¹Amanini na n’amukok nafuhunerek Yesu Kristo, lolonyi ho Davide, lolonyi h’Abramo. ²Abramo nya lomonye ho Isako, Isako lomonye ho Yakobo, Yakobo lomonye ho Juhah, karik olarok honyong. ³Judah nya lomonye ho Perez karik Zerah tho Tamar, Perez lomonye ho Hezron, Hezron lomonye ho Ram.⁴Ram lomonye ho Amminabad, Amminabad lomonye ho Nahshon, karik Nahshon lomonye ho Salmon. ⁵Salmon lomonye ho Boaz tho Raham, Boaz lomonye ho Obed tho Ruth, Obed lomonye ho Jesse. ⁶Jesse nya lomonye h’ohobu Davide . Davide nya lomonye ho Solomone tho Uriah.⁷Solomone nya lomonye ho Rehoboam, Rehoboam lomonye ho Abijah, Abijah lomonye ho Aza. ⁸Aza nya lomonye ho Johoshaphat, Johoshaphat lomonye ho Joram, karik Joram nya lohohony ho Uzziah.⁹Uzziah nya lomonye ho Jotham, Jotham lomonye ho Ahaz, Ahaz lomonye ho Hezekiah. ¹⁰Hezekiah nya lomonye ho Manassek, Manasseh lomonye ho Amon, Amon lomonye ho Josiah. ¹¹Josiah nya lohohonyi ho Jechoniah karik olarok d’omiru h’eyaru nasong di Babylonia.¹²Diholu h’eyaru nasong di Babylonia, Jechoniah nya lomonye ho Sheahtiel, Sheahtiel nya lohohonyi ho Zerubabbel. ¹³Zerubabbel nya lomonye ho Abiud, Abiud nya lomonye ho Eliakim, karik Eliakin nya lomonye ho Azor. ¹⁴Azor nya lomonye ho Zadok, Zadok lomonye ho Achim, Achim lomonye ho Eliud.¹⁵Eliud nya lomonye ho Eleazar, Eleazar lomonye ho Mattham, Mattham lomonye ho Yakobo. ¹⁶Yakobo nya lomonye ho Yosefo, londe ho Maria, nayisu Yesu, loilongoi ara Kristo. ¹⁷Inyong na, owoni nyana operi tomon larangwan (14) th’Abramo do Davide, karik tomon larangwan (14) tho Davide tok d’esuka nasong di Babilonia, karik tomon larangwan (14) th’esuka nasong di Babilonia tok do Kristo.¹⁸Ahana inyana ofuk ayisuna no Yesu Kristo; ethafithahini nya Maria do Yosefo, ti, dihithemi h’amutha nasong, arimahini Maria h’ahohye th’Ohoile tho Lodwa. ¹⁹Yosefo nyana othulo lobis, ti, aang nya owak ethajuhina Maria ahu, th’anyahina arami hune dindak. Thiya, awak inyong lo edara amutha ho Maria ohwai dee.²⁰Dihide hegigilo nanyong arami hune, aindu anjelo l’Ohobu donyong ditha etharika, ajyo donyong, “Yosefo, onyakwarit lo Davide, hoibang endafaitho Maria ara afure nahoi, anyo, owejik inyong na oitho th’adwaran thon’Ohoile Lodwa. ²¹Owon de hoitho leindu iye ilongo ara Yesu – anyo, oindu de ithalwahuna ohothing honyong th’eyatha hasong.”²²Ofuhi arami hune theene, dofunerek asang hanya athuk Ohobu ajaran thol’ohocoroni iwonan ara hadiri, ²³“Oindu de athulo abothor imoho, karik awon h’olonyi, karik afuni de ilongo inyong ara Emmanuele” najo, “Ojok hohothai”.²⁴Thene, ahenyuna no Yosefo, amuthayo Maria, iring nanyahinerek inyong anjelo thoihandye. ²⁵Ti, kabong orwangarik inyong dihithemi h’athamana nanyong olonyi. Thiya elongo ofure lonyong Yesu.

¹Oyisuni nya Yesu di bore ho Bethlehem di Judea, d’omiru howonderek Erode ara ohobu. Kwak ahani, afuni ohothing homok hoiyeyena ohilyefi tholo moithe di Yerusalem, ²karik efiye, “D’amaji nani othamanai oitho, lowon de ara ohobu lo’Ojudei lo? Etehu ohoi ohilyep lonyong ainduna nanyong dihide tholo moithe, karik ifunu ohoi di mojo donyong.” ³Ethaninguna n’Ohobu Erode arami hune, engere bebe, iring dang nengerejarik ohothing fodok di Yerusalem.⁴Ethalongo Erode d’amaji aboithe ho fadiri hohittwak karik ohoityenak h’oyalu, efiyo isong, “Dingai de ofuni iyisuna Kristo?” ⁵“Di bore ho Bethlehem, di Judea,” isong etharangyo. Isong hune arami hegeryo ohocoroni: ⁶“Bethlehem di hap ho Judah, ikara iye natti th’abottok ho Judah hethadiryo; aca, oindu de thohoi lahong, loindu iyohoitho ohothing hndang Israele.’”⁷Thiya, Erode elongo othohomonok hofuni tholo moithe d’oputet laang onyahini dindak karik dirimahina thosong tuhudik omiru holyeyororik ohilyep. ⁸Thiya, asulak isong di Bethlehem ajyo, “Ifwatha karik othifeyethek oitho tuhudik; ara erimak ithai inyong, awak nang atehan, dallo nang dang di mojo dihithemi honyong.”⁹Afwoi, dihiji h’oyihoi, atehuni ohilyep lodwo otehu isong oindu tholo moithe lo. ¹⁰Atehuna nasong ohilyep, amunoi nya bebe tholohide amuno! Alo ohilyep ahithemi nasong tok awetha tholohide h’amaji nayisunerek oitho na.¹¹Othohomonok hulo ajingari dihang. Atehuna nasong oitho hahathing nanyong, Maria, afwoi, arigongoi dihap karik amojyoi donyong. Eduhye isong hulo dindak esoritha hasong h’ayel, alothogong karik ahamurwe, ethafothohini donyong. ¹²Thiya, anyahari isong di miji hosong th’oyihoi tholoboling, anyo, anyahi isong Ojok thaang honyahai d’Erode.¹³Athuhon nasong afwan, aleyo anjelo l’Ohobu ditha etharika do Yosefo, ajyo, “Othifeyo de Erode oitho ara lottohori. Odothoi, iduhu oitho karik ahathingi, engerotho dd Egypto, lwai nang anyahina iye thoidehi amaji nya ara iye inyahu.” ¹⁴Yosefo adotho, eduhu oitho hahathingi, alo th’aharie di Egypto. ¹⁵Esuka diya lwai aye n’Erode. Ihandye nya ahanya, dofuni arami hanya athuk Ohobu acama thol’ohocoroni ara hadiri, “Elongo nang oitho hindang adi Th’Egypto.”¹⁶Atehan n’Erode hijan athuk inyong othohomonok hofuni tholo moithe eitum, engere bebe. Efahak ahuthuk hijan okalifinok ho Bethlehem karik h’amasok haindek, hara oyingathik arehai, thottohori ehandye arami hune iring arami h’ethairu inyong th’othohomonok honyahi inyong omiru holeyororik ohilyep.¹⁷Th’oyihoi tholoya awoni ara hacama ohocoroni Jeremiah ara hadiri, ¹⁸“Oilongit lethaninguni di Ramah, oilolonge l’ekor nadwa, Racael nekor oduring honyong, Ida ebobowa, Anyo, athuhi ayetha.”¹⁹Diholu h’aye n’Erode, aleyo anjelo l’Ohobu ditha h’etharika do Yosefo di Egypto. ²⁰ajyo, “Iduhu okalifonik karik ahathingi, ilo dihap ho Israele, anyo, ohothing honya owahi attohoro oitho hulo athuhi ayetha.” ²¹Yosefo adotho, eduhu oitho karik ahathingi anyaha di Israele.²²Ti, ethairuna no Yosefo hijan aruthak Arkelaus omonye Erode, ara ohobu lo Judea, abang anden diya. Anyahini inyong koti ditha etharika, alo hathi d’amiji natti no Galilea. ²³aduho ahang di Nazareth. Ahani ne, awoni arami hanya acama ohocorok ara hadiri, “Ofuni de ilongo inyong ara Nazarene.”

¹Th’omiru hule aindu Yoanne Batista di terere ho Judea, aculuyo anyahina ohothing ehandio n’arami hayyu hahabis. ²“Iloithothik adi th’eyatha hathai,” ajyo inyong, “anyo, aindek ohobye lothohide.” ³Yoanne nya othulo locama ohocoroni Isaya, najararik inyong, “Othulo lobo lelolongo di terere, ‘Ihuhumyethek oyihoi d’Ohobu; ihuhumahina oyihoi ara lobis d’odaharik inyong.’”⁴Abongoitho ho Yoanne nya hehuhumuni th’ohofir h’akonikoni, iyofoitho erohit amuhunyong di mukok, larik anyari nanyong nya ebeye karik aiso narimahini caa dith’ofara. ⁵Afuni ohothing donyong tho Yerusalem, th’amiji fodok no Judea karik th’amiji fodok naindek d’owor lo Jordano. ⁶Ewaha ohothing eyatha hasong, abuhohini isong Batisimo ditha h’owor lo Jordano.⁷Atehuna no Yoanne Ofarisei karik Osadducihio afuna donyong do Batisimo, ajyo dosong, “Ithai amunuok – ngai ojyo ocohi dothai dikarahina asario nalo Ojok ithai isulahina ne? ⁸Ihandyethek asang hethaithak hijan ethuk ithai eloitho adi th’eyatha hathai. ⁹Karik hoigigilothik hijan ocohi dothai dikarahina asario th’ajaran thanthai Abramo, ohohonyi lothai. Anyahi nang ithai hijan ocohi d’Ojok diduhuna omorik hulo eloicyo ara anyakwarya h’Abramo!¹⁰Otholu leririyo ayefyo n’oyandik th’ohade. Ohiyani laang ongida ahayo, oyefahini de dihap, amirohini d’ahimang. ¹¹Abuhok nang ithai batisimo th’ahari, dithaithahina hijan eburunu ithai d’eyatha ahathai, ti, loindu diholu honang le, oindu de ibuhohina Batisimo th’Ohoile tho Lodwa karik ahimang. Obolo inyong thonang, karik aang dang ocohi donang dihoyo ahamuha hanyong. ¹²Owon inyong lo hattitto hanyong hekisyerek ohima. oindu ingongothohina ohima honyong di koro, ti, oindu de idwehina engayohi ditha h’ahimang naang odunya.”¹³Th’orii le edwong Yesu di Galilea, oindu do Yoanne dibuhohina inyong Batisim d’owor lo Jordano. ¹⁴Ti, Yoanne athemyo esarahina Yesu thoiloicye ahu nanyong, “Aca, iye kodien esarak nang Batisimo, Yoanne ajyo, “Ara iye ikoti iindu donang?” ¹⁵Ti, Yesu etharangyo, “Thoiwona ahani th’orii lya,” Aca th’oyihoi tholya, ehandyo de asang fodok hawak Ojok.” Yoanne eruhok arami hune.¹⁶Athuhon no Yesu efothuna Batisimo, aindu kwak adi thath’ahari. Thiya, angai paradise donyong karik atehu Ohoile l’Ojok oindu dihap iring ayoro h’afangan donyong. ¹⁷Thiya, oilolonge ajyo tho hide, “oitho hindang lo holefeng loko, amuno nang thonyong.”

¹Thiya Ohoile ethadiraru Yesu di terere di thema tho Sitan. ²Diholu operok karik ohariethik athomone arangwan kwong anyari, aleng ahure Yesu. ³Thiya Sitan aindu donyong ajyo, “Ara iye olonyi l’Ojok, iloicye omorik hulo ara anyari.” ⁴Ti, Yesu etharangyo, “Ojyo amanini, ‘Aang ohothing isu th’anyari hamaring, ti, owahi dang ocamitha thohuthuk h’ Ojok.”⁵Thiya Sitan eyaru Yesu di Yerusalem, abore nadwa, alo isarahina inyong dihide h’otek la Tempolo, ⁶karik ajyo donyong, “Ara iye olonyi l’Ojok, omirok ahwan nahoi dihap, anyo, ojyo amanini, ‘Ifahak de Ojok anjelohio honyong dohoi tho iye; indefuni de iye dihide th’ahas thahasong, tek, juk ahejek hahoi, omorik eryafuni.’”⁷Yesu etharangyo, “Ti, ojyo ikoti amanini, “Hoithemyo Ohobu, Ojok lohoi.’” ⁸Thiya Sitan eyaru Yesu dihide h’odonge lohodo bebe, ethaithak donyong ohobyehio h’ahap dith’abolori bukulung nasong.’” ⁹“Asang hune fodok esarak nang de dohoi,” ajyo Sitan, “Ara irigong iye dihap ara iye imojo donang.”¹⁰Thiya Yesu etharangyo inyong, “Ilo adi, Sitan! Ojyo amanini, “Omojyo d’Ohobu, Ojok lohoi, karik ara iye igyema donyong hamaring.’” ¹¹Thiya Sitan edyaharu Yesu. Ara anjelohio afuni, alwahye inyong.¹²Ethaninguna nya no Yesu hijan Yoanne lefithahini ara lefithahini, alo adi di Galilea. ¹³Edyeharu Nazarete, alo isuka di Kapernaum, abore naindek d’ajor no Galilea di hap ho Zebulun karik Naphtali.¹⁴Ofuk ahani, dofuni arami hanya ojyo ohocoroni Isaya huna ifuna ara hadiri. ¹⁵“Ahap na Zebulun karik ahap na Naphtali, d’oyihoi lolo di hari, d’oyirik lobo lo Jordano, Galilea, ahap n’ohothing hoikela th Ojudei! ¹⁶Otehu de ohothing hoisuka di mudwe afangan nabolo, d’ohothing hoisuka d’ahap karik obibile l’aye, odotho de afangan.’”¹⁷Th’omiru hule, aculuyo Yesu etyenio ocame lonyong: “Iloithothik adi th’eyatha hathai, anyo, aindek ohobye lothohide!”¹⁸Adaha nya nanyong di fohor h’Ajor no Galilea, atehu Yesu olarok arehai ohoirerehak h’ohom, Simone, loilongoi ara Petro, karik olai Andrea, diyapoha ohom dith’ajor th’abwuoi. ¹⁹Yesu ajyo dosong, “othifunethek nang diwon ithai ara ohoyapoyak h’ohothing.” ²⁰Yelek ahani, edyaharai abwoino hasong, afwoi honyong.²¹Alo indehai ahani, atehu olarok homok arehai, Yakobo karik Yoanne, olonyirok ho Zebedeo. Owoni nya di rook hosong ho omonye losong Zebedeo, dihuhumahina abwoino hasong, Yesu ilongo isong, ²²karik kwak ahani, edyaharai aroko karik omonye losong, karik dang afwoi honyong.²³Alo Yesu athwa no Galile fodok dityenio ditha h’asynagohio dityenio Asayo Angejuho h’Ohobye, karik dithalihyo ohothing howoni h’opeceni h’adihathik olwarai. ²⁴Athuroro asayo hanyong ditha h’amiji fodok no Syria, hathi iyanai nya donyong ohothing hodiha, ethathacyanai th’opeceni h’adihathik, haye arabokang karik h’ahahe, Yesu ethalihyo isong fodok. ²⁵Elulung nahittok n’ohothing athiforo inyong tho Galilea, d’abothok tomon, tho Yerusalem, Judea karik d’ahap d’oyirik lobo lo Jordano.

¹Atehu Yesu elulung n’ohothing, adok dihide h’odonge, diya, awoni dihap. Ohoifahak honyong asuduha diker honyong, ²karik aculuyo etyenio isong: ³Ohothing, hotek hijan ican isong di hoile thomunoi; ohobye lothohide losong! ⁴Ohothing hothariha thomunoi; oindu de Ojok isong iyoboyo.⁵Ohothing hoilamuha thomunoi; ofuni de ifothuna aning nathuk isong Ojok eruhohina. ⁶Ohothing hobolo awahan nasong ehandyo aning nawak Ojok thomunoi; oindu de Ojok ithafongohina isong kwek kwek! ⁷Ohothing homiehi ohothing homok thomunoi; oindu de isong Ojok imiehina! ⁸Ohothing holibori ditha h’othaji thomunoi; ofuni de itehuna Ojok!⁹Ohothing hoigyema d’elihan n’ahap thomunoi; oindu de Ojok ilongo isong okalifinok honyong! ¹⁰Ohothing hoithgyemye th’arami thahawak Ojok thomunoi; ohobye lothohide losong.¹¹Ithai homorye, ethagyemye, emangye karik adwalai asang hamonyong thoithai omunothi; anyo ithai ohothifok hundang. ¹²Omunothik, efongatha, aca, akanyama nabolo bebe nakanahini dihide ara nathai. Ahani nyana ithagyemye ohocorok homanya dihithemi hothai.¹³“Iwon ithai ara ahipere n’asuduhe bukulung n’othulo. Ti, ara alitho elahipere, aang oyihoi lesarahinerek inyong thoiwona ara ahipere ikoti. Aang aca nanyong, ocohoroi karik ohothing erereyo. ¹⁴“Ijahitha ithai afangan d’ahap fodok. Abore naduhoi dihide h’adonge, aang idimunu.¹⁵Aang othulo lethaulok ahiryai, edimak tholohop h’aning nabo; kombwo, ithahi dihide h’ethawojit ara naleyo, enwaha d’ohothing fodok hothohong. ¹⁶Iring ahani ne dang, afangan nahoi, thowuloi dihithemi h’ohothing. Dotehuni asang hayyu hehandyo iye karik emamajye Lemonye lothohide.¹⁷“Hoigigilothik hijan aindu nang ditharohojyo oyano ho Musa karik etyenitha h’ohocorok. Aang nang aindu, diyaru isong adi, ti, disarahina etyenitha hasong thoiwona ara hadiri. ¹⁸“Iring nawonderek ahide karik ahap, aang aning nabo neduhuni adi, juk natti bebe, th’oyalu – teng ecuhit n’asang bukulung.¹⁹“Inyong na, lomesyo juk efahit natty, etyenio homok thoihandye ahanya, orasa de diholu d’ohobye lotho paradise. Kombwo, loithaningyo oyalu, etyenio homok thoihandye ahanya, obolo de d’ohobye lo paradiso. ²⁰Anyahi nang ithai do hathi, icohi ithai de dijingahina ditha ohobye lo paradiso, ara iruk ithai okalak ohotyenak h’oyalu karik Ofarisei di handyo ainyong owak Ojok.²¹“Ethaningu ithai hijan anyahini nya ohothing berien, ‘Hoittoho; lottoho, ifiye de inyong dihithemi h’oyalu, ²²Ti, thene, anyahi nang ithai, lo ingere h’olai, iyarai de dihithemi h’oyalu, lelongo olai, “Aang-aning-neyijorik- iye,” iyanai de dihithemi h’elulung n’ohobolok, karik loilongo olai ara ohonangani laang aca, owon de habangi nafwarik d’ahimang no inferno.²³Inyong na, ara iwon iye h’esorio newak iye esarahina d’Ojok, ara iye iyuu hijan iwon iye h’aning namonyong holelai, ²⁴idyaharu dodo esorio nahoi dihide h’alatari, ara iye ilo dimora ho lelai, thiya ara iye inyahu dithafothohina esorio nahoi d’Ojok.²⁵Ara ilongo iye lobo dihithemi h’oyalu, ihuhumahina arami di hang howoni omiru, cobong ithai ifwo dihithemi h’oyalu. Ara ithai hefwo dihithemi h’oyalu, ithafothok iye de d’ohokanyani, lethafothok de iye do polis karik efithahini iye. ²⁶Ifitha iye de diya anyahi nang iye, tok iye aduma amillim n’omorit lohoi.²⁷“Ethuk iye ethairuna hijan ojyori nya, “Hoiferorik athulo nolobo.’ ²⁸Ti, thene, anyahi nang iye, lomijyo d’athulo nangorwo awak eyaru inyong ara nayong, eyau honyong dithaji honyong.²⁹Inyong na, ara isarak iye ahonyek nenget eyauna, ikolowothu ara iye icohoro adi! Oyyu dohoi dingodo, th’amirohina iye bukulung dith’ahimang. ³⁰Ara isarak iye ahinang nenget eyauna, obongu ara iye icohoro inyong adi! Oyyu dohoi diwonan h’ahinang aboithe, th’awonan hohoi h’ahwan bukulung dith’ahimang.³¹“Ajyori nya dang, ‘longaterek afure adi, thoisarak inyong amanini n’egero n’apeha. ³²Ti, anyahi nang iye thenene,ara ongaterek othulo loboling afure th’arami thahaang ara adaha h’ohothing homok, iyau de othulo lya eyau naferi h’othulo loikela th’onde, ara omutha inyong na ikoti; karik dang othulo lomuthayo inyong lo dang eyau esuka h’afure nekela th’athulo nanyong.³³Ethuk iye dang ethaninguna hijan anyahini ohothing nya berien, ‘Hoida dia hoitharohojyo arami dia asnag hethuk iye eruhuna. Ti, ihandye d’Ohobu asang hethuk iye epitha di handyo.’ ³⁴Ti, anyahi nang iye thenene, hoipitha, ara iye leruhok ehandyo aning naboling. Hoipitha tho paradiso, aca inyong na, okara l’Ojok. ³⁵ikara dang th’ahap, aca inyong na, amaji nayiryarik ahejek; ikara dang tho Yerusalem, aca inyong na abore n’Ohobu lohittok.³⁶Hoipitha dang th’ahu thanahoi, anyo, aang ocohi dohoi di sarahina juk ohofitti oboithe awonan ara obong dia omoli. ³⁷Ijara ija “Aa’ dia “A a” – aning naboling nejyo iye, oindu th’Omonyoroni Lo.³⁸“Ethuk iye ethaninguna hijan ojyori nyana, ‘Ahonyek h’ahonyek, ohalai h’oholai.’ ³⁹Ti, anyahi nanng dohoi thenene, hoirofu othulo lehandyo dohoi ara namonyong. Ara onang iye othulo lobo ecahani n’enget, isarak dang thonanga iye ecahani n’ehotong.⁴⁰Karik dang, ara iyaru othulo loboling iye dihithemi h’oyalu th’abongo thanahoi nothosuhe, theyaru dang th’abongo thanahoi nauk nahathero na. ⁴¹Karik ara iringak iye ohoremok adohoro attitto hasong d’amaji nalam, indohok amaji nalama ne. ⁴²Ara ifiyo othulo loboling aning nabo thohoi, isarak donyong aning ne. Ara owak lobo attoboro aning nabo thohoi, isarak thotoboro.⁴³“Ethuk iye ethaninguna hijan ajyori, ‘omunoi holoimotte,omunoi omerok hohoi.’ ⁴⁴Ti, thene anyahi nang iye: omunoi omerok hohoi ara iye imojyo th’ohothing thoho ithathacianio iye. ⁴⁵Diwon ithai ara okalifinok h’Omonye lothai di paradiso. Aca, isarak inyong oholong lonyong thowuloi d’ohothing homonyong karik hoyyu see, karik isarak ohuju d’ohothing hoihandyo ara nayyu karik hoihandyo ara namonyong.⁴⁶Anyo ira iye Ojok isoryo, ara imuno iye ti ohothing homuno iye? Ihandyo dang ohothing ohoiduduhak h’enyahwo h’elulung ahanya! ⁴⁷Karik ara icama iye ti d’omorot hohoi, ojyo ehandyo iye aning nabo iring nayeng na? Juk ohothing haang otek Ojok, ihandye ahani! ⁴⁸Iye thobisa tiorr – iring nabisarik Leemonye lotho paradiso tiorrr.

¹Omijye tuhudik d’aangan ehandyo asang h’ohoile karik h’elajok hahoi dihithemi h’elulung, hijan d’otehu ohothing ainyong ihandyo iye, efufurye iye. Ara ihandyo iye asang hune ahani dihithemi h’ohothing, aang iye de irimak esorio the Lemonye lowon dihide. ²Inyong na, ara isarak iye aning nabo d’othulo lomojo, hoithaboloryo esarahina nahoi ne, iring nehandyerek odwalak d’amasok h’amojo n’elulung karik d’oyihothik hohittwak. Ihandye ahani dimamajyo isong ohothing. Anyahi nang dohoi diri, athuhi aduma odwalak hulya arabo.³Ti, ara elwahyo iye ohomjoni lya, olwahye inyong th’oyihoi thalaang juk omorot hoindek dohoi oteharik hijan ehandyo iye aning nabo. ⁴Ahani ne, awoni de ara arami hedima. Dara, Lemonye hamaring, lengengelu iye ehandyo aning nedima, isarak iye de esorio.⁵“Ara iye lemojyo, hoijahitha odwalak! Omunoi awetha thahide dith’athwahio h’elulung hamojorik karik dikeri h’oyihothik hohittwak, dotehu ohothing isong bukulung. Anyahi nang iye diri athuhi efothuna esorio nasong fodok. ⁶Ti, ara iye lemojo, ilo dithwa hohoi, ihyenok oyihet, ara iye imojyo de Lemonye, laang iye itehu. Lemonye, lotehu iye ehandyo aning nabo nedima lya, de isarak iye esorio. ⁷Ara iye lemojyo, hoimojyo th’ocamitha olwarai thahaang olwahu, iring nehandyerek ohothing haang otehi Ojok, hijan ithaningyo de ojohi hosong omojitha hohodo.⁸Hoijahitha isong. Athuk Leemonye atehan ainyong iwak iye dihithemi hohoi efiyo inyong. ⁹Ahana kodien ira iye imojyo: Omonye lohoi lowon dihide: ofure lohoi lodwa thohujo; ¹⁰Ohobye lohoi thoindu; awahan nahoi thoihandye dihap, iring nehandyerek inyong dihide.¹¹Isarak ohoi ahanana anyari newak ohoi. ¹²Ofithok ohoi eyatha hahoi, iring nefithohinerek ohoi homok eyatha hehandyo isong dohoi; ¹³Heyaru ohoi d’ekemitha hako, karik ikau ohoi th’Omonyoroni lo.¹⁴Ara imiehi iye homok eyatha hehandyo isong dohoi; omiehi iye de dang Leemonye lowon dihide. ¹⁵Ti, ara aang iye imiehi homok, aang de dang Leemonye homiehi eyatha hethuk iye eyauna.¹⁶Ara idwa iye, hoitharingyo ahomong iring odwalak. Ithalicye oyaitha hosong, dotehuni isong ara ohothing hodwa, anye tiibai. Anyahi nang iye diri, athuho aduma nasong. ¹⁷Ara kabong iye inyo, imujulai ara iye ikwaracyo ohofir. ¹⁸daang homok otek hijan iye ledwa – araharik Leemonye, laang otehunu de otek. Leemonye lotehu ainyong nedima ihandyo iye, inyong de isarak iye esorio.¹⁹“Ohoikaniethek ebarithi dihwandek hothai dihap dine, hanyo ethur karik alodokya, hawuryo ara ohoholak ahoholyo. ²⁰Kombwo okaniethek ebarithi ara hathai di paradiso, amaji naangarik ethur karik alodokya, karik amaji naang ocohi ohoholak auryo karik ahoholyo. ²¹Aca, owon de othaji lohoi d’amaji nawonderek ebarithi hahoi.²²“Ojahitha ahonde ahirya nawulo d’ahwan. Ara oyiji ahonde hahoi, ifut de ahwan nahoi th’afangan. ²³Ti, ara aang ahonde hahoi oyiji, owon de ahwan nahoi dimudwe. Inyong na, ara owon afangan nothohwan hohoi ara omudwe, angai de ngona owon amonyori n’omudwe! ²⁴Awang othulo locohi awonan ara ongaca l’ohoindefak karik hahong arehai; oman de lobo; eruk lobo; ithaningyo de arami holobo, amesyo holobo. Aang ocohi dohoi digyema d’Ojok karik d’enyahwo.²⁵Inyong nanyahi nang iye thaang hoihayai th’anyari karik th’amatha disuorik dia th’abongo d’ahwan nahoi. Ara ikara ahani, aang diri ayiji n’esu okalu anyari? Karik aang ayiji nahwan okalu abongo? ²⁶Idoro ahwen: aang oromoi, aang ingognoye akanahini amat dikoro; ti, omijo Lethemonye lothohide dosong. Aang ithai ikalu ahwen th’ayiji?²⁷Ocohi lobo thothai amanya tiibai furr, thehaya thananyong? ²⁸“Karik, ainyong ihaya ithai d’abongoitho? Otiha, angai obolo athuya h’afara: Aang hoigyemai karik aang hoihuhumye abongoitha d’ahwandek hasong. ²⁹Ti, anyahi nang ithai hijan juk ohobu Solomone aang nya howon hebarithi h’abongoitho halibori iring aboithe n’athuya huna.³⁰Ojok ithayofyo amiyang notho fara – amiyang nawon dini ahanana karik nalo adi moithe. Nethawuloye di hyali. Aang de inyong diri oindu ithayofyo ithai? Angai berien omutha eruhon nahoi! ³¹Iring na, hoiculuyo ehaya: ‘Thongai de oindu anyari hindang? dia emathitha hundang? (Asang hune juui hehayaitho opangano.) Otek Lethemonye lothohide hijan iwak ithai asang hune bukulung.³²Kombwo, ihayathik tholohide hasang bukulung th’ohobye thol’Ojok karik ainyong de iwak ithai, isarak ithai de asang hune bukulung. ³³Inyong na, hoihayathik arami h’omoithe. Owon de h’arami hanyong hehayai. Aang osiru difonio ethathacianitha h’ofaning. ³⁴Dini hegigilozi ijan ainyong nafuk dena dozai ofaning loindu, iwon izai de ha asing hewak izai. Dini hegigilozi ahizemi no omiru."

¹Hoikanyo homok, daang iye Ojok okannyo. ²Aca oindu iye de Ojok ikanyo, th’oyihoi thele ikanyerek iye homok. Oindu de ikanyo iye th’oyihothik thoh’ekanyerek iye homok.³Anyo hathi imijyo iye d’ahujithing noth’ohonyek hoilelai, ahibu iye aang hoimijyo tuhudik d’ahujithing nahittok noth’ohonyek hohoi? ⁴Angai oko ohu nahoi di jaran do lelai, “Pwanga, iduhu ahujithing th’ohonyek honang, ahibu ye iwonon h’ahithoi dihonyek hohoi? ⁵odwalani lo, iduhu dodo ahithoi th’onyek hohoi, ara iye hathi iduhu ahujithing th’ohonyek holelai.⁶“Hoisarak aning nadwa d’ongohe – iloithoi de dihonya hohoi. Hoicohok onyahwo hohoi holibo dihithemi h’ekaaha – erereye de th’ahejek.⁷“Ifiye, difothu iye, othifeye, dirimak iye, ibabahye, dongai oyihet dohoi. ⁸Aca othulo lefiyo, ifothu de; lothifeyo, orimak de; onga de oyihet d’ohothing hoibabahyo; ⁹Isarak lobo thothai, howoni ara omonyehio hulo, d’olonyi lonyong omorwong, ara ifiyo olonyi anyari? ¹⁰Dia isarak iye amunu ara ifiyo iye ohome? Dia angai ojak amonyori nahoi. itek iye angai isarak iye asang hayyu d’okalifinok hohoi.¹¹Angai de aang okalu esarahina n’Omonye lothai lothohide disarahina asang hayyu d’ohothing hoifiyo inyong! ¹²Ihandye dohomok ainyong iwak iye isong thoihandye dohoi; arami hune hajyo oyalu lo Musa karik loityenierek ohocorok.¹³“Ojingai th’oyihet tholo iruhusi; oyihet d’inferno iyakalang, oyihoi lolo diya ilik; karik olwari ohothing hodaha thole. ¹⁴Ti, oyihet lofwarik d’esu, iruhusi karik oko oyihoi lolo donyong; karik omutha ohothing horimak inyong.¹⁵Omijye tuhuudik ohocorok hoikela th’ohocorok hadiri; ofuni dohoi tholo dang iring okero, ti, tholothwa, isong hulo diri owoho. ¹⁶Itek ithai de isong th’aning thana ihandyo isong. Ofarathik hedwedweye, aang hongidari ahayo karik aang obiyongo ongida abiyongo. ¹⁷Ohiyani loyyu, ongida ahayo hayyu, ara ohiyani lomonyong edoyo ahayo hamonyong.¹⁸Aang ohiyani locohi edoyo ohayo hamonyong karik aang ohiyani lomonyong locohi angidari ahayo hayyu. ¹⁹Karik, ohiyani laang idoyo ahayo hayyu, oyefahini dihap, amirohini dith’ahimang. ²⁰Inyong na, itek ithai de ohocorok th’asang thah’ehandyo isong.²¹Ikara ohothing fodok oilongo na: “Hobu, Hobu” de ojingak d’ohobye lothohide, arahari ohothing hoinhandyo aning nawak lalamonye lthohide, isong thoihandye. ²²Ara Ofaning l’Akanyo laindu, ojyoi de holwa donang, ‘Hobu, Hobu! Ditha h’ofure lohoi, ecama ohoi efahi nahoi th’ofure tholohoi ingaterek ohoi ajohi karik acuhi karik th’ofure tholohoi ehandyo ohoi asang olwarai hafalangai!’ ²³Thiya, ajyo nang de dosong, ‘Aang nang nya atek ithai, ifwatha adi thonang, ohothing omonyorok!’²⁴“Inyong na, othulo loitharuhu ocamitha hundang hulo eruk isong. Ojahitha othulo loilofioro, loduho athwa nanyong dihide hamorwong. ²⁵Ohuju asa, owori angetha karik ahomwa awam difidihyo athwa ne. Ti, kabong athwa opwaharu, anyo, aduho hidihe h’amorwong.²⁶Ti, othulo lowon h’ocamitha hundang hulo, ti, aang hoiruhu ojahitha onyalubathi loduho ahtwa nayong dihide h’akujo. ²⁷Ara ohuju asa, owori anger karik ara ohomwa awam, athwa apwaharu. Karik, ainyong apwaharu nanya ithabangyo ahanya nya.”²⁸Athuhon no Yesu acama arami hune, afalanga elulung oyihoi loityenierek inyong. ²⁹Aang nya ojahitha ohityenak h’oyalu; kombwo etyenio th’akolon.

¹“Ecuruna nya no Yesu th’odonge, elululng nahittok n’ohothing, athiforo inyong. ²Thiya, othulo laleng adihari adiha namonyong n’amuhunyong aindu donyong, arigongo dihap dihithemi honyong, “Lahong, ara iwak iye, ocohi dohoi dithaliboruna nang.” ³Yesu anithok ahinang nayong, athin inyong, “Awak nang,” inyong etharang. “Oliboro.” Thenene ne, elik amuhunyong n’othulo lodiha.⁴Thiya Yesu ajyo donyong, “Ithaningye, hoinyahi d’othulo loboling, ti, ilo gwo do fadiri thoidorye iye. Thiya, dotehi ohothing fodok hijan alibo othulo lonya adiha hadiha n’amuhunyong lo, ehandyo inyong lo ehuma nanya onyahi Musa na.”⁵Ajingara nya no Yesu di Kapernaum, arwangai h’ohoigyemani lo Roma, efiyo thonyong alwaha. ⁶“Lohong, ohoigyemani hindang lodiha dihang dijothit, aang odaha, ithathaciana bebe.” ⁷“Aindu nang de isarahina inyong thoyijyo,” Yesu ajyo.⁸“Ikara ahani, lahong,” etharang ohoigyemani lo Roma. “Aang ocohi donang hijan iindu iye dihang honang. Ifahak ainyong thoihandye, oyyu de ohoigyemani hindang. ⁹Nang dang othulo loindafaitho ohoigyemak hohittwak; karik owoni dang ohoremok hoindafaitho nang. Ajyo nang d’aboithe, ‘Ilo!’; alo; nang ajyo ikoti doloboling, ‘Iwong!’ aindu; karik nang anyahi d’ongaca hindang, ‘Igyemai aning na!’ aang hoigyema aning ne.” ¹⁰Ethaninguna n Yesu arami hune, afalanga ajyo d’ohothing hothiforo inyong, “Anyahi nang ithai, kabong nang arimahinerek othulo d’Israele heruhon najahitha na.”¹¹Anyahi nang ithai tuhudik, ofuni de ohothing olwarai tholo moithe karik tholo thari awoniari dihap h’Abramo, Isako karik Yakobo d’amuno d’Ohobye lothohide. ¹²Ti, hoira iwonan ditha h’Ohobye, omiroroi de adi ditha h’omudwe, amaji nafwarik isong de ikororik karik erocye ohala.” ¹³Thiya, Yesu ajyo d’ohoigyemati l’ogalla ho Roma lya, “Ilo di hang; arami heru iye hune, ihandye de dohoi.” Ara ongaca lodiha lo ayyu th’omiru hule.¹⁴Yesu nya alo dihang ho Petro. Diya, atehu nahamoni ho Petro odiha hethor n’ahu di jothit’. ¹⁵Yesu athin ahinang nayong, ethor n’ahu edehi inyong karik alo ifothuna Yesu ara othohomononi.¹⁶Edwongon n’athari, eyanu ohothing do Yesu ohothing olwarai howoni h’ohoilehio homonyong. Yesu angararik adi ohoilehio omonyorok hulya th’ocame oboithe karik ethalihak ohothing bukulung honya odiha hulo. ¹⁷Ihandyo ahani dofuni arami hanya ajyo ohocoroni Isaya huna ifuna ara hadiri, “Eyaru inyong thahwan adihathik hahothai karik eduhu adi adihathik hahothai.”¹⁸Atehan no Yesu hijan inyong lodihiji h’elulung n’ohothing, anyahi ohothifok honyong thoifwa d’oyirik lobo l’ajor. ¹⁹Ohoityenani l’oyalu aindu donyong. Ajyo, “Ohoityenani, awak nang athiforo iye d’amaji nenderek iye.” ²⁰Yesu etharang inyong, “Owoni owoho karik ahwen h’athwahio, ti, aang Olonyi l’Othulo owon h’amaji naferorik ara inyong ayiri.”²¹Othulo lobo, lonya owon ara ohothifoni, ajyo, “Lohong, nang dodo thoilo di nuhahina lalamonye.” ²²“Othifunu nang,” Yesu etharang, “Idehi ohoyak thomuhak ohoyak hosong.”²³Zene ara Yesu echurok diza ahibo nanyong ara ohozifok honyong aziforo inyong. ²⁴Yesu ecurok di roko, alo h’ohothifok honyong. ²⁵Kwak ahani, ahomwa nako awam di jor, oindeharik aroko alafuho karik adyoro. Ti, orimak Yesu dijothoro. Ofwoi ohothifok, ethahenye inyong. Ajyori, “Olwaha ohoi Hobu, eindek ohoi aye.”²⁶“Anyo ibang ithai ahani,” Yesu etharang, “Anyo omutha eruhon nathai ahani!” Yesu adotho, anyahi ahomwa thowethai karik ahari hepongaitho thowethe. Ahari nya adularu nding nding. ²⁷Afalanga ohthing. “Lojahihitha angai othulo lo?” ajyori isong, “Juk ahomwa karik epongaitha n’ahari ethairye arami hanyong!”²⁸Ajara nya Yesu aindu d’oyirik lobo l’ajor, arwangarik inyong lo ohothing arehai hofuni thath’alomi h’anuhyerek. Owoni nya ohothing hulo h’ohoilehio homonyong dithosong. Ingereji nya ara homonyong. Aang nya othulo lolo thol’oyihoi loindek dosong. ²⁹Irahi ingereji kwak, “Ainyong iwak ithai dohoi, iye Olonyi l’Ojok? Indu iye dibahyo ohoi kabong omiru hofuni?”³⁰Ikara olamarai thene owon nya amaji nethanyerek abathaha. ³¹Ahani ne, ohoilehio homonyong amojyoi do Yesu, “Ara ilo iye ingararik ohoi adi, osulak ohoi ditha elulung n’abathaha nya.” ³²“Ifwatha,” Yesu anyahi isong; isong hulo afwo, afwoi ijingahina dth’abathaha. Elulung n’abathaha ne angero adiwor d’oyirik l’adonge ditha h’ajor, amathi diya.³³Ara ohoyohok h’abathaha hulo angerori di bore, enyanyahye diya arami hafuk d’ohothing howoni h’ohoilehio homonyong. ³⁴Ohothing hotho bore afwoi dindak di kuboitherek Yesu; atehuna nasong inyong, omojyo inyong thoidehi ahap nasong.

¹Ecurok Yesu di roko, abongoro ehiji n’ajor di bore honyong, ²d’amaji neyanerek ohothing donyong othulo laye arakang. Atehuna no Yesu eruhon nara abaya owon dosong, ajyo d’othulo lodiha lo, “Okolo, oitho hindang, “Ahohini eyatha hahoi.”³Thiya, ajyori ohoityenak h’oyalu homok dihwandek hosong, “Othulo lo locama karik lomoryo aning nadwa.” ⁴Yesu agilu ainyong igiglo isong, ajyo, “Anyo igigilo ithai asang hamonyong hajak ahani hune? ⁵Ilik dijan, “Ahohini eyatha,” dia dijan, “Odothoi karik odahai’? ⁶Ithaithak nang de ithai, ara ahani, hijan owon Olonyi l’Othulo h’akolon dihohina eyatha dihap.” Dine ne, ajyo d’othulo laye arobokang lo, “Odothoi thahide, odohu ejothit nahoi, ilo di hang!”⁷Adotho otholu laye arakang lo, alo dihang. ⁸Atehuna n’ohothing ahani ne, abangi, efufurye Ojok. disarahina akolon najak ahani d’ohothing. ⁹Yesu edihi amaji nya; ajara alo, ahithemi, atehu ohiduduhani l’enyahwa th’ohothing, ilongoi ara Mateo, owoni dimaji h’egyema nanyong. Ajyo donyong, “Othifunu nang.”Mateo adotho th’ahide, athiforo inyong.¹⁰Awonan nya no Yesu h’anyari di hang ho Mateo, afuni ohoiduduhak h’enyahwo karik ohothing homok hangaterek thoilulung, awoniari ho Yesu karik ohothifok honyong dinyari. ¹¹Otehuni Ofarisi homok asuduha dinyari ne, efiye ohothifok ho Yesu, “Anyo onyo ohoityenani lothai h’ohothing hojahitha ahani?¹²Ethaningu isong Yesu, etharang, “Aang ohothing hoyiji owak opotho l’ayiji n’ahwan; ti, owahi ohothing hodiha opotho l’ayiji n’ahwan.” ¹³Ifwatha othifeyethek ainyong ojyo amanini negero,”Ehandio n’ayiji awak nang, ikara ehuma n’ecangi,’ Aang nang aindu dilongo ohothing homuno abangi, aindu nang d’ohothing hathuhi acohoro.”¹⁴Thiya ohothifok ho Yoanne afuni difiyo Yesu, ajyori, “Anyo, nara ohoi h’Ofarisi idwa ara ohoi inyo tiibai, ahibu ohothifok hohoi aang hoidwa karik aang onye tiibai kwong? ¹⁵Yesu etharang isong ajyo, “Iwak ithai ohothing hofuni di mutha thaang homunoi ahibu isong h’ohomuthani? Ikara ahani. ti, owon de ofaning lofuni iyarik homuthani adi thosong. Ofuni de idwa, anye tiibai ofaning le.¹⁶Aang othulo lorifyo abongo angoroi th’akerbuse angejuk, anyo akerebuse angejuk irunga karik afonik amaji nathulo notho bongo ne.¹⁷Aang dang othulo lobuhok abalu ongejeuk ditha olofengo ongoroi. obulahta olofengo lya obalu obuhoro dihap. Kombwo, obalu ongejuk, thobuhohini ditha h’olofengo ongejuk. Disukai ara nayyu obalu ongejuk karik olofengo ongejuk.¹⁸Dihide ho Yesu acama ahani, aindu ohoigyemani l’Ojudei donyong, arigongo dihithemi honyong, ajyo, “Aye aitho hindang thenene; iwong ilo ithahi ahas hahoi dihide honyong, isu de.” ¹⁹Yesu adotho athiforo inyong. Ara ohothifok afwoi diput honyong.²⁰Athulo naleng ethathaciana abuhyo ahotho oyingathik tomon larehai aindu tholohurong ho Yesu, athin ohuthuk l’abongo nanyong. ²¹Inyong na ajyo dithaji honyong, “Ara juk athin nang abongo nanyong, ayyu nang de.” ²²Yesu amijyo tholohurong atehu inyong, ajyo, “Ithakolo, aitho hindang, esarak iye eruhon tholiboro.”Th’omiru hule, ayyu athulo.”²³Thiya, Yesu ajinga dihang h’ohoigyemani. Atehuna nayong ohobalak h’oyendok h’athariha, ohothing adotho fodok. ²⁴inyong ajyo, “Ifwatha dingwai ithai bukulung!” Kaang aitho ne hoye – nadiferi ija!” Thiya isong fodok ahendaitho donyong.²⁵Ti, athuhon n’ohothing afwan dingwai, Yesu ajinga ditha h’aitho, endep ahinang nanyong, ara aitho ne adotho dihide. ²⁶Assayo h’arami hune athurohunu d’oker l’aminji nya fodok.²⁷Yesu edehi amaji nya; Aden nanyong ahithemi, ongodok arehai athiforo inyong. “Omiehi ohoi, lolonyi ho Davide,”isong hulo ekor.. ²⁸Ajingara no Yesu dithwa, ongodok arehai hulo afwoi donyong, Yesu efiyo isong, “Iruk ithai hijan ocohi nang hethalihyo ithai?” Isong iruhi, “Aa, Lahong.”²⁹Thiya, Yesu athin ahonde hasong ajyo, “Thofuho iring neruhorik ithai!” ³⁰ahonde hasong anyahak ara habilbo dimaji, Yesu acama dosong ara nako, “Hoinyahini arami hune d’othulo loboling kwong!” ³¹Ti, afwoi, afurohini assayo ho Yesu d’amasok fodok h’amiji nya.³²Afwan nya n’ohothing, eyanu ohothing homok do Yesu othulo laang ocama, anyo, owon inyong h’ohoile lomonyong. ³³Ti, angararik nya n’ohoile lomonyong adi, aculuyo othulo le acama. Afalanga ohothing, ajyori, “Kabong ohoi ithehunerek aning najahitha ahani d’Israele!” ³⁴Ti, Ofarisei ajyori, “Ohobu l’ohoilehio homonyong isarak Yesu akolon nangaterek ohoilehio homonyong.”³⁵Yesu nya alo idodororo abothok karik amisok. Etyenio di Sinagogues, enyanyahak Assayo Hayyu Angjuho h’Ohobye, ethalihyo karik ethayijyo ohothing th’adihathik h’opeceni olwarai. ³⁶Atehuna nanyong elulung n’ohthing, efut othaji lonyong th’amiehunu n’ohothing, anyo, ehayai karik aang alwahio thosong, ajahithi akero haang ohoyohoni.³⁷Ahani ne, ajyo d’ohoifahak, “Olat amana, ti, omuthari ohoingongothok. ³⁸Omojothik do lomonye h’amana, dosulak ohoigyemak hohothai dingongocyo di amana honyong.

¹Yesu elongu ohothifok honyong tomon larehai, esarak isong akolon nangaterek ohoilehio homonyori adi karik nethalihyerek opeceni h’adiha.²Thene ofuretho h’ohoifahak ho Yesu hulo hulohoi: oithaboithe Simone (loilongo inyong dang, ara Petro) karik Andrea olai lonyong, Yakobo lolonyi ho Zebedeo karik Yoanne olai lonyong. ³Filippo karik Bartolomeo; Tomaso karik Mateo, ohoiduduhani l’adumathik, Yakobo, lolonyi ho Alfeyo; karik Taddeo; ⁴Simone Ozelot, karik Juda Iskariote, lonya ithanyangak Yesu lo.⁵Ohoifahak tomon larehai hulya, honya osulak Yesu, anyahi isong ajyo, “ hoifwatha d’ahap n’ohothing hoikela th’Ojudei karik hoijingara d’abore nabo no Samaria. ⁶Kombwo, ifwatha d’okero hathuk alitho, di hang ho Israele; ⁷Kombwo, iring ifwo ithai, ityeniethek ara ithai ijyo, “Aindek Ohobye lothohide!”⁸Ithalihyethek ohodihak, inyahunethek ohoyak disu, ithalihyethek ohodihak h’attalulu h’amuhunyong, karik ongaterethek ohoilehio homonyong. Efothu ithai kwong aduma, isarahina dang kwong aduma. ⁹Hoidahathik h’ayel, ebindang abong karik anaporong dirohitha hothai. ¹⁰Hoidaha h’olofengo l’ohomojok ara ilo iye d’amiji nabo; heyaru abongo naboling nothosude, ahamuha dia othelek. Ohoigyemak thoisarahini aning nawak isong.¹¹Ara eindu iye di bore dia dimiji, ottahithe othulo loyyo ara iye isuka honyong lwai iye anyahara. ¹²Ara ejinga iye dihang, imandaye inyong. ¹³Ara oyyu ahang ne oindu de elik donyong. Ti, ara aang hoyyu, onyaha de elik dohoi.¹⁴Iring d’ohothing naang ifothu ithai dia aang ithairye arami hathai, ara ithai hefwo adi th’ahang dia abore nya, ibabahuna atuur adi tho hamuha hothai. ¹⁵Anyahi nang dothai, d’ofaning lakanyo n’arami, oindu de Ojok imiehina ohothoing ho Sodomo karik ho Gomorrah thoh’ohothing h’abore dia amiji nya.¹⁶“Ithaningyethek, nang lasulak ithai iring akero ditha elulung n’owoho. Ohongotho iring amunuok, ara ithai ilamuha iring aworohocio. ¹⁷Omijethek tuhudik, owoni mwai ohothing hoindafaitho ithai, eyarai ithai dithawejyo, afodohye ithai di Sinagogues. ¹⁸Ofuni de ithai indafaitho karik ethawejye dihithemi ohoidefak h’ahap karik h’ohobusi h’ohothing thonang, dinyahina assayo hadiri dosong karik d’ohothing hoikela th’Ojudei.¹⁹Ara heyanu iye dithaewjyo, hoithathacianio ahwan ditehan ainyong de ifwo ithai icama. ²⁰aca arami hefwo ithai icama hune, ofuni de isarahina ithai orii le.²¹Isarak de olai olai thottohori; ara omonye esarak olonyi thottohori. Odothoi de okalifinok d’omonye karik ahathingie, esarahini isong thottohori. ²²Omani ithai de ohothing bukulung th’ofure tholohindang. Ti, logoterek ithai lwai dicuhit, ithalwahunu de. ²³Ara ithalodohye ithai d’abore na, ingerotho d’abore naboling; aca anyahi nang ithai diridiri, aang ithai de ifwo athan’abottok ho Israele, kabong Olonyi l’Othulo athuk ainduna.²⁴“Aang oitho leyeyena lokalu ohoityenani lonyong. Aang ongaca lobolo thoh’oindefani longyong. ²⁵Inyong na, ira ohoiyeyenani efongon awonan ara ohoityenani lonyong, ongaca, ara ohoindefani lonyong. Ara lahong l’ahang lelongoi ara Beelzebul, ilongoi de dang ohothing h’ahang ne th’ofuretho thohomonyong okalak!²⁶“Inyong na, hoibangatha othulo. Aning nemuho thenene, ofuni de ibuthohina; karik aning nedima, ofuni de ithalyehina. Aning naang otehi, ofuni de isarahina thotehi. ²⁷Arami hanyahi nang ithai ditha h’omudwe hune, owak inyoryo ithai anyahina th’afaning, karik aning nethairu ithai hamaring, owak ilolongok ithai thohide h’efithe n’athwa.²⁸Hoibang ohothing hoithayeyo ahwan, ti, aangi ocohini ethayeyo ohoile; kombwo obangatha Ojok, locohi etharohojyo ahwan karik ohoile ditha h’ahimang. ²⁹Aca enyahwo tiibai, ocohini ithai enyangunerek ohokumok h’ohuju arehai, ti, aang ohokumokthi juk aboithe lodou dihap kwong eruhohina no Lemonye. ³⁰Iring dohoi, juk ohofir hothohu hohoi hulya, athuhi ehera bukulung. ³¹Inyong na, hoibangatha; okalu ayiji nahoi aboithe n’ohokumok olwarai.³²Othulo lonyahi dihithemi h’ohothing hijan inyong hindang, anyahi nang de dang ahani dihithemi ha Lalamonye dihide. ³³Ti, ara orisa nang lobo dihithemi h’ohothing, arisa nang de inyong dihithemi ha Lalamonye lothodihide.³⁴Hoijaratha aindu nang diyanu elik dihap. Ikara. Aaindu nang diyanu odemi loromyerek. ³⁵Aindu nang dithacuhonini olonyirok h’omonye. ahanerok h’ahathingie, afuretho h’olonyirok h’ahamurak, ³⁶omerok hohoi homonyori bebe, isong de ohothing h’ahang nathai.³⁷“Ohothing homuno omonye dia ahathingi okalak nang, aang ocohi dosong diwonan ara ohothifok hundang; ohothing homuno olonyi dia angering okalak nang, aang ocohi dosong diwonan ara ohothifok hundang. ³⁸Ohothing haang odohoro akruce nasong athiforoi nang, aang osiruni awonnan ara ohothifok hundang. ³⁹Ohothing hothemyo arimahina esu nasong, ithalithohini de inyong; ti, ohothing hoithalithok esu nasong thonang, orimahini de esu nasong.⁴⁰“Othulo loifothu ithai tuhudik, ifothu nang tuhudik; loifothu nang tuhudik, ifothu le lonya osulu nang lo tuhudik. ⁴¹Othulo loifothu ohocoroni th’ofure, lothol’ohocoroni, ifothu de esorio n’ohocoroni; loifothu othulo lobis, th’ofure tholo’othulo lobis, ifothu de dang esorio n’othulo lobis.⁴²Loisarak do lobo thohottik hulo ahari hamathai helik, th’ofure tholo’ohothifoni, diri ajyo nang dothai, aang de kwong ithalithok esorio nanyong.”

¹Aindu nya iwonan, athuhon no Yesu anyanyahina ohothifok honyong tomon larehai hulo esarithi, edyaharu amaji nya, alo dityenio dibothok hosong. ²Ethaninguna no Yoanne Batista, dimaji h’efitha, asang hehandyo Kristo, asulak ohothifok honyong donyong. ³“Inyahina ohoi,” ajyo isong hulo donyong, “Inyong iye lya lojyori loindu de lo, dia ithifeyo ohoi loboling?”⁴Yesu etharangyo, ajyo dosong, “Ifwatha dinyahina Yoanne ainyong ethairu ithai karik ainyong etehu ithai. ⁵atehuni ongodok, adahai opalak gwo, hodiha adihathik hengari, alibori, ethaningu othuhok, enyahunai ohoyak d’esu karik enyanyahahini Assayo Angejuho d’ohoicyanak. ⁶Othulo laang iboso thonang, thomunoi”⁷Omiru hafwarik ohothifok ho Yoanne adi, acama Yesu d’elulungi h’ohothing thonyong: “Afwan nyana nathai ditere, ainyong inya iwak ithai atehuna? Amiyang ewothol newahatho ahomwa? ⁸Ti, ainyong nya ifwo ithai ingengelyo? Othulo lotodo abongoitho hajon? Ohothing hoiyofo ahani, amanyai d’ahangithek h’ohobusi.⁹Inyahina nang ainyong ifwo ithai itihyo diya? Ohocoroni? Aa do, ti, etehu ithai okalak ohocoroni. ¹⁰Aca inyong lya lonya egerohini amanini, ‘Ottiha, nang lasulak ohifak hindang dihithemi hohoi, lolo ihuhumyo oyihoi lohoi dihithemi hohoi.’¹¹Anyahi nang dothai diri hijan th’ohothing hoisu angorwo awang lobolo hto Yoanne Batista. Ti, lotti ditha Ohobye lothohide, obolo tho Yoanne. ¹²Hara th’omiru hoityenerek Yoanne Batista ocame lonyong lwai hongorna, ethathacianie Ohobye lothohide th’eribo, karik dang athemyo ohoiribok endefuna inyong na.¹³Hara th’omiru ho Yoanne, ithabuho ohocorok karik oyano acama arami h’Ohobye; ¹⁴karik ara iwak ithai eruhon arami hasong, hajyo Yoanne inyong Elija, lonya athuhi acorohina ainduna nanyong. ¹⁵Ithaningie hathi, ara iwon ithai h’eyoha!¹⁶“Thene, d’ainyong de ngona etharijyo nang ohothing h’ofaning lo? Ojahithi okalifinok howoni dimaji h’enyanga karik ethanyangio: ilolongo elulung nabo, elulung nabo, omurut dihide, ¹⁷hijara, ‘Ehutha ohoi afakile dothai, ithai aang hoisur; ohoi ikor, ithai aang hoithangeryo ehiyo.’¹⁸Aca oindu nya Yoanne, ikara dinyo angiryang karik dimatha obalu. Ara ohothing bukulung ajyori, “Owon h’ohoilehio homnyori ditha honyong.” ¹⁹Ajara nya Olonyi l’Othulo aindu, anyo, amatha: ara isong hulo ajyori, “Idorotho othulo lo; onyo karik amatha bebe, awon ara omotte l’ohoiduduhak h’enyahwo karik omotte l’ohoholak. Ara olofiyoro h’Ojok ethaithahini, ti, ara hobis, th’asang thahafuk.”²⁰Ahani ne, ohothing honya th’abottok hehandyerek Yesu asang hafalangai huna, kabong hoiloyithoi adi th’eyatha hasong, aburunai; thiya Yesu eringyo isong, ²¹Etharinyak nya Yesu dosong, “Aang de bai omonyong dohoi, Koransin karik Betsaida, doisukaitha hothai homonyong hulya.” Ara nya ehandye asang hamonyong ahani di Tyre karik di Sidone, cuna ohothing hothiya athuk aburunu: iyofoi alyenyi karik afurai ahinwarang dihosi. ²²Oindu de ilahan do Tyre karik Sidone thothai, d’ofaning lofunerek ikanyerek arami hothohide.²³Iring tholohoi, Kapernaum, ijyo iye odohohini iye de dihide diri? Ara nya ehandye asang hune hahittwak di Sidone, iring nehandyerek dohoi, ira arami hua irahan lwai hongorna? ²⁴Ti, ajyo nang dothai, ilak de iwonan dihap ho Sodomo thonoi, d’ofaning lokanyerek arami.²⁵D’orii le ajyo Yesu, “Amojyo nang iye, Monye, Ohobu l’ahide karik l’ahap, anyo idimaitho iye asang hune th’ohothing hoilofioro karik hotehi abisan, ara iye inyahi d’ohothing hokabong iyeyena, iring okalifinok. ²⁶Aa do, Monye, aca omu nya dihithemi hohoi. ²⁷Athuk Lalamonye esarahina nang asang bukulung. Aang lotek Olonyi arahari Omonye; aang lotek Omonye arahari Olonyi karik arahari ohothing honyimu inyong dithalyehina inyong dosong.²⁸“Ithai bukulung ohothing hoithathaciana adohoitho asang hawuk, ifuna donang. Esarak nang de ithai ayiri. ²⁹Iduhuna adi aning nedingo ithai, ara ithai iyeyena thonang, arayo, ayyu nang karik ilik nang othaji; irimak ithai de ayiri n’ohoilehio hothai. ³⁰Aca ilik ethathaciana nesarak nang de dothai karik iyelehe de awuhan nesarak nang de dothai.”

¹D’orii nya le, alo Yesu d’Odomonika, abongoro thal’ amandak h’ohima. Oleng nya ahure ohothifok honyong, akweye ewa h’ohima, anye. ²Ti, atehuna n’Ofarisei arami hune, ajyori do Yesu, “Idoro, ihandyo ohothifok hohoi asang haang obis dihandyo d’ofaning l’Ojok.”³Yesu ajyo dosong, “Bai ithai hehena ainyong ihandyo Davide karik ohothing hoigyema honyong ahibu isong ahure oleng?” ⁴Alo dithwa h’Ojok onyo anyari nehumarik naang ocohi donyong karik ohothithing hoigyema honyong anyo dithwa h’Ojok.⁵Kabong ithai ihena oyihothik h’abisan, hojyo d’ofaning l’Ojok etharohojyo ohoigyemak d’ofaning l’Ojok, ti, kaang hoiyauni. ⁶ti, ajyo nang dothai owon lobo dine loikau athwa n’Ojok.⁷Ongida izai igigilo asing ho Ojok diza amaninihio: 'Awang egema za amiehunu do ohozing, ikara esorio no Ojok ti.' Ara itek izai ainyong ojo inyong, awang izai iruk ingocho ohozifok hundang ara namonyo, ha kaang ihandio aning namonyo. ⁸Nang Olonyi lo Ozulo, awon nang ha akolon dinyahina ohozing aning nehandio isong do ofaning le ezaleji."⁹Yesu edyaharu amaji nya, alo di Sinagogue. ¹⁰Otihatha, owon inya na othlo laye ahinang nayong. Ofarisei efiyo Yesu, ajyori, “Obis re ethalihyo othulo lodiha d’Ofaning l’Ojok?” Owahi arimahina oyihoi lojararik isong eyau Yesu.¹¹Yesu ajyo dosong, “Ngai thothai iduhunu, ara apwaharu oker lonyong aboithe ditha agulume d’ofaning l’Ojok, aang hethahoru oker lonyong lya? ¹²Ara thanathai, awang ayiji n’othulo okalu ayiji n’oker!?” Oyyu do ti, ehandyo aning nayyu d’ofaning l’Ojok.¹³Thiya Yesu ajyo d’othulo laye ahinang lya, “Odongok ahinang nahoi. Othulo lya adongok ahinang nanyong; ahinang anyahak dimamji honyong, ajahihterek nanya hoyyu ingyong na. ¹⁴Ofarisei afwo dindak dittahitha oyihoi lottidunerek attohorik inyong.¹⁵Atehan no Yesu ainyong owahi Ofarisei ehandyo donyong, edyaharu amaji nanya, alo adi. Athiforo ohothing holwari inyong lo; inyong ethalihyo isong bukulung. ¹⁶Inyong lo anyahi homok thosong thaang honyahi amaji mawonderek inyong. ¹⁷Ihandyo ahanya dofuni arami hanya onyahi Ojok thol’ohocoroni Isaia, iwonan ara hadiri:¹⁸“Ohoigyemani hindang lo, lathuk nang anyimuna,inyong lamuno nang karik lamuno nang ditha honyong. Asulak nang de Ohoile hindang donyong,doindu ilolongohina akanyo hindang amisok.¹⁹Aang de inyong oindu ilafere dia ithethena karik acama bebe diyihothik. ²⁰Aang de oindu ikilyo amiyang nakulo dia ithadunyo ahiryai nawulo, Inginyo de lwai inyong ateluna dirimahina abisan, ²¹karik ditha honyong, ofuni de ohothing isarahina eyihina nasong.”²²Thiya ohothing homok eyanu do Yesu othulo longodo karik athauho, anyo, owon ditha honyong ohoile lomonyong. Yesu ethalihyo inyong: inyong lo acama karik atehu. ²³Afalanga elulungir h’ohothing bukulung d’asang hehandyo Yesu hune, ajyori, “Ocohi donyong diwonan ara Olonyi lo Davide?”²⁴Ethaninguna n’Ofarisei arami hune, isong etharangyo, “Ongatterek inyong lo ohoilehio homonyori adi, anyo, Beelzebul, ohobu losong isarak inyong akolon.” ²⁵Atek Yesu ainyong igigilo isong, ajyo dosong, “Amiji nebwayo ahwan nanyong ditha elulungir heriborik nabo, aang omanyai orii hohodo. Karik abore nebwabwa th’oyihethik dia th’ahangithek, eriborik nabo, opwaharai de dihap.²⁶Inyong na, ara ongaterek Sitan Sitan, orwang iring ijan ohobye lo Sitan ipwaharu; orwang iring ajaran athuhi inyong ebwabwayo ara elulungir hafwo de ipwaharu kwak adi! ²⁷Ijyo ithai angaterek nang ohoilehio homonyori anyo esarak nang Beelzebul akolon nanyong dihandyo ahani. Oyyu, ngai isarak ohothifok hothai akolon dingaterek isong adi? Aning nehandyo ohothifok hothai, onyahi hijan ipal ithai!²⁸A a, ikara Beelzebul, ti, Ohoile l’Ojok isarak nang akolon dingaterek ohoilehio homonyori adi, nethaithak hijan athuk Ohobye l’Ojok ainduna dothai. ²⁹“Awang othulo locohi awuryo athwa n’othulo loko, eyaru attitto hanyong adi, ara kabong dodo hothoryo othulo loko lya, arujyo hathi athwa nanyong. ³⁰“Othulo loida nang, ongica honang diri; laang olwahyo nang disuduhyo, lodi sasahacyo nang.³¹Karik nang thonyahi ithai hijan, ocohi dimiehina ohothing d’eyau dia aning namonyong najyo isong, ti, lehandyo aning namonyong d’Ohoile Lodwa, aang de omiehini. ³²Locama aning namonyong d’Olonyi l’Othulo, ocohi dimiehina; ti, locama aning namonyong d’Ohoile Lodwa, aang de omiehini - thenene dia mak.³³“Diwonan h’ahayocong nayyu, owak iwon iye h’ohiyani loyyu ahwan nanyong; ara iwon iye h’ohiyani lomonyong, iwon iye de dang h’ahayocong namonyong. Otehi ohiyani th’ahayocong than’edoyo inyong. ³⁴Ithai amukok n’amunuok – angai icama ithai asang hayyu, ahibu ithai imonyong? Aca ocama ahuthuk asang hefut dithaji. ³⁵Iyanu othulo loyyu asang hayyu thathah’akoro n’asang hayyu; ara othulo lomonyong, eyanu asang hamonyong thathah’akoro n’asang hamonyori.³⁶Ocohi dothai ditehan tuhudik hijan d’Ofaning l’Akanyo, ofuni de iwahan th’ohothing abok abok thonyahi arami hamonyori hacama isong. ³⁷Ocamitha hothai ofuni ithai de ikanyerek – difuna inyahinerek dia ibis iye dia epal iye.³⁸Thiya, ohoityenak homok h’oyalu karik Ofarisei homok acama dihide, “Ohoityenani, “isong ajyori, “iwak ohoi iye atehuna ihandyo asang hafalangai.” ³⁹“Angai omonyori karik angai aang ohothing howoni ara h’Ojok d’ofaning lo!” Ajyo Yesu th’afalanga, “Ifiyo ithai nang aning nafalangai? A a! Aning aboithe nafalangai nesarahini dothai, inyong aning nafalanga n’ohocoroni Jonah. ⁴⁰Iring nanya isukarik Jonah ditha h’ohome operok aunihoi karik oharyethik aunihoi, oindu de dang Olonyi l’Othulo isuka dithah’audori n’ahap, operok aunihoi karik oharyethik aunihoi.⁴¹D’Ofaning l’Akanyo, ofuni de ohothing ho Niniveh iwetha ajyori epal ithai, anyo, eloitho isong adi th’eyatha hasong, ethaningye ettittoyo no Jonah; karik nang anyahi ithai hijan dini, owon aning nabo nakalu Jonah.⁴²D’Ofaning l’Akanyo, oindu de Ahabu no Sheba iwetha thahide ajyo epal ithai, anyo, alo inyong na thomiji honyong dithaningyo etyenio n’olofioro n’Ohobu Solomone; karik nang anyahi ithai hijan dini, owon aning nabo nakalu Hobu Solomone!⁴³Ara ohoile lomonyong lalo adi th’othulo, olo d’amiji nayoho dithifeyo amaji nayiryarik. Ara aang orimak nabo, ⁴⁴ojyo d’ahwan nanyong, ‘Anyaha nang de dihang honang.’ Thiya, anyaha, arimak athwa nanyong aang othulo thiya karik ara nafiya karik ehuhuma tuhudik.. ⁴⁵Thiya, alo dindak diyanu ohoilehio cofa hokalak inyong thamonyori, afuni iska diya. Thiya, ajara asang fodok athuho, etharohoja othulo lya fodok okalak nanya thoculwe. Asang de hune hafuni ifuhon d’ohothing omonyorok h’ofaning lahanana.”⁴⁶Hocama Yesu h’ohothing ahani, edwong ahathingi h’olarok. Awethi dingwai, owahi acama honyong. ⁴⁷Loboling th’ohothing ajyo donyong, “Idoro, nehathingi karik holoilai howetha dindak, owahi acama hohoi.”⁴⁸Yesu etharangyo, “Ngai nanahathingi? Hongai halalalai? ⁴⁹Thiya anithok ahinang nayong d’ohothifok honyong, ajyo, “Idorotho! Nanahathingi karik olarok hundang hulo! ⁵⁰Loihandyo aning nawak Lalamonye lothohide, inyong lalalai, nanahani karik nanahathingi.”

¹Ofaning le, edehi Yesu ahang, alo dipogo h’ajor; awoni diya dityenio. ²Esarak nya elulung nahittok n’ohothing nasuduha diker honyong, inyong aden ditha h’aroko, awoni diya, ahibu ohothing owetha difohor h’ajor.³Ocama nya inyong lo th’etharijitha, dinyahinerek asang olwarai. “Owon nya othulo lolo diyeyo ohinyomo h’ohima. ⁴Ayeyo nanyong ohinyomo dimana, adowuni homok diyihoi, ara ahwen afuni, alutharai isong adi. ⁵Homok adowuni dihide h’ahap nalwari omorik diya ahibu aboro omuthari. Ara ohinyomo kwak amuda, anyo, aangi aboro hafwo adihap bebe. ⁶Ti, ainduna nya n’oholong, amudai ohima hottik hobulu; karik kabong ohade hojinga dihap tuhudik, abocori ayohoji kwak.⁷Homok ohinyomo adwuni ditha h’ehwa habolori, aromye amat habulu hune. ⁸Ti, homok ohinyomo adowuni d’aboro hayyu, ara ohima angidari ara hoyyu; arimak homok ebetheha h’ohima, hulo esihe athomone inde, homok esihe athomone aunihoi. ⁹Yesu engohi ocame lonyong, “Ithaningyethek, do ti, ara iwon ithai h’eyoha.”¹⁰Thiya ohothifok afuni do Yesu efiye inyong, “Anyo icama iye d’ohothing th’etharijitha?” ¹¹Yesu etharangyo, “Atehan n’arami hedima h’Ohobye lothohide, athuhi esarahina dothai, ti ikara dosong. ¹²Aca, othulo lowon haning nabo, donyong de isarahini nabo, dowon haning nakalak nawon donyong; ti, othulo laang aning nabo thonyong, juk tiibai nawon honyong ne, iduhuni de adi thonyong.¹³Arami hesarak nang acama dosong th’etharijitha, anyo, omijyo isong hulo, ti, aang otehuni, karik ethayirgye, ti, aang ithaninguni karik aang otehi tuhudik. ¹⁴Inyong na, acorio no Isaya, ocohi dosong thurubuk: ‘Ithayirye, ethayirye de ohothing hulya, ti, aang otehi tuhudik; omijyo isong, omijye, ti, aang otehuni,¹⁵Anyo, othehoi ahosi hasong, athuhi aduneyo eyoha hasong, athuhi emuthahina ahonde hasong. Ara ikara ahani, irahi ahonde hasong itehuna, irahi eyoha hasong ithaninguna karik irahi ahosi hasong itehan tuhud karik ira isong iloitho donang, ojyo Ojok, karik nang isong ithalihyo.’¹⁶Iring dothai, angai de berien ileng ithai! Otehuni ahonde hathai, eyoha hathai ithaninguni. ¹⁷Anyahi nang ithai tuhudik, ohocorok karik ohothing h’Ojok holwari, awahi atehuna ainyong itehu ithai, ti, aang ocohi isong atehuna; karik awahi ethaninguna, ti, aang ocohi isong ethaninguna.¹⁸Ithanignyethek, hoi, ainyong ojyo etharije n’ohoyeni l‘ohinyomo. ¹⁹Ohothing hoithairu ocame l’Ohobye, ti, aang otehi tuhudik, isong hojahitha ohinyomo hodowuni dihiji h’oyihoi. Ara Omonyoroni Lo aindu ilutharu ohinyomo adi.²⁰Ohinyomo hodohi d’amaji nakek ara omorik, awetha dimaji h’ohothing hoifothu ocame th’amuno, ara hethaningyo. ²¹Ti, aang odiyoroi ara nawudo dihap ditha hosong; awang homanyai omiru holwa. Inyong na, ara ethagyemio dia ethathaciana naindu th’arami thoh’ocame tholo ithaningu isong, abocori attaluho.²²Ohinyomo hadou ditha ehwa owetha d’ohothing hoithaningyo ocame, ti, ehaya n’amanya nothohop karik amuno n’enyahwo akoryo ocame; iring ohiyani, aang ithadoyo ahayo. ²³Ara ohinyomo hodohi d’ahap nayyu awetha d’ohothing hoithaningu karik atehi tuhudik ocame: idoye ahayo, homok hosong olwarai iring esihe athomone inde karik homok esihe othomone aunihoi.”²⁴Yesu anyahi isong aryamara naboling: “Ojahitha Ohobye lothohide ahana. Ayehi othulo ohinyomo hoyyu di mana honyong. ²⁵D’oharie nya lobo, aindu omerohothononi ahibu ohothing athuk ajothoro, ayehi ohanger h’athanyan ditha ohima, alo adi. ²⁶Abolori n’ohima, ewa hasong aleyori, athanyan dang ethalyehi ahwandek.²⁷Ohoigyemak h’ohoromoni, ajyori donyong, “Lahong, ohinyomo nya hoyyu iyehi iye dimana hohoi; thongai oindu amiyang n’athanyan ne?’ ²⁸‘Omerohothononi nya lobo ihandyo arami hune,’ inyong etharangyo. ‘Iwak iye ohoi thoifwai orucye amiyang nya adi?’ isong efiyo inyong.²⁹“A a,” inyong etharang, ‘anyo, dirucyo hothai, tek ithai iryafu aruthuna h’ohima. ³⁰Ohima karik athanyan hune thoboloro tok dingongocio. Aindu nang de inyahina ohoingongothok thorucye amiyang dodo adi, athoryo ara ahosi; edwehini adi. Thiya ithai hathi ingongocyo ohima, ara ithai isarak di koro honang.’”³¹Yesu anyahi aryamara nabo dosong: “Ojahitha Ohobye lothohide ahana. Eduhu othulo ohangercong lotti bebe, edulak dimana honyong. ³²Omutha ohongercong lya diri bebe, ti, ara labolo, okalak de oyani bukulung th’abolori. Oindu de iwonan ara ohiyani lofunerek ahwen iduhorik athwahio hasong dithandak honyong.³³Yesu anyahi isong ikoti aryamara naboling: “Ojahitha Ohobye lothohide ahana.Owon nya athulo neduhu omundo, eharuhi h’ahifa ethemithi athomone arangwan tok eyafutha ara narijoro see.³⁴Ocama nya Yesu th’aryamarihio, dinyahinerek asang halwari d’elulungir h’ohothing; aang nya ira icama dosong kwong aryamarihio. ³⁵Ihandyo ahanya, dofuni arami h’ohocoroni iwonan ara hadiri: “Acama nang de aryamarihio, ara nang lacama dosong. Anyahi nang de isong asang haang otehi, gee thoyeyo ahap.”³⁶Edehina no Yesu elulung n’ohothing, ajinga dithwa, afuni ohothifok honyong ajyori donyong, “Inyahi ohoi ainyong aryamari n’athanyan amiyang dith’amana.” ³⁷Yesu, etharangyo, “Othulo loyehi ohinyomothi loyyu, inyong Olonyi l’Othulo; ³⁸Amana inyong ahap; ohinyomothi loyyu, inyong othulo lowon ara l’Ohobye; athanyan isong ohothing howon ara h’Omonyoroni Lo; ³⁹Omerohothononi loyehi athanyan, inyong Sitan; engongocio inyong ecuhit n’oper; ohoingongothok, isong anjelohio;⁴⁰Iring aworye karik aswahahini athanyan, ahani de dang ofuk dicuhit h’oper: ⁴¹osulak de Olonyi l’Othulo anjelohio disuduhyo adi th’Ohobye osang hoisarak ohothing eyauna karik isong fodok hoisarak ohothing ehandyo asang hamonyori, ⁴²karik amirok isong dith’ahimang , amaji nawon de diya ekoron karik erocio n’ohala. ⁴³Thiya, owuloi de ohothing h’Ojok iring oholong dith’Ohobye l’Omonye losong. Lowon h’eyoha, thoithairye!⁴⁴Ojahitha Ohobye lothohide ahana. Afuk d’othulo loboling dirimahina abara dith’amana karik amuhak ikoti; thiya ne, awahu ethanyangahina asang hanyong fodok thamuno, ara inyong anyaha dinyanguna amana nya. ⁴⁵Karik dang, ojahitha Ohobye lothohide ahana. Owon othulo lothifeyo onyahuthong lolibo, ako, ⁴⁶arimahina nanyong aboithe lokalak th’alibori karik th’akolon, alo, alo ithanyangahina asang hanyong fodok, enyangu onyahuthong lya.⁴⁷“Karik dang ojahitha Ohobye lothohide ahana. Omirok ohoyapohak abwoi dith’ajor, endefuni opeceni fodok h’ohom. ⁴⁸Efuthan nabwoi, efihuni difohor; ara isong awoniari dibwayo ohom: ohom hoyyu hulo, esarahini dimuthuhi, ara homonyori acohoroi adi.⁴⁹Oindu de ijahitha ahani dicuhit h’oper; ofuni de anjelohio ifwan dindak disuduhyo ohothing homonyori thoh’oyyu, ⁵⁰karik afuni de imirohina isong dith’ahimang, nafunerek isong ikor, erocye ohala.⁵¹“Itek ithai tuhudik asang hune?” Yesu efiyo isong. “Aa,” isong etharangyo. ⁵²Ahani ne, inyong etharangyo, “Onyahi asang huna hathi ahana: ohoityenani l’oyalu, loindu iinduna ara ohothifoni ditha h’Ohobye lothohide, oindu ijahitha lomonye h’ahang loiduhu asang angejuho karik angoro adi tho koro honyong. ⁵³Athuho no Yesu enyanyahahina isong aryamarihio, edyaharu amaji nya,⁵⁴alo d’abore n’ahang nanyong. Etyenio di Sinagogue, ara ohothing hethairu inyong afalanga. “Thongai orimak inyong elofioro najak ahani?” isong efiyo. “Ara asang hafalangai hanyong? ⁵⁵ikara inyong olonyi l’ohosathani lahyek? Ikara Mariaahathingi nayong? Karik ikara Yakobo, Yosefo,Simone karik Juda olarok honyong? ⁵⁶Aang ara dini isuka ahanerok hanyong? Dingai orimak asang hune fodok?”⁵⁷Ahani ne, edari isong inyong. Yesu ajyo dosong, “Obangi ohocoroni d’amasok bukulung, arahari dibore h’ahang nanyong karik ahang nasong. ⁵⁸Anyo, aang owoni heruhon; kabong inyong lo dang ihandyo asang hafalangai olwarai diya.

¹D’omiru hule, ethairu nya Erode, ohoindefani lo Galilea, assayo ho Yesu. ²Ajyo d’ohoigyemak honyong, “Inyong lya Yoanne Batista; ebuhu th’oye.” “Inyong nawon inyong h’akolon nehandyerek asang hafalangai.”³Aca endafaitho nya Erode Yoanne karik efithak inyong, th’arami thoho Erodias, afure n’olai. Fillipo. ⁴Anyahi nya Yoanne Batista Erode hijan, “Aang obis dohoi diruthahina nafure holoilai Fillipo, Erodias!” ⁵Awak nya Erode attohoro inyong, ti, obang nya Ojudei, anyo, dosong, inyong nya lo ohocoroni.⁶D’amuno n’ofaning lothamanarik Erode, esur nangaring h’Erodias dihithemi h’elulung n’ohothing. Amuno nya Erode, eruhok donyong, ⁷“Epitha nang, esarak nang iye de aning nefiyo iye thonang!”⁸Th’alwahio than’ahathingi, efiyo nangaring h’Erodias inyong, “Isarak nang dini, thenene ditafu ahu no Yoanne Batista!” ⁹Adiha othaji l’ohobu, ti, anyo, athauk inyong eruhohina dihithemi h’ohothing, efahak hijan aning nawak inyong thesarahini donyong.¹⁰Ahani ne, abonguni ahu no Yoanne Batista dimaji h’efitha. ¹¹Eyanai ahu ditafu, ethafothohini dan’anagring h’Erodias; inyong na eyahak ahathingi. ¹²Ohothifok ho Yoanne afuni iyaru ahwan no Yoanne afwoi inuhahina. Thiya, afwoi inyahina Yesu.¹³13 Ethaninguna no Yesu assayo h’aye no Yoanne, edyaharu amaji nya th’aroko, alo th’ahwan d’amaji nanyong hamaring. ¹⁴Yesu adohu adi tho roko; atehuna nanyong elulung nahittok n’ohothing, amiehunu, ethalihyo hodiha thosong.¹⁵Nya th’athari, afuni ohothifok honyong donyong, ajyori, “Aang oholong karik olama amaji ne. Ohothing thoifwa dith’amisok dinyangahina ahwandek anyari.”¹⁶“Aang ofwoi,” Yesu etharangyo. “Ithai th’ahwandek, isarahina isong aning nabo dinyo!” ¹⁷“Asang fodok hewon ohoi hosong hini, elolongitha h’angiryang miyet karik ohom arehai,” isong etharangyo. ¹⁸“Iyanethek hoi isong donang hini,” Yesu ajyo.¹⁹Inyong anyahi ohothing thowoni dihap dihide h’amiyang. Eduhu elolongitha miyet h’angiryang huna karik ohom arehai hulo; amijyo dihide, afurak Ojok ahinwarang; epipinyo elolongitha h’angiryang, esarak d’ohothifok honyong; ara ohothifok esarak isong d’ohothing. ²⁰Efong ohothing bukulung ara nacohi. Thiya, ohothifok ethafuthak okatino tomon larehai th’afithono than’anyari. ²¹Arahi nya ohothing, aang hoiherye angorwo karik okalifinok h’akalifinok, 5,000.²²Thiya Yesu ethacurok ohothifok honyong di roko, thoifwa ahithemi d’oyirik lobo l’ajor, ahibu inyong leru asulak ohothing thoifwa adi. ²³Athuhon nanyong asulahina ohothing adi, alo dihide h’odonge hamaring di mojyo. Edwongon n’athari, orimak Yesu hamaring; ²⁴d’orii lya, aroko olamarai dith’ajor, ahibu ahamwoitho n’ahari inyong igugungyo, anyo, owam nya ahomwa nahittok ado inyong.²⁵Dihiji h’omiru aunihoi karik inde h’amoithe berien, aindu Yesu d’ohothifok honyong, ahibu inyong oduha th’ahide than’ahari. ²⁶Atehuna nasong inyong adaha dihide h’ahari, abangi. “Ohoile re!” ajyori isong, karik erwahai th’abangi. ²⁷Yesu acama dosong kwak. “Ithakolotho,” ajyo inyong. “Nang lya. Hoibangatha!”²⁸Thiya Petro elolongo, “Hobu, ara iye lya diri, inyahi nang thoindu dindak dohoi th’ahide than’ahari.” ²⁹“Iwong!” etharangyo Yesu. Ahani ne, Petro aculuyo adaha ahide n’ahari do Yesu. ³⁰Ti, eisuna nanyong ahomwa nako, abang, abocyo adiyoro dith’ahari. “Ithalwahu nang, Hobu!” inyong lo ekor.³¹D’orii lya, Yesu kwak ewawar, ethahoru endefuna ahinang nanyong, ajyo, “Ya, angai beriena omutha eruhon nahoi! Angai iririhitha iye diruhon?” ³²Ara isong arehai ecurok di roko. Ara ahomwa awetha. ³³Thiya, ohothifok ditha h’aroko, amojyoi do Yesu.“Diri, iye Olonyi l’Ojok!” isong eliliha.³⁴Isong alangitha ajor, afwoi d’ahap no Gennesaret, ³⁵amaji nateharik Yesu. Ahani ne, asulahini isong d’ohothing hodiha dith’amiji, eyanai isong do Yesu. ³⁶Isong hulo amojyoi inyong thohorik ohodihak thothino juk eker ti n’abongo nanyong; ara ohodihak hathin, ayiji.

¹Thiya Ofarisei homok karik ohoityenak h’oyalu afuni tho Yerusalem do Yesu, efiye inyong, ²“Anyo theene bai, naang ohothifok hohoi othifoitho etyenio nefothuni th’ohohonyo hohothai? Aang ofiniai tuhudik dihithemi h’anyari!” ³Yesu etharangyo, “Anyo aang ithai ithifoitho efahit n’Ojok, ara ithai ithifoitho etyenio nathai hamonye?⁴Aca ojyo Ojok, ‘Obanga lemonye karik nehathingi, karik ‘Lofyethak omonye dia ahathingi, awak ithayehini inyong. ⁵Ti, ityenio ithai hijan ara owon othulo h’aning nacohi inyong alwahyerek omonye karik ahathingi, ti, ajyo, ‘Owon na ara n’Ojok!’ ⁶aang inyong lo ithahabuyo omonye lonyong. Th’oyihoi tholya aang inyong lo othifoitho efahit n’Ojok, dithifoitherek etyenio nathai hamonye.⁷Ithai odwalak! Angai nya obis Isaia dicoryo thoithai! ⁸‘Ohothing hulo, ojyo Ojok, ithahuye nang th’ocamitha thohosong, ti, olama othaji losong diri thonang. ⁹Awang ohwadu aning nabo dosong dimojyo donang, anyo, ityenio isong hulo oyihothik hoisukarik othulo, iring oyano hundang!’”¹⁰Thiya Yesu elongo elulung n’ohothing donyong, ajyo dosong, “Ithaningyethek ara ithai itek tuhudik! ¹¹Ikara aning nalo tholohuthuk h’othulo inyong isarak inyong alibori dimojyo, ti, aning naindu tholohuthuk ithabocyo inyong.”¹²Thiya ohothifok honyong afuni donyong, ajyori, “Aang iye itek deene hijan odihari arami hecama iye d’Ofarisei?” ¹³“Ofuni de iruthuna adi, ohiyani lakabong Lalamonye idulak dihide,” Yesu etharangyo. ¹⁴Hoithathacianio ahwan nahoi thosong! Isong hulo ohoityenak ongodok h’ongodok; ara othulo aboithe longodo ithaicyo ongodoni lobo oyihoi, opwaharu isong arehai fodok dicundom.”¹⁵Petro acama omurut dihide, “Inyanyaha d’ohoi ocame lya.” ¹⁶Yesu ajyo dosong, “kaang ithai ilofioro tuhudik, tholohide hohomok. ¹⁷Aang ithai itek tuhudik? Aning nalo tholohuthuk h’othulo, dihohye honyong olo, alo inden adi thohwa honyong.¹⁸Ti, asang hafuni tholohuthuk, thothaji ofuni; isong hune asang hesarak othulo ebothan dimojyo. ¹⁹Aca thothaji honyong ofuni igigilitha hamonyong, heyaru inyong dittohyo, aferorik athulo n’othulo karik oyihothik h’eleru homok olwarai. ²⁰Ti, dinyo kwong afiniya, iring ojyori isong ithai thoihandye – aang ithabocyo othulo.²¹Yesu edehi amaji nya alo d’ahap naindek d’abothok, Tyre karik Sidon. ²²Athulo no Kanaanite namanya d’ahap nya, aindu donyong. “Lolonyi ho Davide!” inyong na ekor bebe. “Omiehi nang, Lahong! Owon nanangaring h’ohoile lomonyong; odiha ara namonyong.” ²³Kabong Yesu hojyo donyong juk ocame aboithe. Ohothifok honyong afuni donyong, amojyoi inyong, “Ongararik inyong na adi! Nadithifoitho ahibu inyong ithathahomyo ohothai!”²⁴Thiya Yesu etharangyo, “Osuluni nang nya ti, d’akero halitho h’ohothing ho Israele.” ²⁵th’arami thohune, aindu athulo ne, apwaharu di hejek honyong. “Olwaha nang, Lahong!” inyong na ajyo. ²⁶Yesu etharangyo, “Aang obis diduhuna anyari n’akalifinok, amirohini d’ongohe.”²⁷“Arami hadiri hune, Lahong;” inyong na etharangyo; “ti, juk ongohe, onye th’anyari nafithoro nadow th’amaji nanyerek holomonye h’ahang.” ²⁸Yesu etharangyo inyong na, “Iye athulo n’eruhon nabolo! Aning newak iye, ihandye de dohoi.” D’orii le, ayyu angering nanyong.²⁹Yesu edehi amaji nya, alo thal’ajor no Galilea. Adohitha adonge, alo iwoni. ³⁰Elulungir hahittwak h’ohothing, afuni donyong, iyanai hosong: ongurak, ongodok, ohoryethak, othuhok karik ohothing olwarai hodiha, hoithaferik isong indehai dihejek ho Yesu; ara inyong ethayijyo isong. ³¹Afalanga ohothing, atehuna nasong: othuhok, ocama; ohoryethak, ebuha; ohopalak, adaha ibisai; ongodok atehuni; karik isong ethahuyo Ojok lo Israele.³²Yesu elongu ohothifok honyong donyong, ajyo, “Odiha nang othaji d’ohothing hulo, anyo, esukai honang operok aunihoi kwong anyari. Aang nang awak asulahina isong adi, kwong ithanyo isong, anyo, tek apwaharai h’ahure diyihoi, difwan dimiji hosong.” ³³Ohothifok efiyo inyong, “Thongai de orimahini anyari nacohi ethanyerek diterere elulung ne?” ³⁴“Baya elolongitha h’amuhuyut owoni dothai?” Yesu efiyo. “Cofa,” isong etharangyo. “Karik ohom hottik tiibai.” ³⁵Yesu anyahi isong thowoni dihap.³⁶Thiya, Yesu eduhu amuhuyuthi cofa h’anyari hune karik ohom, afurak Ojok ahinwarang, apinyo, esarak isong d’ohothifok, ara ohothifok esarak isong d’ohothing. ³⁷Anyo isong fodok anyari ara isong efong. Ara ohothifok ethafuthak akatino cofa h’anyari nafithoro. ³⁸Ohifalai l’ohothing hanyo nya anyari 4,000, aang angorwo h’okalifinok thiya. ³⁹Thiya Yesu athurok ohothing adi, ecurok di roko, alo dihap ho Magadan.

¹Homok Ofarisei h’Osadducihio hofuni do Yesu hulo awahi alohuna Yesu; Isong hulo efiyo inyong thoihandye aning nabo nafalangai dosong, dithaithahina hijan inyong lo th’Ojok. ²Ti, Yesu etharangyo, “Ara oholong lalum, ijyo ithai, ‘Ohoi hoifwo iwonan h’ahap nayyu, anyo, adorya ahide.’³Th’amoithe berien, ithai ijyo, ‘Owak ohuju asan, anyo, odorya ahide ahibu inyong odik ara neriok.’ Ocohi dothai ditehan angai olo ahap ijahitha th’amijyo dihide, ti, aang ocohi dothai dinyahina ethaithitha h’omiru!” ⁴Angai omonyori karik aang owoni ara h’Ojok, ohothing h’ofaning lo!” Ifiyo ithai nang aning nafalangai? Awang! Aning aboithe nafalangai nesarahini de dothai, inyong aning nafalangai no Jonah. Yesu edyaharu isong. Alo adi.⁵Alangitha n’ohothifok d’oyirik lobo l’ajor, akworoi eyaru h’anyari. ⁶Yesu ajyo dosong, “Omijyethek tuhudik, isukathik olamarai th’omundo h’Ofarisei karik h’Osadducihio.” ⁷Ohothifok aculuyo enyanyaha arami hune dihji hosong, “Ocama inyong ahani, anyo, kaang ohothai iyanu h’anyari.” ⁸Otek Yesu ainyong dwo ocama isong, efiyo isong, “Anyo ithafero ithai dihiji hothai awangan n’anyari? Angai berien na omutha eruhon nawon dothai!⁹Kabong ithai itek tuhudik? Aang ithai iyu epipinyahina hindang elolongitha h’angiryang miyet d’ohothing 5,000? Baya akatino ithafuthak ithai? ¹⁰Karik ara elolongitha h’angiryang cofa d’ohothing 4,000.¹¹Angai aang ithai itek tuhudik aangan hindang acama arami h’anyari? Isukathik olamarai th’omundo h’Ofarisei karik h’Osadducihio!” ¹²Thiya ohothifok atehi tuhudik hijan aang inyong ocama dosong arami h’omundo hoihuhumyerek anyari, ti, th’etyenio n’ Ofarisei karik n’Osadducihio.¹³Yesu alo d’ahap naindek d’abore no Caesarea Filippi, amaji nefiyerek inyong ohothifok honyong, “Ngai ojyori ohothing Olonyi l’Othulo lya?” ¹⁴“Ojyori homok Yoanne Batista,” isong etharangyo. “Homok ajyori Elija; ara homok ikoti ajyori Jeremia dia lobo th’ohocorok.” ¹⁵“Ara ithai?” inyong efityo isong, “Ithai ijyo nang, ngai?” ¹⁶Petro etharangyo, “Iye Kristo, Olonyi l’Ojok lomijyo.”¹⁷“Oyyu dohoi, Simone, lolonyi ho Yoanne,” Yesu etharangyo. Aca aangi arami hadiri hune ofuni th’othulo, ti, isarahini dohoi gwo thalala Monye lowon dihide. ¹⁸Inyong na, anyahi nang dohoi, Petro: iye amorwong; dihide h’asihothe n’amorwong na, aduhok nang de ekklesia hindang, naang de juk oyihethik ho Inferno otelu.¹⁹Esarak nang de dohoi ongaitha h’Ohobye lothohide. dara aning nelwo iye dihap, olwoi de dang dihide; nehohi iye dihap, ohohini de dang dihide.” ²⁰Thiya Yesu efahak ohothifok honyong thaang onyahi dolobo othulo hijan inyong Kristo.²¹Th’orii le adihithemi, aculuyo Yesu acama oleyoroi d’ohothifok honyong, “Owak alo nang di Yerusalem di thahthaciana th’ohobolok, ofadirihio hohittwak karik ohoityenak h’oyalu. Ithayeye nang de, ti, diholu h’operok aunihoi, ofuni nang de ithadothuna disu.” ²²Petro eyaru Yesu arakang diringyo inyong. “Ojok thaang ohorik paat, Hobu!” ajyo Petro. ²³Yesu eloyitho ihurongoi, ajyo do Petro, “Ilo adi thonang, Sitan! Iye ohibose diyihoi honang, anyo, aang ocamitha hohoi donang hulya ofuni th’Ojok, ti, th’elathulo.”²⁴Thiya Yesu ajyo d’ohothifok honyong, “Ara owak othulo lobo ainduna honang, thokworo ahwan nanyong, thoiduhu akruce nanyong, athifunu nang. ²⁵Lowak ethalwahuna esu nanyong, ithalithok de, loithalithok esu nanyong thonang, orimak de esu nanyong. ²⁶Orimahini de diri ohothing aning nabo, ara orimahini ahap fodok, ti, ethalithohini esu nasong?²⁷Aca aindek Olonyi l’Othulo ainduna d’abolori n’Omonye lonyong h’anjelohio honyong; oindu de disoryo ohothing abok abok, ngai thoigyematha thohonyong. ²⁸Anyahi nang ithai, owoni homok haang de oye, ara kaang Olonyi l”Othulo hoindu ara Ohobu.''

¹Diholu h’operok inde, eyaru Yesu honyong: Petro karik olarok, Yakobo karik Yoanne dihu h’odonge lohodo, isong diya hamaring. ²Amijyo nasong adihide, atehuni isong eloyitho oindu do Yesu: awulo ahomong nanyong iring oholong karik abongoitho hanyong abwori pang pang pang.³Thiya, ohothifok aunihoi hulo atehuni Musa karik Elija ocamai ho Yesu. ⁴Ahani ne, Petro acama omurut dihide, “Hobu, angai berien na oyyu inyong dohoi diwonan dini! Ara iwak iye, aduhok nang de amorokohio aunihoi dini: aboithe dohoi, aboithe do Musa karik aboithe d’Elija.”⁵Ahibu inyong hocama, aindu adiko nawulo dihide hosong, ara oilongit thath’adiko ajyo, “Olonyi hindang olefeng lo loko, ditha honyong amuno nang ithaningyethek donyong!” ⁶Ethaninguna n’ohothifok omurut lya, abangi isong hulo, apwaharai ahomongithek adihap. ⁷Yesu aindu dosong, athin isong. “Odothothik th’ahide.” inyong ajyo. “Hoibangatha!” ⁸Thiya, isong hulo amijyo dihide. Kaang isong hulo otehu othulo loboling, arahari, ti, Yesu.⁹Ecuruna nasong th’odonge, Yesu anyahi dosong, “ Hoinyahina ethalyehina nethuk ithai attehuna ne, took, Olonyi l’Othulo afuna ethadothuna th’oye.” ¹⁰Thiya, ohothifok efiyo Yesu, “Anyo ojyori ohoityenak h’oyalu hijan, Elija de icak ainduna ahithemi?”¹¹“Elija diri laindu ahithemi,” Yesu etharangyo, “karik, orimak de asang fodok athuhi ehuhuma. ¹²Ti, anyahi nang ithai, athuk Elijah ainduna berien. Aang ohothing hotek; eduhuni inyong ara othulo thene iring owak isong. Ahani de dang ofuni ihandyo d’Olonyi l’Othulo.” ¹³Thiya, ohothifok atehi tuhudik hijan ocama Yesu dosong arami ho Yoanne Batista.¹⁴Anyahuna nasong d’eluluung n’ohothing, aindu othulo lobo do Yesu, arigongo dihithemi honyong, ¹⁵ajyo, “Lahong, omiehi olonyi hindang! Omwai inyong lo h’ahahe. Ara nerimu, omirok inyong dith’ahimang dia ahari. ¹⁶Eyanu nanag inyong d’ohothifok hohoi dithayijyo, ti, kabong hoithayijuni inyong.¹⁷Yesu etharangyo, “Angai iwon ithai ara ohothing haang iruhi karik ohothing hoipal! Omiru baya iwak ithai esuka nang hothai? Iyanethek oitho le donang dini. ¹⁸Yesu esarak efahit d’ohoile lomonyong, alo adi thotha hoitho; th’orii le, ayyu oitho.¹⁹Thiya, ohothifok afuni do Yesu hamaring, efiye inyong, “Anyo aang ohoi ingatterek ohoile lomonyong adi?” ²⁰Yesu etharangyo, “Anyo omutha nya eruhon nathai.” Anyahi nang dothai hijan, ara iwon tihai heruhon nabolo iring ohinyomothi l’ohiyani lohittok, ocohi dothai dijaran d’adonge ne, “Ilo thene, ilo di! Alo. Ira ithai ihandyo asang bukulung!” ²¹*(Amaninihio angoro hako bebe, aang owoni h’ekelit 21, Ti, opecen l’ohoile lomonyong lya, aang olo adi arahari th’amojo karik anyari tiibai) *²²Afuna n’ohothifok bukulung di Galilea, Yesu ajyo dosong, “Aindehi ethafothohina adi n’Olonyi l’Othulo d’ohothing. ²³hofuni inyong ittohoro; ti, diholu h’operok aunihoi, ofuni de inyong idohuna disu.²⁴Afuna no Yesu karik ohothifok honyong di Kapernaum, afuni do Petro ohoiduduhak h’aduma n’Atemplo, efiye Petro, “Oduma ohoityenani lothai aduma n’Atemplo?” ²⁵“Ahani do ti,” Petro etharangyo. Ajingara no Petro dithwa, ecak Yesu acama omurut dihide, “Simone, ainyong egigilo nahoi? Ngai oduma adumathik h’ohobwore h’ahap na? Ohothing h’amiji dia ohodahak?”²⁶“Ohodahak,” Petro etharangyo. “Oyyu hoi do,” Yesu etharangyo, “onyahi hijan, awang ohothing h’amiji oduma. ²⁷Ti, awang ohothai iwak amoryo ohothing hulya. Inyong na, ilo di jor, ilo omirok ogodo dith’ahari. Ifihu ohome ohoithemoni lendefu iye; dihuthuk honyong, irimak iye de anyahuthong ebindang nacohi aduma hindang n’adumit n’Atemplo karik nathai. Iyaru inyong, ara iye iduma isong adumit nahothai.

¹D’orii le, afuni ohothifok do Yesu, efiye, “Ngai lobolo bebe d’Ohobye lothohide?” ²Yesu elongu okalifonit lotti, esarak dihithemi hosong. ³Ajyo dosong, “Diri, diri ajyo nang dothai, ara kabong ithai iloitho iring okalifinok hotti, aang ithai ifwo d’Ohobye lothohide.⁴Othulo lobolo bebe d’Ohobye lothohide, inyong othulo lolau ahwan nanyong, aindu ijahitherek okalifonik. ⁵Othulo loifothu loboling othulo iring oitho lotti ahana lo th’ofure tholo hindang, ifothu nang. ⁶Loisarak okalifinok hottik hoiruk nang, thoiyau, ocohi kodien dithorihina dimurut honyong omorwong lohittok, amirohini thodyoro dith’ahari.⁷Angai de omonyori arami d’ahap hijaran owoni de asang hesarak ohothing ethalithohina eruhon nasong! Ofuni de asang hune ifuhon ti, oindu de imonyori bebe d’othulo loihandyo isong! ⁸Ara isarak ahinang dia aheju nahoi iye ethalithohina eruhon nahoi, obongu adi, ara iye icohoro! Oyyu dohoi dijingara d’esu kwong ahinang dia aheju, th’awonan h’ahas karik ahejek bukulung, amirohini iye dith’ahimang namanya mak.⁹Karik ara isarak iye ahonyek aboithe ethalithohina eruhon nahoi, ikolouthu ara iye icohoro adi! Oyyu dohoi dijingahina desu h’ahonyek aboithe, th’awonan h’ahonde arehai, amirohini iye dith’ahimang namanya mak.¹⁰Ottihatha tuhudik, hoilauna lobo th’okalifinok hottik hulya. Anjelohio hosong dihide, anyahi nang dothai, ingengelye Lalamonye dihide. ¹¹*(Awang)¹²Ainyong igigilo ithai ihandyo othulo, lowon h’akero 100, ara olitho aboithe? Idehi athomne sahal nasahal huna onyo dimukok h’odonge, attaharu aboithe nalitho na. ¹³Ara larimak inyong, anyahi nang iye, omuno bebe th’aker thanalitho ne, tholohide thahakaang olitho huna. ¹⁴Ahani de dang ihandyo lethe Monye lothohide; aang owak oboithe thohottik hulya tholithoi.¹⁵Ara eyau loilai dohoi, ilo donyong, ara iye inyahi donyong epal nanyong. Ti, ihandyethek ithai honyong hamaring. Ara ithanignyo eruhu arami hahoi, ehandyo iye nayyu dinyahuna inyong dohoi. ¹⁶Ti, ara aang ithairyo dohoi, ilongu ohothing arehai karik honyong, dofuni ohothing arehai hulya ingengelahina attihanini ainsong arami hawon, iring najararik amanini.¹⁷Ara aang owak ethairyo dang dosong, inyahi arami hune bukulung d’ekklesia. Ara aang ithairyo d’ekklesia, isukathik honyong iring othulo laang iruk d’Ojok dia ohoiduduhani l’adumathik h’aduma.¹⁸Karik inyong nanyahi nang dothai fodok: aning nelwo ithai dihap, olwaoi de dang dihide; nehorik ithai dihap, iruhohini de dang dihide. ¹⁹Karik anyahi nang ithai: ara iruk ithai, ithai arehai, dihap aning nemojyo ithai, ihandyo de dothai lala Monye lothohide dothai. ²⁰Aca ara ofuni arehai dia aunihoi amaji aboithe th’ofure tholohindang, diya awon nang hosong.”²¹Thiya, Petro aindu do Yesu, efiyo, “Hobu, ara orasa lalai eyauna donang, omiru baya owak amiehi nang inyong, omiru cofa?” ²²“A a, ikara omiru cofa,” Yesu etharangyo, “ti, omiru athomone cofa enyahitha cofa.²³anyo, ahani ojahitha Ohobye lothohide. Owon nya ohobu lowak atehan angai igyema ohoigyemak h’ebarithi hanyong. ²⁴Oculuyo elonguna aboithe thosong lowon h’ojinehio 1,000,000 (amillion aboithe). ²⁵Aang ohoigyemani owon h’enyahwo hacohi adumarik ahoros; d’ahani ne, efahak ohobu inyong thoithanyangahini ara ongaca, athulo nanyong, okalifinok karik akalifinok hanyong, karik asang bukulung hanyong, didumarik ahoros nanyong.²⁶Ohoigyemani apwaharu th’ahungitho dihithemi h’ohobu, ajyo, “Lahong hindang, ongongok ethilauna tiibai,” inyong lo amojyo, ‘aduma nang iye de asang bukulung!’ ²⁷Adihari arami hune d’ohobu, aburunu thonyong, amiehi inyong ahoros, edehi inyong thoilo.²⁸Thiya, othulo lya alo adi d’ohoigyemani hosong loboling, lowon honyong h’ahoros n’enyahwo tiibai ahani. Endafaitho onde lya, akoryo inyong omurut. ‘Odumak nang enyahwo hundang!’ inyong ajyo. ²⁹Ohoigyemani honyong lya apwaharu dihap, amojyo inyong, ‘Ongongok ethilauna tiibai,” inyong lo amojyo, ‘Aduma nang iye de!’³⁰Ti, eda; kombwo, esara inyong thoifithahini dithwa, lwai inyong aduma ahoros. Atehuna n’ohoigyemak homok hulo arami hune afuhon, ejyoryai isong hulo bebe, afwo d’ohobu, anyahini inyong asang bukulung hehandyo onde lya d’ohoigyemani hosong. ³¹Ahani ne, elongu ohobu ohoigyemani lya dithwa. ‘Iye ongaca, laang aca!’ inyong ajyo.³²‘Amiehi nang iye enyahwo fodok hundang hawon dohoi, anyo, emojyo iye nang thomiehi iye. ³³Ira iye imiehina ohoigyemani hohoi lya, iring namiehinerek nang iye.³⁴Engere ohobu bebe; asulak ohoigyemani lonyong lya thosarye, alo ifitha dithwa, took aduma ahoros nanyong bukulung.” ³⁵Yesu engohi ocame, “Ahani de oindu lala Monye ihandyo dothai abok abok, arahari, ara imiehi ithai lethelai th’othaji hothai.”

¹Aindu iwonan ahana, engohina no Yesu acama arami hune, edyaharu Galilea alo d’ahap no Judea, d’oyirik lobo l’Owor lo Jordano. ²Athifoforoi inyong elulungir hahittwak h’ohothing; Yesu ethalihyo karik ethayijyo isong diya.³Homok Ofarisei afuni donyong, athemye alohyo inyong thajaran, “Ohorik oyalu lohothai othulo, thoidehi afure, iring owak inyong?” ⁴Yesu etharangyo, “Kabong ithai ihera amanini nadwa najyo hijan diculwe ayeyo Ohoyani lobusuha karik nangorwo?⁵Karik Ojok ajyo, ‘Th’ahu thone, idehi de othulo omonye karik ahathingi, athuna h’afure; ara de arehai awoni ara aboithe?’ ⁶Ahani ne, aang isong arahi arehai, ti, aboithe. Awang othulo lethapehyo, do, aning nathuk Ojok enuthahina amaji aboithe.”⁷Ofarisei efiyo inyong, “Anyo, hathi, isarak Musa oyalu lohorik othulo thoisarak afure amanini n’apeha, angararik inyong na adi?” ⁸Yesu etharangyo, “Isarak ithai nya Musa amanini napeha han’ethefure, anyo, oko etyenio ithai.” Ti, ikara nya ahani d’omiru h’ayeyo. ⁹Anyahi nang ithai, hathi, hijan othulo lopeha h’afure nanyong th’arami thahamok arahari h’eleru, iyau aferi h’afure n’othulo lobo, ara omuthayo athulo naboling.”¹⁰Ohothifok honyong ajyori donyong, “Ara ahani hoi, ojahitha dihiji h’onde karik afure, oyyu awangan amuthayo.” ¹¹Yesu etharangyo, “Awang etyenio ne olo h’ohothing bukulung, arahari ohothing hathuk Ojok esarahina dosong. ¹²Olwari ahosi hesarak ohothing dia ahathing aangan n’amuthayo: homok, anyo, ahani nya oyisuni isong; homok, ohothing isarak isong esuka ahani; karik ara homok aang homuthayo th’arami thoh’Ohobye lothohide. Loiruhu etyenio ne thoihandye ahani.”¹³Ohothing homok eyanu okalifinok hakalifino do Yesu, dithahina ahas hanyong dihide hosong, amojyo thosong, ti, ohothifok eringyo ohothing hulya. ¹⁴Yesu ajyo, “Okalinok karik akalifinok thoifunu donang; hoithawejyethek isong, anyo, Ohobye lothohide losong hojak ahani hulya. ¹⁵Inyong lo ethahi ahas dihide hosong, alo adi.¹⁶Aindu nya othulo lobo do Yesu, ajyo “Ohoityenani,” inyong efiyo, “Ainyong aning nayyu, owak ehandyo nang, dirimahinerek esu namanya mak?” ¹⁷“Anyo ifiyo iye nang, ainyong nayyu?” etharangyo Yesu. “Owon aboithe ti, loyyu. Othifoithe efahitha, ara iwak iye ajingahina dith’esu.”¹⁸“Aisong efahitha?” inyong efiyo. Yesu etharangyo, “Hoittoho, hoiferorik athulo dia othulo lanabo, hoihoholyo, hoimangyo, ¹⁹obanga lemonye karik nehathingi, omunoi othulo dia athulo naindek dohoi iring nemunorik iye ahwan nahoi.”²⁰“Athifoitho nang efahitha hune bukulung,” ottwathi lya etharangyo. “Ara ainyong owak ehandyo nang?” ²¹Yesu ajyo donyong, “Ara iwak iye abisan, ilo ithanyangak asang hahoi, ara iye isarak enyahwo d’ohoicanak; iwon iye de hebarithi dihide; thiya, iwong, othifunu nang.” ²²Ethaninguna n’ottwathi lya ahani, alo adi ara lejorya, anyo, obara inyong lo bebe.²³Yesu ajyo hathi d’ohothifok honyong, “Anyahi nang ithai hathi tuhudik, oko de bebe d’ohothing hosom dijingahina d’Ohobye lothohide. ²⁴Enyoryo nang ikoti, “Oko de d’othulo lobara ajingara ditha Ohobye l’Ojok th’ajingara n’ababut tholothwa hoiruhet l’ohiyani.²⁵Ethaninguna n’ohothifok honyong arami hune, afalangai. “Ara ahani, ngai ocohi ethalwahunu?” isong efiyo. ²⁶Yesu amijyo dosong gwo, etharangyo isong, “D’othulo, awang arami hune ocohini awonan. Ti, d’Ojok, awang aning naang ocohi awonan.” ²⁷Thiya, Petro acama, “Ottihatha,” inyong ajyo, “Ethuk ohoi edehi asang bukulung ara ohoi ithiforo iye. Ainyong de hofithoro dohoi?”²⁸Yesu ajyo dosong, “Ocohi dothai ditehan tuhudik hijan ara de Olonyo l’Othulo lawoni d’okara lonyong labolori ditha Oper Ongejuk, thiya, ifuni ithai de ohothifok hundang tomon h’arehai hulya iwoni di kani, dindafaitho amukoko tomon larehai ho Israele.”²⁹Karik othulo dia athulo nedehi ahangithek, olarok, ahanerok, omonye, ahathingie, okalifinok, akalifinok dia amandak thonang, oindu de ifothuna alif enyahitha olwarai karik ofuni de isarahina donyong esu nanmanya mak. ³⁰Ti, holwari hofuni de ahithemi, onyahuni de diholu, ara honyahu diholu, afuni ahithemi.

¹Ojahitha Ohobye lothohide ahana. Owon nya othulo loiwan berien diyanu ohothing digyema dimana honyong. ²Eruhi esarahina isong aduma nacohi, enyahwothi ebindang neyelehe ne aboithe d’ofaning; inyong lo asulak isong di mana honyong.³Inyong ataharu ikoti ohoigyemak amiru hosahal, arimak homok owejethe kwong egyema, ⁴anyahi isong, ‘Ifwatha digyema dimana; aduma nang de ithai ara nayyu.’⁵Isong afwo. Thiya, th’omiru tomon larehai karik omiru aunihoi, ehandyo dang ahani. ⁶D’orii miyet, alo irimahina ohothing homok owejetho ija. Aang egyema. “Anyo itharohojyo ithai ofaning kwong ehandyo aning nabo?” inyong efiyo isong. ⁷“Aang othulo lesarak ohoi egyema,” isong ethrangyo. ‘Oyyu, ifwatha dang digyema dimana honang,’ inyong anyahi isong.⁸Edwong n’athari, elongu lomonye h’amana ohotihani l’ohogyemak, ‘Ilongu ohoigyemak; oculuye aduma isong th’ohothing thoh’ofuni aholu hulo, ara iye ingohi th’ohothing thoicak afuna.’ ⁹Ohothing hoculuyo egyema d’omiru miyet, esarahinin othulo aboithe anyahuthong adenario aboithe. ¹⁰Afuna n’ohothing hoicak egyema efothuna aduma nasong ahithemi, ojyori ifothu isong de ngona enyahwo olwarai.¹¹Efothuni aduma nasong , aculuye ewiwinya d’ohotihani l’egyema. ¹²Ohothing homajarai digyema aholu, egyemai orii aboithe ti.’ isong hulo ajyori. “ahibu ohothai igyema ofaning taak ditha h’oholong lonok rang rang - ara iye iduma ohoi hosong see.’¹³''Ithaningye, omotte,’ lomonye h’egyema etharangyo aboithe thosong, ‘Kaang nang ithai attumyo. Aca eruhu ithai egyema n’ofaning aboithe th’ adenario aboithe. ¹⁴Thoone ne, ifothuna aduma nathai, ara ithai ifwo dihang. Nang lalo isarahina d’othulo lamajyo nang aholu lo, aduma nanyong, iring nathuk nang esarahinerek nathai.¹⁵Dia aang obis donang dihandyo aning iring awak nang? Dia ihain iye, anyo nang lahoryo ara nayyu?’ ¹⁶Ahani ne, owon de oiholuhani ara ohithemoni, ara ohoithemoni ara oiholuhani.”¹⁷Anden no Yesu di Yerusalem, eyaru honyong ohothifok tomon larehai hulo, ofwoi ahibu inyong ocacamaru hosong hama hama. ¹⁸“Ithaningyethe,” inyong anyahi dosong. “Ohothai hoifwo di Yerusalem, d’amaji nafwarik isarahinerek adi Olonyi l’Othulo do fadirihio hohittwak karik ohoityenak h’oyalu. Ithapalye de inyong ara lottohori ¹⁹karik, thiya, ethafothohini inyong d’ohothing hoikela th’Ojudei, hofuni de ithafitangyo inyong, afodohye karik abehohini inyong di kruce; ti, diholu h’operok aunihoi, ofuni de ithadothuna inyong disu.”²⁰Thiya, athulo no Zebedeo aindu donyong holonyirok arehai; adulai donyong karik efiye donyong alwaha. ²¹“Ainyong, iwak iye,”Yesu efiyo inyong na. Inyong etharangyo, “Iruhok donang, hijan ofuni de olonyirok hundang hulo arehai iwoni, lobo dinget karik loboling dihothong hohoi, ara iye leindu ara Ohobu.”²²“Awang iye itek ainyong ifiyo iye, “ Yesu etharangyo olonyirok. “Ocohi de dothai amatha ogludyet l’ethathaciana laindek nang de amatha lya?” “Icohi ohoi,” isong etharangyo. ²³“Imathu ithai de diri th’ogludyet hindang, “Yesu anyahi isong, “Ti, ikara nang anyimu ngai de isuka dinget dia dihotong. Amasok hune hathuk lala Monye ehuhumahina d’ohothing hawoni isong ara hosong.” ²⁴Ethaninguna n’ohothifok hulo arami hune, engereji d’ohothifok areahai hulo. Yesu alongu isong bukulung, ajyo.²⁵“Itek ithai hijan owoni opaganihio h’akolon dihide hosong karik owoni ohoindefak h’akolon fodok nendafaitherek. ²⁶Ti, ikara ahani de olo iwonan dihiji hothai. Ara owon lobo dihiji hothai lowak owonan ara lohittok, owak inyong thoiwona ara ohoigyemani lohomok hulo fodok; ²⁷karik ara owak lobo thothai awonan ahithemi, owak inyong thoiwona ara ongaca lothai bukulung ²⁸iring Olonyi l’Othulo, laang oindu hijan owak igyemai thonyong; ti, digyema karik disarahina esu nanyong dilwahunerek ohothing holwa.²⁹Edyaharu no Yesu h’ohothifok honyong Jeriko, athifunu elulung nahittok n’ohothing. ³⁰Ethaninguna n’ongodok arehai honya owoni dipogo h’oyiho, hijan Yesu lolo thol’oyihoi le, aculuye elolongo, “Lolonyi ho Davide! Omiehi ohoi, lahong! ³¹Elulung n’ohothing eringyo isong, anyahini isong thodularu. Ti, isong hulo elolongo omurut dihide, “Lolonyi ho Davide! Omiehi ohoi, lahong!³²Yesu awetha karik elongo isong. “Ainyong iwak ithai nang thoihandye dothai?” inyong efiyo isong. ³³“Lahong,” isong etharangyo “Iwak ohoi iye thoisarak ohoi atehuna nahoi.” ³⁴Amiehi Yesu isong karik athin ahonde hasong; ara ahonde hasong acohi atehuna. Isong athiforo inyong.

¹Aindehi nya nanyong h’ohothifok honyong di Yerusalem karik Bethphage, d’Adonge n’Olives, asulak Yesu thiya, ²ajyo dosong, “Ifwatha d’amiji nothohithemi nya, irimak ithai de ababut notho miji othora diya, angaring honyong. Ohouna ara ithai iyanu isong donang. ³Ara ojyo othulo lobo aning nabo th’arami thohune, ijaratha, “Owak ti Ohobu isong,’ osulu de kwak othulo le isong hothai.”⁴Ofuhi arami hune, th’ocamitha h’ohocoroni, hojyo, ⁵“Inyahi nang angering no Zion, Otiha, Ohobu lohoi loindu dohoi! Olau ahwan dihide h’ababut – nohomutha, angering n’ababut.’”⁶Ohothifok afwoi ihandyo ainyong onyahi isong Yesu thoihandye. ⁷eyanu isong ababut h’angaring, esarahini abongoitho dihide hosong, ara Yesu awoni dihide h’abongoitho. ⁸Ohothing holwa h’elulungir afecye abongoitho hasong diyihoi, homok ekocyo athandak h’oyandit karik osohot afecye diyihoi.⁹Thiya, elulungir h’ohothing, hafwo ahithemi karik aholu no Yesu, elolongoi bebe, “Hosanna do Lolonyi lo Davide! Loindu th’ofure thol’Ohobu thomunoi! Hosanna tholohide h’ahide!” ¹⁰Ajingara no Yesu ditha ho Yerusalem, akek abore ara ocame lojyo, “Ngai inyong lya?” ohothing efiyo. ¹¹“Ohocoroni Yesu lya, tho Nazaret di Galilea,” elulung etharangyo.”¹²Yesu ajinga dith’Atemplo, angaterek ohoinyangak karik ohoithanyangak adi tho Templo. Alafuhyo obeleha hoiloicyerek enyahwo karik hethanyangyerek ayorohoco, ¹³Ajyo dosong, “Igero dith’amaninihio, hijan ajyo Ojok, ‘Ofuni de ilongo Atemplo hindang ara athwa n’amojo.’ ti, ethuk ithai eduhuna ara amaji nedimarik ohoholak.” ¹⁴Afuni ongodok karik opalak donyong di Templo; ara inyong ethalihyo isong.¹⁵Ti, atehuna no fadirihio hohitwak karik ohoigerok h’oyalu asang hafalangai hehandyo inyong, karik ethaninguna nasong elolongo n’okalifinok dith’Atemplo hijan, “Hosanna d’Olonyi lo Davide!’ engerej. ¹⁶Isong ajyori donyong, “Ithaningu iye, ainyong ojyori isong? Yesu ajyo dosong,“Aa, ethaningu nang,” Ti, kabong ithai ihenu thath’amanini nadwa? “Ethuk ithai ehuhumuna thohuthuhye h’okalifinok hottik karik hohonaha emamajyo nabis’?” ¹⁷Yesu edyaharu isong alo adi tho bore, alo di Bethani esuka diya oharie aboithe.¹⁸Dinyahara honyong di bore nya thamoithe berien, aleng ahure Yesu. ¹⁹Atehu inyong ohiyani, longida ahayo dipogo h’oyihoi, alo donyong, ti, aang orimak aning nabo dihide honyong arahari abene.²⁰Ahani ne, inyong ajyo d’ohiyani lya, “Aang iye kwong hoithadoyo ahayo!” Ara ohiyani lya aboco ayohoji Atehuni ohothifok arami hune, afalangai. “Angai oboco ohiyani lya ayohoji kwak ahani?” isong efiyo. ²¹Yesu etharangyo isong, “Anyahi nang ithai, ara iruk ithai, ara ithai aang hoirirhitha, ihandyo ithai de ainyong ehandyo nang d’ohiyani le, ti, ijyo ithai de dang d’odonge lo, “Iye thoiyarai dihide karik dihap dith’ahari nahittok,’ ehandye de. ²²Aning nefiyo ithai ditha hamojo, ahibu ithai iruk, ifothu ithai de.”²³Yesu anyaha di Templo; dihide h’etyenio nanyong, ofadirihio hohitwat karik ohobolok afuni donyong, efiye, “Th’akolon thanani ihandyo iye asang hune? Ngai isarak iye akolon ne?” ²⁴Yesu etharangyo, ajyo dosong, “Efiyo nang ithai efiet aboithe; ara etharangyo ithai nang, anyahi nang de ithai ainyong nawon ara hindang dihandyo asang hune.²⁵Thongai oindu akolon no Batisimo no Yoanne Batista? Thohide dia th’ohothing?” Abocori isong hulo aculuyo elafere dihiji hosong. “Ainyong de ijyo ohothai? Ara etharangyo, ‘Th’Ojok,’Ojyo de dohothai, ‘Anyo naang ithai nya iruk Yoanne?’ ²⁶Ti, ara ejyo th’ohothing, ‘Th’ohothing, ebang, ainyong de ofuni ohothing ihandyo, anyo, otek isong hulo hijan Yoanne Batista ohocoroni.” ²⁷Ara isong hulo etharangyo Yesu, “Aang ohoi itek.” Ara inyong ajyo dosong, “Aang nang dang ithai anyahi.”Thanani akolon ehandyo nang asang hune.”²⁸Thenene, ainyong igigilo ithai? Owon nya othulo lowon h’olonyirok arehai. ²⁹Alo inyong lo da lahong, ajyo donyong, ‘Lalalonyi, ilo digyema dimana ahanana.’ Aang nang awak aden,’ Inyong lo ajyo. Ti, diholu, eloicyo ahu nanyong, alo. ³⁰Thiya omonye alo d’olonyi loboling lo, anyahi dang ahani. ‘Aa, lahong,’ inyong etharangyo, ti, kabong olo. Loni th’arehai ehandyo aning nawak omonye?”³¹“Olonyi lahong ihandyo aning nawak omonye,” isong etharangyo. Ahani ne Yesu ajyo dosong, “Anyahi nang ithai: ohoiduduhak h’adumathik karik amwahi ofwo de d’Ohobye l’Ojok, ahithemi nathai.” ³²Aca oindu Yoanne Batista dinyahina ithai oyihoi lobis dinderek, ithai aang eruk donyong; ti, ohoiduduhak h’adumathik karik amwahi eruhi donyyong. Karik juk ethehu ithai ahani, kabong ithai iloicyo ahosi hathai, ara ithai iruk inyong.³³“Ithaningyethek d’aryamara naboling,” Yesu ajyo. “Owon inya omonye l’ahap loboling, loihuhumyo amana n’ahayo h’obalu, aduhok esisihet n’obalu, ekolok thoilyethe karik aduhok oilyethe lekeyerek. Thiya ebwahi amana d’ohoithanyangak, alo dipoco. ³⁴Edwongon n’orii loingongocyerek ahayo h’obalu, asulak ongacani honyong d’ohoithanyangak disarahina inyong oyirik lonyong l’engongocio.³⁵Ara ohoithanyangak endefuni ongaciani, abahye aboithe, ottohori lobo ara loboling lo amirye th’omorik. ³⁶Ara othulo lya asulak ongaciani homok, olwarai th’ohoithemok, ara dang ohoithanyangak ehanndye ahani dang dosong. ³⁷Thiya, dicuhit, asulak othulo lya olonyi lonyong dosong. “Atek nang tuhudik, obangi de isong lalalonyi,” othulo lya ajyo.³⁸Ti, atehuna n’ohoithanyangak olonyi l’othulo lya, ajyori th’ahwandek thahasong. ‘Olonyi lya lolomonye h’ahap. Ifuna, hattohoro inyong. deyaru attitto hanyong.’ ³⁹Isong hulo endefuni inyong. Acohoroi adi thomana, attohori inyong sdi.⁴⁰“Thene, ara lomonye h’amana oindu, ainyong de oindu ihandyo d’ohoikiyak dia ohoithanyangak?” Yesu efiyo. ⁴¹“Aang inyong opwak attohoro ohothing omonyorok hulya!” isong ajyori, “karik, esarak amana d’ohoithanyangak homok, hofuni isarahina inyong oyirik lonyong l’engongocio dimiru.”⁴²Jesu ajyo dosong, “Kabong ithai ihena ainyong ojyo amanini nadwa?‘ Omorwong lathuk ohoduhok acohoro ara lamonyong, eloitho ara omorwong loyyu bebe, okalak omorik bukulung. Ehandyo Ohobu ahani; Angai berien na olibo dingengela'?⁴³“Karik anyahi nang dang dothai,” Yesu afonik. “Iduhuni de Ohobye l’Ojok adi thothai, esarahini d’ohothing hoithadoyo ahayo.” ⁴⁴(Awang)*⁴⁵Ethaninguni, atehi ofadirihio hohittwak karik Ofarisei hijan isong ocama aryamarihio ho Yesu, ⁴⁶inyong na, isong athemyo endafaitho inyong. Ti, obangi elulungir h’ohothing hoiruk hijan Yesu ohocoroni.

¹Yesu ikoti acama d’ohothing th’aryamarihio, ajyo, ²“Ojahitha Ohobye lothohide ohobu loboling, lonya ehuhumyo amuno n’amutha n’olonyi. “Owon inya ohobu lehuhumyo amuno n’amutha n’olonyi. ³Asulak ohoigyemak honyong dinyahina ohothing hoilongoi thoifunu di muno, ti, edari afuna.⁴Otihyo ahani, aslulak ohogyemak homok dinyahini ohothing hoilongoi thoifunu: ‘Amuno hindang athuho thenene; angotho ohisim karik othagwohi. Athuho asang bukulung. Ifuna d’amuno n’amutha!”’⁵Ti, aang ohothing hoilongoi oyip; ngadi olefeng igigilo egyema nanyong: lo dimana honyong, loni dimaji honyong h’ethanyangio, ⁶ahibu homok indafaitho, abahye karik attohori ohoigyemak. ⁷Engere ohobu bebe; asulak ohoremok honyong, attohori ohottohok hulya karik edwehini abore nasong dihap.⁸Thiya, elongo ohoigyemak honyong, ajyo dosong, ‘Athuho ehuhumio n’amuno n’amutha hindang, ti, aang ocohi d’ohothing hoilongoi difuna imuno.’ ⁹‘Ifwatha thenene diyihothik dilongunu ohothing olwarai iring irimak ithai.’ ¹⁰Thiya ohoigyemak afwoi diyihothik, esusuduhunai ohothing fodok horimak isong, hoyyu karik homonyong; ethafuthahini athwa nahittok namutha top th’ohothing.¹¹Ohobu ajinga dithwa didoryo ohothing hoilongoi, atehu othulo laang iyofo abolongo n’amutha. ¹²‘Omotte, angai indu iye dine kwong eyofo abongo n’amutha?’ ohobu efiyo inyong. Ti, othulo lya adularu.¹³Thiya ohobu anyahi ohoigyemak honyong, ‘Othoratha inyong ahinang karik aheju, ara ithai imirok inyong dindak ditha h’omudwe. Olo de ikor karik erocyo ohala dya,’ ¹⁴Yesu engohi ocame lonyong, “Elongoi olwarai, anyimuni tiibai.”¹⁵Ofarisei ehuhumyo ahwandek dilohuna Yesu th’efietha. ¹⁶Thiya asulahini ohothifok homok hosong karik ohothing h’elulung no Erode, “Ohoityenani, “ajyori isong, ‘Itek ohoi hijan inyahi iye arami hadiri. Ityenio iye arami hadiri h’ainyong owak Ojok d’ohothing, kwong abangi ainyong igigilo homok, anyo, aang iye ittwo oisukaitha h’othulo lobo.’ ¹⁷Inyahi ohoi hoi. Ainyong igigilo Iye? Obis dohoi diduma adumetha do Caesare dia awang?”¹⁸Otek ti Yesu ainyong namonyong owahi isong ehandyo, ajyo, “Anyo iwak ithai nang athemyo, ithai odwalak! 19 Itaithahina nang anyahuthong ebindang ne!” Thiya Isong hulo eyanu donyong anyahuthong ebindang ne, ¹⁹Yesu ajyo dosong, “Hangai arijori karik ofure lo?²⁰“Ho Caesare,” isong etharangyo. Ahani ne, Yesu etharangyo isong, ²¹“Oyyu hoi, isarahina do Caesare, asang ho Caesare, ara d’Ojok ithai isarak, asang h’Ojok.” ²²Ethaninguna nasong ahani, afalangai, afwoi adi.²³D’ofaning le, afuni Osadducihio homok do Yesu anyahini inyong puhek hijana aang de ohothing hoibuhuni th’oye. ²⁴“Ohoityenani,” isong ajyori, “Ojyo Musa ara othulo laang okalifinok oye, oruthak olai aharathani, doyisu okalifinok hofuni itehan ara h’ohoyani.²⁵Thenene, owoni nya olarok cofa hoisukarik afure n’olai losong, ohoyani. Amutha olai lahong h’aharathani, ti, aye kwong ayisuna okalifonit, edehi aharathani d’olai. ²⁶Arami hune ikoti afuhi d’olai oitharehe, oithaunihoi karik dicuhit , d’osong cofa. ²⁷Diholu hosong bukulung, ara athulo nangorwo ne dang aye. ²⁸Iring na, ofaning lofunerek ohothing de idothorik disu, ara nafure hongai oindu inyong na iwonan, inyong na nathuk isong amuthayo bukulung na.”²⁹Yesu etharangyo, ajyo dosong, “Angai beriena ipal ithai! anyo, aang ithai itek Amanini nadwa dia akolon n’Ojok. ³⁰Aca ara ohoyak hadotho disu, ofuni de ijahitha anjelohio dihide, amaji naang amutha thiya.³¹Iring d’ohoyak hofuni de idotho disu: Kabong ithai ihena ainyong onyahi ithai Ojok? Ojyo inyong lo, ³²“Nang Ojok l’Abramo, Ojok lo Isako karik Ojok lo Yakobo.” Inyong lo Ojok l’ohoswok ikara l’ohoyak.” ³³Ethaninguna n’elulungir ahani, afalangai etyenio nanyong.³⁴Ethaninguna n’Ofarisei hijan athuk Yesu ethasingahina Osadducihio, afuni amaji aboithe, ³⁵ara lobo thosong, ohoityeniani l’oyalu, athemyo endefuna Yesu th’efiiet. ³⁶“Ohoityenani,” inyong efiyo, “Nani efahit nabolo bebe ditha hoyalu?”³⁷Yesu etharangyo, “’Omunoi Ohobu, Ojok lohoi th’othaji tholohoi fodok, th’ohoile tholohoi fodok karik th’ahu thanahoi bukulung.’ ³⁸Efahit nabolo karik ako bebe inyong na.³⁹Efahit etharehe nako bebe, inyong na ahana: ’Omunoi othulo dia athulo naindek dohoi, iring nemunorik iye ahwan nahoi.’ ⁴⁰Oyano bukulung ho Musa karik h’ohocorok, oduhoi dihide h’efahitha huna arehai.”⁴¹Asuduha n’Ofarisei amaji aboithe, Yesu efiyo isong, ⁴²“Ainyong igigilo ithai tho ‘Kristo?’’ Lolonyi hongai inyong?” Isong hulo ajyo donyong, “Lolonyi ho Davide.”⁴³Yesu ajyo dosong, “Angai hathi ilongo inyong Davide ditha Ohoile ara Ohobu, ajyo, ⁴⁴“Ojyo Ohobu d’Ohobu hindang, “Owoni dinget honang, lwai nang esarahina omerok hohoi tholohop h’ahejek hahoi.”⁴⁵Ara ilongo Davide Kristo‘Hobu,’angai oco Kristo awonan ara olonyi lo Davide?” ⁴⁶Awang nya othulo locohi esarahina Yesu etharangio nabo; th’ofaning le adi hithemi, aang nya othulo locohi efiyo inyong efietha halwa.

¹Thiya Yesu acama d’elulungir h’ohothing karik d’ohothifok honyong. ²“Ohoityenak h’oyalu karik Ofarisei, isong ohoinyanyahak h’oyalu lo Musa. ³Owak iruhu ithai, ithai ithifoitho arami hanyahi isong ithai; hoitmiruna asang hehandyo isong, anyo, aang isong hulo othifoitho asang hetyenio isong.⁴Othoryo isong hulo attitto hauk dihurongithek h’ohothing haang ocohi adohoro, isong ti aang hothinok juk ohifalai dingarahina ohothing hodohoitho. ⁵Ihandyo isong hulo asang hasong fodok, dotehuni isong. Idorotho ekelitha hegiyeuni tha amanini nadwa, isong eyofoithe dihomongithe karik digeleni hosong.⁶Idorotho dang, angai ohodori akerebusehio hasong hefificyerek abongoitho dihwandek!’ ⁷Omunoi amasok halibo d’operok h’amuno karik anyimye okani hathero di Sinagogues.⁸Omunoi bebe ara hemandaye th’abangi dimasok h’enyanga, h’ethanyangio karik ara lelongoi “Ohoityenani,” anyo, ithai bukulung h’ahang aboithe nawon “h’Ohoityeniani aboithe.” ⁹Ithai thaang hoilongoi othulo loboling dihap ara ‘Omonye,’ anyo iwon ithai h’Omonye aboithe dihide. ¹⁰“Aang dang irahi ilongo ithai ara ‘Lahong’, anyo, lahong lothai loboithe inyong Kristo.¹¹Aboithe lobolo bebe dihiji hothai, thoiwona ara ohoigyemani lothai. ¹²Loithaboloryo ahwan, othalauni de; ara loithalau ahwan, ithabolorye de.¹³“Omonyong de do ti, dothai, ohoityenak h’oyalu karik Ofarisei! Ithai odwalak! Ehyenok ithat oyihet l’Ohobye lothohide dihithemi h’ohothing; aang ithai ijinga diya karik aang ithai ihorik ohothing homok hothemyo ajingara diya. ¹⁴(Awang)*. ¹⁵“Amiehunu ne do de ti, dothai, ohoityenak h’oyalu karik Ofarisei! Ithai odwalak! Idaha ithai ahide n’ahariak hahittwak ara ithai ilangithai amisok bukulung diloithuna othulo aboithe; ara erimak ithai aboithe, ihandyo ithai inyong ara locohi anden di himang operok arehai, iring ithai!¹⁶“Angai omonyong dothai, ohoithaithak ongodok! Ityenio ithai, ‘Ara lepitha th’Atemplo, aang epitha nanyong othoryo inyong, ti, ara ipitha lobo th’ayel di Templo, othoryo inyong epitha ne. ¹⁷Ongodok honanga! Ainyong oko bebe, ayel dia Atemplo nesarak ayel adwaran?¹⁸Ityenio ithai dang, “Ara ipitha lobo th’altare, aang epitha hothoryo inyong, ti, ara ipitha lobo th’esorio thonoth’altare, othoryo inyong epitha ne. ¹⁹Angai ingodo ithai, aang ithai itek! Nani oko thanani, esorio dia altare nesarak esorio adwaran?²⁰Inyong nara, ara othulo lepitha th’altari, inyong lepitha thonyong karik thesoritha thahawoni dihide honyong; ²¹karik ara ipitha othulo th’Atemplo, inyong lepitha thonyong karik th’Ojok lomanya dith’Atemplo; ²²Karik ara ipitha othulo lobo, loipitha th’okara thol’Ojok karik thonyong tholowoni dihide honyong.²³“Angai de odiha dothai, ohoityenak h’oyalu karik Ofarisei! Ithai odwalak! Isarak ithai ethatomone n’amiyang nangwo kudarr, asang halibo hedwongoi, asang hamok hangwo kudarr karik asang hamok hayyu bebe, ti, ida ithai athifoitho etyenio nadiri n’oyalu, abisan, amiehina karik eladiri. Owak iyeyena ithai ehandyo ithai asang hune, ara ithai aang hoidehi hamok adi. ²⁴Ohoithathaithak ongodok! Ipapahyo ithai ohojongathi th’obalu lothai, ara ithai idiloro agodigodi!²⁵“Angai de omonyong dothai, ohoityenak h’oyalu karik Ofarisei! Ithai odwalak! Ilalayo ithai oiwohit, oibithi karik attafu tholondak, ahibu tholothwa ithai idehi ifuthi ara asang herimak ithai th’eribo karik hewak ithai dihwandek hathai ti.” ²⁶“Ofarisei ongodok! Ithai odwalak! Ilalatha oiwohit, oibithi karik attafu tholothwa, dolibori dang tholondak.²⁷“Angai de omonyong dothai, ohoityenak h’oyalu karik Ofarisei! Ithai odwalak! Ithai alame abongi, hatehuni tholondak ara aliborok, ti, tholothwa bee hohot karik ahwandek hamuyak. ²⁸Iring ahani ne dang, tholondak ileyo iye ara loyyu, ti, tholothwa ifut iye thadwala karik theyatha.²⁹“Angai beriena de omonyong dothai, ohoityenak h’oyalu karik Ofarisei! Ithai odwalak! Ihuhumyo ithai alame h’ohocorok ara ekikiricyo alame h’ohothing hamanya amanya nayyu; ³⁰karik ara ithai ijyo, ara nya ira ithai imanya d’orii lonya h’ohohonyo hothai lo, aang ithai ira ihandyo asang hanya ehandyo isong, iring attohoro nasong ohocorok. ³¹Iring na, eruhok ithai diri hijan attohori ohohonyo hothai ohocorok.³²Ifwatha ahithemi hathi hoi, dingohina aning nanya aculuyo holethe hohonyi! ³³Ithai oduring haduring h’amunuok karik amunuok, angai de ikaru ithai amiro dith’ahimang?³⁴Karik inyong na, anyahi nang ithai hijan asulak nang de ithai ohocorok, ohothing hoilofioro karik ohoityenak; ifuni ithai de ittohoro homok hosong, homok abihohini dikruce, homok afodohye di Sinangogues karik angaterek th’obore di bore. ³⁵Diholu h’ehandio ahani ne, oindu de asario nattohoro n’ohothing hokabong ihandyo aning namonyong dihide hothai, th’attohoro n’Abele lokabong ihandyo aning namonyong d’attohoro no lolonyi ho Zakaria lo Berakiah loittohok ithai dihiji Atemplo karik altare. ³⁶Anyahi nang ithai diri: oindu de asario n’attohoro nabolo ahani ne, ipwaharu dihide h’ohothing h’ofaning lahanana!³⁷“Yerusalem, Yerusalem! Iye nettoho ohocorok ara iye imiryo th’omorik ohoifahak hathuk Ojok asulahina dohoi! Operok baya awak nang iye thosuduhu disuhe okalifinok hohoi bukulung, iring nasuduhyerek ahohorong angarok tholohop h’ewa hanyong, ti, aang iye nya iwak! ³⁸Karik ahani ne, ofuni de idehina, ara Atemplo nahoi esuka ija. ³⁹Th’ahanana adihithemi, anyahi nang ithai, aang ithai ifunu nang itehuna ikoti, lwai ithai ajyaran, “Loindu th’ofure thol’Ohobu, thomunoi.’”

¹Yesu edyaharu Atemplo, alo adi. Afuni ohothifok honyong ithayuhina inyong arami h’athwahio h’Atemplo haduhoi. ²Yesu etharangyo, ajyo dosong, “Aang ithai itehu asang hune fodok? Anyahi nang dothai diri, aang de idehini omorwong lobo dihide holobo, aang lobo de laang omiro dihap,”³Awoniara nya no Yesu th’ahap di donge h’Olifs, afuni ohothifok honyong honyong donyong ajyori, “Inyahi ohoi, kanu de ofuni asang hune ifuhon karik inyong de oindu ithaithahina ainduna nahoi karik ecuhit n’oper?” ⁴Yesu etharangyo, ajyo dosong, “Omijyethek tuhudik, tek ithadiraru lobo othulo ithai dipalan. ⁵Aca ofuni de holwa th’ofure tholo hindang. Ofuni de ijaran, “Ang Kristo,” afuni ithaitharu ohothing d’oyihoi lepal.⁶Ifunu ithai de ithaninguna oikoitha h’aremi karik assayo h’aremi olamarai, ti, hoitaluhothik, aang asang hune opwak afuhon, aang onyahi hijan athuk ecuhit n’ahap ainduna. ⁷Oremorik de amisok ahwandek, ohobyehio aremorik ohobyehio karik owoni de ahure karik arithirithihio d’amasok bukulung. ⁸Ojahitha asang hune bukulung adihari n’othomone l’oitho, laitho.⁹“Thiya, ofuni ithai de indefuna, ethafothohini thosarye karik attohori ithai. Omani ithai de amisok bukulung thonang. ¹⁰Th’orii le ofuni de holwa edehina eruho nasong, ofuni de ithanyangyo karik angicarik ahwandek. ¹¹Thiya, ofuni de ohocorok hoikela ileyori karik attumye ohothing holwa.¹²Esarahunu de n’amonyori mwai nya doindu, ara amuno n’ohothing holwa alo ilihan. ¹³Ti, lowetha dindak lwai dicuhit, ithalwahunu de. ¹⁴Karik ofuni de ityenio Assayo Angejuho h’Ohbye dihap bukulung dinyahinerek amisok fodok; thiya, oindu de ecuhit iinduna.¹⁵“Itehu ithai de ‘Abangi Namonyong bebe’ nacama ohocoroni Daniele. Oindu de iwetha d’amaji nadwa.” ¹⁶Thiya, owak ongerori ohothing hotho Judea di dongiok. ¹⁷Othulo lowon dihide h’efithe n’athwa nanyong, thaang igigiloi ecuruna dihap diinduna iduduhyo attitto hanyong diyaru dithwa. ¹⁸Othulo lowon dimana, thaang honyahu di hang diyaru abongo n’ahathero.¹⁹Angai de oindu imonyori operok hule d’angorwo hemoho karik d’ahathingie hethanahyo! ²⁰Omojyithik d’Ojok ithai thaang ofunu ingetha th’Ohomio dia d’Ofaning lo Dominika!” ²¹Aca ethathaciana th’orii le oindu de imonyori okalu ethathaciana nanya nakaang howonderek thoculwe h’ahap, teng ofaning lahanan. ²²Ara kabong nya oprok hule ofuni ithasuhyo, aang nya othulo loira thalwahunu. Ti, th’arami th’arami thoh’ohothing honyimuni, ofuni de ithasuhyo oeprok hule. Arahari ara afuni ithasuhyo omiru hule, inyong de naindu aning nabo aangan iwonan iring inyong.²³Thiya, ara indu othulo lobo ijaran dothai, “Omijye, Kristo lo dini!’ Dia, “Otiha, inyong lo lad’ahtwahio hotholothwa, hoiruk inyong. ²⁴Aca ofuni de ho Kristo karik ohocorok hoikela ileyori; ofuni de ihandyo asang hafalangai hahittwak dithadwalyerek juk ohothing honyimuni h’Ojok, ara ocohi. ²⁵Otihatha, athuk nang ithai anyahina arami hune kabong omiru ofuni.²⁶Inyong na, ara ojyori dohoi, ‘Otiha, Inyong lo diterere!’ hoilo diterere!’ Dia ara ojyori isong, ‘Otiha, inyong lo loditha athwahio hotholothwa huna!’ Hoiruk inyong. ²⁷Aca oindu de Olonyi l’Othulo iinduna irng ahila nenwahyo edoo fodok, thomoithe thoittorit di lumet h’oholong. ²⁸Amaji nawonderek ahwan naye, diya osuduha de atharuha.²⁹Kwak diholu h’ethathacianitha h’operok hule, oindu de oholong irioriohunu, oyefa aang ofang, ohilyefi apwahaitho thohide karik ara asuduhetha h’akolon hothohide angaterek adi thoyihothik hoigyemarik isong.³⁰Thiya, ethamijani l’Olonyi l’Othulo aindu ileyori didoo; ara ohothing hothop fodok afuni ikoron, atehuna nasong Olonyi l’Othulo oindu dihide h’adikolo h’ahide th’akolon karik abolori nahittok. ³¹Oindu de amo nahittok ikor karik ara aindu isulahina ohothai anjelohio honyong d’okangir h’ahap arangwan, karik ofuni de isuduhyo ohothing honyimuni th’ecuhit n’ahap aboithe danabo.³²Ohiyani lohittok longida ahayo, thoityenie ithai, etyenio. Ara athandak hanyong haliji, aculuye esaryo abene, etek ithai hijan aindek Ohiribo. ³³Ahani de dang, ara ithai hetehu asang hune fodok, itek ithai de hijan anyihari omiru; eririye aculuyo eririyo.³⁴Hoikwothik hijan ofuni de asang hune ifuhon dihithemi athuhon n’ohothing hulya fodok afuna aye. ³⁵Ofwoi de ahide karik ahap adi, ti, owetha de ocame hindang.³⁶Aang othulo lotek kanu de oindu ofaning dia omiru hule dia anjelohio dia Olonyi, aang otehi omiru, Omonye hamaring otek.³⁷Oindu de ainduna n’Olonyi l’Othulo ijahitha ainyong ofuk d’orii lo Noah. ³⁸Dihithemi h’omiru h’ahari hadilyo hune afuna, anye, amathai karik amuthai ohothing lwai d’orii loicurohinerek Noah di roko; ³⁹dihide ahani ne, aang ohothing hotek ainyong nalo ifuhon, lwai ahari afuna afiyarai isong fodok adi. Ahani de oindu iwonan, ara Olonyi l’Othulo laindu.⁴⁰D’omiru hule ofuni de ohothing arehai igyema di mana: ofuni de iyaru aboithe, edehini aboithe; ⁴¹Ofuni de angorwo iwonan dihirye, ofuni de iyaru aboithe adi, ara aboithe edehini diholu; ⁴²“Omijyethek tuhudik, hoi, anyo, aang ithai itek tuhudik kanu de oindu Ohobu.⁴³Ara otek lomonye h’ahang omiru hoindunerek ohoholani diwuryo ahang nanyong, itek iye tuhudik hijan isuka inyong lo de thahide tek ohoholani aindu iwuryo ahang nayong. ⁴⁴Inyong na, ihuhumye dang ahwan, anyo, oindu de Olonyi l’Othulo d’omiru haang iye itek ainduna nanyong.⁴⁵“Ngai, hathi de, ohoigyemani loiruk karik elofioro lya? Inyong lo othulo lathuk lahong lonyong esarahina thoindafaithe ohoigyemak honyong, disarak dosong anyari nasong d’omiru hocohi. ⁴⁶Angai de omuno ohoigyemani lya, ara orimak lahong lonyong inyong ihandyo asang hune, ara inyong laindu di hang! ⁴⁷Diri, anyahi nang ithai, isarak de lahong inyong thoindafaithe attitto hanyong fodok.⁴⁸Ti, ara inyong ohoigyemani lomonyong, oindu de inyahina ahwan nanyong hijan aang de lahong onyahu dihang diholu h’omiru holwa. ⁴⁹oindu de obocoro abahyo ohoigyemak honyong, anyo anyari karik amatha h’ohoibothok. ⁵⁰Thiya, oindu de lahong l’ohoigyemani lya iinduna ofaning lobo, laang ohoigyemani otek hijan inyong de loindu; th’omiru hule aang inyong lo otek. ⁵¹Oindu de inyong lahong ibobongyo, eringak inyong thongaru oyetha omonyorok odwalak. Diya, oindu de ikor erocyo ohala.

¹D’orii le, oindu de ohobye lotho hide ijahitha ahana ahodwo hamok tomon, heyaru arie h’ahimang ne thauleye th’omudwe orii l’etharama, afwoi d’ohoitharamani. ²Th’ahodwo hune fodok tomon, obafuni miyet. Ara miyet ahong. ³Anyo, afwan n’ahodwo habafuni hune, eyaru arie hawang owulo di maji h’etharam. ⁴Ahibu ahodwo ahongok huna iyaru arie hacohi karik hawulo.⁵Orii lya, akarahi ohoitharamani. Ara ahodwo emuthitha, ajothoroi. ⁶Dihiji h’oharie, edwong oililye karik ocame, “Ohoitharamani leedwong! Ifuna di fothuna inyong.⁷Ahodwo tomon huna kwak ahenyuni; ethauleye arie hasong. ⁸Ahodwo habafuni efiyo th’ahodwo ahongok huna arie hamok haulo. ⁹Ara ahodwo ahongok huna ajyori, “Awang arie hahoi ocohini. Ifwatha inyangahina ahwandek arie hacohi karik haulo.'¹⁰Hofwo ahodwo abami hune dinyangunu arie haulo ahani, ahibu ahoitharamani edwong. ¹¹Th’orii lya, emoraru ahodwo miyet ahongok huna karik ohoitharamani. Afwoi di mutha; ehienoroi oyihiet. ¹²Orii tiibai ahani, edwongi ahodwo miyet abami huna, efiye ohoitharamani th’ongahi isong oyihiet. ¹³“A a! Awang nang ithai atek,” ohoitharamani etharangak isong.¹⁴Yesu engohi ocame lonyong lya th’ajaran, “Omijethek tuhidik! Awang ithai itek ofaning dia omiru.” Orijoro ohobye lothohide iring othulo lolo d’amiji nabo dipoco. Ilongu esarak d’ohogyemak honyong ebarithi hanyong. ¹⁵Isarak do lobo ebarithi miyet; ara d’etharehe esarak areha; ara d’ethaunihoi esarak aboithe. Ifothu aboithe th’ohegyemak hulya ara hacohi donyong, ara ohoithagyemani alo di poco. ¹⁶Ara ohegyemani lefothu ebarithi miyet, eyaru hanyong huna di thayocyo, arimak hamok miyet dihide hohune.¹⁷Lefothu ebarithi arehai lo dang alo ihandyo ahani. Arimak ebarithi hamok arehai dihide h’arehai huna. ¹⁸Ohegyemani lefothu ebarit aboithe lo, alo inuhania aboithe nanyong na dihap.¹⁹Diholu h’operok holwa, anyahu ohoithagyemani tho poco, efiyo ohegyemak honyong tho nyahi ainyong ehandyo isong. ²⁰Eyanu ohegyemani lefothu ebarithi miyet lo hahamok diya miyet. Ajyo, ²¹Lahong lonyong ajyo donyong, “Egyema iye tuhudik, ohoigyemani loyyu eruhu iye arami! Eruhu iye ara iye iiyinik egyema asang hattik. Esarak nang iye de thoindafaithe asang hahitwak. Iwon olenga ohobye hindang.²²''Ohoigyemani dang lefothu ebarithi arehai th’ohoithagyemani lonyong lo, anyahi lahong lonyong, ajyo, Lahong hindang, esarak iye do nang ebarithi arehai. Idoro, arimak nang hamok dihide hohwa arehai.’ ²³''Ohoithagyemani ajyo donyong, Egyema iye tuhudik, ohoigyemani loyyu eruhu arami! Eruhu iye ara iye iiyinik egyema asang hattik. Esarak nang iye de thendafaithe asang hahitwak. Iwon olenga ohobye hindang.²⁴Ohoigyema lefothu ebarit aboithe lo aindu, ajyo, “Lahong hindang, atek nang iye othulo leririk bebe. Ingongoco iye dith’amana nakabong iye iromo ara iye iyehi ohinyomo diya. ²⁵Abang nang. Inyong nalo nang inuhahina ebarit nahoi aboithe na dihap. Ibe ebarit nahoi.’²⁶Ara ohoithagyemani etharang inyong ajyo donyong, “Iye ohegyemani omonyoroni karik ofathani. Itek iye hijan engongoco nang dith’amana nakabong nang aromo, nang ayehi ohinyomo diya. ²⁷Ira iye nya isarahina ebarithi hundang hune d’ohoindefak h’akoni h’ebarithi; dara nya kodien anyahuna hindang era nang irumahina ayothoi.²⁸Hajak ahani hune, iduhuna ebarit aboithe ne adi thonyong, ara ithai isarak do lara ebarithi hanyong tomon lya. ²⁹D’ othulo lowon h’ebarithi olwarai, ofonihini de halwa donyong. Ara d’othulo lomutha ebarithi hanyong, juk tiibai hune eduhuni de adi thonyong. ³⁰Omirohina ohoigyemani lofyaha dignwai dimudwe, amaji n’ekor herocio n’ohala.³¹Ara mwai Olonyi l’Othulo laindu th’abolori h’anjelohio honyong, oindu de iwoni dikara honyong h’abolori. ³²Ofuni mwai ohothing h’amisok isuduha dihithemi honyong, ekelyo ohothing, iring nekelyerek ohoyohoni akero dinget, anyimot dihotong. ³³Ikelak mwai akero dinget honyong, anyimot dihotong honyong.³⁴Oindu de Ohobu ijaran d’ohothing hotho inget honyong, “Ifuna, ithai hathuk Lalamonye aboroyo, Iyatik ohobye lonya ehuhumahini ithai thoculwe h’ahap. ³⁵Aleng nang nya ahure, ara ithai isarak nang anyari. Nang ebotho ahibothit, ara ithai iasarak nang ahari h’amathai. Alo nang nya di misok, awang amaji tho nang, ara ithai ilongu nang dithwa. ³⁶Adaha nang nya iluluyai, ara ithai nang ithayofyo. Adiha nang, nang efitha nya, ara ithai ifunu nang ittihyo, ara ithai imijyo di put honang.’³⁷Ohothing hobis afuni ijaran donyong, “Hobu, kanu nya, itehu ohoi iye h’ahure, ara ohoi iyeisarak iye anyari, h’ahibothit, ohoi isarak iye ahari hamathai? ³⁸Kanu nya iwon iye ara othohomononi, ohoi iye isarak amaji; kanu nya idaha iye iluluyai ohoi iye ithayofyo? ³⁹Kanu nya idiha iye, iye ifitha, ara ohoi ifwo iye idoryo karik ara ohoi imijyo diput hohoi?’ ⁴⁰Ara Ohobu aindu itharang isong, ajyo, “Diri, anyahi nang dothai, aning nehandyo ithai d’aboithe lotti th’olarok hundang hulya, donang ihandyo ithai.”⁴¹Ohobu aindu ijaran d’ohothing hotho ihotong, “Ifwatha adi thonang, ithai hathuhi ecyenahina, ditha h’ahimang namanya mak, nanya athuhi ehuhumahina do Sitan ho anjelohyo honyong, ⁴²Anyo, aleng nang nya ahure, kabong ithai nang isarak anyari, nang ebotho ahibothit, kabong ithai nang isarak ahari h’amathai. ⁴³Alo nang nya di poco, kabong ithai nang ilongu di hang; nang adaha iluluyai, kabong ithai nang ithayofyo; nang adiha karik nang efitha, kabong ithai nang ifwo idoryo karik kabong ithai nang ifwo idoryo karik imijyo diput honang.’⁴⁴Isong dang afuni itharang ajyori, “Hobu, kanu nya, itehu ohoi iye h’ahure, h’ahibothit, kwong amaji, iluluyai, h’adiha akrik difitha, ara ohoi awang iye ilwahyo?” ⁴⁵Ohobu aindu itharang isong ajyo, “Diri ajo nang dothai, aning nakabong ithai ihandyo d’aboithe do lotti th’olarok hundang hulya, kabong ithai ihandyo do nang.’ ⁴⁶Ofwo de ohothing hulya d’abahio namanya mak; ara ohobisak afwo d’esu namanya mak.”

¹Aindu nya iwonan, engohina no Yesu ocamitha lonyong, ajyo, “D’ohothifok honyong, ²“Itek ithai hijan diholu h’operok arehai owon de ofaning l’amuno; ofaning le lofunere de ibehohinere Olonyi l’Othulo di kruce.”³Ohoithamojok hohitwa karik ohobolok h’ohothing asuduhai di hang h’ohoithamojoni lohitto, Kaifas. ⁴Owak isong hulo th’ahap th’ahap ijan otohori Yesu. ⁵Otehi hijan are otoho isong Yesu d’ofaning l’amuno, ingere de ohothing etharohoje esuka.”⁶Ofaning le orimak Yesu di Bethani, dihang ho Simone l’atalulu, ⁷di nyari, aindu athulo nabo h’ehulo n’elethang, abuhok di hu ho Yesu. ⁸Atehuna n’ohothifok ho Yesu arami hune, engereji, ajori, “aisong arami hetharohojerek elethang ne ija ahani? ⁹Irahi ilwahyere ohoicanak.”¹⁰Yesu, dihide atehan arami hune ajo dosong, “Ainyong nathai nad’athulo ne? Ehandyo aning nalibo bebe do nang. ¹¹Ithai h’ohoicanak imanya; awang de isuka hothai fuur.¹²Abuhohina elethang di hu honang, orijoro iring n’anuhio hindang. ¹³Diri anyahi nang ithai, amaji nepurarri evanjelyo ne di hap, iihi de ohothing aning nehandyo athulo ne do nang.¹⁴Loboling th’ohothifok honyong, lelongoi ara Yuda Iskariot, alo d’ohoithamojok hohitwa, ¹⁵ajo dosong, “Ainyong isarak ithai nang ara ethafothok nang dothai Yesu?” Esarak isong hulo enyahwo othomona aunihoi arakang. ¹⁶D’orii le, othifeyo Yuda oyihoi lethanyangahinerek inyong Yesu.¹⁷D’ofaning ohoithemoni l’anyari n’ofaning l’amuno, afuni ohothifok ho Yesu ajori donyong, “Dingai de efwo inyo anyari n’ofaning l’amuno?” ¹⁸Ajo dosong, “Ifwatha di bore d’othulo lodiya; ijaratha donyong ojo “Ohoithayeyenani’’ “Aindek omiru hundang; alo nang inyo ofaning l’amuno h’ohothifok hundang di hang hohoi.” ¹⁹Ehandyo ohothifok iring nanyahinere isong Yesu, ehuhumye anyari n’ofaning l’amuno.²⁰Edwongon n’athari owoni Yesu h’ohothifok honyong tomon h’arehai di nyari ofaning l’amuno. ²¹Dihide h’anyari, ajo Yesu, “Diri diri ajo nang dothai lobo thothai lolo nang ithanyangahina.” 2 ²²Adiha n’othaja hosong bebe, bebe, diri. Atangahini efifiyo ahwandek ajori abok abok do Yesu, “Ikara do ti nang, Hobu?”²³Yesu etharang, “Lesarak ahinang nanyong honang dibithi lya, inyong de lya lethanyangak nang lo.” ²⁴Olo de Olonyi l’Othulo, iring nathuhi egeryere thonyong. Ti, omonyo de d’othulo lethanyangyo Olonyi l’Othulo lya! Ira nya iyiji ara kabong nya kodyen hoiyisun inyongi. ²⁵Yuda, lethanyangak de Yesu lo ajo, “Nang re Ohoithayeyenani?” Yesu ajo donyong, “Ethuk iye olefeng ajan.”²⁶Dihide anyari nasong, eduhu Yesu angiryang, oboroyo, apinyo. Esarak dosong, ajo, “Ibethina, onyethe. Ahwan hindang ne.”²⁷Eduhu oihutye, ajyo ihum, esarak dosong, ajyo, “Omathathi, ithai fodok. ²⁸ahotho hindang ne n’emora angejuk, nabuhohini de th’ohothing olwarai, dihohinere eyatha. ²⁹Ti, ajyo nang dothai, awang nang h’amatha th’ahayo h’ohiyani lya, lwai d’ofaning lefunere imathari dang di hobye ha Lalamonye.”³⁰Athuhon nasong edolo oyele, ajinguni dindak afwoi di donge h’Olif. ³¹Diya, Yesu ajo dosong, “Engero ithai de fodok adi tho nang th’aharye. Anyo athuk egero, “Abak nang de ohoyohoni, ara akero athuroro.’ ³²Ti, diholu ethadothuna honang, alo nang de ahithemi hothai di Galilea.”³³Peter ajo do Yesu, “Juk ongero ohothing fodok thohoi, awang nang edehi iye.” ³⁴Yesu ajo do Petro, “Anyahi nang iye arami hadiri, do oteng l’amoithe, kabong ohohorong hoisir, irisa iye nang de operok aunihoi.” ³⁵Petro ajo do Yesu, “Juk owon ara aye do nang, awang nang iye arisa.” Ohothifok ho Yesu fodok ajori ahani.³⁶Yesu alo d’amaji nelongoi ara Gethsemane, ajo d’ohothifok honyong, “Owoniyara dini nang lahalo di mojo.” ³⁷Yesu eyaru honyong Petro h’oduring arahai ho Zebedeyo; othaji lo Yesu aboco adihari th’ethathaciana. ³⁸Ajyo d’ohothifok honyong, “Odiha ethathaciana n’othaji hindang lwai diiye. Ithilauna dini. Iririyethe ainyong naindu.”³⁹Ehuthohina no Yesu tiibai ahani, apwaharu ahomong adihap, amojyo, “Lalamonye, ara ocohi kodien, iyaru ethathacana ne adi thonang. Ti, ikara iring awak nang. Aning newak iye thoihandye.” ⁴⁰Yesu anyahu d’ohothifok hong. Orimak athuhi ajothoro; ajo do Petro, “Anyo ti, awang ocohi dothai ethilahina honang juk orii tiibai? ⁴¹Omijethe tuhudik ahibu ithai imojyo tek ithai ethadwalye. Atek nang, oko ohoile, ahibu ahwan ilik.”⁴²Yesu anyaha di mojyo. Ajyo, “Lalamonye, ara owon oyihoi lekarahinerek awangan hindang ethathaciana, aning newak iye th’ehandye.” ⁴³Anyahu koti. Oindu irimahina ohothifok honyong d’ajoo. ⁴⁴Anden adi edyaharu isong koti, alo di mojyo operohothi oithaunihoi. Enyoryo Yesu Ocame lonyong.⁴⁵Aindu ajyo d’ohothifok honyong, “Ithai hodiferi h’ayiri? Idorotho, Anyiha orii, Olonyi l’Othulo lofwoi ithanyangahina d’ohoiyak. ⁴⁶Odothothik. Hafatha. Aindek ohoithanyangani hindang.”⁴⁷Kabong Yesu ingohi ocame, edwong Yuda Iskariot, oithatomone h’areha l’ohothifok, edwong. Oindu h’elulung nahittok n’ohothing th’ohoithamojok hohitwak karik hahong h’ohothing. Ofuni h’odemio karik oinduhi. ⁴⁸Anyahi othulo lolo ithanyangahina Yesu lo elulung angai olo inyong ithaithahina Yesu dosong hijan, “Othulo le mandayo nang, inyong lya. Indefuna inyong.”⁴⁹Kwak, aindu do Yesu, ajyo, “Tekka, ohoithayeyenani!” Emandayo inyong. ⁵⁰Yesu ajyo donyong, “Omotte, ihandye aning newak iye.” Aindu elulung. Endafaitho Yesu.⁵¹Diya, lobo th’ohothifok ho Yesu, ahethu odemi esalu ehiyok n’ohoigyemani l’ohoithamojoni lohittok. ⁵²52 Yesu ajyo donyong, “Inyahak odemi di maji honyong. Ohothing hoilademi, oyethi de th’odemi.’ ⁵³Igigilo iye awang nang hoira ilongo Lalamonye; era isulahina nang elulungir h‘anjelohio tholohide ho tomon h’arehai? ⁵⁴Angai ira arami h’adwa hathuk egero ifuna iwonan?”⁵⁵D’orii le Yesu ajyo d’elulung n’ohothing, “Ifunu ithai h’oinduhi h’odemyo dindafaitho nang iring ohoholani? Nang hothai di Tempolo dithayeyenio, anyo nawang ithai nang indafaitho? ⁵⁶Ti, owon arami hune d’ofuni arami h’ohocorok ileyori.”⁵⁷Athuhon nasong endefuna Yesu, eyarai inyong do Kaifas, ohoithamojoni lohittok. Diya, orimak ohoigerok h’ohobolok disuduha. ⁵⁸Diyaru Yesu do Kaifas, othiforo Petro ahibu inyong ingengekaru isong olamarai.⁵⁹Othifeyo th’orii le ohoithamojok hohitwak karik asuduhe nahittok n’ohobolok arami hepal ditohyere Yesu. ⁶⁰Awang h’orimahini, juk ithemyo iye angai. Diholu h’arami hune fodok afuni homok ohothing arehai, ajyori othulo lya, ⁶¹‘Ocohi do nang disuluyahahini athwa n’Ojok, ara nang aduho, nang ethaiweji d’operok aunihoi.”⁶²Ohoithamojoni lohittok adotho, ajyo do nyong, “Awang etharangio nahoi? Anyo ocama isong arami hamonyong hune tho iye?” ⁶³Odularu Yesu. Ohoithamojoni lohittok ajyo donyong, “Anyahi nang dohoi th’ofure thol’Ojok lesu, inyahi ohoi, iye Kristo, Olonyi l’Ojok?” ⁶⁴Yesu etharang inyong, “Ethuk iye ajaran iye olefeng. Ti, anyahi nang dohoi, th’orii lya adihithemi, itehu iye de Olonyi l’Othulo owoni dinget h’akolon, aindu dihide h’adikolo hotho hide.”⁶⁵Ohoithamojoni lohittok ariit alyenyi hotho hwan hanyong, ajyo, “Athuk acama arami h’amonyong heda Ojok, ajyo, “Ara asang hamonyo hajak angai iwak ithai. Idorotho, ethairu ithai arami hamonyong d’Ojok. ⁶⁶Ainyong igigilo ithai?” Isong etharangi ajyori, “Ocohi h’aye.”⁶⁷Isong hulo amico ahamilak di homong ho Yesu, anangye inyong. Ajyori, ⁶⁸“Onyahi sede ohoi, iye Kristo. Ngai lobak iye lya?”⁶⁹Omiru hulya orimak Petro owoni di fwata, ahodwothi negyema diya efiyo inyong, “Iye do nya ho Yesu di Galilea.” ⁷⁰Arisa Petro dihithemi h’ohothing fodok, ajyo, “Awang nang atek ainyong icama iye.”⁷¹Anden nanyong dingwai dihuthuk oyihyet, ahodwothi nabo negyema atehu inyong, ajyo d’ohothing fodok howon diya, “Owon nya onde lya d’ohothifok ho Yesu la Nazaret.” ⁷²Petro arisa koti th’epit, “Awang nang etek othulo lya.”⁷³Omiru tiibai ahani afuni ohothing hoindek diya koko, ajyori do Petro, “Diri iye lobo th’ohothifok ho Yesu. Oleyo th’ocame lohoi.” ⁷⁴Aboco Petro aculuyo afecyo th’epithahina ahwan th’epit. Kwak ahani ohohorong esir. ⁷⁵Eyuna no Petro ocame lo Yesu donyong, lojyo. “Dihithemi h’esir n’ohohorong, irisa iye nang de operok aunihoi.” Alo dindak, diyambaritha ekor.

¹Abengan n’amoithe, ohoithamojok karik ohobolok, awahi hijan Yesu thottohori. ²Endafaithe, athorye, eyarai Yesu do lahong l’ahap, Ponsyo Pilato.³Atehuna no Juda, lethanyangyo de Yesu lo, hijan Yesu lofwoi ittohoro, enyaharu enyahwo henyangunerek inyong Yesu hune d’ohoithamojok hohittwak h’ohobolok h’ohothing. ⁴Ajyo Juda, “eyau nang disarahina othulo lokabong hoiyau thottohori. Isong hulo ajyori, “Awang oho thiya; otiha arami hahoi holefeng.” ⁵Juda Skariot arwasaru enyahwo hune dith’Atempolo; alo ittoloro.⁶Ohoithamojok hahong h’ohobolok h’ohothing ajyori, “Aang h’eyarai enyahwo h’ahotho di Tempolo.” ⁷Isong hulo ajyori, inyangunerethe enyahwo hune amaji na nuhyerek ohodahak. ⁸Inyong nelongori amaji nya lwai hongorna ara “amaji n’ahotho.”⁹D’ofuni arami h’ohocororni Jeremiya iwonan ara hadiri, “Eduhuni enyahwo hethanyangerek inyong ohothing ho Israele, ¹⁰esarahini di mana h’ohoyani l’amoco, iring nathuhorik nang ohobu anyahinerek.¹¹Yesu awoitha dihithemi ho lahong l’ahap, efiyo inyong, “Iye Ohobu l’Ojudei?” Yesu etharang inyong, “Ejyo iye.” ¹²Pilato anyaha di hang; ethalongo Yesu. “Iye Ohobu l’Ojudei? ”Pilato efiyo Yesu. ¹³Yesu etharang Pilato, “Thohoi oindu oifiet lya, dia ohothing homok onyahi iye hijan nang ngai?” ¹⁴Pilato etharang Yesu, “Hibu nang ti l’Ojudei? Ohothing hohoi indefu, eyanai iye donang. Ehandyo iye ti ainyong.¹⁵Yesu ajyo, “Ohobye hindang ikara lothohop. Ara ohobye hindang lothohop, irahi nang ohothifok hundang ikauna th’endafaitho n’ohobolok h’Ojudei. A a, ohobye hindang ikara lothohop thene!” ¹⁶Pilato efiyo Yesu, “Hibu diri iye Ohobu?” Yesu ethanrang, “Ejyo iye nang Ohobu. Aisuni nang; nang aindu dihap th’arami thohune: dicama arami hadiri. Le ithaningyo arami hadiri, ithaningyo nang.¹⁷“Aisong arami hadirir?” Pilato efiyo Yesu. Pilato anyaha dindak, ajyo d’ohothing, awang nang arimak arami h’ethayeyere Yesu. ¹⁸Otek Pilato hijan owahi Ojudei atohoro Yesu th’ahaini. ¹⁹Asulu nafure ho Pilato ocame d’othulo lonyong, ahibu inyong owoni dihide h’okara lokanyere arami, ocame lojyo, “Hoihandyo arami hamonyong d’othulo lobis lya. Kabong nang ajoothoro ohariee th’etharikahio thahanyong.”²⁰Ohoithamojok hohittwak anyahini d’ohothing thoifiye Pilato thohohi Barabas, attohori Yesu. ²¹Lahong l’ahap efiyo isong, “Loni th’arehai iwak ithai ahohi nang?” Ara ohothing ajyori, “Barabas.” ²²Pilato ajyo dosong, “Angai ehan nang Yesu?” Ohothing ajyori, “Obehok Yesu di kruce.”²³Pilato ajyo dosong, “Anyo, ainyong obafu odyahu?” Ekori, euluhoi, eluluo ohothing, “Obehok Yesu di kruce.” ²⁴Atehuna no Pilato aang aning nacohi honyong ehandyo, engengelyo owahi ohothing etharohojo, elongu ahari afiniya dihithemi h’elulung n’ohothing, ajyo, “Aang ocohi do nang di ngouna ahotho n’othulo lobis lo. Ottihyethe ithai amonye.”²⁵Ohothing fodok ajyori, “Ahotho nanyong thoiwona dohoi h’oduring hohoi.” ²⁶Pilato ahohi Barabas dosong; ethafodohyo Yesu, ahorik isong thoifwa obehok inyong di kruce.²⁷Ohoremok hoiririyo lahong l’ahap eyaru Yesu d’abore nahittok n’eririyerek ahap nasuduharik ohoremok fodok. ²⁸Ahoye inyong, ethayofohini ahilyen anaborong. ²⁹Ehuhumye ehithang n’oihwa abehohini di hu ho Yesu, ahibu inyong indafetho othelek th’enget. Ohoremok hulya arigongo dihithemi honyong, ethalubangye inyong ajyori, “Koruk do ohobu l’Ojudei.”³⁰Ohoremok amico ahamilak di hwan ho Yesu, ahoruni othelek adi tho hinang honyong, abahi Yesu di hu. ³¹Athuhon nasong ethalubangyo Yesu, ahouni ahilyen anaporong ne adi tho hwan honyong, enyahahini ahilyen no Yesu di hwa honyong, eyarai inyong dibehohina di kruce.³²Afuna nasong dindak, arimahini othulo lo Cyrene, loilongoi ara Simone; eringahini inyong anden hosong dingarahina Yesu adohoro akruce. ³³Edwongi di Golgotha, amaji “n’ahosi h’ohothing.” ³⁴Diya, esarahini inyong thomathai emathitha hadwa iring odengela. Ethem ahani, eda Yesu amatha.³⁵Athuhon nasong abehohina Yesu di kruce, ahorai alyenyi hanyong th’arwasa thon’omorik; ³⁶Awoniyari ohoremok hulya, dikeyo inyong. ³⁷Di hu h’akruce, abehohini diya ocame lojyo, “Yesu, Ohobu l’Ojudei.”³⁸Obehohini nya di kruce ohoholak arehai ho Yesu, oboithe dinget, loboling di hotong. ³⁹Ohothing hofwo thole, eniningyo ahosi, amorye inyong, ⁴⁰ajyori, “Iye lonya ijyo, isuluyahak iye de Atempolo ara iye ithawejik d’operok aunihoi, ithahoru do ahwan nahoi! Arai iye olonyi l’Ojok, icuru thohide h’akruce!”⁴¹Ofaning le dang, ethafoyongyo inyong ohoithamojok hohittwak, ohoigerok karik ohobolok ajyori, ⁴²“Ithalwahu homok, aang h’oco alwahuna ahwan nayong. Inyong Ohobu Lo Israele; Inyong thoicuru tho hide h’akruce di ruk ohoi donyong.⁴³Obolo eruk nanyong d’Ojok; Ojok thethalwahu ara owak ethalwahuna inyong, Atha ojyo inyong, “Nang Olonyi l’Ojok.” ⁴⁴Ara ohoholak hobehohini honyong di krue hulo dang amorye inyong ahani.⁴⁵D’omiru inde h’ofaning, aindu omudwe di hap fodok lwai d’omiru sahal h’ofaning. ⁴⁶Th’orii le, elululuo Yesu bebe, ajyo, “Eli, Eli, lama sabaktani? ojyo ocame lya: “Ojok hindang, Ojok hindang, anyo idyaharu iye nang?” ⁴⁷Ohothing howetha diya indehai hoithairu ajyori, “Elija ilongo.”⁴⁸Lobo aboithe thosong kwak eduhu abahandi n’ohimai etuhi ditha h’obalu olodong, esarak di huthuk ho Yesu; tho mathai; ⁴⁹Ohothing holwa ajyori, “Idehina onde lya hamaring. H’edoryethe ara oindu Elija ethalwahuna inyong.” ⁵⁰Yesu koti ekor bebe, ara ohoile lonyong adutharu.⁵¹Th’orii lya, alyenyi fodok hotho Tempolo, arithai hara thohide lwai di hap. Ehihira ahap, omorik abobora. ⁵²Anga alame, ara ohothing h’Ojok honya ajoothoro, ahenyuni th’ajoo. ⁵³Ofuni tho lame, diholu h’ebuhuna nanyong, ajingari d’abore nadwa, aleyori d’ohothifok olwarai.⁵⁴Atehuna na lahong l’ohoiriryak ho Yesu karik ohothing homok, arithirithi h’asang fodok hawon, abangi ajyori, “Onde lya diri Olonyi l’Ojok.” ⁵⁵Owethi, engengelye olamarai angorwo hanya othiforo Yesu tho Galilea difwan ilwahyo diya. ⁵⁶Dith’angorwo hwa owoni nya: Maria Madalina, Maria nahathingi ho James karik Yosefo karik ahathingi n’oduring ho Zebedeyo.⁵⁷Ajara nya awon ara athari, aindu ohobarani lobo th’amiji n’Arimathea, ilongoi ara Yosefo, ohothifoni lo Yesu. ⁵⁸Yosefo l’Arimathea alo do Pilato difiyo ahwan no Yesu. Pilato anyahi ahwan no Yesu thoisarahini do Yosefo.⁵⁹Yosefo eyaru ahwan no Yesu emuhok th’alyenyi angejuho aliborok. ⁶⁰Alo ithaferihina dith’ahilame angejuk nanya ikefak inyong dith’amorwong. Asulak amorwong nahittok dihuthuk h’ahilame, alo adi. ⁶¹Orimak Maria Madalina ho Maria naboling owoniyari diker h’ahilame.⁶²Nya moithe awon ara ofaning lehuhumyo n’ofaning l’amuno. Asuduha ohoithamojok hohittwak, Ofarisei ho Pilato. ⁶³Ajyori, “Lahong, ojahitha ojyo nya ohodwalani* le homijo, ‘Diholu operok aunihoi ebuhu nang de th’oye.’ ⁶⁴Otiha hijan ahilame thoikeye tuhudik. Ara ike ahani, ofuni de ohothifok honyong, ahoholarai inyong ajyori d’ohothing, “Ebuhu th’ohoyak.” Omonyong de adwala etharehe, okalak ehethemoni.”⁶⁵Pilato ajyo dosong, “Iyathik ohoikyani. Ifwatha; Ikeyethek ahilame tuhudik iring itek ithai.” ⁶⁶Afwoi isong hulo, afwoi isarahina ahilame th’ekeye tuhudik, amorwong thoithothorohini dihide, ara ohoikyani eririyo.

¹Thene, diholu h’Ofaning Oithacofe, afwo ho Maria Madalina ho Maria naboling di tihyo ahilame no Yesu. ²D’omiru hule edwong arithirithi, aindu honyong tho hide anjelo l’Ohobu, eyafulangu amorwong adi tho hide h’ahilame no Yesu, awoni dihide h’amorwong.³Oleyo anjelo lya iring emedek n’ahila, abongoitho hanyong abongi iring eriri. ⁴Ehihira ohoikyak h’ahilame th’abangi, ojahitherek ohoyak.⁵Anjelo acama d’angorwo hune, ajyo dosong, “Hoibangatha. Atek nang. Yesu ithifeyo ithai, lonya athuhi abehohina di kruce. ⁶Aang thene; ti, ebuhu iring nanya ojyarik inyong. Ifuna idorotho amaji nanya ithaferihinerek Hobu na. ⁷Ifwatha kwak di nyahina ohothifok honyong, ‘Athuk ebuhuna th’ohoyak. Otihyethe, athuk anden ahithemi nathai di Galilea... Diya, ifwo ithai de itehuna inyong. ‘Idorotho, athuk nang ithai anyahina.”⁸Angorwo hune kwak edyaharu ahilame th’abangi h’amuno, angerori di nyahina ohothifok ho Yesu. ⁹Diya, arwangarik isong Yesu, ajyo dosong, “Emanda!” Afuni angorwo, endafaithe Yesu thohejek amojyoi donyong. ¹⁰Yesu ajyo do song, “Hoibangatha. Inyahina halalalai thoifwa di Galilea. Ofwoi de itehuna nang diya.”¹¹Afwan n’angorwo, ohoikyak h’ahilame no Yesu afwoi dang di bore dinyahina ohoithamojok hohittwak arami angejuho hawon th’orii le. ¹²Athuhon n’ohoithamojok h’ohobolok acama arami hune, eduhuni enyahwo adumahini d’ohoikyak h’ahilame no Yesu. ¹³Anyahini isong hulo ohoikyak, “Ijaratha, d’ohothing homok, afuni ohothifok ho Yesu ahoholarai ahwan nanyong ahibu ohoi ethuk ajoothoro.'¹⁴Ara iwas arami hune do lahong lahap, inyahi ohoi de inyong th’aang hoihandye arami hamonyong dothai.” ¹⁵Eruhuni ohoikyak, efothuni enyahwo iring nathuhi isong anyahina. ethathurohini arami hune d’Ojudei karik di hap fodok lwai hangorna.¹⁶Ti, afwoi ohothifok ho Yesu di Galilea, d’odonge lonya onyahi Yesu isong thoifwa diya lo. ¹⁷Atehuna nasong Yesu, amojyoi donyong. Kabong ti homok hoiruk arami hune tuhudik.¹⁸Yesu aindu, acama dosong, ajyo, “Abolori fodok athuhi esarahina do nang dihide karik di hap. ¹⁹Ifwatha orimahina ohothifok h’amisok fodok. Ethandefahini isong Abatisimo th’ofure thol’Omonye, thol’Olonyi karik thol’Ohoile Lodwa.²⁰Ityeniethek isong thoiruho asang fodok hathuk nang ithai anyahina. Otihatha, awon nang de hothai juui, lwai dicuhit h’ahap.”

¹Aculwe na n’evanjelio no Yesu Kristo, Olonyi l’Ojok. ²Iring negerorik inyong ohocoroni Isaia: “Otiha, nang lasulak ohifak hindang dihithemi h’ahomong nahoi, inyong loindu de ihuhuhumyo oyihoi lohoi. ³Omurut l’othulo loikor ditha hofara, dihuhumyo oyihoi l’Ohobu; dihuhumyo oyihothik honyong hobis.”⁴Yoanne aindu, dibuhyo batisimo naburunu karik namiehina n’eyatha ditha hofara. ⁵Amiji fodok no Judea karik ohothing bukulung ho Yerusalem afwoi donynong. Abuhok inyong dosong batisimo, ewahai eyatha hasong ditha owor lo Jordano. ⁶Iyofo nya Yoanne abongo n’ohofir karik erohit di mukok n’amuhunyong n’akonikoni, karik anyo ebeye karik aiso nalofye ditha hofara.⁷Etyenio oisukaitha hoyyu, thajaran, “oindu de di put honang othulo loko thonang, laang ocohi donang alahyo ahafi h’ahamuha hanyong. ⁸Abuhok nang batisimo dothai th’ahari, ti, oindu de le ibuhohina ithai batisimo th’Ohoile thol’Odwa.”⁹Afuhi arami d’operok hule ahana: aindu Yesu tho Nazarete di Galilea ara Yoanne abuhok inyong batisimo ditha h’owor lo Jordano. ¹⁰Ainduna no Yesu adi thath’ahari, atehu inyong paradiso angai karik inyong dang atehu Ohoile ainduna dihap dihu honyong iring ayoro. ¹¹Omurut aindu thohide, “Iye oitho hindang lamuno nang; amuno nang bebe hohoi.”¹²Thiya Ohoile eringak inyong thoilo ditha h’ohidyefo. ¹³Esuka di hidyefo operok athomone arangwan, ahibu Sitan inyong othemyo. Esuka h’ecangi, ahibu anjelohio igyema donyong.¹⁴Thene, endefa no Yoanne, Yesu aindu di Galilea dinyahina evanjelio n’Ojok. ¹⁵Ajyo, “Acohini omiru karik anyiha ohobye lothohide. Oburunethek ara ithai iruk evanjelio.”¹⁶Adaha nya nanyong diker h’ahari no Galilea, atehu Yesu Simone karik Andrea, lolai ho Simone, omirye abwoyino dith’ahari; isong hulo nya ohoyapohak h’ohom. ¹⁷Yesu ajyo dosong, “Ifuna, othifunethek nang; esarak nang ithai de thoiwona ara ohoyapohak h’ohothing.” ¹⁸Thiya, edyaharu isong hulo abwoyino kwak, athiforoi inyong.¹⁹Aden no Yesu ahithemi tiibai, atehu Yacobo, lolonyi ho Zebedeo karik Yoanne olai lonyong; orifiyo nya isong hulo abwoyino dihide h’aroko. ²⁰Elongo inyong lo isong, edehini omonye losong Zebedeo dith’aroko h’ohoigyemak hadumai, athiforoi inyong.²¹Orii tiibai ahani, afuni di Kapernaum; ofaning le, Oithacofe l’esabit. Yesu ajinga ditha Sinagogue, etyenio. ²²Afalanga ohothing etyenio nanyong, anyo, ityenio inyong lo isong iring othulo lowon h’akolon n’endafaitho n’ohothing, ikara iring ohoigerok.²³Othulo ditha Sinagogue nasong ne lowon h’ohoile loibot ekor, omorut dihide, ²⁴ajyo hijaran, “Ainyong ihandyerek ohoi iye, Yesu la Nazareth? Iindu iye dittohoro ohoi? Atek nang iye ngai. Iye Aboithe Lodwa l’Ojok!” ²⁵Yesu emimingak ohoile lomonyong ajyo, “Odularu, ara iye iindu adi th’othulo lya!” ²⁶Ohoile loibot amirok othulo lya dihap, alo adi thothonyong; alo adi ahibu inyong ikokororo omurut dihide bebe.²⁷Afalanga ohothing bukulung, efifyai ahwandek hijaran, “Ainyong na? Etyenio angejuk th’akolon! Eringyo juk ohoilehio homonyong, eruhi isong hulo arami hanyong. ²⁸Asayo hanyong afwoi d’amasok fodok ditha h’ahap no Galilea.²⁹Ajinguna nasong adi tho Sinagogue, afuni dihang ho Simone karik Andrea, isong ha Yakobo karik Yoanne. ³⁰D’orii lya ne, orimak nahamone ho Petro oferi, odiha h’ethor n’ahu. Isong hulo anyahini do Yesu adiha nanyong. ³¹Thiya inyong lo aindu, eduhu ahinang nanyong, adohu inyong dihide; ethor n’ahu edehi inyong. Inyong na aculuyo alwahyo isong.³²Athari nya, diholu h’alumon n’oholong, eyanai donyong ohothing fodok honya odiha karik howoni h’ohoilehio homonyori. ³³Asuduha abore fodok dihuthuk h’oyihet. ³⁴Ethayijyo ohothing holwa hodiha opeceni h’adihathik hama hama, angaterek oho ilehio homonyong adi, ti, kabong ohorik ohoilehio homonyong to camai, anyo, otehi isong hulo inyong.³⁵Ahenyu inyong lo berien, hoiriok ahap, alo inden d’amaji n’esuritha, amojyo diya. ³⁶Simone karik ohothing honya owoni honyong, athifeyo inyong. ³⁷Arimahini isong hulo inyong, ajyori donyong, “Ohothing fodok, abok abok hothifeyo iye.”³⁸Ara inyong ajyo, “Hafatha adi d’amaji naboling, nathatha h’abothok haindek hune, dalo nang inyahina arami hayyu diya; inyong haindunerek nang thenene hini.” ³⁹Alo atha no Galilea fodok, dinyahina arami hayyu di Synagohio hosong karik dingaterek ohoilehio homonyong adi.⁴⁰Aindu otthulo l’athalulu donyong. Amojyo donyong, arigongo dihap, ajyo donyong, “Ara iwak iye, ocohi dohoi dithaliboryo nang.” ⁴¹Amiehunu nanyong ahani, Yesu athin inyong lo th’ahinang, ajyo donyong, “Awak nang. Oliboro.” ⁴²Kwak ahani, attalulu edehi inyong, alibo.⁴³Yesu ethahongok inyong thaang ocamai, asulak inyong adi. ⁴⁴Ajyo donyong, “Oteha tuhudik di aangan inyahina aning nabo d’othulo loboling, ti, ilo ithaithak ahwan nahoi do fadiri, isarak esorio nahoi d’ethaliborio nahoi iring efahak Musa, iring anyahina dosong.”⁴⁵Ti, alo inyong lo dindak; alo ibocoro aculuyo anyahina arami hune dindak, iring owak inyong, ethathurok ocame, lwai Yesu aangan ajingara dith’abore oleyoroi, ti, esuka dith’amasok halama. Ti, orasa ohothing afuna donyong, th’amasok bukulung.

¹Anyahuna no Yesu di Kapernaum diholu h’operok tiibai, ethaningunu hijan inyong lo lodi hang. ²Afuni donyong ohothing olwarai, aangarik amaji, lwai dihuthuk h’oyihet; inyong lo anyahi dosong ocame.³Thiya, ohothing arangwan eyanu donyong othulo laye arobokang. ⁴Aangan n’elulung ahorihina isong afuna indehai do Yesu, alahanye efithe tholohu ho Yesu, ethacurohini othulo lodiha lya th’ofyel lothoferorik dihithmi ho Yesu dithwa.⁵Atehuna eruhon nasong, Yesu ajyo d’othulo laye arakang lya, “Olonyi, ahohini eyatha hahoi.” ⁶Diyan, ohoigerok howoni d’amaji nya, egigiloi dithaja hosong, ⁷“Angai ocama othulo lya ahani? Ipitha! Ngai ocohi amiehina eyatha, arahari Ojok hamaring?”⁸Kwak Yesu atek di hoile honyong, ainyong igiglo isong dihwandek hosong. Ajyo dosong, “Anyo igigilo ithai ahani dithaja hothai? ⁹Nani ilik, ajaran d’othulo laye arabokang lya, ‘Ahoini eyatha hahoi,’ dia ajaran, ‘Odothoi, iduhu ejoothit nahoi, odahai’?¹⁰Ti, ditek ithai hijan owon Olonyi l’Othulo h’akolon dihap di hohina eyatha, ajyo inyong lo d’othulo laye arabokang lya, ¹¹”Ajyo nang dohoi, odothoi, iduhu ejoothit, ilo di hang hohoi.” ¹²Adotho thahide kwak, eduhu ejoothit nanyong, ajinga dingwai dihithemi h’ohothing fodok, afalanga ohothing fodok, ethabolorye Ojok, ara isong ajyo, “Kabong ohoi irimahinerek aning nabo iring ne.”¹³Alo inyong lo ikoti dindak, dikeremet h’ajor. Ara elulung n’ohothing aindu donyong; etyenio isong. ¹⁴Anden nanyong ahani, atehu Levi, lolonyi h’Alifeyo, owoni di moroko h’ohoiduduhani l’enyahwo, ajyo donyong, “Othifunu nang.” Adotho thahide, athiforo inyong.¹⁵Owon nya Yesu h’anyari dihang ho Levi isong h’ohoiduduhak h’enyahwo karik ohoiyak olwarai, onye honyong karik ohothifok honyong. Aca awoni nya ohothing olwarai hothifoitho inyong. ¹⁶Atehuna nya n’ohoigerok, Ofarisei, Yesu anyo h’ohoiyak karik ohoiduduhak h’enyahwo, ajyori d’ohothifok honyong, “Anyo onyo inyong h’ohoiduduhak karik ohoiyak?”¹⁷Ethaninguna no Yesu arami hune, ajyo dosong, “Ohothing hoyyu ahwandek hasong, aang howahi oiboni, arahari ohothing hodiha owahi aboithe. Aang nang aindu, dilongo ohothing hobis, ti, ohoiyak.”¹⁸Thene nya, orimak owoni ohothifok ho Yoanne karik Ofarisei didwa. Afuni ohothing homok ajyori donyong, “Anyo idwa ohothifok ho Yoanne karik h’Ofarisei, ahibu hohoi aang hoidwa?” ¹⁹Yesu ajyo dosong, “Ocohi d’ohoigyemak edwa, ahibu ohomuthani howon hosong? Howon ohomuthani hosong, aang hocohi isong edwa.²⁰Ti, ofuni de operok hofuni iyarik ohomuthani adi thosong; d’operok hule, ofuni de idwa. ²¹Aang othulo lorifak akerebuse angejuk d’abongo angoroi. Aca, arifiyo ne, oricyo adi thonyong, angejuk th’angoroi, amonyong hathi aritha okalak.²²Aang othulo loithurak obalu angejuk ditha ehulo nelangoro. Ara leyafutha, ofwada ehulo, ara obalu karik ehulo fodok akari. Kombwo, obalu angejuk, thoithurahini ditha h’ehulo angejuk.”²³D’Ofaning Oithacofe, alo Yesu tholo amandak hamok h’ohima, ara ohothifok honyong aculuyo akweyo ahosi h’ohima difwan hosong th’oyihoi thole. ²⁴Ofarisei ajyori donyong, “Otiha, anyo ihandyo isong aning naang obis d’Ofaning Oithacofe?”²⁵Inyong ajyo dosong, “Kabong ithai ihena ainyong ihandyo Davide ahibu inyong ahure oleng – inyong karik ohothing howon honyong – ²⁶angai olo inyong dithwa h’Ojok, orii Abiatar ara ofadiri lohittok, anyo anyari naang obis d’othulo loboling, arahari do fadirihio, juk esarahina d’ohothing homok honya owoni honyong?”²⁷Yesu ajyo, “Ihuhumye nya Ofaning Oithacofe d’ohothing, ikara ohothing d’Ofaning Oithacofe.” ²⁸Inyong na, Olonyi l’Othulo, Ohobu; Ohobu dang l’Ofaning Oithacofe.”

¹Yesu koti adaha di Sinagogue; owon nya othulo lobo diya laye ahinang. ²Ohothing homok engengelyo inyong tuhudik ditihyo ara ithayijyo inyong d’Ofaning Oithacofe dithalyehini epal nanyong.³Yesu ajyo d’othulo laye ahinang lya, “Odothoi, ara iye iwetha dini dihiji h’ohothing bukulung.” ⁴Thiya, ajyo d’ohothing, “Obis dihandyo ayiji d’Ofaning Oithacofe dia diryafuna? Dilwahuna esu dia dittohoro?” Ti, adularai diing.⁵Amijyo dosong th’engere; ejorya th’akolon thon’othaja hosong, ajyo d’othulo lya, “Odongok ahinang nahoi.” Adongok inyong, ara ahinang anyahak dimaji. ⁶Ara Ofarisei afwo dindak dicama h’ohothifok ho Erode dirimahina oyihoi lethayeyerek inyong.⁷Thiya, Yesu h’ohothifok honyong, afwoi d’ahari nahottok, ara elulung n’ohothing tho Galilea, Judea, Yerusalem, Idumea karik thele ho Jordano, Tyre karik Sidone, athiforo. ⁸Ethaninguna nasong asang hehandyo inyong, aindu elulung nahittok donyong.⁹Anyahi ohothifok honyong, thoiyanu aroko natti donyong, anyo, tek elulung inyong amiyithak dihiji. ¹⁰Aca ethayijyo ohothing holwa; owahi ohothing holwa afwan iindehai diithin inyong.¹¹Ara ohoilehio hoibot hatehu inyong, apwaharai dihap dihithemi honyong, ekori hijaran, “Iye Olonyi l’Ojok.” ¹²Anyahi isong thanako thaang hoisarak inyong lo thotehi.¹³Adok di donge; ara ohothifok howak inyong, athiforoi inyong. ¹⁴Inyong anyimu ohothifok tomon h’arehai (hoilongo inyong ara ohoifahak) dowoni honyong, inyong alo efahaitho isong difwan inyahina ocame, ¹⁵karik dowoni h’asuhe dingaterek adi ohoilehio homonyong. ¹⁶Inyong anyimu ohoifahak tomon l’arehai: Simone, loisarak inyong ofure Petro,¹⁷Yakobo, lolonyi ho Zebedeo karik Yoanne lolai ho Yakobo, loisarak inyong ofure Boanerjes, lojyo, olonyirok h’ahila; ¹⁸karik Andrea, Filippo, Bartolomeo, Mateo, Tomaso, Yakobo, lolonyi ho Alfeyo, Taddeo, Simone l’ohoingarak, ¹⁹karik Juda Iskariote, lonya oindu de ithanyangahina Yesu lo.²⁰Thiya, alo dihang; elulung ikoti asuduha, ara naang isong ocohinerek anyerek anyari. ²¹Ethaninguna n’ahang nanyong ahani, afwoi dindefunu inyong, aca ojyori isong, “Etharohoja ahu nanyong.” ²²Ohoigerok ecuruni tho Yerusalem, ajyori, “Endefa inyong lo ho Beelzebul.” karik, “Th’ohoindefani thol’ohoilehio homonyong, ongaterek inyong ohoilehio homonyong adi.”²³Yesu elongu isong donyong, ajyo dosong th’aryemarihio, “Angai ocohi inyong do Sitan dingaterek Sitan adi?” ²⁴Ara ibwa ahabwore, aang ocohi d’ahabwore ne awetha inyong hamaring. ²⁵Ara ibwa ahang, aang ocohi d’ahang ne diwetha inyong hamaring.²⁶Ara adotho Sitan eriborik ahwan nanyong, ebwa, aang ocohi awetha inyong hamaring, ti, edwong ecuhit nanyong. ²⁷Ti, aang othulo lojinga dihang h’othulo loko, arujoro attitto hanyong bukulung, ara kabong dodo othemyo othulo loko lya, etharohojo hathi ahang nanyong.²⁸Anyahina diri dothai, ohohini de ayetha fodok h’olonyirok h’ohothing, juk omotta fodok hoibot hojyori isong, ²⁹ti, othulo locama omoritha hoibot d’Ohoile Lodwa, aang horimak amiehina, ti, eyau eyau nattohyo.” ³⁰Ojyo Yesu ahani, anyo, ajyo isong hulo, “Owon inyong lo h’ohoile lolibo.”³¹Thiya, ahathingi nanyong karik olarok honyong, afuni karik awethi dingwai. Elongoi inyong, alihahini inyong lo dihiji. ³²Elulung awoni ara nalihak inyong, ara isong ajyori donyong, “nehathingi, holoilai karik henehani, heririyo iye dindak; hathifeyo iye.³³Yesu etharangyo isong, “Hongai nanahathingi halalalai?” ³⁴Inyong lo amijyo d’ohothing howoni d’ekorie nalihak inyong, ajyo, “Otihatha, nanahathingi karik halalalai hulo.” ³⁵Aca, loihandyo awahan n’Ojok, inyong lya lalalai, nanahani karik nanahathingi.”

¹Ikoti, aculuyo inyong lo etyenio dipogo h’ahari nahittok; elulung nahittok asuduha donyong, inyong awoni dihiji honyong. Owon nya elulung nya fodok difohor h’ahari nahittok. ²Etyenio inyong isong asang olwarai th’aryamarihio; dityenio honyong, aning na najyo inyong dosong,³“Ithaningyethek! Alo ohoromoni diyeyo ohinyomo honyong. ⁴Diyeyo honyong, adouni homok dihiji h’oyihoi, ara ahwen afuni, alutharai isong. ⁵Homok adohi d’ahap nankek ara omorik, namutha aboro diya. Isong abuli kwak, anyo, awangi aboro hafwo dihap.⁶Ti, ajara oholong aindu, enohyo isong, anyo, aang ohode hosong, ayohoji. ⁷Homok ohinyomo adoro dith’ehwa. Ehwa abulu, aromye isong, aang hobolori dingidari ara anyari.⁸Ohinyomo homok abuli d’ahap nayyu, isong hulo abolori dihide ara holwari, angidari athomone aunihoi, athomone inde, omiru juk esihe.” ⁹Thiya, inyong ajyo, “Lowon h’eyoha, thoithairye.”¹⁰Awonan nya no Yesu hamaring, efiyo inyong ohoifahak tomon larehai howon honyong arami h’arymarihio. ¹¹Inyong ajyo dosong, “Dothai, athuhi esarahina amysterio n’ohobye l’Ojok, Ti, d’ohothing hothondak, esarahini ditha h’aryamarihio, ¹²Inyong na, ara hamijyo, aa, omijye, ti, aang otehuni, karik, ithairyo isong, aa ithairyo, ti, aang otehi tuhudik, dia ara kodien eloithoi, ira isong Ojok imiehina.”¹³Inyong ajyo dosong, “Aang ithai itek tuhudik aryamara na? Angai de itek ithai tuhudik aryamarihio bukulung?” ¹⁴Oyehi ohoyeni ocame. ¹⁵Isong ocamitha hulo, homok hoth’oyihoi, amaji nayehinerek inyong. Ara isong hethairyo, Sitan kwak aindu eyaru adi ocame lonyahini dthosong.¹⁶Ohinyomo hoyehini d’amaji nakek ara omorik: Isong ohothing hara, ara hethaningu ocame, obocori kwak efothuna inyong th’amuno. ¹⁷Ti, aang owoni h’ohade hosong. Isuka isong omiru tiibai. Diholu, ara ethathaciana dia ethagyemio n’ocame nawon, isong hulo aboco kwak apwaharu adi.¹⁸Ikoti, homok ohinyomo hodohi ditha hoihwa. Isong hulo ohothing hoithairyo ocame, ¹⁹ti, awahan n’ahap, ethathadwala n’abara karik awahan n’asang hothohop hamok, aindu, aromyo ocame, aang hongida aning nabo. ²⁰Ohinyomo hoyehini d’ahap nayyu, isong ohothing hoithairyo karik eruhi ocame longida ahayo, athomone aunihoi, athomone inde dia juk esihe othomone enyahitha olwarai.²¹Yesu ajyo dosong, “Ara inwahyo iye athwa, imuhok iye ahirya dia isarak iye inyong tholohop h’aning naang awulo nanyong otehunu? Ithawejik iye ahirya dihide h’aning natihunu awulo n’ahimang thiya. ²²Aca awang aning nedima, naang ofuni de itehan; karik aang de aning nedima, naang oindu ileyori dindak. ²³Ara lowon h’eyoha, thoitharye!”²⁴Ajyo dosong, “Omijyethek tuhudik d’ocame loithairu ithai, anyo, othemit loithairyerek ithai, inyong de ofuni ithai ithemyerek, karik afuni de ifonihinerek dothai. ²⁵Anyo, lowon h’aning nabo, ofonihini de nabo donyong, karik, ara laang howon h’aning nabo, juk tiibai nawon honyong ne, iduhuni de adi thonyong.”²⁶Inyong ajyo ikoti, “Ohobye l’Ojok, ojahitha othulo loyehi ohinyomo dihap. ²⁷Ojootho th’aharie, amjjyo th’afaning; obuli ara ohinyomo abolori, juk inyong aang hotek angai. ²⁸Owetha ahap ara ohima hamaring. Abene ehethemok, amimithang h’athurothe karik Ohimai langida. ²⁹Ara ohima hangidari, ohoromoni kwak atahitha odemi, anyo, edwong engongocio.”³⁰Ajyo ikoti, “D’ainyong ecohi etharwangyo ohobye l’Ojok, dia nani aryamara ocohi hothai anyahinerek inyong? ³¹Ojahitha ohinyomothi lotti, lara, ara ledulahini, omutha inyong lo bebe th’ohinyomo fodok hothohop. ³²Ti, ara lathuhi edulahina, obu karik abolo th’oyandik bukulung hotho mana, howoni h’athandak hahittwak hafunu ahwen hothohide iduhorik athwahio d’obibile lonyong.”³³Th’aryamarihio olwarai iring ne, acama ocame dosong iring nera isong iteharik tuhudik ³⁴karik kabong inyong lo ocama dosong kwong aryamara. Ti, awonan nya nanyong hamaring, enyanyahak asang fodok d’ohothifok honyong.³⁵Ofaning le, nya th’athari, ajyo dosong, “Hafatha d’oyirik lothele.” ³⁶Isong hulo afwo, eyarai Yesu, ara inyng ahani, diroko. Owoni nya arokoni hamok hafwo hosong. ³⁷Ajara nya ahomwa nako awam, epongaitho ahari ditha h’aroko, lwai aroko aindehi efuthan ara ahari.³⁸Ti, ahibu Yesu athauk ajoothoro bebe dihide athehit n’ahu. Ethadocye inyong lo, ajyori, “Ohoityenani, awang iye iwak atehan hijan eindek ohoi aye?” ³⁹Adotho, eringyo ahomwa, ajyo d’ahari nahittok, “Elik! Owethai amaji aboithe!” Thiya, ahomwa awetha, ara adularu nayyu, abolo, awon.⁴⁰Thiya, ajyo dosong, “Anyo ibang ithai? Kabong ithai iwon heruhon?” ⁴¹Abangi isong bebe, ajyori dihwandek hosong, “Ngai de lya, lara juk ahomwa karik ahari nahittok iruhi arami hanyong.”

¹Isong afuni d’oyirik lobo l’ahari nahittok, dihap ho Gerasene. ²Adohuna no Yesu thoroko, aindu othulo lowon h’ohoilehio homonyong tholame donyong.³Omanya othulo lya dilame. Awang othulo lepapahyo inyong; juk th’eririk aang othorunu. ⁴Athorye nya inyong operok olwarai th’ebilat thah’ehenie karik h’eririk. Awur karik afut inyong nya asang hune bukulung. Awang othulo l’akolon locohi akoruna inyong.⁵Th’aharie karik th’afaning, dilame karik didongiok, ikor inyong lo bebe, angocyo ahwan nanyong th’omorik thohofi. ⁶Atehuna nanyong Yesu olamarai ahanya, angero donyong, adumo ahu adihap dihithemi honyong.⁷Ekor inyong lo bebe omurut dihide, “Ainyong awak nang ehandyo hohoi, Yesu, Olonyi l’Ojok Lobolo Dihide Bebe? Amojyo nang iye th’Ojok olefeng, hoithathacianio nang.” ⁸Aca ithabuho nya ajaran donyong, “Iwong adi thoth’othulo lya, iye ohoile loibot.”⁹Inyong efiyo inyong, “Ngai ofure lohoi?” Inyong etharangyo inyong, “Ofure hindang Elulung, aca ilwa ohoi.” ¹⁰Amojyo inyong lo inyong, amojyo inyong ikoti, thaang hongararik isong adi th’ahap nya.¹¹Thene, owon nya elulung n’abathaha diya dinyari dihide h’odonge. ¹²isong amojyo inyong, ajyori, “Ongararik ohoi ditha h’abathaha; ohoi thojingai ditha hosong.” ¹³Inyong ahorik isong; ohoilehio hoibot afuni adi, ajingahini ditha h’abathaha; ara abathaha angerori athan’acundong nadonge, dith’ahari nahittok; ara abathaha esihe arehai apwaharai Karin amathi ditha h’ahari nahittok.¹⁴Thiya, ohoyohok h’abathaha angerori adi, afwoi inyahina di bore ainyong ofuk dimiji; ohothing afuni didoryo aning nathuk afuhon. ¹⁵Thiya ohothing afuni do Yesu, atehuni honyong othulo lonya endafa h’ohoilehio hoibot lo, iyofo karik awoni dinget honyong; abangi nya ohothing.¹⁶Ara ohothing hatehu aning nafuk d’othulo loindefa h’ohoilehio hoibot lo anyahi isong tuhudik aning nafuk; inyong dang anyahi isong arami h’abathaha. ¹⁷Thiya isong hulo aculuyo amojyo inyong thoidehi ahap nasong.¹⁸Athuhon nya no Yesu ecurohina di roko, othulo lonya indefa h’ohoilehio hoibot lo amojyo inyong thomanyai honyong. ¹⁹Kabong Yesu iruhok donyong, ti, ajyo donyong, “Ilo di hang hohoi karik d’ohothing hohoi; ilo inyahi isong aning nathuk Ohobu ehandyo dohoi karik ethaithak iye amiehina.” ²⁰Ahani ne, alo inyong lo, aculuyo anyahina di Dekapolis asang hahitwwak hanya athuk donyong; afalanga ohothing bukulung.²¹Athuhon nya no Yesu alangitha d’oyirik lobo th’aroko, asuduha elulung nahittok diker honyong, anyo, oindek nya inyong d’ahari nahittok. ²²Thiya, lobo aboithe tho hahong h’Asinagogue, loilongoi ara Jairus lo, aindu; atehuna nanyong inyong, apwaharu di hejek honyong. ²³Amojyo, amonjyo ikoti henyak hijan, “Aindek aitho hindang natti aye. Amojyo nang iye, iwong dithahina dihide honyong ahas hahoi, doyyu inyong nan karik amijyo.” ²⁴Alo inyong lo honyong, ara elulung nahittok athiforo inyong, ara nekolok inyong dihiji bebe.²⁵Owon nyana athulo nawo ahotho nanyong oyingathik tomon larehai. ²⁶Aleng ethathaciana th’oiboniok holwa karik aduma th’asang fodok hawon donyong; ti, dihide haduma ahani ne, dirahan ayiji kodien, amomonyorunu hathi. ²⁷Ethaninguna nanyong assayo ho Yesu, aindu tholohurong honyong dith’elulung, athin abongo nanyong.²⁸Aca, inyong na ajyo, “Ara athin nang, juk abongo nanyong ti, ithayijye nang de.” ²⁹Eithin nanyong inyong, awojon awetha; ara inyong na atek dihwan honyong hijaran ayyu inyong th’ethathaciana nanyong.³⁰Yesu kwak atek hijan alo akolon adi thonyong. Eloitho d’elulung, ajyo, “Ngai othin abongoitho hundang?” ³¹Ohothifok honyong ajyori donyong, “Itehu iye elulung ne irudaru adohoi, ara iye ijyo, ‘Ngai othin nang?’” ³²Yesu edoryo diya koko ditehuna ngai ihandyo.³³Atehan ainyong afuk donyong, abang athulo ne, ehihira. Aindu inyong na, apwaharu dihithemi honyong, anyahi inyong arami hadiri. ³⁴Inyong ajyo d’athulo ne, “Aitho, athuk eruhon nahoi iye ethaijyo. Ilo th’elik dithayijunu th’ethathaciana nahoi.”³⁵Hocama inyong ahani, afuni ohothing homok thalahong n’Asynagogue, ajyori, “Aye neengaring, ainyong hoithathacianio iye ohoityeniani?”³⁶Ti, Yesu ethaningu ocame lodwo athuhi ajaran le, ajyo da lahong n’Asynagogue, “Hoibang, ti, iruho.” ³⁷Kabong hoiruhok othulo lobo thoilo honyong, arahari Petro, Yakobo karik Yoanne, lolai ho Yakobo. ³⁸Afuni isong di hang hala lahong l’Asinagogue; inyong atehu ohothing arya iwawacitha; ikori ahibu isong iwuluhoitho bebe.³⁹Ajingara nanyong dithwa, ajyo dosong, “Anyo ijyorya ithai, ara ithai ikor?” Kabong akalifonit oye, ti, nad’ajoo.” ⁴⁰Isong ethalubangyo inyong. Ti, inyong anyahi isong fodok thoifwa dingwai; eduhu omonye l’aitho karik ahathingi, afwoi d’amaji nawonderek aitho.⁴¹Eduhu ahinang n’akalifonit, ajyo donyong, “Thalitha, koum!” Neloicye ara najyo, “Aitho natti, ajyo nang dohoi, odothoi th’ahide.” ⁴²Akalifonit kwak adotho th’ahide, adaha (ara oyingathik honyong tomon larehai). Afalanga isong afalanga nabolo tholohide abolori. Efahak inyong lo isong th’akolon, lobo thaang oteha arami hune. ⁴³Thiya, inyong anyahi isong thoisarak akalifonit aning nabo thonye.

¹Edyaharu amaji nya, alo d’abore n’ahang nanyong; ohothifok honyong athiforo inyong. ²Ainduna n’Ofaning Oithacofe, etyenio di Synagogue. Ethaningyo inyong ohothing holwa, elilihai. Isong ajyori, “Thongai aorimak inyong oityenitha hulya? Honi olofioro hoisarahini donyong hulya?” “Aisong hafalangai hehandyo inyong th’ahinang thananyong hune?” ³Aang hara olonyi l’ohoigyemani l’ahyek lo lya? Lolonyi ho Maria, lolai ho Yakobo, Jose, Juda karik Simone?” Ethamoryo isong Yesu.⁴Thiya Yesu ajyo dosong, “Aang ohocoroni laang howon h’ethahuyo, arahari dibore karik dihang honyong, dihiji h’ahathing hanyong, karik dithatha h’ahang nanyong holefeng.” ⁵Aang ocohi donyong dihandyo egyema naboling nako, arahari ethahina nanyong ahas hanyong dihide h’ohothing tiibai hodiha, ethayijyo isong. ⁶Afalanga inyong aangan nasong eruhon. Thiya alo ityetyenaru d’amisok haindek.⁷Thiya, inyong elongo ohoifahak tomon larehai hulo, arek, arek, esarak isong akolon n’endafaitho dihide h’ohoilehio hoibot. ⁸karik emimingat isong thaang hoiyaru aning nabo d’adaha nasong, arahari ohoigyemani – ikara anyari, olohobon, dia enyahwa ditha h’erohitha hasong – ⁹ti, thoifoi ahamuha, thaang hoiyofoi abongo nahittok nalibo bebe.¹⁰Ajyo dosong, “Ahang nejingarik ithai, isukathik diya, lwai ithai edehina. ¹¹Ara aang abore nabo ifothu ithai karik dia aang ithaningyo dothai, ara ithai hedehi amaji naya, ithuthuina aturr tho hejek hothai adi, ara nanyahi dosong hijan arami hune diri.¹²Afwoi dinyahina ohothing dindak thoburunu. ¹³Angaterek isong ohoilehio homonyong adi, eyelahini ohothing olwarai hodiha elethang karik ethayijye isong.¹⁴Erode ethaningu arami hune, aca athuk ofure lo Yesu ahujon. ajyori nya homok, “Athuhi ethadothuna Yoanne Batista thoye, inyong negyema asang hafalangai hune dtha honyong.” ¹⁵Homok ajyori, “Inyong Elijah.” Homok ikoti ajyori, “Inyong ohocoroni, iring lobo th’ohocorok ho berien.”¹⁶Ti, ethaninguna n’Erode arami hune, ajyo, “Athuhi ethadothuna thoye Yoanne, lonya athuk nang abonguna ahu adi lo.” ¹⁷Aca efahak Erode Yoanne thoifithahini, th’arami thahamuthayerek erode Erodias, (afure no Fillippo, olai).¹⁸Aca anyahi Yoanne Erode, “Aang obis dohoi dimuthayo nafure holoilai.” ¹⁹Ti, eringak Erodias ahwan th’engere, awak attohoro Yoanne, ti, aang orimak ayihoi, ²⁰anyo, obang Erode Yoanne; otek hijaran inyong lo othulo lobis karin lodwa; esarak inyong thoisukai ara nayyu. Ethaningyo inyong, ethalicye ahu nanyong.²¹Thiya, afuni omiru hoyyu d’amuno n’ofaning loisunerek Erode; Ehuhumyo anyanri olwarai, elongo ohoigyemak, ohithwaha h’ohoremok karik hobolok ho Galilea. ²²Nangaring h’Erodias thahwan aindu, abala dosong; Ethamunoyo inyong na Erode karik ohothing hoilongo inyong bebe bebe. Ohobu ajyo donyong, “Ifiye nang aning newak iye; esarak nang de dohoi.”²³Erode epitha d’aitho na, ajyo, “Aning nefiyo iye nang, esarak nang de dohoi juk neyaru ohobye hindang adi thoihiji.” ²⁴Alo adi, alo ijaran d’ahathingi, “Ainyong owak, efiyo nang donyong?” Ahathingi ajyo, “Ohu no Yoanne Batista.” ²⁵Angaring na anyaha kwak d’ohobu, efiyo inyong ajyo, “Awak nang isarak iye nang thenene ahu no Yoanne Batista dith’attittoni na.”²⁶Juk arami hune odiha bebe d’ohobu, aang hocohi donyong didara aning nefiyo inyong ne. th’arami thah’epitha karik th’othohomonok thohonya ilongoi dinyari hulo. ²⁷Ahani ne, ohobu asulak ohoremoni th’ohoikiyak honyong, anyahi inyong thoilo iyanu ahu no Yoanne. Ohoikiyani alo ibongunu ahu no Yoanne thomaji h’efitha. ²⁸Eyanu ahu nanyong dittittoni, esarak d’aitho; ara aitho eyaru, alo isarahina d’ahathingi. ²⁹Ethaninguna n’ohothifok ho Yoanne arami hune, Afuni iyaru ahwan nanyong, afwoi isarahina di hilame.³⁰Ohoifahak afuni ara aboithe ho Yesu, anyahini inyong asang fodok hathuk isong ehandyo karik etyenio. ³¹Thiya, inyong ajyo dosong, “Ifuna adi, ithai th’ahwandek d’amaji nedyaharai, diyiri tiibai.” ³²Aca, ofuni karik afwoi ohothing olwarai, aang owoni h’omiru honyerek. Isong afwo adi th’ahwandek di roko d’amaji nathuhi edyaharu.³³Ti, atehu isong, isong ofwoi adi, otehi isong ohothing holwa; ongerori diya amaji aboithe th’ahejeha thobottok, edwongi diya dihithemi hosong. ³⁴Afuna nasong difohor, atehu inyong elulung nahittok, ara inyong amiehunu isong, anyo, ajahithi akero kwong ohoyhoni. Ahani ne, aculuyo inyong etyenio isong asang olwarai.³⁵Nya th’athari, ohothifok honyong afuni donyong, ajyori, “Amaji ne nathuhi edyaharu, karik dang eriok aharie. ³⁶Othurok isong isong thoifwa dith’amiji karik d’amisok haindek, dofwoi inyanga amonye aning nanyo isong.”³⁷Ti, inyong etharangyo, ajyo dosong, “Isarahina isong aning nabo dinyo.” Isong ajyori donyong, “Ocohi dohoi difwan inyangahina isong anyari n’adenario esihe arehai, esarahini isong thonye?” ³⁸Inyong ajyo dosong, “Iwon ithai h’elolongitha h’anyari baya? Ifwatha otihatha.” Arimahina nasong, ajyori, “Elolongitha h’anyari miyet karik ohom arehai.”³⁹Inyong anyahi ohothing bukulung thowoni dihap dihide h’amiyang nail thelulungir. ⁴⁰Isong awoniari di hap thelulungir thah’esihe aboithe karik athomonehio miyet. ⁴¹Inyong eduhu elolongitha h’anyari miyet karik ohom arehai, amijyo dihide, aboroyo, apinyong elolongitha, esarak d’ohothifok thohorye d’ohothing. Inyong dang, ebwayo ohom arehai hulo dosong bukulung.⁴²Anyo isong, efongi. ⁴³Esusuduhye apinyupinyu h’anyari, ethafuthahini akatino tomon larehai, h’ohom diya. ⁴⁴Arahi nya ohothing honyo alif miyet.⁴⁵Esarak kwak ohothifok honyong thoifwa ahithemi d’oyirik lobo, di Bethsaida, ahibu inyong osulak ohothing thoifwa adi. ⁴⁶Diholu h’asara nanyong dosong, inyong lo adok di donge di mojyo. ⁴⁷Edwong Athari, arimak aroko di hiji h’ahari nahittok, ahibu inyong hamaring dindak.⁴⁸Atehu inyong isong ithathalihini ekukuryo n’arok, aca, owam ahomwa bebe adosong. Dihiji h’oharie, aindu dosong, ahibu inyong odaha dihide h’ahari nahittok; owak anden tholosong. ⁴⁹Ti, atehuna nasong inyong adaha dihide h’ahari nahittok, egigiloi ojyori ngona inyong ohoile; elululwoi, ⁵⁰anyo, atehuni inyong, ara isong abangi. Inyong kwak acama, ajyo dosong, “Ithakolyethek ahwandek! Nanga lya! Hoibangatha!”⁵¹Inyong ecurok di roko hosong; ara ahomwa awetha. Afalanga isong fodok fodok. ⁵²Aca aang isong otehi tuhudik ainyong ojyori elolongitha h’anyari hune. Kombwo, ako hathi othaja hosong ndor ndor.⁵³Athuhon nasong alangitha, edwongi di hap ho Gennasaret, ethawejihini aroko. ⁵⁴Adohuna nasong adi tho roko, atehi ohothing inyong kwak, ⁵⁵isong angerori athan’ahap nya; aculuye adohoitho th’epeditha ohothing hodiha, d’amaji nateharik isong hijan inyong lodiya.⁵⁶Ajingara nanyong dith’amisok, abottok dia amiji nahittok, elengunai donyong ohodihak di fwata. Omojyo isong, isong thothino eker n’abongo nanyong; ayiji ohothing holwari, ieing hathin eker n’abongo nanyong.

¹Asuduha Ofarisei karik ohoigerok homok hofuni tho Yerusalem diker honyong.²Atehuni isong homok th’ohothifok ho Yesu onyo anyari th’ahas thahaibot - kaang hofinia. ³Aca d’Ofarisei karik Ojudei bulung, aang honye th’ahas, ara kabong hofinia tuhudik, anyo, oisukaitha nya hulya h’ohobolok hosong. ⁴(Ara Ofarisei hafuni tho maji-enyang-karik ethanyangio, aang onye ara kabong hohuyoroi; indafaithe dodo asang olwarai hathuk isong efothuna, iring: elalayo n’oihutyena, amoco karik attitto bukulung hanyerek isong.)⁵Ofarisei karik ohoigerok efiyo Yesu, “Anyo aang ohothifok hohoi othifoitho oisukaitha h’ohobolok, ti, anye anyari th’ahas thahaibot?”⁶Ti, ara inyong ajyo dosong, “Ocorok Isaia tuhudik thothai, odwalak, iring negerorik inyong,‘Ithahabuyo nang ohothing hulo th’obiyuha thohosong, ti, olama othaji losong thonang. ⁷Ija ahani, omojyo isong donang, hibu isong ityenio efahitha h’ohothing ara etyenitha hasong.’⁸Erwasak ithai efahitha h’Ojok, ara ithai indafaitho rot rot oisukaith h’ohothing.” ⁹Inyong dang ajyo dosong, “Angai iyinik ithai edara efahitha h’Ojok, dinfaitherek ithai oisukaitha hothai? ¹⁰Aca, ajyo Musa, ‘ithahabuye lemonye karik nehathingi,’ karik, ‘Locama imonyoroi thomonye karik thahthingi thananyong, aang opwak, ottohori.’¹¹Ti, ijyo ithai, ‘Ara othulo ojyo d’omonye dia d’ahathingi, “Alwahio nefothu iye thonang, inyong Korban (Corban).’” (‘Esorio’), ¹²thiya ithai aang hoihorik inyong thoihandye aning nabo d’omonye karik d’ahathingi. ¹³Ethuk ithai elulucyo ocame l’Ojok thoisukaitha thohoifuthu ithai, ara ithai ithafothok d’oper lotho holu. Karik asang alwarai hehelaru hehandyo ithai.”¹⁴Elongo inyong lo ikoti elulung, ajyo dosong, “Ithaningyethek nang, ara ithei itek nang tuhudik. ¹⁵Awang aning nabo nothondak h’othulo nethabocyo inyong, ara ojingak ditha honyong. Aning naindu thothwa h’othulo, inyong ithabocyo inyong.” ¹⁶Tha hamok amaninihio angoro aang ocamitha: Ti, kwak}¹⁷Thiya, edehina no Yesu elulung n’ohothing, ajinga di hang, efiyo inyong ohothifok honyong arami h’aryamara. ¹⁸Yesu ajyo, “Hoirasa ithai esuka kwong atehan tuhudik? Aang ithai itek hijan ara ojinga aning nabo ditha h’othulo thondak aang ithabocyo inyong, ¹⁹anyo, aang olo dithaji honyong, ti, olo di hohye honyong; thiya alo dingwai?” Th’ocame tholya, anyahi Yesu hijan anyatha bukulung, olibori.²⁰Inyong ajyo, “Aning naindu thoth’othulo, inyong ithabocyo inyong. ²¹Aca tholothwa h’othulo, tholondak h’othaji, ofuni egigilitha hamonyong, eleru, ahoholio, attohio, ²²aferorik afure no loboling, awahan asang h’ohothing dia h’ahathing hamok, awahan netharohojo, ethadwalio, amuno n’asang hawak ahwan, ahaini, amorio, etharohojo n’ofure, ethadara karik ananga dia adudufo. ²³Asang fodok hamonyori hune ofuni thothwa; isong ithabocyo othulo.”²⁴Yesu adotho adi thiya, alo dihap ho Tyre karik Sidone. Thiya alo di hang. Aang howak othulo loboling thoteha hijan inyong lodingai, ti, aang nya ocohi donyong edimunu. ²⁵Ti, kwak ahani, athulo, nawon angering nanyong natti h’ohoile lomonyong, ethairu, aindu, apwaharu dihejek honyong. ²⁶Athulo ne nya, n’Agriki, n’amukok no Syrophoenicia. Amojyo donyong, thongaterek ohoile lomonyong adi th’angaring nanyong.²⁷Yesu ajyo donyong na, “Okalifinok thoithanye ahithemi. Aca, aang ocohi diduhuna anyari n’okalifinok abirohini d’ongohe.” ²⁸Ti, inyong na, etharangyo, ajyo, “Aa, Hobu, aca juk ongohe, onye tholohop h’ ethawejit n’anyerek, anyari dedodoitha th’okalifinok.”²⁹Yesu ajyo donyong na, “Th’arami thah’ecama iye, ahohini iye, ilo. Athuk ohoile lomonyong anden adi th’enengaring.” ³⁰Alo inyong na. alo irimahina angering oferi dijoothik, ahibu ohoile lomonyong athuk anden adi.³¹Thiya, inyong lo koti alo adi th’ahap no Tyre, alo tholo Sidone d’ahari nahittok no Galilea lwai ditha h’ahap no Dekapolis. ³²Isong eyau donyong othulo lothuho, loko acama donyong, Efiye inyong thoithahi dihide honyong ahinang nayong.³³Thiya eyaru inyong adi th’elulung; esarak ohifala honyong ditha h’eyoha hanyong, amithu ahamilak, athin ongadiep ³⁴lonyong, ajyo donyong, “Ephphatha,” najyo, “Onga!” ³⁵Eyoha hanyong anga, afothoho h’ongadiep lonyong alahai, aculuyo acama iliboroi.³⁶Ti, Yesu anyahi isong thaang honyahi d’othulo loboling. Ti, dihide hedara nanyong arami hune thonyahini, anyahini hathi okalak. ³⁷Afalanga isong bebe, ajyori, “Athuk ehandyo asang bukulung ara nayyu. Esarak othuhok thoithairye, ara haang ocohi acama, thocamai.”

¹D’operok hule, owon nya ikoti elulung n’ohothing nahittok; aang howoni h’aning nabo dinyo. Yesu elongo ohothifok, ajyo dosong, ²“Amiehunu nang elulung n’ohothing, anyo, esukai honang operok aunihoi, aang aning nanyo isong. ³Ara asulak nang isong dimiji kwong anyo, ofwoi de ipwaharu diyihoi. Ofuni homok hosong th’amaji nalama.” ⁴Ohothifok honyong etharangyo inyong, “Dingai de irimak ohoi anyari d’amaji nalama ahani nefong ohothing hulya?”⁵Inyong efiyo isong, “Baya owoni elolongitha h’angiryang?” ⁶Isong ajyori “cofa.” Anyahi elulung thowoni dihap. Eduhu elolongitha h’anyari cofa. amijyo dihide, afurak ahinwarang, apinyo, esarak d’ohothifok honyong thebwabwahi dosong.⁷Owoni nya isong h’ohom hottik tiibai; athuhon nafurahina ahinwarang thosong, anyahi dang ohothifok thoibwabwahi isong. ⁸Isong anyo, efongi; ehuhuruni apinyu, pinyu hafithoro, isong ethafuthahini akatino hahitwak cofa. ⁹Owoni nya ohothing indehai esihe arangwan. Thiya, inyong asulak isong thoifwa. ¹⁰Kwak ahani, inyong ecurok di roko h’ohothifok honyong, afwoi ditha h’ahap no Dalmanutha.¹¹Thiya Ofarisei afuni dindak dilafere honyong; othifeyo isong thonyong ethamijani thohide, dithemyo inyong. ¹²Inyong ayiritha bebe, ditha h’ohoile lonyong, ajyo, “Ainyong owak oper lya athifeyo d’ethamijani?” Diri, ajyo nang dothai, aang ethamijani de nesarahini d’oper lya.” ¹³Thiya inyong edyaharu isong, ecurok di roko ikoti, alo d’oyirik lobo.¹⁴Thene, athuhi ohothifok honyong akworo eyaru anyari hosong. Aang isong owoni h’elolonge n’anyari nakalu aboithe dith’aroko. ¹⁵Inyong ethathaithak isong, thajaran, “Omijyethek tuhudik, karik idaratha omundo h’Ofarisei karik h’Erode.”¹⁶Ithabuho ohothifok elafere dihiji hosong arami haangan n’anyari. ¹⁷Atehan nanyong arami hune tuhudik, ifiyo inyong isong, “Ainyong ilafere ithai aangan n’anyari? Kabong ithai itehu dia itek tuhudik? Iwon ithai h’othaja hoko?¹⁸Iwon ithai h’ahonde, ithai aang hoitehu? Ithai iwon h’eyoha, ithai aang hoithairu? Aang ithai hoiyu? ¹⁹Epipinyahina nya hindang elolongitha miyet h’anyari d’ohothing esihe miyet, baya akatino hefut th’epipinyitha h’anyari nafithoro irimak ithai? Isong ajyo donyong, “tomon larehai.”²⁰“Epipinyahina nya hindang elolongitha cofa h’anyari d’ohothing esihe arangwan, baya akatino hefut th’epipinyitha h’anyari nafithoro irimak ithai?”Isong ajyori donyong, “Cofa.” ²¹Inyong ajyo, “Kabong ithai itek tuhudik?”²²Isong ahuni di Bethsaida. Ohothing hothiya eyanai donyong othulo longodo; amojyo Yesu thothino inyong. ²³Yesu endep ongodoni lya th’ahinang, eyaru inyong adi thath’amiji. Athuhon nanyong amithahina ahamilak di honde honyong, ethahi ahas hanyong dihide honyong, efiyo inyong, ajyo, “Itehu iye aning nabo?”²⁴Inyong amijyo adihide, ajyo, “Atehu nang ohothing hojak oyandik hodaha.” ²⁵Thiya, inyong ikoti ethahi ahas hanyong dihide h’ahonde hanyong; ara ongodoni abucyo ahonde hanyong, ara atehuna nanyong anyahak dimaji, ara inyong atehu asang fodok ara halibo. ²⁶Yesu asulak inyong di hang honyong, ajyo, “Hoijinga di miji.”²⁷Yesu alo dindak isong h’ohothifok honyong d’amisok Caesarea Philippi. Diyihoi, efiyo ohothifok honyong, “Ngai ojyori ohothing, nang?” ²⁸Isong etharangyo inyong ajyori, “Yoanne Batista.” Homok ajyori, “Elija,’ ara homok ajyori, “Lobo l’ohocorok.”²⁹Inyong efiyo isong, “Ti, ngai ijyo ithai nang?” Petro ajyo donyong, “Iye Kristo.” ³⁰Yesu anyahi isong thaang honyahi lobo othulo ngai inyong.³¹Inyong aculuyo etyenio isong hijan owak Olonyi l’Othulo thoithahtacianie d’asang olwarai, karik ohobolok, ofadirihio hohitwak karik ohoigerok oifuni de idara inyong; ofuni de itohoro inyong, ara inyong ebuhu diholu h’operok aunihoi. ³²Inyong anyahi arami hune oleyoroi. Thiya Petro eyaru inyong arakang, aculuyo eringyo inyong.³³Ti, Yesu eloithok inyong ahurong, amijyo d’ohothifok; thiya, eringyo Petro, ajyo, “Ilo thlohurong honang, Sitan! Iye laang hoihuhumak ahu nahoi d’arami h’Ojok, ti, d’asang h’ohothing.” ³⁴Thiya, Yesu elongu ohothifok honyong karik elulung n’ohothing amaji aboithe, ajyo dosong, “Ara owak loboling athifoitho nang, doidara ahwan nanyong, thoithai akruce nanyong, athifunu nang.³⁵Aca, lowak athalwahuna esu nanyong, ithalithok de; ara lethalithok esu nanyong thonang karik th’evanjelio, ethalwahu de inyong. ³⁶Ainyong ayiji orimak othulo diwonan h’ahap fodok, ti, ethalithok esu nanyong? ³⁷Ainyong ocohi d’othulo ebobolohina h’esu nanyong?³⁸Lojwu ahu thonang karik thocamitha thohundang ditha oper l’eleru karik l’eyau lya, oindu de dang ahu n’Olonyi l’Othulo ijwuon, ara laindu ditha h’abolori n’Omonye lonyong h’anjelohio hodwa.

¹Inyong ajyo dosong, “Diri ajyo nang dothai, owoni homok hothai howetha dini, haang de opil aye dihitheni h’atehuna ohobye l’Ojok ainduna th’akolon.” ²Diholu operok inde, eyaru Yesu Petro, Yakobo karik Yoanne dihide hodonge lohodo, isong hamaring diya. Thiya, eloitho inyong dihithemi hosong. ³Awuloi, abongoitho hanyong, awilang ara abongi pang pang; obwori tholohide hanera oilalayit adi l’opeceni ilalayerek.⁴Thiya Elijah ho Musa aleyori dosong; isong acama ho Yesu. ⁵Petro etharangyo, ajyo do Yesu, “Ohoityenani, oyyu dohothai disuka dine. Ohoi thoduhoi athwahio aunihoi: aboithe dohoi, aboithe do Musa karik aboithe do Elijah.” ⁶(Aca aang isong otek, ainyong ira isong icama. Abangi nya isong.)⁷Adiko aindu, emuhok isong. Thiya, oilolonge aindu thath’adiko, “Olonyi hindang lo lamuno nang. Ithaningyethe donyong.” ⁸Kwak ahani, amijyo nasong eker karik ehiji nasong, aang horimahini othulo loboling hosong, arahari Yesu.⁹Ecuruna nya nasong thodonge, anyahi inyong isong thaang othulo lobo ainyong atehu isong tok Olonyi l’Othulo ebuhuna th’ohoyak. ¹⁰Ahani ne, edehini arami hua dosong hamaring, ti, elafereji dihiji hosong, ainyong ojyo, “Ebuhuna th’ohoyak?”¹¹Isong efiyo inyong, “Anyo ojyo ohoigerok hijan Elijah de icak ainduna ahithemi?” ¹²Inyong ajyo dosong, “Oindu Elijah ahithemi, doindu inyahahina asang fodok dimaji hosong. Anyo hathi igero inyong hijan owak Olonyi l’Othulo thoithathacianai asang olwarai karik alauni inyong? ¹³Ti, ajyo nang dothai hijan athuk Elijah ainduna; ehandyo isong ainyong owak isong thonyong, iring nathuhi egerorik thonyong.¹⁴Afuna nasong d’ohothifok, atehuni elulung nahittok n’ohothing, olihak isong, ahibu ohoigerok ilafereji hosong. ¹⁵Atehuna nasong Yesu, afalangai, angerori donyong karik emandaye inyong. ¹⁶Inyong efiyo ohothifok honyong, “Ainyong ilafere isong hosong?”¹⁷Lobo othulo thath’elulung etharangyo inyong, “Ohoityenani, eyanu nang oitho hindang dohoi. Owon h’ohoile laang ohorik inyong accama. ¹⁸Indafaitho amirok inyong dihap, okofutok eyafutha dihuthuk karik erocyo ohala, eronghodoro. Efiyo nang ohothifok hohoi thongaterek inyong adi, ti, aang ocohini angaterek. ¹⁹Inyong etharangyo isong, “Oper laang iruk lo; lwai kanu iwak ithai nang thoisukai hothai? Lwai kanu de angongyo nang hothai? Iyanethek inyong donang.”²⁰Isong eyanu oitho donyong. Atehuna n’ohoile Yesu, amirok kwak inyong ditha h’ehihira. Apwaharu oitho kwak dihap ara ahuthuk eyafutha ara okofuthot. ²¹Yesu efiyo omonye, “Eyaru omiru baya dijahitha honyong ahani?” ²²Omonye ajyo, “Gee howon ara okalifonit, Omiryecyo nya inyong ditha h’ahimang, ahari dia karik athemyo engohina inyong adi. Ara ocohi iye ehandyo aning naboling, omiehunu ohoi karik olwaha ohoi.²³Jesu ajyo donyong, “Ara ocohi dohoi?” Acohohini asang bukulung dihandyo, d’othulo leruk. ²⁴Kwak ahani, omonye l’okalifonit elulwo bebe, ajyo, “Eruk nang! Olwaha aangan hindang eruho!” ²⁵Atehuna no Yesu elulung angeruna dosong, eringyo ohoile loibot, ajyo, “Iye ohoile lodularu karik lothuho, anyahi nang dohoi, iindu adi thothnyong; hoinyak ajingahina ditha honyong ikoti.”²⁶Inyong lo ekor dindak, ethahihiryo okalifonit bebe karik thiya, aindu adi. Ajahitha oitho lathuk aye, ojararik ohothing holwa, “Aye inyong.” ²⁷Ti, Yesu endefu inyong th’ahinang, adohu inyong dihide, ethawejik oitho thahide.²⁸Ainduna no Yesu dihang, efiyo inyong ohothifok honyong hamaring, “Anyo aang ohoi icohi angararik inyong adi?” ²⁹Inyong ajyo dosong, “Opecen lya aang ocohi angararik dindak, arahari th’omojit.”³⁰Isong afwo dingwai thiya tholo Galilea. Aang howak othulo loboling thoteha dingai ofwo isong. ³¹anyo, inyong nya lodityenio ohothifok honyong. Inyong ajyo dosong, “Ofuni de isarahina Olonyi l’Othul dihas h’ohothing, hofuni de ithayeyo inyong. Operok aunihoi diholu ethayeyo nanyong, oindu de ibuhuna thoye. ³²Ti, kabong isong otek tuhudik ocame lya. Abangi isong efiyo inyong.³³Thiya isong afuni di Kapernaum. Diholu h’ajingara nanyong dihang, efiyo inyong isong, “Ainyong dwo ilafere ithai diyihoi?” ³⁴Ti, adularu isong. Aca ilafere isong nya arami ho ngai thosong lahong bebe. ³⁵Awaniara nanyong dihap, elongu tomon larehai ara aboithe, ajyo dosong, “Ara owak lobo awonan ahithemi, thoiwona diholu, karik awon ara ohoigyemani losong fodok.”³⁶Eduhu okalifonit lotti, esarak dihiji hosong. Inyong adohu inyong dihinasik honyong, ajyo dosong, ³⁷“loifothu okalifonit iring lya thofure tholohindang, ifothu nang; loifothu nang, ikara nang ifothu, ti, ifothu le, losulu nang.”³⁸Yoanne ajyo donyong, “Ohoityenani, etehu ohoi othulo loboling ongaterek ohoilehio homonyong th’ofure tholohoi; ethawejyo ohohi inyong, anyo, aang othifoitho ohothai.” ³⁹Ti, Yesu ajyo, “Hoithwejyethek inyong, anyo, awang othulo loihandyo egyemathik hafalangai th’ofure tholohindang, diholu, acama thonang arami hamonyong.⁴⁰Laang ida ohothai, inyong lo lohothai. ⁴¹Loisarak iye oibithi l’ahari thomathai th’ofure tholo hindang, anyo, iye lo Kristo, ajyo nang dohoi diri, aang ithalithok esorio nanyong.⁴²Loisarak aboithe th’okalifinok hoiruhi donang hulo, thoibosoi, ira nya iyiji donyong efithahina omorwong dimurut honyong, amirohini ditha h’ahari nahittok. ⁴³Ara isarak iye ahinang nahoi eboso, obongu adi. Oyyu dohoi dijingahina ditha hesu ara lopala, th’awonan h’ahas arehai, ara iye ilo ditha h’ahimang, naang odunya, ⁴⁴⁴⁵Ara isarak iye aheju nahoi eboso, obongu adi. Oyyu dohoi dijingara disu ara longura thawonan h’ahejek arehai, amirohini ditha ahimang. ⁴⁶⁴⁷Ara isarak iye ahonyek eboso, ikolouthu adi. Oyyu dohoi dijingara d’ohobye l’Ojok h’ahonyek aboithe, th’awonan h’ahonde arehai, amirohini iye dinferno. ⁴⁸Amaji naang ohoteng lonyong oye. karik ahimang naang ithadunyunu.⁴⁹Aca ofuni de ithasilihyo ohothing fodok th’ahimang. ⁵⁰Oyyu ahipere. Ti, ara athuk adwaran n’ahipere alitho, angai de horimahini adwaran n’ahipere ikoti? Owonatha h’ahiere dihiji hothai, karik isukathik h’elik dihwandek hothai.

¹Yesu edyaharu amaji nya, alo dihap ho Judea karik d’oyirik thele h’Owor lo Jordano; ara elulungir h’ohothing afuni donyong ikoti. Etyenio inyong nya ikoti iring nanya ihandyecerek inyong. ²Thiya Ofarisei afuni ithemyo inyong, efiye, “Obis d’onde didara afure nanyong?” ³Inyong etharangyo, “Ainyong nya onyahi Musa ithai thoihandye?” ⁴Isong ajyori, “Ahorik Musa othulo thoigerye amanini nedararik afure, asulak inyong na adi.”⁵“Othaja hothai hoko ahani hulya isarak Musa egerohina ithai oyalu lojak ahani lya,” Yesu ajyo dosong. ⁶“Ti, thoculwe h’ayeyo, ‘Ayeyo Ojok isong ara lobusuha karik nangorwo.’⁷‘Th’ahu thone, idehi de othulo omonye karik ahathingi, aindu imorihunu h’afure, ⁸ara arehai afuni irahan ara ahwan aboithe. Aang harahi arehai, ti, ahwan aboithe. ⁹Inyong nara, aning nathuk Ojok enuthahina aboithe, othulo lobo thaang horitha.¹⁰Omiru isong dihang, efiyo inyong ohothifok arami hune ikoti. ¹¹Inyong ajyo dosong, “Longaterek afure, amuthayo athulo nabo, iyau h’athulo ne. ¹²Nedehi onde, amuthayo othulo loboling, iyau h’othulo lya.¹³Thiya isong eyanu okalifinot hosong hottik donyong, doindu inyong iyithin isong, ti, ohothifok eringyo isong.¹⁴Ti, edoruna no Yesu, engere, ajyo dosong, “Oburahina okalifinok hottik thoifunu donang, hoilwathik isong, aca ohobye l’Ojok losong, karik l’ohothing hojahitha isong.¹⁵Diri ajyo nang dothai, laang ifothu ohobye l’Ojok iring okalifonit lotti lo, aang de do ti hojinga ditha honyong.” ¹⁶Thiya eduhu okalifinok dihinasik honyong, aboroyo isong ahibu inyong athuk esarahina isong dihinasik honyong.¹⁷Aculuyo nanyong adaha nanyong, othulo lobo angeru donyong, arigongo dihithemi honyong, efiyo inyong, “Ohoityenani loyyu, ainyong owak ehandyo nang, dirimahina ohobye lomanya mak?” ¹⁸Yesu ajyo, “Anyo ilongo iye nang loyyu? Aang lobo loyyu, arahari Ojok hamaring. ¹⁹Itek iye efahitha: Hoittoho, Hoiferorik afure dia onde lanabo, Hoihoholyo, Hoimangyo, Hoidwala karik Ithahabuye loimonye karik nehathingi.”²⁰Othulo lya ajyo, “Ohoityenani, athifoitho nang asang hune fodok hawon nang ara ottwathi. ²¹Yesu amijyo donyong, amuno inyong. Inyong ajyo donyong, “Owon aning aboithe naang thohoi, ithanyangak attitto hahoi fodok ara iye isarak d’ohoicanak, ara iye de iwon h’ebarithi dihide. Thiya, iwong, othifunu nang.” ²²Ti, th’ocame tholya, amukutha, alo adi ara lejyorya, anyo, owon inyong lo h’asang olwarai.²³Yesu amijyo indehai arani, ajyo d’ohothifok honyong, “Angai oko d’ohobarak dijingahina d’ohobye l’Ojok!” ²⁴Afalanga ohothifok ocamitha honyong. Ti, Yesu ajyo dosong ikoti, “Okalifinok, angai oko inyong dijingahina ditha h’ohobye l’Ojok!” ²⁵Ilik d’akonkoni dijingara th’ohuthuk hoihwai, th’ajingara n’othulo lobara ditha h’ohobye l’Ojok.²⁶Afalanga nya isong bebe, acamai dihiji hosong, “Ara ahani, ngai ocohi ethalwahunu?” ²⁷Yesu amijyo dosong, ajyo, “D’ohothing, aang ocohi, ti, ikara d’Ojok. D’Ojok aang aning naang ocohi!” ²⁸Petro aculuyo acama donyong, “Ottiha, edehi ohoi asang fodok, karik ethuk ohoi athiforo Iye.”²⁹Yesu ajyo, “Diri, ajyo nang dothai, aang lobo ledehi ahang, olarok, ahanerok, ahathingi, omonye, okalifinok dia ahap thonang karik th’evanjelio, ³⁰aang hoifothu esihe enyahitha olwarai thene d’oper lo: Ahangithek karik olarok, akalifinok karik ahap, h’ethagyemitha, karik ditha h’ahap naindu karik esu namanya mak.31 ³¹Ti, ohothing holwarai howoni de ara ohoithemo, ofuni de dihholu, ara hothoholu, afuni ara ohoithemok.”³²Isong nya d’oyihoi lolo di Yerusalem, ahibu Yesu ahithemi nasong. Afalanga ohothifok. ara ohothing hothiforo isong abangi. Thiya, Yesu ikoti eyaru tomon larehai, aculuyo anyahina isong ainyong nalo ifuhon donyong. ³³“Idorotho, ohothai hoifwo di Yerusalem; Olonyi l’Othulo, lofwoi ithafothohini da fadiri hohittwak karik ohoigerok; obongok isong de inyong lo ara lottohori, ethafothohini d’ohothing hoikela th’Ojudei. ³⁴Ithalubangyo isong de inyong, amicye ahamilak donyong, abahye inyong karik athayeye inyong. Ti, diholu h’operok aunihoi, oindu de ibuhuna.”³⁵Olonyirok ho Zebedeo, Yakobo karik Yoanne, afuni donyong, ajyori, “Ohoityenani, iwak ohoi ihandye dohoi aning nefiyo ohoi dohoi. ³⁶Inyong ajyo dosong, “Ainyong iwak ithai ehandyo nang dothai?” ³⁷Ara isong ajyori, “Ohorik ohoi thowoni hohoi di bolori hohoi, aboithe d’ahinang nenget karik loboling d’ahinang noihothong.”³⁸Ti, Yesu etharangyo isong, “Aang ithai itek ainyong ifiyo ithai. Icohi ithai de amatha oihutye lamatha nang de, dia efothuna batisimo, thanabuhohini de donang. ³⁹Isong ajyori donyong, “Icohi ohoi,” Yesu ajyo dosong, “Oihutye lamatha de nang, imatha ithai de. karik batisimo nabuhohini de donang, obuhohini de dang dothai. ⁴⁰Ti, ngai owoni dinget dia dihothong honang, ikara hindang disarahina, ti, n’ohothing, honya athuhi ehuhumahina ara nasong.⁴¹Ethaninguna n’ohothifok tomon hulo arami hune, aculuye engere bebe ho Yakobo karik Yoanne. ⁴²Yesu elongu isong donyong, ajyo, “Itek ithai ohothing hoiruhuni ara ohoindefak h’ohothing hoikela th’Ojudei, indafaithe isong ara nako, karik ohoigyemak hosong hohittwak, endafaithe ohigyemak hosong th’elahong.⁴³Ti, ikara ahani dihiji hothai. Lowak ainduna ara lahong lothai, thoiwona ara ohoigyemani lothai, ⁴⁴karik lowak awonan dihithemi dihiji hothai, thoiwona ara ongaca lothai bukulung. ⁴⁵Aca aang Olonyi l’Othulo oindu nya dithagyemayo, ti, digyema karik disarahina esu nanyong didumunerek ohothing holwa.”⁴⁶Isong afuni di Jeriko. Edehina nanyong Jeriko h’ohothifok honyong karik elulung nahottok, orimak ahibu lolonyi ho Timaeus, Bartimaeus, ohomojoni ongodoni, owoni diker h’oyihoi. ⁴⁷Ethaninguna nanyong nya hijan Yesu la Nazarete le, aculuyo erwaha, ajyo, “Yesu, Lolonyi ho Davide, omiehi nang!” ⁴⁸Ohothing olwarai eringyo othulo longodo lya, anyahini inyong thodularu. Ti, inyong lo ekor hathi bebe, “Lolonyi ho Davide, omiehi nang!”⁴⁹Yesu awetha, anyahi inyong thoilonguni. Isong elonguni othulo longodo, ajyori, “Ithangerejye ahwan! Odothoi thahide! Inyong lo, lethalongo iye.” ⁵⁰Amirok abongo nanyong nauk arakan, awaa dihide, alo do Yesu.⁵¹Yesu etharangyo inyong ajyo, “Ainyong iwak iye ehandyo nang dohoi?” Othulo ongodoni ajyo, “Ojok hindang, awak nang efothuna atehuna hindang.” ⁵²Thiya Yesu ajyo donyong, “Ilo, ethayijyo iye eruhon nahoi.” Kwak ahani, acohi inyong atehuna ikoti. Inyong, athiforo inyong diyihoi.

¹Thene, afuna nasong di Yersalem, aindek isong di Bethphage karik Bethany di Donge h’Olives; Yesu asulak arehai ohothifok honyong, ²ajyori dosong, “Ifwatha d’amiji nothele hohothai nya. Ajingara nathai diya, irimak ithai de angaring n’ababut nakabong odohohini dihide honyong. Ohouna, ara ithai iyanu donang. ³Ara ajyo othulo lobo dothai, ‘Anyo ihandyo ithai ahani?’ ijaratha, “Ohobu owak inyong na, inyahunu ohoi de kwak hine''.⁴Afwoi isong, afwoi irimahina angaring n’aluhumar ne oyena dihuthuk h’oyihet dipogo h’oyihoi lohittok, alahunai. ⁵Ohothing homok honya owetha diya, ajyori dosong, “Ainyong ihandyo ithai, ilaharu ithai angaring n’aluhumar?” ⁶Acama isong dosong, iring nadwo onyahinerek isong Yesu; ara ohothing hulya edehini isong thoifwa oyihoi losong.⁷Eyanu isong angaring n’aluhumar,amirohini abongoitho dihide honyong, inyong lo awoni dihide honyong. ⁸Ohothing holwa afecyo abongoitho hasong diyihoi, homok afecyo athandak hayefunu isong thomandak. ⁹Ohothing hofwo ahithemi karik hothiforo isong, elolongoi omurut dihide, “Hosanna! Loindu th’ofure thol’Ohobu, thomunoi. ¹⁰Ohobye l’omonye lohothai Davide loindu thoborye!Hosanna dihide bebe!”¹¹Thiya, Yesu ajinga di Yerusalem, alo ditha a Tempolo didoryo asang fodok hothiya. Aangan n’orii,alo di Bethany h’ohothifok honyong tomon larehai. ¹²Nya moithe, afwan nasong adi tho Bethany, aleng inyong ahure.¹³Atehuna nanyong olamarai ohiyani l’ahayo loli abene, alo itihyo inyong ara owon h’ahayo dihide honyong; ainduna nayong d’ohiyani lya, aang orimak aning naboling, arahari abene hamaring. Ikara omiru hule h’oyandik h’ahayo. ¹⁴Inyong acama d’ohiyani, “Aang othulo lolo inyo ahayocong thohoi ikoti.” Ara ohothifok honyong ethaningu arami hune.¹⁵Isong afuni di Yerusalem, ajingari di Templo, aculuye angaterek ohoithanyangak karik ohoinyangak adi tho Templo, alafuhyo obeleha h’ohoiloyithok h’enyahwo karik okani h’ohithanyangak h’amami. ¹⁶Alwo ohothing bukulung eyaru asang hafwoi ithanyangyo athana Templo.¹⁷Etyenio isong, ajyo, “Aang hoigero, ‘Aang de ofuni ilongo athwa hindang, ara athwa n’amojo n’amisok bukulung’? Ti, awon dothai ara athwa n’ohohorok.” ¹⁸Ethairuna no fadirihio hohittwak karik ohoigerok arami hacama inyong hune, athifeye oyihoi lowaharik etharohijyerek inyong. Aca obangi isong inyong, anyo, elulung bukulung n’ohothing ofalangai etyenio nanyong. ¹⁹Edwongon n’athari, edyaharai abore.²⁰Adaha nasong nya thamoithe berien, atehuni olamarai ohjyani l’ahayo lo, ayoho adi tok dihade honyong. ²¹Petro eyuu, ajyo donyong, “Ohoityenani, Idoro! Ohiyani l’ahayo, lefyethak iye lo, ayoho.”²²Yesu ethangyo isong, “Owonatha h’eruhon d’Ojok. ²³Diri ajyo nang dothai hijan ara ojyo loboling d’odonge lo, ‘Odothoi th’ahide, omirok ahwan nahoi dithah’ahari nahittok,’ ara aang hoiririhitha dithaji honyong, ti, eruk hijan aning nacamai ne, ofuk de, inyong ne aning de nehandyo Ojok.²⁴Iring ahani ne, ajyo nang dothai: Asang bukulung hemojyo ithai ara ithai ifiyo, ara ithai iruhu hijan efothu ithai, owon de aning nya ara nathai. ²⁵Ara iwetha iye thahide, ara iye imojyo, omiehi asang fodok hedararik iye othulo loboling, domiehi iye dang lee Monye lowon dihide ohothing hoihandyo iye ara namonyong.” ²⁶²⁷Dihide h’adaha nya no Yesu ditha Templo, afuni h’ofadiri hohittwak, ohoigerok karik ohobolok donyong, ²⁸Isong ajyori donyong, “Th’akolon thanangai ihandye asang hune, karik ngai isarak iye akolon nehandterek iye ne?”²⁹Yesu ajyo dosong, “Efiyo nang ithai efiet aboithe. Inyahina nang, anyahi nang de ithai th’akolon thanangai ehandyo nang asang hune. ³⁰Abatisimo no Yoanne, inyong na thohide dia th’ohothing?”³¹Isong hulo elafereji dihiji hosong, anyahini ajyori, “Ara ejyo, ‘Thohide,’ ojyo de, “Anyo naang ithai iruk donyong?’ ³²Ti, ara ejyo, ‘Th’ohothing,’ Obangi nya isong ohothing, anyo. otehi isong nya tuhudik hijan Yoanne nya ohcoroni. ³³Thiya, isong etharang Yesu ajyor, “Aang ohoi itek.”Thiya, Yesu ajyo dosong, “Aang nang dang anyahi ithai th’akolon thanangai ehandyo nang asang hune.”

¹Thiya Yesu aculuyo etyenio isong th’aryamarihio. Inyong ajyo, “Owon othulo loidula amana n’ahayo. Aduho oilyethe, abohyo angulume namoyerek ahayo, abohok oilyethe loikeyerek karik ethanyangak d’ohoinyangak karik ohoithanyangak h’ahayo. Alo dipoco. ²D’omiru hocohini ahani, efahak ohoigyemani thoiyahak inyong ahayo hamok thomana. ³Ti, isong eduhu inyong, abahye kark angararik inyong adi kwong aning nabo thohinang.⁴Koti, inyong asulak donyong ohoigyenai loboling. Isong ikoti dang eryafuni lya dihu. Ethajuhini ahu. ⁵Inyong ikoti asulak hoigyemnani loboling. Isong attohori lya. Isong hulo ehandyo ahani dohomok, abahye homok ara homok attohori.⁶Afithoro othulo aboithe donyong disulahina, olonyi lomunoi. Ara inyong aboithe tong, osulalak inyong dosong. Inyong ajyo, “Obangi de isong olonyi hindang.” ⁷“Ti, ohoromok h’ahayo h’obalu acama amonye, ‘Inyong lya ohoruthani. Ifuna, hattohoro inyong, dowon aruthahina ara nahothai.’⁸Isong endefuni, attohori, amiroroi inyong adi thomana. ⁹Ahani ne, ainyong de ihandyo lomonye amana? Oindu de, etharohojyo ohoromok hulya adi, esarak amana dohomok.¹⁰Kabong ithai ihena dith’amanini nagwa na?‘Omorwong lonya edari ohoduhok lo, awon ara omorwong l’asihothe. ¹¹Asang hune nya th’Ohobu,hamuji nya bwaya dihinde hohoi.” ¹²Diholu h’arami hune, ohithwaha h’Ojudei athifyo oyiho loindefunerek Yesu, anyo, atehi isong tuhudik hijan ocama aryamara ne ara namknyong thosong. Ti, obangi nya isong elulung n’ohothing. Inyong na, edyaharai inyong, afwoi adi.¹³Thiya efahak isong Ofarisei homok karik ohothifok ho Erode donyong, dilohuna inyong thocamitha. ¹⁴Afuna nasong, ajyori donyong, “Ohoityenani, arami haang oyiji hegigilo ohothing, ikara hahoi, anyo, aang iye ikelyo. Ityenio iye diri oyihoi l’Ojok. Obis diduma Cesare enyahwa dia ipal? Owak iduma ohoi dia aang ohi iduma?” ¹⁵Ti, otek Yesu adwala nasong, ajyo dosong, “Anyo ithemyo ithai nang? Iyanethek sede adenario ne atihyo nang.”¹⁶Eyanai aboithe do Yesu. Ara inyong ajyo dosong, “Hangai arijori karik oigeritha hothonyong huna?” Isong ajyori, “Ho Cesare.” ¹⁷Yesu ajyo, “Isarahina do Cesare, asang ho Cesare, ara ithai isarak d’Ojok asang h’Ojok.” Afalangai thannayyu donyong.¹⁸Ara Osaduccees, hojyo awang ebuhuna, afuni donyong.Isong efiyo inyong, ajyori, ¹⁹Ohoityenani, egero musa thohoi, “Ara othulo oye, edyaharu afure kwong oitho, ocohi d’olai l’ohayani aruthahina afure, ayisok inyong oduring.²⁰Owon nya olarok cofa; amuthayo ohoithemoni afure, thiya, aye kwong oitho. ²¹Thiya, oitharehe aruthak, aye kwong oitho, oithaunihoi dang ahani. ²²Oithacofe dang, kaang hoidyaharu oitho. Dicuhit hosong fodok, athulo ne aye. ²³Dibuhuna, ara ohothing hadotho ikoti, ara nafre hongai oindu inyong iwonan? Aca awon nya inyong ara afure n’olarok cofa hulya bukulung.”²⁴Yesu ajyo, “Ikara arami hune hesarak ithai epalan huna hune, anyo, aang ithai itek amaninihio hadwa dia akolon n’Ojok? ²⁵Aca ara isong hadotho th’ohoyak, aang homuthaye dia ithamuthahini isong, ti, afuni isong iwonan ara anjelohio dihide.²⁶Ti, ara th’arami thoh’ohothing hoibuhu, kabong ithai ihena amanini no Musa, d’arami h’omiyang, angai ocama Ojok donyong, ajyo, “Nang Ojok l’Abramo, lo Isako karik lo Yakobo’? ²⁷Ikara inyong Ojok l’ohoyak, ti, Ojok l’ohoiswok. Epal ithai do ti.”²⁸Aboithe l’ohoigerok aindu, ethaningyo ofere losong; atehu inyong lo etharang isong Yesu tuhudik. Efiyo inyong, “Nani efahit nako, okalak isong fodok?” ²⁹Yesu ethangyo, “Nako okalak bebe inyong na, “Ithairye, Israele, Ohobu, Ojok lohothai, Ohobu aboithe. ³⁰Omunoi Ohobu, Ojok lohoi th’othaji tholohoi bukulung, th’ohoile tholohoi bukulung, th’ahu thanahoibukulung karik th’akolon thanahoi fodok. ³¹Efahit etharehe inyong na, ‘Omunoi othulo dia athulo naindek dohoi iring ahwan nahoi.’ Aang naboling efahit nakalu hune.”³²Ohoigeroni ajyo, “Oyyu. Ohoityenani! Ethuk iye ajaran tuhudik hijan Ojok aboithe, karik awang lobo arahari inyong. ³³Thomunoi inyong th’othaji fodok, th’ahu fodok karik th’akolon fodok karik thomunoi othulo dia athul naindek donyong iring ahwan nanyong. okalu fodok adi esoritha karik ehumaitha hamudye.” ³⁴Atehan no Yesu hijan athuk inyong lo esarahina etharangio nabis, ajyo donyong, “Aang iye ilama th’ohobye l’Ojok.” Diholu h’arami hua, aang lobo lefifiliyo efiyo Yesu.³⁵35 Ahibu nya Yesu ityenio dimaji h’oyalu la Templo, ajyo, “Angai ojyori ohoigerok hijan Kristo, olonyi lo Davide? ³⁶Daivide thahwa, ajyo ditha h’Ohoile Lodwa, “Ohobu ajyo d’Ohobu hindang, owoni dinget honang, tok nang esarahina omerok hohoi thohop h’ahejek hahoi.” ³⁷Davide thahwan elongo inyong, ‘Hobu.’ inyong na, angai ocohi Kristo awonan ara olonyi lo Daivide?”Ethaningyo elulung anhittok donyong th’amuno.³⁸Dityenio honyong, Yesy ajyo, “Omijyethek tuhudik ohoigerok, howak adaha dith’abongoitho ahodorak karik emandaye isong d’amasok h’elulung, ³⁹karik awoni h’okani h’abolori di synagogues karik d’amasok habolori h’amuno. ⁴⁰Odilyo isong dang athwahio h’aharathak, amojyoi omojitha ohodorak dotehuni isong ohothing. Orimahini de ohothing hulya edara n’ohothing isong nahittok.⁴¹Yesu awoni dihithemi h’amaji namiryerek esoritha di templo; engengelyo ohothing homiryo enyahwo ditha epi. Omiryo ohobarak holwa enyahwo halwa. ⁴²Thiya, aharathani ehecanani aindu, amirok diya ebilat arehai, orijoroi iring agirisi arehai.⁴³Inyong elongu ohothifok honyong, ajyo dosong, “Diri, ajyo nang dothai, esarak aharathani ehecanani enyahwo hakalu h’ohothing fodok hamirok enyahwo dipi. ⁴⁴Omirohini isong hulo thahalwa hasong; ti, aharathani ehecanani ne, eduhu th’eacan nanyong, esarak bukulung hahera inyong isworik''.

¹Aden nya no Yesu adi tho Templo, aindu aboithe th’ohothifok honyong, ajyo donyong, “Ohoityenani, otiha alibori n’omorik karik athwahio hathuhi aduho!” ²Yesu ajyo donyong, “Itehu iye athwahio hahittwak hune? Aang de juk aboithe loindu isuka dihide holobo, kwong alafuhohina adihap.”³Awoni nanyong d’adonge n’Olives namijyo ada Templo, efiye inyong hamaring Petro, Yakobo, Yoanne karing Andrea, ⁴“Inyahi ohoi, kanu de ofuni asang hune ifuhon? Aisong de ethaithitha hanyahi hijan aindek asang hune afuhon?⁵Yesu aculuyo ajaran dosong, “Omijyethek tuhudik, othulo lobo thaang hoithapnyaru ithai adi th’oyihoi lobis. ⁶Ofuni de holwari th’ofure tholo hindang, ajyori, ‘Nang, inyong.’ afuni ithai de ithapanyaru th’oyihoi lobis.⁷Ara ethaningu ithai aremon dia olodok l’aremon, hoibangatha, ofuhi de asang hune, ti, kabong ecuhit hoindu. ⁸Oindu de amiji idotho, aremorik amiji nabo, ara ahabwore eriborik ahabwore. Owon de arithirithihio karik ahure d’amasok olwarai. Isong hune aculwetha h’adihari n’athamana.⁹“Iwona ara abuhu nahwan nahoi. Iyarai ithai de d’elulungir h’ohithwaha karik abahye ithai de ditha synagogues. Iwetha ithai de dihithemi h’ohoindefak h’abottok karik h’ohobusi, thonang, ara nanyahinerek isong. ¹⁰Ti, evanjelio thoilolongohini d’amisok bukulung ahithemi.¹¹Ara endafaithe, eyarai iye, hoihaya ainyong de ilo iye icama, anyo th’orii le, isarahini iye ainyong de ilo iye icama; ikara iye de ilo icama, ti, Ohoile Lodwa. ¹²Oindu de olai isarahina olai thottohori, oindu de omonye isarahina okalifonit thottohori. Ofuni de okalifinok iriborik omonye karik ahathingi, afuni isarahina isong thottohori ¹³Ofuni de ohothing fodok imanan ithai, anyo, th’ofure tholo hindang. Ti, longongok tok dicuhit, oindu de ithalwahunu.¹⁴“Ara etehu ithai amana n’amiehunu owetha d’amaji naang inyong ira iwetherek” (Ohoihenani thoteha tuhudik) “ohothing ho Judea thoingero di dongiok, ¹⁵Lowon dihide h’athwa, thaang hoicuru dihap dijingara ditha dia diduhuna aning nabo thothwa. ¹⁶Lowon dimana, thaang honyahu dihang diyaru abongo nauk thomiji.¹⁷Omonyong de bebe d’ahathing hemoho karik ahathingie hethanahyo. ¹⁸Omojyothik ecuhit nahap thaang hofuho th’ohomio. ¹⁹Operok hule hethathaciana, hakang owonderek gee thoculwe h’ayeyo, nthuk Ojok ayeuna lwai hongorna, awang, aang hoindu iwonan. ²⁰Ara kabong Ohobu hoindu ithasuhyo operok, awang mwai othulo loindu ithalwahunu. Ti, th’arami thoh’othulo logweluni, lathuk inyong anyimuna, obongyo operok honyong ara hosuk.²¹Thiya, ara ojyo lobo dohoi, ‘Otiha, Kristo lo!’ dia ‘Idoro,inyong lo lo!’ hoiruk.’ ²²Aca ofuni de ho Kristo karik ohocorok hoikela ileyori; ofuni de isarahina ethaithitha hafalangai, dithadwalyerek, ara ocohi, juk lanyimni lo. ²³Omijyethek tuhudik! athuk nang anyahina ithai asang hune bukulung dihithemi h’omiru.²⁴Ti, diholu h’ethathacianitha h’operok hulo, oindu de oholong iriohon, aang de oyefa iinduna ifangan, ²⁵ofuni de ohilyefi idoitha thohide, karik akolon nothohide, oindu de ithathanianga.’ ²⁶Thiya ofuni de itehuna Olonyi l’Othulo oindu dith’adikolo, thakolon karik th’ablori thanahittok. ²⁷Thiya oindu de isulahina anjelohio honyong disuduhun ohothing honyong hanyimuni th’ahomwathik arangwan th’ecuhitha h’ahap karik ecuhitha h’ahide.²⁸Iyeyenathik th’ohiyani l’ahayo. Ara athandak habunyu, aliji, otiha hijan aindek Ohiribo. ²⁹Inyong nara dang, ara ithai hetehu asang hune afuhon, otihatha hijan aindek inyong, dipogo hoyihethik.³⁰Diri, anyahi nang dothai, awang de oper lya holing adi, lwai asang hune fodok afuhon. ³¹Ofwoi de ahap karik ahide adi, ti, aangi de ocamitha hundang ofwo adi kwong. ³²Ti, operok dia omiru hule, aang othulo lotek, juk anjelohio hothohide, dia Olonyi, arahari Omonye.³³Otihatha tuhudik! Omijyethek, anyo aang ithai itek orii le. ³⁴Ojahitha othulo lolo d’amaji nabo – idyaharu ahang nayong, esarak ohoigyemak honyong thoindefaithe, ngai h’egyema nanyong, anyahi ohoigyemani loindafaitho oyihet thomijye tuhudik.³⁵Ahana na, orathik, anyo, aang ithai itek kanu oindu lomonye h’ahang; thathari, dihiji oharie, disiret h’ohohorong dia thamoithe berien. ³⁶Ara oindu nyurubut, hoisarahina thorimak ithai d’ajoo. ³⁷Arami hajyo nang dothai hune, ajyo nang d’ohothing bukulung. Iririyethek!''

¹Afithoro nya operok arehai dihithemi ofaning lodwa lonya ongerunerek Ojudei tho Egypto karik Amuno n’ofaning l’anyari naang otufo. Orimak nya ahibu ho fadiri hohittwak karik ohoigerok iduhumya arimahina oyihoi loindefunerek karik attohori Yesu ihoholai. ²Aca ithabuho nya isong ajaran, “Ikara th’ofaning thamuno, tek elulungir h’ohothing adothoi dingalafa.”³Yesu di Bethany dihang ho Simone l’atalulu, dinyari, aindu athulo naboling donyong, iyanu h’elethang nangwo kudarr dihulo nako enyanga nanyong. Abut inyong na ehulo, abuhok elethang dihu honyong. ⁴Ti, owoni nya ohothing homok diya hengere bebe. Acama isong hamaring ajyori, “Aisong arami hetharohojerek elethang ne ahani? ⁵Irahi ithanyangahina tha denario hakalu esihe aunihoi, esarahini d’ohoicanak.” Arai song eringyo athulo ne.⁶Ti, Yesu ajyo, “Idehina inyong na hamaring. Anyo ithathacianio ithai inyong? Athuk ehandyo aning nalibo donang. ⁷Iwon ithai juui h’ohoicanak; ara iwak ithai, ocohi dothai dihandyo ara nayyu dosong, ti, aang ithai de iwon honang juui. ⁸Athuk inyong na ehandyo aning nacohi inyong ehandyo. Athuk eyelyo ahwan hindang dinuhahinerek ⁹Diri anyahi nang dothai, ara evanjelio nafuni inyahina dihap, ofuni de icama aning nathuk athulo ne ehandyo, diyuhinerek inyong na.”¹⁰Thiya, Juda Eskariote, aboithe tho tomon larehai, alo do fadirihio hohittwak, dithafothok inyong inyong dosong. ¹¹Ethaninguna na fadiri arami hune, amunoi bebe, eruhohini esarahina inyong enyahwo. Inyong hathi atahitha oyihoi lethafothohinerek inyong inyong dosong.¹²D’ofaning ohoithemoni l’Anyari Naang Otufo, athuhon nasong amudyo oker l’ofaning lohittok l’Ojudei, ajyori ohothifok honyong, “Dingai iwak iye ofwoi ihuhumyo amaji nefwo inyerek anyari n’ofaning lohittok l’Ojudei?” ¹³Asulak inyong lo arehai h’ohothifok honyong, ajyo dosong, “Ifwatha ditha h’abore, irwangarik ithai de othulo loindafaitho oibithi l’ahari. Othifothik inyong. ¹⁴Amaji najingahinerek inyong dihang, othifothik inyong, ara ithai ijyo do lomonye ahang, “Najang athwa hindang n’othohomononi, nanderek nang inyerek anyari d’ofaning loittok l’amuno l’Ojudei h’ohothifok hundang?”¹⁵Ithaithak ithai de athwa nalat nathuk ehuhuma dihide. Ihuhumahina dohothai amaji diya. ¹⁶Ohothifok afwoi dibore. Arimak isong asang fodok iring nathuk inyong anyahinerek isong, ara isong ehuhumyo dosong anyari n’ofaning lohittok le diya.¹⁷Nya thathari, aindu h’ohothifahak honyong tomon lareha. ¹⁸Diyokongi nya hosong dinyari, Yesu ajyo dosong, “Diri ajyo nang dothai, aboithe lothai, lonyo honang, ithangathak nang de adi. ¹⁹Adihari nya othaja hosong bebeb, ara isong abok abok ajori donyong, “Paat acut, ikara nang?”²⁰Yesu etharangyo ajyo dosong, “Inyong lo aboithe tho tomon larehai, lya, letuhi ahinang honang ditha hoibithi l’anyari lya. ²¹Aca olo de Olonyi l’Othulo, iring nathuhi egerorik thonyong. Ti, ara afuro, d’othulo loindu de ithafothohina Olonyi l’Othulo adi le! Ira nya iyiji, ara kabong nya kodien oyisuni inyong.”²²Dihide nya hanyari nasong, eduhu Yesu elolonge n’anyari, amijyo dihide, aboroyo, apinyo, ethafothok inyong dosong karik ajyo, “Iyatttik na, ahwan hindang ne.” ²³Eduhu oihutye, afurak ahinywarang, esarak inyong dosong, ara isong bukulung amatha thothonyong. ²⁴Ara inyong ajyo dosong, “Ahotho hindang na, nemora angejuk, ahotho nabuhohini th’ohothing olwarai. ²⁵Diri ajyo nang dothai, aang nang de amatha ikoti n’ahayocong na, tok d’ofaning le, ara nang lamatha angejuk dith’Ohobye l’Ojok.”²⁶Athuhon nasong edolo oyele, afwoi d’adonge n’Olives, ²⁷Yesu ajyo dosong, “Ipwaharu ithai de fodok adi; aca igero, ‘Abak nang de ohoyohoni, ara akero athurohunu.’²⁸Ti, diholu h’ethadothuna nang dihide, alo nang de ahithemi nathai di Galilea.” ²⁹Petro ajyo donyong, “Juk apwaharu isong fodok adi, awang nang.”³⁰Yesu ajyo donyong, “Diri ajyo nang dohoi, ahanana – aa, oharie l’ahanana lya, dihithem h’esir n’ohohrong operok arehai, irisa iye nang de operok aunihoi.” ³¹Ti, Petro enginyo, ajyo, “Ara awon ara aye hohoi, awang nang iye arisa.” Isong fodok eruhohini ahani donyong.³²Isong afuni d’amaji nelongoi ara Gethsemane; ara Yesu ajyo d’ohothifok honyong, “Owoniera dini, ahibu nang amojyo.” ³³Inyong eyaru Petro, Yakobo karik Yoanne honyong, aculuyo ejyoria bebe. ³⁴Inyong anyahi isong, “Odiha othaji hindang bebe tok diye. Opwahatha dini, karik omijyethek tuhudik.”³⁵Aden nanyong tiibai ahani, Yesu apwaharu dihap; Inyong amojyo hijan ara dwo kodien ocahi, irahi omiru hulya ifwan adi thonyong. ³⁶Inyong ajyo, “Abba, Monye, dohoi, ocohini asang bukulung awonan.” Iyaru oihutye lya adi thonang. Ti, ikara awahan hindang, ti, nahoi.”³⁷Inyong anyahu, orimak isong hojoothoi, inyong ajyo do Petro, “Simone, iye lohoijootho? Awang ocohi dohoi eririhina nang juk orii aboithe? ³⁸Omijye tuhudik karik ara iye imojyo, daang iye ijingak ditha esusuitha. Owak kodien ohoile, ti, ilik ahwan. ³⁹Koti alo dimojyo th’ocamitha thohodwo omojyorik inyong thohulo.⁴⁰Anyahuna nanyong dosong, oindu irimahina hoferori, ara houk ahonde. Awang isong hulo otehi, ainyong ojyo isong donyong. ⁴¹Inyong aindu dosong operohothi oithaunihoi, ajyo dosong, “Ithai hohoijootho karik ithai hohoiyiri? Acohi! Edwongi omiru. Omijyethe! Athuhi ethafothohina Olonyi l’Othulo dihas h’ohoiyak. ⁴²Odothothik. Hafatha. Anyiha othulo loithafothok nang adi lo.”⁴³Hocama Yesu ahani, edwong Juda, aboithe tho tomon larehai, Oindu helulung ohothing nabolo h’odemio karik otheleho, tha fadiri hohittwak, ohoigerok karik ohobolok. ⁴⁴Thene, onde lethafothok inyong adi lo, aithak, ajyo, “Aboithe lamandayo nang lya, inyong othulo. Indefuna inyong ara ithai ikiyaru inyong adi.” ⁴⁵Edwong no Juda, aindu do Yesu, ajyo, “Ohoityenani,” emandayo inyong. ⁴⁶Thiya, abahye karik endefuni inyong.⁴⁷Ti, aboithe losong lowetha indehai, ahethu ademi, esalu ehiok n’ohoigyemani lo fadiri lohittok. ⁴⁸Yesu ajyo dosong, “Ifunu ithai iring hofuni d’ohoholani th’odemio karik otheleho dindafaitho nang? ⁴⁹Omiru hawonderek nang nya juui hothai karik nang etyenio di Templo, kabong ithai nang hoindafaitho. Ti, owon inya ahani dofuni arami hotho maninihio ifuhon.” ⁵⁰Ohothing honya owoni ho Yesu bukulung, edyaharai inyong. angerori adi.⁵¹Owon nya diya othulo ottwathi lothifoitho Yesu; iyofo abongo narere hamaring dimuhohinerek ahwan nanyong. Endafaitho nya n’ohothing Yesu, edyaharu abongo, angero iluluyai. ⁵²Ethaitharai Yesu do fadiri lohittok.⁵³Osuduhai nya honyong, ofadirihio fodok hohittwak, ohobolok karik ohoigerok. ⁵⁴Thene, Petro athiforo inyong; odaha ti, olamarai, lwai dipar ho fadiri lohittok. Inyong awoni dihiji h’ohoigyemak, asuja ahimang.⁵⁵Thene, ottahithi nya ho fadiri hohittwak karik elulung nahittok n’Ojudei aning nepal nehandyo Yesu, dottohorik inyong. Ti, kabong horimahini naboling. ⁵⁶Aca ohothing holwa emangahini hijan epal Yesu, ti, emangio nasong aang hoiruhohunu.⁵⁷Ara homok adotho, emangahini hijan epal Yesu, ajyori, ⁵⁸“Ethaningu ohoi inyong ajaran, ‘Etharohojo nang de a templo naduhoi th’ahas ne adi, ⁵⁹Diholu h’operok aunihoi, aduhu nang de naboling naang ahas thiya.’”⁶⁰Fadiri lohittok adotho dihiji hosong, efiyo Yesu, “Aang etharangio nahoi?” Ainyong ojyori ohothing hulya nepal icama iye?” ⁶¹Ti, inyong adularu, aang ocama. Koti, fadiri lohittok efiyo inyong, ajyo, “Iye Kristo, Loboithe Laborwa lo?” ⁶²Yesu ajyo,”Nang inyong;itehu ithai de Olonyi l’Othulo ara lawoni dinget h’akolon, aindu ditha h’adikolo hothohide.”⁶³Ara fadiri lohittok aricyo abongoitho hanyong, ajyo, “Hoiwak ohothai ohothing homok hotihak?” ⁶⁴Ethuk ithai ethaninguna omorit l’asang hadwa. Ainyong iwak ithai ihandye? Edari isong fodok inyon, awahi hijan inyong thottohori. ⁶⁵Aculuyo homok amicyo ahamilak donyong, emuhohini ahomong nanyong, anduhye inyong, ajyori donyong, “Ecorit!” Ohogyemak hohong h’ohoremok eyarai, afwoi ibahyo inyong.⁶⁶Orii ho Petro difwatha h’oyalu nothohop, aboithe n’aduring h’egyema do fadiri lohittok aindu donyong. ⁶⁷Inyong na atehu Petro osuja ahimang. Amijyo donyong na iindehai, ajyo, “Iwon iye nya do ho Nazarene, Yesu,” ⁶⁸Ti, eda arami hune, ajyo, “Aang nang atek dia aang nang atek tuhudik aisong arami icama iye. Thiya, aindu dindak, d’oyihet lohittok. Ara ohohorong esir.⁶⁹Ti, inyong eda arami hune ikoti. Ti, aitho ehegyemani ne atehu inyong, ajyo ikoti d’ohothing honya owetha diya iindehai, Othulo lya, lobo thosong. ⁷⁰Ti, inyong arisa ikoti. Omiru tiibai ahani, ohothing honya awetha dini hulo, ajyori do Petro, “Aang opwak, iye aboithe losong. aca iye othulo lo Galilea.”⁷¹Ti, aculuyo esarak ahwan nanyong ditha epithathik karik dipitha. “Aang nang atek loni othulo lecamai iye thonyong lya. ⁷²Ohohorong esir operohothi oitharehe. Thiya Petro eyuu ocamitha hathuk Yesu anyahina donyong: “Dihithemi h’esir n’ohohorong operok arehai, irisa iye nang de operok aunihoi.” Ara inyong apwaharu dihap, abuhyo ehiyo.

¹Nya th’amoithe berien, efefenai amaji aboithe ho fadiri hohittwak, ohobolok, ohoigerok karik elulung nahittok n’Ojudei. Thiya, athoryo isong Yesu, eyarai adi; afwoi ithafothohini inyong do Ponsio Pilato. ²Pilato efiyo inyong lo, “Iye Ohobu l’Ojudei?” Inyong lo etharangyo inyong, “Iye ijyo ahani.” ³Ara ho fadiri hohittwaak elalodohyo inyong th’asang olwarai.⁴Pilato efiyo inyong, “Aang iye itharangyo? Idoro, baya asang helalodohok isong dohoi!” ⁵Ti, kaang Yesu oindu itharangyo inyong; kombwo, ethafalangyo inyong.⁶Thene, d’omiru hule, d’ofaning l’amuno, ohohinda nya Pilato d’ohothing othulo lefitha aboithe lefiyu isong. ⁷Owon nya othulo lefitha h’oimingejak ohottohok loilongoi ara Barabbas d’orii h’ edara athifoitho n’oyalu. ⁸Elulung n’ohothing aindu do Pilato, aculuye efiyo inyong thoihandye iring nehandyecerek inyong.⁹Pilato etharangyo isong ajyo, “Iwak ithai ahohi nang ithai Ohobu l’Ojudei?” ¹⁰Otek nya Pilato hijan ahaini isarak ho fadiri hohittwak ethafothohina Yesu donyong. ¹¹Ti, ho fadiri hohittwak esusuhini elulung n’ohothing thoiikoro bebe hijaran Barabbas thohohini kombwo.¹²Pilato etharang isong ikoti ajyo, “Ainyong iwak ithai ehandyo nang d’Ohobu l’Ojudei?” ¹³Isong ekor bebe, “ Obehok inyong di kruce.”¹⁴Pilato ajyo dosong, “Ainyong namonyong ehandyo inyong?” Ti, isong ekor bebe, tholohide h’ekor, “Obehok inyong di kruce.” ¹⁵Difong elulung n’Ojudei, Pilato ahohi Barabbas. Ethafodohyo Yesu, ethafothok inyong dosong dibehohina di kruce.¹⁶Ohoremok eyaru Yesu difwata h’oyalu (Amaji Nahittok n’Endafaitho Ahap), isong elongu asuduhe n’ohoremok nahittok amaji aboithe. ¹⁷Ara isong ethayofok Yesu abongo anaporong, ehuhumye ehithang n’oyihwa abehohini dihu honyong. ¹⁸Isong aculuyo emandayo inyong and ajyori, “Koruk kaa, Ohobu l’Ojudei!”¹⁹Ethabuho nya isong abahyo ahu nanyong th’amukok thon’othelek karik amicyo ahamilak donyong. Arigongoi karik adulai isong hulo dihithemi honyong. ²⁰Athuhon nasong ethalubangyo inyong, ahouni adi thonyong abongo anaporong na, ethayofohini inyong abongo nanyong, eyarai inyong dibehohina di kruce. ²¹Owon nya othulo lobo, Simone lo Cyrene, loindu tho miji, (Lomonye ho Alexander karik Rufus); eringahini inyong th’odohoro akruce.²²Ohoremok eyanu Yesu, lwai d’amaji nelongoi ara Golgotha (Neloicye ara “Amaji n’Ahu”). ²³Isong esarak donyong obalu loiharwo h’angenge n’ohiyani nangwuo kudarr, ti kabong homatha. ²⁴Abehohini di kruce, ebwaye abongoitho hanyong th’arwasyo otenge dinyahina nani abongo olo ohoremoni dia loni iyaru.²⁵Orii oihaunihoi obehok isong inyong di kruce. ²⁶Dihide ethaithit, isong negero a pal, “Ohobu l’Ojudei.” ²⁷Honyong, isong abehok ohoholak areha, aboithe dinget honyong, aboithe dihothong. ²⁸Amaninihio angoro hayyu ho Marko 15:28:Aindu amanini iwonan najyo, “Eherahini inyong h’ohothing haang obis,’²⁹Ohothing hodaha thole, amorye inyong, eniningye ahosi hasong, ajyori, “Oco, aca ijyo iye itharohojo iye de ara iye iduhon a Templo ditha operok aunihoi, ³⁰olwaha ahwan, icuru dihap tho kruce.”³¹Ahani dang, ethalubangyo inyong ho fadiri hohittwak, isong h’ohoigerok, ajyori, “Olwahyo homok, ti, aang ithalwahu ahwan nanyong. ³²Kristo, Ohobu lo Israele, icuru dihap tho kruce, ditehu ohoi ara ohoi iruk.” Ara ohothing hobehohini honyong hulo emomoryo inyong dang.³³Oriihio inde, ajyo ahap fodok risik tok d’orii oithasahale. D’orii oithahale, ekor Yesu, omurut dihide, “Eloi, Eloi, lama sabachthani?” ³⁴Nawetha dimaji hajaran, “Ojok hindang, Ojok hindang, anyo irwasaru iye nang?” ³⁵Ohothing howetha diya koko, ethaninguna arami hune, ajyori, “Idorotho, inyong lo lelongo Elijah.”³⁶Othulo aboithe lobo, angero,anywahu obalu lerwarwathanga, ahisak dibahandi, esarak inyong thomathai. Othulo lya ajyo, “Hedoryethek ara oindu Elijah idohuna dihap.” ³⁷Thiya, Yesu ekor omurut dihide, aye. ³⁸Ara emuhet na Templo aritha thoihiji, thohide lwai dihap.³⁹Atehuna na lahong l’ohoikyak, lowetha dihomong ho Yesu, hijan athuk inyong aye th’oyihoi tholya, ajyo inyong, “Diri othulo lya nya Olonyi l”Ojok.” ⁴⁰Owoni nya dang angorwo hengengelyo olamarai. Owoni nya dihiji hosong, Maria magdalina, Maria (nahathingi ho Yakobo attwatti karik Joses) karik Salome. ⁴¹Omiru inyong di Galilea, athifoithe karik egyemai donyong. Maria karik angorwo hamok nya dang afuni honyong di Yerusalem.⁴²Athuhon nya athari ainduna, anyo, ofaning nya le loihuhumarik, ofaning lothohithemi h’ofaning Oithacofe, ⁴³aindu Yoesfo lo Arimathea diya. Inyong lo nya othulo lobangi. Owon nya ara l’asuduhe n’ohothing hoithilayo ohobye l’Ojok. Ethakolyo inyong lo ahu, alo do Pilato difiyo ahwan no Yesu. ⁴⁴Afalanga Pilato hijan athuk Yesu aye; elongo inyong lahong l’ohoremok hoikeyo ohothing hoifitha; efiyo, ara aye Yesu.⁴⁵Ethaninguna no Pilato th’ohoremok h’ohoikeyak h’ohoifithak, esarak ahwan no Yesu do Yosefo. Athuk Yosefo enyanguna abongo narere nemuhyerek ohoyak. ⁴⁶Ethacuru inyong dihap tho kruce, emuhok th’abongo, ethaferik inyong dihilame, nanya obohohini ditha h’amorwong. Thiya, ara inyong eyafulangak amorwong dihuthuk h’ahilame. ⁴⁷Maria Madalina karik Maria nahathingi ho Joses atehuni amaji namuhahinerek Yesu.

¹Engohunu nya n’Ofaning Oithacofe, enyanguni Maria Madalina, Maria nahathingi ho Yakobo, karik Salome elethang nafuni isong eyelyerek ahwan no Yesu. ²Nya th’amoithe berien n’ofaning ohoithemoni l’esabit, afwoi dihilame ahibu oholong athuk ettoruna.³Acamai isong huna dihiji hosong, ajyori, “Ngai de olo iyafulanguna omorwong adi thohuthuk h’ahilame?” ⁴Amijyo nasong adihide, atehuni omorwong athuhi eyafulanguna adi; obolo nya omorwong le bebe.⁵Isong ajingari dihilame, atehuni ottwathi loiyofo abongo abong, owoni d’oyirik l’enget; abangi isong huna. ⁶Inyong lo ajyo dosong, “Hoibangatha. Ithai hethifeyo Yesu lo Nazarete, lonya obehohini di kruce lo. Ebuhu! Awang thene. Ottihatha amaji nethaferihinerek isong inyong. ⁷Ti, ifwatha onyahina ohothifok honyong karik Petro, “Inyong lalo ahithemi nathai di Galilea. Itehu ithai de inyong diya, iring nanya arhuk inyong anyahinerek ithai.Ajinguni isong dindak angerori adi thohilame; ehihirai karik abangi. Kabong onyahini aning nabo d’othulo kwong, anyo, abangi nya isong bebe.⁹[Nya th’amoithe berien d’ofaning ohoithemoni l’esabit, diholu h’ebuhuna nanyong, ecak inyong aleyori do Maria Madalina, nanya ongararik inyong ohoilehio cofa homonyong adi thonyong na. ¹⁰Alo inyong na alo inyahina ohothing honya owoni honyong hulo ahibu isong ikori karik ethangerye ehiyo. ¹¹Ethaningu isong hijan omijyo inyong karik atehu inyong na inyong, ti, kabong iruhi.¹²Diholu h’asang hune, aleyo inyong thoyaitha hamaring d’arehai hosong, di daha hosong dith’amiji. ¹³Isong anyaha, afwoi inyahina homok, ti, kabong iruhi dosong.¹⁴Nya diholu, Yesu aleyo d’ohothifok honyong ahibu isong dinyari; ara inyong eringyo isong, thaangan than’eruhon nasong karik akolon n’othaji, anyo, kabong hoiruhi d’ohothing holeyo inyong dosong diholu h’ebuhuna nanyong th’ohoyak. ¹⁵Ara inyong ajyo dosong, “Ifwatha dihap fodok dityenio evanjelio d’ayeuna bukulung. ¹⁶Loiruk abuhohini batisimo, ithalwahunu de; ara laang hoiruk,idari de dang inyong.¹⁷Ofwoi de ethaithitha hune h’ohothing hoiruk: th’ofure tholo hindang, ongaterek de isong ohoilehio omonyorok adi. Ocama de isong th’ahuthuhye angejuho. ¹⁸Ohuro de isong amunuok th’ahas thahasong, karik juk amathai ehweri nethayeyo, aang de iryafu isong. Ithaye de ahas dihide h’ohodihak, ayiji.”¹⁹Athuhon n’Ohobu Yesu acama dosong, eyarai inyong dihide, awoni dinget h’Ojok. ²⁰Ohothifok afwoi inyahina evanjelio dihap bukulung, ahibu Ohobu igyema hosong, ethakolyo ocame losong, thethaithitha thahafwo honyong.

¹Diculwe, awon nya Ocame; owon nya Ocame h’Ojok, karik Ocame nya Ojok. ²Hara thoculwe, owon nya Ocame h’Ojok. ³Tholonyong, ehuhumyo Ojok asang bukulung; aang aning aboithe dith’ayeyo fodok nanya ihuhumye kwong inyong.⁴Ocame nya le, oyihoi l’esu, nanya iyanu afangan d’elathulo. ⁵Afangan nawulo ditha omudwe, karik omudwe laang ithadunyu inyong.⁶Asulak Ojok ohifak lonyong, othulo loilongoi ara Yoanne, ⁷loindu inyahina ohothing arami h’afangan, dithaninguni ocame karik eruhi. ⁸Aang inyong nya thahwan owon ara afangan; oindu dinyahina arami h’afangan.⁹Na nya afangan nadiri – afangan naindu dihap, awulo d’ohothing fodok.¹⁰Owon inya Ocame dihap, karik juk inya ihuhumyo ahap tholonyong, kabong ahap hotek inyong. ¹¹Aindu dimiji honyong, ti, kabong ohothing honyong ifothu inyong;¹²Efothu ti, homok inyong karik eruhi donyong; esarak isong thoifunu iwonan ara olonyirok h’Ojok. ¹³Kabong ofuni iwonan ara olonyirok h’Ojok iring nayisunerek othulo, awon ara omonye, Ojok thahwan awon ara omonye losong.¹⁴Aindu Ocame ara othulo, ara loifut halwahio, h’eladiri, amanya dihiji hohothai. Etehu ohothai abolori nanyong, abolori nefothu inyong iring olonyi loboithe l’Omonye. ¹⁵Acama Yoanne arami hanyong. Ekor dindak, “Inyong lo lonya acama nang thonyong, najarik nang, “Oindu diput honang, ti, obolo inyong thonang, anyo, owon inyong lo kabong nang oyisuni.¹⁶Th’efuthan n’alwahio nanyong, aboroyo ohothai bukulung, eruhok dohothai ayiji nabo diholu hanabo. ¹⁷Esarak ohothai Ojok oyalu tholo Musa, ti, alwahio karik eladiri tholo Yesu Kristo. ¹⁸Kabong othulo lobo lotehu Ojok. Olonyi loboithe, lorijoro h’Ojok karik lowon d’oyirik l’Ojok, inyong isarak inyong thotehi.¹⁹Asulahini ohithwaha h’Ojudei howon di Yerusalem ofadirihio karik Olivies do Yoanne, difiyo inyong, “Iye ngai?” ²⁰Kabong Yoanne ida etharangyo, ti, acamu dindak karik theler, th’ajaran, “Ikara nang Omessiah.” ²¹”Iye ngai, hathi?” isong efiyo, “Iye Elijah?” “A a, ikara nang,” Yoanne etharang. “Iye Ohocoroni?” isong efiyo. “A a,” inyong etharang.²²“Ara ahani, inyahi ohoi iye ngai?” isong etharang. “Owak inyaharu ohoi etharang d’ohothing hosulu ohoi. Ainyong ijyo iye d’ahwan nahoi?” ²³Yoanne etharang th’ocamitha thohoh’ohocoroni Isaya, “Nang omurut l’ohoikoroni di terere; dihuhumyo oyihoi lobis dodaharik Ohobu!”²⁴Thiya, ohothing hosulu Ofarisei hulo. ²⁵efiyo Yoanne, “Ara ikara iye, Omessiah dia Elijah, dia lobo th’ohocorok, anyo ibuhyo iye batisimo?”²⁶Yoanne etharang, “Abuhyo nang batisimo th’ahari, ti, owon othulo lobo lowetha dihiji hothai laang ithai itek. ²⁷Inyong lo loindu diput honing, ti, aang nang asiru juk dihoyo ahamuha hanyong.” ²⁸ofuhi arami hune fodok di Bethani, d’oyirik lotho moithe lo’owor lo Jordano, amaji nabuhyerek Yoane batisimo.²⁹Nya moithe, atehu Yoanne Yesu oindu donyong, ajyo, “Owon oker l’Ojok, leduhu adi eyatha h’ahap! ³⁰Inyong lya lonya acama nang thonyong, anajarik nang, “Othulo loindu diput honing, ti, obolo inyong thonang, anyo, owon dihithemi h’ayisuna hindang.’ ³¹Kaang nang nya atek, ara ngai oindu inyong iwonan, ti, aindu nang nang abuhyo bastismo th’ahari, dotehi inyong ohothing ho Israeie.³²Karik Yoanne anyahi dindak ainyong afuk, “ Atehu nang Ohoile icuru dihap thohide, awetha tholohide h’ahu nanyong. ³³Kabong nang nya atek ijan inyong lya, ti, Ojok, losulu nang dibuhyo batisimo th’ahari, ajyo donang, “Itehu iye de Ohoile oindu dihap, esuka dihide h’othulo; inyong lya lobuhyo batisimo th’Ohoile tho Lodwa.’ ³⁴athuk nang atehuna inyong,” Ajyo Yoanne, “Karik anyahi nang iye hijan inyong lo Olonyi l’Ojok.’³⁵Atehuna nayong Yesu adaha indehai ahanya, ajyo, “Ohindong l’Ojok le.” ³⁶Ethaningu n’ohothifok hulo arehai inyong ajaran ahani, athiforoi Yesu.³⁷Atehuna nayong Yesu adaha indehai ahanya, ajyo, “Ohindong l’Ojok le.” ³⁸Ethaningu n’ohothifok hulo arehai inyong ajaran ahani, athiforoi Yesu. 38 Yesu eloitho, atehu isong athifunu inyong, efiyo, “Ainyong ithifeyo ithai?” Isong etharang, “Dingai isuka iye, Rabbi?” (Ojyo ocame lya “Ohoityenani.”). ³⁹“Ifuna otihatha,” ara inyong etharang. (Orii le nya arangwang didila h’oholong.) Thiya, afwoi honyong d’amaji nesukarik inyong; esukai honyong ofaning le.⁴⁰Aboithe losong nya Andrea, lolai ho Simone Petro. ⁴¹Kwak ahani ne, arimak olai Simone Petro, anyahi inyong, “Erumak ohoi Omessiah.” (Ojyo ocame lya “Kristo,”) ⁴²Thiya, eyaru Simone do Yesu. Jesu amijyo donyong ahani, ajyo, “Ofure lohoi Simone lolonyi ho Yoanne, ti, ilongoi iye de ara Cephas.” (Ofure lya, iring Petro, ojyo “Amorwong.”)⁴³Nya moithe, Yesu adotho, alo di Galilea. Diya, arimak Fillipo, ajyo donyong, “Iwong honang.” ⁴⁴Pillipo nya tho Baidsaida, abore nesukarik Andrea karik Petro. ⁴⁵Pillipo arimak Nathanaiele, anyahi inyong, “Erimak ohoi inyong loigere Musa thonyong ditha amanini n’Oyalu karik loigero thonyong dang ohocorok. Inyong Yesu lolonyi ho Yosefo, tho Nazareth.”⁴⁶“Owon aning nabo nayyu nacohi naindu tho Nazareth?” Nathaniele efiyo. “Iwong idoro,” Pillipo etharang. ⁴⁷Atehuna no Yesu Nathaniele ainduna donyong, acama inyong lo arami thonyong, “Othulo ladiri lo Israele lo, inyong lo; aang aning nabo nekela djtha honyong!” ⁴⁸Nathaniele efiyo inyong, “Angai itek iye nang?” Yesu etharang, “Atehu nang iye orii hoiwetherek iye dimukok h’ohiyani dihithemi helonguna no Pillipo iye.”⁴⁹“Ohoityenani, “ Nathaniele etharang, “Iye olonyi l’Ojok! Iye Ohobu lo Israele!” ⁵⁰Yesu ajyo, “Iruk iye, anyo, anyahi nang iye hijan atehu nang iye iwetha di mukok h’ohiyani?” ⁵¹Inyong ajyo dosong, “Anyahi nang ithai arami hadiri: itehu ithai de ahide onga karik anjelohio h’Ojok ofwoi dihide, afuni dihap dihide h’Olonyi l’Othulo.”

¹Diholu h’operok arehai, owon nya amutha di bore ho Kana di Galilea. Iwon nya nahathigni ho Yesu diya, ²karik Yesu h’ohothifok honyong honya ilongoi di mutha.³Engohunu nya n’obalu, nahathingi ho Yesu ajyo donyong, “Awang obalu lofithoro.” ⁴“Hoinyahi nang ainyong ihandye.” Yesu etharang, “Kabong omiru hundang ofuni.” ⁵Nahathingi ho Yesu anyahi ohoigyemak, “Ihandyethe aning nanyahi inyong dothai.”⁶Owoni Ojudei h’oyihothik hothifoitho isong dihandyo aning naboling, iring elala. Iring d’amutha no Kana, owoni nya amoco inde h’ahari, aboithe nasong iyaru oisahin hohittwa hulo juk athomona aunihoi. ⁷Yesu ajyo d’ohoigyemak, “Ithafuthahina amoco huna th’ahari.” Ethafuthahini bee methelele. ⁸karik thiya, anyahi dosong, “Thene, owohuna ahari hamok adi, ara ithai ithafoyhok dalahong l’ofaning lamuno ne lya.”⁹Isong eyahak donyong ahari.hathuk eolith th’orii lya ara obalu, athemyo, aang otek thongai oindu obalu lo (ti, diri, ohoigyemak howohunu dalahong hulo, isong otek); ¹⁰thiya elongu ohomuthani, ajyo donyong, “Isarahini othulo d’ohothing obalu loyyu bebe ahithemi, ara ohothing hoilongoi hawoni hobalu olwarai lomathai, easarak d’ohothing obalu lothene. Ti,ethuk iye akanahina obalu loyyu bebe.¹¹Aning ehethemoni nethafalangyo nehandyo Yesu ne Kana di Galilea. Anyahi abolori nanyong dia, ara ohothifok honyong eruk donyong.¹²Diholu ho na, iduk Yesu h’ahathingi, olarok karik ohothifok honyong, afwoi di Kapernaum, esukai diya oyethik tiibai.¹³Aindek inya ofaning lohittok l’amuno n’Ojudei (Passover Festival), Yesu alo di Yerusalem. ¹⁴Diya di Templo, orimak ohothing ithananyangyo ahisum, akero, amami, karik ohoiloithok h’enyahwo owaniari dipogo h’obeleha hosong.¹⁵Diya na, ehuhumu inyong lo apicuthi, angararik ecangi fodok adi tho Templo, akero karik ahisum; alafuhyo obeleha h’ohoiloithok henyahwa karik esasahacyo enyahwa hawoni ara ebilat. ¹⁶Eringak ohothing hoithanyangyo amami, “Iyatik isong adi thene! Ithawejethek ehandyo ahang na Lalamonyi ara amaji nenyangarik karik nethantangyerek!”¹⁷Ara ohothifok honyong eyuni ajaran n’amanini, “Amuno hindang ahang nahoi, iye Ojok, omudyo nang iring ahimang.” ¹⁸Hahong ‘Ojudei etharangyo inyong th’efiet, “Ainyong nafalangai nacohi iye ehandyo, di thaithahina hijan ibis iye dihandyo ahani?” ¹⁹Yesu etharang, “Itharohojahina Atemplo ne adi, d’operok aunihoi, nang aduhok dimaji.”²⁰“Ilo iye iduhohina inyong ikoti d’operok aunihoi?” isong efiyo. “Eyaru diduho Atemplo ne oyingathik athomone arangwan nainde!” ²¹Ti, Atemplo nacama Yesu ne, ocama ahwan nanyong. ²²Adohuna inyong nya thoye, ohothifok honyong nya eyuuni hiajan ajyo inyong nya ahani; ara isong eruk amanini karik arami hajyo Yesu.²³Orii ho Yesu di Yerusalem d’omiru h’ofaning lohittok lOjudei, eruhi ohothing holwa donyong, atehuna nasong asang hethafalangyo hehandyo Yesu. ²⁴Ti, kabong Yesu ilahi ahwan nanyong dosong, anyo, otek inyong isong bukulung. ²⁵Aang nya howak hijan lobo thonayhi inyong isong hongai, anyo, athuk inyong olefeng aitek ainyong nadithaja hosong.

¹Owon nya lahong l”Ojudei lara Nikodemo; owon d’asuduhe n’Ofarisei. ²D’oharie nya lobo, alo do Yesu, ajyo donyong, “Ohoityenani, itek ohoi hijan iye ohoitayeyenani losulu Ojok. Aang loboling locohi ehandyo asang hafalangai hehandyo iye hune, arahari ara owon Ojok honyong.”³Yesu etharang, “Anyahi nang iye arami hadiri: aang othulo lobo locohi atehuna Ohobye l’Ojok, ara kabong oyisuni inyong ikoti.” ⁴“Angai oyisuni othulo labolo ikoti?” Nikodemo efiyo. Aang ocohi donyong padacut ajingara dihohe h’ahathingi, ayisuni inyong operohothi oitharehe.”⁵“Anyahi nang iye arami hadiri,” Yesu etharang. “Aang othulo lobo lojinga dithah’Ohobye l’Ojok ara kabong oyisuni inyong th’ahari karik Ohoile. ⁶Oyisuni othulo ara othulo, th’omonye karik ahathingi, ti, ayisuni inyong th’elahoile thon’Ohoile.⁷Hoifalanga, dinyahina honang iye hijan, owak oyisuni ithai bukulung ikoti. ⁸Owam ahomwa iring owak inyong; iye ithairu awaman nanyong, ti, aang iye itek thongai oindu dia dingai olo. Ahani ojahitha d’othulo loyisuni th’Ohoile.⁹“Angai ocohini arani hune awonan,” Nikodemo efiyo. ¹⁰Yesu etharang, “Iye ohoityenani lohittok d’Israele, iye aang hoitek arami hune? ¹¹Anyahi nang iye arami hadiri: icama ohoi arami hetek ohoi, ohoi inyanyahak asang hetehu ohoi, ti, aang lobo lothai lowak eruhna arami hune.¹²Aang ithai iruk nang ara nang lanyahi ithai asang h’ahap na; angai de iruk ithai nang ara anyahi nang ithai asang hothohide? ¹³Ngonyena, kaang lobo lalo dihide, arahari Olonyi l’Othulo, loindu dihap thohide.”¹⁴Iring nadohinerek Musa amunu anaporong dihide h’ohalothi diterere, ahani de dang ofuni idohohina Olonyi l’Othulo, ¹⁵dofuni ohothing hoiruk donyong iwonan hesu namanya mak.¹⁶Aca, amuno Ojok ahap disarahina Olonyi lonyong lara aboithe, dara loiruk donyong, orimak de esu namanya mak. ¹⁷Aang nya Ojok osulu Olonyi dihap ara ohokanyani l’arami, ti, osulu ara ohoithalwahani. ¹⁸Aang hokanye ohothing hoiruk d’Olonyi, ti, athuhi akanyo ohothing haang iruhi d’Olonyi, anyo, kabong hoiruhi d’Olonyi lara Aboithe l’Ojok.¹⁹

¹Atehan no Yesu hijan athuk Ofairsei ethaninguna hijan ethajingyo karik abuhok inyong batisimo d’ohothifok olwarai tho Yoanne, ²(juk ikara nya Yesu thahwan obuhyo batisimo, ti, ohothifok honyong), ³edehi Judea, anyaha ikoti di Galilea.⁴Ti, owak nya olo inyong tholo Samaria. ⁵Inyong alo thal’abore no Samaria, nelongoi ara Synchar, iindehai d’ahap nanya athuk Yakobo esarahina d’olonyi,Yosefo.⁶Owon nya ohiti lo Yakobe diya. Adiha nya ahwan no Yesu adaha, awoni dipogo h’ohiti; Awon nya ara orii othainde l’ofaning. ⁷Aindu athulo no Samaria iwohoro ahari, ara yesu ajyo donyong, “Isarak nang ahari hamok hamathai.” ⁸Orimak athuk ohothifok honyong afwan di bore dinyanga anyari.⁹Athulo no Samaria ne ajyo do Yesu, “Angai ifiyo iye l’Ojudei, nang no Samaria thoisarak iye ahari hamathai? Ojahitha aang Ojudei karik ohothing ho Samaria iruhohunu?” ¹⁰Yesu etharang, ajyo donyong, “Ara ira iye itehan esorio n’Ojok, ara iye itek ngai lojyo dohoi ‘Isarak nang ahari hamathai’ ira iye ifiyo inyong, karik ira inyong isarahina iye ahari h’esu.”¹¹Athulo ne ajyo donyong, “Lahong, awang ewohit nahoi nawohyerek ahari karik oudo ohiti. Dingai de irimak iye ahari hahoi h’esu hune? ¹²Aang iye ibolo, dia ibolo iye, th’omonye lohoi Yakobo, loisarak dohoi ohiti, amatha dang inyong thahwan, iring namatheri olonyirol karik ecangi hanyong thiya?¹³Yesu etharang karik ajyo donyong, “Lomatha th’ahari huna, ibotho de ahibothit ikoti. ¹⁴ti, lomatha ahari hesarak nang donyong, aang hoibotho ahibothit ikoti. Kombwo ahari haindu nang de isarahina donyong, ofuni de iwonan ara asihothe n’ahari hanger d’esu namanya mak¹⁵Athulo ne ajyo donyong, “Isarak nang ahari hune daang nang ebotho ahibothit karik daang nang anyahu diwohoro ahari.” ¹⁶Yesu ajyo donyong, “Ilo, ilongoi othulo lohoi, ara iye inyahu dini.”¹⁷Athulo ne etharang, ajyo donyong,”Aang nang awon h’othulo lobusuha.” Yesu etharang, “Ecama iye ara nabis ’Aang nang awon h’othulo lobusuha,’ ¹⁸Aca iwon iye h’obusuha miyet, ara lewon iye honyong lya, ikara othulo lohoi. Arami hecama iye hune obisi.”¹⁹Athulo ne ajyo donyong, “Lahong, engengelyo nang ahani, iye ohocoroni. ²⁰Omojo nya omonyehio hohoi dihide h’odonge lo, ti, ijyo iye Yerusalem amaji namojorik ohothing.²¹Yesu ajyo donyong, “Iruho donang, athulo na, omiru hofuni hoifunerek ithai imojorik Omonye, aang hara d’odonge lya dia di Yerusalem. ²²Imojo ithai aning naang ithai itek. Imojo ohoi aning netek ohoi, aca owon ethalwahuna th’Ojudei.²³Ti, omiru hofuni, karik nahoi dini thenene, ara ohomojok hadiri hamojyo Omonye dihoile karik diladiri, aca Omonye lothifeyo ohothing hojahitha ahani, thoiwona ara ohomojyok honyong. ²⁴Ojok Ohoile, ohothing homojyo inyong thomojyo dihoile karik diladiri.²⁵Athulo ne ajyo donyong, “Atek nang hijan Omessiah (loilongoi ara Kristo) loindu. Ara laindu, oindu de inyanyahahina ohoi asang fodok.” ²⁶Yesu ajyo donyong, “Nang inyong, lecama iye donyong lya.”²⁷Th’orii le anyahuni ohothifok. Afalanga isong hulo anyo ocama Yesu h’athulo nangorwo, ti aang othulo locama. “Ainyong ithifeyo iye?” dia “Ainyong icama iye honyong?”²⁸Thiya, athulo ne edyaharu amothing nayong n’ahari, alo dibore dinyahina ohothing, ²⁹“Ifuna, otihatha othulo lanyahi nang asang bukulung hehandyo nang. Aang lo ara iwonan ara Kristo diri, dia ira?” ³⁰Edehini abore afuni donyong.³¹D’orii hulya, ethabuho ohothifok arosohina inyong anyo n’anyari, “Ohoityenani, “Onye” ³²Ti, ajyo dosong, “Awon nang hanyari naye naang ithai itek.” ³³Ara ohothifok acama dihiji hosong, “Kabong othulo leyahak inyong aning nabo dinyo, eyanai?”³⁴Yesu ajyo dosong, “Anyari hindang inyong ehandyo aning nawak losulu nang karik engohina egyema nanyong.” ³⁵Aang iye ijyo bai, ‘Afithoro oyefathik arangwan, ara engongocyo edwong’? Nang lajyo dohoi, omijye dihide, ingengelye amandak, aca athuhi angidari dingongocyo! ³⁶Othulo loingongocyo, odumai karik arimak ahayocong n’esu namanya mak, domuno ohoromoni karing ohingongothoni amaji aboithe.³⁷Aca d’arami hune, ajaran, ‘Othulo loromo, loboling loingongocyo’ ara diri, ³⁸Asulak nang ithai dingongocyo amana nakabong ithai iromo. Athuk homok egyema, ara ithai ijingak ditha h’egyema nohomok.”³⁹Ohothing ho Samaria holwa d’abore nya, eruhi donyong thenyanyahit than’athulo noth’ohiti, “Anyahi nang asang fodok hathuk nang ehandyo.” ⁴⁰Thiya, ohothing ho Samaria afuni donyong, efiye inyong thoisukai hosong; esuka hosong operok arehai.⁴¹Homok holwa hosong eruhi do Yesu za arami zaha iwahak inyong dosong. ⁴²Eruhi holwa, th’ocame tholonyong. Ajyori isong d’athulone, “Aang ohoi iruk th’anyahina thanahoi ohoi; Ithuk ohoi ethaninguna th’ahwandek thahahoi karik etek ohoi hijan othulo lo diri ohoithalwahani l’ahap.”⁴³Diholu h’oprok arehai, Yesu alo thiya di Galilea. ⁴⁴Aca Yesu olefeng ajyo, “Aang ohocoroni lethahabuye dimiji honyong.” ⁴⁵Edwong nanyong di Galilea, efothu inyong ohothing ho Galilea tuhudik. Athuhi atehuna asang bukulung hathuk inyong ehandyo inyong di Yesrusalem d’amuno, aca athuhi dang afwan d’amuno.⁴⁶Thene ikoti, anyahu di Kana, di Galilea, amaji naya iloicyerek inyong ahari ara obalu na. Owon nya ohoigyemani lohowore lodiha olonyi di Kapernaum. ⁴⁷Ethaningu hijan aindu Yesu tho Judea di Galilea, alo do Yesu, efiyo inyong thoindu dihap, dithalihyo oitho lonyong lodiha, laindek aye.⁴⁸Yesu thiya ajyo donyong, “Ara kabong iye itehu ethamijanitha karik asang hafalangai, aang iye iruk ⁴⁹Ara ohoigyemani l’ahabwore ajyo donyong, “Lahong, icuru dihap kabong oitho hindang oye.” ⁵⁰Yesu ajyo donyong, “Ilo, isu loilonyi.” Othulo lya eruk arami hacama Yesu donyong. Alo adi.⁵¹Ecur nanyong dihap, arwangarik inyong ohoigyemak honyong; anyahini inyong hijan esu olonyi. Efiyo isong, th’orii loni oculuyo ayiji. ⁵²Isong etharang inyong, “Ngolngole th’omiru cofa idehi inyong adiha.”⁵³Thiya, atek omonye hijan oyyu olonyi omiru honyahinerek inyong Yesu “Ilo, isu loilonyi.” Inyong karik ahang bukulung eruhi. ⁵⁴Ethamijani nya ne etharehe nehandyo Yesu ainduna nanyong tho Judea di Galilea.

¹Diholu h’arami hune, awon nya ofaning lamuno n’Ojudei, Yesu alo di Yerusalem. ²Di Yerusalem, iindehai d’oyihet l’akero, owon ajor nakongarik, nelongoi th’Armaik ara Bethesda; Owon h’opohin h’athwahio miyet hafyo. ³Oferori nya ohothing olwarai hodiha, hongnodo, hongura dia haye arakang diya. ⁴⁵Owon nya diya othulo ladiha oyingathik athomone ounihoi natises. ⁶Atehuna no Yesu inyong ajotho diya, karik atehan nanyong hijan aleng esuka diya, ajyo donyong, “Iwaki ye ayiji:”⁷Othulo lodiha lo etharang inyong, “Lahong, aang othulo lodohok nang ditha h’ajor ara ahari hekurye.” ⁸Yesu ajyo donyong, “Odothoi thahide, iduhu ejothit nahoi, odohai.”⁹Othulo lya kwak ayyu, eduhu ejothik nanyong, adaha. Ofaning le nya Oithacofe.¹⁰Ara Ojudei ajyori d’othulo layyu ahwan lo, “ofaning Oithacofe lya, olwoi iye adaha h’ejothit.” ¹¹Inyong lo etharang, “Onde loithayijyo nang lo ojyo donang, ‘Iduhu ejothik nahoi, odahai.’¹²Isong efiyo inyong, “Ngai othulo ojyo dohoi, ‘Odothoi thahide, iduhu ejothit, odahai?’” ¹³Ti, aang dang othulo lonya ithayijye lo hotek ngai ithayijyo inyong, anyo, th’orii le alithororo Yesu thiya, ti, aang otehi amaji nanderek inyong; owon inya elulung n’ohothing d’amaji nya.¹⁴Diholu, aindu Yesu irimahina inyong di Templo, ajyo donyong, “Otiha, eyu iye! Honye eyauna, daang aning namonyong bebe ofuk dohoi.” ¹⁵Othulo lya alo inyahina Ojudei hijan Yesu nya ithayijyo inyong.¹⁶Ath’arami thohune, ethagyemyo Ojudei Yesu, anyo, ehandyo arami hune d’ofaning oithacofe l’operok cofa. ¹⁷Yesu etharang isong, “Juk thenene, Lalamonye loigyema, karik nang, dang, legyema.” ¹⁸Th’arami thohune, owahi Ojudei nya dang attohoro inyong, anyo, ikara hijan etharohojyo Operohothi Oithaboithe ti, karik dang elongo Ojok ara Omonye lonyong. Etharijyok ahwan nanyong h’Ojok.¹⁹Yesu etharang isong, “Diri diri, aang ocohi d’Olonyi l’Ojok ehnadyo aning nabo th’ahwan thananyong, ara hari aning natehu inyong omonye ihandyo, anyo aning nehandyo Omonye, ihandyo Olonyo th’oyihoi aboithe, ²⁰Aca omuno Omonye Olonyi, ethaithak inyong asang bukulung hehandyo inyong; karik ithaithak inyong de dang egyemathik haittwa thohune, difunu ithai ifalanga.²¹Aca iring ithadocyo Omonye ohoyak thoye, karik esarak isong esu, inyong dang nesarahinerek Olonyi esu d’ohothing howak inyong. ²²Aca aang Omonye Okanyo, ti, athuk esarahina akanyo d’Olonyi, dithahuyo ohothing fodok Olonyi, ²³iring nethahuyerek isong Omonye. Laang ithahuyo Olonyi, aang ithahuyo Omonye losulu inyongDiri diri othulo loithairyo ocame hindang eruk losu nang, owon hesu namanya mak, karik aang de dang ofuni ikanyo arami hanyong ara hamonyong, ti, athuk alangan thaye desu. ²⁵Diri, diri anyahi nang ithai, omiru hofuni, karik dang thenene ne, ara ohoyak de hethaningu oilolonge l’Olongi l’Ojok, ofuni de ohothing hoithairu imanya.²⁶Iring nawonderek Omonye hesu ditha honyong olefeng, athuk dang esarahina ditha Olonyi, dowon inyong hesu ditha honyong olefeng, ²⁷karik dang athuk Omonye esarahina Olonyi akolon di kanyo, anyo, inyong Olonyi l’Othulo.²⁸Hoifalangathik arami hune, aca omiru hofuni, hofunerek ohothing hotholame, ithaninguna oilolonge lonyong. ²⁹karik afuni dindak; hehandyo ara nayyu debuhuna nesu, karik hathuk ehandyo ara namonyong debuhuna nakanyo.³⁰“Aang aning nacohi nang ehandyo thahwan thono hindang olefeng., Akanyo nang, iring ethaningyo nang; akanyo hindang abis, anyo aang nang athifeyo awahan hindang, arahari awahan no le, losulu nang. ³¹Ara anyahi nang arami hundang ara othulo lotihak, aang anyahina hindang owon ara nadiri, ³²Loboling onyahi hijan inyong otihak arami hundang, karik nang atek hijan anyahina nanyong thonang ne, owon ara nadiri.³³Ethuk ithai asulahina do Yoanne. Athuk Yoanne anyahina hijan arami hune hadiri. ³⁴Ti, aang nang efothu enyanyahahina n’arami th’othulo. Acama nang asang hune, dithalwahunu ithai. ³⁵Owon nya Yoanne ara ahirya nawulo karik ethafangyo karik eruhu ithai nya amuno d’afangan nayong orii tiibai.³⁶Ti enyanyahahina n’arami nawon donang, okalu no Yoanne, anyo egyemathik hathuk nang Lalamonye esarahina dihandyo, egyemathik henadyo nang hune, ocamai thonang hijan athuk nang Omonye asuluna. ³⁷Othuk Omonye losulu nang thahwan thannyong olefeng acama thonang. Kabong ithai ithairu oilolonge lonyong dia angai oyaa inyong omiru homok. ³⁸Aang ocame lobo lonyong lofithoro dothai, aca aang ithai iruk othulo lonya athuk inyong asuluna.³⁹Ithifeyo ithai amaninihion hijan irimak ithai de ngona esu namanya mak. Isong amaninihio hune acama thonang, ⁴⁰ithai aang hoiwak afuna donang dirimahina esu.⁴¹Aang nang efothu abolori th’ohothing, ⁴²ti, atek nang hijan aang ithai iwon hamuno n’Ojok dihwandek hothai.⁴³Aindu nang th’ofure tholo Lalamonye; kabong ithai nang ifothu. Ara nya oindu lobo th’ofure tholo lobo, ira ithai ifothuna inyong. ⁴⁴Angai iruk ithai, ithai hoiruhu abolori th’othulo lobo, aang hothifeye abolori naindu th’Ojok lara aboithe?⁴⁵Hoijaratha ngona nag de anyahi amonyori nathai do Monye. Othulo de loonyahi ithai inyong Musa, lethuk ithai ayenio. ⁴⁶Ara iruk ithai do Musa, ira ithai iruho donang, anyo, egero thonang. ⁴⁷Ara aang ithai iruk egeritha hanyong, angai de iruk ithai ocamitha hundang?”

¹Diholu hasang hune, Yesu alo d’oyirik lobo l’ahari no Galilea, nelongooi dang ara ahari no Tiberias. ²Athiforo elulung ‘nohothing nahittok inyong, anyo, atehuni arijorihio h’asang hehandyo inyong dithayijyerek ohothing hodiha. ³Yesu adok didonge; diya awoni dihap h’ohothifok honyong.⁴(Th’omiru hulya, aindek ofaning lohittok l’Ojudei.) ⁵Atehuna no Yesu elulung nahittok n’ohothing ainduna donyong, ajyo do Pillipo, “Dingai de efwo inyang anyari, donyo ohothing hulya?” ⁶(Ti, ocama Yesu ahani do Pillipo, otek ainyong olo inyong ihandyo.)⁷Pillipo etharang inyong, “Aang esihe arehai h’enyahwo helongoi isong ara adenario ocohini juk d’othulo aboithe diwonan h’anyari tiibai.” ⁸Aboithe th’ohothifok, Andrea, lolai ho Simone Petro, ajyo do Yesu, ⁹“Owoni elolongitha miyet h’anyari n’ohimai loingoi ara barli lo karik ohom arehai dini, ti, aisong hune d’ohothing olwarai ahani?¹⁰Yesu ajyo, “Isarahini ohothing hulya thowoni dihap.” Olwa nya amiyang d’amaji nya. Ohothing esihe miyet awonieri dihap. ¹¹Thiya, Yesu eduhu anyari nathuk elolonga ne, karik athuho nanyong afurahina ahinwarang, esarak d’ohothing howonni hulya. Ehandyo dang ahani d’ohom. Anye ara nacohi iring owahi isong. ¹²Efongon n’ohothing, Yesu anyahi d’ohothifok honyong, “Osuduhyethek anyari nedodoyitha ne; daang aning nalitho.”¹³Isong hulo asuduhu, ethafuthahini akatino tomon h’arehai h’anyari nelolongai n’ohimai barli nafithoro th’ohothing hathuk anyo. ¹⁴Atehuna n’ohothing aning nehandyo Yesu ne, ajyori, “Othulo lya diri ohocoroni laindu dihap. ¹⁵Atehan no Yesu hijan owak ohothing inyong endefuna, eringahini inyong ara ohobu, aluya, adok didonge inyong hamaring thahwa.¹⁶Ad’athari, ohothifok honyong awawraru adi hari. ¹⁷Ecurok isong hulo di roko, abongoro tholo hari di Kapernaum. Amiru hulya, eriok aharie kabong Yesu oindu dosong ¹⁸Awam ahomwa nako bebe, nesarak ahari ahamwaitho ara namonyong.¹⁹Ekuroro nasong agwadik tiibai ahani, abangi isong atehuna Yesu adaha dihide ahari ara loindu indehai di roko. ²⁰Ti, inyong alo dosong, “Nang lya! Hoibangatha.” ²¹Thiya, eruk isong efothuna Yesu di roko. Ara aroko edwong kwak d’amaji nadwo ofwarik isong.²²Nya moithe, atehu elulung n’ohothing nawetha d’oyirik lobo l’ahari, aroko aboithe, nanya ofwarik ohothifok hamaring ahibu Yesu aang thiya na. ²³Ti, owoni nya arokoni hafuni tho Tiberias indehai d’amaji naya onyerek elulung n’ohothing anyari nelolonga athuhon nya n’Ohobu afurahina ahinwarang.²⁴Atehan inya n’elulung n’ohothing hijan aang Yesu karik ohothifok honyong, adohithi aroko, afwoi di Kapernaum dithifeyo Yesu. ²⁵Arimahina nasong inyong d’oyirik lobo l’arai, ajyori donyong, “Ohoityenani, kanu iindu iye dine?”²⁶Yesu etharangyo isong ajyo, “Diri diri, ithifeyo ithai nang, anyo,ikara hijan etehu ithai ethamijanitha, ti, anyo, enyo ithai anyari, ara ithai ifong. ²⁷Hoigyemathik th’anyari than’engohunu adi. Ti, igyemathik th’anyari thanamanya esu no mak, naindu de Olonyi l’Othulo isarahina dothai, aca athuk Ojok Omonye, attanyahina ahinang nanyong dihide honyong.”²⁸Thiya isong ajyo donyong, “Ainyong owak ihandyo ohoi digyema ohoi egyemathik h’Ojok?” ²⁹Yesu etharang ajyo dosong, “Egyema n’Ojok nahoi: Iruhotho donyong, lathuk inyong asuluna.”³⁰Isong ajyori donyong, “Ainyong de aning ihandyo iye, ditehu ohoi ara ohoi iruk? Ainyong de ihandyo iye? ³¹Anyo nya omonye hohoi amana dihidyefo, iring negerorik inyong, ‘Esarak isong anyari thohide dinyo.”³²Thiya Yesu etharang isong, “Diri, diri, ikara nya Musa isarak ithai anyari thohide. Lalamonye nya isarak ithai anyari nadiri thohide.” ³³Aca, anyari n’Ojoki inyong naindu thohide dihap, esarak ahap esu. ³⁴Isong ajyori donyong, “Lahong, isarak dohoi anyyari ne juui.”³⁵Yaru ajyo dosong, “Nang anyari n’esu. Loindu donang; loindu donang, aang ahure oleng; loiruk donang, aang hoibotho ahibothit.” ³⁶Ti, anyahi nang ithai diri, ethuk ithai nang atehuna, ti, aang ithai iruk donang. ³⁷Othulo lesarak nang Lalamonye, oindu de donang; loindu donang, aang de acohoro adi.³⁸Anyo, aindu nang thohide, ikara dihandyo iring awak nang, ti, awaha no le, lonya asulu nang lo. ³⁹Awahan ne no le, lonya osulu nang lo, daang juk aboithe lolitho, th’ohothing honya isarak inyong do nang, ti, oindu de ithadocyo isog thahide ofaning lothoicuhit. ⁴⁰Aca awahan na Lalamonye ne, hijan othulo lotehu Olonyi, eruk donyong, owon de hesu karik ithadocye de inyong thahide ofaning lothoicuhit.⁴¹Ojudei ewiwinya, anyo, ajyo Yesu, “Nang anyari naindu thohide dihap.” ⁴²Isong ajyori, “Ikara Yesu lya re, lolonyi ho Yosefo, letek omonye karik ahathingi? Anga hathi ojyo inyong, “Aindu nang thohide dihap?”⁴³Yesu etharang, ajyo dosong, “Idehina ewiwinya dihiji hothai. ⁴⁴Aang othulo lobo loindu donang, ara kabong Omonye lonya osulu nang lo, ifihu inyong karik aindu inyong ithadocyo thahide ofaning lothoicuhit. ⁴⁵Igero ditha hohocorok, ‘Ityenio de Ojok ohothing bukulung.’ Lathuk ethairuna karik eyeyena th’Omonye, oindu de donang.⁴⁶Aang lobo latehu Omonye, arahari inyong loindu th’Omony, otehu Omonye. ⁴⁷Diri diri, loiruk. owon h’esu namanya mak.⁴⁸Nang anyari n’esu. ⁴⁹Anyo holethe monye anama dihidyefo, ayethi.⁵⁰Anyari ne aindu thohide dihap, donyau othulo tiibai amanya de mak. ⁵¹Anyari de nesarak nang dothai, inyong ahwan hindang, d’esu n’ahap.”⁵²Engere Ojudei dihiji hosong, aculuye elafere, “Angai owak othulo lya esarahina ahwan nanyong dohothai dinyo?” ⁵³Yesu ajyo dosong, “ Diri diri, ara kabong otholu onyo ahwan n’Olonyi l’Othulo karik amatha ahotho nanyong, aang ithai iwon hesu ditha hothai.”⁵⁴Lonyo ahiringo amatha ahotho hindang owon de hesu hamanya mak. Aindu nang de dang ithadocy thahide d’ofaning lothoiicuhit. ⁵⁵Aca ahiringo hindang, anyari nadiri, ahotho hindang amatha nadiri. ⁵⁶Lonyo ahiringo hindang, amatha ahotho hindang, owon de ditha honang, nang awon ditha honnyong.⁵⁷Iring asulak nang Omonye lomijo, nang esu th’Omonye, lonyo nang, owon de hesu, karik omanya de thonang. ⁵⁸Anyari ne naindu thohide dihap, ikara iring nanyo omonye, ayethi. Lonyo anyari na, isu de mak. ⁵⁹Ti, Yesu ajyo asang hune ahibu inyong ityenio di Sinagogue di Kapernaum.⁶⁰Thiya ohothifok honyong holwa, hoithairu arami hune, ajyori, “Ocame loko lo; ngai ocohi ethairuna inyong?” ⁶¹Yesu, anyo otek inyong th’ahwan hijan ohothifok honyong ewiwinyai arami hune, ajyo dosong, “Omoryo ithai arami hune?”⁶²Ie, angai ira ijahitha, ara dwo itehu ithai Olonyi l”Othulo olo dihide d’amaji nanya owonderek inyong? ⁶³Ohoile inyong ithasuyo, aang ahwan ohwadu aning nabo. Arami hacama nang dothai hune, isong ohoile karik esu.⁶⁴Dihide ahani ne, owoni homok hothai haang hoiruk. Aca atek Yesu hongai haang hoiruk karik ngai de ithanyangak inyong, ⁶⁵Inyong lo ajyo, “Th’arami thohune ajyo nang dothai, aang othulo locohi ainduna donang, ara kabong Omonye ohoeik donyong.”⁶⁶Th’arami thohune, angerori adi ohothifok honyong holwari; aang hodahai honyong. ⁶⁷Thiya Yesu ajyo d’ohothifok tomon larehai, “Aang ithai ti ingero adi dang, ingero ithai?” ⁶⁸Simone Petro etharang inyong, “Hobu, dongai ira ohoi ifwan? Iwon iye hocamitha h’esu namanya mak. ⁶⁹karik eruk ohoi, ohoi itek hijan iye othulo Oboithe Lodwa l’Ojok.”⁷⁰Yesu ajyo dosong, “Kabong nang anyimu ithai tomon lareha; lobo aboithe thothai awon ara omonyoroni?” ⁷¹Thene, acama tho Juda, lolonyi ho Simone Iskariot, aboithe tho tomon lareahi, lonya oindu ithanyangahina Yesu lo.

¹Diholu hasang hune bukulung, Yesu alo di Galilea, aang olo di Judea, anyo, owahi nya Ojudei attohoro inyong. ²Th’orii le, aindek nya ofaning lohittok l’Ojudei l’Epahuma th’Amonyori.³Ara olarok honyong hathi ajyori donyong, “Idehi amaji ne; ilo di Judea dotehu ohothifok hohoi egyemathik hehandyo iye. ⁴Aang othulo lehandyo aning nabo ara naang otehi, ara owak hijan inyong thotehi tuhudik dindak. Ara ihandyo iye asang hune, ithaithak ahwan dihap.”⁵Aca juk olarok honyong aang nya iruhi donyong. ⁶Yesu hathi ajyo donyong, “Kabong omiru hundang ofuni, awoni omiru hothai arabo juui. ⁷Aang tihai ahap oman, ti, oman nang, anyo, atek nang karik anyahi dindan hijan egyemathik hanyong omonyori.⁸Ifwo ithai d’ofaning lohittok l’Epahuna th’Amonyori, ti, aang nang alo d’ofaning le, anyo, kabong omiru hundang ocohini.” ⁹Athuhon nanyong acama arami hune dosong, esuka di Galilea.¹⁰Athuho nolarok afwan d’ofaning Lohittok, aindu inyong lo dang inden, kwong ohothing atehan. ¹¹Athifeyo inyong nya Ojudei d’ofaning lohittol le, ajyori, “Lonjang inyong?”¹²Obolo nya elafere n’elulungir h’ohothing th’arami thahanyong. Homok ajyori, “Inyong lo othulo loyyu. Homok ikoti ajyori, “Omonyong inyong lo, itharahojyo ahosi h’elulungir h’ohothing.” ¹³Ti, kabong othulo locama arami hanyong dindak th’abangi n’Ojudei.¹⁴Aindehi n’ofaning Lohittok engahunu, Yesu alo di Templo; aculuyo etyenio. ¹⁵Ojudei afalanga, ajyori, “Angai otek othulo lya bebe ahani? Kabong inyong l hoityenie.” ¹⁶Yesu etharang isong ajyo, “Etyenio hindang, ikara hindang, ti, no le, losulu nang.”¹⁷Ara lowak ehandyo awahan nanyong, otek de etyenio na, dia th’Ojok oindu dia acama nang th’ahwan thono hindang. ¹⁸Locama th’ahwan thanyong, lodithifeyo abolori nanyong holefeng, ti, lothifeyo abolori no losulak inyong, lodithifeyo abolori nol’osulak inyong, othulo lya ladiri, laang aangan nabisan thothonyong.¹⁹Kabong ithai Musa isarak oyalu? Ti, aang lobo lothai loindafaitho oyalu. Anyo iwak ithai attohoro nang?” ²⁰Ara elulung etharang, “Iwon iye h’ohoile lomonyong. Ngai owak iye attohoro?”²¹Etharang Yesu ajyo dosong, “Ehandyo nang egyema aboithe, ara ithai ifalanga thonyong. ²²Esarak ithai Musa abosio (ikara hijan abosio na tho Musa, ti, th’ohohonyo), th’operohothi oithacofe, ithai ibosyo othulo.²³Ara obosye othulo d’operohothi oithacofe dobis oyalu lo Musa, anyo ingere ithai dithaijyo honang othulo d’operohothi oithacofe? ²⁴Hoikanyo thajahitha, okanye ibisai.”²⁵Homok hosong tho Yerusalem, ajyori, “Ikara inyong lya onde lotahitha isong ditohoro lo?” ²⁶Idorotho, ocama arami hanyong dindak, ti, aang isong ojyori aning nabo donyong. Ikara hijan aang ohoindefak h’ohothing hotek hijan Kristo lya, dia ahani bai? ²⁷Iteh ohoi ti thongai inyong lo. Ti, ara Kristo oindu, aang othulo lotek ijan inyong lo thai.”²⁸Thiya Yesu ekor di Templo, ityenio, ajyo, “Itek ithai nang, karik itek ithai thongai aindu nang.aang nang aindu th’ahwan thono hindang, ti, owon diri losulu nang; aang ithai itek inyong ²⁹Atek nang inyong, anyo, inyong osulu nang.”³⁰Owahi nya endafaitho inyong, ti, kaang othulo lothin inyong, anyo, kabong omiru honyong ocohini. ³¹Ti, ohothing holwari ditha elulung eruhi donyong, ajyori, “Ara Kristo laindu, oindu de ihandyo egyemathik hafalangai halwa thahathuk onde lya ehandyo hune.” ³²Ethaninguni Ofarisei elulungir h’ohothing ocamai arami hune tho Yesu; ara hofadiri hohittwak karik Ofarisei asulahini ohoigyemak hosong dindafaitho inyong.³³Yesu ajyo, “Esuka nang dihiji hothai orii tiibai, nang de alo dolosulu nang. ³⁴Ithifeyo ithai de nang, ti, aang ithai nang irimak; amaji nanderek nang nya, aang ocohi ithai afwan diya.³⁵Ojudei acamai dihiji hosong, “D’amaji nani de olo othulo lya naang ohothai irrimahinerek inyong?” Olo de d’amaji n’athurohunu dihiji h’Ogriki karik etyenio Ogriki? ³⁶Ainyong ocame lojyo inyong, ‘Ithifeyo ithai de nang, ti, aang ithai nang irimak; amaji nanderek nang nya, aang ocohi ithai afwan diya’?”³⁷Thene dicuhit h’ofaning Lohitok, Yesu, awetha thahide, ajyo th’ekor, “Ara ibotho othulo lobo ahibothit, thoindu donang dimatha. ³⁸Othulo leruk donang, iring najararik amanini, ongetta de owori h’ahari h’esu thohohye honyong.”³⁹Ti ocama arami hune th’Ohoile, tholonya kaang ohothing hoiruk donyong ira ifothuna; kabong nya isarahini Ohoile le, anyo, kabong nya ithabolorye Yesu.⁴⁰Ethaninguna n’elulungi hamok ocamitha hulya, ajyori, “Othulo lya diri ohocoroni.” ⁴¹Homok ajyori, “Kristo lya.” Ti, homok ajyori, “Oindu Kristo tho Galilea?” ⁴²Aang amaninihio ojyori, oindu de Kristo th’onyakwaria ho Davide tho Bethlehem, amiji nanya owonerek Davide?”⁴³Thene, ebwai elulungi th’arami thahanyong. ⁴⁴Ira homok indafaitho inyong, ti, kaang othulo lothin inyong.⁴⁵Thiya, ohoigyemak anyahuni da Fadiri hohittwak karik Ofarisei, enyanyahahini isong, ara isong ajyori d’ohoigyemak hulya, “Anyo naang ithai iyanu inyong?” ⁴⁶Ohigyemak etharang, “Kabong lobo othulo locama iring onde lya.”⁴⁷Ara Ofarisei etharang isong, “Athuhi dang ithai ethadwalyo?” ⁴⁸Athuk lobo th’ohoindefak h’ohothing eruhon donyong, dia lobo tho Ofarisei? ⁴⁹Ti, elulung n’ohothing naang otek oyalu, afyetha.⁵⁰Ara Nikomedo (lobo l’Ofarisei, lonya alo operok hulya do Yesu th’aharie lo) ajyo, ⁵¹“Okanyo oyalu lohothai othulo kabong ithaninguni thonyong, karik atehan, ehandyo inyong ainyong?” ⁵²Isong hulo etharang ajyori donyong, “Iye dang tho Galilea? Othifeyethek ara ithai itihyo, aang ohocoroni loindu tho Galilea.⁵³Thene, ohothing fodok athwuro, ngai alo dihang honyong.

¹Yesu alo di donge h’Oilves. ²Thamoithe berien, alo di Templo; ohothing dang afuni; awoni dihap, etyenio ohothing. ³Ohoigerok karik Ofarisei eyanu, dihiji hosong, athulo nedefuni h’othulo.⁴Ajyori donyong, “Ohoityenani, athulo na endfuni h’othulo lobo. ⁵D’oyano, ifahak ohoi Musa thomirye ohothing hulya th’omorik. Ainyong ijyo iye d’athulo ne? ⁶Ocamai ahani olohrik Yesu dorimak isong epal donyong; ti, Yesu adula, egero dihap th’ohifalai tholonyong.⁷Etotohio nasong efiyo inyong, adotho Yesu thahide ajyo dosong, “Lobo thothai lokabong hoiyau, thomirok omorwong ohithemoni donyong.” ⁸Koti, adula, egero dihap th’ohifalai tholonyong.⁹Ethaninguna nasong, afwoi adi abok abok, oculuyo th’omarwak. Dicuhit, Yesu, apwak Yesu hamaring, h’athulo nadwa indefuni, alihanini dihiji na. ¹⁰Yesu adotho thahide, ajyo donyong, “Athulo na, hojang ohothing hojyo eyau iye hulo? Owon diri juk aboithe lokaang hojyo eyau iye?” ¹¹Inyong na ajyo, “Aang juk aboithe, Hobu.” Yesu ajyo, “Aang nang dang ajyo eyau iye. Ilo, hoinyak iyauna koti.”¹²Yesu acama dosong ajyo, “Nang afangan n’ahap; lothifoitho nang, aang odaha dith’omudwe, ti, owon h’afangan n’esu. ¹³Ofarisei ajyori donyong, “Iye inyahi ahwan nahoi hijan ibis iye, aang onyahi hijan ibis iye diri.”¹⁴Yesu etharang ajyo dosong, “Juk ethaithak ahwan hindang hijan nang ngadi, obis; owon ara diri. Atek nang thongai aindu nang, karik dingai alo nang. ¹⁵Ikanyo ithai arami iring ohothing. Aang nang akanyo arami h’othulo loboling. ¹⁶Ti, ara akanyo nang, akanyo hindang owon ara nadiri, anyo, ikara nang hamaring, ti, awon nang h’Omonye losulu nang.¹⁷Aa, karik igero ditha h’oyalu lothai hijan ethaithahina abisan n’ohothing arehai owon ara nadiri. ¹⁸Nang inyong lanyahi arami hundang th’ahwan thono hindang, karik Omonye losulu nang anyahi abisan n’arami hundang.¹⁹Isong ajyori donyong, “Lojang Lemonye?” Yesu etharang, “Aang ithai itek, nang dia Lalamonye; ara dwo itek ithai nang, ira ithai itehan Lalamonye dang. ²⁰Ocama arami hune dikoro, ahibu inyong ityenio di Templo; kabong othulo lendafaitho inyong, anyo, kabong omiru honyong ofuni.²¹Ajyo ikoti dosong, “Nang lalo adi, ithifeyo ithai nang de, ara ithai iye ditha heyatha hathai. Amaji nanderek nang nya, aang ocohi dothai difuna diya. ²²Ara Ojudei ajyori, “Ottohok de ahwan nanyong?”²³Yesu ajyo dosong, “ifunu ithai tholohop, nang aindu tholohide. Ithai h’ahap na, ikara nang l’ahap na. ²⁴Inyong na, ajyo nang iye ithai de dith h’eyatha hathai, ara aang ithai iruk hijan AWON NANG, iye ithai de ditha eyatha hahtai.²⁵Ara isong ajyori donyong, “Iye ngai?” Yesu ajyo dosong, “Arami hacama nang thoculwe, ²⁶Awon nang hasang olwarai dicama karik dikanyerek ithai.Ti, inyong losulu nang, owon diri; asang hethaningu nang thonyong, isong anyahi nang d’ahap. ²⁷Aang isong hulo hotek hijan ocama dosong arami h’Omonye.²⁸Yesy ajyo, “Ara ithai hethuk adohohina Olonyi l’Othulo, ifunu ithai de itehan hijan AWON NANG, karik aang aning nehandyo nang d’ahwan hindang. Acama nang asang hune, iring netyenierek nang Omonye ²⁹Losulak nang lo, owon honang; kabong hoidehi nang hamaring, anyo, ehandyo nang juui aning nethamunoyo inyong. ³⁰Dihide ho Yesu acama nasang hune, eruhi ohothing holwari donyong.³¹Yesu ajyo d’Ojudei hathuk eruk donyong, “Ara irasa ithai ditha h’ocame hindang, iwon ithai de diri ara ohothifok hundang.” ³²Karik itek ithai de eladiri; ohohi de ithai eladiri th’efitha. ³³Isong etharang inyong, “Ohoi onyakwaria h’Abramo, kabong ohoi iwonderek ara ongacani h’othulo lobo; angai ijyo iye, ‘ohohi de ithai eladiri th’efitha’?”³⁴Yesu etharang isong, “Diri, diri ajyo nang dothai, “Ohoiyauni, ongaca l’eyau.” ³⁵Aang ongaca orasa dihang mak. ³⁶Inyong na, ara ohohi ithai Olonyi, ohohini ithai de diri.³⁷Atek nang hijan ithai onyakwaria h’Abramo; iwak ithai nang attohoro, anyo, awang amaji n’ocame hindang thothothai. ³⁸Acama nang aning natehu nang ha Lalamonye, ara ithai dang ihandyo aning nethairu ithai tho lethemonye.³⁹Isong etharang, ajyori donyong, “Omonye lohoi Abramo.” Yesu ajyo dosong, “Ara ithai oduring h’Abramo, ira ithai ihandyo egyemathik h’Abramo. ⁴⁰Kombwo, thenene, ithai hoiwak attohoro nang, othulo lanyahi ithai arami hadiri hethairu inyong th’Ojok. Kabong Abramo jhandyo ahani. ⁴¹Ihandyethek egyemathik h’omonye lothai.” Isong ajori donyong, “Aang ohoi nya oyisuni th’epal than’arwanga n’omonye, h’ahathingie hahoi. Iwon ohoi h’Omonye aboithe: Ojok.⁴²Yesu ajyo dosong, “Ara dwo Ojok Lethemonye, ira ithai nang imuno, aca th’Ojok aindu nang, aca nang lo dini; aca kabong nang dang aindu th’ahwan thono hindang, ti, inyong osulu nang. ⁴³Anyo aang ithai ithenu ocamitha hundang? Kode ngona de aang ithai ithairu ocamitha hundang. ⁴⁴Ithai ho lethemonye, omonyoroni lo; iwak ithai ehandyo asang hawak lethemonye. Inyong nya ohottohoni thoculwe; ida arami hadiri, anyo, aangi arami hadiri thothonyong. Ara ladwala, ocama thoyet honyong, anyo, inyong lo odwalani karik omonye l’adwala.⁴⁵Inyong nara, iuk acama nang arami hadiri, aang ithai iruk donang. ⁴⁶Ngai thothai ocohi ajaran eyau nang? Ara acama nang arami hadiri, anyo aang ithai nang hoiruk? ⁴⁷Othulo lowon ara l’Ojok, ithairyo ocamitha h’Ojok; aang ithai ithairyo isong, anyo, ikara ithai h’Ojok”⁴⁸Ojudei etharang ajyori donyong, “Aang ohoi diri ithen dijaran iye othulo lo Samaria karik hijan iwon iye h’ohoile lomonyong?” ⁴⁹Yesu etharang, “Aang nang awon h’ohoile lomonyong, ti, ethahabuyo nang Lalamonye. ara ithai nang aang hoithahabuyo.⁵⁰Aang nang athifeyo abolori hindang; owon lothifeyo, akanyo. ⁵¹Diri, diri, ajyo nang dothai, lendafaitho ocame hindang, aang otehu aye.”⁵²Ojudei ajyori donyong, “Thenene, itek ohoi hijan iwon iye h’ohoile lomonyong. Aye Abramo h’ohocorok; ti, ijyo iye, ‘ara lendafaitho ocame hindang, aang opil aye.’ ⁵³Aang iye ibolo th’omonye lohoi Abramo, lathuk aye, ibolo iye? Aye dang ohocorok. Ara ngai iwak iye ehandyo ahwan nahoi?”⁵⁴Yesu etharang, “Ara ethaboloryo nang ahwan hindang, aang abolori ne. Lalamonye inyong ithaboloryo nang – lejyo ithai Ojok lothai. ⁵⁵Kabong ithai itek inyong, ti, atek nang inyong. Ara ajyo nang kodien, ‘Aang nang atek inyong,’ era nang ijahitha ithai, odalani. Ti, atek nang inyong karik nang endafaitho ocame lonyong. ⁵⁶Amuno Abramo loithemonye, atehuna nanyong ofaning hindang. Atehu karik amuno.”⁵⁷Ojudei ajo donyong, “Kabong oyingathik hohoi iwasi athomone miyet, ara iye ijyo etehu iye Abramo?” ⁵⁸Yesu ajyo dosong, “Diri, diri, ajyo nang dothai, “Kabong Abramo owon, AWON NANG. ⁵⁹Isong hulo ahuro omorik, omiryerek inyong, ti, Yesu edema, thiya alo adi tho Templo.

¹Awawararu nya Yesu adith’amiji. Diya, atehu inyong lo othulo lonya oisuni ara lathuk angodo. ²Ohothifok honyong efiyo inyong, “Ohoityenani, hangai eyatha isarak inyong aisuna ara ongodoni? Eyatha hanyong dia h’omonye dia h’ahathingi?”³Yesu etharang, “awangi arami h’eyatha h’omonye dia h’ahathingi th’angodo nanyong. Oisuni inyong lo ara lathuk angodo, d’otehunerek abolori n’Ojok d’ethayiji nanyong.” ⁴Howon ara afaning ahani, igyemathik holonya osulu nang lo th’adodoro. Aharie naindu naang ocohi ithai egyemarik. ⁵Hawon nang dihap, nang afangan n’ahap.⁶Engohina no Yesu ocame lya, amithak inyong lo ahamilak dihap, enyonyonu amotong, eduhu, amenyok dihonde h’ongodoni, ajyo, ⁷“Ilo ilalaye ahomong nahoi di jor ho Siloam (ojyo ocame lya – asulahina.” Ongodoni lo alo ilalayo ahomong nanyong, anyahu thiya ara lamijo.⁸Atehuna n’ohothing hoisuka iyindehai d’ongodoni lamijo lya, emomongai ajyori, “Ikara othulo lo woniatho diyihoi emomojo lo lya?” ⁹Homok ajyori, “Inyong lya.” Ti homok ajyori, “Ikara inyong lya. Ihielaru inyong.” Inyong lo olefeng ajyo, “Inyong nang lya.”¹⁰“Ti ainyong isak iye atehuna thenene?” Isong hulo efiyo inyong. ¹¹Inyong lo etharang isong, “Eharuyo othulo lara Yesu lo amotong th’ahamilak thahanyong, amenyok dihonde honang; ajyo donang, ilo ilalaye ahomong nahoi di jor ho Siloam. Alo nang diri, nelalayo, nang atehu.” ¹²“Lojang inyong Yesu,” isong hulo efiyo. “Aang nang atek,” inyong etharang''.¹³Ohothing hulya eyaru ohongodoni lamijo lo d’Ofarisi. ¹⁴Ofaning leharuyerek Yesu amotong th’ahamilak thanyong lo ofaning lodwa l’Ojok. ¹⁵Ofarisi efiyo othulo lamijo lya koti hijan angai otehu inyong. Inyong lo anyahi isong, “Amenyok Yesu amotong dihonde honang; nang elalayo ahomong hindang di jor ho Siloam; thiya nang atehu.”¹⁶Homok th’Ofarisi ajyori, “Othulo lehandyo arami hune lya, ikara th’Ojok oindu. Ara ikara ahani anyo aang inyong othifoitho arami habis h’ofaning lodwa l’Ojok?” Homok th’Ofarisi ajyori, “Aang ohoyauni oco ehandyo asang hafalangai iring hune.” Th’orii le, ebwa ohothing. ¹⁷Ofarisi koti efiyo ohongodoni lamijo lya, “Ijyo iye esarak othulo lya iye atehuna; oyyu, ainyong ocame lohoi d’ethamijo nanyong iye?” “Inyong lo ohocoroni,” ohongodoni lamijo lo etharang. ¹⁸Aang ohobolok h’Ojudei howak eruhuna hijan ongodo nya othulo lya; ti thene ne atehu. Isong hulo koti elonguni lomonye karik nahathingi h’othulo lonya ongodo lya.¹⁹Ohobolok h’Ojudei efiyo isong, “Lethelonyi lya? Ijyo ithai oisuni inyong lo nya ara lathuk angodo. Ara thanathai, angai oindu inyong koti imijo? ²⁰Omonye karik ahathingi etharangi, “Itek ohoi hijan oitho lohoi lya. Ohoi koti itek hija iisu ohoi inyong lo ara lathuk angodo. ²¹Aning naang ohoi itek angai otehu inyong karik ngai isarak inyong atehuna. Ifiyatha inyong; abolo inyong lo. Inyong olefeng tho itharanga ithai.²²Acama no lomonye karik nahathingi h’othulo lya ahani, th’abangi thon’ohobolok h’Ojudei. Ojyo isong hulo leruhu hijan Yesu ithamijo onde lya ongaterek de adi tho Sinagogue. ²³Arami hune isarak lomonye karik nahathingi h’onde lonya ongodo lya ajaran, “abolo inyong lo, ifiyatha inyong.”²⁴Operohothi oitharehe, isong koti elonguni othulo lonya oisuni ara ongodoni lya, ajyori donyong, “Ipithai dihithemi h’Ojok dinyahina arami hadiri! Itek ohoi hijan othulo lesarak iye atehuna lya ohoyauni.” ²⁵“Aang nang hatek, ara inyong ara ohoyauni,” othulo lonya ongodo lya etharang isong. “Aning natek nang, angodo nang nya, ti th’orii lya, atehu nang.”²⁶“Ainyong ihandyo dohoi?” isong efiyo inyong. “Angai isarak inyong iye atehuna?” ²⁷“Athuk nang ithai anyahina,” inyong lo etharang. “Aang ithai ithaningio. Anyo koti iwak ithai ethayirio; dia iwak ithai awonan ara ohothifok honyong?”²⁸Isong hulo afiyethak inyong, ajyori, “Iye ohothifoni l’onde le; ohoi ohothifok ho Musa. Iring d’onde lecama iye lya, ²⁹Itek ohoi hijan ocama Ojok do Musa. Ara arami h’onde lobo le, aang ohoi hoitek thongai oindu inyong!”³⁰Othulo lamijo lya etharang, “Aisong arami awalihio hune! Ijyo ithai aang ithai itek thongai oindu othulo le; ti erasak nang atehuna.” ³¹Itek ithai hijan aang Ojok hoithaningio ohoyak; ithairio arami h’ohothing hobang inyong karik hoihandio donyong asang hawak inyong isong thoihandye.³²Gee th’ohohonyo, kabong othulo lobo lesarak othulo lonya oisuni ara lathuk angodo th’omijye. ³³Ara ikara th’Ojok oindu othulo lya, aang hoira ihandyo arami hune.” ³⁴Isong hulo etharang, “Aisuni iye; ara iye ibolo ara ohoiyauni – ara iye koti ithemyo etyenio ohoi?” Ara isong angararik inyong adi tho Sinagogue.³⁵Ethaninguna no Yesu arami hune, arimak othulo lonya isarak inyong thomijye lo, efiyo inyong, “Iruk iye d’Olonyi l’Othulo?” ³⁶Othulo lya etharang, ‘Inyahi nang inyong lo ngai, deruk nang donyong!” ³⁷Yesu ajyo donyong, “Eruk atehuna inyong; inyong lecama iye donyong lya. ³⁸“Eruk nang, Hobu;” Othulo lya ajyo, “arigongo nang dihap dihithemi hohoi, Yesu.”³⁹Yesu ajyo, “Aindu nang dihap dine dikanyo arami; dotehu ongodok, ara ohothing hotehu angodo.” ⁴⁰Ethairu homok h’Ofarisi honya owoni d’orii h’ocamarik Yesu, efiye inyong, “Itek ohoi aang ocame lohoi lya theene ojyo ohoi dang ongodok?” ⁴¹Yesu etharang, “Ara ingodo ithai kedien, aang ithai ira iyauna; ti ajaran nathai itehu ithai, inyong nesarak ithai awonan ara ohoiyak.

¹Yesu etharang, “ Anyahi nang ithai arami hadiri: othulo laang ojinga di bongit thol’oyilangit, alangitha thoyihoi tholobo hama, ohoholani lya.” ²Othulo lojinga dibongit thoyihet tholobis, ohoyohoni lya l’engaka.³Onyahi ohoikyani l’oyihiet donyong oyihoi lobis; ithairu engakaha inyong th’omurut, ara lelongo isong th’ofuretho, karik ara leriyaru isong difara. ⁴Ara lathuk eruna engakaha dindak, olo inyong lo ahithemi nasong, ahibu isong athiforo inyong; otek engaka inyong th’omurut.⁵Aang engakaha othiforo othulo lobo caa. Kombwo, ongerori adi th’othulo lolifa; aang h’otehi omurut lonyong. ⁶Onyahi Yesu isong arami hune th’erijaru; Yaa, awang otehi tuhudik ainyong onyahi isong erijaru ne.⁷Yesu ajo koti, “Anyahi nang ithai arami hadiri; nang oyihet l’engaka. ⁸Hulya bukulung hofuni ahithemi hindang hulya, ohoholak karik ohohorok; awang engakaha ithairio isong.⁹“Nang oyihet. Lojingu tholo nang, ithalwahunu de. Ojingu dithwa, ajingu dignwa, arimak amaji nanyerek.” ¹⁰Ara ohoholan laindu, owak ahoholio, owak atohoro karik owak etharohojo. Aindu nang, diwon ithai h’esu – esu nefut.¹¹“Nang ohoyohoni loyyu; leruhok aye th’engakaha tha hanyong.” ¹²Ara othulo lomaje, laang ara ohoyohoni, karik laang enagkaha owon ara hanyong, latehu owo, idehi engakaha, angero; Yaa, ainyong ihandio owo? Indahaitho, athurio engakaha. ¹³Ongero othulo lomaje amajo; Omaje inyong lo amajo. Awang hoifu engakaha.¹⁴Nang, zahuan, inyong ohoyohoni loyu. Atek nang akero hundang holefeng, ara akero hundang holefeng atehi nang, iring natehari nang lala Monye, karik lala Monye atek nang. ¹⁵Nang ohoyohoni loyyu; iring otek nang Omonye; Atek nang dang Omonye. Iring na atek nang engakaha hundang, isong dang atek nang; karik nang eruhu aye thosong. ¹⁶Owoni engakaha hundang hawang th’obore. Owak eyanu nang isong dibore dang. Ithaninguni omurut hindang. Ofuni de iwonan abore aboithe, ohoyohoni aboithe.¹⁷Omuno nang Omonye, th’arami theh’eruhorik nang aye dirimahinerek esu koti. ¹⁸Awang othulo locohi eyaru esu hindang adi tho nang. Nang olefeng eruhu aye. Eruhu nang aye th’ahwan thono hindang. Enyahu nang esu hindang th’ahwan thono hindang. Arami hune hathuk nang Lalamonye anyahina thoihandie.¹⁹Awon koti nya ebwa n’ohothing th’ocamitha tho hulya. ²⁰Ojori nya holwa hosong, “Owon Yesu hoywa! Odohoitho odonge! Ainyong ija ahani ithaningierek ithai arami hanyong?” ²¹Homok ajori, “Awang othulo loywa hocama ahani! Angai ocohi d’othulo loywa esarahina othulo lathuk angodo thomije, atehu?”²²Orii le, ohiribo. Owon amuno n’ofaning lesorio d’Ojok di Templo di Yerusalem. ²³Owon Yesu th’orii le d’oyirik la Tempolo lo ilongoi th’ofure tholo Solomone. ²⁴Osuduhunu ohothing bukulung diker honyong, efiye inyong, “Lwai kanu ilo iye ithasukayo ohoi kwong atehan? Inyahi ohoi arami hadiri: iye ohoithalwahani (Messiah)?”²⁵Yesu etharangio, “Athuk nang ithai anyahina. Yaa ti awang ithai iruk arami hundang. Asang hehandio nang th’adwaran thana Lalamonye, isong ithaithak hijan nang ngai.” ²⁶Awang ithai de ti iruk nang. Aang ithai nang iruk, anyo ikara ithai engaka hundang.²⁷Engaka hundang ithaninguni omurut hindang; atek nang isong, isong nang atek. ²⁸Esarak nang isong esu n’awang ecuhit karik awang isong de oye kwong. Aang othulo locohi ahoruna isong thonang.²⁹Aning nathuk nang Lalamonye esarahina, obolo de th’asang bukulung nawang loboling othulo locohi eduhuna tho hinang h’Omonye. ³⁰Omonye karik nang, ira ohoi oboithe. ³¹Thiya ohothing hulya ahuroi omorik, ara homirierek inyong.³²Yesu ajo dosong, “Ehandio hindang asang hayyu dihithemi hothai, hesarak nang Omonye thoihandye, isong isarak ithai awahan amirio mang th’omorik?” ³³Ohothing etharangio, “Awang ohoi iye imirio th’omorik th’asang tha hayyu thahehandio iye; iwak ohoi iye amirio th’ocame tholo hoi lomonyong dihithemi h’Ojok! Iye othulo ijahani ara iye iwak ehandio ahwan ara Ojok?”³⁴Yesu etharangio, “Igero ditha h’amaninihio hathatha arami h’abisan hijan ojo Ojok, “Ithai ojohi.” ³⁵Itek ohoi hijan arami hacama abibia, arami hadiri mak; karik ilongo Ojok ohothing ara ojohi ohothing hathuk inyong ethafothohina osaritha honyong. ³⁶Tholo nang, anyimu nang Omonye, efahu nang dihap. Yaa angai hathi ijo ithai nang Ojok thajaran thono hindang nang Olonyi l’Ojok?³⁷Heruhotho nang, ara awang nang ehandyo asang hawak nang Lalamonye thoihandye. ³⁸Yaa ti, ara ehandio nang isong, juk ithai awang nang hoiruk, irutho asang hayyu hehandio nang hune, ditek ithai gelere, dasang fodok hijan Lalamonye loditha honang, nang ditha ha Lalamonye. ³⁹Koti ohothing hulya awak endafaitho inyong; Yesu ibulungusaru tho has hosong.⁴⁰Yesu anyaha; alangitha owor lo Yordano; alo d’amaji nanya isarierek Yoane Battista abatisimo na; esuka dia. ⁴¹Afuni ohothing olwarai donyong. “Kabong nya Yoane ihandio asang hafalangai,” isong hulo ajori, Arami ti bukulung h’othulo lya hacama inyong arami hadiri. ⁴²Ara ohothing holwa d’amiji nya eruhi donyong.

¹Isuka nya Lazaro h’ahanerok, Maria ho Martha, di Bethani. Diya, Lazaro nya amwai. ²“(Maria nya, inyong nanya obuhok elethang dihejeha h’Ohobu, efufusio th’ohofir thohothohu honyong na. Olai lonyong Lazaro, lonya ojori odiha lo.”) 3 Ahanerok efahak ahuthuk do Yesu, “Hobu, odiha loimotte.”³Ahanerok efahak ahuthuk do Yesu, “Hobu, odiha loimotte.” ⁴Ethaninguna nya no Yesu arami hune, ajo, “Awang adiha nya ithayeyo Lazaro; owon adiha ne de ara neyanu ethahuyo d’Ojok; tholo nyong de ifothu Olonyi l’Ojok ethahuyo.”⁵Omuno Yesu Martha, ahani karik Lazaro. ⁶Yaa juk ethayiru Yesu amwai no Lazaro, akarihi th’operok arehai. ⁷Thiya Yesu ajo d’ohothifok honyong, “Enyaha di Yudea.”⁸“Ohoithayeyenani,” ohothifok honyong etharangak inyong, “Ayindek iye dwo ohothing hule amirio th’omorik; ara iye ijo koti inyaha dia?” ⁹Yesu ajo, “Owon ofaning h’oriihio tomon lareha. Dia ikara ahani?” Lodaha th’afaning, awang hoiboso; otehu th’afangan than’ahab.¹⁰Ara ti odaha th’aharie, iboso, anyo, awang afangan. ¹¹Ocama Yesu ocame lya afonik, “Othuk omotte lohothai, Lazaro, ajothoro. Alo nang de dithahenyuna inyong th’ajoo.”¹²Ohothifok honyong etharangi Yesu, “Ara ajoothoro, Hobu, ohenyu de ara loyyu.” ¹³Ajoothoro ne thono Yesu, ojo athuk Lazaro aye. Ara ohothifok honyong ajo ngona ajoo hadiri. ¹⁴Yesu hathi anyahi isong gwo, “Aye Lazaro.¹⁵Th’arami thahathai amuno nang. Alama nang thonyong d’orii lya, diruk ithai. Hafatha donyong ¹⁶Tomaso, lonya ilongoi ara Didimo (ocame lojo oheritha), ajo d’ohothifok Yesu ho daha honyong, “Hafatha bukulung, defwo iiye ho Yesu dia.¹⁷Edwongon no Yesu di Bethani, orimak athuhi anuhahina Lazaro. Eyaru operok arangwan dihab. ¹⁸Awang nya Bethani olama tho Yerusalem. ¹⁹Afuni Ojudei olwarai dinyohio Marta karik Maria d’aye no Lazaro, olai losong. ²⁰Ethaninguna no Marta hijan Yesu ledwong, arengero dikuboitho honyong, ahibu Maria opwak dihang.²¹awang Lazaro ira iiye.” ²²Yaa ti, atek nang, juk thenene, ocohi d’Ojok disarahina iye aning nefiyo iye thonyong ²³“Ohenyu de loilai hesu,” Yesu anyahi ajo do Marta.²⁴“Atek nang,” Marta itharangat Yesu, “oindu de ihenyuna d’ofaning lecuhorit ahab.” ²⁵Yesu ajo do Marta, “Nang ebuhuna karik esu. ²⁶Loiruk do nang, juk oye, isu de. Lesu, eruk do nang, awang hoye kwong. Iruk iye arami hune?”²⁷“Aa, Hobu,” Marta etharang, “Eruk nang hijan iye ohoithalwahani, Olonyi l’Ojok, lonya oindu di hab.” ²⁸Athuhon no Marta acama ho Yesu, alo. Alo ilonguna, ahani Maria, arakang, dicama honyong. ²⁹Ethaninguna no Maria ahani elongo inyong, adotho kwak, ewawar dikuboitho honyong.³⁰(Th’orii lya, kabong Yesu hedwong dihiji h’amiji. ³¹Adotho no Maria dinden ekuboitherek Yesu, adotho ohothing fodok hofuni di nyohe athiforoi inyong. Ojori ngona dihilame olo dikor. ³²Edwongon no Maria do Yesu Karik atehuna nanyong Yesu, aboco apwaharu dihejek ho Yesu. “Hobu,” inyong na ajo, “Ara dwo iwon iye dine, awang lalalai ira iiye.”³³Atehuna no Yesu Maria ekoron karik ekoron n’Ojudei fodok hofuni di nyohe, athino othaji lo Yesu bebe. ³⁴“Dingai inuhak ithai inyong?” inyong efiyo isong. “Iwong idoro, Hobu,” isong etharang. ³⁵Yesu ekor; Ehyo honyong abuhunu.³⁶Ojudei ajori, “Idorotho angai obolo amuno nanyong do Lazaro.” ³⁷Homok thosong ajori, “Ara ethamijo othulo lya ongodoni, awang ti hoira isarahina Lazaro th’awang hoye?”³⁸Yesu dihide h’amijan n’othaji lonyong bebe ne, alo dihilame ha Lazaro. Ahilame nya ahulom nemuho th’omorwong. ³⁹Yesu ajo, “Iduhuna amorwong ne adi.” Marta, nahani h’ohoyani Lazaro, ajo, “Hobu, th’orii lya, amuyak ahwan na Lazaro; ara operok honyong arangwan dihilame.” ⁴⁰Yesu ajo do Marta, “Kabong nang anyahi ithai hijan ara iruk ithai, itehu ithai de ohujon n’Ojok.”⁴¹Eduhu isong hulo amorwong adi. Yesu amijo dihide, ajo, “Monye, humo, dithaningio hohoi nang. ⁴²Atek nang berien hijan ithaningio iye nang de; acama nang ahani, diruk elulung nalihak nang ne, hijan iye nya ifahu nang.”⁴³Diholu h’acama no Yesu arami hune, ajo inyong lo bebe, “Lazaro, iwong didak.” ⁴⁴Ohoyani aindu didak, ahejek karik ahas hanyong ara hathora th’ahilyen; imuho dang ahomong nanyong th’ahilyen. Yesu ajo dosong, “Olahahina Lazaro; thoilo.”⁴⁵Ojudei olwarai hofuni dinyohio Maria, hatehu ainyong ihandio Yesu, eruhi donyong. ⁴⁶Homok thosong afwoi dinyahina Ofarisi ainyong ihandio Yesu.⁴⁷Ofarisi karik ohoithamojok awoniari d’oputet. Athuhon nasong ocame, ajori, “Ainyong de ehandio? Owon othulo lya hethamijanitha olwarai. ⁴⁸Ara elahi inyong ahani, iruk de ohothing fodok donyong, ohothing ho Roma afuni iyaru amaji karik amiji nahothai.⁴⁹Lobo th’ohithamojok hohitwa, lara Kaifas, ajo dosong, “Awang ithai itek aning nabo. ⁵⁰Ara thanathai awang ithai itek hijan osiru d’othulo aboithe diiye th’ohothing thoholwai, didehina amiji fodok thoingohunu.⁵¹Awang Kaifas ongau ocame lya thohu honyong. Ocama arami hune, anyo, owon inyong lo ara ohoithamojoni lohitto loyinga le. Ocorok hijan oye de Yesu dithalwahuna amiji. ⁵²Ikara th’amiji hamaring; ocorok inyong lo ahani, doindu Yesu isuduhuna olonyirok h’Ojok hathuk athurohunu, athunak ara aboithe. ⁵³Th’ofaning le adihithemi, owak isong hulo arimahina oyihoi lo ithayeyere Yesu.⁵⁴Th’omiru hule, awang Yesu holeyo dihithemi h’Ojudei; alo adi thiya dith’amiji, thiya alo dith’ofara iindehai d’amiji nelongoi ara Efraim. Esuka diya hoh’othifok honyong. ⁵⁵D’omiru hule, aiindek ofaning l’ehuma n’Ojudei nelongoi ara “Passover” na. Afwoi ohothing fodok thath’amiji di Yerusalem dithaliborio ahwandek.⁵⁶Othifeyo isong hulo Yesu th’orii le. Asuduha nasong di Tempolo, efifiai ahwandek, “Ainyong igigilo ithai? Awang de Yesu hoindu d’ofaning l’ehuma lya? ⁵⁷Th’orii le athuk Ohoithamojok hohitwa karik Ofarisi anyahina hijan, othulo lotek amaji no Yesu, thoinyahi, dindefunere inyong.

¹Operok inde dihithemi h’ofaning l’amuno l‘ehuma, orimak Yesu di Bethani, dihang ha Lazaro, lonya ithabuhu Yesu th’oye lo. ²Dia, amarahini Yesu anyari. Maria ehuhumak Yesu anyari ne, anye isong ho Lazaro. ³Ofaning le, eduhu Maria elethang thoihutye tholo hittok, abuhok di hejek ho Yesu, efufusio th’ohofir thohotho hu honyong.⁴Lobo aboithe th’ohothifok ho Yesu, Yuda Iskariot, lonya oindu ithanyangahina Yesu lo, ajo, ⁵“Irahi dwo ithanyangahina elethang ne, enyangahinerek anyari d’ohoicanak.” ⁶Ajo Yuda ahani, ikara diri owak alwahio ohoicanak. Inyong lo ohoholani; Inyong indafaitho akoro n’ohothifok ho Yesu, anyo thiya, iring owak inyong.⁷Yesu ajo, “Idehina Maria h’attitto hanyong d’ofaning l’onuhierek nang. ⁸Ithai de h’ohoicanak isuka. Ti, ikara nang de lo isuka hothai juii.”⁹Ethaninguna n’elulung nahitto n’Ojudei hijan Yesu lodi Bethani, afwoi dia do Yesu karik d’ittihio Lazaro, lonya hoithek Yesu ithabuhuna th’oye lo. ¹⁰Owahi nya dang ohoithamojok hohittwa eicam attohoro no Lazaro; ¹¹th’arami tha hanyong ofwo Ojudei holwa adi karik eruhi do Yesu.¹²Nya moithe, aindu hoililye nahitto di muno. Ethaninguna nasong hijan Yesu loindu di Yerusalem, ¹³Akonye abene h’osohot afwoi do Yesu th’oiuluhe, “Loindu th’ofure thol’Ohobu, Ohobu lo Israele, thomunoi.”¹⁴Olo Yesu th’ahide than’akayine nohomutha; iring nathuhi egerohinere: ¹⁵“Hoibang, aitho no Zion; ingengela Ohobu lohoi ainduna, th’ahide than’akayine abothor.”¹⁶Th’omiru hule, kabong ohothifok ho Yesu othenu tuhudi ainyong nawon. Otehi ti hijan ara Yesu lathuhi adohina dihide ara ohobu, isong de igyema arami hune, iring najarari amaninihio h’ocame l’Ojok.¹⁷Ohothing h’elulung nya anyahini hijan owon isong nya dia nethabuhunere Yesu Lazaro th’oye na. ¹⁸Ahu ne nabo nanya ondere elulung difothunere Yesu; Ethaningu ohothing ethabuhuna no Yesu Lazaro th’oye. ¹⁹Ofarisi acamaru amonye, ajori, “Ethehu ithai? Awang ohothai irumak oyihoi loboling kwong. Idorotho; ahap fodok nathiforo inyong!”²⁰Ditha h’ohothing honya ofwo di Yerusalem ofaning l’amuno n’ehumarik lo, owoni nya Ogriks. ²¹Ofwoi nya do Fillipo, inyong lo nya tho Besaida di Galilee, ajori donyong, “Lahong, iwak ohoi edorio Yesu.” ²²Fillipo alo inyahina Andrea; isong arehai afwo inyahina Yesu.²³Yesu eruhu isong, ajo, “Edwongi omiru h’Olonyi l’Othulo difothuna ethahuyo nahitto.” ²⁴Diri, diri, ajo nang dothai; orasa de ohonyek l’ohimai oboithe, ara kabong h’oyehini dihap, aye, amuyak. Ti, oisu ohima olwarai, ara aye, amuyak.²⁵Lomuno esu nanyong, ithalithok de esu nanyong; loman esu nanyong dihap dine, indefaitho de esu nanyong ara namanya n’awang ecuhi. ²⁶Lowak egyema ho nang, thothifunu nang; amaji nawondere nang, owon ohoigyemani hindang diya. Ithahuyo de Lalamonye othulo l’egyema ho nang.²⁷“Odiha othaji hindang, ti, ainyong de ajo nang? ‘Monye, ipahu nang th’ethathacana?’ Th’arami tho hune edwongori nang d’omiru hulya. ²⁸Monye, ithahuye ofure lohoi. Oilolonge aindu thohide ajo, “Athuk nang ethahabuyo inyong. Ethahabuyo nang inyong koti.” ²⁹Ethaninguna n’elulung n’ohothing nawoitha indehai diya, ajori apeyo ahila. Homok ajori, “Anjelo ocama do nyong le.”³⁰Yesu etharang, ajo, “Ikara donang oindu oilolonge lya, dothai oindu. ³¹Omiru hulya ho kanyere ahap ne: omiru hulya ho sulunere ohobu l’ahap ne th’okara.³²Karik, ara nang ladohohini dihide, efihu nang de ohothing fodok donang.” ³³Ocama Yesu ahani, dinyahinere opecen laye nanyong.³⁴Elulung etharang inyong, “Ithaningu ohoi th’oyano hoigero hijan oindu de Kristo imanya mak. Angai ijo iye, ‘Oyihahini de Olonyi l’Othulo dihide? Ngai inyong Olonyi l’Othulo lya?’ ³⁵Yesu ajo dosong, “Orasa de afangan hothai omiru tibia. Odahathi howon afangan, tek ithai omudwe endefu. Lodaha th’omudwe, awang otek dingai olo inyong. Howon afangan, iruhotho d’afangan, diwon ithai ara olonyirok h’afangan.” ³⁶Ocama Yesu arami hune, alo idima adi thosong.³⁷Juk ehandio Yesu asang olwarai hafalanagai, kabong hoiruhi donyong. ³⁸D’ofuni ocamitha h’ohocoroni Isaya ileyoro, hojari inyong, “Hobu, eruk ngai arami hahoi? Karik, do ngai onyahini elulung n’ohoremok h’Ohobu?³⁹Th’arami tho hune, awang ocohi dosong eruhon, iring najari Isaya? ⁴⁰“Athuk ethangodoyo ahonde hasong, ethakolio othaja hosong; ara ikara ahani, irahi itehuna th’ahonde tha hasong, athenuni th’othaja tho hosong, eloyithoi. Karik nang era isong ethalihio.⁴¹Ojo Isaya arami hune, anyo, atehu abolori no Yesu, acama tho nyong. ⁴²Ti, dihide h’ocamitha hulya, awang ohoindefak h’ahap hoiruk do Yesu; Awang hoiruhi th’arami thoh’Ofarisi. Awang hoiruhi arami hune tek isong alwoi afwan di sinagog. ⁴³Omunoi emamajo naindu th’ohothing, tholohide thanaindu th’Ojok.⁴⁴Yesu ekor bebe ajo, “Loiruh donang, ikara donang hamaring iruk; Iruk dang do lonya ifahu nang lo. ⁴⁵Lotehu nang, otehu lonya ifahu nang lo.⁴⁶Aindu nang dihab ara afangan, dawang loiruk donang isuka ditha omudwe. ⁴⁷Loithaningio awang hothifoitho ocame hindang, awang nang akanyo arami hanyong. Awang nang aindu di hap dikanyo; aindu nang dithalwahuna ahap.⁴⁸Loida nang karik eda ocamitha hundang, owon ohokanyani lonyong. Ocame lathuk nang anyahina oindu de inyong ikanyo d’ofaning loth’cuhit. ⁴⁹Awang nang h’acama th’ahwan thono hindang; Monye ifahu nang; inyong onyahi nang ainyong ehandio nang karik ainyong acama nang. ⁵⁰Atek nang. Ocame lo Monye donang, awang ecuhit nanyong. Arami hune h’acama nang – iring nathuhori Omonye acama do nang, ahanya acama nang.

¹Dihithemi h’amuno karik anyari n’ofaning l’ehuma, atek Yesu hijan acohini operok honyong di edehina ahap ara inyong alo d’Omonye. Othuhon nanyong amuno ohothing honyong honya owon dihap, amuno inyong isong lwai di cuhi. ²Athuk Sitan esarahina di thaji ho Yuda Iskariot, lolonyi ho Simone, dithanyangahina Yesu.³Atek Yesu hijan athuk Omonye esarahina asang fodok dihinang honyong, anyo, th’Ojok oindu inyong karik d’Ojok de dang onyaha inyong. ⁴Adotho tho nyari, eduhu ahilyen nayong nothohide. Eduhu ahilyen nabo, athorik dihwan. ⁵Abuhok ahari di kelebe, elalayo ahejek h’ohothifok honyong, ethayohojo th’ahilyen thana othorik inyong dihwan honyong na.⁶Aindu Yesu do Simone Petro, ara Simone Petro ajo donyong, “Hobu, ara iye ilalayo ahejek hundang?” ⁷Yesu etharang, ajo donyong, “Aning nehandio nang, awang ithai itek thenene, ifunu ithai de itehan diholu.” ⁸Petro ajo donyong, “Awang iye ilalayo ahejek hundang.” Yesu ajo do Petro, “Ara awang nang helalayo ahejek hahoi, awang nang angara hohoi.” ⁹Simone Petro ajo donyong, “Hobu, helalayo ahejek hundang hamaring; ilalaye dang ahas h’ahu hindang.”¹⁰Yesu ajo donyong, “Othulo lathuk ahuyoro, awang owak elala, arahari ahejek; olibo ahwan nanyong fodok; Ilibo iye, ikara ti ithai fodok.” ¹¹(Atek Yesu othulo lolo inyong ithanyangahina; inyong najo inyong awang ithai ilibo fodok.”)¹²Athuhon no Yesu elalayo ahejek hasong, enyahak alyenyi hanyong dihwan, awoni dihap koti ajo dosong, “Itek ithai ayinyong ehandio nang dothai? ¹³Ilongo ithai nang ara ‘ohoithayeyenani’ karik ‘Hobu.’ Ithen ithai. Nang diri ohoithayeyenani karik Hobu. ¹⁴Ara elalayo nang, ohoithayeyenani karik Ohobu, ahejek hathai, ira ithai dang ilalaru ahejek hathai. ¹⁵Athuk nang ithai ethayithahina, dihandio ithai iring nathuk nang ehandiere dothai.¹⁶Diri diri, ajo nang dothai, awang ohoigyemani hobolo th’ohoithagyemani; awang dang othulo lefahaithe obolo th’othulo lefahaitho. ¹⁷Ara itek ithai asang hune, omunothi, ara ihandio ithai isong. ¹⁸Awang nang acama thoithai fodok; acama nang th’ohothing thah’athuk nang anyimuna, dofuni arami hegero dihap ithenahunu: ‘Lonyo anyari hindang, inyong ongicari nang.’¹⁹Anyahi nang ithai arami hune kabong holeyori, dara ara hafuni ileyori, ifunu ithai iruhon hijan NANG INYONG. ²⁰Diri diri, ajo nang dothai, loifothu othulo lefahaitho nang, ifothu nang; loifothu nang, ifothu le, lonya ifahu nang lo.²¹Acama no Yesu ahani, ejoria; ethaithak arami hune, ajo, “Diri diri ajo nang dothai, lobo thothai lolo ithanyangahina nang.” ²²Ethathamija ohothifok ho Yesu; ofalangai, ngai thosong ocama Yesu.²³Lobo th’ohothifok ho Yesu, lomuno inyong, oyokong d’amaji nanyere indehai do Yesu. ²⁴Simone Petro ajo d’ohothifoni lya, “Ifiya sede inyong; ngai locama inyong lya?” ²⁵Ohothifoni lomuno Yesu lo alo indehai do Yesu, ajo, “Hobu, ngai inyong lecama iye lya?”²⁶Yesu etharang, “Onde leduhu nang anyari, neduthok nang ethafothok donyong; inyong lya.” Athuhon nanyong eduthohina, esarak anyari ne do Yuda, lolonyi ho Simone Iskariot. ²⁷Diholu h’anyari ne, ajingak Sitan ditha honyong; Yesu ajo donyong, “Ainyong hoihandyo iye; ihandye aning newak iye kwak.”²⁸Awang loboling th’ohothifok honyo honyong hulya lotek anyo ojo inyong ahani donyong. ²⁹Igiglo homok thosong hijan ngona endafaitho no Yuda enyahwo hasong, inyong najo Yesu do Yuda, “Inyangai ainyong ewak d’ofaning lamuno,” dia ngona onyahi inyong thoisarak aning nabo d’ohoicanak. ³⁰Athuhon no Yuda efothuna anyari, alo dindak. Th’orii le, awon ara aharye.³¹Athuhon no Yuda anden, Yesu ajo, “Thenene ne, athuhi ethahabuyo Olonyi l’Othulo. Ethahabuyo dang Ojok ditha honyong.” ³²Ithahabuyo de inyong Ojok ditha honyong; ara inyong ethahabuyo inyong kwak. ³³Ithai, okalifinok hottik, awon nang de hothai omiru tiibai. Ithifeyo ithai de nang, karik iring najari nang d’Ojudei, ‘Amaji nandere nang nya, awang ocohi ithai afuna diya.’ Acama nang dang ahani dothai.³⁴Esarak nang dothai efahit angejuk, omunohunethe; iring namunorik nang ithai, omunothi dang ahwandek hathai. ³⁵Th’oyihoi tholya de otehi hijan ithai ohothifok hundang, ara imuno ithai ahwandek hathai.³⁶Simone Petro ajo donyong, “Hobu, anyo nawang nang athiforo iye.” Yesu etharang, “Amaji nandere nang ne, awang ocohi dohoi diinduna thenene; ithifunu iye nang de diholu.” ³⁷Petro ajo donyong, “Hobu, anyo nawang nang athiforo iye thenene? Ara owon ara aye, aye nang de tho iye.” ³⁸Yesu etharang, “Iiye iye de diri tho nang? Diri diri, ajo nang dothai, kabong ohohorong isiir, irisa iye nang de operok aunihoi.”

¹“Hoisarahina othaja hothai tho banga. Iruhotho d’Ojok, ara ithai iruk do nang. ²Di hang ha Lalamonye, owoni athwahio olwarai. Ara dwo ikara ahani, awang nang ira ithai inyahina hijan nang lalo ihuhumio amaji dothai. ³Ara alo nang ihuhumio amaji dothai, aindu nang de ifothuna ithai ara hundang, dara amaji nawondere nang, iwon ithai dang diya.⁴Itek ithai oyihoi d’amaji nandere nang.” ⁵Tomaso ajo do Yesu, “Hobu, awang ohoi itek dingai ilo iye; angai itek ohoi oyihoi?” ⁶Yesu ajo donyong, “Nang oyihoi, arami hadiri karik esu; awang loindu d’Omonye, arahari tholo nang. ⁷Ara itek ithai nang, etek ithai dang Lalamonye; hara th’ahanan adihithemi, ethuk ithai etek nang karik ethuk ithai atehuna inyong.”⁸Fillipo ajo do Yesu, “Hobu, ithaithak ohoi Omonye; Atehan no Omonye, ocohi ohoi.” ⁹Yesu ajo donyong, “Aleng nang esuka hothai, kabong ithai nang itek, Fillipo?” L’athuk atehuna nang, athuk atehuna Omonye. Angai icohi iye ajara ‘Ithaithak ohoi Omonye’?¹⁰Awang ithai iruk hijan nang loditha h’Omonye, Omonye loditha ho nang? Ocamitha h’ajo nang dothai, awang nang acama th’ahwan thono hindang; Monye lowon ditha ho nang, inyong ihandio egyema ne. ¹¹Iruhotho nang; nang loditha h’Omonye; Monye loditha honang; dia hibu, iruhotho egyemathik h’ehandio nang.¹²Diri diri, ajo nang dothai, leruk donang, ihandio de egyemathik hundang karik oindu de dang ihandio egyemathik hahitwa tho hune; nang lalo d’Omonye. ¹³Aning nefiyo ithai th’ofure tholo hindang, ehandyoo nang de dithahuye Omonye ditha h’Olonyi. ¹⁴Ara ifiyo ithai nang aning nabo th’ofure tholo hindang, ehandyo nang de.¹⁵Are imuno ithai nang, ithifoitho ithai de efahitha hundang. ¹⁶Karik amojo nang de Omonye, isarak de ithai ohoibowani lesuka hothai mak- ¹⁷Ohoile l’arami hadiri. Awang ahap ocohi efothuna inyong; awang ahap otehu karik awang otek inyong. Ti, itek ithai inyong; isuka de hothai karik isuka de ditha hothai.¹⁸Awang nang edehi ithai hamaring; Anyahu nang de dothai. ¹⁹Ofithoro omiru tiibai, awang nang ahap olo itehuna; ti, itehu ithai nang. Awon nang, iwon ithai de dang. ²⁰Ofaning le, ifunu ithai de itehan hijan nang loditha ha Lalamonye, ithai ditha honang karik nang ditha hothai.²¹Lowon hefahitha hundang, athifoitho, omuno nang; lomuno nang, omuno de dang inyong Lalamonye, karik nang amuno inyong; nang de dang ethaithak ahwan hindang donyong. ²²Yuda lobo, ikara Iskariot, ajo do Yesu, “Hobu, anyo nara dohoi ithaithak iye ahwan nahoi; anyo nangara d’ahap?”²³Yesu etharang, ajo donyong, “othulo lomuno nang, othifoitho ocamitha hundang; omuno de inyong Lalamonye, ohoi de ifunu do nyong, ohoi ihuhumak ahang nahoi honyong. ²⁴Lawang omuno nang, awang othifoitho ocamitha hundang; ocame lethairu iye tho nang, ikara hindang; oindu th’Omonye loifahu nang.²⁵Athuk nang acama arami hune dothai, hesuka nang hothai. ²⁶Ohoiboboani – Ohoile Lodwa osulu de Omonye th’ofure tholo hindang – oindu ityenio ithai asang fodok; oindu de ithayuhina ithai asang h’ajo nang dothai. ²⁷Edehi nang dothai elik n’othaja karik elik n’ahap; Edehi nang dothai elik n’othaja karik elik n’ahap. Esarak nang dothai, ikara iring nesarahinere ahap. Hoisarahina othaja hothai thobondwoi; hoibangatha.²⁸Ethaningu ithai ainyong ajo nang dothai, ‘nang lalo adi karik alo nang de inyahuna.’ Ara imuno ithai nang, imuno ithai de; nang lalo d’Omonye; obolo Omonye tho nang. ²⁹Acama nang arami hune kabong oleyori, difunu ithai iruhon ara hawoni.³⁰Awang nang acama hothai bebe; ohoindefani l’ahap loindu; awang abolori nanyong okalu hindang. ³¹Ti, doindu ahap itehan hijan amuno nang Omonye, egyema nang iring nanyahinere inyong nang. Odothothi. Efwo adi thene.”

¹“Nang ohiyani l’ahayo. Lalamonye ohoigyemani di mana h’oyani h’ahayo. ²Ikothu tho nang athani nawang ithadoyo ahayo; ihuhumyo thuhudi athani nedoyo ahayo, didoyo ahayo olwarai.³Th’ocame tholo anyahina nang dothai, ilibo ithai. ⁴Isukathi ditha honang, nang ditha hothai. Iring nawang athani idoyere ahayo ara awang th’ohiyani, awang ithai dang ihuru aning nabo, ara awang ithai thotho nang.⁵Nang ohiyani l’ahayo, ithai athandak. Lowon ditha ho nang, nang awon ditha honyong, inyong ithadoyo ahayo. Kwong nang, awang iye icohi ehandio aning nabo kwong. ⁶Ara lowang owon ditha ho nang, ocohoroi adi iring athani, ethayohoje, asuduhie ara athandak, amirohini dith’ahimang, edwehini. ⁷Ara iwon iye ditha ho nang, ocame hindang awon hohoi, ifiye aning newak iye. Isarahini de dohoi.⁸Ethabolorye Lalamonye do hune; ethadoyethe ahayo olwarai, dithaithak hijan ithai ohothifok hundang. ⁹Iring namunori nang Omonye, amuno nang dang ithai. Isukathi dith’amuno hindang.¹⁰Ara ithifoitho ithai efahitha hundang, irasa ithai de dith’amuno hindang; ara athifoitho nang efahitha ha Lalamonye, arasa nang de ditha h’amuno nanyong. ¹¹Acama nang arami hune dothai, dowon amuno hindang ditha hothai, ara amuno nathai athuba.¹²Efahit hindang nang dothai: omunothi ahwandek iring nathuhori nang amuno ithai. ¹³Awang lobo lokalu amuno nanyong n’othulo lowahu aye th’omorot.¹⁴Ithai omorot hundang, ara ihandio ithai asang hanyahi nang ithai. ¹⁵Awang nang ithai elongo ara ohoigyemak; awang ohoigyemani otek ainyong ihandio ohoithagyemani lonyong. Elongo nang ithai ara omorot. Asang fodok h’ethairu nang tha Lalamonye, athuk nang ithai anyahina.¹⁶Ikara ithai nang inyimu; nang anyimu ithai, nang esarak ithai thoifwa idoye ahayo; ahayo hathai owoni. Aning nefiyo ithai Lalamonye th’ofure tholo hindang, isarak de dothai. ¹⁷Anyahi nang ithai asang hune: omunothik ahwandek.¹⁸Ara ongicarik ithai ahap, otehatha hijan ongicarik nang dihithemi hosong angicarik ithai. ¹⁹Ara ithai h’ahap, ira ithai ahap imuno. Ti, ikara ithai h’ahap. Nang anyimu ithai adi thohop, inyong nangicari ithai ahap.²⁰Hoikwothi ocame l’anyahi nang ithai: ‘awang ohoigyemani obolo th’ohoithagyemani lonyong.’Ara ethathacanie nang, ithahtacanie de dang ithai; ara othifoithe ocamitha hundang, othifoithe de dang ocamitha hothai. ²¹Ihandye de asang hune fodok dothai, th’ofure tholo hindang, anyo, awang otehi ngai ifahunu nang. ²²Ara kabong nang aindu nang acama dosong, awang hoirahi iyauna; ti, awang hoikaruni eyau.²³Longicarik ho nang, ongicari Lalamonye. ²⁴Ara kabong nang adodoro asang fodok hakabong lobo ihandiere dihithemi hosong, awang irahi iyauna; ti, athuhi atehuna, angicari nang karik Lalamonye. ²⁵Ofwo arami hune see h’oyano hosong hoigero, ‘Amani nang kwong arami.’²⁶Ara de ohoiboboani, lefahu nang de th’Omonye: Ohoile l’arami hadiri, lolo th’Omonye, laindu, oindu de inyahina arami fodok hundang. ²⁷Ithai dang hodinyahina arami karik asang h’ehandyo nang, anyo, ohothai dang isuka amaji oboithe hara th’oculwe.

¹“Athuk nang acama asang hune dothai, dawang ithai idehi nang. ²Ongaterek isong de ithai tho Sinagogues. Ti orii loindu lo igigilorik ohothing bukulung hotohio hijan isong hodigyema egyema n’Ojok.³Ainyong de isarak isong egyema ahani, anyo, awang otehi Omonye; awang otehi nang. ⁴Acama nang asang hune dothai, dara ara omiru hosong hafuni, diyyu ithai hijan athuk nang ithai anyahina. Kabong nang ithai anyahi asang hune th’oculwe, anyo, hesuka nang hothai.⁵Ti thoone, nang lalo do lonya ifahu nang lo, ti kabong lobo thothai lefiyo nang, “Dingai ilo iye?” ⁶Ti, anyahina hindang ithai asang hune, ethafuthak ejiringa othaja hothai. ⁷Ti Anyahi nang ithai arami hadiri: oyyu de dothai ara alo nang. Ara awang nang alo, awang ohoboboani hoindu dothai; ara alo nang, efahu nang de inyong dothai.⁸Ara ohoiboboani laindu, oindu de ithai ithaithahina hijan epal diri ahap d’arami h’eyau, h’abisan karik h’akanyo – ⁹D’arami h’eyau, anyo, awang isong iruk donang. ¹⁰D’arami h’abisan, anyo, nang lalo do Monye; Awang ithai nang hoifwo itehuna. ¹¹D’akanyo, anyo, athuhi akanyo arami h’ohoindefak h’ahap.¹²Awon nang h’arami olwarai, era nang ithai inyahina, ti awang ithai de igilu tuhudi d’omiru hulya. ¹³Ti, ara Ohoile l’arami hadiri laindu, aindu de ithai ithaithahina arami h’adiri; Oindu de icama th’ahwan thananyong. Oindu de icama aning nethairu inyong; oindu de inyahina asang hafuni ifuna. ¹⁴Oindu de ithahabuyo nang; oindu de iduhuna th’aning thanawon ara hindang, anyahi dothai.¹⁵Asang fodok hawoni da Lalamonye, hundang. Inyong najo nang iduhu de Ohoile th’asang hawon ara hundang, anyahi dothai. ¹⁶Afithoro omiru tibia,awang ithai nang hoifwo itehuna. D’omiru koti homok tibai, ara ithai ifunu nang itehuna.¹⁷Ohothifok homok honyong acamahunai dihiji hosong, “Ainyong ne, nacama inyong d’ohothai ne. ‘Afithoro omiru tibia,awang ithai nang hoifwo itehuna; ‘D’omiru koti homok tibai, ara ithai ifunu nang itehuna,’ karik, ‘Anyo, nang lalo d’Omonye’?” ¹⁸Isong hathi ajori, ““Ainyong nacama inyong ne. ‘D’omiru homok tibai’? Awang ohothai iteh ainyong ocama inyong.”¹⁹Otehu Yesu owahi ohothifok honyong efiyo inyong; inyong ajo dosong, “Arami hune hefiyere ithai ahwandek hathai: ainyong ojo, ‘Afithoro omiru tibia, awang ithai nang hoifwo itehuna; ‘D’omiru koti homok tibai, ara ithai ifunu nang itehuna’? ²⁰Diri diri ajo nang dothai, ifunu ithai de ikor karik othaja hothai afuni idihari, ahibu ti ahap omuno. Ithafut ithai de ijiringa, ti oindu de ijiringa nathai iloitho ara amuno. ²¹Ara athulo nathamana, ijiringa, anyo, afuni omiru honyong, ti, ara nathuk athamana, okworo adihari n’ahwan nayong th’amuno thon’othulo l’aiisuni dihap.²²D’orii lya, iwon ithai h’ejiringa, ti, atehu nang de ithai koti; omuno de othaja hothai; awang de loboling locohi eduhuna amuno adi thothai. ²³Ofaning le, awang de ithai ifiyo nang aning nabo. Diri diri ajo nang dothai, aning n’efiyo ithai th’Omonye th’ofure tholo hindang, isarak de dothai. ²⁴Lwai d’omiru hulya, kabong ithai ifiyo aning nabo th’ofure tholo hindang. Ifiyethe di ifothu ithai dirimahinere amuno nathai.²⁵Athuk nang acama dothai asang hune th’ocamintha ija. Ti, omiru hufuni, h’acamarik nang dothai gwo karik h’anyahinere nang ithai arami puhek.²⁶Ofaning le, ifiyo ithai de th’ofure tholo hindang; awang nang ajo dothai ifiyethek d’amojo d’Omonye tho’ithai. ²⁷Omonye thahwan omuno ithai, anyo, imuno ithai nang karik eruk ithai hijan th’Omonye aindu nang. ²⁸Th’Omonye aindu nang. Aindu nang di hab. Koti nang ledyaharu ahab. Nang lalo d’Omonye.²⁹Thiya ohothifok honyong ajo donyong, “Atha icama iye thenene gwo; ikara ocamatha hulya ija. ³⁰Itek ohoi hijan itek iye asang bukulung; ithathalik othulo lobo efiyo ija ahani. Inyong isarak ohoi eruhon hijan th’Ojok indu iye. ³¹Yesu etharang isong, “Eruk ithai hathi?”³²Edwong omiru hothurierek ithai bukulung: ngai dihang honyong; nang hathi apwak hamaring. Ti, ikara nang diri hamaring. Owon Omonye honang. ³³Athuk nang anyahina ithai arami hune diwon ithai h’elik n’othaja karik n’ahap dithunahunu donang. Ithathacana ithai de dihap. Ithakoliethek ahwandek! Athuk nang ateluna ahap.”

¹Engohina no Yesu acama n’arami hune, amijo dihide, d’amaji nelik, ajo, “Monye, edwongi omiru. Isarak ahujon do Lelonyi, dithahuyo iye.” ²Esarak iye inyong akolon tholohide akolon n’othulo, disarahinerek iye d’ohothing fodok hethuk iye esarahina donyong, esu nawang ecuhit.³Esu n’awang ecuhit, onyahi hijan iye aboithe Ojok ladiri; isarak dang ateha Yesu Kristo lonya ifahu iye lo. ⁴Athuk nang ethaithahina ahujon nahoi dihap; athuk nang egyema nesarak iye donang. ⁵Monye! Isarak nang ahujon dihithemi hohoi, ahujon nanya owon hohoi kabong ahap hoyeuni.⁶Athuk nang iye ethahuyo dihithemi h’ohothing hethuk iye nang esarahina adi thohop. Isong hulo hohoi; ara iye isarak isong donang. Athuk isong hulo eruhuna ocamitha hohoi. ⁷Otek isong hulo hijan asang fodok hesarak iye donang thohoi ofuni. ⁸Anyahi nang dosong ocame lenyahi iye donang, efothuni. Otehi isong hulo hijan thohoi diri aindu nang; eruhi dang hijan iye ifahu nang.⁹“Amojo nang thosong; awang nang amojo th’ahap fodok; amojo nang th’ohothing thoho isarak iye donang; isong hulo hohoi.” ¹⁰Asang fodok hahoi, hundang; asang fodok hundang, hahoi; ahujon hindang ethaithak nang tholosong. ¹¹Nang laindu dohoi lya; awang nang thohop; ti, ohothifok hundang hohowoni dihab. Monye Lodwa! Ikeye isong th’akolon thon’ofure lohoi, ofure lesarak iye donang, dowondere isong hulo ara aboithe, iring newondere iye honang ara aboithe.¹²Nanya hawondere nang hosong na, ekayo nang isong th’akolon thon’ofure lohoi, ofure lonya isarak iye donang diyohoitherek isong kabong lolitho, araharik othulo lonya awon ara lalito dofunere arami hanya athuk egero dihab iwonan ara hadiri. ¹³Nang laindu do hoi lya; acama nang arami hune dihap, difut amuno hindang di thaja hosong. ¹⁴Athuk nang esarahina dosong ocame lohoi, ahap koti aman isong. Isong hulo ikara h’ahab, iring nawang nang awondere ara l’ahap.¹⁵Awang nang efiyo iye hija diyaru isong adi thohob; efiyo nang iye diyohoitho karik dikayo iye isong th’omonyoroni okihik. ¹⁶Iring ikara nang l’ahap, ikara dang isong hulo h’ahap. ¹⁷Iduhu isong hulo dohoi th’arami thah’adiri; ocame lohoi arami ha dirir.¹⁸Efahak nang isong di hap, iring nefahahinerek iye nang di hap. ¹⁹Th’ahwandek thaha song, esarak nang ahwan hindang dohoi, dowon isong dang diri ara hohoi.²⁰Awang nang hamojo thosong hamaring; amojo nang dang th’ohothing thohoiruk do nang th’arami thoh’ocame tholo song. ²¹Amojo nang tho song dowoni isong fodok ara aboithe.²²Esarak nang do song ahujon nesarak iye do nang; d’owon isong ara aboithe, iring newonderek iye ho nang ara aboithe. ²³Awon nang ditha ho song; iye iwon ditha ho nang; d’owoni isong fodok ara aboithe; d’otek ahap hijan iye ifahu nang, karik hijan imuno iye isong, iring nemunorik iye nang.²⁴Monye! Ethuk iye esarahina inyong do nang. Awak nang isong thoisukai d’amaji nawondere nang d’otehuni ahujon hindang, ahujon nara iye esarak do nang, anyo, imuno iye nang kabong hoyeuni ahap.²⁵Monye, oyijoni! Awang ahap hotek iye. Atek nang ti iye. Otehi ohothifok hundang hijan iye ifahu nang. ²⁶Nang esarak isong th’oteha iye. Awang nang hedehi anyahina isong th’oteha iye, dowon amuno nahoi do nang dithosong, nang dang awon dithosong.

¹Athuhon no Yesu acama ocamitha hulya, alo h’ohothifok honyong d’oyirik l’owor lelongoi ara Kidron lo. Ajingari dith’amana nanya owon diya na. ²Otek Yuda, ohoithanyangani lo Yesu amaji nya. Odahaitho Yesu Karik ohothifok honyong diya d’ocame. ³Yuda ethaitharu elulung n’ohoremok ho Roma karik ohoikiak h’Atempolo hoifahak ohoithamojoni lohitto karik Ofarisi, afwoi dith’amana nya, iyarai h’attitto h’angalafari karik aryee henwahyere.⁴Otek Yesu ainyong nalo iwonan donyong. Inyong lo abongoro adihithem, efiyo ohothing hulya, “Ngai ithifeyo ithai?” ⁵“Yesu la Nazaret,” isong hulo etharang. “Nang inyong lya,” yesu ajo, hibu Yuda, ohoithanyangani lonyong lo owoitha dikeremet h’ohothing hulya.⁶Ajaran no Yesu “Nang inyong lya” isong hulo anyahari ihurongoi, ebatharai dihap. ⁷Yesu inyorio efiyo isong, “Ngai ithifeyo ithai?” “Yesu la Nazaret,” isong ajo.⁸“Athuk nang ithai anyahina hijan nang inyong lya,” Yesu ajo. “Ara nang ithifeyo ithai, oburahina homok hulya thoifwai.” ⁹Ocama Yesu ahani d’ofunere arami hanya athuk inyong acama iwonan ara hadiri: “Monye, th’ohothing honya isarak iye do nang, kabong juk aboithe lolitho.”¹⁰Simone Petro enyongu kwak odemi lonyong ohodorani esalu thonyong ehyok nenget no Malkos, ohoigyemani lo ohoithamojoni lohitto di Tempolo. ¹¹Yesu ajo do Simone Petro, “Inyahak odemi di maji honyong. Awang iye iwak amatha oibithi l’ethathacana lathuk nang Lalamonye esarahina?”¹²Thiya ohoremok ho Roma, lahon losong karik ohoikyak h’Ojudei endafatho, athorye Yesu. ¹³eyarai Yesu do Annas. Annas lo lohomoni ho Kaifas, ohoithamojoni lohitto lo oyinga le di Tempolo. ¹⁴Kaifas nyana ocama hijan, osiru d’othulo aboithe diiye th’ohothing fodok.¹⁵Simone Petro karik loboling th’ohothifok, athiforoi Yesu. Otihahunu nya ohothifoni lobo lo Yesu lya h’ohoithamojoni lohitto. Alo inyong lo karik Yesu lwai dithath’ahang n’ohoithamojoni lohitto la Tempolo. ¹⁶Ahibu Simone Petro leru apwak dihuthuk h’oyihiet. Ohothifoni lobo lo Yesu lo anyahi aitho noth’oyihiet thohorik Simone Petro thojingai di hang.¹⁷Aitho noth’oyihiet ne efiyo Simone Petro, “ ikara iye lobo l’ohothifok h’othulo le?” “A a, ikara nang,” Simone Petro etharang. ¹⁸Ilik ahathero bebe ofaning le. Ethaulohini ohoigyemak karik ohoikyak hothiya ahimang, asujai. Simone Petro alo do song diya, asujai ho song.¹⁹Ifyo ohoithamojoni lohitto Yesu arami h’ohothifok honyong karik etyenio nanyong. ²⁰Yesu etharang, “Acamaitho nang arami hundang fodok dindak, dihithemi h’ohothing. Etyenio nang di Sinagogs karik di Tempolo, amasok hadahari ohothing. Awang arami hundang hamongai amonga. ²¹Anyo ifiyo iye nang ahani? Ifiye ohothing h’oithamingio nang. Ifiye ainyong anyahi nang isong. Otehi ainyong ojo isong.²²Acama no Yesu ahani, aboco lobo th’ohoikyak h’ohothing hahong anangio Yesu, ajo, “Ngai ojo dohoi acama ahani d’othulo lahong?” ²³Yesu ajo, “Ara epal nang, inyahi ohothing hothene hulya ainyong ohipale hindang. Ara obisi arami hundang hune, anyo inangio iye nang ija ahani?” ²⁴Annas esarak Yesu th’eyyarai do Kaifa, ohoithamojoni lohitto la Temoplo.²⁵Orimak Simone Petro lohosuja ahimang; homok th’ohothing hosuja ahimang honyong hulya efiyo inyong, “Ikara iye loboling l’ohothifok h’othulo le?” Petro arisa, ajo, “A a, ikara nang.” ²⁶Lobo th’ohoigyemak h’ohoithamojoni lohitto, l’orwanga h’onde lonya isalu Petro ehyok lo, ajo inyong lo do Petro, “Kabong nang atehu iye honyong di mana?” ²⁷Petro koti ajo, “Oco, ojori hibu awang nang atek othulo lya.” Kwak ahani ohohorong aboco esir.²⁸Nya th’amoithe berien, eyarai Yesu tho hong ho Kaifa dihang ha lahong l’ahap no Roma diya, Pilato. Idari hahong h’Ojudei ajingara dith’ahang do rasa isong alibori dinyere ofaning l’amuno n’ehuma. ²⁹Pilato alo dindak do song, efiyo isong, “Ainyong namonyong ijo ithai nehandio othulo lya?” ³⁰Etharang nasong ajo, “Awang ohoi ira iyanu inyong dohoi, ara kabong hoipal.”³¹Pilato ajo do song, “ iyathik ithai inyong, ara ithai icama arami hanyong th’oyano thohothai.” Isong etharang, “Olwoi ohoi ethayeyo othulo l’epal.” ³²Ofuni arami hune iwonan, dofuni ocamitha ho Yesu h’opecen laye nayong iwonan ara hadiri.³³Pilato anyaha di hang; ethalongo Yesu. “Iye Ohobu l’Ojudei?”Pilato efiyo Yesu. ³⁴Yesu etharang Pilato, “Thohoi oindu oifiet lya, dia ohothing homok onyahi iye ijan nang ngai?” ³⁵Pilato etharang Yesu, “Hibu nang ti l’Ojudei? Ohothing hohoi indefu, eyanai iye do nang. Ehandio iye ti ainyong?”³⁶Yesu ajo, “Ohobye hindang ikara lothohop. Ara ohobye hindang lothohop, irahi nang ohothifok hundang ikauna th’endafa n’ohobolok h’Ojudei. A a, ohobye hindang ikara lothohop thene!” ³⁷Pilato efiyo Yesu, “Hibu diri iye Ohobu?” Yesu ethanrang, “Ejo iye nang Ohobu. Aisuni nang; nang aindu di hap th’arami thohune: dicama arami hadiri. Le ithaningio arami hadiri, ithaningio nang.”³⁸Pilato efiyo inyong, "Ainyong nadiri?" Diholu he efiyo ofiat lia, alo dinguai acham ho hobolo ho Ojude ikoti. Ajo dosong, "Arumak nang kaang inyong izapalio omanyit lobo. ³⁹Ti, izai Ojude iwon izai ho esuki diyinga do ofaning la amuno la Alangan, ifiyo izai nang diburahina ozulo aboize lowon dihienit. Dini iwak izai nang diburahina dozai ohobu lo Ojude?"⁴⁰ Elolongoi ikoti, "Awang, heburak ozulo lia, ti oburak Barabbas! Zene Barabbas ozulo lowak ekakalunyo.

¹Pilato ethafodohyo Yesu. ²Ohoremok ehuhumyo ehithang n’oihwa orokonyohini dihu honyong; ethayofohini inyong ahilyen anaporong. ³Afuni donyong, ajori, “Ohobu l’Ojudei mak!” Ehuthohini donyong koko; anangye Yesu.⁴Pilato koti alo dindak, ajo d’elulung n’ohothing ne, “Otihatha, eyanu nang de Yesu dindak dothai; itek ithai hijan awang arami hethayeyere inyong.” ⁵Yesu aindu dindak, ehithang noihwa di hu karik ahilyen anaporong dihwan. Pilato ajo dosong, “Otihatha, othulo lo, lya.” ⁶Atehuna n’ohoithamojok hohittwa karik ohikyak ha Tempolo Yesu, emamarye, ajori obehohini inyong lo di kruce. Pilato ajo, “Iyathi, ara ithai ibehok inyong di kruce, Awang nang ti arimak arami h’attohiere inyong.”⁷Elulung etharang Pilato, “Iwon ohoi h’oyano hoithayeyere inyong. Ojo Yesu inyong Olonyi L’Ojok.” ⁸Ithaninguna no Pilato ocame lya, abang inyong lo bebe. ⁹Pilato ajinga dithwa, efiyo Yesu, “Thongai indu iye?” Kabong Yesu itharang inyong kwong.¹⁰Pilato ajo Yesu, “Awang iye nang itharangio? Awang iye itek hijan acohi nang hama ahohina dia abehohina iye di kruce?” ¹¹Yesu etharang Pilato, “Akolon nahoi do nang th’Ojok oindu. Othulo l’ethafothok nang dohoi, adyahu obafu lohitto.¹²Ethairuna no Pilato ocamitha ho Yesu hulya, athemio arimahina oyihoi l’ohohinerek inyong Yesu. Elulung n’Ojudei ne ajo do Pilato, “ara ihohi iye Yesu, ikara iye omotte l’ohoindefani lohitto l’ahap ne!” ¹³Ethaninguna no Pilato ocame lya koti, eyaru inyong lo Yesu dindak; inyong Pilato awoni dihide okara l’okanyere arami. Ilongoi okara lya ara omorwong (th’ahuthuk thon’Ojudei “Cabbatha”).¹⁴Orii le awon ara athari, dehithemi h’ofaning l’amuno n’ehuma. Pilato ajo d’elulung n’Ojudei ne, “Ohobu lothai, lya.” ¹⁵Ajaran no Pilato ahani, euluho Ojudei, “Hoidehi inyong; hoidehi; obehok inyong di kruce!” Pilato ajo do song, “ Abehok nang ohobu lothai di kruce? Ohoithamojok hahong etharang, “Awang ohobu lohoi, arahari Cesare.” ¹⁶Pilato esarak d’Ojudei Yesu tho behohini di kruce.¹⁷Isong eyaru Yesu, afwoi, Yesu hadohoro akruce nanyong d’amaji n’elongoi ara “amaji n’akululungi,” ilongoi th’ahuthuk thon’Ojudei ara “Golgotha.” ¹⁸Dia obehohini Yesu di kruce; abehohini dang ohothing homok arehai di krucehio hosong; Isong hulo alihak Yesu dihiji.¹⁹Pilato egerok dihu h’akruce no Yesu ne hijan: INRI, najo, “Yesu la Nazaret, Ohobu l’Ojudei.” ²⁰Ehenuni ohothing holwa ocame lya. Oindek amaji nanya obehohinere Yesu nya dihiji h’abore. Igero nya ocame le th’ahuthuhie aunihoi: N’Ojudei, Latino karik ahuthuk n’Ogrik.²¹Ohoithamojok hohittwa ajo do Pilato, “Hoigerok hijan “Ohobu l’Ojudei.” Ijara, “Ojo inyong, inyong ohobu l’Ojudei.” ²²Pilato etharang, “Aning nathuk nang egerio, athuk nang egerio.”²³Athuhon n’ohoremok abehohina Yesu di kruce, ebwaye alyenyi hanyong dosong arangwan. Ara abongo anaporong apwak; awang oyyu di bwayo; ikela orifet lonyong. ²⁴Ohoremok ohoikyak hulo eruhi dihiji hosong, ajori, “Awang h’orice ahilyen anaporong ne. Erwasa omorik. Ara lathenu eyaru ahilyen ara nanyong.” Ofuni arami hune ifuhon, dofuni arami hanya athuk egero iwonan ara hadiri: “Ahorai alyenyi hundang, Arwasai omorik d’ahilyen aboithe hindang.” Arami hune hanya ihandio ohoremok honya iririyo Yesu di kruce.²⁵Owethi nya dikeremet ho Yesu lobeho di kruce ahathingi nanyong, eyanyi, Maria nafure ho Kliopas karik Maria madalina. ²⁶Atehuna nya no Yesu ahathingi karik ohothifoni lomuno inyong bebe lo, owoitha indehai, ajo Yesu d’ahathingi, “Athulo na, indefa lelonyi lya;” ²⁷ajo d’ohothifoni lonyong, “Iye hibu onde, omije d’enehathingi ne.” Th’orii le, ohothifoni lo Yesu eyaru nahathingi ho Yesu dihang honyong.²⁸Diholu h’arami hwa, atehan hijan engohunu arami fodo difuna irijaru iring hathuhi egero dimanini, Yesu ajo, “Ebotho nang ahibothit.” ²⁹Owon inyana amothing n’obalu lodwa d’amaji nya. Ara ohoremok ohoikyak etuhini ahilyen dith’obalu esarahini di huthuk ho Yesu. ³⁰Adiloro no Yesu obalu lodwa lya, ajo, “Athuho do nang.” Yesu ethadil ahu nanyong; ara ohoile lonyong adutharu, edyaharu ahwan nanyong.³¹Ofaning le ofaning oithacofe lehuhumiere ohothing ahwandek d’ofaning l’amuno nasong d’ofaning lodwa. Awang owak otehuni ahwandek di kruce ofaning le. Ojudei efiyo Pilato thohorik isong thourie ahejek h’ohothing hobeho di kruce, d’oyethi kwak eyarai adi. ³²Ohoremok ohoiriryak afuni, aurie ahejek h’ohothing arehai hobehohini di kruce ho Yesu hulo. ³³Edwong nasong do Yesu, orimahini athuk Yesu aye, edyaharai Yesu ara lokabong ahejek ouro.³⁴Ti lobo th’ohoremok ohoikyak hulya arom Yesu omarai; ahotho karik ahari abuhunu thiya. ³⁵Othulo lathehu, inyong onyahi arami hune; ocama inyong lo arami hadiri. Otek inyong lo hijan arami hune hadiri; onyahi inyong difunu ithai dang iruhon.³⁶Ofuhi arami hune, dowoni ara arami hanya athuk egero, “Awang de juk aboithe ohoithong lonyong louro.” ³⁷Koti ajo arami hamok hathuk egero, “Omijo de isong donyong lonya ocuk isong lo.”³⁸Diholu h’arami hune fodok, Yosefo lo Arimathea, ohothifoni lo Yesu lonya awang ithaliehi ahwan th’abangi thon’Ojudei, efiyo Pilato d’iyaru ahwan no Yesu. Inyong lo diri eyaru ahwan no Yesu. ³⁹Nikodemo, lonya owararu do Yesu th’aharie lo, aindu dang diya. Iyanu inyong lo nya elethang nafuni iyeliere ahwan no Yesu.⁴⁰Isong eyaru ahwan no Yesu ara nathuk emuho karik eyela th’elethang thone iring owak oisuketha h’Ojudei. ⁴¹D’amaji nanya obehohinere Yesu di kruce na, owon amana diya. Dith’amana nya, owon ahilame angejuk nakabong h’onuhahinere othulo. ⁴²Eyarai ethaferihini ahwan no Yesu d’ahilame nya, anyo, ofaning le, ohothing fodok dihuhumyo ahwandek d’ofaning lohitto lodwa karik dang oyindek amaji nya diya.

¹Ofaning ohoithemoni d’operok cofa, adotho Maria Madaline th’amoithe berien, olo didoryo ahwan no Yesu d’ihilame. Orimak omorwong athuhi eyafulanguna adi tho hilame. ²Inyong na anyahu, ongeru angeruna do Simone Petro karik d’ohothifoni l’omuno Yesu lo, ajo dosong, “Othuhi eyaru Ohobu tho hilame; awang ohoi itek dingai isarahini inyong.”³Simone Petro karik ohothifoni lobo afwoi di hilame. ⁴Ongerori isong hulo see; ara ohothifoni lobo lo erwatharu Simone Petro, ecak di hilame. ⁵Ohothifoni lo Yesu lecak edwongon di hilame lo elunggureyo olamarai; kabong hojinga. Edwongon nanyon, Petro ecak ajingara di hilame.⁶Atehu alyenyi hanya imuhohinere Yesu huna diya ⁷karik ahilyen nanya owon di hu ho Yesu na. Oduhuthohini inyong na amaji nanyong hamaring.⁸Ohothifoni lobo, lonya icak edwongon di hilame lo, ajinga dang di hilame, atehu karik eruk. ⁹Lwai d’orii le, kabong h’otehi arami h’athuk egero hajo, “odotho de inyong th’ohoyak.” ¹⁰Ohothifok anyahari di hangs.¹¹D’omiru hule, orimak Maria owetha dindak dikeremek h’ahilame; odula ahibu inyong ikor. ¹²Thiya Maria atehu anjelohen arehai owoni; iyofoi alyenyi abongiha, lobo tholo hu karik lobo tholo hejek d’amaji nanya ithaferihinere Yesu na. ¹³Anjilohen hulya ajo do Maria, “Athulo na, anyo ikor iye?” Inyong ajo do song, “Athuhi eyaru Ohobu hindang; awang nang atek dingai isahini inyong.”¹⁴Acama no Maria ahani, amijo eker n’ahilame, atehu Yesu owetha. Awang ti otek hijan Yesu le. ¹⁵Yesu ajo donyong, “Athulo na, anyo ikor iye? Ngai ithifeyo iye? Ojo ngona Maria ohoikyani l’amana lo lya, ajo donyong, “Lahong, ara iye iyaru inyong adi thene, inyahi nang dingai isak iye, d’alo nang iyaru inyong adi.”¹⁶Yesu ajo donyong, “Maria.” Inyong na eloyitho, ajo donyong th’ahuthuk n’Aramaik, “Rabboni” (najo ‘ohoithayeyenani’). ¹⁷Yesu ajo donyong, “Hoithin nang, kabong nang alo d’Omonye. Ilo ijara d’olarok hundang alo nang de da Lalamonye karik le Monye, d’Ojok hindang karik Ojok lohoi.” ¹⁸Alo Maria Madalina, anyahi d’ohothifok ho Yesu, “Atehu nang Ohobu,” inyong ocama arami hune do nang.¹⁹D’ofaning ohoithemoni h’operok cofa nya thathari, ehenoro n’ohothifok ho Yesu dithwa th’abangi thon’Ojudei, aindu Yesu, awoitha dihithemi hosong, ajo, “Elik n’othaja dothai.” ²⁰Diholu h’acama nanyong ahani, ethaithak ohothifok ahas karik omarai lonyong. Atehuna nasong Ohobu, amuno ohothifok.²¹Yesu ajo dosong koti, “Elik n’othaja hothai. Iring nefahaithere nang Omonye, efahaitho nang dang ithai.” ²²Athuhon no Yesu ocama ahani, ehuthak ayiritha nanyong dosong, ajo, “Ifothuna Ohoile Lodwa. ²³Lehohi ithai eyatha hanyong, ehohi ithai; la kabong ithai ihohi eyatha hanyong, kabong h’ohohini.”²⁴Ofaning loindunere Yesu d’ohothifok lo, awang nya Tomaso, lonya ilongoi ara Didimo lo, th’elulung n’ohothifok. ²⁵Anyahini ohothifok homok Tomaso hijan, “Etehu ohoi Ohobu.” Ajo dosong, “Ara kabong nang atehu ohoforo di has honyong, nang athin th’ohifala thoho hundang, nang athin omarai lonyong, awang nang eruk.”²⁶Diholu h’operok tises, ehyenoro koti ohothifok ho Yesu dithwa. Ofaning le owon Tomaso diya. Yesu aindu dosong hibu oyihiet ihieno, ajo, “Elik n’othaja dothai.” ²⁷Thiya Yesu ajo do Tomaso, “Othino ahas hundang th’ohifalai tholo hoi; othino omarai hindang th’ahinang thana hoi. Hoida eruhon. Iruho.”²⁸Tomaso etharang, ajo dongyong, “Ohobu hindang karik Ojok hindang.” ²⁹Yesu ajo donyong, “Atehuna nahoi inyong neruk iye. Ohothing hoiruk kabong hotehuni, th’omunoi.”³⁰Ehandio Yesu asang olwarai hethaithak adwaran nanyong dihithemi ohothifok honyong, ha kabong igerohini ditha amanini na. ³¹Egerohini ocamitha hulya, difunu ithai iruhon hijan Yesu inyong Kristo, ohoithalwahani, Olonyi l’Ojok, difunu ithai iruhon, dirimahinere esu th’ofure tholo nyong.

¹Diholu asang hune, ethaithak Yesu ahwan nanyong koti d’ohothifok honyong dipogo h’ahari no Tiberiya. Ithaithak ahwan nayong ahana: ²Owon nya Simone Petro karik Tomaso, lelongoi ara Didimo, Nathaniel tho Cana di Galiliee, oduri ho Zebedeo karik ohothifok ho Yesu arehai. ³Simone Petro ajo dosong, “Nang lalo di rereha ohom.” Isong hulo ajo, “Efwo dang.” Afwoi, adohithi aroko. Oharye fodok, kabong hoindefuni juk ohome aboithe.⁴Th’amoithe berien, awetha Yesu di fohor h’ahari. Awang ohothifok otek hijan inyong lya. ⁵Yesu ajo dosong, “Otwat hulo, owon aning nanye?” Isong hulo etharang, “Awang.” ⁶Yesu ajo dosong, “Omirohina abwoi nahitto d’oyirik le inget l’aroko. Di rimak ithai.” Isong hulo amirok iring anyahini dosong. Atelai ohothifok ho Yesu efihuna n’abwoi nefut ara ohom.⁷Ohothifoni lomuno Yesu lo ajo do Petro, “Hobu le.” Ethairuna no Simone Petro hijan Hobu le, eduhu ahilyen nothohide athorik dihwan, awa dith’ahari. ⁸Ohothifok homok hulo afuni th’aroko, ifihunai ohom bee di bwoi, indehai difohor. ⁹Alanguna nasong dindak, atehuni ahimang n’ahuk, ahibu ohome omuda, ahibn angiriang nelolonga owon arakang diya.¹⁰Yesu ajo dosong, “Iyanethe ohom homok tho hendefu ithai hulya.” ¹¹Simone Petro efihu abwoi dindak, ohom dia bee; arahi 153. Dihide halwari ohom ahanya, kabong abwoi horitha.¹²Yesu ajo dosong, “Ifuna dinyo anyari n’amoithe berien.” Kabong lobo th’ohothifok honyong lefiyo inyong, hijan, “Iye ngai?” Otehi hijan Ohobu lya. ¹³Yesu aindu, eduhu anyari th’ohom esarak dosong. ¹⁴Operohothi lya oithaunihoi lethaithahinerek Yesu ahwan nanyong d’ohothifok honyong diholu hebuhuna nanyong th’ohoyak.¹⁵Athuhon nasong anyari, Yesu ajo do Simone Petro, “Simone, oitho lo Yoane, imuno iye nang tholohide ho hulya?” Petro ajo donyong, “Aa, Hobu, itek iye amuno nang iye.” Yesu ajo donyong, “Ithanye ahando hundang.” ¹⁶Enyorio koti ajaran donyong operohothi oitharehe, “Simone, oitho lo Yoane, imuno iye nang?” Petro ajo donyong, “Aa Hobu, itek iye hijan amuno nang iye.” Yesu ajo, “Iyohothe akero hundang tuhudik.”¹⁷Ajo koti operohothi oithaunihoi, “Simone, oitho lo Yoane, imuno iye nang?” Ajo donyong, “Hobu, itek iye asang bukulung; itek iye hijan amuno nang iye.” Yesu ajo donyong, “Ithanye akero hundang. ¹⁸Diri, diri ajo nang dothai, hewon ithai nya ara otwat, iyofok ithai alyenyi ara ithai iwawararu iring iwak ithai; ajara ithai imarwo, ifethak ithai ahas hathai, ithayofie ithai, lobo eyaru ithai d’amaji nawang ithai iwak afwarik.”¹⁹Ocama Yesu arami hune, dithaithahinerek ainyong oyet lo Petro loindu ithahuyo Ojok. Diholu h’ocame lya, Yesu ajo do Petro, “Othifunu nang.”²⁰Petro afela adiholu, atehu ohothifoni lomuno Yesu othifunu isong, lonya oyokong ado Yesu, orii hanyari, efiyo lo, “Hobu, ngai de ithanyangak iye?” ²¹Petro atehu inyong, ajo do Yesu, “Ainyong de ihandyo onde lya?”²²Yesu ajo donyong, “Ara wak nang inyong thoisukai lwai nang ainduna, aisong arami hahoi?” ²³Elor ocame lo Yesu lya d’olarok hijan awang de ohothifoni lya oye. Kabong dang Yesu hojyo do Petro aang de ohothifoni lobo lya oye. Ti, Yesu ajo, “Ara ajo nang thoisuka lwai nang ainduna, ainyong nahoi nawang?”²⁴Ohothifoni lo Yesu lonyahi asang hune lya. Inyong igerio. Itek ohoi anyahina nanyong ne, nadiri. ²⁵Owoni asang hamok olwarai hanya ihandyo Yesu. Ara igerie isong abok abok dihap, thono hindang, juk dihap, awang amaji nerahi isarahinere amaninihio hathuk egero.