎ. ²³Enɔkɛ dwã nɛ́ gakó yàl byinə zwã̌-tɔ̀ ǹdə́ shə́-shàlpyɛ̀ ǹdə́ nə̀nu. ²⁴Enɔkɛ zhə̀l ǹdə́ Yi, rə̀myɛ́ kwã nɛ́ ń kə́ ń yə̀ nɛ́ yàl yé, bə̀ Yi kwè mo.²⁵Mətəsəshəla wɛ̀rhɛ́ byinə zɔ̌m ǹdə́ shə́-lyɛlɛ ǹdə́ nyàlpyɛ̀, n lù Ləmɛkɛ. ²⁶Mətəsəshəla yə̀ nɛ́, Ləmɛkɛ lul kwã nɛ́ n wɛ̀rhɛ́ byinə zɔ̃̌-nyàlpyɛ̀ ǹdə́ shə́-lyɛlɛ ǹdə́ nə̀lyè ; n zɛ̃̀ n lù bala byǎ ǹdə́ kana byǎ. ²⁷Mətəsəshəla dwã nɛ́ gakó yàl byinə zɔ̃̌-nə̀bɔ́ ǹdə́ shə́-shǝ̀ldù ǹdə́ nə̀bɔ́ ; n zɛ̃̀ n mə n cì.²⁸Ləmɛkɛ wɛ̀rhɛ́ byinə zɔ̌m ǹdə́ shə́-lyɛlɛ ǹdə́ nə̀lyè, n lù byǐ. ²⁹N ce ń yil bə̀ Nəwee, n wɔ̀ : Mɔ̀bɔ́ èta mɔ́ mà n shíshéré nə́ wun ni nə́ lyààrɛ́ ǹdə́ nə́ jɛ̃̀-tumǝ né nə́ n’é nwɛ̀nɛ̀ nə́ m’é twĩ̀ nə̀ shí cɛ y kɛ̀bɛ́ Bə-zhɔ̌-zhe zhìlì è yò wẽ́ mó.³⁰Ləmɛkɛ yàl nɛ́, Nəwee lul kwã nɛ́ n wɛ̀rhɛ́ byinə zwã̌-nu ǹdə́ shə́-nə̀bɔ́ ǹdə́ nə̀nù ; n zɛ̃̀ n lù bala byǎ ǹdə́ kana byǎ. ³¹Ləmɛkɛ dwã nɛ́ gakó yàl byinə zɔ̃̌-nyàlpyɛ̀ ǹdə́ shə́-shàlpyɛ̀ ǹdə́ nyàlpyɛ̀ ; n zɛ̃̀ n mə n cì.³²Nəwee wɛ̀rhɛ́ byinə zwã̌-nu, n lù Sɛmɛ ǹdə́ Shamɛ ǹdə́ Zhafɛ.

¹1 Lyì bí gə́ tú bə ji kùr bə̀ n’ê pùl cɛ y yó mó yi ní, bə̀ zɛ̃̀ bə̀ lù kana byǎ, ²rə̀myɛ́ yó né, Yi byǎ bɛ́ zɛ̃̀ bə pwírí lyì bí bə̀kwá bɛ́ wɔ́ bwə̃́ə̃́, bə zɛ̃̀ bə zù bə̀ cəcəl w bə cír byɛ̀bɛ́ gakó bə̀ ŋwɛ́nɛ́ mɔ́ bə̀ zə bɛ bǝ yə̀ bə̀ kana bə jí. ³Rə̀myɛ́ yó né, Bə-zhɔ̌-zhe zɛ̃̀ n wɔ̀ : À t’â la à éshìrhə́ né ne yõ̌ numbyíní wẽ́ gaga yil yé, bə̀ numbyíní wɔ́ yala kɔn dúdú, sə è byinə né b’a yə̀ zɔ̌m ǹdə́ shí-èlyè.⁴Lyì y’à ŋwɛ́nɛ́ cɛ yó rə̀myɛ́ yi ní, bə̀ n’ê byìl nándə̀dwààlɛ dɛ̃̌dɛ̃̌, Yi byǎ bɛ́ gə́ tú bə zù ǹdə́ numbyínsí bə̀kwá bə̀ m’e lù byǎ mɔ́ yi ní mú : wɔ́ kã̀dar rɛ́ rə̀myɛ́ rə̀ y’à ŋwɛ́nɛ́ shãã ga rə̀myɛ́ yi ní mú.⁵Bə-zhɔ̌-zhe zɛ̃̀ n pwírí numbyínsi lwɛlɛ tumə né zɛ̃̀ nǝ̀ já dɛ̃́dɛ̃́ cɛ yó, dɛ̃ gakó bə̀ wun ní bùlə̀ né j’â wɔ́ lwɛlɛ dúdú nə̀ n’ê bùlə́. ⁶Bə-zhɔ̌-zhe kə́ ń yə̀l kɔn dɛ̀bɛ́ è ce n wɛ̀rhɛ́ numbyíní n cĩ́ cɛ yé, ń wu j’a zhìlì ń wẽ́.⁷Bə-zhɔ̌-zhe zɛ̃̀ n wɔ̀ : à m’a ce numbyíní y à wɛ̀rhɛ́ mɔ́ jé tɛ̃́ cɛ y yó, kɔn ji kùr ǹdə́ numbyíní, e vò vwàmá nɛ́, ǹdə́ wẽ̀ ré tɛ̀bɛ́ rə̀ n’ê fwàl tɛ̃́ ǹdə́ rə̀ pǔrh mó, ǹdə́ dɛ̃̌ yi kúmsí ; b’à yə̀l kɔn dɛ̀bɛ́ è ce a wɛ̀rhɛ́ rɛ yé. ⁸Sə wɔ́ Nəwee, Bə-zhɔ̌-zhe nɔ ǹdə́ sónó ń sú ń yírhə́.⁹Nyǐ-nə Nəwee shĩ y rí. Nəwee yà ń wɔ́ wu-cángá ǹdə́ zhə̀n cə́bal ń yi ní ; Nəwee y’ǎ nə́ ń zhə̀l ǹdə́ Yi. ¹⁰Nəwee lùl byǎ bə̀tɔ̀ : è yàl, Sɛmɛ ǹdə́ shamɛ ǹdə́ Zhafɛ.¹¹Cɛ y y’à sú ǹdə́ yǔyǔ tumə Yi yé né, cɛ y sú ǹdə́ jàn tumə. ¹²Yi zɛ̃̀ rə nyǐ cɛ yá, rə pwírí è wɔ́ yǔyǔ tumə ; bə̀ numbyíní gakó y’à ce è sɔ́má y wɔ́ yǔyǔ nyǎ cɛ y yó.¹³Rə̀myɛ́ yó né, Yi zɛ̃̀ rə wɔ̀ Nəwee ne : Àmyɛ́ gu à wẽ́ bə̀ numbyíní gakó yò zhɛ̀ ; bə̀ cɛ y gakó sú ǹdə́ jàn tumə ; nyǐ à la bə̀ gakó yò zhùlù ǹdə́ cɛ y ga. ¹⁴Rə̀myɛ́ yilə, fwar kùlkṍ ǹdə́ gopher dǎr ; sə́ ce o zə jìrh ò wẽ́ ń pɛ̃ ; zə mɔ ń mə́ fwàl ò wu w ǹdə́ ò pwẽ̀nè mó. ¹⁵Nyǐ ǹ gə́ la w nɛ́ wɔ̀rhɔ́ : Ce kùlkṍ w dwɛ̀lɛ̀ rɛ́ yə̀ jə̀-tórhó yírhə́ zwã̌-tɔ̀, ò wàn rɛ́ yə̀ jə̀-tórhó yírhə́ shí-ènu, sə ò yó dɛ̃̌ zhìyə́ y yə̀ jə̀-tórhó yírhə́ shə́-ètɔ̀.¹⁶Vǔr cìzhɛ̃̌ rə̀dù, jə̀-tórhó yírh rə̀dù, kùlkṍ w yə́-pɛ̀lɛ́ wa ; vǔr nyí rə̀dù kùlkṍ w sarh nɛ ; Fwar rɛ jìrh sǝ̀tɔ̀; Ń zhili zhilí si dwã yó sǝ vò dɛ̃̌. ¹⁷Sə wɔ́ àmyɛ́, à la ce dwà nánfwɛ̀lɛ̀ nyɔ̀ cɛ y yó, e zhìlì numbyíní kɛ̀bɛ́ gakó è zhe nyǔ è n’ê shǐrh lũ w mó gakó ; kɔn dɛ̀bɛ́ gakó rə̀ ŋwɛ́nɛ́ cɛ y yó mó gakó yò b’a zhìlì.¹⁸Sə à b’a zə à dɔbrɛ́ ǹdə́ ǹmyɛ́ ; ǹ b’a zù kùlkṍ w wə, ǹmyɛ́ ǹdə́ ǹ byǎ bɛ́, ǹdə́ ǹ kɛ̃ mɔ́, ǹdə́ ǹ byǎ bɛ́ kana bɛ́ bə̀ ŋwɛ́nɛ́ ǹdə́ mɔ́ mɔ́. . ¹⁹Ka kɛ̀bɛ́ gakó è zhe nyǔ è n’ê shìrhə́, numbyíní gakó, zə rɛ rə̀lyè rə̀lyé rə̀ dwí rí ni, ń ce kùlkṍ w wə, mùnì ga rə yə̀ nɛ́, rə tó mó rə zə myə̌l : s’e yə̀ námbya èdù ǹdə́ nã́nyɔ̃̀ òdù.²⁰Kúmsi sə̀ dwí rí ni, vwàmá nə̀ dwí rí ni, ǹdə́ tɛ̀bɛ́ rə̀ n’ê fwàl tɛ̃́ ǹdə́ rə̀ pǔrh mú rə̀ dwí rí ni, rə̀lyè rə̀ dwí ni gakó rə̀ bàn ǹ sono, mùnì ga ń zwẽ re rə zə nyǔ. ²¹Sə è gə wɔ́ ǹmyɛ́ yilə, kwě kùjú kɔ̀bɔ́ gakó ò n’ô jí mú, ń cĩ́ dɛ̃̌ ǹ nyí ni, ò yə̀ ǹmyɛ́ ǹdə́ bə̀myɛ́ ga kùjú. ²²Wɔ́ èta Nəwee wɛ̀rhɛ́ nɛ́ : ń wɛ̀rhɛ́ kɔn dɛ̀bɛ́ gakó Yi pɔ mɔ nyí bə̀ ń wɛ̀rhɛ́ mɔ́.

¹Bə-zhɔ̌-zhe wɔ̀ Nəwee ne : Zú kùlkṍ w wə, ǹmyɛ́ ǹdə́ ǹ kɛ̀lɛ́ y gakó ; bə̀ wɔ́ ǹmyɛ́ à nɔ ǹ wɔ́ wu-càngá cə́bal lũ w kɔ̀bɔ́ èta mɔ́ lyì bí cəcəl wə. ²Zə vwǎm námbya ǹdə́ nã́nyɔ̃̀ tɛ̀bɛ́ rə̀ wɔ́ warhgáá kùrə̀ tàlpyɛ̀ ń bə̀ ǹ nyí ni, námbya ǹdə́ ò nã́nyɔ̀; ń zə tɛ̀bɛ́ rə̀ də̀ wárhgáá mɔ́ myɛ, námbya ǹdə́ ò nã́nyɔ̃̀; ³ń zə dɛ̃̌ yi w kúmsí myɛ námbya ǹdə́ nã́nyɔ̃̀, kùrə̀ tàlpyɛ̀, ń bà, mùnì ga sə̀myɛ dwí rí yə̀ nɛ́, rə̀ b’a jé cɛ y gakó yó yé.⁴Bə̀ kɔn gwẽ̌ dǎl dwã nyàlpyɛ̀, à la ce dwà nyɔ̀ dwã shə́-èna ǹdə́ cəcɛrh shə́-èna, a zɛ̃̀ a cɔ̀ wò-nyìr rí tɛ̀bɛ́ à wɛ̀rhɛ́ cɛ y yó mó gakó. ⁵Nəwee wɛ̀rhɛ́ kɔn dɛ̀bɛ́ Bə-zhɔ̌-zhe pɔ mɔ nyí bə̀ ń wɛ̀rhɛ́ mɔ́ gakó.⁶dwà nɛ̃̌ mɔ́ nánfɔ̀lɔ̀ w gə́ zhìlì lũ w mú ǹdə́ Nəwee yà ń zhe byinə zɔ̃̌-nyə̀ldù. ⁷Nəwee zɛ̃̀ n zù kùlkṍ w wə, ǹmyɛ̌ ǹdə́ ń kɛ̃ mɔ́, ǹdə́ ń byǎ bɛ́, ǹdə́ ń byǎ bɛ́ kana bɛ́, mùnì ga n mə n lú də̀-nàná bɛ́ dwà nɛ̃̌ mɔ́ nánfɔ̀lɔ̀ w mə̀ zhìlì lũ w mú yé né.⁸N zə vwàmá nɛ́ nyɛ̀bɛ́ nə́ wɔ́ wárhgáá mɔ́ ǹdə́ nyɛ̀bɛ́ nə̀ də̀ wárhgáá mɔ́, ǹdə́ kúmsí, ǹdə́ wẽ̀ tɛ̀bɛ́ rə̀ n’ê shǐrh rə̀ nyínyìmí cɛ y yó mó gakó, ⁹rə tó Nəwee ne rə zù kùlkṍ w wə, rə̀lyè rə̀lyè, námbya èdù ǹdə́ nã́nyɔ̃̀ òdù, kɔn tó ǹdə́ Yi gə́ y’à pɔ nyí rí Nəwee ne né. ¹⁰Dwà nàná bɛ́ bə̀ zhìlì lũ w mú kwã nɛ́, e wɛ̀rhɛ́ dwã nyàlpyɛ̀ cɛ y yó.¹¹Byinə zɔ̃̌-nyə̀ldù nyǎn rɛ́ byin rí, Nəwee yi ní mú, rə̀ cànsɛ sə̀lyè nyǎ y dwã shí-ǹdə́-nyàlpyɛ̀ dɛ̃ rɛ́, dɛ̃ rɛ́ rə̀myɛ́ yù w gɔ́rɔ́ w nánfɔ̀lɔ̀ w nánlyilyùmú w nə̀-bùlsí j’a púrh, dɛ̃̌ yi rí bwə̀ə̀lé j’a pul. ¹²Dwà y j’a zɛ̃̀ e nyɔ̀ dwã shɛ́-èna ǹdə́ cəcɛrh shɛ́-èna.¹³Dɛ̃ rɛ́ rə̀myɛ́ yù w Nəwee ǹdə́ sɛmɛ ǹdə́ shamɛ ǹdə́ Zhafɛ ǹdə́ Nəwee kɛ̃ mɔ́ ǹdə́ ń byǎ bɛ́ kana bɛ́ bə̀tɔ̀ y zù kùlkṍ w wə : ¹⁴bə̀myɛ́, e súlí vwàmá nɛ́, nə̀myɛ nə́ dwí rí ni gakó, vwǎm mə̀ dwí ni gakó, dɔma byɛ̀bɛ́ bə̀ n’ê fwàl tɛ̃́ ǹdə́ nə̀ pǔrh mú, nə̀ dwí rí ni, ǹdə́ kúmsí gakó sə̀myɛ sə̀ dwí rí ni, kúmsí námpɔ́lsɛ́ gakó, shɛ̀bɛ́ gakó sə̀ zhe vɔ̀mɛ̀ mɔ́.¹⁵Tó rə zù kùlkṍ w w Nəwee sono, rə̀lyè rə̀lyè, tɛ̀bɛ́ gakó rə̀ wɔ́ yala rə̀ zhe nyǔ shíshə̀rhə́. ¹⁶Rə̀ zù kùlkṍ w wə, námbya ǹdə́ nã́nyɔ̃̀, tɛ̀bɛ́ rə̀ wɔ́ yala dwí gakó, kɔn tó ǹdə Yi gə́ y’à pɔ nyí rí Nəwee ne né. Bə-zhɔ̌-zhe zɛ̃̀ n pyi bòlò w Nəwee nyí ni.¹⁷Dwà y nàná bɛ́ bə̀ zhìlì lũ w mú wɛ̀rhɛ́ dwã shɛ́-èna cɛ y yó. Nàná bɛ́ bɔrh, bə zhẽ̌ kùlkṍ w bə ce dɛ̃̌, o zɛ̃̀ o zhǐ cɛ y yə́-pɛ̀lɛ́ wa. ¹⁸Nàná bɛ́ zɛ̃̀ bə ce jɛ̃́ɛ̃́ nɛ bə bɔrh dɛ̃́dɛ̃́ cɛ y yó, kùlkṍ w zɛ̃̀ ò wɔ nàná bɛ́ yó w ò n’ô jíjílí.¹⁹Nàná bɛ́ j’a zɛ̃̀ bə̀ n’ê súlí bə̀ ce jɛ̃́ɛ̃́ nɛ gaga, ce pyàr rɛ́ tɛ̀bɛ́ rə̀ wɔ dɛ̃̌dɛ̃̌ cɛ y yó mó mɔ́lɛ́. ²⁰Nàná bɛ́ zɛ̃̀ bə mɔ́lɛ́ pyàr rɛ́ rə bə lyɛ̃ bə yí də̀-tórhó yírhə́ shí-ǹdə́ rə̀nu.²¹Rə̀myɛ́ yi ní, kɔn dɛ̀bɛ́ rə̀ zhe shíshə̀rhə́ rə̀ n’ê nyínyìmí mú gakó cì, è wɔ́ kúmsí, è wɔ́ vwàmá nɛ́, è wɔ́ vwàmá nánfwààlɛ́, è wɔ́ tɛ̀bɛ́ rə̀ n’ê fwàl tɛ̃́ ǹdə́ rə̀ pǔrh mó, ǹdə́ numbyínsí mú gakó cì. ²²Kɔn dɛ̀bɛ́ gakó rə̀ y’à zhe shíshə̀rhə́, nyǔ shíshə̀rhə́ rə̀ myə̀lə́ wə, rə zɛ̃̀ rə̀ ŋwɛ́nɛ́ cɛ y yó mó, kù, rə̀ cì.²³Wẽ̀ ré tɛ̀bɛ́ rə̀ y’à ŋwɛ́nɛ́ cɛ y yó mó gəkó j’a zhìlì, kɔn zhí numbyínsí e m’e yí vwàmá nɛ́, ǹdə́ tɛ̀bɛ́ rə̀ n’ê fwàl tɛ̃́ ǹdə́ rə̀ pǔrh mó, ǹdə́ dɛ̃̌ yi kúmsí : rə j’a zhìlì cɛ y yó. E dǎl Nəwee ǹdə́ kɔn dɛ̀bɛ́ rə̀ y’à tó mo rə̀ ŋwɛ́nɛ́ kùlkṍ w wẽ́ mó dúdú. ²⁴Nàná bɛ́ j’a yə̀ jɛ̃́ɛ̃́ nɛ cɛ y yó, bə wɛ̀rhɛ́ dwã zɔ̌m ǹdə́ shí-ènu.

¹Yi zɛ̃̀ rə lyǐrh Nəwee ǹdə́ vwàmá nɛ námpɔ́lsɛ́ ǹdə́ nánfwààlɛ́ rə̀ tó mo rə̀ ŋwɛ́nɛ́ kùlkṍ w wẽ́ mó yò ; Yi zɛ̃̀ rə ce zho fùrh cɛ y yó, nàná bɛ́ j’a bə̀ tɛ̃́. ²Rə̀myɛ́ yó né, gɔ́rɔ́ w nánfɔ̀lɔ̀ w nánlyilyùmú w nə̀-bùlsí ǹdə́ dɛ̃̌ yi rí bwə̀ə̀lé j’a pyi, dwà y k’ê yə̀ dɛ̃̌ shí e nyɔ̀ yé. ³Nàná bɛ́ j’a dùr cɛ yó bə twẽ̌ twẽ̌ bə bǝ̀ tɛ̃́ gaga, bə bɔ̀ dwã zɔ̌m ǹdə́ shí-ènu wẽ́.⁴E wɛ̀rhɛ́ cànsɛ shàlpyɛ̀. È cànsɛ̀ shàlpyɛ̀ nyǎ y dwã shí-ǹdə́-nyàlpyɛ́ yùwə̀, kùlkṍ w bə̀ o zhì Araratɛ pyàr rɛ́ yó. ⁵Nàná bɛ́ j’a bɔ̀ námpɔ́lɛ́ námpɔ́lɛ́ kɔn m’e yí cànsɛ shí nyǎ yá. Cànsɛ shí nyǎ y dɛ̃ nã́yéé ré yùwə̀, pyàr rɛ́ ywẽ́ né du pwẽ̀ né.⁶E dwã shɛ́-èna yùwə̀, Nəwee zɛ̃̀ n pul kùlkṍ w cì-jɛ̃́ rɛ́ ń yá ń vùr kùlkṍ w sarh rɛ́ nɛ́ mɔ́. ⁷N zɛ̃̀ n vùr kɔ̀rhɔ̀ o du, ò y’a vò o k’a kwɛ̃̀, èta èta, kɔn m’e yí nàná bɛ́ wĩ, cɛ yó e jǐrh cə-kùlì.⁸N zɛ̃̀ n kə́ n vùr épwèné myɛ du, ń la n nyǐ ǹdə́ nàná bɛ́ gə bɔ̀ cɛ y yó. ⁹Sə épwèné y yə̀ jàà èdú ga nɛ́ sə e cĩ́ è nà nɛ́ yé, ce e k’a kwɛ̃̀ e bàn kùlkṍ w wə, bə̀ nàná bɛ́ y’à ŋwɛ́nɛ́ cɛ y gakó yó. Nəwee vùr ń jɛ̃̀, n zə y n ce kùlkṍ w wə, ń sono.¹⁰N kə n dɛ̃̀ dwã nyàlpyɛ̀ dwã kə́dò, n zɛ̃̀ n kə́ n vùr épwéné y n dwĩ̀ pwẽ̀ ne. ¹¹Rə̀myɛ́ yó né, épwéné y k’â bàn ń sono də̀dɛ̀nɛ́, n pwírí olyivye vɔ òdù o tɔr ò ŋwɛ́nɛ́ è nyú wə. Rə̀myɛ́ yó né, Nəwee zɛ̃̀ n lwar bə̀ nàná bɛ́ bɔ̀ cɛ y yó. ¹²N kə́ n dɛ̃̀ dwã nyàlpyɛ̀ dwã kə́dò ; n vùr épwéné n dwĩ̀. Sə è k’ê yə̀ kwɛ̃̀ e bə̀ ń sono yé.¹³Byinə zɔ̃̌-nyə̀dù ǹdə́ rə̀dù byin rí, cànà nã́yə́ə́ y dɛ̃ nã́yéé ré yùwə̀, nàná bɛ́ wĩ cɛ y yó e kù. Nəwee zɛ̃̀ n pul ku w ò pyi kùlkṍ w mó : n nyǐ cɛ yá, n pwírí è gakó kùlə̀. ¹⁴È cànsɛ sə̀lyè nyǎ y dwã shí-èlyè ǹdə́ nyàlpyɛ̀ y yùwə̀, cɛ y gakó j’a kù.¹⁵Rə̀myɛ̀ yó né, Yi zɔ̀m ǹdə́ Nəwee rə wɔ̀ : ¹⁶Du kùlkṍ w wə, ǹmyɛ́ ǹdə́ ǹ kɛ̃ mɔ́, ǹdə́ ǹ byǎ bɛ́, ǹdə́ ǹ byǎ bɛ́ kana bɛ́ bə̀ tó mó bə̀ ŋwɛ́nɛ́ mɔ́. ¹⁷Ce vwàmá nɛ́ dwí tɛ̀bɛ́ gakó rə̀ tó mó rə̀ ŋwɛ́nɛ́ mɔ́, kúmsí ga, ǹdə́ vwàmá ga, ǹdə́ tɛ̀bɛ́ rə̀ n’ê fwàl tɛ̃́ ǹdə́ rə̀ pǔrh cɛ y yó ga tó mó rə du : rə làà cɛ y yó, rə lù byǎ rə pù rə sú cɛ yá.¹⁸Nəwee zɛ̃̀ n du, ǹmyɛ̌ ǹdə́ ń byǎ bɛ́ ǹdə́ ń kɛ̃ mɔ́ ǹdə́ ń byǎ bɛ́ kana bɛ́. ¹⁹Ǹdə́ vwàmá nɛ́ gakó, ǹdə́ tɛ̀bɛ́ rə̀ n’ê fwàl tɛ̃́ cɛ yó ǹdə́ rə̀ pǔrh mú gakó ǹdə́ kúmsí gakó ǹdə́ wẽ̀ tɛ̀bɛ́ rə̀ zhe nyǔ rə̀ n’ê nyínyìmí cɛ yó gakó, kɔn gakó ǹdə rə̀ dwí gə́ wɔ́ nɛ́ mɔ́, nyí rí j’a du kùlkṍ w wə.²⁰Nəwee zɛ̃̀ n lù vwĩ̀-jùlú n pə Bə-zhɔ̌-zhe ne ; n zə vwàmá nɛ́ nyɛ̀bɛ́ gakó nə́ wɔ́ wárhgáá mɔ́ ǹdə́ kúmsí shɛ̀bɛ́ sə̀ wɔ́ wárhgáá mɔ́ gakó n mə n zwə́l vwə̃̀ námpúmə́ cɛ̃́ɛ̃́ vwĩ̀-jùlú w yó. ²¹Vwə̃̀ né lwẽ́ ré yí Bə-zhɔ̌-zhe sono rə zə nyàn n zwẽ re, n zɛ̃̀ n wɔ̀ ń wu w wẽ́ n wɔ̀ : Numbyíní yilə, à k’â t’â la bwəl námməlwɛlɛ bwəl a pə cɛ y nɛ kə́dò yé, bə̀ numbyíní bùlə̀ né wɔ́ námməlwɛ̀lɛ́ è bə̀sɔ́nɛ́ yi ní ga ; rə̀myɛ́ ce, kɔn rɛ́ dɛ̀bɛ́ à wɛ̀rhɛ́ gakó, rə̀ wɔ́ kɔ̀-nyì mú, à k’â t’â la còrhò-tum pɔ ǹdə à gə́ wɛ̀rhɛ́ nɛ́ ta yé. ²²Cɛ y gə j’â zhǐ gaga, sə́ nyǐ twã́ du ǹdə́ jòró, wàr ǹdə́ cə-lumu, shí ǹdə fɔ̀, cəcɛ̃ ǹdə́ nə̀nyɔ́nɔ́ b’a j’a ŋwɛ́nɛ́ rə̀ t’â la kwǎrh gaga yé.

¹Yi zɛ̃̀ rə cĩ́ bwəl Nəwee ǹdə́ ń byǎ bɛ́ yó, rə wɔ̀ bɛ : Lúl-nə byǎ, á pù á sú cɛ yá. ²Lwar-na, bə̀ cɛ yó vwǎm gakó, dɛ̃̌ yi kúmí gakó, kɔn dɛ̀bɛ́ rə̀ n’ê shǐrh rə̀ nyínyìmí cɛ yó gakó, ǹdə́ nə̀-fɔ̀lɔ̀ w mɔ́mɔ̌rhsɛ́ gakó, b’a dùr á ywẽ rə nyɛ̀ ába : Wɔ́ ámyɛ̌ jɔ̃̀ w bə̀ co re né.³Kɔn dɛ̀bɛ́ rə̀ zhe nyǔ rə̀ n’ê nyínyìmí mú b’a yə̀ à nyí-kùjú : À n’â pɛ rə̀myɛ́ ǹdə gɔ nã́lyɔ̀ ta. ⁴Sə wɔ́ nǎm mɔ̀bɔ́ nyǔ ŋwɛ́nɛ́ mə́ wẽ́ gwẽ̌, jal gwẽ̌ ŋwɛ́nɛ́ mə̀ wẽ́ mó dúdú á bə mə̌ s’á dɔ̃̀ gaga yé.⁵Lwar-na rɛ myɛ, bə̀ à m’a bwə̀rh á jal tɛ̃́ ló mó bwə̀rhə́, à m’a bwə̀rh mə̀ bwə̌rh vwǎm gakó ne ; à m’a bwə̀rh numbyíní jal yò numbyíní ni, numbyíní y è wɔ́ è da-byǐ mú ni. ⁶Lò gə ló numbyíní jal tɛ̃́, wɔ́ rə̀myɛ́ dɛnnɛ ńmyɛ jal m’a tó né mə ló tɛ̃́ ; bə Yi wɛ̀rhɛ́ numbyíní e nyɛrhɛ ǹdə́ rə̀ ta. ⁷Sə ámyɛ̌ lul-nə byǎ á pù á làà cɛ y yó, á sú è yó.⁸Yi k’e n zɔ̀m ǹdə́ Nəwee ǹdə́ ń byǎ bə̀ ŋwɛ́nɛ́ mɔ mɔ́ rə wɔ̀ : ⁹Nyǐ, à la dɔbrɛ zal ǹdə́ ába, ǹdə́ á nɛ̀mɛ́ nɛ́ nə̀ bàn ámyɛ̌ kwã nɛ́ mɔ́ ; ¹⁰ǹdə́ kò-nyìr rí tɛ̀bɛ́ rə̀ ŋwɛ́nɛ́ ǹdə́ ába mɔ́ gakó, kúmsí ǹdə́ vwàmá nɛ́ nánfwààlɛ́ ǹdə́ námpɔ́lsɛ́ gakó cɛ y yó mó, è gə wɔ́ tɛ̀bɛ́ rə̀ du kùlkṍ w wẽ́ mó, è gə wɔ́ vwàmá nɛ́ cɛ y yó mó, wɔ́ rə̀myɛ́ gakó yil dɔbrɛ́ zɔwa.¹¹A n’â zal à dɔbrɛ́ ǹdə́ ába ; nɛ̃̌ mɔ́ nánfɔ̀lɔ̀ k’ê t’â la numbyíní èdù ga zhìlù yé, nɛ̃̌ nánfɔ̀lɔ̀ k’ê t’â bàn cɛ y zhìlù yé. ¹²Yi zɛ̃̀ rə wɔ̀ : Wɔ́ dɔbrɛ́ à n’â zal ǹdə́ ámyɛ̌ ǹdə́ kɔ̀-nyì dwí gakó cəcəl w byinə nə̀ bə zhɔ̌ yil mó, nyǐ rə̀ nyɔrhɔ w kɔn nyɔ̀nɔ̀ èta à la byilu : ¹³À cĩ́ à twã dɛ̃̌ ébɔ̃ w wa, è la yə̀ dɔbrɛ nyɔrhɔ kɔn àmyɛ́ ǹdə́ cɛ y bwə̌l wə ;¹⁴à gə tú à co bə́bán dwã yó dɛ̃̌ cɛ y yə́-pɛ̀lɛ́ wa, twã y m’a du bə́bɔ̃ w wa, ¹⁵à m’a lyǐrh à dɔbrɛ́ àmyɛ́ ǹdə́ ámyɛ̌ ǹdə́ kɔ̀-nyì gakó ǹdə́ numbyíní gakó cəcəl w mó yò, èta nàná nánfwààlɛ k’ê t’â la numbyínsí zhìlù yé.¹⁶Twã y gə duwə ; à nyǐ yə, èta à m’a lyǐrh dɔbrɛ́ rə̀ ŋwɛ́nɛ́ Yi ǹdə́ kɔ̀-nyì dwí gakó, numbyíní dwí gakó cəcəl w byinə nə̀ bə zhɔ̌ zhe mó yò. ¹⁷Yi zɛ̃̀ rə wɔ̀ Nəwee ne : tɛ̀bɛ́ èta mɔ́ wɔ́ dɔbrɛ́ à zɔ àmyɛ́ ǹdə́ numbyíní kɛ̀bɛ́ gakó è ŋwɛ́nɛ́ cɛ y yó mó cəcəl w mó.¹⁸Nəwee byǎ bɛ́ bə̀ du kùlkṍ w wẽ́ mó yàl : Sɛmɛ, Shamɛ ǹdə Zhafɛ. Wɔ́ Shamɛ ń wɔ́ Kanaã da mɔ́. ¹⁹Wɔ́ bə̀myɛ́ bə̀tɔ̀ w èta mɔ́, bə̀ yàl Nəwee byǎ bɛ́, wɔ́ bə̀myɛ́ nɛ̀mɛ́ nɛ́ nə̀ lùl byǎ bə pù cɛ y púlə́púlə́ yó mó.²⁰Rə̀myɛ́ yó né Nəwee zɛ̃̀ n ji kùr ń nə́ ń vwàl cɛ yá, ń zhele də̀vɛ̃́-cèmé né. ²¹N zɛ̃̀ nyɔ̀ də̀vɛ̃́, e zə mɔ, ń pyě ń kòrhó w w tɛ̃́ nã́lyè.²²Shamɛ, Kanaã da mɔ́, nə ń da Nəwee ǹdə́ ń pyě tɛ̃́ nã́lyè, n zɛ̃̀ n du pwẽ̀ nè n byili ri ń da-byǎ bɛ́ bə̀lyè y ne. ²³Rə̀myɛ́ yó né, Shɛmɛ ǹdǝ́ Zhafɛ zɛ̃̀ bə kwè gàmmə̀zù-èdɔ̀lɔ̀ bə jarh bə̀ pyəpyəla yó, bə̀ n’ê zhə̀l ǹdə́ bə̀ kwã, bə yí bə pyìlì bə̀ da mɔ́ ń pyě nã́lyè y mó ne ; bə̀ gə́ y’à co bə̀ yésé kwã nɛ́ mɔ́ ce bə̀ bə da nɛ nã́lyè yé.²⁴Nəwee gə́ tú n zɛ̃̀ ń də̀vɛ̃́ y è y’à zhe mó mó wẽ́ n zhɛ̀, n lwar ǹ byǐ mú námpɔ́lɛ́ y gə́ wɛ̀rhɛ́ mɔ nɛ́. ²⁵N zɛ̃̀ n wɔ̀ : Kanaã zhe bwəl námməlwɛ̀lɛ́ ! ń mà n yə̀ yóm-bal ń da-byǎ bɛ́ yómə́ bé wẽ́ !²⁶Nəwee zɛ̃̀ n kə́ n wɔ̀ : Bə-zhɔ̌-zhe yil ré nə còrhó, ń wɔ́ Sɛmɛ Yi rí mú, sə Kanaã yə̀ bə̀ yóm. ²⁷Bə̀ Yi b’a wɛ̀lɛ̀ Zhafɛ nɛrɛ́ yá, sə rə jòm Sɛmɛ kwə̀ə́rhé wə, sə Kanã yə̀ bə̀ yóm !²⁸Nàná bɛ́ nánfwààlɛ́ gə́ zhìlì lũ w kwã nɛ́, Nəwee wɛ̀rhɛ́ byinə zwã̌-tɔ̀ ǹdə́ shí-ènu. ²⁹Nəwee dwã nɛ́ ń wɛ̀rhɛ́ mɔ́ gakó yàl byinə zɔ̃̌-nə̀bɔ́ ǹdə́ shí-ènu ; n zɛ̃̀ n mə n cì.

¹Nyi-nə Nəwee byǎ bɛ́, Sɛmɛ ǹdə́ Shamɛ ǹdə́ Zhafɛ nɛ̀mɛ́ nɛ́. Nàná bɛ́ gə́ zhìlì lũ kwã nɛ́ bə̀ zɛ̃̀ bə lù byǎ.²Zhafɛ byǎ bɛ́ ń lùl mó yàl : Gɔmɛɛrɛ, Magɔgɛ, Mədəyəə, Javanɛ, Təbalɛ, Məsəshɛkɛ, ǹdə́ Təraasɛ. ³Gɔmɛɛrɛ byǎ bɛ́ ń lùl mó yàl : Asəkɛnaazɛ, Rəfwatɛ, ǹdə́ Təgarəma. ⁴Javanɛ byǎ bɛ́ ń lù mó yàl : Elisəsha, Tərəsiisi, Kitiimi ǹdə́ Dədəniimi. ⁵Wɔ́ bə̀myɛ́ byǎ bɛ́ bə̀ lùl mó, bə̀ jòm tənèsé sə̀ ŋwɛ́nɛ́ nə̀-fwààlɛ́ cəcəl w mó, e jǐrh nunə nánzhəzhɔ̌, lyì gakó ǹdə́ bə̀ cɛrh, ǹdə́ bə̀ zɔ̀mà, ǹdə́ bə̀ dwə́, ǹdə́ bə̀ tənèrh.⁶Shamɛ byǎ bɛ́ ń lùl mó yàl : Kushi, Mitəsərəyim, Puti ǹdə́ Kanaã. ⁷Kushi byǎ ń lùl mó yàl : Saba, Avəyəla, Sabəta, Rəyəma, ǹdə́ Sabətəka. Rayəma byǎ bɛ́ ń lùl mó yàl : Səba ǹdə́ Dədanɛ.⁸Wɔ́ Kushi ń lùl Nimərode myɛ ; wɔ́ ńmyɛ̌ n ju kùr n yə̀ lò mɔ̀bɔ́ ń zhe jàn cɛ yó mó. ⁹Ń yàl gɔ jílnə námbya Bə-zhɔ̌-zhe yé né ; wɔ́ rə̀myɛ́ è ce, bə̀ n’ê wə̀lə̀ : Ǹ nyɛ̌ ǹdə jílnə námbya Nimərode ta Bə-zhɔ̌-zhe yé né. ¹⁰Ń ju kùr n jí pyɛ̀lɛ̀ Babɛl, Erɛkɛ, ǹdə́ Akadɛ nɛ́, Səshiməyaarɛ tənà y wa.¹¹Ashuri wɔ́ tənà èmyɛ́ wẽ́ ń du ní ; n ji Ninivyi ǹdə́ Rəyəbɔtɛ Yir Kalashɛ, ¹²ǹdə́ Rəseene è ŋwɛ́nɛ́ Ninivyi ǹdə́ Kalashɛ bwə̌l mó w mó ; òmyɛ́ ò wɔ́ cə-fɔ̀lɔ̀ wá. ¹³Mətəsərayimi zɛ̃̀ n lù Ludimibá, Anəmyidibá, Ləyabyimibá, Nəfətuyimíbá, ¹⁴Pətərusimibá, Kasəluyimibá, wɔ́ bə̀myɛ́ wẽ́ Filisitɛ̃bá, ǹdə́ Kəfətoriyimbá kùr shí ní.¹⁵Kanaã zɛ̃̀ n lù Sədɔ̃, ń byì-yə́ə́ yə́, ǹdə́ Yɛtɛ ; ¹⁶ǹdə́ Zhəbəshɛ̃bá, ǹdə́ Amərəyɛ̃bá, ǹdə́ Gərəgashɛ̃bá, ¹⁷ǹdə́ Yəvəyɛ̃bá, ǹdə́ Arəkɛ̃bá, ǹdə́ Sənənyɛ̃bá, ¹⁸ǹdə́ Arəvəjɛ̃bá, ǹdə́ Təsəmarɛnyɛ̃bá, ǹdə́ Yamacɛ̃bá. Rə̀myɛ́ kwã nɛ́ Kanaã dwí rí zɛ̃̀ rə làà dwã nɛ.¹⁹Kanaãbá swẽ́ rɛ́ ju kùr Sədɔ̃ nɛ́, Gərarɛ vɔ̃̀ nɛ, e m’e vò Gaza, rə k’e zhì Sodome ǹdə́ Gɔmɔɔrɛ, Adama ǹdə́ Təsəbəyini, rə m’e vò Ləsəsha. ²⁰Wɔ́ bə̀myɛ́ bə̀ wɔ́ Shamɛ byǎ bɛ́, bə̀ dwə́ né, bə̀ dwə́ né, bə̀ zɔ̀mà nɛ, bə̀ zɔ̀mà nɛ, bə̀ cɛmɛ nɛ bə cɛmɛ nɛ, bə̀ tənèrh ne, bə̀ tənèrh ne.²¹Sɛmɛ myɛ lùl byǎ, wɔ́ bə̀myɛ́ gakó bə̀ wɔ́ Ebɛɛrɛ ǹdə́ Sɛmɛ zhɛ̀mbal Zhafɛ byǎ bɛ́. ²²Sɛmɛ byǎ bɛ́ ń lùl ó yàl : Elamɛ, suuri, Arəpakɛsəshadɛ, Ludi ǹdə́ Aramɛ. ²³Aramɛ byǎ bɛ́ ń lùl mó yàl : Utisi, Uli, Gətɛrɛ ǹdə́ Masəshɛ.²⁴Arəpakɛsəshadɛ zɛ̃̀ n lù : Səshəlashɛ ; Səshəlashɛ zɛ̃̀ n lù Ebɛɛrɛ. ²⁵Ebɛɛrɛ lùl byǎ bə̀lyè : mə̀dù y y’ǎ yíl Pəlɛgɛ, bə̀ ń gə̀ yàl nɛ́ yi rí, cɛ y y’à bɔ̀n dwã wa, ń byǐ mú dõ mó yà ń yíl Zhəkanɛ.²⁶Jəkətamɛ zɛ̃̀ n lù : Aləmədadɛ, Səshəlɛfɛ, Yətəsaramavɛtɛ, Jərakɛ, ²⁷Yadəramɛ, Uzhəə, Dəkəla, ²⁸Obalɛ, Abyəmayəə, Səba, ²⁹Ofiiri, Avyəla ǹdə́ Jəbabɛ. Bə̀myɛ́ gakó yàl Jəkətamɛ byǎ.³⁰Bə̀ jòm kɔn zhì Məsəsha nɛ, Səfarɛ vɔ̃̀ nɛ, kɔn m’e vò yi-púrhí sõ pyɔ̀ wá. ³¹Wɔ́ bə̀myɛ́ bə̀ wɔ́ Sɛmɛ byǎ bɛ́, bə̀myɛ bə̀ dwí ni, bə̀ dwí ni, bə̀ zɔ̀mà, bə̀ zɔ̀mà, bə̀ cɛmɛ, bə̀ cɛmɛ, bə̀ tənèrh, bə̀ tənèrh.³²Wɔ́ bə̀myɛ́ bə̀ wɔ́ Nəwee byǎ bɛ́ dwə́ né, bə̀ gə́ yàl lũ w wẽ́ bə pú pú dwã nɛ nɛ́, ǹdə́ bə̀ gə́ jòm jòm tənà tənà nɛ́. Wɔ́ bə̀myɛ́ wẽ́ lyì bí shí bə du bə̀ jòm jòm tənèsé sə̀ làà cɛ y yó mó, nàná bɛ́ gə́ zhìlì lũ w kwã nɛ́.

¹Lyì bí cɛ yó mó gakó y’à n’ê zɔ̀m zɔ̀mɛ̀ kùr rə̀dù ǹdə́ zɔ̀m-byǎ kùr rə̀dù. ²Bə̀ y’à ŋwɛ́nɛ́ yi-púrhí səta, bə zhǐr gàà mɔ́ bə yí bə nə jə́ Səshənəyaarɛ tə̀nà w bə jòm.³Rə̀myɛ́ yó né, bə̀ zɛ̃̀ bə zɔ̀m ǹdə́ dwã bə wɔ̀ : Bà-nà nə́ zɛ̃̀ ! fwə́rh-nə nə́ fwə̌rh bokwǎ, nə́ shɛ̃ bɛ ǹdə́ myǐn. Sə bokǒ mó yə̀ ǹdə bə̀ nə́kulu ta, sə malma mɔ́ yə̀ ǹdə bə̀ shǝ́má ta. ⁴Bə k’e zɔ̀m kə́dò bə̀ wɔ̀ : Bà-nà nə́ zɛ̃̀ ! lú-nə nə́ lù nə́ cə-fɔ̀lɔ̀, ǹdə́ jì èdù e vò dɛ̃̌ e zhí dɛ̃̌ yi rí ni. Èta, nə́ m’a ce nə́ yil ré du lũ w púlə́ púlə́ wə, mùnì ga nə́ bə̀k’á làà tɛ̃́ cɛ y gakó yó yé.⁵Rə̀myé yó né, Bə-zhɔ̌-zhe zɛ̃̀ n só tɛ̃́, ń la n nyǐ cɔ w ǹdə́ jì y numbyínsí byǎ bɛ́ n’ê lwì mú. ⁶Bə-zhɔ̌-zhe zɛ̃̀ wɔ̀ : Nyǐ, bə̀ mù dwã bə̀ wɔ́ dwí rə̀dù, bə̀ gakó zhe dwí zɔ̀mɛ̀ rə̀dù, wɔ́ rə̀myɛ́ è ce bə̀ zɛ̃̀ bə̀ la tum rí tũ̌ ; sə èlǎsɛ́ mɔ́, kaka k’ê wàr bə̀ yé né rə̀ la cə̌r ǹdə́ tum rí tɛ̀bɛ́ gakó bə̀ byili bə̀ bə̀ la wɔ̀rhɔ́ mɔ́ yé. ⁷Rə̀myɛ́ ce, bà-nà nə́ zɛ̃̀ ! só-nə nə́ só tɛ̃́, nə́ gùlí bə̀ dwí zɔ̀mɛ̀ rɛ́ dwã nɛ, mùnì ga bə̀ k’ê bə rə̀ kùr nyɛ̌ ǹdə́ dwã yé.⁸Bə-zhɔ̌-zhe zɛ̃̀ n làà bɛ dwã nɛ gàà mɔ́, bə vò gaga cɛ y gakó yó ; bə yẽ̌ cɔ w lú mú ni. ⁹Wɔ́ rə̀myɛ́ è ce, bə̀ n’ê byẽ̀ cɔ w òmyɛ́ bə̀ Babɛɛlɛ, bə̀ wɔ́ gàà mɔ́ Bə-zhɔ̌-zhe gùlí lyì bí cɛ yó mó gakó zɔ̀mɛ̀ rɛ́ dwã w nɛ́, wɔ́ gàà myɛ Bə-zhɔ̌-zhe làà bɛ dwã nɛ́ dɛ̃̌ cɛ y púlə́ púlə́ yó wə.¹⁰Nyǐ Sɛmɛ nɛ̀mɛ́ yilə né : Wɔ́ Sɛmɛ byinə zɔ̌m yó w ń lùl Arəpacəsəshadɛ, nɛ̃̌ mɔ́ gə́ zhìlì lũ w è byinə nə̀lyè kwã nɛ́. ¹¹Arəpacəsəshadɛ lul kwã nɛ́, Sɛmɛ wɛ̀rhɛ́ byinə zwã̌-nu ; n zɛ̃̀ n lù bala-byǎ ǹdə kana-byǎ.¹²Arəpacəsəshadɛ wɛ̀rhɛ́ byinə shɛ́-ètɔ̀ ǹdə́ nə̀nu, n lù Səshəlashɛ. ¹³Səshəlashɛ lul kwã nɛ́, Arəpacəsəshadɛ wɛ̀rhɛ́ byinə zwã̌-na ǹdə́ byinə nə̀tɔ̀, n zɛ̃̀ n lù bala byǎ ǹdə́ kana byǎ.¹⁴Səshəlashɛ wɛ̀rhɛ́ byinə shɛ́-ètɔ̀, n lù Ebɛrɛ. ¹⁵Ebɛrɛ lùl kwã nɛ́, Səshəlashɛ wɛ̀rhɛ́ byinə zwã̌-na ǹdə́ byinə nə̀tɔ̀ ; n zɛ̃ n lù bala byǎ ǹdə́ kana byǎ.¹⁶Ebɛrɛ wɛ̀rhɛ́ byinə shɛ́-èna ǹdə́ nə̀na, n lù Pəlɛgɛ. ¹⁷Pəlɛgɛ lul ré kwã nɛ́, Ebɛrɛ zɛ̃̀ n wɛ̀rhɛ́ byinə zwã̌-na ǹdə́ shɛ́-ètɔ̀ ; n zɛ̃̀ n lù bala byǎ ǹdə́ kana byǎ.¹⁸Pəlɛgɛ byinə shɛ́-ètɔ̀ yó né ń lùl Rəyu. ¹⁹Rəyu lul ré kwã nɛ́ Pəlɛgɛ wɛ̀rhɛ́ byinə zwã̌-lyè ǹdə́ byinə nə̀bɔ́ ; n lù bala byǎ ǹdə́ kana byǎ.²⁰Rəyu byinə shɛ́-ètɔ̀ ǹdə́ nə̀lyé yó né ń lùl Sərəgu. ²¹Sərəgu lul ré kwã nɛ́ Rəyu wɛ̀rhɛ́ byinə zwã̌-è-lyè ǹdə́ byinə nə̀lyè ; n lù bala byǎ ǹdə́ kana byǎ.²²Sərəgu byinə shɛ́-ètɔ̀ yó né ń lùl Nashɔɔrɛ. ²³Nashɔɔrɛ lul ré kwã nɛ́, Sərəgu wɛ̀rhɛ́ byinə zwã̌-è-lyè ; n lù bala byǎ ǹdə́ kana byǎ.²⁴Nashɔɔrɛ byinə shí-èlyé ǹdə́ nə̀bɔ́ yó né ń lùl Tərakɛ. ²⁵Tərakɛ lul ré kwã nɛ́, Nashɔɔrɛ wɛ̀rhɛ́ byinə zɔ̌m ǹdə́ shí ǹdə́ nə̀bɔ́ ; n lù bala byǎ ǹdə́ kana byǎ. ²⁶Tərakɛ byinə shí-shàlpyɛ̀ yó né ń lùl Abəramɛ, Nashɔɔrɛ ǹdə́ Aranɛ.²⁷Nyǐ Tərakɛ nɛ̀mɛ́ nɛ́ yilə né : Tərakɛ lùl Abəramɛ, Nashɔɔrɛ ǹdə́ Aranɛ. Aranɛ zɛ̃̀ n lù Lɔtɛ. ²⁸Aranɛ zɛ̃̀ n cì ń da Tərakɛ yírh wə, Uri ní, Kələde tənà y w bə̀ gə́ lùl mo mə̀gã̌.²⁹Abəramɛ ǹdə́ Nashɔɔrɛ zɛ̃̀ bə jí kana : Abəramɛ kɛ̃ mɔ́ yíl Sarayi, Nashɔɔrɛ nyǎn mɔ́ zɛ̃̀ ń yíl Mələka, Aranɛ bə̀kɔ́. Aranɛ wɔ́ Mələka ǹdə́ Zhəsəka da. ³⁰Sarayi yà ń wɔ́ kə-eju, ń yə̀ byǐ lùl gaga yé.³¹Wɔ́ rə̀myɛ́ yó né, Tərakɛ zɛ̃̀ n zə ń byǐ Abəramɛ ǹdə́ ń nyɛ̃́ Aranɛ byǐ Lɔtɛ ǹdə́ Sarayi ń byì-cɛ̃, Abəramɛ kɛ̃ mɔ́, Bə tó dwã bə du Uri ní, Kalɛdɛ tənà y wa, bə la Kanaã tənà wa. Bə vò vò bə yí Sharanɛ, bə jòm cɔ w gàà mɔ́. ³²Tərakɛ dwã nɛ́ ń wɛ̀rhɛ́ mɔ́ yàl byinə zwã̌-è-lyè ǹdə́ byinə nə̀nu, Tərakɛ zɛ̃̀ n cì Sharanɛ nɛ́ gàà mɔ́.

¹Bə-zhɔ̌-zhe wɔ̀ Abəramɛ nɛ : Du ǹ tənà y ǹdə́ ǹ da-dǒ w ǹdə́ ǹ da kɛ̀lɛ́ y wa, ń vò tənà y kɛ̀bɛ́ à la mɔ́ byilu mú wə. ²À m’a ce ńmyɛ́ yə̀ tənà nánfwɛ̀lɛ̀, à m’a cĩ́ bwəl ǹ yó ; a ce ǹ yil ré du, sə ǹ b’ǎ yə̀ bwəl nə̀-bùlì. ³À m’a cĩ́ bwəl lyì byɛ̀bɛ́ bə̀ la bwəl ǹ yó w cṹ mú yó wə, sə à b’ǎ cĩ́ bwəl námməlwɛ̀lɛ́ lyì byɛ̀bɛ́ bə̀ la bwəl námməlwɛ̀lɛ́ ǹ yó w cṹ mú yó ; sə dwə́ né cɛ yó mó gakó b’a nə bwəl ǹ wẽ́.⁴Abəramɛ zɛ̃̀ n zə Lɔtɛ n du ń la ǹdə Bə-zhɔ̌-zhe gə́ byili mu ni. Abəramɛ gə́ tú ń nə́ ń zhǐr Sharanɛ nɛ́ yó né, ǹdə́ ń zhe byinə shə́-shə̀ldù ǹdə́ nə̀nu. ⁵Ń gə́ tú ń nə́ ń zhǐr yó né, ń zɔ ń kɛ̃ Sarayi, ǹdə́ ń nyɛ̃́ mɔ́ byǐ Lɔtɛ, ǹdə́ ń jɛ̃̀-kɔn rɛ́ gakó, ǹdə́ ń tùntùnnə̀ bé byɛ̀bɛ́ ń nɔ Sharanɛ nɛ́ mɔ́. Bə zhǐr bə̀ la Kanaã tənà y wa, bə vò vò bə yí Kanaã tənà y wa.⁶Abəramɛ zɛ̃̀ n tó tənà y w n byɛ́lɛ́ byɛ́lɛ́, n yí jàà èdù wə, bə̀ n’ê byẽ̀ bə Səshɛmɛ, kɔn m’e yí More shɛ́ɛ́nɛ yá. Wɔ́ kanaã lyì bí bə̀ y’à jě tənà y wa. ⁷Rə̀myɛ́ yó né, Bə-zhɔ̌-zhe zɛ̃̀ n bə̀ n lyí Abəramɛ, n wɔ̀ : À m’a pə tənà y kɛ̀bɛ́ ǹ nɛ̀mɛ́ nɛ́ nɛ. Abəramɛ zɛ̃̀ n lù vwĩ̀-jùlú n pə Bə-zhɔ̌-zhe mó mɔ̀bɔ́ ń lyí mu mú ni.⁸N zɛ̃̀ zhì gàà n pwà ń wẽ̀ ré, n lyɛ̃ n vò pyɔ̀ w səta, Bətɛlɛ nɛ́ kɔn zǎ yi-púrhí sõ mó ; n pú ń kwə̀ə́rhé gàà, ń yẽ̌ Bətɛlɛ nɛ yi-zùr sõ, n yẽ̌ Ayi ni yi-púrhí sõ. N kə́ n lù vwĩ̀-jùlú gàà n pə Bə-zhɔ̌-zhe ne, n zɛ̃̀ n byẽ̌ Bə-zhɔ̌-zhe yil ré. ⁹Abəramɛ zɛ̃̀ n zhílí ń sɔ́má y ń nə́ ń zhə̀lə̀, n zə ń yé n zǎ Nəgɛvɛ1.¹⁰Nɔrh zɛ̃̀ mə tu tənà y wa ; Abəramɛ zɛ̃̀ n ká ń la Ezhipti, ń la vò n jòm gàà mɔ́, bə̀ nɔrh mɔ́ y’à cɛ̀ dɛ̃́dɛ̃́. ¹¹Bə̀ gə́ tú bə̀ n’ê yǎl bə̀ zù Ezhipti yi ní, n wɔ̀ ń kɛ̃ Sarayi ni : Nyìwé, à yě bə̀ ǹ wɔ́ kɛ̃ mɔ̀bɔ́ ǹ yé zwã̌ y də̀ cɛ̀nɛ̀ dwí. ¹²Ezhipti lyì bí gə nɔ mɔ́, bə̀ b’a wɔ̀ : Nyǐ wɔ́ ń kɛ̃ ! èta, bə b’a zɛ̃̀ bə gu ni, bə yẽ̌ ǹmyɛ́ nɛ. ¹³Ce à n’â lwə̀l mó sə́ wɔ̀, bə̀ ǹ wɔ́ à nəkɔ́, mùnì ga bə tə̀ ǹ yil bə zə nɛ́ cɛ̀nɛ̀, sə à myə̌l bə̀k’a shə́rh ǹmyɛ́ yil yilə.¹⁴Abəramɛ gə́ tú n yí Ezhipti y n zhɛ̀, Ezhipti lyì bí nyǐ bə pwírí kɛ̃ mɔ́ càn dɛ̃́dɛ̃́. ¹⁵Faraɔ̃ kwã-lyì fwààlɛ́ myɛ nə mɔ́, bə̀ n’ê yǎl sə n yə̀ Fwaraɔ̃ kɛ̃ ; bə zə kɛ̃ mɔ́ bə̀ m’e vò Faraɔ̃ sõ kɛ̀lɛ́ wa. ¹⁶N tə̀ Sarayi yil n zə Abəramɛ náàcɛ̀nɛ́ ; n pə pyììsi, ǹdə́ nɛ̃, ǹdə́ bə̀nerh, ǹdə́ tùntùnnə bala ǹdə́ kana ǹdə́ bə̀nə-nɛ̀rh ǹdə́ shamwə́r Abəramɛ nɛ.¹⁷Bə-zhɔ̌-zhe zɛ̃̀ n tə̀ Abəramɛ kɛ̃ Sarayi yil n pə còrhò-tum Faraɔ̃ nɛ, n ce nyəla nánfwààlɛ címí zə ńmyɛ̌ ǹdə́ ń kɛ̀lɛ́ y lyì bí. ¹⁸Rə̀myɛ́ yó né, Faraɔ̃ zɛ̃̀ n byẽ̀ Abəramɛ, n wɔ̀ : Etər ǹ wɛ̀rhɛ́ nɛ́ èta mɔ́ ? Wɔ́ bə̀kɔ́n yil ǹ yə̀ nɛ wə̀l bə̀ wɔ́ ǹ kɛ̃ mɔ́ ? ¹⁹byè yil ǹ wə̀lə̀ : wɔ́ à nəkɔ́ mɔ́ ? Wɔ́ rə̀myɛ́ yil à kwè mò ń la ń yə̀ à kɛ̃. Rə̀myɛ́ ce, èlǎsɛ̃́, nyǐ ǹ kɛ̃ mɔ́ ń zwẽ, sə lyɛ̃ ń vò ! ²⁰Rə̀myɛ́ yó né, Faraɔ̃ zɛ̃̀ n pə nyí ń lyì bí ni bə̀ bə̀ pə mɔ sɔ́má n zə ń kɛ̃ mɔ́ ǹdə́ ń kɔn dɛ̀bɛ́ ń zhe mó, n ká n mə n kwɛ̃̀ n vò.

¹Abəramɛ ká n zhì Ezhipti ní n zhǐr n zə ń kɛ̃ mɔ́ ǹdə́ Lɔtɛ ǹdə́ ń kɔn dɛ̀bɛ́ ń zhe mó gakó n mə zǎ Nəgɛvɛ. ²Abəramɛ yà ń wɔ́ nə̀cɛ̀m-bal nánfɔ̀lɔ̀ ; ń zhe vwàmá ǹdə́ sə̀byǐ ǹdə́ sánnə́má nánzhəzhɔ̌.³N zhì Nəgɛvɛ n zə n zə n yí Bətɛlɛ, n lyɛ̃ n yí ń gə́ ju kùr n pú ń kòrhó w mə̀gã̌ jàà y wa ; Bətɛlɛ ǹdə́ Ayi bwə̌l mó wẽ́ mó, ⁴ń gə́ yà ń jɛ̀rɛ̀ n lù vwĩ̀-jùlú w mə̀gã̌ mɔ́ jàà y wa. Abəramɛ zhì gàà mɔ́, n byẽ̀ Bə-zhɔ̌-zhe yil ré.⁵Lɔtɛ mɔ́ ń yà ń nə́ ń tó mó ń zhə̀l sɔ́msɛ́ mɔ́ myɛ y’ǎ zhe Pyììsi ǹdə́ nɛ̃, ǹdə́ kwə̀ə́rhe. ⁶Sə jàà y bə̀ y’à ŋwɛ́nɛ́ è wẽ́ mó y’à bə já, è yír bə̀ ga la tó dwã bə jòm né yé ; Bə̀ bə̀ jɛ̃̀-kɔn rɛ́ y’à dùm dɛ̃́dɛ̃́, ce bə̀ y’à wàr bə̀ b’a jòm dwã yó yé. ⁷Rə̀myɛ́ yó né, Abəramɛ ènɔ̀nà bɛ́ bə̀ y’à n’ê cə̀r ń vwàmá mɔ́ ǹdə́ Lɔtɛ nyə̀ná zɛ̃̀ bə̀ n’ê bwí dwã. Rə̀myɛ́ yi ní, ǹdə́ wɔ́ Kananyɛ̃bá ǹdə́ Fərəzhɛ̃bá bə̀ y’à jě tənà w gàà mɔ́.⁸Abəramɛ zɛ̃̀ n wɔ̀ Lɔtɛ nɛ : À n’â lwə̀l mó, sə búlə́ bə̀k’a yə̀ àmyɛ́ ǹdə́ ǹmyɛ́ bwə̌l w yé ; ráá à nə̀nɔ̀nà bɛ́ ǹdə́ ǹ nyə̀ná bwə̌l w yé ; bə̀ nə́ wɔ́ da-byǎ. ⁹Tənà y gakó bə ǹ yé né pyě nà ? Rə̀myɛ́ yilə, pɔr ǹdə́ nɛ : ǹ gə la jə̀gwã̀ sõ, à m’a vò jə̀-jĩ́ sõ, ǹ gə la jə̀-jĩ́ sõ, à m’a vò jə̀gwã̀ sõ.¹⁰Lɔtɛ zɛ̃̀ n kwẽ̌ ń yé dɛ̃̌ n nyǐ Zhɔrdɛ̃ vɔlɔ nyí rí púlə́ púlə́ ò gakó pyě nã́lyɔ̀. Rə̀myɛ́ yi ní, ǹdə́ Bə-zhɔ̌-zhe yà ń gwẽ̌ yə̀ Sodome ǹdə́ Gomoore zhìlì yé, vɔlɔ w pyě o m’o vò Təsəwarɛ, ǹdə Bə-zhɔ̌-zhe bɔ́ɔ́ w ta, ǹdə wɔ́ Ezhipti tənà y ta. ¹¹Lɔtɛ zɛ̃̀ n cír Zhɔrdɛ̃ vɔlɔ w nyí rí gakó, n zə ń yé zǎ yi-púrhí ń mə́ ń la. Wɔ́ èta kɔn tó né bə m’e pɔr dwã nɛ.¹²Abəramɛ zɛ̃̀ n jě Kanã tənà y wa ; Lɔtɛ vò ń jě vɔlɔ w cɛmɛ nɛ́ w n pú ń kwə̀ə́rhe gàà mɔ́, n mə n yí Sodome. ¹³Sodome lyì bí y’à wɔ́ wu-bárhɛ́ cinə́, ǹdə́ yə̀-bəlwàálɛ́ nánfwààlɛ cìnə́ Bə-zhɔ̌-zhe yé né.¹⁴Lɔtɛ gə́ pɔr ǹdə́ Abəramɛ n zhɛ̀ ; Bə-zhɔ̌-zhe wɔ̀ Abəramɛ nɛ : Zhẽ̌ ǹ yé dɛ̃̌ ǹ gə́ zhǐ mə̀gã̌ ń nyǐ kɔn zǎ lũ-jə̀gwã̀ ǹdə́ lũ jə̀-jĩ́, ǹdə́ yi-púrhí ǹdə́ yi-zùr sõ ; ¹⁵lwar bə̀ tənà y kɛ̀bɛ́ ǹ nə mɔ́ gakó mó, à la y ǹmyɛ́ ǹdə́ nɛ̀mɛ́ nɛ́ nɛ pɔ byinə nə̀ bə zhɔ̌ zhe yilə.¹⁶À b’a ce ǹ nɛ̀mɛ́ nɛ́ pù nánzhəzhɔ̌ ǹdə cɛ y shó w ta, ce lò gə wɔ̌ ń mà n gə̀ cɛ shó wə́, sə́ nyǐ ń wɔ̌ ń mà n gə̀ ǹ nɛ̀mɛ́ nɛ́ myɛ. ¹⁷Zhɛ̃̀ dɛ̃̌, tó tənà y w ń byɛ́lɛ́ è dwɛ̀lɛ̀ rɛ́ ǹdə́ è wàn rɛ́ ń nyì ; bə̀ à la m’e pɔ. ¹⁸Abəramɛ zɛ̃̀ n wǔr ń kwə̀ə́rhé, n bə̀ n jòm Mamərɛ shɛ́ɛ́nɛ́ rə̀ ŋwɛ́nɛ́ Ebərɔ̃ nyí ni mú wə. N lù vwĩ̀-jùlú tɛ̃́ gàà mɔ́ n pə Bə-zhɔ-zhe ne.

¹Rə̀myɛ́ kwã nɛ́, Shənəyaarɛ pyɔ̌ Arərafɛɛ ǹdə́ Eləzaarɛpyɔ̌ Arəyɔɔkɛ ǹdə́ Elɛmɛ pyɔ̌ Kədɔɔrɛ-Lawɔmɛɛrɛ e súlí Goyimi pyɔ̌ Tədalɛ yi ní, ²Bə̀ tú bə bə̀ bə zɛ̃̀ búlə́ ne ǹdə́ Sodome pyɔ̌ Bəre ǹdə́ Gɔmɔɔrɛ pyɔ̌ Bərəsəsha ǹdə́ Adəma pyɔ̌ Səshənəyabɛ ǹdə́ Təsəboyimi pyɔ̌ Səshəməyəbɛrɛ ǹdə́ pyɔ̌ Bəla bə̀ n’ê byẽ̀ bə̀ Təsəyarɛ mɔ́.³Pyǎ bɛ́ bə̀myɛ́ mɔ́ gakó bə̀ bə nə dwã bə̀ ŋwɛ́nɛ́ Sidimi vɔlɔ w bə̀ n’ê byẽ̀ bə̀ Nə̀kwə̃̌ nə̀-fɔ̀lɔ̀ w mɔ́ jàà y wa. ⁴Bə zù Kədɔralaɔmɛrɛ n cìní bi byinə shí ǹdə́ nə̀lyè, è byinə shí ǹdə́ nə̀tɔ̀ nyǎn rɛ́ yó né, bə̀ zɛ̃̀ bə nyààsɛ bə cẽ. ⁵Sə byinə né shí ǹdə́ nə̀na nyǎ rɛ́ yó né, Kədɔralaɔmɛrɛ ǹdə́ pyǎ bɛ́ byɛ̀bɛ́ bə̀ y’à ŋwɛ́nɛ́ ǹdə́ mɔ mɔ́, zɛ̃̀ búlə́ ne, bə ŋwɛ̀nɛ́ Rəfayimbá Asəshətərɔtɛ-Kərənayim ní, bə ŋwɛ̀nɛ́ Zuzimbá Amɛ nɛ́, bə ŋwɛ̀nɛ́ Emimbá Səshavwɛ-Kərəjətəyim ní, ⁶bə ŋwɛ̀nɛ́ Orənyɛ̃bá bə̀ Səyiri pyɔ̀ w yó, kɔn m’e yí Parã shɛɛnɛ y è ŋwɛ́nɛ́ gɔ-e-lũ èpòlò w nyí ní mú.⁷Bǝ k'a kwɛ̃̀ bǝ bǝ̀ An-Myǝshǝpatɛ, cɔ w òmyɛ́ bǝ̀ n'ê byẽ̀ myɛ bǝ̀ Kadɛɛsɛ, bǝ bú ǹdǝ́ Amǝlǝshitbá bǝ̀ cɔ w nyí ri. gakó wǝ, e súlí ǹdǝ́ Amɔrɛ lyì bí bǝ̀ jě Atǝsatǝsɔn-Tamaarɛ nɛ́ mɔ́. ⁸Rǝ̀ myɛ̀ yó né, Sodome pyɔ̌ mɔ́ ǹdǝ́ Gɔmɔɔrɛ pyɔ̌ mɔ́ ǹdǝ́ Adama pyɔ̌ mɔ́ ǹdǝ́ Tǝsǝboyim pyɔ̌ mɔ́ ǹdǝ́ Bǝla pyɔ̌ mɔ́ bǝ̀ n'ê byẽ̀ myɛ bǝ̀ Tǝsǝwarɛ bǝ ce dwã yó bǝ̀ la b'e bú ǹdǝ́ bɛ, Sǝdimi vɔlɔ w wa, ⁹bǝ̀ la bú ǹdǝ́ Elamɛ pyɔ̌ Tǝdɔrlayɔmɛrɛ, ǹdǝ́ Tǝdǝyǝǝ pyɔ̌ Gojimi ǹdǝ́ Elazaarɛ pyɔ̌ Arǝjɔbɛ ǹdǝ́ Sǝshǝnǝyǝ pyɔ̌ Amǝrǝfǝyǝǝ: E yàl pyǎ bǝ̀na bǝ̀ la bú ǹdǝ pyǎ bǝ̀nu¹⁰Sidimi vɔlɔ w zhǐlsí nyǝ́ né gakó y'à j'a pyi ǹdǝ́ gɔ; Gɔmɔɔrɛ pyɔ̌ mɔ́ ǹdǝ́ Sɔdɔmɛ pyǎ j'a dùr, bǝ vò bǝ tu zhǐlsí wẽ́, bǝ̀ lyì bɩ́ dwã bǝ̀ dàl mɔ́ dùr bǝ̀ vò pyàr rɛ́ wa. ¹¹Lyì bí byɛ̀bɛ́ bǝ̀ ŋwɛ̀nɛ́ bɛ mɔ́, bǝ pwà Sɔdɔɔmɛ ǹdǝ́ Gɔmɔɔrɛ nǝ̀cɛ̀ndɛ́ ǹdǝ́ bǝ̀ wẽ̀ tɛ̀bɛ́ bǝ̀ cĩ́ dɛ̃̌ bǝ̀ la m'e yìlì bǝ̀ cìn mú gakó bǝ m'e lyɛ̃. ¹²Bǝ j'a zǝ Abǝramɛ zhǝ̀n-bal byǐ Lɔtɛ ǹdǝ́ ń jɛ̃̀-kɔn rɛ́ bǝ m'e súlí bǝ m'e lyɛ̃.¹³Rə̀myɛ́ yó né, lò mə̀dù ń yà ń dùr. Lò mó ǹmyɛ̌ bə̀ n byili Ebərəbá lyì bal Abəramɛ ; bal mɔ́ ńmyɛ̌ mɔ́ yà ń jě Mamərɛ shɛnɛ y wẽ́, ń yà ń wɔ́ Amɔrɛnyɛ̃bá lyì bal, Esəshəkwəə ǹdə́ Anɛrɛ da-byǐ, bə̀ y’à zɔ dɔbrɛ ǹdə́ Abəramɛ. ¹⁴Abəramɛ gə́ nyɛ̀ɛ̀ bə̀ bə̀ zɔ ń da-byǐ mú, bə ce ń wɔ́ byìnə́-jì lò mó ce n zɛ̃̀ n lyẽ tùntùnnə̀ bé byɛ̀bɛ́ bə̀ wɔ́ kã̀dar nánfwààlɛ́ du mú, bə̀ lùl bè ń sõ kɛ̀lɛ́ w mɔ́, nunə zwã̌-tɔ̀ ǹdə́ shí-ǹdə́-lyɛlɛ n mə n jì pyǎ bɛ́ kùr n mə n yí Danɛ.¹⁵N zɛ̃̀ cəcɛ̃, n bɔ̀n ń shə̀dɛ́ɛ́sɛ́ dwã nɛ́, ńmyɛ̌ ǹdə́ ń tùntùnnə̀ bé la vò bə bú ǹdə́ bɛ́, sə bə̀ ŋwɛ̀nɛ́ bɛ́, bə pú bə̀ kùr bə jì jì bə m’e yí Kɔba, ò ŋwɛ́nɛ́ Damasɛ jə̀gwã̀ sono. ¹⁶N ká n zə nə̀cɛ̀ndɛ́ gakó n mə n kwɛ̃̀ ; n zə ń da-byǐ Lɔtɛ myɛ ǹdə́ ń jɛ̃̀-kɔn rɛ́ myɛ n mə n kwɛ̃̀ ; e súlí kana bɛ́ ǹdə́ dwí rí.¹⁷Rə̀myɛ́ kwã nɛ́, Abəramɛ gə́ jú bɛlɛ rɛ́ Kədərəlamɛrɛ ǹdə́ pyǎ bɛ́ byɛ̀bɛ́ bə̀ y’a ŋwɛ́nɛ́ ǹdə́ mɔ mɔ́ yó n zhɛ̀, n zɛ̃̀ n ká ń bà. Rə̀myɛ́ yó né, Sɔdɔmɛ pyɔ̌ mɔ́ zɛ̃̀ n du n bə̀ ń la Abəramɛ jəl Səshavwɛ vɔlɔ w bə̀ n’ê byẽ̀ bə̀ pyɔ̌ vɔlɔ mɔ́ wa. ¹⁸Rə̀myɛ́ tó né, Salɛmɛ pyɔ̌ Mələsədɛkɛ zɛ̃̀ n ce bə zə búrú ǹdə́ də̀vɛ̃́ bə bà : Mələsədɛkɛ yà ń wɔ́ Dɛ̃̌ Dɛ̃̌ Yi rí vwĩ̀-zwə́lnə.¹⁹N cĩ́ bwəl Abəramɛ yó, n wɔ̀ : Dɛ̃̌ Dɛ̃̌ Yi rí, rə̀ cǐ dɛ̃̌ ǹdə́ cɛ y mɔ́ cĩ́ bwəl Abəramɛ yó ! ²⁰Sə Dɛ̃̌ Dɛ̃̌ Yi rí nə còrhó, bə̀ wɔ́ rə̀myɛ́ rə̀ co ǹ zwə̀ bé ǹ jɔ̃̀ wa ! Abəramɛ zɛ̃̀ n vùr kɔn rə̀dù rə̀dù, shí shí gakó wẽ́ n pə Mələsədɛkɛ nɛ.²¹Sɔdɔɔmɛ pyɔ̌ mɔ́ zɛ̃̀ wɔ̀ Abəramɛ nɛ : Pə àmyɛ́ nɛ́ lyì bí, sə ǹmyɛ́ zwẽ nə̀cɛ̀ndɛ́. ²²Abəramɛ lyár n wɔ̀ : À n’â zhẽ̌ à jɛ̃̀ à ce Bə-zhɔ̌-zhe ne, Dɛ̃̌ Dɛ̃̌ Yi rí ni, mɔ̀bɔ́ ń cǐ dɛ̃̌ ǹdə́ cɛ y mɔ́ : ²³Bə̀ à t’â la ǹmyɛ́ kaka dwí-byǐ zõ yé, bá tə́tɔ̃̌ nyíní ráá nə̀cìl nyíní myɛ cìcì yé ; mùnì ga ń zɛ̃̀ n zhe bə̀ ǹ ce Abəramɛ jǐrh nə̀mbal yé. À t’â yǎl kaka yé ! ²⁴Sə tɛ̀bɛ́ rə̀dù y sásá rə̀ ŋwɛ́nɛ́ mɔ́, wɔ́ tɛ̀bɛ́ ébwǎ-dàlá bɛ́ jú mú, kɔn súlí Anɛɛrɛ, Esəshəkəə ǹdə́ Mamərɛ byɛ̀bɛ́ bə̀ yàl bala bə̀ tó ne mó cəl ré.

¹Ywẽ̀ né nə̀myɛ́ mɔ́ kwã nɛ́, Bə-zhɔ̌-zhe zɛ̃̀ n tó dàrhà dɛnnɛ n zɔ̀m ǹdə́ Abəramɛ n wɔ̀ : Abəramɛ, bə̀ká dùr ywẽ gaga yé ; bə̀ wɔ́ àmyɛ́ à wɔ́ ǹ ku ò n’ô ǹ yé né búlə́ jàà wa, ǹ kwǎndɛ b’a yə̀ nánfɔ̀lɔ̀ dɛ̃́dɛ̃́. ²Abəramɛ lyár n wɔ̀ : Cǐnnə Bə-zhɔ̌-zhe, wɔ́ bə̀kɔ́n ǹ la nɛ pɔ ? À la cú ǹdə́ à bə byǐ zhe yé ; wɔ́ Damasɛ lyì byǐ Elyəzɛrɛ ń la kɛ̀lɛ́ kɔn rɛ́ cùnú. ³Abəramɛ zɛ̃̀ n wɔ̀ : Nyiwé, ǹ yə̀ nɛ dwí pɛ yé, wɔ́ mɔ̀bɔ́ bə̀ lùl à sõ kɛ̀lɛ́ w mɔ́ ń la à jɛ̃̀-kɔn rɛ́ cǐnnə yál.⁴Rə̀myɛ́ yó né, Bə-zhɔ̌-zhe kə́ n zɔ̀m ǹdə́ Abəramɛ n wɔ̀ : È də̀ ńmyɛ̌ ń la ǹ jɛ̃̀-kɔn rɛ́ cǐnnə yál yé, wɔ́ mɔ̀bɔ́ ń la ǹ sə̀pwà lùlì y wẽ́ shú n du mú, ń la ǹ jɛ̃̀-kɔn rɛ́ cǐnnə mó yál. ⁵Rə̀myɛ́ nɛ́ yó né, n zɛ̃̀ n zə Abəramɛ n du pwẽ̀ nè, n wɔ̀ : Kwẽ̌ ń nyǐ dɛ̃̌ yi rí wə, sə́ gə̀ càmmə̀sɔ̌sɛ́, ń nyǐ ǹ wɔ̌ sɛ ǹ la gál. N zɛ̃̀ n wɔ̀ mɔ̀ : Wɔ́ èta ǹ dwí rí la nɛ́ yál.⁶Abəramɛ zə Bə-zhɔ̌-zhe zhə̀nà, n tə̀ rə̀ yil n nyǐ mu ǹdə́ ń bə dóó zhe ⁷ta Bə-zhɔ̌-zhe kə́ n wɔ̀ mɔ : Àmyɛ́ wɔ́ Bə-zhɔ̌-zhe mɔ́, ń ce ń du Uri Kalədɛ tənà w mɔ́, ń la mɔ́ tənà y èmyɛ́ pɔ e yə̀ ǹ sə̀pwà nyǎ mɔ́. ⁸Abəramɛ lyár n wɔ̀ : Cǐnnə Bə-zhɔ̌-zhe, wɔ̀ bə̀kɔ́n è b’a ce a lwar b’à m’a cìní yə ?⁹Bə-zhɔ̌-zhe wɔ̀ mɔ : Zə byinə nə̀tɔ̀ nə̀-cɛl ǹdə́ byinə nə̀tɔ̀ bɔ̃̀ ǹdə́ byinə nə̀tɔ̀ pyì-bya, e súlí épwèné ǹdə́ épò-bwɛ̀lɛ́ ń mə́ ń bə̀ ń pɛ̃. ¹⁰Abəramɛ zə vwàmá nɛ́ nə̀myɛ́ mɔ́ gakó, n zhì mə̀dù gakó cəcəl w gõ̀ dwã w kùkùlə̀ nə̀lyè, n kwè ne n cĩ́ cĩ́ tɛ̃́ nə zǎ zǎ dwã ; wɔ́ kúmsí ń yə̀ gòm dwã w yé. ¹¹Zúmə́ j’a shí ní nə̀ bə̀ nə̀ la vwàmá nɛ́ cùùrí jú ; Abəramɛ zɛ̃̀ n jì nì.¹²Yi rí gə́ tú e zù yó né, jɛ̃ nánfɔ̀lɔ̀ jí Abəramɛ ; ywẽ ǹdə́ cə̀-byín bə̀ rə pyi mu. ¹³Bə-zhɔ̌-zhe zɛ̃̀ n wɔ̀ Abəramɛ nɛ : Lwar bə̀ ǹ dwí rí la vò bə yə̀ zhələ tənà kɛ̀bɛ́ è t’â la bə̀myɛ́ nyǎ yál gaga wẽ́ ; bə yə̀ yómə́ gàà mɔ́, bə nwɛ̀nɛ̀ bɛ byinə zwã̌-na.¹⁴Sə à m’a kə́ tənà y kɛ̀bɛ́ bə̀ la yómə́ yál è wẽ́ mó bùrsi, bə zɛ̃̀ bə du ǹdə́ nə̀cɛ̀ndɛ nə́nfɔ̀lɔ̀. ¹⁵Sə è gə wɔ́ ǹmyɛ́ yilə, ǹ b’ǎ vò ǹ dabá sono ǹdə́ yə̀-zùlə́, ǹ b’ǎ yə̀ wu-nyɔ̃̀ cəbal ǹ zəzhɛ̀n nɛ wẽ́, fòró ń zɛ̃̀ ń cì bə ce mó. ¹⁶Wɔ́ nàmbalabá kùrə̀ nə̀na kwã nɛ́ bə̀ b’a k’a kwɛ̃̀ bə bə̀ nyɔ̀nɔ̀ ; bə̀ Amɔrɛnyɛ̃bá lwɛlɛ rɛ́ gakó gwẽ̌ yə̀ rə̀ yírə́ yí yé.¹⁷Yi rí gə́ tú rə zù rə zhɛ̀ yi ní, cɛ y j’a jǐrh cə-byṹ fúrí, myǐn-zhù j’a du ǹdə́ nyɛ̀rh mə̀ n’ê tó vwàmá nɛ́ nə̀ gòm dwã w mɔ́ cəcəl w mə̀ lyɛ̃. ¹⁸Dɛ̃ rɛ́ rə̀myɛ́ mɔ́ yùwə̀, Bə-zhɔ̌-zhe zɔ dɔbrɛ ǹdə́ Abəramɛ n wɔ̀ : ²⁰À n’â pɛ tənà y kɛ̀bɛ́ ǹ dwí rí ni, kɔn zhì Ezhipti bwǐ y ni, e m’e vò Efəratɛ bù-fwɛ̀lɛ̀ y nɛ mɔ́ : ¹⁹tənà y lyì bí wɔ́ : Kənənyɛbá, Kənəzhɛ̃bá, Kədəmɔniynɛ̃bá, Etəyɛ̃bá, Fərəzənyɛ̃bá, Arəfəyimbá, ²¹Amɔrənyɛ̃bá, Kananənyɛ̃bá, gərəgashɛ̃bá ǹdə́ Zəbəshɛ̃bá.

¹Abəramɛ kɛ̃ Sarayi yà ń yə̀ byǐ lùl gaga n pɔ̃ yé. Sarayi jà ń yà ń zhe Ezhipti lyì bə̀kɔ́ mə̀dù ń wɔ́ ń tùntunnə̀, ń yíl Agaarɛ. ²Sarayi zɛ̃̀ n wɔ̀ Abəramɛ nɛ : Nyǐ, Bə-zhɔ̌-zhe ce à wɔ́ kə-eju ; rə̀myɛ́ ce, à n’â lwə̀l mó, sə́ bə̀ ń vò ǹdə́ à tùntùnnə̀ mó ; dɛ̀ga, à m’a tó ńmyɛ̌ dɛnnɛ a nə bə̀sɔ́ná. Abəramɛ zɛ̃̀ n cili ń kɛ̃ mɔ́ zɔ̀mà nɛ́. ³Rə̀myɛ́ yó né, Sarayi kwè ń tùntùnnə mó, Ezhipti lyì bə̀kɔ́ mɔ́ n pə ń byal Abəramɛ nɛ n jí ; rə̀myɛ́ yi ní ǹdə́ Abəramɛ gə́ tú ń jě Kanaã nɛ́ mɔ́ zhe byinə shíyə́. ⁴Abəramɛ zɛ̃̀ n zù ǹdə́ Agaarɛ, n kwè pwǐ. Ń gə́ pwírí ń zhe pwǐ y mú ce, n zɛ̃̀ ń nə́ ń nyǐ ń yó-cə́cɛ̃ mɔ́, ń mə́ ń pɔ̀ɔ́sɛ mɔ.⁵Sarayi zɛ̃̀ n wɔ̀ Abəramɛ nɛ : wu-zhìlù w kɔ̀bɔ́ ò n’ô ce ne èta mɔ́ k’a jòm ǹmyɛ́ yó. Nyǐ àmyɛ́ kwè à tùntùnnə mó a pɔ̃́ ń jí ; sə ń gə́ zɛ̃̀ n pwírí ń zhe pwǐ y mú ce, n zɛ̃̀ ń nə́ ń pɔ̀ɔ́sɛ nɛ. Sə wɔ́ Bə-zhɔ̌-zhe ń mà n kə́ bùrsí àmyɛ́ ǹdə́ ǹmyɛ́ cəcəl wə. ⁶Abəramɛ lyár Sarayi n wɔ̀ : Ǹ tùntùnnə mó ŋwɛ́nɛ́ ǹ jɔ̃̀ wa, nyǐ mú, ń wɛ̀rhɛ́ mɔ ǹdə ǹ gə́ só né. Rə̀myɛ́ yó né, Sarayi zɛ̃̀ ń nə́ ń nwɛ̀nɛ̀ mɔ ; ce Agaarɛ dùr ń yé né n vò kwã nɛ́ gaga.⁷Bə-zhɔ̌-zhe màlɛ́ka èdù nə mɔ bwǐ èdù nyí ni gɔ-èpòlò wə, bwǐ èdù è ŋwɛ́nɛ́ Səsuri sɔ̀má y nyí ni. ⁸E wɔ̀ mɔ̀ : Agaarɛ, Sarayi tùntùnnə, yẽ̀ ǹ shí ní, sə wɔ́ yẽ̀ ǹ la nɛ́ ? N lyár n wɔ̀ : Wɔ́ à yó-cə́kɛ̃ Sarayi yé né à n’â dùr né à la yé né gaga.⁹Bə-zhɔ̌-zhe màlɛ́ka y wɔ̀ mɔ : ká kwɛ̃̀ ń vò ǹ yó-cə́kɛ̃ mɔ́ sono, ń lwəl ǹ cìn tɛ̃́ ń yé né. ¹⁰Bə-zhɔ̌-zhe màlɛ́ka y wɔ̀ mɔ : À m’a ce ǹ dwí rí pù, rə jǐrh nánzhəzhɔ̌ dɛ̃́dɛ̃́, lò lò wár rɛ ń la gál yé.¹¹Bə-zhɔ̌-zhe màlɛ́ka y wɔ̀ mɔ : Nyǐ ǹ zhe pwǐ, ǹ la byǐ lúl, sə ǹ m’ǎ ce ń yil bə̀ Esəmayəə ; bə̀ ǹ wu-zhìlù w wẽ́, Bə-zhɔ-zhe nyɛ̀ɛ̀ ǹ cəl ré. ¹²Byǐ mú mà n zə ń jɛ̃̀ n mə n bú ǹdə́ lyì bí gakó, sə lyì gakó myɛ b’a zə bə̀ jɛ̃̀rh bə m’e bú ǹdə́ mɔ ; ń mà n jòm n zə ń yé n zǎ ń da-byǎ bɛ́.¹³Agaarɛ zɛ̃̀ n byẽ̀ Bə-zhɔ̌-zhe mó ń zɔ̀m ǹdə́ mɔ mɔ́ yil ré bə̀ : Ata-Elɛ-pyɔ̌1 ; bə̀ ń yà ń nə́ ń zɔ̀m ń zhe : Ń gə́ nɔ nɛ kwã nɛ́, à yə̀ kaka nɛ́ nyɔ̀nɔ̀ nà ? ¹⁴Wɔ́ rə̀myɛ́ è ce, bə̀ byẽ̀ zhìlí y èmyɛ́ mɔ́ bə̀ Lakayi-pyɔ̌ zhìlí ; è ŋwɛ́nɛ́ Kadɛɛsɛ ǹdə́ Barɛdɛ cəcəl wə.¹⁵Agaarɛ lù byǐ n pə Abəramɛ nɛ ; Abəramɛ ce byǐ mú Agaarɛ lùl n pɔ̃́ mɔ́ yil bə̀ Esəmayəə. ¹⁶Agaarɛ gə́ lùl Esəmayəə n pə Abəramɛ nɛ́ mɔ́ yi ní ǹdə́ Abəramɛ zhe byinə zɔ̃̌ nə̀bɔ́.

¹Abəramɛ gə́ tú n yí byinə shí-nə̀bɔ́ ǹdə́ nə̀bɔ́ yi ní, Bə-zhɔ̌-zhe lyí Abəramɛ n wɔ̀ mɔ : Àmyɛ́ wɔ́ Yi rí rə̀ jàn du kɔn gakó mɔ́. Zhəl à yé né, sə́ yə̀ wu-põ̀ cə́bal. ²À m’a zə dɔbrɛ àmyɛ́ ǹdə́ ǹmyɛ́ cəcəl wə, a ce ǹ dwí rí pù byinə nə̀ bə zhɔ̌ zhe yilə.³Abəramɛ tu n zə ń yé n pú tɛ̃́, Yi zɛ̃̀ rə̀ n’ê zɔ̀m ǹdə́ mɔ rə̀ zhe : ⁴Nyǐ kɔn gə́ la nɛ́ tó, à dɔbrɛ́ à n’â zal ǹdə́ mɔ́ mɔ́ yilə. Ǹ b’ǎ jǐrh tənèrh nánjə̀jóló da. ⁵Bə̀ k’ê t’â la mɔ́ byõ̌ bə̀ Abəramɛ kə́dò yé ; bə̀ b’a byẽ̀ mó bə̀ Abərahamɛ, bə̀ à ce ǹ wɔ́ tənèrh nánjə̀jóló da. ⁶À m’a ce ǹ lùlì y j’â n’ê lùl byinə nə̀ bə zhɔ̌ zhe yilə. À b’a ce ń yə̀ tənèrh ; sə pyǎ b’a shí ǹ wẽ́ bə du.⁷À n’â zal à dɔbrɛ àmyɛ́ ǹdə́ ǹmyɛ́ cəcəl wə, ǹdə́ ǹ nɛ̀mɛ́ nɛ́ nə̀ bàn ǹ kwã nɛ́ mɔ́, kɔn vò ǹdə́ bə̀ nàmbala nàmbala : È m’a yə̀ byinə byinə dɔbrɛ́, rə̀myɛ́ jàn yilə, à m’a yə̀ ǹ Yi ǹdə́ nɛ̀mɛ́ nɛ nə̀ bàn ǹ kwã nɛ́ mɔ́ Yi. ⁸À m’a pə cɔ w ǹ jě ò wẽ́ ǹdə zhə-bal ta mɔ́, ǹmyɛ́ ǹdə́ ǹ nɛ̀mɛ́ nɛ́ nə̀ bàn ǹ kwã nɛ́ mɔ́ nɛ, Kanaãbá tənà y gakó bə cìní, sə à m’a yə̀ bə Yi.⁹Yi wɔ̀ Abəraham nɛ : Ǹmyɛ́, ǹdə́ ǹ nɛ̀mɛ́ nə̀ bàn ǹ kwã nɛ́ mɔ́ m’a zə à dɔbrɛ kẽkẽ, kɔn m’e vò bə̀ nàmbala nàmbala. ¹⁰Wɔ́ tɛ̀bɛ́ à byili nyɔ̀nɔ̀ èta mɔ́ rə̀ à dɔbrɛ́, á la zal kẽkẽ àmyɛ́ ǹdə́ àmyɛ̌ cəcəl w mó, ǹdə́ ǹ nɛ̀mɛ́ nɛ́ nə̀ bàn ǹ kwã nɛ́ mɔ́ : Lò mɔ̀bɔ́ ń wɔ́ bal á cəcəl w gakó mə̌ sə bə gõ̀ mò. ¹¹Á m’ǎ gõ̀ dwã ; sə rə̀myɛ́ b’a yə̀ dɔbrɛ nyɔrhɔ àmyɛ́ ǹdə́ ámyɛ̌ bwə̌l wə.¹²Bal mɔ̀bɔ́ ń gə yú dwã lyɛlɛ, sə bə gõ̀ mo, e m’e vò à nàmbala nàmbala, è gə wɔ́ mɔ̀bɔ́ bə̀ lùl kɛ̀lɛ́ wa ráá mɔ̀bɔ́ bə̀ yè ǹdə́ wɛ́rɛ́ ráá mɔ̀bɔ́ ń wɔ́ zhə-bal byǐ ń də̀ ǹ dwí rí byǐ. ¹³Bə̀ mə̌ sə gõ̀ mɔ̀bɔ́ bə̀ lùl kɛ̀lɛ́ wa, ǹdə́ mɔbɔ́ bə̀ yè ǹdə́ wɛ̀rɛ́ ; èta à dɔbrɛ́ b’a yə̀ á yala nɛ́ nɛ byinə nə̀ bə zhɔ̌ zhe yilə. ¹⁴Bal mɔ̀bɔ́ ń ŋwɛ́nɛ́ ń yə̀ gòm ; mɔ̀bɔ́ bə̀ yə̀ gòm ń yala nɛ́ wẽ́ mó, sə bə gu mu ń dwí rí cəcəl wə : Bə̀ ń cẽ dɔbrɛ́ nyə́ né zõ yò.¹⁵Yi wɔ̀ Abərahamɛ nɛ : Ǹ kə́ ǹ tá ǹ la ǹ kɛ̃ mɔ́ byõ̌ bə̀ Sarayi yé, ǹ yil ré b’a yə̀ Sara. ¹⁶À m’a cĩ́ bwəl ń yó, a tó ń dɛnnɛ a pɔ̃́ byǐ ; à m’a cĩ́ bwəl ń yó, sə ń mà n jǐrh tənèrh ; pyǎ, dwə́ b’a du ń wẽ́.¹⁷Abərahamɛ zɛ̃̀ n tu n zə ń yé n pú tɛ̃́, ń mə́ ń zɔ̀m ń wẽ́ ń zhe : Bal mɔ̀bɔ́ ń zhe byinə zɔ̌m mɔ́, nə wɔ̌ byǐ ń mà n lù ? Sə Sara mɔ́ ń zhe byinə shə́-nə̀bɔ́ mɔ́, nə mà n lù nà ? ¹⁸Abərahamɛ zɛ̃̀ n wɔ̀ Yi ni : À’íí ! Esəməyəə wírí n zə myə̌l ǹ yé né !¹⁹Yi wɔ̀ : nyǐ wɔ́ Zhə̀n zhə̀nà, ǹ kɛ̃ Sara mà n lù byǐ n pɔ̃́ ; sə ǹ b’a ce ń yil bə̀ Yəzakɛ. À b’a zə à dɔbrɛ́ ǹdə́ mɔ, rə̀ yə̀ ǹdə dɔbrɛ tɛ̀bɛ́ rə̀ ŋwɛ́nɛ́ byinə nə̀ bə zhɔ̌ yilə, ń cu kwã nɛ́ myɛ rə̀ yə̀ nɛ́ ń nɛ̀mɛ́ nɛ́ myɛ yilə. ²⁰Sə è gə wɔ́ Esəmayəə yilə, à zwẽ ǹ lwə̌l mɔ́. À m’a cĩ́ bwəl ń yó, a ce n zə lùlì, a ce ń lùlì y j’â n’ê pùl gaga è la ; ń mà n lù pyǎ shí-ǹdə́-bə̀lyè, a ce n yə̀ tənà nánfwɛ̀lɛ̀. ²¹À m’a zə à dɔbrɛ́ ǹdə́ Yəzakɛ mɔ́ Sara la lúl n pɔ̃́ byin ní, yi rí tɛ̀bɛ́ èta cìcì mú yi.²²Yi gə́ zɔ̀m ǹdə́ Abərahamɛ rə zɛ̃̀, rə zɛ̃̀ rə vò dɛ̃̌ Abərahamɛ yə́-pɛ̀lɛ́ wa. ²³Rə̀myɛ́ yó né, Abərahamɛ zɛ̃̀ n zə ń byǐ Esəmayəə, ǹdə́ kɔn dɛ̀bɛ́ gakó rə̀ lùl ń sõ kɛ̀lɛ́ wa, ǹdə́ tɛ̀bɛ́ gakó ń yè ǹdə́ wársɛ, ǹdə́ ǹdə́ lyì byɛ̀bɛ́ bə̀ wɔ́ bala, lyì bí ń sõ kɛ̀lɛ́ w mɔ́ wẽ́ mó, n gõ̀ be dɛ̃ rɛ́ rə̀myɛ́ mɔ́ yùwə̀ ǹdə Yi gə́ pɔ mɔ nyí ní.²⁴Abərahamɛ gə́ gòm yi ní ǹdə́ ń zhe byinə shə́-nə̀bɔ́ ǹdə́ nə̀bɔ́. ²⁵Ń byǐ Esəmayəə gə́ gòm yi ní ǹdə́ ń zhe byinə shí-ǹdə́-nə̀lyè. ²⁶Dɛ̃ rɛ́ rə̀myɛ́ yù w cìcì Abərahamɛ gòm ń byǐ Esəmayəə. ²⁷Ń já n gõ̀ ńmyɛ̌ ǹdə́ ń kɛ̀lɛ́ y lyì bí byɛ̀bɛ́ bə̀ lùl ń sõ kɛ̀lɛ́ w mɔ́ ǹdə́ byɛ̀bɛ́ ń yè ǹdə́ zhələ bé ń yè ǹdə́ wársɛ mɔ́ gakó.

¹Bə-zhɔ̌-zhe tú n lyí mu Mamərɛ shɛnɛ wẽ́, ǹdə́ ń jě tɛ̃́ nə́nyɛ́nɛ́ cə-bɔ́rhɔ́ w yi ní, ń kòrhó w nyí ni. ²N kwẽ̌ ń yé dɛ̃̌ ń la nyǔ, n pwírí bala bə̀tɔ̀ bə̀ zhǐ dɛ̃̌ ń nyí ni. Ń gə́ nɔ bɛ́ n zhɛ̀, n zɛ̃̀ n zhì ń kòrhó nyí ni dùr n vò bə̀ yé né, n jòm ń nə̀dwə́nə́ yó n wùlì tɛ̃́.³N wɔ̀ : À Cǐnnə mó sõ, à gə wɔ́ lò mɔ̀bɔ́ ǹ nɔ nɛ, ǹ só ǹ yírhə́ wə ; à n’â lwə̀l mó, ǹ bə̀ká lyɛ̃ ń vò gaga ǹ tùntùnnə̀ mó yé né yé. ⁴Pə-na nɛ sɔ́má, bə pyà nɛ̃̌ bə̀ pə ába á sə̃̀ á nèsé ; s’á jòm cǒ w kɔ̀bɔ́ kùr w á shǐrh. ⁵À la vò a pyà búrú námpɔ́lɛ́ a pə ába á m’a zə á ku ni ; rə̀myɛ́ kwã nɛ́, á m’ǎ zɛ̃̀ á zhílí á sɔ́má yá ; bə̀ wɔ́ rə̀myɛ́ yil á tú á la á tùntùnnə mó sõ tó a lyɛ̃. Bə lyár bə wɔ̀ : Wɛ̀rhɛ́ ǹdə ǹ gə́ byili ní.⁶Abərahamɛ já n zhǐr làlà n zù ń kòrhó w wə, n yí Sara nyí ni, n wɔ̀ : Zɛ̃̀ làlà, n kwè mún-ècɛ̀nɛ́ y ń mɛrhɛ ku yírhə́ nə̀tɔ̀, ń ce nɛ̃̌ w ń mà ń mə́ ń ji gàtó. ⁷Abərahamɛ ká n dùr n vò ń vwàmá nɛ́ wẽ́, n zə nǔm-bwə̀lə̀ kɛ̀bɛ́ è càn è sú yírh mó, n pə ń tùntùnnə mə̀dù ni n vò n kwɛrhɛ y làlà. ⁸N zɛ̃̀ n kə́ n kwè nwə̃̌ ǹdə́ yil, n súlí nǔm-bwə̀lə̀ y bə̀ kwɛrhɛ mɔ́ nɛ, n bə̀ n cĩ́ bə̀ yé né. N cìcì mú tó be n jòm cǒ w kùr w bə jí.⁹Bə zɛ̃̀ bə wɔ̀ mɔ : Ǹ kɛ̃ Sara ŋwɛ́nɛ́ yẽ̀ ? N lyár n wɔ̀ : Ń ŋwɛ́nɛ́ nɛ́ kòrhó w wə. ¹⁰Bə̀ mə́dù zɛ̃̀ n wɔ̀ : À m’a k’a bə̀ ǹ sono yi ri tɛ́bɛ́ yi cìcì ; sə nyìwé, ǹ kɛ̃ Sara mà n nə byǐ. Rə̀myɛ́ yó né, ǹdə́ Sara cə̀r kórhó w n ce ń kwã nɛ́, ń zhǐ ò nyí ni ń nə́ ń cili.¹¹Abərahamɛ ǹdə́ Sara ga y’à cɛ, bə̀ byinə né já : Sara yà ń kə́ ń tá ń bùl bə̀ ń wɔ̌ byǐ ń la nɔ yé. ¹²N zɛ̃̀ ń nə́ ń mɔ̀n ń wẽ́ ń zhe : Èlǎsɛ̃́ mɔ́ à cɛ, bal shil nə m’a k’e zə nɛ ? À cǐnnə mó myɛ cɛ.¹³Bə-zhɔ̌-zhe wɔ̀ Abərahamɛ nɛ : Wɔ́ bə̀kɔ́n yil Sara mɔ̀n, n wɔ̀ : àmyɛ́ mɔ̀bɔ́ à cɛ mɔ́, zhə̀n zhə̀n ga à m’a nə byǐ ? ¹⁴Kɔn dõ nə ŋwɛ́nɛ́ rə̀ zhe jàn rə̀ m’a jàr Bə-zhɔ̌-zhe nà ? Sə tɛ̀bɛ́ rə̀ byili mú yi rí gə yúwə́ ; yi rí rə̀myɛ́ cìcì, à m’a k’a bə̀ ǹ sono, ǹdə́ Sara nɔ byǐ. ¹⁵Sara zɛ̃̀ n gõ̀ kɔma, n wɔ̀ : À yə̀ mɔ̀n yé. E jà nyǐ wɔ́ ywẽ ń dùr. Sə rə̀ wòwə̀ : Ǹdə́ rə̀myɛ́ ga ǹ mɔ̀n.¹⁶Bala bɛ́ bə̀myɛ́ mɔ́ zɛ̃̀ bə̀ la, bə kwẽ̌ bə̀ n’ê nyǐ Sodome səta. Abərahamɛ zɛ̃̀ n tó be ń nə́ ń zhìì. ¹⁷Rə̀myɛ́ yó né Bə-zhɔ̌-zhe wɔ̀ : À nə m’a shèè kɔn rɛ́ dɛ̀bɛ́ à la wɔ̀rhɔ́ mɔ́ Abərahamɛ nɛ ? ¹⁸… Zhə̀n zhə̀nà, Abərahamɛ mà n jǐrh tənà nánfwɛ̀lɛ́ è zhe jàn, tənèsé cɛ yó mó gakó b’a nə bwəl ń wẽ́. ¹⁹À cír mo mùnì ga n pə nyí ń byǎ bɛ́ ǹdə́ ń kɛ̀lɛ́ y nɛ bə zə Bə-zhɔ̌-zhe sɔ́má yá, bə wɛ̀rhɛ́ cángá ǹdə́ zhə̀n tumə, èta Bə-zhɔ̌-zhe mà n pyìrh nyə́ né ń bwəl Abərahamɛ nɛ mɔ́…²⁰Bə-zhɔ-zhe wɔ̀ : Wìrhí y bə̀ n’ê wǔrh Sodome ǹdə́ Gɔmɔɔrɛ shò kwã nɛ́ mɔ́ yúwə́, bə̀ yə̀-bəlwàálɛ́ já. ²¹Wɔ́ rə̀myɛ́ è ce, à la tɛ̃́ só, a nyǐ ǹdə́ bə̀ gə wɛ̀rhɛ́ wìrhí y kɛ̀bɛ́ bə̀ zɔ̀m è yò w e yí sõ mó gakó mawé, kɔn gə də̀ èta, à m’a lwar rɛ.²²Bala bɛ́ vò bə yí yé né, bə lyɛ̃ bə zǎ Sodome. Abərahamɛ já ń gwẽ̌ ń zhǐ Bə-zhɔ̌-zhe yé né. ²³Abərahamɛ twẽ̌ n yí, n wɔ̀ : Ǹ nə m’a gu wu-cángá cí mú ǹdə́ lyì-bəlwɛ̀lɛ́ y ga ?²⁴Dɛ̀ga, wu-cángá cìnə́ shí-ènu ŋwɛ́nɛ́ cɔ w wa : Ǹ nə m’a gu bə̀myɛ, ǹ tá ǹ la sǔbri cɔ w nɛ pɔ, wu-cángá cìnə́ bé bə̀ ŋwɛ́nɛ́ cɔ w wẽ́ mó yilə ? ²⁵E gu wu-cángá cí ǹdə́ lyì-bəlwɛ̀lɛ́ ga, kɔn zɛ̃̀ e yə̀ rə̀dù èta, wu-cángá cí mú ǹdə́ lyì-bəlwɛ̀lɛ́ yil mó, tùntwĩ̀ĩ̀ rí rə̀myɛ́ mɔ́ zə nyan ǹdə́ mɔ́ ! rə̀ zə nyan ǹdə́ mɔ́ ! Lò mó mɔ̀bɔ́ ń nə ń bùr cɛ y gakó bùrsí mú, ń tá ń la bǔr ǹdə́ cángá nà ? ²⁶Bə-zhɔ̌-zhe zɛ̃̀ wɔ̀ : À gə nɔ wu-cángá cìnə́ shí-ènu Bəbyəlɔɔnɛ cɔ w wa, à m’a pə cɔ w gakó sǔbri bə̀ yilə.²⁷Abərhamɛ kə́ n wɔ̀ : Nyǐ à zɔ wu jɔ̀ a zɔ̀m ǹdə́ Cǐnnə mó, àmyɛ́ mɔ̀bɔ́ à wɔ́ shó ǹdə́ tɔ̀mɔ̀ dúdú mú. ²⁸Dɛ̀ga, shí-ènu wẽ́, bə̀nu gə mùrì bə̀ wẽ́ : Ǹ nə b’a tə̀ bə̀nu y tɛ̀nɛ́ yil ń gu cɔ w gakó ? ? Bə-zhɔ̌-zhe wɔ̀ : À gə nɔ wu-cángá cìnə́ shə́-èna ǹdə́ bə̀nu cɔ w wa, à t’â la w cɔ̌ yé.²⁹Abərahamɛ gwẽ̌ zɔ̀m ǹdə́ Bə-zhɔ̌-zhe wɔ̀ : Dɛ̀ga, wu-càngá cìnə́ shə́-èna b’a na. Bə-zhɔ̌-zhe wɔ̀ : À t’â la kaka wɔ̀rhɔ́ byɛ̀bɛ́ shə́-èna y yilə. ³⁰Abərahamɛ wɔ̀ : À la zɔ̌m, sə Bə-zhɔ̌-zhe bə̀ká n kwè lyim gaga yé. Dɛ̀ga, wu-cángá cìnə́ shɛ́-ètɔ̀ b’a nə cɔ w wa. Bə-zhɔ̌-zhe wɔ̀ : À gə nɔ wu-cánga cìnə́ shɛ́-ètɔ̀, sə́ nyǐ à t’â la kaka wɔ̀rhɔ́. ³¹Abərahamɛ wɔ̀ : Nyǐ à zɔ wu-jɔ̀ a zɔ̀m ǹdə́ Cǐnnə mó. Dɛ̀ga, wu-cángá cìnə́ shí-èlyè b’a nə cɔ w wa. Bə-zhɔ̌-zhe wɔ̀ : wu-cángá cinə́ shí-èlyé yilə, à t’â la cɔ w zhìlù gaga yé.³²Abərahamɛ wɔ̀ : Bə-zhɔ̌-zhe, bə̀ká n kwè lyim yé, bə̀ à k’â t’â la zɔ̌m ǹdə́ è gə də̀ tɛ̀bɛ́ à la zɔ̌m èta mɔ́ dúdú yé. Dɛ̀ga, wu-cángá cìnə́ shíyə́ b’a nə cɔ w wa. Bə-zhɔ̌-zhe wɔ̀ : cu-cángá bé shíyə́ yil à t’â la cɔ w zhìlú gaga yé. ³³Rə̀myɛ́ yó né, Bə-zhɔ̌-zhe zhǐr n vò. Abərahamɛ ká n kwɛ̃̀ n bə̀ ń sõ kɛ̀lɛ́ wa.

¹Màlɛ́kabá bə̀lyè y yí Sodme də̀dɛ̀nɛ́ ; ǹdə́ Lɔtɛ yà ń jě ²Sodome cɔ w bwə̀rə́ y nyí ni. Ń gə́ nɔ bɛ, n zɛ̃̀ ń la bɛ jəl, n yí n tu ń nə̀dwə́nə́ yó bə̀ yé né, n wìlì n zə ń yé n pú tɛ̃́. N zɛ̃̀ wɔ̀ : À cǐnnə, à n’â lwə̀l ába, zú-nə á tùntùnnə mó sõ kɛ̀lɛ́ wa, á zɔ̃̀ ; sámna á nèsé ; à m’ǎ dúlí á zɛ̃̀ nəkɔkɔ́lɛ́ shãã shãã á zhílí á sɔ́má yá. Bə wɔ̀ bə̀ ɔ̃́’ɔ̃, nə́ b’ǎ zɔ̃̀ sɔ́má y yó. ³Sə Lɔtɛ nyɛ́ɛ́ nyɛ́ɛ́ bɛ dɛ̃́dɛ̃́, ce bə zǐr bə zù kɛ̀lɛ́ wa. N zɛ̃̀ n tɛnɛ címsi kùjú ń la bɛ pɔ, n ce bə wɛ̀rhɛ́ búrú ò yə̀ sã̀-nə̀byẽ̌ ce, n pə bɛ bə dɔ̃̀.⁴Rə̀myɛ́ yi ní cìcì, ǹdə́ bə̀ bə tɛ̃́ pyě gwẽ̌ yé, ǹdə́ Sodome cɔ w lyì bí tú bə kə́kɛ́lɛ́ kɛ̀lɛ́ yá, kɔn zhì bə̀sɔ́ná bɛ́ e m’e vò ezhə̀nà bɛ́, cɔ w lyì bí gakó dùr bə bà. ⁵Bə byẽ̀ Lɔtɛ, bə wɔ̀ mɔ̀ : Wɔ́ yẽ̀ bala bɛ́ byɛ̀bɛ́ bə̀ zù ǹ sõ kɛ̀lɛ́ w cəcɛ̃ y kɛ̀bɛ́ wẽ́ mó ŋwɛ́nɛ́ ? Ce bə du bə bə̀ nə́ sono, mùnì ga nə́ lwar bə̀ párá1.⁶Lɔtɛ zɛ̃̀ n du n bə̀ bə̀ sono, n pyi kɛ̀lɛ́ y nyí ni ń kwã nɛ́. ⁷N zɛ̃̀ n wɔ̀ : À da-byǎ, à n’â lwə̀l ába, bə̀k’á wɛ̀rhɛ́ lwɛlɛ rɛ́ yé ! ⁸8 Nyǐ-nə, à zhe bə̀kwá bə̀lyè bə̀ gwẽ̌ yə̀l bal pár gaga yé ; à m’a zə bɛ a bə̀ pwẽ̀ nè, s’á zə bɛ á wɛ̀rhɛ́ ǹdə á gə́ n’á yǎl nɛ́. Sə tɛ̀nɛ́ rə̀dù y à n’â lwə̀l ába mɔ́, bə̀k’á wɛ̀rhɛ́ kaka bala bɛ́ byɛ̀bɛ́ nɛ yé, bə̀ wɔ́ àmyɛ́ sõ kɛ̀lɛ́ w bə̀ tú bə̀ zù ní.⁹Bə wɔ̀ : Vǔr ǹ cìn ń ce kwã nɛ́ ! Bə k’e wɔ̀ : Mɔ̀bɔ́ èta mɔ́ wɔ́ zhə-bal ń tú nə́ sono, n zɛ̃̀ ń nə́ ń yǎl n zə ń cìn n yə̀ bùr-kárna ! Nə̀myɛ̌ twə́r tɛ̀nɛ́ ǹdə́ ǹmyɛ́ ǹdə́ bə̀myɛ́ ga yé. Bə zɛ̃̀ bə̀ n’ê wɛ̀rhɛ́ Lɔtɛ jàn, bə̀ la m’e kə́ jì y bòlò wə́.¹⁰Rə̀myɛ́ yó né, bala bɛ́ ce bə̀ jɛ̃̀ pwẽ̀ né bə vwɛ̃ Lɔtɛ n bə̀ bə̀ sono jùwə̀, bə k’a pyi jì y nyí rí. ¹¹Bə zɛ̃̀ bə ce lyì bí byɛ̀bɛ́ bə̀ y’à zhǐ jì y nyí rí ni mú jǐrh lyìlyə̌r, kɔn zhì bə̀sɔ́ná námpɔ́lsɛ́ e m’e vò náncɛsɛ́ dɛ̃́dɛ̃́ mɔ́. Ce bə zɛ̃̀ bə̀ n’ê pyà jì y ní rí ǹdə́ bə̀ gə́ wɔ̌ nɛ́, bə̀ wàr yé.¹²Bala bɛ́ wɔ̀ Lɔtɛ nɛ : Wɔ́ bə̀kɔ́n ǹdə́ rə̀ dõ ǹ zhe nyɔ̀nò èta gwẽ̌ ? Vǔr ǹ cə̀mmá bɛ́ ǹdə́ bala byǎ bɛ́ ǹdə́ ǹ kana byǎ bɛ́, ǹdə́ kɔn dɛ̀bɛ́ gakó rə̀ wɔ́ ǹmyɛ́ nyǎn cɔ w w mɔ́, ń mə́ du jàà y kɛ̀bɛ́ wẽ́. ¹³Bə̀ nə́ la jàà y kɛ̀bɛ́ zhìlù, bə̀ lwɛlɛ rɛ́ wìrhí è cɔ w lyì shò-kwã nɛ́ mɔ́ já dɛ̃́dɛ̃́ Bə-zhɔ̌-zhe yé né. Wɔ́ Bə-zhɔ̌-zhe ń twĩ̀ nə́ba bə̀ nə́ zhəl nə́ zhìlì jàà yá.¹⁴Lɔtɛ zɛ̃̀ n du, n zɔ̀m ǹdə́ ń cə̀mmá bɛ́ bə̀ y’à jú ń bə̀kwá bɛ́ mɔ́ n wɔ̀ : Zɛ̃̀-na dɛ̃̌, á du jàà y kɛ̀bɛ́ wẽ́ ; bə̀ nyǐ Bə-zhɔ̌-zhe la cɔ w zhìlù. Sə ń cə̀mmá bɛ́ yírhə́ w mó, wɔ́ dədalá ń nə́ ń ce. ¹⁵Cɛ y gə́ tú e bə̀ è n’ê wárh yi ní, màlɛ̀kabá j’a yí Lɔtɛ nyí ni, bə̀ n’ê zɔ̀m ǹdə́ mɔ́ bə̀k’â bwérhé, bə̀ zhe : Zɛ̃̀ ń zə ǹ kɛ̃ mɔ́ ǹdə́ ǹ mə̀kwá bɛ́ bə̀lyé y bə̀ ŋwɛ́nɛ́ nyɔ̀nɔ̀ mɔ́, ń mə́ du, mùnì ga ǹ bə̀ká ń cì cɔ w zhùlù mú wẽ́ yé.¹⁶17 Ń gə́ yà ń zɛ̃̀ ń nə́ ń jíjírhí mú ce, bala bɛ́ zə bə̀ jɛ̃̀ bə zə ńmyɛ̌ ǹdə́ ń kɛ̃ mɔ́ ǹdə́ ń bə̀kwá bɛ́ bə̀lyè y ne, bə yẽ̌ be du kwã nɛ́ cɔ w wa, Bə-zhɔ̌-zhe gə́ yà ń nə́ ń yǎl n ce n lú mú yilə. ¹⁷Bǝ̀ gǝ́ zǝ bɛ bǝ du cɔ w kwã nɛ́, bǝ̀ wǝ̀l Lɔɔtɛ nɛ: Dǔr ń zwẽ ǹ cìnǝ̀. Ǹ bǝ̀k'á pyìrhí ń nyǐ ǹ kwã nɛ́ yé, ǹ bǝ̀k'á zhì jàà kǝ̀l kǝ̀l w nyɔ̀nɔ nyí rí wẽ́ yé! Dǔr ń vò pyɔ̀ w wa, è gǝ dǝ rǝ̀myɛ́ ǹ m'ǎ cì.¹⁸18 Lɔtɛ wɔ̀ bɛ : Ǎ, Cǐnnə, ɔ̃́’ɔ̃ ! ¹⁹Nyìwé, ǹ nyǐ ni ǹdə́ sónó ǹ yírhə́ wə, sə ǹ byili ǹ nɔ̀nɔ̀ dǔr mó nánfɔ̀lɔ̀ w à yilə, ń mə́ zwẽ à myə̌l ré, à n’â lwə̀l mó, nyǐ à wàr à cìn à la zõ pyɔ̀ w yó ǹdə́ cɛ y zhìlù mú yə̀ nɛ zal yé. ²⁰Nyǐ cɔ w kɔ̀bɔ́, òmyɛ́ mɔ́ bwə́l dɛ̃́dɛ̃́, à wɔ̌ à m’a shèè gàà mɔ́, o wɔ́ námpɔ́lɛ́. Ǎ ! a ŋwɛ̀nɛ́ a zwẽ à cìn gàà…ò də̀ námpɔ́lɛ́ nà ?... mùnì ga a zə nyǔ !²¹N zɛ̃̀ n wɔ́ Lɔtɛ : Nyǐ, à gwẽ̌ m’a pɔ̃́ sɔ́má y èmyɛ́ mɔ́, ce à t’â la cɔ w ǹ nə́ ǹ zɔ̀m ò yò mó zhìlù yé. ²²Cə jàn nɛ́ là là ń dùr ń vò ń shèè gàà mɔ́, bə̀ à t’â la kaka wɔ̀rhɔ́ ǹdə́ ǹ gwẽ̌ yə̀ gàà mɔ́ yí yé. Wɔ́ rə̀myɛ́ yil bə̀ co cɔ w òmyɛ́ mɔ́ yil bə̀ Təsəwarɛ.²³Lɔtɛ tú ń nə́ ń zwì Təsəwarɛ ǹdə́ nə̀nyɛ́nɛ́ y lyĩ. ²⁴Rə̀myɛ́ yó né, Bə-zhɔ̌-zhe zɛ̃̀ n ce zho ǹdə́ myǐn nyɔ̀ Sodome ǹdə́ Gɔmɔɔrɛ yó ǹdə dwà ta, Bə-zhɔ̌-zhe jàn yilə. ²⁵N já n ce cɛmɛ nɛ́ ǹdə́ vɔlɔ w gakó ǹdə́ lyì bí byɛ̀bɛ́ bə̀ jě cɛmɛ nɛ́ wẽ́ mó ǹdə́ cɛ y yó cèmé né gakó cɔ̀.²⁶Lɔtɛ kɛ̃ mɔ́ zɛ̃̀ n pyìrhí n nyǐ ń kwã nɛ́, n já n jǐrh nə̀kwə̃̌ cə̀-byòlò. ²⁷Abərahamɛ zɛ̃̀ nəkɔkɔ́lɛ́ shã shã, ń la jàà y kɛ̀bɛ́ ń zhì Bə-zhɔ̌-zhe yé né mə̀gã̌ mɔ́ wa. ²⁸N yí, n kwẽ̌ ń yé ń la Sodome ǹdə́ Gɔmɔɔrɛ səta nyǔ, ǹdə́ vɔlɔ nyí rí gakó nyǔ ; n nə nyɛ̀rh sə shí tɛ̃́ sə̀ n’ê dwi ǹdə myìn-cɔ̀lɔ̀ nyɛ̀rh ta.²⁹Yi gə́ zhìlì cɛmɛ nɛ́ nə̀ ŋwɛ́nɛ́ vɔlɔ w mɔ́ kwã nɛ́, rə zɛ̃̀ rə lyǐrh Abərahamɛ yò ; rə̀ gə́ ce Lɔtɛ lú zhìlù mú wẽ́, rə tə̀ Abərahamɛ yil rə zhìlì cɛmɛ nɛ́ Lɔtɛ yà ń jě nə̀ wẽ́ mó.³⁰Lɔtɛ zhì gàà n zhǐr n vò dɛ̃̌ sõ, n zhǐ pyɔ̀ w yó, ńmyɛ̌ ǹdə́ ǹ mə̀kwá bɛ́ bə̀lyè yá, bə̀ ywẽ y’a zhe mo ǹdə́ Təwarɛ nɛ́ jǒm. N lyɛ̃ n vò n zù myèlé rə̀dù wẽ́, ńmyɛ̌ ǹdə́ ń mə̀kwá bɛ́ bə̀lyè y jě.³¹Zhɛ̀n-kɛ̃ mɔ́ zɛ̃̀ n wɔ̀ nyɛ̃́ mɔ́ nɛ : Nə́ da cɛ ; e jà bal tɛ̀nɛ́ jàà y w nyɔ̀nɔ̀ gaga ń la nə́ sono ǹdə tənèsé lyì bí gakó gə́ n’ê wɛ̀rhɛ́ nɛ́ yé. ³²Zɛ̃̀ ń bà, nə́ pyà də̀vɛ̃́ nə́ pə nə́ da nɛ n nyɔ̃̀, sə nə́ zù ǹdə́ mɔ, mùnì ga nə́ nə nə́ da dwí rə yə̀ nɛ́. ³³Bə zɛ̃̀ bə pə də̀vɛ̃́ bə̀ da nɛ n nyɔ̃̀ cəcɛ̃ y èmyɛ́ mɔ́ wẽ́ ; zhɛ̀n-kɛ̃ zɛ̃̀ n zù ǹdə́ da mɔ́ : Da mɔ́ yə̀ lwar ń gə́ tú zù yi ní ǹdə́ ń gə́ ká n zɛ̃̀ yi ní yé.³⁴È zɛ̃̀ nəkɔkɔ́lɛ́ yá, zhɛ̀n-kɛ̃ mɔ́ wɔ̀ nyɛ̃́ mɔ́ nɛ : Nyǐ, də̀là nɛ cəcɛ̃ y à zù ǹdə́ à da ; rə̀myɛ́ ce bə̀ nə́ k’é pɔ̃́ də̀vɛ̃́ n nyɔ̀ cəcɛ̃ y kɛ̀bɛ́, sə vò ń zù ǹdə́ mɔ, mùnì ga nə́ nə nə́ da dwí rə yə̀ nɛ́. ³⁵Bə zɛ̃̀ bə k’e pə də̀vɛ̃́ bə̀ da nɛ n nyɔ̀ cəcɛ̃ y èmyɛ́ mɔ́ ; nyɛ̃́ mɔ́ myɛ kə́ n vò ǹdə́ da mɔ́ : Da mɔ́ yə̀ lwar ń gə́ tú zù yi ní ǹdə́ ń gə́ ká n zɛ̃̀ yi ní yé.³⁶Lɔtɛ bə̀kwá bɛ́ bə̀lyè y kwè bə̀ da pǔrh. ³⁷Zhɛ̀n-kɛ̃ mɔ́ lù, n ce byǐ mú yil bə̀ Mɔwabɛ : wɔ́ ńmyɛ̌ ń wɔ́ Mɔwabitibá nàmbal ǹdə́ zà ga. ³⁸Nyɛ̃́ mɔ́ námpɔ́lɛ́ y myɛ lù, n ce byǐ mú yil bə̀ Bənɛ-Aməmi : Wɔ́ ńmyɛ́ ń wɔ́ Amənitibá nàmbal ǹdə́ zà ga.

¹Abərahamɛ zhǐr gàà n vò Nəgɛvɛ ; n yí n jòm Kadɛɛsɛ ǹdə́ Səshuuri cəcəl wə. Rə̀myɛ́ kwã nɛ́, n zhǐr n vò n jòm Gərarɛ nɛ́. ²Abərahamɛ zɛ̃̀ ń nə́ ń zɔ̀m ń kɛ̃ Sara yò ń zhe : Nyǐ wɔ́ à nəkɔ́. Rə̀myɛ́ ce Gərarɛ pyɔ̌ Abyəməlɛkɛ, ce bə kwè Sara. ³Yi zɛ̃̀ rə bə̀ rə lyí Abyəməlɛkɛ ǹdə́ cəcɛ̃ ń dàrhà wẽ́, rə wɔ̀ mɔ : Nyǐ ǹ la cú kɛ̃ mɔ́ mɔ̀bɔ́ ǹ kwè mó yilə, bə̀ ń zhe byal.⁴Abyəməlɛkɛ gə́ y’ǎ gwẽ̌ yə̀ zwì ǹdə́ mɔ mɔ́ ce, n lyár n wɔ̀ : Cǐnnə, ǹ nə́ m’ǎ ce bə gu tənà kɛ̀bɛ́ è wɔ́ cángá mɔ́ myɛ cìcì mú nà ? ⁵Ń yə̀ nɛ wə̀l : Bə̀ wɔ́ ń nəkɔ́ nà ? Sə ń cìcì mú myɛ yə̀ wə̀l : wɔ́ à nəbɔ́ nà ? À twĩ̀ ǹdə́ wu-põ̀ ǹdə́ jɛ̃̀rh sə bə dóó zhe yé.⁶Yi zɔ̀m ǹdə́ mɔ́ ń dàrhà wẽ́ rə mɔ̀ : À yě bə̀ ǹ twĩ̀ ǹdə́ wu-põ̀ ; wɔ́ rə̀myɛ́ è ce à cə̀r mó, ǹ yə̀ yə̀-bəlɔ̀lɔ́ wɛ̀rhɛ́ ǹdə́ mɔ́ yé. Wɔ́ rə̀myɛ́ yil à yə̀ mɔ́ sɔ́má pɛ sə́ dwə̀rh mo yé. ⁷Èlǎsɛ̃́, ká pə kɛ̃ mɔ́ bal mɔ́ mɔ̀bɔ́ nɛ ; bə̀ ń wɔ́ Yi nyì-zwennə. Ń mà n lwəl Yi ǹ yilə, ń zə myə̌l. Sə ǹ gə yə̀ mɔ pɛ, sə́ lwar bə̀ ǹmyɛ́ ǹdə́ ǹ kɔn dɛ̀bɛ́ ǹ zhe mó gakó b’a cì.⁸Abyəməlɛkɛ dùlí n zɛ̃̀ nəkɔkɔ́lɛ́ shãã shãã, n byẽ̀ ń tùntùnnə̀ bé gakó, n byili bi ywẽ̀ né nə̀myɛ́ mɔ́ gakó ; sə ywẽ nánfɔ̀lɔ̀ zɔ lyì bí bə̀myɛ́ mɔ́ dɛ̃́dɛ̃́. ⁹Abyəməlɛkɛ byẽ̀ Abərahamɛ myɛ n wɔ̀ : Wɔ́ etər ǹ wɛ̀rhɛ́ nə́bá nɛ èta mɔ́ ? Wɔ́ bə̀kɔ́n wẽ́ à dó mó né, ń zɛ̃̀ ń mə́ ń ce yə̀-bəlɔ̀lɔ́ w nánfɔ̀lɔ̀ w kɔ̀bɔ́ jòm àmyɛ́ ǹdə́ à tənà y yó mó ? Ǹ wɛ̀rhɛ́ tumə nyɛ̀bɛ́ nə̀ bə mə̌ sə nə wɛ̀rhɛ́ à yilə.¹⁰Abyəməlɛkɛ zɛ̃̀ n kə́ n wɔ̀ Abərahamɛ : Wɔ́ bə̀kɔ́n ǹ bùl ǹ wẽ́ ń mə́ twĩ̀ èta mɔ́ ? ¹¹Abərahamɛ lyár n wɔ̀ : À y’à n’â zɔ̀m à wẽ́ bə̀ Yi ywẽ dǔr t’â la tənà y kɛ̀bɛ́ wẽ́ yál zhə̀n zə̀nà ga yé, rə̀myɛ́ ce, bə̀ b’a tə̀ à kɛ̃ yil bə gu ni. ¹²Sə kɔn súlí myɛ, è wɔ́ zhə̀nà, ń wɔ́ à nəkɔ́, à da bə̀kɔ́ ; sə ń də̀ à ná bə̀kɔ́ yé, wɔ́ rə̀myɛ́ mɔ́ dúdú. N zɛ̃̀ n jǐrh à kɛ̃.¹³Yi gə́ tú rə ce a du à da sõ kɛ̀lɛ́ w à n’â tó dɛ̃̌ à zhə̀l mó ce ; a wò Sara nɛ : Nyǐ cɛ̀nɛ̀ rɛ́ tɛ̀bɛ́ ǹ la nɛ wɔ̀rhɔ́ mɔ́ ; jààsɛ́ shɛ̀bɛ́ nə́ gə yú sə̀ wẽ́ mó, sə́ zɔ̀m à yò ń wɔ̀ : Ń wɔ́ à nəbɔ́. ¹⁴Abyəməlɛkɛ zɛ̃̀ n kwè pyììsì ǹdə́ nɛ̃ ǹdə́ tùntùnnə bala ǹdə́ kana n pə Abərahamɛ nɛ ; n pə ń kɛ̃ Sara myɛ.¹⁵Abyəməlɛkɛ wɔ̀ : Nyǐ, à tənà y è pyě ǹ yé né ; jǒm ǹ gə́ só mə̀gã̌. ¹⁶N zɛ̃̀ n wɔ̀ Sara nɛ : Nyǐ, à n’â pɛ wár-kùlsi mɔ̀rhɔ̀ ǹ nəbɔ́ mɔ́ nɛ ; sə̀ m’a yə̀, yə̀ yə̀-bəlɔ̀lɔ́ wɛ̀rhɛ́ myɔrhɔ kɔn lyì bí byɛ̀bɛ́ bə̀ ŋwɛ́nɛ́ ǹdə́ mɔ́ mɔ́ yírh w bə lwar, sə bə̀ gakó lwar bə̀ dóó tɛ̀nɛ́ ǹ yó w yé.¹⁷Abərahamɛ zɛ̃̀ n ce Yi, rə wárh Abyəməlɛkɛ, ǹdə́ ń kɛ̃ mɔ́ ǹdə́ ń tùntùnnə̀ bé bə̀ wɔ́ kana mɔ́; zɛ̃̀ bə ŋwɛ̀nɛ́ bə lù byǎ. ¹⁸Bə̀ Bə-zhɔ̌-zhe yà ń tə̀ Abərahamɛ kɛ̃ Sara yil n ce Abyəməlɛkɛ kɛ̀lɛ́ y gakó jǐrh ejur.

¹Bə-zhɔ̌-zhe lyǐrh kɔn rɛ́ dɛ̀bɛ́ ń yà ń zɔ̀m ǹdə́ Sara mɔ́ yò, Bə-zhɔ̌-zhe zɛ̃̀ n pyìrh nyí rí tɛ̀bɛ́ ń yà ń bwəl sara nɛ mɔ́. ²yi rí tɛ̀bɛ́ Yi y’à byili Sara nɛ mɔ́ gə́ tú e yí. Sara kwè pwǐ, n lù byǐ ń náncɔɔrɛ wẽ́ n pə Abərahamɛ nɛ. ³Abərahamɛ zɛ̃̀ n ce byǐ mú Sara lùl n pɔ̃ mɔ́ yil Bə̀ Yəzakɛ. ⁴Abərahamɛ gõ̀ ń byǐ Yəzakɛ ń dwã lyɛlɛ yùwə̀, ǹdə Yi gə́ y’à pɔ mɔ nyí ní.⁵Abərahamɛ y’ǎ zhe byinə zɔ̌m ń byǐ Yəzakɛ lul ré yi ní. ⁶Sara zɛ̃̀ n wɔ̀ : Yi wɛ̀rhɛ́ nɛ mɔ̀n kɔna ; lò mɔ̀bɔ́ gakó ń nyɛ̀ɛ̀ rɛ la nɛ mɔ̌n. ⁷N kə n súlí n wɔ̀ : Wɔ́ mɔ̌ lò ń y’ǎ mà n wɔ̀ Abərahamɛ nɛ : Sara mà n nyɔ̃̀ byǎ ń nə̀bán nɛ ? Sə ǹdə́ rə̀myɛ́ ga, à lùl byǐ à náncɔɔrɛ wẽ́ a pɔ̃.⁸Bə̀ bə̀sɔ́bwɛ̀lɛ́ y byì, bə kwər y yil ne, Abərahmɛ wɛ̀rhɛ́ címsi bə̀sɔ́bwɛ̀lɛ́ y yil ne kwər dɛ̃ rɛ́ yùwə̀. ⁹N zɛ̃̀ n pwírí Ezhipti lyì bə̀kɔ́ Agarɛ byǐ mú ń lùl Abərahamɛ nɛ mɔ́ nə́ ń mɔ̀nà ;¹⁰Rə̀myɛ́ mɔ́ ce, n wɔ̀ Abərahamɛ nɛ : Jǐ tùntùnnə̀ mó mɔ̀bɔ́ ǹdə́ ń byǐ mú, bə̀ tùntùnnə̀ mó ńmyɛ̌ byǐ mú tá ń la à byǐ Yəzakɛ nɛ tó ń jí cəl Abərahamɛ jɛ̃̀ kɔn rɛ́ wẽ́ yé. ¹¹Sə Abərahamɛ yə̀ zɔ̀mɛ̀ rɛ́ rə̀myɛ́ mɔ́ swéné zhə̀n zhə̀n ga yé, ń byǐ Esəmayəə yilə.¹²Yi zɛ̃̀ rə wɔ̀ Abərahamɛ nɛ : Bá ǹ gə yə̀ rə̀myɛ́ swéné ǹ yírh w byǐ mú ǹdə́ ǹ tùntùnnə̀ mó yil myɛ ; shɛ̀nɛ́ ń wɛ̀rhɛ́ kɔn dɛ̀bɛ́ gakó Sara la mɔ́ lwə̀l mó mó ń pɔ̃ ; bə̀ wɔ́ Yəzakɛ wẽ́ ǹ sə̀pwà dwí rí la nɛ́ shú. ¹³À b’a wɛ̀rhɛ́ tənà ǹ tùntùnnə̀ mó byǐ mú myɛ yilə ; bə̀ ń wɔ́ ǹ dwí.¹⁴Abərahamɛ dùlí n zɛ̃̀ nəkɔkɔ́lɛ́ shãã shãã ; n kwè búrú ǹdə́ nɛ̃̌ kwə̀lə̀, n pə Agarɛ nɛ n pyɛ̀lɛ́ ; n kwè bə̀sɔ́bwɛ̀lɛ́ y myɛ n pɔ̃, n ce n lyɛ̃ ń la. N vò vò n jé Bɛrɛ-Shəba gɔ-elũ èpòlò wə. ¹⁵mɔ́ gə́ tú mə zhɛ̀ kwə̀lə̀ w yi ní, n kwè bə̀sɔ́bwɛ̀lɛ́ y nɛ n yẽ̌ cèmé né òdù kùr wə, ¹⁶n lyɛ̃ ń la, n vò myɛrhɛ ǹdə bə̀ gə́ y’a tə cam rə vò rə tu ma mɔ́ ta, n zə ń yé n zǎ byǐ mú ; ń nə́ ń zɔ̀m ń zhe : À t’â yǎl a nə à byǐ mú ǹdə́ ń nə́ ń cì yé ! N zɛ̃̀ ń jě tɛ̃́ n zə ń yé n zǎ mɔ, n zhẽ̌ ń cəl dɛ̃̌ ń nə́ ń kúrhə́.¹⁷Yi nyɛ̀ɛ̀ bə̀sɔ́bwɛ̀lɛ́ y cəl ré ; Yi màlɛ́ka zhì dɛ̃̌ Arəzana w e byẽ̀ Agarɛ, e wɔ̀ mɔ̀ : Agarɛ, wɔ́ bə̀kɔ́n rə̀ zhe mó ? Bə̀ká ń dùr ywẽ gaga yé, bə̀ Yi nyɛ̀ɛ̀ bə̀sɔ́bwɛ̀lɛ́ y cəl ré jàà kɛ̀bɛ́ è ŋwɛ́nɛ́ nɛ́ mɔ́ wa. ¹⁸Zɛ̃̀ dɛ̃̌, kwě bə̀sɔ́bwɛ̀lɛ́ y ń zə ǹ jɔ̃̀ wa ; Bə̀ à b’a ce e jǐrh tənà nánfɔ̀lɔ̀.¹⁹Yi zɛ̃̀ rə púr ń yírhə́ né, n nə zhìlí nɛ̃̌ ŋwɛ́nɛ́ è wẽ́ ; n yí n tɛ̃́ n ce ń nə̀-bɔ̀lɔ̀ w e sú, n pə bə̀sɔ́bwɛ̀lɛ́ y nɛ e nyɔ̀. ²⁰Yi y’à ŋwɛ́nɛ́ ǹdə́ bə̀sɔ́bwɛ̀lɛ́ yá, e byì gɔ-elũ w wə, e jǐrh twã tarna. ²¹È y’à jě Pərã gɔ-elũ èpòlò w wə, è ná zɛ̃̀ n pyà Ezhipti tənà y lyì bə̀kɔ́ n pɔ̃ e jí.²²Rə̀myɛ́ yó né, Abyəməlɛkɛ zɔ ń shə̀dɛ́ɛ́sɛ́ yó-cə́bal Pəkəə n bə̀ Abərahamɛ sono n wɔ̀ mɔ̀ : Yi ŋwɛ́nɛ́ ǹdə́ mɔ́ kɔn dɛ̀bɛ́ gakó ǹ nə́ wɛ̀rhɛ́ mɔ́ wẽ́. ²³Bwəl nyí ǹdə́ Yil ré ń pɛ̃ nyɔ̀nɔ̀ èlǎsɛ̃́, bə̀ ǹ tá ǹ la àmyɛ́, ráá à byǎ bɛ́, ráá à nɛ̀mɛ́ nɛ́ yúyǔ yé, bə̀ ǹ b’ǎ zə àmyɛ́ ǹdə́ Tənà y kɛ̀bɛ́ ǹ jě è wẽ́ mó cɛ̀nɛ̀, ǹdə́ àmyɛ gə́ zɔ ǹmyɛ nɛ́ ta. ²⁴Abərahamɛ wɔ̀ : À n’â bwəl rə̀ nyí.²⁵Abərahamɛ zɛ̃̀ n ji Abyəməlɛkɛ búlə́, zhìlì èdù y ń tùntùnnə̀ bé zɔ bə zwẽ ǹdə́ jàn mɔ́ yilə. ²⁶Abyəməlɛkɛ lyár n wɔ̀ : À yə̀ lò mó mɔ̀bɔ́ ń wɛ̀rhɛ́ kɔn rɛ́ rə̀myɛ́ mɔ́ pár lwar yé ; ǹ yə̀ rɛ nɛ byili gaga yé, wɔ́ zà à gə́ nyɛ̀ɛ̀ rɛ nɛ́. ²⁷Abərahamɛ zɛ̃̀ n zə pyììsi ǹdə́ nɛ̃ n pə Abyəməlɛkɛ nɛ ; bə̀ ga bəlyè y j’a zə dɔbrɛ ǹdə́ dwã.²⁸Abərahamɛ zɛ̃̀ n vùr pyì-bwǎlsɛ shàlpyɛ̀ n cĩ́ kwã nɛ́. ²⁹Abyəməlɛkɛ bwə̀rh Abərahamɛ bə̀ pyììsí shàlpyɛ̀ ǹ y vùr ń cĩ́ kwã nɛ́ mɔ́ wɔ́ etər nyɛ̌rh ǹdə́ sɛ ? ³⁰n lyár n wɔ̀ : Ǹ m’a zwẽ pyììsí shɛ̀bɛ́ shàlpyɛ̀ à jɔ̃̀ wa, mùnì ga rə̀myɛ́ yə̀ zhə̀n kɔn rə̀ n’ê byili bə̀ wɔ́ àmyɛ́ à kù zhìlí y kɛ̀bɛ́ èta mɔ́.³¹Wɔ́ rə̀myɛ́ yil bə̀ n’ê byẽ̀ jàà y kɛ̀bɛ́ bə̀ Bərɛ-Shəba ; bə̀ wɔ́ gàà mɔ́ bə̀myɛ́ bə̀lyè y ga bwəl nyə́ né ǹdə́ wdã nɛ́. ³²Wɔ́ Bərɛ-Shəba nɛ́ bə̀ zɔ dɔbrɛ́ ǹdə́ dwã nɛ́. Rə̀myɛ́ kwã nɛ́, Abyəməlɛkɛ zɛ̃̀ n ká n zə shə̀dɛ́ɛ́sɛ́ yó-cə́bal Pəkwəə bə k’a kwɛ̃̀ bə vò Fələsətɛ̃bá tənà y wa.³³Abərahamɛ zɛ̃̀ n zhele Təmərisi1 Bərɛ-Shəba nɛ́ ; n zɛ̃̀ n byẽ̀ Bə-zhɔ-zhe yil ré gàà mɔ́, Yi rí rə̀ ŋwɛ́nɛ́ byinə nə̀ bə zhɔ̌ zhe mó. ³⁴Abəharamɛ jòm Fələsətɛ̃bá tənà y w kɔn dɛnɛ.

¹Ywẽ̀ né nə̀myɛ́ kwã nɛ́, Yi zhẽ̀ Abərahamɛ, rə byẽ̀ mo rə mɔ̀ : Abərahamɛ ? N lyár n wɔ̀ : Nyǐn ni ! ²Yi wɔ̀ : Zə ǹ byǐ mú nã́-dùwə̀ yə́, mɔ̀bɔ́ ǹ só mó, Yəzakɛ ; ń mə́ vò Mɔrɛja tənà y wa, ń mə́ ń zwə́l vwĩ̀ námpúm cɛ̃́ɛ̃́ gàà mɔ́ pyàr rɛ́ òdù w kɔ̀bɔ́ à la mɔ́ byilu mú yó ń pɛ̃. ³Abərahamɛ dùlí n zɛ̃̀ nəkɔkɔ́lɛ́ shãã shãã, n kwɛrhɛ ń bə̀na n lyẽ, n zə ń tùntùnnə bə̀lyè ǹdə́ Yəzakɛ. N lo dǎr vwĩ̀ rí námpúm cɛ̃́ɛ̃́ rɛ́ yilə, n zhǐr ń mə́ ń la jàà y kɛ̀bɛ́ Yi byili mu mú wə.⁴N vò vò, è dwã nə̀tɔ̀ yùwə̀, Abərahamɛ kwě ń yé ń la nyǔ, n nə jàà y è nyɛ. ⁵Abərahamɛ zɛ̃̀ n wɔ̀ ń tùntùnnə̀ bé ne : Zhǐ-nə nyɔ̀nɔ̀ ǹdə́ bə̀na yá ; àmyɛ́ ǹdə́ ébɔ́-dǎl mɔ̀bɔ́ la nə́ yí nyɔ̀nɔ̀ èta nə́ cèrhé Yi, sə nə́ k’á bə̀ á sono. ⁶Abərahamɛ kwè dǎr rɛ́ vwĩ̀ rí námpúm cɛ̃́ɛ̃́ rɛ́ yil mó, n zhĩ ri ń byǐ Yəzakɛ nɛ, n zɛ̃̀ ń zhe myǐn mú ǹdə́ shǐ ń jɔ̃̀ wà. Bə̀myɛ́ bəlyé y ga tó dwã bə̀ n’ê zhə̀l bə̀ la.⁷Yəzakɛ zɛ̃̀ ń nə́ ń zɔ̀m ǹdə́ ń da Abərahamɛ ń zhe : À da ! N shɛ̀ n wɔ̀ : À byǐ Yəzakɛ, nyǐ ni ! Yəzakɛ kə́ wɔ̀ : Nyǐ myǐn mú ǹdə́ dǎr rɛ́ ; sə wɔ́ yẽ̀ pyìrhə́ y vwĩ̀ rí námpúm cɛ̃ɛ̃́ rɛ́ yil mó ŋwɛ́nɛ́ ? ⁸Abərahamɛ lyár n wɔ̀ : À byǐ, Yi cìcì b’a pə pyìrhə́ y vwĩ̀ rí námpúm cɛ̃́ɛ̃́ rɛ́ yil mó. Bə̀myɛ́ bə̀lyè y ga k’e zhílí bə̀ n’ê zhə̀lə̀.⁹Bə̀ gə́ yú jàà y kɛ̀bɛ́ Yi y’à byili mú wẽ́ bə zhɛ̀, Abərahamɛ lù vwĩ̀-jùlú gàà mɔ́, n kwɛrhɛ dǎr rɛ́ n cĩ́ ní. N zɛ̃̀ zə ń byǐ Yəzakɛ n lyẽ ń cĩ́ vwĩ-jùlú w yó, dǎr rɛ́ yó wə. ¹⁰Abərahamɛ zɛ̃̀ n zhẽ̌ ń jɛ̃̀ n kwè shǐ y ń mə́ ń la ń byǐ mú zwə́l.¹¹Rə̀myɛ́ yó né, Bə-zhɔ-zhe màlɛ́ka zhì dɛ̃̌ Arəzana w è n’ê byẽ̀ mo è zhe : Abərahamɛ ! Abərahamɛ ! N lyár n wɔ̀ : nyǐ ni ! ¹²Màlɛ́ka y wɔ̀ : Ǹ bəká zə ǹ jɛ̃̀ y e yí byǐ mú ni yé, sə ǹ bə̀ká wɛ̀rhɛ́ mɔ kaka yé ; b’à lwar èlǎsɛ̃́ bə̀ ǹ nə́ dùr Yi, n yə̀ nɛ ǹ byǐ mú nã́-dùwə̀ y vòm yé.¹³Abərahamɛ zɛ̃̀ n kwẽ̌ ń la ń kwã nɛ́ nyǔ n pwírí bə̀cìlə́ bə̀ zɔ è nyimə né bə lyẽ, bə lyẽ tɛ̃́ sɔ̀lɔ̀ òdù wẽ́ ; Abərahamɛ zhǐr n vò n lwə̌r bə̀cìlə́ y n mə n zwə́l vwĩ̀ rí námpúm cɛ̃́ɛ̃́ rɛ́ n cĩ́ ń byǐ Yəzakɛ jàà wa. ¹⁴Abərahamɛ zɛ̃̀ n ce jàà èmyɛ́ mɔ́ yil bə̀ Zəwovwa-Zhire1. Wɔ́ rə̀myɛ́ è ce, ǹdə́ zà zà ga bə̀ n’ê wə̀lə̀ : È gə wɔ́ Bə-zhɔ-zhe pyɔ̀ w yó mó, kɔn tɛnɛ rə̀ la pɔ.¹⁵Bə-zhɔ-zhe màlɛ́ka y k’e zhì dɛ̃̌ Arəzana w e byẽ̀ Abərahamɛ twər rə̀lyè nyǎn rɛ́, ¹⁶e wɔ̀ : Àmyɛ́ cìcì mú n’â tó Bə-zhɔ-zhe zɔ̀mɛ̀ rɛ́ dɛnnɛ à bwəl mó rə̀ nyí ! Ǹ gə́ wɛ̀rhɛ́ èta mɔ́ yilə, ǹ yə̀ ǹ byǐ mú nã́-dùwə́ y vòm mó yilə, ¹⁷à b’a cĩ́ bwəl ǹ yó, a ce ǹ dwí rí pù, ǹdə dɛ̃̌ yi w càmmə́sɔ̌sɛ́ ta, ǹdə nyɔ̀rhɔ́ w nə̀-fɔ̀lɔ̀ w vɔ̃̀ nɛ mɔ́ ta ; sə ǹ dwí rí b’a ŋwɛ̀nɛ́ rə cìní rə̀ zwə̀ bé cɛmɛ nɛ́.¹⁸Tənèsé cɛ y yó mó b’a nə bwəl ǹ wẽ́, bə̀ ǹ wɛ̀rhɛ́ ǹdə à zɔ̀mɛ̀ rɛ́ gə́ byili ní. ¹⁹Abərahamɛ ká n kwɛ̃̀ n vò ǹ tùntùnnə̀ bé sono, bə zɛ̃̀ bə tó dwã bə vò Bərɛ-Shəba ; bə̀ wɔ́ Bərɛ-Shəba nɛ́ Abərahamɛ y’ǎ jě né.²⁰Ywẽ̀ né rə̀myɛ́ kwã nɛ́, lyì zɛ̃̀ bə bə̀ bə̀ n’ê cĩ́ zɔ̀mà Abərahamɛ nɛ bə̀ zhe : Nyǐ, Məlka myɛ lùl byǎ n pə ǹ da-byǐ Nawɔɔrɛ nɛ : ²¹Ń byì-cɛ y yíl Utisi, nyɛ̃́ mɔ́ yíl Buzi, Aramɛ wɔ́ Kəmwəə da1, ²²Kəsədɛ, Azo, Pələssəshɛ, Jədəlafwɛ e súlí Bətwəə bá da.²³Bətwəə zɛ̃̀ n lù Arəbəka. Wɔ́ byǎ bɛ́ bə̀myɛ́ lyɛlɛ y Mələka lùl Abərahamɛ da-byǐ Nawɔɔrɛ nɛ mɔ́. ²⁴Ń jì-kɔ́ mɔ́ y’ǎ yíl Arəma, ńmyɛ lù Təbashɛ, Gahama, Tahashɛ e súlí Maaka.

¹Sara wɛ̀rhɛ́ byinə zɔ̌m ǹdə́ shí-elyè ǹdə́ nyàlpyɛ̀ : Wɔ́ byinə né nə̀myɛ́ Sara wɛ̀rhɛ́ cɛ yó mó èta. ²Sara cù Kərəjatɛ-Arəba nɛ́, bə̀ n’ê byẽ̀ bə̀ Ebərɔ̃ mɔ́, Kanaã tənà y wa ; Abərahamɛ zɛ̃̀ n bə̀ Sara cùù w ni kúrh.³Abərahamɛ zɛ̃̀ n zhì cùù yó, n zɔ̀m ǹdə́ Etɛ byǎ bɛ́ n wɔ̀ : ⁴À wɔ́ zhəbal, à tú à jě á cəcəl wə ; pə-na nɛ à sə̀pwà lú-bɔ̀l á sono, a kwè à cùù w á yé né a ce.⁵Etɛ byǎ bɛ́ lyár Abərahamɛ bə wɔ̀ : ⁶À cǐnnə, cili nə́ sono ! Ǹ wɔ́ Yi pyɔ̌ nə́ cəcəl wə ; cír nə́ lú-bɔ̀là bɛ́ wẽ́ mə̀dù ń ce ǹ cùù w ní ; bə̀ nə̀myɛ̌ mə̀dù ga tá ń la ń lú-bɔ̀l yò cõ ń mə́ ń ce ǹ cùù w yé.⁷Abərahamɛ shí tɛ̃̀ n zɛ̃̀ n jòm tənà y dwí rí yé né, Etɛ byǎ bɛ́ yé né. ⁸N zɔ̀m ǹdə́ bɛ n wɔ̀ : Á gə m’a pɛ̃ sɔ́má a kwè à cùù w à n’â nyǐ à yírhə́ né w à yé né mó a ce, s’á cili, lwə̌l-nə Efərɔ̃ byǐ Təsəwarɛ nɛ, ⁹bə ń yẽ̌ myèlé ré ń cǐ rə́ ŋwɛ́nɛ́ Makəpəla nɛ́, à cɛ y yə́-pɛ̀lɛ́ w mɔ́ nɛ n pɛ̃, a kwɛ̃̌ mɔ rə̀ wɛ́rɛ́ y ye y gə́ mə̌ nɛ́, mùnì ga rə yə̀ à sə̀pwà lú-bɔ̀l á cəcəl wə.¹⁰Efərɔ̃ cìcì yà ń tó ń jě Etɛ byǎ bɛ́ wẽ́. Rə̀myɛ́ yó né, Eshɛ̃bá lyì bal Efərɔ̃ zɛ̃ n lyár Abərahamɛ Etɛ byǎ bɛ́, ǹdə́ byɛ̀bɛ́ gakó bə̀ y’à n’ê tó cɔ w bwə̀rə̀ y bə̀ zwì mú yé né n wɔ̀ : ¹¹À cǐnnə, ɔ̃́’ɔ̃, cili ! À n’â pɛ mɔ́ cɛ yá, ǹdə́ myèlé ré rə̀ ŋwɛ́nɛ́ è wẽ́ mó myɛ a súlí ní. À n’â pɛ rɛ mɔ́, à dwí rí byǎ bɛ́ gakó yírh wə : Ce ǹ cùù wə́.¹²Abərahamɛ já n wùlì tənà dwí rí yé né. ¹³N zɛ̃̀ n zɔ̀m ǹdə́ Efərɔ̃ tənà y dwí rí yé né n wɔ̀ : Cili, à n’â lwə̀l mó ! yẽ̌ a pɔ̃ cɛ y ye yə́ : Shɛ̀nɛ́ è yò à yilə ; sə a vò a ce à cùù w ní.¹⁴Efərɔ̃ lyár Abərahamɛ n wɔ̀ : ¹⁵À cǐnnə, cili ! Cɛ kɛ̀bɛ́ è ye y wɔ́ sə̀byì-kùlsi zɔ̌m mɔ́ myɛ m’a yə̀ byè kɔn, àmyɛ́ ǹdə́ ǹmyɛ́ bwə̌l wə ? Ce ǹ cùù wə́. ¹⁶Abərahamɛ nyɛ̀ɛ̀ Efərɔ̃ nyǎn rɛ́ kùrə̀ ; Abərahamɛ mɛrhɛ wɛ́rɛ́ y kɛ̀bɛ́ Efərɔ̃ byili mú yó w n pə Efərɔ̃ nɛ Etɛ byǎ bɛ́ yé né, È gə wɔ́ dɔ̌lna sono y’à wɔ́ wár-kùlsi zwã̌-na rə̀myɛ́ yi ní mú.¹⁷Efərɔ̃ cɛ y è ŋwɛ́nɛ́ Məkəpəla nɛ́, Məmərɛ nyí ní mú, cɛ y ǹdə́ myèlé ré rə̀ ŋwɛ́nɛ́ nɛ́ cɛ y w ga, ǹdə́ cèmé né nyɛ̀bɛ́ nə̀ ŋwɛ́nɛ́ cɛ y w gakó, ǹdə́ cèmé né nə̀ kwè cɛ y swɛ̃́ rɛ́ nyí rí gakó mó, ¹⁸jǐrh Abərahamɛ sə̀pwà wẽ̀, Etɛ byǎ bɛ́ ǹdə́ byɛ̀bɛ́ bə̀ n’ê tó cɔ w bwə̀rə̀ y bə̀ zwì mú gakó yírh wə.¹⁹Rə̀myɛ́ kwã nɛ́, Abərahamɛ zɛ̃̀ n ce ń kɛ̃ Sara Efərɔ̃ cɛ y è ŋwɛ́nɛ́ Məkəpəla ǹdə́ Mamərɛ y bə̀ n’ê byẽ̀ bə̀ Ebərɔ̃ nyí ni, Kanaã tənà y wẽ́ mó. ²⁰Cɛ y ǹdə́ myèlé ré rə̀ y’à ŋwɛ́nɛ́ gàà mɔ́ jǐrh Abərahamɛ sə̀pwà kɔn. Ń nɔ Etɛ byǎ bɛ́ sono.

¹Abərahamɛ y’ǎ jǐrh náncɛ, ń byinə né já ; sə Bə-zhɔ-zhe yà ń cĩ́ bwəl Abərahamɛ yó kɔn gakó wẽ́. ²Abərahamɛ zɛ̃̀ n wɔ̀ ń kɛ̀lɛ́ y tùntùnnə̀ mó náncɛ y du tùntùnnə̀ bé gakó mó, mɔ̀bɔ́ ń nə́ ń yìlì ń jɛ̃̀-kɔn rɛ́ gakó mó ne : À n’â lwə̀l mó, ce ǹ jɛ̃̀ y à cí rí kùr wə̀ ; ³sə ń bwəl nyí Bə-zhɔ-zhe yil ré yilə, Yi rí rə̀ wɛ̀rhɛ́ dɛ̃̌ ǹdə́ cɛ y mɔ́ yil ré yilə, sə bə̀ká pyà Kanaã lyì bí à jě bə̀ wẽ́ mó bə̀kwá bɛ́ wẽ́, bə̀kɔ́ n pə à byǐ mú ni yé, ⁴sə vò à tənà y wa, à da-dǒ wə, n zə kɛ̃ ń bə̀ ń pə à byǐ Yəzakɛ nɛ.⁵Tùntùnnə̀ mó lyár mɔ wɔ̀ : Sə dɛ̀ga, à gə yúwə́, kɛ̃ mɔ́ zɛ̃̀ ń tá ń yǎl n tó né n bə̀ tənà y kɛ̀bɛ́ wẽ́ ; ce à nə mə̌ s’a zə ǹ byǐ Yəzakɛ a m’a vò Tənà y kɛ̀bɛ́ ǹ shí è wẽ́ mó wə ? ⁶Abərahamɛ lyár wɔ̀ mɔ : Dɛ̃̌ ǹ cìnə̀, ǹ bə̀ká zə mɔ ń mə́ vò yé. ⁷nyǐ, Bə-zhɔ-zhe, dɛ̃̌ yi rí, Yi rí, rə̀ ce a du à da kɛ̀lɛ́ y w ǹdə́ à da-dǒ w w mó, mɔ̀bɔ́ ń zɔ̀m ǹdə́ nɛ, n bwəl nyí n pɛ̃ n wɔ̀ nɛ mɔ́, zɔ̀m n wɔ̀ : À m’a pə tənà y kɛ̀bɛ́ ǹ nɛ̀mɛ́ nɛ́ nɛ mɔ́ cìcì mú, mà n twĩ̀ ń màlɛ́ka y ǹ yé né ; wɔ́ gàà mɔ́ ǹ bà ń kwè kɛ̃ mɔ́ nɛ́ ń bə̀ ń pə à byǐ mú ni.⁸Sə kɛ̃ mɔ́ gə cẽ bə̀ ń tá ń la mɔ́ tó, sə́ lwar bə̀ nyí-bwəl ré ǹ bwəl mo t’â la jú yé. ⁹Tùntùnnə̀ mó zɛ̃̀ n kwè ń jɛ̃̀ y n ce ń cǐnnə Abərahamɛ cí rí kùr wə, n bwəl mo nyí bə̀ ń mà n wɛ̀rhɛ́ wẽ̀ ré rə̀myɛ́ mɔ́.¹⁰Tùntùnnə̀ mó zɛ̃̀ n zə shəmwə́r shíyə́ ń tùntùnnə̀ mó vwàmá nɛ́ wẽ́ n mə n zhǐr, n zə ǹdə́ ń cǐnnə mó jɛ̃̀-kɔn rɛ́ tɛ̀bɛ́ ń yà ń pɔ mɔ mɔ́ gakó n mə n súlí. N zɛ̃̀ n lyɛ̃ ń la Məsopotamyi, Nawɔɔrɛ cɔ w wa. ¹¹N yí cɔ w vɔ̃̀ nɛ n ce shamwə̃́ ré pyẽ̀ rə̀ nə̀dwə́nə́ yó rə̀ n’ê shǐrh zhìlí èdù nyí ní, də̀dɛ̀nɛ́ bɔ̀l wa, kana bɛ́ gə́ y’a bə̀ nɛ̃̌ mɔ́ tã́ɔ̃́ bɔ̀l w yi ní mú.¹²N zɛ̃̀ n wɔ̀ : Bə-zhɔ-zhe, à Cǐnnə Abərahamɛ Yi, à n’â lwə̀l mó, ce à jəl kɔn rɛ́ dɛ̀bɛ́ à bùlə̀ né zhe mó zà, sə́ wɛ̀rhɛ́ wu-bɔ̀nɔ̀ ǹdə́ à cǐnnə Abərahamɛ mɔ́ ! ¹³Nyǐ, à zhǐ zhìlí y nyí ni, cɔ w cə̀ná bɛ́ bə̀kwá bɛ́ la du bə̀ bàn nɛ̃̌ mɔ́ tã́ɔ̃́. ¹⁴Sə kɛ̃-byǐ y kɛ̀bɛ́ à la y wál : À n’â lwə̀l mó, sə́ jìnì ǹ kɔ̀lɔ́ w nyí rí tɛ̃́ ń pɛ̃ a nyɔ̀ nɛ̃̌ mɔ́, e zɛ̃̀ e lyár nɛ n wɔ̀ : zwẽ ń nyɔ̀, à m’a pə ǹ shamwə̃́ ré myɛ nɛ rə nyɔ̀ mɔ́, s’e yə̀ èmyɛ́ ǹ cír ǹ la ǹ tùntùnnə Yəzakɛ nɛ pɔ mɔ́ !¹⁵Ń yə̀ zɔ̀m n zhɛ̀ yé, ǹdə́ Abərahamɛ da-byǐ Myələka byǐ Bətwəə bə̀kɔ́ Erəbəka du ǹdə́ ń kɔ̀lɔ́ n zul ń pyə́pyəla w ń cĩ́ tɛ̃́. ¹⁶Erəbəka yà ń wɔ́ kɛ̃-byǐ kɛ̀bɛ́ è yé-zwã̌ y də̀ cɛ̀nɛ̀ dwí ; è yə̀l pár yé, bal mə̀dù ga yə̀ e dwə̀rh yé. È y’à tú zhìlí y yó e tɛ̃́ nɛ̃́ e ce è kɔ̀lɔ́ w o sú e k’a kwɛ̃̀ è la jé.¹⁷Tùntùnnə̀ mó zɛ̃̀ n dùr n cə̀r è yé ne n wɔ̀ : À n’â lwə̀l mó, yẽ̌ a nyɔ̀ ǹ kɔ̀lɔ́ w nɛ̃̌ mɔ́ námpɔ́lɛ́. ¹⁸E lyár e wɔ̀ : À cǐnnə, nyɔ́. E j’a wɛ̀rhɛ́ làlà e zə è jɛ̃̀ e jìnì kɔ̀lɔ́ w tɛ̃́ e pɔ̃ n nyɔ̀.¹⁹È gə́ pɔ mɔ n nyɔ̀ n zhɛ̀, e wɔ̀ : À m’a tɛ̃́ a pə ǹ shamwə̃́ ré myɛ nɛ rə nyɔ̀ rə sú. ²⁰E zɛ̃̀ e ló è kɔ̀lɔ́ w nɛ̃̌ mɔ́ ga vwàmá nɛ́ nɛ̃̌ nyɔ́ kùlkõ̌ w wẽ́ làlà, e lyɛ̃ e vò zhìlí y yó kə́dò e tɛ̃́ nɛ̃̌ mɔ́ e pə shəmwə̃́ ré gakó ne rə yɔ̀.²¹kɔn j’a cə̀l tùntùnnə̀ mó, ń zhǐ ń nə́ ń nyǐ y ń yə̀ kaka wə̀l yé, ń la nyǐ ǹdə́ Bə-zhɔ-zhe gə mà n ce ń sɔ́má zwẽ nyí ráá è t’â la nyí zõ. ²²Shamwə̃́ ré gakó gə́ nyɔ̀ rə zhɛ̀, bal mɔ́ zɛ̃̀ n kwè sánnə́má cìbyǐ bí èdù è dùmì rí m’a mɛrhɛ dwã ǹdə́ gə̀rámməbá bwə̀ldù ta, ǹdə́ sánnə́má jɛ̃̀-cìbyǔr rə̀lyè, òdù gakó dwìmi rí b’a dwini gə̀ráməbá zɔ̌m ǹdə́ pyàlá. ²³N zɛ̃̀ n wɔ̀ : Ǹmyɛ́ wɔ́ mɔ̌ bə̀kɔ́ ǹdə́ mɔ́ ? À n’â lwə̀l mó sə́ byili ni. Jàà ŋwɛ́nɛ́ ǹ da sõ kɛ̀lɛ́ w à m’a nə a zɔ̃̀ ?²⁴E lyár e wɔ̀ : Àmyɛ́ wɔ́ Bətwəə bə̀kɔ́, myəlaka ǹdə́ Nawɔɔrɛ byǐ mú. ²⁵N kə́ n súlí n wɔ̀ : Mǎlsɛ ǹdə́ gɔ-cilə́ sú tɛ̃́ nə́ sono, jàà myɛ j’à ŋwɛ́nɛ́ ǹ b’ǎ zɔ̃̀.²⁶Rə̀myɛ́ yó né, bal mɔ́ zɛ̃̀ n wìlì Bə-zhɔ-zhe yé né, ²⁷n wɔ̀ : Bə-zhɔ-zhe mó nə còrhó, à cǐnnə Abərahamɛ Yi rí, rə̀ yə̀ rə̀ nɔ̀nɔ̀ dǔr mó ǹdə́ cángá y nɛ yẽ̌ à cǐnnə Abərahamɛ shò-kwã nɛ́ mɔ́ yé ! Bə̀ Bə-zhɔ-zhe zɔ àmyɛ́ cìcì mú à bə à cǐnnə mó da-byǎ bɛ́ sõ kɛ̀lɛ́ wa.²⁸Kɛ̃-byǐ y dùr e vò è byili ywẽ̀ né nə̀myɛ́ è ná sõ kɛ̀lɛ́ wa. ²⁹Erəbəka y’ǎ zhe nəbɔ́, ń yil Labanɛ ? Labanɛ zɛ̃̀ n du n dùr n vò pwẽ̀ nè bal mɔ́ sono zhìlí y nyí ni. ³⁰N yí n nə jə̀-fɔ́lɛ́ cìbyìbí y ǹdə́ jɛ̃̀-cìbyǔr rí ń nəkɔ́ mɔ́ jɛ̃̀ y nɛ, n nyɛ̀ɛ̀ ń nəkɔ́ Erəbəka cəl ń nə́ ń zɔ̀m ń zhe : Wɔ́ èta bal mɔ́ zɔ̀m ǹdə́ nɛ nɛ́. N fwǎr n yí bal mɔ́ ń zhǐ shamwə̃́ ré yala nɛ, zhìlí y səta mɔ́ nyí ni,³¹n wɔ̀ : Bə-zhɔ-zhe nə còrhó, bə̀ ń lyɛ̃, byè yil ǹ zhǐ pwẽ̀ nè èta mɔ́ ? À tɛnɛ jì ǹ yilə, a tɛnɛ jàà shamwə̃́ ré myɛ yilə. ³²Bal mɔ́ zhǐr n yí kɛ̀lɛ́ wa. Labanɛ swàr zhĩĩ rí shamwə̃́ ré yó, n pə rɛ mǎlsɛ ǹdə́ gɔ-cílə́, n pə nɛ̃̌ bal mɔ́ lyì bí byɛ̀bɛ́ bə̀ tó mo mó ne bə m’e sə̃̀ bə̀ nèrh.³³Rə̀myɛ́ kwã nɛ́, bə pɔ̃ kùjú ń la jú. N zɛ̃̀ n wɔ̀ : À t’â la kùjú w jú ǹdə́ à yə̀ kɔn rɛ́ dɛ̀bɛ́ à zhe à la zɔ̌m mɔ́ byili yé. Labanɛ wɔ̀ mɔ bə̀ ń zɔ̌m wɛ̃̀ ! ³⁴Rə̀myɛ́ yó né, n zɛ̃̀ n wɔ̀ : Àmyɛ́ wɔ́ Abərahamɛ tùntùnnə̀. ³⁵Bə-zhɔ-zhe ce à cǐnnə mó sú ǹdə́ bwəl nánfɔ̀lɔ̀, n jǐrh jàn cə́bal. Ń pɔ mɔ pyììsi, ǹdə́ nɛ̃, ǹdə́ wársɛ ǹdə́ sánnə́má, ǹdə́ tùntùnnə̀ bala ǹdə́ kana ga ǹdə́ shamwə̃̌r, ǹdə́ bə̀nerh.³⁶À cǐnnə mó, kɛ̃ Sara, lùl byǐ ń náncɔɔrɛ wẽ́ n pə à cǐnnə mó ne ; n pɔ̃ kɔn rɛ́ dɛ̀bɛ́ gakó ń zhe mó. ³⁷À cǐnnə mó ce a bwəl nyí, n wɔ̀ : Ǹ bə̀ká pyà Kanaãbá tənà y kɛ̀bɛ́ à jě è wẽ́ mó, kana-byǎ bɛ́ wẽ́ kɛ̃ ń pə à byǐ mú ni n jí yé. ³⁸Sə ǹ m’ǎ vò à da sõ kɛ̀lɛ́ w à dwí wẽ́ ń pyà kɛ̃ ń pə à byǐ mú ni.³⁹Sə à y’à wə̀l à cǐnnə mó ne : Dɛ̀ga, sə kɛ̃ mɔ́ gə zɛ̃̀ ń tá ń yǎl n tó ne. ⁴⁰N lyár nɛ n wɔ̀ : Lwar bə̀ Bə-zhɔ-zhe mó mɔ̀bɔ́ à zhə̀l ǹdə́ mɔ mɔ́, mà n twĩ̀ ń màlɛ́ka y e yə̀ nɛ́ ǹdə́ mɔ́, e ce ǹ sɔ́má y zhəl mó zwẽ nyí ; ń pyà kɛ̃ ń pə à byǐ mú ni, ń da dwí rí wẽ́, ń da sõ kɛ̀lɛ́ w ń pɔ̃ n jí. ⁴¹Ǹ gə tú ǹ zhə̀l à dwí rí wə ; bə̀ gə zɛ̃̀ bə̀ yə̀ mɔ́ kɛ̃ mɔ́ pɛ, sə́ nyǐ nyí rí ǹ bwəl à yé né mó mó, k’ê wàr kaka rə̀ la mɔ́ wɔ̀rhɔ́ yé ; bə̀ ǹ ŋwɛ̀nɛ́ ń pyìrh re.⁴²Sə zà, à tú a yí zhìlí y yó, a zɛ̃̀ a wɔ̀ : Bə-zhɔ-zhe, à cǐnnə Abərahamɛ Yi, ǹ gə m’ǎ sɛ̃ nɛ à sɔ́má y zhəl mó zwẽ nyí e pyìrh, ⁴³nyǐ à gə́ tú à zhì zhìlí y nyí, a nə kɛ̃-byǐ è tú nɛ̃̌ tã́ɔ̃́, à m’a wɔ̀ yà : À n’â lwə̀l mó, yẽ̌ ǹ kɔ̀lɔ́ w nɛ̃̌ mɔ́ nɛ ń pɛ̃ a nyɔ̀ námpɔ́lɛ́ ; è gə lyár nɛ è wòwə̀ : ⁴⁴Ǹ cìcì nyɔ́ nɛ̃̌ mɔ́, s’a tɛ̃́ a pə ǹ shamwə̃́ ré mó, wɔ́ kɛ̃ byǐ y èmyɛ́ Bə-zhɔ-zhe cír n cĩ́ à cǐnnə mó byǐ mú ni !⁴⁵À yə̀ rə̀myɛ́ mɔ́ zɔ̀m à wẽ̀ a zhɛ̀ yé, nyǐ Erəbəka ń já ń du ǹdə́ ń kɔ̀lɔ́ ń pyə́pyəla wa ; n yí n zù zhìlí y w n tɛ̃́ nɛ̃̌ mɔ́. A zɛ̃̀ a wɔ̀ mɔ : À n’â lwə̀l mó, pɛ̃ nɛ̃̌ a nyɔ̀. ⁴⁶N zɛ̃̀ làlà n jìnì ń kɔ̀lɔ́ nyí rí ń pyə́pyəla nɛ́ yó, n wɔ̀ : Nyɔ́, sə́ pə ǹ shamwə̃́ ré myɛ nɛ. À nyɔ̀ wà, n pə à shamwə̃́ ré myɛ nɛ rə nyɔ̀.⁴⁷A zɛ̃̀ a bwə̀rh mo a wɔ̀ : Ǹmyɛ́ wɔ́ mɔ̌ bə̀kɔ́ ǹdə́ mɔ́ ? N lyár nɛ n wɔ̀ : Àmyɛ́ wɔ́ Bətwəə bə̀kɔ́, myəlaka ǹdə́ Nawɔɔrɛ byǐ mú. A zɛ̃̀ a kwè jə̀-fɔ́lɛ́ jə̀-byǐ bí a ce ń myə̌l ne, a ce jɛ̃̀ cìbyǔr ń jɛ̃̀ nɛ. ⁴⁸A zɛ̃̀ wìlì tɛ̃́ Bə-zhɔ-zhe yé né, a ce Bə-zhɔ-zhe nə̀báná, à cǐnnə Abərahamɛ Yi rí rə̀ zɔ nɛ rə̀ zhə̀n rɛ́ wẽ́ a vò, a yí a pyà à cǐnnə mó da-byǐ mú bə̀kɔ́ mɔ́ a pə ń byǐ mú ni mú.⁴⁹Sə èlǎsɛ̃́, á gə n’á yǎl á wɛ̀rhɛ́ nɛ cɛ̀nɛ̀ zhə̀n zhə̀nà, à cǐnnə mó yil yilə, s’á byili ri ni ; è gə də̀ èta, s’á byili ri ni, à m’a zɛ̃̀ a vò à jə̀-jĩ́ sõ ráá à jə̀-gwã̀ sõ.⁵⁰Labanɛ ǹdə́ Bətwəə lyár bə wɔ̀ : Wɔ́ Bə-zhɔ̌-zhe sono kɔn rɛ́ rə̀myɛ́ mɔ́ shí ni, ce nə́ wàr lwɛlɛ ráá cɛ̀nɛ̀ nə la zɔ̌m nə́ pɔ̃́ yé. ⁵¹Nyǐ Erəbəka ń zhǐ ǹ yé né, zə mɔ ń vò ń pə ǹ cǐnnə mó ne ǹdə Bə-zhɔ̌-zhe gə́ byili ní.⁵²Abərahamɛ tùntùnnə̀ mó gə́ nyɛ̀ɛ̀ bə̀ zɔ̀mà nɛ́, n zɛ̃̀ n wìlì tɛ̃́ Bə-zhɔ-zhe yé né. ⁵³N vùr sə̀byì-kùlì wẽ̀ ǹdə́ sánnə́má wẽ̀, ǹdə́ gàndɛ̀ n pə Erəbəka nɛ ; n vùr nə̀cɛ̀ndɛ wẽ̀ myɛ n pə ń nəbɔ́ mɔ́ ǹdə́ ń ná nɛ.⁵⁴Rə̀myɛ́ kwã nɛ́, ńmyɛ̌ ǹdə́ lyì bí byɛ̀bɛ́ bə̀ y’à ŋwɛ́nɛ́ ǹdə́ mɔ mɔ́, zɛ̃̀ bə jí bə nyɔ̀, bə zɔ̃̀. Bə̀ gə́ dùlí bə zɛ̃̀ bə zɛ̃̀, tùntùnnə̀ mó wɔ̀ : Yẽ̌-nə ne a k’a kwɛ̃̀ a vò à cǐnnə mó sono. ⁵⁵Nəbɔ́ mɔ́ ǹdə́ ná mɔ́ wɔ̀ : Kɛ̃-byǐ y m’a mɛ̃ ǹdə́ nə́ba dwã màgɛlɛ́, e wɛ̀rhɛ́ dwã shíyə́ ; rə̀myɛ́ kwã nɛ́, ǹ m’ǎ zɛ̃̀ ń vò.⁵⁶N lyár bɛ n wɔ̀ : Bək’á jíjírhí ni yé, bə̀ Bə-zhɔ-zhe ce à sɔ́má y zhəl mó zwẽ nyí ; yẽ̌-nə ne a lyɛ̃, mùní ga a vò à cǐnnə mó sono. ⁵⁷Rə̀myɛ́ yó né, bə lyár bə wɔ̀ : Byẽ̌-nə kɛ̃-byǐ y è bə̀ nə́ bwə̀rh y nə́ nyì. ⁵⁸Bə zɛ̃̀ bə byẽ̀ Erəbəka, bə wɔ̀ mɔ : Ǹ nə́ ǹ yǎl ń tó bal mɔ́ mɔ̀bɔ́ nɛ ń vò ? N lyár n wɔ̀ : À m’a vò.⁵⁹Bə zɛ̃̀ bə yẽ̌ bə̀ nəkɔ́ Erəbəka ǹdə́ kɛ̃ mɔ́ mɔ̀bɔ́ ń kɔ̀n mɔ̀ mɔ́ nɛ bə tó Abərəhamɛ tùntùnnə̀ mó ǹdə́ ń lyì bí ni bə lyɛ̃. ⁶⁰Bə cĩ́ bwəl Erəbəka yó bə wɔ̀ mɔ̀ : Ǎ nə́ nəkɔ́, ǹ b’ǎ ŋwɛ̀nɛ́ ń jǐrh mɔ̀ɔ̀rhɛ mɔ̀ɔ̀rhɛ yàà, sə ǹ nɛ̀mɛ́ nɛ́ b’a cìní bə̀ zwə̀ bé cɛmɛ nɛ́.⁶¹Erəbəka zɛ̃̀, ńmyɛ̌ ǹdə́ kana bɛ́ bə̀ wɔ́ ń tùntùnnə̀ bé mó, jòm shamwə̃́ ré yó, bə tó bal mɔ́ nɛ. Tùntùnnə̀ mó já n zə Erəbəka n mə n lyɛ̃ ń la. ⁶²yó né ǹdə́ Yəzakɛ y’ǎ ká n shí Lakayi-pyɔ̌ zhìlí yó n bə̀ ń jě Nəgɛvɛ tənà y wa.⁶³È də̀dɛ̀nɛ́ èdù, Yəzakɛ yà ń du ń ŋwɛ́nɛ́ cɛsɛ́ wẽ́ ń nə́ ń tɛ́rɛ́ Yi zɔ̀mɛ̀ rɛ́ ń wẽ́, n zɛ̃̀ n kwẽ̌ ń yírhə́ ń la nyǔ, n pwírí shamwə́r rə̀ yúwə́. ⁶⁴Erəbəka myɛ kwẽ̌ ń yírhə́ ń la nyǔ n pwírí Yəzakɛ, n já n só ń shamó w yó. ⁶⁵N wɔ̀ tùntùnnə̀ mó ne : Bal mɔ́ mɔ̀bɔ́ wɔ́ yẽ̀ lò, ń tú ń la nə́ba jəl cɛsɛ́ wẽ́ mó ? Tùntùnnə̀ mó lyár n wɔ̀ : Wɔ́ à cǐnnə mó. N já n kwè ń gàmmə-jɛ̃̀ y n pyi ń yé ne.⁶⁶Tùntùnnə̀ mó zɛ̃̀ n cĩ́ kɔn dɛ̀bɛ́ gakó ń wɛ̀rhɛ́ mɔ́ Yəzakɛ nɛ. ⁶⁷Yəzakɛ zə Erəbəka n mə n vò ń ná Sara kòrhó w wə, n já n kwè Erəbəka n jǐrh ń kɛ̃, n swéné mo. Eta, Yəzakɛ wu w j’â shə́shéré ń ná mɔ́ cu mú yilə.

¹Abərahamɛ kə́ n jí kɛ̃ dõ, ń yíl Kəturə. ²N lù Zəməranɛ, ǹdə́ Zɔkəsəshanɛ, ǹdə́ Mədanɛ, ǹdə́ Mədənəya, ǹdə́ Zəsəshəbakɛ, ǹdə́ Səkuwakɛ. ³Jəkəsəkanɛ lù Səba ǹdə́ Dədanɛ. Dədanɛ byǎ bɛ́ yàl Asəkurimyi, Lətusəshimyi, ǹdə́ Ləyuməmyimyi. ⁴Majanɛ byǎ bɛ́ yàl Efwa, Efɛɛrɛ, Enɔkɛ, Abyəda ǹdə́ Elədaa. Wɔ́ Kətura byǎ bɛ́ ga èta.⁵Abərahamɛ kwè ń jɛ̃̀-kɔn rɛ́ gakó n pə Yəzakɛ nɛ. ⁶Abərahamɛ y’ǎ pɔ paánsɛ ń bwə̃́ə̃́ bé byǎ bɛ́ nɛ ; sə ń y’ǎ vùr be n ce bə vò kwã nɛ́ gaga Yəzakɛ nyí ni, bə vò yi-púrhí səta, yi-púrhí tənà y wa.⁷Nyǐ-nə dwã nɛ́ nyɛ̀bɛ́ Abərahamɛ wɛ̀rhɛ́ cɛ yó mó byinə né yó wə́ : Ń wɛ̀rhɛ́ byinə zɔ̌m ǹdə́ shí-shàlpyɛ̀ ǹdə́ nə̀nu, n cì. ⁸Abərahamɛ shə́shə̀rhə́ né jàn rɛ́ zhɛ̀, n cì, cɔɔrɛ wu-nyɔ̃̀ wẽ́, n cɛ n sú lũ wə́, n zɛ̃̀ n mə n vò ń nàmbala bɛ́ sono.⁹Ń byǎ bɛ́, Yəzakɛ ǹdə́ Esəməyəə kwè mo bə̀ vò bə ce Makəpəla myèlé ré rə̀ ŋwɛ́nɛ́ Eshɛ̃ lyì bal Təsəsarɛ byǐ Efərɔnɛ cɛ y Mamɛrɛ nyí ni mú wə. ¹⁰Wɔ́ cɛ y èmyɛ́ mɔ́ Abərahamɛ yà ń yè Etɛ byǎ bɛ́ sono mó. Wɔ́ gàà mɔ́ bə̀ co Abərahamɛ ǹdə́ ń kɛ̃ Sara nɛ́. ¹¹Abərahamɛ cu mú kwã nɛ́, Yi cĩ́ bwəl ń byǐ Yəzakɛ yó. N zɛ̃̀ ń jě Lakayi-pyɔ̌ zhìlí y nyí ni.¹²Nyǐ-nə Esəməyəə mó, Ezhipti lyì bə̀kɔ́ Agarɛ, Sara tùntùnnə̀ mó lùl n pə Abərahamɛ nɛ mɔ́ nɛ̀mɛ́ nɛ́.¹³Nyǐ-nə Esəməyəə byǎ bɛ́ yilə né, nə̀ tó dwã ǹdə́ bə̀ nàmbala nàmbala bɛ́ : Nəbajɔtɛ ń wɔ́ Esəmayəə byì-cɛ yá, byǎ bɛ́ byɛ̀bɛ́ bə̀ pú mu mú wɔ́ ; Kədarɛ, Adəbyəə, Məbəsamɛ, ¹⁴Məsəkəma, Dumə, Masa, ¹⁵Adadɛ, Təma, Zəturi, Nafəsəkisi ǹdə́ Kədəma. ¹⁶Wɔ́ bə̀myɛ́ bə̀ wɔ́ Esəmayəə byǎ bɛ́ èta ; wɔ́ bə̀ yilə né myɛ èta, kɔn tó ǹdə bə̀ cɛmɛ nɛ́ gə́ y’à zhǐ zhǐ ní, ǹdə́ jààsɛ́ bə̀ y’à jě jě sə̀ wẽ́ mó. Wɔ́ bə̀myɛ́ bə̀ yàl bə̀ dwə́ né yó-cìnə́ bé shí-ǹdə́-bə̀lyè yə́.¹⁷Nyǐ-nə Esəməyəə byinə né ń wɛ̀rhɛ́ cɛ yó mó : nə yàl byinə zɔ̌m ǹdə́ shə́-ètɔ̀ ǹdə́ nyàlpyɛ̀. Ń shə́shə̀rhə́ jàn rɛ́ zhɛ̀ n cì, n vò ń nàmbala bɛ́ sono. ¹⁸Ń byǎ bɛ́ jòm kɔn zhì Avyəla nɛ́ e m’e vò Səshuri, òmyɛ́ ǹdə́ Ezhipti zǎ dwã nɛ, ǹdə́ ǹ gə la Asəri səta mɔ́. Bə̀ jòm bə̀ da-byǎ bɛ́ gakó yé né.¹⁹Nyǐ-nə Abərahamɛ byǐ Yəzakɛ nɛ̀mɛ́ nɛ́ yilə né. ²⁰Abərahamɛ lùl Yəzakɛ, Yəzakɛ bə̀ n yí byinə shɛ́-èna, n zɛ̃̀ n jí Padənɛ-Aramɛ byǐ Bətwəə bə̀kɔ́ Arəbəka. Bətwəə y’à wɔ́ Aramənyɛ̃ lyì bal. Arəbəka y’à ń wɔ́ Aramənyɛ̃bá lyì bal Labanɛ nəkɔ́.²¹Yəzakɛ zɛ̃̀ n lwə̀l Bə-zhɔ-zhe ne, ń kɛ̃ Arəbəka yilə, bə̀ ń kɛ̃ mɔ́ yà ń wɔ́ kə-eju, sə Bə-zhɔ-zhe zwẽ ń lwə̌l mó : Ń kɛ̃ Arəbəka kwè pwǐ. ²²Bəsɔ́ná bɛ́ ń wẽ́ mó, zɛ̃̀ bə́ n’ê zhə̀r dwã ń wẽ́, n wɔ̀ : kɔn nə gə wɔ́ èta, wɔ́ bə̀kɔ́n yil à nə zhe pwǐ yə́ ? N zɛ̃̀ n vò ń la Bə-zhɔ-zhe bwə̌rh n nyìwé.²³Bə-zhɔ-zhe wɔ̀ mɔ : Nyǐ wɔ́ tənèrh sə̀lyè sə̀ ŋwɛ́nɛ́ ǹ wẽ́, sə dwə́ nə̀lyè la ǹ wẽ́ du nə pɔr dwã nɛ ; dwə́ né nə̀myɛ́ nə̀lyè y cəcəl wə, rə̀dù b’a zə jàn dwini rə̀ dõ mó, sə náncɛ y b’a wìlì tɛ̃́ námpɔ́lɛ́ y kùr wə.²⁴Dwã nɛ́ nyɛ̀bɛ́ ń mə̌ sə lù mú tú nə pyìrh ; bə nyǐ bə pwírí wɔ́ nə̀cílə́ bə̀lyé bə̀ y’à ŋwɛ́nɛ́ ń wẽ́. ²⁵Nã́yéé mó du námpwẽ̀ kókó, ń yala nɛ́ wɔ́ kur dúdú ǹdə́ wɔ́ kur kàmmə̀-zǔ ta ; bə ce ń yil bə Ezəyu. ²⁶Rə̀myɛ́ kwã nɛ́, nyɛ̃́ mɔ́ la du ǹdə́ n zə ń jɛ̃̀ ń zhe Ezəyu nə̀kúl ne ; bə zɛ̃̀ bə ce ń yil bə̀ Zhakɔbɛ. Yəzakɛ lùl be ǹdə́ ń zhe byinə shə́-shə̀ldù.²⁷Bə̀sɔ́ná bɛ́ bə̀myɛ́ mɔ́ zɛ̃̀ bə byì. Ezəyu jǐrh ta-bal nánfɔ̀lɔ̀, gɔ lò ; Zhakɔbɛ y’ǎ nyɛ̌ shɛ́shɛ́, ń nə́ ń mɛ̃ jẽ̌ kwə̀ə́rhé wə. ²⁸Yəzakɛ yà ń só Ezəyu gɔ-nàmá bɛ́ ń yà ń nə́ ń dɔ̀m mɔ́ yilə, Arəbəka wɔ́ Zhakɔbɛ ń yà ń só.²⁹È dɛ̃ rə̀dù, Zhakɔbɛ y’ǎ nə́ ń zhìl dɔm, Ezəyu shí gɔ n bə̀ ǹdə́ lyààrɛ́ zù mù kókó. ³⁰Ezəyu zɛ̃̀ n wɔ̀ Zhakɔbɛ nɛ : À n’â lwə̀l mó, sə́ yẽ̌ dɔm mɔ́ mə̀ yé shɛ̀l èta mɔ́ nɛ, mə̀ yé shɛ̀l èta mɔ́ nɛ, ń pɛ̃ a jí, bə̀ nyǐ à lyɛ̀ɛ̀. Wɔ́ rə̀myɛ́ è ce bə ce Ezəyu yil bə̀ Edɔmɛ.³¹Zhakɔbɛ wɔ̀ : È gə wɔ́ rə̀myɛ́, sə́ yè náncɔɔrɛ́ ǹ mə̌ ǹdə́ rɛ́ mɔ́ ǹdə́ nɛ zà. ³²Ezəyu lyár n wɔ̀ : Nyǐ, à m’a cì ; sə náncɔɔrɛ́ à mə̌ ǹdə́ rɛ́ mɔ́, byè rə̀ la nɛ wɔ̀rhɔ́ ? ³³Zhakɔbɛ wɔ̀ : Jɛ̀nɛ̀ ń bwəl ne rə̀ nyí. N bwəl mo rə̀ nyí, n zɛ̃̀ n yè náncɔɔrɛ́ ń mə̌ ǹdə́ rɛ́ mɔ́ ǹdə́ Zhakɔbɛ. ³⁴Rə̀myɛ́ yó né, Zhakɔbɛ zɛ̃̀ n kwè búrú w ǹdə́ wẽ̀ ré rə̀ nyɛ̌ ǹdə́ wɔ́ zhɛ̀mɛ́ ta ń shɛ̃̀ mɔ́ n pə Ezəyu ni. N jí n nyɔ̀, n zɛ̃̀ n zɛ̃̀ ń la. Wɔ́ èta kɔn tó né, Ezəyu mə́ ń yə̀ náncɔɔrɛ́ rə̀ mə̌ ǹdə́ náncɛ mɔ́ sõ nyǐ yé.

¹È byin rí, nɔrh tú mə tu tənà y wa, è də̀ mɔ̀bɔ́ nã́yə́ə́ mó mə̀ tu Abərahamɛ yi ní mú yé ; nɔrh mɔ́ ce Yəzakɛ zɛ̃̀ ń la Fələsətɛ̃bá pyɔ̌ Abyəmɛlɛkɛ sõ Gərarɛ nɛ́.²Bə-zhɔ-zhe lyí mu n wɔ̀ : Ǹ bə̀ká vò Ezhipti yé, mɛ̃ tənà y kɛ̀bɛ́ à la mɔ́ byilu mú wə. ³Jǒm tənà y èmyɛ́ cìcì wẽ́ : à b’a yə̀ nɛ́ ǹdə́ mɔ́, à b’a cĩ́ bwəl ǹ yó, bə̀ à b’a pə cɛmɛ nɛ́ nyɛ̀bɛ́ gakó ǹ nɛ̀mɛ́ nɛ́ nɛ, sə́ yẽ̌ bə̀ à b’a zə nyí rí à bwəl ǹ da Abərahamɛ nɛ mɔ́.⁴À b’a ce ǹ nɛ̀mɛ́ nɛ́ pù ǹdə càmmə́sɔ̌sɛ́ dɛ̃̌ yi w mú ta ; à m’a pə cɛmɛ nɛ́ nyɛ̀bɛ́ èta mɔ́ gakó ǹ nɛ̀mɛ́ nɛ́ nɛ ; sə tənèsé cɛ yó mó gakó b’a nə bwəl ǹ nɛ̀mɛ́ nɛ́ shò kwã nɛ́, ⁵bə̀ Abərahamɛ shɛ̀nɛ́ n cili à zɔ̀mà nɛ́, n wɛ̀rhɛ́ ǹdə à gə́ byili ní gakó, n wɛ̀rhɛ́ ǹdə à gə pɔ nyí ní gakó, n wɛ̀rhɛ́ ǹdə à gə́ pɔ sɔ́má nɛ́ gakó, n wɛ̀rhɛ́ ǹdə à nyə́ né gə́ n’ê byili ní myɛ.⁶Yəzaka já n mɛ̃ Gərarɛ nɛ́. ⁷Rə̀myɛ́ yó né, jàà y lyì bí gə n’ê bwə̀rh zɔ̀mà ń kɛ̃ mɔ́ shò-kwã nɛ́, ń yà n wɔ̀ : Ń wɔ́ à nəkɔ́ ; Arəbəka yé-zwã̌ y gə́ y’à càn mɔ́ ce jàà y lyì bí ywẽ zhe mo, dɛ̀ga, bə̀ b’a tə̀ ń kɛ̃ mɔ́ yil bə gu mu, wɔ́ rə̀myɛ́ è ce n wɔ̀ bə̀ wɔ́ ń nəkɔ́. ⁸N zɛ̃̀ ń nə́ ń dɛnɛ tənà y wa. È dɛ̃ rə̀dù, Fələsətɛ̃bá pyɔ̌ Abyəmyɛlɛkɛ zɛ̃̀ n tó túkwə́rə́ ń la nyǔ n pwírí Yəzakɛ ń nə́ ń dədal ǹdə́ ń kɛ̃ Arəbəka.⁹Abyəmyɛlɛkɛ zɛ̃̀ n ce bə byẽ̀ Yəzakɛ n bà, n wɔ̀ : zhə̀n zhə̀nà, kɛ̃ mɔ́ wɔ́ ǹ kɛ̃. Sə wɔ́ bə̀kɔ́n yil ǹ nə́ zɛ̃̀ ń ŋwɛ̀nɛ́ ń wɔ̀ : bə̀ wɔ́ à nəkɔ́ mɔ́ ? Yəzakɛ lyár n wɔ̀ : Ywẽ rə̀ zɔ nɛ a m’a zɔ̀m èta, mùnì ga bə̀ bə̀k’a tə̀ ń yil bə gu ni yé. ¹⁰Abyəmyəlɛkɛ wɔ̀ : Etər ǹ wɛ̀rhɛ́ nə́ba nɛ́ èta mɔ́ ? Kɔn y’à dàl námpɔ́lɛ́ y sə tənà y dwí rí lò zù ǹdə́ ǹ kɛ̃ mɔ́, sə ǹ y’à b’a ce nə́ wɛ̀rhɛ́ dóó. ¹¹Abyəmyəlɛkɛ zɛ̃̀ n pə nyí rí tɛ̀bɛ́ èta mɔ́, tənà y dwí rí gakó ne n wɔ̀ : Lò mɔ̀bɔ́ ń dwə̀rh bal mɔ́ mɔ̀bɔ́ nɛ ráá ǹ dwə̀rh ń kɛ̃ mɔ́ nɛ, bə̀ b’a gu rə̀-ná-cí.¹²Yəzakɛ zɛ̃̀ n dù n vɔ̀ tənà y èmyɛ́ wa, bə̀ Bə-zhɔ-zhe cĩ́ bwəl ń yó, n jə̀r, ń jíjírí yó òdù gakó pù zɔ̌m byin rí rə̀myɛ́ wẽ́. ¹³Bal mɔ́ ńmyɛ́ mɔ́ jǐrh nə̀cɛ̀m-bal, ń nə̀cɛ̀ndɛ́ j’â n’ê súlí rə̀ la, kɔn vò e yí n jǐrh nə̀cɛm-bal nánfɔ̀lɔ̀. ¹⁴Ń y’ǎ zhe vwàmá nánfwààlɛ ǹdə́ vɔ̃̌-ywààlɛ, ǹdə́ tùntùnnə̀ nánzhəzhɔ̌ : Ce Fələsətɛ̃bá zɛ̃̀ bə̀ n’ê dùr ń bwɛ̃̌.¹⁵Zǐlsí shɛ̀bɛ́ ń da Abərahamɛ tùntùnnə̀ bé y’à kù ń da Abərahamɛ yi ní mú, Fələsətɛ̃bá zɛ̃̀ bə shĩ si ǹdə́ shó. ¹⁶Abyəmyəlɛkɛ zɛ̃̀ n wɔ̀ Yəzakɛ nɛ : Du nə́ sono ń vò, bə̀ ǹ zhe jàn dɛ̃́dɛ̃́ du nə́ba. ¹⁷Yəzakɛ zhǐr gàà mɔ́, n vò ń jě Gərarɛ vɔlɔ w wa, ń gə́ y’ǎ jòm mə̀gã̌ mɔ́.¹⁸Yəzakɛ zɛ̃̀ n kə́ n kwɛrhɛ n kù zǐlsi ń da Abərahamɛ zhǐlsí ń yà ń kù, Fələsətɛ̃bá shĩ si ń da Abərahamɛ cu kwã nɛ́ mɔ́ jàà y wa. N ce se yilə né nyɛ̀bɛ́ ń da yà ń co se mó cìcì.¹⁹Yəzakɛ tùntùnnə̀ bé zɛ̃̀ bə kù vɔlɔ w wa, bə̀ nə zhìlí è zhe nyǔ nɛ̃̌. ²⁰Rə̀myɛ́ yi ní, Gərarɛ vwã̌-ènɔ̀nà bɛ́ zɛ̃̀ bə bə̀ bə̀ n’ê pyà Yəzakɛ vwã̌-ènɔ̀nà bɛ́ nyí bə̀ zhe : Nɛ̃̌ mɔ́ wɔ́ nə́myɛ̌ nyǎm. N zɛ̃̀ n ce zhìlí y èmyɛ́ yil bə̀ Esɛkɛ, bə̀ bə̀ mà nyə̀pɔ̌ ǹdə́ mɔ́.²¹Ń tùntùnnə̀ bé k’e kù zhìlí dõ, bə kə́ bə pyà búlə́ bə̀ nyí ni èmyɛ yilə, n ce èmyɛ yil bə̀ Sətəna. ²²N zhǐr gàà mɔ́ n vò n kù zhìlí dõ, sə bə yə̀ búlə́ pyà ń nyí ni èmyɛ́ yil yé, n ce è yil bə̀ Erəwɔbɔtɛ, ǹdə́ ń nə zɔ̀m ń zhe : Èlǎsɛ̃́ Bə-zhɔ-zhe cĩ́ nə́ba jàà kɛ̀bɛ́ è wà wẽ́, ce nə́ b’ǎ zə nə̀cə̀ndɛ rə pù tənà y wẽ́.²³N zɛ̃̀ n zhì gàà mɔ́ n ká n vò Bɛrɛ-Səsəba. ²⁴Rə̀myɛ́ yó né, Bə-zhɔ-zhe zɛ̃̀ n bə̀ n lyí mú cəcɛ̃, n wɔ̀ : À wɔ́ ǹ da Abərahamɛ Yi rí, ǹ bə̀ká dùr ywẽ gaga, bə̀ à ŋwɛ́nɛ́ ǹdə́ mɔ́, à b’a cĩ́ bwəl ǹ yó, a ce nɛ̀mɛ́ nɛ́ pù, ǹ Da Abərahamɛ à tùntùnnə̀ mó yilə. ²⁵N zɛ̃̀ n lù vwĩ̀-jùlú gàà mɔ́, n byẽ̀ Bə-zhɔ-zhɔ yil ré, n já n pú ń kòrhó w gàà mɔ́. Yəzakɛ tùntùnnə̀ bé j’a kù zhìlí gàà mɔ́.²⁶Rə̀myɛ́ yó né, Abyəmyəlɛkɛ zɛ̃̀ n zə ń dɔwa Awuzətɛ ǹdə́ ǹ shə̀dɛ́ɛ́sɛ́ yó-cə́bal Pyəkɔlɛ n mə n bə̀ Yəzakɛ sono Gərarɛ nɛ́. ²⁷Yəzakɛ zɛ̃̀ n wɔ̀ bɛ : Á shúl ne, á jì nì á sono wà, è nə wɔ́ bə̀kɔ́n yil á tú à sono ?²⁸Bə lyár mɔ bə wɔ̀ : Nə́ pwírí Bə-zhɔ-zhe ŋwɛ́nɛ́ ǹdə́ mɔ́. Wɔ́ rə̀myɛ́ yil nə́ n’é wə̀lə̀ : bə̀ nə̀myɛ́ ǹdə́ ǹmyɛ́ bwəl nyí dwã nɛ, sə nə́ zə dɔbrɛ ǹdə́ mɔ́ ! ²⁹Bwəl nyí bə̀ ǹ tá ǹ la nə́ba lwɛlɛ wɔ̀rhɔ́ yé, sə́ byili myɛ bə̀ nə́ yə̀ mɔ́ nwɛ̀nɛ̀ gaga, bə̀ wɔ́ cɛ̀nɛ̀ dúdú nə́ wɛ̀rhɛ́ mɔ́, sə nə́ yẽ̌ mó ń zhǐr nə́ sono ǹdə́ yə̀-zùlə́. Bə̀ Elǎsɛ̃́ ń wɔ́ lò mɔ̀bɔ́ Bə-zhɔ-zhe cĩ́ bwəl ń yó.³⁰Yəzakɛ zɛ̃̀ n wɛ̀rhɛ́ kùjú, n wɛ̀rhɛ́ címsi bə jí bə nyɔ̀. ³¹Bə dùlí bə zɛ̃̀ nəkɔkɔ́lɛ́ shãã shãã, bə zə dɔbrɛ ǹdə́ dwã. Yəzakɛ zɛ̃̀ n yẽ̌ be bə zhǐr bə̀ la ǹdə́ yə̀-zùlə́.³²Dɛ̃ rɛ́ rə̀myɛ́ yù w cìcì, Yəzakɛ tùntùnnə bə̀ bə zɔ̀m zhìlí y bə̀ y’à n’ê kwì mú yò ǹdə́ mɔ bə wɔ̀ mɔ̀ : Nə́ zɔ zhìlí y nɛ̃̌ nɛ. ³³N ce è yil bə̀ Səshɛba. Wɔ́ rə̀mɛ́ è ce, bə̀ co cɔ w òmyɛ́ yil bə̀ Bɛrɛ-Səshəba, kɔn m’e zhí ǹdə́ zà.³⁴Ezəyu tú n yí byinə shɛ́-èna, n jí Ecɛ̃bá lyì bal Beyeri bə̀kɔ́ Zhəditi, ǹdə́ Ecɛ̃bá lyì bal Elɔ̃ bə̀kɔ́ Basɛmatɛ. ³⁵Bə̀ j’a yə̀ wu-zhùlù kɔn cɛ̀ɛ́ Yəzakɛ ǹdə́ Arəbəka wun ní wẽ́.Zhakɔɔbɛ cĩ́ bwəl ń byǐ Yəzakɛ yó

¹Yəzakɛ tú n cɛ, ń yírhə́ né jàn b’e zhɛ̀ nə̀ k’e bə nɛ́ nɛ yé. N zɛ̃̀ n byẽ̀ ń byì-cɛ yá, Ezəyu n wɔ̀ mɔ̀ : À byǐ ! N lyár mɔ n wɔ̀ : nyǐn ni ! ²Yəzakɛ wɔ̀ : Nyǐ nyɔ̀nɔ̀, à cɛ, à yə̀l à cu dɛ̃ yé.³Sə èlǎsɛ̃́, à n’â lwə̀l mó, kwě ǹ búlə́ wẽ̀ ré, ǹ twã y ǹdə́ ǹ swã̀ yá, zhəl gɔ ń gu gɔ-nàmá ń mə́ ń bà. ⁴kùjú w kɔ̀bɔ́ à só mó ń pɛ̃ a jí, mùnì ga a zɛ̃̀ a cĩ́ bwəl ǹ yó sə a m’a cì.⁵Rə̀myɛ́ yo né, Arəbəka cili kɔn rɛ́ dɛ̀bɛ́ Yəzakɛ zɔ̀m n byili ń byǐ Ezəyu ni mú. Ezəyu zɛ̃̀ n du ń la gɔ w n vò n gu gɔ nàmá bɛ́ n ká n mə n bà mɔ́. ⁶Rə̀myɛ́ yó né, Erəbəka zɛ̃̀ n wɔ̀ ń byǐ Zhakɔbɛ nɛ : Nyǐ nyɔ̀nɔ̀, à nyɛ̀ɛ̀ ǹ da yà ń nə́ ń zɔ̀m ǹdə́ Ezəyu ń zhe : ⁷Zhəl ń zə gɔ nàmá ń mə́ ń bə̀ ń wɛ̀rhɛ́ kùjú ń pɛ̃ à la jú ; sə a zɛ̃̀ a cĩ́ bwəl ǹ yó Bə-zhɔ-zhe yé né ǹdə́ à gwẽ̌ yə̀ cì yé.⁸Rə̀myɛ́ mɔ́ ce, à byǐ cili nyí rí tɛ̀bɛ́ à la mɔ́ byilu èlǎsɛ̃́ mɔ́ : ⁹Zhəl ǹ da vwàmá nɛ́ wẽ́ ń zə bə̀cǐlsi sə̀lyè shɛ̀bɛ́ sə̀ só sə̀ cìnə̀ ń bə̀ ń pɛ̃ ; a zə a m’a wɛ̀rhɛ́ kùjú w kɔ̀bɔ́ ǹ da só jú mú ; ¹⁰ń kwè n vò ń pə ǹ da nɛ n jí, mùnì n cĩ́ bwəl ǹ yó ǹdə́ ń gwẽ̌ yə̀ cì yé,¹¹Zhakɔbɛ lyár ń ná n wɔ̀ : Nyìwé, Ezəyu yala nɛ́ wɔ́ kur dúdú, e jà àmyɛ́ nyə̀ná bə kùr zhe yé. ¹²Dɛ̀ga, ń gə́ mà ǹ bə̀ ń la nɛ́ dwə̌rh mó, a zɛ̃̀ à la jǐrh kɔ̀mɔ̀ ń yé né, è m’a ce è k’ê də̀ cɛ̀nɛ̀ ń la bwəl n pɛ̃́ yé, wɔ́ lwɛlɛ ń la bwəl ń pɛ̃.¹³Ń ná wɔ̀ mɔ̀ : À byǐ, bwəl ré námməlwɛ̀lɛ́ y èmyɛ́ jǒm àmyɛ́ yó ! Ǹmyɛ́ wírí ń cili kɔn rɛ́ dɛ̀bɛ́ à zɔ̀m mɔ́, sə́ vò n kwè wẽ̀ ré ń mə́ ń bə̀ ń pɛ̃. ¹⁴Zhakɔbɛ vò n kwè wẽ̀ ré, n bə̀ n pə ń ná nɛ, ná mɔ́ wɛ̀rhɛ́ kùjú w kɔ̀bɔ́ ń da só mó.¹⁵Erəbəka zɛ̃̀ n zù jù w n vùr ń byì-cɛ Ezəyu kàmmə̀-zwǐsí shɛ̀bɛ́ sə̀ càn dɛ̃́dɛ̃́ mɔ́, n mə n zù Zhakɔbɛ, ń byǐ mú námpɔ́lɛ́ y nɛ. ¹⁶N zə bə̀cǐlsí kur rí n mə n pú ń jɛ̀sɛ́ ǹdə́ ń byã y è bə kur zhe mó ne. ¹⁷N zɛ̃̀ n kwè kùjú w ǹdə́ búrú w ń wɛ̀rhɛ́ mɔ́ n sáálɛ Zhakɔbɛ jɔ̃̀ wa.¹⁸N mə n vò ń da sono n wɔ̀ : À da ! Yəzakɛ wɔ̀ : À byǐ nyǐ ni ! À byǐ, Ǹmyɛ́ wɔ́ mɔ̌ ? ¹⁹Zhakɔbɛ lyár ń da n wɔ̀ : Àmyɛ́ wɔ́ Ezəyu, ǹ byǐ mú náncɛ yá ; nyǐ à wɛ̀rhɛ́ kɔn ré dɛ̀bɛ́ ǹ byili mú. À n’â lwə̀l mó, zɛ̃̀ dɛ̃̌ ń jòm, ń jí à gɔ nàmá bɛ́, mùnì ga ń cĩ́ bwəl à yó.²⁰Yəzaka wɔ̀ ń byǐ mú ni : Ǎ wɔ́ bə̀kɔ́nà ! À byǐ, ǹ pú mǎ ń nə gɔ nàmá làlà èta ! Zhakɔbɛ lyár n wɔ̀ : Wɔ́ Bə-zhɔ-zhe, ǹ Yi rí rə̀ ce bə bə̀ à yé né. ²¹Yəzakɛ zɛ̃̀ n wɔ̀ Zhakɔbɛ nɛ : À byǐ, sə bwəlse à yala nɛ, a dwə̀rh mó a nyǐ ǹdə́ ǹ gə wɔ́ Ezəyu ráá è də̀ ńmyɛ̌.²²Zhakɔbɛ fwǎr n bwəlse ń da Yəzakɛ nɛ, n dwə̀rh mo n wɔ̀ : Cəl ré wɔ́ Zhakɔbɛ cəl ré, sə jɛ̀sɛ́ wɔ́ Ezəyu nyɛ̌sɛ́. ²³Ń yə̀ ń pár lwar yé, bə̀ ń jɛ̀sɛ́ y’à pú ǹdə́ kur ǹdə ń da-byǐ Ezəyu jɛ̀sɛ́ ta ; n zɛ̃̀ n cĩ́ bwəl ń yó.²⁴N wɔ̀ mɔ: Wɔ́ ǹmyɛ́ ǹ wɔ́ à byǐ Ezǝyu mú? Ezǝyu lyár mɔ n wɔ̀ : Wɔ́ àmyɛ́. ²⁵Yǝzakɛ wɔ̀: Zǝ à jɛ̃̀ nɛ, a mùnì a dɔ̃̀ à byǐ mú gɔ-nàmá bɛ. Sǝ a zɛ̃̀ a cĩ́ bwǝl à byǐ mú yó. Zhakɔɔbɛ zǝ sɛ̃́ myɛ n bǝ̀ n pɔ̃́ n nyɔ̀.²⁶Rǝ̀myɛ́ yó né; ń da Yǝzakɛ wɔ̀ mɔ: À byǐ, bwǝlse à nyí ni, sǝ́ kwǝ̀ǝ̀le ne. ²⁷Zhakɔɔbɛ bwǝlse n kwǝ̀ǝ̀le mo. Ń kàmǝ̀-zwǐsí zho w ló yó, n zɛ̃̀ n cĩ́ bwǝl ń wɔ̀: Nyǐ à byǐ mú zho w nyɛ̌ ǹdǝ́ wɔ́ cɛ kɛ̀bɛ́ Bǝ-zhɔ-zhe cĩ́ bwǝl è yó ta. Bǝ̀ Yi pɔ̃́ dɛ̃̌ y w myɔ̀nɔ̀ wá, ǹdǝ́ cɛ y nwǝ̃̌ yǝ́, ǹdǝ́ bǝlé ǹdǝ́ vɛ̃́ rǝ bɔrh!²⁸Bǝ̀ Yi pɔ̃́ dɛ̃̌ y w myɔ̀nɔ̀ wá, ǹdǝ́ cɛ y nwǝ̃̌ yǝ́, ǹdǝ́ bǝlé ǹdǝ́ vɛ̃́ rǝ bɔrh!²⁹Dwǝ́ b'a shɛ̀nɛ́ ǹ nyí ni, sǝ tǝnèrh b'a wùlì ǹ yé né! Yál ǹ da-byǎ bɛ́ yó-cǝ́bal, sǝ ǹ ná-byǎ bɛ́ b'a wùlì ǹ yé né! Bwǝl námmǝlwɛ̀lɛ́ b'a jòm lò mɔ̀bɔ́ gakó ń la bwǝl námmǝlwɛ̀lɛ́ bwǝl n pɔ̃́ mɔ́ yó, sǝ bwǝl náàcɛ̀nɛ́ b'a zò lò mɔ̀bɔ́ ń la bwǝl náàcɛ̀nɛ́ bwǝl ǹ pɔ́ mɔ́ yó.³⁰Yǝzakɛ gǝ́ tú n cĩ́ bwǝl ré Zhakɔɔbɛ yó w ń nǝ́ ń zhɛ̀, ǹdǝ́ Zhakɔɔbɛ myɛ zhǐr ǹ da nyí n zhɛ̀, rǝ̀myɛ́ yi ní ǹdǝ́ ń da-byǐ Ezǝyu myɛ já ń shí gɔ jílǝ y ń nǝ́ ń yí. ³¹Ńmyɛ já n lyɛ̃ wɛ̀rhɛ́ kùjú n bǝ̀ n pǝ ń da nɛ n wɔ̀ mɔ: À da, zɛ̃̀ ń dɔ̃̀ ǹ byǐ mú gɔ-nàmá bɛ́, mùnì ga ń cĩ́ bwǝl ń yó!³²Ń da Yǝzakɛ mɔ́ zɛ̃̀ n wɔ̀: Ǹmyɛ́ wɔ́ mɔ̌ lò? N lyár da mɔ n wɔ̀: Àmyɛ́ wɔ́ Ezǝyu, ǹ byǐ mú náncɛ yá. ³³Kɔn jàr Yǝzakɛ, ń wu j'a zhìlì kókó, n wɔ̀: È nǝ wɔ́ yẽ̀ lò ń zhǝ̀l gɔ n vò n zǝ gɔ-nàmá n bǝ̀ n pɛ̃ èta mɔ́? À dɔ̀m bǝ̀ gakó fòró ń zɛ̃̀ ń bà, sǝ à cĩ́ bwǝl rǝ̀ ná-cí mú yó. Èta bwǝl ré la ńmyɛ̌ yó w yál.³⁴Ezǝyu gǝ́ nyɛ̀ɛ̀ ń da zɔ̀mà nɛ́ èta mɔ́, já n wǔrh dɛ̃́dɛ̃́, ń wu w gakó j'a zhìlì, n zɛ̃̀ n wɔ̀ ń da mɔ́ nɛ: À da, cĩ́ bwǝl àmyɛ yó! Yǝzakɛ zɛ̃̀ n wɔ̀: ³⁵Ǹ da-byǐ mú tú ǹdǝ́ surhǝ námmǝlwɛ̀lɛ̀ n zwẽ ǹ bwǝl ré.³⁶Ezǝyu zɛ̃̀ n wɔ̀: È nǝ wɔ́ bǝ̀ gǝ́ n'ê byẽ̀ mo bǝ̀ gǝ́ co yil ré bǝ̀ n'ê byẽ̀ bǝ̀ Zhakɔɔbɛ mɔ́ yil ń já n yí à yó twǝr rǝ̀lyè ga èta? Ń zwẽ à náncɔr rɛ́, nyǐ ń kǝ́ n bǝ̀ n zwẽ à bwǝl ré myɛ. N zɛ̃̀ n wɔ̀: Ǹ nǝ́ yǝ̀ bwǝl dõ cĩ́ ǹ la nɛ pɔ? ³⁷Yǝzakɛ lyár n wɔ̀ Ezǝyu ni: Nyǐ, à ce ń wɔ́ yó-cǝ́baj, à pɔ ń da-byǎ bɛ́ bǝ́ la tùntùnnǝ, à byili bǝ̀ nyǐ ń mà n nǝ bǝ̀lǝ́ ǹdǝ́ vɛ̃́: Sǝ à byǐ, wɔ́ bǝ̀kɔ́n dõ à wɔ̌ à b'a wɛ̀rhɛ́ ǹ yilǝ?³⁸Ezǝyu wɔ̀ ń da nɛ: À da, wɔ́ bwǝl ré rǝ̀myɛ́ dúdú ǹ zhe? À da, cĩ́ bwǝl àmyɛ yó! Ezǝyu zɛ̃̀ ń nǝ́ kúrh ń cǝl la dɛ̃̌dɛ̃̌.³⁹Ń da Yǝzakɛ, lyár n wɔ̀: Nyǐ! Cɛ y nwǝ̃̌ y t'â la ǹ jàà y wẽ́ yál, dɛ̃̌ yi w myɔ̀nɔ̀ w myɛ t'â la ǹ jàà y wẽ́ yál yé. ⁴⁰Ǹ búlǝ́ shù w dɛnnɛ ǹ b'ǎ tó ń nǝ ǹ nyí kùjú, ǹ bà ń ń pǝ ǹ da-byǐ mú ni, sǝ ǹ b'ǎ yiyiri tɛ̃́ ǹdǝ ǹ gǝ́ nǝ́ ǹ yǎl nɛ́ lò tá ń la ǹ yé ne cǝ̌r yé, ń mà ń kǝ́ ń zhĩĩ rí ń la ǹ byã yó cũ mú.⁴¹Ezǝyu dǝ̀ bwǝl ré tɛ̀bɛ́ ń da cĩ́ Zhakɔɔbɛ yó mó yilǝ, n zɛ̃̀ ń nǝ́ ń jí zùùri ǹdǝ́ mɔ; n zɛ̃̀ ń nǝ́ ń zɔ̀m ń wẽ́ ń zhe: à da mɔ́ cu mú wu-zhìlù w dwã gǝ tú nǝ̀ bwǝl zhɔ̌, à m'a gu à da-byǐ Zhakɔɔbɛ. ⁴²Bǝ zɛ̃̀ bǝ kwè Arǝbǝka byǐ náncɛ Ezǝyu zɔ̀mà nɛ́ bǝ cĩ́ mu. N zɛ̃̀ n byẽ̀ Zhakɔɔbɛ ń byǐ mú námpɔ́lɛ́ yá, n wɔ̀ mɔ: Nyǐwé, ǹ da-byǐ Ezǝyu nǝ́ ń pyà ǹ gu, n mǝ n tu ń lyim ni ǹ yó.⁴³À byǐ, rǝ̀myɛ́ ce, èlǎsɛ̃́ cili kɔn dɛ̀bɛ́ à la mɔ́ byilu mú! Zɛ̃̀ dɛ̃̌ ń dùr ń vò Sharã à da-byǐ Labã sono; ⁴⁴ń mɛ̃ ń dɛ̃̀ dwã màngɛlɛ́ kɔn m'e yí ǹ da-byǐ mú lyim rí tu, ⁴⁵kɔn m'e yí ǹ da-byǐ mú lyim rí só ǹ yilǝ, n swě kɔn rɛ́ tɛ̀bɛ́ ǹ wɛ̀rhɛ́ mɔ mɔ́. Rǝ̀myɛ́ yi ní à m'a zɛ̃̀ a k'a ce ń bà. Sǝ wɔ́ bǝ̀kɔ́n yil ámyɛ̌ bǝ̀lyè y ga nǝ m'a j'a tó dwã dɛ̃ rǝ̀dù á jé à yé né èta mɔ́?⁴⁶Arǝbǝka zɛ̃̀ n wɔ̀ Yǝzakɛ nɛ: Yɛtɛ bǝ̀kwá bɛ́ ce à j'a nyɛ̌rh à cìn lũ w kɔ̀bɔ́ wa. Zhakɔɔbɛ nǝ gǝ zɛ̃̀ ń jú Yɛtɛ bǝ̀kwá bɛ́ bǝ̀myɛ́ dwí rí mǝ̀dù, tǝnà y kɛ̀bɛ́ bǝ̀kwá bɛ́ wẽ́, lũ w kɔ̀bɔ́ wẽ́ yál nǝ́ k'ê zhe kùr à yilǝ?

¹Yǝzakɛ zɛ̃̀ n byẽ̀ Zhakɔɔbɛ, n cĩ́ bwǝl ń yó, n pɔ̃ nyí rí tɛ̀bɛ́ n wɔ̀: Ǹ bǝ̀ká vò ń kwè Kanã lyì bǝ̀kɔ́ ń jí yé. ²Zɛ̃̀ tɛ̃́, zhǝl Padã-Aram, Bǝtwǝl sõ kɛ̀lɛ́ wa, ń kwè bǝ̀kɔ́ mǝ̀dù ǹ ná nǝbɔ́ Labã bǝ̀kwá bɛ́ wẽ́ ń jí.³Bǝ̀ Yi Jàn-bǝ-swɛ̃́-zhe cǝ́bal mɔ́ mà n cĩ́ bwǝl ǹ yó, n ce ń zǝ lùlì, ń lù byǎ bǝ pù, e ce ń jǐrh dwí nánjǝ̀jóló! ⁴Rǝ pǝ ǹmyɛ́ ǹdǝ́ ǹ nɛ̀mɛ́ nɛ́ nɛ Abǝraham bwǝl ré, mùnì ga tǝnà y ń pɔ Abǝraham nɛ, ǹ jě è wẽ́ ǹdǝ Zhǝ-bal ta mɔ́, e yǝ̀ ǹmyɛ́ nyǎ!⁵Yǝzakɛ ce Zhakɔɔbɛ zhǐr n vò Padã-Amam, Bǝtwǝǝ byǐ Labã, Zhakɔɔbɛ ǹdǝ́ Ezǝyu ná rǝbǝka nǝbɔ́ mɔ́ sono.⁶Ezǝyu pwírí Yǝzakɛ gǝ́ cĩ́ bwǝl ré Zhakɔɔbɛ yó, n zɛ̃̀ n twĩ̀ mu Padã-Aram nɛ́ ń la vò n jí kɛ̃ gàà mɔ́ mɔ́, e jà ń cĩ́ bwǝl ń yó, n pɔ̃ nyí myɛ n wɔ̀: Ǹ bǝ̀ká vò ń jí kɛ̃ Kanaã lyì bǝ̀kwá bɛ́ wẽ́ yé. ⁷N pwírí Zhakɔɔbɛ zwẽ ń da ǹdǝ́ ń ná nyí ni n zhǐr n vò Padã-Aram.⁸Ezǝyu lwar bǝ̀ Kanaã lyì bǝ̀kwá bɛ́ dǝ̀ ń da Yǝzakɛ pùbùlǝ̀ yé. ⁹Ezǝyu zɛ̃̀ n vò Yǝsǝmǝyǝǝ sono. N jí kɛ̃, s'e dǝ̀ Abǝrham byǐ Yǝsǝmǝyǝǝ bǝ̀kɔ́ Mayalatɛ, ǹdǝ́ Nǝbazhɔtɛ nǝkɔ́ mɔ́ yé¹⁰Zhakɔɛ zhì Bɛɛr-shǝba nɛ́ n shǝr ń la Aarã. ¹¹Yi rí zú mú jàr mɔ jàà èdù vẽ́, n já n mɛ̃ gàà n zɔ̃̀. N pyẽ̀ gàà mɔ́ ń la zɔ̃̀, n pyẽ̀ tɛ̃̀ n kwè ń nǝ́kulǝ né òdù n mǝ n kwɛ̃́ ń yó¹²Ń zɛ̃̀ n dàrhà, n nǝ lyarh-dɔ́rhɔ́ òdù ò zhì tɛ̃́ cɛ y yó o vò ò n'ô dwǝ̀th dɛ̃̌-yi rí ni. Yi màlɛ́kabá n'ê tó w bǝ̀ zhǝ̀l dɛ̃̌ bǝ̀ k'â swé tɛ̃́. ¹³N nǝ Cǐnnǝ mó ń zhǐ ń nyí ni, ń zhe: À wɔ́ Cǐnnǝ, ǹ da Abǝraam Yi ǹdǝ́ Yǝzakɛ Yi. À la mɔ́ cɛ y ǹ pyě è yó mó ǹmyɛ́ ǹdǝ́ ǹ dwí rí ni pɔ.¹⁴Ń dwí rí m'a yǝ̀ ǹdǝ cɛ y shó w ta, rǝ wɛ̀lɛ̀ rǝ vò yi-zùr ǹdǝ́ yi-púrhí, lũ jǝ̇ègwã̀ ǹdǝ́ lũ jǝ̇-jĩ́ ga. Dwǝ́ né gakó cɛ yó m'a tó ǹmyɛ́ ǹdǝ́ ǹ byǎ bɛ́ dɛnnɛ nǝ nǝ bwǝl. ¹⁵Nyì wé, à ŋwɛ́nɛ́ ǹdǝ́ mɔ́, à m'a yìlì mú ń gǝ́ la mǝ̀gã̌ gakó, sǝ à m'a ce myɛ ń kwẽ̀ ń bǝ̀ tǝnà y kɛ̀bɛ́ wẽ́. à t'â la mɔ́ yõ̌ gaga, kɔn m'e yí a pyìrh kɔn rɛ́ à bwǝl mó rǝ̀ nyí mú.¹⁶Zhakɔɔbɛ gǝ́ shí jɛ̃ rɛ́ wẽ́ n zɛ̃̀ n wɔ̀: "Zhǝ̀n zhǝ̀nà, Cǐnnǝ mó ŋwɛ́nɛ́ nyɔ̀nɔ̀ e jà àmyɛ́ yǝ̀l yé" ¹⁷Ywẽ zǝ mɔ n zɛ̃̀ ń zhe: "Nyǐ jàà y kɛ̀bɛ́ wɔ́ wu-zɛ̃̀ɛ̃́ jàà yòò! Nyǐ nyɔ̀nɔ̀ mɔ́ wɔ́ Yi jì, nyǐ nyɔ̀nɔ̀ mɔ́ wɔ́ dɛ̃̌ yi rí étwí-ènyí"¹⁸Zhakɔɔbɛ dùlí nǝkɔkɔ́lɛ́ shãã shãã n kwè nǝ́kulu w ń yà ń mǝ ń kwɛ̃́ ń yó w ne mó n cìì tɛ̃́, o yǝ̀ ǹdǝ vwĩ̀-jùlú ta, n zɛ̃̀ n ló nwǝ̃̌ ò yǝ́-pɛ̀lɛ́ wa. ¹⁹N zɛ̃̀ n ce jàà èmyɛ́ yil bǝ̀ Bǝtɛlɛ, bǝ̀ y'à n'ê byẽ̀ cɔ w òmyɛ́ mɔ́ shãã ga bǝ̀ Luuzhi.²⁰Zhakɔɔbɛ bɛ zɛ̃̀ n bwǝl nyí n wɔ̀: Yi gǝ ŋwɛ́nɛ́ ǹdǝ́ nɛ, rǝ̀ gǝ dɛ̃̀ nɛ sɔ́má kɛ̀bɛ́ à shǝ́r mó shò kwã nɛ́, rǝ pɛ̃ kùjú a jí, rǝ pɛ̃ kàmǝ̀zwǐsi a zù, ²¹à gǝ kwɛ̃̀ à tú à da sõ kɛ̀lɛ́ w ǹdǝ́ yǝ̀-zùlǝ́, Cǐnnǝ mó mà n jǐrh à Yi. ²²Nǝ́kulu w kɔ̀bɔ́ à cìì, ò wɔ́ vwĩ̀-jùlú mú m'a yǝ̀ Yi jì, Sǝ kɔn rɛ́ tɛ̀bɛ́ ǹ la nɛ pɔ mɔ́ wẽ́, à m'a vùr kɔn rǝ̀dù shí gakó yó a pɔ̃́.

¹Zhakɔɔbɛ já n zɛ̃̀ n kwè Kǝdɛm lyì bí tǝnà y sɔ́má. ²N vò n yí pwírí zhìli èdù gɔ sõ. Pyììsi kùrǝ̀ nǝ̀tɔ̀ y'à pyě tɛ̃́ zhìlí y yala nɛ, bǝ̀ wɔ́ gàà vwàmá nɛ́ y'à n'ê twí nǝ̀ nywɛ̀ nɛ̃̌ nɛ́. Nǝ́kulu nánfɔ̀lɔ̀ y'à pyi zhìlì y nyí ni. ³Vwàmá nɛ́ gakó g:a tu nǝ̀ jǝl dwã gàà, bǝ̀ y'a zɛ̃̀ bǝ byíbyílí nǝ́kulu w bǝ cí kwã nɛ́, bǝ pǝ vwàmá nɛ́ nɛ nǝ nyɔ̀, nǝ̀ gǝ nyɔ̀ nǝ̀ zhɛ̀ bǝ k'a zǝ nǝ́kulu w bǝ pyi zhìlì y nyí rí.⁴Zhakɔɔbɛ zɛ̃̀ n bwǝ̀rh vwã̌-ènɔ̀nà bɛ́ n wɔ̀: À da-byǎ wɔ́ yẽ̀ ámyɛ̌ n'á shí ní? Bǝ lyár mɔ bǝ wɔ̀: Nǝ́ n'é shí Aarã. ⁵N zɛ̃̀ n bwǝ̀rh be n wɔ̀: Á yě Nawɔɔrɛ byǐ Lbã párá? Bǝ lyár mɔ bǝ wɔ̀: Nǝ yě ń párá. ⁶N zɛ̃̀ n bwǝ̀rh be n wɔ̀: Ń jɛ̀? Bǝ lyár mɔ bǝ wɔ̀: Ń jɛ̀. Já nyǐ ń bǝ̀kɔ́ Arashǝǝ gaga mɔ́ ń bàn ǹdǝ́ pyììsí.⁷Zhakɔɔbɛ wɔ̀ bɛ: Yi rí gwẽ̌ ŋwɛ́nɛ́, vwàmá nɛ́ dwã yó cṹ gwẽ̌ yǝ̀ yí yé. Pǝ-na nɛ nɛ̃̌ nǝ nyɔ̀, s'a k'á zǝ nɛ a vò a pǝ nɛ gɔ nǝ dɔ̃̀. ⁸Bǝ lyár mɔ bǝ wɔ̀: Nyǐ vwàmá nɛ́ gakó gǝ́ gwẽ̌ yǝ̀ dwã yó twí mú ce nǝ́ wàr yé. Wɔ́ nǝ̀ gakó gǝ tú nǝ̀ tú dwã nǝ̀ zhɛ̀ fòró bǝ̀ y'a zɛ̃̀ bǝ byíbyílí nǝ́kulu w zhìlí y nyí rí mú bǝ cĩ́ kwã nɛ́ nǝ́ zɛ̃̀ nǝ́ yẽ̌ ne nǝ nyɔ̀.⁹Ń gǝ́ yà ń nǝ́ ń zɔ̀m ǹdǝ́ yi ní, ǹdǝ́ Arashǝǝ já ń yí ǹdǝ́ ń da pyììsí. Arashǝǝ yà ń vwã̌-ènɔn. ¹⁰Zhakɔɔbɛ gǝ́ nɔ Arashǝǝ, ń ná nǝbɔ́ Labã bǝ̀kɔ́ mɔ́ mɔ́, ń yú ǹdǝ́ ń nǝ̀bal Labã pyììsí mú, n twẽ̌ n yí zhìlí y nyí ni n byíbyílí nǝ́kulu w n cĩ́ kwã nɛ́, n ce ń nǝ̀bal Labã pyììsí nyɔ̀ nɛ̃̌ mɔ́¹¹Zhakɔɔbɛ zɛ̃̀ n kwǝ̀ǝ̀le Arashǝǝ ń wùrhí du ń nǝ́ ń kúrhǝ́. ¹²Zhakɔɔbɛ zɛ̃̀ n byili Arashǝǝ ne bǝ̀ ńmyɛ̌ ǹdǝ́ ń da Labã ŋwɛ̀ ǹdǝ́ dwã. Sǝ ńmyɛ̌ wɔ́ Rǝbǝka byǐ. Arashǝǝ já n dùr n vò n byili rí ń da nɛ.¹³Labã gǝ́ nyɛ̀ɛ̀ bǝ̀ n'ê zòm ń nǝkɔ́ mɔ́ byǐ Zhakɔɔbɛ zɔ̀mà, n dùr n vò n jǝl mo. N zǝ mɔ n dɛ̃ ń cìn ni, n kwǝ̀ǝ̀le mo n zɛ̃̀ n zǝ mɔ n vó ń sõ. Zhakɔɔbɛ cĩ́ kɔn dèbɛ́ gakó rǝ̀ yú mu mú Labã nɛ. ¹⁴Labã zɛ̃̀ n wɔ̀ mɔ: Zhǝ̀nà, àmyɛ́ ǹdǝ́ ǹmyɛ́ ga wɔ́ jal mǝ̀dù. Zhakɔɔbɛ já n mɛ̃ Laba¹⁵Rǝ̀myɛ́ kwã nɛ́, Labã zɛ̃̀ n wɔ̀ Zhakɔɔbɛ nɛ: Ǹ nǝ m'ǎ tǝ̀ nǝ́ ŋwɛ̃̀ ǹdǝ́ dwã yil ń já ǹ nǝ́ ǹ twĩ̀ ǹ pɛ nɛ nánfò? Byili ni kɔn dɛ̀bɛ́ à mǝ̌ s'a kwɛ̃̌ mɔ́ mɔ́. ¹⁶Labã jà ń yà ń zhe bǝ̀kwá bǝ̀lyè. Náncɛ y yíl Lɛya, nyɛ̃́ mɔ́ yíl Arashǝǝ. ¹⁷Lɛya yírhǝ́ né y'à wɔ́ wu-bɔ̀nɔ̀ cí yírhǝ́, Arashǝǝ dwɛ̀lɛ̀ rɛ́ y'à sú yírh ń yé-zwã̌ y myɛ y'à dǝ̀ cɛ̀nɛ̀ dwí. ¹⁸Sǝ Zhakɔɔbɛ y'à wɔ́ Arashǝǝ ń y'ǎ só. N zɛ̃̀ n lyár Labã n wɔ̀: Nyǐ à m'a twĩ̀ byinǝ nyàlpyɛ̀ a pɔ̃́ ǹ bǝ̀kɔ́ mɔ́ námpɔ́lɛ́ y Arashǝǝ yilǝ.¹⁹Labã lyár mɔ n wɔ̀: à só s'a pɔ̃́ mɔ ń jí cɔ̃̀ à pɔ mɔ bal dõ ne. Mɛ̃ à sono. ²⁰Zhakɔɔbɛ já n mɛé n twĩ̀ byinǝ nyàlpyɛ̀ Arashǝǝ yilǝ, sǝ ń gǝ́ yà ń só Arashǝǝ mó ce byinǝ né j'a lyɛ̃ ń yírhǝ́ w ǹdǝ wɔ́ dwã màngɛlɛ́ ta.²¹Rǝ̀myɛ́ yó né, Zhakɔɔbɛ zɛ̃̀ n wɔ̀ Labã nɛ: À dwã nɛ́ zhɛ̀ èlǎsɛ̃́, pɛ̃ à kɛ̃ mɔ́ à la jú. ²²Labã zɛ̃̀ n tɛnɛ címsi kùjú n byẽ̀ jàà y èmyɛ́ lyì bí gakó dwã yó.²³Dǝ̀dɛ̀nɛ́ yi gǝ́ yúwǝ́, Labã zǝ ń bǝ̀kɔ́ Lɛya n vò n pǝ Zhakɔɔbɛ nɛ, ń la zù ǹdǝ́ mɔ. ²⁴Labã zǝ Zhǝlǝpa n pǝ ń bǝ̀kɔ́ Lɛya nɛ, ń la yǝ̀ tùntùnnǝ n twĩ̀ n pǝ Lɛya nɛ. ²⁵Cɛ y tú e lǝ́ e zhɛ̀, Zhakɔɔbɛ púrí wɔ́ Lɛya! N zɛ̃̀ n wɔ̀ Labã nɛ: Bǝ̀kɔ́n ǹ wɛ̀rhɛ́ nɛ èta mɔ́? È dǝ̀ Arashǝǝ yil à twĩ̀ a pɔ̃́ nà? È nǝ́ byè yil ǹ myìnì mú?²⁶Labã wɔ̀: Nyǐ nǝ́ sono mó, lò tá ń jɛ̀rɛ̀ ń pɛ nyɛ̃́ byal nɛ n jí n yẽ̌ zhɛ̃n- kɛ̃ mɔ́ nɛ yé. ²⁷Rǝ̀myɛ́ ce, wɛ̀rhɛ́ Lɛya kɛ̃-jú w dwã nɛ́ nyàlpyɛ̀ y ń zhɛ̀, rǝ̀myɛ́ kwã nɛ́ nǝ́ m'ǎ k'é pɔ̃́ Arashǝǝ myɛ, ń twĩ̀ byinǝ nyàlpyɛ̀ dwã à sono ńmyɛ yilǝ.²⁸Zhakɔɔbɛ wɛ̀rhɛ́ èta. N wɛ̀rhɛ́ Lɛya kɛ̃-jú dwã nɛ́ nyàlpyɛ̀ y n zhɛ̀, rǝ̀myɛ́ kwã nɛ́ Labã kwè ń bǝ̀kɔ́ Arashǝǝ n pɔ̃ ń la jú. ²⁹Labã zǝ tùntùnnǝ Byǝla n pǝ Arashǝǝ ne ń la yǝ̀ ń tùntùnnǝ. ³⁰Zhakɔɔbɛ zù ǹdǝ́ Arashǝǝ myɛ sǝ ń swéné Arashǝǝ du Lɛya. Zhakɔɔbɛ kǝ́ n twĩ̀ n pǝ Laã nɛ byinǝ nya;èlpyɛ̀ dwã kǝ́dò.³¹Cǐnnnǝ mó gǝ́ púrí bǝ̀ bǝ Lɛya só mó ce n jǐrh kǝ-lǔl, Arashǝǝ zɛ̃̀ n mɛ̃ nɛ́ kǝ-eju. ³²Lɛya kwè pǔ n lù byǐ n ce ń yil bǝ̀ O̰rɔbɛn, bǝ̀ ń yà ń nǝ́ ń wǝèlǝ̀: Cǐnnnǝ nɔ à zúzúnú wǝ́, sǝ kɔn zhí zà mɔ́ à byal mɔ́ mà n swéné ne.³³N kǝ́ n zǝ pǔ kǝ́dò, n lù byǐ, n zɛ̃̀ n wɔ̀: Zhǝ̀n ga Cǐnnǝ mó nyɛ̀ɛ̀ bǝ̀ nyǐ bǝ̀ bǝ ne só yé, n zɛ̃̀ n kǝ́ n pɛ̃ mɔ̀bɔ́ myɛ n súlí. N ce ń yil bǝ̀ Shǝmǝnyɔ̃. ³⁴N zɛ̃̀ n kǝ́ n zǝ pǔ n lù bal-byǐ, n zɛ̃̀ n wɔ̀: Èlǎsɛ̃́ myɛ̌, à byal mɔ́ mà n já n swéné ne, b'à lùl byǎ bǝ̀tɔ̀ a pɔ̃. Wɔ́ rǝ̀myɛ́ kwã nɛ́, ń kǝ́ ń yǝ̀ lùl yé.³⁵Rǝ̀myɛ́ kwã nɛ́, n zɛ̃̀ n kǝ́ n zǝ pǔ, n lù bal-byǐ n zɛ̃̀ n wɔ̀: Èlǎsɛ̃́, à m'a cèrhé Cǐnnǝ mó! Wɔ́ rǝ̀myɛ́ è ce n ce è yil bǝ̀ Zhǝda. sǝ rǝ̀myɛ́ kwã nɛ́, ń kǝ́ yǝ̀ lùl yé.

¹Arashǝǝ gǝ́ púrí ń tá ń lùl byǎ ń pɛ Zhakɔɔbɛ nɛ, n zɛ̀ ń nǝ́ ń jí byal-kɛnɛ ǹdǝ́ Lǝya. N wɔ́ Zhakɔɔbɛ nɛ: Pɛ̃ byǎ ǹgǝ dǝ̀ rǝ̀myɛ́ à m'a cì! ²Zhakɔɔbɛ lyim j'a zɛ̃̀ rǝ̀ n'ê yì Arashǝǝ dɛ̃́dɛ̃́, n lyár mɔ n wɔ̀: À ŋwɛ́nɛ́ Yi jàà w nà? Wɔ́ rǝ̀myɛ́ è ǹ wɔ́ kǝ-eju!³Arashǝǝ zɛ̃̀ n wɔ̀ mɔ: Nyǐ à tùntùnnǝ byǝla, zú ǹdǝ́ mɔ, mùnì ga n lù byǎ n pɛ̃ a cĩ́ à nèrh yó. Èta àmyɛ m'a tó ń dɛnnɛ a nǝ byǐ. ⁴Arashǝ kwè ń tùnnǝ byǝla n pǝ Zhakɔɔbɛ nɛ ń la jú.⁵Byǝla kwè pwǐ, n lù bal-byǐ n pǝ Zhakɔɔbɛ nɛ. ⁶Arashǝǝ zɛ̃̀ n wɔ̀: Yi bùr à bùrsí n pɛ̃ bùrì. Rǝ zwẽ à lwǝ̌l mó rǝ pɛ̃ byǐ.Wɔ́ rǝ̀myɛ́ n ce ń yil bǝ̀ Dan.⁷Arashǝǝ tunnǝ Byǝla kǝ́ n kwè pǔ kǝ́dò n lù byǐ dõ n pǝ zhakɔɔbɛ nɛ. ⁸Arashǝǝ wɔ̀: À tó Yi rí rǝ̀ yě kɔn gakó yé shò mó dɛnnɛ, àmyɛ lwar kɔn yé shò, sǝ à j'a jí kɛlɛ à zhǝ̀n-kɛ̃ mɔ́ yó. N ce ń byǐ mú yil bǝ̀ Nǝfǝtǝlyi.⁹Lɛya gǝ́ tú púrí ń kǝ́ ń tá ń lùlǝ̀, n kwè ń tùnnǝ Zhǝlǝpa n pǝ Zhakɔɔbɛ nɛ n jí. ¹⁰Lɛya tùnnǝ Zhǝlǝpa lù byǐ n pǝ Zhakɔɔbɛ nɛ. ¹¹Lɛya zɛ̃̀ n wɔ̀: Bǝ̀kɔ́n yó-nyɔ̃ ǹdǝ́ kɔ̀bɔ́! N ce byǐ mú yil bǝ̀ Gaadɛ.¹²Zhǝlǝpa kǝ́ n lù byǐ dõ n pǝ Zhakɔɔbɛ nɛ. Lǝya wɔ̀: ¹³Wɔ́ bǝ̀kɔ́n yó-nyɔ̃̀ dwí à nɔwa! Kana bɛ́ m'a wɔ̀ b'a zhe wu-nyɔ̃̀. N zɛ̃̀ n ce ń byǐ yil bǝ̀ Asɛɛrɛ.¹⁴Bǝ̀lɛ́ y kɔrɔ́ w yi ní, Orɔbɛn zɛ̃̀ n vò cɛsɛ́ wẽ́ n vò n pɔ̌r vɔr dwí rǝ̀dù n bǝ n pǝ ń ná Lɛya nɛ. Arashǝ zɛ̃̀ n wɔ̀ Lɛya nɛ: À n'â lwǝ̀l mó sǝ́ vùr vɔr rɛ́ tɛ̀bɛ́ ǹ byǐ pɔ̌r n mǝ n bǝ̀ mɔ́ màngɛlɛ́ ń pɛ̃. ¹⁵Lɛya lyár mɔ n wɔ: Ǹ gǝ́ zwẽ à byal mɔ́ mɔ́ gwẽ̌ yǝ̀ mɔ́ yí, wɔ́ à byǐ mú vɔr rɛ́ ǹ nǝ́ ǹ yǎl ń zwe ń súlí? Arashǝǝ zɛ̃̀ n wɔ̀ mɔ: È gǝ wɔ́ èta sǝ Zhakɔɔbɛ zù ǹdǝ́ mɔ́ cǝcɛ̃ y kɛ̀bɛ́ ǹ byié mú vɔr re;/ yilǝ.¹⁶Zhakɔɔbɛ shí gɔ n bà, dǝ̀dɛ̀nɛ́ bɔ̀l wa. Lɛya du n jǝl mo n wɔ̀: Lɛya du n jǝl mo n wɔ̀ mɔ: Ǹ mǝ̌ sǝ́ zù ǹdǝ́ nɛ b'a shɛ̀nɛ́ a pǝ à byǐ mú vɔr rɛ́ rǝ̀myɛ́ yilǝ. Sǝ Zhakɔɔbɛ zù ǹdǝ́ mɔ cǝcɛ̃ y èmyɛ́ mɔ́. ¹⁷Yi zwẽ Lɛya lwǝ̌l móŋ kwè pǔ n lù ń byǎ bǝ̀nu nyǎn mɔ́ n pǝ Zhakɔɔbɛ nɛ. ¹⁸Lɛya zɛ̃̀ n wɔ̀: Yi pɔ nɛ à kwǎndɛ́ à gǝ́ pɔ à tùnnǝ mó à byal mɔ́ nɛ mɔ́ yilǝ. N zɛ̃̀ n ce byǐ mú yil bǝ̀ Yǝsakaarɛ.¹⁹Lǝya kǝ́ n zǝ pǔ kǝ́dò n lù byǎ bwǝ̀ldù nyǎn mɔ́ n pǝ Zhakɔɔbɛ nɛ. ²⁰N zɛ̃̀ n wɔ̀: Yi pɔ nɛ pɛnɛ́ kɛ̀bɛ́ è càn! Èlǎsɛ̃́ myɛ, à byal mɔ́ mà n cèrhé ne b'à lùl ń byǎ bwǝ̀ldù nyǎn mɔ́ a pɔ̃. Lɛya ce ń byǐ mú yil bǝ̀ Zabyǝlɔ̃. ²¹Rǝ̀myɛ́ kwã nɛ́, ń tú n bǝ̀ n lù kɛ̃-byǐ n ce ń yil bǝ̀ Dinǝ.²²Yi lyǐrh Arashǝǝ myɛ yò, rǝ zwẽ ń lwǝ̌l mó rǝ ce n jǐrh kǝ-lǔl. ²³Arashǝǝ kwě pǔ n lù byǐ n zɛ̃̀ n wɔ̀: Yi vùr à ci̇zhìl ré! ²⁴N ce ń yil bǝ̀ Zhozefu ń mǝ́ ń zhe: Bǝ-zhɔ-zhe mà n pɛ̃ byǐ n súlí!²⁵Arashshǝǝ gǝ́ tú n lù Zhozefu kwã nɛ́, Zhakɔɔbɛ wɔ̀ Labã nɛ: Yẽ̌ ne a kwɛ̃̀ a vò à da-dǒ. ²⁶Pɛ̃ à byǎ bɛ́ ndǝ́ à kana bɛ́, byɛ̀bɛ́ à twĩ̀ bǝ̀ yil a pɔ̃́ mɔ́ a m'a kwɛ̃̀. Ǹ cìcì mú yě tum rí dɛ̀bɛ́ à twĩ̀ a pɔ̃́ mɔ́ gǝ́ yàl nɛ́.²⁷Labã zɛ̃̀ n wɔ̀ mɔ: Ǹ gǝ́ nyǐ ni ǹdǝ́ sónó mó, ce à pyà ǹdǝ wɔ́ jǝ̀pɛ́rɛ́ ta a lwar bǝ̀ Yi tó ǹ dɛnnɛ rǝ cĩ́ bwǝl à yó. ²⁸Rǝ̀myɛ́ yilǝ, Byili ni, wɔ́ màngal à m'a kwɛ̃̌ mɔ́, sǝ́ yẽ̌ b'à m'a pɔ̃́ rɛ.²⁹Zhakɔɔbɛ lyár Labã n wɔ̀: Ǹ cìcì mú yě à gǝ́ twĩ̀ a pɔ̃́ nɛ́, e súlí myɛ à gǝ́ ce ǹ dɔ̀ w pù ní. ³⁰À gǝ́ y'à gwẽ̌ yǝ̀ ǹ sõ twí mú, ǹ nɛrɛ́ y'à yǝ̀ kaka yí yé, sǝ à gǝ́ tú yó né è zɛ̃̀ e pù dɛ̃́dɛ̃́, Bǝ-zhɔ-zhe tó à dɛnnɛ n cĩ́ bwǝl ǹ yó. Sǝ èlǎsɛ̃́, wɔ́ dǒ àmyɛ́ la tũ̌ a pǝ à lyì bí yilǝ?³¹Labã bwǝ̀rh mo n wɔ̀: È nǝ wɔ́ bǝ̀kɔ́n à nǝ m'a pɔ̃́? Zhakɔɔbɛ lyǝ́r n wɔ̀: Ǹ bǝ̀ká pɛ̃ kaka yé. À la mɔ́ kɔn rǝ̀dù lwǝ̌l ǹdǝ́ ǹ gǝ shɛ̀nɛ́ n pɔ nɛ rǝ̀myɛ́ nyí, à m'a k'â n'â cili ǹ pyììsí sõ à kwɛ̃̀ sɛ. ³²Nyǐ zà à m'a tó ǹ vɔ̌-ywàálɛ́ gakó wẽ́, a vùr pyì-bwɛ̀lɛ́ kɛ̀bɛ́ è wɔ́ námpɔ̀pɔ̀lɛ́ ráá è zhe byìbyínǝ́ gakó ǹdǝ́ pyì-nyɛ̀ kɛ̀bɛ́ è gakó wɔ́ námbyĩ́ ǹdǝ́ bɔ̃̀ kɔ̀kɔ́ gakó ò wɔ́ námpɔ̀pɔ̀lɔ̀ ráá ò zhe byìbyínǝ́ gakó, rǝ yǝ̀ à kwǎndɛ́.³³Nǝkɔla, kɔn rɛ́ dɛ̀bɛ́ rǝ̀ wɔ́ àmyɛ́ nyǎn mɔ́ m'a byili rǝ̀ cìnǝ̀, ǹdǝ́ gǝ tú ǹ la à kwǎndɛ́ byɔ́lɔ́ yi ní, ǹ gǝ nɔ bɔ̃̀ kɔ̀bɔ́ ò dǝ̀ námpɔ̀pɔ̀lɔ̀ ráá ò bǝ byìbyínǝ́ zhe bɔ̃̀ nɛ́ wẽ́, ráá ǹ gǝ nɔ pyì-nyɛ̀ kɛ̀bɛ́ è dǝ̀ námbyĩ́ pyììsí wẽ́ mó, sǝ́ lwar b'amyɛ́ wɔ́ ŋwɔ̀l-bal. ³⁴Labã wɔ̀: rǝ̀myɛ́ càn, kɔn yál ǹdǝ ǹ gǝ́ zɔ̀m nɛ́.³⁵Dɛ̃ rɛ́ rǝ̀myɛ́ yù w cìcì; Labã pɔr bǝ̀-cǐlsí sǝ̀ y'à zhe pòpwǝ̀nǝ̀ ǹdǝ́ byìbyínǝ́ ǹdǝ́ bɔ̀n nɛ́ nyɛ̀bɛ́ gakó nǝ̀ y'à zhe byìbyínǝ́ ráá nǝ́ y'à wɔ́ námpɔ̀pɔɔ̀lɛ̀ mɔ́. Labã kwè kɔn dɛ̀bɛ́ gakó ń zwẽ mó, e súlí pyì-nyɛ̀sɛ́ sǝ̀ y'à n'ê lùl ń pyììsí wẽ́ mó gakó n pǝ ń byǎ bɛ́ nɛ, ³⁶n zɛ̃̀ n vò n wɛ̀rhɛ́ dwã nǝ̀tɔ̀ gakó n mǝ n pɔr dwã nɛ ǹdǝ́ Zhakɔɔbɛ n vò kwã nɛ́ n yẽ̌ Zhakɔɔbɛ nɛ. Sǝ Zhakɔɔbɛ yà ń gwẽ̌ cǝ̀ǝ̀le ń nǝ́ ń cili Labã dɔ̀ w kùr rí rǝ̀ dàl mɔ́ sono.³⁷Zhakɔɔbɛ zɛ̃̀ n pyà pǝpyiléyé ǹdǝ́ amajǝ́ ǹdǝ́ pǝlataanɛ jɛ̀rh nánlyàr. N zɛ̃̀ n pwɛ̀rhɛ̀ sǝ̀ pwǝ̀ǝ̀rhé n yẽ̌ sǝ̀ dǎr rɛ́ nɛ námpwǝ̀rh pwẽ̀ ne. ³⁸N zɛ̃̀ n kwè sǝ̀ dǎr rɛ́ ǹdǝ́ rǝ̀ pòpwǝ̀nǝ̀ né n cĩ́ kùlkwémé né wẽ́, vwàmà nɛ́ gǝ́ n'ê twí nǝ̀ nywɛ̀ nɛ̃̌ mɔ́ mǝ̀gã̌. E jà wɔ́ nɛ̃̌ mɔ́ nyɔ́ yi ní vwàmá y'a zɛ̃̀ nǝ̀ n'ê jìl dwã.³⁹Vwàmá nɛ́ y'a zɛ̃̀ nǝ̀ n'ê jìl dwã dǎr rɛ́ rǝ̀myɛ́ mɔ́ yé né. Vwàmá nɛ j'a zɛ̃̀ nǝ̀ n'ê lùl nǝ̀ byǎ bɛ́ ǹdǝ́ pòpwǝ̀nǝ̀ ǹdǝ́ byìbyínǝ́, ráá námpɔ̀pɔ̀ɔ̀lɛ̀. ⁴⁰È gǝ wɔ́ pyììsí shɛ̀bɛ́ Zhakɔɔbɛ yà ń vùr n cĩ́ kwã nɛ́ mɔ́ yilǝ, ń ce sǝ̀ tó sǝ̀ ŋwɛ́nɛ́ vwàmá nɛ́ nyɛ̀bɛ́ nǝ̀ y'à zhe pòpwǝ̀nǝ̀ né ǹdǝ́ byìbyínǝ́ né mó, Labã vwàmá nɛ́ wẽ́. Ń tó rǝ̀myɛ́ dɛnnɛ n nǝ dɔ̀ ò nyí, ń yǝ̀ w gàl n ce Labã dɔ̀ w wẽ́ yé⁴¹Vwàmá nɛ́ nyɛ̀bɛ́ nǝ̀ só nǝ̀ mú gǝ tú nǝ̀ n'ê jìl dwã yi ní, Zhakɔɔbɛ y'à ń nǝ́ n cĩ́ dǎr rɛ́ nǝ̀ yé y w nàná bɛ́ kùlkwé mé né wẽ́, mùnì ga nǝ jì dwã dǎr rɛ́ yé né. ⁴²Sǝ è gǝ wɔ́ vwàmá nɛ́ nyɛ̀bɛ́ nǝ̀ wɔ́ nánkwààrɛ́ mɔ́, ǹ yà ń tá ń cĩ́ dǎr rɛ́ nɛ́ yé. èta vwàmá nɛ́ nánkwààrɛ́ y'à wɔ́ Labã nyǝ̀ná. Nyɛ̀bɛ́ nǝ̀ só nǝ̀ cìn mú zɛ̃̀ nǝ̀ wɔ́ Zhakɔɔbɛ nyǝ̀ná.⁴³Zhakɔɔbɛ tú n bǝ̀ n jǐrh nǝ̀cɛ̀m-bal nánfɔ̀lɔ̀, ń zhe vwàmá nánzhǝzhɔ̌, ǹdǝ́ tùntùnnǝ nánzhǝzhɔ̌, bala ǹdǝ́ kana ǹdǝ́ yómde ǹdǝ́ bǝ̀nèrh ga.

¹Zhakɔɔbɛ tú n bə nyὲὲ bə Labã byǎ bέ y'à n'ê wǝ̀lǝ̀: Bǝ̀ wɔ́ bǝ̀ da wẽ̀ ré, bǝ̀ da nǝ̀cɛ̀ndɛ́ ń zɔ ń mǝ́ ń zhe nǝ̀cɛ̀nd:é tɛ̀bɛ́ ²Zhakɔɔbɛ nyǐ Labã yé y n púrí è k'ê dǝ̀ ǹdǝ zhãã ga ta ń yé né yé. ³Cǐnnə mó zɛ̃̀ n wɔ̀ Zhakɔɔbɛ nɛ: Ká kwɛ̃̀ ń vò ǹ dabá tǝnà y wa. Bǝ̀ gǝ́ lùl mó mǝ̀gã̌, sǝ́ yẽ̌ bǝ̀ à b'à yǝ̀ nɛ́ mɔ́.⁴Zhakɔɔbɛ ce bə byẽ̀ Arashəə ǹdǝ́ Lɛya bə bǝ̀ ń sõ gɔ sõ, ń gǝ́ yà ń wɔ məgǎ ǹdǝ́ vwàmá nέ mɔ́. ⁵N zɛ̃̀ n wɔ̀ bɛ: À nyǐ a púrí á da yé y kə dǝ̀ ǹdə è shãã ga mɔ́ ta yé, sə à da mɔ́ Yi rí yàl nέ ǹdǝ́ nɛ. ⁶Ámyɛ yě b'à twĩ̀ a pə á da nɛ ǹdǝ́ à jàn gakó.⁷Á da myìnì ni, ń lyǝ́r kwǎndέ tὲbέ ń yà ń la nɛ pɔ mɔ́ twər shíyǝ́. Yi yǝ̀ shὲnέ n wὲrhέ nɛ lwɛlɛ yé. ⁸Ń gǝ́ yà ń wǝ̀lǝ̀: È gǝ́ wɔ́ vwàmá nέ nyὲbέ gakó nǝ̀ zhe byìbbyínə mó nə yǝ̀ ǹ kwǎdέ, vwàmá nέ gakó y'a j'a zɛ̃̀ nǝ̀ n'ê lùl byǎ byὲbέ bə zhe byìbyínə. Sə ń gǝ́ kǝ́ ń wɔ̀: Vwàmá nέ nyὲbέ nə zhe pòpwǝ̀nǝ̀ mó mà yə ǹ kwǎndέ, vwàmá nέ gakó y'a j'a zɛ̃̀ nə n'ê lùl byǎ byὲbέ bə zhe pòpwǝ̀nǝ̀. ⁹Yi zwẽ á da vwàmá nέ rə pɛ.¹⁰E jà vwàmá nέ gǝ́ y'à n'ê jìl yi ní, à dàrh, à kwě à yó à la nyǔ, à púrí bǝ̀-cǐlsi, ǹdǝ́ sǝ̀ pòpwǝ̀nǝ̀ ǹdǝ́ sǝ̀ byìbyínǝ́, sǝ̀ wɔ́ dúdúmǝ́ dúdúmǝ́ sǝ̀ n'ê jìl vwàmá nέ. ¹¹Yi màlέká y zɛ̃̀ e byẽ̀ ne, dàrhà nέ wẽ́: À lyár y a wɔ̀: nyǐ ni¹²E wɔ̀ nὲ: Kwẽ̌ ǹ yó dɛ̃̌ ń nyǐ bǝ̀-cǐlsí shὲbέ ǹdǝ́ sǝ̀ pòpwǝ̀nǝ̀ né ǹdǝ́ sǝ̀ byìbyínǝ́ né, sǝ̀ wǝ́ dúdúmǝ́ dúdúmǝ́ sǝ̀ n'ê jìl vwàmá nέ ma, à nɔ kɔn rέ tὲbέ Labã nǝ́ ń wὲrhέ mɔ́ mɔ́. ¹³À wɔ́ Yi rí tὲbέ ǹ cìì nǝ́kulu w tɛ̃́ Bətɛl nέ, ń ló nwǝ̃̌ y ò yó ń pə rɛ, ń zɛ̃̀ ń súlí ń dwĩ̀ nyí ǹdǝ́ rɛ mɔ́. Èlǎsέ zɛ̃̀ tɛ̃́ ń shǝ́r tənà y kὲbέ wẽ́ ń kwɛ̃̀ ń vò ǹ dwí rí tənà y wa.¹⁴Arashəə ǹdǝ́ Lɛya zɛ̃̀ bə lyár mɔ bə wɔ̀: ¹⁵<Ń gǝ́ yè nǝ́ba, n zwẽ nǝ́ ye y wársέ myɛ n jí mú ce, è dǝ̀ yé ń yè nǝ́ba n zwẽ nǝ́ ye y wársɛ́ n jí, n zɛ̃̀ n nyǐ nǝ́ba ǹdə zhələ ta ń yil nà? ¹⁶Rəmyέ ce, nǝ̀càndέ tὲbέ Yi zwẽ nǝ́ da sõ mó wɔ́ nǝ́myɛ̌ ǹdǝ́ nǝ́ byǎ bέ nyǎn. Èlǎsɛ̃́, zɛ̃̀ ń wὲrhέ kɔn rέ tὲbέ gakó Yi wǝ̀l mó mó.¹⁷Zhakɔɔbɛ já n zɛ̃̀, n ce ń byǎ bέ ǹdǝ́ ń kana bέ jòm yómde. ¹⁸N zɛ̃̀ n zǝ ń vwàmá nέ ǹdǝ́ ń nǝ̀càndέ tɛ̀bɛ́ gakó ń yà ń nɔ Pãdã-Aramɛ nέ n kwɛ̃̀ ń bàn ń da Yəzakɛ sõ, kanaã tənà y wa.¹⁹Labã yà ń zhǝ̀l ń la ń vwàmá nέ kur rí kwar, Arachəə já n tó rǝ̀ dɛnnɛ n ŋwɔ̀ ń da yə né. ²⁰Zhakɔɔbɛ myìnì Aramɛ lyì bal Labã, ń gǝ́ yǝ̀ ce n lwar bǝ̀ ń la dǔr mó yilə. ²¹N zɛ̃̀ n zǝ kɔn dέ tὲbέ gakó rə yà wɔ́ ń nyǎn mɔ́ n mə n dùr n byɛrhɛ Efəraatɛ bù-fwὲlὲ yá, n zɛ̃̀ n lyɛ̃ n zǎ Galaadɛ pyàr rέ səta.²²Sə è dwã nǝ̀tɔ̀ dɛ̃ rέ bǝ̀ cĩ́ Labã nɛ bǝ̀ nyǐ zhakɔɔbɛ dùr. ²³Labã já n zɛ̃̀ n zǝ ń da byǎ ń mǝ́ ń jì ń kwã, dwã nyàlpyὲ ǹdǝ́ ń nǝ́ ń zhǝ̀lǝ̀. N zǝ ń kùr nè Galaadɛ pyàr rέ wẽ́.²⁴Cəcɛ̃ èdù, Yi lyí Aramɛ lyì bal Labã rə wɔ̀ mɔ: Dɛ̃̌ ǹ cìnǝ̀, ǹ bǝ̀ká zɔ̀m cɛ̀nɛ̀ ráá lwɛlɛ ń pǝ Zhakɔɔ bɛ nɛ yé ²⁵Labã zɔ Zhakɔɔbɛ kùr nè ǹdǝ́ ń yà ń pú ń kòrhó Galaadɛ pyàr rέ wẽ́. Labã ǹdǝ́ ń da byǎ bέ myɛ pú bə kòrhó gàà mɔ́.²⁶Labã zɛ̃̀ n wɔ̀ Zhakɔɔbɛ nɛ: ²⁷Byè yil ǹ nə zhèè ń dùr, ń myìnì ni ǹ yǝ̀ ne byili? À y'à m'à cĩ́ mú sɔmá yó ń vò ǹdə wu-nyɔ̃̀ ǹdǝ́ núrh wúl ǹdǝ́ bwàárɛ dú! ²⁸Ǹ já ǹ yǝ̀ yẽ̌ a kwǝ̀ǝ̀lè à bəkwá bέ ǹdǝ́ à nὲmέ nέ myɛ cìcì yé! Ǹ twĩ ǹdə nyǝ̀nyà ta.²⁹À y'à wɔ̌ lwɛlɛ à la ába wɔ̀rhɔ́. Sə cəcɛ̃ y kὲbέ, á dabá Yi rí wǝ̀l nè: ³⁰Èlǎsɛ̃́ ǹ da kὲlέ y shil zhe mó, wɔ́ rǝ̀myɛ́ è ce ń zɛ̃̀ ń shǝ́r ǹ la jè, sə è nə wɔ́ byè yil ǹ ŋwɔ̀l à yə né?³¹Zhakɔɔbɛ lyár Labã n wɔ̀: À y'à n'â bùl bǝ̀ dɛ̀ga ǹ b'ǎ zwẽ ǹ bǝ̀kwá bɛ́, wɔ́ rǝ̀myɛ́ ywẽ rǝ̀ zɔ nɛ. ³²Sǝ zɛ̃̀ ń pyǎ nǝ́ da-byǎ yírh wǝ, lò mɔ̀bɔ́ ǹ nyǐ nyǐ ń nǝ kɔn dɛ̀bɛ́ rǝ̀ wɔ́ ǹmyɛ́ nyǎn à sono, sǝ́ zwẽ re. Sə lò mó mɔ̀bɔ́ ń nɔ ǹ yə né ń sõ mó rǝ̀ na-cí mà n cì.Zhakɔɔbέ yà ń búl bǝ̀ wɔ́ Arashəə ŋwɔ̀l yə né yé.³³Labã lyɛ̃ n zù Zhakɔɔbɛ kòrhó w wẽ́ n pyà, rǝ̀myέ kwã nɛ n lyɛ̃ n zù Lɛya nyɔ̃̌ w wẽ́, n zɛ̃̀ n lyɛ̃ n zù tùntùnnə bǝ̀lyè nyɔ̃̌ w wẽ, sə ń yǝ̀ kaka nɛ yé. Ń gǝ́ shǝ́r Lɛya kòrhó w wẽ́, n lyɛ̃ n zù Arashəə nyɔ̃̌ w wẽ.³⁴Arashəə yà ń kwè yə né n ce yómó w jòmò w kùr wə, n zɛ̃̀ ń jě ò yó. Labã já n gùlí kòrhó w gakó ń yə kaka nɛ yé. ³⁵Arashəə zὲ n wɔ̀ ń da nɛ: <<À yó-cəbal lyim bǝ̀k'á yì à gǝ́ yǝ́ ŋwὲnέ a zhì dɛ̃̌ ń yé né yil yé, bǝ̀ kɔn dὲbέ rə n'ê yí kana bέ mɔ́ yú ní.>>Labã gùlí gùlí kòrhó w sə ń yǝ̀ kaka nɛ yé.³⁶Zhakɔɔbɛ lyim já zɛ̃̀, n zɛ̃̀ ń nǝ́ ń bwí Labã. N bwǝ̀rh mo n wɔ̀: ³⁷Ǹ gǝ́ jìlí à wẽ̀ ré gakó mó, ǹ nə nɔ ǹ kὲlέ y wẽ̀ ré ku òdù ga myɛ cìcì? Sǝ́ ce w pwẽ ne à da-byǎ bέ ǹdǝ́ ǹ da-byǎ bέ yírh wə, sə bə zɛ̃̀ bə m'e kǝ́ àmyέ ǹdǝ́ ǹmyέ bùrsì.³⁸È zhe byinə shí-èlyè à gǝ́ ŋwέnέ ǹdǝ́ mɔ́ nέ, ǹ pyììsí ǹdǝ́ ǹ bɔ̀n rέ pǔrh gwẽ̌ yǝ̀ vùr yé, à yǝ̀ ǹ dɔ̀ w pyì-byesé dɔ̀m yé. ³⁹Vwǎm mɔ̀bɔ́ gɔ wẽ̀ gǝ y'a zǝ rǝ dɔ̃̀ rə zhəzhɛrɛ mɔ́, à nǝ y'à t'â zə mɔ à twí à pɛ mɔ́ nà? Àmyέ à y'à k'a cĩ́ mǝ̀ dõ mǝ̀ jàà w wa. Vwǎm mɔ̀bɔ́ bǝ̀ ŋwɔ̀l nǝ̀nyέnέ ráá cəcɛ̃ nɛ ǹ y'ǎ ce à càrh mɔ́ mɔ. ⁴⁰È gǝ wɔ́ nǝ̀nyɛ́nɛ́ nɛ,Cə-lumu n'ê gwi ni, è gǝ wɔ́ cǝcɛ̃ nɛ, wɔ́ wàr rǝ̀ n'ê zal nɛ, à t'â pwí à yírh yé!⁴¹È zhe byinə shí-èlyè à gǝ́ ŋwέnέ ǹ sõ kὲlέ w nέ. À twĩ̀ byinə shí ǹdǝ́ nǝ̀na a pɔ̃́ ǹ bǝ̀kwá bέ bǝ̀lyè y yilə, a zɛ̃̀ a twĩ̀ byinə nyǝ̀ldù ǹ dɔ̀ w yilə! Ǹ lyǝ́r á kwǎndέ tὲbέ ǹ yà ǹ nǝ́ ǹ pɛ mɔ́ twər shíyə! ⁴²À nàmbal mɔ́ Yi rí, Abəraam Yi rí, ǹdǝ́ mɔ̀bɔ́ ń nǝ́ ń ce ywẽ nánfɔ̀lɔ̀ Yəzakɛ wẽ́ mó gə yà ń yə yàl ǹdə nɛ, ǹ yà ǹ m'ǎ yẽ ne a zhǐr ǹdə jə-fwər! Sə Yi nyǐ à zúzúnú w ǹdə à jὲsέ lyààrέ, rə zὲ rə ká bùrsí cəcɛ y kὲbέ.>>⁴³Labã lyár Zhakɔɔbɛ n wɔ̀ mɔ: Kana byǎ byɛ̀bɛ́ wɔ́ àmyɛ́ bǝkwá, bǝ̀ bǝ̀sɔ́ná bɛ́ wɔ́ àmyɛ́ nyǝ̀ná, vwàmá nɛ́ nyɛ̀bɛ́ wɔ́ amyɛ́ vwàmá, sǝ tɛ̀bɛ́ gakó ǹ nǝ́ mɔ́ gakó wɔ́ àmyɛ́ wẽ̀. Sǝ zà, wɔ́ bǝ̀kɔ́n à wɔ̌ à m'a wɛ̀rhɛ́ a pǝ bǝ̀sɔ́ná bɛ́ byɛ̀bɛ́ à bǝkwá bɛ́ lùl bǝ cĩ̃ cɛ yó mó ne? ⁴⁴⁴⁵Zhakɔɔbɛ kwè nǝ́kulu n cìì tɛ̃́, ò zhǐ dɛ̃̌. ⁴⁶Zhakɔɔbɛ zɛ̃̀ n wɔ̀ ń da-byǎ bέ nɛ: Bə pwà nǝ́kulə bə cĩ púl. Bǝ̀ ga zɛ̃̀ bə jòm púl ré rǝ̀myέ yó bə jí. ⁴⁷Labã ce jàà èmyέ mɔ́ yil bǝ̀ Yəgaarɛ Shaadəta, Zhakɔɔbɛ zɛ̃̀ n ce è yil bə Galɛɛdɛ.⁴⁸Labã zɛ̃̀ n wɔ̀: rǝ̀myɛ́ è ce bǝ ce rǝ̀ yil bǝ̀ Galɛɛdɛ, è n’ê yǎl e wɔ̀ zhǝ̀n-pɔ- púl ré, ⁴⁹bǝ ce e`yil ré dõ mó bǝ̀ Myǝsǝpa, è n'ê yǎl e wɔ̀ yùlù-jàà yá, ń yà ń wǝ̀l è shò kwã nɛ́ : ⁵⁰Ǹ gǝ́ nwɛ̀nɛ̀ à bǝ̀kwá bɛ́, ǹ kwè kana dwã ń mǝ́ súlí à bǝ̀kwá bɛ́ nɛ, má lò tɛ̀nɛ́ ǹdǝ́ nǝ́ba ń wɔ́ nǝ́ zhǝ̀n-cǝ́bal myɛ, Yi wɔ́ àmyɛ́ ǹdǝ́ ǹmyɛ́ ga zhǝ̀n-cǝ́bal.⁵¹Labã súlí n wɔ̀ Zhakɔɔbɛ nɛ: ⁵²Nǝ́kúl-púl ré tὲbέ èta mɔ́ wɔ́ zhǝ̀n-pɔ kɔna, nǝ́kulu w kɔ̀bɔ́ ò cìì tɛ̃́ myɛ wɔ́ zhǝ̀n-pɔ kɔna. Àmyέ n'â bwəl nyí b'à t'â la púl ré tὲbέ ǹdǝ́ nǝ́kulu w kɔ̀bɔ́ gar a bǝ̀ ǹ səta yé, ǹmyɛ m'ǎ bwəl nyí bǝ̀ ǹmyɛ tá ǹ la rə gar ń bǝ̀ à səta yé, è gə dǝ̀ rǝ̀myέ lwɛlɛ mà yí nəba. ⁵³Abəraam Yi rí ǹdǝ́ Nawɔɔrɛ Yi rí m'a yǝ̀ nǝ́ bù-kárna. È y'à wɔ́ bǝ̀ nàmbal mɔ́ Yi rí. Zhakɔɔbɛ zə Yi rí tὲbέ rǝ̀ y'à n'ê ce ywẽ nánfɔ̀lɔ̀ n'ê zal ń da Yəzakɛ mɔ́ ń mə ń bwəl nyí.⁵⁴Rəmyέ kwã nέ, Zhakɔɔbɛ zwǝ́l vwĩ̀ pyɔ̀ w yó n byẽ̀ ń da-byǎ bέ kùjú w jàà wa. Bə jú kùjú bə zhὲ bə dὲὲ pyɔ̀ w yó. ⁵⁵È cɛ-lár rέ, Labã dùlí n zɛ̃̀ nəkɔkɔlέ shãã shãã, n kwəəlè ń nὲmέ nέ ǹdǝ́ ń bəkwá bέ, n cĩ́ bwəl bǝ̀ yó, n zɛ̃̀ n kwɛ̃̀ n vò jè.

¹Zhakɔɔbɛ yà ń wɔ sɔ́má yó ń nǝ́ ń zhǝ̀lǝ̀, Yi màlέkabá zɛ̃̀ bə b'e jəl mo. ²Ń gǝ́ já n nə bɛ, ń wǝ̀lǝ̀: Jàà kɛ̀bɛ́ wɔ́ Yi jàà, n zɛ̃̀ n ce jàà èmyέ yil bǝ̀ Məənəyim.³Zhakɔɔbɛ twĩ̀ tùntùnnə bə tó yé bə vò ń zhὲmbal Ezayu, ń yà ń wɔ Səyiiri tənà y wa, Edɔm nyí rí w mú sõ. ⁴Ń yà ń pɔ bɛ nyí n wɔ̀: Á m'ǎ wɔ̀ á yó cǝ́bal Ezayu ni: ⁵À nɔ nɛ̃ ǹdǝ́ bǝ̀nərh ǹdǝ́ vɔ̃̌-ywàálɛ ǹdǝ́ tùntùnnə, bala ǹdǝ́ kana ga. À twĩ̀ tùtùnnə bǝ̀ bǝ̀ zhəl bə byili à yó-cǝ́bal Ezayu ni mùnì ga n nyǐ ni ǹdǝ́ sónó.⁶Tùntùnnə bé kwɛ̃̀ bə b'e wɔ̀ Zhakɔɔbɛ nɛ: Nǝ́ zhǝ̀l nǝ́ nə ǹ zhὲmbal Ezəyu. Sə ńmyɛ nǝ́ ń zhǝ̀l ń bàn mɔ́ jəl ǹdǝ́ nunə zwã̌-àna. ⁷Ywẽ nánfɔ̀lɔ̀ zɔ Zhakɔɔbɛ, ń wu zɛ̃̀ ò n'ô zɛ̃̀. N zɛ̃̀ n bɔ̀n lyì bí byὲbέ bǝ̀ yà ŋwέnέ ǹdǝ́ mɔ mɔ́, ǹdǝ́ vǝ̃̌-ywàálέ ǹdǝ́ vwàmá nánfààlέ, e súlí yómdé kùkùlǝ̀ nǝ̀lyè, ⁸bǝ̀ ń yà ń nǝ́ ń wǝ̀lǝ̀: Ǹdǝ́ Ezǝyu gǝ tú ń ŋwɛ̀nɛ́ shǝ̀dáásɛ́ kùr rǝ̀dù yǝ́, sǝ kùr ré tɛ̀bɛ́ rǝ̀ dàl mɔ́ m'a ŋwɛ̀nɛ́ rǝ dùr rǝ zwẽ rǝ̀ cìnnǝ̀.⁹Zhakɔɔbɛ zɛ̃̀ n wɔ̀: À da Aberaam Yi ǹdǝ́ à da Yəzakɛ Yi, ǹmyέ Bəzhɔzhe ǹ wǝ̀l nè: ¹⁰nyǐ à j'â wɔ́ námpɔ́lέ dɛ̃́dɛ̃́ ǹdǝ́ náncɔ̀nɔ̀ w kɔ̀bɔ́ gakó ǹdǝ́ wu-bɔ̀nɔ̀ w kɔ̀bɔ́ gakó ǹ wὲrhέ ǹ tùntùnnə mó ne mó! È wɔ́ à dǝ̀dɔ̀lɔ̀ w dúdú à y'à m'a byɛrhɛ Zhɔrdɛ̃ bwǐ yǝ́, èlǎsɛ̃́, à jǐrh nunə kùkùlǝ̀ nǝ̀lyè.¹¹À n'â lwǝ̀l mó, zwẽ ne à zhὲmbal Ezəyu jɔ̃̀ wa, bǝ̀ ń ywẽ zhe ne, ywẽ zhe ne dὲga ń mà n bǝ̀ n gu, àmyέ ǹdǝ́ à kana e súlí bəsɔná bέ ga. ¹²Ǹmyέ ǹ wǝ̀l nè: À n'â yǎl a wὲrhέ mɔ́ cὲnὲ. À m'a ce ǹ dwí rí pù rə yǝ̀ ǹdə nǝ̀-fɔ̀lɔ̀ nyí nyɔ̀rhɔ́ w byǎ bέ bə wàr bǝ̀ la gál mɔ́ ta, bǝ̀ gǝ́ já námbɔrhɔ mɔ́ yilə.¹³Zhakɔɔbɛ mɛ̃ jàà èmyέ w n zɔ̃̀. N zɛ̃̀ n tɛnɛ pɛnέ, kɔn rέ tὲbέ ń yà ń nɔ mɔ́ wẽ́ ń la ń zhὲmbal Ezəyu ni pɔ: ¹⁴Bɔ̀n zwã̌-àlyè ǹdǝ̀ bǝ̀-cǐlsi shí-èlyè ǹdǝ́ pyì-nyὲrh zwã̌-èlyè ǹdǝ́ pyì-byərh shí-èlyè ¹⁵ǹdǝ́ yómde shǝ́-ètɔ̀ rǝ̀ gwẽ̌ n'ê ŋwὲ ǹdǝ́ rǝ̀ byǎ, ǹdǝ́ nǝ̀-nyὲmὲ shǝ́-èna ǹdǝ́ nǝ̀-byərh shíyǝ́ ǹdǝ́ bǝ̀nə-nyὲrh shí-èlyè. ¹⁶Ń bɔ̀n rɛ dwã w rə nyí rə nyí n pə ń tùntùnnə bé né, n zɛ̃̀ wɔ̀ bέ: lyɛ̃-na á yǝ̀ à yé né sə á yẽ̌ bwəl ne vwàmá nέ kùr rǝ̀dù gakó cəcəl wə.>>¹⁷Ń zɛ̃̀ n pə nyí tùntùnnə nã́yǝ́ǝ́ mó ne n wɔ̀: À zhὲmbal Ezəyu gə tú n jəl mó n zɛ̃̀ n bwǝ̀rh mó n wɔ̀: < Ǹ yó-cǝ́bal mó wɔ́ mɔ̌? yẽ̀ ń la nέ? Mɔ̌ vwàmá nǝ̀ wɔ ǹ yé né ? ¹⁸Sǝ́ lyár mɔ ń wɔ̀: à wɔ́ ǹ tùntùnnǝ Zhakɔbɛ lò, nyǐ wɔ́ kɔn ń pɔ nɛ b'à zhǝl a pǝ à yó-cǝ́bal Ezhǝyu ni, nyǐ ń cìcì wɔ kwã ń bànà¹⁹N pə nyí rí rǝ̀myέ rǝ̀dù y ń tùntùnnə bǝ̀lyè nyǎn mɔ́ ǹdǝ́ bǝ̀tɔ̀ nyǎn mɔ́ myɛ nɛ e súlí lyì bí byὲbέ gakó bǝ̀ y'à pú vwàmá nέ kùr mú myɛ nɛ ²⁰sə bǝ súlí bǝ wɔ̀ mɔ: Nyǐ tùntùnnə zhakɔɔbɛ myɛ wɔ nə kwã nέ ń bànà. zhakɔɔbɛ yà ń nǝ́ ń wǝ̀l ń cìn nì: à m'a jὲnὲ a swẽ́ ǹ wu ni ǹdǝ́ pɛnέ y kὲbέ à ce e tó à yé mó. rǝ̀myέ kwã nέ,à cìcì m'a zɛ̃̀ a yí ń yé né, dὲga ń mà ń zwẽ ne nàácὲnέ. ²¹N ce pɛnέ y lyɛ̃ e tó yé, sə ń cìcì mú mɛ̃ zulə y jàà y w cəcɛ̃ èmyέ mɔ.²²Cəcɛ̃ y èmyέ mɔ́, Zhakɔɔbɛ zɛ̃̀ n zə ń kana bέ bǝ̀lyè y ǹdǝ́ ń tùntùnnə bé bǝ̀lyè y ǹdǝ́ ń byǎ bέ shí ǹdǝ́ mǝ̀dù y n tó Zhabɔkɛ byǝrhá y n byɛrhɛ. ²³N ce bə byɛrhɛ bwǐ yə, n ce ń kɔn dɛ̀bɛ́ ń zhe mó gakó súlí rǝ byɛrhɛ.²⁴Zhakɔɔbɛ zɛ̃̀ n mɛ̃ gàà mɔ́ ń dúdú. Sə lò mǝ̀dù tú n zə zãâ ǹdǝ́ mɔ kɔn b'e yí cǝ-lár . ²⁵Lò mó gǝ́ tú n púrí ń dom dom zhakɔɔbɛ ń gǝ yó né, n zɛ̃̀ mà zhakɔɔbɛ cí rí ni rə swàr ǹdǝ́ bǝ̀ gǝ́ y'à n'â zal dwâ y yi ni mú . ²⁶N zɛ̃̀ n wɔ̀ zhakɔɔbɛ nɛ: Yẽ̌ ne a lyɛ̃ nyǐ cɛ y n'ê wárhá. Zhakɔɔbɛ lyár mɔ n wɔ̀ :<<Ǹ gə yǝ̀ bwəl à yó cĩ́ à t'â la mɔ́ yõ̌ ń lyɛ̃ yé . >>²⁷Lò mó zɛ̃̀ n bwǝ̀rh zhakɔɔbɛ n wɔ̀: Ǹ yíl byè? Zhakɔɔbɛ lyár mɔ n wɔ : À yíl zhakɔɔbɛ: ²⁸Lò mó kǝ́ n wɔ̀ mɔ: bǝ̀ k'ê t'â la mɔ́ byõ̌ bǝ̀ Zhakɔɔbɛ yé, bǝ̀ m'a byẽ̀ mó bǝ̀ Esǝrayɛl; bǝ̀ ǹ zɔ zãã ǹdǝ́ Yi, ń zǝ y ǹdǝ́ numbyínsí, sǝ ǹ jú bɛlɛ.²⁹Zhakɔɔbɛ zɛ̃̀ n wɔ̀ mɔ: à n'â lwǝ̀l mó sǝ́ n byili ni ǹ yil ré.>> Lò mó zɛ̃̀ bwǝ̀rh mo n wɔ̀: È nə wɔ́ byè yil ǹ nə ǹ bwǝ̀rh ne à yil ré. Ń já n cĩ́ bwəl zhakɔɔbɛ yó tɛ̃́ gàà mɔ́. ³⁰Zhakɔɔbɛ zɛ̃̀ n wɔ̀: À nɔ Yi à yírh wə, e jà à yírhǝ́ gwẽ̌ ŋwέnέ. Wɔ́ rǝ̀myέ è ce ń já ń ce jàà y èmyὲ yil bə pənəwɛl, è n'ê yǎl e wɔ bə Yi yé zwǎ >>³¹Zhakɔɔbɛ byɛrhɛ pənəwɛl byarhá y ǹdǝ́ yi rí yà n'ê púrhǝ́. Ń yà ń nǝ́ ń twi cí. ³²Wɔ́ rǝ̀myέ è ce kɔn b'e yí zà, Ezərayɛl lyì byǎ bέ t'ǎ dɔm cí rí nyɔnɔ w yé. Zhakɔɔbɛ cí rí nyɔnɔ w ò y'à cὲmὲ mɔ yilə.

¹Zhakɔɔbɛ yà ń kwẽ̌ ń yé dɛ̃̌ ń la nyǔ n púrí Ezəyu ń bànà, ǹdǝ́ nunə zwã-àna ń kwã. N bɔ̀n ń byǎ bέ jàlà n pə Lɛya nɛ, n pə bə jàlà Arashəə ne, n zɛ̃̀ n pə bǝ̀ jàlà ń tùntùnnə bé bəlyè y bǝ̀ y'à wɔ́ kana mɔ́ nɛ. ²N zɛ̃̀ n ce ń tùntùnnə bé bǝ̀ y'à wɔ́ kana mɔ́ ǹdǝ́ bǝ̀ byǎ bέ gakó yǝ̀ yé né, Lɛya ǹdǝ́ ń byǎ bέ zɛ̃̀ bə pú, bǝ̀myέ kwã nέ Arashəə ǹdǝ́ Zhozefu zɛ̃̀ bə pú. ³Ńmyɛ̌ cìcì mú zɛ̃̀ n lyɛ̃ n yǝ̀ bǝ̀ yé né, n tu n zə ń yé n pú tɛ̃́ twər tàlpyὲ éfòró n mə n yí ń zhὲmbal mɔ́ nyí ni.⁴Ezayu dùr n bǝ̀ n jəl mo, n zə mɔ n dɛ̃ ń cìn ni, n kwǝ̀ǝ̀lè mo .Bǝ̀ ga bǝ̀lyè y zɛ̃̀ bǝ̀ n'ê kúrhǝ́ . ⁵rǝ̀myέ kwã, Ezayu kwẽ̌ ń yé dɛ̃̌ n nə kana bέ ǹdǝ́ bǝ̀sɔná bέ, n zɛ̃̀ n bwǝ̀rh Zhakɔɔbɛ n wɔ̀: Byɛ̌ lyì bə ŋwέnέ ǹdǝ́ mɔ́ nyɔɔ̀nɔ̀ mɔ́?>> Zhakɔɔbɛ lyár mɔ n wɔ̀: Wɔ́ byǎ bɛ́ byɛ̀bɛ́ Yi pɔ ǹ tùntùnnǝ mú ni mú.⁶Tùntùnnə bé byὲbέ bǝ̀ y'à wɔ́ kana mɔ́ myɛ twẽ̌ bə yí, bǝ̀myέ ǹdǝ́ bǝ̀ byǎ, bə tu bə zə bǝ̀ yǝ́rh bə pú tɛ̃́. ⁷Bǝ̀myέ kwã nέ, Lɛya myɛ twẽ̌ n yí ǹdǝ́ ń byǎ bέ, bǝ̀myɛ tu bə zə bǝ̀ yǝ́rh bə pú tɛ̃́. Bǝ̀myέ kwã nέ, Zhozefu twẽ̌ n yí ǹdǝ́ Arashəə, bǝ̀myɛ tu bə zə bə yǝ́rh bə pú tɛ̃́. ⁸Ezəyu bwǝ̀rh n wɔ̀: È nǝ wɔ́ yẽ̀ n zǝ byɛ̀bɛ́ à jǝl èta mɔ́ ǹ la nɛ́? Zhakɔɔbɛ wɔ̀: wɔ́ à yó-cǝ́bal mú sono ǹdǝ́ ń gǝ nyǐ ni ǹdǝ́ sónó.⁹Ezǝyu wɔ̀: À nyɛ̃́, nyǐ à zhe kɔn rǝ̀ yú ni rə lyɛ̃ cɛ nɛ, yẽ̌ ǹ kɔn rέ nɛ ǹ sono! Zhakɔɔbɛ lyár n wɔ̀: ¹⁰Nyǐ wɔ́ lwǝ́l à n’â lwǝ̀l mó, ǹdǝ́ ǹ gǝ nǝ́ ǹ nyǐ ni ǹdǝ́ sónó ǹ yé né, sǝ́ shɛ̀nɛ́ ń zwẽ à pɛnɛ́ y à tú à la mɔ́ pɔ mɔ́ à jɔ̃̀ wa; wɔ́ rǝ̀myɛ́ yil à tú a nyǐ mú ǹdǝ wɔ́ Yi à n’â nyǐ ta, sǝ ǹ shɛ̀nɛ́ ń zwẽ ne ǹdǝ́ sónó. ¹¹Nyǐ Yi pɔ nɛ kɔn tὲbέ gakó à zhe rə tum mú. Kaka t'â mwìrì ni yé. Zhakɔɔbɔ nyέέ nyɛ́ɛ́ Ezəyu, fòró n zɛ̃̀ n shὲnέ n zwẽ paánsɛ́.¹²Ezayu zɛ̃̀ n wɔ̀ : Bà-nà nǝ́ zhǐr nyɔ̀nɔ̀. À m'a yǝ̀ ǹ yé né. ¹³Zhakɔɔbɛ wɔ̀ mɔ :À yó-cǝ́bal mɔ́ yě bǝ̀ bǝ̀sɔ́ná bέ n'ê yǎl shulu .e sulí myɛ à mǝ̌ s'a nyǐ pyì-nyὲrh ǹdǝ́ nǝ̀-nyὲbὲ nǝ̀ n'ê ŋwɔ̀ mɔ́ yò. Nǝ́ gə nyέέ nɛ nǝ̀ zhǝ̀lǝ̀, má dɛ̃ rǝ̀dù myɛ, vǝ̃̌-ywàálέ m'a cì. ¹⁴À yó-cǝ́bal mɔ́ lyɛ̃ ń yǝ̀ ń tùntùnnə mo yé né. Ámyέ m'à n'â zhǝ̀l námpɔ́lέ námpɔ́lέ , à m'à tó vwàmá nέ nyὲbέ nǝ̀ wɔ à yé né mo e súlí bǝ̀sɔ́ná bέ zhǝ̀zhǝ̀ǝ̀lé ne, kɔn b'e yí a yí à yó-cíbal mɔ́ sõ Seyiiri ní .>>¹⁵Ezəyu wɔ̀ mɔ: À só s'a yẽ̌ lyì bí byὲbέ bǝ̀ ŋwέnέ ǹdǝ́ nɛ mɔ́ jàlà nɛ ǹdǝ́ mɔ́.Zhakɔɔbɛ zɛ̃̀ n wɔ̀ mɔ: ¹⁶Dɛ̃ rέ rǝ̀myέ mɔ́ yù w cìcì, Ezəyu já n ká n pyìrhí n kwè Səyiiri sɔmá, ¹⁷sə Zhakɔɔbɛ lyɛ̃ n vò Səkɔɔtɛ, n yí n lù jì ń cìcì yilə, n zɛ̃̀ n pú kwəərhe ń vwàmá nέ yilə. Wɔ́ rǝ̀myέ rǝ̀ ce bə byẽ̀ jàà y èmyέ mɔ́ bǝ̀ Səkɔɔtɛ, è n'ê yǎl e wɔ̀ kwəərhe.¹⁸Zhakɔɔbɛ shí Məzopotəmyi dɛ̃̌-sõ n kwɛ̃̀ n bǝ̀ n yí Shəshɛm, Kanaã tənà y w ǹdǝ́ yǝ̀-zùlə. Sə ń zul cɔ w yé y wə. ¹⁹Ń yè cɛ y ń yà ń pú ń kòrhó w è wẽ mó sǝ̀byì-kùlsì zɔ̌m, Səshɛm da Amɔɔrɛ byǎ bέ sõ. ²⁰N zɛ̃̀ n lù vwĩ̀-jùlú tɛ̃̀ gàà mɔ́, n ce ò yil bǝ̀ El-Elohé-Esǝyɛl.

¹Dɛ̃ rǝ̀dù, Zhakɔɔbɛ ǹdǝ́ Lǝya bǝ̀kɔ́ Dinǝ zɛ̃̀ n vò ń la tǝnà y kana-byǎ bɛ́ nǝ gwãɔ̃. ²Rǝ̀myɛ́ yó né, Amɔɔrɛ byǐ Sǝshɛm nɔ mɔ. Wɔ́ Sǝshɛm ń yà ń wɔ́ tǝnà y pyɔ̌. N zǝ kɛ̃-byǐ y jàn n mǝ n zù n ce y cìzhìlǝ̀ ³Zhakɔɔbɛ bǝ̀kɔ́ Dinə mú sónó y'à zù ń wẽ́ dɛ̃́dɛ̃́. N swéné kɛ̃-byǐ ǹdǝ́ ń wu gakó. N zɔ̀m ǹdǝ́ ya, ń zɔ̀mà nɛ́ zù è wẽ.⁴Shəshɛm wɔ̀ ń da Amɔɔrɛ nɛ: Pɛ̃ bǝ̀kɔ́ mɔ́ mɔ̀bɔ́ à la jú ⁵Zhakɔɔbɛ yà ń lwar bə Shəshɛm yà ń co cìzhìl ń bǝ̀kɔ́ Dinə ne. Sə ń byǎ bέ gǝ́ y'à wɔ gɔ sõ ǹdǝ́ vwàmá nέ mɔ ce, n já n shĩ ń nyí kɔn m'e yí bə k'a kwɛ̃̀ bə bà.⁶Shəshɛm da Amɔɔrɛ zɛ̃̀ n vò Zhakɔɔbɛ sõ ń la zhərh ǹdǝ́ mɔ. ⁷Zhakɔɔbɛ byǎ bέ gə shí gɔ sõ bə kwɛ̃̀ bə bà, bə lwar kɔn rέ tὲbέ rə wὲrhέ mɔ́. Rə y'à wɔ́ fuulu bǝ̀ yilə, bǝ̀ lyimə j'a zɛ̃̀ nə n'ê yì dɛ̃́dɛ̃́, bǝ̀ Shəshɛm twĩ̀ cìzhìl nánfɔ̀lɔ̀ tum Esərayɛl nέ, ń gǝ́ nyέέ Zhakɔɔbɛ bǝ̀kɔ́ mɔ́ mɔ́ yilə. Lò bə mǝ̌ sə n twĩ̀ tum rí rǝ̀myέ mɔ́ dwí rí yé.⁸Amɔɔrɛ zɔ̀m ǹdǝ́ bɛ n wɔ̀: Nyǐ bǝ̀kɔ́ mɔ́ sónó w zù à byǐ Sǝshɛm, rǝ̀myɛ́ ce, à n’â lwǝ̀l ába s’á yẽ̌ mo á pɔ̃ ń la jú ⁹Jí-nə nǝ́ jí cɔ̀nɔ̀ ǹdǝ́ dwã: Á m'ǎ pə nǝ́ba á bǝ̀kwá bέ nǝ́ jí, sə nǝ́myɛ pǝ ába nǝ́ nyəná bέ á jí. ¹⁰Á m'ǎ jòm ǹdǝ́ nǝ́ba, nǝ́ tənà y m'a yǝ̀ nɛ́ á yilə: Jǒm-nə è wẽ, jíl-nə è wẽ, sə á zə á sǝ̀pwà cɛrh á cìní.¹¹Shəshɛm cìcì wɔ̀ kɛ̃-byǐ y da mɔ́ ǹd'ê nəbwá bέ nɛ: Á gǝ n'á nyǐ ni ǹdǝ́ sónó, à m'a pǝ ába kɔn dɛ̀bɛ́ á gǝ́ byili b'a pǝ mɔ́. ¹²Ce-nǝ kɛ̃-jú zhùùrí ǹdǝ́ paánsɛ́ yǝ̀ dɛ̃́dɛ̃́, á Byili ni, s'á yẽ̌ b'à m'a pə ába kɔn rέ tὲbέ cìcì á la nɛ byilu mú, ámyɛ wúrí á pɛ̃ kɛ̃-byǐ y à la jú. ¹³Zhakɔɔbɛ byǎ bέ lyár Shəshɛm ǹdǝ́ ń da Amɔɔrɛ ǹdǝ́ myìnù zɔ̀mà, Shəshɛm gə yà ń co cìzhìl bǝ̀ nǝkɔ́ Dinə ne mmú yilə.¹⁴Bə wɔ̀ bɛ: Nyǐ è wɔ́ kɔn dɛ̀bɛ́ nǝ́ t'á la shɔ̀nɔ́ yé, nǝ́ wàr nǝ́ pɛ nǝ́ nǝkɔ́ bal mɔ̀bɔ́ ń yǝ̀ gòm ne yé; rǝ̀ wɔ́ cìzhìl nǝ́ yilǝ. ¹⁵Nǝ́ m'ǎ shɛ̀nɛ́ ǹdǝ́ á gǝ shɛ̀nɛ́ bǝ gõ̀ bal bal gakó á wẽ́. ¹⁶Rǝ̀myɛ́ yó né, nǝ́ m'ǎ pǝ ába nǝ́ bǝ̀kwá bɛ́ á jí, nǝ́myɛ zɛ̃̀ nǝ́ zwẽ á nyǝ̀ná bɛ́ nǝ́ jí. nǝ́ jòm á sono, nǝ́ jǐrh dwí rǝ̀dù ¹⁷Sǝ á gǝ t'á yǎl á cili nǝ́ zɔmà nɛ́, á yǝ̀ shɛ́nɛ́ bǝ gõ̀ ába, nǝ́ m'a zwẽ nǝ́ bǝ̀kɔ́ mɔ́, nǝ́ zɛ̃̀ lyɛ̃ nǝ́ la.¹⁸Amɔɔrɛ ǹdǝ́ ń byǐ Shəshɛm swéné bǝ̀ zɔ̀mà nέ nǝ̀myέ mɔ́. ¹⁹Ébɔ́-dǎl mɔ́ yǝ̀ jíjírhí n mə n wὲrhέ kɔn tὲbέ bǝ̀ y'à byili mu mú yé, bǝ̀ ń yà ń só Zhakɔɔbɛ bǝ̀kɔ́ mɔ́ dɛ̃́dɛ̃́. E jà wɔ́ ńmyɛ̌ bǝ̀ y'à n'ê nyàm ń da sõ kὲlέ w du lyì bí dwã bέ gakó.²⁰Amɔɔrɛ ǹdǝ́ ń byǐ Shəshɛm zɛ̃̀ bə vò cɔ w bwǝ̀rǝ̀ y nyí rí ni bə wɔ̀ cɔ w lyì bí ni: ²¹Lyì bí byɛ̀bɛ́ wɔ́ yǝ̀-zùlǝ́ lyì nǝ́ yilǝ; bǝ̀ m'a mɛ̃ tǝnà y wa, bǝ dɔ̌l bǝ̀ wẽ̀ ré è wẽ́, tǝnà y wà bǝ̀ yilǝ. Bǝ̀ m'a jí nǝ́ bǝ̀kwá bɛ́, bǝ̀myɛ m'a pǝ nǝ́myɛ nɛ bǝ̀ bǝ̀kwá bɛ́ nǝ́ jí.²²Sə nǝ́ bala bέ gə yǝ̀ gòm ǹdə bǝ̀ nyǝ̀ná bέ ta, bǝ̀ t'â la shɔ̀nɔ́ bə jòm ǹdǝ́ nǝ́ba nǝ́ m'é jǐrh dwí rǝ̀dù yé. ²³Nǝ́ gə shὲnέ bǝ̀ la jǒm ǹdǝ́ nǝ́ba bǝ̀ dɔ̀ w ǹdǝ́ kɔn rέ tὲbέ bə cǐ mú e súlí bǝ̀ vwàmá nέ dwã bέ gakó t'â la nǝ́myɛ̌ nyǎn jǐrh nà ?²⁴Lyì bí byὲbέ bǝ̀ y'à du bǝ bǝ̀ cɔ w bwǝ̀rǝ̀ y nyí ni mú, zwẽ kɔn rέ tὲbέ Amɔɔrɛ ǹdə ń byǐ Shəshɛm byili mú. Cɔ w bala bέ gakó shὲnέ bə gõ̀ be. ²⁵Sə è dwã nǝ̀tɔ̀ y yù wǝ̀, rǝ̀myέ ǹdǝ́ bala bέ gǝ́ gòm mǝ̀gã̌ nyí rí y'à gwẽ̌ n'ê yì, Zhakɔɔbɛ byǎ bέ bǝ̀lyè yə, Shəmənyɔ̃ ǹdǝ́ Ləvyi, Dinə nəbwá bέ j'a zù cɔ w wa, ǹdǝ́ lòlò myɛ yǝ̀ rǝ bùl yé, bə j'a gu bala bέ gakó ǹdǝ́ búlǝ́ shù. ²⁶Bə gu Amɔɔrɛ ǹdǝ́ ń byǐ Shəshɛm ǹdǝ́ búlǝ́ shù bə vùr Dinə Shəshɛm sõ jù w bə m'e kwɛ̃̀.²⁷Zhakɔɔbɛ byǎ bέ báásɛ byὲbέ bǝ̀ y'à cὲmὲ mɔ, bə súlí bə bubu cɔ wá, bǝ̀ gǝ́ y'à co cìzhìl bǝ̀ nəkɔ́ mɔ́ nɛ mɔ́ yilə. ²⁸Bə zə bǝ̀ vǝ̃̌-ywàálέ ǹdǝ̀ bǝ̀ vwàmá nánfwààlέ ǹdǝ́ bǝ̀ bǝ̀nesé ǹdǝ́ kɔn tὲbέ gakó rǝ̀ y'à wɔ cɔ w w ǹdǝ́ gɔ sõ mó. ²⁹Bə pwà bǝ̀ nǝ̀cὲndέ gakó ǹdǝ́ bǝ̀ bǝ̀sɔ́ná bέ gakó ǹdǝ́ bǝ̀ kana bέ, bə súlí bə bubu kɔn tὲbέ gakó rǝ̀ y'à wɔ jìsí wẽ́ mó bə m'e lyɛ̃.³⁰Rǝ̀myέ yó Zhakɔɔbɛ wǝ̀l Shəmənyɔ̃ ǹdǝ́ Levyi ni: <<Á vwɛ̃ lwɛlɛ á pə nɛ, á gǝ́ ce tənà y lyì bí, Kanaã lyì bí ǹdǝ́ Pərəzhitəbá m'a zɛ̃̀ bǝ̀ n'ê bwí ǹdǝ́ nɛ mɔ́ yilə. Nǝ́ wɔ́ lyì màngɛlέ sásálaa, bə m'a ce nyí dwã w bə bú ǹdǝ́ nɛ, bə ŋwὲnέ nɛ. Àmyέ ǹd'â kὲlέ y lyì bí m'ǎ jé tɛ̃́. ³¹Bǝ lyár mɔ bə wɔ̀: Bǝ̀ nǝ m'a wɛ̀rhɛ́ nǝ́ nǝkɔ́ ǹdǝ kǝ-nǝ̀fòló ta?

¹Dɛ̃ rǝ̀dù Yi wǝ̀l Zhakɔɔbɛ nɛ: Zɛ̃̀ ń vò Bətɛl ń vò ń jòm gàà. Lú vwĩ-jùlú gàà mɔ́ ń pə Yi rí tὲbέ rə lyí mú, ǹ gǝ́ yà ǹ nə ǹ dùr ǹ zhὲmbal Ezəyu yé né yi ní mú ni. ²Zhakɔɔbɛ zɛ̃̀ n wɔ̀ ń kὲlέ y lyì bí ǹdǝ́ lyì bí byὲbέ bǝ̀ y'à wɔ ń kwã mɔ nɛ: ³Zɛ̃̀-na tɛ̃́, nǝ́ vò Bətɛl. À m'a yí a lù vwĩ-jùlú gàà, Yi rí tὲbέ rə zwẽ à lwǝ̌l mó à zúzúnú w dɛ̃ rέ yù w mú yilə. Rǝ̀ yàl nέ ǹdǝ́ nɛ sɔ́má y à y'à shər mó yi ní.⁴Bə pwà yə né dwã bέ nyὲbέ nə y'à wɔ bə sõ mó e súlí cìbyǔr rí tὲbέ rə y'à wɔ bǝ̀ zhã̌ nɛ mɔ́ bə pə Zhakɔɔbɛ nɛ. Zhakɔɔbɛ kù gɔ́rɔ́ tərəbέtɛ y Shəshɛm yala nɛ mɔ́ kùr wə, n ce re né. ⁵Bə zɛ̃̀ bə zhǐr. Yi ce ywẽ nánfɔ̀lɔ̀ zə cɛmɛ nέ nyὲbέ nǝ̀ y'à bwəl gàà mɔ lyì bí, rǝ̀myέ ce lòlò yǝ̀ dwi n jì Zhakɔɔbɛ byǎ bέ kwã yé.⁶Zhakɔɔbɛ zhǝ̀l n yí Luuzi ò wɔ Kanaã tənà y wa, è n'ê yǎl e wɔ̀ Bətɛl, ńmyɛ̌ ǹdǝ́ lyì bí byὲbέ gakó bǝ̀ y'à wɔ ń kwã mɔ́. ⁷N lù vwĩ-jùlú gàà mɔ, n ce ò yil bǝ̀ EL-Bǝtɛl, bə wɔ́ gàà Yi y'à byili mu rǝ̀ cìn ní ń gǝ́ yà ń nǝ́ ń dùr ń zhὲmbal mɔ́ yé né yi ní mú. ⁸Erəbəka kɔ̀nnà Dəbora cì bə ce mo Bətɛl yala nɛ, shέέnɛ y kὲbέ Zhakɔɔbɛ co è yil bǝ̀ shέέnɛ mɔ́ kùr wə.⁹Yi k'ê lyí Zhakɔɔbɛ kǝ́dò ń gǝ́ shí Məzopotəmyi dɛ̃̌-sõ n kwɛ̃̀ n bə yi ní, rə súlí rə cĩ́ bwəl ń yó. ¹⁰Yi wǝ̀l mo: Ǹ yíl Zhakɔɔbɛ. Bə k'ê t'â la mɔ́ byõ̌ bǝ̀ Zhakɔɔbɛ yé, bə m'a byẽ̀ mó bǝ̀ Esərayɛl.Yi j'a ce ń yil bǝ̀ Esərayɛl.¹¹Yi wɔ̀ mɔ: À wɔ́ Yi rí tὲbέ rǝ̀ jàn bǝ swɛ̃́ zhe mú. Lúl byǎ sə pù. Ǹ m'ǎ jǐrh dwí e súlí dwǝ́ nánzhəzhɔ̌ myɛ ga da, ǹ cìcì mú m'ǎ súlí ń lù pyǎ. ¹²Tənà y kὲbέ à pɔ Abəraam ǹdə Yəzakɛ nɛ mɔ́, à n'â pɛ mɔ́ ya. À m'a pə y ǹ byǎ nɛ ǹ cu kwã nέ. ¹³Yi j'a zhì jàà rǝ̀ zhì è wẽ́ rǝ m'e zɔ̀m ǹdǝ́ Zhakɔɔbɛ mɔ́, rə zɛ̃̀ rə yẽ̌ mo rə vò dɛ̃̌.¹⁴Zhakɔɔbɛ cìì nǝ́kulə tɛ̃́ jàà y èmyέ mɔ́ wẽ́, n zɛ̃̀ n ló dǝ̀vɛ̃́ ǹdǝ́ nwǝ̃̌ nǝ̀ yó. ¹⁵N ce jàà y kὲbέ Yi y'à zɔ̀m ǹdǝ́ mɔ è wẽ mó yil bə Bətɛl.¹⁶Bə zɛ̃̀ bə zhǐr Bətɛl nέ. Bǝ̀ y'à gwẽ̌ dàl námpɔ́lέ sə bə yí Efəraatɛ, Arashəə já n lù. Ń lul mú zɔ zwini. ¹⁷Lul ré gǝ́ y'à zum mú ce, elwərh-kɛ̃ mɔ́ wɔ̀ mɔ: ǹ bǝ̀ká dùr ywẽ yé bǝ̀ ǹ la byǐ dõ lúl ¹⁸Arashəə gə tú ń nə cì yi ní, bə ń jàn rέ y'à zhὲ rə zhὲ, ń co bǝ̀sɔ́bwὲlέ y yil bǝ̀ Bɛn-Oni, è n'ê yǎl e wɔ̀ cu wu-zhùlù Byǐ. Sə è da co è yil bə Bɛzhamɛ. ¹⁹Arashəə cù sə bǝ̀ co mo Efəraatɛ sɔ́má y yó, è n'ê yǎl e byili bǝ̀ wɔ̀ Bɛtələyɛm nέ. ²⁰Zhakɔɔbɛ cìì nǝ́kulu ń lú-bɔ̀l mɔ́ yó: Wɔ nǝ́kulu w òmyέ mɔ́ ò j'â gwẽ̌ ŋwέnέ Arashəə lú-b:ol mɔ́ yó zà zà mɔ́.²²Esərayɛl zhǐr n yẽ̌ jàà y èmyέ mɔ́ nɛ, n zɛ̃̀ n lyɛ̃ Myəgədaal-Edɛɛrɛ n vò n pú ń kòrhó wə. ²¹Ń gǝ́ yà ń jě gàà nyí nyí rí w yi ní, Orəbɛn zhǝ̀l n vò n zù ǹdǝ́ Byəla, ń da kɛ̃ mɔ́ dõ mó. Sə Esərayɛl lwar rɛ. Zhakɔɔbɛ byǎ bέ y'à wɔ́ nunə shí ǹdǝ́ bǝ̀lyè:²³Lɛya byǎ bέ: Orɔbɛn, Zhakɔɔbɛ byì-cɛ yá, ǹdǝ́ Shəmənyɔ̃ ǹdǝ́ Levyi ǹdǝ́ Zhəda, ǹdǝ́ Yəzəkaarɛ e súlí Zabyəlɔ̃. ²⁴Arashəə byǎ bέ: Zhozefu ǹdǝ́ Bɛzhamɛ. ²⁵Arashəə tùntùnnə Byəla byǎ bέ: Dan ǹdǝ́ Nəfətəlyi.²⁶Lɛya tùntùnnə zhələpa byǎ bέ: Gaadɛ ǹdǝ́ Asɛɛrɛ. Wɔ́ Zhakɔɔbɛ byǎ bέ ń lùl Məzopotəmyi dɛ̃̌-sõ mó. ²⁷Zhakɔɔbɛ zɛ̃̀ n vò ń da Yəzakɛ sõ, Mamərɛ nέ, Cərəyaatɛ-Arəba nyí rí wẽ́, è wɔ́ Ebərɔ̃ nɛ́, Abəraam ǹdǝ́ Yəzakɛ ga gǝ́ y'à jòm mǝ̀gã mɔ́.²⁸Yəzakɛ wὲrhέ byinə zɔ̌m ǹdǝ́ shǝ́-lyɛlɛ cɛ yó. ²⁹Ń cù ǹdǝ́ ń cɛ dɛ̃́dɛ̃́. Wɔ́ ń byǎ bɛ́, Ezəyu ǹdǝ́ Zhakɔɔbɛ bǝ̀ kwè mo bə ce.

¹Nyǐ Ezəyu mú bǝ̀ n'ê byẽ̀ bǝ̀ Edɔm mɔ́, dwí rí. ²Ezəyu jú kanaã lyì bǝ̀kwá: Ada, Elɔ ń wɔ́ Yititi mú bǝ̀kɔ́ mɔ́, ǹdǝ́ Oləbama, Ana bǝ̀kɔ́ mɔ́ ǹdǝ́ Shəbəwɔ ń wɔ́ Yivyiti nɔ̃̌ w mɔ́. ³Ń súlí n jí Yəsəmayəə bǝ̀kɔ́ Basəmaatɛ, Nəbayɔɔtɛ nǝkɔ́ mɔ́.⁴Ada ń lùl Eləfaasɛ, Basəmaatɛ zɛ̃̀ n lù Erəwəə. ⁵Oləbama zɛ̃̀ n lù Yəwuushi ǹdǝ́ Yalaam e súlí kɔɔra. Wɔ́ bǝ̀myɛ́ bǝ́ wɔ́ Ezəyu byǎ bέ ń lùl kanaã tənà y w mɔ́.⁶Ezəyu zə ń kana bέ ǹdǝ́ ń byǎ bέ ǹdǝ́ ń bǝ̀kwá bέ ǹdǝ́ ń kὲlέ y lyì bí gakó ǹdǝ́ ń vwàmá nέ gakó e súlí kɔn rέ tὲbέ gakó ń yà ń pyà n nɔ Kanaã tənà y w mɔ́, n mǝ n du n vò tənà kὲbέ è y'à nyɛ ǹdǝ́ ń nyɛ̃́ Zhakɔɔbɛ mɔ́ wa. ⁷Bǝ̀ nǝ̀cὲndέ y'à j'â já dɛ̃́dɛ̃́ rǝ̀myέ ce bǝ̀ y'à wàr bǝ̀ la jǒm ǹdǝ́ dwã yé. Bǝ̀ y'à wàr bǝ̀ m'a nə kɔn tὲbέ bǝ̀ y'à zhe rǝ̀ tum mú tənà y kὲbέ bǝ̀ y'à zhǝ̀l bǝ̀ jě è wẽ mó w myɛ yé, bǝ̀ vwàmá nέ yilə. ⁸Wɔ́ rǝ̀myέ rǝ̀ ce Ezəyu jòm Səyiiri pyɔ̀ w wa. Ezəyu wɔ́ Edɔm.⁹Nyǐ Ezəyu, ń wɔ́ Edɔm da mɔ́ dwí rí byǎ bέ bǝ̀ y'à jě Səyiiri pyɔ̀ w w mɔ́: ¹⁰Nyǐ Ezəyu byǎ bέ yilə né: Ń kɛ̃ Ada byǐ Eləfaazɛ ǹdǝ́ ń kɛ̃ Basəmaatɛ byǐ Erəwəə. ¹¹Eləfaazɛ byǎ bέ yàl Təmã ǹdǝ́ Omaarɛ ǹdǝ́ Səfo ǹdǝ́ Gatam e súlí kənaazɛ. ¹²Ezəyu byǐ Eləfaazɛ yà ń súlí ń zhe kɛ̃ dõ ń yà ń yíl Təməna. Ńmyɛ súlí n lù byǐ, Amalɛɛkɛ n pɔ̃. Wɔ́ bǝ̀myέ bǝ̀ yàl Ezəyu ǹdǝ́ ń kɛ̃ Ada nὲmέ nέ.¹³Erəwəə byǎ bέ yàl Naatɛ ǹdǝ́ Zəra ǹdǝ́ Shamma e súlí Myəza. Wɔ́ bǝ̀myέ bǝ̀ yàl Ezəyu ǹdǝ́ ń kɛ̃ Basəmaatɛ nὲmέ nέ. ¹⁴Nyǐ Ezəyu kɛ̃ Ana bǝ̀kɔ́ ǹdǝ́ Shəbəwɔ̃ nɔ Oləbama byǎ byǎ bέ ń lùl n pɔ̃ mɔ́: Yəwuushi ǹdǝ́ Yalaam e súlí Kɔɔra.¹⁵Nyǐ Ezəyu byǎ bέ yó-cìnǝ́ bé: Ezəyu byì-cɛ Eləfaazɛ byǎ bέ: Təma ǹdǝ́ Omaarɛ ǹdǝ́ Səfo ǹdə Kənaazɛ ¹⁶ǹdǝ́ Kɔɔra ǹdǝ́ Gatam e súlí Amalɛɛkɛ. Wɔ Eləfaazɛ yó-cìnə bé Edɔm tənà y wa. Wɔ Ezəyu ǹdǝ́ ń kɛ̃ Ada nὲmέ nέ.¹⁷Nyǐ Ezəyu byǐ Erəwəə byǎ bέ: Naatɛ ǹdǝ́ Zəra ǹdǝ́ Shamma e súlí Myəza. Wɔ́ bǝ̀myέ bǝ̀ yàl Erəwəə yó-cìnə bé bǝ̀ jòm Edɔm tənà y w mɔ́. Wɔ́ Ezəyu ǹdǝ́ ń kɛ̃ Basəmaatɛ nὲmέ nέ. ¹⁸Nyǐ Ezəyu kɛ̃ Oləbama byǎ bέ: Yəwuushi ǹdǝ́ Yalaam ǹdǝ́ Kɔɔra. Wɔ́ Ana bǝ̀kɔ́ ǹdǝ́ Ezəyu kɛ̃ Oləbama yó-cìnə bé. ¹⁹Wɔ́ Ezəyu byǎ bέ èta ǹdǝ́ bǝ̀ yó-cìnǝ́ bé èta. Ezǝyu, wɔ́ Edɔm.²⁰Nyǐ Səyiiri, ń wɔ́ Oriiti mú byǎ bέ bǝ̀ y'à jὲnὲ bǝ̀ jě Edɔm tənà y w mɔ: Lɔta ǹdǝ́ Shɔbaal ǹdǝ́ Shəbəwɔ ǹdǝ́ Ana, ²¹ǹdǝ́ Dəshɔ ǹdǝ́ Esɛɛrɛ e súlí Dəshã. Wɔ́ bǝ̀myέ bǝ̀ y'à wɔ́ Oriitibá yó-cìnǝ́ bé, Səyiiri byǎ bέ, bǝ̀ jòm Edɔm tənà y w mɔ́. ²²Lɔta byǎ bέ yàl Ori ǹdǝ́ Emaam. Lɔtã yà ń zhe nəkɔ́ mǝ̀dù ń yà ń yíl Təməna.²³Shɔbaal byǎ bέ yàl Aləvã ǹdǝ́ Manaatɛ ǹdǝ́ Ebaal ǹdǝ́ Shəfo e súlí Onam. ²⁴Shəbəwɔ̃ byǎ bέ yàl Aya ǹdǝ́ Ana. Wɔ́ Ana ń tu nàná bέ yó gɔ-elũ èpòlò w wə, ń gǝ́ yà ń nǝ́ ń kál ń da Shəbəwɔ̃ bǝ̀nesé yi ní mú.²⁵Ana byǎ bέ yàl Dəshɔ ǹdǝ́ ń bǝ̀kɔ́ Oləbama. ²⁶Dəshã byǎ bέ yàl Emədã ǹdǝ́ Eshəbã ǹdǝ́ Yətərã e súlí Kərã. ²⁷Esɛɛrɛ byǎ bέ yàl Byələyã ǹdǝ́ Zavã e súlí Akã. ²⁸Dəshã byǎ bέ yàl Uusi ǹdǝ́ Arã.²⁹Nyǐ Oriitəbá yó-cìnǝ́ bé: Lɔtã ǹdǝ́ Shɔbaal ǹdǝ́ Shəbəwɔ ǹdǝ́ Ana, ³⁰ǹdǝ́ Dəshɔ ǹdǝ́ Esɛɛrɛ e súlí Dəshã. Wɔ́ bǝ̀myέ bǝ̀ wɔ́ Oriitibá yó-cìnǝ́ bé, kɔn tó bǝ̀ jìsí ni, Səyiiri tənà y wa.³¹Nyǐ pyǎ bέ byὲbέ bǝ̀ jú pyὲlὲ Edɔm nέ éfòró Esərayɛl lyì byǎ bέ pyɔ̌ mə n bǝ̀ n cìní bi mú. ³²Bəwɔɔrɛ byǐ Bɛɛla, ń cɔ w y'à yíl Dənaba. ³³Bɛɛla gə cù kwã nέ, Ushaam Təmã lyì bí tənà y lò, jǐrh pyɔ̌ ń jàà wa.³⁴Yɔbaabɛ gǝ́ cù kwã nέ, Ushaam, Təmã lyì bí tənà y lò, jǐrh pyɔ̌ ń jàà wa. ³⁵Ushaam gǝ́ cù kwã nέ, Bədaadɛ byǐ Adaadɛ jǐrh pyɔ̌ ń jàà wa. Ń bú ǹdǝ́ Majã lyì bí n ŋwὲnέ bɛ Mɔwaabɛ tənà y wa. Ń cɔ w y'à yíl Avyiiti. ³⁶Adaadɛ gǝ́ cù kwã nέ Masərɛka lyì bal Saməla jǐrh pyɔ̌ ń jàà wa.³⁷Saməlab gǝ́ cù kwã nέ, Erəwɔbɔɔtɛ bwǐ y yó lyì bal Shəwuuli jǐrh pyɔ̌ ń jàà wa. ³⁸Shəwuuli gǝ́ cù kwã nέ, Akəbɔɔrɛ byǐ Baal-Aanã jǐrh pyɔ̌ ń jàà wa. ³⁹Akəbɔɔrɛ byǐ Baal-Anã gǝ́ cù kwã nέ, Adaarɛ jǐrh pyɔ̌ ń jàà wa. Ń cɔ w y'à yíl Po. Ń kɛ̃ mɔ́ yà ń yíl Mǝyǝtǝbyǝǝ, Mətərɛɛdɛ bǝ̀kɔ́ ǹdǝ́ Məzaabɛ nɔ̃̌.⁴⁰Nyǐ Ezəyu yó-cìnǝ́ bé yilə né, kɔn tó dwã ǹdǝ́ bǝ̀ jìsí e súlí bǝ̀ cɛmɛ nέ: Təməna ǹdǝ́ Aləva ǹdǝ́ Yətɛɛtɛ ⁴¹ǹdǝ́ Oləbama ǹdǝ́ Ela ǹdǝ́ Pyənɔ ⁴²ǹdǝ́ kənaazɛ ǹdǝ́ Təmã ⁴³ǹdǝ́ Myəbəsaarɛ ǹdǝ́ Məgəjəə e súlí Yaram. Wɔ bəmyέ bəmyέ bə wɔ Edɔm yó-cìnǝ́ bé kɔn tó dwã ǹdǝ́ bǝ̀ gǝ́ y'à jě jě né, tənà y bǝ̀ y'à cǐ mú wẽ. Wɔ́ Ezəyu mú ń wɔ́ Edɔm da mɔ́ mɔ́ lyì bí.

¹Zhakɔɔbɛ tú n bǝ̀ n jòm Kanaã tənà y wa, ń da mɔ́ gǝ́ yà ń jὲnὲ n jòm mǝ̀gã̌ mɔ́. ²Nyǐ kɔn gǝ́ wɔ́ nέ Zhakɔɔbɛ dwí rí shò kwã nέ: Zhozefu gǝ́ tú n yí byinə shí ǹdə nyàlpyὲ, ń yà ń nǝ́ ń tó ń da-byǎ bέ nɛ ń kál pyììsì. Ń yà ń wɔ ń da kana Byəla ǹdǝ́ Zhələpa byǎ bέ kwã nέ. Sə Zhozəfu yà ń nǝ́ ń zǝ lwɛlɛ rέ tὲbέ bə y'à n'ê zɔ̀m mɔ́ ń ká ń twí ń cĩ́ ń da nɛ.³Esərayɛl yà ń só Zhozəfu du ń byǎ bέ dwã bέ gakó ń gǝ́ lùl mo ń caarɛ wẽ́ mú yilə. Ń yà ń ce bə nyal pyɔ̌ byǐ kàmǝ̀zwǐ n pɔ̃. ⁴Sə Zhozəfu zhὲmmá bέ púrí bǝ̀ da mɔ́ só Zhozəfu du bǝ̀myέ gakó. Bə j'a ji kùr bǝ̀ n'ê súl mu, bǝ̀ k'ê wàr bǝ̀ zɔ̀m náncɔ̀nɔ̀ ǹdǝ́ mɔ yé.⁵dɛ̃ rǝ̀dù, Zhozəfu dàrh dàrhà n zɛ̃̀ n kwè ne n cĩ́ ń zhὲmmá bέ nɛ. rǝ̀myέ ce; bə j'a kwɛrhɛ bǝ̀ n'ê súl mu dɛ̃́dɛ̃́. ⁶Ń yà ń wǝ̀l be: Cilə-nə dàrhà à dàrh.⁷Nǝ́ y'ǎ n'é lyẽ bǝ̀lέ jílǝ́ jílǝ́ cɛrh cəcəl wə. Àmyέ bǝ̀lέ y cíl ré j'a zɛ̃̀ rǝ̀ zhǐ dɛ̃̌. Ámyɛ̌ bəlέ cílə né j'a zɛ̃̀ nǝ̀ bǝ̀ nǝ kəkέlέ rɛ, nǝ̀ n'ê wùlì tɛ̃́ rǝ̀ yé né. ⁸Ń zhὲmmá bέ zɛ̃̀ bə wɔ̀ mɔ: Ǹ nǝ́ ǹ yǎl ń jí pyὲlὲ nǝ́ yó? nà wɔ́ byí ǹ nǝ́ byili bǝ̀ ǹ b'ǎ yǝ̀ nǝ́ yó-cǝ́bal ń cìní nǝ́ba? Bə kwɛrhɛ bə súl mu dɛ̃́dɛ̃́ ń dàrhà nέ ǹdǝ́ ń zɔ̀mà nɛ́ yilǝ.⁹Zhozefu kǝ́ n dàrh dàrhà dwã n kwè nǝ̀myɛ n cĩ́ ń zhὲmmá bέ nɛ n wɔ̀: À dàrh dàrhà dwã: Nǝ̀nyɔ́nɔ́ w ǹdǝ́ cànà y e súlí cãmǝ́sɔ̌rh shí ǹdǝ́ èdù y'à n'ê wùlì tɛ̃́ àmyέ yé né. ¹⁰N cĩ́ ni ń da ǹdǝ́ ń zhὲmmá bέ nɛ nέ. Ń da ji mu búlǝ́ n wɔ̀: Dàrhá nɛ́ ǹ dàrh mɔ́ è etǝr dàhà? Kɔn nǝ b'a yǝ̀ nyɔ́ɔ́ sǝ àmyɛ́ ǹdǝ́ ǹ ná ǹdǝ́ ǹ zhɛ̀mmá bɛ́ bǝ̀ nǝ́ wùlì tɛ̃́ ǹ yé né? ¹¹Ń zhὲmmá bέ zɛ̃̀ bǝ̀ n'ê dùr ń bwɛ̃̌. Sə ń da yà ń já ń zhe ywẽ̀ né nǝ̀myɛ́ mɔ́ ń wẽ́.¹²Zhozefu zhὲmmá bέ shǝ́r bə zə bǝ̀ da vwàmá nέ bə m'e vò gɔ sõ, Shəshɛm nyí rí wẽ́. ¹³Esərayɛl zɛ̃̀ n wɔ́ Zhozefu nɛ: Ǹ zhὲmmá bέ yǝ̀ vwàmá nέ zə bə bə vò gɔ sõ Shəshɛm nέ nà? Bǝ̀ à twĩ̀ mú bǝ̀ sõ. Zhozefu lyár n wɔ̀: Nyǐ ni! ¹⁴Esərayɛl wɔ̀ mɔ: << Zhəl ń gwɛ̃ ń nyì ǹ zhὲmmá bέ gǝ́ jὲ nέ, ǹdǝ́ vwàmá nέ myɛ gǝ́ jὲ nέ. Sǝ́ kwɛ̃̀ ń bǝ̀ ń byili ni. Wɔ́ Ebərɔ̃ nǝ̀-gɔ̀lɔ̀ w wẽ́ Esərayɛl zhì ní n mə n twĩ̀ Zhozefu. Zhozefu já n lyɛ̃ n vò n yí Shəshɛm.¹⁵Bal mǝ̀dù jəl mo ǹdǝ́ ń já ń nǝ́ ń zhǝ̀l dɛ̃̌ gɔ sõ. Bal mɔ́ bwǝ̀rh mo n wɔ̀: Wɔ́ bǝ̀kɔ́n ǹ nǝ́ ǹ pyà? ¹⁶Zhozefu lyár bal mɔ́ n wɔ̀: À zhὲmmá à n'â pyà. À n'â lwǝ̀l mó bǝ̀ ǹ byili ni bǝ́ gǝ́ zə vwàmá nέ bə m'ê wɔ mǝ̀gã̌. ¹⁷Bal mɔ́ wɔ̀ mɔ: Bǝ̀ zhǐr nyɔ̀nɔ̀, sǝ a nyɛ̀ɛ̀ bǝ̀ y'à zhe: Bànà nǝ̀ vò Dɔtã. Zhozefu lyɛ̃ n twèlé ń zhὲmmá bέ nɛ, n yí n nə bɛ Dɔtã nέ.¹⁸Zhozefu zhὲmmá bέ j'a nə mɔ ǹdǝ́ ń gwẽ̌ wɔ pyépyé. Bə zɔ̀m ǹdǝ́ dwã bə cĩ́ ǹdǝ́ ń gwẽ̌ yǝ̀ bǝ̀ nyí ni yí yé, bǝ̀ bǝ̀ la mɔ gu. ¹⁹Bǝ̀ y'à n'ê wǝ̀l dwã nɛ: Nyǐ-nǝ dàrhà dàrhna mɔ́ ń yúwǝ́ ²⁰Bà-na nǝ́ gu mu sə nə kwè mo nǝ́ ji gwáárέ tὲbέ òdù wẽ́. Nǝ́ m'ǎ zɛ̃̀ nǝ́ wɔ̀ bǝ̀ gɔ-ku zɔ mɔ o dɔ̃̀. Nǝ́ m'ǎ nyǐ ń dàrhà nέ gǝ́ m'a jǐrh kɔn ná-dwí yil né!²¹Orɔbɛn nyὲὲ, n zɛ̃̀ ń nǝ́ ń pyà sə n zwẽ mo bǝ̀ jɔ̃̀ wa. Rǝ̀myέ ce ń wǝ̀l be: bǝ̀k'á gu mu yé ²²N súlí n wɔ bɛ: Á bǝ̀k'á ló jal tɛ̃́ yé. Zə-na mɔ á ji gɔ́rɔ́ w kɔ̀bɔ́ wẽ, gɔ-elũ w wə, sə á jɛ̃̀ bǝ̀k'a dwǝ̀rh mo yé. ń yà ń nǝ́ tɛ́rɛ́ rǝ̀myɛ́ ńwẽ́, mùnì ga n zwẽ mo bǝ̀ jɔ̃̀ wa, sə n ce n kwɛ̃̀ n vò ń da sõ.²³Zhozefu gǝ́ tú n bǝ̀ n yí ń zhὲmmá bέ nyí ni, bə zǝ mɔ bə vùr ń kàməzwǐ yǝ́, pyɔ̌ byǐ kàmǝ̀zwǐ y ń yà ń zù mú. ²⁴Bə zɛ̃̀ bə zə mɔ bə vò bə ji nɛ̃ gɔ́rɔ́ w wẽ́. Nɛ̃gɔ́rɔ́ w òmyέ mɔ́ y'à wɔ́ nánfò, nɛ̃̌ y'à tὲnέ ò wẽ yé.²⁵Sə rǝ̀myέ kwã nέ, bə zɛ̃̀ bǝ̀ jě tɛ̃́ bǝ̀ la kùjú jú. Sə bǝ̀ kwẽ̌ bǝ̀ yǝ́rh dɛ̃̌, bə pwírí Yəsəməyəə byǎ bέ kùkùl rǝ̀dù lyì bǝ̀ pú dwã kùrǝ̀, bǝ̀ y'à shí Galaadɛ bǝ̀ n'ê yí. Bǝ̀ yómdé y'à zhĩ cèmé malmala mǝ̀ lwẽ́ nã́nyǝ̀nyὲlέ kùrǝ̀ nánzhəzhɔ̌. Bǝ̀ yérh y'à zǎ Ezhibti. ²⁶Zhəda zɛ̃̀ n wɔ̀ ń da-byǎ bέ nɛ: È wɔ́ bǝ̀kɔ́n nǝ́ la nɔ nǝ́ gǝ gu nǝ́ nyɛ̃́ mɔ́ nǝ́ zɛ̃̀ nǝ́ shèè ń jal mɔ́ mɔ́?²⁷Bà-na nǝ́ yè mo ǹdǝ́ Yəsəmayəə byǎ bέ sə nǝ́ bǝ̀k'á gu mu yé, bǝ̀ ń wɔ́ nǝ́ nyɛ̃́, nǝ́ ga wɔ́ jal mǝ̀dù.Sə ń da byǎ bέ cili ń zɔmέ rέ. ²⁸Majã lyì bí y'à wɔ́ dɔ̌lna, bǝ̀ gǝ́ tú bǝ tó gàà səta bǝ̀ n'ê lyɛ̃, bə vwɛ̃ Zhozefu nɛ̃ gɔ́rɔ́ w wẽ́ bə cĩ́ pwẽ̀ ne. Bə zɛ̃̀ bǝ kwè mo bə yè Yəsəmayəə byǎ bέ sõ wár-kùlsì shí-èlyè. Yəsəmayəə byǎ bέ zə mɔ bə m'e vò Ezhibti.²⁹Orɔbɛn kwɛ̃̀ n bǝ̀ gwɛ̃ nɛ̃-gɔ́rɔ́ w wẽ́, sə ń púrí Zhozefu kǝ́ ń tὲnέ ò wẽ́ yé. Ń já n kǎr ń gàndέ, ³⁰n zɛ̃̀ n kwɛ̃̀ n vò ń da-byǎ bέ sõ, n wɔ̀ bɛ: Bǝ̀sɔ́bwɛ̀lɛ́ y k'ê tɛ̀nɛ́ yé! Sǝ àmyɛ́, wɔ́ yẽ̀ à m'a vò né?³¹Bə zə bǝ̀cìlǝ́ bə gu, bə kwè Zhozefu kàmǝ̀zwǐ bə mɔ́rh è jal mɔ́ wa. ³²Bə zɛ̃̀ bə pǝ kàmǝ̀zwǐ ǹdǝ́ è pɔ̀pɔ̀là nɛ́, bə vò bə pə bǝ̀ da nɛ, bə súlí bə wɔ mɔ: Nyǐ kɔn rɛ́ dɛ̀bǝ́ nǝ́ nɔ mɔ́! nyǐ ń nyǐ wɔ́ ǹ byǐ mú kàmǝ̀zwǐ ráá è dǝ̀ èmyɛ́ ³³Zhakɔɔbɛ nyǐ y n lwar è párá, n zɛ̃̀ n wɔ̀: Wɔ́ à byǐ mú kàmǝ̀zwǐ yǝ́! gɔ-ku zɔ o dɔ̃̀! Ò dɔ̀m Zozhefu o zhǝzhɛrɛ!³⁴Zhakɔɔbɛ kǎr ń gàndέ, n kwè yóló gɔ̀nɔ̀ n lyẽ ń cã̌ nέ. N kúr ń byǐ mú ni dwã nánzhəzhɔ. ³⁵Ń byǎ bέ ǹdǝ́ ń bǝ̀kwá bέ gakó zɛ̃̀ bə bǝ̀ bǝ̀ la ń wu ni zal, n cẽ ń wu ni zal mɔ́ yò. Ń yà ń nə ń wǝ̀l be: È wɔ́ cǐl à la m'a vò a twèlé à byǐ mú ni, cúlú ni. Zhakɔɔbɛ gwẽ̌ cǝ̀ǝ̀lè n kúr ń byǐ mú ni. ³⁶E jà Majã lyì bí y'à yè Zhozefu Ezhibti ní ǹdǝ́ Pɔtəfaarɛ, ń yà ń wɔ́ Faraɔ̃ lyì-fɔ̀lɔ̀, ǹdǝ́ lyì bí byὲbέ bǝ̀ n'ê yìlì Faraɔ̃ mɔ́ yó-cəbal.

¹rǝ̀myέ yi ní, Zhəda shír n yẽ̌ ń da-byǎ bέ nɛ n zɛ̃̀ n vò Adəlam lyì bal mǝ̀dù ń yà ń yíl Yəra sõ. ²N yí n nə Kanaã lyì bal mǝ̀dù bǝ̀kɔ́ ń yà ń yíl Shəwa. N jí bǝ̀kɔ́ mɔ́ n zɛ̃̀ n zù ǹdǝ́ mɔ.³Bǝ̀kɔ́ mɔ́ kwè pǔ n lù byǐ, Zhəda ce ń yil bǝ̀ Erɛ. ⁴Kɛ̃ mɔ́ kǝ́ n zə pǔ n lù byǐ dõ, kɛ̃ mɔ́ ce ń yil bǝ̀ Onã. ⁵Kɛ̃ mɔ́ kǝ́ n lù byǐ dõ kǝ́dò, kɛ̃ mɔ́ cìcì ce ń yil bǝ̀ Shəla. Ń lùl Shəla ǹdǝ́ Zhəda yà ń ŋwέnέ Kəziibi ní.⁶Zhəda pyà kɛ̃ ń yà ń yíl Tamaarɛ n pə ń byì-cɛ Erɛ nɛ. ⁷Sə Zhəda byì-cɛ y wὲrhέ kɔn tὲbέ rǝ̀ yǝ̀ cìnnǝ mú pùbùlǝ̀ yàl, Cinnǝ mú zɛ̃̀ n ce n cì.⁸Rǝ̀myέ yó Zhəda zɛ̃̀ n wɔ̀ Onã nɛ: Zhǝl ń zù ǹdǝ́ ǹ zhɛ̀m-bal mɔ́ kɛ̃ mɔ́, ǹ lù byǐ n yǝ̀ ǹ ǹ zhɛm-bal mɔ́ dwí ⁹Sə Onã yà ń yě bǝ̀ lùlì y èmyέ mɔ́ t'â la ńmyɛ̌ dwí yál yé. Rǝ̀myέ ce, ń gə tú ń zù ǹdǝ́ ń zhὲm-bal mɔ́ kɛ̃ mɔ́ gakó, ń yà ń nǝ́ ń ce ń bɛlɛ rɛ́ nɛ̃̌ mɔ́ lwé tɛ̃́, mùnì ga ń bǝ̀ká n lù byǎ ń zhὲmbal mɔ́ yil yé. ¹⁰Sə rǝ̀myέ yǝ̀ Cinnǝ mú pùbùlǝ̀ yàl yé, Cinnǝ mú ce ńmyɛ cì.¹¹Rǝ̀myέ yó, Zhəda zɛ̃̀ n wɔ̀ ń byì-can Tamaarɛ nɛ: mɛ̃ ejǝ̃̀-kɛ̃ ǹ da sõ kɛ̀lɛ́, kɔn m'e yí à byǐ Shǝla jǐrh náncɛ. Ywẽ y'à zhe mo, ń tá ń yǎl sǝ ń byǐ Shǝla cì ǹdǝ ń da-byǎ bɛ́ ta yé.Tamaarɛ já n kwɛ̃̀ n vò ń jě ń da sõ kɛ̀lɛ́ wa.¹²Kɔn b'e dɛnɛ námpɔ́lέ rǝ̀myέ kwã nέ, Zhəda kɛ̃ Shəwa bǝ̀kɔ́ mɔ́ tú n bǝ̀ n cì. Sə Zhəda wu-zhùlù w gǝ́ tú o b'o lyɛ̃ kwã nέ, n zɛ̃̀ n vò Təməna ń pyì-kur rí kwarna bέ sõ, ńmyɛ̌ ǹdǝ́ ń dɔwa Yəra, Adəlam lyì bal. ¹³Bə zɛ̃̀ bə vò bə byili Tamaarɛ nɛ bə wɔ̀: Nyǐ ǹ nyɛ̀-bal zhǝ̀l Tǝmǝna ń pyì-kur góm ¹⁴Təmaarɛ vùr ń ejǝ̀nǝ̀ kàməzwǐsí, n zɛ̃̀ n zə kàmǝ̀jɛ̃̀ n mə n pyìlì ń yé ne, n súlí n pyìlì ń cìnə, n zɛ̃̀ n vò ń jě Enəyim cɔ w ò wɔ Təməna sɔmá y yó mó, bwǝ̀rǝ̀ y nyí ni. Ń yà ń lwar bǝ̀ nyǐ Shəla yà ń byìl n jǐrh bal, e jà bǝ̀ yǝ̀ mɔ kwè bə pɔ ń la n yə ń kɛ yé.¹⁵Zhəda gǝ́ nɔ mɔ, ń zə mɔ n yǝ̀ kə-nǝ̀fòló, ń gǝ́ yà ń pyìlì ń yé y mó yilə. ¹⁶N ywǝ̀r n vò ń sõ sɔ́má y vɔ̃̀ nɛ, n yí n wɔ̀ mɔ. À n'â yǎl a zù ǹdǝ́ mɔ́! ń yǝ̀ lwar bǝ̀ wɔ́ ń byì-can mɔ́ yé. Tamaarɛ zɛ̃̀ n bwǝ̀rh mo n wɔ̀: Wɔ́ bǝ̀kɔ́n ǹ m'ǎ pɛ̃ sǝ́ mǝ́ zù ǹdǝ́ nɛ?¹⁷Zhəda lyár mɔ n wɔ̀: À m'ǎ ce bə vò bǝ zə à bɔ̀-bwὲlέ èdù bə b'e pɔ̃́. Tamaarɛ wɔ̀ mɔ: Ǹ m'a pɛ̃ kɔn a cĩ́, bɔ̀-bwὲlέ y gə túwǝ́ s'a k'a pɔ̃́? ¹⁸Zhəda wɔ̀: Bǝ̀kɔ́n dwí ǹ nǝ́ ǹ yǎl b'à yɛ̃̌ a pɔ̃́? Tamaarɛ wɔ̀: Pɛ̃ ǹ zhǝ̀n-pɔ ku w ǹd'ô nyíní yǝ́, ǹdǝ́ dǝ̀-dɔ̀lɔ w ò wɔ ǹ jɔ̃̀ w mɔ́. Zhəda kwè re n pɔ̃. N zɛ̃̀ n zù ǹdǝ́ mɔ.Tamaarɛ já n kwè pwí ǹdǝ́ Zhǝda.¹⁹Tamaarɛ shí tɛ̃̀ n zɛ̃̀ ń la jè, N yí n pàr kàmǝ̀jɛ̃̀ yá, n kǝ́ n kwè ń ejǝ̃̀dé kàmǝ̀zwǐsí n zù. ²⁰Zhəda twĩ̀ ń dɔwa Adəlam lyì bal mɔ́ ǹdǝ́ bɔ̀-bwὲlέ y ń la vò n pə kɛ̃ mɔ́ nɛ, sə n zwẽ ń wẽ̀ ré kɛ̃ sõ mó n mǝ n bà. Sə ń dɔwa mɔ́ yú ń yǝ̀ kɛ̃ mɔ́ nɛ yé.²¹Dɔwa mɔ́ zɛ̃̀ n bwǝ̀rh cɔ w lyì bí: Wɔ́ yẽ̀ kǝ-nǝ̀fòlò w ò y'à zhǐ Emǝyiimi sɔ́má nyí ni mú ŋwɛ́nɛ́? Bə lyár mɔ bə wɔ̀: Kǝ-nǝ̀fòlò yǝ̀ nyɔnɔ yàl gaga yé. ²²N zɛ̃̀ n kwɛ̃̀ n bǝ̀ n wɔ̀ Zhəda ne: À yǝ̀ mɔ nɛ yé. Cɔ w lyì bí myɛ wǝ̀l ne bǝ̀ kǝ-nǝ̀fòlò gwẽ yǝ̀ gàà jòm gaga yé. ²³Zhəda wɔ̀: Ń já n jí wẽ̀ ré! Nǝ́ bǝ̀k'á ce bə mɔ̀n nǝ́ba yé. Àmyέ twĩ̀ mú ǹdǝ́ bɔ̀-bwὲlέ yá, sə ǹmyɛ yǝ̀ mo nɛ yé!²⁴Sə è wɛ̀rhɛ́ cànsὲ sǝ̀tɔ̀ rǝ̀myέ kwã nέ, bǝ̀ tú bə byili Zhəda ne bə wɔ̀: Ǹ byì-can Tamaarɛ jǐrh kə-nǝ̀fòló. Nyǐ mu ń kwè pǔ ń fwǝ̌l tumǝ né nǝ̀myέ mɔ́ wẽ́! Zhəda pə nyí n wɔ̀: Bə ce n du pwẽ̀ ne sə bə ji mu myǐn! ²⁵Sə bǝ̀ gǝ́ tú bǝ̀ n'ê vùr mu bǝ̀ la pwẽ̀ ne co yi ní, Tamaarɛ twĩ̀ bə vò bə wɔ̀ ń nyὲ-bal mɔ nɛ: Nyǐ wɔ́ bal mɔ́ mɔ̀bɔ́ wẽ̀ ré tὲbέ èta mɔ́ wɔ́ ńmyɛ̌ nyǎn mɔ́ ń co pwǐ y kɛ̀bɛ́! Nyǐ, ń zhǝ̀n-pɔ ku w ǹdǝ́ ò nyíní yǝ́, ǹdǝ́ ń dǝ̀-dɔ̀lɔ̀ wá! ²⁶Zhəda gǝ́ lwar rǝ̀ párá n zɛ̃̀ n wɔ̀: À twĩ̀ dóó du mu, b'à yǝ̀ mɔ à byǐ Shǝla nɛ pɛ n jí yé. Zhəda já ń kə ń yə zwì ǹdə mɔ yé.²⁷Sə ń lul ré yi gǝ́ tú e yí, bə púrí wɔ́ nǝ̀cílǝ́ bǝ̀lyè bǝ̀ ŋwɛ́nɛ́ ń wẽ́ ²⁸Ń gǝ́ tú ń nǝ́ ń lùl yi ní, nǝ̀cílǝ́ bé mǝ̀dù y jɛ̃̀ y du pwẽ̀ ne. elwərh-kɛ̃ mɔ́ zə yá, n lyẽ tǝ́tɔ̃̌ nyíní nánshὲ è nɛ, ń mə ń zhe: Wɔ́ mɔ̀bɔ́ ń jɛ̀nɛ̀ n tó yé n du.²⁹Sə ńmyɛ̌ mɔ́ ká n ce ń jɛ̃̀ y wẽ́, wɔ́ nyέ mɔ́ ń ká n du. Elwəh-kɛ̃ mɔ́ zɛ̃̀ n wɔ̀: Etǝr ǹ wɛ̀rhɛ́ nɛ́! Zhəda já n ce ń yil bə Pɛrɛɛsɛ. ³⁰Rəmyέ kwã nέ, mɔ̀bɔ́́ tǝ́tɔ̃̌ nyíní nánshὲ y y'à lyẽ ń jɛ̃̀ y nɛ mɔ́ zɛ̃̀ n du. Bə ce ń yil bǝ̀ Zəra.

¹Yəsəməyəə byǎ bέ zə Zhozefu bə m'e vò Ezhibti. Sə bǝ̀ gǝ́ yú Ezhibti, Ezhibti lyì bal Pɔtəfaarɛ, ń yà ń wɔ́ faraɔ̃ lyì-fɔ̀lɔ̀ ǹdǝ́ ń yìlnə bé yó-cǝ́bal mɔ́, yè mo bǝ̀ sõ. ²Cinnǝ mú yàl nέ ǹdǝ́ Zhozefu rǝ̀myέ ce ń kɔn gakó y'à j'â n'ê zwẽ nyí. Zhozefu já n mɛ̃ ń yó-cǝ́bal, Ezhibti lyì bal mɔ́ sõ kɛ̀lɛ́ wa³Ń yó-cǝ́bal mɔ́ nyǐ n púrí Cinnǝ mú yà ń ŋwέnέ ǹdǝ́ mɔ, e súlí myɛ kɔn tὲbέ Zhozefu yà ń nə ń wὲrhέ mɔ́ gakó y'à n'ê zwẽ nyí ń jɔ̃̀ wa. ⁴Ń nyǐ Zhozefu ǹdǝ́ sónó n kwè mo ń la tũ̌ n pɔ̃. Ń kwè mo ń la n nyǐ ń kὲlέ y yò, n kwè ń nǝ̀cὲndέ gakó n súlí n ce ń jɔ̃̀ wa.⁵Pɔtəfaarɛ gǝ́ kwè ń kὲlέ y ǹdǝ́ nǝ̀cὲndέ ga n ce Zhozefu jɔ̃̀ w n zhɛ̀, Cinnǝ mú já n cĩ bwəl ń kὲlέ y yó Zhozefu yilə. Cinnǝ mú bwəl ré j'a yí ń kὲlέ y ǹdǝ́ ń cɛsέ ǹdǝ́ ń nǝ̀cὲndέ gakó. ⁶Rǝ̀myέ yó ń já n yẽ̌ ń nǝ̀cὲndέ gakó ne Zhozefu jɔ̃̀ wa, sə Zhozefu gǝ́ yà ń ŋwέnέ ǹdǝ́ mɔ mɔ́ ce, ń yà ń kǝ́ ń tá ń nyǐ kɔn dõ yò è gə dǝ̀ ń kùjú w ń nǝ́ ń jí mú yò yé. Zhozefu yà ń wɔ́ ébɔ́-dǎl mɔ̀bɔ́ ń yà ń byìl n yí, ń yǝ́-zwã̌ dǝ̀ cɛ̀nɛ̀ dwí.⁷rǝ̀myɛ́ kwã nɛ́, Pɔtəfaarɛ kɛ̃ mɔ́ yírhǝ́ j'a zɛ̃̀ nǝ̀ pyǎ Zhozefu yó ń nǝ́ ń pyǎl mɔ sǝ n zǝ mɔ n mǝ n zù, n wɔ̀: zǝ nɛ ń mǝ́ pyè! ⁸8 Zhozefu cẽ. N zɛ̃̀ n wɔ̀ ń yó-cǝ́bal mɔ́ kɛ̃ mɔ́ nɛ: Nyǐ, à yó-cǝbal mo có ń kɛ̀lɛ́ y wẽ̀ ré gakó à jɔ̃̀ wa, ń tá ń bwǝ̀rh ne kɔn gǝ́ n'ê tó né ń jɛ̃̀-kɔn rɛ́ zɛlɛ́ shò-kwã nɛ́ mɔ́ yò yé. ⁹À yó-cǝ́bal mɔ́ bǝ nɛ du kɛ̀lɛ́ y kɛ̀bɛ́ wẽ́ nà, sǝ ń tá ń cǝ̀r kaka à yé né yé, è gǝ dǝ̀ ǹmyɛ́ dúdú, ǹ gǝ́ wɔ́ ń kɛ̃ mɔ́ yilǝ. wɔ́ etǝr à m'a tó a twĩ̀ lwɛlɛ rɛ́ nánfɔ̀lɔ̀ w kɔ̀bɔ́ dwí rí a m'a dó Yi ni mú?¹⁰Dɛ̃ gakó, kɛ̃ mɔ́ yà ń já ń zhe Zhozefu ni bə ń bǝ̀ n zù ǹdǝ́ mɔ, sə Zhozefu cẽ ń yǝ̀ shὲnέ n vò ń nyí ni, sǝ n zù ǹdǝ́ yé. ¹¹Dɛ̃ rǝ̀dù, Zhozefu zɛ̃̀ n bǝ̀ ń yó-cébal mɔ́ sõ kὲlέ w ń la ń tum rí tũ. Kὲlέ y tùntùnnə bé mǝ̀dù ga myɛ yà ń tὲnέ yé. ¹²Kɛ̃ mɔ́ zə Zhozefu kàmǝ̀zwǐ y ni, n zɛ̃̀ n wɔ̀ mɔ: Zú ǹdǝ́ nɛ!Sə Zhozefu dùr n du pwẽ̀ ne, n yẽ̌ ń kàmǝ̀zwǐ y ni kɛ̃ mɔ́ jɔ̃̀ wa.¹³Kɛ̃ mɔ́ gǝ́ púrí ń dùr n du pwẽ̀ ne n yẽ̌ ń kàmǝ̀zwǐ y ni ń jɔ̃̀ wa, ¹⁴ń byẽ̀ ń kὲlέ y tùntùnnə bé, n wɔ̀ bɛ: Nyǐ-nǝ, ń zɔ́ Ebǝrǝbá lyì bal n bǝ̀ n zǝ nǝ́ba ń mǝ n dǝdal. Nyǐ bal mɔ́ mɔ̀bɔ́ tú n bǝ̀ ń nǝ́ ń yǎl n zǝ nɛ n mǝ n pyẽ̀. A zɛ̃̀ à n'â búbwéé à ce dɛ̃̌. ¹⁵Ń gǝ́ nyὲὲ à n'â búbwéé à ce dɛ̃̌dɛ̃̌ mɔ́, n zɛ̃̀ n dùr n yẽ̌ ń kàmǝ̀zwǐ y ni à nyí ni, n dùr n du kὲlέ wa.¹⁶N kwè Zhozefu kàmǝ̀zwǐ y n cĩ́ tɛ̃́ ń yala nɛ kɔn b'e yí ń byal mɔ́ kwɛ̃̀ n bǝ̀ kɛ̀lɛ́ wa. ¹⁷Rǝ̀myέ yi ní, n zɛ̃̀ n kǝ́ n byili nyí rí rǝ̀myέ rǝ̀dù y ń byal mɔ́ nɛ n wɔ̀: Ebǝrǝbá yǝ-bal ǹ zǝ ń mǝ́ ń bǝ̀ mɔ́, tú à sono; n zǝ nɛ ń la mǝ n dǝdal. ¹⁸À gǝ́ j'a pwírí à búbwéé dɛ̃́dɛ̃́ mɔ́, ń já n dùr n yẽ̌ ń kàmǝ̀zwǐ y ni à nyí ni n du pwẽ̀ ne.¹⁹Byal mɔ́ gǝ́ nyὲὲ kɔn rέ tὲbέ ń kɛ̃ mɔ́ yà ń nǝ́ ń zɔ̀m ǹdǝ́ mɔ́ ń zhe: Bǝ̀ nyǐ, kɔn tɛ̀bɛ́ yóm-bal mɔ́, wɛ̀rhɛ́ nɛ mɔ́! rǝ̀myɛ́ yó, Zozhɛfu yó-cǝ́bal lyim j'a zὲ. ²⁰Ń ce bə zə Zhozefu bə vò bə ce byǝ̀nǝ́-jù wə, bǝ̀ gǝ́ y'à n'ê ce pyɔ̌ mɔ́ byǝ̀nǝ́-jì lyì bí mǝ̀gã. Zhozefu já n yǝ̀ byǝ̀nǝ́-jì w gàà,²¹Cinnǝ mú yàl nέ ǹdǝ́ mɔ. Ń byili mu ń wu-bɔ̀nɔ̀ wá, n ce byǝ̀nǝ́-jì y yó-cébal mɔ́ nyǐ mu ǹdǝ́ sónó. ²²Byǝ̀nǝ́-jì y yó-cǝ́bal mɔ́ já n kwè byǝ̀nǝ́-jì y lyì bí gakó n pə Zhozefu nɛ ń cǐ. Wɔ́ ńmyɛ̌ ń yà ń nə ń ce bǝ̀ twĩ̀ kɔn dɛ̀bɛ́ gakó bǝ̀ mǝ̌ sə bə wὲrhέ mɔ́. ²³Byǝ̀nǝ́-jì y yó-cébal mɔ́ yà ń kǝ́ ń tá ń nyǐ tum rí tὲbέ ń pɔ Zhozefu ni mú yò yé, bə Cinnǝ mú yà ń ŋwέnέ ǹdǝ́ Zhozefu. Sə Cinnǝ mú yà ń nǝ́ ń ce kɔn tὲbέ Zhozefu yà ń nə ń wὲrhέ mɔ́ gakó n'ê zwẽ nyí.

¹Ywẽ né rǝ̀myέ mɔ́ kwã nέ, lyì bí bǝ̀ n'ê pɛ pyɔ̌ mɔ́ ń sɛ̃́ mɔ́ mɔ́ yó-cǝ́bal mɔ́ ǹdǝ́ byɛ̀bɛ́ bǝ̀ n'ê pɛ mɔ búrú mú yó-cǝ́bal mɔ́, tú bə dó bǝ̀ yó-cébal mɔ́, Ezhibti pyɔ̌ mɔ́ nɛ. ²Pyɔ̌ mɔ́ lyim zɛ̃̀ rǝ̀ n'ê yì ń lyì-fwààlέ rǝ̀myέ rǝ̀lyè yǝ́. ³N ce bə zə rɛ bə ce byǝ̀nǝ́-jì y kὲbέ ń yìlnə bé yó-cǝ́bal mɔ́ yà ń cǐ mú wẽ́, bə gǝ́ y'à co Zhozefu mǝ̀gã̌ mɔ́ cìcì.⁴Pyɔ̌ mɔ́ yìlnə bé yó-cébal mɔ́ kwè lyì-fwààlέ rǝ̀lyè y n pə Zhozefu ni, bə ń nyǐ rǝ̀ yò. Rə mɛ̃ byǝ̀nǝ́-jì y wẽ́ dwã màngɛlέ. ⁵Cǝcɛ̃ èdù, lyì bí byɛ̀bɛ́ bǝ̀ n'ê pɛ sɛ̃́ mɔ́ ǹdǝ́ byɛ̀bɛ́ bǝ̀ pɛ búrú w pyɔ̌ nɛ mɔ́, yó-cǝ́nǝ́ bé mǝ̀dù gakó dàrh ń dàrhà, ǹdǝ́ bǝ̀ y'à ŋwέnέ byǝ̀nǝ́-jì y wẽ́. Dàrhà gakó y'à zhe nǝ̀ kùrǝ̀.⁶È dɛ̃ rǝ̀dù, Zhozefu zɛ̃̀ nǝkɔkɔ́lɛ́ n vò n nə pyɔ̌ mɔ́ lyì-fwààlέ sono , n yí púrí bǝ̀ wun zhìlì kókó. ⁷N zɛ̃̀ bwàrh be n wɔ̀: È nə wɔ́ byè yil á yésé gurhi zà èta mɔ́? ⁸Bǝ lyár mɔ ə wɔ̀: Nyǐ wɔ́ dàrhà nǝ́ dàrh, lò zɛ̃̀ ń tɛ̀nɛ́ ń la nǝ́ba nǝ̀ kùrǝ̀ né byilu yé. Zhozefu zɛ̃̀ n wɔ̀ bɛ: È nǝ dǝ̀ Yi sono dàrhà nɛ́ kùrǝ̀ né byilu mú n'ê shí ní nà? Byili-nǝ ne á dàrhà nɛ́ á dàrh mɔ́ a nyìwé.⁹Pyɔ̌ mɔ́ sɛ̃́ parna bɛ́ yó-cǝ́bal mɔ́ cĩ́ ń dàrhà nέ Zhozefu ni n wɔ̀: À dàrhà nέ wẽ́, à nɔ dǝ̀vɛ̃́-cǒ òdù ò y'à wɔ à yé né. ¹⁰Ò jὲsέ y'à wɔ́ sǝ̀tɔ̀. Ò gǝ́ púrh vɔr rɛ́ kwã, o ce pùnǝ́, o zɛ̃̀ o ce byǎ, byǎ bέ byì. ¹¹Faraɔ̃ kǎzɔ̌m mɔ́ ń mǝ́ ń nywὲ mɔ́ y'à wɔ à jɔ̃̀ wa. A kwẽ dǝ̀vɛ̃́-cǒ w byǎ bέ a kã̀ bǝ̀ nɛ̃̌ mɔ́ kǎzɔ̌m mɔ́ wẽ́, a kwè a ce Faraɔ̃ jɔ̃̀ wa.¹²Zhozefu zɛ̃̀ n wɔ̀ mɔ; nyǐ ǹ dàrhà nɛ́ kùrǝ̀ né: Cǒ jɛ̀sɛ́ sǝ̀tɔ̀ w wɔ́ dwã nǝ̀tɔ̀ ¹³È gwẽ̌ dǎl dwã nǝ̀tɔ̀ sə pyɔ̌ mɔ́ zhẽ̌ ǹ yó dɛ̃̌. Ń mà n ce ń kǝ́ twĩ̀ ǹ shãã ga tum rí. Ǹmyέ ǹ m'ǎ ce kǎzɔm mɔ́ Faraɔ̃ jɔ̃̀ w ǹdə ǹ gǝ́ yà ǹ jὲrὲ ǹ nǝ́ ǹ wὲrhέ nέ mɔ́.¹⁴Sə kɔn gə tú rǝ̀ kwɛrhɛ ǹ yilə, sə ǹ y'ǎ lyǐrh à yò, yál wu-bɔ̀nɔ̀ cí ǹdǝ́ nɛ, ń zɔ̀m à yò Faraɔ̃ sõ, mùnì ga n ce a shǝ́r jì y kὲbέ wẽ́. ¹⁵Wɔ́ Ebərəbá tənà y w bǝ̀ zɔ nɛ bə m'e shí ní, e jà nyɔ̀nɔ̀ myɛ à yǝ̀ kaka wὲrhέ sə bə m'e ce ne byǝ̀nǝ́-jù w yé.¹⁶Búrú w màrna bɛ́ yó-cébal mɔ́ gǝ́ púrí Zhozefu cĩ́ dàrhà nέ kùr ré, sə è y'à wɔ́ kɔrhɔ yò mó, ń wɔ̀ Zhozefu ni: Àmyέ dàrhà nέ wẽ́, à y'à zhĩ búúri sǝ́yǝ̌rh sǝ̀tɔ̀ à yó wə. ¹⁷Sǝ́yǎ kὲbέ è y'à pyὲlέ dɛ̃̌ yǝ́-pὲlέ w mɔ́ y'à sú ǹdǝ́ búúri dúdúmǝ́ dúdúmǝ́ tὲbέ Faraɔ̃ yà ń nǝ́ ń dɔ̀m mɔ́. Kúmsí y'à n'ê vwàrh búúrí sǝ́yǎ y wa, à yǝ́-pὲlέ w mɔ́.¹⁸Zhozefu wɔ̀ mɔ: nyǐ ǹ dàrhà nɛ́ kùrǝ̀ né. Sǝ́yǝ̌rh sǝ̀tɔ̀ w wɔ́ dwã nǝ̀tɔ̀ ¹⁹È gwẽ̌ dǎl dwã nǝ̀tɔ̀ sə Faraɔ̃ zǝ ǹ yó n lwǝl tɛ̃́. Ń mà n jele mó cǒ w ne, sə kúmsí m'a bǝ̀ sə vwàrh ǹ yala nàmá bέ.²⁰È dwã nǝ̀tɔ̀ dɛ̃ rέ yù w mú, è yàl Faraɔ̃ lul byin rí yò lyǐrh címsi. Pyɔ̌ mɔ́ já n tɛnɛ címsí kùjú ń tùntùnnə bé gakó yilə. Sə ń zhẽ̌ ń sɛ̃́ mɔ́ parna bέ yó-cǝ́bal mɔ́ ǹdǝ́ búrú màrna bέ yó-cǝ́ba mɔ yó dɛ̃̌. ²¹N kǝ́ n cĩ́ ń sɛ̃́ parna mɔ́ ń yà ń nǝ́ ń ce kǎzɔ̌m mɔ́ ń jɔ̃̀ w mɔ́ ń tum rí wẽ́. ²²N ce bə tɔ̌r búrú màrna bέ yó- cǝ́bal mɔ́. Kɔn tó ǹdə dàrhà nέ kùrǝ̀ né Zhozefu yà ń cĩ́ mú ta. ²³Sə sɛ̃́ mɔ́ parna bέ yó-cǝ́bal mɔ́ yǝ̀ Zhozefu yò lyǐrh yé, ń swě ń yò.

¹Sə è byinə nǝ̀lyè kwã nέ, Faraɔ̃ myɛ tú n bǝ̀ n dàrh dàrhà. Ń yà ń zhǐ Niili y nyí ni. ²Ń la nyǔ n púrí nɛ̃ nyàlpyὲ, ǹ gə nɔ nɛ ǹ já ǹ só, nǝ̀ y'à nù myɛ, nǝ̀ shí Niili y w nə du, nə zɛ̃̀ nǝ̀ n'ê dɔ̀m gɔ bwǐ y vɔ̃̀ nɛ. ³N kǝ́ n nə nǝ̀ dwã nyàlpyὲ, nã́-kwààrɛ, nǝ̀ bǝ càn námpɔlέ myɛ cìcì yé, nə myɛ shí Niili y w nə du. Nə bǝ̀ nə zhì nãyǝ́ǝ́ né yala nɛ, Niili y bù-cǔ yó.⁴Sǝ nǝ̀-kwààrɛ́ nǝ̀ yala nɛ́ gakó kwɛ̀rɛ̀ mɔ́ dɔ̀m nyɛ̀mɛ́ nyàlpyὲ y ǹ gə nɔ ǹ já ǹ só mó, e jà nə y'à nù mú. Rəmyέ yó, Faraɔ̀ já n bwìrhì. ⁵Sə rǝ̀myέ kwã nέ, Faraɔ̃ kǝ́ n dὲὲ, n zɛ̃̀ n kǝ́ n dàrh dàrhà dõ kǝ́dò. N nǝ bǝ̀lέ ywẽ́ nyàlpyὲ nǝ̀ y'à dǝ̀ cɛ̀nɛ̀ dwí, nǝ̀ y'à wɔ́ nánfwààlɛ nǝ̀ y'à n'ê tò bǝ̀lέ ná èdù yó. ⁶N kǝ́ n nǝ ywẽ́ dwã nyàlpyὲ nǝ̀ y'à wɔ́ námpɔ́lsɛ, yi-púrhí zho w ce nə j'á kù, nə tò nə du.⁷Bəlέ ywẽ́ né nyὲbέ nǝ̀ y'à kwàrh mɔ́ jú ywẽ́ nánfwààlέ e jà nə y'à sú mú. Faraɔ̃ já n zɛ̃̀ rǝ̀myέ yó. Ń púrí wɔ́ dàrhà. ⁸Cɛ y gǝ́ lɔ́wá, Faraɔ̃ ce bə byẽ̀ Ezhibti jǝ̀pársɛ́ cìnǝ́ bé ǹdǝ́ lárma cìnǝ: bé gakó bə pɔ̃, bǝ̀ ń wu y'à n'ô zɛ̃̀. N cĩ́ bi ń dàrhà nέ, sə mǝ̀dù ga myɛ yǝ̀ ŋwὲnέ n byili mu nǝ̀ kùrǝ̀ né yé.⁹Wɔ́ rǝ̀myέ yó, pyɔ̌ mɔ́ sɛ̃́ mɔ́ parna bέ yó-cəbal mɔ́ zɛ̃̀ n wɔ̀ Faraɔ̃ nɛ: À m'a lyǐrh à dóó w yò zà a byili. ¹⁰È dɛ̃ rɛ́ nɛ, Faraɔ̃ lyim y'à zɛ̃̀ ń tùntùnnə bé yó, n zɛ̃̀ n ce bə zǝ nɛ, bǝ ce byǝ̀nǝ́-jì y kὲbέ è ŋwɛ́nɛ́ ń yìlnə bé yó-cébal mɔ́ cǐ mú sõ kɛ̀lɛ́ w mɔ́ wẽ́. Àmyɛ́ ǹdǝ́ ń búrú màrna bέ yó-cǝ́bal mɔ́. ¹¹Cǝcɛ̃ èdù, àmyέ ǹdǝ́ ńmyɛ̌ ga tó dwã nǝ́ dàrh, sə dàrhà gakó y'à zhe nǝ̀ kùrǝ̀. Sǝ nǝ́ mǝ̀dù gakó nɔ ń dàrhà nɛ́ kùrǝ̀ né.¹²Ebərəbá ébɔ́-dǎl mǝ̀dù, ń yà ń wɔ́ pyɔ̌ mɔ́ yìlnǝ̀ bé yó-cǝ́bal mɔ́ yə-bal, ń yà ń ŋwέnέ ǹdǝ́ nǝ́ba gàà. Wɔ́ ńmyɛ̌ nɛ nǝ́ cĩ́ nǝ́ dàrhà nέ. N zɛ̃̀ n byili lò gakó ne ń dàrhà nέ kùr ré. ¹³Sə kɔn gakó j'a tó ǹdə ń gǝ́ byili ní, dàrhà gakó shò kwã mɔ́: Faraɔ̃ ká n cĩ́ ni à tum rí jàà wa, n ce bǝ tɔ̌r búrú màrna bɛ́ yó-cǝ́bal mɔ́.¹⁴Faraɔ̃ ce pǝ nyí bǝ̀ bǝ̀ byẽ̀ Zhozefu bə pɔ̃, bə j'a dùr bə vò bə vùr mu làlà byǝ̀nǝ́-jù wə. Bə fɔ̃̀ ń ywésé ǹdǝ́ ń tama nέ, bǝ lyǝ́ ń gàndέ n zɛ̃̀ n lyɛ̃ n vò n shɛ̀ Faraɔ̃. ¹⁵Faraɔ̃ wɔ̀ Zhozefu ni: À dàrh dàrhà sə lò mǝ̀dù ga myɛ yǝ̀ ŋwὲnέ n byili ni nǝ̀ kùrǝ̀ né yé. Sə à nyὲὲ bǝ̀ yòwǝ̀, bǝ̀ bǝ̀ gə cĩ́ dàrhà ǹmyέ nɛ, ǹ wɔ̌ ǹ m'ǎ byili nǝ̀ kùrǝ̀ né. ¹⁶Zhozefu lyár Faraɔ̃ n wɔ̀: Nyǐ è àmyɛ́ yé! Wɔ́ Yi rǝ̀ b'ǎ lyár kɔn tó ǹdǝ́ Faraɔ̃ gǝ́ nǝ́ ń yǎl nɛ́.¹⁷Rǝ̀myέ yó, Faraɔ̃ zɛ̃̀ n wɔ̀ Zhozefu ni: Nyǐ à dàrh, à y'à zhǐ Niili y bù-cǔ w yó. ¹⁸À púrí nɛ̃ nyàlpyὲ nǝ̀ gakó y'à j'a nù, ǹ gə nɔ nɛ myɛ ǹ já ǹ só, nǝ̀ shí Niili y w nə du. Nə y'à zɛ̃̀ nǝ̀ n'ê dɔ̀m bù-cǔ w gɔ wá.¹⁹Sə nǝ̀myέ kwã nέ, nǝ̀ dwã nǝ̀-kwààrɛ nyàlpyὲ myɛ, nǝ̀ bə càn yíh w yé, bǝ̀ gwẽ̌ yǝ̀ nǝ̀ dwí rí nɛ Ezhipti tǝnà y púlǝ́púlǝ́ wẽ́ gaga yé. ²⁰Nɛ̃ nɛ́ nã́-kwààrɛ́, rǝ jà rǝ̀ bǝ càn mɔ́ já rǝ zɛ̃̀ rǝ dɔ̃̀ nɛ̃ nɛ́ nãyǝ́ǝ́ nyàlpyɛ̀ y nǝ̀ y'à nù mú. ²¹Nǝ j'a lyì ni rǝ ce rǝ̀ wẽ́, Sə lò lò yǝ̀ lwar bǝ̀ kɔn zù nǝ̀ wẽ́ myɛ yé. Nǝ j'à gwẽ̌ zhǐ nã́-kwààrέ èta, nǝ̀ bǝ càn ǹdǝ nǝ gǝ́ y'à nyɛ̌ nɛ́ shãã mɔ́ ta. Rǝ̀myέ yó, à j'a bwìrhì.²²À k'a dàrh dàrhà dwã. À nɔ bǝ̀lέ ywẽ́ nyàlpyɛ̀ nǝ̀ n'ê tò bǝ̀lέ ná èdù yó, nǝ̀ y'à càn nə sú e jà nə y'à càn myɛ. ²³A k'a nə nǝ̀ dwã nyàlpyὲ námmyὲέsɛ nǝ̀ kùlǝ̀, yi-púrhí zho w ce nə kù ǹdə wɔ myǐm mə jú ni ta. ²⁴Bəlέ ywẽ́ né námmyὲέsέ dɔ̃̀ bǝ̀lέ ywẽ́ né nyὲbέ nǝ̀ càn mɔ́. Sǝ à byili ni jǝ̀-pársɛ́ cìnǝ́ ne, sə lò yǝ̀ nɛ n byili ni nǝ̀ kùrǝ̀ né yé.²⁵Zhozefu wɔ̀ Faraɔ̃ nɛ: Kɔn rɛ́ tɛ̀bɛ́ Faraɔ̃ dàrh mɔ́ wɔ́ kɔn rǝ̀dù; Yi byili Faraɔ̃ nɛ kɔn rɛ́ tɛ̀bɛ́ ń mǝ̌ sǝ n wɛ̀rhɛ́ mɔ́. ²⁶Nɛ̃ nέ nyàlpyὲ y nǝ̀ càn mɔ́ e súlí bǝ̀lέ y ywẽ́ né nyὲbέ nǝ̀ càn mɔ́ n'ê mɛrhɛ byinə nyàlpyὲ: Rǝ̀myέ ce dàrhá nέ wɔ́ rǝ̀dù.²⁷Nǝ̀-kwààrέ rǝ j'à bə càn mɔ́ rə y'à pú nɛ̃ nέ dwã bέ nɛ, nǝ̀ shí Niili y w nə du mú n'ê mɛrhɛ byinə nyàlpyὲ. Bǝ̀lέ y ywẽ́ né nyàlpyὲ y námmyὲέsέ yi-púrí zho w ce nə kù mú myɛ n'ê mɛrhɛ byinə nyàlpyὲ nɔrh. ²⁸Wɔ́ kɔn rέ tὲbέ à y'à zhe à la Faraɔ nɛ byilu mú: Yi co kɔn tὲbέ rǝ̀ la wɔ̀rhɔ́ mɔ́ pwẽ̀ ne mùnì ga Faraɔ̃ lwar rɛ. ²⁹Nyǐ byinə nyàlpyὲ y nyὲbέ nǝ̀ bàn mɔ́, kɔn gakó m'a j'a sú tɛ̃́ Ezhibti tənà y púləpúlə w rǝ bɔrh.³⁰Sə rǝ̀myέ kwã nέ, nɔrh m'a tu byinə nyàlpyὲ, sə bǝ̀ m'a swě bǝ̀ kɔn gakó rǝ̀ y'à sú tɛ̃́ Ezhibti tənà y w rǝ bɔrh mɔ́ yò. Nɔrh mɔ́ m'a cɔ̀ tənà yá. ³¹Nɔrh mɔ́ mɔ̀bɔ́ mǝ̀ la tu mú, m'a zə càn dɛ̃́dɛ̃́, rǝ̀myέ ce tənà y wẽ́, lòlò kǝ́ ń tá ń la lyǐrh kɔn rέ tὲbέ rǝ̀ y'à sú tɛ̃́ rǝ bɔrh mɔ́ yó yé. ³²Faraɔ̃ gǝ́ dàrh dàrhà nέ nǝ̀myέ mɔ́ wɔ́ twər rǝ̀lyè ga, sǝ́ nyǐ Yi kɔ́ yò wǝ́, sə rǝ̀ m'a ce jàn nέ rə pyìrh w làlà.³³Bǝ̀ Faraɔ̃, zɛ̃̀ èlǎsɛ̃́, n pyà lò mɔ̀bɔ́ ń lɔ́wá e jà ń zhe surhə n cĩ́ Ezhibti tənà y yé né. ³⁴Ń cír lyì tənà y wẽ́ bə zwẽ bǝ̀ vɔ̀lɔ́ w nɛrɛ́ wẽ́, kɔn rǝ̀dù kùrǝ̀ rǝ̀nu gakó yó wə, Ezhibti tənà y wǝ̀-jǝ̀ǝ́ré gakó wẽ́, byinə né nyàlpyὲ y nyὲbέ kɔn gakó la sú tɛ̃́ rǝ bɔrh mɔ́ wẽ́.³⁵Lyì bí bǝ̀myέ mɔ́ m'a zwẽ byinə né nyàlpyὲ y nyὲbέ nǝ̀ bàn mɔ́ nǝ̀ càn mɔ́ jíjí rí bə ló dwã yó, sə bə pyà jààsɛ cɛmɛ nέ wẽ́ bə ló bǝ̀lέ y nέ bə cĩ́, Faraɔ̃ yil yilə. ³⁶È m'a yǝ̀ kùjú kɔ̀bɔ́ bǝ̀ la dɛ̃̌ cṹ, Ezhibti tənà y yilə, byinə né nyàlpyὲ y nyὲbέ nɔrh mɔ́ mǝ̀ bàn mɔ́ yilə. Èta tənà y m'a lú nɔrh mɔ́ jɔ̃̀ wa. Mùnì ga nɔrh mɔ́ bǝ̀k'a gu tǝnà y lyì bí yé.³⁷Faraɔ̃ ǹdǝ́ cɔ w lyì bí ǹdǝ́ cɔ w yé né cìnǝ́ bé swéné tὲbέ Zhozefu zɔ̀m ǹdǝ́ bɛ mɔ́. ³⁸Faraɔ̃ zɛ̃̀ n wɔ̀ cɔ̀ w yé né cìnə bé ne: nǝ́ nǝ m'a nǝ lò dõ, ń zhe Yi Eshirhǝ́ y ǹdǝ mɔ̀bɔ́ ta?³⁹N zɛ̃̀ n wɔ̀ Zhozefu ni: Nyǐ è gǝ́ wɔ́ Yi rǝ̀ byili mú ywẽ̀ né nyɛ̀bɛ́ gakó ń lwar mɔ́, ce lò dõ kǝ́ ń tɛ̀nɛ́ ń lɔ́wá n jà ń zhe surǝ ǹdǝ ǹ ta yé ⁴⁰Wɔ́ ǹmyέ ǹ m'ǎ cìní à kὲlέ yá. À tənà y lyì bí púlǝ́púlǝ́ m'a tó ǹ nyǝ́ né nyὲbέ ǹ la bɛ pɔ mɔ́. Sə wɔ́ à pyὲlὲ dǝ̀gwã́ y dúdú à la m'a dwini mú. ⁴¹Faraɔ̃ súlí n wɔ̀ Zhozefu ni: Nyǐ à pɔ mɔ́ Ezhipti tǝnà y púlǝ́púlǝ́ bǝ̀ ǹ cìní.⁴²Fwaraɔ̃ zɛ̃̀ n vùr ń pyὲlὲ cìbyǐ y ń jǝ̀fɔ́lέ nɛ n ce Zhozefu jǝ̀fɔ́lέ nɛ. N kwè lɛ̃̌ kὲbέ è càn kàmǝ̀zwǐ n zù mu, n kwè sánǝ́má byã-dɔ̀mὲ n ce ń cǝl né. ⁴³N zɛ̃̀ n ce n jòm ń búlǝ́ eshã-vwǝ̃tu rǝ̀lyè nyɔ̃̌ w yó, lyì y'à j'a zɛ̃̀ bǝ̀ wɔ ń yé né bǝ̀ n'ê búbwéé bǝ̀ zhe: Jǒm-nǝ á nǝ̀dwǝ́nǝ́ yó! èta, Faraɔ̃ já n pɔ̃ ŋwɔ̀nɔ́ Ezhibti tənà y púləpúlə yó.⁴⁴N kǝ́ n wɔ̀ Zhozefu ni: Àmyɛ́ à wɔ́ Faraɔ̃! È gǝ dǝ̀ ǹmyɛ́ lò dõ tɛ̀nɛ́ Ezhipti tǝnà y púlǝ́púlǝ́ w ń mà n zhẽ̌ ń jɛ̃̀ ráá ń nà dɛ̃̌ è wẽ́ yé. ⁴⁵Fwaraɔ̃ zɛ̃̀ n ce Zhozefu yil bǝ̀Tǝsǝfwanatɛ-Pǝyashɛ; n pɔ̃ kɛ̃ ń yíl Asǝnatɛ, ń da yà ń vwĩ̀-zwǝ́lnǝ Oyɔ̃ nɛ́ ń yíl Poti-Fǝra. Zhozɛfu já n zɛ̃̀ ń la Ezhipti tǝnà y byɔ́lɔ́.⁴⁶Zhozefu zhǝ̀l n byili ń cìn Ezhibti pyɔ̌ Faraɔ̃ nɛ ǹdǝ́ ń yà ń zhe byinə shǝ́-ètɔ̀. zhozefu gǝ́ shǝ́r Faraɔ̃ sõ n já n lyɛ̃ n vò ń nǝ́ ń byέlέ Ezhibti tənà y púlǝ́púlǝ́. ⁴⁷Byinǝ né nyàlpyɛ̀ y ǹdǝ́ cɛ y zhe gwàl mɔ́ yi ni, kùjú w byìl o pyẽ̀ tɛ̃́ o bɔrh⁴⁸Zhozefu ce bə pwà byinə né nyàlpyὲ y kùjú w bǝ̀ vwàl Ezhibti tənà y gakó wẽ́ mú, n ce bǝ pyà jààsɛ cə-fwààlέ wẽ́, ǹdǝ́ gɔ sõ cɛmɛ nέ nyὲbέ nǝ̀ bwǝ́l cə-fwààlέ nɛ mɔ́ wẽ̀ ré bǝ cĩ́ cə-fwààlέ wẽ. ⁴⁹Zhozefu pwà bǝ̀lέ y è y'à byìl námbɔrhɔ, e j'à è já dɛ̃́dɛ̃́ ǹdə nǝ̀-fɔ̀lɔ̀ nyí ni nyɔ̀rhɔ́ ta, kɔn yí rǝ lyɛ̃ cɛ nɛ ń kǝ́ ń yǝ̀ è mɔrhɔ pyà yé, bǝ̀ bǝ̀ y'à wàr y bǝ̀ la mɔrhɔ bǝ nǝ è yó yé.⁵⁰Nɔrh mɔ́ gǝ́ tú mə dǎl byin sə mə tu mú, Zhozefu lùl byǎ bǝ̀lyè ǹdǝ́ One cɔ w vwĩ-zwəlnə Pɔtəfera bǝ̀kɔ́ Asənaatɛ. ⁵¹N ce byì-cɛ y yil bə Manasɛ bǝ̀ ń yà ń zhe: Yi ce a swě à nɔ̀nɔ̀ w ǹdǝ́ à da kɛ̀lɛ́ y gakó yó ⁵²N zɛ̃̀ n ce ń nyɛ̃́ mɔ́ yil bǝ̀ Efərəyim bǝ̀ ń yà ń nǝ́ ń wǝ̀lǝ̀: Yi ce a lù byǎ tǝnà y kɛ̀bɛ́ à nɔ wu-zhìlù è wẽ́ mú wǝ.⁵³Byinə nyàlpyὲ y nyὲbέ kɔn gakó y'à sú tɛ̃́ rǝ bɔrh mɔ́ tú nə lyɛ̃. ⁵⁴Rǝ̀myέ kwã nέ byinə nyàlpyὲ y nɔrh mɔ́ ju kùrǝ̀, ǹdə Zhozefu gǝ́ yà ń dámǎ n byili ní. Nɔrh mɔ́ gǝ́ la jǒm, ǹdə Zhozefu gǝ́ yà ń dámǎ n byili ní mú; Nɔrh mɔ́ nwὲnὲ tənèsé gakó dɛ̃́dɛ̃́, e jà kùjú y'à ŋwέnέ Ezhibti tənà y púlǝ́púlǝ́ wə.⁵⁵Nɔrh mɔ́ gǝ́ tú mə ji kùr mǝ̀ n'ê zal Ezhibti lyì bí yi ní, bǝ̀ búbwéé bǝ̀ lwəl kùjú Faraɔ̃ nɛ. Faraɔ̃ zɛ̃̀ n wɔ̀ bǝ̀ gakó ne: Zhǝl-nǝ Zhozefu sono, á wɛ̀rhɛ́ kɔn dɛ̀bɛ́ ń la ába byilu mú. ⁵⁶Nɔrh mɔ́ y'à j'â ŋwέnέ tənà y púlǝ́púlǝ́ wǝ. Zhozefu zɛ̃̀ n ce bə pul jààsέ bǝ̀ y'à cĩ́ bǝ̌lsé sǝ̀ wẽ́, cɛmɛ nέ wẽ mó, bə yè ǹdǝ́ Ezhibti lyì bí. Nɔrh mɔ́ zɔ càn dɛ̃̌dɛ̃̌ Ezhibti tənà y wa. ⁵⁷Lũ w púlǝ́púlǝ́ lyì bí y'à n'ê twí bǝ̀ yè bǝ̀lέ y Zhozefu sõ Ezhibti ní, bǝ̀ nɔrh mɔ́ y'à cɛ̀ dɛ̃̌dɛ̃̌ lũ w cə-yala gakó.

¹Zhakɔbɛ zɛ̃̀ n nyὲὲ bǝ̀ bǝ̀lέ ŋwέnέ Ezhibti ní, n zɛ̃̀ n wɔ̀ ń byǎ bέ nɛ: ²À nyὲὲ bǝ̀ jíjí ŋwέnέ Ezhibti ní. Zhəl-nə gàà mɔ́ á yè jíjí á b'ǎ pə nǝ́ba nǝ́ wɛ̀rhɛ́ nǝ́ jí, mùnì ga nǝ́ bǝ̀k'á cì yé. ³Rǝ̀myέ yó, Zhozefu zhὲmmá bέ shí y shí tɛ̃́ bǝ zɛ̃̀ bə vò Ezhibti jíjí rí pyǎ bǝ yè . ⁴Zhakɔbɛ zɛ̃̀ ń yǝ̀ shὲnέ n yẽ̌ Zhozefu nyɛ̃́ Bɛzhamɛ tó ń zhὲmmá bέ nɛ yé, bǝ̀ ywẽ ń y'à mo bǝ̀ dɛ̀ga lwɛlɛ m'a yí mú.⁵Esərayɛl byǎ bέ vò bǝ̀ la jíjí rí yǒ ǹdə lyì bí dwã bέ ta, bǝ̀ nɔrh mɔ́ y'à ŋwέnέ kanaã tənà y myɛ wẽ́. ⁶Zhozefu yà ń zhe ŋwɔ̀nɔ́ nánfɔ̀lɔ̀ tənà y yó; wɔ́ ńmyɛ̌ myɛ ń yà ń nǝ́ ń yè jíjí ǹdǝ́ ń tənà y lyì bí gakó. Ń zhὲmmá bέ zɛ̃̀ bə bà, bə yí bə wùlì tɛ̃́ ń yé né, bə tu bǝ zə bǝ̀ yǝ́rh bə pú tɛ̃́.⁷Zhozefu gǝ́ nɔ ń da-byǎ bέ, ń lwar bǝ̀ párá, sə ń yǝ̀ shὲnέ bə lwar ń pár yé. Ń zɛ̃̀ n zɔ̀m zɔ̃̀-kùlǝ̀ ǹdǝ́ bɛ. Ń bwǝ̀rh be n wɔ̀: Yẽ̀ ámyɛ̌ shí ní? Bə lyár mɔ bə wǝ̀: Nǝ́ shí Kanaã tǝnà y w nǝ́ bǝ̀ kùjú yǒ. ⁸Zhozefu já n lwar ń zhὲmmá bέ párá, sə bǝ̀myέ yǝ̀ ń pár lwar yé.⁹Zhozefu já n lyǐrh dàrhà nέ ń yà ń dàrh bǝ̀ shò kwã nέ mɔ́ yò, n zɛ̃̀ n wɔ̀ bɛ: Ámyɛ̌ wɔ́ lyì byὲbέ á zə surhə á bǝ̀ tənà y yé shò lwar. Á tú á n'á pyà á la á lwar nǝ́ tənà y jàn rɛ́ gǝ́ mǎ nɛ́. ¹⁰Bə lyár mɔ bə wɔ̀: È də èta yé, nǝ́ yó-cébal. nyǐ wɔ́ kùjú ǹ tùntùnnə bé tú yǒ. ¹¹Nǝ́ gakó wɔ́ bal mǝ̀dù byǎ, nyǐ wɔ́ zhǝ̀n nǝ́ n'é zɔ̀mà, ǹ tùntùnnə bé dǝ̀ lyì byὲbέ bǝ̀ zə surhə bə bǝ̀ tənà y jàn rɛ́ yé shò pyǎ bǝ lwar yé.¹²Zhozefu kǝ́ n wɔ̀: È dǝ̀ zhǝ̀n yé. Surhǝ á zǝ á bǝ̀ tənà y jàn rέ gǝ́ bə já mǝ̀gã̌ jààsɛ́ yé-shò lwar. ¹³Bə wɔ̀ Zhozefu ne: Nyǐ ǹ tunnǝ bé, nǝ́ wɔ́ nunǝ shí ǹdǝ́ bǝ̀lyè nǝ́ da nɛ Kanaã tǝnà y wa, sǝ zà, nǝ́ ga nyɛ̃́ mɔ́ mɛ̃ nǝ́ da sono Kanaã tǝnà y wa. Sǝ nǝ́ mǝ̀dù y kǝ́ ń tɛ̀nɛ́ yé.¹⁴Zhozefu wɔ̀ bɛ: À byili ába bǝ̀ nyǐ wɔ́ surhǝ á m'a bǝ̀ tǝnà yé-shò lwar. ¹⁵Nyǐ-nǝ kɔn tὲbέ à la m'a zǝ á kùr ni mú: ǹdǝ́ Faraɔ̃ mɔ́ ń wɔ́ nã́nyì mú, á t'á la nyɔ̀nɔ̀ shǝ́r ǹdǝ́ è gə dǝ̀ á nyɛ̃́ mɔ́ námpɔ́lέ y è tú yé. ¹⁶Twĩ-nə lò mǝ̀dù á wẽ n vò n zə mɔ n mə n bà, sə ámyɛ̌ mɛ̃ byǝ̀nǝ́ jù wǝ̀. Bə m'a lwar ǹdǝ́ è gǝ́ zǝ̀n á n'á zɔ̀mà. Nǝ̀ gə dǝ̀ zhǝ̀nà, sǝ ǹdǝ́ Faraɔ̃ mɔ́ ń wɔ́ nãnyì mú, sə nyǐ wɔ́ zhǝ̀n ga wɔ́ surhə á zɔ á bà, á m'á pyà tənà y yé shò lwar! ¹⁷Zhozefu já n ce bə gakó byǝ̀nǝ́-jù w dwã nǝ̀tɔ̀.¹⁸Dwã nǝ̀tɔ̀ yù wǝ̀, n zɛ̃̀ n wɔ̀ bɛ: À gǝ́ n'â nyàm Yi mú yilə, nyǐ-nə kɔn tὲbέ á m'ǎ wὲrhέ mùnì ga á lú mú: ¹⁹á gə wɔ́ zhǝ̀n cìnǝ́ sə á mǝ̀dù mɛ̃ byǝ̀nǝ́-jì y kὲbέ á ŋwέnέ è wẽ́ mó wə, sə á byὲbέ á dàl mɔ́ zə bǝ̀lέ y á vò á pə á dwí lyì bí nɔrh mɔ́ zhe mó ne. ²⁰Á m'ǎ zə á nyɛ̃́ námpɔ́lέ y á m'á kwɛ̃̀ á b'ǎ pɛ̃. kɔn rέ tὲbέ á byili mú gə wɔ́ zhǝ̀nà, bǝ̀ m'a lwar, rǝ̀myέ yi ní á t'á la cú yé. Sə bǝ̀ wὲrhέ èta zhǝ̀n ga.²¹Bə zɛ̃̀ bǝ̀ n'ê wǝ̀l dwã nɛ: Zhǝ̀nà, nǝ́ y'ǎ dó nǝ́ nyɛ̃́ mɔ́ nɛ, nǝ́ y'ǎ nɔ nɔ̀nɔ̀ ò zhe mu mú, ǹdǝ́ ń nǝ́ ń lwǝ̀l nǝ́ba bǝ̀ nǝ́ dǔr ń nɔ̀nɔ̀ w mɔ́, sǝ nǝ́ yǝ̀ ń zɔ̀mà nɛ́ cili yé! Wɔ́ rǝ̀myɛ́ yil zúzúnú kɔ̀bɔ́ yú nǝ́ba. ²²Orobən zɛ̃̀ n wɔ̀ bɛ: À y'à yǝ̀ ába rɛ wǝ̀l: bǝ̀ bǝ̀ k'á wɛ̀rhɛ́ lwɛlɛ bǝ̀sɔ́bwɛ̀lɛ́ kɛ̀bɛ́ nɛ nà? á zɛ̃̀ á yǝ̀ à zɔ̀mà nɛ́ cili yé. Sǝ nyǐ-nǝ, èlǎsɛ̃́, bǝ̀ n'ê bwǝ̀rh nǝ́ba ń jal mɔ́ yò.²³Bǝ̀ y'à yǝ̀l bǝ̀ Zhozefu nyɛ̌ bǝ̀ dwí zɔ̀mà nέ yé, bə lò yà ń ŋwέnέ ń nǝ́ ń zwẽ bǝ̀ zɔ̀mà nέ ń cĩ́. ²⁴Zhozefu twẽ̌ bǝ̀ yala nɛ n vò kwã nɛ́; n kúrh, n zɛ̃̀ n ká n kwɛ̃̀ n bǝ̀ bǝ̀ nyí ni n zɔ̀m ǹdǝ́ bɛ. N zə Shəmənyɔ̃ bǝ̀ wẽ́, n ce bə lyẽ mo bǝ̀ yírh wə. ²⁵Zhozefu pə nyí bə ce bə wẽ́ ré gakó sú ǹdǝ́ bǝ̀lέ, bə k'a càrh lò gakó ne ń sǝ̀byǐ mú, bə ce mo ń lɔ̀bɔ̀ w wa, bə súlí bə pə bɛ kùjú bǝ̀ la m'e kwè sɔ́má yá.²⁶Bə kwè bǝ̀ bǝ̀lέ y bə zhĩ bǝ̀ bǝ̀nesé ne, bə j'a lyɛ̃. ²⁷Cɛ y gǝ́ tú e yìì bə zɛ̃̀ bə zhì bǝ̀ la shǐrh, bǝ̀ mǝ̀dù zɛ̃̀ n bwèlé ń yóló w ń la gɔ vǔr n pə ń bǝ̀na y nɛ, n já n nə ń səbyǐ mú mǝ̀ pyὲlέ bǝ̀lέ y yó ń yóló w nyí rí wə! ²⁸N zɛ̃̀ n wɔ̀ ń da-byǎ bέ nɛ: Nyǐ bǝ̀k'a càrh nɛ à sǝ̀byǐ mú, nyǐ mu à yóló w wǝ. Bə wun j'a zɛ̃̀ dɛ̃́dɛ̃́, bə zɛ̃̀ bǝ̀ n'ê kəkə bǝ̀ m'ê bwǝ̀rh dwã bǝ̀ zhe: Wɔ́ etǝr Yi wɛ̀rhɛ́ nǝ́ba nɛ́ èta mɔ́?²⁹Bǝ̀ gǝ́ tú bǝ yí bǝ̀ da Zhakɔɔbɛ sõ, Kanaã tənà y wa, bə cĩ́ mu kɔn rέ tὲbέ gakó rǝ̀ wὲrhέ mɔ́. ³⁰Bə wɔ̀ mɔ: Nyǐ bal mɔ́ mɔ̀bɔ́ ń tǝnà yó-cǝ́l mɔ́ mɔ́ já n zɔ̃̀-kùlǝ̀ ǹdǝ́ nǝ́ba, n wɔ̀ bǝ̀ wɔ́ surhǝ nǝ́ zǝ nǝ́ m'é bǝ̀ tǝnà yé-shò lwar. ³¹Sǝ nǝ́ lyár mɔ nǝ́ wɔ̀: Bǝ̀ nyǐ è dǝ̀ surhǝ nǝ́ zǝ nǝ́ bǝ̀ tǝnà y yé-shò lwar yé. ³²Nyǐ nǝ́ y'ǎ wɔ́ da-byǎ shí ǹdǝ́ bǝ̀lyè, nǝ́ da nɛ; nǝ́ mǝ̀dù y kǝ́ ń tὲnέ yé, sǝ zà, nǝ́ nyɛ̃́ mɔ́ námpɔ́lέ y ŋwέnέ ǹdǝ́ nǝ́ da Kanaã tənà y wa.³³Bal mɔ́ ń yà ń wɔ́ tənà y yó-cǝ́bal mɔ́ mɔ́ zɛ̃̀ n wɔ̀ nǝ́ba: Nyǐ-nǝ kɔn dɛ̀bɛ́ è m'a ce a lwar b'ǎ wɔ́ zhǝ̀n cìnǝ́ mɔ́. Yẽ̌-nǝ á da-byǐ mǝ̀dù ni à sono, s'á kwè kùjú w a vò a pǝ á dwí rí ni rǝ jí ³⁴Sə á zə á nyɛ̃́ mɔ́ námpɔ́lέ y á b'ǎ pɛ̃, èta, à m'a zɛ̃̀ a lwar b'ǎ yǝ̀ surhǝ zal á m'á bǝ̀ á la pyà tənà y yé shò á la lwar yé, sə á yǝ̀ zhǝ̀n cìnǝ́. À m'a zɛ̃̀ a pə ába á da-byǐ mú, rǝ̀myέ kwã nέ, á m'ǎ zɛ̃̀ á ŋwɛ̀nɛ́ á wὲrhέ kɔn tὲbέ á n'á yǎl tənà y wẽ mú.³⁵Bǝ̀ gǝ́ tú bə n'ê vùr wẽ̀ ré bǝ̀ ywǝ́ǝ́lé wẽ́ yi ní, bǝ̀ púrí bǝ̀ mǝ̀dù mǝ̀dù gakó sǝ̀byǐ-lɔ̀bɛ́ y è y'à wɔ ń yóló w wẽ́ ǹd'ê sǝ̀byǐ mú ga. Bǝ̀myέ ǹdǝ̀ bǝ̀ da ga gǝ́ nɔ lɔ̀bsέ ǹdǝ́ sǝ̀byǐ mú ga, ywẽ zɔ bɛ. ³⁶Bǝ̀ da Zhakɔɔbɛ zɛ̃̀ n wɔ̀ bɛ: Á n'á zwẽ à byǎ bέ gakó á la nɛ yõ̌! Zhozefu kǝ́ ń tὲnέ yé, Shəmənyɔ̃ myɛ kǝ́ ń tὲnέ yé, á n'á yǎl á zwẽ Bɛzhamɛ myɛ á súlí! Rǝ̀myέ gakó wɔ́ zhĩĩ rǝ̀ zhǐ à wǝ.³⁷Orɔbɛn zɛ̃̀ n wɔ̀ ń da nɛ: À gə yǝ̀ Bɛzhamɛ zə a kwɛ̃̀ a b'a pɔ̃́, sǝ́ gu à byǎ bέ bǝ̀lyè yǝ́. Pɛ̃ Bɛzhamɛ, nyǐ àmyέ m'a k'a zə mɔ a b'a pɔ̃́. ³⁸Zhakɔɔbɛ lyár n wɔ̀: À byǐ mú tá ń la ába tó n vò gàà yé. Ń zhɛ̀mbal mɔ́ cù n yẽ̌ mo ń dúdú. Lwɛlɛ gə yú ába sɔ́má y yó, á m'ǎ ce àmyέ mɔ̀bɔ́ à ywésé pwèlè mó vò cúlú ǹdǝ́ wu-zhùlù nánfɔ̀lɔ̀.

¹Nɔrh mɔ́ y'à j'â gwẽ̌ n'ê nwὲnὲ tənà y lyì bí dɛ̃́dɛ̃́. ²Zhakɔɔbɛ kὲlέ y lyì bí gə tú bə jí jíjí rí tὲbέ bǝ̀ y'à zə bə shí Ezhibti mú bə zhὲ, Zhakɔɔbɛ wɔ̀ ń byǎ bέ nɛ: Ká-na á kwɛ̃̀ a vò Ezhipti á yè jíjí námpɔ́lɛ́ á bǝ̀ pǝ nǝ́ba.³Zhəda wɔ̀ mɔ: Bal mɔ́ ńmyɛ̌ mɔ́ yà ń wò nǝ́ba bǝ̀ ń tá ń yǎl n nǝ nǝ́ba ń yé né ǹdǝ́ nǝ́ da-byǐ mú tɛ̀nɛ́ yé. ⁴Rǝ̀myɛ́ wɔ́ ǹ gə m'ǎ ce nǝ́ nyɛ̃́ mɔ́ tó nǝ́ba n vò nǝ́ yè kùjú w é fòró, ⁵sə ǹ gə yǝ̀ mo yẽ̌ n tó nǝ́ba, sǝ́ nyǐ nǝ́ t'á la yé, bǝ̀ bal mɔ́ ńmyɛ̌ mɔ́ wò nǝ́ba: À t'â la shɔ̀nɔ́ á bǝ̀ à yé né ǹd'á nyɛ̃́ mɔ́ tὲnέ ǹd'ába yé.⁶Esərayɛl zɛ̃̀ n wɔ̀: Wɔ́ kǝ̀kɔ́n yil á wɛ̀rhɛ́ lwɛlɛ á pɛ̃ mɔ́, a zɛ̃̀ á m'á wɔ̀ bal mɔ́ ńmyɛ̌ mɔ́ nɛ b'ǎ gwẽ̌ zhe nyɛ̃́ dõ mo? ⁷Bə lyár mɔ bə wɔ̀: Nyǐ bal mɔ́ bwǝ̀rh nǝ́ba nǝ́ cìcì shò-kwã nɛ́ ǹdǝ́ nǝ́ dwí rí myɛ shò-kwã nɛ́, n wɔ̀: Á da nǝ gwẽ̌ ŋwɛ́nɛ́? Á nǝ zhe da-byǐ? nǝ́ zɛ̃̀ nǝ́ m'é lyár mɔ́ èta: Sǝ nǝ́ yǝ̀ lwar bǝ̀ ń mà n wɔ̀ nǝ́ba: Zhǝl-nǝ á zǝ á nyɛ̃́ mɔ́ á m'á bǝ̀ yé?⁸Zhəda zɛ̃̀ n wɔ̀ ń da Esərayɛl nɛ: Yẽ̌ bǝ̀sɔ́bwɛ̀lɛ́ y e bǝ̀ e tó né, mùnì ga nǝ́ zɛ̃̀ nǝ́ vò; mùnì ga nǝ́myɛ́ ǹdǝ́ ǹmyɛ́ ǹdǝ́ nǝ́ byǎ bɛ́ ga lú nǝ̀ bǝ̀k'á cì yé ⁹A wɔ̀ mɔ: À shὲnέ à n'â zhĩ Bɛzhamɛ yò wə, à gə yǝ̀ kwɛ̃̀ a zə mɔ a b'a pɔ̃́, sə bwǝ̀rh ne ń yò, a ce mo ǹ jɔ̃̀ wa. À gə yǝ̀ mɔ zal a kwɛ̃̀ a m'a bǝ̀ ǹ yé né, rǝ̀ dóó m'a zhì à yó w dɛ̃ gakó ǹ yé né. ¹⁰Nyǐ nǝ́ gə y'ǎ yǝ̀ dɛnɛ dɛ̃́dɛ̃́, èta mɔ́ nǝ́ gə zhǝ̀l gàà mɔ́ nǝ́ k'á kwɛ̃̀, rə yí twər rǝ̀lyè.¹¹Bǝ̀ da Esəraɛl zɛ̃̀ n wɔ̀ bɛ: Kɔn gǝ wɔ́ nyɔ́ɔ́ ǹdǝ́ kɔn wɔ̀rhɔ́ á wɛ̀rhɛ́ rɛ. Pyǎ-na tǝnà wẽ̀, baume námpɔ́lɛ́ ǹdǝ́ tùr námpɔ́lɛ́ ǹdǝ́ aromatɛ ǹdǝ́ myiiri ǹdǝ́ pistachess ǹdǝ́ amandes. Tɛ̀bɛ́ rǝ̀ càn mɔ́ du á ce á ywǝ́ǝ́lé w á vò á pǝ bal mɔ́ nɛ. ¹²Kwě-nǝ sǝ̀byǐ á ce á byẽ́, sə á súlí á zə mɔ̀bɔ́ bǝ̀ y'à pyὲlέ bǝ̀lέ y yó, ywǝ́ǝ́lé nyǝ́ né w mó á vò á càrh mɔ, dὲga wɔ́ dó bǝ̀ y'à dó bǝ̀ yǝ̀ mɔ gàl cɛ̀nɛ̀ yé.???baume, aromate, myiiri, pistaches, amande¹³Zɛ̃̀-na a zǝ á nyɛ̃́ mɔ́ á m'á vò bal mɔ́ sõ. ¹⁴Bǝ̀ Yi Jàn cébal mɔ́ ce n dùr á nɔ̀nɔ̀ sə n jà n yẽ̌ Shəmənyɔ̃ ǹdǝ́ Bɛzhamɛ nɛ bə tó ába bə kwɛ̃̀ bə bà. Àmyέ gǝ m'a jòm nánfò ǹdə à yǝ̀ byǐ lùl ta myɛ, s'a jòm. ¹⁵Bə zɛ̃̀ bə kwè pɛnέ y ǹdǝ́ sǝ̀byǐ mú mɔ̀bɔ́ bǝ̀ y'à nɔ bǝ̀ ywǝ́ǝ́lé wẽ́ mó, bə súlí bə zə Bɛzhamɛ bə shǝ́r bə vò Ezhibti. Bə yí bǝ lyɛ̃ bə vò Zhozefu yé né.¹⁶Zhozefu gǝ́ nɔ Bɛzhamɛ ń ŋwέnέ ǹdǝ́ bɛ, n wɔ̀ ń nǝ̀cὲndέ yìlnə mó ne: Ce lyì bí byɛ̀bɛ́ kɛ̀lɛ́ wa, sǝ́ tɛnɛ kùjú, bǝ̀ lyì bí byɛ̀bɛ́ m'a tó ne bǝ jí kùjú nǝ̀nyɛ́nɛ́ nɛ ¹⁷Bal mɔ́ wὲrhέ kɔn tὲbέ Zhozefu byili mu mú, n zə bɛ n zù Zhozefu sõ kὲlέ wa.¹⁸Ywẽ zɔ bɛ bə gǝ́ zə bɛ bə zù Zhozefu sõ kὲlέ w yilə, bə zɛ̃̀ bǝ̀ zhe: nyǐ è gǝ è wɔ́ wársɛ́ bǝ̀ y'à co nǝ́ ywǝ́ǝ́lé wẽ́ shãã ga mɔ́ yil bǝ̀ zɔ nǝ́ba bǝ bǝ̀ nyɔ̀nɔ̀, sǝ bǝ zɛ̃̀ bǝ tú nǝ́ yó, bǝ zǝ nǝ́ba làlà; bǝ zǝ nǝ́ba ǹdǝ yómǝ́ ta, bǝ zwẽ nǝ́ bǝ̀nesé ¹⁹Bǝ̀ gǝ́ tú bə yí Zhozefu kὲlέ y bwǝ̀rǝ̀ y ń nǝ̀cɛ̀ndɛ́ yìlnǝ mó ŋwɛ́nɛ́ mɔ́ nyí ni, bǝ bwǝ̀rh mo kɛ̀lɛ́ bwǝ̀rǝ̀ y nyí ni, ²⁰bǝ wɔ̀: nǝ́ yó-cǝ́bal, nyǐ nǝ́ n'é lwǝ̀l mó sǔbri! nyǐ nǝ́ jɛ̀rɛ̀ nǝ́ bǝ̀ nyɔ̀nɔ̀ dɛ̃ rǝ̀dù nǝ́ yè kùjú.²¹Sə nǝ́ gǝ́ y'ǎ kwɛ̃̀ nǝ́ la jè yi ní, nǝ́ tú nǝ́ yí jàà èdù wẽ́ nǝ́ la zɔ̃́, nǝ́ zɛ̃̀ nǝ́ la nǝ́ ywǝ́ǝ́lé pul nǝ́ nyǐ, sǝ nǝ́ mǝ̀dù gakó nɔ ń sǝ̀byǐ mú yó w ga bǝ̀ cĩ́ bǝ̀lέ y yó, ń yóló nyí rí wə. Wɔ́ sǝ̀byǐ mú mǝ̀myέ nǝ́ k'á zə nǝ́ bàn cǎrh. ²²Sǝ nǝ́ súlí nǝ́ zə sǝ̀byǐ dõ nǝ́ la m'é yè kùjú. Sǝ nǝ́ yǝ̀l lò mɔ́ mɔ̀bɔ́ ń yà ń ká n ce nǝ́ sǝ̀byǐ mú nǝ́ bǝ̀lέ ywǝ́ǝ́lé wẽ́ mó pár yé. ²³Zhozefu nǝ̀cὲndέ yílnə mó wɔ̀ bɛ: Á wun bǝ̀k'a zɛ̃̀ yé, ywẽ myɛ bǝ̀k'a zə ába yé. Wɔ́ á Yi rí, á da mɔ́ Yi rí rǝ̀ co pɛnέ nánfwὲlὲ á ywǝ́ǝ́lé wẽ́. Bǝ̀ y'à pɔ nɛ á sǝ̀byǐ mú. Rǝ̀myέ kwã nέ, n zɛ̃̀ n vùr Shəmənyɔ̃ n pə bɛ.²⁴Bal mɔ́ zə bɛ n zù Zhozefu sõ kὲlέ wa. N zə bɛ n bǝ̀ n pə bɛ nɛ̃̌ bə m'e sã̀ bǝ̀ nǝ̀rh, n pə gɔ bǝ̀ bǝ̀nesé ne. ²⁵Bə tɛnɛ bǝ̀ pɛnέ y bə m'ê dɛ̃̀ Zhozefu twírí y nǝ̀nyέnέ y nɛ mɔ́, bǝ̀ bǝ̀ y'à dámǎ bǝ byili bi bǝ̀ bǝ̀ m'a jí kùjú ń sono.²⁶Zhozefu gǝ́ tú kὲlέ w n zhɛ̀, bə kwè pɛnέ y kὲbέ è y'à wɔ bǝ̀ sõ jù w mú bə pɔ̃́, bə zɛ̃̀ bə tu bə zə bǝ̀ yǝ́rh bə pú tɛ̃́ ń yé né. ²⁷Ń jɛ̀rɛ̀ n bwǝ̀rh be bǝ̀ jàn bwǝ̀rhǝ́, n zɛ̃̀ n bwǝ̀rh n wɔ̀: Á da mɔ́ ń jǐrh náncɛ á zɔ̀m ń zɔ̀mà à sõ mó jὲ? Ń gwẽ̌ ŋwέnέ?²⁸Bə lyár mɔ bə wɔ̀: Ǹ tùntùnnə nǝ́ da mɔ jὲ, ń búl ń gwẽ̌ ŋwέnέ nέ. Bə lwəl tɛ̃́ bə zə bə yǝ́rh bə pú tɛ̃́. ²⁹Zhozefu gə kwẽ̌ ń yé y dɛ̃̌, n nǝ ń nyɛ̃́ Bɛzhamɛ, ń ná-byǐ mú n zɛ̃̀ n bwǝ̀rh n wɔ̀: Wɔ á nyɛ̃́ mɔ́ námpɔ́lέ y mɔ̀bɔ́bɔ á zɔ̀m ń zɔ̀mà nɛ́ ǹdǝ́ nɛ mɔ́? N zɛ̃̀ n wɔ̀ Bɛ̃zhamɛ nɛ: À byǐ, Yi m'a dùr ǹ nɔ̀nɔ̀!³⁰Zhozefu yala cəcɛmɛ ń gǝ́ nɔ ń nyɛ̃́ mɔ́, ń yǝ́-nàná y'à j'â n'ê yǎl nǝ́ du. N zɛ̃̀ n yǝ̀ làlà n zù ń jì-zɔ̃̀rà y wẽ́ n kúrh gàà mɔ́. ³¹Rǝ̀myέ kwã nέ, n pùl ń yé n zɛ̃̀ n ká n du. Ń gǝ́ ŋwὲnέ n zə ń cìn kwã, ń wɔ̀: pǝ-na kùjú w nǝ́ la jú.³²Bə pǝ Zhozefu dúdú ni ń kùjú. Bə pə ń da-byǎ bέ nɛ, bǝ̀myɛ nɛ bǝ̀ dúdú. Ezhibti lyì bí ń y'à ń byẽ̀ kùjú w yil mú myɛ y'à n'ê jí bə nyí, bǝ̀ bǝ̀ y'à bə sɔ́má zhe sə bə jí ǹdǝ́ Ebərəbá yé. Rǝ̀ wɔ́ bǝ̀ súsúlú. ³³Zhozefu da-byǎ bέ jòm ń yé né, bə yele yele dwã nɛ, kɔn tó dwã ǹdǝ́ bǝ̀ byinə né; kɔn ji kùr ǹdǝ́ bǝ̀ náncɛ y e m'e vò bǝ̀ gakó nyɛ̃́ mɔ́ nɛ. Bǝ̀ y'à n'ê nyǐ dwã shέέ shέέ, bǝ̀ rǝ̀ y'à jàr bɛ. ³⁴Zhozefu ce bə pə bɛ kùjú w kɔ̀bɔ́ bǝ̀ y'à cĩ́ ń yé né mó. Sə kùjú w kɔ̀bɔ́ ń ce bə pə Bɛ̃zhamɛ nɛ mɔ́ y'à búl ò nyὲ dɛ̃́dɛ̃́ du ń dwã bέ nyɔ̃̌ wá, ń nyɔ̃̌ w dweme ń dwã bɛ nyɔ̃̌ twər rǝ̀nu. Bə tó Zhozefu ni bə nyɔ̃̀ sɛ̃́, kɔn b'e yí sɛ̃́ mɔ́ zə bɛ.

¹Zhozefu pə nyí ń jì y nǝ̀cὲndέ yìlnə mó ne n wɔ̀: Ce jíjí lyì bí byɛ̀bɛ́ ywǝ́ǝ́lé wẽ́ rǝ sú rǝ myɛrhɛ bǝ̀ gǝ́ wɔ̌ bǝ̀ m'a zhĩ ní ń pǝ bɛ, sǝ́ ce lò gakó sǝ̀byǐ mú ń yóló w nyí rí wǝ ²Sǝ́ kwè à sǝ̀byì-kùlì y kǎzɔ̌m mɔ́ ǹdǝ́ bǝ̀ nyɛ̃́ mɔ́ námpɔ́lɛ́ y bǝ̀lé y ǹdǝ́ ń bǝ̀lé y ye ga ń ce ń yóló w wǝ. Sə jì y nǝ̀cὲndέ yìlnə mó wὲrhɛ́ ǹdǝ Zhozefu gǝ́ ń byili mu ni.³Cɛ y gǝ́ tú e lá, bə yẽ̌ be bə lyɛ̃ ǹdǝ́ bǝ̀ bǝ̀nesé. ⁴Bǝ̀ gǝ́ tú bə shǝ́r cɔ w wa, bǝ̀ yǝ̀ yé né yí yé, Zhozefu wɔ̀ ń jì y nǝ̀cὲndέ yilnə mó ne: Zɛ̃̀ ń jǐ lyì bí byɛ̀bɛ́ kùr ne, ǹ gǝ zɔ bɛ sǝ́ wɔ̀ bɛ: ⁵È nə wɔ́ byè yil á n'á càrh nɛ lwɛlɛ cὲnὲ rέ tὲbέ à wὲrhέ ába mɔ́ yilə? È nə wɔ́ byè yil á ŋwɔ̀l kǎzɔ̌m mɔ́ mɔ̀bɔ́ à yó-cǝ́bal mɔ́ mǝ́ ń nywὲ e jà ń nǝ́ zǝ mɔ ń mǝ́ ń pár jɛ̃̀ mɔ́? Nyǐ á j'á twĩ lwɛlɛ páá.⁶Nəcὲndέ yìlnə mó dùr n vò n zə bǝ̀ kùr ne, n zɛ̃̀ n cĩ bi Zhozefu zɔmà nέ cìcì. ⁷Bə lyár mɔ bə wɔ̀: Wɔ́ etǝr à yó-cǝ́bal mɔ́ nǝ́ ń zɔ̀m nɛ́ èta mɔ́? Bǝ̀ Yi yìlì ǹ tùntùnnǝ̀ bé ǹdǝ́ bǝ̀ gǝ twĩ̀ tum rí tɛ̀bɛ́ dwí rí!⁸Nyǐ nǝ́ yǝ̀ sǝ̀byǐ mú mɔ̀bɔ́ nǝ́ y'ǎ nɔ nǝ́ ywǝ́ǝ́lé w mó zə nǝ́ shí Kanaã tənà y w nə b'ě càrh mɔ́ nà? Etər nǝ́ nǝ m'ǎ tó né nǝ́ ŋwɔ̀ sǝ̀byǐ ráá sánǝ́má ǹ yó-cébal sõ jù wə? ⁹Lò mó mɔ̀bɔ́ bǝ̀ gǝ tú bǝ̀ nɔ ku w ń sõ mó, sə bə gu mu, sə bə ce nǝ́myɛ jǐrh nǝ́ yó-cǝ́bal mɔ́ yómǝ́. ¹⁰Nǝ̀cɛ̀ndέ yìlnə mó zɛ̃̀ n wɔ̀: Sǝ kɔn yál ǹdǝ á zɔ̀m nɛ́! Lò mó mɔ̀bɔ́ bǝ̀ nɔ kǎzɔ̌m nɔ ń sõ mó, ná-cí mà n yǝ̀ yóm-bal, sǝ dóó t'â la ámyɛ̌ yó w jǒm yé.¹¹Lò gakó já n yəǝ̀ làlà n só ń yóló w tɛ̃́ n zɛ̃̀ n bwèlé ń yóló wə. ¹²Nǝ̀cὲndέ yìlnə mó ji kùr n pyà náncɛ y yóló w wə, n vò n gu yó bə gakó nyɛ̃́ mɔ́ sõ. Bə zɛ̃̀ bə nǝ kǎzɔ̌m mɔ́ Bɛ̃zhamɛ yóló w wẽ́. ¹³Bə j'a kǎr bǝ̀ kàmǝ̀zwǐsí, lò gakó ká n kwè ń zhĩĩ rí n zhĩ ń bǝ̀na y nɛ, bə k'a kwɛ̃̀ bǝ̀ la cɔ w wa.¹⁴Zhəda ǹdǝ́ ń da-byǎ bέ kwɛ̃̀ bə vò bə yí Zhozefu sõ kὲlέ wa, ǹdǝ́ Zhozefu yà ń gwẽ̌ ŋwέnέ. Bə j'a tu bə zə bǝ̀ yǝ́rh bə pú tɛ̃́ ń yé né. ¹⁵Zhozefu zɛ̃̀ n bwǝ̀rh be n wɔ̀: Bǝ̀kɔ́n tum á twĩ̀ mú? Á yǝ̀l bǝ̀ bal mɔ̀bɔ́ ǹdǝ àmyɛ́ ta mɔ́ nǝ́ ń lwar ywẽ̀ nà?¹⁶Zhəda lyár mɔ n wɔ̀: Wɔ́ bǝ̀kɔ́n nǝ́ m'ǎ wɔ̀ à yó-cǝ́bal mɔ́ nɛ nɛ́? Wɔ́ etǝr bùrì nǝ́ m'ǎ pyà? Yi nɔ ǹ tùntùnnǝ̀ bé lwɛlɛ rɛ́. Nyǐ nǝ́ jǐrh à yó-cǝ́bal yómǝ́, nǝ́myɛ̌, ǹdǝ́ mɔ̀bɔ́ bǝ̀ nɔ kǎzɔ̌m mɔ́ ń sõ mó ga ¹⁷Zhozefu wɔ̀: Bǝ̀ Yi yilì ni, àmyέ bǝ̀k'a wὲrhέ èta yé. Lò mó mɔ̀bɔ́ bǝ̀ nɔ kǎzɔ̌m mɔ́ ń sõ mó, wɔ́ ńmyɛ̌ ń mà n jǐrh à yóm. Ámyɛ̌ kwɛ̃̀-na á vò á da sõ ǹdǝ́ yǝ̀-zùlə.¹⁸Zhəda twẽ̌ n yí Zhozefu yala nɛ, n wɔ̀ mɔ: À yó-cébal, ǹ gǝ wɔ́ Yi lò, sǝ́ yẽ̌ ǹ tùntùnnə mó cĩ́ mú zɔ̀mὲ rǝ̀dù, sə ǹ bǝ̀ lyim kwè ǹdǝ́ mo yé! bǝ̀ ǹmyέ ǹdǝ́ Faraɔ̃ ga wɔ́ rǝ̀dù. ¹⁹Wɔ́ à yó-cébal mɔ́ ń yà ń bwǝ̀rh ń tùntùnnə bé n wɔ̀: Á da mɔ gwẽ̌ ŋwέnέ? N súlí n wɔ̀: Á zhe da-byǐ dõ?²⁰Nǝ́ lyár nǝ́ wɔ̀: Nyǐ nǝ́ zhe da ń ŋwɛ́nɛ́ ń cɛ, ǹdǝ́ nǝ́ da byǐ námpɔ́lɛ́, bǝ̀sɔ́bwɛ̀lɛ́ nǝ́ da mɔ́ lùl mo ń náncɔɔrɛ wẽ́, sǝ bǝ̀sɔ́bwɛ̀lɛ́ y èmyɛ́ y'à zhe zɛ̀mbal sǝ ń cùwǝ̀, bǝ̀myɛ́ga wɔ́ bǝ̀ ná nɛ, wɔ́ ń dúdú ń dàl, sǝ da mɔ́ só mo ²¹Rǝ̀myέ yó, ǹ wǝ̀l ǹ tùntùnnə bé ne: Zǝ-nǝ mo á bǝ̀ à sono mùnì ga à cìcì nǝ mɔ ǹdǝ́ à yǝ́-byǐ ²²Sǝ nǝ́ y'ǎ lyár à yó-cébal mɔ́ nǝ́ wɔ̀: Nyǐ bǝ̀sɔ́bwɛ̀lɛ́ y wàr è la zhǐr e yẽ̌ è da nɛ yé, è gǝ zhǐr, da mɔ́ mà cì.²³Rǝ̀myέ yó, ǹ zɛ̃̀ ń wɔ̀ ǹ tùntùnnə bé ne: Á nyɛ̃́ mɔ́ námpɔ́lέ y gə yǝ̀ ába tó e bà, à t'â la shɔ̀nɔ́ á bǝ̀ à yé né yé. ²⁴Sə nǝ́ gǝ́ kwɛ̃̀ nǝ́ vò ǹ tùntùnnə à da mɔ́ sõ mú, nə y'ǎ cĩ́ mu ǹ nyí rí. ²⁵Nǝ́ da mɔ́ wǝ̀lǝ̀: Ká-na á kwɛ̃̀ a vò a yè kùjú námpɔ́lɛ́ á m'á bà. ²⁶Sə nǝ́ lyár mɔ nǝ́ wɔ̀: Nyǐ nǝ́ wàr nǝ́ m'ǎ vò ǹdǝ́ nǝ́ nyɛ̃́ mɔ́ tɛ̀nɛ́ ǹdǝ́ nǝ́ba yé, nǝ́ t'á la yé, bǝ̀ nǝ́ wàr bal mɔ́ mɔ̀bɔ́ yé né nǝ́ m'a vò né, ǹdǝ́ nǝ́ nyɛ̃́ mɔ́ gǝ yǝ̀ nǝ́ba tó yé, rǝ̀myɛ́ wɔ́ nǝ́ nyɛ̃́ gǝ ŋwɛ́nɛ́ ǹdǝ́ nǝ́ba dúdú e fòró nǝ́ vò.²⁷Rǝ̀myέ yó, ǹ tùntùnnə à da mɔ́ zɛ̃̀ n wɔ̀ nǝ́ba: Á yě b'à kɛ̃ mɔ́ wɔ́ byǎ bǝ̀lyè sásálaa ń lùl n pɛ. ²⁸Mǝ̀dù jé n yẽ̌ ne, à bùl bǝ̀ wɔ́ gɔ-ku ò zɔ mɔ o dɔ̃̀. À j'â k'â yǝ̀ mo nɛ yé, kɔn b'e yí zà. ²⁹Á zɛ̃̀ á n'á yǎl á zwẽ mɔ̀bɔ́ myɛ kǝ́dò á yẽ̌ ne! Sǝ nyǐ lwɛlɛ gə yú mu, á m'ǎ ce àmyέ mɔ̀bɔ́ à jǐrh náncɛ à ywəsé pwèlè mó, cì a vò cúlú ǹdǝ́ zúzúnú nánfɔ̀lɔ̀.³⁰Wɔ́ rǝ̀myέ è ce, à gə kwɛ̃̀ à zhǝ̀l ǹ tùntùnnə à da mɔ sõ ǹdǝ́ bǝ̀sɔ́bwὲlέ y kὲbέ yǝ̀ nǝ́ba tó, ńmyɛ̌ ǹdǝ́ bǝ̀sɔ́bwὲlέ y nyǔ mú gǝ́ lyẽ dwã nɛ mɔ́ ce, ³¹ń gə púrí è tὲnέ ń mà n cì. Ǹ tùntùnnə nə da mɔ́, ń yó w pwèlè mó, mà n vò cúlú ǹdǝ́ wu-zhùlù nánfɔ̀lɔ̀. ³²Lwar bǝ̀ nyǐ àmyɛ́ ǹ tùntùnnə mó shὲnέ n zwẽ bǝ̀sɔ́bwὲlέ yò w n zhĩ è da yé né, n wɔ̀: À gə yǝ̀ mɔ zə a kwɛ̃̀ a b'a pɔ̃́, à m'a zhĩ rǝ̀ dóó w à nyǔ mú púlǝ́púlǝ́ wẽ́, à da yé né!³³Èlǎsɛ̃́, à n'â lwǝ̀l mó bǝ̀ ǹ shὲnέ a mɛ̃ nyɔ̀nɔ̀ a yǝ̀ à yó-cǝ́bal mɔ́ yóm, bǝ̀sɔ́bwὲlέ y jàà wa! S'e tó è zhὲmmá bέ nɛ e kwɛ̃̀! ³⁴Etər à m'a tó né a kwɛ̃̀ a vò à da sõ ǹdǝ́ bǝ̀sɔ́bwὲlέ y kὲbέ gə yǝ̀ ne tó? Nyǐ à t'â yǎl a yǝ̀ kɔn tɛ̀bɛ́ rǝ̀ la à da wu-zhìlù kɔn yál yé!

¹Zhozefu yǝ̀ ŋwὲnέ n pyέnέ lyì bí byὲbέ gakó bǝ̀ y'à kǝ́kɛ́lɛ́ mɔ mɔ́ yé né yé. Ń zɛ̃̀ n bya n wɔ̀: Ce-nǝ lyì bí gakó du pwẽ̀ ne. N zɛ̃̀ n byili ń cìn ń da-byǎ bέ nɛ, ǹdǝ́ lyì bí dwã bɛ́ mǝ̀dù ga kǝ́ ń tὲnέ ǹdǝ́ mɔ yé. ²N zɛ̃̀ ń nǝ́ ń kúrh dɛ̃́dɛ̃́, rǝ̀myɛ́ ce Ezhibti lyì bí nyὲὲ, Faraɔ̃ kὲlέ y lyì bí myɛ nyɛ̀ɛ̀. ³Zhozefu zɛ̃̀ n wɔ̀ ń da-byǎ bέ nɛ: Àmyέ wɔ́ Zhozefu! À da gwẽ̌ ŋwέnέ?Sə ń da-byǎ bέ gǝ́ y'à n'ê kəkə ń yé né mó ce, bǝ̀ yǝ̀ ŋwὲnέ bə lyár mɔ yé.⁴Zhozefu wɔ̀ ń da-byǎ bɛ́ nɛ: bwǝlse-nǝ à yala nɛ. Bə twẽ̌ bə yí. N zɛ̃̀ n wɔ̀ bɛ: Àmyέ wɔ́ Zhozefu, á da-byǐ mú mɔ̀bɔ́ á kwè á yè bə zə bə m'e vò Ezhibti mú. ⁵Èlǎsɛ̃́, á bǝ̀k'á zɛ̃̀ á ce á wun zhìlì ráá nǝ̀ n'ê zɛ̃̀ á gǝ́ yè ne nyɔ̀nɔ̀ mɔ́ yil yé, bə wɔ́ Yi rǝ̀ twĩ̀ ni a tó yé a bà, á myǝ̌l ré zõ yilə. ⁶Nyǐ è wɔ́ byinə nǝ̀lyè nyǎn rέ èlǎsɛ̃́ nɔrh mɔ́ gǝ́ tu cɔ w w nέ. E jà byinə né nǝ̀nu y nyὲbέ nǝ̀ gwẽ̌ bàn mɔ́, vwál t'â la vwál yé, jòró myɛ t'â la jǝ̌r yé.⁷Yi twĩ̀ ni a tó á yé mùnì ga a tɛnɛ kùjú a cĩ́ ába tənà y kὲbέ wẽ́, a sɛ̃ ába á gwẽ̌ zə myǝ̌l sə á nǝ á cìn vwǎrh nánfɔ̀lɔ̀ è lú è wẽ. ⁸È dǝ̀ ámyɛ̌ á twĩ̀ ni nyɔ̀nɔ̀ yé, wɔ́ Yi rǝ̀ twĩ̀ ni. Rǝ̀myέ rǝ̀ ce a jǐrh Faraɔ̃ da, à wɔ́ ń kὲlέ y púlǝ́púlǝ́ yó-cǝ́bal, a súlí à n'â nyǐ Ezhibti tənà y púlǝ́púlǝ́ yò.⁹Cə-nə jàn nέ á kwɛ̃̀ làlà á vò á wɔ̀ á da nɛ: Nyǐ ǹ byǐ Zhozefu zɔ̀m n wɔ̀: Yi ce a jǐrh Ezhipti púlǝ́púlǝ́ yó-cǝ́bal, zɛ̃̀ ń bǝ̀ à sõ làlà ǹ bǝ́ká jíjírhí yé ¹⁰Ǹ bǝ̀ ń jòm Gɔshɛn nyí rí wẽ́ à yala nɛ, ǹmyέ ǹdǝ́ ǹ byǎ bέ ǹdǝ́ ǹ nὲmέ nέ, ǹdǝ́ ǹ vǝ̃̌-ywàálέ ǹdǝ́ ǹ vwàmá nánfwààlέ e súlí kɔn tὲbέ gakó rǝ̀ wɔ́ ǹ nyǎn mɔ́. ¹¹Gàà mɔ́, à m'a pɔ̃́ kɔn tὲbέ gakó ǹ zhe rǝ̀ tum mú, mùnì ga kaka bǝ̀k'a mùrì mú yé, ǹmyέ ǹdǝ́ ǹ kὲlέ lyì bí e súlí kɔn tὲbέ gakó rǝ̀ wɔ́ ǹ nyǎn mɔ́, bǝ̀ nɔrh mɔ́ gwẽ̌ m'a yǝ̀ nέ byinə nǝ̀nu.¹²Á cìcì mú yírhǝ́ nɔwa, à nyɛ̃́ Bɛ̃zhamɛ myɛ yírhə nɔwa, bǝ̀ wɔ́ àmyέ cìcì mú à n'â zɔ̀m ǹd'ába. ¹³Cĩ́-nə à ŋwɔ̀nɔ́ w nánfɔ̀lɔ̀ w à zhe Ezhibti ní mú ǹdǝ́ kɔn rέ tὲbέ á ŋwὲnέ á nə mɔ́ gakó à da nɛ. Ce-nə jàn nέ á yí á ce à da bǝ̀ nyɔ̀nɔ̀ làlà.¹⁴Zhozefu já n zɛ̃̀ ń nǝ́ ń kwǝ̀ǝ̀lè ń nyɛ̃́ Bɛ̃zhamɛ ǹdǝ́ ń nǝ́ ń kúrhǝ́. Bɛ̃zhamɛ myɛ nǝ́ ń kwǝ̀ǝ̀lè mo ǹdǝ́ ń nǝ́ ń kúrhǝ́. ¹⁵Zhozefu kwǝ̀ǝ̀lè ń da-byǎ bέ gakó ǹdə ń nǝ́ ń kúrhǝ́. Rǝ̀myέ kwã nέ bə zhərh ǹdǝ́ mɔ.¹⁶Zɔ̀mà nɛ́ j'a yí Faraɔ̃ sõ kὲlέ wa. Bǝ zhe bǝ̀ Zhozefu da-byǎ bɛ́ túwǝ́: Rǝ̀myɛ́ ce wu-nyɔ̃̀ zə Faraɔ̃ ǹdǝ́ ń tùntùnbə bé rǝ̀myέ yilə, ¹⁷Faraɔ̃ zɛ̃̀ n wɔ̀ Zhozefu ni: Wál ǹ da-byǎ bέ nɛ: Zhĩ-nə á bǝ̀nesé ne á zhĩĩ rí, á kwɛ̃̀ á vò Kanaã tənà y wa, ¹⁸Sǝ á k'á zə á da ǹdǝ́ á kὲlέ y lyì bí á m'á kwɛ̃̀ á bǝ̀ à sõ. À m'a cĩ́ ába Ezhibti tənà y cɛ y kὲbέ è j'â búl è càn dɛ̃́dɛ̃́ mɔ́ wẽ́ mùnì ga á jí è wǝ̀-ènyɔ̀ɔ̀lέ.¹⁹Ǹmyέ zhe sɔ́má, pə bɛ nyí ń wɔ̀: Á m'ǎ wɛ̀rhɛ́ èta. Zwẽ-nǝ Ezhipti tǝnà y búlǝ́ vwǝ̃-tur rí á pǝ á byǎ bɛ́ ǹdǝ́ á kana bɛ́ nɛ á vò á zǝ á da á m'á bà. ²⁰Á bək'á pyìrhí á nyǐ wẽ̀ ré tὲbέ á n'á zhǐr á yẽ̌ tɛ̃́ mɔ́ ǹdǝ́ wu-zhùlù yé, bǝ̀ Ezhibti tənà y wẽ̀ ré tὲbέ rǝ̀ càn mɔ́ m'a yǝ̀ ámyɛ̌ nyǎn.²¹Esərayɛl byǎ bέ wὲrhέ kɔn rɛ́ tὲbέ bǝ̀ byili bi mú. Faraɔ̃ ce Zhozefu pə bɛ vwǝ̃tur e súlí kùjú, sɔmá y kǒ mú yilə. ²²N pə címsi gàndɛ lò gakó ne, n zɛ̃̀ n pə wár-kùlsì zwã̌-àtɔ̀ ǹdǝ́ címsi gàndɛ rǝ̀nu Bɛ̃zhamɛ nɛ. ²³N súlí n pə bǝ̀nərh shí sə zhĩ wẽ̀ ré tὲbέ rǝ̀ j'â nyὲ du rǝ̀ dwã bέ Ezhibti ní mú, e súlí bǝ̀nə-nyὲrh shí sə zhĩ bǝ̀lέ ǹdǝ́ búrú e súlí kùjírǝ́ dwã ń da mɔ́ sɔ́má y kǒ yilə.²⁴N zɛ̃̀ n yẽ̌ ń da-byǎ bέ nɛ bə zhǐ, sə bə gə tú bə n'ê zhǐ yi ní ń wǝ̀l be: Á bǝ̀k'á zɛ̃̀ á zhe dwã nɛ sɔ́má y yó yé. ²⁵Bə zhì Ezhibti ní bə kwɛ̃̀ bə yí bǝ̀ da Zhakɔɔbɛ sõ, Kanaã tənà y wa, ²⁶bə cĩ́ mu bə wɔ̀: Nyǐ Zhozefu gwẽ̌ ŋwɛ́nɛ́, è wɔ́ ń gaga mɔ́ ń cǐ Ezhipti tǝnà y púlǝ́púlǝ́. Sə rǝ̀myέ yǝ̀ kaka wὲrhέ Zhakɔɔbɛ nɛ yé, bǝ̀ ń yà ń tá ń zwẽ nyí yé.²⁷Bə k'a kwè zɔ̀mà nέ nyὲbέ gakó Zhozefu yà ń zɔ̀m ǹdǝ́ bɛ mɔ́ bə cĩ́ mu. Rǝ̀myέ kwã, Zhakɔɔbɛ nɔ vwətur rí tὲbέ Zhozefu pɔ bǝ̀ la m'e kwè mo mó, n já n ká n nə ń cìnə. ²⁸Esərayɛl já n búbwéé n wɔ̀: À byǐ Zhozefu yírhə gwẽ ŋwέnέ! Rǝ̀myɛ́ dúdú yú ni! À m'a vò a nə mɔ éfòró a cì!

¹Esərayɛl já n zɛ̃̀ n shǝ́r n kwè sɔ́má ǹdǝ́ ń kɔn rέ tὲbέ gakó ń yà ń zhe mó. Ń gǝ́ tú n yí Bɛɛr-Shəba, n zwǝ́l vwǝ̃̀ n pə ń da Yəzakɛ Yi rí ni. ²Yi tó kɔn rέ tὲbέ Esərayɛl nɔ cəcɛ̃ èdù dɛnnɛ rə zɔ̀m ǹdǝ́ mɔ rə byẽ̀ mo rǝ̀ wɔ̀ Zhakɔɔbɛ! Zhakoɔɓɛ! N lyár n wɔ̀: Nyǐ ni! ³Yi zɛ̃̀ rə wɔ̀ mɔ: Àmyέ wɔ́ Eɛlɛ, ǹ da mɔ́ Yi rí. Bək'á dùr ywẽ ǹdǝ́ Ezhibti zhəl yé, b'à m'a ce ń jǐrh dwí nánzhəzhɔ̌ gàà mɔ́. ⁴Àmyέ cìcì mú m'a tó mó a vò Ezhibti, à m'a k'a zə mɔ́a shí gàà ń kwɛ̃̀ ń bà. Sǝ wɔ́ Zhozefu ń mà n pyi ǹ yírhǝ́ né.⁵Zhakɔɔbɛ já n zhì Bɛɛr-Shəba nέ n zhǐr. Esərayɛl byǎ bέ kwè bǝ̀ da Zhakɔɔbɛ ǹdǝ́ bǝ̀ bǝ̀sɔ́ná bέ e súlí bǝ̀ kana bέ ǹdǝ́ vwǝ̃tur rí tὲbέ Faraɔ̃ yà ń pɔ bǝ̀ la m'e pwà bɛ mɔ́. ⁶Bə zə bǝ̀ vwàmá nέ ǹdǝ́ kɔn tὲbέ gakó bǝ̀ y'à nɔ Kanaã tənà y w mɔ́. Zhakɔɔbɛ zhǝ̀l Ezhibti ǹdǝ́ ń dwí rí gakó ǹdǝ́ ń byǎ bέ ⁷ǹdǝ́ ń nὲmέ nέ ǹdǝ́ ń bǝ̀kwá bέ e súlí ń byǎ bέ bǝ̀kwá bέ gakó. Ń zə ń dwí rí gakó n mə n vò Ezhibti.⁸Nyǐ Esərayɛl byǎ bέ byὲbέ bǝ̀ tú Ezhibti mú yilə né: Zhakɔɔbɛ ǹdǝ́ ń byǎ bέ: Orɔbɛn wɔ́ Zhakɔɔbɛ byì-cɛ yá. ⁹Orɔbɛn byǎ bέ: Anɔɔkɛ ǹdǝ́ Pəlu ǹdǝ́ Esərɔ̃ e súlí Kərəmi. ¹⁰Shəmənyɔ̃ byǎ bέ: Yəməwɛl ǹdǝ́ Yəmyin ǹdǝ́ Owaadɛ ǹdǝ́ Yakɛ ǹdǝ́ Səwaarɛ e súlí Shəwul, Kanaã lyì bǝ̀kɔ́ mɔ́ byǐ mú. ¹¹Levyi byǎ bέ: Gɛrəshɔn ǹdǝ́ kəyaatɛ e súlí Mərəri.¹²Zhəda byǎ bέ: Eɛrɛ ǹdǝ́ Onã ǹdǝ́ Shəla ǹdǝ́ Pɛrɛɛsɛ e súlí Zəra. Eɛrɛ ǹdǝ́ Onã cù Kanaã tənà y wẽ. Pɛrɛɛsɛ byǎ bέ Esərɔ ǹdǝ́ Amul. ¹³Yəsakaarɛ byǎ bέ: Tɔla ǹdǝ́ Puvə ǹdǝ́ Yəshuubi e súlí Shəmərɔ̃. ¹⁴14Zabyəlɔ̃ byǎ bέ: Sɛrɛɛdɛ ǹdǝ́ Elɔ e súlí Yaləyəə. ¹⁵Wɔ́ Lɛya ǹdǝ́ Zhakɔɔbɛ byǎ bέ bǝ̀ lùl Məzopotəmyi dɛ̃̌-sõ mó e súlí bǝ̀ nǝkɔ́ Dinə. Bǝ̀myέ ǹdǝ́ bǝ̀ byǎ bέ ǹdǝ́ bǝ̀ bǝ̀kwá bέ gakó y'à wǝ́ nunə shǝ́-ètɔ̀ ǹdǝ́ bǝ̀tɔ̀.¹⁶Gaadɛ byǎ bέ: Səfɔ ǹdǝ́ Aji ǹdǝ́ Shuni ǹdǝ́ Esəbɔ ǹdǝ́ Eri ǹdǝ́ Arodi e súlí Arəli. ¹⁷Asɛɛrɛ byǎ bέ: Yəməna ǹdǝ́ Yəshəva ǹdǝ́ Yəshəvyi ǹdǝ́ Bərəya e súlí bǝ̀ nəkɔ́ Səra. Bərəya yà ń zhe byǎ bǝ̀lyè, Ebɛɛrɛ ǹdǝ́ Mələcəə. ¹⁸Bǝ̀myέ mɔ́ y'à wɔ́ Zhələpa mɔ̀bɔ́ Labã yà ń pɔ ń bǝ̀kɔ́ Lɛya nɛ, Lɛya zɛ̃̀ n kwè n pə Zhakɔɔbɛ nɛ mɔ́ byǎ: bǝ̀ gakó y'à wɔ́ nunə shí ǹdǝ́ bwǝ̀ldù.¹⁹Zhakɔɔbɛ kɛ̃ Arashəə byǎ bέ: Zhozefu ǹdǝ́ Bɛ̃zhamɛ. ²⁰hibti tənà y wa, Zhozefu zə One, cɔ w vwĩ̀-zwǝ́lnə Pɔtəfera bǝ̀kɔ́ Asənaatɛ n mə n lù Manasɛ ǹdə Efərəyim. ²¹Bɛ̃zhamɛ byǎ bέ: Bɛɛla ǹdǝ́ Bəkɛɛrɛ ǹdǝ́ Ashəbyəə ǹdǝ́ Gəra ǹdǝ́ Naamã ǹdǝ́ Eyi ǹdǝ́ Orɔɔshɛ ǹdǝ́ Məpyim ǹdǝ́ Upyim e súlí Arədɛ. ²²Wɔ́ byǎ bέ byὲbέ Arashəə lùl n pə Zhakɔɔbɛ nɛ mɔ́. Bǝ̀ gakó yàl nunə shí ǹdǝ́ bǝ̀na.²³Dan byǐ mú: Uushim. ²⁴Nəfətəlyi byǎ bέ: Yasəyəə ǹdǝ́ Guni ǹdǝ́ Yəsɛɛrɛ e súlí Shəlɛm. ²⁵Bǝ̀myέ mɔ́ wɔ́ Byəla mɔ́ mɔ̀bɔ́ Labã yà ń pɔ ń bǝ̀kɔ́ Arashəə ne, Arashəə zɛ̃̀ n kwè n pə Zhakɔɔbɛ nɛ mɔ́ byǎ. Bǝ̀ gakó y'à wɔ́ nunə bwàlpyὲ.²⁶Zhakɔɔbɛ dwí rí lyì bí, byὲbέ bǝ̀ y'à wɔ́ ń jal dwí rí rǝ̀ tó rə bǝ̀ Ezhibti mú gakó y'à wɔ́ nunə shǝ́-shǝ̀ldù ǹdǝ́ bwǝ̀ldù, ń byì-cansέ twǝ́r tὲnέ yé. ²⁷Zhozefu byǎ bέ ń lùl Ezhibti ní mú yàl bǝ̀lyè. Zhakɔɔbɛ kὲlέ y lyì bí byὲbέ gakó bǝ̀ tú Ezhibti mú yàl nunə shǝ́-shàlpyὲ.²⁸Zhakɔɔbɛ zɛ̃̀ n twĩ̀ Zhəda n tó yé n vò n nə Zhozefu mùnì ga n bǝ n jəl mo Gɔshɛn nέ; bǝ̀ bǝ̀ la Gɔshɛn. ²⁹Zhakɔɔbɛ lyẽ ń eshã-vwǝ̃tu wə, n vò n jəl ń da Esərəyɛl. Zhozefu gǝ: já n nə mɔ, n já n zɛ̃̀ ń nǝ́ ń kwǝ̀ǝ̀lè mo ǹdǝ́ ń nǝ́ ń kúrhǝ́. ³⁰Rǝ̀myέ yó, Esərayɛl wəǝ̀l mo: Èlǎsέ, à wɔ̌ à cì, bǝ̀ ǹ yírhǝ́ gwẽ̌ ŋwέnέ sə à yírhǝ́ nɔ mɔ́.³¹Zhozefu zɛ̃̀ n wɔ̀ ń da-byǎ bέ ǹdǝ́ ń da dwí rí lyì bí dwã bέ nɛ: À m'a vò a cĩ́ Faraɔ̃ nɛ a wɔ̀: À da-byǎ bέ ǹd'â da dwí rí lyì bí bǝ̀ gakó y'à wɔ Kanaã tənà y w mɔ́ tú à sõ. ³²Bǝ̀ wɔ́ vwã̌-ènɔ̀nà dwí, bǝ̀ n'ê kɔ̀n vwàmá. Bǝ̀ zə bǝ̀ vǝ̃̌-ywàálέ ǹdǝ́ vwàmá nánfwààlέ ga e súlí kɔn rέ tὲbέ bə zhe mó gakó bə m'e bà.³³Èta, Faraɔ̃ gə byẽ̀ ába n bwǝ̀rh tum rí tὲbέ á n'á twĩ̀ mú shò kwã, ³⁴S'á lyár á wɔ̀: Nyǐ ǹ tùntùnnə bé wɔ́ vwàmá bǝ̀ n'ê kɔ̀n bǝ̀sɔ́nέ yi ní ga kɔn b'e yí zà, ǹdə nǝ́ dabá ta. Rǝ̀myέ m'a ce á vò á jòm Gɔshɛm nyí rí wẽ́, bǝ̀ Ezhibti lyì bí j'â súl vwã̌-ènɔ̀n gakó.

¹Zhozefu zɛ̃̀ n vò n cĩ́ Faraɔ̃ nɛ, n wɔ̀: À da ǹd'â da-byǎ shí Kanaã tənà y w bə bà. Bə zɔ bə vǝ̃̌-ywàálέ ǹdǝ́ bǝ̀ vwàmá nánfwààlέ ǹdǝ́ kɔn tὲbέ bǝ̀ zhe mó gakó bə m'e bà, sə bǝ̀ zul Gɔshɛn nέ. ²Zhozefu yà ń vùr nunə bǝ̀nu ń da-byǎ bέ wẽ́ n mə n vò Faraɔ̃ sõ.³Faraɔ̃ zɛ̃̀ n bwǝ̀rh be n wɔ̀: Wɔ́ bǝ̀kɔ́n tum á n'á twĩ̀? Bə lyár mɔ bə wɔ̀: Nyǐ ǹ tùntùnnə bé wɔ́ vwã̌-ènɔ̀nà dwí ǹdǝ́ bɛ ǹdǝ bǝ̀ dabá ta. Wɔ́ vwàmá cǝ̌r è wɔ́ nǝ́ tum ⁴Bə súlí bə wɔ̀ Faraɔ̃ nɛ: Nǝ́ tú nǝ́ la tǝnà w jǒm, bǝ̀ gɔ k'ê tɛ̀nɛ́ ǹ tùntùnnǝ bé vwàmá nɛ́ n'ê dɔ̀m yé, bǝ̀ nɔrh mɔ́ Kanaã tǝnà y wɔ mɔ́ cɛ̀ dɛ̃́dɛ̃́, rǝ̀myɛ́ ce pǝ sɔ́má ǹ tùntùnnǝ bé ne bǝ vò bǝ jòm Gɔshɛn nyí rí wǝ.⁵Faraɔ̃ zɛ̃̀ n wɔ̀ Zhozefu ni: Ǹ da mɔ́ ǹdǝ́ ǹ da-byǎ bέ tú ǹ sõ. ⁶Nyǐ Ezhibti tənà y è pyě ǹ yé né è la, pyǎ jàà kὲbέ è càn du è dwã bέ mɔ́ ń pə bɛ bə jòm. Bǝ̀ bǝ̀ jǒm Gɔshɛn nyí rí wẽ́. Sə ǹ gə yě bǝ̀ lyì ŋwέnέ bǝ̀ wẽ́ bǝ̀ yě kɔ̀nɔ̀ w yé shò, sǝ́ cír bi bə nyǐ àmyέ cìcì mú vwàmá nέ yò.⁷Zhozefu zə ń da Zhakɔɔbɛ n bǝ̀ n byili Faraɔ̃ nɛ. Zhakɔɔbɛ cĩ́ bwǝl Faraɔ̃ yó. ⁸Faraɔ̃ zɛ̃̀ n bwǝ̀rh Zhakɔɔbɛ n wɔ̀: Ǹ byinə né yú màngala èta? ⁹Zhakɔɔbɛ lyár mɔ n wɔ̀: È zhe byinə zɔ̌m ǹdǝ́ zhǝ́-ètɔ̀, à y'a zhì tənà w a lyɛ̃ a vò è dõ w ǹdə zhə-bal ta mɔ́. Sǝ à nyǔ mú byinǝ né dwã nɛ zɔ lyààrɛ dɛ̃́dɛ̃́ nǝ̀ yǝ̀ nánzhǝzhɔ̌ yàl yé. Mǝ̀ yǝ̀ à dabá nyǎn mɔ́ kùr ne yí yé, e jà bǝ̀myɛ y'à n'ê zhǝ̀l dɛ̃̌ ǹdə àmyɛ ta. ¹⁰Zhakɔɔbɛ kǝ́ n cĩ́ bwǝl Faraɔ̃ yó, rǝ̀myɛ́ kwã nέ, n du Faraɔ̃ sõ n kwɛ̃̀ n vò ń sõ.¹¹Zhozefu zə ń da ǹdǝ́ ń da-byǎ bέ n vò n cĩ́ jàà kὲbέ è càn du jààsέ dwã bέ ɔ́ɔ wẽ́, Ezhibti tənà y wa, Araməsɛɛsɛ gə cǐ má nyí rí wẽ́ ǹdə Faraɔ̃ gǝ́ yà ń pɔ mɔ nyí ní. ¹²Zhozefu nyǐ kɔn tὲbέ gakó ń da ǹdǝ́ ń da-byǎ bέ ǹdǝ́ ń da dwí rí lyì bí dwã bέ gakó y'à zhe rǝ̀ tum mú yò, kɔn tó ǹdǝ bǝ̀sɔ́ná bέ yó w gǝ́ mǝ̌ nɛ́.¹³Nɔrh mɔ́ gǝ́ y'à cὲ dɛ̃́dɛ̃́ mɔ́ ce kùjú w tú o b'o lyὲ tənà y púlǝ́púlǝ́ wẽ́. Ezhibti lyì bí ǹdǝ́ Kanaã lyì bí y'à k'ê yǝ̀l kɔn tὲbέ bǝ̀ m'a wὲrhέ ǹdǝ́ nɔrh mɔ́ mǝ̀myέ mɔ́ yé. ¹⁴Zhozefu tó bǝ̀lέ y ń yà ń nǝ́ ń yè mó dɛnnɛ n pwà Ezhibti ǹdǝ́ Kanaã tənèsé sǝ̀byǐ mú gakó, n zɛ̃̀ n vò n cĩ́ mu Faraɔ̃ sõ kὲlέ wa.¹⁵Sǝ̀byǐ mú gǝ́ tú mǝ zhɛ̀ Ezhibti ǹdə Kanaã tənèsé wẽ́ lyɛ́lyɛ́ yó né. Ezhibti lyì bí zɛ̃̀ bə b'e nə Zhozefu bǝ̀ zhe: Pǝ nǝ́ba búrú! È nǝ wɔ́ byè yil ǹ m'a yẽ̌ nǝ́ba nǝ́ cì ǹ yé né? Nyǐ sǝ̀byǐ k'ê tɛ̀nɛ́ yé ¹⁶Zhozefu lyár bɛ n wɔ̀: sǝ̀byǐ mú gǝ tɛ̀nɛ́ s'a pǝ á vwàmá nɛ́, s'á yẽ̌ bǝ̀ à m'a pǝ ába búrú nǝ̀ yilǝ. ¹⁷Bə zə bǝ̀ vwàmá nέ bə b'e pə Zhozefu ni, ńmyɛ zɛ̃̀ n pə bɛ kùjú wǝ́, n mǝ zwẽ eshesé ǹdǝ́ vǝ̃̌-ywàálέ ǹdǝ́ vwàmá nánfwààlέ e súlí bǝ̀nesé kùjú w yilǝ. Byin rí rǝ̀myέ mɔ́ wẽ́, ń zwẽ bǝ̀ vwàmá nέ gakó n zɛ̃̀ n pə bɛ kùjú wǝ́.¹⁸Sə byin rí rǝ̀myɛ́ gǝ́ lyɛ̃ kwã nέ, byin rí rǝ̀ pú mú wẽ́ bǝ̀ tú bə nə Zhofefu bə wɔ̀ mɔ: Nǝ́ t'á la nǝ́ yó-cǝ́bal mɔ́ nɛ shòò bǝ̀ sǝ̀byǐ mú zhɛ̀ yé, bǝ̀ nyǐ bǝ̀ zɔ vwàmá nɛ́ bǝ m'e vò nǝ́ yó-cǝ́bal mɔ́ sono, wɔ́ nǝ́ yala ǹdǝ́ nǝ́ cɛsɛ́ dúdú rǝ̀ dàl. ¹⁹Byè yil ǹ nə m'ǎ zɛ̃̀ ń yẽ̌ nǝ́myɛ̌ ǹdǝ́ nǝ́ cɛsɛ́ ga cì? Yě nǝ́myɛ̌ ǹdǝ́ nǝ́ cɛsέ ga, sǝ́ zɛ̃̀ ń pə nǝ́ba kùjú. Nǝ́myɛ̌ ǹdǝ́ nǝ́ cɛsέ ga m'ǎ twĩ̀ nǝ́ pə Faraɔ̃ nɛ. Pə nǝ́ba wẽ̀ dwí nǝ́ dù, èta nǝ́ m'ǎ yǝ̀ nɛ́, nǝ́ zə myǝ̌l nǝ́ t'á la cú yé, mùnì ga nǝ́ cɛsέ myɛ t'â la tɛ̃̀ mãɔ̃ lò tὲnέ sə wẽ́ yé.²⁰Zhozefu já n yè Ezhibti cɛsέ gakó n pǝFaraɔ̃ nɛ, bǝ̀ nɔrh mɔ́ càn rέ gǝ́ y'à já dɛ̃́dɛ̃́ mɔ́ ce, Ezhibti tənà y lò gakó kwè ń cɛ y n yè. Tənà y gakó j'a zɛ̃̀ e jǐrh Faraɔ̃ sǝ̀pwà-kɔna. ²¹È gə wɔ́ lyì bí yilə, ń ce bə gakó jǐrh yómǝ́, kɔn zhì tənà y tɛ̃́ sõ e m'e yí è dɛ̃̌ sõ ²²Sə Zhozəfu yǝ̀ vwì-zwǝ́lnə bé cɛsέ yè yé, bə Faraɔ̃ yà ń kwè nyí rǝ̀dù rə y'à n'ê kwɛrhɛ vwì-zwǝ́lnə bé. Faraɔ̃ y'ǎ ń zhe kùjú ò ŋwɛ́nɛ́ bǝ̀ yil bǝ̀ n'ê jí. Wɔ́ rǝ̀myέ è ce bǝ̀myέ yǝ̀ bǝ̀ cɛsέ yè yé.²³Zhozefu wɔ̀ dwí rí ni: Zà à yè ámyɛ̌ ǹdǝ́ á cɛsɛ́ ga, a pǝ Faraɔ̃ nɛ; Nyǐ-nǝ jíjí dwí à n'â pɛ ába á la dú. ²⁴²⁵Bə lyár mɔ bə wɔ̀: Ǹ ce nə lú cu yé né. Nǝ́ yó-cǝ́bal mɔ́ nyǐ nǝ́ba ǹdǝ́ sónó, sə ń ce nǝ́ jǐrh Faraɔ̃ yómǝ́! ²⁶Zhozefu já n kwè re ǹdǝ́ nyí ta, rǝ̀ j'â gwẽ̌ n'ê jí zà zà: wẽ̀ ré tɛ̀bɛ́ bǝ̀ jǝ̀r mó kùrǝ̀ né nǝ̀nu y yó wə, Ezhibti ní, kùr ré rǝ̀dù y wɔ́ Faraɔ̃ ń cǐ. Vwĩ̀-zwǝ́lnə bé cɛsέ dúdú Faraɔ̃ bə cǐ yé.²⁷Esərayɛl byǎ bέ mɛ̃ bə jòm Ezhibti tənà y wa, Gɔshɛn nέ. Bǝ̀ tú bə b'e nə bǝ̀ sǝ̀pwà cɛrh, bə lù byǎ bə pù bə j'a jǐrh nánzhəzhɔ̌ dɛ̃́dɛ̃́. ²⁸Zhakɔɔbɛ wὲrhέ byinə shí ǹdǝ́ nyàlpyὲ Ezhibti ní, sə ń byinə né púlǝ́púlǝ́ yàl byinə zɔ̌m ǹdǝ́ shǝ́-èna ǹdǝ́ nyàlpyὲ.²⁹Ń cu gǝ́ tú mə bwəlse, ń byẽ̀ Ń byǐ Zhozefu, n wɔ̀ mɔ: Ǹ gə nǝ́ ǹ nyǐ ni ǹdǝ́ sónó zhǝ̀n ga, sə ce ǹ jɛ̃̀ y à cí rí kùr wə, ǹ bǝ̀ká ń ce à cù w Ezhibti ní yé, èta ǹ m'ǎ byili bə ǹ zhe dɔbrɛ ǹdǝ́ wu-bɔ̀nɔ̀ ǹdǝ́ nɛ. ³⁰À gə cùwǝ̀, sǝ́ kwè ne ń mǝ́ shǝ́r Ezhibti ní ń vò ń ce ne à dabá lú-bɔ̀l mɔ́ wa. Zhozefu lyár mɔ n wɔ̀: À m'a wὲrhέ ǹdə ǹ gǝ́ byili ní. ³¹Zhakɔɔbɛ wɔ̀ mɔ: Bwǝl rǝ̀ nyí ń pɛ̃. Sə Zhozefu bwəl mo rǝ̀ nyí. Esərayɛl zɛ̃̀ n lwəl tɛ̃́ ń pyǝ̀nǝ̀ y yǝ́-pὲlέ wa.

¹Ywẽ̀ né nǝ̀myέ mɔ́ gǝ́ lyɛ̃ kwã, bǝ̀ tú bə wɔ̀ Zhozefu ne: Nyǐ ǹ da mɔ́ bǝ jɛ̀ yé. Zhozefu já n zə ń byǎ bέ bǝ̀lyè yǝ́, Manasɛ ǹdǝ́ Efərəyim n mə n vò. ²Lyì zɛ̃̀ bə cĩ́ Zhakɔɔbɛ nɛ bə wɔ̀: Nyǐ ǹ byǐ Zhozefu bàn ǹ sono. Esǝrayɛl já n zɛ̃̀ n pyɛ́nɛ́ ń cìn n jòm dɛ̃̌ ń pal rɛ́ yó.³Zhakɔɔbɛ wɔ̀ Zhozefu ni: Yi ja;;;èn cǝ́bal mɔ́ lyí ni Luzi ní, Kanaã tǝnà y wa. Rǝ cĩ́ bwǝl à yó. ⁴Rǝ wɔ̀ nɛ: À m'a ce ń pù ń jǐrh nánzhəzhɔ̌ mùnì ga ń yǝ̀ dwǝ́ nánzhəzhɔ̌ da. À m'a pə tənà y kὲbέ ǹ dwí rí ni ǹ cu kwã nέ, rə cìní twéé twéé yilə.⁵Sə èlǎsɛ̃́, ǹ byǎ bέ byὲbέ bǝ̀lyè y ǹ lùl Ezhibti ní ǹd'â y'à gwẽ̌ yǝ̀ ǹ sõ twí Ezhibti ní mú, wɔ́ àmyέ byǎ. Efərəyim ǹdǝ́ Manasɛ ga wɔ́ àmyέ byǎ ǹdə Orɔbɛn ǹdǝ́ Shəmənyɔ̃ ta. ⁶Sə byǎ bέ byὲbέ ǹ lùl bǝ̀myέ kwã mɔ́ m'a yǝ̀ ǹmyέ nyǝ̀ná, bǝ̀ m'a zə bǝ̀ zhὲmmá bέ yilə né bə byẽ̀ be, bə m'e pə bɛ bə cəl-tənà yá. ⁷À gǝ́ y'à shí Məzopotəmyi a kwɛ̃̀ à bàn yi ní, Arashəə cù sɔ́má yó, kanaã tənà y wa, ǹd'â dǎl námpɔ́lέ s'a zù Efərata. Sə wɔ́ Efərata sɔ́má y yó gàà mɔ́ à co mo né. Bə n'ê byẽ̀ Efərata èlǎsɛ̃́ bǝ̀ Bɛtələyɛm.⁸Rǝ̀myέ yó, Esərayɛl nɔ Zhozefu byǎ bέ n zɛ̃̀ n bwǝ̀rh n wɔ̀: Byɛ̀bɛ́ èta mɔ́ yẽ̀ lyì? ⁹Zhozefu lyár ń da n wɔ̀: Wɔ́ byǎ bɛ̀bɛ́ Yi pɔ nɛ nyɔ̀nɔ̀ mɔ́. Esərayɛl zɛ̃̀ n wɔ̀: Ce bǝ yí à nyí mùnì a cĩ́ bwǝl bǝ̀ yó. ¹⁰Esərayɛl yà ń cɛ dɛ̃́dɛ̃́ ce ń yírhǝ́ né y'à k'ê bə nǝ́ nɛ cὲnὲ yé. Zhozefu zɛ̃̀ n zə bəsɔná bέ n yí ń yala nɛ, Esərayɛl kwǝ̀ǝ̀lè be, n vwɛ̃ bɛ n mə n dɛ̃ ń cìn ni,¹¹n zɛ̃̀ n wɔ̀ Zhozefu ni: À y'à t'â bùl b'à m'a k'a nə ǹ yé-zwã̌ y kǝ́dò yé, sə Yi gaga mɔ́ ce a nə mɔ́, a nə ǹ byǎ myɛ a súlí! ¹²Zhozefu kwè ń byǎ bέ ń da nèsé yó, n zɛ̃̀ n tu n zə ń yé n pú tɛ̃́ ń yé né. ¹³Zhozefu zə bǝ̀ ga bǝ̀lyè yǝ́: ń yà n zhe Efərəyim ni ǹdǝ́ ń jǝ̀-jĩ́, ń zhǐ Esərayɛl jǝ̀-gwã̀ sõ, ń zhe Manasɛ ǹdǝ́ ń jǝ̀-gwã̀, ń zhǐ Esərayɛl jǝ̀-jĩ́ sõ. N zə bɛ n twẽ̌ n yí Esərayɛl yala nɛ.¹⁴Esərayɛl cèlè ń ń jǝ̀-jĩ́ y n cĩ́ Efərəyim ń wɔ́ nyɛ̃́ mɔ́ yó wə, n zɛ̃̀ n cĩ́ ń jǝ̀-gwã̀ y Manasɛ yó wə: Wɔ́ èta ń búlǝ̀ né y'à zhe né, bǝ̀ wɔ́ Manasɛ gǝ́ yà ń wɔ́ byì-cɛ mɔ́ yilə. ¹⁵Ń cĩ́ bwəl Zhozefu yó n wɔ̀: bǝ̀ Yi rí tɛ̀bɛ́ à da Abǝraham ǹdǝ́ à da Yǝzakɛ zhǝ̀l rǝ̀ yé né mú, Yi rí tɛ̀bɛ́ rǝ̀ zɔ nɛ rǝ vò à lul yi ní ga kɔn m'e yí zà dɛ̃ rɛ́ tɛ̀bɛ́ mɔ́ ¹⁶Bǝ̀ màlέka y kὲbέ è zwẽ ne lwɛlɛ dwí gakó wẽ mó, cĩ́ bwəl bǝ̀sɔ́ná bɛ́ byὲbέ yó. Sə bə tó bǝ̀ dɛnnɛ bə gwẽ̌ byẽ̀ àmyέ ǹd'â dabá Abəraam ǹdǝ́ Yəzakɛ yilə né, sə bə j'a pù bə jǐrh nánzhəzhɔ̌ bə sú tənà yá.¹⁷Zhozefu gǝ́ púrí ń da cĩ́ ń jǝ̀-jĩ́ y Efərəyim yó mó, ce ń wu ǝ̀ə nyàn yàl yé. N zə ń da jɛ̃̀ y ń la kǒ Efərəyim yó n cĩ́ Manasɛ yó. ¹⁸N wɔ̀ ń da nɛ: È dǝ̀ èta yé à da, nyǐ wɔ́ mɔ̀bɔ́ ń wɔ́ ń byì-cɛ yá, cĩ́ ǹ jǝ̀-jĩ́ jɛ̃̀ y ńmyɛ̌ yó.¹⁹Sə ń da cẽ, n wɔ̀: À byǐ à yě, à yě re. Ńmyɛ mà n jǐrh dwí nánzhəzhɔ̌, ń mà n jǐrh lyì-fɔ̀lɔ̀. Sə ń nyɛ̃́ mɔ́ mà n yǝ̀ lyì-fɔ̀lɔ̀ dwini mu, ń dwí rí m'a jǐrh dwǝ́ nánzhəzhɔ̌. ²⁰Zhakɔɔbɛ cĩ́ bwəl bǝ̀ yó dɛ̃ rέ rǝ̀myέ yù wǝ̀, n wɔ̀: Wɔ́ ǹmyɛ́ dɛnnɛ Esǝrayɛl yà ń la nɛ́ tó né ń cĩ́ bwǝl ré, ń y'ǎ ń zhe: Zhakɔɔbɛ jὲnὲ n byẽ̀ Efərəyim yil ré éfòró n zɛ̃̀ n byẽ̀ Manasɛ nyǎn rέ.²¹Esərayɛl zɛ̃̀ n wɔ̀ Zhozefu ni: Àmyέ la cú, sə Yi m'a yǝ̀ nέ ǹd'ába. Rǝ̀ m'a k'a zə ába á kwɛ̃̀ á vò á nàmbala bέ tənà y wa. ²²Àmyέ n'â pɛ mɔ́ Shəshɛm, cəl ré tὲbέ ǹ mà ń mǝ́ dwini ǹ da-byǎ bέ, à zwẽ Amɔrətəbá sõ ǹdǝ́ à búlǝ́ shù w ǹdǝ́ à twã y mǝ́.

¹Zhakɔɔbɛ byẽ̀ ń byǎ bɛ́ n wɔ̀: bǝ̀-nǝ dwã yó, a byili ába kɔn dɛ̀bɛ́ rǝ̀ la ába yú byinǝ né nyɛ̀bɛ́ nǝ̀ bàn mɔ́ wẽ́ mú. ²Jǒm-nǝ dwã yó, Zhakɔɔbɛ byǎ, s'á cili, á cili á da Yǝsǝrayɛl zɔ̀mà nɛ́!³Orɔbɛn, ǹmyέ ǹ wɔ́ à byì-cɛ yá, à jàn rέ ǹd'â bɛlɛ rέ byì-yǝ́ǝ́ mó, ǹ búl ǹ wɔ́ bal e jà ǹ búl ǹ zhe jàn. ⁴Ǹ wɔ́ ǹdə bwǐ nɛ̃̌ mɔ̀bɔ́ mǝ̀ n'ê dùr ǹdǝ́ jàn ta! E jà ǹ tá ǹ la nãyǝ́ǝ́ mó yál yé, ǹ gǝ́ yǝ̀ ǹ da nyàm ń bǝ̀ ń jì ń pal rέ yó, ń ce ń pyǝ̀nǝ̀ y jìmdi mú yilǝ.⁵Shəmənyɔ̃ ǹdǝ́ Levyi wɔ́ ná-byǎ, sə bǝ́ n'ê zǝ bǝ̀ búlǝ́ shìmì ní bǝ̀ m'ê twĩ̀ jɔ́ɔ́rɛ dúdú wɔ̀rhɔ́ yilə; ⁶À t'â la à cìn co kɔn rέ tὲbέ bǝ̀ co dwã yó, bǝ̀ la wɔ̀rhɔ́ mɔ́ wẽ́ yé, à t'â la bɛ tó a jòm bǝ̀ dwã-gùúlí wẽ́ yé, bǝ̀ bǝ̀ lyimǝ y'à zɛ̃̀, bǝ zɛ̃̀ bə gu lyì, sə bǝ̀ wu-nyɔ̃̀ w nánfɔ̀lɔ̀ w yi ní myɛ, bǝ̀ gòm nǝ̀-byərh nǝ̀-gwǝ̌rh.⁷Bǝ̀ bǝ̀ lyim rí zhe bwǝl námmǝlwɛ̀lɛ́, bǝ̀ rǝ̀ wɔ́ jɔ́ɔ́rɛ tũ̀twĩĩ, rǝ̀myɛ́ m'a yǝ̀ lwɛlɛ. À m'a bɔ̀n bɛ dwã nɛ Zhakɔɔbɛ dwí rí wẽ́, à m'a làà bɛ tɛ̃́ Esərayɛl tənà y wa.⁸Zhəda, wɔ́ ǹmyέ ǹ da-byǎ bέ m'a cèrhé. Ǹ m'ǎ nyέέ ǹ zwə bé bə lwəl bə ywẽ tɛ̃́, ǹ da-byǎ bέ cìcì mú m'a wùlì tɛ̃́ ǹ yé né.⁹Zhəda, à byǐ, ǹ nyɛ̌ ǹdə bɔrɔ byǐ ta, ǹ zhǝ̀l ń zə gɔ-nàmá ń dɔ̃̀, ń kwɛ̃̀ ń bǝ̀ ǹ pwǝ́l mó wə. Zhəda jòm. ń nǝ̀ dṍ yó, n zɛ̃̀ n pyẽ̀ tɛ̃́ ǹdə bɔrɔ ta, ǹdə bɔrɔ nãnyɔ̃̀ ta. Mɔ̌ ń mà n ŋwὲnέ n zhὲrh mɔ tɛ̃́?¹⁰Pyὲlὲ dǝ̀-dɔ̀lɔ̀ w t'â la kwã nɛ́ zhǝl o yẽ̌ Zhəda nɛ gaga yé, ò m'a mɛ̃ ń dwí rí jɔ̃̀ wà, kɔn b'e yí mɔ̀bɔ́ ń cǐ w mú bà, ńmyɛ̌ dwǝ́ né mǝ̌ sə nǝ shὲnέ ń nyí ni mú.¹¹Ń mà n lyẽ ń bǝ̀na y dǝ̀vɛ̃́-cǒ w ne, n zɛ̃̀ n lyẽ ń bǝ̀nǝ-byǐ y dǝ̀vɛ̃́-cǒ w ò càn du mú ni. Ń mà n shàrh ń kàmǝ̀zwǐ y dǝ̀vɛ̃́ y wẽ́, ń shàrh ń kàmǝ̀-zù-èdɔ̀lɔ̀ w dǝ̀vɛ̃́-cèmé né byǎ bέ jal mɔ wẽ. ¹²Ń yírhə né m'a shɛ̀l ǹdǝ dǝ̀vɛ̃́ ta, ń yǝ́lǝ́ né pwèlè ǹdǝ yil ta.¹³Zabyǝlɔ̃ mà n jòm nǝ̀-fwààlɛ́ nyí ni, bǔ-bwǝlǝ bǝ̀ nǝ zhì gàà. Ń tǝnà m'a twèlé e yí Sǝdɔ̃.¹⁴Yəsakaarɛ wɔ́ bǝ̀na kὲbέ è jὲ, è pyě tɛ̃́ bǝ̀nə-bɔ́ɔ́ bǝ̀ lù byílí nǝ̀rh sǝ̀lyè bə m'e kǝ́kέlέ cəcəl wə. ¹⁵Ń púrí ń gǝ́ pyě mǝ̀gã̌ mɔ́ shìrhə y è nyὲ, tənà y myɛ dǝ̀ cɛ̀nɛ̀ dwí. N lwǝl tɛ̃́ ń la zhĩĩ rí zhũ , ń mǝ̌ dwã ǹdə yóm ta.¹⁶Dan mà n cìní ń dwí rí, ǹdə wɔ́ Esərayɛl kwálsέ èdù ta. ¹⁷Dan mà n yǝ̀ dɔm mǝ̀ pyě tɛ̃́ sɔ́má yó, ǹdə kùwǝ̀ è wɔ sɔ́má yó ta, è dɔ̃̀ shəshã nǝ̀gwǝ̌rh ne, è jòmnə mó já n tu n byíbyílí. ¹⁸Cinnǝ, à n'â dɛ̃̀ ǹmyέ vwǎrh mɔ́!¹⁹È gə wɔ́ Gaadɛ yilə, vwǎrhna kùkùl m'a bə rə vwǎrh mɔ, sə ńmyɛ mà n pyě bǝ̀ nǝ̀kúlǝ́ yó n bú ǹdǝ́ bɛ. ²⁰Wɔ́ Asɛɛrɛ sõ kùjú kɔ̀bɔ́ ò càn o j'à já mɔ́ m'a shí ní. Ń mà n pə kùjú kɔ̀bɔ́ ò mǝ̌ ǹdǝ́ pyǎ mɔ́ nɛ ²¹Nəfətəlyi wɔ́ ta kὲbέ è n'ê jíl tɛ̃́, è n'ê lùl byǎ byὲbέ bǝ̀ càn.²²Zhozefu wɔ́ cǒ kɔ̀bɔ́ ò n'ô púrh vɔr nánzhəzhɔ̌ mɔ́ tòó, cǒ ò n'ô púrh nánzhəzhɔ̌, kɔ̀bɔ́ ò wɔ nǝ̀-bùlì nyí ni mú tòó. Ò jὲsέ n'ê tó sǝ tó byílí y ni sǝ vò byílí y yǝ́-pὲlέ wa. ²³Bə pyà ń nyí, bə tǝ mɔ ǹdǝ́ cama bǝ̀ jì mu ǹdǝ́ bǝ̀ bwɛ̃̌ dǔr mú.²⁴sə ń zɔ ń twã y ń jɔ̃̀ kǝ̃kǝ̃, ń vɔ̀mὲ nέ ǹdə ń jὲsέ ga zhe rǝ̀ jàn nɛ, Zhakɔɔbɛ Yi rí lòlò bə rǝ̀ yàlà-zhe mó jàn yilə. Rǝ̀ jǐrh wã̌-ènɔ̀n, Esərayɛl pàtá y mɔ́.²⁵È wɔ́ ǹ da mɔ́ Yi rí tum, rǝ̀ sɛ̃ mɔ́, bǝ̀ Yi rí tὲbέ rǝ̀ wɔ́ Jàn cǝ́bal mɔ́ cĩ́ bwəl ǹ yó! Bwəl ré tὲbέ rə n'ê shí dɛ̃̌ mɔ́, ǹdǝ́ bwəl ré tὲbέ rǝ̀ n'ê shí cə-wǒ w ò wɔ cɛ y kùr w mú,bwəl ré tὲbέ rə n'ê shí yilə né ǹdǝ́ lùlì y wẽ́ mó.²⁶Bwəl ré ǹ da cĩ́ ǹ yó mó du Pyàr rέ tὲbέ rǝ̀ j'â ŋwέnέ shãã shãã ga mɔ́ ǹdǝ́ pyǎlsέ shὲbέ sə j'â ŋwέnέ twéé twéé mó bwəl ré. Bǝ̀ bwəl ré rǝ̀myέ mɔ́ só Zhozefu yó, rə só mɔ̀bɔ́ bǝ̀ cìr ń da-byǎ bέ wẽ́ ń wɔ́ pyɔ̌ mó yó.²⁷Bɛ̃zhamɛ wɔ́ gɔ-kùlí. Nəkɔkɔlέ nɛ, ń já ń nə ń gwi ń dɔmà, dədὲnέ nɛ ń nǝ́ ń tǝ̀l kɔn rέ tὲbέ ń pwà búlǝ́ né wẽ́ mó.²⁸Wɔ́ byὲbὲ èta mɔ́ gakó bǝ̀ y'à wɔ́ Esərayɛl kwálsέ mɔ́, sə y'à wɔ́ shí ǹdǝ́ sǝ̀lyè. Wɔ́ kɔn rέ tὲbέ bǝ̀ da mɔ́ wǝ̀l bé bǝ̀ ń gǝ́ tú ń nǝ́ ń cĩ́ bwəl ré bǝ̀ yó yi ní mú. Ń cĩ́ bwəl lò gakó yó ǹdǝ kɔn gǝ́ mǝ̌ ńmyɛ nɛ. ²⁹Rǝ̀myέ kwã nέ, ń pɔ bɛ nyí n wɔ̀: À gə tú à cùwǝ̀, sə á ce ne à dabá yó, myèlé ré rǝ̀ wɔ Efərɔ̃ nɛ́, Yititi cɛ y w mɔ́ wẽ́, ³⁰Makəpəla nέ, Mamərɛ yé y wə, kanaã tənà y wa, cɛ y kὲbέ Abraam yè Efərɔ̃, Yititi mú sõ, ń la cìnú e yǝ̀ ń cùùrí co jàà mɔ́ wẽ́.³¹Wɔ́ gàà bǝ̀ co Abəraam ǹdǝ́ ń kɛ̃ Sara nέ, e súlí Yəzakɛ ǹdǝ́ ń kɛ̃ Erəbəka nέ. Wɔ́ gàà myɛ à co Lɛya nέ. ³²Wɔ́ Etɛ byǎ bέ só bǝ̀ yè cɛ y ǹdǝ́ myèlé ré, rǝ̀ wɔ è wẽẽ́ mó ga nέ. ³³Zhakɔɔbɛ gǝ́ pɔ ń nyǝ́ né ń byǎ bέ nɛ n zhὲ, ń kwɛ̃̀ ń nèsé n cĩ́ ń pal rέ yó, n já n cì, n twèlé ń dabá nɛ.

¹Zhozefu já n zɛ̃̀ n tu ń da mɔ́ yó, ń nǝ́ ń kwǝ̀ǝ̀lè ń yé-zwã̌ y ǹdǝ́ ń nǝ́ ń kúrhə. ²Rǝ̀myέ kwã nέ, n pǝ nyí lyì-twǝ́rǝ́ bé byὲbέ bǝ̀ y'à n'ê twĩ̀ bǝ̀ pɛ mɔ mɔ́ nɛ, bǝ̀ bǝ̀ tɛnɛ ń da yala nέ. Lyì-twǝ́rǝ́ bé zɛ̃̀ tɛnɛ Esərayɛl yala nέ ³dwã shǝ́-èna, ǹdǝ́ bǝ̀ n'ê zǝ nwǝ̃̌ bǝ̀ tùr mo. Ezhibti lyì bí kúrh Zhakɔɔbɛ nɛ dwã shǝ́-shàlpyὲ.⁴Bə gə kúrh cù w ni, dwã nɛ́ zhὲ, Zhozefu wɔ̀ Faraɔ̃ kὲlέ y lyì bí ni: Á gə n'á nyǐ ni ǹdǝ́ sónó zhǝ̀n zhǝ̀nà, sə á vò á byili á gǝ́ zɔ̀m nɛ́ Faraɔ̃ nɛ á wɔ̀: ⁵Nyǐ à da ce a bwǝl mu nyí n wɔ̀: Nyǐ à la cú! Sǝ à gǝ cù wǝ̀, sǝ vò ń ce lú-bɔ̀l mɔ́ mɔ̀bɔ́ à yè Kanaã tǝnà y w mɔ́ wẽ́. rǝ̀myɛ́ ce à n'â yǎl a zǝ mɔ a vò ce g`à mɔ́, sǝ a k'a kwɛ̃̀ a bà. À da wəl ne: Rəmyέ ce, à n'â lwəl sɔmá à la vò a ce à da mɔ s'a k'a kwὲ a bà. ⁶Faraɔ lyár n wɔ: Zhǝl ń vò ń ce ǹ da ǹdǝ ń gǝ́ ce ń bwǝl mo nyí rí ní.⁷Rǝ̀myέ yó, Zhozefu shǝ́r ń la n vò n ce ń da mɔ́. Faraɔ̃ tùntùnnə bé gakó ǹdǝ́ ń kὲlέ y lyì bí e súlí Ezhibti tənà y náncɛsέ gakó tó mo bə vò; ⁸e súlú Zhozefu kὲlέ y lyì bí gakó ǹdǝ́ ń da-byǎ bέ ǹdǝ́ ń da dwí rí lyì bí dwã bέ: È yàl bǝ̀sɔ́ná bέ ǹdǝ́ vǝ̃̌-ywàálέ ǹdǝ́ vwàmá nánfwààlέ dúdú ni bǝ̀ yẽ̌ Gɔshɛn nέ. ⁹Búlə eshərh-vwǝ̃tur ǹdǝ́ eshərh-jòmnə myɛ tó mo. Lyì bí byὲbέ bǝ́ tó mo bǝ̀ vò mó y'à já dɛ̃́dɛ̃́..¹⁰Bǝ̀ gǝ́ zhǝ̀l bə b'e yí Ataadɛ, Zhɔrdɛ̃ bwǐ kwã nέ mɔ́. Bǝ jòm gàà mɔ́ bǝ dom cu wu-zhùlù wìísi nánfwàlsὲ; Zhozefu kúr ń da mɔ́ nɛ dwã nyàlpyὲ. ¹¹Kanaã lyì bí byὲbέ bə y'à jě tənà y w gàà mɔ́ gǝ́ nɔ cu wu-zhùlù wìísí sǝ̀myɛ́ mɔ́ Ataadɛ nέ mɔ́, bə wwɔ̀: Nyǐ cu wu-zhùlù wìísi Ezhipti ní! Wɔ́ rǝ̀myέ rǝ̀ ce, bə j'a ce jàà y è wɔ Zhɔrdɛ̃ bwǐ y kwã nέ mɔ́ yil bǝ̀ Abɛl-Myəsərəyim.¹²Zhakɔɔbɛ byǎ bέ wὲrhέ kɔn rέ tὲbέ ń yà ń pɔ bɛ rə nyí mú ń yilə. ¹³Bə kwè mo bə m'e vò Kanaã tənà y wa, bə vò bə ce mo Makəpəla cɛ y myèlé ré wə, cɛ y kὲbὲ Abəraam yè Efərɔ̃, Yititi mú sõ, Maməre yé y wə, ń la cìnú ń cùùrí co yil mú wẽ́. ¹⁴Zhozefu gǝ́ co ń da mɔ́ kwã nέ, ń kwɛ̃̀ n bǝ̀ Ezhibti, ńmyɛ̌ ǹdǝ́ ń da-byǎ bέ e súlí lyì bí byὲbέ gakó bǝ̀ y'à tó mo bə vò ń da mɔ́ co mó yil mú.¹⁵Zhozefu Zhὲmmá bέ gə púrí bə da cù n zhὲ, bə wɔ̀ dwã nɛ: Zhozefu gǝ yà ń tǝ̀ lwɛlɛ rɛ́ tɛ̀bɛ́ nǝ́ wɛ̀rhɛ́ mɔ mɔ́ yil n súl nǝ́ba, n càrh nǝ́ba lwɛlɛ rɛ́ tɛ̀bɛ́ nǝ̀ wɛ̀rhɛ́ mɔ́ gakó! ¹⁶Bə zɛ̃̀ bǝ twĩ Zhozefu sõ bə wɔ̀: Nyǐ ǹ da gǝ́ yà ń tú ń la cú yi ní, pɔ nǝ́ba nyí n wɔ̀: ¹⁷Wál-na Zhozefu ni: Bǝ̀ nyǐ à n'â lwǝ̀l mo bǝ̀ ǹ pə sǔbri ǹ da-byǎ bέ nɛ bə lwɛlɛ rέ ǹdǝ́ bǝ̀ dóó w yilə. Bǝ̀ nyǐ bǝ̀ wὲrhέ mɔ lwɛlɛ zhǝ̀n zhǝ̀nà, ǹdǝ́ rǝ̀myέ ga, à n'â lwǝ̀l mo bǝ̀ ń pə sǔbri ń da mɔ́ Yi rí tùntùnnə bé ne! Bǝ̀ gǝ́ zhǝ̀l bə byili ri Zhozefu ni, n já n zɛ̃̀ ń nǝ́ ń kúrhǝ́.¹⁸Rǝ̀myέ kwã nέ, ń da-byǎ bέ cìcì mú zɛ̃̀ bə b'e nə mɔ, bə tu ń nèhrh kùr wə, bǝ̀ zhe: Nǝ́ wɔ́ ǹ tùntùnnǝ. ¹⁹Sə Zhozefu wɔ̀ bɛ: Á bǝ̀k'á dùr ywẽ yé. Àmyέ wɔ Yi jàà w nà? ²⁰Á pyà nɛ lwɛlɛ wɔ̀rhɔ́: sə Yi lyǝ́r re rǝ jǐrh cὲnὲ. rə m'e pyìrh kɔn rɛ́ rǝ̀ yu: zà mɔ́, dwí nánzhəzhɔ̌ vwǎrh yilǝ. ²¹Rǝ̀myέ ce, á bǝ̀k'á dùr ywẽ yé, à m'a nyǐ kɔn tὲbέ ámyɛ̌ ǹd'á bǝ̀sɔ́ná bέ ga zhe rǝ̀ tum mú yò.Zhozefu já n zɔ̀m rǝ̀myɛ́ n mǝ n swẽ bǝ̀ wun ni.²²Zhozefu já n mɛ̃ n jòm Ezhibti ní, ńmyɛ̌ ǹdǝ́ ń da kὲlέ y lyì bí. Ń nɔ byinə zɔ̌m ǹdǝ́ shí yǝ́, ²³n nə ń byǐ Efərəyim nàn-jǝ̀ǝ̀lé. N zwẽ ń nɔ̃̌ Məciiri, Manasɛ byǐ mú, byǎ bέ n cĩ́ ń nǝ̀rh yó.²⁴Dɛ̃ rǝ̀dù Zhozefu wɔ̀ ń da-byǎ bέ nɛ: Àmyέ la cú. Sǝ Yi m'a lyǐrh á yò rə wὲrhέ ába cὲnὲ. Rǝ̀ m'a ce á shǝ́r tənà y kὲbέ wẽ́, á vò tənà y kὲbέ rǝ̀ bwəl è nyí Abəraam ǹdǝ́ Yəzakɛ ǹdǝ́ Zhakɔɔbɛ nɛ mɔ́ wẽ́. ²⁵Zhozefu ce Esǝrayɛl byǎ bɛ́ bwəl nyí n wɔ̀: Bǝ̀ Yi m'a gwɛ̃ ába, s'á zǝ à kúr rí a du nyɔ̀nɔ̀ a vò kwã nɛ́ gaga. ²⁶Zhozefu cù ǹdǝ́ ń zhe byinə zɔ̌m ǹdǝ́ shíyǝ́. Bə zə nwẽ̌ bə tùr ń yala nέ, bə kwè ne bə ce kùlkṍ wẽ́ Ezhibti ní.

¹Nyǐ-nə Esərayɛl byǎ bɛ́ bə̀ tó Zhakɔbɛ nɛ bə bə̀ ⁴Ezhiptiy mú, lò gakó ǹdə́ ń dwí rí mú yilə né, è y'à wɔ́ : ²Orɔbɛnɛ, Shəmənyɔa, Ləvyi, Zhəda, Yəsakarɛ, Zabəlɔ̃,Ɓɛ̃zhamɛ̃, ³Danɛ, Nəffətəli, Gadɛ ǹdə́ Asɛɛrɛ. ⁵Zhakɔbə byǎ y'à wɔ́ nunə shə́shàlpyɛ̀ ; rə̀myɛ́ yi ní ǹdə́ Zozhɛfu myɛ̌ y'ǎ ŋwɛ́nɛ́ Ezhipti ní.⁶Rə̀myɛ́ yó né Zozhefu ǹdə́ ń da-byǎ ǹdə́ bə̀ lyì bí byɛ̀bɛ́ bə̀ y'à wɔ́ bə̀ shí-dwã bɛ́ rə̀myɛ́ yí ní mú gakó cùwə̀. ⁷Esərayɛl byǎ bɛ́ j'a zɛ̃̀ bə lù byǎ nánzhəzhɔ bə̀ pù, bə sú tənà yá, Bə̀ jàn rɛ́ j'â n'ê súlí twéé twéé.⁸Rə̀myɛ́ yó né pyɔ̌ mə̀dù zɛ̃̀ ń cǐ Ezhipti tənà yá ; Pyɔ̌ mɔ́ ńmyɛ̌ mɔ́ yə̀ Zozhefu pár lwar. ⁹N zɛ̃̀ n zɔ̀m ǹdə́ ń tənà y lyì bí n wɔ̀ : Nyǐ-nə Esərayɛl byǎ bɛ́ á nyìwé, bə̀ wɔ́ dwí nànzhəzhɔ̌ dɛ̃́dɛ̃́, bə̀ jàn rɛ́ myɛ du nə́ba. ¹⁰Rə̀myɛ́ ce, bà-nà nə́ wɛ̀rhɛ́ surhə, nə́ ce bə̀ bə̀k'a k'e pù yé, mùnì ga búlə́ gə zɛ̃̀ sə bə̀ bək'a vò bə ce nyí nə́ zwə̀ bé kwã nɛ́ bə bú ǹdə́ nə́ba yé ; mùnì ga bə nə sɔ́má bə du nə́ tənà y w yé.¹¹Bǝ zɛ̃̀ bǝ vùr yó-cìnǝ́ bǝ cĩ́ mùnì ga bǝ pǝ tumǝ nyɛ̀bɛ́ nǝ̀ jɛ̀ bǝ̀ n'e᷇ twǐ̀. Wɔ́ rǝ̀myɛ́ yó né bǝ̀ lù cɛmɛ bǝ̀ n'ê byẽ̀ bǝ̀ Pǝtɔm ǹdǝ́ Ramɛsɛ bǝ pǝ Faraɔ̃ nɛ ń wẽ̀ cṹ jààsɛ. ¹²Ǹdǝ́ bǝ̀ n'ê nwɛ̀nɛ̀ bɛ ga bǝ cẽ bǝ̀ n'ê pùl bǝ̀ la. Bǝ zɛ̃̀ bǝ̀ n'ê jí zùù rì ǹdǝ̀ Esǝyɛl lyì byǎ bɛ́.¹³Rǝ̀myɛ́ yó né bǝ ce Esǝrayɛl lyì byǎ bɛ́ jǐrh yómǝ́ bǝ̀ n'ê twĩ̀ tũ̀-kùlǝ̀. Bǝ ce bǝ̀ lũ w wẽ́ yál mɔ́ k'e bǝ nyàn zhe yé. ¹⁴Bǝ ce be yómde tũ̀-kùlǝ̀ wẽ́; bǝ̀ n'ê fwǝ̌rh dɔ bo-kwǎ; bǝ̀ n'e᷇ vwàl bǝ̀ cɛsɛ́ wa. Wɔ́ tũ̀-kùlǝ̀ né nǝ̀myɛ́ èta mɔ́ bǝ̀ y'à ce bǝ̀ n'ê twẽ̀.¹⁵Ezhipti pyɔ̌ mɔ́ zɛ̃̀ n zɔ̀m ǹdǝ́ Ebǝrǝbá elwǝrh-kana bɛ́, Sǝshǝra ǹdǝ́ Puwǝ nɛ, ¹⁶n wɔ̀ bɛ : Á gǝ lwǝrh Ebǝrǝbá kana, è gǝ wɔ́ bal-byǐ s'a gu yǝ; s'e gǝ wɔ́ kɛ̃-byǐ s'a yẽ̌ y á bǝ̀k'a gwi y yé. ¹⁷Sǝ elwǝrh-kana bɛ́ gǝ́ y'à n'ê nyàm Yi mú ce bǝ̀ yǝ̀ pyɔ̌ nyí rí zwẽ yé, bǝ̀ n'ê yẽ̌ bǝ̀sɔ́ná nɛ bǝ̀ t'â gwi bi yé¹⁸Pyɔ̌ mɔ́ tǝ̀ rǝ̀myɛ́ yil n byẽ̀ elwǝrh-kana n wɔ̀ bɛ: Wɔ́ bǝ̀kɔ́n yil á n'á wɛ̀rhɛ́ èta mɔ́, á yẽ̌ bǝ̀sɔ́ná bɛ bǝ̀ ŋwɛ́nɛ́ nɛ́ mɔ́? ¹⁹Elwǝrh-kana bɛ́ wɔ̀ Faraɔ̃ nɛ: Nyǐ Ebǝrǝbá kana bɛ́ dǝ̀ ǹdǝ Ezhipti lyì kana bɛ́ ta yé; bǝ̀ zhe jàn, ce bǝ̀ y'a mǎ bǝ lù ǹdǝ́ bǝ̀ yǝ̀ elwǝrh-kɛ̃ mɔ́ sõ yí yé.²⁰Yi wɛ̀rhɛ́ cɛ̀nɛ̀ ǹdǝ́ elwǝrh-kana bɛ́; rǝ̀myɛ́ ce dwí rí pù rǝ jǐrh nánzhǝzhɔ̌. ²¹Elwǝrh-kana bɛ́ y'à n'ê dùr Yi ywẽ, ce Yi ce bǝ̀ kǎlsɛ́ lyì bí y'à n'ê súlí. ²²Pyɔ̌ faraɔ̃ zɛ̃̀ n pǝ nyí ń tǝnà y lyì bí gakó ne n wɔ̀: Bǝ̀ gǝ lùl bal-byǐ gakó s'á kwè y a vò á ji bǔ wǝ; sǝ è gǝ wɔ́ wɔ́ kɛ̃-byǐ gakó s'á yẽ̌ y e yǝ̀ nɛ́.

¹Lǝvyi kwálá y byǐ mǝ̀dù yà ń jú Lǝvyi kwálá y bǝ̀kɔ́ mǝ̀dù. ²Kɛ̃ mɔ́ ńmyɛ̌ mɔ́ zɛ̃̀ n kwè pwǐ n lù byǐ. N pwírí byǐ wɔ́ ébɔ́, n jà n shèè mo cànsɛ sǝ̀tɔ̀.³Ń gǝ́ pwírí ń kǝ́ ń wàr ń la mɔ shòò mó yi ní, n kwè sǝ́yǎ n zǝ ku n kwɛrhɛ w kókó, n kwè bǝ̀sɔ́bwɛ̀lɛ́ y cĩ́ ò wẽ́ n pyi ò nyí n cĩ́ myɔrhɔ nɛ́ n vò n cĩ́ bù-cǔ nyí ni vwal-gɔ cǝcǝl wǝ. ⁴Bǝ̀sɔ́bwɛ̀lɛ́ nǝkɔ́ já n zɛ̃̀ ń tǝtwene ń zhǐ kwã nɛ́ ń la nyǐ kɔn gǝ́ la nɛ́ tó.⁵Rǝ̀myɛ́ yó né Faraɔ̃ bǝ̀kɔ́ zɛ̃̀ n bǝ̀ bwǐ yó ń la nɛ̃̌ shɔ, ń tó-dwã bɛ́ lyɛ̃ bǝ̀ twèlé bwǐ y nà nɛ bǝ n'ê jílǝ́. Bǝ̀ zɛ̃̀ bǝ̀ la nyǔ bǝ pwírí kùlkõ̌ vwal-gɔ w cǝcǝl wǝ, n zɛ̃̀ n ń tùntùnnǝ bǝ̀ ń zhǝl n kwè wǝ. ⁶N zɛ̃̀ n pul ò nyí ni, n pwírí wɔ́ bal-byǐ námpɔ́lɛ́ è n'ê kúrhǝ́. È nɔ̀nɔ̀ zǝ mɔ, n wɔ̀: Nyǐ wɔ́ Ebǝrǝbá byǐ!⁷Raèmyɛ́ yi ní, bǝ̀sɔ́bwɛ̀lɛ́ nǝkɔ́ mɔ́ já n yí Faraɔ̃ bǝ̀kó mɔ́ nyí n wɔ̀: Ǹ nǝ́ ǹ yǎl b'à zhǝl a pyà byì-kɔ̀nnà Ebǝrǝbá kana bɛ́ wẽ́ n bǝ̀ n ŋwɔ̀ bǝ̀sɔ́bwɛ̀lɛ́ y kɛ̀bɛ́? Faraɔ̃ bǝ̀kɔ́ mɔ́ lyár mɔ n wɔ̀ : ⁸Zhǝl. Bǝ̀kɔ́ kɛ̃-byǐ y já zhǐr è la vò e pyà bǝ̀sɔ́wɛ̀lɛ́ ná mɔ́.⁹Faraɔ̃ bǝ̀kɔ́ mɔ́ wɔ̀ kɛ̃ mɔ́ nɛ: Zǝ bǝ̀sɔ́bwɛ̀lɛ́ kɛ̀bɛ́ ń mǝ́ vò, sǝ́ pɛ y yil e ŋwɔ̀ ń pɛ̃, sǝ́ yẽ̌ bǝ̀ à m'a pɔ̃́ ǹ kwǎndɛ́. ¹⁰È gǝ́ tú e byì, n zǝ y n bǝ̀ n pǝ Faraɔ̃ bǝ̀kɔ́ mɔ́ nɛ, e jǐrh ǹdǝ ń byǐ ta. N zɛ̃̀ n ce ń yil bǝ Muyiisi, bǝ̀ ń y'ǎ zhe, bǝ̀ wɔ́ nàná wẽ́ à vùr mo né.¹¹Kɔn tú e b'e yí è dɛ̃ rǝ̀dù, ǹdǝ́ Muyiisi byìl náncɛ, n zɛ̃ è n vò ń da-byǎ bɛ́ sono, n yí ń yírhǝ́ nǝ tumǝ né bǝ̀ n'ê twĩ̀ mú nɔ̀nɔ̀ wá. N zɛ̃̀ n nǝ Ezhipti lyì byǐ ń nǝ́ ń mà Ebǝrǝbá byǐ ń da-byǎ bɛ́ cǝlcǝ́ wǝ. ¹²N nyǐ nyɔ̀nɔ̀ n ká n nyǐ nyɔ̀nɔ̀, n pwírí lò lò tɛ̀nɛ́ yé, n já n gu Ezhipti lyì byǐ mú, n kwè mo n gwàr nyɔ̀rhɔ́ n shèè mo né.¹³È cɛ zɛ̃̀ nǝkɔkɔ́lɛ́ y n kǝ́ n du, n pwírí Ebǝrǝbá byǎ bǝ̀lyè bǝ̀ n'ê bwí dwã. N zɛ̃̀ n wɔ̀ mɔ̀bɔ́ ń dó mó ne: Wɔ́ bǝ̀kɔ́n yil ǹ nǝ́ ǹ mà ǹ da-byǐ mú? ¹⁴Bal mɔ́ ńmyɛ̌ mɔ́ zɛ̃̀ n wɔ̀: Wɔ́ mɔ̌ lò ń pɔ mɔ cìnú mú mǝ̀myɛ́ ǹ mǝ́ ǹ kɛ́ nǝ́ bùrsi? Ǹ nǝ́ ǹ yǎl ń gu ni, ǹdǝ ǹ gǝ́ gu Ezhipti lyì byǐ mú mú ta? Ywẽ zǝ Muyiisi, n wɔ̀: Zhǝ̀n zhǝ̀nà, lyì bí lwar yò wǝ́.¹⁵Fwaraɔ̃ lwar kɔn dɛ̀bɛ́ rǝ̀ wɛ̀rhɛ́ mɔ́, n zɛ̃̀ ń nǝ́ ń pyà Muyiisi ń la gu. Muyii zɛ̃̀ n dùr Fwaraɔ̃ yé né, n vò Manjã tǝnà y wa, n yí n zhì zhìlí èdù nyí ni. ¹⁶Manjã vwĩ̀-zǝ́lnǝ yà ń ŋwɛ́nɛ́ ń zhe kana-byǎ bwàlpyɛ̀. Bǝ zɛ̃̀ bǝ bǝ̀ nɛ̃̌ tã́ɔ̃́, bǝ tɛ̃́ nɛ̃̌ mɔ́ bǝ sú bǝ̀ vwàmá kùlkwẽ́ ré bǝ̀ la bǝ̀ da vwàmá nɛ́ nɛ pɔ nǝ nyɔ̀. ¹⁷Rǝ̀myɛ́ yó né vwã̌-ènɔ̀nà yí bǝ jì bi. Muyiisi já n zɛ̃̀ n zwẽ bǝ̀ nyí ni, n ce bǝ̀ vwàmá nɛ́ nyɔ̀ nɛ̃̌ mɔ́¹⁸Bǝ̀ gǝ́ k'a kwɛ̃̀ bǝ yí bǝ́ da Rǝwǝle sõ, n wɔ̀ bɛ: Wɔ́ bǝ̀kɔ́n yil á k'á gwiri á kwɛ̃̀ làlà zà èta mɔ́? ¹⁹Bǝ lyár bǝ wɔ̀: Nyǐ wɔ́ Ezhipti lyì byǐ mǝ̀dù ń zwẽ nǝ́ba vwã̌-ènɔ̀nà jɔ̃̀ wa, ń gaga mɔ́ tɛ̃́ nɛ̃̌ mɔ́ n pǝ vwàmá nɛ́ nɛ nǝ nyɔ̀. ²⁰N zɛ̃̀ n wɔ̀ ń bǝ̀kwá bɛ́ nɛ: Yẽ̀ ń nǝ ŋwɛ́nɛ́? Wɔ́ bǝ̀kɔ́n yil á yẽ̌ bal mɔ́ ńmyɛ̌ nɛ mɔ́? Byẽ̀-nǝ mo n bà, n jí kùjú.²¹Muyiisi já shɛ̀nɛ́ n mɛ̃ bal mɔ́ ńmyɛ̌ sono, n pɔ̃ ń bǝ̀kɔ́ n jí, ń yíl Sǝfɔra. ²²N lù byǐ n pɔ̃ n ce ń yil bǝ̀ Gǝrǝsɔmɛ, bǝ̀ ń yà ń zhe, à jě tǝnà èdù wẽ́ zhǝǝle²³Kɔn dɛnɛ rǝ̀myɛ́ kwã nɛ́, Ezhipti lyì pyɔ̌ cì, Esǝrayɛl lyì byǎ bɛ́ bǝ kwɛrhɛ bǝ̀ n'ê kúrh bǝ̀ wɔ́wɔ́lɛ́ dɛ̃́dɛ̃́ yómré wẽ́, bǝ̀ n'ê kúrh bǝ̀ búbwéé. Bǝ̀ búbóó mó bǝ̀ yóm ré wẽ́ mó zhǝ̀l Yi sono. ²⁴Yi nyɛ̀ɛ̀ bǝ̀ wɔ́wɔ́lɔ́ mɔ́, rǝ lyǐrh rǝ̀ dɔbrɛ́ rǝ̀ zɔ ǹdǝ́ Abǝham ǹdǝ́ Yǝzakɛ ǹdǝ́ Zhakɔbɛ mɔ́ yò. ²⁵Yi nyǐ Esǝrayɛl lyì byǎ bɛ́, bǝ nɔ̀nɔ̀ zǝ rɛ.

¹Muyiisi yà ń nǝ́ ń kál ń cǝ́mbal zhǝtoro vwàmá, Majã vwĩ̀-zwǝ́lnǝ mó; n zǝ vwàmá n mǝ n vò gɔ-elũ èpòlò w kwã nɛ́, n lyɛ̃ n vò Yi pyɔ̀ w Orɛbɛ nɛ́ mɔ́. ²Bǝzhɔzhe màlɛ́ka lyí mu myìn-zhù wẽ́, sɔ̀lɔ̀ cǝcǝl wǝ. Muyiisi nǝ́ ń nyǐ; n pwírí sɔ̀lɔ̀ w zhe myǐn o j'à t'â jí gaga yé. ³Muyiisi wɔ̀: À m'a k'a pyìrhí a nyǐ nɛrɛ́ nánfɔ̀lɔ̀ kɔ̀bɔ́ wɔ́ bǝ̀kɔ́n dwí nɛrɛ́ ǹdǝ́ kɔ̀bɔ́, a nyǐ wɔ́ bǝ̀kɔ́n è ce sɔ̀lɔ̀ zhe myǐn o j'à t'â jí mú.⁴Bǝzhɔzhe gǝ́ nɔ ń nǝ́ pyìrhí ń nyǔ, Yi zhì sɔ̀lɔ̀ w rǝ byẽ̀ rǝ wɔ̀: Muyiisi! Muyiisi! N lyár n wɔ̀: Nyǐ ni! ⁵Dieu wɔ̀: Ǹ bǝ̀ká yí nyɔ̀nɔ̀ yé, vuér ǹ nǝcìlǝ̀ né, bǝ̀ cɛ y kɛ̀bɛ́ ǹ zhǐ è wẽ́ mó wɔ́ Yi nyǎ. ⁶Rǝ súlí rǝ zhe: À wɔ́ Ǹ da Yi rí, Abǝham Yi rí, Yǝzakɛ Yi rí ǹdǝ́ Zhakɔbɛ Yi rí. Muyiisi círhí ń yé y né, bǝ̀ ywẽ y'à zhe mo ǹdǝ́ Yi nyǔ.⁷Bǝzhɔzhe wɔ̀: À nɔ à dwí rí nɔ̀nɔ̀ w Ezhipti ní mú, à nyɛ̀ bǝ̀ wùrhí y bǝ̀ zwǝ̀ bé bǝ̀ n'ê wǔrh mó, à yě kɔn gǝ́ n'ê yì bi ma mɔ́. ⁸Sǝ à só tɛ̃́ à la rɛ lwǝ̌r Ezhipti lyì bí jɔ̃̀ wa, a ce bǝ vò tǝnà nánwowòrhó wẽ́, tǝnà kɛ̀bɛ́ yil ǹdǝ́ tùr n'ê dùr tɛ̃́ è wẽ́, jàà kɛ̀bɛ́ Kana lyì ǹdǝ́ Eshɛ̃́ lyì ǹdǝ́ Amɔ̃́ lyì ǹdǝ́ Fǝrɛzhɛ lyì ǹdǝ Evɛ̃ lyì e súlí Zhǝbu lyì jě è wẽ́ mó.⁹Nyǐ, Esǝrayɛl lyì byǎ bɛ́ wìísí yú à sono, nɔ̀nɔ̀ w kɔ̀bɔ́ Ezhipti lyì n'ê nwɛ̀nɛ̀ bɛ mɔ́. ¹⁰Sǝ èlǎsɛ̃́, zhǝl, à la mɔ́ tũ̌ Fwaraɔ̃ sono, ń vùr à dwí rí, Esǝrayɛl lyì byǎ bɛ́ Ezhipti ní.¹¹Muyiisi wɔ̀ Yi ni: Àmyɛ́ wɔ́ mɔ̌, à la m'a vò Fwaraɔ̃ sono, a m'a vùr Esǝrayɛl lyì byǎ bɛ́ Ezhipti ní mú? ¹²Dieu wɔ̀ mɔ: À m'a yǝ̀ nɛ́ ǹdǝ́ mɔ́; sǝ rǝ̀myɛ́ b'a yǝ̀ mɔrhɔ kɔn ǹ yilǝ rǝ n'ê byili bǝ̀ wɔ́ àmyɛ́ à twĩ̀ mú: Ǹ gǝ tú ǹ ce dwí rí du Ezhipti ǹ zhɛ̀, s'á zǔl Yi pyɔ̀ w kɔ̀bɔ́ yó.¹³Muyiisi wɔè Yi ni: Nyǐ à m'a vò Esǝrayɛl lyì byǎ bɛ́ sono, a wɔ̀ bɛ: Nyǐ wɔ́ á dabá Yi rí rǝ̀ twĩ̀ ni á sono. Sǝ bǝ̀ gǝ zɛ̃̀ bǝ̀ bwǝ̀rh ne ǹ yil ré, à m'a wɔ̀ bɛ bǝ byẽ̀? ¹⁴Yi wɔ̀ Muyiisi ni: À wɔ́ lò mó mɔ̀bɔ́ ń wɔ́ mɔ́. Rǝ k'e súlí rǝ wɔ́: Wɔ́ èta ǹ m'ǎ yí ń lyár Esǝrayɛl lyì byǎ bɛ́ nɛ́: Wɔ́ mɔ̀bɔ́ ń twĩ̀ ni á sono mó. ¹⁵Yi k'e wɔ̀ Muyiisi ni kǝ́dò: Ǹ m'a zɔ̀m ǹdǝ́ Esǝrayɛl lyì byǎ bɛ́ ń súlí ń wɔ̀: Bǝzhɔzhe, á dabá Yi rí, Abǝrahm Yi rí, Yǝzakɛ Yi ri rí ǹdǝ́ Zhakɔbɛ Yi rí, twĩ̀ ni á sono. Nyǐ à yil ré byinǝ byinǝ, nyǐ à yil ré byǎ byǎ è m'e la gaga.¹⁶Zhǝl, ń byẽ̀ Esǝrayɛl náncɛsɛ́ ń cĩ́ dwã yó, sǝ́ wɔ̀ bɛ: Bǝzhɔzhe mó, á dabá Yí rí, Abǝraham Yi rí, Yǝzakɛ Yi rí ǹdǝ́ Zhakɔbɛ Yi rí lyí ni. ¹⁷Rǝ̀ wɔ̀ nɛ: À nɔ ába, a nǝ kɔn tɛ̀bɛ́ bǝ̀ wɛ̀rhɛ́ ába Ezhipti ní mú, sǝ à wòwǝ̀: À m'a ce á du Ezhipti ní, á gǝ́ n'á nwɛ̀nɛ̀ mǝ̀gã̌ mɔ́, ce á vò Kana lyì ǹdǝ́ Eshɛ̃́ lyì ǹdǝ́ Amɔ̃́ lyì bí ǹdǝ́ Fǝrɛzhɛ lyì bí ǹdǝ Evɛ̃ lyì bí e súlí Zhǝbu lyì bí tǝnà y wa, yil mó ǹdǝ́ tùr rí gǝ́ n'ê dùr tɛ̃́ mǝ̀gã̌ mɔ́. ¹⁸Bǝ̀ m'a cili ǹ zɔ̀mà nɛ́, ǹ zǝ Esǝrayɛl náncɛsɛ́ ń mǝ́ vò Ezhipti lyì pyɔ̌ mɔ́ sono, á wɔ̀ mɔ: Nyǐ Bǝzhɔzhe, Ebǝrǝbá Yi rí lyí nǝ́ba. Pǝ nǝ́ba sɔ́má nǝ́ du nǝ́ vò dwã nǝ̀tɔ̀ zhǝl gɔ-elũ èpòlò w wǝ, nǝ́ zwǝ́l vwǝ̃̀ nǝ́ pǝ Bǝzhɔzhe nǝ́ Yi rí ni.¹⁹À yě bǝ̀ Ezhipti lyì pyɔ̌ mɔ́ tá ń la ába yõ̌ gaga á vò yé, ǹdǝ́ è gǝ dǝ̀ jɛ̃̀ kɛ̀bɛ́ è jɛ̀ yé. ²⁰À m'a zhẽ̌ à jɛ̃̀, a mà Ezhipti, à a wɛ̀rhɛ́ màmyaarhɛ tǝnà y wẽ́. Rǝ̀myɛ́ kwã nɛ́ ń mà n yẽ̌ ába á vò. ²¹À gaga mɔ́ m'a ce Ezhipti lyì bí nyǐ dwí rí tɛ̀bɛ́ ǹdǝ́ sónó, á gǝ tú á gǝ tú á du á la, á t'á du a vò ǹd'á jǝ̀-fwǝ̀r yé. ²²Kɛ̃ gakó mà n lwǝ̀l kàmɔ nǝ̀zhǐrh ǹdǝ́ sánǝ́má nǝ̀zhǐrh ń jǝ̀-dõ mó ǹdǝ́ mɔ̀bɔ́ ń ŋwɛ́nɛ́ ń sõ jù w mú ni, n lwǝ̀l gàndɛ myɛ á pǝ á byǎ bɛ́ ǹdǝ́ á bǝ̀kwá bɛ́ nɛ á zù bi. Èta á m'a kɔkɔlɛ Ezhipti lyì bí wẽ̀ ré.

¹Muyiisi lyár n wɔ̀: Nyǐ bǝ̀ t'â la shɔ̀nɔ́ bǝ zwẽ à zɔ̀mà nɛ́ nyí gaga yé, Nyǐ bǝ̀ m'a wɔ̀: Bǝzhɔzhe yǝ̀ mɔ́ lyí gaga yé. ²Bǝzhɔzhe wɔ̀ mɔ: Wɔ́ bǝ̀kúku ò ŋwɛ́nɛ́ ǹ jɔ̃̀ wa? N lyár n wɔ̀: dǝ̀dɔ̀lɔ̀. ³Bǝzhɔzhe wɔ̀: Dol w tɛ̃́ cɛ y yó. N dol w tɛ̃́ cɛ y yó, o jǐrh dɔm. Muyiisi dùr ń yé né⁴Bǝzhɔzhe wɔ̀ Muyiisi ni: Cèleè ǹ jɛ̃̀ y ń ń zǝ mǝ̀ nǝ̀byíl ré ne. N cèlè ń jɛ̃̀ n zǝ mǝ̀ nǝ̀byíl ré ne, dɔm k'a jǐrh dǝ̀dɔ̀lɔ̀ ń jɔ̃̀ wa. ⁵Bǝzhɔzhe wɔ́ mɔ̀ bǝ̀ wɔ́ èta ǹ gǝ yú sǝ́ wɛ̀rhɛ́ nɛ́, mùnì ga bǝ zwẽ nyí bǝ̀ wɔ́ Bǝzhɔzhe, bǝ̀ dabá Yi rí, Abǝraham Yi rí, Yǝzakɛ Yi rí ǹdǝ́ Zhakɔbɛ Yi rí, rǝ̀ lyí mú.⁶Bǝzhɔzhe kǝ́ n wɔ̀ mɔ: Ce ǹ jɛ̃̀ ǹ púlí y kùr wǝ, n ce ń jɛ̃̀ y ń púlí y kùr wǝ, n ká n vùr yǝ, n pwírí ń jɛ̃̀ y zhe yǝ̀bǝcɛ̀ndɛ námpwǝ̃̀ ǹdǝ bǝdũ̀kwǝlǝ ta. ⁷Bǝzhɔzhe wɔ̀: Ká ce ǹ jɛ̃̀ y ǹ púlí y kùr wǝ. N ká n ce ń jɛ̃̀ y ń púlí y kùr wǝ; n ká n vùr y ń púlí y kùr wǝ, n pwírí è k'a jǐrh ǹdǝ ń yala nɛ́ ta.⁸Bǝzhɔzhe wɔ̀: bǝ̀ gǝ yǝ̀ shɛ̀nɛ́ bǝ yǝ̀ ǹ zɔ̀mà cili màmyɔ̃ nã́yóó yilǝ, bǝ̀ m'a shɛ̀nɛ́ bǝ zwẽ nyí rǝ̀lyè nyɔ̃̌ yilǝ. ⁹Bǝ̀ gǝ yǝ̀ shɛ̀nɛ́ bǝ zwẽ nyí màmyaarhɛ rǝ̀lyè yilǝ, bǝ̀ yǝ̀ ǹ zɔ̀mà nɛ́ cili, sǝ́ tɛ̃́ nɛ̃̌ bǔ wǝ, ń ló tɛ̃́ cɛ y yó, nɛ̃̌ mɔ́ ǹ tɛ̃́ bwǐ y w mú m'a jǐrh jal cɛ y yó.¹⁰Muyiisi wɔ̀ Bǝzhɔzhe ne: Ǎàà! Cinnǝ, nyǐ à dǝ̀ lò mɔ̀bɔ́ ń nǝ́ ń púr ń nyí nàná ń zɔ̀m yé, nyǐ è dǝ̀ èyìje ráá dǝ̀lànɛ̀ ráá ń gǝ́ ju kùr ǹ nǝ́ ǹ zɔ̀m ǹdǝ́ ǹ tùntùnnǝ mó yó né à zɛ̃̀ à wàr yé, bǝ̀ nyǐ wɔ́ à nyí rí ǹdǝ́ à mǝ̀jòlò w ga rǝ̀ bǝ shɛ̀ yé. ¹¹Bǝzhɔzhe mɔ̀: Wɔ́ mɔ̌ lò ń wɛ̀rhɛ́ numbyíní nyí rí? sǝ wɔ́ mɔ̌ lò ń nǝ́ numbyíní yǝ̀ nyǝ̀-bǝdɔ̃ɔ̃ cǝ́bal, e yǝ̀ sǝ̀bɔ̀rhɔ̀, è yírhǝ́ nǝ nɛ́ e yǝ̀ sǝ̀bɔ̀rhɔ̀? È dǝ̀ àmyɛ́, Bǝzhɔzhe nà? ¹²Zhǝl, à m'a yǝ̀ nɛ́ ǹdǝ́ ǹ nyí rí, à cèrhè mó kɔn dɛ̀bɛ́ ǹ la zɔ̌m mɔ́. ¹³Muyiisi wɔ̀ : Ǎàà! Cinnǝ, twĩ̌ lò mɔ̀bɔ́ ǹ nǝ́ ǹ yǎl ń twĩ̀ mú.¹⁴Bǝzhɔzhe lyim já zɛ̃̀ Muyiisi yó, rǝ wɔ̀: Ǹ da-byǐ Arɔ̃, Lǝvyiti mú tɛ̀nɛ́ nà? À yě bǝ̀ ń mà n zɔ̀m nàná. Nyǐ ń cìcì mú, ń bàn ǹ yé né; n gǝ tú ń nɔ mɔ́, ń m'a fùù ń wẽ́. ¹⁵Ǹ m'a zɔ̀m ǹdǝ́ mɔ́, ń ce zɔ̀mà nɛ́ ń nyú wǝ; sǝ àmyɛ m'a yǝ̀ nɛ́ ǹdǝ́ ǹ nyí rí ǹdǝ́ ń nyí rí, a m'a cèrhè ába kɔn dɛ̀bɛ́ á la wɔ̀rhɔ́ mɔ́. ¹⁶Ń mà n zɔ̀m n byili dwí rí ni ǹmyɛ́ yilǝ; ǹ mà n yǝ̀ ǹ nyí rí, sǝ ń mà ń Yi jàà w ń yilǝ. ¹⁷Kwě dǝ̀dɔ̀lɔ̀ w kɔ̀bɔ́ ǹ la ń mǝ́ wɛ̀rhɛ́ màmyaarhɛ mɔ́ ń zǝ ǹ jɔ̃̀ wa.¹⁸Muyiisi zɛ̃̀ n ká ń la, n kwɛ̃̀ n tó ń cǝ́mbal Zhǝtoro sono, n wɔ̀ mɔ: À n'â lwǝ̀l mó sǝ́ yẽ̌ ne a k'a vò Ezhipti à da-byǎ bɛ́ sono, a vò a nyǐ ǹdǝ́ bǝ̀ gǝ gwẽ̌ ŋwɛ́nɛ́ lũ ní. Zhǝtoro wɔ̀ Muyiisi ni: Zhǝl ǹdǝ́ yǝ̀-zùlǝ́. ¹⁹Bǝzhɔzhe zɔ̀m ǹdǝ́ Muyiisi Majã nɛ n wɔ̀: Zhǝl, ká vò Ezhipti, bǝ̀ byɛ̀bɛ́ bǝ̀ y'à n'ê pyà gu mú gakó cùwǝ̀. ²⁰Muyiisi já n zɛ̃̀ n zǝ ǹ kɛ̃ ǹdǝ́ ń byǎ bǝ jòm bǝ̀nerh bǝ k'a kwɛ̃̀ bǝ̀ la Ezhipti tǝnà y wa. N kwè ń dǝ̀dɔ̀lɔ̀ ń zhe ń jɔ̃̀ wa.²¹Bǝzhɔzhe wɔ̀ Muyiisi: Ǹdǝ́ ń ká kwɛ̃̀ ń la Ezhipti y ní mú n wɔ́: ǹ nǝ màmyaarhɛ́ tɛ̀bɛ́ gakó à co ǹ jɔ̃̀ mɔ́: Wɛ̀rhɛ́ rɛ Fwaraɔ̃ yé né. Sǝ àmyɛ́ m'a kù ń wu wǝ́, ń tá la shɔ̀nɔ́ n yẽ̌ dwí rí gaga rǝ vò yé. ²²Ǹ m'ǎ wɔ̀ Fwaraɔ̃ nɛ: Nyǐ kɔn dɛ̀bɛ́ Bǝzhɔzhe nǝ́ ń zɔ̀m mɔ́: Esǝrayɛl wɔ́ à byǐ, à byì-yǝ́ǝ́ mó, . ²³À n'â wǝ̀l mó: Yẽ̌ à byǐ mú ni n vò, mùnì ga n zǔl ne; sǝ ǹ gǝ cẽ ǹ mǝ yẽ̌ n vò, sǝ́ nyǐ à m'a gu n byǐ mú, ǹ byì-yǝ́ǝ́ yǝ́.²⁴Bǝ̀ gǝ́ y'à ŋwɛ́nɛ́ sɔ́má yó bǝ̀ la yi ń, bǝ yí jàà èdú wẽ́, Muyiisi la gàà mɔ́ zhɔ̃́. Bǝzhɔzhe zɛ̃̀ n nyáá ń yó ń nǝ́ ń yǎl n gu mu. ²⁵Sǝfɔra zɛ̃̀ n kwè nǝ́kulu ò nyí námmyɛ̀rhɛ́, n gɔ̃̀ ń byǐ mú bɛlɛ rɛ nyí tɔ̀nɔ̀ n kwè n ji Muyiisi nèrh yó, n wɔ̀: Ǹ wɔ́ à byal jal wẽ́! ²⁶Bǝzhɔzhe já n yẽ̌ mo. N zɛ̃̀ n wɔ̀: byal jal wẽ́! Rǝ̀ kùr wɔ́ góm mó.²⁷Bǝzhɔzhe wɔ̀ Arɔ̃ nɛ: Zhǝl gɔ-elũ èpòlò w wǝ Muyiisi yé né. Arɔ̃ zhǐr ń la; n jǝl Muyiisi Yi pyɔ̀ w yó, n kwǝ̀ǝ̀lè mo. ²⁸Muyiisi zɛ̃̀ n byili Bǝzhɔzhe mó ń twĩ̀ mu mú zɔ̀mà nɛ́ nyɛ̀bɛ́ gakó, ǹdǝ́ myàmyaarhɛ tɛ̀bɛ́ ń pɔ nyí bǝ̀ ń wɛ̀rhɛ́.²⁹Muyiisi ǹdǝ́ Arɔ̃ ga j'a zhílí bǝ̀ sɔ́má yá, bǝ ce Esǝrayɛl lyì byǎ bɛ́ náncɛsɛ́ jòm dwã yó. ³⁰Arɔ̃ zɛ̃̀ n byili zɔ̀mà nɛ́ nyɛ̀bɛ́ gakó Bǝzhɔzhe yà ń byili Muyiisi ni mú, n zɛ̃̀ n já n wɛ̀rhɛ́ màmyaarhɛ dwí rí yé né rǝ̀ yírhǝ́ na. ³¹Dwí rí shɛ̀nɛ́ rǝ zwẽ nyí. Bǝ zɛ̃̀ bǝ lwar bǝ̀ nyǐ Bǝzhɔzhe yà ń tú n gwɛ̃ Esǝrayɛl lyì byǎ bɛ́ nɛ, sǝ ń nɔ bǝ̀ nɔ̀nɔ̀ wá; bǝ zɛ̃̀ bǝ wùlì tɛ̃́.

¹Rǝ̀myɛ́ yó né, Muyiisi ǹdǝ́ Arɔ̃ zɛ̃̀ bǝ vò Fwaraɔ̃ sono, bǝ wɔ̀ mɔ̀: Nyǐ Bǝzhɔzhe, Esǝrayɛl Yi rí wò wǝ̀: Yẽ̌ à dwí rí ni rǝ vò, mùnì ga rǝ̀ wɛ̀rhɛ́ címsi gɔ-elũ èpòlò w wǝ, cèrhé à yil ré. ²Fwaraɔ̃ lyár n wɔ̀: Bǝzhɔzhe mó wɔ́ mɔ̌, à la m'a zwẽ ń zɔ̀mɛ̀ rɛ́ nyí, a yẽ̌ Esǝrayɛl nɛ n vò mó ? À yǝ̀l Bǝzhɔzhe mó yár gaga yé, ce à t'â la Esǝrayɛl n vò yé.³Muyiisi ǹdə́ Aarɔ̃ lyár mɔ bə wɔ̀: «Ebərəbá Yi rí lyí nə́ba; nə́ n'é lwə̀l mó bə̀ ǹ yẽ̌ nə́ba nə́ shə́r nə́ vò dwã nə̀tɔ̀ zhəl gɔ-elũ èpòlò w wə, mùnì ga nə́ zwə́l vwə̃̀ nə́ pə Cinu, nə́ Yi rí ni. È gə də̀ rə̀myɛ́ ń mà n ce cím-bəlwɛ̀lɛ́ ráá búlə́ shù gu nə́ba.» ⁴Ezhibti pyɔ̌ mɔ́ lyár bɛ n wɔ̀: «Muyiisi ǹdə́ Aarɔ̃, è nə wɔ́ byè yil á n'á yǎl á ce dwí rí zhǐr rə yẽ̌ rə̀ tumə né ne? Kwɛ̃̀-na á vò á cili á tũ̀-kùlə̀ né sõ!» ⁵Faraɔ̃ súlí n wɔ̀: «Èlǎsɛ̃́ Esərayɛl lyì byǎ bɛ́ jǐrh nánzhəzhɔ̌, á zɛ̃̀ á n'á yǎl á ce bə yẽ̌ bə̀ tũ̀-kùlə̀ né tũ̌ ni!»⁶Dɛ̃ rə̀myɛ́ mɔ́ yù w cìcì, Faraɔ̃ pə nyí Ezhibti lyì bí byɛ̀bɛ́ bə̀ y'à wɔ́ tũ̀-kùlə̀ né yó-cìnə́ bé ǹdə́ Esərayɛl lyì byǎ bɛ́ byɛ̀bɛ́ bə̀ y'à wɔ́ kùkùlə̀ né yó-cìnə́ bé ne n wɔ̀: ⁷«Á bə̀k'á k'á pwà gɔ á pə Esərayɛl lyì byǎ bɛ́ nɛ bə m'e fwə̌rh bɔ-kwǎ bɛ́ ǹdə shãã ga mɔ́ ta yé. Bə̀ cìcì mú m'a vò bə pwà wa. ⁸Sə á ce bə gwẽ̌ fwə̌rh bɔ-kwǎ byɛ̀bɛ́ bə̀ y'à n'ê fwə̌rh kɔn b'e yí zà mɔ́ yó w cìcì, á bə̀k'á bɔ̀ bə̀ yó w yé. Bə̀ wɔ́ nə̀wàcɛ̃̀nyəla, wɔ́ rə̀myɛ́ è ce bə̀ n'ê búbwéé bə̀ zhe: Bà-na nə́ vò nə́ zwə́l vwə̃̀ nə́ pə nə́ Yi rí ni! ⁹Súlí-nə lyì bí byɛ̀bɛ́ tũ̀-kùlə̀ né zwini rí, bə twĩ̀ sə bə yẽ̌ bə̀ cìn-jə́jɔ̀rɔ́ ǹdə́ kɔma zɔ̀mà nɛ.»¹⁰Ezhibti lyì bí byɛ̀bɛ́ bə̀ y'à wɔ́ tũ̀-kùlə̀ né yó-cìnə́ bé ǹdə́ Esərayɛl lyì byǎ bɛ́ byɛ̀bɛ́ bə̀ y'à wɔ́ bə̀ dwí rí kùkùlə̀ né yó-cìnə́ bé du bə cĩ́ nyí Esərayɛl lyì byǎ bɛ́ nɛ bə wɔ̀: «Nyǐ Faraɔ̃ nyí rí: À k'â t'â la gɔ pwǎ a pə ába yé! ¹¹Á cìcì mú zhəl-nə á pwà gɔ w á gə́ m'ǎ nə w mə̀gã̌ mɔ́! Sə á lwar b'ǎ tum rí t'â la bɔ̌ námpɔ́lɛ́ myɛ cìcì yé.»¹²Rə̀myɛ́ yó, dwí rí shə́r rə làà Ezhibti tənà y cə-yala gakó wə, rə̀ la m'e pwà gɔ w bɔ-kwǎ bɛ́ fwə̌rh yilə. ¹³Tũ̀-kùlə̀ né yó-cìnə́ bé y'à j'â pyě bə̀ kùr nyí ni bə̀ zhe: «Ce-nə jàn nɛ́ á zhɛ̀ á tum rí! Dɛ̃ gakó bɔ-kwǎ bɛ́ yó w mə̌ s'o yí ǹdə bə̀ gə́ y'à n'ê pɛ ába gɔ w yi ní yó wə́!» ¹⁴Bə̀ y'à n'ê mà Esərayɛl lyì byǎ bɛ́ kùkùlə̀ né yó-cìnə́ bé byɛ̀bɛ́ Faraɔ̃ tũ̀-kùlə̀ né yó-cìnə́ bé y'à cír bə̀ cǐ bi mú bə̀ m'ê wə̀lə̀: «Byè yil də̀lànɛ̀ ǹdə́ zà ga á yə̀ ŋwɛ̀nɛ́ á fwə̌rh bɔ-kwǎ bɛ́ byɛ̀bɛ́ á y'ǎ mə̌ sə á fwə̌rh mó yó w ga ǹdə shãã ga mɔ́ ta?»¹⁵Esərayɛl lyì byǎ bɛ́ kùkùlə̀ né yó-cìnə́ bé bə̀ bə búbwéé bə ce Faraɔ̃ nɛ bə bwə̀rh bə wɔ̀: «È nə wɔ́ byè yil ǹ nə́ ǹ wɛ̀rhɛ́ tɛ̀bɛ́ ǹ tùntùnnə bé ne? ¹⁶Bə̀ k'ê t'â pwà gɔ w bə̀ pɛ ǹ tùntùnnə bé ne yé, bə̀ j'à zhe bə̀ nə́ fwə̌rh bɔ-kwǎ bɛ́, bə súlí bə̀ n'ê mà nə́ba. Ǹ dwí rí dówə́!» ¹⁷Faraɔ̃ wɔ̀ bɛ: «Á j'á búl á wɔ́ nə̀wàcɛ̃̀nyɛla, nə̀wàcɛ̃̀nyɛla páá! Wɔ́ rə̀myɛ́ è ce á zhe: Bà-na nə́ vò nə́ zwə́l vwə̃̀ nə́ pə Cinu ni. ¹⁸Kwɛ̃̀-na á vò á tum rí wẽ́ èlǎsɛ̃́, bə̀ k'ê t'â la gɔ w pwǎ bə pə ába yé, á j'ǎ m'ǎ fwə̌rh bɔ-kwǎ bɛ́ bə yí yó w kɔ̀bɔ́ á mə̌ sə á fwə̌rh mó.»¹⁹Esərayɛl lyì byǎ bɛ́ kùkùlə̀ né yó-cìnə́ bé púrí bə̀ ŋwɛ́nɛ́ pyə́pyáná wa, bə̀ bə̀ y'à n'ê wə̀l be: «Á t'á la á bɔ-kwǎ bɛ́ yó w bɔ̌ yé. Dɛ̃ gakó è m'a yə̀ yó w kɔ̀bɔ́ á mə̌ sə á fwə̌rh mó.» ²⁰Bə̀ gə́ shə́r Faraɔ̃ sõ bə du yi ní, bə̀ j'a wɛ̀rhɛ́ lala bə yí Muyiisi ǹdə́ Aarɔ̃ bə̀ y'à zhǐ bə̀ n'ê yǎl bə jəl be mó nyí ni. ²¹Bə wɔ̀ Muyiisi ǹdə́ Aarɔ̃ nɛ: «Bə̀ Cinu nyǐ kɔn rɛ́ tɛ̀bɛ́ á wɛ̀rhɛ́ mɔ́ sə n kə́ bùrsí: Á ce Faraɔ̃ ǹdə́ ń tùntùnnə bé yírh zù nə́ba, kɔn nyɛ̌ dwã ǹdə wɔ́ búlə́ shù á co bə̀ jɔ̃̀ w mùnì bə gu nə́ba ta.»²²Rə̀myɛ́ yó, Muyiisi kwɛ̃̀ n vò n nə Cinu n wɔ̀ mɔ: «Cinu, byè yil ǹ nwɛ̀nɛ̀ dwí rí tɛ̀bɛ́? È nə wɔ́ byè yil ǹ nə twĩ̀ ni? ²³À gə́ tú à n'â zɔ̀m ǹdə́ Faraɔ̃ ǹ yil yilə, yi ní ga, ń já ń nə́ ń nwɛ̀nɛ̀ ǹ dwí rí tɛ̀bɛ́, e jà ǹ yə̀ ǹ dwí rí zwẽ yé.»

¹Cinu lyár Muyiisi n wɔ̀: «Èlǎsɛ̃́, ǹ m'ǎ nə kɔn rɛ́ tɛ̀bɛ́ à la Faraɔ̃ nɛ wɔ̀rhɔ́ mɔ́:À jɛ̃̀ y jàn rɛ́ m'a nyɛ́ɛ́ mɔ n yẽ̌ be bə shə́r,À jɛ̃̀ y jàn rɛ́ m'a nyɛ́ɛ́ mɔ ń cìcì mú jì bi bə shə́r ń tənà y wa!»Yi k'e byili Muyiisi ni bə̀ wɔ́ rə̀myɛ́ rə̀ n'ê twĩ̀ mu²Yi wə̀l Muyiisi ni: Àmyɛ́ wɔ́ Cinu. ³À lyí Abəraam ǹdə́ Yəzakɛ ǹdə́ Zhakɔɔbɛ a byili bi b'à wɔ́ Yi rí tɛ̀bɛ́ rə̀ wɔ́ Jàn cə́bal, sə à yə̀ ce bə lwar b'à súlí à yíl «Cinu» yé. ⁴Rə̀myɛ́ kwã nɛ́, à zɔ dɔbrɛ ǹdə́ bɛ, a bwəl nyí b'à m'a pə bɛ Kanaã, tənà y bə̀ zhə̀l bə̀ jě è wẽ́ mó, bə̀ gə́ wɔ́ zhələ mə̀gã̌ mɔ́. ⁵Èlǎsɛ̃́, à nyɛ̀ɛ̀ Esərayɛl lyì byǎ bɛ́, Ezhibti lyì bí n'ê nyɛ́ɛ́ bɛ bə̀ ce bə̀ twĩ̀ mú wɔ́wɔ́lɔ́ mɔ́, sə à lyǐrh à dɔbrɛ́ à zɔ ǹdə́ bɛ mɔ́ yò⁶Rə̀myɛ́ ce, wál Esərayɛl lyì byǎ bɛ́ nɛ: Àmyɛ́ wɔ́ Cinu.À m'a vùr ába Ezhibti lyì bí tũ̀-kùlə̀ né wə, À m'a zwẽ ába bə̀ yómdé wə,À m'a zə à jàn rɛ́ nánfɔ̀lɔ̀ w a súlí a bùr bursi nánfɔ̀lɔ̀ a m'a vwǎrh ába, ⁷À m'a ce á jǐrh dwí tɛ̀bɛ́ rə̀ wɔ́ àmyɛ́ dwí, sə àmyɛ m'a yə̀ Yi á yilə.Á m'ǎ lwar b'àmyɛ́ wɔ́ Cinu,À wɔ́ á Yi rí: Yi rí tɛ̀bɛ́ rə̀ n'ê vùr ába Ezhibti lyì bí tũ̀-kùlə̀ né w mó.⁸À m'a ce á zù tənà y à zhẽ̌ à jɛ̃̀ dɛ̃̌ a m'a bwəl è nyí Abəraam ǹdə́ Yəzakɛe súlí Zhakɔɔbɛ nɛ mɔ́ wẽ́.À m'a pə y ába á cìní.Àmyɛ́ wɔ́ Cinu. ⁹Muyiisi cĩ́ zɔ̀mà nɛ́ nə̀myɛ́ mɔ́ Esərayɛl lyì byǎ bɛ́ nɛ, sə bə̀ yómdé tũ̀-kùlə̀ né zwini rí gə́ y'à ce bə̀ wun y'à n'ê gɛ mɔ́ ce bə̀ yə̀ mo cili yé.¹⁰Cinu kə́ n wɔ̀ Muyiisi ni: ¹¹«Zhəl ń wɔ̀ Ezhibti pyɔ̌ Faraɔ̃ nɛ, bə̀ ń yẽ̌ Esərayɛl lyì byǎ bɛ́ nɛ bə shə́r ń tənà y wa!» ¹²Sə Muyiisi lyár Cinu n wɔ̀: «Esərayɛl lyì byǎ bɛ́ cìcì mú yə̀ à zɔ̀mà nɛ́ cili yé, etər Faraɔ̃ mà n tó né n mə n cili ni ní, àmyɛ́ mɔ̀bɔ́ à nyí rí wàr zɔ̀mà mɔ́?» ¹³Rə̀myɛ́ yó, Cinu zɔ̀m ǹdə́ Muyiisi ǹdə́ Aarɔ̃, n súlí n twĩ̀ bi Esərayɛl lyì byǎ bɛ́ ǹdə́ Ezhibti pyɔ̌ Faraɔ̃ sõ ǹdə́ ń nyə́ né, mùnì ga bə ce Esərayɛl lyì byǎ bɛ́ shə́r Ezhibti tənà y wa.¹⁴Nyǐ bə̀ nàmbala bɛ́ dwə́ né yó-cìnə́ bé: Esərayɛl byì-cɛ Orɔbɛn byǎ bɛ́ yàl Anɔɔkɛ ǹdə́ Pəlu ǹdə́ Esərɔ̃ e súlí Kərəmyi. Wɔ́ bə̀myɛ́ bə̀ yàl Orɔbɛn jìsí yó-cìnə́ bé. ¹⁵Shəmənyɔ̃ byǎ bɛ́ yàl Yəmuwɛl ǹdə́ Yamɛ̃ ǹdə́ Owaadɛ ǹdə́ Yakɛ̃ ǹdə́ Sɔwaarɛ e súlí Kanaã lyì kɛ̃ mɔ́ byǐ Shəwul. Wɔ́ bə̀myɛ́ bə̀ yàl Shəmənyɔ̃ jìsí yó-cìnə́.¹⁶Nyǐ Levyi byǎ bɛ́ yilə né kɔn tó dwã ǹdə́ bə̀ nàmbala bɛ́ Gɛrəshɔn ǹdə́ Kəyaatɛ e súlí Mərəri. Levyi wɛ̀rhɛ́ byinə zɔ̌m ǹdə́ shə́-ètɔ̀ ǹdə́ nyàlpyɛ̀ cɛ yó. ¹⁷Gɛrəshɔn byǎ bɛ́ yàl Lyəbənyi ǹdə́ Shəməyi, kɔn tó dwã ǹdə́ bə̀ jìsí. ¹⁸Kəyaatɛ byǎ bɛ́ yàl Aməram ǹdə́ Yəsaarɛ ǹdə́ Ebərɔ̃ e súlí Uzhəə. Kəyaatɛ wɛ̀rhɛ́ byinə zɔ̌m ǹdə́ shə́-ètɔ̀ ǹdə́ nə̀tɔ̀ cɛ yó. ¹⁹Mərəri byǎ bɛ́ yàl Məli ǹdə́ Mushi. Wɔ́ bə̀myɛ́ bə̀ yàl Levyi jìsí kɔn tó dwã ǹdə́ bə̀ nɛ̀mɛ́ nɛ́.²⁰Aməram jí ń nə̀-kɛ̃ Yɔkəbɛɛdɛ; Yɔkəbɛɛdɛ lù Aarɔ̃ ǹdə́ Muyiisi n pɔ̃. Aməram wɛ̀rhɛ́ byinə zɔ̌m ǹdə́ shə́-ètɔ̀ ǹdə́ nyàlpyɛ̀ cɛ yó. ²¹Yəsaarɛ byǎ bɛ́ yàl Kore ǹdə́ Nəfɛɛgɛ e súlí Zəkəri. ²²Uzhəə byǎ bɛ́ yàl Myəkəyəə ǹdə́ Eləsafã e súlí Sitəri.²³Aarɔ̃ jí Amyənadaabɛ bə̀kɔ́ Elǝshəba, Naashɔ̃ nəkɔ́ mɔ́; n zə mɔ n lù Nadaabɛ ǹdə́ Abyəwu ǹdə́ Eləyazaarɛ e súlí Yətamaarɛ. ²⁴Kore byǎ bɛ́ yàl Asiiri ǹdə́ Eləkana e súlí Abyasaafɛ. Wɔ́ bə̀myɛ́ bə̀ yàl Kore byǎ bɛ́ jìsí. ²⁵Aarɔ̃ byǐ Eləyazaarɛ yà ń jú Pɔcɛl bə̀kɔ́; Pɔcɛl lù Pyənaasɛ n pɔ̃. Wɔ́ bə̀myɛ́ bə̀ yàl Levyi kwálá y dwə́ né yó-cìnə́ bé kɔn tó dwã ǹdə́ bə̀ jìsí.²⁶Wɔ́ Aarɔ̃ ǹdə́ Muyiisi ni Cinu yà ń pɔ nyí n wɔ̀: «Ce-nə Esərayɛl lyì byǎ bɛ́ pú dwã nɛ kùkùl kùkùl ǹdə shə̀dɛ́ɛ́sɛ ta, bə shə́r Ezhibti tənà y wa»; ²⁷Wɔ́ bə̀myɛ́ bə̀ zɔ̀m ǹdə́ Ezhibti pyɔ̌ Faraɔ̃, bə m'e ce Esərayɛl lyì byǎ bɛ́ shə́r Ezhibti ní mú. Wɔ́ Muyiisi ǹdə́ Aarɔ̃.²⁸Dɛ̃ rɛ́ tɛ̀bɛ́ Cinu zɔ̀m ǹdə́ Muyiisi Ezhibti ní mú, ²⁹ń wə̀l Muyiisi ni dɛ̃ rɛ́ rə̀myɛ́ mɔ́ yù wə: «Àmyɛ́ wɔ́ Cinu, zhəl ń cĩ́ Ezhibti pyɔ̌ Faraɔ̃ nɛ kɔn rɛ́ tɛ̀bɛ́ gakó à byili mú mú», ³⁰Muyiisi zhì Cinu yé né n lyár mɔ n wɔ̀: «Nyǐ à nyí wàr zɔ̀mà nɛ́ yé. Etər Faraɔ̃ mà n tó né n cili ni ní?»

¹Sə Cinu wə̀l Muyiisi ni: «Nyǐ à n'â ce ǹ wɔ́ yi Faraɔ̃ yilə, sə ǹ da-byǐ Aarɔ̃ mà n yə̀ ǹ nyì-zwennə. ²Ǹ m'ǎ byili ǹ da-byǐ Aarɔ̃ nɛ kɔn rɛ́ tɛ̀bɛ́ gakó à la mɔ́ rə̀ nyí pɔ mɔ́. Aarɔ̃ mà n zɛ̃̀ n kwè re n cĩ́ Faraɔ̃ nɛ mùnì ga n yẽ̌ Esərayɛl lyì byǎ bɛ́ nɛ bə shə́r ń tənà y wa;³3sə àmyɛ́ m'a kù Faraɔ̃ wu wə́, a m'a ce à myaarhɛ́ ǹdə́ à tũ̀-fwààlɛ́ yó w súlí Ezhibti tənà y wa, ⁴sə ǹdə́ rə̀myɛ́ ga Faraɔ̃ tá ń la ába cilu yé. À m'a byili à jɛ̃̀ y jàn rɛ́ Ezhibti lyì bí ni, sə à m'a bùr bùrsi nánfɔ̀lɔ̀ a m'a ce à shə̀dɛ́ɛ́sɛ́, à dwí Esərayɛl lyì byǎ bɛ́ shə́r Ezhibti tənà y wa. ⁵À gə tú à zhẽ̌ à jɛ̃̀ Ezhibti lyì bí yó w a m'a pə bɛ còrhò-tum a súlí a ce Esərayɛl lyì byǎ bɛ́ shə́r bə̀ sõ kwã nɛ́, Ezhibti lyì bí m'a lwar b'àmyɛ́ wɔ́ Cinu.»⁶Muyiisi ǹdə́ Aarɔ̃ j'a wɛ̀rhɛ́ kɔn rɛ́ tɛ̀bɛ́ Cinu yà ń pɔ bɛ rə̀ nyí mú cìcì. ⁷Muyiisi yà ń zhe byinə shə́-lyɛlɛ, Aarɔ̃ zɛ̃̀ ń yà ń zhe byinə shə́-lyɛlɛ ǹdə́ nə̀tɔ̀, bə̀ gə́ zhə̀l bə vò bə zɔ̀m ǹdə́ Faraɔ̃ yi ní mú.⁸Cinu wɔ̀ Muyiisi ǹdə́ Aarɔ̃ nɛ: ⁹«Faraɔ̃ gə wə̀l ába: Wɛ̀rhɛ́-na màmyɔ, sə́ wɔ̀ Aarɔ̃ nɛ: Kwě ǹ də̀-dɔ̀lɔ̀ w ń dul tɛ̃́ Faraɔ̃ yé né, ò m'a jǐrh dɔm nánjǝ́gɔ́rɔ́!» ¹⁰Muyiisi ǹdə́ Aarɔ̃ zɛ̃̀ bə bə̀ Faraɔ̃ sõ bə wɛ̀rhɛ́ ǹdə Cinu gə́ yà ń pɔ bɛ nyí ní. Aarɔ̃ dul ń də̀-dɔ̀lɔ̀ w tɛ̃́ Faraɔ̃ ǹdə́ ń tùntùnnə bé yé né, də̀-dɔ̀lɔ̀ w jǐrh dɔm nánjǝ́gɔ́rɔ́.¹¹Sə Faraɔ̃ myɛ ce bə byẽ̀ lárma cìnə́ bé ǹdə́ lyì bí byɛ̀bɛ́ bə̀ y'à n'ê twĩ̀ jə̀jǐrh-ywẽ̀ tumə né Ezhibti ní mú; sə bə̀myɛ zə bə̀ wẽ̀ ré ŋwɔ̀nɔ́ w bə wɛ̀rhɛ́ tɛ̀bɛ́ Muyiisi ǹdə́ Aarɔ̃ y'à wɛ̀rhɛ́ mɔ́ cìcì: ¹²Bə̀ mə̀dù gakó dul ń də̀-dɔ̀lɔ̀ w tɛ̃́ sə ò jǐrh dɔm nánjǝ́gɔ́rɔ́. Sə Aarɔ̃ də̀-dɔ̀lɔ̀ w lyìl bə̀ nyǎn rɛ́. ¹³Ǹdə́ rə̀myɛ́ ga, Faraɔ̃ cẽ n kù ń wu wə́; ń yə̀ Muyiisi ǹdə́ Aarɔ̃ cili yé, ǹdə Cinu gə́ yà ń dámǎ n wɔ̀ nɛ́.¹⁴Cinu wɔ̀ Muyiisi ni: «Faraɔ̃ nə́ ń twĩ̀ yó-kùlù, ń cẽ ń tá ń la dwí rí ni yõ̌ rə shə́r yé. ¹⁵Nəkɔl nəkɔkɔ́lɛ́ yá, Faraɔ̃ gə tú ń du ń la nɛ̃̌ mɔ́ nyí ni sə́ vò ń sõ. Dɛ̃̌ mɔ Niili y nyí ni. Ǹ m'ǎ kwè də̀-dɔ̀lɔ̀ w ò y'à jǐrh dɔm mɔ́ ń zə ǹ jɔ̃̀ wa.¹⁶Ǹ m'ǎ wɔ̀ Faraɔ̃ nɛ: Cinu, Ebərəbá Yi rí y'à twĩ̀ ni a b'a wɔ̀ mɔ́: Yẽ̌ à dwí rí ni rə du mùnì ga rə vò rə cèrhé ne gɔ-elũ èpòlò w wə, sə kɔn m'e yí zà, ǹ yə̀ cili yé. ¹⁷Rə̀myɛ́ ce, nyǐ Cinu nyí rí: Àmyɛ́ m'a zə də̀-dɔ̀lɔ̀ w à jɔ̃̀ w mɔ́ a m'a mà Niili y nàná bɛ́ sə bə̀ m'a jǐrh jal. Ǹ m'ǎ zɛ̃̀ ń lwar b'à wɔ́ Cinu. ¹⁸Emwěsé Niili y w mú m'a cì, Niili y m'a sú ǹdə́ lwẽ́ námmədɔ̀rhɔ̀ sə Ezhibti lyì bí k'ê t'â la ŋwɔ̀nɔ́ bə nyɔ̀ è nàná bɛ́ yé.»¹⁹Cinu wɔ̀ Muyiisi ni: «Pə nyí Aarɔ̃ nɛ ń wɔ̀: Kwě ǹ də̀-dɔ̀lɔ̀ wá, sə́ zhẽ̌ ǹ jɛ̃̀ y Ezhibti nàná bɛ́ yó wə, è bwǐsí ǹdə́ è nɛ̃̌-gwáárɛ́ ǹdə́ è pwə́ə́lé yó wə, e súlí nɛ̃̌ gə wɔ mə̀gã̌ gakó, sə rə̀ nɛ̃̌ mɔ́ jǐrh jal! Bə̀ Ezhibti tənà y púlə́púlə́ sú ǹdə́ jal, dɔ̌-nə̀zhẽ̌ né ǹdə́ nə́kulu nə̀zhẽ̌ né ga!»²⁰Muyiisi ǹdə́ Aarɔ̃ wɛ̀rhɛ́ kɔn rɛ́ tɛ̀bɛ́ Cinu yà ń pɔ bɛ rə̀ nyí mú. Aarɔ̃ zhẽ̌ ń də̀-dɔ̀lɔ̀ w dɛ̃̌ n mà Niili y nàná bɛ́ Faraɔ̃ ǹdə́ ń tùntùnnə bé yírh wə. Niili y nàná bɛ́ gakó j'a jǐrh jal. ²¹Emwěsé Niili y w mú j'a cì, Niili y j'a sú ǹdə́ lwẽ́ námmədɔ̀rhɔ̀, Ezhibti lyi bí k'ê yə̀ ŋwɛ̀nɛ́ bə nyɔ̀ è nàná bɛ́ yé. Ezhibti tənà y gakó y'à j'a sú ǹdə́ jal. ²²Sə Ezhibti lyì bí byɛ̀bɛ́ bə̀ y'à n'ê twĩ̀ jə̀jǐrh-ywẽ̀ tumə né Ezhibti ní mú myɛ zə bə̀ wẽ̀ ré ŋwɔ̀nɔ́ w bə̀myɛ wɛ̀rhɛ́ rə̀myɛ́ mɔ́ myɛ cìcì. Faraɔ̃ cẽ n kù ń wu wə́, ń yə̀ Muyiisi ǹdə́ Aarɔ̃ cili yé, ǹdə Cinu gə́ yà ń dámǎ n wɔ̀ nɛ́.²³Faraɔ̃ ká n kwɛ̃̀ n zù ń sõ kɛ̀lɛ́ wa, ń yə̀ re kwè ǹdə yò ta yé. ²⁴Ezhibti lyì bí gakó kù gwáárɛ bə twèlé Niili y vɔ̀mɛ̀ nɛ́ nɛ bə m'e pyà nə̀-nyɔ̀mà, bə̀ bə̀ y'à k'ê wàr Niili y nàná bɛ́ bə̀ nywɛ̀ yé. ²⁵Kɔn wɛ̀rhɛ́ dwã nyàlpyɛ̀, Cinu gə́ ce Niili y nàná bɛ́ jǐrh jal mɔ́ kwã nɛ́.

¹Cinu wɔ̀ Muyiisi ni: «Pə nyí Aarɔ̃ nɛ ń wɔ̀: Zhẽ̌ ǹ jɛ̃̀ y ń zə də̀-dɔ̀lɔ̀ w ń zǎ bwǐsí ǹdə́ nɛ̃̌-gwáárɛ́ e súlí pwə́ə́lé səta, ń ce nyã̀swələ né du nə sú Ezhibti tənà y cə-yala gakó.» ²Aarɔ̃ cèlè ń jɛ̃̀ y n zǎ Ezhibti tənà y nàná bɛ́; nyã̀swələ né du nə sú tənà yá. ³Sə lyì bí byɛ̀bɛ́ bə̀ n'ê twĩ̀ jə̀jǐrh-ywẽ̀ tumə né myɛ zə bə̀ wẽ̀ ré ŋwɔ̀nɔ́ w bə̀myɛ wɛ̀rhɛ́ rə̀myɛ́ mɔ́ cìcì: bə̀ ce nyã̀swələ du nə sú tɛ̃́ tənà y cə-yala gakó. ⁴Faraɔ̃ byẽ̀ Muyiisi ǹdə́ Aarɔ̃ ń sõ n wɔ̀ bɛ: «Lwə̌l-nə Cinu ni bə̀ ń ce nyã̀swələ né vò pyépyé nə yẽ̌ àmyɛ́ ǹd'â dwí rí ni, b'à m'a yẽ̌ Esərayɛl lyì byǎ bɛ́ nɛ bə shə́r bə vò bə zwə́l vwə̃̀ bə pə Cinu ni.»⁵Muyiisi wɔ̀ Faraɔ̃ nɛ: «À n'â lwə̀l sə ǹmyɛ́ cìcì mú byili yi rí tɛ̀bɛ́ à mə̌ s'a lwə̀l Yi ǹmyɛ́ ǹdə́ ǹ tùntùnnə bé e súlí ǹ dwí rí yilə, mùnì ga rə ce nyã̀swələ né jé tɛ̃́ ǹ sõ ǹdə́ ǹ jìsí wẽ́, sə nə j'a mɛ̃ Niili y dúdú wẽ́.» ⁶Faraɔ̃ lyár n wɔ̀: «Nəkɔl dɛ̃ rɛ́ cìcì.» Muyiisi wɔ̀ mɔ: «À m'a wɛ̀rhɛ́ ǹdə ǹ gə́ lwə̀l né mùnì ga ń lwar bə̀ lò tɛ̀nɛ́ ń wɔ́ ǹdə Cinu nə́ Yi rí ta yé, ⁷nyã̀swələ né m'a vò pyépyé nə yẽ̌ ǹmyɛ́ ǹdə́ ǹ jìsí ǹdə́ ǹ tùntùnnə bé e súlí ǹ dwí rí ni, sə wɔ́ Niili y dúdú wẽ́ nə̀ m'a yə̀ nɛ́.»⁸Muyiisi ǹdə́ Aarɔ̃ j'a shə́r Faraɔ̃ sõ kɛ̀lɛ́ wa. Muyiisi zɛ̃̀ n búbwéé n ce Cinu ni nyã̀swələ né ń yà n mə n pə còrhò-tum Faraɔ̃ nɛ mɔ́ shò kwã nɛ́. ⁹Sə Cinu wɛ̀rhɛ́ kɔn rɛ́ tɛ̀bɛ́ Muyiisi yà ń lwə̀l mo mó. Nyã̀swələ né cì, nə jé tɛ̃́ jìsí ǹdə́ kǎlsɛ́ ǹdə́ cɛsɛ́ wa.¹⁰Bə j'a pwà nɛ bə cĩ́ púlə́ nánzhəzhɔ̌, tənà y zɛ̃̀ è y'à j'a sú ǹdə́ nə̀ lwẽ́ námmədɔ̀rhɔ̀ wá. ¹¹Faraɔ̃ gə́ púrí ń nɔ ń cìn námpɔ́lɛ́ rə̀myɛ́ mɔ́ yi ní, n já n kə́ n zɛ̃̀ n twĩ̀ yó-kùlù. Ń yə̀ Muyiisi ǹdə́ Aarɔ̃ cili yé, ǹdə Cinu gə́ yà ń dámǎ n wɔ̀ nɛ́.Màbyə́ə́re rə̀tɔ̀ nyɔ̃̌ wá: bɔ̀mbɔ́nsɛ́ ¹²Cinu wɔ̀ Muyiisi ni: «Pə nyí Aarɔ̃ nɛ ń wɔ̀: Zhẽ̌ ǹ də̀-dɔ̀lɔ̀ w ń mà cɛ y shó wə́; ò m'a jǐrh bɔ̀mbɔ́nsɛ Ezhibti tənà y gakó wẽ́.»¹³Muyiisi ǹdə́ Aarɔ̃ wɛ̀rhɛ́ èta, Aarɔ̃ zhẽ̌ ń jɛ̃̀ y ǹdə́ də̀-dɔ̀lɔ̀ w ń jɔ̃̀ w n mə n mà cɛ y shó wə́. Bɔ̀mbɔ́nsɛ j'a du sə pú numbyínə́ bé ǹdə́ vwàmá nɛ́ nɛ. Cɛ y shó w gakó j'a jǐrh bɔ̀mbɔ́nsɛ Ezhibti tənà y púlə́púlə́ wə. ¹⁴Lyì bí byɛ̀bɛ́ bə̀ n'ê twĩ̀ jə̀jǐrh-ywẽ̀ tumə né myɛ zɛ̃̀ bə zə bə̀ wẽ̀ ré ŋwɔ̀nɔ́ w bə mɛrhɛ bɔ̀mbɔ́nsɛ wɔ̀rhɔ́, sə bə̀ yə̀ ŋwɛ̀nɛ́ yé. Bɔ̀mbɔ́nsɛ́ y'à j'a pú numbyínə́ bé ǹdə́ vwàmá nɛ́ ga nɛ. ¹⁵Lyì bí byɛ̀bɛ́ bə̀ n'ê twĩ̀ jə̀jǐrh-ywẽ̀ tumə né wɔ̀ Faraɔ̃ nɛ: «Wɔ́ Yi jə̀fɔ́lɛ́ yáa» Sə Faraɔ̃ cẽ n kù ń wu wə́. Ń yə̀ Muyiisi ǹdə́ Aarɔ̃ cili yé, ǹdə Cinu gə́ yà ń dámǎ n wɔ̀ nɛ́.¹⁶Cinu kə́ n wɔ̀ Muyiisi ni: «Dùlí ń zɛ̃̀ nəkɔkɔ́lɛ́ shãã shãã ń vò Faraɔ̃ sõ, ń gə tú n du ń la Niili y nyí ni yi ní. Wál mɔ: Nyǐ Cinu nyí rí: Yẽ̌ à dwí rí ni rə shə́r mùnì rə vò rə cèrhé ne. ¹⁷Ǹ gə yə̀ à dwí rí ni yẽ̌ rə shə́r, à m'a ce nə̀zɔ̀ɔ́rɛ bə̀ rə pú ǹmyɛ́ ǹdə́ ǹ tùntùnnə bé ǹdə́ ǹ dwí rí, rə súlí rə sú ǹ jìsí. Ezhibti lyì bí jìsí, e súlí cɛ y kɛ̀bɛ́ bə̀ ŋwɛ́nɛ́ è yó cìcì mú m'a sú ǹdə́ rɛ.¹⁸Dɛ̃ rɛ́ rə̀myɛ́ mɔ́, kɔn t'â la èta yál Gɔshɛn nyí rí wẽ́, à dwí rí gə́ wɔ mə̀gã̌ mɔ́ yé; nə̀zɔ̀rɛ́ èdù ga myɛ t'â la gàà yál yé, mùnì ga ń lwar b'àmyɛ́ Cinu ŋwɛ́nɛ́ tənà y wẽ́. ¹⁹À m'a twĩ̀ vwǎrh tum à dwí rí yilə, a m'a pɔr à dwí rí ǹdə́ ǹ nyǎn rɛ́ dwã wa. Myɔrhɔ w òmyɛ́ mɔ́ m'a yə̀ nɛ́ nəkɔl dɛ̃ rɛ́.»²⁰Cinu wɛ̀rhɛ́ kɔn rɛ́ tɛ̀bɛ́ ń yà ń byili mú. Nə̀zɔ̀ɔ́rɛ́ mɔ dwã nɛ cìlú rə zù Faraɔ̃ ǹdə́ ń tùntùnnə bé jìsí wə, ǹdə́ Ezhibti tənà y gakó wẽ́; tənà y y'à j'a sú ǹdə́ nə̀zɔ̀ɔ́rɛ́. ²¹Rə̀myɛ́ yó, Faraɔ̃ byẽ̀ Muyiisi ǹdə́ Aarɔ̃ ń sõ n wɔ̀ bɛ: «Zhəl-nə á zwə́l vwə̃̀ á pə á Yi rí ni, sə e yə̀ tənà y kɛ̀bɛ́ wẽ́!»²²Muyiisi lyár n wɔ̀: «Nə́ wàr nə́ m'ǎ wɛ̀rhɛ́ èta yé, bə̀ vwə̃̀ né nə́ n'é zwə́l nə́ pɛ Cinu, nə́ Yi rí ni mú wɔ́ pwarha kɔn Ezhibti lyì bí yilə. Nə́ wɔ̌ nə́ m'ǎ zwə́l vwĩ̀ tɛ̀bɛ́ rə̀ wɔ́ pwarha kɔn Ezhibti lyì bí yírh w bə cẽ nə́ba dul ǹdə́ nə́kulə zhə̀nà? ²³Nə́ n'é yǎl nə́ vò dwã nə̀tɔ̀ zhəl gɔ-elũ èpòlò w wə, nə́ zwə́l vwə̃̀ nə́ pə Cinu nə́ Yi rí ni, kɔn tó tɛ̀bɛ́ ń la nə́ba byilu mú.» ²⁴Faraɔ̃ wɔ̀: «À m'a yẽ̌ ába á shə́r á vò á zwə́l vwə̃̀ á pə Cinu á Yi rí ni gɔ-elũ èpòlò w wə. Ámyɛ̌ wúrí á bə̀k'á vò pyépyé dɛ̃́dɛ̃́ yé! Lwə̌l-nə Yi à yilə.»²⁵Muyiisi wɔ̀ mɔ: «È gə wɔ́ èta, à m'a shə́r ǹ sõ a m'a zə Cinu cã̌ nɛ mùnì ga nə̀zɔ̀ɔ́rɛ́ yẽ̌ Faraɔ̃ ǹdə́ ń tùntùnnə bé ǹdə́ ń dwí rí ni rə̀ vò pyépyé nəkɔl dɛ̃ rɛ́ cìcì. Faraɔ̃ myɛ̌ wúrí n yẽ̌ nə́ nyí sòlò ne, n zɛ̃̀ n cẽ dwí rí ni yõ̌ rə vò rə zwə́l vwə̃̀ rə pə Cinu ni yé!» ²⁶Muyiisi shə́r Faraɔ̃ sõ kɛ̀lɛ́ wa, n zɛ̃̀ n zə Cinu cã̌ nɛ. ²⁷Cinu wɛ̀rhɛ́ kɔn rɛ́ tɛ̀bɛ́ Muyiisi lwə̀l mo mó. Nə̀zɔ̀ɔ́rɛ́ zhə̀l pyépyé, rə̀ yẽ̌ Faraɔ̃ ǹdə́ ń tùntùnnə bé ǹdə́ ń dwí rí ni. Nə̀zɔ̀rɛ́ èdù ga myɛ yə̀ dàl yé.²⁸Farɔ̃ wɔ̀: À m'a yẽ̌ ába á vò, á zwǝ́l vwǝ̃̀ á pǝ Bǝ zhɔ̌ zhe á Yi ri rí ni, gɔ-elũ èpòlò w wǝ: sǝ bǝ̀k'á shɛ̀nɛ́ á vò kwã nɛ́ gaga yé. À lwǝ̌l-na Yi à yilǝ. ²⁹Muyiisi lyár n wɔ̀: À m'a du ǹ sono, a ce Bǝ zhɔ̌ zhe. Sǝ zɔ̀rhsɛ́ m' vò kwã nɛ́ sǝ yẽ̌ Farɔ̃ ǹdǝ́ ń tùntùnnǝ bé ǹdǝ́ ń dwí rí ni, Sǝ Faraɔ̃ bǝ̀ká n kǝ́ n shɛ̀nɛ́ n dwĩ̀ ń ń cìn, n cẽ ń dwí ri yõ̌ rǝ shə́r rǝ vò rǝ zwǝ́l vwǝ̃̀ rǝ pǝ Bǝ zhɔ̌ zhe ne yé.³⁰Muyiisi du Faraɔ̀ sono, n ce Bǝ zhɔ̌ zhe. . ³¹Bǝ zhɔ̌ zɛ̃̀ n shɛ̀nɛ́ kɔn dɛ̀bɛ́ Muyiisi lwǝ̀l mó: rǝ̀myɛ́ yó né zɔ̀rhsɛ́ zhǐr sǝ vò kwã nɛ́ gaga sɛ yẽ̌ Faraɔ̃ ǹdǝ́ ń ń tùntùnnǝ bé ǹdǝ́ dwí rí ni. Zɔ̀wà èdù ga k'ê yǝ̀ nɛ́ yàl yé ³²Ǹdə́ rə̀myɛ́ ga, Faraɔ̃ cẽ n twĩ̀ yó-kùlù, ń yə̀ dwí rí ni yẽ rə shə́r yé.

¹Cinu kə́ n wɔ̀ Muyiisi ni: «Zhəl Faraɔ̃ sõ ń vò ń wɔ̀ mɔ: Nyǐ Cinu Ebərəbá Yi rí nyí rí: Yẽ̌ à dwí rí ni rə shə́r mùnì ga rə vò rə cèrhé ne. ²Ǹ gə gwẽ̌ cẽ ǹ tá ǹ la rɛ yõ̌ rə shə́r, ń cẽ ǹ nə́ ǹ cə̀r re, ³Cinu mà n ce cím-bəlwɛ̀lɛ́ è búl è cɛ̀ dɛ̃́dɛ̃́ gurhi vwàmá nɛ́ nyɛ̀bɛ́ nə̀ wɔ ǹ cɛsɛ́ wẽ́ mó ǹdə́ ǹ shəshesé ǹdə́ ǹ bə̀nesé ǹdə́ ǹ yómdé ǹdə́ ǹ nɛ̃ nɛ́ e súlí ǹ pyììsí! ⁴Cinu mà n pɔr Esərayɛl lyì byǎ bɛ́ vwàmá nɛ́ ǹdə́ Ezhibti lyì bí nyə̀ná nɛ́ dwã wa. Vwǎm mə̀dù ga myɛ t'â la cú Esərayɛl lyì byǎ bɛ́ vwàmá nɛ́ wẽ́ yé.»⁵Cinu zɛ̃̀ n cír rə̀ yi rí, n wɔ̀: «Cinu mà n wɛ̀rhɛ́ rɛ tənà y wẽ́ nəkɔl dɛ̃ rɛ́ cìcì.» ⁶Sə è zɛ̃̀ nəkɔkɔ́lɛ́ y Cinu wɛ̀rhɛ́ rɛ: Ezhibti lyì bí vwàmá nɛ́ púlə́púlə́ cì, sə vwǎm mə̀dù ga yə̀ cì Esərayɛl lyì byǎ bɛ́ vwàmá nɛ́ wẽ́ yé. ⁷Faraɔ̃ twĩ̀ bə vò bə byɛ́lɛ́, sə bə̀ púrí vwǎm mə̀dù ga myɛ yə̀ cì Esərayɛl lyì byǎ bɛ́ vwàmá nɛ́ wẽ́ yé! Sə ǹdə́ rə̀myɛ́ ga, Faraɔ̃ gwẽ̌ cẽ n twĩ̀ yó-kùlù; ń yə̀ dwí rí ni yẽ̌ rə shə́r yé.⁸Cinu wɔ̀ Muyiisi ǹdə́ Aarɔ̃ nɛ: «Pwǎ-na kúl myìn-táfúlú jə̀-gúlə́ nə̀lyè, á gə yú Faraɔ̃ yé né, sə Muyiisi la w dɛ̃̌. ⁹Ò m'a jǐrh kɔ́kɔ̀rhɔ́ Ezhibti tənà y yó wə, o ce kúkùlə́ nə̀ n'ê jǐrh nyəla ji Ezhibti tənà y numbyínsí ǹdə́ è vwàmá nɛ́ yala nɛ́ nɛ.» ¹⁰Bə̀ pwà kúl myìn-táfúlú w bə b'e zhì Faraɔ̃ yé né; Muyiisi la w dɛ̃̌, sə ò ce kúkùlə́ nə̀ n'ê jǐrh nyəla ji numbyínsí ǹdə́ vwàmá nɛ́ yala nɛ́ nɛ.¹¹Sə kúkùlə́ né ce lyì bí byɛ̀bɛ́ bə̀ n'ê twĩ̀ jə̀jǐrh-ywẽ̀ tumə né mó yə̀ ŋwɛ̀nɛ́ bə zhì Muyiisi yé né yé, bə̀ nə̀ y'à fwər bə̀myɛ́ ǹdə́ Ezhibti lyì bí gakó yala nɛ́. ¹²Sə Cinu kùl Faraɔ̃ wu wə́, ń yə̀ Muyiisi ǹdə́ Aarɔ̃ cili yé, ǹdə Cinu gə́ yà ń dámǎ n wɔ̀ Muyiisi ni ní.¹³Cinu kə́ n wɔ̀ Muyiisi ni: «Dùlí ń zɛ̃̀ nəkɔkɔ́lɛ́ shãã shãã ń vò Faraɔ̃ sõ, ń vò ń wɔ̀ mɔ: Nyǐ Cinu, Ebərəbá Yi rí nyí rí: Yẽ̌ à dwí rí ni rə shə́r mùnì ga rə vò rə cèrhé ne. ¹⁴Bə̀ èlǎsɛ̃́ myɛ̌, à m'a ce màbyə́ə́re dwí gakó pú ǹmyɛ́ ǹdə́ ǹ tùntùnnə bé ǹdə́ ǹ dwí rí, mùnì ga ń lwar bə̀ nyǐ à bə nyɛrh-dõ zhe cɛ y yó yé.¹⁵À gə y'à pyɛ́nɛ́ a zhẽ̌ jɛ̃̀ ǹmyɛ́ ǹdə́ ǹ dwí rí yó, cím-bəlwɛ̀lɛ́ gə y'à gu ǹmyɛ́ ǹdə́ ǹ dwí rí ga, ń jé tɛ̃́ cɛ y yó, èlǎsɛ̃́-lǎsɛ̃́. ¹⁶Sə nyǐ kɔn rɛ́ tɛ̀bɛ́ rə̀ ce a yẽ̌ mó ǹ gwẽ̌ ŋwɛ́nɛ́ mɔ́: wɔ́ mùnì ga a ce ń lwar à jàn rɛ́ gə́ wɔ́ nɛ́, sə bə bwə̀l à yil ré bə byili lũ w púlə́púlə́ wə. ¹⁷Ǹ gwẽ̌ cẽ ǹ nə́ ǹ cə̀r à dwí rí dwirí y yé ne.¹⁸Nəkɔl dɛ̃ rɛ́, yi rí tɛ̀bɛ́ èta cìcì mú, à m'a ce bədũ̀kwələ dwà nánfwɛ̀lɛ̀ nyɔ̀, è dwí rí gwẽ̌ yə̀ Ezhibti ní nywɛ̀, Ezhibti tənà y gə́ ju kùr yi ní ga kɔn m'e yí zà mɔ́ gaga yé. ¹⁹Rə̀myɛ́ ce, ce bə vò bə pyà jàà bə ce ǹ vwàmá nɛ́ ǹdə́ kɔn rɛ́ tɛ̀bɛ́ gakó ǹ cǐ rə̀ wɔ gɔ sõ mó. Bədũ̀kwələ né m'a gu lò mɔ̀bɔ́ gakó ń mɛ̃ gɔ sõ ǹdə́ vwǎm mɔ̀bɔ́ gakó mə̀ mɛ̃ gɔ sõ, bə̀ yə̀ zə bə bə̀ jè mó.»²⁰Lyì bí byɛ̀bɛ́ bə̀ nyàm Cinu zɔ̀mɛ̀ rɛ́, Faraɔ̃ tùntùnnə bé wẽ́ mó, co bə̀ tùntùnnə bé ǹdə́ bə̀ vwàmá nɛ́ jìsí wẽ́. ²¹Sə byɛ̀bɛ́ bə̀ yə̀ rə kwè ǹdə zɔ̃̀-twə̌ ta mɔ́, yẽ̌ bə̀ tùntùnnə bé ǹdə́ bə̀ vwàmá nɛ́ nɛ gɔ sõ.²²Cinu wɔ̀ Muyiisi ni: «Zhẽ̌ ǹ jɛ̃̀ y ń ce dɛ̃̌-yi wə, sə bədũ̀kwələ ló tɛ̃́ Ezhibti tənà y púlə́púlə́ wə, numbyínə́ bé ǹdə́ vwàmá nɛ́ e súlí cɛsɛ́ gɔ w gakó Ezhibti tənà y yó.» ²³Muyiisi zhẽ̌ ń də̀-dɔ̀lɔ̀ w n ce dɛ̃̌-yi wə, Cinu ce dwà-gùlú j'a zɛ̃̀ ò n'ô domə, bədũ̀kwələ n'ê lwé tɛ̃́: Dwà-myǐn mú tu cɛ y yó, Cinu ce bədũ̀kwələ dwà búl e nyɔ̀ Ezhibti tənà y wa. ²⁴Bədũ̀kwələ, dwà-myǐn ǹdə́ bədũ̀kwələ rə̀ n'ê tó dwã, bədũ̀kwələ nə̀ y'à búl nə̀ já: Ezhibti tənà y y'à gwẽ̌ yə̀ rə̀myɛ́ dwí rí nɛ è gə́ wɔ́ tənà yi ní ga yé.²⁵Bədũ̀kwələ né gu kɔn dɛ̀bɛ́ gakó rə̀ y'à wɔ gɔ sõ, numbyínə́ bé ǹdə́ vwàmá nɛ́ ga. Nə̀ gu cɛsɛ́ gɔ w gakó, nə pɔ́pɔ̀lɛ́ cèmé né gakó Ezhibti tənà y púlə́púlə́ wə. ²⁶Gɔshɛn nyí rí dúdú wẽ́, Esərayɛl lyì byǎ bɛ́ gə́ y'à wɔ mə̀gã̌ mɔ́, bədũ̀kwələ né yə̀ nɛ́ lwé yé.²⁷Rə̀myɛ́ yó, Faraɔ̃ ce bə byẽ̀ Muyiisi ǹdə́ Aarɔ̃ n zɛ̃̀ n wɔ̀ bɛ: «Èlǎsɛ̃́ myɛ̌, à dówə́; Cinu ń wɔ́ cángá cə́bal mɔ́; àmyɛ́ ǹd'â dwí rí nə́ wɔ́ dwə́ə́ré cìnə́ bé. ²⁸Zə-na Cinu cã̌ nɛ bə̀ də̀-byɛɛ́sɛ́ ǹdə́ bədũ̀kwələ né búl rə lyɛ̃ cɛ nɛ èlǎsɛ̃́. À m'a yẽ̌ ába á shə́r á vò, à k'â t'â la ába cə̌r kɔn dɛnɛ yé.»²⁹Muyiisi wɔ̀ mɔ: «À gə du cɔ w w yi ní, à m'a zhẽ̌ à jɛ̀sɛ́ a ce Cinu ni; də̀-byɛɛ́sɛ́ m'a zhɛ̀, bədũ̀kwələ né myɛ k'ê t'â la tɛ̃́ ló yé, mùnì ga ń lwar bə̀ wɔ́ Cinu ń cǐ lũ wə́. ³⁰S'a j'à yě bə̀ ǹmyɛ́ ǹdə́ ǹ tùntùnnə bé gwẽ̌ t'á nyàm Cinu Yi yé.»³¹Lɛ̃̌ y ǹdə́ orzhɛ y ga cɔ̀, bə̀ orzhɛ y y'à n'ê lùlə̀, lɛ̃̌ y myɛ y'à wɔ́ pùnə́. ³²Sə bə̀lɛ́ y dwə́ kùrə̀ né nə̀lyè y gə́ y'à wɔ́ nánkwaárɛ́ mɔ́ ce, nə̀ yə̀ cɔ̀ yé. ³³Muyiisi shə́r Faraɔ̃ sõ, n súlí n du cɔ w wa, n zɛ̃̀ n zhẽ̌ ń jɛ̀sɛ́ dɛ̃̌ n zə Cinu cã̌ nɛ, də̀-byɛɛ́sɛ́ ǹdə́ bədũ̀kwələ né j'a zhì; dwà y k'ê yə̀ nɛ̃̌ tɛ̃́ cìr yé.³⁴Sə Faraɔ̃ gə́ púrí dwà y ǹdə́ bədũ̀kwələ né e súlí də̀-byɛɛ́sɛ́ ga zhì mú, n zɛ̃̀ n kə́ n wɛ̀rhɛ́ yə̀-bəlɔ̀lɔ́ kə́dò. Ńmyɛ̌ ǹdə́ ń tùntùnnə bé twĩ̀ yó-kùùlì. ³⁵Faraɔ̃ wu w j'a gwẽ̌ cə̀ə̀lè o mɛ̃ nánkùlù; ń yə̀ Esərayɛl lyì byǎ bɛ́ nɛ yẽ̌ bə shə́r yé, ǹdə Cinu gə́ yà ń dámǎ n tó Muyiisi dɛnnɛ n byili ní.

¹Cinu kə́ n wɔ̀ Muyiisi ni: «Zhəl Faraɔ̃ sõ bə̀ wɔ́ àmyɛ́ à ce ńmyɛ̌ ǹdə́ ń tùntùnnə bé n'ê twĩ̀ yó-kùùlì, mùnì ga a tó rə̀ dɛnnɛ a twĩ̀ tũ̀-fwààlɛ tɛ̀bɛ́ rə̀ n'ê byili b'à ŋwɛ́nɛ́ bə̀ cəcəl wə, ²sə ǹmyɛ mə́ súlí ń cĩ́ còrhò-tum mɔ̀bɔ́ à pɔ Ezhibti lyì bí ni mú e súlí tũ̀-fwààlɛ́ tɛ̀bɛ́ à twĩ̀ bə̀ sõ mó nyí rí ǹ byǎ bɛ́ ǹdə́ ǹ nɛ̀mɛ́ nɛ́ nɛ. Á m'ǎ zɛ̃̀ á lwar b'àmyɛ́ wɔ́ Cinu.»³Muyiisi ǹdə́ Aarɔ̃ zɛ̃̀ bə vò Faraɔ̃ sõ bə yí bə wɔ̀ mɔ: «Nyǐ Cinu, Ebərəbá Yi rí nyí rí: Ǹ nə m'ǎ cẽ ǹ cìn tɛ̃́ lwəl à yé né kɔn m'e yí dǒ? Yẽ̌ à dwí rí ni rə shə́r mùnì ga rə vò rə cèrhé ne. ⁴Ǹ gə já ǹ gwẽ̌ cẽ ǹ tá ǹ la rɛ yõ̌ rə shə́r, à m'a ce səsɔ̀mɛ̀ bə̀ ǹ tənà y wẽ́ nəkɔl dɛ̃ rɛ́.⁵Nə̀ m'a ləlɛ tɛ̃́ nə pyi cɛ y gakó lò kə́ ń wàr ń la y nɔ ǹdə́ ń yírh yé. Nə̀ m'a jí kɔn rɛ́ tɛ̀bɛ́ bədũ̀kwələ né yə̀ cɔ mɔ́, nə̀ m'a dɔ̃̀ á cèmé né nyɛ̀bɛ́ gakó nə̀ n'ê lyĩ cɛsɛ́ wẽ́ mó. ⁶Nə̀ m'a sú ǹ pyɔ̌-kɛ̀lɛ́ y jìsí ǹdə́ ǹ tùntùnnə bé jìsí e súlí Ezhibti lyì bí púlə́púlə́ jìsí. Ǹ dabá ǹdə́ ǹ nàmbala bɛ́ j'â gwẽ̌ yə̀ rə̀myɛ́ mɔ́ nɛ, bə̀ gə́ wɔ cɛ yó ga, kɔn m'e yí zà yé.» Rə̀myɛ́ kwã nɛ́, Muyiisi shə́r Faraɔ̃ sõ, n ká n kwɛ̃̀.⁷Faraɔ̃ tùntùnnə bé wɔ̀ mɔ: «Numbyíní y kɛ̀bɛ́ nə m'a yə̀ pɔ̀mɔ̀ nə́ yil kɔn m'e yí dǒ? Yẽ̌ lyì bí byɛ̀bɛ́ nɛ bə shə́r mùnì ga bə vò bə cèrhé Cinu bə̀ Yi rí. Ǹ já ǹ gwẽ̌ bə nɛ bə̀ Ezhibti tənà y wɔ́ cɔ́ è j'â n'ê cɔ̀ è la nà?» ⁸Bə k'a ce Muyiisi ǹdə́ Aarɔ̃ kwɛ̃̀ bə bə̀ Faraɔ̃ sõ, Faraɔ̃ zɛ̃̀ n wɔ̀ bɛ: «Zhəl-nə á vò á cèrhé Cinu á Yi rí. Sə è nə wɔ́ lyì byɛ̌ bə̀ la mɔ́?»⁹Muyiisi lyár mɔ n wɔ̀: «Nə́ m'ǎ zə nə́ bə̀sɔ́ná bɛ́ ǹdə́ nə́ náncɛsɛ́ ǹdə́ nə́ bala-byǎ bɛ́ ǹdə́ nə́ kana-byǎ bɛ́ e súlí nə́ və̌-ywàálɛ́ ǹdə́ nə́ vwàmá nánfwààlɛ́ nə́ m'é vò. B'è wɔ́ címsi nə́ mə̌ sə nə́ jí Cinu yilə.» ¹⁰Faraɔ̃ lyár ń mə́ ń mɔ̀n bɛ n wɔ̀: «Bə̀ Cinu yál nɛ́ ǹd'ába à gə yẽ̌ ámyɛ̌ ǹd'á byǎ bɛ́ nɛ á shə́r yi ní. Nyǐ-nə lwɛlɛ rɛ́ á n'á pyà mɔ́ ma wé! ¹¹Nyǐ rə̀myɛ́ mɔ́ wàr rə̀ la wɔ̀rhɔ́ yé! Ámyɛ̌ bala bɛ́ zhəl-nə á cèrhé Cinu bə̀ wɔ́ rə̀myɛ́ á n'á yàlá.» Bə zɛ̃̀ bə jì bi Faraɔ̃ sõ bə ce pwẽ̀ ne.¹²Cinu zɛ̃̀ n wɔ̀ Muyiisi ni: «Cèlè ǹ jɛ̃̀ y Ezhibti tənà y yó w ń mə́ ce səsɔ̀mɛ̀ nɛ́ bə̀ nə pú yə; nə dɔ̃̀ è gɔ w bədũ̀kwələ né yẽ̌ mó gakó.» ¹³Muyiisi cèlè ń də̀-dɔ̀lɔ̀ w Ezhibti tənà y yó wə, Cinu ce zho ò shí yi-púrhí sõ bə̀ o ce tənà y yó wə, dɛ̃ rɛ́ rə̀myɛ́ mɔ́ námpúm, nə̀nyɛ́nɛ́ y ǹdə́ cəcɛ̃ y ga. È zɛ̃̀ nəkɔkɔ́lɛ́ yá, bə̀ púrí zho w y'à zɔ səsɔ̀mɛ̀ nɛ́ o m'o bà.¹⁴Nə j'a zɛ̃̀ nə làà dɛ̃̌ nə sú Ezhibti tənà y gakó, nə jòm è cə-yala gakó wə: bə̀ y'à gwẽ̌ yə̀ səsɔ̀mɛ̀ nánjə̀jóló w òmyɛ́ dwí rí nɛ gaga yé, bə̀ k'ê yə̀ nə̀ dwí rí myɛ nɛ rə̀myɛ́ kwã nɛ́ myɛ yé. ¹⁵Nə j'a pú tənà y gakó, e jǐrh námbyĩ́. Nə dɔ̃̀ tənà y gɔ w ǹdə́ cèmé né byǎ bɛ́ bədũ̀kwələ né y'à yə̀ cɔ mɔ́. Vɔ nánlyɔ̀ yə̀ cǒ yó mɛ̃, gɔ myɛ yə̀ dàl cɛsɛ́ wẽ́ Ezhibti tənà y púlə́púlə́ w yé.¹⁶Faraɔ̃ já n ká n yə̀ làlà n byẽ̀ Muyiisi ǹdə́ Aarɔ̃ n wɔ̀ bɛ: «À dó Cinu, á Yi rí e súlí ámyɛ̌ cìcì mú. ¹⁷À n'â lwə̀l mó bə̀ ǹ kə́ pɛ̃ sǔbri à dóó w yil èlǎsɛ̃́. Zə-na Cinu á Yi rí cã̌ nɛ, mùnì ga n ce cu mɔ̀bɔ́ twẽ̌ à nyí ni mə vò kwã nɛ́.» ¹⁸Muyiisi shə́r Faraɔ̃ sõ, n zə Cinu cã̌ nɛ.¹⁹Cinu ce zho w jǐrh zho nánfɔ̀lɔ̀ ò shí yi-zùr sõ o zə səsɔ̀mɛ̀ nɛ́ o m'o zǎ vwal-gɔ nə̀-fɔ̀lɔ̀ w səta. Səsɔ̃̀ òdù ga myɛ yə̀ dàl Ezhibti tənà y w yé. ²⁰Sə Cinu kùl Faraɔ̃ wu wə́, Faraɔ̃ yə̀ Esərayɛl lyì byǎ bɛ́ nɛ yẽ̌ bə shə́r yé.²¹Cinu kə́ n wɔ̀ Muyiisi ni: «Zhẽ̌ ǹ jɛ̃̀ ń ce dɛ̃̌-yi wə. Sə cə-byín námbyín fúrí, lò wɔ̌ ń dwə̀rh ǹdə́ ń jɛ̃̀ mɔ́, pú Ezhibti tənà yá!» ²²Muyiisi zhẽ̌ ń jɛ̃̀ y n ce dɛ̃̌-yi wə, sə cə-byín námbyín fúrí j'a pú Ezhibiti tənà y gakó, dwã nə̀tɔ̀. ²³Dwã nə̀tɔ̀ y wẽ́, Ezhibti lyì bí mə̀dù ga yə̀ ŋwɛ̀nɛ́ n nə ń da-byǐ ǹdə́ ń yírh yé, bə̀ mə̀dù ga myɛ yə̀ ń jàà kùr ré yó zɛ̃̀ yé. E jà pwẽ̀ y'à ŋwɛ́nɛ́ Esərayɛl lyì byǎ bɛ́ gakó sõ, bə̀ gə́ y'à wɔ mə̀gã̌ gakó.²⁴Faraɔ̃ byẽ̀ Muyiisi n wɔ̀ mɔ: «Zhəl-nə á vò á cèrhé Cinu. Á və̌-ywàálɛ́ ǹd'á vwàmá nánfwààlɛ́ dúdú nə̀ mə̌ sə nə mɛ̃. Sə á bə̀sɔ́ná bɛ́ wɔ̌ bə̀ tó ába bə̀ zhə̀lə̀.» ²⁵Muyiisi lyár Faraɔ̃ n wɔ̀: «È nə wɔ́ ǹmyɛ́ ǹ m'ǎ pə nə́ba vwàmá nɛ́ nyɛ̀bɛ́ nə́ la m'é zwə́l yə̀-zùlə́ vwə̃̀ né ǹdə́ vwə̃̀ námpúmə́ cɛ̃́ɛ̃́ nɛ́ nə́ pə Cinu nə́ Yi rí ni? ²⁶Nə́ vwàmá nɛ́ m'a tó nə́ba, nə́ vwǎm mə̀dù ga myɛ t'â la mãɔ̃ yé. Bə̀ wɔ́ nə̀myɛ́ wẽ́ nə́ la nɛ́ vǔr nə́ m'é cèrhé Cinu nə́ Yi rí. Nə́ gə yə̀ gàà yí, nə́myɛ cìcì mú wàr nə́ m'ǎ lwar kɔn rɛ́ tɛ̀bɛ́ nə́ mə̌ sə nə́ pə Cinu ni mú pár yé.»²⁷Sə Cinu kùl Faraɔ̃ wu wə́, Faraɔ̃ yà ń tá ń yǎl n yẽ̌ Esərayɛl lyì byǎ bɛ́ nɛ bə shə́r yé. ²⁸Faraɔ̃ wɔ̀ Muyiisi ni: «Jé tɛ̃́ nyɔ̀nɔ̀! À k'â t'â yǎl a nə mɔ́ à yé né yé. Dɛ̃ rɛ́ tɛ̀bɛ́ ǹ m'ǎ k'á bə̀ à yé né mó m'a yə̀ ǹ cu dɛ̃!» ²⁹Muyiisi lyár Faraɔ̃ n wɔ̀: «Ǹdə ǹ gə́ wə̀l né! À k'â t'â bàn ǹ yé né kə́dò yé!»

¹Cinu kə́ n wɔ̀ Muyiisi ni: «À m'a ce màbyóó nánkɔɔ́ pú Faraɔ̃ ǹdə́ Ezhibti lyì bí. Sə rə̀myɛ́ kwã nɛ́, Faraɔ̃ mà n yẽ̌ ába á shə́r nyɔ̀nɔ̀, è də̀ ń la ába yõ̌ á shə́r dúdú yé, ń mà n já n jì ába á shə́r nyɔ̀nɔ̀ gaga yilə. ²Rə̀myɛ́ ce, wál à dwí rí ni bə̀ rə̀ bal gakó ǹdə́ rə̀ kɛ̃ gakó lwə̌l wẽ̀ ré tɛ̀bɛ́ rə̀ zùrhì ǹdə́ sə̀byì-kùlì e súlí ǹdə́ sánə́má, ń wúl-bal ráá ń wúl-kɛ̃ nɛ.» ³Cinu zɛ̃̀ n ce Ezhibti lyì bí zə wu-bɔ̀nɔ̀ ǹdə́ ń dwí rí. Kɔn súlí myɛ, Muyiisi wɔ́ lò mɔ̀bɔ́ ń yà ń dámǎ ń búl ń wɔ́ lyì-fɔ̀lɔ̀ Ezhibti tənà y wa, Faraɔ̃ tùntùnnə bé ǹdə́ Ezhibti lyì bí yírh wə.⁴Muyiisi wɔ̀: «Nyǐ Cinu nyí rí: Ecɛ̃-swélé bɔ̀l wa, à m'a tó Ezhibti tənà y w a lyɛ̃. ⁵Byì-cɛ byì-cɛ gakó m'a cì tənà y wẽ́, kɔn zhì Faraɔ̃ byì-cɛ y è mə̌ s'e pú mu e jí pyɛ̀lɛ̀ rɛ́ mɔ́, e m'e yí tùntùnnə mɔ̀bɔ́ ń wɔ́ kɛ̃ ń nə́ ń nɔ̀m mún mú mú byì-cɛ yá, e súlí vwàmá nɛ́ byì-yéésé.⁶Wùrhí nánfwɛ̀lɛ̀, bə̀ gwẽ̌ yə̀ è dwí rí nyɛ̀ɛ̀ bə j'à k'ê t'â la è dwí rí nyɔ̀ɔ̀ myɛ m'a zɛ̃̀ tɛ̃́ Ezhibti tənà y cə-yala gakó wə. ⁷Sə Esərayɛl lyì byǎ bɛ́ sõ mó, kùlí myɛ cìcì t'â la numbyíní ráá vwǎm wə̌rh yé, mùnì ga á lwar bə̀ Cinu nə́ ń pɔr Ezhibti lyì bí ǹdə́ Esərayɛl lyì byǎ bɛ́ dwã wa. ⁸Rə̀myɛ́ yi ní, ǹ tùntùnnə bé ǹ nə èta mɔ́ m'a bə̀ à sõ, bə tu bə̀ nə̀dwə́nə́ yó bə wùlì tɛ̃́ à yé né bə̀ m'ê zhe: Du, ǹmyɛ́ ǹdə́ dwí rí rə̀ wɔ ǹ kwã mɔ́ púlə́púlə́. Rə̀myɛ́ kwã nɛ́, à m'a zɛ̃̀ a shə́r.» Muyiisi já n shí Faraɔ̃ sõ n du ǹdə́ lyi-shùùri.⁹Cinu wɔ̀ Muyiisi ni: «Faraɔ̃ tá ń yǎl n cili ába yé, rə̀myɛ́ ce à tũ̀-fwààlɛ́ yó w j'â n'ô súlí Ezhibti tənà y wa.» ¹⁰Muyiisi ǹdə́ Aarɔ̃ y'à twĩ̀ tũ̀-fwààlɛ́ nə̀myɛ́ mɔ́ gakó Faraɔ̃ yé né, sə Cinu yà ń kùl Faraɔ̃ wu wə́, rə̀myɛ́ mɔ́ ce ń yə̀ Esərayɛl lyì byǎ bɛ́ nɛ yẽ̌ bə shə́r ń tənà y w yé.

¹Cinu wə̀l Muyiisi ǹdə́ Aarɔ̃ nɛ ǹdə́ bə̀ y'à ŋwɛ́nɛ́ Ezhibti tənà y wa: ²«Cànà y kɛ̀bɛ́ m'a yə̀ cànsɛ́ cànà nã́yə́ə́ y á yilə, wɔ́ èmyɛ́ è la yə̀ byin rí kùr-jirə́ cànà yá.³Wál-na Esərayɛl lyì byǎ bɛ́ dwí rí púlə́púlə́ ne:Cànà y kɛ̀bɛ́ dwã shí yù wə, sə kɛ̀lɛ́ gakó ráá étwí-ènyí gakó pyà è pyì-bwɛ̀lɛ́ ráá è bɔ̀-bwɛ̀lɛ́. ⁴Étwí-ènyí rí lyì bí yó w gə wɔ́ námpɔ́lɛ́ dɛ̃́dɛ̃́ vwǎm mə̀dù dɔ́m yilə, sə bə ce dwã yó ǹdə́ bə̀ jè-dõ mó mɔ̀bɔ́ ń bwə́l bə̀ étwí-ènyí rí ni mú, kɔn tó dwã ǹdə́ lyì bí yó wə́. Á m'ǎ nyǐ lò gakó gə́ wɔ̌ ń mà n dɔ̃̀ nɛ́ á m'á cír vwǎm mɔ́.⁵Á m'ǎ zə vwǎm mɔ̀bɔ́ kaka bə mɔ zhe, mə̀ wɔ́ námbya e jà mə̀ zhe byin rə̀dù, á pyì-bwǎlsɛ́ ráá á bɔ̀-bwǎlsɛ́ wẽ́. ⁶Á m'ǎ cĩ́ mu á m'á dɛ̃̀ cànà y èmyɛ́ mɔ́ dwã shí ǹdə́ nə̀na dɛ̃ rɛ́. Esərayɛl byǎ bɛ́ bə̀ tú dwã yó mó m'a zɛ̃̀ bə zwə́l mo, cɛ y gə tú è n'ê byíbyílí yi ní. ⁷Bə̀ m'a zə vwǎm mɔ́ jal mɔ́ kə̀kàlà bə fwàl jìsí bə̀ la sə̀ wẽ́ jǒm bə dɔ̃̀ mɔ mɔ́ bwə̀ə̀lé sarha nɛ́ nə̀lyè y ǹdə́ sə̀ étwí-ènyí zã̌ y ga. ⁸Bə̀ m'a wò vwǎm mɔ́ nàmá bɛ́ bə dɔ̃̀ cəcɛ̃ y èmyɛ́ mɔ́, ǹdə́ búúri rə̀ yə̀ sã̀-nə̀byẽ̌ ce, e súlí vɔr cɛ̀ɛ́.⁹Á bə̀k'á dɔ̃̀ vwǎm mɔ́ kaka nángo ráá mə̀ kɔn rɛ́ tɛ̀bɛ́ rə̀ shɛ̃̀ yé. È m'a yə̀ mə̀ kɔn rɛ́ tɛ̀bɛ́ rə̀ wò dúdú ǹdə́ mə̀ yó w ǹdə́ mə̀ nə̀-gwěsé e súlí mə̀ wu wẽ̀ ré. ¹⁰Á bə̀k'á dàl mə̀ kaka è zɛ̃̀ nəkɔkɔ́lɛ́ yil yé, mə̀ kɔn gə dàl è zɛ̃̀ nəkɔkɔ́lɛ́ yá, sə á ji ri myǐn. ¹¹Nyǐ á gə́ m'ǎ dɔ̃̀ nàmá bɛ́ nɛ́: á cã̌-tɔ̀nɔ̀ w m'a lyẽ á cã̌ nɛ́ ǹdə́ nə̀cìlə̀ á nə̀rh né e súlí ǹdə́ də̀-dɔ̀lɔ̀ á jɔ̃̀ wa. Á m'ǎ j'á dɔ̃̀ bɛ làlà. Wɔ́ Cinu Pakɛ y címsí.¹²À m'a tó Ezhibti tənà y wẽ́ a lyɛ̃ cəcɛ̃ y èmyɛ́ mɔ́, a gu numbyínsí ǹdə́ vwàmá nɛ́ myɛ ga byì-yə́ə́ byì-yə́ə́ Ezhibti tənà y wẽ́. Èta, à m'a kə́ Ezhibti tənà y yə né gakó bùrsí, a pə nɛ còrhò-tum. Wɔ́ àmyɛ́ à wɔ́ Cinu. ¹³À gə tú à la còrhò-tum pɔ Ezhibti lyì bí ni yi ní, jal mɔ́ mə̀ fwàl jìsí á wɔ sə̀ wẽ́ mó yó w mó m'a yə̀ myɔrhɔ á yilə. À gə nɔ jal mɔ́, à m'a gar ába a lyɛ̃. Èta, màbyóó w ò la cɛ y cɔ̌ mɔ́ t'â la ába zal yé. ¹⁴Dɛ̃ rɛ́ rə̀myɛ́ mɔ́ m'a yə̀ lyìrhə́ dɛ̃ á yilə. Á m'ǎ vò zhəl mó mə̀myɛ́ mɔ́ á m'á jí címsi nánfɔ̀lɔ̀ Cinu yilə. Á m'ǎ j'á n'á jí címsí sə̀myɛ́ mɔ́ byin byin gakó, Cinu yilə. Wɔ́ nyí rə̀ m'à j'â ŋwɛ́nɛ́ twéé twéé yilə.¹⁵Á m'ǎ dɔ̃̀ búúri tɛ̀bɛ́ rə̀ yə̀ sã̀-nə̀byẽ̌ ce, dwã nyàlpyɛ̀. Sə kɔn zhì dwã nyàlpyɛ̀ y nə̀myɛ́ mɔ́ dɛ̃ nã́yéé ré, á m'ǎ j'á ce sã̀-nə̀byẽ̌ jé tɛ̃́ á jìsí wẽ́. Bə̀ m'a vùr lò mɔ̀bɔ́ gakó ń dɔ̀m búrú w kɔ̀bɔ́ ò co sã̀-nə̀byẽ̌, dɛ̃ nã́yéé ré e m'e yí dwã nyàlpyɛ̀ dɛ̃ rɛ́, Esərayɛl lyì byǎ bɛ́ wẽ́. ¹⁶Dɛ̃ nã́yéé ré, á m'ǎ jòm kúl-fwɛ̀lɛ̀ Cinu yilə. Dwã nyàlpyɛ̀ dɛ̃ rɛ myɛ, á k'á jòm kúl-fwɛ̀lɛ̀ Cinu yilə. Dwã nɛ́ nə̀myɛ́ mɔ́ wẽ́, tum də́-byǐ ga t'â la tũ̌ yé, wɔ́ kùjú w dúdú lò gakó wɔ̌ ń mà n tɛnɛ ń cìn yilə.¹⁷Á m'ǎ jí búúrí rə̀ yə̀ sã̀-nə̀byẽ̌ ce mó címsí, bə̀ dɛ̃ rɛ́ rə̀myɛ́ mɔ́ yù w cìcì, à ce á dwí rí shə́r Ezhibti tənà y wa. Á m'ǎ j'á n'á jí címsí sə̀myɛ́ mɔ́ byin byin gakó, wɔ́ nyí rə̀ m'à j'â ŋwɛ́nɛ́ twéé twéé yilə. ¹⁸Cànà nã́yə́ə́ y dwã shí ǹdə́ nə̀nà dɛ̃ rɛ́ də̀dɛ̀nɛ́ yá, á m'ǎ dɔ̃̀ búúri rə̀ yə̀ sã̀-nə̀byẽ̌ ce kɔn m'e yí cànà y dwã shí-èlyè ǹdə́ rə̀dù dɛ̃ rɛ́ də̀dɛ̀nɛ́ yá.¹⁹Dwã nɛ́ nyàlpyɛ̀ y wẽ́, bə̀ bə mə̌ sə bə nə sã̀-nə̀byẽ̌ á jìsí w yé. Sə bə̀ m'a vùr lò mɔ̀bɔ́ gakó ń dɔ̀m bùrú kɔ̀bɔ́ ò co sã̀-nə̀byẽ̌, ń wɔ́ zhə-bal ráá Esərayɛl tənà y lò, Esərayɛl lyì byǎ bɛ́ wẽ́. ²⁰Á t'á la búrú ò co sã̀-nə̀byẽ̌ òdù ga á nyú w co yé. Jààsɛ́ shɛ̀bɛ́ á ŋwɛ́nɛ́ sə̀ wẽ́ mó myɛ, sə á dɔ̃̀ búúrí rə̀ yə̀ sã̀-nə̀byẽ̌ ce mó.»²¹Muyiisi byẽ̀ Esərayɛl náncɛsɛ́ gakó dwã yó, n wɔ̀ sɛ: «Zhəl-nə á pyà vwàmá á dwə́ né yilə, sə á zwə́l ne Pakɛ y címsí yilə. ²²Lyẽ-nə yəzɔ́pɛa vɔr dwã nɛ á mɔ́rh rɛ jal mɔ́ mə̀ ŋwɛ́nɛ́ nə̀zhõ̌ w mó wẽ́, sə á zhɛ́rhɛ́ jal mɔ́ á jìsí étwí-ènyí bòló w sarha nɛ́ nə̀lyè y ǹdə́ sə̀ étwí-ènyí zã̌ y yó. Sə rə̀myɛ́ kwã nɛ́, á mə̀dù ga bə̀ká n mɛrhɛ ń la ń jì y étwí-ènyí rí gar n shə́r ń sõ jù w ǹdə́ cɛ y gwẽ̌ yə̀ lɛ́ yé.²³Cinu mà n tó Ezhibti tənà y w n lyɛ̃ ń la mə n pə y còrhò-tum sə ń mà n nə jal mɔ́ jìsí étwí-ènyə́ né sarha nɛ́ dǎr rɛ́ ǹdə́ sə̀ étwí-ènyí zã̌ y yó. Rə̀myɛ́ yi ní, ń mà n gar n yẽ̌ étwí-ènyí rí rə̀myɛ́ mɔ́ nɛ, ń tá ń la cɔ̀rna mɔ́ nɛ yõ̌ n zù á sõ jù w n gu lò yé.²⁴Á m'ǎ wɛ̀rhɛ́ rə̀myɛ́ mɔ́ gakó. Wɔ́ nyí rə̀ m'à j'â ŋwɛ́nɛ́ twéé twéé, ámyɛ̌ ǹd'á nɛ̀mɛ́ nɛ́ ga yilə. ²⁵Á gə tú á zù tənà y kɛ̀bɛ́ Cinu bwəl nyí bə̀ ń la ába pɔ mɔ́ wẽ́, á m'ǎ j'á n'á twĩ̀ tũ̀twĩ̀ĩ̀ rí rə̀myɛ́ mɔ́.²⁶Á byǎ bɛ́ gə bwə̀rh ába bə wɔ̀: ‹Tũ̀twĩ̀ĩ̀ rí èta mɔ́ kùrə̀?› ²⁷Á m'ǎ lyár bɛ á wɔ̀: ‹Wɔ́ Pakɛ y vwĩ̀ rí nə́ zwə́l nə́ pə Cinu ni mú, ńmyɛ̌ mɔ̀bɔ́ ń gar Esərayɛl lyì byǎ bɛ́ jìsí n yẽ̌ Ezhibti tənà y wa, ń gə́ tú n pə còrhò-tum Ezhibti lyì bí ni n zɛ̃̀ n yẽ̌ nə́ kǎlsɛ́ nɛ sə lú mú yi ní mú.› » Rə̀myɛ́ yó, Esərayɛl lyì byǎ bɛ́ jòm bə̀ nə̀dwə́nə́ yó, bə zə bə̀ yə́rh bə pú tɛ̃́ bə cèrhé Cinu. ²⁸Rə̀myɛ́ kwã nɛ́, Esərayɛl lyì byǎ bɛ́ j'a zɛ̃̀ bə vò bə wɛ̀rhɛ́ kɔn rɛ́ tɛ̀bɛ́ Cinu yà ń pɔ rə̀ nyí Muyiisi ǹdə́ Aarɔ̃ nɛ mɔ́.²⁹Ecɛ̃-swélé bɔ̀l wa, Cinu já n gu byì-cɛ gakó Ezhibti tənà y wa, kɔn zhì Faraɔ̃ byì-cɛ y è y'à mə̌ dwã s'e pú mu e jí pyɛ̀lɛ̀ rɛ́ mɔ́, e m'e yí lò mɔ̀bɔ́ bə̀ y'à zɔ búlə́ jàà w bə ce jù w mú byì-cɛ yá, e súlí vwǎm byì-yə́ə́ gakó. ³⁰Faraɔ̃ ǹdə́ ń tùntùnnə bé e súlí Ezhibti lyì bí gakó j'a zɛ̃̀ cəcɛ̃ y èmyɛ́ mɔ́; wu-zhùlù búbwéé nánfwɛ̀lɛ̀ y'à zɛ̃̀ tɛ̃́ Ezhibti tənà y wa, bə̀ kɛ̀lɛ́ èdù ga y'à tɛ̀nɛ́ cùù y'à tɛ̀nɛ́ è wẽ́ yé.³¹Rə̀myɛ́ yó, Faraɔ̃ já n byẽ̀ Muyiisi ǹdə́ Aarɔ̃ cəcɛ̃-swélé y w n wɔ̀ bɛ: «Zɛ̃̀-na! Shə́r-nə à dwí rí cəcəl wə, ámyɛ̌ ǹdə́ Esərayɛl lyì byǎ bɛ́. Zhəl-nə á vò á cèrhé Cinu ǹdə á gə́ lwə̀l né. ³²Zə-na á dɔ̀ wá, və̌-ywàálɛ́ ǹdə́ vwàmá nánfwààlɛ́ ga á m'á súlí á shə́r, ǹdə á gə́ lwə̀l né. Sə á m'ǎ súlí á bwəl bwəl tɛ̀bɛ́ rə̀ càn á pə àmyɛ nɛ!» ³³Ezhibti lyì bí pàm Esərayɛl lyì byǎ bɛ́ kùr ni, bə̀ bə̀ shə́r tənà y w làlà, bə̀ bə̀ y'à n'ê wə̀lə̀: «Nə́ gakó m'ǎ cì!»³⁴Dwí rí j'a kwè rə̀ búrú mún mú mə̀ y'à pò mó rə m'e lyɛ̃ ǹdə́ mə̀ y'à gwẽ̌ yə̀ zɛ̃̀ yé; rə pyípyílí wẽ̀ ré tɛ̀bɛ́ bə̀ n'ê pò búrú mún mú rə̀ wẽ́ mó ǹdə́ rə̀ kàmə̀zù-fwààlɛ́ rə lyẽ, rə zhĩ rə̀ pyə́pyɛla wa. ³⁵Esərayɛl lyì byǎ bɛ́ y'à wɛ̀rhɛ́ ǹdə Muyiisi gə́ yà ń byili bi ní. Bə̀ y'à lwə̀l wẽ̀ rə̀ zùrhì ǹdə́ sə̀byì-kùlì ǹdə́ sánə́má e súlí kàmə̀zù-fwààlɛ Ezhibti lyì bí ni. ³⁶Cinu yà ń ce Ezhibti lyì bí y'à só ń dwí rí yò, rə̀myɛ́ ce Ezhibti lyì bí pɔ kɔn rɛ́ tɛ̀bɛ́ Esərayɛl lyì byǎ bɛ́ y'à lwə̀l be mó. Wɔ́ èta kɔn tó né Esərayɛl lyì byǎ bɛ́ j'a m'e zwẽ Ezhibti lyì bí wẽ̀ ré bə yẽ̌ be nánfò!³⁷Esərayɛl lyì byǎ bɛ́ j'a zɛ̃̀ bə zhì Araməsɛɛsɛ bə zhǐr bə kwè sɔ́má y bə̀ la Sukɔɔtɛ, bala bɛ́ bə̀ y'à n'ê zhə̀l tɛ̃́ mɔ́ dúdú y'à yú nunə mɔ̀ɔ̀rhɛ̀ zɔ̃̌-nyə̀ldù, bə̀sɔ́ná bɛ́ twə́r y'à tɛ̀nɛ́ nɛ́ yé. ³⁸Lyì dwã nánzhəzhɔ̌ bə̀ y'à gùlí gùlí dwã tó be bə shə́r ǹdə́ bə̀ və̌-ywàálɛ e súlí bə̀ vwàmá nánfwààlɛ nánjə̀jóló. ³⁹Bə kwè búrú mún mú mə̀ y'à pò bə̀ y'à m'e shí Ezhibti mú, bə ji ŋwǎmsɛ. Mún mú gə́ y'à yə̀ zɛ̃̀ mɔ́ ce, mə̀ ŋwǎmsɛ́ yàl ŋwǎmsɛ́ shɛ̀bɛ́ sə̀ y'à yə̀ sã̀-nə̀byẽ̌ ce. Bə̀ gə́ pàm bə̀ kùr ni bə jì bi bə̀ bə̀ shə́r Ezhibti ní mu ce, bə̀ y'à yə̀ ŋwɛ̀nɛ́ bə pyà kùjú bə ce bə̀ byẽ́ myɛ cìcì yé. ⁴⁰Esərayɛl lyì byǎ bɛ́ y'à jòm Ezhibti ní byinə zwã̌-àna ǹdə́ shə́-ètɔ̀.⁴¹Sə wɔ́ byinə zwã̌-àna ǹdə́ shə́-ètɔ̀ y pyǐrh yó wə, dɛ̃ rɛ́ rə̀myɛ́ mɔ́ cìcì, Cinu shə̀dɛ́ɛ́sɛ́ kùrə̀ né gakó shə́r Ezhibti tənà y wa. ⁴²Cəcɛ̃ y èmyɛ́ mɔ́ Cinu zɔ ń yírhə́ mùnì ga n ce Esərayɛl lyì byǎ bɛ́ ŋwɛ̀nɛ́ bə shə́r Ezhibti tənà y wa. Wɔ́ Cinu ń cǐ yə. Esərayɛl lyì byǎ bɛ́ myɛ m'a zə bə̀ yírhə́ cəcɛ̃ y èmyɛ́ mɔ́byin byin gakó.⁴³Cinu wɔ̀ Muyiisi ǹdə́ Aarɔ̃ nɛ: «Nyǐ Pakɛ címsí gə́ mə̌ sə sə jí ní: Dwí dõ lò mə̀dù ga myɛ bə mə̌ sə n tó n jí si yé. ⁴⁴Ǹ m'ǎ gõ̀ tùntùnnə mɔ̀bɔ́ gakó bə̀ yè ǹdə́ sə̀byǐ mú, rə̀myɛ́ yi ní, ń mà n zɛ̃̀ n tó n jí si.⁴⁵Zhə-bal mɔ̀bɔ́ ń zul ǹ sõ ráá lò mɔ̀bɔ́ bə̀ kwè bə̀ n'ê kwɛ̃̌ mɔ́ bə mə̌ sə n tó n jí si yé. ⁴⁶Bə̀ m'a jòm jì èdù wẽ́ bə m'e jí si. Ǹ tá ǹ la címsí nǎm mɔ́ mə̀dù ga myɛ zə ń du jù w ń vò pwẽ̀ ne yé. Á t'á la vwǎm mɔ́ kúr rí kɔ́ yé.⁴⁷Esərayɛl dwí rí púlə́púlə́ m'a jí Pakɛ címsí. ⁴⁸Zhə-bal mɔ̀bɔ́ ń jě ǹ sõ gə nə́ ń yǎl n tó n jí Pakɛ címsí n mə n cèrhé Cinu, sə bə jɛ̀rɛ̀ bə gõ̀ bal bal gakó ń sõ mó. Rə̀myɛ́ kwã, ń mà n ŋwɛ̀nɛ́ n twẽ̌ n bwəlse n tó n jí si, ǹdə Esərayɛl lyì byǎ bɛ́ tənà y lò ta. Sə lò mɔ̀bɔ́ ń yə̀ gòm mó mə̀dù ga myɛ bə̀ká n tó n jí si yé.⁴⁹Nyí rí m'a yə̀ rə̀myɛ́ rə̀dù y Esərayɛl lyì byǎ bɛ́ tənà y lò ǹdə́ zhə-bal mɔ̀bɔ́ ń jě á sõ mó yilə.» ⁵⁰Esərayɛl lyì byǎ bɛ́ gakó wɛ̀rhɛ́ kɔn rɛ́ tɛ̀bɛ́ Cinu yà ń pɔ rə̀ nyí Muyiisi ǹdə́ Aarɔ̃ nɛ mɔ́ cìcì. ⁵¹Wɔ́ dɛ̃ rɛ́ rə̀myɛ́ mɔ́ yù w cìcì, Cinu ce Esərayɛl lyì byǎ bɛ́ shə́r bə tùrhì dwã nɛ kùkùl kùkùl bə du Ezhibti tənà y wa, kɔn tó dwã ǹdə́ bə̀ shə̀dɛ́ɛ́sɛ́ kùrə̀ né.

¹Cinu wɔ̀ Muyiisi ni: ²«Vǔr byì-yə́ə́ gakó, kɛ̀bɛ́ è ná tó yé n lù y Esərayɛl lyì byǎ bɛ́ sõ mó, è wɔ́ byì-cɛ ráá vwǎm byì-yə́ə́, ń cĩ́ kwã à yilə. Wɔ́ àmyɛ́ cəl.»³Muyiisi wɔ̀ dwí rí ni: «Lyǐrh-nə dɛ̃ rɛ́ tɛ̀bɛ́ á shə́r Ezhibti ní, yómə́-jè y né mó yò, wɔ́ Cinu ń ce á shə́r gàà mɔ́ ǹdə́ ń jɛ̃̀ jàn rɛ́ nánfɔ̀lɔ̀ wá. Sə á bə̀k'á dɔ̃̀ búrú ò co sã̀-nə̀byẽ̌ dɛ̃ rɛ́ rə̀myɛ́ mɔ́ yé. ⁴Wɔ́ Abyiibi cànàa y wẽ́, zà dɛ̃ rɛ́ á m'ǎ shə́r né. ⁵Rə̀myɛ́ ce, Cinu gə tú ń ce ǹ zù Kanaã lyì bí ǹdə́ Yititəbá ǹdə́ Amɔrətəbá ǹdə́ Yivyitəbá e súlí Zhəbuusi lyì bí tənà y yil ǹdə́ tùr n'ê dùr tɛ̃́ è wẽ́, ń yà ń bwəl è nyí ǹ nàmbala bɛ́ nɛ mɔ́ wa, ǹ m'ǎ twĩ̀ tũ̀twĩ̀ĩ̀ rí tɛ̀bɛ́ cànà y èmyɛ́ mɔ́ wẽ́:⁶Ǹ m'ǎ dɔ̃̀ búúri tɛ̀bɛ́ rə̀ yə̀ sã̀-nə̀byẽ̌ ce dwã nyàlpyɛ̀ wẽ́. Sə dwã nyàlpyɛ̀ dɛ̃ rɛ́ yù wə, á m'ǎ jí címsi nánfɔ̀lɔ̀ Cinu yilə ⁷Dwã nɛ́ nə̀myɛ́ wẽ́, bə̀ m'a dɔ̃̀ búúri rə̀ yə̀ sã̀-nə̀byẽ̌ ce. Bə̀ bə mə̌ sə bə nə búrú ò co sã̀-nə̀byẽ̌ ráá sã̀-nə̀byẽ̌ á tənà y nyí rí púlə́púlə́ wẽ́ yé.⁸Dɛ̃ rɛ́ rə̀myɛ́ mɔ́ yù wə, ǹ m'ǎ cĩ́ ǹ byǎ bɛ́ nɛ ń wɔ̀: ‹Wɔ́ Cinu gə́ co nyí à kwã nɛ́ à gə́ tú a shə́r Ezhibti ní yi ní mú yilə, à n'â wɛ̀rhɛ́ èta.› ⁹Rə̀myɛ́ mɔ́ m'a yə̀ myɔrhɔ ń cĩ́ ǹ vɔ̀mɛ̀ nɛ́ yó ǹdə́ lyìrhə́ kɔn ń lyẽ ǹ cíl rí ni, mùnì ga Cinu nyí rí yə̀ ǹ nyú w twéé gakó, b'è wɔ́ ǹdə́ ń jɛ̃̀ y jàn rɛ́ nánfɔ̀lɔ̀ w Cinu mə n ce ń shə́r Ezhibti tənà y wa. ¹⁰Ǹ m'ǎ wɛ̀rhɛ́ kɔn rɛ́ tɛ̀bɛ́ nyí rə̀myɛ́ mɔ́ n'ê byili, dɛ̃ rɛ́ tɛ̀bɛ́ bə̀ cír rə̀ pyǐrh yil mú, byin byin gakó.¹¹Rə̀myɛ́ ce, Cinu gə tú ń ce ǹ zù Kanaã lyì bí tənà y w ǹdə ń gə́ bwəl nyí ǹmyɛ́ ǹdə́ ǹ nàmbala bɛ́ nɛ nɛ́, n zɛ̃̀ n ce y ǹ jɔ̃̀ wa, ¹²ǹ m'ǎ pə ǹ byì-cɛ gakó ǹdə́ ǹ vwàmá nɛ́ byì-yéésé gakó Cinu ni. Vwàmá nɛ́ byì-yéésé námbyalsɛ́ gakó wɔ́ Cinu cəl! ¹³Sə è gə wɔ́ bə̀nab byì-yə́ə́ yilə, ǹ m'ǎ zə pyì-bwɛ̀lɛ́ ń cĩ́ è jàà wa. Ǹ gə yə̀ pyì-bwɛ̀lɛ́ zə ń cĩ́ è jàà wa, sə́ mà è byã y nɛ ń gu yə. Ǹ m'ǎ pyà kɔn ń cĩ́ ǹ byì-cɛ gakó jàà wa, ǹ byǎ bɛ́ wẽ́.¹⁴Nəkɔla, ǹ byǐ mú gə bwə̀rh mó n wɔ̀: ‹Byè yil á n'á wɛ̀rhɛ́ tɛ̀bɛ́?›, ǹ m'ǎ lyár mɔ ń wɔ̀: ‹Cinu ce nə́ shə́r Ezhibti, yómə́-jè né, ǹdə́ ń jɛ̃̀ jàn rɛ́ nánfɔ̀lɔ̀ wá. ¹⁵Faraɔ̃ gə́ yà ń wɛ̀rhɛ́ yó-kùlù ń tá ń yǎl n yẽ̌ nə́ba nə́ shə́r mo ce, Cinu gu byì-cɛ gakó ǹdə́ vwǎm byì-yə́ə́ gakó Ezhibti tənà y wa. Wɔ́ rə̀myɛ́ è ce, à n'â zwə́l vwǎm byì-yə́ə́ námbya gakó à pɛ Cinu ni. Sə è gə wɔ́ à byǎ bɛ́ byì-cɛsɛ́ gakó yilə, à n'â pyà kɔn à cín sə̀ jàà wa, à zwə́lə́.› ¹⁶Rə̀myɛ́ mɔ́ m'a yə̀ myɔrhɔ ǹ cĩ́ ǹ vɔ̀mɛ̀ nɛ́ ǹdə́ ǹ cíl rí yó b'è wɔ́ ǹdə́ ń jɛ̃̀ y jàn rɛ́ nánfɔ̀lɔ̀ w Cinu mə n ce nə́ shə́r Ezhibti tənà y wa.»¹⁷Faraɔ̃ gə́ yẽ̌ Esərayɛl lyì byǎ bɛ́ nɛ bə shə́r yi ní, Yi yə̀ be zə rə m'e tó Shilisəti lyì bí tənà y sɔ́má y yé, ǹd'ê y'à bwə́l ga yírh wə. Yi y'à wə̀l rə̀ cìn ni: «Dwí rí bə̀k'a tə̀ búlə́ né yil rə̀ wu bùlə̀ né zhɛ́rhɛ́, rə kwɛ̃̀ rə bə̀ Ezhibti yé!» ¹⁸Wɔ́ rə̀myɛ́ è ce Yi ce bə kwɛ̃̀ bə kwè sɔ́má y è zǎ vwal-gɔ nə̀-fɔ̀lɔ̀ w gɔ-elũ èpòlò w səta. Bə̀ y'à súlí bə pwà búlə́ wẽ̀ bə̀ gə́ y'à tú bə̀ n'ê shə́r Ezhibti ní yi ní mú.¹⁹Muyiisi yà ń pwà Zhozefu kúr rí. Zhozefu zhə̀n ga yà ń nyɛ́ɛ́ Esərayɛl lyì byǎ bɛ́ bə bwəl nyí ń gə́ wə̀l be yi ní: «Zhə̀n zhə̀nà, Yi m'a bə̀ rə ce nyí á kwã nɛ́. Rə̀myɛ́ yi ní, á m'ǎ pwà à kúr rí á m'á zhǐr nyɔ̀nɔ̀.» ²⁰Esərayɛl lyì byǎ bɛ́ zhì Sukɔɔtɛ nɛ́ bə zhǐr bə yí bə zul Etam nɛ́, gɔ-elũ èpòlò w nyí ni. ²¹Cinu cìcì yà ń wɔ bə̀ yé né ń nə́ ń zhə̀lə̀: nə̀nyɛ́nɛ́ nɛ, wɔ́ ébɔ̃ ò y'à n'ô byili bi sɔ́má yá, cəcɛ̃ nɛ́, wɔ́ myìn-zhù ò y'à n'ô yə̌r be. Èta, cəcɛ̃ ǹdə́ nə̀nyɛ́nɛ́ ga, bə̀ y'à wɔ̌ bə̀ n'ê zhílí bə̀ sɔ́má yá. ²²Nə̀nyɛ́nɛ́ nɛ, ébɔ̃ w y'à j'â t'â kwàrh dwí rí yé né yál yé, myìn-zhù w myɛ y'à j'â t'â kwàrh rə̀ yé né cəcɛ̃ nɛ myɛ yé.

¹Cinu wɔ̀ Muyiisi ni: ²«Wál Esərayɛl lyì byǎ bɛ́ nɛ bə̀ bə̀ kwɛ̃̀ bə bə̀ bə zul Pyi-Ayərɔɔtɛ yé y wə, Myəgədɔl ǹdə́ nə̀-fɔ̀lɔ̀ w bwə̌l mó wə. Wɔ́ Baal-Səfɔn yé né, á yé y wə, nə̀-fɔ̀lɔ̀ w nyí ni mú, á m'ǎ zul ní. ³Faraɔ̃ mà n zɛ̃̀ ń nə́ ń wə̀l Esərayɛl lyì byǎ bɛ́ shò kwã nɛ́: ‹Nyǐ bi bə̀ wun zɛ̃̀, bə̀ n'ê yə́yɛ́lɛ́ tɛ̃́ tə̀na y wa! Èpòlò w zɔ bɛ!›⁴À m'a kù Faraɔ̃ wu wə́, n zɛ̃̀ n zɛ̃̀ n pú bə̀ kùr ń nə́ ń jì. Sə à m'a nɔ̀ ńmyɛ̌ ǹdə́ ń shə̀dɛ́ɛ́sɛ́ tɛ̃́ a m'a pə còrhó à cìn ni. Ezhibti lyì bí m'a zɛ̃̀ bə lwar b'àmyɛ́ wɔ́ Cinu.» Esərayɛl lyì byǎ bɛ́ wɛ̀rhɛ́ ǹdə ń gə́ byili ní. ⁵Bə̀ zhə̀l bə byili Ezhibti pyɔ̌ mɔ́ nɛ bə̀ Esərayɛl lyì byǎ bɛ́ dùr. Faraɔ̃ ǹdə́ ń tùntùnnə bé wun bùlə̀ né zhɛ́rhɛ́ bə̀ shò kwã nɛ́ bə zɛ̃̀ bə wɔ̀: «Bə̀kɔ́n nə́ wɛ̀rhɛ́ èta mɔ́? Nə́ yẽ̌ Esərayɛl lyì byǎ bɛ́ nɛ bə lyɛ̃ bə̀ k'ê t'â la tũ̌ bə pə nə́ba yé!»⁶Rə̀myɛ́ yó, Faraɔ̃ lyẽ ń búlə́ eshã-vwə̃tu wə́, n zə ń shə̀dɛ́ɛ́sɛ́ n ce ń kwã nɛ́. ⁷N du ǹdə́ búlə́ eshərh-vwə̃tur zɔ̃̌-nyə̀ldù tɛ̀bɛ́ rə̀ y'à càn du rə̀ dwã bɛ́ gakó e súlí Ezhibti búlə́ eshərh-vwə̃tur rí dwã bɛ́ púlə́púlə́, rə̀myɛ́ òdù gakó ǹd'ô jòmnə mó. ⁸Cinu kù Ezhibti pyɔ̌ Faraɔ̃ wu wə́, n zɛ̃̀ n pú Esərayɛl lyì byǎ bɛ́ kùr ń nə́ ń jì. Esərayɛl lyì byǎ bɛ́ y'à zhẽ̌ bə̀ jɛ̀rh bə ce dɛ̃̌a bə̀ gə́ y'à tú bə̀ n'ê shə́r Ezhibti ní mú yi ní. ⁹Ezhibti lyì bí ǹdə́ Faraɔ̃ búlə́ eshərh-vwə̃tur rí púlə́púlə́ ǹdə́ ń eshə-jòmnə bé e súlí ń shə̀dɛ́ɛ́sɛ́ pú bə̀ kùr bə̀ n'ê jì, sə bə̀ zɔ bə̀ kùr ni ǹdə́ bə̀ y'à zul nə̀-fɔ̀lɔ̀ w nyí ni, Pyi-Ayərɔɔtɛ yala nɛ, Baal-Səfɔn yé y wə.¹⁰Faraɔ̃ yà ń bwəlse Esərayɛl lyì byǎ bɛ́ kùr ne. Esərayɛl lyì byǎ bɛ́ kwẽ̌ bə̀ la nyǔ, bə púrí Ezhibti lyì bí bə̀ zɛ̃̀ bə̀ wɔ bə̀ kwã nɛ́ bə̀ bànà! Ywẽ nánfɔ̀lɔ̀ zə bɛ, bə búbwéé bə ce Cinu ni. ¹¹Bə bwə̀rh Muyiisi bə wɔ̀: «È nə wɔ́ lú-bɔ̀là bə̀ bə já Ezhibti ní ń mə́ zɛ̃̀ ń zə nə́ba nə́ la b'ě cì gɔ-elũ èpòlò w wə? Bə̀kɔ́n ǹ wɛ̀rhɛ́ èta, ǹ gə́ ce nə́ shə́r Ezhibti ní mú? ¹²Nə́ yə̀ dámǎ nə́ wɔ̀ mɔ́ Ezhibti ní: ‹Yẽ̌-nə́ba nə́ twĩ̀ nə́ pə Ezhibti lyì bí ni! Nə́ gə n'é twĩ̀ nə́ pɛ Ezhibti lyì bí ni cɔ̃̀ nə́ gə cù gɔ-elũ èpòlò w wə.› »¹³Rə̀myɛ́ yó, Muyiisi wɔ̀ dwí rí ni: «Á bə̀k'á dùr ywẽ yé! Zə-na á wun ni! Á m'ǎ nə kɔn rɛ́ tɛ̀bɛ́ Cinu la wɔ̀rhɔ́ n mə n zwẽ ába zà mɔ́. Ezhibti lyì bí á nə zà èta mɔ́, á k'á t'á la bórhó á nə bɛ gaga yé. ¹⁴Wɔ́ Cinu ń mà n bú búlə́ né á jàà wa. Ámyɛ̌ wúrí á zhì shɛ́ɛ́ jàà èdù!».¹⁵Cinu bwə̀rh Muyiisi n wɔ̀: «Byè yil ǹ nə́ ǹ búbwéé ǹ ce ne? Wál Esərayɛl lyì byǎ bɛ́ nɛ: bə̀ bə̀ zɛ̃̀ dɛ̃̌ bə kwè sɔ́má! ¹⁶Ǹmyɛ́ zhẽ̌ ǹ də̀-dɔ̀lɔ̀ w dɛ̃̌, sə́ cèlè ǹ jɛ̃̀ y nə̀-fɔ̀lɔ̀ w yó wə, ń bɔ̀n w dwã wa, mùnì ga Esərayɛl lyì byǎ bɛ́ tó cə-kùlì wẽ́ nə̀-fɔ̀lɔ̀ w cəcəl w bə byɛrhɛ. ¹⁷Àmyɛ́ m'a kù Ezhibti lyì bí wun ní, mùnì ga bə pú Esərayɛl lyì byǎ bɛ́ kùr bə zù. Rə̀myɛ́ yi ní, à m'a nɔ̀ Faraɔ̃ ǹdə́ ń shə̀dɛ́ɛ́sɛ́ gakó ǹdə́ ń búlə́ eshərh-vwə̃tur rí e súlí ń eshə-jòmnə bé tɛ̃́ a m'a pə còrhó à cìn ni. ¹⁸À gə́ m'a tó rə̀myɛ́ mɔ́ dɛnnɛ a pə còrhó à cìn ni yi ní, Ezhibti lyì bí m'a j'a zɛ̃̀ bə lwar b'àmyɛ́ wɔ́ Cinu.»¹⁹Yi màlɛ́ka y è y'à n'ê zhə̀l Esərayɛl lyì byǎ bɛ́ yé né mó zhǐr e b'è wɔ bə̀ kwã nɛ́. Ébɔ̃ w myɛ zhǐr bə̀ yé né, o b'ò wɔ bə̀ kwã nɛ́. ²⁰Ébɔ̃ w b'o zhì Ezhibti lyì bí ǹdə́ Esərayɛl lyì byǎ bɛ́ cəcəl wə. Ébɔ̃ w yé y èdù y'à wɔ́ cə-byín ò yé y dõ mó zɛ̃̀ è y'à wɔ́ pwẽ̀ rə̀ n'ê yə̌r cəcɛ̃ y wẽ́. Rə̀myɛ́ mɔ́ ce, cəcɛ̃ y námpúm, lòlò yə̀ zhə̀l n bwəlse ń dõ ne yé.²¹Muyiisi cèlè ń jɛ̃̀ y nə̀-fɔ̀lɔ̀ w yó wə. Cinu ce zho nánfɔ̀lɔ̀ ò shí yi-púrhí sõ, zɛ̃̀ tɛ̃́ o ce cəcɛ̃ y námpúm, o ce nə̀-fɔ̀lɔ̀ w pyìrhí o kwɛ̃̀ ò kwã nɛ́, o yẽ̌ cɛ y nɛ tɛ̃́ nánkùlì. Nàná bɛ́ bɔ̀n dwã nɛ. ²²Esərayɛl lyì byǎ bɛ́ zhə̀l cə-kùlì yó, nə̀-fɔ̀lɔ̀ w cəcəl wə. Nàná bɛ́ y'à mɔ dwã nɛ bə̀ zhǐ ǹdə byílsi ta, bə̀ jə̀-jĩ́ ǹdə́ bə̀ jə̀-gwã̀ ga nɛ.²³Ezhibti lyì bí pú Esərayɛl lyì byǎ bɛ́ kùr bə jì bi; Faraɔ̃ eshesé púlə́púlə́ ǹdə́ ń búlə́ eshərh-vwə̃tur rí, e súlí ń eshə-jòmnə bé pú bə̀ kùr bə zù bə vò bə yí nə̀-fɔ̀lɔ̀ w cəcəl wə. ²⁴Cɛ y gə́ tú è bwə́l lɔ́, Cinu jòm myìn-zhù w ǹdə́ ébɔ̃ w wẽ́ n myə̀lɛ́ Ezhibti lyì shə̀dɛ́ɛ́sɛ́, n já n ce kɔn gakó gùlí dwã sə̀ sõ. ²⁵N ce sə̀ eshərh-vwə̃tur rí nèsé cìr, rə̀ dǔr mó j'a zɛ̃̀ e jǐrh zwini. Rə̀myɛ́ yó, Ezhibti lyì bí shə̀dɛ́ɛ́sɛ́ wɔ̀: «Bà-na nə́ yẽ̌ Esərayɛl lyì byǎ bɛ́ nɛ nə́ dùr nə́ vò pyépyé, bə̀ wɔ́ Cinu ń nə́ ń tó be ń bwí ǹdə́ nə́ba!»²⁶Cinu wɔ̀ Muyiisi ni: «Cèlè ǹ jɛ̃̀ y nə̀-fɔ̀lɔ̀ w yó wə: bə̀ nàná bɛ́ kwɛ̃̀ bə bə̀ bə mɔ́lɛ́ Ezhibti lyì shə̀dɛ́ɛ́sɛ́ ǹdə́ sə̀ búlə́ eshərh-vwə̃tur rí e súlí sə̀ eshə-jòmnə bé!» ²⁷Muyiisi cèlè ń jɛ̃̀ y nə̀-fɔ̀lɔ̀ w yó wə. Cɛ y gə́ tú è bwə́l lɔ́, nə̀-fɔ̀lɔ̀ w k'a kwɛ̃̀ o bə̀ ò jàà y wa, rə̀myɛ́ yi ní ǹdə́ Ezhibti lyì bí n'ê dùr bə̀ zǎ wa. Cinu já n ce bə mɛ̃ nə̀-fɔ̀lɔ̀ w cəcəl wə. ²⁸Nàná bɛ́ kwɛ̃̀ bə dùr bə b'e yí bə mɔ́lɛ́ búlə́ eshərh-vwə̃tur rí ǹdə́ eshə-jòmnə bé. Lò mə̀dù ga myɛ yə̀ dàl Faraɔ̃ shə̀dɛ́ɛ́sɛ́ shɛ̀bɛ́ gakó sə̀ y'à pú Esərayɛl lyì byǎ bɛ́ kùr sə zù nə̀-fɔ̀lɔ̀ w w mɔ́ wẽ́ yé.²⁹E jà Esərayɛl lyì byǎ bɛ́ zhə̀l cə-kùlì yó, bə tó nə̀-fɔ̀lɔ̀ w cəcəl w bə byɛrhɛ. Nàná bɛ́ y'à mɔ dwã nɛ bə̀ zhǐ ǹdə byílsi ta, bə̀ jə̀-jĩ́ ǹdə́ bə̀ jə̀-gwã̀ ga nɛ. ³⁰Dɛ̃ rɛ́ rə̀myɛ́ mɔ́ yù wə, Cinu zwẽ Esərayɛl lyì byǎ bɛ́ Ezhibti lyì bí jɔ̃̀ wa. Sə Esərayɛl lyì byǎ bɛ́ nɔ Ezhibti lyì bí cùùrí rə̀ ləlɛ tɛ̃́ nə̀-fɔ̀lɔ̀ w nyí ni. ³¹Esərayɛl lyì byǎ bɛ́ j'a lwar Cinu jɛ̃̀ y jàn rɛ́ nánfɔ̀lɔ̀ w ń yà ń mə n bú ǹdə́ Ezhibti lyì bí mú gə́ y'à wɔ́ kɔn ná-dwí yilə. Esərayɛl lyì byǎ bɛ́ j'a nyàm Cinu, bə zə Cinu ǹdə́ ń tùntùnnə Muyiisi zhə̀nà.

¹Rə̀myɛ́ yó, Muyiisi ǹdə́ Esərayɛl lyì byǎ bɛ́ nún nwə̃́ y kɛ̀bɛ́ bə m'e cèrhé Cinu bə wɔ̀:«À m'a nún Cinu,bə̀ ń búl n twĩ̀ tũ̀-fɔ̀lɔ̀.Eshã y ǹdə́ è eshə-jòmnə mó ga,ń byirh bi n ló nə̀-fɔ̀lɔ̀ w wa.²À jàn rɛ́ ǹd'â nwə̃́ y ga wɔ́ Cinu.Ńmyɛ̌ ń yàl à yi-zwẽẽ́.Ńmyɛ̌ ń wɔ́ à Yi rí,À m'a cèrhé mo;à nàmbal mɔ́ Yi rí yil ré rə̀ du mú,à m'a bwə̀l ré a byili. ³Cinu wɔ́ búlə́-kàndɔ.Cinu, è wɔ́ ń yil ré.⁴Ń byirh Faraɔ̃ búlə́ eshərh-vwə̃tur ríǹdə́ ń shə̀dɛ́ɛ́sɛ́ ga n ló nə̀-fɔ̀lɔ̀ w wa.Faraɔ̃ shə̀dɛ́ɛ́sɛ́ yé né cìnə́ bé byɛ̀bɛ́,bə̀ yě kɔn du bə̀ dwã bɛ́ mɔ́,ń byirh bi ń ló vwal-gɔ nə̀-fɔ̀lɔ̀ w wa. ⁵Nə̀-fɔ̀lɔ̀ w nánlyilyùmú w lyìl bi,ǹdə nə́kulu ta,bə̀ mɔ́lɛ́ bə vò tɛ̃́tɛ̃́ nə̀-fɔ̀lɔ̀ w kùr wə.⁶Ǹ jə̀-jĩ́ jɛ̃̀ y j'â búl è zhe jàn nánfɔ̀lɔ̀, Cinu,ǹ jə̀-jĩ́ jɛ̃̀ y j'â n'ê mà ǹ zwə̀ bé è bɔbwɛlɛ, Cinu. ⁷Ǹ zùwə́ y j'â búl è já dɛ̃́dɛ̃́,ǹ nə́ ǹ zhə̀r ǹ zwə̀ bé ǹ lwé tɛ̃́.Ǹ lyim-cəcɔ̌ w gə zɛ̃̀,bə̀ j'â n'ê jí myǐn ǹdə màálɛ. ⁸Ǹ gə já ń shǐrh, ǹ myə̀lə́ né zho w cenàná bɛ́ j'â n'ê mwɛ dwã nɛ jàà èdù.Nə̀-zha y n'ê zɛ̃̀ è zhǐ dɛ̃̌ ǹdə byílí ta.Nə̀-fɔ̀lɔ̀ w nánlyilyùmú wkùr ré tɛ̃́tɛ̃́ mɔ́ n'ê zal dwã nɛ.⁹Zù-bal mɔ́ yà ń nə́ ń wə̀l ń cìn ni:À m'a pú bə̀ kùr a jì bi a za,à m'a zɛ̃̀ a tə̀ bə̀ wẽ̀ ré à la pwǎ búlə́ né kwã mɔ́,à cəl ré jɛ́nɛ́ rɛ́ m'a lyɛ̃ cɛ nɛ.À m'a fwə̌rh à búlə́ shù wə́,a ce bə jé tɛ̃́! ¹⁰Cinu, ǹ gə́ shǐrh,ǹ myə̀lə́ né zho w ce nə̀-fɔ̀lɔ̀ w lyìl bí tɛ̃́,ǹdə kàmmɔ ku ta,bə̀ tu bə vò tɛ̃́tɛ̃́ nàná bɛ́ ǹdə́ bə̀ jàn rɛ́ kùr wə. ¹¹Mɔ̌ lò ń wɔ́ ǹ nyɛrh-dõ yə né wẽ́, Cinu?Mɔ̌ lò ń nyɛrhɛ mɔ́,ǹmyɛ́ mɔ̀bɔ́ ǹ já ǹ búl ǹ bə dõ zhe mó?Ǹmyɛ́ mɔ̀bɔ́ ǹ tũ̀-fwààlɛ́ ce bə̀ n'ê nyàm mɔ́ mɔ́?Ǹmyɛ́ mɔ̀bɔ́ ǹ nə́ ǹ wɛ̀rhɛ́ màmyaarhɛ mɔ́?¹²Ǹ cèlè ǹ jə̀-jĩ́ jɛ̃̀ yá,cɛ y j'a lyì bi. ¹³Dwí rí ǹ bú búlə́ ń zwẽ mó,ǹ nə́ ǹ zal rɛ ǹdə́ wu-bɔ̀nɔ̀.Ǹ jàn rɛ́ ǹ mə́ zə rɛ,ń zǎ jàà y kɛ̀bɛ́ è wɔ́ ǹmyɛ́ Cinu jàà y wẽ́.¹⁴Dwə́ né dwã bɛ́ nyɛ̀ɛ̀,nə zɛ̃̀ nə̀ n'ê kəkə:Wu-zɛ̃̀ɛ̃́ n'ê gwi Shilisəti lyì bí. ¹⁵Edɔm yó-cìnə́ bé wun zɛ̃̀.Mɔwaabɛ pyə̀-dwí rí lyì bí zɛ̃̀ bə̀ n'ê kəkə.Kanaã lyì bí gakó wun gɔwa.¹⁶Ywẽ ǹdə́ wu-zɛ̃̀ɛ̃́ nánfɔ̀lɔ̀ zhe be.Bə̀ nyə́ cɛrhɛ, ǹ jɛ̃̀ y jàn rɛ́ nánfɔ̀lɔ̀ w yilə,bə̀ kùl bə jǐrh ǹdə nə́kulu ta,kɔn la m'e yí ǹ dwí rí lyɛ̃,kɔn la m'e yí dwí rí ǹ zwẽ rə̀ jǐrh ǹmyɛ́ dwí mú lyɛ̃, Cinu.¹⁷Ǹ zə rɛ ń yí ǹ cəl-tənà y pyɔ̀ w yó,ń ce rə̀ jě gàà twéé twéé yilə.Jàà y kɛ̀bɛ́ ǹmyɛ́ cìcì tɛnɛ,ǹ la è wẽ́ jǒm mó, Cinu.Jàà y kɛ̀bɛ́ ǹmyɛ́ cìcì,la ǹ còrhó-jì y è wẽ́ lú mú, Cinu. ¹⁸Cinu nə́ ń jí pyɛ̀lɛ̀ twéé twéé yilə!»¹⁹Faraɔ̃ eshã y ǹdə́ ń búlə́ eshərh-vwə̃tur rí e súlí ń eshə-jòmnə bé y'à zù nə̀-fɔ̀lɔ̀ w wẽ́, sə Cinu yà ń ce nə̀-fɔ̀lɔ̀ w kwɛ̃̀ ò kwã nɛ́ o b'o mɔ́lɛ́ bɛ: e jà Esərayɛl lyì byǎ bɛ́ zhə̀l cə-kùlì yó, bə tó nə̀-fɔ̀lɔ̀ w cəcəl w bə lyɛ̃. ²⁰Aarɔ̃ nəkɔ́ nyì-zwennə Myərəyam kwè gùlí, kana bɛ́ gakó du bə pú ń kùrə̀, bə̀ n'ê dwí gǔlsi bə̀ m'ê sɛ. ²¹Myərəyam ji nwə̃́ n pə bɛ n wɔ̀:«Nún-nə Cinu,ń búl n twĩ̀ tũ̀-fɔ̀lɔ̀.Eshã y ǹdə́ è eshə-jòmnə mó ga,ń byirh bi n ló nə̀-fɔ̀lɔ̀ w wa!»²²Muyiisi ce Esərayɛl lyì byǎ bɛ́ zhì vwal-gɔ nə̀-fɔ̀lɔ̀ w nɛ bə zhǐr bə zǎ Shuuri gɔ-elũ èpòlò wə́. Bə̀ zhə̀l gɔ-elũ èpòlò w w dwã nə̀tɔ̀ ǹdə́ bə̀ yə̀ nɛ̃̌ nɛ yé. ²³Bə yí Mara, sə bə̀ yə̀ ŋwɛ̀nɛ́ bə nyɔ̀ Mara nɛ̃̌ mɔ́ yé, bə̀ mə̀ y'à nyɛ̌ cɛ̀ɛ́. Wɔ́ rə̀myɛ́ è ce bə ce yil ré bə̀ Mara, rə̀ kùr wɔ́ «càn».²⁴Dwí rí j'a zɛ̃̀ rə̀ n'ê ŋwúŋwùní rə̀ m'ê bwí Muyiisi rə̀ zhe: «Bə̀kɔ́n nə́ la nyɔ́?» ²⁵Muyiisi búbwéé n ce Cinu ni, sə Cinu byili mu cǒ òdù, Muyiisi ká cǒ òmyɛ́ mɔ́ dɔ̌ n dul nɛ̃̌ mɔ́ wẽ́, sə rə̀myɛ́ yó, nɛ̃̌ mɔ́ shɛ̀nɛ́ nyɔ́. Wɔ́ gàà mɔ́ Cinu vùr nyə́ Esərayɛl lyì byǎ bɛ́ yil né, n súlí n pə bɛ lùl-e-púrsi. Wɔ́ gàà mɔ́ myɛ ń zhẽ̀ be né. ²⁶Cinu wə̀l be: «Ǹ gə cili Cinu ǹ Yi rí cəl ré cɛ̀nɛ̀, ń wɛ̀rhɛ́ kɔn dɛ̀bɛ́ rə̀ wɔ́ cánga ń yírh wə, ǹ nə́ ǹ pyèrhè ǹ zhɛ̃̌ ǹ cili kɔn rɛ́ tɛ̀bɛ́ rə̀ wɔ́ ń pùbùlə̀ né, ̀ nə́ ǹ zwẽ ń nyə́ né, à t'â la mɔ́ címsí shɛ̀bɛ́ à ju Ezhibti lyì bí ni mú èdù ga ju yé. Bə̀ wɔ́ àmyɛ́ Cinu, à n'â wárh mɔ́.»²⁷Rə̀myɛ́ kwã nɛ́, Esərayɛl lyì byǎ bɛ́ lyɛ̃ bə yí Elyim: nə̀-bùlsi shí ǹdə́ sə̀lyè ǹdə́ kwə̌rh shə́-shàlpyɛ̀ y'à ŋwɛ́nɛ́ gàà. Bə̀ zul gàà mɔ́, nɛ̃̌ mɔ́ nyí ni.

¹Esərayɛl lyì byǎ bɛ́ zhì Elyim ní bə zhǐr, sə bə̀ gakó púlə́púlə́ zhə̀l bə yí Siini gɔ-elũ èpòlò w wə, Elyim ǹdə́ Sǝnǝyi bwə̌l mó wə, cànsɛ̀ sə̀lyè nyǎ y dwã shí ǹdə́ nə̀nu dɛ̃ rɛ́ yù wə, bə̀ gə́ shə́r Ezhibti tənà y w mɔ́ kwã nɛ́. ²Gɔ-elũ èpòlò w gàà mɔ́, Esərayɛl lyì byǎ bɛ́ k'e zɛ̃̀ bə̀ n'ê ŋwúŋwùní bə̀ m'ê bwí Muyiisi ǹdə́ Aarɔ̃. ³Bə̀ wə̀l be: «Cinu gə yà ń ce nə́ cì Ezhibti tənà y w nə́ gə́ y'à n'ê jòm nàmá bɛ́ nə́kwɛ́nsɛ́ nyí ni, nə́ n'é jí kùjú nə́ búl nə́ swí mú y'à be cɔ̃̀! Á zɛ̃̀ á zə nə́ba á m'á bə̀ gɔ-elũ èpòlò w kɔ̀bɔ́ wẽ́, á la ce nɔrh gu lyì-zhǎ bɛ́ byɛ̀bɛ́ gakó!»⁴Cinu wɔ̀ Muyiisi ni: «À m'a ce búúri shí dɛ̃̌-yi w rə nyɔ̀ ǹdə dwà ta á pwà. Dɛ̃ gakó, dwí rí m'a du rə pwà kɔn mɛrhɛ dwã ǹdə́ rə̀ dɛ̃ gakó kùjú wə́. À m'a tó rə̀ dɛnnɛ a zhẽ̀ re a nyì: rə̀ m'a zwẽ à nyə́ né ráá rə̀ t'â la nɛ zõ? ⁵Dwã nyə̀ldù dɛ̃ rɛ́, dwí rí gə tɛnɛ kɔn rɛ́ tɛ̀bɛ́ rə̀ pwà mɔ́, rə̀ m'a pù rə yí tɛ̀bɛ́ rə̀ n'ê pwà dɛ̃ gakó mó twər rə̀lyèa.»⁶Muyiisi ǹdə́ Aarɔ̃ wɔ̀ Esərayɛl lyì byǎ bɛ́ púlə́púlə́ ne: «Zà də̀dɛ̀nɛ́ y á m'ǎ lwar bə̀ wɔ́ Cinu ń ce á shə́r Ezhibti tənà y wa; ⁷nəkɔl nəkɔkɛ́lɛ́ yá, á m'ǎ nə Cinu còrhó wə́, bə̀ ń nyɛ̀ɛ̀ á gə́ n'á ŋwúŋwùní á m'á bwí ǹdə́ mɔ mɔ́. Nə́myɛ̌ wɔ́ byè, á m'á n'á ŋwúŋwùní á m'á bwí ǹdə́ nə́ba?» ⁸Muyiisi yà ń nə́ ń yǎl n wɔ̀: «Á m'ǎ nə Cinu còrhó w ń gə́ mà n pə ába nàmá á dɔ̃̀ zà də̀dɛ̀nɛ́ yá, n súlí n pə ába búrú á búl á dɔ̃̀ á sú nəkɔl nəkɔkɔ́lɛ́ y mɔ́, bə̀ ń nyɛ̀ɛ̀ á gə́ n'á ŋwúŋwùní á m'á bwí ǹdə́ mɔ mɔ́. Byè nə́myɛ̌ wɔ́? È də̀ nə́myɛ̌ á n'á ŋwúŋwùní á m'á bwí yé, wɔ́ Cinu á n'á ŋwúŋwùní á m'á bwí.»¹¹⁹Muyiisi wɔ̀ Aarɔ̃ nɛ: «Wál Esərayɛl lyì byǎ bɛ́ gakó ne: Twẽ̌-nə á bwəlse Cinu yala nɛ, bə̀ ń nyɛ̀ɛ̀ á ŋwúŋwùnú mú.» ¹⁰Sə Aarɔ̃ gə́ tú ń nə́ ń zɔ̀m ǹdə́ Esərayɛl lyì byǎ bɛ́ yi ní, bə̀ zhízhílí bə̀ yə́rh bə zǎ gɔ-elũ èpòlò wə́: rə̀myɛ́ yó, Cinu còrhó w j'a du ébɔ̃ w wẽ́.11 Cinu wɔ̀ Muyiisi ni: ¹²«À nyɛ̀ɛ̀ Esərayɛl lyì byǎ bɛ́ ŋwúŋwùnú mú. Cĩ́ bi à nyí rí ń wɔ̀: Cɛ y gə tú è n'ê byíbyílí yi ní, á m'ǎ dɔ̃̀ nàmá; nəkɔl nəkɔkɔ́lɛ́ yá, á m'ǎ búl á dɔ̃̀ búrú á sú. Á m'ǎ zɛ̃̀ á lwar b'àmyɛ́ á Yi rí, wɔ́ Cinu.»¹³Də̀dɛ̀nɛ́ y èmyɛ́ mɔ́, nə̀pə̀pǎr rɛ́ j'a du rə sú zulə́ jàà yá. È zɛ̃̀ nəkɔkɔ́lɛ́ yá, myɔ̀nɔ̀ ce o kə́kɛ́lɛ́ zulə́ jàà yá. ¹⁴Sə myɔ̀nɔ̀ w gə́ tu kwã, bə̀ púrí kɔn rə̀ nyɛ̌ ǹdə wẽ̀ byǎ námpwẽ̀ námpɔ́lsɛ dɛ̃́dɛ̃́ ta, bə̀ zɔ dwã nɛ, cɛ y yó, gɔ-elũ èpòlò w wə. ¹⁵Esərayɛl lyì byǎ bɛ́ gə́ nɔ rɛ, bə zɛ̃̀ bə̀ n'ê bwə̀rh dwã bə̀ zhe: «Man U?» («Tɛ̀bɛ́ wɔ́ byè?»), bə̀ bə̀ y'à yə̀l kɔn ná-dwí yil ǹdə́ rɛ yé. Muyiisi wɔ̀ bɛ: «Wɔ́ búrú w kɔ̀bɔ́ Cinu nə́ ń pɛ ába á la dɔ́m mɔ́.¹⁶Nyǐ nyí rí tɛ̀bɛ́ Cinu pɔ mɔ́: Pwǎ-na w kɔn yí lò gakó gə́ wɔ̌ ń mà n dɔ̃̀ nɛ́. Lò gakó mà n pwà kɔn mɛrhɛ ń lyì bí yó wə́, lyítərə nə̀na ku yírh rə̀dù ń kòrhó w lò mə̀dù gakó yilə.» ¹⁷Esərayɛl lyì byǎ bɛ́ wɛ̀rhɛ́ ǹdə bə̀ gə́ byili ní; jàlà pwà dɛ̃́dɛ̃́, jàlà pwà námpɔ́lɛ́. ¹⁸Bə̀ gə́ tú bə zə lyítərə nə̀na yírh ku w bə m'e mɛrhɛ yi ní, lò mɔ̀bɔ́ ń nyǎn rɛ́ y'à já mɔ́ jɛ́nɛ́ rɛ́ y'à yə̀ cɛ nɛ lyɛ̃ yé, kɔn k'ê yə̀ lò mɔ̀bɔ́ ń nyǎn rɛ́ y'à wɔ́ námpɔ́lɛ́ myɛ mùrì yé. Lò gakó yà ń pwà kɔn yí ń gə́ wɔ̌ ń mà n jí ní.¹⁹Muyiisi wɔ̀ bɛ: «Lòlò bə̀ kaka dàl n cĩ́ kɔn m'e yí nəkɔl nəkɔkɔ́lɛ́ y yé!» ²⁰Sə lyì jàlà yə̀ Muyiisi cili yé, bə dàl w bə cĩ́ kɔn m'e yí è zɛ̃̀ nəkɔkɔ́lɛ́ yá. Sə ò cɔ̀ o pɔn o ce zə̀zɔ̀mɛ́. Rə̀myɛ́ yó, Muyiisi lyim j'a zɛ̃̀ rə̀ n'ê yì bi. ²¹Bə̀ y'à j'â n'ê pwà w nəkɔkɔ́lɛ́ gakó, kɔn yí lò gakó gə́ yà ń wɔ̌ ń mà n jí ní. Nə̀nyɔ́nɔ́ w gə tú ò ce cɛ y byìrh, ò y'à n'ô yə̀lə́.²²Dwã nyə̀ldù dɛ̃ rɛ́, bə̀ pwà dwã nə̀lyè búúri, lyítərə nə̀na yírh wẽ̀ ré rə̀lyè, lò gakó yilə. Esərayɛl dwí rí náncɛsɛ́ gakó bə̀ sə cĩ́ ri Muyiisi ni. ²³Muyiisi wɔ̀ sɛ: «Wɔ́ nyí rí rə̀myɛ́ Cinu yà ń pɔ mɔ́: Nəkɔl wɔ́ shìrhə́ dɛ̃, shìrhə́ dɛ̃ rɛ́ tɛ̀bɛ́ Cinu cǐ mú. Shɛ̃̌-na kɔn dɛ̀bɛ́ rə̀ mə̌ ǹdə́ shɔ̃̀ mɔ́; sə á pyì tɛ̀bɛ́ rə̀ mə̌ ǹdə́ pyíl mú. Sə á cĩ́ kɔn rɛ́ tɛ̀bɛ́ rə̀ dàl mɔ́ á m'á dɛ̃̀ nəkɔl nəkɔkɔ́lɛ́ yá.»²⁴Bə̀ cĩ́ tɛ̀bɛ́ rə̀ dàl mɔ́ kɔn m'e yí cɛ-lár rɛ́, ǹdə Muyiisi gə́ yà ń pɔ nyí ní. Sə rə̀ yə̀ pɔn rə ce zə̀zɔ̀mɛ́ yé. ²⁵Muyiisi wɔ̀ bɛ: «Jí-nə re zà, bə̀ zà wɔ́ shìrhə́ dɛ̃ Cinu Yi còrhó yilə. Á t'á la w nɔ pwẽ̀ ne zà yé.²⁶Á m'ǎ pwà w dwã nyə̀ldù, sə dwã nyàlpyɛ̀ dɛ̃ rɛ́, wɔ́ shìrhə́ dɛ̃ rɛ́: kaka t'â la nɔ yé.» ²⁷E jà dwã nyàlpyɛ̀ dɛ̃ rɛ́, lyì jàlà du bə̀ la w pwǎ sə bə̀ yə̀ kaka nɛ yé.²⁸Cinu wɔ̀ Muyiisi ni: «Á m'ǎ cẽ à pùbùlə̀ né wɔ̀rhɔ́ e súlí à nyə́ né zõ kɔn m'e yí dǒ? ²⁹Lwar-na cɛ̀nɛ̀ bə̀ nyǐ Cinu pɔ ába shìrhə́ dɛ̃ rɛ́, n súlí n pə ába dwã nə̀lyè kùjú dwã nyə̀ldù dɛ̃ rɛ́. Lò gakó mɛ̃ ń jàà y wa. Lòlò bə̀ká n shə́r ń dǒ-sõ dwã nyàlpyɛ̀ dɛ̃ rɛ́ yù w yé.» ³⁰Rə̀myɛ́ mɔ́ ce, Esərayɛl lyì byǎ bɛ́ shǐrh dwã nyàlpyɛ̀ dɛ̃ rɛ́ yù wə.³¹Esərayɛl lyì byǎ bɛ́ ce kùjú w òmyɛ́ mɔ́ yil bə̀ mánnɛ. Ò y'à nyɛ̌ ǹdə nyã̀shã̌ dwí ta, ò y'à wɔ́ námpõ̀, ò y'à nyɛ̀ ǹdə ŋwǎmsɛ́ shɛ̀bɛ́ bə̀ co tùr sə̀ wẽ́ ta. ³²Muyiisi wɔ̀: «Nyǐ Cinu nyí rí ń pɔ mɔ́: Bə̀ ce lyítərə nə̀na ku yírh rə̀dù bə cĩ́ dɛ̃̌ á nɛ̀mɛ́ nɛ́ yilə, mùnì ga bə nə búrú w kɔ̀bɔ́ à m'a kɔ̃̀ ába gɔ-elũ èpòlò w wə, à gə́ tú a ce á shə́r Ezhibti ní yi ní mú párá.»³³Muyiisi wɔ̀ Aarɔ̃ nɛ: «Kwě nə̀bwɛ́nɛ́, ń ló lyítərə nə̀na ku w ò sú pyám yírh rə̀dù è wẽ́, ń vò ń cĩ́ Cinu yé né, ń mə́ cĩ́ dɛ̃̌ á nɛ̀mɛ́ nɛ́ yilə.» ³⁴Aarɔ̃ zhə̀l n cĩ́ y dɔbrɛ́ nyə́ né bwə̀lsé yé né ǹdə nyí rí Cinu yà ń pɔ Muyiisi ni mú gə́ y'à n'ê byili ní, bə m'e cĩ́ y dɛ̃̌. ³⁵Esərayɛl lyì byǎ bɛ́ dɔ̀m mánnɛ y byinə shə́-èna, kɔn m'e yí bə vò bə zù tənà y kɛ̀bɛ́ lyì y'à jě è wẽ́ mó wə. Wɔ́ mánnɛ y bə̀ dɔ̀mà, kɔn m'e yí bə yí Kanaã tənà y swɛ̃́ rɛ́. ³⁶Lyítərə nə̀na ku w yírhə́ shí mánnɛ y'à yú bə̀ mɔrhɔ ku w yírh rə̀dù.

¹Esərayɛl lyì byǎ bɛ́ púlə́púlə́ zhì Siini gɔ-elũ èpòlò w w bə zhǐr bə̀ n'ê zhə̀l bə̀ m'ê zhì, bə̀ m'ê zhílí bə̀ sɔ́má yá, kɔn tó nyí rí tɛ̀bɛ́ Cinu yà ń nə́ ń pɛ bɛ mɔ́ nɛ. Bə̀ yú bə zul Erəfyidim ní, sə nɛ̃̌ y'à tɛ̀nɛ́ gàà dwí rí la nyɔ́ yé. ²Rə zɛ̃̀ rə̀ n'ê ji Muyiisi búlə́ rə̀ zhe: «Pə nə́ba nɛ̃̌ nə́ nyɔ̀». Muyiisi bwə̀rh re n wɔ̀: «Byè yil á n'á ji ni búlə́? Byè yil á n'á zhẽ̀ Cinu?» ³Nə̀nyɛ̀lsɛ zɔ dwí rí gàà mɔ́; rə ŋwúŋwùní rə m'e bú ǹdə́ Muyiisi rə wɔ̀: «È nə wɔ́ byè yil ǹ ce nə́ shə́r Ezhibti ní? Wɔ́ nə̀nyɛ̀lsɛ m'e gu nə́myɛ̌ ǹdə́ nə́ byǎ bɛ́ e súlí nə́ vwàmá nɛ́ yil nà?»⁴Muyiisi búbwéé n ce Cinu ni n bwə̀rh mo n wɔ̀: «Bə̀kɔ́n à mə̌ s'a wɛ̀rhɛ́ dwí rí tɛ̀bɛ́ yilə? È dǎl námpɔ́lɛ́ sə rə dul ne ǹdə́ nə́kulə.» ⁵Cinu wɔ̀ Muyiisi ni: «Lyɛ̃ ń yə̀ dwí rí yé né, sə́ súlí ń zə Esərayɛl lyì byǎ náncɛrh màngɛlɛ́ bə tó mó; kwě də̀-dɔ̀lɔ̀ w kɔ̀bɔ́ ǹ mə́ mà Niili y nɛ̃̌ mɔ́ mɔ́ ń zə ǹ jɔ̃̀ wa, sə́ vò. ⁶À m'a zhì ǹ yé né nyɔ̀nɔ̀, Orɛɛbɛ pyɔ̀ w nə̀mù-pyɔ̀ y yó. Ǹ m'ǎ mà nə̀mù-pyɔ̀ wá, sə nɛ̃̌ m'a shí ò wẽ́ mə du, dwí rí nyɔ̀.» Muyiisi wɛ̀rhɛ́ èta Esərayɛl lyì byǎ náncɛsɛ́ yírh wə. ⁷Bə̀ co jàà y èmyɛ́ mɔ́ yil bə̀ Maasa ǹdə́ Mərəba: «Zhõ̀ ǹdə́ Nyì-pyɛ̀ɛ́», Esərayɛl lyì byǎ bɛ́ ŋwúŋwùnú mú bə̀ ŋwúŋwùní bə̀ y'à m'ê bwí mú e súlí bə̀ gə́ y'à zhẽ̀ Cinu bə̀ y'à m'ê zhe: «Cinu ŋwɛ́nɛ́ nə́ cəcəl w ráá ń tɛ̀nɛ́ nɛ́?» mɔ́ yilə.Amalɛɛkɛ lyì bí n'ê bwí ǹdə́ Esərayɛl lyì byǎ bɛ́⁸Amalɛɛkɛ lyì bí tú bə bú ǹdə́ Esərayɛl lyì byǎ bɛ́ Erəfyidim ní. ⁹Muyiisi wɔ̀ Zhozwe ne: «Cír lyì bə̀ wɔ̌ bə̀ m'a zwẽ nə́ba, sə́ du ń vò ń bú ǹdə́ Amalɛɛkɛ lyì bí. Nəkɔl dɛ̃ rɛ́, à m'a vò a zhì pyɛ̀lɛ́ y yə́-pɛ̀lɛ́ y wa, ǹdə́ Cinu də̀-dɔ̀lɔ̀ w à jɔ̃̀ wa.» ¹⁰Zhozwe du n vò ń nə́ ń bwí ǹdə́ Amalɛɛkɛ lyì bí ǹdə Muyiisi gə́ yà ń pɔ mɔ nyí ni, rə̀myɛ́ yi ní ǹdə́ Muyiisi ǹdə́ Aarɔ̃ e súlí Uuri y'à jìl bə vò bə̀ ŋwɛ́nɛ́ pyɛ̀lɛ́ y yə́-pɛ̀lɛ́ wa.¹¹Rə̀myɛ́ yó, Muyiisi gə zhẽ̌ ń jɛ̀sɛ́ dɛ̃̌, Esərayɛl lyì byǎ bɛ́ jàn rɛ́ y'à n'ê dwini Amalɛɛkɛ lyì bí jàn rɛ́. Sə Muyiisi gə só ń jɛ̀sɛ́ tɛ̃́, wɔ́ Amalɛɛkɛ lyì bí jàn rɛ́ rə̀ y'à n'ê dwini. ¹²Muyiisi jɛ̀sɛ́ gə́ tú sə lyɛ̀ɛ̀ sə̀ n'ê jǐrh vwə̀lí yi ní, Aarɔ̃ ǹdə́ Uuri kwè nə́kulu bə cĩ́ ń kùr wə, n zɛ̃̀ n jòm ò yó. Aarɔ̃ ǹdə́ Uuri zɛ̃̀ bə kwɛ̃́ ń jɛ̀sɛ́, mə̀dù èpákɛ̀, mə̀dù èpá dõ mó. Èta, ń jɛ̀sɛ́ j'a ŋwɛ̀nɛ́ sə zhẽ̌ sə zhì dɛ̃̌ kɔn m'e yí yi rí zù. ¹³Zhozwe zə búlə́ shù n mə n jí bɛlɛ Amalɛɛkɛ ǹdə́ ń dwí rí yó wə.¹⁴Cinu wɔ̀ Muyiisi ni: «Kɛ̃ rɛ́ sɛ́bɛ́ yó, bə̀ m'ê lyǐrh rə̀ yò, sə́ ce Zhozwe zhã̌ nyɛ̀ɛ̀ rɛ́: À m'a ce bə j'a búl bə swě Amalɛɛkɛ dwí rí yò cɛ y yó!» ¹⁵Rə̀myɛ́ yó, Muyiisi lù vwĩ̀-jùlú n ce ò yil bə̀ «Cinu wɔ́ bɛlɛ rɛ́ à jú mú myɔrhɔ», ¹⁶N súlí n wɔ̀: «jɛ̃̀ gə́ zhẽ̌ dɛ̃̌ è la bú ǹdə́ Cinu pyɛ̀lɛ̀ rɛ́ mɔ́ ce, búlə́ m'à j'â ŋwɛ́nɛ́ Cinu ǹdə́ Amalɛɛkɛ bwə̌l w byin byin gakó!»

¹Muyiisi cə́mbal Zhətəro, Majã vwĩ̀-zwə́lnə mó, yà ń nyɛ̀ɛ̀ bə̀ n'ê zɔ̀m kɔn rɛ́ tɛ̀bɛ́ Yi y'à wɛ̀rhɛ́ Muyiisi ǹdə́ rə̀ dwí Esərayɛl lyì byǎ bɛ́ yil mú gakó yò: Cinu yà ń ce Esərayɛl lyì byǎ bɛ́ shə́r Ezhibti tənà y wa! ²Muyiisi gə́ ce ń kɛ̃ Səfɔra kwɛ̃̀ kwã nɛ́, ń cə́mbal Zhətəro zwẽ Səfɔra ń sõ ³ǹdə́ ń byǎ bɛ́ bə̀lyè yə́: mə̀dù y yà ń yíl Gɛrəshɔn, rə̀ kùr wɔ́ «Zhə-bal nyɔ̀nɔ̀»; bə̀ ń yà ń wə̀l ń cìn ni: «À jǐrh zhə-bal tənà dõ wẽ́». ⁴Ń dõ mó yà ń yíl Elyəzɛɛrɛ, rə̀ kùr wɔ́: «À Yi rí wɔ́ à sɛ̃ɛ̃́.» Ń yà ń nə́ ń wə̀lə̀: «Wɔ́ à nàmbal mɔ́ Yi rí rə̀ tú rə sɛ̃ nɛ rə ce a lú Faraɔ̃ búlə́ shù w yé né.»⁵Muyiisi cə́mbal Zhətəro e súlí Muyiisi byǎ bɛ́ ǹdə́ ń kɛ̃ mɔ́ zɛ̃̀ bə vò Muyiisi sõ, gɔ-elũ èpòlò w ń yà ń zul né mó, Yi pyɔ̀ w səta mɔ́ wa. ⁶N ce bə wɔ̀ Muyiisi ni: «Wɔ́ àmyɛ́ ǹ cə́mbal Zhətəro, à bàn ǹ sono ǹdə́ ǹ kɛ̃ mɔ́ e súlí ń byǎ bɛ́ bə̀lyè y ń kwã nɛ́.»⁷Muyiisi du n jəl ń cə́mbal mɔ́, n wùlì tɛ̃́ ń yé né, n zɛ̃̀ n kwə̀ə̀lè mo; bə bwə̀rh dwã jàn bwə̀rhə́, bə zɛ̃̀ bə zə dwã bə zù kòrhó w wə. ⁸Muyiisi cĩ́ kɔn rɛ́ tɛ̀bɛ́ gakó Cinu yà ń tə̀ Esərayɛl lyì byǎ bɛ́ yil n wɛ̀rhɛ́ Faraɔ̃ ǹdə́ Ezhibti lyì bí ni ń cə́mbal mɔ́ nɛ, e súlí zwini rí tɛ̀bɛ́ gakó Cinu yà ń ce bə lú rə̀ wẽ́ sɔ́má y kǒ yi ní mú.⁹Rə̀myɛ́ kwã nɛ́, Zhətəro wu zɔ nyàn cɛ̀nɛ̀ rɛ́ tɛ̀bɛ́ gakó Cinu yà ń wɛ̀rhɛ́ Esərayɛl lyì byǎ bɛ́ nɛ, ń gə́ zwẽ be Ezhibti lyì bí jɔ̃̀ w mɔ́ yilə. ¹⁰Zhətəro zɛ̃̀ n wɔ̀: «Bə̀ Cinu mɔ̀bɔ́ ń zwẽ ába Ezhibti lyì bí jɔ̃̀ wa, ǹdə́ Faraɔ̃ jɔ̃̀ wa, ńmyɛ̌ mɔ̀bɔ́ ń zwẽ dwí rí Ezhibti lyì bí jɔ̃̀ w mɔ́, yil ré nə còrhó! ¹¹Èlǎsɛ̃́, à yě bə̀ Cinu já ń búl ń du yə né dwã bɛ́ gakó, má nə̀ lyimə né gə tú nə̀ zɛ̃̀ nə̀ n'ê yì Esərayɛl lyì byǎ bɛ́ yi ní myɛ.»¹²Muyiisi cə́mbal Zhətəro zwə́l vwĩ̀ námpúm cɛ̃́ɛ̃́ ǹdə́ yə̀-zùlə́ vwə̃̀ n pə Yi ni. Aarɔ̃ ǹdə́ Esərayɛl náncɛsɛ́ bə̀ bə tó Muyiisi cə́mbal mɔ́ nɛ bə jí vwĩ̀ rí kùjú w Yi yé né.¹³È zɛ̃̀ nəkɔkɔ́lɛ́ yá, Muyiisi yà ń zhə̀l ń jě ń la dwí rí bùrsí bǔr, dwí rí myɛ mɛ̃ rə dɛ̃̀ Muyiisi yé né, nəkɔkɔ́lɛ́ ga kɔn m'e yí də̀dɛ̀nɛ́. ¹⁴Muyiisi cə́mbal mɔ́ gə́ nɔ kɔn rɛ́ tɛ̀bɛ́ gakó Muyiisi yà ń nə́ ń wɛ̀rhɛ́ dwí rí yil mú, n bwə̀rh mo n wɔ̀: «Bə̀kɔ́n ǹdə́ tɛ̀bɛ́ ǹ nə́ ǹ wɛ̀rhɛ́ dwí rí yil mú? Byè yil ǹ nə jě bùrsí bǔr jàà w ǹ dúdú dwí rí zɛ̃̀ rə̀ zhǐ dɛ̃̌ ǹ yé né, nəkɔkɔ́lɛ́ kɔn m'e la də̀dɛ̀nɛ́?»¹⁵Muyiisi lyár ń cə́mbal mɔ́ n wɔ̀: «Wɔ́ dwí rí gə́ n'ê twí à sõ rə̀ la m'e sú Yi wu mú è ce. ¹⁶Yò gə ŋwɛ́nɛ́ bə̀ cəcəl wə, bə̀ n'ê twí à sono, a kə́ bùrsí yò w shò kwã nɛ́, a súlí a ce bə lwar Yi pùbùlə̀ né ǹdə́ rə̀ nyə́ né párá.»¹⁷Muyiisi cə́mbal mɔ́ wɔ̀ mɔ: «Ǹ gə́ nə́ ǹ wɛ̀rhɛ́ nɛ́ ma mɔ́ bə càn yé. ¹⁸Ǹ jàn rɛ́ m'a zhɛ̀ rə yẽ̌ mó, dwí rí tɛ̀bɛ́ rə̀ ŋwɛ́nɛ́ ǹdə́ mɔ́ myɛ jàn rɛ́ m'a zhɛ̀ rə yẽ̌ re. Tum rí wɔ́ vwə̀lí ǹ yilə, ǹ wàr rɛ ǹ la tũ̌ ǹ dúdú yé. ¹⁹Èlǎsɛ̃́, cili ni náàcɛ̀nɛ́! À n'â pɛ mɔ́ cúcú, sə Yi yə̀ nɛ́ ǹdə́ mɔ́! Ǹ m'ǎ vò zhì dwí rí jàà w Yi yé né: ǹmyɛ́ ǹ m'ǎ zə rə̀ ywẽ̀ né ń mə́ vò Yi yé né, ²⁰ń cèrhè Cinu pùbùlə̀ né ǹdə́ ń nyə́ né lyì bí ni, ń súlí ń byili bi sɔ́má y kɛ̀bɛ́ bə̀ mə̌ sə bə kwè mó ǹdə́ bə̀ gə́ mə̌ sə bə zə bə̀ cìn ní.²¹Sə rə̀myɛ́ kwã nɛ́, ǹ m'ǎ cír lyì byɛ̀bɛ́ bə̀ zhe kùr dwí rí wẽ́, bə̀ n'ê nyàm Yi, lyì bí zhe bə̀ zhə̀nà, lyì bí byɛ̀bɛ́ bə̀ wàr bə̀ la bɛ yǒ ǹdə́ pánsɛ mɔ́, ń ce bə yə̀ nunə mɔ̀rhɔ̀ mɔ̀rhɔ̀ ǹdə́ nunə zɔ̌m zɔ̌m ǹdə́ nunə shí-ènu shí-ènu e súlí nunə shí shí kùkùlə̀ né yó-cìnə́. ²²Bə̀ m'à j'â ŋwɛ́nɛ́ twéé twéé bə̀ n'ê bùr dwí rí bùrsí. Bə̀ m'a zə ywẽ̀ nánfwààlɛ́ bùrsí bə b'e pɔ̃́, sə bə̀myɛ́ cìcì mú m'a bùr ywẽ̀ námpɔ́lsɛ́ bùrsí. Wɛ̀rhɛ́ èta ń mə́ bɔ̀ ǹ zhĩĩ rí dùmì rí, sə bə tó mó bə zhĩ ri! ²³Ǹ gə wɛ̀rhɛ́ rə̀myɛ́ mɔ́, è gə́ wɔ́ kɔn rə̀myɛ́ mɔ́ Yi pɔ mɔ́ rə̀ nyí mú, ǹ m'ǎ ŋwɛ̀nɛ́ ń zhì dɛ̃̌ kẽkẽ. Kɔn súlí myɛ, dwí rí tɛ̀bɛ́ gakó m'a kwɛ̃̀ rə vò rə̀ sõ ǹdə́ yə̀-zùlə́.»²⁴Muyiisi cili ń cə́mbal mɔ́ cúcú mú, n zɛ̃̀ n zɛ̃̀ n wɛ̀rhɛ́ kɔn rɛ́ tɛ̀bɛ́ gakó ń yà ń byili mu mú. ²⁵Muyiisi cír lyì bí byɛ̀bɛ́ bə̀ zhe kùr Esərayɛl tənà y púlə́púlə́ wẽ́, n ce bə yə̀ nunə mɔ̀rhɔ̀ mɔ̀rhɔ̀ ǹdə́ nunə zɔ̌m zɔ̌m ǹdə́ nunə shí-ènu shí-ènu e súlí nunə shí shí kùkùlə̀ né yó-cìnə́. ²⁶Bə̀ y'à j'â ŋwɛ́nɛ́ twéé twéé bə̀ n'ê bùr dwí rí bùrsí. Yò w kɔ̀bɔ́ ò y'à zum mú, bə̀ y'à n'ê zhə̀l bə̀ pɛ w Muyiisi ni, sə kɔ̀bɔ́ ò y'à mə̌ mɔ́, wɔ́ bə̀myɛ́ cìcì mú bə̀ y'à n'ê bùr ò bùrsí. ²⁷Sə rə̀myɛ́ kwã nɛ́, Muyiisi yẽ̌ ń cə́mbal mɔ́ nɛ n kwɛ̃̀ n vò ń tənà y wa.

¹Esərayɛl lyì byǎ bɛ́ gə́ tú bə shə́r Ezhibti tənà y w cànsɛ̀ sə̀tɔ̀ kwã nɛ́, bə̀ yú Sənəyi gɔ-elũ èpòlò w wə. ²Bə̀ zhì Erəfyidim ní bə vò bə yí Sənəyi gɔ-elũ èpòlò w wə, sə bə̀ zul gɔ-elũ èpòlò w wə, pyɔ̀ w yé y wə.³Muyiisi jìl pyɔ̀ w yó ń la n vò n jəl Yi. Cinu zhì pyɔ̀ w yə́-pɛ̀lɛ́ y w n byẽ̀ mo, ń mə́ ń wə̀l mo: «Nyǐ kɔn rɛ́ tɛ̀bɛ́ ǹ m'ǎ wɔ̀ Zhakɔɔbɛ byǎ bɛ́ nɛ, nyǐ nyí rí tɛ̀bɛ́ ǹ m'ǎ cĩ́ Esərayɛl lyì byǎ bɛ́ nɛ mɔ́: ⁴‹Á cìcì yírhə́ nɔ kɔn rɛ́ tɛ̀bɛ́ à wɛ̀rhɛ́ Ezhibti lyì bí ni mú, ǹd'â gə́ kwè ába ǹdə ényə̀la vɔ̃̀mɛ̀ yó né ta, a m'a zə ába a m'a yí à sõ né. ⁵Èlǎsɛ̃́, á gə cili ni, á shɛ̀nɛ́ á zwẽ à dɔbrɛ́ nyə́ né, á m'ǎ yə̀ à cəl à cír dwə́ né gakó cəcəl wə, bə̀ lũ w púlə́púlə́ wɔ́ àmyɛ́ à cǐ wə. ⁶Sə ámyɛ̌ m'ǎ yə̀ vwĩ̀-zwə́lnə dwí à yilə, dwí tɛ̀bɛ́ Cinu dúdú cǐ mú.› Wɔ́ zɔ̀mà nɛ́ nə̀myɛ́ mɔ́ ǹ m'ǎ cĩ́ Esərayɛl lyì byǎ bɛ́ nɛ.»⁷Muyiisi kwɛ̃̀ n bə̀ zulə́ jàà y wa, n byẽ̀ dwí rí náncɛsɛ́ dwã yó, n cĩ́ bi zɔ̀mà nɛ́ nə̀myɛ́ gakó, Cinu yà ń pɔ mɔ nyí bə̀ ń cĩ́ mú. ⁸Dwí rí gakó tó dwã rə lyár rə wɔ̀: «Nə́ m'ǎ wɛ̀rhɛ́ kɔn rɛ́ tɛ̀bɛ́ gakó Cinu wə̀l mó.» Sə Muyiisi zə kɔn rɛ́ tɛ̀bɛ́ dwí rí lyár mɔ́ n vò n cĩ́ Cinu ni. ⁹Cinu wɔ̀ Muyiisi ni: «Nyǐ à m'a zù ébɔ̃ námbyṹ wẽ́ a só a bə̀ ǹ sõ, mùnì ga dwí rí nyɛ̀ɛ̀ à cəl ré à gə tú à n'â zɔ̀m ǹdə́ mɔ́ yi ní sə rə súlí rə zə ǹmyɛ zhə̀nà, twéé twéé yilə.» Muyiisi cĩ́ Cinu ni n ká n bwérhé dwí rí gə́ lyár nɛ́ mɔ́.¹⁰Cinu kə́ n wɔ̀ Muyiisi ni: «Kwɛ̃̀ ń vò dwí rí sõ ń vò ń tɛnɛ rɛ zà ǹdə́ nəkɔla, Cinu yilə; rə súlí rə shɛ̀rh rə̀ gàndɛ́, ¹¹rə tɛnɛ rə zhì dwã nə̀tɔ̀ dɛ̃ rɛ́ yilə, bə̀ wɔ́ dwã nə̀tɔ̀ dɛ̃ rɛ́ yù w Cinu mà n só Sənəyi pyɔ̀ w yó, dwí rí púlə́púlə́ yírh wə.¹²Cĩ́ swɛ̃́ ń mə́ kə́kɛ́lɛ́ pyɔ̀ w sə́ wɔ̀ dwí rí ni: ‹Yìlì-nə á bə̀k'á jì pyɔ̀ w yó yé, sə á bə̀k'á twẽ̌ á yí ò kùr nyí ni dɛ̃́dɛ̃́ myɛ yé.› Bə̀ m'a gu lò mɔ̀bɔ́ gakó ń dwə̀rh w mó! ¹³Jɛ̃̀ t'â la mɔ dwə̌rh yé, sə wɔ́ dúl bə̀ m'a dul mo ǹdə́ nə́kulə ráá bə tə mɔ ǹdə́ cama bə gu. Dóó-cí mú, è wɔ́ vwǎm ráá numbyíní, tá ń la lú yé. Bə̀ gə nyɛ̀ɛ̀ pyì-bya nyu pɔ́lá y cəl ré rə̀ dom, lyì màngɛlɛ́ m'a jì pyɔ̀ w yó.»¹⁴Muyiisi kə́ n shí pyɔ̀ w yó n só tɛ̃́ n kwɛ̃̀ n bə̀ dwí rí sono. N ce rə tɛnɛ rə̀ cìn Cinu yilə, rə súlí rə shɛ̀rh rə̀ gàndɛ́, ¹⁵n zɛ̃̀ n wɔ̀ rɛ: «Tɛnɛ-na á dɛ̃̀, dwã nə̀tɔ̀ zà. Á bə̀k'á zù ǹd'á kana bɛ́ yé.»¹⁶Sə dwã nə̀tɔ̀ dɛ̃ rɛ́ nəkɔkɔ́lɛ́ yá, dwà y y'à zɛ̃̀ è n'ê bya, è n'ê lyə́lyɔ̌, ébɔ̃ námbyṹ b'ò zhǐ pyɔ̀ w yə́-pɛ̀lɛ́ wa, pyì-bya nyu pɔ́lá dom cəl nánfɔ̀lɔ̀; dwí rí púlə́púlə́ j'a zɛ̃̀ rə̀ n'ê kəkə zulə́ jàà y wa. ¹⁷Rə̀myɛ́ yi ní, Muyiisi ce dwí rí shə́r zulə́ jàà y wa, mùnì ga rə vò rə jəl Yi. Rə bə̀ rə̀ zhǐ pyɔ̀ w kùr wə. ¹⁸Sənəyi pyɔ̀ w y'à sú ǹdə́ nyɛ̀rh dúdú, bə̀ Cinu yà ń só ò yó, myǐn mú wə. Ò nyɛ̀sɛ́ y'à la dɛ̃̌-yi w ǹdə myìn-cɔ̀lɔ̀ nyɛ̀rh ta. Pyɔ̀ w gakó j'a búl o zhízhǐ.¹⁹Pɔ́lá y cəl ré y'à j'â n'ê súlí: Muyiisi yà ń nə́ ń zɔ̀mà, sə Yi y'à n'ê tó dwà y byɛɛ́sɛ́ dɛnnɛ rə̀ lyár mɔ. ²⁰Cinu só n bə̀ Sənəyi pyɔ̀ w yə́-pɛ̀lɛ́ y wa, n zɛ̃̀ n zhì gàà mɔ́ n byẽ̀ Muyiisi, sə Muyiisi jìl n vò gàà. ²¹Cinu wɔ̀ Muyiisi ni: «Só tɛ̃́ ń cící dwí rí bə̀ rə̀ bə̀k'a dùr rə̀ la vò rə nyǐ Cinu yé, è gə də̀ rə̀myɛ́, rə̀ lyì nánzhəzhɔ̌ m'a cì. ²²Vwĩ̀-zwə́lnə bé bə̀ n'ê bwəlse Cinu yala nɛ mɔ́ cìcì mú mə̌ dwã sə bə ce jàn nɛ́ bə tɛnɛ bə̀ cìn Cinu yilə, mùnì ń bə̀ká n gu bi yé.»²³Muyiisi wɔ̀ Cinu ni: «Dwí rí wàr rə̀ m'a jì Sənəyi pyɔ̀ w yó yé, bə̀ ǹ dámǎ ń cící nə́ba, ǹ gə́ wə̀l nə́ba: Cĩ́ swɛ̃́ ń mə́ kə́kɛ́lɛ́ pyɔ̀ w s'o yə̀ Cinu nyɔ̃̌.» ²⁴Cinu wɔ̀ mɔ: «Kwɛ̃̀ ń só tɛ̃́, sə́ zə Aarɔ̃ ń kwɛ̃̀ ń jì ń bà. È gə wɔ́ vwĩ̀-zwə́lnə bé ǹdə́ dwí rí yilə, bə̀ bə̀k'a dùr bə̀ la jíl bə vò Cinu sõ yé, è gə də̀ rə̀myɛ́ ń mà n gu bi!» ²⁵Rə̀myɛ́ yó, Muyiisi ká n só tɛ̃́ n vò dwí rí sõ, n vò n zɔ̀m ǹdə́ rɛ.

¹Rə̀myɛ́ yó, Yi zɛ̃̀ rə wɔ̀ tɛ̀bɛ́ gakó Esərayɛl lyì byǎ bɛ́ nɛ: ²«Wɔ́ àmyɛ́ Cinu, ǹ Yi rí, à ce ń shə́r Ezhibti tənà y wa, yómə́-jè né mó: ³Ǹ tá ǹ la yə dwã zal àmyɛ́ yé né yé.⁴Ǹ tá ǹ la yi rə̀dù ga èsã̌yùlú ráá kɔn rɛ́ tɛ̀bɛ́ rə̀ wɔ dɛ̃̌-yi rí w ráá cɛ y yó ráá cɛ y kùr w nàná bɛ́ wẽ́ nyɔrhɔ wɔ̀rhɔ́ yé. ⁵Ǹ tá ǹ la tɛ̃́ wùlù yə né nə̀myɛ́ mɔ́ yé né yé, e súlí myɛ ǹ tá ǹ la nɛ còrhó yé, bə̀ wɔ́ àmyɛ́ Cinu à wɔ́ ǹ Yi rí, Yi rí tɛ̀bɛ́ rə̀ zhe bwɛ̃̌ dǔr mú; rə̀ n'ê pɛ dabá byɛ̀bɛ́ bə̀ súl re mó dóó w còrhò-tum bə̀ byǎ bɛ́ nɛ, kɔn b'e yí nɛ̀mɛ́ kùrə̀ nə̀tɔ̀ ǹdə́ kùrə̀ nə̀na. ⁶Sə rə̀ n'ê byili rə̀ wu-bɔ̀nɔ̀ w lyì bí byɛ̀bɛ́ bə̀ só ré bə súlí bə̀ n'ê zwẽ rə̀ nyə́ né mó nɛ̀mɛ́ kùrə̀ mɔ̀ɔ̀rhɛ̀ nánzhəzhɔ̌ nɛ.⁷Ǹ tá ǹ la Cinu ǹ Yi rí yil ré byõ̌ nánfò yé, bə̀ Cinu tá ń la lò mó mɔ̀bɔ́ ń byẽ̀ ń yil ré nánfò mó ne yõ̌ ǹdə rə̀-ná-cí bə dóó zhe ta yé.⁸Bə̀ lyǐrh shìrhə́ dɛ̃ rɛ́ yò, bə ce rə yə̀ Cinu dɛ̃. ⁹Ǹ m'ǎ twĩ̀ ǹ tumə né gakó dwã nyə̀ldù wẽ́, ¹⁰sə dwã nyàlpyɛ̀ dɛ̃ rɛ́ wɔ́ shìrhə́ dɛ̃ rɛ́ tɛ̀bɛ́ Cinu, ǹ Yi rí cǐ mú. Dɛ̃ rɛ́ rə̀myɛ́ yù wə, ǹmyɛ́ ráá ǹ byǐ ráá ǹ bə̀kɔ́ ráá ǹ tùntùnnə, bal ráá kɛ̃, ráá ǹ vwàmá nɛ́ ráá zhə-bal mɔ̀bɔ́ ń wɔ ǹ cɛmɛ nɛ́ wẽ́ mó, tá ń la tum rə̀dù ga tũ̌ yé. ¹¹Bə̀ Cinu wɛ̀rhɛ́ dɛ̃̌-yi rí ǹdə́ cɛ y e súlí nə̀-fɔ̀lɔ̀ w ǹdə́ kɔn rɛ́ tɛ̀bɛ́ gakó rə̀ wɔ rə̀ wẽ́ mó dwã nyə̀ldù, sə ń shǐrh dwã nyàlpyɛ̀ dɛ̃ rɛ́ yù wə. Wɔ́ rə̀myɛ́ è ce, Cinu cĩ́ bwəl shìrhə́ dɛ̃ rɛ́ yó, n zɛ̃̀ n vùr re rə̀ j'â wɔ́ ńmyɛ̌ nyǎn.¹²Nyám ǹ da ǹdə́ ǹ ná, mùnì ga ǹ myə̌l zə dwɛ̀lɛ̀ cɛ y kɛ̀bɛ́ Cinu, ǹ Yi rí pɔ mɔ́ mɔ́ wẽ́. ¹³Ǹ tá ǹ la numbyíní gu yé. ¹⁴Ǹ tá ǹ la fwə̌l yé.¹⁵Ǹ tá ǹ la ŋwɔ́l yé. ¹⁶Ǹ tá ǹ la kɔn rɛ́ tɛ̀bɛ́ rə̀ də̀ zhə̀n cṹ ǹ jè-dõ shò kwã yé. ¹⁷Ǹ tá ǹ la ǹ jè-dõ kɛ̀lɛ́ y bwɛ̃̌ dǔr yé. Ǹ tá ǹ la ń kɛ̃ mɔ́ ráá ń tùntùnnə mɔ̀bɔ́ ń wɔ́ bal ráá kɛ̃, ráá ń nɔ̃ w ráá ń bə̀na y ráá ń kɔn dɛ̌ dɛ̌ bwɛ̃̌ dǔr yé.»Yi gwẽ̌ n'ê byili rə̀ cìnə̀¹⁸Dwí rí gakó y'à nyɛ̌ dwà y byɛɛ́sɛ́ rə̀ súlí rə̀ y'à nə è lyə́lyɔ̌ mɔ́; rə̀ y'à nyɛ̌ pyì-bya nyu w cəl ré rə súlí rə̀ nə pyɔ̀ w ò y'à sú ǹdə́ nyɛ̀sɛ́ mɔ́. Rə̀ y'à zɛ̃̀ rə̀ n'ê kəkə, rə j'a mɛ̃ pyépyé rə̀ zhǐ. ¹⁹Esərayɛl lyì byǎ bɛ́ wɔ̀ Muyiisi ni: «Ǹmyɛ́ cìcì mú zɔ̌m ǹdə́ nə́ba, nə́ m'ǎ cili; sə Yi bə̀k'a zɔ̀m ǹdə́ nə́ba yé, è gə də̀ rə̀myɛ́ nə́ m'ǎ cì!» ²⁰Muyiisi wɔ̀ dwí rí ni: «È wɔ́ á zhõ̀ yil Yi túwə́, mùnì ga rə ce á nyàm rɛ sə á bə̀k'á wɛ̀rhɛ́ yə̀-bəlwàálɛ yé.» ²¹Dwí rí j'a mɛ̃ pyépyé rə̀ zhǐ, sə Muyiisi twẽ̌ n bwəlse ébɔ̃ námbyṹ w Yi y'à ŋwɛ́nɛ́ ò wẽ́ mó ne.²²Cinu wɔ̀ Muyiisi ni: «Nyǐ kɔn rɛ́ tɛ̀bɛ́ ǹ m'ǎ wɔ̀ Esərayɛl lyì byǎ bɛ́ nɛ mɔ́: Á cìcì mú yírhə́ nə bə̀ wɔ́ dɛ̃̌-yi rí w à zhì ní a m'a zɔ̀m ǹd'ába. ²³Á t'á la yə wɔ̀rhɔ́ á m'á súlí àmyɛ́ nɛ yé. Á t'á la sə̀byì-kùlì ráá sánə́má yə zùrhù á cìn yil yé.²⁴Ǹ m'ǎ lù bo vwĩ̀-jùlú ń mə́ zwə́l ǹ və̌-ywàálɛ́ ǹdə́ ǹ vwàmá nánfwààlɛ́ vwə̃̀ námpúmə́ cɛ̃́ɛ̃́ nɛ́ ǹdə́ ǹ yə̀-zùlə́ vwə̃̀ né ò yó, ń pɛ̃. Jàà kɛ̀bɛ́ gakó à m'a ce bə lyǐrh à yil ré yò è wẽ́, à m'a bə̀ gàà mɔ́ a cĩ́ bwəl ǹ yó. ²⁵Sə è gə wɔ́ nə́kulə vwĩ̀-jùlú ǹ la lú ń pɛ̃, sə ǹ bə̀k'á lù w ǹdə́ nə́kulə nyɛ̀bɛ́ nə̀ sə̀l yé, bə̀ lù ku w m'a ce nə́kulə né jǐrh wẽ̀ nánfwə̀r. ²⁶Ǹ tá ǹ la nə̀rh-cṹ byílsí yó tó ń mə́ jì ń vò à vwĩ̀-jùlú w yó yé, mùnì ga lò bə̀ká n nə ǹ cə̀-lwè y yéa.»

¹Cinu súlí n wɔ̀: Nyǐ nyə́ dwã ǹ la ń zɔ̀m nə̀ yò ń byili Esərayɛl lyì byǎ bɛ́ nɛ:²Ǹ gə yè yə-bal ń wɔ́ Ebərəbá dwí rí lò, ń mà n twĩ̀ byinə nyə̀ldù, sə byinə nyàlpyɛ̀ byin rí, ń mà n nə ń cìnə̀, n shə́r ǹ sõ, ń tá ń la kwǎndɛ kwã̀ɔ̃́ yé. ³Ń gə yà ń tú ǹ sõ ǹdə́ ń wɔ́ bəjə̀m-bal, ń mà n ká n kwɛ̃̀ bəjə̀m-bal. Ń gə yà ń zhe kɛ̃, ń kɛ̃ mɔ́ mà n tó mo n kwɛ̃̀. ⁴Ń yó-cə́bal mɔ́ gə yà ń pɔ mɔ kɛ̃, kɛ̃ mɔ́ zɛ̃̀ n lù bala-byǎ ráá kana-byǎ n pɔ̃, ń yó-cə́bal mɔ́ mà n cìní kɛ̃ mɔ́ ǹdə́ ń bə̀sɔ́ná bɛ́ ga, sə ńmyɛ̌ mà n nə ń cìnə̀, n kwɛ̃̀ ń dúdú.⁵Sə yə-bal mɔ́ gə wə̀lə̀: «À só à yó-cə́bal mɔ́ ǹd'â kɛ̃ mɔ́ e súlí à bə̀sɔ́ná bɛ́, à t'â yǎl a nə à cìn s'a kwɛ̃̀ a yẽ̌ be yé», ⁶ń yó-cə́bal mɔ́ mà n zə mɔ n mə n bwəlse Yi yala nɛ, n zə mɔ n mə n yí ń jì y étwí-ènyí rí ni ráá étwí-ènyí rí bòlò w sarh nɛ, n zə məshǐm n mə n pwə́r ń zhɛ̃̌ rɛ́. Kɔn zhì dɛ̃ rɛ́ rə̀myɛ́ mɔ́, ń mà n já ń nə́ ń twĩ̀ ń pɛ mɔ twéé twéé.⁷Bal gə kwè ń bə̀kɔ́ n yè, yə-kɛ̃ ńmyɛ̌ mɔ́ tá ń la ń cìn nɔ ǹdə bala byɛ̀bɛ́ bə̀ wɔ́ yómə́ gə́ n'ê nɛ bə̀ cìn ní ta yé. ⁸Yə-kɛ̃ mɔ́ gə yə̀ ń yó-cə́bal mɔ́ bùlə̀ yí, yó-cə́bal mɔ́ zɛ̃̀ ń tá ń yǎl mɔ́ ń la jú n yə̀ ń kɛ̃, ń mà n ce bə̀ kwɛ̃̌ mùnì ga n nə ń cìnə̀. Ń yó-cə́bal mɔ́ bə sɔ́má zhe ń yè mó ǹdə́ dwí dõ lyì yé, b'è m'a yə̀ wɔ́ myíní ń myìnì mu.⁹Sə è gə wɔ́ yé ń yè mo ń la ń byǐ ni pɔ, ń mà n wɛ̀rhɛ́ mɔ ǹdə lùl-e-púrí y nyə́ né gə́ byili ní, kana-byǎ bɛ́ shò kwã nɛ́ mɔ́. ¹⁰Yə-kɛ̃ mɔ́ yó-cə́bal mɔ́ gə jú kɛ̃ dõ n mə n súlí mu, ń tá ń la kùjú w ǹdə́ gàndɛ́ e súlí kɛ̃-jú nyə́ né kaka bɔ̌ ń kɛ̃ nã́yə́ə́ mó yil yé. ¹¹Ń gə tá ń pɛ mɔ wẽ̀ kùrə̀ nə̀tɔ̀ y rə̀myɛ́ mɔ́, yə-kɛ̃ mɔ́ mà n nə ń cìn n shə́r sə ń tá ń la sə̀byǐ kwã̀ɔ̃́ yé.¹²Lò mɔ̀bɔ́ ń mà numbyíní n gu, sə bə gu ńmyɛ. ¹³Sə ń gə yə̀ jɛ̀nɛ̀ n pyà ń gu mú, bə̀ wɔ́ Yi rə̀ shɛ̀nɛ́ n tó ń jɛ̃̀ nɛ, à m'a byili mú jàà, gurnə mó dùr n vò n shèè è wẽ́. ¹⁴Sə è gə wɔ́ lò mó mɔ̀bɔ́ ń lyim zɛ̃̀ rə̀ n'ê yì ń dõ dɛ̃́dɛ̃́, n zɛ̃̀ n zə surhə n yíní mu n gu, má rə̀-ná-cí zhə̀l n vò n pyɛ́l à vwĩ̀-jùlúa w ni n mə n ce cã̌ myɛ, ǹ m'ǎ kɔl mɔ gàà mùnì ga bə gu mu.¹⁵Lò mɔ̀bɔ́ ń mà ń da ráá ń ná, sə bə gu mu. ¹⁶Lò mɔ̀bɔ́ ń ŋwɔ̀l numbyíní, ń gə yè y ráá bə̀ nɔ y ń sõ, sə bə gu mu. ¹⁷Lò mɔ̀bɔ́ ń bwəl lwɛlɛ n pə ń da ráá ń ná nɛ, sə bə gu mu.¹⁸Lyì gə n'ê bwí dwã, mə̀dù zɛ̃̀ n mà ń dõ mó ǹdə́ jɛ̃̀ ráá n zə nə́kulu n dul mu n cɛ̀mɛ̀ kɔn b'e yí n pyẽ̀ tɛ̃́, sə ń yə̀ cì, ¹⁹lò mó mɔ̀bɔ́ ń cɛ̀mɛ̀ mɔ́ gə wɔ̌ ń nə́ ń zɛ̃̀ ń zhí ń də̀-dɔ̀lɔ̀ w ń dwi pwẽ̀ ne, bə̀ t'â la còrhò-tum lò mó mɔ̀bɔ́ ń cɛ̀mɛ̀ mɔ mɔ́ nɛ pɔ yé. È wɔ́ ń gə́ mɛ̃ ń yə̀ tum twĩ̀ mú dúdú kwǎndɛ ń mà n kwɛ̃̌ sə n súlí n ce bə shili mu kɔn m'e yí n wárh.²⁰Lò mɔ̀bɔ́ ń mà ń yə-bal ráá ń yə-kɛ̃ ǹdə́ gwə̌ n gu, sə bə cĩ́ bə̀ jim ń yó. ²¹Sə yə-bal mɔ́ ráá yə-kɛ̃ mɔ́ bə̀ mà mɔ́ gə bwəl bə gwẽ̌ wɛ̀rhɛ́ dɛ̃ rə̀dù ráá dwã nə̀lyè rə̀myɛ́ kwã nɛ́, bə̀ t'â la bə̀ jim cṹ, bə̀ bə̀ y'à wɔ́ bə̀ yó-cə́bal wɛ́rɛ́ kɔna.²²Bala gə n'ê bwí dwã bə zɛ̃̀ bə zhə̀r epùwə̀, e j'a lù ǹd'ê pwǐ y gwẽ̌ yə̀ yí yé, yò dõ gə yə̀ ò twə́r né ce, bə̀ m'a kwɛ̃̌ kɔn rɛ́ tɛ̀bɛ́ kɛ̃ mɔ́ byal mɔ́ la bɛ byilu mú. Bə̀ m'a jɛ̀nɛ̀ bə zhərh ǹdə́ dwã yò w shò kwã nɛ́ bə ce dwã yó, bə zɛ̃̀ bə kwɛ̃̌. ²³Sə yò gə yàl nɛ́, wɔ́ myə̌l bə̀ m'a m'e cĩ́ myə̌l jim, ²⁴yírh bə̀ m'a m'e cĩ́ yírh jim, yélé bə̀ m'a m'e cĩ́ yélé jim, jɛ̃̀ bə̀ m'a m'e cĩ́ jɛ̃̀ jim, nà bə̀ m'a m'e cĩ́ nà jim, ²⁵myǐn zə e m'e mɔ̌r bə̀ m'a m'e cĩ́ myǐn zə e m'e mɔ̌r jim, lò cɔ̀mɔ̀ bə̀ m'a m'e cĩ́ lò cɔ̀mɔ̀ jim, mààrɛ̀ bə̀ m'a m'e cĩ́ mààrɛ̀ jim.²⁶Lò gə mà ń yə-bal ráá ń yə-kɛ̃ yírh n lá, ń mà n dwĩ̀ mu, ń yírh ré rə̀ lɔ́ mɔ́ jàà wa. ²⁷È gə wɔ́ ń yə-bal ráá ń yə-kɛ̃ yélé ń mà n ká, ń mà n dwĩ̀ mu, yélé ré rə̀ kɔ́ mɔ́ jàà wa.²⁸Nɔ̃ gə zò bal ráá kɛ̃ ǹd'ô nyimi ní o gu, bə̀ m'a dul w bə gu, sə bə̀ t'â la ò nàmá bɛ́ dɔ́m yé. Bə̀ t'â la yò cṹ ò cə́bal mɔ́ yó w yé. ²⁹Sə nɔ̃ w gə y'à jɛ̀nɛ̀ o myɛ̀rhɛ̀ lyì bí pwǎ shãã ga, bə jà cĩ́ ò cə́bal mɔ́ nɛ n zɛ̃̀ ń yə̀ w yìlì, rə̀myɛ́ yi ní, ò gə zɛ̃̀ ò gu bal ráá kɛ̃, sə bə dul w bə gu. Bə̀ m'a súlí bə gu ò cə́bal mɔ́ myɛ. ³⁰Bə̀ gə ju mu bwã̌, ń mà n pə kɔn rɛ́ tɛ̀bɛ́ gakó bə̀ m'a pɔ̃ rə̀ nyí mú, n mə n zwẽ ń myə̌l ré.³¹Nɔ̃ w gə gu bal-byǐ ráá kɛ̃-byǐ, sə bə wɛ̀rhɛ́ w ǹdə nyí rí rə̀myɛ́ mɔ́ gə́ n'ê byili ní. ³²Nɔ̃ w gə zò yə-bal ráá yə-kɛ̃ o gu, ò cə́bal mɔ́ mà n kwɛ̃̌ wár-kùlsi shə́-ètɔ̀ yə-bal mɔ́ ráá yə-kɛ̃ mɔ́ yó-cə́bal mɔ́ nɛ; sə bə dul nɔ̃ w bə gu.³³Lò gə yẽ̌ nɛ̃̌-gɔ́rɔ́ nyí rí ni nánfò ráá n kù nɛ̃̌-gɔ́rɔ́ n zɛ̃̀ ń yə̀ ò nyí rí ni pyi nɔ̃ ráá bə̀na zɛ̃̀ e tu ò wẽ́, ³⁴nɛ̃̌-gɔ́rɔ́ w cə́bal mɔ́ mà n cə̀rh. Ń mà n pə sə̀byǐ vwǎm mɔ́ mə̀ cù mú cə́bal mɔ nɛ. Ń mà n zɛ̃̀ n cìní vwǎm mɔ́ mə̀ cù mú.³⁵Lò nɔ̃ gə zò lò dõ nɔ̃ o gu, bə̀ m'a yè nɔ̃ w ò yírhə́ ŋwɛ́nɛ́ mɔ́, bə tə̀ ò wársɛ́ ǹdə́ dwã; bə̀ m'a súlí bə tə̀ kɔ̀bɔ́ ò cù mú myɛ. ³⁶Sə bə̀ gə y'à yě bə̀ nɔ̃ w òmyɛ́ mɔ́ y'à jɛ̀nɛ̀ o myɛ̀rhɛ̀ ò n'ô zwè shãã ga, ò cə́bal mɔ́ jà n zɛ̃̀ ń yə̀ w yìlì, ń mà n cə̀rh nɔ̃ kɔ̀bɔ́ ò cù mú jàà wa, sə ńmyɛ̌ mà n cìní kɔ̀bɔ́ ò cù mú.

¹Bə̀ gə zɔ ŋwɔ̀l-bal cəcɛ̃ nɛ ǹdə́ ń nə́ ń pwə́r byílí, bə zɛ̃̀ bə gu mu, bə̀ t'â la ń jal mɔ́ jim cṹ yé. ²Sə bə̀ gə gu mu ǹdə́ yi rí y'à púrh rə yí dɛ̃̌, bə̀ m'a cĩ́ ń jal mɔ́ jim. Ŋwɔ̀l-bal gakó mə̌ dwã sə n cə̀rh kɔna, kɔn rɛ́ tɛ̀bɛ́ ń ŋwɔ̀l mɔ́ jàà wa: ń gə bə kaka zhe, sə bə yè mo bə cĩ́ kɔn rɛ́ tɛ̀bɛ́ ń ŋwɔ̀l mɔ́ jàà wa. ³Bə̀ gə nɔ vwǎm mɔ́ ń ŋwɔ̀l mɔ́ nã́nyì ń jɔ̃̀ wa, è wɔ́ nɔ̃ ráá bə̀na ráá pyìrhə̀, ń mà n cə̀rh vwàmá nə̀lyè vwǎm mə̀dù gakó jàà wa. ⁴Lò gə yẽ̌ ń vwàmá nɛ nə zù ń dõ cɛ ráá ń də̀vɛ̃́-cèmé cɛ wẽ́ nə dɔ̃̀, wɔ́ ń cɛ y kɛ̀bɛ́ è j'â càn dɛ̃́dɛ̃́ mɔ́ jíjí rí ráá ń də̀vɛ̃́-cèmé né cɛ y kɛ̀bɛ́ è j'â càn dɛ̃́dɛ̃́ mɔ́ də̀vɛ̃́-cèmé byǎ bɛ́ ń mà n mə n cə̀rh.⁵Lò gə ju sɔ̀lɔ̀ myǐn, myǐn mú zɛ̃̀ mə lyɛ̃ mə jí bə̀lɛ́ bə̀ kwar bə cĩ́ púl púl mú ráá kɛ̀bɛ́ è gwẽ̌ zhǐ dɛ̃̌ mɔ́ ráá cɛsɛ́, ń mà n cə̀rh kɔn rɛ́ tɛ̀bɛ́ myǐn mú jú mú.⁶Lò gə pɔ sə̀byǐ ráá wẽ̀ dwã ń dõ ne n cĩ́, ŋwɔ̀l-bal zɛ̃̀ n bə̀ n ŋwɔ̀ rɛ ń sõ jù wə, bə̀ gə zɔ ŋwɔ̀l-bal mɔ́, ń mà n cə̀rh kɔn rɛ́ tɛ̀bɛ́ ń ŋwɔ̀l mɔ́ rə yí rə̀ twər kùrə̀ nə̀lyè.⁷Sə bə̀ gə yə̀ ŋwɔ̀l-bal mɔ́ zal, lò mó mɔ̀bɔ́ kɔn rɛ́ jé ń sõ jù w mú mà n bə̀ n zhì Yi yé né n bwəl nyí mùnì ga bə lwar b'è də̀ ńmyɛ̌ ń kwè ń dõ mó kɔn rɛ́ yé. ⁸Dwã vɔ̃ gə ŋwɛ́nɛ́ lyì cəcəl wə, nɔ̃ ráá bə̀na ráá pyìrhə̀ ráá kàmə̀zù-fwɛ̀lɛ̀ ráá kɔn dɛ̌ dɛ̌ rə̀ jé shò kwã nɛ́, mɔ̀ zhe bə̀ «Wɔ́ mə̀myɛ́ cìcì», mɔ̀ myɛ zhe bə̀ «Wɔ́ mə̀myɛ́ cìcì», sə bə zə yò w bə m'e yí Yi yé né. Lò mó mɔ̀bɔ́ Yi la dóó ń yó w cṹ mú mà n cə̀rh kɔn yí vwàmá nə̀lyè, ń dõ mó né. ⁹Lò gə pyi bə̀na ráá nɔ̃ ráá pyìrhə̀ ráá vwǎm mɔ̌ mɔ̌ ń dõ ne, vwǎm mɔ́ gə zɛ̃̀ mə̀ cùwə̀ ráá mə cɛ̀mɛ̀ ráá vwǎrhna zə mɔ bə m'e lyɛ̃ e jà lò yə̀ lwar,¹⁰mɔ̀bɔ́ bə̀ y'à pyi mu vwǎm mɔ́ mà n zə Cinu yil ré n bwəl nyí bə̀ ń yə̀ ń dõ mó kɔn rɛ́ ŋwɔ̀l yé. Vwǎm mɔ́ cə́bal mɔ́ mà n zwẽ nyí. Sə mɔ̀bɔ́ bə̀ y'à pyi mu vwǎm mɔ́ tá ń la kaka cə̌rh yé. ¹¹Sə bə̀ gə ŋwɔ̀l mɔ ń nyí ni, ń mà n cə̀rh mə̀ cə́bal nɛ. ¹²È gə wɔ́ gɔ ku ò zɔ vwǎm mɔ́ o dɔ̃̀ o zhəzhɛrɛ, ń mà n pwà vwǎm mɔ́ nàmá bɛ́ bə̀ dàl mɔ́ n mə n bà, rə̀ yə̀ zhə̀n pɔ kɔna. Ń tá ń la cə̌rh vwǎm mɔ́ gɔ ku w zɔ o dɔ̃̀ yil yé. ¹³Lò gə zwẽ vwǎm ń dõ sõ, vwǎm mɔ́ zɛ̃̀ mə cɛ̀mɛ̀ ráá mə cì ǹdə́ mə̀ cə́bal mɔ́ tɛ̀nɛ́, ń mà n cə̀rh.¹⁴Sə è gə yàl mə̀ cə́bal mɔ́ yírh wə, ń tá ń la cə̌rh yé. Sə è gə y'à wɔ́ zwẽ́ ń zwẽ mo ń la mə n twĩ̀ sə n kwɛ̃̌ mɔ, ń mà n pə mə̀ ye yə́. ¹⁵Bal gə swèlè kɛ̃-byǐ è gwẽ̌ yə̀l bal párá, n zù ǹdə́ yá, ń mà n pə è zhùùrí, n zɛ̃̀ n jí y e yə̀ ń kɛ̃.¹⁶Kɛ̃-byǐ y da mɔ́ gə cẽ ń bə̀kɔ́ mɔ́ pɔ, bal mɔ́ mà n pə sə̀byǐ mə mɛrhɛ kana-byǎ bɛ́ byɛ̀bɛ́ bə̀ gwẽ̌ yə̀l bal pár mɔ́ zhùùrí ye yə́. ¹⁷Ǹ tá ǹ la kɛ̃ mɔ̀bɔ́ ń nə́ ń twĩ̀ jə̀jǐrh-ywẽ̀ tumə né ne yõ̌ nã́nyì yé.¹⁸Bə̀ gu lò mɔ̀bɔ́ ń zù ǹdə́ vwǎm mɔ́. ¹⁹Bə̀ gu lò mɔ̀bɔ́ ń nə́ ń zwə́l vwə̃̀ ń pɛ yə dwã nɛ, n yẽ̌ Cinu dúdú ni pɔ mɔ́ nɛ, Cinu yilə.²⁰Ǹ tá ǹ la pyà ń tó zhə-bal mɔ̀bɔ́ ń jě ǹ sõ mó dɛnnɛ ń zɛ̃̀ yé ráá ǹ ta ǹ la mɔ nɔ̀nɔ̀ yé, bə̀ ámyɛ yàl zhələ Ezhibti tənà y wa. ²¹Á t'á la ejə̃̀-kɛ̃ mə̀dù ga ráá bə̀tɛ̀lɛ́ èdù ga nɔ̀nɔ̀ yé.²²Ǹ gə nwɛ̀nɛ̀ bə̀myɛ́ mə̀dù, n zɛ̃̀ n búbwéé n ce ne, à m'a cili ń búbwéé yə́, ²³à lyim rí m'a j'a zɛ̃̀ dɛ̃́dɛ̃́, sə à m'a gu ába ǹdə́ búlə́ shù. Á kana bɛ́ m'a jǐrh ejə̃̀-kana, á byǎ bɛ́ myɛ m'a jǐrh bə̀tǎlsɛ. ²⁴Ǹ gə jìmì sə̀byǐ à dwí rí lò ne, mɔ̀bɔ́ ń wɔ́ nə̀mɔ̀ ń ŋwɛ́nɛ́ ǹdə́ mɔ́ nɛ, ǹ tá ǹ la mɔ wɔ̀rhɔ́ ǹdə jìmnə̀ bé dwã bɛ ta yé. Á t'á la mɔ nyɔ́ɔ́ n pyà twirí n pə ába yé.²⁵Ǹ gə zwẽ ǹ dõ kàmə̀zù-fwɛ̀lɛ̀ kɔn rɛ́ tɛ̀bɛ́ ǹ pɔ mɔ mɔ́ jàà wa, sə́ vò ń pə y ǹdə́ yi rí gwẽ̌ yə̀ zwì yé, ²⁶bə̀ wɔ́ èmyɛ́ dúdú è wɔ́ ń gàmə̀lyɔ̀nɔ̀, ń mə́ ń círhí ń yala nɛ́. Bə̀kɔ́n ń la pyìlù n mə n pyẽ̀ tɛ̃́? Ń gə búbwéé ń co ne, à m'a cili mu, b'àmyɛ́ wɔ́ nɔ̀nɔ̀-dǔr cə́bal. ²⁷Ǹ tá ǹ la Yi tǔrh yé; ǹ tá ǹ la lwɛlɛ bwəl ń pə lò mɔ̀bɔ́ ń wɔ́ yó-cə́bal nɛ ǹ dwí rí wẽ́ yé.²⁸Ǹ tá ǹ la ǹ jíjə́ né byǎ bɛ́ byɛ̀bɛ́ bə̀ byìl mú ǹdə́ ǹ də̀vɛ̃́ y yə dwã nɛ pɔ yé. Ǹ m'ǎ súlí ń pɛ̃ ǹ byì-cɛsɛ́.²⁹Ǹ m'ǎ wɛ̀rhɛ́ èta myɛ ǹdə́ ǹ nɛ̃ nɛ́ e súlí ǹ pyììsí byì-yéésé: vwǎm mɔ́ byì-yə́ə́ y m'a mɛ̃ è ná y kwã nɛ́ dwã nyàlpyɛ̀; ³⁰sə è dwã lyɛlɛ dɛ̃ rɛ́, ǹ m'ǎ zə y ń zwə́l vwĩ̀ ń pɛ̃. ³¹Á m'ǎ yə̀ à dwí námpúm cɛ̃́ɛ̃́. Á t'á la vwǎm mɔ̀bɔ́ gɔ ku zɔ o dɔ̃̀ o zhəzhɛrɛ mɔ́ dɔ́m yé. Á m'ǎ pə mɔ kǔlse ne.

¹Ǹ tá ǹ la kɔma zɔ̀mà zə ń mə́ tó dɛ̃̌ yé. Ǹ tá ǹ la kɔma góm ń mə́ ce nyí dóó cə́bal kwã nɛ́ yé. ²Ǹ tá ǹ la nyí co lyì-zhǎ bɛ́ byɛ̀bɛ́ bə̀ n'ê pyà lwɛlɛ wɔ̀rhɔ́ mɔ́ kwã yé. Bùrsì jàà wa, ǹ tá ǹ la zɔ̌m ń ce lyì-zhǎ byɛ̀bɛ́ bə̀ t'â yǎl sə bùrsí kwè sə̀ sɔ́má y mɔ́ kwã yé. ³Bùrsì jàà wa, ǹ tá ǹ la nyí nə̀mɔ̀ kwã co, e jà ń bə bùrì zhe yé.⁴Ǹ gə tu ǹ zù-bal nɔ̃ ráá ń bə̀na rə̀ jé yó, sə́ zə rɛ ń bə̀ ń pɔ̃. ⁵Ǹ gə nɔ ǹ zù-bal bə̀na è tu è zhĩĩ rí kùr wə, ǹ tá ǹ la lyɔ̃ ń yẽ̌ mo yé, ǹ m'ǎ sɛ̃ mɔ ń kwɛrhɛ è zhĩĩ rí.⁶Ǹ tá ǹ la ǹ dwí rí lò mɔ̀bɔ́ ń wɔ́ nə̀mɔ̀ mɔ́ bùrsí bǔr námməjóló, ń bùrsí yi ní yé. ⁷Ǹ tá ǹ la ǹ cìn co yò w kɔ̀bɔ́ ò wɔ́ kɔma wẽ́ yé. Ǹ tá ǹ la lò mɔ̀bɔ́ ń bə dóó zhe ráá ń wɔ́ cángá cə́bal gu yé, b'à t'â la lò mɔ̀bɔ́ ń twĩ̀ lwɛlɛ rɛ́ rə̀myɛ́ mɔ́ nyǔ ǹdə lò mɔ̀bɔ́ ń bə dóó zhe ta yé. ⁸Ǹ tá ǹ la shɔ̀nɔ́ bə yè mó ǹdə́ pɛnɛ́ yé, bə̀ pɛnɛ́ y n'ê pyi byɛ̀bɛ́ bə̀ yě rə̀ kùr mó yírhə́, è n'ê súlí è cɔ̀ cángá cìnə́ yò. ⁹Ǹ tá ǹ la zhə-bal mɔ̀bɔ́ ń jě ǹ sõ mó nɔ̀nɔ̀ yé. Á cìcì mú yě zhə-bal nyǔ mú gə́ wɔ́ kɔn ná-dwí yilə, bə̀ ámyɛ yàl zhələ Ezhibti tənà y wa.¹⁰Byinə nyə̀ldù, ǹ m'ǎ dù ǹ cɛ y ń jə̀r. ¹¹Sə byinə nyàlpyɛ̀ byin rí, ǹ m'ǎ yẽ̌ y e shǐrh, sə ǹ tá ǹ la kaka jə̌r è wẽ́ yé. Ǹ dwí rí lyì bí byɛ̀bɛ́ bə̀ wɔ́ nə̀mwà mɔ́ m'a jə̀r bə m'e kɔ̃̀ bə̀ cìnə̀. Gɔ-wẽ̀ ré myɛ m'a jí rə̀ kùr ré. Ǹ m'ǎ wɛ̀rhɛ́ ǹ də̀vɛ̃́-cèmé né ǹdə́ ǹ olyivyə́ə́ré myɛ ga èta.¹²Ǹ m'ǎ twĩ̀ tumə nyɛ̀bɛ́ ǹ mə̌ sə́ twĩ̀ mú dwã nyə̀ldù, sə dwã nyàlpyɛ̀ dɛ̃ rɛ́, ǹ tá ǹ la tum tũ̌ yé, mùnì ga ǹ nɔ̃ w ǹdə́ ǹ bə̀na y shǐrh, sə ǹ yə-kɛ̃ mɔ́ byǐ mú ǹdə́ zhə-bal mɔ́ myɛ k'a zə jàn. ¹³«Á m'ǎ ce jàn nɛ́ á tó kɔn rɛ́ tɛ̀bɛ́ gakó à byili ába mɔ́: á t'á la yə dwã còrhó yé, bə̀ t'â la nə̀ yilə né nyɔ̀ɔ̀ á nyú w yé.¹⁴Byin byin gakó, ǹ m'ǎ jí címsi kùrə̀ nə̀tɔ̀ ń mə́ cèrhé ne: ¹⁵Ǹ m'ǎ jí búrú ò yə̀ sã̀-nə̀byẽ̌ ce címsí. Dwã nyàlpyɛ̀ ǹ m'ǎ dɔ̃̀ búrú ò yə̀ sã̀-nə̀byẽ̌ ce, Abyiibi cànà y wẽ́, ǹdə à gə́ pɔ mɔ́ nyí ní. Bə̀ wɔ́ cànà y èmyɛ́ mɔ́ wẽ́ ǹ shə́r Ezhibti tənà y w nɛ́. Sə rə̀myɛ́ yi ní, bə̀ t'â bàn à yé né ǹdə́ jə̀-fwə̀r yé.¹⁶Címsí sə̀myɛ́ mɔ́ kwã nɛ́, ǹ m'ǎ jí ǹ cɛsɛ́ ǹ dù mú byǎ nã́yə́ə́ jòró w címsí; cɛ y gə tú è púl, ǹ gə tú ǹ jə̀r ǹ cɛsɛ́ wẽ̀ ré ǹ zhɛ̀, ǹ m'ǎ jí rə̀ címsí. ¹⁷Byin byin gakó, ǹ bala bɛ́ m'a bə̀ Yó-cə́bal, Cinu yé né twər rə̀tɔ̀.¹⁸Ǹ tá ǹ la jal vwĩ̀ zwə́l ń zɛ̃̀ ń súlí búrú ò co sã̀-nə̀byẽ̌ ń pɛ̃ yé. Ǹ tá ǹ la vwə̃̀ né nwǐsí bə̀ pɔ nɛ à címsí dɛ̃ rɛ́ mɔ́ dɛ̃̌ cṹ cəcɛ̃ y kɔn m'e yí cɛ y lá yé. ¹⁹Ǹ m'ǎ zə ǹ cɛsɛ́ wẽ̀ ré byǎ bɛ́ nã́yə́ə́ bé ń mə́ bə̀ Cinu, ǹ Yi rí jì y wẽ́. Ǹ tá ǹ la bɔ̀-bwɛ̀lɛ́ shɔ̃̀ è ná y yil mú w yé.²⁰À m'a twĩ̀ màlɛ́ka e bə̀ e yə̀ ǹ yé né e m'e yìlì mú sɔ́má y yó, e zə mɔ́ ń zù jàà y à tɛnɛ ǹ yil mú wə. ²¹Nyám yá, sə́ cili è cəl ré, bə̀k'á cẽ è nyí ni yé, è t'â la ǹ nyí-ni-cõ mó yò shɔ̀nɔ́ yé, bə̀ wɔ́ àmyɛ́ yil yilə è n'ê twĩ̀. ²²Ǹ gə cili è cəl ré, ń wɛ̀rhɛ́ kɔn dɛ̀bɛ́ gakó à byili mú mú, à m'a yə̀ ǹ zwə̀ bé zù-bal e súlí ǹ búl-dwã bɛ́ búl-dõ.²³À màlɛ́ka y gə tú è yàl ǹ yé né, e zə mɔ́ ń zù Amɔrətəbá ǹdə́ Yititəbá ǹdə́ Pərəzhitəbá ǹdə́ Kanaã lyì bí ǹdə́ Yivyitəbá e súlí Zhəbuusi lyì bí tənà y wa, a zɛ̃̀ a ce bə jé tɛ̃́, ²⁴ǹ tá ǹ la bə̀ yə né yé né wùlù ń cèrhé ne yé, ń súlí ǹ tá ǹ la tũ̌ ń pə nɛ myɛ yé, ǹ tá ǹ la wɔ̀rhɔ́ ǹdə bə̀ gə́ n'ê wɛ̀rhɛ́ nɛ́ bə̀ sõ mó yé. Ǹ gaga mɔ́ m'ǎ mà nɛ ń bɔbwɛlɛ, ń súlí ń mà bə̀ nə́kulə né bə̀ cìì tɛ̃́ mɔ́ ń lo. ²⁵Á gə cèrhé Cinu á Yi rí, ń mà n zɛ̃̀ n cĩ́ bwəl á kùjú w ǹd'á nàná bɛ́ yó, ń mà n súlí n pə́ címsí á nyí ni n ce kwã nɛ́.²⁶Bə̀ t'â la kɛ̃ ń pwǐ n'ê vùr ráá ń wɔ́ kə-eju nɔ ǹ tənà y w yé. À m'a yẽ̌ ǹ nyǔ mú dwɛ̀lɛ̀ rɛ́ ga pyìrh. ²⁷À m'a ce ywẽ nánfɔ̀lɔ̀ búl e zə dwə́ né nyɛ̀bɛ́ ǹ la nə̀ sõ mó gakó, a pyẽ̀ nə̀ kùr nyí ni a jì ni. À m'a ce ń nə ǹ zwə̀ bé gakó kwərh bə̀ n'ê dùrə̀. ²⁸À m'a twĩ̀ tù-bəlyẽlyẽẽ́se sə jì Yivyitəbá ǹdə́ Kanaã lyì bí e súlí Yititəbá ǹ yé né. ²⁹È də̀ byin rə̀dù wẽ́ à la bɛ nɛ́ jǔ ǹ yé né yé, bə̀ tənà y m'a b'e jǐrh cɛ nã́wǒ è pyě tɛ̃́ nánfò, gɔ-wẽ̀ ré myɛ m'a pù rə sú yə, sə rə̀myɛ́ m'a bə̀ ǹdə́ ǹ yò zhùlù.³⁰À m'à n'â jì bi ǹ yé né námpɔ́lɛ́ námpɔ́lɛ́ kɔn m'e yí ń pù ń jǐrh nánzhəzhɔ̌, ń zwẽ tənà y ń cìní. ³¹À m'a ce ǹ tənà y zhì vwal-gɔ nə̀-fɔ̀lɔ̀ w nɛ e m'e vò Shilisəti lyì bí nə̀-fɔ̀lɔ̀ w nɛ, e súlí e zhì gɔ-elũ èpòlò w ne e m'e vò Efəraatɛ bù-fwɛ̀lɛ̀ y nɛ. À gə tú à co tənà y lyì bí ǹ jɔ̃̀ wa, ń zɛ̃̀ ń jì bi ǹ yé né ń zhɛ̀, ³²ǹ tá ǹ la dɔbrɛ zal ǹdə́ bə̀myɛ́ ǹdə́ bə̀ yə né yé. ³³Ǹ tá ǹ la bɛ yõ̌ bə jòm ǹ tənà y wa, mùnì ga bə̀ bə̀k'a ce ń dó ne yé: ǹ m'ǎ zɛ̃̀ ǹ nə́ ǹ cèrhé bə̀ yə né, sə rə̀myɛ́ mɔ́ m'a jǐrh pɔ̀mɔ̀ ǹ yilə.»

¹Cinu wə̀l Muyiisi ni: «Jíl ń bə̀ Cinu sõ, ǹmyɛ́ ǹdə́ Aarɔ̃ ǹdə́ Nadaabɛ ǹdə́ Abyəwu e súlí Esərayɛl lyì byǎ bɛ́ náncɛrh shə́-shàlpyɛ̀, sə á m'ǎ zhì pyépyé á wùlì tɛ̃́ á m'á cèrhé ne. ²Sə wɔ́ Muyiisi dúdú ń mà n bwəlse Cinu nyí ni; náncɛsɛ́ myɛ t'â la à nyí ni bwəlse yé. Dwí rí myɛ t'â la mɔ tó rə jì pyɔ̀ w yó yé.»³Rə̀myɛ́ kwã nɛ́, Muyiisi kwɛ̃̀ n bə̀ n cĩ́ Cinu zɔ̀mà nɛ́ gakó ǹdə́ ń nyə́ né Esərayɛl lyì byǎ bɛ́ nɛ. Dwí rí púlə́púlə́ tó dwã rə lyár rə wɔ̀: «Nə́ m'ǎ wɛ̀rhɛ́ kɔn rɛ́ tɛ̀bɛ́ Cinu byili mú gakó.» ⁴Muyiisi já n kɛ̃ Cinu zɔ̀mà nɛ́ ń yà ń byili mu mú gakó. N dùlí n zɛ̃̀ nəkɔkɔ́lɛ́ shãã shãã, n zə nə́kulə shí ǹdə́ nə̀lyè n lù vwĩ̀-jùlú pyɔ̀ w nà nɛ, Esərayɛl kwálsɛ́ shí ǹdə́ sə̀lyè y yilə.⁵Rə̀myɛ́ kwã nɛ́, n twĩ̀ Esərayɛl ébwá-dàlá bə vò bə zwə́l vwə̃̀ námpúmə́ cɛ̃́ɛ̃́, bə súlí bə zə nə̀-byərh bə m'e zwə́l yə̀-zùlə́ vwə̃̀ bə pə Cinu ni. ⁶Muyiisi kwè vwàmá nɛ́ jal mɔ́ kə̀kàlà n ló nə̀zhẽ̌ né wẽ́; n zɛ̃̀ n kwè mə̀ kùr ré n zhɛ́rhɛ́ vwĩ̀-jùlú w yó.⁷Rə̀myɛ́ kwã nɛ́, ń kwè dɔbrɛ́ sɛ́bɛ́ rɛ́ n zhẽ̌ ń cəl n kàrmə̀ dɛ̃̌dɛ̃̌ dwí rí yilə. Dwí rí zɛ̃̀ rə wɔ̀: «Nə́ m'ǎ wɛ̀rhɛ́ kɔn rɛ́ tɛ̀bɛ́ Cinu byili mú gakó, nə́ m'ǎ cili mu.» ⁸Muyiisi kwè jal mɔ́ n zhɛ́rhɛ́ dwí rí yó n zɛ̃̀ n wɔ̀: «Nyǐ dɔbrɛ́ Cinu tó zɔ̀mà nɛ́ nyɛ̀bɛ́ gakó dɛnnɛ n zə ǹd'ába mɔ́ jal mɔ́.»⁹Rə̀myɛ́ kwã nɛ́, Muyiisi ǹdə́ Aarɔ̃ ǹdə́ Nadaabɛ ǹdə́ Abyəwu e súlí Esərayɛl lyì byǎ bɛ́ náncɛsɛ́ shə́-shàlpyɛ̀ y jìl pyɔ̀ w yó. ¹⁰Bə̀ nɔ Esərayɛl Yi rí. Rə̀ nèsé gə́ y'à cĩ́ tɛ̃́ mə̀gã̌ mɔ́ y'à nyɛ̌ ǹdə wɔ jàà kɛ̀bɛ́ bə̀ y'à zə nə́kulə náàcɛ̀nà dwí námpùúli, bə m'e pyìlì y ta; nə́kulə né y'à wɔ́ wárhgáá ǹdə dɛ̃̌-yi rí kùr ré ta. ¹¹Yi yə̀ lwɛlɛ wɛ̀rhɛ́ Esərayɛl lyì byǎ yó-nyɔ̃̀ cìnə́ bé bə̀myɛ́ mɔ́ nɛ yé; bə̀ ŋwɛ̀nɛ́ bə nyǐ Yi cɛ̀nɛ̀ cɛ̀nɛ̀, rə̀myɛ́ kwã nɛ́, bə zɛ̃̀ bə jí bə súlí bə nyɔ̀.¹²Cinu wə̀l Muyiisi ni: «Jíl ń bə̀ ń zhì à səta pyɔ̀ w yó, mùnì ga a pɔ̃́ nə́kulu bwə̀lsé à kɛ̃ nyə́ né zɔ̀mà nɛ́ sə̀ yó nə̀ còrhò yil mú.» ¹³Muyiisi zɛ̃̀ n wɔ̀ náncɛsɛ́ nɛ: «Jǒm-nə tɛ̃́ á dɛ̃̀ nə́ba nyɔ̀nɔ̀ kɔn m'e yí nə́ kwɛ̃̀ nə́ bə̀ á sono.¹⁴Aarɔ̃ ǹdə́ Uuri b'a mɛ̃ ǹd'ába; lò mɔ̀bɔ́ ń zhe yò kɔrhɔ tum sə n nə bɛ». Rə̀myɛ́ kwã nɛ́ Muyiisi shí tɛ̃́ n zɛ̃̀ ǹdə́ ń sanna Zhozwe n jì Yi pyɔ̀ w yó. ¹⁵Muyiisi gə́ jìl pyɔ̀ w yó yi ní, ébɔ̃ w j'a pyi wə.¹⁶Cinu còrhó w j'a só ò ŋwɛ́nɛ́ Sənəyi pyɔ̀ w yó, sə ébɔ̃ w pyi pyɔ̀ w dwã nyə̀ldù. Dwã nyàlpyɛ̀ dɛ̃ rɛ́, Cinu zhì ébɔ̃ w w n byẽ̀ Muyiisi. ¹⁷Cinu còrhó w y'à nyɛ̌ ǹdə myìn-zhù ta pyɔ̀ w yə́-pɛ̀lɛ́ wa, Esərayɛl lyì byǎ bɛ́ yírh wə. ¹⁸Muyiisi zù ébɔ̃ w wa, n jì n vò pyɔ̀ w yó. N mɛ̃ gàà mɔ́ dwã shə́-èna, nə̀nyɛ́nɛ́ ǹdə́ cəcɛ̃ ga.

¹Cinu wɔ̀ Muyiisi ni: ²Wál Esərayɛl lyì byǎ bɛ́ nɛ bə̀ bə̀ lə bə̀ jɛ̃̀-kɔn bə pɛ̃: Á m'ǎ ce lyì bí byɛ̀bɛ́ gakó bə̀ wɔ́ pùbùlə̀ cìnə́ mó lə jɛ̃̀-kɔn rɛ́ rə̀myɛ́ mɔ́.³Nyǐ jɛ̃̀-kɔn rɛ́ tɛ̀bɛ́ á la ce bə lə mɔ́: sánə́má ǹdə́ sə̀byì-kùlì ǹdə́ kàmmɔ ⁴4 ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ kɛ̀bɛ́ è càn ǹdə́ bɔ̃̀ kur ⁵ǹdə́ pyì-byərh tàndɛ rə̀ mɔ́rh nánshɛ̀n ǹdə́ dɔfɛ̃́ɛ̃́sɛa tàndɛ ǹdə́ ákáshá dǎr ⁶ǹdə́ nwə̃̌ pàntámsɛ́ yilə, ǹdə́ wẽ̀ rə̀ lwẽ́ nã́nyə̀nyɛ̀lɛ́, ǹdə́ nwə̃̌ y kɛ̀bɛ́ bə̀ m'ê pɛ Yi tum rí tũ̌ ŋwɔ̀nɔ́ w mɔ́ e súlí wẽ̀ ré tɛ̀bɛ́ rə̀ lwẽ́ nã́nyə̀nyɛ̀lɛ́ bə̀ n'ê ji myǐn mú, ⁷ǹdə́ nə́kul-shɛ̀mà dwí rə̀dù e súlí nə̀ dwã náàcɛ̀nà, vwĩ̀-zwə́lnə náncɛ y kàmə̀zwǐ y ǹdə́ ń nə̀bán yó kàmə̀jɛ̃̀ y bɔ́bwár yilə.⁸Esərayɛl lyì byǎ bɛ́ m'a pú kòrhó bə pɛ̃, sə à m'a jòm bə̀ cəcəl wə. ⁹À m'a byili mú kòrhó w ǹd'ô wẽ̀ ré tɛ̀bɛ́ gakó rə̀ mə̌ sə rə yə̀ ò wẽ́ mó gə́ mə̌ sə rə nyɛrhɛ nɛ́: wɔ́ rə̀myɛ́ mɔ́ cìcì á m'ǎ wɛ̀rhɛ́.¹⁰Esərayɛl lyì byǎ bɛ́ m'a sə̀ kùlkṍ ǹdə́ ákáshá dɔ̌, kùlkṍ w dwɛ̀lɛ̀ rɛ́ m'a yə̀ jə̀-tórhó yírhə́ nə̀lyè ǹdə́ fwã́, ò wɛ̃̀ rɛ́ yə̀ jə̀-tórhó yírh rə̀dù ǹdə́ fwã́, ò dɛ̃̌-zhìyə́ y yə̀ jə̀-tórhó yírh rə̀dù ǹdə́ fwã́. ¹¹Ǹ m'ǎ yə̌l sánə́má mɔ̀bɔ́ mə̀ càn ń mə́ fwàl ò wu w ǹd'ô cã̌ y ga, ń súlí ń zə sánə́má ń mə́ cĩ́ nà ń mə́ kə́kɛ́lɛ́ ò cã̌ yá.¹²Ǹ m'ǎ lù sánə́má cìbyǔr rə̀na ń ce ò nə̀gúlə́ né nə̀na y nɛ: cìbyǔr rə̀lyè yə̀ èpá èdù, rə̀lyè yə̀ èpá y dõ mó. ¹³Ǹ m'ǎ súlí ń sə̀ ákáshá də̀-byǎ bə̀lyè, ń yə̌l sánə́má ń mə́ fwàl bɛ, ¹⁴ǹ m'ǎ zɛ̃̀ ń kwè də̀-byǎ bɛ́ ń ce sánə́má cìbyǔr rí rə̀ wɔ kùlkṍ w nə̀gúlə́ né ne mó bɔ̀là bɛ́ wẽ́, kùlkṍ w zhũ yilə.¹⁵Də̀-byǎ bɛ́ m'a j'a mɛ̃ cìbyǔr rí bɔ̀là bɛ́ wẽ́, bə̀ k'ê t'â la bɛ vǔr yé. ¹⁶Ǹ m'ǎ cĩ́ nə́kulu bwə̀lsé nyə́ né kɛ̃ sə̀ yó, à la mɔ́ pɔ mɔ́, kùlkṍ w wẽ́. ¹⁷Rə̀myɛ́ kwã nɛ́, ǹ m'ǎ zùrhì kùlkṍ w nyí-byǐb rí ǹdə́ sánə́má mɔ̀bɔ́ mə̀ càn, rə̀ dwɛ̀lɛ̀ rɛ́ m'à yə̀ jə̀-tórhó yírhə́ nə̀lyè ǹdə́ fwã́, rə̀ wɛ̃̀ rɛ́ yə̀ jə̀-tórhó yírh rə̀dù ǹdə́ fwã́. ¹⁸Ǹ m'ǎ súlí ń zə sánə́má ń zùrhì shərəbɛ̃́bá bə̀lyè nyí-byǐ rí yə́-pɛ̀lɛ́ w ǹdə́ rə̀ kùr sõ.¹⁹Ǹ m'ǎ zùrhì shərəbɛ̃́ èdù y yə́-pɛ̀lɛ́ sõ, ń zùrhì è dõ mó kùr ré sõ. Á m'ǎ zùrhì shərəbɛ̃́bá, á dɛ̃ bɛ nyí-byǐ rí yə́-pɛ̀lɛ́ y ǹdə́ rə̀ kùr ré sõ, sə bə nɛ bɛ. ²⁰Shərəbɛ̃́bá m'a zhẽ̌ bə̀ vɔ̀mɛ̀ nɛ́ dɛ̃̌ bə lɛ̀lɛ̀ nɛ bə̀ la m'e círhí kùlkṍ w nyí-byǐ rí; bə̀ yésé m'a zǎ dwã, bə̀lyè y ga m'à n'ê nyǐ kùlkṍ w nyí-byǐ rí səta. ²¹Ǹ m'ǎ cĩ́ nə́kulu bwə̀lsé nyə́ né kɛ̃ sə̀ yó, à la mɔ́ pɔ mɔ́, kùlkṍ w wẽ́, ń zɛ̃̀ ń kwè nyí-byǐ rí ń pyi kùlkṍ wə́.²²Wɔ́ gàà à m'a jəl mó né. À m'a zhì nyí-byǐ rí yə́-pɛ̀lɛ́ wa, shərəbɛ̃́bá bə̀lyè y bə̀ ŋwɛ́nɛ́ kùlkṍ w dɔbrɛ́ nyə́ né wɔ ò wẽ́ mó cəcəl wə, a pɔ̃́ nyə́ né nyɛ̀bɛ́ gakó à n'â yǎl bə̀ ǹ pə Esərayɛl lyì byǎ bɛ́ gakó ne mó.²³Rə̀myɛ́ kwã nɛ́, ǹ m'ǎ sə̀ ákáshá dɔ̌ ń mə́ fwar tabəlɛ́, è dwɛ̀lɛ̀ rɛ́ m'a yə̀ jə̀-tórhó yírhə́ nə̀lyè, è wɛ̃̀ rɛ́ yə̀ jə̀-tórhó yírh rə̀dù, è dɛ̃̌-zhìyə́ y yə̀ jə̀-tórhó yírh rə̀dù ǹdə́ fwã́. ²⁴Ǹ m'ǎ yə̌l sánə́má mɔ̀bɔ́ mə̀ càn ń mə́ fwàl ya, ń súlí n zə sánə́má ń mə́ cĩ́ nà ń mə́ kə́kɛ́lɛ́ è nyə́ né.²⁵Ǹ m'ǎ sə̀ də̀-byǎ bə̀ wɛ̃̀ rɛ́ yə̀ jə̀-wàn ń mə́ ń zə è nyə́ né, ń súlí ń zə sánə́má ń cĩ́ nà də̀-byǎ bɛ́ yó ń mə́ kə́kɛ́lɛ́ bə̀ cã̌. ²⁶Ǹ m'ǎ lù sánə́má cìbyǔr rə̀na ń ce è nèsé sə̀na y è nə̀gúlə́ né ne mó ne. ²⁷Bə̀ m'a ce cìbyǔr rí də̀-byǎ bɛ́ bə̀ m'e zə tabəlɛ́ y nyə́ né mó yala nɛ, mùnì ga bə ŋwɛ̀nɛ́ bə ce də̀-byǎ bɛ́ bə̀ la m'e kwè tabəlɛ́ y mɔ́ rə̀ bɔ̀là bɛ́ wẽ́.²⁸Ǹ m'ǎ zə ákáshá dɔ̌ ń mə́ sə̀ də̀-byǎ bɛ́, ń zɛ̃̀ ń yə̌l sánə́má ń mə́ fwàl bɛ; wɔ́ bə̀myɛ́ bə̀ la m'e zhĩ tabəlɛ́ yá. ²⁹Ǹ m'ǎ zùrhì tabəlɛ́ y nə̀zhẽ̌ ǹd'ê kǎzɔ̀má ǹd'ê kwə̀lse e súlí è nə̀zhĩ̀-bwǎlsɛ də̀vɛ̃́ y bə̀ la Yi ni pɔ mɔ́ yilə. Ǹ m'ǎ zùrhì ri ǹdə́ sánə́má mɔ̀bɔ́ mə̀ càn. ³⁰Ǹ mà ǹ já ǹ nə́ ǹ cĩ́ búrú tabəlɛ́ y yó à yé né twéé twéé ǹ pɛ nɛ.³¹Ǹ m'ǎ zə ákáshá dɔ̌ ń mə́ sə̀ də̀-byǎ bɛ́, ń zɛ̃̀ ń yə̌l sánə́má ń mə́ fwàl bɛ; wɔ́ bə̀myɛ́ bə̀ la m'e zhĩ tabəlɛ́ yá. ³²Ǹ m'ǎ zùrhì tabəlɛ́ y nə̀zhẽ̌ ǹd'ê kǎzɔ̀má ǹd'ê kwə̀lse e súlí è nə̀zhĩ̀-bwǎlsɛ də̀vɛ̃́ y bə̀ la Yi ni pɔ mɔ́ yilə. Ǹ m'ǎ zùrhì ri ǹdə́ sánə́má mɔ̀bɔ́ mə̀ càn.³³3 Jɛ̀sɛ́ shə̀ldù y sə̀ zhí ò cã̌ y nɛ mɔ́ èdù gakó m'a yə̀ kǎzɔ̀má bə̀tɔ̀ námpúmə́, kǎzɔ̌m mə̀dù gakó m'a zə mə̀ kúkùlí e súlí mə̀ pùní, rə̀ ga zhí zhí dwã nɛ. ³⁴Ku w bə̀ n'ê cĩ́ pàntámsɛ́ ò yó mó cã̌ y cìcì mú m'a yə̀ kǎzɔ̀má bə̀na námpúmə́, kǎzɔ̌m mə̀dù gakó m'a zə mə̀ kúkùlí e súlí mə̀ pùní, rə̀ ga zhí zhí dwã nɛ:³⁵Kúkùlí myɛ m'a yə̀ jɛ̀sɛ́ shə̀ldù y gə́ zhí zhí cã̌ y nɛ, sə̀lyè sə̀lyè mə̀gã̌ mɔ́ kùr wə. ³⁶Kúkùlə́ né ǹdə́ jɛ̀sɛ́ m'a yə̀ kɔn rə̀dù námpúm ǹdə́ ku w bə̀ n'ê cĩ́ pàntámsɛ́ ò yó mó cã̌ yá, bə̀ m'a tó dwã bə zùrhì rə̀ gakó ǹdə́ sánə́má mɔ̀bɔ́ mə̀ càn.³⁷Ǹ m'ǎ wɛ̀rhɛ́ pàntámsɛ shàlpyɛ̀ ku w bə̀ n'ê cĩ́ pàntámsɛ́ ò yó mó yilə. Bə̀ m'a ji pàntámsɛ́ mùnì ga bə yə̌r jàà y è wɔ ò yé né mó. ³⁸Bə̀ m'a zùrhì ò pyə́lsɛ́ ǹd'ô tɔ̀mɔ̀ nə̀zhĩ̀-bwǎlsɛ́ ga ǹdə́ sánə́má mɔ̀bɔ́ mə̀ càn. ³⁹Bə̀ m'a zə sánə́má mɔ̀bɔ́ mə̀ càn cəə́le shə́-ètɔ̀ bə m'e zùrhì ku w bə̀ n'ê cĩ́ pántámsɛ́ ò yó mó ǹdə́ wẽ̀ ré rə̀myɛ́ mɔ́ dwã bɛ́ gakó. ⁴⁰Èlǎsɛ̃́, ǹmyɛ́ Muyiisi ce jàn nɛ́ ń wɛ̀rhɛ́ kɔn gakó rə tó ǹdə à gə́ byili mú pyɔ̀ w yó mó ne.

¹Ǹ m'ǎ zə kàmə̀jɛ̀rh shí sə̀ sɔ̃̀ ǹdə́ lɛ̃̌ bə̀ nyɔ̀ ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ń mə́ pú Yi kòrhó wə́. Ǹ m'ǎ zɛ̃̀ ń cĩ́ shərəbɛ̃́bá myaarhɛ rə̀ zò zò kàmə̀jɛ̀sɛ́ yó. ²Kàmə̀jɛ̃̀ èdù gakó dwɛ̀lɛ̀ rɛ́ m'a yə̀ jə̀-tórhó yírhə́ shí-èlyè ǹdə́ lyɛlɛ, è wɛ̃̀ rɛ́ yə̀ jə̀-tórhó yírhə́ nə̀na. Kàmə̀jɛ̀sɛ́ gakó dwɛ̀lɛ̀ rɛ́ ǹdə́ sə̀ wɛ̃̀ rɛ́ m'a mɛrhɛ dwã. ³Kàmə̀jɛ̀rh sə̀nu m'a zhílí dwã nɛ, sə̀ dwã sə̀nu y myɛ zhílí zhílí dwã nɛ èta.⁴Ǹ m'ǎ wɛ̀rhɛ́ pyì-kur rə̀ mɔ́rh námpùúli lyẽẽ́se ń ce kàmə̀jɛ̀sɛ́ sə zhí zhí dwã nɛ kùr ré nã́yéé ré kàmə̀jɛ̃̀ nã́yə́ə́ y ne. Ǹ m'ǎ súlí ń wɛ̀rhɛ́ èta kàmə̀jɛ̀sɛ́ sə̀ zhí zhí dwã nɛ kùrə̀ nə̀lyè nyǎn rɛ́ kàmə̀jɛ̃̀ nánkwaá y myɛ nɛ. ⁵Ǹ m'ǎ ce lyẽẽ́se shí-ènu kàmə̀jɛ̃̀ nã́yə́ə́ nyí rí ni ń twèlé, ń zɛ̃̀ ń ce lyẽẽ́se shí-ènu kàmə̀jɛ̀sɛ́ sə̀ zhí zhí dwã nɛ kùrə̀ né nə̀lyè nyǎn rɛ́ kàmə̀jɛ̃̀ nánkwáá y myɛ nyí rí ni ń twèlé; lyẽẽ́se m'a zǎ dwã sə̀lyè sə̀lyè. ⁶Ǹ m'ǎ zùrhì sánə́má pyə́lsɛ shí-ènu, ń mə́ pyɛ́l kàmə̀jɛ̀sɛ́ kùrə̀ né nə̀lyè y dwã nɛ. Èta, Yi kòrhó w m'a j'a yə̀ kɔn rə̀dù námpúm.⁷Rə̀myɛ́ kwã nɛ́, ǹ m'ǎ sɔ̃̀ bɔ̃̀ kur kàmə̀jɛ̀rh shí ǹdə́ èdù ń mə́ súlí ń pú Yi kòrhó w yə́-pɛ̀lɛ́ wa. ⁸Kàmə̀jɛ̃̀ èdù gakó dwɛ̀lɛ̀ rɛ́ m'a yə̀ jə̀-tórhó yírhə́ shə́-ètɔ̀, è wɛ̃̀ rɛ́ yə̀ jə̀-tórhó yírhə́ nə̀na. Sə̀myɛ́ shí ǹdə́ èdù y ga dwɛ̀lɛ̀ rɛ́ ǹdə́ sə̀ wɛ̃̀ rɛ́ ga m'a mɛrhɛ dwã. ⁹Ǹ m'ǎ zhílí kàmə̀jɛ̀rh sə̀nu dwã nɛ sə̀ nyí, ń zhílí shə̀ldù myɛ dwã nɛ sə̀ nyí, ń zɛ̃̀ ń ká shə̀ldù nyǎ y ń ló kòrhó w yé y wə.¹⁰Ǹ m'ǎ wɛ̀rhɛ́ lyẽẽ́se shí-ènu ń ce kàmə̀jɛ̀sɛ́ sə̀ zhí zhí dwã nɛ kùr ré nã́yéé ré kàmə̀jɛ̃̀ nánkwaá y nyí rí ni ń twèlé, ń súlí ń ce sə̀ dwã shí-ènu kàmə̀jɛ̀sɛ́ sə̀ zhí zhí dwã nɛ kùrə̀ nə̀lyè nyǎn rɛ́ kàmə̀jɛ̃̀ nánkwaá y myɛ nyí rí ni ń twèlé. ¹¹Ǹ m'ǎ zùrhì kàmmɔ pyə́lsɛ shí-ènu ń zɛ̃̀ ń kwè se ń ce lyẽẽ́sé ne ń mə́ lyẽ kòrhó w mùnì ga o yə̀ kɔn rə̀dù námpúm.¹²Kòrhó w kàmə̀jɛ̀sɛ́ m'a dàl sə̀ n'ê zhə́zhɛ̀lɛ́ tɛ̃́ nánfò: kàmə̀jɛ̀sɛ́ kə̀kàlà y è dàl mɔ́ m'a ká e ló tɛ̃́ Yi kòrhó w kwã y wa. ¹³Sə kɔn kwè Yi kòrhó w kàmə̀jɛ̀sɛ́ dwɛ̀lɛ̀ rɛ́, kàmə̀jɛ̃̀ y m'a dàl jə̀-tórhó yírh rə̀dù e ká e ló tɛ̃́ Yi kòrhó w sarha nɛ́ ga nɛ e m'e pyìlì wə. ¹⁴Ǹ m'ǎ súlí ń zə pyì-byərh tàndɛ rə̀ mɔ́rh nánshɛ̀n ń mə́ súlí ń pyìlì kòrhó w ń zɛ̃̀ ń súlí ń pyìlì dɔfɛ̃́ɛ̃́sɛ tàndɛ ò yə́-pɛ̀lɛ́ wa.¹⁵Rə̀myɛ́ kwã nɛ́, ǹ m'ǎ zə ákáshá dɔ̌ ń sə̀ dǎr ń cìì tɛ̃́ ń mə́ kwɛ̃́ Yi kòrhó wə́. ¹⁶Dɔ̌ òdù gakó m'a yə̀ jə̀-tórhó yírhə́ shíyə́, ò wɛ̃̀ rɛ́ yə̀ jə̀-tórhó yírh rə̀dù ǹdə́ fwã́. ¹⁷Dɔ̌ gakó m'a zə pyəla nə̀lyè nə̀ ŋwɛ́nɛ́ dwã nyí ni. Ǹ m'ǎ wɛ̀rhɛ́ Yi kòrhó w dǎr rɛ́ rə̀myɛ́ mɔ́ gakó èta. ¹⁸Ǹ m'ǎ sə̀ rə̀ shí-èlyè, Yi kòrhó w sarh rɛ́ rə̀ zǎ Nəgɛɛvɛ səta, jə̀-jĩ́ sõ mó yilə.¹⁹Ǹ m'ǎ zùrhì sə̀byì-kùlì wẽ̀ shə́-èna, dǎr rɛ́ kùrə̀ né la rə̀ yó cṹ: wẽ̀ rə̀lyè dɔ̌ òdù kùr wə, ò pyəla nə̀lyè y yilə, wẽ̀ dwã rə̀lyè dɔ̌ dõ kùr wə, òmyɛ pyəla nə̀lyè y myɛ yilə. ²⁰È gə wɔ́ kòrhó w sarh rɛ́ rə̀ zǎ jə̀-gwã̀ sõ mó yilə, bə̀ m'a sə̀ dǎr shí-èlyè, ²¹bə súlí bə zùrhì sə̀byì-kùlì wẽ̀ ré tɛ̀bɛ́ dǎr rɛ́ kùrə̀ né la rə̀ yó cṹ mú shə́-èna: wẽ̀ rə̀lyè dɔ̌ òdù gakó kùr wə, wẽ̀ dwã rə̀lyè, dɔ̌ dõ myɛ kùr wə.²²Sə è gə wɔ́ Yi kòrhó w etwã-kùr ré, kɔn zǎ nə̀-fɔ̀lɔ̀ w səta mɔ́a, ǹ m'ǎ sə̀ dǎr tə̀ldù, ²³ǹ m'ǎ súlí ń sə̀ dǎr rə̀lyè etwã-kùr ré kwã́ɔ̃́ yilə. ²⁴Tɛ̃́ mɔ́, rə̀ m'a kɔl dwã nɛ, sə rə̀ yə́-pǎlsɛ́ m'a vò sə zhí dwã nɛ cìbyǔ nã́yóó w bɔ̀l mɔ́ wẽ́. Kɔn m'a yə̀ èta dǎr rɛ́ rə̀lyè y ga yilə, rə̀ ga m'a kwɛ̃́ Yi kòrhó wə́. ²⁵Èta, dǎr lyɛlɛ m'a yə̀ kòrhó w etwã-kùr ré wə, ǹdə́ wẽ̀ ré tɛ̀bɛ́ rə̀ zùrhì ǹdə́ sə̀byì-kùlì rə̀ kùrə̀ né n'ê cĩ́ rə̀ yó mó: wẽ̀ ré rə̀myɛ́ mɔ́ shí ǹdə́ tə̀ldù: wẽ̀ rə̀lyè dɔ̌ òdù kùr wə, wẽ̀ rə̀lyè dɔ̌ dõ kùr wə.²⁶Rə̀myɛ́ kwã nɛ́, ǹ m'ǎ sə̀ ákáshá də̀-byǎ: bə̀nu Yi kòrhó w èpá èdù dǎr rɛ́ yó jarh yilə, ²⁷bə̀nu Yi kòrhó sarh rɛ́ dõ mó dǎr rɛ́ yó jarh yilə, bə̀nu Yi kòrhó w etwã-kùr ré, kɔn zǎ nə̀-fɔ̀lɔ̀ w səta mɔ́ dǎr rɛ́ yó jarh yilə. ²⁸Cəcəl dɔ̌ w m'a zhì Yi kòrhó w kùr w o mɛrhɛ dwã ǹdə́ dǎr rɛ́ bòbõ̌ w o vò ó yí Yi kòrhó w yə́-pɛ̀lɛ́ y wa.²⁹Ǹ m'ǎ yə̌l sánə́má ń mə́ fwàl dǎr rɛ́, ń zùrhì cìbyǔr rí bə̀ la də̀-byǎ bɛ́ rə̀ wẽ́ co mó ǹdə́ sánə́má, ń súlí ń yə̌l sánə́má ń mə́ fwàl də̀-jaárhɛ́. ³⁰Ǹ m'ǎ pú kòrhó w o yə̀ ǹdə à gə́ byili mú ní pyɔ̀ w yó mó.³¹Rə̀myɛ́ kwã nɛ́, ǹ m'ǎ zə pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀ ń mə́ sɔ̃̀ gɔ̀nɔ̀. Bə̀ m'a zò shərəbɛ̃́bá myaarhɛ bə cĩ́ ò yó. ³²Ǹ m'ǎ zə sánə́má pyə́lsɛ sə̀na ń mə́ pyɛ́l gɔ̀nɔ̀ w ákáshá yə nə̀na nə̀ kùrə̀ né cĩ́ wẽ̀ rə̀ zùrhì ǹdə́ sə̀byì-kùlì rə̀na yó. ³³Ǹ m'ǎ ce gɔ̀nɔ̀ w pyə́lsɛ́ kùr wə, ń zɛ̃̀ ń cĩ́ kùlkṍ w nə́kulu bwə̀lsé nyə́ né kɛ̃ sə̀ yó mó, gɔ̀nɔ̀ w òmyɛ́ mɔ́ kwã nɛ́. Gɔ̀nɔ̀ w m'a pɔr Yi jàà y ǹdə́ Yi dúdú jàà y dwã nɛ.³⁴Rə̀myɛ́ kwã nɛ́, ǹ m'ǎ kwè nyí-byǐ rí ń cĩ́ kùlkṍ w nə́kulu bwə̀lsé ŋwɛ́nɛ́ ò wẽ́ mó yó, Yi dúdú jàà y wa. ³⁵Ǹ m'ǎ cĩ́ tabəlɛ́ y gɔ̀nɔ̀ w yé y wə, ń zɛ̃̀ ń cĩ́ ku w kɔ̀bɔ́ bə̀ n'ê cĩ́ pàntámsɛ́ ò yó mó tabəlɛ́ y yé y wə, Yi kòrhó w jə̀-jĩ́ sõ. Ǹ m'ǎ jɛ̀nɛ̀ ń cĩ́ tabəlɛ́ y jə̀-gwã̀ sõ.³⁶Rə̀myɛ́ kwã nɛ́, ǹ m'ǎ zə pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀ ń mə́ sɔ̃̀ gɔ̀nɔ̀ dõ kòrhó w étwí-ènyí rí yilə. ³⁷Ǹ m'ǎ sə̀ ákáshá yə nə̀nu, étwí-ènyí rí gɔ̀nɔ̀ w yilə, ń yə̌l sánə́má ń mə́ fwàl nɛ; nə̀ pyə́lsɛ́ m'a zùrhì ǹdə́ sánə́má. Ǹ m'ǎ súlí ń yə̌l kàmmɔ ń mə́ ń zùrhì wẽ̀ ré tɛ̀bɛ́ yə né kùrə̀ né la rə̀ yó cṹ mú rə̀nu.

¹Rə̀myɛ́ kwã nɛ́, ǹ m'ǎ fwar vwĩ̀-jùlú w ǹdə́ ákáshá dɔ̌: vwĩ̀-jùlú w dwɛ̀lɛ̀ rɛ́ m'a yə̀ jə̀-tórhó yírhə́ nə̀nu; ò wɛ̃̀ rɛ́ myɛ yə̀ jə̀-tórhó yírhə́ nə̀nu. Ò sarha nɛ́ nə̀na y ga dwɛ̀lɛ̀ rɛ́ m'a mɛrhɛ dwã, sə ò dɛ̃̌-zhìyə́ y m'a yə̀ jə̀-tórhó yírhə́ nə̀tɔ̀. ²Ǹ m'ǎ ce nyimi ò nə̀gúlə́ né nə̀na y nɛ, sə nə̀ m'a yə̀ kɔn rə̀dù námpúm ǹdə́ vwĩ̀-jùlú wə́, ń zɛ̃̀ ń yə̌l kàmmɔ ń mə́ fwàl wa.³Ǹ m'ǎ zùrhì nə̀zhẽ̌ vwĩ̀-jùlú w tɔ̀mdɛ́ yilə, ǹdə́ pyə́lə́ ǹdə́ jal-zhɔ́rhɔ́ nə̀zhẽ̌ ǹdə́ nàmá lyəlse e súlí nə̀zhĩ̌si wẽ̀ ré rə̀ lwẽ́ nã́nyə̀nyɛ̀lɛ́ y myǐn ju yilə; ǹ m'ǎ zùrhì wẽ̀ ré rə̀myɛ́ mɔ́ gakó ǹdə́ kàmmɔ. ⁴Ǹ m'ǎ zùrhì kàmmɔ ku ǹd'ô bɔ̀là ǹdə zhəzhərhá ta vwĩ̀-jùlú w yilə, ń súlí ń zùrhì kàmmɔ cìbyǔr rə̀na ń ce kàmmɔ ku w ǹd'ô bɔ̀là ǹdə zhəzhərhá ta mɔ́ nə̀gúlə́ né nə̀na y nɛ.⁵Ǹ m'ǎ zə kàmmɔ ku w ǹd'ô bɔ̀là ǹdə zhəzhərhá ta mɔ́ ń mə́ zù vwĩ̀-jùlú w tɛ̃́ mɔ́ ń mə́ yí ò bòbõ̌ wə, nà y bə̀ cĩ́ ǹdə́ sánə́má bə m'e kə́kɛ́lɛ́ ò cã̌ y mɔ́ kùr wə. ⁶Ǹ m'ǎ sə̀ ákáshá də̀-byǎ vwĩ̀-jùlú w yilə, ń yə̌l kàmmɔ ń mə́ fwàl bɛ.⁷Bə̀ m'a ce də̀-byǎ bɛ́ bə̀myɛ́ mɔ́ cìbyǔr rí bɔ̀là bɛ́ wẽ́. Bə̀ gə tú bə̀ la vwĩ̀-jùlú w zhũ, də̀-byǎ bɛ́ m'a yə̀ ò sarha nɛ́ nə̀lyè y ne. ⁸Ǹ m'ǎ zə də̀-lwəəre ń mə́ fwar vwĩ̀-jùlú wə́, sə ò wu w m'a yə̀ nánfóó. Ǹ m'ǎ wɛ̀rhɛ́ w ǹdə bə̀ gə́ byili mú ní pyɔ̀ w yó mó.⁹Rə̀myɛ́ kwã nɛ́, ǹ m'ǎ zə lɛ̃̌ bə̀ sɔ̃̀ kàmə̀jɛ̀rh ń mə́ kə́kɛ́lɛ́ Yi kòrhó w kɔ̀nɔ́ wá. Kɔn zǎ Nəgɛɛvɛ səta, jə̀-jĩ́ sõ mó, kàmə̀jɛ̀sɛ́ dwɛ̀lɛ̀ rɛ́ m'a yə̀ jə̀-tórhó yírhə́ zɔ̌m kɔ̀nɔ́ w vɔ̃̀ òdù yilə. ¹⁰Kɔ̀nɔ́ w yə né shí-èlyè y ǹd'ô wẽ̀ ré tɛ̀bɛ́ yə né kùrə̀ né n'ê cĩ́ rə̀ yó shí-èlyè y m'a yə̀ kàmmɔ bə̀ m'e zùrhì ri; sə yə né pyə́lsɛ́ ǹdə́ sə̀ shisí shɛ̀bɛ́ bə̀ m'ê jele se dɛ̃̌ mɔ́ m'a yə̀ sə̀byì-kùlì bə̀ m'e zùrhì si.¹¹Kɔn m'a yə̀ èta Yi kòrhó w jə̀-gwã̀ sõ myɛ, kɔn twèlé ò dwɛ̀lɛ̀ rɛ́: kàmə̀jɛ̀sɛ́ dwɛ̀lɛ̀ rɛ́ m'a yə̀ jə̀-tórhó yírhə́ zɔ̌m, Yi kòrhó w yə né shí-èlyè y ǹdə́ wẽ̀ ré tɛ̀bɛ́ nə̀ kùrə̀ né n'ê cĩ́ rə̀ yó shí-èlyè y m'a yə̀ kàmmɔ bə̀ m'e zùrhì ri, pyə́lsɛ́ ǹdə́ sə̀ shisí shɛ̀bɛ́ bə̀ m'ê jele se dɛ̃̌ mɔ́ m'a yə̀ sə̀byì-kùlì bə̀ m'e zùrhì si. ¹²È gə wɔ́ kɔ̀nɔ́ w wɛ̃̀ rɛ́ kɔn zǎ nə̀-fɔ̀lɔ̀ w səta mɔ́ yilə, kàmə̀jɛ̀sɛ́ dwɛ̀lɛ̀ rɛ́ m'a yə̀ jə̀-tórhó yírhə́ shí-ènu, sə̀ yə né yə̀ shíyə́, wẽ̀ ré tɛ̀bɛ́ yə né kùrə̀ né n'ê cĩ́ rə̀ yó mó yə̀ shíyə́. ¹³Ò wɛ̃̀ rɛ́ kɔn zǎ yi-púrhí sõ mó myɛ m'a yə̀ jə̀-tórhó yírhə́ shí-ènu;¹⁴kàmə̀jɛ̀rh sə̀ dwɛ̀lɛ̀ rɛ́ wɔ́ jə̀-tórhó yírhə́ shí ǹdə́ nə̀nu ǹdə́ sə̀ yə nə̀tɔ̀ e súlí wẽ̀ ré rə̀tɔ̀ y tɛ̀bɛ́ yə né kùrə̀ né n'ê cĩ́ rə̀ yó mó m'a yə̀ étwí-ènyí rí vɔ̃̀ w òdù ni. ¹⁵Kàmə̀jɛ̀rh sə̀ dwɛ̀lɛ̀ rɛ́ myɛ wɔ́ jə̀-tórhó yírhə́ shí ǹdə́ nə̀nu ǹdə́ sə̀ yə nə̀tɔ̀ e súlí wẽ̀ ré rə̀tɔ̀ y tɛ̀bɛ́ yə né kùrə̀ né n'ê cĩ́ rə̀ yó mó myɛ yə̀ étwí-ènyí rí vɔ̃̀ w dõ mo ne. ¹⁶Bə̀ m'a sɔ̃̀ lɛ̃̌ bə̀ nyɔ̀ e súlí pyì-kur bə̀ mɔ́rh námpùúlí ǹdə́ nánshɛ̀n e súlí nánshɛ̀n gwɛ̃́gwɛ̃́ gɔ̀nɔ̀, kɔ̀nɔ́ w nyí rí yilə, ò dwɛ̀lɛ̀ rɛ́ m'a yə̀ jə̀-tórhó yírhə́ shí-èlyè, bə lyẽ w yə nə̀na nə̀ kùrə̀ né cĩ́ nə̀ wẽ̀ ré rə̀na y yó mó ne.¹⁷Bə̀ m'a lyẽ kɔ̀nɔ́ w yə né gakó dwã nɛ ǹdə́ shirh sə̀ zùrhì ǹdə́ sə̀byì-kùlì, bə̀ m'a zùrhì yə né pyə́lsɛ́ ǹdə́ sə̀byì-kùlì, bə̀ m'a zùrhì wẽ̀ ré tɛ̀bɛ́ yə né kùrə̀ né n'ê cĩ́ rə̀ yó mó ǹdə́ kàmmɔ. ¹⁸Kɔ̀nɔ́ w dwɛ̀lɛ̀ rɛ́ m'a yə̀ jə̀-tórhó yírhə́ zɔ̌m, ò sarh rə̀dù gakó wɛ̃̀ rɛ́ m'a yə̀ jə̀-tórhó yírhə́ shí-ènu. Ò dɛ̃̌-zhìyə́ y m'a yə̀ lɛ̃̌ bə̀ nyɔ̀ kàmə̀jɛ̃̀ jə̀-tórhó yírhə́ nə̀nu, bə̀ m'a zùrhì wẽ̀ ré tɛ̀bɛ́ yə né kùrə̀ né n'ê cĩ́ rə̀ yó mó ǹdə́ kàmmɔ. ¹⁹Bə̀ m'a zùrhì Yi kòrhó w wẽ̀ ré tɛ̀bɛ́ bə̀ la m'ê twĩ̀ ò tumə né gakó mó, ǹd'ô pálá nɛ́ gakó e súlí kɔ̀nɔ́ w pálá nɛ́ gakó ǹdə́ kàmmɔ.²⁰È gə wɔ́ ǹmyɛ́ yilə, ǹ m'ǎ súlí ń pə nyí Esərayɛl lyì byǎ bɛ́ nɛ bə̀ n'ê pɛ mɔ́ olyivyé byǎ nwə̃̌ y kɛ̀bɛ́ è wɔ́ zwẽ́-zwẽ́, kaka myɛ yə̀ y gùlí yé, mùnì ga pàntɛ́mɛ́ j'a zə twéé twéé ²¹dwã-joló kòrhó w wẽ́, gɔ̀nɔ̀ w dɔbrɛ kùlkṍ w wɔ ò kwã nɛ́ mɔ́ yé né. Aarɔ̃ ǹdə́ ń byǎ bɛ́ m'a cili è sõ mùnì ga e zə Cinu yé né, də̀dɛ̀nɛ́ e m'e yí nəkɔkɔ́lɛ́. Wɔ́ nyí rə̀ m'à j'â ŋwɛ́nɛ́ gaga, Esərayɛl lyì byǎ bɛ́ yilə.

¹Cinu súlí n wɔ̀ Muyiisi ni: Zə ǹ da-byǐ Aarɔ̃ ǹdə́ ń byǎ Nadaabɛ ǹdə́ Abyəwu ǹdə́ Eləyazaarɛ e súlí Yətamaarɛ, Esərayɛl lyì byǎ bɛ́ wẽ́, bə bə̀ bə tó mó bə yə̀ vwĩ̀-zwə́lnə bə twĩ̀ bə pɛ̃. ²Ǹ m'ǎ nyal vwĩ̀ rí zwə́l gàndɛ ń pə ǹ da-byǐ Aarɔ̃ nɛ, rə yə̀ zùwə́ ǹdə́ pyɛ̀lɛ̀ myaarhɛ ń yilə. ³Ǹmyɛ́ m'ǎ wɔ̀ surhə cìnə́ byɛ̀bɛ́ gakó à ce bə sú ǹdə́ lárma mɔ́ nɛ bə̀ bə̀ nyal Aarɔ̃ gàndɛ́ mùnì ga n yə̀ lò mɔ̀bɔ́ bə̀ cír sə n twĩ̀ à vwĩ̀ rí zwə́l tum rí.⁴Nyǐ gàndɛ́ tɛ̀bɛ́ bə̀ m'a nyal mɔ́: nə̀bán yó kàmə̀jɛ̃̀ ǹdə́ vwĩ̀-zwə́lnə náncɛ kàmə̀zwǐ ǹdə́ kàmǝ̀zù-èdɔ̀lɔ̀ ǹdə́ kàmə̀zù-pɔ́lɛ́ è zòwə̀ ǹdə́ yó-bɔrɔ́ e súlí cã̌-tɔ̀nɔ̀. Bə̀ m'a nyal vwĩ̀-zwə́lnə gàndɛ́ rə̀myɛ́ mɔ́ ǹ da-byǐ Aarɔ̃ ǹdə́ ń byǎ bɛ́ yilə, mùnì ga bə twĩ̀ à vwĩ̀ rí zwə́l mó tum rí. ⁵Bə̀ m'a zə sánə́má ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀wà, bə m'e sɔ̃̀ rɛ.⁶Bə̀ m'a zə pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀wà, bə m'e sɔ̃̀ vwĩ̀-zwə́lnə náncɛ y kàmə̀zwǐ yə́, bə zɛ̃̀ bə zə sánə́má bə m'e zò yə, rə̀myɛ́ mɔ́ m'a yə̀ lò mɔ̀bɔ́ ń yě tum rí rə̀myɛ́ yé shò mó tum. ⁷Bə̀ m'a ce vɔla nə̀lyè kàmə̀zwǐ y nyə́ né ne è lyõ e zhì mú yilə. ⁸Bə̀ m'a sɔ̃̀ lyẽẽ́sé bə̀ m'ê lyẽ vwĩ̀-zwə́lnə náncɛ y kàmə̀zwǐ y mú ǹdə́ wẽ̀ ré tɛ̀bɛ́ bə̀ m'e sɔ̃̀ kàmə̀zwǐ y mú: pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀wà, bə zɛ̃̀ bə zə sánə́má bə m'e zò se. ⁹Rə̀myɛ́ kwã nɛ́, ǹ m'ǎ kwè nə́kul-shɛ̀mà dwí rə̀dù nə̀lyè ń kɛ̃ Esərayɛl lyì byǎ bɛ́ yilə né nə̀ yó:¹⁰bə̀ yilə nyə̀ldù nə́kulu náàcɔ̀nɔ̀ nã́yóó w yó, nə̀ dwã nyə̀ldù y nə́kulə nə̀lyè nyɔ̃̌ w yó, yilə né pú pú dwã nɛ ǹdə bə̀ gə́ lùl bə pú pú dwã nɛ nɛ́. ¹¹Ǹ m'ǎ kɛ̃ yilə né nə́kulə né nə̀lyè y yó ǹdə nə́kul-sə̀lnə mó gə́ nə́ ń wɛ̀rhɛ́ nɛ́, ǹdə bə̀ gə́ y'a kɛ̃ zhə̀n-pɔ ku w yó né. Ǹ m'ǎ zɛ̃̀ ń kwè nə́kulə né ń dɛ̃ shisí sə̀ zùrhì ǹdə́ sánə́má mɔ́ nɛ. ¹²Ǹ m'ǎ dɛ̃ nə́kulə né nə̀lyè y nə̀ wɔ́ Esərayɛl lyì byǎ bɛ́ yò lyǐrh kɔn mɔ́ vwĩ̀-zwə́lnə kàmə̀zwǐ y vɔla nɛ́ nɛ. Èta, Aarɔ̃ mà n zə bə̀ yilə né n bə̀ Cinu yé né, kàmə̀zwǐ y vɔla nɛ́ yó, rə yə̀ bə̀ yò lyǐrh kɔna.¹³Ǹ m'ǎ zùrhì shirh ǹdə́ sánə́má bə̀ m'a dɛ̃ nə́kulə náàcɛ̀nà sə̀ yó, ¹⁴ǹdə́ sánə́má mɔ̀bɔ́ mə̀ càn nyáná námpɔ́lsɛ sə̀lyè. Ǹ m'ǎ zùrhì si ǹdə nyínsi bə̀ nyɔ̀ ta, ń zɛ̃̀ ń pyɛ̀lɛ́ sɛ sánə́má shisí yó.¹⁵Ǹ m'ǎ sɔ̃̀ nə̀bán yó kàmə̀jɛ̃̀ y bùrsi bǔr yilə, e yə̀ lò mɔ̀bɔ́ ń yě tum rí rə̀myɛ́ yé shò mó tum. Ǹ m'ǎ sɔ̃̀ y ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀wà, ń zɛ̃̀ ń zə sánə́má ń mə́ zò y ǹdə vwĩ̀-zwə́lnə náncɛ y kàmə̀zwǐ y ta. ¹⁶Bə̀ gə pu y dwã wa, è sarha nɛ́ nə̀na y ga dwɛ̀lɛ̀ rɛ́ m'a mɛrhɛ dwã, nə̀ dwɛ̀lɛ̀ rɛ́ ǹdə́ nə̀ wɛ̃̀ rɛ́ ga m'a yə̀ jɛ̃̀-wàn.¹⁷Ǹ m'ǎ tùrhì nə́kulə náàcɛ̀nà è yó è bɔ́bwár yilə: è m'a yə̀ nə́kulə nə̀rh sə̀na: nà nã́yə́ə́ y nə́kulə né òdù m'a yə̀ sarədwaanɛ ǹdə́ tɔpaazɛ e súlí emərɔ́ɔ́dɛa. ¹⁸Nə̀rh sə̀lyè nyǎ y nə́kulə né m'a yə̀ esəkərəbúúkəli ǹdə́ ləzulyiiti e súlí zhaasəpɛb. ¹⁹Nə̀rh sə̀tɔ̀ nyǎ y nə́kulə né m'a yə̀ agaatɛ ǹdə́ korənəlyiini e súlí amətiisətic. ²⁰Nə̀rh sə̀na nyǎ y m'a yə̀ kərəzolyiiti ǹdə́ beriili e súlí onikəsid. Bə̀ m'a dɛ̃ nə́kulə né nə̀myɛ́ òdù gakó sánə́má ka cəcəl wə.²¹Nə́kulə né yó w m'a mɛrhɛ Esərayɛl byǎ bɛ́ yilə né, nə̀ m'a yə̀ shí ǹdə́ nə̀lyè ǹdə bə̀ yilə né yó w ta. Bə̀ m'a kɛ̃ kwálá èdù gakó yil ré nə́kulu òdù gakó yó ǹdə bə̀ gə́ y'a kɛ̃ zhə̀n-pɔ ku w yó né. Nə́kulə né n'ê mɛrhɛ Esərayɛl lyì byǎ bɛ́ kwálsɛ́ shí ǹdə́ sə̀lyè yə́. ²²Ǹ m'ǎ zùrhì nyáná nə̀lyè námpɔ́lsɛ ǹdə́ sánə́má mɔ̀bɔ́ mə̀ càn nə pyɛ́pyɛ́rɛ́ dwã nɛ ǹdə wɔ́ nyínsi bə̀ nyɔ̀ ta ń ce nə̀bán yó kàmə̀jɛ̃̀ y nɛ. ²³Ǹ m'ǎ lù sánə́má cìbyǔr rə̀lyè ń ce nə̀bán yó kàmə̀jɛ̃̀ y nə̀gúlə́ né ne. ²⁴Ǹ m'ǎ zɛ̃̀ ń lyẽ sánə́má nyáná nə̀lyè y námpɔ́lsɛ́ rə̀dù gakó cìbyǔ òdù gakó ne nə̀bán yó kàmə̀jɛ̃̀ y nə̀gúlə́ né ne mó ne.²⁵Sə ǹ m'ǎ lyẽ sánə́má nyáná námpɔ́lsɛ́ nyə́ né nə̀lyè y sánə́má shisí sə̀lyè y sə̀ lyẽ vwĩ̀-zwə́lnə náncɛ y kàmə̀zwǐ y vɔla nɛ́ nɛ mɔ́, mùnì ga nə̀bán yó kàmə̀jɛ̃̀ y yə̀ yé né. ²⁶Ǹ m'ǎ lù sánə́má cìbyǔr dwã rə̀lyè ń ce nə̀bán yó kàmə̀jɛ̃̀ y tɛ̃́ nə̀gúlə́ né ne è gə́ n'ê pyẽ̀ vwĩ̀-zwə́lnə náncɛ y kàmə̀zwǐ y yó mə̀gã̌ mɔ́.²⁷Ǹ m'ǎ zùrhì sánə́má cìbyǔr rə̀lyè dwã ń ce vwĩ̀-zwə́lnə náncɛ y kàmə̀zwǐ y vɔla nɛ́ tɛ̃́ mɔ́ nɛ, è yé né, vɔla nɛ́ gə́ nyal kàmə̀zwǐ y ni mə̀gã̌ mɔ́, kàmə̀zwǐ y lyẽẽ́sé yó. ²⁸Bə̀ m'a zə kàmə̀jɛ̃̀ námpùlí bə lyẽ nə̀bán yó kàmə̀jɛ̃̀ y cìbyǔr rí ǹdə́ vwĩ̀-zwə́lnə náncɛ y kàmə̀zwǐ y cìbyǔr rí dwã nɛ mùnì ga nə̀bán yó kàmə̀jɛ̃̀ y pyẽ̀ jàà èdù vwĩ̀-zwə́lnə náncɛ y kàmə̀zwǐ y lyẽẽ́sé yó, è bə̀k'a j'â n'ê dùr è yó yé²⁹Èta, Aarɔ̃ gə tú ń zù à jì y wẽ́, ń mà n zə Esərayɛl lyì byǎ bɛ́ kwálsɛ́ yilə né, ń wu w wẽ́, ǹdə́ bùrsi bǔr kàmə̀jɛ̃̀ y ń nə̀bán yó mó wẽ́, n bə̀ Cinu yé né, ń já ń mə́ ń lyǐrh bə̀ yò twéé twéé. ³⁰Ǹ m'ǎ ce Urim y ǹdə́ Tummimb y nə̀bán yó kàmə̀jɛ̃̀ y wẽ̀; rə̀ m'a yə̀ Aarɔ̃ nə̀bán rɛ́ yó, ń gə bàn Cinu yé né gakó. Rə̀ m'a yə̀ ń nə̀bán rɛ́ yó twéé twéé, mùnì ga n lwar Cinu pùbùlə̀ né pár Esərayɛl lyì byǎ bɛ́ shò kwã nɛ́.³¹Rə̀myɛ́ kwã nɛ́, ǹ m'ǎ sɔ̃̀ kàmə̀zù-èdɔ̀lɔ̀ w vwĩ̀-zwə́lnə náncɛ y mà n zù ń kàmə̀zwǐ y kùr w mú ǹdə́ pyì-kur rə̀ j'a mɔ́rh námpùúli dúdú. ³²Bə̀ m'a ce byã è cəcəl ré w yó w yilə. Sə bə̀ m'a búl bə kwɛrhɛ bə sɔ̃̀ è byã y nyí rí e zə kwere mùnì ga è bə̀k'a kǎr gaga yé.³³Ǹ m'ǎ zə pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ń mə́ zò gərənəjé byǎ myaarhɛ ń cĩ́ kàmə̀zù-èdɔ̀lɔ̀ w tɛ̃́ sõ nyə́ né yó, ń kə́kɛ́lɛ́. Bə̀ m'a zə sánə́má lòmə̀ námpɔ́lsɛ bə m'e lwẽ̌ lwẽ̌ se dwã nɛ, bə kə́kɛ́lɛ́. ³⁴Sánə́má lòmə̀ né ǹdə́ gərənəjé byǎ bɛ́ m'a lwẽ̌ lwẽ̌ dwã nɛ èdù èdù rə m'e kə́kɛ́lɛ́ kàmə̀zù-èdɔ̀lɔ̀ w nyə́ né ne. ³⁵Aarɔ̃ mà n zù w ń gə tú ń la vwĩ̀-zwə́lnə tum rí tũ̌ yi ní. Bə̀ m'a nyɛ̀ɛ̀ lòmə̀ né cələ né ń gə tú Cinu yé né ń jì y wẽ́ ráá ń gə shə́r Cinu yé né yi ní. Èta mɔ́, ń tá ń la cú yé.³⁶Rə̀myɛ́ kwã nɛ́, ǹ m'ǎ zə sánə́má mɔ̀bɔ́ mə̀ càn ń mə́ zùrhì ku ǹdə pùní ta, ń zɛ̃̀ ń kɛ̃ ò yó ǹdə bə̀ gə́ y'a kɛ̃ zhə̀n-pɔ ku yó né: «Bə̀ pɔ Cinu ni», ³⁷ǹ m'ǎ lyẽ w yó-bɔrɔ́ w nɛ, yó-bɔrɔ́ w yé y wə, ǹdə́ kàmə̀jɛ̃̀ námpùlí. ³⁸Ò m'a lyẽ Aarɔ̃ cíl rí ne mùnì ga n ŋwɛ̀nɛ́ n zhĩ dwə́ə́re tɛ̀bɛ́ Esərayɛl lyì byǎ bɛ́ wɛ̀rhɛ́ wẽ̀ ré tɛ̀bɛ́ rə̀ wɔ́ Yi nyǎn mɔ́ ǹdə́ bə̀ pansɛ́ shɛ̀bɛ́ gakó bə̀ tɛnɛ bə pə Cinu ni mú shò kwã nɛ́ mɔ́. Ń mà n já ń nə́ ń lyẽ w ń cíl rí ni twéé gakó mùnì ga Cinu zwẽ pansɛ́ sə̀myɛ́ mɔ́.³⁹Rə̀myɛ́ kwã nɛ́, ǹ m'ǎ zò lɛ̃̌ kàmə̀zù-pɔ́lɛ́ yá, ń súlí ń sɔ̃̀ lɛ̃̌ yó-bɔrɔ́ ǹdə́ cã̌-tɔ̀nɔ̀; rə̀myɛ́ mɔ́ m'a yə̀ lò mɔ̀bɔ́ ń yě tum rí rə̀myɛ́ yé shò mó tum.⁴⁰Ǹ m'ǎ sɔ̃̀ kàmə̀zù-pɔ́lsɛ ǹdə́ cã̌-tàndɛ ń pə Aarɔ̃ byǎ bɛ́ nɛ; rə̀myɛ́ kwã nɛ́, ǹ m'ǎ súlí ń sɔ̃̀ yə́-púr ń pə bɛ, rə̀ yə̀ zùwə́ ǹdə́ pyɛ̀lɛ̀ myaarhɛ. ⁴¹Ǹ m'ǎ zù Aarɔ̃ ǹdə́ ń byǎ bɛ́ bə̀ gàndɛ́, ń ló nwə̃̌ y bə̀ yó wə, ń zɛ̃̀ ń pyi bi tum rí. Wɔ́ èta ǹ m'ǎ cír bi ní bə m'e twĩ̀ à vwĩ̀ rí zwə́l tum rí.⁴²Nyal lɛ̃̌ jar ń pə bɛ bə m'e círhí bə̀ cìnə̀, bə̀ bə̀k'a nə bə̀ cə̀-lwè y yé. Jar rɛ́ m'a zhì bə̀ cěsé ne rə yí bə̀ cə̃́ né. ⁴³Aarɔ̃ ǹdə́ ń byǎ bɛ́ m'a ce re, bə̀ gə tú bə̀ la dwã-joló kòrhó w wẽ́ zú ráá bə̀ gə tú bə̀ bàn vwĩ̀-jùlú w nyí ni, Yi jàà y wẽ́, vwĩ̀-zwə́lnə tum rí tũ̌ yilə, mùnì ga bə̀ bə̀k'a pyà dóó bə pə bə̀ cìn ni bə zɛ̃̀ bə cì yé. Wɔ́ nyí rə̀ m'à j'â ŋwɛ́nɛ́ twéé twéé Aarɔ̃ ǹdə́ ń byǎ bɛ́ yilə.

¹Nyǐ ǹ gə́ m'ǎ wɛ̀rhɛ́ nɛ́ ń mə́ ce Aarɔ̃ ǹdə́ ń byǎ bɛ́ yə̀ vwĩ̀-zwə́lnə bə̀ n'ê twĩ̀ bə̀ pɛ nɛ mɔ́: zə nə̀-bya ǹdə́ pyì-byərh sə̀lyè kaka bə sɛ zhe mó, ²rə̀myɛ́ kwã nɛ́, zə bə̀lɛ́ mún ń mə́ wɛ̀rhɛ́ búrú ò yə̀ sã̀-nə̀byẽ̌ ce ǹdə́ búúri bə̀ zə nwə̃̌ bə m'e ywə́rh rə̀ mún mú rə̀ yə̀ sã̀-nə̀byẽ̌ ce e súlí ŋwǎmsɛ sə̀ yə̀ sã̀-nə̀byẽ̌ ce bə̀ zhɛ́rhɛ́ nwə̃̌ sə̀ yó.³Ǹ m'ǎ ce re sǝ́yǎ wẽ́, ń zɛ̃̀ ń kwè sə́yǎ y ń tó dwã ǹdə́ nə̀-bya y ǹdə́ pyì-byesé sə̀lyè y ne ń vò ń pə Cinu ni. ⁴Ǹ m'ǎ zə Aarɔ̃ ǹdə́ ń byǎ bɛ́ ń mə́ vò dwã-joló kòrhó nyí rí ni, ń shɛ bɛ nɛ̃̌ mɔ́.⁵Ǹ m'ǎ zɛ̃̀ ń kwè gàndɛ́ ń zù Aarɔ̃ nɛ: kàmə̀zù-pɔ́lɛ́ y ǹdə́ kàmə̀zù-èdɔ̀lɔ̀ w ǹdə́ vwĩ̀-zwə́lnə náncɛ kàmə̀zwǐ y ǹdə́ nə̀bán yó kàmə̀jɛ̃̀ yá, ń zɛ̃̀ ń zə vwĩ̀-zwə́lnə náncɛ y kàmə̀zwǐ y lyẽẽ́sé ń lyẽ. ⁶Ǹ m'ǎ zɛ̃̀ ń kwè yó-bɔrɔ́ w ń cĩ́ ń yó wə, ń súlí ń cĩ́ myɔrhɔ w ò n'ô byili bə̀ bə̀ pɔ mɔ Yi ní mú yó-bɔrɔ́ w yó. ⁷Rə̀myɛ́ kwã nɛ́, ǹ m'ǎ kwè nwə̃̌ y bə̀ la ń yó ló bə m'e byili bə̀ bə̀ cír mu mú ń ló ń yó w yó ń mə́ cír mu.⁸Ǹ m'ǎ zɛ̃̀ ń ce Aarɔ̃ byǎ bɛ́ bwəlse, ń zù bi bə̀ kàmə̀zù-pɔ́lsɛ́, ⁹ń lyẽ Aarɔ̃ ǹdə́ bə̀myɛ́ ga cã̌-tàndɛ́ bə̀ cə̌rh ne, ń pú bi bə̀ yə́-púr rí; kɔn zhì dɛ̃ rɛ́ rə̀myɛ́ mɔ́, bə̀ m'a cìní vwĩ̀-zwə́lnə tum rí, wɔ́ nyí rə̀ m'à j'â ŋwɛ́nɛ́ gaga yilə. Ǹ m'ǎ pə tum rí ŋwɔ̀nɔ́ w Aarɔ̃ ǹdə́ ń byǎ bɛ́ nɛ.¹⁰Ǹ m'ǎ zə nə̀-bya y ń bə̀ dwã-joló kòrhó w nyí rí ni; Aarɔ̃ ǹdə́ ń byǎ bɛ́ m'a cĩ́ bə̀ jɛ̀rh nə̀-bya y yó w yó. ¹¹Ǹ m'ǎ zɛ̃̀ ń zwə́l y Cinu yé né, dwã-joló kòrhó w nyí rí ni.¹²Ǹ m'ǎ kwɛ̃́ nə̀-bya y jal mɔ́ kə̀kàlà ń mɔ́rh ǹ jə̀fɔ́lɛ́ nɛ́ ń mə́ cĩ́ cĩ́ mu vwĩ̀-jùlú w nyimi ní yó. Rə̀myɛ́ kwã nɛ́, ǹ m'ǎ ló jal mɔ́ kùr ré vwĩ̀-jùlú w kùr wə. ¹³Ǹ m'ǎ vùr è wu lyur rí nwǐsí gakó ǹd'ê cɛ̃ rɛ́ ǹdə́ ocə̀-pwala nɛ́ nə̀lyè y ǹdə́ nwǐsí sə̀ dɛ̃ rɛ mɔ́ ń ji myǐn vwĩ̀-jùlú w yó. ¹⁴Sə ǹ m'ǎ du zulə́ jàà y w ń vò ń ji nə̀-bya y nàmá bɛ́ ǹd'ê tɔ̀nɔ̀ w ǹd'ê lyur rí myǐn. Rə̀myɛ́ mɔ́ wɔ́ yə̀-bəlɔ̀lɔ́ w sǔbri nɔ vwĩ̀.¹⁵Rə̀myɛ́ kwã nɛ́, ǹ m'ǎ zə pyì-bya y nã́yə́ə́ y ń bà, Aarɔ̃ ǹdə́ ń byǎ bɛ́ m'a cĩ́ bə̀ jɛ̀rh è yó w yó. ¹⁶Ǹ m'ǎ zɛ̃̀ ń zwə́l y ń kwɛ̃́ è jal mɔ́ ń zhɛ́rhɛ́ vwĩ̀-jùlú w cã̌ y nɛ ń kə́kɛ́lɛ́. ¹⁷Ǹ m'ǎ põ̀ yə, ń pyir y nǎm nǎm, ń súlí ń shɛ̀rh è wu lyur rí ǹdə́ è nə̀-gwěsé ń ló nàmá bɛ́ ǹdə́ yó w yó. ¹⁸Ǹ m'ǎ ji pyì-bya y námpúm myǐn vwĩ̀-jùlú w yó. Rə̀myɛ́ mɔ́ wɔ́ vwĩ̀ námpúm cɛ̃́ɛ̃́ Cinu yilə, rə̀ wɔ́ vwĩ̀ rí tɛ̀bɛ́ rə̀ kɔn gakó n'ê jí myǐn mú, lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́ Cinu yilə.¹⁹Rə̀myɛ́ kwã nɛ́, ǹ m'ǎ zə pyì-byərh sə̀lyè nyǎ y ń bà, Aarɔ̃ ǹdə́ ń byǎ bɛ́ m'a cĩ́ bə̀ jɛ̀rh è yó w yó. ²⁰Ǹ m'ǎ zɛ̃̀ ń zwə́l y ń kwɛ̃́ è jal mɔ́ kə̀kàlà ń cĩ́ cĩ́ Aarɔ̃ ǹdə́ ń byǎ bɛ́ jə̀-jĩ́ zhã̌ nɛ́ ǹdə́ bə̀ jə̀-jĩ́ jə̀fɔ́-byəəré ǹdə́ bə̀ jə̀-jĩ́ nə̀fɔ́-byəəré yó; ǹ m'ǎ zɛ̃̀ ń zhɛ́rhɛ́ jal mɔ́ kùr ré vwĩ̀-jùlú w cã̌ y nɛ ń kə́kɛ́lɛ́.²¹Ǹ m'ǎ twərh jal mɔ́ mɔ̀bɔ́ mə̀ wɔ vwĩ̀-jùlú w yó mó námpɔ́lɛ́ ǹdə́ nwə̃̌ y bə̀ n'ê lwé lyì bí yó bə̀ m'ê cír be mó námpɔ́lɛ́, ń zhɛ́rhɛ́ Aarɔ̃ ǹdə́ ń gàndɛ́ e súlí ń byǎ bɛ́ ǹdə́ bə̀ gàndɛ́ ga yó, èta Aarɔ̃ ǹdə́ ń gàndɛ́ e súlí ń byǎ bɛ́ ǹdə́ bə̀ gàndɛ́ ga m'a yə̀ àmyɛ́ Cinu ni bə̀ pɔ bɛ.²²Pyì-byərh sə̀lyè nyǎ y vwĩ̀ rí m'a yə̀ vwĩ̀-zwə́lnə bé tum rí kùr-jirə́ y vwĩ̀ rí. Ǹ m'ǎ kwè pyì-bya y wẽ̀ ré rə̀ zhe nwǐsí mú, nə̀byíl ré ǹdə́ wu lyur rí nwǐsí ǹdə́ cɛ̃ rɛ́ ǹdə́ ocə̀-pwala nɛ́ ǹdə́ nə̀ nwǐsí e súlí kùr-cí rí; ²³ǹ m'ǎ súlí ń vùr búúrí rə̀ yə̀ sã̀-nə̀byẽ̌ ce mó sə́yǎ y è cĩ́ à yé né mó wẽ́, búrú nánjújúnú òdù ǹdə́ búrú bə̀ ju ǹdə́ nwə̃̌ òdù e súlí ŋwɛ̀mɛ́ èdù.²⁴Ǹ m'ǎ kwè rə̀ gakó ń ce Aarɔ̃ ǹdə́ ń byǎ bɛ́ jɔ̃̀ w ń ce bə pɛ̃ rɛ ǹdə bə̀ gə́ mə̌ sə bə wɛ̀rhɛ́ nɛ́ bə m'e pə pɛnɛ́ Cinu yé né mó né. ²⁵Ǹ m'ǎ k'á zwẽ re bə̀ jɔ̃̀ w ń súlí vwĩ̀ námpúm cɛ̃́ɛ̃́ rɛ́ kɔn rɛ́ nɛ ń ji myǐn vwĩ̀-jùlú w yó, rə yə̀ lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ Cinu yé né. Rə̀ m'a yə̀ vwĩ̀ rí tɛ̀bɛ́ rə̀ kɔn gakó n'ê jí myǐn Cinu yilə.²⁶Ǹ m'ǎ kwè Aarɔ̃ pyì-bya y bə̀ zwə́l bə m'e pɔ̃ ŋwɔ̀nɔ́ w nyɛ̀l rɛ́ ń pə Cinu ni ǹdə bə̀ gə́ mə̌ sə bə wɛ̀rhɛ́ nɛ́ bə m'e pɔ̃ rɛ nɛ́. Wɔ́ rə̀myɛ́ rə̀ m'a yə̀ ǹ cəl ré. ²⁷Ǹ m'ǎ pə Aarɔ̃ ǹdə́ ń byǎ bɛ́ pyì-bya y bə̀ zwə́l bə m'e pə bɛ ŋwɔ̀nɔ́ w mɔ́ nyɛ̀l rɛ́ bə̀ y'à pɔ Yi ni mú ǹdə́ kùr-cí rí bə̀ y'à vùr mú Cinu ni. ²⁸Rə̀myɛ́ m'a yə̀ kɔn rɛ́ tɛ̀bɛ́ Esərayɛl lyì byǎ bɛ́ mə̌ dwã sə bə̀ j'â n'ê wɛ̀rhɛ́ Aarɔ̃ ǹdə́ ń byǎ bɛ́ yil gaga yilə, bə̀ rə̀ wɔ́ jɛ̃̀-jirə́ sə rə̀myɛ́ m'a j'â yə̀ Esərayɛl lyì byǎ bɛ́ jɛ̃̀-jirə́ bə̀ n'ê pɛ bə̀ yə̀-zùlə́ vwə̃̀ né yó: rə̀ m'a yə̀ bə̀ jɛ̃̀-jirə́ bə̀ n'ê pɛ Cinu ni.²⁹Aarɔ̃ cu mú kwã nɛ́, bə̀ m'a pə ń vwĩ̀ rí zwə́l tum rí gàndɛ́ ń nɛ̀mɛ́ nɛ́ nɛ bə zù, dɛ̃ rɛ́ tɛ̀bɛ́ bə̀ la nwə̃̌ y bə̀ yó w ló bə m'e cír bi, sə bə súlí bə pə bɛ ŋwɔ̀nɔ́ w mɔ́. ³⁰Ń byǎ bɛ́ mə̀dù y mɔ̀bɔ́ ń la mɔ pú n yə̀ vwĩ̀-zwə́lnə, n zù dwã-joló w kòrhó w w n mə n twĩ̀ vwĩ̀-zwə́lnə tum rí còrhó-jì y w mú, mà n zù ri dwã nyàlpyɛ̀.³¹Ǹ m'ǎ kwè pyì-bya y bə̀ zwə́l bə m'e pə ŋwɔ̀nɔ́ w mɔ́ nàmá bɛ́ ń pə bə shɛ̃̀ jàà y kɛ̀bɛ́ bə̀ vùr rə̀myɛ́ mɔ́ yil mú wẽ́. ³²Aarɔ̃ ǹdə́ ń byǎ bɛ́ m'a zhì dwã-joló kòrhó w étwí-ènyí rí w bə m'e dɔ̃̀ pyì-bya y nàmá bɛ́ ǹdə́ búrú w ò dàl sə́yǎ y w mɔ́. ³³Bə̀ m'a dɔ̃̀ kɔn rɛ́ tɛ̀bɛ́ bə̀ zə bə m'e lwə̀l sǔbri mú, bə̀ gə tú bə̀ n'ê cír bi bə súlí bə̀ n'ê pɛ bɛ ŋwɔ̀nɔ́ w yi ní. Lò nánfò bə mə̌ sə n dɔ̃̀ rɛ yé, bə̀ bə̀ pɔ rɛ Yi ni. ³⁴È zɛ̃̀ nəkɔkɔ́lɛ́ yá, vwĩ̀ rí bə̀ zwə́l bə m'e pə ŋwɔ̀nɔ́ w nàmá bɛ́ ǹdə́ búrú w gə dàl, sə́ ji rə̀ kùr-dɛ̀lɛ̀ y myǐn. Lò bə̀ká n dɔ̃̀ rɛ yé, bə̀ wɔ́ Yi ni bə̀ pɔ rɛ.³⁵Wɔ́ èta ǹ m'ǎ wɛ̀rhɛ́ nɛ́ Aarɔ̃ ǹdə́ ń byǎ bɛ́ yilə, kɔn tó dwã ǹdə́ kɔn rɛ́ tɛ̀bɛ́ gakó à pɔ mɔ́ rə̀ nyí mú. Ǹ m'ǎ j'á kwè dwã nyàlpyɛ̀ ń mə́ pə bɛ ŋwɔ̀nɔ́ wá. ³⁶Dɛ̃ gakó, ǹ m'ǎ zwə́l nə̀-bya vwĩ̀ yə̀-bəlwàálɛ́ sǔbri nɔ yilə; ǹ m'ǎ zwə́l vwĩ̀ rí kɔn tó dwã ǹdə bə̀ gə́ n'ê wɛ̀rhɛ́ nɛ́ sǔbri pɔ yi ní mú vwĩ̀-jùlú w yó ń mə́ vùr ò jìmdí, ń zɛ̃̀ ń súlí ń ló nwə̃̌ ò yó ń mə́ pə w Cinu ni. ³⁷Ǹ m'a twĩ̀ vwĩ̀-jùlú w jìmdí vǔr tũ̀twĩ̀ĩ̀ rí rə̀myɛ́ mɔ́ myɛ ń súlí ń pə w Yi ni dwã nyàlpyɛ̀ wẽ́: èta vwĩ̀-jùlú w m'a jǐrh Yi dúdú nyɔ̃̌, kɔn rɛ́ tɛ̀bɛ́ rə̀ m'a dwə̀rh vwĩ̀-jùlú w myɛ m'a jǐrh Yi nyǎn.³⁸Súlí nyǐ kɔn rɛ́ tɛ̀bɛ́ ǹ la vwĩ̀-jùlú w yó zwə́l mó: pyì-bwǎlsɛ sə̀lyè sə̀ zhe byin rə̀dù rə̀dù, dɛ̃ gakó, twéé twéé yilə. ³⁹Ǹ m'ǎ zwə́l pyì-bwɛ̀lɛ́ èdù y nəkɔkɔ́lɛ́ nɛ, ń zwə́l è dõ mó cɛ y gə tú è n'ê byíbyílí yi ní.⁴⁰Ǹ m'ǎ súlí mún cəə́le rə̀tɔ̀ mə̀ ywə́rh ǹdə́ nwə̃̌ kaka yə̀ y gùlí lyítər ǹdə́ fwã́ ǹdə́ də̀vɛ̃́ bə̀ la tɛ̃́ ló bə pə Cinu ni lyítər ǹdə́ fwã́ pyì-bwɛ̀lɛ́ nã́yə́ə́ y ne.⁴¹Ǹ m'ǎ zwə́l pyì-bwǎlsɛ́ sə̀lyè nyǎ y cɛ y gə tú è n'ê byíbyílí yi ní, ń súlí mún cəə́le rə̀tɔ̀ mə̀ ywə́rh ǹdə́ nwə̃̌ kaka yə̀ y gùlí lyítər ǹdə́ fwã́ ǹdə́ də̀vɛ̃́ lyítər ǹdə́ fwã́ bə̀ la tɛ̃́ ló bə pə Cinu ni ǹdə nəkɔkɔ́lɛ́ y ta: rə̀ m'a yə̀ lwẽ́ nã́nyə̀nyɛ̀lɛ́ rə̀ n'ê swé lyim tɛ̃́, vwĩ̀ tɛ̀bɛ́ rə̀ kɔn gakó jú myǐn Cinu yilə. ⁴²Rə̀myɛ́ mɔ́ m'a j'a yə̀ twéé twéé vwĩ̀ námpúm cɛ̃́ɛ̃́ rɛ́ á m'ǎ n'á zwə́l byin byin gakó, dwã-joló w kòrhó w étwí-ènyí rí wə, Cinu yé né. Wɔ́ gàà à m'a jəl ába nɛ́ a m'a zɔ̀m ǹdə́ mɔ́ nɛ́.⁴³À m'a jəl Esərayɛl lyì byǎ bɛ́ jàà y èmyɛ́ wẽ́, sə à còrhó w m'a ce e jǐrh àmyɛ́ jàà. ⁴⁴À m'a ce dwã-joló kòrhó w ǹdə́ vwĩ̀-jùlú w jǐrh àmyɛ́ nyǎn. À m'a cír Aarɔ̃ ǹdə́ ń byǎ bɛ́ bə twĩ̀ à vwĩ̀ rí zwə́l tum rí.⁴⁵À m'a yə̀ Esərayɛl lyì byǎ bɛ́ cəcəl wə, sə à m'a yə̀ bə̀ Yi. ⁴⁶Bə̀ m'a lwar bə̀ wɔ́ àmyɛ́ Cinu, à ce bə shə́r Ezhibti tənà y w mùnì a yə̀ bə̀ cəcəl w mó, à wɔ́ bə̀ Yi rí. Wɔ́ àmyɛ́ Cinu à wɔ́ bə̀ Yi rí.

¹Rə̀myɛ́ kwã nɛ́, ǹ m'ǎ fwar vwĩ̀-jùlú ǹdə́ ákáshá dɔ̌ wẽ̀ ré rə̀ lwẽ́ nã́nyə̀nyɛ̀lɛ́ myǐn ju yilə. ²Ò dwɛ̀lɛ̀ rɛ́ m'a yə̀ jə̀-tórhó yírh rə̀dù, ò wɛ̃̀ rɛ́ yə̀ jə̀-tórhó yírh rə̀dù, ò sarha nɛ́ nə̀na y ga dwɛ̀lɛ̀ rɛ́ m'a mɛrhɛ dwã; ò dɛ̃̌-zhìyə́ y m'a yə̀ jə̀-tórhó yírhə́ nə̀lyè. Ǹ m'ǎ ce ò nyimi ní dɛ̃ w nə yə̀ kɔn rə̀dù ǹdə́ wa.³Ǹ m'ǎ yə̌l sánə́má mɔ̀bɔ́ mə̀ càn ń mə́ fwàl ò dɛ̃̌ yé y ǹd'ô sarha nɛ́ ń kə́kɛ́lɛ́, e súlí ò nyimi ní; ǹ m'ǎ zə sánə́má ń cĩ́ nà ń mə́ kə́kɛ́lɛ́ ò cã̌ yá. ⁴Ǹ m'ǎ lù sánə́má cìbyǔr rə̀lyè ń ce vwĩ̀-jùlú w sarha nɛ́ nə̀lyè y ne, nà y ǹ cĩ́ ǹdə́ sánə́má mɔ́ kùr wə, bə̀ la də̀-byǎ bɛ́ rə̀ wẽ́ co bə̀ m'ê zhĩ vwĩ̀-jùlú wə́.⁵Ǹ m'ǎ zə ákáshá dɔ̌ ń mə́ sə̀ də̀-byǎ bɛ́ ń zɛ̃̀ ń yə̌l sánə́má ń mə́ fwàl bɛ. ⁶Ǹ m'ǎ cĩ́ vwĩ̀-jùlú w gɔ̀nɔ̀ w ò n'ô círhí dɔbrɛ kùlkṍ w dɔbrɛ́ nyə́ né bwə̀lsé wɔ ò wẽ́ mó yé y wə; nyí-byǐ rí rə̀ ŋwɛ́nɛ́ kùlkṍ w yó mó yé né, à gə́ la mɔ́ jəl mə̀gã̌ mɔ́.⁷Aarɔ̃ mà n ji wẽ̀ ré rə̀ lwẽ́ nã́nyə̀nyɛ̀lɛ́ mɔ́ myǐn gàà. Ń mà n ji ri myǐn nəkɔkɔ́lɛ́ gakó ń gə tú ń la pàntámsɛ́ kɔrhɔ yi ní. ⁸Aarɔ̃ gə tú ń la pàntámsɛ́ ju cɛ y gə tú è n'ê byíbyílí yi ní myɛ, ń mà n súlí n ji wẽ̀ ré rə̀ lwẽ́ nã́nyə̀nyɛ̀lɛ́ myɛ myǐn. Lwẽ́ nã́nyə̀nyɛ̀lɛ́ èmyɛ́ mɔ́ m'à j'â ŋwɛ́nɛ́ twéé twéé Cinu yé né, byin byin gakó. ⁹Á t'á la wẽ̀ tɛ̌ tɛ̌ rə̀ lwẽ́ nã́nyə̀nyɛ̀lɛ́ myǐn ju vwĩ̀-jùlú w yó yé, á t'á la vwĩ̀ námpúm cɛ̃́ɛ̃́ zwə́l ò yó yé, á t'á la jíjí byǎ cṹ ò yó vwĩ̀ kɔn yil yé, á t'á la də̀vɛ̃́ ló ò yó yé.¹⁰Sə twər rə̀dù byin wẽ́, Aarɔ̃ mà n zwə́l jìmdi vǔr vwĩ̀ rí vwĩ̀-jùlú nyimi ní yó. Ń mà n zə vwĩ̀ rí bə̀ m'ê lwə̀l sǔbri twər rə̀dù byin gakó wẽ́ jal mɔ́ n mə n vùr ò jìmdí, byin byin gakó. Vwĩ̀-jùlú w òmyɛ́ m'a yə̀ Cinu dúdú nyɔ̃̌.¹¹Cinu kə́ n wɔ̀ Muyiisi ni: ¹²«Ǹ gə tú ǹ nə́ ǹ gàl Esərayɛl lyì byǎ bɛ́ ǹ la ń mə́ lwar bə̀ yó w yi ní, bə̀ mə̀dù gakó mà n pə ń myə̌l ré kwǎndɛ; èta màbyóó òdù ga t'â la bə zal yé. ¹³Lò mɔ̀bɔ́ bə̀ la gál mɔ́ mà n pə sə̀byì-kùlì dùmì rí fwã́, ǹdə́ bə̀ gə jə̀ə̀le ǹdə́ còrhó-jì sə̀byì-kùlì y è dùmì rí wɔ́ gə̀rámmɛbá bə̀nu mú. Səbyì-kùlì dùmì rí fwã́ y m'a yə̀ kɔn rɛ́ tɛ̀bɛ́ bə̀ n'ê pɛ Cinu ni. ¹⁴Lò mɔ̀bɔ́ gakó bə̀ la gál, ń zhe byinə shí-èlyè ráá ń lyɛ̃ byinə shí-èlyè, ń mà n pə Cinu kɔn rɛ́.¹⁵È gə wɔ́ kɔn rɛ́ tɛ̀bɛ́ á la Cinu ni pɔ á myə̌l-kwǎndɛ́ yil mú, lò mɔ̀bɔ́ ń wɔ́ nə̀cɛ̀m-bal tá ń la pɔ kɔn dwini sə̀byì-kùlì fwã́ y yé, lò mɔ̀bɔ́ ń wɔ́ nə̀mɔ̀ myɛ tá ń la pɔ kɔn mùrì sə̀byì-kùlì fwã́ y yé. ¹⁶Ǹ m'ǎ zwẽ myə̌l-kwǎndɛ́ Esərayɛl lyì byǎ bɛ́ sõ dwã-joló kòrhó w tum rí yilə. Sə rə̀myɛ́ mɔ́ m'a yə̀ Esərayɛl lyì byǎ bɛ́ myə̌l ré zõ kwǎndɛ́ yò lyǐrh Cinu yé né.»¹⁷Cinu kə́ n wɔ̀ Muyiisi ni: ¹⁸«Ǹ m'ǎ zùrhì kàmmɔ zhǎ, sə ku w kɔ̀bɔ́ è kùr rí cĩ́ ò yó mó myɛ zùrhì ndə́ kàmmɔ, yala sám yilə; ǹ m'ǎ cĩ́ y dwã-joló kòrhó w ǹdə́ vwĩ̀-jùlú w bwə̌l mó wə, ń zɛ̃̀ ń ce nɛ̃̌ è wẽ́.¹⁹Aarɔ̃ ǹdə́ ń byǎ bɛ́ m'à n'ê sàm bə̀ jɛ̀sɛ́ ǹdə́ bə̀ nèsé né gàà. ²⁰Bə̀ gə tú bə̀ la dwã-joló kòrhó w zú bə̀ m'a zhə́zhɛ́lɛ́ bə̀ cìn ǹdə́ nɛ̃̌ mɔ́ mùnì ga bə̀ bə̀k'a cì yé. Bə̀ gə la vwĩ̀-jùlú w nyí ni bwəlse bə̀ la m'e twĩ̀ bə̀ tum rí, ráá bə̀ gə la kɔn rɛ́ tɛ̀bɛ́ rə̀ gakó mə̌ sə rə jí myǐn mú myǐn ju Cinu yil mú, ²¹bə̀ m'a sã̀ bə̀ jɛ̀sɛ́ ǹdə́ bə̀ nèsé mùnì bə̀ bə̀k'a cì yé. Rə̀myɛ́ mɔ́ m'a yə̀ nyí rə̀ m'à j'â ŋwɛ́nɛ́, Aarɔ̃ ǹdə́ ń nɛ̀mɛ́ nɛ́ yilə, byin byin gakó.»²²Cinu kə́ n wɔ̀ Muyiisi ni: ²³Ǹ m'ǎ súlí ń pyà nǔrh sə̀ lwẽ́ ré j'â wɔ́ nã́nyə̀nyɛ̀lɛ́ dɛ̃́dɛ̃́: myííria è yə̀ zal cəə́le rə̀nu; ǹdə́ shənamɔɔmɛb è lwẽ́ nã́nyə̀nyɛ̀lɛ́ cəə́le rə̀lyè ǹdə́ fwã́, ǹdə́ kanɛlc è lwẽ́ nã́nyə̀nyɛ̀lɛ́ cəə́le rə̀lyè ǹdə́ fwã́, ²⁴ǹdə́ káásɛd cəə́le rə̀nu, bə̀ gə la mɔrhɔ ǹdə́ còrhó-jì y mɔrhɔ ku wə́, e súlí olyivyé nwə̃̌ lyítərə bwə̀ldù. ²⁵Ǹ m'ǎ gùlí ri dwã nɛ ń mə́ wɛ̀rhɛ́ nwə̃̌ y kɛ̀bɛ́ bə̀ m'ê pɛ Yi tum rí tũ̌ ŋwɔ̀nɔ́ w mɔ́. Rə̀myɛ́ mɔ́ m'a yə̀ lò mɔ̀bɔ́ ń yě tum rí yé shó mó tum. È m'a yə̀ nwə̃̌ y kɛ̀bɛ́ bə̀ m'ê pɛ Yi tum rí tũ̌ ŋwɔ̀nɔ́ w mɔ́.²⁶Ǹ m'ǎ byèè y dwã-joló kòrhó w yó ǹdə́ nyə́ né bwə̀lsé kùlkṍ w yó, ²⁷ǹdə́ tabəlɛ́ y ǹd'ê wẽ̀ ré gakó yó ǹdə́ ku w kɔ̀bɔ́ bə̀ n'ê cĩ́ pàntámsɛ́ ò yó mó yó ǹd'ô wẽ̀ ré yó ǹdə́ vwĩ̀-jùlú w bə̀ n'ê ji wẽ̀ ré rə̀ lwẽ́ nã́nyə̀nyɛ̀lɛ́ y ò yó mó yó ²⁸ǹdə́ vwə̃̀ námpúmə́ cɛ̃́ɛ̃́ nɛ́ jùlú w yó ǹd'ômyɛ wẽ̀ ré gakó yó ǹdə́ zhǎ y yó e súlí ku w kɔ̀bɔ́ è kùr ré cĩ́ ò yó mó yó ń pə Cinu ni.²⁹Ǹ m'ǎ pə rɛ Cinu ni, sə rə̀ m'a jǐrh Cinu dúdú nyǎn; kɔn rɛ́ tɛ̀bɛ́ rə̀ la wẽ̀ ré rə̀myɛ́ mɔ́ dwə̀rh rə̀myɛ́ kwã nɛ́ m'a yə̀ Cinu nyǎn. ³⁰Ǹ m'ǎ twərh nwə̃̌ y Aarɔ̃ ǹdə́ ń byǎ bɛ́ myɛ yó wə, ń zɛ̃̀ ń ce bə twĩ̀ à vwĩ̀ rí zwə́l mó tum rí. ³¹Rə̀myɛ́ kwã nɛ́, ǹ m'ǎ zɛ̃̀ ń wɔ̀ Esərayɛl lyì byǎ bɛ́ nɛ: Nwə̃̌ y kɛ̀bɛ́ wɔ́ tum rí ŋwɔ̀nɔ́ w pɔ nwə̃̌ yə́; è m'à j'â ŋwɛ́nɛ́ byin byin gakó àmyɛ́ tum rí yilə.³²Lò mə̀dù ga tá ń la y tùr yé; á t'á la è dwí rí wɔ̀rhɔ́ myɔrhɔ yé, b'è wɔ́ Yi rə̀ cǐ yə, è m'a j'a yə̀ Yi rə̀ cǐ yə, ámyɛ̌ yilə. ³³Bə̀ m'a vùr lò mɔ̀bɔ́ ń wɛ̀rhɛ́ è dwí rí n zɛ̃̀ n twərh y lò nánfò yó, ń dwí rí wẽ́.³⁴Cinu kə́ n wɔ̀ Muyiisi ni: Pyǎ wẽ̀ tɛ̀bɛ́ rə̀ lwẽ́ wɔ́ nã́nyə̀nyɛ̀lɛ́: shətɔrákəsɛ ǹdə́ ámbərɛ ǹdə́ galəbanɔme è lwẽ́ nã́nyə̀nyɛ̀lɛ́ e súlí ãsã́ kaka yə̀ y gùlí, sə rə̀myɛ́ mɔ́ gakó mɛrhɛ dwã. ³⁵Ǹ m'ǎ zə rɛ ń gùlí dwã ń wɛ̀rhɛ́ kɔn rɛ́ tɛ̀bɛ́ rə̀ lwẽ́ wɔ́ nã́nyə̀nyɛ̀lɛ́, rə̀ co nə̀kwə̃̌, kaka yə̀ rɛ gùlí yé, Yi tum rí yilə; rə̀myɛ́ mɔ́ m'a yə̀ lò mɔ̀bɔ́ ń yě tum rí rə̀myɛ́ mɔ́ yé shò mó tum. ³⁶Ǹ m'ǎ vùr námpɔ́lɛ́ ń nɔ̀ gúmgúm ń vò ń cĩ́ dɔbrɛ nyə́ né bwə̀lsé yé né, dwã-joló kòrhó w wẽ́, à gə́ la mɔ́ jəl mə̀gã̌ mɔ́. Rə̀myɛ́ m'a yə̀ Yi dúdú nyǎn.³⁷Á t'á la wẽ̀ ré rə̀ lwẽ́ nã́nyə̀nyɛ̀lɛ́ ǹ la wɔ̀rhɔ́ mɔ́ dwí rí wɔ̀rhɔ́ á cìcì yil yé; rə̀ dwí rí m'a wɛ̀rhɛ́ Cinu dúdú yilə. ³⁸Bə̀ m'a vùr lò mɔ̀bɔ́ ń mà n tə̀ rə̀ lwẽ́ nã́nyə̀nyɛ̀lɛ́ y yil n wɛ̀rhɛ́ rə̀ dwí rí ń cìn yil mú, ń dwí rí wẽ́.

¹Cinu kə́ n wɔ̀ Muyiisi ni: ²«nyì wé! À cír Uri byǐ Bəsalɛl, Uuri nɔ̃̌ wá, Zhəda kwálá y lò,³a ce n sú ǹdə́ Yi Eshirhə y mùnì ga n zə lárma ǹdə́ surhə ǹdə́ lwar ǹdə́ tumə dwí gakó tũ̌ ŋwɔ̀nɔ́: ⁴ń wɔ̌ ń tɛ́rɛ́ ń wɛ̀rhɛ́ wẽ̀ rə̀ càn dɛ̃́dɛ̃́, ń wɔ̌ ń zùrhì sánə́má ǹdə́ sə̀byì-kùlì e súlí kàmmɔ wẽ̀, ⁵ń wɔ̌ ń sə̀l nə́kulə náàcɛ̀nà bə m'e cĩ́ bɔ́bwár wẽ̀, wẽ̀ ré yó, ń wɔ̌ ń sə̀l dǎr n súlí n twĩ̀ tumə dwí gakó.⁶À súlí a cír Ayəsamaakɛ byǐ Owɔləyaabɛ, Dan kwálá y lò, ń la n sɛ̃ mɔ. À co lárma bə̀ mə̀dù gakó wẽ́ mùnì ga bə wɛ̀rhɛ́ kɔn rɛ́ tɛ̀bɛ́ gakó à pɔ bɛ rə̀ nyí mú: ⁷dwã-joló kòrhó w ǹdə́ nyə́ né kùlkṍ w ǹdə́ kùlkṍ w nyí-byǐ rí ò yə́-pɛ̀lɛ́ w mɔ́ ǹdə́ kòrhó w wẽ̀ ré dwã bɛ́ gakó ⁸ǹdə́ tabəlɛ́ y ǹd'ê wẽ̀ ré ǹdə́ ku w bə̀ n'ê cĩ́ pàntámsɛ́ ò yó ò zùrhì ǹdə́ sánə́má mɔ̀bɔ́ mə̀ càn mɔ́ ǹd'ô wẽ̀ ré dwã bɛ́ gakó ǹdə́ vwĩ̀-jùlú w bə̀ n'ê ji wẽ̀ ré rə̀ lwẽ́ nã́nyə̀nyɛ̀lɛ́ y myǐn ò yó mó ⁹ǹdə́ vwə̃̀ námpúmə́ cɛ̃́ɛ̃́ nɛ́ vwĩ̀-jùlú w ǹd'ô wẽ̀ ré dwã bɛ́ gakó ǹdə́ zhǎ y ǹdə́ è ku w kɔ̀bɔ́ è kùr rí cĩ́ ò yó mó¹⁰ǹdə́ vwĩ̀ rí zwə́l tum rí gàndɛ́, Aarɔ̃ ǹdə́ ń byǎ bɛ́ m'a zù bə m'e twĩ̀ vwĩ̀ rí zwə́l tum rí mú ¹¹ǹdə́ nwə̃̌ y bə̀ m'ê pɛ Yi tum rí tũ̌ ŋwɔ̀nɔ́ w mɔ́ e súlí wẽ̀ ré rə̀ lwẽ́ nã́nyə̀nyɛ̀lɛ́ bə̀ mə̌ sə bə ji ri myǐn còrhó-jì y w mú. Bə̀ m'a wɛ̀rhɛ́ kɔn tó nyí rí tɛ̀bɛ́ à pɔ mɔ́ mɔ́ cìcì rə̀ kɔn gakó wẽ́.»¹²Cinu kə́ n wɔ̀ Muyiisi ni: ¹³«Wál Esərayɛl lyì byǎ bɛ́ nɛ: Á m'ǎ tó à shìrhə́ dwã nɛ́ nyí rí, bə̀ nə̀ wɔ́ myɔrhɔ w kɔ̀bɔ́ ò j'â ŋwɛ́nɛ́ àmyɛ́ ǹd'ámyɛ̌ cəcəl w gaga yilə, ò m'a ce bə lwar bə̀ wɔ́ àmyɛ́ Cinu à cír ába á wɔ́ à lyì. ¹⁴Á m'ǎ tó shìrhə́ dɛ̃ rɛ́ nyí rí, bə̀ rə̀ wɔ́ Yi dɛ̃. Bə̀ m'a gu lò mɔ̀bɔ́ ń yə̀ nyí rí ni tó mó. Bə̀ m'a vùr lò mɔ̀bɔ́ ń twĩ̀ tum dɛ̃ rɛ́ rə̀myɛ́ yù w mú ń dwí rí wẽ́. ¹⁵Lò gakó mà n twĩ̀ ń tumə né dwã nyə̀ldù y wẽ́, sə dwã nyàlpyɛ̀ dɛ̃ rɛ́ wɔ́ shìrhə́, shìrhə́ dɛ̃ rɛ́ rə̀ wɔ́ Cinu dɛ̃ rɛ́ mɔ́. Bə̀ m'a gu lò mɔ̀bɔ́ gakó ń twĩ̀ tum shìrhə́ dɛ̃ rɛ́ yù wə.¹⁶Esərayɛl lyì byǎ bɛ́ m'a tó shìrhə́ dɛ̃ rɛ́ nyí rí, bə ce shìrhə́ dɛ̃ rɛ́ yə̀ dɔbrɛ tɛ̀bɛ́ rə̀ m'à j'â ŋwɛ́nɛ́ gaga yil mú myɔrhɔ byin byin gakó. ¹⁷Dɛ̃ rɛ́ rə̀myɛ́ mɔ́ m'a yə̀ dɔbrɛ́ rə̀ lyẽ àmyɛ́ ǹdə́ Esərayɛl lyì byǎ bɛ́ dwã nɛ mɔ́ myɔrhɔ; zhə̀n ga, Cinu wɛ̀rhɛ́ dɛ̃̌ ǹdə́ cɛ dwã nyə̀ldù wẽ́, sə dwã nyàlpyɛ̀ dɛ̃ rɛ́ ń yə̀ tum twĩ̀ yé, ń yẽ̌ n shǐrh.»¹⁸Yi gə́ zɔ̀m ǹdə́ Muyiisi Sənəyi pyɔ̀ w yó rə zhɛ̀, rə̀ kwè nyə́ né rə̀ cìcì jɛ̃̀ y kɛ̃ nə́kulu bwə̀lsé sə̀lyè y yó mó rə pɔ̃.

¹Dwí rí púrí Muyiisi yà ń nə́ ń dɛnɛ ǹdə́ pyɔ̀ w yó shí n só tɛ̃́; rə bə̀ rə jòm dwã yó Aarɔ̃ yala nɛ, rə zɛ̃̀ rə wɔ̀ mɔ: «Zɛ̃̀ dɛ̃̌! Wɛ̀rhɛ́ yə ń pə nə́ba nə yə̀ nə́ yé né, bə̀ nə́ yə̀l kɔn rɛ́ tɛ̀bɛ́ rə̀ yú Muyiisi mú mɔ̀bɔ́ ń ce nə́ shə́r Ezhibti tənà y w mɔ́ nɛ yé.» ²Aarɔ̃ wɔ̀ bɛ: «Vǔr-nə sánə́má zhə̌-kɔ̀nà nɛ́ nə̀ wɔ á kana bɛ́ ǹdə́ á bala-byǎ bɛ́ ǹdə́ á kana-byǎ bɛ́ zhã̌ nɛ́ nɛ mɔ́ á b'ǎ pɛ̃.»³Dwí rí lyì bí púlə́púlə́ vùr sánə́má zhə̌-3 Dwí rí lyì bí púlə́púlə́ vùr sánə́má zhə̌-kɔ̀nà nɛ́ bə̀ y'à co bə̀ zhã̌ nɛ mɔ́, bə b'e pə Aarɔ̃ nɛ. ⁴Aarɔ̃ gə́ zwẽ sánə́má mɔ́ bə̀ jɔ̃̀ w kwã, ń yə̌l mo n ló fòrhó wẽ́, n mə n zùrhì nũ̌-bwə̀lə̀ èsã̌yùlú. Rə̀myɛ́ yó, Esərayɛl lyì byǎ bɛ́ búbwéé bə wɔ̀: «Esərayɛl lyì byǎ, nyǐ-nə á yə né nə̀ ce á shə́r Ezhibti tənà y w mɔ́!»⁵Aarɔ̃ gə́ nɔ rə̀myɛ́ mɔ́, ń lù vwĩ̀-jùlú, nũ̌-bwə̀lə̀ y èsã̌yùlú w yé né; rə̀myɛ́ kwã nɛ́, n zɛ̃̀ n bwə̀l n wɔ̀: «Nəkɔl wɔ́ címsi nánfɔ̀lɔ̀ Cinu yilə!» ⁶È zɛ̃̀ nəkɔkɔ́lɛ́ yá, bə̀ gə́ j'a zɛ̃̀ tɛ̃́, bə̀ zwə́l vwə̃̀ námpúmə́ cɛ̃́ɛ̃́, bə súlí bə zə yə̀-zùlə́ vwə̃̀ bə m'e bà; dwí rí jòm tɛ̃́ rə jí rə súlí rə nyɔ̀, rə zɛ̃̀ rə̀ n'ê dədala.⁷Rə̀myɛ́ yi ní, Cinu wə̀l Muyiisi ni: «Só tɛ̃́ làlà, bə̀ ǹ dwí rí ǹ ce rə shə́r Ezhibti tənà y w mɔ́ wɛ̀rhɛ́ yə̀-bəlɔ̀lɔ́ nánfɔ̀lɔ̀. ⁸Bə̀ yə̀ dɛ̃̀ bə m'e ywə̀r sɔ́má y à byili bi mú yó yé. Bə̀ zùrhì nũ̌-bwə̀lə̀ èsã̌yùlú, bə wùlì tɛ̃́ ò yé né bə m'e cèrhé wə, bə zwə́l vwə̃̀ bə pə w bə zɛ̃̀ bə wɔ̀: Esərayɛl lyì byǎ, nyǐ-nə á yə né nə̀ ce á shə́r Ezhibti tənà y w mɔ́.»⁹Sə rə̀myɛ́ yi ní, Cinu wə̀l Muyiisi ni: «À yě dwí rí tɛ̀bɛ́ gə́ wɔ́ nɛ́: rə̀ wɔ́ yó-kùùlì dúdú cìnə́! ¹⁰Rə̀myɛ́ ce yẽ̌ a nyǐ rə̀ na. À lyi-shùùrí m'a ce a ce rə jé tɛ̃́, sə à m'a ce ǹmyɛ́ jǐrh dwí nánjə̀jóló.» ¹¹Sə Muyiisi wə̀l Cinu ń Yi rí ni n mə n só rə̀ lyim tɛ̃́: «Cinu, byè yil ǹ nə m'ǎ ló ǹ lyi-shùùrí ǹ dwí rí tɛ̀bɛ́ ǹ ce rə shə́r Ezhibti tənà y w ǹdə́ jàn nánfɔ̀lɔ̀ w mɔ́, ǹdə́ ǹ jɛ̃̀ y jàn rɛ́ mɔ́ yó?¹²Byè yil ǹ nə m'ǎ ce Ezhibti lyì bí wɔ̀: ‹È wɔ́ bə̀ lwɛlɛ ń nə́ ń pyà n mə n ce bə shə́r nə́ tənà y wa, wɔ́ mùnì ga n gu bi pyàr rɛ́ wa, n ce bə jé tɛ̃́ lyə́m lyə́m cɛ y yó!› Só ǹ lyim rí rə̀ n'ê yì dɛ̃́dɛ̃́ mɔ́ tɛ̃́ sə́ yẽ̌ lwɛlɛ wɔ̀rhɔ́ ǹ dwí rí ni. ¹³Lyǐrh ǹ tùntùnnə Abəraam ǹdə́ Yəzakɛ e súlí Esərayɛl, ǹ yà ǹ zɔ ǹ cìcì yil ré ń mə́ bwəl be nyí mú yò. Ǹ wə̀l be: À m'a ce á dwí rí pù rə yə̀ nánjə̀jóló ǹdə cã̀mə́sɔ̌sɛ́ dɛ̃̌-yi w mú ta. Sə à m'a pə tənà y kɛ̀bɛ́ gakó à bwəl è nyí mú á nɛ̀mɛ́ nɛ́ nɛ, e yə̀ bə̀ cəl bə cìní y twéé twéé yilə.» ¹⁴Rə̀myɛ́ yó, Cinu já n yẽ̌ lwɛlɛ rɛ́ tɛ̀bɛ́ ń yà ń nə́ yǎl n wɛ̀rhɛ́ ń dwí rí ni mú ni.¹⁵Muyiisi shí pyɔ̀ w yó n kwɛ̃̀ n só tɛ̃́, ǹdə́ nyə́ né bwə̀lsé sə̀lyè y sə̀ yésé ga y'à kɛ̃ mɔ́ ń jɔ̃̀ wa; ¹⁶bwə̀lsé y'à wɔ́ Yi rə̀ sə̀l se, kəkɛ̃ɛ̃ rɛ́ myɛ y'à wɔ́ Yi kəkɛ̃ɛ̃ rɛ́ rə̀ kɛ̃ sə̀ yó.¹⁷Zhozwe gə́ nyɛ̀ɛ̀ dwí rí wu-nyɔ̃̀ búbwéésé, ń wə̀l Muyiisi ni: «Búlə́ búbwéése n'ê búbwéé zulə́ jàà y wa!» ¹⁸Sə Muyiisi lyár mɔ n wɔ̀: «È də̀ lyì bə̀ jú bɛlɛ myɛ nwíísi yé, è k'ê də̀ lyì byɛ̀bɛ́ bə̀ ŋwɛ̀nɛ́ búlə́ jàà w myɛ nwíísi yé, è wɔ́ lyì bə̀ n'ê nún bə̀ kwɛ̃́ dwã nyí ni nwíísi à nyɛ̌!»¹⁹Sə Muyiisi gə́ tú n bwəlse zulə́ jàà y w yi ní, ń nɔ nũ̌-bwə̀lə̀ y èsã̌yùlú wə́, ǹdə́ dwí rí myɛ rə̀ y'à n'ê sɛ, ń lyim j'a zɛ̃̀ rə̀ n'ê yì dɛ̃́dɛ̃́. N zhẽ̌ bwə̀lsé sə̀ y'à wɔ ń jɔ̃̀ w mɔ́ dɛ̃̌dɛ̃̌ n fwar tɛ̃́ sə bɔbwɛlɛ pyɔ̀ w nà y nɛ. ²⁰N kwè nũ̌-bwə̀lə̀ y dwí rí y'à zùrhì mú n ji myǐn, n zɛ̃̀ n kwè ò myìn-táfúlú w n nɔ̀ tɔ̀mɔ̀ gúmgúm, n zɛ̃̀ n kwè tɔ̀mɔ̀ w n ló nɛ̃̌ w n pə Esərayɛl lyì byǎ bɛ́ nɛ bə nyɔ̀.²¹Rə̀myɛ́ kwã nɛ́, Muyiisi bwə̀rh Aarɔ̃ n wɔ̀: «Bə̀kɔ́n dwí rí tɛ̀bɛ́ wɛ̀rhɛ́ mɔ́ ń mə́ vwɛ̃ yə̀-bəlɔ̀lɔ́ nánfɔ̀lɔ̀ w kɔ̀bɔ́ ń pə rɛ?» ²²Aarɔ̃ lyár mɔ n wɔ̀: «À n'â lwə̀l mó bə̀ ǹ lyim bə̀k'a zɛ̃̀ yé! Ǹ cìcì mú yě bə̀ dwí rí tɛ̀bɛ́ t'â dɛnɛ ǹdə́ lwɛlɛ wɔ̀rhɔ́ yé. ²³Rə̀ tú rə wɔ̀ nɛ: ‹Zùrhì yə ń pə nə́ba nə yə̀ nə́ yé né, bə̀ nə́ yə̀l kɔn dɛ̀bɛ́ rə̀ yú Muyiisi mú mɔ̀bɔ́ ń ce nə́ shə́r Ezhibti tənà y w mɔ́ nɛ yé.› ²⁴A zɛ̃̀ a bwə̀rh be a wɔ̀: ‹Mɔ̌ lò ń zhe sánə́má?› Bə zɛ̃̀ bə vùr mo bə̀ zhã̌ nɛ bə pɛ̃, a zə myǐn a yə̌l mo. Wɔ́ mə̀myɛ́ à m'a zùrhì nũ̌-bwə̀lə̀ y kɛ̀bɛ́.»²⁵Muyiisi púrí bə̀ Aarɔ̃ yà ń yẽ̌ dwí rí rə̀ y'à n'ê wɛ̀rhɛ́ rə̀ pùbùlə̀ mó ne, n ce rə̀ zwə̀ bé n'ê fulsi ri. ²⁶Rə̀myɛ́ yó, Muyiisi zhə̀l n zhì zulə́ jàà y bwə̀rə̀ y w n wɔ̀: «Lyì byɛ̀bɛ́ bə̀ só Cinu mú bə̀ bə zhì à kwã nɛ́!» Levyi kwálá y lyì bí gakó bə̀ bə zhì bə kə́kɛ́lɛ́ mɔ. ²⁷N wɔ̀ bɛ: «Nyǐ Cinu, Esərayɛl lyì byǎ bɛ́ Yi rí nyí rí: Lò gakó sə́ kwè ǹ búlə́ shù w ń lyẽ ǹ cí ni, tó-nə zulə́ jàà y étwí-ènyí étwí-ènyí gakó á k'á bwérhé, á gu á da-byǐ ráá á dɔwa ráá á jè-dõ!»²⁸Levyi kwálá y lyì bí wɛ̀rhɛ́ kɔn rɛ́ tɛ̀bɛ́ Muyiisi yà ń wə̀l be mó, sə lyì bí byɛ̀bɛ́ bə̀ gu dwí rí wẽ́ mó yú nunə mɔ̀ɔ̀rhɛ̀ rə̀tɔ̀ (3000). ²⁹Rə̀myɛ́ kwã nɛ́, Muyiisi wə̀l Levyi kwálá y lyì bí ni: «Zà dɛ̃ rɛ́, zwẽ-nə vwĩ̀-zwə́lnə tum rí ŋwɔ̀nɔ́ w Cinu nə́ ń pɛ ába, lò gakó gə́ gu ń byǐ ráá ń da-byǐ mú yilə; bə̀ Cinu cĩ́ bwəl á yó zà dɛ̃̀ rɛ́.»³⁰È zɛ̃̀ nəkɔkɔ́lɛ́ yá, Muyiisi wə̀l dwí rí ni: «Á wɛ̀rhɛ́ yə̀-bəlɔ̀lɔ́ nánfɔ̀lɔ̀, rə̀myɛ́ ce à m'a jì a vò Cinu sõ, dɛ̀ga, à m'a nə á yə̀-bəlɔ̀lɔ́ w sǔbri.» ³¹Muyiisi já n kə́ n kwɛ̃̀ n vò Cinu sõ, n yí n wɔ̀ mɔ: «nyì wé Cinu! Dwí rí tɛ̀bɛ́ wɛ̀rhɛ́ yə̀-bəlɔ̀lɔ́ nánfɔ̀lɔ̀; rə̀ zə sánə́má rə zùrhì yə rə̀ cìn yilə. ³²Sə à n'â lwə̀l mó èlǎsɛ̃́ bə̀ ǹ pə rɛ rə̀ yə̀-bəlɔ̀lɔ́ w sǔbri! È gə də̀ rə̀myɛ́, sə́ pɔ́pɔ̌ à yil ré ǹ kɛ̃ nyǔ mú sɛ́bɛ́ rɛ́ wẽ́ mó.»³³3 Cinu lyár mɔ n wɔ̀: «Wɔ́ lò mó mɔ̀bɔ́ ń dó ne mó yil ré à m'a pɔ́pɔ̌ à sɛ́bɛ́ rɛ́ wẽ́. ³⁴Zɛ̃̌ ń vò èlǎsɛ̃́, ń zə dwí rí ń mə́ vò jàà y kɛ̀bɛ́ à byili mú mú wə. À màlɛ́ka y m'a tó ǹ yé. Sə dɛ̃ rɛ́ tɛ̀bɛ́ à bàn còrhò-tum pɔ mɔ́, à m'a pə rɛ còrhò-tum rə̀ yə̀-bəlɔ̀lɔ́ w yilə.» ³⁵Zhə̀n ga, Cinu pɔ còrhò-tum dwí rí ni nũ̌-bwə̀lə̀ y rə̀ y'à zùrhì mú yilə, nũ̌-bwə̀lə̀ y kɛ̀bɛ́ Aarɔ̃ yà ń zùrhì mú.

¹Cinu pɔ nyí Muyiisi ni n wɔ̀: «Zhǐr jàà y kɛ̀bɛ́ wẽ́, ǹmyɛ́ ǹdə́ dwí rí ǹ ce rə shə́r Ezhibti tənà y w mɔ́, ń jì ń vò tənà y à bwəl è nyí Abəraam ǹdə́ Yəzakɛ ǹdə́ Zhakɔɔbɛ nɛ mɔ́ wa, a m'a wɔ̀: ‹Wɔ́ ǹ dwí rí ni à m'a pə ya.› ²À m'a twĩ̀ à màlɛ́ka y e yə̀ ǹ yé né, à m'a jì Kanaã lyì bí ǹdə́ Amɔrətəbá ǹdə́ Yititəbá ǹdə́ Pərəzhitəbá ǹdə́ Yivyitəbá e súlí Zhəbuusi lyì bí. ³Jíl ń vò tənà y yil ǹdə́ tùr n'ê dùr tɛ̃́ è wẽ́ mó wə. Sə àmyɛ́ cìcì t'â la á cəcəl w yál a m'a tó ába a vò yé, b'ǎ wɔ́ dwí tɛ̀bɛ́ rə̀ wɔ́ yó-kùùlì cìnə́, à m'a gurhi ába sɔ́má yó lyə́m lyə́m.»⁴Dwí rí nyɛ̀ɛ̀ Cinu lwɛlɛ nyí rí rə̀myɛ́ mɔ́, wu-zhùlù nánfɔ̀lɔ̀ zə rɛ; lò mə̀dù ga myɛ yə̀ ń címsi kàmə̀zwǐsi zwì yé. ⁵Cinu wɔ̀ Muyiisi ni: «Wál Esərayɛl lyì byǎ bɛ́ nɛ: Á wɔ́ dwí tɛ̀bɛ́ rə̀ wɔ́ yó-kùùlì cìnə́. À gə yàl á cəcəl w a vò ǹd'ába námpɔ́lɛ́ myɛ cìcì, à wɔ̌ à m'a ce á jé tɛ̃́. Vǔr-nə á címsi kàmə̀zwǐsí á cĩ́ tɛ̃́, à m'a zɛ̃̀ a lwar kɔn rɛ́ tɛ̀bɛ́ à mə̌ s'a wɛ̀rhɛ́ ába mɔ́.» ⁶Esərayɛl lyì byǎ bɛ́ gə́ zhǐr Orɛɛbɛ pyɔ̀ w nyí ni kwã nɛ, bə̀ k'ê yə̀ bə̀ címsi kàmə̀zwǐsí zwì yé.⁷Esərayɛl lyì byǎ bɛ́ gə́ y'à tú bə cĩ́ bə̀ zulə́ jàà y yi ní, Muyiisi ya n pwà kòrhó w wẽ̀ ré n mə n du zulə́ jàà y w n twẽ̌ è nyí ni n vò pyépyé n pú w gàà, ń yà ń nə́ ń byẽ̀ w bə̀ «Dwã-joló kòrhó» Rə̀myɛ́ yi ní, lò mɔ̀bɔ́ ń yà ń nə́ ń yǎl n pyà n sú Cinu wu yà ń nə́ ń shə́r zulə́ jàà y w ń zhə̀l dwã-joló w kòrhó w səta. ⁸Sə Muyiisi gə tú ń du ń la kòrhó w səta, dwí rí púlə́púlə́ y'a zɛ̃̀ rə̀ zhǐ dɛ̃̌, lò gakó ń kòrhó w nyí rí ni, ń nə́ ń nyǐ Muyiisi kɔn b'e yí n vò n zù kòrhó w wə. ⁹Muyiisi gə tú ń zù kòrhó w w yi ní, ébɔ̃ w y'à n'ô swé tɛ̃́ ò zhì ò nyí rí ni, Cinu yà n zɛ̃̀ n zhì ébɔ̃ w w ń nə́ ń zɔ̀m ǹdə́ mɔ.¹⁰Dwí rí púlə́púlə́ y'a nə ébɔ̃ w kòrhó w nyí rí ni. Rə y'a zɛ̃̀ rə zhì dɛ̃̌ rə̀myɛ́ yi ní, lò gakó zhì ń kòrhó w nyí rí ni n tu n zə ń yé y n pú tɛ̃́. ¹¹Cinu yà ń zhǐ Muyiisi yé y wə, ń mə́ ń zɔ̀m ń ce mo, ǹdə numbyínsi sə̀lyè gə́ y'a zhǐ dwã yé y w sə̀ n'ê zɔ̀m ǹdə́ dwã nɛ́. Rə̀myɛ́ kwã nɛ́, Muyiisi ya n kwɛ̃̀ n bə̀ zulə́ jàà y wa, sə ń sanna, Nuuni byǐ Zhozwe, ń wɔ́ ébɔ́-dǎl mɔ́, yà ń tá ń shə́r kòrhó w w yé.¹²Muyiisi wɔ̀ Cinu ni: «nyì wé! Ǹmyɛ́ cìcì ǹ wə̀l ne: ‹Ce dwí rí tɛ̀bɛ́ shə́r›, sə ǹ yə̀ ce a lwar lò mó mɔ̀bɔ́ ǹ la tũ̌ n bə̀ n sɛ̃ nɛ mɔ́ pár yé. E jà, wɔ́ ǹmyɛ́ ǹ yà ǹ wə̀lə̀: ‹À yě ǹ párá›, ǹ súlí ń wɔ̀ myɛ: ‹À só mó›. ¹³Ǹ gə só ne zhə̀n zhə̀nà, sə́ byili ni ǹ wu bùlə̀ né, à m'a zɛ̃̀ a lwar ǹ pár pamparɛ̃ɛ̃, ǹ sónó w m'a yə̀ zhə̀n kɔna à yilə. Ǹ bə̀k'á swě bə̀ dwí rí tɛ̀bɛ́ wɔ́ ǹmyɛ́ dwí yé!»¹⁴Cinu lyár Muyiisi n wɔ̀: «Àmyɛ́ cìcì mú m'a zhìì mú a súlí a pɔ̃́ shìrhə́?» ¹⁵Muyiisi wɔ̀ mɔ: «Ǹ cìcì gə cẽ ǹ tá ǹ la nə́ba tó, sə ǹ bə́k'á ce nə́ zhǐr nyɔ̀nɔ̀ yé. ¹⁶È nə wɔ́ bə̀kɔ́n dɛnnɛ bə̀ m'a tó né bə lwar bə̀ ǹ só àmyɛ́ ǹdə́ ǹ dwí rí? È də̀ ǹ gə́ m'ǎ tó nə́ba ǹ nə́ ǹ zhə̀l mó, rə̀myɛ́ mɔ́ zɛ̃̀ rə ce, àmyɛ́ ǹdə́ ǹ dwí rí k'é bə dwí tɛ̌ tɛ̌ nyɛ̌ lũ w púlə́púlə́ w mó nà?»¹⁷Cinu wɔ̀ Muyiisi ni: «À m'a súlí a wɛ̀rhɛ́ kɔn rɛ́ tɛ̀bɛ́ ǹ nə́ ǹ lwə̀l ne mó myɛ, bə̀ ǹ sú à yírh, à súlí à yě ǹ pár myɛ.» ¹⁸Muyiisi lwə̀l Cinu n wɔ̀: «Ce a nə ǹ còrhó wə́!»¹⁹!» Cinu wɔ̀ mɔ: «À m'a tó ǹ yé né a lyɛ̃ a m'a byili mú à wu-bɔ̀nɔ̀ w gə́ já nɛ́, a súlí a bwə̀l ‹Cinu› rə̀ wɔ́ à yil ré, ǹ yé né. À n'â wɛ̀rhɛ́ cɛ̀nɛ̀ lò mó mɔ̀bɔ́ à n'â yǎl mɔ́ nɛ, à n'â dùr lò mó mɔ̀bɔ́ à n'â yǎl a dùr ń nɔ̀nɔ̀ mɔ́ nɔ̀nɔ̀.» ²⁰Cinu súlí n wɔ̀: «Ǹ wàr ǹ m'ǎ nyǐ à yé-zwã̌ y yé, bə̀ numbyíní wàr è m'a nyǐ à yé-zwã̌ y e j'a gwẽ̌ zə myə̌l yé.»²¹Cinu wɔ̀ mɔ: «Nyǐ jàà à nyí ni. Ǹ m'ǎ zhì pyɔ̀-nə́kulu w kɔ̀bɔ́ yó. ²²À gə tú à n'â lyɛ̃ à m'â byili à còrhó w yi ní, à m'a ce mó nə́kulu w gógòló w wə, a zɛ̃̀ a zə à jɛ̃̀ y a m'a círhí mú. ²³Rə̀myɛ́ kwã nɛ́, à m'a pə́ à jɛ̃̀ yá, sə ǹ m'ǎ nə à kwã yá. Sə è gə wɔ́ à yé-zwã̌ yá, lòlò wàr y ń la nɔ yé.»

¹Cinu wɔ̀ Muyiisi ni: «Sə́l nə́kulu bwə̀lse sə̀lyè sə nyɛrhɛ dwã ǹdə nã́yéésé ta; à m'a kɛ̃ zɔ̀mà nɛ́ nyɛ̀bɛ́ cìcì nə̀ y'à kɛ̃ bwə̀lsé nã́yéésé ǹ fwàr tɛ̃́ ń bɔbwɛlɛ mɔ́ yó mó sə̀ yó. ²Tɛnɛ nəkɔl nəkɔkɔ́lɛ́ y yilə; ǹ m'ǎ dámǎ ń jì Sənəyi pyɔ̀ w yó ń bə̀ ń zhì à yé né ò yə́-pɛ̀lɛ́ w gàà mɔ́.³Lòlò bə̀ká n tó mó n jì yé; bə̀ bə̀ lò nɛ pyɔ̀ w yó yé; və̌-yɔ̀lɔ́ w ǹdə́ vwàmá nánfwààlɛ́ myɛ t'â la gɔ-dɔ́m pyɔ̀ w nyí ni yé.» ⁴Muyiisi sə̀ nə́kulu bwə̀lse sə nyɛrhɛ dwã ǹdə nã́yéésé ta, n dùlí n zɛ̃̀ nəkɔkɔ́lɛ́ shãã shãã n jì Sənəyi pyɔ̀ w yó ǹdə́ nə́kulu bwə̀lsé sə̀lyè y ń jɔ̃̀ w ǹdə Cinu gə́ yà ń pɔ mɔ nyí ni.⁵Cinu só n bə̀ ébɔ̃ w wẽ́, n bə̀ n zhì ǹdə́ Muyiisi. Muyiisi zɛ̃̀ n byẽ̀ ń yil ré bə̀ «Cinu». ⁶Rə̀myɛ́ kwã nɛ́, Cinu tó Muyiisi yé né n lyɛ̃ ń mə́ ń bwə̀l ń zhe: «Cinu, Cinu, Yi rí tɛ̀bɛ́ rə̀ wɔ́ nɔ̀nɔ̀-dǔr ǹdə́ sónó cə́bal, à lyim t'â zɛ̃̀ làlà yé, à sú ǹdə́ wu-bɔ̀nɔ̀ ǹdə́ sónó, ⁷à n'â zhì nà èdù yó ǹdə́ nàmbala kùrə̀ mɔ̀ɔ̀rhɛ̀ nánzhəzhɔ̌, à n'â zhìlì à yala nɛ dwə́ə́ré ǹdə́ yó-kùlù tũ̀twə̃̀ə̃̀ né e súlí yə̀-bəlwàálɛ́ yi ní, e jà à t'â yẽ̌ re rə̀ mɛ̃ nánfò yé. À n'â pɛ còrhò-tum byǎ bɛ́ ǹdə́ nɛ̀mɛ́ nɛ́ nɛ bə̀ dabá dwə́ə́ré yilə, kɔn b'e yí bə̀ nàmbala kùrə̀ nə̀tɔ̀ ráá nə̀na.»⁸Muyiisi já n jòm ń nə̀dwə́nə́ yó, n tu n zə ń yé n pú tɛ̃́ n mə n cèrhé Cinu. ⁹N zɛ̃̀ n wɔ̀: «À gə j'â sú ǹ yírh zhə̀n zhə̀na Cinu, sə Cinu bə̀ n yə̀ nə́ cəcəl w n tó nə́ba nə́ m'é zhə̀lə̀. Dwí rí tɛ̀bɛ́ búl rə̀ wɔ́ yó-kùùlì cìnə́, sə ǹdə́ rə̀myɛ́ ga ǹ m'ǎ pə nə́ba nə́ dóó w ǹdə́ nə́ yə̀-bəlɔ̀lɔ́ w sǔbri, ń súlí ń ce nə́ jǐrh ǹmyɛ́ cəl kɔna.»¹⁰Cinu wɔ̀ Muyiisi ni: «À m'a zə dɔbrɛ ǹd'ába. À la tũ̀-fwààlɛ̀ tũ̌ ǹ dwí rí gakó yírh wə, rə̀ dwí rí gwẽ̌ yə̀ wɛ̀rhɛ́ jàà kə̀l kə̀l w cɛ yó ráá dwí rə̀dù ga myɛ sõ yé. Dwí rí tɛ̀bɛ́ gakó rə̀ kə́kɛ́lɛ́ mɔ́ mɔ́ m'a nə bə̀ Cinu tũ̀-fɔ̀lɔ̀ wá, tũ̀-fɔ̀lɔ̀ w kɔ̀bɔ́ à la a tó ǹ dɛnnɛ a wɛ̀rhɛ́ mɔ́ n'ê zɛ̃̀ wu ni. ¹¹Tó kɔn rɛ́ tɛ̀bɛ́ à la mɔ́ rə̀ nyí pɔ zà mɔ́ náàcɛ̀nɛ́. À m'a jì Amɔrətəbá ǹdə́ Kanaã lyì bí ǹdə́ Yititəbá ǹdə́ Pərəzhitəbá ǹdə́ Yivyitəbá e súlí Zhəbuusi lyì bí ǹ yé né.¹²Dɛ̃̌ ǹ cìnə̀, ǹ bə̀k'á ce dwã yó ǹdə́ tənà y ǹ la è wẽ́ zú mú lyì bí yé, rə̀myɛ́ wɔ̌ rə̀ yàl pɔ̀mɔ̀ ǹ yilə. ¹³Á gaga mɔ́ m'ǎ wǔr bə̀ vwĩ̀-jùúlí, á mà bə̀ nə́kulə né bə̀ cìì tɛ̃́ mɔ́ á lo; á m'ǎ súlí á gõ̀ Ashəra pálá nɛ́. ¹⁴Rə̀myɛ́ mɔ́ yilə: ǹ tá ǹ la tu ń zə ǹ yé ń pú tɛ̃́ yi dõ yé né ń mə́ cèrhé re yé, bə̀ Cinu yil ré wɔ́: ‹Zuni cə́bal› (‹Bwɛ̃̌-dǔr cə́bal›), ń wɔ́ bwɛ̃̌-dǔr Yia.¹⁵Ǹ tá ǹ la dɔbrɛ zal ǹdə́ tənà y lyì bí yé: è gə də̀ rə̀myɛ́ bə̀ gə tú bə̀ n'ê cèrhé bə̀ yə né, bə súlí bə̀ n'ê zwə́l vwə̃̀ bə̀ pɛ nɛ yi ní, bə̀ m'a byẽ̀ mó ń tó be ń dɔ̃̀ bə̀ vwə̃̀ né nàmá bɛ́. ¹⁶Ǹ gə zɔ bə̀ bə̀kwá bɛ́ ń pə ǹ byǎ bɛ́ nɛ bə jí, bə̀ bə̀kwá bɛ́ m'a cèrhé bə̀ yə né, sə bə̀ m'a súlí bə vwɛ̃ ǹ byǎ bɛ́ bə ce bə tó be bə cèrhé bə̀ yə né. ¹⁷Ǹ tá ǹ la lù zə ń mə́ zùrhì yə èsã̌yùúli yé.¹⁸Ǹ m'ǎ jí búúri rə̀ yə̀ sã̀-nə̀byẽ̌ ce mó címsí. Ǹ m'ǎ dɔ̃̀ búúri rə̀ yə̀ sã̀-nə̀byẽ̌ ce dwã nyàlpyɛ̀ Abyiibi cànà y wa, ǹdə à gə́ pɔ mɔ́ nyí ní, bə̀ wɔ́ Abyiibi cànà y w ǹ shə́r Ezhibti ní.¹⁹Byì-yə́ə́ ń wɔ́ bal gakó wɔ́ àmyɛ́ à cǐ mu. Èta myɛ ǹ m'ǎ zwə́l ǹ vwàmá nɛ́ byì-yéésé námbyalsɛ́, vwàmá nánfwààlɛ́ ráá və̌-ywàálɛ́ byǎ bɛ́ ń pɛ̃. ²⁰Sə è gə wɔ́ bə̀na byì-yə́ə́ námbyɛlɛ́, ǹ m'ǎ zə pyì-bwɛ̀lɛ́ ń cĩ́ è jàà wa. Ǹ gə yə̀ pyì-bwɛ̀lɛ́ zə ń cĩ́ è jàà wa, sə́ mà è byã y nɛ ń gu yə. Ǹ m'ǎ cĩ́ kɔn ǹ byì-cɛ y è wɔ́ bal gakó jàà wa. Bə̀ t'â bàn àmyɛ́ yé né ǹdə́ jə̀-fwə̀r yé.²¹Ǹ m'ǎ twĩ̀ ǹ tumə né dwã nyə̀ldù, sə dwã nyàlpyɛ̀ dɛ̃ rɛ́, ǹ m'ǎ yẽ̌ nə̀ tũ̌ ni, ń shǐrh. Má è wɔ́ vwál ráá jòrhó yi myɛ, ǹ tá ǹ la tum tũ̌ yé. ²²Ǹ m'ǎ jí səmyɛnsɛ́ címsíb bə̀lɛ́ ywẽ́ nã́yə́ə́ né kwar mɔ́ yi ní ǹdə́ jòrhó w címsí byin rí zhɔ̌ mɔ́ yi ní.²³Twər rə̀tɔ̀ byin rí wẽ́, ǹ dwí rí bala bɛ́ gakó m'a bə̀ Yó-cə́bal Cinu, Esərayɛl Yi rí yé né. ²⁴2Zhə̀n zhə̀nà, à gə tú à jì dwə́ né ǹ yé né, a zwẽ bə̀ tenesé a pɔ̃́, a ce ǹ tənà y wɛ̀lɛ̀ e súlí kwã, ǹ gə tú ǹ bàn Cinu ǹ Yi rí yé né, twər rə̀tɔ̀ byin byin gakó yi ní, lòlò tá ń la ń bùlə̀ è yó cṹ yé.²⁵Ǹ tá ǹ la jal vwĩ̀ zwə́l ń zɛ̃̀ ń súlí búrú ò cò sã̀-nə̀byẽ̌ ń pɛ̃ yé; vwǎm mɔ́ bə̀ gu Pakɛ y címsí yil mú nàmá bɛ́ t'â la dɛ̃̌ cṹ cəcɛ̃ kɔn b'e yí cɛ y lə́ yé. ²⁶Ǹ m'ǎ zə ǹ cɛ y wẽ̀ ré byǎ nã́yə́ə́ bé ń mə́ bə̀ Cinu ǹ Yi rí jì y wẽ́. Ǹ tá ǹ la bɔ̀-bwɛ̀lɛ́ shɔ̃̀ è ná yil mú w yé.»²⁷Cinu kə́ n pə nyí Muyiisi ni n wɔ̀: «Kɛ̃ zɔ̀mà nɛ́ nyɛ̀bɛ́, b'è wɔ́ nə̀myɛ́ à n'â ce yé né à m'â zə dɔbrɛ ǹdə́ ǹmyɛ́ ǹdə́ Esərayɛl lyì byǎ bɛ́.» ²⁸Muyiisi já n mɛ̃ gàà ǹdə́ Cinu dwã shə́-èna, nə̀nyɛ́nɛ́ ǹdə́ cəcɛ̃ ga. Ń yə̀ kùjú jí, ń yə̀ nɛ̃̌ myɛ nywɛ̀ yé. N kɛ̃ dɔbrɛ nyə́ né shí y nə́kulu bwə̀lsé yó.²⁹E jà Muyiisi gə́ shí Sənəyi pyɔ̀ w yó n só tɛ̃́ ǹdə́ dɔbrɛ nyə́ né bwə̀lsé sə̀lyè y ń jɔ̃̀ w yi ní, ń yà ń yə̀l bə̀ ńmyɛ̌ Muyiisi gə́ yà ń zhərh ǹdə́ Cinu mú y'à ce ń yé-zwã̌ y y'à n'ê jə́jɛ̀mɛ́ yé. ³⁰Aarɔ̃ ǹdə́ Esəryɛl lyì byǎ bɛ́ gakó gə́ púrí Muyiisi yé-zwã̌ y y'à n'ê jə́jɛ̀mɛ́ mɔ́ ce, ywẽ zɔ bɛ́ ǹdə́ ń nyí ni yú. ³¹Rə̀myɛ́ yi ní Muyiisi byẽ̀ be, Aarɔ̃ ǹdə́ Esərayɛl lyì byǎ bɛ́ yó-cìnə́ bé gakó zɛ̃̀ bə kwɛ̃̀ bə bə̀ ń sõ, Muyiisi zɛ̃̀ n zɔ̀m ǹdə́ bɛ.³²Rə̀myɛ́ kwã nɛ́, Esərayɛl lyì byǎ bɛ́ zɛ̃̀ bə twẽ̌ bə yí ń nyí ni, n zɛ̃̀ n cĩ́ bi nyə́ né nyɛ̀bɛ́ gakó Cinu yà ń pɔ mɔ Sənəyi pyɔ̀ w yó mó. ³³Muyiisi gə́ zɔ̀m ǹdə́ bɛ n zhɛ̀ kwã, ń zə kàmə̀jɛ̃̀ n mə n círhí ń yé-zwã̌ yá.³⁴Muyiisi gə zhə̀l Cinu yé né ń la zhərh ǹdə́ mɔ yi ní gakó, ń yà ń nə́ ń pàr kàmə̀jɛ̃̀ y ń yé y ne, kɔn m'e yí ń gə tú ń ká ń la pwẽ̀ ne du. Ń gə tú ń du kwã nɛ́, ń nə́ ń cĩ́ nyə́ né nyɛ̀bɛ́ gakó Cinu pɔ mɔ mɔ́ Esərayɛl lyì byǎ bɛ́ nɛ. ³⁵Esərayɛl lyì byǎ bɛ́ y'à n'ê nyǐ Muyiisi yé-zwã̌ y è y'à n'ê jə́jɛ̀mɛ́ mɔ́. Muyiisi ya n kə́ n vwɛ̃ kàmə̀jɛ̃̀ y n mə n pyìlì ń yé-zwã̌ y kɔn m'e yí ń gə kə́ ń kwɛ̃̀ ń la vò n zhərh ǹdə́ Cinu.

¹Muyiisi byẽ̀ Esərayɛl lyì byǎ bɛ́ gakó n cĩ́ dwã yó n zɛ̃̀ n wɔ̀ bɛ: «Nyǐ Cinu nyə́ né ń pɔ mùnì ga bə tó ne mó: ²Lò gakó mà n twĩ̀ ń tumə né dwã nyə̀ldù, sə dwã nyàlpyɛ̀ dɛ̃ rɛ́ m'a yə̀ dɛ̃ tɛ̀bɛ́ rə̀ wɔ́ Yi dɛ̃ á yilə, shìrhə́ dɛ̃ rɛ́, Cinu shìrhə́ dɛ̃ rɛ́. Bə̀ m'a gu lò mɔ̀bɔ́ gakó ń twĩ̀ tum dɛ̃ rɛ́ rə̀myɛ́ mɔ́ yù wə. ³Á t'á la myǐn myɛ cìcì jóó á gə wɔ mə̀gã̌, shìrhə́ y dɛ̃ rɛ́ yù w yé.»⁴Muyiisi súlí n wɔ̀ Esərayɛl lyì byǎ bɛ́ púlə́púlə́ ne: «Nyǐ Cinu nyí rí ń pɔ mɔ́: ⁵Lə-na á jɛ̃̀-kɔn á pə Cinu ni; pùbùlə̀ cə́bal gakó mà n zə ń jɛ̃̀-kɔn rɛ́ n bə̀ n pə Cinu ni: sánə́má ǹdə́ sə̀byì-kùlì ǹdə́ kàmmɔ ⁶6ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ kɛ̀bɛ́ è càn ǹdə́ bɔ̃̀ kur ⁷ǹdə́ pyì-byərh tàndɛ rə̀ mɔ́rh nánshɛ̀n ǹdə́ dɔfɛ̃́ɛ̃́sɛ tàndɛ ǹdə́ ákáshá dǎr ⁸ǹdə́ nwə̃̌ pàntámsɛ́ yilə, ǹdə́ wẽ̀ rə̀ lwẽ́ nã́nyə̀nyɛ̀lɛ́ ǹdə́ nwə̃̌ y kɛ̀bɛ́ bə̀ m'ê pɛ Yi tum rí tũ̌ ŋwɔ̀nɔ́ w mɔ́ e súlí wẽ̀ ré tɛ̀bɛ́ rə̀ lwẽ́ nã́nyə̀nyɛ̀lɛ́ bə̀ n'ê ji myǐn mú ⁹ǹdə́ nə́kul-shɛ̀mà dwí rə̀dù e súlí nə̀ dwã náàcɛ̀nà, vwĩ̀-zwə́lnə náncɛ y kàmə̀zwǐ y ǹdə́ ń nə̀bán yó kàmə̀jɛ̃̀ y bɔ́bwár yilə.¹⁰1Tùntùnnə byɛ̀bɛ́ gakó bə̀ yě tum rí yé shò á cəcəl w mó m'a nə dwã bə twĩ̀ tum rí tɛ̀bɛ́ gakó Cinu pɔ nyí bə̀ bə twĩ̌ mú: ¹¹Yi kòrhó w ǹd'ô yə́-pɛ̀lɛ́ kàmə̀jɛ̃̀ y e súlí ò yə́-pɛ̀lɛ́ kàmə̀jɛ̃̀ y dõ mó ǹd'ô pyə́lsɛ́ ǹd'ô dǎr rɛ́ bə̀ m'e kwɛ̃́ w mɔ́ ǹd'ô də̀-jaarhɛ́ ǹd'ô yə né e súlí ò wẽ̀ ré tɛ̀bɛ́ yə né kùrə̀ né n'ê cĩ́ rə̀ yó mó; ¹²ǹdə́ kùlkṍ w ǹd'ô də̀-byǎ bɛ́ ǹd'ô nyí-byǐ rí ǹd'ô gɔ̀nɔ̀ w ò n'ô bɔ̀n Yi jì y dwã w mɔ́;¹³ǹdə́ tabəlɛ́ y ǹd'ê də̀-byǎ bɛ́ ǹd'ê wẽ̀ ré dwã bɛ́ gakó e súlí búrú w bə̀ n'ê pɛ Yi ni mú; ¹⁴ǹdə́ ku w bə̀ n'ê cĩ́ pàntámsɛ́ ò yó mó ǹd'ô wẽ̀ ré dwã bɛ́ ǹd'ô pàntámsɛ́ e súlí pàntámsɛ́ nwə̃̌ yə́; ¹⁵15 ǹdə́ vwĩ̀-jùlú w bə̀ n'ê ji wẽ̀ ré rə̀ lwẽ́ nã́nyə̀nyɛ̀lɛ́ ò yó mó ǹd'ô də̀-byǎ bɛ́ ǹdə́ nwə̃̌ y bə̀ m'ê pɛ Yi tum rí tũ̌ ŋwɔ̀nɔ́ w mɔ́, ǹdə́ wẽ̀ ré rə̀ lwẽ́ nã́nyə̀nyɛ̀lɛ́ bə̀ n'ê ji myǐn mú ǹdə́ étwí-ènyí gɔ̀nɔ̀ w Yi kòrhó w étwí-ènyí rí yil mú; ¹⁶ǹdə́ vwə̃̀ námpúmə́ cɛ̃́ɛ̃́ nɛ́ vwĩ̀-jùlú w ǹd'ô kàmmɔ ku ǹd'ô bɔ̀là ǹdə zhəzhərhá ta ǹd'ô də̀-byǎ bɛ́ e súlí ǹd'ô wẽ̀ ré gakó ǹdə́ zhǎ y ǹdə́ ku w kɔ̀bɔ́ zhǎ kùr ré y'à cĩ́ ò yó mó;¹⁷ǹdə́ Yi kòrhó w kɔ̀nɔ́ w kàmə̀jɛ̀sɛ́ ǹd'ô yə né ǹdə́ wẽ̀ ré tɛ̀bɛ́ nə̀ kùrə̀ né n'ê cĩ́ nə̀ yó mó e súlí kɔ̀nɔ́ w nyí rí gɔ̀nɔ̀ wá; ¹⁸ǹdə́ Yi kòrhó w pálá nɛ́ ǹdə́ kɔ̀nɔ́ w pálá nɛ́ e súlí nə̀ nyínsí; ¹⁹ǹdə́ vwĩ̀-zwə́lnə gàndɛ́ bə̀ n'ê zwì bə̀ m'ê twĩ̀ tum rí còrhó-jì y wẽ́ mó ǹdə́ vwĩ̀-zwə́lnə náncɛ y gàndɛ́ Aarɔ̃ yil mú, e súlí gàndɛ́ tɛ̀bɛ́ ń byǎ bɛ́ la zu bə m'e twĩ̀ vwĩ̀ rí zwə́l tum rí mú.»²⁰Rə̀myɛ́ kwã nɛ́, Esərayɛl lyì byǎ bɛ́ gakó j'a làà dwã nɛ bə yẽ̌ Muyiisi ni. ²¹Rə̀myɛ́ yó, pùbùlə̀ cìnə́ bé ǹdə́ lò mɔ̀bɔ́ gakó ń yà ń zhe yə̀wǎl pɛnɛ́ pɔ yilə, zə ń jɛ̃̀-kɔn rɛ́ n bə̀ n pə Cinu ni, dwã-joló kòrhó w lú mú ǹd'ô tumə né e súlí vwĩ̀-zwə́lnə gàndɛ́ yilə. ²²Bala ǹdə́ kana ga túwə́. Pùbùlə̀ cə́bal gakó zə sánə́má wẽ̀ n mə n bà: bɔ́bwár ráá bwẽ́ wẽ̀, bɔ́bwár cìbyǔr ǹdə́ jə̀fɔ́lá cìbyǐr n pə Cinu ni ǹdə bə̀ gə́ y'à mə̌ sə bə wɛ̀rhɛ́ nɛ́ bə m'e pə sánə́má mɔ́ nɛ́.²³Lò mɔ̀bɔ́ gakó ń yà ń zhe pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ kɛ̀bɛ́ è càn ǹdə́ bɔ̃̀ kur ǹdə́ pyì-byərh tàndɛ rə̀ mɔ́rh nánshɛ̀n ráá dɔfɛ̃́ɛ̃́sɛ tàndɛ ń sõ zə rɛ n mə n bà. ²⁴Lò mɔ̀bɔ́ gakó ń yà ń cĩ́ sə̀byì-kùlì ráá kàmmɔ kwã nɛ́ Cinu yilə, zə rɛ n bə̀ n pə Cinu ni. Lò mɔ̀bɔ́ gakó ń yà ń zhe ákáshá dǎr, zə rɛ n bə̀ n pə tumə né gakó tũ̌ yilə.²⁵Kana bɛ́ byɛ̀bɛ́ gakó bə̀ y'à yě pyì-kur sɔ̃́ cɛ̀nɛ̀ cɛ̀nɛ̀ mɔ́ sɔ̃̀ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə m'e bà. ²⁶Kana dwã bə̀myɛ́ y'à yě tum rí yé shò e jà bə̀ y'à só bə̀ tum rí myɛ, myɛ sɔ̃̀ bɔ̃̀-kur bə m'e bà.²⁷Dwí rí yó-cìnə́ bé zə nə́kul-shɛ̀mà dwí rə̀dù ǹdə́ nə̀ dwã náàcɛ̀nà, vwĩ̀-zwə́lnə náncɛ y kàmə̀zwǐ y ǹdə́ nə̀bán yó kàmə̀jɛ̃̀ y bɔ́bwár yilə; ²⁸e súlí wẽ̀ rə̀ lwẽ́ nã́nyə̀nyɛ̀lɛ́ ǹdə́ nwə̃̌ pàntámsɛ́ yilə, ǹdə́ nwə̃̌ y kɛ̀bɛ́ bə̀ m'ê pɛ Yi tum rí tũ̌ ŋwɔ̀nɔ́ w mɔ́ ǹdə́ wẽ̀ ré rə̀ lwẽ́ nã́nyə̀nyɛ̀lɛ́ bə̀ n'ê ji myǐn mú. ²⁹Esərayɛl lyì byǎ bɛ́ gakó, bala ǹdə́ kana ga, byɛ̀bɛ́ bə̀ wun y'à búl nə̀ nyɛ̀ bə̀ n'ê yǎl bə pə kɔn tum rí tɛ̀bɛ́ Cinu tó Muyiisi dɛnnɛ n pə rə̀ nyí mú yil mú, zə rɛ bə b'e pə Cinu ni ǹdə́ bə̀ wun gakó.³⁰Muyiiisi wɔ̀ Esərayɛl lyì byǎ bɛ́ nɛ: «nyì wé! Cinu cír Uri byǐ Bəsalɛl, Uuri nɔ̃̌ wa, Zhəda kwálá y lò. ³¹Ń ce n sú ǹdə́ Yi Eshirhə y mùnì n zə lárma ǹdə́ surhə ǹdə́ lwar e súlí tumə dwí gakó tũ̌ ŋwɔ̀nɔ́: ³²Ń wɔ̌ ń tɛ́rɛ́ n wɛ̀rhɛ́ wẽ̀ rə̀ càn dɛ̃́dɛ̃́, n zùrhì sánə́má ǹdə́ sə̀byì-kùlì e súlí kàmmɔ wẽ̀, ³³ń wɔ̌ ń sə̀l nə́kulə náàcɛ̀nà bə̀ m'ê cĩ́ bɔ́bwár wẽ̀, wẽ̀ ré yó, ń wɔ̌ ń sə̀l dǎr n súlí n twĩ̀ tumə dwí gakó.³⁴Cinu pɔ tumə né nə̀myɛ́ mɔ́ dwí rí còrhò mó ŋwɔ̀nɔ́ ńmyɛ̌ ǹdə́ Ayəsamaakɛ byǐ Owɔləyaabɛ, Dan kwálá y lò mó ne. ³⁵Ń ce bə sú ǹdə́ lárma mùnì ga bə ŋwɛ̀nɛ́ bə sə̀ nə́kulə náàcɛ̀nà nɛ́, bə kɛ̃ wẽ̀ ré èsã̌yùúlí, bə ŋwɛ̀nɛ́ bə zò wẽ̀ èsã̌yùúli pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ yó, bə ŋwɛ̀nɛ́ bə sɔ̃̀ sɔ́rá, bə ŋwɛ̀nɛ́ bə twĩ̀ tumə dwí gakó sə bə súlí bə ŋwɛ̀nɛ́ bə tɛ́rɛ́ bə wɛ̀rhɛ́ tumə dwí gakó.

¹Bəsalɛl ǹdə́ Owɔləyaabɛ e súlí lyì bí byɛ̀bɛ́ gakó Cinu yà ń co lárma ǹdə́ surhə bə̀ wẽ́ mùnì ga bə ŋwɛ̀nɛ́ bə twĩ̀ tumə né còrhó-jì y zhe nə̀ tum mú, m'a wɛ̀rhɛ́ kɔn rɛ́ tɛ̀bɛ́ gakó Cinu pɔ rə̀ nyí mú.»²Muyiisi ce bə byẽ̀ Bəsalɛl ǹdə́ Owɔləyaabɛ e súlí lyì bí byɛ̀bɛ́ gakó Cinu yà ń ce bə sú ǹdə́ lárma, bə̀ gakó j'à y'à shɛ̀nɛ́ bə̀ la tumə né tũ̌ mú. ³Bə b'e zwẽ Esərayɛl lyì byǎ bɛ́ pansɛ́ bə̀ y'à lɔ còrhó-jì y lú yil mú Muyiisi sõ. Sə lyì bí gə́ y'à gwẽ̌ n'ê zə pansɛ́ bə̀ twí nəkɔkɔ́lɛ́ nəkɔkɔ́lɛ́ gakó mó ce, ⁴tùntùnnə byɛ̀bɛ́ bə̀ y'à n'ê twĩ̀ còrhó-jì y tumə dúdúmə́ dúdúmə́ né mó zhǐr mə̀dù mə̀dù bə yẽ̌ tumə né bə̀ y'à n'ê twĩ̀ mú ni,⁵bə vò bə wɔ̀ Muyiisi ni: «Wẽ̀ ré tɛ̀bɛ́ lyì bí n'ê zə bə̀ twí mú búl rə̀ já dɛ̃́dɛ̃́ tumə né nyɛ̀bɛ́ Cinu pɔ nyí bə̀ bə̀ twĩ̌ mú yilə!» ⁶Rə̀myɛ́ yi ní, Muyiisi pə nyí bə̀ bə̀ bwə̌l zulə́ jàà y w bə wɔ̀: «Bal ráá kɛ̃, bə̀k'a kə́ n tɛnɛ pansɛ còrhó-jì y yil yé!» Dwí rí j'â k'ê yə̀ pansɛ zə rə m'e bə̀ yé. ⁷Pansɛ́ sə̀ y'à pɔ mɔ́ y'à yú tumə né nə̀ y'à la tũ̌ mú, sə̀ gaga mɔ́ búl sə dàl.⁸Tùntùnnə byɛ̀bɛ́ bə̀ y'à búl bə̀ yě tum rí yé shò du bə̀ dwã bɛ́ mɔ́ zə lɛ̃̌ bə̀ nyɔ̀ ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ bə m'e sɔ̃̀ kàmə̀jɛ̀rh shíyə́, bə súlí bə zò shərəbɛ̃́bá èsã̌yùúli rə̀ búl rə̀ càn dɛ̃́dɛ̃́ sə̀ yó. ⁹Kàmə̀jɛ̃̀ èdù gakó dwɛ̀lɛ̀ rɛ́ y'à wɔ́ jə̀-tórhó yírhə́ shí-èlyè ǹdə́ lyɛlɛ, è wɛ̃̀ rɛ́ y'à wɔ́ jə̀-tórhó yírhə́ nə̀na. Kàmə̀jɛ̀sɛ́ gakó dwɛ̀lɛ̀ rɛ́ ǹdə́ sə̀ wɛ̃̀ rɛ́ ga y'à mə̌ dwã. ¹⁰Muyiisi jɛ̀nɛ̀ n kwè kàmə̀jɛ̀rh sə̀nu n zhílí dwã nɛ, rə̀myɛ́ kwã nɛ́, ń kwè sə̀ dwã sə̀nu y n zhílí sə̀myɛ dwã nɛ.¹¹N wɛ̀rhɛ́ pyì-kur rə̀ mɔ́rh námpùúlí lyẽẽ́se n ce kùr ré nã́yéé ré kàmə̀jɛ̃̀ nã́yə́ə́ y ne. N zɛ̃̀ n wɛ̀rhɛ́ èta myɛ n ce kùrə̀ nə̀lyè nyǎn rɛ́ kàmə̀jɛ̃̀ nánkwaá y myɛ nɛ. ¹²N ce lyẽẽ́se shí-ènu kàmə̀jɛ̃̀ nã́yə́ə́ y nyí rí ni n twèlé, n súlí n ce sə̀ dwã shí-ènu kàmə̀jɛ̀sɛ́ sə̀ zhí zhí dwã nɛ kùrə̀ né nə̀lyè nyǎn rɛ́ kàmə̀jɛ̃̀ nánkwaá nyí rí ni n twèlé, sə zǎ dwã sə̀lyè sə̀lyè. ¹³Ń zùrhì sánə́má pyə́lsɛ shí-ènu n mə n pyə́l kàmə̀jɛ̀sɛ́ sə̀ zhí zhí dwã nɛ́ kùrə̀ né nə̀lyè y mó dwã nɛ, èta Yi kòrhó w j'a yə̀ kɔn rə̀dù námpúm.¹⁴Rə̀myɛ́ kwã nɛ́, ń sɔ̃̀ bɔ̃̀-kur kàmə̀jɛ̀rh shí ǹdə́ èdù ń la n mə n pú Yi kòrhó w yə́-pɛ̀lɛ́ yá. ¹⁵Bɔ̃̀ kur kàmə̀jɛ̀sɛ́ shí ǹdə́ èdù y gakó y'à mə̌ dwã. Èdù gakó dwɛ̀lɛ̀ rɛ́ y'à wɔ́ jə̀-tórhó yírhə́ shə́-ètɔ̀, è wɛ̃̀ rɛ́ y'à wɔ́ jə̀-tórhó yírhə́ nə̀na. ¹⁶Ń zhílí kàmə̀jɛ̀rh sə̀nu dwã nɛ sə̀ nyí, n zɛ̃̀ n kə́ n zhílí shə̀ldù myɛ dwã nɛ sə̀myɛ sə̀ nyí. ¹⁷N wɛ̀rhɛ́ lyẽẽ́se shí-ènu n ce kàmə̀jɛ̀sɛ́ sə̀ zhí zhí dwã nɛ kùr ré nã́yéé ré kàmə̀jɛ̃̀ nánkwaá nyí rí ni n twèlé. N súlí n wɛ̀rhɛ́ rə̀myɛ́ rə̀dù y kàmə̀jɛ̀sɛ́ sə̀ zhí zhí dwã nɛ kùrə̀ né nə̀lyè nyǎn rɛ́ kàmə̀jɛ̃̀ nánkwaá y myɛ nyí rí ni n twèlé.¹⁸N zùrhì kàmmɔ pyə́lsɛ shí-ènu n mə n pyə́l kàmə̀jɛ̀sɛ́ sə̀ zhí zhí dwã nɛ kùrə̀ né nə̀lyè y mùnì ga kòrhó w yə̀ kɔn rə̀dù námpúm. ¹⁹N súlí n tɛnɛ pyì-byərh tàndɛ rə̀ mɔ́rh nánshɛ̀n n mə n pyìlì kòrhó w kàmə̀jɛ̃̀ y yə́-pɛ̀lɛ́ wa, n súlí n pyìlì dɔfɛ̃́ɛ̃́sɛ tàndɛ ò yə́-pɛ̀lɛ́ wa.²⁰Rə̀myɛ́ kwã nɛ́, ń sə̀l ákáshá dǎr n cìì tɛ̃́ ń la mə n kwɛ̃́ Yi kòrhó wə́. ²¹Dɔ̌ òdù gakó dwɛ̀lɛ̀ rɛ́ y'à wɔ́ jə̀-tórhó yírhə́ shíyə́, ò wɛ̃̀ rɛ́ y'à wɔ́ jə̀-tórhó yírh rə̀dù ǹdə́ fwã́; ²²Dǎr rɛ́ òdù gakó y'à zhe pyəla nə̀lyè, nə̀ y'à ŋwɛ́nɛ́ dwã nyí ni. Ń wɛ̀rhɛ́ Yi kòrhó w dǎr rɛ́ gakó èta. ²³Yi kòrhó w dǎr rɛ́ shò kwã mɔ́, ń sə̀l rə̀ shí-èlyè, Yi kòrhó w sarh rɛ́ rə̀ zǎ Nəgɛɛvɛ səta, jə̀-jĩ́ sõ mó yilə;²⁴Ń zùrhì sə̀byì-kùlì wẽ̀ shə́-èna dǎr rɛ́ kùrə̀ né la rə̀ yó cṹ, wẽ̀ rə̀lyè dɔ̌ òdù gakó kùrwə, ò pyəla nɛ́ nə̀lyè y yilə, wẽ̀ dwã rə̀lyè dɔ̌ dõ kùr wə, òmyɛ pyəla nə̀lyè y yilə. ²⁵Ń sə̀l dǎr shí-èlyè Yi kòrhó sarh rɛ́ dõ mó rə̀ zǎ jə̀-gwã̀ sõ mó yilə, ²⁶n súlí n zùrhì sə̀byì-kùlì wẽ̀ shə́-éna dǎr rɛ́ kùrə̀ né la rə̀ yó cṹ mú, wẽ̀ rə̀lyè dɔ̌ òdù gakó kùr wə, wẽ̀ dwã rə̀lyè dɔ̌ dõ myɛ kùr wə.²⁷Ń sə̀l dǎr tə̀ldù, Yi kòrhó w etwã-kùr ré, kɔn zǎ nə̀-fɔ̀lɔ̀ w səta mɔ́ yilə; ²⁸Ń súlí n sə̀ dǎr rə̀lyè Yi kòrhó w etwã-kùr ré kwã́ɔ̃́ yilə;²⁹Rə̀ y'à kɔl dwã nɛ rə̀ tɛ̃́ mɔ́, sə rə̀ yə́-pǎlsɛ́ zhə̀l sə zhí dwã nɛ cìbyǔ nã́yóó w bɔ̀l mɔ́ wẽ́. Ń wɛ̀rhɛ́ èta dǎr rɛ́ rə̀lyè y ga yilə, n mə n kwɛ̃́ Yi kòrhó w etwã-kùr ré nə̀gúlə́ né nə̀lyè yə́. ³⁰Rə̀myɛ́ mɔ́ ce dǎr rɛ́ y'à wɔ́ dǎr lyɛlɛ ǹdə́ rə̀ sə̀byì-kùlì wẽ̀ ré rə̀ kùrə̀ né n'ê cĩ́ rə̀ yó mó shí ǹdə́ tə̀ldù: wẽ̀ rə̀lyè rə̀lyè dɔ̌ òdù gakó kùr wə.³¹Rə̀myɛ́ kwã nɛ́, ń sə̀l ákáshá də̀-byǎ: bə lyẽ bə̀nu Yi kòrhó w èpá èdù dǎr rɛ́ nɛ bə jarh, ³²bə lyẽ də̀-byǎ bə̀nu dwã Yi kòrhó w èpá dõ mó dǎr rɛ́ nɛ bə jarh, bə zɛ̃̀ bə lyẽ bə̀nu Yi kòrhó w etwã-kùr ré rə̀ zǎ nə̀-fɔ̀lɔ̀ w səta mɔ́ dǎr rɛ́ nɛ bə jarh. ³³N ce cəcəl dɔ̌ w zhì Yi kòrhó w kùr w ò mɛrhɛ dwã ǹdə́ dǎr rɛ́ bòbõ̌ w o m'o vò o yí Yi kòrhó w yə́-pɛ̀lɛ́ wa. ³⁴Ń yə̌l sánə́má n mə n fwàl dǎr rɛ́, n zùrhì rə̀ cìbyǔr rí bə̀ la də̀-byǎ bɛ́ rə̀ wẽ́ co mó ǹdə́ sánə́má, n súlí n yə̌l sánə́má n mə n fwàl də̀-byǎ bɛ́ bə̀ la dǎr rɛ́ nɛ lyõ bə jarh mɔ́.³⁵Rə̀myɛ́ kwã nɛ́, n zə pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀ n mə n sɔ̃̀ gɔ̀nɔ̀; n zò shərəbɛ̃́bá myaarhɛ n cĩ́ ò yó. ³⁶Ń sə̀l ákáshá yə nə̀na, n yə̌l sánə́má n mə n fwàl nɛ ǹdə́ nə̀ pyə́lsɛ sə̀ zùrhì ǹdə́ sánə́má, gɔ̀nɔ̀ w yilə. Ń zùrhì sə̀byì-kùlì wẽ̀ rə̀na yə né kùrə̀ né la rə̀ yó cṹ.³⁷Ń zə lɛ̃̌ bə̀ nyɔ̀ ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ n sɔ̃̀ gɔ̀nɔ̀ Yi kòrhó étwí-ènyí rí yilə; rə̀myɛ́ mɔ́ yàl lyì bí byɛ̀bɛ́ bə̀ y'à yě tum rí rə̀myɛ́ mɔ́ yé shò mó tum, ³⁸ǹd'ô yə né nə̀nu yə́, ǹdə́ nə̀ pyə́lsɛ́ ǹdə́ nə̀ wẽ̀ ré, bə̀ la yə né yə́-pǎlsɛ́ w cṹ mú bə̀ yə̌l sánə́má bə m'e fwàl mɔ́, e súlí rə̀ wẽ̀ ré rə̀nu y yə né kùrə̀ né la rə̀ yó cṹ rə̀ zùrhì ǹdə́ kàmmɔ mɔ́.

¹Bəsalɛl sə̀l ákáshá dɔ̌ n mə n wɛ̀rhɛ́ kùlkṍ wə́. Kùlkṍ w dwɛ̀lɛ̀ rɛ́ yàl jə̀-tórhó yírhə́ nə̀lyè ǹdə́ fwã́, ò wɛ̃̀ rɛ́ yə̀ jə̀-tórhó yírh rə̀dù ǹdə́ fwã́, ò dɛ̃̌-zhìyə́ y zɛ̃̀ e yə̀ jə̀-tórhó yírh rə̀dù ǹdə́ fwã́. ²Ń yə̌l sánə́má mɔ̀bɔ́ mə̀ càn n mə n fwàl ò wu w ǹdə́ ò kwã y ga, n zɛ̃̀ n zə sánə́má n cĩ́ nà n mə n kə́kɛ́lɛ́ ò cã̌ yá. ³N zùrhì sánə́má cìbyǔr rə̀na n ce ò nə̀gúlə́ né nə̀na y nɛ: cìbyǔr rə̀lyè èpá èdù ni, cìbyǔr rə̀lyè èpá dõ mó ne.⁴N sə̀ ákáshá də̀-byǎ bɛ́, n yə̌l sánə́má n mə n fwàl bɛ; ⁵n zɛ̃̀ n kwè be n ce kùlkṍ w sarha nɛ́ cìbyǔr rí bɔ̀là bɛ́ wa, bə̀ m'ê zhĩ wə. ⁶Rə̀myɛ́ kwã nɛ́, Bəsalɛl zùrhì kùlkṍ w nyí-byǐ rí ǹdə́ sánə́má mɔ̀bɔ́ mə̀ càn, rə̀ dwɛ̀lɛ̀ rɛ́ yàl jə̀-tórhó yírhə́ nə̀lyè ǹdə́ fwã́, rə̀ wɛ̃̀ rɛ́ zɛ̃̀ rə yə̀ jə̀-tórhó yírh rə̀dù ǹdə́ fwã́.⁷N súlí n zùrhì shərəbɛ̃́bá bə̀lyè ǹdə́ sánə́má n dɛ̃ kùlkṍ w nyí-byǐ rí yə́-pɛ̀lɛ́ y ǹdə́ rə̀ kùr rí ga sõ, ⁸shərəbɛ̃́ èdù yə́-pɛ̀lɛ́ y sõ, è dõ mó kùr rí sõ. Ń zùrhì bi n dɛ̃ kùlkṍ w nyí-byǐ rí yə́-pɛ̀lɛ́ y ǹdə́ rə̀ kùr rí ga sõ, sə bə̀ nɛ bɛ. ⁹Shərəbɛ̃́bá y'à zhẽ̌ bə̀ vɔ̀mɛ̀ nɛ́ dɛ̃̌ bə lɛ̀lɛ̀ nɛ bə̀ m'ê círhí kùlkṍ w nyí-byǐ rí; bə̀ yésé y'à zǎ dwã, bə̀ bə̀lyè y ga y'à n'ê nyǐ kùlkṍ w nyí-byǐ rí səta.¹⁰Rə̀myɛ́ kwã nɛ́, ń sə̀l ákáshá dɔ̌ n mə n fwar tabəlɛ́ yá, è dwɛ̀lɛ̀ rɛ́ yàl jə̀-tórhó yírhə́ nə̀lyè, è wɛ̃̀ rɛ́ yə̀ jə̀-tórhó yírh rə̀dù, è dɛ̃̌-zhìyə́ y zɛ̃̀ e yə̀ jə̀-tórhó yírh rə̀dù ǹdə́ fwã́. ¹¹N yə̌l sánə́má mɔ̀bɔ́ mə̀ càn n mə n fwàl ya, n zɛ̃̀ n zə sánə́má n cĩ́ nà n mə n kə́kɛ́lɛ́ è cã̌ yá. ¹²Bəsalɛl sə̀l də̀-byǎ bə̀ wɛ̃̀ rɛ́ y'à wɔ́ jə̀-wàn n mə n zə è nyə́ né, n súlí n zə sánə́má n cĩ́ nà də̀-byǎ bɛ́ yó n mə n kə́kɛ́lɛ́ bə̀ cã̌. ¹³N zùrhì sánə́má cìbyǔr rə̀na n ce tabəlɛ́ y nèsé sə̀na yá, è nə̀gúlə́ né nə̀na y mɔ́ nɛ¹⁴Bə̀ co cìbyǔr rí bə̀ la də̀-byǎ bɛ́ rə̀ bɔ̀là bɛ́ wẽ́ co bə m'e zhĩ tabəlɛ́ y mɔ́, də̀-byǎ bɛ́ bə̀ m'e zə tabəlɛ́ y nyə́ né mó yala nɛ. ¹⁵Ń sə̀l də̀-byǎ bɛ́ bə̀myɛ́ ǹdə́ ákáshá dɔ̌, n yə̌l sánə́má n mə n fwàl bɛ, tabəlɛ́ y zhũ mú yilə. ¹⁶N zùrhì tabəlɛ́ y wẽ̀ ré dwã bɛ́ ǹdə́ sánə́má mɔ̀bɔ́ mə̀ càn: nə̀zhĩ̌si ǹdə́ kǎzɔ̀má ǹdə́ nə̀zhì-bwǎlsɛ e súlí kwə̀lsé bə̀ y'à la m'e ló də̀vɛ̃́ y tɛ̃́ bə pə Yi ni mú.¹⁷Rə̀myɛ́ kwã nɛ́, Bəsalɛl zùrhì ku w bə̀ n'ê cĩ́ pàntámsɛ́ ò yó mó ǹdə́ sánə́má mɔ̀bɔ́ mə̀ càn. Ò kùr rí ǹd'ô cã̌ y ǹd'ô kǎzɔ̀má bɛ́ ǹd'ô kúkùlə́ né e súlí ò pùnə́ né y'à j'a tó dwã rə zùrhì, rə̀ wɔ́ kɔn rə̀dù námpúm. ¹⁸Ò cã̌ y y'à zhe jɛ̀rh shə̀ldù. Jɛ̀rh sə̀tɔ̀ y'à wɔ cã̌ y èpá èdù, sə dwã sə̀tɔ̀ myɛ zɛ̃̀ sə̀ y'à wɔ cã̌ y èpá dõ mó. ¹⁹Jɛ̀sɛ́ shə̀ldù y sə̀ y'à zhí ku w bə̀ n'ê cĩ́ pàntámsɛ́ ò yó mó cã̌ y nɛ mɔ́ èdù gakó y'à wɔ́ kǎzɔ̀má bə̀tɔ̀ námpúmə́, kǎzɔ̀má bɛ́ mə̀dù gakó y'à zhe mə̀ kúkùlí e súlí mə̀ pùní, rə̀ ga rə̀ zhí zhí dwã nɛ.²⁰Ku w bə̀ n'ê cĩ́ pàntámsɛ́ ò yó mó cã̌ y cìcì mú y'à wɔ́ kǎzɔ̀má bə̀na námpúmə́, kǎzɔ̀má bɛ́ mə̀dù gakó y'à zhe kúkùlí ǹdə́ pùní: ²¹kúkùlí y'à ŋwɛ́nɛ́ jɛ̀sɛ́ sə̀lyé y nã́yéésé gə́ y'à zhí cã̌ y nɛ mə̀gã̌ mɔ́ kùr wə, è dõ myɛ y'à ŋwɛ́nɛ́ jɛ̀sɛ́ sə̀lyè y sə̀ y'à pú mú gə́ y'à zhí cã̌ y nɛ mə̀gã̌ mɔ́ kùr wə, è dõ myɛ zɛ̃̀ è y'à ŋwɛ́nɛ́ jɛ̀sɛ́ sə̀lyé y shɛ̀bɛ́ sə̀ tà kwã sə pú mú gə́ y'à zhí ku w bə̀ n'ê cĩ́ pàntámsɛ́ ò yó mó cã̌ y nɛ mə̀gã̌ mɔ́ kùr wə: kɔn y'à wɔ́ èta jɛ̀sɛ́ shə̀ldù y yilə. ²²Kúkùlə́ né ǹdə́ jɛ̀sɛ́ ga y'à tó dwã ǹdə́ ku w bə̀ n'ê cĩ́ pàntámsɛ́ ò yó mó rə zùrhì ǹdə́ sánə́má mɔ̀bɔ́ mə̀ càn mɔ́, rə̀ y'à wɔ́ kɔn rə̀dù námpúm.²³Bəsalɛl zùrhì ku w pàntámsɛ́ shàlpyɛ̀ yá, ǹdə́ pyə́lsɛ e súlí nə̀zhĩ̀-bwǎlsɛ́ ga ǹdə́ sánə́má mɔ̀bɔ́ mə̀ càn. ²⁴N zə sánə́má mɔ̀bɔ́ mə̀ càn cəə́le shə́-ètɔ̀ n mə n zùrhì ku w bə̀ n'ê cĩ́ pàntámsɛ́ ò yó mó e súlí ò wẽ̀ ré dwã bɛ́ gakó.²⁵Rə̀myɛ́ kwã nɛ́, Bəsalɛl sə̀ ákáshá dɔ̌ n mə n fwar vwĩ̀-jùlú w bə̀ n'ê ji wẽ̀ ré rə̀ lwẽ́ nã́nyə̀nyɛ̀lɛ́ myǐn ò yó mó: ò dwɛ̀lɛ̀ rɛ́ y'à wɔ́ jə̀-tórhó yírh rə̀dù, ò wɛ̃̀ rɛ́ myɛ y'à wɔ́ jə̀-tórhó yírh rə̀dù, ò sarha nɛ́ nə̀na y ga dwɛ̀lɛ̀ rɛ́ y'à mə̌ dwã. Ò dɛ̃̌-zhìyə́ y y'à wɔ́ jə̀-tórhó yírhə́ nə̀lyè. Ò nyimi ní y'à dɛ̃ wa, rə̀ y'à wɔ́ kɔn rə̀dù. ²⁶N yə̌l sánə́má mɔ̀bɔ́ mə̀ càn n mə n fwàl ò dɛ̃̌ yé y ǹd'ô sarha nɛ́ n kə́kɛ́lɛ́, e súlí ò nyimi ní; n zə sánə́má n mə n cĩ́ nà n kə́kɛ́lɛ́ ò cã̌ yá.²⁷Bəsalɛl lù sánə́má cìbyǔr n ce vwĩ̀-jùlú sarha nɛ́ èpésé sə̀lyè y ga nɛ, nà y bə̀ cĩ́ ǹdə́ sánə́má bə m'e kə́kɛ́lɛ́ ò cã̌ y mɔ́ kùr wə, bə̀ la də̀-byǎ bɛ́ rə̀ bɔ̀là bɛ́ w co, vwĩ̀-jùlú w zhũ mú yilə. ²⁸Ń sə̀l ákáshá də̀-byǎ, n zɛ̃̀ n yə̌l sánə́má n mə n fwàl bɛ. ²⁹Ń wɛ̀rhɛ́ nwə̃̌ y kɛ̀bɛ́ bə̀ m'ê pɛ Yi tum rí tũ̌ ŋwɔ̀nɔ́ w mɔ́ e súlí wẽ̀ ré tɛ̀bɛ́ rə̀ lwẽ́ nã́nyə̀nyɛ̀lɛ́ rə̀ bə jìmdi zhe, rə̀myɛ́ mɔ́ yàl lò mɔ̀bɔ́ ń yà ń yě tum rí rə̀myɛ́ mɔ́ yé shò mó tum.

¹Rə̀myɛ́ kwã nɛ́, Bəsalɛl sə̀l ákáshá dɔ̌ n mə n fwar vwə̃̀ námpúmə́ cɛ̃́ɛ̃́ nɛ́ jùlú wə́: ò dwɛ̀lɛ̀ rɛ́ y'à wɔ́ jə̀-tórhó yírhə́ nə̀nu, ò wɛ̃̀ rɛ́ myɛ y'à wɔ́ jə̀-tórhó yírhə́ nə̀nu, ò sarha nɛ́ ga dwɛ̀lɛ̀ rɛ́ y'à mə̌ dwã, ò dɛ̃̌-zhìyə́ y zɛ̃̀ è y'à wɔ́ jə̀-tórhó yírhə́ nə̀tɔ̀. ²N wɛ̀rhɛ́ nyimi n ce ò nə̀gúlə́ nə̀na y nɛ, nə yə̀ kɔn rə̀dù námpúm ǹdə́ wa, n yə̌l kàmmɔ n mə n fwàl wa. ³Ń zùrhì vwĩ̀-jùlú w wẽ̀ ré dwã bɛ́: nə̀zhẽ̌ tɔ̀mdɛ́ yilə, ǹdə́ pyə́lə́ né ǹdə́ jal-zhɔ́rhɔ́ nə̀zhẽ̌ né ǹdə́ nàmá lyəlsé e súlí nə̀zhĩ̌sí bə̀ m'ê ji wẽ̀ ré rə̀ lwẽ́ nã́nyə̀nyɛ̀lɛ́ y mɔ́. Ń zùrhì wẽ̀ ré rə̀myɛ́ mɔ́ gakó ǹdə́ kàmmɔ.⁴N zùrhì kàmmɔ ku ǹd'ô bɔ̀là ǹdə zhəzhərhá ta vwĩ̀-jùlú w yilə, n mə n zù ò tɛ̃́ mɔ́ kɔn b'e yí ò bòbõ̌ wə, nà y bə̀ cĩ́ ǹdə́ sánə́má bə m'e kə́kɛ́lɛ́ ò cã̌ y mɔ́ kùr wə. ⁵N zùrhì cìbyǔr rə̀na n ce kàmmɔ ku ǹd'ô bɔ̀là ǹdə zhəzhərhá ta mɔ́ nə̀gúlə́ né nə̀na y nɛ, də̀-byǎ bɛ́ bə̀ la nə̀ wẽ́ co mó yilə.⁶Ń sə̀l ákáshá də̀-byǎ, n zɛ̃̀ n yə̌l kàmmɔ n mə n fwàl bɛ. ⁷N ce də̀-byǎ bɛ́ cìbyǔr rí rə̀ y'à wɔ vwĩ̀-jùlú w sarha nɛ́ bɔ̀là bɛ́ mɔ́ wa, vwĩ̀-jùlú w zhũ yilə. Ń zə də̀-lwəəre n mə n fwar vwĩ̀-jùlú wə́, ò wu w y'à wɔ́ nánfóó.⁸Rə̀myɛ́ kwã nɛ́, ń zə kana bɛ́ bə̀ y'à n'ê twĩ̀ dwã-joló kòrhó w étwí-ènyí rí ni mú kàmmɔ zhə̀zhésé n mə n zùrhì kàmmɔ zhǎ y ǹdə́ kàmmɔ ku w kɔ̀bɔ́ è kùr ré n'ê cĩ́ ò yó mó.⁹Rə̀myɛ́ kwã nɛ́, Bəsalɛl tɛnɛ dwã-joló kòrhó w kɔ̀nɔ́ wá. Kɔn zǎ Nəgɛɛvɛ, jə̀-jĩ́ sõ mó, kɔ̀nɔ́ w kàmə̀jɛ̀sɛ́ y'à sɔ̃̀ ǹdə́ lɛ̃̌ bə̀ nyɔ̀wà, sə̀ dwɛ̀lɛ̀ rɛ́ y'à wɔ́ jə̀-tórhó yírhə́ zɔ̌m. ¹⁰Yə né shí-èlyè y bə̀ y'à lyẽ kàmə̀jɛ̀sɛ́ nə̀ yó mó e súlí wẽ̀ ré tɛ̀bɛ́ yə né kùrə̀ né y'à cĩ́ rə̀ yó mó y'à zùrhì ǹdə́ kàmmɔ. Pyə́lsɛ́ ǹdə́ cɛ̌bsɛ́ dwã bɛ́ bə̀ y'à m'e lyẽ kàmə̀jɛ̀sɛ́ mɔ́ y'à zùrhì ǹdə́ sə̀byì-kùlì.¹¹Jə̀-gwã̀ sõ mó, kàmə̀jɛ̀sɛ́ dwɛ̀lɛ̀ rɛ́ myɛ y'à wɔ́ jə̀-tórhó yírhə́ zɔ̌m, ǹdə́ sə̀ yə né shí-èlyè yə́, e súlí wẽ̀ ré tɛ̀bɛ́ nə̀ kùrə̀ né n'ê cĩ́ rə̀ yó shí-èlyè rə̀ zùrhì ǹdə́ kàmmɔ mɔ́ ǹdə́ yə né pyə́lsɛ́ e súlí cɛ̌bsɛ́ dwã bɛ́ sə̀ zùrhì ǹdə́ sə̀byì-kùlì mú. ¹²Kɔn zǎ nə̀-fɔ̀lɔ̀ w səta, kàmə̀jɛ̀sɛ́ dwɛ̀lɛ̀ rɛ́ y'à wɔ́ jə̀-tórhó yírhə́ shí-ènu, sə̀myɛ y'à lyẽ yə shí ni, yə né shí y kùrə̀ né y'à n'ê cĩ́ wẽ̀ shí yó, yə né pyə́lsɛ́ ǹdə́ nə̀ cɛ̌bsɛ́ dwã bɛ́ y'à zùrhì ǹdə́ sə̀byì-kùlì.¹³Yi-púrhí sõ, kɔ̀nɔ́ w nyí rí səta, kàmə̀jɛ̀sɛ́ wɛ̃̀ rɛ́ y'à wɔ́ jə̀-tórhó yírhə́ shí-ènu; ¹⁴Kɔ̀nɔ́ w nyí rí jə̀-jĩ́ y ǹdə́ è jə̀-gwã̀ y ga, kàmə̀jɛ̀sɛ́ dwɛ̀lɛ̀ rɛ́ y'à wɔ́ jə̀-tórhó yírhə́ shí ǹdə́ nə̀nu, yə né y'à wɔ́ nə̀tɔ̀, ¹⁵wẽ̀ ré tɛ̀bɛ́ nə̀ kùrə̀ né y'à n'ê cĩ́ rə̀ yó mó y'à wɔ́ rə̀tɔ̀. ¹⁶Kàmə̀jɛ̀sɛ́ shɛ̀bɛ́ gakó bə̀ y'à m'e kə́kɛ́lɛ́ kɔ̀nɔ́ w mɔ́ y'à sɔ̃̀ ǹdə́ lɛ̃̌ bə̀ nyɔ̀wà.¹⁷Wẽ̀ ré yə né kùrə̀ né y'à n'ê cĩ́ rə̀ yó mó y'à zùrhì ǹdə́ kàmmɔ; yə né pyə́lsɛ́ ǹdə́ nə̀ cɛ̌bsɛ́ dwã bɛ́ y'à zùrhì ǹdə́ sə̀byì-kùlì. Bə̀ y'à yə̌l sə̀byì-kùlì bə m'e fwàl wẽ̀ ré tɛ̀bɛ́ bə̀ y'à cĩ́ yə né yə́-pǎlsɛ́ w mɔ́. Sə kɔ̀nɔ́ w yə né gakó y'à lyẽ dwã nɛ ǹdə́ sə̀byì-kùlì cɛ̌bsɛ. ¹⁸Kɔ̀nɔ́ w nyí rí gɔ̀nɔ̀ w y'à sɔ̃̀ ǹdə́ lɛ̃̌ bə̀ nyɔ̀wà, e súlí pyì-kur rə̀ mɔ́rh námpùúlí ǹdə́ nánshɛ̀n e súlí nánshɛ̀n gwɛ̃́gwɛ̃́, bə̀ y'à súlí bə zò wə; rə̀myɛ́ mɔ́ yàl lò mɔ̀bɔ́ ń yà ń yě tum rí rə̀myɛ́ mɔ́ yé shò mó tum; ò dwɛ̀lɛ̀ rɛ́ y'à wɔ́ jə̀-tórhó yírhə́ shí-èlyè, sə ò dɛ̃̌-zhìyə́ y y'à wɔ́ jə̀-tórhó yírhə́ nə̀nu ǹdə kɔ̀nɔ́ w kàmə̀jɛ̀sɛ́ ta. ¹⁹Yə né nə̀na y bə̀ y'à lyẽ w nə̀ yó mó y'à zùrhì ǹdə́ kàmmɔ. Wẽ̀ ré yə né kùrə̀ né y'à cĩ́ rə̀ yó mó myɛ y'à zùrhì ǹdə́ kàmmɔ; pyə́lsɛ́ bə̀ y'à m'e pyɛ́l w yə né ne mó y'à zùrhì ǹdə́ sə̀byì-kùlì; bə̀ y'à yə̌l sə̀byì-kùlì bə̀ m'e fwàl wẽ̀ ré tɛ̀bɛ́ bə̀ y'à cĩ́ yə né yə́-pǎlsɛ́ w ǹdə́ cɛ̌bsɛ́ dwã bɛ́. ²⁰Dwã-joló kòrhó w ǹdə́ kɔ̀nɔ́ w wu w pálá nɛ́ gakó y'à zùrhì ǹdə́ kàmmɔ.²¹Nyǐ kɔn rɛ́ tɛ̀bɛ́ bə̀ vùr Yi kòrhó w dɔbrɛ nyə́ né kòrhó w yilə. Muyiisi ń pɔ nyí n ce bə gə̀ rɛ; è yàl vwĩ̀-zwə́lnə Aarɔ̃ byǐ Yətamaarɛ ń yàl Levyi dwí rí lyì bí yé né bə m'e gə̀ rɛ. ²²Uri byǐ Bəsalɛl, Uuri nɔ̃̌ wá, Zhəda kwálá y lò, yà ń twĩ̀ tumə né nyɛ̀bɛ́ gakó Cinu yà ń pɔ nə̀ nyí Muyiisi ni mú. ²³Ayəsamaakɛ byǐ Owɔləyaabɛ, Dan kwálá y lò, yàl ń sanna: Owɔləyaabɛ yà ń wɔ́ nə́kul-sə̀lnə, ń yà ń yě kɔn rɛ́ tɛ̀bɛ́ rə̀ càn mɔ́ wɔ̀rhɔ́ yé shò, ń yà ń yě myaarhɛ zó n cĩ́ gàndɛ́ yó ǹdə́ pyì-kur rə̀ mɔ́rh námpùúlí ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ kɛ̀bɛ́ è càn.²⁴Sánə́má mɔ́ mɔ̀bɔ́ Esərayɛl lyì byǎ bɛ́ pɔ còrhó-jì y tumə né yil mú gakó yàl cəə́le zɔ̃̌-lyɛlɛ ǹdə́ shə́-shàlpyɛ̀ ǹdə́ tàlpyɛ̀ (877) ǹdə́ gə̀rámməbá zwã̌-àtɔ̀ (300), bə̀ gə jə̀ə̀le bə̀ dùmì rí ǹdə́ còrhò-jì y mɔrhɔ ku wə́. ²⁵Dwí rí lyì bí byɛ̀bɛ́ bə̀ gàl mɔ́ sə̀byì-kùlì y bə̀ pɔ mɔ́ yàl cəə́le mɔ̀ɔ̀rhɛ̀ rə̀tɔ̀ ǹdə́ shí ǹdə́ tàlpyɛ̀ (3017) ǹdə́ gə̀rámməbá zɔ̃̌-nyàlpyɛ̀ ǹdə́ shí-ènu (750), bə̀ gə jə̀ə̀le ǹdə́ còrhó-ji y mɔrhɔ ku wə́. ²⁶È n'ê yǎl e wɔ̀ bə̀ bala mɔ̀ɔ̀rhɛ̀ zɔ̃̌-nyə̀ldù ǹdə́ rə̀tɔ̀ ǹdə́ zwã̌-ànu ǹdə́ shí-ènu (603 550), lyì bí byɛ̀bɛ́ bə̀ zhe byinə shə́-èlyè è m'ê la cìnə́ bé, bə̀ gàl mɔ́, mə̀dù gakó zɔ gə̀rámməbá bə̀nu n bà.²⁷Bə zə sə̀byì-kùlì cəə́le mɔ̀ɔ̀rhɛ̀ rə̀tɔ̀ (3000) bə m'e zùrhì wẽ̀ ré tɛ̀bɛ́ còrhó-jì y yə né e súlí è wẽ́ gɔ̀nɔ̀ w yə né zɔ̀mɛ̀ y kùrə̀ né la rə̀ yó cṹ mú, è n'ê yǎl e wɔ̀ bə̀ ku w òmyɛ́ òdù gakó y'à zùrhì ǹdə́ cəə́le shə́-ètɔ̀. ²⁸Bə zə cəə́lé shí ǹdə́ tàlpyɛ̀ y ǹdə́ gə̀rámməbá zɔ̃̌-nyàlpyɛ̀ ǹdə́ shí-ènu (750) y bə̀ dàl mɔ́ bə m'e zùrhì yə né pyə́lsɛ́ ǹdə́ cɛ̌bsɛ́ bə̀ m'e lyẽ yə né dwã nɛ mɔ́, bə súlí bə yə̌l be, bə m'e fwàl wẽ̀ ré bə̀ y'à cĩ́ yə né yə́-pǎlsɛ́ w mɔ́. ²⁹Kàmmɔ w kɔ̀bɔ́ gakó Esərayɛl lyì byǎ bɛ́ y'à pɔ mɔ́ yàl cəə́le mɔ̀ɔ̀rhɛ̀ rə̀lyè ǹdə́ zɔ̌m ǹdə́ shí-èlyè ǹdə́ rə̀na (2124).³⁰Bəsalɛl zə w n mə n zùrhì wẽ̀ ré tɛ̀bɛ́ rə̀ n'ê kwɛ̃́ étwí-ènyí wẽ̀ ré ǹdə́ kàmmɔ vwĩ̀-jùlú w ǹd'ô ku w ǹd'ô bɔ̀là bɛ́ ǹdə́ vwĩ̀-jùlú w wẽ̀ ré dwã bɛ́ gakó, ³¹ǹdə́ wẽ̀ ré tɛ̀bɛ́ rə̀ kwɛ̃́ kɔ̀nɔ́ w ǹdə́ Yi kòrhó w pálá nɛ́ gakó e súlí kɔ̀nɔ́ w wu w pálá nɛ́ gakó.

¹Bə̀ zɔ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́, bə m'e sɔ̃̀ vwĩ̀-zwə́l tum rí gàndɛ́ còrhó-jì y w mú e súlí Aarɔ̃ vwĩ̀-zwə́lnə gàndɛ́, ǹdə Cinu gə́ yà ń pɔ nyí Muyiisi ni ní.²Bəsalɛl zə pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀ n mə n sɔ̃̀ vwĩ̀-zwə́lnə náncɛ y kàmə̀zwǐ yə́, n zɛ̃̀ n zə sánə́má n zò yə. ³Bə̀ lù sánə́má bə ce mə jǐrh ǹdə sá-jɛ̃̀ ta, bə zɛ̃̀ bə bàà bàà mɔ nə̀rh námmyɛ̀ɛ́sɛ bə m'e gàn dwã nɛ ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌, rə̀myɛ́ mɔ́ yàl lò mɔ̀bɔ́ ń yà ń yě tum rí rə̀myɛ́ mɔ́ yé shò mó tum.⁴Bə̀ nyal vɔla nə̀lyè bə ce kàmə̀zwǐ y nyə́ né ne, è lyẽ e zhì jàà èdù mú yilə. ⁵Vwĩ̀-zwə́lnə náncɛ y kàmə̀zwǐ y lyẽẽ́sé sə̀ y'à pyɛ̀lɛ́ è yó mó myɛ y'à sɔ̃̀ ǹdə kàmə̀zwǐ y ta: pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀wà, sə̀ y'à súlí sə zò ǹdə́ sánə́má, ǹdə Cinu gə́ yà ń pɔ nyí Muyiisi ni ní.⁶Rə̀myɛ́ kwã nɛ́, bə̀ y'à tɛnɛ nə́kul-shɛ̀mà dwí rə̀dù yə́, bə dɛ̃ dɛ̃ shisí sə̀ y'à zùrhì ǹdə́ sánə́má mɔ́ yó; bə̀ y'à zɛ̃̀ bə kɛ̃ Esərayɛl lyì byǎ bɛ́ kwálsɛ́ shí ǹdə́ sə̀lyè y yilə né sə̀ yó ǹdə bə̀ gə́ y'a kɛ̃ zhə̀n-pɔ ku w yó né. ⁷N dɛ̃ nə́kulə né nə̀ wɔ́ Esərayɛl lyì byǎ bɛ́ yò lyǐrh wẽ̀ ré mó, vwĩ̀-zwə́lnə kàmə̀zwǐ y pyə́pyɛla nɛ́ nɛ, ǹdə Cinu gə́ yà ń pɔ nyí Muyiisi ni ní.⁸Rə̀myɛ́ kwã nɛ́, ń sɔ̃̀ nə̀bán yó kàmə̀jɛ̃̀ y ǹdə vwĩ̀-zwə́lnə náncɛ y kàmə̀zwǐ y ta: ń zə pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀ n mə n sɔ̃̀ ya, n zɛ̃̀ n zò y ǹdə́ sánə́má, rə̀myɛ́ mɔ́ yàl lò mɔ̀bɔ́ ń yà ń yě tum rí rə̀myɛ́ mɔ́ yé shò mó tum. ⁹Nə̀bán yó kàmə̀jɛ̃̀ y y'à kɔ́ e pú dwã wa, è sarha nɛ́ nə̀na y ga dwɛ̀lɛ̀ rɛ́ y'à mə̌ dwã, nə̀ dwɛ̀lɛ̀ rɛ́ ǹdə́ nə̀ wɛ̃̀ rɛ́ ga y'à wɔ́ jɛ̃̀-wàn.¹⁰10 Bə̀ y'à tùrhì nə́kulə náàcɛ̀nà nə̀rh sə̀na è yó, è bɔ́bwár yilə: nà nã́yə́ə́ y nə́kulə né wɔ́ sarədwaanɛ ǹdə́ tɔpaazɛ e súlí emərɔ́ɔ́dɛ. ¹¹Nə̀rh sə̀lyè nyǎ y nə́kulə né y'à wɔ́ esəkarəbúúkəli ǹdə́ ləzulyiiti e súlí zhaasəpɛ. ¹²Nə̀rh sə̀tɔ̀ nyǎ y nə́kulə né y'à wɔ́ agaatɛ ǹdə́ korənəlyiini e súlí amətiisəti. ¹³Nə̀rh sə̀na nyǎ y nə́kulə né y'à wɔ́ kərizolyiiti ǹdə́ beriili e súlí onikəsi. Nə́kulə né, òmyɛ́ òdù gakó y'à dɛ̃ sánə́má ka cəcəl wə.¹⁴Nə́kulə né y'à mɛrhɛ Esərayɛl lyì byǎ bɛ́ kwálsɛ́ yilə né yó wə́, nə̀ y'à wɔ́ shí ǹdə́ nə̀lyè ǹdə Esərayɛl lyì byǎ bɛ́ kwálsɛ́ yó w ta. Bə̀ y'à kɛ̃ kwálá èdù gakó yil ré nə́kulu òdù gakó yó, kwálsɛ́ gə́ wɔ́ shí ǹdə́ sə̀lyè yilə, ǹdə bə̀ gə́ y'a kɛ̃ zhə̀n-pɔ ku w yó né. ¹⁵Bə̀ zùrhì nyáná nə̀lyè námpɔ́lsɛ ǹdə́ sánə́má mɔ̀bɔ́ mə̀ càn, nə pyɛ́pyɛ́rɛ́ dwã nɛ ǹdə wɔ́ nyínsi bə̀ nyɔ̀ ta, bə ce nə̀bán yó kàmə̀jɛ̃̀ y nɛ. ¹⁶Bə̀ zùrhì sánə́má shisí shɛ̀bɛ́ bə̀ wɔ̌ bə̀ dɛ̃ nə́kulə sə̀ yó mó sə̀lyè ǹdə́ sánə́má cìbyǔr rə̀lyè, bə zɛ̃̀ bə lyẽ cìbyǔr rí nə̀bán yó kàmə̀jɛ̃̀ y dɛ̃̌ sõ nə̀gúlə́ né nə̀lyè y ne.¹⁷Bə̀ lyẽ sánə́má nyáná námpɔ́lsɛ́ nə̀ pyɛ́pyɛ́rɛ́ dwã nɛ mɔ́ cìbyǔr rí rə̀lyè y ne, nə̀bán yó kàmə̀jɛ̃̀ y nyə́ né ne; ¹⁸bə zɛ̃̀ bə lyẽ sánə́má nyáná námpɔ́lsɛ́ nyə́ né nə̀lyè y sánə́má shisí sə̀lyè y ne, bə súlí bə tó vwĩ̀-zwə́lnə náncɛ y kàmə̀zwǐ y yé y w bə lyẽ ne è vɔla nɛ́ nɛ.¹⁹Bə̀ lù sánə́má cìbyǔr rə̀lyè, bə kwè re bə lyẽ nə̀bán yó kàmə̀jɛ̃̀ y tɛ̃́ sõ nə̀gúlə́ né nə̀lyè y ne, nə̀ gə́ n'ê pyẽ̀ vwĩ̀-zwə́lnə náncɛ y kàmə̀zwǐ y yó mə̀gã̌ mɔ́. ²⁰Bə k'e lù sánə́má cìbyǔr dwã rə̀lyè bə ce vwĩ̀-zwə́lnə náncɛ y kàmə̀zwǐ y vɔla nɛ́ tɛ̃́ mɔ́ nɛ, è yé né, vɔla nɛ́ gə́ nyal nə dɛ̃ kàmə̀zwǐ y ni mə̀gã̌ mɔ́, kàmə̀zwǐ y lyẽẽ́sé yó.²¹Bə zə kàmə̀jɛ̃̀ námpùlí bə m'e lyẽ nə̀bán yó kàmə̀jɛ̃̀ y cìbyǔr rí ǹdə́ vwĩ̀-zwə́lnə náncɛ y kàmə̀zwǐ y cìbyǔr rí dwã nɛ, mùnì ga nə̀bán yó kàmə̀jɛ̃̀ y pyẽ̀ vwĩ̀-zwə́lnə náncɛ y kàmə̀zwǐ y lyẽẽ́sé yó. Èta mɔ́ è y'à t'â dùr vwĩ̀-zwə́lnə náncɛ y kàmə̀zwǐ y yó yé, ǹdə Cinu gə́ yà ń pɔ nyí Muyiisi ni ní.²²Rə̀myɛ́ kwã nɛ́, ń sɔ̃̀ kàmə̀zù-èdɔ̀lɔ̀ w kɔ̀bɔ́ vwĩ̀-zwə́lnə náncɛ y n'ê zwì è kàmə̀zwǐ y kùr w mú, ò púlə́púlə́ y'à j'a sɔ̃̀ ǹdə́ pyì-kur rə̀ mɔ́rh námpùúli, rə̀myɛ́ mɔ́ yàl sɔ́rá tum. ²³Bə̀ y'à vùr byã kàmə̀zù-èdɔ̀lɔ̀ w cəcəl ré w yó w gə́ y'à la mə̀gã̌ tó mó. Byã y nyí rí y'à kwərə, rə̀myɛ́ mɔ́ y'à ce è y'à də̀ kɔn tɛ̀bɛ́ rə̀ m'a kǎr yé. ²⁴Bə̀ y'à zò gərənəjé byǎ myaarhɛ ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀wà, bə cĩ́ kàmə̀zù-èdɔ̀lɔ̀ w tɛ̃́ sõ nyə́ né yó.²⁵Bə̀ zùrhì sánə́má mɔ̀bɔ́ mə̀ càn lòmə̀ námpɔ́lsɛ bə lyẽ bə lwẽ̌ lwẽ̌ gərənəjé byǎ bɛ́ nɛ, kàmə̀zù-èdɔ̀lɔ̀ w tɛ̃́ sõ nyə́ né ne, bə kə́kɛ́lɛ́: ²⁶lòmə̀ né námpɔ́lsɛ́ ǹdə́ gərənəjé byǎ bɛ́ y'à lwẽ̌ dwã nɛ èdù èdù kàmə̀zù-èdɔ̀lɔ̀ w nyə́ né ne rə kə́kɛ́lɛ́, vwĩ̀-zwə́l tum rí tũ̌ yilə, ǹdə Cinu gə́ yà ń pɔ nyí Muyiisi ni ní.²⁷Rə̀myɛ́ kwã nɛ́, bə̀ sɔ̃̀ lɛ̃̌ kàmə̀zwǐsí Aarɔ̃ ǹdə́ ń byǎ bɛ́ yilə, rə̀myɛ́ mɔ́ yàl sɔ́rá tum, ²⁸bə súlí bə sɔ̃̀ lɛ̃̌ yó-bɔrɔ́ wá, ǹdə́ lɛ̃̌ yə́-púr bɔ́bwár wẽ̀ ré e súlí lɛ̃̌ jar rɛ́, ǹdə́ lɛ̃̌ bə̀ nyɔ̀wà; ²⁹e súlí lɛ̃̌ bə̀ nyɔ̀ cã̌-tàndɛ́ rə̀ zò ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́, ǹdə Cinu gə́ yà ń pɔ nyí Muyiisi ni ní, sə rə̀myɛ́ mɔ́ yàl lò mɔ̀bɔ́ ń yà ń yě tum rí rə̀myɛ́ mɔ́ yé shò mó tum.³⁰Rə̀myɛ́ kwã nɛ́, bə̀ zə sánə́má mɔ̀bɔ́ mə̀ càn bə zùrhì ku ǹdə pùní ta, ò wɔ́ kɔn rɛ́ tɛ̀bɛ́ bə̀ pɔ Cinu ni mú myɔrhɔ, bə zɛ̃̀ bə kɛ̃ ò yó ǹdə bə̀ gə́ y'a kɛ̃ zhə̀n-pɔ ku yó né bə wɔ̀: «Bə̀ pɔ Cinu ni». ³¹Bə zə kàmə̀jɛ̃̀ námpùlí bə m'e lyẽ ku w òmyɛ́ mɔ́ yó-bɔrɔ́ w cíl rí ni, ǹdə Cinu gə́ yà ń pɔ nyí Muyiisi ni ní.³²Wɔ́ èta Yi kòrhó w dwã-joló kòrhó w tumə né gakó tó né nə twĩ̀ nə zhɛ̀. Esərayɛl lyì byǎ y'à twĩ̀ tum rí tɛ̀bɛ́ Cinu yà ń pɔ rə̀ nyí Muyiisi ni mú cìcì.Muyiisi zwẽ kɔn rɛ́ tɛ̀bɛ́ gakó Esərayɛl lyì byǎ bɛ́ wɛ̀rhɛ́ mɔ́ ³³Esərayɛl lyì byǎ bɛ́ zə Yi kòrhó y wẽ̀ ré gakó bə m'e bə̀ Muyiisi yé né: kòrhó w ǹd'ô wẽ̀ ré dwã bɛ́: ò pyə́lsɛ́ ǹd'ô sarha nɛ́ dǎr rɛ́, ǹd'ô də̀-byǎ bɛ́ bə̀ n'ê jarh dǎr rɛ́ yó mó, ǹd'ô yə né ǹdə́ wẽ̀ ré tɛ̀bɛ́ yə né kùrə̀ né n'ê cĩ́ rə̀ yó mó; ³⁴34 ǹdə́ pyì-byərh tàndɛ rə̀ mɔ́rh nánshɛ̀n ǹdə́ dɔfɛ̃́ɛ̃́sɛ tàndɛ e súlí gɔ̀nɔ̀ w ò n'ô bɔ̀n Yi jì y dwã w mɔ́; ³⁵ǹdə́ dɔbrɛ nyə́ né kùlkṍ w ǹd'ô də̀-byǎ bɛ́ ǹd'ô nyí-byǐ rí;³⁶ǹdə́ tabəlɛ́ y ǹdə́ è wẽ̀ ré dwã bɛ́ gakó ǹdə́ búrú w bə̀ n'ê pɛ Yi ni mú; ³⁷ǹdə́ ku w bə̀ n'ê cĩ́ pàntámsɛ́ ò yó, ò y'à zùrhì ǹdə́ sánə́má mɔ̀bɔ́ mə̀ càn mɔ́ ǹd'ô pàntámsɛ́ sə̀ y'à cĩ́ sə tùrhì nà èdù mú, ǹd'ô wẽ̀ ré dwã bɛ́ ǹdə́ pàntámsɛ́ nwə̃̌ yə́; ³⁸ǹdə́ sánə́má vwĩ̀-jùlú w ǹdə́ nwə̃̌ y bə̀ m'ê pɛ Yi tum rí tũ̌ mú ŋwɔ̀nɔ́ w mɔ́ ǹdə́ wẽ̀ ré tɛ̀bɛ́ rə̀ lwẽ́ nã́nyə̀nyɛ̀lɛ́ bə̀ n'ê ji myǐn mú e súlí kòrhó w étwí-ènyí rí gɔ̀nɔ̀ wá; ³⁹ǹdə́ kàmmɔ vwĩ̀-jùlú wə́, ǹd'ô ku w ǹd'ô bɔ̀là ǹdə zhəzhərhá ta mɔ́ ǹd'ô də̀-byǎ bɛ́ ǹd'ô wẽ̀ ré dwã bɛ́ gakó, ǹdə́ kàmmɔ zhǎ y ǹdə́ ku w kɔ̀bɔ́ è kùr rí n'ê cĩ́ ò yó mó;⁴⁰ǹdə́ kɔ̀nɔ́ w kàmə̀jɛ̀sɛ́ ǹd'ô yə né ǹdə́ wẽ̀ ré tɛ̀bɛ́ nə̀ kùrə̀ né n'ê cĩ́ rə̀ yó mó, ǹdə́ kɔ̀nɔ́ w nyí rí gɔ̀nɔ̀ w ǹd'ô nyínsí ǹd'ô pálá nɛ́ e súlí Yi kòrhó wə́, dwã-joló kòrhó w tum rí wẽ̀ ré dwã bɛ́ yilə; ⁴¹ǹdə́ vwĩ̀ rí zwə́l tum rí gàndɛ́ bə̀ n'ê zwì bə̀ m'ê twĩ̀ còrhó-jì y wẽ́ mó ǹdə́ vwĩ̀-zwə́lnə Aarɔ̃ gàndɛ́ e súlí gàndɛ́ tɛ̀bɛ́ ń byǎ bɛ́ y'à n'ê zwì bə̀ m'ê twĩ̀ vwĩ̀ rí zwə́l tum rí mú.⁴²Esərayɛl lyì byǎ bɛ́ y'à twĩ̀ tum rí rə̀myɛ́ mɔ́ gakó kɔn tó nyə́ né nyɛ̀bɛ́ gakó Cinu yà ń pɔ Muyiisi ni mú. ⁴³Muyiisi gə́ nyǐ n púrí kɔn tɛ̀bɛ́ gakó Esərayɛl lyì byǎ bɛ́ y'à wɛ̀rhɛ́ mɔ́ y'à tó kɔn rɛ́ tɛ̀bɛ́ cìcì Cinu yà ń pɔ rə̀ nyí mú ni, Muyiisi cĩ́ bwəl bə̀ yó.

¹Cinu wɔ̀ Muyiisi ni: ²«Cànà nã́yə́ə́ y dɛ̃ nã́yéé ré, ǹ m'ǎ pú dwã-joló kòrhó wə́, Yi kòrhó wə́.³Ǹ m'ǎ cĩ́ kùlkṍ w dɔbrɛ́ nyə́ né wɔ ò wẽ́ mó, ò wẽ́, sə ǹ m'ǎ círhí kùlkṍ w gɔ̀nɔ̀ w ò n'ô bɔ̀n Yi kòrhó w dwã w mɔ́, kwã nɛ́. ⁴Ǹ m'ǎ kwè tabəlɛ́ y ń bə̀ ń cĩ́ è jàà y w náàcɛ̀nɛ́ ǹdə́ búúrí bə̀ pɔ nɛ mɔ́ è yó. Ǹ m'ǎ kwè ku w bə̀ n'ê cĩ́ pàntámsɛ́ ò yó mó ń mə́ bà, sə́ súlí ń ji ò pàntámsɛ́.⁵Ǹ m'ǎ cĩ́ sánə́má vwĩ̀-jùlú w bə̀ la wẽ̀ ré rə̀ lwẽ́ nã́nyə̀nyɛ̀lɛ́ myǐn ju ò yó mó dɔbrɛ nyə́ né kùlkṍ w yé né, ǹ m'ǎ zɛ̃̀ ń lyẽ étwí-ènyí gɔ̀nɔ̀ w Yi kòrhó w étwí-ènyí rí ni. ⁶Ǹ m'ǎ cĩ́ vwə̃̀ námpúmə́ cɛ̃́ɛ̃́ nɛ́ jùlú w dwã-joló kòrhó w étwí-ènyí rí ni. ⁷Ǹ m'ǎ cĩ́ kàmmɔ zhǎ y dwã-joló kòrhó w ǹdə́ vwĩ̀-jùlú w cəcəl wə, sə́ ce nɛ̃̌ è wẽ́.⁸Ǹ m'ǎ zə kàmə̀jɛ̀sɛ́ ń mə́ kə́kɛ́lɛ́ kɔ̀nɔ́ w wu wə́, ń súlí ń lyẽ étwí-ènyí gɔ̀nɔ̀ w kɔ̀nɔ́ w nyí rí ni. ⁹Ǹ m'ǎ zə nwə̃̌ y kɛ̀bɛ́ bə̀ m'ê pɛ Yi tum rí tũ̌ mú ŋwɔ̀nɔ́ w ń byèè Yi kòrhó w ǹdə́ kɔn rɛ́ tɛ̀bɛ́ gakó rə̀ wɔ ò wẽ́ mó yó, ń pə òmyɛ́ ǹd'ô wẽ̀ ré gakó Yi ni, sə rə̀ m'a jǐrh Yi nyǎn. ¹⁰Ǹ m'ǎ twərh nwə̃̌ y vwə̃̀ námpúmə́ cɛ̃́ɛ̃́ nɛ́ vwĩ̀-jùlú w ǹd'ô wẽ̀ ré gakó yó, ǹ m'ǎ pə vwĩ̀-jùlú w Yi ni, sə ò m'a jǐrh Yi dúdú nyɔ̃̌. ¹¹Ǹ m'ǎ twərh nwə̃̌ y kàmmɔ zhǎ y ǹdə́ ku w kɔ̀bɔ́ è kùr rí n'ê cĩ́ ò yó mó yó, ń mə́ pə kàmmɔ zhǎ y Yi ni.¹²Rə̀myɛ́ kwã nɛ́, ǹ m'ǎ ce Aarɔ̃ ǹdə́ ń byǎ bɛ́ bə̀ bə zhì dwã-joló kòrhó w étwí-ènyí rí ni, ń shɛ bɛ nɛ̃̌ mɔ́, ¹³ń zɛ̃̀ ń zù Aarɔ̃ ń vwĩ̀-zwə́lnə gàndɛ́, ń twərh nwə̃̌ ń yó wə, ń mə́ pɔ̃ Yi ni mùnì ga n twĩ̀ à vwĩ̀ rí zwə́l tum rí.¹⁴Ǹ m'ǎ ce Aarɔ̃ byǎ bɛ́ myɛ bwəlse, ń zù bi bə̀ kàmə̀zù-pɔ́lsɛ́; ¹⁵Ǹ m'ǎ twərh nwə̃̌ y bə̀ yó w ǹdə bə̀ da ta, mùnì ga bə twĩ̀ à vwĩ̀ rí zwə́l tum rí. Nwə̃̌ y bə̀ m'e pə bɛ à tum rí tũ̌ mú ŋwɔ̀nɔ́ w mɔ́ m'a pə bɛ vwĩ̀ zwə́l tum rí tũ̌ ŋwɔ̀nɔ́ kɔ̀bɔ́ ò m'à j'â ŋwɛ́nɛ́ twéé twéé, byin byin gakó.» ¹⁶Muyiisi já n zɛ̃̀ n wɛ̀rhɛ́ kɔn rɛ́ tɛ̀bɛ́ Cinu yà ń pɔ mɔ rə̀ nyí mú cìcì.¹⁷Byin nã́yéé ré, cànà nã́yə́ə́ y dɛ̃ nã́yéé ré, bə̀ pú Yi kòrhó w bə zhɛ̀. ¹⁸18 Muyiisi pú Yi kòrhó wə́: ń cĩ́ wẽ̀ ré tɛ̀bɛ́ rə̀ n'ê kwɛ̃́ w mɔ́ rə̀ jààsɛ́ wa, ǹdə́ sarha nɛ́ dǎr rɛ́ ǹdə́ də̀-byǎ bɛ́ bə̀ n'ê jarh dǎr rɛ́ yó mó, n súlí n ce ò yə né tɛ̃́. ¹⁹N lɛ̀lɛ̀ kàmə̀jɛ̃̀ y dõ mó Yi kòrhó w yə́-pɛ̀lɛ́ wa, n zɛ̃̀ n pyìlì w ǹdə́ tàndɛ ǹdə Cinu gə́ yà ń pɔ nyí Muyiisi ni ní. ²⁰N kwè dɔbrɛ nyə́ né bwə̀lsé n ce kùlkṍ w wə, n pwà də̀-byǎ bɛ́ n ce bə̀ jààsɛ́ wa, n zɛ̃̀ n kwè kùlkṍ w nyí-byǐ rí n pú ní.²¹N kwè kùlkṍ w n bə̀ n cĩ́ Yi kòrhó w wə, n zɛ̃̀ n lyẽ gɔ̀nɔ̀ w ò n'ô bɔ̀n Yi jì y dwã w mɔ́ ò jàà y wa, n mə n círhí dɔbrɛ nyə́ né kùlkṍ wə́, ǹdə Cinu gə́ yà ń pɔ mɔ nyí ní. ²²N cĩ́ tabəlɛ́ y dwã-joló kòrhó w wə, Yi kòrhó w jə̀-gwã̀ sõ, gɔ̀nɔ̀ w ò n'ô bɔ̀n Yi kòrhó w dwã w mɔ́ yé y wə. ²³N cĩ́ búúrí bə̀ pɔ Cinu ni mú nà tabəlɛ́ y yó, ǹdə Cinu gə́ yà ń pɔ mɔ nyí ní.²⁴N cĩ́ ku w bə̀ n'ê cĩ́ pàntámsɛ́ ò yó mó dwã-joló kòrhó w wẽ́, jə̀-jĩ́ sõ, tabəlɛ́ y yé y wə. ²⁵N ji pàntámsɛ́ Cinu yé né, ǹdə Cinu gə́ yà ń pɔ mɔ nyí ní.²⁶N cĩ́ sánə́má vwĩ̀-jùlú w dwã-joló kòrhó w wə, gɔ̀nɔ̀ w ò n'ô bɔ̀n Yi kòrhó w dwã w mɔ́ yé y wə; ²⁷n zɛ̃̀ n ce bə ji wẽ̀ ré rə̀ lwẽ́ nã́nyə̀nyɛ̀lɛ́ y mɔ́ myǐn ò yó, ǹdə Cinu gə́ yà ń pɔ mɔ nyí ní.²⁸N lyẽ gɔ̀nɔ̀ w Yi kòrhó w étwí-ènyí rí ni. ²⁹N cĩ́ vwə̃̀ námpúmə́ cɛ̃́ɛ̃́ nɛ́ jùlú w Yi kòrhó w dwã-joló kòrhó w étwí-ènyí rí ni. Rə̀myɛ́ kwã nɛ́, ń zwə́l vwĩ̀ námpúm cɛ̃́ɛ̃́ n súlí n pə jíjí byǎ vwĩ̀ yilə, ǹdə Cinu gə́ yà ń pɔ mɔ nyí ní. ³⁰N cĩ́ kàmmɔ zhǎ y dwã-joló kòrhó w ǹdə́ vwĩ̀-jùlú w cəcəl wə, n zɛ̃̀ n ce nɛ̃̌ è wẽ́, yala nɛ́ sám yilə.³¹Muyiisi e súlí Aarɔ̃ ǹdə́ ń byǎ bɛ́ y'à n'ê sàm bə̀ jɛ̀sɛ́ ǹdə́ bə̀ nèsé gàà. ³²Bə̀ y'à n'ê sàm bə̀ jɛ̀sɛ́ ǹdə́ bə̀ nèsé, bə̀ gə tú bə̀ la dwã-joló kòrhó w zú ráá bə̀ gə tú bə la vwĩ̀-jùlú w nyí ni yi ní, ǹdə Cinu gə́ yà ń pɔ nyí Muyiisi ni ní. ³³Muyiisi zə kàmə̀jɛ̀sɛ́ n mə n kə́kɛ́lɛ́ Yi kòrhó w kɔ̀nɔ́ w ǹdə́ vwĩ̀-jùlú wə́, n súlí n lyẽ kɔ̀nɔ́ w nyí rí gɔ̀nɔ̀ w nɛ́. Wɔ́ èta Muyiisi twĩ̀ tumə né gakó né, n zhɛ̀ nɛ́.³⁴Rə̀myɛ́ yó, ébɔ̃ w pyi dwã-joló kòrhó wə́, Cinu còrhó w j'a sú Yi kòrhó wə́. ³⁵Muyiisi yà ń wàr ń nə́ ń zwì dwã-joló kòrhó w yé, bə̀ ébɔ̃ w y'à j'â ŋwɛ́nɛ́ ò wẽ́, Cinu còrhó w myɛ y'à sú wə.³⁶Ébɔ̃ w gə tú ò zɛ̃̀ ò ŋwɛ́nɛ́ Yi kòrhó w yə́-pɛ̀lɛ́ w yi ní gakó, Esərayɛl lyì byǎ bɛ́ y'a j'a k'a zɛ̃̀ bə̀ n'ê zhílí bə̀ sɔ́má y mùnì ga bə yí zulə́ jàà dõ wə. ³⁷Sə ébɔ̃ w gə j'â yə̀ zɛ̃̀ ò wɔ Yi kòrhó w yə́-pɛ̀lɛ́ w yi ní, bə̀myɛ y'à t'â zhǐr bə̀ jàà y w yé; dɛ̃ rɛ́ tɛ̀bɛ́ ò y'a k'a zɛ̃̀ ò wɔ Yi kòrhó w yə́-pɛ̀lɛ́ w mɔ́ bə̀myɛ y'a zɛ̃̀ bə zhǐr. ³⁸Cinu ébɔ̃ w y'à ŋwɛ́nɛ́ Yi kòrhó w yə́-pɛ̀lɛ́ w nə̀nyɛ́nɛ́ nɛ, sə cəcɛ̃ yá, ò y'à wɔ́ pwẽ̀ Esərayɛl lyì byǎ bɛ́ gakó yírh wə, kɔn yàl èta bə̀ sɔ́má y zhəl mó gakó yi ní.

¹Cinu Yi byẽ̀ Muyiisi, n zɛ̃̀ n zhì dwã-joló kòrhó w w n zɔ̀m ǹdə́ mɔ n wɔ̀: ²«Wál Esərayɛl lyì byǎ bɛ́ nɛ: Á lò mə̀dù gə nə́ ń yǎl n pə pɛnɛ́ Cinu ni, s'e yə̀ vwǎm nánfɔ̀lɔ̀ ráá vwǎm námpɔ́lɛ́.³È gə wɔ́ vwǎm nánfɔ̀lɔ̀ vwĩ̀ námpúm cɛ̃́ɛ̃́ ń la zwə́l, sə vwǎm mɔ́ yə̀ námbya, kaka bə mɔ zhe; ń mà n zə mɔ n bə̀ dwã-joló kòrhó w nyí rí ni, mùnì ga Cinu shɛ̀nɛ́ n zwẽ mo; ⁴ń mà n cĩ́ ń jɛ̃̀ vwǎm mɔ́ yó w yó. Èta, Cinu mà n zɛ̃̀ n shɛ̀nɛ́ bə̀ bə̀ zə vwǎm mɔ́ bə m'e twĩ̀ sǔbri lwə̌l tũ̀twĩ̀ĩ̀ rí, mɔ̀bɔ́ ń tú vwĩ̀ rí zwə́l mó yilə.⁵Rə̀myɛ́ kwã nɛ́, ń mà n zwə́l vwǎm mɔ́ mə̀myɛ́ mɔ́ Cinu yé néa; vwĩ̀-zwə́lnə bé bə̀ wɔ́ Aarɔ̃ byǎ bɛ́ m'a zɛ̃̀ bə kwè jal mɔ́ bə pə Cinu ni, bə zɛ̃̀ bə zhɛ́rhɛ́ mɔ vwĩ̀-jùlú w ò wɔ dwã-joló kòrhó w nyí rí ni mú cã̌ y nɛ bə kə́kɛ́lɛ́; ⁶ń mà n põ̀ vwǎm mɔ́, n zɛ̃̀ n pyir mu nǎm nǎm;⁷vwĩ̀-zwə́lnə Aarɔ̃ byǎ bɛ́ m'a jéé myǐn vwĩ̀-jùlú w yó, bə ce dǎr mə̀ wẽ́; ⁸bə̀ m'a zɛ̃̀ bə kwè nàmá bɛ́ bə̀ pyir pyir mú ǹdə́ yó w e súlí nwə̃̌ y bə pyɛ̀lɛ́ dǎr rɛ́ bə̀ co vwĩ̀-jùlú w myǐn mú w mú yó. ⁹Bə̀ m'a zə nɛ̃̌ bə shɛ̀rh vwǎm mɔ́ wu lyur rí ǹdə́ mə̀ nə̀-gwěsé, vwĩ̀-zwə́lnə mó zɛ̃̀ n ji rə̀ gakó myǐn vwĩ̀-jùlú w yó. Vwĩ̀ rí rə̀myɛ́ mɔ́ wɔ́ vwĩ̀ námpúm cɛ̃́ɛ̃́, kùjú kɔ̀bɔ́ ò gakó jú myǐn mú, lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́ Cinu yilə.¹⁰È gə wɔ́ vwǎm námpɔ́lɛ́ ń zɔ ń pyììsí ráá ń bɔ̀n nɛ́ wẽ́ vwĩ̀ námpúm cɛ̃́ɛ̃́ ń la zwə́l, sə n zə mə̀ námbya kɛ̀bɛ́ kaka b'e zhe n pa; ¹¹ń mà n zwə́l mo vwĩ̀-jùlú w jə̀-gwã̀ sõ, Cinu yé né; rə̀myɛ́ yó vwĩ̀-zwə́lnə bé bə̀ wɔ́ Aarɔ̃ byǎ bɛ́ mɔ́ m'a zhɛ́rhɛ́ mə̀ jal mɔ́ vwĩ̀-jùlú w cã̌ y nɛ bə kə́kɛ́lɛ́.¹²N zɛ̃̀ n pyir vwǎm mɔ́ nǎm nǎm, n gõ̀ mə̀ yó wə́, n súlí n gõ̀ mə̀ nwə̃̌ y n pyɛ̀lɛ́ dǎr rɛ́ bə̀ co vwĩ̀-jùlú w myǐn mú w mú yó; ¹³bə̀ m'a zə nɛ̃̌ bə shɛ̀rh vwǎm mɔ́ wu lyur rí ǹdə́ mə̀ nə̀-gwěsé. Rə̀myɛ́ kwã, vwĩ̀-zwə́lnə mó mà n kwè re n ce Cinu ni n pɔ̃, n zɛ̃̀ n ji ri myǐn vwĩ̀-jùlú w yó. Vwĩ̀ rí rə̀myɛ́ mɔ́ wɔ́ vwĩ̀ námpúm cɛ̃́ɛ̃́, kùjú kɔ̀bɔ́ ò gakó jú myǐn mú, lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́ Cinu yilə.¹⁴È gə wɔ́ kúmí vwĩ̀ námpúm cɛ̃́ɛ̃́ ń la zwə́l n pə Cinu ni, sə n zə y épwěnsé ráá épò-bwə̀r ré wẽ́. ¹⁵Vwĩ̀-zwə́lnə mó mà n zwə́l kúmí y vwĩ̀-jùlú w yó; n mǔr è yó wə́, n zɛ̃̀ n ji w myǐn vwĩ̀-jùlú w yó; rə̀myɛ́ kwã, ń mà n kã̀ kã̀ kúmí y jal mɔ́ vwĩ̀-jùlú w sarha nɛ́ nɛ;¹⁶È gə wɔ́ kúmí vwĩ̀ námpúm cɛ̃́ɛ̃́ ń la zwə́l n pə Cinu ni, sə n zə y épwěnsé ráá épò-bwə̀r ré wẽ́. ¹⁷Vwĩ̀-zwə́lnə mó mà n zwə́l kúmí y vwĩ̀-jùlú w yó; n mǔr è yó wə́, n zɛ̃̀ n ji w myǐn vwĩ̀-jùlú w yó; rə̀myɛ́ kwã, ń mà n kã̀ kã̀ kúmí y jal mɔ́ vwĩ̀-jùlú w sarha nɛ́ nɛ;

¹«È gə wɔ́ vɔ̀lɔ́ kɔn lò la Cinu ni pɔ, s'e yə̀ mún mə̀ búl mə̀ càn, n ló nwə̃̌ mə̀ yó, n súlí n cĩ́ ãsã́ mə̀ yó, n mə n bà. ²Lò mó mɔ̀bɔ́ ń tú pɛnɛ́ y pɔ mɔ́ mà n zə rɛ n bə̀ n pə vwĩ̀-zwə́lnə bé bə̀ wɔ́ Aarɔ̃ byǎ bɛ́ mɔ́ nɛ; n zɛ̃̀ n tɛ̃́ mún mú nwə̃̌ y ló mə̀ yó mó jə̀-gúl yírh rə̀dù n súlí ãsã́ y gakó ne, vwĩ̀-zwə́lnə mə̀dù mà n zɛ̃̀ n ji lyìrhə́ kɔna rɛ́ rə̀myɛ́ mɔ́ myǐn vwĩ̀-jùlú w yó. Kùjú w òmyɛ́ mɔ́ wɔ́ kùjú kɔ̀bɔ́ ò gakó jú myǐn mú, lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́ Cinu yilə. ³Mún mú kùr ré rə̀ dàl mɔ́ wɔ́ Aarɔ̃ ǹdə́ ń byǎ bɛ́ cəl; rə̀ j'â wɔ́ Cinu dúdú cəl, rə̀ gə́ wɔ́ kùjírə́ nyɛ̀bɛ́ nə̀ gakó jú myǐn Cinu yil kə̀kàlà mɔ́ yilə.⁴È gə wɔ́ vɔ̀lɔ́ kɔn dɛ̀bɛ́ rə̀ wò kúl wə, ń la pɔ, sə rə yə̀ mún mɔ̀bɔ́ mə̀ búl mə̀ càn mə̀ ywə́rh ǹdə́ nwə̃̌ búúri nánjíjíndi rə̀ yə̀ sã̀-nə̀byẽ̌ ce ráá ŋwǎmsɛ sə̀ yə̀ sã̀-nə̀byẽ̌ ce, bə̀ zə nwə̃̌ bə búbúlí si. ⁵È gə wɔ́ vɔ̀lɔ́ kɔn bə̀ ju ǹdə́ ŋwàn-tɔ́rɔ́ ǹ la pɔ, s'e yə̀ mún bə̀ ywə́rh ǹdə́ nwə̃̌ mə j'à yə̀ sã̀-nə̀byẽ̌ ce bə̀ m'e ji ri.⁶Ǹ m'ǎ zɛ̃̀ ń kə́ kə́ rɛ ń súlí ń ló nwə̃̌ rə̀ yó. Wɔ́ vɔ̀lɔ́ kɔn rɛ́ pɛnɛ́ y èta. ⁷È gə wɔ́ vɔ̀lɔ́ kɔn bə̀ ju ǹdə́ ŋwàn-tɔ́rɔ́, sə rə̀ mún mú yə̀ mún mɔ̀bɔ́ mə̀ búl mə̀ càn, mə̀ ywə́rh ǹdə́ nwə̃̌;⁸Lò mó mɔ̀bɔ́ ń tú pɛnɛ́ y pɔ mɔ́ mà n zə pɛnɛ́ y è tɛnɛ èta mɔ́ n bə̀ n pə Cinu ni; ń mà n pə y vwĩ̀-zwə́lnə mó ne, vwĩ̀-zwə́lnə mó zɛ̃̀ n zə y n bwəlse vwĩ̀-jùlú w nyí ni; ⁹Vwĩ̀-zwə́lnə mó mà n zɛ̃̀ n vùr lyìrhə́ kɔn rɛ́ rə̀ wẽ́, n ji myǐn vwĩ̀-jùlú w yó. Rə̀myɛ́ mɔ́ wɔ́ kùjú kɔ̀bɔ́ ò gakó jú myǐn mú, lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́ Cinu yilə. ¹⁰Vɔ̀lɔ́ kɔn rɛ́ kùr ré rə̀ dàl mɔ́ wɔ́ Aarɔ̃ ǹdə́ ń byǎ bɛ́ cəl; rə̀ j'â wɔ́ Cinu dúdú cəl, rə̀ gə́ wɔ́ kùjírə́ nyɛ̀bɛ́ bə̀ n'ê ji rə̀ gakó myǐn Cinu yil kə̀kàlà mɔ́ yilə.¹¹Vɔ̀lɔ́ kɔn rɛ́ tɛ̀bɛ́ á la Cinu ni pɔ mɔ́ rə̀dù ga bə mə̌ sə rə tɛnɛ ǹdə́ mún mɔ̀bɔ́ mə̀ co sã̀-nə̀byẽ̌ yé. Á t'á la kɔn dɛ̀bɛ́ rə̀ co sã̀-nə̀byẽ̌ ráá tùr myǐn ju rə yə̀ kùjú kɔ̀bɔ́ ò gakó n'ô jí myǐn mú Cinu yil yé. ¹²Á wɔ̌ á pə rə̀myɛ́ mɔ́ Cinu ni, cɛsɛ́ wẽ̀ ré byǎ bɛ́ nã́yə́ə́ bé pɔ yi ní, sə rə̀ t'â la vwĩ̀-jùlú w yó ju rə yə̀ lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ yé. ¹³Ǹ m'ǎ súlí ń cĩ́ nə̀kwə̃̌ vɔ̀lɔ́ kɔn rɛ́ tɛ̀bɛ́ gakó ǹ la pɔ mɔ́ yó. Ǹ Yi rí dɔbrɛ́ nə̀kwə̃̌ y t'â la ǹ pɛnɛ́ y yó lyã̀ɔ̃̀ yé; ǹ m'ǎ já ǹ nə́ ǹ súlí nə̀kwə̃̌ ǹ pɛnɛ́ gakó ne ǹ pɛ.¹⁴È gə wɔ́ cɛsɛ́ wẽ̀ ré byǎ nã́yə́ə́ bé ǹ la Cinu ni pɔ s'e yə̀ jíjí ywẽ́ nyɛ̀bɛ́ nə̀ wò ráá jíjí nándùl byǎ bə̀ pàr; ¹⁵ǹ m'ǎ ló nwə̃̌ rə̀ yó ń súlí ń cĩ́ ãsã́ rə̀ yó. Wɔ́ vɔ̀lɔ́ kɔn rɛ́ èta. ¹⁶Vwĩ̀-zwə́lnə mó mà n zɛ̃̀ n ji mún mú mə̀ pàr mɔ́ námpɔ́lɛ́ ǹdə́ nwə̃̌ y námpɔ́lɛ́ e súlí ãsã́ y gakó, rə̀ wɔ́ lyìrhə́ kɔn rɛ́ mɔ́ myǐn. Rə̀myɛ́ mɔ́ wɔ́ kùjú kɔ̀bɔ́ ò gakó jú myǐn Cinu yilə.

¹«Lò gə la yə̀-zùlə́ vwĩ̀ zwə́l:È gə wɔ́ ǹdə́ vwǎm nánfɔ̀lɔ̀, è wɔ́ nə̀-bya ráá nə̀-nyɔ̃̀, s'e yə̀ vwǎm mɔ̀bɔ́ kaka bə mɔ zhe ń la zə n mə n bə̀ Cinu yé né. ²Ń mà n cĩ́ ń jɛ̃̀ vwǎm mɔ́ ń zə n mə n bə̀ mɔ́ yó w yó, n zɛ̃̀ n zwə́l mo dwã-joló kòrhó w nyí rí ni; rə̀myɛ́ kwã, vwĩ̀-zwə́lnə bé bə̀ wɔ́ Aarɔ̃ byǎ bɛ́ mɔ́ m'a zhɛ́rhɛ́ mə̀ jal mɔ́ vwĩ̀-jùlú w cã̌ y nɛ bə kə́kɛ́lɛ́;³ń mà n vùr yə̀-zùlə́ vwĩ̀ rí vwǎm mɔ́ wu lyur rí nwǐsí ǹdə́ mə̀ wu w nwǐsí gakó n pə Cinu ni, rə yə̀ kùjú kɔ̀bɔ́ ò gakó n'ô jí myǐn mú ń yilə, ⁴ǹdə́ ocə̀-pwala nɛ́ nə̀lyè y ǹdə́ nwǐsí sə̀ dɛ̃ nɛ mɔ́ e súlí sə́púnə́ né nwǐsí, è gə wɔ́ cɛ̃ rɛ́ yilə, bə̀ m'a bɔn rə̀myɛ́ bə súlí ocə̀-pwala nɛ́ nɛ. ⁵Aarɔ̃ byǎ bɛ́ m'a zɛ̃̀ bə súlí ri vwĩ̀ námpúm cɛ̃́ɛ̃́ rɛ́ rə̀ wɔ dǎr rɛ́ bə̀ co myǐn mú w mú yó mó ne bə ji myǐn; rə̀myɛ́ mɔ́ wɔ́ kùjú kɔ̀bɔ́ ò gakó n'ô jí myǐn mú, lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́ Cinu yilə.⁶È gə wɔ́ vwǎm námpɔ́lɛ́ ń la mə n zwə́l yə̀-zùlə́ vwĩ̀ n pə Cinu ni, s'e yə̀ vwǎm mɔ̀bɔ́ kaka bə mɔ zhe yé, mə̀ wɔ́ námbya ráá nányɔ̃̀. ⁷È gə wɔ́ pyìrhə̀ ń la pɔ, ń mà n zə y n bə̀ Cinu yé né. ⁸Ń mà n cĩ́ ń jɛ̃̀ vwǎm mɔ́ mɔ̀bɔ́ ń zə n mə n bə̀ mɔ́ yó w yó, n zɛ̃̀ n zwə́l mo dwã-joló kòrhó w yé né; rə̀myɛ́ kwã, Aarɔ̃ byǎ bɛ́ m'a zɛ̃̀ bə zhɛ́rhɛ́ mə̀ jal mɔ́ vwĩ̀-jùlú w cã̌ y nɛ bə kə́kɛ́lɛ́;⁹ń mà n vùr yə̀-zùlə́ vwĩ̀ rí vwǎm mɔ́ nwǐsí ǹdə́ mə̀ nə̀byíl ré gakó e súlí e ce cə̀-kwə̀rə̀ y né ǹdə́ mə̀ wu lyur rí nwǐsí ǹdə́ mə̀ wu nwǐsí gakó, n pə Cinu ni, rə yə̀ kùjú kɔ̀bɔ́ ò gakó n'ô jí myǐn mú, ń yilə, ¹⁰ǹdə́ ocə̀-pwala nɛ́ nə̀lyè y ǹdə́ nwǐsí sə̀ dɛ̃ nɛ mɔ́ e súlí sə́púnə́ né nwǐsí, è gə wɔ́ cɛ̃ rɛ́ yilə, bə̀ m'a bɔn rə̀myɛ́ bə súlí ocə̀-pwala nɛ́ nɛ. ¹¹Vwĩ̀-zwə́lnə mó mà n zɛ̃̀ n ji rə̀myɛ́ mɔ́ gakó myǐn vwĩ̀-jùlú w yó; rə̀myɛ́ mɔ́ wɔ́ kùjú w kɔ̀bɔ́ ò gakó jú myǐn mú Cinu yilə.¹²È gə wɔ́ bɔ̀-nyɔ̃̀ ń la pɔ, ń mà n zə w n bə̀ Cinu yé né; ¹³n cĩ́ jɛ̃̀ vwǎm mɔ́ yó w yó, n zɛ̃̀ n zwə́l mo dwã-joló kòrhó w yé né; Aarɔ̃ byǎ bɛ́ m'a zɛ̃̀ bə zhɛ́rhɛ́ mə̀ jal mɔ́ vwĩ̀-jùlú w cã̌ y nɛ bə kə́kɛ́lɛ́. ¹⁴Ń mà n zɛ̃̀ n kwè mə̀ wu lyur rí nwǐsí ǹdə́ mə̀ wu nwǐsí gakó, n pə Cinu ni, rə yə̀ kùjú kɔ̀bɔ́ ò gakó n'ô jí myǐn mú ń yilə,¹⁵e súlí ocə̀-pwala nɛ́ nə̀lyè y ǹdə́ nwǐsí sə̀ dɛ̃ nɛ mɔ́ ǹdə́ sə́púnə́ né nwǐsí, è gə wɔ́ cɛ̃ rɛ́ yilə, bə̀ m'a bɔn rə̀myɛ́ bə súlí ocə̀-pwala nɛ́ nɛ. ¹⁶Vwĩ̀-zwə́lnə mó mà n zɛ̃̀ n ji rə̀myɛ́ mɔ́ gakó myǐn vwĩ̀-jùlú w yó; rə̀myɛ́ mɔ́ wɔ́ kùjú kɔ̀bɔ́ ò gakó jú myǐn mú, lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́ Cinu yilə.È wɔ́ Cinu ń cǐ nwǐsí gakó. ¹⁷Á t'á la nwǐsi dɔ́m yé, á t'á la jal jú yé. Rə̀myɛ́ wɔ́ nyí rə̀ m'à j'â ŋwɛ́nɛ́ gaga á yilə, byin byin gakó, jààsɛ́ shɛ̀bɛ́ gakó á ŋwɛ́nɛ́ sə̀ wẽ́ mó w mó.»

¹Cinu zɔ̀m ǹdə́ Muyiisi n wɔ̀: ²«Wál Esərayɛl lyì byǎ bɛ́ nɛ: Lò gə wɛ̀rhɛ́ yə̀-bəlɔ̀lɔ́ ǹdə́ ń yə̀l, ń gar Cinu nyə́ né rə̀dù n wɛ̀rhɛ́ kɔn dɛ̀bɛ́ rə̀ súl mú: ³È gə wɔ́ vwĩ̀-zwə́lnə mó mɔ̀bɔ́ bə̀ tútǔ ǹdə́ nwə̃̌ bə m'e cír mu mú ń wɛ̀rhɛ́ yə̀-bəlɔ̀lɔ́ n já n tó rə̀ dɛnnɛ n cĩ́ yò dwí rí yó wə, ń mà n pə nə̀-bya kɛ̀bɛ́ kaka bə y zhe Cinu ni, yə̀-bəlɔ̀lɔ́ w ń wɛ̀rhɛ́ mɔ́ yilə, yə̀-bəlɔ̀lɔ́ w sǔbri lwə̌l vwĩ̀ rí yilə.⁴Ń mà n zə nə̀-bya y n mə n bə̀ dwã-joló kòrhó w nyí rí ni, Cinu yé né; n cĩ́ ń jɛ̃̀ è yó w yó, n zɛ̃̀ n zwə́l y Cinu yé né. ⁵Vwĩ̀-zwə́lnə mó mɔ̀bɔ́ bə̀ tútǔ ǹdə́ nwə̃̌ bə m'e cír mu mú mà n zə nə̀-bya y jal mɔ́ námpɔ́lɛ́ n mə n bə̀ dwã-joló kòrhó w wə.⁶Ń mà n mɔ́rh ń jə̀fɔ́lɛ́ y jal mɔ́ wa, n zhì Cinu yé né n zhɛ́rhɛ́ mɔ gɔ̀nɔ̀ w ò bɔ̀n Yi jì y dwã w mɔ́ yé y kɛ̀bɛ́ bə̀ nə mɔ́ yó twər tàlpyɛ̀. ⁷Rə̀myɛ́ kwã nɛ́ vwĩ̀-zwə́lnə mó mà n cĩ́ cĩ́ jal mɔ́ vwĩ̀-jùlú w kɔ̀bɔ́ bə̀ n'ê ji wẽ̀ ré rə̀ lwẽ́ nã́nyə̀nyɛ̀lɛ́ myǐn ò yó, ò ŋwɛ́nɛ́ dwã-joló kòrhó w wə, Cinu yé né mó nyimi ní yó; n zɛ̃̀ n ló nə̀-bya y jal mɔ́ mɔ̀bɔ́ mə̀ dàl mɔ́ vwĩ̀ námpúm cɛ̃́ɛ̃́ rɛ́ jùlú w ò wɔ dwã-joló kòrhó w nyí rí ni mú kùr wə.⁸Ń mà n gõ̀ nə̀-bya y bə̀ zwə́l yə̀-bəlɔ̀lɔ́ w sǔbri lwə̌l yil mú nwǐsí: è wu lyur rí nwǐsí ǹd'ê wu w nwǐsí gakó ⁹e súlí ocə̀-pwala nɛ́ nə̀lyè y ǹdə́ nwǐsí sə̀ dɛ̃ nɛ mɔ́ ǹdə́ sə́púnə́ né nwǐsí, è gə wɔ́ cɛ̃ rɛ́ yilə, ń mà n bɔn rə̀myɛ́ n súlí ocə̀-pwala nɛ́ nɛ. ¹⁰Ǹdə bə̀ gə́ n'ê gòm wẽ̀ ré rə̀myɛ́ cìcì ní mú, yə̀-zùlə́ vwĩ̀ rí zwə́l nə̀-bya y yó mó né; vwĩ̀-zwə́lnə mó mà n zɛ̃̀ n ce bə ji ri myǐn vwĩ̀ námpúm cɛ̃́ɛ̃́ rɛ́ vwĩ̀-jùlú w yó.¹¹N ce bə pwà nə̀-bya y kɔn rɛ́ tɛ̀bɛ́ rə̀ dàl mɔ́ gakó, è tɔ̀nɔ̀ w ǹd'ê nàmá bɛ́ gakó ǹd'ê yó w ǹd'ê nə̀-gwěsé ǹd'ê wu lyur rí ǹd'ê byə̀nə́ né bə m'e du zulə́ jàà y wa, ¹²bə vò jàà y kɛ̀bɛ́ bə̀ cír rə̀myɛ́ mɔ́ yil mú wẽ́, bə̀ gə́ n'ê lwé tɔ̀mdɛ́ ǹdə́ rə̀ nwǐsí mə̀gã̌ mɔ́; ń la zɛ̃̀ n ji ri myǐn. Wɔ́ bə̀ gə́ n'ê lwé tɔ̀mdɛ́ ǹdə́ rə̀ nwǐsí mə̀gã̌ mɔ́ w bə̀ m'a ji ri myǐn ní.¹³Esərayɛl lyì byǎ bɛ́ púlə́púlə́ gə dó ǹdə́ bə̀ yə̀l, bə gar Cinu nyə́ né rə̀dù, bə cĩ́ yò bə̀ cìn yó wə, lyì bí gakó zɛ̃̀ bə̀ gwẽ̌ yə̀ yò w nyí ni lwar, ¹⁴bə̀ gə tú bə̀ lwar dóó w òmyɛ́ dwí rí nyí ni, lyì bí gakó m'a pə nə̀-bya, yə̀-bəlɔ̀lɔ́ w sǔbri lwə̌l yilə, bə zə y bə m'e bə̀ dwã-joló kòrhó w yé y wə; ¹⁵Esərayɛl lyì byǎ bɛ́ púlə́púlə́ náncɛsɛ́ m'a cĩ́ bə̀ jɛ̀rh nə̀-bya y yó w yó, Cinu yé né, bə zɛ̃̀ bə zwə́l y Cinu yé né.¹⁶Vwĩ̀-zwə́lnə mó mɔ̀bɔ́ bə̀ tútǔ ǹdə́ nwə̃̌ bə m'e cír mu mú mà n zə nə̀-bya y jal mɔ́ kə̀kàlà n mə n zù dwã-joló kòrhó w wə; ¹⁷ń mà n mɔ́rh ń jə̀fɔ́lɛ́ y jal mɔ́ mɔ̀bɔ́ ń zə n mə n bə̀ mɔ́ wẽ́, n zhì Cinu yé né n zhɛ́rhɛ́ mɔ gɔ̀nɔ̀ w ò bɔ̀n Yi jì y dwã w mɔ́ yé y kɛ̀bɛ́ bə̀ nə mɔ́ yó twər tàlpyɛ̀.¹⁸Rə̀myɛ́ kwã nɛ́, ń mà n cĩ́ cĩ́ jal mɔ́ mə̀myɛ́ mɔ́ vwĩ̀-jùlú w ò ŋwɛ́nɛ́ Cinu yé né dwã-joló kòrhó w wẽ́ mó nyimi ní yó, n zɛ̃̀ ló jal mɔ́ mə̀ dàl mɔ́ gakó vwĩ̀ námpúm cɛ̃́ɛ̃́ rɛ́ jùlú w ò wɔ dwã-joló kòrhó w nyí rí ni mú kùr wə. ¹⁹Ń mà n gõ̀ nwǐsí gakó n ji myǐn vwĩ̀-jùlú w yó.²⁰Ń mà n wɛ̀rhɛ́ nə̀-bya y èmyɛ́ mɔ́ myɛ ǹdə ń gə́ wɛ̀rhɛ́ kɛ̀bɛ́ ń zwə́l n mə n lwə̀l sǔbri ń cìcì yə̀-bəlɔ̀lɔ́ w yil mú ní. Vwĩ̀-zwə́lnə mó gə twĩ̀ yə̀-bəlɔ̀lɔ́ sǔbri lwə̌l tũ̀twĩ̀ĩ̀ rí lyì bí yó, lyì bí b'a nə bə̀ yə̀-bəlɔ̀lɔ́ w sǔbri. ²¹Ń mà n zɛ̃̀ n ce bə kwè nə̀-bya y bə m'e du zulə́ jàà y wa, n ji y myǐn ǹdə ń gə́ ju nə̀-bya nã́yə́ə́ y myǐn ní. Wɔ́ Esərayɛl lyì byǎ bɛ́ byɛ̀bɛ́ bə̀ tú dwã yó mó yə̀-bəlɔ̀lɔ́ w sǔbrí lwə̌l vwĩ̀ rí èta.²²È gə wɔ́ yó-cə́bal ń wɛ̀rhɛ́ yə̀-bəlɔ̀lɔ́, ń gar Cinu ń Yi rí nyə́ né rə̀dù ǹdə́ ń yə̀l, n já n cĩ́ yò ń cìcì yó wə, ²³bə̀ gə ce n lwar yə̀-bəlɔ̀lɔ́ w kɔ̀bɔ́ ń wɛ̀rhɛ́ mɔ́ párá, ń mà n zə bə̀cìlə́ kɛ̀bɛ́ kaka bə y zhe n bə̀ n pa.²⁴Ń mà n cĩ́ ń jɛ̃̀ bə̀cìlə́ y yó w yó, n zɛ̃̀ n zwə́l y jàà y kɛ̀bɛ́ bə̀ n'ê zwə́l vwĩ̀ námpúm cɛ̃́ɛ̃́ rɛ́ nɛ́ mɔ́ wa, Cinu yé né. Vwĩ̀ rí rə̀myɛ́ mɔ́ wɔ́ yə̀-bəlɔ̀lɔ́ sǔbri lwə̌l vwĩ̀ ǹdə́ rɛ. ²⁵Vwĩ̀-zwə́lnə mó mà n mɔ́rh ń jə̀fɔ́lɛ́ vwǎm mɔ́ bə̀ gu yə̀-bəlɔ̀lɔ́ sǔbri lwə̌l yil mú jal mɔ́ wẽ́, n cĩ́ cĩ́ vwĩ̀ námpúm cɛ̃́ɛ̃́ rɛ́ jùlú w nyimi ní yó; n zɛ̃̀ n ló jal mɔ́ mɔ̀bɔ́ mə̀ dàl mɔ́ vwĩ̀ námpúm cɛ̃́ɛ̃́ rɛ́ jùlú w kùr wə.²⁶Ń mà n ji nwǐsí gakó myǐn vwĩ̀-jùlú w yó ǹdə yə̀-zùlə́ vwĩ̀ rí nwǐsí ta. Vwĩ̀-zwə́lnə mó gə tú ń twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí yó-cə́bal mɔ́ yó ń zhɛ̀, yó-cə́bal mɔ́ já n nə ń yə̀-bəlɔ̀lɔ́ w sǔbri.²⁷È gə wɔ́ dwí rí lò nánfò ń wɛ̀rhɛ́ yə̀-bəlɔ̀lɔ́ ǹdə́ ń yə̀l, ń gar Cinu nyə́ né rə̀dù, n já n cĩ́ yò ń cìcì yó wə, ²⁸bə̀ gə ce n lwar ń yə̀-bəlɔ̀lɔ́ w párá, ń mà n zə bɔ̀-nyɔ̃̀ kɔ̀bɔ́ kaka b'o zhe n bə̀ n pa, yə̀-bəlɔ̀lɔ́ w kɔ̀bɔ́ ń wɛ̀rhɛ́ mɔ́ yilə;²⁹ń mà n cĩ́ ń jɛ̃̀ bɔ̃̀ w bə̀ la zwə́l yə̀-bəlɔ̀lɔ́ w yil mú yó w yó, n zɛ̃̀ n zwə́l w jàà y kɛ̀bɛ́ bə̀ n'ê zwə́l vwĩ̀ námpúm cɛ̃́ɛ̃́ rɛ́ nɛ́ mɔ́ wa. ³⁰Vwĩ̀-zwə́lnə mó mà n zɛ̃̀ n mɔ́rh ń jə̀fɔ́lɛ́ vwǎm mɔ́ jal mɔ́ wa, n cĩ́ cĩ́ mu vwĩ̀ námpúm cɛ̃́ɛ̃́ rɛ́ vwĩ̀-jùlú w nyimi ní yó, n zɛ̃̀ n ló jal mɔ́ mə̀ dàl mɔ́ gakó ò kùr wə.³¹Lò mó mɔ̀bɔ́ ń tú vwĩ̀ rí zwə́l mó mà n zɛ̃̀ n gõ̀ nwǐsí gakó ǹdə bə̀ gə́ n'ê gòm se yə̀-zùlə́ vwĩ̀ rí zwə́l yi ní mú, vwĩ̀-zwə́lnə mó zɛ̃̀ n ce bə ji si myǐn vwĩ̀-jùlú w yó, sə yə̀ lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́ Cinu yilə. Vwĩ̀-zwə́lnə mó gə tú ń twĩ̀ sǔbri pɔ tũ̀twĩ̀ĩ̀ rí yə̀-bəlɔ̀lɔ́ w cə́bal mɔ́ yó ń zhɛ̀, yə̀-bɔlɔ̀lɔ́ w cə́bal mɔ́ já n nə ń yə̀-bəlɔ̀lɔ́ w sǔbri.³²È gə wɔ́ pyìrhə̀ ń zə n bə̀ ń la pɔ bə m'e zwə́l vwĩ̀ ń yə̀-bəlɔ̀lɔ́ w yilə, è m'a yə̀ pyì-nyɛ̀ kɛ̀bɛ́ kaka bə y zhe. ³³Ń mà n cĩ́ ń jɛ̃̀ pyìrhə̀ y bə̀ la zwə́l ń yə̀-bəlɔ̀lɔ́ w yil mú yó w yó, n zɛ̃̀ n zwə́l y jàà y kɛ̀bɛ́ bə̀ n'ê zwə́l vwĩ̀ námpúm cɛ̃́ɛ̃́ rɛ́ è wẽ́ mó wə.³⁴Vwĩ̀-zwə́lnə mó mà n zɛ̃̀ n mɔ́rh ń jə̀fɔ́lɛ́ vwǎm mɔ́ bə̀ zwə́l mó jal mɔ́ wa, n cĩ́ cĩ́ vwĩ̀ námpúm cɛ̃́ɛ̃́ rɛ́ vwĩ̀-jùlú w nyimi ní yó, n zɛ̃̀ n ló jal mɔ́ mə̀ dàl mɔ́ gakó ò kùr wə. ³⁵Vwĩ̀-zwə́lnə mó mà n zɛ̃̀ n gõ̀ nwǐsí gakó ǹdə bə̀ gə́ n'ê gòm yə̀-zùlə́ vwĩ̀ pyìrhə̀ y nyɛ̌sɛ́ nɛ́, n zɛ̃̀ n ce bə ji si myǐn vwĩ̀-jùlú w yó n mə n súlí kùjírə́ nyɛ̀bɛ́ nə̀ gakó n'ê jí myǐn Cinu yil mú ni. Vwĩ̀-zwə́lnə mó gə tú ń twĩ̀ yə̀-bəlɔ̀lɔ́ w sǔbri pɔ tũ̀twĩ̀ĩ̀ rí yə̀-bəlɔ̀lɔ́ w cə́bal mɔ́ yó ń zhɛ̀, yə̀-bɔlɔ̀lɔ́ w cə́bal mɔ́ já n nə ń yə̀-bəlɔ̀lɔ́ w sǔbri.

¹«Lò gə wɛ̀rhɛ́ yə̀-bəlɔ̀lɔ́, ń gə́ nyɛ̀ɛ̀ bə̀ n'ê byẽ̀ bə̀ bə̀ bà, bə pə zhə̀n yò shò kwã nɛ́, n zɛ̃̀ ń yə̀ zhə̀l n cĩ́ mú yilə, e jà ń nɔ yò w ò twĩ̀ mú ǹdə́ ń yírhə́, ráá ń nyɛ̀ɛ̀ kɔn ò shò kwã, rə̀myɛ́ yi ní ń mà n zhĩ ń dóó wə́; ²lò gə dwə̀rh kɔn dɛ̌ dɛ̌ rə̀ zhe jìmdi ǹdə́ ń yə̀l, è wɔ́ gɔ-nǎm mɔ̀bɔ́ mə̀ zhe jìmdi cùù ráá jè vwǎm mɔ̀bɔ́ mə̀ zhe jìmdi cùù ráá kò-nyì tɛ̀bɛ́ rə̀ zhe jìmdi cùù, rə̀myɛ́ yi ní, ń já n jǐrh jìmdi cə́bal n súlí n jǐrh dóó cə́bal;⁴lò gə dwə̀rh kɔn dɛ̀bɛ́ rə̀ zhe jìmdi rə̀ shí numbyíní sõ, jìmdi tɛ̌ tɛ̌ rə̀ n'ê ce lò dõ jǐrh jìmdi cə́bal, ǹdə́ ń yə̀l, ń gə tú ń lwar rɛ, ń jǐrh dóó cə́bal; lò gə yẽ̌ bwelé kɛ̀bɛ́ è n'ê zhìlì ń yò ráá è n'ê kwɛrhɛ ń yò shə́r ń nyú w e jà ń yə̀ ń yala nɛ zhìlì n tɛ́rɛ́, ³yò kɔ̀bɔ́ numbyíní gakó gə́ wɔ̌ è bwəl nyí ǹd'ê yə̀ è yala nɛ zhìlì mú wẽ́, ń gə tú ń lwar rɛ, ń jǐrh dóó cə́bal.⁵Lò gə dó ywẽ̀ né nə̀myɛ́ òdù shò kwã nɛ́, ń mə̌ sə n byili kɔn rɛ́ tɛ̀bɛ́ ń mə n dó mó, ⁶sə n zə vwǎm námpɔ́lɛ́ nã́nyɔ̃̀, pyì-nyɛ̀ ráá bɔ̀-nyɔ̃̀, n bə̀ n pə Cinu ni ń yò kɔrhɔ yilə, yə̀-bəlɔ̀lɔ́ w kɔ̀bɔ́ ń wɛ̀rhɛ́ mɔ́ sǔbri lwə̌l vwĩ̀ rí zwə́l yilə; rə̀myɛ́ yi ní vwĩ̀-zwə́lnə mó mà n twĩ̀ sǔbri pɔ tũ̀twĩ̀ĩ̀ rí ń yó.⁷«Lò gə wàr ń mà n nə vwǎm námpɔ́lɛ́, ń wɔ̌ ń zə épwěnse sə̀lyè ráá épò-bwə̀r rə̀lyè ń twí ń pɛ Cinu ni, ń yò kɔrhɔ yə̀-bəlɔ̀lɔ́ w kɔ̀bɔ́ ń wɛ̀rhɛ́ yil mú sǔbri lwə̌l yilə; kúmí y èdù y m'a yə̀ yə̀-bəlɔ̀lɔ́ w sǔbri lwə̌l yilə, è dõ mó yə̀ vwĩ̀ námpúm cɛ̃́ɛ̃́ yilə. ⁸Ń mà n zə sɛ n bə̀ n pə vwĩ̀-zwə́lnə mó ne; sə vwĩ̀-zwə́lnə mó mà n jɛ̀nɛ̀ n zwə́l yə̀-bəlɔ̀lɔ́ sǔbri lwə̌l nyǎ y n pə Cinu ni. Ń mà n pyípyíní è byã y sə ń tá ń la è yó w mǔr yé. ⁹N zhɛ́rhɛ́ è jal mɔ́ vwĩ̀-jùlú w sarh rɛ́ nɛ, n zɛ̃̀ n kã̀ kã̀ mə̀ kùr ré vwĩ̀-jùlú w kùr wə. Vwĩ̀ rí rə̀myɛ́ mɔ́ wɔ́ yə̀-bəlɔ̀lɔ́ w sǔbri lwə̌l vwĩ̀.¹⁰Rə̀myɛ́ kwã, vwĩ̀-zwə́lnə mó mà n zɛ̃̀ n zə kúmsí sə̀lyè nyǎ y n mə n zwə́l vwĩ̀ námpúm cɛ̃́ɛ̃́ ǹdə kɔn gə́ mə̌ sə rə tó né. Vwĩ̀-zwə́lnə mó gə twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí mɔ̀bɔ́ ń wɛ̀rhɛ́ yə̀-bəlɔ̀lɔ́ w mɔ́ yó n zhɛ̀, yə̀-bəlɔ̀lɔ́ w cə́bal mɔ́ já n nə ń yə̀-bəlɔ̀lɔ́ w sǔbri.¹¹Sə lò mó gə bə épwěnse sə̀lyè ráá épò-bwə̀r rə̀lyè ŋwɔ̀nɔ́ zhe, ń wɔ̌ ń nə́ ń zə mún cəə́le rə̀tɔ̀ ń twí ń pɛ yə̀-bəlɔ̀lɔ́ w ń wɛ̀rhɛ́ mɔ́ sǔbri lwə̌l vwĩ̀ rí yilə. Ń tá ń la nwə̃̌ mə̀ yó ló yé, ń tá ń la ãsã́ myɛ mə̀ yó cṹ yé, è gə́ wɔ́ yə̀-bəlɔ̀lɔ́ sǔbri lwə̌l vwĩ̀ yilə.¹²Ń mà n zə mún mú n bə̀ n pə vwĩ̀-zwə́lnə mó ne; vwĩ̀-zwə́lnə mó mà n tɛ̃́ mɔ jə̀-gúl yírh, lyìrhə́ kɔn rɛ́ yilə, n ji mu myǐn vwĩ̀-jùlú w yó n mə n súlí kùjírə́ nyɛ̀bɛ́ nə̀ gakó n'ê jí myǐn Cinu yil mú ni; vwĩ̀ rí rə̀myɛ́ mɔ́ wɔ́ yə̀-bəlɔ̀lɔ́ sǔbri lwə̌l vwĩ̀. ¹³Vwĩ̀-zwə́lnə mó gə tú ń twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ywẽ̀ né nə̀myɛ́ òdù shò kwã nɛ́ ń zhɛ̀, yə̀-bəlɔ̀lɔ́ w cə́bal mɔ́ já n nə ń yə̀-bəlɔ̀lɔ́ w sǔbri. Vwĩ̀-zwə́lnə mó mà n kwè vɔ̀lɔ́ kɔn pɔ tũ̀twĩ̀ĩ̀ rí nə̀-twéésé n mə n twĩ̀ tũ̀twĩ̀ĩ̀ rí rə̀myɛ́ mɔ́.»¹⁴Cinu Yi zɔ̀m ǹdə́ Muyiisi n wɔ̀: ¹⁵«Lò gə gar nyə́ né kɔn rɛ́ tɛ̀bɛ́ Cinu mə̌ ǹdə́ rɛ mɔ́ shò kwã nɛ́ ǹdə́ ń yə̀l, n zɛ̃̀ n wɛ̀rhɛ́ yə̀-bəlɔ̀lɔ́ nánfɔ̀lɔ̀, ń mà n zə pyì-bya kɛ̀bɛ́ kaka bə y zhe, ń və̌-ywàálɛ́ wẽ́, è ye y yí wár-kùlsi màngɛlɛ́, sə wár-kùlì y ye y yə̀ wár-kùlì y kɛ̀bɛ́ è n'ê jí còrhó-jì y w mú ye yə́, n bə̀ n pə Cinu ni, ń la mə n zwə́l vwĩ̀ ń yò w kɔrhɔ yilə. ¹⁶Ń mà n càrh còrhó-jì y kɔn rɛ́ tɛ̀bɛ́ ń zwẽ mó n súlí rə̀ kùr rə̀dù y ní ǹdə́ bə̀ gə bɔ̀n rɛ kùrə̀ nə̀nu mú, n zɛ̃̀ n kwè re n pə vwĩ̀-zwə́lnə mó ne. Vwĩ̀-zwə́lnə mó gə zə pyì-bya y bə̀ la m'e zwə́l vwĩ̀ rí yò w kɔrhɔ yil mú n mə n twĩ̀ yə̀-bəlɔ̀lɔ́ sǔbrí pɔ tũ̀twĩ̀ĩ̀ rí ń zhɛ̀, yə̀-bəlɔ̀lɔ́ w cə́bal mɔ́ já n nə ń yə̀-bəlɔ̀lɔ́ w sǔbri.¹⁷Lò mó gə gar Cinu nyə́ né rə̀dù ǹdə́ ń yə̀l, n zɛ̃̀ n wɛ̀rhɛ́ yə̀-bəlɔ̀lɔ́, dóó ŋwɛ́nɛ́ ń yó wə, sə ń mà n zhĩ wə, ¹⁸ń mà n zə pyì-bya kɛ̀bɛ́ kaka bə y zhe ń və̌-ywàálɛ́ wẽ́, è ye y mɛrhɛ dwã ǹdə́ kɛ̀bɛ́ bə̀ m'ê zwə́l yò kɔrhɔ vwĩ̀ rí ye yə́, n bə̀ n pə vwĩ̀-zwə́lnə mó ne. Vwĩ̀-zwə́lnə mó gə tú ń twĩ̀ yə̀-bəlɔ̀lɔ́ w kɔ̀bɔ́ ń wɛ̀rhɛ́ ǹdə́ ń yə̀l mó sǔbri pɔ tũ̀twĩ̀ĩ̀ rí ń zhɛ̀, yə̀-bəlɔ̀lɔ́ w cə́bal mɔ́ já n nə ń yə̀-bəlɔ̀lɔ́ w sǔbrí. ¹⁹Vwĩ̀ rí rə̀myɛ́ mɔ́ wɔ́ yò kɔrhɔ vwĩ̀, bə̀ lò mó yà ń dó Cinu ni zhə̀n ga.»

¹Cinu zɔ̀m ǹdə́ Muyiisi n wɔ̀: ²«Pə nyə́ né nyɛ̀bɛ́ Aarɔ̃ ǹdə́ ń byǎ bɛ́ nɛ ń wɔ̀:Nyǐ vwĩ̀ námpúm cɛ̃́ɛ̃́ rɛ́ zwə́l mó nə̀-twéésé: vwĩ̀ námpúm cɛ̃́ɛ̃́ rɛ́ n'ê mɛ̃ vwĩ̀-jùlú w myǐn mú w cəcɛ̃ y námpúm kɔn m'e yí cɛ y lá ǹdə́ mə̀ j'â zhe. ³Vwĩ̀-zwə́lnə mó mà n zù ń lɛ̃̌ kàmə̀zù-elyɛ̃nɛ́ yá, n súlí n ce lɛ̃̌ jar; ń mà n pwà vwĩ̀ námpúm cɛ̃́ɛ̃́ rɛ́ rə̀ jú myǐn mú nwǐsí tɔ̀mdɛ́, n cĩ́ vwĩ̀-jùlú w sarh nɛ. ⁴Rə̀myɛ́ kwã, ń mà n vùr ń gàndɛ́ n zɛ̃̀ n zù rə̀ dwã; n kwè nàmá bɛ́ nwǐsí tɔ̀mdɛ́ n mə n du zulə́ jàà y wa, n vò jàà y kɛ̀bɛ́ bə̀ cír rə̀ yil mú wẽ́.⁵Sə è gə wɔ́ vwĩ̀-jùlú w myǐn mú, mə̀ m'à j'â zhe gaga, mə̀ t'â la cú yé; nəkɔkɔ́lɛ́ gakó, vwĩ̀-zwə́lnə mó mà n ce dǎr mə̀ wẽ́, n pyɛ̀lɛ́ vwĩ̀ námpúm cɛ̃́ɛ̃́ kɔn rɛ́ rə̀ yó, n súlí n ji yə̀-zùlə́ vwə̃̀ né nwǐsí myǐn. ⁶Myǐn m'à j'â zhe vwĩ̀-jùlú w yó twéé twéé, sə mə̀ j'â t'â la cú yé. ⁷Nyǐ vɔ̀lɔ́ kɔn rɛ́ pɔ mɔ́ nə̀-twéésé: Wɔ́ Aarɔ̃ byǎ bɛ́ bə̀ mə̌ sə bə zhì vwĩ̀-jùlú w yé y wə, bə pə rɛ Cinu ni.⁸Vwĩ̀-zwə́lnə mə̀dù nə́ ń tɛ̃́ mún mú mə̀ búl mə̀ càn nwə̃̌ y ló mə̀ yó mó jə̀-gúl yírh n súlí n kwè ãsã́ y bə̀ cĩ́ vɔ̀lɔ́ kɔn rɛ́ yó mó n ji myǐn vwĩ̀-jùlú w yó: rə̀ wɔ́ lwẽ́ nã́nyə̀nyɛ̀lɛ́, lyìrhə́ kɔn rɛ́ Cinu yilə. ⁹Vɔ̀lɔ́ kɔn rɛ́ tɛ̀bɛ́ rə̀ dàl mɔ́, Aarɔ̃ ǹdə́ ń byǎ bɛ́ m'a jí ri; bə̀ t'â la sã̀-nə̀byẽ̌ rə̀ wẽ́ co bə m'e jí ri yé, sə bə̀ m'a jí ri jàà y kɛ̀bɛ́ bə̀ cír rə̀myɛ́ mɔ́ yil mú wẽ́; bə̀ m'a jí ri dwã-joló kòrhó w kɔ̀nɔ́ w wu w wə;¹⁰bə̀ t'â la sã̀-nə̀byẽ̌ rə̀ wẽ́ co bə m'e jí ri yé. Wɔ́ cəl ré tɛ̀bɛ́ à n'â pɛ bɛ kùjírə́ nyɛ̀bɛ́ bə̀ n'ê ji nə̀ gakó myǐn bə̀ pɛ nɛ mɔ́ wẽ́ mó. Cəl ré rə̀myɛ́ wɔ́ Cinu dúdú nyǎn ǹdə kɔn rɛ́ tɛ̀bɛ́ rə̀ n'ê dàl yə̀-bəlɔ̀lɔ́ sǔbri lwə̌l vwĩ̀ rí ráá yò kɔrhɔ vwĩ̀ rí yi ní mú ta. ¹¹Bal mɔ̀bɔ́ gakó ń wɔ́ Aarɔ̃ byǐ wɔ̌ ń jí ri; rə̀ wɔ́ nyí rə̀ m'à j'â ŋwɛ́nɛ́ twéé twéé á yilə, byin byin gakó, kùjírə́ nyɛ̀bɛ́ nə̀ gakó jú myǐn Cinu yil mú shò kwã nɛ́; kɔn dɛ̀bɛ́ gakó rə̀ dwə̀rh re m'a jǐrh Cinu nyǎn.»¹²Cinu zɔ̀m ǹdə́ Muyiisi n wɔ̀: ¹³«Nyǐ pɛnɛ́ y kɛ̀bɛ́ Aarɔ̃ ǹdə́ ń byǎ bɛ́ m'a zə bə bə̀ bə pə Cinu ni, dɛ̃ rɛ́ tɛ̀bɛ́ bə̀ m'a tútǔ mu ǹdə́ nwə̃̌ bə m'e cír mu mú: mún cəə́le rə̀tɔ̀ dɛ̃ wẽ́, mə̀ kə̀kàlà èdù y nəkɔkɔ́lɛ́, mə̀ kə̀kàlà y dõ mó də̀dɛ̀nɛ́.¹⁴Ǹ m'ǎ ywə́rh mún mú ǹdə́ nwə̃̌, ń zɛ̃̀ ń ji mu ǹdə́ ŋwàn-tɔ́rɔ́; ǹ m'ǎ kə́ kə́ ŋwɛ̀mɛ́ y éfòró ń zɛ̃̀ ń pɛ y Cinu ni, e yə̀ lwẽ́ nã́nyə̀nyɛ̀lɛ́ Cinu yilə. ¹⁵Aarɔ̃ byǐ mú mɔ̀bɔ́ bə̀ m'a tútǔ ǹdə́ nwə̃̌ n jǐrh vwĩ̀-zwə́lnə náncɛ ń jàà w myɛ mà n wɛ̀rhɛ́ èta: rə̀ wɔ́ nyí rə̀ m'à j'â ŋwɛ́nɛ́ gaga yilə; bə̀ m'a ji pɛnɛ́ y myǐn dɔ́dɔ́ Cinu yilə.¹⁶Vɔ̀lɔ́ kɔn dɛ̀bɛ́ gakó vwĩ̀-zwə́lnə la pɔ mɔ́ púlə́púlə́ m'a jí myǐn Yi yilə: rə̀ kaka t'â la nyú w co yé.» ¹⁷Cinu zɔ̀m ǹdə́ Muyiisi n wɔ̀: ¹⁸«Wál Aarɔ̃ ǹdə́ ń byǎ bɛ́ nɛ: Nyǐ yə̀-bəlɔ̀lɔ́ sǔbri lwə̌l vwĩ̀ rí nə̀-twéésé: Bə̀ n'ê zwə́l yə̀-bəlɔ̀lɔ́ sǔbri lwə̌l vwĩ̀ kɔn rɛ́ jàà y kɛ̀bɛ́ bə̀ n'ê zwə́l vwĩ̀ námpúm cɛ̃́ɛ̃́ kɔn rɛ́ è wẽ́ mó, Cinu yé né; rə̀ wɔ́ Yi dúdú nyǎn.¹⁹Wɔ́ vwĩ̀-zwə́lnə mó mɔ̀bɔ́ ń zwə́l vwĩ̀ rí rə̀myɛ́ mɔ́ ń wɔ̌ ń mà n dɔ̃̀ rə̀ nàmá bɛ́, sə wɔ́ Yi jì y jàà y kɛ̀bɛ́ bə̀ cír rə̀myɛ́ mɔ́ yil mú w ń mà n dɔ̃̀ bɛ nɛ́, dwã-joló kòrhó w kɔ̀nɔ́ w wu w wə. ²⁰Kɔn tɛ̀bɛ́ gakó rə̀ dwə̀rh vwĩ̀ rí nàmá bɛ́ m'a jǐrh Cinu nyǎn; vwǎm mɔ́ jal gə ló gɔ̀nɔ̀ yó, sə bə shɛ̀rh mə̀ jàà yá, Yi jì y jàà y kɛ̀bɛ́ bə̀ cír rə̀myɛ́ mɔ́ yil mú wə.²¹È gə wɔ́ dɔ ku bə̀ m'e shɛ̃̀ vwĩ̀ rí vwǎm mɔ́, sə bə mà w bə lo, sə è gə wɔ́ kàmmɔ ku bə̀ m'e shɛ̃̀ mɔ, sə bə kɔ̀rh ò wu wə́, bə zɛ̃̀ bə zhə́zhɛ́lɛ́ w ǹdə́ nɛ̃̌. ²²Bal mɔ̀bɔ́ gakó ń wɔ́ vwĩ̀-zwə́lnə bé kùkùl ré lò wɔ̌ ń dɔ̀m nàmá bɛ́ bə̀myɛ́ mɔ́: bə̀ wɔ́ Yi dúdú nyə̀ná. ²³Sə bə̀ t'â la vwǎm mɔ̀bɔ́ bə̀ m'e zwə́l yə̀-bəlɔ̀lɔ́ sǔbri lwə̌l vwĩ̀, bə zɛ̃̀ bə zə mə̀ jal mɔ́ bə m'e bə̀ dwã-joló kòrhó w wə, Yi jàà y wa, sǔbri pɔ tũ̀twĩ̀ĩ̀ rí tũ̌ yil mú, nàmá bɛ́ dɔ́m yé. Bə̀ m'a ji bi myǐn.²⁴Bǝ zhɔ zhe zɔ̀m ǹdǝ́ Muyiisi n wɔ̀: ²⁵Zɔ̌m ǹdǝ́ Arɔ̃ ǹdǝ́ ń byǎ bɛ́ n wɔ̀: Nyǐ yǝ̀-bǝlɔ̀lɔ́ vǔr vwĩ̀ rí. W:ó bǝ̀ gǝ́ n'ê zhwǝ́l vwĩ̀ námpúm cɛ̃́ɛ̃́ rɛ́ mǝ̀gã̌ mɔ́ wɔ́ gàà mɔ́ bǝ̀ n'ê zwǝ́l vwĩ̀ námpúm cẽ́ɛ̃́ rɛ́ bǝ̀ pǝ pǝ Bǝ zhɔ zhe ne mó: Bǝ̀ rǝ̀ wɔ́ kɔn dɛ̀bɛ́ rǝ̀ wɔ́ Yi kɔna. ²⁶Vwĩ̀-zwǝ́lnǝ mó mɔ̀bɔ́ ń nǝ́ zwǝ́l vwĩ̀ rí mú nǝ́ ń dɔ̀m rǝ̀ nàmá bɛ́; bǝ̀ rǝ́ mǝ̌ rǝ jí jàà kɛ̀bɛ́ è wɔ́ Yi nyǎ mɔ́ wẽ́, dwã-joló kòrhó w wǝ.²⁷Lò mɔ̀bɔ́ gakó ń dwǝ̀rh ń dwǝ̀rh nàmá bɛ́ nɛ mɔ́ nǝ́ ń jǐrh wárhgáá. Sǝ jal mɔ́ gǝ dwǝ̀rh kàmmǝ-zwǐ ni, bǝ̀ m'a sharh y jàà kɛ̀bɛ́ è wɔ́ Yi nyǎ mɔ́ wẽ́. ²⁸Dɔ nǝ̀zhĩ̌ kɛ̀bɛ́ bǝ̀ shɛ̃̀ nàmǝ́ bɛ́ è wẽ́ mó, sǝ bǝ lo yǝ; sɛ è gǝ wɔ́ kàmɔ nǝ̀zhĩ̌ wẽ́ bǝ shɛ̃̀ bɛ nɛ nɛ, sǝ bǝ shàrh y ǹdǝ́ nɛ̃̌.²⁹È kɔn námbya gakó, vwĩ̀-zwǝ́lnǝ bé n'ê jí ri: bǝ̀ rǝ̀ wɔ́ Yi kɔna. ³⁰Sǝ è gǝ wɔ́ yǝ̀-bǝlwàálɛ shǎrh vwĩ̀ kɔn tɛ̀bɛ́ gakó bǝ̀ zǝ bǝ bǝ̀ dwã-joló jì y w mú jal sǝ bǝ ji ri myǐn.

¹Nyǐ yò kɔrhɔ vwĩ̀ rí zwə́l mó nə̀-twéésé: rə̀ wɔ́ Yi dúdú vwĩ̀. ²Bə̀ m'a zwə́l yò kɔrhɔ vwĩ̀ rí vwǎm mɔ́ jàà y kɛ̀bɛ́ bə̀ n'ê zwə́l vwĩ̀ námpúm cɛ̃́ɛ̃́ rɛ́ nyǎn mɔ́ nɛ́, vwĩ̀-zwə́lnə mó mà n zɛ̃̀ n zhɛ́rhɛ́ mə̀ jal mɔ́ vwĩ̀-jùlú w cã̌ y nɛ n kə́kɛ́lɛ́. ³N zɛ̃̀ n kwè nwǐsí gakó n ce Cinu ni n pɔ̃: nə̀byíl ré ǹdə́ wu lyur rí nwǐsí, ⁴e súlí ocə̀-pwala nɛ́ nə̀lyè y ǹdə́ nwǐsí sə̀ dɛ̃ nɛ mɔ́ ǹdə́ sə́púnə́ né nwǐsí, è gə wɔ́ cɛ̃ rɛ́ yilə, bə̀ m'a bɔn rə̀myɛ́ bə súlí ocə̀-pwala nɛ́ nɛ.⁵Vwĩ̀-zwə́lnə mó mà n zɛ̃̀ n ji ri myǐn vwĩ̀-jùlú w yó: rə̀myɛ́ mɔ́ wɔ́ kùjú kɔ̀bɔ́ ò gakó n'ô jí myǐn mú Cinu yilə. Wɔ́ yò kɔrhɔ vwĩ̀ rí zwə́l nə̀-twéésé èta. ⁶Bal mɔ̀bɔ́ gakó ń wɔ́ vwĩ̀-zwə́lnə bé kùkùl ré lò wɔ̌ ń dɔ̀m nàmá bɛ́ bə̀myɛ́ mɔ́, sə wɔ́ Yi jì y jàà y kɛ̀bɛ́ bə̀ cír rə̀myɛ́ mɔ́ yil mú w bə̀ m'a dɔ̃̀ bɛ nɛ́: bə̀ wɔ́ Yi dúdú nyə̀ná.⁷Yə̀-bəlɔ̀lɔ́ sǔbri lwə̌l vwĩ̀ rí zwə́l nə̀-twéésé ǹdə́ yò kɔrhɔ vwĩ̀ rí zwə́l nə̀-twéésé ga wɔ́ kɔn rə̀dù. Vwǎm mɔ́ bə̀ m'e zwə́l vwĩ̀ rí mú nàmá bɛ́ wɔ́ vwĩ̀-zwə́lnə mó mɔ̀bɔ́ ń twĩ̀ yə̀-bəlɔ̀lɔ́ w sǔbri pɔ tũ̀twĩ̀ĩ̀ rí mú ń cǐ bi. ⁸È gə wɔ́ vwĩ̀-zwə́lnə mó mɔ̀bɔ́ ń zwẽ lò vwĩ̀ námpúm cɛ̃́ɛ̃́ rɛ́ vwǎm mɔ́ n zwə́l n pɔ̃ yilə, wɔ́ ńmyɛ̌ ń cǐ vwĩ̀ námpúm cɛ̃́ɛ̃́ rɛ́ vwǎm mɔ́ ń zwə́l mó tɔ̀nɔ̀ wá.⁹Vɔ̀lɔ́ kɔn rɛ́ tɛ̀bɛ́ gakó bə̀ wòwə̀, ráá bə̀ ju ǹdə́ ŋwàn-tɔ́rɔ́ ráá bə̀ kɛ̀lɛ̀ ǹdə́ nə̀zhĩ̌ wɔ́ vwĩ̀-zwə́lnə mó mɔ̀bɔ́ ń cìní ò vwĩ̀ rí tũ̀twĩ̀ĩ̀ rí mú ń cǐ. ¹⁰Vɔ̀lɔ́ kɔn dɛ̀bɛ́ gakó bə̀ ywə́rh ǹdə́ nwə̃̌ ráá rə̀ mɛ̃ nánkùlù wɔ́ Aarɔ̃ byǎ bɛ́ gakó bə̀ cǐ ri, sə bə̀ gakó cələ né m'a mɛrhɛ dwã.¹¹Nyǐ yə̀-zùlə́ vwĩ̀ rí bə̀ n'ê pɛ Cinu ni mú nə̀-twéésé: ¹²Bə̀ gə la vwĩ̀ rí zwə́l bə m'e súlí ‹nə̀bán-co› ne, bə̀ m'a pə búúri rə̀ yə̀ sã̀-nə̀byẽ̌ ce, rə̀ mún mú ywə́rh ǹdə́ nwə̃̌ ǹdə́ ŋwǎmsɛ sə̀ yə̀ sã̀-nə̀byẽ̌ ce bə̀ zhɛ́rhɛ́ nwə̃̌ sə̀ yó e súlí mún mɔ̀bɔ́ mə̀ búl mə̀ càn mə̀ ywə́rh ǹdə́ nwə̃̌ búúri;¹³bə̀ m'a súlí búrú kɔ̀bɔ́ ò co sã̀-nəbyẽ̌ búúrí ni, bə b'e pə yə̀-zùlə́ vwĩ̀ rí bə̀ la zwə́l nə̀bán-co yil mú yilə. ¹⁴Bə̀ m'a vùr búúrí kùrə̀ né gakó búrú òdù bə pa; è wɔ́ Cinu yil bə̀ n'ê vùr ri, sə wɔ́ vwĩ̀-zwə́lnə mó mɔ̀bɔ́ ń zhɛ́rhɛ́ yə̀-zùlə́ vwĩ̀ rí vwǎm mɔ́ jal mɔ́ vwĩ̀-jùlú w cã̌ y nɛ mɔ́ ń cǐ ri.¹⁵È gə wɔ́ yə̀-zùlə́ vwĩ̀ rí vwǎm mɔ́ bə̀ zwə́l nə̀bán-co yil mú nàmá bɛ́ yilə, bə̀ m'a dɔ̃̀ bɛ dɛ̃ rɛ́ tɛ̀bɛ́ bə̀ zwə́l re mó yù w cìcì, rə̀ kaka t'â la dǎl rə cĩ́ dɛ̃̌ è zɛ̃̀ nəkɔkɔ́lɛ́ y yil yé. ¹⁶Sə vwĩ̀ rí gə wɔ́ ‹nyì-bwelé vwĩ̀› ráá ‹pùbùlə̀ vwĩ̀›, bə̀ m'a dɔ̃̀ rə̀ nàmá bɛ́ jàlà vwĩ̀ rí zwə́l dɛ̃ rɛ́ yù w cìcì, è zɛ̃̀ nəkɔkɔ́lɛ́ y bə̀ wɔ̌ bə̀ dɔ̀m nàmá bɛ́ kùr ré.¹⁷Sə bə̀ m'a ji vwĩ̀ rí nàmá bɛ́ byɛ̀bɛ́ bə̀ gwẽ̌ dàl dwã nə̀tɔ̀ dɛ̃ rɛ́ yù w mú myǐn. ¹⁸Má lò gə nyɛ́ɛ́ ń dɔ̀m yə̀-zùlə́ vwĩ̀ rí nàmá bɛ́ bə̀ dwã nə̀tɔ̀ dɛ̃ rɛ́ yù w myɛ, Yi t'â la lò mó mɔ̀bɔ́ ń zwə́l re mó lwə̌l mó zõ yé; ń vwĩ̀ rí m'a yə̀ nánfò: rə̀ nàmá bɛ́ pɔn; lò mɔ̀bɔ́ gakó ń dɔ̀m bɛ, ń mà n zhĩ ń dóó wə́.¹⁹Kɔn súlí myɛ, bə̀ t'â la nàmá bɛ́ byɛ̀bɛ́ bə̀ dwə̀rh kɔn dɛ̀bɛ́ gakó rə̀ zhe jìmdi mú dɔ́m yé, bə̀ m'a ji bi myǐn. «È gə wɔ́ nàmá bɛ́ shò kwã: Lò mɔ̀bɔ́ gakó ń bə jìmdi zhe wɔ̌ ń dɔ̀m bɛ. ²⁰Sə lò mɔ̀bɔ́ ń zhe jìmdi gə dɔ̀m yə̀-zùlə́ vwĩ̀ rí bə̀ zwə́l bə pə Cinu ni mú nàmá bɛ́, sə bə vùr rə̀-ná-cí ń dwí rí wẽ́.²¹Lò mɔ̀bɔ́ ń dwə̀rh kɔn dɛ̀bɛ́ rə̀ zhe jìmdi gakó, è wɔ́ numbyíní jìmdi ráá vwǎm mɔ̀bɔ́ mə̀ zhe jìmdi ráá vwǎm mɔ̀bɔ́ mə̀ wɔ́ súsúlú kɔn mə j'à súlí mə̀ zhe jìmdi n zɛ̃̀ n dɔ̃̀ yə̀-zùlə́ vwĩ̀ rí tɛ̀bɛ́ bə̀ zwə́l bə pə Cinu ni nàmá bɛ́ mɔ́, sə bə vùr rə̀-ná-cí ń dwí rí wẽ́.»²²Cinu zɔ̀m ǹdə́ Muyiisi n wɔ̀: ²³«Wál Esərayɛl lyì byǎ bɛ́ nɛ: Á t'á la nɔ̃ ǹdə́ pyìrhə̀ e súlí bɔ̃̀ nwǐsí dɔ́m yé. ²⁴Vwǎm mɔ̀bɔ́ mə̀ cù ǹdə́ vwǎm mɔ̀bɔ́ gɔ-wẽ̀ dɔ̀m rə zhəzhɛrɛ nwǐsí wɔ̌ sə̀ zə sə̀ wɛ̀rhɛ́ kɔn dõ, sə á t'á la sɛ dɔ́m yé.²⁵Lò mɔ̀bɔ́ gakó ń dɔ̀m vwǎm mɔ̀bɔ́ ń ju mə̀ kɔn myǐn n pə Cinu ni nwǐsí, sə bə vùr rə̀-ná-cí ń dwí rí wẽ́, nwǐsí sə̀myɛ́ mɔ́ ń dɔ̀m mɔ́ yilə. ²⁶Á t'á la kɔn dɛ̀bɛ́ gakó rə̀ wɔ́ kúmí ráá vwǎm jal jú gaga, jààsɛ́ shɛ̀bɛ́ gakó á ŋwɛ́nɛ́ sə̀ wẽ́ mó w yé. ²⁷Lò mɔ̀bɔ́ gakó ń jú kɔn dɛ̌ dɛ̌ jal, sə bə vùr rə̀-ná-cí ń dwí rí wẽ́.»²⁸Cinu zɔ̀m ǹdə́ Muyiisi n wɔ̀: ²⁹«Wál Esərayɛl lyì byǎ bɛ́ nɛ: Lò gə la yə̀-zùlə́ vwĩ̀ zwə́l n pə Cinu ni, sə n zə cəl ré rə̀ wɔ́ Cinu cəl ré mó n bə̀ n pɔ̃. ³⁰Ń cìcì mú mà n zə kùjírə́ nyɛ̀bɛ́ bə̀ n'ê ji nə̀ gakó myǐn Cinu yil mú, è n'ê yǎl e wɔ̀ nwǐsí n mə n bà; sə ń mà n zə nɛ n súlí nyɛ̀l rɛ́ bə̀ mə̌ sə bə pə ǹdə bə̀ gə́ y'a wɛ̀rhɛ́ nɛ́ bə m'e pə pɛnɛ́ Cinu yé né mó n mə n bà.³¹Vwĩ̀-zwə́lnə mó mà n zɛ̃̀ n ji nwǐsí myǐn vwĩ̀-jùlú w yó, sə nyɛ̀l rɛ́ m'a yə̀ Aarɔ̃ ǹdə́ ń byǎ bɛ́ bə̀ cǐ. ³²Á m'ǎ pə á yə̀-zùlə́ vwĩ̀ rí vwǎm mɔ́ kùr-cí rí vwĩ̀-zwə́lnə mó ne.³³33 Kùr-cí rí rə̀myɛ́ wɔ́ Aarɔ̃ byǐ mú mɔ̀bɔ́ ń nə́ ń pɛ jal mɔ́ ǹdə́ yə̀-zùlə́ vwĩ̀ rí nwǐsí vwĩ̀-jùlú w yó mó cəl. ³⁴34 À zhə̀n ga vùr nyɛ̀l rɛ́ ǹdə́ kùr-cí rí Esərayɛl lyì byǎ bɛ́ yə̀-zùlə́ vwə̃̀ né wẽ́ a pə vwĩ̀-zwə́lnə Aarɔ̃ ǹdə́ ń byǎ bɛ́ nɛ, rə̀ m'a yə̀ bə̀ cəl twéé twéé yilə.³⁵Wɔ́ rə̀myɛ́ rə̀ wɔ́ Aarɔ̃ ǹdə́ ń byǎ bɛ́ cəl kùjírə́ nyɛ̀bɛ́ bə̀ n'ê ji nə̀ gakó myǐn Cinu yil mú yó wə, kɔn zhì dɛ̃ rɛ́ tɛ̀bɛ́ bə̀ cír be bə̀ la yə̀ Cinu vwĩ̀-zwə́lnə mó. ³⁶Wɔ́ cəl ré rə̀myɛ́ mɔ́ Cinu pɔ nyí Esərayɛl lyì byǎ bɛ́ nɛ bə̀ bə̀ pə bɛ, kɔn zhì dɛ̃ rɛ́ tɛ̀bɛ́ ń ló nwə̃̌ bə̀ yó n mə n cír bi mú; wɔ́ nyí rə̀ m'à j'â ŋwɛ́nɛ́ gaga bə̀ yilə, byin byin gakó.»³⁷Wɔ́ vwĩ̀ námpúm cɛ̃́ɛ̃́ rɛ́ ǹdə́ vɔ̀lɔ́ kɔn rɛ́ vwĩ̀ rí ǹdə́ yə̀-bəlɔ̀lɔ́ sǔbri lwə̌l vwĩ̀ rí ǹdə́ yò kɔrhɔ vwĩ̀ rí ǹdə́ Yi tum rí tũ̌ ŋwɔ̀nɔ́ w pɔ vwĩ̀ rí e súlí yə̀-zùlə́ vwĩ̀ rí zwə́l nə̀-twéésé èta. ³⁸Wɔ́ nə̀-twéésé sə̀myɛ́ mɔ́ nyí Cinu pɔ Muyiisi ni Sənəyi pyɔ̀ w yó dɛ̃ rɛ́ tɛ̀bɛ́ ń ce Esərayɛl lyì byǎ bɛ́ zə bə̀ pansɛ́ bə b'e pə Cinu ni Sənəyi gɔ-elũ èpòlò w w mó yù wə.

¹Cinu zɔ̀m ǹdə́ Muyiisi n wɔ̀: ²«Byẽ̌ Aarɔ̃ ǹdə́ ń byǎ bɛ́ ń cĩ́ dwã yó dwã-joló kòrhó w nyí rí ni. Ce bə zə kàmə̀zwǐsí ǹdə́ nwə̃̌ y kɛ̀bɛ́ bə̀ m'ê pɛ Yi tum rí tũ̌ ŋwɔ̀nɔ́ w mɔ́ ǹdə́ yə̀-bəlɔ̀lɔ́ sǔbri lwə̌l vwĩ̀ rí nə̀-bya y ǹdə́ pyì-byesé sə̀lyè y e súlí búúrí rə̀ yə̀ sã̀-nə̀byẽ̌ ce mó sə́yǎ y bə m'e bà. ³Rə̀myɛ́ kwã nɛ́, sə́ byẽ̀ Esərayɛl lyì byǎ bɛ́ púlə́púlə́ myɛ ń cĩ́ dwã yó gàà.»⁴Muyiisi wɛ̀rhɛ́ kɔn rɛ́ tɛ̀bɛ́ Cinu yà ń pɔ mɔ rə̀ nyí mú, Esərayɛl lyì byǎ bɛ́ púlə́púlə́ j'a bə̀ dwã yó, dwã-joló kòrhó w nyí rí ni. ⁵Muyiisi zɛ̃̀ n wɔ̀ lyì bí púlə́púlə́ ne: «Nyǐ-nə kɔn rɛ́ tɛ̀bɛ́ Cinu pɔ nyí b'à wɛ̀rhɛ́ mɔ́.»⁶Muyiisi zɛ̃̀ n ce Aarɔ̃ ǹdə́ ń byǎ bɛ́ twẽ̌ bə yí, n shɛ bɛ nɛ̃̌. ⁷N zù Aarɔ̃ nɛ kàmə̀zù-pɔ́lɛ́ y n lyẽ cã̌-tɔ̀nɔ̀ w ń cã̌ nɛ, n zù mu kàmə̀zù-èdɔ̀lɔ̀ w n zɛ̃̀ n zù mu vwĩ̀-zwə́lnə náncɛ kàmə̀zwǐ yə́; n zɛ̃̀ n zə vwĩ̀-zwə́lnə náncɛ kàmə̀zwǐ y lyẽẽ́sé n lyẽ ń cã̌ kwã;⁸n cĩ́ nə̀bán yó kàmə̀jɛ̃̀ y ń nə̀bán yó, n zɛ̃̀ n ce Urim ǹdə́ Tummima è wẽ́. ⁹N kwè yó-bɔrɔ́ w n cĩ́ ń yó wə, n zɛ̃̀ n lyẽ ku w ǹdə pùní ni ò zùrhì ǹdə́ sánə́má mɔ́ yó-bɔrɔ́ w nɛ, yó-bɔrɔ́ w yé y wə, o yə̀ kɔn rɛ́ tɛ̀bɛ́ bə̀ pɔ Cinu ni mú myɔrhɔ, ǹdə Cinu gə́ yà ń pɔ rə̀ nyí Muyiisi ni ní.¹⁰Muyiisi kwè nwə̃̌ y kɛ̀bɛ́ bə̀ m'ê pɛ Yi tum rí tũ̌ ŋwɔ̀nɔ́ w mɔ́, n mə n tútǔ dwã-joló kòrhó w ǹdə́ kɔn rɛ́ tɛ̀bɛ́ gakó rə̀ wɔ ò wẽ́ mó, n pə rɛ Yi ni. ¹¹N zhɛ́rhɛ́ y vwĩ̀-jùlú w yó twər tàlpyɛ̀, n zɛ̃̀ n tútǔ y vwĩ̀-jùlú w ǹd'ô wẽ̀ ré, e súlí zhǎ y ǹdə́ ku w kɔ̀bɔ́ è kùr ré cĩ́ ò yó mó yó n mə n pə rɛ Yi ni.¹²N ló nwə̃̌ y kɛ̀bɛ́ bə̀ m'ê pɛ Yi tum rí tũ̌ ŋwɔ̀nɔ́ w mɔ́ Aarɔ̃ yó w yó, n zə y n tútǔ mu n mə n pɔ̃ Yi ni. ¹³Muyiisi ce Aarɔ̃ byǎ bɛ́ bwəlse, n zù bi kàmə̀zù-pɔ́lsɛ́, n lyẽ cã̌-tàndɛ bə̀ cə̌rh ne, n zɛ̃̀ n pú bi yə́púr, ǹdə Cinu gə́ yà ń pɔ rə̀ nyí Muyisii ni ní.¹⁴N ce bə zə yə̀-bəlɔ̀lɔ́ sǔbri lwə̌l vwĩ̀ rí nə̀-bya y bə m'e bwəlse; Aarɔ̃ ǹdə́ ń byǎ bɛ́ cĩ́ bə̀ jɛ̀rh nə̀-bya y yó w yó; ¹⁵Muyiisi zwə́l y n zɛ̃̀ n zɛ̃̀ n twərh è jal mɔ́; n mɔ́rh mɔ́rh ń jə̀fɔ́lɛ́ nɛ́ n cĩ́ cĩ́ vwĩ̀-jùlú w nyimi ní nə̀ kə́kɛ́lɛ́ w mɔ́ yó, n mə n vùr vwĩ̀-jùlú w jìmdí; n ló jal mɔ́ kùr ré vwĩ̀-jùlú w kùr wə, n twĩ̀ sǔbri pɔ tũ̀twĩ̀ĩ̀ rí ò yó n mə n pə w Yi ni;¹⁶rə̀myɛ́ kwã nɛ́, Muyiisi kwè nə̀-bya y wu lyur rí nwǐsí gakó ǹd'ê cɛ̃ rɛ́ e súlí è bəcə̀-pwala nɛ́ nə̀lyè y ǹdə́ nə̀ nwǐsí n ji myǐn vwĩ̀-jùlú w yó; ¹⁷sə è gə wɔ́ nə̀-bya y kɔn rɛ́ tɛ̀bɛ́ rə̀ dàl mɔ́ ǹd'ê tɔ̀nɔ̀ w ǹd'ê nàmá bɛ́ e súlí è byə̀nə́ né yilə, ń pwà rɛ n mə n du zulə́ jàà y w n vò n ji ri myǐn, ǹdə Cinu gə́ yà ń pɔ nyí Muyiisi ni ní.¹⁸N ce bə zə vwĩ̀ námpúm cɛ̃́ɛ̃́ rɛ́ pyì-bya y bə m'e bà; Aarɔ̃ ǹdə́ ń byǎ bɛ́ cĩ́ jɛ̀rh pyìrhə̀ y yó w yó. ¹⁹Muyiisi zwə́l y n zɛ̃̀ n zhɛ́rhɛ́ è jal mɔ́ vwĩ̀-jùlú w cã̌ y nɛ n kə́kɛ́lɛ́.²⁰Muyiisi pyir vwǎm mɔ́ nǎm nǎm, n ce bə ji mə̀ yó w ǹdə́ mə̀ nàmá bɛ́ e súlí mə̀ nwə̃̌ y myǐn. ²¹Muyiisi zə nɛ̃̌ n mə n shɛ̀rh mə̀ lyur rí ǹdə́ mə̀ nə̀-gwěsé, n zɛ̃̀ n ji pyìrhə̀ y námpúm mú myǐn vwĩ̀-jùlú w yó. Rə̀myɛ́ mɔ́ yàl vwĩ̀ námpúm cɛ̃́ɛ̃́, lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́, rə̀ yàl kùjú kɔ̀bɔ́ ò gakó n'ô jí myǐn mú Cinu yilə, ǹdə Cinu gə́ yà ń pɔ rə̀ nyí Muyiisi ni ní.²²Rə̀myɛ́ kwã, ń ce bə zə pyì-byesé sə̀lyè nyǎ y bə m'e bà, e yə̀ vwĩ̀-zwə́lnə bé Yi tum rí tũ̌ ŋwɔ̀nɔ́ w pɔ vwĩ̀ rí zwə́l yilə; Aarɔ̃ ǹdə́ ń byǎ bɛ́ cĩ́ jɛ̀rh pyì-bya y yó w yó. ²³Muyiisi zwə́l y n twərh è jal mɔ́ n cĩ́ Aarɔ̃ jə̀-jĩ́ zhə̀-vɔ w ǹdə́ ń jə̀-jĩ́ jə̀fɔ́-byo w e súlí ń jə̀-jĩ́ nə̀fɔ́-byo w yó. ²⁴N zɛ̃̀ n ce Aarɔ̃ byǎ bɛ́ bwəlse, n cĩ́ jal mɔ́ bə̀myɛ jə̀-jĩ́ zhə̀-vɔr rɛ́ ǹdə́ bə̀ jə̀-jĩ́ jə̀fɔ́-byər ré e súlí bə̀ jə̀-jĩ́ nə̀fɔ́-byər ré yó. Rə̀myɛ́ kwã nɛ́, ń kwè jal mɔ́ kùr ré n zhɛ́rhɛ́ vwĩ̀-jùlú w cã̌ y nɛ n kə́kɛ́lɛ́.²⁵N zɛ̃̀ n kwè nwǐsí ǹdə́ nə̀byil ré ǹdə́ wu lyur rí nwǐsí ǹdə́ cɛ̃ rɛ́ ǹdə́ ocə̀-pwala nɛ́ nə̀lyè y ǹdə́ nə̀ nwǐsí e súlí kùr-cí rí; ²⁶n vùr búrú òdù ò yə̀ sã̀-nə̀byẽ̌ ce ǹdə́ búrú òdù ò ju ǹdə́ nwə̃̌ e súlí ŋwɛ̀mɛ́ èdù búúri tɛ̀bɛ́ rə̀ yə̀ sã̀-nəbyẽ̌ ce sə́yǎ y è wɔ Cinu yé né mó wẽ́, n pyɛ̀lɛ́ nwǐsí ǹdə́ kùr-cí rí yó. ²⁷N zɛ̃̀ n kwè rə̀myɛ́ gakó n cĩ́ Aarɔ̃ ǹdə́ ń byǎ bɛ́ jɔ̃̀ wa, n ce bə pə rɛ ǹdə bə̀ gə́ y'a wɛ̀rhɛ́ nɛ́ bə m'e pə pɛnɛ́ nɛ́, Cinu yé né.²⁸Muyiisi zɛ̃̀ n kə́ n zwẽ re bə̀ jɔ̃̀ wa, n ce bə súlí ri vwĩ̀ námpúm cɛ̃́ɛ̃́ rɛ́ nɛ bə ji myǐn vwĩ̀-jùlú w yó; rə̀myɛ́ mɔ́ yàl Yi tum rí tũ̌ ŋwɔ̀nɔ́ w pɔ vwĩ̀, lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́, kùjú kɔ̀bɔ́ ò gakó n'ô jí myǐn mú, Cinu yilə. ²⁹Muyiisi kwè nyɛ̀l rɛ́ n pə Cinu ni ǹdə bə̀ gə́ y'a wɛ̀rhɛ́ nɛ́ Cinu yé né bə m'e pə pɛnɛ́ nɛ́. Wɔ́ rə̀myɛ́ rə̀ wɔ́ Muyiisi cəl Yi tum rí tũ̌ ŋwɔ̀nɔ́ w pɔ pyì-bya y wẽ́ ǹdə Cinu gə́ yà ń pɔ nyí Muyiisi ni ní.³⁰Muyiisi kwè nwə̃̌ y kɛ̀bɛ́ bə̀ m'ê pɛ Yi tum rí tũ̌ ŋwɔ̀nɔ́ w mɔ́ ǹdə́ jal mɔ́ mə̀ y'à wɔ vwĩ̀-jùlú w yó mó, n zhɛ́rhɛ́ Aarɔ̃ ǹdə́ ń gàndɛ́ yó, n súlí n zhɛ́rhɛ́ Aarɔ̃ byǎ bɛ́ ǹdə́ bə̀ gàndɛ́ yó; wɔ́ èta ń wɛ̀rhɛ́ nɛ́ n mə n pə Aarɔ̃ ǹdə́ ń gàndɛ́ Yi ni, n súlí n pə Aarɔ̃ byǎ bɛ́ ǹdə́ bə̀ gàndɛ́ myɛ Yi ni.³¹Muyiisi zɛ̃̀ n wɔ̀ Aarɔ̃ ǹdə́ ń byǎ bɛ́ nɛ: «shɛ̃̌-na pyì-byesé sə̀lyè nyǎ y nàmá bɛ́ dwã-joló kòrhó w nyí ni; wɔ́ gàà á m'ǎ dɔ̃̀ bɛ nɛ́, ǹdə́ búrú w kɔ̀bɔ́ ò ŋwɛ́nɛ́ Yi tum rí tũ̌ ŋwɔ̀nɔ́ w pɔ sə́yǎ y mɔ́, ǹdə à gə́ pɔ nyí a wɔ̀ nɛ́: ‹wɔ́ Aarɔ̃ ǹdə́ ń byǎ bɛ́ bə̀ m'a dɔ̃̀ bɛ.› ³²Á m'ǎ ji nàmá bɛ́ ǹdə́ búrú w kɔ̀bɔ́ ò dàl mɔ́ myǐn. ³³Á m'ǎ j'á mɛ̃ dwã-joló kòrhó w nyí rí ni dwã nyàlpyɛ̀, kɔn b'e yí Yi tum rí tũ̌ mú ŋwɔ̀nɔ́ w bə̀ la ába pɔ mɔ́ pə o zhɛ̀; bə̀ bə̀ m'a pə ába Yi tum rí tũ̌ mú ŋwɔ̀nɔ́ w dwã nyàlpyɛ̀.³⁴Cinu cìcì ń pɔ nyí bə̀ bə̀ wɛ̀rhɛ́ ǹdə nə́ gə́ wɛ̀rhɛ́ zà nɛ́ mɔ́ bə m'e twĩ̀ sǔbri pɔ tũ̀twĩ̀ĩ̀ rí á yó. ³⁵Á m'ǎ j'á mɛ̃ dwã-joló kòrhó w nyí rí ni dwã nyàlpyɛ̀, cəcɛ̃ ǹdə́ nə̀nyɔ́nɔ́ ga. Rə̀myɛ́ mɔ́ kwã nɛ́, á m'ǎ ŋwɛ̀nɛ́ á twĩ̀ Cinu tum rí e jà á t'á la cú yé. Wɔ́ kɔn rɛ́ tɛ̀bɛ́ bə̀ pɔ nɛ rə̀ nyí mú.» ³⁶Aarɔ̃ ǹdə́ ń byǎ bɛ́ wɛ̀rhɛ́ kɔn rɛ́ tɛ̀bɛ́ gakó Cinu tó Muyiisi dɛnnɛ n pə rə̀ nyí mú.

¹Dwã lyɛlɛ dɛ̃ rɛ́, Muyiisi byẽ̀ Aarɔ̃ ǹdə́ ń byǎ bɛ́, e súlí Esərayɛl náncɛsɛ́. ²N zɛ̃̀ n wɔ̀ Aarɔ̃ nɛ: «Pyǎ nũ̌-bwə̀lə̀ yə̀-bəlɔ̀lɔ́ sǔbri lwə̌l vwĩ̀ rí yilə, e súlí pyì-bya vwĩ̀ námpúm cɛ̃́ɛ̃́ rɛ́ yilə, sə kaka bə̀ sə̀ sə̀lyè y ga zal yé, ń mə́ bə̀ Cinu yé né.³Ǹ m'ǎ zɛ̃̀ ń zɔ̀m ǹdə́ Esərayɛl lyì byǎ bɛ́ ń wɔ̀: ‹Zə-na bə̀cìlə́ yə̀-bəlɔ̀lɔ́ sǔbri lwə̌l vwĩ̀ rí yilə, e súlí byin rə̀dù nũ̌-bwə̀lə̀ ǹdə́ byin rə̀dù pyì-bwɛ̀lɛ́, sə kaka bə̀ sə̀ sə̀lyè y ga zal yé, vwĩ̀ námpúm cɛ̃́ɛ̃́ rɛ́ zwə́l yilə, ⁴e súlí nə̀-bya ǹdə́ pyì-bya yə̀-zùlə́ vwĩ̀ rí bə̀ la zwə́l Cinu yé né mó yilə, ǹdə́ mún mə̀ ywə́rh ǹdə́ nwə̃̌; bə̀ wɔ́ zà Cinu la ába ń cìn byilu.› » ⁵Bə zə kɔn dɛ̀bɛ́ gakó Muyiisi yà ń pɔ bɛ rə̀ nyí mú bə m'e bə̀ dwã-joló kòrhó w yé y wə, dwí rí gakó zɛ̃̀ rə twẽ̌ rə bwəlse rə zhì dɛ̃̌ Cinu yé né.⁶Muyiisi kə́ n wɔ̀: «Nyǐ kɔn rɛ́ tɛ̀bɛ́ Cinu pɔ nyí b'ǎ wɛ̀rhɛ́ mùnì ga á nə́ Cinu còrhó wə́.» ⁷Rə̀myɛ́ kwã nɛ́, Muyiisi wɔ̀ Aarɔ̃ nɛ: «Twẽ̌ ń yí vwĩ̀-jùlú w yala nɛ, ń zwə́l ǹ yə̀-bəlɔ̀lɔ́ sǔbri lwə̌l vwĩ̀ rí ǹdə́ ǹ vwĩ̀ námpúm cɛ̃́ɛ̃́ rɛ́ ń mə́ twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ǹ cìcì mú ǹdə́ dwí rí yilə, sə́ zɛ̃̀ ń pə dwí rí pɛnɛ́ yá, ń mə́ twĩ̀ sǔbri pɔ tũ̀twĩ̀ĩ̀ rí rə̀ yilə, ǹdə Cinu gə́ pɔ nyí ní.»⁸Aarɔ̃ twẽ̌ n bwəlse vwĩ̀-jùlú w nyí ni, n zwə́l ń cìcì yə̀-bəlɔ̀lɔ́ sǔbri lwə̌l nũ̌-bwə̀lə̀ y vwĩ̀ rí; ⁹Aarɔ̃ byǎ bɛ́ kwɛ̃́ jal mɔ́ bə pɔ̃; n mɔ́rh ń jə̀fɔ́lɛ́ jal mɔ́ wẽ́, n cĩ́ cĩ́ vwĩ̀-jùlú w nyimi ní yó, n zɛ̃̀ n kwè mə̀ kùr ré n ló tɛ̃́ vwĩ̀-jùlú w kùr wə.¹⁰N ji vwĩ̀ rí vwǎm mɔ́ nwǐsí ǹdə́ mə̀ bəcə̀-pwala nɛ́ ǹdə́ mə̀ cɛ̃ rɛ́ myǐn ǹdə Cinu gə́ yà ń pɔ nyí Muyiisi ni ní. ¹¹È gə wɔ́ nàmá bɛ́ ǹdə́ tɔ̀nɔ̀ w yilə, ń zə rɛ n du zulə́ jàà y w n vò n ji myǐn.¹²Ń zwə́l vwĩ̀ námpúm cɛ̃́ɛ̃́ rɛ́ pyì-bya yá; Aarɔ̃ byǎ bɛ́ kwɛ̃́ è jal mɔ́ bə pɔ̃, n zhɛ́rhɛ́ mɔ vwĩ̀-jùlú w cã̌ y nɛ n kə́kɛ́lɛ́. ¹³Bə kwè vwĩ̀ námpúm cɛ̃́ɛ̃́ rɛ́ vwǎm mɔ́ mə̀ gòm nǎm nǎm mɔ́ e súlí mə̀ yó w bə ji myǐn vwĩ̀-jùlú w yó; ¹⁴n shɛ̀rh mə̀ lyur rí ǹdə́ mə̀ nə̀-gwěsé n zɛ̃̀ n súlí ri vwĩ̀ námpúm cɛ̃́ɛ̃́ rɛ́ nɛ n ji myǐn vwĩ̀-jùlú w yó.¹⁵Rə̀myɛ́ kwã nɛ́, ń zwə́l dwí rí vwə̃̀ né: ń zwẽ dwí rí yə̀-bəlɔ̀lɔ́ sǔbri lwə̌l bə̀cìlə́ y n zwə́l ǹdə vwĩ̀ nã́yéé ré vwǎm mɔ́ ta. ¹⁶N zwə́l vwĩ̀ námpúm cɛ̃́ɛ̃́ rɛ́ vwǎm mɔ́ ǹdə kɔn gə́ mə̌ sə rə tó né. ¹⁷Rə̀myɛ́ kwã nɛ́, ń pɔ mún mú: ń co mo ń jə̀-gúl yírh n súlí nəkɔkɔ́lɛ́ vwĩ̀ námpúm cɛ̃́ɛ̃́ rɛ́ nɛ n ji myǐn vwĩ̀-jùlú w yó.¹⁸Rə̀myɛ́ kwã nɛ́, ń zə nə̀-bya y ǹdə́ pyì-bya y dwí rí y'à pɔ mɔ́ n mə n zwə́l yə̀-zùlə́ vwĩ̀ rí; Aarɔ̃ byǎ bɛ́ kwɛ̃́ sə̀ jal mɔ́ bə pɔ̃, n zhɛ́rhɛ́ mɔ vwĩ̀-jùlú w cã̌ y nɛ n kə́kɛ́lɛ́; ¹⁹è gə wɔ́ nə̀-bya y ǹdə́ pyì-bya y nwǐsí yilə, è n'ê yǎl e wɔ̀ nə̀byílə́ né ǹdə́ wu lyur rí nwǐsí ǹdə́ ocə̀-pwala nɛ́ e súlí cã nɛ́,²⁰bə̀ pyɛ̀lɛ́ rɛ nyɛ̀là nɛ́ yó bə ji myǐn vwĩ̀-jùlú w yó; ²¹Aarɔ̃ zɛ̃̀ n kwè nyɛ̀là nɛ́ ǹdə́ kùr-cí rí n pə Cinu ni ǹdə bə̀ gə́ y'a wɛ̀rhɛ́ nɛ́ bə m'e pə pɛnɛ́ nɛ́ mɔ́, ǹdə Muyiisi gə́ yà ń pɔ nyí ní.²²Rə̀myɛ́ yó, Aarɔ̃ zhẽ̌ ń jɛ̀sɛ́ dɛ̃̌ n zhèlè se dwí rí yó n mə n cĩ́ ri bwəl; sə ń gə́ zwə́l yə̀-bəlɔ̀lɔ́ sǔbri lwə̌l vwĩ̀ rí ǹdə́ vwĩ̀ námpúm cɛ̃́ɛ̃́ rɛ́, e súlí yə̀-zùlə́ vwə̃̀ né n zhɛ̀ kwã, ń kwɛ̃̀ n shí vwĩ̀-jùlú w yó n só tɛ̃́. ²³Muyiisi ǹdə́ Aarɔ̃ tó dwã bə zù dwã-joló kòrhó w wə, bə zɛ̃̀ bə k'a du bə̀ la bwəl cṹ dwí rí yó. Rə̀myɛ́ yó, dwí rí púlə́púlə́ j'a nə Cinu còrhó wə́: ²⁴myǐn j'a shí Cinu yé né mə du mə jí vwĩ̀ námpúm cɛ̃́ɛ̃́ rɛ́ ǹdə́ nwǐsí. Dwí rí gakó nə rɛ; lyì bí mà wu-nyɔ̃̀ búbwéése, bə zɛ̃̀ bə tu bə zə bə̀ yə́rh bə pú tɛ̃́.

¹Aarɔ̃ byǎ bɛ́, Nadaabɛ ǹdə́ Abyəwu, mə̀dù gakó yà ń kwè ń nə̀zhĩ̌ y kɛ̀bɛ́ ń mə́ ń ji wẽ̀ ré rə̀ lwẽ́ nã́nyə̀nyɛ̀lɛ́ y myǐn mú, n ló myǐn è wẽ́ n zɛ̃̀ n ló wẽ̀ rə̀ lwẽ́ nã́nyə̀nyɛ̀lɛ́ myǐn mú wə; èta, bə̀ j'a zə myǐn mɔ̌ mɔ̌, myǐn mɔ̀bɔ́ Cinu yə̀ nyí pɛ mə̀ yil mú, bə m'e bə̀ ń yé né. ²Rə̀myɛ́ yó myǐn j'a shí Cinu yé né mə du mə jí bi; bə j'a cì Cinu yé né.³Muyiisi zɛ̃̀ n wɔ̀ Aarɔ̃ nɛ: «Cinu yà ń dámǎ n wɔ̀ rɛ:‹À n'â yǎl bə̀ lyì bí byɛ̀bɛ́ bə̀ n'ê yí à yala nɛ mɔ́,nyǐ ni ǹdə Yi rí tɛ̀bɛ́ rə̀ bə dõ zhe ta,à súlí à n'â yǎl bə̀ bə̀ cèrhé ne,dwí rí gakó yé né.› »Aarɔ̃ já n shĩ̌ ń nyí. ⁴Muyiisi já n byẽ̀ Myəkayəə ǹdə́ Eləsafã, Aarɔ̃ da da-byǐ Uzhəə byǎ bɛ́, n wɔ̀ bɛ: «Bwəlse-nə nyɔ̀nɔ̀! Pwǎ-na á da-byǎ bɛ́ cùùrí Cinu jì y yé né á m'á du zulə́ jàà y wa.»⁵Bə twẽ̌ bə yí, bə pwà bə̀ da-byǎ bɛ́ cùùrí bə pyípyílí bə̀ kàmə̀zù-pɔ́lsɛ́ wẽ́, bə m'e du zulə́ jàà y wa, ǹdə Muyiisi gə́ yà ń pɔ bɛ nyí ní. ⁶Muyiisi zɛ̃̀ n wɔ̀ Aarɔ̃ ǹdə́ ń byǎ Eləyazaarɛ ǹdə́ Yətamaarɛ nɛ: «Á bə̀k'á yẽ̌ á ywésé ne sə gùlí gùlí dwã nɛ yé, á bə̀k'á kǎr á gàndɛ́a yé, è gə də̀ rə̀myɛ́ á m'ǎ cì sə á m'ǎ súlí á vwɛ̃ Cinu lyim rí á ló Esərayɛl lyì byǎ bɛ́ púlə́púlə́ yó wə. È wɔ́ á da-byǎ Esərayɛl lyì byǎ bɛ́ gakó bə̀ m'a kúrh byɛ̀bɛ́ Cinu ce myǐn jí bi mú. ⁷Ámyɛ̌ j'á bə mə̌ sə á zhǐr dwã-joló kòrhó w nyí rí ni yé, è gə də̀ rə̀myɛ́ á m'ǎ cì, bə̀ gə́ tútǔ ába ǹdə́ nwə̃̌ y kɛ̀bɛ́ bə̀ m'ê pɛ Yi tum rí tũ̌ mú ŋwɔ̀nɔ́ w yilə.» Sə bə̀ wɛ̀rhɛ́ ǹdə Muyiisi gə́ byili bi ní.⁸Cinu zɔ̀m ǹdə́ Aarɔ̃ n wɔ̀: ⁹«Ǹmyɛ́ ǹdə́ ǹ byǎ bɛ́, á t'á la də̀vɛ̃́ ráá kɔ̀-nyɔ̀ɔ̀mà mɔ̀bɔ́ mə̀ co sã̀-nə̀byẽ̌ nyɔ́ á gə mə̌ sə á vò dwã-joló kòrhó w w yi ní yé; èta, á t'á la cú yé. Wɔ́ nyí rə̀ m'à j'â ŋwɛ́nɛ́ gaga á yilə, byin byin gakó. ¹⁰Rə̀myɛ́ mɔ́, wɔ́ mùnì ga á ŋwɛ̀nɛ́ á pɔr kɔn rɛ́ tɛ̀bɛ́ rə̀ wɔ́ Yi nyǎn mɔ́ ǹdə́ tɛ̀bɛ́ rə̀ wɔ́ kɔn nánfò mó dwã wa, kɔn rɛ́ tɛ̀bɛ́ rə̀ zhe jìmdi ǹdə́ tɛ̀bɛ́ rə̀ bə jìmdi zhe dwã wa, ¹¹sə á ŋwɛ̀nɛ́ á cèrhè Esərayɛl lyì byǎ bɛ́ nɛ nyə́ né nyɛ̀bɛ́ gakó Cinu kwè bə̀ yil n zɛ̃̀ n tó Muyiisi dɛnnɛ n pə bɛ mɔ́.»¹²Muyiisi zɔ̀m ǹdə́ Aarɔ̃ e súlí Eləyazaarɛ ǹdə́ Yətamaarɛ, Aarɔ̃ byǎ bɛ́ bə̀ y'à dàl mɔ́ n wɔ̀: «Á gə vùr kùjú kɔ̀bɔ́ ò gakó n'ô jí myǐn mú Cinu yilə, vɔ̀lɔ́ kɔn rɛ́ wẽ́, sə á kwè vɔ̀lɔ́ kɔn rɛ́ kùr ré á jòm vwĩ̀-jùlú w yala nɛ á jí, sə á bə̀ sã̀-nə̀byẽ̌ rə̀ wẽ́ ce yé, bə̀ rə̀ wɔ́ Cinu dúdú cəl. ¹³Á m'ǎ jòm jàà kɛ̀bɛ́ bə̀ cír rə̀myɛ́ mɔ́ yil mú w á m'á jí ri, bə̀ rə̀ wɔ́ ǹmyɛ́ ǹdə́ ǹ byǎ bɛ́ cəl kùjírə́ nyɛ̀bɛ́ nə̀ gakó n'ê ji myǐn Cinu yil mú wẽ́. Wɔ́ nyí rí tɛ̀bɛ́ Cinu pɔ nɛ mɔ́.¹⁴È gə wɔ́ vwàmá nɛ́ nyɛ̀bɛ́ bə̀ m'e zwə́l yə̀-zùlə́ vwə̃̀ né nyɛ̀là nɛ́ ǹdə́ nə̀ kùr-cə̃́ né bə̀ pɔ Cinu ni ǹdə bə̀ gə́ mə̌ sə bə wɛ̀rhɛ́ nɛ́ bə m'e pə pɛnɛ́ mɔ́ yilə, ǹmyɛ́ ǹdə́ ǹ byǎ bɛ́ e súlí ǹ bə̀kwá bɛ́ m'ǎ dɔ̃̀ nɛ jàà kɛ̀bɛ́ è bə jìmdi zhe mó wẽ́, bə̀ rə̀ wɔ́ ǹmyɛ́ ǹdə́ ǹ byǎ bɛ́ cəl ré Esərayɛl lyì byǎ bɛ́ yə̀-zùlə́ vwə̃̀ né bə̀ n'ê zwə́l mó wẽ́. ¹⁵Bə̀ m'a zə kùr-cí rí ǹdə́ nyɛ̀l rɛ́ bə m'e súlí nwǐsí bə̀ n'ê ji myǐn vwĩ̀-jùlú w yó mó ne bə m'e bà; bə̀ gə pɔ rɛ Cinu ni ǹdə bə̀ gə́ mə̌ sə bə wɛ̀rhɛ́ nɛ́ bə m'e pə pɛnɛ́ nɛ́ mɔ́ bə̀ zhɛ̀, nàmá bɛ́ bə̀myɛ́ jǐrh ǹmyɛ́ ǹdə́ ǹ byǎ bɛ́ cəl gaga yilə, ǹdə Cinu gə́ pɔ nyí ní.»¹⁶Muyiisi bwə̀rh yə̀-bəlɔ̀lɔ́ sǔbri lwə̌l vwĩ̀ rí bə̀cìlə́ y bwə̀rhə́, sə ń púrí bə̀ ju y myǐn. Ń lyim j'a zɛ̃̀ rə̀ n'ê yì Eləyazaarɛ ǹdə́ Yətamaarɛ, Aarɔ̃ byǎ bɛ́ byɛ̀bɛ́ bə̀ y'à dàl mɔ́, n zɛ̃̀ n wɔ̀: ¹⁷«Byè yil á nə yə̀ vwĩ̀ rí vwǎm mɔ́ nàmá bɛ́ dɔ̀m Cinu jàà y kɛ̀bɛ́ bə̀ cír rə̀myɛ́ mɔ́ yil mú wẽ́, bə̀ gə́ wɔ́ Cinu dúdú cəl yilə? Cinu pɔ ába vwĩ̀ rí vwǎm mɔ́ mə̀myɛ́ mùnì ga á twĩ̀ sǔbri pɔ tũ̀twĩ̀ĩ̀ rí Esərayɛl lyì byǎ bɛ́ púlə́púlə́ yó Cinu yé né, á m'á vùr bə̀ yə̀-bəlɔ̀lɔ́ wá. ¹⁸Bə̀ gə́ y'à yə̀ mə̀ jal mɔ́ zə bə m'e vò Cinu jì y wẽ́ mó ce, á y'ǎ mə̌ sə á dɔ̃̀ mə̀ nàmá bɛ́ jàà kɛ̀bɛ́ bə̀ cír rə̀myɛ́ mɔ́ yil mú wẽ́ ǹdə à gə́ y'à pɔ nyí ní.»¹⁹Aarɔ̃ zɔ̀m ǹdə́ Muyiisi n wɔ̀: «Cili, nyǐ yò w kɔ̀bɔ́ ò nɔ àmyɛ́ zà mɔ́, dɛ̃ rɛ́ tɛ̀bɛ́ bə̀ zwə́l yə̀-bəlɔ̀lɔ́ sǔbri lwə̌l vwĩ̀ rí ǹdə́ vwĩ̀ námpúm cɛ̃́ɛ̃́ rɛ́ Cinu yé né mó. Cinu nə yà ń mà n shɛ̀nɛ́ a dɔ̃̀ yə̀-bəlɔ̀lɔ́ sǔbri lwə̌l vwǎm mɔ́ bə̀ zwə́l nàmá bɛ́ dɛ̃ rɛ́ rə̀myɛ́ mɔ́ zhə̀nà?» ²⁰Muyiisi já n swéné kɔn rɛ́ tɛ̀bɛ́ ń nyɛ̀ɛ̀ mɔ́.

¹1 Cinu zɔ̀m ǹdə́ Muyiisi ǹdə́ Aarɔ̃ n wɔ̀ bɛ: ²2 «Byili-nə Esərayɛl lyì byǎ bɛ́ nɛ, á wɔ̀:Cɛ yó vwàmá nɛ́ gakó wẽ́, nyǐ-nə nyɛ̀bɛ́ á wɔ̌ á m'ǎ jí mú:³á wɔ̌ á jí vwǎm mɔ̀bɔ́ gakó mə̀ nə̀-cɔ̀ w bɔ̀n dwã w rə̀lyè mó, e jà mə̀ n'ê bwérhé gɔ mɔ́. ⁴Rə̀myɛ́ mɔ́ ce, vwǎm mɔ̀bɔ́ mə̀ n'ê bwérhé gɔ e súlí vwǎm mɔ̀bɔ́ gakó mə̀ nə̀-cɔ̀ w bɔ̀n dwã w rə̀lyè mó dwí rí wẽ́, nyǐ-nə nyɛ̀bɛ́ á t'á la jú mú:yómó wə́, b'ò n'ô bwérhé gɔ sə ò nə̀-cɔ̀ w yə̀ dwã w bɔ̀n rə̀lyè yé: ò wɔ́ jìmdi kɔn ámyɛ̌ yilə;⁵ǹdə́ ywɛlɛ rɛ́, rə̀ n'ê bwérhé gɔ sə rə̀ bə nə̀-càr zhe yé: rə̀ wɔ́ jìmdi kɔn ámyɛ̌ yilə; ⁶ǹdə́ zwèmé y b'è n'ê bwérhé gɔ, sə è bə nə̀-càr zhe yé: è wɔ́ jìmdi kɔn ámyɛ̌ yilə; ⁷ǹdə́ kùkú wə́, b'ò nə̀-cɔ w bɔ̀n dwã w rə̀lyè, sə ò t'â bwérhé gɔ yé: ò wɔ́ jìmdi kɔn ámyɛ̌ yilə. ⁸Á bə mə̌ sə á dɔ̃̀ rə̀ nàmá ráá á dwə̀rh rə̀ cùùrí myɛ yé; rə̀ wɔ́ jìmdi kɔn ámyɛ̌ yilə.⁹Bǔ-wẽ̀ ré gakó wẽ́, nyǐ tɛ̀bɛ́ á wɔ̌ á m'ǎ jí mú: bǔ kɔn gaga, nə̀-fɔ̀lɔ̀ kɔn ráá bwǐ kɔn tɛ̀bɛ́ rə̀ zhe jəla ǹdə́ pwə̀ə̀rhè, á wɔ̌ á jí ri; ¹⁰sə á súl bǔ-wẽ̀ ré tɛ̀bɛ́ rə̀ sú bǔ w wə, ráá kò-nyì tɛ̀bɛ́ gakó rə̀ wɔ nɛ̃̌ w ǹdə́ nə̀-fɔ̀lɔ̀ w ráá bǔ w w rə̀ bə jəla ǹdə́ pwə̀ə̀rhè zhe mó,¹¹sə á m'ǎ j'á súl re twéé twéé yilə; á j'á t'á la rə̀ nàmá dɔ́m gaga yé, sə á m'ǎ súl rə̀ cùùrí myɛ dwə̌rh: ¹²á súl bǔ kɔn rɛ́ tɛ̀bɛ́ gakó rə̀ bə jəla ǹdə́ pwə̀ə̀rhè zhe mó.¹³Kúmsí wẽ́ mó, nyǐ shɛ̀bɛ́ á mə̌ sə á súl, á bə mə̌ sə á dɔ̃̀ mɔ́: zhú ǹdə́ lyõ ǹdə́ còrhò, ¹⁴ǹdə́ bəlyɛ̃zhá ǹdə́ zúmə́ dwí gakó, ¹⁵15 ǹdə́ kààrhɛ́ dwí gakó, ¹⁶ǹdə́ pyɔ̌-cóló ǹdə́ èkwə̀l-pwã̀ ǹdə́ bǔ-òshu ǹdə́ ényɛ̌lsɛ́ dwí gakó,¹⁷ǹdə́ èkwə̀l-byṹ ǹdə́ bù-célé ǹdə́ èkwə̀lə̀, ¹⁸ǹdə́ èkwə̀l-cə́lúbí ǹdə́ lyǎ-kúm-byṹ ǹdə́ zúm, ¹⁹ǹdə́ nə̀myɔ̃̀ ǹdə́ osã́cə-káálɛ dwí gakó ǹdə́ gɔ cə́-bya ǹdə́ ozhɛ̃̀yɔ̀lɔ́.²⁰Á j'á súl vɔ̀mɛ̀-ka kɛ̀bɛ́ è wɔ́ nə̀rh sə̀na ka mɔ́. ²¹Sə ǹdə́ rə̀myɛ́ ga, nyǐ wẽ̀ ré tɛ̀bɛ́ á wɔ̌ á jí vɔ̀mɛ̀-wẽ̀ ré tɛ̀bɛ́ rə̀ wɔ nə̀rh sə̀na wẽ̀ ré wẽ́ mó: wẽ̀ ré tɛ̀bɛ́ rə̀ zhe nə̀rh rə̀ m'ê fwɛ̃́ cɛ y yó mó. ²²Nyǐ tɛ̀bɛ́ á wɔ̌ á jí mú: sɔsɔ̀mɛ̀ dwí gakó ǹdə́ byaalɛ ǹdə́ cìlə̀ ǹdə́ ywə́lə́-sɔsɔ̀mɛ̀. ²³Sə á j'á súl vɔ̀mɛ̀-ka kɛ̀bɛ́ gakó è wɔ́ nə̀rh sə̀na dúdú ka mɔ́.²⁴E súlí myɛ wẽ̀ ré rə̀myɛ́ n'ê ce á jǐrh jìmdi cìnə́, lò mɔ̀bɔ́ gakó ǹ dwə̀rh rə̀ cùù w ni ǹ m'ǎ yə̀ jìmdi cə́bal kɔn m'e yí də̀dɛ̀nɛ́, ²⁵sə lò mɔ̀bɔ́ gakó ǹ zhĩ rə̀ cùù w myɛ ǹ mə̌ sə́ shɛ̀rh ǹ gàndɛ́, sə ǹ m'ǎ yə̀ jìmdi cə́bal kɔn m'e yí də̀dɛ̀nɛ́.²⁶Vwàmá nyɛ̀bɛ́ gakó nə̀ nə̀-cɔ̀ w yə̀ dwã w bɔ̀n ráá nə̀ t'â bwérhé gɔ mɔ́ wɔ́ jìmdi kɔn ámyɛ̌ yilə: lò mɔ̀bɔ́ gakó ǹ dwə̀rh re, ǹ m'ǎ jǐrh jìmdi cə́bal. ²⁷Èta myɛ, nə̀rh sə̀na wẽ̀ ré rə̀ nə̀-pyìlsí n'ê pwí tɛ̃́ mɔ́ wɔ́ jìmdi kɔn á yilə; lò mɔ̀bɔ́ gakó ǹ dwə̀rh rə̀ cùù w ni ǹ m'ǎ jǐrh jìmdi cə́bal kɔn m'e yí də̀dɛ̀nɛ́, ²⁸sə lò mɔ̀bɔ́ gakó ǹ zhĩ rə̀ cùù ǹ mə̌ sə́ shɛ̀rh ǹ gàndɛ́, sə ǹ m'ǎ yə̀ jìmdi cə́bal kɔn m'e yí də̀dɛ̀nɛ́, bə̀ vwàmá nɛ́ nə̀myɛ́ mɔ́ wɔ́ jìmdi kɔn ámyɛ̌ yilə.²⁹Nyǐ wẽ̀ ré tɛ̀bɛ́ rə̀ wɔ́ jìmdi kɔn á yilə, wə̀-nyìr tɛ̀bɛ́ rə̀ sú cɛ y mɔ́ wẽ́: wõ ǹdə́ tə̀tó e súlí búbúr dwí gakó, ³⁰ǹdə́ dádályízhə̀lɛ́ ǹdə́ búbú-èpɔ̀lɔ̀ ǹdə́ búbú ò yala nyɛ̌ ǹdə vɔ-lyɔ̀ w ta, ǹdə́ nyɔ̀rhɔ́ ébú e súlí gɔ́mə́lwà.³¹Wɔ́ rə̀myɛ́ rə̀ m'a yə̀ jìmdi kɔn wə̀-nyìr rí gakó wẽ́ á yilə: lò mɔ̀bɔ́ gakó ǹ dwə̀rh re ǹdə́ rə̀ cùwə̀, ǹ m'ǎ yə̀ jìmdi cə́bal kɔn m'e yí də̀dɛ̀nɛ́. ³²Kò-nyì rí rə̀myɛ́ rə̀dù gə cùwə̀, rə zɛ̃̀ rə tu kɔn tɛ̌ tɛ̌ yó, kɔn rɛ́ rə̀myɛ́ mɔ́ j'a jǐrh jìmdi kɔna, è wɔ́ dɔ̌ ku ráá gɔ̀nɔ̀ ráá tɔ̀nɔ̀ ráá lɔ̀bɔ̀ è n'ê yǎl e wɔ̀ ku kɔ̀bɔ́ bə̀ j'â zhe ò tum, tum tɛ̌ tɛ̌ yilə, bə̀ n'ê ce re nɛ̃̌ wa, rə̀ m'a yə̀ jìmdi kɔna, kɔn m'e yí də̀dɛ̀nɛ́, rə̀myɛ́ kwã rə̀ m'a k'a jǐrh wárhgáá. ³³Kò-nyì rí rə̀myɛ́ mɔ́ gə tu dɔ ku kɔ̌ kɔ̌ wẽ́, kɔn rɛ́ tɛ̀bɛ́ gakó rə̀ wɔ ò wẽ́ mó jǐrh jìmdi kɔna, á m'ǎ lo ku wə́;³⁴bə̀ gə ló nɛ̃̌ mə̀ y'à wɔ ku w òmyɛ́ mɔ́ wẽ́ kùjú kɔ̌ kɔ̌ bə̀ wɔ̌ bə̀ jí mú yó, kùjú w òmyɛ́ mɔ́ jǐrh jìmdi kɔna; èta myɛ, kɔ̀-nyɔ̀ɔ̀mà mɔ̀bɔ́ mə̀ càn myɛ n'ê jǐrh jìmdi kɔna, má mə̀ wɔ ku kɔ̌ kɔ̌ wẽ́ myɛ. ³⁵Wə̀-nyìr rí rə̀myɛ́ cùù gə tu kɔn tɛ̌ tɛ̌ yó myɛ, kɔn rɛ́ rə̀myɛ́ n'ê jǐrh jìmdi kɔna; è gə wɔ́ shɔ̃́ ráá kúl, sə á wǔr ri bə̀ rə̀ jǐrh jìmdi wẽ̀, sə rə̀ m'a j'a yə̀ jìmdi wẽ̀ ámyɛ̌ yilə;³⁶sə è gə wɔ́ nə̀-bùlì ráá nɛ̃̌-gɔ́rɔ́ w ò tu ní, rə̀ nɛ̃̌ mɔ́ gakó gwẽ̌ càn, sə lò mó mɔ̀bɔ́ ń nə́ ń vùr kɔ̀-cù w mə̀ wẽ́ mó nə́ ń jǐrh jìmdi cə́bal. ³⁷Wə̀-nyìr rí rə̀myɛ́ òdù cùù gə tu jíjí byǎ byɛ̀bɛ́ bə̀ la dú yó, jíjí byǎ bɛ́ gwẽ̌ càn, ³⁸sə bə̀ gə y'à jɛ̀nɛ̀ bə ló nɛ̃̌ jíjí byǎ bɛ́ yó, wə̀-nyìr rí rə̀myɛ́ òdù cùù zɛ̃̀ o tu bə̀ yó, jíjí byǎ bɛ́ m'a yə̀ jìmdi kɔn á yilə.³⁹Sə vwǎm mɔ̀bɔ́ á n'á jí gə cùwə̀, lò mɔ̀bɔ́ ń dwə̀rh mə̀ cùù w mà n yə̀ jìmdi cə́bal kɔn m'e yí də̀dɛ̀nɛ́. ⁴⁰Lò mɔ̀bɔ́ ń dɔ̀m mə̀ nǎm mɔ́ mà n shɛ̀rh ń gàndɛ́, sə ń mà n yə̀ jìmdi cə́bal kɔn m'e yí də̀dɛ̀nɛ́. Lò mɔ̀bɔ́ ń zhĩ mə̀ cùù w mà n shɛ̀rh ń gàndɛ́, sə ń mà n yə̀ jìmdi cə́bal kɔn m'e yí də̀dɛ̀nɛ́.⁴¹«Á súl wə̀-nyìr rí tɛ̀bɛ́ gakó rə̀ sú cɛ y yó mó: lòlò tá ń la rɛ dɔ́m yé. ⁴²Á t'á la wə̀-nyìr rí tɛ̀bɛ́ gakó rə̀ sú cɛ y rə̀ n'ê fwàl tɛ̃́ rə̀ pǔrh yó ráá rə̀ wɔ́ nə̀rh sə̀na wẽ̀ ráá sə̀ du gàà mɔ́ dɔ́m yé, b'ǎ súl re.⁴³Á bə̀k'á tó wə̀-nyìr rí tɛ̀bɛ́ rə̀ sú cɛ y yó mó dɛnnɛ á ce á cìn súsúlú wẽ́ yé, á t'á la rə̀ dɛnnɛ tó á byèlè á cìn yé, mùnì ga rə̀ bə̀k'a ce á jǐrh jìmdi cìnə́ gaga yé. ⁴⁴Bə̀ wɔ́ àmyɛ́ à wɔ́ Cinu á Yi rí; rə̀myɛ́ mɔ́ ce, zə-na á cìn mùnì ga á yə̀ àmyɛ́ lyì, b'à wɔ́ Yi rí tɛ̀bɛ́ rə̀ bə dõ zhe yé; á t'á la wə̀-nyìr rí tɛ̀bɛ́ rə̀ n'ê nyínyìmí cɛ yó mó gakó zə á m'á byèlè á cìn yé. ⁴⁵Bə̀ wɔ́ àmyɛ́ Cinu à ce á shə́r Ezhibti tənà y wa, mùnì ga a yə̀ Yi á yilə; rə̀myɛ́ mɔ́ ce, á mə̌ sə á yə̀ àmyɛ́ lyì b'àmyɛ́ wɔ́ Yi rí tɛ̀bɛ́ rə̀ bə dõ zhe.»⁴⁶Wɔ́ nə̀myɛ́ nə̀ wɔ́ nyə́ né vwàmá nɛ́ ǹdə́ kúmsí e súlí bǔ wə̀-nyìr rí rə̀ sú nàná bɛ́ wẽ́ ǹdə́ cɛ y yó mó shò kwã nɛ́ mɔ́. ⁴⁷Nyə́ né nə̀myɛ́ nə̀ n'ê ce bə̀ pɔr vwàmá nɛ́ nyɛ̀bɛ́ nə̀ wɔ́ jìmdi kɔn ǹdə́ nyɛ̀bɛ́ nə̀ də̀ jìmdi kɔna, e súlí vwàmá nɛ́ nyɛ̀bɛ́ bə̀ wɔ̌ bə̀ jí mú ǹdə́ nyɛ̀bɛ́ bə̀ bə mə̌ sə bə jí mú dwã wa.

¹Cinu zɔ̀m ǹdə́ Muyiisi n wɔ̀: ²«Wál Esərayɛl lyì byǎ bɛ́ nɛ: Kɛ̃ gə kwè pǔ n lù bal-byǐ, ń jǐrh jìmdi cə́kɛ̃, dwã nyàlpyɛ̀ yilə, ǹdə ń cànà y yi rí wẽ́ ta. ³Dwã lyɛlɛ dɛ̃ rɛ́, bə̀ m'a gõ̀ bə̀sɔ́bwɛ̀lɛ́ yá;⁴rə̀myɛ́ kwã, kɛ̃ mɔ́ mà n dɛ̃̀ dwã shə́-ètɔ̀ ǹdə́ nə̀tɔ̀ ń lul ré yi ní jal mɔ́ shǎrh mɔ́ yilə. Ń tá ń la kɔn dɛ̀bɛ́ rə̀ wɔ́ Yi nyǎn mɔ́ dwə̌rh ń súlí ń tá ń la Yi jì w zú kɔn m'e yí ń jìmdí shǎrh yi rí pyìrh. ⁵Ń gə lùl kɛ̃-byǐ, səmyɛnsɛ sə̀lyè wẽ́, ń wɔ́ jìmdi cə́kɛ̃ ǹdə ń cànà y yi rí wẽ́ ta; rə̀myɛ́ kwã, ń mà n dɛ̃̀ dwã shə́-shə̀ldù ǹdə́ nyə̀ldù ń lul ré yi ní jal mɔ́ shǎrh mɔ́ yilə.⁶Ń jìmdí shǎrh yi rí gə pyìrh, è gə wɔ́ bal-byǐ ráá kɛ̃-byǐ ń lùlə̀, ń mà n zə byin rə̀dù pyì-bwɛ̀lɛ́, vwĩ̀ námpúm cɛ̃́ɛ̃́ yilə, e súlí épò-bò ráá épwèné, yə̀-bəlɔ̀lɔ́ sǔbri lwə̌l vwĩ̀ rí zwə́l yilə, n bə̀ n pə vwĩ̀-zwə́lnə mó ne, dwã-joló kòrhó w nyí rí ni;⁷vwĩ̀-zwə́lnə mó mà n zwə́l re Cinu yé né, sə ń gə tú ń twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí kɛ̃ mɔ́ yó ń zhɛ̀, kɛ̃ mɔ́ lul ré yi ní jál mɔ́ jìmdí j'a shàrh èta.» ⁸«Kɛ̃ mɔ́ gə wàr pyì-bwɛ̀lɛ́ ń la nɔ, ń mà n zə épwěnse sə̀lyè ráá épò-bwə̀r rə̀lyè, kúmí èdù y m'a yə̀ vwĩ̀ námpúm cɛ̃́ɛ̃́ rɛ́ zwə́l yilə, è dõ mó yə̀ yə̀-bəlɔ̀lɔ́ sǔbri lwə̌l vwĩ̀ rí zwə́l yilə; sə vwĩ̀-zwə́lnə mó gə tú ń twĩ̀ yə̀-bəlɔ̀lɔ́ w sǔbri pɔ tũ̀twĩ̀ĩ̀ rí kɛ̃ mɔ́ yó ń zhɛ̀, kɛ̃ mɔ́ já n jǐrh wárhgáá.»

¹Cinu zɔ̀m ǹdə́ Muyiisi ǹdə́ Aarɔ̃ n wɔ̀: ²«Nyəlɛ ráá yòrhò ráá pɔ́pɔ̌ nyɛl nyɛl gə ju lò yala nɛ, e zɛ̃̀ e jǐrh yala tɔ̀nɔ̀ címí ǹdə yə-bəcàndɛ ta, sə bə zə mɔ bə bə̀ vwĩ̀-zwə́lnə Aarɔ̃ ráá ń byǎ bɛ́ bə̀ wɔ́ vwĩ̀-zwə́lnə mó mə̀dù sõ;³vwĩ̀-zwə́lnə mó mà n nyǐ ń yala tɔ̀nɔ̀ w címí yə́. Sə címí y jàà y kur rí gə jǐrh námpwẽ̀, yala tɔ̀nɔ̀ w zɛ̃̀ o wɛ̀rhɛ́ ǹdə ò co gɔ́rɔ́ ta, sə́ nyǐ wɔ́ yə-bəcàndɛ dwí; vwĩ̀-zwə́lnə mó gə nyǐ mu n zhɛ̀, ń mà n wɔ̀ bə̀ rə̀-ná-cí mú wɔ́ jìmdi cə́bal. ⁴Sə è gə wɔ́ pɔ́pɔ̌ námpõ̀ nyɛl nyɛl ò yə̀ wɛ̀rhɛ́ ǹdə ò co gɔ́rɔ́ ta, kur rí myɛ j'à yə̀ námpwẽ̀ jǐrh, vwĩ̀-zwə́lnə mó mà n cĩ́ nə̀bwɛ̃̀ mɔ́ ń dúdú dwã nyàlpyɛ̀;⁵sə dwã nyàlpyɛ̀ dɛ̃ rɛ́, vwĩ̀-zwə́lnə mó mà n nyǐ mu: pɔ́pɔ̌ w nyí rí gə j'a mɛ̃ rə̀ jàà y wa, rə̀ yə̀ súlí, vwĩ̀-zwə́lnə mó mà n kə́ n cĩ́ nə̀bwɛ̃̀ mɔ́ ń dúdú, dwã nyàlpyɛ̀ dwã kə́dò; ⁶dwã nyàlpyɛ̀ dɛ̃ rɛ́, vwĩ̀-zwə́lnə mó mà n kə́ n nyǐ mu kə́dò: pɔ́pɔ̌ w nyí rí gə byèlè, rə̀ yə̀ súlí, vwĩ̀-zwə́lnə mó nə́ ń byili bə̀ nə̀bwɛ̃̀ mɔ́ jǐrh wárhgáá: è wɔ́ yòrhò; lò mó mà n shɛ̀rh ń gàndɛ́, sə rə̀myɛ́ kwã ń mà n yə̀ wárhgáá;⁷sə yòrhò w nyí rí gə súlí, vwĩ̀-zwə́lnə mó gə́ tú n nyǐ lò mó n zɛ̃̀ n wɔ̀ bə̀ ń wɔ́ wárhgáá kwã nɛ́, lò mó mà n kə́ n vò n ce vwĩ̀-zwə́lnə mó nyǐ mu. ⁸Vwĩ̀-zwə́lnə mó mà n kə́ n nyǐ mu: ń gə púrí yòrhò w nyí rí súlí, vwĩ̀-zwə́lnə mó mà n byili bə̀ lò mó wɔ́ jìmdi cə́bal: sə wɔ́ yə-bəcàndɛ.⁹Yə-bəcàndɛ dwí gə zhe lò, bə̀ m'a zə mɔ bə vò vwĩ̀-zwə́lnə mó sõ; ¹⁰vwĩ̀-zwə́lnə mó mà n nyǐ mu: pɔ́pɔ̌ námpõ̀ gə ju ń yala nɛ, o ce ń kur rí gàà mɔ́ jǐrh námpwẽ̀, yala nàmá bɛ́ j'â pyě pwẽ̀ ne, ¹¹sə́ nyǐ wɔ́ yə-bəcàndɛ címí è j'â wɔ ń yala nɛ́ wẽ́; vwĩ̀-zwə́lnə mó mà n byili bə̀ ń wɔ́ jìmdi cə́bal; sə ń tá ń la ń cìn lyɔ̀ɔ̀ n cĩ́ mu ń dúdú yé, bə̀ kɔn wɔ́ pamparɛ̃ɛ̃ bə̀ ń wɔ́ jìmdi cə́bal.¹²Sə vwĩ̀-zwə́lnə mó gə púrí yə-bəcàndɛ́ rə̀myɛ́ mɔ́ j'a zɛ̃̀ rə̀ n'ê fwər nə̀bwɛ̃̀ mɔ́ yala nɛ́ gakó, kɔn zhì ń nèsé ne e m'e vò ń yó w ne, tɛ̀bɛ́ ń yírh wɔ̌ rə̀ nɛ mɔ́, ¹³ń mà n nyǐ mu: yə-bəcàndɛ́ gə́ fwər nə̀bwɛ̃̀ mɔ́ yala nɛ́ gakó mó ce, vwĩ̀-zwə́lnə mó mà n byili bə̀ nə̀bwɛ̃̀ mɔ́ wɔ́ wárhgáá; ń yala nɛ́ gakó gə́ jǐrh námpwã̀ mɔ́ yilə, ń já n jǐrh wárhgáá. ¹⁴Sə dɛ̃ rɛ́ tɛ̀bɛ́ bə̀ n'ê nɛ ń yala nàmá bɛ́ bə̀ pyě pwẽ̀ ne mó, ń nə́ ń jǐrh jìmdi cə́bal;¹⁵vwĩ̀-zwə́lnə mó mà n nyǐ ń yala nàmá bɛ́ bə̀ pyě pwẽ̀ ne mó, sə ń mà n byili bə̀ ń wɔ́ jìmdi cə́bal: yala nàmá bɛ́ bə̀ pyě pwẽ̀ ne mó wɔ́ jìmdi, sə wɔ́ yə-bəcàndɛ; ¹⁶sə rə̀myɛ́ kwã, yala nàmá bɛ́ bə̀ y'à pyě pwẽ̀ ne mó gə tú bə̀ jǐrh námpwə̀nə̀, lò mó mà n kə́ n vò n nə vwĩ̀-zwə́lnə mó; ¹⁷vwĩ̀-zwə́lnə mó mà n nyǐ mu: vwĩ̀-zwə́lnə mó nə́ ń byili bə̀ címí y jàà y gə́ jǐrh námpwã̀ mɔ́ ce címí y èmyɛ́ mɔ́ t'â ce lò jǐrh jìmdi cə́bal yé. Nə̀bwɛ̃̀ mɔ́ wɔ́ wárhgáá.¹⁸Kúkùlí gə y'à ju lò yala nɛ, e zɛ̃̀ e zhɛ̀, ¹⁹pɔ́pɔ̌ námpõ̀ ráá nánshə̀shɔ́lɔ́ nyɛl nyɛl zɛ̃̀ o du è jàà y wa, rə̀-ná-cí mà n vò n ce vwĩ̀-zwə́lnə mó nyǐ mu; ²⁰vwĩ̀-zwə́lnə mó mà n nyǐ mu: pɔ́pɔ̌ w gə nyɛ̌ ǹdə ò co gɔ́rɔ́ ta, ò jàà y kur rí myɛ jǐrh námpwẽ̀, vwĩ̀-zwə́lnə mó mà n byili bə̀ ń wɔ́ jìmdi cə́bal: wɔ́ yə-bəcàndɛ dwí rə̀ n'ê dwi kúkùlí y jàà y wa;²¹sə vwĩ̀-zwə́lnə mó gə nyǐ mu, n zɛ̃̀ ń yə̀ ku myɛ nɛ́ nɛ kúkùlí y jàà y w ò jǐrh námpõ̀, è jàà y myɛ bə gɔ́rɔ́ zhe e j'à də̀ nyɛl nyɛl, vwĩ̀-zwə́lnə mó mà n cĩ́ rə̀-ná-cí mú ń dúdú dwã nyàlpyɛ̀; ²²sə yə-bəcàndɛ́ nyí rí gə súlí zhə̀n ga, vwĩ̀-zwə́lnə mó mà n byili bə̀ ń wɔ́ jìmdi cə́bal: è wɔ́ yə-bəcàndɛ nyəlɛ; ²³sə pɔ́pɔ̌ w nyɛl nyɛl mɔ́ nyí rí gə mɛ̃ rə̀ jàà y wa, rə̀ gə yə̀ súlí, sə́ nyǐ wɔ́ kúkùlí y è n'ê zhɛ̀ mɔ́ nyí rí; vwĩ̀-zwə́lnə mó nə́ ń byili bə̀ ń wɔ́ wárhgáá.²⁴Kɔn dõ tɛ̀bɛ́ rə̀ wɔ̌ rə̀ yàl nɛ́: Myǐn gə mɔ̌r lò, pɔ́pɔ̌ nyɛl nyɛl nánshə̀shɔ́lɔ́ ráá námpõ̀ zɛ̃̀ o ji jàà y mə̀ mɔ̌r mɔ́ wẽ́, ²⁵vwĩ̀-zwə́lnə mó mà n nyǐ lò mó: pɔ́pɔ̌ w nyɛl nyɛl mɔ́ nyí rí kur rí gə jǐrh námpwẽ̀, ò jàà y zɛ̃̀ è nyɛ̌ ǹdə è co gɔ́rɔ́ ta, sə́ nyǐ wɔ́ yə-bəcàndɛ rə̀ n'ê ji kùr jàà y myǐn mú mɔ̌r mɔ́ wẽ́; vwĩ̀-zwə́lnə mó mà n byili bə̀ rə̀-ná-cí mú wɔ́ jìmdi cə́bal: sə wɔ́ yə-bəcàndɛ dwí;²⁶sə vwĩ̀-zwə́lnə mó gə nyǐ mu, n púrí ku námpõ̀ tɛ̀nɛ́ pɔ́pɔ̌ w jàà y wa, ò yə̀ gɔ́rɔ́ ce ò súlí ò də̀ nyɛl nyɛl myɛ, vwĩ̀-zwə́lnə mó mà n cĩ́ rə̀-ná-cí mú ń dúdú dwã nyàlpyɛ̀; ²⁷sə dwã nyàlpyɛ̀ dɛ̃ rɛ́, vwĩ̀-zwə́lnə mó mà n kə́ n nyǐ mu: pɔ́pɔ̌ w nyí rí gə súlí, vwĩ̀-zwə́lnə mó mà n byili bə̀ rə̀-ná-cí mú wɔ́ jìmdi cə́bal: wɔ́ yə-bəcàndɛ dwí; ²⁸sə pɔ́pɔ̌ nyɛl nyɛl mɔ́ nyí rí gə mɛ̃ rə̀ jàà y wa, rə̀ yə̀ súlí, rə̀ gə súlí rə̀ də̀ nyɛl nyɛl, sə́ nyǐ wɔ́ myǐn mú pɔ́pɔ̌; vwĩ̀-zwə́lnə mó mà n byili bə̀ ń wɔ́ wárhgáá: wɔ́ jàà y myǐn mú mɔ̌r mɔ́ nyí rí rə̀ n'ê zhɛ̀.²⁹Yə-bəcàndɛ címí gə ju bal ráá kɛ̃ yó ne ráá ń tə̀tɔ̀ nɛ, ³⁰vwĩ̀-zwə́lnə mó mà n nyǐ címí y jàà yá: è gə wɛ̀rhɛ́ ǹdə è co gɔ́rɔ́ ta, ku w gàà mɔ́ zɛ̃̀ ò wɔ́ nánshim, ò wɔ́ òdù òdù, vwĩ̀-zwə́lnə mó mà n byili bə̀ rə̀-ná-cí wɔ́ jìmdi cə́bal; wɔ́ səlɔ̀wà, è n'ê yǎl e wɔ̀ bə̀ yó ráá tə̀tɔ̀ myɛ yə-bəcàndɛ;³¹sə vwĩ̀-zwə́lnə mó gə nyǐ səlɔ̀wà y n zɛ̃̀ n púrí è yə̀ wɛ̀rhɛ́ ǹdə è co gɔ́rɔ́ ta, má ku námbyṹ tə̀ è jàà y w myɛ, vwĩ̀-zwə́lnə mó mà n cĩ́ nə̀bwɛ̃̀ mɔ́ səlɔ̀wà y zhe mó ń dúdú dwã nyàlpyɛ̀;³²sə dwã nyàlpyɛ̀ dɛ̃ rɛ́, vwĩ̀-zwə́lnə mó mà n kə́ n nyǐ címí yə́: səlɔ̀wà y nyí rí gə yə̀ súlí, ku nánshim myɛ gə tɛ̀nɛ́ è nyí rí wẽ́, səlɔ̀wà y gə yə̀ súlí e wɛ̀rhɛ́ ǹdə è co gɔ́rɔ́ ta, ³³rə̀-ná-cí mú mà n fɔ̃̀ ń kur rí, sə ń tá ń la səlɔ̀wà y jàà y fɔ́n yé; rə̀myɛ́ yi ní, vwĩ̀-zwə́lnə mó mà n kə́ n cĩ́ lò mó mɔ̀bɔ́ səlɔ̀wà y zhe mó ń dúdú, dwã nyàlpyɛ̀ dwã yilə;³⁴sə dwã nyàlpyɛ̀ dɛ̃ rɛ́, vwĩ̀-zwə́lnə mó mà n kə́ n nyǐ səlɔ̀wà yá: səlɔ̀wà y nyí rí gə yə̀ súlí, è gə yə̀ wɛ̀rhɛ́ ǹdə è co gɔ́rɔ́ ta, vwĩ̀-zwə́lnə mó mà n byili bə̀ rə̀-ná-cí mú wɔ́ wárhgáá; ń gə tú ń shɛ̀rh ń gàndɛ́ kwã, ń mà n yə̀ wárhgáá;³⁵sə səlɔ̀wà y nyí rí gə súlí vwĩ̀-zwə́lnə mó gə́ byili bə̀ lò mó wɔ́ wárhgáá kwã, ³⁶vwĩ̀-zwə́lnə mó mà n kə́ n nyǐ mu: səlɔ̀wà y nyí rí gə́ súlí mú ce, vwĩ̀-zwə́lnə mó kə́ ń tá ń la pyǎ n nyǐ ǹdə́ ku nánshim gə ŋwɛ́nɛ́ yé; rə̀-ná-cí mú já ń wɔ́ jìmdi cə́bal; ³⁷sə səlɔ̀wà y nyí rí gə j'â mɛ̃ rə̀ jàà y w zhə̀n ga, ku námbyṹ zɛ̃̀ o súlí o lyĩ è nyí rí wẽ́, sə́ nyǐ səlɔ̀wà y wɔ́ zhɛ́ è zhɛ̀, lò mó mɔ̀bɔ́ è y'à zhe mó wɔ́ wárhgáá; rə̀myɛ́ mɔ́ ce vwĩ̀-zwə́lnə mó nə́ ń byili bə̀ rə̀-ná-cí mú wɔ́ wárhgáá.³⁸Pə́pǎr nyɛl nyɛl námpwẽ̀ gə ju bal ráá kɛ̃ yala nɛ, ³⁹vwĩ̀-zwə́lnə mó nə́ ń nyǐ mu: pə́pǎr rɛ́ gə wɔ́ námpwẽ̀, rə j'à də̀ nyɛl nyɛl, sə́ nyǐ wɔ́ kúkùlə́ nə̀ du rə̀-ná-cí mú yala nɛ; rə̀-ná-cí mú wɔ́ wárhgáá.⁴⁰Lò ywésé gə ló tɛ̃́ lyə́m lyə́m ń yó wə, ń yó w jǐrh náncə̀lɔ́; rə̀-ná-cí wɔ́ wárhgáá; ⁴¹è gə wɔ́ ń cíl rí ywésé sə̀ shìl, ń cíl ré jǐrh náncə̀lɛ́; rə̀-ná-cí wɔ́ wárhgáá;⁴²sə yə-bəcàndɛ címí nánshə̀shɔ́lɔ́ gə ju ń yó-cɔ̀lɔ́ w nɛ ráá ń cíl náncə̀lɛ́ y nɛ, sə́ nyǐ wɔ́ yə-bəcàndɛ rə̀ n'ê ji kùr ń yə́-pɛ̀lɛ́ y wa, ǹdə́ ń cíl ré ne; ⁴³vwĩ̀-zwə́lnə mó mà n nyǐ mu: jàà y è n'ê yì mú, yə́-pɛ̀lɛ́ ecəl ré ráá cíl ré mó jàà y gə wɔ́ nánshə̀shɔ́lɔ́, e gə nyɛ̌ ǹdə yala yə-bəcàndɛ ta, ⁴⁴sə́ nyǐ rə̀-ná-cí mú wɔ́ yə-bəcàndɛ cə́bal, ń wɔ́ jìmdi cə́bal; vwĩ̀-zwə́lnə mó mà n byili bə̀ ń wɔ́ jìmdi cə́bal, yə-bəcàndɛ zhe ń yó w ne.⁴⁵Yə-bəcàndɛ cə́bal ńmyɛ̌ mɔ́ mə̌ dwã sə n zù kàmə̀zù-ezhaarɛ, n yẽ̌ ń ywésé ne sə gùlí gùlí dwã, n pyìlì ń nyì-kur rí n súlí ń nə́ ń búbwéé ń zhe: ‹Jìmdi cə́bal! Jìmdi cə́bal!›. ⁴⁶Ń mà n já n yə̀ jìmdi cə́bal yi rí tɛ̀bɛ́ gakó címí y è wɔ́ jìmdi kɔn mɔ́ zhe mo mó; wɔ́ rə̀myɛ́ è ce ń mà n du zulə́ jàà y wa, n vò n jòm ń dúdú.⁴⁷«Pyì-kur gɔ̀nɔ̀ ráá lɛ̃̌ gɔ̀nɔ̀ jàà èdù gə kwĩ́, ⁴⁸ráá lɛ̃̌ kàmə̀jɛ̃̀ jàà èdù ráá pyì-kur kàmə̀jɛ̃̀ jàà èdù ráá kàmə̀jɛ̃̀ è sɔ̃̀ ǹd'ê bɔ̀là jàà èdù ráá tɔ̀nɔ̀ jàà èdù ráá kɔn dɛ̀bɛ́ gakó rə̀ wɛ̀rhɛ́ ǹdə́ tɔ̀nɔ̀ jàà èdù, ⁴⁹jàà y è kwĩ́ mú nyí rí gə tú rə̀ jǐrh ǹdə vɔ-lyɔ̀ gə́ y'a nyɛ̌ nɛ́ ráá rə̀ jǐrh nã́nshɔ̃̀, è wɔ́ gɔ̀nɔ̀ w yó ráá tɔ̀nɔ̀ w yó ráá kàmə̀jɛ̃̀ y yó ráá kàmə̀jɛ̃̀ y ǹd'ê bɔ̀là bɛ́ yó ráá kɔn dɛ̀bɛ́ gakó rə̀ wɛ̀rhɛ́ ǹdə́ tɔ̀nɔ̀ mɔ́ yó, nyǐ nyí rí wɔ́ kwĩ́ rə̀ kwĩ́: bə̀ m'a ce vwĩ̀-zwə́lnə bə̀ n nyǐ ri;⁵⁰vwĩ̀-zwə́lnə mó mà n nyǐ jàà y è kwĩ́ mú nyí rí, rə̀myɛ́ kwã, ń mà n pyi ku w ò kwĩ́ mú nyí ni dwã nyàlpyɛ̀; ⁵¹sə dwã nyàlpyɛ̀ dɛ̃ rɛ́, ń mà n nyǐ ku w jàà y è kwĩ́ mú nyí rí: rə̀ nyí rí gə súlí gɔ̀nɔ̀ w yó ráá kàmə̀jɛ̃̀ y yó ráá kàmə̀jɛ̃̀ y ǹd'ê bɔ̀là bɛ́ yó ráá tɔ̀nɔ̀ w yó, má è wɔ́ tɔ̀nɔ̀ ku kɔ̌ kɔ̌ myɛ, sə́ nyǐ bə̀ wàr bə̀ m'a ce kṹ mú nyí rí jé yé; nyǐ ku w zhe jìmdi; ⁵²bə̀ m'a ji gɔ̀nɔ̀ w ǹdə́ pyì-kur rí ráá lɛ̃̌ kàmə̀jɛ̃̀ y ráá kàməjɛ̃̀ y ǹd'ê bɔ̀là bɛ́ ráá tɔ̀nɔ̀ ku w kɔ̌ kɔ̌ ò zhe jàà è kwĩ́ mú myǐn; jàà y è kwĩ́ mú nyí rí gə́ wàr rə̀ m'a jé mó ce, bə̀ m'a ji ku w myǐn.⁵³Sə vwĩ̀-zwə́lnə mó gə nyǐ n púrí jàà y è kwĩ́ gɔ̀nɔ̀ w yó ráá kàmə̀jɛ̃̀ y yó ráá kàmə̀jɛ̃̀ y ǹd'ê bɔ̀là bɛ́ yó ráá tɔ̀nɔ̀ ku kɔ̌ kɔ̌ yó mó nyí rí j'â yə̀ súlí, ⁵⁴ń nə́ ń pɛ nyí bə̀ bə̀ shɛ̌rh ku w ò zhe jàà y è kwĩ́ mú, n zɛ̃̀ n kə́ n pyi ò nyí ni dwã nyàlpyɛ̀; ⁵⁵bə̀ m'a jɛ̀nɛ̀ bə shɛ̀rh jàà y è kwĩ́ mú nyí rí, vwĩ̀-zwə́lnə mó zɛ̃̀ n kə́ n nyǐ ri: jàà y è kwĩ́ mú gə gwẽ̌ wɔ́ ǹdə è gə́ y'à wɔ́ nɛ́, má è nyí rí gə yə̀ súlí myɛ, ku w zhe jìmdi; bə̀ m'a ji w myǐn; bə̀ gɔ̀nɔ̀ w yé y ǹd'ô kwã y ga júwə́;⁵⁶sə vwĩ̀-zwə́lnə mó gə tú ń nyǐ n púrí jàà y è y'à kwĩ́ mú jǐrh námpwã̀ námpɔ́lɛ́ bə̀ gə́ shɛ̀rh y kwã nɛ́, ń nə́ ń gòm rə̀ nyí rí gɔ̀nɔ̀ w nɛ ráá tɔ̀nɔ̀ w nɛ ráá kàmə̀jɛ̃̀ y nɛ ráá kàmə̀jɛ̃̀ y ǹd'ê bɔ̀là bɛ́ nɛ; ⁵⁷sə kɔn gə k'ê du gɔ̀nɔ̀ w ráá kàmə̀jɛ̃̀ y ráá kàmə̀jɛ̃̀ y ǹd'ê bɔ̀là bɛ́ nɛ ráá tɔ̀nɔ̀ ku kɔ̌ kɔ̌ nɛ, sə́ nyǐ wɔ́ kùr ò ju ò k'â n'ô kwĩ́: rə̀myɛ́ yi ní, sə bə ji ku w ò kwĩ́ mú myǐn. ⁵⁸Bə̀ m'a k'a shɛ̀rh gɔ̀nɔ̀ w ráá kàmə̀jɛ̃̀ y ráá kàmə̀jɛ̃̀ y ǹd'ê bɔ̀là bɛ́ ráá tɔ̀nɔ̀ ku kɔ̌ kɔ̌ kɔ̀bɔ́ bə̀ y'à shɛ̀rh, jàà y è y'à kwĩ́ mú zɛ̃̀ e jé mó, rə̀myɛ́ yi ní ò m'a jǐrh wárhgáá.»⁵⁹Wɔ́ nə̀myɛ́ nə̀ wɔ́ nyə́ né pyì-kur ráá lɛ̃̌ gɔ̀nɔ̀ ráá kàmə̀jɛ̃̀ ráá kàmə̀jɛ̃̀ ǹd'ê bɔ̀là e súlí tɔ̀nɔ̀ ku kɔ̌ kɔ̌ gakó jàà y è kwĩ́ mú shò kwã nɛ́; nə̀myɛ́ nə̀ n'ê sɛ̃ bə̀ byili bə̀ kɔn rɛ́ wɔ́ wárhgáá ráá rə̀ zhe jìmdi.

¹Cinu Yi zɔ̀m ǹdə́ Muyiisi n wɔ̀: ²«Nyǐ tũ̀twĩ̀ĩ̀ rí tɛ̀bɛ́ bə̀ m'a tó yə-bəcàndɛ cə́bal jìmdí vǔr dɛ̃ rɛ́ yù w mú: bə̀ gə zə mɔ bə̀ tú vwĩ̀-zwə́lnə mó sõ,³vwĩ̀-zwə́lnə mó mà n du zulə́ jàà y wa, n vò n nyǐ mu. Yə-bəcàndɛ́ cə́bal mɔ́ gə wárh ń yə-bəcàndɛ́ címí y wẽ́, ⁴vwĩ̀-zwə́lnə mó nə́ ń pɛ nyí bə̀ bə̀ zə kúmsi nã́nyìrh sə̀lyè sə̀ bə jìmdi zhe ǹdə́ sɛ́ɛ́dərɛ dɔ̌ ǹdə́ pyì-kur nánshɛ̀n gwɛ̃́gwɛ̃́ e súlí yəzɔ́pɛa bə b'e pɔ̃, mɔ̀bɔ́ bə̀ la ń jìmdí vúr mú yilə; ⁵vvĩ̀-zwə́lnə mó nə́ ń pɛ nyí bə̀ bə̀ zwə́l kúmí nã́yə́ə́ y dɔ nə̀zhĩ̌, nɛ̃̌ wɔ è wẽ́ yə́-pɛ̀lɛ́ wa;⁶rə̀myɛ́ kwã, ń mà n kwè kúmí nã́nyì y è dàl mɔ́ ǹdə́ sɛ́ɛ́dərɛ́ y dɔ̌b w ǹdə́ pyì-kur rí nánshɛ̀n gwɛ̃́gwɛ̃́ mɔ́ e súlí yəzɔ́pɛ yá; n mɔ́rh rə̀ ga kúmí y bə̀ zwə́l bwǐ y nɛ̃̌ mɔ́ yó w mó jal mɔ́ wa; ⁷ń mà n zhɛ́rhɛ́ jal mɔ́ lò mó mɔ̀bɔ́ bə̀ n'ê vùr ń yə-bəcàndɛ́ jìmdí mú yó twər tàlpyɛ̀; n zɛ̃̀ n wɔ̀ bə̀ rə̀-ná-cí mú wɔ́ wárhgáá;rə̀myɛ́ kwã, ń mà n yẽ̌ kúmí nã́nyì y ni e zɛ̃̀ e zù gɔ.⁸Lò mó mɔ̀bɔ́ bə̀ la ń jìmdí vǔr mú mà n shɛ̀rh ń gàndɛ́, n fɔ̃̀ ń kur rí, n súlí n shɛ nɛ̃̌, rə̀myɛ́ yi ní ń já n jǐrh wárhgáá;ń mà n zɛ̃̀ n kə́ n vò zulə́ jàà y wa, sə ń mà n wɛ̀rhɛ́ dwã nyàlpyɛ̀ pwẽ̀ ne, ń tá ń la ń kòrhó w w zú yé; ⁹dwã nyàlpyɛ̀ dɛ̃ rɛ́, ń mà n fɔ̃̀ ń kur rí ǹdə́ ń yó w ǹdə́ ń tama nɛ́ e súlí ń yə́-kúlə́ né; ń mà n fɔ̃̀ ń kur rí gakó;n shɛ̀rh ń gàndɛ́, n shɛ nɛ̃̌, rə̀myɛ́ yi ní ń mà n já n jǐrh wárhgáá;¹⁰dwã lyɛlɛ dɛ̃ rɛ́, ń mà n zə pyì-bwǎlsɛ sə̀lyè kaka bə sɛ zhe ǹdə́ byin rə̀dù pyì-bwɛ̀lɛ́ nã́nyɛ̀ èdù kaka bə y zhe ǹdə́ mún cəə́le nə̀bɔ́, mə yə̀ pɛnɛ́, mə̀ ywə́rh ǹdə́ nwə̃̌ e súlí nwə̃̌ lyítər fwã́; ¹¹vwĩ̀-zwə́lnə mó mɔ̀bɔ́ ń la jìmdí vǔr mú nə́ ń cĩ́ lò mó bə̀ la ń jìmdí vǔr mú ǹdə́ ń pansɛ́ ga Cinu yé né, dwã-joló kòrhó w nyí rí ni;¹²vwĩ̀-zwə́lnə mó mà n zwẽ pyì-bwɛ̀lɛ́ y nã́yə́ə́ y ǹdə́ nwə̃̌ lyítər fwã́ y yò kɔrhɔ vwĩ̀ rí zwə́l yilə;ń mà n pə rɛ ǹdə bə̀ gə́ y'a wɛ̀rhɛ́ nɛ́ bə m'e pə pɛnɛ́ Cinu yé né mó né; ¹³ń mà n zwə́l pyì-bwɛ̀lɛ́ y bə̀ gə́ n'ê zwə́l yə̀-bəlɔ̀lɔ́ sǔbri lwə̌l vwǎm mɔ́ ǹdə́ vwĩ̀ námpúm cɛ̃́ɛ̃́ rɛ́ vwǎm mɔ́ mə̀gã̌ mɔ́, jàà kɛ̀bɛ́ bə̀ cír rə̀myɛ́ mɔ́ yil mú wə, bə̀ kɔn m'a yə̀ rə̀dù yò kɔrhɔ vwĩ̀ rí shò kwã ǹdə kɔn gə́ yàl yə̀-bəlɔ̀lɔ́ sǔbri lwə̌l vwĩ̀ rí shò kwã nɛ́ mɔ́: wɔ́ vwĩ̀-zwə́lnə mó ń cǐ ri; rə̀ wɔ́ Cinu dúdú cəl;¹⁴vwĩ̀-zwə́lnə mó mà n wɛ̀rhɛ́ yò kɔrhɔ vwĩ̀ rí vwǎm mɔ́ bə̀ zwə́l mó jal mɔ́;n cĩ́ mu lò mó mɔ̀bɔ́ bə̀ n'ê vùr ń jìmdí mú jə̀-jĩ́ zhə̀-vɔ w ǹdə́ ń jə̀-jĩ́ jə̀fɔ́-byo w e súlí ń jə̀-jĩ́ nə̀fɔ́-byo w yó; ¹⁵vwĩ̀-zwə́lnə mó mà n kwè nwə̃̌ y lyítər rí fwã́ yá;n twərh y námpɔ́lɛ́ ń jə̀-gwã̀ y wa; ¹⁶n zɛ̃̀ n mɔ́rh ń jə̀-jĩ́ jə̀fɔ́-pyìní y nwə̃̌ y è wɔ ń jə̀-gwã̀ y w mɔ́ wa;n zhɛ́rhɛ́ zhɛ́rhɛ́ twər tàlpyɛ̀ Cinu yé né;¹⁷vwĩ̀-zwə́lnə mó mà n wɛ̀rhɛ́ nwə̃̌ y kur ré rə̀ dàl ń jɔ̃̀ w mɔ́ n cĩ́ lò mó mɔ̀bɔ́ bə̀ n'ê vùr ń jìmdí mú jə̀-jĩ́ zhə̀-vɔ w yó ǹdə́ ń jə̀-jĩ́ jə̀fɔ́-byo w yó e súlí ń jə̀-jĩ́ nə̀fɔ́-byo w yó, n pyɛ̀lɛ́ yò kɔrhɔ vwǎm mɔ́ bə̀ zwə́l mó jal mɔ́ yó wə; ¹⁸vwĩ̀-zwə́lnə mó mà n kwè nwə̃̌ y kur ré rə̀ dàl ń jɔ̃̀ w mɔ́, n ló lò mó mɔ̀bɔ́ bə̀ n'ê vùr ń jìmdí mú yə́-pɛ̀lɛ́ wa;vwĩ̀-zwə́lnə mó zɛ̃̀ n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí Cinu yé né;¹⁹rə̀myɛ́ kwã, vwĩ̀-zwə́lnə mó mà n zɛ̃̀ n zwə́l yə̀-bəlɔ̀lɔ́ sǔbri lwə̌l vwĩ̀ rí; n zɛ̃̀ n twĩ̀ sǔbri pɔ tũ̀twĩĩ̀ rí lò mó mɔ̀bɔ́ bə̀ n'ê vùr ń jìmdí mú yó wə;rə̀myɛ́ kwã ń mà n zɛ̃̀ n zwə́l vwĩ̀ námpúm cɛ̃́ɛ̃́ rɛ́ vwǎm mɔ́; ²⁰vwĩ̀-zwə́lnə mó mà n zɛ̃̀ n kwè vwĩ̀ námpúm cɛ̃́ɛ̃́ rɛ́ ǹdə́ vɔ̀lɔ́ kɔn rɛ́ n cĩ́ vwĩ̀-jùlú w yó;n zɛ̃̀ n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí lò mó yó, sə rə̀myɛ́ mɔ́ kwã, rə̀-ná-cí mú já n jǐrh wárhgáá.²¹Sə lò mó gə já ń wɔ́ nə̀mɔ̀-cɛ̀lɛ́, ń wàr rə̀myɛ́ mɔ́ ga ń la pyǎ n na, ń mà n zə pyì-bwɛ̀lɛ́ èdù sásá n mə n bà, yò kɔrhɔ vwĩ̀ rí zwə́l yilə, bə̀ m'a pɛ y ǹdə bə̀ gə́ mə̌ sə bə wɛ̀rhɛ́ nɛ́ bə m'e pə pɛnɛ́ nɛ́ mɔ́, mùnì ga bə twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ń yó; ń mà n súlí n zə mún mə̀ ywə́rh ǹdə́ nwə̃̌ vwĩ̀ pɛnɛ́ y yilə, e súlí nwə̃̌ lyítər fwã́, ²²e súlí épwěnse sə̀lyè ráá épò-bwə̀r rə̀lyè, kɔn dɛ̀bɛ́ ń wɔ̌ ń mà n nə mɔ́; kúmí èdù m'a yə̀ yə̀-bəlɔ̀lɔ́ sǔbri lwə̌l vwĩ̀ rí zwə́l yilə, è dõ mó yə̀ vwĩ̀ námpúm cɛ̃́ɛ̃́ rɛ́ zwə́l yilə. ²³Dwã lyɛlɛ dɛ̃ rɛ́, ń mà n zə rɛ n bə̀ n pə vwĩ̀-zwə́lnə mó ne ń jìmdí vǔr yilə, dwã-joló kòrhó w nyí rí ni, Cinu yé né;²⁴vwĩ̀-zwə́lnə mó mà n zwẽ yò kɔrhɔ vwĩ̀ rí pyì-bwɛ̀lɛ́ y ǹdə́ nwə̃̌ y lyítər fwã́ yá;n pə rɛ ǹdə bə̀ gə́ mə̌ sə bə wɛ̀rhɛ́ nɛ́ bə m'e pə pɛnɛ́ nɛ́ mɔ́ Cinu yé né; ²⁵rə̀myɛ́ kwã nɛ́, ń mà n zɛ̃̀ n zwə́l yò kɔrhɔ vwĩ̀ rí pyì-bwɛ̀lɛ́ yá; n wɛ̀rhɛ́ è jal mɔ́ n cĩ́ lò mó mɔ̀bɔ́ bə̀ n'ê vùr ń jìmdí mú jə̀-jĩ́ zhə̀-vɔ w ǹdə́ ń jə̀-jĩ́ jə̀fɔ́-byo w e súlí ń jə̀-jĩ́ nə̀fɔ́-byo w yó;²⁶vwĩ̀-zwə́lnə mó mà n twərh nwə̃̌ námpɔ́lɛ́ ń jə̀-gwã̀ y wa; ²⁷n zɛ̃̀ n mɔ́rh ń jə̀-jĩ́ jə̀fɔ́-pyìní y nwə̃̌ y è wɔ ń jə̀-gwã̀ y w mɔ́ wẽ́, n zhɛ́rhɛ́ zhɛ́rhɛ́ twər tàlpyɛ̀ Cinu yé né;²⁸vwĩ̀-zwə́lnə mó mà n wɛ̀rhɛ́ nwə̃̌ y kùr ré rə̀ dàl ń jɔ̃̀ w mɔ́ n cĩ́ lò mó mɔ̀bɔ́ bə̀ n'ê vùr ń jìmdí mú jə̀-jĩ́ zhə̀-vɔ w yó ǹdə́ jə̀-jĩ́ jə̀fɔ́-byo w yó e súlí ń jə̀-jĩ́ nə̀fɔ́-byo w yó, ń gə́ tó yé n cĩ́ yò kɔrhɔ vwĩ̀ rí vwǎm mɔ́ jal mɔ́ mə̀gã̌ mɔ́; ²⁹vwĩ̀-zwə́lnə mó mà n kwè nwə̃̌ y kur ré rə̀ dàl ń jɔ̃̀ w mɔ́ n ló lò mó mɔ̀bɔ́ bə̀ n'ê vùr ń jìmdí mú yə́-pɛ̀lɛ́ wa, n mə n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ń yó Cinu yé né;³⁰vwĩ̀-zwə́lnə mó mà n zwẽ épwěnsé èdù ráá épò-bwə̀r ré òdù, kɔn rɛ́ tɛ̀bɛ́ lò mó zə n mə n bə̀ mɔ́, ³¹ń kúmí y èdù yə̀-bəlɔ̀lɔ́ sǔbri lwə̌l yilə, n zɛ̃̀ n súlí vɔ̀lɔ́ kɔn rɛ́ è dõ mó ne, n zwə́l vwĩ̀ námpúm cɛ̃́ɛ̃́ rɛ́;vwĩ̀-zwə́lnə mó mà n zɛ̃̀ n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí lò mó mɔ̀bɔ́ bə̀ n'ê vùr ń jìmdí mú yó, Cinu yé né.» ³²Wɔ́ nə̀myɛ́ nə̀ wɔ́ nyə́ né yə-bəcàndɛ cə́bal mɔ̀bɔ́ ń yír kɔn rɛ́ tɛ̀bɛ́ bə̀ zhe rə̀ tum ń jìmdí vǔr yil mú shò kwã nɛ́.³³Cinu zɔ̀m ǹdə́ Muyiisi ǹdə́ Aarɔ̃ n wɔ̀: ³⁴«Á gə tú á zù Kanaã tənà y à la ába pɔ á cìní mú wẽ́, à gə ce á tənà y è la á nyǎ jǐrh mú jì èdù kwĩ́c, ³⁵jì y èmyɛ́ mɔ́ cə́bal mɔ́ mà n vò n cĩ́ vwĩ̀-zwə́lnə mó ne n wɔ̀: ‹À nɔ ǹdə wɔ́ kɔn rə̀ kwĩ́ ta à sõ jù wə›.³⁶Vwĩ̀-zwə́lnə mó mà n pə nyí bə̀ bə̀ vǔr jì y wẽ̀ ré gakó bə ce pwẽ̀ ne, éfòró ńmyɛ̌ vwĩ̀-zwə́lnə mó bə̀ n zù è wẽ́ n nyǐ jàà y è kwĩ́ mú; èta bə̀ t'â la jì y kɔn rə̀dù ga nyǔ ǹdə kɔn tɛ̀bɛ́ rə̀ zhe jìmdi ta yé; rə̀myɛ́ kwã nɛ́, vwĩ̀-zwə́lnə mó mà n zɛ̃̀ n zù jì y wẽ́ mùnì n nyǐ yə; ³⁷ń mà n nyǐ jàà y è kwĩ́ mú: jì y wu byílsí jàà y è kwĩ́ mú gə zhe gwársɛ, sə̀ nyɛ̌ ǹdə vɔ-lyɔ̀ ta sə̀ wɔ́ nã́nshɛ̀n, jàà y gə nyɛ̌ ǹdə è co gɔ́rɔ́ ta, ³⁸vwĩ̀-zwə́lnə mó mà n du n zhì jì y étwí-ènyí rí ni, n ce bə pyi jì y dwã nyàlpyɛ̀ yilə.³⁹Dwã nyàlpyɛ̀ dɛ̃ rɛ́, vwĩ̀-zwə́lnə mó mà n kwɛ̃̀ n bə̀ n nyǐ jì yə́: jì y jàà y è kwĩ́ mú nyí rí gə súlí byílsí yó, ⁴⁰vwĩ̀-zwə́lnə mó mà n pə nyí bə̀ bə̀ vǔr nə́kulə né nyɛ̀bɛ́ nə̀ kwĩ́ mú, sə bə súlí bə zə nɛ bə du cɔ w w bə vò bə dwĩ̀, jàà kɛ̀bɛ́ è zhe jìmdi wẽ́;⁴¹ń mà n ce bə kɔ̀rh jì y wu w púlə́púlə́ bə súlí bə zə shó w bə̀ kɔ̀rh mɔ́ bə du cɔ w w bə vò bə dwĩ̀ jàà kɛ̀bɛ́ è zhe jìmdi mú wẽ́; ⁴²rə̀myɛ́ kwã, bə̀ m'a pwà nə́kulə dwã bə ce nã́yə́ə́ né jàà wa, bə súlí bə zə shó dõ bə k'a m'e fwàl jì yə́.⁴³Sə jì y gə zɛ̃̀ è k'ê n'ê kwĩ́ bə̀ gə́ vùr jàà y nə́kulə né bə súlí bə kɔ̀rh y bə zɛ̃̀ bə k'a fwàl y kwã nɛ́, ⁴⁴vwĩ̀-zwə́lnə mó mà n kə́ n vò n nyǐ jì yə́: è jàà y è kwĩ́ mú nyí rí gə súlí, sə́ nyǐ bə̀ wàr bə̀ m'a ce kṹ mú nyí rí jé yé; nyǐ jì y èmyɛ́ mɔ́ zhe jìmdi;⁴⁵rə̀myɛ́ yi ní, bə̀ m'a wǔr jì yə́, bə zɛ̃̀ bə pwà è nə́kulə né ǹd'ê dǎr rɛ́ e súlí shó w bə̀ y'à m'e fwàl y mɔ́ gakó bə m'e du cɔ w wa, bə vò bə ló jàà kɛ̀bɛ́ è zhe jìmdi mú wẽ́. ⁴⁶Lò mɔ̀bɔ́ ń zù jì y w è nyí rí pyu mú yi rí púlə́púlə́ yi ní, ń mà n jǐrh jìmdi cə́bal kɔn m'e yí də̀dɛ̀nɛ́, ⁴⁷lò mɔ̀bɔ́ ń pyẽ̀ jì y w mà n shɛ̀rh ń gàndɛ́, lò mɔ̀bɔ́ myɛ ń jòm è wẽ́ n jí kùjú mà n shɛ̀rh ń gàndɛ́.⁴⁸Sə vwĩ̀-zwə́lnə mó gə tú ń zù jì y wẽ́, n nyǐ yə́, ń gə púrí jì y jàà y è y'à kwĩ́ mú nyí rí gə yə̀ súlí, bə̀ gə́ k'a fwàl y kwã mɔ́, ń mà n byili bə̀ jì y wɔ́ wárhgáá, è kṹ mú nyí rí gə́ jé mó yilə.⁴⁹È gə wɔ́ jì y kṹ mú vǔr yilə,vwĩ̀-zwə́lnə mó mà n zə kúmsi sə̀lyè ǹdə́ sɛ́ɛ́dərɛ dɔ̌ ǹdə́ pyì-kur nánshɛ̀n gwɛ̃́gwɛ̃́ e súlí yəzɔ́pɛ; ⁵⁰ń mà n zwə́l kúmí nã́yə́ə́ y dɔ nə̀zhĩ̌ bwǐ nɛ̃̌ wɔ è wẽ́ yə́-pɛ̀lɛ́ wa; ⁵¹rə̀myɛ́ kwã, ń mà n kwè sɛ́ɛ́dərɛ dɔ̌ w ǹdə́ yəzɔ́pɛ y ǹdə́ pyì-kur rí nánshɛ̀n gwɛ̃́gwɛ̃́ mɔ́ e súlí kúmí nã́nyì yə́;n zɛ̃̀ n mɔ́rh rɛ kúmí y bə̀ zwə́l mó jal mɔ́ wẽ́, e súlí bwǐ y nɛ̃̌ mɔ́ wẽ́;ń mà n zɛ̃̀ n zhɛ́rhɛ́ jal mɔ́ jì y yó twər tàlpyɛ̀;⁵²wɔ́ èta ń mà n já n zə kúmí y jal mɔ́ ǹdə́ bwǐ y nɛ̃̌ mɔ́ ǹdə́ kúmí y nã́nyì y ǹdə́ sɛ́ɛ́dərɛ y dɔ̌ w ǹdə́ yəzɔ́pɛ y e súlí pyì-kur rí nánshɛ̀n gwɛ̃́gwɛ̃́ mɔ́ n mə n vùr ń jì y jìmdí ní; ⁵³ń mà n yẽ̌ kúmí nã́nyì y ni e zɛ̃̀, e shə́r cɔ w wa, e zù gɔ;rə̀myɛ́ kwã nɛ́, ń mà n zɛ̃̀ n twĩ̀ jìmdi vǔr tũ̀twĩ̀ĩ̀ rí jì y yó. Rə̀myɛ́ yó jì y m'a j'a jǐrh wárhgáá.»⁵⁴Wɔ́ nə̀myɛ́ nə̀ wɔ́ nyə́ né címí y kɛ̀bɛ́ gakó è wɔ́ yə-bəcàndɛ ǹdə́ səlɔ̀wà ⁵⁵e súlí gɔ̀nɔ̀ ǹdə́ jì kṹ ⁵⁶56 ráá nyəlɛ ráá yòrhò ráá pɔ́pɔ̌ nyɛl nyɛl shò kwã nɛ́; ⁵⁷nə̀ n'ê sɛ̃ bə̀ pɔr kɔn rɛ́ tɛ̀bɛ́ rə̀ zhe jìmdi ǹdə́ tɛ̀bɛ́ rə̀ wɔ́ wárhgáá mɔ́ dwã wa.

¹Cinu Yi zɔ̀m ǹdə́ Muyiisi ǹdə́ Aarɔ̃ n wɔ̀: ²«Wál-na Esərayɛl lyì byǎ bɛ́ nɛ:«bal bɛlɛ gə n'ê yì rə̀ nɛ̃̌ n'ê dwi mə̀ lwé tɛ̃́, nɛ̃̌ mɔ́ mə̀myɛ́ n'ê ce ń jǐrh jìmdi cə́bal. ³Nyǐ kɔn rɛ́ tɛ̀bɛ́ rə̀ ce ń bɛlɛ nɛ̃̌ mɔ́ mə̀ n'ê dwi mə̀ lwé tɛ̃́ mɔ́ zhe jìmdi mú: ń bɛlɛ rɛ́ nɛ̃̌ mɔ́ n'ê dwi mə̀ lwé tɛ̃́ ráá mə̀ t'â dwi mə̀ lwé tɛ̃́ myɛ, nyǐ ń gə́ wɔ́ jìmdi cə́bal mɔ́ kùrə̀:⁴Rə̀myɛ́ ce, pyònò kɔ̀bɔ́ gakó bal mɔ́ ńmyɛ̌ mɔ́ pyẽ̀ ò wẽ́ mó zhe jìmdi; ku kɔ̀bɔ́ gakó ń jòm ò yó mó myɛ zhe jìmdi. ⁵Lò mɔ̀bɔ́ ń la pyònò w òmyɛ́ mɔ́ dwə̌rh, ń mà n shɛ̀rh ń gàndɛ́ n súlí n shɛ nɛ̃̌, sə ń mà n yə̀ jìmdi cə́bal kɔn m'e yí də̀dɛ̀nɛ́.⁶Lò mɔ̀bɔ́ ń jòm ku kɔ̀bɔ́ bal mɔ́ ńmyɛ̌ mɔ́ jòm ò yó mó yó, mà n shɛ̀rh ń gàndɛ́ n súlí n shɛ nɛ̃̌ sə ń mà n yə̀ jìmdi cə́bal kɔn m'e yí də̀dɛ̀nɛ́. ⁷Lò mɔ̀bɔ́ ń dwə̀rh bal mɔ́ ńmyɛ̌ mɔ́, mà n shɛ̀rh ń gàndɛ́, n súlí n shɛ nɛ̃̌, sə ń mà n yə̀ jìmdi cə́bal kɔn m'e yí də̀dɛ̀nɛ́.⁸Sə bal mɔ́ ńmyɛ̌ mɔ́ gə carh tə̀tàr lò mɔ̀bɔ́ ń wɔ́ wárhgáá yó, lò mó ńmyɛ̌ mà n shɛ̀rh ń gàndɛ́, n súlí n shɛ nɛ̃̌, sə ń mà n yə̀ jìmdi cə́bal kɔn m'e yí də̀dɛ̀nɛ́. ⁹Jòmò kɔ̀bɔ́ gakó bal mɔ́ mɔ̀bɔ́ ń bɛlɛ nɛ̃̌ n'ê dwi mə̀ lwé tɛ̃́ mɔ́ jòm ò yó n mə n vò sɔ́má mɔ́ zhe jìmdi.¹⁰Lò mɔ̀bɔ́ gakó ń dwə̀rh ku kɔ̀bɔ́ ò yàl bal mɔ́ ńmyɛ̌ mɔ́ kùr wə, rə̀-ná-cí jǐrh jìmdi cə́bal kɔn m'e yí də̀dɛ̀nɛ́; sə lò mɔ̀bɔ́ ń kwè ku èta dwí rí n zhĩ mà n shɛ̀rh ń gàndɛ́, n súlí n shɛ nɛ̃̌, sə ń mà n yə̀ jìmdi cə́bal kɔn m'e yí də̀dɛ̀nɛ́. ¹¹Lò mɔ̀bɔ́ gakó bal mɔ́ mɔ̀bɔ́ ń bɛlɛ nɛ̃̌ n'ê dwi mə̀ lwé tɛ̃́ mɔ́ dwə̀rh ǹdə́ ń yə̀ ń jɛ̀sɛ́ zhə́zhɛ́lɛ́, mà n shɛ̀rh ń gàndɛ́, n súlí n shɛ nɛ̃̌, sə ń mà n yə̀ jìmdi cə́bal kɔn m'e yí də̀dɛ̀nɛ́. ¹²Bə̀ m'a lo dɔ nə̀zhĩ̌ y kɛ̀bɛ́ bal mɔ́ mɔ̀bɔ́ ń bɛlɛ nɛ̃̌ mɔ́ n'ê dwi mə̀ lwé tɛ̃́ dwə̀rh mó, sə è gə wɔ́ dɔ̌ nə̀zhĩ̌ sə bə zhə́zhɛ́lɛ́ ya.¹³Bal mɔ́ ń bɛlɛ nɛ̃̌ mɔ́ n'ê dwi mə̀ lwé tɛ̃́ mɔ́ bɛlɛ nɛ̃̌ mɔ́ gə zhì mə̀ k'ê t'â dwi, ń mà n gə̀ dwã nyàlpyɛ̀ kɔn m'e yí ń jìmdí vǔr mú, n shɛ̀rh ń gàndɛ́, n súlí n shɛ bwǐ nɛ̃̌, rə̀myɛ́ yi ní, ń mà n já n jǐrh wárhgáá. ¹⁴Dwã lyɛlɛ dɛ̃ rɛ́, ń mà n zə épwěnse sə̀lyè ráá épò-bwə̀r rə̀lyè n vò n pə vwĩ̀-zwə́lnə mó ne dwã-joló kòrhó w nyí rí ni, Cinu yé né. ¹⁵Vwĩ̀-zwə́lnə mó mà n zwə́l èdù y yə̀-bəlɔ̀lɔ́ sǔbri lwə̌l yilə, n zwə́l è dõ mó vwĩ̀ námpúm cɛ̃́ɛ̃́ yilə; vwĩ̀-zwə́lnə mó mà n zɛ̃̀ n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ń bɛlɛ rɛ́ nɛ̃̌ mɔ́ mə̀ y'à n'ê dwi mə̀ lwé tɛ̃́ mɔ́ yilə, Cinu yé né.¹⁶Bal lùlì y nɛ̃̌ mɔ́ gə du mə ló tɛ̃́, ń mà n shɛ nɛ̃̌ sə ń mà n yə̀ jìmdi cə́bal kɔn m'e yí də̀dɛ̀nɛ́; ¹⁷bə̀ m'a shɛ̀rh gɔ̀nɔ̀ kɔ̀bɔ́ gakó ǹdə́ tɔ̀nɔ̀ kɔ̀bɔ́ gakó lùlì y nɛ̃̌ mɔ́ dwə̀rh, sə rə̀ m'a zə jìmdi kɔn m'e yí də̀dɛ̀nɛ́. ¹⁸Kɛ̃ ǹdə́ bal gə zù ǹdə́ dwã, bə̀ m'a shɛ nɛ̃̌, sə bə̀ m'a j'a yə̀ jìmdi cìnə́ kɔn m'e yí də̀dɛ̀nɛ́.¹⁹Kɛ̃ gə nɔ ń cànà, jal zɛ̃̀ mə̀ n'ê dwi mə̀ lwé tɛ̃́, ń mà n já n yə̀ jìmdi cə́kɛ̃ dwã nyàlpyɛ̀, sə lò mɔ̀bɔ́ ǹ dwə̀rh mo, rə̀-ná-cí mà n já n yə̀ jìmdi cə́bal kɔn m'e yí də̀dɛ̀nɛ́. ²⁰Ku kɔ̀bɔ́ gakó ń pyẽ̀ ò yó ń cànà y yi rí w mú zhe jìmdi, ku kɔ̀bɔ́ gakó ń jòm ò yó myɛ zhe jìmdi.²¹Lò mɔ̀bɔ́ gakó ń dwə̀rh ń pyònò w ne, ń mà n shɛ̀rh ń gàndɛ́, n súlí n shɛ nɛ̃̌, sə ń mà n yə̀ jìmdi cə́bal kɔn m'e yí də̀dɛ̀nɛ́. ²²Lò mɔ̀bɔ́ gakó ń dwə̀rh ku kɔ̀bɔ́ ń jòm ò yó mó ne, ń mà n shɛ̀rh ń gàndɛ́, n súlí n shɛ nɛ̃̌, sə ń mà n já n yə̀ jìmdi cə́bal kɔn m'e yí də̀dɛ̀nɛ́. ²³Lò gə dwə̀rh kɔn rə̀ wɔ ń pyònò w wə, ráá rə̀ wɔ ku w kɔ̀bɔ́ ń jòm ò yó mó yó ne, rə̀-ná-cí mà n já n yə̀ jìmdi cə́bal kɔn m'e yí də̀dɛ̀nɛ́.²⁴Bal gə zù ǹdə́ kɛ̃ mɔ́ ńmyɛ̌ mɔ́, kɛ̃ mɔ́ cànà y jal mɔ́ zɛ̃̀ mə tə mɔ, bal mɔ́ mà n já n yə̀ jìmdi cə́bal dwã nyàlpyɛ̀; sə pyònò kɔ̀bɔ́ gakó bal mɔ́ la ò wẽ́ pyõ̌ mó m'a zə jìmdi.²⁵Kɛ̃ jal gə n'ê lwé tɛ̃́, e j'à də̀ ń cànà ń nɔwa, ráá ń cànà dwã nɛ́ lyɛ̃ mə j'à gwẽ̌ n'ê lwé tɛ̃́, ń mà n yə̀ jìmdi cə́kɛ̃ yi rí rə̀myɛ́ mɔ́ gakó wẽ́; ń mà n yə̀ jìmdi cə́kɛ̃ ǹdə ń cànà y yi rí wẽ́ ta. ²⁶Ń jal mɔ́ tɛ̃́ ló mó yi rí ga, pyònò kɔ̀bɔ́ gakó ń pyẽ̀ ò wẽ́ m'a j'a yə̀ ǹdə pyònò kɔ̀bɔ́ ń pyẽ̀ ò wẽ́ ń cànà y yi ní mú ta; sə ku w kɔ̀bɔ́ gakó ń jòm ò yó mó m'a zə jìmdi ǹdə ò gə́ zhe jìmdi ń cànà y yi ní mú ta. ²⁷Lò mɔ̀bɔ́ gakó ń dwə̀rh pyònò w òmyɛ́ mɔ́ ǹdə́ ku w òmyɛ́ mɔ́ nə́ ń ce ń cìn jìmdi; ń mà n shɛ̀rh ń gàndɛ́, n súlí n shɛ nɛ̃̌, sə ń mà n yə̀ jìmdi cə́bal kɔn m'e yí də̀dɛ̀nɛ́.²⁸Kɛ̃ mɔ́ jal mɔ́ ló mó gə kwĩ, ń mà n dɛ̃̀ dwã nyàlpyɛ̀, rə̀myɛ́ kwã, ń mà n jǐrh wárhgáá. ²⁹Dwã lyɛlɛ dɛ̃ rɛ́, ń mà n zə épwěnse sə̀lyè ráá épò-bwə̀r rə̀lyè, n bə̀ n pə vwĩ̀-zwə́lnə mó ne, dwã-joló kòrhó w nyí rí ni. ³⁰Vwĩ̀-zwə́lnə mó mà n zwə́l kúmí èdù y yə̀-bəlɔ̀lɔ́ sǔbri lwə̌l yilə, n zɛ̃̀ n zwə́l è dõ mó vwĩ̀ námpúm cɛ̃́ɛ̃́ yilə; vwĩ̀-zwə́lnə mó mà n zɛ̃̀ n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí kɛ̃ mɔ́ yó, Cinu yé né, ń jal mɔ́ mə̀ y'à n'ê lwé tɛ̃́ mə̀ y'à ce ń yà ń wɔ́ jìmdi cə́kɛ̃ mɔ́ yilə.³¹Á m'ǎ byili Esərayɛl lyì byǎ bɛ́ nɛ bə̀ bə̀ gə tú bə̀ wɔ́ jìmdi cìnə́ yi ní, sə bə kɔl à jì y yala nɛ bə zhì kwã nɛ́, èta bə̀ t'â la cú bə̀ jìmdí yil yé, è n'ê yǎl e wɔ̀ bə̀ bə̀ t'â la cú bə̀ gə́ m'a ce à jì y è wɔ bə̀ cəcəl w mó zə jìmdi mú yil yé.»³²Wɔ́ nə̀myɛ́ nə̀ wɔ́ nyə́ né bal mɔ̀bɔ́ ń bɛlɛ n'ê yì, nɛ̃̌ zɛ̃̀ mə̀ n'ê dwi mə̀ lwé tɛ̃́ ǹdə́ bal mɔ̀bɔ́ ń lùlì nɛ̃̌ mɔ́ myɛ n'ê dwi mə̀ lwé tɛ̃́ mə zɛ̃̀ mə ce n jǐrh jìmdi cə́bal, ³³e súlí kɛ̃ mɔ̀bɔ́ ń nɔ ń cànà y mɔ́, è n'ê yǎl e wɔ̀ bə̀ bal mɔ̀bɔ́ ráá kɛ̃ mɔ̀bɔ́ jal n'ê dwi ń yala nɛ́ wẽ́, ǹdə́ bal mɔ̀bɔ́ ń nə́ ń zwì ǹdə́ kɛ̃ mɔ̀bɔ́ ń wɔ́ jìmdi cə́kɛ̃ mɔ́ shò kwã nɛ́.

¹Cinu zɔ̀m ǹdə́ Muyiisi, Aarɔ̃ byǎ bɛ́ bə̀lyè y bə̀ cù bə̀ gə́ y'à tú Cinu yé né yi ní mú, cu mú kwã nɛ́. ²Cinu zɔ̀m ǹdə́ Muyiisi n wɔ̀: «Wál ǹ da-byǐ Aarɔ̃ nɛ bə̀ ń bə̀ Yi jì w zwì n lyɛ̃ n vò gɔ̀nɔ̀ w ò bɔ̀n Yi jì y dwã w mɔ́ kwã nɛ́, Yi dɔbrɛ kùlkṍ w nyí-byǐ rí yé y wə, yi tɛ̌ tɛ̌ yé, èta à gə tú Yi dɔbrɛ kùlkṍ w nyí-byǐ rí yə́-pɛ̀lɛ́ wa, ébɔ̃ w wẽ́ yi ní, ń tá ń la cú yé.³Sə Aarɔ̃ gə tú ń la Yi jì y w zú yi ní, nyǐ kɔn dɛ̀bɛ́ ń mà n zə n mə n vò: nə̀-bya yə̀-bəlɔ̀lɔ́ sǔbri lwə̌l vwĩ̀ zwə́l yilə, e súlí pyì-bya vwĩ̀ námpúm cɛ̃́ɛ̃́ zwə́l yilə; ⁴ń mà n zù vwĩ̀-zwə́lnə kàmə̀zù-pɔ́lɛ́ y è sɔ̃̀ ǹdə́ lɛ̃̌, n ce lɛ̃̌ jar, n lyẽ lɛ̃̌ cã̌-tɔ̀nɔ̀ ń cã̌ nɛ́, n zɛ̃̀ n súlí n kwè lɛ̃̌ yó-bɔrɔ́ w n cĩ́ ń yó wə, rə̀myɛ́ mɔ́ wɔ́ vwĩ̀ rí zwə́l tum rí gàndɛ́; ń mà n shɛ nɛ̃̌ éfòró n zù ri; ⁵sə Esərayɛl lyì byǎ bɛ́ púlə́púlə́ m'a pɔ̃ bə̀-cǐlsi sə̀lyè yə̀-bəlɔ̀lɔ́ sǔbri lwə̌l vwĩ̀ zwə́l yilə, e súlí pyì-bya vwĩ̀ námpúm cɛ̃́ɛ̃́ zwə́l yilə.⁶Aarɔ̃ mà n zwə́l nə̀-bya y ń cìcì yə̀-bəlɔ̀lɔ́ w sǔbri lwə̌l yilə, rə̀myɛ́ kwã ń mà n zɛ̃̀ n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ń cìcì mú ǹdə́ ń kɛ̀lɛ́ y lyì bí yilə. ⁷Ń mà n zwẽ bə̀-cǐlsí sə̀lyè y n cĩ́ Cinu yé né, dwã-joló kòrhó w nyí rí ni.⁸Ń mà n zɛ̃̀ n tə́ tántɛ́ɛ́ bə̀-cǐlsí sə̀lyè y shò kwã nɛ́, ń la mə n lwar bə̀cìlə́ kɛ̌ bə̀ m'a pə Cinu ni ǹdə́ kɛ̌ bə̀ m'a pə Azazɛla yil mú párá. ⁹Aarɔ̃ mà n pə bə̀cìlə́ y kɛ̀bɛ́ tántɛ́ɛ́ y zɔ Cinu yil mú Cinu ni, n zɛ̃̀ n zwə́l y yə̀-bəlɔ̀lɔ́ sǔbri lwə̌l yilə. ¹⁰È gə wɔ́ bə̀cìlə́ y kɛ̀bɛ́ tántɛ́ɛ́ y zɔ Azazɛl yil mú, bə̀ m'a zə y bə b'e cĩ́ Cinu yé né, nã́nyì bə m'e twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí è yó, bə zɛ̃̀ bə jì y bə ce gɔ-elũ èpòlò w wə, bə pə Azazɛl nɛ.¹¹Aarɔ̃ mà n zwə́l nə̀-bya y ń cìcì yə̀-bəlɔ̀lɔ́ w sǔbri lwə̌l yilə, rə̀myɛ́ kwã ń mà n zɛ̃̀ n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ń cìcì mú ǹdə́ ń dwí rí yilə. Ń gə tú ń zwə́l nə̀-bya y èmyɛ́ mɔ́ ń cìcì yə̀-bəlɔ̀lɔ́ w sǔbri lwə̌l yil ń zhɛ̀ kwã nɛ́,¹²ń mà n vùr myìn-cala nə̀ wə̀ə̀se, vwĩ̀-jùlú w yó Cinu yé né n ce nə̀zhĩ̌ y kɛ̀bɛ́ bə̀ m'ê ji wẽ̀ rə̀ lwẽ́ nã́nyə̀nyɛ̀lɛ́ y myǐn mú yírh pyã́ã́m, e súlí wẽ̀ ré rə̀ lwẽ́ nã́nyə̀nyɛ̀lɛ́ y bə̀ n'ê ji myǐn mú mún jə̀-gúlə́ yírhə́ nə̀lyè, n mə n vò gɔ̀nɔ̀ w ò bɔ̀n Yi jì y dwã w mɔ́ èpákɛ̀. ¹³Ń mà n zɛ̃̀ n ló wẽ̀ ré rə̀ lwẽ́ nã́nyə̀nyɛ̀lɛ́ y myǐn mú w Cinu yé né, sə rə̀ nyɛ̀sɛ́ m'a j'a pyi kùlkṍ w Yi dɔbrɛ́ bwə̀lsé wɔ ò wẽ́ mó nyí-byǐ rí ni. Èta, ń tá ń la cú yé.¹⁴Ń mà n wɛ̀rhɛ́ nə̀-bya y jal mɔ́, n zɛ̃̀ ń nə́ ń mɔ́rh ń jə̀fɔ́lɛ́ y mə̀ wẽ́ ń mə́ ń zhɛ́rhɛ́ mɔ kùlkṍ w nyí-byǐ rí sarh rɛ́ rə̀ zǎ yi-púrhí sõ mó yó; n zɛ̃̀ n zhɛ́rhɛ́ mɔ twər tàlpyɛ̀ kùlkṍ w nyí-byǐ rí yé né.¹⁵Ń mà n zwə́l bə̀cìlə́ y dwí rí yə̀-bəlɔ̀lɔ́ w sǔbri lwə̌l vwĩ̀ rí yil mú, n zə è jal mɔ́ n mə n vò gɔ̀nɔ̀ w ò bɔ̀n Yi jì y dwã w mɔ́ èpákɛ̀; n zə jal mɔ́ mə̀myɛ́ n mə n wɛ̀rhɛ́ ǹdə ń gə́ zə nə̀-bya y nyǎn mɔ́ n mə n wɛ̀rhɛ́ nɛ́: n zhɛ́rhɛ́ mɔ kùlkṍ w nyí-byǐ rí yó ǹdə́ rə̀ yé né. ¹⁶Ń mà n twĩ̀ Esərayɛl lyì byǎ bɛ́ pwarha tumə né ǹdə́ bə̀ nyí-ni-cṍ, è n'ê yǎl e wɔ̀ bə̀ yə̀-bəlwàálɛ́ gakó sǔbri pɔ tũ̀twĩ̀ĩ̀ rí Yi dúdú jàà y yó wə; ń mà n wɛ̀rhɛ́ èta, dwã-joló kòrhó w ò ŋwɛ́nɛ́ ǹdə́ bɛ, bə̀ pwarha tumə né cəcəl w mó myɛ yilə.¹⁷Aarɔ̃ gə tú ń zù dwã-joló kòrhó w wə, ń la yə̀-bəlɔ̀lɔ́ sǔbri pɔ tũ̀twĩ̀ĩ̀ rí tũ̌ Yi dúdú jàà y wẽ́ yi ní, kɔn b'e yí n kə́ n du pwẽ̀ ne, lò mə̀dù ga myɛ bə mə̌ sə n yə̀ dwã-joló kòrhó w w yé: ń mà n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ń cìcì mú ǹdə́ ń dwí rí e súlí Esərayɛl lyì byǎ bɛ́ púlə́púlə́ yilə. ¹⁸Ń mà n du kòrhó w wə, n vò vwĩ̀-jùlú w ò wɔ Cinu yé né mó yó, n twĩ̀ jìmdi vǔr tũ̀twĩ̀ĩ̀ rí ò yó; ń mà n wɛ̀rhɛ́ nə̀-bya y jal mɔ́ ǹdə́ bə̀cìlə́ y jal mɔ́ n cĩ́ cĩ́ vwĩ̀-jùlú w nyimi ní nə̀ kə́kɛ́lɛ́ w mɔ́ yó. ¹⁹Ń mà n mɔ́rh ń jə̀fɔ́lɛ́ jal mɔ́ wẽ́ n zhɛ́rhɛ́ mɔ vwĩ̀-jùlú w yó twər tàlpyɛ̀, n mə n vùr Esərayɛl lyì byǎ bɛ́ jìmdí bə̀ m'e byèlè w mó, n ce o jǐrh Yi nyɔ̃̌.²⁰Ń gə tú ń twĩ̀ Yi dúdú jàà y ǹdə́ dwã-joló kòrhó w e súlí vwĩ̀-jùlú w jìmdí vǔr tũ̀twĩ̀ĩ̀ rí ń zhɛ̀ kwã nɛ́, ń mà n zə bə̀cìlə́ nã́nyì y n mə n bà. ²¹Aarɔ̃ mà n cĩ́ ń jɛ̀sɛ́ sə̀lyè y bə̀cìlə́ y nã́nyì y yó w yó: ń mà n tùrhì Esərayɛl lyì byǎ bɛ́ dwə́ə́ré gakó ǹdə́ bə̀ nyí-ni-cõ mó gakó, è n'ê yǎl e wɔ̀ bə̀ bə̀ yə̀-bəlwàálɛ́ gakó n byili, n zɛ̃̀ n kwè zhĩĩ rí n cĩ́ bə̀cìlə́ y yó w yó; rə̀myɛ́ kwã nɛ́, ń mà n ce bal, ń yà ń dámǎ n tɛnɛ n zhɛ̀, jì y n mə n vò gɔ-elũ èpòlò w wə. ²²Bə̀-cìlə́ y m'a j'a zhĩ bə̀ dwə́ə́ré gakó e m'e vò cə-kùlì wẽ́.Ń gə jì bə̀cìlə́ y n ce gɔ-elũ èpòlò w kwã nɛ́,²³Aarɔ̃ mà n kwɛ̃̀ n vò n zù dwã-joló kòrhó w wə, n vùr lɛ̃̌ gàndɛ́ ń yà ń zù n mə n zù Yi dúdú jàà y w mɔ́, n zɛ̃̀ n cĩ́ ri gàà mɔ́. ²⁴Ń mà n shɛ nɛ̃̌ jàà y kɛ̀bɛ́ bə̀ vùr rə̀myɛ́ mɔ́ yil mú wẽ́, n zɛ̃̀ n kə́ n zù ń gàndɛ́ dwã bɛ́; rə̀myɛ́ kwã nɛ́, ń mà n zɛ̃̀ n du, n zwə́l vwĩ̀ námpúm cɛ̃́ɛ̃́ ń cìcì mú yilə, n zwə́l rə̀ dõ dwí rí yilə; ń mà n súlí n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ń cìcì mú ǹdə́ dwí rí ga yilə;²⁵rə̀myɛ́ kwã, ń mà n zɛ̃̀ n ji vwĩ̀ rí vwàmá nɛ́ nwǐsí myǐn yə̀-bəlɔ̀lɔ́ sǔbri lwə̌l yilə. ²⁶Lò mó mɔ̀bɔ́ ń jì bə̀cìlə́ y n ‹pə Azazɛl nɛ mɔ́› mà n shɛ̀rh ń gàndɛ́ n súlí n shɛ nɛ̃̌; sə rə̀myɛ́ kwã, ń mà n kə́ n bə̀ n zù zulə́ jàà y wa.²⁷Bə̀ m'a zə nə̀-bya y ǹdə́ bə̀cìlə́ y bə̀ zwə́l yə̀-bəlɔ̀lɔ́ sǔbri lwə̌l yil mú, bə zɛ̃̀ bə zə rə̀ jal mɔ́ bə̀ m'e twĩ̀ yə̀-bəlɔ̀lɔ́ sǔbri pɔ Yi dúdú jàà y w mɔ́, bə m'e du zulə́ jàà y wa, sə bə̀ m'a ji rə̀ tàndɛ́ ǹdə́ rə̀ nàmá bɛ́ e súlí rə̀ byə̀nə́ né myǐn. ²⁸Lò mó mɔ̀bɔ́ ń la rɛ myǐn ju mú mà n shɛ̀rh ń gàndɛ́, n súlí n shɛ nɛ̃̌; sə rə̀myɛ́ kwã, ń mà n ká n ŋwɛ̀nɛ́ n zù zulə́ jàà y wa.²⁹Wɔ́ nyí rə̀ m'à j'â ŋwɛ́nɛ́ gaga, á yilə: cànsɛ̀ shàlpyɛ̀ nyǎ y dwã shí yù wə, ámyɛ̌ Esərayɛl lyì byǎ bɛ́ tənà y lò ǹdə́ zhə-bal mɔ̀bɔ́ ń jě á cəcəl w mó, á m'ǎ lyẽ á nyí, á t'á la tum rə̀dù ga myɛ tũ̌ yé. ³⁰Bə̀ wɔ́ dɛ̃ rɛ́ rə̀myɛ́ bə̀ n'ê twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí rə̀ n'ê ce á jǐrh wárhgáá mɔ́ á yó. Bə̀ m'a vùr á yə̀-bəlwàálɛ́ gakó á jǐrh wárhgáá Cinu yé né. ³¹Rə̀ m'a yə̀ shìrhə́ dɛ̃ á yilə, tum t'â la tũ̌ dɛ̃ rɛ́ rə̀myɛ́ mɔ́ yù w yé, á m'ǎ lyẽ á nyí rə̀ yù wə. Wɔ́ nyí rə̀ m'à j'â ŋwɛ́nɛ́ gaga, á yilə.³²Lò mó mɔ̀bɔ́ ń la yə̀-bəlɔ̀lɔ́ sǔbri pɔ tũ̀twĩ̀ĩ̀ rí tũ̌ mú wɔ́ vwĩ̀-zwə́lnə mó mɔ̀bɔ́ bə̀ tútǔ ǹdə́ nwə̃̌ bə súlí bə pɔ̃ tum rí tũ̌ ŋwɔ̀nɔ́ ń da jàà w mɔ́. Ń mà n zù lɛ̃̌ gàndɛ́, vwĩ̀-zwə́lnə gàndɛ́; ³³ń mà n twĩ̀ jìmdi vǔr tũ̀twĩ̀ĩ̀ rí Yi dúdú jàà y yilə; ń mà n twĩ̀ ri dwã-joló kòrhó w e súlí vwĩ̀-jùlú w yilə; ń mà n twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí vwĩ̀-zwə́lnə bé ǹdə́ dwí rí púlə́púlə́ rə̀ tú dwã yó mó yó.³⁴Wɔ́ nyí rə̀ m'à j'â ŋwɛ́nɛ́ gaga, á yilə, Esərayɛl lyì byǎ bɛ́ yə̀-bəlwàálɛ́ sǔbri pɔ tũ̀twĩ̀ĩ̀ rí shò kwã nɛ́, twər rə̀dù byin byin gakó.»

¹Cinu Yi zɔ̀m ǹdə́ Muyiisi n wɔ̀: ²«Wál Aarɔ̃ ǹdə́ ń byǎ bɛ́ e súlí Esərayɛl lyì byǎ bɛ́ gakó ne: Nyǐ-nə nyí rí tɛ̀bɛ́ Cinu pɔ mɔ́: ³Esərayɛl lò gə zwə́l nɔ̃ ráá pyìrhə̀ ráá bɔ̃̀ zulə́ jàà y w ráá ń du zulə́ jàà y wa, n mə n zwə́l wə, ⁴e jà ń yə̀ vwǎm mɔ́ mə̀myɛ́ mɔ́ zə n bə̀ dwã-joló kòrhó w nyí rí ni mùnì n pə mɔ Cinu ni, Cinu jì y yé né, jal mɔ́ ń ló tɛ̃́ mɔ́ yò w m'a jòm ń yó wə: bə̀ m'a vùr bal mɔ́ ńmyɛ̌ mɔ́ ń dwí rí wẽ́.⁵Rə̀myɛ́ mɔ́ yilə, Esərayɛl lyì byǎ bɛ́ m'a zə vwàmá nɛ́ nyɛ̀bɛ́ bə̀ y'a n'ê yǎl bə zwə́l gɔ sõ mó bə m'e bà; bə̀ m'a pə nɛ vwĩ̀-zwə́lnə mó ne, dwã-joló kòrhó w nyí rí ni, n pə Cinu ni; bə̀ m'a zwə́l ne nə yə̀ yə̀-zùlə́ vwĩ̀ bə pə Cinu ni; ⁶vwĩ̀-zwə́lnə mó mà n zhɛ́rhɛ́ nə̀ jal mɔ́ mə̀myɛ́ Cinu vwĩ̀-jùlú w ò wɔ dwã-joló kòrhó w nyí rí ni mú yó, n zɛ̃̀ n ji nwǐsí myǐn, sə yə̀ lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ Cinu yilə;⁷èta bə̀ k'ê t'â la bə̀ vwə̃̀ né zwə́l bə pə yə né nə̀ nyɛ̌ ǹdə bə̀-cǐlsi ta, bə̀ n'ê twĩ̀ pwarha tumə bə̀ m'ê cèrhé mó nɛ ye. Wɔ́ nyí rə̀ m'à j'â ŋwɛ́nɛ́ gaga, bə̀ yilə, byin byin gakó.⁸Ǹ m'ǎ súlí ń wɔ̀ bɛ: Esərayɛl dwí rí lò ráá zhə-bal mɔ̀bɔ́ ń jě bə̀ cəcəl w gə zwə́l vwĩ̀ námpúm cɛ̃́ɛ̃́ ráá vwĩ̀ dwí dõ, ⁹e jà ń yə̀ mə̀ vwǎm mɔ́ zə n mə n bə̀ dwã-joló kòrhó w nyí rí ni mùnì ga bə zwə́l mo Cinu yilə, bə̀ vǔr rə̀-ná-cí mú ń dwí rí wẽ́.¹⁰Esərayɛl dwí rí lò ráá zhə-bal mɔ̀bɔ́ ń jě bə̀ cəcəl w gə jú jal mɔ̌ mɔ̌, à m'a pyìrhí à yé a cili ń sõ á j'a vùr rə̀-ná-cí ń dwí rí wẽ́; ¹¹bə̀ kò-nyì nyǔ mú wɔ rə̀ jal mɔ́ wa, sə àmyɛ́ pɔ ába nyí b'ǎ zə mɔ á m'á twĩ̀ á nyǔ mú yə̀-bəlwàálɛ́ sǔbri pɔ tũ̀twĩ̀ĩ̀ rí vwĩ̀-jùlú w yó. Zhə̀nà, jal mɔ́ n'ê vùr yə̀-bəlwàálɛ́ mə̀ gə́ wɔ́ nyǔ yilə.¹²Wɔ́ rə̀myɛ́ è ce à wə̀l Esərayɛl lyì byǎ bɛ́ nɛ: ‹Lò mə̀dù ga á wẽ́ tá ń la jal jú yé, zhə-bal mɔ̀bɔ́ ń jě á cəcəl w myɛ cìcì myɛ tá ń la jal jú yé›. ¹³Esərayɛl lyì byǎ bɛ́ lò mə̀dù ráá zhələ bé bə̀ jě á cəcəl w mó mə̀dù gə gu gɔ-nǎm ráá kúmí kɛ̀bɛ́ bə̀ n'ê jí gɔ-jílə́ yi ní, ń mà n ló ku w jal mɔ́ tɛ̃́ n swə̀l shó n ló mə̀ yó;¹⁴bə̀ kò-nyì gakó nyǔ mú wɔ́ rə̀ jal mɔ́, rə̀ gə j'â gwẽ̌ wɔ́ nã́nyì yi ní; wɔ́ rə̀myɛ́ è ce à wə̀l Esərayɛl lyì byǎ bɛ́ nɛ: ‹Á t'á la kò-nyì dɛ̌ dɛ̌ jal jú yé, bə̀ kò-nyì gakó nyǔ mú wɔ́ rə̀ jal mɔ́; lò mɔ̀bɔ́ ń ju rə̀ jal mɔ́, bə̀ m'a vùr mu ń dwí rí wẽ́.›¹⁵Lò mɔ̀bɔ́ gakó, ń wɔ́ tənà y lò cìcì ráá ń wɔ́ zhə-bal, ń dɔ̀m vwǎm náncùù ráá vwǎm mɔ̀bɔ́ ku dɔ̀m o zhəzhɛrɛ mà n shɛ̀rh ń gàndɛ́, n súlí n shɛ nɛ̃̌, sə ń mà n yə̀ jìmdi cə́bal kɔn m'e yí də̀dɛ̀nɛ́; rə̀myɛ́ kwã, ń mà n já n jǐrh wárhgáá. ¹⁶Ń gə yə̀ ń gàndɛ́ shɛ̀rh ráá ń gə yə̀ nɛ̃̌ shɛ, ń cìcì mà n zhĩ ń dóó wə́.»

¹Cinu zɔ̀m ǹdə́ Muyiisi n wɔ̀: ²«Wál Esərayɛl lyì byǎ bɛ́ nɛ: Wɔ́ àmyɛ́ à wɔ́ Cinu á Yi rí. ³Á t'á la kɔn rɛ́ tɛ̀bɛ́ rə̀ n'ê wɛ̀rhɛ́ Ezhibti ní á gə́ jòm mə̀gã̌ mɔ́ dwí rí wɔ̀rhɔ́ yé; á t'á la kɔn rɛ́ tɛ̀bɛ́ rə̀ n'ê wɛ̀rhɛ́ Kanaã tənà y à la ce á b'ǎ zù è wẽ́ mó dwí rí wɔ̀rhɔ́ yé; á t'á la bə̀ nyə́ né ne tó yé;⁴wɛ̀rhɛ́-na ǹdə à lùl-e-púrsí gə́ n'ê byili ní, sə á tó à nyə́ né ne. Wɔ́ àmyɛ́ à wɔ́ Cinu á Yi rí. ⁵Zwẽ-nə à nyə́ né sə á tó à lùl-e-púrsí. Wɔ́ nə̀ tó mó dɛnnɛ numbyíní m'a tó né e zə nyǔ. Wɔ́ àmyɛ́ à wɔ́ Cinu.⁶Á mə̀dù ga tá ń la pyǎ n nə ń dwí lò cə̀-lwèa y yé. Wɔ́ àmyɛ́ à wɔ́ Cinu á Yi rí. ⁷Ǹ tá ǹ la ǹ da cə̀-lwè y nɔ yé, ǹ tá ǹ la ǹ ná cə̀-lwè y myɛ nɔ yé; ń gə́ wɔ́ ǹ ná mɔ́ ce, ǹ tá ǹ la ń cə̀-lwè y nɔ yé. ⁸Ǹ tá ǹ la ǹ da kɛ̃ cə̀-lwè y nɔ yé; b'è wɔ́ ǹ da cìcì cə̀-lwè yə́.⁹Ǹ tá ǹ la ǹ nəkɔ́ cə̀-lwè y nɔ yé, ń wɔ́ ǹ da-bə̀kɔ́ ráá ǹ ná-bə̀kɔ́, má ń kɔ̀n kɛ̀lɛ́ w ráá ń kɔ̀n pwẽ̀ ne myɛ. ¹⁰Ǹ tá ǹ la ǹ byǐ bə̀kɔ́ ráá ǹ bə̀kɔ́ bə̀kɔ́ cə̀-lwè y nɔ yé, b'è wɔ́ ǹ cìcì mú cə̀-lwè yə́. ¹¹Ǹ tá ǹ la ǹ da kɛ̃ bə̀kɔ́ cə̀-lwè y nɔ yé; è gə́ wɔ́ ǹ da ń lùl mu mú ce, ń wɔ́ ǹ nə̀kɔ́.¹²Ǹ tá ǹ la ǹ da nəkɔ́ cə̀-lwè y nɔ yé, ńmyɛ̌ ǹdə́ ǹ da ga wɔ́ jal mə̀dù. ¹³Ǹ tá ǹ la ǹ ná zhə̀n-kɛ̃ ráá ń nyɛ̃́ cə̀-lwè y nɔ yé, bə̀ ńmyɛ̌ ǹdə́ ǹ ná ga wɔ́ jal mə̀dù. ¹⁴Ǹ tá ǹ la ǹ da da-byǐ kɛ̃ yala nɛ yú ń tó rə̀ dɛnnɛ ń nə ǹ da da-byǐ mú cə̀-lwè y yé; ń wɔ́ ǹ da da-byǐ kɛ̃.¹⁵Ǹ tá ǹ la ǹ byì-can cə̀-lwè y nɔ yé; ń gə́ wɔ́ ǹ byǐ kɛ̃ mɔ́ ce, ǹ tá ǹ la ń cə̀-lwè y nɔ yé. ¹⁶Ǹ tá ǹ la ǹ da-byǐ kɛ̃ cə̀-lwè y nɔ yé; bə̀ wɔ́ ǹ da-byǐ mú cə̀-lwè y cìcì.¹⁷Ǹ tá ǹ la kɛ̃ ǹdə́ ń bə̀kɔ́ ga cə̀-lwè y nɔ yé; ǹ tá ǹ la ń byǐ bə̀kɔ́ ráá ń bə̀kɔ́ bə̀kɔ́ cə̀-lwè y nɔ yé; bə̀myɛ́ ǹdə́ ńmyɛ̌ ga wɔ́ jal mə̀dù; rə̀myɛ́ mɔ́ m'a yə̀ pwarha tũ̀twĩ̀ĩ̀. ¹⁸Ǹ tá ǹ la ǹ kɛ̃ mɔ́ nyɛ̃́ jú yé, bə̀ ǹ gə nɔ ń cə̀-lwè y ǹdə́ ǹ kɛ̃ mɔ́ yírhə́ gwẽ̌ ŋwɛ́nɛ́, ǹ m'ǎ ji bya-kɛnɛ nəgúlí tɛ̃́ bə̀ bwə̌l wə.¹⁹Ǹ tá ǹ la kɛ̃ mɔ̀bɔ́ ń nɔ ń cànà y n zɛ̃̀ n jǐrh jìmdi cə́kɛ̃ mɔ́ cə̀-lwè y nɔ yé. ²⁰Ǹ tá ǹ la zú ǹdə́ ǹ da-dǒ kɛ̃ yé, bə̀ rə̀myɛ́ m'a ce ń jǐrh jìmdi cə́bal.²¹Ǹ tá ǹ la ǹ byǐ mə̀dù ga myǐn ju ǹdə vwĩ̀ ta Mɔlɔɔkɛb yil yé, ǹ tá ǹ la ǹ Yi rí yil ré fuuli yé. Wɔ́ àmyɛ́ à wɔ́ Cinu Yi.²²Ǹ tá ǹ la zú ǹdə́ bal ǹdə bə̀ gə́ y'a zù ǹdə́ kɛ̃ nɛ́ yé, rə̀myɛ́ mɔ́ m'a yə̀ pwarha nánfɔ̀lɔ̀. ²³Ǹ tá ǹ la zú ǹdə́ vwǎm yé, bə̀ rə̀myɛ́ mɔ́ m'a ce ń jǐrh jìmdi cə́bal; kɛ̃ myɛ tá ń la ń cìn pɔ vwǎm nɛ mə jì yé, rə̀myɛ́ m'a yə̀ ywǎl nánfɔ̀lɔ̀ tũ̀twĩ̀ĩ̀.²⁴Á t'á la tũ̀twə̃̀ə̃̀ né nə̀myɛ́ rə̀dù ga tũ̌ rə ce á jǐrh jìmdi cìnə́ yé, bə̀ wɔ́ tũ̀twə̃̀ə̃̀ né nə̀myɛ́ nə̀ ce dwə́ né nyɛ̀bɛ́ à n'â jì á yé né mó jǐrh jìmdi cìnə́. ²⁵Tənà y j'a zɛ̃̀ è zhe jìmdi, a zɛ̃̀ a pə y è dóó w còrhò-tum; e zɛ̃̀ e tɔlɛ è lyì bí tɛ̃́.²⁶Sə ámyɛ̌ tənà y lyì bí cìcì ǹdə́ zhələ bé bə̀ jě á cəcəl w mó, tó-nə à nyə́ né ǹd'â lùl-e-púrsí sə á t'á la pwarha tũ̀twə̃̀ə̃̀ né nə̀myɛ́ rə̀dù ga tũ̌ yé; ²⁷lyì bí byɛ̀bɛ́ bə̀ y'à jɛ̀nɛ̀ ába bə̀ jě tənà y w mɔ́ twĩ̀ pwarha tũ̀twə̃̀ə̃̀ né nə̀myɛ́ mɔ́ gakó, tənà y j'a zɛ̃̀ è zhe jìmdi. ²⁸Rə̀myɛ́ m'a ce tənà y t'â la ába tɛ̃́ tɔlɔ ǹdə è gə́ tɔlɛ dwí rí tɛ̀bɛ́ rə̀ jɛ̀nɛ̀ ába mɔ́ ta, b'ǎ ce è zhe jìmdi yil yé,²⁹sə bə̀ m'a vùr lò mɔ̀bɔ́ ń twĩ̀ pwarha tũ̀twə̃̀ə̃̀ né nə̀myɛ́ rə̀dù mú, ń dwí rí wẽ́. ³⁰Zwẽ-nə à nyə́ né, sə á bə̀ pwarha nyə́ né nyɛ̀bɛ́ bə̀ y'à n'ê zwẽ ǹd'á gwẽ̌ yə̀ twí mú zwẽ yé, sə á bə̀ tũ̀twə̃̀ə̃̀ né nə̀myɛ́ mɔ́ dwí rí zə á m'á ce á cìn jìmdi yé. Wɔ́ àmyɛ́ à wɔ́ Cinu á Yi rí.»

¹Cinu zɔ̀m ǹdə́ Muyiisi n wɔ̀: ²«Wál Esərayɛl lyì byǎ bɛ́ púlə́púlə́ ne: Yál-na àmyɛ́ Yi lyì b'àmyɛ́, Cinu á Yi rí bə dõ zhe yé. ³Á mə̀dù gakó mà n nyàm ń da ǹdə́ ń ná, sə n súlí n nyàm à shìrhə́ y dwã nɛ́. Wɔ́ àmyɛ́ à wɔ́ Cinu á Yi rí. ⁴Á t'á la yə nánkɔ̀mdɛ kùr tó yé, á t'á la yə zùrhù á cìn yil yé. Wɔ́ àmyɛ́ à wɔ́ Cinu á Yi rí.⁵Á gə la yə̀-zùlə́ vwĩ̀ zwə́l Cinu yilə, sə á zwə́l ré rə tó ǹdə nyə́ né gə́ n'ê byili ní mùnì n zwẽ á vwĩ̀ rí: ⁶Bə̀ m'a dɔ̃̀ rə̀ nàmá bɛ́ rə̀ zwə́l mó dɛ̃ rɛ́ ǹdə́ rə̀ zɛ̃̀ nəkɔkɔ́lɛ́ yá; rə̀ dwà nə̀tɔ̀ dɛ̃ rɛ́, bə̀ m'a ji nàmá bɛ́ byɛ̀bɛ́ bə̀ dàl mɔ́ myǐn; ⁷bə̀ gə nyɛ́ɛ́ bə̀ dɔ̀m bɛ dwã nə̀tɔ̀ dɛ̃ rɛ́, bə̀ t'â la rə̀-ná-cí lwə̌l mó zõ yé, bə̀ bə̀ wɔ́ nàmá byɛ̀bɛ́ bə̀ pɔn; ⁸lò mɔ̀bɔ́ ń cẽ n dɔ̃̀ bɛ mà n zhĩ dóó ń cìn ni ń gə́ fuuli Cinu cəl ré mó yilə; sə bə̀ m'a vùr rə̀-ná-cí ń dwí rí wẽ́.⁹Á gə tú á la á cɛsɛ́ jə̌r, ǹ tá ǹ la ǹ cɛ y jə̌r ń mə́ yí è swɛ̃́ rɛ́ nɛ yé, sə ǹ tá ǹ la ǹ kwã nɛ́ kwã̀ɔ̃̀ ń gǔn jíjí ywẽ́ nyɛ̀bɛ́ nə̀ dàl mɔ́ myɛ yé; ¹⁰ǹ tá ǹ la ǹ də̀vɛ̃́-cèmé né byǎ bɛ́ ga pɔ̌r yé, sə ǹ tá ǹ la byɛ̀bɛ́ bə̀ ló tɛ̃́ mɔ́ myɛ pwǎ yé; ǹ m'ǎ yẽ̌ be ń pə nə̀mɔ̀ mɔ́ ǹdə́ zhə-bal mɔ́ nɛ. Wɔ́ àmyɛ́ à wɔ́ Cinu á Yi rí.¹¹Á t'á la numbyíní ŋwɔ́l yé, á t'á la kɔma góm á pə á da-dǒ lò ne yé, á t'á la mɔ myìnù yé. ¹²Á t'á la à yil ré zə á m'á bwəl nyí e jà wɔ́ kɔma yé: ǹ gə wɛ̀rhɛ́ èta ǹ m'ǎ fuuli à yil ré. Wɔ́ àmyɛ́ à wɔ́ Cinu.¹³Ǹ tá ǹ la pyǎ ń tó ǹ jè-dõ dɛnnɛ ń zɛ̃̀ yé, sə ǹ tá ǹ la mɔ ŋwɔ́l myɛ yé; tùntùnnə kwǎndɛ́ t'â la ǹ jɔ̃̀ w mãɔ̃ kɔn m'e yí è zɛ̃̀ nəkɔkɔ́lɛ́ yé; ¹⁴ǹ tá ǹ la sə̀-bɔ̀rhɔ̀ tǔrh yé, sə ǹ tá ǹ la ku kɔ̀bɔ́ ò m'a lyə́lyɛ́rɛ́ lyìlyǒ o ji tɛ̃́ myɛ ò yé né cṹ yé; wɔ́ èta ǹ m'ǎ nyàm ǹ Yi rí ní. Wɔ́ àmyɛ́ à wɔ́ Cinu.¹⁵Á t'á la bùrsi kɔ́ námməjóló yé: ǹ tá ǹ la nə̀mɔ̀ mɔ́ nɛ sãɔ̃ yé, ǹ tá ǹ la nyí lyì-fɔ̀lɔ̀ w myɛ kwã nɛ́ co yé, kə́ ǹ da-dǒ lò mó bùrsí ǹdə cángá tũ̀twĩ̀ĩ̀ rí gə́ n'ê yǎl nɛ́; ¹⁶ǹ tá ǹ la ǹ dwí rí lò yil námməlwɛ̀lɛ́ zɔ̌m yé, sə ǹ tá ǹ la cà kɛ̀bɛ́ è m'a ce bə ló ǹ jè-dõ jal tɛ̃́ mɔ́ lò ne co yé. Wɔ́ àmyɛ́ à wɔ́ Cinu.¹⁷Ǹ tá ǹ la ǹ da-byǐ mú súl yé, sə ǹ tá ǹ la tə́tɔ̀ná co ǹdə́ ǹ da-dǒ lò mó bú mùnì ga dóó bə̀k'a jòm ǹ yó ń shò kwã nɛ́ yé; ¹⁸ǹ tá ǹ la ǹ jim cṹ yé, ǹ tá ǹ la ǹ dwí rí lyì bí lwɛlɛ rɛ́ bə̀ wɛ̀rhɛ́ mɔ́ mɔ́ kǒ ń cĩ́ ǹ wẽ́ yé: rə̀myɛ́ ce ǹ m'ǎ swéné ǹ dõ ǹdə ǹ cìcì mú ta. Wɔ́ àmyɛ́ à wɔ́ Cinu.¹⁹Zwẽ-nə à nyə́ né: ǹ tá ǹ la ce ǹ vwàmá dwí kùrə̀ nə̀lyè jìl dwã yé; ǹ tá ǹ la wə̀-dwí kùrə̀ nə̀lyè dú ǹ cɛ y w yé; ǹ tá ǹ la gɔ̀nɔ̀ kɔ̀bɔ́ ò sɔ̃̀ ǹdə́ étɔ̃̀-nyínsi dwí kùrə̀ nə̀lyè zú yé.²⁰Bal gə zù ǹdə́ kɛ̃, kɛ̃ mɔ́ zɛ̃̀ ń wɔ́ yə-kɛ̃, bal dõ yà ń la jú, e jà bə̀ gwẽ̌ yə̀ ń ye y wɛ́rɛ́ y kwɛ̃̌ ráá ń gwẽ̌ bə ń cìn cǐ, bə̀ m'a ji bal mɔ́ ń zù ǹdə́ mɔ mɔ́ bwã̌; bə̀ t'â la bɛ gu yé, bə̀ bə̀ y'à gwẽ̌ yə̀ kɛ̃ mɔ́ nɛ yẽ̌ ń cǐ ń cìn yé; ²¹bal mɔ́ mà n zə pyì-bya n mə n bə̀ dwã-joló kòrhó w nyí rí ni n pə Cinu ni, yò kɔrhɔ vwĩ̀ zwə́l yilə; ²²vwĩ̀-zwə́lnə mó gə zə yò kɔrhɔ pyì-bya y n mə n twĩ̀ yə̀-bəlɔ̀lɔ́ w bal mɔ́ wɛ̀rhɛ́ mɔ́ sǔbri pɔ tũ̀twĩ̀ĩ̀ rí bal mɔ́ yó Cinu yé né ń zhɛ̀ kwã nɛ́, bal mɔ́ já n nə ń yə̀-bəlɔ̀lɔ́ w òmyɛ́ mɔ́ sǔbri.²³Á gə tú á zù Kanaã tənà y wa, á zɛ̃̀ á zhele cèmé dwí tɛ̌ tɛ̌ nə̀ n'ê ce byǎ gakó, á m'ǎ nyǐ nə̀ byǎ bɛ́ ǹdə kɔn dɛ̀bɛ́ rə̀ wɔ́ jìmdi kɔn ta; byinə nə̀tɔ̀ wẽ́, nə̀ byǎ bɛ́ m'a j'a yə̀ jìmdi kɔn á yilə, bə̀ t'â la bɛ jú yé; ²⁴byinə nə̀na nyǎn rɛ́, bə̀ m'a pə nə̀ byǎ bɛ́ gakó Cinu ni, nə̀bán-co címsi wẽ́; ²⁵sə byinə nə̀nu byin rí, á m'ǎ zɛ̃̀ á jí bi; rə̀myɛ́ mɔ́ m'a ce á wò-jə̀ə́ré m'à j'â n'ê pùl rə̀ la. Wɔ́ àmyɛ́ à wɔ́ Cinu á Yi rí.²⁶Á t'á la kaka jú jal yó w yéa, á t'á la jə̀-myaarhɛ tumə tũ̌ yé, á t'á la jə̀pársɛ myɛ párh yé; ²⁷á t'á la á ywésé nyə́ né góm á kə́kɛ́lɛ́ yé, sə á t'á la á pə̀pésé tama nɛ́ fɔ́n yé; ²⁸Á t'á la á yala nɛ́ kǎr kǎr cùù yil yé, á t'á la myaarhɛ myɛ cṹ á yala nɛ́ nɛ yé. Wɔ́ àmyɛ́ à wɔ́ Cinu.²⁹Ǹ tá ǹ la ǹ bə̀kɔ́ cǐrh ń ce fwə̌l wẽ́ ń mə́ yààlɛ mɔ́ yé, mùnì ga tənà y lyì bí bə̀k'a zɛ̃̀ bə̀ n'ê fwə̀lə́, sə tənà y púlə́púlə́ bə̀k'a sú ǹdə́ pwarha tũ̀twĩ̀ĩ̀ yé; ³⁰zwẽ-nə à shìrhə́ y dwã nɛ́ nyə́ né, sə á súlí á nyàm à jì yə́. Wɔ́ àmyɛ́ à wɔ́ Cinu.³¹Á t'á la ywə́lse byõ̌ yé, bə̀ rə̀myɛ́ mɔ́ m'a ce á jǐrh jìmdi cìnə́. Wɔ́ àmyɛ́ à wɔ́ Cinu á Yi rí.³²Ǹ m'ǎ zɛ̃̀ ń zhì dɛ̃̌ yə́-pwə̀rh cə́bal yé né, sə́ nyàm náncɛ; rə̀myɛ́ mɔ́ yi ní ǹ m'ǎ nyàm ǹ Yi rí. Wɔ́ àmyɛ́ à wɔ́ Cinu.³³Zhə-bal gə tú ń la ǹ sõ jǒm, á tənà y wa, á t'á la pyǎ á tó ń dɛnnɛ á zɛ̃̀ yé; ³⁴á m'ǎ zə zhə-bal mɔ́ ń tú ń jě á sõ mó ǹdə tənà y cìcì lò ta, ǹdə wɔ́ ámyɛ̌ mə̀dù ta; ǹ m'ǎ swéné mo ǹdə ǹ cìcì mú ta; bə̀ ámyɛ cìcì mú yàl zhələ Ezhibti tənà y wẽ́. Wɔ́ àmyɛ́ à wɔ́ Cinu á Yi rí.³⁵Á t'á la tɛ̀bɛ́ rə̀ də̀ cángá wɔ̀rhɔ́ kɔn rɛ́ tɛ̀bɛ́ bə̀ vùr nyə́ rə̀ shò kwã mɔ́ yé: kɔn dwɛ̀lɛ̀ ǹdə́ kɔn dùmì e súlí kɔn yírh mɔrhɔ wẽ̀ ré. ³⁶Pyǎ-na mɔrhɔ wẽ̀ ré tɛ̀bɛ́ rə̀ càn mɔ́ ǹdə́ dùmì mɔrhɔ shisí shɛ̀bɛ́ sə̀ càn mɔ́ ǹdə́ efá kɛ̀bɛ́ è càn mɔ́ e súlí yɛ̃ kɛ̀bɛ́ è càn mɔ́. Wɔ́ àmyɛ́ à wɔ́ Cinu á Yi rí à ce á shə́r Ezhibti tənà y w mɔ́. ³⁷Á m'ǎ zwẽ à nyə́ né ǹd'â lùl-e-púrsí gakó, á wɛ̀rhɛ́ ǹdə nə̀ gə́ n'ê byili ní. Wɔ́ àmyɛ́ à wɔ́ Cinu.»

¹Cinu zɔ̀m ǹdə́ Muyiisi n wɔ̀: ²«Ǹ m'ǎ wɔ̀ Esərayɛl lyì byǎ bɛ́ nɛ:bə̀ m'a gu lò mɔ̀bɔ́ gakó, ń wɔ́ Esərayɛl tənà y lò ráá ń wɔ́ zhə-bal ń jě Esərayɛl nɛ́, ń zwə́l ń byǎ bɛ́ mə̀dù n pə Mɔlɛɛkɛ nɛ: tənà y lyì bí m'a dul mu ǹdə́ nə́kulə bə gu;³sə àmyɛ́ cìcì mú m'a bú ǹdə́ lò mó ńmyɛ̌; à m'a vùr mu ń dwí rí wẽ́, ń gə́ pɔ ń byǎ bɛ́ mə̀dù Mɔlɛɛkɛ nɛ mɔ́ yilə, n zɛ̃̀ n já n tó rə̀ dɛnnɛ n ce jìmdi à jì y w n súlí n fuuli à yil ré mó yilə. ⁴Sə tənà y lyì bí gə pyà bə pyi bə̀ yírhə́ lò mó gə́ tú ń nə́ ń zwə́l ń byǎ bɛ́ mə̀dù ń pɛ Mɔlɛɛkɛ nɛ yi ní, bə̀ gə́ t'â yǎl bə gu mu mú yilə, ⁵àmyɛ́ cìcì mú m'a j'a bú ǹdə́ lò mó ńmyɛ̌ mɔ́ e súlí ǹdə́ ń jì yə́, sə à m'a vùr bi bə̀ dwí rí wẽ́, ńmyɛ̌ ǹdə́ byɛ̀bɛ́ bə̀ tó mo bə fwə̌l ǹdə́ Mɔlɛɛkɛ mɔ́.⁶Lò mɔ̀bɔ́ ń nə́ ń byẽ̀ ywə́lse ń mə́ ń fwə̌l èta, à m'a j'a bú ǹdə́ mɔ sə à m'a vùr mu ń dwí rí wẽ́. ⁷Pyǎ-na á yə̀ Yi lyì, bə̀ wɔ́ àmyɛ́ à wɔ́ Cinu á Yi rí.⁸Zwẽ-nə à nyə́ né sə á wɛ̀rhɛ́ ǹdə nə̀ gə́ n'ê byili ní. Wɔ́ àmyɛ́ à wɔ́ Cinu, à cír ába á wɔ́ à dúdú lyì. ⁹Rə̀myɛ́ mɔ́ ce:bə̀ m'a gu lò mɔ̀bɔ́ gakó ń bwəl lwɛlɛ n pə ń da ráá ń ná nɛ; ń cu mú yò w m'a zhì ń cìcì yó wə, ń gə́ bwəl lwɛlɛ n pə ń da ráá ń ná nɛ mɔ́ yilə.¹⁰Bal gə zù ǹdə́ ń dõ kɛ̃, bə̀ m'a gu bi, bal mɔ́ ǹdə́ kɛ̃ mɔ́ bə̀ zù ǹdə́ dwã mɔ́ ga. ¹¹Bal gə zù ǹdə́ ń da kɛ̃, ń nɔ ń da cə̀-lwè yə́; bə̀ m'a gu bə̀ ga bə̀lyè yə́, bə̀ cu mú yò w m'a zhì bə̀ cìcì yó wə. ¹²Bal gə zù ǹdə́ ń byì-can, bə̀ m'a gu bə̀ ga bə̀lyè yə́; bə̀ rə̀myɛ́ wɔ́ ywǎl nánfɔ̀lɔ̀ tũ̀twĩ̀ĩ̀, bə̀ cu mú yò w m'a zhì bə̀ cìcì yó wə.¹³Bal gə zù ǹdə́ bal ǹdə bə̀ gə́ y'a zù ǹdə́ kɛ̃ nɛ́, bə̀ ga bə̀lyè y twĩ̀ pwarha tũ̀twĩ̀ĩ̀; bə̀ m'a gu bi, bə̀ cu mú yò w m'a zhì bə̀ cìcì yó wə. ¹⁴Bal gə jú kɛ̃ ǹdə́ kɛ̃ mɔ́ ná mɔ́ ga, rə̀myɛ́ mɔ́ wɔ́ cìzhìl nánfɔ̀lɔ̀ tũ̀twĩ̀ĩ̀; bə̀ m'a ji ńmyɛ̌ ǹdə́ bə̀myɛ́ ga myǐn; èta pwarha tũ̀twĩ̀ĩ̀ k'ê t'â la tũ̌ á sõ yé.¹⁵Bal gə zù ǹdə́ vwǎm, bə̀ m'a gu bal mɔ́, sə á súlí á gu vwǎm mɔ́ myɛ. ¹⁶Kɛ̃ gə zù ǹdə́ vwǎm mɔ̌ mɔ̌, ǹ mə̌ sə́ gu kɛ̃ mɔ́ ǹdə́ vwǎm mɔ́ ga; bə̀ m'a gu bi, sə bə̀ cu mú yò w m'a zhì bə̀ cìcì yó wə.¹⁷Bal gə jú ń nəkɔ́, ń da-bə̀kɔ́ ráá ń ná-bə̀kɔ́, n zɛ̃̀ n nə ń cə̀-lwè yə́, ń nəkɔ́ mɔ́ myɛ nə ńmyɛ cə̀-lwè yə́, rə̀myɛ́ mɔ́ wɔ́ cìzhìl nánfɔ̀lɔ̀; bə̀ m'a vùr bi bə̀ dwí rí wẽ́, bə̀ dwí rí lyì bí yírh wə; bal mɔ́ mà n zhĩ ń dóó w ń gə́ nɔ ń nəkɔ́ mɔ́ cə̀-lwè y yilə. ¹⁸Bal gə zù ǹdə́ kɛ̃ mɔ̀bɔ́ ń nɔ ń cànà yá, n nə ń cə̀-lwè yə́, bə̀ m'a vùr bə̀myɛ́ bə̀lyè y bə̀ dwí rí wẽ́, bal mɔ́ gə́ nɔ kɛ̃ mɔ́ jal mɔ́ gə́ n'ê shí mə̀gã̌ mə̀ dwi mə̀ lwé tɛ̃́ mɔ́ yilə, ǹdə́ kɛ̃ mɔ́ myɛ gə́ súlí n byili jal mɔ́ gə́ n'ê shí mə̀gã̌ mɔ́ yilə.¹⁹Ǹ tá ǹ la ǹ ná zhə̀n-kɛ̃ ráá ǹ ná nyɛ̃́ ráá ǹ da nəkɔ́ cə̀-lwè y nɔ yé; lò ń gə nɔ mɔ̀bɔ́ ńmyɛ̌ ǹdə́ ńmyɛ̌ ga wɔ́ jal mə̀dù cə̀-lwè yə́, bə̀ bə̀lyè y ga m'a zhĩ bə̀ dóó wə́. ²⁰Bal gə zù ǹdə́ ń da da-byǐ kɛ̃, ń nɔ ń da da-byǐ mú cə̀-lwè yə́; bə̀ bə̀lyè y ga m'a zhĩ bə̀ dóó wə́, bə̀ m'a cì ǹdə́ bə̀ yə̀ bə̀sɔ́ná nɛ yé. ²¹Bal gə jú ń da-byǐ kɛ̃, rə̀myɛ́ mɔ́ wɔ́ jìmdi; ń nɔ ń da-byǐ mú cə̀-lwè yə́, bə̀ t'â la byǎ nɔ yé.²²Á m'ǎ zwẽ à nyə́ né ǹd'â lùl-e-púrsí gakó, sə á wɛ̀rhɛ́ ǹdə sə̀ gə́ n'ê byili ní, mùnì tənà y kɛ̀bɛ́ à la ce á vò á jòm è wẽ́ mó bə̀k'a tɔlɛ ába tɛ̃́ yé. ²³Á t'á la dwə́ nyɛ̀bɛ́ à la jǔ á yé né mó nyə́ né ne tó yé; wɔ́ nə̀ gə́ wɛ̀rhɛ́ wẽ̀ ré rə̀myɛ́ mɔ́ gakó è ce nə̀ ló à wẽ́,²⁴a zɛ̃̀ a wɔ̀ ába:‹Wɔ́ ámyɛ̌ á la bə̀ cɛ y cìnú,sə wɔ́ àmyɛ́ à n'â pɛ y ába á la cìnú,è wɔ́ tənà y kɛ̀bɛ́ tùr ǹdə́ yil n'ê dùr tɛ̃́ è wẽ́ mó!›Wɔ́ àmyɛ́ à wɔ́ Cinu á Yi rí, à cír ába dwə́ cəcəl wə. ²⁵Rə̀myɛ́ mɔ́ ce, pɔr-na vwàmá nɛ́ nyɛ̀bɛ́ nə̀ wɔ́ wárhgáá ǹdə́ nyɛ̀bɛ́ nə̀ zhe jìmdi mú dwã wa, ǹdə́ kúmsí shɛ̀bɛ́ sə̀ zhe jìmdi ǹdə́ shɛ̀bɛ́ sə̀ wɔ́ wárhgáá dwã wa, mùnì ga vwàmá nɛ́ nə̀myɛ́ mɔ́ ǹdə́ kúmsí sə̀myɛ́ mɔ́ e súlí kɔn rɛ́ tɛ̀bɛ́ gakó rə̀ sú cɛ y yó mó, tɛ̀bɛ́ à ce á lwar bə̀ nyǐ rə̀ zhe jìmdi mú, bə̀k'a ce á ce á cìn súsúlú w yé.²⁶Yál-na nɛ́ àmyɛ́ yilə, àmyɛ́ lyì, b'àmyɛ́ Cinu, à wɔ́ Yi rə̀ bə dõ zhe yé; sə à cír ába dwə́ né cəcəl wə, mùnì ga á yə̀ àmyɛ́ lyì.²⁷Bal ráá kɛ̃ gə só ywə́lse byõ̌, bə̀ m'a gu bi; bə̀ m'a dul bi ǹdə́ nə́kulə, bə̀ cu mú yò w m'a zhì bə̀ cìcì yó wə́.»

¹Cinu zɔ̀m ǹdə́ Muyiisi n wɔ̀: «Wál Aarɔ̃ byǎ bɛ́ bə̀ wɔ́ vwĩ̀-zwə́lnə bé ne:Vwĩ̀-zwə́lnə tá ń la ń dwí rí lò cùù dɛnnɛ tó n ce ń cìn jìmdi yé, ²è gə də̀ ń dwí lò mɔ̀bɔ́ bə̀ ga wɔ́ jal mə̀dù: ń ná ráá ń da ráá ń byǐ ráá ń bə̀kɔ́ ráá ń da-byǐ; ³e súlí ń nəkɔ́, ǹdə́ ń gə gwẽ̌ yə̀l bal párá, bə̀ ń gə́ gwẽ̌ yə̀ byal jí mú ce, ń gwẽ̌ wɔ́ ń kɛ̀lɛ́ y lò, vwĩ̀-zwə́lnə wɔ̌ ń ce ń cìn jìmdi ńmyɛ̌ mɔ́ yilə.⁴Ńmyɛ̌ mɔ̀bɔ́ ń wɔ́ yó-cə́bal ń dwí rí wẽ́ mó tá ń la ń cìn jìmdi co yé, è gə də̀ rə̀myɛ́ ń mà n fuuli ń cìnə̀. ⁵Vwĩ̀-zwə́lnə bé j'â t'â la bə̀ yə́-pǎlsɛ́ cəcəl w ywésé fɔ́n yé, bə̀ t'â la bə̀ pə̀pésé tama nɛ́ fɔ́n yé, bə̀ t'â la bə̀ yala nɛ́ kǎr kǎr yé. ⁶Bə̀ m'a j'a yə̀ nɛ́ bə̀ Yi rí yilə, sə bə̀ t'â la bə̀ Yi rí yil ré fuuli yé; bə̀ m'à j'â ŋwɛ́nɛ́ nɛ́ Yi yilə, è gə́ wɔ́ bə̀myɛ́ bə̀ n'ê pɛ Cinu kùjírə́ né, bə̀ Yi rí kùjú w mú yilə;⁷bə̀ t'â la kə-nə̀fòló ráá kɛ̃ mɔ̀bɔ́ bə̀ co cìzhìl mú jú yé; bə̀ t'â la kɛ̃ mɔ̀bɔ́ ń byal zhɔ̃̀ mɔ́ jú yé; bə̀ vwĩ̀-zwə́lnə mó já ń ŋwɛ́nɛ́ ń Yi rí yilə; ⁸ǹ m'ǎ nyǐ mu ǹdə Yi lò ta, bə̀ wɔ́ ńmyɛ̌ ń nə́ ń pɛ ǹ Yi rí kùjú wə́; ń mà n yə̀ àmyɛ́ lò ǹmyɛ́ yilə, b'àmyɛ́ Cinu mú mɔ̀bɔ́ à cír ába á wɔ́ à lyì mú wɔ́ Yi rə̀ bə dõ zhe yé. ⁹Vwĩ̀-zwə́lnə bə̀kɔ́ gə zɛ̃̀ ń nə́ ń fwə̀lə́, ń mə́ ń fuuli ń cìnə̀, wɔ́ ń da ń nə́ ń fuuli, bə̀ m'a ji bə̀kɔ́ mɔ́ myǐn.¹⁰È gə wɔ́ vwĩ̀-zwə́lnə náncɛ yá, mɔ̀bɔ́ ń wɔ́ ń da-byǎ bɛ́ yó-cə́bal mɔ́ mɔ́, ńmyɛ̌ mɔ̀bɔ́ bə̀ ló nwə̃̌ y ń yó w bə m'e cír mu, bə pɔ̃ ŋwɔ̀nɔ́ vwĩ̀-zwə́lnə kàmə̀zwǐsí zú yil mú, ń tá ń la ń ywésé ne yõ̌ sə gùlí gùlí dwã yé, e súlí myɛ ń tá ń la ń gàndɛ́ kǎr yé; ¹¹ń tá ń la cùù òdù ga nɛ bwəlse yé, sə ń tá ń la n tə̀ ń da ráá ń ná yil n ce ń cìn jìmdi yé; ¹²ń tá ń la Yi jì y w shə́r yé, è gə də̀ rə̀myɛ́ ń mà n fuuli ń Yi rí jì yə́, bə̀ bə̀ ló ń Yi rí nwə̃̌ y ń yó w bə m'e cír mu. Wɔ́ àmyɛ́ à wɔ́ Cinu.¹³Ń mà n jí kɛ̃-byǐ kɛ̀bɛ́ è gwẽ̌ yə̀l bal pár mɔ́; ¹⁴ń tá ń la ejə̃̀-kɛ̃ ráá kɛ̃ mɔ̀bɔ́ bə̀ zhɔ̃̀ ráá kɛ̃ mɔ̀bɔ́ ń fwə̌l n mə n ce cìzhìl ń cìn ni jú yé; sə ń mà n jí ń dwí rí kɛ̃-byǐ kɛ̀bɛ́ è gwẽ̌ yə̀l bal pár mɔ́; ¹⁵èta, ń tá ń la dwí-kɔ́rɔ́ ń dwí rí wẽ́ co yé, bə̀ wɔ́ àmyɛ́ Cinu à cír mu ń wɔ́ à lò».¹⁶Cinu zɔ̀m ǹdə́ Muyiisi n wɔ̀: ¹⁷«Wál Aarɔ̃ nɛ: byinə né gakó wẽ́, ǹ byǐ mɔ̀bɔ́ ń wɔ́ nə̀bwɛ̃̀ ǹ byǎ bɛ́ wẽ́ mó tá ń la vwĩ̀-jùlú w ni bwəlse n pə ń Yi rí kùjú w yé;¹⁸zhə̀n ga lò mɔ̀bɔ́ gakó ń wɔ́ nə̀bwɛ̃̀ tá ń la vwĩ̀-jùlú w ni bwəlse yé: ń wɔ́ lyìlyǒ ráá ń nə́ ń twi cí ráá ń myə̌l ré pyál, ráá ń nə̀rh ráá ń vɔ̀mɛ̀ bə dwã mǎ, ¹⁹ráá ń nà ráá ń jɛ̃̀ kɔ́wá, ²⁰ráá ń zhe kúrhú ráá ń wɔ́ nánkwàrà ráá ń yírh zhe wɔ̀rhɛ́ ráá cɔ̀rɔ́ zhe mo, ráá nyəla ju ń yala nɛ ráá bə̀ gu ń bɛlɛ rɛ́. ²¹Aarɔ̃ byǐ mɔ̀bɔ́ ń wɔ́ nə̀bwɛ̃̀ já ń tá ń la vwĩ̀-jùlú w ni bwəlse ń la mə n pə Cinu kùjú w yé; ń gə́ wɔ́ nə̀bwɛ̃̀ mɔ́ ce, ń tá ń la vwĩ̀-jùlú w ni bwəlse ń la mə n pə ń Yi rí kùjú w yé;²²ń wɔ̌ ń jí ń Yi rí kùjú wə́, pansɛ́ shɛ̀bɛ́ sə̀ wɔ́ Yi dúdú nyɛ̌rh mɔ́ ǹdə́ pansɛ́ dwã bɛ́; ²³sə ń gə́ wɔ́ nə̀bwɛ̃̀ mɔ́ ce, ń tá ń la gɔ̀nɔ̀ w ò bɔ̀n Yi jì y dwã w mɔ́ ǹdə́ vwĩ̀-jùlú w ni bwəlse yé, mùnì ga ń bə̀ká n fuuli à jì y ǹdə́ kɔn rɛ́ tɛ̀bɛ́ rə̀ wɔ è wẽ́ mó yé, bə̀ wɔ́ àmyɛ́ à wɔ́ Cinu, à cír bi bə̀ wɔ́ à lyì.» ²⁴Wɔ́ rə̀myɛ́ Muyiisi wə̀l Aarɔ̃ ǹdə́ ń byǎ bɛ́ e súlí Esərayɛl lyì byǎ bɛ́ púlə́púlə́ ne.

¹Cinu zɔ̀m ǹdə́ Muyiisi n wɔ̀: ²«Byili Aarɔ̃ ǹdə́ ń byǎ bɛ́ nɛ, dǒ yi ní bə̀ t'â la pansɛ́ shɛ̀bɛ́ Esərayɛl lyì byǎ bɛ́ n'ê pɛ nɛ mɔ́ nyí ni yú, mùnì ga bə̀ bə̀k'a fuuli à yil ré yé; wɔ́ àmyɛ́ à wɔ́ Cinu. ³Wál bɛ:Byinə né gakó wẽ́, á dwí rí lò mɔ̌ mɔ̌ ń wɔ́ jìmdi cə́bal gə bwəlse pansɛ́ shɛ̀bɛ́ Esərayɛl lyì byǎ bɛ́ n'ê pɛ Cinu ni mú nyí ni, bə̀ m'a ce rə̀-ná-cí jé tɛ̃́ à yé né. Wɔ́ àmyɛ́ à wɔ́ Cinu.⁴Aarɔ̃ byǐ mɔ̀bɔ́ yə-bəcàndɛ zhe ráá ń bɛlɛ nɛ̃̌ n'ê dwi mə̀ lwé tɛ̃́ mə̀dù ga myɛ tá ń la pansɛ́ shɛ̀bɛ́ bə̀ n'ê pɛ Yi ni mú jú ǹdə́ bə̀ yə̀ jɛ̀nɛ̀ bə vùr ń jìmdí yé; kɔn m'a yə̀ èta ǹdə́ lò mɔ̀bɔ́ gakó ń dwə̀rh lò mɔ̀bɔ́ ń co ń cìn jìmdi ń gə́ dwə̀rh cùù mú yilə, ráá lò mɔ̀bɔ́ ń bɛlɛ lùlì nɛ̃̌ ló tɛ̃́, ⁵ráá lò mɔ̀bɔ́ ń dwə̀rh kò-nyì dɛ̀bɛ́ rə̀ n'ê pɛ jìmdi ráá numbyíní kɛ̀bɛ́ è n'ê pɛ jìmdi myɛ, má jìmdí gə wɔ́ ná-dwí yil myɛ. ⁶Lò mó mɔ̀bɔ́ ń dwə̀rh rə̀myɛ́ èta mɔ́ dwí rí mà n yə̀ jìmdi cə́bal kɔn m'e yí də̀dɛ̀nɛ́, sə ń wàr ń mà n jí pansɛ́ shɛ̀bɛ́ bə̀ n'ê pɛ Yi ni mú ǹd'ê gə də̀ nɛ̃̌ ń shɛ;⁷7sə yi rí gə tú rə̀ zùwə̀, ń jǐrh wárhgáá: rə̀myɛ́ yó, ń wɔ̌ ń jí pansɛ́ shɛ̀bɛ́ bə̀ n'ê pɛ Yi ni mú, bə̀ wɔ́ rə̀myɛ́ rə̀ wɔ́ ń kùjú. ⁸Ń tá ń la vwǎm mɔ̀bɔ́ mə̀ cù ráá gɔ-ku gu o zhəzhɛrɛ nàmá bɛ́ dɔ́m yé, bə̀ rə̀ m'a ce mo jìmdi; wɔ́ àmyɛ́ à wɔ́ Cinu. ⁹Vwĩ̀-zwə́lnə bé m'a zwẽ à nyə́ né, sə bə̀ bə̀ yə̀-bəlɔ̀lɔ́ bə̀ cìn ni zhĩ bə̀ kùjú w shò kwã nɛ́ yé; bə̀ gə fuuli kùjú wə́, bə̀ m'a cì; wɔ́ àmyɛ́ Cinu à cír bi, a ce bə̀ wɔ́ àmyɛ́ lyì.¹⁰Lò mɔ̀bɔ́ ń də̀ vwĩ̀-zwə́lnə bé dwí rí lò tá ń la kɔn rɛ́ tɛ̀bɛ́ bə̀ pɔ Yi ni mú jú yé; vwĩ̀-zwə́lnə zhə-bal ráá ń tùntùnnə mɔ̀bɔ́ ń kwè ń nə́ ń kwɛ̃̌ mɔ́ myɛ tá ń la kɔn rɛ́ tɛ̀bɛ́ bə̀ pɔ Yi ni mú jú yé; ¹¹sə vwĩ̀-zwə́lnə mó gə yè lò ǹdə́ sə̀byǐ, rə̀-ná-cí wɔ̌ ń jí ri, ǹdə tùntùnnə mó mɔ̀bɔ́ ń lùl vwĩ̀-zwə́lnə mó sõ ta; bə̀myɛ́ wɔ̌ bə̀ jí ń kùjú wə́.¹²Vwĩ̀-zwə́lnə bə̀kɔ́ mɔ̀bɔ́ ń jú lò mɔ̀bɔ́ ń də̀ vwĩ̀-zwə́lnə bé dwí rí lò tá ń la kɔn rɛ́ tɛ̀bɛ́ bə̀ vùr pansɛ́ shɛ̀bɛ́ bə̀ pɔ Yi ni mú wẽ́ mó jú yé; ¹³sə vwĩ̀-zwə́lnə bə̀kɔ́ mɔ̀bɔ́ ń jǐrh ejə̃̀-kɛ̃ ráá ń byal zhɔ̃̀ mɔ, ń bə bə̀sɔ́ná zhe n zɛ̃̀ n kwɛ̃̀ ǹ bə̀ ń wɔ ń da yó ǹdə ń kɛ̃-byǔr yi ní ta, rə̀myɛ́ yó, ń wɔ̌ ń jí ń da kùjú wə́, ǹdə́ lò mɔ̀bɔ́ ń də̀ vwĩ̀-zwə́lnə dwí rí lò wàr ń jí w ga.¹⁴Lò gə jú kɔn dɛ̀bɛ́ bə̀ pɔ Yi ni ǹdə́ ń yə̀l, ń mà n càrh kɔn rə mɛrhɛ rɛ vwĩ̀-zwə́lnə mó ne, ń mà n súlí kɔn rɛ́ rə̀myɛ́ mɔ́ kə̀kàlà èdù rə̀ yó, ǹdə́ bə̀ gə bɔ̀n rɛ kə̀kàlsɛ sə̀nu. ¹⁵Vwĩ̀-zwə́lnə bé t'â la Esərayɛl lyì byǎ bɛ́ pansɛ́ shɛ̀bɛ́ bə̀ pɔ Yi ni mú fuuli yé, pansɛ́ shɛ̀bɛ́ bə̀ n'ê vùr Cinu yil mú; ¹⁶bə̀ gə jú pansɛ́ shɛ̀bɛ́ bə̀ pɔ Yi ni mú, bə̀ m'a zhĩ dóó w kɔ̀bɔ́ kɔn n'ê nyɛ́ɛ́ bə̀ bə̀ vǔr w mú, Esərayɛl lyì byǎ bɛ́ nɛ, bə̀ wɔ́ àmyɛ́ à wɔ́ Cinu, à cír bi a ce bə̀ wɔ́ àmyɛ́ lyì.»¹⁷Cinu zɔ̀m ǹdə́ Muyiisi n wɔ̀: ¹⁸«Wál Aarɔ̃ ǹdə́ ń byǎ bɛ́ e súlí Esərayɛl lyì byǎ bɛ́ gakó ne:Esərayɛl dwí rí lò ráá zhə-bal mɔ̀bɔ́ ń jě Esərayɛl nɛ́ gə tú ń nə́ ń yǎl n zwə́l vwĩ̀ námpúm cɛ̃́ɛ̃́ n pɛ̃ ǹdə nyɛ̀bɛ́ bə̀ n'ê pɛ Cinu ni bə m'e pyìrh nyì-bwelé vwĩ̀ ráá pùbùlə̀ vwĩ̀ ta, ¹⁹á gə n'á yǎl b'à zwẽ á vwĩ̀ rí, sə á zə nə̀-bya ráá pyì-bya ráá bə̀cìlə́ kɛ̀bɛ́ kaka bə y zhe á vwàmá nɛ́ wẽ́ á m'á bà;²⁰á t'á la vwǎm mɔ̀bɔ́ kɔn zhe zal á bàn nɛ pɔ yé, b'à t'â la á vwĩ̀ rí zõ yé. ²¹Lò gə tú ń pɔ yə̀-zùlə́ vwĩ̀ Cinu ni, rə̀ kɔn rɛ́ shí ń vwàmá nánfwààlɛ́ ráá ń və̌-ywàálɛ́ wẽ́, è wɔ́ ń la mə n pyìrh nyí ń bwəl ráá wɔ́ pùbùlə̀ vwĩ̀, ń gə nə́ ń yǎl bə̀ bə̀ zwẽ ń vwĩ̀ rí, sə e yə̀ vwǎm mɔ̀bɔ́ kaka bə mo zhe; kaka bə̀k'a nə mə̀ yala nɛ yé:²²mə̀ bə̀k'a yə̀ vwǎm mɔ̀bɔ́ mə̀ yírhə́ bə nɛ́ nɛ yé, ráá mə̀ kɔn kɔ́ yé ráá bə̀ gòm mə̀ kɔn yé ráá mə̀ zhe yòrhò yé ráá cɔ̀rɔ́ zhe mo yé ráá mə̀ zhe nɔ yé. Á t'á la mə̀myɛ́ dwí zal á b'ǎ pə Cinu ni yé, á t'á la mə̀ dwí rí vwĩ̀-jùlú w yó cṹ ǹdə vwĩ̀ rí tɛ̀bɛ́ rə̀ kɔn gakó n'ê jí myǐn mú ta, Cinu yil yé. ²³Ǹ wɔ̌ ǹ zə vwǎm mɔ̀bɔ́ mə̀ nèsé bə dwã mə̌ ráá mə̀ kwàrh ǹ vwàmá nánfwààlɛ́ wẽ́ ráá ǹ və̌-ywàálɛ́ wẽ́ ǹ mə́ ǹ zwə́l pùbùlə̀ vwĩ̀, sə è gə wɔ́ ǹ la mə́ pyìrh nyí ǹ bwəl yilə, à t'â la mɔ zõ yé.²⁴Á t'á la vwǎm mɔ̀bɔ́ bə̀ pyárh ráá bə̀ bɔbwɛlɛ mə̀ mɔ́swál rɛ́ ráá bə̀ mǔr ri ráá bə̀ gòm re zə á b'ǎ pə Cinu ni yé; á t'á la rə̀myɛ́ wɔ̀rhɔ́ á tənà y w yé. ²⁵Á t'á la vwàmá nə̀myɛ́ dwí rí myɛ zõ zhə-bal sõ rə yə̀ kùjú á pə á Yi rí ni yé; nə̀ kɔn rɛ́ bə̀ gòm mó ce nə̀ zhe yò, rə̀myɛ́ ce á t'á la shɔ̀nɔ́ á zwẽ ne yé.»²⁶Cinu zɔ̀m ǹdə́ Muyiisi n wɔ̀: ²⁷«Nũ̌-bwə̀lə̀ ráá pyì-byǐ ráá bɔ̀-byǐ gə lùl kwã, è m'a mɛ̃ ǹd'ê ná y dwã nyàlpyɛ̀; sə kɔn zhì è dwã-lyɛlɛ y kwã nɛ́, bə̀ gə pɔ sɛ ǹdə kùjírə́ nyɛ̀bɛ́ nə̀ gakó n'ê jí myǐn mú ta Cinu yilə, à m'a zwẽ se.²⁸Sə á t'á la nɔ̃ ráá pyìrhə̀ ráá bɔ̃̀ ǹd'ô byǐ ga zwə́l dɛ̃ rɛ́ rə̀myɛ́ rə̀dù y yé. ²⁹Á gə la nə̀bán-co vwĩ̀ zwə́l á pə Cinu ni, sə á zwə́l re mùnì n shɛ̀nɛ́ n zwẽ re: ³⁰bə̀ m'a dɔ̀m rə̀ nàmá bɛ́ dɛ̃ rɛ́ rə̀myɛ́ mɔ́ cìcì yù wə, bə̀ t'â la rə̀ kaka dǎl è zɛ̃̀ nəkɔkɔ́lɛ́ y yil yé. Wɔ́ àmyɛ́ à wɔ́ Cinu.³¹Á m'ǎ zwẽ à nyə́ né, sə á wɛ̀rhɛ́ ǹdə nə̀ gə́ n'ê byili ní. Wɔ́ àmyɛ́ à wɔ́ Cinu. ³²Á t'á la à yil ré rə̀ bə dõ zhe mó fuuli yé, mùnì ga Esərayɛl lyì bí gakó ce bə lwar b'à bǝ dõ zhe bə̀ cəcəl w yé; wɔ́ àmyɛ́ Cinu à cír ába a ce á wɔ́ à lyì. ³³Mɔ̀bɔ́ ń ce á shə́r Ezhibti tənà y wa, mùnì n yə̀ Yi á yil mú, wɔ́ àmyɛ́ à wɔ́ Cinu.»

¹1 Cinu Yi zɔ̀m ǹdə́ Muyiisi n wɔ̀: ²2 «Wál Esərayɛl lyì byǎ bɛ́ nɛ: Cinu címsí nánfwàlsɛ́ wɔ́ címsi shɛ̀bɛ́ á m'ǎ jòm kúl-fwàlsɛ Cinu yil mú. Nyǐ àmyɛ́ ǹd'ámyɛ̌ dwã-jəəlé nánfwààlɛ́ rə̀myɛ́ mɔ́:³Lò gakó mà n twĩ̀ ń tum rí dwã nyə̀ldù, sə dwã nyàlpyɛ̀ dɛ̃ rɛ́ wɔ́ shìrhə́ dɛ̃ rɛ́, shìrhə́ ǹdə́ kúl-fwɛ̀lɛ̀ Cinu yilə, dɛ̃ tɛ̀bɛ́ á t'á la tum də́-byǐ tũ̌ rə̀ yù w mú: wɔ́ Cinu shìrhə́ dɛ̃ rɛ́, á gə wɔ mə̀gã̌ gakó.⁴Nyǐ Cinu címsí nánfwàlsɛ́ dwã bɛ́, kúl-fwàlsɛ shɛ̀bɛ́ á m'ǎ jòm Cinu yil mú dwã nɛ́: ⁵Cànà nã́yə́ə́ y dwã shí ǹdə́ nə̀na yù wə, cɛ y gə tú è n'ê byíbyílí yi ní, wɔ́ Cinu Pakɛ yá. ⁶Cànà y èmyɛ́ dwã shí ǹdə́ nə̀nu yù wə, wɔ́ búrú ò yə̀ sã̀-nə̀byẽ̌ ce címsí Cinu yilə. Á m'ǎ dɔ̃̀ búrú kɔ̀bɔ́ ò yə̀ sã̀-nǝ̀byẽ̌ ce dwã nyàlpyɛ̀;⁷dwã nɛ́ nyàlpyɛ̀ y dɛ̃ nã́yéé ré, á m'ǎ jòm kúl-fwɛ̀lɛ̀ Cinu yilə: á t'á la tum tɛ̀bɛ́ rə̀ jɛ̀ rə̀dù ga myɛ tũ̌ yé. ⁸Dwã nɛ́ nyàlpyɛ̀ y dɛ̃ gakó, á m'ǎ pə kùjú kɔ̀bɔ́ ò gakó n'ô jí myǐn mú Cinu ni; dwã nyàlpyɛ̀ dɛ̃ rɛ́, á m'ǎ jòm kúl-fwɛ̀lɛ̀ Cinu yilə; á t'á la tum tɛ̀bɛ́ rə̀ jɛ̀ rə̀dù ga myɛ tũ̌ yé.»⁹Cinu Yi zɔ̀m ǹdə́ Muyiisi n wɔ̀: ¹⁰«Wál Esərayɛl lyì byǎ bɛ́ nɛ: Á gə tú á zù tənà y kɛ̀bɛ́ à n'â pɛ ába mɔ́ wẽ́, á zɛ̃̀ á n'á jə̀r á wẽ̀ ré, á m'ǎ zə á wə̀-cíl nã́yéé ré, á jòró w byǎ nã́yə́ə́ bé, á b'ǎ pə vwĩ̀-zwə́lnə mó ne; ¹¹vwĩ̀-zwə́lnə mó mà n bə̀ n pə wə̀-cíl rí Cinu yé né, mùnì ga Cinu zwẽ á lwə̌l mó; ń mà n pə rɛ shìrhə́ y zɛ̃̀ nəkɔkɔ́lɛ́ yá.¹²Á m'ǎ zwə́l byin rə̀dù pyì-bwɛ̀lɛ́ kaka bə y zhe vwĩ̀ námpúm cɛ̃́ɛ̃́ vwĩ̀ á pə Cinu ni, dɛ̃ rɛ́ tɛ̀bɛ́ á la wə̀-cíl rí pɔ mɔ́, ¹³á súlí mún cəə́le tə̀ldù mə̀ ywə́rh ǹdə́ nwə̃̌ pɛnɛ́, rə̀myɛ́ wɔ́ kùjú kɔ̀bɔ́ ò gakó n'ô jí myǐn mú Cinu yilə, lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́, e súlí də̀vɛ̃́ lyítər ǹdə́ fwã́, bə̀ la tɛ̃́ ló bə pə Cinu ni. ¹⁴Á t'á la búrú ráá jíjí byǎ bə̀ kɛ̀lɛ̀ ráá jíjí nándùl dɔ́m ǹdə́ dɛ̃ rɛ́ tɛ̀bɛ́ cìcì á la zə Cinu pɛnɛ́ y á m'á bə̀ mɔ́ gwẽ̌ yə̀ yí yé. Wɔ́ nyí rə̀ m'à j'â ŋwɛ́nɛ́ gaga, á yilə, byin byin gakó, á gə wɔ mə̀gã̌ gakó.¹⁵Á m'ǎ gə̀ səmyɛnsɛ shàlpyɛ̀ kɔn zhì shìrhə́ y dɛ̃ rɛ́ zɛ̃̀ nəkɔkɔ́lɛ́ yá, è n'ê yǎl e wɔ̀ kɔn zhì dɛ̃ rɛ́ tɛ̀bɛ́ á zɔ wə̀-cíl rí á m'á bə̀ ǹdə bə̀ gə́ y'a wɛ̀rhɛ́ nɛ́ bə m'e pə pɛnɛ́ nɛ́ mɔ́; səmyɛnsɛ́ shàlpyɛ̀ y m'a yə̀ námpúmə́; ¹⁶e m'e yí shìrhə́ kùrə̀ tàlpyɛ̀ nyǎ y zɛ̃̀ nəkɔkɔ́lɛ́ yá, á m'ǎ gə̀ dwã shí-ènu, á zɛ̃̀ á zə wə̀-dùn rí pɛnɛ́ y á b'ǎ pə Cinu ni;¹⁷Á gə wɔ mə̀gã̌ gakó, á m'ǎ zə búúri rə̀lyè rə̀ mà ǹdə́ mún cəə́le rə̀tɔ̀ bə̀ pò mə zɛ̃̀ á shí gàà mɔ́ á m'á bà, bə̀ gə́ y'a wɛ̀rhɛ́ nɛ́ bə m'e pə pɛnɛ́ nɛ́ mɔ́ tũ̀twĩ̀ĩ̀ rí yilə: wɔ́ vɔ̀lɔ́ w byǎ nã́yə́ə́ bé bə̀ la Cinu ni pɔ mɔ́. ¹⁸Á m'ǎ súlí byin rə̀dù pyì-bwǎlsɛ shàlpyɛ̀ kaka bə sɛ zhe ǹdə́ nə̀-bya e súlí pyì-byərh sə̀lyè búrú w ni, sə bə̀ m'a zə rɛ bə zwə́l vwĩ̀ námpúm cɛ̃́ɛ̃́ Cinu yilə; e súlí rə̀ mún mú ǹdə́ rə̀ də̀vɛ̃́ yá, rə̀myɛ́ mɔ́ wɔ́ kùjú kɔ̀bɔ́ ò gakó n'ô jí myǐn mú, lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́ Cinu yilə.¹⁹Á m'ǎ zə bə̀cìlə́ á m'á zwə́l yə̀-bəlɔ̀lɔ́ sǔbri lwə̌l vwĩ̀; á zə byin rə̀dù pyì-bwǎlsɛ sə̀lyè, á m'á zwə́l yə̀-zùlə́ vwĩ̀; ²⁰vwĩ̀-zwə́lnə mó mà n pə vwə̃̀ né nə̀myɛ́ Cinu yé né ǹdə bə̀ gə́ y'a wɛ̀rhɛ́ nɛ́ bə m'e pə pɛnɛ́ mɔ́, ń mà n tó dwã n pə pyì-bwǎlsɛ́ sə̀lyè y ǹdə́ vɔ̀lɔ́ w byǎ nã́yə́ə́ bé búrú w ga. Wẽ̀ ré rə̀myɛ́ mɔ́ wɔ́ Cinu nyǎn, sə wɔ́ vwĩ̀-zwə́lnə mó ń cǐ ri. ²¹Dɛ̃ rɛ́ rə̀myɛ́ yù wə, á m'ǎ bwə̀l á súlí á jòm kúl-fwɛ̀lɛ̀ Cinu yilə; á t'á la tum tɛ̀bɛ́ rə̀ jɛ̀ rə̀dù ga myɛ tũ̌ yé. Wɔ́ nyí rə̀ m'à j'â ŋwɛ́nɛ́ gaga, á yilə, byin byin gakó, á gə wɔ mə̀gã̌ gakó.²²Á gə la á cɛsɛ́ jə̌r, ǹ tá ǹ la ǹ cɛ y jə̌r ń mə́ yí è swɛ̃́ rɛ́ yé, ǹ tá ǹ la jíjí rí rə̀ mɛ̃ tɛ̃́ mɔ́ myɛ gǔn yé, ǹ m'ǎ yẽ̌ re ń pə nə̀mɔ̀ ǹdə́ zhə-bal nɛ. Wɔ́ àmyɛ́ à wɔ́ Cinu á Yi rí.»²³Cinu zɔ̀m ǹdə́ Muyiisi n wɔ̀: ²⁴«Wál Esərayɛl lyì byǎ bɛ́ nɛ: Cànsɛ̀ shàlpyɛ̀ nyǎ y dɛ̃ nã́yéé ré, wɔ́ shìrhə́ dɛ̃ á yilə, lyìrhə́ ǹdə́ wu-nyɔ̃̀ búbwéése dɛ̃, e súlí kúl-fwɛ̀lɛ̀ Cinu yilə. ²⁵Á t'á la tum tɛ̀bɛ́ rə̀ jɛ̀ rə̀dù ga myɛ tũ̌ yé, sə á m'ǎ pə kùjú kɔ̀bɔ́ ò gakó n'ô jí myǐn mú Cinu ni.»²⁶Cinu zɔ̀m ǹdə́ Muyiisi n wɔ̀: ²⁷«Kɔn súlí myɛ, á m'ǎ jòm kúl-fwɛ̀lɛ̀ Cinu yilə, á lyẽ á nyí á súlí á pə kùjú kɔ̀bɔ́ ò gakó n'ô jí myǐn mú Cinu ni, cànsɛ̀ shàlpyɛ̀ nyǎ y dwã shí dɛ̃ rɛ́ rə̀ wɔ́ sǔbri nánfɔ̀lɔ̀ pɔ dɛ̃ rɛ́;²⁸á t'á la tum rə̀dù ga myɛ tũ̌ dɛ̃ rɛ́ rə̀myɛ́ mɔ́ yù w yé, bə̀ rə̀ wɔ́ sǔbri nánfɔ̀lɔ̀ pɔ dɛ̃, dɛ̃ tɛ̀bɛ́ bə̀ n'ê twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí á yó, Cinu á Yi rí yé né mó. ²⁹Rə̀myɛ́ ce, lò mɔ̀bɔ́ ń yə̀ ń nyí lyẽ dɛ̃ rɛ́ rə̀myɛ́ mɔ́ dwí rí yù wə, bə̀ m'a vùr mu ń dwí rí wẽ́;³⁰èta myɛ, lò mɔ̀bɔ́ ń twĩ̀ tum tɛ̌ tɛ̌ dɛ̃ rɛ́ rə̀myɛ́ dwí rí yù wə, à m'a ce n jé tɛ̃́ ń dwí rí cəcəl wə. ³¹Á t'á la tum rə̀dù ga myɛ tũ̌ yé: wɔ́ nyí rə̀ m'à j'â ŋwɛ́nɛ́ gaga, á yilə, byin byin gakó, á gə wɔ mə̀gã̌ gakó. ³²Wɔ́ shìrhə́ dɛ̃ á yilə, dɛ̃ shìrhə́ yilə, á m'ǎ lyẽ á nyí dɛ̃ rɛ́ rə̀myɛ́ mɔ́. Á m'ǎ tó shìrhə́ dɛ̃ rɛ́ nyí rí rə̀myɛ́ mɔ́ kɔn zhì cànà y dwã nə̀bɔ́ y də̀dɛ̀nɛ́ yá, e m'e yí è zɛ̃̀ nəkɔkɔ́lɛ́ y də̀dɛ̀nɛ́ yá.»³³Cinu zɔ̀m ǹdə́ Muyiisi n wɔ̀: ³⁴«Wál Esərayɛl lyì byǎ bɛ́ nɛ: Cànsɛ̀ shàlpyɛ̀ nyǎ y dwã shí ǹdə́ nə̀nu, wɔ́ kwə̀ə́rhé címsí, sə̀ m'a jí dwã nyàlpyɛ̀, Cinu yilə;³⁵sə̀ dɛ̃ nã́yéé ré, bə̀ m'a jòm kúl-fwɛ̀lɛ̀ Cinu yilə; á t'á la tum tɛ̀bɛ́ rə̀ jɛ̀ rə̀dù ga myɛ tũ̌ yé. ³⁶Dwã nɛ́ nyàlpyɛ̀ y dɛ̃ gakó, á m'ǎ pə kùjú kɔ̀bɔ́ ò gakó n'ô jí myǐn mú Cinu ni. Dwã lyɛlɛ dɛ̃ rɛ́, á m'ǎ jòm kúl-fwɛ̀lɛ̀ Cinu yilə, sə á m'ǎ pə kùjú kɔ̀bɔ́ ò gakó n'ô jí myǐn mú Cinu ni: rə̀myɛ́ mɔ́ wɔ́ címsí yó-gurə́ yə́; á t'á la tum tɛ̀bɛ́ rə̀ jɛ̀ rə̀dù ga myɛ tũ̌ yé.³⁷sə̀ dɛ̃ nã́yéé ré, bə̀ m'a jòm kúl-fwɛ̀lɛ̀ Cinu yilə; á t'á la tum tɛ̀bɛ́ rə̀ jɛ̀ rə̀dù ga myɛ tũ̌ yé. ³⁸Dwã nɛ́ nyàlpyɛ̀ y dɛ̃ gakó, á m'ǎ pə kùjú kɔ̀bɔ́ ò gakó n'ô jí myǐn mú Cinu ni. Dwã lyɛlɛ dɛ̃ rɛ́, á m'ǎ jòm kúl-fwɛ̀lɛ̀ Cinu yilə, sə á m'ǎ pə kùjú kɔ̀bɔ́ ò gakó n'ô jí myǐn mú Cinu ni: rə̀myɛ́ mɔ́ wɔ́ címsí yó-gurə́ yə́; á t'á la tum tɛ̀bɛ́ rə̀ jɛ̀ rə̀dù ga myɛ tũ̌ yé.³⁹Sə cànsɛ̀ shàlpyɛ̀ nyǎ y dwã shí ǹdə́ nə̀nu dɛ̃ rɛ́, á gə jə̀r á cɛsɛ́ wẽ̀ ré á zhɛ̀, á m'ǎ súlí á jí címsí dwã nyàlpyɛ̀ Cinu yilə; dɛ̃ nã́yéé ré m'a yə̀ shìrhə́ dɛ̃, dwã lyɛlɛ nyǎn rɛ́ myɛ yə̀ shìrhə́ dɛ̃;⁴⁰dɛ̃ nã́yéé ré, á m'ǎ pyà cèmé byǎ byɛ̀bɛ́ bə̀ càn ǹdə́ kwã̌ vɔr ǹdə́ cèmé né nyɛ̀bɛ́ nə̀ pú mú jɛ̀rh ráá vwaalɛ́ cèmé né jɛ̀rh, á m'á fùù ǹdə́ wu-nyɔ̃̀ dwã nyàlpyɛ̀ Cinu á Yi rí yé né. ⁴¹Byin gakó, á m'ǎ jí címsí sə̀myɛ́ Cinu yil dwã nyàlpyɛ̀; wɔ́ nyí rə̀ m'à j'â ŋwɛ́nɛ́ gaga, á yilə, byin byin gakó. Á m'ǎ j'á n'á jí címsí sə̀myɛ́ cànsɛ̀ shàlpyɛ̀ nyǎ y wa;⁴²á m'ǎ jòm kwə̀ə́rhe w dwã nyàlpyɛ̀; Esərayɛl tənà y lò gakó mà n jòm kòrhó wə, ⁴³mùnì ga á lwar, yi gakó wẽ́, b'à ce Esərayɛl lyì byǎ bɛ́ jòm kwə̀ə́rhe wə, à gə́ ce bə shə́r Ezhibti ní yi ní. Wɔ́ àmyɛ́ à wɔ́ Cinu á Yi rí.» ⁴⁴Rə̀myɛ́ yó, Muyiisi já n zɛ̃̀ n cĩ́ Esərayɛl lyì byǎ bɛ́ nɛ bə̀ gə́ m'a tó né bə m'e jəl Cinu, címsí nánfwàlsɛ́ yi ní mú.

¹Cinu zɔ̀m ǹdə́ Muyiisi n wɔ̀: ²«Pə nyí Esərayɛl lyì byǎ bɛ́ nɛ, bə̀ n'ê pɛ mɔ́ olyivyé byǎ nwə̃̌ y kɛ̀bɛ́ è wɔ́ zwẽ́zwẽ́, kaka myɛ yə̀ y gùlí yé, ku w bə̀ n'ê cĩ́ pàntámsɛ́ ò yó mó yilə, mùnì ga pàntámsɛ́ j'a zə twéé twéé,³gɔ̀nɔ̀ w kɔ̀bɔ́ ò círhí dɔbrɛ́ kùlkṍ wə́, dwã-joló kòrhó w w mó, yé y wə. Aarɔ̃ mà n cĩ́ pàntámsɛ́, sə ŋwɛ̀nɛ́ sə zə də̀dɛ̀nɛ́ kɔn m'e yí nəkɔkɔ́lɛ́, Cinu yé né, twéé twéé. Wɔ́ nyí rə̀ m'à j'â ŋwɛ́nɛ́ gaga, á yilə, byin byin gakó. ⁴Ń mà n cĩ́ pàntámsɛ́ ku w bə̀ n'ê cĩ́ pàntámsɛ́ ò yó ò zùrhì ǹdə́ sánə́má mɔ̀bɔ́ mə̀ càn mɔ́ yó, sə sə̀ m'a zə Cinu yé né twéé twéé.⁵Ǹ m'ǎ zə mún mə̀ búl mə̀ càn ń ji ŋwǎmsɛ shí ǹdə́ sə̀lyè, èdù gakó ji ǹdə́ mún cəə́le tə̀ldù. ⁶Ǹ m'ǎ pyɛ̀lɛ́ pyɛ̀lɛ́ sɛ dwã yó shə̀ldù shə̀ldù, púlə́ nə̀lyè tabəlɛ́ y è zùrhì ǹdə́ sánə́má mɔ̀bɔ́ mə̀ càn mɔ́ yó, Cinu yé né;⁷ǹ m'ǎ cĩ́ ãsã́ kɛ̀bɛ́ kaka yə̀ y gùlí mú púl rə̀dù gakó yə́-pɛ̀lɛ́ wa; è m'a yə̀ lyìrhə́ kɔn búrú w jàà wa; rə̀myɛ́ mɔ́ m'a yə̀ kùjú kɔ̀bɔ́ ò gakó n'ô jí myǐn mú Cinu yilə; ⁸shìrhə́ y dɛ̃ gakó, bə̀ m'a cĩ́ si Cinu yé né, twéé twéé, sə sə̀ m'a shí Esərayɛl lyì byǎ bɛ́ sõ; wɔ́ dɔbrɛ nyí rə̀ m'à j'â ŋwɛ́nɛ́ twéé twéé. ⁹Ŋwǎmsɛ́ sə̀myɛ́ m'a yə̀ Aarɔ̃ ǹdə́ ń byǎ bɛ́ cəl; bə̀ m'a dɔ̃̀ sɛ jàà y kɛ̀bɛ́ bə̀ vùr rə̀myɛ́ mɔ́ yil mú wẽ́, bə̀ sə̀ wɔ́ à dúdú cəl bə̀ vùr kùjírə́ nyɛ̀bɛ́ nə̀ gakó n'ê jí myǐn Cinu yil mú wẽ́; rə̀ j'â wɔ́ bə̀ cəl twéé twéé yilə.»¹⁰Dɛ̃ rə̀dù Esərayɛl lyì bə̀kɔ́ byǐ, ń da mɔ́ yà ń wɔ́ Ezhibti lò, zù Esərayɛl lyì bí wẽ́, ńmyɛ̌ ǹdə́ Esərayɛl lyì byǐ mə̀dù j'a zɛ̃̀ búlə́ ne, zulə́ jàà y cəcəl wə. ¹¹Esərayɛl lyì bə̀kɔ́ mɔ́ byǐ mú já n fuuli Yil réa, n tùrh mu; rə̀myɛ́ ce, bə zə mɔ bə vò Muyiisi sõ. Byǐ mú ná mɔ́ yà ń yíl Shəlomiiti, Dəvri bə̀kɔ́, Dan kwálá y lò. ¹²Bə ce bə̀ n'ê yìlì mu náàcɛ̀nɛ́ bə̀ m'ê dɛ̃̀ nyí tɛ̀bɛ́ cìcì Cinu la pɔ.¹³Rə̀myɛ́ yó Cinu zɔ̀m ǹdə́ Muyiisi n wɔ̀: ¹⁴«Ce lò mó mɔ̀bɔ́ ń tùrh tùùrhí mú du zulə́ jàà y wa; sə lyì byɛ̀bɛ́ gakó bə̀ nyɛ̀ɛ̀ ǹdə́ ń nə́ ń tùrh mú cĩ́ jɛ̀rh ń yó w yó, sə Esərayɛl lyì byǎ bɛ́ gakó dul mu ǹdə́ nə́kulə.¹⁵Ǹ m'ǎ zɛ̃̀ ń wɔ̀ Esərayɛl lyì byǎ bɛ́ nɛ:Lò gə tùrh ń Yi rí, ń mà n zhĩ ń yə̀-bəlɔ̀lɔ́ w yò wə́; ¹⁶rə̀myɛ́ ce, bə̀ m'a gu lò mɔ̀bɔ́ ń fuuli Cinu yil ré: lyì bí gakó m'a dul mu ǹdə́ nə́kulə; ń wɔ́ zhə-bal ráá tənà y cìcì lò, bə̀ m'a gu mu ń gə́ fuuli Yil ré mó yilə.¹⁷Bə̀ m'a gu lò mɔ̀bɔ́ ń mà numbyíní kɛ̌ kɛ̌ n gu mú, ¹⁸Ń gə gu lò dõ vwǎm, ń mà n càrh vwǎm, kò-nyì bə̀ m'a cĩ́ kò-nyì jàà wa.¹⁹Lò gə cɛ̀mɛ̀ ń da-dǒ lò, bə̀ m'a cɛ̀mɛ̀ ńmyɛ kɔn mɛrhɛ dwã ǹdə ń gə́ cɛ̀mɛ̀ mó né: ²⁰kɔn bə̀ y'a ká bə m'e cĩ́ kɔn rə̀ kɔ́ jim; yírh bǝ̀ y'a jàrh bǝ m'e cĩ́ yírh rə̀ jàrh jim, yélé bǝ̀ y'a wǔr bǝ m'e cĩ́ yélé rə̀ wǔr jim; bə̀ m'a cɛ̀mɛ̀ ńmyɛ kɔn mɛrhɛ dwã ǹdə ń gə́ cɛ̀mɛ̀ ń dõ mó né. ²¹Lò mɔ̀bɔ́ ń gu vwǎm, ń mà n càrh mə̀ dõ mə̀ jàà wa; lò mɔ̀bɔ́ ń gu numbyíní, sə bə gu mu.²²22 Á nyə́ né m'a yə̀ nə̀myɛ́ nə̀dù y zhə-bal ǹdə́ tənà y cìcì lò mó ga yilə; bə̀ wɔ́ àmyɛ́ Cinu à wɔ́ á Yi rí.»²³23 Wɔ́ èta Muyiisi zɔ̀m ǹdə́ Esərayɛl lyì byǎ bɛ́ nɛ́. Bə j'a zə mɔ̀bɔ́ ń tùrh tùùrhí mú bə m'e du zulə́ jàà y wa, bə dul mu ǹdə́ nə́kulə. Esərayɛl lyì byǎ bɛ́ j'a wɛ̀rhɛ́ kɔn rɛ́ tɛ̀bɛ́ Cinu yà ń pɔ rə̀ nyí Muyiisi ni mú cìcì.

¹Cinu zɔ̀m ǹdə́ Muyiisi Sǝnǝyi pyɔ̀ w yó n wɔ̀: ²«Zɔ̌m ǹdə́ Esərayɛl lyì byǎ bɛ́, ń wɔ̀ bɛ: Á gə tú á zù tənà y kɛ̀bɛ́ à n'â pɛ ába mɔ́ wẽ́, á m'ǎ n'á yẽ̌ cɛ y nɛ è shǐrh Cinu yilə:³ǹ m'ǎ dù ǹ cɛ y byinə nyə̀ldù; ǹ m'ǎ gõ̀ ǹ də̀vɛ̃́-cèmé né jɛ̀sɛ́, ń pɔ̌r nə̀ byǎ bɛ́; ⁴sə byinə nyàlpyɛ̀ byin rí m'a yə̀ shìrhə́ byin, shìrhə́ byin cɛ y yilə, shìrhə́ byin Cinu yilə: ǹ tá ǹ la ǹ cɛ y dú yé, ǹ tá ǹ la ǹ də̀vɛ̃́-cèmé né jɛ̀sɛ́ góm yé,⁵ǹ tá ǹ la wẽ̀ ré tɛ̀bɛ́ rə̀ lyĩ rə̀ cìn ni jòró nánkɔ̃ɔ̃́ kwã mɔ́ jə̌r yé, ǹ tá ǹ la ǹ də̀vɛ̃́-cèmé né nyɛ̀bɛ́ nə̀ jɛ̀sɛ́ mɛ̃ sə̀ yə̀ gòm mó byǎ bɛ́ pɔ̌r yé, è m'a yə̀ shìrhə́ byin cɛ y yilə. ⁶Ǹmyɛ́ ǹdə́ ǹ tùntùnnə mó mɔ̀bɔ́ ń wɔ́ bal ráá ń wɔ́ kɛ̃ mɔ́, ǹdə́ tùntùnnə mɔ̀bɔ́ ǹ kwè ǹ nə́ ǹ kwɛ̃̌ mɔ́ ráá zhə-bal mɔ̀bɔ́ ǹ zwẽ ǹ sõ mó, è n'ê yǎl e wɔ̀ lyì bí byɛ̀bɛ́ gakó bə̀ wɔ ǹ sõ mó, m'ǎ kɔ̃̀ á cìn ǹdə́ kɔn rɛ́ tɛ̀bɛ́ rə̀ lyĩ cɛ y wẽ́ shìrhə́ byin rí wẽ́ mó. ⁷Sə è gə wɔ́ ǹ vwàmá nɛ́ ǹdə́ ǹ tənà y gɔ-wẽ̀ ré yilə, rə̀myɛ́ m'a dɔ̃̀ wẽ̀ ré tɛ̀bɛ́ rə̀ m'a lyĩ cɛ y wẽ́ mó.⁸«Ǹ m'ǎ gə̀ byinə səmyɛnɛ səmyɛnɛ, səmyɛnsɛ shàlpyɛ̀, è n'ê yǎl e wɔ̀ byinə nyàlpyɛ̀ nyàlpyɛ̀ kùrə̀ tàlpyɛ̀; byinə səmyɛnsɛ shàlpyɛ̀ y sə̀myɛ́ mɔ́ yi rí n'ê mɛrhɛ byinə shə́-èna ǹdə́ nə̀bɔ́. ⁹Cànsɛ̀ shàlpyɛ̀ nyǎ y dwã shí yə́, ǹ m'ǎ wúl pɔ́lá mùnì ga lyì bí búbwéé wu-nyɔ̃̀ búbwéése; sǔbri nánfɔ̀lɔ̀ w pɔ dɛ̃ rɛ́ yù wə, á m'ǎ wúl pɔ́lá á tənà y púlə́púlə́ wẽ́;¹⁰á m'ǎ byili bə̀ byinə shí-ènu byin rí wɔ́ Yi byin, sə á m'ǎ bwə̀l á byili bə̀ tənà y lyì bí gakó nɔ cìn-cìnú; è m'a yə̀ fùwə́ nánfɔ̀lɔ̀ á yilə; sə á mə̀dù mə̀dù gakó mà n kwɛ̃̀ n vò ń cɛ y wa, á mə̀dù mə̀dù gakó mà n kwɛ̃̀ n vò ń kwálá-jì y wə.¹¹Byinə shí-ènu byin rí m'a j'a yə̀ fùwə́ nánfɔ̀lɔ̀ byin á yilə: á t'á la á cɛsɛ́ dú yé, á t'á la wẽ̀ ré tɛ̀bɛ́ rə̀ lyĩ rə̀ cìn ni mú jə̌r yé, á t'á la á də̀vɛ̃́-cèmé né nyɛ̀bɛ́ nə̀ jɛ̀sɛ́ yə̀ gòm mó byǎ bɛ́ pɔ̌r yé, ¹²b'è m'a yə̀ fùwə́ nánfɔ̀lɔ̀, è m'a yə̀ Yi byin á yilə. Á m'ǎ jí kɔn rɛ́ tɛ̀bɛ́ rə̀ lyĩ cɛsɛ́ wẽ́ mó.¹³Fùwə́ byin rí rə̀myɛ́ mɔ́, á mə̀dù mə̀dù gakó mà n kwɛ̃̀ n vò ń cɛ y wa. ¹⁴Á gə n'á dɔ̀lá, ǹmyɛ́ zɛ̃̀ ń yè kɔn ǹdə́ ǹ da-dǒ lò ráá ń zwẽ kɔn ń sõ ń yè, sə á mə̀dù ga bə̀ ń dõ myìnì yé:¹⁵ǹ m'ǎ jə̀ə̀le byinə né nə̀ lyɛ̃ fùwə́ nánfɔ̀lɔ̀ w kwã mɔ́ yó wə́, ń mə́ zwẽ kɔn ǹ da-dǒ lò sõ ń yè, sə ńmyɛ mà n jə̀ə̀le fùwə́ y nánfɔ̀lɔ̀ w ò bàn mɔ́ jòró w byinə né nə̀ dàl mɔ́ n mə n yè ǹdə́ ǹmyɛ́. ¹⁶Byinə né yó w gə já, ǹ kɔn rɛ́ ye y myɛ m'a jì; sə byinə né yó w gə bə já, ǹ kɔn rɛ́ ye y myɛ m'a só: b'è wɔ́ wə̀-jə̀ə́ré jàlà ń nə́ ń yè ǹdə́ mɔ́. ¹⁷Á mə̀dù ga myɛ tá ń la pyǎ n tó ń da-dǒ lò dɛnnɛ n zɛ̃̀ yé; wɔ́ èta ǹ m'ǎ nyàm ǹ Yi rí ní. Bə̀ wɔ́ àmyɛ́ à wɔ́ Cinu á Yi rí.¹⁸Wɛ̀rhɛ́-na kɔn dɛ̀bɛ́ gakó à nyǝ́ né n'ê byili mú, tó-nə à lùl-e-púrsí, sə á wɛ̀rhɛ́ kɔn dɛ̀bɛ́ gakó sə̀ n'ê byili mú: sə á yẽ̌ b'ǎ m'ǎ jòm tənà y w ǹdə́ yə̀-zùlə́. ¹⁹Cɛ y m'a pə ába wə̀-jə̀ə́re, á m'ǎ jí á sú, sə á m'ǎ jòm è wẽ́ ǹdə́ yə̀-zùlə́.²⁰Dɛ̀ga á m'ǎ wɔ̀: ‹Nə́ t'á la dú yé, nə́ t'á la jə̌r myɛ yé, sə wɔ́ bə̀kɔ́n nə́ nə m'ǎ jí byinə nyàlpyɛ̀ byin rí?› ²¹Nyǐ à m'a ce à bwəl ré bə̀ rə só á yó wə, byinə nyə̀ldù byin rí, rə ce jòró w kɔ̀bɔ́ á la jə̌r mó yə̀ jòró kɔ̀bɔ́ á zhe ò tum byinə nə̀tɔ̀ yilə. ²²Byinə lyɛlɛ byin rí, á m'ǎ dù á cɛsɛ́, sə á gwẽ̌ m'ǎ n'á jí jíjí rí nándwə́l ré byin rí rə̀myɛ́ mɔ́, kɔn b'e yí byinə nə̀bɔ́ byin rí jòró w k'o m'o yí.²³Bə̀ t'â la tənà y cɛ y yǒ twéé twéé yil yé, bə̀ tənà y wɔ́ àmyɛ́ à cǐ yə; á j'á wɔ́ dwí dõ lyì á súlí á wɔ́ zhələ á wɔ à sõ; ²⁴rə̀myɛ́ ce, á m'ǎ vùr nyə́ nə̀ n'ê pɛ sɔ́má lò ne ń kə́ ń wɔ̌ ń zwẽ ń cɛsɛ́ ń yè, tənà y kɛ̀bɛ́ è la yə̀ á nyǎ mɔ́ wẽ́. ²⁵Ǹ da-byǐ gə zhe jimə, n zɛ̃̀ ń mə̌ sə n yè ń cɛ y kə̀kàlà, lò mó mɔ̀bɔ́ ń mə̌ sə n zwẽ y n yè mó, è n'ê yǎl e wɔ̀ bə̀ ń dwí lò, mà n kə́ n zwẽ cɛ y kɛ̀bɛ́ ń kwè n yè mó n yè.²⁶Lò gə bə lò zhe ń la kə́ n zwẽ cɛ y kɛ̀bɛ́ ń kwè n yè mó n yè, n zɛ̃̀ n púrí ń cìcì mú wɔ̌ ń mà n kə́ n zwẽ y n yè, ²⁷ń mà n gə̀ byinə né nə̀ lyɛ̃ mɔ́ yó wə́, kɔn zhì è yǒ mó byin rí, e m'e yí fùwə́ nánfɔ̀lɔ̀ w byin rí, n zɛ̃̀ càrh nyɛ̀bɛ́ nə̀ dàl mɔ́ sə̀byǐ mú mɔ̀bɔ́ ń yà ń zwẽ y n yè mó ne, n zɛ̃̀ n kə́ n cìní ń cɛ yá. ²⁸Sə ń cìcì mú gə wàr ń mà n nə kɔn n càrh, kɔn rɛ́ tɛ̀bɛ́ ń kwè n yè mó m'a j'a mɛ̃ mɔ̀bɔ́ ń zwẽ re n yè mó jɛ̀sɛ́ wa, kɔn m'e yí fùwə́ nánfɔ̀lɔ̀ w byin rí; fùwə́ nánfɔ̀lɔ̀ w byin rí, ń mà n yẽ̌ re, sə mɔ̀bɔ́ ń yà ń kwè re n yè mó mà n kə́ n zwẽ ń kɔn rɛ́ n cìní.²⁹Lò gə kwè ń jì-zɔ̃̀rà kɛ̀bɛ́ è wɔ cɔ kɔ̀bɔ́ bə̀ lù byíl-fwàlsɛ bə m'e kə́kɛ́lɛ́ w mɔ́ wẽ́ n yè, ń wɔ̌ ń mà n kə́ n zwẽ y n yè, è yǒ mó dɛ̃ rɛ́ e m'e vò è yǒ mó byin rí zhɔ̌ mɔ́ yi rí wẽ́; wɔ́ byin rə̀dù wẽ́ e k'e zwẽ y e yè mó sɔ́má y wɔ̌ è nɛ nɛ́. ³⁰Byin námpúm gə lyɛ̃ ǹdə́ ń kə́ ń yə̀ jì y è wɔ cɔ̌ w kɔ̀bɔ́ bə̀ lù byíl-fwàlsɛ bə m'e kə́kɛ́lɛ́ w mɔ́ zwẽ n yè, jì y èmyɛ́ mɔ́ m'a j'a yə̀ lò mó mɔ̀bɔ́ ń zwẽ y n yè mó ǹdə́ ń byǎ bɛ́ nyǎ twéé twéé yilə; Ń tá ń la y pɔ fùwə́ y nánfɔ̀lɔ̀ byin rí myɛ yé.³¹Bə̀ m'a wɛ̀rhɛ́ jìsí shɛ̀bɛ́ sə wɔ cɛmɛ nɛ́ nyɛ̀bɛ́ byíl-fwàlsɛ yə̀ kə́kɛ́lɛ́ wẽ́ mó ǹdə tənà y cɛsɛ́ ta; bə̀ wɔ̌ bə̀ m'a k'a kwɛ̃̌ sə̀ ye y bə zwẽ se, sə fùwə́ y nánfɔ̀lɔ́ w byin rí, sə̀ cìnə́ bé m'a zwẽ bə̀ jìsí. ³²Levyi dwí rí lyì bí wɔ̌ bə̀ m'a kwɛ̃̌ bə zwẽ bə̀ cɛmɛ nɛ́ ǹdə́ jìsí shɛ̀bɛ́ sə̀ wɔ cɛmɛ nɛ́ nə̀myɛ́ nyɛ̀bɛ́ bə̀ cǐ mú wẽ́ mó.³³Má è gə wɔ́ Levyi dwí rí lò dõ ń yè jì ráá cɔ, rə̀ wɔ́ Levyi dwí rí cəl ré, rə̀ n'ê zwẽ fùwə́ nánfɔ̀lɔ̀ w byin rí; bə̀ wɔ́ Levyi dwí rí cɛmɛ nɛ́ jìrh, wɔ́ bə̀ cəl ré Esərayɛl lyì byǎ bɛ́ cəcəl wə. ³⁴È gə wɔ́ cɛ kɛ̀bɛ́ è wɔ bə̀ cɛmɛ nɛ́ yala nɛ mɔ́, bə̀ wàr bə̀ yè y yé, b'è wɔ́ bə̀myɛ́ nyǎ twéé twéé yilə.³⁵Ǹ da-byǐ gə jú jimə ǹ sõ, ń wɔ́ dwí dõ lò ráá zhə-bal, nə̀mɔ̀ɔ̀rɛ̀ zɛ̃̀ rə ce ń wàr ǹ jìmə̀ né ń la ŋwɔ́ɔ́, ǹ m'ǎ sɛ̃ mɔ mùnì ga n gwẽ̌ jòm ǹdə́ mɔ́. ³⁶Ǹ tá ǹ la kɔn rɛ́ tɛ̀bɛ́ ǹ pɔ mɔ mɔ́ twirí ráá nyɔ̀ɔ̀rhɛ́ zõ ń sõ yé; wɔ́ èta, ǹ m'ǎ nyàm ǹ Yi rí ní, ǹ da-byǐ mú myɛ mə n ŋwɛ̀nɛ́ n jòm ǹdə́ mɔ́. ³⁷Ǹ tá ǹ la mɔ ǹ sə̀byǐ mú pɔ ń mə́ pyà twirí yé, ǹ tá ǹ la mɔ ǹ kùjú w pɔ ń mə́ pyà nyɔ̀ɔ̀rhɛ́ yé. ³⁸Wɔ́ àmyɛ́ Cinu á Yi rí, à ce á shə́r Ezhibti tənà y wa, à la ába Kanaã tənà y pɔ, mùnì ga a yə̀ Yi á yilə.⁴¹Ǹ da-byǐ gə jú jimə ǹ sõ n zɛ̃̀ n yè ń cìn ǹdə́ mɔ́, ǹ tá ǹ la ce n twĩ̀ yómdé tum yé; ⁴⁰ǹ m'ǎ zə mɔ ǹdə lò mɔ̀bɔ́ bə̀ kwè bə̀ n'ê kwɛ̃̌ ta ráá ǹdə zhə-bal ta; ń mà n yə̀ ǹ tùntùnnə kɔn b'e yí fùwə́ nánfɔ̀lɔ̀ w byin rí; ³⁹rə̀myɛ́ kwã ń mà n shə́r ǹ sõ ǹdə́ ń byǎ bɛ́ n ká n vò ń dwí rí wə; ń mà n ká n vò n jòm ń dabá cɛ y wa.⁴²Zhə̀nà, lyì bí byɛ̀bɛ́ à ce bə shə́r Ezhibti ní mú wɔ́ à tùntùnnə; bə̀ bə mə̌ sə bə yè be ǹdə bə̀ gə́ n'ê yə̀ yómə́ né yé. ⁴³Ǹ tá ǹ la mɔ cìnú ǹdə́ jɔ́ɔ́rɛ yé; wɔ́ èta ǹ m'ǎ nyàm ǹ Yi rí ní. ⁴⁴Sə è gə wɔ́ tùntùnnə bé, bə̀ wɔ́ bala ráá kana, ǹ mə̌ sə́ zə mɔ́ yilə, á m'ǎ yè be dwə́ né nyɛ̀bɛ́ nə̀ kə́kɛ́lɛ́ ába mɔ́ sõ;⁴⁵á wɔ̌ á m'ǎ súlí á yè be dwə́ né nyɛ̀bɛ́ nə̀ wɔ́ zhələ nə̀ tú nə̀ jě á sõ mó byǎ bɛ́ wẽ́, ráá nyɛ̀bɛ́ nə̀ lùl á tənà y w mɔ́ byǎ bɛ́ wẽ́. Bə̀ m'a yə̀ á cəl tɛ̀bɛ́ ⁴⁶á la yõ̌ á pə á byǎ bɛ́ nɛ bə cìní bi ámyɛ̌ kwã nɛ́ bə yə̀ bə̀myɛ́ cəl zhə̀n ga. È gə wɔ́ bə̀myɛ́, á wɔ̌ á m'ǎ cìní bi gaga yilə, sə è gə wɔ́ á da-byǎ Esərayɛl lyì byǎ bɛ́ yilə, á mə̀dù ga tá ń la ń da-byǐ cìnú ǹdə́ jɔ́ɔ́rɛ yé.⁴⁷Dwí dõ lò ráá zhə-bal ń ŋwɛ́nɛ́ ǹ sõ jɛ̃̀ gə zhe kɔna, ǹ da-byǐ zɛ̃̀ n jí jimə ń sõ n zɛ̃̀ n súlí n yè ń cìn ǹdə́ dwí dõ lò mó ń wɔ́ zhə-bal ǹ sõ mó, ráá ǹdə́ zhə-bal dwí dõ lò, ⁴⁸bə̀ wɔ̌ bə̀ m'a kwɛ̃̌ bə zwẽ ǹ da-byǐ mú, ń cìn yǒ mó kwã nɛ́: ń da-byǎ bɛ́ mə̀dù wɔ̌ ń mà n kwɛ̃̌ n zwẽ mo;⁴⁹ń da da-byǐ ráá ń da-byǐ byǐ, lò mɔ̀bɔ́ ńmyɛ̌ ǹdə́ ńmyɛ̌ wɔ́ jal mə̀dù, ń kwálá-jì y lò, wɔ̌ ń kwɛ̃̌ ń zwẽ mo; ráá ń cìcì mú wɔ̌ ń kwɛ̃̌ ń zwẽ ń cìnə̀, ǹdə́ ń gə zhe rə̀ yàlà. ⁵⁰Rə̀myɛ́ yi ní, ńmyɛ̌ ǹdə́ lò mó mɔ̀bɔ́ ń yè ń cìn ń sõ mó m'a ce dwã yó, ń mà n zɛ̃̀ n jə̀ə̀lè byinə né nyɛ̀bɛ́ nə̀ wɔ ń cìn yǒ byin rí ǹdə́ fùwə́ nánfɔ̀lɔ̀ w byin rí bwə̌l w mó yó wə́, mùnì ga ń yǒ mó ye y mɛrhɛ dwã ǹdə byinə né nə̀myɛ́ mɔ́ yó wə́, kɔn tó dwã ǹdə lò mɔ̀bɔ́ bə̀ kwè bə̀ n'ê kwɛ̃̌ mɔ́ dɛ̃ rə̀dù kwǎndɛ́.⁵¹Fùwə́ nánfɔ̀lɔ̀ w byinə né nə̀ dàl mɔ́ gə gwẽ̌ já, ń mà n càrh ń cìn yǒ mó ye y kə̀kàlà e mɛrhɛ dwã ǹdə bə̀ gə́ yè mo né, n mə n kwɛ̃̌ n zwẽ ń cìnə̀. ⁵²Fùwə́ nánfɔ̀lɔ̀ w byinə né nə̀ dàl mɔ́ gə k'ê bə já, ń mà n jə̀ə̀lè byinə né yó wə́, n zɛ̃̀ n càrh ye y ń la kwã̀ɔ̃́ n mə n zwẽ ń cìn mú e mɛrhɛ dwã ǹdə byinə né yó wə́.⁵³Byin byin gakó, lò mó mɔ̀bɔ́ bə̀ yè mó mà n já n mɛ̃ lò mó mɔ̀bɔ́ ń yè mo mó sõ ǹdə tùntùnnə mɔ̀bɔ́ bə̀ kwè bə̀ n'ê kwɛ̃̌ ta, sə ǹ tá ǹ la yõ̌ n cìní mu ǹdə́ jɔ́ɔ́rɛ yé. ⁵⁴Sə bə̀ gə yə̀ ŋwɛ̀nɛ́ bə tó sɔ́msɛ́ sə̀myɛ́ èdù ga bə kwɛ̃̌ bə m'e zwẽ mo, ń mà n nə ń cìnə̀, fùwə́ nánfɔ̀lɔ̀ w byin rí, ńmyɛ̌ ǹdə́ ń bə̀sɔ́ná ga. ⁵⁵«Bə̀ wɔ́ àmyɛ́ nɛ Esərayɛl lyì byǎ bɛ́ mə̌ sə bə twĩ̀ bə pa; bə̀ wɔ́ àmyɛ́ tùntùnnə, bə̀myɛ́ byɛ̀bɛ́ à ce bə shə́r Ezhibti tənà y mɔ́. Wɔ́ àmyɛ́ à wɔ́ Cinu á Yi rí.

¹Á t'á la yə nánkɔ̀mdɛ wɔ̀rhɔ́ á cìn yil yé, á t'á la yi èsã̌yùlú ráá nə́kulu tɛ̃́ cùù yé, á t'á la nə́kulu kɔ̀bɔ́ bə̀ sə̀l mó jàà w cṹ á m'á wùlì tɛ̃́ ò yé né á tənà y w yé, bə̀ wɔ́ àmyɛ́ Cinu à wɔ́ á Yi rí. ²Tó-nə à shìrhə́ y dwã nɛ́, sə á nyàm à jì yə́. Àmyɛ́ à wɔ́ Cinu.³«Á gə zwẽ à nyə́ né, á zwẽ à byilu mú, á n'á wɛ̀rhɛ́ ǹdə mə̀ gə́ n'ê byili ní, ⁴à m'a pə ába dwèsé sə̀ yi rí wə; cɛ y wẽ̀ ré m'a byì, cɛsɛ́ cèmé né m'a ce byǎ;⁵á sõ mó, bə̀ m'a mà jíjə́ né kɔn b'e yí də̀vɛ̃́-cǒ byǎ pɔ̌r mɔ́ yi rí, də̀vɛ̃́-cǒ byǎ pɔ̌r mɔ́ yi rí myɛ m'a yí twã́-dùrú; á m'ǎ jí kùjú á j'á búl á sú, sə á m'ǎ jòm yə̀-zùlə́ wẽ́ á tənà y wa; ⁶à m'a ce yə̀-zùlə́ jòm á tənà y wa; á m'ǎ pyẽ̀ á dɛ̀ɛ̀ sə kaka t'â la á wun ni zã̀ɔ̃̀ yé; à m'a ce gɔ-wẽ̀ ré tɛ̀bɛ́ rə̀ n'ê wɛ̀rhɛ́ lwɛlɛ jé tɛ̃́ tənà y wa; búlə́ shù k'ô t'â bàn á tənà y w yé;⁷á m'ǎ pú á zwə̀ bé kùr á jì, sə á m'ǎ ŋwɛ̀nɛ́ bɛ ǹd'á búlə́ shù wə́; ⁸á nunə bə̀nu m'a jì bə̀ nunə zɔ̌m, á nunə zɔ̌m jì bə̀ nunə mɔ̀ɔ̀rhɛ̀ shíyə́, sə á m'ǎ gu á zwə̀ bé ǹd'á búlə́ shù wə́;⁹à m'a zɛ̃̀ a nyǐ á sõ; à m'a ce á lù byǎ, á pù; a gwẽ̌ jí dɔbrɛ ǹd'ába; ¹⁰á m'ǎ jí á jíjí rí tɛ̀bɛ́ rə̀ dɛnɛ dɛ̃́dɛ̃́ mɔ́, sə á m'ǎ pyǎr jíjí nándwə́l á ce jíjí nándùl rə̀ jàà wa;¹¹à m'a cĩ́ à zulə́ jàà y á cəcəl wə; à k'â t'â la ába zhɔ̃́ yé; ¹²à m'à n'â zhə̀l á cəcəl wə; à m'a yə̀ Yi á yilə, sə á m'ǎ yə̀ dwí àmyɛ́ yilə. ¹³Wɔ́ àmyɛ́, Cinu á Yi rí, à ce á shə́r Ezhibti lyì bí tənà y wa, mùnì ga á bə̀k'á k'á twĩ̀ á pə bɛ yé; wɔ́ àmyɛ́ à kɔ́ á zhĩĩ rí də̀-byǎ bɛ́ a ce á ŋwɛ̀nɛ́ á kwẽ̌ á yó dɛ̃̌ á m'á zhə̀l mó.¹⁴«Á gə yə̀ ne cili, á súlí á yə̀ kɔn rɛ́ tɛ̀bɛ́ èta mɔ́ à pɔ ába rə̀ nyí mú gakó wɛ̀rhɛ́ ǹdə kɔn gə́ mə̌ sə rə wɛ̀rhɛ́ nɛ́, ¹⁵á cẽ à nyə́ né zõ yò, á zhɛ̃̀ à lùl-e-púrsí á m'á cẽ kɔn rɛ́ tɛ̀bɛ́ à pɔ ába rə̀ nyí mú gakó wɔ̀rhɔ́ yò ǹdə kɔn gə́ mə̌ sə rə wɛ̀rhɛ́ nɛ́ ma mɔ́, á zɛ̃̀ á cɔ̀ à dɔbrɛ́,¹⁶rə̀myɛ́ yi ní, nyǐ kɔn rɛ́ tɛ̀bɛ́ àmyɛ́ la ába wɔ̀rhɔ́ mɔ́:À m'a ce címí y kɛ̀bɛ́ è n'ê ce lò kwɛ̀rɛ̀ mɔ́ ǹdə́ kɛ̀bɛ́ è n'ê ce lò yala shɛ̃̀ mɔ́ zə ába, a m'a ce wu-zɛ̃̀ɛ̃́ nánfwɛ̀lɛ̀ zə ába, címsí sə̀myɛ́ m'à j'â n'ê gwi á yírhə́ né, sə̀ n'ê jí ába námpɔ́lɛ́ námpɔ́lɛ́. Á m'ǎ dù á cɛsɛ́, sə wɔ́ nánfò yilə, á zwə̀ bé bə̀ m'a zə sɛ bə kɔ̃̀ bə̀ cìnə̀. ¹⁷À m'a bú ǹd'ába, sə á zwə̀ bé m'a ŋwɛ̀nɛ́ ába; byɛ̀bɛ́ bə̀ súl ába mɔ́ m'a cìní ába, sə á m'ǎ zɛ̃̀ á n'á dùr ywə́l ǹdə́ lòlò tá ń jì ába ga myɛ.¹⁸Á gə gwẽ̌ cẽ á t'á cili ni, a m'a pə ába còrhò-tum mə̀ càn rɛ́ yí twər tàlpyɛ̀ á yə̀-bəlwàálɛ́ yilə. ¹⁹À m'a cɔ̀ jàn rɛ́ tɛ̀bɛ́ rə̀ ce á n'á zhẽ̌ á cìn dɛ̃̌ mɔ́, a ce á dɛ̃̌-yi rí jǐrh nánkùlù ǹdə cɔ̀bɔ́ ta, á cɛ y jǐrh ǹdə kàmmɔ nɛ; ²⁰á m'ǎ zhɛ̀ á jàn rɛ́ nánfò, cɛ y wẽ̀ ré k'ê t'â la byíl yé, tənà y cèmé né myɛ k'ê t'â la byǎ co yé.²¹Á gə cẽ à nyí ni, á zɛ̃̀ á t'á yǎl á cili ni, à m'a pə ába còrhò-tum rə̀ càn rɛ́ yí twər tàlpyɛ̀, kɔn mɛrhɛ á yə̀-bəlwàálɛ́. ²²À m'a twĩ̀ gɔ-wẽ̀ á sõ, rə bə̀ rə zə á byǎ bɛ́ rə yẽ̌ ába, rə gurhi á vwàmá nɛ́, rə ce á jé tɛ̃́, á sɔ́msɛ́ m'a zɛ̃̀ sə pyẽ̀ nánfò rə̀myɛ́ yi ní.²³Sə còrhò-tum rí rə̀myɛ́ gə gwẽ̌ t'â wɛ̀rhɛ́ ába kaka, á gaga mɔ́ j'á zɛ̃̀ á gwẽ̌ n'á cẽ à nyí ni, ²⁴àmyɛ m'a bú ǹd'ába, àmyɛ m'a pə ába còrhò-tum twər tàlpyɛ̀ á yə̀-bəlwàálɛ́ yilə.²⁵À m'a ce búlə́ shù w kɔ̀bɔ́ ò la jim rí cṹ Dɔbrɛ́ yil mú b'ǎ sõ, sə á m'ǎ bə̀ dwã yó á cɛmɛ nɛ́ wa. À m'a twĩ̀ cím-bəlwɛ̀lɛ́ á cəcəl wə, sə á m'ǎ tu á zù-bal mɔ́ jɔ̃̀ wa. ²⁶À gə tú à vòm ába búrú yi ní, kana shí gakó m'a ŋwɛ̀nɛ́ bə tɛnɛ á búrú w shɔ̃́ òdù wẽ́; búrú kɔ̀bɔ́ bə̀ la zə bə bə̀ bə pə ába mɔ́ wɔ́ byə́r bə̀ m'a byə̌r byə̌r w bə pə ába, á m'ǎ dɔ̃̀ w sə á t'á la sú yé.²⁷Sə ǹdə́ rə̀myɛ́ ga, á gə gwẽ̌ cẽ á t'á la nɛ cilu, á zɛ̃̀ á n'á bwí ǹdə́ nɛ, ²⁸à m'a bú ǹd'ába ǹdə́ lyim nánfɔ̀lɔ̀; àmyɛ́ cìcì mú m'a pə ába còrhò-tum twər tàlpyɛ̀ á yə̀-bəlwàálɛ́ yilə.²⁹Á m'ǎ dɔ̃̀ á byǎ bɛ́ yala nàmá bɛ́, á m'ǎ dɔ̃̀ á bə̀kwá bɛ́ yala nàmá bɛ́. ³⁰À m'a ce á vwə̃̀ né zwə́l jààsɛ́ jé tɛ̃́, à m'a ce á vwə̃̀ né jùúlí nyɛ̀bɛ́ bə̀ n'ê ji wẽ̀ rə̀ lwẽ́ nã́nyə̀nyɛ̀lɛ́ nə̀ yó mó jé tɛ̃́; à m'a ló á cùùrí a pyɛ̀lɛ́ á yə né yó, a zɛ̃̀ a zhɛ̃̀ ába.³¹À m'a cɔ̀ á cɛmɛ nɛ́ lyə́m lyə́m, a ce wu-zhùlù nánfɔ̀lɔ̀ á yə né jìsí wə; à k'â t'â la á wẽ̀ ré rə̀ lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́ yò shɔ̀nɔ́ yé; ³²à cìcì mú m'a ce á tənà y sú ǹdə́ wu-zhùlù nánfɔ̀lɔ̀, sə kɔn m'a jàr á zwə̀ bé bə̀ bàn è wẽ́ jǒm mó. ³³Sə è gə wɔ́ ámyɛ̌ yilə, à m'a làà ába tɛ̃́ dwə́ né dwã bɛ́ cəcəl wə, à m'a vùr búlə́ shù a m'a bú ǹd'ába; á tənà y m'a jǐrh èpòlò sə á cɛmɛ nɛ m'a jǐrh jì-bwə̀r.³⁴Rə̀myɛ́ yi ní, tənà y m'a pyìrh è shìrhə́ dwã nɛ́ nyí rí, wu-zhùlù dwã nɛ́ nyɛ̀bɛ́ gakó á cìcì mú la wɔ̀rhɔ́ á zwə̀ bé tənà y mɔ́ yi ní; rə̀myɛ́ yó, tənà y m'a shǐrh sə è m'a pyìrh è shìrhə́ dwã nɛ́ nyí rí; ³⁵wu-zhùlù dwã nɛ́ nə̀myɛ́ gakó yi ní, è m'a shǐrh, e m'e cĩ́ shìrhə́ dwã nɛ́ nyɛ̀bɛ́ è y'à yə̀ ŋwɛ̀nɛ́ e shǐrh mú jàà wa, á gə́ y'ǎ wɔ è wẽ́ mó yi ní mú. ³⁶È gə wɔ́ byɛ̀bɛ́ bə̀ la dǎl á cəcəl w mó yilə, à m'a ce bə̀ wun ga, bə̀ zwə̀ bé cɛmɛ nɛ́ wa. Cǒ vɔ kɔ̀bɔ́ ò n'ô twi tɛ̃́ dweme ré cìcì m'a ce bə zɛ̃̀ bə̀ n'ê dùrə̀; bə̀ m'a dùr ǹdə bə̀ gə́ y'a dùr búlə́ shù yé né ta, sə bə̀ m'a tu tɛ̃́ ǹdə́ lòlò myɛ tá n jì bi ga;³⁷Bə̀ m'a ló ló tɛ̃́ dwã yó ǹdə wɔ́ búlə́ shù yé né bə̀ n'ê dùr ni ta, ǹdə́ lòlò myɛ tá n jì bi ga. Á t'á la ŋwɔ̀nɔ́ á zhì á bú ǹd'á zwə̀ bé yé. ³⁸Á m'ǎ cì dwə́ né dwã bɛ́ sõ, sə á zwə̀ bé tənà y m'a jí ába. ³⁹Byɛ̀bɛ́ bə̀ la dǎl á cəcəl w mó m'a kwɛ̀rɛ̀ bə̀ dóó w yilə, á zwə̀ bé tənèsé wẽ́; bə̀ m'a kwɛ̀rɛ̀ bə̀ nàmbala bɛ́ ǹdə́ bə̀ cìcì dwə́ə́ré myɛ yilə.⁴⁰«Sə bə̀ m'a byili bə̀ dóó w ǹdə́ bə̀ nàmbala bɛ́ nyɔ̌ wá, bə wɔ̀ bə̀ bə̀ dó ne ǹdə́ dóó nánfɔ̀lɔ̀, bə̀ bə̀ gaga mɔ́ cẽ à nyí ni, ⁴¹bə̀ rə̀myɛ́ ce à bú ǹdə́ bɛ, a zə bɛ a m'a vò bə̀ zwə̀ bé tənà y wa; ráá bə̀ dɛ̃ rə̀dù, bə̀ wun ní nə̀ pyi mú m'a pyìrhí sə bə̀ còrhò-tum rí m'a pyìrh. ⁴²Rə̀myɛ́ yó, à m'a lyǐrh à dɔbrɛ́ ǹdə́ Zhakɔɔbɛ mɔ́ yò, a súlí a lyǐrh à dɔbrɛ́ ǹdə́ Yəzakɛ mɔ́ yò e súlí à dɔbrɛ́ ǹdə́ Abəraam mɔ́ yò; à m'a lyǐrh tənà y yò.⁴³Èta bə̀ gə tú bə̀ shə́r bə̀ yẽ̌ tənà y nɛ, è gə pyìrh è shìrhə́ dwã nɛ́ nyí rí ǹdə́ bə̀ yẽ̌ y wu-zhùlù wẽ́ yi ní, bə̀ còrhò-tum rí gə tú rə̀ pyìrh bə̀ bə̀ cẽ à lùl-e-púrsí yò, bə súlí bə zhɛ̃̀ à nyə́ né yilə,⁴⁴rə̀myɛ́ yi ní, ǹdə́ rə̀myɛ́ ga, bə̀ gə tú bə̀ ŋwɛ́nɛ́ bə̀ zwə̀ bé tənà y w yi ní, à t'â la bɛ zhɔ̃́, à t'â la bɛ súl, kɔn b'e yí a ce bə jé tɛ̃́ lyə́m lyə́m, a súlí a cɔ̀ à dɔbrɛ́ ǹdə́ bɛ myɛ yé, bə̀ wɔ́ àmyɛ́ à wɔ́ Cinu bə̀ Yi rí. ⁴⁵À m'a lyǐrh à dɔbrɛ́ à zɔ ǹdə́ bə̀ nàmbala bɛ́ à ce bə shə́r Ezhibti ní dwə́ né gakó yírh w mú yò mùnì ga a yə̀ Yi bə̀ yilə, àmyɛ́ Cinu, a ce nyí bə̀ kwã nɛ́.»⁴⁶Wɔ́ nyə́ nə̀myɛ́ Cinu kwè ǹdə́ lùl-e-púrsí sə̀myɛ́ e súlí nyə́ nə̀myɛ́ ń vùr n tó Muyiisi dɛnnɛ n pa, ńmyɛ̌ ǹdə́ Esərayɛl lyì byǎ bɛ́ shò kwã nɛ́, Sənəyi pyɔ̀ w yó mó.

¹Cinu zɔ̀m ǹdə́ Muyiisi n wɔ̀: ²«Wál Esərayɛl lyì byǎ bɛ́ nɛ: Bə̀ gə zɔ numbyíní bə m'e dwĩ̀ nyí Cinu ni, bə zɛ̃̀ bə̀ la rɛ vǔr,³È gə wɔ́ byinə shí-èlyè e m'e vò byinə shə́-shə̀ldù cə́bal, bə̀ m'a pə sə̀byì-kùlsi shí-ènu, bə̀ n'ê jə̀ə̀lè ǹdə́ còrhó-jì y sə̀byì-kùlì y ye yə́; ⁴è gə wɔ́ kɛ̃, bə̀ m'a pə sə̀byì-kùlsi shə́-ètɔ̀;⁵è gə wɔ́ byinə nə̀nu e m'e vò shí-èlyè byǐ, è gə wɔ́ bal-byǐ bə̀ m'a pə sə̀byì-kùlsi shí-èlyè, è gə wɔ́ kɛ̃-byǐ bə̀ m'a pə sə̀byì-kùlsi shíyə́; ⁶è gə wɔ́ cànà èdù e m'e vò byinə nə̀nu bə̀sɔ́bwɛ̀lɛ́, è gə wɔ́ bal-byǐ bə̀ m'a pə sə̀byì-kùlsi sə̀nu, è gə wɔ́ kɛ̃-byǐ bə̀ m'a pə sə̀byì-kùlsi sə̀tɔ̀;⁷è gə wɔ́ byinə shə́-shə̀ldù è m'ê la cə́bal, è gə wɔ́ bal bə̀ m'a pə sə̀byì-kùlsi shí ǹdə́ sə̀nu, è gə wɔ́ kɛ̃ bə̀ m'a pə sə̀byì-kùlsi shíyə́. ⁸Lò gə wɔ́ nə̀mɔ̀-cɛ̀lɛ́, ń wàr sə̀byǐ mú mɔ̀bɔ́ bə̀ byili mú ń la pɔ, ń mà n zə lò mó mɔ̀bɔ́ ń mə n dwĩ̀ nyí rí mú n mə n bə̀ vwĩ̀-zwə́lnə mó yé né, mùnì ga vwĩ̀-zwə́lnə mó nyǐ mu n zɛ̃̀ n jə̀ə̀lè sə̀byǐ mú mɔ̀bɔ́ bə̀ mə̌ sə bə pə ń jàà w mɔ́; vwĩ̀-zwə́lnə mó nə́ ń nyǐ kɔn rɛ́ tɛ̀bɛ́ mɔ̀bɔ́ ń dwĩ̀ nyí rí zhe rə̀ yala mɔ́ n mə n jə̀ə̀lè ye y bə̀ m'a pə mɔ́.⁹Lò gə dwĩ̀ vwǎm mɔ̀bɔ́ mə̀ wɔ̌ mə̀ pɛ Cinu ni mú nyí, vwǎm mə̀myɛ́ wɔ́ Yi kɔna; ¹⁰bə̀ t'â la vwǎm dõ mə̀ jàà w cṹ yé, bə̀ j'à t'â la mɔ lyə́r yé, bə̀ t'â la vwǎm mɔ̀bɔ́ mə̀ càn mɔ̀bɔ́ mə̀ bə càn mɔ́ jàà w cṹ yé, bə̀ t'â la mɔ̀bɔ́ mə̀ bə càn mɔ̀bɔ́ mə̀ càn mɔ́ jàà w cṹ yé. Sə ǹdə́ rə̀myɛ́ ga, vwǎm mɔ́ mɔ̀bɔ́ bə̀ cĩ́ mə̀ dõ mó jàà w mɔ́ ǹdə́ mə̀ dõ mó ga wɔ́ Yi nyə̀ná.¹¹Lò gə dwĩ̀ vwǎm mɔ̀bɔ́ mə̀ zhe jìmdi nyí Cinu ni, vwǎm mɔ̀bɔ́ bə̀ wàr bə̀ m'a pə Cinu ni mú, bə̀ m'a zə mɔ bə m'e bə̀ vwĩ̀-zwə́lnə mó yé né; ¹²vwĩ̀-zwə́lnə mó nə́ ń nyǐ mu, n jə̀ə̀lè n nyǐ mə̀ càn ráá mə̀ bə càn, sə bə̀ m'a shɛ̀nɛ́ ye y kɛ̀bɛ́ vwĩ̀-zwə́lnə mó jə̀ə̀lè n byili mú; ¹³Sə bə̀ gə n'ê yǎl bə pə kɔn mə̀ jàà w bə m'e zwẽ mo, bə̀ m'a súlí mə̀ ye y kùr ré rə̀dù y ní ǹdə́ bə gə bɔ̀n y kùrə̀ nə̀nu, ye y ne n pa.¹⁴Lò gə pɔ ń jì y Cinu ni, vwĩ̀-zwə́lnə mó mà n nyǐ y n jə̀ə̀lè y n nyǐ è càn ráá è bə càn, sə bə̀ m'a shɛ̀nɛ́ ye y kɛ̀bɛ́ vwĩ̀-zwə́lnə mó jə̀ə̀le n byili mú ¹⁵Sə lò mó mɔ̀bɔ́ ń yà ń pɔ ń jì y Cinu ni mú gə zɛ̃̀ ń kə́ ń nə́ ń yǎl n kwɛ̃̌ n zwẽ ń jì yə́, ń mà n súlí ye y bə̀ jə̀ə̀lè mó kùr ré rə̀dù ǹdə́ bə̀ gə bɔ̀n y kùrə̀ nə̀nu, ye y ne n pa, rə̀myɛ́ kwã nɛ́ jì y m'a j'a k'e jǐrh ńmyɛ̌ nyǎ.¹⁶Lò gə pɔ ń cɛsɛ́ èdù Cinu ni, è ye y m'a tó dwã ǹdə́ kɔn rɛ́ tɛ̀bɛ́ bə̀ wɔ̌ bə̀ m'a dù è wẽ́ mó; sə̀byì-kùlsi shí-ènu, orzhɛ cəə́le zwã̌-àtɔ̀ yilə;¹⁷lò gə pɔ ń cɛ y Cinu ni fùwə́ nánfɔ̀lɔ̀ w byin rí, bə̀ m'a j'a shɛ̀nɛ́ ye y èmyɛ́ mɔ́; ¹⁸lò gə pɔ ń cɛ y Cinu ni fùwə́ nánfɔ̀lɔ̀ w kwã nɛ́, vwĩ̀-zwə́lnə mó mà n jə̀ə̀lè è ye y kɔn tó dwã ǹdə́ byinə nyɛ̀bɛ́ nə̀ dàl éfòró fùwə́ nánfɔ̀lɔ̀ w yí mú yó wə́, sə è ye y m'a bɔ̀.¹⁹Lò mó mɔ̀bɔ́ ń pɔ ń cɛ y Cinu ni mú gə nə́ ń yǎl n kwɛ̃̌ n zwẽ yə, ń mà n súlí è ye y kùr ré rə̀dù ǹdə́ bə̀ gə bɔ̀n y kùrə̀ nə̀nu, ye y ne n pa, rə̀myɛ́ kwã nɛ́, cɛ y m'a j'a k'e jǐrh ńmyɛ̌ nyǎ. ²⁰Sə ń gə yə̀ kwɛ̃̌ n mə zwẽ ń cɛ y n zɛ̃̀ n kwè y n yè ǹdə́ lò dõ, ń kə́ ń wàr ń mà n kwɛ̃̌ n mə n zwẽ y yé, ²¹sə fùwə́ nánfɔ̀lɔ̀ w byin rí, bə̀ gə tú bə̀ yẽ̌ cɛ y nɛ, è m'a yə̀ Cinu nyǎ ǹdə cɛ y kɛ̀bɛ́ bə̀ pɔ Cinu ni twéé twéé yil ta; è m'a jǐrh vwĩ̀-zwə́lnə mó cɛ.²²Lò gə pɔ cɛ kɛ̀bɛ́ ń yà ń yè mó Cinu ni, e j'à də̀ cɛ kɛ̀bɛ́ ń dabá yẽ̌ bə pɔ̃, ²³vwĩ̀-zwə́lnə mó mà n jə̀ə̀le è ye yə́, kɔn m'e yí fùwə́ nánfɔ̀lɔ̀ w ò bàn mɔ́, sə bə̀ m'a pə ye y èmyɛ́ dɛ̃ rɛ́ rə̀myɛ́ yù w cìcì; è wɔ́ Cinu ń cǐ yə.²⁴Fùwə́ nánfɔ̀lɔ̀ w byin rí, bə̀ m'a k'a càrh cɛ y lò mó mɔ̀bɔ́ bə̀ y'à yè y ń sõ mó ne, mɔ̀bɔ́ ń cǐ y mú ni. ²⁵Bə̀ m'a zə Yi jì y sə̀byǐ mú bə m'e jə̀ə̀le ye gakó. Sə̀byǐ mə̀myɛ́ ye y yú gə̀rámməbá shíyə́.²⁶Lò wàr ń mà n pə ń vwǎm byì-yə́ə́ Cinu ni yé, bə̀ byì-yə́ə́ gaga mɔ́ j'â wɔ́ Cinu ń cǐ y dwə́l; è wɔ́ vwǎm nánfɔ̀lɔ̀ ráá vwǎm námpɔ́lɛ́ wɔ́ Cinu ń cǐ mu. ²⁷È gə wɔ́ vwǎm mɔ̀bɔ́ mə̀ zhe jìmdi, bə̀ wɔ̌ bə̀ kwɛ̃̌ bə̀ zwẽ mo, bə̀ gə súlí mə̀ ye y kùr ré rə̀dù ǹdə́ bə̀ gə bɔ̀n y kùrə̀ nə̀nu, mə̀ ye y bə̀ jə̀ə̀lè mó yó yi ní; bə̀ gə yə̀ kwɛ̃̌ bə m'e zwẽ mo, bə̀ m'a yè mo ye y bə̀ jə̀ə̀lè bə byili mú.²⁸Kɔn súlí myɛ, kɔn dɛ̀bɛ́ bə̀ pɔ Cinu ni twéé twéé yilə, numbyíní ráá vwǎm ráá cəl cɛ, bə̀ wàr bə̀ yè re ráá bə̀ kwɛ̃̌ bə m'e zwẽ re yé: kɔn tɛ̀bɛ́ bə̀ pɔ Cinu ni twéé twéé yilə, wɔ́ Cinu dúdú kɔna; ²⁹sə numbyíní kɛ̀bɛ́ bə̀ pɔ Yi ni twéé twéé yil mú, bə̀ wàr bə̀ n'ê kwɛ̃̌ bə̀ m'ê zwẽ y yé: bə̀ m'a gu yə.³⁰Kɔn kùr rə̀dù y tɛ̀bɛ́ bə̀ n'ê vùr cɛ y wẽ̀ ré byǎ bɛ́ ráá cèmé né byǎ bɛ́ kùrə̀ shí gakó yó w mó, tənà y wẽ́, wɔ́ Cinu ń cǐ ri: è wɔ́ Cinu kɔna. ³¹Lò gə nə́ ń yǎl n kwɛ̃̌ n zwẽ ń kɔn rɛ́ kùr ré rə̀dù y ń nə́ ń pɛ kùrə̀ né shí yó w mó, ń mà n pyɛ̀lɛ́ kɔn rɛ́ kùr ré rə̀dù ǹdə́ bə̀ gə bɔ̀n rɛ kùrə̀ nə̀nu yi ní, rə̀ yó w n pa.³²Vwǎm nánfwààlɛ́ shí nyǎn mɔ́ ráá və̌-ywàálɛ shí nyɔ̃̌ wá, è n'ê yǎl e wɔ̀ shí nyǎn mɔ́ bə̀ n'ê cĩ́ də̀-dɔ̀lɔ̀ w mə̀ yó mó wɔ́ Cinu ń cǐ mu; ³³bə̀ t'â la vwàmá nyɛ̀bɛ́ nə̀ càn mɔ́ ráá nyɛ̀bɛ́ nə̀ bə càn mɔ́ cír yé, e súlí myɛ bə̀ t'â la vwǎm lyə́r bə cĩ́ mə̀ dõ mə̀ jàà w yé; sə ǹdə́ rə̀myɛ́ ga, bə̀ gə lyə́r vwǎm bə cĩ́ mə̀ dõ mə̀ jàà wa, vwǎm mɔ̀bɔ́ bə̀ cĩ́ mə̀ dõ mó mə̀ jàà y w myɛ wɔ́ Cinu nyǎm: bə̀ wàr bə̀ m'a kwɛ̃̌ bə m'e zwẽ mo yé.»³⁴Wɔ́ nyə́ né nyɛ̀bɛ́ Cinu tó Muyiisi dɛnnɛ n pə Esərayɛl lyì byǎ bɛ́ yil Sənəyi pyɔ̀ w yó mó èta.

¹Cinu zɔ̀m ǹdə́ Muyiisi Sənəyi gɔ-elũ èpòlò w wə, dwã-joló kòrhó w wə; è yàl Esərayɛl lyì byǎ bɛ́ gə́ shə́r Ezhibti tənà y w mɔ́ kwã nɛ́, byinə nə̀lyè nyǎn rɛ́, cànsɛ̀ sə̀lyè nyǎ y dɛ̃ nã́yéé ré. Cinu wə̀l mo: ²«Kɛ̃-na bala bɛ́ púlə́púlə́ mə̀dù mə̀dù gakó yil ré, á m'á gə̀ Esərayɛl lyì byǎ bɛ́ gakó, jì jì ǹdə́ kɛ̀lɛ́ kɛ̀lɛ́. ³Ǹmyɛ́ ǹdə́ Aarɔ̃ gál-na bala bɛ́ byɛ̀bɛ́ bə̀ zhe byinə shí-èlyè è m'ê la mɔ́, lyì bí byɛ̀bɛ́ bə̀ wɔ́ Esərayɛl shə̀dɛ́ɛ́sɛ́ mɔ́ gakó, lò gakó ń shə̀dɛ́ɛ́sɛ́ kùkùl ré wẽ́.⁴Sə kwálá gakó bal, bal mɔ̀bɔ́ ń wɔ́ kɛ̀lɛ́ cə́bal yə̀ nɛ́ ǹd'ába. ⁵Nyǐ bala bɛ́ byɛ̀bɛ́ bə̀ m'a sɛ̃ ába mɔ́ yilə né: Shədəwuuri byǐ Eləsuuri, Orɔbɛn kwálá y yilə, ⁶ǹdə́ Kurəshədəyi byǐ Shəlumyəə, Shəmənyɔ̃ kwálá y yilə,⁷ǹdə́ Amyənadaabɛ byǐ Nashɔ̃, Zhəda kwálá y yilə, ⁸ǹdə́ Sɔwaarɛ byǐ Nətanəyəə, Yəsakaarɛ kwálá y yilə, ⁹e súlí Elɔ̃ byǐ Eləyaabɛ, Zabyəlɔ̃ kwálá y yilə.¹⁰È gə wɔ́ Zhozefu byǎ bɛ́ yilə: Amyəwuudi byǐ Elyəshama, Efərəyim kwálá y yilə, ǹdə́ Pədəsuuri byǐ Gamələyəə, Manasɛ kwálá y yilə, ¹¹ǹdə́ Jədoni byǐ Abyədan, Bɛ̃zhamɛ kwálá y yilə,¹²ǹdə́ Amyəshədəyi byǐ Ayəzɛɛrɛ, Dan kwálá y yilə, ¹³ǹdə́ Okəran byǐ Pəjəyəə, Asɛɛrɛ kwálá y yilə, ¹⁴ǹdə́ Dəwəə byǐ Eləyasaafɛ, Gaadɛ kwálá y yilə, ¹⁵e súlí Enan byǐ Ayəra, Nəfətəlyi kwálá y yilə.»¹⁶Wɔ́ bə̀myɛ́ byɛ̀bɛ́ bə̀ y'à vùr dwí rí wẽ́ mó èta, bə̀ y'à wɔ́ bə̀ dabá kwálsɛ́ èdù èdù gakó yó-cìnə́: bə̀ y'à súlí bə̀ wɔ́ Esərayɛl shə̀dɛ́ɛ́sɛ mɔ̀rhɔ̀ mɔ̀rhɔ̀ yó-cìnə́ bé.¹⁷Muyiisi ǹdə́ Aarɔ̃ zə bala bɛ́ bə̀myɛ́ bə̀ y'à cír mú bə̀ la yə̀ bə̀ sanna. ¹⁸Muyiisi ǹdə́ Aarɔ̃ cĩ́ dwí rí púlə́púlə́ dwã yó, cànsɛ̀ sə̀lyè nyǎ y dɛ̃ nã́yéé ré, sə Esərayɛl lyì byǎ bɛ́ kɛ̃ bala bɛ́ byɛ̀bɛ́ bə̀ y'à zhe byinə shí-èlyè è m'ê la mɔ́ mə̀dù mə̀dù gakó yil ré, bə j'a tó rə̀ dɛnnɛ bə gə̀ bə̀ lyì bí, jì jì ǹdə́ kɛ̀lɛ́ kɛ̀lɛ́. ¹⁹Muyiisi gàl bɛ Sənəyi gɔ-elũ èpòlò w w ǹdə Cinu gə́ yà ń pɔ mɔ nyí ní.²⁰Esərayɛl byì-cɛ Orɔbɛn byǎ bɛ́ yilə: bə̀ gə́ kɛ̃ bala bɛ́ byɛ̀bɛ́ gakó bə̀ y'à zhe byinə shí-èlyè è m'ê la, e jà bə̀ y'à wɔ́ shə̀dɛ́ɛ́sɛ mə̀dù mə̀dù gakó yil ré, bə̀ dwí rí lyì bí yó w jì jì ǹdə́ kɛ̀lɛ́ kɛ̀lɛ́ mɔ́, ²¹yàl nunə mɔ̀ɔ̀rhɛ̀ shə́-èna ǹdə́ tə̀ldù ǹdə́ zwã̌-ànu (46 500) Orɔbɛn kwálá y yilə.²²Shəmənyɔ̃ byǎ bɛ́ yilə: bə̀ gə́ gàl bala bɛ́ byɛ̀bɛ́ bə̀ y'à kɛ̃ bə̀ mə̀dù mə̀dù gakó yil ré bə m'e gə̀ bɛ mɔ́, bala bɛ́ byɛ̀bɛ́ gakó bə̀ y'à zhe byinə shí-èlyè è m'ê la, e jà bə̀ y'à wɔ́ shə̀dɛ́ɛ́sɛ mɔ́, bə̀ dwí rí lyì bí yilə né, jì jì ǹdə́ kɛ̀lɛ́ kɛ̀lɛ́, ²³yàl nunə mɔ̀ɔ̀rhɛ̀ shí-ènu ǹdə́ nə̀bɔ́ ǹdə́ zwã̌-àtɔ̀ (59 300) Shəmənyɔ̃ kwálá y yilə.²⁴Gaadɛ byǎ bɛ́ yilə: bə̀ gə́ kɛ̃ lyì bí byɛ̀bɛ́ gakó bə̀ y'à zhe byinə shí-èlyè è m'ê la, e jà bə̀ y'à wɔ́ shə̀dɛ́ɛ́sɛ yilə né mó, bə̀ dwí rí lyì bí yilə né, jì jì ǹdə́ kɛ̀lɛ́ kɛ̀lɛ́, ²⁵yàl nunə mɔ̀ɔ̀rhɛ̀ shə́-èna ǹdə́ rə̀nu ǹdə́ zɔ̃̌-nyə̀ldù ǹdə́ shí-ènu (45 650) Gaadɛ kwálá y yilə.²⁶Zhəda byǎ bɛ́ yilə: bə̀ gə́ kɛ̃ lyì bí byɛ̀bɛ́ gakó bə̀ y'à zhe byinə shí-èlyè è m'ê la, e jà bə̀ y'à wɔ́ shə̀dɛ́ɛ́sɛ yilə né mó, bə̀ dwí rí lyì bí yilə né, jì jì ǹdə́ kɛ̀lɛ́ kɛ̀lɛ́, ²⁷yàl nunə mɔ̀ɔ̀rhɛ̀ shə́-shàlpyɛ̀ ǹdə́ rə̀na ǹdə́ zɔ̃̌-nyə̀ldù (74 600) Zhəda kwálá y yilə.²⁸Yəsakaarɛ byǎ bɛ́ yilə: bə̀ gə́ kɛ̃ lyì bí byɛ̀bɛ́ gakó bə̀ y'à zhe byinə shí-èlyè è m'ê la, e jà bə̀ y'à wɔ́ shə̀dɛ́ɛ́sɛ mɔ́, bə̀ dwí rí lyì bí yilə né, jì jì ǹdə́ kɛ̀lɛ́ kɛ̀lɛ́, ²⁹yàl nunə mɔ̀ɔ̀rhɛ̀ shí-ènu ǹdə́ rə̀na ǹdə́ zwã̌-àna (54 400) Yəsakaarɛ kwálá y yilə.³⁰Zabyəlɔ̃ byǎ bɛ́ yilə: bə̀ gə́ kɛ̃ lyì bí byɛ̀bɛ́ gakó bə̀ y'à zhe byinə shí-èlyè è m'ê la, e jà bə̀ y'à wɔ́ shə̀dɛ́ɛ́sɛ mɔ́ yilə né, bə̀ dwí rí lyì bí yilə né, jì jì ǹdə́ kɛ̀lɛ́ kɛ̀lɛ́, ³¹yàl nunə mɔ̀ɔ̀rhɛ̀ shí-ènu ǹdə́ tàlpyɛ̀ ǹdə́ zwã̌-àna (57 400) Zabyəlɔ̃ kwálá y yilə.³²È gə wɔ́ Zhozefu byǎ bɛ́ myɛ̌ yilə: Efərəyim byǎ bɛ́ shò kwã nɛ́: bə̀ gə́ kɛ̃ lyì bí byɛ̀bɛ́ gakó bə̀ y'à zhe byinə shí-èlyè è m'ê la, e jà bə̀ y'à wɔ́ shə̀dɛ́ɛ́sɛ mɔ́ yilə né, bə̀ dwí rí lyì bí yilə né, jì jì ǹdə́ kɛ̀lɛ́ kɛ̀lɛ́, ³³yàl nunə mɔ̀ɔ̀rhɛ̀ shə́-èna ǹdə́ zwã̌-ànu (40 500) Efərəyim kwálá y yilə.³⁴Manasɛ byǎ bɛ́ shò kwã nɛ́: bə̀ gə́ kɛ̃ lyì bí byɛ̀bɛ́ gakó bə̀ y'à zhe byinə shí-èlyè è m'ê la, e jà bə̀ y'à wɔ́ shə̀dɛ́ɛ́sɛ mɔ́ yilə né, bə̀ dwí rí lyì bí yilə né, jì jì ǹdə́ kɛ̀lɛ́ kɛ̀lɛ́, ³⁵yàl nunə mɔ̀ɔ̀rhɛ̀ shə́-ètɔ̀ ǹdə́ rə̀lyè ǹdə́ zwã̌-àlyè (32 200) Manasɛ kwálá y yilə.³⁶Bɛ̃zhamɛ byǎ bɛ́ shò kwã nɛ́: bə̀ gə́ kɛ̃ lyì bí byɛ̀bɛ́ gakó bə̀ y'à zhe byinə shí-èlyè è m'ê la, e jà bə̀ y'à wɔ́ shə̀dɛ́ɛ́sɛ yilə né mó, bə̀ dwí rí lyì bí yilə né, jì jì ǹdə́ kɛ̀lɛ́ kɛ̀lɛ́, ³⁷yàl nunə mɔ̀ɔ̀rhɛ̀ shə́-ètɔ̀ ǹdə́ rə̀nu ǹdə́ zwã̌-àna (35 400) Bɛ̃zhamɛ kwálá y yilə.³⁸Dan byǎ bɛ́ yilə: bə̀ gə́ kɛ̃ lyì bí byɛ̀bɛ́ gakó bə̀ y'à zhe byinə shí-èlyè è m'ê la, e jà bə̀ y'à wɔ́ shə̀dɛ́ɛ́sɛ yilə né mó, bə̀ dwí rí lyì bí yilə né, jì jì ǹdə́ kɛ̀lɛ́ kɛ̀lɛ́, ³⁹yàl nunə mɔ̀ɔ̀rhɛ̀ shə́-shə̀ldù ǹdə́ rə̀lyè ǹdə́ zɔ̃̌-nyàlpyɛ̀ (62 700) Dan kwálá y yilə.⁴⁰Asɛɛrɛ byǎ bɛ́ yilə: bə̀ gə́ kɛ̃ lyì bí byɛ̀bɛ́ gakó bə̀ y'à zhe byinə shí-èlyè è m'ê la, e jà bə̀ y'à wɔ́ shə̀dɛ́ɛ́sɛ yilə né mó, bə̀ dwí rí lyì bí yilə né, jì jì ǹdə́ kɛ̀lɛ́ kɛ̀lɛ́, ⁴¹yàl nunə mɔ̀ɔ̀rhɛ̀ shə́-èna ǹdə́ òdù ǹdə́ zwã̌-ànu (41 500) Asɛɛrɛ kwálá y yilə.⁴²Nəfətəlyi byǎ bɛ́ yilə: bə̀ gə́ kɛ̃ lyì bí byɛ̀bɛ́ bə̀ y'à zhe byinə shí-èlyè è m'ê la, e jà bə̀ y'à wɔ́ shə̀dɛ́ɛ́sɛ yilə né mó, bə̀ dwí rí lyì bí yilə né, jì jì ǹdə́ kɛ̀lɛ́ kɛ̀lɛ́, ⁴³yàl nunə mɔ̀ɔ̀rhɛ̀ shí-ènu ǹdə́ rə̀tɔ̀ ǹdə́ zwã̌-àna (53 400) Nəfətəlyi kwálá y yilə.⁴⁴Nyǐ yó w kɔ̀bɔ́ Muyiisi ǹdə́ Aarɔ̃ ǹdə́ Esərayɛl yó-cìnə́ shí ǹdə́ bə̀lyè yə́, kwálá gakó y'à zhe è lò, gàl bə nə mɔ́. ⁴⁵Esərayɛl lyì byǎ bɛ́ gakó bə̀ gàl kɛ̀lɛ́ kɛ̀lɛ́, byɛ̀bɛ́ bə̀ y'à zhe byinə shí-èlyè è m'ê la, e jà bə̀ y'à wɔ́ Esərayɛl shə̀dɛ́ɛ́sɛ mɔ́, ⁴⁶gakó yó w yàl nunə mɔ̀ɔ̀rhɛ̀ zɔ̃̌-nyə̀ldu ǹdə́ rə̀tɔ̀ ǹdə́ zwã̌-ànu ǹdə́ shí-ènu (603 550).⁴⁷Levyi dwí rí lyì bí, bə̀ da kwálá y è nyí ní, bə̀ y'à yə̀ Esərayɛl lyì byǎ bɛ́ dwã bɛ́ nɛ tó bə gə̀ yé.Zulə́ jàà y gə́ m'a cĩ́ ní ⁴⁸Zhə̀n ga Cinu yà ń zɔ̀m ǹdə́ Muyiisi n wɔ̀: ⁴⁹«Levyi kwálá y lyì bí dúdú ǹ tá ǹ la gál yé, bə̀myɛ́ dúdú yó w ǹ tá ǹ la pyǎ Esərayɛl lyì byǎ bɛ́ dwã bɛ́ wẽ́ yé.⁵⁰Ǹ m'ǎ ce Levyi dwí rí lyì bí n'ê nyǐ Yi kòrhó w nə́kulu bwə̀lsé nyə́ né kɛ̃ sə̀ yó mó, wɔ ò wẽ́ mó, ǹd'ô wẽ̀ ré dwã bɛ́ gakó e súlí ò tum wẽ̀ ré gakó mó yò. Bə̀ m'à n'ê zhĩ Yi kòrhó w ǹd'ô wẽ̀ ré dwã bɛ́ gakó. Bə̀ m'à n'ê twĩ̀ ò tum rí, sə bə̀ m'à n'ê zul bə̀ kə́kɛ́lɛ́ wa.⁵¹Yi kòrhó w gə tú ò la ò jàà w zhǐr, Levyi kwálá y lyì bí m'a wǔr wə; sə Yi kòrhó w gə tú ò la jàà w myɛ zhǔ, wɔ́ bə̀myɛ́ myɛ bə̀ m'a k'a pú wə. Bə̀ m'a gu lyì-fò mɔ̀bɔ́ ń bwəlse ò nyí ni mú. ⁵²Esərayɛl lyì byǎ bɛ́ m'a zul, lò gakó ń jàà y wa, ń shə̀dɛ́ɛ́sɛ́ kùkùl ré wẽ́.⁵³È gə wɔ́ Levyi kwálá y lyì bí yilə, bə̀ m'a zul bə kə́kɛ́lɛ́ Yi kòrhó w nə́kulu bwə̀lsé, nyə́ né kɛ̃ sə̀ yó mó, wɔ ò wẽ́ mó, mùnì ga rə̀myɛ́ mɔ́ ce Yi lyi-shùùrí bə̀k'a ló Esərayɛl lyì byǎ bɛ́ dwí rí yó w yé. Levyi dwí rí lyì bí m'a twĩ̀ Yi kòrhó w nə́kulu bwə̀lsé nyə́ né kɛ̃ sə̀ yó, wɔ ò wẽ́ mó tum rí.» ⁵⁴Wɔ́ rə̀myɛ́ mɔ́ Esərayɛl lyì byǎ bɛ́ wɛ̀rhɛ́; bə̀ j'a wɛ̀rhɛ́ kɔn rɛ́ tɛ̀bɛ́ cìcì Cinu yà ń pɔ rə̀ nyí Muyiisi ni mú.

¹Cinu zɔ̀m ǹdə́ Muyiisi ǹdə́ Aarɔ̃ n wɔ̀: ²«Esərayɛl lyì byǎ bɛ́ m'a zul, lò gakó ń shə̀dɛ́ɛ́sɛ́ kùkùl ré wẽ́, ń kwálá y shò lwar myɔrhɔ w kùr wə; bə̀ m'a kɔl námpɔ́lɛ́ bə yẽ̌ dwã-joló kòrhó w ne, bə zɛ̃̀ bə zul bə kə́kɛ́lɛ́ wa.³Shə̀dɛ́ɛ́sɛ́ kùkùlə̀ né nyɛ̀bɛ́ nə̀ mù dwã nɛ nə̀ wɔ́ Zhəda zulə́ jàà y kùkùl ré mó m'a zul yé né, yi-púrhí sõ. Amyənadaabɛ byǐ Nashɔ̃ ń wɔ́ Zhəda kwálá y byǎ bɛ́ yó-cə́bal mɔ́; ⁴ń shə̀dɛ́ɛ́sɛ́ yó w wɔ́ nunə mɔ̀ɔ̀rhɛ̀ shə́-shàlpyɛ̀ ǹdə́ rə̀na ǹdə́ zɔ̃̌-nyə̀ldù (74 600).⁵Yəsakaarɛ kwálá y ǹdə́ Zabyəlɔ̃ kwálá y m'a zul Zhəda kwálá y yala nɛ. Sɔwaarɛ byǐ Nətanəyəə ń wɔ́ Yəsakaarɛ byǎ bɛ́ yó-cə́bal mɔ́; ⁶ń shə̀dɛ́ɛ́sɛ́ yó w wɔ́ nunə mɔ̀ɔ̀rhɛ̀ shí-ènu ǹdə́ rə̀na ǹdə́ zwã-àna (54 400).⁷Elɔ̃ byǐ Eləyaabɛ zɛ̃̀ ń wɔ́ Zabyəlɔ̃ byǎ bɛ́ yó-cə́bal mɔ́; ⁸ń shə̀dɛ́ɛ́sɛ́ yó w wɔ́ nunə mɔ̀ɔ̀rhɛ̀ shí-ènu ǹdə́ tàlpyɛ̀ ǹdə́ zwã̌-àna (57 400).⁹Zhəda zulə́ y lyì bí gakó yó w wɔ́ nunə mɔ̀ɔ̀rhɛ̀ zɔ̌m ǹdə́ shə́-lyɛlɛ ǹdə́ tə̀ldù ǹdə́ zwã̌-àna (186 400), shə̀dɛ́ɛ́sɛ́ kùrə̀ né nə̀tɔ̀ y yilə. Wɔ́ bə̀myɛ́ bə̀ m'a tó yé bə zhǐr.¹⁰Shə̀dɛ́ɛ́sɛ́ kùkùlə̀ né nə̀ mù dwã nɛ nə̀ wɔ́ Orɔbɛn zulə́ jàà y kùkùl ré mó m'a zul jə̀-jĩ́ sõ. Shədəwuuri byǐ Eləsuuri ń wɔ́ Orɔbɛn byǎ bɛ́ yó-cə́bal mɔ́; ¹¹ń shə̀dɛ́ɛ́sɛ́ yó w wɔ́ nunə mɔ̀ɔ̀rhɛ̀ shə́-èna ǹdə́ tə̀ldù ǹdə́ zwã̌-ànu (46 500).¹²Shəmənyɔ̃ kwálá y ǹdə́ Gaadɛ kwálá y m'a zul Orɔbɛn kwálá y yala nɛ. Surəshədəyi byǐ Shəlumyəə ń wɔ́ Shəmənyɔ̃ byǎ bɛ́ yó-cə́bal mɔ́; ¹³ń shə̀dɛ́ɛ́sɛ́ yó w wɔ́ nunə mɔ̀ɔ̀rhɛ̀ shí-ènu ǹdə́ nə̀bɔ́ ǹdə́ zwã̌-àtɔ̀ (59 300).¹⁴Erəwəə byǐ Eləyasaafɛ zɛ̃̀ ń wɔ́ Gaadɛ byǎ bɛ́ yó-cə́bal mɔ́; ¹⁵ń shə̀dɛ́ɛ́sɛ́ yó w wɔ́ nunə mɔ̀ɔ̀rhɛ̀ shə́-èna ǹdə́ rə̀nu ǹdə́ zɔ̃̌-nyə̀ldù ǹdə́ shí-ènu (45 650).¹⁶Orɔbɛn zulə́ y lyì bí gakó wɔ́ nunə mɔ̀ɔ̀rhɛ̀ zɔ̌m ǹdə́ shí-ènu ǹdə́ òdù ǹdə́ zwã̌-àna ǹdə́ shí-ènu (151 450), shə̀dɛ́ɛ́sɛ́ kùrə̀ né nə̀tɔ̀ y yilə. Wɔ́ bə̀myɛ́ bə̀ la yə̀ kùkùlə̀ né nə̀lyè nyǎn rɛ́ rə̀ la pú rə zhǐr mú.¹⁷Rə̀myɛ́ kwã nɛ́, dwã-joló kòrhó w m'a zɛ̃̀ o zhǐr, Levyi zulə́ jàà y lyì bí, zulə́ jààsɛ́ cəcəl wə. Bə̀ m'a zhǐr zulə́ jàà y w kɔn tó dwã ǹdə bə̀ gə́ zul ní, lò gakó ń jàà y wa, kùkùl gakó pú rə̀ dõ mó ne.¹⁸Shə̀dɛ́ɛ́sɛ́ kùkùlə̀ né nə̀ mù dwã nɛ nə̀ wɔ́ Efərəyim zulə́ jàà y kùkùl ré mó m'a zul yi-zùr sõ. Amyəwuudi byǐ Elyəshama ń wɔ́ Efərəyim byǎ bɛ́ yó-cə́bal mɔ́; ¹⁹ń shə̀dɛ́ɛ́sɛ́ yó w wɔ́ nunə mɔ̀ɔ̀rhɛ̀ shə́-èna ǹdə́ zwã̌-ànu (40 500).²⁰Manasɛ kwálá y ǹdə́ Bɛ̃zhamɛ kwálá y m'a zul Efərəyim kwálá y yala nɛ. Pədəsuuri byǐ Gamələyəə ń wɔ́ Manasɛ byǎ bɛ́ yó-cə́bal mɔ́; ²¹ń shə̀dɛ́ɛ́sɛ́ yó w wɔ́ nunə mɔ̀ɔ̀rhɛ̀ shə́-ètɔ̀ ǹdə́ rə̀lyè ǹdə́ zwã̌-àlyè (32 200),²²Jədoni byǐ Abyədan zɛ̃̀ ń wɔ́ Bɛ̃zhamɛ byǎ bɛ́ yó-cə́bal mɔ́, ²³ń shə̀dɛ́ɛ́sɛ́ yó w wɔ́ nunə mɔ̀ɔ̀rhɛ̀ shə́-ètɔ̀ ǹdə́ rə̀nu ǹdə́ zwã̌-àna (35 400).²⁴Efərəyim zulə́ jàà y lyì bí yó w gakó wɔ́ nunə mɔ̀ɔ̀rhɛ̀ zɔ̌m ǹdə́ lyɛlɛ ǹdə́ zɔ̌m (108 100), shə̀dɛ́ɛ́sɛ́ kùrə̀ né nə̀tɔ̀ y yilə. Bə̀ m'a yə̀ kùkùlə̀ né rə̀tɔ̀ nyǎn rɛ́ rə̀ la pú rə zhǐr mú.²⁵Shə̀dɛ́ɛ́sɛ́ kùkùlə̀ né nə̀ mù dwã nɛ nə̀ wɔ́ Dan zulə́ jàà y kùkùl ré mó m'a zul jə̀-gwã̀ sõ. Amyəshədəyi byǐ Ayəzɛɛrɛ ń wɔ́ Dan byǎ bɛ́ yó-cə́bal mɔ́; ²⁶ń shə̀dɛ́ɛ́sɛ́ yó w wɔ́ nunə mɔ̀ɔ̀rhɛ̀ shə́-shə̀ldù ǹdə́ rə̀lyè ǹdə́ zɔ̌m nyàlpyɛ̀ (62 700).²⁷Asɛɛrɛ kwálá y ǹdə́ Nəfətəlyi kwálá y m'a zul Dan kwálá y yala nɛ. Okəran byǐ Pəjəyəə ń wɔ́ Asɛɛrɛ byǎ bɛ́ yó-cə́bal mɔ́; ²⁸ń shə̀dɛ́ɛ́sɛ́ yó w wɔ́ nunə mɔ̀ɔ̀rhɛ̀ shə́-èna ǹdə́ òdù ǹdə́ zwã̌-ànu (41 500).²⁹Enan byǐ Ayəra zɛ̃̀ ń wɔ́ Nəfətəlyi byǎ bɛ́ yó-cə́bal mɔ́; ³⁰ń shə̀dɛ́ɛ́sɛ́ yó w wɔ́ nunə mɔ̀ɔ̀rhɛ̀ shí-ènu ǹdə́ rə̀tɔ̀ ǹdə́ zwã̌-àna (53 400).³¹Dan zulə́ jàà y lyì bí gakó yó w wɔ́ nunə mɔ̀ɔ̀rhɛ̀ zɔ̌m ǹdə́ shí-ènu ǹdə́ tàlpyɛ̀ ǹdə́ zɔ̃̌-nyə̀ldù (157 600). Bə̀ m'a tà kwã bə zhǐr, kùkùl gakó m'a pú rə̀ dõ kùrə̀.»³²Nyǐ Esərayɛl lyì byǎ bɛ́ bə̀ gàl kwálá kwálá mɔ́, zulə́ jààsɛ́ lyì bí bə̀ gàl shə̀dɛ́ɛ́sɛ kùkùl kùkùl mú gakó yó wə́: nunə mɔ̀ɔ̀rhɛ̀ zɔ̃̌-nyə̀ldù ǹdə́ rə̀tɔ̀ ǹdə́ zwã̌-ànu ǹdə́ shí-ènu (603 550). ³³Bə̀ yə̀ dwã tó bə gə̀ Levyi dwí rí lyì bí ǹdə́ Esərayɛl lyì byǎ bɛ́ dwã bɛ́ yé; wɔ́ nyí rí tɛ̀bɛ́ Cinu yà ń pɔ Muyiisi ni mú.³⁴Wɔ́ rə̀myɛ́ Esərayɛl lyì byǎ bɛ́ wɛ̀rhɛ́. Bə̀ y'à n'ê zul shə̀dɛ́ɛ́sɛ kùkùl kùkùl, bə̀ n'ê zhǐr jì jì ǹdə́ kɛ̀lɛ́ kɛ̀lɛ́ bə̀ m'ê tó nyí rí Cinu pɔ Muyiisi ni mú.