ክያጃ ሹቃካ ማቴዎስሃፑክ 1ብዛካ ጅሼንካ ኢየሱስ ¹ውዋካ ዳዊት፣ እን ኣይ ውዋካ ኣብራሃም ብዛካ ጅሼንካ ኢየሱስ ሃእንካ ዻዮጝ፤ ²ኣብራሃም ጅሽ ይስሐቅ፣ ይስሐቅ ጅሽ ያዕቆብ፣ ያዕቆብ ጅሽ ይሁዳዬ ጪኒጌን ኔኒዬ፣ ³ይሁዳ ከኦካ ኝያካ ትዕማር ፊሬስ ጅሽ ዛራ፣ ፊሬስ ጅሽ ኤስሮምን፣ ኤስሮምን ጅሽ ኣራምን፣⁴ኣራምን ጅሽ ኣሚናዳብን፣ ኣሚናዳብን ጅሽ ነኣሶን፣ ነኣሶን ጅሽ ሰልሞን፣⁵ሰልሞን ጅሽ ቦዔዝን ካራኬብ፣ ቦዔዝ ከሩት ጅሽ ኢዮብዴን፣ ኢዮብድ ጅሽ እሴይ፣⁶እሴይ ጅሽ ቢቲ እጝ ዳዊት፣ ዳዊት ከኦካ ኝያካ ኦሪዮ ጅሽ ሰልሞን፣⁷ሰልሞን ጅሽ ሮብዓምን፣ ሮብዓም ጅሽ ኣቢያን፣ ኣቢያን ጅሽ ኣሣፋ፣⁸ኣሣፋ ጅሽ ኢዮሣፍጥን፣ ኢዮሣፍጥ ጅሽ ኢዮሆራም፣ ኢዮሆራም ጅሽ ዖዝያን፣⁹ዖዝያን ጅሽ ኢዮኣታምን፣ ኢዮኣታም ጅሽ ኣካዝ፣ ኣካዝ ጅሽ ሕዝቅያስ፣¹⁰ሕዝቅያስ ጅሽ ምናሴ፣ ምናሴ ጅሽ ኣሞን፣ ኣሞን ጅሽ ኢዮስያስ፣¹¹ኢዮስያስ ኬሹካ ባቢሎን ምርኮ ጅሽ ኢኮንያኔ ጪኒጌን ኔኒዬ፣¹²ከኦካ ባቢሎን ምርኮ ጩዋ ኢኮንያን ጅሽ ሳላትያል፣ ሳላትያል ጅሽ ዘሩባቤል፣¹³ዘሩባቤል ጅሽ ኣብዩድ፣ ኣብዩድ ጅሽ ኤልያቄም፣ ኤልያቄም ጅሽ ኣዛር፣¹⁴ኣዛር ጅሽ ሳዶቅ፣ ሳዶቅ ጅሽ ኣኪም፣ ኣኪም ጅሽ ኤልዩድ፣¹⁵ኤልዮድ ጅሽ ኣልዓዛር፣ ኣልዓዛር ጅሽ ማታን፣ ማታን ጅሽ ያዕቆብ፣¹⁶ያዕቆብ ጅሽ ዮሴፍ፣ ዮሴፍ ሃሓራካ ጁዋ ኢየሱስ ክርስቶስ ማሪያም።¹⁷ኣኪ ኬኣብራሃም ሌይ ኣህ ዳዊት ጅሼን ታጵ ኦይድ፤ ኬዳዊት ሌይ ኣህ ባቢሎን ምርኮ ጅሼን ታጵ ኦይድ፤ ኬባቢሎን ምርኮ ሌይ ኣህ ጅሼንካ ክርስቶስ ማቲባ ጅሼን ታጵ ኦይድ።ጅሼንካ ኢየሱስ ክርስቶስ¹⁸ክያጃካ ጅሼንካ ኢየሱስ ክርስቶስ ሃእያጝ፤ ጁዋኔ ኔኒ ማሪያም ሄሲሼ ቡዋካ ዮሴፍ ጌይኬን ጋጜ ኡሩካ ኬኡሲካ ባሪዮዬ ጌያ።¹⁹ሃራ ኔኒ ዮሴፍ ናንዳካጝ ኣዬ ውር ጫንቃሌ ማሪያም ኦካ ማሪካ ውር ቡልሼን ናንዳካጝ ማሬ ዎሼኝ ቃቢያ ላክ ኦይዴን።²⁰ኣኔንባ ኬቃቦ እጜ፤ ውርካ ኤርጎካ ታቺ እጝ ጌዬን ኬሹካዬ፤ ዋይሼ እሺ እያጝ፤ ውዋካ ዳዊት ዮሴፍ ዮ፤ ሃራ ኑኑ ማሪያም ሃምካ ቶኦ ቦሼን ኦይ ሪግሺኔን፤ እን ኡሩኮጝ ሃኬ ኡሲካ ባሪዮዬ።²¹ጅሽባ ሃንታካ ጁሙ ሮጝ ኔኒዻ የሺጚ ኢየሱሴ የሺውባ፤ ባይሺሿ ዛርሲዻ ኬኦካ ሴሶ ጊዬይ።²²ታቺ እን ኬውርካ ባሪዮ ሺጜ እያጜ ሃሳዎጝ ካሙኒኖጝ ይጝ ፓይላ ማቲያ፤²³እየዎ ዻጵ ኡሩኳ፤ ጅሽባ ሃንታካ ጁሙዻ፤ ሮጝ ኔኒዻ ሺጝባ ኣማኑኤል፤ ሆኮል ኔኒዻ ሺጝ ባሪዮ ኣኔን ኬኡዋው።²⁴ዮሴፍዻ ጬዬና ኬሩዋቱክ ክያኒ፤ ጩዋ ኬእያይ ውርካ ኤርጎካ ባሪዮ ክያጆጝ ቦሼያ ማሪያም ሃምካ ቶኦ ኔኑጝ።²⁵ኣይባዬ ሌይ ሃምካ ጅሼ ውዋ እን ኔኒ ካሌሜን ካኒ እባጅኬን፤ ውዋ እን ጅሼዻ ሺጝ ኢየሱሴ ሺዋ።

ሃፑክ 2ከታጝ ሹሽ ቱሎጝ ፓይኔንካ ውር ጊታይ ቶዬን ቢሉጝ¹ከቦንካ ቢቲ እጝ ሄሮድስ፤ ኢየሱስ ኬቤተልሔም ጅሼ ይሁዳጝ ጩዋ ከታጝ ሹሽ ቱሎጝ ውር ጊታይ ቶዬን ቢሉጝ ፓዬን ዮጝካ ኢየሩሳሌሜ፤²እን ጅሾጝ ቢቲ እንካ ኣይሁድ ኣኔን ኦን? ከታጝ ሹሽ ቱሎጝ ሃቶያ ቢሊዬ ካይሁንቶጝ ሃፓይናያ» ሺጝ እያይኔ ጋንሼና።³ቢቲ እን ሄሮድስ ሹ እጝ ዋዬ እን ሻን ኔኒ ኑሻ፤ ፕር ውርካ ኢየሩሳሌም ፓይላ ኑሼና ሻን ከጋጝ።⁴እሺዻ ፑኡሺ ታታቻንካ ውርካ ቃሼ ውርካ እርርሲኔንካ ቶኦካ ይሁኔንካ ኣይሁዴ፤ ክርስቶስ ጅሼ ኦን ኣንሻ እንግን።⁵እንግንዻ ሺጝ ከይሁዳ ቤተልሔም ውር እንካ ባሪዮ ሺጝ እያጜ ቶኳዬ ሺጝ እያይ፤⁶ይን ጌዬን ከዳሊካ ይሁዳ እን ቤተልሔም ከኦካ ታታቻንካ እንቃ ክየምጵንዻ የቶክኬን፤ እንካ ባክ ዛርሲ ናኒ ካ እስራኤሉጝ ቱልባ ኬኦኑኑዬ።⁷ጩዋ ሄሮድስ ሺውሽ ውር ጊታይ ቶዬን ቢሊ ኬራሼኔ ናንዳካ ሃሳውኔን ታይ ቢሊ ጌይኖጝ ኬሹ ሊኪ እባጃ።⁸ውር ጊታይ ቶዬን ቢሊዻ ይዕሲሼያ እያጝካ ቤተልሔም፤ ዋይሼ እንግን ፓይዬ ዎሺ ውዋ፤ ፕር ኣንዻ ካካማ ይሁኖጝ የጌያያጝ ዋኬ ፓዬን ኦናኒዬ ኣኒኔ ኦን ሜይቴ ኣምባ።⁹ውር ጊታይ ቶዬን ቢሊዻ እጝ ቢቲ እን ክያጆጝ ዋዮጝ ጩዋ ካርሲያ ፓዬን ጊዬይ። ቢሊ እን ቶዬ ከታጝ ሹሽ ቱሎጝ እያንሽ እንግኔ ቦሼያ ሃም ውዋ ኣኖጝ።¹⁰ቶዬ ቢሉጝ ዋዝንዽያ ከኦይ ኣኖጝ ሳጊ።¹¹ሹ እን ሁሉኬ ቶኦጝ ጌይ ውዋ ኬጁዋኔ ማሪያም፤ ቶኬ ኩዋሚንዻዬ ይወና። ቦሁ ሣጥን ጊዬይዻዬ ጋያ እሺ ወርቄ፣ ቁኛ፣ ካርቤም።¹²ካማር ሃምካ ሄሮድስ ዋኬኔ ባሪዮ ኬእን ኣጅሼ እንግን ኬሹካጝ፤ ኬጉዋር ቃክ ዋካ ሃምካ ፔን ጊዬዩጝ።እያጝካ ግብፅ ጉኩሼን¹³ውር ጊታይ ቶዬን ቢሊ ፓዮጝ ጩዋ ውርካ ኤርጎካ ታቺ እን ዹዋልሼ ዮሴፍ ኬሹካዬ፤ ዋይሼ እሺ ናሹጝጋ ሹ እንኬ ዋኮጝ ሌይ ሃምኬ እባጆጝ ቦው ውዋዌ ጁዋኔዬ ሪሼ እያንካ ግብፄ ኡፋ ኬታይ ሄሮድስ ዎሻ ውዋ ኒሼኔ።¹⁴ዬ ዮሴፍ ናሹጛ፤ ቦው ውዋዌ ጁዋኔዬ ከሚክር ኩያ ግብፅ።¹⁵ከታይ ሌይ ሃም ሄሮድስ ካኣርሾጝ ኡፓ። ከይጝ ሃሺውባ ውዋ ናኒ ከዳሊካ ግብፅ» ሺጝ እያይኔ ኬቶካ ውርካ ባሪዮ ክያጃ እጝ ሃሳዎጝ ሙኔና።¹⁶ሄሮድስ ውር ጊታይ ቶዬን ቢሊ ቱዋኔ እሺ ሹ እን እባጆጝ ካሎን ማኒሻ። ኬእን ውር ጊታይ ቶዬን ቢሊ ክያጆጝ ሃንታካ ጁሙ ጊታይ ኣይ ቦን ዻዌ ከኦይን ዱቡጝ ካቤተልሔሜ ካጶሮክ እንካ ክራ እጜ ፓይላ ይዕሲዬ ኒሺሻ።¹⁷ከይጝ ኬውርካ ባሪዮ ኤርምያስ ሺጜ እያጜ ክያጆጝ ሙኔና፤¹⁸«ናቅድ ካኦቆራዬ ካኡቹካ ታቺዬ ዋዬና ከበራማ፤ራሔል ኦቆራ ናንዳካ ሃንታ ኔኒ፤ ቁዋቅትሼን ካኒ ቻሊኬን ሃንታ ኔኒ ፓይላ ጃኬናዬ።ከግብፅ ፓይሼያ እያንካ ናዝሬቱጝ¹⁹ሄሮድስ ኣርሾጝ ጩዋ ውርካ ኤርጎካ ታቺ እጝ ዹዋልሼ ዮሴፌ፤²⁰ሺጝ ናሹጝጋ ቦው ውዋዌ ጁዋኔዬ ዋክሼ እያንካ ፔንካ እስራኤሉጝ፤ እን ዎሺ ውዋ ኒሼኑጝ ኣርሻዬ።²¹ዮሴፍ ናሹጜ ቦው ውዋዌ ጁዋኔዬ ዋካ ፔንካ እስራኤል።²²ኣይባዬ ኣርኬላዎስ ከይሁዳ ጌጳዽዬ ኦካ ባልካ ሹኔ ሄሮድሴ ሹ እን ዋዮጝ ሪግሼና። ኬሹካ ጋጅሺሽ እሺያ ኩያ ሃምካ ጎብሼንካ ገሊላጝ፤²³ካርሲያ ፔን እጝ ሺጜ ናዝሬት ኩዬ ኡፌን። ከታይ ከውርካ ባሪዮ ሺጝባ ውርካ ናዝሬት»

ሃፑክ 3ኪሊማካ ዮሐንስ እንካ ዱቅኔኑጝ¹ከትጌሽ እን ዮሐንስ እንካ ዱቅኔን ከይሁዳ ቦና ክያኒ ክሊዬኔ ኩና።²ክሊማ ኔኒዻ ሃኬና ሺጝ ጌጳሞካ ባሪዮ ሳኒያዬ ሁሉክ ይሁኔን»³ከውርካ ባሪዮ ኢሳይያስ ሺጜ እያጜ ክያጆጝ ሃእሺ፤«ከቦና ክያኒ፤ እንካ ኣሽኪ ጉዋርካ ታቺ እጝ፤ ናቅድ እን ሺጚ ኣሽኪ ጉዋሬ ኡቹኩጝ።⁴ኣፓላካ ዮሐንስ ኣዬ ጪራሽካ ጋማላጝ፤ ከእልኮ ቁም ቃልሺ። ዳዓኖ ኔኒዻ ሃካፍታዬ ይትሬካ ቦናዬ።⁵ከኢሩሳሌሜ፣ ከውርካ ይሁዳ ፓይላዬ ውር ጊታይ ኣኔን ማራካ ዮርዳኖስ ፓይላ ፓዬን ሃምካ ዮሐንሴ፤⁶ሺዕሺሺ ሴሶ ጊዬይህዬ ዱቅዬና ኬቡዋ ኔኒ ኦካ ዳራካ ዮርዳኖስ።⁷ውር ጁዋኑካ ፈረሳውያኔ ካሳዱቃውያኔ ፓይኔ ሃምካ ራቅካ ዱቅኔኔ ሹ እጝ ጌዮጝ ዋይሼ እንግን እያጝ፤ እየው ሃንታካ ዱብቴን/ ኣይባዬ ከክያጃ ጋራ እንካ ኩዋው ከዻቅቶጝ ሃኒን ኪሊ እየው/⁸ጊታይ ሁሉኪ ይሁኔን ጉፑቷ ካርቡ፤⁹ከቃቦ ኬና ሺጚ ኣብራሃም ሃሹኔ ጉዋዩ ኦይድ እየው ኤታጋን ቱዋንቴን፤ ሃዋይሼባ እየው ባሪዮ ኬኦካ ባይ ጊታጝ ናንዳካ ሃንታካ ኣብራሃም ቻሊባ ቲቲሼን።¹⁰እየዎ ቲብጁ ሼክዬያ ጊሜይካ ሻሪ ቱምዬን፤ ሻሪ እን ማሪ ካርቡ ሹቃ ኡፑቴን ፓይላ ቃጭባ፤ ፓቅሼባ ጉ ክያንዻ፤¹¹ኣን ናንዳካ ይሁኔን ሃዱቅ እየውባ ኬሙዋ፤ ኣይባዬ እን ቻው ዼቴን ማራን ሁሉኩሼን፤ ቁዋቃ እን ሳጊኬ ኦናኑጝ ኬኣን ማ ኩንባ። ዬ እሺ ዱቅ እየውባ ኬኡሲካ ባሪዮዬ ጉወ።¹²ቋሼ ኣኔን ኬቡዋ ኔኒ፤ ኩዻን ካይካይባ፤ ሲንዳን ኡቲሼባ ኳትን፤ ዬ ሾሎቃን ኡዱባ ኬጉ እን ማር ካዬኑጝ።ዱቅኔንካ ኢየሱስ¹³ከሹ እን ኢየሱስ ከቡዋካ ዮሐንስ ዱቅኔን ከገሊላ ኩና ዮርዳኖስ።¹⁴ዬ ዮሐንስ ሺጝ « ይጝ ኣይኬን እያይ፤ ኣን ዎሺሽ ኬእን ዱቅኔንያጝ እን የኩን እያን ዮጝ ናኑጝ? ሺጝ እያይኔ ሃርጌያ።¹⁵ኢየሱስዻ ሺጝ ጊዳሞ ኣኔኬን ናሺሼ ኣምባ፤ ይጝ ሻሜን ጫንቃላን ፓይላ ሙኔን ሁሉክሼባዬ» ዮሐንስዻ ቱምያ ከክያጃ እጝ።¹⁶ኢየሱስዻ ዱቅባ ቱላ ከሙዋ ክያኒ፤ ይሪካ ፎላ ቦወኔ ኡሲካ ባሪዮ ማቲ ሆሌዬ ጎቤ ጌያ።¹⁷ናቅድ ኬና ሺጚ «እየዎ፤ ኬእሺ ዋዝንሲ ኣን ውዋ እን ናኑጝ ሃናሺዬ ሃይጝ ከፎላ ዋዬና።

ሃፑክ 4ፓታናካ ኢየሱስ¹ከኦይን ጩዋ ኡሲካ ባሪዮ ካፓታኒዬ ከዲያብሎስ ቦሼያ ሃምካ ቦናጝ።²ቶሮንዽዬ ሹ ኦይታሜ ምክር ኦይታም ካሽ ቃዋ እሺ።³እንካ ፓታና ኩን ኦካ ኢየሱሴ፤ ሺጝ የኣይያ ውዋካ ባሪዮያጝ ባይ ጊታጝ ካማትዬ ባላሻ ይንዳ ኤርግትየ።⁴ኢየሱስዻ ሺጝ፤ ሃንታካ ውር ኡፍኬን ከባላሻጵን ሺጝ እያይኔ ቶኳ ሺግ እያይኔ ዋሼያ እሺ።⁵ጩዋ ዲያብሎስ ቦሼ ሃምካ ከተማካ ውርካ ይሁኔኔ ቡልሼ ሃምካ ቶኦካ ባሪዮ ዾዮኬ፤⁶ሺጝ የኣይ ውዋካ ባሪዮያጝ ኬኦጝ ኡንጉልሼ እን ኤምኑ ዳራ ሃም፤ ሺጝ እያጜ ቶኳዬ፤ «ጃፍ ኑኑ ካማርኬ ባይ ሙኔኔ፤ ከቡዋ ጊዬይ ካቲት እንባዬ፤ ውርካ ኤርጎ ናንዳካ እን ጌርግትባ።⁷ኢየሱስዻ ሺጝ፤ እያይ ከወርቀት ሺጝ ኦይድ ባሪዮ ኣምላክ ፓታንሲዬኔ ቶኳ ሺጝ እያይኔ ዋሼያ እሺ።⁸ፕር ዲያብሎስ ቡልሼያ ኢየሱስ ኦካ ጋግ ኬና ካሎን ኣይ ዼግ፤ ሺጝ ታታቻንካ ፔኑጝ ከጌጳሞ ጊዬይ ዹዋልሼ ኣምባዬ፤⁹የቡዴ ይወንያ ኣንያጝ ይጝ ፓይላ ሃኣይ እንባ» ሺጝ እያይ።¹⁰ኢየሱስዻ ሺጝ፤ እን እጁጝ ከሌሜን ናኒ ካም ዹክ/ ይሁንቴ ባሪዮ ኣምላክ፤ ሺጝ ኣምላክ ሃእሽጵኔ ቶኳዬ።¹¹ጩዋ ዲያብሎስ ኦይድ እሺዬ ኩያ፤ ውርካ ኤርጎዻ ኩኔ ቁዋቅትሺሻ እሺ።ኢየሱስ ካርሲያ ኪሊማ¹²ኢየሱስ ዋዬ ቁሜንካ ዮሐንሱጝ ዋካ ገሊላ።¹³ኦይድ ከተማካ ናዝሬቴ ኩያ ሃምካ ፔን ጊታዬን ከኛፓስካ ዘብሎኔ ካንፍታሌሜ እያጝካ ቅፍርናሆሜ ካርሲያ ኡፔን።¹⁴ከኦይን ከውርካ ባሪዮ ኢሳይያስ ሺጜ እያጜ ክያጆጝ ሙኔና፤¹⁵ዳሊካ ዘብሎን፣ ዳሊካ ንፍታሌም፤ ከዮርዳኖስ ታቴ እንካ ጉዋርካ ቋጩርካ ኛፓስ ገሊላካ ዛርሲ፤¹⁶ዛርሲ እን ቆቤን ድሙጉ ክያኑጝ ጌያ ኦሜሌል ታቺ፤ እን ኣኔን ኦካ ሙሆልካ ዳሊካ ኣርሼን ኦሜሌል ቱልሼያ።¹⁷ካርሲ ኬኦይኔ ኢየሱስ ካርሲያ ሁሉኪ ይሁኔን፤ ጌጳሞካ ባሪዮ ድያውሻ ሺጜ ኪሊኔን።ሺወንካ ውርካ ዻይኔን ጊታይካ ሌሜን¹⁸ኢየሱስ ሳጊዬኬ ቋጩርካ ኛፓስካ ገሊላጝ፤ ጌይ ጪኒጌንካ ጋጝ ዻ እጝ ሺጜ ስምዖኔ ጪኔ ኔኒ እንድርያሴ። ጋይ ውርካ ቆውኔኔ ጋኔን ኘፑቴይ ጊዬይ ኛፓስ ክያኒ ፓቅሼኔ።¹⁹ኢየሱስዻ ዋይሼ እንግን፤ ፓዬንባ፤ ዻይቴ ኣምባ፣ ሃሻሚባ እየው ጊታኬና ካቆው።²⁰ይሪካ ጎይድ ኘፑቴይ ጊዬይዬ ዻዬያ።²¹ሳጊዬዻጝ፤ እንቃ ጌይ ጪኒጌን ካጋጝ ዻ ሃንታካ ዘብዴዎስ ያዕቆቤ ጪኔ ኔኒ ዮሐንሴ። ከሹቡጌን ጊዬይ ዘብዴዎስ ጋኔን ኘፑቴይ ጊዬይ ኣሽክዬን። ኢየሱስዻ ሺዋ እንግን፤²²ይሪካ ጎይድ ጋጊ ጊዬይዬ ሹኔዬ ዻዬያ።ባይሺሼንካ ውርካ ቡርቂ²³ኢየሱስዻ ኣኔንባ ኦካ ቶኦ ጊታይካ ይሁኔን እርርሲዬኔ፤ ኣኔንባ ክያጃ ሹቃቃ ጌጳሞካ ባሪዮ ኪሊዬኔ፤ ኦካ ጫቃንካ ዛርሲ ባይሺሽ ቡርቂ ፓይላዬ ኣኔን ፔንካ ገሊላ ፓይላ ሺሪዬን።²⁴እን ናሹጚ ኬኦይን ጎሺ ኔኒ ዋዬና ኦካ ፔንካ ሶሪያ ፓይላ፤ ዛርሲዻ ጊታይ ዴሜንኬ ቡርቂ እንቃ እንቃጝ፤ ጊታይ ጋሊዬን ኬቡርቂ ጋራጝ፤ ጊታይ ኡሲካ ቤሮ ኣኖጝ፣ ጊታይ ኣኔ ቡርቂ እጝ ፓዌጆሉጝ፤ ኤላን ፓይላ ቦሼያ እሺ፤ ባይሺሻዻ።²⁵እጝ ናሹጜኬ እን ጊታይ ፓዬንኬ ገሊላጝ፣ ጊታይ ፓዬንኬ ከተማ ታጵ እጝ፣ ጊታይ ፓዬንኬ ኢየሩሳሌም፣ ጊታይ ፓዬንኬ ይሁዳዬ ከዮርዳኖስ ታቶጝ ዛርሲ ጁዋኑ ዻዬያ እሺ።

ማቴዎስሃፑክ 5ኪሊማ እንካ ጋግ¹ዛርሲ ጁዋንዻ ፑኡሺሜኔ ሹ እን ጌዮጝ፣ ሌፕ ጋጊዬ ኡፓ፤ ውር ጊታይ ዻዬ ጆሌ እሺዻ ፓዬና ኦኔኒ።²ሺጝ እያጜ ካርሲያ እንግን እርርሲዬን፤³«ኬኡሲካ ባሪዮ ጊታይ ኣይ ኩፑጝ ጋይ ጫንቃሌ ጌጳሞካ ባሪዮ ሃጊዬይዬ፤⁴ጊታይ ሞይካድ ጋይ ጫንቃሌ ጌይባ ቁዋቂቲ፤⁵ሌሟን ጋይ ጫንቃሌ፤ ጁዋንትሽባ ዳሊ ኪያኒ፤⁶ጊታይ ጫንቃል ኣዬን ካሽ ቃወዬ ኮርጉ ቃወዬ ጋይ ጫንቃሌ ናዓሽባ።⁷ጊታይ ሺዕሺሺ ጋይ ጫንቃሌ ጌይባ ሺዕሺኔን።⁸ጊታይ ሸን ጊዬይ ኣይ ጫንቃሉጝ ጋይ ጫንቃሌ ጌይባ ባሪዮ።⁹ጊታይ ጎብሺ ሹቃጝ ጋይ ጫንቃሌ ሺጝ ሃንታካ ባሪዮዬ ሺውባ።¹⁰ሺጝ ናንዳካ ጫንቃሌ ጊታይ ፓዩጝ ጋይ ጫንቃሌ፤ ጌጳሞካ ባሪዮ ሃጊዬይ።¹¹ውር ናንዳካ ኣን ይራ እየውያጝ፤ ዋኬ እየዌ ጋራ ፓይላ ድኬያ እየው ኬሾሮያጝ ጋይ ጫንቃል።¹²ኣንቲቲ እን ከቦቴ ፎላ ዾዮኩጝ ናንዳካጝ ኣዬ ታቹጝ ካዋዝንሲ እየውባ፤ ሻምባ ሾሮ ኬሌሜን ጉዩ ውርካ ቶካ ባሪዮ ጊታባ ኣኖጝ የዋክቴያ እያይ።ሶቆዬ ኦሜሌሌ¹³እየው የኣያ ሶቃካ ዳሊ፤ ሶቆ ሶቆ ኣይን ኔኒ ጩዋንቲ ኔኒ ካይያያጝ ጩዋንቲ ኔኒ ዋሼ ጌዬን ቻሊሜንባይ? ካፓቅሼ ሹኑኬውርካ ባጞጝ ሳጊ ኣይኬን ካኣሽኪኔን።¹⁴እየው የኣያ ኦሜሌልካ ፔኑጝ፤ ከተማ እን ኣኔን ኦካ ጋጉጝ ቻሊሜንኬን ራሺኔን።¹⁵ውር ላሉጙሽ ፓኖሴ ኣጁጝኬን ከኦካ ካራም ዱቡ፤ ጊታይ ኣኔን ቶኦ ቱዎጝ ፓይላ ካ ላሉጞጝ ጋጁጝ ካራም ካራም ዾዮክ።¹⁶እያይ ውር ጌይ ዋድማ ሹቃ እን ጊዬይዬ ካጌጳሲዬ ሹኔ እን ጊዬይ ኣኔን ፎላ ዾዮክ ከሌሜንካ ውር ላሉጛ።ቱንሲካ ክያጃ¹⁷ክያጃዬ ውርካ ባሪዮዬ ኦይድ ከኦኮኑጝ ሃኩኔ ሃንቺሺዬን ዋሺቴን፤ ሃኩኒ ሹዋጵሼን ዬ ሃካና ኩንኬን ሃንቺሺዬን።¹⁸ሃዋይሼ እየውባ ኣኩሉክ፤ ፎላዬ ዳሊዬ ሌይ ሃምካ ሳጊዮጝ ክያጃ ፓይላ ሙኔንባዬ ከኦካ ክያጃ ፊደል ክየም ወይ ኦኬ ክየም ጎብሽኬን።¹⁹ዬ ውር ክየምጵንዻ ኬኦካ ክያጃ ጊታጝ ኣይን ጆጊ እን ሳስክያያጝ፤ እንቃዻ ካሳጊዮ እርርሲያያጝ፤ ከኦካ ጌጳሞካ ባሪዮ ሺጝ ዽኒዬ ሺውባ፤ ኣይባዬ ክያጃ ጊታጝ ሙኒሽባዬ እንቃዻ ካሙኒንቴባዬ እን እርርሲ ከኦካ ጌጳሞካ ባሪዮ ሺጝ ታቺዬ ሺውባ።²⁰ጫንቃል ኣዬን ጊዬይ ሃኬ ፈረሳውያኔ ውርካ እርርሲኔንካ ክያጃ ባካ ሌሜኔ ማቲ ጫንቃሌ ማር ጌዬንያጝ ሃምካ ፎላካ ጌጳሞ ሁሉኬን የቻሊያኬን።ናፒሲ ኒሼን ሁሉኩሼኬን²¹ውር ጊታባካ ሌሜን ዋይሼ ኦይድ ኒሼን ካጝ ኒሹጝ ኮምሼባ የዋያያ፤²²ዬ ኣን ሃዋይሼባ እየው ከኦኬና ማር ኣኔን ውር እን ማኒሼ ጪኔጝ ኮምሼባ፤ ውርካጝ ዋይሼ ጪኔ ሞኙጝ ኦካ ሌሜንካ ካራም ጋንሽባ፤ ፕር ካጝ ሺጚ ዳዳቡጝ ኮምሼንካ ጉ ካሊ እሺባ።²³ዬ ሹካጝ መባ ኑኑ ኦካ ጋላ ቡልሼን የሺጜ ባሪዮ ቡልሼን ኦይን ጪን ማኒሺሼ እን ኣኔዬ ጌይ ጶቅያጝ፤²⁴መባ ኑኑ ኦቼባ ኦይካ ሌሜን ጋላ ቡልሼን፤ ኬሌሜን ካሜ ናሺ ጋምባ እኔ ጪኔ፤ ጩዋ ዋኬ ቦሼባ መባ ኑኑ ባሪዮ።²⁵ባላጋራ እን ኑኑ ካሲሲ እን ካማር እን ኮምሺሼኔ፤ እን ቶዬን ጋራካ ውር ጃ ካማር ሳስክዬ እንካ ቁም ኣዬኔ፤ ካማር እን ቶኦካ ቁሜንዻ ፓቅሼን፤ ካኒ ኣኔንባ ጉዋር ክያኒዬ ይሪካ ካሜ ናሺ ጋንባ ኬባላጋራ ኑኑ።²⁶ሃሺጝባ ኣኩሉ፤ ኮምሺሼያ እንያጝ ሌይ ሃምኬ ካሺዬ ሺሊንጊ እንካ ቱንሱጝ የቱልኬን ከኦይን።ኩጳሲዬን ሁሉኩሼኬን²⁷ሺጜ ኦይድ ኩጳሺዬን የዋያያ።²⁸ዬ ኣን ሃዋይሼባ እየው፣ ውርካጝ ቶይ ሃኣጚ ኬካርቡካ ኣንግርማጝ ፓይላ ኩጳሲዬና ኬሸን ከእሺ።²⁹ካርቡ ኑኑ ቡዎን ኣኔ ክያጃካ ሴሶያጝ ቡሌ ፓቅባ ይሪካ፤ ካፓቅሼ ሩዋ ኑኑ ፓሲ ሃምካ ጉያጝ ካፓቅሼኬ ኦካ ሩዋ ኑኑ ቶና ሃባሺ።³⁰ቡዋ ኑኑ ቡዎን ኣኔ ክያጃካ ሴሶያጝ ቃጬ ፓቅባ ይሪካ፤ ሩዋ ኑኑ ፓሲ ካፓቅሼ ሃምካ ጉያጝ ካፓቅሼኬ ኦካ ሩዋ ኑኑ ቶና ሃባሺ።³¹እን ቡሊ ኝያ ኔኒ ፓይላ ካጋዬ ወርቀትካ ቡሊኔን ኣኔባ ከእያይ ሺጜ የዋያያ።³²ዬ ኣን ሃዋይሼባ እየው፤ ማርሼ ዾዮክ ኦይን ኩጳሲምኔኔ ውር እን ቡሊ ኝያ ኔኑጝ ፓይላ ሻምባ እያይ ካኩጳሲምኖጝ፤ ኬክያጃ እጝ ኝያ እን ቡሎጝ ውር እን እያኒሹጝ ኮምሼ ኬኦይን ኣሽክዬ ኩጳሞጝ።ናንዳካ ዜርማ³³ውር ጊታባካ ሌሜን ዋይሼ ኦይድ ኬሾሮ ዜርሚኔን፤ እን ዜርሜን ኦካ ማሪካ ቶይ እን ኤምኑ ሺጜ እያይ የዋያያ።³⁴ዬ ኣን ሃዋይሼባ እየው ኦይድ ካሎን ዜርሚንቴን፤ ኣይን ፎላጝ ኦይድ ዜርሚንቴን፤ ሃኦካ ኡፔንካ ባሪዮዬ፤³⁵ኣይንኬ ዳሉጝ ኦይድዜርሚንቴን፤ ሃኦካ ኡሲ ቦወንካ ባሪዮዬ፤ ኦይድኬ ኢየሩሳሌም ዜርሚንቴን፤ ሃካታማካ ቢቲ ታቺ እጜ፤³⁶ኣይን ኦካ እን ኤምኑጝ ኦይ ዜርሚኔን፤ ጭራሺ ክየምጵንዻ ፎልቼን ወይ ድሙጉ ሻሜን የቻሊኬኔ።³⁷ዬ የሃሳውናያጝ ክያጃ ጉዩ ሃኣኩሉክያጝ ሺጚ ኣኩሉክ፤ ማር ኣዬንያጝ ካኣይ እያይ፤ ከእን ኣይ ሹኑክ ፓይላ ካኩዋው ሃጋራዬ።ናንዳካ ኣሽክዬን³⁸ሺጜ ካርቡ ናንዳካ ካርቡ፤ ኒጊ ናንዳካ ኒጊ የዋያያ።³⁹ዬ ኣን ሃዋይሼባ እየው፤ ውር እን ኣሽክዬን ክያጃ ጋራጝ ኦይዲ ኖኪቴን፤ ኣይባዬ ውር እን ሙሪ ዻቢን ኑኑ ቡዎን ሁቡሼባ ኑዋዻ።⁴⁰ውር ክየም ካሲሲ እን ከኣንቲቲካ ቡዋ ኑኑ ቦወንያጝ ሌሜዬ ኣይባ።⁴¹ውር ክየም ሻማ እን ጊዲ ኬጉዋር ኬና ዹካትሽ ኪሎ ሚትር ክየምያጝ ሌሜ ጉዋር እንቃዬ ፓይባ ኬጋጝ።⁴²ጊታይ ይወን ኦኑኑጝ ኣይባ፤ ከኦኑኑ እን ዎሺ ቢዲሩጝ ኦይ ማሪ ቲቲሼን።⁴³ሺጜ ናሺባ ናሺዺ ኑኑ፤ ሚኔባ ጋል ኑኑ የዋያያ።⁴⁴ዬ ኣን ሃዋይሼባ እየው፤ ናሺባ ጋል ጉዩ፤ ናንዳካ ጊታይ ዋኬ እየው ይወንባ።⁴⁵የሻማያ እያይንያጝ የማትያባ ሃንታካ ሹቡጊን እን ጉዩ ኣኔን ፎላ ዾዮክ፤ እሺ ቡልሼባ ሹሽ ናንዳካ ውር ጋራኔ ሌሟኔ፤ ጎትዻ ቢውሺሼባ ናንዳካ ውርካ ሴሶዬ ጫንቃላኔ።⁴⁶የናሺያያ እን ናሺ እየውጵንያጝ የጌያ ኦኬ ኬና ኣኒኒ እያን? ኤ ውር ጊታይ ፑኡሺኔ ጆል ጊቢሪካ ኬና ኣሽኪ ይጝ ኣኔኬኒ?⁴⁷ሃኦኬና የቲትሺቴ ጪኒጊንጵን ቡዋያጝ ኬውር እንቃ የኣያኬ ኦ ላሻ? ዛርሲ ኬና ኣሽኪ እን ኣኔኬኒ?⁴⁸ዬ ሹቡጊን እን ጉዩካ ፎላጝ ኣዬ ካሎን ጫንቃን እየውዻ ካሎን ኣይ ጫንቃል።

ሃፑክ 6ናንዳካ ኦኬ ባሺ ኣይኔን ¹ውርካ ቶዬ እየው፤ ዋድማ ሹቃ እንጉዩ ኬሌሜን ጊዬይ ኣሽክዬን ኣጅቴባ፤ የሻማያ እያይዻያጝ ኬኦካ ሹቡጊን እን ጉዩካ ፎላጝ የጌያኬን ኣንቲቲ። ²ኣጁጋን ካጌጳሲዬ እንግን ከኦካ ውሬ ኬእያይ ሻሜ ኦጉዋይካ ጉዋሬ ከቶኦካ ይሁኔኔ፤ እየውዻ ሹካጝ የሺጝቴ ኩፓን ኦኬ ኣዬን የሺጚ ካቶይ ኣምባዬ ኦይ ጡሩንባት ትቢሲዬን፤ ሃዋይሼባ እየው ኣኩሉክ፤ ጊታይ ሻሚ እያይ ቦዋ ኣንቲቲ ጊዬይ ፓሲ።³ዬ እየው የኣያያ ኩፓንያጝ እን ቡዋ ጉዩ ቡዎን ኣሽክዮጝ ቡዋ ጉዩ ዋርካታ ካማር እባጄን፤⁴ኦኬ ኣይኔን ጉዩ ካኣይኬ ራሺኔን፤ እን ጋሽክዬ ከራሼን ሹኔ እንጉዩ ካጌዩጝ ካሺሼ እየውባ ኣንቲቲ ጉዩ።ናንዳካ ይሁኔን⁵የይሁናያጝ ኦይዲ ኬውር ኣጁጋን ማቲቴን፤ እንግን ሺጝ ውርካ ቶይ ኡዋባዬ ኦጉዋይካ ቶኦካ ይሁኔኔ ኦጉዋይካ ጉዋሬ ናሺባ ማራ ጎሬ ይሁኔን፤ ሃዋይሼባ እየው፤ ኣንቲቲ ጉዩ ኬፓሲ ቦዋ።⁶ዬ እን የሺጝያ ይሁኔንያጝ ሁሉክ ሃምካ ቶኦ ኑኑጝ፤ ሃጌ ሃፑኬ ይሁንቴባ ሹኔ እን ኑኑ ኣኔን ኦጁጉጝ፤ እን የኣስክዬ ኬራሼን ሹኔ እን ኑኑ ጌዬጝ ካሺሼ እንባ ኣንቲቲ።⁷የይሁናያጝ ክያጃ ጊታይካ ማም ኬሌሜን ሃሳዋ ጉዩ የዋሻ ኬኦኮኑጝ ካዋያ ዛርሲዬ፤ ኦይዲ ሃሳዋ ጉዩ ራጅምሺቴን።⁸ኦይዲ እንግን ሙኒኔን፤ ሹቡጊን ጉዩ ኬሌሜንካ ይሁኔን ጉዩ ኦይንካ ዎሺሽ እየው እባጃዬ።⁹ዬ እየው ሺጚ እያጜ ይወንባ፤«ይን ኡፔን ፎላ ዾዮክ ሹኖጝ ጉዋዩጝ፤ ሮጝ ኑኑ ካጌጳዺባ፤¹⁰ጌጳሞ ኑኑ ካኩዋባ፤ ከእያይ ክያጃ ኣኒኔ ፎላ ዾዮክ ካኣኒንቴባ ዳሊ ክያንዻ።¹¹ምሽ እን ጉዋዩ ካሹ ጮል ሹጝ ኣይ ኡዋባ።¹²ፕር ኡዋዻ እን ሃሴሲቶጝ ኬእያይ ሃሺጝቴ ሺዕሺሼ ኡዋባጝ ሴሶ ጉዋዩ ሺዕሺሼ ኡዋባ።¹³ኦይ ኡዋው ጋሎ ክያንዻ ዾቅሼን ኬጋራ ክያንዻ ኬዻዓሺ ኡዋባዬ፤ ጌጳዽዬን፣ ቁዋቅቲ፣ ጌጳሞ፣ ቦንኬ ቦን ሃኑኑዬ፤ ኣሜን።¹⁴እን እየው የሴሲቶጝ የሺጛያ ሺዕሺሼ ኡዋባያጝ ሹኔ እን ጉዩ ካፎላጝ ፕር ሺዕሺሼ እየውባ።¹⁵ኣይባዬ ሴሶካ ውር የማራያ ካሺዽባ ሺጜንያጝ፤ ሹኔ ጉዩዻ ሴሶ ጉዩ ዋይሼኬን እየው ካሺዽባ።ናንዳካ ቶሮንዽዬን¹⁶የቶሮንዽያያጝ ኦይዲኬ ውር ኣጁጋን ሩጴን፤ እንግንዻ ሩጴን ጊዬይ ካጊባጅባዬ ሌሜ ዹዋልሼን ማሪ ጊዬይ ክያኒ ሞይካዾ፤ ዋይሼባ እየው ኣኩሉክ፤ጊታይ ሻሚ እያይ ኣንቲቲ ጊዬይ ኬፓሲ ቦዋ።¹⁷ዬ እን ሹካጝ የሺጜ ቶሮንዽዬን ኡዋንባ ማሪ ኑኑ፣ ጵሽባ ሩዋ ኑኑዻ፤¹⁸ከቶሮንዽዬን ይጝ ሹኔ እን ኑኑ ኣኔን ኦጁግጵን ካእባጆጝ፤ ዬ ከኦካ ውር ማቲባ ኬና ሻሜ ጁግ፤ እን ሻሜኬ ራሼኑጝ ሹኔ እኑኑ ካጌዩጝ ካሺሼ እንባ ኣንቲቲ።ሆድማሞካ ፎላ¹⁹ውርካ ኣማ ናንዳካ ኣምኔን ካጊያምሼ ሃጌን፤ ጎርጉዻ ካቆዻ ቻሊዬ ዳሉጝ ኦይዲ እየው ኤታጋን ሆድማሞ ፑኡሺሽቴን፤²⁰ኣይባዬ ውርካ ኣማ ናንዳካ ኣምኔን ካጊያምሼ ሃጌን፤ ጎርጉዻ ካቆዳ ካማሬ ቻሊዬን ፑኡሺቴባ እየው ኤታጋን ሆድማሞ ፎላ ዶዮክ ሃም፤²¹ኦይን ሆድማሞ ኑኑ ኣኖጝ ሻን ኑኑዻ ኣኔን ኦይን።²²ካርቡ ሃፓኖስካ ሩዋ፤ ካርቡ ኑኑ ሃሹቃያጝ ሩዋ ኑኑ ፓይላ ማቲባ ኬና ቆቅሼኬ ፓኖስ።²³ካርቡ ኑኑ ሃዴምንያጝ ሩዋ ኑኑ ፓይላ ማቲባ ኬና ቆቅሼ ኬድሙጉ፤ ኣኪ ፓኖስ እን ኣኔን ሩዋ ኑኑ ቱዎጝ ማቲያ ድሙጉያጝ፤ ዲሙጉ እጝ ካኣይ እያን ኡጉድ?²⁴ውር ክየም ቻሊኬን ውር ዻ ዋድሚሺሼን፤ ሚኔ ክየሜ ናሺባ ኑዋ፤ ባሪዮዬ ቢሬዬ ክየምጵን ጎሜን ቻሊሜንኬን።ኦይ ኦቆርኔን²⁵ዬ ሃዋይሼባ እየው፤ ናንዳካ ቆቤን ጉዩ ሃኣማኦ? ሃማታ ኦ? ሃኪማ ኦዻ? ኦይዲ እያይ ሺጜ ኦቆሪንቴን። ዻቆ ኬኦካ ዳዓኖ ሩዋ ኬኦካ ኣፓላ ሳጊኬኒ?²⁶ይንዳ ቶይየ ኩባርካ ዾዮክ፤ ኮርኬን፣ ፓቲኬን፣ ኡቲሼኬን ኳቲን ክያንዻ ካኣይባዻዬ ሹኔ እንግዬይ ካፎላጝ ኣምሻ እንግን። እየው ኬኦጊዬይ ካሎን የሳጊያኬኒ?²⁷ኣይባዬ ኦካ ጫቃን ጉዩ ኦቆሬኔ ሌሜ ሰዓት ክየምጵንዻ ካቻሊ ሌሜን ሃኒን?²⁸ፕር ናንዳካ ኣፓላ የኦቆርና ናንዳካ ኦ? ይንዳ ቶይየ ኦላካ ጳል፤ ሳጊኬን ወይ ትርኪኬን።²⁹ዬ ሃዋይሼባ እየው፤ እን ኣኔ ጌጳሞ ቢቲ እጝ ሰለሞንዻ ከኦላ ጊታጝ ካኒ ክምኬን ክየምጵንዻ።³⁰እየው ጊታጝ ይሁኔን ጆጊህ/ ባሪዮ ቶይ ሹጜ ክራ ሃሪሽያጝ እንካ ፓቅሼ ጉ ክያኑጝ ሹጩካ ጳል ክማ እንያጝ እየውጵን ሳስክዬ ማር እያን ክሚሼን?³¹ዬ ኦይድ ሃኣማ ኦ? ሃማታ ኦ? ሃክማ ኦዬ ኦይድ ኦቆርቴን።³²ዛርሲ ኦጊታይ ፓይላ ጌዬን ኦቆሬንባ፤ ሹኔ እንጉዩካ ፎላጝ ኦግታይ ፓይላ ካዎሺሼ እየው እባጃ።³³ዬ ኬፓይላ ሌምሺዬ ጌጳሞካ ባሪዮ ዎሺ ጫንቃል ኔኒ፤ ጊታይ ፓይላ ሌሜ እየውባ።³⁴ዬ ኬእንካ ዻሙ ቃቢዬን ኦይድ ኦቆርቴን፤ ኦቆራካ ዻሙ ካኡጙሼ ዻሙ፤ ሹ ክየም ክየም ጋሎ ኬና ኣይ ኔኒ ኣኔባዬ።

ሃፑክ 7ውር እንቃ ካማር ኮምሼን¹ካማር እየው ኮምሼኔ ውር ክየምጵንዻ ኦይድ ኮምሼን፤²ኬእያይ የኮምሺቶጝ ኮምሼ እየውባ፤ ኬእያይ የሳፋሪቶጝ ሳፋሪሼ እየውባ።³ዳካ እን ኣኔን ካርቡ ኑኑ ክያኑጝ የካኔ ቡልኬኔ፤ ሃናንዳካኦ የቶዬ ዳካ እን ኣኔን ካርቡካ ጪን ክያኑጝ?⁴ጊሜይ እን ኣኔን ካርቡ ኑኑ ክያኒ ኣኔባዬ ዳካ እጝ ኣኔን ኦካ ካርቡካ ጪን የቻሊባይ ካቡልሼ እንባ ሺጜን?⁵እን ኣጁጉጝ ሌምሼ ቡል ዳካ እጝ ኣኔን ካርቡ ኑኑ ክያኑጝ፤ ጩዋ ዳካ እን ኣኔን ኦካ ካርቡካ ጪን የቶይ ሹቃዬ ዬቡልባ።⁶ካማርኬ ጃፍ ጊዬይ ባጜኔ፤ ካማር እንዻ ዋኬ ቦጊጌኔ፤ ኦይን የይሁሺኖጝ ኦይድ ክያኒ ኣዬን ፑርፆ ፑርፆ ጊዬይዻ ኦይድ ኦካ ሌሜንካ ቾፑ ፓቄን።ይወንባ፣ ዎሺባ፣ ቋንቁባ⁷ይወንባ፤ ጋይ እየውባ፤ ዎሺባ፣ የጌያባ፤ ቋንቁባ ሃፑክዻ ቦውሼ እየውባ።⁸ናንዳካ እን ይወን ፓይላ ጋይባ፤ እን ዎሺዻ ጌይባ፤ ናንዳካ እን ቋንቁዻ ቦውሼባ ሃፑክ።⁹ከኦካ ጫቃን ጉዩ ውዋ ይወን ባላሻያጝ ሹኔ ኬና ካኣይ ባይ ኣኔባይ?¹⁰ወይ ይወን ኣርቴያጝ ኬና ካኣይ ቻች ኣኔይ?¹¹ኣኪ፤ እየው ጋራን የኣንቴባዬ ሃንታ ጉዩ ኦኬ ሹቃ ኣዬን የእባጃያጝ ሹኔ እንጉዩ ካፎላጝ ናንዳካ ጊታይ ይወን ኣዬን ሹቃ ኣዬን ሳስክዬ ማር እያን ኣዬን?¹²ውር እንቃ ኬእያይ ሻምሼ እየው ኦይን የዎሺቶጝ እየውዻ ኣሽክቴ እንግንባ፤ ክያጃዻ፤ ውርካ ቶካ ባሪዮዻ ፑኡሺባ ኬእጜ።ሃፑክ ቆቃ እጜ ሆላ እጜ¹³ሻውባ ኬጉዋር ቆቃ እጝ፤ ጉዋር እን ካቦሼ ሃምካ ካዮጝ ሃታቺ፤ ሃፑክ ኔኒዻ ሃሆላዬ፤ ውር ጁዋኑ ሻውባ ኬጉዋይ፤¹⁴ዬ እንካ ሄክሺሼ ሃምካ ዻቆ ጉዋር ኔና ዺታኬ፤ ሃፑክ ኔኒዻ ሃቆቃ ውር ጊታይ ካሻውዻ ሃጩዋማጵን።ውርካ ሾሮካ ቶካ ባሪዮ¹⁵ቱዎጝ ጊዬይ ማቲ ዮዮካ ሆቺኔኔ ኣኔባዬ ጊታይ ኪሚ ዱሲዬንካ ማድሬ ሻው ባኪ ጊዬይ ክያኑጝ ኬኦካ ውርካ ቶካ ባሪዮ ጊታይካ ሾሮጝ ኣጅቴባ።¹⁶ኬኦካ ካርቡ ጊዬይ ሃእባጃያ ከኦካ ኮዶካ ክዽሬ፤ እግሽያጝ ቆዻምባይ?¹⁷ፕር ሻሪ ሹቃ ፓይላ ኡፑት ካርቡ ሹቃ፤ ሻሪ ጋራ ፓይላ ኡፑት ካርቡ ጋራ።¹⁸ሻሪ ሹቃ ኡፑትኬን ካርቡ ጋራ፤ ሻሪ ጋራዻ ቻሊኬን ሻሪ ካርቡ ሹቃ ኡፑቴን።¹⁹ሻሪ እን ማር ካርቡ ሹቃ ኡፑቴን ፓይላ ቃጭባ፤ ፓቅሼባ ጉዻ።²⁰ዬ የእባጃባ ኬካርቡ ጊዬይ።²¹ካኒ ሹዋጵሽኬን ክያጃካ ባባ እን ኣኔን ፎላ ዾዮኬ፤ ጊታይ ሺጜን ታቹጝ ዮ፤ ፓይላ ሻውኬን ፎላ ዾዮክ።²²ኬሹ እን ጁዋናን ሺጝባ፤ «ታቹጝ ዮ፣ ታቹጝ ዮ፤ ኬሮጝ ኑኑ ሃካና ሃሳዋኬኒ ሃሳዋ? ኬሮጝ ኑኑ ሃካና ቡላኬኒ ቤሮ? ኬሮጝ ኑኑ ሃካና ኣሽክያኬኒ ኦኬ ሹቃሹቃ ጁዋኑ? ዋይሼባ ኣን እያይ።²³ኬሹ እን ኬሊኪ ሺጝባ ሃእባጅኬን እየው ካሎን፤ እየው ጋራን ጊታጝ ኬኦናኒ ፓይ ዹክ/ውር ኣጁጉዬ ኣርሹጉ እን ኣሽክዬን ቶኦዬ²⁴ኣኪ ውር እን ዋይ ክያጃ ናኒዬ ሻሚ ሹቃጝ ሙኔን ውር ኣጁጉ ኮኑጝ ኣሽኪ ቶኦ ኔኒ ባይ ክያኑጝ።²⁵ጎት ኩኔ፤ ሚሮዻ ጉንዝዬ፤ ፑጉዻ ፑጌ፤ ሙራ ቶኦ እጝ፤ ኬኣሽክዬን ኔኒዻ ናንዳካጝ ጋሽክዬ ባይ ክያኑጝ ካኒ ቡድኬን።²⁶ውር እን ዋይ ክያጃ ናኒዬ ማር ሹቃ ሻሜን ሙኔን ውር ኣርሹጉ ኮኑጝ ኣሽኪ ቶኦ ኔኒ ኣዞ ክያኑጝ።²⁷ጎት ኩኔ፣ ሚሮዻ ጉንዝዬ፣ ፑጉዻ ፑጌ፣ ሙራ ቶኦ እጝ፤ ቶኦ እንዻ ቡዳ፤ ቡዴን ኔኒዻ ሃጋራ።²⁸ኢየሱስ ሹ እን ሹዋጴ እርርሲኔን ኔኑጝ፤ ዛርሲ ጎሺያ ኬእርርሲኔን ኔኒ፤²⁹ናንዳካ ኦ ማርኬ ውርካ እርርሲኔንካ ቶኦካ ይሁኔንካ ውርካ ኣይሁድ ኣዬኔ ሃናንዳካጝ እርርሲዬ እንግን ኬውርካ ጌጳሞጝ።

ሃፑክ 8ባይሼንካ ውር እን ኣኔ ቡርቅካ ጊዮጝ¹ከሹ እን ጎቤኬ ጋግ ክያኑጝ ዛርሲ ጁዋኑ ዻዬያ።²እየዎ ውርካ ቡርቅካ ጊዬ ክየም ኩን ኦካ ኢየሱሴ ቶኬ ኩዋምን ኦካ ማሪ ኔኒዬ ኣኔን ይሁኔኔ ሺጝ ታቹጝ ዮ፤ የናሺሼያ ኣንያጝ የቻሊባይ ኣን ጫጅቃል ሻሜን?³ኢየሱስዻ ቲት ቡዋ ኔኒዬ ዱሜ ሺጝ ሃናሺያ ጌይባ ጫንቃል/ ውር እንዻ ይሪካ ከኦካ ቡርቅካ ጊዬ ጌያ ጫንቃል።⁴ጩዋ ኢየሱስ ዋይሼ እሺ ባይሼን ኑኑ ኦይ ውር ክየምጵንዻ ሃሳውሼን፤ ኣይባዬ ካሜ ዹዋልሼ እን ኤምኑ ውርካ ቃሽ፤ ጋላባ ሙሴ ኤርግቶጝ ኣሽኪባ፤ ይንዻ ማቲሼባ እንግን ማኚ።ይሁኔን ካታቺ እንካ ዽቡጝ⁵ኢየሱስ ሄክሽባ ቅፍርናሆም ታቺካ ዽብ ክየም ኩኔ ሺጝ እያጜ ይወና፣⁶ታቹጝ ዮ፤ ውርካ ዋድማ ናኒ ማቲ ኤላዬ ካሎን ኬጋሊዬን ኡጛ ቶኦ ክያኒ።⁷ኢየሱስዻ ሺጝ ኣን ሃኩና ባይሺሽባ።⁸የታቺ እንካ ዽብ ዋሼ ሺጝ እያጝ፤ ታቹጝ ዮ፤ ሃምካ ቶኦ ናኒ ሁሉኬን ማር ኬና ካሁሉኩሼ እኔን፤ ኣይባዬ ኣኒንቴ ኦጜ ሃሳው ክያጃጵን ውርካ ዋድማ ናኒ ባይሽባ፤⁹ኣንዻ ውር ጊታኬና ሃኤርጊቴ ኣኔባ፤ ጊታይ ኤርጊቲ ኣንዻ ከኦናኒ ዱቡ ኣኔባ፤ ከኦግዬይ ሃዋይሼ ክየም ካምባያጝ ኩይባ/ ሃዋይሼ ኑዋ ኩዋባያጝ ኩንባ፣ ሃዋይሼ ውርካ ዋድማዻ ኣሽኪ ይጝያጝ ኣሽኪባ።¹⁰ኢየሱስዻ ጎሺ ኬዋሼን ኔኒዬ ዋይሼ ውር ጊታና ኣኔን ዻይኔን እያጝ ሃዋይሼባ እየው ኣኩሉክ፤ ከኦካ ጭቃንካ ውርካ እስራኤልዻ ውር ኬና ኣኔ ይሁኔን እያጝ ክየምጵንዻ ሃካና ጌይኬን።¹¹ሃዋይሼባ እየው ውር ጁዋኑ ፓዬንባ ኬታጝ ሹሽ ቱሌዬ ኬታጝ ሹሽ ዴቄዬ ኬኦካ ቆቤንካ ፎላ ዾዮክ ማራማራ ቆባ ኣብርሃም፣ ይስሐቄ ያዕቆቤ፤¹²ፎላዾዮክ ጊታይ ሼክሼ ኣኖጝ ፓቅሼባ ሹኑክ ሃም ኣይ ድሙጉጝ፤ ከሹ እን ማቲባ ኦቆራዬ ኒጊ ሺክዬኔ።¹³ኢየሱስዻ ዋይሼ ታቺ እንካ ዽብ ካምባ ካማቲሼባ እን ኬይሁኔን ኑኑ፤ ውርካ ዋድማዻ ኬሃሳዋ እን ባይሻ።ኢየሱስ ባይሺሻ ውር ጁዋኑ¹⁴ኢየሱስ ኩይ ሃምካ ቶኦካ ጴጥሮስያጝ ጌይ ኣፕኔካ ጴጥሮስ ዴሜንኬ ቄጪቲካ ሩዋዌ ኡጜ፤¹⁵ዱማ ቡዋ ኔኒ፤ ቄጭቲካ ሩዋዻ ኦቼያ እሺ፤ ናሹጝዻዬ ቾቺንሺያ እንግን።¹⁶ከምክር እን ውር ጁዋኑ ጊታይ ቤሮ ጎሞጝ ቦሼያ ሃምካ ኢየሱስ፤ እሺዻ ቡላ ኡሲ ጋራ ኬክያጃ፤ ባይሺሻ ውርካ ቡርቅዻ ፓይላ።¹⁷ከኦይን ሃሳዋ እን ኢሳይያስ ሺጜ እያጜ ክያጆጝ ሙኔና፤ እሺዻ ቦዋ ቡርቅ እን ጉዋዩ ማውርካ ዻይኔንካ ኢየሱስ ማቲዬን ኣንሺሽ ቱምዬን¹⁸ኢየሱስ ሹ እን ውር ጁዋኑ ፑኡሺሚኔ ማራማራዬ ጌዮጝ ካቁዋልሺኔ ኛፓስ ታቶጝ ሜይሼያ እንግን።¹⁹ከሹ እን ውርካ ቶኦካ ይሁኔንካ ኣይሁድ ክየም ኩኔ ሺጝ፤ ውሩጝካ እርርሲዬን ዮ፤ ኦካጝ ሃኩዬ ፓይላ ሃዻዬ እንባ።²⁰ኢየሱስዻ ሺጝ፤ ይግንካ ኩዬይ ኣኔ ቶኦካ ኩባርካ ዾዮክ፤ ዬ ሃንታካ ውር ራቅ ኬና ካናዓሺሼ እሺ ኤምኑ ሺግ እያይኔ ዋሼያ እሺ።²¹ውር ኬና ኣይ ውርካ ዻይኔን ውር እንቃ ክየም ፕር ሺጝ ታቹጝ ዮ፤ ከሌሜን ካካማ ቱቱኬ ባባጝ ናሺሼ ኣንባ።²²ዬ ኢየሱስ ሺጝ ኣርሼን ኣርሼን ጊዬይ ካቱቱክ እንግንባ፤ እን ዻይሼ ኣንባ።ኢየሱስ ሪባ ሄሌቆን²³ከኦይን ኢየሱስ ሁሉካ ጋጊ፤ ውር ጊታይ ዻዬ ጆሌ እሺዻ ዻዬዬ ሻዌ ፓያ።²⁴ሉጉድ ሄሌቆን ቁዋቃ ናሹጝ ኛፓስ ክያኒዬ ሌይ ሃምካ ሻሜ ጋጉጝ ጁጉያ እንግን ፤ ዬ ከሹ እን ኢየሱስ ኣኔን ኡጜን።²⁵ውር ጊታይ ዻዬ ጆሌ እሺዻ ፓዬ ጬይሽ እሺዬ፤ ሺጝ «ታቹጝ ዮ/ ሃካይያያ ዻዓሺ ኡዋባ።²⁶ኢየሱስዻ ዋይሼ እንግን እየው ጊታጝ ይሁኔን ጆጊ የሪግሺና እያን ይጝ ጩዋ ናሹጜ ጎሪያ ፑጉዬ ሄሌቆኔ ይሪካ ጌያ ሹይ።²⁷ውርዻ ሺጝ ውሩጝ ኤርጊት ፑጉዬ ሄሌቆኑጝ ሃውር ኬና ኣኔን እያኔ ጎሺያ።ኢየሱስ ባይሺሻ ከኦካ ውር ዻ ኡሲ ጋራ²⁸ቁዋሌን ኛፓሴ ሄክሼ ፔን እን ሺጜ ጌርጌሴኖን፤ ጌይ ውር ዻ ጊታኬና ቤሮ ጎሜዬ ቆቢኒ ኦይካ ራቅካ ሌሲ ቱሌ። ከጉዋር እን ሌይ ሃም ውርካ ማሬ ሳጊዬን ጋይ ውር ጋራ።²⁹እንግንዻ ሺጝ «ውዋካ ባሪዮ ዮ፤ ከኡዋው ኣና ክያጃካ ኦ? ዋዳ ካኒ ሄክሽኬኔ የኩኔ ኡዋው ጋልንሺዬኒ? ሺጝ እያይኔ ጉቹካ።³⁰ከኦጊዬይ ዽታኬ ሾዎት ኣና ኦካ ራጴንካ ቾፑ ጁዋኑ።³¹ቤሯንዻ ዋይሼ ኢየሱስ ሃኦኬና ከቡሌ ኡዋውያጝ ካሻውቴ ሃምካ ራጴንካ ቾፑ ቱዎጝ ናሺሼ ኡዋባ ሺጝ እያይኔ ይወና።³²ኢየሱስዻ ዋይሼ እንግን ፓይባ፤ ቤሯንዻ ቱልኬ ኦካ ውራኔ ሻዋ ሃምካ ቾፑጝ፤ ቾፏንዻ ኦይን ኣኔ ፓይላ ዝልንሲ ኦካይንካ ቶጌ ሻው ኛፓስ ክያኒዬ ዱቁሜን ሙዋ ክያኒዬ ጋርሻ።³³ውርካ ዻውኔንካ ቾፑ ጉኬ ፓይ ሃምካ ከተማዬ፤ ኦይን ሙኔን ፓይላዬ ውር ጊታይ ቤሮ ጎሜዬ ኣኖጝ ኦይን ጋሽክዮጝ ሃሳዋ።³⁴እየዎ፤ ውር ጊታይ ኣኔን ኦካ ከተማ እን ፓይላ ኢየሱስ ቶዬን ቱላ፤ ሹ እን ጌዬዻጝ ካጎይዻ

¹ሃፑክ 9ባይሺሼንካ ውር ኤላ እንጩዋ ኢየሱስ ቁዋሌን ኛፓስ ከጋጊዬ ኩና ሃምካ ፔን ኔኑጝ።²ከኦይን ውር ዼት ውር ኤላ ክየም ከሻሪዬ ቦፓይኔያ ሃምን ኔኑጝ።ኢየሱስዻ ጌይ ይሁኔን ጊዬይዬ ዋይሼ ኤሪ ኤላ እን «ይህ/ እን ውዋጝ ሴሶ ኑኑ ሺዕሺሼያ እን።³ከሹ እን ውርካ ቶኦካ ይሁኔንካ ኣይሁዴ ውርካ እርርሲኔኔ ሺጝ ይና ባሪዮ ይሬን» ሺጝ እያይኔ ጉንድሜና ኬሻን።⁴ኢየሱስ እባጅ ቃቦ ጊዬይዬ ሺጝ እያጝ፤ የቃብያ ናንዳካ ኦ ከሻን ጉዩ ክያጃ ጋራ?⁵ኣይባዬ ሴሶ ኑኑ ሺዕሺሼያ እኔ ናሹጜ ዼት ሻሪ ኑኑዬ ካምባዬ ሃና ኣይ ባዶጝ?⁶ኣይባዬ ሃንታካ ውር ዳሉጝ ክያኑጝ ሴሶ ሺዕሺዬን ኣኔ ጌጳሞጝ ከእባጅባዬ ጊያ» ሺጝ እያይኔ ዋይሼ ውር ኤላ እን ናሹጜ ዼት ሻሪ ኑኑዬ ካምባ ሃምካ ቶኦ ኑኑጝ።⁷ውር ኤላ እንዻ ናሹጜ ኩያ ሃምካ ቶኦ ኔኑጝ።⁸ዛርሲዻ ሹ እጝ ጌዬ እን ጎሺያ፤ ቋቅሽ ሪግዻዬ ሺጝ ባሪዮ እን ኣይ ውር ጌጳሞ ኬና ኣይ እያጝ ካጌጳዽባ።ሺወንካ ማቴዎስ⁹ኢየሱስ ናሱጝ ኬኦይኔ ኩያጝ ጌይ ውር ክየም ኬና ሺጜ ማቴዎስ ኡፍ ኦኑጝ ካሺዬ ጆሌ ጊቢሪዬ፤ ዋይሼ እሺ ዻይሼ ኣንባ እሺዻ ናሹጜ ዻዬያ።¹⁰ኢየሱስ ኣኔባ ኦካ ቶኦካ ማቴዎስ ኡፔኔ፤ ውር ጁዋኑ ጊታይ ፑኡሺኔ ጆል ጊቢሪዬ ውር ጊታይካ ሴሶዬ ፓይኔ ቆባ ከእሺዬ ውር ጊታይ ዻዬ ጆሌ እሺዬ።¹¹ውርካ ፈረሳውያን ሹ እን ጌዬ እን ዋይሼ ውር ጊታይ ዻዬ ጆሌ እሺ ውር እን እርርሲዬ ጆል እየው ሃኦ ኣሚኔ ከውር ጊታይ ፑኡሺኔ ጆል ጊቢሪዬ ጋንሼና።¹²ኢየሱስዻ ዋይ እን ሃሳወዬ ዋይሼ እንግን እያጝ፤ «ሀኪም ካሆሺሾጝ ሃናንዳካ ውር ጊታይ ዴሜን ዬ ማርካ ውር ጊታይ ኣይ ፓኬን፤¹³ፓይዬ፤ ኬጋላ ሳጊ ሃናሺያ ሺዕሺዬን እን ሺጝ እያይ ቶይባ፤ ሃውርካ ሴሶ ዬ ሃካና ኩንኬን ውር ጫንቃላን ሺወን።ውር ጊታይ ዻዬ ጆሌ ኢየሱስ ክያጃ እን ማሬ ቶሮንዽዬን¹⁴ውር ጊታይ ዻዬ ጆሌ ዮሐንስ ፓዬን ኦካ ኢየሱሴ ሺጝ፤ ኡዋዌ ፈረሳውያኔ ሃቶሮንዽያያጝ ውር ጊታይ ዻዬ ጆሌ እን ሃኦ ማሬ ቶሮንዽዬኔ ጋንሼና?¹⁵ኢየሱስዻ ዋይሼ እንግን እያጝ፤ ኡታ ኣኔባ ከእንግኔ ውር ጊታይካ ይያሩጝ እያይ ካሞይካዽዮጝ ቻሊባይ? ሹ እን ካቦወ ኡታ ከኦጊዬይ ኩንባ፤ ከሹ እን ቶሮንዽባ።¹⁶ኦካ ኣፓላ ጌቾ ውር ኬና ካቻክሼ ኣፓላ ሃሊ ኣኔኬን፤ ሻማ እያይንያጝ ኣፓላ ሃሊ እን ቦጉግባ ኣፓላ ጌቾ እጜ ሃዽሺኔን ኔኒ ካሎን ጌጳዽዬ ኩይባ።¹⁷ኦካ ቷንዳ ጌቾ ውር ኬና ካእርሼ ኣላላ ሃሊ ኣኔኬን፤ ሻማ እያይንያጝ ቷንዳ ጳቅባ፤ ኣላላዻ እሬንባ ቷንዳዻ ማቲባ ከኦካ ኦኬ ኣሽክዬን ሹኑክ፤ ኣይባዬ ኣላላ ሃሊ ካጊርሼ ኦካ ቷንዳ ሃሊ ከኣዬን እን ኣላላዬ ቷንዳዬ ሙኒኔ ሹቃዬ ቆብሼባ።ውዋ እን ናሹጝ ከኦካ ኣርሼኔ ኝያ እን ባይሺሼ ከኦካ ኒያቡ እርኔኔ ¹⁸ኢየሱስ ኣኔንባ ከውር ሃሳውኔኔ፤ ውር ታቺ ክየም ቡድ ኦካ ማሪ ኔኒዬ ሺጝ፤ ውዋ ናኒ ጋን ኣርሻ ካኡፔኬ ዻቆጝ ኩዋዌ ኣይሼ ቡዋ ኑኑ። ¹⁹ኢየሱስዻ ናሹጜ ፓያ ኬጋጝ፤ ውር ጊታይ ዻዬ ጆሌ እሺዻ ዻዬያ እንግን።²⁰ከኦይን ኝያ ኬና እሬን ኒያቡ ቦን ታጵ ላማ ኣኔን ጋሊዬን ኩንኬ ታካ ሁሬ ዱማ ጩዎኑካ ኣፓላ።²¹እሺዻ ሺጝ፤ ሃዱምያ ጩዎኑካ ኣፓላ ኔኒ ጵንዻያጝ ሃባይሽባዬ ጊያ።²²ኢየሱስዻ ሁቤን ሁሬ ቶይ ኝያ እጜ ሺጝ፤ «ይህ፤ ውዋ ናኒዮ፤ ይሁኔን ኑኑ ባይሺሻ እን። ኝያ እንዻ ይሪካ ባይሻ።²³ኢየሱስዻ ሄክሽባ ሃምካ ቶኦካ ታቺ እንካ ቶኦካ ይሁኔን ጌይ ዛርሲ ጊታኬና ኣኔን ኦቆርኔኔ ኡቹኬኔ፤²⁴ዋይሼ እንግን ኣዬን ጉዋር ውዋ ኡጝ ኡጜን ዬ ካኒ ኣርሽኬን የእንግን ጫጋ እሺ።²⁵ቡሌ ዛርሱጝ ጩዋ ሁሉክ ቱዎጜ ጎማ ቡዋ ኔኒ፤ ውዋ እንዻ ናሹጜ ዾራ።²⁶ሃሳዋ እንዻ ሻምሺያ ክራ እን ፓይላ።ባይሺሼንካ ውር እን ካርቡ ኣይ ቆሮዬ ዱዺዬ²⁷ኢየሱስ ኩይባ ከጉዋይ፤ ውር ዻ ጊታኬና ካርቡ ኣይ ቆሮ ሺጜን ውዋካ ዳዊት ዮ፤ ሺዕሺሼ ኡዋባዬ ጉቹኬ ዻዬያ።²⁸ውር ጊታይ ካርቡ ኣይ ቆሮዻ ዻዬዬ ሻዋ ኦይን ኢየሱስ ሁሉኮጝ፤ ኢየሱስ ዋይሼ ውር ጊታይ ካርቡ ኣይ ቆሮ ካቻሊዬ ካርቡ ጉዩ ላሉጝሼን የእባጃያይ ሺጝ እያይኔ ኣንሻ እንግን። እንግንዻ ሺጝ ታቹጝ ዮ እህዌ ዋሼያ እሺ።²⁹ኢየሱስዻ ዱም ካርቡ ጊዬይዬ ሺጝ ካማቲሼባ እየው ኬይሁኔን ጉዩ።³⁰ካርቡ ጊዬይዻ ጌያ ዋጭ፤ ኢየሱስዻ ሺጝ፤ ይጝ ውር ክየምጵንዻ ካማር እባጄኔ ካሎን ኣጅሺሻ እንግን።³¹ዬ እንግን ቱሎጝ ክራ እን ናንዳካ ኢየሱስ ሃሳዋ።³²ቱልኬ ኦይንያጝ ውር ዱዺ ኬና ጎማ ኡሲካ ጋራ ቦፓይኔያ ሃሚን ኔኑጝ።³³ኡሲ ጋራ እንዻ ቱሎጝ ውር ዱዺ እን ካርሲያ ሃሳውኔን፤ ዛርሲዻ ጎሺዬ ሺጝ፤ ኦኬ ኬና ኣይ እያጝ ኦካ ፔንካ እስራኤል ካኒ ጌዬ ጊባጅኬን።³⁴ዬ ውርካ ፈረሳውያን ሺጝ ቤሮ ካቱሎጝ ሃኬ ታቺካ ቤሮ።ውርካ ዋድማ ሃጩዋማ³⁵ኢየሱስ እርርሲዬን ኦጉዋይካ ቶኦካ ይሁኔኔ፤ ክሊዬን ክያጃ ሹቃካ ጌጳሞካ ባሪዮዬ ፕር ባይሺሼን ቡርቂ ጊታይ ማር ባይሼኔ ቡርቂዬ፤ ሺሪያ ኦጉዋይካ ከተማዬ ሳፓራዬ።³⁶ዛርሲዻ ማቲ ማድር ኮኑጝ ማር ውርካ ዻውኔን ኣኔኔ ላላቅሜን ከኦኮኑጝ ውር ኬና ካቶይ እንግን ማሬ ኣኔኔ ዻዹጝኔያ እንግን።³⁷ዋይሼ ውር ጊታይ ዻዬ ጆሌ እሺ እያጝ፤ ዋዳካ ጎት ሃጁዋኑ ዬ ውርካ ዋድማካ ዋዳካ ጎት ሃጩዋማ፤³⁸ዬ ታቺካ ዋዳካ ጎት፤ ካይዕሲሼ ሃምካ ውርካ ዋድማጝ ይወና

ሃፑክ 10ይዕሲዬንካ ውር ታጵ ላማ ጊታይካ ዻይኔን¹ሺውሼ ውር ታጵ ላማን ጊታይ ዻዬ ጆሌ እሺ ሃሚንዬ ካቡሌ ኡሲካ ጮዩዬ ካባይሺሼ ቡርቂ እን ማር ባይሺኔ ውር ጊታይ ዼሜኔ ፓይላ ኣያ እንግን ጌጳሞ።²ሮጝካ ውር ታጵ ጊታይካ ዻይኔንዻ ሃእንካ ዻይሾጝ እንካ ሌሜን ጴጥሮስ እን ሺጜ ስምዖኔ ጪኔ እንድርያሴ፣ ሃንታካ ዘብድዎስ ያዕቆቤ ቺኔ ዮሐንሴ፣³ፊልጶስ፣ በርተሎሜዎሴ፣ ቶማሴ እን ፑኡሺኔ ጆል ጊቢሪ ማቴዎሴ፣ ውዋካ እልፍዮስ ያዕቆቤ እን ሺጜ ታዴዎስ ልብድዮሴ፤⁴ስምዖን እንካ ቀነናውዬ ኣስቆሮቱ ይሁዳ እን ሳስክዬ ኣዬን ኢየሱሴ።⁵ውር ታጵ ላማ ጊታጝ ኢየሱስ ይዕሲያ እንግን ኬኤርግንቶ ኬና ኣይ እያጝ፤ ኦይድ ሃምካ ዛርሲ ፓይቴን፤ ኦይድ ሃምካ ውርካ ሳማሪያ ሁሉክቴን።⁶ሳጊ ፓይ ሃምካ ቶኦካ እስራኤል ሃምካ ማድር ጊታይ ካህይ።⁷ፓዬ ሺጝ ጌጳሞካ ባሪዮ ድያውሻዬ ክሊዬንባ።⁸ባይሺሻ ውር ጊታይካ ቡርቅዻ፣ ቲትባ ጊታይ ኣርሽዻ፣ ጊታይካ ቡርቅካ ጊዬዻ ሻምባ ጫንቃል፤ ቡልባ ቤሮዻ፣ እን ቦው እየው ከማም እያይ ኣይባ ኬማም እያይ።⁹ከፓዬን ጉዩ ኣይን ወርቆጝ ኣይን ቢሮጝ ወይ ኣይን ኦኬ እንቃጝ ኦይድ ጎምቴን።¹⁰ ከጉዋር ጉዩ ኳንሽዻ፣ ኦኬ እንቃ ኬቡዋዻ ወይ ቻኩ ወይ ሴጋ ኦይድ ጎምቴን፤ ናንዳካ ውርካ ዋድማ ሁሉኩሼባ ከኣሜን እንካ ሹ ጮል።¹¹የሁሉካያ ኦካ ከተማ ክየሜ ወይ ኦካ ጶሮክያጝ ውር እን ናሺ እየው ቾቺንሺዬን ዎሺዬ ቦባ ኡሲ ኦካ ቶኦ ኔኒ፤ ሌይ ሃምኬ ቱልቴዻጝ ቆቢባ ኦይን።¹²የሁሉካያ ኦካ ቶኦ ክየምያጝ ሌምሺ ጌሶ።¹³ቶኦ እን ክያኒ ውር ኬና ቦው ሆፎ ጉዩ ኣኔያጝ ሆፎ ጉዩ ሄክሽባ እሺ፤ ውር ኬና ማር ሆፎ ጉዩ ቦወን ማር ኣኔንያጝ ሆፎ ጉዩ ዋክባ እየው።¹⁴ውር ክየምጵንዻ ማራ እየው ቾቺንሺዬኔ ወይ ክሊኔን ጉዩ ዋዬን ማር ናሺዬንያጝ፤ ከኦካ ቶኦ እን ወይ ከኦካ ከተማ እን የቱላያጝ ቡቡኒካ ጃፍ ጉዩ ክሽክሺዬ ቱልባ።¹⁵ሃዋይሼባ እየው ኣኩሉክ፤ ከሹካ ኮምሼን ከኦካ ውር እን ኡጚ ኦካ ከተማ እን ሳጊ እን ሄክሺ ሶዶሜ ጋሞራዬ ሃባዶ።¹⁶ሃይዕሲ እየውባ ከማድር ኦካ ጫንቃንካ ዮዮ፤ ዬ ኣዬኬ ቻች ኣጁጉ፣ ማትኬ ሆሌ ሌሞ።¹⁷ውር ጎም እየዌ ቦሼባ ሃምካ ካራምካ ኮምሼን፤ ከኦጉዋይካ ቶኦካ ይሁኔን ጊዬይዻ ሙር እየውባ፤ ዬ ከኦግዬይ ኣጅቴባ።¹⁸ናንዳካ ክያጃ ናኒ ቦሼባ እየው ሃምካ ሌሜንካ ታታቻኔ ጌጵሹጋኔ፤ ከኦግዬይዬ ከኦካ ሌሜንካ ዛርሲዬ የማትያባ ማኝ።¹⁹ሹካጝ ጎሜ እየውዻ ኦይዲ ሓሃሳዋ ኦ ሃዋሻ ኦዬ ኦይዲ ኦቆርንቴን፤ ከሹ እን ሃኣይ እየውባ እንኬ ሃሳውቶጝ፤²⁰እንካ ሃሳውንቴ ከእየው ሃኡሲካ ሹኔ እንጉዩ ካፎላጝ ዬ ማር እየወን።²¹ጪኔ ሳስክዬ ኣይባ ጪኔ ኣርሼን፣ ሹኔዻ ውዋ፣ ሃንታንዻ ጊያምሺሻባ ሹቡጋን፣ ኒሽሽባዻ።²²ናንዳካ ሮጝ ናኒ ውር ፓይላ ሚኔ እየውባ፤ ኣይባዬ እን ቁዋቅትሽ ሌይ ቱንሱጝ እሺ ባይሽባ።²³ዋኬያ እየው ከኦካ ጶሮክ ክየምያጝ ጉኩቴ ኦ እንቃ፤ ሃዋይሼባ እየው ኣኩሉክ የካኔ ሄክሻኬን ከተማካ እስራኤሌ ሃንታካ ውር ኩንባ።²⁴ውር ጊታይ ዻዬ ጆሌ እሹጝ ከውር እን እርርሲኔ ጆሉጝ፣ ውርካ ዋድማዻ ሳጊኬን ኦካ ታቺ እን፤²⁵ውር ጊታይካ ዻይኔንዻ ዋይሼ ውር እንካ እርርሲኔን ውርካ ዋድማ ሙኔና ታቺ እንያጝ ጃኬና። ኤምኑካ ጶሮክ እን ኣኔን ኦካ ጶሮካ ብዔልዜቡል ሳስክዬ ሺጝሼ እያን እየው/²⁶ዬ ኦይድ እንግን ሪግሲንቴን፤ እን ጅጞጝ ዹዋልሲኔን፤ እን ድኮጝ ቡሌን ሺዽኬን።²⁷እን ሜይሼ እየው ድሙጉ ክያኑጝ ሃሳዊ ኦ ሜሌል ክያኒ፤ እን ሃዋይቴ ከናቡ ጉዩጝ ኬራፊ ጳል ክያኒ፤²⁸ኒሽ ኣሩጝ ዬ እን ማሪ ናፒሴ ኒሼን ኦይድ ሪግሽንቴን፤ ሳጊ ሪግሼን እን ካይሲ ኣሩጜ ናፒሲዬ ከጉውጝ።²⁹ኦይን ጉዋሩጝሼ ከሺሊንጊ ክየም ኣንቲትዻ ክየምጵንዻ ከቃቦካ ሹኔ ሹኑክ ፓቄንኬን ዳሊ ክያኒ።³⁰ኣይን ጪራሺካ ሹቦ ጉዩዻ ክየምጵንዻ ሺዽኬኔ ኬና ኮሜ ኣኔኬን።³¹ዬ ኦይዲ ሪግሺንቴን ከኦካ ኣንቲት ጁዋኑ ኣንቲቲ ጉዩ ሃኬና ጌጳሲዬ።³²ከኦካ ሌሜንካ ውር እን ክሊዬን ኬሮጝ ናኑጝ ኣንዻ ከኦካ ሌሜንካ ባባ እን ኣኔን ዾዮኩጝ ሃኪሊባ።³³ኣይባዬ እን ቡድያን ኦካ ሌሜንካ ውር ኣን³⁴ኣን ሃኩኖጝ ኦይድ ኦኮኑጝ ሃኩኔ ሹቃ ጌጳሲዬን ዋሽቴን፤ ኤቤል ዬ ሃካና ኩንኬን ሹቃ ጎብሼን።³⁵ኣን ሃኩኖጝ፤ ውዋ ከኦካ ሹኔ፤ ውዋ እንካ እጛሽ ከኦካ ጁዋኔ ኣፒኔ ከኦካ ባካ ሌሜን ላሊዬን።³⁶ጋላካ ውር ማቲባ ጶሮክ ክየም።³⁷ከኦናኒ ሳጊ ውር እን ናሺ ጁዋኔ ወይ ሹኖጝ ናኒ ማቲዬን ሁሉኩሼኬን።³⁸እን ማሪ ሻሪ እንካ ሮይኔን ዼቴ ኣን ዻዬን ናኒ ማቲዬን ሁሉኩሼኬን።³⁹ውር እን ዎሺ ዻቆ ኔኒ ዻሺዬን ካይባ፤ እን ሳስክዬ ኣዬን ናፒሲ ኔኒ ናንዳካ ኣን ጌይባ።⁴⁰እን ቦው እየው ቦባ ኣንዻ፤ እን ቦው ኣን ቦባ እን ይዕሲ ኣንዻ።⁴¹ውርካ ቶካ ባሪዮ እን ቦኬ ሮጝካ ውርካ ቶካ ባሪዮጝ ጌይባ ኣንቲትካ ውርካ ቶካ ባሪዮ፤ ጫንቃላን እን ቦኬ ሮጝካ ጫንቃላን ጌይባ ኣንቲትካ ጫንቃላን።⁴²ዬ ሃዋይሼባ እየው ኣኩሉክ፤ ውር ክየምጵንዻ ከኦካ ሃይሻይሺ ጊታጝ ክየም ጊዬይ ማቲያ ውርካ ዻይኔን ናኒያጝ ኒያቡ ክየም ኣያ ሙዋ ጪራታያጝ ካይሲኬን ኣንቲቲ።

ሃፑክ 11ዮሐንስ እንካ ዱቅኔን ኣንሺኔን እን ይዕሲሼ ሃምካ ኢየሱስ¹ኢየሱስ ኣዬ ሹዋጴ ውር ታጵ ላማ ጊታይ ዻዬ ጆሌ እሺ ኤርጎጝ ጩዋ እርርሲዬኔ ክሊዬኔ ኩያ እያጝካ ከተማካ ገሊላጝ።²ዮሐንስ ኣኔን ቶኦካ ቁሜን ቱዎጜ ኦግታይ ኢየሱስ ኣሽክዮጝ ሹ እን ዋዮጝ፤ ይዕሲሼ ውር ጊታይ ዻዬ ጆሌ እሺ ሃሚን ኔኒዬ፤³ሺጝ እን እን ሺጜ ኩንባዬ ሃካልቶጝ ሃእን ሞ ካካሊ እንቃዬ ጋንሼና?⁴ኢየሱስዻ ሺጝ እያጜ ዋሼያ እንግን፤ «ፓዬ ይጝ የዋይቴዬ የጌይቴዬ ሜይቴባ ዮሐንስ።⁵ጊታይ ካርቡ ኣይ ቆሮዻ ጌይባ፣ ኤላን ጃልባ፣ ጊታይካ ቡርቂካ ጊዬ ጌይባ ጫንቃል፣ ጊታይ ኣይ ዱጛ ዋይባ፣ ጊታይ ኣርሹጝ ናሹጝጋ፣ ናንዳካ ኩፓን ጋን ጋኔን ክያጃ ሹቃ ክሊዬን።⁶እን ማርኬ ኣን ካቲምኔን ሃኬና ጉዋኔ።⁷ውርካ ዻይኔንካ ዮሐንስ ፓዮጝ ጩዋ፤ ኢየሱስ ናንዳካ ዮሐንስ ሺጝ እያጜ ካርሲያ ዛርሲ ሜይሼን፤ «እያጝካ ቦና የቱላ ኦ ቶዬን? ሹጩ ይንግሼን ከፑጉይ?⁸ሞ የፓያ ኦ ቶዬን? ውር እን ኪሚ ኣፓላ ሹቃኪ? ውር ጊታይ ኪሚ ኣፓላ ሹቃጝ ኣኔባ ኦካ ቶኦካ ታታቻን/⁹ኣኪ የቱላ ኦ ቶዬን? ውርካ ቶካ ባሪዮ ቶዬኒ? ይንጌ፤ ሃእን ሳጊኬ ኦካ ውርካ ቶኦካ ባሪዮጝ።¹⁰እን ሺጜ እያጜ ቶኮጝ ሃእሺ፤ ከሌሜን ኑኑ ካኣሽኪ ጉዋሬ ከእን ሃሌምሻ ይዕሲባ ውርካ ኤርጎ።¹¹ሃዋይሼባ እየው ኣኩሉክ፤ ከጊታይ ጅሼኬ ኦካ ጫቃንካ ሃኣጙጝ ኬና ውይ ዮሐንስ እንካ ዱቅኔን ካኒ ናሹጝኬን፤ ኣይባዬ ከፎላ ዾዮክ ኬፓይላ እን ኣይ ይርኩጝ ከፓይላ ሳጊባ።¹²ካርሲኬ ዮሐንስ እንካ ዱቅኔን ሌይ ኣይ ቦኑጝ ጌጳሞካ ፎላ ይቃ ከጁዋኑ፤ ጊታይ ጌይዻ ጋይ ቁዋቃ።¹³ውርካ ቶካ ባሪዮዻ፤ ክያጃካ ሙሴ ፓይላ ሌይ ኣይ ዮሐንስ ክያጃ ሃሳዋዬ።¹⁴ኣኪ የናሺያያ ቦወንያጝ ኩንባ እን ሺጜ እያይ ኤልያስ ሃእሺ።¹⁵ዋይባ ካጝ ናቡ ኣኖጝ ካዋይባ።¹⁶ጅሼን ይጝ ካሙኒንቴ ኬኦ? ሙኔን ሃንታ ኮኑጝ ቆቢ ኦካ ጋባያዬ ሺወኒ ጋጝ።¹⁷ሃቲቢሼ እየው ቱሉንጎቴ የካኔ ባጛኬን፤ ሃጎብሼ እየው ኦኬ ጋራዬ የካኔ ኦቆራኬን።¹⁸ዮሐንስ ናንዳካጝ ካኣምኔዬ ማትኔዬ ዽያኔ ኩኖጝ፤ ሺጝ ኡሲ ጋራ ኣኔባዬ።¹⁹ሃንታካ ውር ኣሜኔ ማታኔ ኩና፤ እንግንዻ ሃጊታይ ኣሜኔ ማር ናዓሼን፤ ውርካ ማቲኔን ፕር ጊታይ ፑኡሺዬን ጊቢሪዬ ናሺዺ ጊታይካ ሴሶዬ ኣኔባ። ዬ እባጄንካ ዋድማ ኔኒ ጌያ ጫንቃል።ከተማ ጊታይ ማር ይሁኔን ሁሉኬን ኣጅሼን እን ሜይሾጝ²⁰ጩዋ ከተማ ጁዋኑ ጊታይ ኢየሱስ ኣኒኔ ኦኬ ሹቃ ኣሽክዬን ማሬ ይሁኔን ሁሉኬን ሺጝ እያጜ ኖክያ፤²¹ሃይ/ ኮራዚን፣ ሃይ/ ቤተ ሳይዳ፤ ኦኬ ሹቃ ጊታይ ጋሽክዬ ኦጉዩጝ ዋንቲ ጋሽኪያ ጢሮሴ ሲዶናያጝ ኦባ ካኒ ክም ኣፓላዬ፤ ጱልጱቴን ቡዎሉ ክያኒዬ ሻዋ ይሁኔን።²²ዬ ሃዋይሼባ እየው፤ ከሹካ ኮምሼን ከኦጉዩ ሳጊ ከጢሮሴ ሲዶናዬ ጋልንሺዬን ሃባዶ።²³እን ቅፍርናሆምዻ የዎሺያይ ፎላ ዾዮክ ዼግዼግ ጌዬን? ኣይባዬ የጎቢባ ሃምካ ጉውጝ፤ ኦሹቃ እን ጋሽክዬ ኦኑኑጝ ዋንቲ ጋሽኪያ ሶዶምያጝ፤ ሌይ ሃም ኣይ ሹጝ ኣኔባ።²⁴ዬ ሃዋይሼባ እን፤ ከሹካ ኮምሼን ከእን ሳጊ ናንዳካ ሶዶም ሃባዶ።ኡሲ ቦወን እን ክርስቶስ ካኣይኖጝ²⁵ከሹ እን ኢየሱስ ሺጝ እያጝ፤ ፤ ታቺካ ፎላዬ ካዻሊዬ ባባ ዮ፤ ይጝ ከኦካ ጊታይ እባጅዬ ጊታይ ኣይ ጌጵሹጉዬ የሻሚ ጁጌ የዹዋልሼ ሃንታጝ ሮጝ ኑኑ ካጌጳዽባ፤²⁶ጋን ባባ ዮ፤ ይጝ ከሌሜን ኑኑ ማት ክያጃ ሹቃዬ ጌያዬ።²⁷ኦኬ ፓይላ ኬባባ ጋያ ኣን ከሹኔ እንቃ ኬና ካእባጅ ኣኔኬን።²⁸እየው ጊታይ ናሬን ዴጪሼዬ ዻቹጝ ፓዬን ኦናኒ ኣንዻ ሃቦውሺሽ እየውባ ኡሲ።²⁹ናሪባ ክያጃ ናኒ እርርባ ኬኣንዻ፤ ኣን ከሻን ሃኣይ ሌሞዬ ሹቃዬ፤ ናንዳካ ናፒሲ ጉዩ የጌያባ ኡሲ ቦወን፤³⁰ክያጃ

ሃፑክ 12ናንዳካ ሹ እንካ ሶጵሳ ሪግሺኔን¹ከኦይን ጩዋ ኢየሱስ ሳጊያ ከኦካ ጫቃንካ ቲሽካ ቅያኒ፤ ውር ጊታይ ዻዬ ጆሌ እሺዻ ናንዳካጝ ካሽ ቃወ እንግኑጝ ካርሲያ ቲሺ ቱሼ ቃወን።²ውርካ ፈረሳውያንዻ ሹ እን ጌዬ እኑጝ ዋይሼ ኢየሱስ «እየዎ ውር ጊታይ ዻዬ ጆሌ እኑጝ ሃኦ ሻሜ ኦይን ከሹካ ሶጵሳ ማሬ ኣሽክዬኑጝ?³እሺዻ ዋይሼ እንግን እያጝ፤ ዳዊቴ ውር ጊታይ ጋዬኬ ጋጜ ሹ እን ካሽ ቃወ እንግኑጝ ኦይን እሺ ኣሽክዮጝ የካኔ ኮሟኬኒ?⁴ሁሉካ ሃምካ ቶኦካ ይሁኔን፤ ካውርካ ቃሽ ዬ እን ኣይ ኔኒዻ ከውር ጊታይ ጋዬ ኬጋጝ ጋማ ምሽ እን ማሬ ይሁሺኔን።⁵ሞ ውር ጊታይካ ቃሽ ከኦካ ቶኦካ ይሁኔን ቱዎጝ ምኔ ሹ እንካ ሶጵሳዬ ኣሽኪ ዋድማያጝ ካማሬ ሴሶ ኣዬን ከክያጃባካ ሌሜን የካኔ ኮሟኬኒ?⁶ኣይባዬ ሃዋይሼባ እየው፤ እንካ ሳግኬ ቶኦካ ይሁኔን ኣኔባ ኦጝ።⁷ከጋላ ሳጊ ሃናሺባ ሺዕሺዬን፤ ክያጃ እን ሺጜ እያይ ኣዬ ኦ ዋቲ የእባጃያጝ ዋንቲ የማራያ ቻንቃላን ክያኒ ኮምሼን።⁸ሃንታካ ውር ሃታቺካ ሶጵሳዬ።⁹ከኦይን ሳጊዬ ኩዬ ሁሉካ ይሁኔን ጊዬይ፤¹⁰ከኦይን ኣና ውር ክየም ኬና ቡዋ ኣይ ኤላ፤ ዎሽ ጉዋርካ ኢየሱስ ካሲሲዬኔ ሺጝ፤ ከሹካ ሶጵሳ ባይሺሼን ጋዬናይ ዬ ጋንሼና።¹¹እሲዻ ሺጝ፤ ከኦካ ጫቃን ጉዩ ውር ክየም ምድር ኔኒ ኮል ይግንያጝ ከሹካ ሶጵሳ ከኦይን ኮሌ ይግን ጁጁሬ ቡልኬኒ?¹²ኣኪ ውር ካሎን ሳጊኬን ከኦካ ማድር? ዬ ከሹካ ሶጵሳ ሹቃ ኣሽክዬን ጋዬና ዋይሼ እንግን እያይ።¹³ጩዋ ዋይሼ ውር እን ቲት ቡዋ ኑኑ፤ ማቲያ ከቡዋ እንቃ ሹቃ።¹⁴ውርካ ፈረሳውያን ቱልኬ ኦይኔ ሻም እያን ካኒሼ ኢየሱሱጝ ክሊዬና ኬጋጝ።ውርካ ዋድማ እን ባሪዮ እድዮጝ¹⁵ኢየሱስ እባጅ ቃቦ ጊዬይዬ ኩያ ከኦይን፤ ዛርሲ ጁዋኑዻ ዻዬያ እሺ፤ ባይሺሻ ውርካ ቡርቅ ፓይላዻ፤¹⁶ኒን ኣዬን ኔኒ ካማር ውር ክየምጵንዻ ሜይሼኔ ሜይሼያ እንግን።¹⁷ይጝ ኣዬ እያጝ ከውርካ ቶካ ባሪዮ ኢሳይያስ ሺጜ እያጜ ሃሳዎጝ ካሙኒኖጝ ይጛ እሺ፤¹⁸እየዎ እና እድዮጝ፤ ሃናሺዬዬ ውርካ ዋድማ እን ዋዝንሲ ኣን፤ ኡሲ ናኒ ሃኣጁጝ ኦኔኒ ቱዎጝ፤ እሺዻ ኬራፒሼባ ዛርሲ ቡሌን።¹⁹ጓሬንኬን ወይ ኡቹኬን፣ ዋይሺሽኬን ናቅድ ኔኒ ጳል ክያኒ።²⁰ቡሌን ሌይ ሃምካ ሳጊዮጝ፤ ካያ እን ኩቱዮጝ ጩኬንኬን፤ እን ፒርዻ ኪሬካ ቻኬን ካይኬን፤²¹ዛርሲ ከሮጝ ኔኒ ሻምባ ካቃዬን።ሺጜንካ ኢየሱስ ቡሌ ቤሮ ከኦካ ታቺካ ቤሮጝ²²ከኦይን ጩዋ ውር ጊታኬና ኡሲ ጋራ ጎሜዬ ኣይ ሙሙዾዬ ኣይ ዱዽዬ ቦሼያ ሃሚን ኔኑጝ፤ ኢየሱስዻ ባይሺሻ፤ ውር እንዻ ቻሊያ ጌዬኔ ሃሳውኔኔ።²³ዛርሲ ፓይላዻ ጎሺያ፤ ሺጝ ውዋጝ ሃዋካ ዳዊት።²⁴ኣይባዬ ሹ እን ውርካ ፈረሳውያን ዋዬ እን፤ ሺጝ ውሩጝ ቡሌ ቤሮጝ ሃኬ ታቺካ ቤሮ ብዔልዜቡል»²⁵ኢየሱስዻ እባጅ ቃቦ ጊዬይዬ ዋይሼ እንግን እያጝ፤ ጌጳሞ እን ካሺ ጋጝ ፓይላ ላልሜንባ፤ ከተማ ወይ ቶኦ ጊታይ ካሺ ካጝ ቁዋቅትሽኬን።²⁶እጁጝ ሃኦኬና ካቡሌ እጁጝያጝ፤ ሃጊታኬና ላሊ ጋጝ፤ ፕር ማቲያ እያይዻያጝ ጌጳሞ ሻም እያን ካቻሊዬ ቁዋቅትሼ ዾሬኑጝ?²⁷ኣን ሃቡሌ ቤሮጝ ሃኬ ብዔልዜቡልያጝ፤ ሃንታ ጊዬይ ካቡልኬ ኦ? ዬ ሃንታ ጊዬይ ኮምሼባ።²⁸ዬ ኣን ሃቡሌ ቤሮ ሃኬ ኡሲካ ባሪዮያጝ፤ ጌጳሞካ ባሪዮ ኩና ኦጉዩ። ²⁹ወይ ውር ክየም ዎሻ ኦካ ባርካ ውር ቁዋቃ እን ኣንቲቲ ሆቼንያጝ፤ ሌምሼ ማራ ውር ቁዋቃ እን ቁሜንያጝ ሻም እያን ካሙኒሺኔ እሹጝ? ማ ቻሊባ ³⁰እን ማርኬ ኣን ኣኒኔን ፓይላ ሚኔ ኣንባ፤ ጊታይ ማርኬ ኣን ፑኡሹሚኔን ፓይላ ላልሜንባ።³¹ዬ ሃዋይሴባ እየው፤ ሴሶ ኣሽክዬኔ ሃሳዋካ ይሬን ሃሳወኔ ፓይላ ዋይሼባ ውር ካሺዽባ፤ ኣይባዬ ሃሳዋ ካይሬን እን ሃሳውሼ ኡሲካ ባሪዮጝ ሺጝሼኬን።³²ውር ክየምጵንዻ እን ሃሳውሼ ውር ክያጃ ጋራጝ ሺጝሼባ ካሺዽባ፤ ዬ ውር እን ሃሳውሼ ኡሲካ ባሪዮ ክያጃ ጋራጝ ኣይን ይጜ ፔን እንካ ኩዋዌ ሺጝሼኬን ካሺዽባ።³³ሻሪ ፓይላ ናንዳካጝ የእባጅቶጝ፤ ከጌይቴ ካርቡ ሹቃጝ ኣንቴ ሻሪ ሹቃ፤ ዬ የኣንቴ ሻሪ ጋራያጝ የጌያ ካርቡ ጋራ።³⁴እየው ሃንታካ ዱብቴን፤ እየው የኣያ ጋራያጝ ክያጃ ሹቃ ሃሳወን የቻሊያ እያን? እን ቋቂ ሻን ክያኑጝ ቶግ ሃሳውባዬ።³⁵ውር ሹቃ ኬሻን እን ፑኡሺዮጝ ቡል ኦኬ ሹቃ፤ ውር ጋራ ኬሻን እን ፑኡሺዮጝ ቡል ኦኬ ጋራ³⁶ኣይባዬ ሃዋይሼባ እየው፤ ውር ናንዳካ ክያጃ እንካ ማም ሹ እን ክያጆጝ ፓይላ ከሹካ ኮምሼን ጋንሼንባ።³⁷ናንዳካ ኦ እን ናሹጝኬ ክያጃ ኑኑጝ የጌይባ ጫንቃል፤ እን ናሹጝኬ ክያጃ ኑኑ ኮምሼ እንባ።ዹዋልሺኔንካ እባጄን ናንዳካ ዎሼን³⁸ከኦይን ውር ክየም ክየም ካቶኦካ ይሁኔን ካኣይሁዴ ውርካ እርርሲኔኔ ውርካ ፈረሳውያኔ ሺጝ፤ ውሩጝካ እርርሲኔን ዮ፤ ከኦኑኑ ሃዎሻያ ዹዋልሺኔን ሹቃ ጌዬን።³⁹ዬ እሺ ዋይሼ እንግን እያጝ፤ «ጋራ ኣሽክዬ ኩጳሞዬ ጅሼን ኣንሼን ዹዋልሺኔን፤ ኣይባዬ ከዹዋልሺኔንካ ውርካ ቶካ ባሪዮ ዮናስ እንቃ ዹዋልሺኔን ጋዬንኬን።⁴⁰ዮናስ ኡፔ ኦካ ክያጝካ ኣርቴ ሹ ጅያኔ ምክር ጅያኔ፤ ከእያይ ሃንታካ ውር ክያጝካ ዳሊ ክያኒ ኡፓ ሹ ጅያኔ ምክሬ።⁴¹ውርካ ነነዌ ከሹካ ኮምሼን ከኦካ ጅሼን ይጝ ናሹጜ ኮምሼባ፤ እንግን ከክሊማካ ዮናስ ሁሉካ ይሁኔኔ። እየዎ እን ሳጊኬ ኦካ ዮናስ ኣኔባ ኦጝ።⁴²ከሹካ ኮምሼን ታቺ እንካ ቶጉጝ ናሹጜ ኮምሼባ ጅሼን ይጝ፤ ኦኬ እባጄን ካሰሎሞን ዋዬን ሃኩንያ ኬሃም ዳሊ ዶክዮጝ፤ እየዎ፤ እን ሳጊኬ ኦካ ሰሎሞን ኣኔባ ኦጝ።⁴³ኡሲካ ጮዩ ቱላ ከኦካ ውርያጝ ኡሲ ቦወን ጌዬን ኩይባ ሃም ሙዋ ማሬ ኣኔን ራቅ እን ኣይ ቁዋቃጝ፤ ዬ ኡሲ ቦወን እን ዎሾጝ ጌይኬን።⁴⁴ጩዋ ሺጝባ ካዋካ ካምባ ኦኑጝ ሃኡፎጝ፤ ዋክዻያጝ ጌይባ ቶኦ ይጌ ጋሽክዬ ኡፍ ጫንቃሌ ማም እያይኔ።⁴⁵ጩዋ ኩዬ ከኦኔኒ ጊታይ ኣይ ሳጉጝ ቦኩኔባ ኡሲ ጋራ እንቃ ሶጳ፤ እንግንዻ ሁሉኬ ቆባ ኦካ ውር እን ቱዎጝ። ቁዋቃ ኣዬንካ ውር እን ማቲባ ካሎን ዼግ፤ ኦካ ጅሼን ጋራጝ ማቲባ እያይ።ጁዋኔካ ኢየሱሴ ጪኒጋኔ⁴⁶ኢየሱስ ኣኔንባ ዛርሲ ሃሳውኔኔ፤ ጁዋኔዬ ጪኒጋኔ ዎሽ እሺ ሃሳውኔኔ ጎሬ ጋኔባ ሹኑክ።⁴⁷ውር ክየምዻ ሺጝ፤ «እየዎ፤ ጁኔ ጪኒጌን ኑኑዬ ዎሽ እን ሃሳውኔኔ ጎሬ ጋኔባ ሹኑክ።⁴⁸ኢየሱስዻ ሺጝ እና ኒን? ጪኒጌን ናኒካ ሃጊጝካ ኒን? ሺጝ እያይኔ ዋሼያ እንግን።⁴⁹ከቡዋዻ ቶይ እያጝካ ውር ጊታይ ዻዬ ጆሌ እሺዬ ሺጝ እያጝ፤ እናዬ ጪኒጌን ናኒዬ ሃግታጝ።⁵⁰ውር እን ኣሽኪ ክያጃ እንካ ባባ እንካ ፎላጝ ፓይላ እ

ሃፑክ 13ሄክንሶካ ጴንታ¹ከሹ እን ኢየሱስ ቱልኬ ቶኦ ክያኒዬ ኩዬ ኡፓ ሃምካ ላቅካ ኛፓስ።²ናንዳካጝ ዛርሲ ጁዋኑ ጱዼ እሹጝ ኦቼ እንግን ኦይካ ላቅካ ኛፓሴ ሌፌ ኡፓ ጋጊ ክያኒ።³ኦኬ ጁዋኑ ኬሄክንሶ ሺጝ እያጜ ሜይሼያ እንግን፤ ውርካ ሃሙ ኮወን ክየም ቱል እያይ ጴንታ ኮሬን።⁴ኣኔን ኮሬኔ ክየም ክየም ፓቄን ማራካ ጉዋር፤ ኩባርዻ ፓዬኔ ቋዻሜ ቁጃ።⁵ጴንታ ክየም ክየም ፓቄን ኦኬና ዳሊ ጁዋኑ ማሬ ኣኔን፤ ኦካ ባይ፤ ዳሊ ናንዳካጝ ኣዬ ሺታጝ ፎታ ይሪካ።⁶ኣይባዬ ሹሽ ኡሾጝ ሩጳ፤ ጊሜይ ኔኒዻ ናንዳካጝ ማሬ ሹቃ ጎሜኑጝ ሩጳ።⁷ጴንታ ክየም ክየም ፓቄን ጫቃንካ ክዽሬ፤ ክዽሬዻ ጌጵሼ ሃጅሼ ፎቴን ኔኒ ዱቡዬ ሺዕሺያ።⁸ጴንታ እንቃ ፕር ፓቄ ዳሊ ሹቃ ክያኒ፤ ኡፑታ ካርቡዻ፤ ክየም ዽብ፣ ክየም ላታም፣ ክየም ማካንታም።⁹ካጝ ናቡ ኣኖጝ ካዋይባ።¹⁰ጩዋ ውር ጊታይ ዻዬ ጆሌ እሹጝ ፓዬን ኦኔኒዬ ሺጝ ሃኦ/ የሜይሼ ዛርሲ ከሄክንሶዬ ጋንሼና።¹¹እሺዻ ዋይሼ እንግን እያጝ፤ ጋያ እየው ክያጃካ ድኬንካ ፎላ ዾዮክ እባጄን፤ ዬ ካኒ ጋይኬን እንግን።¹²እን ኣኖጝ ሌሜምባ፤ ጁዋንቲሽባዻ፤ ዬ ከኦካ እን ማር ኣኔን ኣይን እን ኣኔዻ ቦባ።¹³ዬ ሺጜ እያጜ ሜይሼ እንግን ከሄክንሶጝ ሃናንዳካ ይጝ፤ «ጌይባዬ ካማሬ ጌዬን፣ ዋይባዬ ካማሬ ዋዬን ወይ ካማሬ ጶቅሲዬን።¹⁴እን ሺጜ እያጜ ሃሳዎጝ ከሃሳዋካ ኢሳይያስ ሙኒሼንባ እንግን፤«ዋዬንካ የዋያባ፤ ኣይባዬ የጶቅሲያኬን፣ ጌዬን የጌያባ፤ ኣይባዬ የእባጃኬን። ¹⁵ሻንካ ዛርሲ ዴጪሻዬ፤ ናቡ ጊዬይዻ ዋይኬን፤ ካማር ጌዬኔ ካርቡ ጊዬይ ሙሙዻ፤ ይጝ ማራ እያይ ኣዬንያጝ ዋንቲ ጌይኬ ካርቡ ጊዬይዬ፣ ዋይኬ ናቡ ጊዬይዬ፣ ጶቅሲኬ ሻን ጊዬይዬ ዋክሼ ዮጝ ናኒዬ ሃባይሺሽያ እንግን።¹⁶እየው ናንዳካጝ ካርቡ ጉዩ ጌዮጝ፣ ዬ ናቡ ጉዩዻ ዋዮጝ የኣያ ኬና ጉዋኔ።¹⁷ሃዋይሼባ እየው ኣኩሉክ፤ ውርካ ቶካ ባሪዮ ጁዋኑዬ ውር ጫንቃላኔ ዎሽ እን እየው የጌይቴ ጌዬኔ፣ እን እየው የዋይቴ ዋይኔ፤ ዬ ካኒ ኣይሼኬን እንግን።¹⁸ኣኪ ዋይባ ሄክንሶካ ውር እን ኮር ጴንታጝ፤¹⁹ውር እን ዋይ ክያጃካ ጌጳሞካ ባሪዮዬ ማር ጶቅሲዬን ኣይን ኦካ ሻንካ ኒን ጋራ ኩኔ ሁሉኬ ኬልባ ጴንታ እን ኮሮጝ። ይንዻ ሃጴንታ እን ፓቄን ማራካ ጉዋር።²⁰እን ኮሬ ኦካ ዳሊካ ባዩጝ፤ ሙኔን ውር እን ዋይ ክያጃካ ባሪዮዬ ዋዝንዽሾጝ።²¹ኣይባዬ ክኔይ ቡሌን ማሬ ቻሊዬን ኣኔን ኡፍኬን ሹ ጁዋኑ፤ ናንዳካ ክያጃ እን ጋሎ ወይ ፓር ኩንያጝ ካቲሜንባ።²²ጊታይ ኮሬ ኦካ ጫቃንካ ክዽሮጝ ሃጊታይ ዋይ ክያጃዬ ናንዳካ ክያጃካ ፌኑጝ ኦቆርኔኔ እንግን ኤታጋን ኬቃቦካ ሆድማሞ ቱዋኔን ቦዋዽዬ ሙኔን ውር እን ካማር ካርቡ ኡፑቴን።²³ዬ ጴንታ እን ኮሬ ዳሊ ሹቃ ክያኑጝ ሙኔን ውር እን ዋይ ክያጃዬ ጶቅሲ፤ ከኣኩሉክ ኡፑትባ ካርቡ፤ ክየም ዽብ፣ ክየም ላታም፣ ክየም ማካንታም።ሄክንሶካ ኦኬ ጋራ²⁴ኢየሱስዻ ሺጝ እያጜ ሜይሼያ እንግን ሄክንሶ እንቃ፤ ፎላ ዾዮክ ሙኔን ውር ኮኑጝ ኮሪ ጴንታ ሹቃ ሃሙ ክያኑጝ።²⁵ኣይባዬ ውር ፓይላ ኣኔንባ ራጴኔ፤ ጋል ኩኔ ኮር ኦኬ ጋራ ጫንቃካ ሲንዴ ክያኒዬ ኩያ።²⁶ሲንዴዻ ፎቴ ካርሲ ካርቡ ኡፑቴንያጝ ኦኬ ጋራ እንዻ ቱልባ ኬጋጝ።²⁷ኤቴንካ ሃሙ እን ውርካ ዋድማ ኔኒ ፓዬን ኦኔኒዬ ሺጝ፤ ታቹጝ ዮ፤ ኦካ ሃሙ ኑኑ ካኒ ኮርኬን ጴንታ ሹቃ? ኦኬ ጋራጝ ኩንኬ ኦን?²⁸እሺዻ ዋይሼ እንግን ሃዋድማካ እጁጝ። ውርካ ዋድማዻ ዋይሼ እሺ ካፓያ ቡጭቴ ኦኬ ጋራ እን የናሺሼባይ? ሺጝ እያይኔ ጋንሼና።²⁹ዬ እሺ ሺጝ፤ ኣይኬን፤ ናንዳካኦ የሺጛ ካቡጭ ኦኬ ጋራ እጜ የቻሊያባ ሲንዴዻ ከጋጝ ቡጬን፤³⁰ኦይድባ ሌይ ሃም ሹካ ባርጊን ካሄክሾጝ ካጌጵሽባ ከጋጝ። ከሹ እን ውር ጊታይ ካፓቲ ካሌማ ቡጭባ ኦኬ ጋራ እን፤ ካጉዱቤ ኬጉውጝ ቁም እንግንባ፤ ዬ ሃዋይሼባ እየው ሲንዴ ኔኒ ፑኡሺዬ ኡትቴባ ኳትን።ሄክንሶካ ሆልጆ ሆልጆዬ እርሾዬ³¹ሄክንሶ እንቃ ሺጝ እያጜ ሜይሼያ እንግን፤ ፎላ ዾዮክ ውር ክየም ውይ ሆልጆ ሆልጆ ኮኑጝ ኮሬ ራቅካ ሃሙጝ።³²ካርቡካ ሆልጆ ሆልጆ ከኦካ ጴንታ ዶክ ኣይን ሃይሻይሹጝ፤ ዬ ጌጵሽያጝ ሳጊኬ ኦካ ኮዶ ፓይላዬ፤ ሌይ ሃም ኩባርካ ዾዮክ ካፓይና ቆቤ ቃቅቴን ኔኒ ክያኑጝ ማቲባ ሻሪ ታቺ።³³ካንዻ ሺጝ እያጜ ሜይሼያ እንግን ሄክንሶ እንቃ፤ ፎላ ዾዮክ ኝያ ክየም ቦ ሊጥ ፓሲዬ ሌይ ሃምካ ቱርጶጝ ሆርሲኬ ዽል ኩጴን ጅያኔ ሙኔን ዽል ኮኑጝ ጅጞጝ።³⁴እን ፓይላ ኢየሱስ ሜይሼያ ዛርሲ ከሄክንሶ፤ ክያጅኬን ከሄክንሶዬ ኦኬ ክየምጵንዻ ሜይሼኬን እንግን ማም እያይ።³⁵ከይጝ ከውርካ ባሪዮ ሺጜ እያጜ ሃሳዎጝ ሙኔና፤ «ቶግ ናኒ ሃቦውባ ከሄክንሶ፤ ፔን ካርሲኬ ኦባ ሙኔዬ እን ድኮጝ ሃክያጅባ።ሹቦካ ክያጃካ ሄክንሶ እንካ ሻሪ ጋራ እን³⁶ጩዋ ኦይድ ዛርሲዬ ሁሉካ ቶኦ፤ ውር ጊታይ ዻዬ ጆሌ እሺዻ ፓዬን ኦኔኒዬ ሺጝ፤ ሜይሼ ኡዋው ሹቦካ ሻሪ ጋራ እን ኣኔን ሃሙ ክያኒዬ የሜይሼ ኡዋው»³⁷እሺዻ ሺጝ እያጜ ዋሼያ እንግን፤ እን ኮሪ ጴንታ ሹቃጝ ሃሓንታካ ውር፤³⁸ሃሙ ሃዳሉጝ፤ ጴንታ ሹቃ ሃሓንታካ ጌጳሞካ ባሪዮ፤ ሻሪ ጋራ እን ሃሓንታካ ኦኬ ጋራ፤³⁹ጋል እን ኮሬ ኩይዻ ሃዲያብሎስ፤ ዋዳካ ባርጊን ሃቱንሲካ ፔንያጝ ጊታይካ ፓቲህ ሃውርካ ኤርጎካ ባሪዮ።⁴⁰ሻሪ ጋራ እን ከእያይ ቡጬ ፓይላዬ ጉዱቤኬ ጉውጝ ቱንሲካ ፔንዻ ማቲባ እያይ።⁴¹ሃንታካ ውር ይዕሲባ ውርካ ኤርጎ፤ እንግንዻ ጊታይ ኣይካ ሴሶዬ ኣሽክዬን ክያጃ ጋራዬ ቋዻሜ ቡልባ ከኦካ ጌጳሞካ ባሪዮ።⁴²ፓቅሼ እንግንባ ሃሚንካ ጉው ኣኔ ኦቆራዬ ኒጊ ሺክዬኔ።⁴³ከሹ እን ጫንቃላን ከኦካ ጌጳሞካ ሹቡጋን ላሉጝጋ ከሹሽ። ዋይባ ካጝ ናቡ ኣኖጝ ካዋይባ።ሄክንሶካ ሆድማሞ እን ድኬዬ ኣንቲቲ ቁዋቃ እኔ⁴⁴ፎላ ዾዮክ ሙኔን ሆድማሞ ኮኑጝ ድኬ ሃሙ ክያኑጝ፤ ውር ክየም ሹ እን ጌዮጝ ዋሼ ድካ፤ እን ናሹጝኬ ዋዝንዽዬን ኔኑጝ ኩዬ፤ እን ኣኖጝ ፓይላ ኡዋሩጝሼ ኡዋሩጛ ሃሙ እን።⁴⁵ፕር ፎላ ዾዮክ ሙኔን ኣንቲቲ ቁዋቃ ኮኑጝ ነጋዴ ዎሾጝ፤⁴⁶ሹ እን ጌዬ ኣንቲቲ እን ካሎን ኣይ ቁዋቃጝ ኩዬ ኡዋሩጙሽ እን ኣኔ ፓይላዬ ኡዋሩጛ።ሄክንሶካ ኞፑቴይ⁴⁷ፕር ፎላ ዽዮክ ሙኔን ኞፑቴይ ኮኑጝ ፓቅሼ ኛፓስ ክያኒዬ ጎሚ ኣርቴ ዋናዋናጝ፤⁴⁸ውር ጊታይ ቆወን ኣርቶጝ ኞፑቴይ ጊዬይ ቆቅያግ ጁጁሬ ቡልሼባ ማራካ ኛፓስ፤ ጩዋ ቆቤ እዲ ሹቃ ሹቃ ጊዬይዬ ኡቲሼባ ኦኬ ክያኒ፤ ዬ ፓቅባ ጋራ ጋራን።⁴⁹ሃምካ ቱንሲካ ፔን ማቲባ እያይ፤ ውርካ ኤርጎ ፓዬኔ ውርካ ሴሶ ከኦካ ጫንቃላን እድዬን፤⁵⁰ሃክሼባ ሃምካ ጉውጝ እን ኣኔ ኦቆራዬ ኒጊ ሺክዬኔ።⁵¹ኢየሱስ ዋይሼ እንግን ይጝ ፓይላ ሁሉክሼያይ እየው? እንግንዻ ሺጝ እህ»።⁵²እሺዻ ሺጝ፤ ዬ ውር ክየምጵንዻ እባጃ ክያጃካ ባካ ሌሜን፤ ከሆድማሞ እን ሪግሺኔ ፑኡሺዬን ሙኔን ኤቴኒካ ኣንቲቲ እን ቡሊ ሃሊ እጜ ጌቾዬ።ውርካ ባሪዮ ሪግሼንኬን ከኦካ ፔን ኔኒ⁵³ኢየሱስ ሹዋጴ ሄክንሶ ጊታይ፤ ናሹጜ ኩያ ከኦካ ክራ እን።⁵⁴ኩና ሃምካ ፔ ኔኑጝ፤ ከኦካ ቶኦካ ይሁኔን ጊዬይ ካርሲያ ዛርሲ እርርሲዬን፤ እንግንዻ ዻዹጝኔዬ ሺጝ እያጝ፤ ውሩጝ ጌይኬ ኦን ኦኬ እባጄን ይጜ ኦኬ ሹቃ ሹቃ ጊታጝ ኣሽክዬኔ ጌይኬ ኦን ቁዋቅቲ?⁵⁵ይጝ ማር ውዋካ እን ኣሽክዬጆል ቶኦዬኒ? ሮጝካ ጁዋኔካ ማር ማሪያሜኒ? ጪኒጌን ኔኒካ ማር ያዕቆቤ፣ ዮሴፌ፣ ስምዖኔ ይሁዳዬኒ?⁵⁶ጪኒጌን ኔኒካ እጛሽካ ጋኔኬኒ ከኡዋው ኣኪ ይጝ ፓይላ ውሩጝ ጌይኬ ኦን?⁵⁷ዬ ማር እሺ ቦወኔ ሺዽያ። ዬ ኢየሱስ ሺጝ፤ ውርካ ባሪዮ ከሪግሺኔን ሃኬ ኦካ ፔን ኔኒዬ ቶኦ ኔኒ ጲኔ።⁵⁸ናንዳካጝ ማሬ ክያጃ ኔኒ ጉሜኑጝ ካን

ሃፑክ 14ኣርሼንካ ዮሓንስ እንካ ዱቅኔን¹ከሹ እጝ እን ኣይ ታቺካ ኦይድሳ ሄሮድስ ዋያ ጎሺካ ኢየሱስ፤²ውርካ ዋድማ ኔኒዻ ሺጝ፤ ኣያ እያይንያጝ ዮሐንስ እንካ ዱቅኔን ናሹጝኬ ኣርሼን ክያኒዬ ኩና፤ «ኦኬ ሹቃ ፓይላ ጊታጝ ጋሽክዬ ከእሺ ሃእጝ።³ከሌሜን ሄሮድስ፤ ከክያጃካ ኝያካ ጪኔ ፊልጶስ ሄሮድያድ ጎምሽ ዮሐንሴ ዾቅሺሻ ቶኦካ ቁሜን።⁴ናንዳካ ኦ ካእያኒሼ ኝያካ ጪኖጝ ኬክያጃ ዮሐንስ ሺጝ ቻሊሜንኬን።⁵ሄሮድስዻ ዎሽ ዮሐንስ ኒሼኔ ዛርሲ ናንዳካጝ ቶዬኬ ውርካ ቶካ ባሪዮጝ ሪግሼና።⁶ሄሮድስ ኣሽክዬ ምሽካ ሹካ ጅሼን ኔኑጝ፤ ውዋካ ሄሮድያድ ባጝ ይያሪዬ ናንዳካጝ ዋዝንሲዬ እሹጝ፤⁷ካጝ ኣንሺኖጝ ፓይላ ካኣዮጝ ሁሉኩሼያ ቃቦ።⁸ውዋዻ ጁዋኔ ክሊ እሺዬ ዋይሼ እሺ፤ ሹቦካ ዮሐንስ ካቃጫ ፓቅሼ ቋሼ ክያኒዬ ቦኩዋባ ጋን።⁹ከሹ እን ታቺ እን ዻዹጝኔያ፤ ኣይባዬ ናንዳካ ቃቦ እን ሁሉኬዬ ኳማና ጊታይ ኣኔን ኦይኔ ካሙኖጝ ኤርግታ ውር።¹⁰ይዕሲዬ ቃጪሻ ሹቦካ ዮሐንስ ኦይን ኣኒኔ ቶኦካ ቁሜን ክያኑጝ።¹¹ሹቦ እን ቃጬዻ ኣጁጝ ቋሼ ክያኒዬ ኣያ ውዋ እን፤ ውዋ እንዻ ቦኩዬዬ ኣያ ጁዋኔ።¹²ውር ጊታይ ዻዬ ጆሌ ዮሐንስዻ ቦው ሩዋ ኔኒዬ ቱቱካ፤ ጩዋ ኦይን ሙኔን ፓዬ ሜይሼያ ኢየሱስ።ኢየሱስ ኣምሻ ውር ሺ ቾን¹³ኢየሱስ ሹ እን ዋዬ ኦይን ሙኔን፤ ናሹጝኬ ኦይኔ ኩያ ከጋጊ ኦኬና ውር ማሬ ኣኔን። ዛርሲዻ ዋይ ኦይን ሙኔኔ፤ ከኦጉዋይካ ከተማጝ ዻዬ ፓዬያ እሺ ከጃፍ።¹⁴ኢየሱስ ጎብኬ ጋጊ ክያኒያጝ ጌይ ውር ጁዋኑዬ ዻዹጝኔያ፤ ባይሺሻ ጊታይካ ቡርቅዻ።¹⁵ሹሽ ቃይትሼ ኩዮጝ ውር ጊታይ ዻዬ ጆሌ እሹጝ ፓዬን ኦኔኒዬ ሺጝ፤ ራቁጝ ሃኦ ቦና ኬና ማሬ ኦኬ ክየምጵንዻ ጌዬን፤ ሹሽ ናንዳካጝ ኣኒኔ ቃይቲሼኑጝ ካፓይ ኦጉዋይካ ጶሮኬ ካኡዋሩጝ ምሽዻዬ ካኣሞጝ ይዕሲባ ዛርሲ።¹⁶ ዬ ኢየሱስ ሺጝ፤ ፓዬን ዎሺሽኬን እንግን፤ እንካ ጋሞጝ እየው ኣይ እንግንባ ዋይሼ እንግን እያይ።¹⁷እንግምዻ ሺጝ ኣኔን ኦጝ ሃባላሻ ቾኔ ኣርቴ ዻጵኔ።¹⁸እሺዻ ሺጝ ይንዳ እን ኣኖጝ ቦፓይንቴየ ዮጝ ናኑጝ።¹⁹ጩዋ ዛርሲ ካቆቤ ሹጩ ክያኑጝ ሜይሼያ እንግን፤ ጎም ባላሻ ቾናኔ ኣርቴ ዻዋኔ ሁቡሼ ካርቡ ኔኒ ፎላ ዾዮኬ ይሁሼኔ ጩክ ባላሻዬ ኣያ ውር ጊታይ ዻዬ ጆሌ እሹጝ፤ እንግንዻ ጋያ ዛርሲ።²⁰ውር ፓይላ ኣሜ ናዓሻ፤ ጩዋ ውር ጊታይ ዻዬ ጆሌ እሹጝ ቋዻም ፑርፆፑርፆዬ ቋቅሻ ቋሼ ቾን።²¹ውር ጊታይ ኣሚዻ ከኦካ ሃዓጚዬ ሃንታዬ እንቃ ሃጁሙ ሺ ቾን።ኢየሱስ ጃላ ኬጃፍ ኛፓስ ክያኒ²²ይሪካ ውር ጊታይ ዻዬ ጆሌ እሹጝ ካኮልሼ ጋጊዬ ካቁዋልሺኔ ታቶጝ ሜይሼያ እንግን፤ እሺ ሺዽያ ታካ ሁር ካዛርሲ ይዕሲዬን።²³ይዕሲዬ ዛርሱጝ ጩዋ ኳታ ጋግ እሺጵን ናንዳካ ይሁኔን፤ ምክርሼዻ ኣኔን እሺጵን ኦይን፤²⁴ከሹ እን ጋጊ ኣኔንባ ሙዋ ክያኒ ኩዬኔ ፑጉ ናሹጜ ካርሲያ ከሄሌቆን ጳላቅጳላቅ ጌዬን።²⁵ከምክርዻ ኬክያጝ እንካ ኦይድሳጝ ኢየሱስ ኣኔን ከኛፓስ ጃሌን፤ ኩና ሃምካ ውር ጊታይ ዻዬ ጆሌ እሹጝ።²⁶ውር ጊታይ ዻዬ ጆሌ እሺዻ ሹ እን ጃሌ ኩኔ ኛፓስ ክያኒ ከጃፌ ጌዮጝ ሪግሼኔ ጉቹካ።²⁷ኢየሱስዻ ይሪካ ዋይሼ እንግን፤ «ይህ፤ ሃኣን ኦይድ ሪግሺንቴን።²⁸ጴጥሮስዻ ሺጝ፤ ታቹጝ ዮ፤ ሃእንያጝ ካጃሌ ሙዋ ክያኒዬ ካኩዋዌ ሃሚን ኑኑጝ ኤርግት ኣንባ።²⁹እሺዻ ዋይሼ እሺ ኩዋባ። ጴጥሮስዻ ጎብኬ ጋጊ ክያኒዬ ጃልኬ ሙዋ ክያኒዬ ኩያ ሃምካ ኢየሱስ።³⁰ኣይባዬ ሹ እን ጌዬ ቁዋቅቲካ ፑጉጝ ሪግሼና ካርሲዬ ዱቅሚኔንዻ ሺጝ ታቹጝ ዮ፤ ዻዓሺ ኣንባዬ ኡቹካ።³¹ኢየሱስዻ ይሪካ ቲት ቡዋዌ ጎም እሺዬ ዋይሼ እሺ እን ይጝ ይሁኔን ጆጊህ የቃጋዺ ኦ?³²ኢየሱሴ ጴጥሮሴ ሌፌ ጋጉጝ ፑጉዻ ጌያ ሹይ።³³ጩዋ ውር ጊታይ ኣኔን ጋጊ ክያኑጝ ሺጝ እን ኣኩሉክ የኣይ ውዋካ ባሪዮዬ ይወና።ባይሺሼን ከኦካ ጌንሳሬጥ³⁴ቁዋልሺኔ ኛፓስ ታቶጝ ጩዋ ሄክሻ ፔን እን ሺጜ ጌንሳሬጡጝ፤።³⁵ውር ጊታይ ቆቤን ኦይን ሹ እን ጊባጄ ኢየሱስ ኣዬን ኔኑጝ፤ ይዕሲሼያ ሜርሜር ኦካ ፔን ጊታይ ኣኔን ኦካ ክራ እን፤ ጊታይ ዴሜንዻ ፓይላ ኬሃሚን ኔኒ ቦፓይኔን፤³⁶ጊታይ ዴሜን ካዱም ኣፓላ ኔኒዬ ካባይሾጝ ይወና፤ ጊታይ ዱሚዻ ፓይላ ባይሻ።

ሃፑክ 15ግሎካ ውርካ ፈረሳውያን¹ከኦይን ጩዋ ውር ጊታይካ ፈረሳውያን ፓዬንኬ ኢየሩሳሌሜ ውርካ እርርሲኔን ካክያጃ ባካ ሌሜኔ ፓዬን ኦካ ኢየሱሴ፤²ሺጝ ውር ጊታይ ዻዬ ጆሌ እን ሚኔ ግሎካ ሹቡጋን ሃናንዳካ ኦ? ጋም ዳዓኖዻያጝ ጉዋንኬን ቡዋ ጊዬይ፤ ሺጝ እያይ።³ኢየሱስዻ ሺጝ እያጜ ዋሼያ እንግን፤ እየውካ የሺጛ ናንዳካ እየው ኤታጋኔንያጝ የሚንቴ ናንዳካ ኦ ክያጃካ ባሪዮ?⁴ባሪዮ ሺጝ፤ ሪግሺንቴባ ሹቡኔ ጁኔ፤ ውር እን ሜይሼ ሹኔ ወይ ጁዋኔ ክያጃ ጋራጝ ካኒሿ ሺጝ እያይኔ ኤርግትያጝ፤ ⁵ዬ እየው ውር ክየምጵንዻ እንካ ሺጝሼ ሹኔ ወይ ጁዋኔ ኣሽክሼኑጝ ኦኬ ክየምጵንዻ ሃሻማ ቡልሼባ ባሪዮ መባ፤ የሺጛ እያይኔ፤⁶ውር ክየም ሻማ ይንያጝ ሪግሼና ሹኔ ወይ ጁዋኔ፤ ⁷ኢየው ኣጁጋን ኢሳይያስ ናንዳካ እየው ሃሳዋ እን ሺጜ እያጜ ክያጆጝ ሃሊኪ፤⁸ዛርሱጝ ሪግሼን ኣን ከፎዾሮካ ቶግ፤ ዬ ሻን ጊዬይ ኬኦናኒ ኣኔን ዹክ፤⁹ይወን እን ማም እያይ፤ እርርሲዬን ጊዬይዻ ከውር ሃሊኪ።¹⁰ዛርሲ ካፓዬን ሃሚን ዲያውዌ ዋይሼ እንግን እያጝ፤ «ዋይባ ጶቅሲባዻ፤¹¹እንካ ጮይሽ ውር ሃእን ቱልኬ ቶጌ ዬ ማር እን ሁሉኩሼ እያጝካ ቶጌን።¹²ጩዋ ውር ጊታይ ዻዬ ጆሌ እሹጝ ፓዬን ኦኔኒዬ ሺጝ፤ ውርካ ፈረሳውያን ዋይ እን የሃሳወዬ ማኒሾጝ የእባጅያይ?¹³የእሺ ዋይሼ እንግን እያጝ፤ ባባ እንካ ፎላ ዾዮኩጝ ሻሪ እን ማሬ ዾቅዬን ፓይላ ቡጭባ።¹⁴ኦይድ እንግንባ፤ እንግን ሃጊታኬና እያንሼ ጆሌ ውር ሙሙዾ፤ ሙሙዾዻ እያኒሻ ሙሙዾያጝ እንግን ዻዋን ጎም ጋጜ ሻውባ ኦካ ኣርሼን።¹⁵ጴጥሮስዻ ሺጝ፤ ሜይሼ ኡዋው ሄክንሶ ኔኒ።¹⁶እሺዻ ዋይሼ እንግን እያጝ፤ እየውዻ ይቲ የካኔ ጶቅሲያኬኒ?¹⁷እን ሁሉኬ ቶግ ፓይላ ሙግ ክያጜ፤ ጩዋ ካቱሌ ሹኑክ የእባጄኬኒ?¹⁸ዬ እን ኩንኬ ቶግ ቱልኬ ሻን፤ ካጮይሽ ውር ሃይዕጝ፤¹⁹ቃቦ ጋራ፤ ናፒሲካ ውር ኒሼን፣ ኣንግርማ፣ ኩጳሞ፣ ጓር፣ ከሾሮ እርርሲኔኔ ሮጝ ካይሲዬን ቱልኬ ሻኔ።²⁰ካጮይሽ ውር ሃጊታይ ዬ ጉዋንኬን ቡዋዌ ኣሚኔን ጮይሽኬን ውር።ይሁኔን ካኝያ እንካ ካነዓናዊ²¹ኢየሱስ ቱልኬ ኦይኔ ኩያ ፔንካ ጢሮሴ ሲዶናዬ።²²ኝያ ክየም ካከነዓናዊ ኩንኬ ኦካ ኦካ ፔን እጜ ኩይ ሃምካ ኢየሱሴ ሺጝ፤ ታቺጝ ዮ፤ ውዋካ ዳዊት ቶይ ኣንባ፤ ውዋ ናኒ ኡሲካ ጮዩ ጎሜ ካሎን ጋልንሺባዬ ኡቹካ።²³ዬ እሺ ካኒ ዋሼኬን እሺ ክያጃ ክየምጵንዻ፤ ከሹ እን ውር ጊታይ ዻዬ ጆሌ እሹጝ ፓዬን ኦኔኒዬ፤ ሺጝ ዻዬ ኡዋዌ ኡቹካዬ ኤ የይዕሲያ እሺያጝካ ሺጝ እያይኔ ጋንሼና።²⁴እሺዻ ሺጝ፤ ጊታይ ይዕሲዬዬ ኣይኬ ቶኦካ እስራኤል ሃሓምካ ማድር ጊታይ ካይጵን።²⁵ኝያ እንዻ ቡድ ኦካ ጃፍ ኔኒዬ ሺጝ፤ ታቹጝ ዮ፤ ኬልሺያንባ።²⁶እሺዻ ዋሼ ዋይሼ እሺ፤ ምሽካ ሃንታ ኑኑ ቦወ ክያኒ ባክሼን ሁሉኩሼኬን።²⁷እሺዻ ሺጝ፤ እህ ታቹጝ ዮ፤ ክያኒ ኣምባ ፑርፆፑርፆ ጊታይ ፓቄን ከኦካ ኡፌንካ ታቺ እን።²⁸ከሹ እን ኢየሱስ ዋይሼ እሺ፤ እን ኝያጝ፤ ይሁኔን ኑኑ ሃታቺ/ ዋይሼ እሺ ኬእያይ የዎሾጝ ሙኒሼን እንባ» ውዋ ኔኒዻ ቦኬ ሹ እኔ ባይሻ።ኢየሱስ ኣምሻ ውር ሺ ኣሁር²⁹ኢየሱስ ናሹጝኬ ኦይኔ ኩይ ፔን ኣኔን ኦካ ቋጩርካ ኛፓስካ ገሊላዬ ሌፍ ጋጌ ኡፓ።³⁰ውር ጊታኬና ኣይ ጁዋኑዻ ኤላን፣ ጊታይ ካርቡ ኣይ ሙሙዾጝ፣ ጊታይ ኣይ ኤላጝ፣ ጊታይ ኣይ ዱዺዻ ፕር እንቃ ውር ጁዋኑ ጊታይካ ቡርቁጝ ቦፓይኔዬ ጋጁጛ ኦካ ጃፍ ኔኒ፤ እሺዻ ባይሺሻ።³¹ዛርሲዻ ጌይ ካጝ ኣይ ዱዺዻ ሃሳወኔ፤ ኤላዻ ማቲ ሹቃዬ ኤላንዻ ፒክሼኔ ፓዬ፤ ጊታይ ካርቡ ኣይ ሙሙዾዻ ጌዬ ቶዬ ጎሺያ፤ ጌጳሲያ ኣምላክ ካእስራኤልዻ።³²ኢየሱስ ሺው ውር ጊታይ ዻዬ ጆሌ እሺዬ፤ ዋይሼ እንግን «ዛርሲ ናንዳካጝ ጋዬኬ ኣን ሹ ጅያኔ ኦካ ኣሜንዻ ማሬ ኣኔኑጝ ዻዹጙቴ እንግንባ፤ ጉዋር ክያንዻ ካሽ ዻቺሼ ካማር ቡዴን ቶሮንዽዬ ካይዕሲዬ እንግን ካኒ ናሺኬን።³³ውር ጊታይ ዻዬ ጆሌ እሺዻ ሺጝ፤ ኦካ ቦናጝ ኦኬ ክየምጵንዻ ማሬ ኣኔን ምሽ እን ዛርሱጝ ፓይላ ካኣሞጝ ካጌይኬ ኦን?³⁴ኢየሱስዻ ሺጝ፤ ኣይባዬ ኣና ባላሻ አኸ? ጉዩዬ ኣንሻ እንግን። እንግንዻ ሺጝ ኣና ባላሻ ሶጳዬ ኣርቴ ሃይሻይሺዬ።³⁵እሺዻ ዋይሼ እንግን ዛርሲ ካቆቤ ዳሊ ክያኑጝ ሜይሺቴ እንግንባ።³⁶ቦው ባላሻ ሶጳኔ ኣርታኔ ይሁሺኖጝ ጩዋ ጩኬ ኣያ ውር ጊታይ ዻዬ ጆሌ እሹጝ እንግንዻ ካሺሼያ ዛርሲ።³⁷ውር ፓይላ ኣሜ ናዓሻ፤ ውር ጊታይ ዻዬ ጆሌ እሺዻ ቋዻም ፑርፆፑርፆ ጊታይ ሺዽዬ ቋቁሻ ቋሼ ሶጳ።³⁸ውር ጊታይ ኣሚዻ ከኦካ ሃዓጚዬ ሃንታዬ እንቃ ኣና ጁሙ ሺ ኣሁር።³⁹ኢየሱስዻ ይዕሲዬ ዛርሱጝ ጩዋ ኬጋጊ ኩያ መጌዶል።

ሃፑክ 16ኢየሱስ ከፎላ ዾዮክ ካዹዋልሺንቴ ኦኬዬ ጋንሼና¹ውርካ ፈረሳውዬ ካሳዱቃውዬ ፓዬን ኦካ ኢየሱሴ ዎሽ ፓታንሲዬኔ ከፎላ ዾዮክ ካዹዋልሼ እንግን ኦኬዬ ጋንሼና።²እሺዻ ዋይሼ እንግን እያጝ፤ «ከምክር፤ የሺጛባ ፎላ ማቲባ ናንዳካ ካላሉጜን።³ኬካሪንታዻ ፎላ ሼሽክያ፤ ዴጭሻ፣ ዬ ጎት ቢባ፤ የሺጛባ እያይ፤ የሻማባ ዴንታካ ፎላ ዋና፤ ኣይባዬ የቻሊያኬን ዹዋልሺኔን ካቦን ዋና ሻሜን።⁴ጅሼን ጋራጜ ካኣንግርማዬ ዎሼን ዹዋልሺኔን፤ እንቃ ጋዬንኬን። ጩዋ ኢየሱስ ኦይድ እንግኔ ኩያ።እርሾካ ፈረሳውዬ ካሳዱቃውዬ⁵ቁዋሊኔ ኛፓሱጝ ውር ጊታይ ዻዬ ጆሌ እሹጝ ጌርሺኔያ ባላሻ።⁶ኢየሱስዻ ዋይሼ እንግን ኣጅቴባ፤ ከኦካ እርሾካ ፈረሳውዬ ካሳዱቃውዬ ቶይ እየው ኤታጋን።⁷ዬ እንግን ዋይሼ ጋጝ ኣይባጵን ኦጝ ሃማርቴ ባላሻ ቦወኔ ሃሳወና።⁸ኢየሱስዻ እባጅ ቃቦ ጊዬይዬ ዋይሼ እንግን እያጝ፤ እየው ጊታጝ ይሁኔን ኣይ ጆጉጝ፤ እየው ከጋጝ ናንዳካጝ የማርቴ ባላሻ ቦውቴን የሃሳውና ናንዳካ ኦ?⁹ባላሻ ቾናን ሄኪዬ ውር ሺ ቾኔ ፑርፆፑርፆ የቋቅሺቴ ቋሼ አኸ? የጶቅሲያኬኒ?¹⁰ፕር ባላሻ ሶጳን ሄክዬ ውር ሺ ኣሁራኔ ፑርፆፑርፆ የቋቅሺቴ ቋሼ አኸ ጌይኬን ኦጉዩ ጶቅ?¹¹ኣኪ ሃሜይሼ እየው ማሬ ናንዳካ ባላሻ ኣዬን የማራ እያን ጶቅሲዬን? ካንዻ ከኦካ እርሾካ ፈረሳውዬ ካሳዱቃውዬ ኣጅቴባ።¹²ከሹ እን ኣጅሼ እንግን ማሬ ናንዳካ እርሾካ ባላሻ ኣዬኔ ኣዬ እርርሲዬንካ ፈረሳውዬ ካሳዱቃውዬ ጊባጃ።ጴጥሮስ ሃሳወ ኒን ኣዬንካ ኢየሱሱጝ¹³ኢየሱስ ሹ እን ሄክሼ ፔን እን ሺጜ ፊልጶስ ቂሣሪያ ዋይሼ ውር ጊታይ ዻዬ ጆሌ እሺ፤ ኣይባዬ ውር ዋሽ ኣን ኬኒኔ ኣንሻ እንግን።¹⁴እንግንዻ ሺጝ ውር ክየም ክየም ሺጝ ዮሐንስ እንካ ዱቅኔኑጝ፣ ዶክ ሺጝ ኤልያስ፣ ፕር ዶክ ሺጝ ኤርምያስ ወይ ሺጝ ከኦካ ውርካ ቶካ ባሪዮ ክናኒ ክየም ናሹጛ።¹⁵እሺዻ ዋይሼ እንግን ኤ እየውካ የዋይሺቴ ኣን ኒን?¹⁶ስምዖንዻ ሺጝ፤ እን የኣይ ክርስቶስ ውዋካ ባሪዮዬ ዋሻ።¹⁷ኢየሱስዻ ሺጝ እያጝ፤ ውዋካ ዮና ስምዖን ዮ፤ የኣይ ጫንቃል፤ ይን ሜይሼ እን ሃባባ እን ኣኔን ፎላ ዾዮክ ዬ ማር ኣሩጜ ኒያቡዬን።¹⁸እን የኣይ ጴጥሮስ፤ ሃኣሽክባ ቶኦካ ይሁኔን ኦካ ባዩጝ፤ ሃፑካ ባይዻ ሳጊኬን።¹⁹ሃኣይባ እን ቦወንካ ፎላ ዾዮክ፤ ጊታይ ቁሜ ዳሉጝ ክያኒ ፓይላ ማቲባ ኬና ቁሜ ፎላ ዾዮክ፤ ጊታይ ቡሌ ዳሉጝ ክያኒ ፓይላ ማቲባ ኬና ቡሌ ፎላ ዾዮክ።²⁰ጩዋ እሺ ኣዬ ክርስቶሱጝ ካማር ውር ክየምጵንዻ ሜይሼኔ ኣጅሻ ውር ጊታይ ዻዬ ጆሌ እሹጝ።ኢየሱስ ናንዳካ ኣርሼን ኔኒ ሌምሼ ክያጃ²¹ኢየሱስ ካርሲኬ ሹ እጜ ካካሜ ኢየሩሳሌሜ፤ ኦይን ከውር ጌቿኔ ታታቺካ ውርካ ቃሼ ከኦካ ቡዋካ ውርካ እርርሲኔን ካክያጃ ባካ ሌሜኔ ካጌዬ ጋሎዬ ካኒሾጝ፤ የከሹ እንካ ማክንሳጝ ናሹጜን ኔኒ ካኣኖጝ ካርሲያ ውር ጊታይ ዻዬ ጆሌ እሹጝ ሜይሼን።²²ጴጥሮስዻ ጊድሜን ሃምካ ቋጩርካ ኢየሱሴ ሺጝ፤ ታቹጝ ዮ፤ ኦኬና ኣይ እያጝ ሄክሽኬን እን ክየምጵንዻ፤ ሺጝ እያይኔ ካርሲያ እሺ ጎሪዬን።²³ኢየሱስዻ ሁቤን ሃምካ ጴጥሮሴ ዋይሼ እሺ «እን እጁጙጝ ካምባ ከኦጝ/ ኦካ ውር ዬ ኦካ ባሪዮ ከቃቦ ኑኑ ናንዳካጝ ማሬ ኣኔኑጝ ማቲሼያ እን ካቲሚኔን።²⁴ጩዋ ኢየሱስ ዋይሼ ውር ጊታይ ዻዬ ጆሌ እሺ እያጝ፤ ውርካጝ ናሺ ኣን ዻዬን ኣኔያጝ ካቡዲ እሺ ኤምኑ፤ ካዼ ሻሪ እንካ ሮይኔኔ ካዻይሼ ኣንባ።²⁵ውር እን ዎሺ ናፒሲ ኔኒ ዻዓሺዬን ፓይላ ካይባ፤ ኣይባዬ ውር እን ካይሲ ናፒሲ ኔኒ ናንዳካ ኣን ዻቅባ።²⁶ውር ሺዕሺሽኔን ዳሉጝ ፓይላ፤ ዬ ካይሲያ ኔኒያጝ ኣሽክዮ? ወይ ውር ኦካ ባልካ ናፒሲ ኔኒ ካቻሊዬ ካሺዬን ኣንቲቲ ኔናኦ?²⁷ሃንታካ ውር ከጌጳሞካ ሹኔ ኩንባ ከውርካ ኤርጎ፤ ናንዳካ ውር ክየም ክየም ካሺሼባ ከእያይ ኣሽክዮጝ።²⁸ሃዋይሼባ እየው ኣኩሉክ፤ ከኦካ ጫቃንካ ጊታጝ ጎሩጝ ሌይ ሃም ሃንታካ ውር ከጌጳሞ ካኩዋዌዬ ካጌዮጝ ጊታኬና ካማር

ሃፑክ 17ዴንታ ዋና ማቲዬንካ ኢየሱስ¹ሹሽ ማቲዬ ሳዓት ላ ጩዋ ኢየሱስ ቦው ጴጥሮሴ ያዕቆቤ ፕር ጪኔካ ያዕቆብ ዮሐንሴ እንግንጵኔ ኮቴያ ጋግ ራጅሜ ክየም።²ከኦይን ኦካ ማሪ ጊዬይ ዋንዺ ኔኒ ማቲያ ዋና፤ ማሪ ኔኒዻ ላሉጛ ከሹሽ፤ ኣፓላ ኔኒዻ ቶክ ካርቡ ኬኦኬሜሌል።³ይሪካ ሙሴዬ ኤልያሴ ሃሳወን ከኢየሱሴ ጌያ።⁴ጴጥሮስዻ ዋይሼ ኢየሱስ ታቹጝ ዮ፤ ሃኣኒናያ ኦጝያጝ ሃሹቃ ከኡዋው፤ ሃኬ ክያጃ ኑኑያጝ፤ ካኣሽኪ ቶኦ ጅያን ክየም ኑኑ፣ ክየም ካሙሴ፣ ክየም ካኤልያስ።⁵እሺ ኣኔንባ ሃሳውኔኔ፤ ሉፍ ሹማ እንግን፤ ከሉፍ ቱዎጝዻ ኩና ናቅዲ ኬና ሺጝ፤ ከእሺ እን ዋዝንሲ ኣን ውዋ እን ናኒ ሃናሺዮጝ ሃይዕጝ፤ ዋይሼንባ እሺ።⁶ውር ጊታይ ዻዬ ጆሌ እሺዻ ዋዬ እን ቴርጋዽዬ ቡዳ ከማሪ ጊዬይ ዳሊ ክያኒ።⁷ኢየሱስዻ ኩኔ ዱም እንግኔ ዋይሼ እንግን ናሹጝጋ ኦይድ ሪግሺንቴን፤⁸ጌይ ካቼ ቶይያጝ ከኦካ ኢየሱስ እንቃ ካኒ ጌይኬን ውር እንቃ።⁹ጋኔንባ ከጋግ ክያኒ ጎቤኔ ኢየሱስ ዋይሼ እንግን፤ ሃንታካ ውር ሌይ ሃምካ ናሹጜ ከኣርሼን ክያኑጝ ጊታይ የጌይቶጝ ኦይዲ ውር ክየምጵንዻ ሜይሺቴኔ ኤርጊታ እንግን።¹⁰ውር ጊታይ ዻዬ ጆሌ እሹጝ ሺጝ፤ ኣኪ ውርካ እርርሲኔን ካክያጃ ባካ ሌሜን ሺጜ ሌሜ ኩና ኤልያስ ሃኦ? ሺጝ እያይኔ ጋንሼና።¹¹እሺዻ ሺጝ እያጜ ዋሼያ እንግን፤ ኤልያስ ከኣኩሉክ ኩኔ ኣሽኪሼባ ኦኬ ፓይላ፤¹²ኣይባዬ ሃዋይሼባ እየው፤ ኤልያስ ኩና፤ ኣይባዬ ኦይን የዎሽቶጝ ኣሽክቴባ ዬ የእባጃኬን ፕር ሃንያካ ውር ከቡዋ ጊዬይ ጌይባ ጋሎ።¹³ውር ጊታይ ዻዬ ጆሌ እሹጝ ከሹ እን ኢየሱስ ሃሳወ ናንዳካ ዮሐንሱጝ ጊባጃ።ኢየሱስ ባይሺሻ ውዋ እን ኣኔ ቡርቂ እን ፓቄጆል እሹጝ¹⁴ዋክባ ሃምካ ዛርሱጝ፤ ውር ክየም ኩን ኦካ ኢየሱሴ ቶኬ ኩዋሚን ኦካ ማሪ ኔኒዬ ሺጝ፤¹⁵ታቹጝ ዮ፤ ባንዞ ቶይሼ ኣን ውዋ ናኒ፤ ከቡርቂ እን ፓቄጆሉጝ ካሎን ኣኔን ጋሊዬን፤ ሹ ጁዋኑ ቡድባ ጉ ክያኒ፤ ሁሉካ ሙዋ ክያንዻ።¹⁶ቦፓይኔያ ሃምካ ውር ጊታይ ዻዬ ጆሌ እሹጝ ኣይባዬ ካባይሺሾጝ ካኒ ቻሊኬን።¹⁷ኢየሱስዻ ሺጝ፤ « እን ጅሼን ቆሮጝ ማር ይሁኔኑጝ፤ ከእየው ሃኡፒ ሌይ ኣሚን፤ ሃዶንሺ ሌይ ኣሚንዻ፤ ሺጝ ቦፓይንቴ ዮጝ ውዋ እን።¹⁸ጩዋ ኢየሱስ ጎሪያ ኡሲ ጋራ እኔ ቱላ ከኦካ ውዋ እን፤ ውዋ እንዻ ቦኬ ሹ እኔ ባይሻ።¹⁹ውር ጊታይካ ዻይኔንዻ ፓይ እንግንጵን ሃምካ ኢየሱሴ ሺጝ፤ ኡዋው ሃማርቴ ኡሲ ጋራ ቡሌን ሃኦዬ ጋንሼና።²⁰እሺዻ ዋይሼ እንግን ሃናንዳካ ክያጃ እን ይሁኔን ጉዩ ቶኩዮጝ፤ ሃዋይሼባ እየው ኣኩሉክ የኣንቴ ይሁኔን ኬና ውይ ካርቡካ ሻሪ ሃይሻይሺያጝ፤ ኣይን ጋጉጝ ናሹጝኬ ኦጜ ካም ሃምያጝ ኩይባ፤ ኦኬና ካካው እየውዻ ኣኔኬን፤²¹ኦኬና ኣይ እያጝ ማርኬ ይሁኔን ቶሮንዽዬኔ ኣዬንያጝ ቱልኬን።²²ጋኔንባ ኦካ ፑኡሺምኔኔ ኢየሱስ ዋይሼ እንግን እያጝ፤ ሃንታካ ውር ሳስክዬ ጋዬንባ ፤²³ኒሽባዻ፤ እሺዻ ከሹ እንካ ማክንሳ ናሹጝጋ። ውር ጊታይ ዻዬ ጆሌ እሺዻ ካሎን ሞይካዽያ።ናንዳካ ቶኦካ ይሁኔን ጊቢሪ ካሺዬን²⁴ኢየሱሴ ውር ጊታይ ዻዬ ጆሌ እሺዬ ሄክሼ ቅፍርናሆም ጩዋ፤ ውር ጊታይ ቦውኔ ጆል ጊቢሪካ ቶኦካ ይሁኔን ፓዬን ኦካ ጴጥሮሴ ሺጝ፤ ውርካ እርርሲኔን ጉዩ ቡልሽኬን ቶኦካ ይሁኔን ሺሊንጊ ዻዋን?²⁵እሺዻ ዋይሼ እንግን ካሺባ። ጴጥሮስ ሁሉካ ሃምካ ቶኦጝ ከሌሜን ኢየሱስ ዋይሼ እሺ፤ «ስምዖን፤ ታታቺካ ዳሉጝ ወይ ውር ጊታይ ፑኡሺኔ ጆል ጊቢሩጝ የዋሽኬ ኦኮኑጝ ፑኡሺዬ ጊቢሪ ከኦካ ሃንታ ጊዬይ ወይ ከውር እቃኪ?²⁶ጴጥሮስዻ ሺጝ ቦኬ ኦካ ውር እንቃ። ኢየሱስዻ ሺጝ እያጝ፤ ኣኪ ሃንታ ጊዬይ ጋይ ኣርና፤²⁷ኣይባዬ ካማር እንግን ጋልንሺዬኔ ካሜ ፓቅሼ ኦኳ ኑኑ ኛፓስ ክያኒ፤ ኣርቴ እንካ ሌሜን የጎሞጝ ፎቅ ቶግ ኔኒዬ ሺሊንጊ ክየም እን የጌዮጝ ካሺባ ከሮጝ ኑኑዬ ናኒዬ።

ሃፑክ 18ከፓይላ ሳጊ ፎላ ዾዮክ ሃኒን¹ከሹ እን ውር ጊታይካ ዻይኔን ፓዬን ኦካ ኢየሱሴ ሺጝ፤ ከፓይላ ሳጊ ፎላ ዾዮክ ሃኒኔኔ ጋንሼና።²ኢየሱስዻ ዼት ሃንታ ዽታኬ ክየሜ ሪብ ጫቃን ጊዬይዬ ዋይሼ እንግን እያጝ፤³ሃዋይሼባ እየው ኣኩሉክ፤ የማራ ዋኬ ሃንታ ዽታኬ ማቲዬንያጝ ክየምጵንዻ የሻዋኬን ፎላ ዾዮክ።⁴ዬ ከፎላ ዾዮክ ካሳጊኬ ፓይላ ሃእን ሻሚ እሺ ኤምኑ ከሃንታ ዺኒ ይርኩጝ፤⁵ውር እን ቦው ሃንታ ኬና ውይ ይጝ ከሮጝ ናኑጝ ቦባ ኣንዻ።⁶ኣይባዬ ከጊታይ ይወን ከኣን ከኦካ ሃይሻይሺ ጊታጝ፤ ውርካጝ ካቲንሲ ክየም፤ ካቁምሼ ማዶካ ባይ ዴጩጉ ቦሉ ኔኒ ክያኒዬ ካፓቅሼ ኛፓሴ ካዱቅምኖጝ ሃባሺ።⁷ፔኑጝ ናንዳካጝ ማቲዬ ኦካ ካቲሚኔኑጝ ሃይ/ ኩኔንካ ካቲሚኔን ሺዽኬኔ፤ ኣይባዬ ናንዳካ ውር እን ኣይ ኦካ ካቲሚኔን ሃይ።⁸ቡዋ ኑኑ ወይ ጃፍ ኑኑ ናንዳካጝ ማቲሼ እን ኦካ ካቲሚኔኑጝ ቃጬ ፓቅባ፤ ከኣኔ ቡዋ ዻዌ ወይ ጃፍ ዻዌ ካፓቅሼ እን ሃምካ ጉ እንካ ሹ ጮልያጝ፤ ከኣዬ ኤላዬ ወይ ዱጙሚዬ ከሁሉኬ ሃምካ ዻቆጝ ሃባሺ።⁹ፕር ካርቡ ማቲሼያ እን ኦካ ካቲሚኔንያጝ ቡሌ ፓቅባ፤ ከኣኔ ካርቡ ዻዌ ካፓቅሼ እን ጉ ክያኑጝ፤ ከኣኔ ካርቡ ክየሜ ከሁሉኬ ሃምካ ዻቆጝ ሃባሺ።¹⁰ከኦካ ጫቃንካ ሃይሻይሺ ጊታጝ ኦይዲ ክየምጵንዻ ቦውቴኔ ኣጅቴባ፤ ሃዋይሼባ እየው፤ ከውርካ ኤርጎ ጊታይ ኣኔን ፎላ ዾዮኬ ¹¹ሃንታካ ውር ኩና ጊታይ ካይህ ዻዓሺዬን።ሄክንሶካ ማድር እን ካይህ¹²ይንዳ ሜይቴየ ኣን፤ ውር ክየም ካኣኔ ማድር ዽብ ክየሜ ከኦካ ጊታይ ክየም ካይያጝ ኦቼ ሳልታም ሳላን ጋግ ክያኒዬ ዎሼ ኩይኬን እን ካይህ?¹³ሃዋይሼባ እየው ኣኩሉክ፤ ጌያ ማድር እን ካይህያጝ፤ ከኦካ ሳልታም ሳላን ጊታይ ኣኖጝ ካሎን ዋዝንዽባ ከእን ጌዮጝ።¹⁴እያይ ከኦካ ጫቃንካ ሃይሻይሺ ጊታጝ ክየምጵንዻ ካካይህዮጝ ማር ክያጃካ ሹኔ እን ጊዬይ ካፎላ ዾዮኬን።ናንዳካ ጋጝ ጋሊንሺዬን¹⁵ጪኔ ኑኑ ጊያሚሺሻ እንያጝ ካሜ ኣይ እኔ እሺዬ ዻዺኔ ሜይሼባ እሺ ሴሶ ኔኒ፤ ዋይሼና እንያጝ ሻምሼባ ጪን ሃሚን ኑኑጝ።¹⁶ኣይባዬ ማር እን ዋይሺኔንያጝ ክያጃ ፓይላ ማቲባ ከክያጃ ኬና ካቁዋቅትትሽ ከማኝ ዻዌ ጅያኔ፤ ጎም ውር ክየም ወይ ዻዌ ካሃሳውኔባ።¹⁷እንግን ዋይሺኔንያጝ ሜይሼ ቶኦካ ይሁኔን፤ ማራ ቶኦካ ይሁኔን ዋይሺኔንያጝ ኮምሼ እሺ ከዛርሲዬ ውርካ ጊቢሪ ፑኡሺዬኔ።¹⁸ሃዋይሼባ ኣኩሉክ፤ እን የኣሽክቴ ዳሉጝ ክያኒ ፓይላ ማቲባ ኬና ካቁሜ ፎላ ዾዮክ፤ እን የቡልቴ ዳሉጝ ክያኒ ማቲባ ኬና ቡሌ ፎላ ዾዮክ።¹⁹ፕር ሃዋሼባ እየው ኣኩሉክ፤ ዳሉጝ ክያኒ የኣያ ዻዌ ኦኬ ካጝ የይሁንቴ ከጋጝ ዋይሺኔኑጝ ባባ እን ኣኔን ፎላ ዾዮኩጝ ኣሽክሼባ እየው።²⁰ጊታይ ኣይ ዻዌ ወይ ጅያኔ ፑኡሺሜን ከሮጝ ናኑጝ ኣን ሃጌዬንባ ኦይን።ናንዳካ ሺዕሺዬን ሻሜን²¹ከሹ እን ጴጥሮስ ኩይ ኦካ ኢየሱሴ ሺጝ፤ ታቹጝ ዮ፤ ጪኔ ናኒ ጊያሚሺሻ ኣንያጝ ካሺዕሺሼ እሺ ክያጝ አኸ? ሃሌይ ክያጝ ሶጳይ?²²ኢየሱስዻ ሺጝ «ሌይ ክያጝ ሶጳታም፤ ሶጳዬ ሌይ ክያጝ ሶጳጵን ሃሺጝኬን።²³ዬ ፎላ ዾዮክ፤ ሙኔን ኮመን ኮኑጝ ኣኔን ኦካ ቡዋካ ውርካ ዋድማዬ ታቺ እን ዎሼ ፑኡሺዬን።²⁴ሹ እን ካርሲዬ ቢራንዻ ኮመን ቦፓይኔያ ውርካ ዋድማ ኬና ኣኔ ባጃ ሺ ታጲ።²⁵ውርካ ዋድማ እን ናንዳካጝ ካዎሼ ባጃ እን ኣኔን ኦኔኒ ካሺዬኑጝ፤ ካኡዋሩጝሼ ኝያ ኔኒዬ፣ ሃንታ ኔኒዬ፣ ኣንቲቲ ኔኒዬ ካካሺዮጝ ታቺ እን ኤርግታ።²⁶ከሹ እጝ ዋርካ ዋድማ እን ቡድ ጃፍ ኔኒ ክያኒዬ ሺጝ ዶንሺሼ ኣንባ፤ ባጃ እን ኣኔን ኦናኒ ፓይላ ሃካሺባ፤ ሺጝ እያይኔ ይወና።²⁷ታቺ እንዻ ዻዹጝኔዬ ሺዕሺሼያ እሺ፤ ባጃዻ ፓይላ ኦቼ እሺዬ ይዕሲያ።²⁸ውርካ ዋድማ እንዻ ቱልባ ከኦካ ሌሜንካ ታቺ እን ጌይ ባይዳ ኬና ኔኒ ኣኔ ባጃ ሺልንጊ ዽብ ክየሜ ጎሜ ዋይሼ እሺ ባጃ እን ናኒ ኣኔን ኦኑኑ ካሺሼ ኣምባ።²⁹ባይዳ ኔኒዻ ቡድ ኦካ ማሪ ኔኒዬ ሺጝ ዶንሺሼ ኣንባ ሃካሺሼ እንባዬ ይወና።³⁰ኣይባዬ ካዶንሺሼ እሹጝ ካኒ ናሺኬን፤ ሌይ ሃም ካካሺዬ ባጃ እን ኣኖጝ ዾቅሺሼያ ቶኦካ ቁሜን።³¹ውርካ ዋድማ እንቃ ጊታይ ጌይ ኦይን ሙኔን ካሎን ዻዹጝኔያ፤ ፓዬ ኦይን ሙኔን ፓይላ ሜይሼያ ኤሪ ታቺ እን።³²ከሹ እጝ ታቺ እን ሺውሽ ውርካ ዋድማ እጜ፤ ዋይሼ እሺ እያጝ፤ እን ውርካ ዋድማ ጋራጝ፤ ናንዳካጝ የይሁኔ ኣኑጝ ባጃ እን ፓይላ ሃኦቼያ እን፤³³ኣን ከእያይ ሃሺዕሺሼ እኑጝ እንዻ ባይዳ ኑኑ ሺዕሺሼን ሁሉኩሼኬኒ?³⁴ከማንትዻ ሌይ ሃም ካካሺያ ሹዋጶጝ ሳስክዬ ኣዬና ሃምካ ቶኦካ ቁሜኑጝ።³⁵ዬ እየው ክየም ክየም የማርቴያ ጪንጊን ከሻን ካሺዽባ ሺጜንያጝ፤ ሹኔ እን ጉዩ ካፎላዻ ሻምባ እያይ።

ሃፑክ 19ኣንሺኔን እን ኩኒ ናንዳካ ቡሌንካ ሃዓጙጝ¹ኢየሱስ ሃሳወ ሹዋጴ እን ጩዋ፤ ኦይድ ገሊላዬ ኩያ ዮርዳኖስ ታቴ እያጝካ ጎብሼንካ ይሁዳጝ።²ዛርሲ ጁዋኑዻ ዻዬያ፤ ባይሺሻ እንግን ከታይ።³ውርካ ፈረሳውያን ዎሽ ፓታንሲዬኔ ፓዬኔ ሺጝ፤ ኣይባዬ ውር ክየም ከክያጃ ኦዻ ኝያ ኔኒ ቡሌን ናሺሼያይ? ሺጝ እያኔ ጋንሼና።⁴እሺዻ ዋሼ ዋይሼ እንግን እያጝ፤ እንካ ሙኒኔን እባ ኬሌሜን ሻሜ ጁሙዬ ሃዓጚዬ ሙኖጝ የካኔ ኮሟኬኒ?⁵ፕር ሺጝ እያጝ፤ ውር ኦይድባ ሹኔዬ ጁዋኔዬ፤ ኣይባ እሺዬ ኣጚዬ፤ እንግን ዻዋን ማቲባ ኣሩጝ ክየም ሺጜ እያይ ማር ናንዳካ እኔኒ?⁶ከኦይን ማቲባ ኣሩጝ ክየም ዬ ማር ዻዌን ዬ ውር ጊታይ ባሪዮ ሻሜ ክየሙጝ ኦይድ ዋና ሻምቴን።⁷እንግንዻ ሺጝ፤ ኣኪ ሙሴ ኣዬ ጁሙ ክየም ማኝካ ወርቀትካ ይዕሲዬ ኦጙጝ ሃኣ ኤርግቶጝ?⁸ኢየሱስዻ ዋይሼ እንግን እያጝ፤ ሙሴ ጌይ ቁዋቅቲካ ሻን ጊዬይ ካቡሌ ሃኣጚ ጊዬይዬ ጊያ ናሺዬ እባ ኬሌሜን ካኒ ኣይኬን እያይ፤⁹ሃዋይሼባ እየው፤ ውር እን ማሪ ኝያ ኔኒ ኩጳሲኔኔ ሌይ ሃም ካማሬ ጌዬን ቡል ኣጝዬ ሃኣጚ ካጝ እያኒሼ ፓይላ ማቲባ ኩጳሞ፤ ውርካጝ እያኒሺ ኝያ እን ቡሎጝ ኣሽክባ ኩጳሞ።¹⁰ውር ጊታይ ዻዬ ጆሌ እሹጝ ሺጝ፤ ክያጃካ ኡማዬ ኣጝዬ ኣያ እያይንያጝ ማራ እያኒሺኔንያጝ ሃባሺ።¹¹ዬ ኢየሱስ ዋይሼ እንግን እያጝ፤ ከኦካ እን ጋዬ እንግን እንቃ እርርሲዬኑጝ ውር ክየምጵንዻ ቻሊኬን ቦወን፤¹²ናንዳካ ኦ ውር ክየም ክየም ማቲ ውር ኬና ካኣይ እሺ ኤምኑ ባሪዮዬ ጅሽባ፤ ዶክ ሻምኬ ቡዋካ ውሬ ማቲባ ኬና ኣይ እንግን ኤታጋን ባሪዮ፤ ፕር ሺጝ ናንዳካ ፎላ ዾዮኬ ጊታኬና ካሻም እንግን ኤታጋን ኬና ካኣይ ባሪዮ ኣኔባ፤ እን ቻሊ ይን ቦወን ቦባ።ኢየሱስ ኡዋና ሃንታ ሃይሻይሻን ¹³ጩዋ ካኣይሼ ቡዋዌ ካይሁሺንቴባዬ ቦፓይኔያ ሃንታ ሃሚን ኔኑጝ፤ ዬ ውር ጊታይ ዻዬ ጆሌ እሹጝ ጎሪያ ውር ጊታይ ቦፓይኔ ሃንታጝ። ¹⁴ኢየሱስዻ ሺጝ፤ ሃንታ ካፓይኔ ዮጝ ናኑጝ ኦይድ ሃርጊቴን፤ ፎላ ዾዮክ ሃካ ጊታይ ውይ ጊታጝ ¹⁵ኣይሼ ቡዋጝ ጩዋ ናሹጝኬ ኦካ ራቅ እኔ ኩያ።ኣንሺኔን ካውር ሆድሞ እን¹⁶ከኦይን ውር ክየም ኩን ኦካ ኢየሱሴ ሺጝ፤ « ውሩጝካ እርርሲኔን ዮ፤ ካጌዬ ዻቆካ ቦንካ ቦን ካኣሽክሼ እን ኦኬ ሹቃ ኬና ኣይ እያኔ ኣንሼና?¹⁷ኢየሱስዻ ሺጝ፤ የኣንሽ ኣን ናንዳካ ኦ ኦኬ ሹቃ? ኣይ ሹቃ ሃኦኬ ክየምጵን፤ ዬ የዎሺያ ሃምካ ዻቆ ሁሉኬንያጝ ዻዬ ኤርጓን።¹⁸ውር እን ሺጝ ኤርጎ ጊታናዬ ኣንሼና? ኢየሱስዻ ሺጝ፤ « ኦይ ኒሼን፣ ኦይ ኩጳሲዬን፣ ኦይ ኦጉርኔን፣ ኦይ ከሾሮ ኪሊዬን፤¹⁹ርግሺንቴባ ሹቡኔ ጁኔ፤ ውርካ ጉል ኑኑ ናሺኬ እን ኤምኑ።²⁰ውር ባርሻ እን ሺጝ ሃጊታይንያጝ ሃዻዬያ፤ ከኦካ ጊታጝ እንቃ ጆጊሼ ኣን ሃኦ?²¹ኢየሱስዻ ዋይሼ እሺ፤ የዎሺ ካሎን ማቲዬንያጝ፤ ካሜ ኣንቲቲ ኑኑ ፓይላ ኡዋሩጙሼ ቢሬ ኔኒ ኣይ ኩፓን፤ የጌይባ ሆድማሞ ፎላ ዾዮክ፤ ጩዋ ኩዋዌ ዻዬ ኣንባ።²²ውር ባርሻ እንዻ ናንዳካጝ ሆድማሞ ጁዋኑ ኣኖጝ ዋዬ እን ሞይካድዬ ኩያ።²³ኢየሱስዻ ዋይሼ ውር ጊታይ ዻዬ ጆሌ እሺ እያጝ፤ ሃዋይሼባ ኣኩሉክ፤ ናንዳካ ውር ሆድሞ ፎላ ዽዮክ ሁሉኬን ካሎን ሃጋሎ።²⁴ፕር ሃዋይሼባ እየው፤ ውር ሆድሞ ናንዳካጝ ካሁሉኬ ሃምካ ጌጳሞካ ባሪዮያጝ ጋማላ ካሁሉኬ ከፑልታካ ማርፌ ሃባዶ።²⁵ውር ጊታይ ዻዬ ጆሌ እሹጝ ዋዬ እን ካሎን ከዻዹጝኔን ሺጝ፤ ኣኪ ሃኒን ካቻሊ ኡዋው ባይሺሼኔ ጋንሼና?²⁶ኢየሱስዻ ቶይ እንግኔ ሺጝ፤ እን ማርኬ ታጝካ ውር ቻሊምኔን ከታጝካ ባሪዮ ቻሊሜንባ።²⁷ጴጥሮስዻ ዋሼ ሺጝ፤ ኡዋው ሃኦይዳ ፓይላዬ ሃዻይቴያ እን ኣኪ ካጌይ ኦኬና ኣኔን እያን?²⁸ኢየሱስዻ ዋይሼ እንግን እያጝ፤ ሃዋይሼባ እየው ኣኩሉክ፤ ኬክራ ሃሊ እን ሺጚ ኩኔን ሃንታካ ውር ሹ እን ከጌጳሞ ኡፌ ፎላ ዾዮኩጝ፤ እየው ጊታጝ ዻዬ ኣንዻ የቆባ ኦካ ቆቤን ታጲ ላማኔ የኮምቴባ ኦካ ውርካ እስራኤል ታጵ ላማን ።²⁹ውር እን ሺጚ ናንዳካ ሮጝ ናኒዬ ኦይድ ቶኦ ኔኑጝ፣ ጪኒጌን ኔኑጝ፣ ጪኒጌን ኔኒ ካእጛሹጝ፣ ጁዋኖጝ፣ ሃንታ ኔኑጝ ወይ ሃሙ ኔኑጝ ፓይላጝ ጌይባ ሌሜዬ ዽብ ክየም፤ ሆርሜንባ ሃምካ ዻቆካ ቦንካ ቦኑጝ።³⁰ኣይባዬ ጁዋኑ ጊታይ ኣኔን ሌሜን ማቲባ ሁር፤ ጁዋኑ ጊታይ ኣኔን ሁር ማቲባ ሌሜን።

ሃፑክ 20ሄክንሶካ ውርካ ዋድማ ጊታይካ ራቅካ ሃሙካ ካርቡካ ሻሩጝ¹ፎላ ዾዮክ ሙኔን ኤምኑ ኮኑጝ ኣጁጚ ውርካ ዋድማካ ራቅካ ሃሙካ ካርቡካ ሻሪካ ዻም።²ናሺዬ እን ከሹሽ ካካሺሼ እንግን ሺሊንጊ ክየም ክየም ጩዋ ይዕሲሼያ ውርካ ዋድማ ሃምካ ሃሙጝ።³ከዻም ኩንኬ ሳዓት ጅያኔ ጌይ ውር ዶክ ጊታኬና ኦይድ ዋድማዬ ጎሪኒ ኦካ ራቅካ ኡዋሩጚሺኔኔ፤⁴ዋይሼ እንግን እየውዻ ፓዬ ኣሽክባ ሃምካ ራቅካ ሃሙካ ካርቡካ ሻሩጝ፤ እንካ ዎሺሽ እየው ሃኣይ እየውባ።⁵እንግንዻ ፓያ፤ ከሹሽ ሳዓት ላዌ ሳሌ ቱሌ ኣጁጛ ውርካ ዋድማ እንቃ ካሹሽ።⁶ከቃይ ጩዋ ሺጜካ ሳዓት ታጲ ሁሉኬኑጝ ቱሌ ጌይ ውር እንቃ ጊታኬና ጎሪዬ ዋይሼ እንግን ሹሽ ይን ፓሲ የኣንቴኬን ዋድማዬ የጎሬ ሻማ ኦ ኦጜ ኣንሻ እንግን።⁷እንግንዻ ሺጝ ሃካይሲያያ ውር ኬና ካኣጁጝ ኡዋው ዋድማ ክያኒዬ ጊያ።«እሺዻ ዋይሼ እንግን እየውዻ ፓዬ ኣሽክባ ኦካ ራቅካ ሃሙ ናኒ።⁸ክራ ቃይትሾጝ ጩዋ ኤምኑካ ሃሙ ዋይሼ ውር እን ካቶያ ጆል ውርካ ዋድማ፤ ካርሲኬ ጊታይ ፓዬን ሁሬ ሌይ ሃም ጊታይካ ሌሜን ካፓይኖጝ ሺው ውርካ ዋድማ ጊታይ ኣኔ ፓይላዬ ካሺሼ እንግን ቢሬ ጊዬይካ ትጌሽ።⁹ሺጜ ሳዓት ታጲ ካላጝ ውርካ ዋድማ ጊታይ ጋጁጞጝ ፓዬኔ ቦዋ ሺሊንጊ ክየም ክየም።¹⁰ጊታባ ጋጁጜ ከሌሜን ፓይኖጝ ዋሽኬ ኦኮኑጝ ካጋዬ ቢሬካ ቲጌሽ ኬና ካሳጊ ኬጊታይ ፓዬን ሁሩጝ፤ ኣይባዬ እንግንዻ ካሺሼ ሺሊንጊ ክየም ክየም።¹¹ቦወ ቢሬካ ቲጌሹጝ ጉንድምሼን ኤምኑካ ቶኦዬ፤¹²ሺጝ ጊታጝ ጋጁጜ ኬቱንሲዬ ኣሽኪ ሳዓት ክየምጵን፤ ከኡዋው ጊታጝ ኣሽኪ ሹሽ ፓሲዬ ዻቹጝ ሹሽዻ ካቴዬ ሃድብንቶጝ ካሺሼ እያን ከኡዋው ሊኪ?¹³እሺዻ ዋይሴ ውርካ ዋድማ እንካ ሌሜን እያጝ፤ ውርካ ናሺዺ ናኒ ዮ፤ የካኔ ሄክሺሼኬኒ እን ኤምኑ ሴሶ? ከሺሊንጊ ክየም ኣሽክዬን ይቢ የካኔ ሃሳውንኬኒ ከኣን?¹⁴ጋን ቦው እን ሄክሽ እኔ ካምባ፤ ከእያይ ሃኣዬ እን ሃዎሺያ ውር ኩን ሁርዻ ኣዬን።¹⁵ኣኪ ከቢሬ ናኒ ኦይን ሃዎሾጝ ኣሽክዬን ሃቻሊኬኒ? ወይ ሌሞ ኣዬን ናኒ ጎማ ኣን ቦውንታይ?¹⁶ዬ እንካ ሁር ማቲባ ሌሜን፣ እንካ ሌሜን ማቲባ ሁር።ናንዳካ ጋሎ እንካ ሄክሽ ኢየሱስ ክያጃ ላንሳ¹⁷ኢየሱስ ኣኔን እያጝካ ኢየሩሳሌም ኩይሼኔ ቦው ውር ታጲላማን ጊታይ ዻዬ ጆሌ እሺ ክየም ክየሜ ዋይሼ እንግን እያጝ፤ ¹⁸ኣኪ ይጛ እያጝካ ኢየሩሳሌም ፓይሼን ጉዋዩ፤ ሃንታካ ውር ሳስክዬ ጋይባ ታታቻንካ ውርካ ቃሼ ውርካ እርርሲኔንካ ክያጃባካ ሌሜኔ፤ እንግንዻ ካኣርሾጝ ኮምሼባ፤¹⁹ካጋሊንሺዮጝ፣ ካሙሬዬ ካሮዮጝ ሳስክዬ ጋይባ ዛርሲ ከሹ እኣንሺኔንካ ኦካ ጌጳሞካ ታቺ እን ራቅ ዼግ ጌዬን²⁰ከኦይን፤ ሃንታካ ዘብዴዎስ ጁዋኔ ከሃንታ ኔኒ ፓዬን ኦካ ኢየሱሴ ቶኬ ኩዋምን ኦካ ማሪ ኔኒዬ ካጋሽክሼ እሺ ኦኬ ክየም ይወና።²¹እሺዻ ዋይሼ እሺ የዎሺ ኦ? እሺዻ፤ ሺጝ ሃንታ ዻ ጊታጝ ናኑጝ ከጌጳሞ ኑኑ ክየም ካኡፌ ቡዎን ክየም ካኡፌ ዋርካታጝ ናሺሼ ኣንባ» ሺጝ እያይ።²²ኢየሱስዳ ዋይሼ እሺ የእባጅኬን እንኬ ይሁኖጝ፤ ኒያቡ እን ኣን ሃማቶጝ የቻሊያባይ ማቴን? «እንግንዻ ሺጝ ሃቻሊያባ»²³እሺዻ ሺጝ፤ ከኣኩሉክ የማታባ ከኒያቡ ናኒ፤ ኣይባዬ ከቡዎን ናኒዬ ዋርካታዬ ቆቤን ሃሓም ባባ ኣሽክዮጝ፤ ዬ ማር ኦኬና ኣን ሃናሺዬዬን።²⁴ሹ እን ታጳን ዋዮጝ፤ ማንሼያ ጪኒጌንካ ጋጝ ዻዋን።²⁵ኢየሱስዻ ሺው እንግን ክየምጵኔ ዋይሼ እንግን እያጝ፤ ታታቺካ ዛርሲ ካማቲሼ ዛርሲ ጊዬይ ታታቹጝ፤ ውር ጊታይ ኣኔ ጌጳሞጝ ካኡዋሩጜ እንግን ከቁዋቅቱጝ የእባጃያ፤²⁶ዬ ከኦካ ጫቃን ጉዩ እያይ ማቲዬን ኣኔኬን፤ ከኦጉዩ እን ዎሺ ታቺ ማቲዬን ካማቲ ውርካ ዋድማ ጉዩ፤²⁷እን ሆቺቼን ዴግ ማቲዬን ካማቲኬ ኦጉዩ ዱቡ፤²⁸ሃንታካ ውር ማርኬ እያጝ ዋድምሼ እየውዌኔ፤ ኩና ዋድሚኔኔ ናፒሲ ኔኒ ጁዋናን ኣዬኔ።ባይሼን ካውር ዻዋን ጊታይ ካርቡ ኣይ ሙሙዾጝ²⁹ኢየሱሴ ውር ጊታይ ዻዬ ጆሌ እሺዬ ቱሌ ፓይ እያጝካ እያርኮያጝ ዛርሲ ጁዋኑ ዻዬያ እንግን።³⁰ከኦይን ውር ዻ ጊታኬና ካርቡ ኣይ ሙሙዾ ቆቤ ኣኔባ ጉዋር ማራ፤ ኢየሱስዻ ሳጊኬ ጉዋዬ ዋዮጝ፤ ሺጝ ታቹጝ ዮ፤ ውዋካ ዳዊት ቶይ ኡዋባዬ ጉቹካ።³¹ዛርሲዻ ኬክያጃካ ጎሪዬን ካቆብ ሹዬ ሜይሼያ እንግን፤ ዬ እንግን ከማኒሼ ኡቹኬን ሺጝ፤ ታቹጝ ዮ፤ ውዋካ ዳዊት ቶይ ኡዋባ/³²ኢየሱስዻ ዾሬ ሺው እንግኔ ዋይሼ እንግን፤ የዎሻ እን ካኣሽክሼ እየው ኦጝ?³³እንግንዻ ሺጝ የዎሻ እን ካርቡ ጉዋዩ ካጌዮጝ።³⁴ኢየሱስዳ ዻዹጝኔያ እንግን፤ ዱማ ካርቡ ጊዬይዻ፤ ይሪካ ጌዬ ዻዬያዻ።

ሃፑክ 21ኢየሱስ ከጌጳሞ ታቺ ሁሉካ ኢየሩሳሌም¹ከኢየሩሳሌም ድያው ከኦይን ጌዬን ከኦካ ጋግካ ደብር ዘይት ሄክሽባ ራቅ እን ሺጜ ቤተ ፈጌውጝ፤ ኢየሱስ ይዕሲያ ከኦካ ውር ጊታይ ዻዬ ጆሌ እሹጝ ዻ፤²እንግን እያጝ፤ ፓይባ ሃምካ ጶሮክ እን ኣኔን ኦጉዩ ዲያው፤ ሄክሼን ጉዩዬ የጌያባ ሃንታካ ኡኩሊ ክየም፤ ቡሊዬ ቦፓይንቴባ ዮጝ ናኑጝ።³ውር ክየምጵንዻ ዋይሼያ እየው ሃኦ የሻምቴ እያይንያጝ ዋይሺቴ እንግን ታቺ እን ዎሻ ይዕሲባ ይሪካ።⁴ይን ካማቲዮጝ ከውርካ ቶካ ባሪዮ ሺጜ እያጜ ሃሳዎጝ ካሙኒንቴባዬ ጊያ።⁵ዋይሼ ውርካ ጽዮን እያጝ፤ እየዎ ቢቲ ኑኑ፤ ማቲ ሌሞዬ፤ ከኦካ ኡኩሊዬ ኦካ ሚያኔ፤ ኡፌ ሃንታካ ኡኩሊዬ ኩንባ ኦኑኑ።⁶ውር ጊታይ ዻዬ ጆሌ እሺ ፓዬ ከእያይ ኢየሱስ ኤርግቴ እንግን ጋሽክያ።⁷ቦፓይኔ ኡኩሊ እጜ ውዋዌ ጋይሼያ ኣፓላ ጊዬይ ሹዎር ጊዬይ ዾዮክ፤ እሺዻ ኡፌያ እንግን።⁸ከዛርሲዻ ጁዋናን፤ ጃካ ኣፓላ ጊዬይ ጉዋር ክያኒ፤ ዶክ ከኦካ ጩዎኑካ ሻሪ ኑሽ ቃቂቴኔ ፓቅሼያ ጉዋር ክያኒ።⁹ጊታይ ሌሜ ፓይኬ ሌሜኔ ጊታይ ዻዬኬ ሁሬ ሺጝ እያጜ ጋኔን ኡቹኬን፤ ሆሣዕና ናንዳካ ውዋካ ዳዊት፤ እጝ ኩንኬ ሮጝካ ታቺ እን ሃኬና ጉዋኔ፤ «ሆሣዕና ካኣይካ ፓይላ/»¹⁰ሹ እን ሁሉኬ ኢየሩሳሌም ውርካ ኢየሩሳሌም ፓይላ ሺጝ ይና ኒኔ ኑሼና ሻን።¹¹ዛርሲዻ ሺጝ፤ ይጝ ኩና ኢየሱስ እን ጌዬንኬ ገሊላ ናዝሬቱጝ።ኢየሱስ ጌይ ውር ጊታይ ኒግድዬን ቶኦካ ይሁኔን ክያኒዬ ቡላ¹²ጩዋ ኢየሱስ ሁሉክ ሃምካ ቶኦካ ይሁኔኔ ዋኬያ ውር ጊታይ ኣኔን ኡዋሩጝሺኔኔ ኡዋሩጝኔኔ፤ ሁቡብ ኦግያይ ጉዋሩጝሼ ቢሬ ክያኒዬ ካራሜ ሆሌዬ ኦካ ቆቤኔ፤¹³ቶኦ ሺጝ ቶኦካ ይሁኔኔ ቶካ፤ ዬ እየው የሻማያ ይግንካ ጉዋርጉ፤ ዋይሼ እንግን እያይ።¹⁴ከኦካ ቶኦካ ይሁኔን ቱዎጝ ውር ጊታይ ካርቡ ኣይ ሙሙዾዬ ኤላኔ ፓዬና ኦኔኒ፤ እሺዻ ባይሺሻ እንግን።¹⁵ኣይባዬ ታታቻንካ ውርካ ቃሼ ውርካ እርርሲኔንካ ክያጃባካ ሌሜኔ ኦጊታይ ዹዋልሺኔዬ ሃንታ ጊታይ ሺጜን ሆሣዕና ውዋካ ዳዊቴ ኦቹኬን ሹ እኔ ጌዮጝ ቆቃ ከማኒት።¹⁶እንግንዻ ሺጝ፤ ኦግታጝ ሃንታ ጊታጝ ሺጞጝ የዋይባይ? ኢየሱስዻ ሺጝ፤ እህ» ሃዋይባ፤ እን ሺጜ እያጝ ክየምጵንዻ የካኔ ኳማኬኒ? «ከኦካ ሃንታዬ ጊታይ ኣውዬን ሁቴዬ፤ ከኦካ ቶካ ሃንታ ኣሽክባ ይሁኔን።¹⁷ኦይድ እንግኔ ቱላ ከኦካ ከተማ እን፤ ኩይ ቢታኒያዬ ኡጛ ኦይን።ሻሪካ ኣሜን እን ማር ካርቡ ኡፑቴን¹⁸ኢየሱስ ከካሪንታ ኣኔን እያጝካ ከተማ ዋክሼኔ ካሽ ቃዋ እሺ፤¹⁹ጌይ ሻሪካ ኣሜን ክየም ኦካ ማራካ ጉዋሬ ኩይ ሃሚን ኔኒያጝ ከኦካ ቃቅቴን እንቃ ናንዳካጝ ማሬ ኦኬ ክየምጵንዻ ጌዬኑጝ፤ ዋይሼ ሻሪ እን ካርሲኬ ጋኔ የኣኔኬን ካርቡ፤ ሻሪ እንካ ኣሜን ይሪካ ቁዋቅሻ።²⁰ውር ጊታይ ዻዬ ጆሌ እሺዻ ጌይ ኦይን ሙኔኔ ከጎሺዬን ሺጝ ሻሩጝ ካኣሜኑጝ ቁዋቅሻ እያን ከክየምጵን?²¹ኢየሱስዻ ዋይሼ እንግን፤ ሃዋይሼባ እየው ኣኩሉክ፤ የኣንቴ ይሁኔኔ የማራ ቃጋዽዬንያጝ ማር እን ጋሽክሼ ሻሪካ ኣሜንጵኔኔ ፤ የዋይሺቴ ጋጉጝ ቡጪንቴ ከኦጜ ዾቅምንቴ ኛፓስ ክያኒያጝ ማቲባ፤²²የኣንቴ ይሁኔኔ እን የይሁኔቴ ከይሁኔን ፓይላ የጌያባ።ኣንሺኔን እን ሄክሺ ኦካ ጌጳሞካ ኢየሱስ²³ኢየሱስ ሁሉክ ኦካ ቶኦካ ይሁኔኔ ኣኔንባ እርርሲኔኔ፤ ታታቻንካ ውርካ ቃሼ ጌጵሹጋንካ ዛርሲዬ ፓዬኔ ሺጝ፤ ኦግታጝ ፓይላ የኣሽክዮጝ ሃኬ ጌጳሞካ ኦ? ኣይን ጌጳሞካ ሃኒኔ? ጋንሼና።²⁴ኢየሱስዻ ዋሼ ዋይሼ እንግን እያጝ፤ ኣንዻ ካኣንሽ እየው ክያጃ ክየም፤ የዋሺቴያ ኣንያጝ ኣንዻ ኦግታጝ ሃኣሽክዬ ከጌጳሞካ ኦጝ ሃሜይሼ እየውባ፤²⁵ዱቅኔንካ ዮሐንስ ሃኬ ፎላ ሞ ከውር? እንግንዻ ሃሳወን ከጋጜ ሺጝ እያጝ፤ ሃሺጛያ ከፎላያጝ ኣኪ ዋይሼባ ኡዋው ሃኦ ካማርቴ ይሁኔኑጝ፤²⁶ሃሺጛያ ሃኬ ውርያጝ፤ ፕር ዛርሲ ናንዳካጝ ዮሐንስ ኣዬ ውርካ ቶካ ባሪዮዬ ጌሪሚኖጝ ሃሪግሺናባ።²⁷ዬ ሺጝ ሃእባጃኬኔ ዋሺያ ኢየሱስ። እሺዻ ሺጝ ኦግታጝ ሃኣሽክዬ ከጌጳሞካ ኦጝ ሃሜይሼኬን እየው።ሆኮልካ ኤርጎ²⁸ኢየሱስዻ ዋይሼ እንግን እያጝ፤ የዋሻ ከእያን? ኣና ውር ኬና ኣኔ ሃንታካ ጁሙ ዻ፤ ኩይ ሃምካ ውዋ እንካ ሌሜኔ ሺጝ ውዋ ናኒዮ፤ ሹጝ ካም ሃምካ ራቅካ ሻሪካ ኣሜኔ ዋድሚባ።²⁹ውዋዻ ሺጝ፤ ሃኩይኬን፤ ዬኬ ታካ ሁር ዻቢሺ እሺ ኤምኑዬ ኩያ፤³⁰ኩይ ሃምካውዋ እንካ ላንሳዬ ሺጝ እያይ፤ ውዋዻ ሺጝ ኤኤ ³¹ከኦካ ዻዋን ሹዋጵሽ ኤርጎካ ሹኔ ሃና? እንግንዻ ሺጝ ውዋ እንካ ሌሜኑጝ፤ ኢየሱስዻ ዋይሼ እንግን እያጝ፤ ሃዋይሼባ እየው ኣኩሉክ፤ ውር ጊታይ ፑኡሺዬን ጊቢሪዬ ጊታይ ኩጳሲዬኔ ከሻወን ሌምባ ፎላ ዾዮክ፤³²እንካ ዱቅኔን ዮሐንስ ጫንቃላን ጉዋር ዹዋልሼን ኩና ኦጉዩ፤ የእየው የካኔ ጉማኬን፤ ዬ ውር ጊታይ ፑኡሺዬን ጊቢሪዬ ጊታይ ኣሽክዬን ኩጳሞዬ ጉማ፤ ኦይን ሙኔን የጌይቶጝ ጩዋ ኣይን ይሁኔን የሁሉኬ ካኔ ጉማኬን።ሄክንሶካካ ውርካ ሃሙ ጊታይካ ካርቡካ ሻሩጝ³³ዋይባ ሄክንሶ እንቃዻ፤ ኣና ኤምኑካ ሃሙካ ካርቡካ ሻሪ፤ ካቴያ ማራማራ ካኦግታይ ኮሬ ካርሚ፤ ቋዳ ይግንካ ካርቡካ ሻሪ ጊታይ ሃክሼን፤ ሙራ ኣምሻ ኬና ኣይካ ባክኔን፤ ጩዋ ኡዋሩጙሽ ሃሙ እን ኦካ ውር ጊታይ ኮውኔ ጆል ሃሙዬ ኩያ ፔን እንቃ።³⁴ቲጌሽካ ባርጊን ሄክሾጝ ይዕሲያ ውርካ ዋድማ ኔኒ ሃምካ ውር ጊታይ ኮውኔ ጆል ሃሙጝ ካቦሼ እሺ ካርቡ ጊዬይዬ።³⁵ውር ጊታይ ኮውኔ ጆል ሃሙዻ ጎም ውርካ ዋድማ ኔኒ ክየሜ ሙራ፤ ኒሻ ኑዋ፣ ኑዋ ፕር ሙራ ከባይ።³⁶እሺዻ ይዕሲያ ውርካ ዋድማ ኬና ሳጊኬ ጊታይካ ሌሜን፤ ውር ጊታይ ኮውኔ ጆል ሃሙዻ ጋሽክሼያ እንግን ኦኬ ኬና ኣይ ሃይነት ክየም።³⁷ከቱንሲ ሺጝ ሪግሼንባ ውዋ ናኒዬ ይዕሲያ ውዋ ኔኒ።³⁸ኣይባዬ ውር ጊታይ ኮውኔ ጆል ሃሙጝ ሹ እጝ ጌዬ ውዋ እን ሺጝ ይንጵን ሃእንካ ሮግምንቶጝ ፓዬኔ ካኒሺዬ ካሮግሜንባ ሃሙጜ ሃሳወና።³⁹ጎምኬ ኦይንካ ራቅካ ሃሙዬ ቡልሼ ሹኑኬ ኒሻ።⁴⁰ኣኪ ኤምኑካ ሃሙ እንካ ሻሪካ ኣሜን ኩንያጝ የዋሻኬ እንካ ሻምሼ ውር ጊታይ ኮውኔ ጆል ሃሙ እያን?⁴¹እንግንዻ ሺጝ፤ ጋራ ጊታይ ጋልንሺዬ ኒሽ እንግኔ ኡዋሩጙሼባ ውር እንቃ ጊታይ ይዕሲሼ እሺ ካርቡካ ሻሪ እን ሹ ጮሉጝ።⁴²ኢየሱስዻ ሺጝ፤ የካኔ ኮማኬን እን ሺጜ እያጜ ቶኬ ከወርቀትካ ውርካ ቶካ ባሪዮዋን?«ባይ እን ውር ጊታይ ፓልሲዬ ጆል ቦውዮጝ ማቲያ ሹቦካ ሄክንሲዬን፤ ባሪዮ ሻማ ይጝ፤ ዋድማ ኔኒ ናንዳካ ካርቡ ጉዋዩ ሃሹቃ።⁴³ዬ ሃዋይሼ እየውባ፤ ጌጳሞካ ባሪዮ ቦኬ ጉዩዬ ጋይባ ዛርሲ እን ካኡፉትሺሽ ካርቡጝ፤⁴⁴ጊታይ ቡዲ ኦካ ባዩጝ ጩጩኬንባ፤ ዬ ባይ እን ውር ቡድሾጝ ጋጭባ።⁴⁵ታታቻንካ ውርካ ቃሼ ውርካ ፈረሳውያኔ ዋዬ ሄክንሶ እን ሃሳወ ናንዳካ እንግኑጝ ግባጃ።⁴⁶ኣይባዬ ዎሽ ኢየሱስ ጎሜ ፓዬ ቁሜኔ ናንዳካጝ ዛርሲ ሻሜ ኢየሱስ ከውርካ ቶካ ባሪዮዬ ቶዮጝ ሪግሼና።

ሃፑክ 22ሄክንሶካ ውር ጊታይ ሺወ ሃምካ ኣማካ ዴሞጾቃጝ¹ኢየሱስዻ፤ ፕር እንቃ ሜይሼያ እንግን ሄክንሶ ኬና ሺጝ እያጝ፤²ፎላ ዾዮክ ሙኔን ሙኔን ቢቲ ኬና ኣሽክሼ ዴሞጾቃካ ውዋ ኣማጝ፤³ቢቲ እንዻ ካሺው ውር ጊታይ ቾችንሺዬ ይዕሲያ ውርካ ዋድማ፤ ዬ እንግን ሺጝ ሃፓይናኬን።⁴ፕር ይዕሲ ውርካ ዋድማ እንቃዬ ሺጝ፤ ዋይሺቴ ውር ጊታይካ ቾችንሺዬ፤ እየዎ፤ ሃኒቃ ቢህዌ ቢህ ሻጋሻጋኔ ሃኣሽክያያ ኣማ፤ ኦኬ ፓይላ ናንዳካጝ ጋሽክዬ ሹዋጶጝ ዋይሺቴ እንግን ፓዬን ሃምካ ዴሞጾቃጝ።⁵ዬ ውር ጊታይካ ቾችንሺዮጝ ሺወን እን ድርግቲሼዬ፤ ክየም ኩያ ሃምካ ሃሙጝ፣ ኑዋ ኩያ ሃምካ ኒጊዲ ኔኑጝ፤⁶ጎም ውርካ ኤርጎ ጊታይ ሺዺዬ ዋኬ ጆሌዬ ኒሻ።⁷ቢቲ እንዻ ማኒሼ ይዕሲ ፓፃኖዬ ካሲያ ውር ጊታይ ኒሼን፤ ኡዱባ ከተማ ጊዬይዻ።⁸ጩዋ ዋይሼ ውርካ ዋድማ እያጝ፤ ኣማካ ዴሞጾቃ ሃሼኪሚ፤ ኣይባዬ ውር ጊታይካ ቾችንሺዮጝ ናንዳካጝ ማሬ ጌዬኑጝ፤⁹ኳቲ ሃምካ ጉዋር እን ሳጊዬ ጆሌዬ ጊታካጝ የጌይቶጝ ፓይላ ሺውቴባ ዮጝካ ኣማካ ዴሞጾቃጝ።¹⁰ውርካ ዋድማዻ ኳት ሃምካ ጉዋሬ ካጝ ጌዮጝ ሹቃ እንዻ ጋራ እንዻ ፓይላ ፑኡሺዬ ኦልማ እንካ ዴሞጾቃጝ ቋቁሻ ከኳመና።¹¹ቢቲ እንዻ ሁሉክ ኳመና ጊታይ ቾችንሺዬ ቶዬንያጝ፤ ጌይ ውር ክየም ኬና ማር ኣፓላካ ዴሞጾቃ ኪሜን፤¹²ሺጝ እያጝ፤ ውሩጝካ ናሺማ ናኒዮ፤ የማር ኣፓላካ ዴሞጾቃ ኪሜኔ የቻኒ እያን ኦጝ ሁሉኬን? ዬ ውር እን ሃውር ኬና ማር ክያጃካ ውር ዋዬን።¹³ቢቲ እንዻ ዋይሼ ውር ጊታይካ ዋድማ ቁሚ ቡዋ ኔኒዬ ጃፍ ኔኒዬ ፓቅቴ ሃም ኣይ ድሙጉጝ፤ ከኦይን ማቲባ ኦቆራዬ ኒጊ ሺኪዬኔ ዋይሼ እንግን እያይ።¹⁴ጊታይ ሺዎጝ ሃጁዋኑ፤ ዬ ጊታይ ጊድዮጝ ሃጩዋማ።ናንዳካ ቄሳር ጊቢሪ ካሺዬን¹⁵ከኦይን ጩዋ ውርካ ፈረሳውያን ቱሌ ፓዬ ከኦካ ቶግ ኔኒ ክያጃ እን ቱሉጝ ካቶሊባዬ ክሊያ ጋጝ።¹⁶ውር ጊታይ ዻዬ ጆሌ እንግኔ ውርካ ሄሮድሴ ይዕሲሼ ሃሚን ኔኒዬ ሺጝ እያጝ፤«ውሩጝካ እርርሲዬን ዮ፤ እን የእርርሲዬ ጉዋርካ ባሪዮ ከኣኩሉኬ፤ የማሬ ውር ክየምጵንዻ ጁኔኔ፤ የቶዬ ውር ፓይላ ከሊኩጝ ሃእባጃያ፤¹⁷ሜይሼ ኡዋባ ሙኒሼን እን እያን? ኣይባዬ ናንዳካ ቄሳር ጊቢሪ ካሺሼን ሁሉኩሼባ ሞ ሁሉኩሼኬን?¹⁸ዬ ኢየሱስ እባጅ ጃካማ ጊዬይዬ ዋይሼ እንግን እያጝ፤ እየው ኣጁጉ ጊታጝ ካሙኒሺኔኑጝ የዎሻ እያን ክያጃ ናኒ ቶሊዬን?¹⁹ይንዳ ዹዋልሺቴያ ኣን ቢሬ እን የሺጝቴ ጊቢሪ ካሺዬኑጝ፤ እንግንዻ ቦሼያ እሺ ሺሊንጊ ክየም።²⁰እሺዻ ሺጝ፤ ዴንታ እን ጌዬን ኦካ ቢሮጝ ሃካ ኒን? ቶኬን ኔኒካ ሃካ ኒን?²¹እንግንዻ ሺጝ ሃካ ቄሳር፤ እሺ ዋሼ ሺጝ፤ ኣኪ እንካ ቄሳር ኣይ ቄሳር፣ እንካ ባሪዮጝ ኣይ ባሪዮ።²²ዋዬ እን ጎሺያ፤ ጎይድ እሺዻዬ ፓያ።ናንዳካ ናሹጜንካ ኣርሼን²³ውርካ ሰድቃውያን ጊታይ ሺጚ ናሹጜንካ ኣርሼን ኣርሼን ኣኔኬኔ ቃቢ ፓዬን ኦካ ኢየሱሴ ሺጝ እያጜ ጋንሼና፤²⁴ውሩጝካ እርርሲዬን ዮ፤ ሙሴ እባ ውር ክየም እያንሽ ሃኣጚዬ ማር ሃንታ ቡሌኔ ኣርሽያጝ ጪኔ ካእያኒሼ ኝያካ እን ኣርሺዬ ካቡልሼ ሃንታጝ ክያጃ።²⁵ከኦካ ጫቃን ጉዋዩ ኣና ጪኒጌንካ ጋጝ ሶጳ፤ እንካ ሌሜን እያንሽ ሃኣጚዬ ቡልኬን ሃንታዬ ኣርሾጝ ጪኔ እያኒሻ ኣጚ፤²⁶ፕር እንካ ላንሳዻ እያይ፣ እንካ ማክንሳዻ ሌይ ሃም ሶጳን ካጊያኒሾጝ ጋርሻ ከዴንታ እን።²⁷ከቱንሲ ኝያ እንዻ ኣርሻ።²⁸ዬ ፓይላ ናንዳካጝ እያኒሾጝ ከሹካ ናሹጜን ከኦካ ሶጳን ማቲ ኝያካ ና?²⁹ኢየሱስዻ ሺጝ እያጜ ዋሻ፤ ወርቀትካ ውርካ ቶካ ባሪዮዬ ቁዋቅትካ ባሪዮዬ ናንዳካጝ የማርቴ እባጄኑጝ የጊያምሻያ፤³⁰ከኦካ ናሹጜን ጩዋ ውር ማቲባ ውርካ ኤርጎካ ፎላዬ እያኒሽኬን፣ እያኒሼንኬንዻ፤³¹ዬ ናንዳካ ናሹጜንካ ኣርሼን ባሪዮ ሺጜ እያጜ ሃሳዎጝ የካኔ ኳማኬኒ?³²ኣን ሃኣይ ኣምላክ ካኣብርሃም፣ ኣምላክ ካይስሐቅ፣ ኣምላክ ካያዕቆብ። ባሪዮ ሃእያይ ዬ ማር ኣምላክ ካኣርሼኔን።³³ዛርሲ ሹ እን ዋዬ እን ጎሺያ ከእርርሲዬን ኔኒኤርጎ ታቺ እን³⁴ዋይ እን ኢየሱስ ሻሜ ሰዱቃውያን ሹዬ፤ ውርካ ውርካ ፈረሳውያን ፑኡሺሜና ክየምጵንዻ፤³⁵ከኦግዬይዻ ውር ክየም ኬና እባጅ ክያጃ ባካ ሌሜን ዎሽ ፓታንሲዬኔ ሺጝ እያጝ፤³⁶ውሩጝካ እርርሲዬን ዮ፤ ከኦካ ክያጃ ፓይላ ሳጊያ ኤርጎ ና?»³⁷እሺዻ ሺጝ እያጝ፤ ኣምላክ ታቺ እን ካሎን ከሻን ኑኑ፣ ካሎን ከናፒሲ ኑኑ፣ ካሎን ከቃቦ ኑኑ ናሺባ፤³⁸ይጝ ሃእን ኣይካ ሌሜኔ ሳጊኬ ኦካ ኤርጎ ፓይላጝ።³⁹እንካ ሙኔን ይጝ፤ ይንዻ ሃእን ሺጚ ውርካ ጉል ኑኑ ናሺኬ እን ኤምኑጝ፤⁴⁰ክያጃዬ ውርካ ቶካ ባሪዮዬ ሃጊታይ ጋጁጜ ከኤርጎ ዻ ጊታጝ ፓይላጝ።ክርስቶስ ሃውዋካ ኒን?⁴¹ውርካ ፈረሳውያን ጋኔንባ ፑኡሺሚኔ ቆቤኔ ኢየሱስ ሺጝ እያጜ ኣንሻ እንግን፤⁴²ናንዳካ ክርስቶስ ሙኒሼን እየው እያን? ሃውዋካ ኒንዻ?እንግንዻ ሺጝ፤ ሃውዋካ ዳዊት።⁴³እሺዻ ዋይሼ እንግን እያጝ፤ «ኣኪ ዳዊት ከቁዋቅትካ ኡሲካ ባሪዮ ሺጝ ናንዳካ ኦታቹጝ ናኑጝ? ሺጝ ናንዳካ ኦዻ እያጝ?⁴⁴ባሪዮ ታቺ እን ናኑጝ፤ ጋል ናኒ ሌይ ሃም ቶኬ ከጃፍ ናኒ ዱቡ ኩዋሚኑጝ፤ ኡፓ ቡዎን ናኒ።⁴⁵ዬ ዳዊት ሺጝ ታቹጝ ናኒዬ ሺውያጝ፤ ቻሊ እያን ውዋ ማቲዬን?⁴⁶ቻሊ ክያጃ ክየም ዎሼኔ ወይ ካርሲኬ ሹ እኔ ውር ክየምጵንዻ ኬና ካኣንሽ እሺ ኣኔኬን።

ሃፑክ 23ኢየሱስ ዻብሺያ ውርካ ፈረሳውያኔ ውርካ እርርሲኔንካ ክያጃ ባካ ሌሜኔ¹ከኦይን ኢየሱስ ሺጝ እያጜ ሜይሼያ ዛርሲዬ ውር ጊታይ ዻዬ ጆሌ እሺዬ፤²ውር ጊታይካ እርርሲኔንካ ክያጃ ባካ ሌሜኔ ውርካ ፈረሳውያኔ ቆባ ኦካ ካራምካ ሙሴ።³ዬ ኦግታይ ሃሜይሼ እየው ፓይላ ኣሽክባ፤ ቶይባዻ፤ ኣይባዬ ከእያይ ሃሜይሾጝ ጋሽኪኬኔ ኦይድ ዴንታ ጊዬይ ዻይቴን።⁴ፕር ዼቴን እን ማሬ ዼቴን ቻሊዬ ዼቴን ዴጩጉ ቁሜ ጋይሼባ ካፓናካ ውር ክያኒ፤ ዬ እንግን ኤታጋን ኣይን ከሳይታካ ቡዋጝ ዱምኬን።⁵ሺጝ ናንዳካ ቶይኔኔ ኦግታይ ጋሽክዮጝ ፓይላ ጋሽክ ኦካ ማርካ ውር፤ ሃሳዋ ጊዬይዻ ራጅምሽባ፤ ራጅምሽባ ኣፓላ ኪሜን ጊዬይ፤⁶ኦካ ራቅካ ኣማዻ ዎሽ ራቅካ ጌጳሞ፤ ኦካ ቶኦካ ይሁኔንዻ ናሺባ ካራም እንካ ሌሜን ጎሜን።⁷ፕር ኣይን ኦጉዋይ ጉዋሩጙሺኔ ጆሎጝ ሆፎ ጌዬን ዎሽ እን ከኦካ ቆሮጝካ ካዋይሼ እንግን ውርካ እርርሲኔኔ ካሺዎጝ።⁸ዬ እየው ካማር ውርካ እርርሲኔን ሺጜ ሺወን፤ ውርካ እርርሲኔን ጉዩ ሃክየምጵን፤ እየው ፓይላ የኣያ ጪኒጌንካ ጋጝ።⁹ናንዳካጝ የኣንቴ ሹኔ ክየም እንጉዩካ ካፎላ ዾዮኩጝ፤ ዳሉጝ ክያኒ ውር ክየምጵንዻ ኦይዲ ባባ ሺጜ ሺውቴን።¹⁰ታቺ ጉዩ ናንዳካጝ ኣዬ ክርስቶስ ክየም እኑጝ፤ ካማር እየው ታቺ ሺጜ ሺወን።¹¹ከኦካ ጫቃን ጉዩ እን ሳጊኬ ኦጉዩ ፓይላጝ ካማቲ ውርካ ዋድማ ጉዩ፤¹²እን ሻሚ እሺ ኤምኑ ዼግዼጉጝ ጎባ፤ ዬ እን ጎብሺ እሺ ኤምኑጝ ጌጳሲባ።¹³እየው ጊታጝ ኣይ ኣጁጉጝ ውርካ እርርሲኔንካ ክያጃ ባካ ሌሜኔ ውርካ ፈረሳውያኔ፤ ከሻው ፎላ ዾዮክያጝ ናንዳካጝ የሃግቴ ናንዳካ እንግን ሃፑኩጝ ሃይ/ እየው የሻዋኬን፤ ውር ጊታይ ዎሺ ሻወን የዾቅቴኬን።¹⁴እየው ኣጁጋን ውርካ እርርሲኔንካ ክያጃ ባካ ሌሜኔ ውርካ ፈረሳውያኔ ሃይ/ የሻማ ቶኦካ ዳልሷን ማሜ፤ ናንዳካጝ የዎሽቴ ይሁኔን ኬና ሙኔን ውር ራጅሞጝ የጋያባ ኮምሼን ጋራ።¹⁵እየው ኣጁጋን ውርካ እርርሲኔንካ ክያጃ ባካ ሌሜኔ ውርካ ፈረሳውያኔ ውር ክየም ሃምካ ቶኦካ ይሁኔንካ ውርካ ኣይሁድ ዾቅሼን ናንዳካጝ የጃሊንቴ ኛፓስ ክያኒዬ ዳሊ ክያኑጝ፤ ሹካጝ ጎሞጝ ከኦጉዩ ሳጊ ናንዳካጝ የሻምቴ ሃንታካ ኡሲ ጋራጝ ሃይ።¹⁶እየው ጊታጝ እያኒሼ ጆሌ ሙሙዾጝ ሃይ/ ውር ክየምጵንዻ ዜርሜና ቶኦካ ይሁኔን ክያንያጝ ማር ኦኬ ክየምጵንዻዬን፤ ኣይባዬ ዜርሜና ከወርቄ እን ኣኔን ቶኦካ ይሁኔን ክያኒያጝ፤ የሺጛ ሄክሺሽባ ፓይላ።¹⁷እየው ጊታጝ ሃሳውሺኖጝ ጊታጝካ ሾሮጝ/ ከወርቄዬ ወርቄዬ ቶኦካ ይሁኔን እን ይሁሺኔዬ ሳጊያ ና?¹⁸ፕር ውር ክየምጵንዻ ዜርሜና ከጋላያጝ ኣይኬን ኦኬ ክየምጵንዻ፤ ኣይባዬ ዜርሜና መባ እን ኣኔን ዾዮክያጝ የሺጛባ ሄክሽባ ፓይላ፤¹⁹እየው ሙሙዻን ከመባዬ መባዬ ከጋላ እን ይሁሺኖጝ ሳጊያ ና?²⁰እን ዜርሜንኬ ጋላጝ፤ ዜርሜንኬ ጋላዬ ከእን ኣኔን ጋላ ዾዮክ ፓይላዬ። ²¹እያይ እን ዜርሜንካ ቶኦካ ይሁኔኑጝ፤ ዜርሜንኬ ቶኦካ ይሁኔኔ ጊታይ ራጵ ቱዎጜ። ²²እን ዜርሜንኬ ፎላዻ ዜርሜን ከኦካ ኡፔንካ ባሪዮዬ እን ኡፒ ኦካ ኡፔንካ ፎላ ዾዮኬ።²³እየው ኣጁጋን ውርካ እርርሲኔንካ ክያጃ ባካ ሌሜኔ ውርካ ፈረሳውያኔ ሃይ/ ከኣዝሙዴ ከእሳላሌ የኣይና ኣዬን ከከሙኔ፤ ከኦካ ክያጃ ቱዎጝ ጊታይ ኣይ ካሎን እንዻ ኮምሼን፤ ሺዕሺኔ ሹቃ ኣዬኔ ዬ የቦውያያዬ፤ የማራ ጊታይ ኦይደኔ ጊታጝ ኣሽክዬን ዋቲ የሻዋያ፤²⁴እየው ውር ጊታይ ጁወ ጆል ውሬ ሃሳውሺኖጝ የእድያ ማንክዬ የምንቴባ፤ ዬ ሌፓባ ጋማላ።²⁵እየው ኣጁጋን ውርካ እርርሲኔንካ ክያጃ ባካ ሌሜኔ ውርካ ፈረሳውያኔ ሃይ/ ኒያቡዬ እንካ ሹኑኬ የቋጫ እንካ ሹኑኩጝ፤ ዬ ቱዎጝ ጉዩ ቆቃ ከማኒቴ ሴሶዬ።²⁶እን ፈረሳዊ ሙሙዾጝ/ ሌምሼ ሻም ኒያቡዬ ካሹኑክ እንካ ቱዎጝ ጫንቃል፤ ጩዋ እንካ ሹኑክ ማቲባ ኬና ቋጬ።²⁷እየው ኣጁጋን ውርካ እርርሲኔንካ ክያጃ ባካ ሌሜኔ ውርካ ፈረሳውያኔ፤ እን ሹቃትሽ ሹኑኬ ጌዬን ዬ እንካ ቱዎጝ ቀጪካ ኣርሼን ፓይላ ቆቅኬ ኡሲካ ጮዩዬ ኣኔያጝ ናንዳካጝ የሙኒንቴ ሌሲ እን ቋዶጝ ሃይ/²⁸እየውዻ ከሹኑክ የሙኒሺና ውር ጫንቃል የቱዎጝ ጉዩ ቆቃ ከሚኒሺኔኔ ጋራዬ።²⁹እየው ኣጁጋን ውርካ እርርሲኔንካ ክያጃ ባካ ሌሜኔ ውርካ ፈረሳውያኔ ሃይ/ የኣሽክያያ ሌሲካ ውርካ ባሪያኔ፤ የሪባ ሌሲካ ውር ጫንቃላኔ፤³⁰ሃቆባያ ቦንካ ቦንያጝ፤ ዋቲ ኒያቡካ ውርካ ባሪያን እርሺሼን ሃኣያኬን ከጋጝ፤ የሺጛባ እያይኔ።³¹ከይጝ ናንዳካጝ የኣይቴ ሃንታካ ሹቡጊን ጊታባ ኒሺ ውርካ ባሪያኑጝ፤ የኣያባ ማኝካ እየው ኤታጋን።³²ኣኪ ካርሲዬንካ ሹቡጊን ኣሽክዬን ከቱንሲ ሄክሺሽባ/³³እየው ታቺ፤ ሃንታካ ዱብቴን፤ ከኦካ ኮምሼንካ ጉ የቻሊያ እያን ዻቄን?³⁴ዬ ሃይዕሲሼባ እየው ውርካ ቶካ ባሪያን፤ ኣጁጋኔ ውርካ እርርሲኔኔ፤ ከኦካ ጊታይዻ የኒሻባ ክየም ክየም፣ ክየም ክየም የሮያባ፤ ዶክ የሙራ ኦጉዋይካ ቶኦካ ይሁኔን፤ ከከተማ የዋክቴባ ኦካ ከተማ እንቃ።³⁵ዬ ካርሲኬ ኒያቡካ ኣቤል ጫንቃል እጜ ከኦካ ጫቃንካ ይሁኔኔ ጋላዬ ሌይ ሃም የኒሽቶጝ ሌይ ሃምካ ውዋካ ባራክዩ ሌይ ሃምካ ኒያቡካ ዘካሪያሱጝ ዳሉጝ ክያኑጝ ናያቡ ጫንቃሉጝ የእርሺሽቶጝ ፓይላ እየው የኣያ ጊታኬና ካጋንሼ።³⁶ሃዋይሼ እየውባ ኣኩሉክ፤ ከኦግታባ ሳጊ ፓይላ ጋንሽባ ጅሼን ይጝ።³⁷እን ይጝ ኒሺ ውርካ ቶካ ባሪያኑጝ፤ ጊታይ ሃይዕሲሼ ዮጝ ኑኑጝ እን ይጝ ሙርኬ ባዩጝ ኢየሩሳሌም ዮ፤ እን ኢየሩሳሌምዻ/ ባቻ ከእያኑጝ ሃክሼ ሃንታ ኔኒ ታቡጉ ክያኑጝ፤ ሃንታ ኑኑ ፑኡሺዬን ሃዎሺ ክያጝ አኸ፤ ዬ እን የካኔ ማቲኬን ውር ኬናካ ናሽ፤፤³⁸እየዎ ማቲ ኬና ቡሌዬ ሺዽባ/³⁹ሃዋይሼ እየውባዬ፤ እን ኩንኬ ሮጝካ ታቺ እን ሃኬና ጉዋኔ» ሃምኬ ሺጝቴ እያይ የጌያኬን ኣን እንቃ።

ሃፑክ 24ዹዋልሺኔንካ ቱንሲካ ፔን¹ኢየሱስ ቱልኬ ኦካ ቶኦካ ይሁኔኔ ኩይያጝ፤ ውር ጊታይ ዻዬ ጆሌ እሹጝ ካዹዋልሼ እሺ ፎቄ ፓዬና ኦኔኒ።²ዬ እሺ ሺጝ ይጝ ፓይላ የቶያባይ? ሃዋይሼባ እየው ኣኩሉክ፤ ባይ ፑኡሺሼ ኦካ ባዬ ይጝ የቶይቶጝ፤ ማር ኮሲምኔኔ እያይ ኣዮጝ ባይ ክየምጵንዻ ኬና ካሺዺ ኣኔኬን።³ኣኔንባ ኦካ ጋግ እን ሺጜ ደብረ ዘይት ኡፔ፤ ውር ጊታይ ዻዬ ጆሌ እሹጝ ፓዬን እንግንጵን ኦኔኒዬ ሺጝ፤ ይንዳ ማይሼ ኡዋባ ኦግታጝ የክያጄ ፓይላ ሙኔን ኣሚን? ኩኔኔ ዹዋልሺኔን ካቱንሲካ ፔን ሃኦ?⁴ኢየሱስዻ ዋሼ ዋይሼ እንግን እያጝ፤ ውር ክየምጵንዻ ካማር እየው ጊያምሺሼኔ ኣጅቴባ፤⁵ውር ጁዋኑ ሺጝ ኣን ሃኣይ ክርስቶሴ ፓዬንባ ከሮጝ ናኒዬ፤ ጊያምሺሽባ ውር ጁዋኑ።⁶የዋያባ ሃሳዋ ጊታኬና ኣይካ ፓሬ ፓሬ፤ ኦጊታይ ከግዲ ሙኒኔን ኣኔባ ኣይባዬ ቱንሲ ኔኒ ናንዳካጝ ኣዬ ኣካራጝ፤ ከይጝ ከኦይድ ቴርጋዽዬኔ ኣጅቴባ።⁷ዛርሲ ዛርሲ ክያኒ፣ ጌጳሞ ከጌጳሞ ክያኒ ናሹጝሼባ፤ ከኦካ ክራ እንቃ እንቃ ማቲባ ካሼ ጁጉምኔንካ ዳሊዬ፤⁸ዬ እን ፓይላ ሃእሲማ እንካ ሌሜን።⁹ከሹ እን ሳስክዬ ጋይ እየውባ ጋሎ፤ ኒሽባ እየውዻ፤ ናንዳካ ሮጝ ናኒ ዛርሲ ማቲባ ኬናካ ሚኔ እየው።¹⁰ከሹ እን ጁዋናን ካቲሜንባ፣ ሳስክዬ ኣዬን ጋጝባ፣ ሚኔባ ጋጝዻ።¹¹ውርካ ቶካ ባሪዮ ጁዋኑ ከሾሮ ናሹጝጋ፤ ጊያሚሺሽባ ጁዋናንዻ።¹²ኦኬ ጋራ ናንዳካጝ ካጌጳዽዮጝ ናሺማ ካውር ጁዋኑ ጪራትሽባ፤¹³እን ቁዋቅትሽ ሌይ ቱንሱጝ እሺ ባይሽባ።¹⁴ካማቲሼ ዛርሲ ፓይላ ማኝዬ፤ ክያጃ ሹቃጝ ከጌጳሞ ክሊዬባ ፔን ፓይላ፤ ጩዋ ከቱንሲ ኩንባ።¹⁵ኣኪ ከውርካ ቶካ ባሪዮ ዳንኤል ክያጆጝ፤ ካዮካ ጮዩ ዾር ኦካ ራቅ እን ይሁሺኔዬ ጌዬንያጝ፤ እን ኮሙጝ ካጶቅሲባ።¹⁶ከሹ እን ጊታይ ኣኔን ይሁዳጝ ካጎብሼ ጋግ።¹⁷እን ኣኔን ኮሬ ክያኑጝ ውር ክየምጵንዻ ኣንቲቲ ሃንቺሺዬን ካማር ጎቤን።¹⁸እን ኣኔን ራቅካ ሃሙጝ ውር ክየምጵንዻ ካማር ኣፓላ ቦወን ዋኬን።¹⁹ከሹዋን ጊታይ ኣይ ኡሩኬኔ ጊታይ ኣሁሼኔ ሃይ/²⁰ኣኪ ጉኬን ጉዩ ካማርኬ ባርጊኔ ሹካ ሶጵሳዬ ኣዬኔ ይወንባ።²¹ከሹ እን ካርሲኬ ኦባ ሙኔ ፔኔ፤ ሌይ ጋን እን ማር ኣኔን፤ ከኦይን ጩዋ እንቃ እንካ ጋሽክሾጝ፤ ማትባ ጋሎ ታቺ።²²ዋንቲ ሺወን ማር ኩንቡልሼንያጝ ውር ጊታይካ ኣሩጝ ዻቅኬን፤ ዬ ሺጝ ናንዳካ ጊታይ እድዬያጝ ሹዋን ጊታይ ኩንቡልሺሽባ።²³ከሹ እን ውር ክየምጵንዻ ዋይሼያ እየው ክርስቶስ ኣኔን ኦጝ ወይ ኣኔን ሃምያጝ ኦይድ ከሸን ጎምቴን።²⁴ክርስቶስ ካሾሮዬ ውርካ ቶካ ባሪዮ ካሾሮዬ ናሹጝጋዬ፤ ሺጝ ናንዳካ ጊታይ ጊድዬ ጊያሚሺሼኔ ሻምባ ዹዋልሺኔን ታታቺዬ ኦኬ ሹቃሹቃዬ።²⁵እየዎ፤ ሃሌምሻ ሜይሼያ እየው፤²⁶ዬ ኦይዲ ኣኔን ቦና ክያኒዬ ኦይድ ሃሚን ፓዬን ቱልቴን፤ ኦይዲ ኣኔን ጳል ክያኒዬ ኦይድ ከሸን ጎምቴን።²⁷ማኬን ካጎት ቱልኬ ሃም ሹሽ ቱሌዬ ሌይ ታጝ ዴቆጝ ከእያይ ላሉጞጝ ኩኔንካ ሃንታካ ውርዻ ማቲባ እያይ።²⁸ራቅ እን ኦኬ ኣርሾጝ ኪዬጊ ፑኡሺሜንባ።²⁹ይሪካ ከኦካ ሹካ ጋሎ ጩዋ፤ ሹሽ ድምባ፤ ትጌሽዻ ሃርጊኔባ ሜሌል ጌዬን፤ ቢሊካ ካፎላ ዾዮክ ትርክሲባ፤ ቁዋቃንካ ፎላዻ³⁰ከሹ ዹዋልሼሺኔን ካሃንታካ ውር ጌዬንባ ከፎላ ዾዮክ፤ ውርካ ዳሉጝ ፓይላ ኦቆርባ፤ ሃንታካ ውር ከፎላ ክያኒ ኬሉፍ ኩንኬ ቁዋቅቲዬ ጌጳሞ ታቺዬ ጌይባ፤³¹ውርካ ኤርጎዻ ይዕሲባ ከናቅዲ ታቺ፤ እንግንዻ ጊታይ ጊድዮጝ ከኡሲ ኣሁራን ከፎላ ዾዮክ ቦኬ ማራ ቶናዬ ሌይ ኣይ ማራ ቶናጝ ፑኡሺባ።³²እርሮጝ እርርባ ከኦካ ሻሪ እንካ ኣሜኑጝ፤ ጩዎኑ ኔኒ ጫጉርሼ፣ ቃቅቴን ኔኒ ኮድያጝ ከሹ እን ባርግን ሄክሾጝ የእባጃያ።³³ከእያይ የጌያያ ይን ፓይላያጝ፤ እሺ ሄክሾጝ ሻኒ ጉዩ ክያኑጝ የእጃያ።³⁴ሃዋይሼባ እየው ኣኩሉክ፤ ይጝ ፓይላ ሌይ ሃምካ ሙኒኖጝ ጅሼን ይጝ ሳጊኬን።³⁵ፎላዬ ዳሊዬ ሳጊባ ዬ ክያጃ ናኒ ሳጊኬን።ሹ እንካ ኩዋወዬ ዋዳዬ እባጄንኬን³⁶ዬ ከሹ እኔ ዋዳዬ ከሹኔ እንቃ ኣይን ውርካ ኤርጎካ ፎላጝ፣ ኣይን ውዋጝ ውር ክየምጵንዻ እባጅኬን።³⁷ከእያባካ ቦንካ ኖኃ ኩኔንካ ሃንታካ ውርዻ ማቲባ እያይ፤³⁸ኬሌሜንካ ካዮካ ሙዋ ሌይ ሃምካ ዾቅሼ ኖኃ ጋጊ ክያኑጝ፤ ውር ኣኔን ኣሚኔኔ ማቲኔኔ፤ እያኒሼኔ እያኒሺኔኔ፤³⁹ሌይ ሃምካ ሹዋን ጊታይ ካኩና ኦጝ ጊባጅኬኔ፤ ሉጉድ ከእያይ ሙዋካ ካዮ ዱቁንሲዬ እንግኑጝ፤ ሃንታካ ውር ኩናዻያጝ ማቲባ እያይ።⁴⁰ከሹ እን ውር ዻ ድቤንኬን ከጋጝ ሃሙ ክያኒ፤ ክየም ቦባ ኑዋ ሺዽባ።⁴¹ሃኣጚ ዻ ዽዼንባ ከጋጝ ክየም ቦባ ኑዋ ሺዽባ።⁴²ኣኪ ሹካ ኩኔንካ ታቺ እን ጉዩ ናንዳካጝ የማርቴ እባጄኑጝ ጬዬኔ ካሊባ።⁴³ኣጅቴባ ይጝ፤ ኤምኑ ዋቲ እባጃ ጓርጉ ከምክር ዋዳ እን ኩኔያጝ፤ ጬዬኔ፤ ዋቲ ቶኦ ኔኒ ካማር ቡሪዬኔ ባካ።⁴⁴ሃንታካ ውር ኩንባ ከዋዳ እን የማርቴ ቃቢዬኔ እየውዻ ቆባ እያይ ሼኪሚ።⁴⁵ከሹ እን ኣይ ሊኩጝ ካኣዬ እየው ዳዓኖጝ ኤምኑ ከኦካ ጶሮክ ኔኒ ውርካ ዋድማ እን ካኣጁጞጝ ኣይ ሹቃዬ ኣይ ኣጁጉጝ ሃኒን?⁴⁶ኤምኑ ሹካጝ ዋኬ ኩኖጝ፤ ኤልቅሞ እን ጋይኖጝ እን ኣኔን ሙኔኔ ጌዮጝ ውርካ ዋድማ እን ሃኬና ጉዋኔ፤⁴⁷ሃዋይሼባ እየው ኣኩሉክ፤ ጌጳሲባ እሺ ኦካ ኣንቲቲ ፓይላ።⁴⁸ኣይባዬ ውርካ ዋድማ እን ማቲ ጋራዬ ናንዳካ እሺ ኤምኑ፤ ሺጝ ታቺ እን ኡፔንባዬ፤⁴⁹ናሹጜ ካርሲያ ውርካ ዋድማ እንቃ ባይዳን ኔኒ ሙሬንያጝ፤ ኣሜኔ ማቴና ከውር ጊታይካ ጮዩያጝ፤⁵⁰ከሹ እን እሺ ማሬ ቃቢዬኔ ዋዳዬ ታቺ እን ኩኔ፤⁵¹ቃጪጭ እሺባ፤ ባሊ ኔኒ ሻምባ ከውር ጊታይ ኣይ ኣጁጉጝ፤ ከኦይን ማቲባ ኦቆራዬ ኒጊ ሺክዬኔ።

ሃፑክ 25ሄክንሶካ እጛታን ታጳን¹ከሹ እን ፎላ ዾዮክ ሙኔን እጛታን ታጳን ጊታይ ቦዊ ፓኖስ ጊዬይዬ ፓይ ኡታ ቦወኑጝ።²ከኦግዬይ እጛታን ቾናን ጋይ ቶልታ፤ ቾኗን ፕር ጋይ ጊታኬና ካጶቅሲ ኦኬ፤³ቶልታን ጎም ፓኖሴ ዋቃትካ ካሊኔን ካኒ ጎምኬን።⁴ዬ ጊታይ ኣይ ኣጁጉጝ ከፓኖስ ጊዬይ ጎማ ዋቃትካ ካሊኔን ከኞኮንኮሎ።⁵ከሹ እን ኡታ ኡፑኖጝ እንግን ፓይላ ካርቡ ጊዬይ ጎጄ ራጳ።⁶ከምክር ጫቃን ዋይ ሺወን ኬና ሺጜ ኡታ ኩና ቱልዬ ቦዊ እሺባ።⁷ከሹ እን እጛታን ፓይላ ናሹጜ ቦው ፓኖስ ጊዬይዬ ጋሽክሼያ ኦካ ላሉጝሼን።⁸ቶልታን ዋይሼ ኣጁጋን ናንዳካጝ ፓኖስ ጉዋዩ ሺጜ ኣርሼኑጝ፤ ኣይ ኡዋው ዋዓቲ ጉዩ ቶና።⁹ዬ እጛታን ኣጁጋን ዋሼ ሺጝ፤ ዋቃቱጝ ኣኔን ኦጉዋዩጝ ናንዳካጝ ካማሬ ኡዋዌ እየዌ ሄክዬኑጝ፤ ፓይ ሃም ጉዋሩጝሼ ጆሌዬ ኡዋሩጝጋ ካጉዩ።¹⁰ፓዬ ዋቃቲ ኡዋሩጜኑጝ፤ ኡታ ኩና፤ እጛታን ጊታይ ቆቢ ሼክሙጝ ከኡታ እን ሻዋ ከጋጝ ሃምካ ዴሞጾቃጝ፤ ሃጌያ ሃፑክዻ።¹¹እጛታን ዶክ ኡሺሽ ሹሼ ፓዬኔ ሺጝ ታቹጝ ዮ፤ ታቹጝ ዮ፤ ባውሼ ኡዋው ሃፑክ።¹²ዬ እሺ ዋሼ ሺጝ፤ ሃዋይሼባ እየው ኣኩሉክ፤ ሃእባጅኬን እየው።¹³ኣኪ ናንዳካጝ የማርቴ ሹወ ዋዳዬ እባጄኑጝ ሼኪዬ ካሊባ።ሄክንሶካ ውርካ ዋድማ ቶልታ¹⁴ጌጳሞካ ባሪዮ ሙኔን ውር ኮኑጝ ሺው ውርካ ዋድማዬ ኤልቅምሼን ኣንቲቲዬ ናሹጝ ፔን እንቃ ኩዬን፤¹⁵ናንዳካ ውር ክየም ክየም ኬካ ካንታ ጊዬይ ክየም ኣይ ሺሊንጊ ቾን፣ ኑዋ ኣይ ሺሊንጊ ዻ፣ ፕር እንቃ ኣይ ሺሊንጊ ክየሜ፤ ካርሲያ ኩዬን፤¹⁶ውር እን ቦዊ ሺሊንጊ ቾኑጝ ይሪካ ካርሲ ኒጊድዬ ሺዕሺያ ሺሊንጊ ቾን ፕር፤¹⁷ውር እን ቦዊ ሺሊንጊ ዻውጝ ሺዕሺያ ሺሊንጊ ዻ፤¹⁸ዬ ውር እን ቦዊ ሺሊንጊ ክየሙጝ ¹⁹ታቺካ ውርካ ዋድማ ጊታይዻ ከቦን ጁዋኑ ጩዋ ዋክ ኬታባ ኩዬዬ ፑኡሺያ ቢሬ ጊታባ ኣዬ እንግኑጝ።²⁰እን ቦዊ ሺሊንጊ ቾኑጝ ፕር ሌሜዬ ቦኩኔ ሺሊንጊ ቾኔ ሺጝ፤ ታቹጝ ዮ/ እባ የኤልቅምሼን ኣን ሺሊንጊ ቾን፤ ሃኣጝ ሺዕሺያ እንቃ ፕር ሺሊንጊ ቾን።²¹ታቺ እንዻ ሺጝ የሻምያ ሹቃ፤ እን ውርካ ዋድማ ሹቃ ሌሞጝ፤ እን ከኦካ ኦኬ ዽታኬ ማቲ ውር ሹቃ ሌሞጝ፤ ሃጌጳሲ እንባ ኦካ ኦኬ ጁዋኑ ሁሉካ ከዋዛ ሃምካ ታቺ እን ኔኑጝ።²²ፕር ውርካ ዋድማ እን ቦዊ ሺሊንጊ ዻውጝ ኩኔ ሺጝ፤ ታቹጝ ዮ፤ እባ የኣይ ኣን ሺሊንጊ ዻ፤ ሃኣጝ ሃሺዕሺያ እንቃ ሺሊንጊ ዻ።²³ታቺ እንዻ ሺጝ የሻምያ ሹቃ፤ እን ውርካ ዋድማ ሹቃ ሌሞጝ፤ ናንዳካጝ ከኦኬ ዽታኬ የማቲዬ ሌሞጝ፤ ሃጌጳሲ እንባ ከኦካ ኦኬ ጁዋኑ፤ ኬዋዛ ሁሉክባ ሃምካ ታቺ እን ኑኑጝ።²⁴ውርካ ዋድማ እን ቦዊ ሺሊንጊ ክየም ኩኔ ሺጝ፤ ታቹጝ ዮ፤ እጝ እን የማሬ ኮሬን እን ሃዹጝ፤ እጝ እን የማሬ ላልዬን እን ፑኡሺ፤ የኣዬ ውር ጋራጝ ሃእባጅያ እን።²⁵ዬ ሃሪግሼኔ ሃኩይዬ ሃቆዲ ይግኔ ሃድክያ ሺሊንጊ እን የኣዬ ኣኑጝ፤ ቢሬ ኔኒዻ ሃኣጝ።²⁶ውር ታቺ እንዻ ዋሼ ሺጝ፤ እን ውርካ ዋድማ ጋራ ቶልታጝ፤ ከኦካ እን የማሬ ኮሬኑጝ ሃዼን፤ ከኦካ እን የማሬ ላልዬን ፑኡሺዬን የኣዮጝ ጊባጃይ?²⁷ኣኪ ሹካጝ ሃዋኮጝ ቢሬ ናኒ ጅሺሼዬ ሃጌዮጝ ዋንቲ ሃኣይ እንግን።²⁸ኣኪ ቦዊ ሺሊንጊዬ ኣይ ውር እን ኣኔ ሺሊንጊ ታጱጝ፤²⁹እን ኣኖጝ ሌሜባ፤ ኣኔባ እን ሺዺዻ፤ ዬ ኦካ እን ማር ኣኔኑጝ ኣይን እን ኣኖጝ ቦባ።³⁰ውርካ ዋድማጝ ማርካ ኣግዬኑጝ ቡል እሺዬ ፓቅቴባ ሃም ኣኔ ኦቆራዬ ኒጊ ሺኪዬኑጝ ሃም ኣይ ድሙጉጝ።ኮምሼንካ ቱንሲ³¹ሃንታካ ውር ኬውርካ ኤርጎ ኩንኬ ጌጳሞያጝ፤ ከጌጳሞ ኡፓ ፎላ ዾዮክ፤³²ዛርሲ ፓይላዻ ፑኡሺሜንባ ኦካ ሌሜን ኔኒ፤ እሺዻ ከእያኑጝ ውርካ ዻውኔን እዲዬ ማድር ከኦካ ጛሜውጝ፤ ሻምባ ዛርሲ ዋና ከኦካ ኑዋ፤³³ማድራን ከቡዎን፣ ዬ ጛሜዋን ከታካ ዋርካታ።³⁴ከሹ እን ቢቲ ዋይሼባ ጊታይ ኣኔን ቡዎን እያጝ፤ እየው ጊታጝ ባባ ኡዋኖጝ፤ ፓዬንባ፤ ካርሲኬ ኦባ ሙኔ ፔኔ ጌጳሞ እን ጋሽክሼ እየውጝ ዎርሜንባ፤³⁵ናንዳካኦ፤ ካሽ ቃው ኣኔ የኣምሻያ ኣን፣ ኮርጉ ቃው ኣኔ የማቲሻያ ኣን ሙዋ፣ ሃማቲ ኮማናዬ የቾቺንሺያያ ኣን፤³⁶ሃጌችዬ የኡዋሩጝቴያ ኣን ኣፓላ፣ ሃዴሜ የኣክንሲያያ ኣን፣ ሃቁሜንዻዬ የኣንሺናያ ኣን።³⁷ጫንቃላን ዋሼ ሺጝ እያጝ፤ ታቹጝ ዮ፤ ካሽ ቃው እኔ ሃኣሚን ሃጌይታ ኣምሽቴ እኑጝ? ወይ ኮርጉ ቃው እኔ ሃኣሚን ሃጌይታ ማቲሽቴ እን ሙዋጝ?³⁸የማቲ ኮማናዬ ሃኣሚን ሃጌይታ ቾችንሺቴ እኑጝ? ወይ የጌቺዬ ሃኣሚን ሃጌይታ ኡዋሩጙሽቴ እን ኣፓላጝ?³⁹ፕር የዴሜኔ ወይ የቁሜኔ ሃኣሚን ሃጌይታ ኣንሺንቶጝ?⁴⁰ቢቲ እንዻ ዋሼ ሺጝ፤ ሃዋይሼባ እየው ኣኩሉክ፤ ከኦጉዩ ጊታይ ኣይ ይርኩጝ ጊታይ የኣሽክቴ ጪኒጌን ጉዩ ክየሙጝ ሃኬ እያይ የኣሽክቴ ኣንዻጝ፤ ሃዋይሼባ እየው እያይ፤⁴¹ጩዋ ፕር ዋይሼ ጊታይ ኣኔን ዋርካታ እያጝ፤ እየው ጊታጝ ጋሺዮጝ፤ ጌይኬ ኦናኒ ዋናዬ ፓይባ ሃምካ ጉ እን ጋሽክሼ ዲያብሎሴ ውርካ ኤርጎ ኔኑጝ፤⁴²ናንዳካኦ፤ካሽ ቃው ኣኔ የካኔ ኣምሻኬን ኣን፣ ኮርጉ ቃው ኣኔ የካኔ ማቲሻኬን ኣን ሙዋ፣⁴³ሃማቲ ኮማናዬ የካኔ ቾችንሺያኬን ኣን፣ ሃጌቺዬ የካኔ ኡዋሩጙሽቴኬን ኣን ኣፓላ፣ ሃዴሜኔ፣ ሃቁሜኔ የካኔ ኣንሺናኬን ኣን።⁴⁴እንግንዻ ዋሼ ሺጝ እያጝ፤ ታቹጝ ዮ፤ ካሽ ቃው እኔ ወይ ኮርጉ ቃው እኔ፣ የማቲ ኮማናዬ ወይ የጌቺዬ፣ የዴሜኔ ወይ የቁሜኔ ሃጌያዬ ሃኣሚን ሃማርቴ እን ሄክሽቴኑጝ?⁴⁵ከሹ እን እሺዻ ዋሼ ሺጝ፤ ሃዋይሼባ እየው ኣኩሉክ፤ ከጊታይ ኣኔን ኦጉዩ ይርኩጝ እን የማርቴ ጪኒጌን ጉዩ ክየም ኣሽክሼን ሃኬ እያይ የማርቴ ኣንዻ ኣሽክሼኑጝ» ሃዋይሼባ እየው እያይ።⁴⁶ጊታይ ፓይ ሃምካ ኮምሼንካ ቦን ጮሉጝ፤ ዬ ጫንቃላን ፓይ ሃምካ ዻቆካ ቦን ጮሉጝ።

ሃፑክ 26ክያጃ እን ኣይሁድ ሃሳውሺኔ ኢየሱሱጝ¹ኢየሱስ ሃሳወ ሹዋጴ ክያጃ ጊታይ ጩዋ፤ ዋይሼ ውር ጊታይ ዻዬ ጆሌ እሺ እያጝ፤²ከሹ ዻ ጩዋ ኣዬ ፋሲካጝ የእባጃያ፤ ሃንታካ ውር ካሮዮጝ ሳስክዬ ጋዬንባ።³ከኦይን ጩዋ ታታቻንካ ውር ቃሼ ጌጵሹጋንካ ዛርሲዬ ፑኡሺሜን ኦካ ካርቡካ ታቺ እንካ ውርካ ቃሽ ሺጜ ቀያፌ፤⁴ከጉዋር ቆቃ እያይ ካጎሜ ኢየሱሴ ካኒሾጝ ክሊያ ጋጝ።⁵ኣይባዬ፤ ከኦካ ጫቃንካ ዛርሲ ካማር ዋራቅ ቲቴኔ ሺጝ ካማርኬ ሹካ ቶንቶሮ ኣዬኔ ቱሙያ።ኝያ እን ጲሺ ኢየሱስ ከጋሙሮጝ⁶ኢየሱስ ኣኔንባ ቢታንያ ኦካ ቶኦካ ስምዖን እን ኣኔ ቡርቅካ ጊዬዬ፤⁷ኝያ ክየም ቦው ጋሙሬ እን ካሎን ኣንቲቲ ኣይ ቁዋቃ ከኞኮንኮሎዬ ኩና ኦኔኒ፤ ጋኔንባ ከጋጝ ቆቤኔ እርሼያ እሺ።⁸ውር ጊታይ ዻዬ ጆሌ እሹጝ ሹ እን ጌዬ እን ማንሼ ሺጝ እያጝ፤ ሴሶጝ ፓይላ ሃናንዳካኦ?⁹ጋሙሬ እን ጉዋሩሽ ኣንቲቲ ጁዋኑ ክያኒዬ ቢራን ኔኒ ኦና ቻሊዬ ውር ኩፓን ኣዬኑጝ/»¹⁰ኦየሱስ እባጅ እጜ ዋይሼ እንግን እያጝ፤ ሃኦ የጋሊንሺቴ ኝያጝ? ኣሽክሼያ ኣን ኦኬ ሹቃ፤¹¹ኩፓን ሹ ጮል ጋኔባ ከእየው፤ ዬ ኣን ሹ ጮል ሃኣይኬን ከእየው።¹²እርሼ ሩዋ ናኒ ክያኒ ጋሙሮጝ ሼኪ እንካ ቱቱኬ ኣኑጝ፤¹³ሃዋይሼባ እየው ኣኩሉክ ክያጃ ሹቃጝ ካፔን ፓይላ ሹካጝ ክሊዮጝ፤ ኣይን ኦካ ራቅና እን እሺ ኣሽክዮጝ ክያጅባ ካጶቅሲዬን።ይሁዳ ቱምያ ኢየሱስ ሳስክዬ ኣይኔን¹⁴ከኦይን ጩዋ ከኦካ ታጲ ላማን ክየም እን ሺጜ ይሁዳ እንካ ኣስቆሮቱ ኩይ ሃምካ ታታቻንካ ውርካ ቃሼ፤¹⁵ሺጝ፤ ሃሳስክያ ኣያ እየው እሺያጝ፤ እየውካ የኣያ ኣን ኦ? እንግንዻ ሺጝ ኮሙዬ ኣይ እሺባ ቢሬ ማካንታም።¹⁶ካርሲኬ ሹ እኔ ይሁዳ ካሊዬን ሹ ባሺ እን ካሳስክያ ኣይኔ ኢየሱሱጝ።ምሽካ ቃይካ ታቺ እን¹⁷ከቶንቶሮካ ባላሻ ሹ እንካ ሌሜን ውር ጊታይካ ዻይኔን ፓዬን ኦካ ኢየሱሴ ሺጝ የዎሺ እን ካኣሽክቴ እን ፋሲካ ኦን?¹⁸እሺዻ ዋይሼ እንግን ፓይ ሃምካ ከተማዬ ዋይሺቴ ውር እን ሺጜ እገሌ እያጝ፤ ውር እንካ እርርሲኔን ሺጝ ሹዋን ሄክሻዬ ቶንቶሮካ ፋሲካ ሃኣምባ ከውር ጊታይ ዻዬ ጆሌ ኣን ኦካ ቶኦ ኑኑ» ዋይሺቴ እሺ እያይ።¹⁹ውር ጊታይካ ዻይኔ ጆሌንዻ ከእያይ ኢየሱስ ኤርግትኖጝ ጋሽክያ ቶንቶሮካ ፋሲካ።²⁰ሹሽ ቃይትሼዻ ኢየሱስ ኡፓ ከጋጝ ኬውር ታጲ ላማን።²¹ጋኔንባ ኣሚኔን ክያንዻዬ፤ ሺጝ ሃዋይሼባ እየው ኣኩሉክ፤ ከኦጉዩ ክየም ሳስክዬ ኣዬን ኣምባ።²²እንግንዻ ሞይካዽዬ፤ ከክየም ክየም ሺጝ፤ ታቹጝ ዮ፤ ሃኒን?²³እሺዻ ዋሼ ዋይሼ እንግን እያጝ፤ ውር እን ሳስክዬ ኣዬን ኣዬ ኣኑጝ ኣኔንኬ ኣን ቡዋ ኔኒ ቋሼ ክያኒ ዾቅሼን።²⁴ሃንታ ውር እን ቶኬ ናንዳካ እሹጝ ኩይባ፤ ኣይባዬ ናንዳካ ውር እን ሳስክዬ ኣዬን እሹጝ ሃይ፤ ዋቲ ውር እን ማር ጅሺኔኔ ሺዽያጝ ሃባሺ።²⁵ይሁዳ እን ሳስክዬ ኣዬንዻ ሺጝ ውሩጝካ እርርሲኔኑጝ ዮ፤ ሃኒን? እሺዻ ሺጝ ሃእን።²⁶ጋኔንባ ኣምኔኔ ኢየሱስ ቲት ባላሻዬ ኡዋና፤ ጩኬ ኣይ ውር ጊታይ ዻዬ ጆሌ እሺዻዬ፤ ሺጝ ይዕጝ ኣሚባ ይጛ ኣሩጝ ናኒ።²⁷ጩዋ ቲት ካርቡካ ሻሪ እን ቱርጴዬ ይሁሼና፤ ኣይ ውር ጊታይ ዻዬ ጆሌ እሺዬ፤ ዋይሼ እንግን እያጝ እየው ፓይላ ማቲባ ከኦጝ፤²⁸ናንዳካ ሴሶካ ውር ጁዋናን ከሺዕሺዬን ካእርንቶጝ ሃኒያቡካ ክያጃ ሃሊ እን ናኑጝ።²⁹ሃዋይሼባ እየው፤ ሃምካ ጌጳካ ባባጝ ከዴንታ ሃሊ ሌይ ሃምካ ሹ እን ካማቴኬ እየው ከጋጝ ካርሲኬ ጋኔ ሃማቲኬን ከእየው ካርቡካ ሻሩጝ።³⁰ኪወ ይያሩጝ ጩዋ ኮትሼያ እያጝካ ጋግካ ደብር ዘይቱጝ።ቡድዬንካ ጴጥሮስ ሌምሼ ክያጃ³¹ከኦይን ጩዋ ኢየሱስ ዋይሼ እንግን እያጝ፤ እየው ፓይላ ከምክር ይጝ የካቲምናባ ከኦናኒ የቡድያባ ኣን፤ ሺጝ እያጜ ቶካዬ፤«ሃሙርባ ውርካ ዻውኔን፤ ማድር ጊታይ ኣኔን ዜሌ ክያኒ ላልሜንባ።³²ኣይባዬ ሃናሹጝያጝ ጩዋ ሃሌም እየዌ ሃኩይባ ገሊላ።³³ጴጥሮስዻ ዋሼ ሺጝ፤ ዶክ ፓይላ ናንዳካ ክያጃ ኑኑ ካቲሚኒን ኣን ክየምጵንዻ ሃካቲሜንኬን/³⁴ኢየሱስዻ ሺጝ፤ ሃዋይሼባ እን ኣኩሉክ፤ ከምክር ይንካ ሹጝ ከሌሜንካ ኬዬንካ ባቻ የቡድያምባ ክያጝ ጅያን።³⁵ዬጴጥሮስ ሺጝ፤ ከእን ኣይን ኣርሼን ክየምጵንዻ ሃቡድኬን እን፤ ውርካ ዻይኔን ዶክዻ እንግን ፓይላ ሺጝ እያይ።ይሁኔንካ ኢየሱስ ሃምካ ጌቴሴማኑጝ³⁶ከኦይን ጩዋ ኢየሱስ ከውር ጊታይ ዻዬ ጆሌ እሹጝ ፓያ ራቅካ ፔን እን ሺጜ ጌቴሴማኑጝ፤ ዋይሼ እንግን ሹካጝ ሃኩያ ሃማ ሃይሁኖጝ እየው ቆቢባ ኦጝ።³⁷ከኦግታይዻ ቦው ጴጥሮሴ ሃንታካ ዜብድዮስ ዻዋኔ ኩዬ፤ ካርሲያ ዻቼኔ ጫንቅዬኔ፤³⁸ከኦይን ሺጝ ናፒሲ ናኒ ሌይ ሃምካ ኣርሾጝ ካሎን ዻዹጝኔያ፤ ኬቁዋቅቲሼን ቆቢባ ከኣን ኦጝ።³⁹ሳጊ ዽታኬ ማሜ ቶኬ ኩዋኔ ሺጝ ባባዮ፤ ቻሊሜንያጝ ኒያቡጝ ካሲጊባ ከኦናኒ፤ ኣይባዬ ካማርኬ እን ኣን ሃሆሼዬ ካማቲባ ከእጝ እን የሆሾጝ» ሺጝ እያይኔ ይወና።⁴⁰ጩዋ ዋኬ ሃሚኔ ኩን ሃምካ ውር ጊታይ ዻዬ ጆሌ እሺያጝ፤ ራጴ ጌያ እንግን፤ ዋይሼ ጴጥሮስ እያጝ፤ ኣኪ የካውሺናያይ ከኣን ሳዓት ክየምጵንዻ ቁዋቅትሼን?⁴¹ከማር ሃምካ ጋሎ ሻወኔ ቁዋቅትሼ ይወንባ፤ ኡሲ ሃሼክሚ፤ ዬ ኣሩጝ ሃዻቹጉ።⁴²ፕር ክያጝ እንካ ላንሳጝ ኩዬ ሺጝ፤ «ባባ ዮ፤ ይጝ ሃኒያቡ እን ሃማሬ ማቴኔ ማር ሳጊዬንያጝ ክያጃ ኑኑ ካሙኒንቴባዬ» ይወና።⁴³ፕር ዋኬ ኩኖጝ ካርቡ ጊዬይ ናንዳካጝ ሩዋቱክ ጎመዬ ጎጅኖጝ ራጴ ጌያ እንግን።⁴⁴ፕር ኦይድ እንግኔ ኩዬ ክያጝ እንካ ማክንሳጝ ይሁኔን ናካ ሌሜን ሌሜያያ።⁴⁵ጩዋ ዋኬ ኩይ ሃምካ ውር ጊታይ ዻዬ ጆሌ እሺዬ ዋይሼ እንግን እያጝ፤ ካንዻ የቦዋ ኡሲዬ የራጳያይ? እየዎ፤ ዋዳ ሄክሻ፤ ሃንታካ ውር ከኦካ ቡዋካ ውርካ ሴሶ ሳስክዬ ጋዬንባ፤⁴⁶ናሹጝጋ ካፓይባ እን ሳስክዬ ኣዬን ኣኑጝ ጋን ኩንባ።ጎሜንካ ኢየሱስ⁴⁷ኣኔንባ ሃሳውኔኔ ከታጲ ላማን ክየም ይሁዳ ኩና፤ ጊታይ ይዕሲዬ ከሃምካ ውር ቃሼ ከጌጵሹጋንካ ውሬ ውር ጁዋኑ ጎም ኤቤሌ ሻሪዬ ጋኔባ ከጋጝ።⁴⁸ይሁዳዻ ሺጝ እን ኣን ሃሹንቆጝ ሃእሺ፤ ጎሚባ ሺጝ እያይኔ ናንዳካጝ ሜይሼ እንግን ከዹዋልሺኔኑጝ፤⁴⁹ኩይ ሃምካ ኢየሱሴ፤ ሺጝ «ውሩጝካ እርርሲኔኑጝ ዮ፤ ሹቃ ካኣይሼ እኔ ሹንቃ።⁵⁰ኢየሱስዻ ዋይሼ እሺ ውሩጝ ካናሺዺ ናኒዮ፤ ሹዋጵሽባ እን የኩኖጝ፤ ከሹ እን ውር ፓይኔ ጎማ ኢየሱስ⁵¹ከኦካ ውር ጊታይ ኣይኬ ኢየሱስ ክየም ቲት ቡዋዌ ጎም ኤቤሌ ቆው ናቡካ ውርካ ዋድማ እንካ ውርካ ቃሼ ቃጫ።⁵²ኢየሱስዻ ሺጝ እያጝ፤ ዋሽባ ጋን ኤቤሌ ዾቅሼባ ሃም፤ እን ጎሚ ኤቤሉጝ ፓይላ ካይባ ከኤቤል።⁵³ዎሺሽያጝ ሃይወን ባባያጝ ከኦካ ፓፃኖ ታጲ ላማን ውርካ ኤርጎ ጊታይ ሳጊ የዋሻ ከኦኮኑጝ ካማርሼ ኣን ውርካ ኤርጎ ይዕሲሼንኪ?⁵⁴ይን ማቲያ እያይንያጝ ፕር ውርቀትካ ውርካ ቶካ ባሪዮ ኦይን ሺጜ ኣይባጝ እያን?⁵⁵ከሹ እን ኢየሱስ ዋይሼ ዛርሲ እያጝ፤ ከእያኑጝ ጎሜ ጓርጉጝ የቦዋ ኤቤሌ ሻሪዬ የፓይናያይ ኣን ጎሜን? ሹ ጮል ሃኡፔ ቶኦካ ይሁኔን ክያኒዬ ሃእርርሲ እየውያጝ ዋቲ የጎማኬን ኣን፤⁵⁶ኣይባዬ ይጝ ፓይላ ኣዮጝ ውርካ ቶካ ባሪዮ ከወርቅትካ ውርካ ቶካ ባሪያን ክያጆጝ ካሙኒኖጝ ሃይዕጝ።ከሹ እን ውር ጊታይ ዻዬ ጆሌ እሺ ፓይላ ጎይድ እሺዬ ጉካ።ኢየሱስ ከኦካ ሌምንካ ካራምካ ኣይሁድ⁵⁷ከሹ እን ውር ጊታይ ጎሚ ኢየሱሱጝ፤ ውርካ እርርሲኔንካ ክያጃ ባካ ሌሜኔ ጌጵሹጋንካ ውሬ ኦይን ፑኡሺምኔ ጋኖጝ፤ ቦሼያ ሃምካ ታቺ እንካ ቃሽ ሃምካ ቀያፋ።⁵⁸ኣይባዬ ጴጥሮስ ኣኔንኬ ዹኬ ዻዬ ሌይ ሃምካ ካርሚካ ታቺ እንካ ውርካ ቃሹጝ፤ ሁሉክ ቱዎጜ ካቶዬ ቱንሲካ ክያጃጝ ኡፓ ከውር ጊታይካ ባኪኔኑጝ።⁵⁹ከሹ እን ታታቻንካ ውርካ ቃሼ ውርካ ካራምካ ኣይሁዴ ፓይላ ኢየሱስ ኒሺሼን ጋኔን ክያጃካ ሾሮ ዎሼን፤⁶⁰ቦፓይኒን ማኝ ጁዋኑካ ሾሮጝ ካኒ ጌይኬን ሜርሜር ኬና ኣይ ሊኪ፤ ዬ ከታካ ሁር ውር ዻ ፓዬኔ ሺጝ፤⁶¹ውሩጝ፤ ሺጝ ሃኮሲ ቶኦካ ይሁኔንካ ባሪዮዬ፤ ከክያጝካ ሹ ጅያን ሃቻሊባ ዋሼ ኣሽክዬኔ» ሃሳዋ።⁶²ከሹ እን ታታቻንካ ውርካ ቃሽ ናሹጜ ጎሬ፤ «ውር ጊታጝ ፓይላ ፓይኔ ማቲ ማኙጝ እን የኣይኬን ዋሼን ክየምጵንዻ?⁶³ዬ ኢየሱስ ኡፓ ሹይ፤ ታታቻንካ ውርካ ቃሽ ሺጝ፤ ሃዜርሚናባ ከባሪዮ እጝ፤ እን የኣይ ክርስቶስ ውዋካ ባሪዮያጝ ሜይሼ ኡዋባ»⁶⁴ኢየሱስዻ ሺጝ፤ እንዻ የሺጝያ፤ ኣይባዬ ሜይቴባ እየው ፓይላ፤ ቢያ ኬሌሜን ሃንታካ ውር ኡፓ ኦካ ቡዋካ ቁዋቃ እን ቡዎኔ ከፎላ ሉፍ ኩኔ የጌያባ።⁶⁵ከሹ እን ታታቻንካ ውርካ ቃሽ ሃዽሽ ኣፓላዬ፤ ሺጝ ሃሳዋ ክያጃካ ይርኔን ኦካ ባሪዮ፤ ከኦጝ እንቃ ዎሺሻ ኡዋው ማኝካኦ? ሃሳውሼ ባሪዮ ክያጃካ ይርኔን እየውዻ የዋያያ።⁶⁶ሙኒሼን እየው እያን? ዋይሼን እንግን እያይ፤ እንግንዻ ሺጝ ካኣርሽባዬ ዋሻ።⁶⁷ከሹ እን ፓልቅሼ ማሪ ኔኒዬ ሙራ ከዛው፤ ዶክ ሙር ካሎን ታቺዬ፤⁶⁸ሺጝ ክርስቶስ ዮ፤ ሃኒን ሙሪ እኑጝ? ይንዳ ሜይሼዬ ኡዋው ሃሳዋ/»ጴጥሮስ ቡዲያ ኢየሱስ⁶⁹ከኦይን ጩዋ፤ ጴጥሮስ ኣኔንባ ኦካ ካርሚካ ውር ታቺ እንካ ቃሽ ኡፔኔ፤ ኝያ ክየም ካዋድማካ ቶኦ እን ኩን ኦኔኒዬ፤ ሺጝ እንዻ የኣይኬ ኢየሱስ እንካ ገሊላጝ»⁷⁰ዬ እሺ ሺጝ፤ የሃሳወ ናንዳካ ኦጝ ሃእባጅኬኔ ቡዲያ ኦካ ማሪካ ውር ፓይላ።⁷¹ኩይሼ ሃምካ ቱልሼንካ ካርሚ እኑጝ ኝያ ክየም ካዋድማ ጌይ እሺዬ፤ ዋይሼ ውር ጊታይ ኣኔን ኦይን፤ ውሩጝ ኣኔንኬ ኢየሱስ እንካ ናዝሬቱጝ»⁷²እሺዻ ከክያጃካ ዜርማ ሺጝ፤ ውር እን የሺጞጝ ሃእባጅኬኔ/ ቡዲያ እንቃ።⁷³ቆቤ ዽታኮጝ ጩዋ፤ ውር ጊታይ ጎሬ ኣኔን ኦይን ፓዬኔ ዋይሼ ጴጥሮስ፣ ሃሳዋ ኑኑ ናንዳካጝ እባጅኖጝ፤ ከኣኩሉክ እንዻ ከኦግዬይ የኣይ ክየም/⁷⁴እሺዻ ዜርሜኔ ካይሲንሲዬ ዋይሼ እንግን፤ «ኣን ሃእባጅኬን ውር እን። ይሪካ ባቻ ኬያ።⁷⁵ከሹ እን ጴጥሮስ እጝ ዋይሼ ባቻ ካኒ ኬይኬኔ የቡድያምባ ክያጝ ጅያኔ ኢየሱስ ክያጆጝ ጌያ ጶቅ፤ ጴጥሮስዻ ቱል ሹኑኬ ኦቆ

ሃፑክ 27ይሁዳ ሮያ እሺ ኤምኑ¹ዻም ከካሪንታ ታታቻንካ ውርካ ቃሼ ጌጵሹጋንካ ዛርሲዬ ፓይላ ሃሳወና ከክያጃ እንካ ኒሼ ኢየሱሱጝ፤²ቁሞጝ ጩዋ ቦወ ሳስክዬ ጋያ ታቺ እን ጵላጦስ።³ይሁዳ እን ሳስክዬ ኣዬን ኮምሼ ኢየሱስ ሹ እን ጌዮጝ ዻቢሺያ እሺ ኤምኑ፤ ቢሬ ጊታይ ቦወዻ ሺጝካ ታታቻንካ ውርካ ቃሼ ጌጵሹጋንካ ዛርሲዬ ኣዬኔ፤⁴ሺጝ ናንዳካጝ ሃሳስክያ ኣይኔ ውር ጫንቃሉጝ ሃግያምሽያ። እንግንዻ ሺጝ፤ ኣኪ ሃኦ ካዾቅሺሽ ኡዋው ኦይኑጝ፤ እና ክያጃካ ሹቦ ኑኑ/⁵ዬ ይሁዳ ባክሼ ቢሬ ቶኦካ ይሁኔን ክያንዬ ቱላ፤ ኩይዻዬ ሮይ እሺ ኤምኑዬ ኣርሻ።⁶ታታቻንካ ውር ጊታይካ ቃሽ ቲት ቢሬ እኔ፤ ሺጝ ናንዻካጝ ኣዬ ቢሬካ ኒያቡጝ ካፓቅቴ ሃምካ መባጝ ሃቻሊያኬን፤⁷ሃሳወኔ ሺጝ ካኣይ ኦካ ቱቱኬንካ ኮማናዬ ከቢሬ እን ጉዋሩጜያ ራቅ ኦካ ውር እን ኣሽክዬን ጁውጝ።⁸ዬ ራቅ እን ሌይ ጋን ሺጝ ራቅካ ኒያቡዬ ሺውባ።⁹ከይንዻ ከውርካ ቶካ ባሪዮ ኤርምያስ ሺጜ እያጜ ሃሳዎጝ ሙኔና፤ ካኣይኬ ኣንቲቲ ኔኒዬ ሃንታካ እስራኤሌ ጊታይ ሄክንሲየውጝ ቦዋ ቢሬ ማካንታም፤¹⁰ባሪዮዻ ከእን ኤርግቴ ኣኑጝ ሃክሺሽያ ራቅካ ውር እን ኣሽክዬን ጁውጝ።ኢየሱስ ከኦካ ሌሜንካ ጲላጦስ¹¹ከሹ እን ኢየሱስ ከኦካ ሌሜንካ ታቺ እንካ ፔኑጝ፤ ታቺ እንካ ፔንዻ ሺጝ እን የኣይ ቢቲካ ኣይሁዴ ኣንሻ? እሺዻ ሺጝ ከእያይ የሺጜዬ ዋሼያ እሺ።¹²ዬ ታታቻንካ ውርካ ቃሼ ጌጵሹጋኔ ዎሽ እሺ ካሲሲዬኔ ዬ ካኒ ጌይኬን ዋሼን ክየምጵንዻ።¹³ከሹ እን ጲላጦስ ሺጝ «ውር አኸ ቦፓይኔ ማኝ ካካሲሲዬ እን የዋይኬኒ?¹⁴ዬ እሺ ሌይ ሃም ታቺ እንካ ፔን ካጎሺዮጝ ናንዳካ ካሲሲዬን እን ኩኑጝ ካኒ ዋሽኬን ክያጃ ክየምጵንዻ።¹⁵ታቺ እንካ ፔኑጝ ካቡልሼ ዛርሲ ከቶንቶሮ ውር ክየም እንካ ቁሜኑጝ ማቲያ ዱሱምኔን።¹⁶ከሹ እን ኣና ውር ኬና ጊባጄኬ ሴሶ ኬና ሺጜ በርባን ሃውርካ ቁሜን።¹⁷ዛርሲዻ ፑኡሺሜኔ ጲላጦስ ዋይሼ እንግን፤ ከኦካ በርባኔ እን ሺጜ ክርስቶስ ኢየሱሴ የዎሻ እን ካቡልሼ እየው ና?¹⁸ጲላጦስዻ ሳስክዬ ጋይኔኬ ቦውንታ እባጃ።¹⁹ኣኔንባ ኦካ ካርሚካ ኮምሼን ኡፔኔ ኝያ ኔኒ ሺጝ ናንዳካ እሺ ሹጝ ከሹካ ካጌዬ ጋሎ ጁዋኑጝ፤ ኦካ ውር ጫንቃል እን ኣይ ኦኬ ክየምጵንዻ ሻሜን» ይዕሲያ ሜርሜር ኬና ሺጚ እያይ።²⁰ኣይባዬ ታታቻንካ ውርካ ቃሼ ጌጵሹጋኔ ካቡልሼ እንግን በርባኔ ዬ ካኒሼ ኢየሱሱጝ ካይሁኖጝ ጋኔን ዛርሲ ሱድዬን።²¹ታቺ እንካ ፔንዻ ሺጝ፤ ከኦካ ዻዋን ጊታጝ የዎሻ እንካ ቡልሼ እየው ኒኔ ኣንሼና። «እንግንዻ ሺጝ በርባኔ ዋሻ።²²ጲላጦስዻ ሺጝ፤ ኣኪ እን ሺጜ ክርስቶስ ኢየሱስ ካሻም እያን? ውር ፓይላ ሺጝ ካሮይባ/²³ጲላጦስዻ ሺጝ፤ ናንዳካ ኦ? ኣሽኪ ኦኬ ጋራ ኬና ኣይ ኦ? ዬ ኣንሻ እንግን። ዬ እንግን ሌሜዬ ጉቹኬ ሺጝ ካሮይባ/²⁴ጲላጦስ ክያጃ ቲቴ ጃካማጝ እንቃ ማሬ ኦኬ ክየምጵንዻ ኣኔኑጝ ጌዬ፤ ሺጝ ኣን ከኦካ ኒያቡካ ውር ይጝ ሃኣይ ጫንቃል ካርሲኬ ጋኔ ክያጃ ፓይላ ሃጉዩ ሺጝ እያይኔ ቦኩኔ ሙዋ ኦካ ማሪካ ዛርሲዬ ኡዋና ቡዋ ኔኒ።²⁵ዛርሲዻ፤ ፓይላ ሺጝ ኒያቡ ኔኒ ካኣኒንቴ ኦጉዋዩዬ ኦካ ሃንታ ጉዋዩዬ ዋሻ።²⁶ከሹ እን ቡልሼያ እንግን በርባን፤ ዬ ሙሬ ኢየሱሱጝ ጩዋ ካሮዮጝ ሳስክዬ ጋዬና።ኢየሱስ ከኦካ ፓፃኖካ ውርካ ሮማን²⁷ከኦይን ታቺ እንካ ፔኑጝ ዋይሼ ፓፃኗን ቦቴ ኢየሱስ ሃምካ ባርካ ታቺ እን፤ ፑኡሺሼያ ፓፃኗንዻ ፓይላ ኦካ ማራማራ ኔኒ።²⁸ቡል ኣፓላ ኔኒዻ ክምሼያ ኣፓላ ጫጩጉ፤²⁹ቦው ክጵሬዬ ጋሽኪኬ ሆርሆሬ ጋይሼያ ሹቦ ኔኒ ክያኒ ቦው ሴጋካ ሻሪዬ ጋይሼ ቡዋ ኔኒ ቡዎኔ ቶኬ ኩዋሚን ኦካ ማሪ ኔኒዬ ሺጝ፤ ቢቲካ ኣይሁድ ዮ፤ ሹቃ ካኣይሼ እኔ ጎልቲያ፤³⁰ፓልቅሼያ ማኒቄዻ፣ ቦው ሳጋ እንካ ሻሪ ከኦካ ቡዋ ኔኒዬ ሌሜዬ ሌሜዬ ሙራ ሹቦ ኔኒ፤³¹ጎልቲዮጝ ጩዋ፤ ቡል ኣፓላ ጫጩጉ እኔ ክሚሻ እሺ ኣፓላ ኔኒ፤ ቦፓዬያ ሮዬንዻ።ሮዬንካ ኢየሱስ³²ጎሜ ፓዬዻጝ ጌያ እን ሺጜ ስምዖንካ ቀሬናጝ፤ ካዼቴ ሻሪ እንካ ሮይኔንዻ ሻምሼያ እሺ ጊዲ።³³ሆኮል ኔኒዻ ሺጝ፤ «ራቅካ ሹቦካ ኦኮሎ፤ ሄክሻ ፔን እን ሺጜ ጎልጎታጝ።³⁴ካማት ዝእያ እን ዎርሲዬ ከሐሞቴ ጋያ እሺ፤ ዬ እሺዻ ካማቶሞጝ ካኒ ናሺኬን።³⁵ሮዮጝ ጩዋ ፓቅ እጣዬ ካሺሜና ኣፓላ ኔኒ፤³⁶ኣኔን ኦይንዻ ቆቤ ካሊዬን። ኦካ ሹቦ ኔኒ ዾዮክዻ፤³⁷ጋይሼያ ቶኬንካ ካሲሲዬን ኬና ሺጚ ይጛ ቢታካ ኣይሁድ።³⁸ውር ጓርጉ ዻ ጊታኬና ክየም ሻም ቡዎን ክየም ሻም ዋርካታዬ ሮያ ከጋጝ።³⁹ውር ጊታይ ሳጊኬ ጉዋር ይሬን ካሎኔ ይንግሼን እንግን ኤታጋኔ ሺጝ፤⁴⁰እን እጝ ሺጚ ሃኮሲ ቶኦካ ይሁኔኔ ከክያጝካ ሹ ጅያን ሃኣሽክባጝ፤ ይንዳ ባይሺሽየ እን ኤምኑ/ የኣይያ ውዋካ ባሪዮዻያጝ ይንዳ ጎብየ ከሮይኔን ክያኒ/ ሺጜን እያይ።⁴¹ታታቻንካ ውርካ ቃሼ ውርካ እርርሲኔንካ ክያጃ ባካ ሌሜኔ ጋይኬ ውር ጌጵሹጋኔ ጎልቲ እሺዬ ሺጜን እያጝ፤⁴²ባይሺሻ ውር እንቃ የካኒ ቻሊኬን እሺ ኤምኑ ባይሺሼን/ የኣይያ ቢቲካ እስራኤልያጝ ጎባ ጋን ከሮይኔን ክያኒ፤ ኡዋዻ ካጎምኬ ሻን።⁴³ኤርሜና ከውዋካ ባሪዮ ሺጜን፤ ናንዳካጝ ሺጜ የኣይ ውዋካ ባሪዮጝ ይንዳ ናሺያጝ ካባርሺሽዬ ጋን/⁴⁴ውር ጓርጉ ጊታይ ቁሜ ከጋጝዻ እያይ ሃሳወን ክያጃካ ይሬን።ኣርሼንካ ኢየሱስ⁴⁵ከሹሽ ቦኬ ሳዓት ላዌ ሌይ ኣዬ ሳዓት ሳሉጝ ዳሉጝ ክያኒ ማቲያ ድሙጉ።⁴⁶ሺጜ ሳዓት ሳል ሄክሼኑጝ፤ ኢየሱስ ሻም ናቅዲ ኔኒ ዼጌ ሺጝ፤ ኤሎሄ/ ኤሎሄ/ ለማ ሰብቅታኒዬ? ኡቹካ፤ ሆኮል ኔኒዻ ሺጝ፤ ኣምላክ ዮ፤ ኣምላክ ዮ፤ ሃኦ የኦይዴ ኣኑጝ? ሃኬና ሺጚ እያይ።⁴⁷ከጊታይ ጎሬ ኣኔን ኦይን ውር ክየም ክየም ዋዬ ኡቹካጝ ሺጝ፤ ሺወን ኤልያስ/⁴⁸ከኦግዬይዻ ውር ክየም ሪሼ ኩይ ይሪካዬ ቦው ሰነፈጌ እርሼ ኦካ ዝእያካ ኮምጣጤዬ፤ ሰነፈግዻ ሻምሼ ኦካ ጩዎኑካ ሻሪዬ ካማቶጝ ኣያ ኢየሱስ።⁴⁹ዬ ጊታይ ሺዽ ሺጝ፤ ይንዳ ኦይድዬ ኤልያስ ካኩዋዋ ባይሺሾጝ ሃጌያባ/⁵⁰ኢየሱስ ፕር ኡቹካ ከናቅዲ ኬና ኣይ ታቺ፤ ሳስክዬ ኣዬና ኡሲዻ።⁵¹ከሹ እን ማጋራጃካ ቶኦ ቦኬ ዾዮኬ ሃዽሼን ሌይ ዱቡ ዻ፤ ዳሊዻ ሁቡቤና፤ ባያንዻ ፓሊሲሜና።⁵²ሌሳን ቦወና፤ ጊታይ ራጴ ኣኔን ኦይንዻ ውር ጁዋኑካ ባሪዮ ናሹጛ፤⁵³ቱልኬ ሌሲ ክያኒዬ ከናሹጜንካ ኢየሱስ ጩዋ ሁሉክ ሃምካ ከተማካ ውርካ ይሁኔኔ ጌዬና ኦካ ውር ጁዋኑ።⁵⁴ታቺ እንካ ዽቤ ውር ጊታይ ጋዬ ከጋጜ ባኬን ኢየሱሴ ጌዬ እን ዳሊ ሁቡቡኔዬ ኦይን ሙኔኔ ፓይላጝ ሪግሼን ካሎኔ ሺጝ፤ ይጝ ከኣኩሉክ ሃውዋካ ባሪዮ/⁵⁵ጊታይ ፓዬንኬ ገሊላዬ ሃኣጚ ጁዋኑ ጊታይ ዻዬ ኢየሱስ ኦይን ዎሺሽ እሺ ኣሽክዬኑጝ ጎርኬ ዹኬ ቶዬን ዳቢ እኔ ጋኔባ ኦካ ራቅ እኑጝ።⁵⁶ከኦካ ጫቃን ጊዬይዻ ማሪያም እንካ መግደላዊዬ፤ ማሪያም ጁዋ ያዕቆቤ ዮሴፌ ፕር ጁዋኒኔካ ሃንታካ ዘብዴዎስ ጋኔባ ኦይን።ሌሲካ ኢየሱስ⁵⁷ከቃይ ውር ሆድሞ ኬና ሺጜ ዮሴፍ ኩና ከኣርማትያስ፤ እሺዻ ሃውርካ ዻይኔንካ ኢየሱስ።⁵⁸ኩይ ሃምካ ጲላጦሴ ይወና ሩዋካ ኢየሱስ፤ ካጋዬ እሹጝ ጲላጦስዻ ሜይሼና።⁵⁹ዮሴፍዻ ቦው ሩዋኔኒዬ ሳሪያ ከኣፓላ ጫንቃል፤⁶⁰ኣጁጛ ኦካ ሌሲ እን ኔኒ ቋዴ ባይ ክያኑጝ፤ ጩዋ ኡንጉል ባይ ታቺዬ ሃጌ ሃፑካ ሌሲዬ ኩያ።⁶¹ከሹ እን ማሪያም እንካ መግደላዊዬ ማሪያም ኑዋዌ ቆቤ ጋኔባ ዻርካ ሌሲ።ባክኔንካ ሌሲ⁶²ከዻም ከኦካ ሼክማካ ሹ እንካ ሶጵሳ ጩዋ፤ ሹ እን ኣኖጝ፤ ታታቻን ጊታይካ ቃሼ ውርካ ፈረሳውያኔ ፓዬን ኦካ ማሪካ ጲላጦሴ ሺጝ እያጝ፤⁶³ታቹጝ ዮ፤ እን ሺጜ እንካም ኡፓ ኬዻቆዬ፤ ከሹ ጅያን ጩዋ ሃናሹጝጓጝ ጌይሼያ ኡዋው ጶቅ፤⁶⁴ዬ ውር ጊታይ ዻዬ ጆሌ እሹጝ ካጓጉሬ ሩዋ ኔኒዬ፤ ካዋይሼ ዛርሲ ናሹጛ ከኣርሼን ክያኒዬ ካማር ድኬኔ ካባክቴ ሌሲ ሌይ ሃምካ ሹ እንካ ማክንሳጝ ኣይ ኡዋው ኤርጎ፤ ወይ ከሌሜን ጉዋዩ ማቲባ ጊያሚኔን ታቺ።⁶⁵ጲላጦስዻ ዋይሼ እንግን ባኪ⁶⁶

ሃፑክ 28ናሹጜንካ ኢየሱስ ከሌሲ ክያኒ¹ሹ እንካ ሶጵሳ ሳጊዮጝ ጩዋ፤ ከሹዋን ሹ እንካ ሌሜን ክራዻ ካኒ ሼሽኪኬኔ፤ ማሪያም እንካ መግደላዊዬ ማሪያም ኑዋዌ ፓይ ሌሲ ቶዬኔ።²ሉጉድ ማቲያ ሁቡቡኔንካ ዳሊ ታቺ፤ ውርካ ኤርጎካ ባሪዮዻ ጎብኬ ፎላ ዾዮኬ ኩዬ ኡንጉል ባዬ ኡፌያ ዾዮክ፤³ዴንታ ኔኒዻ ውይኬ ማኬንካ ጎት ሹቃ ኣፓላዻ ማቲያ ፎልቼን ከካ ጪራቲ።⁴ውር ጊታይካ ባኪኔንዻ ሪግሼን ውርካ ኤርጎካ ባሪዮዬ ሪጄና፤ ማቲያ ከውር ኮኑጝ ኣርሹጝ።⁵ውርካ ኤርጎካ ባሪዮዻ ዋይሼ ሃኣጚ ጊታይ እያጝ፤ ኦይዲ ሪግሺንቴን የዎሽቴ ኢየሱስ እን ሮዮጝ ሃእባጃያዬ፤⁶እሺ ኣኔኬን ኦጝ፤ ከእያይ ክያጆጝ ናሹጛ፤ ፓዬኔ ቶይባ ኦይን ኡጞጝ።⁷ጋይ ፓይ ይሪካዬ ዋይሺቴ ውር ጊታካ ዻይኔን ናሹጛ ከኣርሼን ክያኒ፤ ሌም እየወ ኩይባ ገሊላ፤ የጌያባ እሺ ሃሚን ሺጚ እያይኔ ሜይቴ እንግንባ። ኣኪ ሃሜይሼያ እየው/»⁸ሃኣጛንዻ ከሪግዬ ከዋዛዬ ፓዬ ውር ጊታይካ ዻይኔን ሜይሼን ጉኬ ፓይ ቤርቢዬ ጎይድ ኦይንካ ራቅካ ሌሲዬ ፓያ።⁹ይሪካ ኢየሱስ ሌምኔ እንግኔ ዋይሼ እንግን ሹቃ ካኣይሼባ እየው/ እንግንዻ ፓይ ሃምካ ኢየሱሴ ጎም ጃፍ ኔኒዬ ይወና።¹⁰ኢየሱዻ ዋይሼ እንግን፤ ኦይዲ ሪግሺንቴን፤ ፓይዬ ካፓዬ እያጝካ ገሊላጝ ሜይቴባ ጪኒጌን ጉዩዻ ጌይባ ኣን ሃሚን።ማኝ ኣዬንካ ውር ጊታይካ ባኪኔን¹¹ሃኣጛንዻ ጋኔንባ ጉዋር ክያኒዬ፤ ከኦካ ውር ጊታይካ ባኪኔን ጩዋማ ፓይ ሃምካ ከተማዬ ኦይን ሙኔን ፓይላ ሜይሼያ ታቺ እንካ ውርካ ቃሹጝ።¹²ታታቻንካ ውርካ ቃሽዻ ጋይኬ ውር ጌጵሹጋኔ ፑጪዬ ሃሳወና፤ ፓፃኗን ካቢሬ ጁዋኑ ኣዬን፤¹³ዋይሼ እንግን እያጝ፤ ሺጚ ሃኣኒና ራጴኔ ውር ጊታይካ ዻይኔን ፓዬኔ ኣጉራ።¹⁴ሃሳዋጝ ኣይን ታቺ እን ዋያጝ፤ ኡዋው ሃሜይቴ እሺባ ሹቃ፤ ክያጃ ጋራ ካማር እየው ሄክሼኔ ኡዋው ሃሻማባ።¹⁵ፓፃኗንዻ ቦወ ቢሬ ሻማ እያይ ጌርጊቴ እንግኑጝ ክያጃ እን ሌይ ጋን ከኦካ ውርካ ኣይሁድ ጌጳሲዬ ጋኔን ሻሚሺዬን።ይዕሲዬን ታቺ እን¹⁶ከኦይን ውርካ ዻይኔን ታጲካላን ፓያ ገሊላ ኦካ ጋግ እን ኢየሱስ ዹዋልሼ እንግኑጝ።¹⁷ሹ እን ጌዬዻ ይወና፤ ዬ ውር ዶክ ቃጋዽያ።¹⁸ኢየሱስዻ ኩይ ሃሚን ውርካ ዻይኔን ኣኔዬ ዋይሼ እንግን እያጝ፤ ጌጳሞ ፓይላ ከፎላዬ ከዳሊዬ ጋያ ኣን፤¹⁹ዬ ፓይዬ ዱቂ ዛርሲ ፓይላ ከሹኔ፣ ከውዋዌ ከሮጝካ ኡሲካ ባሪዮዬ ሻሚባ ውርካ ዻይኔን ናኒ፤²⁰እን የሜ

ሃፑክ 1ዮሐንስ እንካ ዱቅኔን ክልማ ኔኒ¹ውዋካ ባሪዮ፤ ክያጃ ሹቃ እንካ ሌሜን ካኢየሱስ ክርስቶስ።²ከውርካ ባርዮ ኢሳይያስ፤ ሺጝ እያጜ ቶኳ፤ እየዎ፤ እንካ ኣሽኪ ጉዋር ኑኑ ውርካ ኤርጎ ኬሌሜን ኑኑ ሃይዕሲባ።³እንካ ይግ ጉዋርካ ታቺ እጝ ኣሽክቴባ እንካ ይጌን ሺጝ እያይኔ ናቅድካ ውር እጝ ኡቹኪ ቦና ክያኑጝ።⁴ዬ እንካ ዱቅኔን ዮሐንስ ዱቅዬን ቦና ክያኒዬ፤ ክልዬን ዱቅኔን እንካ ሺዕሺኔንካ ሴሶዬ ኩና።⁵ውርካ ፔንካ ይሁዳ ኦይ ቆብሼዬ፤ ውርካ ኢየሩሳሌም ፓይላዬ ፓይ ሃም ኔኒዬ ሺዕሺዬን ሴሶዬ ዱቅዬና ከቡዋካ ዮሐንስ ኦካ ዳራካ ዮርዳኖስ።⁶ዮሐንስዻ ክም ጪራሺካ ጋማላ፤ ኬእልኮ ቁም ቃልሺ፤ ቃወን ካፍታዬ ይቲሬካ ቦናዬ።⁷ክልማ ኔኒዻ ሺጝ፤ ኣን ሃጌይ ኩፔ ካቡል ቁሜንካ ቻውያጝ ማራን ሁሉኩሼን፣ እጝ ሳጊኬ ኦናኒ ኬኣን ማ ኩንባ፤⁸ኣን ሃዱቅ እየውባ ከሙዋ እሺ ዱቅ እየውባ ኬኡሲካ ባሪዮ» ሃኬና ሺጝ እያይ።ዱቅኔንካ ኢየሱሴ ፓታኒዬኔ⁹ኬሹ እጝ ኢየሱስ ኩንኬ ኦካ ከተማ እጝ ኣይኬ ገሊላ ናዝሬቴ ዱቅዬና ኬቡዋካ ዮሐንስ ኦካ ዳራካ ዮርዳኖስ።¹⁰ኬሹ እጝ ቱሌ ኬሙዋ ክያኑጝ፤ ፎላ ቦወኔ፤ ኡሲካ ባሪዮ ማቲ ሆሌዬ ጎብሼ እሺዬ ጌያ።¹¹ናቅድ ኬና ሺጝ ውዋ እጝ ናኒ ሃናሺያ ሃእን ከእን ኦኬ ዋዝንሲያና ዋዬና ኬፎላ።¹²ይሪካ ኡሲካ ባሩዮ ቦሼያ እሺ ሃምካ ቦናጝ።¹³ፓታኒዬን ኬእጁጜ ኡፓ ሹ ኦይታም፤ ኡፕኬ ዳብዻ፤ ውርካ ባሪዮዻ ኣኔንኬ እሺ።እድዬን ካውር ጊታይ ካሌሜን ካዻያ ጆሌ እሹጝ¹⁴ቁሜ ዮሐንስ ጩዋ፤ ኢየሱስ ክልዬን ክያጃ ሹቃካ ባሪዮ ኩይ ገሊላዬ፤¹⁵ሺጝ ሹሽ ሄክሻ፤ ጌጳሞካ ባሪዮ ድያውቲሻ፤ ሻው ይሁኔን፤ ኬክያጃ ሹቃጝዻ ጉሚባ፤ ሺጝ እያይኔ ክልዬና።¹⁶ኢየሱስ ሳጊኬ ኦካ ቆጩርካ ኛፓስካ ገሊላያጝ፤ ስምዖኔ ጪኔ ኔኒ እንድያሴ ናንዳካጝ ጋዬ ውርካ ቆውኔንካ ኣርቶጝ፤ ሚጪሼ ኞፑቴይ ጊዬይ ኛፓስ ክያኒዬ ጌያ።¹⁷ኢየሱስ ዋይሼ እንግን ዻይቴ ኣንባ፤ ሃሻምባ እየው ኬና ካቆው ውር።¹⁸እንግንዻ ይሪካ ጎይድ ኞፑቴይ ጊዬይዬ ዻዬያ።¹⁹ሳጊዬ ዽታኬ ማም ጌይ ሃንታካ ዘብዴዎስ ያዕቆቤ ጪኔ ኔኒ ዮሐንሴ ቆብ ጋጊ ክያኒዬ ጋሽክዬን ኞፑቴይ ጊዬይዬ። ²⁰ይሪካ ሺዋ እንግን፤ እንግንዻ ጎቼ ሹቡጌኔ ውርካ ዋድማ ጊታይ ኣሽክኔ ጆል ካርሚ ጋጊ ክያኒዬ ዻዬያ።ኢየሱስ ቡላ ኡሲካ ጮዩ ²¹ኬኦይ ፓያ እያጝካ ቅፍርናሆም፤ ኢየሱስ ኬሹ እጝ ይሪካ ሁሉክ ሃምካ ቶኦካ ይሁኔኔ ካርሲያ እርርሲኔን። ²²ማርኬ እያኑጝ ቶኬዬኔ እርርሲዬን ኬውር ኮኑጝ ጌጳሲዮጝ፤ ዛርሲዻ ዻዹጝኔ እርርሲኔን ኔኒ።²³ኬሹ እጝ ኦካ ቶኦካ ይሁኔን ጊዬይ ውር ኬና ኣኔ ኡሲካ ጮዩ ሺጝ እያጜ ኡቹካ፤²⁴ኢይሱስ እንካ ናዝሬት ኬኦጉዋዩ የዎሾ? የኩኒ ኡዋው ካይሲዬኒ እን የኣዬ ኒን ሃእባጃያ፤ እን የኣይ ውዋካ ባሪዮ/»²⁵ኢየሱስዻ ሺጝ ኡፕ ሌዬ ቱልባ ኬኦኔኒዬ ጎሪያ።²⁶ኡሲካ ጮዩዻ ዳርጊሲዬ ውር እጝ ኬቁዋቅቱጝ ጩዋ ኡቹኬ ቱላ።²⁷ዛርሲ ፓይላ ዻዹጝ ኔዬ፤ ሺጝ እሻ ሃኦ? ሃእርርሲኔን ሃሊ እጝ ኣኔ ጌጳሞኪ/ ኣይን ኡሲካ ጮዩዻ ኤርጊትባ፤ እንግንዳ ቱልባ/» ሺጝ እያይኔ ጋንሻ ጋጝ።²⁸ይሪካ ጎሺ ኔኒ ሄክሻ ኦካ ራቅ ጊታይ ኣኔን ኦካ ገሊላ ፓይላ።ኢየሱስ ባይሺሻ ውር ጁዋኑ²⁹ይሪካ ቱልባ ኬቶኦካ ይሁኔን፤ እሺዬ ያዕቆቤ ዮሐንሴ ፓዬ ኩሉካ ሃምካ ቶኦካ ስምዖኔ እንድርያስ።³⁰ኣፕኔካ ስምዖን ሩዋ ቄጪሼ ዴሜኔ ኣኔን ኡጜን፤ ናንዳካ እን ዴምኖጝ ሜይሼያ እሺ፤³¹ዬ እሺዻ ኩይ ሃሚን ኡጜዬ ጎም ቡዋ ኔኒዬ ቲታ፤ቄጪቲካ ሩዋዻ ኦይዳ እሺ፤ ናሹጜ ካርሲያ እንግን ቾችንሺዬን።³²ጫቼንካ ሹሽዻ ጩዋ ዴቆጝ፤ ኬቃይ ጩዋ ውርካ ክራ እጝ ፓይላ ቦው ውር ጊታይ ካቡርቅዬ ጊታይ ቤሮ ጎሜዬ ቦሼያ ሃሚን ኔኑጝ።³³ዛርሲካ ከተማ እጝ ፓይላ ፑጭዬ ኣኔ ኦካ ሃፑካ ቶኦ።³⁴እሺዻ ባይሺሻ ውር ጁዋኑ ጊታይ ዴሜን ኬቡርቅ ዋናዋናጝ፤ ቡላ ቤሮ ጁዋኑዻ፤ ኣይባዬ ቤሮ ናንዳካጝ እባጄ ኣይንካ ኢየሱሱጝ ካሃሳውኖጝ ካኒ ኣይኬን እንግን።ኢየሱስ ይወና ኦካ ራቅ ኬና ውር ማሬ ኣኔን³⁵ካሪንታዻ ካኒ ክራ ሃርሽኬኔ፤ ኢየሱስ ናሹጜ ቱላ ኬቶኦ፤ ኩይ ኦካ ራቅ ክየሜ ካርሲያ ይሁኔን።³⁶ስምዖኔ ባይዳን ኔኒዬ ዻዬ እሺዬ ካርስያ ዎሼን፤³⁷ሹ እጝ ጌዮጝ ዋይሼ እሺ ውር ፓይላ ዎሽ እምባ።³⁸እሺዻ ዋይሼ እንግን ካናሹጜ ካፓይባ ኦካ ጶሮክ ጊታጝ ኣኔን ድያው፤ ካክሊይንቴባ ኦይን፤ ሃኩኖጝ ሃናንዳካ እጝ።³⁹ዬ ሁሉክ ኦጉዋይካ ቶኦካ ይሁኔኔ ኬክኢየሱስ ባይሺሻ ውር እጝ ኣን ቡርቅካ ጊዮጝ⁴⁰ውር ክየም ኬና ጎማ ቡርቅካ ጊዬ ቶኬ ኩዋሚን ኦካ ማሪ ኔኒዬ ሺጝ የናሺሼያ ኣንያጝ የቻሊባይ ኣን ጫንቃል ሻሜን» ሺጝ እያይኔ ይወና።⁴¹ኢየሱስዻ ዻዹጝኔ ውር እጜ ቲት ቡዋ ኔኒዬ ዱሜ፤ ሺጝ ሃናሺባ ጌይባ ጫንቃል።⁴²እሺዻ ይሪካ ኬኦካ ቡርቅካ ጊዬ ጌያ ጫንቃል፣ ባይሻዻ።⁴³ኢየሱስዻ ካሎን ኣጅሺሽ ውር እጜ ሺጝ እያጜ ይዕሲያ፤⁴⁴ክያጃ ክየምጵንዻ ከማር ውር ሜይሼኔ ኣጅሼባ፤ ኣይባዬ ካኣይሼ እንግን ማኝዬ ካሜ ዹዋልሼ እን ኤምኑ ውርካ ቃሽ፤ ናንዳካ ጫንቃል ጌዬን ኑኑ ኣሽክባ ጋላባ ሙሴ ክያጆጝ» ሺጝ እያይ።⁴⁵ዬ ውር እጝ ኦካጝ ኩዮጝ ክያጃ እጝ ፓይላ ሃሳውሼያ ራቅ ጊታይ፤ ሃሳዋዻ ሻማ ፒሽካ። ናንዳካ እጝ ኢየሱስ ኦካ ከተማ ኒንዻ ኬጃ ሁሉኬን ካኒ ቻልኬን፤ እጝ ናሹጝ ኬኦጝ ካርሲያ ኦካ ራቅ ጊታይ ኣኔን ኬኦካ ከተማ ዋስ ኡፔን፤ ዬ ውር ካኒ ጱዽኬን ኬኦይን ቆቦጝ ሃም ኔኒ ፓይሼን።

ሃፑክ 2ኢየሱስ ባይሺሻ ውር ኤላ እጝ¹ከሹ ጩዋማ ጩዋ ኢየሱስ ዋካ ቅፍርናሆም፤ ሁሉኬ ሃምካ ቶኦጝ ዛርሲ ዋያ።²ዬ ኦይንካ ሃፑክ ሹኑክዻ ሺዽኬኔ ራቅ እጝ ሌይ ሃም ሆላካ ካይዮጝ ዛርሲ ጁዋኑ ፑኡሺሜና፤ እሺዻ ክሊያ እንግን ክያጃካ ባሪዮ።³ውር ጩዋማ ዶክ ዼትሽ ውር ኤላ ክየም ውር ኣሁሬ ቦፓይኔያ ሃሚን ኔኑጝ።⁴እጝ ናሹጝኬ ጁዋኑ ኣዬንካ ዛርሱጝ ኦይን ኢየሱስ ኣኖጝ ሄክሼን ናንዳካጝ ማሬ ቻሊዬን፤ ሌፍ ዾዮኬ ዻሪ እጝ እሺ ኣኖጝ ኮሲ ቆርቆሮዬ ጋይሼ ሆላዬ ኤሪ ኤላ እጝ ኬኣልጋ እጝ ኡጞጝ ሃንቺሺያ።⁵ኢየሱስዻ ጌይ ይሁኔን ጊዬይዬ ዋይሼ ኤሪ ኤላ እጝ፤ እን ውዋጝ ሴሶ ኑኑ ሺዕሺሼያ እን/።⁶ውር ጊታይ ቶክኔ ጆል ወርቀቴ ውር ጊታይ ቆቤ ኣኔን ኦይን ውር ክየም ክየም ናንዳካ ክያጃ እጝ ቃቢኬ ሻኔ፤⁷ሺጝ ውሩጝ ሺጝ እያን እያይ? ይንጌ ኣንሼን ኣምላክ ክያጃካ ይሪኔን ሃሳወን ኬኦካ ባሪዮ ክየም እጝ ሃኒን ካቻሊ ሴሶ ሺዕሺሺዬኑጝ? ሺጝ እያይኔ ቃቢያ።⁸ኢየሱስዻ ይሪካ እባጅ እጝ ቃቢዬኬ ሸን ኬኡሲዬ፤ ሺጝ የቃቢያ እያን እያይ?⁹ካዋይሼ ኤሪ ኤላጝ ሺዕሺሼያ እን ሴሶ ኑኑዬ፤ ናሹጜ ዼት ኣልጋ ኑኑዬ ካምባዬ ሃና ኣይ ባዶጝ?¹⁰ኣይባዬ ሃንታካ ውር ዳሉጝ ክያኑጝ ሴሶ ሺዕሺዬን ጌጳሞ ኣኖጝ ካጊባጅባዬ ዋይሼ ኤሪ ኤላ፤¹¹ናሹጜ ዼት ኣልጋ ኑኑዬ ካምባ ሃምካ ቶኦ ኑኑጝ።¹²እሺዻ ናሹጜ ውር ፓይላዻ ቶይባዬ ዼት ኣልጋዬ ኩያ፤ ውር ጊታይ ኣኔን ኦካ ክራ እጝ ናንዳካ ዳቢ እጝ ዻዹጝኔዬ፤ ሺጝ ኦኬና ኣኔን እያጝ ሃምባዬ ሃጌያ እባጃኬኔ ጌጳሲያ ባሪዮ።ሺወንካ ሌዊ¹³ፕር ኢየሱስ ኩያ ሃምካ ላቅካ ኛፓስ፤ ዛርሲዻ ኬጁዋንቲ ፓያ ሃሚን ኔኑጝ፤ እሺዻ እርርሲያ እንግን።¹⁴ሳጊኬ ጉዋይዻያጝ ጌይ ውዋካ እልፊዮስ ሌውይ ኡፕ ኦኑጝ ጋይኔ ጆሌ ጊቢሪዬ፤ ዋይሼ እሺ ዻዬ ኣምባ፤ እሺዻ ናሹጜ ዻዬያ።¹⁵ኣኔንባ ሃምካ ቶኦካ ሌዊ ኡፔኔ፤ ናንዳካጝ ውር ጁዋኑ ጊታይ ፑኡሺኔ ጆል ጊቢሪዬ ካሴሶዬ ናንዳካጝ ዻዮጝ፤ ጋኔን ኬኢየሱሴ ውር ጊታይ ዻዬ ጆሌ እሺዬ ኣሚኔን።¹⁶ከውርካ ፈረሳውዬ ውር ጊታይ ቶክኔ ጆል ወርቀቴ ሹ እጝ ኢየሱስ ኣሚኔ ከውር ጊታይ ፑኡሺኔ ጆል ጊቢሪዬ ካሴሶዬ ጌዮጝ፤ ሺጝ ሃኦ? ኣሚኔ ኬውር ጊታይ ፑኡሺኔ ጆል ጊቢሪዬ ካሴሶዬ ጋንሻ ውር ጊታይ ዻዬ ጆሌ እሹጝ።¹⁷ኢየሱስዻ ዋይ እጝ ክያጄዬ፤«ኣክንሲዬን ዎሺሽ ጊታይ ዴሜን ዬ ማር ናንዳካ ጊታይ ኣይ ፓኬን፤ ኣን ሃኩኖጝ ሃጊታይካ ሴሶጝ ዬ ጊታይ ኣይ ጫንቃል ሃካ ኩንኬን ሺወን፤ ዋይሼ እንግን እያይ።ናንዳካ ቶሮንዽዬን ኣንሺኔን እጝ ኩኑጝ¹⁸ውር ጊታይ ዻዬ ጆሌ ዮሐንሴ ጊታይካ ፈረሳውዬ ኣኔን ቶሮንዽዬን ፤ ውር ክየም ክየም ፓዬኔ ዋይሼ ኢየሱስ፤ ውር ጊታይ ዻዬ ጆሌ ዮሐንሴ ካፈረሳውያኔ ቶሮንዽያጝ ውር ጊታይ ዻዬ ጆሌ እን ካማሬ ቶሮንዽዬን ሃኦ?¹⁹ኢየሱስዻ ዋይሼ እንግን እያጝ፤ ኡታ ኣኔባ ኬእንጊኔ ጊታይካ ኡታ ቻሊባይ ቶሮንዽዬን? ኡታ ኣኔባ ኬእንግኔ ቻሊኬን ቶሮዽዬን፤²⁰ሹ እጝ ካቦወ ኡታ ኬኦጊዬይ ኩንባ፤ ዬ ኬሹ እጝ ቶሮንዽባ።²¹ውር ኬና ካቻክሼ ኣፓላ ሃሊ ጌቾ ክያኒ ኣኔኬን፤ ዬ ሻማ እያይንያጝ ኣፓላ ሃሊ እጝ ቦጉጓ ኣፓላ ጌቾ እጝ፤ ሃዽሺኔን ኔኒዻ ጌጳዽዬ ቻክባ።²²ፕር ኣላላ ሃሊ ውር ኬና ካኣጁጝ ኬቷንዳ ጌቾ ኣኔኬን፤ ሻማ እያይንያጝ ኣላላ ጳሲባ ቷንዳ፤ ኣላላዻ ጊያሚሺሿ ቷንዳ፤ ዬ ኣላላ ሃሊ ኣጁጜን ኒንካ ኣኖጝ ሃኬ ቷንዳ ሃሊ።ኢየሱስ ሃታቺካ ሶጵሳ²³ከሹካ ሶጵሳ ኢየሱስ ኣኔንኬ ቅያኒ ሳጊዬን፤ ውር ጊታይ ዻዬ ጆሌ እሹዬ ጋኒኔ ኬጋጝ ፓዬን ካርሲያ ቲሺ ቱሼን።²⁴ውርካ ፈረሳውያንዻ ሺጝ፤ እየዎ፤ ሃኦ የኣሽክቴ ኦይን ሃርጊኔ ኬሹካ ሶጵሳጝ? ሺጝ እያይኔ ጋንሼና።²⁵እሺዻ ዋይሼ እንግን እያጝ፤ ሹ እጝ ዳዊት ካሽ ቃወ እሺዬ ዳዓኖ ኣሜን ፎሽክዬ እሺዬ ኣሽኪዬ ኬውር ጊታይ ጋዬኬ ጋጝ ዬካኔ ኮማኬኒ?²⁶ኬቦንካ ውርካ ቃሽ ሁሉክ ሃምካ ቶኦካ ይሁኔኔ፤ እጝ ሺጜ ካኣማ ውርካ ቃሽጵን ምሽ እጝ እሺ ኣሜ ኣያ ውር ጊታይ ጋዬኬ ጋጝ።²⁷ፕር ዋይሼ እንግን እያጝ፤ ሹ እንካ ሶጵሳ ሙኒሼ ውር ዬ ውር ካኒ ሙኒሼኬን ሹ እንካ ሶጵሳጝ፤²⁸

ሃፑክ 3¹ከሹ እንቃ ሁሉካ ቶኦካ ይሁኔን፤ ኦይን ኣና ውር ኬና ቡዋ ቱፑኒኒ።²ከክያጃ ውር ጊታይ ዎሺ እሺ ካሲሲዬን እጝ ባይሺሺኔ ከሹ እንካ ሶጵሳ ቶዬን ጋን ካሊዬን።³እሺዻ ዋይሼ ውር እጝ ቱፑኔን ቡዋ፤ ቡዋ ናሹጜ ኩዋው ዮጝካ ሌሜን።⁴ኢየሱስዻ ሺጝ፤ ሹ እንካ ሶጵሳ ጋይና ሹቃ ኣሽክዬን ሞ ጋራ? ዻቆ ዻሺዬን ሞ ካይሲዬን? እንግንዻ ቆባ ሹይ።⁵ዻዹጝኔ ማኒትካ ሻን ጊዬይዬ ቶይ ጊታይ ጎሪ ማራማራ ጊዬይ ኬማኒቴ ዋይሼ ውር እጝ ቲት ቡዋ ኑኑ/» ውር እንዻ ቲታ ቡዋ ኔኒ፤ ቡዋ ኔኒዻ ካሎን ማቲያ ሹቃ።⁶ውር ጊታይካ ፈረሳውያንዻ ሻም እያን ካካሲሲዬ እሹጝ ካርሲያ ኬውር ጊታይካ ሄሮድስ ሃሳውኔን።ውር ጁዋኑ ዻዬያ ኢየሱስ⁷ኢየሱስ ከውር ጊታይ ዻዬ ጆሌ እሺጝ ኩያ ሃምካ ኛፓስ፤ ዛርሲ ጁዋኑ ጊታኬና ፓዬንኬ ገሊላዻ ዻዬያ።⁸ኦግታይ ኣሽክዮጝ ውር ጊታይ ዋዩጝ ካይሁዳ፣ ካኢየሩሳሌም፣ ካኤዶምያስ፣ ከውርካ ፔን ጊታይ ኣኔን ኦካ ዳራካ ዮርዳኖስ ታቶጝ ፕር ካጥሮስ ካራቅ ጊታይካ ሲዶና ፓዬና ሃምኔኑጝ።⁹ዛርሲ ጊታይ ፑኡሺሜኔ ኣኖጝ ካሪጊሺሽባዬ ኤርጊታ ውር ጊታይ ዻዬ ጆሌ እሹጝ ካጋሽኪ ጋጊ ዽታኬዬ።¹⁰ናንዳካጝ ባይሺሼ ውር ጁዋኑጝ፤ ካዱም ውር ጊታይ ጋሊዬን ኬቡርቅዬ ኣኔን ዋሺዬ ኩዬን።¹¹ኡሲካ ጮዩዻ ጌዬ እሹጝ ቡድ ኦካ ማሪ ኔኒዬ ሺጝ እን የኣይ ውዋካ ባሪዮዬ/ ጋኔን ኡቹኬን።¹²ዬ እሺ ካማር ኣዬን ኔኒ ክያጄኔ ካሎን ኣኔን እንግን ጎሪዬን።ጌጳሲዬንካ ውር ታጵ ላማን¹³ኢየሱስ ሌፍ ጋጌ ጊታይ ዎሾጝ ካፓዬን ኦኔኒዬ ሺዋ፤ እንግንዻ ፓይኔ ሃሚን ኔኑጝ፤¹⁴ካኣይኬ እሺዬ፤ ካይዕሲ ክሊማዬ ጌጳሲያ እንግን ታጵላማን፤ ሺጝ ሐዋርያቴ ሺዋ እንግን።¹⁵ካቡል ቤሮዬ ኣያ እንግን ጌጳሞ።¹⁶ውር ታጵላማን ጊታይ ጌጳሲዬዻ ሃጊታጝ፤ እጝ ሺጜ ጴጥሮሴ ሺዎጝ ስምዖን፣¹⁷ይጝ ቦኦኔርጌስ ጊታይ ሺጜ ሃንታካ ጉጉናቴ ሺዎጝ ሃንታካ ዘብዴዎስ ያዕቆቤ ጪኔ ዮሐንሴ፣¹⁸እንድርያስ፣ ፊልጶስ፣ በርቴሎሜዎስ፣ ማቴዎስ፣ ቶማስ፣ ውዋካ እልፍዮስ ያዕቆብ፣ ታዴዎስ፣ እንካ ቦውንታ ስምዖን፣¹⁹ፕር እን ሳስክዬ ኣዬን ኣስቆርቱ ይሁዳ።ኢየሱሴ ብዔል ዜቡሌ²⁰ከኦይን ጩዋ ኢየሱስ ሁሉካ ቶኦ ክየም፤ እሺዬ ውር ጊታይ ዻዬ ጆሌ እሺዬ ሌይ ሃም ዳዓኖ ኣሜንካ ካወ እንግን ዛርሲ እንቃ ከጁዋንቲ ፑጪያ።²¹ኤዳን ጊታይ ኔኒ ዋዬ ኣዬን እጝ ጌርሺኔያ ቃቦ ጊዬይ ሺጝ እያይኔ ቦ እሺዬ ቦፓዬያ ሃሚን ኣኖጝ።²²ውር ጊታይ ቶክኔ ጆል ወርቀት ፓዬንኬ ኢየሩሳሌም፤ ሺጝ ብዔል ዜቡል ኡጜያ፤ ሺጝ ቤሮ ካቡሎጝ ሃኬ ታቺካ ቤሮ።²³እሺዻ ሺው እንግኔ ዋይሼ እንግን ኬሄክንሶ እያጝ፤ እጁጝ ሻም እያን ካቡሌ እጁጙጝ?²⁴ታታቺ ጊታይ ካሺ ጋጝ ቻሊኬን ቁዋቅቲሼን፤²⁵ቶኦዻ ላልያ ጋጝያግ ቻሊኬን ዾሬን።²⁶ኬእያይ እጁጝ ላሊ ጋጜ ሃኦኬና ካሺሚኔያጝ ቻሊኬን ጎሬን፤ ፎትሽባ።²⁷እጝ ናሹጝ ኬኦጝ ውር ክየም ሌምሼ ቁምኬን እን ኣይ ቁዋቃዬ ቻሊኬ ቶኦካ ውር ቁዋቃ እጝ ሁሉኬ ኣንቲቲ ሆቼን፤ ካቻሊዬ ቶኦ ኔኒ ሆቼን ቁማ ውር ቁዋቃ እንያጝ ጊያ።²⁸ሃዋይሼባ እየው ኣኩሉክ፤ ሴሶካ ሃንታካ ውሬ ይሬን እጝ ይሪኔዬ ፓይላ ሺዕሺባ፤²⁹ኣይባዬ ውር እጝ ሃሳውሼ ኡሲካ ባሪዮ ክያኒ ሃሳዋካ ይሬኑጝ ቦንኬቦን ማቲሼባ ውርካ ባጃካ ሴሶ ዬ ቦንኬቦን ሺዕሺሼኬን።³⁰ኡሲካ ጮዩ ኬና ሺጚ እያይ ኣኔባ።ጁዋኔካ ኢየሱሴ ጪኒጋን ኔኒዬ³¹ከኦይን ጩዋ ጁዋኔ ዬ ጪኒጌን ኔኒዬ ፓዬና፤ ጎር ሹኑኬ ይዕሲ ውሬ ሺውሻ።³²ውር ጁዋኑ ጊታይ ጎሪ ማራማራ፤ ሺጝ እየዎ፤ ጁኔ ጪኒጌን ኑኑዬ ዎሽ እምባ።³³እሺዻ ዋሼ ሺጝ ጁዋኔ ናኒ ሃኒን ጪኒጌን ናኒካ ሃጊታጝካ ኒን?³⁴ቶይ ውር ጊታይ ቆብ ማራማራዬ ሺጝ እያጝ ጁዋኔ ናኒዬ ጪኒጌን ናኒዬ ሃጊታጝ።³⁵እጝ ኣሽኪ ክያጃካ ባሪዮ ፓይላ እሺ ሃጪኔ ናኒዬ፣ ጪኔ ናኒ ካእጛሼ እናዬ።

ሃፑክ 4ሄክንሶካ ጴንታ¹ከሹ እንቃ ጩዋ ካርሲያ ኦካ ላቅካ ኛፓስ እርርሲዬን። ኦይን እሺ ኣኖጝ ናንዳካጝ ዛርሲ ጁዋኑ ፑኡሺምኖጝ፤ ሁሉክ ኦካ ጋጊ እጝ ኣኔን ኛፓስ ክያኒዬ ኡፓ፤ ዛርሲ ፓይላ ጊታይ ኣኔን ኦካ ማራካ ኛፓስ እጝ ፑጭያ።²እሺዻ እርርሲያ እንግን ኦኬ ጁዋኑ ኬሄክንሶ፤ ዋይሼ እንግን እያጝ፤³ዋይባ፤ ውር ክየም ናሹጝ እያይ ጴንታ ኮሬን።⁴ሹ እጝ ኮሬ ጴንታጝ ክየም ፓቄን ጉዋር ማራ፤ ኩባር ፓዬኔ ቆዾሜ ቁጅ።⁵እንቃ ፓቄን ኦኬና ዳሊ ጁዋኑ ማሬ ኣኔን ኦካ ራቅካ ባይ፤ ናንዳካጝ ዳሊ ጁዋኑ ማሬ ኣኔን ፎት ይሪካ፤⁶ዬ ሹ እጝ ሹሽ ቱሎጝ ሩጴ፤ ናንዳካጝ ጊሜይ ማሬ ኣኔኑጝ ቁዋቅሻ።⁷ጴንታ እንቃ ፓቄን ኦካ ጫቃንካ ክዽሬ፤ ክዽሬዻ ጌጵሼ ናንዳካጝ ሃጅሼ ሩቡ እጝ ዱቡጝ ካኒ ኡፑትኬን ካርቡ።⁸ጴንታ ዾክ ናንዳካጝ ፓቅኔ ዳሊ ሹቃ ክያኑጝ፤ ፎቴ ጌጵሻ፤ ኡፑታ ካርቡዻ፤ ክየም ማካንታም፣ ክየም ላታም፣ ክየም ዽብ።⁹ጩዋ ኢየሱስ ሺጝ ካጝ ኣኔ ናቡጝ ካዋይባ።¹⁰ሹ እጝ ኣዬ እሺጵን፤ ውር ታጵላማን ጊታይ ዻዬ ጆሌ እሺዬ ውር እንቃ ጊታይ ጋዬ ኬጋጜ ናንዳካ ሄክንሶ እጝ ጋንሼና።¹¹እሺዻ ዋይሼ እንግን ናንዳካ እየው ጋያ ክያጃካ ጌጳሞካ ባሪዮ እባጄን፤ ዬ ናንዳካ ጊታይ ኣኔን ሹኑክ ከሄክንሶ ሜይሼባ፤¹²እንዳ፤ ጌዬን ጌይባዬ ካማሬ ጶቅሲዬን፤ ዋዬንዻ ዋይባዬ ማሬ ኬሸን ጎሜን።¹³ጩዋ ኢየሱስ ዋይሼ እንግን እያጝ፤ ሄክንሶጝ የካኔ እባጃኬኒ? ኣኪ ሄክንሶ እንቃ ፓይላ የሻማ እያን ከእባጅቶጝ?¹⁴ኮሬን ኮር ክያጃ።¹⁵ውር ክየም ክየም ሙኔን ጴንታ ኮኑጝ ፓቄን ጉዋር ክያኑጝ፤ ሹ እጝ ዋዬ ክያጃጝ ይሪካ እጁጝ ኩኔ ቦባ ክያጃ እጝ ኮሬ ሻን ጊዬይ ቱዎጝ።¹⁶ፕር ዶክ ሙኔን ጴንታ ኮኑጝ ኮሬ ባይ ክያኑጝ፤ ሹ እጝ ዋዬ ክያጃጝ ይሪካ ቦባ ኬዋዛ፤¹⁷ኣይባዬ ናንዳካጝ ማሬ ጊሜይ ኣኔኑጝ ካቆቤ ካሹ ጩዋማጵን፤ ናንዳካ ክያጃ እጝ ኦኬ ጋራ ወይ ጋሎ ሹካጝ ኩኖጝ ይሪካ ሻውባ ጋሎ ክያኒ።¹⁸እንቃ ፕር ሙኔን ጴንታ ኮኑጝ ኮሬ ክዽሬ ክያኑጝ፤ ክያጃ ዋዬን ዋይባ፤¹⁹ኣይባዬ ክያጃካ ፔኑጝ ቱሌን ሻውን፤ ሆድማሞ ፑኡሺዬን ፕር ከኦኬ እንቃ ኣንግርዽዬን ክያጃ ቦውዬ ጎሜን ካማር ካርቡ ኡፑቴኔ ሻምባ።²⁰ዶክ ሙኔን ጴንታ ኮኑጝ ኮሬ ዳሊ ሹቃ ክያኑጝ፤ ጊታይ ሃጊታይ ካዋይ ክያጃዬ ካቦዌ ካኡፑት ካርቡጝ፤ ክየም ማካንታም፣ ክየም ላታም፣ ክየም ዽብ።ሄክንሶካ ፓኖስ እጝ ኣኔን ካራም ዾዮክ²¹ዋይሼ እንግን እያጝ፤ የቦፓንቴ ፓኖሴ ከድኬን ወይ ኦካ ኣልጋ ዱቡ የኣጁጛባይ? ከኣጁጝቴ ማር ካራም ዾዮኬኒ?²²ዬ እን ድኬ ማሬ ዹዋልሺኔን፤ እን ጅጜዬ ማሬ ኦሜሌል ቡልሼን ኣኔኬን፤²³ዋይባ ካጝ ናቡ ኣኖጝ ካዋይባ።²⁴ኬዻይሼን ኦይን ኬዋይቶጝ ኣጅሽቴባ ኦካ ሳፋሪዬን ካጝ የሳፋሪቶ ሳፋሪሼ እየውባ፤ ፕር ኬኦይን ሳጊ ሌሜ እየውባ።²⁵እን ኣኖጝ ሌሜባ፤ ዬ እንቃ እን ማር ኣኔን ክያኒ፤ እያይ እን ኣኔዻ ቦባ።ሄክንሶካ ጴንታ እጝ ጌጲሹጝ²⁶ጩዋ ኢየሱስ ዋይሼ እንግን እያጝ፤ ጌኣሞካ ባሪዮ ሙኔን ይጝ፤ ውር ክየም ኮር ጴንታ ዳሊ ክያኒ።²⁷ውር እጝ ከሚክር ኡጝጓ ከሹሽ ናሹጝጓ፤ ኣይባዬ እሺ ካኒ እባጅ ኬኔ ጴንታ እጝ ፎቴ ጌጵሻ፤²⁸እሺ ዳሊዻ ኬሌንካ ሲሪካ ፎቴንካ ሩቡ፤ ጩዋ ቃል ይግኔ፤ ከኦይን ቃሎጝ ጌይሼባ ካርቡ ኬና ኡፑቲ፤²⁹ካርቡ ኔኒዻ ኬእያይ እግሾጝ ቁዋቅሼን ኔኒ ሄክሾጝ ይሪካ ናሹጝ ፓቲዬኔ ካርሲባ ፓቲዬን።ሄክንሶካ ሆልጆሆልጆ³⁰ፕር ሺጝ እያጝ፤ ጌጳሞካ ባሪዮ ሃሄክንሲያ ኬኦ? ሞ ሃክያጃኬ ሄክንሶካ ኦ?³¹ኬኦካ ጴንታ ጊታይ ኮሬ ኦካ ዳሉጝ ካሎን እን ኣይ ሃይሻይሹጝ ሙኔን ካርቡካ ሆልጆሆልጆ፤³²ዬ ኮሬ ፎታያጝ ጩዋ፤ ኬኦካ ኦጊታይ ኮሬዬ ኣኔን ኦይን ፓይላ ሳጊባ፤ ኩባርካ ፎላዻ ቆባ ኦካ ቃቅቴን ታታቺ ጊታይካ ሻሩጝ።³³ኢየሱስዻ ኬእያይ ዎሽ ውር ኬልሺዬን፤ ኬሄክንሶ ጁዋኑ ጊታኬና ኣኔን እያይ ሜይሼያ እንግን።³⁴ኦኬ ክየምጵንዻ ማርኬ ሄክንሶ ኣዬኔ ሜይሼኬን እንግን፤ ዬ ሹካጝ ኣዬ እሺዬ ውር ጊታይ ዻዬ ጆሌ እሺጲኑጝ ክያጅኢየሱስ ሪባ ሄሌቆን³⁵ከሹ እጝ ቃይትሾጝ፤ ዋይሼ እንግን ካቁዋልሼን ታቴ።³⁶እንግንዻ ጎይድ ዛርሲዬ ቦ ጊታይ ኣኔን ጋጊ ክያኒዬ ፓያ፤ ጋጊ እንቃ ኣኔባ ኬእንግን።³⁷ከሹ እጝ ፑጉ ቁዋቃ ካሳይሌ ናሹጛ፤ ሄሌቆንዻ ሌይ ሃም ሙዋ ካቆቄ ጋጉጝ ኣኔን ጋጊ ይንጊሼን።³⁸ዬ ኢየሱስ ኣሽክሼ ኦካ ኡጜኔ ኡጜ ኣኔ ኦካ ጋጊ ታካ፤ እንግንዻ ጬይሻ፤ ሺጝ ውርካ እርርሲዬን ይጝ ጉዋዩ ዮ፤ ይጝ ሃጃክንቶጝ የጌይኬኒ?³⁹እሺዻ ናሹጜ ጎርያ፤ ዋይሼ ኛፓስ ጌይ ሹይ።⁴⁰ዋይሼ ውር ጊታይ ዻዬ ጆሌ እሺ፤ ሃናንዳካ ኦ የሪግሺንቴ እያጝ? ሌይ ኣይህ ሹጝ ይሁኔን ጉዩ ኣኔኬኒ? ዋይሼ እንግን እያይ።⁴¹እንግንዻ ሪግሼና፤ ዋይሼ ጋጝ ውሩጝ ሪቢሺ ሄሌቆን ሃኒኔ? ሃሳወና ኬጋጝ።

ሃፑክ 5ባይሺሼንካ ውር እጝ ቤሮ ጎሞጝ¹ቁዋሌን ኛፓሴ ፓያ ፔን እጝ ሺጜ ጌንሳሬጥ።²ኢየሱስ ጎባ ኬጋጊ ክያኒ፤ ውር ኬና ኡሲካ ቤሮ ጎሜ ቱልኬ ኦይን ቱቱኬ ውሬ ካጌይ እሺባዬ ኩና ሃሚን ኔኑጝ።³ውሩጝ ሃውር ኬና ኣኒኔ ጆል ኦኑጝካ ሌሲዬ ውር ክየምጵንዻ እሺ ኬሳንሳላ ቁሜን ሃኬና ማሬ ቻሊዬን።⁴ሹ ጁዋኑ ጃፍ ኔኒ ቃማ ኬዛውዬ ሳንሳላዬ፤ ኣይባዬ ሳንሳላ እንካ ቡዋ ኑሽባ ዛው እንካ ጃፍ ጩጩካ፣ ውር ክየምጵንዻ እሺ ጎሜ ኡፑሼን ካኒ ኣይኬን ኬና ካቻሊሚንቴ።⁵ኦጉዋይካ ሌሲዬ ጋጌ ሺሪዬ ኡቹኬኔ ኣኔን ሩዋ ኔኒ ኬባይ ቆሁዌን።⁶ውሩጝዻ ሹ እጝ ጌዬ ኢየሱስ ኬዹኩጝ ሪሼ ኩን ኦኔኒዬ ቶኬ ኩዋምኔ ይወና፤⁷ኡቹክ ኬናቅድ ታቺዻዬ ሺጝ፤ እን ታቺ ውዋጝካ ባሪዮ ኢየሱስ ዮ፤ ኣን ኬእን ኣና ኦ? ኬማር ኣን ጋልንሺዬ ኬባሪዮ ሃኩያ።⁸ሺጝ እያይ፤ ኢየሱስ ሺጝ እን ኡሲካ ጮዩ ከኦካ ኤሩጝ ቱልባ?»⁹ጩዋ ኢየሱስ ሺጝ ሮጝ ኑኑ ሃኒኔ ኣንሼና፤ እሺዻ ሺጝ ሃኣያ ጁዋኑዬ ሮጝ ናና ሌጌዎን።¹⁰ካማር እንግን ኬፔን ቡሌኔ ካሎን ይወና።¹¹ኦካ ጉርባ ኬና ጌዬን ድያው ኣኔ ኦካ ራጴን ታቺ ኬና ኣይካ ቾፑ።¹²ኡሲ ጊታይ ካጮዩዻ ዋይሼ ኢየሱስ ይዕሲሼ ኡዋው ሃምካ ቾፑዬ ካሻውባዬ ናሺሼ ኡዋባ ሺጝ እያይኔ ይወና።¹³እሺዻ ናሺሼያ እንግን። ኡሲካ ጮዩዻ ቱሌ ሻዋ ሃምካ ቾፑጝ፤ ኒሽ ቾፑ ሺ ዻዌ ዝልንሲዬ ኦይን ካቶጌ ጎብ ባይኔ ሻው ኛፓሴ ዱቁሜና።¹⁴ጊታይካ ዻውኔን ጉኬ ፓያ፤ ሃሳዋ ጊታይ ሄክሺሻ ኦጉዋይካ ከተማዬ ካጶሮክ ጊታይ ኣኔን ኬከተማ ዹኬ፤ ዛርሲዻ ኦይን ሙኔን ቶዬን ኬኦይን ኣኖጝ ፓዬና።¹⁵ሹ እጝ ፓይኔ ኦካ ኢየሱስዻጝ፤ ውር እጝ ቤሮ ጎሞጝ ክሚሽ ኣፓላዬ ዋኬ ኡፕ ኬእንግን ኦይኔ ጌዬ፤ ሪግሼና።¹⁶ይጝ ውር ጊታይ ጌዮጝ ናንዳካ ውር እጝ ቤሮ ጎሜ ጋሽክዬ ናንዳካ ቾፓኔ ሃሳውሼያ ዛርሲ።¹⁷ጩዋ ዛርሲ ካኦይዻ ፓዬ ፔን ጊዬዩጝ ካርሲያ ኢየሱስ ይሁኔን።¹⁸ኢየሱስ ሹ እጝ ሁሉኬ ጋጉጝ፤ ውር እጝ ቤሮ ጎሞጝ ኣንሼና ኬእሺ ኩዬን።¹⁹ዬ ኢየሱስ ካኒ ናሺሼኬን እሺ፤ ኣይባዬ ካምባ ሃምካ ቶኦ ኑኑጝ፤ ሜይሼባ ኤዳ ኑኑ ታቺ እጝ ኦታቺ እጝ ኣሽክሼ እኔ ኦሹቃ እጝ ዹዋልሼ እኔ።²⁰ውር እንዻ ኩያ፤ ኦግታይ ኢየሱስ ኣሽክሼ እሹጝ ካርሲያ ኦካ ከተማ እጝ ሺጜ ዐሥር ፔን እጝ ክያኒ ሃሳወን፤ ጊታይ ዋይዻ ፓይላ ጎሺያ።ውዋ እጝ ኣርሺዬ ኝያ እጝ ዴሜኔ²¹ፕር ኬጋጊ ሹ እጝ ቁዋልሺኔ ታቶጝ፤ ዛርሲ ጁዋኑ ፑኡሺሜና ማራማራ፤ ጋኔንባ ኦይንካ ላቅካ ኛፓሴ፤²²ኬኦካ ታታቻንካ ቶኦካ ይሁኔን ክየም እጝ ሺጜ ኢያኢሮስ ናንዳካጝ ኩኔ ዮጝ፤ ሹ እጝ ጌዬ ኢየሱሱጝ ቡድ ኦካ ጃፍ ኔኒዬ፤²³ሺጝ ውዋ ዽታኬ እን ናኑጝ ሄክሻ ኦይካ ቶካ ኣርሼኔ፤ ባይሺሽባ ካኡፕኬ ዳቆዬ ኩዋዌ ኣይሼ ቡዋ ኑኑ» ሺጝ እያይኔ ካሎን ይወና።²⁴ኢየሱስዻ ኩያ ኬእሺ። ዛርሲ ጁዋኑዻ ማራማራ ይቄን ጋጜ ኣኔን እሺ ዻዬን።²⁵ኦይን ኣና ኝያ ኬና ኒያቡ እሬን ቦን ታጵላማ፤²⁶ከውር ጁዋኑ ጊታይካ ዼሻ ጋሊዬኔ እን ኣኖጝ ፓይላ ሹዋጵሼ ቡርቂ፤ ሃኬ ኦይ ቃቢዮጝ ዬ ካኒ ኣጊኬን።²⁷ሹ እጝ ዋዬ ናንዳካ ኢየሱሱጝ፤ ከኦካ ጫቃንካ ውር ኩንኬ ታካ ሁሬ ዱማ ኣፓላ ኔኒ።²⁸ናንዳካኦ ኣኔ ቃቦ ኬና ሺጜ ሃዱሚያ ኣፓላ ኔኒጵንዻያጝ ሃባይሽባ።²⁹ኒያቡ እን ኔኒ ሜሌን ይሪካ ዾራ፤ ኬጋሎ ዳርጊኔንዻ እባጃ ኬሩዋዻ።³⁰ይሪካ ናንዳካጝ ኢየሱስ ቁዋቅቲ ቱሌ ኬኦኔኒ እባጃ፤ ሁቤን ሃምካ ዛርሲዬ፤ ሺጝ ሃኒን ዱሚ ኣፓላ ናኑጝ?³¹ውር ጊታይ ዻዬ ጆሌ እሺዻ ሺጝ ዛርሲ ኣኔንባ ጋጝ ይቄኔ ሃናንዳካኦ? የሺጜ ሃኒን ዱሚ ኣኑጝ?³²ዬ ኢየሱስ ውር እጝ ሻሚ እያይ ጌዬን ኣኔን ማራማራ ቶዬን።³³ኝያ እንዻ ኣሽክ ኦ ሹ እን እባጆጝ ሪግሼኔ ሪጄ ኩኔ ቶኬያ ኩዋምን ኦካ ማሪ ኔኒ፤ ኣኩሉክዻ ፓይላ ክያጃ።³⁴እሺዻ ዋይሼ እሺ፤ ውዋ ናኒዮ፤ ይሁኔን ኑኑ ባይሺሻ እን፤ ካምባ ኬሹቃ፤ ኬጋሎ ኑኑዻ ቦባ ኡሲ።³⁵ኢየሱስ ኣኔንባ ሃሳውኔኔ፤ ውር ፓዬንኬ ሃምካ ቶኦካ ታቺ እንካ ቶኦካ ይሁኔኔ ኢያኢሮስ ሺጝ ውዋ ናኒ ኣርሻ ዬ ኣኪ ውርካ እርርሲዬኑጝ ዮ፤ ሃናንዳካኦ የዻቾጝ? ሺጝ እያይ።³⁶ዬ ኢየሱስ እባጃ እጝ ውር ሃሳወዬ ዋይሼ ታቺ እንካ ቶኦካ ይሁኔን ይሁንቴ ይሁኔንጵን ዬ ኦይሪግሺኔን።³⁷ከጴጥሮስ ከያዕቆ ፕር ከጪኔካ ያዕቆብ ዮሐንሴ እንቃ ውር ክየምጵንዻ ካዻዮጝ ካኒ ናሺኬን።³⁸ኢየሱስ ሄክሽባ ሃምካ ቶኦካ ታቺ እንካ ቶኦካ ይሁኔን፤ ኢየሱስ ውር ኣኔን እንቶኤ ሺጜኔ ኦቆርኔኔ ጌያ።³⁹ሁሉክ ሃምንካ ቶኦዻዬ፤ ይጝ ፓይላ ኦቆራዬ ሞይካዾዬ ሃኦ? ዋይሼ እንግን ውዋ እጝ ኡጛ ዬ ካኒ ኣርሽኬን።⁴⁰ውር ፓይላ ጫጋ እሺ። ቡሌ ውር ፓይላ ኬቶኦጝ ጩዋ፤ ሹኔካ ውዋዌ ጁዋኔካ ውዋዌ ፕር ከውር ጊታይ ጋዬ ኬጋጜ ዻዬ ጆሌ እሹጝ ሌይ ሃምካ ሺጞጝ ሁሉካ ሃሚን ውዋ ኣኖጝ።⁴¹ጩዋ ጎም ቡዋካ ውዋ እጜ ሺጝ ናሹጜ ዾርባ/ ሃሳዋ ኔኒዻ ሺጝ እን ውዋጝ ሃዋይሼባ እን ናሹጝጋ።⁴²ውዋ እንዻ ይሪካ ናሹጜ ዾራ፤ ኩይሼያ እያጜ ዮጜ፤ ቦን ኔኒዻ ሃታጲላማ፤ ውርዻ ናንዳካ ዳቢ እጝ ካሎን ጎሺያ።⁴³እሺዻ ክያጃ እጝ ካማር ውር ክየምጵንዻ ሜይሼኔ ካሎን ኣጅሻ እንግን፤ ሺጝ ኦካ ኣሜን ኣኔያጝ ካጋይባዬ ሜይሼያ እንግን።

ሃፑክ 6ውርካ ባሪዮ ሪግሼንኬን ኬፔን¹ከኦይን ጩዋ ኢየሱስ ናሹጜ ኩያ ሃምካ ፔን እጝ ጌጵሾጝ፤ ውር ጊታይ ዻዬ ጆሌ እሺዻ ዻዬያ እሺ።²ሹ እንካ ሶጵሳ ሄክሾጝ፤ ካርሲያ ኦካ ቶኦካ ይሁኔን እርርሲዬን፤ ውር ጁዋኑ ጊታይ ዋይዻ ጎሺያ። እንግንዻ ሺጝ፤ ውሩጝ ጌይኬ ኦን ካያጃ ጊታጝ? ይጝ ጋይኔ እባጄን ኔና ኦ? ፕር ኦኬ ሹቃሹቃ ጊታጝ ኣሽኪ እያን ኬቡዋ ኔኒ?³ይጝ ማር እጝ ጻጵዬኔኒ? ማር ውዋካ ማርያም፣ ካያዕቆቤ ካዮሴፌ፣ ካይሁዳዬ ካጪኔካ ስምዖን ኔኒ? ጪንጌን ኔኒካ ካኒ ጋኔኬኒ ኬኡዋው ኦጝ? እን ናሹጝ ኬእንዻ ሁሉካ ጋራ ክያኒ።⁴ኢየሱስዻ ሺጝ፤ ውርካ ባሪዮ ካማሬ ሪግሺኔኑጝ ሃኦካ ፔን ኔኒዬ፤ ከኦካ ጫቃንካ ኤዳ ኔኒጵኔ» ዋይሼ እንግን እያይ።⁵ኬኦይን ውር ጩዋማ ጊታይካ ቡርቅ ባይሺሼ እንቃ ካኣሽክዬ ኦኬ ሹቃ እንቃ ካኒ ቻሊኬን፤⁶ኬእጝ ማሬ ይሁኔንዻ ጎሺያ።ኢየሱስ ይዕሲያ ውር ታጵላማንከኦይን ኢየሱስ ኦጉዋይካ ጶሮክ ኣኔን ሺሪዬ እርርሲዬን።⁷ሺውሼ ውር ታጵላማን ኦኔኒዬ፤ ይዕሲያ ዻ፤ዻ፤ ናንዳካ ኡሲካ ጮዩ ኣያ እንግን ጌጳሞ።⁸ኣያ እንግን ክያጃጝ፤ ናንዳካ ጉዋር ጉዩ ከኦካ ሴጋ እንቃ፤ ምሽ ወይ ኮኒሽ ወይ ፕር ኦይዲ ቤሬዻ ጎምቴን፤⁹ዾቅቴባ ቻኩ፤ ኣይባዬ፤ ኦኬ ኦኬ ዻ ከቡዋ ቆቃ ኦይዲ ክምቴን፤¹⁰ሹካጝ የሁሉክቴ ኦካ ከተማ ክየም ሌይ ሃምኬ ቱልቴ ኬኦካ ከተማ እጝ ቆቢባ ኦይን።¹¹ኣያ ራቅካጝ ማሬ እየው ቦወኔ ዋይሺኔንያጝ የቱላያ ከኦካ ራቅ እንያጝ ካማቲሼ እንግን ማኝዬ ቡቡኒ እጝ ኣኔን ኦካ ጃፍ ጉዩ ዱቡጝ ክሽክሺባ ኦይን።¹²እንግንዻ ቱልኬ ኦይኔ ውር ካሁሉክ ይሁኔኔ ክሊዬና፤¹³ቡልሻ ቤሮ ጁዋኑ፤ ውርካ ቡርቂ ጁዋኑዻ ጵሽኬ ዋቃቲዬ ባይሺሻ።ኒቄንካ ዮሐንስ እንካ ዱቅኔን¹⁴ሮጝካ ኢየሱስ ጋንባ እባጄ ፓዬኔ፤ ሄሮድስ ታቺ እን ዋያ እጝ። ውር ክየም ክየም ሺጝ፤ ይጝ ኣሽኪ ዳቢ ሹቃጝ ኬእሹጝ፤ እንካ ዱቅኔን ዮሐንስ ናሹጝ ኬኣርሼን ክያንያጝ ጊያ» ሺጜን እያይ።¹⁵እንቃዻ ሺጜን ሃኤልያስ። ውር ክየም ክየም ፕር ሺጝ ሃውርካ ባሪዮ።¹⁶ዬ ሄሮድስ ዋይ ክያጃ እንያጝ፤ ሺጝ ናሹጛ ዮሐንስ እን ሃኒቂሾጝ ኬኣርሼን ክያኒ።¹⁷እሺ ሄሮድስ ናንዳካ ኝያካ ጪኔ ፊልጶስ ሄሮድያድ እያኒሼን፤ ካጎማ ቁሞጝ ኣዬን ክያጃዬ ዾቅሺሻ ዮሐንስ ቶኦካ ቁሜን፤¹⁸ዮሐንስዻ ሄሮድስ ካእያኒሼ ኝያካ ጪኖጝ ኬክያጃ ሃርግኔያ ሺጜን እያይ።¹⁹ሄሮድያድዻ ናንዳካ ክያጃ እጝ ጎምኬ ሸኔ ዎሺሽ ኒሺሼን፤ ኣይባዬ ካኒ ኣይሼኬን እሺ።²⁰ናንዳካኦ ዮሐንስ ኣዬ ጫንቃሌ ኣዬ ውርካ ባሪዮጝ ሄሮድስ እባጄ ሪግሼኔ ኣኔን ካሊዬን፤ እን ዮሐንስ ክያጆጝ ዋዬ ሄሮድስ ኬሪግዻ ኣኔንኬ ዋዛ ዋዬን።²¹ኬቱንሲዻ ኩና ከሹ እጝ ሄክንድ፤ ሄሮድስ ሻምሼያ ሹ እጝ ጅሼ እሺዬ ውር ጊታይ ኣኔ ጌጳሞ ዼጌ፤ ጊታይካ ፓሬ ውር ታታቺ ጊታይ ጊባጄ ገሊላዬ ኣማ።²²ሹ እጝ ውዋካ ሄሮድያድ ሁሉኬ ባጚኖጝ ዋዝንሲያ ውር ጊታይ ቾቺንሺዮጝ ታቺ እንዻ ዋይሼ ውዋ እን ኦይን የዎሼ ፓይላ ኣንሽ ኣምባ ሃኣይ እንባ፤²³ፕር ኣይኒን ሌይ ሃምካ ጌጳሞ ናኑጝ፤ እጜ የኣንሼ ኣን ፓይላ ሃኣይ እንባ ሺጝ እያይኔ ሁሉክሼያ እሺ ቃቦ።²⁴እሺ ጋን ካቱላ ዋይሼ ጁዋኔ ኦ? ሺጚሼ እሺ እያይ። ጁዋኔዻ ሺጝ ሹቦካ ዮሐንስ እንካ ዱቅኔን።²⁵ውዋ እንዻ ይሪካ ቤርቢዬ ዋካ ሃምካ ቢቲ እጝ፤ ሺጝ ጋን ኬኣይቴ ኣን ሹቦካ ዮሐንስ ኬቆሼ ሃዎሺያ።²⁶ቢቲ እንዻ ናንዳካ ክያጃ እጝ ካሎን ሞይካዽያ፤ ኦካ ማሪካ ኮመና ካካሪሲዬ ክያጃ እጝ ካኒ ዎሽኬን።²⁷ዬ ይዕሲያ ፓፃኖ ክየም ይሪካ ካቃጫ ቦኩኔ ሹባ ዮሐንሱጝ ኤርጊታ፤ እሺዻ ኩዬ ኦካ ቶኦካ ቁሜን ቱዎጝ ቃጭ ሹቦካ ዮሐንሴ፤²⁸ቦኩኔ ከቆሼዬ ኣያ ውዋ እጝ፤ ውዋ እንዻ ኣያ ጁዋኔ።²⁹ውር ጊታይ ዻዬ ጆሌ ዮሐንስዻ ዋይባ እጝ ፓዬና፤ ቦው ሩዋ ኔኒዻዬ ቱቱካ። ኢየሱስ ኣሚሻ ውር ሺ ቾን³⁰ውር ታጵላማንዻ ፑኡሽሜን ኦካ ማራማራካ ኢየሱሴ ክያጃ ኦጊታይ ጋሽክዬዬ ጊርርሲዬዬ።³¹ናንዳካ ውር ጁዋኑ ኣኒኔ ፓይኔኔ ፓዬኔ ኣይን ዳዓኖ ኣሜንዻ ናንዳካጝ ሹሽ ማሬ ኣኔኑጝ፤ ሺጝ ይንዳ እየውጵን ኬኣን ካፓይ ራቅክየም ኬና ውር ውር ማሬ ኣኔን ካቦው ኡሲ።³²ዬ እንግንጵን ፓያ ራቅክየም ኬና ውር ማሬ ኣ³³እንግንዻ ፓዮጝ ውር ጁዋኑ ጌዬ ጊባጃ፤ ጊታይ ኣኔን ኦካ ከተማ እጝ ሌሜ ጉኬ ጃፌ ሄክሻ።³⁴ኢየሱስ ሹ እጝ ሺጜ ጋጊ ኮሊሼን ዛርሲ ጁዋኑ ፑኡሺሜኔ ጌያ፤ ሁዬኬ ማድር ኮኑጝ ማር ውርካ ዳሁኔን ኣኔን ዻዹጝኔያ እንግን፤ ካርሲያ እንግን ኦኬ ጁዋኑዻ እርርሲዬን።³⁵ሹሽዻ ቃይቲሼ ኩዮጝ ውር ጊታይ ዻዬ ጆሌ እሹጝ ፓዬን ኦኔኒዬ ዋይሼ እሺ፤ ራቁጝ ሃቦና፤ ሹሽዻ ቃይቲሻ፤³⁶ካፓይ ክራጝ ውር ኣኔ ክያኒዬ ካጉዋሩጝ ኦካ ኣሜኔ ካጋሜንባዬ ይዕሲባ ዛርሲ።³⁷ዬ እሺ ዋሼ ሺጝ ኣይባ እን እየው ኬኣምቶጝ «እንግንዻ ሺጝ፤ ካፓያ ኡዋሩጝ ኬሺሊንጊ ዻ ሚሼ ካኣይ እንግንባ እንካ ጋሞጝ ካኣይያይ?³⁸እሺዻ ዋይሼ እንግን ኣና ባላሻ አኸ? ዋይሼ እንግን ይንዳ ፓዬ ቶህየ።³⁹ከኦይን ጩዋ ዛርሲ ካቆባ ኦካ ሹጩ ኬና ኣይ ጫጉሬዬ ካካሺ እንግንባ ኬጋጜ ኤርጊታ እንግን።⁴⁰ዛርሲዻ ካሺሜን ዽብ ዽቤ ዶጝታም ዶጝታሜ ቆባ ኬጋጝ።⁴¹እሺዻ ቦው ባላሻ ቾናኔ ኣርቴ ዻዋኔ ቶይ ፎላዬ ኡዋና፤ ጩክ ባላሻዻዬ ካቦሼ እንግንባዻዬ ኣያ ውር ጊታይ ዻዬ ጆሌ እሹጝ፤ ኣርቴ ዻዋንዻ ካሺሼያ ውር ፓይላ።⁴²ውር ፓይላ ኣሜ ናዓሻ፤⁴³ውር ጊታይ ዻዬ ጆሌ እሺዻ ከኦካ ባላሻ እጝ ጋሜዬ ኣርቴዬ ፑርፆፑርፆ ቆዻሜ ቆቁሻ ቋሼ ታጵላማ።⁴⁴ውር ጊታይ ኣሚ ባላሻ እንዻ ሃጁሙ ሺ ቾን።ኢየሱስ ኛፓስ ክያኒ ኩያ ኬጃፍ⁴⁵እሺ ይሪካ ኣኔንባ ዛርሲ ይዕሲዬኔ፤ ውር ጊታይ ዻዬ ጆሌ እሹጝ ኬጋጊ ካሌማ ቁዋሌን ቤተ ሳይዳዬ ኤርጊታ እንግን።⁴⁶ጩዋ ኦይድ ኦይድ እንግኔ ሌፓ ሃምካ ጋግ ይሁኔን።⁴⁷ሹ እጝ ቃይቲሾጝ ጋጊ ኣኔን ኛፓስ ጫቃን፤ ኢየሱስ እሺጵን ኣኔን ዻሊ ክያኒ።⁴⁸ፑጉ ናንዳካጝ ኣኒኔ እንግን ጁጉዬኑጝ፤ ውር ጊታይ ዻዬ ጆሌ እሹጝ ዳርጊዬን ኬይባዬ ጌያ፤ ከሚክር እንካ ኦይድሳጝ ኡጜ፤ ኩይኬ ኛፓሴ ሄክሼ ሃሚን ጊዬዩጝ ኣኔንኬ ቆጩር ጊዬይ ሳጊዬ ኩዬን።⁴⁹ኣይባዬ ሹ እጝ ኩዬ ኬኛፓሴ ጌዮጝ ዋሽኬ ኦኮኑጝ ካኦይዴ እንግኔ ጉቹካ፤⁵⁰ፓይላ ሹ እን ጌዬ እሹጝ ቴርጋዽያ። እሺዻ ይሪካ ሃሳውኔ እንግኔ፤ ዋይሼ እንግን ይጝ/ ሃኣን ኦይድ ሪጊሺንቴን።⁵¹እሺዻ ሌፍ ጋጊ ክያኒዬ ኡፓ ኬእንግን፤ ፑጉዻ ኦይዳ ፑጌን፤ እንግንዻ ካሎን ጎሺያ፤⁵²ካኒ ጶቅሲኬን ሹቃ ናካ ባላሻዬ፤ ሸን ጊዬይ ኣርሼ ጊያ ኡፔ።⁵³ሹ እጝ ቁዋሊኖጝ ሄክሻ ጌንሳሬጤ ጎባ፤ ጋጊ እንዻ ሪባ ኦይን።⁵⁴ይሪካ ጎባ ኬጋጊ ክያኒ ዛርሲ እባጃ ኢየሱስ፤⁵⁵ውርካ ክራ እጝ ፓይላ ኬጉኬን ዼት ውር ጊታይካ ቡርቅ ኬኣልጋዬ ጋኔን ኦይ እሺ ኣኖጝ ቦፓይኔን።⁵⁶ኦካ ጶሮክ ጊታካጝ ሄክሼዬ ወይ ከተማዬ ወይ ጶሮክ ጊታይ ኣኔን ኬከተማ ሹኑኬ ፓይላ ጋጁጝ ውርካ ቡርቂ ጳል ክያኒዬ ኣይን ጩሆኑ ካኣፓላጝ ዱሜን ጋኔን ይሁኔን፤ ጊታይ ዱሚዻ ፓይላ ጋኔን ባይሼን።

ሃፑክ 7ኢየሱስ ሚኔያ ክያጃ እንካ ኣይሁድ ካሹኑክ¹ከኦይን ጩዋ ውርካ ፈረሳውያኔ ውር ጊታይ ፓዬንኬ ኢየሩሳሌሜ ውር ክየም ክየም ጊታይ ቶክኔ ጆል ወርቀቴ ፑኡሺሜና ማራማራ፤²ውር ጊታይ ዻዬ ጆሌ እሹጝ ጌይ ውር ጊታይ ጋሜን ምሽ ኬቡዋ ኬና ማሬ ጫንቃ ሻሜን ወይ ኬና ማሬ ኡዋኔን፤³ውርካ ፈረሳውዬ ካኣይሁዴ ፓይላ ሺጝ ጊሎካ ሹቡጌን ካሊዬንያጝ፤ ኬክያጃ እጝ ሊኪ ማር ቡዋ ጊዬይ ኬኣጅቱም ኡዋኔንያጝ ጋምኬኔ፤⁴ዋካኬ ሃምካ ራቅካ ኡዋሩጝያጝ ሮኮኔ ማራ እንግን ኤታጋን ጫንቃል ሻሜንያጝ ጋምኬን፤ ፕር ሞቃ፣ ጁ፣ ቋሼዬ ኣልጋዬ ጊታይ ኣይካ ጊሎ እንቃ ካሊባ።⁵ውርካ ፈረሳውዬ ውር ጊታይ ቶክኔ ጆል ወርቀቴ ዋይሼ ኢየሱስ ውር ጊታጝ ዻዬ ጆሌ እኑጝ ኬጊሎካ ሹቡጋን ቆቤን ሃናንዳካኦ ጋሚኔ ኬቡዋ እጝ ማሬ ኡዋኔኑጝ? ሺጝ እያይኔ ጋንሼና።⁶እሺዻ ሺጝ እያጜ ዋሻ፤ ኢሳይያስ ናንዳካ እየው፤ ናንዳካ ኣጁጋን ኬሊኪ ሃሳዋ፤ ሺጝ እያጜ ቶካዬ፤ «ዛርሱጝ ሪጊሼን ኣን ኬፎዾሮ፤ ዬ ሸን ጊዬይ ኬኦናኒ ኣኔን ዹክ፤⁷ይወን ኣን ኬማም እያይ፤ እርርሲዬን ጊዬይዻ ሃኦጊታይ ውር ኣሽክዬጵን።⁸ዬኦይዳያ ኤርጎካ ባሪዮዬ የቶይና ጊሎካ ውሬ ዴንታዬ።⁹ፕር ዋይሼ እንግን እያጝ፤ የሺጛያ ጊሎ ጉዩ ካሊዬንያጝ፤ እያይ ኬኦይቴ ኤርጎካ ባሪዮ ኣኔባ።¹⁰ሙሴ ሺጝ፤ ሪግሺንቴባ ሹቡኔ ጁኔ፤ ውር እን ይሪ ሹኔ ወይ ጁዋኖጝ ካሎን ካኣርሽባ ሺጛ እያይኔ፤¹¹ዬ እየው ውር ክየም ሹኔ ወይ ጁዋኔ ኬኣን ጌዬን ሃእንካ ሁሉክ እንካ ኬልሾ ፓይላ ሃኦጝ ቁርባን ሃሻሚያ ኦካ ቡሌን የሺጛ እያይኔ፤¹²እየውዻ ውሩጝ ኣይን ሹኖጝ ኣይን ጁዋኖጝ ኬኦጝ ጩዋ ኦኬ ክየምጵንዻ ኣሽክቶጝ የናሺቴኬን።¹³ዬ ጊሎ እጝ የሳስኪቴ ጅሼን ኬውሩጝ የሚንቴያ ክያጃካ ባሪዮ፤ ይንዳ እጝ ሙኔን ዬኣሽክያባ ኦኬ ጁዋኑ/።¹⁴ፕር ኢየሱ ሽውሼ ዛርሲ ሃሚን ኔኒዬ ዋይሼ እንግን እያጝ፤ ዋይሼን ኣምባ፤ እየው ፓይላ ጶቅሲባ፤¹⁵ኦኬ ክየምጵንዻ ኬና ካሁልኬ ሹኑኬ ካጮይሽ ውር ኣኔኬን፤ ሳጊ ካጮይሽ ውር ሃእጝ ቱልኬ ኦኑኑዬ ቱልሼ ሹኑኩጝ፤¹⁶ዋይባ ካጝ ኣኔ ናቡ ካዋይባ።¹⁷ኦይዴ ዛርሲዬ ሁሉኬ ቶኦጝ ጩዋ ናንዳካ ሄክንሶናጝ ጋንሻ ውር ጊታይ ዻዬ ጆሌ እሹጝ።¹⁸እሺዻ ዋይሼ እንግን ክያጃጝ ካኒ ሁሉክሼኬኒ እየው? ኦኬ ክየምጵንዻ ኬና ካሁሉክ ኬሹኑክ ሃምካ ውሬ ካቻሊ ጮይሼን ኣኔኬን፤¹⁹ማር ሃምካ ሻኔ ሁሉክ ሃምካ ክያጝ፤ ጩዋ ቱልባ ኬሩዋዌ። ኢየሱስ ሺጜ እያይ ምሽ ፓይላ ኣዬ ጫንቃል ክያጃ።²⁰ፕር ሺጝ እያጝ፤ እን ቱልኬ ኦካ ሁሩጝ እን ጮይሽባ ውር፤²¹ኬቱዎጝ እጝ ቱልኬ ሻንካ ውር ቃቦ ጋራ፤ ኣንግርማ፣ ጎር፣ ውር ኒሼን፣ ኩጳሞ፤²²ዛልንሲዬን፣ ጋራ ኣሽክዬን፣ ውር ኡጙሼን፣ ቦውንታ፣ ሮጝ ካይሲዬን፣ ቶልታሞ ሃጊታይ።²³ክያጃ ጊታይ ፓይላ ቱልኬ ኦካ ውር ጮይሽባ ውርዻ።ኝያ እንካ ሲሮፊኒቃዊ²⁴ጩዋ ናሹጝ ኬኦይኔ ኩያ ፔንካ ጥሮስ፤ ሁሉክ ቶኦ ክየሜ ኦይን ኡፔን ዎሽ እን ውር ክየምጵንዻ ካማሬ እሺ ጌዬን፤ ኣይባዻዬ ኦይ ኡፎጝ ካኒ ቻሊኬን ራሺኔን።²⁵ዬ ይሪካ ኝያ ክየም እጝ ውዋ ዽታኬ እንኔኑጝ ጎማ ኡሲካ ጮዩጝ ዋይ ናንዳካ እሺዬ ኩኔ ቡዳ ኦካ ጃፍ ኔኒ።²⁶ኝያ እንዻ ሃውርካ ግርኬ፤ ኬጅሼን ኔኒ ሺጝ ሲሮፊኒቃዊ፤ እሺዻ ኢየሱስ ካቡል ቤሮ ኬኦካ ውዋ ኔኒዬ ይወና።²⁷ዬ እሺ፤ዋይሼ እሺ፤ ባላሻካ ሃንታ ኑኑ ቦዌ ክያኒ ኣዬን ናንዳካጝ ማሬ ሊኪ ኣዬኑጝ ኬሌሜን ሃንታ ካኣማ ናዓሽባ።²⁸እሺዻ ዋሼ ሺጝ፤ ይንጌ፤ ታቹጝ ዮ፤ ክያኒ ቆብ ኦይንካ ሻወን ዱቡዬ ኣሜን ፑርፆፑርፆ ካሃንታ።²⁹እሺ ዋይሼ እሺ«ዬ ሺጝያጝ እንያጝ ካምባ፤ ቤሮ ቱላ ኬኦካ ውዋ ኑኑ።³⁰እሺዻ ዋክ ሃምካ ቶኦያጝ ውዋ ኔኒ ኡጝ ኣልጋ ክያኒዬ ቤሮዻ ኦቼዬ ጌያ።ባይሼንካ ዱጛ እጜ ዱዺ እጜ³¹ኬኦይን ኢየሱስ ናሹጝ ኬፔንካ ጥሮሴ፤ ሻምኬ ዳራካ ሲዶናዬ ከኦካ ፔንካ ከተማ እጝ ሺጜ ዐሥር ሳጊዬ ኩና ኛፓስካ ገሊላ።³²ጩዋ ውር ቦፓይኔያ ሃምን ኔኒ ውር እጝ ኣይ ዱጋዬ ዱዺዬ፤ ካኣይሼ ቡዋዻዬ ይወና።³³ኢየሱስ ሻም ውር እጝ ኬኦካ ዛርሲዬ ቦኩዮጝ ጩዋ፤ ዾቅሼያ ቡዋ ኔኒ ናቡ ቱዎጝ፤ ጩዋ ሺጝ ካፓልቅባዬ ዱማ ካትካ ውር እጝ።³⁴ቶይ ፎላዬ ሺጝ ቃታታና «ኤፍታህ/ እጝ ሺጝ ቦወና።³⁵ይሪካ ናቡ ኔኒዻ ቦወና፤ ቡል ካት ኔኒዻዬ ካርሲያ ሃሳውኔን።³⁶ኢየሱስዻ ዳቢ እጝ ካማር ክየምጵንዻ ሜይሼኔ ኤርግታ፤ ኣይባዬ ከእያይ እሺ ካማሬ ሃሳወኔ ሜይሾጝ፤ ክያጃ እጝ ሻሚሺዬ ሃሳዋ።³⁷ዛርሲዻ ኬኦይ ሳጊ ጎሺዬ ሺጝ ኦይን ኣሽክዬ ፓይላ ሃሹቃ፤ ዱጛንዻ ዋይባ፣ ኣይን ዱዻንዻ ሻማ እያይካ ሃሳውኖጝ።

ሃፑክ 8ኢየሱስ ኣሚሻ ውር ሺ ኣሁር¹ከሹ እጝ፤ እንቃ ዛርሲ ጁዋኑ ፑኡሽሜና፤ ኦኬ ክየምጵንዻ ኬና ካጋሜ ናንዳካጝ ማሬ ኣኔኑጝ ሺውሼ ውር ጊታይ ዻዬ ጆሌ እሺ ሃሚን ኔኒዬ ዋይሼ እንግን እያጝ፤²ናንዳካግ ድቢኔካ ኣን ሹ ጅያኔ ኦካ ኣሜን ጊዬይዻ ናንዳካጝ ማሬ ኣኔኑጝ ውር ጊታጝ ሃዻዹጝኔያ፤³እያጝ ካሽ ቃወ እንግን ሃይዕሲሼያ እንግን ሃምካ ቶኦ ጊዬዩጝ ውር ክየም ክየም ናንዳካጝ ፓይኔኬ ዹኩጝ ጉዋር ክያኒ ካቲሜኔ ቡድባ።⁴ውር ጊታይ ዻዬ ጆሌ እሹጝ ዋሼ ሺጝ፤ ኬቦናጝ ክያኒ ምሽ እጝ ካኣምሽቴ ጊታጝ ጌይኬ ኦን?⁵እሺዻ ሺጝ ኣና ባላሻ ኣኽዌ ኣንሻ እንግን፤ እንግንዻ ሺጝ ሶጳ።⁶እሺዻ ዛርሲ ካቆብ ኬዳሊዬ ሜይሼያ፤ ቦው ባላሻ ሶጳኔ ይሁሺኖጝ ጩዋ ካጋይ ውሬ ኣያ ውር ጊታይ ዻዬ ጆሌ እሹጝ፤ እንግንዻ ጋያ ዛርሲ።⁷ፕር ኣና ኣርቴ ሃይሻይሺ ጊታኬና፤ እሺዻ ይሁሼን ኣርቴ ጊታይኔ ካጋ እንግንባዬ ሜይሼያ እንግን።⁸ዛርሲዻ ኣሜ ናዓሻ፤ ጩዋ ውር ጊታይ ዻዬ ጆሌ እሹጝ ፑርፆፑርፆ ጊታይ ሺዺ ቋዻሜ ቋቂሽ ቋሼ ሶጳ፤⁹ኦይን ኣና ውር ሺ ኣሁር፤ ይዕሲዬ እንግን ጩዋ፤¹⁰ከውር ጊታይ ዻዬ ጆሌ እሺ ፓያ ፔን እጝ ሺጜ ዳልማኑታ ኬጋጊ።¹¹ፈረሳውያን ቱሌ ካርሲያ ከኢየሱስ ዜርሚኔን። ዎሽ እሺ ፓታንሲየኔ ካዹዋልሼ እንግን ኦኬ ኬፎላ ዾዮኬ ጋንሼና።¹²እሺዻ ካሎን ዎርጊኔ ኡሱጝ፤ ሺጝ ጅሼን ይጝ ሃናንዳካኦ ኣንሺኔ ኦኬ ዹዋልሺኔን? ሃሺጝ ኣኩሉክ፤ ናንዳካ ጅሼኑጝ ዹዋልሺኔን ክየምጵንዻ ሃኣይኬን /¹³ጩዋ ኦይድ እንግኔ ቁዋልሼና ታቴ ኬጋጊ።እርሾካ ፈረሳውዬ ካሄሮድሴ¹⁴ውር ጊታይ ዻዬ ጆሌ እሺ ናንዳካጝ ጌርሺኔ ባላሻ ቦወኑጝ፤ ከኦካ ባላሻ ክየም እንቃ ጋጊ ቱዎጝ ኦኬ ክየምጵንዻ ካኒ ኣኔኬ።¹⁵ኢየሱስዻ፤ ሺጝ ኣጅቴባ ከኦካ እርሾካ ፈረሳውዬ ካሄሮድሴ ማንኪ እየው ኤታጋን ሹቃ ሺጝ እያይኔ ሜይሼያ እንግን።¹⁶እንግንዻ ዋይሼ ጋጝ፤ ዋይሼ ኡዋው እያይ ሃኦጝ ባላሻ ማሬ ኦጉዋዩ ኣኔን» ሺጝ እያይኔ ሃሳወና።¹⁷ኢየሱስዻ እባጅ ቃቦ ጊዬይዬ፤ ዋይሼ እንግን እያጝ፤ የሺጛ ሃናንዳካጝ ባላሻ ማሬ ኦጉዋዩ ኣኔኔ ጊያ ሃናንዳካኦ የሃሳውንቴ እያይኑጝ? ጋን የጶቅሲያኬኒ? የእባጃኬኒ? ሸን ጉዩ ኣርሻይ?¹⁸የኣንቴባ ካርቡዬ የጌያኬኒ? የኣንቴባ ናቡዬ የዋያኬኒ? የጶቅሲያኬኒ?¹⁹ባላሻ ቾን ሹ እን ሃቦዋ ኣዬ ውር ሺ ቾን የቦዋ ፑርፆፑርፆ ቋሼ ፓስ ኣኸ? እንግንዻ ሺጝ ታጵላማ።²⁰ኤባላሻ ሶጳን ሹ እን ሃቦዋ ኣዬ ውር ሺ ኣሁር የቦዋ ፑርፆፑርፆ ቋሼ ፓስ አኸ? እንግንዻ ሺጝ፤ ሶጳ»።²¹እሺዻ ዋይሼ እንግን ሌይ ጋን የካኔ ጶቅሲያኬን እያንኪ።ውር እን ካርቡ ኣይ ቆሮዬ ባይሺሼ ቤተ ሰይዳጝ²²ኬኦይን ጩዋ ፓዬና ቤተ ሰይዳ። ውር ጩዋማኬ ዶክ ቦፓይኔ ውር ክየም ኬና ካርቡ ኣይ ቆሮ ኦኔኒዬ ካዱሞጝ ይወና።²³እሺዻ ጎም ቡዋካ ቡዋካ ውር እጝ ካርቡ ኣይ ቆሮዬ ቡልሼያ ኬጶሮክ ሹኑክ፤ ሺጝ ካፈቅቴ ካርቡ ክያኒዬ፤ ኣይሼ ቡዋ ኔኒ ኦኔኒዬ፤ ኣና ኦ? ኬና የቶዬ ሺጝ እያይኔ ኣንሻ እሺ።²⁴እሺዻ ጌይ ካቼ ሺጝ፤ ውር ይንግሼን ኬሻሪዬ ሃጌይባ።²⁵ኢየሱስዻ ፕር ሺጝ ቡዋ ናኒ ኣይሼ ኦካ ካርቡካ ውር ይጜ፤ ከሹ እጝ ካርቡ ኔኒ ላሉጛ፤ ሜሌልዻ ዋክሼያ እሺ፤ ኦኬ ፓይላ እድዬ ቶዬን ቻሊያ።²⁶ጩዋ፤ ዋይሼ እሺ ኦይሃምካ ጶሮክ እጝ ሁሉኬን/ ኦካ ጶሮክ እንዻ ኦይ ውር ክየምጵንዻ ሜይሼን» ሺጝ እያይኔ ይዕሲሼያ እሺ ሃምካ ጶሮክ ኔኑጝ።ጴጥሮስ ናንዳካ ኢየሱስ እባጄን እን ኣኖጝ²⁷ኢየሱስ ከውር ጊታይ ዻዬ ጆሌ እሹጝ ኩያ ሃምካ ቶኦካ ፊልጶስ ቂሳሪያ፤ ጋንባ ኬጉዋር ፓዬኔ ዋይሼ ውር ጊታይ ዻዬ ጆሌ እሺ፤ የጋን ውር ዋይሼ ኣን ኒን? ሺጝ እያይኔ ኣንሻ እንግን።²⁸እንግንዻ ሺጝ፤ ጊታኬና ሺጚ እንካ ዱቅኔን ዮሐንስ ኣኔባ፤ ዶክ ሺጝ ሃኤልያስ፤ ዶክ ፕር ሺጝ ሃውር ጊታባካ ባሪዮ ክየም ጊዬይ» ሺጝ እያይኔ ሜይሼያ እሺ።²⁹ጩዋ ሺጝ ኤ እየውካ የዋይሺቴ ኣን ኒን? ሺጝ እያይኔ ኣንሻ እንግን። ጴጥሮስ ሺጝ እን የኣይ ክርስቶስ።³⁰ኢየሱስ ናንዳካ እሺ ካማር ውር ክየምጵንዻ ሜይሼኔ ኣጅሻ እንግን።ኢየሱስ ናንዳካ ኣርሼን ኔኒ ሌሚሼ ክያጃ³¹ጩዋ ሃንታካ ውር ካጌዬ ጋሎ ጁዋኑጝ፤ ኬውር ጌጵሹጋን፤ ኬታታቺካ ውርካ ቃሼ ከውር ጊታይ ቶክኔ ጆል ወርቀቴ ካቦውዮጝ፤ ካኒሼዬ ከሹ እንካ ማክንሳ ካናሹጞጝ ካርሲያ እንግን እርርሲዬን።³²እሺዻ ሜይሼያ እንግን ኬሊኪ እጝ፤ ኬሹ እጝ ጴጥሮስ ቦኩዬ ኢየሱስ እሺጵኔ ካርሲያ ጎሪዬን።³³ኢየሱስ ሁቤኔ ቶይ ሃምካ ውር ጊታይ ዻዬ ጆሌ እሺዬ፤ ዋይሼ ጴጥሮስ እን እጁጙጝ ካምሼ ኦናኒ ሁር/ እን የቃቢዬን እንካ ውር ዬ ክያጃካ ባሪዮ የቃቢኬኔ» ሺጝ እያይኔ ጎሪያ እሺ።³⁴ከኦይን ጩዋ፤ ሺው ዛርሲ ካውር ጊታይ ዻዬ ጆሌ እሺዬ ዋይሼ እንግን እያጝ፤ ውር እጝ ናሺ ኣን ዻዬን ኣኔያጝ ካቡዲ እሺ ኤምኑ፤ ካዼት ሻሪ እንካ ሮይኔኔ ካዻይሼ ኣምባ፤³⁵ውር እጝ ዎሺ ናፒሲ ኔኒ ዻዓሺዬን ፓይላ ካይባ፤ ናንዳካ ኣኔ ናንዳካ ክያጃ ሹቃ ክያጄኔ ጊታይ ካይሲ ናፒሲ ጊዬዩጝ ፓይላ ባይሽባ።³⁶ውር ዳሉጝ ፓይላ ማቲ ኔኒዬ ካይሲያ ናፒሲ ኔኒያጝ ካኣሽክዮ?³⁷ኣይባዬ ውር ናንዳካ ናፒሲ ኔኒ ኣና ኦ ካሌሜን?³⁸ኬቦን እጜ ከኦካ ጫቃንካ ጅሼንካ ሴሶ ኬኣኔ ኬክያጃ ናኒዬ ጊታይ ሪጊሼን ፓይላ፤ ሃንታካ ውርዻ ከኦካ ጌጳሞ

ሃፑክ 9¹ፕር ሺጝ ሃዋይሼባ እየው ኣኩሉክ፤ ከኦካ ጫቃንካ ጊታጝ ጎሩጝ ሌይ ሃም ጌጳሞካ ባሪዮ ካኩዋዌ ከቁዋቂትዬ ካጌዮጝ ውር ክየም ክየም ጊታኬና ማር ኣርሼን ጌዬን ኣኔባ» ዋይሼ እንግን እያይ።ሩዋካ ኢየሱስ ላሉጛ²ከሹ ላ ጩዋ ኢየሱስ እያንሽ ጴጥሮሴ፣ ያዕቆቤ፣ ዮሐንሴ ኮቴያ ጋግ ራጅሜ ክየም፤ ጋይ እንግንጵን፤ ከኦካ ማሪ ጊዬይ ጌያ ዋና፤³ኣፓላዻ ዳሉጝ ክያኑጝ ውር ክየጵንዻ ማሬ ጩቤ እባጄን ዴንታ ኔኒ ካሎን ማቲያ ፎልቼን።⁴ኤልያሴ ሙሴዬ ሃሳወን ከኢየሱሴ ጌያ።⁵ጴጥሮስ ዋይሼ ኢየሱስ ውርካ እርርሲዬን ይን ጉዋዩዮ፤ ሃቆባያ ኦጝያጝ ሃሹቃ ከኡዋው፤ ሃኣሽክያባ ኦካ ጅያን፤ ክየም ኑኑ፣ ክየም ካሙሴ፣ ክየም ካኤልያስ።⁶ካሎን ናንዳካጝ ሪግሺኖጝ ኦጊታይ ሃሳወዻ ካኒ ጊባጅኬን።⁷ጩዋ ሉፍ ኩኔ ሹማ እንግን፤ ከኦካ ክያጝካ ሉፍ፤ ኩና ናቅድ ኬና ሺጝ፤ ውዋ እን ናኒ ሃናሺዬ ሃይዕጝ፤ ዋይሼን እሺባ።⁸ይሪካ ቶዬ ማራ ጊዬዩጝ ከኦካ ኢየሱስ እንቃ ውርክየጵንዻ ካኒ ኣኔኬን።⁹ከሹ እን ጎቤኬ ጋግ ክያኑጝ፤ ሺጝ ሃንታካ ውር ሌይ ሃምካ ናሹጜ ከኣርሼን ክያኑጝ ኦይን የጌይቶጝ ኦይድ ውር ክየምጵንዻ ሜይሺቴን፤ ሺጝ እያይኔ ሜይሼያ እንግን።¹⁰እንግንዻ ክያጃ እን ክያጆጝ ጎማ ኬሼን፤ ኣይባዬ፤ ከኣርሼን ናሹጜን ኣዬ ኦ ጋንኬ ጋጝ ሃሳውኔን።¹¹ጩዋ ሺጝ፤ ኤውር ጊታይ ቶክኔጆል ወርቀቱጝ ሺጜ ካሌማ ኩዋው ሃኤልያስ ሃኦ? ሺጝ እያይኔ ጋንሼና።¹²ኢየሱስዻ ዋይሼ እንግን እያጝ፤ ኤልያስ ከኣኩሉክ ሌሜ ኩኔ ኦኬ ፓይላ እያይ ኣዮጝ ኣሽክባ፤ ኣኪ፤ ሃንታካ ውር ካጌዬ ጋሎ ጁዋኑዬ ቦውዬን ካኣኖጝ ቶኮጝ ሙንሼን እየው ኬእያን?¹³ኣይባዬ ሃዋይሼባ እየው፤ ኤልያስ ኩና፤ እንግንዻ ናንዳካ ሃንታካ እሺ ከእያይ ቶኮጝ እን ዎሾጝ ፓይላ ጋሽክዮጝ።ባይሺሻ ውዋ እን ኣኔ ኡሲካ ጮዩጝ¹⁴ዋኬ ፓይኔ ሃምካ ውር ጊታይ ዻዬ ጆሌ እሺዬ ሺዺህ፤ዛርሲ ጁዋኑ ላጛ እንግን፤ ውር ጊታይ ቶክኔ ጆል ወርቀትዻ ዜርሜን ኬእንግኔ ጌያ።¹⁵ዛርሲ ፓይላ ቶዮጝ ይሪካ ጎሺዬ ቡዋ ቲቴን ጉኩሼያ ሃሚን ኔኑጝ።¹⁶እሺዻ ዋይሼ እንግን ዜርሚኔ ከእንግን ሃክያጃካ ኦ? ሺጝ እያይኔ ኣንሻ እንግን።¹⁷ከኦካ ጫቃንካ ዛርሲ ውር ክየም ሺጝ እያጝ፤ ውርካ እርርሲኔኑጝ ዮ፤ ውዋ ናኒ ኡሲካ ጮዩ ጎሜ ሻም ዱዽዬ ማቲ ባጃዬ ሃቦኩኔያ ዮጝ ኑኑጝ።¹⁸ሹካጝ ናሹጞጝ ውር ፓይላ ሚኔባ፤ ቡልባ ዱቦ ኬቶግ፣ ሺኪባ ኒጊዻ፣ ሩዋ ኔኒዻ ቁዋቅትሽባ፤ ካቡልሽ ኡሲ እንካ ጮዩዬ ኣንሻ ውር ጊታይ ዻዬ ጆሌ እሹጝ፤ ዬ እንግን ካኒ ቻሊኬን።¹⁹ኢየሱስዻ ዋሼ ሺጝ፤ ጅሼን ማር ይሁኔን ዮ፤ ኬእየው ሃኡፒ ሌይ ኣሚን? ሃዶንሺሼ እየው ሌይ ኣሚን? ዋይሼ እንግን ቦፓይንቴ ውዋ እን ዮጝ።²⁰ውርዻ ቦፓይኔያ ሃሚን ኔኒጝ፤ ኡሲካ ጮዩዻ ሹ እን ጌዬ ኢየሱስ ይሪካ ዳርግሲያ ውዋ እን፤ ፓቅሼ እሺ ዳሊ ክያኒዬ ዳርጊሲዬ ካርሲያ ዱቦ ቡልሼን።²¹ኢየሱስዻ ዋይሼ ሹኔ ከውዋ ጎሜ እሺ ማቲ ሹ አኸ? ሺጝ እያይኔ ኣንሻ። እሺዻ ሺጝ እያጝ ካርሲኬ ናሳሞዬ ጊያ።²²ዎሽ ኒሼኔ ሹ ጁዋኑ ፓቅሼባ ጉ ክያንዻ፣ ሙዋ ክያኒዻ፤ ሃኦኬና የቻሊዬያጝ ቶይሼ ኣንባ፤ ባይሺሼ ኣንባዻ።²³ኢየሱስዻ ዋይሼ እሺ፤ የሺጚ የቻሊያጝ ኪ? ናንዳካ ውር እጝ ይወን ፓይላ ቻሊሜንባ።²⁴ሹኔካ ውዋ እን ይሪካ ሺጝ ሃይወንባ፤ እጛ ማሬ ይሁኔን ሃእባጅያ/ ሺጝ እያይኔ ኡቹካ።²⁵ኢየሱስዻ ሹ እን ዛርሲ ግድምሼን ዮጝ ኔኒዬ ኣኒኔ ከጉኬን ፓይኔኔ ጌዮጝ፤ ሺጝ እን ኡሲ ዱጛጜ ዱዹጜ ቱልባ ኬኦኔኒ/ ካርሲ ኬጋኔ ኬማር ዋኬ ሁሉኬኔ ሃሜይሼ እን/ ሺጝ እያይኔ ጎሪያ ኡሲካ ቾዩ።²⁶ኡሲ እንካ ጮዩዻ ኡቹኬ ካሎን ዳርጊሲዬ እሹጝ ጩዋ ቱሌኬ ኦካ ውዋ እጝ፤ ውር ጁዋኑ ሌይ ሃምካ ሺጜ ኣርሻ ውዋ እን ማቲያ ኬውር ኮኑጝ ኣርሹጝ።²⁷ዬ ኢየሱስ ጎም ቡዋ ኔኒዬ ቲታ፤ ውዋ እንዻ ናሹጜ ዾራ።²⁸ኢየሱስዻ ሁሉኬ ቶኦጝ ጩዋ፤ ውር ጊታይ ዻዬ ጆሌ እሹጝ እንግንጵን ሺጝ ኡዋው ካማርቴ ቡሌን ቻሊዬን ሃናንዳካኦ? ሺጝ እያይኔ ጋንሼና።²⁹እሺዻ ሺጝ፤ ኦኬና ኣኔን እያይ ቡሌን ኬቻሊቶጝ ሃኬ ይሁኔኔ ኬቶሮንዽዬኔ ዋይሼ እንግን እያይ።³⁰ጩዋ ናሹጜ ሳጊያ ኬዳራካ ገሊላ፤ ኢየሱስዻ ራቅ ጊታይ ኣኖጝ ውር ክየምጵንዻ ካእባጆጝ ካኒ ዎሽኬን፤³¹ዋይሼ ውር ጊታይ ዻዬ ጆሌ እሺ ሃንታካ ውር ሳስክዬ ጋይባ ቡዋካ ውር፤ እንግንዻ ኒሽባ፤ ከሹ ጅያን ጩዋ ናሹጓ፤ ሺጝ እያይኔ ካርሲያ እንግን እርርሲዬን።³²ዬ እንግን እን እሺ ሜይሼ እንግኑጝ ካኒ ዋይኬን ሹቃ፤ ካማር ኣንሺኔንዻዬ ሪግሼና።ኬፓይላ ኣይ ሳጋ ኒን?³³ከኦይን ጩዋ እንግን ፓይላ ፓዬና ቅፍርናሆም። ሁሉኬ ቶኦጝ ጩዋ ዋይሼ እንግን ይቲ እና የዜርሚንቴ ጉዋር ክያኒ ሃናንዳካ ኦ? ሺጝ እያይኔ ኣንሻ እንግን።³⁴ዬ እንግን ጉዋር ክያኒ ዜርሚኔ ሺጜ ኬፓይላ ሃኒን ኣይሳጉጝ ጌያ ሹይ።³⁵ቆቦጝ ጩዋ ሺው ውር ታጵላማኔ፤ ሺጝ እን ዎሺ እንካ ኣዬን፤ ካኣይ ቱንሲካ ፓይላዬ ካኣይ ውርካ ዋድማካ ፓይላዬ» ዋይሼ እንግን እያይ።³⁶ቦኩኔ ሃንታ ዽንዻዬ ሪባ ኦካ ጫቃን ጊዬይ፤ ናግዻዬ፤³⁷ሺጝ ከኦካ ሃንታ ጊታጝ ውር እን ናሺ ክየም ናሺባ ኣንዻ፤ እን ናሺ ኣንዻ እን ናሺ ፓይላጝ ማር ኣኔን ሃእጝ ይዕሲ ኣን» ዋይሼ እንግን እያይ።እን ማር ኡዋው ሚኔን ፓይላ ኣኔንኬ ኡዋው³⁸ዮሐንስዻ ዋይሼ ኢየሱስ፣ ውርካ እርርሲዬን ይን ጉዋዮ፤ ውር ክየም ቡል ቤሮ ከሮጝ ኑኑዬ ሃጌያያ፤ ማሬ ኡዋው ዻዬን የሃርጌያይ?³⁹ዬ ኢየሱስዻ ሺጝ እያጝ፤ ኦይድ ሃርግቴን፤ ውር ክየም ኣሽኪ ከሮጝ ናኒ ኦኬ ሹቃዬ ይሪካ ቻሊኬን ኣን ክያጃ ጋራ ሃሳውሼን።⁴⁰እን ማር ኡዋው ሚኔን ፓይላ ኣንኬ ኡዋው፤⁴¹ሃዋይሼባ እየው ኣኩሉክ፤ ክርስቶስ ኣዬን ጉዩ ከሮጝ ናኒ ውር እን ኣይ እየው ኬኞኮንኮሎ ክየም ሙዋጝ ፓይላ ካይሲኬን ኣንቲቲ እንካ ጋዬ እሹጝ።ከውር እንቃ ካቲሚኔን ኣዬን⁴²ከኦካ ጊታይ ይወንኬ ኣን ከኦካ ሃይሻይሺ ጊታጝ እን ካቲ ክየም ፓይላ ካቁምሼ ቦሉ ኔኒ ማዶካ ባይ ዴጩጉዬ ፓቅሼያ ኛፓስ ክያኒያጝ ሃባሺ፤⁴³ዬ ቡዋኑኑ ካቲሜናያጝ ቃጭባ፤ ከኡፔኬ ቡዋ ዻዌ ከሁሉኬ ጉያጝ ከኡፔኬ ዱጙሚዬ ከሁሉኬ ሃምካ ዻቆ ሃባሺ፤⁴⁴ሺጛ ጉያጝ ኣርሽኬን፤ ጉ ኔኒዻ ካይኬኔ፤⁴⁵ጃፍ ኑኑ ካቲሜኔያጝ ቃጭባ፤ ኬኡፔኬ ጃፍ ዻዌ ካፓቅሼ እን ሃምካ ጉያጝ ኬኣዬ ኤላዬ ኬሁሉኬ ሃምካ ዻቆ ሃባሺ፤⁴⁶ሺጛ ጉያጝ ኣርኬን፤ ጉዻ ካይኬኔ፤⁴⁷ካርቡ ኑኑ ካቲሜናያጝ ሆልቄ ቡልባ፤ ኬኡፔኬ ካርቡ ዻዌ ካፓቅሼ እን ሃምካ ጉያጝ፤ ኬኡፔኬ ካርቡ ክየሜ ኬሁሉኬ ሃምካ ጌጳሞካ ባሪዮጝ ሃባሺ፤⁴⁸ሺጛ ጉያጝ ኣርኬን፤ ጉዳ ካይኬኔ፤⁴⁹ውር ፓይላ ቆብባ ኬጉዌ።⁵⁰ሶቆ ሃሹቃ፤ ኣይባዬ ሶቆ ኣዬን ኔኒ ካይያያጝ የሻማ እያን ከዋሼ ሻምቴ ጩዋናጝ? ሶቆ ካኣኔባ ኦጉዩ ቱዎጝ፤ ናሺባ ጋጝ።

ሃፑክ 10ቡሌንካ ኡማዬ ኣጚዬ¹ጩዋ ኢየሱስ ናሹጜ ኩያ ፔንካ ይሁዳዬ ራቅ ጊታይ ኣኔን ዮርዳኖስ ታቴዬ፤ ዛርሲ እንቃ ፑኡሽሜና ኦካ ማራማራ ኔኒ፤ ከኦይን እርርሲያ እንግን ኦግታይ ኣሽክዬ ኬሌሜን።²ውር ክየም ክየምካ ፈረሳውያን ዎሽ እሺ ፓታንሲዬኔ ፓዬኔ ሺጝ፤ ውር ኝያ ኔኒ ቡሌን ኣኔባይ? ሺጝ እያይኔ ጋንሼና።³እሺዻ ዋሼ ዋይሼ እንግን ሙሴ ሜይሼ እየው ኦ?⁴እንግንዻ ሺጝ፤ ሙሴያጝ ቶክ ወርቀትካ ቡሌኔ ካቡሎጝ ናሺሼያ ኡዋው።⁵ኢየሱስዻ ዋሼ ዋይሼ እንግን እያጝ፤ ሙሴ ቶክሼ እየው ክያጃ እን ሃናንዳካጝ ሸን ጉዩ ኣዬ ኣርሹጉጝ።⁶ኣይባዬብከሌሜን ካሙኔን ባሪዮ ሻማ ጁሙዬ ሃኣጚዬ ሙና።⁷ዬ ውር ኦይድባ ሹኔዬ ጁዋኔዬ፤ ኡፓ ኬኣጚዻ፤⁸እንግን ዻዋን ማቲባ ኣሩጝ ክየም፤ ከኦይን ጋይ ኣሩጝክየም ዬ ማር ዻዌን፤⁹ዬ ውር እን ኣይኬ ባሪዮጝ ውር ክየምጵንዻ ካማር ዋና ማቲዬን።¹⁰ፕር ኬሹ እን ሁሉኬ ቶኦጝ፤ ውር ጊታይ ዻዬ ጆሌ እሹጝ ቲት ክያጃ እኔ ጋንሼና።¹¹እሺዻ ዋይሼ እንግን ውር ክየምጵንዻ ቡል ኝያ ኔኒዬ እያንሻ እንቃያጝ ኣሽክያ ከእሺ ኩጳሞ፤¹²እሺዻ ቱልኬ ኦካ ኡማዬ እያንሼና ከጁሙ እንቃያጝ ኩጳሲዬና» ዋይሼ እንግን እያይ።ኢየሱስ ኡዋና ሃንታ ሃይሻይሺ¹³ኢየሱስ ካዱም እንግንባዬ፤ ውር ቦፓይኔያ ሃንታ ጊዬይ ሃሚን ኔኑጝ፤ ዬ ውር ጊታይ ዻዬ ጆሌ እሹጝ ጎሪያ እንግን።¹⁴ኢየሱስዻ ቶይ እጜ ሚኒሼዬ ዋይሼ እንግን እያጝ፤ ሃንታ ካፓዬምባ ዮጝ ናኑጝ ኦይድ ሃርጊቴን፤ ጌጳሞካ ባሪዮ ሃካ ጊታይ ውይ ጊታጝ።¹⁵ሃዋይሼባ እየው ኣኩሉክ፤ ጌጳሞካ ባሪዮ ጊታይ ማርኬ ሃንታ ማቲዬን ፓይላ ክየምጵንዻ ሁሉኬን።¹⁶ናግ ሃንታዻዬ ኣይሼ ቡዋዌ ኡዋና እንግን።ባርሻ ሆድሞ እጝ¹⁷ናሹጝ ኬኦይኔ ካርሲዬ ጉዋር፤ ውር ክየ ሪሼ ኩና ሃሚን ኔኑጝ፤ ኦካ ማሪ ኔኒዻ ቶኬ ኩዋሚኔ ሺጝ፤ ውርካ እርርሲኔን ሌሞጝ ዮ፤ ካሁሉኬ ሃምካ ቦንካ ካቦን ካኣሽኪ ኦኬና ኣኔን እያን» ሺጝ እያይ።¹⁸ኢየሱስዻ ሺጝ እያጜ ዋሼያ እሺ፤ ሃኦ የዋይሼ ኣን ሌሞጝ? ከኦካ ባሪዮ ክየም እጝ እንቃ ሌሞ ኣኔኬን፤¹⁹የእባጅያይ ጊታይ ክያጆጝ፤ ኦይ ኒሼን፣ ኦይ ኩጳሲዬን፣ ኦይ ኦጉሬን፣ ኦይ ከሾሮ ክሊዬን፣ ኦይ ቱዋኔን፣ ሪግሺንቴባ ሹቡኔ ጁኔ።²⁰ውር እንዻ ሺጝ፤ ውርካ እርርሲዬን ይጝ ዮ፤ ጊታይ እባ ሃካርሲኬ ናሳሞ ናኒዬ ሃዻዬያ።²¹ኢየሱስዻ ቶይ እሺዬ ናሺያ፤ ዋይሼ እሺ ኣኪ ኦኬ ክየም ጆግሼያ እን ካሜ ጊታይ ኑኑ ኣኖጝ ፓይላ ኡዋሩጝሽባ፤ ዬ ኣይባ ኩፓን ኬፎላ ዾዮክ የጌይባ ሆድማሞ ኬና ፑኡሺዬ፤ ጩዋ ኩዋዌ ዻዬ ኣምባ።²²ውር እንዻ ዋዬ እጝ ካሎን ሞይካዽያ፤ ናንዳካጝ ሆድማሞ ጁዋኑ ኣኖጝ ዻዹጝኔዬ ኩያ።²³ኢየሱስ ቶዬ ውር ጊታይ ኣኔን ማራማራጝ፤ ዋይሼ ውር ጊታይ ዻዬ ጆሌ እሹጝ ናንዳካ ውር ሆድሞ ሃምካ ጌጳሞካ ባሪዮ ሁሉኬን ካሎን ቁዋቅትሽ እያን/²⁴ውር ጊታይ ዻዬ ጆሌ እሺዻ ዻዹጝኔያ ክያጃ እጝ ሃሳዎጝ፤ ኢየሱስ ፕር ዋይሼ እንግን እያጝ፤ ሃንታ ናኒዮ፤ ሃምካ ጌጳሞካ ባሪዮ ሁሉኬን ኣይ እያን ቁዋቃ።²⁵ናንዳካጝ ውር ሆድሞ ካሁሉኬ ሃምካ ጌጳሞካ ባሪዮያጝ ሳጊ ጋማላ ሁሉኬ ፑልታካ ማርፌያጝ ሃባዶ።²⁶ውር ጊታይ ዻዬ ጆሌ እሺዻ ሳጊ ኬዻዹጝኔን ሺጝ ኣኪ ሃኒን ካቻሊ ኡዋው ባይሺሼኑጝ ሺጝ እያይኔ ሃሳወና።²⁷ኢየሱስዻ ጌይ እንግንኔ፤ ሺጝ እን ማርኬ ታጝካ ውር ቻሊምኔን ኬታጝካ ባሪዮ ቻሊሜንባ» ዋይሼ እንግን እያይ።²⁸ጴጥሮስዻ ሺጝ እየዎ፤ ኡዋው ሃኦይዳ ፓይላዬ ሃዻይቴያ እን።²⁹ኢየሱስዻ ዋሼ ሺጝ፤ ሃዋይሼባ እየው ኣኩሉክ፤ ውር እን ሺጚ ናንዳካ ኣኔ ክያጃ ናኒዬ ኦይዲ ጶሮክ ኔኒ ወይ ጪኒጌን ኔኑጝ ወይ ጪኒጌን ኔኒካ እጛሽ ወይ ጁዋኖጝ ወይ ሹኖጝ ወይ ሃንታ ኔኑጝ ወይ ሃሙ ኔኑጝ ፓይላ፤³⁰ጋን ኬቦኑጝ ኬጋራ ጶሮክ ኔኒ፣ ጪኒጌን ኔኒ፣ ጪኒጌን ኔኒካ እጛሽ፣ ሃንታ ኔኒዬ ሃሙዬ ሌሜ ዽቤ እን ማር ቦወን፤ ፔን እን ሺጚ ኩኔን ካማር ሃምካ ዻቆካ ቦንካ ቦን ሆርሚኔን ኣኔኬን።³¹ኣይባዬ ውር ጁዋኑ ጊታይ ኣኔን ሌሜን ማቲባ ሁር፤ ጊታይ ኣኔን ሁር ማቲባ ሌሜን።ኢየሱስ እንቃ ናንዳካ ኣርሼን ኔኒ ሌምሼ ክያጃ ³²እያንካ ኢየሩሳሌም ቱልሼን ጋንባ ጉዋር ክያኒዬ ኢየሱስ ኣኔን ኬሌሜን ግዬይ ኩዬን ፤ ውር ጊታይ ዻዬ ጆሌ እሹጝ ዻዹጝኔያ ውር እንቃ ጊታይ ዻዬ እንግንዻ ፕር ሪግሼና። ፕር ሻም ውር ታጵላማን ከኦካ ዛርሲ ዋናዬ ካሄክሼ ኦዌ ሜይሼያ እንግን። ³³ዋይሼ እንግን እያጝ ካፓይሺቴ እያንካ ኢየሩሳሌም፤ ሃንታካ ውር ሳስክዬ ጋይባ ታታቻንካ ውርካ ቃሼ ውር ጊታይ ቶክኔ ጆል ወርቀቴ፤ እንግንዻ ኮምሼባ ኮምሼንካ ኣርሼን፤ ሳስክዬ ጋይባ ዛርሲዻ፤ ³⁴ጎልቲባ፤ ፓልቅሼባዻ፤ ሙርባዻ፣ ጩዋ ንሽባ፤ ዬ እሺ ኬሹ እንካ ማክንሳ ጩዋ ናሹጓ።ኣንሺኔንካ ያዕቆቤ ዮሐንሴ³⁵ጩዋ ሃንታካ ዜብዴዎስ ያዕቆቤ ዮሐንሴ ፓዬን ሃም ኔኒዬ ሺጝ ውርካ እርርሲዬኑጝ ዮ፤ ኦይን ሃይሁንቴ ፓይላ ካኣሽክሼ ኡዋው ሃዎሻያ።³⁶እሺዻ ዋይሼ እንግን የዎሻ እን ካኣሽክሼ እየው ኦጝ?³⁷እንግንዻ ሺጝ ከሹካ ጌጳሞ ኑኑ ካኣጁጜ ውር ጉዋዩ ክየም ከቡዎን ክየም ከዋርካታዬ ካቆብቶጝ ናሺሼ ኡዋባ።³⁸ኢየሱስዻ ሺጝ፤ የእባጃኬን ኣይን ኦይን ኬይሁንቶጝ፤ ኒያቡ እን ኣን ሃማቶጝ፣ ዱቅኔን እን ኣን ሃዱቅኖጝ ከዱቅይንቶጝ የቻሊያባይ?³⁹እንግንዻ ሺጝ እህ ሃቻሊያባ። ኢየሱስዻ ሺጝ ኒያቡ እን ኣን ሃማቶጝ የማታባ፣ ዱቅኔን እን ኣን ሃዱቅኖጝ የዱቅናባ፤⁴⁰ኣይባዬ ቡዎን ናኒ ወይ ዋርካታ ናኒ ቆቤን ሃሓም ጋሽክሼ እየው ዬ ማር ኦኬና ኣን ካኣዬ እየው ወን» ዋይሼ እንግን እያይ።⁴¹ውር ታጳን ጊታይ ሺዺ ዋዬ እን ካርሲሼያ ያዕቆቤ ዮሐንሴ ማኒሼን።⁴²ኢየሱስዻ ፑኡሺ እንግን ክየምጵኔ ዋይሼ እንግን እያጝ፤ ሺጝ ታታቺካ ዛርሲዬ ከእያይ የቃብቶጝ ከእያይ ቦወ ጌጳሞጝ፤ ከኦጊዬይ ጌጳሞ ከእያይ ዹዋልሼ እየው የእባጃያይ፤⁴³ዬ ከታጝ ጉዩ ማር እያይኔን፤ ከኦካ ጫቃን ጉዩ እን ዎሺ ታቺ ማቲዬን ፓይላ ካማቲኬ ውርካ ዋድማ፤⁴⁴ውር እን ዎሺ ሌሜን ማቲዬን፤ ካማቲ ካይሲካ ፓይላ፤⁴⁵ሃንታካ ውር ካዋድሚዬዬ ዻቆ ኔኒ ናንዳካ ጁዋናን ካሻሜ ማም እያይኔ ካኣዬ ኩናዬ ካኒ ኩንኬን ዋድሚዬን።ኢየሱስ ባይሺሻ በርጤሜዎስ እን ካርቡ ኣይ ሙሙዾጝ⁴⁶ከኦይን ጩዋ ፓዬና ኢያርኮ። ኢየሱሴ ውር ጊታይ ዻዬ ጆሌ እሺዬ ከዛርሲ ጁዋኑዬ ቱልኬ ኢያርኮያጝ ጌይ ውር ኬና ካርቡ ኣይ ሙሙዾ ውዋካ ጤሜዎስ በርጤሜዎስ ኡፍ ጉዋር ማራዬ ኣኔን ይሁኔን።⁴⁷እሺዻ ሹ እን ዋዬ እጝ ኣዬ ኢየሱስ እንካ ናዝሬት፤ «ሺጝ ውዋካ ዳዊት ፤ ኢየሱስ ዮ ዻሺያምባ፤ ሺጝ እያይኔ ካርሲያ ኡቹኬን።⁴⁸ካኡፍ ሹዬ ውር ጁዋኑ ጎሪያእሺ፤ ዬ እሺ ሺጝ ውዋካ ዳዊት ዮ፤ ዻሺያምባዬ ሌሜዬ ኡቹካ።⁴⁹ኢየሱስዻ ዾሬ ዋይሼ እንግን ሺውባ፤ እንግንዻ ዋይሼ ውር እጝ ካርቡ ኣይ ሙሙዾ «ይህ፤ ናሹጝጓ ሺው እንባ/⁵⁰እሺዻ ኡፑት ኣፓላ ኔኒዬ ጌይ ካቼ ኩና ሃምካ ኢየሱሱጝ።⁵¹ኢየሱስዻ ሺጝ የዎሺ እን ካኣሽክሼ እን ኦጝ? ውር እን ካርቡ ኣይ ሙሙዾዻ ሺጝ ውርካ እርርሲዬኑጝ ዮ፤ ሃዎሺ ጌዬን።⁵²ኢየሱስዻ ዋይሼ እሺ ካምባ ይሁኔን ኑኑ ባይሺሻ እን» ይሪካዻ ካርቡ ኔኒ ጌያ፤ ከጉዋርዻ ዻዬ ኢየሱሴ ኩያ።

ሃፑክ 11ኢየሱስ ከጌጳሞ ታቺ ሁሉካ ኢየሩሳሌም¹ከኢየሩሳሌም ከቆጩርካ ጋግካ ደብር ዛይት ሃም ኣኖጝ ሹ እን ሄክሼ ቤተ ፈጌዬ ቢታንያዬ፤ ኢየሱስ ከኦካ ውር ጊታይ ዻዬ ጆሌ እሹጝ ሺጝ እያጜ ይዕሲያ ዻ፤²ፓይባ ኦካ ጶሮክ ጊታይ ኣኔን ሌሜን ጉዩጝ፤ ሃንታካ ኡኩሊ ኬና ውር ማሬ ቆቤ እባጄን ቁሜ የጌያባ ኦይን፤ ቡሌ ቦፓይንቴባ፤³ውር ክየምጵንዻ ዋይሼያ እየው የሻሜቴ ኦዬ? ኣንሻ እየውያጝ፤ ሺጚ ዎሺሻ ታቺ እጝ ዋሼ ይዕሲባ ይሪካዬ ሜይቴባ።⁴እንግንዻ ፓያ፤ ጉዋር ክያኒ ኦካ ሃፑካ ቶኦ ክየም ቁም ቁም ሃንታካ ኡኩሊዬ ጌያ፤ ቡላዻ።⁵ከኦካ ውር ክየም ክየም ጊታይ ጎሩጝ ሺጝ ሃኦ? የቡልቶጝ።⁶ውር ጊታይ ዻዬ ጆሌ እሺዻ እን ኢየሱስ ሺጞጝ ሹ እጝ ሜይሼ ውሩጝ ናሺሼያ እንግን።⁷ቦፓይኔ ሃንታካ ኡኩሊ ሃምካ ኢየሱሴ ጃክሼ ኣፓላ ጊዬይ ሹዎር ኔኒ ክያኒዬ፤ እሺዻ ኡፌያ።⁸ውር ጁዋኑ ጃካ ኣፓላ ጊዬይ ጉዋር ክያኒ፤ ውር ዶክ ፕር ቦው ቃቅቴንካ ሻሪ ጫጉሬዬ ኣኔን ጃኬን።⁹ከጊታይ ሌሚዬ ጊታይ ዻዬ ኬታካ ሁሬ ሺጝ ከናቅድ ታቺ እያጝ፤ «ሆሣዕና/ እን ኩንኬ ሮጝካ ታቺ እጝ ሃኬና ጉዋኔ/¹⁰እንካ ኩዋው ኬጌጳሞካ ሹቡጌን ጉዩ ዳዊት ሃኬና ጉዋኔሆሣዕና ኬእያይ/።¹¹ኢየሱስዻ ሄክሻ ኢየሩሳሌም፤ ጩዋ ሁሉካ ሃምካ ቶኦካ ይሁኔን፤ ቶያ እን ኣኔን ማራማራ ፓይላ፤ ሹሽዻ ናንዳካጝ ቃይትሾጝ ከውር ታጵላማን ኮቲሼያ ቢታንያ።ኢየሱስ ይጋ ቶኦካ ይሁኔን¹²ከዻም ቱሌኬ ቢታንያ ኢየሱስ ካሽ ቃዋ።¹³እሺዻ ጌያ ካርቡካ ሻሪ ኬና ጋሜ ኬዹክ ሺጝ ካጌይ ካርቡ ኔኒዬ ኩይሼያ ሃሚን ኣይባዬ ቲጌሽካ ኣሜን ኔኒ ሄክሽኬኔ ኬኦካ ቃቅቴን እንቃ ኦኬ ክየምጵንዻ ካኒ ጌይኬን።¹⁴ጩዋ ዋይሼ ሻሪ እን ካርሲኬ ሹጜ ሌይ ቦንኬ ቦን ካርቡ ክየምጵን ከኦኑኑ ጋምኬን፤ ውር ጊታይ ዻዬ ጆሌ እሹጝ እጜ ዋያ።¹⁵ፓዬና ኢየሩሳሌም፤ ጩዋ ሁሉክ ሃምካ ቶኦካ ይሁኔኔ፤ ካርሲያ ጊታይ ኡዋሩጜኔ ኡዋሩጝሼኔ ቡሌን፤ ኦግታይ ጌዬ ቢሮጝ ካራሜ ሆሌ ጊታይ ጉዋሩጝሼዬ ሁቡባ ካራምካ ቆቤን፤¹⁶ውር ክየምጵንዻ ካዼቴ ¹⁷እንግን እርርሲዬንዻ፤ ቶኦ ሺጝ ቶኦካ ይሁኔን ካዛርሲ ፓይላዬ ካኒ ቶኬኒ? የእየው የሻማያ ይግንካ ጓርጉ።¹⁸ታታቺካ ውርካ ቃሼ ውር ጊታይ ቶኩኔ ጆል ወርቀቴ ዋዬ እን ሻም እያን ካካይሲዮጝ ጋኔን ጉዋር ዎሼን፤ ዛርሲ ፓይላ ናንዳካ እርርሲዬን ኔኒ ዻዹጝኔዬ ሪግሼና።¹⁹ቃይትሼዻ ቱልኬ ኦካ ከተማ እጜ ፓያ።ሻሪ እንካ ኣሜን ቁዋቅሻ²⁰ካናዻሜ ሳጊኬ ከጉዋሬ፤ ሻሪ እንካ ኣሜን ቁዋቅሼ ሌሜ ከጊሜይ ኔኒዬ ጌያ።²¹ጴጥሮስዻ ክያጃ እን ጌይ ጶቄ፤ ዋይሼ ኢየሱስ ውሩጝካ እርርሲዬኑጝ ዮ፤ ሻሪ እን የኣሺዮጝ ቁዋቅሻ።²²ኢየሱስዻ ዋይሼ እንግን እያጝ፤ ይወንባ ኬባሪዮ፤²³ሃዋይሼባ እየው ኣኩሉክ፤ ውር ክየምጵንዻ ዋይሼ ጋጉጝ፤ ቡጭንቴ ፓቅንቴ ኛፓስ ክያኒዬ ሺጝ እያይኔ እን ማራ ኬሻን ቃጋዽዬንያጝ ሙኒሼን እሺባ።²⁴ዬ ኦግታይ የይሁንቴ ኬይሁኔን ፓይላ ሻምባ ኬና ኬቦቴዬ የይሁናያጝ ማቲሼ እየውባ።²⁵ፕር ከይሁኔን ሹካጝ የጎርቶጝ፤ ሹኔ እንጉዩካ ፎላጝ ካዋይሼ እየው ሴሶ ጉዩ ካሺዽባጝ እየውዻ እን ኣኔን ከውር ፓይላ ሺጝቴባ ካሺዽባ።²⁶ዬ የማራያ ካሺዽባ ሺጜንያጝ ሹኔ እንጉዩ ካፎላዻ ሺዕሺሼኬን እየው ሴሶ ጉዩ።ኦካ ጌጳሞካ ኢየሱስ ቲታ ኣንሺኔን²⁷ፕር ፓዬና ኢየሩሳሌም፤ ኢየሱስ ከሹ እን ሺሪዬ ከኦካ ማራካ ቶኦካ ይሁኔን፤ ታታቺካ ውርካ ቃሼ፤ ውር ጊታይ ቶክኔ ጆል ወርቀቴ ጌጵሹጉካ ዛርሲዬ ፓዬን ኦኔኒዬ፤²⁸ዋይሼ እሺ ኦግታጝ የኣሽኪ ከጌጳሞካ ኦ? ኦግታጝ የኣሽክዬ ካኣይ እን ጌጳሞ ሃኒን?²⁹ኢየሱስዻ ዋሼ ዋይሼ እንግን እያጝ፤ ይንዳ ኣንዻ ካኣንሺየ እየው ክያጃ ክየም፤ ዋሺቴ ኣምባ ኣንዻ ኦግታጝ ሃኣሽክዬ ኬጌጳሞካ ኦጝ ሃሜይሼ እየውባ።³⁰ዱቅዬንካ ዮሐንስ ሃኬ ፎላ ሞ ኬውር? ዋሽቴ ኣምባ።³¹እንግንዻ ዋይሼ ጋጝ እያጝ፤ ሃሺጛያ ኬፎላያጝ፤ ኣኪ ዋይሼባ ኡዋው ሃኦ የማርቴ ይሁኔኑጝ፤³²ኣኪ ካሺጚያይ ኬውር? ዛርሲ ፓይላ ዮሐንስ ናንዳካጝ ኣዬ ውርካ ባሪዮ ኣኩሉኩጝ ናንዳካጝ ይሁኖጝ ሪግሼና።³³ዬ ዋይሼ ኢየሱስ ሃእባጃኬኔ ዋሼያ፤ ኢየሱስዻ ሺጝ ኣኪ ኣንዻ ኦግታጝ ሃኣሽክዬ ከጌጳሞካ ኦጝ ሃሜይሼኬን እየው» ዋይሼ እንግን እያይ።

ሃፑክ 12ሄክንሶካ ውር ጊታይካ ሃሙ ኡዋሩጙሽ ራቅካ ሻሪካ ኣሜን¹ጩዋ ሺጝ እያጜ ካርሲያ እንግን ሄክንሶጝ ሜይሼን፤ ሺጝ ውር ክየም ኮር ሻሪካ ኣሜን፤ ካቴ ማራማራ ጊዬይ ካርሚ፤ ቆድ ይግንካ ኡጵሼን፤ ኣሽክሼ ኣምሻካ ባኪኔን፤ ጩዋ ኡዋሩጙሽ ኦካ ውርካ ሃሙዬ ኩያ ፔን እንቃ።²ከሹካ እግሼን ከኦካ ሻሪ እን ካቦሼ እሺ ካርቡዬ ከኦካ ውርካ ዋድማ ኔኒ ይዕሲሼያ ክየም ሃምካ ውርካ ሃሙጝ።³ዬ እንግንዻ ጎሜ ሙሬ ይዕሲያ ቡዋ ማም እያይ።⁴ፕር ይዕሲያ ውርካ ዋድማ እንቃ፤ እንግንዻ ሙር እሺዬ ጎብሼ ዋሼ ይዕሲያ።⁵ፕር ካንዻ ይዕሲያ እንቃ፤ ኒሻ እን፤ ከእንቃ ከጫቃንካ ጁዋናን ክየም ክየም ሙር ክየም ክየምዻዬ ኒሻ።⁶ካንዻ ኬና ካይዕሲሼ እንቃ ኣኔባ፤ እንዻ ሃውዋ እን ናኒ ሃናሺዮጝ ውዋ ናኒ ሪግሼንባ ሺጝ እያይኔ ከፓይላ ጩዋ ይዕሲያ።⁷ዬ ውር ጊታይካ ሃሙ ዋይሼ ጋጝ ሃይንያጝ ካሎን እንካ ቦዋ እሺ ፓዬኔ ካኒሺባ ኦኬፕ ፓይላ ማቲባ ጉዋዩ፤ ሺጝ እያይኔ ሃሳወና።⁸ጩዋ ጎሜ ኒሻ፤ ቡልኬ ኦይንካ ሃሙዬ ፓቃ።⁹ኣኪ ኤምኑ ካሻሪ ጊታይ ሺጝ፤ የዋሻ ኬኦኮኑጝ ካኣሽክሼ እየው ኦጝ? ኩንባ የኒሽባ ውር ጊታይካ ሃሙጝ፤ ሻሪ ጊታይካ ኣሜንዻ ኣይባ ውር እንቃ።¹⁰ክያጃ ካወርቀት እን ሺጜ እያይ የካኔ ኮማኬኒ? «እን ቦዊ ውር ጊታይ ፓሊሲኔ ጆል ባይ እሺ ማቲያ ሹቦካ ኦኬ።¹¹ታቺ እን ኣሽክያ ይጝ፤ ይንዻ ናንዳካ ካርቡ ጉዋዩ ሃሹቃይ?¹²ሄክንሶ እን ክያጆጝ ኣዬ ጊዬዩጝ ናንዳካጝ ጊባጆጝ፤ ዎሻ ጎሜን ኣይባዬ ናንዳካጝ ሪግሺኔ ዛርሱጝ ጎይዴ ፓያ።ናንዳካ ቄሳር ጊቢሪ ካሺዬን¹³ጩዋ ካቶሊ ክያጃ ኔኒዬ ከኦክ ውርካ ፈረሳውዬ ውርካ ሄሮድሴ ይዕሲሼያ ሃሚን ኔኑጝ።¹⁴እንግንዻ ፓዬኔ ሺጝ እያጝ፤ ውሩጝ ካእርርሲዬን ይን ጉዋዮ፤ እን የኣዬ ውር ሊኪ ሃእባጃያ ኣዬንካ ውርዻ ናንዳካ ጉዋር ኑኑ የጁኒኬን የእርርሲባ ጉዋርካ ባሪዮጵን ኬኣኩሉክ ኣይባዬ ናንዳካ ቄሳር ጊቢሪ ካሺሼን ሁሉኩሼንባ ሞ ሁሉኩሼኬን?¹⁵ኡዋካ ካካሺያ ሞ ካማር ካሺዬን? ዬ ኢየሱስ እባጅ ኣጅቱም ጊዬይዬ ሺጝ፤ ሃኦ? የዎሽቴ ክያጃ ናኒ ቶሊዬኑጝ ይንዳ ኣህያ ኣን ሺሊንጊ ክየሜ ካቶይባ።¹⁶እንግንዻ ቦፓይኔያ፤ ሺጝ ይጛ ዴንታካ ኒን? ቶኬን ኔኒካ ሃካኒን? እንግንዻ ሺጝ ሃካቄሳር፤¹⁷ኢየሱስዻ ሺጝ እንካ ቄሳር ኣይ ቄሳር፤ እንካ ባሪዮ ኣይ ባሪዮ፤ እንግንዻ ጎሺያ እሺ።እያኒሼ ናሹጘኔ¹⁸ከኦይን ጩዋ ውርካ ሳድቃውያን ጊታይ ሺጚ ናሹጘን ካኣርሼን ኣኔኬን ፓዬን ኦኔኒዬ ሺጝ እያጜ ጋንሼና፤¹⁹ውርካ እርርሲዬን ይጝ ዮ፤ ውር ክየም ጪኔ እያኒሽ ሃኣጚዬ ጅሽኬን ሃንታዬ ኣርሺያግ፤ ውር እን ካእያኒሼ ኝያ እጜ፤ ካቡልሼ ጪኔ ሃንታዬ ሙሴ ቶክሼያ ኡዋው።²⁰ኣኪ ኣና ጪኒጌንካ ጋጝ ሶጳ፤ እንካ ሌሜን እያኒሼኔ ካኒ ቡልኬን ሃንታዬ ኣርሻ፤²¹እንካ ላንሳ እያኒሽ ኝያ እጜ እሺዻ ካኒ ቡልኬን ሃንታዬ ኣርሻ፤ እንካ ማክንሳዻ እያይ፤²²ሶጳን ፓይላ ጊያኒሼኔ የሃንታዻ ካኒ ቡልኬኔ ከቱንሲ ኝያ እንዻ ኣርሻ።²³ኣኪ ሶጳን ጊያኒሼና ከሹካ ናሹጘን ካኣይ ኝያካ ፓይላይ? ሺጝ እያይ።²⁴ኢየሱስዻ ሺጝ እያጜ ዋሼያ እንግን፤ የሴሲቶጝ ይንጌ ወርቀትካ ውርካ ባሪዮዬ ናንዳካጝ የማርቴ ቁዋቅትካ ባሪዮ እባጄኑጝ/²⁵ሹካጝ ናሹጜ ከኣርሼን ክያኑጝ ማቲባ ኬውርካ ኤርጎካ ፎላ ዬ ጊያኒሼንኬን፤ ጊያንሽኬን።²⁶ዬ ናንዳካ ናሹጜን ካኣርሼን፤ ከወርቀትካ ሙሴ ይጝ ናንዳካ ኮዶ ካኣይን ክያጃ፤ ባሪዮ ሺጝ ኣን ሃኣይ ኣምላክ ካኣብርሃም፣ ኣምላክ ካይሳሐቅ፣ ኣምላክ ካያዕቆብ፤ እን ሺጚ እያይ የካኔ ኮማኬኒ?²⁷ባሪዮ ሃኣምላክ እጝ ዬ ማር ኣምላክ ካኣርሼኔን፤ ዬ ካሎን የጊያምሻያ።ክያጃ እን ሳጊኬ ፓይላጝ²⁸ከኦካ ውር ጊታይ ቶኬን ክየም ኩኔ ዜርሜኔ ዋያ፤ ኣንሺኔን እን ኢየሱስ ኣይኖጝ ዋሼን እንካ ሊኪ ጶቅሲዬ፤ ሺጝ ኣይባዬ ኬክያጃ ፓይላ ኣይሳጊ ሃና? ሺጝ እያይኔ ኣንሼና።²⁹ኢየሱስዻ ሺጝ እያጜ ዋሼያ፤ ከፓይላ እን ሳጊ ሃይጝ፤ እስራኤል ዮ ዋይባ፤ ኣምላክ ታቺ እን ጉዩጝ ሃታቺ ክየምጵን።³⁰እንዻ ኣምላክ ታቺ እን ኑኑጝ ካሎን ከሻን ኑኑ፣ ካሎን ኬናፒሲ ኑኑ፣ ካሎን ከቃቦ ኑኑ፣ ካሎን ከቁዋቅቲ ኑኑ ናሺባ።³¹እንካ ላንሳ ሃይዕጝ፤ ባይዳ ኑኑ ናሺኬ እን ኤምኑ። ኬኦካ እን ክያጃ ኬና ሳጊ ኣኔኬን።³²ውር እን ቶክኔ ጆል ወርቀትዻ ሺጝ፤ ውሩጝ ካእርርሲዬን ዮ፤ የሺጚያ ሹቃ፤ ካኣይቴኬ እሹጝ፤ ከእሺ እንቃ ማሬ ኣኔኑጝ የክያጆጝ ሃሊኪ።³³እሺዻ ሃካሎን ከሻን ኑኑ፣ ካሎን ከሹቢ ኑኑ፣ ካሎን ከናፒሲ ኑኑ፣ ካሎን ከቁዋቅቲ ኑኑ ናሺባ ፕር ባይዳ ኑኑዻ ናሺኬ እን ኤምኑ ከኦካ ጋላ ጊታይ የኡዱቤ ፓይላዬ ከጋላ እንቃዬ ሳጊባ።³⁴ኢየሱስዻ እባጅ እን ዋሼኬ ጶቅሲዬኔ ዋይሼ እሺ፤ እን ከኦካ ጌጳሞካ ባሪዮ የማር ኬና ዹካትሼን፤ የጩዋ ውር ኬና ዎሺ እሺ ኣንሼን ኣኔኬን።ክርስቶስ ሃውዋካ ኒን?³⁵ኢየሱስ ከሹ እን እርርሲኔ ከኦካ ቶኦካ ይሁኔን ጳል ክያኑጝ፤ ሺጝ እያጜ ጋንሼና፤ ውር ጊታይ ቶኩኔ ጆል ወርቅት ሃኦ ሺጜ ክርስቶስ ሃውዋካ ዳዊቱጝ?³⁶ዳዊት ክያጅኬ ኡሲካ ባሪዮያጝ ሺጝ፤ «ታቺ ታቹጝ ናኑጝ፤ ጋል ናኒ ሌይ ሃም ኬሻሜ ከጃፍ ናኒ ዱቡጝ ኡፓ ቡዎን ናኒ ክያኒ» ሺጝ እያይ።³⁷ኣኪ እሺ ዳዊት ሺጛ ታቺያጝ ዋሼ ማቲ እያን ውዋ? ዛርሲ ጁዋኑ ኣኔን ኬዋዛ ዋዬን።³⁸ኬሹ እን እርርሲዮጝ ሺጝ እያጝ፤ ከኦካ ውር ጊታይ ቶኩኔ ጆል ወርቀት ኣጅቴባ፤ ናሺባ ኣፓላ ኬና ኣይ ባሺ ኪሜ ሺሪዬን፤ ኦጉዋይካ ጳልዻ ዎሽ ጌሶካ ጌጳሞ፤³⁹ከኦካ ቶኦካ ይሁኔን ካኣይሁድ ከኦካ ካራም እንካ ዼግ፤ ከኦካ ራቅካ ኣማ ዎሽ ኦካ ጌጳሞ፤⁴⁰ቃቢኬ ይሁኔን ራጅሜ እንግዬይዬ ሻምባ ቶኦካ ዳልሶ እን ቡንዱርቆ፤ ጊታይ ጌይባ ኮምሼን ኬና ኣይ ታቺ።ኣይኔንካ ዳልሶ እጝ⁴¹ኢየሱስ ኦካ ካራም እንካ ቢሬ ኣጁጜ ጆሌን ድያው ኡፌ ውር ጁዋኑ ኣይኔን ጊዬይ ዾቅሼ ኦካ ሳጥን እን ኣኔን ኦካ ቶኦካ ይሁኔኔ ጋጁጜ ጆሌ ቢሬዬ ኣኔን ቶዬን።⁴²ዬ ዳልሶ ሌሞ ክየም ዾቅሼያ ሺሊንጊ ክየም ኬና ማርኬ ናስ ዻ ሳጊዬን።⁴³ኢየሱስዻ ሺው ውር ጊታይ ዻዬ ጆሌ እሺዬ ሺጝ፤ ሃዋይሼባ እየው ኣኩሉክ፤ ዳልሶ ኩፑጝ ከኦካ ጊታይ ፓቅሼ ሳጥን ኪያኑጝ ኬዶክ ሳስክዬ ዾቅሼያ።⁴⁴ጊታጝ ፓይላ ኣዬን ኬእጝ ሺዽኬ ሆድማሞ ጊዬዩጝ፤ ዬ እሺ ከካንታካ ኩፓሞ ኔኒ ኣኖጝ ፓይላ ቡሌ እን ኣይካ ኡፌን ኔኒዻ ፓይላ ቡሌ ኣዬና።

ሃፑክ 13ሄክንሶካ ቱንሲካ ቦን¹ቱልኬ ቶኦካ ይሁኔንያጝ ከኦካ ውር ጊታይ ዻዬ ጆሌ እሺ ክየም ሺጝ፤ ውሩጝካ እርርሲዬን ጉዋዩ ዮ፤ ባይ ጊታጝ ሹቃትሽ እያን፤ ፎቅዻ ሹቃትሽ እያን ይንዳ ቶህዬ።²ኢየሱስዻ ዋሼ ሺጝ፤ የቶይ ፎቅ ታታቺ ጊታጝኪ? ባይ ክየም ኣኒኔ ከክየም ሺዽኬን፤ ፓይላ ኮሲሜንባ።³ኢየሱስ ኡፌ ኣኔባ ኦካ ጋግ እንካ ደብር ዛይት ኣኔን ዻርካ ቶኦካ ይሁኔኔ ጴጥሮሴ፣ ያዕቆቤ፣ ዮሐንሴ፣ እንድሪያሴ ሺጝ እያጜ ጋንሻ እሺ፤⁴ይጝ ካኣዬ ኣሚን ሜይሼ ኡዋባ፤ ኤካ ይጝ ፓይላ ቱንሲ ዹዋልሺኔን ሃኦ?⁵ኢየሱስዻ ካርሲያ እንግን እያጝ ዋይሼን፤ ውር ክየምጵንዻ ካማር እየው ጊያሚሺሼኔ ኣጅቴባ፤⁶ውር ጁዋኑ ሺጝ ኣን ሃኣይ እሺዬ ፓዬንባ ኬሮጝ ናኒ፤ ጊያሚሺሽባ ጁዋኑዻ።⁷ሹካጝ የዋይቴ ናንዳካ ፓሬ ሃሳዋካ ፓሬ ኦይድ ሻን ኑሺንቴን፤ እን ኣዬን ኔኒ ኔባ፤ ዬ ቱንሲ ኔና ኣካራ።⁸ዛርሲ ኬዛርሲ፣ ጊታይ ጌጳዺ ኬጊታይ ጌጳዺ ናሹጝሼ ጋንባ፤ ከኦካ ራቅ ጁዋኑ ማቲባ ይንግሺኔን ካዳሊዬ ካሼ፤ ጊታይ ፓይላ ሃእሲማ እንካ ሌሜን።⁹ዬ እየው ኣጅቴባ እየው ኤታጋን፤ ናንዳካ ካራም ሳስክዬ ጋዬን እየውባ፤ ኬኦጉዋይካ ቶኦካ ይሁኔን ሙር እየውባ፤ ኬማቲ ማኝዬ ናንዳካ ከኦካ ታታቺካ ፌኔ ጊታይ ጌጳዽዬ ኬሌሜን የጎራባ።¹⁰ዬ ሌምሼ ዛርሲ ፓይላ ክያጃ ሹቃ ክሊዬን ኣኔባ፤¹¹ጎም እየውዌ ሹካጝ ቦሼ ሃምካ ኮምሼን ኬዋዳ እጝ ካጝ ሃኣዬ እየው ሃሳውባ ዬ ኦይድ ሌሜ ማ ክያጃ ኦ? ሺጜ ኦቆርቴን፤ እንካ ሃሳው ሃኡሲካ ባሪዮ ዬ ማር እየው ዌኔ።¹²ጪኔ ጪኔ ኔኒ፤ ሹኔ ውዋ ኔኒ ሳስክዬ ኣዬንባ ሃምካ ኣርሼን፤ ሃንታካ ውር ጊታይ ጌጵሺሽ እንግን ጋይሼባ ሴሶ፣ ኒሽባዻ።¹³ናንዳካ ኣን ኦካ ውር ፓይላ የማቲያባ ኬና ጋይኔ፤ እን ቁዋቅትሽ ሌይ ቱንሱጝ ባይሽባ።¹⁴ጮዩካ ካዮ ዾር ኦካ ራቅ እን ማር ኣኔኔ ሹካጝ ጌይኖጝ እንካ ካም ካጶቅሲባ፤ ካጉኩሼ ኦካ ጋግካ ይሁዳ፤¹⁵ኦጊታይ ኣኔን ኦካ ቶኦ ዾዮክ ካማር ጎቤን፤ ኣንቲቲ ቡሌ ካማር ሃምካ ቶኦ ሁሉኬን፤¹⁶ራቅካ ቅያኒ ኣፓላ ማር ኣኔንያጝ ቦወን ካማር ዋኬን።¹⁷ከሹ እን ናንዳካ ጊታይ ኣይ ኡሩኬኔ ጊታይ ኣውሼኔ ሃይ/¹⁸ይጝ ካማርኬ ሃጋይ ኣዬኔ ይወንባ፤¹⁹ከሌሜን ባሪዮ ባሪዮ ናሹጝ ከሹ እን ሙኔ ኦግታይ ሙኔዬ ሌይ ጋን፤ ፕር እንቃ ከሌሜን ጋሎ ታቺ ኬና ማር ሃሪያ ኣኔን ኣኔባ።²⁰ታቺ እን ማር እየው ሹሻን ኩምቡልሼንያጝ ውር ክየምጵንዻ ዋቲ ማርባ ባይሼን፤ ዬ ናንዳካጝ እድዬ እየው ሺጝ ናንዳካ ጊታይ እድዬዬ ኩምቡልሻ ሹዋን።²¹ከሹ እን ውር ክየምጵንዻ ዋይሼያ እየው እየዎ ክርስቶስ ኣኔን ኦጝኪ? ወይ ዋይሼያ እየው ሃሃምኪያጝ ኦይድ ጉምቴን።²²ክርስቶስ ጊታይካ ሾሮዬ ውርካ ባሪዮ ጊታይካ ሾሮዬ ናሹጜ ኣሽክያ ኦኬ ሹቃ ሹቃዬ ዹዋልሺኔንያጝ የቻሊያያጝ ኣይ ጊታይ ጊድዬዻ ግያምሺሽባ።²³ዬ ኣጅቴባ፤ ሹኔኒ ካኒ ሄክሽኬኔ ፓይላ ሃሜይሼ እየውባ።²⁴ከሹ እን፤ ከጋሎ ጩዋ ሹሽ ቱልባ ትጌሽዻ ሜሌል ጌዬን ኔኒ ዴቅኬን፤²⁵ቢሊ ኬፎላ ዾዮክ ክሽክሽባ፤ ቁዋቃን ካፎላዻ ናሹጝጋ።²⁶ከሹ እን ሃንታካ ውር ኬቁዋቅቲ ታቺዬ ጌጳሞዬ ኩንኬ ሉፔ ጌይባ።²⁷እሺዻ ይዕሲ ውርካ ኤርጎዬ ኬኡሲ ኣሁራን ቦኬ ማራካ ዳሊዬ ሌይ ማራካ ፎላዬ ፑኡሺባ ጊታይ ጊድዮጝ።²⁸ሄክንሶ ኔኒ እርርባ ኬሻሪ እንካ ኣሜን፤ ጩዎኑ ኔኒ ጫጉርሽያጝ፤ ቃቅቴን ኔኒ ኮድያያጝ ባርጊን ሄክሾጝ የእባጃያ፤²⁹ፕር እንቃ ኦግታይ ካሎን የቶያያጝ ኬኦኮኑጝ ሄክሾጝ ኣኒኔ ሻኒ ክያንዻ እባጅባ።³⁰ሃዋይሼ እየውባ ኣኩሉክ፤ ኦግታይ ሌይ ሃምካ ሙኑኖጝ ጅሼን ይጝ ሳጊኬን፤³¹ፎላዬ ዳሊዬ ሳጊባ፤ ዬ ክያጃ ናኒ ሳጊኬን።ሹሼ ዋዳዬ እባጄንኬን³²ኣይባዬ ከሹ እን ወይ ከዋዳ እን ኬባባ እንቃ ኣይን ውርካ ኤርጎካ ፎላጝ፤ ኣይን ውዋ ኔኑጝ፤ ውር ክየምጵንዻ እባጅኬን።³³ዬ ሹ ኔኒ ኣዬ ኣሚን የእባጃኬኔ፤ ኣጅቴባ፤ ቁዋቅትሽባ፤ ይወንባዻ።³⁴ይጝ ቶኦ ኦቼ ውርካ ዋድማኔ፤ ውርካ ዋድማ ክየም ክየም ይዕሲባሼባ ኦጉዋይካ ዋድማ ጉዬይዬ፤ እንካ ባክ ኤርግቴ፤ ዋሼባ ውር እጝ ኩዩጝ።³⁵ኣኪ ኤምኑ ካቶኦ ኬቃይ ወይ ኬቡዴን፤ ከኬዬንካ ባቻ ወይ ክራ ካኒ ጌይኬን ሜሌሌ ካኩዋዌ የእባጃኬኔ ቁዋቅትሼ ባክባ፤³⁶ሉጉድ ኩናያጝ ካማር እየው ሩዋቱክ ክያኒ ጌዬን/³⁷እና ሜይሼ እየው ሃሜይሼባ ውር ፓይላዻ፤ ቁዋቅትሼ ካሊባ/»

ሃፑክ 14ኝያ እን ጲሺ ኢየሱስ ከጋሙሮጝ¹ቶንቶሮካ ባላሻካ ፋስካ ሺዽያ ሹዻጝ፤ ታታቺካ ውርካ ቃሼ ውር ጊታይ ቶክኔ ጆል ወርቀቴ ኢየሱስ ከጃካማ ጎሜኔ ኒሼኔ ጋኔን ክያጃ ዎሼን።²ኣይባዬ ኣሽክሼ ዛርሲ ሴሶጝ ኬቶንቶሮ ጎሜን ኣይኬን ሺጝ እያይኔ ጋኔን ሃሳውኔን።³እሺዻ ካቢታኒያ ኣኔንባ ኦካ ቶኦካ ስምዖን እንካ ቡርቅካ ጊዬ ኡፌኔ፤ ኝያ ክየም ካሎን ቦኩኔ ጋሙሬ ኬና ጉዋሩጜ ኬኣንቲቲ ቁዋቃዬ ጎምኬ ኞኮንኮሎካ ኣልባሳጥሮሴ ኩና፤ ጩክ ኞኮንኮሎዻዬ ጲሼያ እሺ ጋሙሬ።⁴ውር ክየም ክየም ጊታይ ቆቢ ኣይን ማኒሽ ናንዳካ ዳቢ እጜ ጋኔን እያጝ ሺጜን፤ ጋሙሬ እን ሃኦ ላሊዬ ማም እያይ?⁵ዋቲ ጉዋሩጙሽ ኬሺሊንጊ ዽብ ጅያን ጋላጜ ጋያ ኩፓንያጝ ሃባሺ፤ ኝያ እንዻ ጎማ።⁶ዬ ኢየሱስ ዋይሼ እንግን እያጝ፤ ኦይድባ ሃኦ የጋልንሺቴ እሹጝ? ኣሽክያ ኦኬ ሹቃ።⁷ውር ኩፓን ኣይን ሹ ፓይላ ጋኔባ ኬእየው፤ ሹካጝ የዎሽቶጝ የቻሊያባ ኬሊሺዬን ዬ ኣን ሹ ጮል ሃኡፊኬን ኬእየው፤⁸እሺ ኦይን ሺጜ ኣሽክዬን ኣሽክባ፤ ሩዋ እን ናኒ ኣይካ ሌሲ ሌምሼ ጵሻ፤⁹ሃዋይሼ እየውባ ኣኩሉክ፤ ክያጃ ሹቃ ኬዳሉጝ ክያኒ ፓይላ ሹካጝ ክሊዮጝ ኣይን ኦካ ራቅ ና እን እሺ ኣሽክዮጝ ማቲ ኦካ ጶቅሲዬኔ ክያጅባ።¹⁰ከኦይን ጩዋ ከኦካ ታጵ ላማን ክየም እን ሺጜ ኣስቆሩቱ ይሁዳጝ ሳስክዬ ኣይኔን ኩያ ሃምካ ታታቻንካ ውርካ ቃሽ።¹¹እንግንዻ ዋዬ እጝ ዋዝንዽያ፤ እሺ ቢሬ ኣዬን ሁሉካ ቃቦ፤ ዬ ሹ እጝ እሺ ካሳስክያ ኣይኖጝ ጋኔን ሹ እንካ ኣጊ ካሊዬን።ምሽካ ቃይ ካታቺ እጝ¹²ኬሹ እንካ ሌሜን ካኒቄ ማድርካ ቶንቶሮካ ፋስካጝ፤ ውር ዻዬ ጆሌ እሹጝ ፓዬን ኦካ ኢየሱሴ፤ ዋይሼ እሺ ምሽካ ቃይ ካፈሲካ የዎሽ እንካ ኣሽክቴ እን ኦን?¹³እሺዻ ከኦካ ውር ጊታይ ዻዬ ጆሌ እሺ ዋይሼ ዻ እያጜ ይዕሲያ፤ ፓይባ ሃምካ ከተማጝ፤ የጌይባ ውር ኬና ዼቲ ቷንዻካ ሙዋ፤¹⁴ዻይቴ እሺ ሌይ ኦይካ ቶኦ እንካ ሁሉኮጝ፤ ዋይሺቴ ኤምኑካ ቶኦ ታቺ፤ እንካ እርርሲኔንካ ውር ጊታይ ዻዬ ጆሌ እሹጝ ቶኦ እንካ ቆቤንካ ኮመና ካኣሜ ምሽካ ቃይካ ፋሲካ ሃኦን?፤¹⁵እሺዻ ዹዋልሼ እየውባ ሙሆል ታቺ እን ጃኬ ዾዮኩጝ፤ ኣሽክቴ ኣምባ ኦይን። ¹⁶ውር ጊታይ ዻዬ ጆሌ እሺዻ ቱሌ ፓያ ሃምካ ከተማ እጝ ኦግታይ ኢየሱስ ሺጞጝ ፓይላ ማቲዬ ጌያ፤ ቶንቶሮካ ፋሲካዻ ጋሽክያ ኦይን።¹⁷ሹሽ ቃይትሼዻ ኢየሱስ ኩና ከውር ታጲላማን።¹⁸ጋኔንባ ኬጋጝ ቄቤኔ፤ ዋይሼ እንግን ሃዋይሼ እየውባ ኣኩሉክ፤ ከኦካ ጫቃን ጉዩ ይጝ ሃኣምንቴ ከጋጝ ክየም ሳስክዬ ኣዬን ኣምባ።¹⁹እንግንዻ ዻዹጝኔያ፤ ውር ክየም ክየም ካርሲያ ካማር ኣን ኣዬን ሺጌን።²⁰እሺዻ ዋይሼ እንግን እያጝ ከኦካ ታጲላማን ክየም ከኣን ሃእንካ ዾቅሼ ቡዋ ኔኒ ሆትማጺ ክያኑጝ።²¹ሃንታካ ውር ከእያይ ቶኬ ናንዳካ እሹጝ ኩይባ፤ ዬ ናንዳካ ውር እን ሳስክዬ ኣዬን ሃንታካ ውሩጝ ሃይ/ ውር እጝ ዋቲ ማር ጅሺኔንያጝ ሃባሺ።²²ሺጜ ኣሚኔኑጝ ቲት ባላሻዬ ኡዋና፤ ጩኬ ኣያ ውር ጊታይ ዻዬ ጆሌ እሺዳዬ ሺጝ ይዕጝ ይጛ ኣሩጝ ናኒ፤²³ቲት እንካ ማቴንዻዬ ይሁሼኔ ኣያ እንግን፤ ፓይላ ማታ ኬኦይን።²⁴ፕር ዋይሼ እንግን እያጝ፤ ይጝ ናንዳ ጁዋናን ከእርርቶጝ ሃክያጃ ሃሊካ ኒያቡ ናኒ፤²⁵ሃዋይሼ እየውባ ኣኩሉክ፤ ጌጳሞካ ባሪዮ ሌይ ሃም ካማቴ ካርቡካ ሻሪ ሃሉጝ ሌይ ሃምካ ሹ እን ሃማትኬን ይጝ እንቃ።²⁶ኪዌ ይያሩጝ ጩዋ ኮትሼያ ጋግካ ደብር ዘይት።ጴጥሮስ ካቡድዮጝ ኢየሱስ ሌምሼ ክያጃ²⁷ኢየሱስዻ ዋይሼ እንግን እያጝ፤ ከእያይ ሺጜ እያጜ ቶኮጝ፤ እየው ፓይላ የቡድያ ኣምባ ሃሙርባ እንካ ዻውኔን፤ ማድራንዻ ላልሜንባ።²⁸ዬ ናሹጜ ሺጝ፤ ሃሌም እየውዌ ሃኩይባ ገሊላ።²⁹ጴጥሮስዻ ሺጝ፤ ውር ፓይላ ካቲሚኒን ኣን ሃሻሚኬን።³⁰ኢየሱስዻ ዋይሼ እሺ፤ ሃዋይሼ እምባ ኣኩሉክ፤ ኬሚኪሩጝ ባቻ ካኒ ኬይኬን ክያጝ ዻዌ የቡድያምባ ክያጝ ጅያን።³¹ጴጥሮስዻ ሺግ፤ ኬእን ኣይንካ ኣርሼን ክየምጵንዻ ሃቡድኬን፤ ሺጝ እያይኔ ሳስክዬ ክያጃ። ፓይላ ፕር ሺጝ እያይ።ኢየሱስ ይወና ጌቴሴማኒ³²ከኦይን ጩዋ ኩያ ራቅ እን ሺጜ ጌቴሴማኑጝ፤ ኢየሱስዻ ዋይሼ ውር ጊታይ ዻዬ ጆሌ እሹጝ ኣን ሃኣንባ ይሁኔኔ እየው ቆቢባ ኦጝ።³³ቦኩዬ ጴጥሮስ፣ ያዕቆቤ ዮሐንሴ፤ ካሎን ሞይካዽዬ ካርሲያ ሪግሼኔ ይሁኔን።³⁴ፕር ዋይሼ እንግን ናፒሲ ናኒ ሌይ ሃምካ ኣርሾጝ ካሎን ሞይካዽያ፤ ዋይሼ እንግን ቆብ ኦጜ ቦውዌ ካሊባ።³⁵ሳጊ ዽታኬዬ ሺንካ ዳሊ ክያኒ ቡዴን ቻሊዬንያጝ ዋዳ ካሳጊዬ ከእሹጝ ይወናዬ፤³⁶ሺጝ፤ ባባ፤ ባባዮ፤ ኦኬ ፓይላ የእባጅባዬ ኒያቡጝ ሻምባ ከኦናኒ ዹክ፤ ኣይባዬ ካማርኬ ክያጃ ናኒ ኣዬኔ ካኣይኬ ክያጃ ኑኑ።³⁷ዋኬ ኩኖጝ ጌይ ውር ጊታይ ዻዬ ጆሌ እሹጝ ራጴ፤ ዋይሼ ጴጥሮስ እያጝ፤ «ስምዖን ዮ፤ የኡጝያይ? ኣይን ዋዳ ክየም የካውሼን ካሊዬኔይ?³⁸ኬማር ሃምካ ጋሎ ሻወኔ ቁዋቅትሽባ፤ ይወንባዻ፤ ኡሲ ሃሼኪሚ፤ ዬ ኣሩጝ ሃዻቹጉ።³⁹ፕር ኩዬ ይሁኔን እንካ ሌሜን እንቃ ይወና።⁴⁰ዋክ እንቃያጝ ካርቡ ጊዬይ ሩዋቱክ ዴጪሼዬ ራጴ ጌያ እንግን፤ ይጝ ዋኬዻ ካኒ ጌይኬን ።⁴¹ክያጝ እንካ ማክንሳ ኩኔ ዋይሼ እንግን እያጝ፤ የጋን የራጳዬ የቦዋያይ ኡሲ? ጃኬና/ ዋዳ ኔኒ ሄክሻ፤ እየዎ፤ ሃንታካ ውር ኦካብ ቡዋካ ውርካ ሴሶ ሳግዬ ጋዬንባ።⁴²ናሹጝጋ፤ ካፓይባ እጝ ሳስክዬ ኣዬን ኣን ኩና።ጎማ ኢየሱስ⁴³ይሪካ ኣኔንባ ሃሳውኔኔ ከኦካ ውር ታጵ ላማን ክየም ይሁዳ ኩና፤ ጊታይ ኣይኬ ጋጜ ጎም ኤቤሌ ቁራጝ፤ ኣና ውር ጁዋኑ ጊታኬና ይዕሲዬ ከሃምካ ታታቻንካ ውርካ ቃሼ፣ ሃምካ ውር ጊታይ ቶክኔ ጆል ወርቀቴ፣ ጌጵሹጋኔ።⁴⁴ሺጝ እን ኣዬን ኣን ሃእን ካሌማ ሹንቅ ኣኑጝ ጎሚ እሺባ፤ ኣጅሺሽ እሺዬ ቦፓይቴባ፤ ሺጝ እያይኔ ሌሜ ኣያ እንግን ሜርሜር።⁴⁵ሄክሼዻ ይሪካ ኩን ኦካ ኢየሱሴ፤ ሺጝ ውርካ እርርሲዬኑጝ ዮዬ፤ ሹንቃ፤⁴⁶ውርዻ ጎም ኢየሱሴ ቁማ።⁴⁷ኬኦካ ውር ጊታይ ጎሬ ኣኔን ድያው ክየም ቦው ኤቤሌ ቃጫ ናቡካ ውርካ ዋድማካ ውርካ ቃሽ።⁴⁸ኢየሱስዻ ዋይሼ እንግን እያጝ፤ ኬኦኮኑጝ የፓይንቴ ጉዋሩጉ ጎሜን የቦዋ ኤቤሌ ካያዬ የፓይናያይ ኣን ጎሜን?⁴⁹ከሹዋን ሃእርርሲዬ እየው ኦካ ቶኦካ ይሁኔኔ ሃኣዬኬ እየው የካኔ ጎማኬን ኣን፤ ወርቀት ካሹዋጵሽ ባዬ ዬይጝ ማቲያ።⁵⁰ከሹ እን ፓይላ ኦይዴ ጉካ።⁵¹ባርሻ ኬና ክያጃ ኔኒ ጅጜን ኣኔን ኢየሱስ ዻዬን፤ ውር ሹ እን ጎሜ ባርሻ እጝ፤⁵²ኦይድ ኣፓላ ኔኒዬ ሪሽ ቡንዱርቆ።ኢየሱስ ኦካ ሌሜንካ ካራም⁵³ቦሼያ ኢየሱስዻ ሃምካ ታታቻንካ ውርካ ቃሼ፤ ካውር ጌጵሹጋኔ ጊታይ ቶክኔ ጆል ወርቀቴ ፓይላ ፑኡሺሜና።⁵⁴ጴጥሮስዻ ዻዬኬ ዹኬ ሌይ ሁሉካ ሃምካ ካርሚካ ውርካ ቃሽ፤ ጩዋ ኡፍ ኦይኔ ጉ ኣኔን እሺ ሼሊዬን።⁵⁵ውር ታታቻንካ ውርካ ቃሼ ውር ጊታይካ ካራሜ ፓይላ ኢየሱስ ኒሼን ጋኔን ማኝ ዎሼን፤ ኣይባዬ ካኒ ቻሊኬን ጌዬን።⁵⁶ውር ጁዋኑ ክያጅኒን ኬሾሮጝ ክያጃ ጊዬይ ካኒ ቻሊኬን ክየም ማቲዬን።⁵⁷ውር ክየም ክየም ናሹጜ ሺጝ እያጜ ሃሳዋ ኬሾሮ፤⁵⁸ውሩጝ ሺጝ ሃኮሲ ቶኦካ ይሁኔን እን ቡዋካ ውር ኣሽክዬዬ፤ ኬሹ ጅያን ሃኣሽክባ ቶኦ ኬና ቡዋካ ውር ማሬ ኣሽክዬኔ ሃዋያያ።⁵⁹ኣይባ እያይዻዬ ክያጃ ጊዬይ ካኒማቲኬን ክየም።⁶⁰ታቺካ ውርካ ቃሽ ናሹጜ ዾር ኦካ ማሪ ጊዬይዬ ሺጝ፤ ውር ጊታጝ ሃሳውኔ ናንዳካ እን ሃኦን ሃናንዳካ ኦ የማሬ ሃሳውኔኑጝ ሺጝ እያይኔ ኣንሻ ኢየሱስ።⁶¹ዬ ኢየሱስ ኡፋ ሹይ፤ ፕር ታቺ እጝ ሺጝ፤ ውዋካ ታቺ እን ጉዋኖጝ ክርስቶስ ሃእኒ? ሺግ እያይኔ ኣንሻ እሺ።⁶²ኢየሱስዻ ሺጝ ይንጌ ሃኣን፤ ሃንታካ ውር ኡፓ ኦካ ቡዋካ ቁዋቃ እን ቡዎንያጝ ሉፍ ኩንኬ ፎላዬ የጌያባ።⁶³ታቺ እንካ ውርካ ቃሽዻ ሃዽሽ ኣፓላዬ ሺጝ እያጝ፤ «እንቃ ዎሺሻ ኡዋው ማኝካ ኦ?⁶⁴ይሬን ሃዋያያ፤ ኣኪ ሙኒሼን እየው እያን? እንግንዻ ሺጝ ካኣርሾጝ ኣኔባዬ ኮምሼያ ክያጃ ክየም።⁶⁵ኬሹ እን ውር ክየም ክየም ካርሲሼያ ማኒቄ ፓልቅሼን፤ ጅጝ ካርቡ ኔኒዬ ሙርኬ ዛውዬ ሺጝ፤ ይንዳ ሃሳውየ ክያጃ/ ዶክ ሙር ካሎኔ ቦዋ።ጴጥሮስ ሺጝ ሃእባጅኬን ኢየሱስ⁶⁶ጴጥሮስ ኦካ ካርሚ እን ኣኔንባ ኦካ ቶኦ እንካ ዱቡዬ፤ ኬኦካ ውር ጊታይ ባኬን ታቺካ ውርካ ቃሽ ክየም ኩና፤⁶⁷ጴጥሮስ ጉ ቄጪሼ ጌዬ ሁቤኔ ቶዬ፤ ሺጝ እንዻ የኣይኬ እንካ ኢየሱስ እንካ ናዝሬቱጝ።⁶⁸ዬ እሺ ሺጝ እን የክያጆጝ ሃእባጅኬን፤ ሺጝ ሁሉኩሼኬን ኣኔ ቡድያ። ጩዋ ኮትሼያ ሃምካ ሃፑክ እንካ ሁሉኬን፤ ከሹ እን ባቻ ኬያ።⁶⁹ውር እንካ ባክኔንዻ ሹ እጝ ጌዬ እሹጝ፤ ዋይሼ ውር ጊታይ ጎሪ ኦይን ውሩጝ ኬኦግዬይ ሃክየም፤ ሺጝ እያይኔ ፕር ክያጃ።⁷⁰ዬ እሺ ካንዻ ቡድያ። ቆቤ ዽታኮጝ ጩዋ ውር ጊታይ ኣኔን ኦይን ኬኣኩሉክ ጴጥሮስ ኣዬ ውርካ ገሊላ ናንዳካጝ ጊባጆጝ ሺጝ፤ እን ኬኦግዬይ የኣይ ክየም።⁷¹ዬ እሺ ሺጝ፤ እን ውር እጝ የክያጆጝ ኣን ሃእባጅኬን ሺጝ እያይኔ ካርሲያ ሾሮሺኔን።⁷²ይሪካ ባቻ ኬያ እንካ ላንሳጝ፤ ጴጥሮስዻ ክያጃ እን ኢየሱስ ሺጜ ኬሌሜንካ ኬዬንካ ባቻጝ ዻ የቡድያምባ ክያጝ ጅያኑጝ ጌያ

ሃፑክ 15ኢየሱስ ኬኦካ ሌሜንካ ጲላጦስ¹ከዻም ኬካሪንታ ታታቻንካ ውርካ ቃሼ ጌጵሹጋኔ ውር ጊታይ ቶክኔ ጆል ወርቀቴ ውር ኬውር ጊታይካ ካራሜ ፓይላ ይሪካ ሃሳውኖጝ ጩዋ ቁም ኢየሱሴ ቦፓዬያ፤ ሳስክዬ ጋያ ጲላጦስዻ።²ጲላጦስዻ ሺጝ፤ እን የኣይ ታቺካ ኣይሁድ? ሺጝ እያይኔ ኣንሻ፤ ኢየሱስዻ ሺጝ ኬእያይ የሺጞጝጜ ዋሼያ እሺ።³ታታቻንካ ውርካ ቃሽዻ ካሲሲያ እሺ ኬክያጃ ጁዋኑ።⁴ጲላጦስዻ ዋይሼ እሺ ሃኦ የማሬ ቃቦ ኣይኔኑጝ? እየዎ ካሲሲያ እን ኬክያጃ ጁዋኑ ሺጝ እያይኔ ኣንሻ እንቃ።⁵ዬ ኢየሱስ ካኒ ዋሽኬን ክየምጵንዻ፤ ጲላጦስ ዻዹጝኔያ።⁶ከቶንቶሮ ካቡልሼ ዛርሲ ውርካ ቁሜን ጊታይ ይሁኖጝ ኣኔ ዱስሚኔንካ ኣይኔን።⁷ናሹጝ ኬሴሶዬ እጝ ኒሺ ናፒሱጝ እን ቁሜ ኬውርካ ሴሶጝ ኣና ውር ክየም ኬና ሺጌ በርባን።⁸ዛርሲዻ ፓዬኔ ኬእያይ ዱሲዮጝ ካጋሽክሼ እንግንባዬ ይወና ጲላጦስ።⁹ጲላጦስዻ ሺጝ፤ የዎሻያይ ካቡልሼ እየው ቢቲካ ኣይሁዱጝ? ሺጝ እያይኔ ኣንሻ እንግን፤¹⁰ናንዳካኦ ታታቻንካ ውርካ ቃሽ ሳስክዬ ጋይኔ ኢየሱስ ከቦውንታ እባጃ።¹¹ዬ ታታቻንካ ውርካ ቃሽ ኬኦካ ባል ኔኒ ካቡልሼ እንግን በርባን ካጋንሼንባዬ ቲታ ዛርሲ።¹²ጲላጦስዳ እንቃ ሺጝ፤ ኣኪ እን የሺጝቴ ቢቲካ ኣይሁዱጝ የዎሻ እንካ ሻሜ እያን?¹³እንግንዻ እንቃ ሺጝ ካሮይባዬ ጉቹካ።¹⁴ጲላጦስዻ ሺጝ፤ ናንዳካ ኦ? ኣና ሴሶ ካኦ ኬና ኣሽክዬ። ዬ እንግን ሺጝ ካሮይባዬ ሌሜዬ ጉቹካ።¹⁵ጲላጦስዻ ዛርሲ ዋዝንሲዬን ቡልሼያ እንግን በርባን፤ ዬ ካሙሬ ኢየሱሴ ካሮዮጝ ሳስክዬ ኣዬና።ፓፃኗን ጎልቲያ ኢየሱስ¹⁶ፓፃኗንዻ ቦሼያ እሺ ሃም ሺጜ ፕርይቶሪዮን ሃምካ ካራምካ ታቺ እጝ፤ ፓፃኗንዻ ፓይላ ፑኡሺሜና ክየምጵን።¹⁷ክምሼያ ኣፓላ ጫጩጉ፤ ጋይሼያ ሹቦ ኔኒ ክያንዻ ክዽሬ።¹⁸ጩዋ ሺጝ ቢቱጝ ካኣይሁድ ዮ፤ ሹቃ ካኣይሼ እን/ ሺጝ እያይኔ ቲታ ቡዋ፤¹⁹ሹቦ ኔኒዻ ሙራ ኬሴጋ፤ ፓልቅሼያ ማኒቄዻ፤ ቶኬ ኩዋሚንዻዬ ይወና።²⁰ጎልቲዮጝ ጩዋ ቡል ኣፓላ ጫጩጉ እጜ፤ ክምሼ እሺ ኣፓላ እን ኔኒዬ ቦፓዬያ ሮዬን።ሮዬንካ ኢየሱስ²¹ሹኔካ ኣሌክሳንድሮሴ ሩፎሴ እን ሺጜ ስምዖን ውርካ ክየም ካቀሬና ኩንኬ ሊቴ ካዼቴ ሻሪ እንካ ሮይኔኑጝ ቹቹንሺሼያ።²²ጩዋ ቦሼያ ኢየሱስ ራቅ እን ሺጜ ራስቅል ጎልጎታጝ።²³ጋያ እሺ ኣላላ እጝ ዎርሲዬ ኬከርቤውጝ፤ ዬ እሺ ካኒ ቦኬን።²⁴ሮያ፤ ውር ክየም ክየም ካቱልሾጝ እባጄን ኣፓላ ኔኒ ካቱልሾጝ ሃዽሼ ካሺሜና።²⁵ከሹ እን ሮዮጝ ዋዳ ሃሳዓት ጅያን።²⁶ቶኬንካ ካሲሲዬን ጊዬይ ሃኬና ሺጝ ቢቲካ ኣይሁድ።²⁷ከእሺ ሮያ ጓዋርጉ ዻ ክየም ኬቡዎን ክየም ኬዋርካታ።²⁸ወርቀት ሺጜ ኮማ ኬውርካ ሴሶጝ ሙኔና ከእጝ።²⁹ጊታይ ሳጊኬ ጉዋርዻ ይንግሽ እንግን ኤታጋኔ ሃሳዋካ ይሬን ክያጄን ጋኔን እያጝ ሺጜን፤ ዬጌይያይ/ ካኮሲ ቶኦካ ይሁኔኔ ካኣሽኪኬ ሹ ጅያን ሃእኒ፤³⁰ይንዳ ጋን ጎብኬ ኦይንካ ሮይኔኔ ባይሺሽየ እን ኤምኑ።³¹ፕር ታታቻንካ ውርካ ቃሼ ውር ጊታይ ቶክኔ ጆል ወርቀቴ ከኦልቲዬን ዋይሼ ጋጝ እያጝ፤ ባይሺሻ ውር እንቃ የካኒ ቻሊኬን እሺ ኤምኑ ባይሺሼን፤³²ካጌይታ ይሁንቶጝ ክርስቶስ ይጝ፤ ቢቱጝካ እስራኤሉጝ ይንዳ ካጎብየ ከሮይኔን ክያኒ። ጊታይ ሮዬ ኬእሺዻ ጋኔን እያይ ሃሳዋካ ይሬን ክያጄን።ኣርሼንካ ኢየሱስ³³ቦኬ ሳዓት ላዌ ሌይ ካኣዬ ሳዓት ሳሉጝ ዳሉጝ ክያኑጝ ማቲያ ድሙጉ።³⁴ከሳዓት ሳልዻ ኢየሱስ ሺጝ፤ ኤሎሄ ኤሎሄ ለማ ሰበቅታኒ? ሺጝ እያይኔ ኡቹካ ኬናቅድ ታቺ፤ ዋካል ኔኒዻ ሺጝ ኣምላኬ ኣምላኬ ሃኦ የኦይዴ ኣኑጝ።³⁵ውር ክየም ክየም ጊታይ ጎሬ ኣኔን ኦይን ዋዬ እጝ ሺጝ ሺው ኤልያስ።³⁶ጩዋ ውር ክየም ቤርቢዬ ኩዬ ቦው ኣላላዬ ካማትባዬ ቦሼያ ኢየሱስ፤ ጩዋ ሺጝ ይንዳ ኦይድየ፤ ኤልያስ ኩኔ ሃንቺሺያጝ ሃጌያባ።³⁷ኢየሱስዻ ኡቹክ ከናቅዲ ታቺዬ ኣዬና ናፒሲ ኔኒ።³⁸ናዻራካ ቶኦካ ይሁኔን ቦኬ ዾዮኬ ሌይ ዳራ ሃዽሼና ዻ።³⁹ታቺ እንካ ዽብ ዾሬ ኣኔን ዳሪካ ኢየሱሱጝ፤ ኡቹክ እያይኔ ሹ እን ኣይኔ ናፒሲ ኔኒዬ ጌዮጝ፤ ሺጝ ውሩጝ ኬኣኩሉክ ሃውዋካ ባሪዮ።⁴⁰ኬሹ እጝ ሃኣጚ ኣኔን ኬዹክ ጎሬ ቶዬን፤ ኬኦካ ጫቃን ጊዬይ ማሪያም እንካ መግደላዊቱጝ፤ ጅዋኔካ ዺኒ እን ያዕቆቤ ዮሳዬ ማሪያም፤ እያይ ሰሎሜዻ ኣኔባ።⁴¹ሃኣጚ ጊታይ ሃጊታይ ቦኬ ገሊላዬ ዻዬዬ ሹሹምብዬ ጆልዬ፤ ፕር ሃኣጚ ጁዋኑ ጊታኬና ፓይኔ ኬጋጝ ኬኢየሩሳሌም ኣኔባ።ሌሲካ ኢየሱስ⁴²ክራ ቃይትሼ ኩኔ ማቲያ ሼክማ ካሹ እንካ ሶጵሳጝ፤⁴³እን ሪግሺኖጝ ኣይ ታቺካ ካራሜ ካሊዬን ጌጳሞካ ባሪዮዬ ዮሴፍ እንካ ኣርማትያሱጝ ኬሾያሞ ኩይ ሃምካ ጲላጦሴ ይወና ሩዋካ ኢየሱስ።⁴⁴ጲላጦስዻ እያይ ይሪካ ዋዬ ኣርሼን ኔኑጝ ጎሺያ፤ ሺው ታቺ እንቃዬ ሺጝ ኣርሾጝ ኡፌናይ ይንዳ ኣንሼንየ፤⁴⁵ኣርሼን ኔኒ ዋዬኬ ኦካ ታቺ እንካ ዽቡጝ ጩዋ ሩዋ ኔኒ ኣያ ዮሴፍ።⁴⁶ዮሴፍዻ ኡዋሩጛ በፈታ፤ ሃንቺሺ ኣሩጝ ኔኒዬ ኣጁጜ በፈታ ክያኑጝ ጩዋ፤ ኣጁጛ ኦካ ሌሲ እን ቆዴ ባይ ክያኑጝ፤ ቶግካ ሌሲዻ ሹፋ ኬባይ።⁴⁷ማሪያም እንካ መግደላዊቴ ጁዋኔካ ዮሳ ማሪያሜ ጋጁጜ ኦን ጋኔን ቶዬን።

ሃፑክ 16ናሹጜንካ ኢየሱስ¹ሹ እንካ ሶጵሳ ሳጊዮጝ ጩዋ፤ ማሪያም እንካ መግደላዊዬ፣ ጁዋኔካ ያዕቆብ ማሪያሜ፣ ሰሎሜዬ ፓዬ ሩዋካ ኢየሱስ ጋሙሬ ጵሼን ጉዋሩጛ።²ከክያጝካ ሹዋን ሹ እንካ ሌሜን ኬዻም ኬካሪንታ፤ ካኒ ሹሽ ኣኔንባ ቱሌኔ፤ ጋኔንባ እያጝካ ሌሲ ፓዬኔ፤³ሺጝ ባይ እጝ ኬኦካ ቶግካ ሌሲ ሃኒን ካኡንጉልሼ ኡዋውጝ ሺጝ እያይኔ ጋኔን ሃሳውኔን።⁴ጌይ ካቼ ቶይያጝ፤ ባይ እን ካሎን ኣይ ታቹጝ ኬካ ቶግካ ሌሲ ኡንጉሌኔ ጌያ።⁵ሁሉኬ ሃምካ ሌሱጝ፤ ጌይ ውር ኬና ኪሚ ኣፓላ ፎልቼኔ ኡፊ ቡዋ ቡዎኔ ቴርጋዽያ።⁶ዬ እሺ ዋይሼ እንግን እያጝ፤ ኦይድ ቴርጋዽቴን፤ እን የዎሽቶጝ እጝ ሮዮጝ ሃእንካ ናዝሬት ኢየሱስ፤ እሺ ናሹጛ፤ ኣኔኬን ኦጝ፤ ኦይን የኣጁጝቴ እሹጝ ሃኦጝ።⁷ኣይባዬ ፓዬ ዋይሺቴ ውር ጊታይ ዻዬ ጆሌ እሺዬ ጴጥሮሴ ሌሜ ፓይ ገሊላ ከእያይ ሜይሼ እየው የጌያባ ኦይን ሺጚ እያይኔ ሜይሺቴ እንግንባ።⁸ሃኣጛንዻ ሪጄኔ ጎሺዬ ኬኦይንካ ሌሲ ጉኬ ቱላ፤ ናንዳካጝ ሪግሺኖጝ ካኒ ሜይሼኬን ውር ክየምጵንዻ።⁹ኬክያጝካ ሹዋን ሹ እንካ ሌሜን ናሹጜ ኬኣርሼን ክያኑጝ ጩዋ፤ ኬሌሜን ካቡሌ ቤሮ ሶጳን ጌዬና ኬማሪያም እንካ መግደላዊ፤¹⁰እሺዻ ኩዬ፤ ጊታይ ጋዬ ኬጋጝ ሞይካዽዬ ጋኔን ኦቆርኔኔ ጌዬ ኣዬ እሺዬ ጌይኔኬ እሹጝ ሜይሼያ እንግን።¹¹ዬ እንግን ካኒ ጉምኬን።¹²ኬኦይን ጩዋ ኬኦካ ውር ጊታይ ዻዬ ጆሌ እሹጝ ዻ ፓይሼ እያጝካ ሊቴ ኬዴንታ እንቃ ጌዬና ኦግዬይ።¹³እንግንዻ ዋኬ ፓዬ ሜይሼያ ውር ጊታይ ጋዬ ኬጋጝ፤ ኣይባዬ ካኒ ጉምኬን።¹⁴ኬኦይን ጩዋ ታጵላማን ጋኔንባ ኬጋጝ ቆቤኔ ዹዋልሼያ እንግን፤ ናሹጜ ጩዋ ውር ጊታይ ጌዩጝ እጝ ሜይሼ እንግን ናንዳካጝ ማሬ ጉሜኑጝ፤ እን ማሬ ጉሜን ጎማ እንግን ቃግማ ካሻን ጊዬይ።¹⁵ዋይሼ እንግን እያጝ፤ ፓይባ ፌን ፓይላ፤ ክያጃ ሹቃጝ ናኑጝ ሜይቴባ ሙኔን ፓይላ፤¹⁶እን ጉምዬ የዱቅቶጝ ባይሽባ፤ ዬ እን ማሪ ጉሜን ኮምሼባ።¹⁷ጊታይ ጉሙጝ ዻዬባ ዹዋልሺኔን ጊታጝ፤ ኬሮጝ ናኒ ቡልባ ቤሮ፣ ሃሳወንባ ኬቶግ ሃሊዻ፤¹⁸ጎምባ ቻች ኬቡዋ ጊዬይ፤ ማቲኒን ኦኬ ኬና ካኒሽ ጊያሚሽኬን እንግን፤፣ ቡዋ ጊዬይዻ ቻቺሼባ ኦካ ውር ጊታይ ዴሜን እንግንዻ ባይሽባ።¹⁹ኢየሱስ ታቺ እን ሃሳወ እጝ ጩዋ ኩያ ፎላ ዾዮክ፤ ኡፋ ኦካ ባሪዮ ቡዋ ቡዎንዻ።²⁰ጩዋ ውር ጊታይ ዻዬ ጆሌ እሹጝ ቱሌ፤ ኪሊዬና ራቅ ፓይላ፤ ታቺ እን ኣኔን ኬእንግን ኣሽክዬን፤ እርርሲኔን ጊዬይ ዻዬዬ ኬዹዋሊሺኔን ጊታይ ኬሙኒኔን ኣኔን ክያጃ ቁዋቅትሺሼን።

ሃፑክ 1ሁሉኩሼን ¹ኬጫቃን ጉዋዩ ክያጃ ጊታይ ሙኔን ጁዋናን ክያጃ ጊታይ ጊባጆጝ ቶኬ ጌዬምባ። ²ክያጃ እንዻ ናሹጝ ኬሌሜኔ ውር ጊታይ ኣይ ማኝ ካካሪቡዬ ውር ጊታይ ክያጆል ክያጃዬ ጊታይ ኣኖጝ ሓጊታይ ክያጆጝ። ³ታቹጝ ቴዎፊሎስ ዮ፤ኣንዳ ኬታጝ ናኑጝ ኦኬ ፓይላ ኬኣሽክዬኔ ኬኣጅሼኔ ሃቃቢዮጝ ጩዋ ክያጃ ዳዬ ኣዬን ኔኒዬ ካቶክሼ እን ማቲ ሹቃዬ ሃጌያያ። ⁴ይንዳ ሃኣሽክዮጝ ኦይን ዬእርርዮጝ ኣዬ ኣኩሉክ ኬእባጅዬ ጊያ።ውር ካ ዱቅኔን ዮሓንስ ጅሼን ኔኒ ሌምሼ ክያጃ ⁵ኬታቺካ ይሁዳ ኬቦንካ ሄሮድስ ኬኦካ ውርካ ኣብያ ኣና ውር ክዬም ኬና ሺጜ ዛካርያስ ኝያ ኔኒ ኤልሳብጥ ኣንኬ ውርካ ኣሮን። ⁶እንግን ዳዋን ኬክያጃካ ባሪዮዬ ክሊማዬ ፓይላ ዳዬዬ ሃንታዳ ጋኔኬኔ ቆባ ኬሌሜንካ ባሪዮ ጋይጫንቃሌ። ⁷ኣይባ እያይዳዬ ኤልሳቤጥ ኬጌቺንታ ኔኒ ሃንታዳ ኣኔኬን፤እንጊን ዳዋን ጋይ ውር ጊታኬና ኬቦን ጊዬይ ጌቺ።⁸ሹ ክዬም ዛካርያስ ሹካ ዋድማ ኔኒ ሄክሾጝ ኬኦካ ሌሜንካ ባሪዮ ሃታቺካ ፔን።⁹ኬሊኪ ኬታቻሞ ኔኒ ኩዬ ሁሉክ ሃምካ ቶኦካ ባሪዮዬ ናንዳካ እርርኔን ሻም ቁኛዬ ሄክሻ እሺ።¹⁰ሹ እጝ ሹካ እርሮ ኔኒ ሄክሾጝ ዛርስ ፓይላ ጎር ሹኑኬ ይዌና።¹¹ውርካ ኤርጎካ ባሪዮ ዶራ ኦካ ቁኛ ቡዋ ቡዎኔ ጌያ። ¹²ዛካርያስዳ ሹ እጝ ጌዮጝ ቴርጋድዬ ሪግሼና። ¹³ውርካ ኤርጎ ዋይሼ እሺ ዛካርያስ ዮ፤ኦይ ሪግሺኔን ይሁኔን ኑኑ ዋያ ኝያ ኑኑ ኤልሳቤጥ ጅሽባ ሃንታካ ጁሙ ሮጝ ኔኒ ዬሺጚ ዮሓንስ።¹⁴ኬእሺ ባሊዬ ዋዛዬ ሄጌይባ፤ውር ጁዋንዳ ናንዳካጝ ጂሼ እሹጝ ዋዝንሲ እንግንባ።¹⁵ኦካ ሌሜንካ ባሪዮ ማቲባ ታቺ ኣይን ኣላላጝ ኣይን ኦዕንቃ ጊታይ ጮይሼ ጆሉጝ ፓይላ ማትኬን ካኒ ኣንባ ኦካ ክያጝካ ጁዋኔዬ ቆቅሼያ ኡሲካ ባሪዮ።¹⁶ኬኦካ ውርካ እስራኤል ጁዋናን ዋሼባ ሃምካ ታቺ እጝ ሃምካ ባሪዮጝ። ¹⁷ሻንካ ሹቡጋን ሃምካ ሃንታን፤ጊታይ ማሪ ኤርጎ ቦዌን ካዋሼ ሃምካ ጫንቃሌ፤ካኣሽክሼ ውር ጊታኬና ካሻው ሃምካ ባሪዮዬ ኬኡሲካ ኤልያሴ ቁዋቅትዬ ኬሌሜንካ ታቺ እጝ ኩይባ።¹⁸ዛካርያስ ዋይሼ ውርካ ኤርጎካ ባሪዮ ይጝ ኣን ሃእባጅኬ ኦ ኣን ሃኣይ ጌቾ ኝያ ናንዳ ኬቦን ኔኒ ጌቺያ ሺጝ እያይ። ¹⁹ውርካ ኤርጎካ ባሪዮ ዋሼ ዋይሼ እሺ ኣን ይጝ ዶሪ ኦካ ሌሜንካ ባሪዮ ሃዓይ ጌብሬኤል ይጝ ሹቃጝ ካሜይሼ እን ይዕስያ ኣን። ²⁰እዮዎ ናንዳካጝ ዬማሬ ክያጃ ናኒ ዋዬኑጝ ካሊ ሹ ኔኒ ሌይ ሃምካ ሙኒኖጝ ዬማቲ ዱድዬ ዬካሊባ ዬቻሊኬን ውር ክዬምጵንድ ሜይሼን።²¹ዛርሳዳ ናንዳካጝ ዛካርያስ ኡሽሼ ቶኦክያኑጝ ካሪሲያ ጉንዱምኔን። ²²ጩዋ ቱሎጝ ካኒ ዎሽኬን እንግን ሜይሼን ኦጊታይ ውርካ ኤርጎካ ባሪዮ ክያጆጝ ናንዳካጝ ኮሜን ማሬ እባጄኑጝ ሺጝ ጌይ ውርካ ኤርጎካ ባሪዮዬ ጊያ። ²³ዛካርያስዳ ሹካ ዋድማ ኔኒ ጃክኖጝ ዋኬ ኩያ ሃምካ ቶኦኔኑጝ።²⁴ኬኦይን ጩዋ ኝያ ኔኒ ኤልሳቤጥ ኡሩካ፤ኬክያጝካ ትጌሽ ቾን ዲካ እሺ ኤምኑ።²⁵እሺዳ ሺጝ ታቹጝ ናኑጝ ኬሹቃቲ፤ኬሴካሞ ናኒ ኬኦካ ጫቃን ካውር ካቡሌ ኣን ጌዬ ጋንኬ ሹጝ ኣሽክሼያ ኣን ይጝ።ጅሼንካ ኢየሱስ ሌምሼ ክያጃ ²⁶ኬትጌሽ እጝካ ላይሳ ባሪዮ ይዕሲያ ውርካ ኤርጎ ኔኒ ኦካ ፔን እጝ ጌዬን ኬጌልላ ሃምካ ካታማካ ናዝሬት። ²⁷ይዕሲሼ ሃምካ ውርካ ዳዊት ኬና ሺጜ ዮሴፍ፤ናንዳካ ሃራኔኒ ዻጵ እጝ ዻጵ እጝ ሮጝ ኔኒ ሺጝ ማሪያም። ²⁸ውር ካኤርጎ ሁሉክ ሃምኔኒዬ ፤ሺጝ ይጝ ካሎን ናሺዮጝ ሹቃ ካኣይሼ እን፤ባሪዮ ኣንኬ እን ፤እን ዬኣይኬና ጉዋኔ ዋይሼ እሺ። ²⁹ማሪያምዳ ናንዳካ ሃሳዋ እጝ ቴርጋድዬ ሺጝ፤ይጝ እሻ ሃጌሶካ ኦ ሺጝ እያይኔ ካርሲያ ክያጃ ጊታይ ቃብዬን።³⁰ውርካ ኤርጎ ዋይሼ እሺ ማሪያም ዮ ኬኦካ ባሪዮ ዬጌያ ኦኬ ታቺ፤ኦይሪግሺኔን፤ ³¹እዮዎ ዬኡሩኩባ ዬጅሺባ ሃንታካ ጁሙ ሮጝ ኔንዳ ዬሺጚ ኢየሱስ፤ ³²እሽዳ ማቲባ ታቺ ሺጝባ ውዋካ ባሪዮ ታቺ እጝ፤ባሪዮ ኣምላክዳ ኣይባ እሺ ጌጳሞ እጝካ ሹኔ ኔኒ ዳዊት። ³³ኦካ ቶኦካ ያዕቆብ ጌጳድባ ኬጌጳሞ ኔኒ ቱኒሲ ኣኔኬን።³⁴ማሪያምዳ ዋይሼ ውርካ ኤርጎካ ባሪዮ ኣን ናንዳካጝ ሃማሬ ጁሙ ጌዬኑጝ ይጝ ኣይ እያን እያይ፤ ³⁵ውርካ ኤርጎካ ባሪዮ ዋሼ ዋይሼ እሺ ኡሲካ ባሪዮ ኩንባ ኦኑኑ ቁዋቅቲካ ውዋካ ታቺ እጝ ይሁሼን እምባ፤ዬውዋ እጝ ዬሺጌ ጂሼን ሺጝ ውዋካ ባሪዮ።³⁶እዮዎ ኤዳ ኑኑ ኤልሳቤጥ ኬጌቺንታ ኔኒ ኡሩካ ሃንታካ ጁሙ ኬኡሩኬን ኔኒ ማቲያ ትጌሽ ላ።³⁷ኦኬ ኬና ካካው ባሪዮ ኣኔኬኔ፤³⁸ኣን ሃኣይ ውርካ ባሪዮ ኬክያጃ ኑኑ ካማቲሼባ ኣን ሽጝ እያይ፤ጩዋ ውርካ ኤርጎካ ባሪዮ ቱሌ ኩያ።ማሪያም ኩያ ኤልሳቤጥ ኣንሺኔን ³⁹ማሪያምዳ ኬክያጝካ ሹ እጝ ናሹጝ ይሪካዬ ኩያ ሃምካ ፔን እጝ ኣይ ባሪጊን፤ፔን ክዬም ሃምካ ፔንካ ይሁዳጝ። ⁴⁰ኩዬ ሁሉክ ሃምካ ቶኦካ ዛካሪያሴ ዋይሼ ኤልሳቤጥ ሃሹቃይ፤ ⁴¹ኤልሳቤጥዳ ሹ እጝ ዋዬ ጌሶካ ማሪያም ውዋ ኣሼንኬ ኦካ ፒሲዬ ሁሉካ ኦካ ኤልሳቤጥ።⁴²ሻም ናቂዲ ኔኒ ዴጌ ሺጝ እንኬ ኦካ ጫቃንካ ሃኣጚ ዬኣይኬና ጉዋኔ ጫላ እጝካ ፒሲ ኑኑጝ ሃኬና ጉዋኔ ።⁴³ኣይባ እያይዳዬ ጁዋኔካ ታቹጝ ናኑጝ ካኩዋዌ ኦናኒ ሃኣይ ኒኔ ።⁴⁴እዮዎ ናቂዲ ካጌሶ ኑኑ ሁሉኬ ናቡ ናኒ ክያኑጝ ጫላ እጝ ኣን ፒሲ ናኒ ክያኑጝ ኬዋዛ ኣሼና።⁴⁵ታቺ እጝ ሹዋጵሽባ ሽጝ እያይኔ ጊታይ ክያጆጝ ፤ጎሙጝ እሺ ሃዕን ጉዋኖጝ።⁴⁶⁴⁷ይያሪካ ማሪያም

ሃፑክ 2ጅሼንካ ኢየሱስ¹ኬቦን እጝ ፔን ፓይላ ካኮሜዬ ካቶክሺሼ ሮጜ ኬኣውግስጦስ ቄሳር ኤርጎ ቱላ። ²ዬቄርኔዎስ ኣዬ ታቺካ ፔንካ ሶሪያጝ ሻሜ ኬሌሜን ሃኮሜንካ ዛርሲ። ³ዬ ውር ክዬም ክዬም ፓያ ሃምካ ፔን ጊዬዩጝ ሮጝ ቶክሺሼን።⁴ዮሴፍዳ ኣንኔ ኬቶኦካ ዳዊቴ ኣዬ ውርካ ጋጝ ናሹጝኬ ሃም ጌዬን ኬካታማካ ጌልላ ናዝሬቴ ኩይሼ ሃምካ ካታማካ ዳዊት ይሁዳ እያጝካ ቤቴልሔም። ⁵ኬታይዳ ጊታይ ፓይ ሮጝ ቶክሺሼን ናንዳካጝ ሹካ ጅሼን ሄክሾጝ ጋይ እሺዬ ሃራ ኔኒ ማሪያሜ።⁶ጋንባ ኦይኔ ሹካ ጅሼን ኔኒ ሄክሻ። ⁷ውዋ እጝ ኣይካ ሌሜን ጅሻ ሃጁሙ፤ሳሪኬ ኣፋላዬ ናንዳካጝ ማሬ ኦካ ቆቤንካ ኮሜና ጌዬኑጝ ሆኦሲያ ኦካ ማራካ ዜሌ።ውርካ ዳውኔኔ ውርካ ኤርጎዬ⁸ፔን እጝ ክያኒ ኬምክር ካሊዬ ኦካ ራጴን ጊዬዩጝ ጋኔ ውርካ ዳዌን ጊታኬና ራጵ ጳልክያኒ።⁹ውርካ ኤርጎካ ባሪዮ ኩን ሉጉዴ ዶራ ኦካ ቆጩር ጊዬይ፤ጌጳሞካ ባሪዮዳ ላሉጛ ኦካ ጫቃን ጊዬይ፤ሪጊ ታቺዳ ጎማ እንግን።¹⁰ውርካ ኤርጎካ ባሪዮ ዋይሼ እንግን ኦይሪግሽንቴን እጝካ ኣይሼ ዛርሲ ዋዛ ታቺ ክያጃ ሹቃ ሃቦሼያ እዬው። ¹¹ሹጝ ኦካ ካታማካ ዳዊት ጅሼያ እዬው ዴሻዬ፤እሽዳ ሃክርስቶስ ታቺ እጝ። ¹²ይጝ ካማቲሼባ እዬው ሜርሜር ሃንታ ዲኒ ሳሪኬ ኣፋላዬ ሄጌዬባ ዎኦሲ ኦካ ማራካ ዜሌዬ።¹³ሉጉድ ፓፃኖ ጁዋኑካ ፎላ ጌዬና ኬውርካ ኤርጎ ጌጳሲ ባሪዮዬ ሺጝ እያጝ፤¹⁴ጌጳሞ ካኣይካ ባሪዮ፤ሹቃ ካኣይሼባ ውር ጊታይ ካዳሊ ናሺ እሹጝ።¹⁵ውርካ ኤርጎ ጌይ ኬኦጊዬይ ዋናዬ ኮቲሼ እያጝካ ፎላጝ፤ውርካ ዳውኔን ሺጝ ኪያጃጝ ባሪዮ ሜይሼ ኡዋው ካፓይሺቴ እያጝካ ቤቴልሔም፤¹⁶እንግንዻ ይሪካ ፓያ፤ማሪያሜ ዮሴፌ ዎኦሲ ውዋ ኦካ ዜሌዬ ጌያ።¹⁷ጌዮጝ ጩዋ ናንዳካ ውዋ እጝ ሜይሼ እንግን ፓይላ ሃሳዋ።¹⁸እንግንዻ ዋዬ ክያጃ ጊታይ ውርካ ዻሁኔን ክያጆጝ ፓይላ ጎሺያ።¹⁹ማርያም ዬ ዋዬ ክያጃ ጊታይ ጎምኬ ሸኔ ኣኔን ቃቦዬን።²⁰ውር ጊታይካ ዻሁኔንዻ ክያጃ ጊታይ ሜይሼ እንግን ፓይላ ኣዬዬ ጌዮጝ፤ ናንዳካጝ ዋዬዬ ጌዬዬ ፓይላ ጌጳሲ ባሪዮዬ ይወኔ ዋካውዋ ኢዬሱስ ቦሼያ ሃምካ ቶኦካ ይሁኔን ²¹ማቲህ ሹ ሎጝካዬ ሹካ ቆሬን ሄክሾጝ ውርካ ኤርጎ ኬሌሜንካ ጅሼን ሮጝ እጝ ኣይሾጝ ሺዌያ።²²ኬእያይ ክያጃባ ሙሴ ቡሎጝ ኬክያጝካ ሹ እጝ ሹካ ጅሼን ጊዬይ ሙኒኖጝ፤ዮሴፌ ማሪያሜ ውዋ ባሪዮ ቦሼን ፓይሼያ እያጝካ ኢዬሩሳሌም።²³ይጝ ኬክያጃካ ባሪዮ፤ውዋ ኣይካ ሌሜን ፓይላ ሃኬና ጌጳሲዬ፤ሺጜ እያይኔ ቶኮጝ ካሙኒኔዬ፤²⁴ፒር ኬክያጃካ ባሪዮ ሌሞዳ ዌይ ሃንታካ ሆሌዳ ሺጜ እያይ ጋላ ቦፓይኔን ኣኔባ።²⁵ኬሹ እጝ ኣና ውር ክዬም ኬና ኡፑኒ ኢየሩሳሌም ኬና ኣይ ቁዋቃዬ ኬና ሺጜ ስሞዖን፤እሺዳ ሃውር ኬና ቶይኒ ጫንቃል ኣዬንካ እስራኤሌ ሃውር ኬና ኣኔ ኡሲ።²⁶ፒር ጌዬ ታቺ ኣዬንካ ክርስቶስ ሜይሼያ ኬኡሲካ ባሪዮ።²⁷እሺዳ ኬ ሹ እጝ ይዕሲ እሺ ኬኡሲዬ ኩዬ ሁሉካ ሃምካ ቶኦካ ባሪዮጝ፤ሹቡጌን ካውዋ ኬክያጃባ ዱሲሜን እንካ ሙንንቶጝ ቦው ውዋ ኢዬሱሴ ሹ እጝ ሻዎጝ፤²⁸ስሞዖን ቦዌ ናጋ፤ጌጳሲ ባሪዮዬ ሺጝ፤²⁹ታቹጝ ዮ፤ክያጃኑኑ ኬእያጝ ሃጌዮጝ ጋን ውር ኑኑ ኬሹቃ ይዕሲባ።³⁰ካርቡ ናኒ ኦካ ሌሜን ካውር ፓይላ ዬኣሽክዮጝ።³¹ባይሼን ኑኑ ጌያዬ።³²ይጝ ካኣይ ዛርሲ ኑኑ ሜሌል፤ናንዳካ ዛርሲ ኑኑ ናንዳካ እስራኤል ሃታቺ።³³ሹኔዬ ጁዋኔዬ ናንዳካ ክያጃ እጝ ሜይሼ እሹጝ ዳዱጝኔያ እንግን።³⁴ስሞዖንዳ ኡዋና እንግን፤ጁዋኔ ኔኒ ማሪያምዳ ሺጝ እያጝ፤ውዋ ይጝ ኬ ኦካ እስራኤል ጁዋናን ካኣይሼ ናንዳካ ቡዴኔ ናሹጜኔ ፒር ካኣይሼ ውር ጊታይ ክያጃ ጋራ ጅጞጝ ማይዴዬ ቱምያ።³⁵ናንዳካ ጁዋናን ካሜይሼ ቃቦካ ሻኔ ጊያ፤ናፒሲ ኑኑዳ ፒር ቶክባ ኬኤቤል ራጂሜ።³⁶ፒር ኬኦካ ውርካ ኣሴር ውዋካ ፋኑኤል፤ውርካ ባሪዮ እጝ ሼጜ ሓና ኣኔባ ኬታይ፤እሺዳ ካሎን ጌቺያ፤ኬኡማባ ኔኒ ባ እያንሺ ኬዳጳሞ ኡፓ ቦን ሶጳ፤ ³⁷ቦን ኔኒ ማቲዬ ሎጝካይታም ኦይዱጝ ኬሹሼ ሚክሬ ቱልኬን ኬኦካ ቶኦካ ይሁኔኔ ኬቶሮንድዬኔ ኡፓ። ³⁸ሹ እጝ ኩኔ ጌጳስዬ ባሪዮጝ ክያጃካ ውዋ እጝ ሜይሼያ ውርካ ኢየሩሳሌም ፓይላ።³⁹ዮሴፌ ማሪያሜ ሹዋጴ ክያጃካ ባሪዮዬ ኤርጎዬ ፓይላ ጩዋ ሃምካ ካታማ እጝ ኣን ሃምካጎብሼንካ ጌሊላ ዋኬ ፓያ እያጝካ ካታማ ጊዬዩ ናዝሬት።⁴⁰ውዋዳ ጌጵሼ ቁቅትሼ ኩያ፤ቆቅሼያ ኦኬ እባጄን፤ኣይኔንካ ባሪዮ ኣንኬ እሺ።ኢዬሱስ ኬቦን ታጲ ላማ ኩያ ሃምካ ቶኦካ ይሁኔን ⁴¹ውር ኔንዳ ኬክያጝካ ቦን ናንዳካ ቶንቶሮካ ፋስካ ፓይሼ ጆሌ እያጝካ ኢዬሩሳሌም። ⁴²ውዋዳ ጌጲሼ ማቲዬ ቦን ታጲ ላማጝ ኬእያኑጝ ዱስዮጝ ፓያ ሃምካ ቶንቶሮጝ፤ ⁴³ጩዋ ሹዋጴ ቶንቶሮጝ፤ ዋኬ ሃምካ ጶሮክ ጊዬዩጝ ውዋ ኣጁጉ እጝ ኢዬሱስ ሺዲያ ኢዬሩሳሌም፤ውራንኔንዳ ይጝ እሺ ሺድዮጝ ካኒ ጊባጅኬን። ⁴⁴ዋሽኬ ኦኮኑጝ ጋዬኬ ጋጜ ፓዬኬ ጉዋር ሹ ክዬም፤ ጩዋ ካርሲያ ኦካኤዳን ኔኒዬ ባይዳን ኔኒዬ ዎሼን።⁴⁵ጩዋ ማሬ ጌዬን ዎሼ ፓዬ ዋክሼያ እያጝካ ኢየሩሳሌም። ⁴⁶ኬ ሹ ጂያን ጩዋ ኡፍ ኦካ ጫቃንካ ውርካ እርርስኔኔ ጋን ቆቤ ክያጃ ኔኒ ዋዬኔ ኣንሼን እንግን ክያጃዬ ጌያ ኦካ ቶኦካ ይሁኔን። ⁴⁷ጊታይ ዋዬ ፓይላ ጶቅሲዬኔ ዋሼኔ ጎሺያ።⁴⁸ውራን ኔኒዳ ሹ እጝ ጌዮጝ ዳዱጝኔያ፤ጁዋኔ ኔንዳ ሺጝ፤ውዋ ናኒዮ ሃኦ? ዬሻሜ ኡዋው እያጝ ኣኔ ሹቡኔ ካኑሼን ሻኔ ካዎሽ እንያጝ፤⁴⁹እሺዳ ሺጝ ሃኦ? ዬዎሽቴ ኣኑጝ ኬጌይቴ ኣን ኦካ ቶኦካ ባባጝ ዬእባጃኬኒ?⁵⁰እንግንዳ ክያጃ እጝ ሃሳዎጝ ካኒ ሁሉክሼኬን እንግን ሹቃ።⁵¹ጩዋ ጎብሼያ እያጝካ ናዝሬት፤እሺዳ ካርሲያ ኤርጎካ ጁዋኔዬ ካሹኔዬ ዋዬን፤ጁዋኔ ኔኒዳ ጎም ክያጃ ጊታይ ኬሻኔ ኣንቃቢዬን።⁵²ኢዬሱስዳ ኬጌጳሞዬ ኬኦካ ሌሜንካ ባሪዮዬ ውሬ ጌጵሻ።

ሃፑክ 3እንካ ዱቅኔን ዮሐንስ ኪሊማ ኔኒ¹ጢባሪዮስ ታቺ እጝ ጌጳድዮጝ ቦን ኔኒ ሃታጲ ዶጝ፤ዬጲላጦሳ ኣዬ ታቺካ ይሁዳጝ ፤ሄሮድስ ሃታቺካ ገሊላ፤ጭኔ ኔኒ ፍልጶስ ሃታቺካ ኢጡሪያሴ ፕራኮንዶሴ፤ሊሶኒዮስዳ ኣዬ ታቺካ ሳቢላንሳጝ፤ ²ሓናዬ ቃያፋሜ ጋንባ ጌጳድዬ ፋዬኔ፤ክያጃካ ባሪዮ ኩንሼያ ሃምካ ውዋካ ዛካሪያስ ዮሓንስ ቦና ክያኒ።³እሺዳ እጝካ ኣይ ሺዕሺኔንካ ሴሶ፤ክሊዬን ይሁኔንካ ዱቅኔኔ ኦካ ጶሮክጊታይ ኣኔን ኦካ ዳራካ ዮርዳኖስ ፓይላዬ ኩና።⁴ይጝ ኬወርቀትካ ውርካ ባሪዮ ኢስይያስ ክያጃ እጝ ሺጜ እያይኔ ቶኮጝ«ኬቦና እጝ ሺጝ እያጜ ኡቹኩጝ ናቅዲካ ውር»«እጝ ካኣሽኪ ጉዋርካ ባሪዮ ካይግ እባጅባ፤⁵ባይን ፓይላ ቆቅባ፤ጋጌ ጉርባዬ ሻምባ ይርክ ይርክ፤ጉዋር ቆሮ እጝ ሻምባ ጌዝ ክሮ ሳርክሳርክ እጝካ ይጊኔንዳ ማቲባ ሊኪ። ⁶ብዛካ ውር ፓይላ ጌይባ ባይሺሼንካ ባሪዮ።⁷ዮሓንስዳ ዋይሼ ውር ጊታይ ፓዬንኬ ቡዋኔኒን ዱቅኔን እያጝ፤እዮው ሃንታካ ዱፍቴን ኬክያጃ ጋራ እጝ ኩኑጝ ኬቱጝቱጝቶጝ ሃኒን ክሊ እዮው?⁸ኣኪ ጊታይ ሁሉክ ይሁኔን ጉፍትባ ካርቡ፤ፒር ኬሻን ጊዬይ ኣና ሹ ጊዬይ ሜሌል እጝ፤ኬእያይ ኦይዲ ካርሲቴን ባሪዮ ኬኦካ ባይ ጊታጝ ካእባጄ ሃንታ ኔኒ ጫንቃል ቲትሼን ሃሜይሼ እዮውባ።⁹ኣይን ጋን ቲቢጁ ቆባ ኦካ ጊሜይካ ሻሪ፤ሻሪ ጊታይ ማሪ ካርቡ ሹቃ ኡፑቴን ፓይላ ቃጬ ፓቅሼባ ጉክያኒ።¹⁰ዬ ዛርሲዳ ሺጝ ካሻም እያንዬ ጋንሼና።¹¹ዮሓንስዳ ሺጝ፤እጝ ኣኔ ኣፓላ ዳጝ ካኣይባ ካእጝ ማሪ ኣኔን፤እጝ ኣኔ ዳኣኖጝ ካሻምባ እያይ፤ሺጝ እያይኔ ዋሼያ እንግን።¹²ውር ጊታይ ፑኡሺኔ ጆል ጊቢሩጝ ፓዬን ኦኔኒ ዱቅኔኔ ዋይሼ እሺ ውርካ እርርሲዬኑጝ ጉዋዩጝ ዮ፤ኡዋካ ኤካኣሽክዮ?¹³እሺዳ ሺጝ፤ጋን ኬኦጝ ሃሜይሼ እዬው ሳጊ ኦይዲ ጊቢሪ ፑኡሺቴን፤¹⁴ፓፃኖንዳ ፕር ሺጝ ኤ ኡዋውካ ካኣሽክዮ?፤ሺጝ እያይኔ ጋንሼና እሺዳ ሺጝ፤ኦይዲ ቢሬካ ውር ኬጋራ ቦውቴን፤ሩዋ ኔንዳ ኦይዲኬ ሾሮ ካሲሲቴን፤ቢሬ ጉዩዳ ሃሊኪ ኬእዬው።¹⁵ዛርሲዳ ፎሽካድዬ ኣን ጎሬ ካሊዬን «እሺ ክርስቶስ»ሺጝ እያይኔ ፓይላ ናንዳካ ዮሓንስ ኬሻን ጊዬይ ጋንቃቢዬን። ¹⁶ዮሓንስዳ ናንዳካ እንግን ፓይላ ሺጝ እያጜ ዋሼያ፤ኣን ሃዱቅ እዬውባ ኬሙዋዬ ኬኣን እጝ ካቁዋቅትሽ ኩንባ፤ኣንዳ ሃኣይኬን ኬና ካቡል ቁሜን ካቻው ኔኒ እሺ ዱቂ እዬውባ ኬኡሲ እጝካ ይሁኔኔ ጉዌ።¹⁷ቆይድ ቡቡንሲዬኔ ሲንዳን ኮትን ክያኒ ኡቲሼን ቆሼ ኣንኬ እሺ፤ዬሾሎቃን ጉዱባ ኬጉ እጝ ማሪ ኣርሼ።¹⁸ዮሓንስዳ ክያጃ እንቃ ጁዋኑ ኬክሊማ ኣጅሺሻ ዛርሲዬ ክያጃ ሹቃ እጝ ክሊያ እንግን። ¹⁹ዬ ኣይባ እያይኔ ዮሓንስ ኣዬ ቢቲካ ጌልላጝ ሄሮድስ ሃኝያካ ጭኔ ናንዳካ ክያጃካ ሄሮድያዳዬ ናንዳካ ዋድማ እንቃ እንቃ ጊታይ ሹ እጝ ካንሲዮጝ፤ ²⁰ሄሮድስ ይጝ ኦግታይ ማር ኣኔን ፓይላ ሌሜዬ ዶቅሺሼያ ዮሓንስ ቶኦካ ቁሜን።ዱቅኔንካ ኢየሱሴ ብዛካ ጅሼን ኔኒዬ²¹ዛርሲ ፓይላ ዱቅኔ ጩዋ ኢየሱስዳ ዱቅዬና፤ኣን ይሁኔኔ ፎላ ቦወና፤²²ኡሲካ ባሪዮ ማቲ ሆሌዬ ጎቢሼያ እሺ፤ኬፎላዳ ኩና ንቂዲ ኬና ሺጝ፤ውዋ እናኑጝ ሃናሺዮጝ ሃእን ኬእን ኦኬ ዋዝንሲያና።²³ኢየሱስዳ ካርሲዬ ዋድማጝ ቦን ኔኒ ማቲያ ማካንታም፤ዛርሲዳ ኬእያይ ሄክንሲዮጝ ማቲ ውዋካ ዮሴፍ፤ውዋካ ኤሊ፤ ²⁴ውዋካ ማት፤ውዋካ ሌዊ፤ውዋካ ሚልኪ፤ውዋካ ዮና፤ውዋካ ዮሴፍ፤²⁵ውዋካ ማታትዩ፤ውዋካ ኣሞጽ፤ውዋካ ናሆም፤ውዋካ ኤሲሊም፤ውዋካ ናጌ፤²⁶ውዋካ ማኣት፤ውዋካ ማታትዩ፤ውዋካ ሴሜይ፤ውዋካ ዮሴፍ፤ውዋካ ዮዳ፤²⁷ውዋካ ዮናን፤ውዋካ ሬሳ፤ውዋካ ዘሩባቤል፤ውዋካ ሰላትያል፤ውዋካ ኔሪ፤ ²⁸ውዋካ ሚልኪ፤ውዋካ ሐዲ፤ውዋካ ዮሳስ፤ውዋካ ቆሳም፤ውዋካ ኤልሞዳም፤ውዋካ ኤር፤ ²⁹ውዋካ ዮሴዕ፤ውዋካ ኤልዓዘር፤ውዋካ ዮራም፤ውዋካ ማጣት፤ውዋካ ሌዊ፤³⁰ውዋካ ስምዖን፤ውዋካ ይሁዳ፤ውዋካ ዮሴፍ፤ውዋካ ዮናም፤ውዋካ ኤልያቄም፤³¹ውዋካ ሜልያ፤ውዋካ ማይናን፤ውዋካ ማጣት፤ውዋካ ናታን፤ውዋካ ዳዊት፤³²ውዋካ እሴይ፤ውዋካ ኢዮቤድ፤ውዋካ ቦዔዝ፤ውዋካ ሰልሞን፤ውዋካ ነኣሶን፤³³ውዋካ ኣሚናዳም፤ውዋካ ኣራም፤ውዋካ ኣሮኒ፤ውዋካ ኤስሮም፤ውዋካ ፋሬስ፤ውዋካ ይሁዳ፤ ³⁴ውዋካ ያዕቆብ፤ውዋካ ይስሐቅ፤ውዋካ ኣብርሃም፤ውዋካ ታራ፤ውዋካ ናኮር፤ ³⁵ውዋካ ሴሮህ፤ውዋካ ራጋው፤ውዋካ ፋሌቅ፤ውዋካ ኣቤር፤ውዋካ ሳላ፤³⁶ውዋካ ቃይንም፤ውዋካ ኣርፋክስድ፤ውዋካ ሴም፤ውዋካ ኖኅ፤ውዋካ ላሜይ፤ ³⁷ውዋካ ማቱሳላ፤ውዋካ ሄኖክ፤ውዋካ ያሬድ፤ውዋካ መላልኤል፤ውዋካ ቃይናን፤ ³⁸ውዋካ ሄኖስ፤ ውዋካ ሤት፤ውዋካ ኣዳም፤ውዋካ ባሪዮ።

ሃፑክ 4ፓታናካ ኢየሱስ ¹ኢየሱስ ቆቅሼ ኡሲ ካባሪዮዬ ዋክባ ኬዮርዳኖስ ቦሼያ እሺ ሃምካ ቦናጝ፤ ²ኬታይ ሹ ኦይታም ፓታኒያ ኬዲያብሎስ፤ኬሹ ጊታይ ኦኬ ክዬምጵንዳ ኣምኬኔ ኡፔ ኬቱንሲ ካሽ ቃዋ እሺ።³ዲያብሎስዳ ሽጝ ይንዳ የኣይያ ውዋካ ባሪዮያጝ ባይ ጊታጝ ካማትዬ ምሹጝ ሻምባ።⁴ኢየሱስዳ ሺጝ«ሃንታካ ውር ኡፑኬን ኬምሽጵን ሽጝ እያይኔ ቶካኣ»ሽጝ እያይኔ ዋሼያ እሺ።⁵ጩዋ ዲያብሎስ ቡልሼ እሺ ኦኬና ኣይ ዴጌ ሺጝ ይንዳ ጌጳሞ ካፔኑጝ ፓይላ ዱዋሊሺንትዬ ይሪካ። ⁶ሺጝ እያጝ ፤ታታቻን ግታጝ ጌጳሞዬ ታቺ ኣዬኔ ፓይላ ጋያ ኣን፤ናንዳካ ጊታይ ናሺ ኣን ናንዳካጝ ካኣዮጝ፤ሃኣይባ እን። ⁷ዬ የይሁወንያ ኣንያጝ ጊታጝ ፓይላ ማቲባ ኑኑ።⁸ኢየሱስዳ ዋሼ ሺጝ ይሁንቴ ባሪዮ ኣምላክ ሃእሺጵን ኣይ ኣምላክ፤ሺጝ እያይኔ ቶካ።⁹ጩዋ ቦሼ ሃምካ ኢየሩሳሌሜ ሪብ እሺ ኦካ ሁሉኩሼንካ ቶኦካ ይሁኔኔ ሺጝ እያጝ«ይንዳ የኣይያ ውዋካ ባሪዮያጝ ኡንጉልዬ እን ኤምኑ ኬኦጝ ሌይ ዳራ ሃም። ¹⁰ናንዳካኦ ሺጝ እያይኔ ቶካ«ካቶይ እምባዬ»ውርካ ኤርጎ ናንዳካ እን ጌርግትባ፤ ¹¹ጃፍ ኑንዳ ካማር ኬባይ ሙኔኔ ኬቡዋ ጊዬይ ጎሜ ቲትባ።¹²ኢየሱዳ ሽጝ«ኦይ ባሪዮ ታቺ እጝ ፓታንሲዬን ሺጛ እያይ»ሺጝ እያይኔ ዋሼያ እሺ። ¹³ዲያብሎስዳ ጩዋ ሹዋጴ ፓታና ፓይላጝ ሌይ ሃም ሹ እንቃ ካጌዬ ጋጝ ኬኦኔኒ ኩያ።ኢየሱስ ኬናዝሬት ካይሲዬ ውርካ ኡፔን ¹⁴ኢየሱስ ኬካንታካ ኡሲ ዋካ ገሊላ፤ጎሺ ኔንዳ ኬኦካ ጶሮክ ጊታይ ኣኔን ኦካ ፔን ጊታይ ፓይላ ቱላ። ¹⁵እሺዳ ኣኔን እንጊን ኦካ ቶኦካ ይሁኔን እርርሲየን፤ውር ፓይላዳ ይወና እሺ።¹⁶ጩዋ ኩያ ሃምካ ከተማ ባጌጲሾጝ ናዝሬት፤ኬእያባ ዱሱሜን ሹ እንካ ሶጵሳ ኩዬ ሁሉክ ሃምካ ቶኦካ ይሁኔንካ ውርካ ኣይሁድ፤ናሹጜ ዶራ ካኮመን፤ ¹⁷ጋያ እሺ ወርቀትካ ውርካ ባሪዮ ኢሳይያስ፤ሹ እጝ ክያጄ ሃሳዋካ ወርቀት እጝ ጌያ ኦይ ሺጜ እያጜ ቶኮጝ፤¹⁸¹⁹

ሃፑክ 5ውር ጊታይ ካሌሜን ካዳዮጝ ሺዋ ¹ዛርስዳ ማራማራ ኣን ሪጊሺኔኔ ይጝካ እርርሲዬ እዮው ክያጃ ካባሪዮ ዋይባ፤ኢየሱስ ዶሬ ኣን ኦካ ላቅካ ዳራካ ጌንሳሬጥ። ²ኬ ሹ እጝ ጌይ ውርካ ጋጊ ዳሃ ጎር ማራካ ቅያንዬ ዬ ውር ጊታይካ ቆውኔን ጎብ ኬጋጊ ክያኒዬ ጋኔን ኘፑቴይ ግዬይ ኡዋኔን። ³ከጫቃንካ ጋጊ ክያኒ ኦይ ስምዖን ኣኖ ሁሉኬ፤ኬዳሊ ዲታኬ ጌዬ ሾዎት ይወና፤ጩዋ ኡፕ ጋጊክያ ንዬ ካርሲያ ዛርሲ እርርሲዬን።⁴ሹ እጝ ሹዋጴ ሃሳዋጝ ዋይሼ ስምዖን ጌይ ሃም ሙዋ ኣይ ቱሌዬ ኣርቴ ኦትሼን ፓቅቴ ኘፑቴይ ። ⁵ስምዖን ዋሼ ሺጝ፤ውርካ እርርሲዬኑጝ ናኒ ዮ ሚክር ፓሲ ሃቆዋ ሌይ ሃዳቻ ራጳያ ክየምጵንዳ ሃካና ኦቲሻኬን፤ዬ እን የኣኔያጝ ሃፓቅሼባ ኘፑቴይ፤ ⁶ሹ እጝ ሻሜ እያይ ካሎን ጎትሻ ኣርቴ ጁዋኑ፤ኘፑቴያን ካርሲያ ኑሺሺኔን። ⁷ባይዳን ጊታይ ጊዬይ ኣኔን ኬጋጊ እንቃጝ ካፓይና ኬልሺ እንግንባዬ ሺዋ ኬሄክንሶ፤እንግንዳ ፓዬኔ ጋጋን ዳዋን ቆቅሼያ ኬኣርቴ ጋጋንዳ ካርሲያ ዱቁሚኔን።⁸ስምዖን ጴጥሮስዳ ሹ እጝ ጌዮጝ ቡድ ኦካ ኩዋሚንካ ኢየሱሴ፤ሺጝ ታቹጝ ናኑጝ ኣን ሃኣይ ውርካ ሴሶዬ ኦይኬ ኦናኒ ኩዬን።⁹እጝ ሺጜ እያይ እሺዬ ውር ጊታይ ጋዬ ኬጋጜ ናንዳካ ኣርቴ ጁዋኑ ጊታይ ጎሞጝ ናንዳካጝ ጎሺዮጝ።¹⁰ፕር ጊታይ ኣይ ባይዳካ ስምዖን ሃንታካ ዛብዴዎስ ያዕቆቤ ዮሐንሴ ጎሺያ።ኢየሱስ ዋሼ ዋይሼ ስምዖን ኦይ ሪጊሺኔን ጩዋ የማቲባ ኬና ካቆው ውር፤¹¹ጩዋ እንግንዳ ጊድንሲሼ ጋጊ ማራጝ ጎይድ ፓይላዬ ዳዬያ እሺ።ውር እጝካ ቡርቂካ ጊዮጝ¹²ኢየሱስ ኬከተማን ሹ እጝ ኣኔ ኦካ ክየም፤ኬኦካ ከተማ እጝ ኣና ውር ክየም ኬና ቡርቂ ካጊዬ ጎሜ፤ውር እጝ ሹ እጝ ጌዬ ኢየሱስ ኬሌሜን ኔኒ ቡዴ፤ሺጝ ታቹጝ ዮ፤የናሺሼያ ኣንያጝ ኣን ጫንቃል ሻሜን የቻሊባይ?ሺጝ እያይኔ ይወና።¹³ኢየሱስዳ ቲት ቡዋዌ ዱሜ ሺጝ ሃናሺያ ጌይባ ጫንቃን፤ይሪካ ጊዬ ካይ¹⁴ኢየሱስዳ ሺጝ ይጝ ኦይ ውር ክየምጵንዳ ሜይሼን፤ዬካሜ ዱዋልሼ እን ኤምኑ ታታቻን ካማቲሼ እንግንዳ ማኝዬ ናንዳካ ጫንቃል ጌዬን ኑኑ ጋላባ ሙሴ ኤርጊቶጝ ቡልባ ሺጝ እያይኔ ኤርጊታ።¹⁵ከኣይባ እያይዳዬ ናንዳካ እሺ ሃሳዋ እጝ ሃሳዎጝ ሳጊዬ ጌጳድዬ ኩያ፤ካሎን ውር ጁዋኑ እጝ እሺ ሃሳዎጝ ዋዬኔ ጊታይ ኣኔ ቡርቅ ፓይላ ፑኡሺሜና።¹⁶ዬኢየሱስ ሹ ጁዋኑ ኩይ ሃም ውር ማሬ ኣኔኔ ኣን ይሁኔን።ኢየሱስ ባይሺሻ ውር ጌቾ እጝ ¹⁷ሹ ክየም ኢየሱስ ኣን እርርሲዬን፤ኬሹ እጝ ውር ጊታይ ካገሊላዬ ጊታይ ካፔንካ ይሁዳዬ ፓይላዬ ውር ጊታይ ፓዬንኬ ኢየሩሳሌሜ ፈረሳውያኔ፤ውርካ እርርሲኔን ጊታይ ካቢትዬ ቆቤ ጋኔ።ካባይሺሼ እንግን ቁዋቅቲ ካታቺ እጝ ኣንኬ እሺ።¹⁸ኬሹ እጝ ውር ዼቴ ፓይኔያ ውርክየም ኬሻላ ኦካ ማሪካ ኢየሱስ ኣጁጜን ታማ ቶኦ ቱዎጝ ዶቅሼን።¹⁹እጝ ናሹጝ ኬጁዋኑ ኣዬን ካዛርሱጝ ቶኦ ቱዎጝ ዾቅሼን ናንዳካጝ ካዌ እንጊኑጝ ሌፍ ቶኦ ዾዮኬ ኮሲዬ ኦካ ጫቃን ካውር ዳሪ እጝ ኢየሱስ ኣኖጝ ሃንችሺያ ኬሻላዳ ኢያይ ኦካ ማሪ ኔኒ።²⁰ኢየሱስዳ ጌይ ይሁኔን ጊዬይዬ፤ሺጝ እን ውሩጝ ሴሶ ኑኑ ሺዕሺሼያ እን። ²¹ውር ጊታይ ቶክኔ ጆል ወርቀቴ ፈረሳውያኔ ሺጝ ይጝ እሺ ኣምላክ ሳግዬን ሃሳወን እያጝ ሃኒን?ከኦካ ባሪዮ ክየም እጝ እንቃ ውር ኬና ካቻሊ ሴሶ ሺዕሺሺዬን ሃኒን?ሺጝ እያይኔ ካርሲያ ቃብዬን።²²ኢየሱስዳ ናንዳካጝ እባጄ፤ዋይሼ እንግን፤ሃኦ የቃብቴ ኬሻን ጉዩ ይጝ?²³ካሺጜ ሺዕሺሼያ እን ሴሶ ኑኑዬ ናሹጜ ካምባዬ ሃና ኣይ ባዶጝ?²⁴ኣይባ እያይዳዬ ይጝ ሃኣኖጝ ሃንታካ ውር ከዳሉጝ ክያኒ ሴሶ ሺዕሺሼን ጌጳሞ ኣኖጝ ኬእባጅባዬ ጊያ፤ጩዋ ዋይሼ ኤሪ ጌቾ እጝ ሃዋይሼ እን ናሹጜ ቦው ሻላ ኑኑዬ ካምባ ሃምካ ቶኦ ኑኑጝ።²⁵እሺዳ ናሹጝ ይሪካዬ ዶራ ኦካ ማሪ ጊዬይ ዴት ኑጝ ኡጜ ጆሌዬ ጌጳሲ ባሪዮዬ ኩያ ሃምካ ቶኦ ኔኑጝ። ²⁶ሹ እጝ ዳዱጝኔ እንግኔ ጌጳሲ ባሪዮዬ ሺጝ ሃግሺወን ካሌዊ²⁷ኬኦይን ጩዋ ኢየሱስ ቱልኬ ኦይኔ ኩያ፤ዬጌይ ውር ክየም ኬና ፑኡሺኔ ጆል ጊቢሪ ኬና ሺጜ ሌዊ ኡፍ ኦኑጝ ፑኡሺኔ ጆሌ ጊቢሪዬ፤ዬዋይሼ እሺ ዳዬ ኣምባ»²⁸እሺዳ ኦይድ ፓይላዬ ናሹጜ ዳዬያ።²⁹ሌዊዳ ናንዳካ ኢየሱስ ኣሺክያ ኣማ ሃምካ ቶኦ ኔኑጝ፤ውር ጁዋኑ ጊታይ ፑኡሺኔ ጆል ጊቢሪዬ ውር እንቃዬ ከእንግን ቆባ ኬጋጝ።³⁰ውርካ ቶክኔን ካወርቀቴ ውርካ ፈረሳውያኔ ሺጝ ሃኦ?ኣምኔዬ ማትኔ ኬውር ጊታይ ፑኡሺኔ ጆል ጊቢሪዬ ካሴሶዬጝ ሺጝ እያይኔ ጉንድምሼና ውር ጊታይ ዳዬ ጆሌ እሹጝ።³¹ኢየሱስ ሺጝ እያጜ ዋሼያ እንግን፤ሃውርካ ቡርቅዬ፤ጊታይ ኣይ ፓክ ዎሺሺኬን ኣክንሲዬን።³²ኣን ሃኩኖጝ ሃጊታይ ካሴሶ ሃምካ ይሁኔን ዋሼኔ ጊታይ ኣይ ጫንቃል ሺወን ሃካና ኩንኬን።ኢየሱስ ናንዳካ ቶሮን ጋንሼና³³እንግንዳ ሹ ጁዋኑ ውር ጊታይ ዳዬ ጆሌ ዮሐንስ ቶሮድባ፤ጊታይ ካፈረሳውያንዳ ሻምባ እያይ፤ዬጊታይ ኑኑ ሹ ጮል ኣሜምባ ማቴንባዳ»ሺጝ እያይ።³⁴ኢየሱስዳ ዋይሼ እንግን እያጝ፤ ኡታ ኣኔባ ኬእንግኔ እንካ ቦን ቶሮን ሻምሺሼን ቻሊሜምባይ?³⁵ዬ ሹ እጝ ካቦወ ኡታ ኩንባ፤ሹ እጝ ቶሮንድባ።³⁶ፕር ሺጝ እያጜ ሜይሼያ እንግን ኬሄክንሶ፤ከኦካ ኣፓላ ሃሊ ሃድሼ ኣፓላ ጌቾ ክያኒ ቻኪሼን ውርክየምጵንዳ ኣኔኬን፤ሻማ እያይኒያጝ ሃድሽ ኣፓላ ሃሊ እጜ ኣፓላ ጌቾ ኪያኒ ቻኪሼን ናሺኬን ጋጝ።³⁷ውር ኬና ካእርሼ ኣላላ ሃሊ ቶንዳ ጌቾ ኪያኒዬ ካኣጁጝ ኣኔኬን ሻማ እያይኒያጝ ኣላላ ሃሊ እጝ ጳቅሽባ ቶንዳ፤ኣላላዳ እረምባ፤ቶንዳዻ ማቲባ ኬኦካ ኣሽኪኔን ሹኑክ።³⁸ዬ ኣላላ ሃሊ ቶንዳ ሃሊ ኪያኒ እርሼን ኣኔባ።³⁹ኣኪ ማታ ኣላላ ሃሊያጝ ውር ኬና ካናሺ ሃሊ ኣኔኬን፤ናንዳካኦ

ሃፑክ 6ታቺ እንካ ሶጲሳጝ ¹ሹ ክየም ኢየሱስ ኣንኬ ኦካ ቂያኒ ሳጊዬኔ ውር ጊታይ ዳዬ ጆሌ እሹጝ ቱሽ ቲሺዬ ጎም ኬቡዋዌ ጋን ቃወን። ²ከኦካ ጫቃንካ ፈረሳውያን ውር ክየም ክየም ሺጝ ኬሹ እንካ ሶጲሳ ኣሽክዬን ማሬ ኣይኔን ሃኦ የኣሺኪቶጝ?³ኢየሱስዳ ሺጝ እያጜ ዋሼያ እንግን«ዳዊት ሹ እጝ ካሽ ቃዌ እሹጝ ኣሺክዬ ከባይዳን ኔኑጝ ክየምጵንዳ ካኒ ኮምሼኬኒ እየው?⁴ኩዬ ሁሉክ ሃምካ ቶኦካ ይሁኔኔ ቦው ሚሽ ጊታይ ጋሽኪሼ ታታቻኔ ኣማ፤ዬኣያ ውር ጊታይ ጋዬ ኬጋጝ፤⁵ፕር ሺጝ ሃንታ ካውር ሃታቺካ ሶጲሳኔኒ።⁶ኬሹካ ሶጲሳ እንቃ ሁሉክ ሃምካ ቶኦካ ይሁኔኔ ኣኔን እርርሲኔኔ ኦይ ኣና ውር ኬና ቱፑኒኒ ቡዋ።⁷ውርካ ቶክኔን ካወርቀቴ ፈረሳውያኔ ዎሽ ካሲሲዬኔ ካባይሺሾጝ ካሊ ቶዬን።⁸ኢየሱስዳ እባጅ ቃቦ ጊዬይዬ ዋይሼ ውር እጝ ቱፑኒኒ ቡዋ ናሹጜ ዾርባ ጫቃን ጊዬይ ክያኒ፤ውር እንዳ ናሹጜ ዾራ።⁹ኢየሱስዳ ሺጝ ይንዳ ካኣንሺዬ እየው ክያጃ ክየም፤ሹካ ሶጲሳ ጋይና ሹቃ ኣሺክዬን ሞ ጋራ ኣሺክዬን?ናፒሲ ባይሺሼን ሞ ካይሲዬን?ዋይሼ እንግን እያይ።¹⁰ፕር ኢየሱስ ቶዬ ጊታይ ኣኔን ማራማራ ፓይላጝ ጩዋ ዋይሼ ውር እጝ ቲት ቡዋ ኑኑ ውር እንዳ ኬእያይ ሺጜ ሻማ፤ቡዋ ኔንዳ ካሎን ፒኪሼ።¹¹ዬ ውራን ቆቂሼ ማኒቴ፤ኦይጝ ካሻሚሼ ኢየሱስ ጉባይያ ኬጋጝ።እድዬን ካውር ታጲ ላማን¹²ከሹ ጊታይ ኢየሱስ ናንዳካ ይሁኔን ኮቲሼያ ጋግ ክየም፤ሚኪር ፓይላ ይወን ባሪዮዬ ኡጛ።¹³ኪራ ሃሪሾጝ ሺው ውር ጊታይ ዳዬ ጆሌ እሺዬ ጊድያ ውር ታጲ ላማን እንግንዳ ሺጚሼ ሐዋሪያቴ ኣይሼያ እንግን።¹⁴እንግንዳ፤እጝ ሺጜ ጴጥሮሴ ሺወ ስምዖኔ ጪኔኔኒ እንድሪያንሴ፤ያዕቆብ፤ዮሐንስ፤ፊልጶስ፤በርተሌሜዎስ፤¹⁵ማቴዎስ፤ቶማስ፤ውዋካ እልፊዮስ ያዕቆብ፤እጝ ሺጜ ካቦውንታ ስምዖን፤¹⁶ውዋካ ያዕቆብ ይሁዳዬ ጩዋ እጝ ሳስክዬ ኣዬን ኢየሱስ ኣስቆሮቱ ይሁዳዬ።ዎሺሚካ ኪሊማካ ቡራኬና¹⁷ኢየሱስዳ ጎብኬ እንግን ጋግ ኪያኒዬ ዶራ ኦኬና ኣይ ባልዽሽ፤ኬውር ጊታይ ዳዬ ጆሌ እሺ ካሎን ውር ጁዋኑ ኣኔባ ኦይን፤ውርካ ይሁዳ ፓይላዬ ካኢየሩሳሌሜ ፕር ካጢሮሴ ካሶዶናዬ ውር ጊታይ ፓዬን ኦይን ካማራካ ኛፓስ ኣና ውር ጁዋኑ።¹⁸ጊታይዳ ፓዬን ዋዬኔ፤ጊታይ ኣኔ ቡርቂ ካባይሺሽባዬ።ጊታባ ቆብኬ ኡሲካ ጮዩ ጋሊዬን ባይሺሻ።¹⁹ናንዳካጝ ቁዋቂቲ ቱሌ ከኦኔኒዬ ኣኒኔ ውር ጁዋኑ ባይሺሼን፤ውር ፓይላ ዎሽ እሺ ዱሜን።²⁰ሁቤኔ ቶይ ሃምካ ውር ጊታይ ዳዬ ጆሌ እሺዬ ሺጝ «እየው ኩፓን የኣያ ጫንቃሌ ጌጳሞ ካባሪዮ ሃጉዩ» ²¹እየው ጊታጝ ጋን ካሽ ቃዎጝ የኣያ ጫንቃሌ የማ ዬናኣሻባ፤እየው ጊታጝ ጋን ኦቆሬን የኣያ ጫንቃሌ የማ ዬጫጋባ፤²²ውር ናንዳካ ሃንታካ ውር ሚኔ እየውያጝ ከጫቃን ጉዩ ጌይ ዋናዬ ጎም እየውያጝ፤ኣይ እየው ሮጝ ጋራያጝ የኣያ ጫንቃል።²³እየሆ ቲጌሽ ጉዩ ከፎላ ክያኒ ሃታቺዬ ከሹ እጝ ካኣይሼባ እየው ዋዛ፤ኬጆጊ ሹቡጊን ጉዩ ጊታባ ካሌሜን ጋሽኪሼ ውርካ ባሪዮን ሃእያጝ።²⁴ኣይባ እያይኔ እየው ሆዲማን ሃይ/ጫንቃል ኣዬን ጉዩ ጋን ዬቦዋያ።²⁵እየው ጊታጝ ጋን ናኣሹጝ ሃይ/ማ ካሽ ቃው እየውባ፤እየው ጊታጝ ጫጉጝ ሃይ/ማ የሞይካዺያባ፤ዬኦቆራባ።²⁶ውር ፓይላ ናንዳካ እየው ሃሳዋ ክያጃ ሹቃያጝ ሃይ/ሹቡጌን ጊታባ ጉዩ ካሌሜን ሻሚሼ ውር ጊታባ ካባሪዮ ኬሾሮጝ ይጛ እሺ።ናሺባ ጋል ኑኑ²⁷ኣይባ እያይኔ ናንዳካ ጊታይ ካዋይ ሃሜይሼባ እየው፤ጋል ጉዩ ናሺባ ናንዳካ ጊታይ ሚኔ እየው ኣሽኪቴ ሹቃ፤²⁸ናንዳካ ጊታይ ኣሺ እየው ባሪኪባ፤ናንዳካ ጊታይ ጊያሚሺሽ እየው ይወንባ፤²⁹ውር እጝ ዻሺ ዻቢን ኑኑ ቶኖጝ ኣይባ ቶናዻ፤ውር እጝ ቡዋ ኣይ ቆቃዬ ቦው ኣንቲቲ ኑኑጝ ኦይ ሃርጌን ፤³⁰ጊታይ ይወን ኦኑኑ ፓይላ ኦይባ፤እጝ ቦዊ ካዋሼ እን ኦይ ኣንሺኔን።³¹ኦይን ውር ውር ዎሼ እየው ኣሽኪሼን እየውዳ ኣሺኪ እያይ።³²ጊታይ ናሺ እየው የናሺያያጝ የጌያ ኣንቲቲ ዋና ኬና ኣይ እያን?ኣይን ጊታይ ካሴሶዳ ናሺያ እየውያጝ የናሺያባ።³³ናንዳካ ጊታይ ማሪ እየው ሹቃ ኣሽኪሼን የኣሽኪቴያ ሹቃያጝ የጌያ ኣንቲቲ ዋና ካና ኣይ እያን?ኣይን ጊታይ ካሴሶዳ ሻሚባ እያይ።³⁴ውር እጝ የሺጝቴ ዋሽባ ባጃጝ የቦውሺሻያጝ የጌያ ኣንቲቲ ዋና ኬና ኣይ እያን?ኣይን ጊታይ ውርካ ሴሶ ቦዎጝ ዋሼ ቦወን ቦውሺሽባ ውርካ ሴሶ።³⁵ኣይባ እያይዳዬ ጋል ጉዩዳ ናሺባ፤ሻሚባ ሹቃዳ፤ሃዋሻ ቦዋባ ኦይዲ እያይ ሺጜ ቃቢዬኔ ቦውሺሽባ፤ከኦካ ሃሳዋ ጊታይ ማቲባ ታቺ፤የማቲያባ ሃንታካ ታቺ እጝ፤እሺዳ ናንዳካ ጊታይ ጌጳሲ እሹጝ ኬጋራ ክያኒ ሃሌሞዬ።³⁶ናንዳካጝ ሹቡጌን ጉዩ ኣዬ ሹቃ እየውዳ ኣይ ሹቃ።ውር እንቃ ኦይ ኮሚሼን³⁷ኦይዲ ኮሚሺቴን ኮሚሼኬን እየው፤ኦይዲ ጋሊንሺቴን ጋሊንሺኬን እየው፤ሺዕሺባ ሺዕሺሼ እየውባ።³⁸ኣይባ ጋይ እየውባ፤የሳፋርሲያያጝ ናንዳካጝ ካሳፋርሲሼ እየው፤የዕንቅያያጝ፤ኬና ጁጉሜ ኬና ሺድዬ ሳፋር ሹቃ ሳፋሪዬ ጋይ እየውባ።³⁹ፕር ሜይሼያ እንግን ሄክሶጝ፤«ሙሙዾ ቻሊባይ ሙሙዾ ጁወ ጃሌን?እንግን ዻዋን ጎም ጋጜ ሻውኬን ይጊን?⁴⁰ውር ጊታይ ዻዬ ጆሌ እሺ ሳጊኬን ከኦካ ውርካ ኪሊማ፤ኣይባ እያይኔ ውር እጝ እሪሪ ፓይላ እጝ ሁሉኩጝ ማቲባ ኬ እጝ እርርሲዬን።⁴¹ዳካ እጝ ኣን ኦካ ካርቡ ካጪን ሃናንዳካ ኦ የቶዮጝ? የቶይኬን ጊሜይ እጝ ኡፒ ካርቡ ኑኑ ኪያኑጝ።⁴²የካኔ የቶይካን ዳካ እጝ ኣኒ ካርቡ ኑኑ ኪያኒዬ፤ጪኔ ኑኑ የዋይሼ ጪኔ ናኒዮ ዳካ እጝ ኣኒ ካርቡ ኑኑ ኪያኑጝ ካቡላይ የሺጝ ናንዳካ ኦ እያይ? እን ኬሌሜን ቡል ዳካ እጝ ኣኒ ካርቡ ኑኑ ኪያኑጝ ከኦይን ጩዋ የጊያ ቶዬ ሹቃዬ ቡሌ ዳካ እጝ ኣኔን ኦካ ካርቡ ካጪኑጝ።ሻሪዬ ካርቡ ኔኒዬ⁴³ሻሪ ኬና ኣይ ሹቃዬ ኡፉቲ ካርቡ ጋራ ኣኔኬን፤ ኣይባ እያይኔ ሻሪ ኬና ኣይ ጋራዬ ኡፉቲ ካርቡ ሹቃ ኣኔኬን።⁴⁴ሻሪ ፓይላ ጊባጅባ ኬካርቡ እጝ እጊሺ ክዽሬ ኪያኑጝ ቆዾምኬን ከኦካ ኮዶ ቃጭኬን ካርቡ ሺም።⁴⁵ውር ሹቃ እጝ ቆቅ ሻን ኔኒ ኪያኑጝ ኦኬ ሹቃ ቡልኬ ሻን፤ውር ጋራ እጝ ቆቅ ሻን ኔኒ ኪያኑጝ ኦኬ ጋራ ቡል ጋራ፤ውር ኬሻን ኔኒ ቆቄ ሺዽዬ ሃሳውባ ከቶግ።ውርካ ሻኔ ውር ቶልታ ካቶኦ ኣሽኪዬኔ⁴⁶እን ኣን ሃሺጞጝ የሻማኬን፤ጩዋ ሃኦ? የዋይሺቴ ኣን ታቹጝ ዮ፤ታቹጝ ዮ?⁴⁷እን ካኩዋው ኦናኑጝ ሃእጝ ካዋይ ኪያጃ ፓይላዬ ካሙን ከሙኔን ኔኒ ሃዹዋሊሼ እየውባ፤⁴⁸ቶኦ ኣሽክዬን ጊታይ ቱላቲሼ ቆዴዬ ሙኔን ውር ጊታይ ኣሽክዬን ኦካ ባይ፤ሹ እጝ ሚሮ ኩኖጝ ቆቄን ካሙዋ ይቅባ ቶኦ እጝ፤ናንዳካጝ ሻሜ ዛቡጝ ይንጊሺኔን ካኒ ቻሊኬን።⁴⁹እጝ ዋይ ክያጃ ናኒዬ ማሪ ሹዋጲሼን ውር ኮኑጝ ኣሺኪ ቶኦ ኔኒ ዳሊ ክያኑጝ፤ ሹ እግ ቆቄን ካሙዋ ሙሬ ቶኦ ኔኑጝ ይሪካ ቡድባ፤ ኮሲባ ጋራ ጋራ።

ሃፑክ 7ይሁኔን ካታቺ እንካ ድብ ¹ኢየሱስ ሃሳወ ሹዋጴ እጝ ኦካ ማሪ ካዛርሲ ፓይላጝ ጩዋ ኩዬ ሁሉካ ቅፍርናሆም።²ኦይን ኣና ውር ካታቺካ ድብ ክየም፤ሺጝ ውርካ ዋድማ ናኒ ካሎን እጛ ሃናሺዮጝ ዴሜኔ ሄክሻ ካኣርሼን።³እሺዻ ናንዳካ ኢየሱስ ሹ እጝ ዋዮጝ ፤ካባይሺሽ እሺባዬ ካይሁኔ እሹጝ ይዕሲያ ውር ጌቾ ክየም፤ክየም ካኣይሁድ።⁴ውር ጊታይ ካሜርሜርዻ ሹጝ ፓይኔ ኦካ ኢየሱስ ሺጝ እያጜ ይወና፤ይጝ ከኣሽኪሼ ሁሉኪሼባ፤⁵ናንዳካ ኦ ውሩጝ ናሺባ ዛርሲ ጉዋዩ ቶኦካ ይሁኔን ኣሽክሼ ኡዋው ሃእሺ።⁶ኢየሱስዻ ኩያ ኬእንግን፤እሺዻ ሹ እጝ ሄክሼ ኦካ ቶኦጝ፤ታቺ እንካ ድብ ይዕሲ ውርካ ናሺማ ኔኒዬ ሺጝ እያጝ ታቹጝ ዮ፤ኬኦካ ቶኦ ናኒ ዾዮክ ኬዱቡ ሁሉኬን የማሪ ውር ኬና ካሁሉኬኔ ኦይዻቼን፤⁷እጝ ናሹጝ ከኦይ ካቦኩዋዌ ኦካ ማሪ ኑኑ ካሁሉክሼ ኣን ሃካና ኮሚኬን እን ሃሳው ክያጃጵን ውርካ ዋዲማ ናኒ ካባይሹዋ።⁸ኣን ሃኣኔ ጌጳሞ ታቺ ኬኦናኒ ዱቡ ፓፃኖ ጊታኬና ካኤርጊቴ ኣኔባ፤ሃዋይሼ ክየም ካምባያጝ ኩይባ፤ሃዋይሼ ክየም ኩዋባያጝ ኩንባ፤ውርካ ዋዲማ ናንዻ ሃዋይሼ ኣስኪ ይጝያጝ እጝ ሃኤርጊቶጝ ኣሽኪባ።⁹ኢየሱስዳ ዋዬ እጝ ኬኦኔኑጝ ጎሺያ፤ጌይ ሺሬ ናንዳካ ዛርሲ ጊታይ ኣኒ እን ዳዬን ሃዋይሼ እየውባ፤እያጝ ይሁኔን ታቺ ኬና ኣኔን እያጝ ኣይን ኦካ እስራኤል ሃካና ጌይካን ዋይሼ እንግን እያይ።¹⁰ውር ጊታይ ይዕሲዬ ዋኬ ፓዬ ሃምካ ጶሮክ ውርካ ዋዲማ ጊዬይ ባይሼ ጌያ።ኢየሱስ ቲታ ውዋካ ኝያ ዳልሶ እጝ ኬኣርሼን ክያኒ¹¹ጩዋ ከኦይን ኢየሱስ ካኒ ኡፕኬን ሹ ጁዋኑዬ ኩያ ሃምካ ከተማ እጝ ሺጜ ናይን፤ ውር ጊታዬ ኬጋጜ ዛርሲ ጁዋኑዬ ፓያ ኬጋጝ።¹²ፓዬ ሄክሼ ኦካ ሃፑክ ካሁሉኪሼን ካከተማ እጝ እየሆ ውር ዼቴ ፓይኔ ውር ኣርሹጉዬ ቱሌያ፤እጝ ኣርሺዻ ሃሃንታ ክየም ካጁዋኔ ጁዋኔዳ ሃጌቾ ውር ጁዋኑ ካከተማ እጝ ኣን ኬእሺ።¹³ታቺ እንዻ ሹ እጝ ጌዮጝ ሁቤኔ ቶዬ ሺጝ ኤኤ/ኦይ ኦቆርቴን ዋይሼ እንግን እያይ።¹⁴ኩይ ድያውዌ ዱማ ሻላ እጝ ዼቲኖጝ፤ውር ጊታይ ዼቲዻ ፓይላ ጎራ፤ኢየሱስዳ ሺጝ ሃዋይሼ እኑጝ ካዋድማ ናሹጜ ዾርባ።¹⁵ውርና ኣርሺዳ ናሹጜ ኡፓ ካርሲያ ሃሳውኔንዻ ኢየሱስ ቦወ ኣያ ጁዋኔ።¹⁶ፓይላ ጫፒያ ኬሪጊ፤ጌጳሲ ባሪዮዬ ሺጝ፤ውር ታቺ ካባሪዮ ናሹጛ ከኦካ ጫቃን ጉዋዩ»ባሪዮ ቶያ ዛርሲ ኔኒ።¹⁷ጎሺ እንካ ኢየሱስ ኦካ ፔንካ ይሁዳዬ ኦካ ፔን ጊታይ ኣኔን ኦካ ክራ እጝ ፓይላ ቱላ።ኢየሱሴ እንካ ዱቅኔን ዮሐንሴ¹⁸ጊታይ ዻዬ ጆሌ ዮሐንሱጝ ፓይላ ሜይሼያ ዮሐንስ እሺዻ ከኦካ ጫቃን ጊዬይ ሺው ዻወ፤¹⁹እጝ ሺጜ ኩንባ ሃእን ሞ? ካካሊ እንቃ ሺጝ እያይኔ ይዕሲሼያ ሃምካ ታቺ እጝ ።²⁰ውርዻ ፓይ ሃምካ ኢየሱሴ ሺጝ እንካ ዱቅኔን ዮሐንስ ሺጜ ኩንባ ሃእን ሞ? ካካሊ እንቃ ሺጝ እያይኔ ይዕሲሼያ ኡዋው ኦኑኑ።²¹ኬሹ እጝ ኢየሱስ ባይሺሻውር ጁዋኑ ኬኦካ ቡርቂዬ ኣርሼኔ፤የባይሺሻ ከኦካ ጮዩዬ፤ውር ጁዋኑ ጊታይ ካርቡ ኣይ ቆሮዻ ላሉጝሻ ።²²ዋይሼ ጊታይ ይዕሲዬ ፓዬንኬ ሃምካ ዮሐንስ እያጝ፤ፓዬ ይጝ የጌይቴዬ የዋይቴዬ ሜይቴባ ዮሐንስ፤ጊታይ ጃፍ ኣይ ኤላጝ ኬሊኪ ጃልባ፤ጊታይ ሩዋ ኣኔ ቡርቂ ካጊዮጝ ጌይባ ጫንቃል ጊታይ ኣይ ዱጛጝ ዋይባ፤ጊታይ ኣርሹጝ ናሹጝጋ፤ናንዳካ ጊታይ ኣይ ኩፒ ክያጃ ሹቃ ክሊባ።²³ውር ጊታይ ማሪ ኬኦናኒ ካቲሚኔን ፓይላ ሃኬና ጉዋኔ²⁴ውርካ ኤርጎ ካዮሐንስ ፓዮጝ ጩዋ ኢየሱስ ካርሲሼያ ዛርሲ ናንዳካ ዮሐንስ ሃሳወን፤ዋይሼ እያጝ፤የፓይሺቴ እያጝ ካቦና ሃኦ ቶዬን?ሻሪ ጊታይ ፑጉ ይንጊሼ ጆሌኪ?²⁵ይህ/የፓያ ኦ ቶዬን?የፓያ ውር እጝ ኪሚ ኣፓላ ሹቃ ቶዬኒ?ኦካ ኣፓላ ሹቃ እጝ ሹቃቲሺዬ፤ጊታይ ሴሲ ኦካ ቆቤን ጊዬይ ኦካ ጶሮክ ካዛርሲ ኣኔባ።²⁶ይህ/የፓያ ኦ ቶዬን?ኬኦይን ውርካ ባሪዮ ቶዬኒ?ጋን ሃዋይሼ እየውባ፤እጝ የፓይቴ ቶዬን ሃእጝ ኬኦካ ውርካ ባሪዮዻ ኣይሳጉጝ።²⁷እጝ ሺጜ እያጜ ቶኮጝ ሃእሺ፤እጝ ካኣሽኪሼ እን ጉዋር ውርካ ኤርጎ ኬሌሜን ኑኑ ሃሌሚሺዬ ሃይዕሲባ።²⁸ሃዋይሼ እየውባ፤ኬኦካ ጊታይ ጂሼ ኬኦካ ጫቃን ካሃኣጚ ኬና ካሳጊ ዮሐንስ ኣኔኬን፤ዬ ኬኦካ ጌጳሞ ካባሪዮ ፓይላ እጝ ኣይጆጊ እሺ ሳጊባ»²⁹ጊታይ ፑኡሺኔ ጆል ጊቢሪዳ ክየምጵንዻ ሺዺኬኔ ሹጝ ዋዮጝ ፓይላ ዱቅዬን እንካ ዮሐንሱጝ ጋያ ባሪዮ ጌጳሞ እጝ ሁሉኩጝ፤³⁰ፈረሳውያኔ ጊታይ እባጅ ክያጃዬ ኬቡዋካ ዮሐንስ ማሬ ዱቅኔን፤ባሪዮ ናንዳካ እንግን ኦይን ኣኖጝ ባዲሻ።³¹ኢየሱስ ጩዋ ሺጝ እያጝ፤ኣኪ ጂሼን ካውሩጝ ካሙኒንቴ ኦ?ሙኒሼን ኦ?³²ቆባ ኦካ ራቅካ ኡዋሩጝ ኦይን ኬጋጜ ሺው ጋምባ፤ሙኔንባ ሃንታ ጊታይ ሺጜን እይጝ «ሃቲቢሼያ እየው ቱሉንጎት የካኔ ባጛኬን፣ ሃጎቢሼያ እየው ጋሎ የካኔ ኦቆራኬን»³³ናንዳካ ኦ እንካ ዱቅኔን ዮሐንስ ዋቲ ማር ሩቡዬ ኣላላዬ ማቴንያጝ ጌጳሞ ኣኔባ ሃዋይሼ እየው እያይ፤³⁴ሃንታካ ውር ፕር ኣኔን ኣሚኔኔ ኣኔን ማቲኔኔ ኩናያጝ፤ እጝ ካኣማዬ ካማቲኔኔ፤ውር ጊታይ ፑኡሺኔ ጆል ጊቢሪዬ የኣንቴ ውርካ ናሺማ ካሴሶ።³⁵ኣኪ ሊኪ ኣዬን ካእባጄን ኦካ ሃንታን ፓይላጝ ጊባጃ።ኝያ ክየም ጲሻ ኢየሱስ ኬጋሙሬ³⁶ከኦይን ጩዋ ከውርካ ፈረሳውያን ክየም ዎሽ ኬኢየሱስ ጋጝ ኣሚኔኔ ቾቺንሲያ፤እሺዳ ኩይ ሃምካ ቶኦ ካውር እንካ ፈረሳውያኔ ኡፓ ኬካራም።³⁷ኬኦካ ከተማ እጝ ኣና ኝያ ክየም ኬና ኣኔ ሴሶ፤ኢየሱስ ኡፔ ኬውርካ ፈረሳውያን ኬጋጜ ሹ እጝ ዋዮጝ፤ቦው ጋሙሬ ኬኞኮንኮሎ ክየሜ ኩና፤³⁸ዶር ሁር ኦካ ቆጩር ካጃፍ ኔኒዬ ኦቆሬ ጫፊሺያ ጃፍ ኔኒ ኬጪራው፤ኬጪራሺ ኔኒ ካርሲያ ቆጬን፤ሹንቅ ጃፍ ኔኒዬ ጲሻ ኬጋሙሬ።³⁹ውር እንካ ፈረሳውያን ቾቺኝሺዬ እሹጝ ሹ እጝ ጌዮጝ፤ሺጝ ውሩጝ ዋታ ውርካ ባሪዮያጝ ኝያ እጝ ዱሚ እሺ ኣዬ ኒኔ፤ፕር ኣዬ ሃኣጚ ኬና ኣይ እያኔ፤ዋንቲ እባጃ፤ሃውርካ ሴሶ ሺጝ እያይኔ ዋንቲ ቃቢያ ኬሻን።⁴⁰ኢየሱስዳ ሺጝ ስምዖን ዮ ኦኬ ኬና ካ ሜይሼ እን ኣኔባ።እሺዳ ሺጝ ውሩጝ ካእርርሲዬንኑጝ ናኑጝ ሜይሼ ኣምባ።⁴¹ኢየሱስዳ ሺጝ እያጝ፤ኬኦካ ውር ኬና ቢዲርሲዬ ቢሬ ኣና ውር ዻ ኬና ቢድርሲኒ እንካ ሌሜን ኣና ሺሊንጊ ዽብ ቾን፤እንካ ላንሳ ፕር ኣና ሺሊንጊ ዶጝታም።⁴²እንካ ካሺዬ ካይሲያጝ ባጃ ጊዬይ ኦቺቲባ እንግን ዻዋን፤ኣኪ ከኦካ ውር ዻዋን ጊታይ ካቢዲሩጝ ካሳጊዬዬ ኬናሺቴ ሃና?⁴³ስምዖንዻ ዋሼ ሺጝ፤ኦናኒ ዊ ኦኮኑጝ እጝ ጎቼ ባጃ ጁዋኑጝ፤ኢየሱስዻ ሺጝ የዋሺያ ኬሊኪ።⁴⁴ሁቤኔ ቶይ ሃምካ ኝያ እጜ ዋይሼ ስምዖን ዬቶይባይ ኝያጝ? ኣን ሃኩያ ሁሉካ ሃምካ ቶኦ ኑኑጝ፤ሙዋ ጲንዻ ዬካኒ የቦሼኬን ኦካ ጃፍ ናኒ ክያኒ፤የእሺ ጫፒሺያ ጃፍ ናኒ ኬጪራው ዬቆጫ ኬጪራሺዻ።⁴⁵እን ክየምጵንዻ ዬካኔ ዋይሼኬን ኣን፤የእሺ ካርሲ ኬኦና ሁሉኬዬ ካኒ ኦይድኬን ጃፍ ናኒ ሹንቀን ።⁴⁶እን ዬካኔ ጲሺኬን ኣን ኬዋቃቲ፤ እሺ ጲሻ ኣን ኬ ጋሙሬ።⁴⁷ዬ ሃሜይሼባ እን፤ ካሎን ዬናሺያዬ ሴሶ ጁዋኑ ሺዕሺሼያ እን፤ ዬ እን ሺዕሺሼ ዺኑጝ ሃእን ናሺ ዺኑጝ።⁴⁸ኢየሱስዻ ዋይሼ ኝያ እጝ ሴሶ ኑኑ ሺዕሺሼያ እን።⁴⁹ኮመና ጊታይ ቆቤ ኬጋጜ ጋኖጝ፤ ሺጝ ይጝ ኣይን ሴሶጝ ካሺዕሺ እሺ ሃኒን? ሺጝ ኣያይኔ ሃሳወና ኬጋጝ።⁵⁰ኢየሱስዻ ዋይሼ ኝያ እጝ ይሁኔን ኑኑ ባይሺሻ እን ኬሹቃ ካምባ ሃምካ ቶኦ ኑኑጝ።

ሃፑክ 8ሄክንሶ ካጴንታ ¹ከኦይን ጩዋ ኢየሱስ ክያጃ ሃሊ ካጌጳሞ ካባሪዮ ክሊዬኔ ሳጊያ ከኦካ ከተማዬ ጶሮክ ጊታይ ኣኔን ኬኦካ ከተማ ዹኬ፤ ውር ታጲ ላማን ኣኔን ኬእሺ። ²ፕር ሃኣጚ ጊታይ ኡሲ ካጮዩ ጎሜዬ ካቡርቅዬ ባይሺሾጝ ክየም ክየም ኣኔባ ኬጋጝ።እንግንዻ እጝ ቡሌ ቤሮ ሶጳ እንካ ማግደላዊት ሺጜ ማርያም፤ ³ጊታይ ኣይ ታቺ ካቶኦካ ሄሮድስ ኝያካ ኩዛ ዮሓና፣ ሶስና፣ፕር ኣና ውር እንቃ ጁዋኑ፤ እንግንዻ ሃውር ጊታኬና ዋድሚ ኣንቲቲ ጊዬይ።⁴ዛርሲ ጁዋንዻ ፑኡሺሜን ኦክየሜ ኣኔንባ ቆቤኔ፤ ፕር ውር ፓዬን ኬከተማ እንቃ እንቃዬ ፑኡሺሚኔ ሃምን ኔኑጝ፤ ሄክንሶጝ ሺጝ እያጜ ሜይሼያ እንግን፤⁵ውር ክየም ናሹጝ ጴንታ ኔኒ ኮሬን፤ ሹ እጝ ኮሮጝ ጴንታ ክየም ፓቄን እያይ ማራካ ጉዋር፤ ባጝ እያይ ኬጃፍዻ፤ ኩባር ካዾዮክ ፓዬን ቆዾሜ ቁጅ እያይ፤⁶ጴንታ ክየም ክየም ፓቄን እያይ ኦካ ባይ፤ ፎቶጝ ካኒ ጫፊ ኣኔኬኔ ቁዋቅሽ።⁷ፕር ጴንታ ዶክ ፓቄን እያይ ኦካ ጫቃንካ ክዽሬ፤ጌጵሽ ኬጋጝ ኬክዽሬዬ ሃጅሼ ዱቡዬ ሺዕሽያ።⁸ጴንታ እንቃዻ ፓቄን እያይ ኦካ ዳሊ ሹቃ፤ ሹ እጝ ፎቶጝ ኡፑት እያይ ካርቡ ዺብ ክየም ሌሜዬ።ሺጝ እያይኔ ሹዋጶጝ፤ ሻም ናቅዲ ኔኒ ዼጌ ሺጝ፤ ዋይባ ካጝ ኣኔ ናቡ ካዋይባ።⁹ውር ጊታይ ዻዬ ጆሌ እሺዻ ጋንሼና ሹቦካ ሄክንሶ እጝ።¹⁰እሺዻ ዋይሼ እንግን ናንዳካ እየው ጌጳሞ ካባሪዮ ክያጃ እንካ ቱዎጝ እባጄን ኔኒ ጋያ እየው፤ ዬ ናንዳካ ውር እንቃ ሃሜይሼባ ኬሄክንሶ፤እንዻ ካጌዬዬ ካማሬ ኣጂሼን፤ ካዋዬዬ ካማሬ ጶቅሲዬን ጊያ።¹¹ዬሹቦ ካክያጃ ናካ ሄክንሶናጝ ሃይዕጝ፤ እጝ ሺጜ ጴንታ ሃክያጃ ካባሪዮ፤¹²ጊታይ ፓቄን ኦካ ማራካ ጉዋር ሄካ ዋይ ክያጃጝ፤ ኣይባ እያይኔ ካይሁኔዬ ካማሬ ባይሼን ሃእጝ ዲያብሎስ ኩኔ ቦወ ክያጃ እጝ ኣኔን ሻን ጊዬይ ክያኑጝ።¹³ጊታይ ፓቄን ኦካ ባይ ሃጊታይ ዋይ ክያጃጝ ቦው ኬዋዛጝ፤ ጊታይ ይወን ይሪካ ኦይን፤ዬ ናንዳካጝ ጊሜይ ማሬ ኣኔን፤የከሹካ ጋሎ ይሪካ ሃጊታይ ካቡዲህ።¹⁴ጊታይ ፓቄን ኦካ ጫቃንካ ክዽሬ ሃጊታይ ካዋይ ክያጃጝ፤ ጊታይዻ ዲቤኔ ራጴ፤ ናንዳካ ዻቆ ካዳሉጝ፤ ጋሎ፤ሆዲማሞዬ፤ዋዛካ ባሊዬ ቦዊ እንጊኔ ጉፑትኬን ካርቡ።¹⁵ጊታይ ፓቄን ዳሊ ሹቃ ክያኑጝ ሃጊታይ ክያጃ እጝ ሻሚ ሹቃዬ ካዋዬ ካጎም፤ ሃጊታይ ከቁዋቂቲ ካኡፑት ካርቡጝ።ጉ እን ኣኔን ባኪ ክያኑጝ ¹⁶ውር ክየምጵንዻ ኬና ካላሉጙሽ ጉዌ ካጅንኬ ኦኬ ወይ ካኣጁጝ ኦይን ኡጜ ዱቡ ኣኔኬን፤ ሳጊ ሻው ቶኦያጝ ካጌዬ ኦሜሌሉጝ ዼግ ኣጁጜን ኣኔባ። ¹⁷እን ማሬ ዹዋሌን፤ እን ዲኮጝ፤ እን ማሬ እባጄን፤ እን ማር ኦሜሌል ቱሌን፤ ኦኬ ኬና ዲኬ ኣኔኬን። ¹⁸ኣኪ የሻማ እያን ኬዋይቶጝ፤ ኣጅቴባ፤ ኦካ እን ኣኖጝ ሌሜባ ዬ ማራ ኣኔንያጝ ፓይላ እን ኣኖጝ ኦይን እንካ ሙኒንቶጝ ቦባ።ጁዋኔ ካኢየሱሴ ጪኒጋኔ¹⁹ከኦይን ጩዋ ጁዋኔ ካኢየሱሴ ጪኒጋኔ ኦይን እሺ ኣኖጝ ፓዬና፤ እንግንዻ ከእጝ ናሹጝ ኬጁዋኑ ኣዬን ካዛርሱጝ ካኒ ቻሊኬን ሃም ኔኒ ሄክሼን።²⁰ከሹ እጝ ሃሳዋ ኬና ሺጜ ጁኔ ጪኒጌን ኑኑዬ ዎሽ እን ቶዬኔ ጎራ ሹኑክ።²¹እሺዻ ዋሼ ዋይሼ እንግን እያጝ፤ እን ኣይ ጁዋኔ ናኒዬ ጪኔ ናኑጝ ሃእጝ ካዋይ ክያጃ ካባሪዮዬ ካኣሽኪ።ኢየሱስ ሻማ ሄሎቆን ሹይ²²ከኦካ ሹዋን ሹ ክየም ኢየሱስ ኬውር ጊታይ ዻዬ ጆሌ እሹጝ ሌፊሼ ጋግ ክያኒ፤ ኢየሱስዻ ዋይሼ እንግን ኬኦካ ኛፓስ ይጝ ካቁዋሊሼን ታቴ፤ጩዋ ካርሲያ ፓዬን።²³ ጋኔንባ ፓዬኔ ኢየሱስ ካርቡ ጎጄ ኡጛ፤ ከሹ እጝ ኛፓስ ክያኒ ሄሌቆን ታቺ ናሹጛ፤ ሙዋዻ ናንዳካጝ ኣሺኔ ሙጌ ጋጊ ክያኑጝ ሄክሻ ኦይንካ ካዮጝ፤²⁴ውር ጊታይ ዻዬ ጆሌ እሹጝ ፓዬን ኦኔኒዬ ሺጝ ታቹጝ ዮ፤ ታቹጝ ዮ፤ ይጛ ጃኪኔን ጉዋዩይ/ ሺጝ እያይኔ ጬይሻ እሺ።²⁵እሺዻ ጬዬኔ ጎሪያ ፑጉዬ ሄሌቅሼን ካሙዋዌ፤ ከሹ እጝ ፑጉዻ ኦይዳ ሄሌቅሼን፤ ጌያ ሹይዻ፤ እሺዻ ዋይሼ ውር ጊታይ ዻዬ ጆሌ እሺ ይሁኔን ጉዩ ኣኔን ኖን? እንግንዻ ከሪጊዬ ከጎሺዬኔ፤ እጝ ካጎም ፑጉዬ ሙዋጝ፤ እጝ ኣዬ እያይ ካጌርጊቶጝ እሺ ሃኒን? ሺጝ እያይኔ ሃሳወና።ባይሺሼን ካውር እጝ ቤሮ ጎሞጝ²⁶ከኦይን ጩዋ ከኦካ ገሊላ እንቃ ከጋጊ ቁዋሊሼና ፔን እጝ ሺጜ ጌርጌሴኖን፤²⁷ኢየሱስ ከሹ እጝ ጎቤ ከጋጊ ክያኑጝ፤ ጌይ ውር ክየም ካከተማ እጝ ኬና ቤሮ ጎሜ፤ ውር እጝ ሹ ጁዋኑ ክምኬን ኣፓላዬ፤ ኡፍኬን ጶሮክዻዬ፤ ሃውር ኬና ሻሚ ኦይንካ ሌሲ ጶሮክ፤²⁸ሹ እጝ ጌዬ ኢየሱሱጝ ኡቹኬ ዋሼ ማሪኔኒ ዱቡዬ ክውናቅዲ ታቺ ሺጝ፤ ውዋካ ባሪዮ ታቺ እጝ ኢየሱስዮ፤ ኣን ኬእን ኣና ክያጃካ ኦ? ኬማር ኣንጋሊንሺዬኔ ሃይወን እንባ።²⁹ኡሲ እንካ ጮዩ ሺጝ እያይ፤ ካቱሌ ኬኦካ ውር እጝ ኢየሱስ ናንዳካጝ ኤርግቶጝ፤ ኡሲ እንካ ጮዩ ናንዳካጝ ይሪካ ካጌዬ ጫንቃሉጝ ቁም ጃፍካ ውር እጝ ኬሳንሳላዬ ዛውዬ ካሊያጝ ኑሺሽ ሳንሳላ እጝ ቁሜዬ ቤሮ እጝ ጎሙጝ ይዕሲሼያ እያጝካ ቦናጝ ዸዹ ዺዻ ዼ ዽ ዾ ጰ³⁰ኢየሱስዻ ሺጝ ሮጝ ኑና ሃኒኔ ኣንሻ እሺ፤እሺዻ ናንዳካጝ ቤሮ ጁዋኑ ሻወ ኣኖጝ፤ሺጝ ሌጌዎን»³¹ዋይሼ ቤሮዻ ሻዊ ኣንጦርጦስ፤ ካማር እንግን ጎሜኔ ካሎን ይወና።³²ከኦካ ጋግ እጝ ኣኒ ኦካ ክራ እጝ ዱቡ ኦይ፤ኣና ኦካ ራጴን ጁዋኑ ካቾፑ፤ ቤሯንዻ ካዋይሼ እንግን ፓዬ ሻው ኦካ ራጴንካ ቾፑጝ ይወና፤ እሺዻ ዋይሼያ እንግን።³³ቤሯንዻ ቱልኬ ኦካ ውር እጜ ሻዋ ሃምካ ቾፑጝ፤ ራጴንካ ቾፑዻ ኣኔን ሃምካ ኣርሼን ዲያው፤ ዚሊንሲዬ ሻው ኛፓሴ ዱቁሜና።³⁴ውርካ ዻውኔን ሹ እጝ ጌዬ ኦይን ሙኔን ራሼኔ ፓዬ ሜይሼያ ኦጉዋይካ ከተማዬ ኦጉዋይካ ውር ጊታይ ቆቤን ከኦካ ከተማ ዹኬ፤³⁵ዛርሲዻ ኦይን ሻሞጝ ቶዬን፤ ከኦይን ጋኖጝ ቱሌ ፓዬና ሃምካ ኢየሱሱጝ፤ ውር እጝ ቤሮ ቱሌዻጝ ክሚሺሽ ኣፓላዬ ዋሼያ ሃምካ እሺ ኤምኑ ጅጜን፤ኡፍ ኦካ ጃፍካ ኢየሱሴ ሹ እጝ ጌዮጝ ሪጊሼና።³⁶ውር እጝ ቤሮ ጎሞጝ ባይሼዬ ጌዮጝ፤ ሻም እያን ባይሾጝ ሜይሼያ ዛርሲ።³⁷ውርካ ክራ እንካ ጌርጌሴኖን ፓይላ ናንዳካጝ ሪጊ ታቺ ጎሜ እንጊኑጝ ከኦይን ኢየሱስ ካማር ኩዬኔ ይወና፤ እሺዻ ሁሉክ ጋጊዬ ዋኬ ኩያ።³⁸ውር እጝ ቡሌ ቤሮጝ ካካሜ ከኢየሱስ ከጋጝ ይወና፤ ዬ እሺዻ ሺጝ እያጜ ይዕሲያ እሲ፤³⁹ዋኬ ካም ሃምካ ቶኦ ኑኑዬ፤ ኦታቹጝ ባሪዮ ኣሽክሼ እን፤ ኦጉዋይ ካከተማ ፓይላ ከኣኩሉክ ሃሳወ ካምባ።ውዋ እጝ ኣርሺዬ ኝያ እጝ ዴሜኔ⁴⁰ናንዳካጝ ዛርሲ ፓይላ ኣኒኔ ጎሬ ካሊዬኑጝ፤ ሹ እጝ ኢየሱስ ዋኮጝ ኬዋዛ ቦዋ።⁴¹ከሹ እጝ ታቺካ ቶኦካ ይሁኔንካ ይሁዳ ኬና ሺጜ ኢያኢሮስ ኩኔ ቡድ ጃፍካ ኢየሱሴ ሺጝ ካፓይ ጶሮኬ ይወና።⁴²ይጝ ቦኩኔ ይሁኔን ሃናንዳካ ውዋ እጝ ኣይ ቦን ታጲ ላማጝ፤ እሺዻ ኣኔን ኦካ ኣርሼን ድያው፤ ኣንባ ሃሚን ኩዬኔ ዛርሲ ካሎን ኬጋጝ ይቀን ኣኔን ጫድዬን፤⁴³ኣና ኝያ ኬና ሜሌኒ ኒያቡ ቦን ታጲ ላማ፤ ኣንቲቲ ጊታይ ኣኖጝ ሹዋጲሼ ውርካ ዼሻዬ ውር ክየምጵንዻ ኬና ካባይሺሽ እሺ ኣኔኬን፤⁴⁴እሺዻ ጊዲሜን ኬታካ ውሬ ዱም ጩዎኑ ካኣፓላዬ ማቲ ባይሺሼን ኔኑጝ ይሪካ ኒያቡ እጝ ኣኔን እሪኔን ዾራ።⁴⁵ኢየሱስዻ ሺጝ ሃኒን ዱሚ ኣኑጝ? ሹ እጝ ውር ፓይላ ቡዲዬ ዱሜን ጊዬዩጝ ጴጥሮስ ሺጝ ታቹጝ ዮ፤ ዛርሲ ፓይላ ከኦካ ሮሙጝ፤ ኬይቂኔን ኣኔን ጫዲዬን።⁴⁶ዬ ኢየሱስ ሺጝ ውር ክየም ዱማ ኣን፤ ቁዋቂቲ ቱሌ ኬኦናኒ ሃእባጂያ።⁴⁷ኝያ እንዻ ካኒ እባጅኬኔ ኩዬን ቻሊዮጝ፤ ሹ እን እባጆጝ፤ሪጄ ኩን ኦካ ማሪ ኔኒዬ ቶኬያ ኩዋሚን ዱሜ ናንዳካ ኦዬ፤ ሻም እያን ባይሼ ይሪካዬ፤ ኦካ ማሪካ ዛርሲ ፓይላ ሃሳዋ።⁴⁸እሺዻ ሺጝ፤ ውዋ ናኒዮ ይሁኔን ኑኑ ባይሺሻ እን፤ካምባ ኬሹቃ።⁴⁹ኢየሱስ ካኒ ኣንባ ሃሳውኔኔ፤ ውር ታቺካ ቶኦካ ይሁኔን ካውርካ ይሁዳ ክየም፤ ቱልኬ ኦካ ቶኦካ ኢያኢሮሴ፤ ሺጝ ውዋ ናኒ ኣርሻ፤ ከኦጝ ጩዋ ኦይዲ ውርካ እርርሲኔን ዻችሽቴን፤ ሺጝ እያይ።⁵⁰ኢየሱስዻ ዋዬ እጝ ዋይሼ ኢያኢሮስ ኡሌይ፤ ኦይ ሪጊሺኔን፤ይሁንቴ ይሁኔንጵን ውዋ ኑኑ ባይሽባ።⁵¹ኩዬ ሁሉኬ ሃምካ ቶኦካ ኢያኢሮሱጝ ከኦካ ጴጥሮሴ ከኦካ ዮሐንሴ፣ ከኦካ ያዕቆቤ፣ ጩዋ ከኦካ ሹና ውዋዌ፣ ጁዋኔ ካውዋዌ፤ውር እንቃ ካሁሉኮጝ ካኒ ናሺኬን።⁵²ከሹ እጝ ውር ፓይላ ኦቆሬኔ ኣኔን እንቶ ኤ፤ እንቶ ኤ፤ ሺጜን። ዬ እሺ ሺጝ ኦይዲ ኦቆርቴን ኡጝ፤ ኡጜን ዬ ካኒ ኣርሽኬን።⁵³ውርዻ ናንዳካጝ እባጄ ኣርሼን ኔኑጝ ጫጋ እሺ።⁵⁴ዬ እሺ ጎም ቡዋኔኒዬ ዋይሼ እሺ እን ኝያጝ ናሹጝጋ።⁵⁵ኡሲ ካውዋዻ ዋካ፤ ይሪካ ናሹጜ ዾራ፤ ኢየሱስዻ ሺጝ ኦካ ኣሜን ኣኔያጝ ኣይ እሺባ።⁵⁶ውር ኔንዻ ጎሺያ፤ ዬ እሺ ኦግታይ ሙኔን ካማሬ ውር ክየምጵንዻ ሜይሼን ሜይሼያ እንግን።

ሃፑክ 9ይዕሲዬን ካውር ታጲ ላማን ¹ኢየሱስዻ ሺው ውር ታጲ ላማን ክየምጲኔ፤ ካቡሌ ቤሮ ፓይላዬ ካባይሺሼ ቡርቂዬ ኣያ እንግን ቁዋቂቲዬ ጌጳሞዬ። ²ፕር ካኪሊዬ ጌጳሞ ካባሪዮዬ ካባይሺሼ ውርካ ቡርቁጝ ይዕሲያ እንግን።³ዋይሼ እንግን እያጝ፤ ኣይን ሴጋጝ፣ ኣይን ሻራንኮጝ፣ ኣይን ሚሹጝ፣ ኣይን ቢሮጝ፣ እን ኣኔ ቡዋ ዻ ጎሜን ዎሺሽኬን።⁴ሌይ ሃም ከቱልቴ ከኦካ ከተማ እጝ፤ ኦካ ቶኦ እጝ ካሌሜን ኣይን ቶኦ ኬና ኣኔን እያን ቆቢባ ኦይን።⁵ውርካ ከተማ እጝ ማር እየው ቦወኔ ሺዲያያጝ የኦይዳ ከተማ እጜ የሺጛ ቱሌንያጝ፤ካማቲሼ እንግን ማኝዬ፤ ቡቡኒ ካጃፍ ጉዩ ክሽክሼ ቱልባ።⁶እንግንዻ ኬእያይ ሺጞጝ ቱሌ ፓዬ፤ ክልዬኔ ፓይ ክያጃ ሹቃዬ ኦጊታይ ፓዬ ፓይላ ባይሺሽ ውር ጊታይ ካቡርቅዬ ጋኔን ኦጉዋይ ካጶሮክ ሳጊዬን።⁷ታቺ እንካ ገሊላ ሄሮድስ፤ ከሹ እጝ ዋዬ ኦጊታይ ሙኔን ፓይላጝ ኬኣዬን ኔኒ ቴርጋዽያ፤ ናንዳካ ኦ ውር ክየም፤ ክየም ዋሽ ኬኦኮኑጝ ዮሐንስ ናሹጜ ኬኣርሼን ክያኑጝ፤ ሺጝ እያይኔ ጋኔን ሃሳውኔን።⁸ዶክ ዋሽ ኬኦኮኑጝ ጌዬ ኤልያሱጝ፤ ፕር ዶክ ሺጝ ውር ጊታባ ካሌሜን ካባሪዮ ክየም ጊዬይ ናሹጛ ሺጝ እያይኔ ጋኔን ሃሳውኔን።⁹ሄሮድስዻ ሺጝ፤ ዮሐንስ ባካ ዱቅኔን ኣን ሃቃጪሽ ቦሉ ኔኒዬ ሃኒሺሽያ፤ ጩዋ ናንዳካ እሺ ሺጜ እያጜ ሃሳወዬ ሃዋዮጝ ውሩጝ ሃኒን? ፤ ሺጝ ሃጌይ ኬካርቡ ናኒያጝ ዋቲ ሃባሺ።ኢየሱስ ኣሚሻ ውር ሺ ቾን ¹⁰ውር ታጲ ላማንዻ ሹ እጝ ዋኬ ፓይኖጝ፤ ጊታይ ገሽክዮጝ ፓይላ ሃሳዋ፤ እሺዻ ቦው እንግኔ፤ ሃምካ ከተማ እጝ ሺጜ ቤተ ሳይዳ ፓይሼን ፓሺሜና እሺጲን። ¹¹ዛርሲ እባጅ እጜ ዻዬያ እሺ፤ እሺዻ ቦው እንግኔ ናንዳካጝ ኣኒኔ እንግን ጌጳሞ ካባሪዮ ክሊዬን፤ ጊታይ ዎሺሽ ባይሺሼን ባይሺሻ።¹²ሹሽ ሺጜ ቃይትሼን ውር ታጲላማን ፓዬን ኦኔኒዬ ሺጝ ናንዳካጝ ኡዋው ሃኣኒንቴ ቦና ክያኑጝ ፤ ዛርሲ ካይዕሲዬ ካፓይ ኦጉዋይ ካጶሮኬ ካዎሽ ሚሼ ኦካ ራጴኔ»¹³ዬ እሺ ሺጝ ጊታይ ጉዩ ኬኣምቶጝ ኣይ እንግንባ፤ እንግንዻ ሺጝ፤ ሚሽ እጝ ካሄኪ ዛርሱጝ ሃማራ ፓዬ እንቃ ኡዋሩጜንያጝ ጊታይ ኣኒኦጉዋዩ ከኦካ ባላሻ ቾኔ ኣርቴ ዻዌ ሳጊኬን፤¹⁴ኦይን ኣና ጁሙ ሺ ቾን፤ ኢየሱስዻ ዋይሼ ውር ጊታይ ዳዬ ጆሌ እሺ፤ ዛርሲ ጊታጝ ካሺ እንግን ዶጝታም፣ ዶጝታሜ ቆቢሽባ።¹⁵ውር ጊታይ ዻዬ ጆሌ እሺዻ ከእያይ እሺ ሺጞጝ ሻማ እያይ ውር ካቆቦጝ።¹⁶እሺዻ ቦው ባላሻ ቾናኔ ኣርቴ ዻዋኔ ቲትሼ ዾዮኬ ኡዋኔ ካሺዬ ኣያ ውር ጊታይ ዻዬ ጆሌ እሹጝ።¹⁷ውር ፓይላ ኣሜ ናዓሼ፤ ውር ጊታይ ዻዬ ጆሌ እሺዻ፤ እንግንዻ ፑርጾ ፑርጾ ካባላሻ ጊታይ ሺዺ ቆቃ ቆሼ ታጲላማ።ጴጥሮስ ክሊዬና ኒን ኣዬንካ ኢየሱስ¹⁸ከኦይን ጩዋ ኢየሱስ ኣኔን እሺጲን ይሁኔን፤ ውር ጊታይ ዻዬ ጆሌ እሺዻ ጋኔን ከእሺ፤ እሺዻ ሺጝ ሄጋን ዛርሲ ዋሽ ኣን ኬኒን? ሺጝ እያይኔ ኣንሻ እንግን።¹⁹እንግንዻ ሺጝ፤ ውር ክየም፤ ክየም ሺጝ ሃእንካ ዱቂኔን ዮሐንስ፤ ዶክ ሺጝ ኤልያስ፤ ፕር ዶክ ሺጝ ኬኦካ ውር ጊታባ ካሌሜን ካባሪዮ ክየም ናሹጛ ኬኣርሼን ክያኒ፤ ሺጝ እያይ።²⁰እሺዻ ሺጝ፤ኤ እየውካ የዋሻ ኣን ኬኒን? «ጴጥሮስ ሺጝ፤ እን ዬኣይ መሲሕ ካባሪዮ/ ሺጝ እያይኔ ዋሼያ እሺ።²¹ኢየሱስዻ እጝ፤ ካማር ውር ክየምጵንዻ ሜይሼኔ ካሎን ኣጅሻ እንግን።²²ፕር ሺጝ፤ ሃንታ ካውር ካጌዬ ጋሎ ጁዋኑ ሁሉኳ፤ ፕር ከኦካ ውር ጌቿኔ፤ ከኦካ ታታቻን ካቃሼ፤ ኦካ ጊታይ ቶኬን ወርቀቴ፤ ካቦሁዬዬ፤ ካኒሼዬ፤ ከሹ እንካ ማኪንሳ ካናሹጜ ኬኣርሼን ክያኒ ኣኔባ።²³ጩዋ ዋይሼ እንግን ፓይላ እያጝ፤ ውር እጝ ዎሺ ኬኦናኒ ማ ኩኔን ኣኔያጝ፤ ካቡዲ እሺ ኤምኑ እንካ ሾቁኔን ሹ ጮል ካዼቴ ካዻዬ ኣምባ።²⁴ናንዳካ ኦ፤ እጝ ዎሺ ናፒሲ ኔኒ ዻሺዬን ካይባ፤ እን ሺጚ ናንዳካ ኣኔ ካይሲ ናፒሲ ኔኑጝ ባይሽባ።²⁵ውር ሺዕሺኒን ፔኑጝ ፓይላጝ፤ ወይ ጆጊሺያያጝ ዋድማ ኔኒ ሃኦ?²⁶ውር ክየምጵንዻ ሪጊሼና ኬኣኔ ክያጃ ናኒያጝ፤ ፕር ኬባባዬ ኬውርካ ኤርጎዬ ጌጳሞ ኩናያጝ ሪጊሼንባ።²⁷ሃዋይሼ እየውባ ኣኩሉክ፤ ኬኦካ ጫቃን ካጊታጝ ጎሩጝ ጌይኬን ጌጳሞ ካባሪዮዬ ውር ጊታኬና ካማር ኣርሼን ጌዬን ኣኔባ።ሩዋ ሁቡኔን ካኢየሱስ²⁸ ኢየሱስ ክያጄ እጝ፤ ኬክያጝካ ሹ ሎንካይ ጩዋ ቦው ጴጥሮሴ፣ ዮሐንሴ፣ ያዕቆቤ ናንዳካ ይሁኔን ኮቲሼያ ኦካ ጋግ ክየም።²⁹ኣኔንባ ይሁኔን ክያኒዬ ሩዋ ካማሪ ኔኒ ሁቤና፤ ኣፓላ ኔኒዻ ማቲያ ኬማኬን ካጎት ማቲያ ኬና ካቶክ ካርቡ ፎልቺሼ።³⁰ እየዎ ውር ዻ፤ እንግንዻ ሃሙሴዬ ኤልያሴ፤ ጋን ኬእሺ ሃሳውኔን።³¹ጌዬን ኬጌጳሞዬ፤ ካሹዋጵሽባ ኬኢየሩሳሌም፤ ሺጜ እያይ፤ ኬፔኑጝ ናንዳካ ዋና ጌዬን ኣኔን ሃሳውኔን።³² ዬ ጴጥሮሴ ውር ጊታይ ጋዬ ኬጋጜ ካርቡ ጊዬይ ጎጄ ራጴ፤ ጬይኖጝ ጌይ ጌጳሞዬ ውር ዳ ጊታይ ጎሪ ኬእሺዬ።³³ውራንዻ ኬኦካ ኢየሱስ ጌዬ ዋናዬ ፓዮጝ፤ ጴጥሮስ ሺጝ ታቹጝ ዮ፤ ሃቆባያ ኦጝያጝ ሃሹቃ ኬኡዋው፤ ዬካኣሽኪ ቶኦ ጂያን፤ ክየም ካኣይ ኑኑ፣ ክየም ካይካ ሙሴ፣ ክየም ካኣይካ ኤልያስ፤ እጝ ሃሳዎጝ ካኒ እባጅኬን።³⁴ኣኔንባ እጝ ሃሳወኔ ሉፍ ኩኔ ጂጛ እንጊን፤ ሁሉኬ ኦካ ሉፑጝ ሪጊሼና፤³⁵ኦካ ሉፕ ቱዎጝ ኩና ናቂዲ ኬና ሺጝ ውዋ እን ናኑጝ ሃዕዲዮጝ ሃይዕጝ ዋይባ ክያጃ ኔኒ።³⁶ሹ እጝ ዋዬ ናቂዱጝ ኢየሱስ ማቲ እሺጲኔ ጌያ፤ ዬ ውር ጊታይ ዻዬ ጆሌ እሹጝ ጎማ ክያጃ እጝ ኬሼን፤ ዬናንዳካ ክያጃ እጝ ጌዮጝ ከሹ እጝ ውር ክየምጵንዻ ካኒ ሜይሼኬን።ኢየሱስ ባይሺሻ ውዋ እጝ ኣኔ ኡሲካ ጮዩጝ³⁷ጩዋ ጎቤ ኬጋግ ክያኑጝ ዛርሲ ጁዋኑ ፓዬኔ ጌያ ኢየሱስ።³⁸ኬሹ እጝ፤ ኬኦካ ጫቃን ካዛርሲ ውር ክየም ሻም ናቂዲ ኔኒ ዼጌ ሺጝ፤ ውርካ እርርሲዬኑጝ ዮ፤ ውዋ ናኒ ናንዳካጝ ኣዬ እሺጲን፤ ኬቶይሼ ኣን ውዋ ናኒ ሃይወኒያ እን።³⁹ኡሲ ጎም እሺያጝ ሉጉድ ኡቹኳ፤ ኬዱቦ ዳርጊሲባ፤ ኦኬ ጋራ ሄክሽ እሺያጝ ኦይድ ኬጋሎ አኸ።⁴⁰ውር ጊታይ ዻዬ ጆሌ እሹጝ ካቡልባዬ ይወና፤ ዬካኒ ቻሊኬን።⁴¹ኢየሱስዻ ሺጝ ጅሼን ቆሮ ጊታጝ ማሪ ይሁኔን ኣን ኬእየው ሃኡፍ ሌይ ኣሚን? ሃዶንሺሼ እየው ሌይ ኣሚን? ሺጝ ይንዳ ቦኩዋየ ውዋ ኑኑ ዮጝ።⁴²ኣኔንባ ውዋ ቦኩኔን ክያኒዬ ቤሮ እጝ ፓቅሼ ዳሊ ክያኒዬ ዳርጊሲያ፤ ዬኢየሱስዻ ጎሪ ኡሲካ ጮዩዬ ባይሺሻ ውዋ እጝ፤ ዬዋሼ ኣያ ሹኔ።⁴³ውር ፓይላዻ ታቺ ኣዬን ካባሪዮ ዻዹጝኔያ፤ እን እሺ ኣሽክዮጝ ፓይላ፤ ውር ፓይላ ኣኔንባ ዻዹጝኔኔ፤ ኢየሱስ ዋይሼ ውር ጊታይ ዻዬ ጆሌ እሺ፤⁴⁴ይጝ ክያጃጝ ሃሜይሼ እየው፤ ክየምጵንዻ ኬማር ቆቢኔኔ ሃንታካ ውር ሳስክዬ ጋዬንባ ኦካ ቡዋካ ውር፤ ሺጝ እያይ።⁴⁵ዬ እንግንዻ ሃሳዋ እጝ ካኒ ዋይኬን፤ ካማር ጶቅሲዬኔ ክያጃ እጝ ጌይሼያ እንግን ሺር፤ ካማሬ ዋሼ ኣንሺኔኔ ሪጊሼና።ኬኦካ ፓይላ ሳጊ ካኣይ ኒን?⁴⁶ኬኦጊዬይ ሃኒን ካኣይሳጉጝ ኬኦካ ጫቃን ካውር ጊታይ ዻዬ ጆሌ እሹጝ ፓሊሞ ናሹጛ።⁴⁷ኢየሱስዻ እባጅ ቃቦ ካሻን ጊዬይየ፤ ቦ ሃንታ ዺታኬ ክየሜ ሪባ ኦካ ቆጩር ኔኒ።⁴⁸ዋይሼ እንግን እያጝ፤ እጝ ካቦው ውዋ ዺታኮጝ ኬሮጝ ናኒ ኣኔያጝ፤ ቦዋ ኣን ፕር ቦባ እን ይዕሲ ኣንዻ፤ ኬኦካ እየው ፓይላ እጝ ኣይ ይርኩጝ፤ ኬፓይላ ሳጊባ።⁴⁹ዮሐንስዻ ሺጝ ታቹጝ ዮ፤ ውር ክየም ኬሮጝ ኑኑ ቡል ቤሮዬ ሃጌያያ፤ ካኣዬ ኬኡዋዌ ካማሬ ዻይኔን ካታሚያይ ሃርጌን።⁵⁰ኢየሱስዻ ሺጝ ኦይዲ ሃርጊቴን፤ እን ማር እየው ሪቢዺዬን ፓይላ እሻ ኬእየው።ሪቢንዾ ካውርካ ሳማሪያ⁵¹ኢየሱስ ሱ እጝ ፎላ ኩዬን ኔኒ ሄክሾጝ፤ እያጝካ ኢሩሳሌም ኩዬን ቱሚዬ ናሹጛ።⁵²ሌሚሼ ይዕሲያ ውርካ ኤርጎ ሃሚን፤ እንግንዻ ሌሜ ፓይ ክያጃ ጊታይ ኣኖጝ ኣጊሲዬኔ ፓዬ ሁሉካ ጶሮካ ውርካ ሳማሪያ ክየም።⁵³ዬ ዛርሲ ኣኔን እያንካ ኢየሩሳሌም ፓይሼን፤ ናንዳካጝ ማሬ እባጄኑጝ ካኒ ቦኬን እንግን።⁵⁴ውር ጊታይ ዻዬ እሺዻ ዮሐንሴ ያዕቆቤ ጌዬ እጝ ሺጝ፤ ታቹጝ ዮ፤ ኬእያባ ኤልያስ ኣሽክዬ ፓይላዬ ጉ ጎቤ ኬፎላዬ ካይሲዬ እንግን፤ ኡዋዻ ካኤርጊቶጝ ዬናሺሼባይ ኡዋው?⁵⁵ዬ ኢየሱስዻ ሁቤኔ ጎሪያ እንግን ዬ ሺጝ፤ እየው ዬ ኣኒንቴ ኬኡሲካ ኦ ዬእባጃኬኒ? ሃንታካ ውር ኩኖጝ ኩን ዻቆ ካውር ዻሺዬን ዬካኒ ኩንኬን ካይሲዬን፤⁵⁶ኦካ ጶሮክ እንቃ።ውርካ ዻይኔ ጆሌን ኣንቲቲ እንካ ካሺሺዕ⁵⁷ኣኔንባ ኬጉዋር ፓዬኔ ውር ክየም ኩኔ ሺጝ ኦይን ኬፓይቶጝ ፓይላ ሃዻዬ እየውባ።⁵⁸ኢየሱስዻ ሺጝ፤ ይጊን ካኩዬይ ኣኔ ቶኦካ ኩባር ካዾዮክ፤ ዬሃንታካ ውርዻ ኦኬና ካዾቅሼ ቦሉ ኣኔኬን።⁵⁹ዬዋይሼ ውር እንቃ ዻዬ ኣምባ፤ ውር እንዻ ሺጝ ታቹጝ ዮ፤ ካሌማ ካማ ካቱቱክ ባባ።⁶⁰ኢየሱስዻ ሺጝ ጊታይ ኣርሺ ኣርሼን ጊዬይ ኦይዲባ ቱቱኬን፤ ዬ እን ካሜ ኪሊይንቴ ጌጳሞ ካባሪዮ።⁶¹ፕር ውር እንቃ ሺጝ ታቹጝ ዮ፤ እን ዻዬን ሃዻዬባ፤ ኣይባ እያይኔ ኬሌሜን ካዋካ ካማ ይዕሲ ውር ጊታይ ኣኔን ሃምካ ቶኦ ናኑጝ ዬ ናሺሼባይ ኣን።⁶²ዬ ኢየሱስ ሺጝ ውር እጝ ቱፑኒ ክያጃዬ ዋኬ ት

ሃፑክ 10ኢየሱስ ይዕሲያ ውር ሶጳታም ላማን ¹ከኦይን ጩዋ ታቺ እጝ እድዬ ጌጳስያ ውር ሶጳታም ላማን፤ ኦካ ከተማ ካጝ ካፓዬዬ ራቄ ፓይላ ካሌምባዬ ሻም እንግን ዻ ዻዌ ይዕሲያ። ²ዋይሼ እንግን እያጝ፤ ኪሊማ ሃጁዋኑ ዬ ውርካ ዋድማ ሃጩዋማ፤ ዬ ታቺ እንካ ኪሊማ፤ ዬ ውርካ ዋድማ ካይዕሲሼ ሃምካ ራቅካ ኪሊማ ይወና።³ሺጝ ፓይ እያጝ፤ ከማድር ሃይዕሲሼ እየውባ ኦካ ጫቃንካ ዮዮ።⁴ኣይን ሻራንኮጝ፤ ኣይን ኮኒሹጝ ኣይን ቻውጝ ኦይዲ ቦቴን፤ ጉዋር ክያንዻ ኦይዲ ውር ክየምጵንዻ ሆፎ ዋይሺቴን።⁵ዬፓያዬ ኣይን ቶኦካ ኒን የሻዋያጝ ሌሚሺዬ ሺጝ ሹቃ ካኣይሼ ቶኦጝ።⁶ውርካ ሆፎ ኣኔያ ኦይንያጝ፤ ሆፎ ጉዩ ፓቄንባ ኦኔኒ፤ ማር ኣዬንያጝ ሆፎ ጉዩ ዋክባ እየው።⁷እን ቦሼ እየው ፓይላ ዬኣማዬ ዬማታያጝ፤ ቆቢባ ኦካ ቶኦ እጝ፤ ኦይን ዬ ኣሽክዮጝ ጌዬን ኣኔባ፤ ከኦካ ቶኦ እጝ ኦይዲ ኦዕንቃ ፓዬን።⁸ኣይን ኦካ ከተማ ኒን፤ የሻዋያጝ ኦይን ውር ቦሼ እየው ኣሚባ።⁹ውርካ ቡርቂ ጊታይ ጌዬን ኦይን ባይሺሽባ፤ ዋይሺቴ እንግን ጌጳሞ ካባሪዮ ዲያውሻ ኦጉዩ።¹⁰ኣይባ እያይኔ፤ የሻዋ ኦካ ከተማ ክየሜ ማር እየው ቦወንያጝ፤ ቱል ኦካ ጳሌ ሺጚ እያጝ፤¹¹ቡቡኒ ካከተማጝ ጉዩ ኣኔን ጃፍ ጉዋዩ ክያኑጝ፤ ባሺ ሃትርኪሲያባ፤ ናንዳካ ኦ ጌጳሞ ካባሪዮ ዲያውሻ እንዻ እባጅባ።¹²ሃዋይሼባ እየው፤ ከሹ እጝ ኦካ ከተማ እጝ፤ ሳጊ እንካ ሶዶም ማቲባ ባዶ።¹³ሃይ ኮራዚን/ ሃይ ቤተ ሳይዳ/ ኦ ሹቃ እጝ ጋሽክሼ እየው ዋቲ ጋሽክሼ ጢሮሴ ሲዶናያጝ፤ ከኦባ እጝ ክሚ ኣፓላ ታቺ ፤ ዋቲ ጲሼን ቡዎሉዬ ሁሉካ ይሁኔን።¹⁴ናንዳካ ኦ ሹካ ኮምሼን ኬኦጉዩ ሳጊ ናንዳ ጢሮሴ ሲዶናዬ ባድሽባ።¹⁵እንዻ ቅፍርናሆም ሃዋይሼ እን ጌይሼ ዼግ፤ ዼግ፤ ዬ ጎቢባ ሃምካ ጉውጝ።¹⁶ጊታይ ዋይሼ እየው ዋይሼ ኣን፤ ጊታይ ማሪ እየው ቦወን ቦኬን ኣንዻ፤ እን ማሪ ኣን ቦወንዻ እን ይዕሲ ኣንዻ ቦኬን።¹⁷ውር ሶጳታም ላማን ዋዚንዽዬ ዋካ ዋኬዻጝ ሺጝ ታቹጝ ዮ፤ ኣይን ቤሮጝ ኬሮጝ ኑኑ ሃቡላያ።¹⁸እሺዻ ዋይሼ እንግን ኣያጝ፤ እጁጝ ኬፎላ ክያኒ ፓቄን ኬማኬን ካጎቴ ሃጌያ።¹⁹ኣኪ ቻቼ ናቁሬ ኬባጝቶጝ፤ ኬኦካ ጋል ቁዋቂቲ ፓይላ ክያኒ ጌጳሞ ሃኣይያ እየው፤ ኦኬ ኬና ካጊያሚሽ እየው ክየምጵንዻ ኣኔኬን።²⁰ካኣይባ እያይኔ ናንዳካጝ ዬቡልቴ ኡሲ ጋራጝ፤ ኬእጝ ኦይዲ ዋዚንዺቴን፤ ዬ ሮጝ ጉዩ ናንዳካጝ ቶኬ ፎላ ክያኑጝ ካዋዚንሲ እየውባ።²¹ኬሹ እጝ ኢየሱስ ከኡሲ ካባሪዮ ኣሺኪ ሾሮዬ ሺጝ እያጝ፤ ታቹጝ ካፎላዬ ካዳሉጝ፤ ባባ ዮ፤ ይጝ ፓይላ ከኣጁጋኔ፤ ታታቻኔ፤ ዬሻሚ ጁጌ ዬዹዋሊሺኔ ናንዳካ ሃንታጝ ሃጌጳሲያ እን፤ ጋን ባባ ዮ፤ ይጝ ማቲያ ክያጃ ሹቃ ኑኑ²²ኬታጝ ካባባ ፓይላ ጋያ ኣን፤ ፕር ውዋ ኣዬ ኒን ኬሹኔ እንቃ ኬና ካእባጅ ኣኔኬን፤ ሹኔ ኣዬ ኒን ኬውዋ እንቃ፤ ውዋዻ ኬእን ዎሼ ኣዬን እንቃ፤ ኬና ካእባጅ ኣኔኬን።²³ሁቡሼን እያንካ ውር ጊታይ ዻዬ ጆሌ እሺዬ፤ ዋይሼ እንግንጵን፤ እንግንጵን፤ እየው ኦይን ዬቶይቶጝ ካርቡ ጊታይ ካቶይ ሃጫንቃል፤²⁴ሃዋይሼባ እየው፤ ውርካ ባሪዮ ጁዋኑዬ ታታቻኔ፤ ኦይን እየው የቶይቶጝ ዎሽ ቶዬኔ ካኒ ጌይኬን፤ እን እየው የዋይቶጝ ዋዬን ዎሼ ካኒ ዋይኬን።ውር ሌሞ እንካ ሳማሪያጝ²⁵እየው ሹ ክየም ውር ክየም ኬና እባጅ ክያጃ ናሹጝ ኢየሱስ ፓታንሲዬኔ ሺጝ ውሩጝ ካእርርሲዬን ዮ፤ ሃምካ ዻቆ ካቦን ጮል ሆሩሚኔን ካኣሽክሼ እን ኦ?²⁶ኢየሱስ ሺጝ እጝ ቶኬ ኬክያጃ ሃኦ? ዬ ኮሚ እያን? ሺጝ እያይኔ ዋሼያ እሺ።²⁷ውር እንዻ ዋሼ ሺጝ ኣምላክ ታቺ እጝ ናሺ ካሎን ኬሻን ኑኑ፤ ካሎን ኬዻቆ ኑኑ፤ ካሎን ኬቁዋቂቲ ኑኑ፤ ካሎን ኬቃቦ ኑኑ፤ ባይዳ ኑኑዻ ናሺኬ እን ኤምኑ፤ ሺጝ እያይ።²⁸ኢየሱስዻ ሺጝ ዬዋሺያ ኬሊኪ፤ የእንዻ ሻም እያይ፤ የኡፓ ኬዻቆ።²⁹ውር እንዻ ሆሽ እሺ ኤምኑ ጫንቃል ሻሜኔ ሺጝ ኣይባዬ፤ ባይዳ ናኒ ሃኒን?³⁰ኢየሱስዻ ሺጝ እያጜ ዋሼያ እሺ፤ ውር ክየም ከኢየሩሳሌም ጎቢሼ እያጝካ ኢያርኮጝ፤ ፓቄን እያይ ኦካ ቡዋካ ጎርጉ፤ ቡሪ ኣፓላዬ ሙሬ ሄክሼ ኦይካ ኣርሼን ጎይዴ ፓያ።³¹ውር ታቺ ክየም ሉጉድ ኩኔ ጎብ እያይ ኬጉዋር እን ኣይ ባይን፤ ጌዮጝ ጌይ ፃክርሚዬ ሳጊያ።³²ፕር ውር ክየም ካሌዊ ሄክሽ ኦይ ካራቅ እኔ ጌዬ እሺዻ ጌይ ፃክርሚዬ ሳጊያ።³³ዬ ውር እንካ ሳማሪያ ኩዬ ጉዋር ኔኑጝ፤ ኦይን ውር እጝ ኣኖጝ ሄክሻ ሹ እጝ ጌዮጝ ዻዹጝኔያ።³⁴ኩኔ ጊዬ ኔኒ ክያኒ እርሼ ዋቃቲዬ ኣላላዬ ቁማ፤ ኣጁጝ ኦካ ኡኩሊ ኔኒዬ ቦሼያ ሃምካ ኡሲ ቦወን ካቶኦካ ኮማናጝ፤ ከኦይን ሻማ ሹቃ ሹቃ።³⁵ኬኦይ ቡል ሺሊንጊ ዻዌ ኣይ ኤምኑ እንካ ቶኦካ ኡሲዬ ሺጝ፤ ውሩጝ ሃኤልቅሚሼንያ እን፤ ኣኪንሲባ፤ ኬእጝ ሳጊ ኣንቲቲ ካጝ የቡሎጝ ኣን ሃዋክያጝ ሃካሺሼ እምባ።³⁶ኣኪ ውር እጝ ፓቄን ኦካ ጎርጉ ጂያናን ጊታይ ማቲ ባይዳ ኔኒ ሙኔን ና?³⁷ውር እጝ እባጂ ክያጃ ሺጝ ጋ እጝ ኣሽክሼ ሹቃጝ፤ ኢየሱስዻ ሺጝ «እንዻ ካሜ ሻም እያይ።ኢየሱስ ኬኦካ ቶኦካ ማርታዬ ማርያሜ³⁸ኢየሱሴ ውር ጊታይ ዻዬ ጆሌ እሺዬ ፓዬ ጉዋር፤ ኢየሱስ ሁሉካ ጶሮክ ክየም፤ ኝያ ክየም ኬና ሺጜ ማርታ ቾቺንሽያ እሺ ኦካ ቶኦ ኔኒ።³⁹እሺዻ ኣኔ ጪኔ ኬና ሺጜ ማርያም፤ ማርያምዳ ዋዬን ክያጃዬ ኣኔባ ኡፔ ኦካ ጃፍካ ታቺ እጝ ዱቡ።⁴⁰ዬ ማርታ ኬጁዋኑ ኣዬን ካዋዲማ ኔኒ፤ ኣን ሹዋጴኔ፤ ኩይ ሃም ኔኒዬ ሺጝ ታቹጝ ዮ፤ ጪኔ ናኒ ኦቼ ኣን ዋድማ ፓይላዬ ኡፊያጝ የጌይ ሹይህ? ካኬልሺዬ ኣን ሜይሼባጌ።⁴¹ዬ ታቺ እንዳ ሺጝ እያጜ ዋሼያ እሺ፤ ሺጝ ማርታ፤ ማርታ፤ ናንዳካ ኦኬ ጁዋኑ የኦቆረንባይ፤ ቃይባ፤⁴²ዬ እንካ ዎሺሽ ሃኦኬ ክየምጲኒ? ማርያም ሺጝ ይንጌ እን ኣይ ባሺ እድያ፤ ይጝ ኬኦኔኒ ቦኬን።

ሃፑክ 11ይሁኔን እን ኢየሱስ እርርሲዮጝ ¹ሹ ክየም ኢየሱስ ኣኔን ኦካ ጶሮክ ክየም ይሁኔን፤ ሹዋጴ ይሁኔን ውር ጊታይ ዻዬ ጆሌ እሺ ክየም ሺጝ ታቹጝ ዮ፤ ኬእያይ ዮሐንስ እርርሲዬ ውር ጊታይ ዻዬ ጆሌ እሺ ይሁኔን ኔኑጝ እንዻ ይሁኔን ኑኑ እርርሲ ኡዋባ።²እሺዻ ዋይሼ እንግን እያጝ የይሁናያጝ ሺጝ እያጝ፤«ሹኖጝ ጉዋዩጝ፤ ሃይሁንቴ ኬሮጝ፤ ጌጳሞ ኑኑ ካኩዋባዬ፤³ሚሽ እንጉዋዩ ካሹ ጮል፤ ሹጝ ኣይ ኡዋባ፤⁴ሴሶ ጉዋይዻ ሺዕሺሼ ኡዋባ፤ ኡዋዻ እጝ ሃሴሲቶጝ ፓይላ ሃሺጛያ ሺዕሺሼ ኡዋባ፤ ኦይ ኡዋው ጋሎ ክያኒ ፓቂሼን፤ ኬጋራ ክያንዻ ባይሺሽ ኡዋባዬ።⁵ፕር ዋይሼ እንግን እያጝ፤ ከኦጉዩ ውርካ ናሺማ ኣኔያጝ፤ ኬሚኪር ኩይ ሃሚን ኔኒዬ፤ ሺጝ ጩዋናጝ ናኒዮ፤ ቢዲሪሼ ኣን ባላሻ ጅያን፤ ⁶ባይዳ ናኒ ክየም ኩንኬ ጉዋሬ ኦኬና ካኣዬ እሲ ኣኔኬን፤ ሺጝ እያይኔ ይወና ካኣሚሼን ፤ ⁷እሺዻ ሺጝ ሃኣንባ ቶኦ ቱዎጜ ኦያን ጋሊንሺዬን፤ ሃፑክ ሃጌያ ሃንታ ናንዻ ራጳ ኦናኒ፤ ኣኪ እያጝ ካናሹጛ ቦውሼ እን ሃካና ቻሊኬን። ⁸ሃዋይሼባ እየው ኣዬ ጩዋና ኑኑ፤ ናሹጜ ማሬ እን ኣዬን፤ ናንዳካጝ ይሁኖጝ እን ሆሼ ፓይላ ጋይባ።⁹ዬ ሃዋይሼባ እየው፤ ይወንባ ጋይ እየውባ፣ ዎሺባ የጌያባ፣ ቋንቁባ ሃፑክ ቦውሼ እየውባ፤¹⁰ናንዳካ ኦ ጊታይ ይወን ፓይላ ቦባ፤ ጊታይ ዎሺዻ ጌይባ፤ ጊታይ ቋንቂ ሃፑክዻ ቦውሼባ።¹¹ኬኦካ ጫቃን ጉዩ ሹኔ ኣኔባዬ ውዋ ይወን ኣርቴያጝ ኬና ካኣይ ቻች ኣኔባይ?¹²ሞ ይወን ሞጉያጝ ኣይባይ ናቁር?¹³እየው የኣያ ጋራዬ የኣንቴባዬ፤ ሃንታ ጉዩ ኣዬን ሹቃ ኣዬን የእባጃያጝ ሹኔ እን ጉዩ ካፎላጝ ጩዋ ናንዳካ ጊታይ ይወን ሃኦ ካማሬ ኡሲካ ባሪዮ ሳስክዬ ኣዬኑጝ?ታቺ እጝ ኢየሱሴ ብዔል ዜቡሌ¹⁴ሹ ክየም ኢየሱስ ኣኔን ቤሮ ዱዺ ቡሌን፤ ቤሮ እንዻ ቱሎጝ ውር ዱዺ እጝ ሃሳወና፤ ዛርሲዻ ዻዹጝኔያ።¹⁵ዬ ውር ክየም ክየም ሺጝ ኬታቺካ ቤሮካ ብዔል ዜቡል ቡልባ ቤሮ።¹⁶ፕር ውር ክየም ክየም እሺ ፓታንሲየን ከኦካ ፎላ ካዹልሼ እንግን ኦኬዬ ኬኦኔኒ ዎሻ።¹⁷ዬ ኢየሱስ እባጅ ቃቦ ጊዬይየ ዋይሼ እንግን፤ ጌጳሞ እጝ የካሺቴ ጋጝ ፓይላ ካይባ፤ ቶኦ ጊታይ ኣይ ዋና ዋና ቡድባ።¹⁸እጁጝዻ ካሺያ ጋጝያጝ ጌጳሞ ሻም እያን ካቁዋቅቲሾጝ፤ ቤሮ ካቱሌ ኬኦካ ብዔል ዜቡል የክያጃባይ። ¹⁹ኣኪ ኣን ሃቡሊያ ቤሮ ኦካ ብዔል ዜቡልያጝ፤ ሃንታ ጉዩ ቡሌን ካኣይኬ እያን? ዬ እንግን ማቲሼባ እየው ካኮምሼን። ²⁰ዬ ኣን ሃቡሌ ሃኬ ቡዋካ ባሪዮያጝ ጌጳሞ ካባሪዮ ካኩዋዌ ኦጉዩ እባጂባ።²¹ውር ቁዋቃ እጝ ቁመኔ ቶያ ቶኦ ኔኒያጝ ኣንቲቲ ኔኒ ቆባ ኬሹቃ።²²ኣይባ እያይኔ ውር እጝ ኣይ ቁዋቃ ሳጉጝ ኩኔ ቶክ እሺዬ ሳጊያያጝ እጝ ጊባጄዬ ኣኖጝ ቶኬን ቡልሽባ፤ ኣንቲቲ ኔኒ ቦወ ካሺሼባ ውር እንቃ።²³እን ማርኬ ኣን ኣዬን ሚኔባ ኣን፤ እን ማሪኬ ኣን ፑኡሺሚኔን ላሊሜንባ።²⁴ኡሲካ ጮዩ ቱልኬ ኦካ ውርያጝ ኡሲቦወን ካሙዋ ማሬ ኣኔን፤ ላላቅሜንባ፤ ማር ጌዬኔ ሺዽያጝ፤ ሺጝ ሃዋካ ኩይባ ቶኦ እንናኑጝ ሃቱሎጝ፤²⁵ዋክዻያጝ ቶኦ ኔኒ ይጌ፤ ጋሽክሼዬ ጌይባ።²⁶ኬኦይን ጩዋ እሺ ኬእንቃ እን ጎም እሺ ቦው ቤሮ ሶጳዬ ኩንባ፤ ሁልክዻዬ ኡፓ ቱዎጝ ኦይን፤ ኦካ ውር እን ካባካሌሜን ሳጊ ማቲሼባ ካሎን ቁዋቂቲ ዼግ።²⁷ኢየሱስ ኣንባ እጝ ሃሳወኔ ኬኦካ ጫቃን ካዛርሲ፤ ኝያ ክየም ሻም ናቂዲ ኔኒ ዼጌ ሺጝ ፒሲ እን ኔኒ ዼቴዬ ሁቴ እን ኡዋኔዬ ጋይ ጫንቃል ሺጝ እያይ።²⁸ዬ እሺ ሺጝ ጊታይ ኣይ ጫንቃል ሃጊታይ ካዋይ ክያጃ ካባሪዮዬ ካኣሽኪ።ሜርሜር ካዮናስ²⁹ዛርሲ ጁዋኑ ሹ እጝ ኣኒኔ ፑኡሺሚኔ ፓዬን ኢየሱስ ካርሲያ እያጝ ሺጜን፤ ጅሼን ይጝ ሃጋራ ዎሽ ሜርሜር ሹቃ፤ ኣይባ እያይኔ ኬኦካ ሜርሜር ካዮናስ እንቃ ዋና ጋይኬን።³⁰ናንዳካ ኦ ዮናስ ኣዬ ሜርሜር ካውርካ ነነዌ ሃንታካ ውር ናንዳካ ጅሼን ይጝ ማቲባ ሜርሜር።³¹ታቺ እንካ ቶጉጝ ኬሹካ ኮሚሼን ናንዳካ ጅሼን ኑጝ ናሹጜ ኮሚሼባ፤ እሺ ኣጅቱም ካሰሎሞን ኩና ኬሃምካ ዶኩዬን ካዳሉጝ፤ እየዎ እጝ ሳጊ ኬኦካ ሰሎሞን ኣኔባ ኦጝ።³²ውርካ ነነዌዻ ኬሹካ ኮሚሼን ኬጅሼን ጊታጝ ናሹጜ ኮሚሼባ፤ እንግንዻ ዋይ ክሊማካ ዮናሴ ሻዋ ይሁኔን፤ እየዎ እጝ ሳጊ ኬኦካ ዮናስ ኣኔባ ኦጝ።ላሉጜን ካፓኖስ ³³ውርኬና ካላሉጚሽ ፓኖሴ ካኣጁጝ ኦኬና ኣይ ጁጌ፤ ወይ ኬኦካ ካራም ውር ኬና ካኣጁጝ ዱቡ ክየምጵንዻ ኣኔኬን፤ ሳጊ ውር ጊታይ ሻው ካጌዬ ኦሜሌል ጋጁጝ ካራም ዾዮክ። ³⁴ፓኖስ ካሩዋ ኑኑ ሃካርቡ ኑኑ፤ ካርቡ ኑኑ ሃሹቃያጝ፤ ሩዋ ኑንዻ ሃባሺ፤ ካርቡ ኑኑ ሃዴሜንያጝ ሩዋ ኑንዻ ማቲባ ኬና ኣይ ድሙጉ። ³⁵ዬ ኦሜሌል እጝ ሩዋ ኑኑ ቱዎጝ ካማር ሚክርሼኔ ኣጂሼባ። ³⁶ኣኪ ሩዋ ኑኑ ፓይላ ሃሹቃዬ ሩዋ እን ኑኑ ማር ዲሜን፤ ሩዋ እን ኑኑ ላሉጙጝ ካይሲባ።ኣጂሼን ካክያጝ ላ³⁷ኢየሱስ ሹዋጴ ሃሳዋ ውር ክየም ካፈረሳውያን ካኣምኔ ኬእሺ ቾቺንሺያ፤ እሺዻ ሁሉክ ኬጋጜ ኡፓ።³⁸ውርካ ፈረሳውያን ኢየሱስ ኬሌሜን ካዳዓኖ ሹ እጝ ማሬ ቡዋ ኡዋኔኔ ጌዮጝ ጎሺያ።³⁹ታቺ እንዻ ሺጝ ዬጋን እየው ውርካ ፈረሳውያን ሃኣይያ እየው ኒያቡዬ ሩዋ እንካ ሹኑክያጝ ዬእን ጉዩካ ቱዎጝ ኬሴሶዬ ኬሆላዬ ሃኬና ቆቂ።⁴⁰እየው ኣርሹጉ ጊታጝ፤ ውር እን ሙን ሩዋ እንካ ሹኑክ ካኒ ሙንኬን እንካ ቱዎጝ?⁴¹ኣይባ እያይኔ እን ኣኒ ቱዎጝ ሻሚ ጫንቃሌ ኣይባ፤ ኬሹ እጝ ፓይላ ኣይሼባ እየው ጫንቃን።⁴²እየው ፈረሳውያን ሃይ/ ኬኣዝሙዴ ኬጤና ኣዳም ፕር ኦኬ ፓይላ ጊታይ ኮሬ ካኣሜኔ የቋዴ ቡልባ፤ ኣይባዬ ቡሌኔ ባሪዮ ናሺዬኔ የሺጛ ቻሊባ ኣይባ እያይኔ የኦይዳኬን እኔ እንካም ኣሽክየን ዬሁሉካያ⁴³እየው ፈረሳውያን ሃይ/ ኬቶኦካ ይሁኔን ካራም ካጌጳሞ ቡዋ ጉዩ ኬኦካ ጫቃን ካኡዋሩጝኔን ቲቴን የናሺያባ።⁴⁴ውር ካኒ እባጅኬኔ ከዾዮክ እንካ ካም ሌሲ እጝ ሻሜ ጁጝ ናንዳካጝ ከዎሽቴ ሃይ»።⁴⁵ኬኦካ ውር ጊታይ እባጅ ክያጃ ክየም ዋሼ ሺጝ ውርካ እርርሲዬኑጝ ዮ፤ ኣኪ የሃሳውያ እያይንያጝ፤ ኡዋዻ የቦውያ፤ ሺጝ እያይኔ ዋሼያ።⁴⁶ኢየሱስዻ ፕር ሺጝ እየው ጊታጝ እባጅ ክያጃጝ ሃይ/ ኦይን ውር ማሬ ናሬን፤ ናሬን ዴጩጉ የናራባ፤ ዬ እየው ኤታጋን ኣዬን ካቡዋ ጉዩ የዱማኬን።⁴⁷ውርካ ባሪዮ ጊታይ ሹቡጊን ኒሾጝ ናንዳካጝ የኣሽኪቴ ሌሱጝ ሃይ/⁴⁸ኣኪ ዋድማ ካሹቡጊን ቁዋቃ ሻሜን የኣያ ማኚ እንጊን ኒሻ ውርካ ባሪዮ እየውዻ የኣሽኪያያ ሌሲ።⁴⁹ዬ እባጄን ካባሪዮ ሺጝ እያጝ፤ ውርካ ባሪዮዬ ሐዋርያቴ ይዕሲሼ እየውባ፤ እንግንዻ ኒሺዋ እየው ክየም ክየም፤ እንቃዻ ይዕሲስባ።⁵⁰ዬ ጅሼን ይጝ ካርሲ ኬኦባ ሙኔ ፔኔ ናንዳካጝ እርሾጝ፤ ናንዳካ ውርካ ባሪዮ ፓይላ ኒያቡ ሃኬና ጋንሺኔ፤⁵¹ካርሲ ኬኒያቡካ ኣቤሌ ኬኦካ ጫቃንካ ጋላዬ ቶኦካ ይሁኔን ሌይ ሃምካ እርሾጝ ሌይ ሃምካ ሄክሼ ኒያቡ ካካርያስ ዎሽባ፤ ጋን ሃዋይሼባ እየው ጅሼን ይጝ ሃኣንሺኔን ካይጝ።⁵²እየው ጊታጝ እባጅ ክያጃጝ ሃይ/ ዬኦጉራያ ቦሆን ካእባጄኔ፤ የቦዋያ፤ እየው ኤታጋን የካኔ ዬሻዋኬን፤ እንኬ ሻውቴ ሃርጌያ እየው።⁵³ጩዋ ኢየሱ ቱሌ ኬኦይን ውርካ ወርቀት ቶኩኔኔ ፈረሳውያኔ ቃብሼ ጋራዬ ኬኣንሺኔን ካርሲያ እሺ ጁጉየን።⁵⁴ክያጃ እጝ ቱልኬ ቶጝ ጋን ዶክ ዶክ ሻሜን።

ሃፑክ 12ክያጃካ ኣጅሼኔ ቁዋቂቲሼኔ ¹ከሹ እጝ ዛርሲ እጝ ካኮሜ ከሺ ጁዋኑ ሌይ ሃምካ እባጄ ጋጝ ፑኡሺሜኔ ኣኔባዬ ውር ጊታይ ዻዬ ጆሌ ኢየሱስ ካርሲያ እያጝ ሺጜን፤ «ከኦካ ክያጃ እንካ ፈረሳውን ኣጅቴባ እንዻ ሃቁዋቂቲ።²እጝ ማሪ ዹዋልሼን፤ እጝ ሳጊዮጝ እጝ ማሬ እባጄን ኦኬና ሻሜ ጁግ ክየምጵንዻ ኣኔኬን።³ዬ እጝ የሃሳውቴ ኬድሙጉ ክያኑጝ ከኦሜሌል ዋዬምባ ኬኦካ ይጊን ቱዎ ኬናቡ እጝ ጌይ ፄው ፄው ናንዳካ ውር ኬኣኩሉክ ክያጅባ።⁴ጩዋና ጊታጝ ናኒዮ፤ ሃዋይሼባ እየው እጝ ኒሺ ኣሩጝ ዬከኣይዮጝ ክየምጵንዻ ኣሽክየን ማሪ እባጄን ኦይድ ሪጊሺኔን።⁵ኣይባ እያይኔ እጝ ዋቲ ከሪጊሺንቶጝ ሃዹዋልሼ እየውባ፤ የኒሺያያጝ ጩዋ ሃምካ ጉ ፓቂሼን ጌጳሞ ኣኔዬ ከሪጊሺንቴ ሃእሺ፤ ጋን ሃዋይሼባ እየው ሪጊሼን እሺ።⁶ኦኬቾን ኬና ካጉዋሩጙሼ ኬሺሊንጊ ታጲ ኣኔኬኒ? ካኣይባ እያይኔ ከኦካ ጊታይ ክየምጵንዻ ከኦካ ባሪዮ ኣሽኪኬን።⁷እየው ኣይን ጪራሺ ካሹቦ ጉዩ ፓይላ ሃኬና ኮሜ፤ ኣኪ ኦይድ ሪጊሺኔን፤ ከኦካ ኦኬ ጁዋኑ ዬኣንቴ ኣንቲቲ ኬና ኣይ ሳጊ።⁸ሃዋይሼባ እየው እን ክሊዬን ናንዳካ ኣን ኦካ ማሪካ ውር ፓይላ ሃንታካ ውር ፕር ከኦካ ሌሜን ካውርካ ኤርጎ ካባሪዮ ክሊባ።⁹እን ቡድያን ኦካ ሌሜን ካውር፤ ከኦካ ሌሜንካ ውርካ ኤርጎካ ባሪዮ ቡድባ።¹⁰ኦካ ሃንታካ ውር እጝ ሃሳውሼ ክያጃ ባዶጝ ፓይላ ጋሽክሼባ፤ ዬ እን ይሪ ኡሲካ ባሪዮጝ ጋሽኪሼክ¹¹ውር ጎም እየውዌ ሹ እጝ ቦሼ ሃምካ ታታቻን፤ ዬሻማ እያን ወይ ኦ ኬዋክቶጝ ኦይድ ኦቆርቴን።¹²ከሹ እጝ ኦይን ኬሃሳውቶጝ ኡሲካ ባሪዮ እርርሲባ እየው።ኣርሹጉ ኣዬን ውር ካሆድሞ እጝ¹³ከኦካ ጫቃን ካዛርሲ ውር ክየም ሺጝ ውሩጝ ካእርርስኔኑጝ ዮ፤ ጪኔ ናኒ ካካሺሼ ኣን ኣንቲቲ እጝ ሮጉሚኔ ሜይሼ ኣምባ።¹⁴ኢየሱስዻ ዋይሼ ውር እጝ እን ውሩጝ ከኦጉዩ ሻሚ ኣን ውርካ ኮምሺኔን ወይ ካቶይኔን ሃኒን?¹⁵ፕር ሃንታካ ውር ዻቆ ኔኒ ማሬ ካሆድማሞ ኣዬን ኣጅቴባ፤ ኬዛላሞ ፓይላ ማንኪባ እየው ኤታጋን፤ ሺጝ እያይ።¹⁶ከኦይ ሺጝ እያጜ ሜይሼያ እንግን ኬሄክንሶ፤ ኣና ውር ሆድሞ ኬና ካሎን ሃሙ ኔኒ ኣኔ ካርቡ ካሩቡ ጁዋኑ፤¹⁷ውር እንዻ ሺጝ ኦግታጝ ሃኮሮጝ ኦኬና ካፑኡሺሼ ናንዳካጝ ማሬ ኣኔኑጝ ካሻም ኦ? ሺጝ እያይኔ ቃቢያ ኬሻን።¹⁸ሺጝ እያጝ ኣኪ ሃሻም እያጝ ኮትን ጊታይ ናኒ ኣኖጝ ካኮሲዬ ካኣሽኪ እንቃ ኬና ኣይ ሆሮሪ፤ ጩዋ ኦግታይ ሃኮሬዬ ኣንቲቲ ናኒዬ ፓይላ ሃፑኡሺሼባ ኦይን፤¹⁹ናፒሲ ናንዻ ሃዋይሼባ ናፒሲ ናኒዮ፤ እንካ ሄክሼ እን ቦን ጁዋኑጝ ሃፑኡሺሼያ እን ሆድማሞ፤ ኣኪ ቦው²⁰ዬባሪዮ ሺጝ እን ኣርሹጉጝ ናፒሲ ኑኑ ሚኪሩጝ ቦወን ዎሻ፤ ኣኪ ኦግታይ የፑኡሺዮጝ ካኣይካ ኒን?²¹ዬውር እጝ ፑኡሺሼ እሺ ኤምኑ ሆድማሞጝ፤ ዬ ኬታጝካ ባሪዮ ውር እን ማይ ሆድሞ ኣዬን ቱንሲ ሃእያይ።ኦይዲ ኦቆርቴን²²ከኦይን ጩዋ ኢየሱስ ዋይሼ ውር ጊታይ ዻዬ ጆሌ እሺ እያጝ፤ ዬሃዋይሼባ እየው፤ ናንዳካ ዻቆ ጉዩ ናንዳካ ኦይን ኬኣምቴጝ ወይ ናንዳካ ሩዋ ጉዩ ናንዳካ ኦይን ኬኪምቶጝ ኦይዲ ኦቆርቴን።²³ዻቆ ኬኦካ ዳዓኖ፤ ሩዋ ኬኦካ ኣፓላ ሳጊባዬ።²⁴ይንዳ ቶይ ቋሮክ፤ ኮርኬን፤ ፓቲኬን፤ ፑኡሺዬን ወይ ኮትን ጋኔኬን፤ ዬባሪዮ ኣምሽ እንግንባ፤ እየው ካሎን ዬሳጊቴ ኬኦካ ኩባር ኣኔኬኒ?²⁵ኣይባዬ ኬኦጉዩ ኦቆሬኔ ከቦን ክያኒ ሹ ክየም ሌሜን እባጃ ኒን?²⁶ኣኪ ኣይን ኦኬ ባዶ እጝ ኣሽክዬን የኣያ ጊታኬና ካማር እባጄንያጝ፤ ናንዳካ ኦኬ እንቃ ሃኦ ዬኦቆርቶጝ?²⁷ይንዳ ኦላ ጊታጝ ሻም እያን ጌጵሾጝ ቶይየ፤ ሳጊኬን፤ ቡልኬን፤ ኣይባ እያይኔ ሃዋይሼባ እየው፤ ኣይን ሰሎሞን ከጌጳሞ እጝ ፓይላ ኬኦኔኒ ክየምጵንዻ ካኒ ቦኬን ጌጳሞ።²⁸ኣኪ ባሪዮ ሹጝ ቶዬ ዻሙ ሹጩ እንካ ጳል ካፓቂሼ ጉ፤ ሃእንካ ኪሚሼያጝ፤ እየው ጊታጝ ይሁኔን ጆጊ፤ ሳስክዬ ኪሚሺሽ እያን እየው?²⁹ዬኬኣምቴ ኦዬ ኬኪምቴ ኦዬ ከሻን ጉዩ ኦይዲ ኦቆርቴን። ³⁰ይንካ ዛርሲ እን ኣን ፔን ይን ክያኒ ፓይላ ዎሽባ፤ ዬ ሹኔ ጊዬይ እን ፓይላ ካዎሺሼ እንግን እባጃ።³¹ሳጊ ካዎሽ ጌጳሞ ካባሪዮ፤ እን ፓይላ ሌሜዬ ኣይ እየውባ።³²እየው ኣኔ ኦካ ቆቤን ጆጉጝ እየው ጌጳሞ ኣዬን ሃቃቦ ሹቃ ካሹቡጊን ጉዩዬ ኦይዲ ሪጊሺንቴን።³³እንጉዩ ኣኖጝ ኡዋሩጙሺዬ ኣይ ኩፓን፤ እን ጎርጉ ካማሬ ኣጉሬን ፤ እንካ ኣምዻ ካማሬ ኣሜን ካንካል እንካ ማር ጌቺዬን ኣንቲቲ እንካ ማር ጌቺዬንዻ ፎላ ክያኒ ፑኡሺባ።³⁴ሻን ጉዩ ማቲባ ኤቴኒ ካባልካ ኣንቲቲ ጉዩ።ጬይኔ ካልዬን³⁵ኬጩሪ ቁሜኔ ሼኪባ፤ ፓኖስ ጉዩዻ ካማቲባ ኬና ላሉጝ፤³⁶ታቺ እን ጉዩ ሌይ ሃምካ ዋኬ ኬሃምካ ኣምካ እያኒሹጝ፤ ካሊዬ ኩኔ ቋንቅ ሃፑክያጝ ይሪካ ፓዬ ቦወን ሙኔን ውር ጊታኬና ኣይሼኪዲ።³⁷ሹ እጝ ታቺ ጉዩ ኩኖጝ ውርካ ዋድማ ጊታይ ጬዬኔ ዬጌይቶጝ ጋይጫንቃል፤ ሃዋይሼባ እየው ኣኩሉ፤ ታቺ እን ጉዩ ኬኩምቡሌ ቁሜና፤ ኡፑሽ እየውባ ኬጉራ፤ ኩንዻዬ ቾቺንሺ እየውባ።³⁸ኬሚክር እን ኣንኬ ላንሳጝ፤ ኩንኬ ቶኦ እንካ ማክንሳዬ ጬዬን እያይኔ ዬጌያያጝ ውርካ ዋድማ ጊታይ ጋይ ጫንቃል።³⁹ዬ እባጅባ ይጝ፤ ጎርጉ ኩኔ ሹ ና ኤቴንካ ቶኦ ዋቲ እባጅያጝ ቆድ ቶኦያጝ ኡፍ ሹዬ ቶይኬን።⁴⁰እየውዻ ሼክዬ ካሊባ፤ ሃንታካ ውር ኬሹ እጝ ዬማርቴ እባጄን ኩንባዬ።⁴¹ጴጥሮስዻ ሺጝ ታቹጝ ዮ፤ ሄክንሶጝ ዬሃሳዎጝ ሃጉዋዩ ጵንሞ ካውር ፓይላ?⁴²ታቺ እንዻ ሺጝ እያጜ ዋሻ፤ ኣኪ ሚሽ ጉዩ ኬሹ እጝ ኣይ ሊኪ ኬእያይ ጋዬ እየው፤ ታቺ እጝ ኬኦካ ውር ኔኒ ክያኒ ካጌጳሲዮጝ ኣይ ሹቃዬ ሳጊዬ ሃኒን?⁴³ታቺ እንዻ ዋሼ ኣሽክያ እያይያጝ ውርካ ዋዲማ እን ጌዩጝ እሻ ጫንቃል።⁴⁴ሃዋይሼባ እየው ኣኩሉክ፤ ኦካ ኣንቲቲ ጊታይ ኣኖጝ ፓይላ ጌጳሲባ።⁴⁵ዬውርካ ዋድማ እጝ፤ ሺጝ ታቺ እን ናኒ ኩንኬን ይሪካ ኡፔና ሺጝ እያይኔ ቃቢዬ ሙር ውርካ ዋዲማ ሃኣጚዬ ጁሙያጝ፤ ፕር ኬእያይ ዎሾጝ ኣሜንባ፤ ካሪሲያ ማቲኔ ጮይኔንያጝ፤⁴⁶ኦካ ውርካ ዋዲማ እን ሹ እጝ ታቺ እጝ ሹእጝ ቃቢዬ ዋዳ እጝ ማሬ ቃዽዬን ኩንባ፤ ዬቃጭባ ባልካ ባሊኔኒ ሻም ኬውር ጊታይ ማር ይሁኔን።⁴⁷ቃቦ ካታቺ እጝ እባጅባዬ እጝ ማሪ ሼክዬን ኤርጎ ኔንዻ ውርካ ዋዲማ እጝ ማሪ ኣሽክዬን ካሎን ሙርባ፤⁴⁸ኣይባዬ ይጝ እን ማር እባጄኔ እንካ ሙርሽጵን ኣሽኪ ውርካ ዋድማ ኬሊኪዬ ሙርባ። ጊታይ ጋዬ ጁዋኑ ፓይላ ዎሽባ ጁዋኑ፤ ቦዋ ኤልቅሞ ጁዋንዻያጝ ካሊባ ጁዋኑ።ማር ሹቃ ኣዬኔ ላሊሚኔን⁴⁹ኣን ሃኩኖጝ ሃኩኒ ዳሉጝ ክያኒ ጉ ፓቂሼን፤ ኣይን ጋን ሃኡዱቡያጝ ኣይሼ እያን ኣን ሹቃ/⁵⁰ኣይባዬ ዱቁዬን ኬና ካዱቁዬ ኣኔባ ሌይ ሃምካ ጃክኖጝ የጋሊያ እያን?⁵¹ዳሉጝ ክያኑጝ የዋሻ ኬኦኮኑጝ ሃኩኔ ኬሹቃኪ? ሃዋይሼ እየው ማር እያይኔን፤ ኣን ሃኩኖጝ ሃኩኒ ላሊዬን።⁵²ካርሲ ኬጋኔ ኦካ ጶሮክ ክየም ኣና ውር ቾን ጊታኬና ላሊሚኒ፤ ዻዋን ኦካ ጅያናን፤ ጅያናን ኦካ ዻዋን ናሹጚሼ ጋጜ ላሊሜንባ፤⁵³ሹኔ ኬውዋ ጁሙ እጝ፤ ውዋ ጁሙ እንዻ ኬሹኔ፤ ጁዋኔዻ ኬውዋ እጛሽ እጝ፤ ውዋ እጛሽ እንዻ ኬጁዋኔ፤ ኣፊኔዻ ኬባካ ሌሜን፤ ባካ ሌሜንዻ ኬኣፊኔ ናሹጙሼ ጋጜ ላሊሜንባ።ቦናን ቃቢዬን⁵⁴ፕር ዋይሼ ዛርሲ እያጝ፤«ሉፍ ኩንኬ ታጝ ሹሽ ዴቄያጝ የቶያያጝ የሺጛ ጎት ሺንካ ኩኔን፤ ማቲባ እያይዻ።⁵⁵ፑጉ ካቶጉ ፑጋ ኬታጝካ ቶጉያጝ፤ የሺጛባ ሹሽ ማቲባ ኬና ካቄጪሽ፤ ማቲባ እያይ።⁵⁶እየ ው ቁዋቃ ጊታጝ፤ ዴንታ ካፎላዬ ካዳሊዬ ቃቢዬን የእባጃባይ? ኣኪ ቦን ይንካ ጋን ቃቢዬን ዬካውሺና እያን?⁵⁷ኣኪ እየው ኤታጋን ኦይን ኣይ ሊኩጝ ሃኦ ዬማሬ ኮምሼን? ⁵⁸እንካ ባላጋራ ኑኑ ኦካ ሌሜንካ ውር እን ኮምሺኔ ጆል ውር ዬሺጛ ፓዬንያጝ፤ ካኒ ኣኔንባ ጉዋር ክያኒዬ ኬእሺ ቃሺሚኔን ሻም ሹቃ ማር እያይ ኣዬንያጝ ጁው እኔ ቦሼባ ሃምካ ውር እጝ፤ ውር እንዻ ሳስክዬ ኣዬንባ ሃምካ ጋልንሺዬን ካጋልንሺያ ፓቂሼ ሃምካ ቶኦካ ቁሜን፤⁵⁹ሃዋይሼባ እየው ሌይ ሃምኬ ካሺዬ ሺሊንጊ ኬኦይ

ሃፑክ 13ሺወንካ ይሁኔን ¹ከሹ እጝ ኩኔ፤ ዋይሼ ጲላጦስ ኒያቡ ጊዬይ ናንዳካጝ የዎርሺቴ ኬጋላ ጊዬይ ናንዳካ ውርካ ገሊላ ኦይ ኣና ውር ጊታኬና ሃሳውሺኔ። ²እሺዻ ሺጝ እያጜ ዋሼያ እንግን፤ ኣኪ ውር ጊታጝ ካገሊላ ጋሎጝ ሄክሾጝ ውርካ ገሊላ ፓይላ ሳጊ ሙኒሼን ኬኦኮኑጝ ጋኔ ሴሶኪ? ³ሃዋይሼባ እየው ማር እያይኔን፤ የማራ ይሁኔን ሻወንያጝ እየው ፓይላ የካይባ እያይ።⁴ወይ ፕር ውር ታጲ ሎንካይ ጊታይ ሃክሼ ጊሜይ ካሻሪዬ ኣርሹጝ ከኦካ ውር ጊታይ ቆቤን ኢየሩሳሌም ሳጊ ፓይላ ሙኔን ጊታኬና ኣኔ ሴሶይ? ⁵ሃዋይሼ እየውባ ማር እያይኔን፤ እየው ፓይላ የማራ ይሁኔን ሻወንያጝ የካይያባ እያይ።⁶ፕር ሺጝ እያጜ ክያጃ ሄክንሶጝ፤ ውር ክየም ኦይካ ሃሙ ኔኑጝ ኣና ሻሪካ ኣሜን ሹቃ ኬና ኮሬ፤ እሺዻ ዎሽ ካርቡ ኔኒዬ ኩኔ ክየምጵንዻ ካኒ ጌይኬን።⁷ውርካ ዋድማ ካሻሪ እንዻ ሺጝ እየዎ ሃዎሽ ካርቡ ኔኒዬ ቦን ጅያን ሃኩኒ ኦካ ሻሩጜ ኦኬ ክየምጵንዻ ሃካና ጌይኬን፤ ሺጝ ዬ ቃጬ ፓቅባ ሃናንዳካኦ ካእሽክዬ ዳሊ ማም።⁸ዬ እሺ ሺጝ እያጜ ዋሼያ፤ ታቹጝ ዮ፤ ካቶክ ማራማራ ኔኒዬ ሌይ ሃምካ ኡሹሚዮጝ ኦይድባ ካቦኑጝጵን።⁹ናንዳካ ቆቤን ሃሹቃ ወይ ቃጭባ።ኝያ ኳዋምጵ ክየም ባይሺሻ ኬሹ እንካ ሶጵሳጝ¹⁰ኢየሱስ ከሹካ ሶጵሳ ክየም ኣን ኦካ ቶኦካ ይሁኔን እርርሲኔን።¹¹ኦይን ኣና ኝያ ኬና ጎማ ዻቾ፤ ኬና ቦን ታጲ ሎንካይ ፓሲ ሻሚ ሩዋ ኔኒ ልሺሽ፤ እሺዻ እን ናሹጝ ኬዻቾ ኔኑጝ ጌይኬን ካችዻ።¹²ኢየሱስዻ ሹ እጝ ጌዬ እሹጝ ሺዋ፤ ሺጝ እን ኝያጝ ኬቡርቂ ኑኑ የቱልያ ኣርና፤¹³ቻቺሼያ እሺ ቡዋ፤ እሺዻ ይሪካ ጌያ ጋዜ ዾራ፤ ጌጳሲያ ባሪዮዻ።¹⁴ዬታቺ እንካ ቶኦካ ይሁኔን፤ ሺጝ ኢየሱስ ናንዳካጝ ባይሺሼ ከሹ እንካ ሶጵሳጝ ዻቢሺሺያ፤ ሺጝ ዛርሲ ሹ ጊታይ ካጋሽክዬ ዋድማ ሹ ላ ኣኔባ፤ ዬ ከሹዋን ጊታይ ፓዬኔ ባይሺሼምባ የማርኬ ሹካ ሶጵሳዬን።¹⁵ታቺ እን ዋሼ ሺጝ እያጝ እየው ቁዋቃን ከኦካ ጫቃን ጉዩ ውር ክየም ከሹካ ሶጵሳ ካቡል ቢ ወይ ኡኩሊዬ ካቦካሜ ሙዋ ሁሺዬን ኣኔኬኒ?¹⁶ኣኪ ኝያጝ ኣዬ ውዋካ ኣብራሓሜ ቦን ታጲ ላማ ቁሙኔ ኬእጁጜ ኡፎጝ ኬቁሜን እን ኬሹካ ሶጵሳ ቡሌን ሁሉኬንኬኒ?¹⁷ሹ እን ክያጄ እን ውር ጊታኑጝ ሚኔ እሺ ፓይላ ሪጊሼና፤ ዬ ዛርሲ ፓይላ ናንዳካ ዋድማ ሹቃ እን ኣሽክዮጝ ዋዝንዽያ።ሄክንሶ ካጪናቲዬ እርሾዬ¹⁸ከኦይን ጩዋ ኢየሱስ ሺጝ እያጝ ጜጳሞ ካባሪዮ ሙኔን ኦ? ካሄክንሲ ከኦ?¹⁹ውር ክየም ቦወ ሺጝ ዊ ካርቡ ካጪናቲ ኬና ኮሬ ሃሙ ክያኒ፤ ጌጵሼ ማቲያ ሻሪ፤ ኩባር ካዾዮክዻ ቆባ ኦካ ጩዎኑ ኔኒ።²⁰ፕር ሺጝ ጌጳሞ ካባሪዮ ካሄክንሲኬ ኦ?²¹ኝያ ክየም ቦወ ሺጝ ውይ እርሾ ኮኑጝ ዎርሲዬ ኬዽል ፓሲዬ ቱርጶጝ።ሃፑክ ቆቃ እጝ²²ከኦይን ጩዋ ኢየሱስ ኣንባ እያንካ ኢየሩሳሌም ኩይሼኔ፤ ከኦካ ከተማ ጊታይ ሳጊዬዬ ጶሮኬ ኣኔን እርርሲዬ ሳጊዬን።²³ውር ክየም ኩኔ ሺጝ ውርካ እርርሲኔንኑጝ ዮ፤ ጊታይ ካባይሽ ሃጩዋማ ጲኒ? እሺዻ ዋይሼ እንጊን እያጝ፤²⁴ኬሃፑክ ዽታኬ እግ ሁሉኬን ኒሺሽ እየው ኤታጋን፤ ሃዋይሼባ እየው፤ ውር ጁዋኑ ዎሽባ ሁሉኬን፤ ኣይባ እያይኔ ኣይሼኬን እንግን።²⁵ኤቴኒ ካቶኦ ጩዋ ናሹጜ ሃጌያ ሃፑክያጝ ዬጎራ ሹኑኬ፤ ታቹጝ ዮ፤ ቦውሼ ኡዋባ የሺጛ እያይኔ የካርሲያባ ሃፑክ ቋንቄን፤ ዬእሺ ሺጝ እያጜ ዋሼባ እየው፤ የኣይቴ ኒኔ የፓይቴኬ ኦኔ ሃእባጅኬን እየው።²⁶እየውዻ የሺጛባ ኬእን ኬጋጝ ሃኣምናያ፤ ሃማቲናያ ከኦካ ጳልዻ ዬእርርሲያ ኡዋው።²⁷እሺዻ ዋይሼባ እየው፤ ዬኣይቴ ኒኔ ዬፓይንቴ ኬኦኔ ሃእባጅኬን እየው፤ እየው ጊታጝ ካሴሶጝ ኬኦናኒ ፓይ ዹክ።²⁸ኣብራሓሜ፣ ይሳሓቄ፣ ያዕቆቤ፣ ውርካ ባሪዮ ፓይላ ከኦካ ጌጳሞ ካባሪዮ ቱዎጝ ዬጌያያጝ ዬእየው ፓቅሼ ሹኑኬ የሺዺያያጝ፤ ከሹ እጝ ማቲባ ኦቆራሬ ኒጊ ሺኪዬኔ።²⁹ውር ፓዬን ኬታጝ ሹውሽ ቱሌዬ ኬታጝ ዴቄዬ፤ ኬታጝ ካጋጊዬ ኬታጝካ ቶጉዬ ኦካ ጌጳሞ ካባሪዮ ኬጉራ ፓዬኔ ቆባ።³⁰እየዎ ኬኦካ ጊታይ ካውር ጊታኬና ካማቲ ሌሜን፤ ኬኦካ ጊታይ ካሌሜን ጊታይ ካማቲ ውር ኢየሱስ ናንዳካ ኢየሩሳሌም ቡርቃዽያ³¹እን ውር ክየም ክየም ካፈረሳውያን ፓይኔ ሺጝ ናንዳክጝ ሄሮድስ ዎሼ እንካ ኒሼኑጝ ኬኦጝ ናሹጜ ካምባ።³²እሺዻ ዋይሼ እንግን ፓዬ ዋይሺቴ ኩዬይ እጝ እየዎ ሹጜ ዻሙዬ ሃቡልባ ቤሮ፤ ጊታይ ካቡርቅዻ ሃባይሺሽባ፤ ኬሹ እንካ ማክንሳ ሃሄክሽባ ግቤ፤ ዋይሺቴ እሺ ሺጛ እያይ።³³ኣይባ እያይኔ ውርካ ባሪዮ ካኣርሼ ኬኦካ ኢየሩሳሌም ሹኑክ ሁሉኬን፤ ሹጜ ዻሙዬ ኬዻሙ እያጜ ዮጜ ጃሌን ናኒ ሃካርሲባ።³⁴ኢየሩሳሌም፤ ኢየሩሳሌም ዮ፤ ኬኒሼ ውርካ ባሪዮጝ ውር ጊታይ ይዕሲዬ ዮጝ ኑኑ ካሙሬ ኬባይዩጝ/ ከእያኑጝ ባቻ ፑኡሺሼ ሃንታ ኔኒ ዮጝ ኬታቡጉጝ ሃዎሺ እየው ኣኸ፤ ዬእየው የማራያ።³⁵እየው ቶኦ ጉዩ ማቲ ማም እያይኔ ሺዽያ፤ ሃዋይሼባ እየው እን ኩንኬ ሮጝካ ታቺ እጝ ሃኬና ጉዋኔ ሌይ ሃኬ ሺጝቴ እያይ ኣኪ ዬጌያኬን ኣን።

ሃፑክ 14ኢየሱስ ከኦካ ቶኦካ ውርካ ፈረሳውያን ክየም ¹ክየም ኢየሱስ ዳዓኖ ኣሜን ሹ እጝ ሁሉኬ ኦካ ቶኦካ ውር ታቺ ክየም ካፈረሳውያን ፤ ውር ኣንኬ ካርቡ ቶዬን። ²ኦይን ኣና ውር ክየም ኬና ጋልዬን ኬናሼን ካሩዋ ኬና ኣኔን ሌሜን ኔኒ። ³ኢየሱስዻ ዋይሼ ውር ጊታይ እባጅ ክያጃዬ ፈረሳውያ፤ ከሹ እንካ ሶጵሳጝ ውርካ ቡርቂ ባይሺሼን ሃሊኪ ሞ ኣይኬን? ሺጝ እያይኔ ኣንሻ እንግን።⁴እንግንዻ ቆባ ሹይ፤ እሺዻ ጎም ውር እጜ ባይሺሼ ይዕሲያ።⁵ፕር ሺጝ ኬኦጉዩ ኬሹ እንካ ሶጵሳጝ ውዋ ክየም እን ኔኒ ወይ ቢ ኔኒ ሙጋ ይግንያጝ ማሪ ይሪካ ኩዬ ቡሌን ሃኒን? ሺጝ እያይኔ ዋሼያ እንግን።⁶እንግንዻ ናንዳካ ክያጃ እጝ ሃሳዋ ኬና ካዋሼ ክየምጵንዻ ካጌዮጝ ካኒ ቻሊኬን።⁷ውር ጊታይ ቾቺንሺ ኢየሱስ ጊድዬ ራቅካ ጌጳሞ ሄክንሶጝ ሺጝ እያጜ ሜይሼያ እንግን።⁸ውር ክየም ሺወያ እን ሃምካ እያንሽያጝ ውር እን ሳጊ እን ኬጌጳሞ ሺዋያጝ ኦይን ካራቅካ ጌጳሞ ኦይ ኡፔን።⁹ውር እን ቾቺንሺ እየው ዻዋን ኩኔ ዋይሼ እን ራቁጝ ኦቼ ውሩጝ፤ እንዻ የሪጊሼኔ የኩይባ ሃምካ ራቅ እን ኣ¹⁰ኣይባ እያይኔ ሹካጝ ሺወ እኑጝ ቶዬ ኡፍ ኦይ ኣይዱቡጝ፤ ውር እጝ ቾቺንሺ እየው ኩኒያጝ ዋይሼባ እን፤ ጩዋናጝ ናኒዮ ጌይሼ ሃም ኣይዴግ ሿት፤ እንዻ ከሹ እን ኬጋጝ ኬኦካ ሌሜን ካውር ጊታይ ቆብ ኬጉራጝ ፓይላ የጌጳዽባ።¹¹ናንዳካኦ ውር እን ሻሚ እሺ ኤምኑ ዼግዼጉጝ ፓይላ ማቲባ ይርክ፤ እን ሻሚ እሺ ኤምኑ ይርክ ይርኩጝ ማቲባ ዼግ።¹²ፕር ኢየሱስ ዋይሼ ውር እጝ ቾቺንሺ እሺ እያጝ፤ ሹ እጝ የሻሜ ኣማጝ ሃዳዓኖ ካቲፓይ ወይ ሃካቃይህ ካማር እን ኬጋራ ሃጌኔ ባጃዻ ካማር እን ዋሼኔ ኦይ ጩዋናን ኑኑ፤ ወይ ጪኒጌን ኑኑ፤ ወይ ኤዳን ኑኑ፤ ወይ ውርካ ጉል ኑኑ ኦይቾቺንሺዬን።¹³ኣይባ እያይኔ ሹ እጝ የኣሽክዬ ኣማጝ ሺው ውር ጊታይ ኣይ ኩፑጝ፤ ውር ጊታይ ሩዋ ኣይ ኤላጝ፤ ውር ጊታይ ኣይ ጌቾዬ ካርቡ ኣይ ቆሮዬ፤¹⁴ጉዋን እንባ። ጊታይ እን ባጃ ዋሼን ናንዳካጝ ማሬ እባጄኑጝ፤ ኬኦካ ናሹጜን ካጫንቃላን ባጃ ዋሼን ኣኔባ።ሄክንሶ ካኣማ ታቺ እጝ¹⁵ከኦካ ጫቃን ካውር ጊታይ ቆቤን ከኢየሱስ ኬጋጝ ክየም ዋይ ክያጃ እጜ ሺጝ ኬጌጳሞ ካባሪዮ ሄክሼ ጊታይ ካቆብ ኬጋጜ ካኣምንቶጝ ጋይ ጫንቃል።¹⁶ኢየሱስዻ ሺጝ እያጝ ውር ክየም ኣሽኪ ኣማ ታቺዬ ሺው ውር ጁዋኑ፤¹⁷ዋዳካ ኣማ ሹ ኔኒ ሄክሾጝ ዋይሼ ኮመና ጊታይ ካቾቺንሺዬ እየዎ ኦኬ ፓይላ ኣሽክሜና ሺጝ እያይኔ ካሺወ እንግን ይዕሲባ ውርካ ዋድማ ኔኒ።¹⁸ኣይባ እያይኔ እንግን ፓይላ ካርሲባ ኦኬ ክያጄን፤ እንካ ሌሜን ሺጝ ናንዳካጝ ካን ሃኡዋሩጜ ዳሉጝ ኩዬ ቶዬን ኣኔባ፤ ሺጝ እንቶኤ ሺዕሺሼ ኣምባ።¹⁹እንቃ ሺጝ ሃኡዋሩጝ ቢ ካሃሙ ኮውሼኔ ናንዳካጝ ካኮውሻ ቶዬ እንግኑጝ፤ እንቶኤ ሺዕሺሼ ኣምባ።²⁰እንቃ ፕር ሺጝ ናንዳካጝ ሃኣዬ ኡታጝ ኩኔን ሃካና ቻሊኬን።²¹ውርካ ዋድማዻ ዋኬ ኩኔ ጊታይ ሃሳዎጝ ሜይሼባ ታቺ እጝ፤ ከሹ እጝ ማኒሼ ዋይሼባ ውርካ ዋድማ ይሪካ ካማም ካጎብሼን ኦካ ጉዋር ጊታይ ውር ሳጊዬ ጆሌ ሺው ውር ጊታይ ኣይ ኩፑዬ፤ ሩዋ ኣይ ጫዋዬ፤ ጊታይ ካርቡ ኣይ ቆሮዬ፤ ጊታይ ኣይ ኤላዬ ዾቅሼ ዮጝ፤ ²²ውርካ ዋድማዻ ሺጝ ታቹጝ ዮ፤ ጊታይ ዬኤርጊቴ ፓይላ ሙኔና የጋን ቦዋ ኣኔይ።²³ታቺ እጝ ዋይሼ ውርካ ዋድማ ካም ኦጉዋይ ካጉዋሬ ካጶሮክ ጊታይ ኣኔን ዹኬ፤ ቶኦጝ ካቋቆጝ ካጝ የጌዬ ፓይላ ጎም ጊድዬ ቦኩዋዌ ዾቂሼባ።²⁴ሃዋይሼባ እየው ከኦካ ጫቃን ካውር ጊታይ ሃቾቺንሺዬ ውር ክየምጵንዻ ኣማጝ ናኑጝ ኣምኬን።ውርካ ዻይኔን ማቲዬን ኣንቲቲ እንካ ካሺሺ²⁵ዛርሲ ጁዋኑ ኣኔንባ ኬጋጝ ፓዬኔ ኢየሱስ ሁቤኔ ዋይሼ እንግን እያጝ፤²⁶ውር እጝ ካኩዋው ኦናኒ ማር ሹኔዬ ጁዋኔዬ፤ ኝያ ኔኒዬ ሃንታ ኔኒዬ፤ ጪኒጋን ኔኒ ካጁማኔ ካእጛታኔ፤ ኣይን ዻቆ ኔኑጝ ሺዺኬኔ ማራ ፓቄንያጝ ቻሊኬን ውር ኬና ዻያ ጆሌ ኣን ማቲዬን።²⁷ማራ እንካ ሮዬ እሺ ዼቴ ኣን ዻዬንያጝ ቻሊኬን ውር ኬና ካዻያ ጆሌ ኣን ማቲዬን።²⁸ኬኦጉዩ ውር ክየም ዎሽ ፎቅ ኣሽክዬንያጝ፤ ኮሜን እባጄን ማሬ እባጄን ኬሌሜን ኡፌ ማሪ ኣንቲቲ ኔኒ ቃቢዬን ሃኒን?²⁹ኦይድ ኣሽክዬኔ ካውሼና ኮመንያጝ ጊታይ ጌዮጝ ፓይላ ላሊሜንባ።³⁰ሺጝባ ውሩጝ ኣሽክዬ ካርሲዬ ጊያ፤ ዬኮመን ካውሼና።³¹ወይ ውር ታቺ ክየም ሹ እጝ ናሹጜ ኬታቺ እንቃ ፓሩጝ፤ ውር እጝ ካማር ፓፃኖ ሺ ላማታም ዾቅሼ ውር ታቺ እንካ ኩዋው ኬፓፃኖ ሺ ታጲ ካማር ዾቅሼ ኡፌ ካሊዬን ሃኒን?³²ሃኦኬና ማሬ ሪቤን እባጄንያጝ፤ ውር ታቺ እንቃ እን ኣንባ ኬዹክ ኩኔኔ፤ ይዕሲ ውርካ ሜርሜሬ ኣንሼንባ ቃሽ።³³ከኦጉዩ ውር ክየምጵንዻ ማር ኦግታይ ኣኔ ፓይላ ኦይዴንያጝ ቻሊኬን ውር ኬና ካዻያ ጆሌ ኣን ማቲዬን።³⁴ሶቆ ሃሹቃ፤ ዬሶቆ ጩዋንቲ ኔኒ ካይያያጝ ሻም እያን ዋኬ ሶቆ ጩዋና ኣዬን ካቻሊዮጝ?³⁵ማቲያ ዳሊዻ ናንዳካጝ ማሬ ካኦኬ ኣሽክዬን ማቲዬኑጝ ፓቅሼባ ሹኑክ"«ዋይባ ካጝ ናቡ ኣኖጝ ካዋይባ»።

ሃፑክ 15ሄክንሶ ካማድር እንካይ ¹ሹ ክየም ውር ጊታይ ፑኡሺዬን ጊቢሪዬ ጊታይ ካሴሶዬ ፓይላ ዋዬን ፑኡሺሜና ማራማራ። ²ውርካ ፈረሳውያኔ ጊታይ ቶኩኔ ጆል ወርቀቴ ሺጝ ውሩጝ ቦባ ውር ጊታይ ካሴሶጝ ኣሜንባ ኬእንግንዻ» ሺጝ እያይኔ ጉንድሜና።³ኢየሱስ ሺጝ እያጜ ሜይሼያ እንግን ሄክንሶጝ፤ ⁴ከኦካ ጫቃን ጉዩ ውር ክየም ኣኔ ማድር ዽቤ ከኦካ ጊታይ ክየም ካይያያጝ፤ ሳልታም ሳላን ኦቼ ጳል ክያኒዬ ሌይ ሃምካ ጌዬ እጝ ካይህ ዎሼን ሃኒን ካማር ኩዬን?⁵ሹካጝ ጌዮጝ ዋዝንሲ እሺዬ ከኦና ላላቅምኖጝ ዼቴ⁶ዋክባ ሃምካ ጶሮክ፤ ሺው ክየምጵንዽን ውርካ ናሺዺ ኔኒዬ ውርካ ጉሌ ሺጝባ ቢ እን ናኒ ካይ ሃጌይያ ከዱይ ቱዎጜ፤ እየውዻ ካኣይኬ ጋጜ ካዋዝንዽባ።⁷ሃዋይሼባ እየው ጊታጝ ካማር ይሁኔን ዎሺሼን ኬሳልታም ሳላን ጫንቃል ኣይሳጊ እጝ ሁሉክ ይሁኔን ኬኦካ ክየም ካሴሶ ኬኦካ ፎላ ማቲሼባ ዋዛ።ሄክንሶካ ሺሊንጊ እን ካይህ⁸ወይ ኝያ እን ኣኔ ሺሊንጊ ካቢሬ ታጵዬ ኬኦካ ታጳን ክየም ካይያጝ ሌይ ሃምካ ጌዮጝ ሃኝያካ ኒን ካላሉጙሽ ፋኖሴ ካይግ ቶኦ ኔኒዬ ካማር ዎሼኑጝ?⁹ሹካጝ ጌዮጝ ሺው ናሺዽ ኔኒዬ ውርካ ጉል ኔኒ ክየምጵኔ ሺጝባ ሺሊንጊ ካቢሬ እን ናኒ ካይህ ሃጌይያዬ እየውዻ ካኣይኬጋጜ ካዋዝንዽባ።¹⁰ሃዋይሼባ እየው ጊታጝ ፓይላ ከሁሉኬ ይሁኔን ከውር ክየም ካሴሶ ኬኦካ ሌሜን ካውርካ ኤርጎካ ባሪዮ ማቲባ ዋዛ።ሄክንሶካ ውዋ እጝ ካይህዬ ጌዮጝ¹¹ፕር ኢየሱስ ዋይሼ እንግን እያጝ ውር ክየም ኣኔ ሃንታ ዻ።¹²ከኦካ ጊታይ ውዋ ዽታኬ እጝ ዋይሼ ሹኔ ባባ ዮ፤ ከኦካ ሆድማሞ ኑኑ ኣያን ጊታይ ኣይ ናኑጝ፤ ሹኔዻ ኣንቲቲ ጊታይ ኣኖጝ ካሺሼያ ሃንታ ኔኒ።¹³ካኒ ቆብኬን ሹጁዋኑዬ ውዋ ዽታኬ እን ቦው ጊታይ ጋዬ እሺ ፓይላዬ ኩይሼያ ፔን ዹክ፤ ኬታይ ኩዮጝ ላሊ እያይ ኣንቲቲ ኔኒ።¹⁴እሺዻ ጩዋ ሹዋጴ ኣንቲቲ ጊታይ ኣኔ ፓይላጝ ከኦካ ፔን እጝ ማቲሼያ ካሽ ኬና ማር ጃክኔን፤ ካርሲያ ጋሊዬን።¹⁵ዬ ጊድሜን ኦካ ውር ክየም ኬና ኡፉኒ ፔን እጝ፤ ውር እንዻ ካዋኬ ቾፉዬ ይዕሲሼያ እሺ ሃምካ ቅያኑጝ።¹⁶ኣይን ሹጩ ጊታይ ቾፉ ዼድዮጝ ኣኔን ኣንግርድዬን፤ ኣይባዬ ኣይን እጝ ውር ኬና ካኣይ ካኒ ኣኔኬን።¹⁷ዬሹ እጝ ኡዋሩጝ ሻኑጝ ሺጝ እያጝ፤ ውርካ ዋድማካ ባባ አኸ ሺዕሺ ዳዓኖጝ፤ ዬኣን ኦጝ ኬካሽ ሃሄክሺያ ኦካ ኣርሼን/¹⁸ካናሹጛ ካም ሃምካ ባባዬ ካሺጝ እያጝ «ባባ ዮ፤ ከፎላዬ ከሌሜን ኑኑዬ ሃግያምሽያ፤¹⁹ኬጋኔ ኬሺወ ኣን ውዋ ኑኑ ሁሉክሼኬን ኣን፤ ሺዋ ኣንያጝ ከውርካ ዋድማ ኑኑ ኮማኬ ክየም።²⁰ዬናሹጜ ኩይባ ሃምካ ሹኖጝ። «ኣይባዬ፤ እሺ ካኒ ኣኔንባ ዹኬ፤ ሹኔ ጌዬ ዻዹጝኔዬ፤ ሪሼ ኩይ ሃም ኔኒዬ ናጌ ሹንቋ።²¹ውዋ ኔንዻ ሺጝ ባባ ዮ፤ ኬኦካ ፎላዬ ሌሜን ኑኑዬ ሃግያምሽያ ጩዋ ከሺወ ኣን ውዋ ኑኑ ሁሉኬን።²²ዬሹኔ ዋይሼ ውርካ ዋድማ ኔኒ ይሪካ ፓይዬ ኬፓይላ ኣፓላ ጊታይ ኣይ ሹቃ ሹቃጝ ቦፓይንቴዬ ክሚሺሺባ፤ ኦካ ቡዋ ኔኒ ሻሚቴ ቀለበት፤ ጃፍ ኔኒ ዾቂሺቴ ቻው።²³ማድር እን ሻግንዻ ቦፓይንቴዬ ኒቅባ፤ ካቃውባ ካሽ ካቱሎጝ።²⁴ውዋጝ ናኒ ጋጭ ኣርሼን፤ የጋን ማቲያ እያይ፤ ካይዻዬ ጊያ፤ ጋን ጌያ፤ ጩዋ ካርሲባ ዋዝንዽዬን።²⁵ከሹ እን ውዋ ታቺ እጝ ኣኔን ሃሙ ክያኒ፤ ጩዋ ሹ እጝ ዋክሼ ጶሮኬ ሄክሾጝ፤ ዋይ ናቂዲ ካይያሪ፤²⁶እሺዻ ኬኦካ ውርካ ዋድማ ሺው ክየሜ ክያጃ እጝ ኣዬ ኣንሼና።²⁷ውር እንካ ዋድማ ሺጝ፤ ጪን ኩና፤ ናንዳካጝ ኣዬ ፓኬ ኩኔ²⁸ጪኔ ታቺ እን ማንሼ ቶኦ ቱዎጝ ሁሉኬን ካኒ ዎሽኬን፤ ሹኔ ኩን ሹኑኬ ካሁሉኮጝ ይወና።²⁹ዬእሺዻ ዋሼ ዋይሼ ሹኔ እያጝ፤ እየዎ ቦን ጁዋኑጝ ሃማቲኬ ካይሲ ካዋድማ ኑኑዬ፤ ከኦካ ኤርጎ ኑኑ ክየምጵንዻ ሃካና ጆግሺኬን፤ ዬእን ካዋዝንዽዬ ኬባይዳን ናኑጝ ሚያን ክየምጵንዻ የካኔ ኣይኬን ኣን።³⁰ኣይባዬ ውዋጝ ኑኑጝ ሹዋጲ ኣንቲቲ ኑኑ ከውርካ ጋላሞቴ ኩንያጝ የኒቂሼባ ማድር ሻጋ እን።³¹ሹኔዻ ሺጝ፤ ውዋ ናኒ ዮ፤ እን ሹ ጮል የኣንኬ ኣን፤ እን ኣይ ናኒ ፓይላ ሃኑኑ፤³²ጪኖጝ ኑኑ ጋጭ ኣርሼኔ፤ ኣያ እያይዻ፤ ካይዻዬ ጌያ፤ የዋዝንሲ ኡዋባዬ ካኒቂሺቴ ኦኬ ኣኔባ።

ሃፑክ 16ሄክንሶ ካኣምሺኔን ካውር ኣጁጉ ¹ኢየሱስ ዋይሼ ውር ጊታይ ዻዬ ጆሌ እሺ እያጝ፤ ውር ሆድሞ ክየም ኣኔ ኣኔ ውር ክየም ኬና ካኣምሽ፤ ውር እንካ ኣምሽዻ ላሊዬ ኣንቲቲ ካውር ሆድሞ እጝ ክያጃ እጝ ሄክሻ ሃምካ ውር ሆድሞ እጝ። ²ዬሺወ ሺጝ ይጝ ሃዋያ ሃኦ? ጩዋ እን ኬማቲዬ ውርካ ኣሚሺኔን ናኒ የቻሊኬን፤ ኣንቲቲ ጊታይ ካቃሚኔን ዋሼ ኣምባ ቢሬ ካኮመን።³እን ኣሚሺኔ ጆሉጝ ኬሻን ኔኒ ሺጝ እያጝ፤ ታቹጝ ዮ፤ ኬኦካ ኣሚሺኔን ናኒ ኬጎብሽ ኣምባይ፤ ሃሙ ኮወን ካንታ ናኒ ኣኔኬን፤ ኦኬ ይሁኔንዻ ሃሪጊሼንባ፤ ዬካሻም እያን?⁴ከኦካ ኣሚሺሼን ሃጎቦጝ ውርካ ዾቅሼ ኣን ሃምካ ቶኦ ጊዬዩጝ ይጝ ሃኣሽክዮጝ ሃእባጅያ።⁵ዬውር ጊታይ ኣኔ ባጃ ካታቺ እጝ ፓይላ ሺዋ ክየም ክየም፤ ውር እንካ ሌሜን ሺጝ ታቹጝ ዮ፤ ባጃ ኑኑ ኦናኒ ኣና አኸ?⁶እሺዻ ሺጝ ኣና ዽብ ካዋዓቲ ክየም «ውር እንካ ኣሚሺኔንዻ ሺጝ ይዕጝ ወርቀት ካቢሬ ኑኑ ኡፍ ይሪካዬ ሺጝ ጃርካን ዶጝታሜ ቶኳ።⁷ጩዋ ዋይሼ እንቃ ኤእንካ ኦኑኑ ኣና አኸ? «እሺዻ ሺጝ ኣና ኮንሽ ካስንዲ ዶጝታም፤ «ውር እንካ ኣሚሺኔን ሺጝ ይዕጝ ዳብዳቤ ካባጃ ኑኑ፤ «ሺጝ ኮንሽ ኦይታሜ ቶኳ።⁸ታቺ እንዻ ውርካ ኣሚሺኔን እንካ ጃካማ ጎሺያ ኬኣጅቱም፤ ሃንታካ ፔኑጝ ከጊታይ ሙኔን ኬጋጝ ኬቆቤን ጊታይ ጌዬን ሳጊ ከኣጅቱም ሳጊባ ሃንታካ ሜሌል።⁹ ዬዋይሼባ እየው ቢሬ ካፔኑጝ ሹካጝ ጃክኖጝ ከቆብቴ ከቶኦካ ቦንካ ቦን፤ ውር ጊታይ ናሺ ቢሬ ጊታይ ናሺ ቢሬ ጊታይ ፑኡሺሼያ እንግን ኤታጋን።¹⁰ውር እን ከኦካ ዽታኬ ቃብዬን ከኦካ ታቺዻ ቃቢባ፤ ከኦኬ ዽታኬ እን ማር ቃብዬን ከኦኬ ታቺዻ ቃቢኬን።¹¹ኣኪ የማራ፤ የማራ ኬሆድማሞ ካፔኑጝ ቃቢዬንያጝ፤ ሆድማሞ እንካ ኣኩሉክ ሃኒን ካኤልቅሚንታ ኣይ እየው?¹²የማራ ኬሆድማሞ ካውር እንቃ ቃቢዬንያጝ፤ ሆድማሞ እጝ ኣይ ጉዩ ሃኒን ካኣይ እየው?¹³ከሹ ክየም ውር ታታቺ ዻ ካይሲ ኬና ካቻሊ እንግን ዋድሚሼን ክየምጵንዻ ኣኔኬን፤ ሚኔ ክየሜ ናሺባ ክየም፤ ወይ ክየም ቦሼባ ዮጝ ጊዬዩጝ እንቃ እን ቦባ፤ የባሪዮ ሺጝ ኬኣዬ ካይሲካ ቢሬ የቻሊኬን።¹⁴ውር ጊታይ ካፈረሳውያን ናሺዬን ቢሬጝ ዋዬ እን ፓይላ ጎልቲያ ኢየሱሱ።¹⁵እሺዻ ዋይሼ እንግን እያጝ፤ እየው ከኦካ ሌሜንካ ውር ሃጊታይ ሻሚ እየው ኤታጋን ጫንቃል፤ የባሪዮ እባጃ ሻን ጉዩ፤ እን ጌጳሲዬ ኬታጝካ ውር ኬታጝካ ሌሜንካ ባሪዮ ሃኬና ጮይ።¹⁶ክያጃዬ ውርካ ባሪዮዬ ሌይ ሃም ሄክሼ ዮሐንስ ጋን ክያጄኔ ቆባ፤ ከኦይን ጩዋ ዬጌጳሞካ ባሪዮ ሃሊ ክሊያ፤ ውር ፓይላ ሃሚን ሻወን ሆቺቼንባ።¹⁷ኣይባዬ ኬኦካ ክያጃ ኦኬ ክየም ካፓቂኔያጝ ፎላዬ ዳሊዬ ካሳጊዬ ሃባዶ።¹⁸ውር እጝ ቡሊ ኝያ ኔኒዬ እያኒሽ እንቃ ፓይላ ኩጳሲሜና፤ ኝያ እግ ቱልኬ ኦካ ኡማዻ ውር እጝ እያንሹጝ ኩጳሲሜና።ውር ሆድሞ እጜ ኣልዓዛሬ¹⁹ፕር ኢየሱስ ሺጝ እያጝ፤ «ውር እጝ ኪሚ ሐምራዊዬ በፍታ ዽታኬ፤ ኣና ውር ሆድሞ ኬና ሹ ጮል ኡፊ ኬባሊዬ ዋዛዬ።²⁰ከዬክንሲዬን ፕር ኣና ውር ኬና ሩዋ ኣኔ ጊዬ ውር ኩፒ ኬና ሺጜ ኣልዓዛር፤ ኡጜ ኣኔን ኦካ ሁፑካ ሆድሞ እጝ።²¹ሚሽ ጊታይ ቲርኪ ኬኦካ ኡፔካ ሆድሞ እጝ ኣሜንዻ ኣንጊርዺባ፤ ክያኒዻ ሺዺኬኔ ፓዬኔ ኣን ጊዬ ኔኒ ሊያቴን።²²ውር ኩፒ እንዻ ኣርሻ፤ ሜርሜር ኔኒዻ ቦሼያ ሃምካ ወርቀትካ ኣብራሃም፤ ሆድሞ እንዻ ኣርሼ ቱቱካ።²³ኣኔንባ ጉ ክያኒ ጋሊዬኔ ጌይ ካቼ ጌያ ኣብራሃም ከዹክ፤ ጎም ኣልዓዛር ከወርቀ ጌያ።²⁴እሺዻ ዋይሼ ኣብራሃም፤ ባባ ዮ፤ ቃቢሼ ኣምባ፤ ናንዳካጝ ሃኣኒኔ ኦካ ላሉጜን ካጉ ጋሊዬን፤ ኣልዓዛር ኬጩዎኑ ካቡዋ ካዱሜ ሙዋዌ ካጪራቲሺሼ ካት ናኑጝ እንቶኤ ይዕሲሼ ኣምባ፤ ሺጝ እያይኔ ኡቹካ።²⁵ዬኣብራሃም ሺጝ እያጝ፤ውዋ ናኒዮ ኬቦንካ ዻቆካዳሊ ኬእያይ ዬቦወ ኦኬ ሹቃጝ፤ ፕር ኣልዓዛር ቦወ ኦኬ ጋራጝ ጶቂሲባ፤ ዬእሺ ጌዮጝ ጫንቃልያጝ፤ እን ዬጌዬን ጋሎ ክያኒ።²⁶ከፓይላ ሳጊ ኬኦጝ ሃሚን ጉዩ ሳጊዬን ዎሼን ማሬ ቻሊዬን፤ ፕር ጊታይ ኣኔን ሃሚን ማሬ ዮጝ ጉዋዩ ቁዋሊሺኔን፤ ኬኦጉዋዩዬ ኬኦጉዩዬ ኣርሼን ታቺ ሻማ።²⁷እሺዻ ሺጝ እያጝ፤ ባባ ዮ፤ ጩዋ ካይዕሲሼ ኣልዓዛር ሃምካ ቶኦካ ባባጝ ሃይወንያ እን፤²⁸ናንዳካጝ ጪኒጌን ናኒ ቾን ኣኖጝ፤ እንግንዻ ካማር ኦጝካ ጋሎ ፓይኔኔ ካኣጅሺሽባ እንግን።²⁹ዬኣብራሃም ሺጝ፤ ሙሴዬ ውርካ ባሪዮኔ ጋኔባ፤ ካዋይሼን እንግንባ።³⁰እሺዻ ዋይሼ ኣብራሃም ባባ ዮ፤ ማር እያይኔን፤ ውር ክየም ናሹጝ ከኣርሼን ክያኒዬ ኩያ ሃሚን ጊዬይያጝ ሁሉኳ ይሁኔን።³¹ኣብራሃም ሺጝ «ማርሼና ሙሴዬ ውርካ ባሪዮዬ ዋይሺኔንያጝ፤ ኣይን ውር ክየም ናሹጛ ኬኣርሼን ክያኒያጝ ይወንኬን።

ሃፑክ 17ሴሶ፣ ይሁኔን፣ ጌጳሞ¹ኢየሱስ ዋይሼ ውር ጊታይ ዻዬ ጆሌ እሺ፤ ውር እየው ክያጃ ጋራ ክያኒ ዾቅሼን ፓይኔን ጊዬይ ሺዺኬን፤ ኣይባዬ ውር ጊታይ ፓዬን እየው ጋራ ክያኒ ዾቅሼን ናንዳካ ውር እጝ ሃይ።²ውር እጝ ናንዳካጝ ካዾቅሼ ሃይሻይሺ ጊታይ ጋሎ ክያኒያጝ፤ ካቁምሼ ቦሉ ኔኒ ባይ ካዺዺኔኔ ካፓቂሼ ኛፓስ ዋንታ ባሺ።³ዬናንዳካ እየው ኤታጋን ኣጅቴባ፤ «ጪኔ ኑኑ ጊያሚሻ እንያጝ ጎሪባ፤ ኡፓ ሹይያጝ ሺዕሺሼ እሺባ፤⁴ኬሹ እጝ ጊያሚሻ እን ክያጝ ሶጳዬ ሺጝ ሃኡፑያ ክያጝ ሶጳ ሹይዬኩና ኦኑኑያጝ ሺዕሺሼ እሺባ።⁵ውር ታጲ ላማንዻ ዋይሼ ታቺ እጝ ሌሜ ኡዋው ይሁኔን ጉዋዩ።⁶ታቺ እንዻ ሺጝ ይሁኔን ኬና ዊ ካርቡ ካጪናቲ ኣኔያ ኦጉዩያጝ፤ ዬዋይሺቴ ኡዎፑሩጝ ቡጪንቴዬ ካሜ ዾቅሚንቴ ኛፓስ ክያኒያጝ ክይሼባ እየው።⁷ፕር ኢየሱስ ሺጝ እያጝ፤ ኬኦካ ጫቃን ጉዩ ውር ክየም ኣኔያ ውርካ ዋድማ ኬና ካኮውንቴ ሃሙ ወይ ኬና ኣይ ውርካ ዻውኔን ካማድር፤ ውርካ ዋድማ እጝ ኩንኬ ሃምካ ሃሙ ሺጝሼባይ ይሪካ ኡፍ ኦካ ካራም?⁸ከኦይ ሳጊ ሺጝሼባ ኣን ካኣሜ ዳዓኖ ካቃይ ኣሽክሼ ኣምባ፤ ኣን ሃምካ ኣሚኔዬ ካማቲኖጝ ቁሙንቴዬ ኣሽክሼ ኣምባ፤ ፕር ኬኦይ ጩዋ እንዻ ዬኣሚባ።⁹ኣኪ ውር እጝ ኤርጊቲ ውርካ ዋድማ ኔኒ እያይ፤ ሹዋጳያጝ ይሁሼንባይ ባሪዮ?¹⁰ዬ እየውዻ ጊታይ ዬኤርጊቴ ፓይላ ሹ እጝ ዬሻምቶጝ፤ ኬኮመን የኣያ ውር ጊታይ ኣይካ ዋድማጝ፤ ኦጊታይ ኣሽክየን ካሁሉኩሼ ኡዋው ሺጝ ሙኒሼን ኡዋባ።ውር ታጵ ጊታይ ጌይኬ ኦካ ቡርቂካ ጊዬ ጫንቃል¹¹ከኦይን ጩዋ ኢየሱስ ኩይሼ እያጝካ ኢየሩሳሌም፤ ሳጊኬ ማሌካ ሳማሪያዬ ካገሊላዬ፤¹²ኩዬ ሁሉኬ ኦካ ጶሮክ ክየም ጌያ ውር ታጵ ጊታኬና ጎማ ቡርቂካ ጊዬ፤ እንግንዻ ጎራ ኬዹክ፤¹³ኬናቂዲ ታቺዻ ዋይሼ ኢየሱስ፤ ታቹጝ ዮ፤ ቶይ ኡዋባ።¹⁴እሺዻ ሹ እጝ ጌዬ እን ዋይሼ እንግን ፓዬ ዹዋልሺቴ እየው ኤታጋን ውር ታታቻን፤ እንግንዻ ጋንሼባ ታይ ፓይሼኔ ጌያ ጫንቃል።¹⁵ከኦግዬይ ክየም ሹ እጝ ጌዬ ባይሼን ኔኑጝ ኬናቅዲ ታቺ ጌጳሲ ባሪዮዬ ዋካ፤¹⁶ኦካ ጃፍካ ኢየሱስዻ ቶኬ ኩዋሚኔ ጌጳሲያ፤ ውር እንዻ ሃውርካ ሳማሪያ።¹⁷ኢየሱስዻ ሺጝ እያጜ ኣንሻ እሺ ዋይሼ እሺ ውር ጊታና ባይሺ ማር ውር ታጵዬኒ? ጩዋ ሳላን ሄክሾን?¹⁸ከኦካ ውር ጪጮን እንቃ ውር ኬና ካዋካ ጌጳሲ ባሪዮ ኣኔኬን እያኪ?¹⁹ዋይሼ ውር እጝ ናሹጜ ካምባ ይሁኔን ኑኑ ባይሺሻ እን።ኩኔን ካጌጳሞ ካባሪዮ²⁰ሹ እጝ ውርካ ፈረሳውያን ሺጜ ጌጳሞ ካባሪዮ ኩን ኣሚኔ ጋንሼ ኢየሱሱጝ ሺጝ እያጜ ዋሼያ እንግን፤ ጌጳሞ ካባሪዮ ኩንኬን ከኦግታኬና ካዹዋልሺኔዬ ኬጌይቴ፤²¹ውር ቻሊኬን ሃኦጝ ወይ ሃሓም ሺጜን፤ እየዎ ጌጳሞ ካባሪዮ ኣኔን ጫቃን ጉዩ።²²ዋይሼ ውር ጊታይ ዻዬ ጆሌ እሺ፤ ሃንታ ካውር ሹ እን ዬኣንግር ዺቴ ሹ ክየም ቶዬን ኩንባ፤ ፕር የጌያኬን።²³ውር ሺጝ ኣኔን ሃም ወይ ኣኔን ኦጝ፤ ኦይድ ዻዬ ፓዬንዻ፤²⁴ናንዳካኦ ከእያኑጝ ጉጉነት ማኬዬ ፎላ ላሉጜ ጌይኔ ፓይላ ሌይ ሙሬ ማራጝ ሹካጝ ሃንታካ ውር ኩኖጝ ማቲባ እያይ።²⁵ኣይባዬ ሌሜን ካይጝ ካሙኒኖጝ ሃንታካ ውር ካጋሊዬ ጁዋኑዬ ናንዳካ ጅሼን ይጝ ኣኔባ ቦዋዽዬን።²⁶ከእያባ ኣዬኬ ቦንካ ኖኅ ፓይላ፤ ከቦንካ ሃንታካ ውር ማቲባ እያይ።²⁷ኖኅ ሌይ ሃምካ ሹ እጝ ካሁሉኬ ጋጉጝ፣ ውር ኣኔን ኣሚኔኔ ማቲኔኔ፤ እን እያኒሼን እያኒሼና፤ ሙዋ እን ካይሲ ኩኔ ካይሲያ እንግን።²⁸ከቦንካ ሎጥዻ ሃእያይ፤ ውር ኣኔን ኣሚኔኔ ማቲኔኔ፤ ኣኔን ኡዋሩጝኔኔ ኡዋሩጝሺኔኔ፤ ኣኔን ሻሪ ዾቅዬኔ ቶኦ ኣሽክዬኔ፤²⁹ዬ ሹ እጝ ሎጥ ቱሌ ኬሶዶም ጉ ጎቤንኬ ዾዮኬ ሹዋጳእንግን።³⁰ሃንታካ ውር ሽይካጝ ጌይኖጝ ማቲባ እያይ።³¹ከሹ እጝ ውር እጝ ኣኔን ቶኦ ዾዮክ ጎብኬን ኣንቲቲ እን ኣኔን ቶኦ ቱዎጝ ቦወን፤ ፕር ውር ጊታይ ኣኔን ሃምካ ሃሙ ዋክሼኬን ሁር።³²ጶቅሲባ ኝያካ ሎጥ፤³³ውር እጝ ሆሺ ዻቆ ኔኒ ድቢሼን ፓይላ ካይባ፤ ዬውር እጝ ሳስክየ ኣዬን ዻቆ ኔኑጝ ኡፑሽባ።³⁴ሃዋይሼባ እየው ከሚክር እጝ ውር ዻ ራጳ ኬኣልጋ ክየም፤ ክየም ቦባ ኑዋ ሺዽባ።³⁵ሃኣጚ ዻ ዺዼምባ ኬጋጝ፤ ክየም ቦባ ኑዋ ሺዽባ።³⁶ውር ዻ ሃምካ ሃሙ ኣይባ ኬጋጝ፤ ክየም ቦባ ኑዋ ሺዽባ።³⁷እንግንዻ ዋሼ ሺጝባ ታቹጝ ዮ፤ ጊታጝ ቦወ ቦሼ ኦን?«እሺዻ ዋይሼ እንግን ሃም ሲልዳ ኣኖጝ ክዬጊ ፑኡሺሜንባ።

ሃፑክ 18ሄክንሶ ካኝያ ዳልሶ እጝ ቁዋቅትሼ ይወን¹ውርካ ዳይኔን ካማር ዻቼኔ ኢየሱስ ክያጃ ሄክንሶ ካዹዋልሺኔን እን ኣይካ ይሁኔን ካሹ ጮል፤²ዋይሼ እንግን እያጝ ኣና ውር ክየም ኬና ኡፑኒ ኦካ ከተማ ክየም፤ ኬና ማር ባሪዮ ሪግሺኔኔ ኬና ጌጳሲዬን ውር።³ኦካ ከተማ እጝ ኣና ኝያ ክየም ኬና ኡፒ፤ እሽዻ ሹጮል ኩዬ ጆል ሃምካ ውር እጜ ሺጝ ኣን ናንዳካጝ ኬውርካ ጎሬን ናኒ ሃኣኔ ክያጃጝ ኮሙሼ ኣምባ።⁴ውር እጝ ቶይኔ ጆል ሴሶ ካውርዻ ኬሹጩዋማ ዶክ ካኒ ዋይሼኬን እሺ ክያጃኣ ኔኒ፤ ዬከኦይን ጩዋ ከሸን ኔኒ ሺጝ እያይ እያጝ፤ ክየምጵንዻ ሃሪጊሼንኬን ባሪዮዻዬ፤ ሃጌጳሲኬን ውርዻዬ፤⁵ናንዳካ ኝያጝ ጋልንሺኔ ኣኑጝ ሃኮምሼባ፤ ማር እያይ ኣዬንያጝ ሹጮል ጎይሼ ኣን ሌይ ዻቺሻምባ።⁶ታቺ እንዻ ሺጝ፤ እን ውሩጝ ካሴሶ ክያጆጝ ዋይባ።⁷ሹሼ ሚክሬ ጊታይ ኡቹኩሼ ሃም ኔኒ ባሪዮ ኮምሼኬኒ? ከኦይን ኣይ ጆጊ ገለጝ እባጄ ሺጝባይ?⁸ሃዋይሼባ እየው፤ ይሪካ ኮሚሼባ፤ ኣይባዬ ሃንታካ ውር ሹ እጝ ኩኖጝ ዳሉጝ ካጌዬ ውር እጝ ኣኔ ይሁኔንኪ?ሄክንሶካ ውርካ ፈረሳውያኔ ውር ጊታይ ፑኡሺኔጆል ጊቢርዬ⁹ጊታይ ኮሚ እንግን ኤታጋን ኬጫንቃሌ ቃይህ ውር እንቃ ቶይኬ ካርቡካ ቦውንታጝ ሺጝ እያጜ ሜይሼያ ሄክንሶጝ፤¹⁰ውር ዻ ናንዳካ ይሁኔን ፓያ ሃምካ ቶኦካ ይሁኔን፤ ክየም ሃውርካ ፈረሳውያን ኑዋ ሃውር ኬና ፑኡሺኔጆል ጊቢሪ።¹¹ውር እንካ ፈረሳውያን ናንዳካ እሺ ኤምኑ ኣን እያጝ ዾሬ ይሁኔን፤ ባሪዮ ዮ፤ ኣን ከውር እንቃ ፓይላ ሃኣይ ውርካ ሴሶ፤ ሃኣይ ውር ኬና ኣሽክኔ ጆል ኩጳሞ፤ ኬኦጝ ሳጊ ናንዳካጝ ሃማሬ ውርካ ጊቢሪ ፑኡሺኔ ጆሌን ሃጌጳሲያ እን፤¹²ከክያጝ ካሹዋን ሃቶርንዺባ ክያጝ ዻ፤ ከካጝ ሃጌዬ ፓይላ ሃቡልሼባ ቶኦ ኑኑ።¹³ዬእን ፑኡሺኔ ጆል ጊቢሪ ዾር ዹኬ፤ ኣይን እያንካ ፎላዻ ካች ጌዬ ቶዬን ካኒ ዎሽኬን።¹⁴ሃዋይሼባ እየው፤ እን ኬኦካ እንካ ፈረሳውያን ሳጊ ኬኦካ ባሪዮ ኮምሼ ኬጫንቃሌ ዋኬ ኩያ ሃምካ ቶኦ ኔኑጝ፤ እን ሻሚ እሺ ኤምኑ ዼግዼግ ፓይላ ጌይባ ይርክ ይርክ፤ እን ሻሚ እሺ ኤምኑ ይርክ ይርኩጝ ጌይባ ዼግዼግ።ኢየሱስ ኬሃንታ ሃይሻይሻን¹⁵ኢየሱስ ካዱምባዬ ውር ኣኔን ሃንታ ጊዬይ ሃሚን ኔኒ ቦሼን፤ ውር ጊታይ ዻዬ ጆሌ እሺዻ ሹእን ጌዬ እጝ ጎሪያ እንግን።¹⁶ዬኢየሱስ ሺውሼ ሃንታ ሃሚን ኔኒዬ ሺጝ እያጝ፤ ሃንታ ካፓይኔ ኦናኒ ሜይቴባ፤ ኦይዲ ሃርጊቴን፤ ጌጳሞ ካባሪዮ ሃካ ሃንታ ጊታይ ሙኔን እያጝ።¹⁷ሃዋይሼባ እየው ኣኩሉክ፤ ጌጳሞ ካባሪዮ እን ማርኬ ሃንታ ማቲዬን ፓይላ ፓይላ ክየምጵንዻ ሁሉኬን።ሆድሞ ታቺ እንካ ኣይሁድ¹⁸ከኦካ ታታቻን ካኣይሁድ ክየም ሺጝ፤ ውርካ እርርስኔን ሌሞጝ ዮ፤ ዻቆ እንካ ቦን ጮል ክያኒ ዎሩምኔን ካኣሽክሼ እን ኦኬ ሹቃ ኬና ኣን እያን? ሺጝ እያይኔ ኣንሼና።¹⁹ኢየሱስዻ ሺጝ እያጜ ዋሼያ እሺ፤ «ሃናንዳካ ኦ የዋይሼ ኣን ሌሞጝ? ከኦካ ባሪዮ ክየም እጝ እንቃ ሌሞ ክየምጵንዻ ኣኔኬን።²⁰ኤርጊንቶ ጊታይ ሺጜ፤ ኦይ ኩጳሲዬን፣ ኦይ ኒሼን፣ ኦይ ኦጉሬን፣ ኦይ ኬሾሮ ኪሊዬን፣ ሪግሺንቴባ ሹቡኔ ጁኔ» የእባጅያይ።²¹ውር እንዻ ሺጝ ሃጊታይንያ ኦባ ካርሲ ኬናሳሞዬ ሃዻዬያ።²²ኢየሱስዻ ሹ እን ዋዬ እን ሺጝ፤ ኣኪ ኦኬ ክየም ሺዽሼያ እን፤ ኦጊታይ ኑኑ ኣኔ ፓይላ ኡዋሩጙሼ ኣይ ኩፓን፤ ከፎላ የኣኔባ ኦካ ሮጝ ቶኬ ኣጁጜን፤ ጩዋ ኩዋዌ ዻዬ ኣምባ።²³ዬውር እንዻ ዋዬ እን ናንዳካጝ ሆድማሞ ጁዋኑ ኣኖጝ ካሎን ሞይካዽያ።²⁴ኢየሱስዻ ቶይ ውር እጜ ሺጝ እያጝ፤ ናንዳካ ጊታይ ሆድማሞ ኣይ ጁዋኑጝ ዾዮክ ሃምካ ባሪዮ ሁሉኬን ኣይእያን ጋሎ?²⁵ናንዳካጝ ሆድሞ ካሁሉኬ ጶሮካ ባሪዮያጝ ሳጊ ጋማላ ካሁሉኬ ከፑልታካ ማርፌ ሃባዶ።²⁶ውር ጊታይ ዋይ እጝ ሺጝ ጩዋ ካቻሊ ኡዋው ባይሺሼን ሃኒን?²⁷ኢየሱስዻ ሺጝ እን ማርኬ ታጝካ ውር ቻሊሚኔን ኬታጝካ ባሪዮ ቻሊሜምባ።²⁸ጴጥሮስዻ ሺጝ፤ እየዎ፤ እን ኣኔን ኦጉዋዩ ፓይላ ሃኦይዳዬ ሃዻይቴያ እን። ²⁹ኢየሱስዻ ሺጝ ሃዋይሼባ እየው ኣኩሉክ፤ ውር እጝ ሺጚ ናንዳካ ጌጳሞካ ባሪዮዬ፤ ኦይድ ኝያ ኔኑጝ ወይ ጪኒጌን ኔኑጝ ወይ ውር ኔኑጝ ወይ ሃንታ ኔኑጝ፤ ³⁰ከቦን ይጝ ጁዋኑ ሌሜዬ፤ ኬቦን እጝ ኣይካ ኩኔን ውር ኬና ካማር ዻቆ ካቦንካ ቦን ጌዬን ኣኔኬን።ኢየሱስ ናንዳካ ኣርሼን ኔኒ ክያጃ እንቃ³¹ኢየሱስ ቦው ውር ታጵላማን ጊታይ ዻዬ ጆሌ እሺ ክየም ክየሜ ዋይሼ እንግን እያጝ፤ ኣኪ ሃሺጛ እያጝካ ኢየሩሳሌም ኮቴን፤ ውርካ ባርሪዮ ናንዳካ ሃንታካ ውር እን ቶኮጝ ሙኔንባ።³²ሳስክዬ ጋይባ ዛርሲ እንግንዻ ጎልቲባ፤ ጋሊንሺባ፤ ፓልቂሼባ ማኒቄዻ፤ ሙርባዻ፤ ጩዋ ኒሽባ።³³እሺዻ ኬሹ እንካ ማክንሳ ናሹንጓ።³⁴ዬ ውር ጊታይ ዻዬ ጆሌ እሺዻ ኦካ ጊታይ ሃሳዎጝ ክየምጵንዻ ካኒ ጊባጅኬን፤ ሃሳዋ እንዻ ጌይሼያ እንግን ጁግ፤ ሃሳወ ናንዳካኦ ካኒ ጊባጅኬን።ኢየሱስ ባይሺሻ ውር እጝ ካርቡ ኣይ ሙሙዾጝ³⁵ኢየሱስ ሹ እጝ ሄክሼ ኢያርኮጝ፤ ውር ኬና ካርቡ ኣይሙሙዾ ኣኔን ማራካ ጉዋር ኡፔ ይሁኔን።³⁶ውር እጝ ካርቡ ኣይሙሙዾጝ ዛርሲ ሳጊ ኬጉዋይኔ ዋዬ ናንዳካ ክያጃ እጝ ኣንሼና።³⁷እንግንዻ ዋይሼ እሺ እንካ ናዝሬት ኢየሱስ ኣኔን ኬጉዋጝ ሳጊዬን።³⁸እሺዻ ሺጝ ውዋጝ ካዳዊት ኢየሱስ ዮ፤ ካሲያምባዬ ኡቹካ።³⁹ውር ጊታይ ሌሜ ፓዩጝ ካኡፍ ሹዬ ጎሪያ፤ ዬ እሺ ሺጝ ውዋካ ዳዊት ዮ፤ ካሲያምባዬ ሌሜዬ ኡቹካ።⁴⁰ኢየሱስዻ ዾሬ ካቦሼ ውር እጝ ሃሚን ኔኑጝ ሜይሼና፤ ሹ እን ኩኔ ኦኔኑጝ፤⁴¹ሺጝ ካኣሽክሼ እን ኦዬ ኣንሼና፤ ውር እጝ ካርቡ ኣይሙሙዾጝ ሺጝ ታቹጝ ዮ፤ ሃዎሺ ጌዬን።⁴²ኢየሱስዻ ሺጝ «ቶይባ ይሁኔን ኑኑ ባይሺሻ እን።⁴³ውር እንዻ ይሪካ ኦይን ቻሊያ ጌዬን፤ ጌጳሲ ባሪዮዬ ዻዬ ኢየሱሴ። ዛርሲ ፓይላ ጌዬ እጝ ጌጳሲያ ባሪዮ።

ሃፑክ 19ዘኬዎስ እን ፑኡሺኔ ጆል ጊቢሩጝ¹ኢየሱስ ሁሉክ እያርኮዬ ኬኦይ ሳጊዬ ኣኔን ኩዬን።²ውር ክየም ኬና ሺጜ ዘኬዎስ ኣኔባ ኦይን፤ ካሎን ሃውርካ ጊቢሪ ፑኡሺዬኔ ሆድሞዬ።³እሺዻ ውር እጝ ሺጜ ኢየሱስ ኣዬ ኒን ዎሽ ቶዬ፤ ዾሬን ኔኒ ኣዬ ኩምቡሌዬ እን ናሹጝኬ ጁዋኑ ኣዬን ካዛርሲ እሺ ቶዬን ካኒ ቻሊኬን። ⁴ኢየሱስ ናንዳካጝ ኣኒኔ ኬጉዋይ እጝ ሳጊዬኑጝ፤ እሺ ቶዬን ሪሼ ኩይ ሌሜኔ ሌፓ ኡዎፑር።⁵ኢየሱስዻ ሄክሼ ኦይን ጌይ ካቼ«ሺጝ ዘኬዎስ ዮ፤ ሹጝ ቶኦ ኑኑ ክያኒ ድቢኔን ሁሉኩሼ ኣምባዬ ይሪካ ጎባ።⁶እሺዻ ጎብ ይሪካዬ ቦዋ እሺ ከዋዛ።⁷ውር ጊታይ ኣኔን ኦይን ጌይ እጜ፤ ሺጝ ካሁሉክ ኦካ ቶኦካ ውርካ ሴሶዬ ካቾቺሚንቴባይ፤ ሺጝ እያይኔ ካርሲያ ጉንዱሚኔን።⁸ዬ ዘኬዎስ ዾሬ ዋይሼ ታቺ እጝ ታቹጝ ዮ፤ እየዎ ሆድማሞ ጊታጝ ኣኔን ኦናኒ ፓይላ ዶክ ሃኣይባ ኩፓን፤ ውር ክየምጵንዻ ሃኣይያ ኬሾሮያጝ ሃሌሜ ኣሁሬ ሃኣይባ።⁹ኢየሱስዻ ሺጝ እያጝ፤ ውሩጝ ፕር ኣዬ ውዋካ ኣብራሃም፤ ሹጝ ዻዓሾ ኩና ኦካ ቶኦጝ፤¹⁰ናንዳካኦ ሃንታካ ውር ኩኖጝ ሃእጝ ካይህ ዎሼኔ ባይሺሼኔ።ሄክንሶ ካቢሬ ታጳን¹¹ዛርስዻ ኣኔንባ እጝ ዋዬኔ፤ ካርሲያ ከሄክንሶ ክያጄን፤ ናንዳካኦ ውር ፓይኔ ኢየሩሳሌም ዋሽኬኦኮኑጝ ካዹዋልሼ እንግን ጌጳሞ ካባሪዮ ጊያ።¹²ዬሺጝ እያጝ፤ ውር ታቺ ክየም ቦው ጌጳሞ ካቢታሞዬ ናንዳካ ዋኬን ኩያ ፔን ዹክ።¹³ከኦካ ጫቃንካ ውርካ ዋድማ ሺው ታጳኔ ኣይ ቢሬ ታጵዬ «ሺጝ ሌይ ሃምካ ዋካ ኩዋዎጝ ኬቢሮጝ ኒጊድንቴባ።¹⁴ዬ ናንዳካጝ ውርካ ፔን ሚኖጝ፤ ሺጝ ውሩጝ ካጌጳዽሼ ኡዋው ሃዎሻኬን ሺጝ እያይኔ ኬታካሁር ይዕሲሼያ ውርካ ኤርጎ።¹⁵ኣይባዬ ውር ታቺ እጝ ማቲ ታቺዬ ዋኪሼያ ሃምካ ፔን፤ ውርካ ዋድማዻ ኬቢሬ እን እሺ ኣይኖጝ ኒጊድኔያ፤ ቲርፒሲዬ እባጄን ሺውሻ።¹⁶ውርካ ዋድማ እንካ ሌሜን ኩኔ፤ ሺጝ ታቹጝ ዮ፤ ቢሬ ጊታይ የኣዬ ኣን ፕር ጅሼያ ቢሬ ታጵ፤¹⁷ታቺ እጝ ሺጝ፤ እን ሹቃጝ ከዋድማጝ የሻሚያ ሹቃ፤ ከኦዽታኬ የማቲ ሹቃዬ ናንዳካጝ የጌይኖጝ፤ ከኦካ ከተማ ታጵ ጋያ እን ጌጳሞ።¹⁸እንካ ላንሳ ኩኔ ሺጝ፤ ታቹጝ ዮ፤ ከኦካ ቢሬ ጊታይ የኣዬ ኣን ጅሼያ ቢሬ ቾን።¹⁹ታቺ እንዻ ፕር ሺጝ እን ኦካ ከተማ ቾን ጋያ እን ጌጳሞ።²⁰ውር እንካ ዋድማ ኑዋ ኩኔ ሺጝ እያጝ፤ ታቹጝ ዮ፤ ቢሬ እጝ ሃቁም ኬኣፓላዬ ሃኣጁጜ ሃዓጝ፤²¹ቦው እን የማሬ ኣጁጜን፤ ናንዳካጝ የማሬ እጝ የኮሬ ሃዼኑጝ የኣይ ውር ውር ጋራዬ ሪግሺንቴባ።²²ታቺ እንዻ ሺጝ እን ውርካ ዋድማ ጋራጝ/ ሃኮምሼያ እን ክያጃ፤ እኑጝ ቦው እን የማሬ ኣጁጜን እጝ የማሬ ኮሬን ሃዹጝ ውር ጋራ ኣዬን ኑኑ የእባጅያያጝ፤²³ሃኩኒዬ ሃቦው ናኒ ኬጊታይ ጅሼዻዬ፤ ሃናንዳካኦ ካማሬ ውር ጊታይ ዋድሚ ኣዬኑጝ?²⁴ታቺ እጝ ዋይሼ ውር ጊታይ ጎሩጝ፤ ቦው ቢሬ ኔኒዬ ኣይ ውር እጝ ኣኔ ቢሬ ታጱጝ።²⁵እንግንዻ ሺጝ ታቹጝ ዮ፤ ይንጌ እሺ ኣኔ ቢሬ ታጵ።²⁶እሺዻ ሺጝ፤ ሃዋይሼባ እየው፤ ጊታይ ኣኔ ፓይላ ሌሜባ፤ ዬካእንቃ እጝ ማር ኣኔን ቦባ።²⁷ኣይባዬ ካማሬ ኦግዬይ ጌጳዽዬን ጊታይ ዎሹጝ ጋላን ጊታይ ቦፓይንቴ ኦጝ ካማሪ ናኒዬ ኒቂ እንግንባ።ኢየሱስ ከጌጳሞ ታቺ ሁሉካ ኢየሩሳሌም ²⁸ኢየሱስ ሃሳዌ እጝ ጩዋ፤ እያጝካ ኢየሩሳሌም ቱሌም ሌሜ ጋኔን ፓዬን።²⁹ኬጋግ እጝ ጌዬን ከኦካ ፔን እጝ ሺጜ ዳብር ዘይት፤ ሹ እጝ ሄክሼ ኦካ ከተማ ጊታይ ሺጜ ቤተ ፋጌዬ ቢታንያዬ፤ ከኦካ ውር ጊታይ ዻዬ ጆሌ እሹጝ ዋይሼ ውር ዻ እያጜ ይዕሲያ፤³⁰ፓይባ ኦካ ጶሮክ እጝ ኣኔን ኦካ ሌሜን ጉዩጝ፤ የሁሉክያ ኦይንያጝ የጌያባ ሃንታካ ኡኩሊ ኬና ማሬ ቆቤን ቁሜ፤ ቡሉዬ ቦፓይንቴባ ዮጝ።³¹ውር ክየምጵንዻ ሺጝ ሃናንዳካኦ የቡልቶጝ ኣንሽ እየውያጝ ዋይሽቴ እንግን ዎሺሽባ ታቺ እጝ።³²ውር ጊታይ ይዕሲዬዻ ፓዬ ጋንሼባ ማቲዬ ጌያ።³³ኤታጋንዻ ጌይ እን ቡሌ ሃንታካ ኡኩሊዬ ዋይሼ እንግን የቡላ ናንዳካ ኦ?³⁴እንግንዻ ሺጝ ዎሺሽባ ታቺ እጝ።³⁵ጩዋ ሃንታካ ኡኩሊ እጝ ቦሼያ ዮጝካ ኢየሱሱጝ፤ ፓቅሼ ኣፓላ ጊዬይ ሹዎር ኔኒ ክያኒዬ ቆብሻ ኢየሱስ ኦካ ኡኩሊ።³⁶ውርዻ ጉዋይ ካጉዋር እጝ እሺ ኩዮጝ ጋኔን ኣፓላ ጊዬይ ጃኬን።³⁷ከኦካ ጋግ ካዳብር ዘይት ሹ እጝ ሄክሼ ኦካ ጉዋር እጝ ኣይ ባይን ባይን፤ ናንዳካጝ ጌዬ ውርካ ዻይኔ ጆሌን ጁዋኑጝ ኦኬ ሹቃ ፓይላ ዋዝንዽዬ ሻም ናቅዲ ጊዬይ ዼጌ ሺጝ እያጜ ካርሲያ ባሪዮ ጌጳሲዬን፤³⁸«ቢቲ እጝ ኩንኬ ሮንካ ታቺ እጝ ሃኬና ጉዋኔ/«ከፎላ ሹቃ፤ ኬጊታይ ኣኖጝ ጌጳሞ³⁹ውርካ ፈረሳውያን ክየም ክየም ጊታይ ኣኔን ኦካ ጫቃንካ ውሩጝ ዋይሼ ኢየሱስ፤ ውርካ እርርሲዬኑጝ ዮ፤ ጎሪባ ውር ጊታይ ዻዬ ጆሌ እኑጝ።⁴⁰እሺዻ ሺጝ፤ ሃዋይሼባ እየው» የዋይሺቴያ እንግን ቆብሹይያጝ ባይ ጊታጝዻ ኡቹኳ።⁴¹ኢየሱስዻ ኩዬ ሄክሼ ኢየሩሳሌም ጌይ ከተማዬ ኦቆርሼያ፤⁴²ሺጝ እያጝ፤ ኣይሹቃ ኑናኦ እን ዋቲ ሹጝ የእባጅያያጝ/ ዬ ጋን ከኦካ ካርቡ ኑኑ ካህያ።⁴³ጋል ኑኑ ኣሽኪ ሌሜን ኑኑ ክያኒ ካርሚዬ፤ ኦጉዋይካ ሆላን ጱዻ፤ ሹ እጝ ካጋሊንሺዬ እን ኩንባ።⁴⁴እኔ ሃንታ ጊታይ ኑኑ ቆቤን ካርሚ ኑኑ ቱዎጜ ዎርሲባ ከዳሊ፤ ባይዻ ጎቼኬን ባይ ክያኒ፤ ሹካጝ ሃቶዬ እን የእባጅኬኔ።ኢየሱስ ከኦካ ቶኦካ ይሁኔን⁴⁵ከኦይን ጩዋ ኢየሱስ ሁሉክ ሃምካ ቶኦካ ይሁኔኔ ቡላ ውር ጊታይ ኣኔን ኡዋሩጝሺኔን፤⁴⁶ፕር ሺጝ ቶኦጝ ሺጝ ቶኦካ ይሁኔኔ ቶኳ፤ ዬ እየው የሻማያ ይግንካ ጎርጉ።⁴⁷ከክያጝካ ሹዋንዻ ኣኔን ኦካ ቶኦካ ይሁኔን እርርሲኔን፤ ውር ጊታይካ ቃሼ ታታቻኔ፤ ውር ጊታይ ጆል ወርቀቴ ጊታይ እያኒሼጆሌ ዛርሲዬ ዎሽ እሺ ኒሼን፤⁴⁸ኣይባዬ ዛርሲ ፓይላ ናንዳካጝ ፎሽካዽዬ እርሮጝ እያይን ካሻሜ ካዋ እንግን።

ሃፑክ 20ጌጳሞካ ኢየሱስ ማቲሼያ ኣይሁድ ኣንሺሺኔን¹ሹ ክየም ኢየሱስ ኣኔን ዛርሲ ኦካ ቶኦካ ይሁኔን እርርሲዬኔ ክያጃ ሹቃ ክሊዬኔ ውርካ ቃሼ ታታቻኔ፤ ውር ጊታይ ቶክኔ ጆል ወርቀቴ ጌቿኔ ፑኡሺሜኔ ፓይኔ ኦካ ኢየሱስ፤²እንግንዻ ሺጝ ኦግታጝ የኣሽክዮጝ ኣየኬ ጌጳሞካኦ ሜይሼ ኡዋባ፤ ውር እጝ ኣይ እን ጌጳሞ ሃኒን? ሺጝ እያይኔ ጋንሼና።³እሺዻ ሺጝ እያጜ ዋሼያ እንግን፤ ኣንዻ ካኣንሽ እየው ክያጃ ክየም ይንዳ የዋሻባይ፤⁴ዱቅኔን ካዮሐንስ ሃኬፎላ ሞ ሃኬውር?»⁵እንግንዻ ሺጝ እያጜ ክሊዬና ኬጋጝ፤ ሺጝ ሃሺጛ ከፎላያጝ ሃኦ ካማሬ ኡዋው ሃናንዳካ ኦ የማርቴ ይሁኔኑጝ?»⁶ሃሺጛ ከውርያጝ ዛርሲ ፓይላ ናንዳካጝ ዮሐንስ ኣዬ ውርካ ባሪዮዬ ይሁኖጝ ሙር ኡዋባ ኬባይ።⁷ዬሺጝ ኣዬኬ ኦን ኡዋው ሃእባጃኬኔ ዋሼያ።⁸ኢየሱስዻ ዋይሼ እንግን ኣኪ ኣንዻ ኦግታጝ ሃኣሽክዬ ኬጌጳሞካ ኦ ሃሜይሼኬን እየው።ሄክንሶካ ጊታማን⁹ከኦይን ጩዋ ኢየሱስ ሺጝ እያጜ ካርሲያ ዛርሲ ሄክንሶጝ ሜይሼን፤ ውር ክየም ዾቂ እያይ ሻሪካ ኣሜን፤ ኡዋሩጙሽ ኦካ ውር ጊታይ ኮውኔ ጆል ሃሙዬ ኩይ ፔን እንቃዬ ኡፓ ሹ ጁዋኑ።¹⁰ከትጌሽ እንካ ባርግን ካይዕሲሼ እሺ ካርቡ ካሻሪዬ ይዕሲሼያ ውርካ ዋድማ ሃምካ ውር ጊታይ ኮውኔ ጆል ሃሙጝ፤ ዬ ውር ጊታይ ኮውኔ ጆል ሃሙጝ ሙር ውርካ ዋድማዬ ¹¹ፕር ይዕሲያ ውርካ ዋድማ እንቃ፤ ፕር ውር ጊታይ ኮውኔ ሃሙጝ ሙር እሺዬ ጎብሼ ይዕሲያ ቡዋ ማም።¹²ፕር ይዕሲያ እንካ ማክንሳጝ፤ ፕር ውር ጊታይ ኮውኔ ጆል ሃሙጝ ሻም እሺ ጊዬማሜ ፓቅሼያ ሹኑክ።¹³ኤምኑ ካሻሪ እጝ ሺጝ ኣኪ ካሻም እያን? ይንዳ ፕር ሃይዕሲባ ውዋጝ ናኒ ሃናሺዮጝ፤ ካካሪግሼን እሹጝ። ¹⁴ዬ ውር ጊታይ ኮውኔ ጆል ሃሙጝ ሹ እን ጌዬ ውዋ እጝ፤ ሺጝ ይንጌ ይጛ እንካ ሮጊምንቶጝ፤ ፓዬኔ ካኒሺባ፤ ጩዋ ኦኬ ፓይላ ማቲባ ጉዋዩ» ሃሳወኔ ክሊያ ጋጝ፤¹⁵ቡል ኬኦይን ዾቅዬ ሻሪ እጝ ሹኑኬ ኒሻ።«ኣኪ ኤምኑ ካሻሪ እጝ ካሻም እንግን እያን?¹⁶ኩኔ ሹዋጳ ውር ጊታይ ኮውኔ ጆል ሃሙጝ፤ ኦካ ሻሪ እጝ ዾቅዬዻ ኣይባ ውር እንቃ። ዛርሲዻ ሹ እጝ ዋዬ እጝ ሺጝ ኣኪ እጝ ኣኖጝ ካማር ቦኩኔን።¹⁷ኢየሱስዻ ቶይ ሃሚን ጊይዬ ሺጝ እያጝ፤ «ይቲ ውር ጊታይ ፓልሲኔ ጆል ባይ ጊታይ ፓቄን ባይ ክያኑጝ ካሙርባ ሹቦ ጊዬይ፤ እሺ ማቲያ ሹቦካ ሄክንሲዬን ቶኮጝ ሹቦ ካክያጃ ኔኒ ሃኦ?¹⁸ጊታይ ፓቄን ኦካ ባይ ፓይላ ኩቲባ፤ ጊታይ ፓቄን ባይ ዾዮክ ፓይላ ጋጪባ።¹⁹ውር ጊታይ ቶክኔ ጆል ወርቀቴ ታታቺካ ውርካ ቃሼ ሄክንሶጝ ሃሳውሼ እንግን ናንዳካጝ ጊባጆጝ፤ ኬዋዳ እጝ ዎሽ ጎሜን፤ ኣይባዬ ሪጊሼና ዛርሲ።ናንዳካ ቄሳር ጊቢሪ ካሺዬን²⁰ኢየሱስ ሳስክዬ ታታቻን ቁዋቅትዬ ጌጳሞዬ ኣዬን፤ ክያጃ እጝ ቱልኬ ቶግ ኔኑጝ ሺሪሚኔን ጋኔን ቆቤ ቶልዬን፤ ዬ ይዕሲያ ውርካ ዶያ ጊታይ ምኔን ጫንቃሌ ፓዬን ኦግዬይዬ።²¹ውርካ ዶያዻ ፓዬኔ ሺጝ እያጜ ኣንሼና፤ ውርካ እርርሲዬን ይጝ ጉዋዩ ዮ፤ እን ዬኣዬ ውርኬና ክያጂኒ ኦኬ ሊኪዬ የእርርሱዬ፤ ፕር የእርርሲዬ ጉዋርካ ባሪዮ ኬኣኩሉኬ የማሬ ውር ክየምጵንዻ ቡድዬን ሃእባጃያ።²²ኣይባዬ ቄሳር ጊቢሪ ቡልሼን ቻልሜምባ ሞ ቻልሜንኬን?²³ዬ እሺ እባጅ ጋሮ ጊዬይ ዋይሼ እንግን እያጝ፤²⁴ይንዳ ዹልሺቴያ ኣን ሺሊንጊ ክየም፤ እን ኣኔን ኦኔኒ ሃዴንታካ ኒኔ ወርቀት ቶኬን ካኒን?²⁵እንግንዻ ሺጝ ሃካ ቄሳሬ ዋሼያ። እሺዻ ሺጝ እን ኣይካ ቄሳር ኣይ ቄሳር እን ኣይካ ባሪዮ ኣይ ባሪዮ።²⁶ዬ ክያጃ እጝ ሃሳዌ ኦካ ማሪካ ዛርሲ ካኒ ቻሊኬን ቶሊዬን፤ ዋሼን ንናሹጜንካ ኣርሼኔ እያኒሼ²⁷ውርካ ፈረሳውያን ጊታይ ሺጚ ናሹጜን ካኣርሼን ኣኔኬን፤ ክየም ክየም ፓዬን ኦካ ኢየሱሴ ጋንሼና ክያጃ።²⁸ሺጝ ውርካ እርርሲኔኑጝ ዮ፤ ውር ክየም እያኒሽ ሃኣጚዬ ካኒ ጅሽኬን ሃንታዬ ኣርሽያጝ፤ ጪኔ ኔኒ እያኒሼ ቡልሼ ሃንታዬ ካሪቤ ቢዛካ ጪኖጝ ሙሴ ቶክሼያ ኡዋው።²⁹ኣኪ፤ ኣና ጪኒጌን ካጋጝ ሶጳ፤ እንካ ሌሜን እያኒሽ ሃኣጚዬ ቡልኬን ሃንታዬ ኣርሻ፤³⁰እንካ ላንሳዻ ሃእያይ፤³¹ፕር እንካ ማክንሳዻ እያንሽ፤ ሶጳን እያይ ፓይላ ጊያኒሼኔ ቡልኬን ሃንታዬ ጋርሻ።³²ከቱንሲ ኝያ እንዻ ኣርሻ፤³³ኣኪ ሶጳን ፓይላ ናንዳካጝ ጊያኒሺኖጝ፤ ከሹካ ናሹጜን ማቲ ኝያካ ኒን?³⁴ኢየሱስዻ ሺጝ እያጜ ዋሼያ እንግን ሃንታካ ፔኑጝ እያኒሼንባ፤ እያኒሽ ጋምባ፤³⁵ዬ ጊታይ ካጌይ ዳሊ እንካ ኩዋዌ ናሹጜን ካኣርሼን ጊታይ ካሁሉክ እያኒሺንኬን እያኒሽኬን።³⁶ናንዳካጝ ኣዬኬ ውርካ ኤርጎጝ ኬኦጝ ጩዋ ኣርኬን፤ ናንዳካጝ ጋዬ ሃንታ ናሹጜን ጋይ ሃንታካ ባሪዮ።³⁷ሙሴ ናንዳካ ኮዶ ናንዳካጝ ቶኬ ከወርቀትካ ክያጃ ቱዎጝ ታቺ እጝ፤ ሺጜ ኣምላክ ካኣብርሃም፣ ኣምላክ ካይስሐቅ፣ ኣምላክ ካያዕቆብ፤ ኬእያይ ናሹጜን ካኣርሼን ዹዋሊሼንባ።³⁸ኦኬ ፓይላ ናንዳካጝ ኣዬኬ እሹጝ፤ እሺ እያይ ከባሪዮ ዬ ማርኬ ኣርሼኔን።³⁹ውር ክየም ክየም ጊታይ ቶክኔ ጆል ሺጝ ውርካ እርርሲዬኑጝ ዮ፤ የሃሳውያ ሹቃ።⁴⁰ከኦይን ጩዋ ውርክየምጵንዻ ካኣንሼ እሹጝ ካኒዎሽኬን።ክርስቶስ ሃውዋካ ኒን?⁴¹ከኦይን ጩዋ ኢየሱስ ዋይሼ እንግን እያጝ፤ ውር ሺጝ እያን ክርስቶስ ሃውዋካ ዳዊት?⁴²ናንዳካኦ እሺ ዳዊት ከወርቀት ካይያራን ሺጛ እያጝ፤ «ታቺ ታቹጝ ናኑጝ ኡፓ ከኦካ ቡዎን ናኒ፤⁴³ጋል ናኒ ሌይ ሃም ከሻሜ ባጜን ካጃፑጝ።⁴⁴ኣኪ እሺ ዳዊት፤ ሺጜ ታቹጜ ሺዎጝ ኣይ እያን ውዋ ኔኒ?⁴⁵ዛርሲ ፓይላ ኣኔን ዋዬኔ፤ ዋይሼ ውር ጊታይ ዻዬ ጆሌ እሺ እያጝ፤⁴⁶ውር ጊታይ ናሺ ኣፓላ ሉም ኪሜ ሺሪዬን፤ ውር ጊታይ ሃም ጉዋሩጜ ጆሌ ሺጜን ዎፎዬ ከኦካ ቶኦካ ይሁኔን ካውርካ ኣይሁድ ካራምካ ጌጳሞ፤ ከኦካ ራቅካ ኣማ ዎሽ ራቅካ ጌጳሞ፤ ከኦካ ቶኬን ካወርቀት ኣጅቴባ።⁴⁷እንግንዻ ሃጊታኬና ካሻም ቶኦካ ዳልሷን ቡንዱርቆ፤ ሺጝ ናንዳካ ቶይኔኔ ራጅሚሽባ ይሁኔን ጊዬይ፤ ጊታይ ኮምሼን ጋራ ካሊ እንግንባ።

ሃፑክ 21መባ እጝ ኝያ እን ኣይኖጝ¹ኢየሱስ ጌይ ካቼ ቶይያጝ ኦካ ቶኦካ ይሁኔን ኦኑጝ ፑኡሺዬ ጆሌ መባ ውር ሆድሟን ኣኔን መባ ጊዬይ ፓቅሼኔ ጌያ።²ፕር ኝያ ኩፒ ክየም ቦኪኔ ሺሊንጊካ ናሲ ሃይሻይሽ ዻዌ ፓቅሼ ኦይኔ ጌያ፤³ሺጝ እያጝ ሃዋይሼባ እየው ኣኩሉክ ከኦካ ፓይላ ሳጊ ኝያ ኩፑጝ ኣዬና ኬና ሳጊ፤⁴ውር ጊታጝ ጋዬን ጊታይ ሺዺ ከኦጊዬይያጝ፤ የእጝ እሺ ኣይኖጝ ሃእንካ ኩፓሞ ኔኑጝ ካኑጝ ኣኒኔ እሺ ኤምኑ ቃሚዬንዻ ፓይላ ኣዬና።ዹዋሊሺኔን ካቱንሲካ ቦን⁵ውር ጊታይ ዻዬ ጆሌ እሺ ክየም ክየም ሺጝ ቶኦካ ይሁኔን ኬሹቃቲሼንካ ባይ ሹቃዬ ኣይኔን ካስዕሌ ሃሳዋ፤ ኢየሱስዻ ሺጝ እያጝ፤⁶ይጝ የቶይቴ ፓይላ ማር ኮሲሚኔኔ ባይ ኬባይ ከእያይ ፑኡሺዮጝ ሹ እጝ ካማሬ ሺዺዬን ኩንባ።⁷እንግንዻ ሺጝ ውርካ እርርሲዬን ይጝ ጉዋይዮ፤ ኣኪ ይጝ ፓይላ ካሙኒኖጝ ሃኣሚን? ፕር እንካ ሙኒኔ እያይ ዹዋሊሺኔን ኔኒ ሃኦ? ሺጝ እያይኔ ጋንሼና።⁸እሺዻ ሺጝ እያጜ ዋሼያ እንግን፤ ከማር ጊያሚሴኔ ኣጅቴባ፤ ኣን ሃኣይ እሺ ዬ ፕር ሺጝ ሹየክሼዬ ኬሮጝ ናኒ ፓዬንባዬ፤ ዬ እየው ኦይዲ እንግን ዻይቴን።⁹የዋያ ናንዳካ ፓሬ ናንዳካ ሴሶካ ዛርሲያጝ ኦይዲ ቴርጋዽቴን፤ ይጝ ሙኔን ካሁሉኮጝ ሌሜ ጊያዬ የቱንሲ ኔኒ ማቲኬን ይሪካ እያይ።¹⁰ፕር ዋይሼ እንግን እያጝ፤ ዛርሲ ኦካ ዛርሲ ታታቻን ኦካ ታታቻን ናሹጝሼ ጋምባ።¹¹ማቲባ ሁቡኔን ካዳሊ ታቺ፤ ካሼ ጋሎዬ ኦካ ራቅ እንቃ እንቃ ሙኔምባ፤ ኦኬና ካሪጊሺሽ እያይ ከፎላ ዹዋሊሺኔን ታቺ ማቲባ።¹²ዬ ይጝ ፓይላ ከሌሜንካ ሙኒኔን ውር ጎም እየውባ፤ ዋኬ እየውባ፤ ዾቅሼ እየውባ ሃምካ ቶኦካ ይሁኔኔ ሃምካ ቶኦካ ቁሜኔ፤ ቦፓይኔባ እየው ኦካ ሌሜን ካታታቻን፤ ይጝ ፓይላ ናንዳካ ሮጝ ናኒ ዬክሽ እየውባ።¹³ይጝ ኬኪሊዬን ማቲሼ እየውባ ባሊ ሹቃ።¹⁴ዬ ሃኣይና ዋሼንካኦ ከእያይ ሌሚሺዬ ኦይዲ ሪጊሺኔን እጝ ቶይ ሹቃ።¹⁵ጊታይ ካሚኒኔን ጉዩ ፓይላ ካሚኒኔዬ ካሱዱምኔዬ ክያጃ እንካ ቻሊዬኔ ኣጁቱሜ ሃኣይ እየውባ።¹⁶ውር ጊታይ ጌጵሺሽ እየው፣ ጪኒጌን ጉዩ፣ ውር ጉዩዬ ባይዳን ጉዩዬ ክየምጵንዻ ሺዽኬኔ ሳስክዬ ኣዬን እየውባ፤ ከኦጉዩ ውር ክየም ክየም ኒሿ።¹⁷ናንዳካ ሮጝ ናኒ ኬኦካ ውር ፓይላ የማቲያባ ኬና ሚኔ።¹⁸ኣይባዬ ኬኦካ ጪራሺ ጉዩ ክየምጵንዻ ካይኬን፤¹⁹ኬቁዋቅቲሼ ጎሬን የዻሺያባ ናፒሲ ጉዩ።²⁰ኢየሩሳሌም ጱዽ ኬፓፃኖ ካፓሬ ሹካጝ የጌይቶጝ፤ ካይዬ እባጅባ ሌሲ ኔኒ።²¹ከሹ እጝ ጊታይ ኣኔን ሃምካ ይሁዳ ካጉኩሼባ ሃምካ ጋግ፤ ጊታይ ኣኔን ኦካ ከተማጝ ከኦይን ካቱልባ፤ ጊታይ ኣኔን ኦካ ከተማ ዹክዻ ካሻውባ ካሻውባ ሃምካ ከተማጝ፤²²እጝ ቶኬ ከወርቀት ካሙኒንቴባዬ ይጝ ሃሹካ ፎቴን።²³ኬኦካ ዳሉጝ ማቲባ ጋሎ ታቺ፤ ከይጝ ማኒት ኩንባ ኦካ ዛርሲ፤ ዬ ከሹ እጝ ጊታይ ኣይ ኡሩኬኔ ጁዋጌን ጊታይ ኣሁሼኔ ሃይ/²⁴ቡድባ ኬኤቤል፤ ሃምካ ዛርሲ ፓይላ ቦባ ኣንቲቲ፤ ኢየሩሳሌም ሌይ ሃም ቦንካ ዛርሲ ካሙኒኖጝ፤ ማቲባ ካባጜንካ ዛርሲ።²⁵ኬሹሽ፣ ኬቲጌሽ ክያኒዬ ቢሊዬ ማቲባ ዹዋሊሺኔን፤ እን ናሹጝ ከናቂዲ ካእርጊዬን ካኛፓሱጝ፤ ከኦካ ዛርሲ እጝ ኣኔን ዳሉጝ ክያኑጝ ይግሼንባ፤ ኑሼምባ ሻን፤²⁶ናንዳካጝ ካሁቡቤ ከቁዋቂቲ ካፎላጝ፤ ውር ኬሪጊዬ ሺጝ ፔኑጝ ክያኒ ካኩና ኦዬ ከካሊዬን ናዺባ።²⁷ከሹ እጝ ሃንታካ ውር ኬቁዋቂቲዬ ኬጌጳሞ ታቺዬ ኩንኬ ሉፔ ጌይባ።²⁸እየውዻ ኦጊታይ ካርሲያ ሙኒኔንያጝ፤ ባይሼን ጉዩ ናንዳካጝ ሄክሾጝ ጌይ ጋዜ ጎርባ፤ ሻሚቴባ እየው ኤታጋን ዶዮክ ካች።²⁹ፕር ሺጝ እያጜ ሜይሼያ እንግን ሄክንሶጝ፤ ሺጝ ቶይባ ሻሪ ጊታጝካ ኣሜኑጝ፤³⁰የቶያያጝ ቃቂቴን ጊዬይ ኮድያ፤ ከሹ እጝ ባርጊን ሄክሾጝ እየው ኤታጋን የእባጃያ።³¹እያይ ፕር የእባጃያ ሙኒኔን ካኦጊታይንያጝ፤ ጌጳሞካ ባሪዮ ዲያውሼ እባጅባ።³²ሃዋይሼባ እየው ኣኩሉክ ይጝ ፓይላ ሌይ ሃምካ ሙኒኖጝ ጅሼን ይጝ ሳጊኬን።³³ፎላዬ ዳሊዬ ሳጊባ ዬ ክያጃ ናኒ ሳጊኬን።³⁴ኣኪ ዻቆ እን ማሪ ሃጌን ኣኔን፤ ከጁዋንቲ ካማቲኔኔ ናንዳካ ቆቤኔ ኬጋሎ ሸን ጉዩ ካማር ሞይካዽዬኔ፤ ኬሹ እጝ ኬካይ ሉጉድ ካማር እየው ሄክሼኔ ኣጅቴባ።³⁵ይጝ ሄክሽ ውር ጊታይ ቆቤን ኦካ ዳሉጝ ፓይላ።³⁶ዬ ከእን ኩኑጝ ፓይላ ከዻቴዬ ከኦካ ሌሜንካ ሃንታካ ውር ጎረን ከቻሊቶጝ ሹጮል ቁዋቂቲሼ ይወንባ።³⁷

ሃፑክ 22ይሁዳ ቱሙያ ታቺ ሳስክዬ ኣይኔን¹ከሹ እጝ ባላሻ እን ሺጜ ካፋስካ ቶንቶሮ ሄክሻ።²ታታቺካ ውርካ ቃሼ ውር ጊታይ ቶክኔ ጆል ወርቀቴ ናንዳካጝ ሪጊሺኔ ዛርሱጝ፤ እያይ ካቡሌ ኢየሱስ ጋኔን ጉዋር ዎሼን።³እጁጝዻ ከኦካ ታጵ ላማ ጊታይ ኮሞጝ ኩዬ ሁሊክ ኦካ እጝ ሺጜ ኣስቆሮቱ ይሁዳጝ፤⁴ይሁዳ ኩይ ሃምካ ታታቻንካ ውርካ ቃሼ ጊታይ ጌጳሲዬ ኦካ ቶኦካ ይሁኔኔ እያይካ ሳስክያ ኣይኔ ኢየሱስ ሃሳወና።⁵እንግንዻ ዋዝንዲ ኬእጜ ቢሬ ኣይኔን ህሳወና።⁶እሺዻ ኬእጝ ክያጄ ቱሙያ፤ ሳስክዬ ኣይኔንዻምሽ ካቱንሲ እንካ ቃይ⁷ኬኦይን ጩዋ እንካ ኒቄ ማድርካ ፈስካ ቶንቶሮካ ባላሻ ሄክሻ።⁸ኢየሱስዻ ሺጝ ካኣምቴ ምሽካ ቃይካ ፋስካ ፓዬ ኣሽክቴ ኣምባ፤ ሺጝ እያይኔ ይዕሲያ ጴጥሮሴ ዮሐንሴ።⁹እንግንዻ ሺጝ የዎሺ እንካ ኣሽክቴ ኦን?¹⁰እሺዻ ዋይሼ እንግን እየዎ፤ የሁሉካያ ኦካ ከተማያጝ የጌያባ ውርኬና ዼቲ ቷንዳካ ሙዋ፤ ሌይ ኦካ ቶኦ እን እሺ ሁሉኮጝ ዻይቴባ፤¹¹ዋይሺቴ ኤምኑካ ቶኦ፤«ውር እንካ እርርሲኔን» ሺጝ ከውር ጊታይ ዻዬ ጆሌ ኣን ምሽካ ቃይካ ፈሲካ ካኣምቴ ቶኦካ ኮመና ሃኦን ዋይሼ ኡዋው ሺጚ እያይ?¹²እሺዻ እን ኣኔን ዾዮክ እን ጃኮጝ ዹዋልሼባ እየው፤ ኦልማ ታቺ፤ ኣሽክቴ ኣምባ ኦይን።¹³እንግንዻ ኬእያይ ኢየሱስ ሜይሼ እንግን ማቲዬ ጌያ፤ ቶንቶሮካ ፋሲካዻ ጋሽክያ ኦይን።¹⁴ዋዳ ኔኒ ሄክሼዻ ኢየሱስ ከውር ታጵ ላማን ቆባ ኬጋጝ።¹⁵ዋይሼ እንግን እያጝ፤ ኬኦካ ሌሜን ካጋሎ ጌዬን ናኒ ፋሲካጝ ኬእየው ኣሜን ካሎን ሃኣኒ ኣንጊርዽዬ፤¹⁶ሃዋይሼባ እየው፤ ከኦካ ጌጳሞካ ባሪዮ ሌይ ሃም ሹቦካ ክያጃጝ ካሙኒኖጝ ፋሲካጝ ሃኣምኬን ከእየው እንቃ።¹⁷ቦው ኒያቡዬ ይሁሺኖጝ ጩዋ ዋይሼ እንግን ይዕጝ እየው ፓይላ ካሺሜንባ።¹⁸ሃዋይሼባ እየው፤ ካርሲ ኬጋኔ ሌይ ሃም ጌጳሞካ ባሪዮ ካኩዋዎጝ ካርቡካሻሩጝ ሃማቲኬን።¹⁹ቲት ባላሻዬ ይሁሼኔ፤ ጩኬ ኣያ እንግን፤ ሺጝ ይጝ ናንዳካ እየው ካኣይኖጝ ሃኣሩጝ ናኒ፤ ይጝ ሻምባ ካኣን ቃቢዬን።²⁰ኬእያይዻ ከምሽካ ቃይ ጩዋ ቲት ኒያቡዬ ዋይሼ እንግን እያጝ፤ ይጝ ናንዳካ እየው ኬኦካ ኒያቡ እጝ ናኒ ሺጝ እርኔን ካኣሽክዮጝ ሃክያጃ ሃሊ።²¹ኣይባዬ ቡዋካ ውር እን ሳስክዬ ኣዬን ኣን ኣኔባ ኬኣን ኦጝ ሃቆብቶጝ።²²ሃንታካ ውር ኬእያይ ቱሙዮጝ ሌሜ ኩይባ፤ ኣይባዬ ናንዳካ ውር እጝ ሳስክዬ ኣዬን እሹጝ ሃይ።²³እንግንዻ ኬኦካ ጫቃን ጊዬይ ሺጝ ውር እጝ ኣሽኪ ይጝ ኣዬ ኒን ²⁴ፕር ከኦካ ጫቃን ጊዬይ ሳጊ ኣዬ ኒን ኬታይ ጊዬይ ዜርማ ናሹጛ።²⁵ኢየሱስዻ ዋይሼ እንግን እያጝ፤ ቢታካ ዛርሲ ኡዋሩጝባ ዛርሲ ኬቁዋቂቲ፤ ኦጊዬይ ጌጳሞ ኣኔኬን ሺጝ ሃውር ጊታኬና ኣሽኪኒ ክያጃ ሹቃዬ ሺውባ።²⁶ዬ ኬታይ ጉዩ ካማር እያይ ኣዬን፤ ሳጊ ኬኦጉዩ እን ኣይ ታቹጝ ካማቲኬ ሃንታ፤ እጝ ጌጳሲዮጝ ካማቲኬ ውርካ ዋድማ።²⁷ኣይባዬ፤ ኬኦካ ጊታጝ ቆቢ ኬኣኔ ኬዾሬ ቾቺንሺዬን ሃኒን ካሳጊዩጝ? ማር ጊታጝ ቆቢ ኬኣኔኒ? ዬ ኣን ሃኣኒኔ ኦካ ጫቃን ጉዩ ሃኣይኬ ውርካ ዋድማ።²⁸እየውዻ የጌያኬን ኬኦናኒ ዋናዬ ኬሹካ ጋሎ ናኒ ዬኣያ ጊታኬና ጎሪ ቆጩር ናኒ ክያኒ፤²⁹ባባ ኬእያይ ጌጳሲዬ ኣን ኣንዻ ከጌጳሞ ናኒ ፕር ሃጌጳሲ እየውባ፤³⁰ይጝዳ ኬጌጳሞ ከቆብቴዬ ኣምንቴዬ ማቲንቴዬ ፕር ኬቆብቴ ፎላ ዾዮኬ ከኮምቴ ፔንካ እስራኤል ታጲ ላማኔ ጊያ።³¹ፕር ኢየሱስ ሺጝ እያጝ፤ ስምዖን፤ ስምዖን ዮ፤ እጁጝ ይወና እየው ከስንዲ ቡቡንሲዬን፤³²ዬ እን ይሁኔን ኑኑ ካማር ካይዬኔ ናንዳካ እን ይሁንቴባ፤ እንዻ ሹካጝ የዋኮጝ ቁዋቅትሺሽባ ጪኒጌን ኑኑ።³³ስምዖንዻ ሺጝ፤ «ታቹጝ ዮ፤ ኣን ኬእን ሃምካ ቶኦካ ቁሜን ሁሉኬንዻ፤ ናንዳካ ኣርሼንዻ ሃኣይ ሼኪሚ»³⁴ኢየሱስዻ ሺጝ፤ ጴጥሮስ ዮ፤ ሹጝ ባቻ ካኒ ኬይኬኔ ሃዋይሼባ እን የሺጚ ሃእባጅኬኔ ዬቡድያምባ ክያጝ ጅያን።³⁵ጩዋ ሹ እጝ ኢየሱስ ይዕሲዬ እንግን ማም ካንካልዻ ኣኔኬኔ፤ ኮንሽዻ ኣኔኬኔ፤ ቻውዻ ኣኔኬኔ ይዕሲዬ እንግኑጝ ኣኔ ኦኬና ጆጊ? ሺጝ እያይኔ ኣንሻ እንግን። እንግንዻ ሺጝ ኦኬ ክየምጵንዻ ካኒ ጆጊኬን።³⁶ኢየሱስዻ ዋይሼ እንግን እያጝ፤ ዬጋን እን ኣኔ ካንካል፣ እን ኣኔ ኮንሽ ካጎምባ፤ እን ማር ኤቤል ኣኔን ካኡዋሩጙሽ ኣፓላዬ ካኡዋሩጝጋ።³⁷ሃዋይሼባ እየው፤ ኬእያይ ሺጜ ኮማ ኬውርካ ሴሶ፤ ሺጜ እያይኔ ቶኮጝ ኬኣን ሙኒኔን ኣኔባ፤ ናንዳካ ኣን እጝ ቶኮጝ ሙኒኔን ኔኒ ኬኣኩሉክ ሄክሻ።³⁸ውር ጊታይ ዻዬ ጆሌ እሹጝ ሺጝ፤ ታቹጝ ጉዋይ ዮ፤ እየዎ ኤቤል ዻ ሃጊታጝ ኦጝ ኣኔባ፤ እሺዻ ዋይሼ እንግን ሃሊኪ።ኢየሱስ ይወና ኦካ ጋግካ ደብር ዛይት³⁹ኢየሱስ ኬእያኑጝ ዱሲዮጝ ቱሌ ኩያ ሃምካ ጋግካ ዳብር ዛይት፤ ውር ጊታይ ዻዬ ጆሌ እሹጝ ዻዬያ እሺ።⁴⁰ሹ እን ሄክሼ ኦይን ዋይሼ እንግን ከኦይዲ ጋሎ ክያኒ ሁሊኬኔ ይወንባ።⁴¹ኬኦጊዬይዻ ባይ ባኬን ካሎን ዹካቲሼ ቶኬ ኩዋሚኔ ይወና፤ ⁴²ሺጝ እያጝ፤ ባባ ዮ፤ ሃኬ ክያጃ ኑኑያጝ፤ ኒያቡጝ ቦባ ኬኦናኒ፤ ኣይባዬ ካማርኬ ክያጃ ናኒ ኣዬኔ ኬክያጃ ኑኑ ካሙኒንቴባ።⁴³ውርካ ኤርጎካ ባሪዮ ዹዋልሼ እሹጝ ቁዋቅትሻ።⁴⁴ካሎን ኣኔን ሪጊሺኔ ቁዋቅትሼ ይሁኔኔ፤ ኡሱማዻ⁴⁵ናሹጝ ኬሃምካ ይሁኔኔ ኩያ ሃምካ ውር ጊታይ ዻዬ ጆሌ እሹጝ፤ እንግንዻ እን ናሹጝ ኬሞይካዾጝ ራጴ ጌይ እንግኔ፤⁴⁶ዋይሼ እንግን የራጳ ናንዳካ ኦ? ኬማር ሃምካ ጋሎ ሻወኔ ናሹጜ ይወንባ።ጎማ ኢየሱስ⁴⁷እሺዻ ካኒ ኣኔንባ ሃሳውኔኔ፤ ውር ጁዋኑ ፓዬና፤ ከኦካ ውር ታጵላማን ውር ክየም እጝ ሺጜ ይሁዳጝ ኣን እንግን እያንሼን፤⁴⁸ዬ ኢየሱስ ሺጝ፤ ይሁዳ ዮ፤ ሃንታካ ውር ኬሹንቄን የሳስክዬ ኣዬምባይ?⁴⁹ውር ጊታይ ኣኔን ኦካ ቆጩር ካእየሱስ ጌይ ክያጃ እጜ «ሺጝ ታቹጝ ዮ፤ ካቆዋይ እንግን ኬኤቤል?⁵⁰ኬኦጊዬይ ክየም ቆወ ቃጫ ናቡ ቡዎን ካውርካ ዋድማካ ውርካ ቃሽ።⁵¹ዬ ኢየሱስ ሺጝ ኦይድባ፤ ኦይን ሄክሼ ኦጝ ክያጃ ኔኒ ኣኔባ፤ የዱም ናቡካ ውር እጜ ባይሺሻ።⁵²ጩዋ ኢየሱስ ዋይሼ ውር ጊታይ ፓዬን እሺ ጎሜን፤ ታታቺካ ውርካ ቃሼ ውር ጊታይ ጌጳሲዬ ኦካ ቶኦካ ይሁኔኔ ውር ጌቿኔ እያጝ ኬኦኮኑጝ የፓይንቴ ጎርጉ ጎሜን የቦዋ ኤቤሌ ካያዬ የፓይናያይ?⁵³ሹጮል ኬሹ ጊታይ ሃኣኒኔ ኬእየው ኦካ ቶኦካ ይሁኔን የካኔ ቲትቴኬኒ ኣን ቡዋ፤ የይጝ ሃሹ እጝ ሚክር ጌጳዽሼ እየው።ጴጥሮስ ቡድያ ኢየሱስ⁵⁴ኬኦይን ጩዋ ጎም ኢየሱሴ ቦፓዬያ፤ ፓዬ ዾቅሼያ ኦካ ጶሮካ ውር ታቺ እንካ ውርካ ቃሹጝ፤ ጴጥሮስዻ ኣኔን ኬዹክ ዻዬን።⁵⁵ውርዻ ኡዋጝ ጉ ኦካ ጶሮክ ካውር ታቺ እንካ ውርካ ቃሼ ኣኔባ ኬጋጝ ቁቤኔ፤ ጴጥሮስዻ ኣኔባ ኬእንግን ኡፔ።⁵⁶ኝያ ክየም ካዋድማካ ቶኦ ጌይ ጴጥሮስ ኦካ ማራካ ጉዌ ሁቡኔ ቶይ እሺዬ ሺጝ ውሩጝዻ ፕር ኣኔንኬ እሺ» ⁵⁷ዬ እሺዻ ሺጝ እን ኝያጝ ኣን ሃእባጅኬኔ ቡድያ። ⁵⁸ቆቤ ዽታኬ ጩዋ ውር እንቃ ክየም ጌይ እሺዬ ሺጝ እንዻ የኣይኬ እሺ? የጴጥሮስ ሺጝ እን ውሩጝ ማር ኣኔን።⁵⁹ቆቤ ፕር ዽታኬ ዋዳክየም ውር እንቃ ክየም ሺጝ ውሩጝ ከኣኩሉክ ናንዳካጝ ኣዬ ውርካ ገሊላጝ ቃጊማዻ ኣኔኬኔ ኣኒኔ ጋይኬ ጋጝ።⁶⁰ዬ ጴጥሮስ ሺጝ እን ውሩጝ፤ እጜ ሃሳወ ኣን ሃእባጅኬን፤ ካኒሃሳዌ ሹዋጵኬን እጜ ባቻ ኬያ።⁶¹ታቺ እን ሁቤኔ ቶያ ጴጥሮስ፤ ጴጥሮስዻ እን ታቺ እጝ ሺጜ ሹጝ ካኒ ባቻ ኬይኬኔ የቡድያምባ ክያጝ ጅያን ጌያ ጶቅ።⁶²ጴጥሮስዻ ቱል ሹኑኬ ካሎን ኦቆራ።ፓፃኗን ጎልቲያ ኢየሱስ⁶³ውር ጊታና ቁም ኢየሱሴ ኣኒኒ ቶዬን ካርሲያ ሙሬኔ ኦልቲዬኔ፤⁶⁴ጂጝ ካርቡ ኔኒዬ ሺጝ ይንዳ ሃሳውየ ክያጃ ሙሪ እን ሃኒን? ሺጝ እያይኔ ጋኔን ኣንሺኔን።⁶⁵ዶክ ሃሳው ክያጃ ጁዋኑካ ይሪኔኔ የጋኔ እሺ ሆርጊኔን።ኢየሱስ ከኦካ ሌሜንካ ጲላጦሴ ሄሮድሴ⁶⁶ሹ እጝ ሃሪሾጝ፤ ጌቾ ጌቿንካ ዛርሲዬ፤ ታታቻንካ ውርካ ቃሼ ውር ጊታይ ቶክኔ ጆል ወርቀቴ ፑኡሺሜኔ፤ ቦሼያ ኢየሱስ ሃምካ ሌሜንካ ካራም ጊዬዩጝ።⁶⁷እንግንዻ ሺጝ እን የኣይ ክርስቶሲ? ይንዳ ሜይሼየ ኡዋው፤ ኢየሱስዻ ሺጝ ሃሜይሼያ እየውዻያጝ የጉምቴኬን ኣን።⁶⁸ሃኣንሺያ እየውዻያጝ የዋሺቴኬን ኣን።⁶⁹ኣይባዬ ካርሲኬ ጋኔ ሃንታካ ውር ኡፓ ኦካ ቡዋካ ባሪዮ ቡዎን።⁷⁰ከሹ እጝ እንግን ፓይላ ሺጝ፤ ዬእን የኣይ ውዋካ ባሪዮይ? እሺዻ ሺጝ ይንጌ ኣዬን ናኒ እየው ዬክያጃያ።⁷¹እንግንዻ ሺጝ ከኦጝ እንቃ ዎሺሻ ኡዋው ማኝካ ኦ? ኡዋዻ እን ቱልኬ ቶግ ኔኑጝ ሃዋያያ።

ሃፑክ 23¹ጊታይ ፑጪ ኦይን ፓይላ ናሹጜ ቦሼያ ኢየሱስ ሃምካ ጲላጦስ፤²ሺጝ እያጜ ካርሲያ ካሲሲዬን፤ ውሩጝ ጊያሚሺሻ ዛርሲ ጉዋዩ፤ ካቡልሼ ቄሳር ጊቢሪያጝ ሃርጊኔዬ፤ ፕር ሺጝ ኣን ሃኣይ ክርስቶስ ቢቲዬ ሃጌያያ።³ጲላጦስዻ ሺጝ የኣይ ቢቲካ ኣይሁዲ? ሺጝ እያይኔ ኣንሼና። ኢየሱስዻ ሺጝ ኬእያይ የሺጞጝ።⁴ጲላጦስዻ ዋይሽ ታታቻንካ ቢታኔ ዛርሲዬ «ኣን ኦካ ውሩጝ ሴሶ ክየምጵንዻ ኬና ሃጌዬ ኣኔኬን።⁵ዬ እንግን ሺጝ ውሩጝ ካርሲኬ ገሊላዬ ሌይ ኦጝካ ውርካ ይሁዳዻ ሺዽኬኔ ፑኡሺያ ሺጝ እያይኔ ቁዋቅቲሼ ሃሳዋ።⁶ጴላጦስ ዋዬ እጝ ኣዬ ውርካ ገሊላጝ ኣንሼና ካእባጄን፤⁷ኢየሱስ ኩኔኬ ሃምካ ውርካ ሄሮድስ ሹ እጝ እባጆጝ፤ ሄሮድስ ኬክያጝካ ሹ እጝ ናንዳካጝ ኣኒኔ ኢየሩሳሌሙጝ ይዕሲሼያ ሃም ኔኑጝ።⁸ሄሮድስዻ ሹ ጁዋኑ ናንዳካጝ ዎሼ ኢየሱስ ጌዬኑጝ፤ ሹ እን ጌዮጝ ካሎን ዋዝንዽያ፤ ክያጃ ኔኒ ናንዳካጝ ዋዮጝ፤ ኣሽኪ ኦኬ ሹቃያጝ ጌዬን ኣኔን ቃቢዬን።⁹ኣንሻ እሺ ክያጃ ጁዋኑዻ፤ ዬ እሺ ክየምጵንዻ ካኒ ዋሽኬን።¹⁰ታታቻንካ ቢቲዬ ውር ጊታይ ቶክኔ ጆል ወርቀቴ ጎር ኦይኔ ጋኔን እሺ ሴሶ ክያኒ ዋሼን።¹¹ሄሮድስዻ ጋይኬ ፓፃኗኔ ቦውያ፤ ጎልቲያዻ፤ ኪሚሼ ኣፓላካ ጌጳሞዻዬ ዋሼ ይዕሲሼያ ሃምካ ጲላጦስ።¹²ሄሮድሴ ጲላጦሴ ኬሹ እጝ ናሺያ ጋጝ፤ ዬ እባኬሌሜን ኦካ ጫቃን ጊዬይ ኣኔ ጎሬን።¹³ጲላጦስዻ ፑኡሺ ታታቻንካ ውርካ ቃሼ፤ ታታቺካ ፔኔ ዛርሲዬ ክየምጵኔ፤¹⁴ዋይሼ እንግን እያጝ፤ ውሩጝ የሺጛ ቲቲሼያ ዛርሲ ሃምካ ሴሶዬ የቦፓይንቴያይ ዮጝ ናኑጝ፤ ኣንዻ ከኦካ ሌሜን ጉዩ ሃቃብዬ ከኦካ ካሲሲኔን እን የቦፓይንቴ ሴሶ ክየምጵንዻ ሃካና ጌይኬን።¹⁵ፕር ሄሮድስ ማሬ ኦኬ ክየምጵንዻ ጌዬን ዋሼያ ዮጝ ጉዋዩጝ፤ ከእያጝ የቶይቶጝ ውሩጝ ካሄክሼ ሃምካ ኣርሼን ኦኬ ክየምጵንዻ ካኒ ሙንኬን፤¹⁶ዬ ሃጋልንሺያ ሃቡልባ።¹⁷እጝ ሺጜ እያይ ኬቶንቶሮ ውርካ ቁሜን ክየም ኬጊዲ ካቡልሼ እንግን ሃናንዳካጝ ዎሺሾጝ።¹⁸ዛርሲዻ ፓይላ ኬጋጝ ጎር ሹኑኬ ሺጜን ውሩጝ ቡሊቴ ዮጝ ቡልቴ ኦዋው ባርባን ሺጝ እያይኔ ጋኔን ኡቹኬን፤¹⁹ባርባንዻ ኬከተማ ቱዎጝ ሃኬና ቲቲሼ ዛርሲ ሃምካ ሴሶዬ ሃውር ኬና ኒሺኒ ውሬ ቁሜ።²⁰ጲላጦስዻ ናንዳካጝ ዎሼ ኢየሱስ ቡሌኑጝ ፕር ሜይሼያ እንግን እንቃ፤²¹ዬ እንግን ሺጜን ሮይባ ሮይባዬ ጋኔን ኡቹኬን።²²ጲላጦስዻ ኬክያጝካ እንካ ማክንሳጝ ሺጝ ናንዳካ ኦ? ውሩጝ ሴሶ ኬና ኣሽክዬ ኣኔይ? እንካ ሄክሺሽ ሃምካ ኣርሼን ሴሶ ክየምጵንዻ ኣን ሃካና ጌይኬን፤ ዋይሼ እንግን ሃጋልንሺያ ቡልባ።²³እንግንዻ ሻም ናቂዲ ጊዬይ ዼጌ ካሮዮጝ ካሎን ይወና፤ ኡቹካ ጊዬይዻ ጁዋንቲሻ።²⁴ዬ እን ጋንሺኔ ካሙኖጝ ጲላጦስ ክያጃ ቱሚዬን ኔኒ።²⁵ጊታይ ቲቲሼ ዛርሲ ሴሶ ክያኒዬ ኒሺ ውሬ ቁሜ ኣኖጝ፤ ካቡልሼ እንግን ፓዬ ይሁኖጝ ቡልሼ እንግን ሃውር እንካም፤ ዬናንዳካጝ ዎሼ ኢየሱሱጝ እያይ ካሻሞጝ ሳስክዬ ኣያ እንግን።ሮዬንካ ኢየሱስ²⁶ጎሜ ኢየሱሴ ቦፓዮጝ ጌይ ውር ኬና ሺጜ ስምዖን ውርካ ቀሬና ኩንኬ ጶሮክ ጊታይ ኣኔን ኬኦካ ከተማ ዹኬ፤ ጌዬ ዼትሽ ሻሪ እንካ ሮይኔን ካዻዬ ኢየሱሴ ካካምባዬ ሻማ እሺ ጊዲጊዲ።²⁷ዛርሲ ጁዋኑዬ ሃኣጚ ጊታኬና ዻሼን ቋቁም ጊዬይዬ ኣኔን ኦቆርኔን ጋን ኬውር ጊዬይ ዻዬን።²⁸ዬ ኢየሱስ ሁቤን ሃምን ጊዬይዬ ዋይሼ እንግን እያጝ፤ እየው ሃኣጚ ጊታጝካ ኢየሩሳሌም ኦቆርቴ እየው ኤታጋኔ ሃንታ ጉዩዬ ዬ ኦይድ ናንዳካ ኣን ኦቆርቴን፤²⁹እየዎ፤ ሴኳኔ ፒሲ ጊታይ ማሪ ጅሺኔኔ፤ ጊታይ ማሪ ሁቴ ጊዬይ ኡዋኔን ጋይ ጫንቃን ሹ እን ኬኣሁሺንቴ ኩንባዬ።³⁰ኬሹ እጝ ሺጝባ«ጋግ ቡድሼያ ኡዋው ጉርባዻ ራሼና ናንዳካ ኡዋው»።³¹ኣኪ ኬሻሪ ቁላ ሻማ እያጝያጝ፤ ኬቁዋቃካ ካሻም ኦ?»³²ውርካ ሴሶ እንቃዻ ካኒሼ ኬጋጝ ጎሜ ቦፓይኔያ።³³ሹ እጝ ሄክሼ ፔን እን ሺጜ ቀራኒዮ ሮያ። ጊታይ ካሴሶዳ ክየም ሻሚሼ ቡዎን ኑዋ ሻሚሼ ዋርካታዬ ሮያ።³⁴ኢየሱስዻ ሺጝ ባባዮ፤ ጊታጝ ሻሚ እያጝ ጊባጅኬኔ ጊያ ሺዕሺሼ እንግንባ። እንግን ሃዽሽ ኣፓላዬ ካሺሜና።³⁵ዛርሲዻ ኣኔን ጎሬ ቶዬን። ውር ታታቻን ካፔንዻ ሺጝ« ባይሺሽባ ዶክ ይንዳ ሃክርስቶስ እጝ ጊድዬ ኬኦካ ባሪዮያጝ ካባይሺሽ እሺ ኤምኑ፤ ሺጝ እያይኔ ጋኔን ኦልቲዬን።³⁶ፓፃኗንዻ ፓዬኔ ጋኔን ኦልቲዬን፤ ጋይ ኣላላካ ካርቡካ ሻሪዬ፤³⁷ሺጜን፣ ዬኣይ ቢቲካ ኣይሁድያጝ ባይሺሽባ እን ኤምኑ።³⁸ኬኦካ ሹቦ ኔኒ ዾዮክዻ ኣና ኦኬና ቶኬ ሺጜ ይጛ ቢቲካ ኣይሁድ።³⁹ኬኦካ ጊታይካ ሴሶ ሮዮጝ ክየም ሃሳው ሃሳዋካ ይሪኔኔ ሺጝ እን የማር ክርስቶሴን ሺጜን ይንዳ ባይሺሽየ እን ኤምኑዬ ኡዋዌ።⁴⁰ዬእንካ ሴሶ ኑዋ ሺጝ እያጜ ጎሪያ እሺ፤ የኣኔንባ ኦካ ኮምሼን ክየሜ፤ እን የሪግሼንኬን ባሪዮ?⁴¹ኡዋው ናንዳካ ኦይን ሃኣሽኪቶጝ ጋሎ ጌዬን ናንዳካጝ ኣኖጝ፤ ሃኣኒና ኦካ ኮሚሼንካ ኣኩሉክ፤ ዬ ውሩጝ ክያጃ ጋራ ክየምጵንዻ ካኒ ኣሽኪኬን።⁴²ፕር ሺጝ ኢየሱስ ዮ፤ ሹካጝ የኩኔኬ ጌጳሞጝ ቃብያንባ።⁴³ኢየሱስዻ ሺጝ ሃዋይሼባ እን ኣኩሉክ ሹጝ ኬኣን የኡፊፓ ሃም ኣይ ሺሙጝ።ኣርሼንካ ኢየሱስ⁴⁴ሹሽዻ ሃሳዓት ላ፤ ሌይ ሃምካ ሄክሼ ሳዓት ሳሉጝ ዳሉጝ ክያኒ ማቲያ ሚክር፤⁴⁵ሜሌል ኣዬንካ ሹሽ ሃርጌያዬ ናዻራካ ኣፓላካ ቶኦካ ይሁኔን ሃዽሼኔ ካሺሜና ክያጝ ዻ።⁴⁶ኢየሱስዳ ኡቹክ ኬናቂዲ ታቺዬ ሺጝ ባባዮ ኡሱጝ ናኑጝ ሃኣይያ ቡዋ ኑኑ/ ሺጜ እያይ ኣርሻ።⁴⁷ታቺ እንካ ውር ዽባን ጌዬ ዳቢ እጝ ሙኔን፤ ሺጝ ውሩጝ ኬኣኩሉክ ሃጫንቃሌ ጌጳሲያ ባሪዮ።⁴⁸ውር ጊታይ ኣኔን ኦካ ክራ እጝ ፓይላ እን ሙኔን ቶዬን ፑኡሽሜኔ ሹ እጝ ጌዮጝ ዻሽ ቋቁም ጊዬይዬ ዋካ።⁴⁹ኣይባዬ ጊታይ እባጂ ኢየሱስ ኬድያው ፓይላ ፕር ካርሲ ከገሊላዬ ሃኣጚ ጊታይ ዻዮክ ቶዬን እጜ ጎራ ኬዱክቱቱኬንካ ኢየሱስ⁵⁰ከታታቻንካ ኣይሁድ ኣና ውር ክየም ኬና ኣይ ሹቃዬ ኣይ ጫንቃል ኬና ሺጜ ዮሴፍ።⁵¹ውር እንዻ ኬኪሊማ እንካ ካራሜ ኣሽክዬን ኔኒዬ ካኒ ዎሩሜንኬን። እሺዻ ኣዬ ውርካ ከተማካ ኣይሁድ እጝ ሺጜ ኣርማቲያስ ኩኔንካ ጌጳሞካ ባሪዮ ኣኔን ካሊዬን።⁵²ውሩጝዻ ኩይ ሃምካ ጲላጦሴ ይወና ሩዋካ ኢየሱስ፤⁵³ሹ እጝ ጋዬ እሹጝ፤ ሃቺሺ ሩዋ ኔኒዬ ሳርኬ ኣፓላዬ ኣጁጛ ኦካ ሌሲ እጝ ቆዴ ባይ ክያንዬ ካኒ ማሬ ውር ቱቱኬን።⁵⁴ሹ እንዻ ሃሹካ ሼክዬን፤ ሹእንካ ሶጵሳ ኣን ሄክሴን።⁵⁵ካርሲኬ ገሊላዬ ሃኣጚ ጊታይ ፓዬን ከኢየሱሱጝ ዻዬ ፓዬ ቶያ ቱቱኬን ኔኒ፤ ሻም እያን ጋጁጜ ሩዋ ኔኑጝ ቶያ።⁵⁶ጩዋ ዋኬ ጋሽክያ ጋሙሬዬ ቦዽዬ፤ ከክያጃ እጝ ክያጆጝ ከሹ እንካ ሶጵሳ ቦዋ ኡሲ።

ሃፑክ 24ናሹጜንካ ኢየሱስ¹ኬሳምንት ሹ እንካ ሌሜን ሃኣጚ ቦው ጋሙሬ ጋማ እጝ ጋሽክዬ፤ ካሎን ካና ካሪንታዬ ፓያ ሃምካ ሌሱጝ።²ባይዻ ኬኦይንካ ቶካሌሲ ኬሌኔ ጌያ፤³ሹ እጝ ጉኬ ሻዌ ቱዎጝ ካኒ ጌይኬን ሩዋካ ኢየሱስ ታቺ እጝ።⁴ናንዳካ ዳቢ እጝ ጋኔንባ ካቢኔኔ፤ እየዎ፤ውር ዻ ጊታኬና ኪሚ ኣፓላ ኬና ካሎን ቶኪ ካርቡዬ ሉ ጊጉድ ጎራ ኦካ ቆጩር ጊዬይ።⁵ሃኣጛንዻ እን ናሹጝ ኬሪጊ ጊዬዩጝ ጋንባ ማሪ ጊዬይ ዱቡ ሁቡሼኔ፤ ውር ጊታይዻ ዋይሼ እንግን እያጝ፤ እን ኣይ እያይ ሃኦ የዎሽቴ እሺ ኦካ ኣርሼኑጝ?⁶እሺ ናሹጛ/ ኣኔኬን ኦጝ፤ ፕር ከሹ ጊታባ ኣኒኔ ገሊላ ኦይን ሜይሼ እየው ሃኦ ጶቅስባ፤⁷ሃንታካ ውር ካሳስክያ ጋዬ ቡዋካ ውርካ ሴሶዬ ካሮዬዬ ከሹ እንካ ማክንሳ ካናሹጜ ኣኔባ፤ ሺጝ እያይኔ ክያጃ።⁸ሃኣጛንዻ ኬሹ እጝ ጶቅስያ ክያጃ እጝ።⁹ሃኣጚ ጊታይዻ ዋክ ኬኦይካ ሌሲዬ ክያጃ ጊታይ ፓይላ ሜይሼያ ውር ታጲ ካላኔ ጊታይ ሺዺ ኦይኔ።¹⁰ኦጊታይ ፓዬ ሜይሼ ውር ጊታይ ዻዬ ጆሌ እሹጝ፤ ሃእጝ ሺጜ መግደላዊ ማርያሜ፣ ዮሐናዬ፣ ጁዋኔካ ያዕቆብ ማርያሜ፣ ሃኣጚ እንቃ ጊታይ ጋዬ ኬጋጜ።¹¹ዬ እንግን ክያጃ ጊታይ ሃኣጛን ሃሳዎጝ ናንዳካጝ ዋሼኬ ሱድማጝ ካኒ ጎምኬን። ¹²ዬ ጴጥሮስ ናሹጜ ሪሼ ኩያ ሃምካ ሌሱጝ፤ ሄክሽ ኦይዻዬ ጌይ ኩፔ ቶይቱዎጝያ፤ ኦግታይ ጅጜ እሹጝ ኦይን ቆብሾጝ ቆብ እንግንጵኔ ጌያ፤ ኬኦይን ሙኔን ዻዹኔዬ ዋካ ሃምካ ቶኦ ኔኑጝ።ኬኦካ ጉዋርካ ኤማሁስ¹³ኬሹ እጝ ኬኦካ ውር ታጲ ላማ ጊታይ ዻዬ ጆሌ እሹጝ ውር ዻ ፓይ ጉዋር ኬና ከኢየሩሳሌም ዹካትሽ ኪሎ ሚትር ታጲ ካላ ፓይ ፔን ኬና ሺጜ ኤማሁስ።¹⁴እንግን ናንዳካ ክያጃ እጝ ሙኔን ጋንኬ ጋጝ ሃሳውኔን።¹⁵ጋኔንባ ሃሳውኔኔ ጉባይኔኔ እሺ ኢየሱስ ኩኔ ካርሲያ ኬእንግን ኩዬን፤¹⁶ኣይባዬ ካማር እሺ እባጄኔ ጎምሽ ካርቡ ጊዬይዬ ጊያ።¹⁷እሺዻ ዋይሼ እንግን የኣኒናባ ኬጉዋር ፓዬኔ ሃኦ የጉባይንቶጝ? እንግንዻ ሞይካዽዬ ጎራ።¹⁸ኬእንግንዻ ውር ክየም ኬና ሺጜ ቀላዮጳ ዋይሼ እሺ «ኬሹ እጝ ክያጃ እጝ ሙኔን ኢየሩሳሌም ኦጝ ካማር እባጄን ሃእንጵኒ ኣይ ኮመና ካፔኑጝ?¹⁹እሺዻ ዋይሼ እንግን ኦይን ሙኔን ኦጝ ሃኦ? እንግንዻ ሺጝ እጝ ኬኦካ ሌሜንካ ባሪዮዬ ካውሬ እን ኬዋድማዬ ክያጃዬ ኣይ ቁዋቃጝ ውር እን ኣይካ ባሪዮ ሃኢየሱስ እንካ ናዝሬቱጝ፤²⁰ታታቻንካ ቢቲዬ ታታቻንካ ፔን ጉዋዩዬ ሳስክዬ ጋዬና እሺ ሃምካ²¹ዬ ኡዋው ሃሺጝቴ ዻሺባ ውርካ እስራኤሌ ሃቃቢያ ቆብቴ ሃእሺ፤ ከፓይላ ሳጊ ፕር፤ ዳቡጝ ሙኔኔ ኬሹጝ ሃሹ ጅያን።²²ፕር ኬኦካ ጫቃን ጉዋዩ ሃኣጚ ክየም ክየም ሃዻዹጙንቴያ፤ እንግንዻ ኬካሪንታ ጋኔን ሃምካ ሌሲ ፓዬኔ፤²³ሹ እጝ ማሬ ሩዋ ኔኒ ጌዬኑጝ፤ ፓዬኔ እን ኡፔኬ ካርቡጝ ጊታይ ውርካ ኤርጎካ ባሪዮ ሜይሼ እንግን ጌዬ ፓዬኔ ሜይሼያ ኡዋው።²⁴ኬኦጉዋይዻ ውር ክየም ክየም ፓይ ሃምካ ሌሲዬ፤ ኬእያይ ሃኣጛን ክያጆጝ ማቲዬ ጌያ፤ ዬ ካኒ ጌይኬን እሺ።²⁵እሺዻ ዋይሼ እንግን እያጝ፤ እየው ውር ጊታጝ ማር ኦኬ ጶቅሲዬኑጝ፤ ሸን ጉዩዻ ከጊታይ ውርካ ባሪዮ ክያጆጝ ኡፔንኬ ኒን፤²⁶ክርስቶስ ካጌዬ ጋሎጜ ካሁሉኬ ሃምካ ጌጳሞ ሁሉኩሼኬኒ?²⁷ካርሲ ኬሙሴዬ ውርካ ባሪዮዬ ፓይላ ናምዳካ እሺ እጝ ቶኬ ከወርቀትካ ውርካ ባሪዮ ሜይሼያ እንግን።²⁸ፓዬ ሄክሼ ኦካ ፔን እጝ ፓይሾጝ ዋሽኬ ኦኮኑጝ ኢየሱስ ካሳጊያ ካሞጝ።²⁹ዬ እንግንዻ ሺጝ፤ ምክር ኣኔን ሄክሼን ሹሽዻ ናንዳካጝ ሺጜ ቃይትሼኑጝ ሺጝ ኡጝጋ ኬኡዋዌ ካሎን ይወና፤ የሁሉካ ከእንግንዻ ኡጜን።³⁰ሹ እጝ ቆቤ ኬጋጝ ካራም ክያኑጝ ቲት ባላሻዬ ኡዋና፤ ጩክዻዬ ኣያ እንግን።³¹ኬሹ እጝ ካርቡ ጊዬይ ፎቺሜና፤ ጊባጃ እሺዻ፤ እሺዻ ኩያ ኬኦጊዬይ።³²እንግንዻ ሺጝ፤ ሃኣኒናባ ኬጉዋሬ ሃሳውኔ ክያጃ ወርቀትካ ውርካ ባሪዮዬ ሜይሺኒን ኡዋያጝ ሸን ጉዋዩ ካኒ ሪግሼንኬን ሺጝ እያይኔ ሃሳወና።³³ከሹ ናሹጜ ዋክሼያ እያጝካ ኢየሩሳሌም፤ ውር ታጲ ካላኔ ውር ጊታይ ጋዬ ኬጋጜ ፑጪ ኬጋጝ ክየምጵን ሃምኔ ጌያ፤³⁴እንግንዻ ሺጝ ታቺ እጝ ኬኣኩሉክ ናሹጛ/ ስምዖን ጌያ ሺጝ እያይኔ ሃሳወና።³⁵ከኦካ ውር ጊታይ ዻዬ ጆሌ እሺ ዻዋን ኦይሙኔን ጉዋር ክያኒዬ ሹ እጝ ኢየሱስ ጩኬ ባላሻዬ ሻም እያን ጊባጆጝ ሜይሼያ እንግን።ኢየሱስ ዹዋልሼያ ውር ጊታይ ዻዬ ጆሌ እሹጝ³⁶ጋኔንባ ክያጃ እጝ ሃሳውኔኔ እሺ ኢየሱስ ዾራ ጫቃን ጊዬይ፤ ዋይሼ እንግን ሹቃ ካኣይሼ እየው።³⁷ዬእንግንዻ ቴርጋዽዬ ሪግሼና፤ ዋሽኬ ኦኮኑጝ ጌዬ ኡሲካ ባሪዮዬ።³⁸እሺዻ ዋይሼ እንግን የሪግሺና ናንዳካ ኦ? ሃናንዳካ ኦ ዬኣጅጝቴ ቃግማ ሻን ጉዩ ክያኑጝ?³⁹ቶይባ ቡዋ ናኒዬ ጃፔ፤ ሃኣን ናካኑጝ፤ ፕርዻ ዱሜ ቶይ ኣምባ፤ ኬእጝ ዬቶይቴ ኬኣን ኡሲ ኣሩጜ ጊጪዬ ኣኔኬን።⁴⁰ሺጝ እያኔ ዹዋልሼያ እንግን ጃፔ ቡዋዌ።⁴¹እንግንዻ እን ናሹጝ ኬዋዛዬ ዻዹጝኔኑጝ ካኒ ይወንኬኔ፤ ኦካ ራቅ ይጝ ኦኬ ክየምጵንዻ ኬና ኬኣምቴ ኣኔባይ? ዋይሼ እንግን እያይ።⁴²እንግንዻ ኬኦካ ኣርቴ ጊታይ ጉሾጝ ጋያ እሺ ክየም።⁴³እሺዻ ቦወ ኣማ ኦካ ማሪ ጊዬይ።⁴⁴እሺዻ ዋይሼ እንግን፤ ከሹጊታባ ሃኡፑኔ ኬእየው፤ ኬክያጃ ካሙሴዬ፣ ኬክያጃካ ውርካ ባሪዮዬ፣ ኬወርቀትካ ይያሪዬ እን ናንዳካ ኣን ቶኮጝ ፓይላ ካሙኒኖጝ ኣኔባ ሃሺጜ እያይኔ ሃሜይሼ እየው ሃይጝ።⁴⁵ዬ ኬሹ እጝ ከጶቅስቴ ወርቀትካ ውርካ ባሪዮ ሹቦ ጉዩ ቦዋ፤⁴⁶ዋይሼ እንግን እያጝ፤ ሺጝ እያጜ ቶኳ፤ «ክርስቶስ ጌይባ ጋሎ፤ ከሹ እንካ ማክንሳ ናሹጝጋ ኬኣርሼን ክያኒ፤⁴⁷ካርሲ ከእየሩሳሌሜ ናንዳካ ዛርሲ ፓይላ ጫንቃል ሺዕሺዬንካ ሴሶ ኬሮጝ ኔኒ ክልዬምባ።⁴⁸እየውዻ የኣያካ ማኙጝ።⁴⁹ኣንዻ ቃቦ እጝ ባባ ኣዬ ኣን ሃይዕሲሼ እየውባ፤ ዬ እየው ከዾዮክ ሌይ ሃምኬ ጌይቴ ቁዋቂቲ ቆቢባ ኦጝካ ከተማካ ኢየሩሳሌሙጝ።ኩዬንካ ኢየሱስ⁵⁰ከኦይን ጩዋ ቦ እንግኔ ሌይ ኮትሼያ እያንካ ቢታንጝ፤ ቲት ቡዋ ኔኒዬ ኡዋና እንግን።⁵¹ኣኔንባ እንግን ኡዋኔኔ፤ ጌይ ዋናዬ ኩያ እያጝካ ፎላጝ።⁵²እንግንዻ ይወና፤ ኬዋዛ ታቺዻ ዋክሼያ እያጝካ ኢየሩሳሌም።⁵³ጌጳሲ ባሪዮዻዬ ሹጮል ጋኔን ኦካ ቶኦካ ይሁኔን።

ክያጃ ሹቃካ ዮሐንስሃፑክ 1ክያጃ ማቲያ ኣሩጝ¹እባ ከሌሜን ኣና ክያጃ፤ ክያጃዻ ኣኔንኬ ባሪዮ፤ ክያጃዻ ሃባሪዮ።²እሺዻ እባ ከሌሜን ኣኔንኬ ባሪዮ።³ኦኬ ፓይላ ሙና ከእሺ፤ ከኦካ ጊታይ ሙኖጝ ፓይላ ኬና ማሬኬ እሺ ሙኔን ኣኔኬን።⁴ዻቆዻ ኣኔንኬ እሺ፤ ዻቆ እንዻ ሃኦ ሜሌልካ ውር።⁵ኦሜሌልዻ ላሉጝጋ ኦድሙጉ፤ ድሙጉዻ ካኒ ባሺኬን እሺ።⁶ኣና ውር ክየም ኬና ይዕሲዬ ኬሃምካ ባሪዮ ኬና ሺጜ ዮሐንስ፤⁷ውር ፓይላ ካሁቡሼ እሺ ሻን ጊዬዩጝ፤ ማቲ ማኝካ ኦሜሌሌ ኩና ዾሬን፤⁸ኩን ናንዳካ ኦሜሌል ክሊኔን ዬ እሺ ኤምኑ ካኒ ማቲኬን ሜሌል።⁹እንካ ኣይ ውር ፓይላ ኦሜሌል ሜሌልካ ኣኩሉክ ኣኔን ዳሉጝ ክያኒ ኩኔን።¹⁰እሺ ኣኔን ዳሉጝ ክያኒ፤ ፔን ሙኖጝ ኣይኒን ከእሹጝ፤ ፔን ካኒ እባጅኬን እሺ።¹¹ኩን ኦካ ውር ኔኒ፤ ዬ ውራን ኔኒ ካኒ ናሺኬን እሺ፤¹²ናንዳካ ጊታይ ናሺ እሺዬ ጊታይ ይወንኬ ሮጝ ኔኒዬ ፓይላ ዬ ካጋዬ ሃንታካ ባሪዮጝ ኣያ እንግን ኦኬ ፓይላ።¹³ጊታይ ጅሼኬ ባሪዮ ዬ ካኒ ጅሽኬን ከኒያቡ ወይ ከኣሩጝ ወይ ከክያጃካ ጁሙ።¹⁴ክያጃዻ ማቲያ ኣሩጝ፤ ኡጛ ኦካ ጫቃን ጊዬይዻ። ኡዋዻ ቁዋቅሼ ኣይኔኔ ኣኩሉኬ ሃጌያያ ጌጳሞካ ውዋ ክየም እን ኩንኬ ሃምካ ሹኖጝ።¹⁵ዮሐንስዻ ሺጝ፤ እንካ ኩዋውኬ ኦናኒ ማውጝ ናንዳካጝ ኣኒኔ ከኦናኒ ሌሜኑጝ እን ሃሺጜ ሳጊባ ከኦናኒዬ ሃኪሊኖጝ ሃእሺ» ሺጝ እያይኔ ኡቹካ፤ ክሊዬና ናንዳካ እሺዻ።¹⁶ናንዳካ ቋቄን ኔኒ ኡዋው ፓይላዻ ከኦካ ኣይኔን ሃቦዋያ ኣይኔን፤¹⁷ክያጃ ጋዬና ከታጝካ ሙሴውጝ፤ ኣይኔኔ ኣኩሉኬ ኩና ከታጝካ ኢየሱስ ክርስቶሱጝ።¹⁸ውር ክየምጵንዻ ኬና ጌይ ባሪዮ ኣኔኬን፤ ኣይባዬ ሹኔ ውዋ ክየም እን ኣኔን ኦካ ቋጩር ኔኑጝ ኣምላክ ዹዋልሼና እሺ።ዮሐንስ እንካ ዱቅኔን እሺ ኤምኑ ማሬ ክርስቶስ ኣዬኑጝ ክያጃ¹⁹ውርካ ኣይሁድ ዮሐንስ ኣዬ ኒኑጝ ኣንሺኔን ይዕሲ ውርካ ቃሼ ውርካ ሌዋዊዬ ካኢየሩሳሌሜ፤ ይዕሲሼ ሃሚን ኔኒዬ፤ ማኛሞ እን ዮሐንስ ኣይኖጝ ሃይዕጝ።²⁰ሺጝ ከማኝ ኣዬን ሃዋክሼኬን ሁር፤ ኣን ሃማር ክርስቶሴን» ሺጝ እያይኔ ክያጃ ከኣኩሉክ።²¹እንግንዻ ሺጝ ኣኪ እን የኣይ ኒን? ኤልያስ ሞ? ዬ ጋንሼና።እሺዻ ሺጝ« እዕጝ» እንግንዻ ሺጝ ኣኪ የኣይ ውርካ ባሪዮይ? እሺዻ ሺጝ «እዕጜ» ዋሼያ እንግን።²²ከቱንሲዻ ሺጝ፤ ኣኪ የኣይ ኒን? ካሜይቴ ውር ጊታይ ይዕሲ ኡዋውጝ ናንዳካ እን ኤምኑ የሺጚ ኦ?²³ዮሐንስዻ ሺጝ፤ ከውርካ ቶካ ባሪዮ እሳይያስ ክያጆጝ፤ «ሺጚ ኣሽኪባ ጉዋርካ ባሪዮዬ ናቅድካ ውር እን ኡቹኪ ቦና ክያኑጝ ሃኣኔ ዋሼያ እንግን።²⁴ከኦካ ውርካ ፈረሳዊ ከኦካ ውር ክየም ክየም ጊታይ ይዕሲዬዻ፤²⁵ሺጝ ኣኪ፤ የማሪያ ክርስቶስ ወይ ኤልያስ ወይ ውርካ ቶካ ባሪዮ ኣዬንያጝ ሃናንዳካ ኦ የዱቅኔ ጆሌዬ ጋንሼና።²⁶ዮሐንስዻ ሺጝ እያጜ ዋሼያ እንግን፤ ኣን ሃዱቅ እየውባ ከሙዋ፤ ዬ እን እየው የማርቴ እባጄኑጝ ዾራ ኦካ ጫቃን ጉዩ። ²⁷እንካ ኩዋኬ ኦናኒ ማውጝ፤ ኣይን ቁሜንካ ቻው ኔኒ ቡሌን ሃማሬ እባጄኑጝ እና እሺ።²⁸ይን ፓይላ ኣዮጝ ማድርካ ባሪዮ²⁹ዮሐንስ ከዻም ኢየሱስ ኩን ሃሚን ኔኒዬ ጌዬ ሺጝ እያጝ፤ «እየዎ፤ እንካ ቡል ሴሶካ ፔኑጝ ማድርካ ባሪዮ፤³⁰እና ሺጜ እንካ ኩዋው ከኦናኒ ማጝ ናንዳካጝ ኣኒኔ ከሌሜን ናኑጝ ሳጊ ከኦናኑጝ ሃእሺ፤³¹ኣይን ኣንዻ ሃካና እባጅኬን፤ ኣን ሃዱቅና ኩኔ ከሙዋጝ እሺ ካዹዋልሼ ከታጝካ እስራኤሌ ጊያ።³²ጩዋ ዮሐንስ ሺጝ እያጜ ክያጃ ማኝ ኣዬን ኔኒ፤ «ኡሲካ ባሪዮ ማቲ ሆሌዬ ጎብኬ ፎላ ዾዮኬ ኡፌ እሺዬ ጌያ።³³ካዱቅኔ ከሙዋጝ እን ይዕሲ ኣኑጝ፤ ካዱቅኬ ኡሲካ ባሪዮጝ፤ ኡሲ ጎብኬ ዾዮኬ እን ኡፌዬ የጌይቶጝ እጛ እሺ» ሺጝ እያይኔ ሌይ ሃምካ ሜይሼ ኣኑጝ ኣንዻ ሃካና እባጅኬን፤³⁴ሃጌይያ እን እሺ ኣዬ ውዋካ ባሪዮጝ ሃኪሊዬንባ።ውርካ ዻይኔንካ ኢየሱስ ጊታይካ ሌሜኑጝ³⁵ከዻም ዮሐንሴ ውርካ ዻይኔን ዻዌ ፕር ጋኔን ኦካ ራቅ እጝ፤³⁶ኢየሱስዻ ሳጊኬ ጉዋዬ ጌዬ ሺጝ እየዎ፤ ማድርካ ባሪዮ።³⁷ውርካ ዻይኔን ዻዋን ጊታይ ሃሳወ እጜ ዋዮጝ ዻዬያ ኢየሱስ።³⁸ኢየሱስዻ ሁቤኔ ቶያጝ ዻዬ እሺዬ ጌዬ፤ ሺጝ የዎሻ ኦዬ ኣንሻ እንግን፤ እንግንዻ ሺጝ፤ «ረቢ፤ የኡፒ ኦን? «እን ሺጜ ረቢ፤ ሺጝ ውሩጝካ እርርሲኔኑጝ፤³⁹እሺዻ ዋይሼ እንግን ፓዬኔ ቶይባ፤ ዬ ፓዬ ኡፌ ኦን ጌያ፤ ከሹ እን ድብኔ ከጋጝ፤ ሹሽዻ ኣንሼን ኦይካ ሳዓት ታጱጝ።⁴⁰እን ዮሐንስ ሃሳወዬ ዋዬ ዻዬ ኢየሱሱጝ ከኦካ ዻዋን ክየም ሃጪኔካ ስምዖን ጴጥሮስ እንድሪያስ።⁴¹እንድሪያስዻ እን ሻሜኬ ሌሜኑጝ፤ ዎሽ ጪኔ ኔኒ ስምዖኔ ሺጝ፤ ሃጌያያ መሲሕዬ ዋካ ሜይሼን፤ እን ሺጜ መሲሕ ሃክርስቶስ እያጝ።⁴²ቦኩኔያ ሃምካ ኢየሱስዻጝ። ኢየሱስዻ ቶይ እሺዬ ሺጝ እን የኣይ ውዋካ ዮና ስምዖን፤ ዋይሼ እን ኬፈ ሺውባ» ሺጝ እያይ፤ እን ሺጜ ኬፍ ሃጴጥሮስ እያጝ።ኢየሱስ ሺዋ ፊልጶሴ ናትናኤሌ⁴³ከዻም ኢየሱስ ዎሻ እያጝካ ገሊላ ኩዬን፤ ጌይ ፊልጶስዻዬ ዋይሼ እሺ ዻዬ ኣምባ።⁴⁴ፊልጶስዻ ኬካ እንድሪያሴ ኬካ ጴጥሮሴ ፓይላ ሃውርካ ከተማካ ቤተ-ሳይዳ።⁴⁵ፊልጶስዻ ጌይ ናትናኤሌ ዋይሼ እሺ፤ «ሙሴ ከወርቀትካ ክያጃ፤ ውርካ ቶካ ባሪዋን ናንዳካ እሺ ቶኮጝ ሃጌያያ ውዋካ ዮሴፍ ኢየሱስ እንካ ናዝሬቱጝ።⁴⁶ናትናኤልዻ ሺጝ፤ ኦኬ ሹቃ ካቱሌኬ ኦካ እንካ ናዝሬቱጝ ቻሊሜንባ። ፊልጶስዻ ዋይሼ እሺ ኩዋዌ ቶይባ።⁴⁷ኢየሱስዻ ናትናኤል ኩን ሃሚን ኔኒዬ ጌዬ፤ ሺጝ፤« እየዎ፤ እን ማር ጃካማ ኣኔን ውር ኣኩሉክ ካእስራኤል።⁴⁸ናትናኤልዻ ሺጝ የእባጅ እያን ኣኔ ኣንሼና? ኢየሱስዻ ሺጝ፤ የኣኔንባ ኦይካ ጊሜይካ ሻሪ ኡፌኔ፤ ካኒ ፊልጶስ ሺውኬን እኔ ሃጌያ እኔ ዋሼያ እሺ።⁴⁹ናትናኤልዻ ዋሼ ሺጝ፤ «ረቢ/ እን የኣይ ውዋካ ባሪዮ፤ እን የኣይ ቢቲካ እስራኤል።⁵⁰ኢየሱስዻ ሺጝ የጎሜኬ ሻኑጝ ሃናንዳካጝ ሃዋይሼ እን ሃጌይ እን ኦካ ጌሜይካ ሻሪኪ? ካኒ የጌይባ ኦኬ ኬና ካሳጊኬ ኦጝ፤⁵¹ሌሜዬ ሺጝ፤ ሃዋይሼባ እየው ኣኩሉክ፤ ፎላ ቦወኔ፤ ውርካ ኤርጎካ ባሪዮ ኮትሼ ሃንታካ ውሬ ጎብሼዬ የጌያባ።

ሃፑክ 2ኢየሱስ ሻማ ሙዋ ዝእካ ወይን¹ከሹ እንካ ማክንሳጝ፤ ሃምካ ጎብሼንካ ገሊላ፤ ኦካ ከተማካ ቃና ኣና ዴሞፆቃ፤ ጁዋኔካ ኢየሱስዻ ኣኔባ ኦይን፤²ሺውሼ ኢየሱሴ ውር ጊታይ ዻዬ ጆሌ እሺዬ ሃምካ ዴሞፆቃጝ።³ከሹ እን ዝእካ ወይን ጃክኔዻ ጁዋኔካ ኢየሱስ ማሪያም ሺጝ ይንጌ ዝእካ ወይን ጊዬይ ጃኬና።⁴ኢየሱስዻ ሺጝ እን ኝያጝ ዮ፤ ሃዋይሼ እን ካኣሽኪኦ? ሹ ናኒ ካኒ ሄክሽኬን።⁵ጁዋኔዻ ዋይሼ ውርካ ዋድማ ጊታይ ኣኔን ኦይን እያጝ ኦይን ሜይሼ እየው ፓይላ ኣሽክባ።⁶ከጫንቃል ሻሜንካ ውርካ ኣይሁድ፤ ኦይን ኣና ቷንዳ ጊታኬና ጎሚ ሊትር ሶጳታም ዶጝ ሌይ ሊትር ዽብ ክየሜ ታጵ ዶጜ ላ ጊታኬና ጋሽክዬኬ ባይ።⁷ኢየሱስ ዋይሼ ውርካ ዋድማን ጾዖሲ ቷንዳን ከሙዋ፤ እንግንዻ ጾዖሲያ ቷንዳን ከሙዋ ሌይ ሃምካቶግ።⁸እሺዻ ዋይሼ እንግን ጂዊ ዾዮክ ኔኒዬ ኣይ ታቺ እንካ ዴሞፆቃጝ።እንግንዻ ሻማ ከእያይ ጌርጊቴ እንጊኑጝ።⁹ታቺ እንካ ዴሞጾቃዻ መቴ ቶያ ሙዋ እን ሁቡሼ ሃምካ ዝእካ ወይኑጝ፤ ኣይባዬ ኩንኬ ኦን ካኒ እባጅኬን፤ ዬ ውርካ ዋድማ ጊታይ ጂዊ ሙዋ እን ጊባጃ።¹⁰ውር ፓይላ ሺጝ እንካ ሌሜን የቦኩኖጝ ሃዝእካ ወይን ሹቃ፤ ኮማናን ማቶጝ ጩዋ፤ ሺጝ ቦኩኔባ ኣይን ዝእካ ወይን ፓይላጝ፤ ዬ እን የኣጁጝያ ዝእካ ወይን ሹቃጝ ሌይ ጋን።¹¹ኢየሱስዻ ዹዋልሺኔን ሹቃ ሹቃ ጊታይ ከሌሜን ኣሽክያ ሃምካ ጎብሼንካ ገሊላጝ ኦካ ከተማካ ቃና፤ ዹዋልሼና ጌጳሞ ኔኒዻ፤ ውር ጊታይካ ዻይኔንዻ ጎማ ክያጃ ኔኒ ከሻን።ኢየሱስ ይጋ ቶኦካ ይሁኔን¹²ከኦይን ጩዋ ከጁዋኔዬ ጪኒጋኔ ጎብሼያ እያጝካ ቅፍርናሆም፤ ቆባ ሃሚን ሹ ጩዋማ።¹³ፋሲካካ ኣይሁድ ሄክሽባ፤ ኢየሱስ ኩያ እያጝካ ኢየሩሳሌም።¹⁴ኦይካ ጳልካ ቶኦካ ይሁኔን ጌይ ውር ጊታኬና ኡዋሩጚሺኒ ቢዌ፣ ማድሬ፣ ሆሌዬ፣ ፕር ውር ጊታኬና ቆቤ ፑኡሺኔ ጆልቢሬ።¹⁵ኣሽኪ ኣላንጋካ ካያዬ ዋኬያ ማድሬ ቢዌ ፓይላ ከኦካ ራቅካ ቶኦካ ይሁኔን፤ ላሊያ ቢሬካ ውር ጊታይ ፑኡሺዬንዻ፣ ሁቡባ ካራም ጊዬይዻ።¹⁶ቡላ ውር ጊታይ ኡዋሩጙሼን ሆሌዻ ከኦይን ዋይሼ እንግን ቶኦካ ባባ የሻማያ ቶኦካ ኒጊድኔን።¹⁷ውር ጊታይካ ዻይኔንዻ እን ሺጜ ቦውንታ ኣኔንኬ ቶኦ ኑኑ ኡሽምባዬ ቶኮጝ ጌያ ኦጊዬይ ጶቅ።¹⁸ውርካ ኣይሁድዻ ዋይሼ እሺ ይን ፓይላ ከኣሽክዮጝ የኣኔ ጌጳሞካ ኦ ካእባጅቶጝ ተዹዋልሼ ኦኬ ሹቃ ኬና ኣይ እያን?¹⁹ኢየሱስዻ ዋይሼ እንግን፤ ኮሲባ ቶኦካ ይሁኔን ይጝ፤ ኣን ሃዋሻ ኣሽኪባ ከክያጝካ ሹ ጅያን፤ ሺጝ እያይኔ ዋሼያ እንግን።²⁰ውርካ ኣይሁድዻ ሺጝ፤ ቶኦካ ይሁኔን ይጝ ኣሽክዬን ቦዋ ቦን ኦይታም ላ ኣኪ እን የዋሼ ኣሽኪ እያን ከሹ ጅያን?²¹ዬ ዋቲ ሺጝ ቶኦካ ይሁኔንያጝ፤ ኣና ናንዳካ እሺ ኤምኑ ሃሳወን።²²ናሹጜ ከኦካ ኣርሼን ጩዋ፤ ውር ጊታይካ ዻይኔን እሺ ሃሳወ ኦጝ ጶቅሲያ፤ ጎማ ከሻን ክያጃ እን ወርቀት ሺጜዬ ኢየሱስ ሺጜዬ።²³ከቶንቶሮካ ፋሲካ ኣኔንባ ኢየሩሳሌሜ፤ ውር ጁዋኑ ጌይ ኦሹቃ እን ኣሽክዬዬ ጎማ ከሻን።²⁴ዬ ኢየሱስ ናንዳካጝ እባጄ ውር ፓይላጝ፤ ኤርሜንኬን ከእንግን።²⁵ናንዳካጝ እባጄ እን ኣኔን ኦካ ውር ቱዎጝ፤ ውር ክየምጵንዻ ካማቲዬ ማቲዬ ማኝካ ውሩጝ ካኒ ናሺኬን።

ሃፑክ 3ኢየሱስ እርርሲያ ኒቆድሞስ¹ከኦካ ውርካ ፈረሳውያን፤ ከኦካ ታታቻንካ ውርካ ኣይሁድ ክየም ኣና ውር ኬና ሺጜ ኒቆድሞስ፤²ከምክር ኩን ኦካ ኢየሱሴ ሺጝ፤ «ረቢ፤ ባሪዮ ከውር እን ኣኔን ከእሹጝ እንቃ ኦኬ ሹቃ ጊታይ እን ኣሽክዮጝ ውር ክየምጵንዻ ካኣሽክዮጝ ናንዳካጝ ካማሬ ቻሊዬኑጝ፤ የኣዬ ውርካ እርርሲኔን ኬና ኩንኬ ሃምካ ባሪዮ ሃእባጅያ።³ኢየሱስዻ ዋሼ ዋይሼ እሺ ሃዋይሼባ እን ኣኩሉክ፤ ውር ክየምጵንዻ ማር ጅሼን እንቃ ጅሼንያጝ ቻሊኬን ጌጳሞካ ባሪዮ ጌዬን።⁴ኒቆድሞስዻ ሺጝ፤ ውር ጌቺያጝ ጩዋ ቻሊባይ ጅሺኔን? ካጅሼ እንቃጝ ዋኬ ሃምካ ፒሲካ ጁዋኔ ሁሉኬን ቻሊባይ?⁵ኢየሱስዻ ሺጝ እያጜ ዋሻ፤ ሃዋይሼባ እን ኣኩሉክ፤ ውር ክየምጵንዻ ማራ ከሙዋዬ ኡሲዬ ጅሼንያጝ ቻሊኬን ሃምካ ጌጳሞካ ባሪዮ ሁሉኬን።⁶እን ጅሼኬ ኣሩጝ ሃኣሩጝ፤ እን ጅሼኬ ኡሱጝ ሃኡሲ።⁷ናንዳካጝ ሃዋይሼ እን ካጅሼ እየው ዻ ኣኔባ ኦይ ዻዹጝኔን።⁸ፑጉ ፑጉሼባ ታይ ናሺዮጝ፤ የዋይባ ናቅድ ኔኒዻ፤ ኣይባዬ ኩንኬ ኦኔ ኩይሼ ታኔ የእባጅኬን ጊታይ ጅሼኬ ኡሲ ፓይላ ሃእያይ።⁹ኒቆድሞስዻ ሺጝ፤ ይን ቻሊሜን እያን እያይ ኣዬኔ ኣንሼና።¹⁰ኢየሱስዻ ሺጝ እያጜ ዋሼያ እሺ፤ እን የኣይባ ውርካ እርርሲኔንካ እስራኤሌ የማር እያን ክያጃ ጊታጝ እባጄን?¹¹ሃዋይሼ እን ኣኩሉክ፤ እን ሃእባጆጝ ሃክያጅባ፣ እን ሃጌዮጝ ሃማኝሺባ፤ ዬ እየው የካኔ ጉማኬን ማኝ ኣዬን ጉዋዩ።¹²ናንዳካ ኦካ ዳሊ ሃሜይሼ እየዌ እን የማርቴ ከሻን ጎሜኑጝ፤ ናንዳካ ክያጃካ ፎላ ሃሜይሼያ እየውያጝ የሻማ እያን ከጎምቴ ከሻኑጝ?¹³ከኦካ ሃንታካ ውር እን ጎብኬ ፎላጝ እንቃ፤ ውር ክየምጵንዻ ኬና ካኮትሼ እያጝካ ፎላ ኣኔኬን።¹⁴ሙሴ ከእያይ ሮዬ ቻች ቦና ክያኑጝ፤ ሃንታካ ውርዻ ካሮዬ እያይ ኣኔባ፤¹⁵ይንዻ እን ይወን ከእሹጝ ፓይላ ካኣኔ ዻቆካ ቦን ጮሉጝ ጊያ።¹⁶እን ይወንከ እሹጝ ፓይላ ቦን ጮል ካኡፌኬ ዻቆጝ ዬ ካማሬ ካህዬን ባሪዮ ሌይ ሃምካ ኣይኔ ውዋካ ክየም እን ናሺያ ፌኔ።¹⁷ባሪዮ ይዕሲሼ ውዋ ኔኒ ዳሊ ክያኒ ማርካ ኮምሼ ዳሊዬኔ፤ ውርካ ዳሉጝ ካባይሼኬ እሺዬ ጊያ።¹⁸እን ይወንኬ እሹጝ ፓይላ ኮምሼኬን፤ ዬ ጊታይ ማርኬ እሺ ይሁኔን ናንዳካጝ ማሬኬ ሮጝካ ውዋካ ባሪዮ ክየም እን ይሁኔኑጝ ጋን ኮምሼያ።¹⁹ኮምሼን ኔኒዻ ሃይዕጝ፤ ሜሌል ኩና ዳሊ ክያኒ፤ ዬ ውር ናንዳካጝ ዋድማ ጊዬይ ኣዬ ጋራጝ፤ ከኦካ ሜሌል ሳጊ ናሺ ኦድሙጉ፤²⁰ጊታይ ኣሽክዬን ጋራ ፓይላ ሚኔባ ኦሜሌል፤ ኦግታይ ጋሽክዬዳ ካማር ጌይኔኔ ፓዬንኬን ሃምካ ሜሌሉጝ።²¹ዬ እን ጃሌ ጆልኬ ኣኩሉኩጝ ዋድማ ኔኒ ዮሐንስ እንካ ዱቅኔን ናንዳካ ኢየሱስ ክሊዬና²²ከኦይን ጩዋ ኢየሱሴ ውር ጊታይ ዻዬ ጆሌ እሺዬ ፓያ ፔንካ ይሁዳ፤ ከታይዻ ኡፓ ከእንግን ሹ ጩዋማ፤ ዱቅዬናዻ።²³ከሹ እን ዮሐንስዻ ከሃምካ ሳሌም ድያው ሃምካ ፔን እን ሺጜ ሄኖን ኣና ሙዋ ጁዋኑ፤ ኣኔን ዱቅዬንዻ ውርዻ ናንዳካ ዱቅኔን ኣኔን ፓይኔን።²⁴ይን ኣዮጝ ሃኬ ሌሜንካ ቁሜንካ ዮሐንስ።²⁵ከኦካ ውር ክየም ክየምካ ዻይኔንካ ዮሐንሴ ከኦካ ጫቃንካ ውርካ ኣይሁድ ክየሜ ናንዳካ ጫንቃል ጌዬን ዜርማ ናሹጛ፤²⁶ፓዬን ኦካ ዮሐንስዻዬ፤ ሺጝ «ረቢ፤ እጝ ኣኔንኬ እን ዮርዳኖስ ታቶጝ፤ ውር እን የክሊኔ ናንዳካ እሹጝ፤ እየዎ፤ ዱቅዬንባ ውር ፓይላ ፓይባ ሃሚን ኔኑጝ።²⁷ዮሐንስዻ ሺጝ እያጜ ዋሻ፤ ማራ ከዾዮክ ሃም ኣይኔንያጝ ኦኬ ክየምጵንዻ ቦወን ቻሊኬን።²⁸ኣን ሃማር ክርስቶሴን፤ ኣይባዬ ይዕሲያና ከሌሜን ኔኒ ሃሺጜ እያይ እየው የክሊናባ እየው ኤታጋን።²⁹ኡታ እን ሃካ ኡማ እን እያንሽ እሹጝ፤ ዬ ውርካ ጁወ ጆሌን እን ዾሪ ቆጩር ኔኒ ክያኒ ካናቅዲ ኔኒ ዋዬኑጝ፤ ዋያ ናቅዲ ኔኒያጝ ካሎን ዋዝንሲ እሺባ፤ ዋዛ እን ሃናኒ፤ እሺዻ ጋን ሙኔና።³⁰እሺ ካሳጊዬዬ ዬኣን ካቶክዮጝ ኣኔባ።³¹እን ኩንኬ ዾዮኩጝ ሃኬ ውር ፓይላ ሳጊ፤ እን ኣይካ ዳሉጝ ሃካ ዳሊ፤ ሃሳውባ እንካ ዳሊዻ፤ እን ኩንኬ ዾዮኩጝ ሃኬ ኦካ ፓይላ ሳጊ፤³²እን ጌዬዬ ዋዬዬ ክሊኔባ፤ ኣይባዬ ውር ክየምጵንዻ ዋይኬን ክሊማ ኔኒ።³³ውር እን ዋይ ክሊማ ኔኒዻ፤ ባሪዮ ኣዬ ኣኩሉክዻ እባጃ።³⁴ባሪዮ ሳፋርሲኬን ኡሲ ኔኒ ናንዳካጝ ኣይኖጝ፤ እን ባሪዮ ይዕሲዮጝ ሃሳው ክያጃካ ባሪዮ።³⁵ሹኔ ናሺባ ውዋ፤ ኦኬ ፓይላ ኣዬና ከቡዋ ኔኒ።³⁶እን ይወን ከውዋ ፓይላ ዻቆካ ቦን ጮል ኣኔባ፤ ዬ እን ማርኬ ውዋ ይሁኔን ማኒቲካ ባሪዮ ኣኔባ ኦኔኒ ዬ ጌይኬን ዻቆ።

ሃፑክ 4ኢየሱስ ሃሳወና ከኝያካ ፈረሳውያን ክየም¹ውርካ ፈረሳውያን ከኦካ ዮሐንስ ሳጊ ኢየሱስ ፑኡሺዬ ውርካ ዻይኔን ጁዋኑዬ ዱቅዮጝ ዋያ፤²ኣይባዬ እን ዱቅዬን ማር ኢየሱሴኔ ሃውር ጊታይካ ዻይኔን።³ታቺ እንዻ ዋይባ እን ኦይድ ይሁዳዬ ዋኬ ኩያ ገሊላ።⁴ኣኔ ኦኬና ሳጊዬኬ ዳራካ ሰማሪያ፤⁵ዬ ከሰማሪያ፤ ኣኔ ራቅ ኬና ያዕቆብ ኣዬ ውዋ ኔኒ ዮሴፍ፤ ኩና ኦካ ከተማ ኬና ሺጜ ሲካር።⁶ከኦይንዻ ኣና ይግንካ ያዕቆብ፤ ኢየሱስ እን ናሹጝ ጃሌን ኔኑጝ ናንዳካጝ ዻቾጝ ኡፓ ኦካ ቆጩርካ ይግን እንካ ሙዋጝ፤ ሹሽዻ ኣንሼን ኦይካ ሳዓት ላጝ።⁷ኝያ ክየም ካሰማሪያ ኩን ሙዋ ጅወንያግጝ ኢየሱስ ዋይሼ እሺ፤ ባንዞ ኣያን ኦካ ማቴን፤⁸ውር ጊታይካ ዻይኔን ዳዓኖ ኡዋሩጜን ፓያ ሃምካ ከተማጝ።⁹ኝያ እንካ ሰማሪያዻ ሺጝ፤ «እን የኣይባ ውርካ ኣይሁዴ የዋይሼ እያን ኣን ውሩግካ ሰማሪያ ኣያን ሙዋ? ሺጜ እያይ ውርካ ኣይሁድ ዎርሜንኬን ከውርካ ሰማሪያ።¹⁰ኢየሱስዻ ሺጝ፤ ውር እን ዋይሼ እን ማቲሻን ኣይኔንካ ባሪዮ ኣዬ ኒኑጝ ዋቲ የእባጅያጝ፤ ከእያይ ኣንሼ እኑጝ እሺዻ ኣይባ እን ሙዋካ ዻቆዬ ዋሼያ እሺ።¹¹ኝያ እንዻ ሺጝ እያጝ፤ ታቹጝ ናኑጝ፤ ሃኣኔኬኒ ኦካ ጅውኔን፤ ይግንዻ ሃቱሌ ኣኪ ሙዋጝ ዻቆጝ የጌይኬ ኦን?¹²ኣይባዬ፤ እን የሳጊባይ ከሹኔ እ ጉዋዩ ያዕቆብ እን ኣህ ኡዋው ይግኑጝ ?እሺ ኤምኑዬ ሃንታ ኔኒዬ፤ ዳብዻ ማቲባ ከኦካ ይግን ይጝ።¹³ኢየሱስዻ ሺጝ እያጜ ዋሼያ እሺ፤ ውር ማቲ ሙዋ ይጙጝ ፕር ኮርጉ ቃው እሺባ እንቃ፤¹⁴ዬ ውር እን ማቲ ሙዋ እን ኣን ሃኣይኖጝ ክየምጵንዻ ኮርጉ ቃውኬን እሺ፤ ሙዋ እን ኣን ሃኣይኖጝ እን እሬን ከቱዎጝ ማቲባ ሙዋካ ዻቆካ ቦን ጮል።¹⁵ኝያ እንዻ ሺጝ፤ ታቹጝ ናኑጝ ኮርጉ ካማር ኣን ቃወኔ ሙዋ ጅወን ካማር ዋኬ ጆሌኔ፤ ባንዞ ኣያን ሙዋ እን።¹⁶እሺዻ ዋይሼ እሺ፤ ካሜ ሺው ኡማ ኑኑዬ ዋኬ ኩዋባ ዮጝ።¹⁷ኝያ እንዻ ሺጝ ኣን ሃኣኔኬን ጁሙዬ ዋሼያ።ኢየሱስዻ ዋይሼ እሺ እያጝ፤ ሃኣኔኬን ጁሙ ሺጜን ኑኑ ሃሊኪ እያጝኪ፤¹⁸ከኣኩሉክ የኣኔ ጁሙ ቾን፤ የጋን እን ኣኔን ከእኑጝ፤ ናንዳካጝ ማሬ ኡማ ኑኑ ኣዬኑጝ፤ እን የክያጆጝ ሃኣኩሉክ።¹⁹ኝያ እንዻ ሺጝ እያጝ፤ ታቹጝ ናኑጝ እን የኣዬ ውርካ ባሪዮጝ ሃጌያ፤²⁰ሹቡጌን ጉዋዩ ይወና ኦካ ጋጉጝ፤ ዬ እየው ውርካ ኣይሁድ የሺጛ ውርካ ይሁኖጝ ሃኬ ኢየሩሳሌም።²¹ኢየሱስዻ ዋይሼ እሺ እያጝ፤ እን ኝያጝ፤ ኣይን ከጋጉጝ ኣይን ኢየሩሳሌሙጝ ሹ እን የማርቴ ባባ ይሁኔን ካኩዋዎጝ ጎምባ ከሻን።²²እየው ውርካ ሰማሪያ የይሁናባ ናንዳካ እን የማርቴ እባጄኑጝ፤ ዬ ኡዋው ናንዳካጝ ሹቃቲ ኣኒኔኬ ኢየሩሳሌሙጝ ሃይሁናባ እን ሃእባጅቶጝ።²³ጊታይ ይወን ከኣኩሉክ ናንዳካ ባባ ሹ እንካ ይሁኔኬ ኡሲዬ ኣኩሉኬ ኩንባ፤ ካንዻ ኩና፤ ባባዻ ዎሽባ ጊታይ ይወን እያይ ከኣኩሉኩጝ።²⁴ባሪዮ ሃኡሲ፤ ጊታይ ይወን እሺዻ ካይሁኔ ከኡሲዬ ከኣኩሉኩጝ ኣኔባ።²⁵ኝያ እንዻ ሺጝ፤ እን ሺጜ ክርስቶስ መሲሕ ካኩዋዎጝ ሃእባጃያ፤ እሺ ኩንያጝ ሜይሼባ ኡዋው ክያጃ ፓይላ።²⁶ኢየሱስ ሺጝ፤ ይንጌ ኣን ይጝ ሃሳውኔ እን ሃኣይ እሺዬ ሜይሼያ እሺ ጃ።ውር ጊታይካ ዻይኔን ዋኬ ፓዬና²⁷ከሹ እን ውር ጊታይካ ዻይኔን ዋኬ ፓይኔ፤ ሃሳወንኬ ሃኣጚዬ ጌዬ ጎሺያ፤ ዬ ኣይባዬ የዎሺ ኦ?» ወይ የሃሳውኔ እሺ ናንዳካ ኦ? ውር ክየምጵንዻ ኬና ሺጚ እያይኔ ኣንሺኒ ኣኔኬን።²⁸ኝያ እንዻ ኦይድ ቷንዳዬ ዋክሼያ እያንካ ከተማጝ፤ ናንዳካ ዛርሲዻ፤²⁹ሺጝ ኦግታይ ሃኣሽክዬ ፓይላ ውር እን ሜይሼ ኣኑጝ ፓዬኔ ቶይባ፤ እሺ ካኣይ ክርስቶሲ?³⁰እንግንዻ ቱልኬ ከተማዬ ፓይሼያ ሃሚን እሺ ኣኖጝ።³¹ከሹ እን ውር ጊታይካ ዻይኔ ጆሌን ሺጝ፤ «ረቢ፤ ኣም ሩቡጌ» ³²ዬ እሺ ሺጝ፤ ሃኣኔ ዳዓኖካ ኣሜን እን እየው የማርቴ እባጄኑጝ» ዋይሼ እንግን እያይ። ³³ውር ጊታይካ ዻይኔን ሺጝ ኤ ውር ቦፓይኔ ዳዓኖይዬ? ሃሳወና።³⁴ኢየሱስዻ ዋይሼ እንግን እያጝ፤ ዳዓኖ ናኒ ሃክያጃካ እን ይዕሲያን ኣሽክዬኔ ዋድማ ኔኒ ሹዋጵሼኔ፤³⁵እየው ከሺጝቴ ከትጌሽ ኣሁር ጩዋ ባርጊን ሄክሽባ ኣኔኬኒ? «እየዎ፤ እንካ ኮሬን ናንዳካጝ ሄክሾጝ ሃዋይሼባ እየው ጌይ ካቼ ቶይ ቅያኒ።³⁶እንካ ሃዴኑጝ ኣይኒን ጋኑጝ ቦዋ እንካ ካሺሼ እሹጝ፤ ኣይባዬ ዻቆ እንካ ቦን ጮሉጝ ፑኡሺባ ጴንታን፤ ይንዻ እንካ ኮሬ እንካ ፓትዬ ካጋዬኬ ጋጜ ካዋዝንሲ እንግንባዬ ጊያ።³⁷ዬ ክየም ኮርባ ኑዋ ፓትባ፤ ሄክንሶ እን ሺጜ እያይ ሃኣኩሉክ።³⁸እን የማርቴ ዻቼኑጝ ከፓትባዬ ይዕሲያ እየው ውር ዶክ ኣሽክያ ዋድማካ እን ኣይ ዻቹጉጝ፤ እየውዻ ጊታይ ዻቹጝ የፑኡሺያባ ካርቡ።ውር ጁዋኑካ ሰማሪያ ጎማ ኬሻን³⁹ኝያ እንዻ ናንዳካጝ ሺጜ «ኦግታይ ሃኣሽክዮጝ ፓይላ ሜይላ ሜይሼያ ኣኔ ናንዳካጝ ክያጆጝ፤ ከኦካ ከተማ እን ውር ጁዋኑካ ሰማሪያ ጉማ ከእሺ።⁴⁰ዬ ውርካ ሰማሪያ ሹ ፓይኔ ኦኔኑጝ ካቆብኬ ጋጜ ካሎን ይወና፤ ኡፓ ኦይንዻ ሹ ዻ።⁴¹እን ናሹጝኬ ክያጃጝ ውር እንቃ ጁዋኑ ጉማ።⁴²ዋይሼ ኝያ እንዻ፤ ኣኪ ካጉምቶጝ ማርኬ እን የሜይሼ ኡዋጵኔን፤ ኡዋዻ ሃዋያያ ኡዋ ኤታጋን፤ ውሩጝ ከኣኩሉክ ኣዬ ዼሻካ ዳሉጝ ሃእባጃያ።ኢየሱስ ባይሺሻ ውዋካ ኤሪ እን ጌጳሲዮጝ⁴³ከሹ ዻዋን ጩዋ ኩያ ገሊላ⁴⁴ውርካ ቶካ ባሪዮ ከኦካ ፔን ኔኒ ካማሬ ሪግሺኔኑጝ እሺ ኢየሱስ ክያጃ።⁴⁵ሄክሼ ገሊላዻጝ ውርካ ገሊላ ቾቺንሺያ እሺ ከዋዛ፤ ናንዳካ ኦ፤ እንግንዻ ከቶንቶሮካ ፋሲካ ናንዳካጝ ኣኒኔ ኢየሩሳሌሜ ጌዬ ኦግታይ ኣሽክዬ ኦይኑጝ።⁴⁶ኢየሱስዻ ዋካ ሃምካ ፔን እን ሻሜ ሙዋ ዝእያካ ወይኑጝ፤ ሃም ጌዬንኬ ገሊላ እያንካ ከተማካ ቃና እንቃ፤ ከኦካ ቅፍርናሆም ውር ኬና ውዋ ዴሜኒ ኣና ውር ኬና ጌጳሲዬ፤⁴⁷ውር እንዻ ሹ እን ኢየሱስ ኩኔኬ ይሁዳዬ ኩዬ ገሊላዬ ዋዮጝ፤ ኩይ ሃሚን ኔኒዬ ሺጝ ካካማ ባይሺሽ ውዋ እን ኔኒ ኣኔን ኦካ ቶካ ኣርሼን ዲያው ይወና።⁴⁸ኢየሱስዻ ሺጝ፤ እየው ኣይን ኣሚኑጝ ማሪያ ዹዋልሺኔኔ ኦኬ ሹቃዬ ጌዬንያጝ የጉማኬን ክያጃ ናኒ።⁴⁹ውር እን ጌጳሲዬዻ ሺጝ ታቹጝ ናኒዮ፤ ውዋ ናኒ ከሌሜንካ ኣርሼን ባንዞ ሄክሼ ኣንባ።⁵⁰ኢየሱስዻ ዋይሼ እሺ ውዋ ኑኑ ኡፓ ከዻቆ ካምባ። ውር እንዻ ክያጃ እን ኢየሱስ ክያጆጝ ጎምኬ ሻኔ ኩያ።⁵¹ኣኔንባ ጉዋር ክያንዻዬ፤ ጌይ ውርካ ዋድማኔ ውዋ ኔኒ ኡፔኬ ዻቆጝ ሜይሼያ እሺ።⁵²እሺዻ ውዋ ቡርቅ ኦቼ እሺ ከሳዓት ኣኸዌ ኣንሽ እንግንያጝ፤ ሺጝ ቄጪቲካ ሩዋ ኔኒ ኦቼ ጊያጎጝ ከሳዓት ጂያን።⁵³ሹኔዻ ኣዬ ሳዓት እን ኢየሱስ ሺጜ ውዋ ኑኑ ኡፓ ከዻቆጝ ጌያ ጶቅ፤ እሺዬ ውርካ ጶሮክ ኔኒዬ ይወና ባሪዮ።⁵⁴ይንዻ ከይሁዳ ኢየሱስ ኩይ ገሊላዬ ዹዋልሺኔን ሹቃ እን ኣሽክዮጝ ሃኣንካ ላንሳጝ።

ሃፑክ 5ባይሺሴን እን ሻሜ ኦካ ቤተ-ሳይዳጝ¹ከኦይን ጩዋ ኣና ቶንቶሮካ ኣይሁድ፤ ኢየሱስዻ ኩያ እያጝካ ኢየሩሳሌሙጝ።²ከኦካ ኢየሩሳሌም፤ ኦይካ ቆጩርካ ሃፑካ ማድር ኣና ኦካ ቶኦ ቾን ካጄሌጆሌን፤ ከቶካ ኣርማይክ ኦካ እን ሺጜ ቤተ-ሳይዳ ኣና ኦክየም ካዱቅኔ ጃሌን።³ከኦካ ጃሌጆሌን ጊታይ ቱዎጝ ኣና ውር ጁዋኑ ጊታኬና ሩዋ ኣይ ኤላ፣ ጊታኬና ካርቡ ኣይ ሙሙዾ፣ ጊታይ ኣይ ኤላዬ ኣኔ ቡርቅዬ ጋኔን ራጴን።ጋኔን ይንግሺኔንካ ሙዋ ካሊዬኔ፤⁴ውርካ ኤርጎካ ታቺ እን ሹካጝ ሳጊዬ ሳጊዬ ይንግሼ ሙዋጝ፤ ኦካ ውር ጊታይ ቡርቅ ራጴ ኣኔን ኦይን ካጝ ሌሜ ሙር ኦይንካ ዱቅኔኑጝ ኣኔን ባይሼን።⁵ከኦይን ኣና ውር ክየም ኬና ኣይካ ቡርቅዬ ኡፒ ቦን ማካንታም ሎንካይ።⁶ኢየሱስዻ ሹ እን ውር እን ኣኔዬ ጌዮጝ፤ እባጅ እን ሹ ጁዋኑ ኡፔኬ ዴንታ እጜ ዋይሼ እሺ፤ የዎሽባይ ባይሼን?»⁷ውር እንካ ቡርቅዻ ዋሼ ሺጝ፤ ታቹጝ ዮ፤ ሙዋ ሹካጝ ይንግሺኖጝ ውር ኬና ካጎብሼ ኣን ሃምካ ዱቅኔን ኣኔኬን፤ ሃሄክሺያ ካሁሉኬንያጝ ዌውር እንቃ ሌም ኣምባ።⁸ኢየሱስዻ ዋይሼ እሺ፤ ናሹጝጋ/ ቦው ዳቢ እን የኡጜዬ ካምባ።⁹ውር እንዻ ባይሻ ይሪካ፤ ዼት ዻፓ እን ኡጜዬ ኩያ።እን ሙኒኖጝ ሃኬ ሹ እንካ ሶጵሳጝ።¹⁰ውርካ ኣይሁድዻ ዋይሼ ውር እን ባይሺሼ፤ናንዳካጝ ኣዬ ሹካ ሶጵሳጝ ከዼቴ ዻፓ ኑኑዬ ኬካሞጝ ከዳንቢ ኔኒ ናሺኬን።¹¹ዬ እሺ ሺጝ፤ ውር እን ባይሺሽ ኣኑጝ ዋይሼያ ኣን ዼት ዻፓ ኑኑዬ ካምባዬ ዋሼያ እንግን።¹²እንግንዻ ሺጝ ውር እን ዋይሼ እን ዼት ዻፓ ኑኑዬ ካምባ ሃኒኔ ጋንሼና።¹³ኢየሱስ ናንዳካጝ ጌዬ ታራሬ ሙጌ ጫቃንካ ዛርሱጝ፤ ውር እን ባይሺሽ እሺ ኣዬ ኒኑጝ ካኒ እባጅኬን።¹⁴ከኦይን ጩዋ ኢየሱስ ጌይ ውር እን ሃምካ ቶኦካ ይሁኔኔ ዋይሼ እሺ እየዎ፤ ባይሺሻ እን ዬ ካርሲኬ ጋኔ ኦይ ሴሶ ኣሽክዬን፤ የማር እያይ ሻሜንያጝ ሄክሻ እን ኬና ሳጊኬ ኦጝ።¹⁵ውር እንዻ ባይሺሻ እሺ ኢየሱሱጝ ኩዬ ሜይሼያ ውርካ ኣይሁድ።ውዋ ኣዬንባ ዻቆ¹⁶ውርካ ኣይሁድ ከሹካ ሶጵሳ ኣሽክዬ ኦግታይ፤ ጋኔን ኢየሱስ ዋኬን።¹⁷ኢየሱስዻ ሺጝ፤ ባባ ኣኔን ኣስክዬን ሌይ ጋን፤ ፕር ኣንዻ ሃኣሽክባ።¹⁸ኣኪ ውርካ ኣሁድ ማርኬ እን ኢየሱስ ሻሜኬ ሹካ ሶጵሳ ጵኔኔ፤ ሻሜ እሺ ኤምኑ ከባሪዮ ሊኩጝ፤ ካሎን ዎሻ ኒሼን።¹⁹ኢየሱስዻ ሺጝ እያጜ ዋሼያ እንግን፤ «ሃዋይሼባ እየው ኣኩሉክ፤ ሹኔ ኣሽክዬ እን ጌዬጵን ዬ ውዋ ካኣሽክዬ እሺጵን ቻሊኬን፤ እን ሹኔ ኣሽክዮጝ ፓይላ ፕር ውዋዻ ኣሽክባ፤²⁰ሹኔ ናንዳካጝ ናሺዬ ውዋጝ እንካ ኣሽክዮጝ ፓይላ ዹዋልሼባ፤ ከጎሺቴዻጝ ዹዋልሼንባ ኦግታይ ሳጊኬ ኦካ ጊታጝ።²¹ናንዳካኦ ሹኔ ናንዳካጝ ቲቴ ጊታይ ኣርሹጝ፤ ኣዬ ዻቆዻጝ፤ ውዋዻ ፕር ናንዳካ እን ናሺዮጝ ፓይላ ኣይባ ዻቆ።²²ሹኔ ኮምሼኬን ውር ክየምጵንዻ፤ ኣይባዬ ኮምሼን ፓይላ ሳስክዬ ኣያ ውዋ፤²³ይንዻ፤ ፓይላ ጊታይ ርግሼን ሹኖጝ ካሪግሺንቴ ውዋዻዬ ጊያ፤ እን ማር ውዋ ሪግሺኔን፤ ሪግሼንኬን ሹኔ እን ይዕሲ እሺዻ።²⁴ሃዋይሼባ እየው ኣኩሉክ፤ እን ዋይ ክያጃ ናኑጝ፤ ከእን ይዕሲ ኣንዻ እን ጉሙጝ ኣኔባ ዻቆካ ቦን ጮል፤ ከኦይካ ኣርሼን ቁዋልሺና ሃምካ ዻቆዬ ኩይኬን ሃምካ ኮምሼኑጝ።²⁵ሃዋይሼባ እየው ኣኩሉክ፤ ጊታይ ኣርሹጝ ሹ እን ካዋዬ ናቅዲካ ውዋካ ባሪዮ ኩንባ፤ ካንዻ ኩና፤ ጊታይ ዋይዻ ቆባ ከዻቆ።²⁶እሺ ሹኔ ኣኔ ዻቆካ ኔኑጝ ፓይላ፤ ውዋዻ ካኡፑኬ ዻቆ ኔኑጝ ኣዬናዬ፤²⁷ውዋ ናንዳካጝ ኣዬ ሃንታካ ውርዻ፤ ካኮምሾጝ ኣዬና ጌጳሞ።²⁸ኦይዲ ከይጝ ጎሺቴን፤ ሹ እን ጊታይ ኣኔን ሌሲ ክያኒዻ ካዋዬ ናቅድ ኔኑጝ ኩንባ፤²⁹ጊታይ ኣሽኪ ሹቃጝ ናሹጝሼ ዻቆ ሹቃ፤ ጊታይ ኣሽኪ ጋራጝ ናሹጝሼ ኮምሼን።³⁰ኣን ካኣሽክዬ ኣንጵኑጝ ሃቻሊኬን፤ ካኮምሾጝ ሃእንካ ዋዬጵን፤ ሃክያጃካ እን ይዕሲ ኣን ዬ ናንዳካጝ ሃማሬ ክያጃ ናኒ ኣሽክዬኑጝ ኮምሼን ናኒ ሃሊኪ።ናንዳካ ኢየሱስ ክሊማ ጊታይ ክያጆጝ³¹ኣን ካክሊህንቴ ናንዳካ ኣን ኤምኑጝ፤ ክሊማ ናኒ ውር ኬና ካዋይ ኣኔኬን፤³²ውር እንቃ ኬና ካክሊህንቴ ናንዳካ ኣን ኣኔባ፤ እሺ ናንዳካ ኣን ክሊማ እንካ ኣይኖጝ ኣዬ ኣኩሉኩጝ ሃእባጅያ።³³ይዕሲሼያ እንግን ሃምካ ዮሐንሱጝ፤ እሺዻ ክሊዬና ናንዳካ እሺ ኣኩሉክ፤³⁴ኣን ሃማር ኬናካ ዋይ ክሊማካ ውሬን፤ ይን ሃክያጆጝ እየው ካባይሽባዬ ጊያ።³⁵ዮሐንስ ማኒሼ ላሉጝሻ ፓኖስኬና ጌይ ሜሌል፤ ሺጝ እየው ከሹ ጩዋማ የናሺያ እንካ ዋዛንዽቴኬ ከኦሜሌሉጝ።³⁶ዬ ኣን ሃኣኔ ክሊማ ኬና ካሳጊኬ ኦካ እንካ ዮሐንሱጝ፤ ካሹዋጵሾጝ እን ባባ ኣዬ ኣኑጝ፤ ኣንዻ ዋድማ እንካ ኣሽክዮጝ ባባ ከእያይ ይዕሲዬ ኣኑጝ ሃኪሊዬንባ።³⁷ባባ እን ይዕሲ ኣንዻ ናንዳካ ኣን ክሊዬና፤ እየውዻ የካኔ ዋያኬን ክየምጵንዻ ናቅዲ ኔኒ፤ የካኔ ጌያኬን ዴንታ ኔኒ፤³⁸ናንዳካጝ የማርቴ ከእን ይዕሲ ኣን ጉሜኑጝ ክያጃ ኔኒ ኣኔኬን ኦጉዩ።³⁹የሙኒና ጊታኬና ካጌይኬ እሺ ዻቆካ ቦን ጮሌ የማርማሪና ወርቀት፤ ወርቀት ጊታይ ሃጊታኬና ኪሊኔ ናንዳካ ኣን፤⁴⁰ዬ እየው ከቆብቴኬ ዻቆጝ የዎሻኬን ዮጝ ናኒ ፓይኔን።⁴¹ኣን ከኦካ ውር ሃቦኬን ጌጳሞ፤⁴²ኣይባዬ ሃእባጅያ እየው፤ ናሺማ ካባሪዮ ማሬ ሻን ጉዩ ክያኒ ኣኔኑጝ ሃእባጅያ።⁴³ኣን ሃኩንኬ ሮጝካ ባባዬ የካኔ ናሺያኬን ኣን፤ ዬ ውር እንቃ ኩንኬ ሮጝ ኔኒያጝ የናሺያባ።⁴⁴እየው ጊታጝ ኣይ ጋጝ ጌጳሞጝ፤ ኣይባዬ እን ኩንኬ ኣፓላካ ክየም እን ሃኬና የዎሽቴ ጌጳሞያጝ፤ የሻማ እያን ከጉምቴኬ ሻኑጝ?⁴⁵እን ካሲሲ እየው እን የቃቢቶጝ ሃሙሴ ዬ፤ ኣን ሃሙኔንኬን ከባባ ኬና ካሴሲ እየው ከሌሜንካ ሙሴ፤⁴⁶ዋቲ የጉማያ ክያጃካ ሙሴያጝ፤ የጉማያ ክያጃ ናኒዻ፤ ናንዳካ ኦ እን እሺ ቶኮጝ ሃናንዳካ ኣን።⁴⁷የማራ እን እሺ ቶኬ ጉሜንያጝ፤ የጉማ እያን እን ኣን ሃሜይሼ እየው

ሃፑክ 6ኢየሱስ ኣምሻ ዛርሲ ሺ ቾን¹ከኦይን ጩዋ ኢየሱስ ከሃም ሺጜ ጥብርያዶስ ቁዋሌን ኛፓስካ ገሊላዬ ኩያ ከኦካ ኛፓስ ዾክ።²ውር ጁዋኑዻ ባይሺሽ ውርካ ቡርቅዬ ጌይ ዻዋልሺኔን ሹቃሹቃ ጊታይ ኣሽክዬዬ ዻዬያ።³ጩዋ ኢየሱስ ሌፍ ሃምካ ጋጌ ኡፓ ከውር ጊታይ ዻዬ ጆሌ እሹጝ።⁴ቶንቶሮካ ፈሲካ ካኣይሁድ ሄክሻ።⁵ኢየሱስዻ ጌይ ካቼ ቶይያጝ ጌይ ዛርሲ ጁዋጁ ፓዬን ዮጝ ኔኒዬ፤ ፊልጶስዻ ሺጝ፤ ባላሻ እን ዛርሲ ጊታጝ ካኣሞጝ ካኣሩጝ ከኦን?⁶ኣንሼ እኑጝ ሃካ እሺ ፓታንሲዬን ዬ እሺ ቃቢዬ ኣሽክዬኑጝ እባጃ።⁷ፊልጶስዻ ሺጝ፤ ውር ክየም ክየም ኣይን ዺኒ ዺኑጝ ካኣሞጝ ሻሜን ኣይን ባላሻካ ሺሊንጊ ዻውጝ ሄክኬኔ ዋሼያ።⁸ከኦካ ውርካ ዻይኔን ክየም እን ሺጜ ስምዖን ጴጥሮሴ ጪኔ እንድርያሴ ሺጝ እያጝ፤⁹ውዋ ኬና ቦዊ ባላሻ ቾኔ ኣርቴ ሃይሻይሺ ዻዌ ኣኔባ ኦጝ፤ ዬ ይን ሄኪ እያን ዛርሱጝ ፓይላ?¹⁰ኢየሱስዻ ሺጝ፤ ውርካ ቆባዬ ሻሚባ» ኦካ ራቅ እን ኣና ሹጩ ጁዋኑ፤ ጁሙ ሺ ቾንዻ ቆቤያ።¹¹ኢየሱስዻ ቲት ባላሻ ቾናኔ ይሁሼና፤ ናንዳካ ጊታይ ቆቢዻ ጊታይ ዎሾጝ ፓይላ ሄክሻ፤ ሻማ ኣርቴዻ እያይ።¹²ውር ፓይላ ኣሜ ናዓሾጝ ጩዋ፤ ከኦካ ፑርፆፑርፆ ጊታይ ሺዺ ካማር ላልምኔኔ ዋይሼ ውር ጊታይ ዻዬ ጆሌ እሺ ፑኡሺባ።¹³እንግንዻ ከኦካ ባላሻ ቾን ጊታይ ጋሞጝ ቋዻሜ ቋቁሻ ቋሼ ታጵላማ።¹⁴ውርዻ ጌዬ ዹዋልሺኔን ሹቃሹቃ ጊታይ ኢየሱስ ኣሽክዮጝ ጩዋ ሺጝ፤ ከኣኩሉክ ውርካ ቶካ ባሪዮ እን ካኩዋው ዳሉጝ ክያኑጝ ሃይዕጝ።¹⁵ኢየሱስዻ እባጅ እን ውር ካፓይና ጌጳዽዬ ጊድዬ ፕር ኮትሼያ እሺጵን ጋግ ኬና ኣኒኒ ፃክርሚ።ኢየሱስ ጃሌ ኩያ ከሙዋ¹⁶ሹ እን ቃይትሾጝ ውር ጊታይ ዻዬ ጆሌ እሹጝ ጎባ ሃምካ ኛፓሱጝ፤¹⁷ሻወ ቆብ ጋጊ ክያንዻዬ ናሹጛ እያጝካ ቅፍናሆም ቁዋልኔን። ሹሽዻ ቃይትሻ፤ ኢየሱስዻ ካኒ ኩንኬን ኦግዬይ።¹⁸ናንዳካጝ ፑጉ ቁዋቃ ኣኒኔ ፑጌኑጝ ኛፓስ ኣኔን ይንግሺኔን።¹⁹ቁዋልባ ዹካቲ ኪንዲ ቾን ወይ ላ፤ ኢየሱስ ጃልኬ ሙዋዌ ኩንሼ ዮጝ ጊዬይዬ ጌዬ ቴርጋዽያ።²⁰ዬ እሺ ዋይሼ እንግን ኦይዲ ሪግሺንቴን ሃኣን።²¹እንግንዻ ዎሻ እን ካሌፓ ኡፔ ጋጊ ክያኑጝ፤ ጋጊ እን ይሪካ ሄክሻ ላቅካ ታይ ኩይሾጝ።²²ከዻ ውር ጊታይ ሺዺ ኛፓስ ታቶጝ ኦይን ኣና ጋጊ ክየሙጝ ጊባጃ፤ ኢየሱስ ማሬ ጋጊ ኮልሼኔ ውር ጊታይካ ዻይኔ ጆሌን ፓዬ እንግንጵን ጊባጃ።²³ከኦይን ጩዋ፤ ዛርሲካ ጥባርዮስ ከጋጊ እንቃ ፓያ ሃም ታቺ ኡዋኔ ባላሻጝ።²⁴ውርዻ እባጃ እን ኢየሱስ ወይ ውርካ ዻይኔን ማሬ ኦይን ኣኔኑጝ፤ ኢየሱስ ዎሼን ከጋጊ ፓይሼያ እያጝካ ቅፍርናሆም።ኢየሱስ ሃምሽካ ዻቆ²⁵ሹ እን ጌዬ ከኦካ ላቅካ ኛፓስ ታቶጝ ሺጝ፤ «ረቢ፤ እን የኩኒ ኣሚን ኦጝ።²⁶ኢየሱስዻ ሺጝ እያጜ ዋሼያ እንግን፤ «ሃዋይሼባ እየው ኣኩሉክ የዎሽቴ ኣኑጝ ሃናንዳካጝ የኣምቴ ባላሻዬ የናዓሽቴጵን ዬ ማራ ናንዳካ እን የጌይቴ ዹዋልሺኔ ሹቃዬን።²⁷ኦይዲ ናንዳካ ባላሻ እን ካይህ ኣሽክቴን፤ ኣይባዬ ኣሽክ ናንዳካ ዳዓኖ እን ሃንታካ ውር ኣዬ እየዌ ኣይካ ዻቆካ ቦን ጮሉጝ፤ ዬ እባጄን ካባሪዮ ባባ ከእሺ ጋይሼያ ማኅተሜ።²⁸እንግንዻ ሺጝ፤ ኣኪ ዋድማካ ባሪዮ ኣሽክዬን ኣና ኦ ሻሜን?²⁹ኢየሱስዻ ሺጝ፤ ከኤርሜንባ ከእን ይዕሲ እሺዬ፤ ይጝ ሃዋድማካ ባሪዮ ሺጝ እያይኔ ዋሼያ እንግን።³⁰ዬ ሺጝ እያጜ ጋንሼና፤ ካጌይታ ኤርምሺንቶጝ የሻሚ ኦኬ ሹቃ ኬና ኣኔን እያን? የኣሽኪ ኦዻ?³¹ካጋምባዬ ኣያ እንግን ምሽ ከፎላ ሺጜ እያይኔ ቶኮጝ፤ ሹቡጌን ጉዋዩ ኣማ መና ቦና ክያኒ።³²ኢየሱስዻ ዋይሼ እንግን እያጝ፤ ሃዋይሼባ እየው ኣኩሉክ፤ እንካ ኣይ እየው ምሽ ከፎላጝ ማር ሙሴዬን፤ ዬ ምሽ እንካ ኣኩሉክ ከፎላ ካኣይ እየው ሃባባ።³³ምሽካ ባሪዮ እን ጎብኬ ፎላጝ፤ እሺ ሃእን ካኣይ ዳሉጝ ዻቆጝ።³⁴እንግንዻ ሺጝ፤ «ታቹጝ፤ ኣኪ ኣይ ኡዋው ምሽ እን ሹ ጮል።³⁵ኢየሱስዻ ዋይሼ እንግን እያጝ፤ ምሽካ ዻቆ ሃኣን፤ እን ኩን ዮጝ ናኒ ክየምጵንዻ ካሽ ቃውኬን እሺ፤ እን ኤርሜን ከኣንዻ ኮርጉ ቃውኬን እሺ ክየምጵንዻ።³⁶ኣይባዻዬ ከእያይ ሃሜይሼ እየው የጌያባዻዬ የኤርምሺንቴኬን።³⁷እን ባባ ኣዬ ኣን ፓይላ ፓዬንባ ዮጝ ናኑጝ፤ ካጝ ኩኒ ኦናኒዻ ክየምጵንዻ ሃቡልሼኬን ሹኑክ፤³⁸ሃጎቤኬ ዾዮኩጝ ማርካ ክያጃ ናኒ ሻሜኔኔ፤ ሃካ ክያጃካ እሺ እን ይዕሲ ኣን ሹዋጵሼን፤³⁹ክያጃካ እን ይዕሲ ኣንዻ፤ ከኦካ ጊታይ ኣዬ ኣን ፓይላ ክየምጵንዻ ማር ካይዬኔ ሃእን ከሹካ ቱንሲ ካቲቶጝ።⁴⁰ክያጃካ ባባ እን ጌይ ውዋዌ ኤርሜን ከእሹጝ ፓይላ ሃእን ካኡፔኬ ዻቆካ ቦን ጮሉጝ፤ ኣንዻ ከሹ እንካ ቱንሱጝ ሃቲቲባ።⁴¹ውርካ ኣይሁድዻ እን ሺጜ ምሽካ ዻቆ እን ጎብኬ ፎላጝ ሃኣኑጝ ካርሲያ ጉንዱምኔን።⁴²ፕር ይጝ፤ ሃእባጅቴ ሹኔዬ ጁዋኔዬ፤ ማር ውዋካ ዮሴፍ ኢየሱሴኒ? ኣኪ ሺጝ እያን ሃጎብኬ ፎላ ዾዮክ።⁴³ኢየሱስዻ ዋሼ ዋይሼ እንግን እያጝ፤ ኦይዲ ከጋጝ ጉንዱምንቴን፤⁴⁴ባባ እን ይዕሲ ኣኑጝ ከእን ማሬ ቃቢዬን እንቃ ውር ክየምጵንዻ ዮጝ ናኒ ኩኔን ቻሊኬን፤ ኣንዻ ከሹ እንካ ማክንሳጝ ሃቲቲባ።⁴⁵ከውርካ ባሪዮዻ ውር ፓይላ ውር ፓይላ ማቲባ ኬና እርር ከባሪዮ» እን ሺጜ እያይኔ ቶኮጝ፤ እን ዋይሼን ባባዬ እርር ከእሹጝ ፓይላ ፓዬንባ ዮጝ ናኑጝ።⁴⁶ከኦካ እን ኣይኬ ባሪዮ እንቃ ውር ክየምጵንዻ ኬና ጌይ ባባ ኣኔኬን፤ ጌይ ሹኖጝ ሃእሺጵን።⁴⁷ሃዋይሼባ እየው ኣኩሉክ ካጝ ኤርምሼን ፓይላጝ ኣኔባ ዻቆካ ቦን ጮል።⁴⁸ዻቆ ሃኣን።⁴⁹ሹቡጌን ጉዩ ጋማ መና ቦና ክያኒ፤ ካኣይባዬ ጋርሻ።⁵⁰ኣይባዬ ውርካ ማሬ ኣርሼኑጝ ምሽ እንካ ጋሞጝ እን ጎብኬ ፎላጝ ሃይዕጝ።⁵¹ምሽ እን ጎብኬ ፎላ ዾዮክ እና ኣን፤ ውር ክየምጵንዻ ኣማ ምሽ ይንያጝ ኡፓ ቦን ጮል፤ ካማቲሼ ዳሊ ዻቆዬ ካኣይኖጝ ሃኣሩጝ ናኒ።⁵²ውርካ ኣይሁድዻ ሺጝ ውሩጝ ካቃውቴ ኣሩጝ ኔኑጝ ሻም እያን ካቻሊዬ ኡዋው ኣዬኑጝ? ሺጝ እያይኔ ካሎን ካርሲያ ከጋጝ ዜርምኔን።⁵³ኢየሱስዻ ዋይሼ እንግን እያጝ፤ ሃዋይሼባ እየው ኣኩሉክ፤ የማራ ኣሩጝካ ሃታካ ውር ቃወኔ ኒያቡ ኔኒዻ ማቴንያጝ የኣንቴኬን ዻቆ።⁵⁴እን ቃው ኣሩጝ ናኑጝ፣ እን ማቲ ኒያቡ ናኒዻጝ ኣኔባ ዻቆካ ቦን ጮል፤ ኣንዻ ከሹ እንካ ቱንሱጝ ሃቲቲባ።⁵⁵ኣሩጝ ናኒዻ ሃዳዓኖካ ኣኩሉክ፣ ኒያቡ ናኒዻ ሃሙዋካ ኣኩሉክ፤⁵⁶እን ቃው ኣሩጝ ናኑጝ፣ እን ማቲ ኒያቡ ናኒዻጝ ኡፓ ከኣን፤ ኣንዻ ሃኡፑካ ከእሺ።⁵⁷ከእያይ ባባ ይዕሲዬ ኣኑጝ፤ ኣንዻ ከእን ናሹጝኬ እሹጝ ሃኡፑኬ ዻቆጝ፤ እን ቃው ኣንዻጝ እን ናሹጝኬ ኣኑጝ ኡፓ ከዻቆ።⁵⁸ምሽ እን ጎብኬ ፎላ ዾዮኩጝ ሃይዕጝ፤ ሹቡጌን ጉዩ ጋማ መና፤ ጋርሻዻ ዬ ውር እን ኣሚ ምሹጝ ኡፓ ቦን ጮል።⁵⁹ሃሳወ እን ከኦካ ቅፍርናሆም፤ ኦካ ቶኦካ ይሁኔን ኣኔን እርርሲኔኔ ጊያ።ውርካ ዻይኔን ጁዋኑ ኦይዳ ኢየሱስ ዻዬን⁶⁰ውርካ ዻይኔን ጁዋናን ዋዬ እኑጝ ሺጝ ይና ክያጃ ኬና ካርግሺሽ ውር፤ ሃኒን ካቻሊ ዋዬንዻጝ።⁶¹ውር ጊታይካ ዻይኔንዻ ጋኔንባ ከክያጃ እንዻ ጉንዱምኔኔ ኢየሱስ እባጅ እሺጵኔ ዋይሼ እንግን እያጝ፤ ይጝ ማቲሼባይ እየው ኦኬ ጋራ?⁶²ኣኪ ሃንታካ ውር ሌሜ ሌፓ ኦባ ኣኔያጝ የጌያያጝ የሺጛ ኦ?⁶³ኡሲ ኣዬባ ዻቆ፤ የኣ⁶⁴ካኣይባዬ ከኦጉዩ ውር ክየም ክየም ጊታኬና ማሪ ኤርምሺኔን ኣኔባ። ይንዻ ኢየሱስ ማራ ጊታጝካ ኒን ከእሺ ኤርምኔኔ ካሳስክያ ኣይና እሺ ኒኑጝ ናንዳካጝ እባጄ ጊያ።⁶⁵ፕር፤ ማራ ከታካ ሹኔ ኣይኔንያጝ ውር ክየምጵንዻ ካኩዋዌ ዮጝ ናኑጝ ቻሊሜንኬን» ሺጜ እያይ ሃናንዳካ እጝ።⁶⁶ከኦይን ጩዋ ውርካ ዻይኔን ጁዋኑ ዋክሼያ ሁር፤ ከኦይ ካኒ ዻዬኬን።⁶⁷ኢየሱስዻ ዋይሼ ውርካ ዻይኔን ታጵላማን ፕር እየውዻ የዎሻያይ ፓዬን?⁶⁸ስምዖን ጴጥሮስዻ ሺጝ እያጜ ዋሻ፤ ታቹጝ ዮ፤ ካፓይ ኦካ ኒን? እን የኣኔ ዻቆካ ቦን ጮል፤⁶⁹እን የኣዬ ውዋካ ባሪዮ ክየም እኑጝ ሃኤርምንቴያ፣ ሃእባጃያዻ።⁷⁰ኢየሱስዻ ዋሼ ሺጝ፤ እዲ እየው ታጲላማን ማር ኣኔኒ? ኣይባዬ ከኦጉዩ ክየም ሃዲያብሎስ።⁷¹ውዋካ ስምዖን እንካ ኣስቆሮቱ ይሁዳ፤ ከኦካ ታጲላማን ኣይኒን ክየሙጝ፤ ከታካ ሁር ካሳስክያ ኣይኖጝ፤ ኣኔን ናንዳካ እሺ ሃሳወን።

ሃፑክ 7ኢየሱስ ኩያ ሃም ጋሜ ቶንቶሮካ ዳሱጝ¹ከኦይን ጩዋ ውር ጊታይካ ኣይሁድ ናንዳካጝ ዎሼ ኢየሱስ ኒሼኑጝ፤ ኦይድ ሃምካ ጎብሼንካ ይሁዳ ሺሪዬኔ ሺሪያ ከገሊላ።²ዬ ቶንቶሮካ ዳስካ ኣይሁድ ከሹ እን ሄክሾጝ፤³ጪኒጌንካ ኢየሱስ ሺጝ እያጝ፤ ፕር ውርካ ዻይኔን ካጌዬ ኦኬ ሹቃ ጊታይ የኣሽክዮጝ ከኦጝ ካም ይሁዳ፤⁴ዎሽ እሺ ኤምኑ ጃ ሻሜኔ ውር ክየምጵንዻ ኬና ኣሽኪኬ ራሼን ኣኔኬን፤ እንዻ የኣያ ኬና ካኣሽኪ ክያጃ ጊታጝያጝ፤ ዹዋልሼ እን ኤምኑ ዳሉጝ።⁵ኣይን ጪኔጌን ኔኒዻ ካኒ ጌርምኔኬን እሺ።⁶ኢየሱስዻ ዋይሼ እንግን እያጝ፤ ሹ እንካ ሊኪ ካኒ ሄክሽኬን ኣን፤ ዬ ናንዳካ ሹ ና ሃሊኪ ከእየው።⁷ዳሉጝ ቻሊኬን እየው ሚኔን፤ ዬ ኣን ኣሽክዬን ዋድማ ጊዬይ ናንዳካጝ ኣዬ ጋራዬ ሃኪሊኖጝ ሚኔ ኣምባ።⁸እየው ፓይባ ሃምካ ቶንቶሮጝ፤ ሹ እንካ ሊኩጝ ናንዳካጝ ማሬ ናንዳካ ኣን ሄክሼኑጝ ሃኩይኬን ሃምካ ቶንቶሮጝ።⁹ዋይሼ እንግን እያይኔ ኡፔና ገሊላ።¹⁰ካኣይባዬ ጪኒጌን ፓዬ ሃምካ ቶንቶሮጝ ጩዋ፤ እሺ ማር ጃ ኩዬኔ ከራሼን ኩያ ሃምካ ቶንቶሮጝ።¹¹ከኦክ ቶንቶሮ እን ውርካ ኣይሁድ ሺጝ ውር እን ኣኔን ኦኔ? ጋኔን ዎሼን።¹²ናንዳካ እሺ ኦካ ጫቃንካ ዛርሲ ኣና ጉንድምኔን ጁዋኑ። ውር ቶና ሺጝ ሃውር ሌሞ፣ ዬ ውር ዶክ ሺጝ ማር እያይኔን ሃእን ጊያምሺሽ ዛርሱጝ።¹³ካኣይባዬ ናንዳካጝ ሪጝሺኔ ኣይሁዱጝ ናንዳካ እሺ ውር ክየምጵንዻ ኬና ካሃሳው ጃ ኣኔኬን።ኢየሱስ ጌዬን ኦይካ ቶንቶሮዬ እርርሲዬና¹⁴ከኦካ ጆጊካ ቶንቶሮ ኢየሱስ ሁሉክ ሃምካ ቶኦካ ይሁኔኔ ካርሲያ እርርሲኔን።¹⁵ውርካ ኣይሁድዻ ከጎሺዬን ሺጝ ውሩጝ ካኒ እርርኬን ወርቀቴ ቻሊ እያን እባጄን?¹⁶ኢየሱስዻ ዋይሼ እንግን እያጝ፤ እርርሲዬን ይጝ ሃእርርሲዬ እየው ማርኬ ታጝ ናኒዬኔ፤ ኩንኬ ሃምካ እን ይዕሲ ኣኑጝ።¹⁷ውር ክየምጵንዻ ዎሻ ክያጃካ ባሪዮ ኣሽክዬንያጝ፤ እርርሲዬን ናኒ ኩንኬ ባሪዮ ወይ ከኣኑጝ ሻም ዋናዬ ጊባጃ፤¹⁸እን ሃሓሳወ ከኣን ኤምኑጝ እን ሃኣሽክዮጝ ሃናንዳካጝ ዎሼ ጌጳሞ ኔኑጝ፤ እን ኣሽኪ ናንዳካ ጌጳሞካ እን ይዕሲ እሹጝ እሻ ውርካ ኣኩሉክ ሾሮዻ ጌይኬን ኦኔኒ።¹⁹ሙሴ ካኒ ኣይኬን እየው ክያጃ? ኣይባዬ የካኔ ዻይቴኬን ክያጃ ክየምጵንዻ። ሃናንዳካ ኦ የዎሽቴ ኣን ኒሼኑጝ?²⁰ዛርሲዻ ዋይሼ እሺ እኑጝ ጮዩካ ቤሮ ጎሞጝ ሃኒን ካዎሽ እን ኒሼኑጝ?²¹ኢየሱስዻ ዋሼ ዋይሼ እንግን እያጝ፤ ሃኣሽክያ ዋድማ ክየምያጝ እየው ፓይላ የዻዹጙንቴባ።²²ቋርኔን ኩኖጝ ሃኬ ሹቡጊን ዬ ማርኬ ሙሴዬን፤ ኣይባዬ ሙሴ ናንዳካጝ ኣዬ እየው ቋርኔኑጝ ኣይኒን ሹካ ሶጵሳጝ የቋራባ ሃንታ።²³ከማር ክያጃካ ሙሴ ሚኔኔ ሃንታ ሃኬና ቋሬኬ ሹካ ሶጵሳያጝ፤ ዴንታካ ውር ናንዳካጝ ባይሺሼ ከሹካ ሶጵሳጝ የማኒሺቴ እያን ኣን?²⁴የኦይድ ኮምሼንካ ማርካ ውር ቶዬ ኮምሼኔ የካርሲያ ኮምሼንካ ሻን ቱዎጝ።ኢየሱስ ናንዳካጝ እሺ ኣዬ ክርስቶሱጝ²⁵ከሹ እን ከኦካ ውር ጊታይ ኣኔን ኢየሩሳሌም ውር ክየ ሺጝ እያጝ፤ ውር እን የዎሽቴ ኒሼኑጝ ማር ይጜኒ?²⁶ሃኣጝ እሺ ሃሳወንባ ጳል ክያኒ፤ ሜይሼኬን እሺ ክያጃ ክየምጵንዻ፤ ሃክርስቶሴ ውር ታታቻንዻ ዻቁንኬን እሺ ናሺዬን፤²⁷ዬ ውሩጝ ኣዬኬ ኦን ኡዋው ሃእባጃያ፤ ክርስቶስ ኩንያጝ ይንጌ ኩኔኬ ኦኑጝ ውር ክየምጵንዻ እባጅኬን።²⁸ኢየሱስ ከኦካ ቶኦካ ይሁኔን ጳል ክያኒ ከእርርሲኔን ሻም ናቅዲ ኔኒ ዼጌ ሺጝ እያጝ፤ ጋን የእባጅያ ኣን ሃኣዬኬ ኦኑጝ የእባጃ ኣንባ፤ ኣን ሃኣኔ ኦጙጝ ማርኬ ኣን ኤምኑዬን፤ ኣይባዬ እን ይዕሲ ኣኑጝ እሻ ውርካ ኣኩሉክ። እየው የእባጃኬን።²⁹ዬ እን ሃኣዬ ከታይ ኔኑጝ እሺዻ ናንዳካጝ ናንዳካጝ ይዕሲዬ ኣኑጝ ሃእባጅያ።³⁰ዬ ዎሻ ጎሜን፤ ኣይባዬ ናንዳካጝ ናንዳካጝ ሹ ማሬ ሄክሼኑጝ ውር ክየምጵንዻ ካኒ ዱምኬን እሺ፤³¹ኣይባዬ ከኦካ ዛርሲ ጁዋናን ጌርሜንኬ እሺዬ ሺጝ ኣኪ ክርስቶስ ኩናያጝ ኣሽክባይ ኦኬ ሹቃ ጊታኬና ሳጊኬ ኦካ ጊታጝ ውሩጝ ኣሽክዮጝ።³²ውርካ ፈረሳውያንዻ ሺጝ ዛርሲ ሃሳውሺኔ እሺ ከጉንዱምኔኑጝ ውርካ ቃሼ ካፈረሳውያኔ ካጎሞጝ ይዕሲያ ውር ጊታይ ባክኔ ጆል ቶኦካ ይሁኔኑጝ።³³ኢየሱስዻ ሺጝ እያጝ፤ ካኡፔኬ እየው ሃሹ ጩዋማጵን፤ ጩዋ ሃኩይባ ሃምካ እን ይዕሲ ኣኑጝ፤³⁴የዎሻ ኣንባ፤ ዬ የጌያኬን ኣን፤ የቻሊያኬን ኦይን ሃኣኖጝ ፓይኔን።³⁵ውርካ ኣይሁድዻ ዋይሼ ጋጝ እያጝ ውሩጝ ኦይን ካማርቴ እሺ ጌዬን ቻሊዬኑጝ ቃቢ ኦን ኩዬን? ከኦካ ጫቃንካ ውርካ ግርክ ውር ጊታይ ኔኒ ላልሜኑጝ ዎሽ ሃሚን ኩዬ እርርሲኔኒ?³⁶ሺጜ የዎሻ ኣንባ፤ ዬ የጌያኬን ኣን፤ ፕር ኦይን ሃኣኒኔዻ የቻሊያኬን ፓይኔን ሃኦ?³⁷ከኦይንካ ቶንቶሮካ ሹ ታቺ እን ኣይካ ቱንሲ ኢየሱስ ዾሬ ከናቅዲ ታቺ ሺጝ እያጝ፤ ውር ካጝ ኮርጉ ቃወ ኣኔያጝ ካኩዋው ዮጝ ናኒዬ ካማትባ፤³⁸ውርካጝ ኤርሜን ከኣን ኣኔያጝ፤ ከእያይ ወርቀት ሺጞጝ ሙዋካ ዻቆ እሬንባ ከቱዎጝ።³⁹እን ሺጜ እያይ ውር እን ኤርሜንኬ እሹጝ ሃናንዳካጝ ኣኔ ኡሲ እንካ ቦዎጝ፤ ናንዳካ ኦ ካኒ ናንዳካጝ ማሬ ኢየሱስ ጎብዬኑጝ ካኒ ኣይኬን እንግን ኡሲ።⁴⁰ከኦካ ዛርሲ ውር ክየም ክየም ዋይ ክያጃዬ ሺጝ፤ ከኣኩሉክ ውሩጝ ሃውርካ ቶካ ባሪዮ።⁴¹ውር ዶክ ሺጝ እሻ ክርስቶስ። ፕር ውር ዶክ ሺጝ ክርስቶስ ቻሊ እያን ከገሊላ ኩኔን?⁴²ወርቀትዻ» ክርስቶስ ኣዬ ቢዛካ ዳዊት፤ ካኩዋዌ ከሃም ዳዊት ኡፔዻ ቤተልሔም ኣኔንኬን ክያጄን?⁴³ዬ ከናንዳካ ክያጃካ ኢየሱስ ከኦካ ጫቃንካ ዛርሲ ማቲያ ላልምኔን፤⁴⁴ውር ክየም ክየም ዎሻ ጎሜን፤ ኣይባዬ ውር ክየምጵን ካኒ ቲትሼኬን እሺ ቡዋ።ውር ጊታይ እያኒሼ ጆሌ ኣይሁድ እን ማሬ ኤርምኔኑጝ⁴⁵ከቱንሲ ውር ጊታይ ባክኔ ጆል ቶኦካ ይሁኔን ዋኬ ፓያ ሃምካ ታታቻንካ ውርካ ቃሼ ውርካ ፈረሳውያኔ፤ እንግንዻ ዋይሼ ውር ጊታይካ ባኬን ሃኦ የማርቴ ቦፓይንቴኑጝ?⁴⁶ውር ጊታይካ ባክኔንዻ ሺጝ፤ ከእያይ ውር ክየምጵንዻ ሃሳወኔ እባጅኬኔ ዋሼያ እንግን።⁴⁷ውርካ ፈረሳውያንዻ ሺጝ እያጜ ዋሻ፤ ቱዋና እየውዻ እያጝኪ?⁴⁸ኣይባዬ ከኦካ ውር ታታቻኔ ውርካ ፈረሳውያኔ ውር ኬና ኤርምኒ ከእሺ ኣኔህ?⁴⁹ዬ ዛርሲ ጊታጝ ማር ክያጃ እባጄኑጝ ሃጊታኬና ጋሺዬ።⁵⁰ከኦካ ሌሜንካ እጝ ውር ኬና ሌሜ ኩይ ሃሚን ኔኒዬ ከኦግዬይ ክየም ኒቆዲሞስ ዋይሼ እንግን እያጝ፤⁵¹ክያጃ ጉዋዬ ውር ክየም ካኒ ሌሜ ዋይኬኔ ካጋሽክዬ ኦ ካኒ እባጅኬኔ ኮምሼባይ?⁵²እንግንዻ ዋይሼ እሺ እንዻ ፕር የኣይካ ገሊላይ? ውርካ ቶካ ባሪዮ ካማሬኬ ገሊላ ናሹጜኔ ቃቢባ፤ የሄክሻባ ሺጝ እያይኔ ዋሼያ እንግን።⁵³ኦይን ጩዋ ፓይላ ፓያ ሃምካ ቶኦ ጊዬቱጝ።

ሃፑክ 8ኝያ እን ጎሜኬ ኩጳሞጝ¹ዬ ኢየሱስ ኩያ ደብረ ዛይት።²ከካሪንታዻ ፕር እንቃ ጌያ ኦካ ጳልካ ቶኦካ ይሁኔን፤ ዛርሲዻ ፑኡሺሜና ኦካ ማራማራ ኔኒ፤ ኡፓ እንግን እርርሲዬንዻ።³ውርካ እርርሲኔንካ ክያጃ ባካ ሌሜኔ ውርካ ፈረሳውያኔ ቦፓይኔያ ኝያ ኬና ጎሜኬ ኩጳሞ ክያኒ፤ ሪባ እሺ ኦካ ሌሜንካ ዛርሲዻ፤⁴ዋይሼ ኢየሱስ እያጝ፤ ውሩጝካ እርርሲዬን ዮ፤ ኝያጝ ኣሽክዬን ኩጳሞዬ ጎማ፤⁵ሙሴዻ፤ ሃኣጚ ጊታይ ኣኔንኬ እያጝ ካሙርቴኬ ባዩጝ ሜይሼያ ኡዋው፤ ኤ እንካ የሺጚ ኦ?⁶ቦፓይኔ ኣንሺኔን እኑጝ፤ ዎሽ ጉዋር እንካ ካሲሲዬ እሺዬ ጊያ። ዬ ኢየሱስ ጌይ ኩፔ ካርሲያ ከቡዋ ኔኒ ዳሊ ክያኒ ቶኬን።⁷ዜርሜኔ ከክያጃ እን ጋንሺኖጝ ጌይ ካቼ ዋይሼ እንግን እያጝ፤ ከኦጉዩ ሌሜ ሙር እን ማር ሴሶ ኣኔኑጝ ከባይ፤⁸ፕር እንቃ ጌይ ኩፔ ቶካ ዳሊ ክያኒ።⁹ዋይባ እጝ፤ ካርሲኬ ውር ጌቿኔ ካርሲያ ክየም ክየም ቱሌን፤ ኝያ እን ከኦና ዾሬ ኣኔ ሌሜን ኔኒ ክያኑጝ ኢየሱስ ሺዽያ እሺጵን።¹⁰ኢየሱስዻ ጌይ ካቼ ዋይሼ ኝያ እን እያጝ፤ እን ኝያጝ ውራን ፓይ ኦን? ኦና ጋንሼንኬን እን ኮምሼን?¹¹እሺዻ ሺጝ፤ ታቹጝ ዮ፤ ውር ክየምጵንዻ ኣኔኬን፤ ኢየሱስዻ ሺጝ ኣንዻ ሃኮምሼኬን እን፤ ካምባ ካርሲኬ ሹጜ ኦይ ሴሶ ኣሽክዬን።ክሊኔንካ ኢየሱስ እን ኣዬ ኣኩሉኩጝ¹²ኢየሱስ ፕር እንቃ ዋይሼ ውር «ኣን ሃኣይ ፓኖስካ ዳሉጝ፤ ካጝ ዻዬ ኣኑጝ ማትሼባ ሜሌልካ ዻቆ ዬ ክየምጵንዻ ጃሌጆልኬን ድሙጉ ክያኒ።¹³ውርካ ፈረሳውያንዻ ሺጝ እን ኪሊማ እን ኑኑጝ የኪሊኔ ናንዳካ እን ኤምኑጝ ኣኔኬን ውር ኬናካ ቦው።¹⁴ኢየሱስዻ ዋሼ ዋይሼ እንግን እያጝ፤ እንካ ኪሊህንቴ ናንዳካ ኣን ኤምኑጝ ሃኩኔኬ ኦኔ ካካሜ ኦኔ ናንዳካጝ ሃእባጆጝ ኪሊማ ናኒ ሃኣኩሉክ፤ ዬ እየው ሃኩኔኬ ኦኔ ወይ ካካሜ ኦኔ ኦኬ ኬና የእባጅቴ ኣኔኬን።¹⁵እየው የቃብቴ ከቃቦካ ውር፤ ኣን ሃኮምሼኬን ውር ክየምጵንዻ፤¹⁶ካኮምሾጝ፤ ሃኬ ባባ እን ይዕሲ ኣን ዬ ናንዳካጝ ማሬ ኣንጵን ኣዬኑጝ ኮምሼን ናኒ ሃሊኪ።¹⁷ኪሊማካ ውር ዻ ኣኔ ቦወኑጝ ቶካ ከክያጃ ጉዩ።¹⁸ናንዳካ ኣን እንካ ኪሊህንቶጝ ክየማ ኣን፤ ኪሊማ እንቃ እን ይዕሲሼ ኣን ሃባባ።¹⁹ከኦይዻ ሺጝ፤ ሹቡን ኣኔን ኦን? ኢየሱስዻ ሺጝ የእባጃኬን ባባዻ ኣንዻ፤ ዋቲ የእባጃያ ኣንያጝ የእባጃባ ባባዻዬ ዋሼያ እንግን።²⁰ኢየሱስ ሃሳወ እኑጝ ሃኬ ኦካ ካራምካ ቶኦካ ይሁኔን ቱዎጝ ኦካ ቋጩርካ ቶኦካ ኣማ ኣኔን እርርሲኔን፤ ካኣይባዬ ሹ ኔኒ ናንዳካጝ ማሬ ሄክሼኑጝ ውር ክየምጵንዻ ካኒ ጎምኬን እሺ።²¹ኢየሱስዻ ፕር እንቃ ሺጝ፤ ኣን ሃኩይባ እየውዻ የዎሻ ኣንባ፤ ከሴሶ ጉዩዻ የኣርሻባ፤ ዬ ታይ ኣን ሃሺጜ ኩዬኑጝ የቻሊያኬን ፓይኔን።²²ውርካ ኣይሁድ ሺጝ፤ ሺጜ ታይ ሃሺጜ ኩዬኑጝ የቻሊያኬን ፓይኔኑጝ ዎሽ እሺ ኤምኑ ኒሼኒ?²³ዬ እሺ ዋይሼ እንግን እያጝ፤ «እየው የኣያካ ዱቡ፤ ኣን ሃኣይካ ዾዮክ፤ እየው የኣያካ ዳሉጝ፣ ኣን ሃማርካ ዳሉጜን።²⁴ከኣርሽቴ ከሴሶ ጉዩጝ ሃሜይሼያ እየው፤ ሃዋይሼያ እየው ኣን ሃኣይ እሺያጝ፤ እን ኣን ሃኣዬ እሹጝ የማራያ ከሻን ጎሜያጝ ከሴሶ ጉዩ የኣርሻያዬ።²⁵እንግንዻ ሺጝ፤ ኣይባዬ እን የኣይ ኒን? ኢየሱስዻ ሺጝ እያጜ ዋሼያ እንግን፤ እን ሃሜይሼ እየው ሌይ ጋኑጝ ኣን ሃኣይ እሺ።²⁶ከኦጉዩ ኦኬ ጁዋኑ ጊታኬና ካክያጄዬ ካኮምሼዬ ኣኔባ፤ ኣይባዬ እን ይዕሲ ኣኑጝ ሃውር ሌሞ፤ እን ሃዋዬ ከኦኔኑጝ ሃሜይሼባ ዳሉጝ።²⁷እንግንዻ ኣኒኔ እንግን ናንዳካ ሹኔ ሜይሼኑጝ ካኒ ጶቅሲኬን።²⁸ዬ ኢየሱስ ሺጝ እያጝ፤ ሹ ካጝ የሻምቴ ሃንታካ ውር ዼግ ዼጉጝ፤ ኦይን ሃክያጆጝ እሺ ኣዬ ኣኑጜ ሃክያጄ እን ባባ እርርሲዬ ኣኔ፤ ሃማሬኬ ክያጃ ናኒ ኣሽክዬኑጝ የእባጃባ፤²⁹እን ይዕሲ ኣን እሺ ኣኔኬ ኣን፤ ሹ ፓይላ እንካ ዋዝንሲ ኣኑጝ ናንዳካ ኣሽክዬን ካኒ ኦቼኬን ኣንጵን።³⁰ሃሳውባ እን ውር ጁዋኑ ኤርምኔና ከእሺ።ሃንታካ ኣብርሃም³¹ኢየሱስ ዋይሼ ውርካ ኣይሁድ ጊታይ ኤርሜንኬ እሺ እያጝ፤ የቁዋቅትሻያ ከእርርሲኔን ናኒያጝ ከኣኩሉክ እየው ኣያ ውርካ ዻይኔ ጆሌን ናኒ፤³²የእባጃባ እንካ ኣኩሉክዻ፤ ከኣኩሉክዻ ቡልባ እየው ኣርና።³³እንግንዻ ዋሼ ሺጝ ኡዋው ሃኣያ ሃንታካ ኣብርሃም፤ ሃማቲያ ካይሲካ ውር ክየምጵንዻዬ ሃእባጃኬን፤ ኣኪ የሺጊ እያን የቱላባ ኣርና?³⁴ኢየሱስዻ ሺጝ እያጜ ዋሼያ እንግን፤ ሃዋይሼባ እየው ኣኩሉክ፤ ውር እን ኣሽክዬን ሴሶጝ ሃውርካ ዋድማካ ሴሶ፤³⁵ውርካ ዋድማ ኡፍኬን ከሹቃ ኦካ ጶሮካ ሹኔ ከሹቃ፤ ዬ ሃንታ ኣይን ሹ ፓይላ ኡፓ ቶኦ ክያኒ።³⁶ኣኪ ውዋ ቡላ እየው ኣርናያጝ፤ ከኣኩሉክ የማቲያባ ኣርና።³⁷የኣይቴ ሃንታካ ኣብርሃሙጝ ሃእባጅያ እየው፤ ኣይባዬ ናንዳካጝ የማርቴ ክያጃ ናኒ ዋይቴኑጝ የቱሙዬ ናሹጛያ ኣን ኒሼን።³⁸ኣን ሃሃሳውባ እጝ ሃጌዬኬ ኦካ ባባጝ፤ እየውዻ የኣሽክያባ እን የዋይቴኬ ኦካ ሹቡጊኑጝ።³⁹እንግንዻ ሺጝ፤ ሹቡጌን ጉዋዩካ ሃኣብርሃሜ ሃዋሼያ እሺ።ኢየሱስዻ ዋይሼ እንግን እያጝ፤ የኣያያ ሃንታካ ኣብርሃምያጝ ከኣሽኪ እን ኣብርሃም ኣሽኪዬኪ።⁴⁰ኣኩሉክ እን ሃዋዬኬ ኦካ ባሪዮዬ ሃሜይሼ እየው የቱሙዬ ናሹጛያ ኣን ኒሼን፤ ዬ ኣብርሃም ካኒ ሻምኬን እያይ።⁴¹እን እየው የኣሽክቶጝ ሃእን ሹቡጊን ጋሽክዮጝ፤ እንግንዻ ሺጝ፤ «እየውካ ሃማራ ጊታኬና ጅሼኬ ኩጳሞዬኒ፤ ሺጝ ሹኔ ጉዩ ሃባሪዮጵኔ ዋሼያ እንግን።ሃንታካ ዲያብሎስ⁴²ኢየሱስዻ ዋይሼ እንግን እያጝ፤ ባሪዮ ዋታ ሹቡጊንያጝ፤ ኣን ሃኩኔኬ ሃምካ ባሪዮዬ ሃኩንያዬ፤ ዋንቲ የናሺያያ ኣን፤ እሺ ይዕሲያ ኣን ዬ ሃካና ኩንኬን ኣንጵን።⁴³ይን ሃክያጆጝ ሃናንዳካ ኦ የማርቴ ጶቅሲዬኑጝ? ናንዳካኦ ሃናንዳካጝ የማርቴ ክያጃ ናኒ ዋዬን ቻሊዬኑጝ።⁴⁴እየው የኣያካ ሹቡጊን ጉዩ ዲያብሎስ፤ የዎሻ ክያጃካ ሹቡጊን ሹዋጵሼን፤ እሺ እባ ከሌሜን ሃውርካ ኒሺኔን፤ ከእሺ ናንዳካጝ ኣኩሉክ ማሬ ኣኔኑጝ ካኒ ቁዋቅትሽኬን ከኣኩሉክ፤ እሻ ውርካ ሾሮ፤ ናንዳካጝ ኣዬ ⁴⁵ዬ ኣን ናንዳካጝ ሃሃሳወ ኣኩሊኩጝ የኤርምንቴኬን ከኣን።⁴⁶ከኦጉዩ ናንዳካ ሴሶ ኬና ካቻሊ ኣን ካሲሲዬን ኣኔባይ? ሃኬና ሃሳወ ከኣኩሉክያጝ፤ ሃናንዳካኦ የማርቴኬ ኣን ኤርምኔኑጝ?⁴⁷እን ኣይኬ ባሪዮጝ ዋይ እጝ ባሪዮ ሺጞጝ፤ ዬ እየው ናንዳካጝ የማርቴኬ ባሪዮ ኣዬኑጝ የዋያኬን።እጝ ኢየሱስ ሃሳወ ናንዳካ እሹጝ⁴⁸ውርካ ኣይሁድ ዋሼ ሺጝ እን የኣይ ውርካ ሳማሪያይ፤ ፕር እን ሃሺጝቴ ቤሮ ጎማ እኑጝ ሃማራ ሊኪዬኒ?⁴⁹ኢየሱስዻ ሺጝ እያጜ ዋሼያ እንግን፤ ኣንካ ሃሪግሼንባ ባባ ዬ ቤሮ ካኒ ጎምኬን ኣን፤ ዬ እየው የጎብሻያ ኣን።⁵⁰ኣን ሃዎሽኬን ጌጳሞ ናኒ፤ የእጛ ዎሾጝ ኣኔባ፤ ካኮምሺኔንዻ ሃእሺ።⁵¹ሃዋይሼባ እየው ኣኩሉክ ውር ክየምጵንዻ ዻዬያ ክያጃ ናኒያጝ ጌይኬን ኣርሼን ክየምጵንዻ።⁵²ውርካ ኣይሁድ ሺጝ እያጝ፤ ቤሮ ኣኒኔ ከእኑጝ ሃእባጃያ ጋን፤ ኣብርሃም ኣርሻ፣ ውርካ ቶካ ባሪዮንዻ ጋርሻ እያይ፤ ዬ እን የሺጚ ውርካጝ ዻዬ ክያጃ ናኑጝ ካማሬ ኣርሼን ጌዬኑጝ የክያጅያ።⁵³እን የሳጊባይ ከኦካ ሹቡጌን ጉዋዩ ኣብርሃም? እሺ ኣርሻ ውርካ ቶካ ባሪዮንዻ እያይ፤ ኣይባዬ እን ከሺጝ ኣን ሃኣይ ኒን?⁵⁴ኢየሱስዻ ሺጝ እያጜ ዋሻ፤ ኣን ሃጌጳሲያ ኣን ኤምኑያጝ ጌጳሞ ናኒ ሃማም እያይ፤ ዬ እንካ ጌጳሲ ኣኑጝ እን እየው የሺጝቴ ኣምላክ ጉዋዩጝ ሃባባ።⁵⁵እየው ከማር እባጄኑጝ ኣን ሃእባጅያ፤ የሺጛያ ሃእባጃኬንያጝ ኣንዻ ሃማቲባ ውርካ ሾሮ ከእየው፤ ዬ ኣን ሃእባጅያ፤ ሃቶይባ ክያጃ ኔኒዻ።⁵⁶ሹቡጊን ኣብርሃም ከቃቦካ ሹ ናኒ ጌዬን ዋዝንዽንያ፤ ጌያዻ፤ ሻማ ሾሮዻ።⁵⁷ውርካ ኣይሁድዻ ሺጝ፤ እኑጝ ካኒ ቦን ማር ዾጝታም ሄክሼኑጝ የጌይያህ ኣብርሃም?⁵⁸ኢየሱስዻ ሺጝ ሃዋይሼባ እየው ኣኩሉክ፤ ከሌሜንካ ጅሼንካ ኣብርሃም ኣን ሃኣይ ኣን።⁵⁹ከሹ እን ሺጝካ ሙሬኔ ቦዋ ባይ፤ ዬ ኢየሱስ ራሼና ከኦጊዬይ፤ ቱልኬ ኦካ ቶኦካ ይሁኔንዻዬ ኩያ።

ሃፑክ 9ኢየሱስ ባይሺሻ ውር እን ካርቡ ኣይ ሙሙዾዬ ጅሾጝ¹ሳጊኬ ጉዋርያጝ ጌይ ውር ኬና ካርሲኬ ኦባ ጅሼዬ ካርቡ ኣይ ሙሙዾ።²ውር ጊታይካ ዻይኔንዻ ሺጝ፤ «ረቢ፤ ውሩጝ ካርቡ ኣይ ሙሙዾዬ ጅሾጝ ኣሽኪ ሴሶ ሃኒን? ሃእሺ ሞ ውራን ኔኒዬ ጋንሼና።³ኢየሱስዻ ሺጝ እያጜ ዋሻ፤ እሺ ወይ ውራን ኔኒ ካኒ ጋሽኪኬን ሴሶ፤ ይጝ ኣዬውጝ ካዹዋልሼን ዋድማካ ባሪዮ ከእሺዬ ጊያ።⁴ሹ ኣኔባዬ ዋድማካ እን ይዕሲ ኣን ኣሽክዬን ኣኔባ፤ ውር ክየምጵንዻ ካማሬ ኣሽክዬን ቻሊዬን ምክር ኔኒ ኩንባ፤⁵ሃኣኔንባ ዳሉጝ ክያኒዬ ፓኖስካ ዳሉጝ ሃኣን።⁶ሺጜ እያይኑጝ ጩዋ፤ ሺጝ ካፓልቅቴ ዳሊ ክያኒዬ ሙኒያ ሲሮ፤ ጵሻ ካርቡካ ውር እንዻዬ፤⁷ዋይሼ እሺ ካሜ ሮኩንቴ ኦካ ዱቅኔን እንካ ሰሊሆም፤ እን ሺጜ ሰሊሆም ሺጝ ሃኬና ይዕሲዬ። ውር እንዻ ኩዬ ሮኬና፤ ጌይዻዬ ዋኬ ኩና።⁸ውርካ ጉል ኔኒዬ ከሌሜንካ እን ኡፔ ኣኔን ይሁኔኔ ጌይ እሹጝ፤ ሺጝ ውሩጝ ማር ውር ኑጝ ኡፔ ኣኔን ይሁኔንኪ?⁹ውር ክየም ክየም ሺጝ ከኣኩሉክ ሃእሺ፣ ዶክ ሺጝ፤ ሙኔን እሺ ዬ ማር እሺዬን። ዬ እሺ ሺጝ ሃኣን።¹⁰እንግንዻ ሺጝ ኣኪ ካርቡ ኑኑ ቦወን እያኔ ጋንሼና?¹¹እሺዻ ሺጝ ውር እን የሺጝቴ ኢየሱስ ሻም ሲሮዬ ጵሻ ካርቡ ናኒ፤ ካካሜ ሰሊሆሜ ካሮኩኖጝ ሜይሼያ ኣን፤ ሃኩያ ሮኬንያ ጌዬንዻ ሃቻሊያ ሺጝ እያይኔ ዋሼያ እንግን።¹²እንግንዻ ሺጝ ኣኪ ውር እን ኣኔን ኦን። እሺዻ ሺጝ ኣንዻ ሃእባጅኬን።ውርካ ፈረሳውያን ውር እን ሻም እያን ባይሾጝ ካርሲያ ቶዬን¹³እንግንዻ ቦሼያ ውር ኑጝ ካርቡ ኣይ ሙሙዾጝ ሃምካ ውርካ ፈረሳውያን።¹⁴ኢየሱስ እን ኣሽክዬ ሲሮጝ፤ ውር እን ካርቡ ቦውኖጝ ሃሹ እንካ ሶጵሳጝ።¹⁵ዬ ውርካ ፈረሳውያን ሻም እያን ቻሊዬ ጌዬኑጝ ጋንሼና፤ ውር እንዻ ሺጝ፤ እሺ ጵሻ ካርቡ ናኒ ከሲሮ፤ ኣንዻ ሃሮኬንያ፤ ሃኣጝ ሃጌይያ ዋይሼ እንግን እያይ።¹⁶ውር ክየም ክየም ካፈረሳውያን ሺጝ ውሩጝ ማር ሹ እንካ ሶጳሳ ሪግሺኔኑጝ ማርኬ ባሪዮዬን ዬ ዶክ ሺጝ፤ ውርካ ሴሶ ቻሊ እያን ኦኬ ዹዋልሺኔን ሹቃ ጊታጝ ኣሽክዬን? ከኦካ ጫቃን ጊዬይ ኣይሼያ ዋራቅ።¹⁷ዬ ዋክቴ ሃምካ ውር ኑጝ ካርቡ ኣይ ሙሙዾጝ፤ ሺጝ ናንዳካ ውር እን ቦው ካርቡ ኑኑጝ፤ ኣኪ እን የሺጚ እያን? ውር እንዻ ሺጝ እሻ ውርካ ቶካ ባሪዮ።¹⁸ውርካ ኣይሁድዻ ይዕሲሼ እሺ ሃምካ ውራን ኔኒዬ ሌይ ሃምካ ሺዎጝ፤ ውር እን ካርቡ ኣይ ሙሙዾዬ ጌዬዬ ካኒ ጎምኬን ከሻን።¹⁹እንግንዻ ሺጝ፤ ውዋ እን ጉዩ የሺጝቴ ጅሻ ሙሙዾጝ ሃይንኪ? ኣኪ ጋን ሻም እያን ቻሊዬ ጌዬኑጝ ዋይሼ እንግን እያይ።²⁰ውራን ኔኒዻ ሺጝ እያጜ ዋሻ፤ ኣዬ ውዋ ጉዋዩዬ ጅሼ ካርቡ ሙሙዾጝ ሃእባጃያ፤²¹ዬ ጋን ሻም እያን ቻሊዬ ጌዬኔ ካርቡ ኔኒ ቦውሻ እሺ ኒኔ ኡዋው ሃእባጃኬን።ናንዳካጝ ኣዬ ውር ፓሱጝ፤ ናንዳካ እሺ ኤምኑ ቻሊባ ሃሳውኔኔ ኣንሽ እሺ።²²ውርካጝ ሺጚ ኢየሱስ ሃክርስቶሴ ክሊዬን ፓይላ ከኦካ ቶኦካ ይሁኔን ካዋኮጝ ናንዳካ ውርካ ኣይሁድ ሌሜ ቱሙዮጝ፤ ውራን ኔኒ እን ሺጜ እያይኑጝ ሃናንዳካጝ ሪግሺኔ ውርካ ኣይሁዱጝ።²³ውራን ኔኒዻ፤ ኣዬ ውር ፓሱጝ ኣንሺ እሺ።²⁴ሺው ውር እን ካርቡ ኣይ ሙሙዾ እንቃዬ ሺጝ፤ እን ውሩጝ ሪግሺንቴባ ባሪዮ፤ ውር እን ኣዬ ውርካ ሴሶጝ ኡዋው ሃእባጃያ።²⁵እሺዻ ሺጝ፤ እን ሃኣዬ ውርካ ሴሶጝ ኣን ሃእባጅኬን፤ ኣይባዬ ሃኣዬ ውር ኬና ካርቡ ኣይ ሙሙዾዬ ዬ ጋን ሃኣኒኔ ጌዬኑጝ ሃእባጅያ ኦኬ ክየም።²⁶እንግንዻ ሺጝ፤ ሻም እን እያን፤ ካርቡ ኑኑዻ ቦው እያኔ ጋንሼና።²⁷እሺዻ ሺጝ ሃሌምሻ ሜይሼያ እየው፤ የካኔ ዋይሺቴኬኒ ኣን፤ ሃናንዳካኦ የዎሽቴ እንቃ ዋዬኑጝ፤ ፕር እየው የዎሻ ውርካ ዻይኔን ማቲዬኒ?²⁸ከኦይን ጩዋ ሃሳውሼ እሺ ክያጃካ ይሪኔኔ ሺጝ እያጝ፤ ውርካ ዻይኔን ካውሩጝ ሃእኒ? ኡዋካ ሃኣያ ውርካ ዻይኔንካ ሙሴ/²⁹ባሪዮ ሃሳውኔ ሙሶጝ ሃእባጃያ፤ ዬ ውሩጝ ኩኔኬ ኦንዻ ሃእባጃኬን።³⁰ውር እንዻ ሺጝ እያጜ ዋሼያ እንግን፤ እን ኩንኬ ኦኑጝ እየው የማርቴ እባጄኑጝ፤ ሃኬና ጎሺዬ፤ ኣይባዬ እሺ ቦሼያ ኣን ካርቡ ናኒ።³¹ባሪዮ ሃኬ እን ዋይሼን እሺዬ ሪግሼኔ ኣሽክ ክያጃ ኔኒዬ ዬ ማሬ ውርካ ሴሶ ዋይሼኔኑጝ ሃእባጃያ።³²ሺጝ ውር ኬና ቦው ካርቡካ ውር ኬና ካርሲኬ ኦባ ጅሼዬ ኣይ ሙሙዾጝ ኣኔባጝ፤ ካርሲኬ ኦባ ሙኔ ፔኔ ውር ክየምጵንዻ ኬና ዋህ ኣኔኬን።³³ውሩጝ ዋቲ ማራ ከባሪዮ ኣዬንያጝ ዋንቲ ቻሊሜንኬን ይጝ ኣሽክዬን።³⁴እንግንዻ ሺጝ፤ ክያጃ ኔኒ እኑጝ ሻሜ ጅሼኬ ሴሶ፤ እን የሺጚ እያን ኡዋው እርርሲዬን? ሺጝ እያይኔ ዋሼያ እሺ፤ ዋኬያዻ።ሙሙዾ ኣዬንካ ኡሲ³⁵ኢየሱስዻ ዋያ እን ዋኬ ውር እኑጝ፤ ሹ እን ጌዬ እሺዻ ዋይሼ እሺ የኤርምንባይ ከሃንታካ ውር?³⁶ውር እንዻ ሺጝ፤ ታቹጝ ናኒዮ፤ ካኤርሚኖጝ እሻ ኒኔ ኣንሼና።³⁷ኢየሱስዻ ዋይሼ እሺ የጌይያህ፤ ጋን ኣኔን ከእን ሃሳውኔን እሻኒን?³⁸ውር እንዻ ሺጝ፤ ታቹጝ ዮ፤ ሃኤርሚኔባ፤ ቶኬ ኩዋምንዻዬ ይወና።³⁹ኢየሱስዻ ሺጝ፤ ሙሙዻን ካጌዮጝ፤ ጊታይ ጌይዻ ካሃሳዎጝ፤ ናንዳካ ኮምሼን ሃኩንያ ሃኩንያ ዳሉጝ ክያኑጝ።⁴⁰ውር ክየም ክየም ጊታይካ ፈረሳውያን ኣኔን ከእሹጝ ዋይ እጜ ሺጝ ሃኦ ኔኒ? ኣኪ ኡዋዻ ሃሙሙዾ ኣዬን ጉዋዩይ?⁴¹ኢየሱስዻ ዋይሼ እንግን ዋንቲ የኣያያ ሙሙዾያጝ የኣንቴኬን ሴሶ፤ዬ ጋን ናንዳካጝ የሺጝቴ ሃጌያባጝ፤ ሴሶ ጉዩ ከእያይ ኣኖጝ ኣኔባ።

ሃፑክ 10ውርካ ዻውኔኔ ዜሌዬ¹ሃዋይሼባ እየው ኣኩሉክ፤ ሃምካ ዜሌካ ማድር ማርኬ ሃፑኬኔ እን ቃሌ ሁሉኬ ኦ እንቃጝ ሃጓርጉዬ ካቃውኔኔ፤²ዬ እን ሁሉኬ ሃፑኩጝ እሻ ውርካ ዻውኔንካ ማድር፤³ውር እን ባኬን ሃፑክዻ ቦውሼባ እሺ ሃፑክ፤ ማድራንዻ ዋይባ ናቅዲ ኔኒ፤ ማድራን ኔኒዻ ሺውኬ ሮጜ ቡልባ።⁴ቡላ ጊታይ ኣይ ኔኒ ፓይላያጝ ጩዋ ኩይባ ከሌሜን ጊዬይ፤ ማድራንዻ ናንዳካጝ ዋዬ ናቅዲ ኔኑጝ ዻዬ እሺባ።⁵ዬ ውር እን ኣይ ኮማናጝ ናንዳካጝ ማሬ ናቅዲ ኔኒ እባጄኑጝ ጉክባ ከኦኔኒ ዬ ዻዬኬን እሺ ክየምጵንዻ።⁶ኢየሱስ ዋይሼ እንግን ሄክንሶጝ፤ ዬ እንግን ሜይሼ እንግን ኦጝ ካኒ ጶቅሲኬን።⁷ዬ ኢየሱስ ፕር ዋይሼ እንግን እያጝ፤ ሃዋይሼባ እየው ኣኩሉክ፤ ሃፑካ ማድር ሃኣን።⁸ጊታይ ፓዬን ከሌሜን ናኑጝ ሃጓርጉዬ ካቃውኔኔ፤ ዬ ማድራን ካኒ ዋይሼንኬን እንግን።⁹ሃፑካ ኣን፤ እን ሁሉኬ ዻሪ ናኒ ፓይላ ባይሽባ፤ ሻውባ፣ ቱልባዻ ጌይባ ኦካ ቃትዻ።¹⁰ጓርጉ ኩን ኣጉሬኔ፣ ኒሼኔ ካይሲዬንጵኔ፤ ዬ ኣን ካኣይሼ እንግን ዻቆዬ ካዻሺዬ እንግኔ ሃኩንያ።¹¹ውር ሹቃካ ዻውኔን ሃኣን፤ ውርካ ዻውኔን ሹቃ ሳስክዬ ኣዬንባ ዻቆ ኔኒ ናንዳካ ማድራን፤¹²ዬ ውርካ ዻውኔን እን ሃይዕሲዮጝ ማድራን ናንዳካጝ ማሬ ኔኒ ኣዬኑጝ፤ ዮዮ ፓዬንያጝ ኦይድ እንግኔ ሪሽባ፤ ዮዮዻ እንዽባ ማድራን፤ ላሊባዻ።¹³ሪሾጝ ሃናንዳካጝ ኣዬ ሃሊዬ ማርሼ ማድራን ኦኬ ክየምጵንዻ ኣኔኑጝ።¹⁴ውርካ ዻውኔን ሹቃ ሃኣን፤ ሃእባጅያ ማድራን ናኒ፤ እንግንዻ ጊባጃ ኣን፤¹⁵ይንዻ ባባ ከእያይ እባጄ ኣኑጝ፤ ኣንዻ ሃኬ እያይ ሃእባጄ ባባጝ። ዻቆ ናኒዻ ሃሳስክያ ኣዬን ናንዳካ ማድራን ናኒ።¹⁶ጊታይ ማርኬ ኦካ ዜሎጝ ኣዬኑጝ ማድር ናኒ እንቃ ኣኔባ፤ እንግን ቦኩኔን ናኒ ኣኔባ። እንግንዻ ዋይባ ናቅዲ ናኒ፤ ማቲባ ዜሌ ክየምዻ፤ ውርካ ዻውኔንዻ ሃክየም።¹⁷ናንዳካ ዋኬ ናሹጜን ናንዳካጝ ካሳስክያ ኣይኔ ዻቆ ናኑጝ ባባ ናሺያ ኣን።¹⁸ዻቆ ናኒ ሃሳስክያ ኣዬንባ ከቃቦ ናኒ ዬ ውር ክየምጵንዻ ቦኬን ከኦናኒ፤ ሳስክዬ ኣይኔኔ ናሹጜኔ ሃኣኔ ጌጳሞ፤ ኤርጎጝ ሃቦዎጝ ሃኬ ኦካ ባባ።¹⁹ከኦይን እን ናሹጝኬ ክያጃ እኑጝ እንቃ ከኦካ ጫቃንካ ውርካ ኣይሁድ ማቲያ ላልምኔን።²⁰ውር ጁዋኑ ሺጝ፤ ሃኬና ቤሮ ጎሜ ኣይ ውርካ ጮዩ፤ ሃኦ የዋይቴ ክያጃ ኔኑጝ?²¹ዬ ዶክ ሺጝ፤ ይጝ ማር ሃሳዋካ ውር እን ቤሮ ጎሜዬን፤ ቤሮ ቻሊባይ ካርቡካ ውር እን ኣይ ሙሙዾ ቦወን?እን ውርካ ኣይሁድ ማሬ ኣምኒዬኑጝ²²ከኦካ ኢየሩሳሌም ማቲያ ቶንቶሮካ ቶኦካ ይሁኔን ሮኩንሲዬን፤ ዋዳ ኔኒዻ ሃባርጊን፤²³ኢየሱስዻ ከኦካ ካርምካ ቶኦካ ይሁኔን ቱዎጝ፤ ኣኔን ከኦይካ ዋኬጆሌንካ ሰሎሞን ሳጊዬን፤²⁴ውርካ ኣይሁድዻ ጱዽ እሺዬ ዋይሼ እሺ ሃሌይ ኣሚን ከጎሜ ሻን ጉዋዩዬ ከኡፎጝ? እን የኣይ ክርስቶስያጝ ሜይሼ ኡዋው ሊኪ።²⁵ኢየሱስዻ ሺጝ እያጜ ዋሼያ እንግን፤ ኣን እባጝ ሃሜይሼያ እየው፤ ዬ እየው የኣምኒያኬን ከሮጝካ ባባ፤ ኦኬ ሹቃ ጊታይ ሃኣሽክሼ እየው ሃሳውባ ናንዳካ ኣን፤²⁶ዬ እየው ናንዳካጝ የማርቴ ማድር ናኒ ኣዬኑጝ የኣምኒያኬን ክያጃ ናኒ፤²⁷ማድራን ናኒ ዋይባ ናቅዲ ናኒ፤ ኣን ሃእባጅያ እንግን፤ እንግንዻ ዻዬ እንባ፤²⁸ኣን ሃኣይባ እንግን ዻቆካ ቦን ጮል፤ ካይኬን ክየምጵንዻ፤ ከኦካ ቡዋ ናኒዻ ውር ክየምጵንዻ ኬናካ ቻሊ እንግን ዎቼን ኣኔኬን።²⁹ባባ እን ኣይ ኣን እንግኑጝ ከፓይላ ሃሳጊ፤ ከኦካ ቡዋካ ባባዻ ውር ኬና ካቻሊ እንግን ዎቼን ኣኔኬን።³⁰ኣኔ ባባዬ ሃኣያ ክየም።³¹ውርካ ኣይሁድ እሺ ሙሬን ቦዋ ባይ እንቃ፤³²ዬ ኢየሱስ ሺጝ፤ ሃዹዋሼ እየውባ ዹዋልሺኔን ሹቃ ታታቺ ጁዋኑ ጊታይ ኣኔንኬ ባባጝ፤ ኣኪ ከኦካ ጊታይ የሺጛ ናንዳካና ኣን ሙሬን? ዋይሼ እንግን እያይ።³³ውርካ ኣይድዻ ሺጝ፤ ሃሺጝቴ እን ሙሬኑጝ የኣይባ ውርካ ማሜ፤ ዋድማ ኑኑ የሻሜ ኬካ ኣምላክ፤ የሃሳውኔ ክያጃካ ይሪኔኑጝ ዬ ከጊታጝ ማር ናንዳካ ናዬኔ ዋሼያ እሺ።³⁴ኢየሱስዻ ሺጝ እያጜ ዋሼያ እንግን፤ ከክያጃ ጉዩ እየው የኣያ ኣማልክት ሺጝ እያይኔ ካኒ ቶኬኒ?³⁵እን ቦሼ እየው ክያጃካ ባሪዮ ኣማልክት ጉዩ ኣኔያጝ፤ ማር ኬና ካማር ወርቀት ሚኔን ቻሊዬንያጝ፤³⁶ኣኪ፤ ሃዋይሼያ እየው ሃኣይ ውዋካ ባሪዮያጝ፤ ኣይን ሹኖጝ እን ሻሜ ዋናዬ ባርኪዬ ይዕሲሼ ዳሉጝ ሃናንዳካ ኦ የሺጛ ይራዬ የሻምቴ ውርካ ሴሶጝ?³⁷ሃማሪያ እን ባባ ኣሽክዬ ኣሽክዬንያጝ የኣምኒያኬን ክያጃ ናኒ፤³⁸ዬ ሃኦኬና ኣሽክዬዬ የማራያ ኣን ኣምኒዬንዻያጝ፣ ባባ ኣኒኔ ከኣኔ ኣንዻ ሃኣኒኔ ከባባዬ ከእባጅቴዬ ከጵቅሲቶጝ ኦኬ ሹቃሹቃ ጊታይ ኣምኒባ።³⁹ፕር እንቃ ዎሻ ጎሜን፤ ዬ እሺ ዻቃ ከኦካ ቡዋ ጊዬይ።⁴⁰ከኦይን ኢየሱስ ኩያ ኦባ ከሌሜን ዮሐንስ ዱቅዬ እሺ እያጝካ ዮርዳኖስ ታቴ፤ ኡፓ ኦይንዻ፤⁴¹ውር ጁዋኑዻ ፓዬን ኦይን ኔኑጝ። እንግንዻ ሺጝ፤ ዮሐንስ ካኒ ኣሽኪኬን ኦኬ ሹቃ ክየምጵንዻ፤ ኣይባዬ እን ሃሳወ ናንዳካ ውሩጝ ፓይላ ሃኣኩሉክ።⁴²ከኦካ ራቅ እን ውር ጁዋኑ ኣምኒያ ከኢየሱስ።

ሃፑክ 11ኣርሼንካ ኣልዓዛር¹ከኦካ ልትካ ማሪያሜ ጪኔ ማርታዬ እን ኡፔን ቢታንያ እን ሺጜ ኣልዓዛር ዴሜኔ ኣኔባ።²እን ጪኔ ኔኒ ኣልዛዓር ዴምኔ ማሪያም፤ እርሼ ጃፍካ ታቺ እን ሹቶዬ ኣኔን ጃፍ ኔኒ ከጪራሺ ፒቴን።³ጪኒጌንካ ጋጝዻ ሺጝ፤ ታቹጝ ዮ፤ ውር እን ሃናሺቶጝ ዴሜናዬ ይዕሲሼያ እሺ ሜርሜር።⁴ኢየሱስ ሹ እን ዋዬ እኑጝ ሺጝ፤ ዴምኔን እን ውዋካ ባሪዮ ካጌጳሲኬ እሺዬ ሃናንዳካ ጌጳሞካ ባሪዮ ዬ ማር ኬና ካሄክሺሽ ሃምካ ኣርሼኔን።⁵ኢየሱስዻ ናሺባ ማርታዬ ጪኔዬ ኣልዓዛሬ።⁶ኣይባዬ ሹ እን ዋዬ ዴምኔንካ ኣልዓዛር ከኦካ ራቅ እን ኣኖጝ ድቤና ሹ ዻ።⁷ከኦይን ጩዋ ዋይሼ ውር ጊታይ ዻዬ ጆሌ እሹጝ ካዋክቴ እያጝካ ይሁዳጝ።⁸እንግንዻ ሺጝ ውሩጝካ እርርሲዬን ጉዋዩ ዮ፤ ከሌሜንካ ሹ ጩዋማ ውርካ ኣይሁድ ዎሻ እን ከባይ ሙሬን፤ ፕር እንቃ የኩይባይ ሃሚን?⁹ኢየሱስዻ ሺጝ እያጜ ዋሻ፤ ሹሽ ሃሳዓት ታጲላማ ማር ሜሌሌኒ? እን ናሹጝኬ ኦሜሌል ካዳሉጝ ናንዳካ ሹሽ እን ጌዮጝ እንካ ዋካ ጆል ካትሜንኬን፤¹⁰ዬ እንካ ካቲምንቶጝ ሃእን ጃሌጆል ድሙጉ ክያኑጝ ኦሜሌል ኣኔኬኔ።¹¹ሜይሼ እንግን እኑጝ ጩዋ ዋይሼ እንግን፤ ውርካ ናሺማ ጉዋዩ ኣልዓዛር ኡጛ፤ ኣንዻ ሃኩይባ እሺ ከሩዋቱክ ክያኒ ጬይሼን¹²ውር ጊታይ ዻዬ ጆሌ እሺዻ ሺጝ፤ ታቹጝ ዮ፤ ኡጉያጝ ባይሽባይ።¹³ኢየሱስ ሜይሼ እንግን እኑጝ ሃናንዳካ እን ኣርሾጝ፤ ዬ ውር ጊታይካ ዻይኔን ዋሽኬ ኦኮኑጝ ሃሳወ ከኦኮኑጝ ሩዋቱክ ጎሜ እሺዬ ኡጞጝ።¹⁴ዬ ከኣኩሉክ ዋይሼ እንግን ኣልዓዛር ኣርሻ።¹⁵ከኣምኒቶጝ፤ ናንዳካጝ ሃማሬ ሃሚን ኣኔኑጝ ናንዳካ እየው ኦኬ ዋዝንሲያ ኣን ዬጋን ካፓይባ ሃሚን ኔኑጝ።¹⁶ከኦይን እን ሺጜ ዲዲሞስ ቶማስ ዋይሼ ውርካ ዻይኔን ጊታይ ሺዺ ኡዋዻ ካፓያ ኣርሺባ ከእሺ።ኢየሱስ ሌምሲያ ጪኒጌንካ ኣልዓዛር¹⁷ኢየሱስ ሄክሺኒንያጝ ኣልዓዛር ቱቱኬ ማቲያ ሹ ኣሁር።¹⁸ቢታንያ ከኦካ ኢየሩሳሌም ዹካትሽ ዹካትሼን ካሹ ታጲላማ።¹⁹ውር ጁዋኑካ ኣይሁድዻ ፓዬን ማርታዬ ማሪያሜ ናንዳካ ኣርሼንካ ጪኒጌን ኣልዓዛር ሌምሲዬን፤²⁰ማርታ ዋይ ኩኔንካ ኢየሱሴ ቱላ ቦወን፤ ዬ ማሪያም ሺዺያ ቶኦ ክያኒ።²¹ማርታዻ ዋይሼ ኢየሱስ እያጝ፤ ታቹጝ ዮ፤ ዋንቲ እን የኣኔያ ኦጝያጝ ዋቲ ጪኔ ናኒ ኣርኬን።²²ኣይን ጋኑጝ ኦካጝ ሃይሁኖጝ ፓይላ ባሪዮ ካኣዬ ኣኑጝ ሃእባጅያ።²³ኢየሱዻ ዋይሼ እሺ ጪኔ ኑኑ ናሹጝጋ።²⁴ማርታዻ ሺጝ፤ ከሹካ ቱንሲ ከናሹጜን ካናሹጞጝ ሃእባጅያ።²⁵ኢየሱስ ዋይሼ እሺ እያጝ፤ ናሹጜኔ ዻቆዬ ሃኣን፤ እን ኣምኒኬ ኣኑጝ ኣርሺኒን ኦፓ ከዻቆ፤²⁶ካጝ ኡፍኬ ኣኑጝ፤ እን ኣምኒኬ ኣንዻ ክየምጵንዻ ኣርኬን የኣምኒባይ ይጝ?²⁷እሺዻ ሺጝ፤ እህ ታቹጝ ዮ፤ እን የኩኔ ዻሉጝ ክያኒ የኣዬ ክርስቶስ ውዋካ ባሪዮጝ ሃኣምኒባ። ²⁸ሺጜ እን ጩዋ፤ ዋኬ ኩዬ ሺው ጪኔ ማሪያም እሺጵኔ ሺጝ፤ ²⁹ማሪያምዻ ዋይባ እን ናሹጝ ይሪካዬ ኩያ ሃሚን ኔኑጝ።³⁰ከሹ እን፤ ሃራቅ እን ማርታ ቦወ ኢየሱስ ዬ ካኒ ሁሉኬን ሃምካ ሊቱጝ።³¹ውር ጊታይካ ኣይሁድዻ ጊታና ሌንሲዬን ማሪያሜ ኣኔን ቶኦ ቱዎጝ ጌይ እን ናሹጜ ቱሌዬ፤ ዋሽኬ ኦኮኑጝ ካካሜ ሃምካ ይግኔካ ኦቆሬዬ ዻዬያ።³²ማርታዻ ሄክሽ ሃምካ ራቅ እን ኢየሱስ ኣኔዬ ጌይባ፤ ቡድ ጃፍ ኔኒ ክያኒዬ ሺጝ፤ ታቹጝ፤ ታቹጝ ዮ፤ ዋንቲ እን የኣኔያ ኦጝያጝ ጪኔ ናኒ ኣርኬን።³³ኢየሱስዻ ሹ እን እሺ ኦቆሮዬ ጌዬ ውርካ ኣይሁድ ጊታይ ዻዬ እሺዬ ፓዬኑጝ መንፍስ ሞይካዽዬ፤³⁴ሺጝ የኣጁጛ ኦኔ ኣንሼና። እንግንዻ ሺጝ ታቹጝ ዮ፤ ኩዋዌ ቶይባ።³⁵ኢየሱስዻ እርሻ ጪራው ኔኒ።³⁶ውርካ ኣይሁድዻ ሺጝ ይንዳ ቶህየ ናሺ እያን?³⁷ከኦግዬይዻ ውር ክየም ክየም ሺጝ፤ ውር እን ቦዊ ካርቡካ ውር እን ኣይ ሙሙዾጝ፤ ዋቲ ውሩጝዻ ካማሬ ኣርሼን ቻሊዬን ሻማ?እን ኢየሱስ ቲቴ ኣልዓዛር ከኣርሼን ክያኑጝ³⁸ኢየሱስ ዱም ሻን ኔኒ እንቃ ከሞይካዾዬ ኩና ሃንካ ሌሱጝ፤ ሌሲዻ ሃጊን ኬና ሹፔኬ ባይ፤³⁹እሺዻ ዋይሼ እንግን ቲቲ ባይ፤ ጪኔካ እን ኣርሺዻ ማርታ ሺጝ ታቹጝ ዮ ጋን ናንዳካጝ ኡፑኔ ሹ ኣሁሩጝ ማጅባ።⁴⁰ኢየሱስዻ ዋይሼ እሺ ሃሺጚ የኣምኒያጝ የጌይባ ጌጳሞካ ባሪዮዬ ሃካና ሜይሼኬኒ እን?⁴¹ቲቲባ ባይ፤ ኢየሱስዻ ቶይ ዾዮኬ ሺጝ እያጝ፤ ባባዮ፤ ናንዳካጝ የዋይሺኔ ኣኑጝ ሮጝ ኑኑ ካጌጳዽባ፤⁴²ሹ ጮል የዋይሺኔ ኣኑጝ ሃእባጅያ፤ ዬ ሃክያጄ እኑጝ ከኦካ ውር ጊታጝ ጎሩጝ ከእያይ የይዕሲዬ ኣኑጝ ካጋምኒባዬ ጊያ።⁴³ኢየሱስ ሺጜ እኑጝ ጩዋ ከናቅዲ ታቺ ሺጝ ኣልዓዛር ዮ፤ ኩዋ ቱልባዬ ሺዋ።⁴⁴ውርና ኣርሺዻ ከኦና ቡዋ ኔኒዬ ጃፌ ሳሪዬ ከጫርቅካ ኣፓላ ዽታኮጝ ማሪ ኔኒዻ ቁሜኬ ኣፓላጝ ቱላ። ኢየሱስዻ ሺጝ ቡል ና ሳሪዬ እሺዬ ካካምባ።ጫልኪምኔን እን ሻሜካ ኢየሱስ ኒሼኑጝ⁴⁵ዬ ከኦካ ውርካ ኣይሁድ ጊታይ ፓዬን ሃምካ ማሪያም፤ ከኦግታይ ኢየሱስ ኣሽክዬዬ ጌዮጝ ጁዋናን ጋምኒያ ከእሺ።⁴⁶ዬ ውር ክየም ክየም ፓዬ ኦይን ኢየሱስ ኣሽክዮጝ ሜይሼያ ውርካ ፈረሳውያን፤⁴⁷ከኦይን ታታቻንካ ውርካ ቃሼ ውርካ ፈረሳውያኔ ሺዋ ውር ታታቻንካ ካራምካ ኣይሁድ ጉባይ ክያኒ። እንግንዻ ሺጝ እያጝ፤ ውሩጝ ናንዳካጝ ኣኒኔ ኦኬ ሹቃ ሹቃ ጁዋኑ ኣሽክዬኑጝ ሃሻማ እያን ካኣዬ ባሹጝ?⁴⁸ሃኦይዳያ እያይንያጝ ውር ፓይላ ዋክሼባ እሺ፤ ውርካ ሮማን ኩኔ ቦባይ ራቅ ጉዋዩዬ ዛርሲ ጉዋዩዬ።⁴⁹ከኦካ ጫቃን ጊዬይዻ፤ ክየም ከቦን እን ኣይ ታቺካ ውርካ ቃሽ ቀያፋ ሺጝ እያጜ ሃሳዋ፤ ይንጌ እየው የእባጃኬን ኦኬ ክየምጵንዻ/⁵⁰ዛርሲ ፓይላ ናንዳካጝ ካካይዬያጝ ናንዳካ ዛርሲ ውር ክየም ካኣርሾጝ ኣዬ ባሹጝ የጶቅሲያኬኒ?⁵¹እን ክያጆጝ ማርኬ እሺዬን፤ ኣይባዬ ከቦን እን ናንዳካጝ ኣዬ ታቺካ ውርካ ቃሹጝ፤ ኢየሱስ ካኣርሼ ዛርሲካ ኣይሁዱጝ ሃሳው ሃሳዋ፤⁵²ማር ናንዳካ ዛርሲ እንጵኔኔ፤ ሃንታካ ባሪዮ ጊታይ ላልሜኑጝ ሃናንዳካ ፑኡሺዬን።⁵³ካርሲኬ ሹ እኔ ሃሳወና ካኒሼን።⁵⁴ዬ ኢየሱስ ካርሲኬ ኦይኔ ከኦካ ጫቃንካ ኣይሁድ ካኒ ሳጊኬን ጃ፤ ኣይባዬ ጌይሼያ ጌይሼያ ልት እን ጌዬንኬ ቆጩርካ ኤፍሬም ቦና ክያኒ ታራር፤ ኡፓ ኦይን ከውር ጊታይ ዻዬ ጆሌ እሹጝ።⁵⁵ፋሲካካ ውርካ ኣይሁድ ሄክሽባ፤ ከሌሜንካ ሄክሼንካ ቶንቶሮ ዳንቢካ ጫቃል ጌዬን ሻሜን ውር ጁዋኑ ከፔን ጊዬይ ፓይሼያ እያጝካ ኢየሩሳሌም።⁵⁶ዎሼን ኢየሱስዻ፤ ጎር ኦካ ቶኦካ ይሁኔንዻ ሺጝ ሻሜን እያን ካማሬ ናንዳካ ቶንቶሮ ኩኔኔ ሃሳወና።⁵⁷ዬ ውር ታታቻንካ ውርካ ቃሼ ውርካ ፈረሳውያኔ ኢየሱስ ኣኒኔ ኦኑጝ ካጎሞጝ ውር እን እባጁጝ ካዹዋልሺኖጝ ጌርጊታ።

ሃፑክ 12እን ጵሼ ኢየሱስ ከሹቶ ቢታንያጝ¹ቶንቶሮካ ፋሲካ ሺዺያ ሹ ላጝ፤ ኣልዓዛር እን ኢየሱስ ቲቴ ከኣርሼን ክያኑጝ ኩያ ሃሚን ኣኖጝ እያጝካ ቢታንያጝ።²ከኦይን ሺጝ ናንዳካ ኢየሱሴ ጋሽኪያ ምሽካ ቃይ። ማርታ ዋድምዬንያጝ ኣልዓዛር ኡፔ ኣኔባ ከእሺ ክየምጵን።³ማርያምዻ ቦው ሹቶካ ናርዶስ እን ኣንቲቲ ኣይ ቁዋቃ ጁጊዬ እርሼያ ኦካ ጃፍካ ኢየሱስ፤ ቋጫ ጃፍ ኔኒዻ ከጪራሺ፤ ቶኦ እንዻ ካይካ ሹቶ እን ሄክያ።⁴ዬ ከኦካ ውርካ ዻይኔን ክየም፤ እንካ ሳስክያ ኣይንቶጝ ይሁዳ ሚኔዬ ሺጝ እያጝ፤⁵ሹቶጝ ጉዋሩጙሽ ከሺሊንጊ ዽብ ጂያኔ ቢሬ ኔኒ ሃናንዳካ ኦ ማሬ ኩፓን ኣዬኑጝ?⁶ ሃሳወ እኑጝ ሃናንዳካጝ ኣዬ ውርካ ኮንሽካ ሃክሼን ኣዬኑጝ፤ ከኦካ ውር ጊታይ ቆቡጝ ናንዳካጝ ኣዬ ጓርጉ ኬና ኣሽኪሼ እሺ ኤምኑ ዬ ካኒ ሃሳውሼኬን ውር ኩፓን።⁷ኢየሱስዻ ሺጝ እያጝ፤ ሹቶጝ ናንዳካጝ ቃብሼ ሹካ ቱቱኬን ናኑጝ ካኡፑንቴባዬ ኦይድባ፤⁸ውር ኩፓን ሹ ጮል ጋኔባ ከእየው፤ ዬ የጌያኬን ኣን ሹ ጮል።⁹ከሹ እን ውር ጁዋኑካ ኣይሁድ እባጅ እን ኢየሱስ ኣኒኔ ኦይኔ ፓዬና፤ ፓይኔዻ ማር ናንዳካ ኢየሱስ ጵን ሺጜ ፓይኔኔ ፓዬን ኣልዓዛር እን እሺ ቲቴ ከኣርሼን ክያኒ ቶዬን።¹⁰ዬ ታታቻንካ ውርካ ቃሽ ሃሳወና ካኣልዓዛር ኒሼን።¹¹ይንዻ ናንዳካ እሺ ሃኦጝ ውር ጁዋኑካ ኣይሁድ ፓዬ ሃምካ ኢየሱሴ ኣኒኔ ኣምኒዬኑጝ።ኢየሱስ ሁሉካ ከጌጳሞ ኢየሩሳሌም¹²ከዻም ዛርሲ ጁዋኑ ጊታይ ፓዬን ሃምካ ቶንቶሮጝ ኢየሱስ ኣኒኔ እያጝካ ኢየሩሳሌም ኩንሼኑጝ ዋያ፤¹³ቦው ቃቅቴንካ ሻሪዬ ፓያ እሺ ከጉዋር ክያኒ ቦወን፤ ሻም ናቅዲ ጊዬይ ዼጌ ሺጝ እያጝ፤«ሆሣዕና»/«እን ኩንኬ ሮጝካ ታቺ እን ሃኬና ጉዋኔ/»«ቢትካ እራስራኤል ሃኬና ጉዋኔ/»¹⁴ኢየሱስዻ ጌይ ሃንታካ ኡኩሊዬ ኡፔያ፤እን ሺጜ እያጜ ቶኮጝ፤¹⁵ውዋካ ጽዮን ዮ፤ ኦይ ሪግሺኔን፤ እየዎ፤ ቢቲ ኑኑ ሃንታካ ኡኩሊዬ ኩንባ።¹⁶ውር ጊታይካ ዻይኔንዻ ከሌሜን ካኒ ጶቅሲኬን ጊታይ ፓይላ፤ እን ቶኬ ናንዳካ እሺዬ እን ጋሽክዬ ናንዳካ እሺዬ፤ ጌጳሲዬ ኢየሱሱጝ ጩዋ የጊያ ጊባጄ።¹⁷ከሹ እን ሺወ ኣልዓዛሬ ቲቴኬ ኣርሼን ክያኑጝ፤ ውር ጊታይ ጋዬኬ ጋጙጝ ጋኔን ናሹጜን ኔኒ ማኝሺዬን።¹⁸ውር ጁዋኑ ዋዬ ናንዳካ ኦኬ ሹቃ እን ኣሽክዮጝ ቱላ እሺ ቦወን።¹⁹ዬ ውርካ ፈረሳውያን ዋይሼ ጋጝ ኣኪ ቻሊሜን እያን ሻሜን?የጌያያይ/ ውርካ ዳሉጝ ፓይላ ሁቤኔ ዻዬያ እሺዬ ሃሳወና።ኢየሱስ ሌምሼ ክያጃ ናንዳካ ኣርሼን ኔኒ²⁰ከኦካ ጫቃንካ ውር ጊታይ ፓይ ሃምካ ቶንቶሮጝ ኣና ውርካ ግሪክ ጊታኬና ፓይ ይሁኔን።²¹እንግንዻ ከሃም ጌዬንኬ ገሊላ ፓዬን ሃምካ ውር እን ኣኔን ቤተ ሳይዳ ሃምካ ፊልጶሴ ሺጝ ታቹጝ፤ ባንዞ ሃዎሻያ ኢየሱስ ጌዬን»²²ፊልጶስዻ ኩያ እንድሪያስ ሜይሼን፤ እንድሪያሴ ፊልጶሴ ሜይሼያ ኢየሱስ።²³ኢየሱስዻ ሺጝ እያጜ ዋሼያ እንግን፤«ዋዳ እንካ ጌጳሲዬ ሃንታካ ውሩጝ ሄክሻ፤²⁴ሃዋይሼባ እየው ኣኩሉክ፤ ዻማሳዻካ ሲንዲ ፓቄን ዳሊ ክያኒዬ ማራ ኣርሼንያጝ ሺዽባ እሺጵን፤ዬ ኣርሺያጝ ኡፑትባ ካርቡ ጁዋኑ።²⁵እን ናሺ ዻቆ ኔኑጝ ካይባ፤ ዬ ናንዳካ ውር እን ሚኔ ዻቆ ኔኒ ናንዳካ ዳሉጝ ዻቆካ ቦን ጮል ካሊ እሺባ።²⁶ውር ካጝ ዋድምሼ ኣን ኣኔያጝ ዻዬ ኣንባ፤ ኣንዻ ሃኣኔባ ኦይን ውርካ ዋድማ ናኒ ኣኖጝ፤ እን ዋድምሼ ናንዳካ ኣንዻ ባባ ጌጳሲባ።²⁷ጋንካ ናፒሲ ናኒ ሪግሼና ከሺጝ ኦ? ባባዮ፤ ከኦካ ዋዳጝ ከባይሺሼ ኣን ኣኔኬኒ? ካኣይባ ሃኩኖጝ ሃናንዳካ ዋዳጜ።²⁸ባባዮ ጌጳሲ ሮጝ ኑኑ፤ ከኦይንዻ ሃጌጳሲባ ፕር ሃጌጳሲባ ናቅዲ ኬና ሺጝ እያይ ኩና ከፎላ።²⁹ውርካ ኣያሌ ጊታይ ኣኔን ኦይኔ ዋይ ናቅዲ እን ሺጝ ሃጉጉናት፤ ፕር ዶክ ሺጝ ሃሳውና ውርካ ኤርጎ።³⁰ኢየሱስዻ ሺጝ እያጝ፤ ናቅዲ እን ኩኖጝ ማር ናንዳካ ኣኔኔ ሃናንዳካ እየው፤³¹ሹ እንካ ኮምሼ ዳሉጝ ሃጋን፤ ታታቻንካ ዳሉጝ ጋን ፓቅሼባ ሹኑጝ።³²ዬ ኣን ሹካጝ ሃጌዬኬ ዻሉጝ ዼግዼጉጝ ውር ፓይላ ሃፑኡሺሼባ ሃሚን ናኑጝ።³³ሃሳወ እን ሃናንዳካጝ ሺጜ ናንዳካ ኣርሼን ኬና ኣይ እያን ኣርሼኑጝ።³⁴ዛርሲዻ ሺጝ፤ ኡዋካ ክርስቶስ ካኡፔ ቦን ጮሉጝ ሃዋያያ ከክያጃ፤ ኣኪ፤ ሃንታካ ውር ካጌዬ ዼግዼግ ኣኔባይ የሺጚ እያን? ሃንታካ ውር እን ሃኒን?³⁵ኢየሱስዻ ሺጝ እያጜ ዋሼያ እንግን፤ ካርሲኬ ሹጜ ናንዳካ ሹ ጩዋማ የኣንቴባ ኦሜሌል፤ ድሙጉ ካኒ ኩንሼኬን እየውዌ፤ ናንዳካጝ ኦሜሌል ኣንሼ እየውጝ ጃሌጆልባ፤ ውር እን ጃልኔጆል ድሙጉ ክያኑጝ ኦይን ካካሞጝ እባጅኬን።³⁶ካኣይ ሃንታካ ውር ኦሜሌል፤ ኦሜሌል ናንዳካጝ ኣኒኔ ኦጉዩጝ ኣምኒባ ከሜሌል እን፤ ኢየሱስ ሃሳወ ሹዋጵባ እን ኩያ ከኦጊዬይ፤ ራሼናዻ።ውርካ ኣይሁድ እን ማሬ ኣምኒዬን ቁዋቅትሺሼን ጊዬይ³⁷ኢየሱስ ኣሽክኒን ዹዋልሺኔን ሹቃ ጊታይ ኦካ ማሪ ጊዬዩጝ፤ ካንዻ ካኒ ጋምኒኬን፤³⁸ይንዻ ውርካ ቶካ ባሪዮ ኢሳይያስ ሺጜ፤«ታቹጝ ዮ፤ ሃኒን ዋይ ክሊማ ጉዋዩጝ?ቡዋካ ታቺ እን ካዹዋልሼ ኒን? ክያጃ እን ሺጜ እያይ ሃእንካ ሙኒንቶጝ።³⁹ዬ ካኒ ቻሊኬን ኣምኒዬን፤ ይንዻ ሃእን ከኦካ ራቅ እንቃ ኢሳይያስ ሺጜ እያጜ ሃሳዎጝ፤⁴⁰ሻማ ካርቡ ጊዬይ ሙሙዾ፤ ሻማ ሻን ጊዬይዻ ዱዺ፤ ዬ ከካርቡ ጊዬይ ጌይኬን፤ ካሻን ጊዬይዻ ጶቅሲኬን፤ ካማር እንግን ባይሺሼንዻዬ ዋኬን።⁴¹ኢሳይያስ ሺጜ እኑጝ ሃናንዳካጝ ጌዬ ጌጳሞካ ኢየሱሱጝ፤ ክያጃ ናንዳካ እሺዻ።⁴²ኣያ እያይዻያጝ፤ ከኦካ ጫቃንካ ታታቻንዻ ሺዺኬኔ ውር ጁዋኑ ኣምኒያ ከእሺ፤ ካኣይባዬ ናንዳካጝ ውርካ ፈረሳውያን ሪግሺኔ እንግን ከኦካ ቶኦካ ይሁኔን ቡሌኑጝ ካኒ ክያጅኬን ኣምኒዬን ጊዬይ ጃ።⁴³ይን ኣየውጝ ከኦካ ባሪዮ ጌጳሲዬን ሳጊ ሃናንዳካጝ ናሺዬ ውር ጌጳሲዬኑጝ።⁴⁴ከኦይን ኢየሱስ ሻም ናቅዲ ኔኒ ዼጌ ሺጝ እያጝ፤ ውር ክየምጵንዻ ኣምኒያ ከኣንያጝ ማርኬ ኣንጵኔኔ ኣምኒኬ እን ይዕሲ ኣንዻጝ።⁴⁵ኣን ጌይ ኣንዻ ጌይባ እን ይዕሲ ኣንዻጝ።⁴⁶እን ኣምኒኬ ኣኑጝ ካማር ድሙጉ ክያኒ ኣኒኔኔ ሃማቲ ኦሜሌሌ ሃኩኒያ ዳሉጝ ክያኑጝ።⁴⁷ጊታይ ዋይ ክያጃ ናኒዬ ማር ሹዋጵሼን ካኮምሼ እንግን ማር ኣኔን፤ ሃኩኒ ውርካ ዳሉጝ ባይሺሼን ዬ ሃካና ኩንኬን ውርካ ዳሉጝ ኮምሼን።⁴⁸እንካ ኮምሼ ጊታይ ማር ኣን ቦወኔ ጊታይ ኦልትዬን ክያጃ ናኒዬ ኣኔባ፤ ክያጃ እን ሃክያጆጝ እሺ ኮምሼባ ከሹካ ቱንሲ፤ ናንዳካኦ⁴⁹ኣን ሃካና ሃሳወንኬን ከኣን ኤቴኒ፤ ኣይባዬ ባባ እን ይዕሲ ኣኑጝ ካሃሳወ ኦዬ ካሃሳወ እያኔ ኤርግታ ኣን።⁵⁰ኤርጎ ኔኒ ካሄክሺሽ ኦካ ዻቆካ ቦን ጮሉጝ ሃእባጅያ፤ ዬ እጛ ሺጞጝ ፓይላ ባባ ካሃሳዎጝ ሃእን ሜይሼ ኣንጵን።

ሃፑክ 13እን ኢየሱስ ኡዋኔ ጃፍካ ውር ጊታይካ ዻይኔኑጝ¹ሹ ኔኒዻ ሊኪ ሃኬ ሌሜንካ ቶንቶሮካ ፋሲካ፤ ኢየሱስዻ ሹ እን ካኦይዴ ፔኑጜ ካካሜ ሃምካ ሹኖጝ ሄክሼ እባጃ፤ ጊታይ ኣኔን ዳሉጝ ክያኒዬ ኣይኔኑጝ ናሺያ፤ ናሺያ እንግን ከናሺማ ካሎንዻ።²ምሽካ ቃይዻ ጋኔንባ ቦፓይኔኔ፤ ካሳስክያ ጋዬን ኢየሱሴ ዲያብሎስ ቲትሻ ሻንካ ውዋካ ስምዖን ይሁዳ እንካ ኣስቆሮቱጝ።³ኢየሱስዻ ሺጝ፤ ባባ ከእያይ ኣጁጜ ኦኬ ፓይላ ኦካ ጌጳሞ ኔኒ ዱቡጝ፤ እባጅ እን ይዕሲዬ ከኦካ ባሪዮዬ ካዋኬ ሃምካ ባሪዮዬ፤⁴ናሹጛ ከኦካ ምሽካ ቃይዻ፤ ኣጁጛ ኦኑጝ ክሜዻ፤ ቁማ እሊኮ ኔኒ ከፎጣ።⁵ጩዋ እርሼ ሙዋካ ሮኩኔኔ ኡዋኔን ጃፍካ ውርካ ዻይኔኔ ካርሲያ ከፎጣ እን ኪሞጝ ቋጬን።⁶ኩና ሃምካ ስምዖን ጴጥሮሱጝ፤ ጴጥሮስዻ ሺጝ፤ «ታቹጝ ዮ፤ እን የኡዋኒባይ ጃፍ ናኒ?⁷ኢየሱስዻ ዋሼ ሺጝ፤ ጋን ይጛ ሻሞጝ የእባጅኬን፤ ዬ ማ የጶቅሲባ።⁸ጴጥሮስዻ ሺጝ ኣኔኬን የኡዋኒኬን ጃፍ ናኒ ክየምጵንዻ፤ ኢየሱስስዻ ዋይሼ እሺ ሃማሪያ ጃፍ ኑኑ ኡዋኔንያጝ የኣኔኬን ባሊ ከኣን።⁹ስምዖን ጴጥሮስዻ ሺጝ «ታቹጝ ዮ፤ ካማር ጃፍ ናኒጵን ኣዬኔ ኡዋንባ ቡዋ ናኒዬ ሩዋዌ።¹⁰ኢየሱስዻ ሺጝ ውር እን ሮኬኑጝ ካዎሺሽ እሻ ጃፍ ኡዋኔንጵን፤ ዬ ሩዋ ኔኒ እን ሺዺ ሃጫንቃል። የኣያያ እየው ፓይላያጝ እየው የኣያ ጫንቃል።¹¹እን ሺጜ እየው ፓይላ የማራ ጫንቃሌኑጝ ውር እን ካሳስክያ ኣይንቴ እሹጝ ሃናንዳካጝ እባጆጝ።¹²ኡዋኔ ሹዋጴ ጃፍ ጊዬዩጝ ጩዋ፤ ኪም ኣፓላዬ ዋኬ ኡፓ ኦናካ ካራም ኔኑጝ፤ ዋይሼ እንግን እያጝ፤ የጶቅሲያባይ ይጝ ሃኣሽክሼ እየውጝ?¹³እየው የዋይሺቴባ ኣን ውርካ እርርሲኔኔ ታቹጜ ሃሊኪ፤ ከእያይ የዋይሺቴ ኣኑጝ ሃኣይ እያይ።¹⁴ኣኪ ኣን ሃኣይባ ታቺ ጉዩዬ ውርካ እርርሲዬን ጉዩዬ ሃኣኔባዬ፤ ሃኡዋኒያ ጃፍ ጉዩያጝ እየውዻ ከእያይ ከኡዋኒቴ ጋጝ ጃፉጝ ኣኔባ።¹⁵ከእያጝ ኣን ሃኣሽክሼ እየውጝ እየውዻ ከኣሽኪ እያይኔ ሃኦቼያ እየው ሄክንሶ።¹⁶ሃዋይሼባ እየው ኣኩሉክ፤ ውርካ ዋድማ ከኦካ ታቺ እን፤ ውርካ ኤርጎዻ ሳጊኬን ከኦካ እን ይዕሲ እሹጝ።¹⁷ኣኪ የእባጃ ኦጊታጜ የሹዋጵሻያጝ የኡዋኒናባ።ካሳስክያ ጋይኔ እሹጝ ኢየሱስ ሃሳዋ¹⁸ሃማር ናንዳካ እየው ፓይላ ሃሳውኔን፤ ሃእባያ ጊታይ ሃእድዮጝ፤ ኣይባዬ እን ጪኪ ባላሻ ናኒ ከኣኑጝ ቲትሼያ ኣን ታና» ክያጃካ ወርቀት እን ሺጜ እያይ ካሙኒንቴባዬ ጊያ።¹⁹ሙኔንያጝ እን ኣዬ ኣኑጝ ከኣምኒባዬ፤ ከሌሜንካ ሙኒኔንካ ይጝ ሃሜይሼ እየውባ።²⁰ሃዋይሼባ እየው ኣኩሉክ፤ ውር እን ቦው እን ይዕሲ ኣኑጝ ቦባ ኣንዻ፤ እን ቦው ኣኑጝ ቦባ እን ይዕሲ ኣንዻ።²¹ሺጜ እጝ ጩዋ ኢየሱስ ቋቁሽ ከመንፈሴ ሺጝ፤ ሃዋይሼባ እየው ኣኩሉክ፤ ከኦካ ጫቃን ጉዩ ክየም ሳስክዬ ኣዬን ኣንባ» ሺጝ እያይኔ ክያጃ ጃ።²²ውር ጊታይካ ዻይኔንዻ ሺጜ ኒኑጝ ካብሜኔ ቶያ ጋጝ።²³ከኦግዬይ ውርካ ዻይኔን ክየም ኑጝ ናሺ ኢየሱሱጝ ጊድሜን ሃምካ ቋቁምካ ኢየሱሴ ኣኔን ኡፔን።²⁴ስምዖን ጴጥሮስዻ ውርካ ዻይኔን ዶክ ቅንጪሼ እሺ ካርቡ ከራሼኔ ዋይሼ እሺ ኣዬ ኒኑጝ ኣንሺንቴባ።²⁵እሺዻ ጌምኔ ሃምካ ቋጩርካ ኢየሱሴ ሺጝ፤ ታቹጝ ዮ፤ ካኣይ ኒኔ ኣንሼና?²⁶ኢየሱስዻ ሺጝ እን ሃቅንጪሼ ካርቡዬ ሃኣዬ ፑርፆፑርፆካ ባላሻጝ ሃእሺ» ጩዋ ፑርፆፑርፆ እንካ ባላሻጝ ቅንጪሼዬ ኣያ ውዋካ ስምዖን ይሁዳ እንካ ኣስቆሮቱጝ።²⁷ይሁዳዻ ቦባ ፑርፆፑርፆ እንካ ባላሻጝ ይሪካ እጁጝ ሁሉካ ኦኔኒ።ኢየሱስዻ ዋይሼ እሺ ኦይን የሺጜ ኣሽክዬኑጝ ኣሽኪ ይሪካ፤²⁸ኣይባዬ ኢየሱስ ሺጜ ናንዳካ ኦጝ ከኦካ ውር ጊታይ ቆቤኬ ጋጙጝ ክየምጵንዻ ካኒ እባጅኬን።²⁹ይሁዳ ናንዳካጝ ኣዬ ውርካ ቢሬ ጎሜኑጝ፤ ዋሽኬ ኦኮኑጝ ኢየሱስ ሺጜ ካኣይ ውር ክየም ክየም ናንዳካ ቶንቶሮ ኦይንካ ዎሾጝ ካጉዋሩጜባዬ ወይ ካኣይ ኩፓኔ።³⁰ይሁዳ ቦባ ፑርፆፑርፆ እንካ ባላሻጝ ቱሌ ኩያ፤ ሃምክርዻ።ጴጥሮስ ካቡድኖ ኢየሱስ ሃሳዋ³¹ይሁዳ ቱሎጝ ጩዋ ኢየሱስ ሺጝ እያጝ፤ «ጋን ሃንታካ ውር ጌጳሲያ፤ ከእሺዻ ጌጳሲያ ባሪዮ።³²ኣኪ ባሪዮ ጌጳሲያ ከዕሺያጝ፤ ባሪዮ ጌጳሲያ ውዋ ኔኒ ከእሺ፤ ጌጳሲያ ይሪካ።³³ሃንታ ናኒዬ ካኡፔኬ እየው ሃሹ ጩዋማጵን እየው የዎሻ ኣንባ፤ ናንዳካ ውርካ ኣይሁድ ኦይ ኣንካ ካሞጝ ከፓይንቶጝ የቻሊያኬን» ከእያይ ሃዋይሼ እየው ጋን ሃሜይሼ እየው ይጝ።³⁴ሃኣይባ እየው ኤርጎ ሃሊ፤ ይንዻ ከናሺ ጋጝባዬ ጊያ፤ ኣኪ ኣን ከእያይ ሃናሺዬ እየውጝ እየውዻ ናሺ ጋጝባ።³⁵የናሺያያ ጋጝያጝ የኣይቴ ውርካ ዻይኔን ናኑጝ ውር ፓይላ እባጅባ ከእዕጝ።³⁶ስምዖን ጴጥሮስ ሺጝ ኬካም ኦን? ኢየሱስዻ ሺጝ ጋን ኦይን ካካሞጝ የቻሊኬን ኣን ዻዬን፤ ዬ ከታካ ሁር የዻዬ ኣንባዬ ዋሼያ እሺ።³⁷ጴጥሮስዻ ሺጝ፤ ታቹጝ ዮ፤ ጋን ካማሬ እን ዻዬን ቻሊዬን ሃኦ? ናንዳካ እን ኣይን ዻቆ ናኑጝ ሃሳስክያ ኣዬንባ።³⁸ኢየሱስዻ ሺጝ እያጜ ዋሻ፤«ዻቆ ኑኑ ከኣኩሉክ የሳስክዬ ኣዬንባይ ናንዳካ ኣን?ሃዋይሼባ እን ኣኩሉክ፤ ባቻ ካኒ ኬይኬኔ የቡድያምባ ክያጝ ጅያን።

ሃፑክ 14ኢየሱስ ቁዋቅትሺሻ ውርካ ጊታይካ ዻይኔኑጝ¹ሻን ጉዩ ካማር ሪግሺኔን፤ ኣምኒባ ከባሪዮ፤ ፕር ኣምኒባ ከኣንዻ።²ሃምካ ጶሮካ ባባ ኣኔ ኦካ ቆቤን ጁዋኑ፤ ዋቲ ይጝ ማር እያይ ኣዬንያጝ ሃሜይሼያ እየው፤ ካካሜዻጝ ሃኩይ እየው ራቅ ኣሽኪሼን።³ሃኩያ ኣሽክሼያ እየው ራቅያጝ ጩዋ፤ እየውዻ ከኣኔን ሃምን ኣን ሃኣኔ ከጋጜ እንቃ ሃኩንባ እየው ቦወን።⁴የእባጃባ ጉዋር እን ካሄክሼ ሃም ኣን ካካሞጝ።ጉዋር እን ካሄክሼ ሃምካ ሹኖጝ⁵ቶማስዳዻ ሺጝ፤ ታቹጝ ዮ፤ ኬካሜ ኦኑጝ ኡዋው ሃእባጃኬን፤ ኣኪ ሃቻሊያ እያን ጉዋር ኔኒ እባጄን?⁶ኢየሱስዻ ሺጝ እይጝ፤ ጉዋር ሃኣን፤ ኣኩሉኬ ዻቆዬ ሃኣን፤ ማራ ከታጝ ናኒ ኣዬንያጝ ኬና ካኩዋው ሃምካ ባባ ኣኔኬን።⁷ዋንቲ የእባጃያ ኣንያጝ የእባጃባ ባባዻ። ዬ ካርሲኬ ጋኔ የእባጃባ፤ የጌያባዻ።⁸ፊልጶስዻ ሺጝ፤ታቹጝ ዮ፤ የዹዋልሼያ ኡዋው ሹቡንያጝ ጃኬና።⁹ኢየሱስዻ ሺጝ እያጝ፤ እን ፊልጶስ ቦን ጁዋኑጝ ሃኣኒኔ ከእየው የእባጅኬኒ ኣን? እን ጌይ ኣኑጝ ጌይባ ባባዻ፤ የሺጚ እያን ዹዋልሼ ኣን ሹቡን?¹⁰ኣን ሃኣዬኬ ባባጝ፤ ባባዻ ኣኒኔ ከኣኑጝ የኣምኒኬኒ፤ ክያጃጝ ሃይሼ እየው ማርኬ ታጝ ናኒዬን፤ ኣይባዬ እንካ ኣሽኪ ዋድማጝ ሃባባ እን ኣኔንኬ ኣኑጝ።¹¹ሃሜይሼያ እን ኣጝ ሃኣኒኔኬ ባባዬ ባባዻ ኣኒኔኬ ኣንያጝ ኣምኒባ ከኣን፤ ዶክ ሺዺኒኑጝ ናንዳካ ዋድማ ሹቃ ጊታይ ኣምኒባ ከኣን።¹²ሃዋይሼባ እየው ኣኩሉክ፤ እን ኣምኒ ኬኣኑጝ ኣሽክባ ዋድማ ጊታጝ ኣን ሃኣሽክዮጝ፤ ፕር ናንዳካጝ ኣን ካካሜ ሃምካ ባባጝ ኣሽክባ ኬና ሳጊኬ ኦጝ።¹³ሹኔ ከእያይ ጌጳሲዬ ከውዋጝ፤ እን የይሁንቴ ከሮጝ ናኒ ፓይላ ሃኣሽክባ፤¹⁴ኣይን ኦኬ ናጝ የይሁናያ ከሮጝ ናኒያጝ፤ ኣን ሃኣሽክባ።ናንዳካ መንፈስካ ቅድስ ቃቦ እን ጋይኖጝ¹⁵የናሺያ ኣንያጝ የዻይቴባ ክያጃ ናኒ።¹⁶ኣን ሃይወንባ ባባ፤ እሺዻ ኣይባ እየው ቁዋቅቲ እንካ ኡፍኬ እየው ቦን ጮሉጝ።¹⁷እሺዻ ሃመንፈስ እንካ ኣኩሉኩጝ፤ ዳሉጝ ናንዳካጝ ካማሬ ኣን ጌዬኔ እባጄኑጝ ቻሊኬን ኣን ቦወን። ዬ እየው ናንዳካጝ ሃኣኒኔ ከእየውዌ ¹⁸ሃኦይድኬን እየው ከሃንታ ኮኑጝ ማር ውር ኔኒ ኣኔኑጝ፤ ሃኩኒባ ዮጝ ጉዩጝ።¹⁹ከሹ ጩዋማ ጩዋ፤ ዳሉጝ ጌይኬን ኣን ክየምጵንዻ፤ ዬ እየው የጌያባ ኣን። ኣን ናንዳካጝ ሃኣዬ እያዩጝ እየውዻ የማቲያባ እያይ።²⁰ኣን ሃኣኒኔ ከባባጝ፤ እየውዻ የኣኒንቴ ከኣኑጝ ፕር ኣንዻ ሃኣኒኔ ከእየው ከሹ እን የእባጃባ።²¹እን ናሺ ኣኑጝ ሃእንካ ቦው ኤርጎ ናኒዬ ካዻዮጝ፤ እን ናሺ ኣንዻ ባባ ናሺባ፤ ኣንዻ ሃናሺባ፤ ሃዹዋልሼንባ ኣን ኤምኑዻ።²²ከኦይን ይሁዳ እን ማርካ ኣስቆሮቱ ኣዬኑጝ ሺጝ፤ «ታቹጝ ዮ፤ ኣኪ ማር ዳሉጝ ኣዬኔ ከዹዋልሼ ኡዋው እን ኤምኑጝ ሃእያን?²³ኢየሱስዻ ሺጝ እያጝ ካጝ ናሺ ኣን ኣኔያጝ ዻዬባ ክያጃ ናኒ፤ ባባ ናሺባ፤ ሃፓይናባ ሃሚን ኔኒዻ፤ ሃቆባ ከእሺዻ።²⁴እን ማር ኣን ናሺዬኑጝ ዻዬኬን ክያጃ ናኒ፤ ክያጃጝ የዋይቶጝ ሃካ ባባ እን ይዕሲያን ዬ ማር ናኒዬን።²⁵ጋን ሃኣኔንባ ከእየዌ ይጝ ፓይላ ሃሜይሼያ እየው።²⁶ባባ ከሮጝ ናኒ ቁዋቃ እንካ ይዕሲዮጝ ሃመንፈስ ቅድስ ዬ እርርሲባ እየው ኦኬ ፓይላ፤ እን ኣን ሃሜይሼ እየው ፓይላ ቃብሼ እየውባ።²⁷ሃኦቼባ እየው ሹቃዻ፤ ሃኣይባ እየው ሹቃ ኣዬን ናኒ፤ እን ኣን ካኣዬ እየው ማርኬ እያይ ውርካ ዳሉጝ ካኣዬ እየወን፤ ሻን ጉዩ ካማር ኑሼን፣ ካማር ሪግሺኔንዻ።²⁸ሃኩይባ፤ ሃዋክዻዬ ሃኩንባ ኦጉዩ ሃሺጜ እያይ የዋያያ፤ ዋቲ የናሺያያ ኣንያጝ ባባ ናንዳካጝ ካሳጊዬኬ ኦናኑጝ፤ ሃሺጜ ሃምካ ባባ ኩዬኑጝ ዋንቲ ዋዝንሲያ እየው፤²⁹ይጝ ሃሳዎጝ ሙኔንያጝ ከኣምኒቶጝ፤ ከሌሜንካ ሙኒኔን ኔኒ ሃሜይሼያ እየው።³⁰ታታቻንካ ዳሉጝ ናንዳካ እንካ ኩዋው ካርሲኬ ጋኔ ሓሃሳውኬን ጁዋኑ ከእየው፤ እንዻ ጌጳሞ ኣኔኬን ከኣን፤³¹ኣይባዬ ኣን ከእያይ ሃናሺዬ ባባጝ፤ ኦግታይ ባባ ኤርግቴ ኣኑጝ ከእያይ ሃኣሽክዮጝ ውርካ ዳሉጝ ካእባጅባዬ ጊያ።«ናሹጝጋ ካፓይባ ከኦጝ።

ሃፑክ 15ጊሜይካ ሻሪዬ ጩዎኑዬ¹ሻርካ ኮሬን እንካ ኣኩሉክ ሃኣን፤ ኤምኑካ ሻሪ ሃባባ።²እሺዻ እን ኣኔንኬ ኣኑጝ፤ ጩዎኑ ጊታይ ማር ካርቡ ኡፑቴን ፓይላ ቃጬ ፓቅባ፤ የጩዎኑ ጊታይ ኡፑት ካርቡጝ ፓይላ ካኡፑት ሳጊዬ ቃጪጭባ ጩዎኑ ጊዬይ።³እን ናሹጝኬ ክያጃጝ ሃሜይሼ እየው ጋን እየው የኣያ ጫንቃል።⁴ቆቢባ ከኣን፤ ኣንዻ ሃኡፒባ ከእየው።ጩዎኑ ማርኬ ጊሜይ ኣዬንያጝ ቻሊኬን እሺጵን ካርቡ ኡፑቴን፤ እየውዻ የማራያ ከኣን ቆቤንያጝ የቻሊያኬን ካርቡ ኡፑቴን።⁵ኣን ሃኣይ ሻሪ ኬና ኮሪዬ፤ እየውዻ የኣያ ጩዎኑ፤ ውር ክየምጵንዻ ኡፓ ከኣንያጝ ኣንዻ ሃኡፒያ ከእሺያጝ፤ እሺ ኡፑትባ ካርቡ ጁዋኑ፤ ኣን ሃማር ኣኔንያጝ የቻሊያኬን ኦኬ ክየምጵንዻ ኣሽክዬን።⁶እን ማርኬ ኣን ኡፔኑጝ ውይ ጩዎኑ ኮኑጝ ፓቄዬ ቁዋቅሹጝ፤ ጩዎኑ ጊታይ ኣኔን እያይ ቋዻሜ ፓቅሼባ ጉ ክያኒ፤ ጉዱባዻ።⁷የቆባያ ከኣንያጝ ክያጃ ናኒዻ ቆባ ኦጉዩ ቱዎጝያጝ፤ ኦኬ ካጝ የዎሽቴ ፓይላ ይወንባ፤ ጋይ እየውባ።⁸ከካርቡ ጁዋኑ ኡፑቴን የኣይቴ ውርካ ዻይኔን ናኑጝ የዹዋልሺናያጝ፤ ባባ ጌጳሲባ ከይጝ።⁹ከእያይ ባባ ናሺዬ እን ፓይላ ኣንዻ ሃናሺ እየውባ፤ ቆቢባ ከናሺማ ናኒዻ።¹⁰ኣን ከእያይ ሃዻዬ ኤርጎካ ባባዬ ሃኡፑኬ ናሺማጝ፤ እየውዻ የዻይቴ ኤርጎ ናኒያጝ የቆባባ ከናሺማ ናኒ።¹¹ዋዛ ናኒ ካኣይኬ እየዌ ዋዛ ጉዩ ካኣይ ፓሲዬ ሃሜይሼያ እየው ይጝ።¹²ኤርጎ ናኒ ሃይዕጝ፤ ከእያይ ሃኣን ሃናሺዬ እየው እየውዻ ናሺባ ጋጝ።¹³ናንዳካ ውርካ ናሺማ ጉዩ ዻቆ ሳስክዬ ኣይኔን ከናሺማ ኬና ካሳጊ ውር ክየምጵንዻ ኣኔኬን፤¹⁴የሹዋጵሻያ እን ሃሜይሼ እየውያጝ የኣያ ናሺዺ ናኒ።¹⁵ካርሲኬ ጋኔ ሃዋይሼኬን እየው ውርካ ዋድማ፤ ውርካ ዋድማ እባጅኬን እጝ ታቺ እን ኣሽክዮጝ፤ ኣይባዬ ናንዳካጝ ሃሜይሼ እየው እን ሃዋዬኬ ኦካ ባባ ፓይላጝ ሃዋይሼያ እየው ውርካ ናሺዺ ናኒ።¹⁶ኣን ሃእድያ እየው ዬ እየው የካኔ እድያኬን ኣን፤ ከፓዬ ከኡፑቴ ካርቡጝ ካርቡ ጉዩዻ ካኣኖጝ ሃጌጳሲያ እየው።ዬ እን የይሁንቴ ከሮጝ ናኑጝ ፓይላ ባባ ኣይ እየውባ።¹⁷ከናሺ ጋጝባዬ ኤርጎ ናኒ ሃይዕጝ።ውርካ ዳሊ እንካ ሚኔ ውርካ ዻይኔኑጝ¹⁸ውርካ ዳሉጝ ሚኔያ እየውያጝ፤ ከኦካ ሌሜን ጉዩ ሚኔ ኣኑጝ እባጅባ።¹⁹ዋንቲ የኣያያ ካዳሉጝያጝ፤ ዳሉጝ ሻም እየው ከእን የኣይቴኬ እሺዬ ናሺያ እየው፤ ናንዳካጝ ሃሻሜ እየው ከኦካ ዳሉጝ ዋናዬ ሃእድዮጝ የማራካ ዳሉጜን፤ ዳሉጝ ሚኔ እየው ሃናንዳካ እዕጝ።²⁰ጶቅሲባ ክያጃ እን ሃሺጜ ውርካ ዋድማ ሳጊኬን ከኦካ ታቺ እጜ ሃክያጆጝ። ዋኬያ ኣንያጝ ዋኬባ እየውዻ፤ ዻዬያ ክያጃ ናኒያጝ ዻዬባ ክያጃ ጉዩዻ።²¹ናንዳካጝ ማሬ እን ይዕሲያን እባጄኑጝ፤ ናንዳካ ሮጝ ናኒ ሻምሼንባ እየው እዕጝ።²²ዋንቲ ሃማሪያ ኩኔ እንግን ሜይሼንያጝ ዋቲ ሴሶ ማራ ኦግዬይ ኣኔን፤ ዬ ጋን ናንዳካ ሴሶ ጊዬይ ኦኬ ኬና ካኣዬ እንግን ኣኔኬን።²³እን ሚኔ ኣኑጝ ሚኔባ ባባዻ።²⁴ኦይን ውር እንቃ ማሬ ኣሽክዬኑጝ ዋቲ ሃማሪያ ጫቃል ጊዬይ ኣሽክዬንያጝ፤ ዋንቲ ሴሶ ማራ ኦግዬይ ኣኔን፤ ዬ ጋን ጌያ ኦኬ ሹቃ ጊታጝ፤ ኣይባዬ ሚኔያ ኣኔ ባባዬ።²⁵ይንዻ ኦኬ ክየምጵንዻ ኣኔኬኔ የሚንቴያ ኣን ሺጜ እያይኔ ቶኬኬ ክያጃጝ ካሙኒንቴባዬ ጊያ።²⁶ኣን ከኦካ ባባ እንካ ይዕሲሼ እየው፤ ቁዋቅትሼን እን ቱልኬ ኦካ ባባጝ፤ መንፈስ እንካ ኣኩሉክ ሹካጝ ኩኖጝ፤ እሺ ክሊዬንባ ናንዳካ ኣን።²⁷ፕር እየውዻ ከሌሜን ናንዳካጝ የኣኒንቴ ከኣኑጝ የክሊናባ።

ሃፑክ 16¹ሃዋይሼ እየው ይጝ ፓይላጝ ከማር ካቲሚኔኔ ጊያ።²ቡልባ እየው ከኦጉዋይካ ቶኦካ ይሁኔንካ ኣይሁድ፤ ፕር ጊታይካ ኒሽ እየው ፓይላ ከእያይ ዋድምሺኔ ባሪዮጝ ሹ እንካ ኮሞጝ ኩንባ።³ጊታይ ኣሽክሼ እየው ጊታጝ ፓይላ ሃናንዳካጝ ማሬ ባባ ወይ ኣን እባጄኑጝ።⁴ይጝ ሃሌማ ሜይሼ እየው ሹ ኔኒ ሄክሽያጝ ከጶቅሲባዬ ጊያ፤ ናንዳካጝ ሃኣዬኬ እየውጝ ሃሜይሼኬን እየው።ዋድማካ መንፈስ ቅዱስ⁵ኣኪ ሃኩይባ ሃምካ እን ይዕሲ ኣኑጝ፤ ካኣይባዬ ከኦጉዩ ኬናካ ሺጝ የኩይ ኦኔ? ካኣንሽ ኣን ኣኔኬን።⁶ከይጝ ሃሳወን ናኒ ሻን ጉዩ ቋቋ ከሞይካዾ፤⁷ኣይባዬ ሃዋይሼባ እየው ኣኩሉክ፤ ኩዬን ናኒ ሃባሺ ናንዳካ እየው፤ ኣን ሃማሪያ ኩዬንያጝ እንካ ሌሚሲ እየው ኩንኬን ዮጝ ጉዩጝ፤ ዬ ሃኩይያጝ ሃይዕሲሼባ እሺ ዮጝ ጉዩጝ፤⁸ከሹካጝ ኩኔዻ ፔኑጝ ናንዳካ ሴሶዬ፤ ናንዳካ ጫንቃሌ ኮምሼኔ ኖኪባ።⁹ሺጛ ናንዳካ ሴሶያጝ፤ ሃናንዳካ እን ውር ማሬኬ ኣን ኣምኒዬኑጝ፤¹⁰ናንዳካ ጫንቃል፤ ሃናንዳካጝ ካካሜ ሃምካ ባባዬ ካርሲኬ ኦይኔ ከማርቴ ኣን ጌዬኑጝ፤¹¹ናንዳካ ኮምሼን፤ ሃእን ውር ታታቻንካ ፔኑጝ ካኮምሾጝ።¹²ሃኣኔ ኦኬ ጁዋኑ ጊታኬና ካሜይሼ እየው፤ ዬ ጋን ከናርቴ ኣኑጝ የቻሊያኬን።¹³ከ ሹካጝ መንፈስ እንካ ኣኩሉክ ካኩዋዎጝ፤ እያኒሼባ እየው ፓይላ ሃምካ ኣኩሉኩጝ፤ እሺ ሃሳውኬን ከእሺ ኤምኑ፤ ሃሳውባ እን ዋዬጵን፤ ፕርዻ ሜይሼባ እየው ናንዳካ እን ሺጝኬ ታካ ሌሜን ሙኒኔኑጝ።¹⁴ቦው እን ኣይ ናኒዬ ከእባጅቶጝ ከሻሜን ጎቢ ኣንባ።¹⁵እን ኣይካ ባባ ፓይላ ሃናኒ፤ ኣኪ ቦው እን ኣይ ናኒዬ ከእባጅቶጝ ሻምባ፤ ሃናንዳካ እን የኣንቶጝ።¹⁶ከሹ ጩዋማ ጩዋ የጌያኬን ኣን፤ ካኣይባዬ ፕር ከሹ ጩዋማ ጩዋ የጌያባ ኣን።ሜይካዾ ካውር ጊታይካ ዻይኔንካ ኢየሱስ እን ዋሼ ሃምካ ዋዛጝ¹⁷ከኦካ ውርካ ዻይኔንካ ኢየሱስ ክየም ክየም ሺጝ፤ ሺጜ ከሹ ጩዋማ የጌያኬን ኣን፤ ካኣይባዬ ፕር ከሹ ጩዋማ የጌያባ ኣን፤ ፕርዻ ሺጝ ሃኩይባ ሃምካ ባባያጝ ሃኦ ኔኒዬ? ሃሳወና።¹⁸ሺጜ ሹ ጩዋማካ ሃኦ? ኦይን ሺጜዻ ካኒ ሁሊኩሼኬን ኡዋው ሺጜን እያይኔ ጋኔን ጋጝ ኣንሼን።¹⁹ኢየሱስዻ እባጄ እን ዎሼ እሺ ኣንሼኑጝ ዋይሼ እንግን እያጝ፤ «ኣን ሃሺጜ ከሹ ጩዋማ ጩዋ የጌያኬን ኣን፤ ካኣይባዬ ፕር ከሹ ጩዋማ ጩዋ የጌያባ ኣኑጝ ሃዋይሼ እየው እያይ፤ ኣዬ ኦ ናኑጝ የኣንሻባይ ጋጝ?²⁰ሃዋይሼባ እየው ኣኩሉክ፤ እየው የኦቆራባ፣ የሞይካዺያባዻ፤ ዬ ፔኑጝ ዋዝንዺባ፤ ካኣይባዬ ሞይካዺዬን ጉዩ ዋክሼባ ሃምካ ዋዛጝ።²¹ሃኣጚ ሹ ኔኒ ሄክሼ ጅሼንያጝ ጫኒቂዬንባ፤ ዬ ሹዋጵሽያጝ ጩዋ፤ ውር ናንዳካጝ ኩኔ ፔኑጝ ክያኑጝ ጌርሺኔባ ጫኒቂዬን ኔኒ፤²²ከእያይዻ ጋን እየውዻ የኣኒና ሞይካዾ ክያኒ፤ ኣይባዻዬ ናንዳካጝ ካጌዬ እየው ዋዝንሲ እየውባ፤ ኦኬና ካቦው ዋዛ ጉዩዻ ኣኔኬን።²³ከሹ እን የይሁናኬን ከኦናኒ ኦኬ ክየምጵንዻ፤ ሃዋይሼባ እየው ኣኩሉክ፤ እን የይሁንቴ ከሮጝ ናኒ ፓይላ ባባ ኣይ እየውባ።²⁴ሌይ ኣይ ጋኑጝ ኦኬ ክየምጵንዻ የካኔ ይሁናኬን ከሮጝ ናኒ፤ ይወንባ የቦዋባ ዋዛ ጉዩዻ ማቲባ ፓሲ።²⁵ሃዋይሼባ እየው ሌይ ኣይ ጋኑጝ ኣይኒን ከሄክንሶጝ፤ የካርሲኬ ጋኔ ናንዳካ ባባ ማርኬ ሄክንሶዬኔ ሹ እን ካሃሳወ ጃውጝ ኩንባ።²⁶ከሹ እን የይሁናባ ከሮጝ ናኒ፤ ይንዻ ከባሊ ጉዩ ሃይወንባ ባባ እያጜን።²⁷ናንዳካጝ የናሺቴ ኣኔ ሃቱሌ ከሃምካ ባሪዮዻ ናንዳካጝ የኣሚኒቴ ኣኑጝ እሺ ባባዻ ናሺባ እየው።²⁸ሃቱልኬ ሃምካ ባባዬ ሃኩንያ ፔኑጝ ክያኒ፤ ዬ ጋን ሃኦይዲ ፔኑጜ ሃኩይባ ሃምካ ባባጝ።²⁹ከኦይን ጩዋ ውር ጊታይካ ዻይኔንካ ኢየሱስ ሺጝ እያጝ፤ ይንጌ ካንዻ ማርኬ ሄክንሶዬኔ ኣኔን ጃ ሃሳወን።³⁰ጋን ኦኬ ፓይላ ካጊባጄዬ ውር ክየምጵንዻ ካኣንሺኖጝ ካማሬ ዎሺሼኑጝ ሃዋያያ፤ ይንዻ የቱሌኬ ሃምካ ባሪዮጝ ካኣምኒቶጝ ሻማ ኡዋው።³¹ኢየሱስዻ ዋሼ ዋይሼ እንግን እያጝ፤ ጋንካ የኣምኒያ እያጝኪ?³²እየዎ፤ እየው ፓይላ ከሹ እን ከላልምንቴ ሃምካ ጶሮክ ጉዩጝ ኩንባ፤ ሹ እንዻ ሃጋን። የኦይዳባ ኣንዻ ኣምጵን፤ ካኣይባዬ ባባ ናንዳካጝ ኣኒኔ ከኣኑጝ ሃማር ኣምጵኔን። ³³ከኣን ከኣንቴ ሆፎጝ፤ ሃሜይሼያ እየው ይጝ፤ የኣኒናባ ዳሉጝ ክያኒዬ የኣንቴ ጋሎ፤

ሃፑክ 17እን ኢየሱስ ይሁኔ ናንዳካ እሺ ኤምኑጝ¹ኢየሱስ ሃሳወ እን ጩዋ ሁቤኔ ቶይ እያጝካ ፎላዬ ሺጝ እያጜ ይወና፤«ባባ ዮ፤ ሹ ሄክሻ፤ ካጎቢዬ ውዋ ኑኑጝ ጎቢባ ውዋ ኑኑ፤²ከጊታይ ሃቦወኬ ኦኑኑ ፓይላ ካኣይኔ ዻቆካ ቦን ጮሉጝ ከኦካ ውር ፓይላ የኣዬንያ ጌጳሞዬ።³ሃእንጵን ኣይ ኣምላካ ኣኩሉኬ ኢየሱስ ክርስቶስ እን የይዕሲዮጝ ካጊባጆጝ ይጝ ሃዻቆካ ቦን ጮል።⁴ዋድማ እን የኣዬ ኣን ከሹዋጵሼን ጎቢያ ኣን ከዳሉጝ።⁵ኣኪ ባባ ዮ፤ ካኒ ሙንኬን ፔኔ ከጎቢንታ ባ የኣኒኔ ኦኑኑጝ ጎቢባ ኣን ከታይ ኑኑጝ።እን ኢየሱስ ይሁሺኔ ውር ጊታይካ ዻይኔን ኔኑጝ⁶ናንዳካ ውር ጊታጝ የኣዬ ኣን ከፔኑጝ ክያኑጝ ሃዹዋልሼንያ ሮጝ ኑኑ፤ እባ ጋይ ኑኑ፤ የኣህያ ኣን እንግንዻ ዻዬያ ክያጃ ኑኑ።⁷የኣዬ ኣን ፓይላጝ ኣዬኬ ታይ ኑኑጝ ጋን ጊባጃ፤⁸ናንዳካ ኦ ክያጃ እን የኣዬ ኣኑጝ ሃኣይ እንግኔ ቦዋ፤ ኣንዻ ሃቱሌኬ ኦኑኑጝ ከኣኩሉክ ጊባጅጃ፤ እን የይዕሲዬ ኣንዻ ጋምኒያ፤⁹እንግን ናንዳካጝ ጋዬ ኑኑጝ ሃይሁሼን እንግንባ፤ ናንዳካ ጊታይ የኣዬ ኣኔ ኣይ ኑኑዬ ዬ ሃይሁሼንኬን ፔኑጝ።¹⁰እን ኣይ ናኑጝ ፓይላ ሃኑኑ፤ እን ኣይ ኑኑጝ ፓይላ ሃናኒ ከእንግንዻ ሃጎቢ እንባ።¹¹ካርሲኬ ጋኔ ኣን ሃኡፔንኬን ፔኑጝ ክያኑጝ፤ ዬ እንግን ጋኔንባ ፔኑጝ ክያኑጝ፤ ኣን ሃሺጝካ ሃሚን ኑኑ ኩኔን፤ ቅዱስ ባባ ዮ፤ ኡዋው ከእያይ ሃኣይቴ ክየሙጝ እንግንዻ ካጋይ ክየሜ ከእን የኣዬ ኣን ከሮጝ ኑኑ ዻው እንግንባ።¹²ኣን ሃኣኔንባ ከእንግኔ፤ ከሮጝ እን የኣዬ ኣኑጝ ሃማቲ ካርሚ ጊዬይዬ፤ ሃዻው እንግንዻዬ ካሹዋጵሼ ክያጃካ ወርቀቱጝ ከኦካ ውዋ ክየም እን ካካይህ እንቃ ከኦግዬይ ውር ክየምጵንዻ ካኒ ካይህኬን።¹³የጋን ይጝ ሃሓሚን ኑኑ ኩኔን ናኒ፤ ኣይባዬ ዋዛ ናኒ ካቋቄ ኦግዬዩጝ፤ ጋን ሃኣኔንባ ፔኑጝ ክያኒዬ ሃሓሳውባ ይዕጝ።¹⁴ሃኣህያ እንግን ክያጃ ኑኑ፤ ኣን ከእያይ ሃማሬኬ ፔኑጝ ኣዬኑጝ፤ እንግንዻ ከኣን ማሬኬ ፔኑጝ ኣዬኑጝ ፔኑጝ ሚኔያ እንግን።¹⁵ሃይሁኔ እኑጝ ከዻው እንግን ከኦኬ ጋራ ክያኒዬ ዬ፤ ማር እጝ ከቡሌ እንግን ከፔኑጝ ክያኒዬን።¹⁶ኣን ከእያይ ሃማሬኬ ፔኑጝ ኣዬን ፓይላ፤ እንግንዻ ማርካ ፔኑጜን።¹⁷ክያጃ ኑኑ ሃኣኩሉክ፤ ቀድሲ እንግንባ ከኣኩሉክ ኣዬን ኑኑ።¹⁸እን ከእያይ የይዕሲሼ ኣን ፔኑጝ ክያኑጝ ኣንዻ ሃይዕሲሼባ እንግን እያጝካ ፔን ፓይላጝ።¹⁹እንግን ካጋዬ ጊታኬና ቀድሲዬ ከኣኩሉኩጝ፤ ሃቀድሲባ ኣን ኤምኑ ናንዳካ እንግን።እን ኢየሱስ ይሁሼ ውር ጊታይካ ይሁኔን ፓይላጝ²⁰ሃኬ ጊታይ ቦው እርርሲዬን ጊዬይ ጊታይ ኣምኒኬ ኣንዻ ፓይላ ዬ ሃይሁሼንኬን ጊታጝጵን፤²¹ይንዻ፤ ባባ ዮ፤ እን ከእያይ የኣኒኔኬ ኣን፤ ኣን ከእያይ ሃኣኒኔ ከእኑጝ ፓይላ ካጋዬ ክየሙጝ፤ ፕርዻ እን ከእያይ የይዕሲዬ ኣኑጝ ውርካ ፔኑጝ ካኣምኒዮጝ፤ እንግንዻ ካጋይኬ ኡዋዌ ጊያ።²²ኡዋው ከእያይ ሃኣይቴ ክየሙጝ እንግንዻ ካጋዬ ክየሙጝ፤ ጎቢንታ እን የኣዬ ኣኑጝ ሃኣህያ እንግን።²³ይንዻ ሃእን ኣን ሃኣዬኬ እንግኑጝ፤ እንዻ የኣዬኬ ኣኑጝ። እን ከእያይ የይዕሲዬ ኣኔ ከእጝ የናሺዬ ኣኔ ከእን የናሺዬ እንግንዻዬ ፔኑጝ ካእባጆጝ፤ ክየም ኣዬን ጊዬይ ካኣይ ካሎን።²⁴ባባ ዮ፤ ጊታጝ የኣዬ ኣኑጝ፤ ካጋኒኔ ኦይን ሃኦጝ ካኒ ሙንኬን ፔኔ ናንዳካጝ የናሺዬ ኣኑጝ ካጌዬ ጎቢንታ እን የኣዬ ኣኑጝ ሃዎሺያ።²⁵ባባ ጫንቃሉጝ ዮ፤ ፔኑጝ ማርኒን እን እባጄኑጝ፤ ኣን ሃእባጅያ እን፤ ጊታጝ እጝ እን የይዕሲዬ ኣኑጝ ጊባጃ።²⁶ናሺማ እን ኑኑ ኣኔንኬ ኣኑጝ ካኣኒኔ ኦግዬዩጝ፤ ኣንዻ ካኣኒኔ ኦግዬዩጝ፤ ካጊባጄ እኑጝ ሃሻሚያ ካጊባጄ እንዻጝ ሃሻሚባ።

ሃፑክ 18እን ጎሜ ኢየሱስ ከውር ጊታይ ሚኔ እሹጝ¹ኢየሱስ ሺጜ እን ጩዋ ጋይኬ ውር ጊታይ ዻዬ ጆሌ እሺዬ ቁዋሌና ባይንካ ቄድሮን፤ ሻዋ ታቴ ሃም ኣኔ ሻሪካ ኣሜኑጝ።²ሹ ጁዋኑ ኢየሱስ ከውር ጊታይካ ዻይኔን ኔኑጝ ናንዳካጝ ጌይኔ ኦካ ራቅ እኑጝ፤ ይሁዳ እን ሳስክዬ ኣዬንዻ እባጃ ክራ እጝ።³ይሁዳ እያንሽ ፓፃኗኔ ፕርዻ ታታቻንካ ውርካ ቃሼ ውር ዶክ ጊታይ ይዕሲዬ ከሃምካ ፈረሳውያኔ ኩና ኦይካ ራቅካ ሻሪካ ኣሜኑጝ፤ እንግንዻ ቦው ችቦ፣ ፋኖሴ ኣንቲቲካ ፋሬ ጊያ።⁴ኢየሱስዻ እባጅ እንካ ሄክሽ እሺ ፓይላዬ ቱሌ፤ ዋይሼ እንግን የዎሻ ኒን?⁵እንግንዻ ሺጝ ኢየሱስ እንካ ናዝሬቱጝ፤ ኢየሱስዻ ዋይሼ እንግን እሺ ሃኣን። ይሁዳ እን ሳስክዬ ኣዬንዻ ኣኔባ ከእንግን ዾሬ።⁶ኢየሱስዻ ከሹ እን ሺጜ እሺ ሃኣኑጝ ቱጝቱጝሼያ ሁር ቡዳ ዳሊ ክያኒዻ።⁷ፕርዻ ሺጝ የዎሻ ኒኔ ኣንሻ እንግን? እንግንዻ ሺጝ፤ ኢየሱስ እንካ ናዝሬቱጝ።⁸ኢየሱስዻ ዋሼ ሺጝ፤ ሃዋይሼያ እየው ኣን ሃኣይ እሺ ኣኪ ሃኦኬና የዎሽቴ ኣንያጝ ኦይድባ ጊታጝ ካፓይባ፤⁹ይንዻ ኣዮጝ፤ ሃኬ ክያጃ እን ሺጜ ከኦካ ጊታጝ የኣዬ ኣኑጝ ክየምጵንዻ ካኒ ካይህኬኔ ክያጆጝ ካሙኒንቴባዬ ጊያ።¹⁰ቦው ኤቤሌ ስምዖን ጴጥሮስ ና ኣኔዻ ጁጉያ ኤቤል ቆው ናቡ ቡዎንካ ውርካ ዋድማካ ታቺ እንካ ውርካ ቃሼ ቃጫ፤ ሮጝካ ውር እንካ ዋድማዻ ሃኬና ሺጜ ማልኮስ።¹¹ኢየሱስዻ ዋይሼ ጴጥሮስ፤ ዋሽባ ኤቤል ኑኑ ሃምካ[ ሰገባጝ ] የካኔ ማቲኬኒ ኒያቡ እን ባባ ኣዬ ኣኑጝ?ቦሼያ ኢየሱስ ሃምካ ታቺካ ውርካ ቃሹጝ ኦካ ሌሜንካ ሐና¹²ፓፃኗንዻ ጋይኬ ውር ጊታይካ ኤርጎዬ ጋይኬ ኣሽካራካ ኣይሁድዻዬ ጎማ ኢየሱስ፤ ቁማዻ፣¹³ከሌሜን ቦሼያ ሃምካ ሐና እን ኣይ [ኣፒኔካ] ቀያፋጝ፤ ቀያፋዻ ሃታቺካ ውርካ ቃሽካ ኣፒኔ ሐና።¹⁴ቀያፋምዻ ሃእን ሺጚ፤ ሺጝ ናንዳካ ዛርሲያጝ ውር ክየም ካኣርሾጝ ሃባሺዬ ኪሊዬን ውርካ ኣይሁዱጝ።ቡድኔንካ ጴጥሮስ¹⁵ስምዖን ጴጥሮሴ ውርካ ዻይኔን ክየሜ ዻዬያ ኢየሱስ፤ ውርካ ዻይኔን ይጝዻ ናንዳካጝ ጊባጄ ጋጝ ከውር ታቺ እንካ ቃሹጝ ሻዋ ከጋጝ ከኢየሱስ ሃምካ ካራምካ ታቺ እንካ ውርካ ቃሹጝ፤¹⁶ዬ ጴጥሮስ ሺዺያ ከኦካ ሃፑክ ሹኑክ። ውርካ ዻይኔን ኑዋ እን ጊባጄ ጋጝ ከውር ታቺ እንካ ውርካ ቃሹጝ ዋኬ ሃሳውኔ ውር እን ባኬን ኦይካ ሃፑኬ ዾቅሼያ ጴጥሮስ።¹⁷ውር እን ባኬን ኦይንካ ሃፑክዻ ዋይሼ ጴጥሮስ፤ እን የማሪ ውርካ ዻይኔንካ ውሩጝ ክየሜኒ? እሺዻ ሺጝ እዕጝ።¹⁸ናንዳካጝ ኣኔ ጪራቱጝ ውርካ ዋድማኔ ኣሽካራኔ ጎሬ ጋኔባ ኦካ ቅልቃጩምካ ጉ ማራ ካቱልቱል ጌዬን፤ ጴጥሮስዻ ዾርኬ እንግኔ ኣኔን ጉ ሻወን።እን ቦሼ ኢየሱስ ኦካ ሌሜንካ ታታቻንካ ውርካ ቃሹጝ¹⁹ከሹ እን ታታቻን ጊታይካ ውርካ ቃሹጝ ጋንሻ ኢየሱስ ናንዳካ ውር ጊታይካ ዻይኔኔ ናንዳካ እርርሲዬን ኔኒዬ።²⁰ኢየሱስዻ ሺጝ እያጜ ዋሼያ እንግን፤ ኣን ሃሜይሼያ ፔኑጝ ከሊኪ፤ ውርካ ኣይሁድ ከኦካ ከቶኦካ ይሁኔን ካጝ ፑጪዮጝ፤ ከኦካ ቶኦካ ይሁኔንዻ ሹ ጮል ሃእርርሲያ፤ ኬና ሃሓሳወ ኬራሼን ኣኔኬን።²¹ሃኦ የኣንሽቴ ኣኑጝ? ኣንሽባ ጊታይ ዋይሼን ኣኑጝ፤እየዎ፤ ጊታይ ሃሓሳዎጝ እንግን ጊባጃ።²²ኢየሱስ ከሹ እን ሃሳወ እኑጝ፤ ከኣሽካራ ጊታይ ጎሬ ኣኔን ኦካ ቆጩር ኔኒ ክያኑጝ ክየም ሺጝ እን ዋሼ ታቺካ ውርካ ቃሹጝ ሃእያጝኪዬ? ሙራ ካሎን።²³ኢየሱስዻ ሺጝ፤ ሃኦኬና ሃሓሳወ ጋራያጝ ማኝሺባ ጋራ እን ሃሓሳዎጝ፤ ዬ ሃኦኬና ሃሓሳወ ኣኩሉክያጝ ሃኦ የሙሬ ኣኑጝ?²⁴ሐናዻ ኢየሱስ ከእን ቁሜ ኣኖጝ ይዕሲሼያ ሃምካ ታቺካ ውርካ ቃሽ ቀያፋጝ።ቡድኔንካ ጴጥሮስ እንካ ላንሳዬ ማክንሳዬ²⁵ስምዖን ጴጥሮስዻ ዾሬ ኣኔንባ ጉ ሻወኔ፤ ዋይሼ እሺ እን የማሪ ውርካ ዻይኔን ኔኒ ክየሜኒ? እሺዻ ሺጝ እዕጜ ቡድያ።²⁶ከኦካ ውርካ ዋድማካ ታቺካ ውርካ ቃሽ ክየም እን ጴጥሮስ ቃጬ ናቡጝ ውር ኔኒ፤ ሺጝ ሃካና ጌይኬኒ እን ከእሺ ሃምካ ራቅካ ሻሪካ ኣሜኔ ኣንሼና?²⁷ጴጥሮስዻ ቡድያ እንቃ፤ ይሪካ ባቻ ኬያ።ኢየሱስ ከኦካ ሌሜንካ ጲላጦስ²⁸ውርካ ኣይሁድዻ ከኦካ ቀያፋም ቦሼያ ኢየሱስ ሃምካ ካራምካ ታቺካ ውርካ ሮም፤ ክራ ኔኒዻ ሃካሪንታ፤ ውርካ ኣይሁድ ካቻሊዬ ፋሲካ ኣሜኑጝ፤ ካማር ሴሶ ክያኒ ሻወኔ ካኒ ሻውኬን ሃምካ ካራምካ ታቺ እጝ።²⁹ዬ ጲላጦስ ቱል ሃሚን ጊዬይዬ ሺጝ ካሲሲዬን እን የቦቴ ውሩጝ ሃኦዬ? ኣንሻ እንግን።³⁰እንግንዻ ሺጝ ዋቲ ውሩጝ ማራ ውርካ ሴሶ ኣዬንያጝ ሃቦፓይንቴኬን ኦካ ማሪ ኑኑዬ ዋሼያ እሺ።³¹ጲላጦስዻ ዋይሼ እንግን ቦው እየውጵኔ ኮምቴባ ኬካ ሕግ ጉዩ፤ ውርካ ኣይሁድዻ ሺጝ ሃኡዋያጝ ኦካ ውር ክየምጵንዻ ካኮምቴ ኮምሼንካ ኣርሼኑጝ ሃኣንቴኬን [መብት]።³²ይን ኣዮጝ ካኣርሼ ኣርሼን ኬና ኣይ እያኑጝ ሺጝ ናንዳካ ሜይሺኔኔ ክያጃ እን ኢየሱስ ሃሳዎጝ ካሙኒንቴባዬ ጊያ።³³ጲላጦስዻ ዋክ ሃምካ ካራሜ ሺውሺሽ ኢየሱሴ ሺጝ፤ እን የኣይ ቢቲካ ኣይሁዲ ዬ ኣንሻ?³⁴ኢየሱስዻ ሺጝ፤ ቃቦጝ ሃኑኑ ሞ ሃውር እንቃ ሜይሼ እን ናንዳካ ኣኑጜ? ዋሼያ እሺ።³⁵ጲላጦስዻ ዋሼ ሺጝ፤ እን የኣይ ውርካ ኣይሁዲ? ይዕሲሼ እን ዮጝ ናኑጝ ሃውር ኑኑዬ ታታቻንካ ውርካ ቃሼ፤ ኣይባዬ የሻሚ ኦዬ ዋይሼ እሺ እያይ።³⁶ኢየሱስዻ ሺጝ፤ ጌጳሞ ናኒ ማርኬ ፔኑጜን፤ ዋቲ ኣያ ኦጝያጝ ውርካ ኣይሁድ ካጎሜ ኣኑጝ ኣሽካራን ናኒ ሃርጊኔያ ኣን፤ ዬ ጋን ጌጳሞ ናኒ ማርኬ ኦጜን።³⁷ጲላጦስዻ ሺጝ ኣኪ የኣይ ቢቲ እያንጌ/ ኢየሱስዻ ሺጝ ኣን ሃኣዬ ቢቱጝ ሃሳወን ኑኑ ሃሊኪ፤ ጅሼ ኣኑጝ፤ ሃኩኔ ፔኑጝ ክያኑጝ ሃናንዳካ ኣኩሉክ ማኝሺዬን እን ኣይኬ ኣኩሉክ ፓይላ ዋይሼን ኣንባ ሺጝ እያይ።³⁸ጲላጦስዻ ሺጝ፤ ኣኩሉካ ኦ? ሃሳወ እን ጩዋ ቱል ሃምካ ውርካ ኣይሁዴ ዋይሼ እንግን እያጝ ኣን ሃካና ጌይኬን ሴሶ እንካ ካሲሲዮጝ፤³⁹ኣይባዬ ከፋሲካ ካቡልሼ እየው ውርካ ቁሜን ክየሙጝ የዱሲያያ፤ ዬ ካቡልሼ እየው ቢቲካ ኣይሁዱጝ የዎሻባይ?⁴⁰እንግንዻ እንቃ ሺጝ፤ ከኡቹኬን ሺጝ ኣኔኬን ማር እሺዬን/ ቡልሼ ኡዋው በርባን። ዬ በርባን ሃጓርጉ።

ሃፑክ 19ኢየሱስ ካሮዮጝ ኮምሼያ¹ጲላጦስዻ ቦው ኢየሱሴ ሙሪሻ።²ፓፃኗንዻ ክዽሬካ [ኣክሊሌ] ቁሪዬ ጋይሼያ ሽቦ ኔኒ፤ ክምሼያ እሺ ኣፓላ ጫጩጉዻ፤³ዋኬ ጆልዻዬ ሺጝ ታቹጝካ ኣይህድ ዮ፤ ሹቃ ካኣይሼ እኔ ጋኔን ካሎን ሙሬን።⁴ጲላጦስዻ ቱል እንቃ ሹኑኬ ሺጝ፤ ኣኪ ይጝ ሃቡልሼ ሃሚን ጉዩጝ ካሲሲዬን ካሴሶ ኬና ሃማሬ ጌዬንጝ ከእባጅባዬ ጊያ ዋይሼ እንግን እያይ።⁵ኢየሱስዻ ኡፑት ክዽሬ እንካ ኣክሊሌ ክም ኣፓላ እንካ ሓምራዊዬ ቱላ፤ ጲላጦስዻ ዋይሼ እንግን፤ እየው፤ ውሩጝ።⁶ታታቻንካ ውርካ ቃሼ ኣሽካራኔ ከሹ እን ጌዮጝ፤ ሺጜን ሮይባ/ ሮይባዬ ጉቹኳ፤ ዬ ጲላጦስ ሺጝ እየው ቦውዬ ሮይባ፤ ከታጝ ናኑጝ ካሲሲዬን ኬናካ ሄክሼ ሃምካ ሴሶጝ ሃካና ጌይኬን።⁷ውርካ ኣይሁድዻ ሺጝ፤ ኡዋው ሃኣንቴ ሕግ፤ ናንዳካጝ ሻሜ እሺ ኤምኑ ባሪዮጝ ከሕግ ጉዋዩ ካኣርሾጝ ኣኔባ።⁸ጲላጦስዻ ዋዬ እኑጝ ካሎን ሪግሼና፤⁹ዋኬ ሁሉክ ሃምካ ካራሜ ዋይሼ ኢየሱስ የኩንኬ ኦኔ ኣንሼና፤ ዬ ኢየሱስ ካኒ ዋሼኬን እሺ ክየምጵንዻ።¹⁰ጲላጦስዻ ሺጝ፤ የሃሳውንኬኒ ኣን? ካቡሌ እን ወይ ካሮዬ እኑጝ ሃኣኔ ጌጳሞጝ የእባጅኬኒ?¹¹ኢየሱስዻ ሺጝ፤ ዋንቲ ማራ እን ከዾዮክ ኣዬንያጝ ኦናኒ ዋቲ የኣኔኬን ጌጳሞ፤ ዬ ውር እን ሳስክዬ ኣይ ኣን እኑጝ ኣኔ ሴሶ ሳጊ።¹²ከኦይን ጩዋ ጲላጦስ ዎሻ ኢየሱስ ቡሌን፤ ዬ ውርካ ኣይሁድ ሺጝ የቡልያ ውሩጝያጝ የማር ናሺዽካ ቄሳሬን፤ ውር እን ሻሚ እሺ ኤምኑ ቢቱጝ ሃውርካ ሚኒኔንካ ቄሳሬ ካርሲያ ኡቹኬን ጊዬይ።¹³ጲላጦስ ዋዬ እኑጝ ቡልሼያ ኢየሱስ ሹኑጝ፤ ከኦይን ሺጜ [ንጣፋካ ባዩጝ፤ ከቶካ ኣራማይክ ከራቅ እን ሺጜ ገበታዬ] ሺዎጝ፤ ኡፓ ኦካ ካራምካ ኮምሼን።¹⁴ዋዳ እንዻ ሃኦካ ሼክዬንካ ቶንቶሮካ ፋሲካ፤ ሹሽ ኔኒዻ ሃኬ ሳዓት ላ። ጲላጦስዻ ሺጝ እየዎ፤ ቢቲ ጉዩ።¹⁵ዬ እንግን ሺጝ ቡልባ/ ቡልባ/ ሮይባዬ ጉቹኳ። ጲላጦስዻ ሺጝ ካሮያይ ቢቲ ጉዩ፤ ታታቻንካ ውርካ ቃሽዻ ሺጝ ከቄሳር እንቃ ሃኣንቴኬን ቢቲዬ ዋሼያ እሺ።¹⁶ከቱንሲዻ ካሮዮጝ ጲላጦስ ሳስክዬ ኣያ እንግን።ሮዬንፓፃኗንዻ ጎም ኢየሱሴ ቦፓዬያ¹⁷እሺዻ ዼት ኦይንካ ሮዬ እሺዬ ከቶካ ኣራማይክ ሃም ሺጜ ጎልጎታዬ ሺዎጝ ቱላ ሃምካ ራቅ እን ሺጜ [የራስ ቅል]።¹⁸ሮያ ኦይንዻ፤ ከእሺዻ ውር ዻ፤ ክየም ሻምሼ ታጝ፣ ኑዋ ሻምሼ ታጜ፣ ኢየሱስ ሻምሼ ጫቃኔ ሮያ።¹⁹ጲላጦስዻ ቶክ ወርቀቴ ቁሪሼያ ኦይካ ሻሪ እንካ ሮይኔኑጝ፤ ቶኬን ኔኒዻ ሃኬና ሺጝ ኢየሱስ እንካ ናዝሬት ቢቲካ ኣይሁድ።²⁰ራቅ እን ሮዬ ኢየሱስዻ ናንዳካጝ ኣኒኔ ኦካ ቆጩርካ ከተማጝ ውርካ ኣይሁድ ጁዋናን ኮማ ወርቀት እን ቶኮጝ፤ ቶኬን ኔኒዻ ሃኬ ኣራማይኬ ላቲኔ፤ ካግሪክዻዬ።²¹ውርካ ኣይሁዴ ታታቻንካ ውርካ ቃሼ ከጲላጦስ ኖክዬን ሺጝ፤ «እሺ ናንዳካጝ ሺጜ ኣን ሃኣይ ቢቲካ ኣይሁዱጝ ቶኳ ዬ ኦይ ሃቢቲካ ኣይሁድ ሺጜ ቶኬን።²²ጲላጦስዻ ሺጝ ጃኬና እን ሃቶኮጝ ²³ፓፃኗንዻ ሮዬ ኢየሱሱጝ ጩዋ፤ [ውር ጊታይ ቡዋ ኣይ ቆቃ ሺዺያጝ] ቦው ኣፓላ ኔኒዬ ናንዳካ ውር ክየም ክየም ካሄክሼ ክየም ክየሙጝ ካሺሜና ከኣሁር፤ እን ቡዋ ኣይ ቆቃዻ ቦኬ ዾዮኬ ሌይ ኣይ ዱቡጝ ማቲ ፓሲ ክየሜ ሃኣፓላ ኬና ማር ቻኬን ኣኔኔ ጋሽክዬ።²⁴ዬ ሺጝ፤ ካቲት[ዕጣዬ] ካጝ ሄክሾጝ ካሄክሽባ ዬ ካማር ሃዽሼኔ ሃሳወና። ይጝ ኣዮጝ ሃክያጃካ ወርቀት እን ሺጚ፤ ካሺሜና ኣፓላ ናኒ፤ ከኦካ ጊታይ ቡዋ ኣይ ቆቃዻ ፓቃ ዕጣጝ ካሙኒንቴባዬ ጊያ።ፓፃኗንዻ እን ሻሞጝ ሃይዕጝ።²⁵ከኦካ ቆጩርካ ሮይኔንካ ኢየሱስ ጁዋኔዬ ጪኔካ ጁዋኔዬ፤ ፕርዻ ኝያካ ቃላዮጳ ማሪያሜ ማሪያም እንካ መግደላዊዬ ጎሬ ጋኔባ።²⁶ከሹ እን ኢየሱስ ዋይሼ ጁዋኔዬ ውርካ ዻይኔን እን ዾር ቋጩር ኔኒ ክያኒዬ ቶዬን እንግኔ፤ ዋይሼ ጁዋኔ እን ኝያጝ ዮ፤ ውዋ ኑናጝ፤²⁷ዋይሼ ውር እንካ ዻይኔንዻ ጅናጝ፤ ካርሲኬ ሹ እኔ ውር እንካ ዻይኔን ቦሼያ እሺ ሃምካ ቶኦ ኔኑጝ።ኣርሼንካ ኢየሱስ²⁸ከኦይን ኢየሱስ እባጅ ኦግታይ ካሙኒንቴ ፓይላዬ፤ ሺጝ ክያጃ ወርቀት ካሙኒኖጝ ኮርጉ ቃዋ ኣን።²⁹ከኦይን ኣላላ ካወይን ኬና ማሊ ከኣንቲቲ ኬና ቆቂ ኣኔባ፤ እንግንዻ [ጎርሼ ከሰፈነጌ ከዘንካ ሂሶጵ ቦሼያ ሃምካ ቶግ ኔኑጝ።³⁰ኢይብሱስዻ ቦወ ማሎ እን ጩዋ ሺጝ ሙኔና፤ ሻም እሺ ኤምኑ ሹዬ ሳስክዬ ኣዬና [መንፈስ] ኔኒ።³¹ሹ እንዻ ሃሹካ ሼክዬንካ ሹ እንካ [ሶጵሳጝ] ውርካ ኣይሁድ ሩዋካ ውር ጊታይ ሮዮጝ ከሹ እንካ ሶጵሳጝ ካማር ሮይኔን ክያኒ ድቢኔኔ ናንዳካጝ ዎሼዬ እንዻ ናንዳካጝ ኣዬ ሹካ ሶጵሳ ዋናጝ፤ ውራን ጊታይ ሮዮጝ ካጩክ ዱር ጊዬይዬ ካሃንቺሺዮጝ ይወና ጲላጦስ።³²ዬ ፓፃኗንዻ ፓዬኔ ጩካ ዱርካ ውር ጊታይ ሮዬ ኣይኬ ክርስቶሱጝ፤ ፕርዻ ጩካ ዱርካ ኑዋዻ።³³ዬ ከሹ እን ፓይኔ ኦካ ኢየሱሱጝ ናንዳካጝ ኣርሼዬ ጌዮጝ ካኒ ጩኬን ዱራን ኔኒ፤³⁴ኣይባዬ ከኦካ ፓፃኗን ክየም ቶካ ቆጩርካ ኢየሱስ ከፓር፤ ይሪካ ኒያቡዬ ሙዋዌ እሬና።³⁵ውር እን ጌይ እንዻ ኣዬና ማኛሞ፤ ማኛሞ ኔኒዻ ሃኣኩልክ፤ ሃሳወ ኣኩሉክዻ ክያጃ እን እየውዻ ከኣምኒቶጝ ማኝሺባ።³⁶ይንዻ ኣዮጝ፤ ወርቀት ከእያይ ሺጜ፤ ከኦካ ጊጪ ናኒ ክየምጵንዻ ጩኬን ካሙኒኖጝ፤³⁷ወርቀት እንቃዻ ሃኬ እያይ ሺጜ፤ ጊታይ ቶኪዻ ጌይባጝ።ሌሲካ ኢየሱስ³⁸ከኦይን ጩዋ ዮሴፍ እንካ ኣርማትያሱጝ ሩዋካ ኢየሱስ ቦወና ይወና ጲላጦስ፤ ዮሴፍዻ ናንዳካጝ ሪግሺኔ ውርካ ኣይሁዱጝ ከራሺኔን ሃውርካ ዻይኔንካ ኢየሱስ፤ እሺዻ ጲላጦስ ናሺዮጝ ጩዋ ኩኔ ቦዋ ሩዋ ኔኒ።³⁹ከሌሜንካ እን ኒቆድሞስ እን ኩንኬ ምክር ኦካ ኢየሱሱጝ ቦው [ሊትር] ኬናካ ሄክንሲዬኬ ዽብ ክየም [ከርቤኔ ዋልቅንቶዬ] ኩና።⁴⁰እንግንዻ ቦው ሩዋካ ኢየሱሴ [ከዱስምኔንካ ሳሪኔንካ ውርካ ኣይሁድ ከኣፓላ ኬና ሻምሼ [ሹቶዬ] ጅጜያ እሺ።⁴¹ኦካ ራቅ እን ሮዬ ኢየሱሱጝ ሃኦካ [ራቅካ ሻሪካ ኣሜን] ከኦካ ራቅ እንካ ሻሪካ ኣሜኑጝ ኣና ሌሲ ኬና ማሬ ውር ክየምጵንዻ ቱቱኬን።⁴²ሹ እንዻ ናንዳካጝ ኣዬ ሹካ ሼክዬንካ ሹካ ሶጵሳካ ውርካ ኣይሁዴ ሌሲዻ ናንዳካጝ ኣኒኔ ዲያውጝ ቱቱካ ኢየሱስ ኦይን።

ሃፑክ 20ኢየሱስ ናሹጛ ከኣርሼን¹[ከሳምንት] ከሹ እንካ ሌሜኑጝ፤ ኬካሪንታ ካኒ ኣይባ ድሙጉዬ፤ ማሪያም እንካ መግደላዊ ኩያ ሃምካ ሌሱጝ፤ ባይዻ ኡንጉሌን ከኦይካ ሁሉኩሼንካ ቶካ ሌሲዬ ጌያ።²ዬዻ ሪሼ ኩይ ሃምካ ስምዖን ጴጥሮሴ ውርካ ዻይኔን ኑዋ እን ናሺ ኢየሱሴ ኩኔ ሺጝ፤ ቡል ታቺ እን ከኦካ ሌሲዬ ቦዋ፤ ጋጁጜ ኦንዻ ሃእባጃኬን ዋይሼ እንግን እያይ።³ከኦይን ጴጥሮሴ ውርካ ዻይኔን ኑዋዌ ቱሌ ፓያ ሃምካ ሌሱጝ።⁴እንግን ዻዋን ጋኔን ጉኬን፤ ውርካ ዻይኔን ኑዋ እኑጝ ሌም ጴጥሮሴ ሄክሻ ሃምካ ሌሱጝ።⁵ጌይ ኩፔ ቶይያጝ [ኣፓላ እን ጋሽክዬ ከጃፍካ ታልባጝ] ኣኔ ኦይኑጝ ጌያ፤ ዬ ካኒ ሁሉኬን ሃምካ ሌሱጝ።⁶ስምዖን ጴጥሮስ እን ኣኔን እሺ ዻዬኑጝ ሄክሼ ሁሉካ ሃምካ ሌሲዻ፤ እሺዻ ጌያ [ኣፓላ እን ጋሽክዬ ከጃፍካ ታልባጝ፤]⁷ፕርዻ ጌያ ጫርቄ እን ቁሪሼ ኦካ ሹቦካ ኢየሱሱጝ፤ ጫርቄ እንዻ ጌይኬ ኦካ [ከፋን] ዋናዬ ኣኔን ኦና ሻሜ ቁርጱጝ።⁸ከኦይን ውርካ ዻይኔን ና ሌሜ ሄክሽ ሃምካ ሌሱጝ ሁሉካ ቱዎጝ፤ ጌይዻዬ ኣምኒያ፤⁹ይንዻ ኢየሱስ ካናሹጜ ከኣርሼን ክያኑጝ ሃናንዳካጝ ካኒ ማሬኬ ወርቀት እባጄኑጝ።ኢየሱስ ጌዬና ኦካ ማሪያም እንካ መግደላዊ¹⁰ከኦይን ጩዋ ውራን ጊታይካ ዻይኔን ዋኬ ፓያ ሃምካ ቶኦ ጊዬዩጝ፤¹¹ዬ ማሪያም ዾር ኦይካ ሌሲ ሹኑኬ ኣኔን ኦቆሬን፤ ኣኔን ኦቆሬንዻዬ ሌሲ ቶዬን ጌያ ኩፍ።¹²ኦና ኣሩጝካ ኢየሱስ ኣኖጝ፤ ውርካ ኤርጎካ ኢየሱስ ዻ ጊታኬና ኪሚ ኣፓላ ፎልቼን ክየም ኡፍ ኦካ [ራስጌዬ] ኑዋ ኡፍ ኦካ [ግርጌዬ] ጌያ።¹³እንግንዻ ሺጝ፤ እን ኝያጝ የኦቆሪ ናንዳካ ኦዬ ጋንሼና።እሺዻ ሺጝ ቦዋ ታቺ እን ናኑጝ ጋጁጜ ኦንዻ ሃካና እባጅኬን።¹⁴ሃሳው እንዻዬ ሁቤንያጝ ኢየሱስ ዾር ኦይኔ ጌያ፤ ዬ ኣዬ ኢየሱሱጝ ካኒ እባጅኬን።¹⁵እሺዻ ዋይሼ እሺ እን ኝያጝ የኦቆር ናንዳካ ኦ? የዎሺ ኒንዻ? እሺዻ ዋሽኬ ውር እን ባኬን [ራቅካ ሻሪካ ኣሜኔ] ዋይሼ እሺ፤ «ታቹጝ ናኒዮ፤ ሃኦኬና ቦዋ እንያጝ፤ ባንዞ ቦዋ እንያጝ የኣጁጜ ኦኑጝ ሜይሼ ኣንባ።¹⁶ኢየሱስዻ ሺጝ፤ ማሪያም። እሺዻ ሁቤን ሃሚን ኔኒዬ ከቶካ ኣራማይክ ሺጝ፤ «ረቢኒ/ ሆኮል ኔኒዻ ሺጝ ውሩጝካ እርርሲኔን ዮ፤ እያጝ።¹⁷ኢየሱስዻ ካኒ ናንዳካጝ ማሬ ሃምካ ሹኔ ኩዬኑጝ፤ ዋይሼ እሺ ኦይ ኣን ዱሜን፤ ሳጊዻ ካም ሃምካ ጪኒጌን ናኒዬ ሺጝ ሃኩይያ ሃምካ ባባዬ ሃምካ ሹቡጊኔ፤ ሃምካ ኣምላክ ናኒዬ ሃምካ ኣምላክ ጉዩዬ ሺጛ እያይኔ ሜይሼ እንግንባ፤¹⁸ማሪያም እንካ መግደላዊዻ ኩን ሃምካ ውርካ ዻይኔኔ ሺጝ፤ ይንጌ ሃጌይያ ታቺ እን፤ እጝ እሺ ክያጄዻ ሜይሼያ እንግን።ኢየሱስ ጌዬና ኦካ ውር ጊታይካ ዻይኔኑጝ¹⁹ከሹ እን [ከሳምንትዻ] ከሹ እንካ ሌሜን ከቃይ፤ ውር ጊታይካ ዻይኔን ሪግሼን ውርካ ኣይሁዴ ሃጌ ሃፑኬ ፑጪዬ ጋኔባዬ፤ ኢየሱስ ኩኔ ዾራ ኦካ ጫቃን ጊዬይ፤ ዋይሼ እንግን ሹቃ ካኣይሼ እየው።²⁰ሺጝ እጜ ዹዋልሼያ እንግን ቡዋዌ ቆጩሬ፤ ውር ጊታይካ ዻይኔንዻ ከሹ እን ጌዬ ታቺ እኑጝ ካሎን ዋዝንዽያ።²¹ኢየሱስዻ ፕር እንቃ ዋይሼ እንግን ሹቃ ካኣይሼ እየው፤ ባባ ከእያይ ይዕሲዬ ኣኑጝ፤ ኣንዻ ሃይዕሲባ እየው።²²ሺጜ እንዻ ጩዋ፤ ሻምሼ እንግን [እፌ] ዋይሼ እንግን ቦባ [መንፈስ ቅዱስ]²³የዋይሺቴያ ሴሶካ ውር ካሺዺባያጝ፤ ዋይሼባ እየውዻ ሴሶ ጉዩ ካሺዺባ፤ ዬ የማረያ ሴሶ ጊዬይ ካሺዺባ ሺጜንያጝ፤ ዋይሼኬን እየው ካሺዺባ።ኢየሱስ ጌያና ኦካ ቶማስ²⁴ከሹ እን ከኦካ ውር ታጲላማን ኣይ ክየሙጝ፤ እን ሺጜ ዲዲሞስ ቶማስ፤ ከሹ እን ኢየሱስ ኩኖጝ ካኒ ኣኔኬን ከውር ጊታይካ ዻይኔን።²⁵ውርካ ዻይኔን ዶክዻ ሺጝ፤ «ይንጌ/ ሃጌያያ ታቺ እጝ ዬ እሺ ሺጝ፤ ሃማሪያ ማዳካ ቡዋ ጊታይ ፃጵዬ ከምስማር ጌዬንያጝ፤ ኦካ ባልካ ምስማርዻ ሃማሪያ ቡዋ ናኒ ሻምሼንያጝ፤ ሃማሪያ ቆጩር ኔኒ ክያንዻ ቡዋ ናኒ ዾቅሼንያጝ ሃኣምኒኬን።²⁶ከሹ ሎንካይዻ ጩዋ፤ ውር ጊታይካ ዻይኔን ጋኔን ቶኦ ቱዎጝ፤ ቶማስዻ ኣኔኬ እንግን፤ ሃጌ ሃፑክዻዬ ጊያ፤ ዬ ኢየሱስ ኩኔ ዾራ ኦካ ጫቃን ጊዬይ፤ ዋይሼ እንግን ሹቃ ካኣይሼ እየው፤²⁷ከኦይን ዋይሼ ቶማስ ቦሼ ቡዋ ኑኑ ዮጝ፤ ቶይባ ቡዋ ናኒዻ፤ ቲት ቡዋ ኑኑዻ ዾቅሼባ ኦካ ቆጩር ናኒ፤ ዋይሼ እሺ ኦይ ቃጋዽዬን ኣምኒባ።²⁸ቶማስዻ ሺጝ፤ ታቹጝ ናኒዮ፤ ኣምላክ ዮ።²⁹ኢየሱስዻ ዋይሼ እሺ፤ እን ናንዳካጝ የጌዬ ኣኑጝ የኣምኒያ፤ዬ ጊታይ ማር ጌዬኔ ኣምኒ ጋይ ጫንቃል።³⁰ኢየሱስዻ ኦካ ወርቀቱጝ እንቃ ኦሹቃ ጊታይ ማሬ ቶኬን ሻማ ከኦካ ማሪካ ውር ጊታይካ ዻይኔኑጝ፤³¹ኣይባዬ እሺ ኢየሱስ ክርስቶስ፤ ኣዬ ውዋካ ባሪዮጝ ካጋምኒዮጝ፤ ጋምኒዻዬ ከሮጝ ኔኒ ካጋኔ ዻቆጝ ቶኳ ይጝ።