¹Nhə a ɓəlep wupel nung Yesu laa Naan. ²Wudok mə yil nɗəgən sar Ishaya laa lep Naan hə," Gu naa, a lep Laa lep n-yaa war yi ngə ɗee war n-myap pee yi ngə. ³Ɗəgəl gurum fu yong pee nɗəgən gəgər, 'chin war Long gu lə, chin war afee gu lə zaghat!'⁴Yohana wul ni fu kən kən nɗəgən gəgər mən ni fu laa ɓəlep kə amnaan nun seer jeppee wubias. ⁵Nɗəgən gəyil Judiya gə gurum Urushalima dip nau mə muan də muup, mə lap amnaan fu muup nɗəgən kong Urdun, mə seers bii wubis a muop. ⁶Yohana dok myang a byat ndung mu chin a shi dyip kulmi, ɗee teng nar buaghat nbuən muup. Nyi dok sə afee a dagok dat gə muəhn n-gəgər nani.⁷Laa ɓəlep yen, "me məguwə nyin nwul ndangkong nə ndung nyi a wumaa kaa nə hə, a-kye də fu sam dughum shang koghop nkwak muup məu. ⁸An, a kən gurum shi am, ɗee ni yong gə kən gurum a shi Mərip wuret."⁹Dok a nɗəgən ɓit nani, Yesu tong n-Nazaret N-Galili mən Yohana Kən ni nkong Urdun. ¹⁰Ndung Yesu taakaa dat nɗəgən am hə mən kəbətəng ep, mən mərip wuret sam kaa muup kə bii la bəl hə. ¹¹Mən me mə ɗəgəl tong kəbətəng yen, "A gə a Laa ɗem anə, took nə piya yoon gə gəh."¹²Mən Mərip mang ni muan gəni nɗəgən gəghər. ¹³Ni nɗəgən gəghər nani bi yakgurum vəl ɗee war Shaitan nkam ni yi. Ni dok gəme gə lua wung muop, ɗee məwəng muop fu wap ni.¹⁴Ndangkong ndung mə yaa Yohana hə, Yesu wull dedat nɗəgən Galili fu laa ɓlepnaan, ¹⁵Ni fu yen, Perə kang, ɓit laa Naan ni duk nsar, mə nit bii wubias, mə muən naduk nɓəlep Naan."¹⁶Ndung langɗok fu bəchep kong Galili hə, mə kat Siman, gə Andarawus emnəgən Siman, muop fu fuwər, dok muop wu yak chirep muop. ¹⁷Yesu laa də muop yen, "Wak gu ja də nə, a bat gun gu wak a wupin kwat gurum muop n-an." ¹⁸Bər dat mən mə nyit yak chirep a muop, mən mə muan gədə muup.¹⁹Yesu gə muan dat ntagham, mən naa Yakub laa Zebedi gə Yohana emnəgən muup muop fu myap bii yak chirep a muop. ²⁰Yong muop mən mə nyit nda muop Zebedi nɗəgən chii gə wu pian ɓlang afee, mən mə muan gədə muup.²¹Mən mə ruwə nɗəgən Caparnaum npa ɓit nyak Sabbat, Yesu muan nɗəgən pee wapNaan ni fu shepee. ²²Mən shepee afe nani wa bii wufuwə fu muop, nsa ni fu shepee nani kat kə bii a mugwə ndung ni a wumaa hə, a kəbi wu biran hə məu.²³Mən me məgwə nɗəgən pee wap a muop ni gə chilem wubis pyan wal ²⁴yen, "Ɗee, mə chin a me gə gəh he, Yesu la Nazaret? Gə wul a də gə tuə mən ya? A man gə, gə a wusaar nung Naan!" Mən ²⁵Yesu əp gədə damuam muop nani yen, "ləngkit, fat nɗəgən muup gu nyit ni!" ²⁶Mən mərip wubis vəling tak ni nyil mən mə pət nyit ni, ni fu lang ɗəgəl ɓəɓal.²⁷Wa a bii wufuwə fu gurum muop dip, mən mə nang fu shak, "Ɗee a bii me shing he? A shepee wu maa eh? Bən chen mərip wubias muop, mən mə sam gə kaa muop ntagham muup!" ²⁸Mən ɓəlep kaa muup tak yal gəyil Galili dipɓit.²⁹Ndangkong mə fat lat nɗəgən lə shepee, mən mə ja lə Siman gə Andarawus, gəme gə Yakub ɗee Yohana. Nnəgən npee nhə, ³⁰Nəghan Mad Siman dok teer ɗok a wugok, mən mə laa də. ³¹Mən wul, yaa sar muup, mən ep ni kətəng, mən lat, yaghal muan dedat gədə muop, ni fu wap muop.³²Gə kangsəgən nani, ndung fuus rə hə, mən lang jaa gə wu gok muop, gə muop ndung muop gə damuam hə. ³³Gurum pee nani muop mə jaa dip dyam fulə. ³⁴Yesu bar gurum gwet gə gok muop gəjing-gəjing bən taghat məwəng meet, mən nyit məwəng muop nani mə laa ɓəlep məu nsa mə man ni gwe nau.³⁵Yaghal mok mok gəɓit, wa pee saan duk məu, mən yaghal muan gə sok kaa shik məpee fu ɗangnaan yi. ³⁶Siman gə gəvung gurum ndung muop gəme hə, ³⁷mə tang ni muan mə kat ni mən mə yen, "Gurum dipɓit fu tang gə."³⁸Mən laa yen, "Nin ɗaghat mə muan nme məpee ɗik, ɗee war mə laa ɓəlep naan yi nnəgən zak. A nyi a bii wusaa a pət yi gəɓang." ³⁹Nɗəgən Galili dip, muan ni fu laa lep Naan, mə n ni fu fat gə damuam muop.⁴⁰Me mə wu loghom wul də muup. Ɗang ni, sam dughum mən laa də muup yen, "Ɗin gə dem bə ɗin gə muən kagham n-an." ⁴¹Naa chighir kaa muup mən Yesu shang sar muup mən bəm ni, yen, "A chin.Kat kagham!" ⁴²Bər dat nnəghən mən Loghom nyit ni, mən kat kagham.⁴³Yesu byang ɓlep wagap də muup mən yen gwa waa, ⁴⁴Mən laa yen, "Nayong gə laa də məgwə, mwaan mwaan gə nyin kaa kaa sak ndaawang, mən gə pən bii nsar wudok Musa laa den hə nmuop."⁴⁵Muan mən oghot fu muup kə ɓəlep ndung Yesu laa də muup hə məu, muan gə kwap yi laa də gurum muop, ndung Yesu baa kutni gə pət gənaar gurum muop hə zak məu. Ɗee tətong dat səsok, ɗee gurum muop pee məmeet, lat mə jəjaa dat kat ni npee nani.

¹Ndangkong ɓit vəl, ndung wawul n-Capernaum lə, mən mə kələng mə yen ni gəpang. ²Mən gurum gwet mə muan lat nnəgən ba pee ɗem ɗen shi məu, mən bəm ɓəlep gə muop.³Pak Daas muop mə wul gə me məgwə ndung swopshik muup muut hə, gurum a feer mə mang ni. ⁴Mən mə kat yong ruwə nnəgən gə kwət gə weel də wul duk duk, mən mə shang dap kələ, npee ndung Yesu ni nnəgən hə. Mən ndung mə gap pee kələ nani hə, mən mə sam gə wukut nani nkaa fung kələ ka kəram.⁵Yesu naa muən naduk ndung muop gə ni hə, Mən laa də wu shik ween nani yen, "Laa, bii wubis agə, a mang gwe a baa gə ni." ⁶Mən pak mə pian bii yil muop mə ɗiam ɗok nnəgən, mən muop fu ɗyee, ⁷anang Dagwə nhə fu laa ɓəlep kam he? Ɓlep nhə a damsəm naan! A wuɗang gə vang bii wubis eh? Niang kwət a Naan dat eh?"⁸Ɗaghat dat mən Yesu man nɗəgən mərip muup, bii ndung muop fu ɗyee nɗəgən muop hə. Mən laa də muop yen, "Anang gun fu ɗiye kamn nbuzung gu eh? ⁹A menang ɓess laa də wu shik ween na ni he? Hai, 'Mə vang bii wubis a gə ah' a yen, 'Yaghal gətəng, gəmang karam agə gə muan muan eh'?¹⁰A də ɗewar gu man La gurum ni gə maa yi gəyil də nbang bii wubis yi" mən laa də wu shik ween, ¹¹"A laa gə gə, yaghal gətəng, mang kəram a gə, mən gə waa ləgə." ¹²Mən Wushik ween nani yaghal kəshii muup, mən mang kəram teer ani, muan muan ntagham gurum muop dip, ɗee a bi took piya mən mə saam səm Naan, mə yen, "Jet mə bii kamhə me."¹³Chin pət gə bang fu bəchep kong, mən gurum muop dip mə muan də muup, mən shee muop. ¹⁴Ndung ni nɗel hə, mən naa Levi laa Alfewus tong ɗok gə pee tong mə lap gəndung, mən laa də muup yen, "Lang gədə nə." Mən yaghal muan gədə muup.¹⁵Yesu dok tongɗok fu sə lə Levi, mən wulap gəndung muop and wu chan bii wubias muop fu sə gə Yesu nau gə Jepmuan afee muop, nsa muop dok gwet, mən mə ləng gədə muup. ¹⁶Ndung wubiran muop, ndung a Farisawa muop hə, mə naa Yesu fu sə gə wu pian chyan bii wubis muop, gə, wulap gəndung muop, mən mə laa də Jepmuan afee muop mə yen, Ɗee anang Ni fu sə gə gurum muop he?'¹⁷Wu Yesu kələng muop kam hə mən laa də muop yen, "Gurum ndung muop gə kagham shishik hə, gə mə tang wu ɗak məu, A wugok muop gə mə tang wuɗak. A wul a də gurum wu chan bii wuret məu, a wul a də wuchan bii wubis muop."¹⁸Jepgədə gə də Yohana muop gə Farisawa muop dok fu sənfu. Mən pak gurum ja mə laa yen, "A nang Jepgədə Yohana gə nung Farisawa muop fu sənfu, ɗee Jepgədə gə muop shi fu məu eh?" ¹⁹Yesu lap fu muop yen, "Ɗee muop ndung mə ja də bughat ɗik gə mə sənfu a wa me, mən Namuar ni nnəgən muop eh? Ɗin mə kwət a gəme gə Namwar bə baa mə sənfu zak məu.²⁰Ɓit ni nwul ndung gə mə mang Namwar nbaa gəni fu muop hə, ɓit nani, yong gə mə sənfu. ²¹Məgwə gə taan byat wufuwə nlə ka byat wusəgar ah, baghal bə bii ɓərəm wufuwə ɗee, ɗee wusəgər yillang, ɓə bii yallang nani gə bis ndoghol.²²Məgwə gə ɗək am laatəng wufuwə nɗəgən Dəpan wusəgər ah, nyang məu bə pyan Dəpan nani bə nau vəl yong mə lat baan. Nsa akamn, ɗək amlaatəng wufuwə nɗəgən Dəpan wufuwə."²³Paa ɓit Sabbat mən Yesu muan gənung mar pak əksə, mən Jepgədə muup muop mə ɓəm chak paksə. ²⁴Mən Farisawa muop mə laa də muup mə yen, "Gə naa, anang muop fu chin bii ndung ni nyit məu nɓit Sabbat eh?"²⁵Mən lap fu muop yen, "Jet gu naa nbiiran Dauda ndung dok ni fu tang bii gə ndung ɓlak yaa ni he- ni gə Daas muop ndung dok muop gə ni hə? ²⁶Dok muan nɗəgən Lə wap mən Abiyata dok ani a Ndawang wuyoon, mən sə Nawe ndung ni ka war hə məu, duk gurum ndung sə hə, nyang a Ndawang wuyoon muop məu, bən muən ngurum muop ndung muop gəme gəni he?"²⁷Yesu yen, "Sabbat dok mə chin ni adə gurum ah, dok mə chin a gurum də Sabbat eh? ²⁸Gə kam hə, La gurum ani a ndaLong, nka Sabbat nau."

¹Yesu bən yaghal nɗəgən lə wap mən kat me məgwə a wusarween. ²Pak gurum ɗyam zhing mə mə lang yit muop naa ni nkwət yong gə pən kagham nyi nɓit Sabbat oh, ɗewar mə kat bii tuang yi kaa muup.³Yesu laa ɓlep də daguwə wusarween nani yen, "Yaghal gə dar npee hə gənaar gurum hə ɗee mənaa gə yi." ⁴Mən laa də gurum muop yen, "Ɗee nɓit Sabbat ɓə ɗong ɗin gurum nchin a bii wuret ha, a wubis ɗong he, mə tə gurum ah, mə bəbar ni eh?" Mən pee kit.⁵Mən naa pee yaa bat muop gə ni nɗəgən dəfil, bii nani laa shi muup nsa ɓətchan a muop, mən laa dagwa nani yen, "Shang sar gə." Mən shang sar muup mən Yesu lat gok sar nani, sar muup waa tong gəret. ⁶Dat waghab nnəghən Farisiyawa mə fat ɓəm tang war də kat ni də tə muop gə Herodiyawa muop.⁷Mən Yesu mə sam yaa nkong muəp gə Jepgədə muup muop, mən nagət gurum mə pət nɗəgən Galili gə Judiya ⁸ɗee Urushalima, yaa gə Idumiya ɗee muan gə ɗel Urdun, gə Taya ɗee Sidon, a gət gurum dat mən gə lat me, ndung mə kələng bii wu ni fu chin hə, mə jaa dipɓit də muup.⁹Mən laa də Jepgədə muup muop mə chin la chii wuchom ɗen dəduk nsa gurum mə fyer ɗem məu, yong mə gam kaa muup ndoghol. ¹⁰Ni dok pən kagham ngurum gwet, ani gurum ndung muop gə weel mə ja yi ɗewar Ni ɓuam muop yi.¹¹Pee ndung mərip wubis naa ni ɓa fatɗək nyil ntagham muup mə yen, "Gə a Laa Naan." ¹²Ɓyang waghat pən muop nayong mə saa gurum mə man ni.¹³Kaa lat ya kapang mən yong gurum muop ndung ɗem ɗin kat muop hə kaa mə kat ni. ¹⁴Mən fas gurum sarkavəl (ndung yong muop a Jeplep hə), ɗee war mə kwət gəme gəni də lep muan laa ɓlep Naan, nau ¹⁵gə kat maa də chen damuam muop yi. ¹⁶Mən fas wusarkavəl muop nani: Siman, ndung muən sam a Bitrus hə,¹⁷Yakub laa Zebedi, gə Yohana emnəgən Yakub, ndung pən səm muop a Boanagis, ndung a Jep naantəng hə, ¹⁸gə Andarawus, de Filibus, ɗe Batalomi, ɗee Matiyu, ɗee Toma, de Yakub la Alfewus, ɗee Tadewu, ɗee Siman ndung a Zealot hə, ¹⁹ɗee Yahuza Iskariyoti ndung yong gə pən ni Yesu hə.²⁰Mən waa gəpang, mən gurum mə bən chin təl kə shak, nayong mə bən sə nawee. ²¹Məmya muup mə kələng kam hə, mən mə muan ɗewar mə yaa ni yi mə baa gəni, mə yen, "Məbii chin chin ni." ²²Wubiran muop ndung mə tuaghat n-Urushalima wul hə mə yen, "Beelzabul yaa ni," gə, "Ni fu fat gə damuam muop a gə kagham long damuam muop."²³Yesu yon muop mə wakja də muup mən laa ɓəlep nɗəgən kwaan yen, "Anang lat bə Shaitan chen Shaitan ye? ²⁴Ɗin yillong mə fat nɗyam də shak bə yillong nani yong gə dar me. ²⁵Ɗin ɗəgən lə n-pyan vəl bə lə nani gə ɗar gəret məu.²⁶Ɗin Shaitan npət nɗar nyit shik muup, mə gap ɗəgənshik bə ɗar məu, ɓə mə naa dang muup. ²⁷Məgwə gə ɓoot fu rə lə məgwə wubal də mang wat məbii, nyang yaa a wuɓal lə nani nɓwaghat nɗəng məu bə ɓoot fu chin mə bii nlə nani məu.²⁸A laa a naduk gə gun, dip bii wubias ndung gurum mə chin hə yong a vang a baa gəni, nau gə ɓlep wu waar ndung pət nfu muop hə, ²⁹dip gurum ndung laa ɓlep wuwaar kaa Mərip Wuret, bii wubis afee yong gə kat vang məu, bii wubis nani anung lat məu." ³⁰Yesu laa kam hə a nsa mə yen, "Ni gə mərip wubaan."³¹Mən Nəgən muup muop gə məjep emnəgən muup mə ja dyam gəɓang. Mə lep yong ni. ³²Gurum mə yaa ni meer, mən mə laa də muup mə yen, "Nəgən wu laa gə, gə mə emnang muop gəɓang fu tang gə."³³Mən lap yen, "A wuɗang muop a Nəgən nə gə məjep emna muop eh?" ³⁴Tepyit muup naa pee fu tong, yaa bat mən yen, "Nhə a muop a Nəgən nə mə jepemnaa muop! ³⁵Gurum ndung chin bii ndung Naan ɗem ah, ani a emnaa, gə Naa."

¹Nɗəgən kamhə, mən bəm shepe fu chep kong. Gurum mə lang nja gər, mən yaghal rə tong nɗəgən chii. Gurum dip mə ɗyam ɗok fu chep kong. ²Mang muop bii shee nɗəgən kwaan, mən laa də muop nɗəgən shepee nani yen,³"Bə gu ləng lə ləng, wu mar muan tang əksə. ⁴Ndung kop sə nani hə, pak wat ɗok kə war, mən yer mə sam, sam mə sə dip. ⁵Pak əksə nani wat ɗək kə gwak-pang npe ndung kat yil-wuleen gwet məu. Əksə pət bər, nsa rə n-yil gəret məu.⁶Ndung fuus kaa dat hə, mən mə fya nsa seen muop ruwə n-yil kər məu. ⁷Pak əksə mə watɗək nɗəgən təng nəkyen. Ndung təng Nəkyen mə kaa lat hə, mən Nəkyen myang sə nani muop mən mə myal məu, mən əksə wən.⁸Goghot əksə mə watɗək kaa yil wuret, mən myal, mə fyar gə əksə, ɗee pak myal warə ya gurum gəme gə fu sar, ɗee pak mə wakruwə ya gurum-kun, ɗee pak mə a ɗaa." ⁹Mən laa yen, "Gə dəgwə gə kwət gə kom, bə ni kələng!"¹⁰Ndung Yesu ni nmeshik hə, gurum ndung dok muop gəme gəni, ɗee wusarkavəl muop mə nang ɓəlep ndung ni laa n-kwaan hə. ¹¹Mən laa də muop yen, "Mə muən a Bi-gəsok yil-long Naan ngun, də mə gəbang muop bə a Kwaan, ¹²ɗeewar mə ləngyit muop, mə ləngyit muop, bə mə naa məu, yong baa mə ləng kom muop, əə mə mə ləngkom muop, bə mə man kəkang məu, ɓaghal bə mə bəbat fu tuaghat a muop ɓə she Naan ya naa kaa muop."¹³Laa də muop yen, "Gu man gəkang kwaan nani mo? Chin anənang gu man gəkang gəvap kwaan muop eh? ¹⁴Wupin kop sə, kop ɓəlep. ¹⁵Pak a ndung fatɗək kə war hə, n-pee ndung kop ɓəlep hə. Ndung mə kələng ɓəlep nani. Shaitan waa ji kok ɓəlep ndung mə kop nɗəgən muop hə.¹⁶Pak a ndung mə kop kə gwaghap pang hə, ndung mə kələng ɓəlep nani dat mən, mə lap gə took piya. ¹⁷Mən muop gə seen nɗəgən shik muop məu. Mən mə moghor lani dat lee. Ndung Kong chuk weal mə tak gə muutlaa, mən wuɗək kə ɓəlep hə bən dat mə pələp.¹⁸Gət gurum muop ndung mə tang nɗəgən nəkyen hə. A muop ndung me kələng ɓəlep. ¹⁹Mən chak jep ɓəlep gəyil, gə fuən pe, bii tong ə enɗiye goghot ruwə nɗəgən ja mə ɓyang ɓəlep mən ba la wuret me. ²⁰Muop ndung dok mə kop kə yil wuret hə, a muop ndung mə kələng ɓəlep, mən mə lap hə, mən mə lap laa, yaa gurum kə fu sar, gə pak yagurum kun gə pak maa kamhə."²¹Yesu laa gə muop yen, "Ɗee lat bə gu ja gə Tilngong nɗəgən lə, bə gu mang tughushi gu səp a kaa ha, gu ɗen a bədə Gəɓin he? Yong gu lang Tilngong na ni a kə pee bə lang afee. ²²Mə bii a wu səsok ndung yong gə mə man məu ha, bii ndung a wusəsok hə yong gə pət n-pee wusaan, gurum mə man yi. ²³Məgwə n-kwət gə kom kələng, bə ni kələng!"²⁴Mən laa də muop yen, "Ləng kom gu gu kələng ɓəlep yi, Ɗaa ndung gu kat bii kat nnəgən hə yong mə kat ani ngun, gə mə bən ɗək ndee a kaa. ²⁵Nsa a kamn, duk gurum ndung ni gəni hə, yong mə ɗək ndee akaa nyi, gurum ndung nyi gəni məu hə, yong mə yaa nlap fu muup, dip gəbii ndung ni gəni."²⁶Mən laa yen, "Yil-Long Naan ni a gəbi gurum ndung kop chirem bii nyil hə. ²⁷Waa də lə mən daar yaghal mən kat chirem sə nani pət ba yaghal myal, wupin bii man kwət taa anənagho məu. ²⁸Yil bi ɓee chirem sə gə kashik muup: gəfoghop bi yaawar, mən kom gədə man wu-ək sə pət dedat nɗəgən kom nani. ²⁹Ɗin wu-ək sə nani nnung ɓə wupin ni gə mang a Jem dat bər nsa, tar dyip sə lang."³⁰Mən bən yen, "Mə mang Yil-Long Naan mə kam a gə bii me, ɗee mə gap kwaan a gə bime mə laa gəkang ye? ³¹Nyi a kə bie la təng Yisti hə, ndung ni lani dat gənaar mənye muop, ³²Ɗin mə kop ni nyil bə yong nyaghal fyer lat bə maa goghot təng muop in ɗəgən mənye muop, sar təng nani bii nan ma mənye muop dip, ɗee war yer kəbətəng muop sam mə ləng lə muop yi ntəng nani."³³Nɗəgən kwaan gwet kat gə bi ndunghə, laa ɓəlep Naan də nmuop, ndung waarə npee ndung ɓəlep nani saan ka muop hə, ³⁴mən baa laa nde ɓəlep zak nyang nkwət a n-kwaan məu. Ɗin nkwət a ni dat, bə ran dang ɓəlep nani muən də n-Jepgədə muop dip.³⁵Pa dee, ndung kangsəgən chin, mən laa də muop yen, "Nin ɗagat mə ɗək məkaa gəɓətyit ndee yi." ³⁶Mən mə yighil gə Yesu nit gəvung gurum muop, ɗin ni gwe nɗəgən Chii. Pak Chii muop dok muop nnəghən. ³⁷Mən me mə Koghom gə vəvit yaghal ndung ba watɗək nɗəgən Chii ba ɗəgən Chii nani gam yi.³⁸Mən Yesu dok ni n-saam n ɗəgən memə pee fu teer. Mən mə mii ni, mə yen, "Wushepee, mən də dəm bə weel gə zak ha?" ³⁹Ndung gə yaghal nsaam hə, mən laa bəlep də Koghom gə Chip yen, "Pee lang kit" mən Koghom nani lang, mən pee klok, məbii dung zak məu.⁴⁰Mən laa də muop yen, "Gu luaghat a luaghat me? Ɗee muən naduk a gu ni ane?" ⁴¹Luaghat tə muop a til məu, mən mə laa də shak, "Dee daguwə nhə a wuɗang hə, nsa Koghom gə dəvit, gə Chip muop mə lap leen ntagham muup nau ha?

¹Mə ɗək Kong ɗək kaa gəɓət yit nde gəpee Garisin. ²Mən nnəghən dat ndung Yesu gə pət dat nɗəghən Chii hə, mən me mə daguwə ndung ni gə mərip wubis hə wul də muup, tong a n-gəcheer muup.³Daguwə nani bii tong ɗok a Kəcheer. Məguwə ɓoot fu yaa ni məu, ɗin mə ɗyin ni shi shaghal ɓə ɗem məu. ⁴Dok mə ɗyan ni shi shaghal nkwak gə sar nshii nɓəl, mən kwap muop dip kuləp hə. Məguwə kat kagham də nyaa ni məu nsa kagham ɗam məu.⁵Tong ɗok Kəcheer gə Kapan nani gəɓit gə kangsəgən gə ləpar, bii lat bə zwam ɗəgəl muup, ba kwap shik muup shi pang wu-aghas muop. ⁶Ndung naa Yesu nsəng, mən yak muan gə sam dughum ntagham muup.⁷Wal gə ɗəghəl muup laa yen, "A chin ame gə gəhe, Yesu Laa Naan wu maa? A ɗang gə gə Naan gə kaa shik, gə muən noghol n-an məu." ⁸Nsa dok bii ni fu laa də muup yen, "Gə mərip wubis, pət nɗəgən daguwə nhə."⁹Mən nang fu muup yen, "Səm gə a wuɗang he?" Mən lap fu muup yen, "Səm nə a Gak, nsa mən gak." ¹⁰Ɗang ni sar nɓəl ɗin ni nchen dun nɗəgən Gak nani hə məu.¹¹Mən nagət Toghos Kəgər mə ɗyamɗok fu sə n-bədə pang fu sə, ¹²mən mə ɗang ni, muop fu yen, "Pət gə mən mə yaa nɗəgən Toghos Kəgər muop, mə ruwə yi nɗəgən muop yi." ¹³Mən nyit muop, mərip wubis mə fat ruwə nɗəgən Toghos, mən mə suwə sam kə pang nani ruwə nɗəgən Am, muop dok mə wak ruwə Kam vəl Am wuyoon nani kok muop yi.¹⁴Mən muop ndung dok muop fu sə gə Toghos Kəgər ha, mə suwə man gə laa nɗəgən pee wuyoon gəyil nani. Mən gurum gwet fat də muan mə maa bii wu taa hə yi. ¹⁵Mən jaa də Yesu mən mə kat Daguwə nani ndung dok ni gə Mərip wubis hə, tong ɗok, ɓyang lee wuret, kaa muup ni nyit dat, mən luaghat tuə muop gə bii ndung taa nani hə.¹⁶Gurum ndung mə naa bii ndung taa gə dagwə ndung dok a wupin mərip wubis nani hə mə tərang dəng ɓəlep nani pən də n-muop, nau gə ɓəlep Toghos kəgər muop hə. ¹⁷Mən mə ɓəm ɗang ni, ni nyit pee gəyil a du.¹⁸Ndung ni də rə nɗəgən Chii hə, mən dagwə wudok ni gə mərip wubis nani ɗang ni ɗewar n-muan gədə muup yi. ¹⁹Mən nyang laa də muup yen, "Waa də məgurum a gə muop, gə laa gə muop bii ndung Nda Long chin də gə hə, gə ndung naa chighir kaa gə hə." ²⁰Mən waa, muan ɗok gə laa bii wu-nan ndung Yesu chin də muup hə gə Dikapolis, mən wa bii wufuwə də dip gəsəm muop.²¹Ndung Yesu gap ɗel kə ɓəyit ndee hə, nɗəgən Chii, Mən nagət gurum muop mə yaa ni meer, nnəgən eskoghop kong. ²²Mən gəme nɗəgən wunan laa wap muop, səm muup a Jairus wul, mən lat mən naa ni dat mən pal teer ntagham muup. ²³Ɗang ni sar n-ɓəl, yen, "La larep nə ni də muut. A ɗang gə, ji gə lang sar gə kaa muup ɗewar ni kat kagham gə bar yi." ²⁴Mən yaghal gədə muup, mən nagət gurum mə muan gədə muup, mə ləng ɗok mərat gə ni fu muan.²⁵Mən me mə Namat dok ni nnəgən ndung təghəm fu sə ni warə yii sarshikavəl. ²⁶Swa noghol doghol kə sar mə ɗak muop gwet, bən tə sar muup waghap nyang məu ndung shaghal afee lat dip hə, məbii ɗee məu, mən gok nani a fu teghen dat muan ntagham. ²⁷Ndung kələng ɓəlep kaa Yesu. Mən wul gə naa ani, ndung ni nɗel n-ɗəgən gurum hə mən yaghal gə sar ɓəm təgo afee.²⁸Dok ni laa gwe yen, "Ɗin a ɓəm wa təgo afee dat, bə a kat kagham." ²⁹Ndung ɓəm ni dat hə, mən təghəm sə nani lang, mən shishik muup bat waghap nnəgən, kat kagham gə muutla.³⁰Nnəgən dat mən Yesu man kagham nit jin lani. Mən bat yit muup naa pee nɗəgən gurum muop mən nang fu muop yen, "A wuɗang ɓəm təgo ane?" ³¹Jepgədə afee mə lap yen, "Dee gət gurum muop nhə mə meer gə dat dip bə gə yen, 'Wuɗa ɓəm gə ya?'" ³²Mən Yesu naa pee fu tang gurum ndung chin bii nani yi.³³Namat nani, gə man afee gə bii ndung taa hə, mən lughut yaa ɗee ni afu ɗam dat. Mən pət ji pəttaa ntagham muup gə laa naduk yi dip pən də nni. ³⁴Mən laa də muup yen, "Reepnə, naduk ayi pən kagham nyi, waa dat chagap, gok ayi lat."³⁵Ndung ni fu ɓəlep hə, mən pak gurum n-wuyoon lə wap muop ja mə yen, "Lareep gə muut gwe. Anang gə weel Wushepee yi a kwang eh?"³⁶Ndung Yesu kələng bii ndung mə laa hə, mən laa də wuyoon ləwap muop yen, "Gu luaghat məu. Pən naduk dat." ³⁷Ɗem me məguwə gə shendə muup məu, ɗee a Bitrus, gə Yakubu, ɗee Yohana emnəgən Yakubu dat. ³⁸Mə ja ruwə lə wuyoon ləwap nani mən mə naa gurum mə langɗok, ɗee a gət eer dat gə ɗəghəl muop.³⁹Ndung Yesu rə nɗəgən lə hə, mən laa də muop yen, "Anang gu weel yi gun fu eer kam he? La laa nani muut məu, ni a n-saam dat." ⁴⁰Mən mə swar kaa muup, mən chen muop mə fat gəɓang dip, mən mang nda lalaa, gə nəghən lalaa, ɗee gurum muop ndung mə ja gəme hə ruwə nɗəgən lə ndung lalaa nani n-nəghən hə.⁴¹Mən yaa sar lareep nani mən laa də muup yen, "Tabita koom," ndung ani a, "La lareep, an fu laa dəyi, yaghal gətəng." ⁴²Bərdat mən larep yaghal muan muan (Dok yii afee a sar shi kavəl). Mən waa abii lughut pee fu muop. ⁴³Mən ɓyang waghap muən muop, nayong məguwə n-kələng bii nani hə. Mən laa də muop mə pən sə nni sə.

¹Ndung pət nnəgən hə mən wawul dedat gəyil lə muop, mən Jepgədə muup muop. ²Ndung Sabbat warə hə, mən sheshepee nɗəgən ləwap. Gurum gwet mə kələng ni mən tong a bii wufuwə də muop. Mən mə yen "Ɗee ba, kat bii shee nhə ane?' "Ɗee endiye wuret ndung ni gəni nhə, a wuɗang pən n-nye?" "Dee bii maa yoon nhə ndung chin gə sar muup nhə?" ³"Nhə a Kafinta moo, a laa Maryamu ɗee emnəgən Yakubu muop gə Yosis ɗee Yahuza gə Siman moo? Mə Jepemnəgən muup muop gəme gə mən moo?" Mən Yesu dam took muop.⁴Mən Yesu laa gə muop yen, "Lalepnaan gə mə naa yoon afee lə muup, gə məmya muup muop, gə lə muup me." ⁵Dok ɓwət fu chin məbii məu, ɗee a ləng sar dat nkaa pak wugok muop dat mə kat kagham yi. ⁶Nyang pən naduk a muop tong bii wufuwə fu muup. Mən muan nghan lə muop fu she shepee n-nəgən.⁷Mən yong Jepgədə muup muop wusarkaval, lep muop vəl vəl mən muən maa n-muop kə mərip wubis muop, ⁸mən laa də muop mə mang məbii də muan nani məu, muop gə mə mang a ras dat, mə mang nawee, gə lau, gə shaghal n-ɗəgən, ⁹muop mə ɓyang Koghop, naa yong mə kok təgo vəl məu.¹⁰Mən laa də muop yen, "Ɗin gu ruwə lə məgwə, ɓə gu tuaghat n-nəgən nayong gu muan n-meməpee. ¹¹Ɗin me mə gəyil məgurum muop mə nyang lap gun, mə nyang kələng gun məu bə, gu nyit pee nani, gu ɓwat yil kwak, tong a tuamshik gəfu muop."¹²Mə fat gəɓang mən mə shakɓəlep də gurum muop ɗin mə nyit bii wubis a muop hə. ¹³Mə taghat damuam muop, mə ɗak wugok muop gwet gə muər wuret, mə mə kagham.¹⁴Long Hiridus kələng lat mə yen Səm Yesu waa abii wu maayoon, ndung pak gurum muop fu yen, "Yohana wupin Amnaan yaghal nfu muut nsa səm nani nhə, nsa kamhə kagham maa lang ɗok gədə muup." ¹⁵Pak gurum mə yen, "Ni a Iliya." N-nəgən pak mə yen, "Ni a Lalepnaan kat gə bii a ndee nɗəgən jeplepnaan ndung dok gwe n mok hə."¹⁶Ndung Hiridus kələng kamhə mən yen, "Yohana, ndung dok a gap kaa muup hə, nyaghal." ¹⁷Nsa Hiridus lep mə yaa Yohana ɓal n-lə ɓal nsa Hiridiyas (Mad emnəgən muup Filibus), nsa dok lap ni.¹⁸Yohana dok laa də Hiridus yen, "Lap mat emnang ni kə war məu." ¹⁹Mən Hiridus yaa ni n-ɓət mən ɗem ɗin tə ni, mən ɓoot məu, ²⁰nsa Hiridus yaghal lughut Yohana, nsa man ni a gurum wukər bən a gurum wuret, mən ɗen ni n-pee ndung məbii gə chin ni hə məu.Ntong n-kələng ni bə dafil yaa ni, bən tong kələng ni gə took piya.²¹Mən me məɓit mən war ep kang gə ɓit laa Hiridus, mən yong yong pee də biisə də wuɓəlang afee muop, gə mənan ɓəlang afee n-nung Galili. ²²Reep Hiridiya wul gə kaa shik ji met gya n-tagham muop, mən piya took Hiridus gə wumoos afee muop. Mən Long laa də larep yen, "Nang bii ndung took yi ɗem hə, bə a tang a pən nyi."²³Mən səgər fumuup yen, "Dip bii ndung yi tang hə, bə a pən nyi, ɗin n-wa nrə a goghot yillong a nə, bə a pən nyi." ²⁴Mwaan gə nang fu Nəgən muup yen, "Ɗee anang a me fu muup eh?" Mən Nəgən muup yen, "Kaa Yohana wupin muət amnaan." ²⁵Mən yak mwaan də Long mən yen, "A ɗem ɗin gə ɗen a Kaa Yohana wupin muən amnaan hə an gəɗes hə."²⁶Took long dam, mən a nsa fu muup ndung səgər hə ɗee wumoos afee muop hə, mən yong gə baa gə dangkong muup zak məu. ²⁷Mən long lep memə Soja kə fu lətap afee yen, gwa ji gə kaa Yohana. Lalep nani mwaan gə gap kaa Yohana nɗəgən ləɓal. ²⁸Wawul gə kaa muup nani nɗagən ɗaa mən muən n-Larep, mən Lareep pən n-Nəgən muup. ²⁹Ndung Jepgədə muup mə kələng kamhə, mən ja mə mang swopshik muup mwaan mə wum.³⁰Jeplep mə tuaghat ɗok shi ɓət Yesu, mən mə laa də muup bii ndung du chin hə, gə shepee ndung du chin hə. ³¹Mən laa də muop yen, "Wak gu ja n-meməpee wufii gu nyak yi til." Gurum dok mə lang n-wul, pak muop fu wak, ndung mə kat wa pee də sə sə məu. ³²Mən mə mwan tangpe nyak nani nɗəgən chii gə kaashi muop.³³Ndung muop n-yighil hə, gurum ndung mə tuaghat gəyil muop meet mə naa muop man, mən mə suwə gəme gə muop n-shii, mən mu mwan ruwə ɗee kaa muop. ³⁴Ndung mə kaa ruwə gəbət yitn-dee hə, mən naa nagət gurum mən naa chighir kaa muop, nsa muop a gəbii biikang ndung wukangni wən hə. Mən bəm shee muop gə jepbi gwet.³⁵Ndung pee ləng hə, mən Jepgədə muup mə ja də muup ja mə yen, "Ndung hə a pee wu səsok, bən fuus səngpe gwe. ³⁶Shak muop mə wak ɗewar muan n-pak pee muop yi də mə seet sə mə sə yi hə."³⁷Mən lap fu muop yen, "Muən meməbi n-muop mə sə." Mə laa də muup mə yen, "Mə muan dat mə seet sə nu Kam vəl mə muən muop mə sə ho?" ³⁸Mən lap yen, "Ɗee gun a gə Nawee ɗang he? Muan gu naa" Ndung mə naa lat hə, mən wakja mə yen, "Nawee a Paat, gə Chirep Vəl."³⁹Laa də gurum muop mə tuaghat tə tuaghat gəjing-gəjing n-yil. ⁴⁰Mə tuaghat gəjing gəjing, n-Daa gə yak-gurum vəl gə fu sar. ⁴¹Ndung lap Nawee paat gə Chirep vəl hə, məng yit lang gəpətəng mən lang wuret akaa mən gərəp ɗəgən mən pən n-Jepgədə muup muop mə muən n-gurum muop. Mən kwap ɗəgən Chirep vəl nani n-muop dipɓit.⁴²Muop dip mə sə sə n-fu wu yoon muop hə. ⁴³Mə kok pak gəvung Nawee nani Tughushi sarshikaa vəl gə chirep muop. ⁴⁴Gurum muop dok mə wak ruwə Kam paat ndung mə sə nawee nani hə.⁴⁵Nnəgən dat mən shak Jepgədə muup muop mə ruwə nɗəgən Chii mə yaa war n-ni kwap ɗiləng gə bətyitndee, də Betsaida, ɗewar ni shak gurum mə kwap yi. ⁴⁶Ndung mə wak lat hə, mən ni kaa pang də ɗangnaan. ⁴⁷Ndung kangsəgən chin hə, mən Chii wawul gənaar am, wa ni zak a ni dat n-meshik muup n-pee nani.⁴⁸Mən naa kat mə lap leen nsa koghom weel muop fu muan. Gəkang gəɓit mən wul də muop, lang ɗok kə am gə muan muan yi, ɗem ɗin ndel muop. ⁴⁹Ndung mə naa ni ha, mə diye mə kat a məwəng mən mə eer, ⁵⁰nsa mə naa ni mən luaghat twə muop. Mən bərdat mən laa ɓəlep də muop yen, "Chin tughur duan! A an! Gu luaghat məu!"⁵¹Mən rə nɗəgən chii gəme gə muop, mən koghom wuɗin ni fu ɓwap hə lang. Mən waa ɓəlep wufuwə fu muop. ⁵²Mə man nkwət Nawee nani nyin a me hə məu. A waa nBəzung muop ɓal də man.⁵³Ndung mə kwap ɗiləng hə, mə kaa kəɗəgər nɗəgən yil Gannasarit mən mə ɗyin Chii nani lə shi təng. ⁵⁴Ndung mə fat nɗəgən Chii hə, mən mə naa ni man. ⁵⁵Mən mə muan ɗok kə yil pee muop nani, mən mə ɓəm ja gə gurum wu gok muop kə karam, ɗin mə kələng mə yen ni nji.⁵⁶Ndung rə lat nɗəgən gəyil muop məmeet, gəjing gəjing bə mə ɗak wu gok muop kə lətuk, mən mə ɗang ni ɗin ni nɗem ɓə ninɗəghat muop mə ɓəm fuchep təgo afee. Muop ndung mə ɓwam ni mə kat kagham.

¹Farisawa muop gə pak wubiran muop ndung mə tuaghat nUrushalima ja ya ni meer.²Mən mə naa mə kat pak Jepgədə muup muop mə sə nawee gə sar wurap. ³(Nsa Farisiyawa ga gəvung Yahudawa muop bii mə sə sə nyang mə vang sar muop gəret məu, mə yaa ɓəlep daskagham a muop gəret. ⁴Ndung Farisawa mə tuaghat kələtuk ja hə, mə nyang sə sə nsa mə swaghat məu. Bitət muop gwet dat ndung mə yaa ni kəpkəp mə ləng gədə hə, kəbii vang Kop muop, Tughul muop, gə pak jeppee muop, nau gə war sə sə muop.⁵Farisawa muop gə wubiran muop mə nang fu Yesu yen, "Anang Jepgədə gə muop fu muan gədə biitət daskagham məu he, mə vang sar shee mə sə sə məu eh?"⁶Mən laa də muop yen, "Ishaya la lep kə ɓəlep kaa gu gun Mweng muop, la yen, 'Gurum muop nhə mə pən yoon a shi fu muop dat, ɗee bəzung muop səng pee gə an. ⁷Wappee a muop a wufii dat, mə yaa bii shee gə bii tət nung gurum dat waa a bii shee fu muop.'⁸Gu zwam bitət Naan mən gu ya a nung gurum ɓəɓal." ⁹Mən laa də muop yen, "Gu nyang gə Bitət Naan, ɗee gu ɗen a nəmuk dat! ¹⁰Musa dok laa yen, 'Gu muən maa n-mən ndaa gu muop gə mə naghan gu muop' bən yen, 'Dagwə ndung gə laa ɓəlep wubaan kaa wulaa ni, bə yong gə muut a leng waar.'¹¹Mən gu yen, 'Ɗin məguwə nlaa də nda muup oh, a nəgən muup bə, "Bii ndung ɗin yong a pən ngun də təpgun a wuwaar,'" (a ni a, 'mə muən nNaan') - ¹²bə baa gə ɗem ɓəlep məgwə chin məbi zak də nda muup gə nəgən muup zak məu. ¹³Gun a fu ya bitət nung Naan wa wubaan ɗee a bitət nəmuk dat gə pət nteer. Ɗee pak jepbi ndung muop a kat kəbi nani də chin hə."¹⁴Bən yong gurum n-ɓəl mən laa də muop yen, "Gu kələng ah, gun dip ɗewar gu mang kang yi. ¹⁵Məbi gə pət a gəɓang, n-rə nɗəgən ɓət gurm ani gə dam ni məu. A bii ndung tong n-ɗəgən muup ani gə dam ni." ¹⁶Dagwə ndung n-kwət gə kom hə bə n-ɗagat ni kələng.¹⁷Ndung Yesu nyit gurum muop mən taa nlə nani hə, mən Jepgədə muup mə nang kwaan ndung ni laa fu muup. ¹⁸Yesu lap yen, "Ɗee gun nhe, mankang wən gun nau ah? Gu man kan bii ndung tong gəɓang rə nɗəgən gurum gə dam ni məu, ¹⁹nsa gə rə nɗəgən bət muup məu, yong gə rə nɗəgən bət bə pət a nlə-es mo?" Gə bəlep ndung hə Yesu ya sə waa a wuret dat dip.²⁰La yen, "A bii ndung pət nɗəgən gurum hə ani gə dam ni. ²¹Nsa bi ndung nɗəgən gurum hə, a shi bəzung, pət a shi ɓəlep diye wubaan, bwaar chet, gə wat gə təgurum. ²²Dam gə surəp gurum, bichaa, bətchan, gə fuən pe, gə ɗoghor, gə dam səm, gə ɓagal, gə bii tuang, gə kaa bal gə chis pe. ²³Dip bii wubias muop hə tong a nɗəgən gurum, a muop gə mə dam gurum."²⁴Yaghal n-nəgən mən muan gəyil Taya gə Sidon. Wul nɗəgən me mə lə mən ɗem ɗin mugwə n-man ni n-nəgən məu, nau kamhə mən mə man. ²⁵Gə laa məu me mə namat wul gə reep muut ndung ni gə damuam ha, kələng mə yen Yesu ni nnəgən mən wul ji pal teer ntagham muup. ²⁶Namat nani ni a ɗəgəl Girik, peepət a fee a Ponishiya. Ɗang Yesu ɗin pət gə damuam muop nshik reep muup.²⁷Mən laa də muup yen, "Nit nɗagat Jep muop mə sə sə nɗang. Ɗong ɗin mə mang sə jepmuop mə pən ass muop məu." ²⁸Mən namat lap fu muup yen, "Əhh, Ndalong, Ass ndung muop gəpang bii mə sə sə jepmuop ndung ɗee hə."²⁹Mən laa də namat yen, "Nsa yi laa kamhə, bə yi waa dat. Damuam mə fat gwe shishik reep yi." ³⁰Ni gə waa dat waa reə gəpang mən kat lareep muup teer ɗok kə karam, damuam fə fat gwe.³¹Mən bənshin pət nnəgən gəyil Tyre, mən bat gəwar Sadama, fu kong Galili kaa yaa gəyil Decapolis. ³²Mən mə ja gə meməgwə ndung a wudwaghar hə, bən ɓoot fu laa ɓəlep məu, mə ɗang ni ɗewar ni lang sar nkaa muup yi.³³Mən mang ni yaghal gəni nɗəgən gurum muop n-səsok, mən ɓyang la sar nɗəgən kom muup, mən tə zeel lə nɗəgən mən ɓəm liis muup. ³⁴Mən epyit na kəpətəng, mən pəs nook mən laa yen, "Ifatta," kamhə a "Ep!" ³⁵Nnəgən dat mən kop muup ep, mən mə tə bii ndung dok dən ni shi ɓəlep hə, mən bəm laa ɓəlep dedat gərət.³⁶Laa də muop mə laa də məgwə məu. Bii nlaa də muop mə laa məu bə tong gəye ɓəlep nani bənchin muan npee wusəng. ³⁷Bii nani waa a ɓəlep wufuwə fu muop, mən mə yen, "Dagwa nani chin jepbi nau a wuret dat. Wuduaghar kələng pee, Wufuɓəm laa ɓəlep."

¹Shi wu dok nmok hə, dok nagət gurum muop nnəgən, mən sə wən də sə. Yesu yong Jepgədə muup muop mən laa də muop yen, ²"An fu naa chighir nkaa gurum muop nhə, nsa muop shiɓət nə gwe warə ɓit kun, mən mə kat məbii sə duk məu. ³Ɗin a chen muop mə wak zeet nyang a mə sə sə ɓə yong mə wat ndək kəwar. Pak muop mə tuaghat a npee səng." ⁴Jepgədə muup mə lap yen, "Ɗee yong mə kat Nawee nɗəgən pee kat gəbii nha də fu aghal gurum muop ah?"⁵Mən nang fu muop yen, "Gun gə Nawee nani a ɗang he?" Mən mə yen, "Poghovəl." ⁶Ni laa də gurum muop mə tuaghat nyil. Mang Nawee poghovəl nani, ɗangnaan mən gərəp ɗəgən. Pən nJepgədə muup muop mə muən ngurum muop, mən mə muən ngurum muop nani.⁷Muop dok bən gə la chirep, ndangkong ndung ɗangnaa hə, mən pən nJepgədə muup muop mə gap shizak. ⁸Gurum mə səsə nani aghal. Mən mə kok goghot sə nani tughushi wunan pokopvəl. ⁹Dok gurum mə wakruwə Kam Feer. Mən shak muop mə wak. ¹⁰Bərdat mən mə yighil gəme gə Jep gədə muup muop, mə muan nɗəgən gəyil Dalmanutha.¹¹Mən Farisiyawa muop mə fat mə ɓəm ɓəlep ɓaghal gə ni. Mən mə tang ɗin ni n-nyin meməbii kəbətəng n-muop, mə kamni kamhə. ¹²Yesu pəs nook nɗəgən mərip muup mən yen, "Ame saa gurum chini mə tang bi-ɗyeer ye? A laa a naduk gə gun, yong gə mə niin bi-dyeer n-ɓit na chini nhə məu." ¹³Mən yaghal rə nɗəgən chii mən taa kaa kəɓətyit ndee.¹⁴En Jepgədə muup muop muut ɗee kaa nawee. Nsa nawee nani dee a gəme dat nɗəgən chii. ¹⁵Kar muop yen, "Gu kang gə Yisti nung Farasiyawa gə nung Hiridus."¹⁶Jepgədə muop mə lap gəkang də shik muop mə yen, "A nsa mən gə nawee məu." ¹⁷Yesu dok man nau mən laa də muop yen, "A nang gun fu weel kə ndung gun gə nawee məu eh? Gu naa gəɗee duk moo? Gu man gəkang mo? Bəzung mə dwam a kam ha?¹⁸Gun gə yit, gu naa mo? Gun gə kom, gu kələng mo? Gun baa gu ɗiye mo? ¹⁹Ndung a gərəp ɗəgən nawee də gurum kam paat ha, tughushi dok a ɗang ndung gu kok ye?" Mən mə lap mə yen, "Salkavəl."²⁰"Ndung a gərəp ɗəgən nawee də gurum kam feer hə, tughushi dok a ɗang ndung gu kok he?" Mən mə yen, "Pokopvəl." ²¹Mən yen, "Gu man gəkang məu ha?"²²Mə wakja nBatsaida. Mən gurum nnəgən mə ja gə wuvughum mə ɗang Yesu də nɓəm ni yi. ²³Yesu ya wuvughum nani nsar muup, mən pət gəni nɗəgən pee nani. Ndung tə zeel lə nyit muup mən lang sar muup ka wuvughum nani, mən nang fu muup yen, "Yit gə naa məbii ah?"²⁴Naa pee gətəng, mən yen, "A naa gurum muop mə muan ɗok gə yen a təng muop." ²⁵Mən bən ləng sar muup kə əkyit muup, mən dagwə nani epyit muup, mən naa pee dip ɗəɗong. ²⁶Yesu lep muop mə muan gəyil lə muup mən yen, "Gu ruwə nɗəgən pee nani nhə məu."²⁷Yesu mə fat gə Jepgədə muup muop muan Caesarea Filippi. Muop kəwar mən nang fu Jepgədə muup muop, "Ɗee gurum bi məyen an a wuɗang he?" ²⁸Mə lap mə yen, "Yohana wupin Kən. Pak mə yen, 'Iliya,' mən gəvung mə yen, 'Gəme nɗəgən Jeplepnaan muop.'"²⁹Nang fu muop yen, "Ɗee gun fu yen, an a wuɗang he?" Bitrus lap la yen, "A gə a Kiristi." ³⁰Yesu kar muop nayong mə la də məgwə.³¹Mən ɓəm shee muop yen La Gurum yong gə ntəgərchin ka jepbi meet a leng waar, daskagam muop gə mənan ndawang muop gə wubiran muop yong mə nyang, mə bən tə ni, ndangkong ɓit kun bə yong gə yaghal. ³²Laa lep nani dar gə muop. Mən Bitrus yong ni kəjong mən nyang gəni.³³Mən Yesu bat naa Jepgədə muup muop mən nyang gə Bitrus yen, "Baa ndangkong nə Shaitan! Gə weel gə bi Naan məu, ɗee a bi gə gurum muop dat eh." ³⁴Mən yong nagət gurum muop gə Jepgədə muup muop npee gəme, mən yen, "Ɗin gə dagwə gə ɗem də muan gədənə, yong gə nyang kaa shik muup, nmang shepbeel afee, mən muan gədə nə.³⁵Gə dagwə ndung ɗem ɗin ɗen took lang afee bə yong gə kat məu, Gə dagwə ndung nyang tooklang afe nsa ɓəlep Naan gə an, bə yong gə kat. ³⁶Gurum gə kat a me nɗəgən gəyil he, kan kat gəyil nhə ɗee took lang afe wən eh? ³⁷Ɗee gurum yong gə bat tooklang afe a gə bimə he?³⁸Gə dagwə kaa gə nwaat gə ɓəlep anə gə an nɗəgən dampe gəyil nhə ɓə kaa Laa Gurum yong gə waat zak də muup Kan pa nwul nɗəgən yoon nnung Nda muup gə Məwəngwusaar afee muop.

¹Mən laa də muop, a naduk, pak gu mə diamdok npee nhə gə mə cham muut mou, mə naa yil long Naan gə maa Naan wu gə wul də yit muop hə. ²Gənook bit peme Yesu mang Bitrus gə Yakubu gə Yohana muop dat, mən mə kaa gə guaghap wufiyer. Nəgən gədə yit muop mən bad shikmuup. ³Lee shishik afee mən naɗəə a piya pat, wudung mugwo wu vang rap gəyil gə boot wu chin kam hə mou.⁴Mən Iliya gə Musa mə ɗin ka kaashak, muop pə laa ɓələp gə Yesu. ⁵Bitrus laa də Yesu "Wushepee, ɗong mən hə, bə mə chan kilip kun, gəmə nəmak, ndee anung Musa gə Iliya". ⁶Man bii wu gə laa məu, nsa lughat yak muəp.⁷Muəp nəgən mən Ligin sam kwə muəp mən me dəgəl pət gənaar Ligin, "Nhə a laa gəchin nə wu a ɗemni hə. Gu kələng ni." ⁸Muəp da nəgən, ba mə naapee, mə kat mugwo zak məu, wadee a Yesu dat.⁹Muəp pə waksam gə guaghap, mən kwaar muəp, bii wu mə naa hə, mə laa gə mə mugwə məu, dee bit wa laa gurum gə yagal ntugun gənok muut. ¹⁰Mən mə ogot fu muəp gə bələp nashak, mən mə laa də shak "ɗee yagal gənok muut," nashak ni pə nin a me?"¹¹Mə nang fu muup, a nsa me wuranpee mə yen Iliya ani gə wul a ɗel eeh? ¹²Mən laa yen, Iliya ni gə wul a deel də bən ap jepee muəp dip. A wame me yil mə yen Laa gurum yong gə naa mutlaa bən mə nyang yit muup eeh? ¹³An pə laa gə gun Iliya wul gwe mə chan bii ndung məkat ɗong gə məchin gə ni ka gə bii wudung gu kat mənan wubiyil mə yil bələp nka muup.¹⁴Mən mə wakja də gogot məjeplep afee muəp, mə naa nagət gurum mə gaar muəp, pə kaganshik gə mənan wubiyil muəp ¹⁵Gə mə naa Yesu dat waɗee gə ye bi wufuwə mən nagət gurum mə suwə muan mə kaat ni. ¹⁶Mən nang pə məjeplep afee, "ɗee gun a pə kaganshik me gə muəp eeh?"¹⁷Mugwə gəme ndəgən nagət gurum laa yen "Wushepee, a wul gə laa nə ngə, Ni gə me mə chillem wudung gə dən laa bəlep shi muup. ¹⁸Labi mang ni tak nyil, dəfil pət nfu, aar agas muup, bə bal, a laa də məjeplep agə də mə chen bii nani, mə chin məu. ¹⁹Mən laa də muəp, "gun gurum gəɗes hə, naduk wən gun, ɗee pa a tong gə gun a veet ah? Ɗee təgərchin anə gə gun a veet ah? Wak gu ja gə lalaa nani an"²⁰Mə wakja gə lalaa nashak də muup, mən chillem nani naa Yesu mən mang lalaa nani gə naɗam, lalaa pal ɗee gə ɓiring dat nyil, dəfil gə pət nfuu. ²¹Mən Yesu nang fu nda lalaa, "ni kamhə abit dang eeh?" nda lalaa yen a nla wuchom. ²²Labi tak ni n-am gə wus, də tə ni. Ɗin gə ɓoot wu chin mə bii, gə naa chigir nkamu ɗee gə mang wufiwu nka mu.²³Mən Yesu laa də muup, "gə boot ah? jepee muəp dip a wuɓeɓes də gurum wudung pən naduk hə". ²⁴Nəgən dat mən ada lalaa epfu gə dəgəl yen, "A pən naduk. Gə mang wufiu nka nə gə naduk wu wən an hə". ²⁵Mən Yesu naa nagət gurum muəp pə suwə ja mən laa biyal də chillem wubis yen, "gə chillem fu bəm, gə dugar, gə tak ni, a chen gun, fuat ndəgən muup, bən gu yok gu ja zak ndəgən muup məu."²⁶Mən chillem wubis wal bən mang lalaa gə naɗam gəret mən pət. Lalaa waɗee gəye dok muut a muut gwe, nagət gurum məyen, "muut." ²⁷Mən Yesu epni, mən Lalaa yagal ɗar.²⁸Wu Yesu warə gəpang, mən məjeplep afee mə nang fu muup kolok, " A wame mən mə boot chen ni pət ba eh?" ²⁹Mən laa də muəp yen, "chillem gə ɓess chen məu, a gə dangnaan".³⁰Mə yigil nook pee nani mə lem ntugun Galili gə tangkop mugwə man pee wu muop nəgən məu. ³¹Nsa ni pə she məjeplep afee mwop. Mən laa də mwop yen, "yong mə pən Lagurum nsar gurum, ndung gə mə tə ni, ɗin mə tə ni, ndangkong bit kun bə yagal." ³²Mən mə man kang bəlep wu ni laa məu, lugut bən tə muop də nang.³³Mən mə wakruwo Capanaum. Gənok mə ruwo gəpang mən nang fu muop, " Ɗee gun ɗin pə laa a bii meh gə war eeh?" ³⁴Mən mə dok kit, nsa ɗin muop pə kaganshik gə shak gə war nka a wuɗang a wuyoon eh? ³⁵Mən tong tətong, mən yong wusarkavəl gəshak mən laa də muop, guwo wu gə kwət a pel, ni gə sam gə kaa muup bən chin bəlang ngogot gurum muop."³⁶Mən mang laa wuchom shin ɗen gənaar muop. Mən mang ni gə sar muup mən laa də muop yen, ³⁷"Dagwə wu lap lalaa nhə ndəgən səm nə, bə lap an, dagwə wu lap an, lap a an dat məu, lap a gwo wu lep an."³⁸Yohana laa gə ni yen, "wushepee, mə naa mugwo ni pə chen chillem wubis ndəgən səm gə, mən mə dən shi muup, nsa ni gədə mu mou. ³⁹Mən Yesu laa yen, gu dən shi muup mou, nsa ɗee wuɗang yong gə chin nagət bəlang mənan ndəgən səm bən bat laa bəlep wuləleng nka nə eeh.⁴⁰Gurum wudung ni fu bətlee gə mən hə mou, bə ni fu gəme gə mən. ⁴¹Gurum wu pən am njang gun ndəgən səm nə nsa gun a nung Kiristi, naduk, an pə laa gə gun gurum nani yong gə kat kopgəshi muup.⁴²Gə gurum ndung gə chin bii wu jep muop nhə mə pələp gə war naduk wu mə pən an, bə dong mə mang nəgən pang esfin ɗian took muup ɓə mə tak ɗəgən am. ⁴³Ɗin a sar gə ani gə waɗee war pal agə, bə gə gap gə tak, Ɗong wu gə rə nLənaan gə sar gəme, ma wu gə rə nləwus gə sar vəl. ⁴⁴Ləwus wu gə pitpit hə mou.⁴⁵⁴⁶Ɗin a kwak gə ani gə waɗee war pal agə, bə gə gap gə tak, dong wu gə rə nlənaan a wukəbəl, ma wu mə tak gə nləwus gə kwak vəl.⁴⁷Ɗin a yit gə ani gə waɗee a war pal agə, shang gə tak, dong wu gə rə lə yil long nung Naan gə yit gəme, ma wu gə rə yit vəl, bən mə tak gə nləwus. ⁴⁸Npee wu nəyet gə mə dəm mou, wus gə pit mou.⁴⁹Nsa gurum dip mə vaar muop gə wus. ⁵⁰Kəgən ni a wudong, ɗee a shang afee nwon, bə gə chin anang də ni nshang eeh? Gu ɗee a kəgən wu shang, bən gu tuaghat chagap gə suk.

¹Yesu nit pee nani yagal wa gəyil Yahudiya gəbət Kong Urdun, mən gurum mə muan də muup, də ni shee muop, nsa waɗee a was muup gwe. Mən ²Farisawa muop mə ja də muup də mə nang dəgəl muup, mə yen, "ɗee ni nka war də damis tədik gə mat muup ah?" ³Mən laa yen, "Dok a Musa layen ame gə gun eh?" ⁴Mən mə yen, "Musa nit damis ran biyil tədik, bə chen namat nashak.⁵Dok wa nsa kaa ba agu a bii wudung sa ni yil bii ɗen ngun yi". Yesu bən laa də muop, ⁶"Ndəgən shideel wu Naan chin gəyil hə, ɗen lawumis gə namat."⁷A wani lawumis yong gə nit nda muup gə nəgən muup ɗee ni ɓam shi mat muup. ⁸Muop vəl gə mə ɗee a swopshik gəme bə mə ɗee vəl zak mou, mə ɗee a gəme. ⁹Gə kam hə, bii wu Naan kang, mugwo tee gənaar muop mou.¹⁰Wu muop gəpang mən məjeplep afee mə bən nang fu muup nka ɓəlep tədik nani. ¹¹Mən laa də muop yen, "gurum ndung tədik gə mat muup bən lap nde mat, bə chin a bwar gə namat nashak. ¹²Din a namat tədik gə mis muup nbən mwan nde ɗik bə ni namat nashak chin a bwar.¹³Mən gurum muop mə wakja gə jep wudyen də ni ɓuam shishik muop yi, mən məjeplep afee muop mə dən shi muop. ¹⁴Mən Yesu naa, mən took muup dam, mən laa də muop, "Gu nit jep wudyen mə wakja də nə, muop mə dən mou, nsa yil long Naan a də gurum muop gə bii muop hə.¹⁵Naduk a laa də gu, gurum wu niang lap yil long Naan ka la wuchom hə, yong gə rə nəgən mou." ¹⁶Mən yak muop lə shishik muup mən lang wuret nkaa muop.¹⁷Wu ni yagal də muan afee, mən me mugwo zuwat gə də muup, mən dugum ntagam muup mən nang fu muup yen, "Wushepee wudong, ɗee gə chin a bii me də a kat tooklang gəgwo eeh?" ¹⁸Yesu laa yen, " a wa me gə yong an shi gurum wudong eh? gurum dip a wudong mou, a Naan dat ani a wudong". ¹⁹Ɗee gə man Biitət nha, "gə tə gurum mou, gə chin bwar gə mat gurum mou, gə muan wat mou, gə laa wurum gəkang bəlep mugurum muop mou, gə chin vogop mou, chin bii wudong də Nda gə Na."²⁰Mən dagwo nashak lap yen, "Wushepee, a chan jepee nani dip wu a kutni nshe yagal. ²¹"Yesu naa ni, napee dempee, "bii gəme won gə, Gə seet gə jepee wu gə gəni dip, gə pən wupia muop, bə gə kat bilong kəbətəng, bə gə wa gəji gə muan gədə nə." ²²Mən kələng kamn hə mən bəzung muup dam, mən wa ndəgən took dam, nsa nia wulong wagap.²³Yesu naa məjeplep afee mən yen, "ni a wu lafu, də wulong muop mə ruwə yillong Naan!" ²⁴Bəlep afee wa a bii wu fuwo də məjeplep afee muop, bən la də muop yen, "jep muop, ni a wu lafu də wulong muop mə ruwə nyillong Naan! ²⁵Yong gə ɓes Kulmi nrə nfung nyir de ka wulong nrə nyillong Naan."²⁶Bii wufuwo nani rəng muop dat dip, mən mə nang fu shak, din nkwot a kam ha? a wudang gə bar eeh? ²⁷Yesu naa muop mən yen, "gəpee gurum, a bii wu ɓes mou, gəpee Naan jepee dip a wu ɓeɓes" ²⁸Bitrus laa ɓəlep gəni yen, "Mə nit jepee dip, mə muan gədə gə.²⁹Yesu yen, "naduk, an pə laa gə gun, mugwo gə nit lə, məjep-emnəgən muup, nəgən muup, nda muup, jep muup, mar, nwa an, gə bəlep wuret. ³⁰Yong gə kat wuret ndəgən bit wuchini, ɗaa nka ɗaa nung lə, məjep-emnəgən, gə nəgən, gə jep muop gə mar, gə manchin bən gəyil wu gə wawul a tooklang gəgwo. ³¹Nagət gurum ndung dok muop a shideel hə gə mə wa wutəs, wutəs gə wa shideel".³²Muop gəwar Urushalima, Yesu ni ntaam, məjeplep afee muop mə naa bii wufwo, gurum muop ndung muop fu gəme hə mə bən luagat. Yesu bən kok muop wusarkavəl, yagal gə muop gəjong mən laa bii ndung yog gə taa nka muup. ³³Gu naa ah, mən muan Urushalima, yong mə pən Laa gurum ndawang gə mənan wubiran muop. Yong gə mə tə ni bən mə pən ni wujong muop. ³⁴Yong mə laa ɓlep wubaan, mə tuak zeel mə lə shishik muup, mə mwak ni gə val, bən mə tə ni. Gənook bit kun bə yagal."³⁵Yakubu gə Yohana, jep Zebedee mə ja də muup mə yen, "Wushepee, mətangkop gə chin bii wu mənang pə gə" ³⁶Mən laa də muop yen, "Gu tang a chin ame ngun eeh?" ³⁷Mə laa mə yen "Gə nit mən mə tughat gə gə ntəgən pee pən yoon a gə, gəme nsar dasə, gəme nsar dakul."³⁸Mən Yesu laa də muop yen, "Gu man bii ndung gun fu nang hə mou. Yong gu boot fu sua am ndəgən dəkwaar ndung an a sua gə mogorkung nung amnaan ndung an a chin ha? ³⁹Mən mə yen, "Gə mə boot", mən Yesu laa də muop yen, "dəkwaar am ndung an a sua ah, gun yong gu sua, bən amnaan wu mə chin an hə, gun zak yong gu chin. ⁴⁰Gurum wu gə tong nsar nə dasə gə dakul a nəmaan mou, a nung gurum muop ndung mə miap muop hə"⁴¹Gogot məjeplep sar mə kələng kam hə, mən tuup muop lee gə Yakubu gə Yohana. ⁴²Mən Yesu yong muop də shik muup, laa yen, "Gu man muop ndung mə man gə muop wa ya wujong muop, mə maa gəkagham muop, mənan a muop bii mə kamshik wu took muop ɗem kə muop.⁴³Nhə gə kwət kam hə gənaar mou, Gurum wu gə kwət a wuyoon ndəgən gu bə ni gə ɗee a wulee, ⁴⁴Bən gurum wu gə kwət a wupel ndəgən gu bə ni gə ɗee kwərəm gogot gurum muop dip. ⁴⁵Nsa Laa gurum wul a də gurum muop mə ɗee kwərəm afee mou, də ni ɗee kwərəm bən pən tooklang afee nɗang də gurum nbəl".⁴⁶Mə wakja Jeriko. Gə nit Jeriko ni gə məjeplep afee muop mən nagət gurum mə ja nəgən, mə kat wuvugum wujet gə ɗangɗang, səm muup a Batimawus, laa Timawus, tong dok fu war. ⁴⁷Ndung kələng a Yesu nung Nazaret, mən tak dəgəl muup bəbal yen, "Yesu laa Dauda, gə naa chigir nkaa nə". ⁴⁸Gurum mə dən shi muup, mə yen gua dok kit, mən shin ep dəgəl muup bəbal, ni fu yen, "Yesu laa Dauda, gə naa chigir kaa nə"⁴⁹Yesu ɗar, yen muop mə yong ni, mə yong ni, mə yong wuvugum nani, mən yen, "Gə tugurduan! yagal gətəng! Ni fu yong gə". ⁵⁰Mən tak kamlang afee hə, mən muan də Yesu.⁵¹Yesu lap mən yen, "a chin a bii me də gə eeh?" wuvugum na shak yen "Wushepee, a tang kop din a naa pee." ⁵²Mən Yesu laa də muup, "muan muan a gə, naduk a gə pən kagham ngə." Nnəgən mən naa pee, mən lang gə də Yesu, mə muan fu gəme.

¹Mə wakruwə Urushalima dəduk gə Batafaji gə Betani gəpee gwaghap Zaitun mən Yesu lep vəl ndəgən məjeplep afee, ²Mən laa də muop, "Gu muan ndəgən tugun wuchom gəjong mu. Gu ruwə nəgən bə gu kat laa gwi ndung mə rap ni duk mou, bə gu shang ni, gu wak gu ja gə ni n-an. ³Din mugwə nang fu gu 'awame gun fu chin kam hə eeh?' Bə gu yen "A Nda long ni pə tang kop, muop nbən wawul gəni hə".⁴Mən mə muan mə kat laa gwi ɗin ɗok ntagam fulə pəchep war, mən mə shang. ⁵Pak gurum ndung mə dyam ɗok nəgən hə mə laa də muop, mə yen, "Gun pə chin ame, gu shang laa gwi nani eeh?" ⁶Mən mə laa də muop bii wu Yesu laa gə muop hə. Mən gurum muop nani mə nit muop mə muan muan a muop.⁷Muop wu vəl nani mə wakja gə laa gwi nYesu mən mə faa kamlang a kaa fee mən Yes tong aka. ⁸Nagət gurum mə faa byaat a muop gəwar, gogot gurum mə faa a kom yim wu mə kwap ntəng gənung mar hə. ⁹Muop wu mə yaa war, gə muop wu gənook muop fu lang dəgəl mə yen, "Yoooh! a wuret gurum wu gəwul ndəgən səm Nda long. ¹⁰A wuret wul yil long nung Nda mu Dauda! Yoooh gə gəbətəng!"¹¹Mən Yesu rə ndəgən Urushalima, mən muan də wapnaan naa jeppee dip. Gə kangsəgən chin, mən muan Betani gə muop wu sarkavəl nani. ¹²Bit bang dat mən mə yigil nit Betani, mən ɓlak tə ni.¹³Ni nsəng mən naa təng tuas wu ni gə kom gəret, mən muan gə naa dong ni gə lalaa, mən kat zeet nsa a shii laa afee mou, ¹⁴mən laa də təng tuas nani yen, "Gurum yong she mə sə laa yi zak mou" mən məjeplep afee muop mə kələng bəlep wu ni laa hə.¹⁵Mə wak ruwə Urushalima, mən rə nlə wap, mən bəm chen wu seet lee muop ndəgən lə wap. Bən tuagan pee bətong wu bat shagal muop, gə wu seet gə bəl kəgər chin kon hə. ¹⁶Dən gurum muop gə mə mang bii seet nlə wap mou.¹⁷Mən she muop yen, "Ni yiyil mo? Lə nə gə kwət a pee pədang pee nung gəyil dip mou? Mən gu nit ni wa pee kuləp muop." ¹⁸Mən mənan ndawang muop gə mənan wubiran muop mə kələng bəlep wu ni laa hə, mən tang war də mə tə ni yi. Nsa mə lugut ni nwa gurum muop mbəl muop fu na bii wufuwə ndəgən bii shee afee. ¹⁹Gə kansəgən mən mə fat nit pe pətong a muop nani.²⁰Gəbit dat muop nmuan, mən mə kat təng tuas nani fii nau gə seen afee. ²¹Mən Bitrus dye mən yen, "Wushepee, gə naa! Təng tuas wudok gə lang fu gə a kahə, fii dip.²²Mən Yesu lap yen, "pən naduk nNaan, ²³naduk an fu laa gəgun, ɗin mugwo laa də pang hə yen 'yagal gə pal ndəgən nəgən am, ɗin chin ni gə bəzung gəme mən pən naduk bə gə chin kam hə, Naan yong gə chin kamhə.²⁴Ani an pə laa gə gun: "dip bii wu gu ɗang Naan akaa hə, pən naduk ɓə gu kat, gə waa nɗe a nəmuk. ²⁵Ɗin gun fu ɗangnaan, ɓə gu lap wubis nung emnəgən gu muop gu kon, bə Nda gu ndung ni kəbətəng hə lap bi wubis agu zak kon". Ɗin gu niang lap wubis məjepemnəgən gu kon, bə Nda ndung ni kəbətəng hə ni gə lap bii wubis agu kon mou." ²⁶Ɗin gu lap wubis məgwə gu kon məu bə Nda gu kəbətəng yong gə nyang lap wubis agu kon məu.²⁷Mən bə bən wakja Urushalima shizak. Yesu ni fu muan ndəgən ləwap, mən mənan ndawang muop gə mənan wubiran muop, gə daskagham muop mə wakja də muup. ²⁸Mə laa də muup mə yen, "Ɗe gə pə chin jeppee muop hə, gə maa wu menang eh? A wuɗang pən maa chan jeppee nani ngə eh?"²⁹Yesu laa də muop yen, "Anang bləp gəme fu gu, Gu laa gə an bə a laa gə gun maa ndung an fu chan jeppee muop gə ni hə. ³⁰Lap amnaan wu Yohana chin hə, dok tong a kəpətəng ha, a gurum gə ni eh? Gu lap dat eh?"³¹Mə də shak bən mə ɓagalka mə yen, "Ɗin mə laa mə yen, 'a kəbətəng' bə laa yen, 'ɗee wame gu niang pən naduk ni eh?' ³²Ɗin mə laa mə yen 'a gəpee gurum'..." Muo fu luaghat gurum muop, nsa gurum dip mə man Yohana dok ni a laa lep Naan. ³³Mən mə lap də Yesu mə yen, "Mə man mou" mən Yesu laa də muop" an zak a laa gə gun, maa ndung an pə chan jeppee muop nani mou.

¹Mən Yesu ɓəm shee muop nkwaan, laa yen, "me muguo marmar təng Inabi, mən gaar pee nashak dip, bən ok tugun nung lap am afee, yagal ɗik lə tap mən mang pən wu ankaa afee, mən yagal muan muan afee. ²Gə shii wuret, mən lep me məlaa pəsar muup gə nung mar nani ni laa də muop mə pən pak laatong nashak. ³Mən mə yaa ni nas, mə bən chen ni wa chak.⁴Bən lep nde laa pəsar muup, mə pən gok ni nkaa mə bən pən nogol. ⁵Bən lep nde, mən mə tə ni. Mə chin kam hə gə gurum muop gwet, mə nas pak, mə tuwə gogot.⁶Bən ni gə laa gəme ndung gə lep hə, a laa gəchin afee ndung ɗem ni. Ni a wutəs ndung lep ni hə də muop, laa yen, 'yong gə mə kələng laa nə. ⁷"Mən wumar ankaa təng mə laa də shak. 'Ni nhə a wuteerkop, wak gu ja, mə tə ni bə gogotɗaa kop muup gə ɗee nəmuun.⁸Mə yaa ni, mə tə ni, mə tak ni pəchep mar. ⁹Gə kam hə, ɗee wupin martəng yong gə chin a me? Ni yong gə chen wumar təng ankaa nani ɗee pən mar mugurum ndee muop.¹⁰Ɗee gu naa biran ndəgən wu əkbəlep mooh? Pang ndung wu ɗyak lə mə nyang hə, bən wa a nung kugur lə. ¹¹Nhə a Nda long gə ni, bən ɗee a bii wufuwə nyit mu.'" ¹²Mə tang də ya Yesu nsa mə man kwaan ndung ni laa hə, a də du, mən mə lughat gurum muop mən mə nit ni muan fu muan afee.¹³Mən mə lep gə pak Farisiyawa gə Hiridiyawa muop də mə lang gwak gə ɓəlep ndung ni fu laa hə. ¹⁴Mə wakja də Yesu mə yen, "Wushepee, mə man gə fu shepee wuret, gə pən yit gurum mou. Gə fu shepee naduk nung war Naan. Mə kwat wap Kaisar, bə ni nyit ah, ni nyit mou eh? mə kwat ah, mə nit eh?" ¹⁵Mən Yesu man muop a fu dye a wubis də ni, mən laa yen "A wame gun fu kam an eh? Wak gu ja gə ək shagal nani a naa yii."¹⁶Mən mə wakja gə ək shagal gəme Yesu. Mən laa yen, "Ɗee gu kat lap a wudang ah, gə biyil sar sudang eh?" Mə yen, "a Kaisar" ¹⁷Yesu yen, "gu pən bii ndung anung Kaisar nsa ni anung Kaisar, ɗee mə pən nung Naan nsa a nung Naan." mə naa bii wufuwə fu muup.¹⁸Mən Sadukiyawa mə muan də muup, muop ndung mə laa mə yen yagal gənook muut zeet hə, mən mə nang fu muup, mə yen, ¹⁹"Wushepee, Musa dok yil nbiran yen, 'ɗin emnəgən gə muut mən nit mat kəkop muup, lagurum ɗin wən ni, bə emnəgən muup gə lap mat nashak, də ɗen seen nkop emnəgən muup ndung muut hə.²⁰Dok mə chin mejep emnəgən muop pogovəl, gəme ni gə mat, mən muut, nit laa kəkop mou. ²¹Mən dagwo wuvəl bən lap ni mən muut nit laa gə kop mou, wukun bən chin a kam hə. ²²Wupogovəl mə chin a kam hə mə nit laa kəkop mou. mən namat nashak muut, ²³Nɗəgən yagal ntugun muut, ndung muut nyagal hə, ɗee ni yong gə tong a mat wudang eh? Nsa muop dip pogovəl dok mə lap ni."²⁴Yesu laa yen, nhə a bii ndung sa gu chin ɗel ha mou, Nsa dok gu man gəkang wu ək ɓəlep nɗee kə kamɓəlep Naan yi mou? ²⁵Bit ndung wu məmuut yagal ntugun hə, bəlep ɗik gə bəlep ɗyak ni kə bətəng mou, yong mə ɗee a kəbi məwəng kəbətəng²⁶Ɗin nkwət a yagal ntugun, ɗee jet gu naa nbiran nung Musa mooh? ndəgən bəlep wung. Ndung Naan laa ɓəlep gə ni yen, 'An a Naan nung Ibrahim, Naan nung Ishaku gə Naan nung Yakubu. ²⁷Ni a Naan nung wu mumuut mou, a nung wugə nook, gu chin ɗel ashik."²⁸Məgwə gəme nɗəgən wuyil biran ji kələng ɓəlep ndung muop fu laa ni, naa kat Yesu ni fu laa ɓəlep na ni nyit, mən nang fu muup, "A məbyang mənang a wuyoon dip dip eh?" ²⁹Yesu lap yen, wuyoon dip dip, gu ləng komgu, gun gurum Israila, Ndalong Naan amu, Nda long ni a gəme. ³⁰Gu ɗem NdaLong Naan gə bəzung dip, gə nook agu, gə endiye agu, gə ɓal agu. ³¹Wuvəl afee, gə ɗem tənglə agə kəbi wu gə ɗem kasak hə, mə wuɓyang wuyoon wu maa nhə kwət mou.³²Mən wuyoon wu ranbiran laa yen, ɓəlep ɗong Wushepee, Naan a gəme, ndee kwət zak mou, a ni dat. ³³Ɗem ni dip gə bəzung, gə endiye wuret, gə bal, bən gə ɗem tənglə agə kəbi kaasak hə, ni a wumaa bii dək gə bii wap. ³⁴Yesu naa kat lap ɓəlep wuret, mən bən laa də muup yen, "Gə səng pee gə yilLong Naan mou."Ndangkong nhə məguwə ba nang bəlep fu Yesu zak mou.³⁵Wu Yesu fu shepee nlə wap hə, mən laa yen, "A wame mə yen Kiristi ni a laa Dauda eh? ³⁶Nsa Dauda ni gə kashik muup, chillem wusəsaar laa yen, "Nda long laa də Ndalong a nə, " tong gə sar nə dasə, bə gə ɗen wukas gə muop mə ɗee a petong nkwak gə". ³⁷Dauda gə kashik bii yong ni shi Nda Long' bə Kiristi bən ɗee laa Dauda ah? mən ɗongbət nagət gurum gəret ndung muop fu kələng ni hə.³⁸Ndəgən bishee Yesu, la yen, "Gu kang gə wuran biran muop, ndung mə muanɗok nɗəgən byat mənan, mə tangkop gurum bii mə nang muop kə lətuk, ³⁹bən bii mə tang pee pətong wuret nlə wap gə pee səbi. ⁴⁰Mə bən vogop surəp kaa, bii mə bən mang ɗangnaan wuzaar, ɗee gurum mə naa muop yi. Gurum muop nani nhə, yong mə kat shep muut wuyoon."⁴¹Mən Yesu tong eskogop tugul bidək nɗəgən lə wap, ni fu naa bii ndung gurum muop fu dək nɗəgən tugul, wushagal mənan muop mbəl mə ɗək bii wu tətegen. ⁴²Mən me mə matkaa ɗək anini shingshing nɗəgən tugul biɗək.⁴³Mən yong məjeplep afee muop, mən laa də muop yen, "an fu laa a daduk gə gun, bii ndung matkaa dək hə nɗəgən tugul biɗək hə, maa nung gogot gurum dip. ⁴⁴Nsa muop dip mə pən a nɗəgən bii ndung mə kat gwet hə, Matkaa nhə a nɗəgən piya, mən pən wutəs bii ndung ni gə ni hə."

¹Wu Yesu yagal pət nlə Naan, mən gəme ndəgən məjeplep afee laa də muup yen, "Wushepee, gə maa pang muop wuret nhə, gə lə ndung mə ret badən nhə!" ²Mən laa də muup, "Gə naa nagət lə wuret nhə? Pang gəme yong gə ɗee nkaa ndee ndung gə mə tugun tak hə mou."³Yesu tongɗok gə pang Zaitun dukduk gə pin-Naan, Bitrus, Yakubu, Yohana gə Andarawus mə nang fu muup kolok, ⁴"Gə laa də mu, ɗee a pa me bə jeppee nani gə dək eh? Ɗee a bii me yong gə mə naa chin jeppee nani gəmə dək eh?"⁵Mən Yesu laa yen, "gu kang yong məgwə fwəngun gə war wuhaan, ⁶Gurum mbəl yong gə mə wul nɗəgən səm nə mə yen, 'An a ni,' Gə mə bat gurum muop gəwar wabaan.⁷Ɗin gu kələng ɓlep lekɗiel muop, gə ɓlep kələng lekɗiel bə gu weel mou, jeppee nhə gə mə dək a ɓit wutəs wul duk mou. ⁸Gurum gəyil yong mə nyang yit shak, yil long yong mə yighil də shak. Yil gə təɓəl npak pee gə ɓəlak npak pee. Nhə a ni a nogol wupel.⁹"Tuaghat gu kang. Yong gə mə muan gə gun ntagham wuyil muop, gə mə nas gun nlə wap.Yong gu ɗyam ntagham gwamna gə mənlong muop wa nsa an, gu nyin a tuamshik nmuop. ¹⁰Ɓəlep wuret yong gə mə laa ni də gurum gəyil dip.¹¹Ɗin mə yak gun mə muan gə gun ntagham shep, bə gu weel gə bi ndung gu laa hə mou. Nsa nɗəgən chii gəme, gə mə pən bii ndung gu laa hə, a gun gu laa məbii mou, a chillem wusəsaar ani gə laa. ¹²Emnəgən gə pən emnəgən ni mə tə, Nda gə pən laa muup, jep gə mə nyang məmya du bən mə pən muop mə twə. ¹³Gurum gə mə nyang yit gu nwa an, Gurum wu mogorkung də bit wutəs, gurum nashak gə bar.¹⁴Ɗin gu naa bii nung lugut ɗardok ndung ɗong din nkwət nəgən hə mou.(wu naa biran ni man gə kang) bə gurum ndung muop yil Yahudiya bə mə swə kaa pang. ¹⁵Gurum wu ni gə dapkə lə, nayong nsam də mang me mə bii. ¹⁶Gurum wu ni gə laap hə, nayong wa gə gənook də mang kamlang afee.¹⁷Gə ɗee a bii chigir də muop gə jep nbət gə jep wuɗyen wu muop pə swa yugur pa bit nani. ¹⁸Gu ɗangnaan yong nta nlugun. ¹⁹Nɗəgən ɓit nani gə ɗee bit natuangang ndung me jet taa kam hə duk mou, nɗəgən shideel wu Naan chin gəyil hə, wa gəɗee bit wuchini she ntaa zak mou. ²⁰A nsa Nda long baa gə pak ɓit muop nani mou. Ɗin mugwə gəme nɗəgən seen Adamu gə bar meh! A nwa muop wu Naan tagat, mən baa gə pak bit.²¹Ɗin mugwə nkat gun mən yen, gunaa Kiristi ni hə, gu naa ni hə! gu pən naduk bəlep afee mou. ²²Nsa kiristi wu wuram, gə wu laa lepnaan wu wuram gə mə nyin kəshak, bən mə chan bi wufuwə nung naa gəret, də mə fwən gurum muop, ga ndung mə taghat hə. ²³Tong gu kang! An dok a laa gwe gə gun jeppee muop nhə dip²⁴Gənok ɓit natuangang nani nhə, fuus yong gə wa ləpar, tar yong gə pia mou. ²⁵Ramcha gə mə watdək kəpətəng hə kamɓəlep kəbətəng gə təɓəlshik. ²⁶A ni ɗe bə mə naa Laa gurum gə tong wasam nɗəgən lighin gə kam ɓəlep wuɓal gə lapyoon. ²⁷Ɓə gə lep məwəngnaan kok wutətagat muop dək gəshak, dip gəsar gwang pee feer nhə, fuus kaa , fuus rə, wa naa wang, wa naa gəpang, gə pee fulang gəyil gə pee fulang kəpətəng.²⁸Gu mang bishee gə təng wut, ndung bəm taa kom muup bə gu man pas kus. ²⁹Ɗin gu kat bii muop nani fu dək, bə gu man ni dəduk, ni duk gə fulə.³⁰Naduk, an fu laa gə gun, gun nhə gu dəm nlat shee bii nhə ntaa mou. ³¹Kəbətəng gə gəyil gə mə wakɗələng, bəlep anə gə wa nɗel mou. ³²Nung ɓit gə shii, wumanni kwət mou, ɗin ya məwongnaan wubətəng, gə laa, a N̄da dat a ni man.³³"Tong gə en, gu kang! gu dangnaan nsa gu man shii nani mou. ³⁴Gə ɗee ka gə bii wupinlə wu muan muan nit gəpang afee pən bəlang məjepbəlang afee gə bəlang muop ɗiɗyak, bən laa də wunaa tap ni bi naa pee ɗəɗong.³⁵Nwa kan hə tong gə en, nsa gə man ɓit ndung wupin lə gə wawul gəpang hə mou, lagəyit gə kansəgən, ɗee gənaar ləpar oh, a ndung koo tokshik oh, ɗee gə ɓit oh. ³⁶Ɗin ni wawul kuk mən nayong kat gun nsaam. ³⁷Bii wu a laa gə gun a laa də gurum dip a kam hə, tuaghat gu kang!"

¹Ɗee bit vəl dat ɓə ɓit bisə nung nawee kəgən won warə, mənan ndawang gə wubiran muop fu lapkang də ya Yesu də mə tə ni. ²Muop fu laa ni "gə kwət a nɗəgən ɓit bisə nhə mou, yong gurum muop mə taa nka mu"³Wu Yesu ni gəyil Betani lə Saminu wutəlogom, tongɗok dat, mən me namat ji gə tuu mwər wu gə taghas, bən ni gə shaghal gəret, mən məm mwər nani nkaa Yesu. ⁴Pak gurum wudok muop gəme gə Yesu hə took muop dam gə namat nani, mɛ laa də shak mə yen, 'ɗee bii wu namta fu chin nhə, ame a kyen afee? ⁵Nhə a mwər gə taghas, ni gə shaghal, ɗin mə seet gə ni mə pən shaghal nani nwupiya muop ɗin bis ha? mə ɓial namat nani kamn.⁶Mən Yesu laa yen, "Nitni nbəfe. Ɗee gun fu weel ni anang eh? Chin a bii wuɗong də nə. ⁷Gun jet gəme gə wupiya muop, ɗin gu ɗem ɗin gu mang wufiu nka muop bə gu boot pə chin ni, nsa an a tong kwang gə gun mou. ⁸Namat nhə chin a bii wuret, mən swopshik nə a də wum. ⁹Naduk, an fu laa gə gun, ɗin gə mə laa ɓəlep wuret gəyil, bii wu namat nhə chin yong gə mə laa ni, də bi mə diye gə ni.¹⁰Mən Yahuza Iskariyoti, gəme nɗəgən wusarka vəl yaghal muan də ndawang muop də pən gəni nmuop. ¹¹Mənan ndawang mə kələng kamn, mən took muop piya, mən mə laa ɓəlep shaghal wu yong mə pən Yahuza, mən ɓəm tang war wu yoon gə pən Yesu nmuop¹²Pa ɓit wupel nung ɓit bisə nung nawe wu kəgənwən, gə bii wap təm, mən jepmuan afee muop mə laa də muup, "Ɗee gə mu muan ane mə myap bisə a mu ye?" ¹³mən lep vəl nɗəgən jepmuan afee muop, "Gu ruwə nɗəgən pətong gurum muop nhə, ɓu gu kat me mə dagwə ni gə sha am. Ləng gədə muup. ¹⁴Lə ndung ni rə nnəgən hə, bə gu ruwə gədə muup, bə gu laa də wupin lə nani gu yen, 'Wushepee laa yen "ɗee pee bəsam ani gə pee səsə ani gə jepmuan ani muop eh?'"¹⁵Bə kam gəməlang ndung mə myap gwe ngun. Ɓə gu myap bətong amu nnəgə." ¹⁶Jepmuan muop mə yighil muan npee pətong gurum muop nani, muan mə kat a kamn gəbi ndung ni laa hə, mən mə myap pee bisə a muop nani nnəgən.¹⁷Gə kangsəgən, mən wul nnəgən gə wusarkavə muop. ¹⁸mə tuaghat dat ɗok fu sə, mən Yesu laa yen, "A laa naduk gə gun, nɗəgən gu ndung mən fu sə gəme gə gun hə, me gu yong gə muən gə an." ¹⁹Mən mə weel, mə nang fu muup, muop gəme-gəme, mə yen, "naduk ɗee a an ah?"²⁰Mən Yesu lap fu muop yen, "Nɗəgən gu wusarkavəl nhə, gəme nɗəgən gu ndung mən fu səsə nɗəgən daa gəme hə. ²¹Nsa Laa gurum yong gə waa gəbi ndung wuək ɓəlep laa ka muup hə. Yong gə bis nka dagwə ndung gə pən Laa gurum hə! Dəgən gə ɗong ɗin mə laa wa laa ni mou."²²Muop nɗəgən sə dat mən, Yesu mang nawee, lang wuret a kaa, mən tarap dəgən. "Lap nhə. Nhə a suop san." ²³Mən mang la jang gə am nɗəgən, mən dəkyil nNaan, mən pən muop, mən mə swaa dip. ²⁴Laa də muop yen, Nhə a təghəm anə nung ɓlepdem, təghəm kon də gurum mɓəl. ²⁵A laa naduk gə gun, a bən a swa am laa təng zak mou ɗee bit ndung a swa a wufuwə nyil long Naan dat hə."²⁶Ndangkong lə see saam səm Naan, mən mə muan kə pang Zaitun. Yesu laa də muop yen, "Gun dip²⁷ yong gu ɓarapnaɓarap gu pələp nwa an, nsa yil ɗok yiyil, 'Gə a chen wutap təm ɓə təm gə mə lən'.²⁸Ndangkong yaghal anə, bə yong a yaa war ngun ndə muan Galili." ²⁹Bitrus lap laa yen, "Ɗin gurum muop dip mə suwə, ɓə an ga yak mou."³⁰Yesu lap fu muup yen, "A laa a naduk a pən gə, chini ləpar, gə chii an kaa gə kun she deelkoo ntok shik sar vəl yi." ³¹Mən Bitrus lap laa yen, "An a chii gə mou, a muup ma ɓə a mumuut dat gəme gə gə." Muop dip mə lap a kamn hə.³²Mə wakja nme mə pə mə yong a Getsamani, mən Yesu laa də jepmuan afee muop yen, "Gu tuaghat hə, a ɗangnaan yi." ³³Mən mang Bitrus, gə Yakubu, gə Yohana, mən bəm kələng chichik afee bən weel dip. ³⁴Mən laa də muop, "nook nə ni nɗəgən weel, nagəyen ɗin gə muut a muut. Gu taughat hə gu kang."³⁵Yaghal ɗel dat lee, mən Yesu pal nyil ɗangnaan, ɗin kwət a wuɓeɓes, bə mang chii nhə gə pee ji. ³⁶Laa yen, Ɗee Nda, bii dip a wuɓeɓes də gə, gə mang lajang tə gə, chin nhə gə pee nə, dip gə kam hə, a enɗiye anə məu, a nə mak.³⁷Mən yaghal waji kat muop nsaam, mən laa də Bitrus, "Siman, gə a nsaam ah? Gə boot fu kang wa chiin gəme mo? ³⁸Gu tuaghat gu kang, gu ɗangnaan yong ba gə pal ndəgən bii wubis." En mərip gə diye dat mən swopshik təgen." ³⁹Bən yaghal muan də ɗangnaan bən laa a ɓəlep nani shi zak.⁴⁰Bən waji kat muop a nsaam shizak, nsa yit muop təgen gə saam. Mə man bii ndung mə lap laa zak də muup məu. ⁴¹Bən muan wukun mən laa də muop yen, "ɗee gu kutni a nsaam nani gun pə nooksuk mooh? mak kam hə! chii wa rə. ⁴²Gu naa! Laa gurum mə pən ni nsar gurum whan bii wubias. Gu yighil gətəng mə wak , gu naa gwe wu gə pən an ni duk duk gə mən."⁴³Ɗin gə laa dat, mən Yahuza, gəme nɗəgən wusarkavəl, wul gə gurum mbəl, muop gə ngo, dughul, mənan ndawang, mənan wubiran gə daskagham. ⁴⁴Yahuza wu gə pən Yesu yawar laa gə muop yen, "Ndung a kangfu nə gə ni gu man ani, gu ya ni gu wak gu ɓal." ⁴⁵Yesu gə wul dat, mən waji də Yesu laa yen, "Wushepee" mən kangfu gə ni. ⁴⁶Mən mə ya ni, mə wak gə ni.⁴⁷Gəme nɗəgən muop wu mə ɗyam dok hə, shang ngo afee mən gap laa lə ndawang wuyoon mən gap kom muup. ⁴⁸Mən Yesu laa də muop, "gufat gə ye a kuləp gə ngo, gə dugul də gu ya an ah? ⁴⁹An zəm nɗəgən gu, an fu bishee nlə wapnaan, bə gu ya an məu. Nhə də wu əkɓəlep kəgət yih. ⁵⁰Muop ndung gədə Yesu hə mə swo dip.⁵¹Me mə laaswal, ni dat gə ngodo afee ɗok ni gədə Yesu. Mə ya ni.Mən ya ni. ⁵²Mən tak ngodo afee nmuop, mən zwat ngum.⁵³Mən, mə muan gə Yesu də wuyoon ndawang. Gurum muop ndung də muup hə, a mənan ndawang, daskagham gə wubiran muop. ⁵⁴Bitrus lang gədə muup nsəng wa rə lə wuyoon ndawang. Mən tong də muop futap, muop pə ɗanwus.⁵⁵Wuyoon ndawang gə daskagham nung Yahudawa mə tang tuam shik nkaa Yesu də mə boot fu tə ni. Mən mə kat zeet. ⁵⁶Nagət gurum mə ja gə tuamshik wurum nkaa Yesu, mən fu muop tong gəme meh!⁵⁷Pak gurum mə bə yigil dyam mə pən tuamshik wurum nkaa muup, mə yen, ⁵⁸"Mə kələng ni laa yen, "An gə a rəgəp ləwap naan ndung mə ɗik shi sar nhə, bən a ɗik ni nɗəgən ɓit kun ndung a wuɗik gə sar məu" ⁵⁹Dip gə kam hə, tuamshik a muop fu wa gəme meh?⁶⁰Mən wuyoon ndawang yaghal ɗar gənaar muop, mən nang fu Yesu yen, "Ɗee gə gə me mə ɓəlep ndung gə laa nkə tuamshik wu mə pən nka gə hə mooh? ⁶¹Mən ɗok bəp, laa məbii meh. Bən wuyoon ndawang nang fu muup yen, "A gə nani a Kiristi ah?, Laa wuret ah? ⁶²Yesu lap yen, "A An, yon gu naa Laa gurum tongɗok nsar dasə yil-Long Naan, bən ni fu sam nɗəgən lighin kəbətəng⁶³Wuyoon ndawang tee təgo shishik muup, yen "Ɗee mə bən mə tang a ndee tuamshik ah? ⁶⁴Gu kələng dam səm wu ni laa ha, ɗee a meh a enɗiye a gu eh?" muop dip mə gap shik muut nkaa muup. ⁶⁵Pak gurum mə bəm tuak zeel lə nshik muup, mə oghot yit bə mə chit ni bə mə yen, "Laa lepnaan!" Wulek muop mə yighil gə ni mə bən nas ni.⁶⁶Bitus ni nnəgən bədə ləme, mən Larep wuɓəlang lə ndawang waji də muup. ⁶⁷Naa Bitrus fu ɗan wus, mən naa ni dukduk mən yen, "Gə dok gə gəme gə dagwə Nazaret nhə." ⁶⁸Mən chii, yen, "A man bii ndung yi fu laa hə mou." mən laghal pət nlə nani, mən Deelkoo tokshik.⁶⁹Larep wuɓəlang lə ndawang naa ni bən laa shizak də muop ndung mə dyamɗok nəgən hə, yen "Dagwa nhə ni nɗəgən muop." ⁷⁰mən bən chii, lee dat mən muop ndung mə ɗyamɗok muop fu laa daə Bitrus mə yen, "Gə wagap a gəme nɗəgən muop, nsa gə a gurum Galili."⁷¹Mən lang zhirii gəshik muup ni fu səgərnaan, laa yen, "A man dagwə ndung gun fu laa ɓəlep akaa nhə məu." ⁷²Bər dat mən deelkoo tokshik wuvəl, Bitrus dye ɓəlep wudok Yesu laa də ni yen, "ɗin delkoo ntokshik vəl bə gə chii gə an" mən enɗiye rə ni kam hə, mən taa nwal.

¹Gəbit dat mən mənan ndawang muop mə yong shak gə daskagham gə wubiran gə gogot mə nlong nung gəyil Yahudawa, mə ɓwaghat Yesu mang muan mə pən ni Bilatus. Bilatus nang fu muup yen, ²"A gə a Long nka Yahudawa muop mə? Mən lap laa yen, "A gə gəlaa kamn." ³Mənan ndawang muop mə wakja gə tuamshik mɓəl kaa Yesu.⁴"A gə a Long nkaa Yahudawa muop mə?" Bilatus bən nang fu muup yen, "Ɗee gə gə bəlep laa moo? Gə naa nagət bəlep ndung muop fu tuamshik nkaa gə gəni!" ⁵Mən Yesu laa məbii də muup mou, ɗee a bii wu fwə də muup.⁶Ɗin bit biisə nwar nrə, bə Bilatus bii shang gurum gəme nɗəgən muop nlə bal ndung mə gurum mə ɗem ani hə. ⁷Dok me məgwə nnəgən, mə yong ni a Barabas, ni nnəgən nləɓal gə goghot gurum muop ndung a wuɓlep nyang muop hə. ⁸Gurum mə ja də Bilatus muop fu nang fu muup, gə mə chin ka wujet hə.⁹Bilatus lap laa yen, "Gu ɗem ɗin a shang a Long Yahudawa muop ngun ha?" ¹⁰Nsa ni mən mənan ndawang muop fu ɓətɗeet gə Yesu mə ja gə ni nyi. ¹¹Mən mənan ndawang muop mə kar gurum muop də mə shang Barabas nkop Yesu.¹²Bilatus bən lap laa yen, "Ɗee gə waa nənang gə Long Yahudawa eh?" ¹³Man mə la mə yen, "Mə kaa ni!"¹⁴Bilatus laa də muop yen, "A me a wubis ndung chin hə he? Mə bən lang lang nɗəgəl ɓəɓal "Mə kaa ni!." ¹⁵Bilatus ɗem ɗin npya took gurum muop, mən shang Barabas pən nmuop, nas Yesu mən muən nmuop də mə kaa ni.¹⁶Wule muop mə muan gə ni ngugut (Pətong gwabnati) gə nagət wulek muop. ¹⁷Mə lə lee wupəpel shishik muup, gə Vugum long nung nəkyen nyi. ¹⁸Muop fu tuangbət muup gə mə yong ni a shi "Mə nang Long Yahudawa!"¹⁹Mə chit kaa muup gə dugul, mə bən tuak zeel lə shishik muup. Mə duagham gə fuərəm muop mə wapni nung ɓətbis. ²⁰Mə chin ɓətbis mak muop, mə taghat lee shishik muup ndung a wupəpel hə, mə ɓyang nə muup, mə fat gə ni də mə kaa ni. ²¹Muop nɗəgən muan mə kang mugwə mə yong ni a shi, Saminu Bakairawani (ni a nda Alizanda gə Rufus). mə ya ni mang shep kaa Yesu.²²Wulek muop mə ja gə Yesu nme mə pee ndung mə yong a Golgota (ndung mə yong a "Pee əgəs kaa"). ²³Mə pən muəs wu rəroop nyi, mən nyang swaa. ²⁴Mə kaa ni mə kwap ɗəgən lee shishik muup, mə bən chin piaɗaa ɗok muop dip mə kat laa nashak.²⁵Gə arkaa dat mən mə kaa ni. ²⁶Mə yil lang nkaa muup, "Nhə a Long Yahudawa." ²⁷²⁸Mə kaa ni gə goghot gurum vəl, a kuləp muop, gəme nsar dasə ɗee ndee nsar dakul.²⁹Wu ɗələng war mə agas ni, gə ɗək kaa muop mə yen, ənhə! a gə ndung gə rəgəp la wapnaan bən gə ɗik ni nɗəgən ɓit kun, ³⁰Bar kaa sak, sam gə shep kaa!"³¹A kam hə dip mənan ndawang muop fu tuang ni mə yen, "Bar gurum muop, Boot gə bar shik muup zak məu" ³²Ɗee Kiristi, Long Israila, sam gəɗes hə gə shepkaa, ɗee mə naa yi, bə mə pən naduk yi." Muop ndung mə kaa a wu gəme hə mə tuangɓət muup.³³nfuus gənaar, pee kwə dip, ³⁴ndung fuus bat mən Yesu ep ɗəgəl ni ɓəɓal yen, "Eloi, Eloi, lama sabaahtani!" ndung ani a "Naan anə, Naan anə, a wame gə tak an eh?" ³⁵Muop ndung mə dyam ɗok hə, mə kələng ɓəlep afee, mə yen, "Naa ni fu yong a Iliya."³⁶Məgwə yak gəsə, ɓyang kam tung ɗəgən muəs shin ɓyang nmuəs, mən pən nyi swa. Dagwə nani yen, "mə naa, nɗong bə Iliya sam mang ni" ³⁷mən Yesu ep ɗəgəl ni ɓəɓal mən muut. ³⁸Bii fulə nung lə wapnaan mə gap ɗəgən vəl, kədeel sam pət.³⁹Me wumagat ndung ɗar ɗok hə, naa Yesu muut hə laa yen, "Naduk dagwa nhə a Laa Naan." ⁴⁰Dok pak surəp muop mə ɗyam ɗok mə naa pee nsəng, nɗəgən muop a Maryamu Magadaliya, Maryamu (Nəgən Yakubu gə Yusufu) gə Salome. ⁴¹Wudok ni n-Galili hə, dok bi mə ləng gədə muup, mə wap ni, goghot nagət surəp muop mə ja gədə muup n-Urushalima.⁴²Gə kangsəgən, ndung muop fu myap jeppee ɗ ɓit atsabar, ⁴³Yusuf nung gəyil Arimatiya wul, a gurum gəsar, bi mə naa ni gə yoon nɗəgən mənan ndawang muop ni fu yil-long Naan, mang tugurduan mən muan də Bilatus, nang də lap kum Yesu. ⁴⁴Ɗee bii wufuə də Bilatus, kan Yesu muut gwe. Mən yong Wumaghat nang fu muup, Yesu muut gwe ah?⁴⁵Dangkong kələng fu Wumaghat, mən ɗem mə pən kum Yesu n-Yusufu. ⁴⁶Yusufu dok seet byat wum gurum. Mən sam gə shishik Yesu kə shep kaa, mən yaa ni lə nɗəgən byat wum nani, mən muan gə ɗen ni nɗəgən tughum pang ndung mə gap hə. Mən ɓəring pang lang shi fu tughun nani. ⁴⁷Maryamu Magadaliya gə Maryamu nəgən Yusufu pee ndung mə wum Yesu nnəgən hə.

¹Ndangkong ɓit atsabar ɗəl lat, mən Maryamu Magadaliya gə Maryamu nəgən Yakubu gə Salome mə sarap muər gətaghas də mə məm shishik Yesu. ²Gəɓit dat, pa ɓit wume nnung shii lətuk, mən mə muan fu dughun gə arkaa³Muop fu laa də shak mə yen, "A wudang yong gə ɓəring pang fu tughun nbaa gə ni nmən eh?" ⁴Gə mə ep yit muop dat mən mə kat mugwə yaa war ɓəring pang nani gwe, nsa a pang wu makbi.⁵Mə ruwə fu tughun lat mən mə kat memə laaswaal ɗarɗok gə lee piya, nsar dasə, mə ɗee bii wufuwə də muop. ⁶Mən laa də muop yen, "lughut ntə gun me", gun fu tang a Yesu nung Nazaret ndung mə kaa ha?, Yaghal gwe, ni hə məu, ɓə gu naa pee ndung mə ɗen ni nnəgən hə. ⁷Wak gu laa gə Jepmuan afee muop, gə Bitrus, gu yen yaa war gwe ngun n-Galili. Gu kat ni a nnəgən ka gəbi ndung dok laa gə gun hə.⁸Mə fat lat nɗəgən tughun nani, mən mə swə gəsə, shishik muop fu ɗam ba lughut tuə muop gə bii wufuwə ndung mə naa hə.⁹Gəɓit pa ɓit wufuwə nnnung shii lətuk, mən muan gə nyin gə shik muup n-Maryamu Magadaliya wudok chen məkwarkum pokopvəl shishik muup hə. ¹⁰Mən muan laa gə muop gə ndung dok muop gə me fu chiin anf eer hə. ¹¹Mə kələng yaghal ni n-kagham mən a ni Maryamu Magadaliya naa ni, mən mə pən naduk meh.¹²Ndangkong nani mən Yesu bə nyin kaa shik mugurum muop vəl kə war. ¹³Mən mə yok laa də goghot Jepmuan afee muop, dip gə kam hə, mə ɗem məu.¹⁴Ndangkong nani mən Yesu nyin kaa shik m-Jepmuan afee wusarkaagəme, muop fu sə, mən Yesu dəl kom muop gə nyang pən naduk ɗee ɓlep-nyang amuop, nsa mə nyang pən naduk gə gurum muop ndung mə naa ni ndangkong yaghal afee nɗəgən tughun hə. ¹⁵Laa də muop yen, "Gu muan gəyil, laa ɓəlep wuret də gurum dip. ¹⁶Gurum ndung pən naduk mən mə kən ni bə gə bar, gurum ndung nyang pən naduk gə rə nlə wus.¹⁷Jeppee muop nhə gə mə muan gə gurum muop ndung mə pən ɣ naduk, nɗəgən səm nə gə mə chin məwarkum muop, mə laa ɓəlep nɗəgən liis wufuwə. ¹⁸Yong mə yak wəh gə sar muop, mə swa bii muut, bə gə chin məbii gə muop meh. Gə mə ləng sar muop kə wugok muop bə mə kat kagham."¹⁹Ndangkong ndung Nda Long laa ɓəlep də muop, mə mang ni wa də kəbətəng mən tong gə sar dasə nung Naan. ²⁰Jepmuan mə yigil muan laa ɓəlep wuret meet, Nda Long chin ɓəlang gə muop bən nyin bii wufuwə gə jeppee muop.