¹Ebe ushishi ni o to Ijesu Ikiristi ekẹ le, omyi Idevidi, omyi Ebulahamu. ²Ebulahamu lẹ khi ita Aziki, ọni Aziki lẹ khi ita Ijekọpu, Ijekọpu lẹ khi ita Ijuda ali inyọgwho ọli. ³Ijuda lẹ khi ita Ipẹrẹzi ali Izẹra ni itama ọ vyia, Iparẹzi lẹ khi ita Ẹzirọni. Ẹzroni lẹ khi ita Iramu.⁴Iramu lẹ khi ita Aminadabu, Aminadabu lẹ khi ita Inashiọni, Inashọni lẹ khi ita Isamọni. ⁵Isamọni lẹ khi ita Iboazi, ni Irehabu ọ vyia nali, Iboazi lẹ khi ita obẹdi ni Irutu ọ vyia naa, Obẹdi lẹ khi ita Ijẹse. ⁶Ijẹse lẹ khi ita Idevidi ni oghyie, Idevidi lẹ khi ita Isolomọni ni ugwhẹ Uraya ọ vyia nali.⁷Isolomọni lẹ khi ita Irehobuamu, Irehobuamu lẹ khi ita Abija, Abija lẹ khi ita Asa. ⁸Asa lẹ khi ita Ijẹhoshafati, Ijẹhoshafati lẹ khi ita Ijoramu, Ijoramu lẹ khi ushishi Uzaya.⁹Uzaya lẹ khi ita Ijotamu, Ijotamu lẹ khi ita Azi, Aazi lẹ khi ita Ẹzẹkaya. ¹⁰Ẹzẹkaya lẹ khi ita Imanasẹ, Imanasẹ lẹ khi ita Amọni, Amọni lẹ khi ita Ijosaya. ¹¹Ijosaya lẹ khi ita Ijẹkonaya ali inyọgwho ọli ẹrhẹghẹ ni a rhọ tsua iọgbọ Ijusi je Ibabelọni.¹²Abhi a ke rhọ tsua wẹ je Ibabelọni, Ijẹkonaya lẹ khi ita Ishẹatẹli, Ishẹatẹli lẹ khi ita Izerubabẹli. ¹³Izerubabẹli lẹ khi ita Abiudi, Abiudi lẹ khi ita Ẹliakimu, Ẹliakimu lẹ khi ita Azọ. ¹⁴Azọ lẹ khi ita Izadọki, Izadọki lẹ khi ita Achim, Achim lẹ khi ita Ẹliudi.¹⁵Ẹliudi lẹ khi ita Ẹliaza, Ẹliaza lẹ khi ita Imatani, Imatani lẹ khi ita Ijekọpu. ¹⁶Ijekọpu lẹ khi ita Ijosẹfu ugwhẹ Imeli ni a te obọ ọli vyia Ijesu ni a lu Ikiristi. ¹⁷Oni ushishi rhọ te Ebulahamu apfishi Idevidi o kyila igbe ali ene, rhọ te Idevidi apfishi ẹrhẹghẹ ni a rhọ tsua wẹ je Ibabelọni eni ushishi e kyili igbe ali ene, rhọ te ẹrhẹghẹ ni a rhọ tsua wẹ je Ibabelọni apfishi ẹrhẹghẹ Ikiristi e kyili ushshi igbe ali ene.¹⁸Odẹ ni a te vyia Ijesu lẹ khi ona. Ijosẹfu li ọ mhọli Imeli ni inyọ ọli, Ama neni e mẹ egbe ọkpotso ali ọmọse, a gwanọ bhale a vhẹ khi ọ shee mẹ te ikpa Ayẹmhẹ ni o Pfuasẹ. ¹⁹Ugwhẹ ọli ni ọ kyili Ijosẹfu ọ kyili ọgbọ ni ọ pfuasẹ, iyọ ọ vha nono khi lẹ rhi omama nwu ọli vhi ogbolo. Li ọ rhọ mhasẹ khi lẹ bẹna tsua pfia.²⁰Abhi ọ ke rhẹẹ sa eni ingme, aghyiukọ Ọnọmhuẹyẹ ọ bhuli ọli le alo ẹvhena, ọọ li, “Ijosẹfu, ni omyi Idevidi, imhẹ nu ulishi khi u rhọ rhue Imeli abhi ugwhẹ ẹ, rharhi khi ọmọ ni ọa mẹẹ Ayẹmhẹ ni o Pfuasẹ li ọ mẹ ọli a nalii. ²¹Ọ la laa vyia ọmọ ọmọse, u la laa lu ọli Ijesu, rharhi lẹ li ọ laa tsumhi iọgbọ vhi ingmobe le.”²²Rhẹmhi a mẹ ena kwu khi a rhọ rhi emeni Ọnọmhuẹyẹ ọ te unu ọbolẹ ngme, ni ọọ rhọ ẹẹ li, ²³Ghe, ọkpotso ni ọ vha yẹsẹ ọmọse nee, ọ la laa mẹ ọ vyia ọmọ ọmọse ni a laa kee lu (Imanuẹlẹ”)—ni o ngme khi, “Ishinẹgba ọ nu eyẹ la.”²⁴Ijosẹfu ọ te ovhesẹ vue ọa khyiẹlẹ abhi ọni aghyiukọ Ọnọmhuẹyẹ ọ ngme khasẹ ọli, ọọ liyọ rhue ọli abhi ugwhẹ ọli. ²⁵Ama ọ vha degbe chi mama ọli shi imẹ egbe ọkpotso ali ọmọse rhili apfishi ni ọ rhọ vyia ọni ọmọ ọmọse. Ọọ lu ọli Ijesu.

¹Abhi a ke rhọ vyia Ijesu shi Ibẹtilihẹmu nẹẹ Ijudea ẹrhẹghẹ oghyie Ẹrọdu. Iọgbọ etsẹgbẹ e te obhoni ọwẹ ọ te a lasele (east) bhẹ vhi Ijerusalẹmu eẹ li. ²“Mhi gyhi ọni oghyie Ijusi ni a vyia ogbọ? Obhoni ọwẹ o te a lasele (east) li eyẹ te mẹ atata ọli, li eyẹ rhọ bhẹ khi eyẹ gbe ga nali. ³Abhi Ẹrọdu ni oghyie ọ ke rhọ suọ ona, egbe e vha gwee sheshe ọli ali Ijerusalẹmu kwu ni e nu ọli la.⁴Ẹrọdu ọọ nyalu eni e kpeda ughamhi ali eni ikọwe, ọ rhọ mhila wẹ, “Obho ẹẹ khi a lẹẹ vyia ọni Ikiristi shi? ⁵E ke sọ vhọ eẹ li, “Elemhi Ibẹtilẹhẹmu nẹẹ Ijudea, abhi ọbole ọ kẹkẹ shi ekẹ khi oyọ, ⁶‘Ghyiẹ, Ibẹtiẹhẹmu, ni o la Ijudea, ghyiẹ li u kpọkẹ ni eni e kpalo Ijudea, obọ ẹ li ọni ọ kpalo ọ te laa bhẹ ni ọ laa rhi iọgbọ mhẹ Izulẹ khasẹ odẹ."⁷Ayọ li Ẹrọdu ọ ke rhọ bẹna a nyalu eni e mhuẹ iyẹsẹ ni ọ rhọ mhila wẹ ẹrhẹghẹ ni oni atata o rhọ lẹ lase le. ⁸Ọọ ghyie wẹ je Ibatlẹhẹmu ni ọ rhẹ wẹ,, “Vha kaa nono ọni ọmọ tsu,tsu. Vha kha ke mẹ ọli, vha gwe a ngme khasẹ mhẹ khi mhi lia mẹ ọli mhi ke li gbega nali.’’⁹Abhi e ke rhọ suọ ingmemhi ni ọni oghyie ọ ngme, ee rhọ te odẹ wẹ vu, oni atata ni e mẹ obhoni ọwẹ o te a lasele (east) o kpalo na wẹ rhili apfishi ni o rhọ bhale a gbesọ asha ni ọni ọmọfẹ ọ la. ¹⁰Abhi e ke rhọ mẹ oni atata, oghẹlẹ o vu wẹ udu.¹¹Ee lono oni elemhi apfẹ e mẹ ọni ọmọpfẹ ali Imeli ni inyọ ọli; Ee nyẹsẹ egbe je ekẹ nali e gbega nali. E kweghyie ẹkpa wẹa e rhi isomopfa igolu ali itulale ni o kpela—kpela nali. ¹²Alo evhena Ishinẹgba ọ chi wẹ esọ khi imhẹli e liegbe a mẹ Ęrọdu, iyọ odẹ ovhese li e ke te liegbe je ẹvhue ni e kpọ te bhẹ.¹³Abhi e ke rhọ vu, aghyiukọ Ọnọmhuẹyẹ ọ bhẹ bhuli Ijosẹfu le elemhi ẹvhena ni ọ rhọ ẹẹ li, “Chi ekẹ vue, khi u rhue ọni ọmọpfẹ ọna ali inyọ ọli khi vha na je Ijipiti. Vha la ekayọ apfishi na mhi rhọ gwe laa gwu khasẹ vhẹ khi vha liegbe bhẹ, rharhi khi Ęrọdu ọ lẹẹ nono ọni ọmọ khi lẹ pfuse ọlia. ¹⁴Oni ẹliyọsẹ oyọ Ijosẹfu ọ rhue ọni ọmọfẹ ali inyọ ọli na je Ijipiti. ¹⁵Ayọ li e la rilili apfishi ẹrhẹghẹ ni Ęrọdu ọ rhọ gwhua. Ona li o rhi ọli tsẹ emeni Ọnọmhuẹyẹ ọ ke ngme te unu ọbolẹ, ni ọ rhọ ẹẹ li, “Elemhi Ijipiti lẹ mhi te nyalu omyi mhẹ.”¹⁶Abhi Ẹrọdu ọ ke rhọ mẹ khi eni e mhuẹ iyẹsẹ khi ee nwenyiẹ lẹ isuea, ofu o lẹẹ fu ọli ọ ke ghyie ichoja khi e gbolo ivhiẹ emọsea ni e la Ibẹtlẹhẹmu ali eni e la oni aloekẹ oyọ kwu ni e te ikpe eva kpiale ekẹ, ẹrhẹghẹ ni eni e mhuẹ iyẹsẹ e le khọkhọ khasẹ ọli eyọ.¹⁷Ona li o rhọ tsẹ emeni a ke te unu Ijẹremaya ni ọbolẹ ngme ni ọ rhọ ẹẹ li, ¹⁸A sokwu urhui elemhi Irama, khi ẹẹ vyie ali ukpokpomhi ọrhọ, Irichiẹli ọọ vyiẹ ni imyi ọ, ọ vha rhi egbe na ẹẹ lẹlẹ, rharhi khi e she gwhuloa.”¹⁹Abhi Ẹrọdu ọ rhọ gwhua, a kee ẹẹ khi a fẹẹ, aghyiukọ Ọnọmhuẹyẹ ọ bhẹ bhuli Ijosẹfu le vhi Ijipiti elemhi evhena ọọ li, ²⁰”Chi ekẹ vue khi u rhue ọni ọmọ ali inyọ ọli khi vha liegbe je ekẹ Izulẹ, rharhi khi eni e nono egwhuili ọni ọmọ e she gwhuloa. ²¹Ijosẹfu ọ vue ọ rhue ọni ọmọ ali inyọ ọli bhale vhi ekẹ Izulẹ.²²Ama abhi ọ ke rhọ suọ khi Achẹlausi li ọ ke la eghyiele Ijudea ni ita ọli Ẹrọdu ọ kpọ la, ulishi o lẹẹ nwu ọli khi ọ rhọ jilẹ je obholọ. Abhi Ishinẹgba ọ ke rhọ gwe la elemhi ẹvhena dọmhi ọ, ọ je aloekẹ Igalili. ²³Ọ ke a nyele ẹvhue ni ẹẹ lu Inazarẹti. Ona li o ke rhọ tsẹ emeni ebolẹ e kee kẹkẹ shi ekẹ ni e rhọ ẹẹ khi a laa lu ọli ọnyi Inazarẹti.

¹Eni egbẹlẹ eyọ, Ijọni ni ọọ batazi iọgbọ ọ bhẹ ọọ ngme ingmemhi Ishinẹgba vhi elemhi apata Ijudea ọọ li, ²”Vha nwegbe lieliẹ, rharhi khi aleghyie Ishinẹgba o she chi bhẹ.” ³Rharhi emeni ọbolẹ Ẹzaya ọ kpọ ngme obodẹ ọli khi ọna, ọọ li ẹẹ li, “Uruli li ọ kyia la vhi elemhi apata a sọse, vha nwegbe khẹ odẹ Ọnọmhuẹyẹ, vha khyiẹlẹ odẹ ọli sheshe.⁴Ede ni a te ekwẹ ilakwumhi fia li ọọ sọ, ọ gwe rhi ugbhogbho ẹkwẹ ẹlamhii nwu okwu. Initso ali iwọọ lẹ khi emanale ni ọ le. ⁵Ijerusalẹmu kwu, ali Ijudea kwu ali aloekẹ ni o gasẹ okẹ Ijodani e lase nali. ⁶Abhi e ke rhọ tanọ ingmobe wẹ, Ọọ batizimhi wẹ elemhi okẹ Ijodani.⁷Ama abhi ọ ke rhọ mẹ iọgbọ Ifarisisi ali Isadiusisi nebu khi ee bhẹ bhuli ọli le khi ọ batizi wẹwẹ, ọọ wẹ, “Vhẹvhẹ imyi enyẹ osuẹ, ọgwho ọ ke vhi vhẹ ude khi vha na ni ofu ni oa bhẹ? ⁸Vha mọ ikpamhi inwegbelieliẹ. ⁹Imhẹ vha sa khi vha la laa li ẹẹ li egbe vhẹ, ‘Eyẹ mhọli Ebulahamu ni ọ kyili ita eyẹ.” Ama mhi ẹẹ vhẹ khi Ishinẹgba ọ dobẹ nwu eni echẹ ena mela ivhiẹa ni Ebulahamu vyia.¹⁰A she rhi aghamhi kpẹ iji eni erhẹ. khi orhẹ ni o vha sheda mọ ikpamhi a laa tọ ọli gbe a no oni orhẹ kpẹ. ¹¹Mhi rhi ibatizimhi amẹ ni o kyili uwi inwegbelieliẹ a na vhẹ. Ama ọni ọ laa bhẹ kposhimhi na mhẹ li ọ fu dala mhẹ, Imha dobẹ laa taghyiẹ ọli ẹkwẹ owẹa. Ayẹmhẹ ni o Pfuasẹ ali erhẹ li ọ rhọ laa ke batazi agbọ. ¹²Ukpokpo ni ọ rhaa lumhi ido o la vhi obọ ni ọ te laa degbema yalọ emeni e la ekẹ ni ọ rhọ laa shi ẹkọmhi. Ọ rhi erhẹ ni e vhaa pfua tosẹ ichichi wẹa.”¹³Ijesu ọ ke te Igalili bhẹ vhi okẹ Ijodani khi Ijọni ọ batizi lẹ. ¹⁴Ijọni ọ vha ẹẹ nono khi lẹ batazi ọ, li ọ rhọ ẹẹ li, “Ghyiẹ li u kha batizimhi mhẹ, see u ke lia bhẹ bhui mhẹ le? ¹⁵Ijesu ọ sọ vhọ, ọọ li, “Dobẹ ọli kyia yọ nena, rharhi khi o dea khi eyẹ rhi odẹ aghyie kwu tsẹ.” Iyọ Ijọni ọọ lama batazi ọ.¹⁶Abhi ọ ke rhọ batizi pfuse, Ijesu ọ te okẹ lasele ayayayọ, a kee ẹẹ khi ẹẹ fẹẹ, eda o gweghyiea nali. Ọ mẹ Ayẹmhẹ Ishinẹgba oo kpiale abhi ugbekwhukwhu bhuli ọli le ọa khyiẹ nya vhi egbe. ¹⁷Ghe, urhui o te idane ngme, “Ọna khi omyi mhẹ ni ọ gwhẹ mhẹ, egbe ọli e maa nwu mhẹ

¹Iyọ Ayẹmhẹ ọ rhue ọli je ekẹ apata ni okhyio ọ la lẹẹ nwu ọli fẹẹ. ²Abhi ọ ke rhọ pfi azumhi ẹlẹ egbhọ eva ẹlogota ali ẹliyọsẹ, okyiamhi o kee gbe ọ. ³Ọni ọ lẹẹ nwu ọli fẹẹ, ọ bhẹ ọọ li, “O kha kyila khi ghyiẹ khi ọni Omyi Ishinẹgba, wẹ ẹẹ li eni echẹ ena e mela ukphakpha.” ⁴Ama Ijesu ọọ kee sọ vhọ, ọọ li, “Oo la akẹkẹshekẹ, ‘khi ọgbọ ọ vha nyele a ni emenale logwho, ama ingmemhi kwu ni e te unu Ishinẹgba lasele.”⁵Iyọ ọni okhyio ọ ke rhue ọli je ẹvhue ni o pfuasẹ ọ rhi ọli nya atsẹghẹmhi ukhomhi owuka. ⁶Ọọ li, “O kha kyia khi ghyiẹ khi ọni Omyi Ishinẹgba da kwu ekẹ rharhi khi o la akẹkẹshekẹ, “Ọ la rhi ọda ni eni ighyiukọ ọli khi e rhi eloe kwu ẹ, e rhi abọ yasẹ ẹ vhi ekẹ khi uu ke kpi owẹ shi ẹchẹ.⁷Ijesu ọọ ke ẹẹ li, O gwe la akekẹshekẹ ‘’Imhẹ nwu Ishinẹgba ni ọ mhọli ẹ imhasẹ. ⁸Okhyio ọ gwe rhue ọli shele je atsẹghẹmhi ukhomhi ọkpha, ọ rhi ọli khasẹ eghyiele ukhomhi ekagbọ kwu, ali ikiki ni e la. ⁹Ọọ li, ena kwu mhi laa rhọ nẹẹ, ni u sheda nyẹsẹ egbe tarhugwhu gbega na mhẹ.¹⁰Ijesu ọọ ke ẹẹ li, “Vu ana le na mhẹ, ghyiẹ okhyio! rharhi khi a kẹkẹ ọli shi ekẹ, ‘Ọnọmhuẹyẹ ni Ishinẹgba lọgwho la gbega a na. ¹¹Okhyio ọ ke pfi ọ shi ayọ vu, ọ kee ẹẹ khi lẹ fẹẹ, ighyiukọ e rhọ bhale a gbega nali.¹²Abhi Ijesu ọ ke rhọ suọ khi a she nwu Ijọni, ọọ liegbe je Igalili. ¹³Ọ te Inazarẹti vu je Ikapaniọmu a nyele, ni o chi mama okwu Igalili aloekẹ Izẹbulọ ali Inaftali.¹⁴Irhẹmhi a mẹ ona khi emeni a ke te unu ọbolẹ Azaya ngme o kẹ tsẹ. ¹⁵”Aloekẹ Izẹbulọ ali aloekẹ Inaftali ni e chi mama okwu, ọkpeda ni Ijodani nẹẹ Igalili ni o kpẹ Ijẹtasi, ¹⁶Iọgbọ ni e shitọ aloebi, e she mẹ ukpokpomhi ufulọ, li shi eni e shitọ oni aloekẹ ali arhorho egwhi, ufulọ o she nya rhugwhu wẹ.”¹⁷Rhọ te oni ẹrhẹghẹli oyọ bhẹ li Ijesu ọ ke tee ngme ingmemhi Ishinẹgba, “Vha nwu egbe lieliẹ khi aleghyie oweda o she chi bhẹ.¹⁸Abhi ọ ke rhọ te esọ okwu Igalili lẹẹ dọsẹ, ọọ mẹ ọgbọ ali inyọgwho ọli, Isamọni ni a gwe lu Ipitẹ, ali Adulo ni inyọgwho ọli, e pfi iga ẹẹ lo okẹ rharhi khi eni e gbe ifẹ li e kyia. ¹⁹Ijesu ọọ wẹ, ‘‘Vha bhẹ rhọ khẹ mhẹ, khi mhi rhẹ vhẹ kyili egbe iọgbọ vhi ifẹ. ²⁰Ayayayọ e dobẹ iga wẹ ni e rhọ rhọ khali ọli vu.²¹Abhi Ijesu ọ ke rhọ gwe te ayọ ẹẹ vuu, ọ gwe mẹ ọgbọ ali inyọgwho ọli, Ijemhisi omyi Izẹbẹdẹ ali Ijọni ni inyọgwho ọli, ọni Izẹbẹdẹ ni ita wẹ li e nu la ọkọ ẹẹ naghyiẹ iga wẹa. Ọọ nyalu wẹ. ²²E vha nwu inana ni e rhọ dobẹ oni ọkọ ali ita wẹ ni e rhọ rhọ khali ọli vu.²³Ijesu ọ lẹẹ kyia kyia vhi elemhi Igalili kwu, ọọ wẹna wẹ vhi ewuka, ọọ ngme ingmemhi Ishinẹgba ni e kyilii iyi aleghyie, ọọ rhue iọgbọ igwhuamhi ọdọdọda vhi egbe le. ²⁴Ingmemhi ọli o ga ekẹ Isiria kwu, eni iọgbọ e rhi eni e gwhua ẹẹ ghyi ọ, ali eni e vha ze ali eni e mhuẹ ọtomhẹ igwhamhi ọdọdọda, shi eni iyẹmhẹ ebe e la egbe, shi eni idukpakpa ee to, ali eni e kyishi. Ijesu ọ gaa myie wẹwẹ kwu pfuese. ²⁵Iọgbọ nebu e rhọ te Igalili rhọ khali ọli, shi Idekapolisi, ali Ijerusalẹmu ali Ijudea, ali a dọsẹ Ijodani.

¹Abhi Ijesu ọ ke rhọ mẹ oni agbaa khi o le gba, ọọ shele ukhomhi ọkpha. abhi ọ ke rhọ shitọ, eni idibo Ijesu e bhẹ bhuli ọli le. ²Ọọ kweghyie unua ọọ wena wẹ owẹna, ọọ wẹ, ³”Ivọsẹna khi uwi eni anya ayẹmhẹ ọa gbe, rharhi khi owileghyie o laa kyili uwẹ wẹ. ⁴Ivọsẹna khi uwi eni e lẹ ọrhọ, rharhi khi a la laa zeze wẹ idu.⁵Ivọsẹna khi uwi eni e pfọmhẹ, rharhi khi e la laa le oni ukhomhi ekẹ agbona ukwu. ⁶Ivọsẹna khi uwi eni okyiamhi ali okyiamẹ ipfuasẹ ọa gbe, rharhi khi e la laa kwhe. ⁷Ivọsẹna khi uwi eni e mhuẹ ivhẹlemhi, rharhi khi e la laa mẹ ivhẹlemhi. ⁸Ivọsẹna khi uwi eni e chẹma vhi idu, rharhi khi e la laa mẹ Ishinẹgba.⁹Ivọsẹna khi uwi eni e rhi ọpfọmhẹ a bhẹ, rharhi khi a la laa lu wẹ imyi Ishinẹgba. ¹⁰Ivọsẹna khi uwi eni a zẹ okwhẹ kpẹsẹ rharhi igwabhagbe wẹ, owileghyie o laa kyili uwẹ wẹ.¹¹Ivọsẹna khi uwi eni iọgbọ e zẹnọ ẹnwẹ a na, ni a gwe zẹ okwhẹ kpẹsẹ, ọa liyọ e ngme irọkhọli ingme a kwu wẹ rharhi mhẹmhẹ. ¹²Kee ghẹlẹ egbe ea nwu ẹ, rharhi ukpokpomhi elele o mugha a khẹ vhi owileghyie. Oni odẹ ona li iọgbọ e kpọ te zẹ okwhẹ kpẹsẹ ebolẹ ni e kpalo na vhẹ.¹³Vhẹvhẹ khi ugbhele oni agbona. Oni ugbhele o kha ke wasẹ ivyiọlọ ọlia, see o ke gwe lia vyiọlọ? ọ vha gwe a mhuẹ emeni a rhi ọli a li. Irhẹmhi a kee tsua ọli a kwa agbọ e rhi awẹ nwuno ọli dọsẹ a lẹẹ. ¹⁴Vhẹvhẹ khi ufulọ agbọ. Ẹvhue ni e nyele ukhomhi ọkpha e vha gbhagbha.¹⁵Wẹ khi rhẹmhi iọgbọ e rhi ufulọ a rhu e ta ugwhugwhu gwese ọ, ama irhẹmhi a rhi ọli a shi ogenete, khi o gẹẹ ni iọgbọ kwu ni e la oni apfẹ. ¹⁶Vha dobẹ ufulọ vhẹ gẹẹ kwu iọgbọ kwu khi e kẹ mẹ ikanya aghyie ni vhaa gbe khi e kẹ chichi Ita vhẹ ni ọ la owaileghyie.¹⁷Imhẹ vha sa khi irhẹmhi bhẹ a gwhọghọ ishia wẹ khi eni ebolẹ. imha bhẹ a pfuẹchẹ wẹa, rhẹmhi bhẹ a rhẹ wẹ tsẹ. ¹⁸Rharhi ingmaghyie mhi ngme khasẹ vhẹ, apfishi ni ekẹ ali idane e rhọ laa dọsẹ, a vha la rhue ukpamhi ingme ogwho vhi eni ishi le, sẹkẹnẹ khi rhẹmhi wẹwẹ kwu e gaa tsẹ.¹⁹Iyọ ọni ọ laa gbe ushi ni o shẹ nẹ kwu vhi elemhi eni ishi ena, ọa liyọ ọ wẹna khasẹ iọgbọ khi e gbe wẹa, a laa lu ọli ọni ọ kpe ijawẹ vhi owileghyie. Ama ọnọni ọ laa rhẹ wẹ gwhẹ ọ gwe wẹna iọgbọ wẹwẹ, a la laa lu ọli ọkatsu elemhi aleghyie oweda. ²⁰Ingmaghyie mhi ngme khasẹ vhẹ, sẹkẹnẹ khi igwabhagbe vhẹ rhẹmhi o fu dala igwabhagbe eni ikọwe ali Ifarisisi, vhavha laa dobẹ lo owileghyie Ishinẹgba.²¹Vha she suọ khi a ngme khasẹ wẹ ẹrhẹghẹ ni o dọsẹ khi, “Imhẹ gbe ugbee” rharhi khi ọni ọ gbe ubgee ọ la laa la okhẹna ẹzọ. ²²Ama mhi ngme khasẹ vhẹ khi ọni ọ laa rhi ofu inyọgwho ọli shi elemhi ọ la laa la okhena ẹzọ: Abagwhoyọ, ọgbọ ni ọ laa li ẹẹ li inyọgwho ọli, ‘Ghyiẹ ọgbọ apfuẹ! ọ la laa la okhẹna eni ea mhasẹ, ọni ọ ke laa li ẹẹ li Ghyiẹ adẹkẹ ọ la laa la okhẹna owerhẹ.²³Rharhi ona, u kha mhuẹ emeni u rhọ laa fofo vhi ukhomhi ọta khi u ke sato khi inyọgwho ẹ ọ rhi ofu ẹ shi elemhi, ²⁴Dobẹ oni isomhopfa ẹ shi odalo oni ọta, khi u vu kpọ a nu inyọgwho ẹ rhọ sheshe nee neni u bhẹ a rhi isomhopfa ẹ fofo.²⁵Nu ọni ọ khi u lue na lẹ rhọ sheshe ayayayọ neni vha gaa je owẹzọ, ọni ọ khi u lue na lẹ ọọ ke ji ẹ abọa ni ọni ọ yẹsẹ ushi to ẹ abọ lo ogba igwhumha. ²⁶Egbegbe ingme mhi ngme khasẹ vhẹ, u wa mhuẹ te ekẹ ayọ a lase gwhe sẹkẹnẹ khi irhẹmhi u pfuse ikpaghọlọ ni e kpọẹ ẹ le kwua.²⁷Vha she suọ khẹ khi, imhẹ vha yẹ odọsẹ. ²⁸Ama mhi ngme khasẹ vhẹ khi ọni ọ laa bino ọkpotso dọsẹ ọ sa isamhi iditsia obodẹ ọ, ọ she rhi udu ọli dọsẹ ọli vhi egbe.²⁹O kha kyia khi ukpẹloe obita ẹ li o laa rhẹ dee, zọlọ ọli pfia. O ti khi opfọgwho ijegbe ẹ khi o li opfua dala khi u rhi ijegbe ẹ kwu je owerhẹ. ³⁰O kha ke kyia khi obọ obita ẹ li o rhẹ laa deẹ, khyi ọli pfia. Rharhi khi o ti khi u zẹ ukhyikhyi ijegbe dala u rhi ijegbe ẹ kwu lo owerhẹ.³¹Aa ngme ọ, khi ọni ọ sheda laa kwhu ogwhẹ ọli, ọ kẹkẹ ebe ivugwhẹ nali. ³²Ama mhi ẹẹ vhẹ, ọnọni ọ sheda laa kwhu ugwhẹ ọli, ina khi rhẹmhi ọ gbe iditsea ọkpotso ali ọmọse, lọ zẹ ni ọ rhọ odọsẹ: abagwhoyọ ọni ọ laa mhọli ọni a kwhu ugwhẹ rhẹmhi ọ odọsẹ ọli vhi egbe.³³Abagwhoyọ, vhaa gwe suọ khi a gwe ngme ẹrhẹghẹ ni o dọsẹ, “Imhẹ rhi egbe ẹ rhomhi ilimhi, ama rhi Ọnọmhuẹyẹ rhomhi. ³⁴Ama mhi ẹẹ vhẹ, imhẹ gaa rhomhi pẹẹ pẹẹ wẹ khi eghyiele Ishinẹgba li u rhọ rhomhi, rharhi lẹ khi utekwu eghyiele ọli: ³⁵wẹ khi ekẹ, rharhi li Ishinẹgba ọ rhi awẹ nya: wẹ khi Ijerusalẹmu, rharhi lẹ khi ẹvhue oghyie nọfu.³⁶Wẹ khi ukhomhi ni u zẹ, rharhi u waa dobẹ a khyiẹlẹ ugbagamhi utsu ogwho shi ọbishi shi ọpfuasẹ. ³⁷Ama dobẹ “Ee ẹ kyili Ee ẹ, ọa liyọ Obho ẹ o kyili Obho, ememeni e ke dala ona onobe li o ke kyia.³⁸Vhaa gwe sokwu ni a rhọ ngme, ‘ Ẹloe li a zẹ ashi ẹloe, ẹkọẹ li a zẹ ashi ẹkọẹ. ³⁹Ama mhi gwe ngme ọ khasẹ vhẹ, “Imhẹ chi egbe ni ọgbọ ọbe; Ọni ọ laa lase ẹ esọ ogwho, lieliẹ oni okpọẹ nali abagwhoyọ.⁴⁰A khaa mẹ ọni ọ nwu ẹ la je owa ẹzọ ọ myie ẹ awulu ni o kpọkẹ, li rhi awulu ni o kpeda ma vhọ. ⁴¹A khaa mẹ ọni ọ khi lẹ rhẹ la kyia okyiẹ imali ogwho, nu ọli kyia imali eva. ⁴²Ọni ọ mhila ẹ ẹtsẹkẹ, rhọ na, imhẹ sọ ọni ọ laa myie ẹtsẹkẹ ngmomhi oshimhi egbe.⁴³Vhaa gwe sokwu khẹ khi, ‘Vha mhọli ighọli ọgbọ nabhi ghyiẹ khi vha bhishi elemhi ẹbele vhẹ. ⁴⁴Ama mhi ẹẹ vhẹ, “Vha somhi elemhi ẹbele vhẹ kwu vha pfi olema a ni eni e rhi osueli a na vhẹ. ⁴⁵Khi vhaa kẹ kyili imyi ọni Ita vhẹ ni ọ la owileghyie. Rharhi khi lẹ li ọ rhi ọwẹ ọli a lasele ni ọgbọ ọbe ali ọgbọ aghyie, li ọ gwe rhi amẹ a rhuẹ rhugwhu eni e pfuasẹ ali eni e vha pfuasẹ.⁴⁶Rharhi vha kha somhi elemhi eni e somhi elemhi vhẹ, mhi ke gyhi elele ni vha ke laa mhuẹ vhọ? Emyionoga e vha mẹẹ lia liyọ? ⁴⁷Oo kha le kyia khi inyọgwho vhẹ lọgwho vhaa tsẹ, mhi gyhi oni vha ke rhọ dala iọgbọ evhese, Ijẹtasi e vha mẹẹ lia liyọ? ⁴⁸Elemhiyọ, egbe e nwẹmaa gba na vhẹ abhi egbe e li gba ni Ita vhẹ nẹẹ aleghyie.

¹Vha rhi ẹgbhẹ kyia khi vhaa ke gbe ikanya ipfuasẹ ukpẹloe agbọ rharhi khi e kẹ mẹ vhẹ, vha khaa liyọ, vhavha laa mhuẹ elele vhi obọ ọni Ita vhẹ ni ọ la aleghyie. ²Vha khaa somhi opfa imhẹ vha kphele okphẹ abhi enakẹmẹmhẹ ea li vhi elemhi ika ali ifuodẹ, khi agbọ e kẹ chichi wẹwẹ. Ingmaghyie mhi gwu khasẹ vhẹ, e she myie elele wẹ obobobọ.³Vha kha laa somhi opfa, imhẹ vha dobẹ obọ ọgobọ yẹsẹ opfa ni vha rhi obọ obita somhi. ⁴Iyo isomopfa vhẹ o kyili obena. Iyo Ita vhẹ ni ọ yẹsẹ emeni e la ogbhagbha ọ laa rhi elele na vhe.⁵Ama vha khaa pfi olema, imhẹ vha liabhi enakẹmẹmhẹ, rharhi khi e maa nono khi wẹwẹ e ke tonomugha elemhi ika pfi olema ali ifuodẹ, khi agbọ e kẹ kee mẹ wẹwẹ. Ingmaghyie mhi ngme khasẹ vhẹ, e she le myiẹ elele wẹ obobobọ. ⁶Ama, vhẹvhẹ, vha khaa la pfi olema, vha kee lono elemhi ewa. Gwese edẹ, khi vha pfi olema bhuli Ita vhẹ ni ọa mẹ ogbhagbha. Ita vhẹ ni ọa mẹ ogbhagbha ọ laa rhi elele na vhẹ. ⁷Vha khaa pfi olema, imhẹ vha khyiẹlẹ ingme ngme iti ingmẹ abhi Ijẹtasi ea li, rharhi khi e khọkhọ khi ikhyiẹlẹ ingme ngme iti ingmẹ la te laa sokwu wẹwẹ.⁸Elemhiyọ, imhẹ vha liabhi wẹwẹ, rharhi khi Ita vhẹ ọ yẹsẹ emeni vhaa nono neni vha mhilali. ⁹Elemhiyọ, ina vha lia kee pfi olema: Ita eyẹ ni ọ la owileghyie, ipfuasẹ o kyili eva ẹ. ¹⁰Eghyiele ẹ o bhale, o kyili abhi o ghọli ẹ oni ekẹ ona abhi o li owileghyie.¹¹Rhọ ni eyẹ amo ena emenale ogbẹlẹ. ¹²yelea eta ni eyẹ loa ni eyẹ, abhi eyẹ li yelea ni eni e lo eyẹ eta . ¹³Imhẹ rhi eyẹ lo imhasẹfẹ, ama tsumhi eyẹ vhi ọnọbe le.¹⁴Rharhi ọni ọ vha yelea ni ọni ọ gbe gọ nali, Ita ọli ni ọ la owileghyie ọ vha laa yelea nali. ¹⁵Ama, ọni ọ ke yelea ni ọni ọ lue nali, Ita ọli ni ọ la owileghyie ọ laa yelea nali.¹⁶Abagwhoyọ, vha kha pfi azumhi, imhẹ vha nwu alo shi ukhomhi abhi enakẹmẹmhẹ ea li, rharhi khi irhẹmhi ea li wumawuma khi a kẹ mẹ khi wẹwẹ e pfi azumhi. Ingmaghyie mhi gwu khasẹ vhẹ, e she myie elele wẹ obobobọ. ¹⁷Ama vhẹvhẹ, vha kha pfi azumhi, rhi ovhili laghe ukhomhia, vha kpe aloa. ¹⁸Khi agbọ e ke yẹsẹ khi rhẹmhi vha pfi azumhi, sẹkẹnẹ khi Ita vhẹ ni ọ la ogbhagbha lọa yẹsẹ. Ọni Ita vhẹ ni oa mẹ emeni e gbhagbha ọ laa rhi elele na vhẹ.¹⁹Imhẹ vha sanọ ẹpfue vhẹ koko shi oni agbona. Ni ikẹlẹ ali igwhọgwhọ ea pfuchiẹa, wẹ khi asha ni ighyiatọ e dobẹ a gbea chi itsua. ²⁰Onochi, vha sanọ ẹpfue vhẹ koko shi owileghyie ni egbe vhẹ, ni ikẹlẹ ali igwhọgwhọ e vha te la pfuẹchẹ wẹa, wẹ khi ighyiato li e laa gbe odẹa lo do wẹ tsua. ²¹Rharhi khi asha ni ẹpfue ni vha mhuẹ e la, ayọ li isamhi vhẹ ọa la.²²Ukpẹloe lẹ khi ufulọ ijegbe. Elemhiyọ ukpẹloli vhẹ o kha ti, ijegbe vhẹ kwu ufulọ o ga vhọ. ²³Ama ukpẹloli vhẹ o vha ti, ijegbe vhẹ kwu e vọ ubili. Elemhiyọ, ufulọ ni o la vhẹ egbe o kha kyili ubili, oni ubili oyọ o ma laa gba! ²⁴Ọgbọ ọ vha dobẹ a ga ega ava, rharhi ọ khaa bishi elemhi ọgwho ọa somhi elemhi ọni ọ kpọẹ, oa liyọ ọ kha rhue ọgwho nẹẹ, ọ rhi ọni ọ kpọẹ shi ukpatsunu. Vhavha dobẹ a ga Ishinẹgba ali ọsuemhẹ.²⁵Elemhiyọ, imhẹ vha la ayele shi ingme agbọ vhẹ, shi emeni vha laa le ọa liyọ emeni vha laa da, wẹ khi emeni vha laa rhọ kwu egbe. A khi ayẹmhẹ lo mẹẹ dala emenale, ijegbe o dala ede? ²⁶Vhaa bino ipfele ni ea fiala eda gwhe. E vha rhọ kọ wẹ khi rhẹmhi ea kyiẹsẹ, wẹ khi rhemhi e rha shi ilu, ama Ita vhẹ li ọ rhọ na wẹ a le. Ama vhẹvhẹ vha nwu ẹloe da wẹ?²⁷Ọgwho elemhi vhẹ ni ọa kpokpo ni ọ dobẹ laa khyi ẹta owẹ shi iyagha ọli? ²⁸Elọ e ke zẹ khi ingme ede le ke a kpokpo vhẹ? Sa gwhe ebui ilili ni e la elemhi ebui, abhi e lia fu. e vhaa gbe ikanya wẹ khi rhẹmhi ea chi olu. ²⁹Mhi khyie gwe gwu khasẹ vhẹ, Asha ni Isolomọni ọ mhuẹ ọsuemhẹ rhamhi ọ vha mhọli ikiki abhi wẹwẹ.³⁰O khaa kyia khi Ishinẹgba ọ liyo rhi ede a kwu ebuli vhi egbe, ni o kyia khi e kha la vhọ amo, akọ a tsua wẹ kwu unogwho, see ọ vha ke li laa rhi ode kwu vhẹ egbe, vhẹvhẹ ni vha mhuẹ ukwukwu irhọshiọ? ³¹Rharhiyọ, imhẹ vha gwe kpokpo egbe, “Elọ eyẹẹ le? ọa liyọ elọ eyẹẹ da, ọa liyọ elọ eyẹẹ rhọ kwu egbe?³²Ijẹtasi ea nono eni ẹtsẹkẹ ena kwu. Ita vhẹ ni ọ la owileghyie ọ li yẹsẹ khi e li to vhẹ. ³³Vha kpọ dua aleghyie Ishinẹgbai ali igwabhagbe ọli, a la laa rhi eni ẹtsẹkẹ ena kwu ma ẹẹ vhẹ vhọ. ³⁴Rharhiyọ, imhẹ gwe sa isamhi akọ, rharhi khi akọ o laa rhi ẹloe kwhu egbe ọli, ogbẹlẹ kwu li o yẹsẹ abhi ọ li rhi ọkphakphamhẹ ọli a kyia

¹Imhẹ vha gwu ọgbọ ezọ, khi a ke li gwu vhẹ ẹzọ. ²Rharhi abhi vha li sọ ọgbọ unu ẹzọ iyọ li a li laa sọ vhẹ vhi ẹzọ. rharhi khi emeni vha rhọ mhasẹ ni ọgbọ li a li rhọ laa mhasẹ na vhẹ.³See vha ke lia bino unanalo ni o la ọzeva vhẹ vhi ẹloe, ama ni vhavha ke rhọ lia mẹ ufolorhẹ ni o pfi gbe vhi uwẹ vhẹ? ⁴See vha ke li a li ẹẹ li inyọgwho vhẹ, ‘Dobẹ mhẹ rhue ukwu ni o la ẹ vhi ẹloe le, ni o kyia khi ufolorhẹ o li la uwẹ vhẹ? ⁵Vhẹvhẹ enaKẹmẹmhẹ! Vha kpọ rhue ufolorhẹ ni o la vhẹ vhi ẹloe le ne, khi vha chigbe mato mẹ ukwu ni o la inyọgwho vhẹ vhi ẹloe.⁶Imhẹ vha rhi emeni e pfuasẹ ni iweshi, wẹ khi rhẹmhi vha kwu eka vhẹ shi ekẹ a ni igwulu. O kha liyọ irhẹmhi e rhi awẹ a nwuno wẹ shi ekẹ, e chigbe liegbe bhuli vhẹ e tsẹkẹ vhẹ kwa.⁷¹⁰Vha mhila, a la laa rhọ na vhẹ. Vha nono, vha la laa mẹ. Vha kphele odẹ, a la laa kweghyiea na vhẹ. ⁸Rharhi ọni ọ mhila kwu, laa rha na, ọni ọ nono, ọ la laa mẹ, ọni ọ ke kphele odẹ, a la laa kweghyiea nali. ⁹Ọa liyọ, a mẹ ogbo vhi elemhi vhẹ, ni omyi ọli ọ laa mhilali ukphakpha ọ tsua ẹchẹ nali? 10Ọa liyọ ọ kha mhilali afẹ, ọ nwu ẹnyẹ nali?¹¹Elemhiyọ, vhẹvhẹ ni vha kyili iọgbọ ebe vha kha ke yẹsẹ abhi a li rhi isomhopfa ni e ti a ni imyi vhẹ, see Ita vhẹ ni ọ la elemhi aleghyie ọ vha ke li laa rhi emeni e ti li ni ọni ọ mhilali? ¹²Elemhiyọ, ememeni vha nono khi iọgbọ e kyhiẹlẹ na vhẹ, vha li kyhiẹlẹ ọli na wẹ, rharhi khi ona lẹ khi ushi eni ebole.¹³Rhọ te obunuodẹ ni a pfiko lo, rharhi khi obunuodẹ ni o vhẹ ni o li gbhaghyia li o kwa shi epfua, ama iọgbọ ebubu li e rhọ te vhọ a dọsẹ. ¹⁴Rharhi khi obunuodẹ ni o je odẹ agbọ rhẹmhi o li pfiko o li ghọnya, ghọnya, ikwkwu iọgbo li e mẹ ọli.¹⁵Vha mhuẹ ẹgbhẹ shi ebolẹ ighagha, ni ea bhẹ bhuli vhẹ le e rhi ekwẹ isumha kwu egbe, ni a kha rhẹ yẹsẹ khi idumhi ni a khẹna li e kyia. ¹⁶Ikpamhi erhẹ wẹ li a te a yẹsẹ wẹ. Igba ọkphẹkphẹ li a te a pfanọ ilomu, la khi ukhẹkha li a te a pfanọ ikpamhi orhẹ ifighi? ¹⁷Abagwhoyọ, orhẹ onaghyie kwu li ọa mọ ikpamhi aghyie, ama orhẹ obe ọa mọ ikpamhi ebe.¹⁸Orhẹ aghyie o vhaa mọ ikpamhihi ebe, wẹ khi orhẹ obe li ọa mọ ikpamhi aghyie. ¹⁹Orhẹ kwu ni o vhaa mọ ikpamhi ni e ti, irhẹmhi a tọ ọli a gbe, a pfi ọli lo erhẹ. ²⁰Rharhiyọ, ikpamhi wẹ vha te laa yẹsẹ wẹ.²¹A khi ọgbọ kwu ni ọ mhẹẹ, Ọnọmhuẹyẹ, Ọnọmhuẹyẹ li ọ laa lo eghyiele oweda, sẹkẹnẹ khi eni e khyiẹ emeni Ita mhẹ ni ọ la oweda ọ nono. ²²Oni o ogbẹlẹ iọgbọ ebubu, e laa li ẹẹ mhẹẹ, ‘Ọnọmhuẹyẹ, Ọnọmhuẹyẹ, eyẹ vhẹ mẹ rhi eva ẹ ngme emeni e gbhagbha lasele, eyẹ vha rhi eva ẹ kwhu iyẹmhẹ ebe kwa, eyẹ vha mẹ rhi eva ẹ gbe idudumhi ikanya inyaloa? ²³Iyọ, mhi la laa la ogbolo ngme khasẹ wẹ “Imha yẹsẹ vhẹ! vha chi mhẹ ana le vhẹvhẹ e li uvhaza!’²⁴Elemhiyọ, ọgbọ kwu ni ọ suọ ingmemhi mhẹ, ni ọ rhẹ wẹ gbe, ọ la laa liabhi ọgbọ ọtsẹgbhẹ ni ọ ma owa nya ukhomhi agbhẹ. ²⁵Amẹ o rhuẹ, ikpho e na, ikpekpe e pfi, e jigyhi oni owa ama o vha de gwọghọa, rharhi khi a tọ nya ukhomhi agbhẹ.²⁶Ama khi ọgbọ kwu ni ọ suọ ingmemhi mhẹ ni ọ vha rhẹ wẹ gbe, ọ la liabhi adẹkẹ ni ọ ma owa nya ukhomhi ekhashẹ. ²⁷Amẹ o kpiale, ikpho e bhẹ, ‘ikpekpe e pfi, e jigyi oni owa, o de, o bhale a kyili idemhi otọgbe.²⁸Abhi Ijesu ọ ke rhọ ngme eni ingmemhi ena pfuse, owena ọli o nya eni agbaa ni e legbaa aloa. ²⁹Rharhi khi ọọ lẹẹ wẹna wẹ abhi ọni a rhi unu na, a khi enabhi ikọwe wẹ e wẹna agbọ eyọ.

¹Abhi Ijesu ọ ke rhọ te ukhomhi ọkpha kpiale, iọgbọ ebubu e rhọ khali ọli. ²A kee ẹẹ khi ẹẹ fẹẹ, ọni efafe e nwu ọ bhẹ bhuli ọli le ọ nyẹsẹ egbe nali, ọọ li, “Ọnọmhuẹyẹ, o ghọli ẹ, khi u rhẹ mhẹ pfuasẹ.” ³Ijesu ọ rhi obọ chi ọ, ọọ li, “O gwhẹ mhẹ; pfuasẹ, “Udomhija, ọ pfuasẹ efafe ni e nwu ọ e kpila vhi egbea.⁴Ijesu ọọ li, “Imhẹ ngme khasẹ ọgbọkhọgbọ; rhọ te odẹ ẹ, khi u rhi egbe a khasẹ eni e kpeda ugamhi khi u rhi isomhopfa fofo ni imozisi ọ li khi a rhọ fofo, u rhi ọli fofo khi o myie ọtsẹ khasẹ wẹ nẹẹ.⁵Abhi Ijesu ọ ke rhọ lo elemhi ikpaniumu, ọni ọ tsua ichoja kpalo, ọ lemali. ⁶Ọọ li, “Ọnọmhọli, ọgamhẹ ọ vheseshi apfẹ ọa gwhua onaghyie, onaghyie, rhẹmhi ọ gwhoghọa shi ekẹ.” ⁷Ijesu oọ li, “Mhia bhẹ khi mhi kaa rhi oli ze.”⁸Ọni ọ tsua ichoja kpalo ọ ke sọ vhọ ọọ li, “Ọnọmhọli, imha tẹ ni u waa lo apfẹ mhẹ le, le ngme oni ingme khi ọni ọgamhẹ ọ laa ze. ⁹Rharhi khi ọni ọ mhasẹ a bhẹ lẹ mhi kyia, mhi mhuẹ ichoja na mhi mhasẹ a na. Mhi khẹ li ghyiẹ, “Vu, rhẹmhi ọa vu, mhi gwe ẹẹ li ọvhese, “Bhẹ, rhẹmhi ọa bhẹ, mhi kha rhẹ gwe ẹẹ li, ọgamhẹ, ‘kyhiẹli ona, rhẹmhi ọa kyhiẹlẹ ọ.” ¹⁰Abhi Ijesu ọ ke rhọ suọ ona, o nya ọli aloa, li ọ rhọ ngme khasẹ eni e rhẹ khali ọ, “Ingmaghyie mhi ngme khasẹ vhẹ, o kha rhẹ kyia elemhi Izulẹ imha mẹ ọgbọ ni ọ mhuẹ irhọshiọ onana gwhe.¹¹Mhi ngme khasẹ vhẹ, iọgbọ nebu e la laa te obhoni ọwẹ o te a lasele (east) bhẹ ali obhoni o te a lo ekẹ {west}, e gba gasẹ itebu Ebulahamu, Aiziki ali Ijekọpu elemhi aleghyie oweda. ¹²Ama a laa pfino imyi aleghyie kwu lono alo ebili asha ni e laa ke vyiẹ e rhi akọ a le akọ. ¹³Ijesu ọọ li ọni ọga ichoja, “Kee lẹ! abhi u li mhuẹ irhọshiọ ena, iyọ o li la kyia nẹẹ” oni ẹrhẹghẹ ni ọ rhọ lee ngme yọ eyọ, li ọni ọgamhẹ ọ rhọ lee ze.¹⁴Abhi Ijesu ọ ke rhọ lo apfẹ ipitẹ le, ọ bhale a vhẹ khi ọgọ Ipitẹ ni ọkpotso ọọ gwhua igwhuamhi iba. ¹⁵Ijesu ọ rhi obọ chi ọ, oni igwhamhi o chi ọ vhi egbe le, ọ chi ekẹ vue, ọ khyiẹli ẹmenale na wẹ.¹⁶Abhi ogbode o ke rhọ le, a rhi iọgbọ ni iyemhẹ ebe e la egbe bhuli Ijesu le, ingmemhi unu li ọ rhọ kwhu wẹ kwa, ọ chigbe rhi eni e kpọẹ kwu ni ee gwhua ze. ¹⁷Iyọ, ona li a rhọ rhi oni ingmemhi tsẹ emeni ọbolẹ Azaya ọ ke ngme, ni ọ rhọ ẹẹ li “Lọọ te egbe ọli myie eyẹ igwhamhi kwa ọ tsua ọtomhẹ eyẹ kwu.¹⁸Abhi ọ ke rhọ mẹ iọgbọ nebu e gba gasẹ lẹ, ọọ wẹ, wẹwẹ e liegbe je esọ okwu Igalili ni o kpọẹ. ¹⁹Akọwe ọ bhẹ bhuli ọli le, ọọ li, “Ọwẹnagbọ, mhi rha khali ẹ je obhoni u waa je kwu.” ²⁰Ijesu ọọ sọ vhọ, “Inyaka e mholi ese, ipfele ni ea fiala eda, e mhuẹ ikolo, ama Omyi Ọmọse ọ vha mhuẹ asha ni ọ de ukhomhi a gbe.”²¹Ọvhese elemhi eni e rhẹ khali ọli, ọọ li, ''Ọnọmhọli, dobẹ mhẹ kpọ a rhi ita mhẹ tọ nee.'' ²²Ama, Ijesu ọọ ke sọ vhọ, ọọ li, ''Rhọ khẹ mhẹ nee, khi u dobẹ eni e gwhu rhi ilimhi wẹ tọ.’’²³Abhi Ijesu ọ ke rhọ lo ọkọ, idibo ọli ee li rhọ khali ọli lo oni ọkọ. ²⁴A kee ẹẹ khi ẹẹ fẹẹ, ududumhi akpekpe o lo oni okẹ, akpakpa o gwese oni ọkọ. Ama oni ẹrhẹghẹ ovhesẹ o uwu Ijesu. ²⁵Eni idibo ọli e ke bhẹ bhuli ọli le ee vu ọli ovhesẹ, eẹ li, ''Tsumhi eyẹ Ọnọmhọli, khi eyẹ laa gwhuloa!''²⁶Ijesu ọọ wẹ, Elọ e rhi ulishi a nwu vhẹ, vhẹvhẹ ni vha mhuẹ ukwukwu irhọshiọ?'' Ọ chi ekẹ vue ọ va nya oni akpekpe ali oni okwu ukhomhi. Ayayayọ ashakhasha o li kpekpe. ²⁷Oni ingme o nya eni iọgbọ aloa eẹ li, ''Uvhali ọmọse ni ọgwho ọna ọ kyia ena, li shi akpakpe ali okwu ni e rhọ li suọ esọ a nali?''²⁸Abhi Ijesu ọ ke rhọ bhẹ vhi esọ ẹvhue ni o kpọẹ, aloekẹ Igadarẹnẹsi, ikwhumhava ni iyẹmhẹ ebe e mhasẹ naa e bhẹ bhuli ọ le, ifu uji li e tee lasele e nwemaa ze ukhomhi, ni a vha ke rhọ gwe jilẹ te oni odẹ oyọ dọsẹ lẹẹ lẹ asha. ²⁹Ee sọse, eẹ li “Elọ eyẹ rhẹ a kyhiẹ, Omyi Ishinẹgba? Rẹmhi u bhẹ vhi ana la rhi osuẹ ni eyẹ neni oni ẹrhẹghẹ o rhamhi?”³⁰Igwulu nebu e la ayọ ẹẹ le emenale, e vha nuẹ ata shi wẹ egbe. ³¹Eni iyẹmhẹ ebe e ke khyie lee lema Ijesu ẹẹ li “U kha la kwhu eyẹ lasele, kwhu eyẹ a kwu elemhi eni igwulu ena” ³²Ijesu ọọ wẹ, “vha vu!” eni iyẹmhẹ e lasele ea lono elemhi eni igulu eyọ vhi egbe. A ke ẹẹ khi ẹẹ fẹẹ, Eni igulu kwu e nanọ kpiale a dena kwulo okwu, amẹ o gbolo wẹa.³³Eni e rhi eni igwulu le, egbhia kwa, e na je elemhi ẹvhue, ea ngme emeni a mẹ, oo rhọ gbe emeni a mẹ obodẹ eni e mhọli iyẹmhẹ ebe. ³⁴A ke ẹẹ khi ẹẹ fẹẹ, eni ẹvhue kwu e lasele e bhe bhui Ijesu le. Abhi e ke rhọ mẹ ọ, e lemali khi ọ vu oni aloekẹ wẹwẹ oyọ le.

¹Ijesu ọọ ke lo ọkọ, ọ da okẹ bhẹ vhi ẹvholi ọ. ²A ke ẹẹ khi ẹẹ fẹẹ, e tsua ọmọse shi ivhia bhẹ ni ọ gwọghọa. Abhi ọ ke rhọ mẹ irhọshiọ ni e mhuẹ, Ijesu ọọ li ọni ọmọse ni ọ gwoghọa, “Omyi mhẹ ni ọmọse, kwualoa. ingmobe ni u li a she yele wẹa.nẹẹ”³Iyọ, ikowe egwho ni e la elemhi wẹ ee ke nu egbe ngme, “Ọni ọmọse ọna ọa pfino inua.” ⁴Ijesu ọ yẹsẹ emeni e sa vhi idu li ọ rhẹ wẹ, “See vha ke lia sa onobe vhi elemhi idu vhẹ? ⁵Mhi ghe oni o kẹlẹ nẹẹ ni a kha ẹẹ li, “A shẹ yele ingmobea nẹẹ, ‘la khi “Chi ekẹ vue khi u ke kyia’? ⁶Ona li u ke rha yẹsẹ khi Omyi Ọmọse ọ mhuẹ izemhi ni ọ rha yele ingmobea ni iọgbọ oni ukhomhi ekagbona, ọọ li ọni ọ gwhọghọa, “Chi ekẹ vue, tsua ivhia ẹ khi u kee je apfẹ.”⁷“Iyọ ọni ọmọse ọ chi ekẹ vue ọ je apfẹ ọli. ⁸Abhi eni ebubu iọgbọ e ke rhọ mẹ ona, o nya wẹ aloa ee chichi Ishinẹgba, ni ọ rhi izemhi onana ni iọgbọ. ⁹Ijesu ọ ke te ayọ a dọsẹ, ọ mẹ ọgbọ ni ẹẹ lu Imachiu ni ọ shitọ asha ni emyionoga e la. Ọọ li, “Rhọ khẹ mhẹ” ọ chi ekẹ vue ọ rhẹẹ khali ọ.¹⁰Abhi Ijesu ọ ke rhọ shitọ apfẹ le emenale, a ke ẹẹ khi ẹẹ fẹẹ, emyionoga nebu ali elingmobe e bhẹ a nu Ijesu ali idibo ọli le emenale. ¹¹Abhi iọgbọ Ifarisis e ke rhọ mẹ ona, eẹ li, eni idibo Ijesu “Elọ e zẹ khi ọni ọwẹnagbọ ọ nui emyionoga ali elingmobe a le emenale?”¹²Abhi Ijesu ọ ke rhọ suọ ona, ọọ wẹ, “Iọgbọ ni e mhuẹ izemhi ijegbe, e vha nono ọbo, eni ea gwhua lọgwho li ea nono ọbo. ¹³Vha Ka vu vha kaa wẹna abhi ona o ngme, ‘Ivhẹlemhi lẹ mhi nono a khi ilasobọ rharhi khi rhemhi bhẹ, a khi eni e gwabhagbe mhi ke gwe nyalu khi e kaa pfiegbedeno, ama elingmobe.”¹⁴Eni e rhẹ khali Ijọni e bhẹ bhuli ọli le eẹ li, “Elọ e zẹ khi eyẹ ali Ifaresis eyẹ nwemaa pfi azumhi, idibo ẹ e vha lia pfi?” ¹⁵Ijsesu ọọ wẹ, “Eni e ye izuode e mhia lẹ ọrhọ ni ọsogbo ọ khyie nu we la? Ama eni egbẹlẹ ea bhẹ ni a rhọ laa rhue ọni ọsogbo vu iteteva wẹ le, oni rhẹghẹ e chigbe ke a pfi azumhi.¹⁶Aa mẹ ọgbọ ni ọ to ode onogbọ a ma awulu ojọ, rharhi khi o la laa kyiọlọ oni awulu le, oni ikyiọlọa o ke vhiemhosue shiọ.¹⁷Wẹ khi rhẹmhi iọgbọ e kwuno enyọ enegbọ a shi ibene enyọ ejọ; e kha liyọ, eni ibene enyọ rhẹmhia vẹnọa eni enyọ e kwuno kwa, ishọyọ eni ibene enyọ e shashea, onochi ni e kha rhọ kwuno enyọ enegbọ shi ibene egbọ, li eni enyọ ali eni ibene e vha rha li opfua..”¹⁸Abhi Ijesu ọ rhẹ ngme eni ingme khasẹ wẹ ,a ke ẹẹ khi ẹ fẹẹ, ọnọfu ọ bhẹ a nyẹsẹ ukhomhi nali. Ọọ li, ''Omyi mhẹ ni ọkpotso ọ shẹ la gwhu nena, elemhi iyọ, bhẹ khi u kaa rhi obọ nya vhi egbe khi ọ kẹ gwe la agbọ. ¹⁹Ijesu ọ chi ekẹ vue ali idibo ọli, e rhọ rhẹ khali ọli vu.²⁰A ke ẹẹ khi ẹẹ fẹẹ, ọkpotso ni ọ she kwu olia egbea ikpe igbe ali eva, ọ rhọ te Ijesu oshimhi ọ rhi obọ chi esọ awulu ni ọ sọ. ²¹Rharhi khi ọ she nu egbe ọli ngmee, ọọ li, “Mhi kha le dobẹ rhi obọ chi ọli awulu, mhi laa ze.” ²²Ama, Ijesu ọ pfialo ni ọ rhọ mẹ ọli, ọọ li, omyi mhẹ ni ọkpotso, mhọdu: irọhshiọ ni u mhuẹ o she myie pfuse” obobobọ ọni ọkpotso ọ pfa olia.²³Abhi Ijesu ọ ke rhọ bhẹ vhi apfẹ ọgbọ nọfu, ọ mẹ ekphele efee ayọ oo li nyioo, ²⁴Ọọ wẹ, “Vha ka vu, rharhi khi ọni ọmoshi ọna ọ vha gwhu, rhẹmhi ọ vhesẹshi.” Ee gyia ọli, ee nwẹnyẹ ọli isue.²⁵Abhi a ke rhọ kwhu wẹ lo odẹ, ọọ lo oni elemhi owa ọa nwu ọni ọmoshi obọ, ọni ọmoshi ọ chi ekẹ vue. ²⁶Oni ingme o ga ashakhasha kwu.²⁷Abhi Ijesu ọ ke rhọ te ayọ vu, izalo ava e rhẹ khali ọli, ee sọse, eẹ li, “Mhuẹ ivhẹlemhi kwu eyẹ, omyi Idevidi!” ²⁸Abhi Ijesu ọ ke rhọ lo apfẹ le, eni izalo e bhẹ bhuli ọli le. Ijesu ọọ wẹ, “Vhaa rhọshiọ khi mhi dobẹ a khyiẹli ona?” E sọ vhọ, “Ee Ọnọmhọli.”²⁹Ijesu ọ ke rhi obọ chi wẹ ikpalo ọọ li, “Abhi irhọshiọ ẹ o li o kaa kyia yọ nẹẹ.” ³⁰Iyọ, ikpalo wẹ e gweghyiea. Ijesu ọ ke kpẹka nya wẹ ukhomhi ọọ wẹ, “Imhẹ vha dobẹ ọgbọ yẹsẹ pẹẹ, pẹẹ. ³¹Ama abhi e kẹ rhọ lasele, e rhi oni ingme ga ashakhasha oni aloekẹ kwu.³²Abhi eni izalo ava e ke rhẹẹ vu, a ke ẹẹ khi ẹẹ fẹẹ, a rhi ọni ọ mhuẹ ayẹmhẹ udungme bhui Ijesu le. ³³Abhi a ke rhọ kwhu ọli oni ayẹmhẹ udungme egbea, ọni udungme ọọ ngme. O nya oni agbaa ni e rhọ gba aloa, “A vha kpọ mẹ onana gwhe elemhi ekẹ Izulẹ!” ³⁴Ama eni Ifarisis eẹ li, “Izemhi iyẹmhẹ ebe li ọ rha kwhu iyẹmhẹ ebe kwa.³⁵Ijesu ọ kyia ẹẹ kyia eni ẹvhue nefu ali ekeke. Ọọ wẹna wẹ elemhi ewuka, ọọ ngme ingmemhi aleghyie Ishinẹgba, ọọ myie wẹ igwuamhi ali ọtomhẹ kwa. ³⁶Abhi ọ rhọ mẹ agbaa ni o rhọ gba, ọ mhuẹ ivhẹlemhi kwu we, rharhi khi e vha mhuẹ isheshe egbe, abọ e sha wẹ. rharhi khi rhẹmhi e liabhi isumha ni e vha mhuẹ ọni ọ rhẹ wẹ a le.³⁷Ọọ li eni idibo ọli, “Emẹkhọmhi e gaa bu, ama eni ea khyiẹsẹ wẹ ee shẹ. ³⁸Vha nyanya pfi olema bhuli Ọnọmhọli eni ẹkhọmhi, khi ọ rhi eni ea khyiẹsẹ ẹkhọmhi bhẹ.”

1Ijesu ọ nyalu ikwhumhi ogbe ali ava ni e rhẹ khali ọli koko gba ọ rhi izemhi na wẹ obodẹ iyẹmhẹ ni e vha pfuase, khi e ke kwhu wẹ kwa ea rhue iọgbọ igwhamhi ali ọtomhẹ ọdọdọda egbea.²Nenaa, ikwhumhi ogbe ali ava ni e rhẹẹ khali ọli khi ena, Ọni ikyiatsolo lẹ khi Isamọni (ni ọ gwe lu Ipite), ali Adulo ni inyọgwho ọli) Ijemhisi omyi Izẹbẹdi, ali Ijọni ni inyọgwho ọli. ³Ifilipu ali Ibatolomi, Itọmọsi ali imachiu ni ọmyionoga; Ijemhisi omyi Afiusi, ali Itadiusi. ⁴Isamon ni ọnyi Iziloti, ali Ijudasi Isikarọti ni ọ lẹ rhi ọli dẹẹ.⁵Eni ogbe ali ava ena li Ijesu ọ ghyie kwa. Ọ shi ushi na wẹ ọọ wẹ, “Imhẹ vha lo asha ni iọgbọ Ijẹntasi e nyele, imhẹ vha lo elemhi ẹvhue Isameria. ⁶Onochi, vha kaa nono isumha ni e waa vhi apfẹ Izulẹ. ⁷Abhi vha li a la eyọ, vha kee ngme khi, “Aleghyie Ishinẹgba o she chi bhẹ.’⁸Vha rhi eni ea gwhua ze, vha nwu eni e gwhu vue, rhi eni e efafe e nwu pfuasẹ, vha kwhu iọgbọ iyẹmhẹ ebe egbe le. Apfuẹ li u myie ọ, apfuẹ li u rhi ọli a na iọgbọ. ⁹Imhẹ tsua igolu, wẹ khi isiliva, shi ẹlomho ali ẹkpa. ¹⁰Imhẹ vha pfi ẹkwẹ sọ ni vhaa lẹ asha, wẹ khi awulu ovhese, wẹ khi ekwẹ, wẹ khi orhẹ atuekẹ, rharhi khi ọgbe akanya ọ tẹ ni a rhi emenale na le.¹¹Ẹvhue khi ẹvhue ni vha laa lo, vha nono ọni vha kwu a shi na, vha la ayọ apfishi ni vha rha vu. ¹²Vha kha lo elemhi apfẹ le, vha tsẹ otsẹ. ¹³Ona apfẹ o kha tẹ, ọpfọmhẹ vhẹ o bhe vhi oni apfẹ, o kha ke kyia khi o vha tẹ, ọpfọmhẹ vhẹ o gwe liegbe bhui vhẹ le.¹⁴Eni e vha ke rhẹ vhẹ kwu shi, wẹ khi rhẹmhi e rhi esọ shi ingmemhi vhẹ, vha kha te oni apfẹ oyọ a vu, ọa liyọ oni ẹvhue oyọ, vha kpishi ekẹ ni e la vhẹ ẹkọawẹ kwu ekẹ. ¹⁵Ingmaghyie mhi ngme khasẹ vhẹ “Ogbẹlẹ igwezọ, Isodomu ali Igomora li o laa somhi egbe dala oni ẹvhue oyọyọ.¹⁶Ghe, ghe, rhẹmhi ghyie vhẹ kwa abhi isumha ni e la iteteva idumhi, iyọ vha fialoa abhi enyẹ vha pfọmhẹ abhi igbekwhukwhu. ¹⁷Vha rhi ẹgbhẹ kyia iọgbọ egbe, rharhi khi a laa rhẹ vhẹ je owa ẹzọ, e rhi ite gbe vhẹ vhi elemhi ewuka. ¹⁸A gwe laa nwuno vhẹ bhuli igọvinọ ali enighyie rharhi mhẹmhẹ, o rhọ kyili ọtsẹ na wẹ ali Ijẹtasi.¹⁹E kha nwuno vhẹ bhẹ vhi asha, imhẹ vha kpakpa egbe obodẹ emeni vha laa ngme, rharhi khi emeni vha laa ngme wẹ a laa rhọ na vhẹ oni ẹrhẹghẹ. ²⁰Rharhi a khi ghyiẹ li u laa ngme, ama Ayẹmhẹ ọni Ita lọ laa ngme nẹẹ! E la laa nwuno vhẹ bhuli eni ea mhasẹ, e la laa rhi ite gbe vhẹ vhi elemhi ewuka.²¹Inyọgwho ọ la laa chi inyogwho ọli lo egwhi, ita ọ chi omyi ọli lo. Ivhiẹ e la laa ma nu ita wẹ vue e zẹ egwhi ni o gbe wẹ. ²²Iọgbọ kwu e la laa kyili ẹbele vhẹ rharhi eva mhẹ. Ama ọni ọ laa rhi egbe myie apfishi ukpẹsẹ ọ la laa myie pfuese. ²³E kha zẹ okwhẹ kpẹsẹ vhẹ vhi oni ẹvhue ona, vha na je oni o kpọẹ, ingmaghyie mhi gwu khasẹ vhẹ, vhavha laa dobẹ kyia ẹvhue Izulẹ kwu pfuse neni Omyi Ọmọse ọ bhẹ.²⁴Ọni ọ la obọ ọga ọli a wẹna akanya ọ vha fu a dala ọni ọa wẹna ọli akanya, wẹ khi ọgamhẹ li ọ fu a dala ọni ọa ga. ²⁵O ti khi ọni a wẹna ọ liabhi ọni ọa wẹna ọli, abagwhoyọ ọgamhẹ ọ liabhi ọni ọa ga. e kha ke lu mhẹmhẹ ọdapfẹ oghyie egbhọ, see ke wẹ la lu oni apfẹ!²⁶Rharhiyọ, imhẹ nu ulishi wẹ, rharhi khi a vha mẹ emeni e gbhagbha ni a vha laa gweghyiea, a vha mẹ emeni e gbhagbha ni a vha laa yẹsẹ. ²⁷Emena mhi ngme khasẹ vhẹ elemhi ubi, ngme ọli lasele ẹlogota, elemhi vha suọ vhi obena, vha rhi ọli tsabọ ukhomhi uroromhowa.²⁸Imhẹ nu ulishi eni e dobẹ a gbe ijegbea, ama e vha dobẹ a gbe ayemhẹa onochi, nu ulishi ọni ọ dobẹ a pfuse ijegbe ali avhagwhu ẹa vhi owerhẹ. ²⁹A khi ukọbọ ali ekpini li a rhi ikpharulu ava a dẹẹ? Iyọ, a vha mẹ ọni ọ de a pfile ekẹ ni Ita ẹ ọ vhaa yẹsẹ. ³⁰O kha rhẹ kyia itsu ni e la ẹ vhi ukhomhi kwu a lolo wẹ. ³¹Imhẹ vha nu ulishi. Vha ghalẹ dala ikpharulu n e bububu.³²Elemhiyọ, ọgbọ kwu ni o laa myie ọtsẹ na mhẹ, mhi li laa myie ọtsẹ nali ukpẹloe Ita mhẹ ni ọ la oweda. ³³Ama ọni ọ la khyie mhẹ ukpẹloe agbọ, mhi li laa khyie ọli ukpẹloe Ita mhẹ ni ọ la oweda. Ama ọni ọ la khyie mhẹ ukpẹloe agbọ, mhi li laa khyie ọli ukpẹloe Ita mhẹ ni ọ la oweda.³⁴Imhẹ vha sa khi ọpfọmhẹ mhi rhọ bhẹ vhi ukhomhi ekagbọ, a khi ọpfọmhẹ mhi rhọ bhẹ, ama, ọfẹdo lọ. ³⁵Rharhi rhẹmhi bhẹ a to okwhẹ ni ọmọ ali Ita ọli, ọmọ ọkpotso ali inyọ ọli, ọsọmọ ali inyọdọ. ³⁶Ẹbele ọgbọ e la laa te atukpapfẹ ọli lasele.³⁷Ọni ọ mhuẹ ighọli ita ọli ali inyọ ọli dala mhẹ, ọ vha kyili uwẹ mhẹ, ama ọni ọ ke mhuẹ ighọli omyi ọli ni ọmọse ali omyi ọli ni ọkpotso dala mhẹ ọ vha kyili uwẹ mhẹ. ³⁸Ọni ọ vha tsua ogbagala ọli rha khẹ mhẹ, ọ vha kyili uwẹ mhẹ. ³⁹Ọni ọ dobẹ ayemhẹ ọli to ọli vhi egbe, ọ la wasẹ ọlia; ama ọni ọ ke wasẹ ayẹmhẹ ọlia rharhi mhẹmhẹ ọ gwe laa mẹ ọli rhue.⁴⁰Ọni ọ kpẹsẹ abọ myie ẹ, ọ kpẹsẹ abọ myie mhẹ, ọni ọ ke kpẹsẹ abọ myie mhẹ ọ kpẹsẹ abọ myie ọni ọ ghyie mhẹ. ⁴¹Ọni ọ kpẹsẹ abọ myie ọbolẹ rharhi khi ọ kyili ọbolẹ ọ la laa mhọli elele ọbolẹ. Ọni ọ laa kpẹsẹ abọ myie ọni ọ pfuasẹ rharhi khi ọ kyili ọni ọ pfuasẹ ọ la laa mhọli elele ọni ọ pfusẹ.⁴²Ọnọni ọ laa rhi ẹtsẹkẹ ni eni ikwukwu wẹ ena, o kha rhẹ kyili ukolo amẹ na wẹ da, rharhi khi ọ kyili odibo mhẹ, ingmaghyie mhi ngme khsaẹ vhẹ, a vha mẹ abhi elele ọli e li laa waa."

¹Abhi Ijesu ọ ke rhọ ghyie eni idobo ọli ikwhumhi ọgbe ali ava kwa pfuse, ọ te ayọ vu ni ọ rhọ je ẹvhue wẹ lẹẹ wẹna iọgbọ ọ rhi oni ingmemhi ọli tsabo. ²Nenaa, abhi Ijọni ọ ke rhọ la ọgba igwhumha suọ emeni ọni Ikiristi ọ gaa ẹẹ khyiẹ, ọọ ghyie eni idibo ọli usomhi bhuli Ijesu, ³Ọọ li, “Ghyiẹ khi ọni ọ lẹẹ bhẹ, la khi ọvhese ọ la ni eyẹ mugha kee khẹ?”⁴Ijesu ọ sọ wẹ vhọ ọọ li, “Vha vu khi vha kaa ngme khasẹ Ijọni emeni vha mẹ ali emeni vha gwe suọ. ⁵Izalo e she a mato, ikhyila e she a kyia, eni efafe e nwu e she pfuase, eni e lesọ e shẹ a suọ esọ, eni e gwhu e she gwe vule, eni o to a she ngme ingmemhi Ishinẹgba khasẹ wẹ. ⁶Ivọsẹna lẹ khi uwi ọni ọgbọ ni a vha mẹ ẹrhẹghẹ ni ọ rhọ zẹ onobe mhẹ.”⁷Abhi eni iọgbọ ena e ke rhọ nono odẹ te, Ijesu ọ ke ngme ingmemhi Ijọni khasẹ ebubu iọgbọ ni e la ayọ ọọ wẹ, “Elọ vha nono je apata lẹẹ bino, ugwobọ orhẹ ni akpekpe o pfi lọ? ⁸Ama elọ vha je odẹ lẹẹ bino, ọgbọ ni ọ rhi ede epfopfo kwhẹ lọ? ingmaghyie, iọgbọ ni e rhi ede epfopfo kwhẹ apfẹ eni ighyie li ea nyele.⁹Ama elo vha nono jee elase lẹ bino, ọbole lọ? Ee, mhi ẹẹ vhẹ, ọna ọ dala ọbolẹ. ¹⁰Ọna li a kẹkẹ ingmemhi ọli eyọ, ni a rhọ ẹẹ li, “Ghẹ ghe, mhia ghyie aghyiusomhi mhẹ bhui vhẹ, ni ọ la shẹshẹ odẹ na vhẹ.¹¹Ingmaghyie mhi ngme khasẹ vhẹ, iọgbọ ni ikpotso e vyia kwu, a vha mẹ ọni ọ fu dala Ijọni ni ọa baptizi iọgbọ. Ama ọni ọ gaa kpọkẹ nẹẹ elemhi aleghyie oweda li ọ fu dala ọli. ¹²Rhọ te egbẹlẹ Ijọni ni ọa baptizi iọgbọ a pfishi nena, aleghyie oweda ifiafialo li o ke kyia, iọgbọ ifiafialo li e ke rhi izemhi a rhue ọli.¹³Rharhi khi eni ebolẹ kwu ali oni ushi e she kpọ rhi emeni e gbhagbha ẹẹ lasele neni a mẹ Ijọni. ¹⁴O kha kyia khi u lama laa myie ọ, ọna khi Ẹlaja, ọni ẹẹ khi ọ lẹ bhẹẹ. ¹⁵Ọni ọ zẹ esọ ni a rha suọ, ọ rhi esọ shi ekẹ.¹⁶Elọ mhi laa rhi oni o zele ona khọkhọ? rhẹmhi o liabhi eni ivhiẹ ni e la atuo okyi ẹẹ bọla, ni e shito ni ee nyalu egbe. ¹⁷Eẹ li, “Eyẹ kphele ofe nẹẹ, u waa gbe ishimhi. Eyẹ la ọrhọ, u waa vyiẹ.¹⁸Rharhi khi abhi Ijọni ọ rhọ bhẹ, ọ vha ẹẹ le ukphakpha wẹ khi rhẹmhi ọọ da onyọ, ẹẹ khi, “Ọ mhuẹ iyẹmhẹ ebe’ ¹⁹Omyi Ọmọsẹ li ọ ke gwe bhẹ na, ọọ le ọọ da e ke gwe ẹẹ ii, ‘Vha ghe ọ, ọ zẹ elemhi ali ọdenyọ li ọ kyia, ali ukpokyia emyionoga ali elingmobe! Ama emeni ẹgbhẹ o khyiẹlẹ li a rha yẹsẹ ọli.²⁰Ijesu ọ kee vanọ nya eni ẹvhue ni ọ la gbe idudumhi ikanya vhi ukhomhi, rharhi khi e vha mhuẹ ipfiegbedeno ọọ wẹ. ²¹khi uwẹ vhẹ, ichorazini! Epfua khi uwẹ vhẹ, Ibẹtsaida! O kha kyia khi a li na gbe eni idudumhi ikanya enana vhi itaya ali Isidọni ni a gbe na vhẹ ena lọ, e kha she rhi ede na kyiọlọ kyiọlọ ali enwẹ pfiegbedeno. ²²Ama o la laa ti Itaya ali Isaidọni egbe dala vhẹ ogbẹlẹ igwẹzọ.²³Ghyiẹ, Ikapaniumu, rhẹmhi u sa khi a laa yasẹ vhi ekẹ je aleghyie oweda? Obho, a la laa kpọlọ ẹ kpiale je owerhẹ. O kha kyia khi idudumhi inyaloa ni a gbe na vhẹ khi a gbe wẹ shi Isodọmu lọ, o kha khyie la vhọ apfishi amo. ²⁴Ama mhi ẹẹ vhẹ, khi iọgbọ Isodọmu e vha laa mhuẹ ọnwunu abhi vhẹvhẹ ogbẹlẹ igwẹzọ.²⁵Oni ẹrhẹghẹ oyọ, Ijesu ọọ li, “Mhi chichi ẹ, Ita, Ọnọmhọli, ghyiẹ ni u ma ekẹ ali idane, rharhi khi u rhi eni ingme ena gbhagbha ni etsẹgbhẹ ali eni e mhuẹ iyẹsẹ, u maghyiẹ wẹa khasẹ eni e vha ye owẹna, abhi ikwukwu ivhiẹ. ²⁶Ee, Ita, iyọ li o li ti ẹ vhi ẹleoe. ²⁷Ẹtsẹkẹ kwu a she te obọ Ita mhẹ rhẹ wẹ mhuẹ mhẹ obọ, ama a vha mẹ ọni ọ yẹsẹ ọni ọmọ sẹkẹnẹ khi ọni Ita, a vha mẹ ọni ọ yẹsẹ ọni Ita sẹkẹnẹ khi ọni Ọmọ, ali ọgbọ ọvhese ni ọni Ọmọ ọ la rhọ khasẹ ọli.²⁸Vha bhẹ bhui mhẹ le, vhẹvhẹ ni vhaa gbe ikanya ni o lọsẹ rhukphẹ, khi mhi rhi ivhiẹmhia na vhẹ. ²⁹Tsua ugbholo mhẹ khi u te obọmhẹ wẹna, rharhi khi mhi mhuẹ ichegbe kpiale ali ipfọmhẹ udu, avhagwhu vhẹ o la laa mhuẹ ivhẹmhia. ³⁰Rharhi khi ugbholo mhẹ o vha nwu unu wẹ khi itsua mhẹ li e khọ.

¹Oni ẹrhẹghẹ oyọ Ijesu ọọ te ishemhi ivhakpa dọsẹ lẹ lẹẹ ogbẹlẹ ivhiẹmhia, Okyiamhi oo kee gbe eni idido ọli, ee nyanọ inu ivhakpa rhẹẹ le. ²Abhi iọgbọ Ifarisis e ke rhọ mẹ wẹ, eẹ li Ijesu, “Ghe, idibo ẹ ni ea khyiẹlẹ emeni a gwhẹ ogbẹlẹ ivhẹmhia.”³Ama, Ijesu ọ ke ẹẹ wẹ, “Vhavha khyie li mẹ zẹ emeni Idevidi ọ ke khyiẹ, ni okyiamhi o rhẹẹ gbe ọli ali iọgbọ ni e nu ọli la? ⁴Abhi ọ li je apfẹ Ishinẹgba a le ukphakpha, ni o kyia khi o vha dea ni ọ kha le, ali eni e nu ọ la, ni o kyia khi eni e kpeda ugamhi wẹwẹ lọgwho li e kha le wẹ?⁵Vhavha khyie mẹ zẹ, khi eni e kpeda ugamhi e she li gbe ushia ni a vha lolo na wẹ shi ipfidọ? ⁶Ama mhi ẹẹ vhẹ khi ọgbọ ni ọ fu dala owuka ọ la ana.⁷Vha kha yẹsẹ abhi a rhi ona ngme lọ, khi mhi laa mhuẹ ivhẹlemhi a khi ilasobo, vhavha kha luese eni e vha lue. ⁸Rharhi khi ọni Ọmyi Ọmọsẹ lẹ khi ọni ọ mhuẹ ogbẹlẹ ivhiẹmhia.”⁹Ijesu ọ ke te ayọ vu ọ lo elemhi owuka wẹ. ¹⁰A ke ẹẹ khi ẹẹ fẹẹ, a mẹ ọmọsẹ ọgwho ni obọ ọli o chinyaa. Eni Ifarisis e ke mhila Ijesu eẹ li, “Oo mẹ te odẹ ushi khi a rhọ rhi ọgbọ ze ogbẹlẹ ivhiẹmhia? Rharhi khi rhẹmhi ẹẹ khi wẹwẹ e kẹ lẹlẹ ọ pfidọ.¹¹Ijesu ọọ wẹ, ọgwho elemhi vhẹ, ni ọ mhuẹ osumha ọgwho, ọni o sumha ọ de lo uyele ogbẹlẹ ivhiẹmhia, ni ọ vhaa nwu ọ vhọ lasele? ¹²U ke la ngme osumha ali ọgbọ ọni ọ nwuẹloe nẹẹ! Oo dea khi ọgbọ rhọ khyiẹlẹ onaghyie ogbẹlẹ ivhiẹmhia.”¹³Ijesu ọọ li ọni ọmọsẹ, “Nise obọa” Ọọ nise ọlia, o gwe kwhenoto abhi obọ ni o kpọẹ. ¹⁴Ama eni Ifarisis e ke vu e lẹẹ gba ugbamhi ọ, ee nono abhi e li gbe ọlia.¹⁵Abhi egbe e ke rhọ gwu ingme khasẹ ọ, ọ te ayọ vu. Iọgbọ ebubu e rhọ khali ọli, ni ọ rhọ myie wẹwẹ kwu igwhuamhi kwa. ¹⁶Ọ kpẹka nya wẹ ukhomhi khi imhẹli e dobẹ iọgbọ evhese yẹsẹ. ¹⁷Khi emeni ọbolẹ Azaya ọ ke ngme, khi o kẹ tsẹ, ni ọ rhọ ẹẹ li.¹⁸“Ghe, egamhẹ mhẹ ni mhi she zẹ; ọni ọ gwhẹ mhẹ, ni ọ rhi egbe a nwu avhagwhu mhẹ. Mhi la laa rhi Ayẹmhẹ mhẹ nali, ni ọ rhọ laa sọ iọgbọ Ijẹtasi unu ẹzọ.¹⁹Ọ vha laa nu wẹ wola, wẹ khi rhẹmhi ọ laa vyiẹ gbalala; wẹ khi rhẹmhi ọgbọ ọ laa sokwu urhui ọli vhi edato. ²⁰Ọ vha laa gwọghọ ẹji ni a kpanọa; ifofo ni ea li ewọli ọ vha laa pfuse wẹa. Sẹkẹnẹ khi rhẹmhi ọ rhi ipfuasẹ nwu ẹtsẹkẹ kwu le. ²¹Iọgbọ Ijẹtasi e la laa mhuẹ irhegbenya elemhi eva ọli.”²²Ọgbọ ọgwho ni ọ zalo ni ọ gwe kyili udungme, ni iyẹmhẹ ebe e la egbe, a rhọ bhui Ijesu le. Ọ rhi ọli ze, ọọ kee ngme ọ mato. ²³Ebubu iọgbọ kwu ni e la ayọ o nwu wẹ ẹloe eẹ li, “Ọni ọmọse ọna ọ mẹ dobẹẹ a kyili ọmyi Idavidi nena ee?”²⁴Ama abhi eni Ifarisis e ke rhọ suọ eni inyaloa ena, eẹ li, “Ọni ọmọse ọna, ayẹmhẹ okhyio li ọ rhọ a kwu iọgbọ iyẹmhẹ ebe egbe kwa.” ²⁵Ama Ijesu ọọ yẹsẹ isamhi wẹ, ọọ wẹ, “eghyiele kwu ni o kemhi egbe ọ, rhẹmhi ọa li opfua, ẹvhue ọa liyọ apfẹ ni o kemhi egbe ọ o vha laa mugha.²⁶Okhyo ọ kha kwhu okhyio pfia, ọ shẹ kemhi egbe ọ. See eghyiele ọli o lia mugha? ²⁷O kha kyia khi izemhi iyẹmhẹ okhyio mhi rha kwhu iyẹmhẹ ebe kwa, izemhi ọgwho eni e rha khẹ vhẹ e ke rhọ li kwhu we a kwa? Rharhi ona, wẹwẹ le laa sọ vhẹ unu ẹzọ.²⁸Ama o kha kyia khi Ayẹmhẹ Ishinẹgba lẹ mhi rha kwhu iyẹmhẹ ebe a kwa, iyọ aleghyie Ishinẹgba o she bhẹ bhuli vhẹ le khi oyọ. ²⁹See ọgbọ ọ li dobẹ a lo apfẹ ọni ọ ze le ina khi rhẹmhi ọ kpọ fali ọli? Ishọyọ ọ chigbe chi ọli itsua apfẹ. ³⁰Ọni ọ vha nu mhẹ la rhẹmhi ọ zẹ okwhẹ kpẹsẹ mhẹ, ọni ọ vha nu mhẹ sanọ a koko, rhẹmhi ọ pfi a khakha.³¹Elemhiyọ mhi ẹẹ vhẹ, ingmobe kwu ali ipfiunua a laa yele wẹa, ama ipfiunua rhọ khali ọni Ayẹmhẹ ni o Pfuasẹ, a vha laa yele ọlia gwhe. ³²Ama, ọnọni ọ laa zẹ onobe rhọ khali Omyi Ọmọse, a la laa yele ọlia nali. Ama ọnọni ọ laa zẹ onobe Ayẹmhẹ ni o pfuasẹ, a vha laa yele ọlia nali, shi oni agbona shi agbọ ni o ke a bhẹ.³³Orhẹ o kha ti, ikpamhi ọli e li ti, ọa liyọ orhẹ o kha kyili orhẹ obe ikpamhi ọli e li kyili enebe, rharhi khi ikpamhi orhẹ la te a yẹsẹ orhẹ. ³⁴Vhẹvhẹ imyi enye, abhi vha ke rhọ kyili iọgbọ ebe, see vha kee lia ngme ingmaghyie? Emeni e vọ udu li o te unu a lase. ³⁵Ọgbọ ni elemhi ọli o ti li ingmaghyie o te unu a lase, abagwhoyọ ọni ọ zẹ elemhi obe ingmobe ni e la vhi udu li ọ te unu ngme a lasele.³⁶Mhi gwe ngme khasẹ vhẹ khi ogbẹlẹ igwẹzọ ọgbọgbọ ọ la laa lolo khasẹ Ishinẹgba abhi e li ngme ijajamhi ingmemhi. ³⁷Rharhi te ikpa ingmemhi unu li ẹzọ o te laa pfuasẹ ẹ, te ingmemhi unu ẹ li ẹzọ o te laa gbe ẹ.”³⁸Iọgbọ Ifarisis egwho ali ikọwe e ke sọ Ijesu vhọ eẹ li, “Ọwẹnagbọ, eyẹ a nono khi eyẹ te obọ ẹ mẹ ishẹfẹ.” ³⁹Ijesu ọ sọ wẹ vhọ ọọ wẹ, “Ozele obe ni ea ye odọse wẹwẹ li ea nono ishẹfẹ, ama a vha mẹ ishẹfẹ ni a laa rhọ nali ina khi ishẹfẹ Ijona ni ọbole. ⁴⁰Rharhi khi abhi Ijona ọ li gbhẹ elemhi afẹ ni ọfu ogbẹlẹ esẹ ali eliyọse esẹ, iyọ li Omyi Ọmọse ọ li laa la elemhi ekẹ ogbẹlẹ esẹ ali eliyọsẹ esẹ.⁴¹Iọgbọ Ininivẹ e la laa nu eni ozele ona mugha gwu ẹzọ ni e rhọ laa luese wẹ. Rharhi khi ee pfiegbedeno ẹrhẹghẹ ni Ijona ọ rhọ rhi ingmemhi Ishinẹgba tsabọ, ‘Ghe ọgbọ ni ọ fu dala Ijona ọ la ana.⁴²Oghyie ikpotso ni e te obhoni ọwẹ o te a lasele bhẹ ọ la laa nu oni ozele ona mugha gwu ẹzọ ni ọ rhọ laa luese wẹ. rharhi khi ọ te obhoni ekẹ okpẹsẹ bhẹ khi ọ kaa suọ iyẹsẹ Isolomọni, vha ghee, ọgbọ ni ọ fu dala Isolomọni ọ la ana.⁴³Ayẹmhẹ ni o vha pfuasẹ o kha lase ọgbọ egbe le, o te ekẹ ekhakha a dọsẹ la lẹ ọa nono ivhẹmhia, ama ọ vha ke mẹ. ⁴⁴Ọ ke ẹẹ li, “Mhi la liegbe je apfẹ mhẹ na mhi kpọ te vu.” Ọ kha ke liegbe, ọ bhale a vhẹ khi oni apfẹ o li gboo, rhẹmhi ọa fuomhi ọlia ọ sheshe ọli kpẹ kpẹ. ⁴⁵Rhẹmhi ọ ke a vu ọa rhue iyẹmhẹ ni e vha pfuasẹ oshila evhese gwe a gboghyiẹ egbe ọli, e bhẹ gaa nu ọli nyele ayọ. Agbọ ọli ni ikposhimhi o ke vhiemhosue dala oni ikyiatsolo. Iyọ li o la li oni ozele ona vhi egbe.''⁴⁶Abhi Ijesu ọ ke rhọ khyie nu eni agbaa ni e rhọ gba ẹẹ ngme, a kee fẹẹ, inyọ ọli ali inyọgwho ọli e mugha atuodẹ, ee nono khi wẹwẹ e nu ọli ngme. ⁴⁷Ọgbọ ọgwho ọọ li, “Ghe inyọ ẹ ali inyọgwho ẹ e mugha atodẹ ea nono khi wẹwẹ nu a ngme.”⁴⁸Ijesu ọ sọ ọni ọ ngme khasẹ vhọ, “Ọgwho khi inyọ mhẹ?” Egwho khi inyọgwho mhẹ? ⁴⁹Ọ ke nise obọ bhui idibo ọli “Ghe, ena khi inyọ mhẹ ali inyọgwho mhẹ. ⁵⁰Rahrhi khi ọni ọ kyhiẹ emeni Ita mhẹ ni ọ la oweda ọ nono ọni ọgbọ khi inyọgwho mhẹ ni ọmọse, ali ọkpotso ali inyọ mhẹ.”

¹Oni ogbẹlẹ oyọ, Ijesu ọ te apfẹ lasele ni ọ rhọ shitọ esọ okwu. ²Ebubu iọgbọ, e sẹ gasẹ ọ, ọ ke lo elemhi ọkọ shitọ, eni iọgbọ kwu ni e legba gasẹ ọ e mugha esọ igbogbo.³Ijesu ọ rhi ekpita ngme ingme nebu khasẹ wẹ. Ọọ wẹ, “Ghe, ọni ọ kọ ẹkọmhi ọ lasele ni ọ rhọ lẹẹ kọ ẹkhọmhi. ⁴Ọ kee kọọ, egwho e dena kwu esọ atuodẹ, ipfele e bhẹ a sanọ wẹ le. ⁵Egwho e dena kwu igwhechẹ ni e vha mẹ ekẹ nebu, ee nyanya zẹ rharhi khi oni ekẹ ni e la o vha gbe ekẹ. ⁶Ama abhi ovọ o ke rhọ bhẹ, e toa rharhi khi e vha mhuẹ ikpi onaghyie, li e rhọ khakhaa.⁷Egwho e dena kwu ifu igba. Eni erhẹ igba e fu e tsese wẹ. ⁸Evhese e dena kwu ekẹ aghyie ni o wǫghǫ, e mọ ikpamhi, egwho e mọ ikpamhi egbhọ ishie, egwhọ egbhọ esẹ, egwho iti uye ali igbe. ⁹Ọni ọ ze esọ, ọ rhi esọ shi ekẹ.”¹⁰Eni idibo ọli e bhẹ eẹ li Ijesu, “Elọ ezẹ khi u rhi ekpita nu eni iọgbọ a ngme?” ¹¹Ijesu ọ sọ vhọ ọọ li, “A she rhi oni imasha na vhẹ ni vha rhǫ dobẹ a yẹsẹ emeni e gbhagbha ilemhi aleghyie oweda, ama a vha rhi imasha oyọyǫ na wẹ. ¹²Rharhi khi ọni ọ mhuẹ, li a gwe laa rhọ ma vhọ, ọ ke gaa mhuẹ gbili. Ama; ọni ọ vha mhuẹ, li a gwe myie ma oni ọ kpọ mhuẹ vhọ.¹³Iyọ, rhẹmhi rhi ekpita nu wẹ a ngme, rharhi e zẹ ikpalo, ama e vha rhę wę a mato onaghyie, e zẹ esọ, ama e vhaa suọ esọ onaghyie, wẹ khi rhemhi e mhọli iyẹsẹ. ¹⁴Wẹwẹ li ingme ogbhagbha ni ọbolẹ Azaya ọ ngme o tsẹ shi ukhomhi, ni ọ rhọ ẹẹ li, ‘Isuọmhi u laa suọ, ama o vha laa ga ẹẹ vhi esọ; imẹmhi u laa mẹ, ama o vha la ga ẹẹ vhi ẹloe.¹⁵Rharhi khi udu eni iọgbọ ena rhemhi o li tsẹẹlẹ, ikpalo wẹ e she gwese: khi e ke rhi ikpalo wẹ mato, wẹ khi rhẹmhi e rhi esọ wẹ a suọ, wẹ khi rhẹmhi e rhi idu wẹ a mẹ ọli a mẹ, e kha pfi egbe deno lọ, mhi kha rhẹ wẹ zẹ.¹⁶Ama a zẹ ọte ni ikpalo vhẹ, rharhi khi ea mẹ, shi esọ vhẹ, rharhi khi ea suọ. ¹⁷Ingmaghyie mhi ngme khasẹ vhẹ khi ebolẹ nebu ali iọgbọ ni e gwabhagbe ee li nono khi wẹwẹ e mẹ emeni vhaa mẹ, ama e vha dobẹ mẹ wẹ. O li gwhẹ wẹ khi wẹwẹ e suọ emeni vhaa suọ, e vha dobẹ suọ wẹ.¹⁸Rhi esọ shi ekẹ ekpita ọni ọ kọ ẹkomhi. ¹⁹Ọgbọ ọ kha suọ oni ngmemhi aleghyie ama ọ vha suọ ọli limhi, ọni ọkhọlọ ọ bhẹ laa wolọ ọli emeni a kpọ rhọ kọ ọli vhi udu. Ona khi ọni ukpamhi ni a rhọ kọ esọ odẹ.²⁰Oni a rhọ kọ igwhechẹ khi ọni ọ suọ oni ingmemhi ni ọ rhi oghẹlẹ myie ọli ayayayọ. ²¹Ama o vhaa simhii shi egbe, ọọ le mhuẹ irhegbemyie elemhi ukwukwu ẹrheghẹ. Abhi echọ ọa liyọ izẹ okwhẹkpẹsẹ o ke rhọ bhẹ rharhi oni ingmemhi, obobobọ li ọ rhọ tsutsu.²²Oni a kọ shi ifu igba, lẹ khi ọni ọ suọ oni ngmemhi, ama abhi mhi lii kyia ingme agbọ, ali ighagha ọsuemhẹ agbọ li o tsese oni ingmemhi, ọ bhale a gbe apfuẹa. ²³Oni a kọ shi ekẹaghyi ni o wọghọ, lẹ khi ọni ọ suọ oni ingmemhi, alo ọli e ga, ọna li o mọ ikpamhi erhẹ ni e kwheno; egwho e mọ egbhọ ishie, egwho egbhọ esẹ, egwho uye ali igbe.”²⁴Ijesu ọ gwe kpe ita ovhese khasẹ wẹ; ọọ li, “Aleghyie oweda rhẹmhi o liabhi ọgbọ ni ọ kọ emẹkọmhi aghyie shi ishemhi. ²⁵Abhi ovhese o ke rhọ nwu ọ; ẹbele ọ bhale a kọ ebui gboghyiẹ eni emẹkọmhi ọ rhọ te odẹ ọli vu. ²⁶Abhi e ke rhọ zẹ ni e rhọ mọ ikpamhi, eni ebui e li nu wẹ lasele abagwhoyọ.²⁷Eni egamhẹ ẹẹ li oni o mhuẹ ishemhi, ‘Ọga, a khi egbegbe ẹkọmhi li u she kọ shi ishemhi? See ebui e ke li vọ vhọ?’ ²⁸Ọọ wẹ, “Ẹbele li ọ gbe oyọ akanya eyọ.’ eni egamhẹ ẹẹ li, ‘u nono khi eyẹ kaa vhọlọ wẹa?’.²⁹Ọni ọmhuẹshemhi ọọ li, “Obho.Vha khaa vhọlọ eni ebulia, vha ke nwu emẹkọmhi ma vhọ vhọlọa. ³⁰Vha dobẹ wẹ fu o ke kyila ẹrhẹghẹ ikhyiẹsẹ. Oni ẹrheghẹ ikhyiẹsẹ, mhi laa gwu khasẹ eni ea khyiẹsẹ, “Vha kpọ vhọlọ eni ebulia, vha kwhuli wẹ inwushẹ tosia, ama, eni emẹkọmhi vha koko wẹ tsua kwu mhẹ akaa.³¹Ijesu ọ gwe kpe ita ovhese khasẹ wẹ, ọọ wẹ, aleghyie oweda o liabhi ukpamhi imustadi ni ọgbọ rhue a kọ vhi ishemhi ọli. ³²Oni ukpamhi orhẹ ona, li o shiẹ dala ikpamhi erhe evhese. Ama abhi o ke rhọ fu, li o ke gaa fu dala erhẹ ni e la oni ogba kwu. Oo ke bhale a kyili ukporhẹ, ishọyọ ipfele ni e la idane e bhẹ a kwu iko shi igwabọ ọli.”³³Ijesu ọ gwe kpe ita ovhese khasẹ wẹ, “Aleghyie owẹda o liabhi uduekẹ ni ọkpotso ọ rhọ kwu gboghyiẹ emosọmhi iji akpala esẹ ni e ke rhọ fuma.”³⁴Eni ingme na kwu li Ijesu ọ rhi ekpita ngme khasẹ eni agbaa ni e rhọ gba. A vha mẹ emeni ọ ngme ni ọ vha rhi ekpita ngme khasẹ wẹ. ³⁵Rhẹmhi ẹẹ khi a kẹ rhi emeni ebolẹ e ngme tsẹ, ni ee rhọ ẹẹ li, “Mhi laa gweghyie unu mhẹa kpita. Mhi laa ngme ingme ni a rhọ gbhagbha te ituekẹle oni agbona lase.”³⁶Ijesu ọ pfi eni agbaa ni e rhọ gba shi ayọ ọ lo apfẹ. Eni ldlbo ọli e bhẹ bhuli ọ le eẹ li, kweghyiea khasẹ eyẹ ekpita ebui ni e vọ ishemhi. ³⁷Ijesu ọ ke sọ wẹ vhọ ọọ li, ”Ọni ọ kọ ikpamhi erhẹ ni e ti lẹ khi ọni Omyi Ọmọse. ³⁸Oni ishemhi lẹ khi oni agbona, ikpamhi erhẹ ni e ti, wẹwẹ khi imyi aleghyie. Eni ebui khi imyi eni ọkhọlọ, ³⁹Ọni ẹbele ni ọ kọ eni ebui lẹ khi okhyio. Eni ẹkọmhi khi ikposhimhi agbọ, eni ea khyiẹsẹ wẹwẹ khi ighyiukọ.⁴⁰Elemhiyọ, abhi a li la kwhuli eni ebui tosia, iyọ la laa li ẹrhẹghẹ ikposhimhi agbọ. ⁴¹Omyi Ọmọse ọ laa ghyie ighyiukọ ọli ni e rhọ laa sanọ ẹtsẹkẹ kwu ni ea tsua ingmobe vhi aleghyie lasele, ali eni ea li uvhaza. ⁴²E la laa pfi wẹ lo elemhi ẹlamhi erhẹ, asha ni e la laa ke vyiẹ ea gbe akọ akọ. ⁴³Ishọyọ eni e gwabha gbe ea gẹẹ abhi ọwẹ elemhi aleghyie Ita we, ọni ọ ze esọ, ọ rhi eso shi ekẹ utogwho.⁴⁴Aleghyiele Ishinẹgba rhẹmhi o liabi ẹpfue ni a rhọ gbhagbha ishiemhi. Ọmose ọ ke mẹ oli rhi oghele rhue ọli gbhagbha, o rhi emeni ọ mhuẹ kwu dẹ ọ rhọ dẹ oni ishimhi. ⁴⁵Abagwhoyo, aleghyiele Ishinẹgba rhẹmhi o liabi ọni ọdokyi ni ọ nono itsua ni e ghalẹ ghalẹ. ⁴⁶Ọ ke mẹ ogwho ni o ghale, ghalẹ, ọa rhi ẹpfue ni ọ mhuẹ kwu dẹ ọ rha dẹ ọli.’”⁴⁷Abagwhoyọ, aleghyie oweda rhẹmhi o liabhi aga ni a pfilo okẹ, ni o nwuno elamhi ọdọdọda. ⁴⁸Abhi o ke rhọ vọ, egbeifẹẹ e chi ọli lase vhi esọ igbogbo. E shitọ, e sanọ ẹtsẹkẹ aghyie ni e la vhọ kwu shi ikoko ali ilolo, ama ẹtsẹkẹ ni e kpọẹ ni e vha ti, e tsua wẹ kwa.⁴⁹Ina, li o laa li ẹrhẹghẹli ikposhimhi agbọ: eni ighyiukọ e la laa bhẹ laa sanọ iọgbọ ebe vhi iọgbọ ni e gwabha gbe kwa. ⁵⁰A la laa kwuno wẹ lono elamhi erhẹ, ni e la laa kee vyiẹ ea gbe akọ akọ.⁵¹Eni ingme ena kwu e she ga vhẹ ẹloe? Eni idibo ọli eẹ li “Ee Ọnọmhọli’’ ⁵²Ijesu ọ ke ẹẹ wẹ, “Akọwe kwu ni ọ sheda kyili odibo aleghyie oweda rhẹmhi ọ liabhi ọdapfẹ ni ọa wolọ itsua ejọ ali enegbọ vhi elemhi ọsuemhẹ ọli lase.” ⁵³Ijesu ọ ke kpe eni ekpita ena pfuse, ọ te ekayọ vu.⁵⁴Ijesu ọ ke lo aloekẹ ọli le ọọ wẹna eni iọgbọ vhi elemhi owuka wẹ. Eni ingme e nwemaa nya wẹ aloa, eẹ li, “Obho ọni ọmọse ọna ọ te li na mhuẹ iyẹsẹ ali eni inyaloa ena? ⁵⁵Ọni ọmọse ọna ọa mẹ kyili omyi ikapita? A khi inyọ ọli lẹ mẹẹ khi Imeli? inyọhwho ọli a khi wẹwẹ e she mẹẹ khi iyi Ijemhisi, Ijosẹfu, Isamọni ali Ijudasi? ⁵⁶Ali inyọgwho ọli ni ikpotso, a khi eyẹ gaa nyele? Iyọ, obho ọni ọmọse ọna ọ te mẹ eni ẹtsẹkẹ ena kwu?⁵⁷E ke mẹ ofu nali. Ama Ijesu ọọ wẹ, “A vha mẹ ọbole ni ọ vha mhuẹ ojima sẹkẹnẹ elemhi ẹvholi ọ ali ẹdẹli ọ. “ ⁵⁸Ọ vha gbe ọnyaloa nebu vhi ayọ rharhi umhamyiesuọ wẹ.

¹Oni ẹrhẹghẹ oyọ Ẹrọdu ni oghyie ọ sokwu okekẹ Ijesu. ²Ọọ li eni egamhẹ ọli, Ijọni ni ọa baptizi iọgbọ khi ọna; ọ she te egwhuli vue. Li eni izemhi ena e te la vhi ijegbe a gbe ikanya ena.”³Rharhi khi Ẹrọdu ọ shẹ kpọ nwu Ijọni, ọ fali ọli, ọ pfi ọli lo ọgba igwhumha rharhi ugwhẹ ọli, ni inyọgwho ọli ni Ifilipu ọ kpọ mhuẹ. ⁴Rharhi khi Ijọni ọọ li ẹẹ khi, “O vha te odẹ ushi khi u rhọ mhọli ugwhẹ inyọgwho ẹ abhi ugwhẹ ẹ.” ⁵Ẹrọdu ọ khaa gbe ọlia, ama ọọ nulishi eni iọgbọ.⁶Abhi ogbẹlẹ ighẹlẹ shi ogbẹlẹ ni a rhọ vyia Ẹrọdu o ke rhọ rhamhi, ọmọ ni ugwhẹ ọli ọ rhọ ma egbe a nye nali ni ọmọmoshi ọ gbe ishimhi ni o nwemaa rhi egbe nwu Ẹrọdu. ⁷Emeni ọ ke rhọ sọ vhọ, ọọ rhomhi khi ememeni ọ laa mhila lẹ lẹ laa rhọ nali.⁸Abhi ọ ke rhọ bhuli inyọ ọli, ọni inyọ ọli ọ khọli khasẹ ọ abhi ọ lẹẹ sọ ọli, li ọ rhọ bhẹ bhuli ọni oghyie ọọ li, “khyi ukomhi Ijọni ni ọa baptizi iọgbọ shi oni ọfala ona na mhẹ.” ⁹Oni omhila ni ọ mhila o rhi egbe khekhe ọni oghyiea, ama rharhi irhomhi ni ọ rhomhi ali iọgbọ ni e nu ọli shitọ ẹẹ ghọdọọ, li ọ te ẹẹ li a kaa khyi ọli nali.¹⁰Ọọ ghyie ni a rhọ je ogba igwhumha a khyi Ijọni ukhomhi nali. ¹¹A ke rhi oni ukhomhi shi ọfala ni ọni ọmoshi ọ rhọ tsua li ghyi inyọ ọli. ¹²Eni idibo Ijọni e ke bhẹ e tsua olimhi ọli ni e rhọ rha tọ. Abhi a ke rhọ mẹ ona, e vu ea ngme khasẹ Ijesu.¹³Abhi Ijesu ọ ke rhọ suọ ona, ọ te ayọ vu ni ọ rhọ lo ọkọ ẹẹ je ikpogwho ni agbọ e vha la. Abhi eni iọgbọ e ke rhọ suọ, e rhọ te oni elemhi ẹvhue rhi awẹ apfuẹ rhọ khali ọli. ¹⁴Ijesu ọ rhọ khẹ wẹ abhi ọ ke mẹ eni ebubu iọgbọ. Ọọ mhuẹ ivhẹlemhi kwu wẹ ọ rhẹ wẹ ze vhi igwhamhi ni e la wẹ gbe.¹⁵Abhi ogbode o ke rhọ le, idibo ọli e bhe bhuli ọ le eẹ li, “Apata lẹ khi ọna, abagwhoyọ ogbe o she o gwe kyia. Wẹ li eni iọgbọ ena e kee je, khi e te egbe wẹ je elemhi ẹvhue a dẹ emenale le.”¹⁶Ama Ijesu ọọ wẹ, “O vha ti khi e liyọ kee je. vha rhi ẹtsẹkẹ na wẹ le” ¹⁷Eẹ li, “Irhu ikphakpha ishie ali ifẹli eva li eyẹ le mhuẹ shi ana nena” ¹⁸Ijesu ọọ li, “Rhue wẹ bhe ghyi mhẹ.”¹⁹Ijesu ọọ li eni iọgbọ e shitọ ikhomhi ebui. Ọ rhue eni irhu ikphakpha ishie ali ifẹli eva, ọ yasẹ alo je eda ọ zẹ ọte ni eni emenale, ọ kwẹkwẹ wẹ ọ rhọ ni idibo ọ. E myie ọli wẹwẹ e kemhi wẹ ni eni iọgbọ. ²⁰Wẹwẹ kwu e le, e kwhe. E chigbe sanọ ikhyikhyi ni e dena kwu ekẹ vọsẹ igwhugwhu igbe ali eva. ²¹Eni e le eni emenale, e rhamhi emọse agbẹlẹ egbhọ igbe ashi ishie, a rhi obọ rhue Ikpotso ali eni ivhie vhọ le.²²Obobobọ ọọ li idibo ọli e lono ọkọ kpalo na lẹ je opfọbhoni o kpọẹ, khi lẹ li ẹẹ li eni iọgbọ e kee je. ²³Ọ ke ẹẹ li eni iọgbọ e kee je, lọgwho ọ shele ọkpha lọẹ pfi olema. Ọ la ayọ rhili apfishi ẹlogbode. ²⁴Ama oni ọkọ o she la iteteva okwu, rhẹmhi o kee li tseghyie, tseghyie, rharhi oni akpakpa, rharhi khi oni akpekpe o vha gwabha ẹẹ pfi.²⁵Ẹrhẹghẹ okwulokwu ene, ogbe o ke lẹẹ gbe Ijesu ọ chi mama wẹ; ọọ kyia ukomhi okwu. ²⁶Abhi idibo ọli e ke rhọ mẹ khi ọa kyia ukhomhi okwu, idu e fia wẹ elemhi eẹ li, “Olimhi ni ogwho khi ona” e rhi ulishi sọọse. ²⁷Ama Ijesu ọ ke nyanya ẹẹ wẹ, “Vha mhodu! Mhẹmhẹ lọ! imhẹ vha gwe nu ulishi.”²⁸Ipitẹ ọ sọ vhọ ọọ li “Onomhọli, o kha kyia khi ingmaghyie lọ, wẹ mhi li kyia oni ukhomhi ukwu shiọ,” ²⁹Ijesu ọọ li, “Bhẹẹ” iyọ Ipitẹ ọ te elemhi oni ọkọ lasele ọọ kyia ukhomhi okẹ bhuli Ijesu le. ³⁰Abhi Ipitẹ ọ ke rhọ mẹ akpekpe, ulishi oo nwu ọli; ọ kee mii lo uji okẹ, ọọ sọse ọọ li, ”Ọnọmhọli, tsumhi mhẹ!”³¹Obobobo Ijesu ọ nise obọa, ọ tso obọ sọ Ipitẹ ọ nwu ọli, ọọ li, Ghyiẹ nu mhuẹ ukwukwu irhọshiọ see u ke lia bi ikhọkhọ?” ³²Abhi Ijesu ali Ipitẹ e ke rhọ lo elemhi oni ọkọ, oni akpekpe o pfua. ³³Eni e nu ọli la oni ọkọ e gbega nali eẹ li, “Ingmaghyie lọ ghyiẹ khi Omyi Ishinẹgba”³⁴Abhi e ke rhọ da vhi oni okẹ, e bhẹ a rhọ nwu Igenesareti. ³⁵Iọgbọ ni e la ayọ abhi alọ wẹ o ke rho ga Ijesu vhi egbe, e ghyie ighyiusomhi je ashakhasha elemhi oni aloekẹ oyọ kwu, ni e rhọ rhi iọgbọ kwu ghyi ọ ni e gwhua. ³⁶E lemali khi ọ lee dobẹ wẹwẹ le rhi obọ chi esọ awulu ọli, abhi ebu, abhi eshẹ ni e rhi obọ chi ọli awulu e ke ze.

¹Ikọwe ali Ifarisisi ni e la Ijerusalẹmu e bhẹ bhuli Ijesu le. Eẹ li, ²See idibo ẹ e ke lia gbe itushi eni e womhẹa? Rharhi khi e vhaa kpe abọa ni e laa le emenale?” ³Ama ọ sọ wẹ vhọ ọọ wẹ, see vhẹvhẹ vha ke li lia gbe ushi Ishinẹgba rharhi itushi vhẹ?⁴Rharhi khi Ishinẹgba ọọ li ẹẹ li, “Rhi ojima ni ita ẹ ali inyọ ẹ,’ rharhi khi ọni ọ laa zẹ onobe ita ọli ali inyọ ọli ọ nwemaa gwhua. ⁵Ama vhaa ngme vha ẹẹ khi, “Ọnọni ọ laa li ẹẹ li ita lẹ ali inyọ lẹ, “Ikpaghyiobọ na mhi kha rhọ nẹẹ, onochi mhi rhi ọli somhi Ishinẹgba opfa.” ⁶Ọni ọgbọ ọyọ ọ vha gwe rhi ojima in ita ọli. Vha she te oni odẹ ona rhi ingme Ishinẹgba mela apfuẹ te ikpa utushi vhẹ.⁷Vhẹvhẹ enaKẹmẹmhẹ, ona li ọbolẹ Azaya ọ mẹ ni ọ ke rhọ ngme, ‘ ⁸Eni iọgbọ ena ufufunu li e rhọ rhi ojima a na mhẹ, ama khi idu wẹ o nuẹ shi mhẹ egbe. ⁹Ugamhi afpuẹ li ea ga mhẹ, rharhi khi abhi o gwhẹ wẹ lia wẹna agbọ rhọ te ishi agbọ.”¹⁰Ọọ ke nyalu oni agbaa chi mama egbe ọ, ọọ wẹ, “Vha rhi esọ shi ekẹ khi vha yẹsẹ. ¹¹A khi emeni ọgbọ ọ le shi elemhi li o rhi ọli kyili ọni ọ vha pfuasẹ, ama emeni e te ẹ vhi unu lasele, emeni e rhi ọgbọ a kyili ọni ọ vha pfuasẹ lẹ khi ona.”¹²Eni idibo e ke bhẹ bhuli ọli le eẹ li, “U mẹẹ yẹsẹ khi abhi iọgbọ Ifarisisi e rhọ suọ eni ingme ena khi oo rhi ofu fuu we?” ¹³Ijesu ọ sọ vhọ ọọ li, “Orhẹ kwu ni Ita mhẹ ni ọ la aleghyie ọ vha kọ, rhemhi a laa vhọ ọlia. ¹⁴Dobẹ wẹ, shi uwẹ wẹ, eni e rhi odẹ a khasẹ eni e vha mato li e kyia. Ọzalo ọ kha nwu ọzalo orhẹ, rhẹmhi e gaa de a pfilo elimhi”¹⁵Ipitẹ ọ sọ vhọ ọọ li Ijesu, “Gweghyiea oni ekpita ona khasẹ eyẹ. ¹⁶Ijesu ọọ li, “Rhẹmhi vha khyie liabhi eni e vha mhuẹ iyẹsẹ ena?” ¹⁷Vhavhaa mẹ khi emeni e te unu lo elemhi khi rhemhi o te ayọ a lasele ọa lo elemhi ikelezẹti?¹⁸Ama emeni e te unu lasele udu li o te bhẹ. Wẹwẹ khi emeni ea pfuẹchẹ ọgbọa. ¹⁹Rharhi khi udu li isamhi ebe e te a bhẹ, nabhi, ugbee, odọsẹ, ighaba, ighyiatọ, ọtsẹ ighagha ali ẹnwẹ. ²⁰Ena khi ẹtsẹkẹ ni e rhi ijiomhi a nwu ọgbọ. Ama ile emenale ni u waa kpe abọa o vha rhi ọgbọ shi umhapfuasẹ.²¹Ijesu ọ ke te ayọ vu ni ọ rhọ je aloekẹ itaya ali Isadọni. ²²A ke ẹẹ khi ẹẹ fẹẹ, ọkpotso ọnyi Ikena ni ọ te oni aloekẹ oyọ lasee: Ọ sọọse ọọ li, “Mhuẹ ivhẹlemhi kwu mhẹ, Ọnọmhọli, Omyi Idevidi; iyẹmhẹ ebe e rhi echọ a ni omyi mhẹ ni ọkpotso.” ²³Ama Ijesu ọ vha pfa shi ọ vhi ekẹ. Idibo ọli e ke bhẹ bhuli ọli le eẹ li, “Yagwa kwhu ọ vu rharhi khi ọ sọọse rha khali eyẹ.”²⁴Ama Ijesu ọ sọ wẹ vhọ ọọ wẹ, “A vha ghyie mhẹ bhuli ọgbọkhọgbọ sẹkẹnẹ khi isumha ni e waa shi apfẹ Izulẹ.” ²⁵Ama ọọ ke bhẹ a nyẹsẹ ukhomhi nali ọọ li, “Ọnọmhọli, kpaghyiẹ mhẹ” ²⁶Ọọ sọ vhọ ọọ li, “O vha te odẹ khi a rhọ myie ikwukwu ivhie ukphakpha a pfi ọ ghyi imyi iweshi.”²⁷Ọọ li, “Iyọ lọ, Ọnọmhọli, ama imyi iweshi e khyie sanọ a le ikhẹshẹmhi ẹtsẹkẹ ni e te ukomhi itebu ọga dena kwule. ²⁸Ijesu ọ sọ vhọ ni ọ rhọ ẹẹ li, “Kpotso irhọshiọ nu mhuẹ o ma gbaa. O kaa kyia iyọ nẹẹ abhi u li nono ọ.” Oni ẹrhẹghẹ oyọ omyi ọli ọ ze obobobọ.²⁹Ijesu ọ te ayọ vu ni ọ rhọ je asha ni o chi mama okwu igalili. Ọ te ayọ vu ọ shele ukomhi ọkpha a shitọ. ³⁰Iọgbọ nebu e bhẹ bhuli ọ le. E rhi ikhyila, izalo, idungme ali iọgbọ evhese ni e gwhua mẹ egbe. E rhẹ wẹ bhẹ vhi ẹghẹghẹ Ijesu, ọ gaa rhi wẹwẹ kwu ze. ³¹Iyọ o nya wẹ aloa ni ọ rhọ mẹ khi eni idungme khi ee ngme, eni ikhyila ee kyia, izalo ee mato. E ke chichi Ishinẹgba Izulẹ.³²Ijesu ọ ke nyalu idibo ọli chi mama egbe ọọ rhọ ẹẹ wẹ, ''Elemhi oni agbaa ona ọa vhala mhẹ, rharhi khi avho ni amoliẹsẹ li e te nu mhẹ la ena e vha le ẹtsumhanẹkẹ. Imha nono khi mhi to wẹ abọ kwa ni e vha le emenale, khi e ke chiuba shi atuodẹ. ³³Eni idibo eẹ li, ''Obho eyẹ laa mẹ irhu ikpkakpha nebu vhi elemhi apata ni eyẹ la ena ni e laa kwhese iọgbọ ni e lina bu ena?'' ³⁴Ijesu ọọ wẹ, ''irhu ikphakpha ingmẹ vha mhuẹ?'' Eẹ li, ''Ishila ali ikwukwu ifẹẹ'' ³⁵Ijesu ọ ke ẹẹ li eni iọgbọ e shitọ ekẹ.³⁶Ọ rhue eni irhu ikphakpha ishila ali eni ifẹ, abhi ọ ke rhọ kphẹmhi shi vhọ, ọ kwẹkwẹ eni ikphakpha ni ọ rhọ rhẹ wẹ ni eni idibo ọ. Eni idibo ọ e kemhi wẹ ni eni iọgbọ. ³⁷Eni iọgbọ kwu, e le e kwhe kpẹkẹẹ. E sano eni emenale ni e kpọẹ vọsẹ igwhugwhu ishila. ³⁸Eni e le wẹ e khyili emọse agbẹlẹ egbhọ igbe asha ene. A rhi obo rhue ikpotso vhọ le ali eni ivhiẹ. ³⁹Iyọ Ijesu ọ chigbe ẹẹ wẹ khi e kee je, ọ lo ọkọ ni ọ rhọ vu jee ẹvholi Imagadan.

¹Iọgbọ Ifarisisi ali Isadiusisi e bhẹ lẹẹ nwu ọli fẹẹ ni e rhọ mhilali khi ọ rhi ishẹfẹ ni o te idane bhẹ khasẹ wẹwẹ. ²Ama ọ ke sọ vhọ ni ọ rhọ ẹẹ li, “O kha kyia ẹlogbode, vhẹ khi, “Ogbe o maa laa ti amo, rharhi khi eda oa lilẹ.³Ẹluzogbe vhẹ li, “Oni ogbe o vha laa ti amo, rharhi khi idane oa lilẹ o gwe chi kpiale” vha gwabha ngme a lasele abhi idane o li ẹloe, ama vhavha ke dobẹ a ngme lasele ishẹfẹ oni ẹrhẹghẹ ni o bhẹ ena. ⁴Ozele ingmobe ni ea li odosẹ ea nono ishẹfẹ, ama a vha laa rhi ishẹfẹ na wẹ sẹkẹnẹ khi ishẹfẹ Ijona,” Iyọ, li Ijesu ọ pfi wẹ shi ayọ vu.⁵Eni idibo ọli e ke liegbe obhoni o kpọẹ, ama, e vha gwe sato tsua ikphakpha. ⁶Ijesu ọọ wẹ, “Vha zẹ ẹgbhẹ shi iduekẹ iọgbọ Ifarisisi ali Isadiusis. ⁷Eni idibo ọli e ke sa vhi elemhi wẹ ni e rhọ eẹ li, “Ina khi eyẹ vha tsua ikphakpha lọọ. ⁸Ijesu ọ yẹsẹ emeni ee ngme ni ọ rhọ ẹẹ wẹ, “Vhẹvhẹ ni vha mhuẹ ukwukwu irhọshiọ, elọ vha ke te a sa vhi idu vhẹ ni vha rhọ ẹẹ khi, ina khi vhavha tsua ikphakpha lọ?⁹Vhẹvhẹ vhavha khyie yẹsẹ, wẹ khi rhemhi vha sato, irhui ikhakpha ishie ni a ke rhọ ni agbẹlẹ egbhọ igbe igbe ashi ishie, igwhugwhu ingmẹ vha sanọ ekẹ? ¹⁰Nenaa eni irhui ikhakpha ishila ni a rhọ ni agbẹlẹ egbhọ ashi ene igwhugwhu ingmẹ vha sanọ ekẹ?¹¹Elọ e ke zẹ ni vhavha ke rhọ yẹsẹ khi a khi ingmemhi ikphakpha mhi ngme? Vha zẹ ẹgbhẹ shi iduekẹ Ifarisisi ali Isadiusisi” ¹²Ayọ li e ke la yẹsẹ khi a khi rhẹmhi ọọ wẹ khi e zẹ ẹgbhẹ shi emeni e rhi ukphakpha fuma, ama khi ewẹna iọgbọ Ifarisisi ali Isadiusis li ọọ ngme.¹³Abhi Ijesu ọ ke rhọ bhẹ vhi ukyiekyiemhi aloekẹ Isisaria Ifilipi ọọ ke mhila idibo ọli, ọọ wẹ, “Ọgwho iọgbọ eẹ khi Omyi Ọmọse ọ kyia? ¹⁴Eẹ li, “Egwho eẹ khi Ijọni ni ọa baptizi Iọgbọ lọ, egwho, eẹ khi Ẹlaja lọ; evhese eẹ khi Ijerimaya ọa liyo ukwhumhọgwho elemhi eni ebolẹ. ¹⁵Ọọ wẹ, “Ama ọgwho vha ke ẹẹ khi mhi kyia? ¹⁶Isamọni Ipitẹ ọọ ke sọ vhọ ọọ li, “Ghyiẹ khi ọni ikiristi, Omyi Ishinẹgba ni ọ nyele”¹⁷Ijesu ọ sọ vhọ, ni ọ rhọ ẹẹ li, “A zẹ ọte nẹẹ ghyiẹ Isamọni Iba Ijona, rharhi a khi ẹlamhijegbe ali ọlia li e gweghyiẹ ona khasẹ ẹ, ama Ita mhẹ ni ọ la oweda. ¹⁸Mhi ẹẹ ghyiẹ, khi ghyiẹ khi Ipitẹ, ukhomhi oni agbhẹ ona lẹ mhi laa ma owuka mhẹ shi, ikphokpholo owerhẹ o vha laa pfi gwese ẹ.¹⁹Mhi la laa rhi igoji aleghyie oweda nẹẹ, Ememeni vha laa gẹnọ oni ukhomhi ekagbọ ona, a la laa gẹnọ ọli vhi elemhi oweda, ememeni vha la taghyiẹa ukhomhi oni ekẹ ona, a la laa taghyiẹ ọlia elemhi oweda” ²⁰Ijesu ọ ke kpe ẹka nya eni idibo ọli vhi ukhomhi khi imhẹ wẹ kpọ ọli epfẹ ekẹ le khasẹ iogbọ khi lẹlẹ khi ọni Ikiristi.²¹Rhọ te oni obọ oyọ bhẹ li ọ ke te ngmee khasẹ idibo ọli khi lẹ nwemaa lẹ je Ijerusalemu, lẹ mechọ nebu obọ eni e womhẹ ali eni e kpeda ugamhi ali eni ikọwe, a gbe lẹa, a gwe nwu lẹ vue bhẹ vhi inyele ogbẹlẹ ozesẹ. ²²Ipitẹ ọ kphẹ tali ọ nu ọli ngme vyili, vyili, ọọ li, “Ona o nuẹ shi ẹ vhi egbe, Ọnọmhọli: A vha chigbe laa mẹ onana obodẹ ẹ. ²³Ama Ijesu ọ liegbe ni ọ rhọ ẹẹ li Pitẹ, “Kaa je mhẹ oshimhi ghyiẹ okhyio! Ọzuodẹ lẹ u kyia na mhẹ, rharhi khi u waa pfi ẹgbue shi ẹtsẹkẹ Ishinẹgba, sẹẹ khi ẹtsẹkẹ agbọ”²⁴Ijesu ọ ke ẹẹ li idibo ọli, “A kha mẹ ọni ọ khi lẹ rha khẹ mhẹ, ọ khyie egbe ọli, ọ pfi obọ rhue ọgbagala ọli, ọ chigbe rha khẹ mhẹ. ²⁵Rharhi khi ọni ọ khi lia tsumhi ayẹmhẹ ọli, ọ laa wasẹ ọlia, ọnọni ọ ke laa wasẹ aymẹhẹ ọlia rharhi mhẹmhẹ ọ laa gwe mẹ ọli. ²⁶Mhi gyhi elele ni o la khi ọgbọ ọ rhọ mhọli agbọ kwu vhi elele ọ ke rhi ayẹmhẹ ọli to vhọ? La khi elo ọgbọ rhọ laa lọghyiẹ ayẹmhẹ ọli?²⁷Rharhi khi Omyi Ọmọse ọ la laa rhi ikiki Ita ọli ali ighyiukọ ọli bhẹ, ishọyọ ọ fali iọgbọ kwu ota abhi e li gbe. ²⁸Ingmaghyie mhi ngme khasẹ vhẹ, “Iọgbọ egwho vhẹ e la ni e nu vhẹ mugha ana ena, ni e vha laa mẹ egwhi ẹloe gwhe, rhili a pfishi ẹrhẹghẹ ni e rhọ laa mẹ Omyi Ọmọse ọ rhi eghyiele ọli a bhale.”

¹O ke gba ẹlesesa dọsẹ, Ijesu ọ rhue Ipitẹ ali Ijemhisi, ali Ijọni ni inyọgwho ọli, ọ rhẹ wẹ bhẹ vhi ukhomhi ọkpha ni o yagha, wẹwẹ ọgwho. ²Ọ la Ukpẹloe wẹ mela egbe. alo ọli ee gẹẹ abhi ọwẹ, ede ni ọ sọ ee pfuasẹ abhi ufulọ ni ọa gẹgẹgẹ.³A ke ẹẹ khi ẹẹ fẹẹ, Imozisi ali Ẹlaja e nu ọli na eta. ⁴Ipitẹ ọ ke ẹẹ li Ijesu. “Ọnọmhọli, oo khaa ti khi eyẹ rhọ la ana. O kha kyia khi o ghọli e, eyẹ kha tọ ikwu esẹ shi ana, a tọ ogwho nẹẹ, a tọ ogwho ni Imozisi, a tọ ogwho ni Ẹlaja.”⁵Aloabọ ni ọ rhọ khyiele ngme, ghe, ghe, atutu ni o pfuasẹ, pfuasẹ, o gwese wẹ, urhuli ni o te oni atutu lasele, oo ngmee ọọ li, “Ọna khi egbegbe Omyi mhẹ ni ọ gwhẹ mhẹ, egbe ọli e maa nwu mhẹ. Vha rhi esọ shi ọ vhi ekẹ” ⁶Abhi idibo ọli e ke rhọ suọ ona, e tutu alo ma ekẹ, ulishi oo nwu wẹ. ⁷Ijesu ọ bhale a rhi obọ chi wẹ ọọ wẹ, “Vha vu ekẹ le khi imhẹ vha gwe nu ulishi. ⁸Li e rhọ yasẹ alo ekẹ e vha gwe mẹ ọgbọkhọgbọ sẹkẹnẹ khi Ijesu lọgwho.⁹Abhi e ke rhọ te oni ukhomhi ọkpha ẹẹ kpiale, Ijesu ọ kpẹka nya wẹ ukhomhi, ọọ wẹ, “Imhẹ vha ngme emeni vha mẹ ena khasẹ ọgbọkhọgbọ, sẹkẹnẹ khi ẹrhẹghẹ ni Omyi Ọmọse ọ rhọ laa te egwhi vulẹ” ¹⁰Eni idibo ọli, e mhilali, eẹ li, Elọ e ke zẹ shiọ ni ikọwe e ke rhọ ẹẹ li khi Ẹlaja li ọ kpọ laa bhẹ ikyiatsolo?”¹¹Ijesu ọ sọ vhọ ọọ li, “Ingmaghyie Ẹlaja ọ la laa bhẹ laa rhi ẹtsẹkẹ kwu shi ikpa ni e la. ¹²Ama mhi ngme khasẹ vhẹ, Ẹlaja ọ she kpọ bhẹ, ẹloe wẹ o vha ta vhi egbe. Onochi, e khyiẹlẹ ọli emeni o gwhẹ wẹ. Abagwhoyọ, Omyi Ọmọse ọ li laa mẹ ẹchọ obọ wẹ.” ¹³Ayọ li eni idibo ọli e ke te yẹsẹ khi obodẹ Ijọni ni ọọ batazi iọgbọ li ọọ ngme.¹⁴Abhi e ke rhọ liegbe bhẹ bhuli oni agbaa ni e rhọ gba le, ọmọse ọgwho ọ nyẹsẹ egbe ni Ijesu ọọ li, ¹⁵Ọnọmhuẹmhẹ, mhọli ivhẹlemhi kwu omyi mhẹ, idukpakpa li ea te ọli, o maa nwu ọ ze, utotona li ọ rhọ de alo erhẹ ali amẹ. ¹⁶Lẹ mhi rhọ rhi ọli bhẹ buli idibo ẹ le, ama e vha dobẹ rhi ọli ze.¹⁷Ijesu ọ sọ vhọ ọọ li, “Vhẹvhẹ ozele ni e kẹnaa ni e vha mhuẹ irhọshiọ, ashio mhi laa nu vhẹ la tẹsẹ rhamhi? Ashio mhi laa nu vhẹ rhi egbe myie tẹsẹ rhamhi? Rhi ọli bhẹ vhi ana ghyi mhẹ gwhe.” ¹⁸Ijesu ọ va nya vhi ukhomhi, oni ayẹmhẹ obe o chi ọ vhi ẹgbe le. Obobobọ ọni ọmọ ọ le ze.¹⁹Eni idibo ọli e bena bhui Ijesu le eẹ li, “Elọ e zẹ khi eyẹ vha dobẹ kwhu ọ lẹ vhi egbe lasele?” ²⁰Ijesu ọọ wẹ, “Rharhi ukwukwu irhọshiọ ni vha mhuẹ lọ, rharhi khi ingmaghyie mhi ngme khasẹ vhẹ, o kha kyia khi vha mhuẹ irhọshiọ ni o rhẹ shiẹ abhi ukpamhi imọstadi, vha dobẹ a li ẹẹ li ọkpha ‘vu ana le, o la laa vu ayọ le a vha mẹ emeni e vha laa gba nẹẹ. ²¹Ama ayẹmhẹ ọnana ọ vha lase ọgbọ egbe le ina khi rhọ te ikpa olema ali azumhi.”²²Abhi e ke rhọ la Igalili, Ijesu ọọ li idibo ọli, ''A la laa nwu omyi ọmọse ghyi iọgbọ. ²³Ama, e la laa gbe ọlia, ogbẹlẹ oze esẹ, a gwe laa nwu ọli vue.'' Rharhi ona egbe vha gwe nwu eni idibo ọ.²⁴Abhi e ke rhọ bhẹ vhi Ikapaniọmu, emyionoga e bhẹ bhuli Ipitẹ le, eẹ li, “Ọwẹnagbọ ọ vha mẹẹ lia zẹ oga?” ²⁵Ọọ li, “Ee” Abhi Ipitẹ ọ ke rhọ lo elemhi apfẹ le, Ijesu ọ kyiatsolo nu ọli ngme ọọ li, “See u sa vhọ, Samọni? Eni ighyie oni agbona, obọ egwho e te a myienono oga ali emeni a rha ga oghyie? Obọ omekẹ lọ la khi obọ elele?²⁶Abhi Ipitẹ ọ ke rhẹ khi obọ elele lọ, “Ijesu ọọ li, “Oyọ khi rhẹmhi a rhi obọ gbe ivhiẹ ekẹ shi. ²⁷Rharhi khi eyẹ ke rhi eni emyionoga li ingmobe, kee je okwu, pfi ukpakwhi lo okẹ, khi u rhọ nwu afẹ, ọni u kyiatsolo laa nwu gweghyie ọli unua, u bhẹ laa vhẹ ukpaghọ, rhue ọli zẹ oga mhẹ ali uwẹ vhẹ.”

¹Oni ẹrhẹghẹ oyọ eni idibo ọli eẹ li, “Ọgwho ọ mẹẹ fu nẹẹ kwu elemhi aleghyie oweda?” ²Ijesu ọ nyalu ukwukwu ọmọ chi mama egbe, ọ rhi ọli shi iteteva wẹ. ³Ọọ li, “Ingmaghyie lẹ mhi ngme khasẹ vhẹ, sẹkẹnẹ khi rhẹmhi vha nwu egbe lieliẹ vha ke liabhi ikwukwu ivhiẹ, a vha laa mẹ odẹ ni vha te laa lo aleghyie oweda.⁴Iyọ, ọgbọ ni ọ laa chi egbe ọli kpiale abhi ọni ukwukwu ọmọ ọna, ọni ọgbọ ọyọ li ọ fu nẹẹ elemhi aleghyie oweda. ⁵Ọgbọ ni ọ laa rhue ukwukwu ọmọ ọnana chi mama egbe elemhi eva mhẹ mhẹmhẹ lọ rhue chi mama egbe. ⁶Ama ọnọni ọ ke laa rhi eni ikwukwu wẹ ena ni e lama shi mhẹ vhọ li ingmobe, o kha ti nẹẹ khi ọgbọ ọyọyọ a zu ẹchẹ shi ọ vhi urhui, a pfi ọli lo asha ni o limhi nẹẹ elemhi okwu.⁷Epfua khi uwi agbọ rharhi khi a nwemaa mẹ ọzuodẹ, ama khi epfua khi uwi ọni ọgbọ ni o te obọ ọli bhẹ. ⁸O kha kyia khi obọ ẹ ọa liyọ owẹ ẹ li o laa pfi ẹ gbe, khyi ọli pfia. O ti nẹẹ khi u rhọ la agbọ kyila ukyila ni ọ kachẹa, dala abọ ali awẹ ẹ e gba nẹẹ lo owerhẹ ni agbọagbọ.⁹O kha kyia khi ukpẹloe ẹ li o laa rhẹ de, o dea khi u zọlọ ọli pfia. O khaa ti khi u rhọ rhi ukpẹloe ogwho lo agbọ ni agbọagbọ, dala u rhi ikpalo eva e rhọ gba nẹẹ lo owerhẹ ni abgoagbo.¹⁰Zẹ khi imhẹli a mẹ emeni u rhọ rhi ukpẹloe gbe ukwhumhogwhọ elemhi eni ikwukwu wẹ ena. Rharhi khi mhi ẹẹ vhẹ khi elemhi aleghyie oweda ighyiukọ wẹ ea bino Ita mhẹ alo na wẹ ẹrhẹghẹ kwu vhi aleghyie oweda. ¹¹Rharhi khi Omyi Ọmọse, rhemhi ọ bhẹ a tsumhi eni e waa.¹²See vhaa saa? Ọgbọ kha mẹ mhuẹ isumha egbhọ ishie, ekẹ o ke gbhamhi ọgwho vhọ vu, ọ vha mẹẹ a dobẹ ukpamhi ogwho o vha la egbhọ ishie shi abesọkpha, ọa nono ọni ọgwho ni ekẹ o gbhamhi vu eyọ? ¹³Ọ kha mẹẹ mẹ ọ, ingmaghyie mhi ngme khasẹ vhẹ, egbe la laa nwu ọ shi ọni ọgwho ọyọ dala eni ukpamhi ọgwho ọ vha la egbhọ ishie ni ekẹ o vha gbhamhi vu. ¹⁴Abagwhoyọ, o vha ghọli Ita ẹ ni ọ la aleghyie oweda khi a rhọ mẹ khi ukwhumhogwho elemhi eni ikwukwu wẹ ena khi ọ rhọ pfua.¹⁵Inyọgwhọ ẹ ọ kha li ẹ ingme, bhuli ọli, dobẹ ọli yẹsẹ asha ni ọ te lue nẹẹ, ama o le kyili vhẹvhẹ lẹ. Ọ kha rhi esọ shi ẹ vhi ekẹ, u she gwe chi ingogwho ẹ mama egbe, ¹⁶Ọ vha ke rhi esọ shi ẹ vhi ẹkẹ, nyalu inyọgwho ẹ ọgwho ọa liyọ ava evhese ma egbe, ishọyọ ọtsẹ ukwumhava ọa liyọ ikwumhasẹ, ingme o she ngme egbe ọ.¹⁷Ọ vha ke rhi esọ shi wẹ ekẹ, kaa ngme oni ingme khasẹ eni eyuka, ọ vha ke gwe rhi esọ shi eni eyuka vhi ekẹ, vha rhue ọli abhi ọgbọ Ijẹtasi ali omyionoga.¹⁸Ingmaghyie mhi ngme khasẹ vhẹ, ememeni vha gẹnọ ukhomhi ekagbọ a la laa gẹnọ ọli elemhi aleghyie oweda, ama ememeni vha taghyiea vhi ukhomhi ekagbọ, a la laa taghyiẹ ọlia vhi elemhi aleghyie oweda. ¹⁹Mhi gwe ngme khasẹ vhẹ, khi ikwhumhava elemhi vhẹ oni agbona khi e lama ni egbe shi ẹtsẹkẹ ogwho ni e mhila, Ita mhẹ ni ọ la elemhi eda ọ la laa khyiẹlẹ ọli na wẹ. ²⁰Rharhi khi asha ni ikwhumhava ọa liyọ ikwhumhasẹ e legba elemhi eva mhẹ, mhi la wẹ vhi iteteva.”²¹Ipitẹ ọ ke bhe ọọ li Ijesu, “Ọnọmhọli, iti ingmẹẹ inyọgwho mhẹ ọ laa li mhẹ ingme na mhi rhọ yelea a naa? O kha rhamhi iti shila lọ?” ²²Ijesu ọọ li, “Imhẹ ghyiẹ iti ishila, ama iti egbhọ esẹ ikpẹ gbe ali ishila e kaa la asha ishila mhi ngme.²³Elemhiyọ aleghyie oweda rhẹmhi o liabhi oghyie ọgwho ni ọ khi lẹ lẹẹ nu egamhẹ lẹ ta ikpaghọ. ²⁴Abhi ọ ke rhẹ ta wẹẹ, e rhi ọgamhẹ ogwho bhẹ ni ọ lo ọli ikpulu agbẹlẹ egbhọ igbe asha igbe. ²⁵Abhi ọ vha ke rhọ mẹ odẹ ni ọ te lẹẹ fẹ wẹẹ, ọga ọli ọọ li khi a nwu ọli dẹ, ali ugwhẹ ọli ali imyi ọli ali emeni ọ mhuẹ kwu, khi a rhọ fali oni ota.²⁶Iyọ ọni ọgamhẹ ọọ de ta hrugwhu ọọ li, “Ọga, vhẹlemhi mhẹ, mhi laa fali ẹ eni eta kwu.’ ²⁷Iyọ ọni ọga ọli ọyọ, rharhi khi idu e kẹkẹ ọlia, ọ wolọ ọli abọa ota ni ọ lo kwu, a gbe wẹ kwa naa.²⁸Ama ọni ọgamhẹ ọyọ ọ ke lo ode, ọ bhale a vhẹ ọni e gaa ẹẹ gbe akanya, ni ọ li lo ọli ikpulu egbhọ ishie ọ kpha tsua, ọ nwu ọli urhui ọọ li, “Fẹ mhẹ ota ni u lo mhẹ. ²⁹Ama ọni ọmọse ọyọ, ọ tarugwhu ọọ lemali, ọọ li “Mhuẹ irhobọnwidu na mhẹ, mhi la laa fẹ oni ota.”³⁰Ama ọni a gbe ota kwa na eyọ, o vha lama shiọ onochi, oa pfi ọli lo ogba igwhumha, ọọ li, 'sẹkẹnẹ khi rhẹmhi ọ fali mhẹ oni ota ni ọ lo mhẹ.' ³¹Abhi eni e gaa ẹẹ gbe akanya e ke rhọ mẹ emeni a mẹẹ, abọ e sha wẹ, e ke bhẹ a ngme khasẹ ọni oga wẹ emeni a mẹ kwu.³²Ọni ọga ọgamhẹ ọyọ ọ ke a nyalu ọli mhila, “Ghyiẹ ọgbọbe, ota ni u lo mhẹ kwu mhi yelea nẹẹ rharhi khi u lema mhẹ. ³³U waa ke li mhuẹ ivhelemhi kwu ọgamhẹ nabhi ghyiẹ, abhi mhi li mhuẹ ivhẹlemhi kwu ẹ eyọ?”³⁴Ofu o kee fuu ọni ọga ọli ọ rhọ rhe ọli ni eni e rhi ẹchọ a ni iọgbọ, ọọ wẹ, sẹkẹnẹ khi rhẹmhi ọ fali ota ni ọ lo kwu. ³⁵Iyọ Ita mhẹ ni ọ la aleghyie oweda ọ li la li ẹ, ni a mẹ ọni ọ vha rhi udu ọli kwu yelea ni eni inyọgwho ọli.’’

¹Abhi ọ ke ngme eni ingmemhi ena pfuse, ọ te Igalili vu, ọ bhẹ vhi iteteva Ijudea ni o kpeda ni okẹ Ijodani. ²Ebubu iọgbọ e rhọ khali ọli, ọ la ayọ rhẹ wẹ ze.³Ifarisisi e bhuli ọli le, e nwu ọli fẹẹ, eẹ li,”Ushi oo mẹẹ ngme khi ọmọse ọ kwhu ọgwhẹ ọli ni a mhuẹ emeni a mẹ?” ⁴Ijesu ọọ li, “Vhavha khyie zẹ ebe, khi ọni ọ te ekẹ ma wẹ khi ọkpotso ali ọmọse li ọ ma wẹ?⁵Ọọ gwe ngme, Rharhi ona ọmọse ọ la chi ita ọli ali inyọ ọli egbe tanya ọ toma ugwhẹ ọli vhọ?’ ⁶Ishọyọ e vha ke gwe kyili ava, ama ijegbe ogwho. Elemhiiyọ, emeni Ishinẹgba ọ toma, imhẹ laa mẹ ọni ọ pfala wẹa.”⁷Eẹ li, ’Elọ e ke zẹ khi Imozisi ọọ li ẹẹ, a rhi ebe ivugwhẹ ni ọkpotso khi a kwhu ọ?” ⁸Ọọ wẹ, “Rharhi khi udu vhẹ o maa womhẹ li Imozisi ọ te dobẹ vhẹ ẹẹ pfa ugwhẹa, ama te ituekẹle o vha kpọ kyia yọ. ⁹Mhi ẹẹ vhẹ, “Ọnọni ọ la kwhu ugwhẹ ọli, ina khi irhẹmhi ọ gbe ighaba, ọ mhọli ọvhese, irhẹmhi ọ li odọsẹ. abagwhoyọ ọmọse ni ọ laa mhọli ọkpotso ni a kwhu ugwhẹ, irhẹmhi ọ li odọsẹ.¹⁰Eni idibo Ijesu eẹ li Ijesu, o kha kyia khi iyọ li ingme ọkpotso ali ọmọse o li, o vha ti khi ọgbọ ọ ye ugwhẹ khi oyọ.” ¹¹Ama Ijesu ọọ wẹ, “ A khi ọgbọ kwu li ọ dobẹ laa myie eni ewẹna ena, sẹkẹnẹ eni a rhi imhasha na khi e myie wẹ. ¹²Rharhi khi a mẹ eni a vyia egwhuegbea. A mẹ eni iọgbọ e rhọ kyili egwhuegbea. A mẹ eni e rhi egbe wẹ kyili egwhuegbea, rharhi aleghyie Ishinẹgba. Ọni ọ dobẹ a myie eni ingme ena, ọ myie wẹ.¹³A nwuno ikwukwu ivhiẹ bhuli Ijesu le khi ọ rhi obọ nyanọ wẹ egbe pfi olema na, ama idibo ọli e kwhu wẹ kwa. ¹⁴Ijesu ọ va nu wẹ ukhomhi vyili, vyili, “Vha dobẹ eni ikwukwu ivhiẹ, imhẹ vha nwu wẹ gba khi e ke bhuli mhẹ le, rharhi khi aleghyie uwi iọgbọ enana.” ¹⁵Ọọ rhi obọ nyanọ wẹ egbe, neni ọ te ayọ vu.¹⁶A ke ẹẹ khi ẹẹ fẹẹ, ọmọse ọgwho ọ bhẹ bhui Ijesu le ọọ li, “Ọwẹnagbọ, mhi gyhi onaghyie na mhi nwemaa laa khyiẹ na mhi rha mhuẹ inyele ẹlẹnagbọagbọ? ¹⁷Ijesu ọọ li, “Elọ e zẹ khi u waa lu mhẹ ọni ọ ti? Ukhumhọgwho li ọ le t, ni ọ kyili ishinẹgba, ama u khaa nono khi u mhuẹ inyele, rhi ishi Ishinẹgba gwhẹ.¹⁸Ọni ọmọse ọọ li, “Ishi ni e egwho?” Ijesu ọọ li, imhẹ gbe ugbee, imhẹ li odọsẹ, imhẹ do ighyiatọ, imhẹ myie ọtsẹ ighagha. ¹⁹Rhi ekpẹ ni ita ẹ ali inyọ ẹ, u mhọli ighọli ọgbọ nabhi ghyiẹ abhi u li mhọli ighọli egbe ẹ .”²⁰Ọni ọnọghodọ ọọ li, “Mhi kpọ ga rhi ena kwu a gbee, elọ e ke khyie kpọẹ ni a nono?” ²¹Ijesu ọọ li, “U kha nono khi egbe gba nẹẹ pfuse, kee lẹ, rhi emeni u mhọli dẹẹ, khi u rhọ kemhi ni enanya, ishọyọ khi u mhọli ẹpfue shi aleghyie oweda. ishọyọ u bhẹ khi u rhọ khẹ mhẹ.” ²²Abhi ọni ọnọghọdọ ọ ke rhọ suọ emeni Ijesu ọ ngme, ayele li ọ ke rhọ vu rharhi khi ọ mhọli ukpokpomhi ọsuemhẹ.²³Ijesu ọọ li idibo ọli, ‘’Ingmaghyie mhi gwu khasẹ vhẹ, oo maa nwunu khi ọnọsuemhẹ ọ rhọ dobẹ lo aleghyie Ishinẹgba. ²⁴Mhi gwe gwu khasẹ vhẹ, Ọnọsuemhẹ ọ rhọ lo aleghyie Ishinẹgba, ukhomhi ena o she rhọ te ukpẹloe agbede a dọsẹ.”²⁵Abhi idibo ọli e ke rhọ suọ ona, abọ e sha wẹ eẹ li, “Ọgwho ọ ke ga laa pfueọle shiọ?” ²⁶Ijesu ọ pfi alo a fẹ wẹ ọọ wẹ, ²⁷“A kha ẹẹ li obodẹ ọgbọ o vha gba, ama obodẹ Ishinẹgba, ẹtsẹkẹ kwu e laa gba?”²⁸Ijesu ọọ wẹ, “ingmaghyie mhi gwu khasẹ vhẹ, vhẹvhẹ ni vha rhọ khẹ mhẹ, oni ogbẹlẹ ni Omyi Ọmọse ọ laa shitọ utekwu eghyieli ikiki, vha li laa shitọ itekwu igbe ali eva, vhaa sọ ẹdẹli Izulẹ unu ẹzọ.²⁹Ọnọni ọ laa te rharhi mhẹ dobẹ apfẹ oli, inyọgwho ọli ni ikpotso ali emọse, ita ọli, ali inyọ ọli, ali imyi ọli, ali ekẹ ọli, ọ laa mhuẹ wẹ asha egbho ishie ọ chigbe gwe le ukwu ẹlẹnagbuagbọ. ³⁰Ama eni e kpalo nena, e la laa kposhimhi, eni e kposhimhi e la laa kpalo.

¹Aleghyie oweda rhẹmhi o liabhi ọni ọ mhọli ogba, ni ọ rhi ogbeẹ a nono eni e ye ọwa ẹẹ nali. ²Abhi ọ ke rhọ lama khi lẹẹ laa fẹ wẹ akpulu ogwho, gwho, gwho, ọ li, e kee je oni ogba e ke lẹẹ gbe akanya.³Ọ ke gwe lo odẹ ẹrhẹghẹ okwulọkwu itili ọ mẹ enọwa khi e mugha atuokyi khi e vha mhuẹ oni ea gbe. ⁴Ọọ we, “Vha kaa je ishemhi mhẹ a gbe akanya. Emeni e ti vhẹ elemhi mhi la laa rhọ na vhẹ” E te ayọ vu ni e rhọ lo oni ogba lẹẹ gbe akanya.⁵Ọ ke gwe lo odẹ ẹrhẹghẹ ọkwulọkwu igbe ali eva, ọ gwe lo odẹ ẹrhẹhgẹ ọkwulọkwu esẹ ọ gwe ngme wẹ yọ. ⁶Ọọ gwe liyọ lo odẹ ẹrhẹghẹ ọkwulọkwu ishie ọ bhale a vhẹ khi evhese e tono mugha e vhẹ khyiẹlẹ ẹtsẹkẹ. Ọọ wẹ, “See vha ke li mugha ana ogbe ni amo vhavhaa khyiẹlẹ ẹtsẹkẹ?’ ⁷Eẹ li, “Rharhi khi eyẹ vha mẹ ọni ọ rhue eyẹ vhi ọwa. Ọọ wẹ, vha kee je oni ogba emeni e gọ lu vhẹ mhi laa rhọ na vhẹ.⁸Abhi ogbode o ke rho le, ọni ọ mhọli oni ogba ọọ li ọni ọ rhi eni iọgbọ gbe akanya, ‘Nyalu eni egbe ikanya khi u fali wẹ ota, rhọ te ọni ọ kposhimhi bhẹ gbasẹ apfishi ọni ọ kyiatsolo bhẹ. ⁹Abhi eni e rhi ọkwulọkwu ishie bhẹ ọ fali wẹ akpulu ogwho, gwho, gwho. ¹⁰Abhi eni kyiatsolo e ke rhọ bhẹ, e khọkhọ khi wẹwẹ e la lẹẹ myie bu nẹẹ, ama a gwe li fali wẹ akpulu ogwho, gwho, gwho, abagwhoyọ.¹¹Abhi e ke rhọ myie ifọta wẹ, e gwu ẹzọ khasẹ ọni ọ mhọli oni ogba. ¹²Eẹ li, ‘Eni e bhẹ kposhimhi ọkwulọkwhu ogwho li e le gbe akanya, ama see u ke li fali eyẹ abagwho? Eyẹ ni eyẹ she gbe akanya ni ovọ o she gbe khakhaa.’¹³Ọni ọ mhọli ogba ọ sọ ọni ukwhumhogwho wẹ vhọ, ‘Ukpokyia mhẹ, imha ke khyiẹlẹ vhẹ onobe. A khi akpulu ogwho lẹ mhi nu vhẹ do? ¹⁴Myie abhi mhi nu vhẹ do khi vha kee je obhoni vha je. Abhi o gwhẹ mhẹ li o kyia khi mhi rhọ fali vhẹ abagwho.¹⁵A khi mhẹmhẹ na mhi mhuẹ ẹtsẹkẹ mhi yẹsẹ abhi mhi a li ọli? Rharhi khi mhi gwabha li vhẹ li vha rhi ukpẹloe obe fẹẹ mhẹ a shi?’ ¹⁶Iyọ eni e kpe oshimhi e la laa kpalo, eni e kpalo e la laa kpe oshimhi a nyalu ebubu ama ikwukwu li a zẹ.”¹⁷Abhi Ijesu ọ rhọ je Ijerusalẹmu, ọọ rhue ikwhumhi ọgbe ali ava mhọ obọ, ọ lẹ odẹ gwu khasẹ wẹ ọọ wẹ, ¹⁸“Ghee, ghe Ijerusalẹmu li eyẹ a je naa, a laa nwu Omyi Ọmọse ni eni e kpeda ugamhi ali ikowe. ¹⁹e la laa gbe ọlia. Ee laa ji ọli abọa ni Ijẹtasi nwu alo wu ekẹa, e rhi ite gbe ọ, e chigbe tanọmanọ. Ama ogbẹlẹ ozesẹ ọ te egwhi vule.”²⁰Inyọ imyi Izẹbẹdẹ ọọ rhi imyi ọ ma egbe bhui Ijesu le. Ọọ nyẹsẹ egbe nali ọ mhilali ẹtsẹkẹ. ²¹Ijesu ọọ li, “Elọ u nono?” Ọọ li, “Rhi unu bhẹ khi eni imyi mhẹ ena, khi e rhọ nu ẹ shitọ, ọgwho o pfọni obita ẹ, ọni ọ kpọẹ opfọni ọgobọ ẹ elemhi aleghyie ẹ”²²Ama Ijesu ọ sọ vhọ ọọ li, “U waa yẹsẹ emeni u waa mhila ena. Vha dobẹ laa la ukolo na mhi la laa da ena da?” Eẹ li, “Eyẹ dobẹ.” ²³Ọọ wẹ, “Ingmaghyie lọ, vhaa nwemaa la ukolo mhẹ a da. Ama vhaa rhọ shitọ obọ obita ali obọ ogọbọ mhẹ a khi mhẹmhi rhi ọli a na vhẹ, ama eni Ita mhẹ ọ khyiẹlẹ ọli shi na, wẹwẹ li e mhọli ọli.” ²⁴Abhi eni ogbe ali ọgwho ni kpọẹ e ke rhọ suọ oni ingme, e mẹ ọtuegbe ni eni ikwhumava ni e kpọẹ.²⁵Ama Ijesu ọ nyalu wẹ chi mama egbe ọọ wẹ, “Vha yẹsẹ khi eni ea mhasẹ ni Ijẹtasi izemhi li e rha mhasẹ na wẹ, abagwhoyọ enefu ni e la e rha khasẹ wẹ khi a she rhi unu na wẹwẹ obodẹ wẹ. ²⁶Ama imhẹ uwẹ vhẹ o liyọ, onochi, ọnọni ọa nono khi lẹ kyili ọnọfu vhi iteteva vhẹ ọ nwemaa kpọ a kyili ọgamhẹ. ²⁷Abagwhoyọ ọnọni ọa nono khi lẹ kpalo ọ nwemaa kpọ a kyili ọgamhẹ. ²⁸Iyọ li Omyi Ọmose ọ vha li bhẹ khi a gbega lẹ, ama ọ rhọ ga iọgbọ, ọ chigbe gwe rhi ayẹmhẹ ọli pfa iọgbọ shi ekẹ.”²⁹Abhi e ke rhọ te Ijẹriko lasele, iọgbọ ebububu e rhọ khẹ wẹ. ³⁰E mẹ izalo ava khi e shitọ esọ odẹ. Abhi e ke rhọ sokwu khi Ijesu ọọ dosẹ, e sọse eẹ li “Ọnọmhuẹyẹ, Omyi Idevidi, mhuẹ ivhelemhi kwu eyẹ.” ³¹Eni iọgbọ ni e legba e va nya wẹ vhi ukhomhi, eẹ wẹ, vha koko unu ayọ. Ama e khyiele sọse eẹ li, Ọnọmhuẹyẹ, “Omyi Idivedi, mhuẹ ivhelemhi kwu eyẹ.”³²Ijesu ọ ke mugha tọkọlọ ọ nyalu wẹ ọọ wẹ, “Elọ vha nono khi mhi khyiẹ na vhẹ?” ³³Eẹ li, “Ọnọmhuẹyẹ, rhẹmhi eyẹ khi ikpalo eyẹ khi e kwheghyiea. ³⁴Abhi Ijesu ọ ke rhọ mhuẹ ivhẹlemhi kwu wẹ, ọọ rhi obọ chi wẹ alo, obobobọ ee mato e rhọ khali Ijesu vu.

¹Abhi Ijesu ali idibo ọli e rhọ chi mama Ijerusalẹmu ni e rhọ bhẹ vhi Ibẹtfaji, obhoni ukhomhi ọkpha Olivi, Ijesu ọ ghyie idibo ọli ava, ²Ọọ wẹ, “Vha je ẹvhue ni o mama oni ẹvhue ona,vha kha yẹsẹ a bhẹ vhaa laa mẹ akachi ali alakumhi ni a nwu zu vhi ayọ, vha taghyiẹ wẹ bhẹ ghyi mhẹ. ³Ọni ọ mhila vhẹ, vha gwu khasẹ ọ khi, ‘Ọnọmhuẹyẹ li ọa nono wẹ’ ọni ọgbọ ọ vha laa nwu vhẹ shi rhẹmhi ọ dobẹ wẹ rha khẹ vhẹ bhale.⁴Irhẹmhi a mẹ ona khi emeni a te unu ọbolẹ ngme o kẹ tsẹ, ọọ ngme, ọọ li, ⁵Mhi ngme khasẹ imyi ikpotso Izayọni, vha ghe, oghyie vhẹ ọ she a bhẹ bhuli vhẹ le, ọ chiegbekpiale a nya akachi ali alakwumhi.”⁶Eni idibo ọ ni ọ ghyie e liyọ lẹ a khyiẹlẹ abhi Ijesu ọ ghyie wẹ. ⁷E nwu akachi ọnọghọdọ ali alakwumhi ghyi ọli, e rhi ede wẹ kwhẹsẹ ọ, Ijesu ọ shitọ vhọ. ⁸Ebubu eni iọgbọ e banọ ede ali iwulu wẹ kwu ekẹ nali rhẹẹ te, eni e kpọẹ e gbe ebe kwu ode.⁹Iọgbọ ni e kpalo ali eni e rhẹ khali Ijesu, ee sọse, ee li ẹẹ li, “Ikiki (Hossanna) o kyili uwi Omyi Idevidi! Ivhọsẹna o kyili uwi ọni ọ te eva Ọnọmhuẹyẹ bhale. Ikiki (Hosanna) ni ọ yagha nẹẹ!” ¹⁰Abhi Ijesu ọ ke rhọ lo Ijerusalẹmu le, oni ẹvhue kwu o li gbii ee mhila ogbọ, “Ọgwho ọna ọ kyia shiọ? ¹¹Oni agbaa ni o legba e ke sọ, “Ọna khi Ijesu ọni ọbolẹ, ni ọ te Inazarẹti nẹ Igalili bhẹẹ.”¹²Ijesu ọ lo owuka. Eni e la elemhi oni owuka e la vhọ ẹẹ do okyi, ọ pfino wẹ itsua kwa. Shi itebu eni e rhi ikpaghọ lọghyiẹ ikpaghọ ali itekwu eni e rhi igbekwukwu dẹ. ¹³Ọọ ke ẹẹ wẹ, “O la akẹkẹshiebe , ‘Apfẹ mhẹ la laa ke lu apfẹ olema, ‘Ama vha ke rhi ọli mela owa igyiaguda.” ¹⁴Eni e zalo ali ikhyila e bhẹ bhuli ọli le vhi oni owuka ọ rhẹ wẹ ze.¹⁵Ama abhi eni e kpeda ugamhi e ke rhọ mẹ ikanya ọnyaloa ni ọ gbee, ni e rhọ gwe mẹ khi eni ivhiẹ e sọse vhi oni owuka ee li ẹẹ li, “Ikiki (Hosanna) o kyili uwi Omyi Idevidi” o rhi ofu fuu wẹ. ¹⁶E ke ẹẹ li, “Uu mẹẹ a suọ emeni eni iọgbọ ena e mhia ngme?” Ijesu ọ ke sọ wẹ vhọ, “Ingmaghye lọ! Vhavha khyie li te ebe zẹ , khi unu ivhiẹ ali imọfẹ li a te a mẹ ichichi ni o gba pfuse?” ¹⁷Iyọ Ijesu ọ ke pfi wẹ shi ayọ je ẹvhue Ibẹtani a gbhẹ.¹⁸Ẹluvyiogbe ọọ ke liegbe je oni ẹvhue, okyiamhi o kee gbe ọ. ¹⁹Ọ ke mẹ orhẹ (ifigi) vhi esọ odẹ. Ọ chi mama ọli, ama ọ vha mẹ ukpamhi vhi ukhomhi ọ sẹkẹnẹ ebe apfuẹ, ọ ke ẹẹ li, “U waa gwe a mhọ ukpamhi gwhe.” Ayayayọ oni orhẹ (ifigi) o khakhaa.²⁰Abhi idibo ọli e ke rhọ mẹ ọli, o sha wẹ abọ eẹ li, “See oni orhẹ (ifigi) o ke gbha li khakhaa?” ²¹Ijesu ọ ke sọ wẹ vhọ, “Egbegbingme mhi ngme khasẹ vhẹ, vha kha mhuẹ irhọshiọ khi u waa bi ikhọkhọ, a khi emeni a li oni orhẹ (ifigi) ona lọgwho a le laa mẹ, vha dobẹ a nu ọkpha a ngme, chi ekẹ ana le khi u kee je elemhi okwu, iyọ a li laa mẹ ọ. ²²Emeni vha laa rhi olema mhila ni vha sheda lama shi vhọ, vha laa mhọli ọ.”²³Abhi Ijesu ọ ke rhọ lo elemhi owuka le, eni e kpeda ugamhi ali eni e womhẹ e bhẹ bhuli ọli le asha ni ọ lẹẹ wẹna iọgbọ owẹna eẹ li, “Izemhi ni ogwho u rhaa gbe eni ikanya ena? Ọgwho ọ rhi oni izemhi ona nẹẹ? ²⁴Ijesu ọ ke sọ wẹ vhọ, ọọ wẹ, “Mhi mhọli ogbọ ogwho na mhia mhila vhẹ. Vha kha sọ mhẹ vhọ, mhi chigbe ngme khasẹ vhẹ izemhi na mhi rha gbe eni ikanya ena.²⁵Ibatizimhi Ijọni obho o mẹẹ te bhẹ, aleghyie lọ la khi obọ iọgbọ?” Ee ke ye ochi, eẹ li, “Eyẹ kha ẹẹ khi alghyie lọ, ọọ laa li ẹẹ li, see vhavha ke li rhọ shi ọli vhọ?’ ²⁶Ama eyẹ khẹ khi obọ iọgbọ lọ, ulishi agbọ ni e legba ọa nwu eyẹ, rharhi wẹwẹ kwu irhẹmhi e rhue Ijọni abhi ọbolẹ” ²⁷Li e ke rhọ sọ Ijesu vhọ, eẹ li, “Eyẹ vha yẹsẹ,” ọ ke gwe sọ wẹ vhọ, “Imha laa gwu khasẹ vhẹ izemhi ọna mhi rha gbe eni ikanya ena.²⁸Ama vha khọkhọ shi ona gwhe? Ọni ọmọse li ọ vyia ivhiẹ ava. Ọ bhuli ọni ikyiatsolo ọọ li, ''Omyi mhẹ, je ishemhi a gbe akanya amo.’ ²⁹Ọni omyi ọli ọọ li, “Imha ye, ama o ke li zẹlẹ, ọ nwu udu lieliẹ ọọ lẹẹ. ³⁰Ọni ọmọse ọ bhuli ọni ọzava ọ ngme ọli abhi ọ kpọ ngme ọni ikyiatsolo. Ọni ọmọ ọọ li, ‘’Mhia ye ita,’ ama khi ọ vha ye.³¹Mhi gyhi ọni ọ khyiẹlẹ emeni ita wẹ ọ nono nena? “E ke sọ vhọ, ẹẹ li “Ọni ikyiatsolo.” Ijesu ọọ wẹ, “Egbegbingme mhi gwu khasẹ vhẹ, emyionoga ali ighaba e laa lo owa aleghyie Ishinẹgba khẹ vhẹ. ³²Rharhi khi Ijọni odẹ igwabhagbe li ọ te bhẹ bhuli vẹ le, ama vhavhaa rhọ shi ọ vhọ, na ke rhọ bhale a vhẹ khi enemyionoga ali ighaba wẹwẹ li e lama shi ọ vhọ. Vhẹvhẹ, abhi vha ke rhọ mẹ khi a mẹ yọ, vhavha chigbe nwu egbe lieliẹ lama shi ọ vhọ.³³Vha rhi esọ shi ekpita ovhese. Ọmọse ogwho ọ la, ọ mhọli ukpokpomhi ekẹ. Ọ gwa ikpamhi erhẹ shi vhọ, ọ gba ọgba gasẹ ọli a lẹ, ọ tọ asha ni a ba ikpamhi erhẹ a shi vhi elemhi oni ogba, ọ tọ asha ni a la khẹ ighyiatọ shi ayọ, ọ ngmomhi ọli ni eni e rhi ẹloe a kwhu eni ikpamhi erhẹ, ọ jee ẹvhue ovhese. ³⁴Ẹrhẹghẹ ikhyiẹsẹ eni ikpamhi erhẹ o kee chi bhẹ, ọ ghyie egamhẹ ọli bhuli eni ọ zẹ shi vhọ khi e rhi ẹkọmhi lẹ na wẹ ghyi lẹ.³⁵Ama eni egamhẹ ni ọ ghyie e nwuno wẹ, e gbe ọgwho, e gbolo ọvhesea, e chigbe tono ọgwho ẹchẹ. ³⁶Ọni ọ mhọli oni ogba ọ gwe ghyie egamhẹ ọli evhese, nebu dala eni ikyiatsolo, eni e rhi ẹloe kwu oni ogba e gwe li wẹ yọ. ³⁷Utozesẹ omyi ọli li ọ ke ghyie, ọọ li, “E laa rhi ekpẹ ni omyi mhẹ.’³⁸Abhi eni e rhi ẹloe a kwhu oni ogba e ke rhọ mẹ ọni omyi ọ, eẹ li egbeẹ, ‘Ọni ọ laa le ukwu ọli khi ọna, vha bhẹ, khi eyẹ gbe ọlia khi eyẹ rhi ukwu le,’ ³⁹Li e rhọ nwu ọ pfi te ogba a lase, e rhọ gbe ọlia.⁴⁰Nenaa ọni ọ mhọli oni ogba ọ kha ke bhale, see ọ laa li eni e rhi ẹloe a kwhu oni ogba oyọ” ⁴¹Eẹ li, “Odẹ ọkhọlọ li ọ te laa pfuse wẹa, ọ chigbe myie wẹ lẹ ọ rhọ ni iọgbọ evhese ni e rhi ẹloe a kwhu ogba, ni e laa kee khyiẹsẹ wẹ ghyi ọ ni e ke vyie.”⁴²Ijesu ọọ wẹ, “Vhavha khyie li te akẹkẹshebe zẹ, ‘khi ẹchẹ ni etowa e rhi ẹloe gbe li o ke nwu ukpowa mhuẹ. Ishinẹgba li ọ ngme ọ, ingme ọnyaloa li o kyia shi eyẹ vhi ẹloe.⁴³Elemhiyọ mhi ẹẹ vhẹ, a la laa myie vhẹ eghyiele, Ishinẹgba ọ rhue ọli ni ẹvhue ni ea gwa ikpamhi erhẹ, ⁴⁴Ọnọni oni ẹchẹ ona o laa de nwu ọ laa tsẹkẹ kwa.⁴⁵Abhi eni e kpeda ugamhi ali Ifarisisi e ke rhọ suọ ona, e mẹ ọli mẹ khi ingme wẹwẹ li ọọ ngme. ⁴⁶Ama abhi e ke rhẹẹ nono khi wẹwẹ e nwu ọ, ulishi oni agbaa ni o legba oo nwu wẹ, rharhi khi eni iọgbọ rhẹmhi e rhue ọli abhi ọbolẹ.

¹Ijesu o gwe kpe ita ovhese khasẹ wẹ ọọ wẹ, ²’’Aleghyie oweda rhẹmhi ọ liabhi oghyie ọgwho ni ọ mhọli uliemhi izuode ni omyi ọli ni ọmọse. ³Ọ ghyie egamhẹ ọli khi e kaa nyalu eni ọ rhi ebe ghyi shi oni izuode bhẹ, ama e vha lama bhẹ.⁴Abagwhoyọ ọni oghyie ọ gwe ghyie egamhẹ ọli evhese, ọọ wẹ, ‘Vha gwu khasẹ eni a rhi ebe ghyi, “Vha li ẹẹ li, Vha ghe, ghe, mhi she nye emenale pfuse khi vha bhẹ. Mhi she gbolo ena ali imanu nefua. Mhi she nwunegbe pfuse. Vha bhẹ vhi oni uliemhi izuode.”⁵Ama eni a ghyie a lu o vha gaa nwu wẹ egbe pẹẹ. Egwho ee lẹẹ ishemhi wẹ, evhese vhọ e lẹẹ ikanaya ọdọdọda. ⁶Eni e kpọẹ e nwuno eni egamhẹ ọni oghyie, e yẹghẹwẹa, e chigbe gbolo wẹa. ⁷Ama o rhi ofu fuu ọni oghyie onaghyie, onaghyie. Li ọ rhọ ghyie ichoja ọli, ‘Vhaa gbolo eni e gbolo egamhẹ mhẹa, vhaa chigbe tosẹ wẹ ẹvholia.⁸Ọ ke ẹẹ li egamhẹ ọli, ‘A she nwuno egbe oni izuode pfuse, ama eni a ghyie a lu egbe e vha gba na wẹ. ⁹Elemhiyọ vha jee uvọdẹ khi uvọdẹ khi vha nyalu ọni vha mẹ kwu bhale vhi oni uliemhi izuodẹ.’ ¹⁰Eni egamhẹ ọli e liyọ je ivọdẹ khi ivọdẹ e rha koko agbọ ni e mẹ kwu gba, shi eni e ti ali eni e vha ti. Oni agbalaa uliemhi izuode o vu iọgbọ ni a nyalu.¹¹Ama abhi ọni oghyie ọ ke rhọ bhẹ lẹẹ bino eni a nyalu shi oni uliemhi izuode, li ọ rhọ bhale a vhẹ ọni ọ vha rhi awulu izuode sọ. ¹²Ọni oghyie ọọ li, ‘Ukpokyia mhẹ, see u waa ke li sọ awulu izuode ni u rhọ liyọ lo ana lee?’ Ọni ọmọse ọ pfiesuọa.¹³Ọni oghyie ọ ke ẹẹ li eni egamhẹ, ‘Vha fali ọni ọmọse ọna abọ ali awẹ, khi vha pfi ọli lo aloebi, ni ọ laa kee mẹ ẹchọ ọ rhi akọ a kee le akọ,’ ¹⁴Rharhi ebubu iọgbọ li a nyalu ama ikwukwu wẹ li a sanọ vhọ.¹⁵Eni Ifarisisi ee mhasẹ abhi wẹwẹ e li lẹẹ rhi ushi nwu Ijesu obọ te ikpa ingmemhi unu ọ. ¹⁶Iyọ e ghyie egamhẹ wẹ bhuli ọ, ali eni e nwu kwu Ẹrọdu vhọ. Eẹ li Ijesu, “Ọwẹnagbọ, eyẹ yẹsẹ ẹ shi ọgbọ ni ọa ngme ingmaghyie, u rhi ingmaghyie a wẹna iọgbọ odẹ Ishinẹgba, u waa rhi ẹgbhẹli ọgbọ a gbe, u waa mhọli ọna li ọ kpẹ mhẹ nẹẹ. ¹⁷Nenaa gwu khasẹ eyẹ, elọ u sa vhọ? Ushi li o mẹẹ kyia khi a rhọ zẹ oga ghyi Isiza laa khi imhẹli a zẹ?”¹⁸Ama Ijesu ọ yẹsẹ ọkhọlọ wẹ li ọ rhọ mhila wẹ, “See vha ke li nwu mhẹ a fẹẹ, enaKẹmẹmhẹ? ¹⁹”Vha rhi oni ukpaghọ oga khasẹ mhẹ,” li e rhọ rhi oni ukpọgwho lasele.²⁰Ijesu ọọ wẹ, “Ọgwho a nwu shi ana ena, see a lu evali?’ ²¹E ke sọ vhọ, eẹ li, “Isiza.” Ijesu ọ ke ẹẹ wẹ, “Iyọ, rhi uwi Isiza ni Isiza, u rhi uwi Ishinẹgba ni Ishinẹgba.” ²²Abhi e ke rhọ suọ ona, abọ e sha wẹ. Irhẹmhi e ke pfi ọli shi ayọ vu.²³Oni ogbẹlẹ iọgbọ Isadusisi egwho e bhẹ bhuli ọli le, eni e vha lama shi itiegwhivule. Eẹ li, ²⁴”Ọwẹnagbọ, Imozisi ọọ ngme, ‘Ọmọse ọ kha gwhua, khi ọ vha vyia ivhiẹ, inyọgwho ọli ọọ nwemaa ẹẹ mhọli ọli khi ọ vyialọ ivhiẹ shi ni ọni inyọgwho ọli ni ọmọse ni ọ gwhua eyọ,’²⁵Aa ke liyọ mẹ inyọgwho emọse oshila. Ọni ikyiatsolo ọ mhọli ọkpotso ọ bhale a gwhua, ọ vha vyia ivhiẹ. Ọ dobẹ ugwhẹ ọli shi ekẹ ni inyọgwho ọ. ²⁶Inyọgwho ọli ni ọzava ọ mhọli ọli ọ vha li vyia ivhiẹ ọ li gwhua, ọzasẹ, ọ gwe mhọli ọli ọ gwhua apfishi ọni ọzoshila, ²⁷E ke gaa gwhuloa pfuse, ọni ọkpotso ọ li gwhua. ²⁸Nenaa, ogbẹlẹ itegwhivule, elemhi wẹwẹ oshila ugwhẹ ọgwho ọ laa kyia? Rharhi wẹwẹ kwu li e gaa mhọli ọli.”²⁹Ijesu ọ ke sọ wẹ vhọ ọọ wẹ, “Ipfiobọdọ vha mhọli ena, rharhi khi vhavha yẹsẹ ingmemhi Ishinẹgba wẹ khi izemhi ọli. ³⁰Rharhi itiegwhivule ni iọgbọ e laa vule, ọmọse ọ vhaa mhọli ọkpotso wẹ khi ọkpotso li ọ laa ke gwe ye ugwhẹ.³¹Ama obodẹ itiegwhivule, vhaa khyie li mẹ zẹ emeni Ishinẹgba ọ ngme ni ọ rhọ ẹẹ li, ³²‘Mhẹmhẹ khi Ishinẹgba Ebulahamu, Aziki, ali Ijekọpu? Ishinẹgba ọ vha kyili Ishinẹgba eni e gwhu, ama eni e nyele,” ³³Abhi oni agbaa ni o legba e ke rhọ suọ ona, owẹna ọli o rhi abọ sha wẹ.³⁴Ama abhi Ifarisisi e ke rhọ suọ khi Ijesu ọ she zuse Isadusisi unu, ee la koko egbe gba, ³⁵Ukwhumhọgwho ni ọ kyili ọni ọ rhi iọgbọ ẹẹ gwu ẹzọ, ọ mhilali ogbọ, ọ rhọ nwu ọli fẹẹ- ³⁶”Ọwẹnagbọ, ushi ni ogwho o gaa fu nẹẹ elemhi ishi khi ishi kwu?”³⁷Ijesu ọọ li, “”U nwemaa rhi ukpakomhi ẹ kwu a mhọli ighọli Ọnomhọli ni Ishinẹgba ẹ, ali shi avhagwu ẹ kwu, ali udu ẹ kwu.’ ³⁸Ona khi ushi ikyiatsolo ali oni o fu nẹẹ kwu.³⁹Ushi ni o kpọẹ irhẹmhi o gwe liabhi lẹ- ni ọọ li, ‘U nwemaa mhọli ighọli ọgbọ nabhi ghyiẹ.’ ⁴⁰Eni ishi ena lẹ khi ukhomhi ishi ni e kpọẹ kwu.”⁴¹Abhi eni Ifarisisi e khyie li legba, Ijesu ọ mhila wẹ ogbọ. ⁴²Ọọ wẹ, “See vha khọkhọ obodẹ ọni Ikiristi?” Omyi ọgwho ọ kyia, “e ke sọ vhọ ẹẹ li, “omyi Idevidi.”⁴³Ijesu ọọ wẹ, “See Idevidi ọ ke li lu ọli Ọnọmhuẹyẹ vhi elemhi ayẹmhẹ, ni ọ rhọ ẹẹ li, ⁴⁴“Ọnọmhọli ọọ li Ọnọmhuẹmhẹ, “ Shitọ obọ obita mhẹ, apishi na mhi rhọ laa rhi ẹbele ẹ kpọkẹ nẹẹ rhi ẹkoawẹ nwuno.'”?⁴⁵Idevidi ọ kha ke lu ọni Ikiristi ‘Ọnomhuẹmhẹ,’ see ọ kee lia kyili omyi Idevidi?” ⁴⁶A vha mẹ ọni ọ dobẹ sọ vhọ, te ọni ogbẹlẹ vu a vha gwe mẹ ọni ọ gwe jilẹ mhilali ogbọ.

¹Iyọ Ijesu ọ nu iọgbọ ni e legba ngme, ali idibo ọli. ²Ọọ wẹ, “Ikowe ali Ifarisisi e shitọ utakwu Imozisi. ³Rharhiyọ, ushi ni e shi na vhẹ kwu, lẹ vha rha gwhẹ. Ama imhẹ vha khọlia wẹ khyiẹlẹ emeni ea khyiẹlẹ, rharhi khi e laa ngme ama e vha rhẹ wẹ a gbe.⁴Ingmaghyie lọ, e maa gba itsua ni e khọkhọkhọ ni ea nwunu itsuamhi a nyanọ iọgbọ ike. Ama khi wẹwẹ obọ wẹ, e vha dobẹ rhi ukpobọ a yẹsẹ wẹ vhi ekẹ. ⁵Emeni ea khyiẹlẹ kwu, irhẹmhi ea khyiẹ wẹ khi agbọ e kẹ kee mẹ wẹwẹ. Irhẹmhi e fia itsuọtsuọ ni e vhẹ, e gwe nwuno abọ awulu wẹ ni e sọ vhẹsẹa.⁶Asha ekpẹ o maa gwhẹ wẹ ni ea shitọ ni a mhọli uliemhi elemhi ewuka. ⁷Ali otsẹ ni akẹ vhi atuokyi, ali agbọ e gwe kee lu wẹwẹ ‘ega.⁸Ama imhẹ la lu ẹ ‘Ọga.’ rharhi khi ọwẹnagbọ ọgwho li a lee mẹ, vhẹvhẹ ni e kpọẹ inyọgwho vha kyia. ⁹Imhẹ vha lu ọgbọkhọgbọ oni agbona ‘’Ita,” rharhi khi Ita ọgwho vha lee mhuẹ, ni ọ la aleghyie oweda. ¹⁰Wẹ khi rhẹmhi u dobẹ ọgbọ a lu ẹ ‘Ọwẹnagbọ,’ rharhi ọwẹnagbọ ọgwho li a lee mẹ ni ọ kyili Ikiristi. Ama ọnọni ọ laa kyili ọnọfu elemhi vhẹ ọ kpọ kyili ọgamhẹ.¹¹Ama ọnọni ọ laa kyili ọnọfu elemhi vhẹ ọ kpọ kyili ọgamhẹ. ¹²Ọnọni ọ sheda laa chi egbe ọli shele, a la laa chi ọli kpiale, ama ọnọni ọ sheda laa chi egbe ọli kpiale, a la laa chi ọ li shele.¹³“Ama epfua khi uwẹ vhẹ, vhẹvhẹ ikowe ali Ifarisisi, enaKẹmẹmhẹ! Vha pfino igoji vhi odẹ aleghyie zuse iọgbọ shi elase. Vhẹvhẹ vhavha lama lo, wẹ khi rhẹmhi vha dobẹ iọgbọ ni ea nono khi wẹwẹ e lo lo. ¹⁴Epfua khi uwẹ vhẹ, enaKẹmẹmhẹ! Vhaa lono apfẹ esọrhọ, vha rhi olema ni o nuẹ a kwu alo: elemhiyọ vha laa myie epfua ni o fu nẹẹ. ¹⁵Epfua khi uwẹ vhẹ, vhẹvhẹ Ikowe ali Ifarisisi, Enabọmhẹmhẹ! Rharhi vhaa da okẹ laa nwu iọgbọ bhẹ vhi ugamhi. Ọ kha bhẹ, vha chigbe rhọ mela omyi owerhẹa adẹva abhi vha li la.¹⁶Epfua khi uwẹ vhẹ, vhẹvhẹ izalo ni e rhi iọgbọ a khasẹ odẹ, ‘Vhẹ khi ọni ọ rhi owuka rhomhi, khi o vha kyili ingme. Ama ọni ọ rhi igolu ni o la owuka rhomhi, li irhomhi o mugha gba pfuse. ¹⁷Vhẹvhẹ izalo idẹkẹ, mhi gyhi oni o fu nẹẹ, igolu laa khi oni owuka ni o rhi oni igolu shi ipfuasẹ.¹⁸Abagwhoyọ, ‘Vha gwe ẹẹ khi ọgbọ kha rhi ọta rhomhi o vha kyili ingme. Ama ọni ọ rhi isomhopfa ni e la vhọ rhomhi, irhomhi ọli li o mugha gbaa.’ ¹⁹Vhẹvhẹ izalo, oni ogwho o fu nẹẹ, isomhopfa, laa khi oni ọta ni o laa rhi eni isomhopfa shi ipfuasẹ.²⁰Ọnọni ọ laa rhi ọta rhomhi, shi oni ọta ali emeni e la vhọ kwu li ọ rhọ rhomhi. ²¹Abagwhoyọ ọnọni ọ laa rhi owuka rhomhi shi lẹ ali eni e nyele vhọ kwu. ²²Ọnọni ọ laa rhi aleghyie Ishinẹgba rhomhi, shi oni utekwu eghyiele ali ọni ọ shitọ vhọ li ọ rhọ rhomhi.²³Epfua khi uwẹ vhẹ, Ikọwe ali Ifarisisi, enaKẹmẹmhẹ! A vha mẹ emeni vhavha te a zẹ arhuogwho igbe, Shi ebe iwẹwẹ ali ẹfọ, ama vha rhi obọ gbe shi emeni e nwemaa vọ ẹloe nẹẹ vhi eni ishi nabhi, isunu ẹzọ ni o te odẹ, ivhẹlemhi, irhọshiọ. Ama emeni vha kha khyiẹlẹ khi ena, ni vha gaa rhi ẹloe gbe. ²⁴Izalo ni e rhi ẹloe a kwhu, vhaa rhue ọgbọ ukwu onyọa, ama vhẹvhẹ vhaa to akpa onyọ a luẹ.²⁵Epfua khi uwẹ vhẹ, Ikowe ali Ifarisisi, enaKẹmẹmhẹ! Rharhi vhaa kpe elase ukoloa ali atasa, ama elemhi ọli o vọ ikwu ali ighiaghia. ²⁶Vhẹvhẹ Ifarisisi ni e zalo, vha kpọ kpe elemhi ukolo ali atasaa. Ishọyọ elase wẹ e ke li pfuasẹ abagwhoyọ.²⁷Epfua khi uwẹ vhẹ Ikọwe ali Ifarisisi, enabọmhẹmhẹ! Rharhi rhẹmhi vha liabhi iji ni a rhi ẹtse waa, khi elase ọli khi o somhote, ama khi elemhi ọli o vọ ilimhi iọgbọ ali igwhua ali ijomhi. ²⁸Iyọ vha li, vha gaa pfuasẹ elase ukpẹloe agbọ, ama elemhi vhẹ o vọ ijomhi, aKẹmẹmhẹ ali ingmobe.²⁹Epfua khi uwẹ vhẹ, Ikowe ali Ifarisisi, enakẹmẹmhẹ! Rharhi vha gaa manọ iji ebolẹ ali eni e pfuasẹ, vha gaa rhi ẹtse a shishi wẹa. ³⁰Vha ẹẹ li, ‘O kha kyia khi vhaa la agbọ oni ẹrhẹghẹ ititita vhẹ lọ, vhavha kha nu wẹ mhọli obọ shi ebolẹ ni e gboloa.’ ³¹Ama vha khyiele a li ẹẹ khi imyi eni e gbolo wẹa lẹ vha kyia.³²Vhaa li te ingmobe ita vhẹ kemhi yọ? ³³Vhẹvhẹ enyẹ, vhẹvhẹ ozele enyẹ (ilighyio), see vha li laa na pfue igwẹzọ owerhẹ?³⁴Elemhiyọ, ghe ghe, mhi ghyie ebolẹ bhuli vhẹ, etsẹgbhẹ ali Ikọwe. Vha gbolo ebubu wẹa, vha tanọ egwho vhọ manọ. Vha rhi itele gbe egwho vhi elemhi ewuka vha kwhu wẹ te ẹvhue ona je ẹvhue ona. ³⁵Ukhomhi vhẹ li eni ọlia eni e pfuasẹ ni e la ukhomhi ekagbọ ni vha gboloa e la, rhọ te ọlia Ebẹni rhili apfishi Izẹkaraya omyi Ibarachaya, ni vha gbea vhi elemhi asha ni o pfuasẹ ali ọta. ³⁶Egbegbingme mhi gwu khasẹ vhẹ, ena kwu a gaa laa mẹ wẹ oni ozele ona.³⁷Ijerusalẹmu, Ijẹrusalẹmu, vhẹvhẹ ni vha gbolo ebolẹ ni vha tono eni aghyie bhui vhẹ echẹ! See mhi li la koko imyi vhẹ kee gba utotona, abhi ọkhọkhọ ọ lia koko imyi ọli shi ifu ipfua, ama vhaa rhọ shiọ! ³⁸Vhavha mẹ, a she tsua apfẹ vhẹ pfia. ³⁹Mhi ẹẹ vhẹ, te nena vu vhavha gwe laa mẹ mhẹ, apfishi ni vha rhọ laa li ẹẹ li, ‘Ivọsẹna khi uwi ọgbọ ni ọ te obọ Ishinẹgba bhẹ.”

¹Ijesu ọ te owuka lase ọ rhọ te odẹ ọ. Idibo ọli e ke bhẹ bhuli ọli, e rhi ọli a khasẹ ewuka. ²Ọọ sọ wẹ vhọ ọọ wẹ, “Vha mẹ eni ẹtsẹkẹ ena nena? Ingmaghyie mhi gwu khasẹ vhẹ, a vha mẹ ẹchẹ ni o laa nya egbe egbe ni o vha laa de kwa.”³Abhi ọ li shitọ ukhomhi okpha olivi eyọ, idibo ọli e bhẹ bhuli ọli le kẹẹ, eẹ li, “Gwu khasẹ eyẹ, ẹrhẹghẹ ni a rhọ laa mẹ eni ingme na? Elọ khi ishẹfẹ ni o laa rhi ibhale ẹ khasẹ ali emeni a laa mẹ ẹrhẹghẹ ukpẹsẹ agbọ?” ⁴Ijesu ọ sọ wẹ vhọ, ọọ wẹ, “Vha zẹ ẹgbhẹ shi ọ khi ọgbọ ọ kee wasẹ vhẹa. ⁵Rharhi ebubu iọgbọ e la laa rhi eva mhẹ bhẹ. Eẹ li, ‘Mhẹmhẹ khi Ikiristi,’ e la laa wasẹ ebubua.⁶Vha la laa kee suọ khi aa khọlii ekhọli. Ama imhẹ vha dobẹ ulishi nwu vhẹ, rharhi khi aa nwemaa mẹ eni ẹtsẹkẹ ena; ama ukpẹse agbọ o vha khyie rhamhi nee. ⁷Ẹvhue e la laa nwu okhọli nu ẹvhue vule, eghyiele e nwu okhọli nu eghyiele vule. A la laa mẹ ukhomhi ekẹ e kwuno a lono ashakhasha kwu. ⁸Ama ena kwu khi ugbẹkẹle osoli abhi ọkpotso ni ọ laa vyia.⁹E la laa rhi ẹchọ na vhẹ e gbolo vhẹa. Ẹvhue khi ẹvhue kwu e la kee bishi elemhi vhẹ rharhi eva mhẹ. ¹⁰Rharhi iyọ ebubu e la laa de imyiesuo ea va egbe oshimhi, ea bhishi elemhi egbe, ¹¹Ẹbolẹ ighagha e la laa lasele e wasẹ ebubua.¹²Rharhi khi ingmobe o la vọ ekagbọ, ighọli ni ebubu e mhọli o laa pfọa. ¹³Ama ọni ọ sheda laa rhi egbe myie la pfishi ukpẹsẹ, ọ laa pfue vhọ le. ¹⁴A la laa ngme oni ingmemhi aleghyie ona gasẹ oni ukhomhi ekẹ agbona kwu o rhọ pfi ọtsẹ shi ẹvhue khi ẹvhue kwu. Neni agbọ o pfo.¹⁵Elemhiyọ, vha kha sheda mẹ emeni a gwhẹ ni o tsua epfua, ni Idaniẹlẹ ni ọbolẹ ọ ke ngme, khi o mugha asha ni o pfuasẹ, (eni e zẹ ebe o ga wẹ ẹloe,) ¹⁶Eni e la Ijudea e nanọ a kee je ukhomhi ọkpha, ¹⁷Ọni ọ la ukhomhi oweda imhẹli ọ gwe kpiale ekẹ a rhue emeni e la apfẹ. ¹⁸Ọni ọ la ishemhi imhẹli ọ liegbe je apfẹ aa wolọ ede ọli.¹⁹Ama o maa laa khọlọ eni ea mẹ vhi egbe ali eni e rhi imọfẹ shi egbe! ²⁰Vha pfi olema khi imhẹli ifiala je idane vhẹ o de shi ẹrhẹghẹ ulili wẹ khi ogbẹlẹ ivhiẹmhia. ²¹Rharhi khi ukpokpomhi ẹchọ nofu ọa bhẹ, o nabhi a vha kpọ gaa mẹ gwhe ni a te tue agbọ ekẹ le ena apfishi nena. obho, a vha chigbe gwe laa mẹ yọ gwhe. ²²Sẹkẹnẹ khi rhẹmhi a khyi eni egbẹlẹa, a vha mẹ ọgbọ ni ọ kha pfue vhọ le. Ama rharhi eni a zẹ, a la laa khyi eni egbẹlẹa.²³Iyọ ọgbọ khẹ ghyiẹ, ghee, Ikiristi li ọ la ana ena!’ ọa liyọ, ‘Ikiristi li ọ la obholọ ena!’ imhẹ lama shi ọ vhọ.’ ²⁴Rharhi Ikiristi ighagha ali ebolẹ ighagha e la laa bhẹ e rhi inyaloa etọgbe a khasẹ, khi wẹwẹ e kẹ wasẹ agbọa, o khẹẹ gba lọ, e kha li wasẹ eni a zẹa. ²⁵Vha ghee, mhi she gwu khasẹ vhẹ shi ekẹ.²⁶Iyọ, e kha eẹ ghyiẹ, ‘Ikiristi ọ la apata,’ imhẹ je apata. ọa liyọ, eẹ ghyiẹ ghee, ọ la elemhi owa,’ imhẹ lama shiọ. ²⁷Abhi ọwẹẹ o li a te obhoni o te a lase {east} gẹẹ la kwu obhoni o te a lo ekẹ {west} , iyọ li ibhale Omyi ọmọse o laa li. ²⁸Rharhi khi asha ni ẹlamhi ọ kẹa shi ayọ li igwuli e le a gba.²⁹Ama oni ẹrhẹghẹ echọ oyọ o kha yẹsẹ dọsẹ ọwẹẹ o laa bi ebi, ukyi o vha gwe a gẹẹ, itata e te idane denaa kwule, izemhi idane ọa jigyhi.³⁰Oni Ẹrhẹghẹ ayọ ishẹfẹ Omyi Ọmọse o lase vhi idane, unu ẹvhue khi unu ẹvhue ea vyiẹ ni e mẹ ọni Omyi Ọmọse ọ te atutu rhi izemhi ali ikiki te idane a kpiale. ³¹Ọ rhi okphẹ ni ighyiukọ ọli a kphele onaghyie, onaghyie, ishọyọ e laa te ashakhasha koko eni ọ zẹ gba, te asha ni idane o te tuekẹle apfishi asha ni o kpẹsẹ.³²Vha te ikpa orhẹ olivi wẹna. Vhaa kha sheda mẹ khi orhẹ o de ebe a kwa, vha yẹsẹ khi okasẹ o she chi bhẹ. ³³Abagwhoyọ, vhaa kha shedaa mẹ ẹtsẹkẹ enana, vha yẹsẹ khi oni ẹrhẹghẹ o she chi bhẹ, o chi mama obunodẹ.³⁴Ingmaghyie mhi ngme a khasẹ vhẹ, oni ozele ona o vha dọsẹ la lẹẹ, sẹkẹnẹ irhẹmhi a mẹ eni ingme na kwu. ³⁵Ekẹ ali idanẹ e la dọsẹ, ama ingmemhi mhẹ, e vha laa dọsẹ gwhe.³⁶Ama oni ogbẹlẹ ali oni ẹrhẹghẹ a vha mẹ ọni ọ yẹsẹ, o kha rhẹ kyili ighyiukọ ni e la oweda, wẹ khi ọni Omyi ọ, sẹkẹnẹ ọni Ita lọgwho kpee.³⁷Abhi o ke li egbẹlẹ Inowa, iyọ ibhale Omyi Ọmọse o la li. ³⁸Eni egbẹlẹ, neni a mẹ ikpho rhẹmhi ee le ee da, ee zu ede ee mhọli ikpotso apfishi ni Inowa ọ rhọ lo ọkọ, ³⁹E vha yẹsẹ emeni a mẹ apfishi ni ikpho e rhọ bhale a tsua wẹ kwa, iyọ li ibhale Omyi Ọmọse o laa li.⁴⁰Iyọ, emọse ava e laa la ishemhi, a rhue ọgwho a dobẹ ọgwho. ⁴¹Ikpotso ava e la kee mhẹli ẹtsẹkẹ vhi emeni a laa mhẹli ẹtsẹkẹ, a rhue ọgwho a dobẹ ọgwho. ⁴²Elemhiyọ vha rhi eloe kpẹ, rharhi khi vhavha yẹsẹ oni ogbẹlẹ ni Ọnọmhuẹyẹ ọa bhale.⁴³Ama vhaa yẹsẹ ona, o kha kyia khi ọdapfẹ ọ yẹsẹ ẹrhẹghẹ ni ọghyiatọ ọ rhẹ bhẹ lọ, rhẹmhi ọ kha ẹẹ khẹ odẹ ọ vha kha dobẹ wẹ gbe ọli odea lo ọli vhi apfẹ. ⁴⁴Elemhiyọ vhaa nwemaa lia nwuno egbe shi ekẹ, rharhi khi ọni Omyi Ọmọse ọ la laa bhẹ ẹrhẹghẹ ni vhẹvha sha shi.⁴⁵Ọgwho ọ kyili ọgamhẹ ni ọa suọ esọ, ni ọ kyili ọtsẹgbhẹ, ni ọga ọli ọọ li ọ kee khẹ apfẹ na lẹ, khi lẹ kee rhi emenale na wẹ le shi ẹrhẹghẹ? ⁴⁶Ivọsẹna khi uwi ọgamhẹ ọyọyọ, ni ọga ọli ọ bhẹ laa vhẹ khi ọa gbe akanya ni a rhọ nali. ⁴⁷Ingmaghyie mhi gwu khasẹ vhẹ khi ọni ọga ọli ọ laa rhọ kpeda ni eneni ọ mhuẹ kwu.⁴⁸Ama a kha mẹ ọgamhẹ ni ọ sa vhi udu khi, ‘Ọga mhẹ ọ she a tẹsẹ,’ ⁴⁹Ọa gbee egamhẹ nabhi lẹ, ọ nu edenyọ a da enyọ, ⁵⁰Ọga ọgamhẹ ọyọyọ rhẹmhi ọa bhẹ shi ẹrhẹghẹ ni oni ọgamhẹ ọyọyọ ọ vha sa shi, ali ẹrhẹghẹ ni ọ vha yẹsẹ. ⁵¹Ọni ọga ọli ọyọ rhẹmhi ọa pfa ọli eva, ọ rhi ọli shi asha ni ọ rhi enakẹmẹmhẹ e la, asha ni ọ la laa kee mẹ ẹchọ ọ rhi akọ a le akọ.

¹Iyọ eghyiele eda rhẹmhi o laa liabi imọmoshi ogbe ni e vha yẹsẹ ọmọse nee ni e wolọ ikpa wẹ bhuli ọmọse ni ọ lẹẹ rhẹ wẹ zuode. ²Ikwhumhi ọshie vhọ e kyili idẹkẹ ọshie ni e kpọẹ e kyili etsẹgbhẹ ³Rharhi eni imọmoshi idẹkẹ oshie e chino ikpa, e vha rhue ovhili shi ẹtsẹkẹ ovhese. ⁴Ama eni ọshie ni e kyili etsẹgbhẹ e chino ikpa e chigbe rhue ovhili shi ẹtsẹkẹ ovhese kẹẹ.⁵Abhi ọni ọ lẹẹ rhẹ wẹ zuode ọ ke rhẹẹ tẹsẹ, e vheseshi ovhese o nwuno wẹ. ⁶Ama ogbokheva o ke le e rhọ suọ khi ẹẹ sọọse,’ e kee ẹẹ khi wẹwẹ ea fẹẹ, ọni ọmọse li ọ bhẹ naa! Vha je elase kee bhuli ọ.’⁷Eni imọmoshi kwu e vule e gẹsẹ ikpa wẹ shele. ⁸Eni idẹkẹ eẹ li eni etsẹgbhẹ, ‘Vha rhi ovhili ni eyẹ shi ikpa khi ikpa eyẹ e she laa pfua.’ ⁹Ama eni etsẹgbẹ e ke sọ wẹ vhọ eẹ li, ‘Ovhili eyẹ o vha laa lo eyẹ ali vhẹvhẹ shi vhọ, onochi vha bhuli eni e rha dẹ khi vha nu wẹ dẹẹ.’¹⁰Abhi e kee rhọ lẹẹ dẹ, ọni ọ lẹ rhẹ wẹ zuode ọ bhẹ, eni e nwuno egbe e rho khali ọli lo oni owa uliemhi izuode, a gwese oni odẹ. ¹¹O ke li dẹnẹe, eni e kpọẹ, ee kphele abọ odẹ, eẹ li Ọga! Ọga! kweghyie odẹa ni eyẹ. ¹²Ama ọọ ke sọ wẹ vhọ ọọ wẹ, egbegbingme mhi gwu khasẹ vhẹ, imha yẹsẹ vhẹ,’ ¹³Vha rhi ẹloe kpẹ rharhi khi vhavha yẹsẹ oni ogbẹlẹ ọa liyọ oni ẹrhẹghẹ.¹⁴Irhẹmhi o liabhi ọgbọ ni ọ lẹẹ lali ẹvhue. Ọ nyalu egamhẹ ọli ọ kemhi ẹpfue ọli na wẹ. ¹⁵Ukwhumhọgwho ọ rhi ikpulu ishie na ọli, ọvhese ọ rhi ikpulu eva nali, ọvhese ọ rhi akpulu ogwho nali. Ọ kemhi wẹ na wẹ abhi afu ọgbọgbọ o ta, li ọ rhọ vu lẹẹ asha. ¹⁶Ayayayọ ọni a rhi ikpulu ishie na ọ rhẹ wẹ do okyi, ọ bhale gwe a mẹ ikpulu ishie vhi elele.¹⁷Abagwhwoyọ ọni a rhi ikpulu eva na ọ li rhi iyi ọli do okyi ọ gwe mẹ ikpulu eva vhọ. ¹⁸Ama ọni ọ rhi akpulu ogwho na ọ rhọ te odẹ ọli ọ vu, ọa tọ iyi ọli sọ elemhi ekẹ, ọ rhi oni ukpaghọ ọga ọli a gbhagbha.¹⁹O ke gaa tẹsẹ, ọni ọga wẹ ọ te asha jele khi lẹ kaa bino abhi e li rhi emeni lẹ kemhi na wẹ kyia, khi lẹ fali ọgbọgbọ abhi ọ li gbe. ²⁰Ọni ọgamhẹ ni ọ rhi ikpulu ishie na, ọ rhi ikpulu ishie evhese ghyi ọga ọli, ọọ li ọga ikpulu ishie ni ọ rhọ na mhẹ mhi gwe mẹ ikpulu ishie vhi elele.’ ²¹Ọni ọga ọli ọọ li, ‘Moo, nwu ikanya, egbegbe ọgamhẹ! Ukwukwu ọ na mhi rhọ nẹẹ u gwabha rhi ọli kyia. Mhi laa rhẹ kpeda vhi emeni ebu, lo asha ọvyiọlọ ni o kyili uwi ọga ẹ.’²²Ọni ọgamhẹ ni a rhi ikpulu eva na , ọ bhẹ ọọ li, ‘Ọga, ikpulu eva ni u rhọ na mhẹ ghee mhi she gwe mẹ ikpulu eva evhese vhi elele. ²³Ọga ọli ọọ li, “Moo, nwu ikanya, egbegbe ọgamhẹ! Ukwukwu ẹtsẹkẹ na mhi rhọ nẹẹ u gwabha rhi ọli kyia. Iyọ mhi la laa rhẹ she ukhomhi atsẹkẹ nebu. lo asha ọgẹlẹ ọga ẹ.’²⁴Ọni a rhi akpulu ogwho na ọ bhẹ ọọ li, ‘ọga, mhi yẹsẹ ọgbọ ni ọa nwu agbọ jijiji li u kyia. Asha ni u waa rhọ kọ shi li u je laa khyiẹsẹ. ²⁵Ulishi li oo nwu mhẹ, lẹ mhi rhọ rhẹ wẹ a gbhagbha mhi tọ wẹ sọ ekẹ, ghe, ghe, ghyi ẹtsẹkẹ ẹ ni u kpọ rhọ na mhẹ.²⁶Ama ọni ọga ọli ọ ke sọ vhọ ọọ li, ‘Ghyiẹ ọgamhẹ ọgbọ ọkhọlọ ali ọkhẹmhẹ, u kpọ lee yẹsẹ khi asha ni imha rhọ kọ shi ayọ mhi je laa khyiẹsẹ. ²⁷Irhẹmhi u kha rhi ikpaghọlọ mhẹ na mhẹ mhi rha shi ilu ni a rhi ikpaghọlọ a shi, ishọyọ abhi mhi ke rhọ jele ena e kha nya vhọ na mhẹ nena.²⁸Elemhiyọ vha myie ọli oni ukpaghhọ khi vha rhọ ma ọni ọ mhọli ikpulu ishie vhọ. ²⁹Rharhi ọni ọ mhuẹ li a gwe rhaa ma vhọ, ọni ọ vha kpọ mhuẹ li a gwe a myie ukwukwu ni ọ kpọ mhuẹ. ³⁰Vha pfi ọni ọgamhẹ ọbe ọna lo aloebi, asha ni ọ la kee mẹ osue ọa gbe akọ vhi akọ.³¹Omyi Ọmọse ọ kha rhi ikiki ọli bhẹ ali ighyiukhọ ọli kwu, ọ la laa shitọ utekwu eghyiele ọli. ³²Ọ la laa koko ẹvhue kwu gba, ọ rhi ọgbọgbọ shi ikpọda, abhi ọrhisumhale ọ lia sanọ isuma vhi iteteva elamhi le. ³³Ọ khaa rhi isuma shi obita, ọ rhi elamhi shi ọgobọ.³⁴Iyọ ọni oghyie ọ laa li ẹẹ li enẹ obita, ‘Vha bhẹ, Vhẹvhẹ ni Ita mhẹ ọ zẹ ote na, vha le ukwu aleghyie ni a nwuno egbe shi na vhẹ te ituekẹle oni agbona. ³⁵Abhi okyiamhi o rhẹ gbe mhẹ vha rhi emenale na mhẹ le; abhi okyiamẹ o rhẹ gbe mhẹ vha rhi amẹ na mhẹ da; mhi kyili olele vha rhue mhẹ je apfẹ; ³⁶Mhi banọa vha rhi ode sọ mhẹ; mhi lẹẹ gwhua vha rhi ẹloe kwhu mhẹ; mhi la ogba ighumha vha bhale a bino mhẹ.’³⁷Eni e pfuasẹ e la mhila ọli ogbọ, ‘Ọnọmhọli, asha eyẹ mẹ khi okyiamhi o la ẹẹ gbe ẹ ni eyẹ rhọ rhi emenale na ẹẹ le? Okyiamẹ o gbe ẹ eyẹ rhi amẹ na ẹẹ da? ³⁸Ashio eyẹ mẹ khi u kyili ọlele, ni eyẹ rhọ rhi ẹẹ lo owa? U banọa eyẹ rhi ode kwu ẹ vhi egbe? ³⁹Ashio eyẹ mẹ ẹ khi u lẹ gwhua, ọa liyọ, u la ogba igwhumha, ni eyẹ rhaa bino ẹ? ⁴⁰Ọni oghyie ọ la laa sọ wẹ vhọ ọọ wẹ, ‘Egbegbingme mhi ngme khasẹ vhẹ, ememeni u khyiẹlẹ ni ọni ọ gaa kpọkẹ elemhi eni inyọgwho mhẹ ena, mhẹmhẹ vha khyiẹlẹ ọli na.⁴¹Iyọ, ọ la laa nu eni e la ọgobọ ngme, ‘Vha vu mhẹ alo le, vhẹvhẹ ni a pfi unu na, vha kee je owerhẹ ni ẹlẹnagbọagbọ ni a nwuno egbe shi ni okyio ali ighyiukọ ọli, ⁴²Rharhi okyiamhi o lẹẹ gbe mhẹ vhavhaa rhi emenale na mhẹ le; okyiamẹ o gbe mhẹ vhavha rhi amẹ na mhẹ da; ⁴³Mhi kyili ọlele vhavha rhue mhẹ lo owa; mhi banọa vhavha rhi ode kwu mhẹ egbe; mhi la ogba igwhumha, mhii gwhua vhavha bhale a bino mhẹ.’⁴⁴Iyọ ee li laa mhila ọli eẹ li, ‘Ọnọmhọli, obho eyẹ mẹ khi okyiamhi o lẹẹ gbe ẹ ni eyẹ vhaa rhọ rhi emenale na ẹẹ le, ⁴⁵Ọ la laa sọ wẹ vhọ,ọọ wẹ, ''Egbegbingme lẹ mhi ngme khasẹ vhẹ, emeni vhavha khyiẹlẹ ni eni inyọgwhọ mhẹ ena, mhẹmhẹ vha khyiẹlẹ ọli na.' ⁴⁶Ena e la laa je osoli ni ẹlẹngbọagbọ ama eni e pfuasẹ e je agbọ ẹlẹnagbuagbọ.

¹Ẹrhẹghẹ ni Ijesu ọ rhọ lẹẹ ngme pfuse, ọọ li idibo ọli, ²“Vha yẹsẹ khi ẹleva li o ke kpọẹ ni a rhọ laa khyiẹlẹ uliemhi idọsẹalẹ, iyọ a la laa nwu Omyi Ọmọse na wẹ khi e rhọ tanọmanọ.³Eni e kpeda ugamhi ali eni e womhẹ e laa legba vhi apfẹ ọni ọ kpeda, ni a lu Ikafasi. ⁴Ee mhasẹ khi wẹwẹ e bẹna rhi ushi nwu Ijesu obọ khi wẹwẹ e mẹ abhi wẹwẹ e li gbe ọlia. ⁵Rharhi khi e lẹẹ ngme, “A khi ẹrhẹghẹ uliemhi khi ozugwhu o ke bhẹ vhi iteteva eni iọgbọ.”⁶Abhi Ijesu ọ rhọ la Ibẹtani apfẹ Isimọni ni efafe nwu, ⁷Ijesu ọ kee le emenale, ọkpotso ọgwho ọ tsua akanama itulale ni o nwemaa galẹ, galẹ, bhuli ọli le, ọ kwu ọ rhugwhu ọli, ⁸Ama idibo ọli e ke rhọ mẹ emeni ọọ khyiẹlẹ, eẹ li, “Elọ a gaa pfuẹchẹ ona kwa a shi ena? ⁹A kha rhi ona dẹ a rhọ kemhi ni eni anya lọọ.¹⁰Ama Ijesu, ọọ yẹsẹ ona, li ọ rhẹ wẹ, ‘‘Elọ vha mẹ kpokpo ọni ọkpọtso ọna shi? Rharhi khi ọ she khyiẹlẹ ẹtsẹkẹ aghyie na mhẹ. ¹¹Enanya e nu vhẹ la ẹrhẹghẹ kwu, ama imha nu vhẹ la ana ẹrhẹghẹ kwu.¹²Rharhi oni ovhi ni ọ kwu shi mhẹ egbe na, rhẹmhi ọ khyiẹlẹ abhi a li laa rhẹ mhẹ tọ. ¹³Egbegbingme mhi gwu khasẹ vhẹ, asha ni a la laa ngme oni ingmemhi ona vhi ukhomhi ekagbọ kwu, a la laa kee sato emeni ọ khyiẹlẹ amo ena.¹⁴Ukwhumhọgwho elemhi eni ikwhumhọgbe ali ava ni ẹẹ lu Ijudasi, ọ bhuli ọni ọ kpeda ugamhi. ¹⁵ọọ li, “Ingmẹ vha la rhọ na mhẹ khi mhi rhi Ijesu na vhẹ?” E lama ni egbe shi ipọmhi uye ali igbe. ¹⁶Te oni ẹrhẹghẹ vu li ọ tee nono imasha ni ọọ rhọ nwu Ijesu na wẹ.¹⁷Ogbẹlẹ ikyiatsolo uliemhi idọsẹalẹ eni idibo Ijesu e bhuli ọli le ni e rhọ mhilali,” Ashio u nono khi eyẹ nwuno egbe oni uliemhi idọsẹalẹ shi nẹẹ?” ¹⁸Ọọ wẹ, vha je elemhi ẹvhue apfẹ ọni ọmọse ọgwho vha li ẹẹ li, ‘Ọwẹnagbọ ọọ ghyiẹ, ẹrhẹghẹ mhẹ o she rhamhi. apfẹ mhi laa khyiẹlẹ oni uliemhi idọsẹalẹ ona ali idibo lẹ.””” ¹⁹Eni idibo ọli e ye oni usomhi abhi ọ li ghyie wẹ lẹ, ni e rha nwuno egbe oni emenale idọsẹalẹ.²⁰Abhi ogbode o ke rhẹẹ le, ọ shitọ nu idibo ọli le emenale. ²¹Abhi e ke rhẹẹ le emenale, ọọ li, “Egbegbingme mhi gwu a khasẹ vhẹ, khi ukwhumhogwho elemhi vhẹ li ọ laa rhẹ mhẹ dẹ.” ²²Ona ọ rhi oya ga wẹ egbe, rhẹmhi ọgbọgbọ ọ kee mhilali , 'Mhẹmhẹ lọ Ọnọmhọli?²³Ọọ sọ vhọ, “Ọni ọ nu mhẹ a le emenale ena li ọ laa rhẹ mhẹ dẹ. ²⁴Omyi Ọmọse ọ nwemaa gwhua, abhi o li la akẹkẹshebe obodẹ mhẹ; Ama khi epfua lẹ khi ọni a laa te ikpa ọli rhi Omyi Ọmọse dẹ! a vha vyia ọli bhẹ vhi agbọ lọ li o khaa somhi nẹẹ.” ²⁵Ijudasi, ni ọ lẹẹ rhọ dẹ, “Ọọ li. ‘Ọga mhẹmhẹ lọ?” Ọ ke sọ vhọ “U she te unu ẹ ngme ọ.”²⁶Abhi e ke rhẹẹ le emenale, Ijesu ọ rhue ukphakpha, ọ zẹ ọte nali, ọ gbe ọ kyhia, ọ rhi ọli ni idibo ọli, ọọ wẹ, ‘Vha mọ le, ijegbe mhẹ khi ona.”²⁷Ọ ke rhue oni ukolo ọ kphẹmhi Ishinẹgba, ọ rhi ọli na wẹ ọọ wẹ, “Vha da ọli vhẹvhẹ kwu; ²⁸Ona khi ọlia mhẹ ni o kyili alamanegbe nogbọ, ni a kwu khi ingmobe ebububu iọgbọ e kẹ kyili eni a gbe kwa. ²⁹Ama mhi gwu khasẹ vhẹ, imha gwe laa nu vhẹ da oni onyọ ona. Sẹkẹnẹ oni ogbẹlẹ na mhi laa nu vhẹ da ọli vhi aleghyie Ita mhẹ.³⁰Abhi e ke rhọ to uwolo pfuse, e vu jee ukhomhi okpha olivi. ³¹Ijesu ọ ke ẹẹ wẹ, “Vhẹvhẹ kwu vha laa denakwa amyiọsẹ rharhi mhẹmhẹ, rharhi khi o la akẹkẹshebe, mhi la gbe ọrhisumhale ẹtsẹkẹ, eni isumha egbheakwa. ³²Ama mhi kha ke te egwhi vule, mhi la kpalo Igalili khẹ vhẹ.”³³Ama Ipitẹ ọọ ke ẹẹ li, “Ọgbọ kwu ọ kha rhẹ khyie ẹ, imha mhuẹ khyiẹ ẹ gwhe.” ³⁴Ijesu ọọ li, “Egbegbingme mhi gwu a khasẹ vhẹ, Amyiọsẹ ena, neni ọkpa ọ gbheẹghẹ, u laa khyie mhẹ itesẹ.” ³⁵Ipitẹ ọ ke sọ vhọ, “O kha rhẹrhẹ rhamhi uwi egwhi imha laa chigbe khyiẹ ẹ.” Idibo ọli ni ekpọẹ e li khọlia Ipitẹ ngme yọ.³⁶Ijesu ọ ke nu wẹ je Igẹsimẹnẹ ọọ li idibo ọli, “Vha shitọ ana khi mhi jẹ obholọ a pfi olema,” ³⁷Ọ rhue Ipitẹ mhọ ọbọ ali imyi Izẹbẹdẹ ikwhumhava e she laa ọrhọ, egbe e vha gwee sheshe wẹ. ³⁸Ọọ wẹ, “Ọrhọ o she vọ mhẹ vhi udu nena, ni o gaa pfi egwhi. Vha la ana khi vha nu mhẹ rhi ẹloe kpẹ.³⁹Ọ chi je odalo sui, ọ tarhugwhu, ọ pfi olema, ọọ li, ‘ Oo Ita mhẹ, o kha kyia khi ọa gba, zẹ khi oni ukolo ona khi o dọsẹ mhẹ a lẹ, a khi abhi o gwhẹ mhẹ, ama abhi o ghọli ẹ. ⁴⁰Ọ ke liegbe bhẹ, ọ bhale a vhẹ khi ovhesẹ o nwuno wẹ, ọọ li Ipite, ‘’Vha gaa li dobẹ nu mhẹ rhi ẹloe kpẹ ọkwulọkwu ogwho? ⁴¹Vha rhi ẹloe kpẹ khi vhaa ke delo ọnwufẹ: O gaa ghọli oni ayẹmhẹ, ama khi o lọsẹ ijegbe.⁴²Ọ gwe liegbe vu utozeva, ọa pfi olema, ọọ li, Ita mhẹ, o kha kyia khi oni ukolo ona khi o vha laa dọsẹ mhẹ la lẹ, khi mhi nwemaa da ọli, o kaa kyili abhi o ghọli ẹ, ⁴³Ọ ke gwe liegbe bhẹ ọ bhale a vhẹ khi ovhesẹ o nwuno wẹ, rharhi khi ikpalo e shee khọsẹ wẹ. ⁴⁴Ọ gwe pfi wẹ shi ayọ ọ vu,’ ọ gwe pfi olema utozesẹ ọ gwe ngme abhi ọ kpọ ngme.⁴⁵Ijesu ọ ke bhẹ bhuli idibo ọli le ọọ wẹ, “Irhẹmhi vha khyie vhesẹshi vhaa vhiẹmhia? Vha ghe, ghe, oni ẹrhẹghẹ o she bhẹ, a she rhi Omyi Ọmọse ni elingmobe dẹ. ⁴⁶Vha vule, khi eyẹ vu. Vha ghe, ghe ọni ọ laa rhẹ mhẹ dẹ ọ she chi mama ana.”⁴⁷Abhi ọ li khyiele ngme eyọ, Ijudasi, ni ọ la eni ikwhumhọgbe ali ava, ọ bhẹ, iọgbọ nebu e nu ọli kyia obọ eni e kpeda ugamhi ali eni e womhẹ li e te rhọ khali ọli bhẹ. E chino ifẹdo ali ikpokpo bhuli Ijesu le. ⁴⁸Ọni ọ lẹ rhi Ijesu dẹ ọ rhi ishẹfẹ na wẹ, ọọ wẹ, “Ọna mhi sheda laa pfipfi unu lẹ lọ, vha nwu ọ.⁴⁹Ayayayọ li ọ rhọ bhuli Ijesu le ọọ li, mhi tsẹ ẹ, ''Ọga” ọ pfipfi ọli unu. ⁵⁰Ijesu ọ ke ẹẹ li, “ukpokyia, khyiẹlẹ emeni e rhẹ bhẹ.” Ee bhẹ ea nwu Ijesu rhue vu.⁵¹A ke ẹẹ khi ẹẹ fẹẹ, ukwhumhọgwho elemhi idibo ọli ọ nise obọ ji ọfedo, ọ pfi ọli ni ukwhomhọgwho elemhi eni egamhẹ ọni ọ kpeda ugamhi, ọ khyi ọli esọa. ⁵²Ijesu ọọ li, “tsi ọfedo sọ upfiapfia ọli, rharhi eni e tsua ọfẹdo, ọfẹdo li ọa pfuse wẹa. ⁵³Rhẹmhi vha khọkhọ khi imha dobẹ a nyalu Ita mhẹ, ọ rhi ighyiukọ ni a vha dobẹ a lolo ghyi mhẹ. ⁵⁴See oni ingmemhi o ke lia tsẹ, ina khi rhẹmhi a mẹ wẹ?”⁵⁵Ijesu ọ ke la ayọ gwu khasẹ eni iọgbọ, ọọ wẹ, “Rhẹmhi vha ke rhi ọfẹdo ali itsua okwhẹ la nwu mhẹ ena abhi agyiaguda? Ogbẹlẹ kwu lẹ mhi rhẹ la owuka ẹẹ wẹna agbọ, vhavha nwu mhẹ. ⁵⁶Ama irhẹmhi a le li mẹ ena khi emeni a kẹkẹ shi ebe e kẹ tsẹ.” Iyọ idibo ọli e nanọ kwa.”⁵⁷Eni e nwu Ijesu e rhọ bhuli Ikafasi ni ọ kpeda ugamhi, asha ni eni ikọwe ali eni e kpeda e legba. ⁵⁸Ipitẹ ọ tanya rhẹ khẹ wẹ je atukpapfẹ owa ẹzọ ọni ọ kpeda ugamhi. Ọ je elemhi ayọ a nu eni e khẹ ayọ shitọ khi lẹ mẹ emeni a ke lẹẹ mẹ.⁵⁹Eni e kpeda ugamhi ali eni ee sọ unu ẹzọ e lẹẹ nono abhi e li rhi ushi nwu ọli obọ, khi wẹwẹ e kẹ mẹ abhi wẹwẹ ee li gbe ọlia. ⁶⁰Ama e vha mẹ ushi ogwho khi ogwho nwu ọ, eni ebubu iọgbọ li ee lasele myie ọtsẹ ighagha. Ama ikposhimhi ikwhumhava evhese e gwe lasele. ⁶¹Eẹ li, “Oni ọmọse ọna ọọ li ẹẹ li, ‘Mhi dobẹ a gwọghọ oni owuka ona mhi gwẹ sheshe ọli ma elemhi elese.”⁶²Ọni ọ kpeda ugamhi ọ chi ekẹ vule ọọ li, “U waa mhọli emeni u waa sọọ? Emeni a lolo kwu ẹ vhi egbe ena?” ⁶³Ijesu ọ vhaa sọ vhọ? Ọni ọ kpeda ugamhi ọ ke ẹẹ li, “Mhi rhi eva Ishinẹgba shi ushi nẹẹ khi u gwu khasẹ eyẹ ni Ikiristi li u kyia ingmaghyie, ni Omyi Ishinẹgba.” ⁶⁴Ijesu ọ ke sọ vhọ, “U she te egbe ẹ ngme ọ. “Ama mhi gwu khasẹ vhẹ, te nena vu vha laa mẹ Omyi Ọmọse ọ shitọ obọ obita izemhi, ọ te atutu oweda dọsẹ la lẹẹ.”⁶⁵Ọni ọ kpeda ugamhi ọ kyiọlọ awulua shi egbe ọli vhi urhui ọọ li, “Ọ she pfi unua! elọ eyẹ ke gwe nono ọtsẹlẹ a shi? Vhaa li te egbe vhẹ sokwu ọli nenaa, khi ọ she pfi unua. ⁶⁶See vha ke sa vhọ? Eẹ li, “Ọ kyili emeni a kha gbea.⁶⁷E tono etẹẹ kwu ọ vhi alo ee gbe ọ, e rhi ẹkoabọ ẹẹ gbe ọ, ⁶⁸Eẹ li, “Ngme ingme ogbhagbha khasẹ eyẹ, ghyiẹ ni Ikiristi. ọgwho ọ mẹẹ lase ẹ esọ eyọ?”⁶⁹Oni ẹrhẹghẹ ona Ipitẹ ọ shitọ elase owa ẹzọ, ọmọmoshi ni ọ la ayọ ẹẹ gbe akanya ọ bhẹ bhuli ọli le ni ọ rhọ ẹẹ li, “Uu li nu Ijesu Igalili kyia.” ⁷⁰Ama ọ cha ukpẹloe eni iọgbọ kwu, ọọ li, “Imha gaa yẹsẹ emeni u gaa ngme pẹẹ.”Ọ ke te obunodẹ dọsẹ lẹ lẹẹ, ọmọmoshi ọvhese ni ọ li la ayọ ẹẹ gbe akanya ọ mẹ ọli ọ gwu khasẹ iọgbọ ni e la ayọ, “Ọni ọmọse ọna ọ li lẹ eni idibo Ijesu ọnyi Inazẹrẹti. ⁷²Ighẹ li ọ ke rhọ cha, “Imha yẹsẹ ọni ọmọse.”⁷³O ke li zẹlẹ eni e mugha ayọ e bhẹ bhuli Ipitẹ le, eẹ li, “Ingmaghyie lọ khi u li la eni iọgbọ ni e rhẹ khali Ijesu, rharhi khi ingmemhi ẹ li o rhọ khasẹ eyẹ.” ⁷⁴Rhẹmhi ọ kee gwumhi ọọ bino ighẹ, “Imha yẹsẹ ọni ọmọse ona, ‘ọ lee ngme pfuse ọkpa ọ gbhiẹghẹ. ⁷⁵Ipitẹ ọ rhọ lee sato emeni Ijesu ọ ke ngme, “Neni ọkpa ọ gbhiẹghẹ, u laa khyie mhẹ itesẹ, “Li ọ rhọ je elase lẹẹ vyiẹ onaghyie, onaghyie.

¹Abhi ogbe o ke rhọ gbe, eni e kpeda ugamhi ali eni e womhẹ, e mhasẹ khi wẹwẹ e gbe Ijesua. ²E fali ọ rhue vu, e je ọli abọa ni Ipaleti ni ọ kyili igovinọ.³Abhi Ijudasi, ni ọ rhi Ijesu dẹ, ọ ke rhọ mẹ khi a she ẹẹ li a kaa gbe ọlia, ọ nwu udu lieliẹ, ọ lieliẹ eni ipọmhogwho ikpẹ igbe ghyi eni e kpeda ugamhi ali eni e womhẹ. ⁴Ọọ wẹ, “Mhi she pfidọ rharhi khi mhi rhi ọlia ni ọ vha li ingme dẹ,” ama e ke sọ vhọ ẹẹ li, “Mhi gyhi oni o de eyẹ vhọ? ghyiẹ li u mhọ oyọ,” ⁵Li ọ rhọ pfi eni ikpaghọ kwu owuka, ni ọ rhọ vu, ọ vu ọa soli egbe ọli gbea.⁶Eni e kpeda ugamhi ali eni e womhẹ e wolọ eni kpaghọ eẹ li, “Ena e vha kyili emeni a rha shi ilu na rhi ikpaghọlọ a shi.” ⁷Abhi e ke rhọ ye omhasẹ ee ke rhi eni ikpaghọ a dẹ ekẹ ni a rhi elele a tọ. ⁸Rharhi ona li a te lu oni ekẹ, “Ekẹ ọlia” apfishi amo.⁹Emeni Ijẹremaya ọ ke ngme li o tsẹ, ni ọ rhọ ẹẹ li, “Ee wolọ eni ipọmhi ogwho ikpẹ igbe, abhi iọgbọ Izulẹ e rhi ọli dẹ, ¹⁰E rhi ọli a dẹ oni ekẹ ọmekhe, abhi Ọnọmhọli ọ li rhi odẹ khasẹ mhẹ.¹¹Ijesu ọ tomugha odalo ọni Igọvinọ, ọni Igọvinọ ọ ke mhilali ogbọ, “Ghyiẹ khi oghyie Ijusi?” Ijesu ọ ke sọ vhọ,”Ghyiẹ li u ngme yọ eyọọ,” ¹²Ama ni eni e kpeda ugamhi ali eni e womhẹ e rhẹrhẹ gwu ẹzọ kwu ọ vhi egbe, ọ vha sọ wẹ vhọ, ¹³Ipaleti ọ ke ẹẹ li, “U waa suọ emeni a ga ẹẹ khi u li?” ¹⁴Shi ingme ogwho khi ogwho ọ vha sọ wẹ, ona li o rhi abọ sha ọni Igọvinọ.¹⁵Abhi itushi wẹ o ngme lẹ khi, Igọvinọ ọ nwemaa rhue ogwhumha ọgwho vhi ogba igwhumha le ọni agbaa ni o legba e sheda la zẹ khi a wolọ abọa. ¹⁶Oni ẹrhẹghẹ ni a ngme na, e mhọli ukpokpomhi agyiaguda ni ẹẹ lu Ibasabasi.¹⁷Abhi e ke rhọ legba, Ipaleti ọọ wẹ, “Ọgwho vha nono khi mhi rhue ogba igwhumha lasele na vhẹ?” Ibasabasi lọ la khi Ijesu ni a lu Ikiristi?” ¹⁸Rharhi ọọ lee yẹsẹ khi e she kpọ le lee rhi ibishelemhi le rhi ọli lasele. ¹⁹Abhi ọ li shitọ utekwu igwuẹzọ eyọ, ugwhẹ Ipaleti ọ pfi ingme rhọ khali ọli ọọ li, “Imhẹ mhọli emeni u li ọni ọmọse ọyọ oo. Rharhi mhi le ẹvhena ebe obodẹ ọli amo.”²⁰Eni e kpeda ugamhi ali eni e womhẹ ee tue eni iọgbọ abọ khi e li ẹẹ khi Ibasabasi lẹ wẹwẹ ea nono, khi a gbe Ijesua. ²¹Ọni Igọvinọ ọ ke mhila eni iọgbọ, “Elemhi wẹwẹ ava mhi gyhi ọni vha nono khi mhi wolọ abọa na vhẹ?” E ke sọ vhọ eẹ li Ibasabasi lọ!” ²²Ọọ ke gwe mhila wẹ, see mhi ke a li Ijesu ni a lu Ikiristi?”²³Ọọ wẹ, ''elọ e zẹ, mhi gyhi ọkhọlọ ni ọ li?'' E ke sọse zezeze, eẹ li, gbe ọlia'' ²⁴Abhi Ipaleti ọ ke rhọ mẹ khi lia mhọli emeni lẹ dobẹ lẹ li vhọ, khi ashakhasha oo li gbii, ọ rhue amẹ, ọ rhọ kpe abọa ukpẹloe oni agbaa, ọọ li, ''Imha mhọli emena mhi yẹsẹ vhi ọlia ọni ọmọse ọna. vha te egbe vhẹ bino ọli feẹ gwhe.''²⁵Eni iọgbọ kwu eẹ li, “Ọlia ọli o la eyẹ vhi ukhomhi ali imyi eyẹ.” ²⁶Ọ ke wolọ Ibasabasi abọa na wẹ, ama ọ rhi ite gbe Ijesu ọ ji ọli abọa na wẹ khi e rhọ tanọmanọ.²⁷Eni ichoja Igọvinọ e nwu Ijesu je agbalaa nofu e koko ichoja gba. ²⁸E gweghyie ọli awulu ni ọ sọ e rhi ode ọlilẹ zu ọli. ²⁹E khyiẹlẹ arhu igbakpẹ gwese ọli ukhomhi, e rhi orhẹ atuekẹ mhọli ọli obọ obita. E digwhua ẹẹ nali e nwẹnyẹ ọli isue, ee li ẹẹ li, “Moo, oghyie Ijusi.”³⁰Ee tono etẹ kwu ọ, e myie ọli orhẹ atuekẹ rhẹ gbe ọ vhi ukhomhi. ³¹Abhi e ke rhọ rhi ọli li egyia pfuse, e gweghyie ọli oni awulu atuekẹ ni e rhọ sọ ọli, e rhue awulu ọli sọ ọli, e rhue ọli vu je obhoni a je lẹẹ tanọmanọ.³²Abhi e ke rhọ lasele, e mẹ ọmọse ọgwho ni ẹẹ lu Isamọni ni ọnyi Isirini, e rhi izemhi nwu ọli khi ọ rhọ khali wẹwẹ a tsua oni ọgbagala. ³³E bhẹ vhi asha ni a lu Igogota, emeni o ngme lẹ khi, “Asha ukhomhi olimhi.” ³⁴E rhi onyọ nali da ni a rhi ọyala gboghyiẹ. Abhi ọ ke rhọ bino ọ vhi unu, ọ vha dobẹ dali.³⁵Abhi e ke rhọ tanọmanọ, e kemhi ode ọli e pfi etsẹ shiọ. ³⁶E shitọ ee bino ọ. ³⁷E ta ẹtsẹkẹ ma kpeda ni ukhomhi ọ, e kẹkẹ ushi ni o nwu ọli shi vhọ, “Ọna khi Ijesu, ni ọ kyili oghyie Ijusi.”³⁸A tanọ igyiaguda ava ma vhi egbe, ọgwho ọ la obita ọni ọ kpọẹ ọ la vhi obọ ọgobọ. ³⁹Eni e dọsẹ lẹ lẹẹ ee zẹnọ ẹnwẹ nali, e jigyi ukhomhia. ⁴⁰Eẹ li, “Ghyiẹ ni u wẹ khi u kha gwọghọ owukaa u mali ẹlesẹ, tsumhi egbe ẹ abhi u ke rhọ kyili Omyi Ishinẹgba shiọ, te oni ọgbagala ona kpiale shiọ!”⁴¹Iyọ li eni e kpeda ugamhi e lii gyia ọli, ali eni e womhẹ ali ikọwe, eẹ li, ⁴²Ọọ lẹẹ tsumhi iọgbọ ama ọ vha dobẹ a tsumhi egbe ọli. Oghyie Izulẹ li ọ kyia. Ọ te oni ọgbagala kpiale shiọ, khi eyẹ lama shi ọ vhọ nena.⁴³Ishinẹgba ọ khi lẹ rhi egbeda. Ishinẹgba ọ tsumhi ọ khi a mẹ ọli shiọ, ‘Rharhi khi ọ lẹẹ ngme khi Omyi Ishinẹgba lẹ kyia,” ⁴⁴Eni igyiaguda ni a tanọmanọ gboghyiẹ ọli ee ngme ingmemhi ẹnwẹ rhẹ khali ọ.⁴⁵Te ẹrhẹghẹ ọkwulọkwu esesa apfishi itili ubili o bi oni aloekẹ kwu. ⁴⁶O ke rhamhi ẹrhẹghẹ ọkwulọkwu itili, Ijesu ọ rhi urhui ni o ze sọse, “Ọọ li. “Ita, Ita, see u ke li sọ mhẹ oshimhi egbe?” ⁴⁷Abhi eni e mugha ayọ e ke rhọ suọ, “ eẹ li, Elaja li ọa nyalu enaa.”⁴⁸Ukwhogwho ọ na a rhue isoso, ni ọ kwu onyọ shi, e rhi ọli shi unu ugwhuagha shi ọ vhi unu khi ọ da ọli. ⁴⁹Eni e kpọẹ e ke eẹ khi, “Vha chi ọ vhi egbe lẹ, eyẹ mẹ ni Ẹlaja ọ bhẹ laa tsumhi ọ.” ⁵⁰Ijesu ọ ke gwe sọse zezeze utozeva, li ayẹmhẹ ọli o rhọ pfo.⁵¹A ke ẹẹ khi aa fẹẹ, oni ode ni a rhọ ta vhi oni owuka o te ukhomhi gbekhyiẹ apfishi uji ọli. Ekẹ oo jigyi, egbhẹ e gbolo kyiọlọ. ⁵²Iji ni a rhi iọgbọ tọnọ e kwhegyiea, ilimhi ebubu eni e pfuasẹ ni e gwhuloa, e vue. ⁵³E te iji vule ni ọ vha rhọ te egwhi vule nee, e lo oni ẹvhue ni o pfuasẹ, ebubu iọgbọ ee mẹ wẹ.⁵⁴Eni e kpeda ni ichoja ali eni e la ayọ ẹẹ bino wẹ e ke rhọ mẹ khi ekẹ oo jigyi ali emeni a gaa mẹ kwu, ulishi oo ke nwu wẹ eẹ li, “Egbebgingme Omyi Ishinẹgba li ọ kyia.” ⁵⁵Ikpotso ni e rhọ khali Ijesu te Igalili rhọ khali ọ vu, wẹwẹ li e rhi ẹloe kwhu ọli, e tanya ẹẹ fẹli ọ ⁵⁶Imeli Imdadalini ali Imeli inyọ Ijemhisi ali Ijosẹfu, ali inyọ imyi Izẹbẹdẹ ni emọse.⁵⁷Ogbode o kee le ọmọse ọgwho nọfufufu, ọnyi Arimataya, ni ẹẹ lu Ijosẹfu, ni ọ li rhẹ khali Ijesu. ⁵⁸Ọọ laa lema Ipaleti olimhi Ijesu. Ipaleti ọ rhi unu nali khi ọ kha tsua oni i olimhi a tọ.⁵⁹Ijosẹfu ọ tsua oni i olimhi, ọ rhi ode opfopfo kwuli ọli, ⁶⁰Ọ rhi ọli a tọ uji ọli ni ọ te irhui fia ogbọ. Ọ gheghe ẹchẹ otọgbe zuse unu oni uji ọọ jee. ⁶¹Imeli Imdalini ali Imeli ni ọ kpọẹ e la ayọ, e shitọ esọ uji ni o kpọẹ.⁶²Ogbẹlẹ ozeva, ni o mama ogbẹlẹ inwunegbe, eni e kpeda ugamhi ali Ifrisisi e nu Ipaleti koko gba. ⁶³Eẹ li, “Ọga, eyẹ sato ẹrhẹghẹ ni ọnẹ ighagha ọyọ ọ rhọ laa, ọọ ngme, ‘Khi lẹ laa vule ogbẹlẹ ozesẹ.’ ⁶⁴Zẹ iọgbọ khi e kaa khẹ oni uji ẹlẹ esẹ. Ina khi iyọ, idibo ọli e bhẹ laa do oni olimhi tsua e ke gwu khasẹ agbọ khi, ‘Ọ she te egwhi vule, ‘Ighagha ni ikposhmhi o la laa fu dala oni ikyiatsolo.⁶⁵Ipaleti ọọ wẹ, “Vha rhue ekhẹodẹ, khi vha kaa khẹ ayọ onaghyie, onaghyie.” ⁶⁶E lẹ, ea khẹ oni uji, e shi oni ẹchẹ ẹfẹ e rhi eni e khẹ odẹ shi ayọ.

¹Ogbokheva ogbẹlẹ uka okeke utsutsu ogbeẹ see, Imeli Imadalini ali Imeli ni ọ kpọẹ e bhẹ lẹẹ bino oni uji ni a rhi Ijesu tọ. ²Udomhija, ekẹ oo jigyi gbẹ, gbẹ, gbẹ, aghyiukọ Ọnọmhuẹyẹ ọ te idane kpiale, ọa gheghe oni ẹchẹ vhi odẹ le, ọ shitọ vhọ.³Ijegbe ọli oo gẹẹ nya, nya, nya, abhi ufulọ, awulu oli oo pfuasẹ gbo, gbo, gbo, abhi ukpamhi amẹ. ⁴Udu o fianọ eni e khẹ ayọ vhi elemhi e denagbe abhi ilimhi ni e gwhulo.⁵Ọni aghyiukọ ọ ke nu eni ikpotso ngme ọọ wẹ, “Imhẹ vha nu ulishi, mhi yẹsẹ khi Ijesu vhaa nono, ni a tanọmanọ gbea. ⁶Ọ vha la ana, ama ọ she te egwhi vule, abhi ọ ke kpọ lee ngme. Vha bhale a ghe asha ni a rhi ọli tọ. ⁷Vha nyanya a gwu khasẹ idibo ọli khi, ‘Ọ she te egwhi vule, vha ghe, ghe, ọ she kpalo na vhẹ a je Igalili. Vha bhẹẹ laa vhẹ ọli vhi ayọ,’ vha ghee, mhi she gwu na vhẹ nena.”⁸Eni ikpotso e nyanya rhi ulishi ali ukpokpomhi oghẹlẹ vu oni uji le, li e rhọ na a gwu khasẹ idibo ọli. ⁹E ke ẹẹ khi wẹwẹ ee fẹẹ, Ijesu ọ kwhu wẹ vhẹ ọọ wẹ, “Vha moo.” Eni ikpotso e na bhuli ọ, ea nwu ọli awẹ, e gbe ga nali. ¹⁰Iyọ Ijesu ọ ke ẹẹ wẹ, “Imhẹ vha nu ulishi. Vha kaa gwu khasẹ inyọgwho mhẹ khi e ke je Igalili. Ayọ li e bhẹ la vhẹ mhẹ.”¹¹Eni ikpotso e kee lẹẹ, e ke ẹẹ khi wẹwẹ ee fẹẹ, egwho vhi elemhi eni e khẹ oni uji e je elemhi ẹvhue a gwu khasẹ eni e kpeda ugamhi emeni a gaa mẹ kwu. ¹²Abhi eni e kpeda ugamhi ali eni e womhẹ e ke rha lona e mhasẹ obodẹ oni ingme, e tsua ikpokpomhi ikpaghọ ni eni ichoja. ¹³Eẹ wẹ, “Vha kee gwu khasẹ agbọ ni e kpọẹ khi. “Idibo Ijesu li e bhale ẹliyọsẹ a do olimhi ọli tsua ni ovhesẹ o rhọ nwuno eyẹ.’’¹⁴Igọvinọ ọ kha suọ ona, eyẹ la lema li khi ọ kwhẹsẹ vhẹ ọrhọ ni o la vhẹ egbea.” ¹⁵Iyọ, eni ichoja e tsua eni ikpaghọ ea khyiẹlẹ abhi e ngme wẹ. Oni ingme ona oo gaa aloekẹ Ijusi kwu ali ashakhasha kwu apfishi amo.¹⁶Ama idibo ọli ogbe ali ọgwho e vu ni e rhẹẹ jee Igalili, ukhomhi ọkpha ni Ijesu ọ li wẹwẹ e kaa lona. ¹⁷Abhi e ke rhọ mẹ ọ, e gbega nali, ama egwho e khyiele bi ikhọkhọ.¹⁸Ijesu ọ bhẹ bhuli wẹ le ọọ wẹ, “A she rhi izemhi kwu na mhẹ shi onẹ ekẹ shi onẹ idane. ¹⁹Vha kee lẹ khi vha ke lẹẹ kolo iọgbọ ni Ishinẹgba vhi ẹvhue khi ẹvhue kwu. vha kee rhi eva Ishinẹgba Ita, uwi Ọmọ, ali uwi Ayẹmhẹ ni o pfuasẹ batazi wẹ.²⁰Vha wẹna wẹ khi emena na mhi gaa wẹna ẹ wẹ e ke rhẹ wẹ gbe, vha ghe, ghe, mhi nu vhẹ la ẹrẹghẹ kwu apfishi ẹlẹnagbọagbọ.”

¹Ona khi ituekẹle ingmemhi Ijesu Ikiristi, omyi Ishinẹgba. ²Abhi a li kẹkẹ ọli shi ebe ọbolẹ Azaya, ''ghee, mhia ghyie aghyiusomhi mhẹ bhẹ bhuli ẹ le, ọni ọ laa sheshe odẹ nẹẹ. ³Urhuli ọgbọ o la elemhi apata ẹẹ ngme, nwẹgbe odẹ Ishinẹgba shi ekẹ, u khyiẹli odẹ ọli sheshe tatata.⁴Ijọni ọọ bhẹ, ọ la apata rhi ibaptisimhi ni iọgbọ ọọ ngme ingmemhi ibatizimhi ni o kyili uwi ipfiegbedenegbe ni o kyili irhọyele imhobea. ⁵Ẹvhue Ijudea ali agbọ kwu ni e la Ijerusalemu e lase bhẹ bhuli oli le. Ọ ke la okẹ Ijodani ẹẹ batazi wẹ, ee tanọ ingmobe wẹ. ⁶Ijọni ọọ sọ awulu ẹkwẹ ilakumhi ọ rhi ugbhogbho ekwẹ nwu okwu, ọọ le initso ali iwọọ.⁷Ọọ ngme khase wẹ, ọọ wẹ, Ọgbọ ọvhese ọa bhẹ mama mhẹ ni ọ ze dala mhẹ, ni o kyia khi imha tẹ na mhi dobẹ a taghyiẹ ọli uli ẹkwẹ owẹa. ⁸Ibatazi amẹ mhi rha na vhẹ, ama Ayẹmhẹ ni o Pfuasẹ li ọ rhọ laa batazi vhẹ.''¹¹⁹Eni ẹrhẹghẹ ẹyọ Ijesu ọọ te Inazarẹti ni o la Igalili bhẹ, Ijọni ọọ ke batazi Ijesu vhi okẹ Ijodani. ¹⁰Ijesu ọ kẹ te okẹ lasele, ọọ mẹ khi idane o gweghyiea ọni Ayẹmhẹ ọọ kpiale bhuli ọ abhi esu. l¹¹ Urhuli oo ke te aleghyie ngme, ọọ li, ''Ghyiẹ khi Omyi mhẹ ni Ọmọse ni ọ nwemaa gwhẹ mhẹ. Egbe ẹ e maa nwu mhẹ.''¹²Iyọ, ayayayọ oni Ayẹmhẹ o rhọ rhi ọli je elemhi apata. ¹³Ọọ la elemhi apata ẹlẹ egbhọ eva, Okhyio ọ nwu ọli fẹe. Elemhi ogwa ni elamhi e la, Eni ighyiukọ e rhi eloe kwu ọ.¹⁴A ke nwu Ijọni kpẹshi ogba igwhumha, Ijesu ọ bhẹ vhi Igalili ọọ ngme ingmemhi Ishinẹgba. ¹⁵Ọọ li, oni ẹrhẹghe o she bhẹ, eghyiele Ishinẹgba o she chi bhẹ, vha pfi egbe denegbe khi vha lama shi oni usomhi Ishinẹgba.''¹⁶Ọ ke te esọ okwu Igalili dọsẹ lẹ lẹẹ, ọ mẹ Isamọni ali Adulo inyọgwho Isamọni khi e kwuno iga ẹẹ kwulo okẹ, rharhi khi egbipfẹẹ li e kyia. ¹⁷Ijesu ọọ ke ẹẹ wẹ, ''Vha bhẹ, rhọ khẹ mhẹ, mhi laa rhẹ vhẹ kyili enwunagbọ.'' ¹⁸Ayayayọ ee tsua eni iga shi ayọ e rhọ khali ọ vu.¹⁹Ijesu ọ ke kyia je alo dẹnẹ, ọọ mẹ Ijemhisi ni omyi Izẹbẹdẹ ali Ijoni ni inyọgwho ọli; khi ee gbẹla iga wẹ. ²⁰Ayayayọ ọ nyalu wẹ e pfi ita wẹ ali egamhẹ ni a rhue ọwa shi ọkọ, e rhọ khali ọ vu.²¹E ke bhẹ vhi elemhi Ikapaniọmu, ogbẹlẹ ivhiẹmhia, Ijesu ọọ nyanya lo owuka a wẹna iọgbọ. ²²Owẹna ni ọ wẹna agbọ o nya wẹ aloa, rharhi khi rhẹmhi ọọ wẹna wẹ abhi ọgbọ ni a rhi afu na a khi ewẹna nabhi eni ikọwe e wẹna agbọ.²³Elemhi oni owuka ọmọse ọgwho ọ la ayọ ni ọ mhuẹ ayẹmhẹ obe, ọọ sọọse gbalalala. ²⁴Ọọ li, ''Elọ eyẹ rhi ẹẹ a li, Ijesu ọnyi Inazarẹti? Rhẹmhi u bhẹ laa gbolo eyẹa? Mhi yẹse ọni u kyia. Ghyiẹ khi ọni ọ pfuase uwi Ishinẹgba!'' ²⁵Ijesu ọ tsa shi ọni ayẹmhẹ obe unu ọọ li, ''Koko unu khi u te ọ vhi egbe a lase!'' ²⁶Ọni ayẹmhẹ oo pfi ọli gbe ekẹ ọọ sọọse ọ te ọ vhi egbe a lase.²⁷O nwu eni iogbọ kwu vhi ẹloe, ee mhila egbẹ wẹ, ''Elọ khi ena? Obho a ye enana khi ewẹna ni e lina mhuẹ izemhi? Li shi iyẹmhẹ ni e vha pfuasẹ rhẹmhi ọ li shi ushi a na wẹ e suọ esọ nali! ²⁸Ayayayọ oni ingmemhi ọli o ga ashakhasha kwu vhi aloekẹ Igalili.²⁹Abhi e ke rhọ te oni owuka ẹẹ lasele, ee rhi Ijamhisi ali Ijọni ma egbe je apfẹ Isamọni ali Adulo. ³⁰E bhale a vhẹ ọgọ Isamọni Ipitẹ khi ọ vheseshi khi ọọ gwhua igwhuamhi iba, ayayayọ e gwu ni Ijesu. ³¹Ọọ bhẹ bhuli ọli le, ọ nwu ọli obọ, ọ nwu ọli vue, eni iba e vu ọ vhi egbe le, li ọ rhọ nye emenale na wẹ le.³²Oni ẹlẹ ogbode oyọ, ni ọwẹ o kee rhẹẹ lo ekẹ, aa chino eni e gwhua ali eni e mhọli iyẹmhẹ ebe ghyi Ijesu. ³³Oni ẹvhue kwu e legba obunodẹ. ³⁴Ọọ rhi ebubu ni ee gwhua igwhuamhi ọdọdọda ze, ama ọ vha dobẹ eni iyẹmhẹ ebe ngme pẹẹ rharhi khi e yẹsẹ ọli.³⁵Ọọ rhi utsutsu ogbeẹ vule, ni ogbe o vha rhọ khyie gbea nee: ọ je asha ni o li kpekpe lẹẹ pfi olema. ³⁶Isamọni ali eni e gaa nu ọli la ee nono ọli. ³⁷Abhi e ke rhọ mẹ oli eẹ li, ''Agbọ kwu ea nono ẹ.''³⁸Ọọ wẹ, ''Eyẹ je obhovhese, ẹvhue ni e chi mama ana, khi mhi li je obholọ a ngme oni ingmemhi. Li o rhẹ mhẹ lase vhi ana.'' ³⁹Ọọ kyia gase Igalili lẹ lẹẹ, ọọ wẹna wẹ vhi elemhi ewuka wẹ ọọ kwhu iyẹmhẹ ni e vha pfuasẹ kwa.⁴⁰Ọmọse ọgwho ni efafe e nwu. Ọọ lemali; Ọ deigwha ọọ li, ''O kha ghọli ẹ, rhẹ mhẹ ze.'' ⁴¹Elemhi ee vhala ọli, IJesu ọ nise obọa rhọ chi ọli, ọọ li, ''O gwhẹ mhẹ. pfuasẹ.'' ⁴²Ayayayọ eni efafe e chi ọli vhi egbe le, ọ pfuasẹ.⁴³IJesu ọ kpeka nya vhi ukhomhi ọọ li khi ọ nyanya vu, ⁴⁴Ọọ li, ''Imhẹẹ gwu ni ọgbọkhọgbọ pẹẹ, ama kee lẹẹ, kaa rhi egbe ẹ khasẹ eni e kpeda ugamhi, khi u kaa khyiẹlẹ abhi ushi Imozisi o ngme, khi o rhọ pfi ọtsẹ shi vhọ khasẹ wẹ.''⁴⁵Ama ọ vu je elase ọa gwu khasẹ agbọ ọ rhi oni ọnyaloa ni ọ mẹ ga ekẹ ni Ijesu ọ vha rhọ gwe dobẹ lo elemhi ẹvhue pele, pele. Ọ ke je asha ni o li kpekpe, agbọ e te ashakhasha nono ọli bhẹ vhi ayọ.

¹IJesu Ọọ ke liegbe bhẹ vhi Ikapaniumu, agbọ e ke suọ khi ọ laa apfẹ. ²Ayọ oo vọ agbọ tsua ẹẹ kwa ni a vha rhọ gwe mẹ asha ni a ke gwee la, gaa apfishi obunodẹ, Ijesu ọ ke ngme ingmemhi Ishinẹgba ẹẹ khasẹ wẹ.³Emọse egwho e tsua ọgwhegbea ghyi ọli; wẹwẹ ane li e tsua ọli. ⁴Abhi e vha ke rhọ masha ẹẹ lo ayọ rharhi khi agbọ ee maa bu, ee maghyiẹ oni ukhomhi owa asha ni e laa. Asha ni e maghyiẹa li e ke te tsua ọni ọmọse ali ẹtẹtẹ ni a rhọ shi kpẹla lo oni elemhi owa.⁵IJesu Ọ ke mẹ irhọshiọ wẹ, Ọọ ke ẹẹ li ọnọmọse ni ọ gwhegbea, ''Omyi mhẹ ni ọmọse, aa she gbe ingmobe ẹ kwa,'' ⁶Ama ikọwe egwho ni e la ayọ ee lẹẹ sa elemhi udu wẹ. ⁷''See ọni ọmọse ona ọ kee lia ngme naa? Rhẹmhi ọ pfiunua! Ọgwo ọ dobẹ aa yele ingmobea ina khi Ishinẹgba?⁸Ayayayọ IJesu ọ she yẹsẹ emeni e sa udu wẹ. Ọọ wẹ, ''See vha ke lia sa ingme enana vhi udu vhẹ? ⁹Onogwho o kẹlẹ nẹẹ khi a rhọ ẹẹ li ọni ọgwhegbea ọna, 'A she gbe ingmobe kwa nẹẹ' la khi 'Vu ekẹ le, khi u tsua ivhia ẹ, khi u kee kyia'?¹⁰Khi vha rhọ yẹsẹ khi Omyi Ọmọse o mhọli afu oni ukhomhi ekẹ ona ni ọ rhọ dobẹ a yele ingmobea,''ọọ li ọni ọ gwhegbea, ¹¹''Mhii ẹẹ ghyiẹ, vu ekẹ le, tsua ivhia ẹ, khi u kee je apfẹ,'' ¹²Ayayayọ ọ vue, ọ tsua ivhia ọli, ọ la ukpẹloe ọgbọ kwu ọ te oni owa a lase, oo nya wẹwẹ kwu aloa e chichi Ishinẹgba, eẹ li, ''Eyẹ vha khyie kpọ mẹ na gwhe.''¹³Ọọ ke gwe rhọ te esọ okẹ vu, oni agbaa e bhẹ bhuli ọli le, ọ wẹna wẹ. ¹⁴Ọọ ke dọsẹ lẹ lẹẹ, ọ mẹ Afẹọsi ni omyi Ilevi khi ọ shitọ asha ni emyionoga e laa ọọ li, ''Rhọ khẹ mhẹ,'' Ọọ vu ekẹ le ọ rhọ khali ọ.¹⁵IJesu ọ ke la apfẹ Ilevi lee emenale, emyionoga ali elingmobe e li nu Ijesu ali idibo ọli le emenale, rharhi khi eni e rhẹ khali ọli ee bu. ¹⁶Eni ikọwe, ni e kyili Ifarisisi, e ke mẹ khi Ijesu ọ nu elingmobe ali emyionoga ẹẹ le emenale, eẹ li idobọ ọli, ''See ọ ke lia nu elingmobe ali emyionoga aa le emenale?''¹⁷IJesu ọ ke rhọ suọ ona ọọ wẹ, ''Eni e ze e vha nono ọbo; sẹkẹnẹ eni e vha ze lọgwho lia nono ebo. Imha bhẹ a nyalu eni e gwabhagbe, ama elingmobe.''¹⁸Idibo Ijọni ali Ifarisisi ee lẹẹ pfi azumhi. Iọgbọ egwho e ke bhale a mhila ọli, ''Elọ e zẹ khi idibo Ijọni ali Ifarisisi khi e ke a pfi azumhi, ama idibo ẹ e vha lia pfi?'' ¹⁹IJesu ọọ ke ẹẹ wẹ. ''Eni a ghyie a lu e mẹẹ a pfi azumhi ni ọni ọa kwhẹsẹ ọkpotso ọ khyie nu wẹ la ayọ? Ọni ọa kwhẹsẹ ọkpotso ọ kha sheda nu wẹ la e vha pfi azumhi.²⁰Ama ẹrhẹghẹ ọa bhẹ ni ọni ọa kwhẹsẹ ọkpotso ọ rhọ laa vu wẹ iteteva le, e ke chigbe a pfi azumhi oni ẹrhẹghẹ. ²¹A vha gbẹla ode ogbọ a toma ode ojọ, a kha liyọ gbẹla rhẹmhi ọa kyiọlọ vhọa, onogbọ o kyiọlọ vhi onojọ le, oni ikyiọlọa o ke viemhiosue dala abhi o kpọ li.²²A vha mẹ ọni ọ kwu onyọ onogbọ a shi elemhi agege onojọ, A kha mẹ yọ, rhẹmhi oni onyọ ọa gbe oni agegea ishọyọ shi oni onyọ ali oni agege e gaa li opfua. Onochi, kwu onyọ ogbọ shi agege ogbọ.''²³Ogbẹle ivhiẹmhia IJesu ọọ te ishemhi ivhakpha dọsẹ lẹ lẹẹ, idibo ọli ee nyanọ ivhakpha. ²⁴Eni Ifarisisi e ke eẹ li, ''Ghe, ghe, see ke lia khyiẹlẹ emeni a gwhẹ ogbẹlẹ ivhiẹmhia?''²⁵Ọọ ke ẹẹ wẹ, ''Vhavha khyie mẹ zẹ emeni Idavidi o ke khyiẹ ni okyiamhi o rhọ ẹẹ gbe ọ ali iọgbọ ni e nu ọli la? ²⁶Abhi ọ li lo owuka ni Abiatha ọ rhọ kyila ọni ọ kpeda ugamhi, Ni ọ rhọ le emenale ni a rhọ shini eni e kpeda ugamhi ni ọ vha kha le, ọọ le, ọ gwe li rhọ ni eni e nu ọli la le?''²⁷IJesu ọọ li, ''Ọgbọ li a khyiẹlẹ ogbẹlẹ ivhiẹmhia na, a ma ọgbọ ni obgẹlẹ ivhiẹmhia. ²⁸Elemhiyọ, Omyi Ọmọse lẹẹ khi Ọnọmhọli, ni ọ mhọli ogbẹlẹ ivhiẹmhia.''

¹Ọọ kyia bhẹ vhi owuka ọ bhale a vhẹ ọmọse ọgwho ni obọ ọli o khakhaa. ²Ebubu iọgbọ ee rhi ẹloe kpẹ ọli vhi egbe ni ẹẹ khi Ijesu ọ rhọ ze ogbẹlẹ ivhiẹmhia khi wẹwẹ e kẹ mẹ ushi nwu ọli obọ.³IJesu ọọ li ọni ọ khakhaa obọa, ''Vue to mugha iteteva ọgbọ kwu.'' ⁴Iyọ ọọ li eni iọgbọ, ''Ushi o mẹẹ li khi a khyiẹlẹ onaghyie ogbẹlẹ ivhiẹmhia laa khi onobe li a kha khyiẹ?'' Ama rhẹmhi e pfiesua.⁵Ọọ rhi ofu bino wẹ gyili, gyili, rharhi udu wẹ o maa womhẹ, ọọ ke ẹẹ li ọni ọmọse, ''Nise obọ ẹa,'' Ọ nise ọlia Ijesu ọ rhi obọ li ze. ⁶Ayayayọ Ifarisisi ea nu ibolo Ẹrọdu mhasẹ abhi wẹwẹ e li gbe ọlia.⁷IJesu, ali idibo ọli, e je okẹ nofu, agbaa ni o rhọ gba e te Igalili ali Ijudea rhọ khali ọli. ⁸Shi IJerusalemu, Idumea, ali ọkpeda ni IJodani, ali aloekẹ Itaya, ali Isidoni, iọgbọ nebu, abhi e ke rhọ suọ emeni ọ gaa khyiẹlẹ, e bhẹ bhuli ọli le.⁹Ọ ke ẹẹ li idibo ọli khi e nwu ọkọ okeke shi na lẹ rharhi eni iọgbọ ni ebububu, khi e ke mhuli lẹ lẹa. ¹⁰Rharhi khi ọ rhi ebubu ze, eni ee gwhua rhẹmhi e kee sha ẹẹ nwu ọ ni ẹẹ khi wẹwẹ e kẹ dobẹ rhi obọ chi ọ.¹¹ni iyẹmhẹ ni e vha pfuasẹ e rhọ mẹ ọli kwu, rhẹmhi e de talorhugwhu nali e sọọse gbalalala, eẹ li, Ghyiẹ khi Omyi Ishinẹgba.'' ¹²Rhẹmhi ọ kpẹka ẹẹ nya wẹ ukhomhi khi imhẹli e dobẹ ọgbọ yẹsẹ ọni lẹ kyia.¹³Oo ke gwe shele je ukhomhi ọkpha, ọ nyalu eni ọ nono, e bhẹ bhuli ọli le. ¹⁴ Ọọ zẹ ikwhumhi ọgbe ali ava ni ọ lu ighyiusomhi), khi e kẹ nu ọli la ọ kee ghyie wẹ laa ngme ingmemhi Ishinẹgba khasẹ iọgbọ, ¹⁵Khi e mhọli afu ni e rha kee kwhu iyẹmhẹ ikhyio kwa. ¹⁶Ọọ zẹ eni ikhumhi ogbe ali ava: Isamọni, ni ọ lu Ipitẹ,¹⁷IJemhisi omyi Zebede, IJọni ni inyọgwho Ijemhisi, ni ọ lu Iboanagisi, omyi akphala li o ngme, ¹⁸Adulo, Ifilipu, Ibatolomiu, Imachiu, Itọmọsi IJemhisi omyi Afiọsi, Itadusi, Isamọni ọnyi Izilọti, ¹⁹Ali Ijudasi Iskarọti, ni ọ lẹẹ rhọ dẹẹ.²⁰Ọọ kee je apfẹ, eni iọgbọ e gwe a legba, e vha dobẹ le emenale. ²¹Abhi apfẹ ọli e ke rhọ suọ, e bhale a nwu ọli, eẹ li, ''Evhevhẹ e she a rhue ọli. ²²Ikọwe ni e te Ijerusalẹmu kpiale eẹ li, 'Ọgbhọ lọ kyila,'' abagwhoyọ, iyẹmhẹ ikhyio li ọ rha kwhu iyẹmhẹ ni e vha pfuasẹ a kwa.''²³Ijesu ọ nyalu wẹ chi mama egbe ọ rhi ekpita ngme ingme khasẹ wẹ, ''See okhyio ọ lia kwhu okhyio? ²⁴Eghyiele o kha kemhi egbe ọ, oni eghyiele oyọ o vha dobẹ a mugha. ²⁵Apfẹ o kha kemhi egbe ọ, o vhaa dobẹ a mugha.²⁶Okhyio ọ kha nwu okwhẹ nu egbe ọli vue khi ọ kemhi, ọ vha dobẹ a mugha, ama ayọ li ọ pfo shi. ²⁷Ama a vha mẹ ọni ọ dobẹ a lo apfẹ ọni ọ ze la do ọli ighyiatọ ina khi rhẹmhi ọ kpọ fali ọni ọ ze eyọ nee, ọ ke chigbe pfuomhi ọli apfẹa.²⁸Egbegbe ingme mhi ngme khasẹ vhẹ, ingmobe nu li kwu Omyi Ọmọse a laa gbe wẹ kwa nẹẹ, shi ipfinunua ni u pfia rhọ khali ọli, ²⁹Ama ọnọni ọ laa pfininua rhọ khali Ayẹmhẹ ni o Pfuasẹ a vha yele wẹa nali gwhe, ushi ẹlẹnagbọagbọ li o nwu ọ.'' ³⁰Ijesu ọ ngme ona rharhi ee ngme khi, ''Ọ mhọli ayẹmhẹ ni o vha pfuasẹ.³¹Iyọ inyọ ọli ali inyọgwho ọli e bale ea mugha atukpafẹ. E ghyie a lu ọ. ³²Agbaa e gba gasẹ ọ eẹ li, ''Inyọ ẹ ali inyọgwho ẹ e la atukpapfẹ, Ghyiẹ lia nono.''³³Ọọ ke sọ wẹ vhọ, ''Egwho khi inyọ mhẹ ali inyọgwho mhẹ? ³⁴Ọọ bino gase eni e pfi okhyi gasẹ ọ, ọọ li, ''Vha ghee, ena khi inyọ mhẹ ali inyọgwho mhẹ! ³⁵Rharhi khi ọnọni ọ sheda laa gbe abhi o ghọli Ishinẹgba, ọni ọgbọ khi inọgwho mhẹ ni ọmọse ali ọni ọkpotso, ali inyọ mhẹ.''

¹Ọọ ke gwe gbasẹ ọọ wẹna wẹ esọ okẹ. Ebubu iọgbọ e pfi khyili gasẹ ọli, ọ ke lo elemhi oni ọkọ deshitọ. Ẹni iọgbọ e shitọ esọ okẹ. ²Ọ rhi ekpita ẹẹ wẹna wẹ emeni ebu.³Vha rhi esọ shi ekẹ; ọni ọmọse ọ ye ishemhi aa kọ ikpamhi erhẹ. ⁴Abhi ọ ke rhẹ kọ, ikpamhi egwho e dena kwu esọ odẹ, ipfele e sanọ wẹ le. ⁵Ikpamhi egwhọ e dena kwu ukhomhi agbhẹ, ni ekẹ aghyie e vha la, ayayayọ e zẹ rharhi khi oni ekẹ o vha limhi.⁶ovọ o ke lasele, o gbe wẹ khakhaa, rharhi khi oni ekẹ o vha limhi ekẹ. ⁷Ikpamhi evhese e de kwu ifu igba. Eni igba e fu shele e tanọ wẹ gboloa, e vha dobẹ mọ ikpamhi pẹẹ.⁸Evhese e dena kwu ekẹ aghyie eni ido e fuu shele ee vẹgba, egwho e jinọ uye ali igbe, egwho egbhọ esẹ, egwho egbhọ ishie.'' ⁹Ọọ wẹ ọni ọ zẹ esọ, ọ suọ emena mhi ngme.¹⁰Abhi o ke rhọ kpọ Ijesu lọgwho le, eni e chi mama ọli ali eni ogbe ali ava ni e rhẹ khali ọ e ke mhilali obodẹ oni ekpita. ¹¹Ọọ wẹ, ''Vhẹvhẹ li a rhi emeni e gbhagbha vhi aleghyie Ishinẹgba na. Ama eni e la elase ekpita mhi rhọ gwu ingme a khasẹ wẹ. ¹² Ea fẹẹ, e zẹ ikpalo ni a rhọ a mato, ama e vha rhẹ wẹ a mẹ ato, e zi esọ ama emeni a ngme o vha ga wẹ ẹloe, ina khi iyọlọ e kha nwegbe lieliẹ bhuli Ishinẹgba le, ọ gbe ingmobe kwa na wẹ.''¹³Ọọ wẹ, ''Vha li yẹsẹ abhi oni ekpita ona o ngme? See vha ke li la yẹsẹ abhi ekpita ni ekpọẹ e ngme shiọ? ¹⁴Ọni ọ kọ ẹkọmhi ingmemhi ishinegba li ọọ kọ. ¹⁵Enabhi e dena kwu esọ odẹ eyọ, wẹwẹ khi eni ingmemhi ishinẹgba ni a kọ. E ke suọ wẹ, ayayayọ okhyio ọ bhale a sanọ eni ingmemhi ni a kọ shi wẹ vhi udu le.¹⁶Eni a kọ shi ukhomhi agbhẹ, abhi e rhọ suọ eni ingmemhi, e rhi oghẹlẹ myie wẹ ayayayọ. ¹⁷Eni ingmemhi e vha rhi imhili nwu ekẹ onaghyie, e rhi egbe myie ukwukwu ẹrhẹghẹ. Ọnwufẹẹ ali izokwhekpẹsẹ e ke bhale rharhi khi eni ingmemhi e vha simhi shi wẹ vhi idu onaghyie, ayayayọ e tsutsu e dena kwa.¹⁸Evhese khi eni a kọ shi ifu igba. E suọ eni ingmemhi, ¹⁹ ama ẹtsẹkẹ agbọ, ali ighagha ẹpfue, ali ọgwhẹmhe ẹtsẹkẹ evhese, wẹwẹ lee lono wẹ vhi egbe ni e tanọ eni ingmemhi, ni e vha rhọ dobẹ wẹ jino. ²⁰Aa mẹ eni a kọ shi ekẹ aghyie. Wẹwẹ khi eni e suọ eni ingmemhi ni e rhẹ wẹ gbe akanya e jino: egwho e jino uye ali igbe, egwho egbhọ esẹ, egwho egbhọ ishie.²¹Ijesu ọọ ke wẹ, ''U mẹẹ rhi akpa a rhu shi elemhi owa u gwese ọ shi ugwugwu, la khi ufu agodo? Rhẹmhi u rhue ọli a nya ukhomhi itebu vhi elemhi owa. ²²Rharhi khi a vha mẹ emeni a rhọ gbhagbha ni a vha laa yẹsẹ, wẹ khi rhẹmhi a mẹ ingmemhi obẹna ni o vha laa gweghyiea gboo. ²³Ọni ọ ze esọ, ọ suọ.''²⁴Ọọ wẹ, ''Emeni u suọ rhi esọ shi vhọ, rharhi khi emeni u rhọ mhasẹ, li a rhọ mhasẹ laa nẹẹ; a gwe rhi ipfiobọ shi ẹ vhọ. ²⁵Rharhi khi ọni ọ kpọ mhuẹ li a gwe rha ma vhọ, ọni ọ vha kpọ mhuẹ a gwe laa myie ọli oni ọ kpọ mhuẹ rhue.''²⁶Ijesu ọọ li, ''Oni aleghyie Ishinẹgba rhẹmhi o liabhi ọmọse ogwho ni ọ kọ ikpamhi erhẹ shi ekẹ. ²⁷Ọa vhesẹshi ẹẹliyọsẹ ọ vule abhi ogbe o ke rhọ gbe, eni ẹkọmhi e zẹ lasele e fu, ama ọ vha yẹsẹ abhi e li kyia. ²⁸Ekẹ li o te egbe ọli a mọ ikpamhi, e kha kwuno igbede, e ta ebe, e chigbe jino. ²⁹Eni ẹkọmhi e kha ke vhyie ayayayọ ea lilẹ, rharhi e she rhamhi ikhyiẹsẹ.''³⁰Ọọ li, ''Elọ eyẹ rhi eghyiele Ishinẹgba khọkhọ, laa ekpita ni ogwho eyẹ dobẹ rha khọkhọ ọli? ³¹ọ liabhi ukpamhi imọtadi ni o kyia khi, a kha kọ ọli, li o shẹ nẹẹ vhi ikpamhi erhẹ ni e laa oni agbona kwu. ³²Ama a kha rhọ kọ, lẹẹ lo ke gaa a dala erhẹ evhese ni e laa oni ogba, rhẹmhi ọa zẹ ikpokpomhi igwhuabo, ishọyọ ipfele nẹẹ idane e kwu ikolo shiọ e nyele ayọ.³³Ekpita nebu enana li ọ rhọ ngme ingme khasẹ wẹ, abhi ebu abhi e shẹ ni e mẹ ọli mẹ, ³⁴ Ingmemhi ni ọ ngme kwu a vha mẹ oni ọ vha rhi ekpita ẹẹ ngmee. Ama o kha kpe logwho le, rhẹmhi ọ kweghyie wẹa ẹ khasẹ idibo ọli.³⁵Oni ogbẹlẹ, ni ogbode o ke rhọ le, ọọ wẹ, ''Eyẹ liegbe je obhoni o kpọẹ.'' ³⁶E pfi eni iọgbọ shi ayọ, e rhi Ijesu ma egbe vu, abhi o ke rhọ kyia khi iJesu ọ she kpọ le lo elemhi ọkọ. Ekọ evhese e gwe li nu wẹ la ayọ. ³⁷Ududumhi akpakpa oo pfii, akpekpe o tasẹ amẹ ẹẹ kwu elemhi oni ọkọ oni ọkọ o she gaa vọ amẹ.³⁸Ọni Ijesu ovhesẹshi oo nwu ọli shi oshimhi oni ọkọ. e ke vu ọli ovhesẹ, eẹ li, ''Ọwẹnagbọ, u waa pfi ẹgbue shi ọ khi eyẹ laa gwhuloa?'' ³⁹Ọ chi vue, ni ọ rhọ va nya oni akpekpe vhi ukhomhi ọọ li oni okwu, o li kpekpe,''Oni akpekpe o pfua, asha kwu o li kpekpe.⁴⁰Ọọ wẹ, ''See vha ke lia nu ulishi? Vhavha khyie li mhọli irhọshiọ?'' ⁴¹Ududumhi ulishi oo nwu wẹ eẹ li egbe, ''Ọgwho ọni ọ kyia, ni ọ nu akpekpe a ngme o li suọ esọ a naa?''

¹ke lieliẹ egbe je obhoni o kpọẹ, aloekẹ Igẹrasẹnẹsi. ²Ijesu ọ te elemhi ọkọ ẹẹ lasele, ọmọse ọgwho ni ọ mhọli ayẹmhẹ ni o vha pfuasẹ ọ te atalimhi lasele bhẹ bhuli ọli le.³Atalimhi li ọ ni ọmọse ọ nyele. A vha mẹ ọni ọ gwe dobẹ ẹẹ nwu ọli, wẹ khi rhẹmhi a gwe dobẹ ẹẹ sọ ọli igha. ⁴A she kpọ sọ ọli udo ali igha ẹrhẹghẹ nebu. ọ khyiolo eni igha kwua ọ kwu udoa. A vha mẹ ọni ọ dobẹ nwu ọli shi.⁵ẹliyọse shi ẹlogota elemhi oni atalimhi ali ikhomhi ekpha li ọ lẹẹ sọọse ọ rhi echẹ nia nwu kyiọlọ egbe ọlia. ⁶Abhi ọ ke rhọ nya mẹ Ijesu obhoni odẹ o nuẹ, ọ na bhẹ bhuli ọli ọ nyẹsẹ egbe nali.⁷Ọọ sọọse gogogo ọọ li, ''Elọ mhi rhẹ a li Ijesu Omyi Ishinẹgba Nọfu nẹẹ? Mhi rhi Ishinẹgba lema ẹ, imhẹ rhi ẹchọ na mhẹ.'' ⁸Rharhi khi Ijesu ọ kpọ lee nu ọli ngme, ''kaa lase ghyiẹ ayẹmhẹ ni o vha pfuasẹ.''⁹Ọọ mhilàli, ọọ li, ''See a lu eva ẹẹ? ''Ọ ke sọ vhọ, ''Eva mhẹ khi ebuu (Ligion) iyẹmhẹ ebe nebu, rharhi khi eyẹ maa bu.'' ¹⁰Ọọ ke lemali khi imhẹli ọ kwhu wẹwẹ a lase vhi oni aloekẹ ona.¹¹Oni ẹrhẹghẹ igulu ni e bububu e laa ukhomhi ọkpha ẹẹ le emenale. ¹²E ke lemali, eẹ li, ''kwhu eyẹ lono eni igulu ena egbe; ''khi eyẹ lono wẹ egbe. ¹³Iyọ ọọ lama na wẹ; Eni iyẹmhẹ ni e vha pfuasẹ e lase a lono eni igulu egbe, e ke nanọ kpẹla ọkpha a lono okwu, eni igulu e rhamhi agbhẹlẹ ẹgbhọ igbe ashi eva.¹⁴Eni e rhi eni igulu le e na kwa je elemhi ẹvhue a ngme khasẹ wẹ emeni a mẹ. Ebubu iọgbọ e je obholọ a rhi ẹloe wẹ mẹ emeni a mẹ. ¹⁵E bhẹ bhuli Ijesu le e bhale a vhẹ khi ọni ọmọse ni iyẹmhẹ ebe e chi egbe le khi ọ nu ọli shitọ, ọ rhi ede kwhẹ, khi ọ she ze, ulishi o kee nwu wẹ.¹⁶Eni e rhi ẹloe wẹ mẹ emeni a mẹ obodẹ ọni ọmọse ni iyẹmhẹ ebe e kpọ la egbe ni e ke chi egbe le ali obodẹ eni igulu. ¹⁷Eni iọgbọ e ke lema Ijesu khi ọ vu aloekẹ wẹwẹ le.¹⁸Abhi Ijesu ọ ke rhẹẹ lo elemhi ọkọ, ọni ọmọse ni iyẹmhẹ ebe e lase egbe le ọọ lema ọli khi ọ dobẹ lẹ rhọ khali ọ. ¹⁹Ama Ijesu ọa lama nali, ama ọọ li, ''Kee je bhuli apfẹ ẹ, khi u kaa gwu khasẹ wẹ emeni Ọnọmhọli ọ khyiẹlẹ nẹẹ, ali ivhẹlemhi ni ọ rhọ khase ẹ.'' ²⁰Ọni ọmọse ọ ke vu ọ ngmee kyia ẹvhue Idẹcapolisi akanya otọgbe ni Ijesu ọ gbe nali. oo nya ọgbọ kwu aloa.²¹Ijesu ọ ke rhọ lo ọkọ da okẹ je esọ ni o kpọẹ, ebubu iọgbọ e sẹgasẹ ọli abhi ọ li mugha esọ okẹ. ²²Ukwhumhọgwho elemhi eni e kpeda ughamhi, ni aa lu Ijarusi, ọ bhẹ, abhi ọ ke rhọ mẹ ọ, ọ de vesẹshi ọ vhi odalo. ²³Ọọ lema ọọ li, ''Omyi mhẹ ni ọkpotso ni ọ keke ọ she laa gwhu, yagwa, bhale a rhi obọ nya vhi egbe khi ọọ kee gwhu khi ọ ze.'' ²⁴Ọọ ke rhọ khali ọli, ebubu iọgbọ ee to egbe abọ ẹẹ nwu Ijesu rhọ khali ọ.²⁵Ọkpotso ọgwho ni ọlia o she kwu egbe ikpe igbe ali eva. ²⁶Ọ she mẹ echọ obọ ebo nebu ọ she pfuse emeni ọ mhuẹ kwua. Ama khi ọ vha ẹẹ ze, onochi, o vhiemhiosue shiọ. ²⁷Ọ ke suọ obodẹ Ijesu. Abhi Ijesu ọ ke rhẹẹ kyia iteteva iọgbọ ni e gasẹ ọli a lẹẹ, ọ rhi obọ chi esọ awlulu ọ.²⁸Rharhi khi ọọ ngme, ''Mhi kha sheda dobẹ rhi obọ chi ọli awulu, mhi laa ze.'' ²⁹Ọ ke lee to ọli obọ, eni ọlia e pfa, ọ lee ṣokwu vhi egbe lẹ khi lẹ she ze vhi igwhuamhi ni o la lẹ vhi egbe.³⁰Ayayayọ Ijesu ọ yẹsẹ khi izemhi o she te lẹ vhi egbe a lase. Ọ ke lieliẹ alo ọ mhila ogbọ ọọ li, ''Ọgwho ọ rhi obọ chi mẹ awuluu?'' ³¹ọli ẹẹ li, ''U mẹ khi ebubu iọgbọ e sha nwu ẹ, waa li ẹẹ li ọgwho ọ rhi obọ chi mhẹ?''' ³²Ijesu ọ bino gasẹ a lẹ nẹẹ khi lẹ mẹ ọni ọ rhi obọ chi lẹ.³³Ọni ọkposo, ni ọ yẹsẹ abhi o li ọ vhi egbe, Ọ rhi ulishi ali ibamhi detarhughu ni Ijesu ọ lolo khasẹ ọ emeni ọ mẹ. ³⁴Ijesu ọọ li, ''Omyi mhẹ ni ọkpotso, irhọshiọ nu mhuẹ o she pfuese ẹ. Rhi ọpfọmhẹ kee je khi u ze vhi igwhuamhi ẹ.''³⁵Abhi ọ li khyie le nu ọni ọkposo ngmee, iọgbọ egwho e te apfẹ ọni ọkpeda ugamhi bhẹ, eẹ li, 'Omyi ẹ ni ọkpotso ọ she gwhu. Elọ u ke gwe kpokpo ọni Ọwẹnagbọ a shi?''³⁶Ama abhi Ijesu ọ rhọ pfa suọ emeni ee ngme, ọọ li ọni ọkpeda ugamhi, ''Le lama shiọ imhe dobẹ ulishi nwu ẹ.'' ³⁷Ọa dobẹ ọgbọ ọvhese kphase ọ, ina khi Ipitẹ ali Ijemhisi ali Ijọni ni inyọgwho Ijemhisi. ³⁸E bhẹ vhi apfẹ ọni ọkpeda ughamhi bhalẹ a vhẹ ashakhasha kwu oo li rhugwhurhugwhu, ebubu iọgbọ e vyiẹ e sọse.³⁹Ọọ ke lo oni apfẹ le, ọọ wẹ, ''See vha ke li nwuashio ni vha ke rha vyiẹ? Ọni ọmọ ọ vha gwhu ama ovhesẹ li o nwu ọ." ⁴⁰E gyia lia, ama lẹ, ọ kwhu wẹwẹ kwu je elase, ọ rhue ita ọni ọmọ ali inyọ ọli ali eni e rhọ khali ọli kyia. e gaa lo elemhi owa ni ọni ọmọ la.⁴¹nwu ọni ọmọ obọ ọọ li, ''Ghyiẹ eghele ọmọmoshi, mhii ẹẹ ghyiẹ, vu ekẹ le.'' ⁴²Ayayayọ ọni ọmọ ọ vu ekẹ le ọọ kyia ọni ọmọ ọ la ifuabọ ikpe igbe ali eva. ⁴³Ọọ kpẹka nya wẹ ukhomhi khi imhẹli e gwu khasẹ ọgbọ pẹẹ. Ọọ wẹ, vha rhi emenale na le.

¹Ọọ ke te ayọ vu ọọ jee ẹvholo ọli, idibo ọli e rhọ khali ọ vu. ²Ogbẹlẹ ivhiẹmhia, ọọ wẹna wẹ owẹna vhi elemhi owuka. Ebubu ni e sokwu owẹna ọli o sha wẹ abọ. Eẹ li, ''Obho ọ te mẹ eni ewẹna ena?'' Obho ọ mẹ ona khi ẹgbhẹ?'' Ọnyaloa eni egwho ena e kyia ni ọ rhi abọ ọli a gbe ena?'' ³Aa mẹ khi ọni ọ kyili omyi Ikapita, omyi Imeli ali inyọgwho Ijemhisi ali Ijosẹsi ali Ijudasi ali Isamọni mẹẹ khi ọna? A khi inyọgwho ọli ni ikpotso e nu eyẹ la eyọ?'' Ona o rhi elemhi Ijesu bi wẹ.⁴Ijesu ọọ wẹ, ''Ọbolẹ ọ maa nwu ẹloe, sẹkẹnẹ ẹvholi ni a vyia ọli shi ali inyọgwho ọli.'' ⁵Ọ vha dobẹ gbe ikanya aghyie vhi ayọ ikwukwu iọgbọ li ọ le rhi obọ nyanọ ikhomhi rhọ ze. ⁶Umharhọshiọ wẹ o nwu ọli vhi ẹloe. Ọọ lẹẹ jee ẹvhue khi ẹvhue ọọ wẹna agbọ.⁷Ọ ke nyalu eni ikwhumhọgbe ali ava ọ ghyie wẹ avavava kwa, Ọ rhi izemhi na wẹ obodẹ iyẹmhẹ nia pfuasẹ. ⁸Ọọ chi wẹ esọ khi imhẹli e rhue ẹtsẹkẹ mhọ obọ ni ea lẹ asha, shi orhẹ ni a rha tuekẹ, shi emenale shi ẹkwẹ ni a rha lẹ asha, wẹ khi rhẹmhi vha tsua ikpaghọ shi ẹkpa. ⁹Ama e lee rhi ekwẹ shi awẹ, imhẹli e sọ iwulu ikwẹ eva.¹⁰Ọọ wẹ, ''Apfẹ ni u sheda laa lo, vha la ayọ a rhamhi ẹlẹ ni vha laa vu. ¹¹A kha mẹ ẹvhue ni e vha lama shi ẹ vhọ, vu ayọ le, kpishi idabu ni e la ẹ vhi awẹ kwu ekẹ khi o rhọ myie ọtsẹ gbe wẹ.''¹²E ke vu je elase lẹẹ tsabọ khasẹ iọgbọ khi e pfi egbe denegbe obodẹ ingmobe wẹ. ¹³E kwhu iyẹmhẹ ebe nebu kwa, e rhi ovhi tono iọgbọ egbe e gwe rhẹ wẹ ze.¹⁴Oghyie Ẹrọdu ọ ke suọ ona, khi eva Ijesu o she ga ekẹ. Egwho vhọ eẹ li, ''Ijọni ni ọa batazi ọ she te egwhivule rharhi ona, li ọ te lina mhọli izemhi a gbe ikanya inyaloa.'' ¹⁵Egwho eẹ khi Ẹlaja lọ'' Eni e kpọẹ eẹ khi, ''Ọbolẹ li ọ kyia, ọ liabhi ukhwhumhọgwho eni ebolẹ ni ẹlẹ.¹⁶Ama abhi Ẹrọdu ọ rhọ suọ ọọ li, ''Ijoni na mhi bẹ ukhomhia, li ọ ke gwe vue shiọọ''. ¹⁷Rharhi Ẹrọdu li ọ te egbe ọli ghyie usomhi khi a nwu Ijọni kpẹshi ogba igwhumha rharhi Ẹrọdia ugwhẹ Ifilipu ni inyọgwhọ ọli ọ mhuẹ khi ọ ke mhọ ofu.¹⁸Rharhi khi Ijọni ọ ngme khasẹ Ẹrọdu, ''khi o vha te odẹ khi u rhọ mhọli ugwhẹ inyọgwho ẹ''. ¹⁹Ẹrọdia ọ mhọli ofu ni Ijọni ọ nono abhi lẹẹ li gbe ọlia, ama ọ vha dobẹ, ²⁰Rharhi khi Ẹrọdu ọ lẹẹ nu ulishi Ijọni: rharhi khi ọ yẹsẹ khi ọni ọ gwabha gbe ali ọni ọ pfuasẹ li ọ kyia, ọọ rhi eloe kwhu ọ khi a ke rhi egbe chi ọ. Ingmemhi ni Ijọni ọ ngme o rhi ofu fu ọ, ama ọ ghọli ọ khi lẹ rhọ ke suọ ingme ni ọọ ngme.²¹Imasha o la oni ogbẹlẹ ni Ẹrọdu ọ rhọ lẹẹ ghyieghyie shi ogbhẹlẹ ni a rhọ vyia ọli ọ nye emenale ni ichoja ọli, ali eni ea mhasẹ, ali eni e kpeda vhi Igalili. ²²Omyi Ẹrọdia ni ọkposo ọ bhẹ a gbe ishimhi khasẹ wẹ. Oo rhi Egbe nwu ọ ali eni ọ ghyie a lu, ọni oghyie ọọ li ọni ọmoshi, ''Mhila mẹ ememeni o ghọli ẹ mhii laa rhi ọli nẹẹ.''²³Ọọ rhomhi khasẹ ọ ọọ li, ''Emeni u mhila mhẹ mhi laa khyiẹlẹ ọli nẹẹ, o kha rhẹ kyili ukyiẹkyiẹmhi eghyiele mhẹ.'' ²⁴Ọọ ke vu ni ọ rha mhila inyọ ọli "Elọ mhia mhilali?'' Inyọ ọli ọọ li, ukhomhi Ijọni ni ọa batazi agbọ." ²⁵Ọ ke nyanya bhuli ọni oghyie ọa mhila ọli, ọọ li, ''Mhia nono khi u lee khyi Ijọni ni ọa batazi iọgbọ ukhomhi shi ọfala na mhẹ.''²⁶Oni ngme ọ kee to ọni oghyie egbe, ama rharhi oni irhomhi ali eni ọ ghyie a lu, ọ vha dobẹ chi egbe oni ingme. ²⁷Ayayayọ ọni oghyie ọ ke ghyie achoja ọgwho elemhi eni e rhẹ khali ọli khi ọ kha khyi ukhomhi Ijọni bhẹ. Ọni achoja ọ vu je ogba igwhumha a khyi ọli ukhomhi ghyi ọ. ²⁸Ọ tṣua oni ukhomhi shi elemhi ọfala ghyi ọni ọmoshi, ọni ọmoshi ọ tsua ghyi inyọ ọ. ²⁹Abhi eni idibo ọli, e ke rhọ suọ, e bhẹ a tsua olimhi ọli je uji a tọ.³⁰Eni ighyiusomhi, e ke sẹgasẹ Ijesu a lẹ, e gwu khasẹ ọli emeni abhi e gaa khyiẹlẹ ali ni e wẹna. ³¹Ọ ke ẹẹ wẹ, ''Vha bhẹ khi eyẹ je esọ ogwa khi eyẹ kaa vhiẹmhia ikwukwu ẹrhẹghẹ.'' Rharhi ebubu egwho ee bhe egwho ee je, shi ẹrhẹghẹ e vha mhuẹ ni e rhẹ lee emenale. ³²E ke te egbe wẹ lono ọkọ ẹẹ je esọ ogwa.³³Ebubu iọgbọ e mẹ wẹ ni e rhẹ vu, ebubu e yẹsẹ wẹ, ee gaa rhọ te ẹvhue khi ẹvhue rhi awẹ nanọ rhẹ khẹ wẹ, wẹwẹ ni e rhi awẹ nanọ rhẹ khẹ wẹ eyọ e gwe lo ayọ khẹ wẹ. ³⁴Abhi e ke rhọ te ọkọ kpiale, Ijesu ọ mẹ agbaa ni o legba ọ mhọli ivhẹlemhi kwu wẹ rharhi khi e liabhi isumha ni e vha mhuẹ ọni ọ rhẹ wẹ a le. Ọọ ke gwe la ayọ wẹna wẹ emeni ebu.³⁵Abhi ogbode ọ ke rheẹ le, idibo ọli e bhẹ bhuli ọli le, "Elemhi ogwa khi ona, ogbode o she gwe a le." ³⁶Wẹ li e kee je ẹvhue ni e chi mama ana khi e kaa dẹ emenale ni egbe wẹ le.''³⁷‘’Ijesu ọọ sọ wẹ vhọ, ‘’Vhẹvhẹ vha rhi emenale na wẹ le.’’ E ke sọ ọli vhọ eẹ li, ‘’Eyẹ kha rhẹ rhi ikpulu egbhọ igbe dẹẹ emenale na wẹ ea kwhese wẹ?'' ³⁸Ijesu ọọ ke sọ vhọ ọọ li, ‘’Irhui ikphakpha ingmẹ vha mhuẹ shi ayọ? Vha kaa bino gwhe,'' E ke a bino, eẹ li, ‘’Irhui ikhpakpha ishie ali ifẹli eva li eyẹ mhuẹ.³⁹Ọ ke ẹẹ li eni iọgbọ khi e shitọ ekẹ ikhomhi ebui. ⁴⁰E ke nwuno egbe shitọ, egwho egbhọ ishie, egwho egbhọ eva igbe. ⁴¹Ọ ke rhue eni ikphakpha ishie ali ifẹli eva, ọ yasẹ wẹ ekẹ, ọ zẹ ọte shi vhọ ọ gbolo wẹ khyiolo ọ rhue wẹ ni eni idibo ọli khi e kee kemhi wẹ ni eni iọgbọ. Ọ gwe liyọ kemhi eni ifẹli eva ma wẹ vhọ.⁴²Wẹwẹ kwu e le e kwhe, ⁴³E sanọ ikhyikhyi eni ikphakpha vọsẹ igwugwu igbe ali eva ali ikhyikhyi eni ifẹ ni e la kpọẹ. ⁴⁴Eni e le eni emenale e kyili agbẹlẹ egbhọ igbe asha ishie.⁴⁵Ayayayọ ọọ li idibo ọli khi e lono ọkọ khi e ke je elase okẹ ni o kpọẹ, Obhoni Ibẹsiada, ayọ ọ ke te ẹẹ li oni agbaa e ke je. ⁴⁶Abhi e ke rhọ vu ọ je okhomhi ọkpha lẹẹ pfi olẹma. ⁴⁷Abhi ogbode o ke rhọ le, oni ọkọ o la iteteva oke, lọgwho li ọ lee la ukhomhi ekẹ.⁴⁸Ọọ mẹ abhi o li nwu wẹ unu khi e rhọ gheghe oni ọkọ lasele rharhi khi akpekpe oo pfi. Ufuabọ ẹrhẹghẹ ọkwulọkwu esẹ ẹliyọsẹ ọ bhẹ bhuli wẹ le, ọọ kyia vhi ukhomhi okẹ, ọọ nono khi lẹẹ dọsẹ wẹ. ⁴⁹Ama e ke mẹ khi ọọ kyia vhi ukhomhi okẹ, e khọkhọ khi olimhi lọ ee sọse, ⁵⁰E mẹ ọli ulishi oo nwu wẹ. ayayayọ ọọ wẹ, ''Vha mhọdu! imhẹ vhaa dọbẹ ulishi nwu vhẹ.''⁵¹Ọ nu wẹ lo oni ọkọ, oni akpekpe o pfua, ingme ọli o nya wẹwẹ kwu aloa. ⁵²Rharhi khi o vha khyie ga wẹ ẹloe emeni oni ukphapkpha o ngme, ama rhẹmhi idu wẹ o vha kẹlẹ mhuẹ iyẹsẹ.⁵³Abhi e ke rhọ da okẹ, e bhẹ vhi Igenesareti li e rhọ rhi ọkọ nwu. ⁵⁴Abhi e ke rhọ te ọkọ lasele, e la ayayayọ yẹsẹ ọ, ⁵⁵Eni iọgbọ e ke je ashakasha e rhi ivhia ẹẹ chino eni ee gwhua ona aloekẹ oyọ kwu bhuli ọli, obhoni e suọ khi ọ bhẹ kwu.⁵⁶Obhobho ni ọ te dọsẹ lẹ lẹẹ kwu rhẹmhi e nasẹ eni ee gwhua shi atuokyi, e kee lemali khi ọ yagwa khi ọ lee dobẹ wẹwẹ rhi ukpobọ chi ọli awulu. Wẹwẹ kwu ni e rhi obọ chi ọli awulu rhẹmhi e ze.

¹Eni Ifarisisi ali eni ikọwe egwho ni e te Ijerusalemu bhẹ e sẹgasẹ ọli.²E ke mẹ khi idibo ọli egwho e rhi abọ ni e vha pfuasẹ ẹẹ le emenale; abọ na vha kpea. ³Rharhi khi eni Ifarisisi ali Ijusi kwu e vha ẹẹ le emenale ina khi rhẹmhi e kpe abọa onaghyie, onaghyie: itushi enejọ li e rhọ khẹ. ⁴Eni Ifarisisi e kha rhẹ ye okyi, e vha ẹẹ le emenale ina khi rhẹmhi e kwhẹa. Iyọ li a gwe li mhọli ishi evhese ni e nwu zezeze ni e rhẹ khẹ, Nabhi ishi ikpe ikoloa, ekheọsọ, itasa ẹlomho, ali itabu ni a la le emenale.)⁵Eni Ifarisisi ali eni ikọwe ee mhila IJesu, ''Elọ e zẹ khi idibo ẹ khi e vha rha khali ushi ni enejọ e shi, rharhi khi rhẹmhi ea le emenale e vha kpe abọa?''⁶ọ ke ẹẹ wẹ, ''Azaya ọ gwabha ngme ingme obodẹ vhẹ, vhẹvhẹ enabọmẹmhẹ, ọọ kẹkẹ, ''Eni iọgbọ ena eghọghọ unu li e rha na mhẹ ama udu wẹ o nuẹ shi mhẹ egbe. ⁷Ugamhi apfuẹ li ea ga mhẹ, ea wẹna ewẹna otsonagbọ abhi ishi wẹ e li.'⁸Vha rhi obọ gbe ishi Ishinẹgba shi vha rha khali ishi agbọ.'' ⁹Ọọ wẹ, Vhaa lee liyọ khyie ishi Ishinẹgba fiẹẹ khi vhaa kẹ rhi ishi vhẹ gbe! ¹⁰Rharhi khi Imozisi ọọ ngme ọọ li, 'Rhi ekpẹ ni ita ẹ ali inyọ ẹ,' ọ gwe ẹẹ li, Ọni ọ zẹ ẹnwẹ ni ita ọli aọ liyọ inyọ ọli ọọ laa gwhua.'¹¹Ama vhẹvhẹ khi, 'Ọgbọ ọ kha ẹẹ li ita ọli ali inyọ ọli, ''Ikpaghyiẹobọ na mhi kha rhọ nẹẹ mhi rhi ọli somhi Ishinẹgba opfa. ¹²Vhavha ke gwe dobẹ wẹ mhọli emeni e khyiẹlẹ a ni ita wẹ ali inyọ wẹ. ¹³Vha she rhi ishi vhẹ rhi ishi Ishinẹgba mela apfuẹa. ali ẹtsẹkẹ enabhi enana ni vha gwe a khyiẹlẹ.''¹⁴Ọọ gwẹ nyalu agbaa ni e legba ọọ wẹ, ''Vhẹvhẹ kwu vha rhi esọ shi ekẹ, khi vhaa yẹsẹ emena mhi a ngme. ¹⁵A vha mẹ emeni e la elase ijegbe ọgbọ ni o rhi ọli a kyili ọni ọ vha pfuasẹ. Sẹkẹnẹ emeni e te ọ vhi egbe lasele li o rhi ọli a kyili ọni ọ vha pfuasẹ.'' ¹⁶Ọni ọ zẹ esọ, ọ rhọ suọ.¹⁷Abhi IJesu o ke rhọ pfi eni iọgbọ shi ekẹ ayọ vu, ọọ lo apfẹ, idibo ọli e kee mhilali emeni oni ekpita oyọ o ngme. ¹⁸IJesu ọo li, ''Vhẹvhẹ vhavha khyie li mhuẹ iyẹsẹ? Vhavha khyie li mẹ khi emeni ọgbọ rhọ pfilo unu khi o vha rhi ọli a kyili ọni ọ vha pfuasẹ. ¹⁹Rharhi khi o vhaa jee ọli vhi udu, ama khi akpiji li o lee lea jee a ke nẹ ọli kwu izelezẹti.'' Oni ingme ona li Ijesu ọ ngme ni ọ rhọ rhi emenale kwu shi pfuasẹ.²⁰Ọọ li, ''Emeni e te elemhi ọgbọ lasele li o rhi ọli a kyili ọni ọ vha pfuasẹ. ²¹Rharhi khi elemhi udu ọgbọ, li isamhi ebe e te a lasele, isamhi idetsia ikpotso ali emọse, ighyiatọ, ugbee, ²²Irhi ingme ọgbọ shi elemhi, ẹtsẹkẹ ituegbe, ọkhọlọ, ighagha, ọgwhẹmhẹ ẹtsẹkẹ ọgbọ, ọgwhẹmhẹ ikpotso ali emọse, irhi unu mise ọgbọa, ichichegbe, inye idẹkẹ.'' ²³Udu li eni ingmobe ena kwu e te a bhẹ, wẹwẹ khi emeni e rhi ọgbọ kyili ọni ọ vha pfuasẹ.''²⁴Ọ te ayọ vu ni ọ rhọ ẹẹ jee aloekẹ Itaya ali Isidọni. Ọ lo apfẹ ogwho ọ vha nono khi ọgbọ ọ yẹsẹ khi lẹ la ayọ ama ọ vha dobẹẹ gbhagbha ni a rhọ ẹẹ mẹ ọli. ²⁵Ama ayayayọ ọkposo ọgwho ni omyi ọli ni ọkposo ọ mhuẹ iyẹmhẹ ni e vha pfuasẹ, ọọ ke suọ obodẹ ọ, khi ọ bhale, ọ de talorhugwhu ọli vhi odalo. ²⁶Ọni ọkposo ọ kyili ọgbọ Igiriki, ọnyi Isarofonisha. Ọọ lema khi ọ kwhu ọli eni iyẹmhẹ ni e vha pfuasẹ ọli vhi egbea.²⁷Ọọ li, ''Kpọ dobẹ eni ivhiẹ kpọ le emenale nee, rharhi khi o vha gbe akanya emenale ni a laa rhọ ni eni ivhiẹ khi a rhi ọli ni iweshi le.'' ²⁸Ama ọ ke sọ vhọ ọọ li, ''Ee, Ọnọmhọli, ''Iweshi e khyie lea la ufu itebu sanọ ikwu emenale le.''²⁹Ọọ li, ''Rharhi khi u ngme ona, u ke dobẹ a vu. eni iyẹmhẹ ni e la omyi ẹ ni ọkpotso egbe e she a lase.'' ³⁰''Abhi ọ ke rhọ liegbe jee apfẹ, ọọ bhale a vhẹ khi ọni ọmọ ọ vhesẹshi ẹtẹtẹ khi eni iyẹmhẹ e she vu ọli vhi egbe le.³¹Ọọ ke gwe te aloekẹ Itaya vu, ọ rhọ te Isidọni jee okẹ Igalili ọ shele je aloekẹ Idikapolisi. ³²A ke rhi udungme ni ọ gwe le esọ ghyi ọ, ee lema khi ọ rhi obọ nya vhi egbe.³³Ọ rhue ọli je egbẹbẹ, ọ sọnọ ọli ikpuabọ vhi esọ, ọ to etẹ, ọ rhi ọli shi ọ vhi olẹmhi. ³⁴Ọ bino idane, ọ yẹmhẹa vuu ọli, ''Ẹfata,'' see o ngme, ''Kwheghyiea!'' ³⁵Ayayayọ esọ ọli e kwheghyiea, emeni e nwu ọli unu ni ọ vha rhọ dobẹ ngme o taghyiẹa ọọ ngme.³⁶Ọ kpẹka nya wẹ vhi ukhomhi khi imhẹli e gwu ni ọgbọ pẹẹ. Ama abhi ọ kpẹka nya wẹ ukhomhi, iyọ li ee tsọ vhi abọ. ³⁷Oo nwemaa nya wẹ aloa, li e rhọ eẹ li, ''Ọ maa gwhabha gbe. Li shi idungme ali elesọ ọ she rhẹ wẹ ze.''

¹egbẹlẹ eyọ, aa gwe mẹ iọgbọ nebububu, e vha mhuẹ emenale ni ee le. IJesu ọ ke nyalu idibo oli ọọ wẹ, ²''Idu eni iọgbọ ena e kẹkẹ mhẹa, rharhi khi o she gbe ẹlẹ esẹ ni e te nu mhẹ la ana ena e vha le ẹtsẹkẹ. ³Mhi kha liyo dobẹ wẹ a jee khi e vha le ẹtsẹkẹ e dobẹ a chuba shi atuode. Egwho vhọ odẹ o nuẹ obhoni e te bhẹ.'' ⁴Eni idibo ọli e ke eẹ li, '' Obho eyẹ laa mẹ emenale ni e laa kwhese ebubu iọgbọ enana vhi elemhi ogwa ni eyẹ la ena?''⁵Ọọ ke ẹẹ wẹ ''Irhu ikphakpha ingmẹ vha mhuẹ shi ayọ?'' Eẹ li, ''Ishila. ⁶Ọọ ke ẹẹ li oni agbaa ni e rhọ gba e shitọ ekẹ. Ọ wolọ eni ikphakpha ishila, ọ kphẹmhi shi vhọ, ọ gbolo wẹ khyiolo. Ọ rhue wẹ ni eni idibo ọli khi e rhọ kemhi na wẹ, ee liyọ kemhi wẹ ni oni agbaa.⁷Ẹ gwe li mhọli ikwukwu ifẹẹ, ọ gwe kphẹmhi shi vhọ, ọọ li e gwe li kemhi wẹ manọ wẹ vhọ. ⁸Ee le e kwhe. E sanọ ikhyikhyi wẹ ni e le kpọẹ vọsẹ igwhugwhu ishila. ⁹Eni iọgbọ ni e le wẹ e kyili agbẹlẹ egbhọ igbe ashi ishie. Ọ chigbe ẹẹ li khi e kee je. ¹⁰Ayayayọ lẹ ali idibo ọli e nu ọli lo elemhi ọkọ, ni e rhẹ je aloekẹ Idamanuta.¹¹Ẹni Ifarisisi e lasele e nu ọli lee epfuasẹ. ee mhilali ishẹfẹ ni o laa te aleghyie bhẹ. ¹²Ọ yẹmhẹa vuu ọọ wẹ, ''Elọ e rhi oni ozele ona a nono ishẹfẹ? Ingmaghyie mhi gwu khasẹ vhẹ, a vha mhọli ishẹfẹ ni a laa rhọ khasẹ oni ozele ona.'' ¹³Ọ pfi wẹ shi ayọ, ọ gwe a lo ọkọ, ọ da je elase okẹ ni o kpọẹ.¹⁴Nenaa eni idibo ọ e yelea e vha tsua emenale. e vha mhuẹ dọse urhui ukphakpha ogwho shi elemhi oni ọkọ. ¹⁵Ọ chi wẹ esọ ọọ wẹ, ''Vha rhi ẹloe kpẹ, vha bẹ ẹlolia shi ekẹ obodẹ uduekẹ Ifarisisi ali Ẹrọdu.''¹⁶Ẹni idibo ee na eta kwugbe, ''Rharhi khi eyẹ vha mhọli ukphakpha shi ana pẹẹ li ọ te ngme yọ,'' ¹⁷ Ijesu ọọ yesẹ emeni ee sa, ọọ wẹ, ''Elọ e ze khi vhaa khọkhọ khi ina khi vhavha mhọli ukphakpha lẹ vha te a ngme yọ? Vhavha khyie mẹ ọ mẹ? o vha khyie ga vhẹ ẹloe? Rhẹmhi idu vhẹ e vha khyie mhọli iyẹsẹ ena?¹⁸Vha zẹ ikpalo, vhavha rhẹ wẹ a mato? Vha zẹ eso, vhavha rhẹ wẹ a suọ? Vhavha gwe sato ọọ? ¹⁹Na mhi rhọ gbe ikphakpha ishie kyiolo ni agbẹlẹ egbhọ igbe asha ishie, igwhughwu ingmẹ ikhyikhyi ni a le kpọẹ e vọsẹ ni a chino vu?'' Eẹ li igbe ali eva.''²⁰Laa khi abhi mhi rhọ gbolo ikphakpha ishila khyiolo vhi iteteva agbẹlẹ egbhọ igbe asha ene, igwhugwhu ingmẹ e vọ ni a tsua vu?'' Eẹ li ishila.'' ²¹wẹ, ''O vha khyie ga vhẹ ẹlọe nenaa?''²²E ke bhẹ vhi Ibesaida. eni iogbọ ni e la ayọ e rhue ọmọse ni ọ zalo bhuli ọ, ee lemali khi ọ rhi obọ chi ọ. ²³Ijesu ọ nwu ọni ọzalo obọ, lase vhi elemhi ẹvhue le. Ọ ke tono etẹ shishi ọli aloa, ọ mhilali ọọ li, U gaa mẹ ẹtsẹkẹ pẹẹ?''²⁴Ọ yase alo ekẹ, ọọ li, ''Mhia mẹ iọgbọ e liabhi erhẹ nia kyia.'' ²⁵Ọ ke gwe rhi abọ nya vhi eni alo, ikpalo ọni ọmọse e gwheghyiea, ọọ mato, rhẹmhi ọ ke gaa ẹẹ mato gboo. ²⁶Ijesu ọ ke ẹẹ li, ''kee jee apfẹ ẹ, khi imhẹli lo elemhi ẹvhue.''²⁷Ijesuṣ ọ rhọ khali idibo ọ je ẹvhue ni e la Isẹzaria Ifilipi. Atuodẹ li ọ la mhila idibo ọ, ọọ wẹ, ''Ogwho agbọ ẹ mẹẹ khi mhi kyia?'' ²⁸E ke sọ vhọ eẹ li, ''Ijoni ni ọ rhi Ibaptizimhi a ni agbọ. Evhese eẹ li ''Ẹlaja,'' eni e kpọẹ, eẹ li, 'Ukwhumhogwho elemhi eni ebolẹ''²⁹"Ọ gwe mhila wẹ, ‘Ọgwho vhẹvhẹ khi mhi kyia?" Ipitẹ ọọ li "Ghyiẹ khi ọni Ikiristi". ³⁰"Ijesu ọ kpẹka nya wẹ ukhomhi khi imhẹli e ngme khasẹ ọgbọ ọna lẹ kyia.³¹Ayọ li ọọ ke lẹẹ wẹna wẹ khi Omyi Omọse ọ nwemaa mẹ ẹchọ obodẹ emeni ebu, eni e womhẹ ali eni ighyie ali eni e kpeda ugamhi ali eni ikowẹ e la kyhie mhẹ, e gbe mhẹa, ogbẹlẹ ozi esẹ mhi vule. ³²Rhẹmhi ọ gaa ngme ọ gboo. Iyọ Ipitẹ ọ rhue ọli je esẹbẹ nu ngme vyili vyili.³³Ijesu ọ ke lieliẹ alo a bino idibo ọli ọ tsa shi Ipitẹ unu ọọ li, ''Liegbe je mhẹ oshimhi ghyiẹ okhyio! U waa pfi agbuẹ shi ẹtsẹkẹ Ishinegba, ama ẹtsẹkẹ agbọ.'' ³⁴Ọọ ke nyalu eni iọgbọ ni e legba ali idibo ọ kwugbe, ọọ wẹ, ''A kha mẹ ọni ọ laa rhọ khẹ mhẹ, ọ nwemaa kpọ a khyie egbe ọli, ọ tsua ọgbagala ọli, ọ rhọ khali mhẹ.³⁵ọni ọa nono khi lẹ tsumhi ayẹmhẹ lẹ ọ la wasẹ ọlia, ama ọni ọ laa wasẹ ayemhẹ olia rharhi mhẹmhẹ ali ingmemhi Ishinẹgba, ayẹmhẹ ọli o vha laa waa. ³⁶Mhi gyhi ele ni ọgbọ ọ laa mẹ, khi ọ rhọ mhọli oni agbona kwu vhi elele, ọ wasẹ ayẹmhẹ ọlia? ³⁷Elọ ọgbọ ọ rhọ dobẹ laa rhọ lọghyiẹ ayẹmhẹ ọli?³⁸Ọni ọa nu omama mhẹ ali ingmemhi mhẹ elemhi oni ozele odọsẹ ali ingmobe ona, Omyi Ọmọse ọ li laa nu omama ọli ni ọ ke rhi ighyiukọ ọli ni e pfuasẹ bhẹ vhi ikiki Ita ọli.

¹Ọọ ke ẹẹ wẹ, ''Ingmaghyie mhi gwu khasẹ vhẹ, Egwho vhi elemhi vhẹ ni e tono mugha ana ena egwhi o vha laa rhi egbe chi wẹ neni e mẹ khi aleghyie Ishinẹgba o rhi izemhi kpiale." ²Ogbẹlẹ ozi esesa, IJesu ọ rhue Ipitẹ ma egbe ali Ijemhisi ali Ijọni shele je ukhomhi ọkpha ni o yagha. Abhi wẹwẹ ọgwho e li la ayọ eyọ, Ọọ laa ukpẹloe wẹ mela egbe. ³Iwulu ọli ee gẹẹ pẹpẹpẹ, ee pfuasẹ gbogbogbo, e pfuasẹ dala ọpfuasẹ ni o gaa pfuasẹ nẹẹ vhi oni agbona kwu.⁴Ẹlaja ali Imozisi e bhẹ bhuli wẹ le, e nu Ijesu na eta. ⁵Ipitẹ ọ ke sọ vhọ ọli Ijesu, ''Ọwẹnagbọ, o ti khi eyẹ kha la ana, eyẹ tọ ikwu esẹ. Ogwho u kyili uwẹ, ogwho uwi Imozisi, oni o kpọẹ uwi Elaja". ⁶Rharhi khi Ipitẹ ọ vha yẹsẹ emeni ọ kha ngmẹ, rharhi khi ulishi oo nwu wẹ.⁷Atutu o bhẹ a rhi arhorho gwese wẹ. Iyọ, urhui o te oni atutu ngmẹ lasele, "Ọna khi Omyi mhẹ ni ọ gwhẹ mhẹ. Vha rhi esọ shi ọ vhi ekẹ." ⁸Udomhija, abhi e ke rhọ pfialo, e vha gwe mẹ ọgbọkhọgbọ sẹkẹnẹ khi Ijesu lọgwho kpe.⁹E ke rhọ te oni ọkpha ẹẹ kpiale, ọ kpẹka nya wẹ ukhomhi khi imhẹ wẹ e ngmẹ khasẹ ọgbọkhọgbọ emeni e mẹ, o ke kyila ni Omyi Ọmọse ọ te egwhi vue. ¹⁰Iyọ e rhi oni ngmẹ shi elemhi wẹ, ama e nu egbe wẹ ẹẹ na eta, ''Itiegwhivule,'' see o mẹẹ ngmẹ.¹¹ke mhila ọli, "Elọ e zẹ khi eni ikọwe ẹẹ li Elaja li ọ kpọ la bhe?" ¹²Ọọ wẹ, Elaja ọ nwemaa kpọ a bhẹ ọa rhi etsẹkẹ kwu shi ikpa wẹ. Elọ e ke zẹ khi ẹ khi Omyi Ọmọsẹ ọ nwemaa laa mẹ ẹcho obodẹ ẹtsẹkẹ nebu a khyie ọ? ¹³Ama mhii ẹẹ vhẹ Ẹlaja ọ she bhẹ, e khyiẹlẹ ọli abhi o ti wẹ vhi ẹloe, abhi ebe ni o Pfuasẹ o ngmẹ obodẹ ọli."¹⁴Abhi e ke rhọ bhẹ vhi obhoni idibo ni e kpọle e la, e mẹ agbaa o legba ali eni ikọwẹ khi e sẹgasẹ wẹ e nu wẹẹ lee epfuasẹ. ¹⁵Ayayayọ abhi e ke rhọ mẹ Ijesu, abọ e sha oni agbaa kwu e nanọ lẹẹ tsẹ ọli. ¹⁶Ọ mhila eni idibo ọli, ọọ wẹ, ''Elọ vha nu wẹ le epfuasẹ a shi?''¹⁷ Ukwhumhogwho elemhi oni agbaa ọ mhila ọli, ọọ li, "Ọwẹnagbọ, Mhi rhue omyi mhẹ ghyiẹ; ni ọ mhuẹ ayẹmhẹ udu ngmẹ, ¹⁸O pfi ọnwọmọ nali ọa pfinọ ọli vhi ekẹ; ọa fu etẹ unu, ọ gwe rhi akọ a le akọ, ọa womhia. Mhi ke ẹẹ li idibo ẹ khi e kwhu oli oni ayẹmhẹ pfia, ama e vha dobẹ." ¹⁹Ọ nu wẹ ngme ọọ wẹ, "Ozele ni e vha myie a suọ, ẹlẹ mhi laa nu vhẹ la rhamhi? Ashio mhi laa rhi obọ gbanidu na vhẹ rhamhi? Vha rhi ọli bhẹ.''²⁰E rhi ọni ọmọ ghyi ọ. Abhi oni ayẹmhẹ ọ ke rhọ mẹ Ijesu, obobobọ ọni ọnwọmọ o nwu ọ. Ọni ọmọ ọ de a gbe ekẹ ọọ fu etẹ unu. ²¹Ijesu ọ ke mhila ita ọli, ''Ashio o tẹsẹ rhamhi nee ni o te la vhi egbe?'' Ọni ita ọli ọọ li. Rhọ te ivhiẹ bhẹ. ²²Utotona li o rhọ pfi ọli a lo erhẹ ali amẹ ọa nono abhi oo li gbe ọlia. U kha mhuẹ emeni u dobẹ a khyiẹ, mhuẹ ivhẹlemhi kwu eyẹ khi u kpaghyie eyẹ.²³Ijesu ọọ ke ẹẹ wẹ, ''U kha dobẹ? ẹtsẹkẹ kwu e laa gba ni ọni ọ lama shi vhọ." ²⁴Obobobọ ita ọni ọmọ ọ sọọse lase ọọ li, ''Mhi myie lama shiọ! Kpaghyiẹ umha myie suọ mhẹ!" ²⁵Abhi Ijesu ọ ke rhọ mẹ iọgbọ e nanọ lẹẹ bino wẹ, ọ va nya ọni ayẹmhẹ obẹ ukhomhi ọọ li, ''Ghyiẹ ayẹmhẹ udungme ali ayẹmhẹ ilesọ, mhi mhasẹ nẹẹ, lase ọ vhi egbe le, imhẹ gwe lo ọ vhi egbe gwhe.''²⁶Ọọ sọọsẹ gbalala ọnwọmọ o jighyi ọli onaghyie, onaghyie ọ chigbe a lase. Ọni ọmọ ọọ fẹẹ abhi ọni ọ gwhu, iyọọ ebubu iọgbọ eẹ li ẹẹ li, ''Ọ she gwhu." ²⁷Ijesu ọ nwu oli obọ vue, ọni ọmọ ọ vue tomugha.²⁸Abhi Ijesu ọ ke rhọ bhẹ vhi oni apfẹ, idibo ọ e bẹna mhilali, "Elọ e zẹ khi eyẹ Vha dobẹ kwhu ọ pfia eyọ?" ²⁹Ọọ wẹ, ''Olema lọgwho li a rhọ dobẹ kwhu ọli a pfia.''³⁰E ke te ayọ vu e rhọ te Igalili dọsẹ a lẹ. Ijesu ọ vha nono khi iọgbọ e yẹsẹ obhoni lẹ la, ³¹Rharhi khi ọ wẹna eni idibo ọ, ọọ wẹ, "Omyi Omọse a la laa ji ọli abọa ni iọgbọ, e gbe ọlia. A Kha ke gbe oli, ogbẹlẹ ozi esẹ ọ gwe laa vule." ³²Ama e vha suọ limhi emeni ọ rhi ọli ngmẹ, ulishi oo nwu wẹ ni e kha ke rhọ mhila ọli vyie.³³E ke bhẹ vhi Ikapaniọmu. Abhi ọ ke rhọ lo elemhi apfẹ, ọ mhila idibo ọli, "Eta ni egwho vha mẹẹ na atuodẹ eyọ?" ³⁴E pfesua. Rharhi khi epfuase li e nu egbe wẹ le obodẹ ọni ọ fu nẹẹ elemhi wẹ vhi ekẹ atuodẹ. ³⁵Ọ de shito, ọ nyalu eni ogbe ali ava kwugbe. Ọọ wẹ, "A kha mẹ ọni ọa nono khi lẹẹ kyili ọni ikyiatsolo, ọ nwemaa kpọ a kpe oshimhi ọ kyili ọgamhẹ wẹwẹ kwu."³⁶Ọ rhue ukwukwu ọmọ bhẹ vhi iteteva wẹ. Ọ rhue ọli shi abọ ni ọ rhọ ẹẹ wẹ, ³⁷"Ọni a laa kpẹsẹ abọ myie ọmọ ọnana elemhi eva mhẹ, mhẹmhẹ li ọ li kpẹsẹ abọ myie eyọ, ọni ọ la myie mhẹ, a khi mhẹmhẹ ọgwho li ọ kpẹsẹ abọ myie, li shi ọni ọ ghyie mhe li ọ gaa kpẹsẹ abọ myie.³⁸Ijoni ọọ li, "Ọwẹnagbọ, eyẹ mẹ ọgbọ ni ọ rhi eva ẹẹ kwhu iọgbọ iyẹmhẹ ebe egbe kwa eyẹ vasẹ rhugwhu ọ, rharhi khi ọ vha rhọ khali eyẹ.'' ³⁹Ama Ijesu ọọ li, "Imhẹ vhasẹ kwu wẹ, rharhi khi a vha mẹ ọni ọ laa gbe akanya otọgbe elemhi eva mhẹ ni ọ la zẹ onobe mhẹ.⁴⁰Ọni ọ vha zẹ okwhẹ kpẹsẹ eyẹ uwi eyẹ li ọ kyia. ⁴¹ọ laa rhi ukolo amẹ na vhẹ daa rharhi khi u kyili uwi IKiristi, ingmaghyie mhi gwu na vhẹ, elele ọli o vha laa waa.⁴²Ọni ọ laa zẹ khi eni ikwukwu wẹ ẹna ni e lama shi mhẹ vhọ e denakwa, oo kha ti nẹẹ khi a zu ẹchẹ nofu shi ọ vhi urhui a pfi ọ lo elemhi okwu. ⁴³Obọ ẹ o kha laa rhẹ de, khyi ọli pfia. Oo kha ti nẹẹ khi u kachẹa lo aleghyie dala khi u rhi abọ eva lo owerhẹ, elemhi erhẹ ni e vha pfua. ⁴⁴Ekwhẹ ni e la ayọ e vha gwhu wẹ khi eni erhẹ lia pfua.⁴⁵O kha kyia khi owẹ li o laa rhẹ tsutsu dee, khyi ọli pfia. Oo kha ti nẹẹ khi u kyili ukhyila lo aleghyie dala awẹ eveveva e gba nẹẹ lo owerhẹ. ⁴⁶Ekwhẹ ni e la ayọ e vhaa gwhu, wẹ khi eni erhẹ lia pfua.⁴⁷O kha kyia ukpẹloe ni u zẹ li o kha rhẹẹ de, tọnyi ọlia. Oo kha ti nẹẹ khi u rhi ukpẹloe ogwho lo aleghyie dala u rhi ikpalo eva lo owerhẹ, ⁴⁸Ekwhẹ ni e la ayọ e vhaa gwhu, wẹ khi eni erhẹ lia pfua.⁴⁹Rharhi khi a laa kwu erhẹ shi ọgbọ kwu egbe. ⁵⁰Ugbhe o ti, ama oni ugbhe o kha ke wasẹ ọlẹlẹ ọlia, see o ke gwe lia nwu ẹtsẹkẹ? Vha kyili ugbhele ni egbe vhẹ, vha rhi ọpfọmhẹ rhaa khali egbe vhẹ.''

¹

¹Nenaa, abhi e ke rhọ bhẹ vhi Ijerusalemu, e she ke chi mama evhuẹ Ibetfaji ali Ibẹtani, ukhomhi okpha olivi, Ijesu ọ ghyie idibo ọli ava lasee. ²Ọọ wẹ, ''Vha lo elemhi oni ẹvhue ona ni o salo gwhe eyẹ ena. Vha kha lee yẹsẹ a lo vhọ le, vha bhẹ la vhẹ akẹkẹtẹ ni a vha nya gwhe. Vha taghyiẹ ọli ghyi mhẹ. ³A kha mẹ ọni ọ mhila vhẹ, "Elọ vha khyiẹ ena? Vha li ẹẹ li, 'Ọnọmholi li ọa nọnọ ọli⁴E ke vuu e bhale a vhẹ khi akẹkẹtẹ a nwu oli zu obunuodẹ elase ufuodẹ ataghedeghede, Li e rhọ taghyie ọli. ⁵Iọgbọ egwho ni e mugha ayọ ẹẹ wẹ, "Eli vhaa khyiẹ, ni vha rha taghyiẹ ọni akẹkẹtẹ ọnaa?" ⁶E sọ wẹ vhọ abhi Ijesu ọ ghyie wẹ, eni iọgbọ e dobẹ wẹ vu.⁷Eni idibo ava e nwu ọni akẹkẹtẹ ghyi Ijesu e gweghyie iwulu wẹ kwurhugwhu ọli ni Ijesuu nya. ⁸Ebubu iọgbọ e naghyiẹ ede wẹa kwu ode, evhese e nyanọ igwuabọ erhẹ ni e nyanọ vhi elemhi ebui. ⁹Eni e kpalo nali ali eni e rhẹ khali ọ e sọọse, ''Otsumhi eyẹ! Izotena khi uwẹ ọni ọ rhi eva Ọnọmholi bhẹ. ¹⁰Izotena khi uwẹ eghyiele Idevidi ni ita eyẹ! Otsumhi eyẹ lẹ khi ọni ọ yagha nẹẹ!¹¹Ijesu ọ ke lo elemhi Ijerusalemu ọ lo elemhi owuka ọ bino ashaskhasha gasẹ a lẹ. Oni ẹrhẹghẹ ubi o she bi, ọ wolọ idibo ọli ma egbe ee jee Ibẹtani. ¹²Ogbe o ke gbe, ni e ke rhọ te Ibẹtani jele, okyiamhi o kee gbe ọọ.¹³Ọ te odonuẹ mẹ orhẹ ifigyi ni o ta ebe, ọọ bino ọ ni ẹẹ khi lẹẹ mẹ idomha vhi ukhomhi ọ. Abhi ọ ke rhọ bhẹ uji ọ, ọ vha mẹ ẹtsumhanẹkẹ vhi ukhomhi ọ sẹkẹnẹ ebe lọgwho. rharhi khi o vha kyila ẹrhẹghẹ ni oni erhẹ ifigyi ee rhẹ mọ nee. ¹⁴Ọ nu oni orhẹ ngme, ''Ọgbọ ọ vhaa gwe laa le ukpamhi oni orhẹ ona gwhe.'' Idibo ọli e suọ emeni ọ ngme.¹⁵E bhẹ vhi Ijerusalemu, ọ ke lo owuka le, ọ kee kwhu eni e la owuka ẹẹ dẹẹ ali eni e rhẹ dẹẹ lasele. Ọ tanọ itebu eni e rhi ikpaghọ lọghyiẹ ikpaghọ rhugwhu ali itekwu eni e rhi igbekwukwu dẹẹ. ¹⁶Ọ vha dobẹ ọgbọ tsua ẹtsẹkẹ ni a rhẹ dẹẹ te oni owuka a lase.¹⁷Ọọ wẹna wẹ ọọ wẹ, ''A vhẹẹ kẹkẹ ọli shi ekẹ, 'Apfe mhẹ la laa kee lu apfe olema ẹvhue kwu?'' Ama vha she rhi ọli mela ogba ighyiatọ. ¹⁸Abhi eni e kpeda ugamhi ali eni ikọwe e ke rhọ suọ emeni ọọ ngme, e kee nono abhi e li gbe ọlia. rharhi khi owẹna li o nya eni agbaa ni e legba aloa ulishi oo nwu wẹ. ¹⁹Ogbode o kha lee kwu, Ijesu ali idibo ọli e vu oni ẹvhue.²⁰E ke kyia dọsẹ lẹ lẹẹ ẹlẹ uzogbe, e bhale a vhẹ khi oni orhẹ ifigyi o te ukhomhi khakhaa nwu imhili ọ. ²¹ọ sato vhọ ọọ li, ''Ọwẹnagbọ, ghee! Orhẹ ifigyi ni u ke pfi unu na li oo mẹẹ khakhaa enaa.''²²Ijesu ọ sọ wẹ vhọ, ọọ wẹ, ''Vhaa mhuẹ irhọshiọ rhọ khali Ishinẹgba. ²³Ingmaghyie mhi ngme khasẹ vhẹ, ọni ọ laa nu oni ọkpha ona ngme, 'Vu ekẹ ana le khi u de pfilo ukwu,' khi ọ vhaa sheda bi ikhọkhọ vhi elemhi udu ọli, emeni vha ẹẹ li khi a mẹ, li Ishinẹgba ọ laa khyiẹlẹ.²⁴mhi ẹẹ vhẹ: Emeneni u pfi olema shi kwu, khi ulama khi uwẹ li o ke kyia, o laa kyili uwẹ. ²⁵U kha vue a pfi olema, u nwemaa yelea ẹbe ni u nwu ni iọgbọ, khi Ita ẹ ni ọ la elemhi aleghyie khi ọ li yele ingmobea nẹẹ abagwhoyọ. ²⁶Ama u waa sheda yelea ni ọgbọ, Ita ẹ ni ọ laa aleghyie ọ vha laa yelea nẹẹ.''²⁷E gwe liegbe bhẹ vhi Ijerusalemu. Abhi Ijesu ọ ke rhẹẹ kyia vhi elemhi owuka, eni e kpeda ugamhi ali eni ikọwẹ ali eni e womhẹ e bhẹ bhuli ọ le. ²⁸Eẹ li, ''Izemhi ọgwho u rha gbe eni ikanya ena? Ọgwho ọ rhi oni afu nẹẹ khi u rhọ kee gbe wẹẹ?''²⁹Ijesu ọọ wẹ, "Mhia mhila vhẹ ogbọ ogwho. Vha kha sọ mhẹ vhọ mhi laa gwu khasẹ vhẹ ọni ọ rhi oni afu na mhẹ na mhi rha gbe eni ikanya ena. ³⁰''Ibatizimhi Ijoni, obọ iọgbọ li oo mẹẹ te bhẹ laa khi elemhi aleghyie lọ? Vha sọ mhẹ vhọ."³¹E ke nu egbe wẹ lee epfuasẹ eẹ li, "Eyẹ khẹ khi, 'Aleghyie lọ,' ọ laa li ẹẹ li, See vhavha ke li lama shi ọ vhọ?' ³²Ama eyẹ khẹ khi obọ agbọ lọ, ulishi eni iọgbọ ọa nwu wẹ, rharhi khi wẹwẹ kwu ee gaa lama khi Ijọni ọbolẹ li ọ kyia. ³³E ke sọ Ijesu vhọ ni e rhọ ẹẹ li, "Eyẹ vha yesẹ.'' Ijesu ọ ke ẹẹ wẹ, ''Imha laa gwu na vhẹ afu ọna mhi rha gbe eni ikanya ená shiọ."

¹Ijesu ọ rhi ekpita ẹẹ wẹna wẹ. Ọọ wẹ, ''Ọmọse ọgwho ọ gwa ishemhi, ọ gba ogba gasẹ ọli a lẹẹ, ọ tọ atekẹ ni a laa khyiẹlẹ enyọ. Ọ gwe tọ akpamhi shi vhọ ọ chigbe ngmomhi ọli ni eni ee gwa ikpamhi erhẹ. Ọ ke vuu ọọ lẹ asha odonuẹ. ²Erheghẹ ikhyiẹsẹ, ọ ghyie ọgamhẹ ọli bhuli eni ee gwa ikpamhi erhẹ eyọ khi e myie wẹ ikphamhi erhẹ ni e khyiẹsẹ nee ghyi lẹ. ³E nwu ọli, e gbe ọli, e kwhu o, ọ chigbe ẹẹ li ọ rhi abapfuẹ kee jee.⁴Abagwhoyọ ọ gwe ghyie ọgamhẹ ọvhese bhuli wẹ. E kwali ọli utse ukhomhi e chigbe yẹghẹ olia. ⁵Ọ gwe ghyie ọvhese, ọna li e ke gbea. Odẹ ogwho li ọọ rhi evhese ni ọ gwe ghyie te, e gbe egwho e egbolo eni e kpọẹa.⁶Oo khyie kpọẹ ukwhomhọgwho le ni ọ lẹẹ ghyie, ni ọ kyili omyi ọ ni ọ nwemaa ghọli ọli. Ọọ li, "E laa rhi ekpẹ ni omyi mhe.'' ⁷Ama eni ee gwa ikpamhi erhẹ eyọ eẹ li egbe wẹ, "Ọna li ọ laa le oni ukwu ona. Vha bhẹ khi eyẹ gbe ọlia, ishọyọ khi oni ukwu o kẹ kyili uwi eyẹ''⁸Li ee rhọ nwu ọli, e gbe ọlia, e pfi ọli te oni ogba a lase. ⁹Iyọ, elọ ọni ọ mhue oni ọgba ọ ke laa li? Rhẹmhi ọa bhale ọa pfuse eni ee gwa ikpamhi erhẹ eyọa ishọyọ ọ chigbe rhue ọli ni iọgbọ evhese.¹⁰Vhavha khyie li zẹ oni akẹkẹshekẹ ona? 'Ẹchẹ ni eni ea ma owa e khyie, o she mela ẹchẹ ni o nwu ukpowa mhuẹa. ¹¹Obọ Ọnọmholi li o te bhẹ, o maa nya eyẹ aloa."' ¹²Ee lẹẹ dua abhi e li nwu ọ, ama ulishi oni agbaa ni o legba oo lẹẹ nwu wẹ, rharhi khi e she yẹsẹ khi wẹwẹ li ọọ rhi oni ekpita ona nu ngme. Li ee rhọ pfi ọ shi ayọ ni e rhọ vuu.¹³E ke ghyie iọgbọ egwho elemhi Ifarisisi ali iọgbọ ni e rhẹ khali Ẹrọdu bhuli ọ khi wẹwẹ e rhọ te ingmemhi unu ọ rhi ushi nwu ọli obọ. ¹⁴Abhi e ke rhọ bhuli ọ eẹ li, "Ọwẹnagbọ, eyẹ yẹsẹ khi u waa rhi esọ a shi ọgbọ ekẹ, wẹ khi rhẹmhi u waa gbe ọgbọ a ni ọ gbọ. Odẹ Ishinẹgba lẹ u waa wẹna agbọ. O mẹ te odẹ ushi khi a rhọ zẹ oga ni Isiza laa khi o vha ti? Eyẹ zẹẹ, laa khi imhẹli eyẹ zẹẹ? ¹⁵Ama Ijesu ọọ yẹsẹ abọmẹmhẹ wẹ, li ọ rhẹ wẹ, See vha ke lia nwu mhẹ fẹẹ? Vha rhue oni ukpaghọ bhẹ khi mhi binọ ọli gwhe.''¹⁶Ee rhue ogwho ghyi Ijesu. Ọọ wẹ, "Arọkhọkhọ ali eva ọgwho a vi shiọ ena?'' Eẹ li, "Uwi Isiza lọ." ¹⁷Ijesu ọọ wẹ, ''Rhi uwi Isiza ni Isiza.'' u rhi uwi Ishinẹgba ni Ishinẹgba.'' Abọ li e ke sha wẹ.¹⁸Eni Isadusisi, ni ẹẹ khi a vha mẹ itiegwhivule, e bhẹ bhuli ọli le. Ee mhilali, eẹ li, ¹⁹"Ọwẹnagbọ, Imozisi ọ kẹkẹ ghyi eyẹ, 'Inyogwho ọgbọ ni ọmọse ọ kha gwhua khi ọ tsua ugwhẹ ọli pfia khi ọ vha vyia ọmọ, ọni ọmọse ọ rhue ọni ugwhẹ inyọgwho ọ, khi ọ vyialọ ivhiẹ shini ọni inyọgwhọ ọli.'²⁰Aa liyọ mẹ Inyọgwho emọse oshila; ọni ikyiatsolo ọ mhuẹ ọkpotso ọ deshi vhọ ọ gwhua, ọ vha vyia ọmọ. ²¹Ọzava ọ rhue ọni ọkpotso ọ gwe gwhua, ọ vha vyialọ ivhiẹ. Ozasẹ ọ gwe liyọ. ²²Apfishi ọzi oshila ọ vha li vyialọ ivhiẹ. Emeni e ke kposhimhi vhọ kwu ọni ọkpotso ọ li gwhua. ²³Ogbẹlẹ itiegwhivule, ni e ke vue, ugwhẹ ọgwho ọni ọkpotso ọyọ ọ laa kyia? Rharhi khi eni inyọgwho oshila, oshila e gaa mhọli ọli a ga.''²⁴Ijesu ọọ li, ''A khi emeni vha te pfi obọ a dọ khi ona, Rharhi khi vhavha yẹsẹ ebe Ishinẹgba ni o Pfuasẹ wẹ khi izẹmhi ọli? ²⁵Rharhi e kha te egwhi vule, e vha gwe a ye ugwhẹ wẹ khi rhemhi e gwe laa mhọli ikpotso, ama rhẹmhi e ke laa liabhi ighyiukọ ni e laa aleghyie.²⁶Obodẹ eni e gwhu ni e gwe vule, vhavha li te ebe Imozisi zẹẹ, emeni a mẹ elemhi ebui ni o too, abhi Ishinẹgba ọ li nu ọ ngme ni ọ rhọ ẹẹ li, "Mhẹmhẹ khi Ishinẹgba Ebulahamu, Ishinẹgba Aziki, ali Ishinẹgba Ijekopu?" ²⁷Ọ vha kyili Ishinẹgba ẹni e gwhu, ama eni e nyele. Rhẹmhi vha dọ ọlia.''²⁸Ọkwhumhọgwho vhi eni ikọwe ọ bhẹ a rhi esọ shi ingme ni ee ngme; rharhi khi ọọ mẹ khi Ijesu ọ gwabha sọ wẹ vhọ. Li ọ ke rhọ mhilali, ''Mhi gyhi ushi ni o gaa fu ukhomhi nẹẹ elemhi eni ishi kwu? ²⁹Ijesu ọọ li, ''Oni o fu ukhomi nẹẹ lẹ khi, 'Izulẹ vha rhi esọ shi ekẹ, Ọnọmhọli ni Ishinẹgba eyẹ, Ọnọmhọli ọgwho li ọ kyia. ³⁰U nwemaa rhi udu ẹ, ayẹmhẹ ẹ, ukpakomhi ẹ ali izemhi ẹ kwu a mhọli ighọli Ọnọmhọli ni Ishinẹgba ẹẹ.' ³¹Ushi ozi eva khi ona, 'U nwemaa mhọli ighọli ọgbọ nabhi ghyiẹ abhi u li mhọli ighọli egbe ẹ.' A vha gwe mẹ ushi nofu dala ena."³²Ọni akọwe ọọ li, ''Egbegbe, Ọwẹnagbọ! ingmaghyie li u ngme khi Ishinẹgba ogwho li ọ kyia, khi a vha mẹ ọvhese igwepfẹ ọ. ³³Khi e eyẹ rhi ukpakomhi eyẹ kwu mhọli ighọli ọ, ali iyẹsẹ eyẹ kwu, ali izemhi eyẹ kwu, eyẹ gwe mhọli ighọli ọgbọ nabhi eyẹ abhi eyẹ li mhọli ighọli egbe eyẹ, li o fu dala isomhopfa ali ilasobo.'' ³⁴Abhi Ijesu ọ ke rhọ mẹ khi ọ she sọ isọmhi ọtsẹgbhẹ, ọọ li, ''Aleghyie Ishinẹgba o vha nuẹ ata shi ẹ vhi egbe.'' Abhi a ke rhọ mẹ ona, a vha mẹ ọni ọ ke gwe jilẹ mhila Ijesu egbọ evhese dala ayọ.³⁵Ijesu ọ ke sọ wẹ vhọ, ni ọ rhọ la elemhi owuka ẹẹ wẹna, ọọ li, ''See eni ikowẹ e kẹ lia li ẹẹ khi ọni Ikiristi khi omyi Idevidi? ³⁶Idevidi lẹ obọ ọli, elemhi Ayẹmhẹ ni o Pfuase li ọ rhọ ngme, ni ọ rhọ ẹẹ li, 'Ọnọmhọli ọọ li Ọnọmhuẹmhẹ 'Shitọ mhẹ vhi obọ obita, apfishi na mhi rhọ rhi ẹbele ẹ a shi ẹ vhi ijiawẹ.' ³⁷Idevidi kpakpaa, ọ lu Ikiristi Ọnọmhọli', iyọ see ọ ke lia kyili omyi Idevidi? Ududumhi agbaa ni e rhọ gba e rhi egbenwumhẹ rhi esọ shi ọ vhi ekẹ.³⁸Abhi ọ ke rhẹẹ wẹna wẹ owẹna Ijesu ọọ wẹ, ''Vha rhi ẹgbhẹ kyia eni ikọwe egbe, ni ea nono khi wẹwẹ e kee chalọ ede ekẹ ali otsẹ atuokyi, ³⁹ali khi wẹwẹ e kee shitọ itekwu ni e yagha, yagha, vhi Ewuka ali itekwu enefu ni a la uliemhi. ⁴⁰E gwe a sha eni esọrhọ apfẹ, ea pfi elema ni e nuẹnuẹnuẹ khi agbọ e kẹ mẹ wẹwẹ. Iọgbọ enana ilopfua wẹ li o laa fu nẹẹ.⁴¹Ijesu ọ shitọ egbe akpachi ni a rhi isomhopfa ẹẹ kwulo vhi elemhi owuka; ọ bino iọgbọ abhi e li kwuno ikpaghọ ẹẹ shi elemhi oni akpachi. Iọgbọ ebubu ni e pfue, e tsua ikpaghọ nebu kwulo elemhi ọ. ⁴²Iyọ ọsọrhọ ọni anya oo gbe, ọọ bhale rhi ekpini eva shi vhọ, ni e liabhi ukọbọ.⁴³Ijesu ọ nyalu idibo ọ gba ni ọ rhọ ẹẹ wẹ, ''Ingmaghyie mhi ngme khasẹ vhẹ, ọni ọsọrhọ ọna li ọọ gaa rhi emeni e fu nẹẹ pfilo oni akpachi ona kwu. ⁴⁴Rharhi khi ọgbọ kwu rhẹmhi ọ te emeni ebu ni ọ mhuẹ rhue lasele, Ama ọni ọsọrhọ ọna, elemhi anya ọli, li ọ te rhue ikpaghọlọ ni ọ mhuẹ elemhi agbọ ọli kwu lasele ena

¹Abhi Ijesu ọ ke rhọ te owuka ẹẹ vuu, ukwhumhogwho elemhi eni idibo ọ, ọọ li, ''Ọwẹnagbọ, binọ abhi echẹ ali ewa e somhote gwhe!" ²Ọọ li, "U she a mẹ eni ikpokpomhi ewa ena? A vha mẹ ẹchẹ ogwho ni o laa nya egbegbe ni o vha laa de pfia.''³Abhi ọ ke rhọ shitọ ukhomhi okpha olivi ni o salo gwhe owuka, Ipitẹ, Ijemhisi, Ijọni ali Adulo e bẹna mhilali, ⁴''Ngme khasẹ eyẹ ẹrhẹghẹ ni ogwho a rhọ laa mẹ eni ingme ena? Elọ o laa kyili ishẹfẹ ni o laa rhọ khasẹ abhi a li laa mẹ eni ingme ena?⁵Ijesu ọ ke lolo khasẹ wẹ, "Vha rhi ẹgbhẹ kyia khi ọgbọ ọ ke rhẹ vhẹ waa odẹ. ⁶Ebubu wẹ e laa rhi eva mhẹ bhẹ eẹ li, Mhẹmhẹ khi lẹẹ, e la laa lẹlẹ iọgbọ nebu wodẹ.⁷U khaa sokwu kha khọli waa suọ esọ okwhẹ, imhẹ yele, a nwemaa laa mẹ wẹ, ama ukpẹsẹ ọ vha rhamhi nee. ⁸Rharhi khi ẹvhue e laa kee kholi ẹvhue, eghyiele e ma nu eghyiele evhese vue. Ekẹ e la asha nebu kwuno a lono, ikwhumhi e le. Ena khi ituekẹle okwu itomhi.⁹Vha rhi ẹloe kpẹ. E la laa ji vhẹ abọa ni eni ea mhasẹ, a gwe la elemhi owuka gbe vhẹ. Vhaa laa mugha odalo Igovinọ ali eni ighyie rharhi mhẹmhẹ, khi o rhọ kyili ọtsẹ na wẹ. ¹⁰Ama a nwemaa kpọ laa rhue oni usomhi Ishinẹgba laa tsabọ vhi ẹvhue khi ẹvhue kwu.¹¹E kha rhẹ nwu vhẹ khi e rhẹ vhẹ na wẹ, imhẹ vha yele emeni vha laa ngme. Rharhi khi oni ẹrhẹghẹ oyọ, ememeni vha laa ngme a laa gwu ọli khasẹ vhẹ; a khi vhẹvhẹ vha laa kee ngme, ama Ayẹmhe ni o Pfuasẹ lọ. ¹²Inyọgwho ọ laa rhi inyọgwho ọli lo egwhi, abagwhoyọ ita ọ rhi ọmọ lo egwhi. Ivhiẹ e la laa ma nu ita wẹ ali inyọ wẹ vue e zẹ egwhi ni o gbe wẹ. ¹³Ọgbọ kwu ọ laa kee bishi elemhi vhẹ rharhi mhẹmhẹ. Ama ọni ọ sheda laa rhi egbe myie laa rhamhi ukpẹsẹ, ọgbọ ọyọyọ ọ laa kyili ọni a tsumhi.¹⁴Vha kha sheda mẹ khi emeni a gwhẹ ali opfuẹchiẹ o mugha asha ni o vha kha mugha (ọni ọa zẹ emeni a kẹkẹ ọ yẹsẹ limhi), eni e laa Ijudea ee na je ikhomhi ekpha, ¹⁵Ọni ọ la ukhomhi owa imhẹli ọ gwe kpẹla je elemhi owa, wẹ khi rhẹmhi ọa rhue ẹtsẹkẹ, ¹⁶Ọni ọ laa ishemhi imhẹli ọ gwe jele a rhue ode.¹⁷Ama epfua khi uwi ikpotso ni ea mẹ ali eni e rhi ivhiẹ shi egbe oni ẹrhẹghẹ oyọ! ¹⁸Pfi olema khi imhẹli o kyili ẹrhẹghẹ orhuẹ. ¹⁹Rharhi khi a laa mẹ ududumhi osue ni o kyia khi a vha kpọ mẹ gwhe ni a te tue oni agbona ekẹ le ena, ni Ishinẹgba ọ te ma agbọ ena, rhili a pfishi nena, obho, a vha chigbe a mẹ gwe laa mẹ yọ gwhe. ²⁰Sẹkẹnẹ khi rhẹmhi Ọnọmhọli ọ khyi eni egbẹlẹa, a vha kha mẹ ọgbọ ni ọ pfue ọ le, ama rharhi eni a zẹ, li ọ te kyhi eni e egbẹlẹa.²¹Ọgbọ ọ khi ẹẹ ghyiẹ, 'Ghee, ọni Ikiristi ọ laa ana! Ọa liyọ, 'Ghee, ọ laa ayọ!' Imhẹ lama shi ọ vhọ. ²²Rharhi khi Ikiristi ighagha ali ebolẹ ighagha e la laa lasele e rhi ishẹfẹ ali inyaloa a khasẹ, khi wẹwẹ e kẹ dobẹ lẹlẹ iọgbọ, o khẹ gba lọ, shi eni a zẹ a kha li ghagha wẹ. ²³Rhi ẹloe kpẹ! Mhii she ngme eni ingme ena khasẹ vhẹ shi ekẹ neni oni ẹrhẹghẹ o rhamhi.''²⁴Oni ududumhi osue oyọ o kha dọsẹ a lẹ, ọwẹ o laa bi ebilia, ukyi o vha gwe a gẹẹ, ²⁵Itata e te eda dena kwule, izemhi ni e la elemhi eda ea kee jighyi. ²⁶Ishọyọ e la laa mẹ khi Omyi Ọmọse ọ rhi ikiki ọli ali izemhi ọ te atutu a bhẹ. ²⁷Iyọ ọ laa ghyie ighyiukọ ọli khi e te asha enenene sanọ eni ọ zẹ, rhọ te asha ni ekẹ o te gbasẹ apfishi asha ni idane o kpẹsẹ.²⁸Vha te orhẹ ifigyi wẹna ẹgbhẹ. Igwuabọ erhẹ e kha sheda ta inu, li vha ke rha yese khi oruamẹ o she chi bhẹ. ²⁹Abagwhoyọ, vha kha sheda mẹ khi a mẹ ingme enana, li vha ke rha yẹsẹ khi o she bhẹ, o chi mama obunodẹ.³⁰Ingmaghyie mhi ngme khasẹ vhẹ, oni ozele ona o vha laa dọsẹ sẹkẹnẹ khi eni ingme ena kwu rhẹmhi a mẹ wẹ. ³¹Ekẹ ali eda e laa dosẹ, ama ingmemhi mhẹ e vha laa adosẹ gwhe. ³²Obodẹ oni ogbẹlẹ oyọ ali oni ẹrhẹghẹ oyọ, a vha mẹ ọni ọ yẹsẹ, o kha rhẹ kyili eni ighyiukọ ni e la aleghyie, ali ọni Ọmọ, sẹkẹnẹ khi ọni Ita lọgwho.³³Vha kee fẹ lololo, Vha rhi ẹloe kpẹ, rharhi khi vhavha yẹsẹ ẹrhẹghẹ ni o kyia. ³⁴Rhemhi o liabhi ọmọse ọgwho ni ọọ lẹ asha: ọọ vuu ọ rhi apfẹ ọli shi egamhẹ ọli vhi obọ, ọgbọgbọ ali akanya ọli. Ọọ li eni ea khẹ odẹ e kee fẹ lololo khi imhẹli e dobẹ ovhesẹ nwuno wẹ.³⁵Iyọ vha rhi ẹloe kpẹ! rharhi khi vhavha yẹsẹ ẹrhẹghẹ ni ọni ọdapfẹ ọ rhọ laa jele, ni ẹlogbode lọ, ni ẹlogbokheva lọ, ni ọkpa ọ gbhiẹghẹ lọ, ni ẹluzogbe lọ vhavha yẹsẹ. ³⁶Ọ kha liyọ bhẹ udomhija, imhe vha dobẹ ọli bhẹ a vhẹ khi ovhẹsẹ o nwuno vhẹ. ³⁷Emena mhi ngme vhẹ lẹ mhi ngme ọgbọ kwu ''Vha rhi ẹloe kpẹ!''

¹Egbẹlẹ eva li o ke kpọẹ ni a rhọ lẹẹ khyiẹli uliemhi irhuedọsẹalẹ ali uliemhi ukphakpha ni a kpokolo. Eni e kpeda ugamhi ali ikọwe ee bẹna e mhasẹ abhi e li lẹ nwu IJesu gbea. ²Ama a khi ẹrhẹghẹ uliemhi, rharhi khi o ke pfi ozugwhu iteteva eni iọgbọ.''³Abhi IJesu ọ ke rhọ bhẹ vhi elemhi Ibetani apfẹ Isamọni ọnẹfafe, ọ ke shitọ itebu lee emenale, ọkposto ọgwho ọ bhẹ bhuli ọ le ni ọ tsua akpachi itulale amẹ ni o ghalẹ, ghalẹ. Ọọ ke kweghyie ọlia ọ kwu rhugwhu ọ vhi ukhomhi. ⁴Oo rhi ofu fuu iọgbọ egwho. E kee la ifuabọ ẹẹ ngme eẹ li, "Elọ ọ nwemaa li ona opfu kwa shi ena?" ⁵Aa kha rhi oni itulale ona dẹẹ dosẹ ipomhi uye ali igbe, a rhi eni ikpaghọ kemhi ni enanya '' Ee luese ọni ọkpotso.⁶Ama IJesu ọ ke ẹẹ wẹ, '' Vha dobẹ ọ shilẹ. Elọ vha kphakpha li a shi? Ọ she khyiẹli emeni e somhote na mhẹ. ⁷Ẹrhẹghẹ kwu li enanya e rhọ nu vhẹ a la, ẹrhẹghẹ ni o gwhẹ vhẹ vha rhọ khyiẹli onaghyie a na wẹ, a khi ẹrhẹghẹ kwu vha rha mẹ mhẹ. ⁸Ọ she khyiẹli emeni ọ dobẹ: Ọ she kwu ovhi rhugwhu mhẹ shi irhọtọ mhẹ. ⁹Ingmaghyie mhi ngme khasẹ vhẹ, asha ni a la laa ngme oni ingmemhi Ishinẹgba ona ukhomhi ekagbọ ona kwu, emeni ọni ọkpotso ona ọ khyiẹli ena a la laa kee rhi ọli sato ọ vhi egbe.''¹⁰Iyọ IJudasi Iskariọti, ukwhumhọgwho eni ogbe ali ava, ọ vu bhuli eni e kpeda ugamhi khi lẹ rhọ rhi ọli na wẹ nwu. ¹¹Abhi eni e kpeda ugamhi e ke rhọ suọ, egbe e nwu wẹ shi ọ e shi obọ khi wẹwẹ laa rhi ikpaghọ nali. Li ọ ke rha nono imasha ni ọ rhọ ji ọli abọa na wẹ.¹²Ogbẹlẹ ikyiatsolo uliemhi ukphakpha ni a kpokolo, ni ushi o ngme khi a rhọ rhi oke lasẹ obo vhi oni uliemhi irhuedosẹalẹ, idibo Ijesu eẹ li, "Ashio waa nono khi eyẹ khyiẹlẹ nẹ nu la laa le emenale irhuedọsẹalẹ?" ¹³Ọ ke ghyie ikwhumhi ava elemhi eni idibo ọli ọọ wẹ, ''Vha lo oni elemhi ẹvhue ona vha laa mẹ ọmọse ni ọ tsua akhe amẹ. Vha rhọ khali ọ. ¹⁴Apfẹ ni ọ laa lo eyọ, vha rhọ khali ọli lo vhọ, vha ẹẹ li ọni ọ mhuẹ oni apfẹ, ''Ọni Ọwẹnagbọ ọọ li, "Mhi gyhi owa na mhi laa kwushi na mhi la laa nu idibo mhẹ la le emenale uliemhi irhuedọsealẹ?"¹⁵Ọ la rhọ khasẹ vhẹ ududumhi elemhi owa vhi oweda ni a kwhẹse ni a she nwegbe shi ekẹ. Vha khyiẹli ayọ shi ekẹ ni eyẹ. ¹⁶Eni idibo ọli ava e vu ni e rhọ ẹẹ je oni evhue; e bhale a vhẹ ẹtsẹkẹ kwu abhi ọ kpọ le li ngme ọ khasẹ wẹ eyọ, e ke khyiẹli emenale uliemhi irhuedọsẹalẹ shi ayọ.¹⁷Abhi ogbode o ke rhọ ẹẹ le, ọ rhi eni ogbe ali eva ma egbe bhẹ. ¹⁸Abhi e ke rhọ la ukhomhi itebu lee emenale IJesu ọọ wẹ, '' Ingmaghyie mhi ingme khasẹ vhẹ,, ukwumhọgwho elemhi vhẹ abhi vha li nu mhẹ a le emenale ena ọ laa rhẹ mhẹ dẹẹ.'' ¹⁹Egbe e pfọ wẹwẹ kwua, iyọ ukwhumhọgwho, gwho, gwho, ọ kee mhilali, Mhẹmhẹ lọọ?''²⁰IJesu ọ sọ wẹ vhọ ọọ li,'' Ukwhumhọgwho elemhi eni ogbe ali ava lọ, ọni ọ nu mhẹ rhi ukphakpha a sọmhi atasa ogwho. ²¹Rharhi khi Omyi Ọmọsẹ ọ la rhọ khẹ odẹ ni Ibabo o ngme obodẹ ọli. Ama epfua khi uwi ọni ọgbọ ni a te ikpa ọli rhi Omyi Ọmọse dẹẹ! A vha vyia li lọ li o kha somhi nẹẹ,''²²E ke lee emenale, IJesu ọ rhue ukphakpha, ọ zẹ ọte shi vhọ, ọ gbọkhyia. Ọ rhue na wẹ ọọ wẹ, "Mọ ona, Ijegbe mhẹ khi ona.'' ²³Ọ rhue ukolo, ọ kphẹmhi shi ọ, ọ rhue na wẹ, wẹwẹ kwu e gaa te vhọ da. ²⁴Ọọ wẹ, Ona khi olia mhẹ ni o kyili uwi alamanegbe, ọlia ni a kwu lase ni agbọ nebu. ²⁵Egbegbingme mhi gwu khasẹ vhẹ, imha gwe laa da oni onyọ ona sẹkẹnẹ oni ogbẹlẹ na mhi ke gwe laa da ọli oni ogbọ vhi aleghyie Ishinẹgba.''²⁶Abhi e ke rhọ to uwolo pfuse, e ke vu je okpha Olivi. ²⁷Ijesu ọọ wẹ, ''Vhevhe kwu vha laa na kwa rharhi mhẹmhẹ, Rharhi khi a kẹkẹ ọ shi ekẹ, "Mhi la rhi ẹtsẹkẹ li ọni ọrisumhale iyọ eni isumha e vẹ kwa."²⁸Ama mhi kha vue, mhi la kpalo vhi igalili khẹ vhẹ. ²⁹Ipitẹ ọọ li, ''Agbọ kwu e kha rhẹ dena kwa, mhẹmhi imha vu.''³⁰Ijesu ọọ li, ingmaghyie lẹ mhi ngme khasẹ vhẹ, amyiọsẹ neni okpa ogbhiẹghẹ ite eva, u laa khyie mhẹ ite esẹ." ³¹Ama Ipitẹ ọọ li, "O kha rhẹ kyili egwhi mhi laa gwhu rhọ khali ẹ, imhaa khyie ẹ.'' Iyọ wẹwẹ kwu e gaa li shi oni obọ.³²E ke bhẹ vhi asha ni aa lu Igetisẹmani, IJesu ọọ li idibo ọli, ''Vha shitọ ana khi mhi laa pfi olema." ³³Ọ rhue Ipitẹ, IJemhisi, ali IJọni ma egbe, ni ọ rhọ gbasẹ ẹchọ ọ la ududumhi ọkhekhegbea. ³⁴Ọọ wẹ, "Avhagwhu mhẹ o la ududumhi osue, nabhi ọa pfi egwhi, vha la ana khi vha rhi ẹloe kpẹ.''³⁵IJesu ọ chi je odalo ukwukwu ọ, ọ de je ekẹ, ọọ pfi olema, o kha lẹẹ gba lọ, khi oni ẹrhẹghẹ ona o kha dọsẹ mhẹ a lẹ. ³⁶Ọọ li, Ita, a vha mẹ emeni u waa dobẹ a khyiẹlẹ. Rhue mhẹ oni akpa ona odẹ le. Ama a khi abhi o gwhẹ mhẹ, abhi o ghọli ẹ lọ.''³⁷Ọọ liegbe bhẹ ọ bhale a vhẹ khi ovhesẹ o nwuno wẹ, ọ ke ẹẹ li Ipitẹ, ''Isamọni, ovhesẹ li o nwu ẹ ena? U waa gaa li dobẹ kwu ovhesẹa ukwukwu ẹrhẹghẹ? ³⁸Kwu ovhesẹa khi u pfi olema khi u ke de lo ọnwufẹẹ. O gaa ghọli oni ayẹmhẹ, ama oni ijegbe o lọsẹ ọli.'' ³⁹Ọ gwe vue vu ọa pfi olema, ọ gwe ngme ingme ni ọ kpọ ngme.⁴⁰Ọ gwe liegbe bhẹ ọ bhale a vhẹ khi ovhesẹ o gwe nwuno wẹ, rharhi khi ikpalo wẹ e shee khọsẹ wẹ e vha gwe yẹsẹ emeni ee ngme. ⁴¹gwe bhẹ utozi esẹ ọọ wẹ, ''Rhemhi vha khyie lia vhesẹshi vhaa vhiẹmhiaa? Osomhi! Oni ẹrhẹghẹ o she bhẹ. Binoo! A she rhi Omyi Ọmọse ni elingmobe dẹẹ. ⁴²Vu ekẹ le, khi eyẹ vu. Ghee, ọni ọ rhẹ mhẹ dẹẹ ọ she chi mama ana.⁴³Obobobọ, abhi ọ khyie li ngme eyọ, Ijudas, ukwhumhọgwho elemhi eni ogbe ali eva, ọ she bhẹ, ali iọgbọ nebu ni e te obọ eni e kpeda ali eni ikọwe ali eni e womhẹ bhẹ, e chino ifẹdo ali ikpokpo rhọ khali ọ. ⁴⁴Nena ọni ọ rhọ li dẹẹ ọ she rhi ishẹfẹ na wẹ, ọọ wẹ, Ọna mhi sheda laa pfipfi unu, lẹ lọ. Vha nwu ọ vha rhi ẹloe kpẹ ọ vhi egbe nwu vu.'' ⁴⁵Abhi Ijudasi ọ ke rhọ bhẹ ayayayọ ọ le bhẹ bhui Ijesu le kpholo, ọọ li, ''Ọwẹnagbọ!'' ọ pfipfi ọli unu. ⁴⁶li e rhọ kwu abọ nwu ọli, e nwu ọ.⁴⁷Ama, ukwhumhọgwho elemhi wẹ ni ọ mugha egbọayọ ọ ji ọfẹdo ọ bẹ ọgamhẹ ọni ọ kpeda ugamhi esọa. ⁴⁸Ijesu ọọ wẹ, ''Rhemhi vha bhẹ bhui mhe le abhi agyiagwuda, vha chino ifẹdo ali ikpọkpo rhọ laa nwu mhẹ ?" ⁴⁹Abhi mhi rhọ nu vhe la ẹrhẹghẹ kwu, na mhi rhọ ẹẹ wẹna vhẹ vhi owuka, vhavha ke nwu mhẹ. Ama rhemhi a li na mẹ ọ khi akẹkẹshekẹ o kẹ tsẹ. ⁵⁰Eni e gaa nu Ijesu la eyọ kwu e vẹ kwa.⁵¹ọnọghọdọ ọgwho ni ọ sọ ode na vhiẹnẹ vhiẹnẹ; ọọ rhẹẹ khali ọ. e nwu ọ ama ⁵²ọ dobẹ oni ode na vhiẹnẹ,vhiẹnẹ na wẹ ọ rhi irhumheba na pfia.⁵³E nwu Ijesu bhuli ọni ọ kpeda ugamhi. Eni e kpeda ugamhi kwu ali eni ikọwe ali eni e womhẹ ee le legba gasẹ ọ. ⁵⁴Oni ẹrhẹghẹ ona Ipitẹ ọ rhi ẹfefe shi ekẹ rhẹẹ khali ọ, gaa apfishi atukpapfẹ ọni ọ kpeda ugamhi. Ọ nu eni e khẹ odẹ shitọ asha ni e lẹẹ khase erhẹ.⁵⁶Nenaa Eni e kpeda ugamhi ali oni agbaa kwu ee lẹẹ nono ọtsẹ ni a rhọ nwu ọ khi wẹwẹ e kẹ mẹ abhi wẹwẹ e li gbe ọlia. Ama khi e vha mẹ. ⁵⁵Agbọ ebubu e pfi ọtsẹ ighagha nebu nwu ọ ama e vha de unu ọgwho.⁵⁷Egwho e chi eke vue ni e rhẹẹ myiono otsẹẹ ighagha gbe ọ; eẹ li, ⁵⁸"E eyẹ suọ ni ọ rhẹẹ ngme, "Mhi laa gwọghọ oni owuka ona ni a rhi abọ ma, ogbẹlẹ ozi eṣẹ mhi rhi abọ ma ovhese." ⁵⁹Ni e rhẹrhẹ myie eni ọtsẹ ena e vha khyie de unu ọgwho.⁶⁰Ọni ọ kpeda ugamhi ọ ke te ifuabọ wẹ vue ni ọ rhọ mhila IJesu, ''U waa mhuẹ emeni u waa sọ? Uu li suọ ọtsẹ ni eni iọgbọ ena e myie gbe ẹ ena?'' ⁶¹Ama rhẹmhi ọ lee pfi wẹ esọa. Ọni ọ kpeda ugamhi ọ gwe mhilali ogbọ ọọ li, Ghyiẹ khi ọni Ikiriṣti, Omyi ọni a zọte naa?'' ⁶²IJesu ọọ li, '' Mhẹmhẹ lọọ. U la laa mẹ Omyi Ọmọse ni ọ shitọ obọ obita izemhi ni ọ rhọ te atutu nẹẹ eda bhẹẹ''⁶³Ọni ọ kpeda ugamhi ọ kyiọlọ awulua shi egbe ọli vhi urhui, ọọ li, ''E eyẹ khyie lia nono etsẹẹ nenaa? ⁶⁴Vha she suọ unu ni ọ pfia. Elọ vha ke khọkhọ shiọ?'' Wẹwẹ kwu ee gaa luese ọ abhi ọni a kha gbea. ⁶⁵Egwho e tono etẹ kwu ọ e gwese ọli alo e ke rhi ẹtsẹkẹ ẹẹ li ọ eẹ li, ''Bọbọbọ ọgwho ọa li ẹ yọ? Eni e ichoja e rhue ọli a gbee.⁶⁶Abhi Ipitẹ o li la atukpapfẹ eyọ, ọgamhẹ ọmọmoshi ọni ọ kpeda ọgwho ọ bhẹ bhuli ọli le. ⁶⁷Ọ mẹ Ipitẹ khi ọ mugha ẹẹ khasẹ erhẹ, ọ bino ọli lolo. ọọ li, ''Uu li nu Ijesu Inazarẹti kyia.'' ⁶⁸Ama ọ cha, ọọ li, ''Imha yẹsẹ wẹ khi rhẹmhi suọ vyie emeni u waa ngme pẹẹ.'' Li ọ rhọ vu ayọ le ni ọ rhọ lo elase.⁶⁹Ama ọni ọgamhẹ ọnọmoshi ọ mẹ ọli ọ gwe ẹẹ li eni e mugha ayọ. ''Ọnọmọse ọna ọ li la eni e rha khali ọ!'' ⁷⁰Ọ gwe cha. Oke li kekeke eni e mugha ayọ ee li eẹ li Ipitẹ, "Ingmaghyie uu laa, rharhi khi ọnyi igalilii li u kyia"⁷¹ogwhumhi li ọ kee rhẹ sọ wẹ vhọ, ''Imha mẹ yẹsẹ ọni ọmọṣe ọna wẹ khi rhẹmhi yẹsẹ emeni vhaa ngme.'' ⁷²Ayọ ọkpa ọ gbhiẹghe utozi eva. Ipitẹ ọ chigbe sato ingme ni Ijesu ọ ke ngme khasẹ ọli; ''Neni ọkpa ọ gbhiẹghe ite eva, u la khyie mhẹ ite esẹ.''Li Ipitẹ ọ rhọ gbe akhe ivyiẹa ni ọ rhẹ vyiẹ.

¹Utsutsu ogbeẹ tsunẹ eni e kpeda ugamhi ali eni e womhẹ ali eni ikọwe ali eni Isaẹdiri ni ee mhasẹ. E fali Ijesu e rhue ọli vu. E ke rhi ọli ghyi Ipaleti. ²Ipaleti ọ mhilali, "Ghyiẹ khi oghyie eni IJusi"? Ọ sọ vhọ ''Ghyiẹ li u ngme yọ eyọ." ³Eni e kpeda ugamhi e rhi ishi nebu nwuno Ijesu.⁴Ipaleti ọ gwe mhilali '' Uu waa sọ vhọ? U waa mẹ ishi nebububu ni e rha nwu ẹ nena? ⁵Ama Ijesu ọ vha degbe sọ Ipaleti vhọ, ona o gaa khekhe ọli egbea.⁶Nena ẹrhẹghẹ uliemhi rhẹmhi Ipaleti ọ kpọ a rhue ogwhumha ọgwho abọa, ogwhumha ni e lama khi a rhue obọa na wẹwẹ. ⁷Eni igwhumha ni ee vha ẹẹ suọ esọ, elemhi eni e gbe ugbee ni e la vhọ, ọmọse ọgwho ọ la ni ẹẹ lu Ibarabasi. ⁸Eni iọgbo e bhui Ipaleti le eẹ li khi ọ khyiẹ na wẹwẹ abhi ọ kpọ li khyiẹ na wẹwẹ ẹrhẹghẹ ni o dọsẹ.⁹Ipaleti ọ sọ wẹ vhọ ọọ wẹ, ''Vhaa nono khi mhi rhue oghyie Ijusi abọa na vhẹ?" ¹⁰Rharhi khi ọ yẹsẹ khi ibishelemhi li eni e kpeda ugamhi e rhọ kpọ nwu Ijesu ghyi ọli. ¹¹Eni e kpeda ugamhi e nwuasẹ oni agbaa khi e li ẹẹ li khi ọ wolọ Ibarabasi abọa na wẹwẹ.¹²Ipaleti ọ gwe sọ wẹ vho ọọ li, ''See mhi ke a li oni oghyie IJusi?" ¹³E gwe sọọse, "Tanọ ọli manọ!''¹⁴Ipaleti ọọ wẹ, "Mhi gyhi onobe ni ọ mẹẹ khyiẹ?'' E gwe sọọse shi ọ.'' Tanọ ọli manọ" ¹⁵Iyọ Ipaleti ọ lẹẹ nono khi lẹ rhi egbe nwu oni agbaa, li ọ rhọ wolọ Ibarabasi abọa na wẹ. Ọ rhi itele gbe Ijesu ọ chigbe rhi ọli na wẹ khi e rhọ tanọ manọ.¹⁶Eni ichoja e rhue ọli lo elemhi oni atukpapfe ( ogba ichoja), e nyalu eni igbhogbho eni ichoja kwu. ¹⁷E rhi awulu atuekẹ ni o gbe ekheliẹ sọ Ijesu, e vhali arhu igba e rhọ gwese ọ vhi ukhomhi. ¹⁸E kee tsẹ ọli, "Moo, oghyie Ijusi!"¹⁹E rhi ebui gbanọ ọli ukhomhi e tono etẹ ẹẹ rhugwhu ọ. E deigwha ẹẹ nali. ²⁰Abhi e ke rhọ rhi ọli li egyia pfuse, awulu ekheliẹ ni e kpọ rhọ sọ, li e gweghyie ọli e rhi uwi ọlia sọ ọli, e rhue ọ vu lẹẹ tanọ manọ. ²¹Ọni ọ te asha lẹẹ je e rhi akanya na, ọmọse ọgwho ni aa lu Isamọni ọnyi Isirini (ita Alẹzẹda ali Irufusi); e rhi izemhi nwu ọ khi ọ tsua oni ọgbagala Ijesu.²²Eni ichoja e ke rhue Ijesu bhẹ vhi asha ni aa lu Igogota ( abhi o ngme lẹ khi Asha ni ikhomhi ilimhi ea la). ²³E rhi onyọ nali ni aa rhi ugala ma, ama ọ vha da ọli. ²⁴E ke tanọ manọ e kemhi iwulu ọli e pfi etsẹ shi vhọ khi wẹwẹ e yẹsẹ abhi oo rhamhi achoja ọgwhọ, gwhọ, gwho.²⁵O she ke rhamhi ẹrheghẹ ọkwulọkwu ozi itili abhi e rhọ tanọ manọ. ²⁶E rhọ shi ọli ẹfẹ e ẹkẹkẹ ushi ni o nwu ọ, "OGHYIE ENI IJUSI" ²⁷E tanọ ighyiatọ ava ma Ijesu egbe, ọgwho ọ la vhi obita, ọgwho ọ la vhi ọgobọ. ²⁸Abhi ebe ni o pfuasẹ o ngme li o tsẹ, A lolo ọli gboghyiẹ eni e gbushia.²⁹Eni e dọsẹ lẹẹ lẹ ee ka ọli, e jigyhi ukhomhia eẹ li, ''Aha! '' Ghyiẹ ni u waa ẹẹ khi u la gwọghọ owuka u gwe ma ọli elemhi elẹ esẹẹ. ³⁰Tsumhi egbe ẹ khi u te oni ọgbagala ona kpiale shiọ!''³¹eni e kpeda e gwe li rhi ọli nu egbe wẹ li egyia, ali eni ikọwe, ee li ẹẹ li, ọọ lẹẹ tsumhi iọgbọ evhese, ọ kha dobẹ abhi ọ li tsumhi egbe ọ. ³²Ọni Ikiristi, oghyie Izulẹ, te oni ọgbagala kpiale shiọ, khi eyẹ kẹ lama shi ẹ vhọ.'' li ishi eni a tanọ manọ gboghyiẹ ọli e li zẹ onobe ọli.³³Ẹrhẹghẹ ọkwulọkwu igbe ali eva ẹlogota, ubili o bi ukhomhi oni aloekẹ oyọ kwu rhili apfishi erhẹghẹ ọkwulọkwu esẹ ẹlogbode. ³⁴Oni ẹrhẹghẹ ọkwulọkwu esẹ ẹlogbode Ijesu ọọ rhi urhui ni o ze sọọse, ("Eloi, Eloi lama sabaachtha ni?") abhi o ngme khi, ''Ishinẹgba mhe, Ishinẹgba mhe, see u ke li khyie mhẹ?" ³⁵Egwho ni e mugha ayọ e ke suọ, eẹ li, ''Vhavha suọ, o she a nyalu Ẹlaja.'³⁶Ọgwho ọ na, ọa pfuẹ isoso kwu onyọ, e sọ unu ugwhagha vhọ, shi ọ vhi unu khi ọ da ọli. ọni ọmọse ọọ li, ''Eyẹ kee bino ọ ni Ẹlaja abhi ọ li laa rhue ọli kpiale." ³⁷Ijesu ọ gwe rhi urhui ni o ze sọọse ọ chigbe gwhu. ³⁸Ode ni a rhọ ta vhi ukhomhi owuka o gbe khyiẹ eva rhọ te ukhomhi ọ apfishi uji ọ.³⁹Abhi ọni ọ kpeda ni eni ichoja ni ọ mugha ẹ bino IJesu ọ ke mẹ odẹ ni Ijesu ọ te gwhu, ọọ li, ''Imgmaghyie ọni ọmọse ọna Omyi Ishinega li ọ kyia.'' ⁴⁰Ikpostso egwho e tanọnyanọ ẹẹ bino ọ. Wẹwẹ khi Imeli Imadalini, ali Imeli (inyọ Ijemhisi ni ọ keke ali Ijosẹs) Ali Isalomẹ. ⁴¹Abhi ọ rhọ la elemhi Igalili e rhọ ẹẹ khali ọ, ee kpaghyiẹ ọli obọ. ikpotso evhese nebu e li rhọ khali ọ je Ijerusalemu.⁴²Abhi ogbode o ke rhọ le rharhi khi o kyili ogbẹlẹ inwegbe khe, ogbele ivhẹmhia. ⁴³Ijosefu ọnyi Arimatia ọ bhẹ vhi ayọ, ọ kyili oni a rhi ekpẹ na elemhi ikatsu, ni ọ mugha ẹẹ khẹ Aleghyie Ishinẹgba. Ọ mhọli udu lo bhuli Ipaleti khi ọ rhi olimhi ọli na lẹ a tọ. ⁴⁴Oo nya Ipaleti aloa. Ni ọ rhọ suọ khi Ijesu ọ she gwhu, ọọ ke nyalu ọni ọ kpeda ni ichoja ni ọ rhọ mhila ọli ingmaghyie ni Ijesu o she gwhu.⁴⁵Abhi ọ ke rhọ te unu ọni ọ kpeda ni ichoja suọ khi ọ she gwhu, ọọ li a tsua oni olimhi Ijesu ni Ijosẹfu. ⁴⁶Ijosẹfu ọ she dẹẹ ode ni o li vhiẹnẹ vhiẹnẹ. ọ te ukhomhi ọgbagala tsua ọli kpiale, ọ rhi oni ode na vhiẹnẹ vhiẹnẹ kwhuli ọli, ọ tsua pfilo uji ni a tọ shi elemhi ẹchẹ. Ọ gheghe ẹchẹ gwese unu oni uji ⁴⁷Imeli Imadalini ali Imeli ni inyọ Ijosẹsi e mẹ asha ni a rhi IJesu tọ.

¹Abhi ogbẹlẹ Ivhiẹmhia o ke rhọ dọsẹ, Imeli Imadalini ali Imeli ni inyọ Ijemhisi ali Isalomẹ, ee dẹẹ itulale khi e rhaa tono ọ vhi egbe abhi a li olimhi. ²Utsutsu ogbeẹ see, ogbẹlẹ ikyiatsolo vhi elemhi uka, e je oni uji abhi ọwẹ o ke rhọ lasele.³Ee li ẹẹ li egbe wẹẹ, "Ọgwho ọ laa gheghele oni echẹ ni o la unuodẹ oni ujia ni eyẹ?" ⁴E kee bino, e mẹ khi a she gheghele oni eche vhi odẹa, ni o kyia khi o maa gba.⁵E ke lo oni uji e bhale a vhẹ ọnọghọdọ ni ọ rhi itsua opfopfo kwhẹ, ọ shitọ opfọni obita. o nya wẹ aloa. ⁶Ọọ wẹ, "Imhẹ vha nu ulishi. Ijesu ọnyi Inazarẹti ni a tano manọ vhaa nono. Ọ she te egwhi vue! ọ vha la ana. Bino asha ni a rhọ tọ. ⁷Ama vha kee lẹẹ, vha kaa gwu khasẹ idibo ọli ali Ipitẹ khi ọ she kpalo na vhẹ a je Igalili. Ayọ vha bhẹ laa vhẹ ọ abhi ọ ke kpọ le gwu na vhẹ eyọ."⁸E te oni uji na lase; egbe e kphele wẹ o nya wẹ aloa. E vha mhuẹ emeni e gwu khasẹ ọgbọ pẹẹ rharhi khi ulishi oo nwu wẹ.⁹Utsutsu ogbeẹ ogbẹlẹ ikyiatsolo vhi elemhi uka, abhi ọ ke rhọ te egwhi vue, ọ kyiatsolo rhi egbe ọ khasẹ Imeli Imagdalini, ni ọ ke te egbe ọli kwhu iyẹmhẹ ebe oshila kwa. ¹⁰Ọ vu ni ọ rhaa ngme khasẹ eni e nu ọli la, ni e khyiele la ọrhọ ni ee vyiẹ. ¹¹E suọ khi ọ la agbọ khi ọ she rhi egbe ọ khasẹ ọli, ama e vha lama shi ọ.¹²Abhi a ke rhọ mẹ ena nee, ọ gwe rhọ te odẹ ovhese rhi egbe ọli khasẹ iọgbọ evhesẹ, abhi e li lẹẹ asha. ¹³E ke vu a ngme khase idibo ọli ni e kpọẹ ama e vha lama shi ọ.¹⁴Ijesu ọ ke degbe rhi egbe ọli khasẹ eni ogbe ali ọgwho abhi e li rhi egbe gbhegbhe itebu, ọ kphẹta wẹ shi umha mhuẹ irhọshiọ ali udu ni o whomhẹ ni e zẹ, rharhi khi e vha lama shi ingmemhi itiegwhivule ni e gwu khasẹ wẹ. ¹⁵Ọọ wẹ, ''Vha lo ekẹ agbọ kwu khi vha ngme ingmemhi Ishinẹgba khasẹ eni Ishinẹgba ọ ma kwu. ¹⁶Ọni ọ myie vhẹ suọ ni a baptazi ọ laa kyili ọni a myie pfuese, ama ọni ọ vha ke myie vhẹ suọ ọ la kyili ọni a pfusea.¹⁷Ena khi ishẹfẹ ni e la rhọ khẹ eni e myie suọ. Elemhi eva mhẹ vha laa kwhu iọgbọ iyẹmhẹ ebe egbe kwa. E la laa ke ngme ẹvholi ọda. ¹⁸E la laa rhi abọ nwuno enyẹ e kha rhẹ da emeni ea gbe ọgbọ o vha laa mhue emeni o li wẹ. E la laa rhi abọ nya eni ea gwhua vhi egbe iyọ e laa ze."¹⁹Abhi Ọnọmholi ọ ke rhọ nu wẹ ngme pfuse, a rhuẹ ọli she je elemhi aleghyie ni ọ rha shitọ obọ obita Ishinẹgba. ²⁰Eni idibo ọli e vu ea rhi eni ingme tsabọ ashakhasha kwu, iyọ Ọnọmhọli ọ nu wẹ la ọọ gbe ikanya rhẹ khẹ wẹ ọ nwu ma wẹ vhọ te ikpa ishẹfẹ ali inyaloa ni e rhẹ khẹ wẹ.

¹iọgbọ e she nyakwa khi e rhọ kẹkẹ eni ẹtsẹkẹ ni e she tsẹ shi eyẹ vhi abọ nee shi ekẹ, ²Abhi e lee li rhẹ wẹ ni eyẹ eyọ, ni e te ituekẹle rhi ẹloe wẹ mẹ e gwe kyili egamhẹ oni usomhi. ³Uwi obọ mhẹ abagwhoyọ, te ituekẹle mhi te li kwuegbea gwuanọ emeni e zẹ ena kwu, oo ti mhẹ ẹloe khi mhi kẹkẹ wẹ shi ekẹ abhi e li laa, ghyiẹ ọgbọ aghyie Itiofilosi. ⁴Rhẹmhi liyọ khyiẹlẹ ọ khi vha kẹ yẹsẹ oni ingmaghyie obodẹ emeni a gaa wẹna vhẹ kwu.⁵Erhẹghẹ Ẹrọdu, oghyie Ijudea, aa mhọli ọni ọmọse ọgwho ni ẹẹ lu Izakaraya, ọnyi ẹdẹ Abijani. Ugwhẹ ọli ọ kyili omyi Erọni, eva ọli khi Elizabẹti. ⁶Ee gaa nyele inyele ipfuasẹ rhọ khali Ishinẹgba; ee gwaba ẹẹ gbe e rhi ishi Ọnọmhọli gwhẹ. ⁷Ama e vha vyia ọmọ, rharhi aga li Elizabẹti ọ kyia, oni ẹrhẹghẹ oyọ e she kyili ikyiọjọ.⁸Izakaraya ọ la odalo Ishinẹgba gbega nali, ọọ gbe ukanya ọni ọ kpeda ugamhi abhi a li kemhi wẹ shiọ. ⁹Abhi aa li zẹ Eni e kpeda ugamhi khi e ke li gbe oni ikanya, a liyọ rhi ideshie zẹ ọli khi ọ kee laa owuka Ọnọmhọli tosẹ itulale. ¹⁰Eni iọgbọ ni e kpọẹ ni e ke legba ẹẹ pfi olema vhi elase ẹrhẹghẹ ni ọ rhẹẹ tosẹ itulale vhi elemhi owuka.¹¹Aghyiukọ ọọ ke bhale a nu Izakaraya tomugha opfọni obita oni Ọta ni a lẹẹ tosẹ itulale. ¹²Egbe e vha gwe sheshi Izakaraya ni ọ rhọ mẹ ọli, egbegbe ulishi o bhale ọ vhi egbe. ¹³Ama ọni aghyiukọ ọo li, "Izakaraya imhẹ gwe nu ulishi, rharhi khi a she suọ olema ẹ. Ugwhẹ ni Elizabeti ọ laa vyia ọmọ ọmọse. u laa lu ọli Ijoni.¹⁴U la laa mhọli oghẹlẹ ali egbenwumhẹ, abagwhoyọ iọgbọ ebubu ee laa ghẹlẹ shi ivyiamhi ọli. ¹⁵Rharhi khi ọọ laa kyili ọnọfu vhi ukpẹloe Ọnọmhọli. Ọ vha laa da ọnyọ ni ọa nwu ọgbọ wẹ khi oni o ze, Ayẹmhẹ ni o Pfuasẹ ọ laa te elemhi igwhu inyọ ọli vọsẹ ọli lasele.¹⁶Iọgbọ ebubu Izulẹ e laa liegbe bhuli Ọnọmhọli ni Ishinẹgba wẹ. ¹⁷Ọ la laa rhi ayẹmhẹ ali izemhi Ẹlaja rhọ kee rhẹ khali Ishinẹgba. Ọ laa khyiẹlẹ ona khi lẹ rhọ nwu ikpakomhi eni ita bhuli eni ivhiẹ, ishọyọ khi eni ea suọ esọ khi e rhọ rhọ te ẹgbhẹli eni e pfuasẹ kee kyia. Rhẹmhi ọ laa khyiẹlẹ ona khi lẹ rhọ nwuno iọgbọ egbe shi ni Ọnọmhọli ni a she kpọ nwuno egbe shi nali."¹⁸Izẹkaraya ọọ ke mhila ọni aghyiukọ, "See mhi li laa yẹsẹ ona? Rharhi khi mhi she kyili ọjọ, ugwhẹ mhẹ ọ she gwe li kyili ọjọ abagwhoyọ." ¹⁹Ọni aghyiukọ ọọ ke sọ vhọ ọọ li, "Mhẹmhẹ khi Igebulẹ, ni ọ mugha odalo Ishinẹgba. Rhẹmhi a ghyie mhẹ khi mhi kaa nu ẹẹ ngme, khi mhi tsua oni usomhi aghyie ona bhuli vhẹ. ²⁰Ghe, ghe, udungme li u ke a kyila rhili a pfishi egbẹlẹ ni a rhọ laa mẹ eni ingme ena kwu, rharhi khi u waa lama shi ingmemhi mhẹ, ni o kyila khi o la laa tsẹ shi ẹrhẹgbẹ aghyie."²¹ẹrhẹghẹ ona, eni iọgbọ ni e legba ee mugha ẹẹ khẹ Izẹkaraya. Oo nwu wẹ ẹloe emeni e zẹ khi ọ liyọ ke tẹsẹ vhi elemhi oni owuka. ²²Abhi ọ ke rhọ lasele, ọ vha gwe dobẹ ẹẹ ngme wẹ khi rhẹmhi ọ gwe dobẹ sọ wẹ vhọ. Oo ke ga wẹ vhi ẹloe khi irhẹmhi ọ mẹ idowẹmẹ ni ọ rhọ liyọ tẹsẹ vhi elemhi oni owuka. Obọ li ọ kee rhọ nu wẹẹ ngme, ọ ke kyili udungme. ²³Abhi ẹrhẹghẹ ukanya li ọ ke rhọ pfoo, ọọ liegbe je apfẹ ọli.²⁴Abhi eni egbẹlẹ ena e ke rhọ dọsẹ a lẹ, Elizabẹti ni ugwhẹ ọli ọọ lẹẹ mẹ. Ọ rhi egbe ọli gbhagbha elemhi ikyi ishiẹ. Ọọ li, ²⁵"Emeni Ọnọmholi ọ khyiẹlẹ na mhẹ khi ona ni ọ rhọ bino mhẹ rhi ẹwela na khi lẹ kẹ rhue mhẹ omama egbea vhi ukpẹloli iọgbọ."²⁶Nenaa, abhi imẹmhi Elizabẹti ọ ke rhọ rhamhi ikyi esesa, Ishinẹgba ọọ ghyie ọni aghyiukọ Igebulẹ je ẹvholi ni a lu Igalili ni ẹẹ lu Inazarẹti, ²⁷bhuli ọni ọmọmoshi ni ọ vha yẹsẹ ọmọse nee, ni ọmọse ni aa lu Ijosefu ọ zẹ shi ekẹ khi lẹ lẹẹ kwhẹsẹ. Ushishi Idevidi li ọni ọmọse ọ kyia, eva ọni ọmoshi ni ọ vha yẹsẹ ọmọse nee khi Imeli. ²⁸Ọni aghyiukọ ọ bhẹ bhuli ọli le, ọọ li, "Mhi tsẹ ẹ, ghyiẹ ni u nwumaa mhuẹ ẹwela! Ọnọmhọli ọ nu ẹ la!" ²⁹Ama eni ingme e sha ọli abọ uvhali otsẹ ni ogwho ona o kyia shiọ.³⁰Ọni aghyiukọ ọọ li, "Imhẹ gwe nu ulishi, Meli, rharhi khi u she mhọli ẹwela vhi obọ Ishinẹgba. ³¹Ghee, u la laa mẹ u vyia ọmọ ọmọse, u la laa lu eva ọli 'Ijesu.' ³²Ọnọfu li ọ laa kyila aa gwe laa lu ọli Omyi ọni ọ yagha nẹẹ. Ọnọmhọli ni Ishinẹgba ọ laa rhi eghyiele ita ọli ni Idevidi nali. ³³Ọọ laa kee mhasẹ ni apfẹ Ijekọpu ẹlẹnagbọagbọ, Eghyiele ọli o vha laa mhọli ukpẹsẹ."³⁴Imeli ọọ ke ẹẹ li ọni aghyiukọ, "See a li laa mẹ ena, abhi imha khyie li yẹsẹ ọmọsẹ nee ena?'' ³⁵Ọni aghyiukọ ọọ ke sọ ọli vho, ọọ li, "Ayẹmhẹ ni o Pfuasẹ o laa bhale bhuli ẹẹ le, izemhi ọni ọ yagha nẹẹ ni Ishinẹgba o laa gwese ẹ. Ishọyọ ọni ọ pfuasẹ ni u laa vyia aa la ke lu ọli Omyi Ishinẹgba.³⁶Gwe ghee, Elizabẹti ni vha kyili apfẹ ogwho ọ she li a mẹ ọmọ ọmosẹ nenaa vhi ẹrhẹghẹ ikyiojọ, ikyi esesa li o lu ọ vhi egbe nee, ọni a kpọ ẹẹ lu aga. ³⁷Rharhi khi a vha mẹ emeni o vhaa pfo Ishinẹgba a khyieli." ³⁸Imeli ọọ li, "U waa mẹ khi ọgamhẹ ọkpotso mhi kyia. O kaa kyia yọ abhi u li ngme ọli." Iyọ, ọni aghyiukọ ọ ke pfi ọli shi ayọ vu.³⁹Oni ẹrhẹghẹ oyọ Imeli ọọ nyanya chi ekẹ vule ọọ je ẹvholi ni o la abọ esọ ọkpha, ni o la aloekẹ Ijudea. ⁴⁰Ọ je elemhi apfẹ Izẹkaraya a tsẹ Ẹlizabẹti. ⁴¹Abhi Elizabẹti ọ ke rhọ sokwu otsẹ Imeli, ọmọ ni ọ la vhi asọmọ ọ nwu egbe lieliẹ, Ayẹmhẹ ni o Pfuasẹ ọ bhẹ bhuli Ẹlizabẹti le.⁴²ọ nya unua ọ sọse oghẹle, ọọ li, "Ọni a zẹ ọte na vhi elemhi eni ikpotso li u kyia, ali ọmọ ni ọ la ẹẹ vhi asọmọ. ⁴³Oni ọgwho ona o kyia na mhẹ ena ni inyọ Ọnọmhuẹmhẹ ọ rhọ nono mẹ bhẹ vhi apfẹ ena? ⁴⁴U waa mẹ, abhi mhi rhọ lee sokwu otsẹ ẹ vhi esọ mhẹ, rhẹmhi ọmọ ni ọ la mhẹ asọmọ ọ nwu egbe lieliẹ shi oghẹlẹ. ⁴⁵Ivọsẹna khi uwi ọni ọkpotso ni ọ myie lama khi ingme ni Ọnọmhọli ọ ngme khasẹ ọli khi e la laa tsẹ."⁴⁶Imeli ọọ li, "Avhagwu mhẹ chichi Ọnọmhọli. ⁴⁷Oghẹlẹ o vọsẹ ayẹmhẹ mhẹ vhi obodẹ Ishinẹgba ọni otsumhi mhẹ.⁴⁸Rharhi khi ọ she bino abhi o li mhẹ vhi egbe mhẹmhẹ ọgamhẹ ọkpotso. Vhaa mẹ, te nena vu ozele kwu e laa kee lu mhẹ ọni a zẹ ọte na. ⁴⁹Rharhi khi ọni ọtọgbe ọ she khyieli emeni e gba na mhe, eva ọli gwe khi ọni ọ pfuasẹ.⁵⁰Ivhẹlemhi ọli rhẹmhi ọa tẹsẹ rhọ te ozele apfishi ozele ni eni e rhi ojima nali. ⁵¹Ọ she rhi abọ ọli rhi izemhi ọli khasẹ; ọ she vẹsẹ eni rhi isamhi idu wẹ chichiegbe kwa.⁵²Ọ she kpọlọ imyi eghyie vhi eghyiele wẹ kpiale. ọ nwuno eni agbọ o gbe vule. ⁵³Ọ she rhi ẹtsẹkẹ aghyie ni eni okyiamhi ọa gbe le, ama ọ dobẹ eni ọsuemhẹ rhi elemhi apfuẹ vu.⁵⁴Ọ she kpaghyiẹ Izulẹ obọ ọgamhẹ ọ, ishọyọ khi ọ rhọ sato rhi ivhẹlemhi ọ khasẹ wẹ. ⁵⁵Abhi ọ ngme ita eyẹ Ebulahamu ali ushishi ọli ẹlẹnagbọagbọ.''⁵⁶Imeli ọọ nu Elizabẹti la elemhi ikyi esẹ, neni ọ ke liegbe je apfẹ ọli. ⁵⁷Nenaa, abhi ivyiamhi o ke rhọ rhamhi Elizabẹti ọọ ke vyia ọmọ ọmọse. ⁵⁸Aganyelẹ ali inyọgwho ọli ee suọ khi Ọnọmhọli ọ she khyi ivhẹlẹmhi nya vhi ivhẹlemhi, e bhale a nu ọli ghẹlẹ.⁵⁹Iyọ, ogbẹlẹ ozelele e bhale a fẹli ọni ọmọ. E ke lẹẹ lu ọni ọmọ ''Izẹkaraya,'' ni o kyili eva ita ọli. ⁶⁰Ama inyọ ọli ọọ ke sọ vhọ ọọ li, "Obho, Ijoni la laa kee lu ọ." ⁶¹Ee ke eẹ li, "A vha mẹ ọgbọ elemhi ẹdẹ vhẹ ni ọ kpọ le oni eva ona."⁶²Ee ke rhi abọ nu ita li ngme abhi a kha lu ọ. ⁶³Ọni ita ọli ọọ li khi a rhi emeni a kẹkẹ a shi na lẹ, li ọ rhọ kẹkẹ, khi "Eva li khi Ijoni." Oni ingme oo nya wẹwẹ kwu aloa.⁶⁴Obobobọ, unu ọli o gweghyiea, olẹmhi ọli o taghyiea. ọọ ngme ọ chichi Ishinẹgba. ⁶⁵Ulishi o lo iọgbọ kwu ni e gaa nyele vhi egbe. eni ingme na kwu oo gaa ga eni ẹvholi Ijudea kwu ni e la aloekẹ ekpha. ⁶⁶Agbọ kwu ni e suọ emeni a mẹ e rhẹ wẹ shi idu, eẹ li, "Elọ ọni ọmọ ọna ọ kyia shiọ?" Rharhi khi obọ Ishinẹgba o la vhi agbọ.⁶⁷Ayẹmhẹ ni o Pfuasẹ o ke vọsẹ Izẹkaraya ni ita ọli ọọ ngme ingmemhi ogbhagbha, ọọ li, ⁶⁸"Ichichi khi uwi Ọnọmhọli, ni Ishinẹgba Izulẹ, rharhi khi ọ she kpaghyiẹ iọgbọ ọli obọ khi lẹẹ rhọ myie wẹ pfuese.⁶⁹Ọ she yasẹ okphẹ imyiepfuese ni eyẹ ni apfẹ ọgamhẹ ọli ni Idevidi, vhi iteteva ẹdẹli ọgamhẹ ọli ni Idevidi, ⁷⁰Abhi ọ li te unu ebolẹ ni e pfuasẹ ni a kpọ mẹ ẹrhẹghẹ ni o dọsẹ. ⁷¹Ọ laa tsumhi eyẹ vhi obọ ẹbele eyẹ le ali eni ea bishi elemhi eyẹ.⁷²Ọ la khyiẹli ona khi lẹ rhọ rhi ivhẹlemhi khasẹ ita eyẹ, ali khi ọ rhọ sato ishobọ ọli ni o pfuasẹ, ⁷³Ilimhi ni ọ rhomhi ni ita eyẹ Ebulahamu. ⁷⁴Ọọ rhomhi ilimhi khi lẹ laa rhọ ni eyẹ, eyẹ ni a she tsumhi vhi obọ ẹbele eyẹ le, khi eyẹ rhọ dobẹ ga ọli eyẹ vhaa nu ulishi, ⁷⁵vhi elemhi ipfuasẹ ali igwhabhagbe rhọ khali ọli egbẹlẹ eyẹ kwu.⁷⁶Ingmaghyie lọ, ghyie, ọni ọmọ, a laa kee lu ọli ọbolẹ Ọnọfu nẹẹ, rharhi khi u la laa rhọ te ukpẹloe Ọnọmhọli laa nwuno odẹ ọli shi ekẹ, ⁷⁷khi u rhọ rhi iyẹsẹ imyiepfuese ni iọgbọ ọli, te ikpa igbe ingmobe kwa na wẹ.⁷⁸Rharhi ivhẹlemhi Ishinẹgba eyẹ li a te laa mẹ ena, rharhi ovọ ni o te idane a nya kwu le oo laa rhamhi eyẹ vhi egbe, ⁷⁹O gẹẹ rhugwhu eni e shitọ vhi alo ebili ali eni e laa arhorho egwhi. ọọ laa khyiẹlẹ ona khi lẹ rhọ sheshe eyẹ awẹ te ode ọpfọmhẹ."⁸⁰Iyọ ọni ọmọ ọọ womhẹloe shele ọ ze vhi elemhi Ayẹmhẹ ni o Pfuasẹ, ọ nyele vhi ekẹ apata rhili apfishi ẹrhẹghẹ ni ọ ke rhọ lasele vhi izulẹ.

¹Nena oni ẹrhẹghẹ oyọ, oghyie Isiza Ọgọstọsi ọọ shi ushi gasẹ ekẹ a lẹẹ khi a lolo iọgbọ kwu ni e nyele oni aloekẹ oyọ. ²Ona khi ikyiatsolo ni a rhọ lẹẹ lolo iọgbọ ni Ikwiriniọsi ọ rhọ kyili igovinọ shi aloekẹ Isiria. ³Iyọ ọgbọ kwu ọ je ẹvholi ọli a rhi eva shi ekẹ shi oni ilolo.⁴Abegwhoyọ, Ijosẹfu ọ te ẹvholi ni aa lu Inazarẹti ni o lẹẹ Igalili vu je ẹvholi ni aa lu Ibẹtilẹhẹmu ni o lẹẹ aloeke Ijudeani ni o kyili evholi Idevidi, rharhi khi ọni Ijosẹfu ẹdẹli Idevidi li ọ kyia. ⁵Ọọ rhue Imeli mhọ obọ a rhi eva shi ekẹ, ni ọ lẹẹ mhuẹ ni o kyia khi ivyiamhi o she chi mamali.⁶Nenaa, e kee la ayọ, ẹrhẹghẹ ivyiamhi Imeli oo ke rhamhi. ⁷Ọọ vyia ọmọ ọmọse, ọmọjọ ọli, ọ khyili ọli shi ede. Ọ rhue ọli vhesẹshi ukhomhi asha ni a rhi emenale shi ni elamhi le. rharhi khi a vha mẹ elemhi owa ni e kwu shi.⁸Oni aloekẹ oyọ, a mẹ erhisumhale ni e nyele obholọ rhi eloe kwu isumha wẹ ẹliyọsẹ. ⁹Udumhija, aghyiukọ ọ bhẹ bhuli wẹ le, ikiki Ishinẹgba o gẹẹ gasẹ wẹ, ulishi oo nwu wẹ onaghyie, onaghyie.¹⁰Iyọ, ọni aghyiukọ ọọ ke ẹẹ wẹ, "Imhẹ vha gwe nu ulishi, rharhi khi mhi she rhi usomhi aghyie ọnogbọ ni o rhi oghẹlẹ ghyi ọgbọ kwu. ¹¹Amo a she vyia otsumhi na vhẹ shi ẹvholi Idevidi. Lẹẹ khi Ikiristi Ọnọmhọli! ¹²Ona khi ishẹfẹ ni a rhọ laa khasẹ vhẹ, vha laa mẹ khi a gbe ede gẹnọ ọmọfẹ shi elemhi a shi ni a rhi emenale a shi ni elamhi le."¹³Udumhija ichoja aleghyie nebu ea de gboghyiẹ eni ighyiukọ ẹẹ chichi Ishinẹgba, ee li ẹẹ li, ¹⁴"Ikiki o kyili uwi Ishinẹgba ni ọ yagha nẹẹ kwu, ọpfọmhẹ o laa ukhomhi ekagbọ iteteva iọgbọ ni egbe wẹ ea nwu ọ."¹⁵Abhi eni ighyiukọ e ke rhọ pfi wẹ shi ayọ vu jee aleghyie, eni erhisumhale e ke ẹẹ li egbe wẹwẹ "Eyẹ je Ibẹtilẹhẹmu, khi eyẹ kaa rhi ẹloli eyẹ mẹ abhi eni ingme na kwu e li laa, ni Ọnọmhọli ọ gweghyiea khasẹ eyẹ ena." ¹⁶Ee ke nyanya ẹẹ je obholọ, e bhale a vhẹ Imeli ali Ijosẹfu, e mẹ khi a rhi ọni ọmọ vhesẹshi elemhi asha ni a rhi emenale a shi ni elamhi le.¹⁷Abhi e ke rhọ liyọ mẹ ena, ee ke gwu ni iọgbọ emeni a gwu na wẹ vhi obodẹ ọni ọmọ. ¹⁸Iọgbọ kwu ni e suọ emeni eni irhisumhale e ngme o sha wẹ abọ. ¹⁹Rharhi Imeli ọọ lẹẹ sa eni ingme na kwu ni ọ suọ, ọ nwuno wẹ shi udu. ²⁰Eni erhisumale ee ke liegbe je obhoni e te kpọ bhale, ee chichi Ishinẹgba shi ẹtsẹkẹ kwu ni e suọ ali ni e mẹ, abhi a le li ngme ọ khasẹ wẹ.²¹O ke gbe ẹlelele ni a rhọ lẹẹ fẹli ọni ọmọ, e lu ọli Ijesu, eva ni ọni aghyiukọ ọ ngme khasẹ wẹ khi a lẹẹ lu ọ neni a rhọ gaa ẹẹ mẹ ọli.²²Abhi eni egbẹlẹ irhegbe shi ipfuasẹ e ke rhọ gba, abhi ushi Imozisi o ngme, Ijosẹfu ali Imeli ee ke rhi ọni ọmọfẹ bhale vhi elemhi owuka nẹẹ Ijerusalemu khi a kaa rhọ mhọli Ọnọmhọli obọ. ²³Abhi a kẹkẹ shi ushi Ọnọmhọli, "Ọmọ ọmọse ni ọ sheda gweghyie asọmọ inyọ ọlia a laa kee lu ọli ọni a rhọ ni Ọnọmhọli mhuẹ,'' ²⁴E gwe li bhale a lasẹ obo abhi ushi Ọnọmhọli o ngme, esu ava ọa liyọ igbekwhukwhu ava.''²⁵Ghe, ghee, ọmọse ọgwho ọ laa Ijerusalemu nẹẹ lu Isimiọni. Ọni ọmọse ọna ọ kyili ọgbọ ni ọ nyele inyele aghyie. Ọ mugha ẹẹ khẹ ọni ọ lẹẹ zeze iọgbọ Izulẹ idu, Ayemhẹ ni o o Pfuasẹ o la vhi egbe. ²⁶Ayẹmhẹ ni o Pfuasẹ ọ she kpọ kpe ọli epfẹ ekẹ le khasẹ ọli khi ọ vha laa gwhua neni ọ mẹ Ọnọmhọli ni Ikiristi.²⁷Ogbẹlẹ ogwho Ayẹmhẹ ni o Pfuasẹ ọọ rhi ọli bhẹ vhi owuka. Abhi ita ọli ali inyọ ọli e ke rhọ rhue ọni ọmọ bhẹ, ni ọ kyila Ijesu, khi a rhọ khyiẹlẹ nali abhi ushi o ngme, ²⁸Ọni Isamọni ọọ myie wẹ lẹẹ shi abọ, ọọ chichi Ishinẹgba ọọ li, ²⁹"Nenaa dobẹ ọgamhẹ ẹ rhi opfọmhẹ kee lẹẹ , Abhi ingmemhi ẹ o ngme, Ọnọmhọli.³⁰Rharhi khi ikpalo mhẹ e she mẹ imyiepfuese ẹ, ³¹Ni u khyiẹlẹ vhi ukpẹloe iọgbọ kwu. ³²Ufulọ li ọ kyila ni a rhọ rhu ni Ijẹtasi ọ gwe kyili ikiki ni iọgbọ ẹ Izulẹ."³³Emeni ẹẹ ngme obodẹ ọ Oo sha ita ali inyọ ọni ọmọ abọ. ³⁴Iyọ Isimọni ọ zẹ ọte na wẹ, ọọ li Imeli ni inyọ ọni ọmọ, "Rhi esọ shi ekẹ onaghyie! ọni ọmọ ọna, ọọ la laa zẹ idemhi ali ivule iọgbọ ebubu Izulẹ ọ gwe kyili ishẹfẹ ni emeni a kpọ ngme shi ekẹ. ³⁵Abagwhoyọ, ọfẹdo o la laa gbese avhagwhu ẹ, ishọyọ isamhi ni e laa idu ebubu iọgbọ a gweghyie wẹa gboo."³⁶Ọbolẹ Ọkpotso ọgwho ni ẹẹ lu Ana, ọọ li la ayọ. Ọọ kyili omyi Fanuwẹli ni ọkpotso ni ọ la ẹdẹli Asha. Egbegbe ọkyiọjọ li ọ kyila. Ikpe ishila li ọ nu ugwhẹ ọli la, ³⁷ni ọ ke rhọ kyili ọsọrhọ elemhi ikpe egbhọ ene ikpamhi ene. Ọ vha chigbe vu owuka ọ rhi azumhi ali olema gbega ni Ishinẹgba, shi ota shi iyọsẹ. ³⁸Ayayayọ, ọ bhẹ bhui wẹ le ọ kphẹmhi ni Ishinẹgba. Ọ ngme ingme ọni ọmọ khasẹ agbọ kwu ni e mugha ẹẹ khẹ imyiepfuese Ijerusalemu.³⁹Abhi e ke rhọ gaa khyiẹli ẹtsẹkẹ kwu pfuse abhi ushi Ọnọmhọli o ngme, e liegbe bhale vhi Igalili, ẹvhue wẹ ni Inazẹrẹti. ⁴⁰Ọni ọmọ ọọ kee fuu shele ọọ ze, ọọ mhọli ẹgbhẹ shiọ, ivhẹlemhi Ishinẹgba ọ nu ọli la.⁴¹Ukpe kwu li ita ọli ali inyọ ọli e rhẹ ye aliukpe idọsẹalẹ je Ijerusalemu. ⁴²Abhi ọ ke rhọ gbe ikpe igbe ali eva, ee ke gwe ye oni uliukpe. ⁴³Abhi e ke rhọ la obholọ a rhamhi elemhi egbẹlẹ ni e la oni aliukpe rhamhi, li e rhẹ je apfẹ. Ama ọni ọmọ ọmọse ni Ijesu ọọ kpọẹ shi Ijerusalemu ita ọli ali inyọ ọli e vha yẹsẹ. ⁴⁴Ee sa khi ọ degboghyiẹ ogwhẹ iọgbọ kyia, rharhi khi rhẹmhi ee kyia ni ubi bi. Ee kee nono ọli vhi ifuabọ inyọgwho wẹ ali ikpokyia wẹ.⁴⁵Abhi e vha ke rhọ mẹ ọli, ee liegbe je Ijerusalemu lẹẹ nono ọli vhi ayọ. ⁴⁶Ee ke nono ọ, nono ọ, vhi ufuabọ iọgbọ ogbẹlẹ ozesẹ, li e ke rhọ bhale a vhẹ ọli vhi owuka khi ọ shitọ iteteva ewẹnagbọ, khi ọ rhi esọ shi wẹ ekẹ khi ọọ mhila wẹ egbọ. ⁴⁷Iọgbọ kwu ni e sokwu ọli oo nya wẹ aloa obodẹ iyese ọli ali isọmhi ni ọ sọ wẹ.⁴⁸Abhi e ke rhọ mẹ ọli, oo sha wẹ abọ. Inyọ ọli ọọ ke ẹẹ li, "Omyi mhẹ, elọ e zẹ ni u ke rhọ li eyẹ naa? Rhi esọ shi ekẹ, mhẹmhẹ ali ita ẹ eyẹ she nono ẹ, nono ẹ,'' ⁴⁹Ọọ wẹ, "Elọ e zẹ khi vhẹẹ nono mhẹ? Vhavha li yẹsẹ khi mhii nwemaa la akanya Ita mhẹ?" ⁵⁰Ama e vha yẹsẹ abhi ọ rhi eni ingmemhi eyọ ẹẹ ngme.⁵¹Iyọ, ọọ ke rhọ khali wẹ je Inazarẹti ọ suọ esọ ẹẹ na wẹ. Inyọ ọli ọ nwuno eni ingme kwu shi udu ọli. ⁵²Iyọ Ijesu ọọ fuu shiọ vhi ijegbe ali ẹgbhẹ, ọọ mẹ onaghyie obọ iọgbọ ali obọ Ishinẹgba.

¹Nenaa abhi o rhọ gbe ikpe igbe ali ishie ni oghyie Itiberiọsi Isiza ọ rhọ la eghyie, Ipọtiọsi Ipaleti ọ rhọ kyili Igọvina Ijudea, Ẹrọdu ọ kyili ọni ọ mhuẹ ekẹ vhi Igalili, inyọgwho ọli ni Ifilipu ọ li kyili ọni ọ mhuẹ ekẹ vhi Iturea ali Itirachonitisi, Ilisaniasi ọ li kyili ọni ọ mhuẹ ekẹ Abilẹne, ²ẹrhẹghẹ ni Anasi ali Ikafasi e rhọ kyili eni e kpeda ugamhi, ingmemhi Ishinẹgba o rhọ bhẹ bhuli Ijọni ni omyi Izakaraya le vhi elemhi apata.³Ọọ kyia ẹẹ kyia vhi aloekẹ okẹ Ijọdani, ọọ ngme ngmemhi ibatizimhi inwegbelieliẹ ni o kyili igbe ingmobe kwa.⁴Abhi a li kẹkẹ ọli. shi elemhi ebe ingmemhi Azaya ni ọ kyili ọbolẹ, "Urhuli ọgbọ o laa elemhi apata ẹẹ sọọse, oo li ẹẹ li, 'Nwuno odẹ Ọnọmhọli egbe shi ekẹ, u khyiẹlẹ odẹ ọli sheshe.⁵A laa suli igbilimhi eke kwu, ekpha ekeke ali enefu a sheshe wẹ tẹtẹ, edẹ ni a gọnyi, gọnyi a sheshe wẹ, a sheshe edẹ na gwagwa. ⁶Agbọ kwu e laa mẹ imyiepfuese Ishinẹgba."'⁷Iyọ Ijọni ọọ li eni iọgbọ ebubu ni e bhẹ lẹẹ batazi obọ ọli, "Vhẹvhẹ ni vha kyili imyi ivhali ẹnyẹ osuẹ, ọgwho ọ ke vhi vhẹ ude khi vha na ni ofu ni oa bhale?⁸Vha mọ ikpamhi ni e tẹ shi ipfiegbe deno egbe, imhẹẹ vha ke eẹ li egbe vhẹ, 'Eyẹ mhọli Ebulahamu vhi ita,' rharhi khi mhi gwu na vhẹ khi Ishinẹgba ọ dobẹ te eni echẹli ena vyia ivhiẹ a ni Ebulahamu.⁹Nenaa a she lee rhi aghamhi kpẹ eni imhili eni erhẹ. Iyọ, orhẹ kwu ni o vha sheda mọ ikpamhi aghyie a laa tọ ọli gbe, a tsua ọli pfilo elemhi erhe."¹⁰Iyọ iọgbọ ebubu ni e la oni agbaa ee ke mhila ọli, eẹ li, "See eyẹ ke a li nena?" ¹¹Ọọ ke sọ wẹ vhọ, ọọ wẹ, "Ọni ọ mhọli iwulu eva, ọ rhue ogwho ni ọni ọ vha mhọli pẹẹ, abagwhoyọ ọni ọ mhọli emenale ọ gwe li liyọ rhọ ni ọni ọ vha mhuẹ."¹²Iyọ emyionoga e li bhale lẹẹ myie ibatizimhi, e gwe eẹ li, "Ọwẹnagbọ, see eyẹ nwemaa laa li?" ¹³Ọọ wẹ, "Imhẹẹ vha myie ikpaghọlọ bu dọsẹ abhi vha kha myie."¹⁴Ichoja egwho e ke gwe mhila ọli, eẹ li, "Eyẹ naa? See eyẹ ke laa li?" Ọọ wẹ, "Imhẹ vha rhi izemhi myie ọgbọkhọgbọ ukpaghọlọ, wẹ khi rhẹmhi vha rhi ushi ni o vha nwu ọgbọ a nwu ọli. Vha dobẹ ifọta ni a fali vhe kwhese vhẹ."¹⁵Abhi e li rhi ẹloe shi odẹ shi ibhale Ikiristi, ọgbọ kwu ọọ kee bi ikhọkhọ khi a dobẹ a mẹ khi Ijọni khi ọni Ikiristi. ¹⁶Ijọni ọọ ke sọ wẹwẹ kwu vhọ, ọọ wẹ, "A khi ẹẹ li Onabhi uwẹ mhẹ, amẹ lẹ mhi rha batazi iọgbọ, ama ọgbọ ọgwho ọa bhale ni ọ mhọli izemhi dala mhẹ, imha tẹ na mhi dobẹ a taghyiẹ ọli uli ekwẹ awẹa. Ọ laa rhi ibatizimhi Ayẹmhẹ ni o Pfuase ali erhali na vhẹ.¹⁷Ọ nwu orhẹ akhakha mhọ obọ ni a tsọ akwhi ni o zẹ akọ sọ khi ọ rhọ degbe ma ekẹ kpishi ido wolọ kwu aka ọli. Ama ọ laa chi ijafu wẹ ma rhi erhẹ tosẹa ni e vha la pfua gwhe."¹⁸Ingmemhi izezidu nebubu, li ọ rhọ gwu ingmemhi aghyie eni egbọ aa khasẹ eni iọgbọ. ¹⁹Ijọni ọọ gwe li kpha dese oghyie Ẹrọdu shi ugwhẹ inyọgwho ọli ni ọ mhuẹ, ni ẹẹ lu Ẹrodiasi, ali ingmobe ebubu ni Ẹrọdu ọ gwe li. ²⁰Ama Ẹrọdu ọọ gwe khyiẹlẹ ingmobe ovhese. Ni ọ rhọ nwu Ijọni gwese shi elemhi ogba igwhumha.²¹Nenaa oo ke rhamhi ẹrhẹghẹ ni Ijọni ọ rhẹẹ bataizi iọgbọ, Ijesu ọọ li batazi. Abhi ọ ke rhẹẹ pfi olema, eda oo gweghyiea. ²²Ayemhe ni o Pfuasẹ o kpiale abhi esu a nya vhi ijegbe, urhuli o te eda ngme lasele, ọọ li, "Ghyiẹ khi egbegbe Omyi mhẹ. Egbe ẹ e maa nwu mhẹ gba.²³Ijesu lẹẹ obọ ọli, ufuabọ ikpe uye ali igbe li ọ gbe ni ọ rhẹẹ wẹna wẹ ingmemhi Ishinẹgba. Omyi Ijosẹfu ọ kyia kyila, ni ọ kyili omyi Eli, ²⁴ni omyi Imatati ni ọ kyili omyi Ilẹvi, ni omyi Imẹchi, ni omyi Ijanaa ni ọ kyili omyi Ijosẹfu,²⁵Ni omyi Imatatayasi, ni omyi Emọsi, ni omyi Inahumu, ni omyi Esili, ni omyi Inagaa, ²⁶ni omyi Imati, ni omyi Imatatayasi, ni omyi Isemẹni ni omyi Ijosẹfu, omyi Ijoda,²⁷Ni omyi Ijoana, omyi Irhẹsa, omyi Izerubabeli, ni omyi Ishẹatiẹli, omyi Inẹri, ²⁸Ni omyi Imẹchi, ni omyi Adi, ni omyi Ikosamu, ni omyi Emadamu, ni omyi Eri, ²⁹ni omyi Ijoshua, ni omyi Elieza, ni omyi Ijorimu, ni omyi Imatati, ni omyi Ilẹvi,³⁰Ni omyi Isimiọni, ni omyi Ijuda, ni omyi Ijosẹfu, ni omyi Ijonamu, ni omyi Eliakimu, ³¹ni omyi Imelea, ni omyi Imena, ni omyi Imatata, ni omyi Inatani, ni omyi Idevidi, ³²ni omyi Ijesẹ, ni omyi Obẹdi, ni omyi Iboazi, ni omyi Isamọni, ni omyi Inashọni,³³omyi Aminadabu, ni omyi Adimini, ni omyi Ani, ni omyi Ẹzirọni, ni omyi Iperẹzi, ni omyi Ijuda, ³⁴ni omyi Ijekọbu, ni omyi Aziki, ni omyi Ebulahamu, ni omyi Itera, ni omyi Inahọ, ³⁵Ni omyi Serugu, ni omyi Ireu, ni omyi Ipẹlẹgi, ni omyi Ẹbaa, ni omyi Ishela,³⁶Shẹla ni omyi Ikenani, ni omyi Afazadi, ni omyi Ishemu, ni omyi Inoa, ni omyi Ilamẹchi, ³⁷ni omyi Imẹtusẹla, ni omyi Enọki, ni omyi Ijaredi, ni omyi Imahalaliẹ, ni omyi Ikenani, ³⁸ni omyi Enọsi, ni omyi Iseti, ni omyi Adamu, ni omyi Ishinẹgba.

¹Iyọ Ijesu, ni Ayẹmhẹ ni o Pfuasẹ o vọsẹ, ọ rhọ te okẹ Ijọdani jele, Oni Ayẹmhẹ ni o Pfuasẹ oo ke rhi ọli je apata ²ẹlemhi ẹlẹ egbhọ eva, okhyio ọ la ayọ nwu oli fẹẹ. Elemhi eni egbẹlẹ ena, ọ vha le emenale pẹẹ, ikposhimhi okyiamhi o kee gbe ọli.³Okhyio ọ ke ẹẹ li, "O kha kyila khi Omyi Ishinẹgba li u kyia rhi oni ẹchẹli ona mela ukphakphaa." ⁴Ijesu ọọ ke sọ ọli vhọ, "Aa kẹkẹ oli shi ekẹ, ''Ọgbọ ọ vha nyele shi ukphakpha lọgwho, sẹkẹnẹ ingmemhi ni o te unu Ishinẹgba lasele.'"⁵Iyọ ọni okhyio ọ ke gwe rhue ọli a nya asha ni o gaa yagha yagha, elemhi ukwukwu ẹrhẹghẹ ọ rhi eghyiele ukhomhi ekẹ agbọ kwu khasẹ ọ. ⁶Ọni okhyio ọọ ke ẹẹ li, "Mhi laa rhi afu nẹẹ khi u rhọ mhase kee ni eni eghyiele ena kwu, ali ọsuemhẹ ni e la vhọ. Mhi dobẹ a khyiẹlẹ ena rharhi khi a she rhẹ wẹwẹ kwu shi mhẹ vhi obọ khi mhi kee rhi ẹloe kwhu wẹ, mhi dobẹ rhue wẹ a na ọni ọ gwhẹ mhẹ. ⁷Elemhiyọ u kha lama nyẹsẹ egbe na mhẹ u gbe ga na mhẹ, ena kwu e laa kyili iyẹ.''⁸Ama Ijesu ọọ ke sọ vhọ ọọ li, "Aa kẹkẹ ọli shi ekẹ, 'Khi u nwemaa gbe ga ni Ọnọmhọli ni Ishinẹgba, lọgwho li u nwemaa laa gbega.'"⁹Ọni okhyio ọ ke gwe rhọ je Ijerusalẹmu ọ rhue ọli a nya obhoni atsẹghẹmhi ukhomhi owuka, ọọ li, "O kha kyia khi Omyi Ishinẹgba li u kyia, te a ayọ da kwu ekẹ gwhe. ¹⁰Rharhi khi a kẹkẹ ọli shi ekẹ, 'Ọọ laa li ẹẹ khi ighyiukọ lẹ khi e rhi ẹloe kwhu ẹ,' ¹¹E gwe laa rhi abọ yasẹ vhi ekẹ, khi uu ke kpi owẹ shi ẹchẹ."¹²Ijesu ọọ sọ ọli vhọ, ọọ li, "O laa akẹkẹshekẹ, U waa nwu Ọnọmhọli ni Ishinẹgba ẹ a fẹẹ." ¹³Abhi okhyio ọ ke rhọ nwu ọli fẹẹ pfuse, ọ pfi ọli shi ayọ ọ vu nee.¹⁴Iyọ Ijesu ọọ ke rhi izemhi Ayẹmhẹ ni o Pfuasẹ liegbe bhale vhi Igalili, okeke ọli o ga oni aloekẹ oyọ kwu. ¹⁵Ọ laa owuka wẹ wẹna wẹ, iọgbọ kwu e chichi ọli.¹⁶ogbẹlẹ ogwho ọ bhẹ vhi inazarẹti, ẹvhue ni a la kwẹlẹ ọ shele. Abhi ọ li la vhọ, ọ lo elemhi owuka ogbẹlẹ ivhẹmhia, ọ vhule ni ọ rhọ zẹ Ibabo. ¹⁷A rhi ebe ọbolẹ Izaya nali. ọọ kweghyiea ọlia ọ bhale a vhẹ asha ni a kẹkẹ ọli shi,¹⁸"Ayẹmhẹ Ọnọmhọli o la mhẹ vhi egbe, rharhi khi a she rhi ovhili ni o kyili uwu izemhi to mhẹ vhi okhomhi, khi mhi gwu ingmemhi onogbọ khasẹ enanya, Ọ ghyie mhẹ khi mhi kaa gwu ingmemhi igbadegbea khasẹ eni a nwuno, khi mhi gweghyie izalo aloa, ali mhi myie eni ẹchọ pfuese, ¹⁹Khi mhi rhi ukpe ẹwella Ọnọmhọli tsabọ."²⁰Iyọ, ọ ke gbe oni ebe ma, ọ rhue ọli ni ọni ọ rhi ẹloe kwhu ọwuka, ọa de shitọ. Iọgbọ kwu ni e laa oni owuka e wolọ alo kwu ọ vhi egbe. ²¹Ọọ ke nu wẹ ẹẹ ngmẹ, ọọ wẹ, "Amo emeni a kẹkẹ shi oni ebe ona o she tsẹ shi vhẹ esọ." ²²Ọgbọ kwu ni ọ la ekẹ ayọ ọọ suọ emeni ọ gaa ngme kwu eni ingmemhi izọtena ni e te ọ vhi unu lasele e nya wẹwẹ kwu alọa. Ee li ẹẹ li, "Ọmyi Ijosẹfu mẹẹ khi ọnaa, laa khi ọa kyili lẹẹ?"²³Ijesu ọ ke ẹẹ wẹ, "Ingmaghyie vha laa kpe oni ekpita ona khasẹ mhẹ, 'Ọbo rhi egbe ẹ ze. Ememeni eyẹ suọ kwu khi u khyiẹlẹ vhi Ikapaniọmu, liyọ khyiẹlẹ wẹ vhi elemhi ẹvholi ana ni o kyili apfẹ ẹ abagwhoyọ.''' ²⁴Ọ gwe ẹẹ wẹ, "Egbegbingme mhi ngme vhẹ, a vha mẹ ọbolẹ ni a kpẹsẹ abọ myie vhi elemhi evholi na vyia ọli shi.²⁵Ama mhi gwu ingmaghyie khasẹ vhẹ khi esọrhọ nebu e la oni Izulẹ ẹrhẹghẹ Ẹlija, ni a rhọ pfi okpẹ idane ni amẹ o vha rhọ rhuẹ elemhi ikpe esẹ ali ukhyikhyi, ni ukwumhi o rhọ le ashakhasha oni aloekẹ kwu. ²⁶A vha ghyie Ẹlija bhuli wẹ sẹkẹnẹ ọsọrhọ ni ọ nyele Izẹrẹfati ni o mama Isidọni. ²⁷Iyọ li a gwe li mẹ eni efafe e nwu ẹrhẹghẹ Ẹlisha ni ọbolẹ, a vha mẹ ọnyiẹ wẹ ọvhese ni ọ ze ina khi Inemani.''²⁸Ofu oo lẹẹ fuu eni iọgbọ kwu ni e laa oni owuka abhi e rhọ suọ eni ingme ena. ²⁹E vu ekẹ le e rhi izemhi ali ofu kwhu ọli te oni ẹvhue a lase, e rhi ọli a rhamhi abọ esọ ọkpha oni ẹvhue wẹ, khi e rho dobẹ pfi ọli kpẹla a lo ugbilimhi ekẹ. ³⁰Ama ọọ te wẹ vhi ifuabọ a lase ọ rhọ te odẹ ọli vu.³¹Ọ ke kpela kwu ikapaniọmu, evholi ni o la elemhi Igalili. Ogbẹlẹ Ivhiẹmhia ogwho ọọ wẹna iọgbọ vhi elemhi owuka. ³²Ọwẹna ọli o nya wẹwẹ kwu aloa, rharhi khi owẹna ọni a rhununa li ọọ wẹna wẹ.³³Oni ogbẹlẹ ọmọse ọgwho ọọ la ayọ ni ọ mhọli ayẹmhẹ okhyio ni o vha pfuasẹ, ọ rhi urhui ni o ze sọọse lasele, ọọ li, ³⁴"Elọ eyẹ rhẹ a li, Ijesu nẹẹ Inazarẹti? irhẹmhi u bhale a pfuse eyẹa? Mhi yẹsẹ ọni u kyila! Ghyiẹ khi uwi Ishinẹgba ni ọ Pfuase!"³⁵Ijesu ọọ ke kpha dese ọni ayẹmhẹ ni o vha pfuasẹ, ọọ li, "Koko unu khi u lase ọ vhi egbe le!" Abhi ọni ayẹmhẹ okhyio ọ ke rhọ pfi ọni ọmọse gbe vhi iteteva wẹ, ọọ te ọ vhi egbe a lase ọ vha kwali ọli utse. ³⁶Oo nya eni iọgbọ kwu aloa, e la ifuabọ ẹẹ ngme oni ingmemhi, Ee li ẹẹ li , "Ingmemhi nabhi eni e gwho ena e kyila? Ọ rhi afu ali izemhi shi ushi ni iyẹmhẹ ni e vha pfuasẹ e liyọ a lase pfiẹẹ.'' ³⁷Rharhi ena ingmemhi ọli oo gaa ga oni aloekẹ obholọ kwu.³⁸Ijesu ọọ ke rhọ te oni owuka a lasele ọ lo apfẹ Isimiọni. Ee bhale a vhẹ khi ọgọ Isimiọni ni ọkpotso khi eba ee to ọ, ee ke nu ọni ọkpotso lema Ijesu. ³⁹Ọọ ke bhale a nu ọli tomugha, ọ nu eni eba ngme, e vu ọli vhi ijegbe le. obobobọ, ọ chi ekẹ vule ọọ khyiẹlẹ emenale na wẹ.⁴⁰Abhi ọwẹ o kee rhẹẹ lo ekẹ, iọgbọ ee wolọ iọgbọ ni ee ghwua ighwuamhi ọdọdọda bhẹ ghyi Ijesu. Ọ rhi obọ nyanọ ọgbọgbọ vhi egbe ọ rhẹ we ze. ⁴¹Iyẹmhẹ ikhyio e li te iọgbọ ebubu ijegbe a lasele, ee vyiẹ lase gboo eẹ li, "Ghyiẹ khi Omyi Ishinẹgba!" Ijesu ọọ kpha dese eni iyẹmhẹ ikhyio, ọ vha dobẹ wẹ ngme, rharhi khi ee yẹsẹ khi lẹẹ khi ọni Ikiristi.⁴²Abhi ogbe o ke rhọ gbe, ọ je obhoni o vima a la. Iọgbọ ebubu e nonọ ọli kyia, kyia, li e rhọ bhale a vhẹ ọli asha ni ọ vima ni ọ la. Ee lẹẹ dua khi wẹwẹ e kpẹsẹ ọli shi ayọ khi ọọ ke vu. ⁴³Ama ọọ wẹ, "Mhii nwemaa ngme oni usomhi aghyie ni o kyili onogbọ obode aleghyie khasẹ evholi evhese nebu, rharhi khi ona li a te ghyie mhe bhale vhi ana." ⁴⁴Iyọ ọọ kee liyọ ẹẹ ngme eni ingmemhi kyia, kyia, vhi elemhi eni ewuka kwu ni e la aloeke Ijudea.

¹Aa ke bhale a vhẹ khi agbọ ebubu e rhi esọ shi ingmemhi Ishinẹgba ni ọọ ngme, abhi ọ li tomugha esọ okwu nẹẹ Igẹnẹsarẹti. ²Ọ mẹ ekọ okẹ eva ni a chi lasele vhi esọ igbogbo oni okwu. Egbeifẹẹ e she kee te elemhi eni ekọ lasele ee kpee iga wẹa. ³Ijesu ọ ke lo elemhi ọkọ ogwho vhọ, ni o kyili uwi Isimiọni, ọọ li ọ chi oni ọkọ vhi elemhi okẹ lase suii. Iyọ, ọ ke deshito elemhi oni ọkọ ẹẹ wẹna iọgbọ ni e laa esọ igbogboo.⁴Abhi ọ ke rhọ ngme pfuse, ọọ li Isamọni, "Chi oni ọkọ ona chi je asha ni o limhi khi u kwu iga lo okẹ khi u nwuno ifẹ." ⁵Isamọni ọọ ke ẹẹ li, "Ọga, rhẹmhi eyẹ gbe ikanya ekẹ ni ogbe gbe, eyẹ vha nwu etsẹkẹ pẹẹ, ama abhi u ke li ngme ọli ena, mhi kwu eni iga lo okẹ shiọ. " ⁶Abhi e ke rhọ liyọ, ee ke nwuno ifẹ ni ebububu, eni iga wẹ ee pfanọa. ⁷Iyọ, ee ke lu iọgbọ ni e laa ọkọ ni o kpọe khi e bhale a kpaghyiẹ wẹwẹ. E bhale a chino eni ifẹ vọsẹ eni ekọ eveveva, irhẹmhi eni ekọ e kwunolono okẹ.⁸Ama Isamọni ni Ipitẹ, abhi ọ ke rhọ mẹ yọ, ọ de tarhugwhu vhi ẹghẹghẹ Ijesu, ọọ li, "Chi kyia na mhẹ, rharhi khi ọlingmobe mhi kyila, Ọnomhọli." ⁹Rharhi khi irhẹmhi o nya li alọa, ali iọgbọ ni e nu ọli la ayọ, shi akwete ifẹ ni e nwuno. ¹⁰Li shi Ijemhisi ali Ijọni, ali imyi Izebedi ni emọse, li ee nu Isimiọni la. Ijesu ọọ li, "Imhẹẹ gwe nu ulishi, rharhi rhọ te amo vu u laa kee nwuno iọgbọ." ¹¹Abhi e ke rhọ chino ekọ wẹ te okẹ lasele vhi ekẹ, e dobẹ eni ẹtsẹkẹ kwu shi ayọ e rhọ khali Ijesu vu.¹²Aa ke bhale a vhẹ khi abhi ọ rhọ bhẹ vhi ẹvhue ogwho vhọ, ọmọse ọgwho ni efafe e vọ vhi egbe kwu ọ la ayọ. Abhi ọ ke rhọ mẹ Ijesu, ọọ de talorhugwhu ekẹ ọọ lema ọli, ọọ li, "Ọnọmhọli, o kha ghọli ẹ, u dobẹ rhẹ mhẹ a pfuasẹ." ¹³Iyọ, Ijesu ọọ nise obọa bhuli ọli, ọọ li, "O gwhẹ mhe. pfuasẹ." obobobọ eni efafe e vu ọli vhi egbe le.¹⁴Ọ kpe ẹka nya vhi ukhomi khi imhẹli ọ gwu ni ọgbọkhọgbọ, ama ọọ li, "Kaa rhi egbe ẹ khasẹ eni e kpeda ugamhi ishọyọ u khyiẹlẹ ilasobo shi irhọpfuasẹ, abhi ushi Imozisi ọ ngme, khi o rhọ pfi ọtsẹ shiọ khasẹ wẹ."¹⁵Ama irhẹmhi ngme ọli o ga ashakhasha kwu, iọgbọ ebubu ee bhale a kwugbe vhi asha ni ọ la khi e rhọ rhi esọ shi owẹna ọli ali khi ọ rhọ myie wẹ igwhuamhi kwa. ¹⁶Ama utotona li ọ rhẹẹ je elemhi ogwha lẹẹ pfiolema.¹⁷Ogbẹlẹ ogwho ọọ kee wẹna iọgbọ owẹna, Ifarisisi ali ewẹnagbọ ishi ni e te evholi Igalili ali Ijudea bhẹ ee shitọ ayọ, ali eni e te ẹvholi Ijerusalemu bhẹ. Izemhi Ọnọmhọli oo nu ọli la ni ọ rhẹẹ rhue iọgbọ igwhuamhi egbea.¹⁸Iọgbọ egwho ee ke bhẹ, e tsua ọmọse ni ọ gwọghọa shi ivhia bhẹ vhi ayọ, e nono odẹ ni e tee tsua ọli lo bhuli Ijesu. ¹⁹E vha mẹ odẹ ni e te tsua ọli lo elemhi owa rharhi agbaa ni o legba ee bu, iyọ e ke tsua ọli te ukhomhi owa kpiale bhẹ vhi elemhi oni owa, abhi ọ li laa ivhia eyọ, te iteteva iọgbọ bhẹ vhi asha ni Ijesu ọ mugha ghẹdẹẹ.²⁰Ijesu ọọ li, vhavha mẹ irhọshiọ wẹ, "Mọse, a she gbe ingmobe kwa nẹẹ." ²¹Eni Ikowe ali Ifarisisi e ke mhila ọli ogbọ shi ona, eẹ li, "Ọgwho khi ọnaa ni ọa ngme ingmemhi ipfininua ena? Ọgwho ọ dobẹ a yele ingmobea ni ọgbọ ina khi Ishinẹgba lọgwho?"²²Ama Ijesu, ọ mato mẹ emeni ee sa, ọọ sọ wẹ vhọ ọọ wẹ, "Elọ e zẹ khi vhaa mhila oni ogbọ ona vhi elemhi idu vhẹ? ²³Mhi gyhi oni o kẹlẹ nẹẹ kha rhọ ngme, 'A gbe ingmobe kwa nẹẹ' laa khi 'Vu ekẹ le khi u kee kyia?" ²⁴Ama ona vha ke rha yẹsẹ khi Omyi Ọmọse ọ mhọli afu oni ukhomhi ekẹ ona ni ọ rhọ gbe ingmobe a kwa, mhii ẹẹ ghyiẹ, 'Vu ekẹ le, tsua ivhia ẹ khi u kee je apfẹ ẹ."²⁵Ayayayọ, ọ chi ekẹ vule vhi ukpẹloe wẹ. Ọ tsua ivhia ni ọ vhesẹshi, ọ liegbe jee apfẹ ọli, ọ rhi ikiki ni Ishinẹgba. ²⁶Oo nya ọgbọ kwu aloa, e rhi ikiki ni Ishinẹgba. Ulishi o lẹẹ nwu wẹwẹ kwu, eẹ li, "Eyẹ she mẹ ingme ọshabọ amo."²⁷Aa ke mẹ ena pfuse, Ijesu ọ te ayọ vu ni ọ rhọ mẹ ọmyionoga ni ẹẹ lu Ilẹvi khi ọ shitọ asha ni a lẹẹ myiono oga. Ọọ li, "Rhọ khẹ mhẹ." ²⁸Iyọ Ilẹvi ọ dobẹ etsumhanẹkẹ kwu, ọ chi ekẹ vule, ọ rhọ khali ọli.²⁹Ilẹvi ọọ khyiẹli ududumhi uyalọ shi apfẹ ọli ni Ijesu, emyionoga nebu ee la ayọ, ali iọgbọ evhese ee gaa shitọ gasẹ oni itabu e nu ọli le oni emenale. ³⁰Ama eni Ifarisisi ali eni Ikowe ee gwu Ijesu ẹzọ ẹẹ khasẹ idibo ọli, eẹ li, "Elọ e zẹ khi vha nu emyionoga ali iọgbọ elingmobe deshitọ a le a da?" ³¹Ijesu ọọ ke sọ wẹ vhọ, ọọ wẹ, "Iọgbọ ni e ze, e vhaa nono ebo ikwhumhi, eni ea gwhua lọgwho li ea nono ọbo. ³²Imha bhale a nyalu eni e pfuasẹ khi e pfi egbe deno egbe, ama elingmobe mhi bhẹ a lu khi e pfiegbe deno."³³E ke eẹ li, "Idibo Ijọni ẹrhẹghẹ kwu li e rha pfi azumhi ea pfi olema, iyọ li idibo Ifarisisi e lia li abagwhoyọ. Ama iyi ẹ, ea le, ea da." ³⁴Ijesu ọọ ke ẹẹ wẹ, "Aa mẹ ọgbọ ni ọ laa kwhẹsẹ ọkpotso ni ọ laa dobẹ eni e bhale vhi oni izuode khi e pfi azumhi, ni ọni ọa kwhẹsẹ ọkpotso ọ khyie nu wẹ la? ³⁵Ama eni egbẹlẹ ea bhale ni a rhọ laa myie wẹ ọni ọa kwhẹsẹ ọkpotso rhue vu, eni egbẹlẹ eyọ e ke chigbe a kee pfi azumhi."³⁶Iyọ, Ijesu ọọ ke kpe oni ekpita ona khasẹ wẹ. Ọọ wẹ, "A vha mẹ ọgbọ ni ọa khyiẹ ubẹmhi ode ogbọ toma ode ojọ. Ọ kha liyọ, rhẹmhi ọa khyiọlọ oni ode ogbọa, oni ubẹmhi ode ogbọ o vha de ama oni ode ojọ vhọ.³⁷Iyọ, Ijesu ọọ ke kpe oni ekpita ona khasẹ wẹ. ³⁸Ọọ wẹ, "A vha mẹ ọgbọ ni ọa khyiẹ ubẹmhi ode ogbọ toma ode ojọ. ³⁹Ọ kha liyọ, rhẹmhi ọa khyiọlọ oni ode ogbọa, oni ubẹmhi ode ogbọ o vha de ama oni ode ojọ vhọ.

¹Ogbẹlẹ ivhiẹmhẹa Ijesu ọ rhọ te ifu ishemhi ivhakpa lẹẹ dọsẹ idibo ọli ee bẹẹ ivhakpa, ee kphele ikpamhi wẹ, ee wu wẹ vhi ẹkọabọ , ee lee wẹ. ²Ama eni Ifarisis egwho eẹ li, "Elọ e zẹ khi vhaa khyiẹli emeni ushi o vha ngme khi a khyiẹlẹ ogbẹlẹ ivhiẹmhẹa?"³Ijesu, ọ ke sọ wẹ vhọ, ọọ wẹ, "Vhavha khyie kpọ li zẹ vhi ebe, emeni Idevidi ọ ke khyiẹlẹ ni okyiamhi o rhẹ gbọ ọli, ali emọse ni e nu ọli la? ⁴Ọ lo elemhi owuka, ni ọ rhọ rhue ukphakpha ni a rhọ bhẹ vhi apfẹ ugamhi Ishinẹgba a gbega, ọ te vhọ khyi le, ọ gwe li te vhọ khyi ni eni e nu ọli la le, o kha rhẹ kyia khi ushi lọ khi ọgbọ ovhese ọ vhaa le oni ukphakpha oyọ sẹkẹnẹ khi eni e kpeda ugamhi lọgwho li ushi ọọ li khi e lee ọli." ⁵Iyọ, ọọ ke eẹ wẹ, "Omyi Ọmọse khi Ọnọmhọli ogbẹlẹ ivhiẹmhẹa).⁶Ogbẹlẹ ivhiẹmhẹa ovhese ọọ ke lo elemhi owuka ọọ wẹna eni iọgbọ ni e la ayọ. Ọmọse ọgwho ọ la ayọ ni obita ọli o khakhaa. ⁷Eni ikowe ali Ifarisisi e rhi ẹloe kpẹ ọ vhi egbe ni ẹẹ khi Ijesu ọ rhọ ze ogbẹlẹ ivhiẹmhẹa, ishọyọ khi wẹwẹ e kẹ mẹ ushi nwu ma ọli vhi obọ khi ọ kẹ gbe gọ. ⁸Ama ọọ yese emeni ee sa, li ọ ke rhọ ẹẹ li oni ọmọse ni obọ ọli o khakhaa, "Vu ekẹ le, khi u tomugha vhi iteteva iọgbọ kwu ni e la ana." Iyọ ọni ọmọse ọọ vule, ọ tomugha ayọ.⁹Ogbẹlẹ ivhiẹmhẹa ovhese ọọ ke lo elemhi owuka ọọ wẹna eni iọgbọ ni e la ayọ. Ọmọse ọgwho ọ la ayọ ni obita ọli o khakhaa. ¹⁰Eni ikowe ali Ifarisisi e rhi ẹloe kpẹ ọ vhi egbe ni ẹẹ khi Ijesu ọ rhọ ze ogbẹlẹ ivhiẹmhẹa, ishọyọ khi wẹwẹ e kẹ mẹ ushi nwu ma ọli vhi obọ khi ọ kẹ gbe gọ. ¹¹Ama ọọ yese emeni ee sa, li ọ ke rhọ ẹẹ li oni ọmọse ni obọ ọli o khakhaa, "Vu ekẹ le, khi u tomugha vhi iteteva iọgbọ kwu ni e la ana." Iyọ ọni ọmọse ọọ vule, ọ tomugha ayọ.¹²Oo ke de shi vhọ eni egbẹlẹ eyọ ni ọ je ukhomhi ọkpha a pfi olema. Ọọ pfi olema bhuli Ishinẹgba ni ogbogbe. ¹³Ogbe o ke gbe, ọ lu eni idibo ọli chi mama egbe, ọ zẹ wẹwẹ ogbe ali ava, ni a gwe li lu ighyiusomhi.''¹⁴Eva eni idibo lẹ khi ena, Isamoni (ni ọ gwe li lu Ipitẹ) ali inyọgwho ọli ni aa lu Adulo, Ijemhisi, Ijọni, Ifilipu, Ibatolomhi, ¹⁵Imachiu, Itọmọsi, Ijemhisi ni omyi Alfeọsi, Isamọni ni a gwe a lu Izilọti, ¹⁶Ijudasi omyi Ijemhisi, ali Ijudasi Isikarọti, ni ọ rhi Ijesu dẹ.¹⁷Ijesu ali wẹwẹ e te oni ukhomhi okpha kpiale vhi ekẹ atẹẹtẹẹ. Iọgbọ ebubu ni e lama shi ọli vhọ e rhọ gba, abagwhoyọ iọgbọ ebubu ee te Ijudea ali Ijerusalemu bhẹ, ali esọ okwu Itaya ali Isidọni. ¹⁸Irhẹmhi e bhale a rhi esọ shi ọli vhi ekẹ ọ ke gwe rhuẹ wẹ igwhuamhi egbea. Iọgbọ ni iyẹmhẹ ni e vha pfuasẹ e la egbe, e li ze. ¹⁹Ọgbọ kwu ni ọ la oni agbaa e nono abhi wẹwẹ e li rhi obọ ẹẹ chi ọ, iyọ ọ gaa li rhi wẹwẹ kwu ze.²⁰Ijesu ọọ bino eni idibo ọli, ọọ wẹ, "Ivọsẹna khi uwi enanya, rharhi khi aleghyie Ishinẹgba uwẹwẹ li o kyia. ²¹Ivọsẹna khi uwẹ vhẹ, ni okyiamhi ọa gbe nena, rharhi khi vha la laa le kwhe. Ivọsẹna khi uwi eni ea vyiẹ nena, rharhi khi e la laa gyiaa.²²Ivọsẹna khi uwẹ vhẹ ni iọgbọ ea bishi elemhi ni e gwe a zọlọ vhẹ ni ea pfuẹchẹ vhẹ eva abhi iọgbọ ebe, rharhi Ọmyi Ọmọse. ²³Vha kee ghyieghyie shiọ vha fiala lo eda kee ghẹlẹ, rharhi khi vha nwemaa laa mhọli idudumhi ifọta shi elemhi aleghyie eda, iyọ li ushishi ni e to wẹ ekẹ le e kpọ li eni ebolẹ.²⁴Ama epfua khi uwi enọsuemhẹ! rharhi khi e she kpọ lee myie ọpfọmhẹgbe wẹ. ²⁵Ẹpfua khi uwẹ vhẹ ni e she vọ! rharhi khi okyiamhi o laa gbe vhẹ idegbe. Epfua khi uwi eni ea gyia nena! rharhi khi vhaa laa vyiẹ idegbe.²⁶Epfua khi uwẹ, ni ọgbọ kwu ọa zẹ onaghyie ẹ! Rharhi khi iyọ li ushishi wẹ e kpọ li eni ebolẹ.²⁷mhi gwu na vhẹ ni vha rhi esọ shi ekẹ nena, vhaa mholi ighọli ẹbele vhẹ vha khyiẹli onaghyie kee rhẹẹ khali eni ea bishi elemhi vhẹ. ²⁸Vha zẹ ọte ni eni ea gwhumhi vhẹ, vha pfi olema a ni eni e rhi echọ aa na vhẹ.²⁹Ọni ọ lasẹ ẹ esọ, vha gwe lieliẹ oni esọ ozeva nali. Ọgbọ ọ kha myie ẹ awulu rhue oni o kpọkẹ ma vhọ. ³⁰Rhọ ni ọni ọ mhila ẹ. Ọgbọ ọ kha rhue ẹ ẹtsẹkẹ nu mhuẹ, imhẹ li ẹẹ li khi ọ gwe lieliẹ ọli ghyiẹ.³¹Abhi u nono khi iọgbọ e kha li ẹ, li wẹ yọ. ³²O kha kyia khi eni e mhọli ighọli ẹ lọgwho li u mholi ighọli wẹ, mhi gyhi ele ni o la vhọ nẹẹ? o kha rhẹ kyili elingmobe e lia mhọli ighọli eni e mhọli ighọli wẹ. ³³U kha le khyiẹli onaghyie a ni eni e khyiẹli onaghyie a nẹẹ, mhi gyhi ele ni o la vhọ nẹẹ? rharhi khi o kha rhẹ kyili elingmobe e lia liyọ. ³⁴U kha le ngmomhi ẹtsẹkẹ a ni iọgbọ ni u yẹsẹ khi ee mẹ laa fali ẹ, mhi gyhi elele ni o rhọ nẹẹ? o kha rhẹ kyila elingmobe e li ngmomhi a ni egbe wẹ, e rhi udu shi khi e gwe la mẹ fali wẹwẹ shiọ.³⁵Ama mhọli ighọli ni ẹbele ẹ. Ngmomhi na wẹ, imhẹ kphakpha egbe ẹ shi khi e gwe lieliẹ ẹtsẹkẹ ghyi ẹ, iyọ elele ẹẹ e maa laa gba. Vha laa kyili imyi Ishinẹgba ni ọ yagha nẹẹ kwu, rharhi khi lẹẹ obọ ọli ọ lia somhelemhi eni e vha yẹsẹ ẹte ali iọgbọ ebe. ³⁶Vha mhọli ivhẹlemhi, abhi ita vhẹ ni Ishinẹgba ọ lee li mhuẹ ivhẹlemhi vhẹ eyọ.³⁷Imhẹ gwu ọgbọ ẹzọ, khi a ke gwu ẹ. Imhẹ rhi unu pfuẹchẹ ọgbọa, khi a ke li rhi unu pfuẹchẹa. Gbe kwa na iọgbọ, aa li laa gbe kwa nẹẹ.³⁸Rhọ na iọgbọ, aa li laa rhọ nẹe. Aa mhasẹ nẹẹ onaghyiẹ, onaghyie, a kpikpi ọli, a jigyhi ọ, o vọ tsua kwa, la laa mhasẹ kwu ẹ vhi ẹghẹghẹ. rharhi khi emeni u rhọ mhasẹ ni ọgbọ, la laa rhọ mhasẹ nẹẹ."³⁹Iyọ ọ ke kpe oni ita ona khase wẹ. "Ọzalo ọ mẹẹ dobẹ rhi ọzalo ọvhese a khasẹ odẹ? A kha mẹ yọ, wẹwẹ ava e laa dena kwulo elimhi, laa khi a vha laa mẹ yọ? ⁴⁰Odibo ọ mẹẹ yẹsẹ a dala ọni ọa wẹna ọli, ama ọni ọ kwegbea wẹna pfuse ọ laa liabhi ọni o wẹna ọli.⁴¹Elọ e zẹ khi waa bino ukwukwu inanalo ni o la inyọgwho ẹ vhi ẹloe, ama u waa mẹ ufolo orhẹ ni o laa ẹ vhi ẹloe. ⁴²See u ke li dobẹ a li ẹẹ li inyọgwho ẹ, "Inyogwho, dobẹ mhẹ rhue ẹ oni ukwukwu inanalo ona ẹẹ vhi ẹloe le, ni u waa rha mẹ ufolo orhẹ ni o laa ẹ vhi ẹloe. Ghyiẹ abọmẹmhẹ! kpọ rhue ufolo orhẹ ni o laa ẹ vhi ẹloe le nee, u ke mato gboo mẹ oni ukwukwu inanalo ni o la inyogwho ẹ vhi ẹloe rhue ọli vhọ le.⁴³Rharhi khi a vhaa mẹ orhẹ aghyie ni oa mọ ikpamhi ni e kẹa, wẹ khi irhẹmhi aa mẹ orhẹ ni o kẹa ni oa mọ ikpamhi ni e ti. ⁴⁴Rharhi khi orhẹ kwu ukpamhi ni oa mọ lẹ a te a yẹsẹ ọli. Iọgbọ e vha rhọ te erhẹ igba aa zẹ ikpamhi ifigyi, wẹ khi irhẹmhi a te erhẹ igba kpẹ aa zẹ ikpamhi idumhi ilonwu.⁴⁵Ọgbọ aghyie onaghyie ni o la vhi udu li ọ te aa ngme ingme aghyie vhi unu lasele, ọgbọ ọbe, onobe ni o la vhi udu li ọ te a wolọ ingme ebe a lasele. Rharhi khi emeni e bu ni ọgbọ ọ mhuẹ shi udu lẹ li ọ te a ngme ingmemhi unu lasele.⁴⁶See vhaa lia lu mhẹ Ọnọmhọli, Ọnọmhọli, ochikọyọ khi vhavha khyiẹli emena mhi ngme vhẹ? ⁴⁷Ọni ọ sheda bhale bhui mhẹ le ni ọ suọ ingmemhi mhẹ ni ọ rhẹ wẹ gbe, mhi laa ngme khasẹ vhẹ emeni abhi ọ kyia. ⁴⁸Rhẹmhi ọ liabhi ọgbọ ni ọa ma owa, ni ọ gaa vaa ekẹa limhi, limhi, gbe owa ekẹ le nya vhi ukhomhi agbhẹ ni o womhẹ womhẹ. Amẹ o kee rhuẹ, ikpho e na gasẹ oni owa, ama o vha dobẹ jigyhi ọ, rharhi khi aa ma ọli imamhi aghyie.⁴⁹Ama ọgbọ ni ọ suọ ingmemhi mhẹ ni ọ vha rhọ gbe, rhẹmhi ọ liabhi ọgbọ ni ọ ma owa nya ukhomhi ekẹ apfuẹ, a vha vaa lia gbẹkẹle ma. Abhi ikpho e ke rhọ na gasẹ oni owa oyọ, obobobọ o kwu gbe, ikposhimhi oni owa oyọ li o ke vhiemhiosue dala ituekẹkẹle ududumhi opfu li o gbe ọ.

¹Abhi Ijesu ọ ke rhọ ngme emeni ọ ngme kwu khasẹ eni iọgbọ pfuse, ọ lo elemhi Ikapanumu.²Odibo ọga ichoja ọgwho, ni ọ nwemaa nwu ọli egbe, ọọ lẹẹ gwhua onaghyie,onaghyie, ọ lẹẹ gwhu, ³Ama ọni ọga ichoja abhi ọ ke rhọ sokwu ingmemhi Ijesu, ọọ ke ghyie eni e womhẹ Ijusi ava bhuli ọli, ọọ li, khi ọ bhale a tsumhi ọni ọgamhẹ lẹ vhi egwhi le. ⁴Abhi e ke rhọ chi mama Ijesu, ee ke gaa ẹẹ lema Ijesu nali, eẹ li, "Ọ lo ni u bhẹ laa gbe ọni akanya onana na, ⁵rharhi khi ọ maa mhọli ighọli ni oni ẹvholi eyẹ ona, li ọ gwe ma oni owuka ona ni eyẹ."⁶Iyọ Ijesu ọ ke rhọ khẹ wẹ vu. Ama abhi ọ ke rhọ chi mama oni apfẹ, ọni ọga ichoja ọ ke ghyie ikpokyia ọli bhuli ọli khi ee li ẹẹ li, "Onomholi, imhẹ kpokpo egbe ẹ, rharhi khi imha tẹ ni u waa lo ufu owa mhẹ le. ⁷Rharhi ona, imha nwemaa bino egbe mhẹ khi mhi tẹ onaghyie na mhi kha bhuli ẹ le, ama lee ngme oni ingmemhi, iyọ, ọni ọgamhẹ mhẹ ọ laa ze. ⁸Rharhi khi mhẹmhẹ ọgbọ ni ọ li mholi afu ni ọa mhasẹ lẹ mhi li kyia, mhi mhọli ichoja ni e kpọkẹ na mhẹ. Mhi kha ẹẹ li ọna, kee lẹ.' rhẹmhi ọa lẹẹ, mhi ẹẹ li ọvhese 'Bhẹ, rhẹmhi ọa bhẹ, mhi ẹẹ li ọgamhẹ, khyiẹli ona,' rhẹmhi ọa khyielẹ ọli.⁹Abhi Ijesu ọ ke rhọ suọ ona, ingme ọni ọmọse oo nya ọli aloa, ọ ke rhọ lieliẹ alo bhuli agbaa ni e legba ni e rhẹẹ khali ọli, ọọ wẹ, "Mhi gwu na vhẹ, rhaa gbe egbegbe Izulẹ imha khyie mẹ ọni ọ li na mhọli irhọshiọ onana." ¹⁰Iyọ, eni iọgbọ ni ọ ghyie e liegbe bhale a vhẹ khi ọni ọgamhẹ ọ she ze.¹¹Ukwukwu ẹrhẹghẹ o ke dọsẹ a lẹ, Ijesu ọọ ke je evholi ogwho ni aa lu Inaani. Eni idibo ọli e rhọ khali ọli, gboghyiẹ iọgbọ ebubu evhese. ¹²Abhi ọ ke rhọ chi mama obunodẹ oni ẹvhue, ghee, olimhi laa tsua laa dọsẹ ena, ọmọ ọmọse ọgwho ni inyọ ọli ọ lee vyia. Ọni okpotso ọ kyili ọsọrhọ, iọgbọ ebubu ee te oni ẹvhue rhọ khali ọli. ¹³Imẹmhi ni ọ lee mẹ ọ tsolo, o nwemaa rhi obọ chi Ọnọmhọli idu e kẹkẹ ọlia rhọ khali ọli ọọ li, "Imhẹ gwe vyiẹ." ¹⁴Iyọ, ọ chi mama ayọ ọ rhi obọ chi oni akpẹchi ni a rhọ li shi, eni e tsuali e gbesọ. ọọ li, ''Nọghọdọ, mhii ẹẹ ghyiẹ, vule.'' ¹⁵Ọni ọmọ ọnọghọdọ ni ọ gwhu ọ vule deshitọ ọọ ngme. Ijesu ọ rhue ọli ni inyọ ọli.¹⁶Iyọ ulishi o lono eni iọgbọ kwu vhi egbe. Ee chichi Ishinẹgba, eẹ li ẹẹ li, "A she nwu ududumhi ọbolẹ vue vhi iteteva eyẹ" "Ishinẹgba ọ gwe pfi ẹloe fẹli iọgbọ ọli." ¹⁷Ingmemhi ọni Ijesu o ga aloekẹ Ijudea kwu ali ẹvholi ni e gasẹ ọli a lẹ.¹⁸Eni idibo Ijọni e gwu eni ingme ena khase ọli. ¹⁹Iyọ Ijọni ọ ke nyalu ikwhumhava vhi idibo ọli ghyie bhuli Ọnọmhọli khi e li eẹ li, "Ghyiẹ khi u lẹẹ bhẹ, laa khi a mẹ ọgbọ ọvhese ni eyẹ mugha kee khẹ?'' ²⁰Abhi e ke rhọ chi mama Ijesu, eni emọse eẹ li, "Ijọni ni ọa batazi iọgbọ li ọ ghyie eyẹ bhuli ẹ khi eyẹ li ẹẹ ghyiẹ, "Ghyiẹ ẹẹ khi u lẹẹ bhẹẹ, laa khi eyẹ mugha kee khi ọgbọ ọvhese.?"²¹Elemhi oni ẹrhẹghẹ ni e rhẹ mhila ọli ena ọ rhi iọgbọ ebubu zee vhi igwhuamhi wẹ ali ọtomhẹ ali eni e mhọli iyẹmhẹ ebe, shi izalo ọ gweghyie wẹ aloa. ²²Ijesu ọọ sọ wẹ vhọ, ọọ wẹ, "Vha kee liegbe je obhoni vha te bhẹẹ, vha gwu ni Ijọni emeni vha mẹ ali emeni vha suọ. Eni e zalo e she a mato, eni ikhyila e vule a kyia, eni efafe e nwu a rhẹ wẹ ze, iọgbọ ni e lesọ ea suọ esọ, eni e ghwuloa a she gwe nwuno wẹ vule liegbe bhẹ vhi agbọ, eni ea nono a she gwu oni usomhi onogbọ khasẹ wẹ. ²³Ivọsẹna khi uwi ọni ọgbọ ni ọ vha mẹ ọtuegbe rharhi mhẹmhẹ.''²⁴Abhi eni ighyiusomhi Ijọni e ke rhọ vu, Ijesu ọọ kee gwu ingme Ijọni khase oni agbaa, "Elọ vha je apata lẹẹ bino, ẹji ni akpekpe o pfi lọ? ²⁵Ama elọ vha lasele lẹẹ bino, ọgbọ ni ọ rhi ede na bunẹẹ kwhẹ lọ? Ghe, ghe, iọgbọ ni e rhi ede ni e somhote kwhẹ ni e la ọsuemhẹ apfẹ oghyie li ea nyele. ²⁶Ama elọ vha lo odẹ lẹẹ bino, ọbolẹ lọ? Ee, mhi gwu na vhẹ, ọni ọ gba dala ọbolẹ lọ.²⁷Lẹ khi ọni a kẹkẹ ingme ọ shi ekẹ, 'Ghee, mhi laa ghyie aghyiusomhi mhẹ kpalo nẹẹ, Ni ọ laa bodẹ shi nẹẹ.' ²⁸Mhi gwu na vhẹ, elemhi iọgbọ ni ikpotso e vyia kwu, a vha mẹ ọnọfu ukhomhi dala Ijọni, ama ọgbọ ni ọ kpọkẹ nẹẹ vhi aleghyie Ishinẹgba ọ fu dala Ijọni."²⁹Abhi eni iọgbọ kwu e ke rhọ suọ ona, shi emyionoga, eẹ li khi Ishinẹgba ọ maa gwẹ kyia. Ee li la iọgbọ ni Ijọni ọ rhi batizimhi na. ³⁰Ama eni Ifarisisi ali eni e mhuẹ iyẹsẹ ishi Ijusi limhi, ni ọ vha rhi ibatizimhi na, e khyie ẹgbhẹ Ishinẹgba ni egbe wẹ.³¹"Elọ mhi laa rhi iọgbọ oni ozele ona khọkhọ? See e li laa? ³²Irẹmhi e liabhi eni ivhiẹ ni e laa atuokyi bọla, ni e deshitọ ni e nyalu egbe eẹ li, 'Eye kphele ofee nẹẹ, u waa gbe ishimhi. Eye la ọrhọ, u waa vyiẹ.'³³Ijọni ni ọọ batizi ọ bhẹ, ọ vha ẹẹ le emenale wẹ khi rhẹmhi ọ da onyọ, vha ẹẹ khi "Ọ mhọli ayemhẹ okhyio. ³⁴Ọmyi Ọmọse ọ bhale ọa le, ọa da, vha ẹẹ li, 'Ghee ọ, ọ zelemhi ali ọdenyọ, ali ukpokyia emyionoga ali elingmobe li ọ kyia!' ³⁵Ama imyi ẹgbhẹ li ee rhi ẹgbhẹ a khasẹ."³⁶Oni ẹrhẹghẹ ona Ifarisisi ọgwho ọ nyalu Ijesu khi ọ bhale a nu lẹ le emenale. Iyọ abhi Ijesu ọ ke rhọ lo apfẹ ọni Ifarisisi ọgwho le, ọ ke chi mama oni itabu lẹ lee emenale. ³⁷Ghe, ghee, ọkpotso ọgwho ọ laa oni ẹvhue ni o kyila ọlingmobe. Ọọ ke suọ khi ọ bhẹ vhi elemhi apfẹ ọni Ifarisisi ọgwho lẹ le emenale, ọ ke rhue akanama itulale ni aa lu alabasita. ³⁸Ọ tomugha vhi oshimhi obhoni o kpẹ awẹ ọọ vyiẹ egbegbe evyiẹ. Ọ kwu amẹ evyiẹ ọli rhugwhu Ijesu awẹ. Ọọ rhi itsu ni e laa vhi ukhomhi shishi wẹa, ọọ pfipfi ọli awẹ, ọ kwu oni itulale shi ọ vhi eni awẹ.³⁹Abhi ọni Ifarisisi ọgwho ni ọ lu Ijesu a le emenale ọ rhọ mẹ ọli, ọọ sa vhi elemhi, ọọ li, "O kha kyila khi ọni ọmose ọna khi ọbolẹ li ọ kyila lọ, ọ kha yẹsẹ uvhali ọkpotso ọlingmobe ni ọ rhi abọ a nwuno ọli ena." ⁴⁰Ijesu ọọ ke sọ vhọ, ọọ li, "Isamọni, mhi mholi emena mhi laa gwu nẹẹ. "Ọọ li, Ọwanagbọ, ngme khasẹ mhẹ gwhe!"⁴¹Ijesu ọọ li, "Eluota ava ee lo ọgbọ ọgwho ota. Ọgwho ọ lo ọli ikpulu eva ali ukhyikhyi, ọni ọ kpọẹ, ọ lo ọli ipọmhi uye ali ishe. ⁴²Rharhi khi wẹwẹ avavava e vha mẹ ikpaghọlọ fali, ọ gaa gbe kwa na wẹwẹ ava. Elemhiyọ, mhi gyhi ọni ọ somhelemhi nẹẹ?'' ⁴³Isamọni ọ sọ li vhọ ọọ li, "Mhi sa khi ọni a gbe enebu nẹẹ kwa na lọ." Ijesu ọọ li, "U gwabha sọ vhọ."⁴⁴Ijesu ọ liẹliẹ alo bhuli ọni okpotso, ọọ li Isamọni, "U mẹ ọni ọkpotso ọna. Mhi she lo elemhi apfẹ ẹ le. U waa rhi amẹ na mhẹ kpe awẹa, ama lẹẹ, ọ she rhi amẹ evyiẹ ọli pfino mhẹ awẹa, ọ rhi itsu ọli shishi wẹa. ⁴⁵U waa pfipfi mhẹ unu, ama lẹẹ, te obọ na mhi rhọ lo apfẹ ẹ le enaa, ọ vha pfipfi mhẹ awẹ vhiẹmhia.⁴⁶U waa rhi ovhili to mhẹ ukhomhi, ama lẹẹ, ọ she rhi itulale wu mhe awẹa. ⁴⁷ena, mhi gwu nẹẹ khi lẹẹ ni ọ mhọli ingmobe nebu nẹẹ a she gwe liyọ gbe wẹ kwa nali, ọ gwe liyọ mhọli ighọli ni o gba abagwhoyọ. Ama ọni a gbe ikwukwu wẹ kwa na, ukwukwu ighọli li ọa mhọli."⁴⁸Iyọ ọ ke ẹẹ li, "Aa gbe ingmobe kwa nẹẹ." ⁴⁹Igbhogbho ni e rhọ gaa ẹẹ le emenale eẹ li egbe, "Ọgwho ọna ọ kyia shiọ ni ọ li gbe ingmobe a kwa?" ⁵⁰Ijesu ọ ke ẹẹ li ọni ọkpotso, "Irhọshiọ ẹ o she tsumhi ẹ. Rhi ọpfomhẹ kee vu.

¹Ijesu ọ kyia lẹ gasẹ ẹvholi ọdọdọda nefu ali ekeke, ọọ ngme ingmemhi onogbọ obodẹ aleghyie Ishinẹgba eni ikwhumhọgbe ali ava e rhẹ khali ọ, ²ali ikpotso egwho ni iyẹmhẹ ebe ali ighwuamhi ọdọdọda e vu egbe le. Wẹwẹ khi Imeli ni a gwe li lu Imagdalini, ni a te egbe ọli kwhu iyẹmhẹ oshila a lase, ³Ijoana, ugwhẹ Ichuza, ni ọ kyili aghyiusomhi Ẹrodu, Isuzana, ali ikpotso evhese, ni e rhi ẹtsẹkẹ kpaghyiẹ wẹ obọ.⁴Nenaa abhi iọgbọ ebubu e ke rhọ legba, gboghyiẹ iọgbọ ni e te evholi nefu ọdọdọda bhale, ọọ rhi ekpita nu wẹ ngme. ⁵"Ọgwaishemhi ọọ ke vu ọ lẹẹ kọ ẹkọmhi egwho. Abhi ọ rhẹẹ kọọ, ẹkọmhi egwo vhọ, e de kwu esọ atuodẹ, a rhi awẹ nwuno wẹ ma ekẹ, ipfele nẹ eda, e bhale a sanọ wẹ lẹ. ⁶Egwho, e dena kwu ukhomhi ekẹ agbhẹ, abhi e ke rhọ zẹẹ, e khakhaa rharhi khi e vha mẹ amẹ.⁷Iyọ, egwho e dena kwu iteteva igba, eni igba ali eni ẹkọmhi e gaa fu shele utogwho eni igba e tanọ wẹ gboloa. ⁸Ama ẹkọmhi egwho e dena kwu ukhomhi ekẹ ni o ti e mọ ikpamhi nebu e rhi nabhi asha egbhọ ishie bu dala abhi a rhọ kọ wẹ." Abhi Ijesu ọ ke rhọ ngme eni ngmemhi ena pfuase, ọọ ke sọọse lasele, ọọ li, "Ọni ọ zẹ esọ ni a rha suọ ọ rhọ suọ."⁹Eni idibo ọli e ke mhilali emeni oni ekpita o ngme. ¹⁰Ijesu ọọ ke ẹẹ wẹ, "A she rhi oni imasha na vhẹ khi vha rhọ yẹsẹ ogbhagbha ọnyaloa aleghyiele Ishinẹgba, ama iọgbọ ni e kpọẹ, ekpita laa rha wẹna khasẹ wẹ, ishọyọ, imẹmhi, e vha laa mẹ gboo, isuọmhi, e vha laa suọ limhi."¹¹Nenaa abhi oni ekpita o ngme lẹẹ khi onaa. Oni ẹkọmhi khi ingmemhi Ishinẹgba. ¹²Eni ẹkọmhi ni e dena kwu esọ odẹ wẹwẹ khi eni iọgbọ ni e suọ oni ingmemhi, ama okhyio ọ bhale a sanọ wẹwẹ vhi idu le, khi ee ke lama shi vhọ, khi e kẹ pfue vhọ le. ¹³Iyọ, eni e dena kwu ekẹ ukhomhi agbhẹ, wẹwẹ khi iọgbọ ni e suọ oni ingmemhi ni e rhi oghẹlẹ myie oni ingmemhi, ama e vha rhi ikpi nwu ekẹ pẹẹ; ukwukwu ẹrhẹghẹ, abhi ẹrhẹghẹ imhasẹfẹẹ ọ ke rhọ bhẹ e dena kwa.¹⁴Eni ẹkọmhi ni e dena kwu vhi ifu igba wẹwẹ khi iọgbọ ni e suọ oni ingmemhi, ama e kee je alo ọtomhẹ ali ọsuemhẹ ali ọvyiọlọ oni agbona, e tsese wẹ gboloa, rharhi iyọ, e vha dobẹ mọ ikpamhi ni e womhẹ. ¹⁵Ama eni ikpamhi ni e dena kwu ekẹ aghyie, wẹwẹ khi eni iọgbọ ni e zẹ idu aghyie, abhi e rhọ suọ oni ingmemhi e rhi egbegbe idu aghyie myie eni ingmemhi, e nwu wẹ ma egbe onaghyie, onaghyiẹ, li o rhọ rhi inyakwa rhirhirhi mọ egbegbe ikpamhi ni e ti.¹⁶Nenaa, a vha mẹ ọgbọ ni ọ rhi akpa rhu pfuse, ọ ke gwe ta atasa nofu gwese ọli ọa liyọ ọ tsua ọli shi ufu agodo, onchi, rhẹmhi ọ rhue ọli a shi asha ni a rhi akpa a nya, khi ishọyọ ọgbọ kwu ni ọ sheda lo le o rhi ọli a mato. ¹⁷Rharhi khi a vha mẹ emeni o gbhagbha, ni a vha laa yẹsẹ, wẹ khi emeni o laa ufu ọli ni a vha laa yẹsẹ ni o vha laa lase vhi alo ufulọ. ¹⁸Iyọ, vha zẹ ẹgbhẹ shi abhi vha li rhi esọ a shi ekẹ, rharhi khi ọni ọ kpọ mhọli, la gwe laa rhọ ma vhọ, ọni ọ vha mhọli, a gwe laa myie ọli oni ọ sa khi lẹ kpọ mhuẹ."¹⁹Iyọ inyọ Ijesu ali inyọgwho ọli ni emose e bhẹ bhuli ọli le, ama e vha dobẹ chi mama ọli rharhi oni agbaa ni o legba. ²⁰Aa ke gwu nali eẹ li, "Inyọ ẹ ali inyogwho ẹ, e mugha vhi atuodẹ, ea nono khi wẹwẹ e mẹ." ²¹Ama Ijesu ọ ke sọ vhọ ọọ wẹ, "Inyọ mhẹ ali inyọgwho mhẹ wẹwẹ khi eni e suọ ingmemhi Ishinẹgba, ni e rhẹ wẹ gbe akanya."²²Aa mẹ ogbẹlẹ ogwho ni Ijesu ali eni idibo ọli e rhọ lo elemhi ọkọ okẹ, ọọ ke ẹẹ wẹ, "Eyẹ da okẹ, je esọ opfọ ni o kpọẹ.'' Ayọ li ee te vu. ²³Ama abhi e ke rhọ gwẹ ọkọ ẹẹ lẹẹ, ovhesẹ o ke do Ijesu nwu, ududumhi akpakpa o lasele abhi akpekpe ni o ze o ke rhẹẹ pfi vhi oni ukhomhi okẹ, ọkọ wẹ o she vọ amẹ, o rhẹ wẹ shi ududmhi okhẹna.²⁴Iyọ idibo Ijesu e ke bhale a vu ọli ovhesẹ, eẹ li, "Ọga! Ọga! Eyẹ laa ghwuloaa!" Ọọ vu ovhesẹ ọ va nya oni akpekpe vhi ukhomhi oni akpakpa ni o tsua oni okẹ o pfua, ashakhasha o li tọmhi, tọmhi. ²⁵Iyọ ọọ ke ẹẹ wẹ, "Mhi gyhi irhọshiọ vhẹ?" Udu o fia wẹ elemhi, o nya we aloa onaghyie, onaghyie, ee mhila egbe wẹ, "Ọgwho ọna ọ kyia ena shiọ, ni ọ rhọ li nu okẹ ali akpekpe a ngme, e rhọ shiọ vhọ?"²⁶E bhale vhi aloekẹ Igẹrasẹnẹsi ni o la igwepfẹ Igalili. ²⁷Abhi Ijesu ọ rhọ bhẹ vhi oni aloekẹ, ọmọse ọgwho ọ rhọ te oni elemhi ẹvhuẹ bhẹẹ bhuli ọli le, ọni ọmọse ọna, ọ mhọli iyẹmhẹ ikhyio. O she tẹsẹ, ọ vha sọ edẹ, wẹ khi rhẹmhi ọ nyele vhi owa, sẹkẹnẹ atalimhi li ọ kee le la.²⁸Abhi ọ rhọ mẹ Ijesu, ọ sọọse nwu ekẹ, ọ de pfigbe ọ vhi odalo. Ọ rhi urhuli ni o ze ẹẹ li, "Elọ mhi rhẹ a li, Ijesu, Omyi Ishinẹgba ni ọ yagha nẹẹ kwu? Mhi lema ẹ, imhẹ rhi ẹchọ na mhẹ." ²⁹rhẹmhi Ijesu ọ kwhu oni ayẹmhẹ ni o vha pfuasẹ te ọni ọmọse egbe a lasele, rharhi khi o she rhue ọli sọ ite ingmẹẹ nebu. A kha rhẹ rhi igha shi ọ vhi abọ khi a gwe sọ ọli igha awẹ, khi ọgbọ nu ọli tomugha, khi e kee khẹ ọli, irhẹmhi ọọ kwu eni ighaa, oni ayẹmhẹ okhyio li o khyie kwhu ọli lo ogwa.³⁰Ijesu ọọ ke mhila ọli, "See a lu eva e?" Ọọ ke ẹẹ li, "Abuu." rharhi khi iyẹmhẹ ikhyio nebububu e she lono ọli vhi egbe. ³¹Rhẹmhi eni iyẹmhẹ ikhyio e lee lema li tsumhi khi imhẹli ọ kwhu wẹwẹ a kwu ugbilimhi ekẹ.³²Oni ẹrhẹghẹ ona, igwulu ebubu e laa ukhomhi ọkpha ẹẹ le emenale, eni iyẹmhẹ ikhyio ee ke lema ọli khi ọ lama na wẹwẹ lono eni igwulu vhi egbe. Ọọ lama na wẹ khi e lono. ³³Iyọ eni iyẹmhẹ ikhyio e ke te egbe ọni ọmọse lasele a lono eni igwulu eyọ vhi egbe, eni igwulu kwu e nanọ kpẹla ọkpha a lono elemhi okwu, okwu o gbolo wẹ.³⁴Abhi eni rhi ẹloe ee kwhu eni igwulu e rhi ẹloe mẹ emeni a mẹ, e nanọ kwa, ea gwu oni ingme khasẹ eni e laa elemhi ẹvhue ali ẹvholi ni e gase obholọ kwu. ³⁵Iọgbọ ni e suọ oni ingme oyọ kwu e lasele a rhi ẹloe mẹ emeni a mẹ, ee liyọ bhẹ bhuli Ijesu le, e bhale a vhẹ ọni ọmọse ni eni iyẹmhẹ ikhyio e te egbe lasele. Alo e ke ga dala ọli ọ sọnọ ede. ọ deshitọ vhi ẹghẹghẹ Ijesu, ulishi o kee nwu wẹ.³⁶Iyọ li eni e rhi ẹloe mẹ emeni a gaa mẹ kwu li e ke ngme khasẹ eni e kpọẹ abhi a ke li tsumhi ọni ọmọse ni iyẹmhẹ ikhyio e kpọ mhasẹ na. ³⁷Iọgbọ kwu ni e la aloekẹ Igarasenis ali eni e gasẹ ọli kwu e gwu ni Ijesu khi ọ vu wẹwẹ ekẹ le, rharhi khi ududumhi ulishi li o kee nwu wẹ. Iyọ ọ ke lo ọkọ ni ọ rhọ liegbe e je.³⁸Ọni ọmọse ni a kwhu iyẹmhẹ ikhyio vhi egbe le ọ lema Ijesu khi ọ dobẹ lẹ rhọ khali ọli vu, ama Ijesu ọ vha lama, ọọ li, ³⁹"Liegbe je apfẹ ẹ, u kaa to okhẹ ududmhi akanya ni Ishinẹgba o gbe nẹẹ." Ọni ọmọse ọ rhọ te odẹ oli vu, ọ rhi ududumhi akanya ni Ijesu ọ gbe nali tsabọ gasẹ oni aloekẹ oyọ kwu.⁴⁰Abhi Ijesu ọ ke rhọ jele, eni agbaa ni e legba e tsẹ ọli mekyia, rharhi khi li wẹwẹ kwu e kpọ mugha ẹẹ khẹ. ⁴¹Ghe, ghe, ọmọse ọgwho ni aa lu Ijarusi, ni ọ li la eni e mhasẹ vhi owuka. Ijarusi ọọ de tarhughu ni Ijesu, ọọ lema ọli khi ọ bhale vhi apfẹ lẹ, ⁴²Rharhi khi ọ mhọli ọmọ ọkpotso ogwho kpe ni ọ gbe ikpe igbe ali eva, ọ she lẹẹ gwhu. Ama abhi ọ ke rhẹ lẹẹ, oni agbaa ee mimi egbe rhẹ khali ọ.⁴³Ọkpotso ogwho ọọ la ayọ ni ọ she kwu ọlia vhi egbe elemhi ikpe igbe ali eva ọ she gaa pfuẹchẹ ikpaghọlọ ni ọ mhuẹ kwua shi abọ ebo, ama a vha mẹ ọni ọ dobẹ fẹli ọli vhi oni igwhuamhi. ⁴⁴Ọ rhọ te Ijesu oshimhi rhi obọ chi ọli esọ ode, ayayayo ọlia ni e kwu ọli vhi egbe e pfa.⁴⁵Ijesu ọọ li, "Ọgwho ọ rhi obọ chi mhẹ eyọ?" Abhi wẹwẹ kwu e ke rhọ ẹẹ chaa, Ipitẹ ọọ li, "Ọga, agbaa ni o rhọ gba ena ni e chi a nwu ẹ ni e rhi egbe a gbe ẹ ena?" ⁴⁶Ama Ijesu ọọ li, " Ọgbọ ọgwho ọ she rhi obọ chi mhẹ, rharhi khi mhi yẹsẹ khi izemhi o she lase mhẹ vhi egbe le."⁴⁷Abhi oni okpotso ọ ke rhọ mẹ khi lẹ vha dobẹ gwe lẹẹ rhi emeni lẹẹ li gbhagbha, ọọ bhale ọọ kphele jẹjẹjẹ. Ọ de vhesẹshi vhi odalo Ijesu, ọ ke ngme vhi ukpẹloe agbọ kwu ni e rhọ gba emeni e zẹ ni lẹ rhọ rhi obọ chi ọli ali abhi lẹ ke li ze ayayayọ. ⁴⁸Iyọ ọọ ke ẹẹ li "Omyi mhẹ ni ọkpotso, irhọshiọ ẹ o she rhẹ ze. Rhi ọpfọmhẹ kee lẹẹ."⁴⁹Abhi ọ rhọ khyie le ngme, ọgbọ ọ te apfẹ ọni oa mhasẹ vhi owuka bhẹ, ọọ li, "Omyi ẹ ni ọmoshi ọ she gwhu. I mhẹ gwe kphakpha egbe ẹ Ọwẹnagbọ." ⁵⁰Ama abhi Ijesu ọ ke rhọ liyọ suọ, ọọ sọ vhọ, ọọ li, "Imhẹ nu ulishi. Lee rhọ shi vhọ, a la myie ọli pfuese."⁵¹Abhi ọ ke rho bhẹ vhi oni apfẹ, ọ vha dobẹ ọgbọ nu ọli lo rhọ khali ọli, sẹkẹnẹ Ipitẹ, Ijọni ali Ijamhisi, ali ita ọni ọmọshi, ali inyọ ọli. ⁵²Oni ẹrhẹghẹ iọgbọ kwu ni e la ekẹ ayọ ẹẹ vyiẹ na li gbii, ama ọọ wẹ, "Imhẹ vha gwe vyiẹ. Ọ vha gwhu, ama rhẹmhi ọ lee vhesẹshi." ⁵³Ama e gyia lia kpaa, rharhi khi wẹwẹ e yẹsẹ khi ọni ọmọ ọ she gwhu.⁵⁴Ama lẹẹ, ọ nwu ọni omoshi obọ, ọ sọse lasele, ọọ li, "Ọmọ, vule." ⁵⁵Ayẹmhẹ ọli o liegbe bhale, ọ chi ekẹ vule ayayayọ. Ọọ khi a rhi emenale nali le. ⁵⁶Ọọ nyalu ita ọli ali inyọ ọli aloa, ama ọ kpe ẹka nya wẹ ukhomhi khi imhẹli e gwu ni ọgbọkhọgbọ emeni a mẹ.

¹Ọọ lu eni ogbe ali ava chi mama egbe, ọ rhi izemhi ali afu na wẹ obodẹ iyẹmhẹ ikhyio kwu ali irhue eni e vha ze igwhuamhi egbea. ²Ọọ ghyie wẹ lo odẹ khi e kaa rhi ingmemhi aleghyiele Ishinẹgba tsabọ e rhi eni es gwhua ze.³Ọọ wẹ "Imhẹ vha rhue ẹtsẹkẹ mhọ obọ asha ni vha lẹẹ ena, wẹ khi orhẹ ni a rha tuekẹ, wẹ khi ẹkwẹ-ni a rhi ikpaghọ a shi, wẹ khi ukphakpha, wẹ khi ukpaghọ, wẹ khi ode ni a sọ. ⁴Apfẹ ni vha sheda lo, vha la ayọ apfishi ni vha rhọ laa vu obholọ le.⁵Eni e vha ke kpẹsẹ abọ myie vhẹ, vha khaa vu oni ẹvhue oyọ le, vha kpishi idabu ni e la vhẹ ẹkoawẹ kwu ekẹ khi o myie ọtsẹ gbe wẹ." ⁶Iyọ vha vu khi vha lono eni ẹvholi ekeke, kee ngme ingmemhi ogbọ aghyie vha rhi iọgbọ aa ze ashakhasha kwu.⁷Oni ẹrhẹghẹ ona Ẹrọdu, ni oghyie, ọ sokwu emeni ẹẹ mẹ egbe e vha gwee sheshe ọ, rharhi khi iọgbọ egwho ẹẹ khi Ijọni ni ọa Batazi iọgbọ ọ she te egwhi vule. ⁸Egwho, eẹ li khi Elaja ọ she bhale a rhi egbe khasẹ, egwho ẹẹ li khi ukwhumhọgwho elemhi eni ebolẹ nẹlẹ ọ she gwe vue liegbe bhẹ vhi agbọ. ⁹Ẹrọdu ọo li, "Mhii she khyi Ijọni ukhomhia, ama ọgwho mhi ke li naa suọ obodẹ ọli ena? Ẹrọdu ọ kee nyakwa khi lẹ mẹ Ijesu.¹⁰Abhi eni ọ ghyie lo odẹ e ke rhọ bhale, e gwu nali emeni e gaa khyiẹlẹ kwu. Ọọ wolọ wẹ mẹ egbe ẹẹ je ẹvhue ọgwho ni a lu Ibẹtisaida. ¹¹Ama eni iogbọ nebububu e ke rhọ suọ ona e rhọ khali ọli vu, ọọ rhue wẹ gboghyiẹ egbẹ ọ, ọ ngme ingmemhi Ishinẹgba khasẹ we, eni e gwhua ni e nono izemhi, ọ rhẹ wẹ ze.¹²Ogbode o kee lee, eni ikwhumhọ ogbe ali ava e bhuli ọli ẹẹ li, "Wẹ li eni iọgbọ ena khi e via khi e je ẹvholi ni e chi mama egbọana khi e kaa nono asha ni e kwu a shi ali asha ni e la laa le emenale, rharhi khi ekẹ apata li eyẹ la ena." ¹³Ama ọọ ke ẹẹ wẹ, "Vha rhi ẹtsẹkẹ na wẹ le. "eẹ li, "Eyẹ vha mhọli dọsẹ irhu ikhakpha ishie ali ifẹli eva, sẹkẹnẹ khi eyẹ vu a dẹ emenale ghyi eni iọgbọ ena le." ¹⁴Eni iọgbọ ni e la ayọ e kyili agbẹlẹ igbhọ igbe asha ishie. ọọ li idibo ọli, "Vha nwuno wẹ ufuabọ igbhọ eva igbigbigbe shitọ,''¹⁵Ee liyọ khyiẹlẹ, eni iọgbọ kwu e denashitọ. ¹⁶Ọ rhue eni irhu ikphakpha ishie ali eni ifeli eva, ọ yasẹ alo ekẹ je eda, ọ zọte na wẹ, ọ kwẹkwẹ wẹ, ọ rhue wẹ ni eni idibo ọli khi e kemhi ni eni iọgbọ ebubu ni e shitọ. ¹⁷Wẹwẹ kwu e le e kwhe, eni ikhyikhyi ni e le kpọẹ e sanọ wẹ ekẹ, vọsẹ igwhugwhu igbe ali eva.¹⁸Abhi lọgwho ọ ke rhẹ pfi olema, eni idibo ọli e nu ọ la ayọ, ọọ ke mhila wẹ ogbọ ọọ wẹ, ọgwho iọgbọ ebubu e mẹẹ khi mhi kyia?" ¹⁹Ee sọ vhọ eẹ li, ''Ijọni ni ọa batazi agbọ, ama ẹgwho eẹ li Ẹlaja, evhese eẹ li ebolẹ nẹlẹ li ee gwe te egwhi vule."²⁰Ọọ ke ẹẹ wẹ "Ama ọgwho vha ke ẹẹ khi mhi kyia vhẹvhẹ obọ vhẹ?'' Ipitẹ ọọ li, "Ọni Ikiristi ni ọ te obọ Ishinẹgba bhale" ²¹Ama ọọ kpe ẹka nya wẹ vhi ukhomhi, Ijesu ọọ khi imhẹli e gwu khasẹ ọgbọkhọgbọ pẹẹ, ²²Omyi Ọmọse ọ nwemaa mẹchọ obodẹ ẹtsẹkẹ nebu shi enejọ ali eni e kpeda ugamhi ali ikowe e laa khyie ọ, e gbe ọlia, ogbẹlẹ ozesẹ ọ gwe vule bhẹ vhi agbọ.²³Ọọ wẹ, "Ọni ọ laa rhọ khẹ mhẹ, ọ nwemaa khyie egbe ọli, ọ pfi obọ rhue ọgbagala ọli ọ rha khẹ mhẹ ogbẹlẹ kwu. ²⁴Ọni ọ dua khi lẹ kẹ tsumhi ayẹmhe lẹẹ, rhẹmhi ọa wasẹ ọlia, ama ọni ọ laa wasẹ ayemhe ọlia rharhi mhẹmhẹ ọ laa tsumhi ọ. ²⁵Mhi gyhi elele ni ọgbọ ọ laa mhuẹ, khi ọ rhọ mhọli oni agbọ ona kwu vhi elele, ama ọ wasẹ ayẹmhẹ, ọlia?²⁶Ọni ọ sheda ẹẹ khi omama mhẹ ali ingme mhẹ li ọa nwu lẹ, Ọmyi Omọse ọ li laa nu omama ọli ni ọ bhale vhi elemhi ikiki ọli, ali ikiki ọni Ita ali uwi ighyiukọ. ²⁷Ama mhi gwu egbegbingme khasẹ vhẹ, a mẹ egwho vhi elemhi vhẹ ni e tomugha ana ena, ni e vha laa bino egwhuli fẹẹ rhili apfishi neni e mẹ eghyiele Ishinẹgba"²⁸Ijesu ọ ngme ena, ogbẹlẹ ozelele ọ rhue Ipitẹ ali Ijọni ali Ijemhisi mẹ egbe lẹẹ pfi olema vhi ukhomhi ọkpha. ²⁹Abhi ọ ke rhẹẹ pfi olema orhẹ alo ọli e nwu lieliẹ, ede ni ọ sọ ee pfuasẹ pẹpẹpẹ.³⁰Ghe, ghe, emose ava e nu ọli neta! wẹwẹ khi Imozisi ali Ẹlaja. ³¹Ikiki wẹ oo gẹẹ. ee ngme obodẹ egwhuli ọli, ni o kyila khi ọ she le lẹẹ je Ijerusalemu rhọ tsẹ.³²Oni ẹrhẹghẹ ona Ipitẹ ali eni e kpọẹ ni e nu ọli la ovhesẹ o she gaa nwuno wẹ. ama abhi e ke rhọ gaa vu ovhesẹ, e mẹ ikiki ọli ali eni emọse ava khi e nu ọli tomugha. ³³Abhi e ke rhọ te asha ni Ijesu ọ la ẹẹ vu, Ipitẹ ọ ke ẹẹ li "Ọga, o ti khi eyẹ kha gbatsẹ shi ana eyẹ tọnọ ikwu esẹ. eyẹ kha khyiẹlẹ ogwho nẹẹ, ogwho uwi Imozisi, oni o kpọẹ uwi Ẹlaja.'' Ọ vha yẹsẹ emeni ọ rhọ ngme.³⁴Ọ kee le lee ngme eni ingme ena, atutu o bhale a gwese we; e kee nulishi abhi atutu o li pfi gasẹ wẹ. ³⁵Urhuli o te oni atutu ngme laselẹ, ọọ li, 'Ọna khi Omyi mhẹ ni ọmọse na mhi zẹ vha rhi esọ shi ọli vhi ekẹ.'' ³⁶abhi oni urhuli o ke rhọ ngme pfusẹ, o bhale a kpọ Ijesu lọgwho le shi ayọ. E pfiesọa kpekpee, eni egbẹlẹ eyọ e vha ngme khasẹ ọgbọkhọgbọ emeni e me.³⁷Ogbẹlẹ ozeva, ni e ke rhọ te oni ukhomhi ọkpha kpiale, ebubu iọgbọ e rhẹ khali ọ. ³⁸A ke ẹẹ khi ẹẹ fẹẹ, ọmọse ọ te oni agbaa sọse ọọ li, ''Ọwẹnagbọ, mhi lema ẹ khi u binọ omyi mhẹ ni ọmọse, rharhi khi lọgwho khi ọmọ ọgwho na mhi vyia. ³⁹U waa mẹ nena, ayẹmhe li ọa nwu ọ, udomhija ọọ vyiẹ nwu ekẹ, idukpakpa ọ nwu ọ, ọọ fu ofulu vhi unu. O maa nwunu neni o vu ọ vhi egbe le, rhẹmhi ọ gaa mẹ khi ọ kwuọtse vhi egbe onaghyie, onaghyie, ni o liyọ nwu ọ pfuse. ⁴⁰Mhii lema eni idibo ẹ khi e kwhu ọ lẹ vhi egbe a lase, ama e vha dobe.'⁴¹Ijesu ọọ sọ vhọ ọọ li, 'Vhẹvhẹ ozele uvhaza ali umhamyieasuọ, ẹrhẹghẹ ni ogwho mhi laa nu vhẹ laa rhamhi na mhi laa nu vhẹ rhi egbe myie rhamhi? Rhue omyi ẹ bhẹ vhi ana.'' ⁴²Abhi ọni ọmọ ọ kee li bhẹ, ọni ayẹmhẹ obe o pfi ọli gbe oo jigyhi ọli zezeze. Ama Ijesu ọ kpha dese oni ayẹmhẹ ni o vha pfuasẹ, ọ rhi ọni ọmọ ze, ọ nwu ọli obọ na ita ọli.⁴³Oo gaa nya wẹwẹ kwu aloa obodẹ ifumhi Ishinẹgba. Ama abhi eni ikanya ena kwu e ke khyie li nya wẹ aloa, ọọ li eni idibo ọli, ⁴⁴''Vha dobẹ eni ingme ena lo vhẹ esọ limhi, limhi, rharhi khi ọni Omyi Ọmọse a laa rhọ ọli ni iogbọ nwu.'' ⁴⁵Ama e vha suọ vyie abhi ọ rhi oni ingme ona ngme, rharhi khi rhẹmhi a rhi ọli gbhagbha wẹ, li ee vha rhọ suọ ọli vyie. Ulishi o lẹẹ nwu wẹ khi e rhọ mhila ọli ogbọ emeni oni ingme o ngme.⁴⁶Ikhẹnu o ke bhale vhi iteteva wẹ obodẹ ọnọfu nẹẹ elemhi wẹ. ⁴⁷Ama abhi Ijesu ọ ke rhọ yẹsẹ emeni ee sa vhi udu, ọ rhue ukwukwu ọmọ shi igwuepfẹ, ⁴⁸Ọ ke ẹẹ wẹ ''A kha mẹ ọgbọ ni ọ sheda laa kpẹsẹ abọ myie ukwukwu ọmọ ọnana elemhi eva mhẹ, mhẹmhẹ li ọ kpẹsẹ abọ myie abagwhoyọ, ọni ọ kpẹsẹ abọ myie mhẹ, ọni ọ ghyie mhẹ li ọ li kpẹsẹ abọ myie. Rharhi khi ọni ọ shẹ nẹẹ vhi iteteva vhẹ lẹ khi ọnọfu nẹẹ kwu.''⁴⁹Ijoni ọ sọ vhọ ọọ li, ''Ọga, eyẹ mẹ ọgbọ ọgwho ni ọ rhi eva ẹ kwhu ikhyio kwa, eyẹ kpha dese ọli, Rharhi khi ọ vha rha khali eyẹ.'' ⁵⁰Ama Ijesu ọ ke ẹẹ wẹ ''Imhẹ vha kpha dese ọli, rharhi khi ọni ọ vhaa zẹ okwhẹ kpẹsẹ mhẹ uwẹ mhẹ li ọ kyia.''⁵¹Abhi eni egbẹlẹ e ke rhọ chi bhẹ ni ọ rhọ lẹẹ shele je eda, ọ lee nwu alo je Ijerusalemu. ⁵²Ọ ghyie ighyiusomhi kpalo, ee ke je ẹvholi Isamaria ni okeke a nwuno egbe shi nali. ⁵³Ama iogbọ ni e la ayọ e vha kpẹsẹ abọ myie ọli, rharhi khi ọ she lee nwu alo te Ijerusalemu.⁵⁴Abhi Ijemhisi ali Ijọni ni idibo ọli e rhọ liyọ mẹ enaa, eẹ li, ''Ọnọmhọli, u nono khi eyẹ lu erhẹ te eda kpiale a pfuse wẹa?'' ⁵⁵Ama khi ọọ ke lieliẹ alo ọ kpha dese wẹ. ⁵⁶Li e ke rhọ vuu je evholi ovhese.⁵⁷Abhi e ke rhẹ lẹẹ, ọgbọ ọgwho ọọ wẹ, ''Mhi rha khali ẹ obhobho nu waa je kwu.'' ⁵⁸Ijesu ọọ li,'' inyaka e mhọli esẹẹ, ipfele nẹẹ eda e mholi ikolo, ama Omyi Ọmose ọ vha mholi asha ni ọ de ukhomhi a gbee.''⁵⁹Ọ ke gwe ẹẹ li ọgbọ ovhese, ''Rhọ khẹ mhẹ, ''Ama ọọ li,''Onomholi, dobẹ mhẹ kyiatsolo a rhi ita mhẹ tọ nee.'' ⁶⁰Ama ọ ke ẹẹ li, ''Dobẹ eni e mhọ olimhi rhi olimhi wẹ tọ, ama khi ghyiẹ vuu khi u ke lẹẹ ngme ingmemhi aleghyie Ishinẹgba kyia, kyia vhi ashakhasha kwu.''⁶¹Ọgbọ ọvhese abagwhoyọ ọọ li,''Mhi rha khali e, Ọnọmhọli, ama kpọ dobẹ mhẹ a tsẹ apfẹ mhẹ okyila.'' ⁶²Ama Ijesu ọọ li, ''A vha mẹ ọgbọ, ni ọ rhi obọ nya ẹgba ni ọ pfialo oshimhi ni ọ tẹ shi aleghyie Ishinẹgba.''

¹A ke mẹ ena pfuse, li Ọnọmhọli ọ rhọ zẹ iogbọ egbhọ esẹ ikpẹ igbe evhese, ọ ghyie wẹ kwa ikwhumhi avavava kpalo je ẹvhue nabhi ọọ nono khi lẹẹ je. ²Ọọ wẹ ''Eni ẹkọmhi e buu, ama khi eni ea khyiẹsẹ ee shẹẹ. elemhiyọ vha nyanya lema Ọnọmhọli eni ẹkọmhi, khi ọ rhi egbe ikanya bhẹ vhi eni ẹkọmhi.³Vha kee lẹẹ. ghee, rhẹmhi ghyie vhẹ kwa abhi isumha kwu ifuabọ idumhi. ⁴Imhẹ vha tsua ọtsọtsọ ukpaghọlọ, wẹ khi oni a rha ye asha, wẹ khi ekwẹ ni a rha shi awẹ, abagwhoyọ imhẹ vha tsẹ ọgbọkhọgbọ vhi atuode.⁵Apfẹ ni vha laa lo, vha kyiatsolo ẹẹ li, 'Ọpfọmhẹ o la oni apfẹ ona. ⁶Ọgbọ ọpfọmhe ọ kha la ayọ, ọpfọmhẹ vhẹ o nu ọli la, a ke mẹ ọgbọ ọpfọmhẹ vhi ayọ, opfomhẹ o liegbe bhuli vhẹ. ⁷Oni apfẹ oyọ, emeni a laa rhọ na vhẹ vha rhọ le vha rhọ da, rharhi khi ogbakanya ọ tẹ ni a fẹli ọta. Imhẹ vha dada apfẹ iọgbọ.⁸Ẹvhue ni vha lo, khi e kpẹsẹ abọ myie vhẹ, vha le emeni a laa rhọ na vhe, ⁹Iyọ vha rhi eni ea gwhua ni e la ayọ ze. Vha li ẹẹ wẹ, 'Aleghyie Ishinẹgba o she chi mama vhẹ'¹⁰Ama ẹvhue ni vha laa lo kwu, ni e vha kpẹsẹ abọ myie vhẹ, vha lasele vhi ifuodẹ vha li ẹẹ li, ¹¹''Idabu ni e la oni ẹvholi vhẹ ona ni e zuno manọ eyẹ vhi ekwẹ eyẹ kpishi wẹ kwu rhugwhu vhẹ! Ama vha yẹsẹ ona, khi aleghyie Ishinẹgba o she chi bhẹ.' ¹²Mhi ngme khasẹ vhẹ ogbẹlẹ igwẹzọ o la to Isodọmu egbe dala oni evhue oyọ.¹³Ẹpfua khi uwẹ vhẹ, Ikorazini Epfua khi uwẹ vhẹ, Ibetisada! O kha kyia khi ikpokpomhi ikanya ni a gbe na vhẹ a gbe eyọyọ ni Itaya ali Isidọni lọọ, ee kha nwegbe pfi deno o tẹsẹ, e rhi ede ni a kyiọlọkyiọlọ denashito vhi enwẹ. ¹⁴Ama khi o laa somhi ltaya ali Isidọni egbe da vhẹ ogbẹlẹ igwẹzo. ¹⁵Ghyiẹ, Ikapanọmu, rhẹmhi u sa khi a la laa chi ẹ shele je idane? obho, a laa chi ẹ kpiale je owerhe.¹⁶Ọni ọ rhi esọ shi vhẹ vhi ekẹ, mhẹmhẹ li ọ rhi esọ shi vhọ, ọni ọ ke khyie mhẹ ọni ọ ghyie mhẹ li ọ khyie.''¹⁷Eni iọgbọ egbhọ ese ikpamhi igbe e rhi oghẹlẹ liegbe bhale, eẹ li, Ọnomholi, lishi iyemhẹ ebe rhẹmhi e li nwu nyẹsẹ ni eyẹ elemhi eva ẹ.'' ¹⁸Ijesu ọọ ke ẹẹ wẹ, ''Mhii lẹẹ mẹ okhyio ọ te eda dee pfile abhi inyamhinya. ¹⁹Ghe, ghe, mhi she rhi izemhi na vhẹ khi vha rhi awẹ kee nwuno enyẹ ali ikpi, ali izemhi ẹbele kwu, a vha laa mẹ emeni e dobẹ laa kwali vhẹ utse. ²⁰Ama imhẹ vha ghẹlẹ shi ona lọgwho, khi eni iyẹmhẹ ebe e nyẹsẹ na vhẹ, ama vha nwemaa ghẹlẹ khi a she kẹkẹ eva vhẹ shi aleghyie Ishinẹgba.''²¹Oni ẹrhẹghẹ ni a ngme na ọọ ghẹlẹ ududumhi oghẹlẹ vhi elemhi Ayẹmhẹ ni o Pfuase, ọọ li, "Mhi chichi ẹ o Ita, Ọnọmholi ekẹ ali eda, rharhi khi u rhi eni ẹtsekẹ ena gbhagbha ni eni e mhuẹ iyẹsẹ ali etsẹgbhẹ, u gweghyie wẹa khasẹ eni e vha ye owẹna, abhi ikwukwu ivhiẹ. Ee, Ita, iyọ li o li ti ẹ vhi ẹloe."²²"Ita mhẹ ọ she rhi ẹtsẹkẹ kwu mhọli mhẹ obọ, a vha mẹ ọgbọ ni ọ yẹsẹ ọni Ọmọ kyila sẹkẹnẹ ọni Ita, wẹ khi rhẹmhi a mẹ ọni ọ yẹsẹ ọni Ita ọ kyila sẹkẹnẹ ọni Ọmọ, abagwhoyọ ọni o ghọli ọni Ọmọ li ọ rha khasẹ."²³Ọ lieliẹ alo bhuli eni idibo, ọ bẹna ẹẹ wẹ, "Izọtena khi uwẹ iọgbọ ni e mẹ emeni vhaa mẹẹ. ²⁴Mhi gwu na vhẹ, ebolẹ nebu ali eni ighyie ee nono khi wẹwẹ e mẹ eni ẹtsẹkẹ ni vha mẹ ena, ama e vha mẹ wẹ, ee nono khi e suọ emeni vha suọ ena, e vha suọ wẹ."²⁵A kee ẹẹ khi ẹẹ fẹẹ, ọwẹnagbọ ishi Ijusi ọgwho ọ ke vule ọọ nwu ọli fẹẹ, ọọ li, "Ọwẹnagbọ, e lọ mhii nwemaa laa khyiẹlẹ na mhi rhọ laa le agbọ ẹlẹnagbọagbọ vhi ukwhu?" ²⁶Ijesu ọọ li, 'Elọ a kẹkẹ shi oni ushi? See u li zẹ ọli?" ²⁷Ọ kee sọ vhọ, ọọ li, "U nwemaa rhi ukpakomhi ẹ kwu a mhọli ighọli Ishinẹgba, ali avhagwhu ẹ kwu, ali izemhi ẹ kwu, ali udu ẹ kwu, u gwe liyọ mholi ighọli ọgbọ nabhi ghyiẹ abhi u li mhọli ighọli egbe ẹ.'' ²⁸Ijesu ọọ li, "U gwabha sọ vhọ. Le ke liyọ ẹẹ khyiẹlẹ abhi u le li ngme ọli ena, u laa nyele."²⁹Ama ọni ọwẹnagbọ, ọ khyiele nono khi lẹ kwhẹ pfuase, ọọ li Ijesu, "Ọgwho khi ọzeva mhẹ?" ³⁰Ijesu ọ sọ vhọ ọọ li, "Ọni ọmọse ọgwho ọọ te Ijerusalemu kpẹla ẹẹ kwu Ijeriko. Ọ de lo ifuabọ igyiatọ, ni e myiono ọli emeni ọ mhọli kwu, e gbe ọli, e kẹsẹ ukwukwu ayẹmhẹ nali.³¹Abhi ọgbọ ọ li dọsẹ la lẹ ọni ọ kpeda ugamhi ọgwho ọ li te oni odẹ kpiale, li ọ ke rhọ mẹ ọni ọmọsẹ, ọ rhọ te opfọni okpọẹ dọsẹ a lẹ. ³²Abagwhoyọ, li ọgbọ Ilẹvati ọgwho ọ gwe li mẹ ọ, ọ rhọ te opfọni okpọẹ dọsẹ a lẹ.³³Ama ọnyi Isameria ọgwho, ọọ lẹẹ asha, ọ bhale a vhẹ ọli. abhi ọ ke rhọ mẹ ọ, elemhi ọli o vhala ọli, ³⁴Ọ bhuli ọli, ọ gbanọ ọli eni ivyiolo, ọ kwu ovhili ali onyọ shi ọli vhi eni ivyiolo. Ọ nwu ọli nya ukhomhi akachi ni ọ nya, ọ rhi ọli bhẹ vhi owa, ọ rhi ẹloe kwhu ọli. ³⁵Ogbẹlẹ ozeva ọ rhue ikpẹva lasele, ọ rhue ọli ni ọni ọ mholi owa ni a lẹẹ fẹli iọgbọ, ọọ li, "Rhi ẹloe kwhu ọli ememeni u ke gwe laa pfuẹchẹa shi ọ vhi egbe, mhi kha jele, mhi laa fali ẹ wẹwẹ."³⁶Elemhi eni ikwhumhi asẹ ena Ọgwho u sa khi ọ kyili ọzeva ọni ọ de lo abọ ighyiato?" ³⁷Ọni ọwenagbọ ọọ li, "Ọni ọ mhọli ivhẹlemhi kwu ọli eyọ lọ." Ijesu ọọ li, "Vu khi u liyọ a khyiẹlẹ rhọ khali ọgbọ nu dobẹ a kpaghyiẹ."³⁸Nenaa, abhi e ke rhẹ lẹẹ, ọ lo oni evholi okeke ogwho, Ọkpotso ọgwho ni ẹẹ lu Imata ọ tsẹ ọli mekyia ọ rhọ je elemhi apfẹ ọli. ³⁹Ọ mhọli inyọgwho ọkpotso ni ẹẹ lu Imeli, ni ọ deshito ẹghẹghẹli Ijesu ọ rhi esọ shi ingmemhi ọli.⁴⁰Ama Imata ọ lee sa alo gwhe emenale ni ọọ nye. Ọọ ke bhẹ bhuli Ijesu le, ọọ li, "Ọnọmhọli, u waa gaa pfi egboe shi vhọ ni inyọgwho mhẹ ọ rhọ dobẹ mhẹmhẹ ọgwho a nye emenale nẹnaa?" Iyọ gwu nali khi ọ li kpaghyie mhẹ." ⁴¹Ama Ọnọmhọli ọ sọ ọli vhọ ọọ li, "Imata, Imata, ẹtsẹkẹ nebu e maa nwu ẹ egbe ikhyiẹlẹ, ⁴²Ama ẹtsẹkẹ ogwho ni o nwemaa vọ ẹloe. Imeli ọ she zẹ ọli, ni a vha laa myie ọli rhue gwhe."

¹Abhi Ijesu ọ ke rhọ la asha ogwho pfi olema, okwhumhọgwho vhi eni idibo ọli, ọọ li, "Ọnọmhọli, wẹna eyẹ abhi a lia pfi olema nabhi Ijọni ọ li wẹna idibo ọli."²Ijesu ọ ke ẹẹ wẹ, "Vha khaa lema vha kee li ẹẹ li, 'Ita, ipfuasẹ o kyili uwi eva ẹ. Aleghyie o bhale.³Rhi emanale ogbẹlẹ ni eyẹ. ⁴Yele ingmobea ni eyẹ, abhi eyẹ li yelea ni eni e lue ni eyẹ. Imhe rhi eyẹ a lo imhasẹ fẹẹ."⁵Ijesu ọ ke ẹẹ wẹ, "Mhi gyhi ọni ọ laa mhọli ukpokyia, ni ọ laa bhuli ọli ẹlẹogbokheva, ọọ li, 'Ukpokyia mhẹ, ngmomhi irhu ikphakpha esẹ na mhẹ, ⁶Rharhi khi ukpokyia mhẹ ọ lee te odẹ nono mhẹ bhẹ nena, imha mhọli ẹtsẹkẹ pẹẹ na mhi rhọ nali a le nena. ⁷Ọni ọ la elemhi owa eyọ ọ ke sọ vhọ, ọọ li, 'Imhẹ kpokpo mhẹ. A she pfi okpẹ vhi odẹ, mhẹmhẹ ali imyi mhẹ eyẹ she a vhesẹshi vhi ẹtẹtẹ. Imha dobẹ vule laa rhi ukphakpha nẹẹ nena.' ⁸Mhi ngme khasẹ vhe, o kha rhẹ kyia khi ọ vha kha kpọ vule a rhue oni ukphakpha nali rharhi khi u kyili ukpokyia ọli, ọ laa te rharhi omama ali okpokpo vule laa rhue ememeni u nono nẹẹ.⁹Mhi gwu na vhẹ, vha mhila, a laa rhọ na vhẹ; vha nono, vha laa mẹ; vha kphele obọ odẹ, a laa kweghyiea na vhẹ. ¹⁰Ọgbọ ni ọ mhila laa rha naa; Ọgbọ ni ọ nono, li ọa mẹ; ọgbọ ni ọ kphele odẹ, laa gweghyie a naa.¹¹elemhi vhẹ abhi ita ni omyi ọli ni ọmọse ọa mhila afẹ ọ nwu ẹnyẹ nali? ¹²Ọa liyọ ọ mhila ọli ẹkẹ, u nwu okpi nali? ¹³Elemhiyọ, vhẹvhẹ ni vha kyili elingmobe vha kha ke yẹsẹ isomhopfa enana ni e ti rha na imyi vhẹ, Ita vhẹ ni ọ la aleghyie li ọ vha ke li laa rhi Ayẹmhẹ ni o Pfuase ni eni e mhila ọli?¹⁴Idegbe Ijesu ọọ kwhu ayẹmhẹ okhyio te egbe ọgbọ lasele, ayẹmhẹ udungme. Abhi oni ayẹmhẹ o ke rhọ lasele, ọni ọmọse ni ọ kyili udungme ọọ kee ngme. O nya oni agbaa ni e rhọ gba ayọ aloa. ¹⁵Ama iọgbọ egwho vhọ eẹ li, "Izemhi oghyie egbhọ, li ọ rha kwhu ikhyio kwa.¹⁶Egwho e nwu ọli fẹẹ eẹ li ọ rhi ishẹfẹ aleghyie oweda khasẹ wẹwẹ. ¹⁷Ama Ijesu ọ yẹsẹ emeni e la wẹ vhi isamhi ọ rhẹ wẹ, "Ẹghyiele o kha kemhi egbe ọli, o ke kyia khi apfẹ li o kemhi egbe ọli shi asha eva rhẹmhi ọa de.¹⁸O kha kyia khi Okhyio ọ kemhi egbe ọli, see eghyiele ọli o ke lia mugha? Rharhi khi vha ẹẹ li khi ayẹmhẹ ọghyie egbhọ mhi rha kwhu ikhyio kwa. ¹⁹O kha kyia khi ayẹmhẹ oghyie egbhọ mhi rhọ kwhu ikhyio a kwa, ọgwho eni e rha khẹ vhẹ e ke rhọ li kwhu wẹ a kwa? Rharhi ona, wẹwẹ e la sọ vhẹ unu ezọ. ²⁰Ama o kha kyila khi ukpobọ Ishinẹgba lẹ mhi rhọ kwhu ikhyio a kwa, aleghyie Ishinẹgba o she bhẹ bhuli vhẹ le shiọ.²¹Ijesu ọ khyiele ngme, ''Ọmọse ni ọ ze ni ọ mhọli egbegbe ọkhapfẹ ni ọ khẹ apfẹ a nali, emeni ọ mhue kwu rhẹmhi e pfue okhẹna le, ²²Ama ọmọse ni ọ ze dala ọli ọ ke sha ọli khi ọ dobẹ nwu ọli lẹ, rhẹmhi ọni ọmọse ni ọ ze nẹẹ eyọ ọa myiono ọli itsua okwhẹ, ọ chino ọni ọmọse emeni ọ mhọli kwu. ²³Ọni ọ vha nu mhe la, ẹbele mhe li ọ kyia, abagwhoyọ ọni ọ vha nu mhẹ a koko rhẹmhi ọ myie mhẹ zaghaa kwa.²⁴Ayẹmhẹ ni o vha pfuasẹ o kha vu ọgbọ egbe le, rhẹmhi ọ rhaa te aloekẹ ekhakha oa nono ivhiemhia. Ọ vha ke mẹ, ọọ li, 'Mhi gwe lielie egbe a je apfẹ na mhi kpọ te vu. ²⁵Ọ kha ke bhale, ọ mẹ khi ọ liabhi owa ni a pfiomhia kpiẹkpiẹ, khi o khyiẹ li gboo. ²⁶Iyọ rhẹmhi ọni ayẹmhẹ obe ọa vu ọa wolọ iyẹmhẹ ebe oshila evhese ni e vhiemhi dala ọli bhẹe, Wẹwẹ kwu e lono ọ vhi egbe e gaa nyele ayọ. Iyọ, agbọ ọni ọgbọ o ke bhale a vhiemhi dala agbọ ọli ni ikyiatsolo."²⁷Ọ ke liyọ ẹẹ ngmee, ọkpotso ọgwho ọọ ke yasẹ urhuli vhi ekẹ ni o torhugwhu oni agbaa, ọọ li, "Aa zọte ni asọmọ ni o vyia ẹ ali ẹnye ni o fẹli ẹ." ²⁸Ama ọ ke ẹẹ li, "Eni e suọ oni usomhi ni e rhọ gbe, wẹwẹ li Ishinẹgba ọ zẹ ọte naa!"²⁹Abhi oni agbaa o ke rhọ le shiọ, Ijesu ọọ li, "Oni ozele ona ozele obe lọ. E vha nono ishẹfẹ, ama a vha mẹ ishẹfẹli ni aa rhọ laa na wẹ sẹkẹnẹ ishẹfẹli Ijona. ³⁰Abhi Ijona ọ le li kyili ishẹfẹ ni iọgbọ Ininẹvi, iyọ li Omyi Ọmọse ọ li laa kyili ishẹfẹ ni oni ozele ona.³¹Oghyie ikpotso ni ọ la obhoni o kpọkẹ ọ laa vule ogbẹlẹ igwẹzọ ọ rhi iluemhi ni iọgbọ eni ozele ona, rharhi khi irhẹmhi ọ te obhoni agbọ o kpẹsẹ vu a rhi esọ shi ẹgbhẹli Isolomọni, ọnọfu dala Isolomọni ọ la ana.³²Iọgbọ Ininẹvi e laa vule luese iọgbọ oni ozele ona, rharhi khi ee nwegbe lieliẹ ni Ijona ọ rhọ ngme ingmemhi Ishinẹgba khasẹ wẹ, vha gwe ghee, ọnọfu dala IJona ọ la ekẹ ana.³³A vha mẹ ọgbọ ni ọ rhi akpa a rhu ọ ke rhi ọli a shi asha ni o gbhagbha wẹ khi ufu ughwughwu, ama asha ni o yagha ni a rhi akpa nya ishọyọ eni e lo ayọ e ke rhi oni ufulo a mato. ³⁴Ukpẹloli ẹ lẹ khi ufulọ ijiegbe ẹ. Ukpẹloe ẹ o kha ti, ijiegbe ẹ kwu li oa vọ ifulọ. Ama khi ukpeloli ẹ khi o vha ti, ijiegbe ẹ kwu li ọa vọ ubili. ³⁵Rharhiyọ, gwẹ kyia khi ufulọ ni o lẹ vhi egbe oo ke kyili ubili. ³⁶O kha kyia yọ, khi ijiegbe ẹ kwu o vọ ufulọ, a vha mẹ o pfọni o la kyili ubili vhọ, iyọ rhẹmhi ijiegbe ẹ kwu o ke laa liabhi ufulọ o lia gẹẹ o gẹẹ sagha rhugwhu ẹ."³⁷Abhi ọ ke rhọ ngme pfuse, Ifarisisi ọgwho ọọ li ọ bhale a nu lẹ le emenale vhi apfẹ lẹẹ, iyọ Ijesu ọ ke lo ayọ ọ deshitọ. ³⁸Oo ke nya ọni Ifarisisi aloa abhi ọ vha li kpọ kpabọa neni ọọ le emenale ẹlogbode.³⁹Ama Ọnọmhọli ọọ ke ẹẹ li, "Nena, vhẹvhẹ eni Ifarisisi vhaa kpe oshimhi ikolo ali ivhelea, ama elemhi vhẹ e vho ẹtsẹkẹ itoegbe ali onobe. ⁴⁰Vhẹvhẹ emọse ni vha mholi ẹgbhẹ! A khi ọni ọ ma oshimhi ọli li ọ gwe li ma elemhi ọ? ⁴¹Vha rhi emeni e la elemhi ọ ni enanya, ishọyọ ẹtsẹkẹ kwu e ke pfuasẹ na vhẹ.⁴²epfua khi uwẹ vhẹ Ifarisis, rharhi khi vhaa zẹ arhue ogwho vhi igbe le, vhi ikpagho ni vhaa mẹ vhi ebe ni vha gwa vhi shi ishemhi vhẹ. ama vha rhi obọ gbe ikhyiẹli ingme te odẹ ali ighọli Ishinẹgba. Oo ti khi ọgbọ ọ rhọ gwabha ke gbe ọ gwe mholi ighọli ni Ishinẹgba, ọ vha gwe li chi obọ je oshimhi vhi ikhyiẹli ẹtsẹkẹ ni e kpọle abagwhoyọ.⁴³Epfua khi uwẹ vhẹ Ifarisisi, rharhi khi itekwu ni e kpalo vhi ewuka li ea gwhẹ vhẹ ali otsẹ ekpẹ vhi atuokyi. ⁴⁴Epfua khi uwẹ vhẹ, rharhi khi irhẹmhi vha liabhi iji agbọ ni a vha shi ẹfẹẹ shi, ni iọgbọ e rhọ te ikhomhi wẹ dọsẹ la lẹ e vha yẹsẹ."⁴⁵Ọwenagbọ ishi eni Ijusi ọgwho ọ ke sọ ọli vhọ, ọọ li, " Ọwenagbọ, emeni u waa ngme rhẹmhi u rhẹ wẹ a ka eyẹ." ⁴⁶Ijesu ọọ li, "Epfua khi uwẹ vhẹ, ewẹnagbọ ishi! Rharhi khi irhẹmhi vha khyi itsua a nya iọgbọ vhi ike ni e vha dobẹa tsua, ama vhẹvhẹ vha laa lama rhi ukpobọ ogwho vhẹ chi eni itsua eyọ pẹẹ.⁴⁷Epfua khi uwẹ vhẹ, rharhi khi vha manọ ẹtsẹkẹ a rhọ ke sato eyẹ vhi egbe nyanọ ikhomhi iji eni ebolẹ, ochikọyọ khi ushishi vhẹ li ee gbolo wẹa. ⁴⁸Iyọ vha kyili ọtsẹ, vha gwe nwu gboghyiẹ eni ikanya ni eni ushishi e kpọẹ egbe, rharhi khi egbegbingme wẹwẹ li ee gbolo eni ebolẹa, iji wẹ vha manọ ẹtsẹkẹ a rhọ sato eyẹ vhi egbe a nya vhi ikhomhi eyọ.⁴⁹Rharhi ona abagwhoyọ, ẹgbhẹ Ishinẹgba ọọ li, 'Mhi la laa ghyie ebolẹ ali idibo bhuli wẹ, ee la laa zẹ okwhẹ kpẹsẹ wẹ, e gbolo egwho vhọa. ⁵⁰Oni ozele ona, li a ke laa nwu sota ọlia eni ebolẹ ni a kwuno ọlia te ugbẹkẹle agbọ bhẹ, ⁵¹Rhọ te ọlia Ebẹni apfishi ọlia Izekaraya, ni a gbea shi iteteva ọta owuka. ee, mhi ngme khasẹ vhẹ, a laa nwu oni ozele ona to vhọ.⁵²Epfua khi uwẹ vhẹ eni ewẹnagbọ ishi Ijusi, rharhi khi vha she rhue okpẹ iyẹsẹ mhọ obọ, vhavha lo elemhi ọ, vhavha dobẹ eni ea lo lo."⁵³Ijesu ọ ke vu ayọ, eni ikowẹ ali eni Ifarisisi e kpha to ọli, e nu ọli lee epfuasẹ obodẹ emeni ebu, ⁵⁴E nyakwa ni ẹẹ khi wẹwẹ e mẹ ingmemhi vhi unu ọli ni wẹwẹ e nwu ma vhi unu.

¹Oni ukwukwu ẹrhẹghẹ, ni iọgbọ agbẹlẹ egbhọ igbe asha ingmẹ ni e rhọ legba, ni iọgbọ e rhọ dena ẹẹ nwegbe, ọọ ke kyiatsolo nu eni idibo ọli ngme, ọọ wẹ, "Vha gwẹ kyia obodẹ eni uduekẹ Ifarisisi ni o rhi ẹtsẹkẹ a fuma, ni o kyili abọmẹmhẹ.²Ama a vha mẹ emeni o gbhagbha ni a vha gwegyiẹa, wẹ khi rhẹmhi a mẹ emeni a rhọ shi ufu ọli ni a vha laa yẹsẹ. ³Elemhiyọ, emeni u ngme vhi aloebi a laa suọ ọli vhi alo ufulọ, abagwhoyọ emeni u bẹna ngme vhi elemhi owa ni a vili, vili, a laa rhi ọli tsabọ vhi ukhomhi owa eda.⁴Mhi ngme khasẹ vhẹ ikpokyia mhẹ, I mhẹ vha nulishi eni e dobẹ a gbe ijiegbea, ni e vha ke gwe la mhuẹ emẹni e ke dobẹ li vhẹ ovhese. ⁵Ama mhia chi vhẹ esọ ọni vha kha nulishi. Vha nulishi ọni o kyila khi ọ kha gbe ọgbọa, ọ gwe mhọli afu ni ọ rhọ pfi-ọli a lo owerhẹ. Ee, mhi ẹẹ vhẹ, vha nulishi ọli.⁶Aa khi ikwukwu ikọbọ eva li a rhi itẹgba oshie a dẹẹ? Ama a vha mẹ ọgwho vhọ ni Ishinẹgba ọ yelea ni ọ vha rhi ẹloe shi egbe. ⁷Li shi igbagamhi itsu ni e la ẹẹ vhẹ ukhomhi a lolo wẹ. Vha nwu ẹloe dala itẹgba nebu.⁸Mhi ẹẹ vhẹ ọgbọ ni ọ ngme ingmemhi onaghyie mhẹ khasẹ iọgbọ, Omyi Ọmọse ọ li laa ngme ingmemhi onaghyie ọli vhi ukpẹloe ighyiukọ Ishinẹgba, ⁹Ama ọni ọ laa khyie mhẹ vhi ukpẹloe agbọ a li laa khyie ọli vhi ukpẹloe ighyiukọ Ishinẹgba.¹⁰Ọgbọ kwu ni ọ zẹ onobe Omyi Ọmọse, a laa gbe ọli kwa nali, ama ọgbọ ni ọ sheda laa zẹ onobe Ayẹmhẹ ni o Pfuasẹ, a vha gbe ọli kwa nali.¹¹A kha rhẹ vhẹ bhale vhi adalo owuka, eni ighyie, ali eni ea mhasẹ, ali eni a rhi unu naa, imhẹ vha lẹ ayele obodẹ emeni vha laa rhọ khẹ egbe vhẹ oshimhi, ali emeni vha gaa laa ngme kwu, ¹²rharhi khi Ayẹmhẹ ni o Pfuasẹ ọọ laa wẹna vhẹ oni ẹrhẹghẹ oyọ emeni vha kha ngme."¹³Ayọ li ọgbọ ọgwho vhi elemhi oni agbaa ọọ ke rhẹ li, "Ọwẹnagbọ, gwu ni inyọgwho mhẹ khi ọ kemhi ukwhu na mhe." ¹⁴IJesu ọọ li, "Mọse, ọgwho ọ rhẹ mẹ kyili ọnọsunuẹzọ oa liyọ ọni ọ laa vhẹ vhi iteteva?" ¹⁵Ọọ wẹ, "Vha rhi ẹloe kpẹ vha chegbe vhi ẹtsẹkẹ ituegbe le, rharhi khi ayemhe ọgbọ o vha khyiẹnya ọsuemhẹ ni ọ mhuẹ.''¹⁶Iyọ Ijesu ọ ke kpe ita khasẹ wẹ, ọọ wẹ, "Ishemhi ọmọse ọgwhọ ni ọ mhọli ẹpfue o nwemaa vẹgba onagyie, onagyie, ¹⁷Ọọ ke bhale a sa elemhi udu ọli, ọọ li, 'See mhi ke laa li eyọọ, rharhi khi imha mhọli asha na mhi laa sọ emẹkọmhi mhẹ shi?' ¹⁸Ọọ li, 'Emena mhi laa khyiẹ khi onaa. Mhi la laa gwọghọ ilu mhẹa mhi ke khyiẹlẹ ọ vhẹsẹa, ayọ lẹ mhi ke wolọ emẹkọmhi a kwu shi. ¹⁹Mhi ke ẹẹ li "Avhagwhu mhẹ, u mhọli emẹkọmhi nebububu, ni a sọ shi nẹẹ shii ikpe nebu ni ea bhẹ. Vhiẹmhia, u le, u da, kee ghẹlẹ waa li agbọ."²⁰Ama Ishinẹgba ọ ke ẹẹ li, "Ghyiẹ ọni adẹkẹ ọmọse ọna, amyiọse aa nono avhaghwu ẹ vhi obọ ẹ, emeni abhi u ke gaa khyiẹ shi ekẹ ena, iyi ọgwho e ke laa kyila nenaa?' ²¹Iyọ li o laa li ọgbọ ni ọ chi ọsuemhẹ shi ni egbe ọli, ni o vha kyili ọsuemhẹ Ishinẹgba."²²Ijesu ọọ ke ẹẹ li idibo ọli, "Elemhiyọ mhi gwu khasẹ vhẹ, lmhẹ vha la ayele obodẹ agbọ vhẹ-- emeni vhaa le, ali obodẹ ijebe vhẹ-emeni vhaa rhọ kwu egbe. ²³Rharhi khi ayẹmhẹ o dala emenale, ijegbe o dala ede ni a sọ.²⁴Vha bino ipfele ni e vha rha kọ wẹ khi rhẹmhi ea khyiẹsẹ. E vha mhọli elemhi owa ni e khyiẹsẹ a shi wẹ khi ilu, ama Ishinẹgba li ọ rhọ na wẹ a le. Vhavha mẹ abhi vha li nwu ẹloe dala ipfele nenaa! ²⁵Ọgwho elemhi vhẹ egbe ea kphele khi lẹ ma shẹ ni ọ dobẹ khyi ẹtawẹ a nya egbe ọli vhi ikpe? ²⁶O kha kyia u waa dobẹ khyiẹlẹ oni ukwhukwu ẹtsẹkẹ ni a suii ona, elọ e zẹ khi vha ke a kpokpo egbe vhẹ shi eni ekpọẹ ena?²⁷Vha sa obodẹ ebuli ilili --abhi e lia fu. E vhaa gbe ikanya. Wẹ khi rhẹmhi ea chi ilu, mhii khyie ngme khasẹ vhẹ, o kha rhẹ kyili Isolomọni asha ni ọ rhẹ mhọli ọsuemhẹ rhamhi eyọ, ọ vha mẹ ede kwu egbe abhi ọgwho vhi elemhi wẹ.²⁸Ishinẹgba ọ kha rhi ede kwu ebuli (ilili) egbe, ni e la vhọ amo, akọ a chi wẹ ma tosẹa, see vha ke sa khi ọ vha laa rhi ede kwu vhẹ vhi egbe, Oo, vhẹvhẹ ni vha mhuẹ ukwukwu irhọshiọ!²⁹Imhẹ vha nono emeni vhaa le ali emeni vha da, Imhẹ li gbagbagba. ³⁰Rharhi khi iọgbọ kwu ni e la ukhomhi ekẹ agbọ ẹtsẹkẹ ena e to wẹ, Ita vhẹ ọ li yẹsẹ khi eni ẹtsẹkẹ ena kwu e li to vhẹ abagwhoyọ.³¹Ama vha dua shi aleghyie ọli, eni ẹtsẹkẹ ena kwu a la laa rhẹ wẹ ma vhọ na vhẹ. ³²Imhẹ vha nulishi vhẹvhẹ ukwukwu ivhiẹ, rharhi egbe maa nwu ita vhẹ shi ọ khi ọ rhọ rhi aleghyie na vhẹ.³³Vha rhi emeni vha mhuẹ dẹ khi vha rhọ ni enanya. vha khyiẹlẹ ẹkpa shi ni egbe vhẹ ni e vha takwa--vha fali ilu shi aleghyie ni o vha kyiojọ, ni ọghyiatọ ọ vha dobẹ chi a mama, ni esele e vha pfuẹchẹa. ³⁴Rharhi khi asha ni ọsuemhẹ vhẹ o la, ayọ li udu vhẹ o gwe lia la abegwhoyọ.³⁵Vha nwuno ede vhẹ kwulo ọtsaka, vha zẹ khi ifulọ vhẹ ea kee le lee gẹẹ, ³⁶vha liabhi iọgbọ ni e mugha khẹ ọga wẹ ni ọ ye izuode khi ọ kha ke a jele, ishọyọ khi ọ kphele obọ odẹ, e ke nyanya laa kwheghyie odẹa nali.³⁷Izọtena lẹ khi uwi eni egamhẹ, ni ọga wẹ ọ bhale a vhẹ vhi ukhomhi ikhodẹ. Egbegbingme mhi ngme khasẹ vhẹ khi irhẹmhi ọa nwuno ede ọli ni o nuẹ tsọsọ okwu ọli, ọ rhẹ wẹ deshitọ khi e le emenale, ọ kemhi na we. ³⁸Izọtena khi uwi eni egamhẹ ni ọga wẹ ọ liegbe bhale utozeva ali utozesẹ ọ bhale a vhẹ khi e khyiele a khẹ ode.³⁹Vha gwe li yẹsẹ ona, o kha kyila khi ọdapfẹ ọọ yẹsẹ ẹrhẹghẹ ni ọghyiatọ ọ rhọ laa bhale lọ, ọ vha kha lama khi a gbe lẹ owaa. ⁴⁰Vha liyọ nwu egbe abegwhoyọ , rharhi khi vhavha yẹsẹ ẹrhẹghẹ ni ọni Omyi Ọmọse ọ rhaa bhale."⁴¹Ipitẹ ọọ li, "Ọnọmhọli, eyẹ lọgwho li u kpe oni ita ona khasẹ, la khi ọgbọ kwu?" ⁴²Ọni Ọnọmhọli ọọ li, "Ọgwho ọ kyili ọni ọ kpeda ukanya ni ọ mhọli ingmaghyie ni ọga ọli ọ rhọ kpeda ni egamhẹ ọli evhesẹ khi ọ rhi emenale na wẹ kee le shi ẹrhẹghẹ? ⁴³Ivọsẹna lẹ khi uwi ọgamhẹ ọyọyọ, ni ọga ọli ọ bhẹ laa vhẹ khi ọa khyiẹlẹ emeni ọ ghyie ọli khi ọ khyiẹ ni ọ liegbe bhẹ. ⁴⁴Egbegbingme mhi ngme Khasẹ vhẹ khi ọọ la nwu ọli nya ukhomhi ẹtsẹkẹ ni ọ mhuẹ kwu.⁴⁵Ama ọni ọgamhẹ ọyọ ọ ke ẹẹ li vhi elemhi udu ọli,' 'Ọnọmhuẹmhẹ ọ vha kẹ jele', ọ ke a gbe eni egamhẹ emọse ali eni ikpotso ni e kpọẹ, ọa le ọa da enyọ, enyọ ea gbe ọli, ⁴⁶Ọni ọnọmhọli ọni ọgamhẹ ọyọ ọọ laa bhale oni ogbẹlẹ ni ọ vha takpẹ ọ yekpẹ ọ, ali oni ẹrhẹghẹ ni ọ vha yẹsẹ, irhẹmhi ọa khyiolo ọlia kwẹkwẹkwẹ, ọ rhi ọli shi ikpa ni a rhi elingmobe a shi.⁴⁷Ọni ọgamhẹ ọyọ, ni ọ yẹsẹ abhi o ghọli ọnọmhọli ọli, ni ọ vha ke rhi ushi ni ọga ọli ọ rhọ na gwhẹ, a laa rhi ekpa nebububu gbe ọli. ⁴⁸Ama ọni ọ vha yẹsẹ, ni ọ ke khyiẹli emeni ọ vha kha khyiẹ ni a gbe ọgbọ a shi, ikwukwu ekpa li a rha gbe ọli. Ọgbọ ni a sheda rhi eni ebu na, eni ebu li a nono obọ ọli, ọni a ke rhi eni ebububu na mhuẹ, a laa mhila ọli eni e bu dala ayọ.⁴⁹Erhẹ mhi bhale a pfie shi ukhomhi ekagbọ, rhẹmhi a khẹ khi a she le pfie wẹ nenaa. ⁵⁰Ama mhi mhọli Ibatizimhi ni a rhọ laa bataizi mhẹ, ghee mhi la ukpokpomhi ọtomhẹ sẹkẹnẹ khi rhẹmhi o gba pfuse!⁵¹Rhẹmhi vha sa khi ọpfọmhẹ mhi rhọ bhale vhi ukhomhi ekagbọ? Obho, Mhi gwu na vhẹ, onochi ovala mhi rhọ bhẹ. ⁵²rhọ te nena vu apfẹ ni ikwhumhi ọshie e la, e laa valaa, ikwhumhi asẹ e to uji ma nu ava a wola, abagwhoyọ ikwhumhi ava, e nu asẹ a wola. ⁵³E laa vala egbe, ita, ọ ma nu omyi ọli ni ọmọse vue, ọmọ ọmọse ọ ma nu ita ọli vue; lnyọ ọ ma nu omyi ọ ni ọkpotso vule, ọmọ ọkpotso ọ ma nu inyọ ọli vule; Inyọdọ ọ ma nu ọsọmọ vule."⁵⁴Ijesu ọ gwe ngme khase eni agbaa abegwhoyọ, ọọ li, "Vha kha mẹ khi atutu o te opfọni ọwẹ o te a lo ekẹ a lasele, vha nyanya, ẹẹ li, 'Amẹ o she a bhale,' iyọ a li laa mẹ ọ. ⁵⁵Akpekpe o kha ke te obhoni olọkẹ a pfi, vha ẹẹ li, 'Ududumhi ovọ ni ọa tosẹ ẹtsẹkẹa li o laa to enaa, ingmaghyie a liyọ mẹ ọ. ⁵⁶Vhẹvhẹ abọmẹmhẹ, vha gwabha bino ogbe abhi ekẹ ali eda e li la, ama elọ e ke zẹ khi vhavha rhọ li gwẹ abhi a lia ngme emeni oni ẹrhẹghẹ ona o kyila?⁵⁷Elọ e zẹ khi vhẹvhẹ egbe vhẹ vhavha dobẹ a yẹsẹ emeni o gbe akanya? ⁵⁸Rharhi khi u kha nu ẹbele vhẹ a je ọwẹzọ, la ekẹ atuodẹ rhọ nu ọli sheshe khi ọọ ke chi ẹ dọsẹ ayọ je ẹghẹghẹli ọsọunuẹzọ, khi ọni ọsọunuẹzọ ọọ kẹ rhẹ ni ọnọfu ichoja, khi ọnọfu ichoja ọ ke nwu ẹ je ogba igwhumha. ⁵⁹Mhi gwu na vhẹ, agbọagbọ u waa lase vhọ le gwhe sẹkẹnẹ khi u fali eta rhili apfishi ukọbọ ni o kpe ẹ oshimhi obọ.''

¹Oni ẹrhẹghẹ oyọ, iọgbọ egwho vhọ ee gwu ni Ijesu obodẹ iọgbọ Igalili ni Ipaleti ọ rhi ọlia wẹ gboghyiẹ wẹ ilasobo khyiẹ. ²Ijesu ọọ wẹ, "Vha li sa khi eni iọgbọ Igalili eyọ wẹwẹ li e li ingmobe dala iọgbọ Igalili kwu ni e kpọle rharhi khi e mẹ ẹchọ onana? ³Obho, Mhi gwu na vhẹ. Ama vhavha sheda pfi egbe denegbe, odẹ oyọyọ vha te laa li opfuaa.⁴Laa khi iọgbọ ikwhumhi ogbe ali olalee nẹẹ Isilomu ni oweda o de nwu gboloa eyọ, rhẹmhi vha ke sa khi ingmobe wẹ li e vhiemhi dala iyi agbọ ni e la Ijerusalemu? ⁵Mhi ẹẹ vhẹ obho. Ama vhavha sheda pfi egbe denegbe vhi ingmobe vhẹ, vhaa gaa liyọ laa li opfuaa.''⁶Ijesu ọọ kpe oni ita ona, "Ọgbọ ọgwhọ ọọ kọ oni ukpamhi orhẹ ni a lu ifigi shi ogba ọli, ọ ke bhale a bino ni e she mọ ikpamhi, ọ vha mẹ ukpamhi vhi ukhomhi ọli pẹẹ. ⁷Ọni ọmọse ọ ke ẹẹ li ọni ọ rhi ẹloe a kwhu oni ogba nali, 'Ghee, ukpe ozi esẹ lẹ khi ona na mhi te bhale laa bino ni ẹẹ khi mhii mẹ ukpamhi vhi oni orhẹ ifigi ona pfa imha mẹ vhọ pẹẹ. khyi ọli gbe. Elọ vha dobẹ ọli pfuẹchẹ oni ekẹ ona kwa shi?'⁸Ọni ọ rhi ẹloe a kwhu oni ogba ọ sọ vhọ ọọ li, 'Dobẹ ọli oni ukpe ona lọgwho mhi va lia gasẹ rhi ifataliza shi vhọ. ⁹O kha ke mọ ikpamhi isukpe, o ti; o vha ke mọ, u chigbe khyi ọli gbe!'"¹⁰Oni ẹrhẹghẹ ona Ijesu ọ lẹẹ wẹna iọgbọ owẹna vhi owuka ogbẹlẹ ivhiẹmhia. ¹¹A kee fẹẹ, a mẹ ọkpotso ọgwho vhi ayọ ni ọ kyia khi ọ she gbe ikpe igbe ali elele abhi ayẹmhẹ igwhuamhi o te la vhi egbe, ọ nwu nyẹsẹ ọ vha dobẹ ẹ yase egbe ekẹ vule tomugha onaghyie.¹²Abhi Ijesu ọ ke rhọ mẹ ọli, ọ nyalu ọli, ọọ li, "kpotso, ze vhi oni igwhuamhi ẹ ona." ¹³Ọ rhi obọ nya vhi egbe, obobobọ ọ sheshe egbe tomugha ọ rhi ikiki ni Ishinẹgba. ¹⁴ Ama ọni ọọ mhasẹ vhi owuka ọọ mẹ ọ, oo to ọ vhi egbe shi vhọ rharhi khi Ijesu ọ rhi ọgbọ ze ogbẹlẹ ivhiẹmhia. Iyọ ọni ọọ mhasẹ eyọ ọọ li oni agbaa, "Ogbẹlẹ ẹlesesa li o dea khi a rhọ gbe akanya, u rhi ọgbọ ze, ama a khi ogbẹlẹ ivyiẹmhia."¹⁵Ọnọmhọli ọọ ke sọ li vhọ, ọọ li, "Abọmẹmhẹ! Elemhi vhẹ mhi gyhi ọni ọ vhaa taghyiẹ ijaki ọa liyọ ẹna lia ọ rhọ li a da amẹ ogbẹlẹ ivhiẹmhia? ¹⁶Abegwhoyọ ọmyi Abulahamu ni ọkpotso li ọ kyia, ni okhyio ọ nwu zu elemhi ikpe igbe ali elele, oyọ khi a vha kha taghyiẹ ọlia ogbẹlẹ ivhiẹmhiaa?"¹⁷Abhi ọ ke rhọ ngme eni ingmemhi ena pfuse, omama li o kee nwuno eni e kpha dese ọ, ama eni iọgbọ ni e rhọ gba kwu rhẹmhi e kee ghẹlẹ shi akanya ikiki ni ọ gbe.¹⁸Iyọ, Ijesu ọọ li, "See aleghyie Ishinẹgba o mẹẹ li laa, e lọ mhi laa rhi ọli khọkhọ? ¹⁹Irhẹmhi o liabhi oni ukpamhi imọstadi ni ọni ọmọse ọ rhue pfi je elemhi ogba, ni o ke bhale a kyili ududumhi okporhẹ, ni ipfele ni e la eda e kwu ikolo shi igwabọ ọli."²⁰Utozeva ọ gwe ẹẹ li, "Elọ mhi dobẹ rhi aleghyie Ishinẹgba a khọkhọ? ²¹Irhẹmhi o liabhi uduekẹ ni ọkpotso ọ rhọ ma ijakpala emosọmhi esẹ ni o ke fuma vọsẹ ekẹ."²²Ijesu ọ liyọ kọ lẹ fẹẹ ikwukwu ẹvholi ni e laa atuodẹ Ijerusalẹmu ọọ wena wẹ. ²³Ọgbọ ọgwho ọ ke ẹẹ li, "Ọnọmhọli, ikwukwu iọgbo la mẹ laa tsumhi? Iyọ, ọ ke ẹẹ li, ²⁴"Dua khi u rhọ te odẹ na pfiiko lo, rharhi khi ebubu e laa dua khi wẹwẹ e rhọ lo, e vha laa dobẹ lo.²⁵Ọdapfẹ ọ kha sheda vule so kpẹ vhi odẹ, irhẹmhi vha ke a mugha elase vhaa kpele odẹ vhaa li ẹẹ li, "Ọnọmhọli, Ọnọmhọli, dobẹ eyẹ lo le,' ọ laa sọ vhẹ vhọ ọọ vhẹ, "Imha yẹsẹ vhẹ wẹ khi obhoni vha te bhale." ²⁶Ishọyọ vha ke ẹẹ li, 'Eyẹ le, eyẹ da, vhi ukpẹloli ẹ u gwe wẹna iọgbọ ifuoedẹ eyẹ.' ²⁷Ama ọ laa sọ vhẹ vhọ, ọọ li, 'Mhi ẹẹ vhẹ, imha yẹsẹ vhẹ, Vha vu mhẹ aloa, vhẹvhẹ elingmobe!'²⁸Aa laa me evyiẹ ali ilakọ khyiaa ni vha mẹ Abulahamu, Aziki, Ijekọbu ali eni ebolẹ kwu ni e laa aleghyie Ishinẹgba, ama vhẹvhẹ rhẹmhi a kwhu vhẹ a kwa vhi atuode. ²⁹E laa te opfọni ọwẹ o te a lasele, ali oleda, ali olọkẹ bhale laa deshito vhiẹmhia vhi ukhomhi itabu ni a laa lee emenale vhi aleghyie Ishinẹgba. ³⁰Vha yẹsẹ ona, khi eni e kposhimhi e laa kpalo, eni e kpalo e ke a kpe oshimhi."³¹ke li denẹẹ, Ifarisisi egwho e bhale, eẹ li, "Vu ekẹ ana le rharhi khi Ẹrọdu ọa nono abhi lẹẹ lia gbea." ³²Ijesu ọọ li, "Vha kaa ngme khasẹ ọni anyaka ọyọ, 'Ghee, Mhi a kwhu ikhyio kwa mhi rhi izemhi a ni iọgbọ amo ali akọ, ogbẹlẹ ozi ẹsẹ, mhi rhamhi asha na mhia nono khi mhia rhamhi.' ³³Abhabhi o rhẹ li, o kyili emeni o nwegbe khi mhi rhọ khyiẹlẹ kee je alo amo, akọ ali akopfua, abhi o rhọ kyia khi o vha dea khi a rhọ gbe ọbolẹ pfia vhi Ijerusalẹmu.³⁴Ijerusalẹmu, Ijerusalẹmu, ni e gbolo eni ebolẹa ni e tono eni a ghyie echẹ. Iti ingmẹ mhi nono khi mhi koko imyi vhẹ gba abhi ọkhọkhọ ọ lia nwuno imyi ọlia shi ifu ipfua nee, ama o vha gwhẹ vhẹ. ³⁵Ghee, a she tsua apfẹ vhẹ pfia. Mhi ngme khasẹ vhẹ, vhavha laa mẹ mhẹ rhili a pfishi ni vha rha li ẹẹ li, 'Izọtena khi uwi ọni ọ rhi eva Ọnọmhọli bhale."

¹Ogbẹlẹ ivhiẹmhia ogwho, ọọ je apfẹ ukwhumhọgwho eni e kpeda ni e kyili agbaa Ifarisisi lẹẹ le emanale, e rhi ẹloe kpẹ ọ vhi egbe. ²Ghee, ọmọse ọgwhọ ni ọọ gwhua igwhuamhi ofumhi ọ mugha ọli vhi odalo. ³Ijesu ọ ke mhila eni e nwemaa yẹsẹ ushi eni Ijusi ali eni Ifarisisi, ọọ wẹ, "Ushi oo mẹẹ ngme khi a myie ọgbọ igwhuamhi kwa ogbẹlẹ ivhiẹmhia, la khi o vha ti yọ?"⁴Ama e pfi esọa kpekpee. Iyọ Ijesu ọọ ke nwu ọli, ọ rhi ọli ze, ọọ li khi ọ vu. ⁵Ọ ke ẹẹ wẹ, "Ogwho elemhi vhẹ ni ọ mhọli ọmọ ọmọse ọa liyọ ẹna ni ọ de lo elemhi ilija ogbẹlẹ ivhiẹmhia ni ọ vha laa chi ọli lasele ayayayọ?" ⁶E vha dobẹ sọ vhi eni egbọ ena.⁷Abhi Ijesu ọ rhọ mẹ khi eni a ghyie a nyalu khi e maa nono itekwu ojima, ọọ ke kpe ita khasẹ wẹ, ọọ wẹ, ⁸"Ọgbọ ọ kha lu vhẹ shi uliemhi izuode, imhẹ ghyiẹ kaa shito asha ojima, rharhi khi aa mẹ ọgbọ ni ọ li lu ni ọ mhọli ojima dala vhẹ. ⁹Ọni ọ gaa lu vhẹ ọ kha bhale, ọọ laa li ẹẹ vhẹ, "Vue ikpa ni vha shitọ ena le ni ọni ọgbọ ọna,' omama li vha ke rhọ laa je asha ni o kpọkẹ nẹẹ kwu.¹⁰Ama a kha ghyie a lu ọgbọ, ọ kaa shitọ asha ni o gaa kpokẹ nẹẹ kwu, ọni ọ ghyie a lu ẹ khi ọ ke bhẹ, ọọ laa li ẹẹ li, 'Ukpokyia, kaa je asha ni o yagha dala ana.' Ishọyọ ọọ kee a mholi eghọghọ vhi ukpẹloe eni vha gaa shitọ. ¹¹Rharhi ọgbọ ni ọ sheda chi egbe ọli shele, a la laa chi ọli kpiale, ọgbọ ni ọ ke chi egbe ọli kpiale, a la laa chi ọli shele."¹²Ijesu ọọ gwe li nu ọni ọ ghyie a nyalu ọli ngme, ọọ li, "U kha nye emenale ẹlogota ọa liyọ ẹlogbode, imhẹ lu ikpokyia ẹ wẹ khi inyọgwho ẹ, wẹ khi enọsuemhẹ ni vha gaa nyele, khi e kẹ li ghyie a lu ẹ shiọ, khi u kẹ mhọli elele vhọ.¹³Ama u kha mhọli uliemhi, nyalu enanya, ikhyila, eni e vhaa kyia, ali izalo, ¹⁴iyọ u laa mhọli izọtena vhọ, rharhi khi e vha laa dobẹ fali ẹẹ ota shi vhọ. Rharhi khi a la laa fali ẹẹ ota ogbẹle itiegwhuli vule eni e pfusẹ."¹⁵Abhi ukwhumhọgwho ni ọ li nu Ijesu shito ukhomhi itebu ọ ke rho suo eni ikpamhi ingme ena, ọọ li Ijesu, "Izọtena khi uwi ọni ọgbọ ni ọ laa le emenale vhi aleghyie Ishinẹgba!" ¹⁶Ama Ijesu ọọ ke ẹẹ li, "Ọni ọmọse ọgwho ọọ nye ududumhi akhe ọ ghyie a nyalu iọgbọ ebubu. ¹⁷Abhi a rhọ nye oni akhe pfuse, ọ ghyie ọgamhẹ ọli khi ọ kaa gwu ni eni ọ ghyie a lu, 'Vha bhale, rharhi khi mhi she nwuno ẹtsẹkẹ kwu egbe shi ekẹ.'¹⁸Wẹwẹ kwu eẹ khi wẹwẹ e vha masha lẹẹ bhẹ. Ọni ikyatsolo ọọ li, 'Mhi she dẹ oyẹmhi ekẹ, mhi nwemaa laa bino ọli. Yagwa mhuẹ irhobọ nwu idu na mhẹ.' ¹⁹Ọvhese ọọ li, 'Mhi she dẹ ena ogbe, mhi laa rhẹ wẹ lo odẹ fẹẹ. Yagwa mhuẹ irhobọ nwu idu na mhẹ.' ²⁰Ọvhese ọọ li, "Mhi she lee mholi ọkpotso ogbọ, iyọ, imha dobẹ laa bhẹ.'²¹Ọni ọgamhẹ ọ bhale a gwu nali abhi e gaa ngme kwu. Oo kee to ọni ọdapfẹ vhi egbe ọọ li ọni ọgamhẹ ọli, 'Nyanya lo ekẹ atuodẹ, je ifuodẹ khi ifuodẹ kwu ni e la oni ẹvhue ona khi u wolọ enanya, ikhyila izalo ali eni e kyishi bhale vhi ana.' ²²Ọni ọgamhẹ ọọ li, 'Ọga, a she khyiẹlẹ emeni u wẹ li a khyiẹlẹ pfuse, ama imasha o khyie laa elemhi owa.²³Ọni ọga ọọ li oni ọgamhẹ, 'Kee Je atuodẹ agbala ni a gbodo ali ivọdẹ kwu khi u rhi izemhi rhẹ wẹ bhẹ vhi ana, khi apfẹ mhẹ o kẹ vọ. ²⁴Mhi gwu na vhẹ, a vha mẹ ọnyi eni iọgbọ ni a ke kyiatsolo nyalu eyọ ni e gwe laa bino eni emenale mhẹ unu fẹẹ.'"²⁵Nenaa iọgbọ nebu e rhẹẹ khali ọli, ọ lieliẹ alo ọọ wẹ, ²⁶"A kha mẹ ọni ọ bhẹ bhui mhẹ le khi ọ vha khyie ita ọli, ali inyọ ọli, ugwhẹ ọli, imyiẹ ọli, inyọgwho ọli ni ikpotso ali emọse, ee, ali ayẹmhẹ ọli abagwhoyọ ọ vha dobẹ laa kyili odibo mhẹ. ²⁷Ọni ọ vha tsua ọgbagala li ọ rhọ khẹ mhẹ ọ vha laa kyili odibo mhẹ.²⁸Ọgwho elemhi vhẹ, ni ọ laa to oweda, ni ọ vha kpọ a shitọ ọ lolo abhi o laa rhue ni a rhọ laa mali pfuse? ²⁹Ina a khi iyọọ, ọ kha rhi oni owa lighyi , ọ vha ke gwe dobẹ mali pfuse, eni e mẹ ọli kwu rhẹmhi e ke rhi ọli a kee li egyia, ³⁰ea li ẹẹ li, "Ọni ọmọse ọna li ọọ to owa ama ọ vha gwe dobẹ pfuse ọli.'³¹Oghyie ni ọgwho ọ kyia, ni ọ laa nu oghyie ọvhese kwhẹ, ni ọ vha laa kyiatsolo deshitọ rhue esọ shi ẹgbhẹ ali ude ni ẹẹ khi lẹ dobẹ rhi iọgbọ agbẹlẹ egbhọ igbe, asha agbẹlẹ egbhọ ashi igbe ni lẹ mhuẹ nu oghyie ovhese ni ọ mhọli iọgbọ egbẹlẹ egbhọ igbe, asha agbẹlẹ egbhọ igbe asha uye khọli? ³²Ọa ke liyọ, ọ kha mẹ khi eni ichoja ni e kpọẹ khi e laa odẹ e khyie nuẹ shi ọ vhi egbe rhẹmhi ọ nyanya laa nono iọgbọ ni e rhẹ wẹ a sheshe, ³³Abagwhoyọ, elemhi ọni ọ vha ji ẹtsẹkẹ ni ọ mhuẹ kwu abọa ọ vha dobẹ laa kyili ọdibo mhe.³⁴Oghyie ni ọgwho ọ kyia, ni ọ laa nu oghyie ọvhese kwhẹ, ni ọ vha laa kyiatsolo deshitọ rhue esọ shi ẹgbhẹ ali ude ni ẹẹ khi lẹ dobẹ rhi iọgbọ agbẹlẹ egbhọ igbe, asha agbẹlẹ egbhọ ashi igbe ni lẹ mhuẹ nu oghyie ovhese ni ọ mhọli iọgbọ egbẹlẹ egbhọ igbe, asha agbẹlẹ egbhọ igbe asha uye khọli? ³⁵Ọa ke liyọ, ọ kha mẹ khi eni ichoja ni e kpọẹ khi e laa odẹ e khyie nuẹ shi ọ vhi egbe rhẹmhi ọ nyanya laa nono iọgbọ ni e rhẹ wẹ a sheshe, Abagwhoyọ, elemhi ọni ọ vha ji ẹtsẹkẹ ni ọ mhuẹ kwu abọa ọ vha dobẹ laa kyili ọdibo mhe.

¹Oni ẹrhẹghẹ ona emyionoga ali elingmobe egwho e bhẹ lẹẹ rhi esọ shi Ijesu vhi ekẹ. ²Ama eni Ifarisisi ali eni Ikọwe ee kee kwumhẹ eẹ li, "Ọni ọmọse ọna ọ kpẹsẹ abọ a myie elingmobe, ọ gwe nu wẹ a le emenale."³Ijesu ọọ kpe oni ita ona khasẹ wẹ, ọọ li, ⁴"Ọgwho elemhi vhẹ, ọa mhọli isumha egbhọ ishie ọgwho ọ ke waa vhọa, ọ vha dobẹ egbhọ ene ikpamhi igbe ali otiale ni e kpọẹ shi odato, ọ laa nono ọgwho ni ọ waa lia rhlili apfi shi ni ọ rha mẹ ọli? ⁵Ishọyọ ọ kha ke mẹ ọli, ọ rhue ọli pfi nya ike ọa ghẹlẹ.⁶Ọ kha ke rhamhi apfẹ, ọ nyalu ikpokyia ọli ali a gaa nyele kwugbe, ọọ wẹ, 'Vha nu mhẹ ghẹlẹ, mhi she mẹ osumha mhẹ ni ọ waa. ⁷Mhi ngme khasẹ vhẹ abagwhoyọ, oghẹlẹ o la la vhi aleghyiele eda shi obodẹ ọlingmobe ọgwho ni ọ pfi egbe denegbe vhi ingmobe ni ọa li le, dala iọgbọ egbhọ-ene ikpamhi ogbe ali itili ni e she kpọ pfuasẹ ni e vha gwe nono ipfiegbe deno egbe vhi ingmobe le.⁸Laa khi okpotso ni ọgwho ọ laa mhọli ikpegbe, ni ukpọgwho o ke waa vhọa, ni ọ vha rhi akpa a rhu, ọ fuomhi elemhi owaa, bino ufuọ ali ufuọlia, nono ọli onaghyie-onaghyie rhili apfishi ni ọ rha mẹ ọli? ⁹Ọ kha ke mẹ ọli, ọ nyalu ikpokyia ọli ali aa gaa nyele kwugbe, ọọ li, 'Vha nu mhẹ ghẹlẹ, rharhi khi ukpọgwho ni o waa mhẹa, mhi she mẹ ọli.' ¹⁰Mhi gwu na vhẹ abegwhoyọ, oghẹlẹ o la vhọ vhi ukpẹloe ighyiukọ Ishinẹgba shi ọlingmobe ọgwho ni ọ chi ingmobe ilimhi le."¹¹Iyọ Ijesu ọọ li, "Ọmọse ọgwho ọ mhọli ivhiẹ emọse ava, ¹²ọni ọ kpọkẹ vhọọ ọọ li ita lẹẹ, 'Ita, rhi ẹtsẹkẹ mhẹ na mhẹ na mhi kha le vhi ukwu.' Iyọ, ọni ita ọli ọ kemhi emeni ọ mhuẹ shi ashi eva, ọ rhi iyi ọli nali.¹³O ke li dẹnẹ, ọni ọ kpọkẹ eyọ, ọ wolọ itsua ọli, ọ je evholi ni o nuẹ a la, ayọ li ọ la pfuẹchẹ ikpaghọlọ ni ọ mhuẹ kwa shi ududumhi agbọ ilimhi. ¹⁴Nenaa abhi ọ ke rhọ pfuse eni ikpaghọ kwa pfuse, ududumhi ukhumhi o bhale vhi oni evhue, ayọ li ọ ke te a gbasẹ osue ali ẹchọ.¹⁵Ọ vu, ọ rhi egbe ọli ghyi ọgbọ ọgwho vhi elemhi oni ẹvhue oyọ khi lẹ nu ọli kee gbe akanya, ọ rhi ọli je ishemhi khi ọọ kee rhi emenale ni igulu le na lẹ. ¹⁶Egbe e kee nwu ọli rharhi khi lẹẹ laa ke mẹ ifufu emenale ni a rhọ ni igulu le kee le rharhi khi a vha mẹ ọni ọ rhi ẹtsẹkẹ nali ke gwe le pẹẹ.¹⁷Ama abhi ẹgbhẹ ọni ọmọ ni ọ kpọkẹ ọ ke rhọ dele ni ọ ke rha mẹ egbe ọli mẹ, ọọ li, 'Egamhẹ ongmẹ ita mhẹ ọ rhue vhi akanya ni ea le emenale kpọẹ egbe le nena, mhẹmhi la ekẹ ana ena, gwhu a ni okyiamhi! ¹⁸Mhia vu ekẹ ana le mhi bhuli ita mhẹ, mhi li ẹẹ li, "Ita, mhi she li ingmobe kwu aleghyie Ishinẹgba, ali ghyiẹ. ¹⁹Imha gwe tẹ ni aa lu omyi ẹ ni ọmose; rhẹ mhẹ kyili ukwhomhọgwho elemhi egamhẹ ni ea ga ẹ."²⁰Iyọ li ọni omyi oni ọmọse ni ọ keke ọ li bhuli ita ọli le. Abhi ọ kee rhẹẹ bhẹ ni ọ rhọ khyie la obhoni odẹonuẹ, ita ọli ọ mẹ ọli, elemhi ee vhala ọli, ọ naa nwu ọli, ọ pfipfi ọli unu. ²¹Ọni ọmọ ọọ li, 'Ita, mhi she li ingmobe kwu Ishinẹgbe ali ghyiẹ. Imha gwe tẹ ni a gwe a kee lu omyi ẹ ni ọmọse.'²²Ọni ita ọli ọọ li eni egamhẹ ọli, 'Vhaa nyanya rhi ode ni o somhote bhẹ, vha rhi ọli kwu ọli vhi egbe, vha rhi ukwhi shi ọli vhi abọ, vha gwe rhi ekwẹ shi ọli vhi awẹ. ²³Ishọyọ vha nwuno ẹna ni e nwemaa gba lasele khi vha gbe ọlia. Khi eyẹ kee le eyẹ a ghọdọ. ²⁴Rharhi khi ọni omyi mhẹ ọna, ọọ gwhua, nenaa, ọ she gwe nyele. Ọọ waa, nenaa a she mẹ ọli.' Ayọ li e te to oghẹlẹ ali ighọdo vhi ekẹ le.²⁵Ọni ẹrhẹghẹ ona omyi ọli ni ọjọ ọ ye ishemhi. Abhi ọ ke rhẹẹ jele ni ọ rhọ chi mama apfẹ, ọ sokwu ikphema ali ishimhi. ²⁶Ọ ke nyalu ọgamhẹ ọgwho ọ mhilali emeni a mẹ. ²⁷Ọni ọgamhẹ ọọ li, Inyọgwho ẹ ọ she te obhoni ọ ye jele iyọ ita ẹ ọ she gbe ududumhi ẹna rharhi khi ọ jele ijele egbenwumhẹ.'²⁸Ọni omyi ọ ni ọjọ ọọ kee mhọ ofu, ọ vha lama lo elemhi apfẹ, ita ọli ọ ke lasele vhi atuodẹ, ọ lemali. ²⁹Ama ọni omyi ọ ni ọjọ ọọ li ita lẹẹ, 'Ghee, ikpe nebu na mhi te a ga ẹ abhi ogwhumha, Imha gbe ushi ẹ ogwho gwhe, ama u waa li nwu omyi ẹlamhi na mhẹ gbea nye emenale ni ikpokyia mhẹ gwhe, ³⁰Ama abhi omyi ẹ ọ ke rhọ bhale, ni o kyia khi ọ she rhi ẹpfue ẹ nono ikpotso pfuse ọ pfuẹ ọsuemhẹ kwa, li u mẹẹ gbe ududumhi ena na ena.'³¹Ọni ita ọli ọọ li, 'Ọmọ, ẹrhẹghẹ kwu li u rhọ nu mhẹ la, emena mhi mhọli kwu iyi ẹ loọ. ³²Ama oo dea khi eyẹ rhọ khyiẹlẹ uliemhi egbenwumhẹ, rharhi khi ọni inyọgwho ẹ ọna ọọ kpọ gwhua, nenaa ọ she ke gwe nyele; ọ kpọ waa, nenaa a she ke gwe mẹ ọli.'"

¹Ijesu ọọ gwe ngme khase eni idibo ọli, 'Ọmọse ọgwho ni ọ pfue ọọ la vhọ ni ọ mhọli ọni ọ rhi ẹloe kwhu akanya nali, a ke ngme khasẹ ọ khi ọni ọ rhi ẹloe kwhu akanya ẹẹ nali eyọ ọọ pfuẹ ọli ọsuemhẹ a kwa. ²Iyọ ọni ọsuemhẹ ọyọ, ọ ke nyalu ọli, ọọ li, 'Elọ mhi mẹẹ a suọ vhi obodẹ ena? Rhọ khasẹ mhẹ abhi u li gbe akanya na mhẹ, rharhi khi u waa ke gwe laa kee rhi ẹloe kwhu akanya na mhẹ.'³Ọni ọ rhi ẹloe kwhu akanya eyọ ọọ li egbe lẹẹ, 'See mhi ke laa li eyọo, abhi ọga mhẹ ọ ke rhọ la myie mhẹ akanya ena? Imha mhọli izemhi ni a rha gwa ekẹ, omama ọa nwu mhẹ khi mhi rhọ kee yẹ olema. ⁴Mhi yẹsẹ emena mhi laa li, ishọyọ a kha ke rhue mhẹ vhi ukanya le, agbọ e kẹ dobẹ mhẹ lo wẹ apfẹ.'⁵Iyọ ọni ọ rhi ẹloe kwhu akanya nali eyọ ọ nyalu eni e lo ọga ọli eta, ọ mhila ọni ikyiatsolo, ọọ li, 'Ingmẹẹ u she mẹẹ lo ọga mhẹ eyọ?' ⁶Ọọ li, 'ijiakpala ivhili egbhọ ishie.' O ke ẹẹ li. 'Mọ oni ebe ota ona ni u lo, nyanya deshito, khi u kẹkẹ ijiakpala egbhọ eva, ikpamhi igbe. ⁷Ọni ọ rhi ẹloe kwhu akanya eyọ ọ gwe ẹẹ li ọgbọ ọvhese, 'Ingmẹẹ ghyiẹ u lo?' Ọọ li, 'Ijiakpala ido egbhọ ishie.' ọọ li, 'Mọ oni ebe ota ona ni u lo, kẹkẹ ijiakpala egbhọ-ene shi vhọ.'⁸Ọni ọga ọni ọ rhi ẹloe kwhu akanya ni ọ vha gwuabha ẹẹ gbe eyọ ọọ chichi ọ rharhi khi ọ khyiẹlẹ ingme ọtsẹgbhẹ. Rharhi khi imyi oni agbona ea khyiẹlẹ te odẹ iyẹsẹ rhọ khali iọgbọ dala imyi ufulọ. ⁹Mhi ngme khasẹ vhẹ, vha rhi ọsuemhẹ oni agbona ni e vha pfuasẹ nwuno ikpokyia ni egbe vhẹ, ishoyọ oni osuemhẹ o kha ke pfo, e ke a dobẹ vhẹ lo apfẹ wẹ ni ẹlẹnagbọagbọ le.¹⁰Ọgbọ ni ọ mhọli ingmaghyie shi ukwukwu ọli, lẹ lọ gwea mhọli ingmaghyie a shi onofu, ama ọni ọ vha sheda mhọli ingmaghyie shi ukwukwu ọli, ọ vhaa mhọli ingmaghyie shi oni otọgbe ni a rhọ nali. ¹¹Iyọọ, vhavha sheda mhọli ingmaghyie shi ikpaghọ ọsuemhẹ agbọ, see vha ke lia mhọli ingmaghyie shi egbegbe ọsuemhẹ? ¹²Abegwhoyọ, o kha kyia khi vhavha rhi ingmaghyie rhọ khali emeni ọgbọ ọvhese ọ mhuẹ, ọgwho ọ ke laa rhi ọsuemhẹ obọ ẹ nẹẹ?¹³A vha mẹ ọgamhẹ ni ọ dobẹ a ga ega ava, a mẹ khi ọ khaa bishi elemhi ọgwho ọ mhọli ighọli ọni ọ kpọẹ, ọa liyọ, rhẹmhi ọa mhọli ẹrhẹghẹ a na ọgwho, ọ rhi ẹloe gbe omhasẹ ọni ọ kpọle. vhavha dobẹ a ga Ishinẹgba ali ọsuemhẹ kwugbe."¹⁴Nenaa eni Ifarisisi, ni ukpaghọlọ o nwemaa ẹẹ ghọli, e suọ eni ingme ena kwu, e kee rhi ọli li egyia. ¹⁵Ọ ke ẹẹ wẹ, "Vha rhi egbe vhẹ kyili eni e vha lue ukpẹloli agbọ, ama Ishinẹgba ọ yese ikpakomhi vhe. Emeni ea ghọli agbọ li e vha ghọli Ishinẹgba.¹⁶Ushi ali eni ebolẹ ee lee la rhilili apfishi neni Ijọni ọ bhale. Te oni ẹrhẹghẹ oyọ vu, li a te rhi usomhi onogbọ ni o kyili uwi aleghyie Ishinẹgba a tsabọ, ọgbọgbọgbọ ọ te rhi izemhi nyakwa nono odẹ ni lẹ te lo elemhi ọli. ¹⁷Ama o kẹlẹ nẹẹ khi ekẹ ali idane e rhọ dosẹ a lẹẹ dala ukpamhi ingmemhi Ishinẹgba ogwho o rhọ mela apfuẹa.¹⁸Ọni ọ sheda khwu ugwhẹ ọli ni ọa mhọli ọvhese odọsẹ li ọ li, ọni ọ sheda mhọli ọkpotso ni a kwhu ugwhe, rhẹmhi ọ li odọsẹ.¹⁹Nenaa ọmọse ọgwho ọọ la vhọ ni ọ nwumaa pfue, ni ọ rhi ede uchẹ ali eni e ke gwe ghalẹ, ghalẹ ẹ kwu egbe, abhi ogbe o gbe kwu li ọ rhi ẹpfue ọli li agbọ je alo. ²⁰Aa mẹ ọmọse ọvhese ni ọọ lema ni ẹẹ lu Ilazarọsi ni egbe ọli kwu e vọ ivyiolo, ivyiolo, ni ọọ shitọ vhi obunodẹ ni a tee lo apfẹ ọli, ²¹Oo gaa ghọli ọli khi ọ rhọ sanọ emeni e te ukhomhi itebu ọnọsuemhẹ ọyọ dena kwu ekẹ le, a rhi obọ gbe oyọ shi, iweshi e bhale ee lala li eni ẹmẹli eyọ.²²O ke bhale a rhamhi, ọni ọọ lema eyọ, ọ ke rhọ gwhu ighyiukọ e tsua ọli vu je ẹghẹghẹ Ebulahamu. Ọnọsuemhẹ ọyọ ọ gwe li ghwu, a rhi ọli tọ, ²³O je irhẹrhẹ (owerhẹ), abhi ọ kee lii mẹ ẹchọ vhi owerhẹ, ọ ke khyi akwhẹ nya ike bino idane li ọ rhọ mẹ Ebulahamu ali Ilazarọsi obhoni odẹ o nuẹ.²⁴Ọ ke sọọse lasele, ọọ li, 'Ita Ebulahamu, mhọli ivhẹlemhi kwu mhẹ khi u ghyie Ilazarọsi, khi ọ sọ ukpobọ vhi amẹ de to mhe vhi olẹmhi khi o pfọmhẹ mhẹ olẹmhi rharhi khi mhi la ududumhi ọtomhẹ vhi oni elemhi awerhẹ ona.'²⁵Ama Ebulahamu ọọ li, 'Ọmọ, sato ẹrhẹghẹ ni u rhọ la agbọ, u myie ẹtsẹkẹ kwu ni e ti, ama Ilazarọsi abagwhoyọ ọ li myie ẹtsẹkẹ enebe. Ama nenaa ọ she la asha ọpfọmhẹ ọli, ghyiẹ li u la elemhi ọtomhẹ ena. ²⁶A rhi obọ gbe ena kwu shi, a tọ ududumhi uyele shi vhọ, e nabhi e kha da bhẹ vhi obhoni u la e vha laa dobẹ, abagwhoyọ a vha li mẹ ọni ọ dobẹ a te obhoni u la bhẹ bhuli eyẹ lee.'²⁷Ọnọsuemhẹ ọ ke ẹẹ li, 'Mhi lema ẹ, Ita Ebulahamu, khi u ghyie ọli je apfẹ ita mhẹ. ²⁸rharhi khi mhi mhọli inyọgwho emose oshie - khi ọ ke li a vyhi wẹ ude, rharhi khi ulishi ọa nwu mhẹ khi e ke li bhale a vhẹ mhẹ ana ni o kyili asha ẹchọ ena.'²⁹Ama Ebulahamu ọọ li, 'E mhọli Imozisi ali eni ebolẹ; dobẹ wẹ rhi esọ shi we vhọ.' ³⁰Ọnọsuemhẹ ọ ke sọ ọli vhọ ọọ li, 'Obho, Ita Ebulahamu, o kha kyila khi ọgbọ ọ te egwhi vule nena, e laa pfiegbe denegbe.' ³¹Ama Ebulahamu ọọ li, 'O kha kyila khi e vha rhi esọ shi Imozisi ali eni ebolẹ vhọọ, ọgbọ ọ kha rhẹ te egwhi vule, e vha laa rhọ shiọ.'''

¹Ijesu ọo ke ẹẹ li eni idibo ọli, "Egbegbingme lọ khi eyẹ dobẹ a li ingmobe, ama epfua khi uwi ọni o te obọ ọli bhẹ! ²Rhẹmhi a kha gba ẹchẹ mali vhi urhuli a tsua ọli pfilo elemhi okwu li o kha ti ọ vhi egbe nẹẹ, dala ọ rhọ zẹ ni okwhomhọgwho eni ikwukwu wẹ ena e rhọ tsutsu de odẹa.³Vha rhi ẹloe kpẹ egbe vhẹ egbe. Inyọgwho vhẹ o kha li ingmobe, vha nu ọli ngme, ọ kha mẹ ọli mẹ khi ọ nwu egbe lieliẹ, vha yelea nali. ⁴Ọ kha gbe gọ nẹẹ ite ishila ogbẹlẹ, ọ lieliegbe bhuli ẹ le ite ishila, ọọ ghyie, 'Yagwa,' u nwemaa yelea nali!"⁵Eni idibo eẹ li Ọnọmhọli, "Khyi nya eyẹ vhi irhọshiọ." ⁶Onomholi ọ ke ẹẹ li, ''U kha mholi irhọshiọ ni o liabhi ukpamhi imọstadi u laa li ẹẹ li, oni orhẹ isikamọ ona, 'Vu ekea, khi u kaa gbọla shi elemhi okwu,' o laa kyia yọ.⁷Ama ọgwho elemhi vhẹ, ni ọ mhọli ọgamhẹ ni ọa gwa ishemhi ọa liyọ rhẹmhi ọ rhi ẹloe a kwhu isumha ọ ke jele, ọọ li, 'Bhale khi u kaa le emenale nenaa abhi ọ li yẹsẹ te ishemhi a jele eyọ? ⁸Ni ọ vhaa laa li ẹẹ li, 'Khyiẹlẹ emenale na mhẹ, rhi ugbhogbho nwu ede ẹ khi u khyiẹlẹ na mhe le nee. mhi kha ke le pfuse, u chigbea le u da iyi ẹ?⁹Ọ vha kphẹmhi ọni ọgamhẹ rharhi khi usomhi ni a ghyie ọ li ọ ye, laa kha khi li ọ ye? ¹⁰Abagwhoyọ, li shi vhẹvhẹ, vha kha khyiẹlẹ etsumhanẹkẹ ni ẹẹ li vha khyiẹlẹ, vha khyiẹ wẹ, 'A khi oyọ li o ke rhẹ vhẹ tẹ. rharhi khi akanya ni o gọ lu vhẹ ni vha kha gbe lẹ vha gbe eyọ.'"¹¹E kee je Ijerusalemu, ọ rhọ te aloekẹ Isameria ali Igalili. ¹²Ọọ ke lo elemhi oni evholi ogwho, ọ bhale a vhẹ iọgbọ ekhomhi ni e fefe e nwu. E mugha chi tanya nali. ¹³Ee ke yasẹ irhuli vhi ekẹ e kwu inua, eẹ li, "Ijesu, ọga, mhuẹ ivhẹlemhi kwu eyẹ."¹⁴Abhi ọ ke rhọ mẹ wẹ ọọ wẹ, "Vha vu a rhi egbe vhẹ khase eni e kpeda ugamhi." E ke liyọ lẹẹ, e pfuasẹ efafe ni e la wẹ egbe e pfo. ¹⁵ Abhi ukwhumhọgwho elemhi wẹ ọ ke rhọ mẹ khi eni igwhuamhi e lase lẹ vhi egbe le, ọ pfi egbe denegbe ọ rhi urhuli kwu sọọse chichi Ishinẹgba. ¹⁶Ọ ta rhugwhu nyẹsẹ ukhomhi shi Ijesu awẹ, ọọ kphẹmhi ọli. Ọnyi Isameria li ọ kyia.¹⁷Ijesu ọọ sọ ọli vhọ, ọọ li, "Aa khi vhẹvhẹ ikwhumhọgbe vha she kyia? ¹⁸Eni e ke kpọẹ e vha li bhẹ lia rhi ikiki ni Ishinẹgba, ina khi ọni ọlele ọna?" ¹⁹Ọọ li, "Vu ekẹ lẹ, khi uu kee vu. irhọshiọ ni u mhuẹ o she rhẹ ze."²⁰Abhi eni Ifarisisi e ke rhọ mhila ọli ẹrhẹghẹ ni aleghyie Ishinẹgba o rhọ laa bhẹ, Ijesu ọọ ke sọ wẹ vhọ, ọọ li, "Aleghyie Ishinẹgba o vha kyili emeni a dobẹ rhi ukpẹloli a mẹ. ²¹Wẹ khi rhẹmhi e ke aa li ẹẹ li, 'Bino ana!' ọa liyọ bino obholọ! rharhi khi aleghyie Ishinẹgbe o la vhẹ iteteva."²²Ijesu ọọ li idibo ọli, ''Eni egbẹlẹ ea bhale ni vha rhọ laa ke nono abhi vha li mẹ ogbẹlẹ ogwho eni egbẹlẹ ọni Omyi Ọmọse, ama vhavha laa mẹ ọli. ²³E laa kee li ẹẹ ghyiẹ, 'Bino ana! Bino ayọ! Ama imhẹ rhọ khẹ wẹ a bino, wẹ khi rhẹmhi u rhọ khẹ wẹ, ²⁴Rharhi abhi inyiamhinyia o le lia li gbiaa, gbiaa, eyọ o ga idane kwu, iyọ li oni ogbẹlẹ Ọmyi Ọmọse o laa li.²⁵Ama ọ nwemaa kpọ a mẹ ẹchọ shi ẹtsẹkẹ nebu, ozele ọli e khyie ọli. ²⁶Abhi a kpọ li mẹ ọli egbẹlẹ Inowa, iyọ la li laa mẹ ọli oni ogbele Omyi Ọmọse. ²⁷Ee lẹẹ, ee da, ee kyiẹlẹ izuode, abagwhoyọ e rhi iọgbọ ẹ zuode, rhili apfishi ni Inowa ọ rhọ lo elemhi ọkọ__ ikpho e bhale a pfuse wẹwẹ kwua.²⁸Abagwhoyọ abhi a gwe li mẹ egbẹlẹ Ilọtu, ee le, ee da, ee dẹnọ, ee rhẹẹ dẹẹ, ee tọnọ ewa. ²⁹Ama oni ogbẹlẹ ni Ilọtu ọ rhọ te Isodọmu vu, erhẹ ali ugbhele ofu ali erhẹ o rhọ te Idane rhuẹsẹ kwule pfuse wẹwẹ kwua.³⁰Oni odẹ ona li o li laa te oni ogbẹlẹ ni a rhọ laa rhi Omyi Ọmọse khase. ³¹Oni ogbẹlẹ ẹlẹyọ, imhẹli ọni ọ la ukhomhi owa ọ kpiale a wolọ ede ni ọ rhọ shi elemhi owa. Wẹ khi rhẹmhi ọni ọ lẹẹ ishemhi ọ gwe jele.³²Sato ugwhẹ Ilọtu. ³³Ọni ọa dua khi lẹ tsumhi ayẹmhẹ lẹ ọọ laa wasẹ ọlia, ama ọni ọ ke wasẹ ayemhẹ ọlia rharhi mhẹmhẹ ọ laa tsumhi ọli.³⁴Mhi gwu khasẹ vhẹ, oni ẹliyiọsẹ oyọ iọgbọ ava ee la la ẹtẹtẹ ogwho. A rhue ukwhumhọgwho a dobẹ ọni ọ kpọẹ. ³⁵Ikpotso ava ee laa kee mhẹli ẹtsẹkẹ. A rhue ukwhumhọgwho a dobẹ ọni ọ kpọẹ. ³⁶Ẹmọse ava e la la ishemhi; ukwhumhọgwho ọ vu, ọni ọ kpọle ọ la ekẹ.³⁷E ke mhilali, eẹ li, "Ashio Ọnọmhọli?" Ọọ ke ẹẹ wẹ "Asha ni a mẹ olimhi ayọ laa bhe la vhẹ igwhi."

¹Iyọ ọọ ke kpita khasẹ wẹ abhi e lia kee pfi olema ẹrhẹghẹ kwu, abhi abọ ea li lẹ sha wẹ. ²Ọọ li, "Evholi ogwho oo la, ọsunuẹzọ ni ọ vha ẹẹ nulishi Ishinẹgba wẹ khi ekpẹ ọgbọ li ọ mhuẹ ọọ la.³Nenaa, ọkpotso ọsọrhọ ọ la oni ẹvhue, ọọ ke bhẹ bhuli ọli le, ọ rhọ ẹẹ li, 'Kpaghyiẹ mhẹ gwu ẹzọ kpẹ mhẹ obodẹ ọzeva mhẹ.' ⁴Ọọ gaa liyọ kpokpo ọ tẹsẹ ọ vha ẹẹ nono khi lẹ kpaghyiẹ ọli, ama o ke kpẹ tẹsẹ ọọ li egbe lẹẹ, 'Ama imha mhọli ekpẹ ọgbọ wẹ khi ulishi Ishinẹgba, ⁵Ama abhi ọni ọkpotso ọna ọ ke rha kphakpha mhẹ, mhi laa kpaghyiẹ ọli gwu kpẹ ọli, Khi ọọ ke kphakpha mhẹ dọsẹ o ke pfi ọlọsẹmhẹ na mhẹ shi utotona ni ọ rha bhale laa kpokpo mhẹ ena.'"⁶Iyọ Ọnomhọli ọọ li, "Vha rhi esọ shi emeni ọni ọsunuẹzọ ni o vha pfuasẹ ọ ngme. ⁷Nena Ishinẹgba ọa li laa gwu kpẹ eni e sọse a nyalu ọli shi ota shi iyọsẹ? Ọ vha mẹẹ laa rhi obọ nwu idu rhọ khẹ wẹ? ⁸Mhi gwu khasẹ vhẹ khi ọ laa nyanya sọ wẹ unu ẹzọ? Ama Omyi Ọmose ọ kha bhale, ọ mẹ bhe laa vhẹ irhọshiọ vhi ukhomhi ekagbọ?"⁹Iyọ ọ gwe kpe oni ita ona khasẹ iọgbọ ni ẹẹ khi wẹwẹ e pfuasẹ dala ọgbọ kwu ni e rhi ukpeloe ee gbe iọgbọ ni e kpọẹ, ¹⁰"Emọse ava ee je owuka lẹẹ pfi olema-- ọgwho ọ kyili Ifarisisi ọni ọ kpọẹ ọ kyili ọmyionoga.¹¹Ọni ọ kyili Ifarisisi ọ mugha ọọ pfi olẹma ọọ rhi egbe ọli gha, ọọ li ẹẹ li, 'Uwegbe Ishinẹgba, imha liabhi iọgbọ evhese ni e kyili ighyiato, eni e vha pfuasẹ, eni ea ye odọsẹ, ọa liyọ ọni ọmọse ọna ni ọ kyili ọmyionoga. ¹²Iteva mhia nwu azumhi elemhi uka kwu. Mhia zẹ arhue ogwho igbe vhi emena mhi mhọli kwu le,'¹³Ama ọni ọmyionoga, ọ mugha tanya, ọ vha jilẹ bino eda, ama ọ rhi obọ nya aye, ọọ li, 'Ishinẹgba, fẹ elemhi mhẹ, mhẹmhẹ ọlingmobe.' ¹⁴Mhi ngme khasẹ vhẹ, ọna ni ọ lama khi ọlingmobe lẹ kyia, laa gbe kwa na, rharhi ọni ọ chi egbe ọ she a la laa chi ọli kpiale, ama ọni ọ ke chi egbe ọli kpiale a laa chi oli shele."¹⁵Eni iọgbọ ee ke wolọ imọfẹ bhuli ọ le, khi ọ rhi obọ chi wẹ, ama abhi eni idibo ọli e ke rhọ mẹ wẹ, e va nyanọ wẹ ikhomhi. ¹⁶Ama Ijesu ọ ke nyalu wẹ, ọọ wẹ, "Imhẹ vha gwe kwhu lkwukwu lvhiẹ, vha dobẹ wẹ bhale bhuli mhẹ le rharhi khi enana li e mhọli eghyiele Ishinẹgba. ¹⁷Ingmaghyie mhi ngme khase vhẹ, ọni ọ vha rhue eghyiele Ishinẹgba abhi ọmọfẹ ọ vha chigbe laa lo vhọ le."¹⁸Okwhumhọgwho eni ee mhasẹ ọ ke mhila ọli, ọọ li, "Egbegbe Ọ̣wẹnagbọ, elọ mhi laa li na mhi rhọ laa dobẹ lo agbọ ẹlẹnagbọagbọ?'' ¹⁹Ijesu ọọ li, "Elọ e zẹ ni u ke rha lu mhẹ ọnọti? A vha mẹ ọnọti, sẹẹ khi Ishinẹgba lọgwho. ²⁰U yẹsẹ eni ishi imhẹ ye odọsẹ, imhẹ gbe ugbee, imhẹ do ighyiatọ, imhẹ pfi ọtsẹ ighagha, rhi ekpẹ ni ita ẹ ali inyọ ẹ." ²¹Ọni ọa mhasẹ eyọ, ọọ li, "Te ekẹ vu lẹ mhi te rhi eni ingme ena gwhẹ bhẹẹ."²²Abhi Ijesu ọ ke rhọ sokwu ona, ọọ ke nu ọli ngme, “O kpọẹ ẹtsẹkẹ ogwho le. Uu nwemaa laa rhi ọsuemhẹ ni u mhọli kwu dẹẹ u kemhi wẹ ni enanya, ishọyọ khi u mhọli ọsuemhẹ shi aleghyie eda – ishọyọ u bhale a rhọ khẹ mhẹ.” ²³Ama abhi ọni ọmọse ni ọ mhọli ọsuemhẹ eyọ ọ ke rhọ suọ eni ingmemhi ena pfuse, oya oo ga gaa li vhi egbe kwu, rharhi khi ọọ ma mhọli ọsuemhẹ.²⁴Iyọ Ijesu, ọ ke mẹ ọli, abhi oya o li lu ọli, ọọ li, “O maa kyili emeni e nwu unu khi ọni ọ mhọli ọsuemhẹ ọ rhọ lo aleghyie Ishinẹgba! ²⁵Rharhi khi oo la laa kẹlẹ nẹẹ khi ukhomhi ẹna o rhọ te ukpẹloe agbede dọsẹ laa lẹ, dala khi ọnọsuemhẹ ọ rhọ lo aleghyie Ishinẹgba.”²⁶Eni e suọ ona ee ke eẹ li, “Nena mhi gyhi ọni ọ ke la dobẹ myie pfuese shiọ?” ²⁷Ijesu ọọ li, “Emeni ọgbọ ọ vha dobẹ a khyiẹlẹ Ishinẹgba ọ dobe a khyiẹlẹ ọli.”²⁸Ipitẹ ọọ li, “Nenaa, osuemhẹ eyẹ kwu eyẹ she dobẹ wẹ eyẹ rhọ khali ẹẹ. ²⁹Ijesu ọọ ke ẹẹ li, “Ingmaghyie mhi ngme vhẹ, khi a vha laa mẹ ọgbọ ni ọ dobẹ apfẹ ọli, inyọgwho ọli, ita ali inyọ ọli, imyi oli, rharhi aleghyie Ishinẹgba, ³⁰Ni ọ vha laa mhọli eni e dọsẹ ayọ vhi oni agbona, ali agbọ ẹlẹnagbọagbọ.”³¹Abhi ọ ke rhọ koko eni ogbe ali ava kwugbe, ọ gwu khasẹ wẹ, ọọ wẹ, “Ghee, Ijerusalemu lẹ li eyẹ a je ena, emeni eni ebolẹ e gaa kẹkẹ obodẹ Omyi Ọmọse ee la laa tse. ³²Ee la laa nwu ọli ni eni Ijẹtasi, ee rhi ọli li egyia, ee rhi omama nwu ọli, ee toni etẹẹ kwu ọli. ³³E kha ke rhi itele gbe ọ pfuse, ee gbe olia ogbẹlẹ ozi esẹ ọ gwe vule."³⁴E vha yẹsẹ emeni ọ rhi eni ingmemhi ena ẹẹ ngme, eni ingmemhi ena rhẹmhi a rhẹ wẹ gbhagbha na wẹ, elemhiyọ e vha yesẹ emeni ẹẹ ngme.³⁵E ke bhale a vhẹ khi, Ijesu ọ chi mama Ijeriko, ọni ọmọse ni ọ zalo ọ shitọ esọ odẹ ẹẹ mhila omhilaa, ³⁶Ọ ke suọ khi agbọ e tutu lẹẹ dọsẹ, ọọ ke mhila emeni a mẹ. ³⁷Ee ke gwu khase ọli khi Ijesu nẹẹ Inazareti li ọ dọsẹ la lẹẹ.³⁸Oni ọmọse ni ọ zalo eyọ ọọ ke sọọse zezeze, “Ijesu omyi Idevidi vhẹlemhi mhẹ.” ³⁹Eni e dọsẹ lẹ lẹẹ e va nya vhi ukhomhi, khi ọ koko unu. Ama rhẹmhi ọ khyie lee sọọse waa, omyi Idevidi, vhẹlemhi mhe.”⁴⁰Ijesu ọọ ke mugha ọọ li, e nyalu ọni ọmọse na lẹẹ. Abhi ọni ọzalo ọ ke rhọ chi mama Ijesu, ọọ ke mhilali, ⁴¹“Elọ u waa nono khi mhi kyiẹlẹ nẹẹ?” Ọọ ke sọ vhọ, “Ọnọmhọli, mhiaa nono khi mhi kee mato.”⁴²Ijesu ọọ li, ''Kee mato. Irhọshiọ ni u mhuẹ o rhẹ rhuẹ igwhuamhi egbea. ⁴³Ayayayọ ọọ mato, ọ rhọ khali ọ, ọọ chichi Ishinẹgba. Abhi agbọ e ke rhọ mẹ ona, wẹwẹ kwu ee chichi Ishinẹgbe.

¹Ijesu ọọ rhọ te Ijẹriko dọsẹ lẹ lẹẹ. ²Ọmọse ọgwho ọọ la ayọ ni ẹẹ lu lzakiọsi. Ọ kyili ọga emyionoga, ọ mhọli ọsuemhẹ.³Ọ nyakwa khi lẹ rhọ mẹ ọni Ijesu ọ kyia, ama ọ vha dobẹ rhọ te oni agbaa ni o legba ẹẹ mẹ ọli, rharhi khi ọ vha yagha. ⁴Iyọ, ọ na kpalo ni eni iọgbọ ọa shele orhẹ Isakamọ khi lẹ kẹ mẹ ọli, rharhi khi oni odẹ oyọ li Ijesu ọ te lẹẹ dọsẹ.⁵Abhi Ijesu ọ rhọ rhamhi ayọ, ọ yasẹ alo ekẹ ọọ li, "Izakiọsi, nyanya kpiale, rharhi khi amo ena mhi nwemaa rhamhi apfẹ ẹ" ⁶Iyọ, ọ nyanya, ọ kpiale rhi oghẹlẹ tsẹ Ijesu mekyia. ⁷Abhi ọgbọ kwu ọ ke rhọ mẹ ona, wẹwẹ kwu e ke kwumhẹ, eẹ li, "Ọ she lo elemhi ayọ ọa kọ fẹli ọmọse ni ọ kyia ọlingmobe."⁸Izakiọsi ọ tomugha ọọ li Ọnọmhọli, 'Ghee, Ọnọmhọli, apfeva ẹpfue mhẹ mhi rhaa ni enanya, o kha kyia khi mhi she li ọgbọ le vhi ẹtsẹkẹ pẹẹ kwu, mhi laa fali ọli ade ene na mhi li ọ le." ⁹Ijesu ọọ ke ẹẹ li, "Amo imyiepfuese o she bhẹ vhi oni apfẹ ona le, rharhi khi omyi Ebulahamu li ọ li kyia. ¹⁰Rhẹmhi Ọmyi Ọmọsẹ ọ bhale a nono ali khi ọ rhọ tsumhi iọgbọ ni e waa."¹¹Abhi e ke rhọ suọ eni ingme ena, oọ khyele kpita ẹẹ khasẹ wẹ, ọ she chi mama Ijerusalẹmu, ee sa khi aleghyie Ishinẹgba o she lee rhi egbe khasẹ obobobọ. ¹²Iyọ ọọ ke ẹẹ li, "Omose ni ọmhọli ojima ọgwho ọ lo elemhi ẹvhue ni ọ je lẹẹ myie wẹ eghyiele ni egbe ọli khi lẹ gwe jele.¹³Ọ luno Ikwhumhọgbe vhi egamhẹ ọli, ọ rhi ikpulu ishie na wẹ, ọọ wẹ, "Vha rhi ọli kee do okyi apfishi na mhi rha jele." ¹⁴Ama iọgbọ ẹvholi ọ, ee bishi elemhi ọ, e ghyie iọgbọ ni e to ẹloe wẹ bhuli ọ, eẹ li, 'Eyẹ vha nono khi ọni ọmọse ọna ọ kyili oghyie eyẹ ọ mhasẹ a ke ni eyẹ.' ¹⁵Abhi ọ ke rha myie oni eghyele jele, ọọ nyalu eni egamhẹ ni ọ rhi ikpaghọ na, khi lẹ yẹsẹ elele ni e ke mhuẹ vhi okyi ni e rhẹẹ wẹ do.¹⁶Ọni ikyiatsolo ọ bhẹ bhuli ọli le, ọọ li, 'Ọnọmhọli, ipọmhi igbe ni u rhọ na mhẹ mhi she mẹ ipọmhi igbe nya vho.' ¹⁷Ọni ọga wẹ ni ọgbọ ekpẹ ọyọ, ọọ wẹ, 'Nwu ikanya u maa gwabha gbe, ọgamhẹ aghyie. Rharhi khi u rhi udu aghyie khyiẹlẹ oni ukwukwu ẹtsẹkẹ ona, mhi la rhẹ kpeda u mhasẹ a ni ẹvholi igbe.'¹⁸Ọzava ọ bhẹ, ọọ li, "Ipọmhi ishie ni u rhọ na mhẹ mhi she gwe mẹ ipọmhi ishie nya vhọ.' ¹⁹Ọni ọmọse ekpẹ ọyọ ni ọ kemhi ikpaghọ na wẹ eyọ ọọ li, 'Ghyiẹ kee mhasẹ ni ẹvholi ishie.'²⁰Ọvhese ọ bhale, ọọ li, 'Ọnọmhọli gyhi ipomhi ogwho ẹ na mhi gẹnọ shi ode kpẹkpẹẹ shi nẹẹ, ²¹rharhi khi ulishi ẹ li oo nwu mhẹ, rharhi khi ọgbọ ọbe li u kyia. Asha ni u waa rhọ shi li u je laa rhue, u gwe a khyiẹsẹ emeni u waa rhọ kọ.'²²Ọni ọga wẹ ni ọgbọ ekpẹ ọyọ ọọ li, 'Ingmemhi unu ẹ mhi te laa sọ ẹ unu ẹzọ. Ghyiẹ ọgamhẹ ọkhọlọ. Uu kpọ le yẹsẹ khi ọgbọ ọbe lẹ mhi kyia, khi asha ni imha rhọ shi lẹ mhi je laa rhue, mhi je asha ni mhi rhọ kọ shi laa khyiẹsẹ. ²³Elọ e ke zẹ khi u waa rhi ukpaghọlọ mhẹ shi ilu ni a rhi ikpaghọ a shi na mhẹ, ishọyọ nena na mhi ke rhọ jele ena e she vyia shiọ?'²⁴Oni ọmose ni ọ mhọli ojima ni ọga wẹ, ọọ li eni e mugha ayọ, 'Vha myiẹ ọli oni ipọmhi ogwho, khi vha rhi ọli ni ọni ọ mhọli ipomhi igbe.' ²⁵E ke eẹ li, 'Ọnọmhọli, ọ kpọ mhọli ipọmhi igbee.'²⁶'Mhi ngme khasẹ vhẹ, khi oni ọ mhuẹ, li a gwe rha ma vhọ, ama ọni ọ vha mhuẹ, oni ọ kpọ mhuẹ rhẹmhi a gwe a myie ọ lẹ. ²⁷Ama eni ẹbele mhe ena, ni e vhaa nono khi mhi kyili oghyie wẹwẹ, vha rhẹ wẹ bhale vhi ana khi a gbolo wẹa ukpẹloẹ mhẹ.'²⁸Abhi ọ ke rhọ ngme eni ingme ena kwu, ọ vu ọ shele jee Ijerusalemu.²⁹Ọ ke chi mama Ibẹtifage ali Ibẹtani, ọkpha ni aa lu Olivẹti, ọ ghyie idibo Ikwhumhava, ³⁰Ọọ li, "Vha je ẹvholi ni o mama oni ẹvhue ona. Vha kha le lia lo vhọ vha laa mẹ ijaki, ni a vha khyie kpọ nya nee. Vha taghyiẹ ọlia khi vha nwu ọli ghyi mhẹ. ³¹ọ kha mhila vhe, 'Elọ e zẹ khi vhaa taghyiẹ ọli?' vha li ẹẹ li, 'Onomhọli lọ laa rhi ọli khyiẹlẹ ẹtsẹkẹ.'"³²Eni a ghyie e bhale a vhẹ ọni ijaki abhi Ijesu ọ kpọ le gwu na wẹ. ³³Abhi e rhẹ taghyiẹ ọni ijaki, eni e mhọli ọli eẹ wẹ, "Elọ e zẹ khi vhaa taghyiẹ ọni ijakia?" ³⁴Eẹ li, "Ọnọmhọli li ọ mhuẹ emeni ọ rhi ọli laa khyiẹlẹ." ³⁵E rhi ọli bhẹ ghyi Ijesu, e rhi ede wẹ kwu ọni Ijaki e nwu Ijesu shele ọli. ³⁶Abhi ọ ke rhẹ lẹẹ, ee naghyiẹ ede wẹa kwu atuode.³⁷Abhi ọ ke rhọ chi mama abesọ ọkpha Olivi, eni iọgbọ kwu ee ghẹlẹ e rhi urhui ni o ze ẹẹ chichi Ishinẹgba shi idudumhi Ikanya kwu ni ọ gaa gbe, ³⁸Eẹ li, "Aa zọte ni ọni oghyie ni ọa bhale elemhi eva Ọnọmhọli! Ọpfọmhẹ o la elemhi aleghyie eda ali ikiki ni o yagha nẹẹ!"³⁹Ifarisisi egwho ni e la oni agbaa eẹ li, "Owẹnagbọ, kpha dese idibo ẹ." ⁴⁰Ijesu ọọ sọ vhọ ọọ li, "Mhi ngme khasẹ vhẹ, o kha kyia khi ena e pfiesọa, ẹchẹ e laa sọse lasele kee sẹlẹ mhẹ."⁴¹Abhi Ijesu ọ ke rhọ chi mama oni ẹvhọli, ọ vyiẹ kwu ọ, ⁴²ọọ li, "Rhẹmhi a khẹ khi vha yẹsẹ nena, abhi a lia mhọli ọpfọmhẹ Ishinẹgba! Ama nenaa a rhẹ wẹ gbhagbha na vẹẹ.⁴³Eni egbẹlẹ e la bhale na vhẹ, ni ẹbele vhẹ e rhọ laa gba ọgba khyili vhẹ, e sẹ gasẹ vhẹ, e te ashakhasha a sha vhẹ. ⁴⁴E laa gbe vhẹ ali imyi vhẹ nwu ekẹ, E vha laa dobẹ ẹchẹ ogwho a nya ukhomhi ovhese, rharhi khi vhavha mẹ ọli mẹ ni Ishinẹgba ọ rhẹẹ dua khi lẹ tsumhi vhẹ."⁴⁵Ijesu ọ lo oni owuka ọ tono eni ee do okyi abọ a lase, ⁴⁶ọọ wẹ, "Oo laa akẹkẹshekẹ, 'Apfẹ mhẹ o laa kyili apfẹ olema,' ama vha she rhi apfẹ mhẹ mela apfẹ ighyiatọa."⁴⁷Iyọ Ijesu ọọ laa owuka ẹẹ wẹna iọgbọ ogbẹlẹ kwu. Eni e kpeda ugamhi ali eni Ikọwe ali eni e kpeda ni eni iọgbọ, ee nono khi wẹwe e gbe ọlia, ⁴⁸ama e vha mẹ odẹ ni e tee khyiẹlẹ ọli, rharhi khi eni iọgbọ kwu li e rhi esọ shi ọli vhi ekẹ onaghyie, onaghyie.

¹Ogbẹlẹ ogwho, abhi Ijesu ọ rhẹẹ wẹna iọgbọ vhi owuka, eni e kpeda ugamhi ali eni Ikọwe ali eni e womhẹ e bhẹ bhuli ọli le. ²Ee ngme, eẹ li, "Ngme khasẹ eyẹ izemhi ọgwho u rhaa gbe eni ikanya ena? Ọa liyọ ọgwho ọ rhi oni afu ona nẹẹ?"³Ọọ ke sọ vhọ ọọ wẹ, "Mhi lia mhila vhẹ ogbọ. Vha gwu na mhẹ. ⁴ibatisimhi Ijọni. Aleghyie oweda li o te bhale laa khi obọ iọgbọ?"⁵Ee ke nu egbe wẹ kwu ochi, eẹ li, "Eyẹ kha ẹẹ li, 'Rhọ te eda lọ, ọ laa li ẹẹ li, 'Elọ e ke zẹ khi vhavha lama shi ọli vhọ?' ⁶Ama eyẹ kha ke ẹẹ li, 'Obọ iọgbọ li o te bhale,' iọgbọ kwu e laa tono eyẹ eche, rharhi khi e lama khi Ijọni, ọbolẹ li ọ kyia.⁷Elemhiyọ, e ke eẹ li khi wẹwẹ e vha yẹsẹ obhoni o te bhale. ⁸Ijesu ọ ke ẹẹ wẹ, "Mhẹmhẹ, I mha ngme a khasẹ vhẹ izemhi ọna mhi rha khyiẹlẹ eni ẹtsẹkẹ ena shiọ."⁹Ọ ke kpe oni ita ona khase eni iọgbọ, "Ọni ọmọse ọ gwa ishemhi, ọ ngmomhi ọli ni eni ea gwa ikpamhi erhẹ, ọ lo elemhi ẹvholi ovhese ọ la vhọ tẹsẹtẹsẹ. ¹⁰O ke rhamhi ẹrhẹghẹ ni e ngme shi, ọ ghyie ọgamhẹ ọli bhuli eni ee gwa ikpamhi erhẹ ni ọ ngmomhi oni ishemhi na, khi ọ kaa myie wẹ ikpamhi erhẹ ni e vyie nee gyhi lẹ. Ama eni ee gwa ikpamhi erhẹ eyọ, e gbe ọni ọgamhẹ ọyọ, e chigbe kwhu ọli rhi abọ apfuẹ vu.¹¹Ọ gwe ghyie ọgamhẹ ọvhese, e gwe liyọ gbe ọli, e yẹghẹ ọli, e chigbe kwhu ọli rhi abọ apfuẹ vu. ¹²Ọ khyie gwe ghyie ọzasẹ, e gwe liyọ gbe ọli kwali ọli utse, e to ọli abọ a lase.¹³Elemhiyọ, ọni ọmhọli oni ishemhi ọọ li, 'See mhi ke a li nenaa? Mhi a ghyie omyi mhẹ ni ọmọse ni ọ nwemaa ghọli mhẹ. Mhi sa khi e laa rhi ekpẹ nali.' ¹⁴Ama abhi eni ea gwa ikpamhi erhẹ eyọ e ke rhọ mẹ ọli, e nu egbe wẹ mhasẹ, eẹ li, 'Ọni ọ laa le ukwu ọli khi ọna. Vha bhẹ khi eyẹ gbe ọlia, khi oni ukwu o kyili uwi eyẹ.'¹⁵E te oni ishemhi to ọli abọ a lase, e gbe ọlia. Elọ ọni ọ mhọli ọni ishiemhi oyọ ọọ ke li wẹ? ¹⁶Irhẹmhi ọa bhale a pfuse eni ea gwa ikpamhi erhẹ eyọa, ọ rhi oni ishemhi ni iọgbọ evhese." Abhi e ke rhọ suọ ona, eẹ li, "Ishinẹgba ọ laa gwhẹ!"¹⁷Ama Ijesu ọ fẹẹ wẹ, ọọ li, "See oni ingmemhi Ishinẹgba ona o ngme? 'Oni ẹchẹ ni eni e ma owa e khyie, a she rhi ọli kyili echẹli ukpowa'? ¹⁸Ọgbọ kwu ni ọ sheda de shi oni ẹchẹ, ọ laa shashea. Ọni o ke laa de nwu, irhẹmhi ọa mhẹli ọlia tẹtẹẹ."¹⁹Iyọ eni ikọwe ali eni e kpeda ugamhi ee nono abhi wẹwẹ e li nwu ọli oni ẹrhẹghẹ oyọ, rharhi khi wẹwẹ li ọ te kpe oni ita ona. Ama ulishi eni iọgbọ oo nwu wẹ. ²⁰E rhi ẹloe kpẹ ekẹ nwu etse, e zẹ iọgbọ ni ee di khi wẹwẹ e maa gwabha a gbe, khi e kaa nwu ingme ma vhi unu, ishọyọ a nwu ọli rhọ ghyi eni ea mhasẹ ali Igọvinọ ni e mhuẹ izemhi ali afu.²¹E mhilali , eẹ li, "Ọwẹnagbọ, eyẹ yẹsẹ khi waa ngme u gwe a wẹna a te odẹ, a vha mẹ ọgbọ ni ọ wẹna a khasẹ ẹ, ama waa wẹna ingmaghyie obodẹ odẹ Ishinẹgba. ²²Oo mẹẹ te odẹ ushi khi a rhọ zẹ oga ni Isiza laa khi o vha te odẹ?"²³Ama Ijesu ọ yesẹ ighagha wẹ khi rhẹmhi e nono abhi e li rhi ushi nwu ọli obọ, o kyili eni Ijusi, ni e vha ẹẹ nono khi wẹwẹ e zẹ oga, o ke kyili eni gọmechi Iromasi, Ọ ke ẹẹ wẹ, ²⁴''Vha rhi ukpaghọ Iromasi bhẹ gwhe, ukhomhi ọgwho a vyi shi vhọ ena?” Eẹ li, “Isiza lọ.” Ni ọ kpeda igọmhechi Iromasi²⁵Ọọ wẹ, “Iyọ vha rhi emeni e kyili iyi Isiza na Isiza, eni e lkyili iyi Ishinẹgba vha rhọ ni Ishinẹgba.” ²⁶Eni ikọwe ali eni e kpeda ugamhi e vha mẹ emeni ee rhẹẹ zẹ ọli ekẹ awẹ vhi emeni ọ ngme vhi ukpẹloli eni iọgbọ. Oni isọvhọ ọli o nya wẹ aloaa e vha gwe ngme ingme ovhese pẹẹ.²⁷Abhi Isadusis egwho e rhọ bhẹ bhuli ọli le, eni e ẹẹ khi a vha mẹ itiegwhivule, ²⁸Ee mhila ọli, eẹ li, "Ọwẹnagbọ, Imozisi ọọ kẹkẹ shi ekẹ ni eyẹ khi inyọgwho ọgbọ ni ọmọse ọ kha gwhua, ni ọ vha vyia ọmọ ni ugwhẹ ọli, inyọgwho ọli ni ọmọse li ọ ke a rhue ọni ọkpotso khi ọ vyia ivhiẹ shi nali. Ishọyọ a kẹ yẹsẹ khi ọni ọ gwhua li ọ vyia ọli²⁹Aa mẹ emọse oshila ni e kyili inyogwho egbe. Ọni ikyiatsolo ọ mholi ọkpotso ọ vha vyia ọmọ ni ọni okpotso neni ọ gwhua, ³⁰ọni ọzava ọ rhọ khali oni ushi ona ọ rhue oni ọkpotso ọ gwhua abagwhoyo ọ vha vyia. ³¹Ozasẹ ọ gwe liyọ rhue ọli apfishi ọzi oshila, ọ vha vyia ni ọni ọkpotso ọ gwe gwhua. ³²Idegbe oni ọkpotso ọ li gwhua. ³³O kha kyia khi ingmaghyie khi a laa te egwhi vule, ọni ogbẹlẹ itiegwhivule ugwhẹ ọgwho ọ kyia vhọ? Rharhi wẹwe oshila, oshila, kwu li e gaa laa mhọli ọli vhi ugwhẹ."³⁴Ijesu ọo wẹ, "Oni agbona li a lee laa mhuẹ egbe, ni a laa kwhẹsẹ ikpotso ni emọse e laa mhọli ikpotso. ³⁵ Ama eni a mẹ khi e tẹ ni ea te egwhi vule li ea lo inyele ẹlẹnagbọagbọ e vha mhọli egbe wẹ khi rhẹmhi ea ye ugwhẹ. ³⁶ Wẹ khi rhẹmhi e gwe a gwhu, rharhi khi abagwho wẹwẹ ali eghyiukọ e ke li, abhi e ke rhọ kyili imyi itegwhivule.³⁷Ama khi eni e gwhu ee laa vule, rhẹ li a gbe Imozisi ọọ kẹkẹ shi ekẹ a asha ni ebuli e lẹẹ to, ni ọ la lu Ọnọmhọli Ishinẹga Ebulahamu ali Ishinẹgba Aziki ali Ishinẹgba Ijekọbu. Ilimhi e vha ga Ishinẹgba eni e nyele li ea ga Ishinẹgba. ³⁸Nenaa, ọ vha kyili Ishinẹgba eni e gwhu, ama uwi eni e nyele li ọ kyia, rharhi ọgb kwu li ọ nyele na.."³⁹Eni ikọwe Ijusi egwho e sọ vhọ eẹ li, "Ọwenagbọ, u maa gwabha sọ." ⁴⁰E vha gwe jilẹ mhila ọli ogbọ dala ayọ⁴¹Ijesu ọ ke eẹ wẹ, "Mhi laa rhọ khasẹ vhẹ khi agbọ e khẹ khi Ikristi khi ẹdẹli Idevidi lọ, e vha gwabha ngme! ⁴²Idevidi ọ te egbe ọli ngme vhi elemhi ebe Isamu ọọ li, Ishinẹgba ọọ li Ọnọmhuẹmhẹ, 'Shitọ vhi obọ obita mhe, na mhi la laa rhi eghọghọ nẹẹ. ⁴³rhili apfishi na mhi rhọ laa rhi ẹbele ẹ kpọkẹ ni ẹkowẹ ẹ.' ⁴⁴Iyọ Idevidi ọọ lu Ikiristi 'Ọnọmhọli'! elemhiyọ see ọ ke li kyili omyi Idevidi! Ona li o rhọ khasẹ khi ọ fu dala Idevidi"⁴⁵Ukpẹloe ọgbọ kwu ọọ li idibo lẹẹ, ⁴⁶"Vha zẹ ẹgbhẹ shi eni ikọwe vhi egbe, ni e nono khi wẹwẹ e kee sọ ede na gbholo kee kyia, ali otsẹ atuokyi, ali asha eghọghọ vhi elemhi ewuka ali asha ni a laa khyiẹli uliemhi. ⁴⁷E gwe lia lono apfẹ eni esọrhọ, ali elama ighagha ni e nuẹnuẹnuẹ. Epfua nofu o la laa kyili uwẹwẹ."

¹Ijesu ọ bino eni e pfue ni e rhi isomhopfa ẹẹ fofo, ²Ọọ mẹ ọsọrhọ ọgwho ni anya o nwemaa ẹẹ gbe khi ọ rhi ikọbọ eva pfilo vhọ. ³Ọọ ke ẹẹ li, ''egbegbingme mhi gwu khasẹ vhẹ, ọni ọsọrhọ ọna li ọ gaa rhue obọa dala wẹwẹ kwu. ⁴Rharhi khi eni e kpọẹ ena rhẹmhi e te ọsuemhẹ ni e mhọli rhue. Ama ọni ọsọrhọ ọna, asha ni anya o gbe ọlia rhamhi, emeni ọ mhuẹ ni o kyili agbọ li kwu li ọ gaa rhọ pfilo vhọ.''⁵Abhi egwho e li ngme ingmemhi owuka, abhi a li rhi echẹ kwhẹsẹ ọ, ali isomhopfa, ọọ li, ⁶''Eni ẹtsẹkẹ ena ni vhaa mẹ ena, ẹrhghẹ ọa bhẹ ni ẹchẹli ogwho o vha gwe rhọ laa kpọle shi ukhomhi oni okpọẹ ni o vha laa gwọghọa.''⁷E ke mhila ọli, eẹ li, ''Ọwẹnaagbọ, ẹrhẹghẹ ni ogwho a la laa mẹ eni ẹtsẹkẹ ena kwu? Ali ishẹfẹ ni a laa mẹ ni oni ẹrhẹghẹ o chi a bhẹ?'' ⁸Ijesu ọọ li, ''Vha rhi ẹgbhẹ kyia khi a kee ghagha vhẹ. Rharhi khi ebubu e la laa rhi eva mhẹ bhẹ, ea li ẹẹ li 'Mhẹmhẹ lọ,' oni ẹrhẹghẹ o she chi bhẹ,' Imhẹ rhọ khẹ wẹ. ⁹Vha khaa sokwu okwhẹ, imhẹ vha dobẹ udu jigyhi vhẹ, rharhi khi ena li a kpọ laa mẹ, ama ukpẹsẹ agbọ o vha khyie rhamhi nee.''¹⁰Ọọ gwe ẹẹ wẹ, ''Ẹvhue ali ẹvhue e laa zẹ okwhẹ kpẹsẹ egbe, eghyiele e zẹ okwhẹ kee kpẹsẹ egbe. ¹¹Ekẹ e laa ke kwunolono, ukwhumhi ali igwuamhi ọdọdọda e gbili ashakhasha. Aa mẹ ingme ni ea ke fianọ agbọ idu elemhi ali inyaloa ni e te idane a bhẹ.¹²Neni aa mẹ ena kwu, e la kee nwuno vhẹ e rhi ẹchọ a kee na vhẹ, a nwuno vhẹ a kwulo elemhi ewuka ali egba igwhumha, e rhẹ vhẹ a bhuli eni ighyie ali Igọvinọ rharhi mhẹmhẹ. ¹³Ona o laa rhi imhasha na vhẹ kee gwu ingmemhi mhẹ khasẹ wẹ.¹⁴A kha mẹ yọ imhẹ vha wẹna ẹzọ ni vha laa gwu shi ekẹ, ¹⁵Rharhi khi mhi laa rhi ingmemhi ali ẹgbhẹ na vhẹ, ni eni e rhẹ vhẹ je ẹzọ e vha rhọ laa dobẹ nwu vhẹ le.¹⁶Ama shi ita vhẹ ali inyọ vhẹ, ali inyọgwho vhẹ ni ikpotso ali emọse, ali agbesọlọ ali ikpokyia e laa gbolo ebubu vhẹa. ¹⁷Agbọ kwu e laa kee bishi elemhi vhẹ rharhi eva mhẹ. ¹⁸Ama o kha rhẹ kyili ugbagamhi utsu ni o la vhẹ vhi ukhomhi ọ vha li opfua. ¹⁹Vha kha rhi egbe myie vha laa mhọli elele vhi avhagwumhe vhẹ.²⁰Vha kha sheda mẹ khi ichoja e sẹgasẹ Ijerusalẹmu, oyọ vha kee rha yẹsẹ khi iliopfua o she chi bhẹ. ²¹Iyọ eni e la Ijudea e na je ikhomhi ekpha nefu, abagwhoyọ eni e la iteteva ẹvhue e vu, wẹ khi rhẹmhi vha dobẹ eni e la oni ẹvhue a lo vhọ. ²²Ishọyọ emeni a gaa kẹkẹ obodẹ mhẹ khi e kẹ tsẹ.²³Epfua khi uwi eni ea mẹ ali eni e rhi ivhiẹ shi egbe oni ẹrhẹghẹ ni a ngme ena! rharhi khi a la laa mẹ udududmhi ẹchọ vhi oni ukhomhi ekagbọ ona, ofu o de rhugwhu eni iọgbọ. ²⁴A la laa rhi ọfẹdo pfuse wẹa a chigbe nwuno wẹ je ẹvhue khi ẹvhue, Ijẹtasi e nwu Ijerusalẹmu okwhẹ, apfishi ẹrhẹghẹ Ijẹtasi ni e rhọ laa gba pfuse.²⁵A la laa mẹ ishẹfẹ vhi ọwẹ ali ukyi. Ukhomhi ekagbọ, okhẹna o la laa ẹvhue khi ẹvhue, ali ọshabọ te ikpa okwu ni ea gbhomhi ali akphakpha. ²⁶Iọgbọ egwho e laa kee chuba rharhi emeni e rhi ẹloe kpẹ khi a laa mẹ ukhomhi ekagbọ. Rharhi khi idane o la kee jigyhi gbẹgbẹgbẹ.²⁷E la laa mẹ Omyi Ọmọse ọ te atutu a bhale vhi elemhi izemhi ọ ali ikiki ọ. ²⁸A kha sheda mẹ ena, vu ekẹ le, vha yasẹ ikhomhi ekẹ, rharhi khi ẹrhẹghẹ ipfavhọle o she chi bhẹ.''²⁹Ijesu ọ kpe ita khasẹ wẹ, ọọ wẹ, ''Bino orhẹ ifigyi, ali erhẹ kwu, ³⁰E khaa kwu myiẹmyiẹ khi e mọ chiki, vhaa te egbe vhẹ a yẹsẹ khi orhuamẹ li o le. ³¹Vha khaa mẹ ena, vha she le yẹsẹ khi aleghyie o she chi bhẹ.³²Egbegbingme mhi ngme khasẹ vhẹ, oni ozele ona o vhaa dọsẹ, sẹkẹnẹ khi rhẹmhi a mẹ ena kwu. ³³Ekẹ ali idane e dọsẹ laa lẹ, ama ingmemhi mhẹ o vha dọsẹ la lẹ.³⁴Vha rhi ẹloe kpẹ egbe vhẹ vhi egbe, khi idu vhẹ o ke vọ ijajamhi ingme ali enyọ inwumhi, ali ikpokpomhẹ agbọ. rharhi khi oni ogbẹlẹ rhẹmhi o laa nwu vhẹ vhi iba. ³⁵Abhi akwhi ni a nya o lia nwu ẹtsẹkẹ, iyọ li o li laa nwuno agbọ kwu ni e laa oni ukhomhi ekagbọ kwu iba.³⁶Ama vha rhi ẹloe kpẹ ẹrhẹghẹ kwu, vha pfi olema khi vha kẹ ze onaghyie khi vha rhọ dobẹ na pfue ena kwu, khi vha rhọ gwe dobẹ mugha odalo ọni Omyi Ọmọse.''³⁷Ẹrhẹghẹ ni ọ rhẹẹ wẹna agbọ vhi elemhi owuka ẹliyọsẹ ọọ je elase, ọ la ukhomhi ọkpha ni ogbogbe ni ẹẹ lu Olivi. ³⁸Eni iọgbọ kwu e rhi ogbeẹ see bhẹ a rhi esọ shi owẹna ọli vhi elemhi owuka.

¹Nenaa uliemhi ukphakpa ni a vha rhi uduekẹ a shi nye, ni a luu idọsẹalẹ. ²Eni e kpeda ugamhi ali eni ikowe e mhasẹ abhi wẹwẹ e li gbe Ijesua, rharhi khi ulishi agbọ oo nwu wẹ.³Okhyio ọ ke lo Ijudasi Isikariọti vhi egbe, ukwhumhọgwhọ elemhi eni ogbe ali ava. ⁴Ijudasi ọ vu ọa nu eni e kpeda ugamhi abhi ọ li nwu Ijesu na wẹ.⁵Egbe e gaa nwu wẹ shiọ, e lama khi wẹwẹ e rhi ikpaghọlọ ẹẹ nali. ⁶Ọ lama shi vhọ, li ọ ke te nono oni imasha ni lẹẹ rhọ rhi ọli na we nwu ni o vha laa kyili igbẹẹ.⁷Ogbẹlẹ oni uliemhi ukphakpha ni a vha rhi uduekẹ a shi nye oo bhẹ, ni a rhọ nwemaa rhi oke idọsẹalẹ ẹẹ lasẹ obo. ⁸Ijesu ọ ghyie Ipitẹ ali Ijọni, ọọ li, "Vha vu khi vha kaa nwegbe emenale oni idọsẹalẹ shi ekẹ shi ni eyẹ, khi eyẹ kaa le." ⁹E mhila ọli, "Ashio u nono khi eyẹ kha nwuno oni egbe shi?"¹⁰Ọ sọ wẹ vhọ, ọọ li, "Rhi esọ shi ekẹ, vha kha lo oni evhue le, ọni ọmọse ni ọ nwu agege amẹ mhọ obọ ọ kyia bhẹ laa vhẹ vhẹ. Vha rhọ khali ọli lo apfẹ ni ọ sheda laa lo. ¹¹Iyọ vha li ẹẹ li ọni ọdapfẹ, 'Ọni Ọwẹnagbọ ọọ ghyiẹ, "Mhi gyhi elemhi owa ni elele e kwu a shi, ni mhẹmhẹ ali Idibo mhẹ eyẹ la laa le emenale idọsẹalẹ?¹²Ọ laa rhi elemhi owa ni o gba nẹẹ ni a kwu a shi khase vhẹ ni o kpeda. Vha nwuno eni egbe shi ayọ." ¹³E liyọ lẹẹ, e bhale a vhẹ etseke kwu abhi a li ngme wẹ. Iyọ e nwuno eni egbe oni emenale Idọsẹalẹ.¹⁴Abhi oni ẹrhẹghẹ o ke rhọ rhamhi, Ọ nu eni idibo ọli deshitọ. ¹⁵Iyọ ọọ wẹ, "Mhi she kpọ le lia nono abhi mhi li nu vhẹ le oni emenale ona nena mhi mẹ ẹchọ. ¹⁶Mhi ẹẹ vhẹ, Imha ke gwe laa le ọli, apfishi ni o rha tsẹ vhi elemhi aleghyie Ishinẹgba."¹⁷Iyọ, Ijesu o rhue ukolo, abhi ọ ke rhọ kphẹmhi shiọ, ọọ li,"Vha mọ ona, khi vha kemhi ọli ni egbe vhe. ¹⁸Mhi ẹẹ vhẹ, Imha gwe laa da eni amẹ ikpamhi erhẹ ena, apfishi ni aleghyie Ishinẹgba o rha bhẹ."¹⁹Iyọ ọ rhue ukphakpha, abhi o ke rhọ kphẹmhi shiọ, Ọ gbe ọ khyi, ọọ li, "Ona lẹ khi ijegbe mhẹ ni a rhọ na vhẹ. Vha kee lina ẹẹ khyiẹlẹ vha rhọ sato mhẹ vhi egbe." ²⁰Ọ gwe liyọ rhue oni ukolo abagwhoyọ ni e rhọ le emenale ẹlogbode pfuse, ọọ li. Ọni ukolo ona lẹ khi ishobọ onogbọ elemhi ọlia mhẹ, ni a kwu shi ekẹ na vhẹ.²¹Ama vha rhi esọ shi ekẹ. Ọni ọ laa rhẹ mhẹ dẹẹ ọ nu mhẹ la oni ukhomhi itabu ona. ²²Rharhi khi Omyi Ọmọse abhi a li mhasẹ ingme ọ shi ekẹ iyọ li o laa li. Ama epfua khi uwi ọni a te obọ ọli rhọ dẹẹ!'' ²³Ee kee mhila egbe wẹ ogbọ, Ọgwho ọ kyia vhi elemhi wẹwẹ ni ọ lẹẹ khyiẹlẹ oni ingme ona.²⁴Iwola oo ke gwe de vhi iteteva wẹ obodẹ ọni a rhue fu nẹẹ kwu. ²⁵Ọọ we, "Ẹni ighyie Ijẹtasi li e mhasẹ a na wẹ, abagwhoyọ eni ea mhasẹ e rhue egbe wẹ fu nẹẹ wẹwẹ laa lu eni e mhuẹ eghọghọ.²⁶Ama uwẹ vhẹ o vha kyia yọ. Onochi, ọnọfu nẹẹ vhi iteteva vhẹ ọ zẹ ọmọ. Ọni ọ nwuẹloe nẹẹ ọ kyili ọgamhẹ. ²⁷Mhi ghe ọnọfu nẹẹ, Ọni ọ shito ukhomhi itebu a le emenale laa khi ọni ọa kemhi emenale? O vha kyili ọni ọ shitọ ukhomhi itebu? Ama mhi laa itetva vhẹ abhi ọni ọ ọa ga vhẹ.²⁸Ama vhẹvhẹ khi eni e nu mhe la rhiili vhi elemhi ọnwufẹẹ mhẹ. ²⁹Mhi rhi eghyiele na vhẹ, abhi Ita mhẹ ọ li rhi eghyiele na mhẹ, ³⁰Khi vha kẹlẹ le vha da vhi itebu mhẹ elemhi aleghyie mhẹ. Vhaa li laa shito ikhomhi eghyiele vhaa sọ ẹdẹli Izulẹ igbe ali eva unu ẹzọ.³¹Isamọni, Isamọni, rhi ẹgbhẹ kyia, okhyio ọ she nono abhi ọ li nwu ẹ, khi lẹ kpishi ẹ abhi afu ado. ³²Ama mhi she lema nẹẹ, khi irhọshiọ ẹ o ke bakwu. U kha ke liegbe bhẹ zise inyọgwho ẹ. "³³Ipitẹ ọọ ke ẹẹ li, "Ọnọmhọli, mhi nwu egbe khi mhi rhọ khali ẹ je obhoni u waa je o kyili ọgba igwhumha o kyili egwhi."³⁴Ijesu ọ sọ vhọ, ọọ li, "Mhi ngme khasẹ ẹ, lpitẹ, itesẹ li u waa cha khi u waa yẹsẹ mhẹ neni ọkpa ọ gbhiẹghẹ."³⁵Iyọ Ijesu ọọ wẹ, "Abhi mhi rhọ ghyie vhẹ lo odẹ ni imha rhọ rhi ẹkwẹ na vhẹ pfi sọ, wẹ khi akpulu ni a sọ itsua a shi, wẹ khi ekwẹ ni a rha shi awẹ, vhaa mẹẹ mhọli emeni e to vhẹ?" Ee ke sọ vhọ, eẹ li, "A vha mẹ ẹtsẹkẹ" ³⁶Iyọ ọ ke gwu na wẹ ọọ li, "Ama nenaa, ọni ọ mhọli ẹkwẹ ni a pfi a sọọ, ọ rhue mhọ obọ. Ọni ọ vha mhọli ọfẹdo ọ rhi awulu dẹ khi ọ rhọ dẹ Ogwho.³⁷lyọ, mhi ngme khasẹ vhẹ emeni a kẹkẹ obodẹ mhẹ o nwemaa tsẹ, 'Aa rhi ọli gboghyiẹ eni e vha rhi ushi a gwhẹ.' Rharhi khi emeni a ngme shi ekẹ obodẹ mhẹ o she tsẹ." ³⁸E ke eẹ li, "Ọnọmhọli, ghee! Ọfedo eva e la ana." Ọọ wẹ khi, "E somhi."³⁹Abhi e ke rhọ le emenale ẹlogbode pfuse, Ijesu ọ je ukhomhi Ọkpha Ọlivi abhi ọ nwemaa kpọ a li, eni idibo ọli e rhọ khali ọli. ⁴⁰Abhi e ke rhọ rhamhi ayọ, ọọ wẹ, "Vha lema khi vhaa ke lo elemhi ọnwufẹẹ."⁴¹Ọọ vu asha ni e la le suii je asha ni nabhi a dobẹ pfi ẹchẹ a rhamhi, ọ degwhua ọ pfi olema, ⁴²ọọ li, ''Ita, o kha ghọli ẹ, rhue mhẹ oni ukolo ona odẹa na mhẹ. Ama a khi abhi o gwhẹ mhẹ, o kaa kyili abhi o ghọli ẹ⁴³Iyọ aghyiukọ o te idane kpiale rhi egbe khasẹ ọli, ọ zeze ọli udu. ⁴⁴Rharhi khi ọ laa elemhi osue, ọ lema onaghyie, onaghyie, efọse ni e gbe ọli e li tikpọ abhi ọlia ee dena ẹẹ kwu ekẹ.⁴⁵Abhi ọ ke rhọ te oni olema yasẹ egbe ekẹ, ọ bhẹ bhuli eni idibo ọli le, ọ bhẹ a vhẹ khi ovhesẹ oya o nwu wẹ, ⁴⁶ọọ ke mhila wẹ, ọọ li, "Elọ e zẹ khi vhaa vhesẹshi? Vha vule khi vha lema, khi vhaa ke lo elemhi imhasẹfẹẹ."⁴⁷Abhi ọ ke rhọ kyhie lina ẹẹ ngme, ghee, akwete iọgbọ e bhale, Ijudasi ukwhumhọgwho eni ogbe ali ava eni idibo ọli, lẹ li ọ kpalo na wẹ ni ọ rhẹ wẹ kyia. Ọ chi mama Ijesu, khi lẹ pfipfi ọli unu, ⁴⁸Ama Ijesu ọọ li, "Judasi, rhẹmhi u rhi ipfipfi unu rhi Omyi Ọmọse a dẹẹ?⁴⁹Abhi eni e la asha ni Ijesu ọ la khi lẹẹ mẹ emeni e lẹẹ khyiẹ, eẹ li, Ọnọmhọli, eyẹ pfi ọfẹdọ?" ⁵⁰lyọ ukwhumhọgwho elemhi wẹ ọ khyie pfi ọli ni ọgamhẹ ọni ọ kpeda ugamhi, ọ bẹ ọli esọ obitaa. ⁵¹Ijesu ọọ li, 'Osomhi ayọ)" Ọ rhi obọ chi ọli esọ, o gwe liabhi o kpọ li.⁵²Ijesu ọọ li eni e kpeda ugamhi, ali eni ichoja ali eni e womhẹ ni e bhẹ lẹẹ nwu ọli, "Rhẹmhi vha bhẹ bhui mhẹ le abhi agyiaguda, vha chino ifẹdo ali ikpokpo? ⁵³Abhi mhi rhọ nu vhẹ la ewuka, ogbẹlẹ kwu, vhavha nwu mhe. Ama oni ẹrhẹghẹ vhẹ khi ona, ali izemhi aloebili."⁵⁴E tsobọ sọ ọli, e nwu vu, e chalọ ọli je apfẹ ọni ọ kpeda ugamhi. Ama Ipitẹ ọ vha rhẹẹ khali wẹ awawawẹ. ⁵⁵Abhi e ke rhọ pfie erhẹ shi iteteva atukpapfẹ owa ezọ ni e ke rhọ gaa deshitọ, Ipitẹ ọ shitọ vhi iteteva wẹ.⁵⁶Ọmọmoshi ọgwhọ ni ọ la ayọ ẹẹ gbe akanya ọ mẹ ọli abhi ọ li shitọ vhi odalo eni erhẹ khase, ọ lee kwu alo a nya vhi alo ọọ li, "Ọni ọmọse ọna ọọ li nu ọli laa." ⁵⁷Ama Ipitẹ ọ cha, ọọ li, kpotso, I mha yẹsẹ ọli." ⁵⁸Ukwukwu ẹrhẹghẹ ọgbọ ọvhese ọ gwe mẹ ọli, ọọ li, "Ghyiẹ u li la wẹ vhọ,'' Ama Ipitẹ ọọ li, "Mọse, aa khi mhẹmhẹ ni u mẹ."⁵⁹Ẹrhẹghẹ nabhi ọkwulọkwu ogwho o ke dọsẹ, ọmọse ọvhese ọ gwe rhi unu shi vhọ ọọ li, "Egbegbingme ọni ọmọse ọna ọọ nu ọli la, rharhi khi ọnyi lgalili li ọ kyia." ⁶⁰Ama Ipitẹ ọọ li, "Mọse, I mha yesẹ emena waa ngme." Ayayayayọ, abhi ọ li khyiele ngme, ọkpa ọ le gbhiẹghẹ.⁶¹Ọnọmhọli ọ lieliẹalo a fẹli Ipitẹ. Ipitẹ ọ sato oni ingmemhi Ọnọmhọli, ni ọ rhọ ẹẹ li, "Neni Ọkpa ọ gbhiẹghẹ amo itesẹ waa cha khi u waa yẹsẹ mhẹ." ⁶²Ipitẹ ọ lo odẹ, ọọ kẹkẹ evyiẹ.⁶³Eni emọse ni a zẹ e ke khẹ Ijesu e rhi ọli li egyia, ee gbe oli. ⁶⁴E kha ke gẹnọ ọli alo, ea mhila ọli, eẹ li, "Bọbọbọ! Ọgwho ọ rhi ẹtsẹkẹ li ẹ eyọ?" ⁶⁵Ee ngme ivhẹngme evhese kwu Ijesu, e pfino inua ẹẹ shi ọ vhi egbe.⁶⁶Abhi ogbe o le gbe, eni e womhẹ e lu abọ gba, shi eni e kpeda ugamhi ali eni ikọwe. E rhọ li bhuli eni ea mhasẹ, ⁶⁷Eẹ li, "O kha kyia khi ghyiẹ khi ọni Ikiristi, gwu ni eyẹ." Ama ọọ wẹ," Mhi kha rhẹ gwu khasẹ vhẹ, vhavha laa lama shi vhọ, ⁶⁸o kha rhẹ kyia khi mhẹmhẹ mhi mhila vhẹ lọ, vha vhẹẹ sọ vhọ.⁶⁹Ama rho te nena vu, Omyi Ọmọse ọ laa shito obọ obita izemhi Ishinẹgba." ⁷⁰Wẹwẹ kwu eẹ li, "Oyọ khi ghyiẹ khi Omyi Ishinẹgba?" Ijesu ọọ ke ẹẹ wẹ, "Vhẹvhẹ khi lẹẹ mhi kyia." ⁷¹Eẹ li, "Elọ e zẹ khi eyẹ kyiele a nono ọtsẹẹ? Rharhi khi eyẹ she te egbe eyẹ te unu ọli suọ."

¹Eni akwete iọgbọ kwu e vu ekẹ le, e nwu Ijesu ghyi Ipaileti. ²E gwu ẹzọ kwu ọ vhi egbe, eẹ li, "Eyẹ mẹ ọni ọmọse ọna khi ọa gbe ushi ẹvhue eyẹa, ọọ khi imhẹ laa zẹ oga ghyi Isiza, ọ gwe ẹ khi lẹlẹ khi Ikiristi, ni oghyie."³Ipaileti ọọ ke mhila ọli ọọ li, "Ghyiẹ khi oghyie eni Ijusi?" Ijesu ọ sọ vhọ ọọ li "Ghyiẹ li u ngme yọ eyọ." ⁴Ipaleti ọ ke ẹẹ li eni e kpeda ugamhi ali ebubu iọgbọ ni e la ayọ, "Imha mẹ ọni ọmọse ọna iluemhi egbe.'' ⁵Ama e khyiele ngme, ''Eẹ li, rhẹmhi ọa pfuẹchẹ agbọa, ọa wẹna iọgbọ ni e la ona aloekẹ Ijudea kwu ewẹna, rhọ te Igalili apfishi ana.''⁶Abhi Ipaleti ọ ke rhọ suọ ona, ọ mhila ogbọ ni ẹẹ khi ọnyi Igalili li ọni ọmọse o kyia. ⁷Abhi ọ ke rhọ gwanọ mẹ khi Ẹrọdu li ọọ mhasẹ, ọọ rhue Ijesu ghyi Ẹrọdu, ni o kyia khi ọọ laa Ijerusalẹmu eni egbẹlẹ eyọ.⁸Abhi Ẹrọdu ọ ke rhọ mẹ Ijesu, egbe e gaa nwu ọli, rharhi khi odẹ o she nuẹ ni ọ te a nono khi lẹẹ mẹ ọli. Ọ she sokwu ogbọ ọli ọ sa khi lẹẹ la laa mẹ onyaloa egwho ni ọ gbe. ⁹Ẹrọdu ọ mhila Ijesu egbọ ni ebububu, ama Ijesu ọ vha pfa shi ọ vhi ekẹ. ¹⁰Eni e kpeda ugamhi ali eni ikọwe li e gaa mugha, e nyakwa gwu ẹzọ kwu ọ vhi egbe.¹¹ali ichoja ọli ee ka ọli, e rhi ọli li egyia, e rhi ede ni e somhote kwhẹsẹ ọli, e chigbe lieliẹ Ijesu ghyi Ipaleti. ¹²Ẹrọdu ali Ipaleti e ke mela ukpokyia ọli oni ogbẹlẹ ( ẹbele egbe li e kpọ kyia gwhe).¹³Ipaleti ọ bhẹ a lu eni e kpeda ugamhi ali eni ighyie ni ea mhase ali eni iọgbọ ni e legba, ¹⁴Ọọ wẹ, ''Vhẹvhẹ vha rhi ọni ọmọse ọna ghyi mhẹ abhi ọmọse ni ọ rhi iọgbọ a te odẹ onobe, vha she mẹ nena, khi mhi she mhila ọli egbọ ukpẹloe vhẹ, imha mẹ ọli iluemhi vhi egbe emeni vhẹ khi ọ gaa li kwu.¹⁵Obho, shi Ẹrọdu ọ vha li mẹ ọli iluemhi vhi egbe, li ọ gwe rhi ọli liegbe ghyi eyẹ, vha ghee, ọ vha li ingme ni a gbe ọlia a shi. ¹⁶Iyọ rhẹmhi laa mẹ ọli ẹchọ, khi mhi wolọ ọli abọa.'' ¹⁷Nena Ipaleti ọ yẹsẹ khi lẹẹ nwemaa a wolọ ogwhumha ọgwho abọa ni Ijusi vhi oni erheghe uliemhi ona.¹⁸Ama wẹwẹ kwu e kwu inua, eẹ li, ''Rhue ọni ọmọse ona vu, Khi u wolọ Ibarabasi neabọa ni eyẹ!'' ¹⁹Ibarabasi ọ kyili ọmọse ni a nwu shi ogba igwhumha rharhi uvhaza ni ọọ gbe oni ẹvhue ali ugbee igbemhi.²⁰Ipaleti ọ gwe nu wẹ ngme, rharhi khi ọọ nono khi lẹẹ wolọ Ijesu abọa. ²¹Ama e sọọse, eẹ li, ''A tanọ ọli manọ, a tanọ ọli manọ.'' ²²Utozesẹ, ọ gwe ẹẹ wẹ, ''Elọ e zẹ, mhi gyhi onobe ni ọni ọmọse ọna ọ li? Imha mẹ emeni ọ li na laa gbe ọlia shi. Elemhiyọ, mhi kha mẹ ọli ẹchọ mhi wọlọ ọli abọa.''²³Ama rhẹmhi e khyie rhi unu shi vhọ ee sọse gbalala, e nono khi a tanọ ọli manọ. lrhuli wẹ li ee ke rhi Ipaleti lama shi wẹ vhọ. ²⁴Elemhiyọ, ọ rhi emeni e mhila na wẹ. ²⁵Ọ wolọ oni a nwu shi ogba igwhumha ni e nono abọa, ni ọọ kyili ọnẹvhaza ali ọgbeugbee. Ama ọọ rhi Ijesu na wẹ abhi o gwhẹ wẹ.²⁶Abhi e rhọ rhi ọli vu, e tsobọ sọ ukhumhọgwho ni aa lu Isamọni nẹẹ Isiri, ni ọ te oni evholi bhale, e tsua oni ọgbagala nali tsua, rhẹ khali Ijesu.²⁷Akwete iọgbọ nebu, shi ikpotso ni oya o vọ idu ni ee vyiẹ nali, e rhẹẹ khali ọli. ²⁸Ama Ijesu ọ ke lieliẹ alo bhuli wẹ, ọọ li, ''Ivhiẹ ikpotso Ijerusalemu, Imhẹ vha gwe vyiẹ mhẹ, ama vha vyiẹ ni egbe vhẹ ali imyi vhẹ.²⁹Vha ghee, eni egbẹlẹ ea bhale ni e laa li ẹẹ li, izọtena khi uwi iga ali asọmọ ni e vyia ọli, ali ẹnyele ni ọ nye.' ³⁰E la ke li ẹẹ li ekpha ni e yagha, yagha 'De nwu eyẹ,' ali ekpha vha gwhese eyẹ.' ³¹E kha khyiẹlẹ ena abhi ebe orhẹ e lia bishi ena, elọ a ke la mẹ ni o khakhaa?''³²Emọse ava evhese ni e kyili igyiaguda, a gbolo wẹa ma vhi egbe.³³Abhi e ke rhọ rhamhi asha ni a lu ikhomhi ilimhi, ayọ le la tanọ ọli manọ ali eni igyiaguda, ọgwho ọ la vhi obita, ọni ọ kpọẹ ọ la li vhi ọgobọ. ³⁴Ijesu ọọ li, ''Ita, yelea na wẹ, rharhi khi e vha yẹsẹ emeni ea khyiẹli.'' E pfi etsẹ shi ede ọ, e kemhi wẹ.³⁵Eni iọgbọ e tonomhugha ee bino ọli, eni ighyie ni ea mhasẹ e li rhi ọli li egyia, ee li ẹẹ li, ọọ lẹẹ tsumhi iọgbọ evhese. Vha dobẹ ọli tsumhi egbe ọli shiọ, ni o kyia khi lẹ khi ọni Ikiristi uwi Ishinẹgba, ni a ze.''³⁶Eni iọgbọ e tonomhugha ee bino ọli eni ighyie ni ea mhasẹ abagwhoyọ e rhi ọli li egyia, ³⁷ee li ẹẹ li, ọọ lẹẹ tsumhi iọgbọ evhese. ³⁸Vha dobẹ ọli tsumhi egbe ọli shiọ, ni o kyia khi lẹ khi ọni Ikiristi uwi Ishinẹgba, ni a ze.''³⁹Ukwhumhọgwho eni igyiaguda ni a li tanọmanọ, ọọ zẹnọ ẹnwẹ ẹẹ nali, ọọ li "A khi ghyiẹ khi Ikiristi? Tsumhi egbe ẹ ali eyẹ." ⁴⁰Ama ọni ọ kpọẹ ọ kpha dese ọli, ọọ li, "U wa lia nu ulishi Ishinẹgba, ni o kyia khi ẹchọ abagwho li eyẹ gaa mẹ ena? ⁴¹Eyẹ li o dea ni eyẹ kha la ana, rharhi khi emeni eyẹ li eyẹ mẹ ẹchọ a to vhọ. Ama ọni ọmọse ọna ọ vha mhue emeni ọ li pẹẹ, pẹẹ."⁴²Ọ ke gwe ẹẹ li, "Ijesu, sato mhẹ egbe nu bhẹ vhi elemhi aleghyie ẹ." ⁴³Ijesu ọ ke ẹẹ li, "Egbegbingme mhi gwu nẹẹ, amo u la nu mhẹ la elemhi aleghyie oweda."⁴⁴Ẹrhẹghẹ okwulọkwu igbe ali eva, ubili o bi oni ukhomhi ekẹ kwu rhiili a pfishi ọkwulọkwu esẹ ẹlogota. ⁴⁵Ọwẹ o ke lo ekẹ, Iyọ ode ni a rhọ ta vhi owuka o te iteteva gbekhyiẹ a to ekẹ.⁴⁶Ijesu ọ ke rhi urhuli ni o ze vyiẹ nwu ekẹ, ọọ li, "Ita, elemhi ẹkọabọ ẹ mhi rhi ayẹmhẹ mhẹ shi."Abhi ọ ke rhọ ngme ona, ọ gwhu. ⁴⁷Abhi ọni ọga ichoja ọ ke rhọ mẹ emeni a mẹ, ọ rhi ikiki ni Ishinẹgba, ọọ li, "O ga mẹ ẹloe khi ọmọse ni ọ pfuasẹ khi ọna"⁴⁸Abhi eni akwete iọgbọ kwu ni e gaa bhale a gba khi wẹwẹ e rhi ẹloe wẹwẹ mẹ emeni a gaa khyiẹlẹ kwu, e gbe abọ ma ayẹ ee je. ⁴⁹Ama iọgbọ ọli kwu, ali eni ikpotso ni e rhọ khali ọli te igalili bhẹ, e ta nya odẹ ni o nuẹ bino eni ingme kwu.⁵⁰Ghe, ghe, ọmọse ọgwho ọ la vhọ ni ẹẹ lu Ijosẹfu, ọọ li la eni ee sọ unu ẹzọ, egbegbe ọgbọ aghyie li ọ kyia. ⁵¹Ọ vha lama shi emeni e ngme ali emeni e kyiẹlẹ, ọnyi Aramatiya li ọ kyila, ẹvhue Ijusi, ni ọ mugha ẹẹ khẹ aleghyie Ishinẹgba.⁵²Ọni ọmọse ọna, ọa mẹ Ipaleti, khi a rhi olimhi Ijesu na lẹ a tọ. ⁵³Ọọ tsuali kpiale ọ kwhuli ọli shi ode opfopfo, a rhọ tọ uji ni a te ẹchẹ pfia ogbọ, ni a vha kpọ khyie rhi ọgbọ tọ.⁵⁴O kyili ogbẹlẹ inwnegbe, ni ogbe o rhọ lẹẹ gbe ogbẹlẹ ivhiẹmhia. ⁵⁵Eni ikpotso, ni e te Igalili rhọ khali ọ bhẹ, ẹ rhẹẹ khali ọ lẹẹ bino oni uji ali abhi a li rhọ tọ. ⁵⁶E liegbe jele, ni e rhọ a tsua itulale. Ogbẹlẹ ivhiẹmhia, e vhiẹmhia abhi ushi o ngme.

¹Utsutsu ogbeẹ oni ogbele ikyiatsolo oni elemhi uka, e bhale vhi oni uji, e tsua ltulale ni e lẹẹ rhọ shi Ijesu vhi egbe. ²Abhi e ke rhọ bhẹ vhi ayọ, ee bhale a vhẹ khi a she gheghele oni ẹchẹ vhi odẹa. ³Ee lo elemhi oni uji, ama e vha mẹ oni olimhi Onomholi ni ljesu vhi ayọ.⁴E vha yẹsẹ emeni e kha khyiẹ. E kee fẹẹ, udomhija e mẹ emọse ava ni e sọnọ iwulu ni ee gẹẹ pẹpẹpẹ khi e mugha. ⁵Udu o fianọ eni ikpotso elemhi. E nyẹsẹ egbe je ekẹ, eni emọse ẹẹ wẹ, ''See vha ke lia nono ọni ọ nyele vhi ifuabọ ilimhi?⁶"Ọ vha la ekẹ ana, ama ọ she vule! Vha sato abhi ọ ngme vhẹ abhi vha rhọ khyie la elemhi lgalili, ⁷Khi a nwemaa ji Omyi Ọmose abọa ni elingmobe khi e rhọ tanọmanọ, ogbẹlẹ ozese, ọ gwe vule."⁸Eni ikopotso e sato ingmemhi ọli, ⁹E te oni uji bhale ea gwu eni ingme ena kwu khasẹ eni ogbe ali ọgwho ali eni e kpọẹ kwu. ¹⁰Nenaa lmeli lmagalini, ljoana, lmeli ni inyọ ljemhisi ali eni ikpotso evhese ni e nu wẹ la li ea gwu ni eni idibo ọli emeni a gaa mẹ kwu.¹¹Ama oni usomhi ona rhẹmhi o liabhi ingmemhi iwe ni ldibo ọli, e vha lama shi eni ikpotso vho. ¹²Ama lpitẹ ọ vule ọọ na ẹẹ je oni uji, ọ mugha ẹẹ bino elemhi ọ, ọọ mẹ oni ode ni a rhọ kwhuli oli. Ipitẹ ọ rhọ vu je apfẹ ọli, ọọ li ibe obodẹ emeni a me.¹³Ghe, ghee, oni ogbẹlẹ oyọ ikwhumhava e je evholi ni aa lu Emausi, ni o liabhi imali igbe ali esesa te ayọ je Ijerusalemu. ¹⁴E nu egbe ee neta emeni a gaa mẹ kwu.¹⁵Abhi e kee li neta, ni ee li mhila egbe wẹ ogbọ, Ijesu ọ chi mama wẹ. ¹⁶Ama a vha dobẹ alo wẹ gweghyiea khi e ke yese ọni ọ kyia.¹⁷Ijesu ọọ wẹ, "lngme elọ vhẹvhẹ ava vha lina ngme abhi vha lia kyia ena?" E mugha ayọ o ke liabhi khi o sha wẹ abọ. ¹⁸ukwhumhọgwho vhọ, ni aa lu lkiliopasi, ọọ li, " Ghyiẹ ọgwho li u la Ijersalemu ni u waa rhọ yese emeni a mẹ ana eni egbẹlẹ ena?"¹⁹ljesu ọọ we, "Ingme ni ogwho?" Eẹ li, "lngme obode ljesu ni ọnyi Inazarẹti, ni ọ ke kyili ọbolẹ, ni ọ ngme ududmhi ingmemhi Ishinẹgba ni ọ gbe ikpokpomhi ikanya ọnyaloa ni iọgbọ. ²⁰ Ali abhi eni e kpeda ugamhi ali eni ighyie e li rhọ lase khi a tanọmanọ gbea.²¹Ama eyẹ mholi irhegbenya khi li ọ laa dobẹ tsumhi Izulẹ. Ingmaghyie, a rhi obọ gbe ena kwu shi, ugbẹlozesẹ khi ona abhi a te mẹ eni ingme ena.²²Ama abagwhoyọ, ikpotso egwho ni e li nu eyẹ la e rhi abọ sha eyẹ, ni e rhọ je oni uji utsutsu ogbeẹ. ²³Abhi e vha ke rhọ mẹ oni ijiegbe oli, e bhale, ẹẹ li khi wẹwẹ e gwe li mẹ ighyiukọ ni e gwu khasẹ wẹwẹ khi ọ vha gwhua khi ọ la agbọ. ²⁴Emose egwho ni e nu eyẹ la e je oni uji, e bhale a vhẹ o liabhi eni ikpotso rhẹmhi e le li ngme ọli. Ama e vha bhale a vhẹ ọli vhi ayọ.''²⁵ljesu ọọ we, "O emọse idekẹ ni e mholi idu ni e vha kẹlẹ a lama shi emeni ebolẹ e kpo ngme! ²⁶O vha kyili emeni e nwu egbe khi ọni lkiristi khi o rhọ mẹ eni echọ ena, ọ ke lo elemhi ikiki ọli?" ²⁷Rhọ te lmozisi bhẹ apfishi eni ebolẹ kwu, Ijesu ọ kweghyiea khase wẹ emeni ebe akẹkẹshekẹ o ngme obodẹ oli.²⁸Abhi e ke rhọ chi mama oni evhue, ni ee jee, ljesu o ke liabhizẹzẹ khi lẹ kyiele je alo. ²⁹Ama e nu ọli gwu ọ, eẹ li, " Nu eyẹ la ana, rharhi khi ogbode o she le, oni ubi o she wẹ laa bi." lyọ ljesu ọ lo ọ vha nu we la ayọ"³⁰Abhi ọ ke rhọ nu wẹ shitọ ayọ khi lẹ nu wẹ le emenale, ọ rhue oni ukphakpha, ọ zẹ ọte shio, ọ gbe ọli khyia, ọ rhọ na wẹ. ³¹Ayọ li ikpalo wẹ e la gweghyiea, e mato mẹ khi lẹ lọ, ọ welia shi wẹ vhi alo. ³²E ke eẹ li egbe, " Idu eyẹ li e mẹẹ vhala eyẹ yọ, ni ọ rhọ nu eyẹ ẹẹ ngme vhi atuode, ni ọ rhọ maghyie eni ingmemhi Ishinẹgba ẹẹ khase eyẹ yọọ?"³³E vule oni ẹrhẹghẹ oyọ e liegbe bhale vhi ljerusalẹmu. E bhale a vhẹ khi eni ikwhumhogbe ali ọgwho khi e legba, ali eni e nu we la, ³⁴Eẹ li, "Onomholi ọ she te egwhi vule ingmaghyie, ọ she rhi egbe khase lsamọni." ³⁵Iyọ e ke gaa ngme emeni e mẹ vhi atuodẹ khasẹ wẹ, ali abhi Ijesu ọ li rhi egbe ọli khase ni ọ rhọ gbe ukphakpha khyia.³⁶Abhi e kee li ngme eni ingme ena, ljesu ọ tomugha wẹ vhi iteteva, ọọ wẹ, "Opfomhẹ o nu vhẹ laa." ³⁷idu e fianọ wẹ elemhi, ulishi o rhẹẹ nwu wẹ, e sa khi olimhi wẹwẹ e me.³⁸ljesu ọọ wẹ, "Elọ e ze khi vhaa nulishi? Elo e zẹ khi vhaa mhila egbọ elemhi idu vhe? ³⁹vha ghee abọ mhẹ ali awẹ mhẹ, mhẹmhẹ lọ. Vha rhi obọ chi mhẹ khi vha mẹ. Rharhi khi olimhi ọ vha mhọli ofiegbe ali igwa, abhi vha mẹ khi mhi li mhuẹ wẹ ena." ⁴⁰Abhi ọ ke rhọ ngme ona, ọ rhi abọ ali awẹ khase wẹ.⁴¹ Abhi oghẹlẹ o ke kyiele li rhue wẹ sọ, ni o li nya wẹ aloa, ljesu ọọ wẹ, "Vhavha mhọli etsẹkẹ pẹẹ ni vhaa lee?" ⁴²E rhue ukhyikhyi afẹ ni ee gbe erhẹ nali. ⁴³ljesu ọ rhue ọ, ọ rhi ọli le ukpeloe wẹ.⁴⁴Ọọ wẹ, "Abhi mhi rhọ nu vhẹ la, mhi ngme khase vhẹ emeni a kẹkẹ shi ushi Imozisi ali eni ebolẹ ali ebe lsamu (ebe iwolo ldevidi) e nwemaa tsẹ."⁴⁵Ọọ ke gweghyie wẹ idua, khi e kẹ yẹsẹ emeni ebe akẹkẹshekẹ o ngme. ⁴⁶Ọọ wẹ, ''Oo la akẹkẹshekẹ, khi ọni lkiristi khi ọ mẹ ẹchọ, ọ te egwhi vhule ogbẹlẹ ozesẹ. ⁴⁷Abagwhoyọ ichegbe vhi ingmobe le ali iyele ingmobea a ngme ọ gasẹ ẹvhue khi ẹvhue kwu elemhi eva ọli, vha te ljerusalemu gbasẹ.⁴⁸Vhẹvhẹ khi ọtsẹ eni ingme na kwu. ⁴⁹Ghee, mhi ghyie oni ishobọ lta mhẹ a bhuli vhẹ. Ama vha mhugha vhi elemhi oni evhue, rhili apfishi na mhi rhọ laa rhi izemhi te aleghyie ghyi vhẹ.''⁵⁰lyọ ljesu ọ rhọ khẹ wẹ a rhamhi odẹ apfishi ni e rhọ chi mama lbetani. Ọọ yasẹ abọ eda ọ zọte na we. ⁵¹Ọọ ke zọte na wẹ, ọ dobẹ wẹ shi ayọ a rhue ọli shele je elemhi eda.⁵²Elemhiyọ e gbega nali, e rhi ududmhi oghẹlẹ liegbe bhale vhi ljerusalemu. ⁵³Ẹrhẹghẹ kwu li e rhẹẹ la owuka, ee gbega ni lshinegba.

¹Te ugbẹkẹle, li a te mẹ oni ingmemhi, oni ingmemhi o nu Ishinẹgba la. ²Ọni ingmemhi o kyili Ishinẹgba. ³Ugbẹkẹle li ọ te nu Ishinẹgba la. Lọ ma ẹtsẹkẹ kwu, a vha mẹ emeni a ma kwu ni o vha kyia kha khi ikpa ọli li a te ma wẹ.⁴Ọọ mhọli inyele, oni inyele o kyili ufulọ agbọ kwu. ⁵Oni ufulọ, o gẹẹ elemhi aloebi; Ama oni aloebi o vha yẹsẹ ọlia.⁶Aa mẹ ọmọse ọgwho ni Ishinẹgba ọ ghyie ni ẹẹ lu Ijọni. ⁷Ọọ bhale ọa myie otsẹ ni ọni ufulọ, khi agbọ kwu e kẹ te kpa ọli lama shi vhọ. ⁸A khi Ijọni khi ọni ufuọlọ; ama rhẹmhi ọ bhale a myie ọtsẹ ni ọni ufulọ.⁹Ọyọ khi ọni egbegbe ufulọ, ni ẹẹ khi ọ lẹẹ bhẹ vhi ukhomhi ekagbọ, khi ọ gẹẹ rhugwhu agbọ kwu.¹⁰Ọọ bhẹ vhi ukhomhi ekagbọ, a gwe te ikpa ọli ma agbọ, oni agbọ o vha yẹsẹ ọni ọ kyia. ¹¹Ọọ bhẹ bhuli iọgbọ ọli le, ama eni iọgbo ọli e vha lama myie ọli lama.¹²Ama abhi e bu abhi e shẹ ni e lama myie ọli lama, ọ rhi izemhi na wẹ, ni e rhọ kyili imyi Ishinẹgba. ¹³Ọni a vyia, ni a vha rhi ọlia vyia. Wẹ khi rhẹmhi o kyili ivyiamhi ọkpotso ali ọmọse, wẹ khi abhi o ghọli ọgbọ, ama obọ Ishinẹgba.¹⁴Nena, oni ingmemhi, oo mela ọgbọa, ọ nyele iteteva eyẹ. Eyẹ she mẹ ikiki ọli, ikiki ni o kyili oni a kẹẹ ni o te obọ Ishinẹgba bhẹ, ni ivhẹlemhi ali ingmaghyie o vọ. ¹⁵Ijọni ọọ ngme ingmemhi ọli ọọ sọse zezeze ọọ li, “Ọna mhii ngme yọ khi ọna, na mhi rhẹ li khi ọni ọ la bhẹ mama mhẹ ọ laa fu dala mhẹ, rharhi ọ she kpọ la neni a mẹ mhẹ.”¹⁶Rhọ te ivọ pfuse ọli, eyẹ she myie isomopfa apfuẹ lu isomhopfa. ¹⁷Obọ Imozisi li ishi e te bhẹ, ivhẹlẹmhi ali ingmaghyie e te obọ Ijesu Ikiristi bhale. ¹⁸A vha mẹ ọgbọ ni ọ mẹ Ishinẹgba gwhe. Sẹkẹnẹ lọgwho kpee. ni ọ kyili Ishinẹgba, ni ọ la ẹghẹghẹ Ishinẹgba, ọ she rhọ khasẹ iọgbọ.¹⁹Ona khi emeni Ijọni ọọ ngme, ni Ijusi e rhọ te Ijerusalẹmu ghyie eni e kpeda ugamhi ali Ilẹvati bhuli ọ khi e mhilali ogbọ, “Ọgwho u kyia?” ²⁰Ọọ gwu ingmaghyie khasẹ wẹ, ọ vha cha, ọọ wẹ, “Imha kyili Ikiristi.” ²¹E gwe mhilali, ‘’Ọgwho u ke kyia shiọ? Ẹlaja li u kyia? Ọọ ke ẹẹ wẹ, “Obho,’’ E ke gwe eẹ li, “Ọni ọbolẹ li u ke kyia shiọ?” ọọ wẹ, “Obho.”²²E ke eẹ li, “Ọgwho u kyia? khi eyẹ rhọ yẹsẹ emeni eyẹ laa gwu khasẹ eni e ghyie eyẹ? See u ngme obodẹ egbe ẹ? ²³ Ọọ wẹ, “Mhẹmhẹ khi urhuli ni o laa apata aa vyiẹ: ‘khyiẹlẹ odẹ Ọnọmhọli sheshe,’ abhi ọbolẹ Azaya ọ kee li ngme ọ.”²⁴Eni iọgbọ ni Ifarisisi e ghyie, e mhilali eẹ li, ²⁵“Abhi u waa ke rhọ kyili Ikiristi wẹ khi Ẹlaja wẹ khi ukwhomhọgwho elemhi eni ebolẹ Ishinẹgba, see u ke li a batizi iọgbọ shiọ?”²⁶Ijọni ọ ke sọ wẹ vhọ ọọ wẹ, “Ibatizimhi amẹ mhi rha ni agbọ, ama ọgbọ ọ la vhẹ iteteva ni vhavha yẹsẹ. ²⁷Ọna khi ọni ọ lẹẹ bhẹ mama mhẹ. Imha lo na mhi dobẹ a taghyiẹ ọli ẹkwẹ owẹa.” ²⁸Ibẹtani li a la khyiẹlẹ ena kwu esọ okẹ Ijodani, ni o kpọẹ ni Ijọni ọ lẹẹ batazi agbọ.²⁹Ogbẹlẹ ozeva, Ijọni ọ ke mẹ khi Ijesu ọọ bhẹ, ọọ li, “Ghe, ghe, ọna khi omyi oke Ishinẹgba ni ọ rhue agbọ ingmobe egbea! ³⁰Ọna mhi kee ngme khi ọna, ‘khi ọni ọ laa bhẹ mama mhẹ ọ fu dala mhẹ. ³¹Imha kpọ yẹsẹ ọ, ama rhẹmhi ẹẹ khi ọ kẹ rhi egbe khasẹ Izulẹ lẹ mhi rhọ bhẹ laa rhi amẹ batazi agbọ.”³²Ijọni ọọ ngme lase, ọọ li, “Mhi mẹ ọni Ayẹmhẹ ọ te idane kpiale, ọ da nya vhi egbe. ³³Imha kpọ yẹsẹ ọ, ama ọni ọ ghyie mhẹ ni ọọ mhẹ khi mhi rhi amẹ kee batazi iọgbọ li ọ mhẹẹ, ‘Ọni u sheda mẹ khi Ayẹmhẹ ọ kpiale bhuli khi ọ nya vhi egbe, li ọ laa kee rhi Ayẹmhẹ ni o Pfuasẹ batazi agbọ.’ ³⁴ Mhi she mẹ mhi ngme khi Omyi Ishinẹgba khi ọna.”³⁵Abhagwhoyọ, ogbẹlẹ ozeva, abhi Ijọni ọ li nu idibo ọli ava mugha eyọ, ³⁶ee mẹ khi Ijesu ọ dọsẹ lẹẹ lẹ, Ijoni ọọ li, “Ghe, ghe, ghe Omyi Oke Ishinẹgba.”³⁷Abhi eni idibo ọli ava e ke rhọ suọ khi Ijọni ọ ngme naa, ee rhọ khali Ijesu vu. ³⁸Abhi Ijesu ọ ke rhọ pfi alo oshimhi ọ mẹ khi e rhẹ khali lẹ ọọ wẹ, “Elọ vha nono?” eẹ li, “Ọga, ashio u nyele?” ³⁹Ọọ wẹ “Vha bhale a ghe,” e ke rhọ khali ọli a bino asha ni ọ nyele; e nu ọli la ayọ oni ogbẹlẹ kwu rharhi o she chi mama ẹrhẹghẹ ọkwulọkwu ene ẹlẹ ogbode.⁴⁰Ukwhomhogwho elemhi eni ikwhumhi ava ni ọ suọ khi Ijọni ọọ ngme ni ọ rhọ khali Ijesu vu, lẹ khi Adulo, inyọgwho Ipitẹ. ⁴¹Inyọgwho ọli Isamọni Ipitẹ li ọ kyiatsolo mẹ ọọ li, “Eyẹ she mẹ ọni Imezaya” ni aa lu Ikiristi.’ ⁴²Ọ rhọ bhuli Ijesu le, Ijesu ọ bino ọli ọọ li, “Ghyiẹ khi Isamọni omyi Ijọni. Ghyiẹ li a ke laa kee lu Ikẹfasi” ni ọ kyili ‘Ipitẹ’ (agbhẹ).⁴³Ogbẹlẹ ozeva, ni Ijesu ọ rhẹẹ nono khi lẹẹ je Igalili, ọọ mẹ Ifilipu ọọ li, “Rhọ khẹ mhẹ” ⁴⁴Ifilipu ọnyi Ibẹshẹda li ọ kyila, ni o kyili ẹvhue Adulo ali Ipitẹ. ⁴⁵Ifilipu ọ ke mẹ Inatanẹli ọọ li, ọni ishi Imozisi ali ebolẹ e ke kẹkẹ ingmemhi ọ shi ekẹ, eyẹ she mẹ ọ, Ijesu omyi Ijosẹfu, ọnyi Inazarẹti.”⁴⁶Inataniẹli ọọ li, “Ẹtsẹkẹ aghyie o kpọ te Inazarẹti a lasee?” Ifilipu ọọ li, ⁴⁷“Bhale a ghe.” Ijesu ọ ke mẹ khi Inataniẹli ọọ bhẹ bhuli ọ le ọọ ngme ingme ọ, ghee, egbegbe ọnyi izulẹ! Ni ọ vha mhọli ighagha!” ⁴⁸Inataniẹli ọọ ke mhilali “See u li yẹsẹ mhẹ? “ Ijesu ọọ li, “Neni Ifilipu ọ nyalu ẹ eyọ, mhi mẹ khi u shitọ uji orhẹ olivi.”⁴⁹Inataniẹli ọọ li, “Ọga, ghyiẹ khi Omyi Ishinẹgba! Ghyiẹ khi oghyie Izulẹ!!” ⁵⁰Ijesu ọ sọ vhọ ọọ li, “Rharhi mhi ke ẹẹ khi mhi mẹ vhi uji orhẹ li u ke rhọ lama shiọ ena? U la laa mẹ emeni e fu dala ana.” ⁵¹Ijesu ọọ li, egbegbingme lẹ mhi gwu khasẹ ẹ, u la laa mẹ khi aleghyie o kweghyiea eni ighyiukọ Ishinẹgba ea shele ẹa kpiale bhuli Omyi Ọmọse le.’’

¹Ogbẹlẹ ozi esẹ, Izuode oo la Ikena nẹẹ Igalili, inyọ Ijesu ọọ li la ayọ. ²A li nyalu Ijesu ali idibo ọ shi oni izuode.³Abhi eni enyọ e ke rhọ pfo, inyọ Ijesu ọọ li, “Enyọ e she pfo.” ⁴ Ijesu ọọ li, “kposo, mhi gyhi egbue mhẹ ni o la ona? Ẹrhẹghẹ mhẹ o vha rhamhi nee” ⁵Inyọ ọli ọ ke gwu khasẹ idibo ọ, ọọ wẹ, “Ememeni ọ laa gwu khasẹ vhẹ khi vha khyiẹ, vha khyiẹlẹ ọ.”⁶Ekhe-ẹchẹ ẹsesa ee la ayọ, ni Ijusi e la ẹẹ kpe egbea, abhi itushi wẹ o ngme, nabhi ighalawa amẹ eva ọa liyọ esẹ li e vọ ogwho, gwho, gwho. ⁷Ijesu ọ ke ẹẹ wẹ, “Vha vhalọ amẹ vọsẹ eni ekhe na.” E vhalọ amẹ vọsẹ wẹ gba, gba,gba. ⁸Ọ ke gwu khasẹ eni idibo ọli “Vha jẹ ghyi ọni ọ kpeda oni ishitọ. “ E liyọ jẹ ghyi ọ.⁹Ọni ọ kpẹda vhi oni ishitọ ọ ke da eni amẹ ni e ke mela enyọa, ọ vha yẹsẹ oboni oni onyọ o te bhẹ, ama ọni ọ je eni amẹ ghyi ọ lọgwho li ọ le yẹsẹ. Ọọ ke nyalu ọni ọ mhuẹ ishitọ. ¹⁰Ọọ li, “Onyọ ni o ti li a kpọ rha lasele ni agbọ da, e kha ke da khi ọa nwu wẹ a chigbe rhi oni o vha ti lasele. Ama see u ke li rhi egbegbe onyọ shi ayọ apfishi nena?’’¹¹Ọna khi ọnyaloa ni Ijesu ọ khyiatsolo gbe vhi Ikena nẹẹ Igalil, ni o rhi ikiki ọli khasẹ. iyọ idibo ọli e lama shi ọli vhọ.¹²Abhi a ke rhọ mẹ ona, inyọ ọli ali inyọgwho ọli ni emọse ali idibo ọli, e kpẹla je Ikapaniọmu. ayọ li e ke la elemhi ikwukwu egbẹlẹ.¹³Ẹrhẹghẹ alieukpe idọsẹalẹ o chi bhẹ, Ijesu ọ shele je Ijerusalẹmu. ¹⁴Ọ bhale a vhẹ eni e la owuka rhi isumha ali igbekwukwu dẹ. Eni e rhi ikpaghọ ẹ lọghyiẹ ikpaghọ e li shitọ ayọ.¹⁵Ọọ rhue ute ni a vali rhọ kwhu wẹ te oni owuka lase, shi eni isumha ali ena. Ọọ tono eni e rhi ikpaghọ ẹẹ lọghyiẹ ikpaghọ abọ ikpaghọ kwa, ọ chigbe gwe tanọ wẹ itebu rhugwhu. ¹⁶Eni e rhi igbekwukwu ẹẹ dẹ ọọ wẹ, “Vha wolọ eni etsẹkẹ ena ana le. Imhẹ vha gwe rhi apfẹ Ita mhẹ mela okyia.”¹⁷Ona o rhi idibo ọli sato khi o la akẹkẹshekẹ khi ‘Ọnwegbe apfẹ ẹ o maa nwu mhẹ egbe gba. ¹⁸ Eni ea mhasẹ ni Ijusi e ke mhila ọli, “Mhi gyhi ishẹfẹ ni u laa rhọ khasẹ eyẹ ni eyẹ rhọ laa yẹsẹ khi Ishinẹgba li ọ rhi unu nẹẹ?” ¹⁹Ijesu ọọ wẹ, “Vha gwọghọ oni owuka ona, elemhi ẹlẹ esẹ lẹ mhi gwe rha mali vule.”²⁰Ẹni ea mhasẹ ni Ijusi eẹ li, ikpe egbhọ eva ikpẹ esesa li o rhue neni eyẹ dobẹ tọ oni owuka ona, wẹ khi u la tọ ọli ẹlẹ esẹẹ?” ²¹Ama ingme mhi ijegbe ọli li ọọ ngme ni ọ rhẹ khọkhọ owuka. ²²Abhi ọ rhọ te egwhivule, idibo ọli e sato khi ọọ ngme ọli, ona li o ke rhẹ wẹ lama shi ingmemhi Ishinẹgba ni Ijesu ọọ ngme.²³Abhi ọ rhọ la Ijerusalẹmu ẹrhẹghẹ uliemhi idọsẹalẹ, ebubu iọgbọ e lama shi eva ọli, ni e rhọ mẹ ikpokpomhi inyaloa ni ọ gbe. ²⁴Ama Ijesu ọ vha ji egbe ọli abọa ni iọgbọ rharhi khi ọ yẹsẹ emeni ọgbọ kyia. ²⁵Ọ vha nono khi ọgbọ gwu khasẹ lẹ emeni ọgbọ kyia, rharhi khi ọ yẹsẹ abhi e li la vhọ

¹Ifarisisi ọgwho ọ la ni ẹẹ lu Inikodemọsi, ọ kyili ukwhomhọgwho elemhi agbaa Ijusi. ²Ọni ọmọse ọna, ọọ bhẹ bhuli Ijesu le ẹliyọsẹ ọọ li, “Ọga, ẹyẹ yẹsẹ abhi Ọwẹnagbọ ni ọ te obọ Ishinẹgba bhẹ rharhi khi a vha mẹ ọni ọ dobẹ a gbe eni inyaloa ena ni u waa gbe ena ina khi Ishinẹgba li ọ nu ọli la.”³Ijesu ọọ li, “Ingmaghyie, ingmaghyie, mhi gwu khasẹ ẹ, sẹkẹnẹ rhẹmhi a khyiẹlẹ ọgbọ vyia ọ vha laa mẹ aleghyie Ishinẹgba.” ⁴Inikodemọsi ọọ li, see a li khyiẹlẹ ọgbọ a vyia ni ọ ke she womhẹ nee? Rhẹmhi ọ ke gwe la lo elemhi inyọ ọli a ke gwe khyiẹlẹ ọli vyia utozi evaa?⁵Ijesu ọọ li, “ingmaghyie, ingmaghyie, mhi ngme khasẹ ẹ sẹkẹnẹ rhẹmhi a khyiẹlẹ ọgbọ vyia te ikpa amẹ ali Ayẹmhẹ, ọ vha lo aleghyie Ishinẹgba. ⁶Ọni a rhọ te ikpa ẹlamhijegbe vyia ọ kyili uwi ẹlamhijegbe, abagwhoyọ ọni a rhọ te ikpa Ayẹmhẹ vyia ọ kyili uwi Ayẹmhẹ.⁷Imhẹli ona o nya vhẹ aloe khi mhi ẹ ghyiẹ, ‘khi u nwemaa kyili ọni a khyiẹ vyia.’ ⁸Obhoni oghọli akpekpe li o te a pfi. u la sokwu ọ vhi egbe, ama u waa yẹsẹ obhoni o te a bhẹ wẹ khi obhoni oa je. Iyọ ọa li ọna kyhiẹlẹ vyia vhi egbe.”⁹Inikodemọsi ọọ li, “See a li laa mẹ ena kwu ?” ¹⁰Ijesu ọọ li, “Ọwẹnagbọ Izulẹ li u kyia, u waa khyie li yẹsẹ ena kwu? ¹¹Ingmaghyie, ingmaghyie, emeni eyẹ yẹsẹ li eyẹ a ngme, abagwhoyọ eyẹ myie ọtsẹlẹ a shi emeni eyẹ mẹ. ama vhaa lama shi eyẹ vhi emeni eyẹ gwu a khasẹ vhẹ.¹²Mhi gwu ingme oni ekagbona khasẹ vhẹ vhavha lama shi vhọ, mhi kha ke gwu ingmemhi aleghyie khasẹ vhẹ li vha ke laa lama shi? ¹³A vha mẹ ọgbọ ọvhese ni ọ shele je aleghyie oweda sẹkẹnẹ khi ọni ọ kpọ te aleghyie oweda kpiale, ni ọ kyili Omyi Ọmọse.¹⁴Abhi Imozisi ọ li yasẹ ẹnyẹ vhi ekẹ vhi elemhi apata, iyọ a li laa yasẹ Omyi Ọmọse vhi ekẹ. ¹⁵Khi eni e laa lama shi ọ vhọ kwu e kẹ a mhọli agbọ ẹlẹnagbọagbọ.¹⁶Rharhi khi Ishinẹgba ọ maa mhọii ighọli agbọ, li ọ te rhi Omyi ọli ọgwho kpe bhale, khi ọni ọ sheda laa lama shi ọ vhọ ọ vha ke gwe laa li opfua, ama ọ laa mhuẹ agbọ ẹlẹnagbọagbọ. ¹⁷Rharhi Ishinẹgba ọ vha ghyie Omyi ọli bhẹ vhi ukhomhi ekagbọ khi ọ kaa pfuse agbọa, ama khi agbọ e rhọ te ikpa ọli pfue vhọ le. ¹⁸Ọni ọ lama shi ọ vhọ ọ vha laa li opfua. Ama ọni ọ vha ke lama shi ọ vhọ, ọ ṣhe kpọ lee li opfua nee rharhi khi ọ vha lama shi eva ọni Omyi Ishinagba ni a kẹẹ.¹⁹Emeni oni igwẹzọ omugha nya, lẹ khi oni ufulọ o she bhale vhi ukhomhi ekagbọ, ama ubili li o ghọli iọgbọ dala ufulọ, rharhi khi ikanya wẹ ikanya ebe lọ. ²⁰Rharhi khi ọni ọ vha khyiẹlẹ onobe kwu ufulọ ọ vha ghọli ọli wẹ khi rhẹmhi ọa bhẹ vhi alo ufulọ khi ikanya lẹ e ke gweghyiea. ²¹Ama ọni ọa gbe ikanya aghyie li ọa bhẹ vhi alo ufulọ kha kẹ mẹ onaghyie lẹ gbo, gbo, gbo khi wẹwẹ e she khyiẹlẹ abhi o ghọli Ishinẹgba.”²²Abhi a ke rhọ mẹ ona, Ijesu ali idibo ọli e je aloekẹ Ijudea. Ọọ nu wẹ la ayọ elemhi ẹrhẹghẹ ọọ rhi ibatazimhi ni iọgbọ. ²³Ijọni ọ li la Anọni ni o chi mama Isalimu batazi iọgbọ rharhi khi amẹ e bu ayọ. Iọgbọ ee bhuli ọli lẹ myie ee batizimhi. ²⁴Oni ẹrhẹghe oyọ a vha nwu Ijọni pfi lo ogba igwhumha nee.²⁵Epfuasẹ o lo iteveva idibo Ijọni egwho ali Ijusi obodẹ itushi ikpegbea. ²⁶Ee bhuli Ijọni le eẹ li, “Ọga, ọni vha gaa la esọ okẹ Ijodani eyọ, ni u ke myie ọtsẹ naa, u waa mẹ, khi ọ she rhi ibatizimhi a ni iọgbọ, agbọ kwu e she kpele gbe a bhuli ọ nenaa.”²⁷Ijọni ọọ li, “Ọgbọ ọ vha dobẹ a myie ẹtsẹkẹ obọ Ishinẹgba sẹkẹnẹ khi aleghyie li a te rhọ naa. ²⁸ Vha dobẹ myie ọtsẹ a na mhẹ khi mhi li ẹẹ khi, ‘Imha kyili ọni Ikiristi’ ama emena mhi ngme, lẹ khi rhẹmhi a ghyie mhẹ kpalo naa.'²⁹Ọni ọ kwhẹsẹ ọkposo li ọ mhọli ọ. Ukpokhyia ọni ọa kwhẹsẹ ọkposo ni ọ mugha rhi esọ shi ọ vhi ekẹ, rhẹmhi egbe ea nwu khi lia sokwu urhuli ọni ọa kwhẹsẹ ọkpotso. ona, ọa liyọ oyọ, li o rhi oghẹlẹ mhẹ vọ fuse. ³⁰Ọ nwemaa kee shele, ama mhẹmhẹ mhia kee kpẹla.³¹Ọni ọ te aleghyie kpiale li ọ kpeda kwu. Ọni ọ la ukhomhi ekagbọ ọ kyili uwi agbọ ọa ngme ingmemhi agbọ. Ọni ọ te aleghyie kpiale li ọ gaa kpeda kwu. ³²Emeni ọ mẹ ni ọ suọ li ọ ngme, ama a vha mẹ ọni ọ lama shi ọ vhọ. ³³Ọni ọ lama shi ọ vhọ ọ she rhọ khasẹ khi ingmaghyie li Ishinẹgba ọ kyia.³⁴Rharhi Ọni ishinẹgba ọ ghyie li ọa ngme ingmemhi Ishinẹgba. rharhi ayẹmhẹ ni ọ rhọ nali rhẹmhi ọ vọ pfuse. ³⁵Ọni Ita rhẹmhi ọ mhọli ighọli Omyi ọli li ọ rhọ rhi ẹtsẹkẹ kwu shi ọ vhi obọ. ³⁶Ọni ọ lama shi ọni Omyi ọ vhọ ọ laa mholi agbọ ẹlẹnagbọagbọ. Ama ọni ọ vha lama shi ọni Omyi ọ vhọ ọ vha laa mẹ inyele, ama ofu Ishinẹgba li o de a rhugwhu ọ.”

¹Abhi Ijesu ọ ke rhọ yẹsẹ khi Ifarisisi e she suọ khi lẹẹ batazi iọgbọ nebu dala Ijoni. ²(Ama a khi Ijesu li ọ te egbe ọli batazi agbọ, idibo ọli lọ.) ³Ọọ te Ijudea vu ọ je Igalili.⁴Oo dea khi ọ nwemaa rhọ te Isameria dọsẹ lẹ lẹẹ. ⁵Ọọ ke bhẹ vhi ẹvholi Isameria, ni ẹẹ lu Isaka, ni o mama ekẹ ni Ijekọpu ọ rhọ ni omyi ọli ni Ijosẹfu.⁶Ilija Ijekọpu o la ayọ. O she lọsẹ Ijesu rharhi okyiẹ ni ọ kyia ọ shitọ esọ oni ilija. O kyili ẹrhẹghẹ ẹlogota. ⁷Ọkpotso ọnyi Isameria ọọ bhẹ lẹẹ vha amẹ, Ijesu ọọ li, “Rhi amẹ na mhẹ da.” ⁸Oni ẹrhẹghẹ idibo ọli e she je elemhi ẹvhue lẹẹ dẹ emenale.⁹Ọni ọkpotso ọnyi Isameria ọ ke ẹẹ li, “Ghyiẹ ọnyi Iju, see u ke lia mhila mhẹ, mhẹmhẹ ọkpotso Isameria, ame na daa?” Rharhi khi Ijusi ali Isameria e vha mhọli oni e la. ¹⁰Ijesu ọọ li, “U kha yẹsẹ isomopfa Ishinẹgba lọ, ali ọni ọọ ghyiẹ, ‘Jẹ amẹ na mhẹ da lọ, ‘U kha mhila ọli, ọ rhi amẹ ni e nyele nẹẹ da.”¹¹Ọni ọkpostso ọọ ke ẹẹ li, “Ọga, u waa tsua ibọkẹti, oni ilija khi ona o limhi. Obho u ke te laa mẹ eni amẹ ni e nyele? ¹²U waa ke fu dala Ijekọpu ni ita eyẹ, la khi u fu nẹẹ, ni ọ tọ oni ilija ona ni eyẹ ni ọ li tee da amẹ, shi imyi ọ ali elamhi ọli.”¹³Ijesu ọọ li, “Ọni ọ da eni amẹ ena okhyiamhi amẹ o gwe a gbe ọ, ¹⁴Ama ọni ọ da amẹ na mhi laa rhọ nali, okhyiamẹ o vha gwe laa gbe ọ gwhe. Onochi, amẹ na mhi laa rhọ nali, o laa mela ilija shi ọ vhi elemhi ni o la rhi agbọ ẹlẹnagbọagbọ nali.”¹⁵Ọni okpotso ọọ li, “Ọga, li rhi eni amẹ ena na mhẹ da khi okhyiamẹ o ke gwe gbe mhẹ khi mhi ke gwe bhẹ vhi ana a vha amẹ.” ¹⁶Ijesu ọọ li, “Kee vu, khi u kaa nyalu ugwhẹ ni ọmọse bhẹ, khi u chigbe liegbe bhẹ.”¹⁷Ọni okpotso ọọ li, ‘Imha nwu ugwhẹ.”Ijesu ọọ li, “U maa gwabha ngme, ‘Ni u rhẹ khi u waa nwu ugwhẹ.’ ¹⁸ Rharhi emọse oshie e she kpọ mhọli ẹ, ọni u ke gwe nu la ena ọ vha kyili ugwhẹ! Ona mhi rhẹ khi u maa gwabha ngme.''¹⁹Ọni ọkpotso ọọ li “Ọga, mhi she mẹ khi obolẹ Ishinẹgba li u kyia. ²⁰Oni ukhomhi ọkpha ona, li ita eyẹ e kpọ lẹẹ ga ugamhi, ama vhẹvhẹ khi Ijerusalẹmu li o dea ni agbọ e kha lẹẹ ga ugamhi.”²¹Ijesu ọọ li, ‘Kpotso, lama shi mhẹ vhọ, rharhi ẹhrẹghẹ ọa bhẹ nu waa rhọ gwe laa ke je oni ukomhi ọkpha ona wẹ khi Ijerusalẹmu laa ga Ishinẹgba. ²²Emeni vhavha yẹsẹ lẹ vha ga. ama emeni eyẹ yẹsẹ li eyẹ a ga, rharhi obọ Ijusi li imyiepfuese o te bhẹ.²³Iyọ, ẹhrẹghẹ ọa bhẹ, oni ẹrhẹghẹ khi ona, ni egbegbe eni ea ga ugamhi e rhọ laa kee ga ọni Ita elemhi Ayẹmhẹ ali ingmaghyie, iọgbọ eyọyọ li Ishinẹgba ọa nono khi e kee ga lẹ. ²⁴Rharhi khi IShinẹgba Ayẹmhẹ li ọ kyia, eni ea ga ọli e nwemaa ga ọli elemhi Ayẹmhẹ ali ingmaghyie.”²⁵Ọni ọkptso ọọ li, “Mhi yẹsẹ khi Imezaya ọa bhẹ ni a lu (Ikiristi). Ọ kha bhẹ, ọọ laa gwu ingme kwu khasẹ eyẹ.” ²⁶Ijesu ọọ li, “Mhẹmhẹ, na mhi nu ẹ a ngme na, mhẹmhẹ lọ.”²⁷Oni ẹrhẹghẹ idibo ọli e she jele. Oo nwu wẹ ẹloe ni e rhọ bhale a vhẹ khi ọ nu ọkpotso ngme, a vha mẹ ọni ọ mhila ọli, “Elọ waa nono?” Wẹ khi “See u ke li nu ọkpotso a na eta?”²⁸Ọni ọkpotso ọ dobẹ akhe ọli shi ayọ, ọ liegbe je elemhi ẹvhue, ọa gwu khasẹ eni iọgbọ ọọ wẹ, “ ²⁹Vha bhale a ghe ọmọse ọgwho ni ọ gwu khasẹ mhẹ emena mhi gaa li kwu. Ọna ọa laa dobẹ kyili Ikristi yọ?” ³⁰Ee te oni ẹvhue bhale a mẹ ọ.³¹Oni ẹrhẹghẹ na ngme na, idibo ọli ee kpokpo ọ, ee li ẹẹ li, “Ọga, le eminale.” ³²Ama Ọọ wẹ, “Mhi mhọli emenale na mhia le ni vhavha yẹsẹẹ.” ³³ Eni idibo ọli e ke nu egbe wẹ ngme, “Ọgbọ ọ vhaa ke rhi emenale gyhi ọ lee, la khi a rhọ gyhi ọ?”³⁴Ijesu ọọ wẹ, “Akanya mhẹ lẹ khi mhi rhọ gbe abhi o ghọli ọni ọ ghyie mhe, abagwhoyọ mhi gbe ọ pfuse. ³⁵Imhẹ vha gwhe ẹẹ li, khi o kpi ikyi ene le ni ẹkhọmhi e rha rhamhi ikyiẹsẹ’? Mhi gwu khasẹ vhẹ, vha pfialo bino ishemhi, u mẹ khi ẹkhọmhi e she vhyie ni a khyiẹsẹ! ³⁶Ọni ọa kyhiẹsẹ li ọa myie ifọta, ọa kyhiẹsẹ ẹkọmhi chima shi agbọ ẹlẹnagbọagbọ, khi shi ọni ọ rhọ ọkọ ali ọni ọa kyhiẹsẹ khi e kwugbe ghẹlẹ.³⁷Ingmaghyie li o kyia, ‘Ukwhumhọgwho li ọ rhọ kọ, ọvhese ọ kyhiẹsẹ.” ³⁸Mhi she ghyie vhẹ khi vha kaa khyiẹsẹ emeni vha gbe akanya shi. iọgbọ evhese e she kpọ gbe, vha she li lo akanya wẹ ni e gbe..”³⁹Ebubu Isameria ni e la oni ẹvhue ee lama shi ọ vhọ rharhi emeni ọni ọkpotso ọ gwu khasẹ wẹ ni ọ myie ọtsẹ shi ọ, “Ọ she gwu ingmemhi agbọ mhẹ khasẹ mhẹ.” ⁴⁰Abhi eni iọgbọ Isameria e ke rhọ bhẹ bhuli ọli le, ee lema ọli khi ọ nu wẹwẹ la ayọ nee, ọọ nu wẹ la ayọ egbelẹ eva.⁴¹Rharhi oni ingme ona ebubu iọgbọ ee lama shi vhọ. ⁴²E kee nu ọni ọkpotso ngme ẹẹ li, “Eyẹ rhọ shi vhọ, ama a khi rharhi emeni u ngme lọgwho, rharhi eyẹ she li rhi esọ eyẹ suọ, Eyẹ she ke yẹsẹ avyiena khi ọni otsumhi khi ọna.”⁴³Ẹlẹ eva e ke dọsẹ, ọọ te ayọ vu ni ọ rhẹẹ je Igalili. ⁴⁴Rharhi khi Ijesu li ọ rhi unu ọli ngme ọ, khi ọbolẹ Ishinẹgba ọ vha mhọli ojima vhi elemhi ẹvholi ọ. ⁴⁵Abhi ọ rhọ bhẹ vhi Igalil, eni iọgbọ Igalili e tsẹ ọ mekhyia. Rharhi e gaa mẹ ikanya ni ọ gbe vhi uliemhi ni ẹẹ khyiẹ vhi Ijerusalẹmu, rharhi khi e li la ayọ.⁴⁶Ọọ gwe liegbe bhẹ vhi Ikena nẹẹ Igalili, asha ni ọ ke la rhi amẹ mela onyọa. Ọnọfu ọgwho omyi ọli ni ọmọse ọọ la Ikapaniọmu ẹẹ gwhua. ⁴⁷Abhi ọ rhọ suọ khi Ijesu ọ she liegbe te Ijuda ọọ je Igalili, ọa lema Ijesu khi ọ bhale a rhi ọni Omyi lẹ ni Ọmọse ze, ni ọ she lẹẹ gwhu.⁴⁸Ijesu ọọ ke ẹẹ li, “Ina khi rhẹmhi vha mẹ ishẹfẹ, vhavha la lama shi vhọ.’ ⁴⁹Ọni ọnọfu ọọ li, “Ọga, yagwa kpiale neni ọmyi mhẹ ọa gwhua.” ⁵⁰Ijesu ọọ li, ”Kee je omyi ẹ ọ la ọ vha gwhu.” Ọni ọmọse ọ rhọ shi emeni Ijesu ọ ngme, li ọ rhọ vu jee.⁵¹Ọ kee kpẹla, egamhẹ ọli e mẹ ọli vhi odẹ, eẹ li omyi ẹ ọ vha gwhu khi ọ nyele. ⁵²Ọ mhila wẹ ẹrhẹghẹ ni ogwho ọ rhọ zee. Eẹ li, “Odẹẹ, ẹrhẹghẹ ukwhulọkwhu ishila li eni iba e rhọ vu ọ vhi egbe le.”⁵³Ayọ li ọni ọmọse ọ rhọ sato khi ẹrhẹghẹ ni Ijesu ọ rhọ ẹẹ li, “Omyi ẹ ọ la khi ọ vha gwhu lọ, “Rharhi ona, lẹ ali apfẹ ọli kwu e lama shi vhọ. ⁵⁴ Ona khi akanya ọnyaloa ni ọ gbe ni ọ rhọ te Ijudea bhẹ vhi Igalili.

¹Abhi ena kwu e ke rhọ dọsẹ a lẹ, a kee khyiẹlẹ uliemhi eni Ijusi, Ijesu ọ shele je Ijerusalẹmu. ²Atekẹ ogwho oo la Ijerusalẹmu ni a rhi unu Iburu luu Ibẹshada. Ni o mhọli imyi amẹ ikwẹ ishie. ³Ebhubu iọgbọ ni ee gwhua nabhi, izalo, egwhegbea ali eni e khakhaa li e vhesẹshi eni imyi amẹ. ⁴A mhuẹ ẹrhẹghẹ ni aghyiukọ ọ rhọ da ẹẹ kwu oni atekẹ, ọ wushe ọlia, ọni ọ khyiatsolo laa dakwulo vhọ rhẹmhi ọ ze vhi igwhuamhi ememeni o ni o rhẹ kyia.⁵Ọmọse ọgwho ni ọ she gwhegbea ikpe uye ali igbe ali elele ọ la ayọ. ⁶Abhi Ijesu ọ ke rhọ mẹ khi ọ vhesẹshi ayọ, abhi ọ ke rhọ yẹsẹ khi ọ she tẹsẹ ayọ, ọ ke ẹẹ li, “Waa nono khi u ze?⁷Ọni ọmọse ni ọ gwhegbea ọọ li, “Ọga, imha mhọli ọgbọ pẹẹ, atekẹ o kha tsukwua ni ọ tsua mhẹ a pfilo oni atekẹ. mhi kha ke rhẹ lia nyakwa khi mhi dakwulo vhọ, ọgbọ ọvhese ọ she kpọ dalo vhọ khẹ mhẹ.” ⁸Ijesu ọ ke ẹẹ li, “Vule, khi u tsua ivhia ẹ, khi u ke kyia.”⁹Ayayayọ ọni ọmọse ọ ze, ọọ tsua ivhia ọli, ọọ kyia. Oni ogbẹlẹ o kyili ogbẹlẹ ivhiẹmhia.¹⁰Eni iọgbọ Ijusi eẹ li ọna rhọ ze, “Amo khi ogbẹlẹ ivhiẹmhia, ushi o vha ngme khi u tsua ivhia amo.” ¹¹ Ọọ ke ẹẹ wẹ, “Ọni ọ rhẹ mhẹ ze li ọ mhẹ khi mhi tsua ivhia khi mhi kee kyia.”¹²E ke mhilali, “Ọgwho ọ ghyiẹ khi u tsua ivhia khi u kee kyia?” ¹³Ama ọni ọmọse ni a rhọ ze, ọ vha yẹsẹ ọni ọ rhi ọli ze rharhi Ijesu ọ she bẹna vu, rharhi khi agbaa o rhọ gba ayọ.¹⁴Idegbe, Ijesu ọọ bhale a vhi ọli vhẹ owuka ọọ li, ghe, ghe, u she ke ze nena! Imhẹ gwe li ingmobe, khi u ke gwe mẹ emeni e dala ana vhi egbe.” ¹⁵Ọni ọmọse ọ ke vu ni ọ rha gwu khasẹ eni Ijusi khi Ijesu li ọ rhẹ lẹ ze.¹⁶Rharhi ena li Ijusi e ke te zẹ okwhẹ kpẹsẹ Ijesu, rharhi khi ọọ gbe eni ikanya ena obgẹlẹ ivhiẹmhia. ¹⁷Ijesu ọ ke gwu khasẹ wẹ, ọọ wẹ, “Ẹrhẹghẹ kwu li Ita mhẹ ọ rhaa gbe akanya, iyọ mhi lia gbe abagwhoyọ.” ¹⁸ Rharhi ona, iọgbọ Ijusi e khyiele nono abhi wẹwẹ e li gbe Ijesua rharhi khi ọ gbe ushi ogbẹlẹ ivhiẹmhia, ama a khi oyọ lọgwho rharhi khi ọ gwe li lu Ishinẹgba Ita ọli, khi ọ rhi egbe ọlia aa mela Ishinẹgbaa.¹⁹Ijesu ọọ wẹ, ingmaghyie, ingmaghyie, ọni Ọmọ ọ vha mhuẹ emeni ọ dobẹ te obọ ọli a kyhiẹlẹ, sẹkẹnẹ emeni ọ mẹ khi Ita ọli ọa kyhiẹ, ememeni Ita ọli ọa kyhiẹ kwu, li ọni Ọmọ ọ lia kyhiẹlẹ. ²⁰Ọni Ita ọọ mhọli ighọli ọni Ọmọ, li ọ rhọ rha khasẹ ọni Ọmọ emeni ọa kyhiẹlẹ kwu, ọ gwe laa rhi emeni e fu dala ana khasẹ ọ khi o kẹ nwu vhẹ ẹloe.²¹Abhi ọni Ita ọ lia nwu enegwhu a vule ọ rhẹ wẹ nyele, iyọ li ọni Ọmọ ọ li rhi inyele a ni ọni ọ ghọli ọli. ²²A khi ọni Ita ọli ọ laa sọ agbọ unu ẹzọ, rharhi khi ọ she rhi ẹzọ kwu shi Omyi ọli vhi obọ. ²³Khi agbọ kwu e kẹ rhi ojima ni ọni Omyi ọli abhi e li rhi ojima ni ọni Ita ni ọ ghyie ọ.²⁴Ingmaghyie, lọ, ọni ọ suọ ingmemhi mhẹ ni ọ lama shi ọni ọ ghyie mhẹ vhọ, ọ la laa mhuẹ agbọ ẹlẹnagbọagbọ ọ vha ke gwe laa li opfua, rharhi ọ she te egwhi dọsẹ a je inyele.²⁵Ingmaghyie, ingmaghyie, mhi ẹẹ vhẹ khi ẹrhẹghẹ ọa bhẹ, oni ẹrhẹghẹ lẹ khi ona, ni enegwhu e rhọ laa suọ urhuli Omyi Ishinẹgba, eni e laa suọ ọli e laa nyele.²⁶Abhi ọni Ita ọ li mhọli inyele vhi elemhi egbe ọli, ọ she liyọ rhọ ni ọni Omyi ọ khi ọ li mhọli inyele vhi elemhi egbe ọli, ²⁷Ọni Ita ọ she rhi unu ni ọni Ọmọ khi ọ rhọ sọ unu ẹzọ rharhi khi lẹ khi ọni Omyi Ọmọse.²⁸Imhẹ vha dobẹ ona nwu vhẹ ẹloe, rharhi khi ẹrhẹghẹ ọa bhẹ ni eni e la uji e rhọ laa sokwu urhuli ọ. ²⁹E la vu le: eni e khyiẹlẹ onaghyie e vule je agbọ ẹlẹnabgọagbọ, eni e li ingmobe e vule shi ẹzọ.³⁰Imha mhuẹ emena mhi dobẹ te obọ mhẹ a khyiẹlẹ. emena mhi suọ, lẹ mhi rha sọ unu ẹzọ, igwuẹzọ mhẹ rhẹmhi o sheshe rharhi a khi abhi o gwhẹ mhẹ mhia khyiẹlẹ, ama abhi ọni ọ ghyie mhẹ ọ nọnọ. ³¹Mhi kha ẹẹ khi mhi myie ọtsẹ ni egbe mhẹ, a dobẹ a mẹ khi ọtsẹ mhẹ o vha kyili ingmaghyie. ³²Ọgbọ ọvhese li ọ myie ọtsẹ a na mhẹ, mhi yẹsẹ khi ọtsẹ ni ọ myie na mhẹ egbegbe ọli lọ.³³Vha she ghyie bhuli Ijọni obodẹ mhẹ, ọ myie ọtsẹ shi vhọ abhi o li la. ³⁴Abhabi o rhẹ li, ọtsẹlẹ ni a myie na mhẹ o vha kyili uwi otsonagbọ. Rhẹmhi ngme ena a khasẹ vhẹ khi vha kẹ kyili eni a tsumhi. ³⁵Ufulọ li Ijọni ọ kyia ni ọ gẹẹ gboo, vha mhọli ẹrhẹghẹ ni vha rhẹ nono khi vha ghẹlẹ shi ufulọ ọli.³⁶Ọtsẹlẹ na mhi mhuẹ o fu dala uwi Ijọni, rharhi ikanya ni ọni ita ọ rhọ na mhẹ khi mhi gbe, eni ikanya na mhia gbe, wẹwẹ le myie ọtsẹlẹ a na mhẹ. ³⁷ Ọni Ita ni ọ ghyie mhẹ ọ she li te egbe ọ myie ọtsẹ na mhẹ. Shi orhalo ọli vhavha mẹ gwe wẹ khi urhuli ọli vha kpọ sokwu gwhe. ³⁸Ingmemhi ọli o vha nu vhẹ la, rharhi khi vhavha lama shi ọni ọ ghyie mhẹ vhọ.³⁹Vha gwanọ ebe ni o pfuasẹ ni vha khọkhọ khi vha te laa mhọli agbọ ẹlẹnagbọagbọ, oni ebe ni o pfuasẹ ona li o ngme ingmemhi mhẹ. ⁴⁰Vha lama khi vhavha bhẹ bhuli mhẹ le khi mhi rhi agbọ na vhẹ.⁴¹A khi ichichi agbọ mhia nono. ⁴²Ama mhi yẹsẹ khi vhavha mhọli ighọli Ishinẹgba.⁴³Elemhi eva Ita mhẹ mhi rhọ bhẹ, vhavha lama shi mhẹ vhọ. Ama ọgbọ ọvhese ọ kha ke rhi eva ọli bhẹ nena, vha lama shi ọli vhọ; ⁴⁴See vha ke li lama shi vhọ, vhẹvhẹ ni vhaa nono khi agbọ e ke chichi vhẹ ni vhavhaa nono ichichi ni o te obọ Ishinẹgba bhẹ?⁴⁵Imhẹ vha sa khi mhẹmhẹ mhi laa rhi ẹzọ gbe vhẹ ẹghẹghẹ ọni Ita. Ọni ọ rhi ẹzọ gbe vhẹ lẹ khi Imozisi, ni vha rhi egbe nya. ⁴⁶Vha kha lama shi Imozisi vhọ lọ vha kha li myie mhẹ suọ nena rharhi khi li ọ kẹkẹ ingmemhi mhẹ. ⁴⁷Abhi vhavha ke rhọ lama shi emeni Imozisi ọ kẹkẹ, see vha ke lia lama shi ingmemhi mhẹ

¹Abhi a ke rhọ mẹ ena, Ijesu ọ lieliẹegbe je esọ okẹ Igalili ni o kpọẹ, ni a gwe lu okẹ Itiberiasi. ²Ebubu iọgbọ ee rhẹẹ khali ọ rharhi khi ee mẹ ọnyaloa ni ọọ gbe ni eni e gwhua. ³Ijesu ali idibo ọli e vu je abesọ ọkpha a shitọ.⁴Nenaa idọsẹalẹ, ni o kyili aliukpe Ijusi, oo chi bhẹ; ⁵Abhi Ijesu ọ ke rhọ yasẹ alo ekẹ ni ọ rhọ mẹ khi agbaa o legba khi ee bhuli lẹ lee, ọọ li Iflipu, “Obho eyẹ te laa dẹ ikphakpha ni eyẹ rhọ ni ena kwu a le nenaa?” ⁶Ama rhẹmhi Ijesu ọ rhi ona nwu Ifilipu fẹẹ, rharhi khi ọọ yẹsẹ emeni ọ lẹ khyiẹ.⁷Ifilipu ọ ke sọ vhọ, ọọ li, “A kha rhẹ mẹ irhu ikphakpha ni e rhamhi ikpulu igbhọ igbe e vha laa lo ni a te laa rhi ukwukwu emenale ni ukwhumhọgwho, gwho, ogwho le. ⁸Ukwumhọgwho elemhi idibọ ọli, Adulo, inyọgwho Isamọni Ipitẹ ni ọmọse, ọọ li Ijesu, ⁹ ''Ọmọ ọmọse ọgwho ọ la ana ni ọ mhuẹ irhu ikphakpha ishie ali ifẹli eva shi ana, ama asha ena e laa nwu eni iọgbọ ni e lina bububu ena?¹⁰Ijesu ọọ li, “Wẹ li eni iọgbọ e shitọ.” Ebuli ni e bu ee nwemaa la ayọ. Eni emọse e shitọ ekẹ, e la ifuabọ agbẹlẹ egbhọ igbe asha ishie. ¹¹Ijesu ọ wolọ eni irhu ikphakpha ọ kphẹmhi shi ọ, ọ kemhi ni eni e shitọ. Iyọ ọ gwe li kemhi eni ifẹ manọ wẹ vhọ abagwhoyọ, abhi ọgbọgbọ ọ li nono. ¹²Abhi eni iọgbọ e ke rhọ le ni e rhọ vọ, ọọ li eni idibo ọli, “Vha sanọ ikhyikyi ni a le kpọẹ chima, khi a ke mẹ emeni e li opfua.”¹³E sanọ eni ikhyikhyi vọsẹ igwhugwhu igbe ali eva ni e te eni irhu ikphakpha ishie le kpọẹ. ¹⁴ Abhi eni iọgbọ e ke rhọ mẹ oni ọnyaloa ona ni ọ gbe, eẹ li, “Ọna khi egbegbe ọni ọbole ni ẹẹ khi ọ lẹẹ bhẹ vhi ukhomhi ekagbọ.” ¹⁵Abhi Ijesu ọ ke rhọ mẹ khi e lẹ rhi izemhi rhẹ lẹ kyili oghyie, li ọ rhọ li vyiẹ shele je ukhomhi ọkpha.¹⁶Ogbode o kee le, idibo ọli e kpẹla kwu okẹ ni o khyishi. ¹⁷ Ee lono ọkọ, e rhọ da okẹ je Ikapaniumu. Ubi o bi, Ijesu ọ vha khyie bhẹ bhuli wẹ le. ¹⁸Oni ẹrhẹghẹ ukpokpomhi akpekpe o she pfi, oni okẹ oo wushea.¹⁹Abhi idibo oli e ke rhọ kyia ufuabọ imali esẹ ọa liyọ imali ene, ee mẹ khi Ijesu ọọ kyia ukhomhi okẹ ọ she chi mama obhoni ọkọ wẹ o rhamhi nee, ulishi oo nwu wẹ. ²⁰Ama Ijesu ọọ wẹ, mhẹmhẹ lọọ! “Imhẹ vha nu ulishi.” ²¹Egbe nwu wẹ khi ọ rhọ nu wẹwẹ lo oni ọkọ, ayayayọ oni ọkọ o rhamhi ekẹ asha ni e je.²²Ogbẹlẹ ozeva, iọgbọ nebu ni e mugha esọ okẹ ni o kpọẹ ee mẹ khi ọkọ ovhese o vha gwe la ayọ sẹkẹnẹ khi ogwho ni Ijesu ọ vha nu idibo ọli lo ni wẹwẹ ọgwho e lo vu. ²³Ekọ egwho e te Itiberiasi bhale ni o chi mama asha ni e kee la le lkphakpha ni Ọnọmhọli ọ kee zẹ ọte na.²⁴Abhi eni iọgbọ ni e legba e vha ke rhẹẹ mẹ Ijesu wẹ khi idibo ọli vhi ayọ, li e rhọ lono ekọ ni e rhọ nono Ijesu jee Ikapaniọmu. ²⁵Abhi e ke rhọ bhale a vhẹ ọli vhi obhoni okpọẹ ni okẹ okhyishi, eẹ li, “Ọga ẹrhẹghẹ ni ogwho u rhọ bhẹ vhi ana?”²⁶Ijesu ọọ wẹ, “ingmaghyie, ingmaghyie, vhaa nono mhẹ, ama a khi rharhi khi vha mẹ ọnyaloa, ama rharhi eni irhu ikphkpha ni vha le vọ. ²⁷Imhẹ vha gwe dua shi emenale ni ea li opfua, ama vha kee dua ẹẹ shi emenale ni o mhọli agbọ ẹlẹnagbọagbọ ni Omyi Ọmọse ọ laa rhọ na vhẹ, rharhi Ishinẹgba ni Ita ọ she rhi ishẹfẹ ọli shi ọli ẹfẹ.²⁸E ke rhọ ẹẹ li, “Elọ eyẹ nwemaa laa khyiẹ ni eyẹ rhọ laa gbe akanya Ishinẹgba?” ²⁹Ijesu ọọ wẹ, Abhi vha lia gbe akanya Isinẹgba khi ona, “Lẹ khi vha rhọ myie ọni ọ ghyie suọ.³⁰E ke eẹ li, “Mhi ghyi ishẹfẹ ni u laa rhọ khasẹ eyẹ, ni eyẹ laa mẹ ni o laa rhi eyẹ lama shi ẹ vhọ? ³¹Ita eyẹ ee le eni ikphakpha ni e te idane denakule vhi apata, abhi o li la akẹkẹshekẹ,’ khi ọọ rhi ikphakpha ni e te ldane denakule na wẹ le.”³²Ijesu ọọ wẹ, ingmaghyie, ingmaghyie, a khi Imozisi li ọ rhi ikphakpha ni e te idane denakule na vhẹ lee, ama Ita mhẹ li ọ rhi egbegbe ikphakpha ni e te idane denakule na vhẹ le; ³³Rharhi ukphakpha Ishinẹgba lẹ khi ọni ọ te aleghyie kpiale ni ọ rhi inyele ni oni agbona.” ³⁴Eẹ li, “Ọga, rhi oni ukphakha ona ni eyẹ kee le ẹrhẹghẹ kwu.”³⁵Ijesu ọọ wẹ, “Mhẹmhẹ khi oni ukphakpha agbọ, ọni ọ bhẹ bhuli mhẹ le okhyiamhi ọ vha gwe a gbe ọ, ọni ọ lama shi mhẹ vhọ okhyiamẹ o vha gwe a gbe ọ. ³⁶Ama mhi ẹẹ vhẹ, vha she mẹ mhẹ, vhavha khyie lama shi ọ. ³⁷Iọgbọ ni Ita mhẹ ọ rhọ na mhẹ ee laa bhẹ bhuli mhẹ le, ọnọni ọ bhuli mhẹ le a vha mẹ ọna mhi laa kwu pfia.³⁸Rharhi mhi she te aleghyie kpiale, a khi mhi kaa khyiẹlẹ abhi o gwhẹ mhẹ, ama abhi o ghọli ọni ọ ghyie mhẹ lọ. ³⁹Abhi o ghọli ọni ọ ghyie mhẹ khi ona, khi wẹwẹ kwu ni ọ rhọ na mhẹ imhẹli a mẹ ọni ọ waa mhẹa, ama khi mhi laa nwuno wẹ vule ogbẹlẹ ikposhimhi. ⁴⁰Abhi o ghọli Ita mhẹ, khi ọgbọ kwu ni ọ la mẹ ọni Omyi ọli ni Ọmọsẹ ọ lama shi ọ vhọ li ọ laa mhọli agbọ ẹlẹnagbọagbọ; abhagwhoyọ mhi gwẹ laa nwu wẹ vule ogbẹlẹ ikposhimhi.⁴¹Rharhi khi Ijesu ọọ khi “Mhẹmhẹ khi ukphakpha ni o te aleghyie kpiale,” eni Ijusi ee wọwọ. ⁴²Eẹ li, “Aa mẹ khi ọni Ijesu ọna, ni omyi Ijosẹfu ni ọmọsẹ, ni eyẹ mẹẹ yẹsẹ ita ọli ali inyọ ọli? See ọ ke lia li ẹẹ li khi aleghyie lẹ te kpiale?””⁴³Ijesu ọọ wẹ, “Imhẹ vha gwe la ifuabo wọwọ. ⁴⁴A vha mẹ ọni ọ laa bhuli mhẹ le sẹkẹnẹ khi Ita mhẹ ni ọ ghyie mhẹ li ọ chi ọli bhui mhẹ le, iyọ, mhi la laa nwu ọli vule ogbẹlẹ ikposhimhi. ⁴⁵Oo la akẹkẹshekhẹ elemhi ebe ebolẹ, ‘Ishinẹgba li ọ laa wẹna eyẹ kwu.’ Ọni ọ ṣuọ ali ọni ọ te obọ ọni Ita wẹna li ọa bhuli mhẹ le.⁴⁶A vha mẹ ọni ọ mẹ ọni Ita gwhe, sẹkẹnẹ ọni ọ rhọ te obọ Ishinẹgba bhẹ-lọgwho kpe li ọ mẹ ọ gwhe. ⁴⁷Ingmaghyie, ingmaghyie, ọni ọ lama shi ọ li ọ laa mhọli agbọ ẹlẹnagbuagbọ.⁴⁸Mhẹmhẹ khi ukphakpha ni o rhi agbọ ọa ni ọgbọ. ⁴⁹Ita vhẹ ee le emenale ni e te aleghyie denakule vhi apata, ee khyie gwhuloa.⁵⁰Ona khi ukphakpha ni o te aleghyie kpiale, ọni ọ sheda laá le ọli ọ vha gwe a gwhu. ⁵¹Mhẹmhẹ khi ukphakpha inyele ni o te aleghyie kpiale. Ukphakpha na mhi laa rhọ na vhẹ lẹ khi ijegbe mhẹ ni o laa rhi inyele ni oni agbona.”⁵²Eni Ijusi ee kee fu ofu ee le epfuasẹ, eẹ li, “See ọni ọmọse ọna ọ li laa rhi ijegbe ọli ni eyẹ lee?” ⁵³Ijesu ọọ wẹ, ingmaghyie, ingmaghyie, sẹkẹnẹ khi rhẹmhi u le ijegbe Omyi Ọmọse, u da ọlia ọli, u waa laa mhọli inyele.⁵⁴Ọnọni ọ laa le ijegbe mhẹ ni ọ laa da ọlia mhẹ li ọ mhọli agbọ ẹlẹnagbọagbọ, mhi gwe nwu vhẹ vule ogbẹlẹ ikposhimhi. ⁵⁵Rharhi ẹlamhijegbe mhẹ lẹ khi egbegbe emenale, ọlia mhẹ khi egbegbe onyọ na kha da. ⁵⁶Ọni ọ le ẹlamhijegbe mhẹ ni ọ da ọlia mhẹ ọọ laa nu mhẹ la, mhẹmhẹ mhi nu ọ la.⁵⁷Abhi ọni Ita ni ọ nyele ọ li ghyie mhẹ, ali abhi mhi li nyele rharhi ọni Ita, iyọ, ọni ọ le mhẹ ọ li laa nyele rharhi mhẹmhẹ. ⁵⁸Ọna khi ọni ukphakpha ni ọ te aleghyie kpiale, a khi abhi eni ita vhẹ e li le ni e rhọ khyie gwhuloa. Ọni ọ le oni ukphakpha ona ọ laa nyele ẹlẹnagbọagbọ.” ⁵⁹Elemhi owuka li Ijesu ọ la ngme eni engmemhi ena kwu, ni ọ rhẹẹ wẹna wẹ vhi elemhi Ikapaniọmu.⁶⁰Abhi ebubu idibo ọli e ke rhọ suọ ona, eẹ li, “Owẹna ona o nwunu oo; ọgwho ọ laa dobẹ rhi ena gbe?” ⁶¹Rharhi khi Ijesu ọ ke rhọ te egbe ọ yẹsẹ khi idibo ọli ee wọwọ shi oni ingme, ọọ wẹ, rhẹmhi ona o ke pfuẹchẹ vhi idua ena?⁶²Vha kha ke chigbe mhẹ khi Omyi Ọmọse ọa shele je obhoni ọ kpọ laa? ⁶³Ayemhẹ Ishinẹgba li o rhi agbọ ọa ni ọgbọ. Ẹlamhijegbe o vha mhuẹ emeni o kyia. Ingmemhi na mhi gwu a khasẹ vhẹ Ayẹmhẹ li e kyia, e gwe kyili agbọagbọagbọ.⁶⁴A khyie mẹ ebubu vhẹ ni e vha khyie lama shiọ.” Te ituekẹle li Ijesu ọ te yẹsẹ eni e vha lẹ lama shi ọ vhọ ali ọni ọ lẹ rhi ọli dẹ. ⁶⁵Ọọ wẹ, “Ona li o zẹ mhi rhọ gwu khasẹ vhẹ khi a vha mẹ ọni ọ laa bhẹ bhui mhẹ le sẹkẹnẹ khi ọni Ita li ọ rhi ọni izemhi nali.”⁶⁶Rhọ te ana vu, ebubu eni e rhẹ khali ọli e rhọ chi egbe je oshimhi e vha gwe rhẹẹ khali ọ. ⁶⁷Ijesu ọọ li eni ikwhumhi ogbe ali ava, “Vhavha lia vuu?” ⁶⁸Isamọni Ipitẹ ọọ li, “Ọnọmhọli, ọgwho eyẹ ke vu a bhui? Ghyiẹ li u mhuẹ ingmemhi agbọ ẹlẹnagbọagbọ, ⁶⁹ Eyẹ she lama shi ọ eyẹ mẹ ọli mẹ khi ghyiẹ khi Ọni o pfuasẹ ni ọ te obọ Ishinẹgba bhẹ.”⁷⁰Ijesu ọọ wẹ, “A khi mhẹmhẹ mhi zẹ vhẹvhẹ ogbe ali ava, okwumhogwho vhẹ ọ kyili okhyio?” ⁷¹Ingmemhi Ijudasi ni omyi Isamọni Iskarọti, li ọọ ngme, ni ọ lẹ eni ikwhumhi ọgbe ali ava, rharhi li ọọ lẹ rhi Ijesu dẹẹ.

¹Abhi a ke rhọ mẹ ena, Ijeṣu ọọ lẹẹ kyia kyia vhi aloekẹ Igalili, ọ vha nono khi lẹ je Ijudea rharhi Ijusi e mẹẹ dua abhi wẹwẹ e li gbe ọlia. ² O kyili ẹrhẹghẹ ni a rhọ lẹ khyiẹlẹ aliukpe ikwu ni o kyili uwi Ijusi.³Inyọgwhọ ọli ni emọse eẹ li, “Kee li je Ijudea, khi idibo ẹ e kẹ kee li mẹ ikanya ni u waa gbe. ⁴Ọni ọ khi a kẹ yẹsẹ lẹ ọ vha khyiẹlẹ ẹtsẹkẹ ogbhagbha. U kha gbe ikanya enana, li u rhọ rhi egbe ẹ a khasẹ agbọ.”⁵Li shi inyọgwho ọli ni emose e vha lama shi ọ vhọ. ⁶Ijesu ọọ wẹ, “Ẹrhẹghẹ mhẹ ọ vha ramhi nee, ama ẹrhẹghẹ kwu khi uwẹ vhẹ. ⁷Oni ukhomhi ekagbọ ona e vha mhuẹ ibishelemhi vhẹ, ama ea bishelemhi mhẹ, rharhi khi mhia ngme khasẹ wẹ khi ikanya ebe li ea gbe.⁸Vha kee lẹ oni aliukpe, ama mhẹmhẹ imha ye rharhi ẹrhẹghẹ mhẹ o vha rhamhi nee.” ⁹Abhi ọ ke rhọ lina ngme wẹ khas w eyọ, lẹẹ ọ vha vu ọ khyie la Igalili.¹⁰Ama, abhi inyọgwho ọli e ke rhẹẹ lẹ oni aliukpe, ọ kee li lẹ, ama rhẹmhi ọ bẹna, ọ vha rhi egbe ọli lase gboo. ¹¹Eni Ijusi ee nono ọ vhi asha ni a lẹẹ khyiẹlẹ oni aliukpe eẹ li, “Mhi ghọọ?”¹²Ee ngme fufu elemhi iteteva oni agbaa ni e legba obodẹ ọni Ijesu, egwho eẹ li, “Ọgbọ aghyie li ọ kyia,” evhese eẹ li, “Obhoo, rhẹmhi ọa wasẹ ebububu iọgbọa,” ¹³ Ama a vha degbe mẹ ọni ọ jilẹ ngme lasele rharhi ulishi eni Ijusi.¹⁴Abhi oni aliukpe o ke rhọ rhamhi iteteva, Ijesu ọọ lo elemhi owuka lẹẹ wẹna iọgbọ. ¹⁵Oo sha eni Ijusi abọ eẹ li, “Obho ọni ọmọse ọna ọ te gaa li na yẹsẹ ena? A khi rhẹnhi ọ ye owẹna ebe gwhe.” ¹⁶ Ijesu ọọ wẹ, “Owẹna mhẹ ọo vha kyili uwi obọ mhẹ, ama khi obọ ọni ọ ghyie mhẹ li e te bhẹ.¹⁷Ọni ọ nono khi lẹ khyiẹlẹ abhi o ghọli Ishinẹgba, ọ laa yẹsẹ obodẹ eni ingme ena, ni obọ Isinẹgba li e te bhẹ, ni ingmemhi obọ mhẹ mhia ngme. ¹⁸Ọnọni ọa ngme ingme obọ ọli, ikiki obọ ọli li ọa nono, ama ọni ọa nono ikiki ọni ọ ghyie ọ, lẹ khi ọgbọ aghyie, abagwhoyọ lẹ khi ọni ọ gwabha gbe.¹⁹Imozisi ọ vha mẹẹ rhi ishi na vhẹ? aa mẹẹ mẹ ọni ọ rhọ gbe. See vha ke lia dua abhi vha lia gbe mhẹa?” ²⁰Eni iọgbọ ebubu ni e legba eẹ li, “U mhuẹ ayẹmhẹ okhyio! Ọgwho ọ khi lẹ laa gbea?”²¹Ijesu ọọ li, akanya ọgwho mhi gbe ni o nya vhẹ aloa ena. ²² Imozisi ọ rhi ushi ofẹẹ na vhẹ ni o kyia khi obọ enẹlẹ li o te bhẹ a khi obọ Imozisi, rharhi ona vha te a fẹli ivhiẹ ogbẹlẹ ivhiẹmhia.²³Ọgbọ ọ kha fẹli ọmọ ogbẹlẹ ivhiẹmhia ọ vha gbe ushi Imozisia yọ, see vha ke lia mhọli ofu mhẹ rharhi khi mhi rhi ọgbọ ze ogbẹlẹ ivhiẹmhia? ²⁴Imhẹ vha bino ọgbọ alo gwu ẹzọ, ama vha gwu ẹzọ ni o pfuasẹ.”²⁵Iọgbọ ni e te Ijerusalẹmu bhẹ eẹ li, “A khi ọni ea nono khi wẹwẹ e laa gbea khi ọna? ²⁶Vha ghee, li ọa ngme vhi igbẹ ena, a khi rhẹmhi o kyia khi eni ea mhasẹ e vha yẹsẹ khi lẹ khi ọni Ikiristi, la kha khi lẹẹ? ²⁷Eyẹ yẹsẹ obhoni ọni ọmọse ọna ọ te bhẹ. Ikiristi ọ kha bhẹ, a vha mẹ ọni ọ la yẹsẹ obhoni ọ te bhẹ.”²⁸Ijesu ọ la owuka ẹẹ sọse, wẹna iọgbọ ọọ li, “Vhẹvhẹ kwu vha yẹsẹ mhẹ ali obhona mhi te bhẹ. Imha bhẹ ibhale obọ mhẹ, ama ọni ọ ghyie mhẹ ọ mhuẹ ingmaghyie, vhavha yẹsẹ ọ. ²⁹Mhẹmhẹ mhi yẹsẹ ọ rharhi khi obọ ọli mhi te bhẹ.”³⁰Ee ke nono abhi e li nwu ọ, ama khi a vha dobẹ nwu ọ rharhi khi ọ vha gbe ikanya ọli pfuse nee. ³¹Ama Ebubu eni iọgbọ iteteva oni agbaa ni o legba e lama shi ọ vhọ. eẹ li, “Ikiristi ọ kha bhẹ ọ la gbe ikanya ni e dala ana?” ³²Eni Ifarisis e suọ khi eni iọgbọ ena ee la ifuabọ ee ngme eni ingme ena obodẹ Ijesu, li eni e kpeda ugamhi ali Ifarisisi e rhọ ghyie ichoja khi e kaa nwu ọ.³³Ijesu ọọ li, “Mhi khyie nu vhẹ laa ukwukwu ẹrhẹghẹ, mhi laa bhuli ọni ọ ghyie mhẹ. ³⁴Vha laa nono mhẹ vhavha gwe mẹ mhẹ; Obhoni mhia je, vhavha laa dobẹ bhẹ vhi ayọ.”³⁵Eni iọgbọ Ijusi eẹ li egbe wẹ, “Obho ọni ọmọse ọna ọa je ni eyẹ vha gwe la mẹ ọ? Oboni iọgbọ Igiriki e gbheakwhwa je li ọa je laa wẹna wẹ? ³⁶See ọ rhi ona ngme, khi vha laa nono mhẹ vhavha gwe mẹ mhẹ; obhoni mhia je, vhavha laa dobẹ bhẹ vhi ayọ?”³⁷Ogbẹlẹ ikposhimhi, ni o kyili ogbẹlẹ nofu oni aliukpe, Ijesu ọ vule ọ sọse ọọ li, “Oni okyiamẹ ọa gbe ọ bhẹ bhuli mhẹ le khi ọ kaa da.” ³⁸Ọni ọ lama shi mhẹ vhọ, abhi akẹkẹshekẹ o ngme, ‘Okẹ amẹ ni o nyele o la te ọ vhi elemhi kee naa.”³⁹Ingmemhi Ayẹmhẹ ni o Pfuasẹ li ọọ ngme, ni eni e lama shi ọ vhọ e laa mhọli; a vha rhi oni Ayẹmhẹ bhẹ nee oni ẹrhẹghẹ oyọ, rharhi khi a vha rhi ikiki ni Ijesu nee.⁴⁰Abhi ebubu iọgbọ elemhi oni agbaa ni o legba, e ke rhọ suọ eni ingmemhi ena eẹ li, “Ọni egbegbe ọbolẹ khi ọna.” ⁴¹Ama egwho eẹ li, elọ, Ikiristi ọ kha rhẹ laa bhẹ ọ ke te Igalili bhẹ lọ? ⁴²Akẹkẹshekẹ o vha mẹẹ ngme khi ẹdẹli Idevidi li ọ te lẹẹ bhẹ ali Ibẹtilẹhẹmu, ẹvhue ni a vyia Idividi shi?”⁴³Ona o pfi okemhi shi wẹ iteteva rharhi Ijesu. ⁴⁴Ebubu eni iọgbọ ee lẹẹ nono khi wẹwẹ e nwu ọ ama a chigbe mẹ ọni ọ nwu ọ.⁴⁵Iyọ eni ichoja ee lieliegbe bhuli eni e kpeda ughamhi ali Ifarisisi. eẹ wẹ, “Elọ e zẹ khi vhavha nwu ọ bhẹ?” ⁴⁶ Eni ichoja eẹ li, “Eyẹ vha mẹ ọgbọ ni ọ kpọ lina ngme gwhe.”⁴⁷Eni Ifarisisi eẹ wẹ, “A she li ghagha vhẹ laa? ⁴⁸A she mẹ eni ea mhasẹ ni e lama shi ọ vhọ, la khi Ifarisisi? ⁴⁹Ama eni iọgbọ ebubu ena ni e vha yẹsẹ ushi epfua khi uwẹ wẹ.”⁵⁰Inikodemọsi ni ọ ke kpọ bhui Ijesu le ẹliyọsẹ, ni ọ li la agbaa Ifarisisi ọọ wẹ, ⁵¹“Rhẹmhi ushi eyẹ Ijusi ọọ li a sọ ọgbọ unu ẹzọ neni ọni ọgbọ ọ gwu? ⁵²Eẹ li, “Igalili li u li te bhẹẹ laa? Kaa gwanọ khi u mẹ khi ọbolẹ ọ vha te Igalili lase gwhe.”⁵³Li ọgbọgbọ ọ rhẹẹ je apfẹ ọli.

¹Ijesu ọ je ukhomhi ọkpha Olivi. ²Utsutsu ogbeẹ ọ lieliegbe je owuka, iọgbọ kwu e bhẹ bhuli ọli le; ọ deshitọ ọọ wena wẹ. ³Eni ikowe ali iọgbọ Ifarisisi ee nwu ọkpotso ni ọ li odọsẹ bhuli Ijesu le. e rhọ shi iteteva.⁴Ee ke eẹ li Ijesu, “Ọwẹnagbọ, rhẹmhi eyẹ nwu ọni ọkpotso ọna vhọ khi ọọ li odọsẹ. ⁵ Nenaa, ushi Imozisi oo ngme, khi a tono ọkpotso ọnana echẹ; Ama see ghyiẹ u ke li sọ shi ọ? ⁶Rhẹmhi e li ngme ona khi wẹwẹ e kẹ mẹ abhi wẹwẹ e li rhi ushi nwu ọli obọ, Ijesu ọọ ke nyẹsẹ egbe je ekẹ ọ rhi ukpobọ ẹẹ kẹkẹ ẹtsẹkẹ shi ekẹ.⁷Abhi e ke rhọ khyiele mhilali egbọ, ọọ yasẹ ukhomhi ekẹ ọọ wẹ, “Ọni ọ yẹsẹ khi ingmobe ọ vha la lẹ vhi egbe, ọ kyiatsolo to ọli ẹchẹ.” ⁸Ọ gwe nyẹsẹ egbe gwe kẹkẹ ẹtsẹkẹ shi ekẹ.⁹Abhi e ke rhọ suọ emeni ọ ngme, ukpamhi ọgwhọgwhọgwho ọọ vu, rhọ te ikpa abhi e li kyili ọjọ. E pfi Ijesu shi ayọ, ali ọni ọkpotso ni ọ la wẹ iteteva. ¹⁰Ijesu ọ ke yasẹ ukhomhi ekẹ ọọ li ọni ọ kpotso, “Kpotso, mhi gyhi eni e rhi ushi nwu ẹ? A vha mẹ ọni ọ gbea?” ¹¹Ọọ li, “ a vha mẹ, Ọnọmhọli,” Ijesu ọọ li, “Imha la li ẹẹ li a gbea. kee lẹ; ama imhẹ gwe li ingmobe gwhe.¹²Ijesu ọọ gwe ẹẹ li eni iọgbọ, “Mhẹmhẹ khi ufulọ agbọ; ọnọni ọ rhọ khẹ mhẹ ọ vhaa kyia aloebi ama ọ laa mhọli ufulọ ni o rhi agbọ a ni ọgbọ.” ¹³ Eni Ifarisisi eẹ li, “Ọtsẹ ighagha li u myie, rharhi khi ghyiẹ li u myie ọtsẹ ni egbe ẹ.”¹⁴Ijesu ọọ wẹ, mhi kha rhẹ myiẹ ọtsẹlẹ ni egbe mhẹ, ingmaghyie li o kyia. Mhi yẹsẹ obhona mhi te bhẹ ali obhona mhia je, vhẹvhẹ vhavha yẹsẹ obhona mhi te bhẹ wẹ khi obhona mhia je. ¹⁵Uwi otsonagbọ vha rha sọ unu ẹzọ; ama mhẹmhẹ imha sọ ọgbọ unu ẹzọ. ¹⁶Ama mhi kha rhẹ sọ ọgbọ unu ẹzọ, ẹzọ ni o pfuasẹ mhia sọ rharhi khi a khi mhẹmhẹ ọgwho mhi kyia, ama eyẹ ali ọni Ita li eyẹ gaa la ni ọ ghyie mhẹ.¹⁷A gwe li kẹkẹ ọli shi ushi vhẹ, khi emeni ikwhumhi ava e myie ọtsẹ shi ingmaghyie li o kyia. ¹⁸Mhi myie ọtsẹ ni egbe mhẹ, Ita mhẹ ni ọ ghyie mhẹ ọ gwe li myie ọtsẹ na mhẹ abagwhoyọ.”¹⁹Eẹ li, “Mhi gyhi ita ẹ?” Ijesu ọọ wẹ, “Vhavha yẹsẹ mhẹ wẹ khi Ita mhẹ o kpọẹ; o kha kyia khi vha yẹsẹ mhẹ lọ, vhavha kha li yẹsẹ Ita mhẹ abagwhoyọ.” ²⁰Egbe asha ni a lẹ rhẹ fofo vhi owuka li ọ la ngme eni ingme ena, a vha mẹ ọni ọ nwu ọli rharhi ẹrhẹghẹ egwhuli ọli o vha rhamhi nee.²¹Ọọ wẹ, “Mhia vu; vhaa laa kee nono mhẹ, vha gwhulo shi ingmobe vhẹ. Obhona mhia je vhavha la dobẹ bhẹ vhi ayọ.” ²²Iọgbọ Ijusi eẹ li, “Rhẹmhi ọ ke laa gbe egbe ọlia shiọ, ni ọ ke rhẹ khi obhona mhia je vhavha la dobẹ bhẹ vhi obholọọ?”²³Ijesu ọọ wẹ, “Vhẹvhẹ vha kpọkẹ; mhẹmhẹ mhi te oleda bhẹ. uwi oni agbona vha kyia; mhẹmhẹ imha kyili uwi oni agbona. ²⁴Elemhiyọ, mhi gwu khasẹ vhẹ, khi vha laa gwhuloa shi ingmobe vhẹ. sẹkẹnẹ khi rhẹmhi vha lama khi mhẹmhẹ lọ, vha laa gwhuloa shi ingmobe vhẹ.²⁵E ke mhilali “Ọgwho u kyia?” Ijesu ọọ wẹ, “Ekẹ mhi te gwu khasẹ vhẹ! ²⁶Mhi mhọli emeni ebu na mhi laa ngme na mhi gwe laa gwu kwu vhẹ egbe. Ama ọni ọ ghyie mhẹ ingmaghyie li ọa ngme; emena mhi te obọ ọli suọ, lẹ mhi gwu a khasẹ agbọ ena.” ²⁷E vha yẹsẹ khi ingmemhi ọni Ita li ọ ngme khasẹ wẹ.²⁸Ijesu ọọ li, “Vha kha yasẹ Omyi Ọmọse vhi ekẹ, li vha rhọ laa yẹsẹ khi mhẹmhẹ lọ, khi a khi izemhi mhẹ mhi rha khyiẹlẹ emena mhia khyiẹ. Abhi ọni Ita ọ li wẹna mhẹ, lẹ mhi li gwu a khasẹ vhẹ eyọ. ²⁹Ọni ọ ghyie mhẹ ọ nu mhẹ la, ọ vha dobẹ mhẹmhẹ ọgwho, rharhi khi rhẹmhia khyiẹlẹ emeni e rhi egbe aa nwu ọ.” ³⁰Abhi Ijesu ọ ke rhẹẹ ngme eni ingmemhi ena, iọgbọ ebubu e lama shi ọ vhọ.³¹Ijesu ọọ li eni Ijusi ni e lama shi ọ vhọ, “Vha kha sheda rhi emena mhia wẹna vhẹ ena a gbe akanya lẹ vha rhọ laa kyili egbegbe idibo mhẹ; ³² Vha la laa yẹsẹ ingmaghyie, oni ingmaghyie oo la laa pfa vhẹ vhọ le.” ³³Eẹ li, “Udogbapfẹ Ebulahamu li eyẹ kyia, eyẹ vha kpọ kyili igwhumha iọgbọ gwhe. See u ke lia li ẹẹ li, khi vha la laa pfue vhọ le?³⁴Ijesu ọọ wẹ, “Ingmaghyie mhi gwu khasẹ vhẹ, ọgbọ kwu ni ọa li ingmobe ogwhumha ingmobe li ọ kyila. ³⁵Ogwhumha ọ vha laa udogbapfẹ agbọagbọ; ama ọmọ ni a vyia shi udogbapfẹ li ọa la vhọ agbọagbọ. ³⁶Iyọ ọni Ọmọmọse ni ọ la oni udogbapfẹ, ọ she pfa vhọ le pfuse.³⁷Mhi yẹsẹ khi udogbapfẹ Ebulahamu vha kyia; ama vhaa nono abhi vha lia gbe mhẹa rharhi ingmemhi mhẹ o vha la vhẹ agbọ. ³⁸Mhi she gwu khasẹ vhẹ emena mhi te obọ Ita mhẹ mẹ, vhẹvhẹ vha lia khyiẹlẹ emeni vha te obọ ita vhẹ suọ.”³⁹Eẹ li, ‘Ebulahamu ita eyẹ li ọ kyia.” Ijesu ọọ wẹ, “Vha kha kyili imyi Ebulahamu lọọ, vha kha ẹẹ gbe ikanya ni Ebulahamu ọọ gbe. ⁴⁰ Ama, vha nono abhi vha lia gbe mhẹa, ọgbọ ni ọ gwu ingmaghyie a khasẹ vhẹ na mhi te obọ Ishinẹgba suọ. ⁴¹Emeni ita vhẹ e khyiẹ lẹ vha khyiẹlẹ ena?” Eẹ li, “A vha vyia eyẹ ivhiẹ ighaba. Ita ọgwho li eyẹ mhuẹ, ni ọ kyili Ishinẹgba.”⁴²Ijesu wẹ, “Ishinẹgba ọ kha kyili Ita vhẹ lọ, vha khẹ somhi elemhi mhẹ, rharhi obọ Ishinẹgba mhi te bhẹ; Ibhale na mhi bhẹ ọa kyili uwi obọ mhẹ, li ọ ghyie mhẹ. ⁴³See vha ke li a yẹsẹ emena mhia ngme? Rharhi vhaa rhi ingmemhi mhẹ ali owẹna mhẹ a gbe akanya. ⁴⁴ Uwi ita vhẹ vha kyia, ni okhyio, vhaa nono khi vha ke khyiẹlẹ ingmemhi ẹlamhijegbe ni ita vhẹ e kpọ ẹẹ khyiẹlẹ. Ekẹ li ọ te gbee ugbee ọ vha mugha shi ingmaghyie rharhi khi ọ vha mhọli ingmaghyie. Ọ kha pfi olẹmhi, abhi ọ le li khi oyọ rharhi khi ọpfiolẹmhi li ọ kyia ali ita olẹmhi.⁴⁵Ama, rharhi khi mhia ngme ingmaghyie, li vhavha te lama shi mẹ vhọ. ⁴⁶Mhi gyhi ọni ọ mẹ mhi ingmobe egbe? Abhi o ke rhọ kyia khi ingmaghyie mhi gwu a khasẹ vhẹ, elọ e ke zẹ khi vhavha lama shi mẹ vhọ shiọ? ⁴⁷Ọni ọ kyili uwi Ishinẹgba li ọa suọ ingmemhi ọli; Rharhi khi vhavha kyili uwi Ishinẹgba li vhavha te a suọ ingmemhi ọ.⁴⁸Ọọ sọ eni Ijusi vhọ, ọọ wẹ, eyẹ vha gwhabha ngme, ni eyẹ khi samaria li u kyia, khi u mhọli ayẹmhẹ okhyio? ⁴⁹Ijesu ọọ ke sọ wẹ vhọ, ''Imha mhọli oykhyio: Mhi rhi ojima ni Ita mhẹ, ama vhẹvhẹ vhavha mhọli eghọghọ mhẹ.⁵⁰A khi ikiki obọ mhẹ mhia nono; ama ukwumhọgwho ọ la ni ọ nono ikiki ni ọ gwe laa sọ unu ẹzọ. ⁵¹Egbegbingme mhi gwa khasẹ vhẹ, a kha mẹ ọni ọ rhi ingmemhi mhẹ gbe, ọ vha gwhu gwhe!”⁵²Eni Ijusi eẹ li, “Avyiena eyẹ yẹsẹ khi u mhuẹ ayẹmhẹ okyhio. Ebulahamu ali eni ebolẹ e gwhuloa; Ama u ke ẹẹ khi, ‘Ọnọni ọ laa rhi ingmemhi mhẹ gbe, khi ọ vha laa gwhua.’ ⁵³U fu dala Ebulahamu ni ita eyẹ ni ọ li gwhua? Ali eni ebolẹ ni e li gwhuloa. Ọgwho ọ ma ẹẹ?”⁵⁴Ijesu ọọ li, “Mhi kha rhi ikiki ni egbe mhẹ apfuẹ li o kyia; Ita mhẹ li ọ laa chichi mhẹ, ni vhẹ khi Ishinẹgba vhẹ li ọ kyia. ⁵⁵Vhavha yẹsẹ ọ, ama mhẹmhẹ mhi yẹsẹ ọ. Mhi kha ẹẹ khi imha yẹsẹ ọ, ọpfiolẹmhi mhi kyia abhi vhẹvhẹ, Ama mhi yẹsẹ ọ mhi rhi ingmemhi ọli a gbe. ⁵⁶Rhẹmhi Ebulahamu ọ ghẹlẹ khi lẹ mẹ ogbẹlẹ mhẹ; egbe e nwu ọ rharhi khi ọ mẹ ọ.”⁵⁷Ene Ijusi eẹ li, “U waa gbe ikpe ẹgbhọ eva igbe nee, u she mẹ Ebulahamu gwhe? ⁵⁸“Egbegbingme mhi gwu khasẹ vhẹ, neni a mẹ Ebulahamu mhi she le la.” ⁵⁹Li e rhọ wolọ echẹ ekẹ khi wẹwẹ e tono ọli wẹwẹ, Ijesu ọ rhi egbe ọli gbhagbha ni ọ rhọ te owuka a lase.

¹1 Abhi Ijesu ọ ke rhọ dọsẹ lẹ lẹẹ, ọọ mẹ ọmọse ni a vyia ọzalo. ²Idibo ọli ee ke mhila ọli, “Ọga, ingmobe ọgwho o pfi izalo shi ọna egbe ena, li ọ zẹ la khi ita ọli ali inyọ ọli?”³Ijesu ọọ li, “A khi lẹ wẹ khi ita ọli ali inyọ ọli li e li ingmobe. Ama rhẹmhi ẹẹ khi a kẹ rhi akanya Ishinẹgba khasẹ. ⁴Eyẹ nwemaa gbe akanya ọni ọ ghyie mhẹ abhi ogota o li le ena. Ubi o she laa bi ni ọgbọ ọ vha rhọ gwe laa gbe akanya. ⁵Abhi mhi li la oni agbona ena, mhẹmhẹ khi ufulọ agbọ.”⁶Abhi Ijesu ọ ke rhọ ngme ena pfuse, ọ tono etẹ kwu ekẹ, ọ rhi eni etẹ fọse ekẹ, ọ rhẹ wẹ shishi ọni ọmọse aloa. ⁷Ọọ li, “Vu, u kee je atekẹ Isalọmu aa kpe wẹa” (abhi eva oni atekẹ o ngme lẹ khi ighyiemhi). Ọni ọmọse ọ je obholọ, ọa kpe wẹa, rhẹmhi ọ ke te obholọ mato bhẹ.⁸Ibolo ọni ọmọse ali iọgbọ evhese ni e kpọ mẹ ọli gwhe ee li ẹẹ li, ọna ọ vha kyili ọni ọ ke she lemaa?” ⁹Egwho eẹ li, lẹ lọọ, eni e kpọẹ eẹ li, obho a khi lẹẹ, ama ọ liabhi lẹ,” Ama ọni ọmọse ọọ li, “Mhẹmhẹ lọọ.”¹⁰Eẹ li, “Sẹe alo ẹ e ke li gweghyiea?” ¹¹Ọọ wẹ, “Ọmọse ọgwho ni a lu Ijesu li ọ rhi etẹ fọse ekẹ shishi mhẹ aloa ọọ mhẹ, vu ke jee atekẹ Isalọmu khi u kaa kpe wẹa,’ mhi liyọ lẹ a kpe wea, lẹ mhi ke rha mato ena. ¹²Eẹ li, “Mhi gyhi ọni ọmọse nena?” Ọọ wẹ, “Imha mẹ ọli.”¹³Ee rhue ọni ọmọse ni ọ kpọ zalo bhuli Ifarisisi. ¹⁴Ọni ogbelẹ o kyili ogbelẹ ivhiẹmhẹa ni ọ gbe oni ọnyaloa ona. ¹⁵Eni Ifarisisi ee gwe mhila ọni ọmọse abhi ọ li kweghyiea aloa. Ọọ wẹ, “Rhẹmhi ọ rhi igbọlọ shishi mhẹ aloa, mhi kpe wẹa, lẹ mhi ke rha mato ena.”¹⁸Ifarisisi egwho eẹ li, “Ọni ọmọse ọna ọ vha te obọ Ishinẹgba bhẹ rharhi khi ọ vha rhi ushi ivhiẹmhẹa a gwhẹ.” Eni ekpọẹ eẹ li, “See ọlingmobe ọ ke li dobẹ a gbe ọnyalọa onana?” ona o rhi okemhi shi wẹ vhi iteteva. ¹⁷E gwe eẹ li ọni ọzalo, “See ghyiẹ u ke li sọ shi ọ obodẹ ọni ọmọse ni ọ gweghyie ẹ aloa?” Ọni ọmọse ọọ li, “Ọbolẹ li ọ kyia.” ¹⁶Apfshi oni ẹrhẹghẹ ona Ijusi e vha khyie lama shi ọ khi ọni ọ kpọ zalo ni ọ ke gweghyie aloa lọ, apfishi ni e rhọ chigbe a nyalu ita ọli ali inyọ ọni a vyia ọzalo mhila.¹⁹Ee ke mhila ita ọli ali inyọ ọli, “Omyi vhẹ khi ọna ni ẹẹ khi rhẹmhi a vyia ọli ọzalo? See ọ ke lia mato shiọọ?” ²⁰Ita ali inyọ ọli eẹ li, “Eyẹ yẹsẹ khi omyi eyẹ lọ. Eyẹ yẹsẹ khi ọzalo li eyẹ vyia ọli. ²¹Ama abhi ọ ke lia mato, eyẹ vha yẹsẹ, ọnọni ọ gweghyie ọli aloa, eyẹ vha yẹsẹ. Vha mhila ọli, ọ she fu. Ọ dobẹ a sọ vhẹ vhọ.”²²Rhẹmhi ita ọli ali inyọ ọli e liyọ sọ wẹ vhọ, rharhi ulishi eni Ijusi oo nwu wẹ. Rharhi khi eni Ijusi e she kpọ le lama ni egbe khi ọni ọ sheda laa li ẹẹ khi Ijesu lẹ khi Ikiristi, a to ọli abọ te owuka a lase. ²³Ona li o zẹ ni ita ọli ali inyọ ọli ee rhọ ẹẹ li, vha mhila ọli, ọ she fu.”²⁴Utozeva e gwe nyalu ọni ọ kpọ zalo eẹ li, “Rhi ikphẹmhi ni Ishinẹgba. eyẹ yẹsẹ khi ọlingmobe li ọni ọmọse ọna ọ kyia.” ²⁵Ọni ọmọse ọ ke sọ wẹ vhọ, “Ni ọ kyili ọlingmobe ni ọ vha kyili ọlingmeobe, imha yẹsẹ. Emena mhi lee yẹsẹ lẹ khi mhi kpọ zalo, ama mhi she a mato.”²⁶E ke eẹ li, “See ọ li ẹ? See ọ li kweghyiẹ ẹ aloa?” ²⁷Ọọ wẹ, “Mhi she kpọ le gwu na vhẹ, vhavha lama shi mhẹ vhọ! See vha ke gwe ẹẹ mhi ngme nenaa?²⁸Rhẹmhi vha ke a nono khi vha li kyili idibo ọli laa?” Ofu o kee fu wẹ eẹ li, “Ghyiẹ khi odibo ọli, ama Imozisi li eyẹ ena eyẹ rha khẹ! ²⁹Eyẹ yẹsẹ khi Ishinẹgba ọ nu Imozisi ngme, ama ọni ọmọse ọna, eyẹ vha yẹsẹ obhoni ọ te bhẹ.”³⁰Ọni ọmọse ọọ wẹ, “Ọnyaloa khi ona! Vhẹ khi vhavha yẹsẹ obhoni ọ te bhẹ, ama li ọ gweghyie mhẹ aloa. ³¹Eyẹ yẹsẹ khi Ishinẹgba ọ vha suọ olema ọlingmobe, ama eni ea ga Ishinẹgba ali eni e rhi ingmemhi ọli a gbe, li Ishinẹgba ọ rhi esọ a shi ekẹ.³²Te ituekẹle agbọ apfishi ana a vha kpọ suọ gwhe khi ọgbọ dobẹ gweghyie ọgbọ ni a vyia ọzalo aloa gwhe. ³³O kha kyia khi ọni ọmọse ọna khi ọ vha te obọ Ishinẹgba bhẹ lọ, ọ vha kha dobẹ gbe akanya onana.” ³⁴Eẹ li, “Ingmobe li a vyia vhẹvhẹ shi, rhẹmhi ghyiẹ u ke a nono khi u ke wẹna eyẹ naa?” Li e rhọ te owuka to ọli abọ a lase.³⁵Ijesu ọọ ke suọ khi e she to ọli abọ te owuka a lase. Li ọ rhọ nono ọ mẹ ni ọ rhọ ẹẹ li, “Uu lama shi Omyi Ishinẹgba vhọ?” ³⁶Ọni ọmọse ọọ ke sọ vhọ ọọ li, “Ọgwho ọ kyia, Ọnọmhọli, ni u wẹ mhẹ mhi lama shi vhọ?” ³⁷ Ijesu ọọ li, “Uu she mẹ ọ. Li ọọ nu ẹẹ a ngme naa.” ³⁸Ọni ọmọse ọọ li, “Ọnọmhọli, mhi lama shi vhọ, “Li ọ rhọ gbega nali.³⁹Ijesu ọọ li, “Rharhi khi igwuẹzọ mhi rhọ bhẹ vhi oni agbona khi eni e vhaa mato alo wẹ e gweghyiea khi eni ea mato khi e zalo.” ⁴⁰Iọgbọ Ifarisisi egwho ni e chi mama ọli ee suọ emeni ọọ ngme eẹ li, “Izalo eyẹ ke li kyia ena shiọọ?” ⁴¹Ijesu ọọ li, “Vha kha zalo lọ, vhavha khaa mhọli ingmobe. Ama vhẹ khi, ‘Eyẹ a mato,’ ingmobe vhẹ e la asha ni e la.

¹“Ẹgbegbingme mhi gwu khasẹ vhẹ: ọni ọ vha te obunodẹ lo owa isumha, ọ rhọ te odẹ ovhese lo, ọgbọ ọyọyọ ọghyiatọ ali agyiaguda li ọ kyia. ²Ọni ọ rhọ te odẹ a lo owa isumha, lẹ khi egbegbe ọni ọrisumhale.³Ọkhẹudẹ ọ kha gwheyie obunodẹa ni ọni ọrhisumhale ea sokwu urhuili ọli, ọa luno eni isumha ọli eva ọ rhẹ wẹ a je elase la le. ⁴Ọ kha wọlọ wẹ lase, ọ kpalo na wẹ, eni isumha e rha khali ọ, rharhi khi e yẹsẹ uruli ọ.⁵E vha rha khali ọlele onochi rhẹmhi e nana ọli, rharhi khi e vha yẹsẹ urhuili ọlele,” ⁶ Ijesu ọọ kpe oni ita ona khasẹ wẹ, ama e vha yẹsẹ emeni ọ rhi ọli ngmee.⁷Ijesu ọ gwe ẹẹ wẹ, “Egbegbingme mhi gwu khasẹ vhẹ: Mhẹmhẹ khi oni obunodẹ ni isumha kwu e te a lono owa. ⁸Eni e kpọ bhẹ khẹ mhẹ, ighyiatọ ali igyiaguda li e kyia, ama eni isumha e vha rhi esọ shi wẹ vhi ekẹ.⁹Mhẹmhẹ khi ọni obunodẹ. Ọnọni ọ sheda laa te ikpa mhẹ lo, ọ la pfue vhọ le; ọ la lo ọ vha lase ọ mẹ ebuli aghyie a kee le. ¹⁰Rhẹmhi ọgyhiatọ ọ bhẹ khi lẹ rha do rhue, lẹ gbea, lẹ pfusea. Mhẹmhẹ mhi she bhẹ khi e kẹ mhọli agbọ ni o vọ pfuse.¹¹Mhẹmhẹ khi egbegbe ọni ọrhisumhale. Egbegbe ọni ọrhisumhale li ọ rhi agbọ ọli a shi ekẹ ni isumha ọli. ¹²Ọni a rhue ọwa, ni ọ vha kyili ọni ọrhisumhale, ni ọ vha mhọli eni isumha, ọ kha mẹ khi ọdumhi ọa bhẹ, rhẹmhi ọ na pfia ọ pfi eni isumha shi ayọ vu. Ọni ọdumhi ọ chino wẹ ọ tsẹkẹ wẹ kwa. ¹³Rhẹmhi ọọ na pfia rharhi khi ọ kyili ọna rhue ọwa ọ vha pfi ẹgboe a shi wẹ egbe.¹⁴Mhẹmhẹ khi egbegbe ọrhisumhale. Mhi yẹsẹ isumha mhẹ, isumha mhẹ e yẹsẹ mhẹ. ¹⁵Ọni Ita ọ yẹsẹ mhẹ, mhẹmhẹ mhi yẹsẹ ọni Ita, mhi rhi agbọ mhẹ shi ekẹ ni isumha mhẹ. ¹⁶Mhi mhọli isumha evhese ni e vha la ana nena. Mhi nwemaa laa rhue wẹ bhẹ la gboghyiẹ ena, e la laa suọ urhui mhẹ khi e kẹ koko gba khi e mhọli ọrhisumhale ọgwho.¹⁷Ona li o rhi Ita mhẹ mhọli ighọli mhẹ; mhi rhi agbọ mhẹ shi ekẹ khi mhi kẹ gwe mẹ ọli rhue. ¹⁸A vha mẹ ọni ọ laa myie mhẹ lẹ rhue, ama mhẹmhẹ mhi te egbe mhẹ rhọ shi ekẹ. Mhi mhọli izemhi na mhi rha rhọ shi ekẹ, mhi mhọli izemhi na mhi rha rhue ọ vhi ekẹ. Ita mhẹ li ọ shi oni ushi ona na mhẹ.”¹⁹Abhi eni Ijusi e ke rhọ suọ emeni Ijesu ọ ngme, okemhi o gwe lo wẹ vhi iteteva. ²⁰Ebubu wẹ eẹ li, “Ọ mhọli ayẹmhẹ okhyio, ọ gwe a vhevhẹ. Elọ vha rhi esọ shi ọ vhi ekẹ a shi?” ²¹Iọgbọ evhese eẹ li, “Ọni ọ mhọli ayẹmhẹ okhyio ọ vha ngme ingmemhi enana. Ayẹmhẹ okhyio o vha dobẹ a gweghyie ọzalo aloa?”²²Oni ẹrhẹghẹ ona, o kyili ẹrhẹghẹ aliukpe irhọnamhuẹ vhi Ijerusaẹmu. ²³O kyili orhuamẹ, Ijesu ọ rhọ te atukpapfẹ owuka elemhi arakpha Isolomon. ²⁴Ijusi e sẹ gasẹ ọ eẹ li, “Elẹ u la rhi eyẹ shi ikhọkhọ rhamhi? O kha kyia khi Ikiristi lu kyia wẹ le lee gwu khasẹ eyẹ.”²⁵Ijesu ọọ wẹ, “Mhi she kpọ gwu khasẹ vhẹ, ama vhava lama shi ọ. Ikanya na mhi rhi eva ita mhẹ a gbe, wẹwẹ li e myie ọtsẹ a na mhẹ. ²⁶Vhaa lama shi mhẹ vhọ rharhi khi vhaa kyili isumha mhẹ.²⁷Isumha mhẹ ea sokwu urhui mhẹ; mhi yẹsẹ wẹ, e rha khẹ mhẹ. ²⁸Mhi she rhi agbọ ẹlẹnagbọagbọ na wẹ; e vha chigbe a li opfua, a vha mẹ ọni ọ laa dobẹ myiono mhẹ wẹwẹ vhi obọ.²⁹Ita mhẹ, ni ọ rhẹ wẹ na mhẹ, li ọ fu dala ọgbọ kwu, iyọ a vha mẹ ọni ọ laa dobẹ myiono ọni Ita wẹwẹ vhi obọ. ³⁰Mhẹmhẹ ali ọni Ita ọgwho li eyẹ kyia.” ³¹Eni Ijusi e sanọ echẹ vhi ekẹ khi wẹwẹ e tono ọli wẹwẹ.³²Ijesu ọọ li, “Mhi she nwemaa rhi egbegbe ikanya aghyie nebu khasẹ vhẹ te obọ Ita mhẹ. ikanya ni egwho vha ke laa tono mhẹ echẹ kee shi ena?” ³³Eni Ijusi eẹ li, “Eyẹ vha tono ẹẹ echẹ shi ikanya aghyie, ama ipfininua, rharhi khi ghyiẹ, ọgbọ apfuẹ, u rhi egbe ẹ a kyili Ishinẹgba.”³⁴Ijesu ọọ wẹ, “A kẹkẹ ọ shi ushi vhẹ khi, Ishinẹgba vha kyia””?” ³⁵Ọ kha lu wẹ ishinẹgba, ọgwho oni ingme oyọ o nu ngme ( ingmemhi Ishinẹgba ni o kyili akẹkẹshekẹ o vhaa pfi olẹmhi), ³⁶Ingmemhi mhẹ vha ngme, ni ọni Ita ọ kpe abọa ghyie bhẹ vhi oni agbona, ‘Vhẹ khi mhi a pfino inua,’ rharhi khi mhi ẹẹ vhẹ, ‘khi Omyi Ishinẹgba mhi khyia’?³⁷O kha kyia khi a khi ikanya Ita mhẹ mhi a gbe, imha vha lama shi mhẹ vhọ. ³⁸Ama, mhi kha gbe eni ikanya, khi vhavha rhẹ lama shi mhẹ vhọ, vha lama shi eni ikanya na mhi a gbe, khi vha rhọ yẹsẹ vha mẹ ọ mẹ khi ọni Ita ọ nu mhẹ la mhi nu ọni Ita la.” ³⁹Ee gwe nono khi wẹwẹ e nwu Ijesu, ama ọ te ifuabọ wẹ vu.⁴⁰Ijesu ọ liegbe vu jee elase Ijodani obhoni Ijọni ni ọọ batazi ọ khyiatsolo la ẹẹ batizi iọgbọ, Ijesu ọ la ayọ. ⁴¹Ebubu iọgbọ e bhẹ bhuli ọ le. e khyiele ngme, “Ijọni ni ọọ batazi iọgbọ ọ vha kee gbe inyaloa, ama emeni Ijọni ọ gaa ngme obodẹ ọni ọmọse ọna ingmaghyie li e gaa kyia,” ⁴²iọgbọ e lama shi Ijesu vhọ vhi ayọ.

¹Ọmọse ọgwho ni ẹẹ lu Ilazarọsi ọọ lẹẹ gwhua, ọ nyele evhue Ibẹtani, ẹvhue Imeli ali Imata. ²Ọni Imali ọyọ li ọ ke kwu itulale rhugwhu Ọnọmhọli ni ọ rhi itsu shishi ọli awẹa, li inyọgwho ọli ni ọmọse ọ kee gwhua.³Inyọgwho ọli ni ikpotso e ke ghyie usomhi bhuli Ijesu eẹ li, “Ọnọmọhli, ghe, ọni u nwemaa mhọli ighọli ọọ gwhua.” ⁴Abhi Ijesu ọ ke rhọ suọ oni ingme, ọọ li, “igwhamhi Ilazarọsi’ o vha kyili uwi egwhi, ama rhẹmhi o laa rhi ikiki ni Ishinẹgba khi a kẹ yasẹ ọni Omyi Ishinẹgba ekẹ.”⁵Ijesu ọ mhọli ighọli Imata ali inyọgwho ọli ni ọkpotso ali Ilazarọsi. ⁶Abhi ọ rhọ suọ khi Ilazarọsi ọọ gwhua, Ijesu ọ khyie la asha ni ọ la suọ ẹlẹ eva. ⁷Abhi ona o ke rhọ dọsẹ, ọọ li idibo ọli, “Eyẹ gwe liegbe je Ijudea.”⁸Eni idibo ọli eẹ li, “Ọga, Eni Ijusi ee kpọ la ayọ tono ẹ echiẹ gwhe, obholọ li u ke gwe a je enaa?” ⁹Ijesu ọọ wẹ, a khi ọkwulọkwu igbe ali eva li e la ẹlogota? ọgbọ khaa kyia ẹlogota, ọ vhaa tsutsu, rharhi khi ọa mato gboo.¹⁰Ama ọ khaa ke a kyia ẹliyọsẹ, ọ laa ke tsutsu rharhi khi ọ vha mato.” ¹¹Abhi ọ ke rhọ ngme ena pfuse, ọọ wẹ, “Ukpokyia eyẹ Ilazarọsi ovhesẹ o she nwu ọ, ama mhia je obholọ khi mhi kaa vu ọli ovhesẹ.”¹²Eni idibo ọli eẹ li, “Ọnọmhọli, o kha kyia khi ovhesẹ li o nwu ọ, ọ laa zee.” ¹³Ingmemhi egwhuli Ilazarọsi li Ijesu ọọ ngme’ ama idibo ọli ee khọkhọ khi ingmemhi ovhesẹ apfuẹ li ọọ ngme. ¹⁴Rhẹmhi Ijesu ọ kyiọlọ ọlia gwu khasẹ wẹ, “Ilazarọsi ọ she gwhu.¹⁵Egbe nwu mhẹ, rharhi khi imha la ayọ, khi vha kẹ lama shi ọ. Vha kyia khi eyẹ kaa mẹ ọ.” ¹⁶Itọmọsi, ni a kee lu itsema, ọọ li idibo ọli ni e kpọẹ. “Eyẹ li rhọ khali Ijesu vu khi eyẹ li nu ọli gwhua.”¹⁷Neni Ijesu ọ ke rhamhi ayọ, ọ bhale a vhẹ khi o she gba ẹlẹ ene ni ọ te gwhu ni a te rhọ tọ. ¹⁸Te Ijerusalemu je Ibetani o vha nuẹ, o la ufuabọ imali esẹ. ¹⁹Ebubu iọgbọ Ijusi e she a nu Imata ali Imeli shitọ, khi e kee zeze wẹ idu obodẹ inyọgwho wẹ ni ọmọse ni ọ gwhua. ²⁰Abhi Imata ọ ke rhọ suọ khi Ijesu ọ she bhẹ, ọ na nwu ọ, vhi odẹ, ama Imeli ọ khyie shitọ apfẹ.²¹Imata ọọ li Ijesu, “Ọnọmhọli, ‘’U kha la ana lọ, inyọgwho mhẹ ọ vha kha gwhua. ²²Apfishi nenaa, mhi yẹsẹ khi ememi u rhẹ mhila Ishinẹgba ọ laa rhi ọli nẹẹ.” ²³jjesu. ọọ li, “Inyọgwho ẹ ọ gwe a vue.”²⁴Imata ọọ li, “Mhi yẹsẹ ogbẹlẹ ikposhimhi ni Ishinẹgba ọ rhọ laa nwuno iọgbọ te egwhi vule, ọ li laa vule.” ²⁵Ijesu ọọ li, mhẹmhẹ khi ọni ọ nwuno iọgbọ te egwhi a vule; ọni ọ lama shi mhẹ vhọ, ama ọ kha rhẹ gwhua, ọ gwe laa nyele; ²⁶Ọni ọ nyele ni ọ lama shi mhẹ vhọ ọ vha laa gwhua. U waa lama shi ona?”²⁷Ọọ li, “Ingmaghyie, Ọnọmhọli, mhi lama khi ghyiẹ khi Ikiristi, ni Omyi Ishinẹgba, ọni ọ lẹ bhẹ vhi agbọ.” ²⁸Abhi ọ ke rhọ ngme ona, ọ liegbe je apfẹ bẹna a nyalu Imeli. Ọọ li, “Ọwẹnagbọ ọ she bhẹ khi ọa nyalu ẹ.” ²⁹Abhi Imeli ọ ke rhọ suọ, ọ nyanya chi vue ni ọ rhẹẹ bhuli Ijesu.³⁰Oni ẹrhẹghẹ, Ijesu ọ vha khyie lo elemhi ẹvhue ama ọ la asha ni ọ bhale a vhọ. ³¹Eni Ijusi ni e nu Imeli ali Imata la ọrhọ, abhi e ke rhọ mẹ khi ọ vue gbuu je elase. e vue rhọ khali ọ; e khọkhọ khi rhẹmhi ọ je uji Ilazarọsi lẹẹ vyiẹ. ³² Abhi Imeli ọ ke rhọ bhẹ vhi asha ni Ijesu ọ la ni ọ rhọ mẹ ọ, ọ de talorugwhu ọ vhi odalo ọọ li, “Ọnọmhọli, u kha la ana lọ inyọgwho mhẹ ọ vha kha gwhua.”³³Abhi Ijesu ọ ke rhọ mẹ khi ọọ vyiẹ, ali Ijusi ni ee zeze ọli udu khi ee li vyiẹ, ọọ rhi ikhekhegbea vyiẹ elemhi ayẹmhẹ udu o vha sheshe ọ. ³⁴Ọọ li, “Ashio a rhi ọli tọ?” Eẹ li, “Ọnọmhọli, bhale a ghe ọ. ³⁵Ijesu ọọ vyiẹ.³⁶Ijusi eẹ li, “Ghe abhi ọli mhuẹ ighọli Ilazarọsi gwhe oo!” ³⁷Ama egwho eẹ li, “Ọna ọ vha mẹẹ kyili ọni ọmọse ọyọ ni ọ ke kweghyie ọzalo aloa? Ọna li ọ vha ke laa dobẹ nwu te egwhi vule?”³⁸Ijesu, abhi ọ ke gwe li vyiẹ evyiẹ idukunu, ọ je oni uji ni a rhi ọli tọ. uji ni a ma li o kyia a tsua ẹchẹ nofu gwese ọ. ³⁹Ijesu ọọ li, “Tsua oni ẹchẹ ona odẹa.” Imata, ni inyọgwho Ilazarọsi ni ọ gwhua, ọọ li Ijesu, “Ọnọmhọli, oni olimhi ọ she a kẹnaa nenaa, rharhi khi o she gba ẹlẹ ene ni a te rhi ọli tọ.” ⁴⁰Ijesu ọọ li, “Imha gwu khasẹ khi u kha lama shi mhẹ vhọ, khi u laa mẹ ikiki Ishinẹgba?”⁴¹E tsua oni ẹchẹ vhi odẹa, Ijesu ọ yasẹ alo ekẹ ọọ li, “Ita, “Mhi kphẹmhi ẹ khi u she suọ mhẹ, ⁴²Mhi yẹsẹ khi ẹrhẹghẹ kwu li u rha suọ mhẹ. Ama rharhi iọgbọ ni e nu mhẹ mugha ena lẹ mhi rhọ ngme ona, khi e kẹ lama khi ghyiẹ li u ghyie mhẹ.”⁴³Abhi ọ ke rhọ ngme pfuse, “li ọ rhọ sọọse gbalalala, Ilazarọsi, lasele!” ⁴⁴Ọni ọmọse ni ọ gwhu ọ vule, ama a khyie liyọ rhi ode kwhuli ọli she eke. Ijesu ọọ wẹ, “Vha taghyiẹ ọlia khi ọ kee vu.”⁴⁵Ebubu iọgbọ Ijusi ni e bhẹ vhi ayọ a mẹ Imeli ali akanya ni Ijesu ọ gbe, ee lama shi ọ vhọ. ⁴⁶Ama egwho vhọ e vha gwu khasẹ Ifarisisi akanya ni Ijesu ọ gbe.⁴⁷Eni e kpeda ugamhi ali Ifarisisi e koko iọgbọ Ijusi gba eẹ li, “See eyẹ li rhi ona kyia? Ọni ọmọse ọna ọa gbe inyaloa ọdọdọda. ⁴⁸ Eyẹ kha lina pfi ọli esọa agbọ kwu e laa rhọ khali ọ; Iromu e bhẹ laa myie eyẹ ana e gwhọghọ eyẹ ẹvhuelia.”⁴⁹Ukwhumhogwho elemhi wẹ ni ẹẹ lu Ikẹafasi, ni ọ kyili ọni ọ kpeda ugamhi oni ukpe, ọọ wẹ, “Vhavha mhuẹ emeni Vha yẹsẹ pẹẹ. ⁵⁰ Vhavha li yẹsẹ khi ukwumhọgwho ọ kha gwhua ni eni iọgbọ li o somhi dala evhue kwu e rhọ li opfua?”⁵¹A khi rharhi egbe ọli li ọ ngme shi; ama abhi ọni ọ kpeda ugamhi oni ukpe, rhẹmhi ọ ngme emeni e gbhagbha khi Ijesu ọ laa gwhua ni evhue. ⁵²A khi igwhua ni ẹvhue lọgwho, ama khi Ijesu ọ rhọ koko imyi Ishinẹgba ni e gbheakwua vhi ashakhasha. ⁵³Te oni ogbẹlẹ vu li e tee nono abhi e li nwu Ijesu gbea.⁵⁴Rharhi ona, Ijesu ọ vha gwee lasele vhi ogbolo iteteva Ijusi. Onochi lẹ ali idibo ọli e vu je ẹvhue ni o chi mama apata ni a lu Efuremu. Ayọ li ọ nu idibo ọli la. ⁵⁵Oni ẹrhẹghẹ aliukpe idọsẹalẹ o she chi bhẹ, ebubu iọgbọ e rhọ te ẹvhue ọdọdọda ẹẹ je Ijerusalemu neni oni aliukpe o rhamhi khi wẹwẹ e kaa rhi egbe shi ipfuasẹ.⁵⁶E lẹẹ nono Ijesu, e nu egbe wẹ ngme abhi e li mugha owuka eyọ, “See vha khọkhọ? khi ọ vha laa bhẹ vhi oni aliukpe lọọ?” ⁵⁷Eni e kpeda ugamhi ali Ifarisisi e she ngme khi ọni ọ sheda laa mẹ asha ni Ijesu ọ la, ọ bhale a ngme khi a kaa nwu ọ.

¹Ogbẹlẹ ozesesa khi oni uliemhi idọsẹalẹ o chi bhẹẹ, Ijesu ọ bhẹ vhi Ibetani, ẹvholi Ilazarọsi ni Ijesu ọ nwu te egwhi vule. ²Aa nye emenale nali vhi ayọ, Imata ọọ kemhi, Ilazarọsi ọ li la ayọ nu Ijesu le emenale. ³Imeli ọọ tsua akanama itulale ni o ghalẹ, ghalẹ, ọ kwu ọli shi Ijesu awẹ, ọ rhi itsu ọli shishi ọli wẹwẹa; iKphela oni itulale o ga oni apfẹ kwu.⁴Ijudasi Isikaroti, ukwhumhogwho elemhi eni idibo ọli, ni ọ lẹẹ rhi Ijesu dẹẹ ọọ li, ⁵“Elọ e zẹ khi a vha rhi oni itulale ona dẹẹ ipọmhi uye ali igbe khi a rhọ kemhi ni enanya?” ⁶A khi rhẹmhi ọ ngme ona rharhi khi ọ maa pfi ẹgbue shi enanya vhi egbe, ama rharhi khi ọghyiatọ li ọ kyia: rharhi khi li ọ tsua ikpaghọ ẹẹ mhuẹ rhẹmhi ọ khi lẹ kẹ mẹ ikpaghọ do rhue.⁷Ijẹsu ọọ li, “Vha chi ọ vhi egbe lẹ khi ọ rhi emeni ọ mhuẹ shi na mhẹ shi ogbẹlẹ irhọtọ mhẹ. ⁸Ẹrhẹghẹ kwu vha rha mhuẹ enanya shi iteteva vhẹ; ama khi imha la iteteva vhẹ ẹrhẹghẹ kwu.”⁹Abhi eni iọgbọ Ijusi e ke rhọ yẹsẹ khi Ijesu ọ la ayọ, e bhẹ, ama a khi rharhi Ijesu li e te bhẹ, ama ni ẹẹ khi wẹwẹ e li mẹ Ilazarọsi, ni Ijesu ọ te egwhi nwu vule. ¹⁰Eni e kpeda ugamhi ee gba ugbamhi Ilazarọsi abhi wẹwẹ e li nwu ọ gbea; ¹¹Rharhi khi Ilazarọsi li ọ zẹ ni ebubu iọgbọ e te lama shi Ijesu vhọ.¹²Ogbẹlẹ ozeva iọgbọ nebu e bhẹ vhi oni uliemhi. Abhi e ke rhọ suọ khi Ijesu ọ bhẹ vhi Ijerusalẹmu, ¹³ee chino evyiamhi iji ea mugha otuodẹ khẹ ọ e kwuno inua ẹẹ sọse, “Hosana! Ivhọsẹna lẹ khi uwi ọgbọ ni ọ te obọ Ọnọmhọli bhale, ni ọ kyili oghyie Izulẹ.¹⁴Ijesu ọọ mẹ alakhumhi ọ shitọ vhọ; abhi o li la akẹkẹshekẹ, ¹⁵“Imhẹ vha nu ulishi, vhẹvhẹ imyi ikpotso Izayọni; Vha ghee, oghyie vhẹ ọ she a bhale, ọ shitọ ukhomhi alakhumhi.¹⁶Idibo ọli e vha kpọ te ekẹ yẹsẹ eni ngme ena kwu; ama abhi a ke rhọ rhi ikiki na Ijesu, li e ke rhọ sato khi eni ingme ena kwu kha she kpọ kẹkẹ wẹ shi ekẹ abagwhoyọ a she kpọ khyiẹ wẹ nali.¹⁷Iọgbọ ebubu ni e la asha ni Ijesu ọ la nwu Ilazarọsi te uji vule, wẹwẹ li e ke myie ọtsẹ khasẹ eni e vha la ayọ. ¹⁸Ona li o rhi agbọ ebubu lasele rharhi khi ee suọ ọnyaloa ni ọ gbe. ¹⁹Eni Ifarisisi e ke nu egbe wẹ ẹẹ ngme, eẹ li, “Ghee, vhaa mhuẹ emeni vha laa li vhọ; ghee agbọ kwu e she tutu rha khali ọ.”²⁰Nena iọgbọ Igiriki e la eni e shele lẹẹ ga ugamhi vhi oni aliukpe. ²²E bhẹ bhuli Ifilipu le, ni ọ kyili ọnyi Ibẹshẹda ni o la elemhi Igalili, ee mhila ọli ẹẹ li, “Ọga, eyẹ a nono khi eyẹ mẹ Ijesu.” ²¹“Ifilipu ọ ke a gwu ni Adulo; Adulo ali Ifilpu li e ke gaa gwu ni Ijesu.²³Ijesu ọ ke sọ wẹ vhọ ọọ li, “Ẹrhẹghẹ na rhọ rhi ikiki a ni ọni Omyi Ọmọse li a la ena. ²⁴Egbegbingme lẹ mhi gwu khasẹ vhẹ, sẹkẹnẹ khi ukpamhi avhakpa ni a kọ rhẹmhi o kpọ gwhua, ina a khi iyọ, ogwho li o lele a kyia, ama o kha gwhua, li o rhọ chigbe a nyanọ ekhẹ onaghyie o ke bububu.²⁵Ọni ọ nwu agbọ ọli jijiji rhẹmhi ọa waa ọlia; ama ọni ọ pfi agbọ ọli aboa ọ laa mhọli agbọ ni ẹlẹnagbọagbọ. ²⁶Ọni ọa ga mhẹ, ọ rhọ khẹ mhẹ; asha na mhi la, ayọ li ọni ọgamhẹ ọ lia la abagwhoyọ, ọni ọa ga mhẹ, ọni Ita ọ la laa rhi eghọghọ nali.²⁷Ayẹmhẹ ọa kpokpo mhẹ nena: See mhi ke a ngme nena? Rhẹmhi ke mẹẹ li ẹẹ li, ‘Ita, tsumhi mhẹ oni ẹrhẹghẹ ona? Ni o kyia khi li o rhẹ bhẹ oni ẹrhẹghẹ ona? ²⁸Ita, rhi ikiki ni eva ẹ.” Uruli oo ke te aleghyie ngme, “Mhi she kpọ rhi ikiki nali mhi gwe rhi kikik a nali.” ²⁹Ebubu iọgbọ ni e mugha ayọ ni e sokwu ọ eẹ li akphala li o va ena. Eni e kpọẹ eẹ li, Aghyiukọ li ọ nu ọli a ngme ena.”³⁰Ijesu ọọ li, “A khi rharhi mhẹmhẹ li oni urhuli o te ngme, ama rharhi vhẹvhẹ. ³¹Ẹrhẹghẹ igwẹzọ oni abgọna khi ona: Nenaa li a rhọ laa kwhu ọni omyi oghyie pfia.³²Mhẹmhẹ obọ mhẹ, a kha yasẹ mhẹ vhi ekẹ, mhi laa chi agbọ kwu mama egbe.” ³³Rhẹmhi ọ ngme ona shi uvhali egwhi ni ọ lẹẹ gwhu.³⁴Eni iọgbọ ee sọ vhọ eẹ li, “Eyẹ suọ khi ushi o ngme khi Ikiristi ọọ la la vhọ ẹlẹnagbọagbọ. See vha sọ shiọ, ‘Khi a nwemaa yasẹ Omyi Ọmọse ekẹ’? Ọgwho khi ọni Omyi Ọmọse ọna?” ³⁵Ijesu ọọ wẹ, “Ukwukwu ẹrhẹghẹ li oni ufulọ o la nu vhẹ la. Vha kee kyia elemhi ufulọ abhi ọli nu vhẹ la ena, khi ubi o ke pfi gwese vhẹ. ọni ọa kyia alo ebe ọ vha yẹsẹ obhoni oa je. ³⁶Abhi vha ke rhọ mhọli ufulọ, vha lama shi oni ufulọ vhọ, khi vha kẹ kyili omyi ufulọ.” Ijesu ọ ke ngme ena pfuse ọ chi ayọ le ọa na gbhagbha na wẹ.³⁷Ama Ijesu ọ gbe ikanya inyaloa ukpẹloe wẹ. E vha khyie lama shi ọ vhọ. ³⁸Khi ingmemhi ni ọbolẹ Izaya ọ ngme o kẹ tsẹ, ni ọ rhọ ẹẹ li; “Ọnọmhọli, ọgwho ọ laa lama shi usomhi ni eyẹ tsua? Ọgwho a laa rhi oni ogbhagbha Ishinẹgba khasẹ?³⁹Rharhi ona li e vha rhọ dobẹ lama shi ọ, Azaya ọ ke gwe ngme, ⁴⁰“Ọ she zuse wẹ alo ọ gwe womhẹ wẹ idua; Ina a khi iyọ lọ, e kha rhi alo wẹ ẹẹ mato e rhi idu wẹ mẹ ọli mẹ, e nwu lieliẹ, mhi rhẹ wẹ ze.⁴¹Azaya ọọ ngme eni ingme ena kwu rharhi khi ọọ mẹ ikiki Ijesu li ọ rhẹ ngme ingme ọ. ⁴²Ama ni a rhẹ lia ngme ena, ebubu eni e kpeda ee lama shi Ijesu vhọ; ama rharhi ulishi Ifarisisi li e vha te jilẹ rhi egbe wẹ lasele khi a ke kwhu wẹwẹ vhi owuka a lase. ⁴³Eghọghọ agbọ li e nono dala eghọghọ ni o te obọ Ishinẹgba bhẹ.⁴⁴Ijesu ọọ sọse gbaa ọọ li, “Ọnọni ọ laa lama shi mẹ vhọ, a khi mhẹmhẹ ọgwho li ọ lama shi vhọ ama li shi ọni ọ ghyie mhẹ, ⁴⁵Ọni ọ sheda mẹ mhẹ ọ she mẹ ọni ọ ghyie mhẹ.⁴⁶Rhẹmhi bhẹ abhi ufulọ vhi oni agbona khi ọnọni ọ laa lama shi mhẹ vhọ, ọ vha gwe laa la ebili. ⁴⁷Ọgbọ kha suọ ingmemhi mhẹ khi ọ vha rhọ gbe, imha gwu ọli ezọ; mhi she bhẹ, a khi rhẹmhi bhale a gwu ọni agbọna ẹzọ, ama mhi rhọ tsumhi wẹ.⁴⁸Ọni ọ kyhie mhẹ ni ọ vha rhi ingmemhi mhẹ gbe akanya ọ laa mhọli ọni ọ laa gwu ọli ẹzọ: Oni ingmemhi na mhi a ngme li o laa gwu ọli ẹzọ ogbẹlẹ ikposhimhi. ⁴⁹A khi ingmemhi egbe mhẹ mhia ngme, ama, ingmemhi Ita mhẹ ni ọ ghyie mhẹ, ni ọ shi ushi na mhẹ, emena mhii kee ngme, ali enena mhi laa ngme. ⁵⁰Mhi yẹsẹ khi ushi ọli ni ọ shi lẹ khi inyele ẹlẹnagbọagbọ; Ishọyọ ingmemhi na mhi ngme, abhi ọni Ita ọ le li ghyie mhẹ, iyọ mhi li gwu a khasẹ vhẹ.

¹Neni a khyiẹlẹ aliukpe idọsẹalẹ, rharhi Ijesu ọ she yẹsẹ khi lẹ she lẹẹ vu oni agbona le bhuli ọni Ita, rharhi khi ọọ mhọli ighọli iyọ ọli ni e la ukhomhi ekagbọ, ọọ mhọli ighọli wẹ apfishi ukpẹsẹ. ²Okhyio ọ she kpọ le rhọ shi Ijudasi Iskarọti ni omyi Isamọni udu khi ọ rhi Ijesu dẹẹ.³Ijesu ọọ yẹsẹ khi ọni Ita ọ she rhi ẹtsẹkẹ kwu shi lẹ vhi obọ, khi obọ Ishinẹgba ni lẹ te bhẹ lẹ lẹẹ gwe a jee. ⁴Ọọ Te ukhomhi emenale vule ọ rhọ gweghyie awulu ni o kpeda. Ọ te egbe ọli gbe itawe kpẹkpẹ ọ rhọ pfi nya ike. ⁵Ọ jẹ amẹ shi atasa ni o vhẹ alo, ọ rhẹẹ kpe idibo ọli awẹa, ọ rhi oni itawe ni ọ pfi nya ike shishi wẹ awẹa.⁶Ọ ke rhamhi Isamọni Ipitẹ egbe, Ipitẹ ọọ li, “Ọnọmhọli, rhẹmhi u li laa kpe mhẹ awẹa ena? ⁷Ijesu ọọ li, “Emena mhia khyiẹlẹ ena o vha ga ẹẹ vhi ẹloe nee, ama idegbe li o rhọ laa ga ẹẹ vhi eloe.” ⁸ Ipitẹ ọọ li, ‘’U waa kpe mhẹ eni awẹ ena.” Ijesu ọọ li, “U waa sheda dobẹ mhẹ kpe ẹ awẹa, u waa mhọli ẹgboe shi mhẹ egbe.” ⁹Isamọni Ipitẹ ọọ li, “Ọnọmhọli, imhẹ kpe mhẹ awẹa lọgwho, li shi abọ mhẹ ali ukhomhi mhẹ..”¹⁰Ijesu ọọ li, “ọni ọ she kpọ kwhẹa nee ọ vha gwe a kwhẹ ikwhẹmhi ovhese awẹ lọgwho li ọ ke a kpea, rharhi ọ she kpọ le le pfuasẹ; vha pfuase, ama a khi vhẹvhẹ kwu.” ¹¹Rahrhi Ijesu ọ she yẹsẹ ọni ọ lẹẹ rhọ dẹẹ; li o zẹ ni ọ rhọ ẹẹ li, “A khi vhẹvhẹ kwu vha pfuasẹ.”¹²Abhi ọ ke rhọ kpe wẹ awẹa pfuse, ọ wolọ iwulu sọnọ ọ gwe a de shitọ, ọọ wẹ, “Vha yẹsẹ emena mhi khyiẹlẹ na vhẹ eyọ? ¹³Vhaa luu mhẹ ‘Ọwẹnagbọ’ ali ‘Ọnọmhọli’, vha gwabha ngme, ọna mhi kyia khi ọyọ. ¹⁴Mhi kha kyili Ọnọmhọli ali Ọwẹnagbọ, khi mhi kpe vhẹ awẹa, vha liyọ kpe egbe awẹa. ¹⁵Rhẹmhi rhi irhọkhasẹ khasẹ vhẹ khi vha kee liyọ ẹẹ khyiẹlẹ rhọ khali egbe abhi mhi li khyiẹ rhọ khẹ vhẹ ena.¹⁶Egbegbingme, mhi gwu khase vhẹ ọgamhẹ ọ vha fu dala ọga ọli; wẹ khi ọni a ghyie li ọ ke fu dala ọni ọ ghyie ọli usomhi. ¹⁷U kha yẹsẹ eni ngme ena, ivọsẹna khi uwẹ ni u rhi ẹẹ wẹ gbe akanya. ¹⁸A khi vhẹvhẹ kwu mhi ngme, rharhi khi mhi yẹsẹ ena mhi zẹ, ama rhẹmhi gwu ena khasẹ vhẹ khi akẹkẹshekẹ o kẹ tsẹ: ‘Ọni ọ nu mhẹ le emenale li ọ ke gwe pfi idebe kwhu mhẹ.¹⁹Rhẹmhi gwu ona khasẹ vhẹ nena khi ishọyọ a kha ke mẹ wẹ vha laa lama shiọ khi mhẹmhẹ lọ. ²⁰Egbegbingme mhi gwu a khasẹ vhẹ, ọni ọ myie mhẹ ọna mhi ghyie li ọ myie, abagwhoyọ, ọni ọ myie mhẹ ọni ọ ghyie mhẹ li ọ myie.²¹Ẹrhẹghẹ ni Ijesu ọ ke rhẹẹ ngme ona, udu o she kpokpo ọli, li ọ rhọ ẹẹ li, “Ingmaghyie, ingmaghyie, mhi gwu khasẹ vhẹ khi ukwhumhọgwho elemhi vhẹ li ọ laa rhẹ mhẹ dẹẹ.” ²²Eni idibo ọli e pfi alo a bino egbe, o sha wẹ abọ ọni ọ nu ngme.²³Odibo Ijesu ọgwho ọ la ni ọ nwemaa ẹẹ gheghe Ijesu egbe, ọni Ijesu ọ nwemaa li nono ingme ọ. ²⁴Isamọni Ipitẹ ọọ li ọni odiboi ọli ọyọ ni ọ nwuema chi mamali khi ọ mhilali, “Ọgwho u mẹẹ khi ọ kyia?” ²⁵Ọni odibo ọli ọyọ ọ gwe lieliẹ egbe a gheghe Ijesu egbe ọọ li, “Ọnọmhọli, ọgwho ọ kyia?”²⁶Ijesu ọọ li, “Ọna mhi sheda laa rhi ukphakpha sọmhi na eyọ lẹ lọ.” Abhi ọ ke rhọ rhọ sọmhi, ọ rhi ọli ni Ijudasi omyi Isamọni Isikarọti. ²⁷Ọ lee rhi oni ukphakpha naa pfuse, okhyio ọ le lo ọ vhi egbe. Ijesu ọ ke ẹẹ li, ememeni u laa khyiẹ, khyiẹlẹ ọli vui”²⁸Abhi e gaa li le emanale eyọ a vha mẹ ọni ọ yẹsẹ emeni e zẹ khi ọ ngme ọli yọ. ²⁹Egwho e khọkhọ khi ina khi Ijudasi ọọ tsua ikpaghọ mhuẹ li ọ te ngme ọli yọ, khi rhẹmhi Ijesu ọọ li, “Kaa dẹnọ emeni eyẹ rhọ laa li oni ukpe,” ọa liyọ khi ọ rhi ẹtsẹkẹ ni ẹnanya. ³⁰Ijudasi ọ le myie oni ukphakpha, ayayayọ ọ le li vui ọ vu je elase: oni ẹrhẹghẹ ubi o shee bi.³¹Abhi Ijdasi ọ ke rhọ vu, Ijesu ọọ li, “Nena a she rhi ikiki ni Omyi Ọmọse, Ishinẹgba ọ she la vhi egbe a mholi ikiki. ³²Ishinẹgba ọ laa te egbe ọli mhọli eghọghọ abagwhoyọ ọ laa rhi ikiki nali nena. ³³Ikwukwu ivhiẹ, mhi khyie nu vhẹ la elemhi ukwukwu ẹrhẹghẹ. Vha laa ke nono mhẹ, abhi mhi kpọ ngme eni Ijusi, na mhi rhọ ẹẹ wẹ, ‘Obhona mhia je, vhavha la dobẹ yẹsẹ,’ lẹ mhi gwe li gwu khasẹ vhẹ ena.³⁴Mhi rhi ushi ogbọ a na vhẹ, khi vha mholi ighọli egbe, abhi mhi li mhọli ighọli vhẹ eyọ, vha nwemaa liyọ li a mhọli ighọli egbe vhẹ. ³⁵Ena li e laa rhi iọgbọ yẹsẹ khi mhẹnhẹ vha rha khẹ, ni vha sheda nono ingme egbe vhẹ.³⁶Isamọni Ipitẹ ọọ li, “Ọnọmhọli, obho waa lẹẹ?” Ijesu ọọ li, “Obho na mhia je, vhavha la dobẹ rhọ khẹ mhẹ nena, ama idegbe vha rhọ laa rhọ khẹ mhẹ.” ³⁷Ipitẹ ọọ li, “Ọnọmhọli, elọ e zẹ khi eyẹ vha laa dobẹ rhọ khali ẹ nena? Mhi rhi agbọ mhẹ shi ekẹ a nẹẹ.” ³⁸Ijesu ọọ li, “Wẹ khi u rhi agbọ ẹ shi ekẹ a na mhẹ? Egbegbingme mhi gwu khasẹ vhẹ, neni ọkpa ọ vyiẹ u laa khyie mhẹ itesẹ.”

¹“Imhẹ vha dobẹ idu kpokpo vhẹ. lama shi Ishinẹgba vhọ; u gwe li lama shi mhẹ vhọ abagwhoyọ. ²Apfẹ Ita mhẹ ewa e gbili vhọ; o vha kyia yọ lọ, mhi kha gwu khasẹ vhẹ, khi mhi laa nwunegbe shi ekẹ shi na vhẹ. ³Mhi kha nwunegbe shi ekẹ shi na vhẹ pfuse, mhi gwe a liegbe bhẹ laa wolọ vhẹ je obhona mhi la, asha na mhi a je ayọ vha li la nu mhẹ la.⁴Vhavha yẹsẹ obhona mhia je.” ⁵Itọmọsi ọọ li Ijesu, “Ọnọmhọli, eyẹ vha yẹsẹ obhoni u waa je; see eyẹ li la yẹsẹ oni o dẹ?” ⁶Ijesu ọọ li, “Mhẹmhẹ khi oni ode, oni ingmaghyie ali oni agbọ; a vha mẹ ọni ọ laa dobẹ bhuli ọni Ita mhẹ le sẹkẹnẹ rhọ te ikpa mhẹ. ⁷O kha kyia khi vha yẹsẹ mhẹ lọ, vha kha li yẹsẹ ọni Ita mhẹ abagwhoyọ; Te nena vu vha she ke yẹsẹ ọli vha mẹ ọli.”⁸Ifilipu ọọ li Ijesu, “Ọnọmhọli, rhi ọni Ita khasẹ eyẹ, oyọ lọgwho o somhi eyẹ,” ⁹Ijesu ọọ li, “Imha khyie nu vhẹ la tẹsẹ, ni vhavha rhọ khyie yẹsẹ mhẹ, Ifilipu?¹⁰Vhavha li lama shi ọ khi mhi la elemhi Ita mhẹ, Ita mhẹ ọ la elemhi mhẹ? Ingme na mhi gwu a khasẹ vhẹ e vha kyili ingmemhi obọ mhẹ: ọni Ita ni ọ nyele elemhi mhẹ li ọa gbe eni ikanya. ¹¹Vha lama shi mhẹ vhọ, khi mhi la elemhi ọni Ita, ọni Ita ọ la elemhi mhẹ; ọa liyọ, u te rharhi ikanya na mhia gbe lama shi ọ.¹²Egbebgingme mhi gwu khasẹ vhẹ, khi ọni ọ myie mhẹ suọ, ikanya na mhi gbe, ọ li laa gbe wẹ abhagwhoyọ; ọ la laa gbe eni e dala ayọ rharhi khi mhia bhuli ọni Ita. ¹³Emeneni u laa rhi eva mhẹ mhila, mhi laa khyiẹlẹ ọli khi ọni Ita ọ kẹ te ikpa ọni Ọmọ mholi ikiki. ¹⁴U kha mhila ẹtsẹkẹ elemhi eva mhẹ, mhi laa khyiẹlẹ ọ nẹẹ.¹⁵U kha mholi ighọli mhẹ. rhi ishi mhẹ gwhẹ. ¹⁶Mhi laa lema ọni Ita, ọọ la laa rhi ọzezudu ọvhese ghyi vhẹ khi ọ nu vhẹ la ẹlẹnagbọagbọ. ¹⁷Oni Ayẹmhẹ ingmaghyie, Agbọ e vha laa dobẹ myie ọli nena rharhi khi e vha mẹ ọ gwẹ wẹ khi rhẹmhi e yẹsẹ ọ. Ama khi vhẹvhẹ vha yẹsẹ ọ, rharhi khi ọ nu vhẹ la ọ gwe la elemhi vhẹ.¹⁸Imha laa dobẹ vhẹvhẹ ọgwho; mhi gwe laa leiliẹ egbe bhuli vhẹ le, ¹⁹O kha li zẹlẹ nena, agbọ e vha gwe laa mẹ mhẹ. Rharhi khi mhi nyele, vha li laa nyele abagwhoyọ. ²⁰Oni ogbẹlẹ vha rhọ laa yẹsẹ khi mhi la elemhi ọni Ita, khl vhẹvhẹ vha la elemhi mhẹ, khi mhẹmhẹ mhi la elemhi vhẹ.²¹Ọnọni ọ laa sokwu ingmemhi mhẹ ọ rhẹ wẹ gbe akanya, li ọ somhi elemhi mhẹ; ọni ọ mholi ighọli mhẹ Ita mhẹ ọ laa mholi ighọli ọli shi vhọ, mhi li laa mhọli ighọli ọli mhi rhi egbe mhẹ khasẹ ọ. ²²Ijudasi, a ke khi uwi (Iscarọti) ọọ li Ijesu, “Ọnọmhọli, elọ e zẹ khi u laa rhi egbe ẹ khasẹ eyẹ u waa ke li rhi egbe ẹ lia khasẹ agbọ?”²³Ijesu ọọ li, “Ọni ọ mhuẹ ighọli mhẹ, ọ rhi ingmemhi gbe akanya. Ita mhẹ ọ laa mhọli ighọli ọli, eyẹ la laa bhuli ọli le eyẹ nyele ọ vhi egbe. ²⁴Ọni ọa bishi elemhi mhẹ, li ọ vha rhi ingmemhi mhẹ a gbe akanya. Ingmemhi na mhi gwu a khasẹ vhẹ ena, e vha kyili iyẹ mhẹ, ama ingmemhi ọni Ita ni ọ ghyie mhẹ lọ.²⁵Mhi gwu eni ingme ena kwu a khasẹ vhẹ, abhi mhi khyie li nu vhẹ la ena. ²⁶Ama, ọni ọzezudu, ni ọ kyili Ayẹmhẹ ni o pfuasẹ, ni ọni Ita ọ laa rhi eva mhẹ ghyie, ọ la laa wẹna vhẹ ẹtsẹkẹ kwu ọ gwe laa yele vhẹ emena mhi gaa ngme khasẹ vhẹ kwu. ²⁷Ọpfọmhẹ na mhi rhọ shi ekẹ na vhẹ; mhi rhi ọpfọmhẹ mhẹ na vhẹ. O vha liabhi oni agbọ apfuẹ e rha ni iọgbọ. Imhẹ vha dobẹ idu kpokpo vhẹ, wẹ khi ulisi li o nwu vhẹ.²⁸Vha she suọ abhi mhi ngme vhẹ, ‘Mhia vu, mhi gwe liegbe a bhẹ bhuli vhẹ le.’ vha kha mhọli ighọli mhẹ, rhemhi egbe khẹ nwu vhẹ rharhi khi mhia bhuli ọni Ita, rharhi khi ọni Ita li ọ fu da mhẹ. ²⁹Mhi she kpọ gwu khasẹ vhẹ shi ekẹ neni a mẹ wẹ, ishọyọ a kha ke mẹ wẹ vha ke lama shi ọ khi mhi kpọ ngme yọ.³⁰Imha gwe laa ngme dala ana, rharhi khi omyi oghyie oni agbona ọa bhẹ. Ọ vha mhuẹ izemhi ọbodẹ mhẹ, ³¹Ama khi agbọ e rhọ yẹsẹ khi mhi mhọli ighọli ọni Ita, abhi ọni Ita ọ li ghyie mhẹ mhi lia khyiẹ. Vha vue, khi eyẹ vu ana le.

¹Mhẹmhẹ khi egbegbe ukporhẹ, Ita mhẹ li ọ rhẹ wẹ a fu. ²Ugwhobọ kwu ni o vha mọ ikpamhi rhẹmhi ọ nya ọli a pfia, ugwhobọ ni ọa mọ ikpamhi rhẹmhi a sanọ ọlia khi o kẹ kee mọ ikpamhi nebu.³Vha she le pfuasẹ nee rharhi ingmemhi na mhi gwu a khasẹ vhẹ. ⁴Toma mhẹ vhi egbe, mhẹmhẹ mhi toma ẹ vhi egbe. Abhi ugwhobọ orhẹ o vha li dobẹ te egbe ọli a mọ ikpamhi sẹkẹnẹ khi rhẹmhi o toma orhẹ, iyọ vhavha li dobẹ a mọ ikpamhi ina khi rhẹmhi vha toma mhẹ vhọ.⁵Mhẹmhẹ khi oni ukporhẹ, vhẹvhẹ khi eni igwuabọ oni orhẹ. Ọni ọ toma mhẹ vhọ, na mhi toma vhọ, ọgbọ ọyọyọ li ọ laa mọ ikpamhi nebu, rharhi ina khi mhẹmhẹ a vha mẹ emeni ea pfo vhẹ. ⁶Ọni ọ vha toma mhẹ vhọ, rhẹmhi a nya ọli a pfia o khakhaa; agbọ e no ọli kpẹ e rhọ pfie erhẹ, e to kwa. ⁷Vha kha toma mhẹ vhọ, khi ingmemhi mhẹ e nu vhẹ la, vha mhila ememeni e ghọli vhẹ, a la laa khyiẹlẹ ọli na vhẹ.⁸Ona li o rhi ikiki a ni Ita mhẹ, khi vha rhọ kee mọ ikpamhi nebu, iyọ vhaa rhọ khasẹ khi idibo mhẹ vha kyila. ⁹Abhi Ita mhẹ ọ li mhọli ighọli mhẹ, iyọ mhi li mhọli ighọli vhẹ; vha khyie liyọ gẹ nwu ighọli mhẹ.¹⁰U kha rhi ishi mhẹ gbe akanya, ighọli mhẹ o la nu ẹ la abhi mhi li rhi ishi Ita mhẹ gbe ni ighọli ọli o li nu mhẹ la. ¹¹Irẹmhi gwu eni ingmemhi ena khasẹ vhẹ khi oghẹlẹ mhẹ o kẹ nu vhẹ la ishọyọ oghẹlẹ vhẹ o kẹ vọ.¹²Ushi na mhi shi na vhẹ khi ona, khi vha mhọli ighọli egbe abhi mhi li mhọli ighọli vhẹ. ¹³A vha mẹ ighọli ni o dala ana, khi ọgbọ ọ rhọ rhi agbọ ọli shi ekẹ ni ikpokyia ọli.¹⁴Vha kha khyiẹlẹ emena mhi ẹ vha khyiẹlẹ li vha rhọ kyili ikpokyia mhẹ. ¹⁵Imha gwe a lu vhẹ egamhẹ, rharhi khi ọgamhẹ ọ vha yẹsẹ emeni ọga ọli ọa khyiẹlẹ. Mhi she lu vhẹ ikpokyia, rharhi emena mhi te obọ Ita mhẹ suọ kwu mhi she rhẹ wẹ khasẹ vhẹ.¹⁶A khi vhẹvhẹ vha zẹ mhẹ, ama mhẹmhẹ mhi zẹ vhẹ mhi zẹ vhẹ khi vha ke lẹẹ mọ ikpamhi, eni ikpamhi e vha dena kwa. Ishọyọ khi emeni vha ke la mhila ọni Ita elemhi eva mhẹ ọ laa khyiẹlẹ wẹ na vhẹ. ¹⁷Rhẹmhi gwu ena kwu khasẹ vhẹ, khi vha kẹ mhọli ighọli egbe.¹⁸Agbọ e khaa bishi elemhi vhẹ, yẹsẹ khi a she kpọ bishi elemhi mhẹ. ¹⁹Vha kha kyili uwi agbọ lọ, rhẹmhi agbọ e kha ẹẹ somhi elemhi vhẹ abhi uwẹ wẹ; ama rharhi khi vhavha kyili uwi agbọ khi mhi gwe zẹ vhẹ te iteteva agbọ lasele, ona li o rhi agbọ a bishi elemhi vhẹ.²⁰Vha sato ingmemhi na mhi gwu khasẹ vhẹ, ‘khi ọgamhẹ ọ vha fu a dala ọga ọli.’ O kha kyia khi e zẹ okwhẹ kpẹsẹ mhẹ, e nwemaa li la zẹ okwhẹ kpẹsẹ vhẹ; O kha kyia khi e rhi ingmemhi mhẹ gbe akanya lọ, e kha li rhi iyẹ vhẹ gbe. ²¹Ee gaa khyiẹlẹ vhẹ ingme enana rharhi eva mhẹ rharhi khi e vha yẹsẹ ọni ọ ghyie mhẹ. ²²Imha bhale a lina nu wẹ ngme lọ, e vha kha yẹsẹ ingmobe, ama nenena e vha ke gwe mẹ ọni ọ la li ẹẹ khi lia suọ emeni a ngme.²³Ọni ọ bishi elemhi mhẹ, rhẹmhi ọ li bishi elemhi Ita mhẹ. ²⁴Imha liyọ gbe eni ikanya ni ọgbọ ọvhese ọ vha dobẹ gbe vhi iteteva wẹ lọ, e vha kha yẹsẹ ingmobe; ama nenaa e she ke mhẹ emena mhi khyiẹ ea bishi elemhi mhẹ ali Ita mhẹ. ²⁵Rhẹmhi a mẹ ena khi emeni a kẹkẹ shi ekẹ e kẹ tsẹ; Imha mhuẹ emena mhi li ni e bishi elemhi mhẹ a shi.’²⁶Ọni ọzezudu ọ kha bhale, na mhi laa te obọ Ita mhẹ rhọ ghyi vhẹ, lẹ khi Ayẹmhẹ ingmaghyie, ni ọ te obọ ọni Ita bhale, ọ la laa myie ọtsẹ na mhẹ. ²⁷Vhẹvhẹ obọ vhẹ vha lia myie ọtsẹ na mhẹ rharhi ituekẹle vha te nu mhẹ la.

¹Mhi gwu eni ingmemhi ena khasẹ vhẹ khi vhaa kee tsutsu. ²Ee la te ewuka tono vhẹ abọ la lase; ingmaghyie, ẹrhẹghẹ ọa bhẹ ni eni ea gbolo vhẹa ea kee khọkhọ khi egbegbe akanya aghyie wẹwẹ ea gbe a ni Ishinẹgba.³Ee laa kee khyiẹlẹ ẹtsẹkẹ enana rharhi khi e vha yẹsẹ ọni Ita wẹ, wẹ khi mhẹmhẹ. ⁴Rhẹmhi gwu eni ngme na khasẹ vhẹ, khi oni ẹrhẹghẹ o kha ke rhamhi khi aa mẹ wẹ, vha laa kee sato vhọ abhi mhi li gwu wẹ khasẹ vhẹ. Imha kpọ te ekẹ ngme ena khasẹ vhẹ rharhi khi mhi khyie kpọ nu vhẹ la.⁵Nenena, mhi she laa vu bhuli ọni ọ ghyie mhẹ, ama khi a vha mẹ ọni ọ mhila mhẹ ogbọ, “Obho waa lẹẹ?” ⁶Rharhi mhi ngme vhẹ yọ, o she rhi oya lo vhẹ. ⁷Ama, ingmaghyie mhi gwu khasẹ vhẹ: mhi kha vu, li o somhi vhẹ nẹẹ; rharhi khi imha vuu, ọni ọzezudu ọ vha laa bhẹ bhuli vhẹ le; ama mhi kha vu, mhi laa ghyie ọli bhẹ bhuli vhẹ le.⁸Ọ kha bhẹ, ọni ọzezedu ọ laa rhi ingmobe ga agbọ eloe, obodẹ igwabhagbe, ali igwẹzọ. ⁹Ee laa yẹsẹ ingmobe, rharhi khi e vha lama shi mhẹ vhọ; ¹⁰Obodẹ igwabhagbe, rharhi mhia bhuli ọni Ita, ni vhavha rhọ gwe laa mẹ mhẹ. ¹¹Obodẹ igwẹzọ, rharhi khi omyi oghyie oni agbona a she gwu ọli ẹzọ.¹²Mhi mhọli emeni ebu na mhi kha gwu khasẹ vhẹ nena, ama khi e vha laa ga vhẹ ẹloe nena. ¹³Ama, ọ ni Ayẹmhẹ ingmaghyie ọ kha bhẹ; ọ la laa rhi ẹloe kwhu vhẹ rhọ te odẹ ingmaghyie; rharhi ọ vha laa ngme ingme obọ ọli; ama emeni ọ laa te unu mhẹ suọ, li ọ laa ke ngme; ọ la laa gwu khasẹ vhẹ emeni a la mẹ vhi odalo. ¹⁴Ọ la rhi ikiki na mhẹ, rharhi emeni ọ te obọ mhẹ mẹ li ọ laa gwu kee khasẹ vhẹ.¹⁵Ememeni Ita mhẹ Ọ mhuẹ kwu iyẹmhẹ lọ; iyọ, emena mhi rhọ ẹẹ khi ọni Ayẹmhẹ ọ laa te obọ mhẹ rhue ọ gweghyiea khasẹ vhẹ. ¹⁶O kha li zẹlẹ nena, vhavha gwe laa mẹ mhẹ, o kha ke gwe li zẹlẹ vhaa gwe laa mẹ mhẹ.¹⁷Idibo ọli egwho e ke mhila egbe wẹ ogbọ, “See ọ ngme eyẹ ena?” “O kha li zẹlẹ vhavha gwe laa mẹ mhẹ, ọ gwe ẹẹ li, o kha ke gwe li zẹlẹ vhaa gwe laa mẹ mhẹ,’ rharhi khi mhia bhuli oni Ita?” ¹⁸E ke gwe mhila egbe wẹ, “See ọ mẹẹ rhi ona ngme ena, ‘O kha li zẹlẹ’? eyẹ vha yẹsẹ abhi ọ rhi ọli ngme.”¹⁹Abhi Ijesu ọ ke rhọ mẹ khi oni ngme oa kpokpo wẹ idu, ọọ wẹ, “Ona vha ke a mhila egbe vhẹ, ‘khi mhi ẹẹ khi, ‘O kha li zẹlẹ vhavha gwe laa mẹ mhẹ, o kha ke gwe li zẹlẹ vha gwe laa mẹ mhẹ’? ²⁰Egbegbingme mhi gwu khasẹ vhẹ, vha laa kee vyiẹ vha la ọrhọ, ama agbọ ea ke ghẹlẹ; vha laa la ọrhọ ama khi oni ọrhọ vhẹ o la mela oghẹlẹa. ²¹Okwhu o kha to ọkpotso ni ọ laa vyia, rhẹmhi ọa la ọrhọ; ama ọ kha ke vyia ọni ọmọ, rhẹmhi ọ ke a ghẹlẹ ọ vha gwe sato echọ ni ọ mẹ rharhi khi ọ she vyia ọmọ bhẹ vhi agbọ.²²Iyọ vha li laa la ọrhọ ena, ama eyẹẹ gwe laa mẹ egbe; idu vhẹ o laa vọ oghẹlẹ, a vha ke gwe mẹ ọgbọ ni ọ laa myie vhẹ oni oghẹlẹ. ²³Oni ogbẹlẹ vhaa gwe laa mhila mhẹ ogbọ. Egbegbingme, mhi gwu khasẹ vhẹ, ememeni vha laa mhila oni Ita, ọ la rhọ na vhẹ elemhi eva mhẹ. ²⁴O kha rhẹ kyia khi vhaVhaa khyie kpọ rhi eva mhẹ mhila ẹtsẹkẹ; vha mhila, vha laa mhọli ọli ishi ọyọ oghẹlẹ vhẹ o kẹ vọ pfuse.²⁵Ekpita mhi rhọ gwu ingme a khasẹ vhẹ agbọagbọ, ama ẹrhẹghẹ ọa bhẹ ni imha rhọ gwe laa rhi ekpita gwu ingme ke khasẹ vhẹ onochi rhẹmhi ke a maghyiẹ ọlia kee khasẹ vhẹ abhi ọni Ita ọ li la.²⁶Ẹrhẹghẹ ni a ngme na vha laa rhi eva mhẹ mhila, imha ke gwe ẹẹ vhẹ khi mhi laa lema ọni Ita na vhẹ; ²⁷Ọni Ita ọ mhuẹ ighọli vhẹ rharhi khi vhavha mhuẹ ighọli mhẹ li vhavha rhọ lama khi obọ ọni Ita mhi te bhale. ²⁸Obọ Ishinẹgba mhi te bhẹ, mhi she bhẹ vhi ukhomhi ekagbọ; mhi ẹẹ vhẹ, mhi laa vu ukhomhi ekagbọ le mhi bhuli ọni Ita.”²⁹Idibo ọli eẹ li, “Ghe, ghe, rhẹmhi u ke lee gwu khasẹ eyẹ abhi o li laa, u waa ke gwe rhi ekpita gwu ingme a khasẹ eyẹ. ³⁰Avyiena li eyẹ yẹsẹ khi u yẹsẹ ẹtsẹkẹ kwu, o vha kyili oni eyẹ ke gwe rha mhila ẹ ogbọ. Rharhi ona, eyẹ rhọ shi ọ khi obọ Ishinẹgba li u te bhẹ. ³¹Ijesu ọọ wẹ, “Vha she lama shi ọ avyiena?”³²Ghe, ghe, oni ẹrhẹghẹ ọa bhẹ, o she le bhẹẹ, ni vha rhọ laa vẹkwa, ọgbọgbọ ọ na je obhoni ọ mẹ, vha pfi mhẹmhẹ ọgwho shi ayọ. Ama a khi mhẹmhẹ ọgwho rharhi khi ọni Ita ọ nu mhẹ la. ³³Rhẹmhi gwu ena khasẹ vhẹ khi vha kẹ te ikpa mhẹ mhọli ọpfọmhẹ. Ukhomhi ekagbọ ọkpokpomhẹ o la, ama vha mhọli izezudu: mhi she nwu oni agbona le.

¹Abhi Ijesu ọ ke rhọ ngme eni ingmemhi ena pfuse, ọ yasẹ alo ekẹ ọọ li, “Ita, oni ẹrhẹghẹ o she bhẹ; rhi ikiki ni ọni Ọmyi khi ọni Ọmyi ẹ khi ọ rhi ikiki nẹẹ. ²Abhi u lee li rhi unu nali eyọ obodẹ ọgbọ kwu khi ọ rhi agbọ ẹlẹnagbọagbọ ni eni u rhọ nali kwu.³Ona khi oni agbọ ẹlẹnagbọagbọ: khi e kẹ yẹsẹ, ọni Ishinẹgba ọgwho kpe ni ọ kyili Ishinẹgba ingmaghyie, ali ọni u ghyie ni ọ kyili Ijesu Kiristi. ⁴Mhi rhi ikiki nẹẹ vhi ukhomhi ekagbọ, abhi mhi li gbe akanya nu rhọ na mhẹ pfuse. ⁵Nenaa, Ita, rhi ikiki na mhẹ ma egbe ẹ vhi egbe ali ikiki na mhi nu ẹ mhuẹ neni oni agbọ ona o toekẹle.⁶Mhi rhi eva ẹ khasẹ iọgbọ nu rhọ na mhẹ vhi ukhomhi ekagbọ. Ghyiẹ lu kpọ mhuẹ wẹ; u ke rhẹ wẹ na mhẹ, e she rhi ingmemhi ẹ gbe akanya. ⁷Nenaa e she yẹsẹ khi ẹtsẹkẹ kwu nu rhọ na mhẹ obọ ẹ li e te bhẹ, ⁸Rharhi ingnemhi ẹ nu rhọ na mhẹ mhi she rhẹ wẹ na wẹ. E kpẹsẹ abọ myie wẹ o ga wẹ ẹloe khi ingmaghyie obọ ẹ lẹ mhi te bhẹ, e lama shi ọ khi ghyiẹ lu ghyie mhẹ.⁹Mhi pfi olema na wẹ, ama a khi agbọ kwu mhi pfi olema na ama e nu rhọ na mhẹ, rharhi khi iyẹ le kyia. ¹⁰Ẹtsẹkẹ mhẹ kwu ghyiẹ lu gaa mhuẹ, ẹtsẹkẹ ẹ kwu e kyili iyẹ mhẹ; mhi te vhọ mhọli ikiki. ¹¹ Imha gwe la oni agbona, ama khi wẹwẹ e khyie la oni agbona, mhia bhẹ bhuli ẹ le. Ita ni ọ pfuasẹ, rhi eva ẹ nu rhọ na mhẹ khẹ wẹ khi e kẹ kyili ogwho, abhi eyẹ ghyiẹ eyẹ li kyili ogwho.¹²Abhi mhi rhọ nu wẹ la, eva ẹ lẹ mhi rhẹ khẹ wẹ nu rhọ na mhẹ; mhi khẹ wẹ, aa mẹ ọni ọ pfua vhọ, sẹkẹnẹ ọni omyi epfua, khi emeni e la akẹkẹshekẹ o kẹ tsẹ. ¹³Nenaa mhi she a bhẹ bhuli ẹ le; ama rhẹmhi a ngme eni ingmemhi ena ekẹ agbọ khi e kẹ mhọli oghẹlẹ ni o vọ, ¹⁴Mhi she rhi ingmemhi ẹ na wẹ; agbọ ea bishi elemhi wẹ rharhi ea kyili uwi oni agbọ ona, abhi imha li kyili uwi oni agbọ ona.¹⁵A khi rhẹmhi pfi olema khi u kha wolọ wẹ oni agbọ ona le ama khi u khẹ wẹ obọ oni ọkhọlọ le. ¹⁶kyili uwi oni agbọ ona, abhi imha li kyili uwi oni agbọ ona. ¹⁷wẹ shi ikpọda ni egbe ẹ elemhi ingmaghyie, rharhi khi ingmemhi ẹ ingmaghyie le kyia.¹⁸Ghyiẹ lu ghyie mhẹ bhẹ vhi ukhomhi ekagbọ, mhẹmhẹ mhi she ke gwe li ghyie wẹ je oni ukhomhi ekagbọ. ¹⁹wẹwẹ lẹ mhi te je egbe mhẹ abọa nẹẹ vhi elemhi ingmaghyie.²⁰A khi ena lọgwho mhi pfi olema na, ama li shi eni e laa lama shi mhẹ vhọ te ikpa ingmemhi wẹ. ²¹Khi e kẹ kyili ogwho, abhi ghyiẹ, ita, u li la elemhi mhẹ, mhi li la elemhi ẹ. Mhi pfi olema khi wẹwẹ e li la elemhi eyẹ khi agbọ e kẹ lama shi ọ khi ghyiẹ lu ghyie mhẹ.²²Ikiki ni u rhọ na mhẹ mhi she li rh ọli na wẹ, khi e kẹ kyili ogwho, abhi eyẹ ghyiẹ eyẹ li kyili ogwho. ²³Mhẹmhẹ mhi elemhi wẹ, ghyiẹ u la elemhi mhẹ, khi egbe gba na wẹ pfuse elemhi ogwho; khi agbọ e kẹ yẹsẹ khi ghyiẹ lu ghyie mhẹ, u mhuẹ ighọli wẹ, abhi u li mhuẹ ighọli mhẹ.²⁴Ita, emeni u rhọ na mhẹ, o gwhẹ mhẹ khi asha na mhi laa la khi e nu mhẹ la ayọ khi e kẹ mẹ ikiki mhẹ, ni u rha mhẹ: rharhi ituekẹkele agbọ lu te mhọli ighọli mhẹ.²⁵Ita ni ọ gwabha gbe, agbọ e vha yẹsẹ ẹ, ama mhẹmhẹ mhi yẹsẹ ẹ; ena e li yẹsẹ khi ghyiẹ lu ghyie mhẹ, ²⁶Mhi she rhi eva ẹ khasẹ wẹ, rhẹmhi rhọ khasẹ wẹ khi ighọli ni u mhuẹ na mhẹ khi o li la wẹ egbe.”

¹Ijesu ọ ke ngme eni ingme ena pfuse, lẹ ali idibo ọli e da uchokẹ Ikidrọ, ogba o la ayọ ni e lo. ²Ijudasi ni ọ lẹẹ rhọ dẹẹ, ọ li yẹsẹ ayọ, rharhi Ijesu ọ nwemaa rhi idibo ọli mhọ obọ ẹẹ je ayọ ẹrhẹghẹ kwu. ³Ijudasi, ọ ke wolọ ichoja ni e te obọ eni e kpeda ugamhi ali Ifarisisi bhẹ, e chini itsua okwhẹ, ali ikpa ali itọchi bhẹ vhi ayọ.⁴Ọni Ijesu, ni ọ yẹsẹ emeni a lẹẹ mẹ, ọ chi je odalo ọ mhila wẹ “Ọgwho vhaa nono?” ⁵Eẹ li, “Ijesu ọnyi Inazarẹti.” Ijesu ọọ wẹ, “Ghee, mhẹ” Ijudasi ni ọ rhọ dẹe, ọọ li nu eni ichoja mugha ayọ.⁶Abhi ọ ke rhọ ẹẹ li ghee mhẹ, e tsutsu e de je ekẹ. ⁷Ọ gwe mhila wẹ utozeva, mhi ẹẹ vhẹ ọgwho vhẹ khi vha nono?” E gwe eẹ li, “Ijesu ọnyi Inazarẹti.”⁸Ijesu ọọ li, “Mhi she ẹẹ vhẹ khi mhẹmhẹ khi ọnaa; o kha kyia khi mhẹmhẹ vhaa nono vha li ẹẹ li eni e kpọẹ khi e vu.” ⁹Rhẹmhi a mẹ ena khi akẹkẹshekhẹ o kẹ tsẹ ni ọọ li, “Eni u rhọ na mhẹ aa mẹ ọni ọ wa vhọa.¹⁰Isamọni Ipitẹ, ni ọ mhọli ọfẹdo, ọ ji ọli lasele ni ọ rhọ rhọ bẹ ọgamhẹ ọni ọ kpeda ugamhi esọ obitaa. Ọni ọgamhẹ lẹẹ lu Imakọsi. ¹¹Ọọ li Ipitẹ, “Rhi ọfẹdo pfi lo upfiapfia ọli. ukolo ni ita mhẹ ọ rhọ na mhẹ, imhẹ mhi te vhọ daa?¹²Eni ichoja ali eni ea mhasẹ ni Ijusi, e fali Ijesu. ¹³ E kyiatsolo rhi ọli bhuli Anasi, rharhi lẹ khi ọgọ Ikafasi, ni ọ kyili ọni ọ kpeda ugamhi oni ukpe. ¹⁴Ikafasi lọ rhi ẹgbhẹ ni Ijusi khi ukwhumhogwho ọ nwemaa gwhua ni iọgbọ.¹⁵Isamọni Ipitẹ ọ rhọ khali Ijesu, ali odibo ọli ọvhese, ọni ọ kpeda ugamhi ọọ yẹsẹ ọni odibo ọli ni a ngme na, ọọ li nu Ijesu lo oni owa ẹzọ ọni ọ kpeda ugamhi; ¹⁶Ipitẹ ọ mugha elase obunodẹ. Iyọ ọni odibo ọli ni ọ kpọẹ, ni ọni ọ kpeda ugamhi ọ yẹsẹ eyọ, ọọ je elase a nu ọni ọkpotso ni ọ khẹ odẹ ngme ni ọ ke chigbe rhue Ipitẹ lo owa.¹⁷Ọni ọkpotso ni ọ khẹ ode ọọ li Ipitẹ, “U waa she li kyili ukwhumhọgwho eni idibo ọni ọmọse ọna?” Ọọ li, “A khi mhẹmhẹ.” ¹⁸Eni egamhẹ ali eni ea mhasẹ li e gaa mhugha ayọ; e pfi avu erhẹ shi ayọ, rharhi khi ulili oo gbe, ee khase eni erhẹ, Ipitẹ ọ li nu wẹ la ayọ, ọ tomugha li khase eni erhẹ.¹⁹Ọni ọ kpeda ugamhi ọ kẹ mhila ljesu ogbọ obodẹ eni idiboi ọli ali owena ni ọọ wena iọgbọ. ²⁰Ijesu ọọ li, “Mhi she ngme gboo khasẹ agbọ kwu; ẹrhẹghẹ kwu lẹ mhi rhọ la owuka ẹẹ wena iọgbọ ni Ijusi e legba. Imha mhuẹ emena mhi ngme shi ogbhagbha. ²¹U ke le lia mhila mhẹ? Mhila agbọ ni ee sokwu emena mhi ngme. Wẹwẹ le yẹsẹ emena mhi ngme.”²²Abhi Ijesu ọ ke rhọ li na sọ vhọ, ukhumhọgwho elemhi eni ea mhasẹ ọ rhi obọ rhi ẹtsẹkẹ li ọ, ọọ li, “Iyọ lu kha li sọ ọni ọ kpeda ugamhi vhọ?” ²³Ijesu ọọ li, “O kha kyia khi onobe mhi ngme, ngme ọ lase. Ama o kha ke kyia khi ingmaghyie mhi ngme, elọ u ke rhi ẹtsẹkẹ li mhẹ ashi?” ²⁴Annasi ọ ke fali Ijesu rhue ghyi Ikẹfasi ni ọ kpeda ugamhi.²⁵Oni ẹrhẹghẹ ona Isamọni Ipitẹ ọ tomhagha ẹẹ khase erhẹ. Eni iọgbọ eẹ li, “U waa kyili ukwhumhọgwho eni idibo ọ?” Ọ cha ọọ li obho.” ²⁶Elemhi eni egamhẹ ọni ọ kpeda ugamhi, ni ọ kyili inyọgwho ọni Ipitẹ ọ ke khyi esọa, ọọ li, “Imhẹẹ mẹ khi u nu ọli la vhi oni ogba oyọ?” ²⁷Ipitẹ ọ gwe cha, ayayayọ ọkpa ọ gbhiẹghẹ.²⁸Ee ke te obọ Ikẹfasi rhue Ijesu je okwugbe Iromasi ni Igọvinọ ọ la. eni iọgbọ ea rhọ khẹ wẹ lo oni okwugbe Iromasi ni Igọvinọ ọ la khi e ke kyili eni ea pfuasẹ khi e kẹ le emenale oni aliukpe idọsẹalẹ. ²⁹Ipaleti ọ ke je elase ọọ wẹ, “Ushi elọ vha rha nwu ọni ọmọse ọna?” ³⁰Eẹ li, “O kha kyia khi ọni ọmọse ọna khi ọa kyili ọni ọ khọlọ lọ, eyẹ a kha nwu ọni ọmọse ọna ghyi ẹ.³¹Ipaleti ọ ke ẹẹ wẹ, vha te egbe vhẹ rhue ọ, khi vha rhi ishi vhẹ gwu ọli ezọ.” Eni Ijusi eẹ li, “Ushi o vha ngme khi eyẹ gbe ọgbọa.” ³²Rhẹmhi e ngme ona khi ingmemhi Ijesu o kẹ tsẹ, obodẹ uvhali egwhi ni ọ lẹẹ gwhu.³³34 Ipaleti ọ gwe liegbe lo okwugbe Iromasi ni Igọvinọ ọ la a nyalu Ijesu; ọọ li, “Ghyiẹ khi oghyie Ijusi?” ³⁴Ijesu ọọ li, “Uwi obọ ẹ waa mhila mhẹ ena, abhi khi iọgbọ li e ghyiẹ khi u kaa mhila mhẹ bhẹ?” ³⁵Ipaleti ọọ li, Imha kyili ọnyi Iju, la khi mhi kyilaa? Evholi ẹ ali eni e kpeda ugamhi li e nwu ẹ ghyi mhẹ; elọ u li?”³⁶Ijesu ọọ li, “Eghyiele mhẹ o vha kyili uwi oni agbona. O kha kyia khi eghyiele mhẹ o kyili uwi oni agbona lọ, egamhẹ mhẹ e kha khọli khi a ke nwu mhẹ ni Ijusi. ingmaghyie eghyiele mhẹ o vha te oni agbona bhẹ.” ³⁷Iyọ Ipaleti ọ ke ẹẹ li, “Ọghyie lu ke kyia shiọ?” Ijesu ọọ li, “Ghyiẹ wẹ khi oghyie mhi kyia eyọ. Ona li o zẹ na rhọ vyia mhẹ, abagwhoyọ ona li o zẹ na mhi rhọ bhẹ vhi ekagbọ khi mhi myie ọtsẹ shi oni ingmaghyie. Eni e kyili uwi ingmaghyie li e rhi esọ ashi mhẹ ekẹ.”³⁸Ipaleti ọọ li, “Elọ khi ingmaghyie?” abhi ọ ke rhọ ngme ona pfuse, ọ gwe liegbe je elase bhuli eni Ijusi ni ọ rhọ ẹẹ wẹ, “Imha mẹ ọni ọmọse ona ingme igyiaguda vhi egbe. ³⁹Ama vha yẹsẹ khi vha mhọli ushi khi mhi laa wolọ ukwhumọgwho abọa ẹrhẹghẹ aliukpe idọsẹalẹ. Vha nono khi mhi wolọ oghyie Ijusi abọa?” ⁴⁰E ke gwe sọọse ni e rhọ ẹẹ li, “A khi ọni ọmọse ọna, ama Ibarabasi,” ọni Ibarabasi agyaguda li ọ kyia.

¹Ipaleti ọ nwu Ijesu vu khi a rhi ite gbe ọ. ²ichoja e do arhu igba e rhọ gwese Ijesu ukhomhi, e rhi awulu atuekẹ ni oo bishi sọ ọli. ³Ee bhẹ bhuli ọli le eẹ li, “moo, oghyie Ijusi!” e rhi abọ ẹẹ lase ọli esọ.⁴Ipaleti ọ gwe lo elase bhuli eni iọgbọ ọọ wẹ, ‘‘vha ghee, mhi rhue ọni ọmọse a lase ghyi vhẹ khi vha rhọ yẹsẹ khi imha mẹ ọli iluemhi vhi egbe.” ⁵Ijesu ọ ke lasele; ọ gwese arhu igba ali awulu atuekẹ ni oo bishi. Ipaleti ọọ wẹ “Vha ghee ọni ọmọse!” ⁶eni e kpeda ugamhi ali eni ea mhasẹ e ke rhọ mẹ Ijesu, e sọọse eẹ li, “A tanọmanọ, a tanọmanọ!” Ipaleti ọọ li, vha te egbe vhẹ rhue ọli a gbea, rharhi khi imha mẹ oli iluemhi vhi egbe.”⁷ Eni Ijusi e ke eẹ li Ipaleti, “Eyẹ mhọli ushi, oni ushi o she nwu ọli, ọ kyili emeni a kha gbea rharhi ọ rhi egbe ọ kyili Omyi Ishinẹgba.” ⁸Abhi Ipaleti ọ ke rhọ suọ emeni ee ngme, ulishi o nwu ọli onaghyie, onaghyie. ⁹Ọ gwe lo oni owa ẹzọ ọọ li Ijesu, ‘Obho u mẹẹ khi u te bhẹ?” Ama, Ijesu ọ vha sọ vhọ.¹⁰Ipaleti ọọ li, “U waa gwe a sọ mhẹ vhọ? la khi u waa li yẹsẹ khi mhi mhọli izemhi na mhi rhaa li ẹẹ li khi a wolọ ẹ abọa ọa liyọ mhi ẹẹ li a tanọ ẹ manọ?” ¹¹Ijesu ọọ li, “U waa mhọli izemhi obodẹ mhẹ sẹkẹnẹ khi rhẹmhi a rhọ te aleghyhie oweda rhi oni izemhi nẹẹ. Ama khi ọgbọ ni ọ rhẹ mhẹ na vhẹ lọ mhọli ingmobe ni o fu nẹẹ.”¹²Rharhi abhi ọ li sọ vhọ, Ipaleti ọọ dua abhi ọọ li wolọ ọli abọa, ama eni Ijusi e khyiele sọse tsumhi, “U kha wolọ ọni ọmọse ona abọa, u waa kyili ukpokyyia Isiza; Ọni ọ lu egbe ọli oghyie rhẹmhi ọ zẹ okwhẹ kpẹsẹ Isiza.” ¹³Abhi Ipaleti ọ ke rhọ suọ abhi e lii ngme, ọ rhue Ijesu lasele ọa shitọ utekwu igwẹzọ asha ni a lu ẹtẹtẹ ẹzọ.¹⁴O kyili ogbẹlẹ ni a rhẹẹ nwunegbe shi oni aliukpe idọsẹalẹ, ẹrhẹghẹ ọkwulọkwu esesa. Ipaleti ọọ li Ijusi, “Vha ghee oghyie vhẹ!” ¹⁵E sọse gbalala, vha rhue ọ vu, vha rhue ọ vu; vha tanamanọ!” Ipaleti ọọ wẹ, vha lama khi mhi tanọ oghyie vhẹ manọ?” Ọni ọ kpeda ugamhi ọọ li, “Eyẹ vha mhọli oghyie ọvhese sẹkẹnẹ Isiza.” ¹⁶ Ipaleti ọ ke rhọ ji Ijesu abọa na wẹ khi e rhọ tanọmanọ.¹⁷Ayọ li e te nwu Ijesu vu je elase, nI ọ rha te egbe ọli a tsua oni ọgbagala, ẹẹ je asha nẹẹ lu ukhomhilimhi, ni Iburu e lu Igogotha. ¹⁸Ee le tanọ Ijesu manọ, ali emọse ava, ọgwho obita ọvhese ọgobọ, Ijesu ọ la wẹ vhi iteteva.¹⁹Ipaleti ọọ kẹkẹ shi ukhẹkhẹmhi orhẹ tama ukomhi oni ọgbagala: ‘’IJESU INAZARẸTI, ỌNI OGHYIE IJUSI’’. ²⁰Ebubu iọgbọ Ijusi e lẹẹ zẹ ọ rharhi khi asha ni a tanọ Ijesu manọ o chi mama elemhi ẹvhue. Unu Iburu ali Ilati ali Igiriki li a rhọ kẹkẹ oni ishẹfẹ.²¹Ọni ọ kpeda ugamhi ni ọ kyili uwi Ijusi ọọ li Ipaleti, “Imhẹ kẹkẹ, ‘Oghyie Ijusi, ama lee kẹkẹ khi, ọọ khi ‘Mhẹmhẹ khi oghyie Ijusi.’ ²² Ipaleti ọọ li, ”Emena mhi kẹkẹ mhi she kẹkẹ ọ nee.²³Abhi eni ichoja e ke rhọ tanọ Ijesu manọ pfuse, e rhue awulu atuekẹ ọli e kemhi ọli shi asha ene, eni ichoja ane e rhue opfọ ogwho, gwho, gwho, ali oni awulu. Oni awulu o vha mhuẹ abọ, rhẹmhi apfi shi ọ te oleda apfishi ekẹ. ²⁴E ke eẹ li egbe, “Imhẹ li eyẹ kyiọlọ lia, onochi eyẹ pfi etsẹ shi ọ khi eyẹ mẹ uwi ọni o laa kyila.” Rhẹmhi a mẹ ona khi akẹkẹshekẹ o kẹ tsẹ ni ọọ li, “Rhẹmhi e kemhi awulu atuekẹ mhẹ, e pfi etsẹ shi awulu okeke mhẹ.”²⁵Akanya ni eni ichoja e gbe khi ona. Inyọ Ijesu ali inyọgwho inyọ ọli ni ọkpotso ali Imeli ni ugwhẹ Ikilopasi ali Imeli Imadalini e nu ọgbagala Ijesu tomugha. ²⁶Abhi Ijesu ọ ke rhọ mẹ inyọ ọ ali ọni gbe akanya rhẹ khali ọli ni ọ nwemaa mhọli ighọli ee mugha egbọayọ, ọọ li inyọ ọli, “kpotso, ghee, omyi ẹ khi ọna!” ²⁷Ọ ke lialo bhuli ọni odibo ọli, ọọ li ghee, inyọ ẹ khi ọna!” Ayọ li ọni odibo ọli ọ te rhue inyọ Ijesu je apfẹ ọli.²⁸Abhi a ke rhọ gaa mẹ ena pfuse, rharhi khi ọ yẹsẹ khi lẹ she gbe eni ikanya pfuse, khi lẹ rhọ rhi akẹkẹshekẹ tsẹ ọọ li, “O kyiamẹ ọa gbe mhẹ. ²⁹Agege onyọ o la ayọ, e pfuẹ isoso kwu ọ e sọ ugwuagha vhọ rhọ shi ọ vhi unu. ³⁰Ijesu ọ ke rhọ tsu unu, ọọ li, “Opfoo.” ọ nyẹsẹ ukhomhi ọ yẹmhẹ ayẹmhẹ ikposhimhi.³¹O kyili ogbẹlẹ ni a rhọ nwunegbe shi oni aliukpe, khi eni ilimhi nI a gboloa khI e ke la ukhomhi ọgbagala ni ogbo gbe nI o kyili ogbẹlẹ ivhiẹmhia, rharhi khi oni ogbẹlẹ o kyili ogbẹlẹ ni o nwemaa vọ ẹloe, eni Ijusi eẹ li Ipaleti khi a gwhọghọ wẹ awẹ, khi a rhọ wolọ wẹ ọgbagala kpẹale. ³²Eni ichoja e bhẹ ea gwhọghọ ọni ikyiatsolo awẹ, ali ọni ọzava ni a tanọmanọ ma Ijesu egbe. ³³Abhi e ke rhọ rhamhi Ijesu egbe, e bhale a vhẹ khi ọ she kpọ lee gwhu, e vha ke gwe gwhọghọ ọli awe.³⁴Ama achoja ọgwho ọ rhi ochi tali vhi epfẹlemhi, ayayayọ ọlia ali amẹ e kwu lasele. ³⁵Ọni ọ mẹ ona ọ pfi ọtsẹ shi vhọ khi ingmaghyie lọ. Ọ yẹsẹ ingmaghyie li o kyia khi vha kẹ lama shi ọ.³⁶Rhẹmhi a gaa mẹ ena kwu khi emena kẹkẹ shi ekẹ e kẹ tsẹ, “khi aa mẹ ugwa ọli ni o gwhọghọa.” ³⁷Iyọ, akẹkẹshekẹ ovhese oo ngme, ọọ li, “E la laa bino ọni e rhi ochi tali.”³⁹ Abhi ena e ke rhọ dọsẹ, Ijosẹfu ọnyi Arimatẹya rharhi ọọ kpọ li rhẹ khẹ Ijesu, ama rhẹmhi ọ bẹna rharhi ulishi eni Ijusi, lọ ke a mhila Ipaleti khi lẹ tsua oni olimhi Ijesu vu. Ipleti ọọ rhi imasha nali ni ọ rha tsua oni olimhi Ijesu vu. ³⁸ Inekodemọsi ọ li bhẹ, ọni ọ ke kpọ bhuli Ijesu le ẹliyọsẹ eyọ. Ọ tsua akpulu itulale ali ivyiẹmhi ni e khọ rhamhi ufuabọ ikhọmhi ikpulu isimete eva.⁴⁰E tsua olimhi Ijesu e rhi ode ọlilẹ kwhuli ọli e kwhu itulale shi ọ vhi egbe abhi ushi Ijusi o ngme khi a li rhi iọgbọ ẹẹ tọ. ⁴¹Asha ni a tanọ ọli manọ ogba o la ayọ; elemhi oni ogba uji ni a vha khyie kpọ rhi ọgbọ tọ gwhe o la ayọ. ⁴²Rharhi khi o kyili ogbẹlẹ ni Ijusi e rhẹẹ nwuegbe shi oni aliukpe oni uji o gwe chi mama ayọ, li e rhọ rhi Ijesu a tọ ayọ.

¹Utsutsu ogbeẹ ogbẹlẹ ikyatsolo elemhi uka; Imeli Imadalini ọ je uji ni ọ rhọ tọ, ọ bhale a vhẹ kha she gheghe oni ẹchiẹ odea. ²Ọọ na a gwu ni Isamọni Ipitẹ ali odibo Ijesu ni ọ nwemaa mhọli ighọli, ọọ wẹ, “A she tsua olimhi Ọnọmhọli vhi uji vu, eyẹ vha yẹsẹ obhoni a tsua ọli jee.”³Iptẹ ali idobo ọli e vu. e je oni uji. ⁴E gaa nanọ ẹẹ lẹ; ọni ọ odibo ọli ni ọ kpọẹ lọ ke kpọ kpalo ni Ipitẹ rhamhi oni uji. ⁵Ọ mugha ọọ bino elemhi ọ; ọ mẹ oni ode ọlilẹ vhi ayọ ni a rhọ kwhuli ọ, ama ọ vha ke lo elemhi ọni uji nee. Isamọni Ipitẹ ọ ke rhamhi ayọ lọ ke kpọ lo oni uji. Ọ mẹ oni ode ọlilẹ na rhọ kwhuli ọli vhi ayọ.⁶Isamọni Ipitẹ ọ ke rhamhi ayọ lọ ke kpọ lo oni uji. Ọ mẹ oni ode ọlilẹ na rhọ kwhuli ọli vhi ayọ. ⁷ali ode ni a rhọ kpẹsẹ ọli ukhomhi. O vha la asha ni oni ode ni a rhọ kwhuli ọli o la ama rhẹmhi o te egbe ọli ghẹghẹ je ikpali.⁸Ọni ọ odibo ọli ni ọ kpọẹ ọ li lo oni uji; ọni ọ kyiatsolo lo oni uji; ọọ mẹ ọ lama shi ọ. ⁹Rharhi apfishi oni ẹrhẹghẹ oyọ e vha khyie kpọ yẹsẹ emeni a kẹkẹ shi ekẹ khi Ijesu ọ nwemaa te egwhuli vule. ¹⁰Ayọ ll idibo ọli e ke tee je apfẹ wẹ.¹¹Na rha ngme na, Imeli ọ lee tomugha elase vyiẹ; ọ kha vyiẹ, ọ ke bino oni uji. ¹²Ọọ ke Mẹ ẹghyiukọ ikwhumhi ava khi esọ ede ọpfopfo dena shitọ, ọgwho ọ shitọ obhoni o kpeda ọni ọ kpọẹ ọ shitọ olọkhẹ, asha ni a rhi olimhi Ijesu shi. ¹³Eẹ li, “kpotso, elọ u vyiẹ a shi?” Ọọ wẹ, “Rharhi a she tsua olimhi Ọnọmhọli vu imha yẹsẹ obhoni e tsua jee.”¹⁴Abhi ọ ke rhọ ngme ena, ọ ke nwu egbe lieliẹ ọ mẹ khi Ijesu ọ mugha ayọ, ama khi ọ vha yẹsẹ khi Ijesu lọ. ¹⁵Ijesu ọọ li, “Kpotso, see u ke lia vyiẹ? ọgwho waa nono?” Ọọ khọkhọ khi ọni ọ la ogba ẹẹ gbe akaya lọ, ọọ li, “Ọga, o kha kyia khi ghyiẹ lu tsua oni olimhi ayọ, gwu khasẹ mhẹ asha ni u tsua ọli a pfishi, khi mhi kaa tsua.¹⁶Ijesu ọọ li, Meli,” ọ pfi alo o shimhi, ọ rhi ẹvhue Arameki nu ọli ngme, “Raboni,” emeni o ngme lẹ khi “Ọwẹnagbọ” ¹⁷Ijesu ọọ li, “Imhẹ, rhi obọ chi mhẹ, rharhi imha shele bhuli ọni Ita nee; ama kee bhuli inyọgwho mhẹ wẹwẹ khi mhi laa shele bhuli Ita mhẹ ali Ita vhẹ, ni ọ kyili Ishnẹgba mhẹ ali Ishinẹgba vhẹ.” ¹⁸Imeli Imadalini ọ vu ni ọ rha gwu khasẹ idibo ọli, “Mhi she mẹ Ọnọmhọli,” khi emeni ọ gaa ngme kwu khi ena.¹⁹Abhi ogbode o ke rhẹẹ le, oni ogbẹlẹ, o kyili ogbẹlẹ ikyiatsolo vhi elemhi uka, ni idibo ọli e ke rhọ gwese edẹ rharhi ulishi Ijusi, Ijesu ọ bhale a tomugha wẹ iteteva ọọ wẹ, ²⁰“Ọpfọmhẹ o kyili uwẹ vhẹ. Ọ ke ngme wẹ yọ pfuse, ọ rhi abọ ọli ali igwepfẹ khasẹ wẹ. abhi idibo ọli e ke rhọ mẹ Ọnọmhọli , egbe ee nwu wẹ.²¹Ijesu ọọ gwe ẹẹ wẹ, “Ọpfọmhẹ o nu vhẹ la. ²²Abhi ọni Ita ọ li ghyie mhẹ iyọ mhi lia ghyie vhẹ ena.” Ijesu ọ ke ngme ona pfuse, ọ yẹmhẹ kwu wẹ ọọ wẹ, “Vha myie Ayẹmhẹ ni o Pfuasẹ. ²³Ọni vha laa gbe ingmobe kwa na, a la laa gbe kwa nali; ọni vhavha sheda gbe kwa na a vha laa gbe kwa nali.”²⁴Itọmọsi, ukwhumhọ eni ogbe ali ava, ni ẹẹ lu Ididimọsi (itsema), ni ọ vha nu wẹ la ayọ ni Ijesu ọ rhọ nono wẹ bhẹ. ²⁵ Eni idibo ọli ni e kpọẹ li e ke gwu khasẹ ọli idegbe, “Eyẹ she mẹ Ọnọmhọli, “ Ọọ li, “Sẹkẹnẹ khi rhẹmhi mẹ asha ni a tanọ ekpẹ shi ọli vhi abọ mhi gaa sọ ọli ukpobọ vhọ, mhi gwe sọ ọli ukpobọ asha ni a ta ọli ochi igwepfẹ, imha lama shi vhọ.”²⁶Ugbẹlẹ ozele, eni idibo ọli e gwe la elemhi owa, Itọmọsi ọ li la ayọ oni ogbẹlẹ. Abhi a li gwese ede eyọ, iyọ li Ijesu ọ li bhale a tomugha wẹ vhi iteteva, ọọ wẹ, “Ọpfọmhẹ o nu vhẹ la.” ²⁷Ọ ke ẹẹ li Itọmọsi, “Sọ mhẹ ukpobọ vhi ana, u bino mhẹ abọ; sọ mhẹ obọ vhi ana, u rhi obọ rhamhi mhẹ vhi ana, u sọ mhẹ lẹ vhi igwepfẹ; imhẹ gwe kyili ọni ọ vha mhọli irhọshiọ, ama lama shiọ.”²⁸Itọmọsi ọọ li, “Ọnọmhọli ali Ishinẹgba mhẹ “ ²⁹Ijesu ọọ li, “Rharhi khi u ke mẹ mhẹ, li u ke rhọ chigbe lama shi vhọ ena. Ivhọsẹna lẹ khi uwi ọni ọ vha mẹ neni ọ lama shiọ.”³⁰Ijesu ọ gwe gbe inyalọa niebu evhese ukpẹloe idibo ọli ni a vha kẹkẹ shi oni ebe ona’; ³¹Ama rhẹmhi a kẹkẹ ena khi u kẹ lama khi Ijesu lẹ khi Ikiristi, ni Omyi Ishinẹgba, khi abhi u ke li la lama shiọ, u ke laa mhọli inyele elemhi eva ọli.

¹Abhi ena kwu e ke rhọ dọsẹ a lẹ ena Ijesu ọ gwe a rhi egbe ọli khasẹ idibo ọli vhi okẹ Itiberiasi; ina li ọ li rhi egbe ọli khasẹ: ²Isamọni Ipitẹ ali Itọmọsi Ididimọsi (itsema) ali Inataniẹli ni ọ kyili ọnyi Ikena ni ẹ Igalili ali imyi Izẹbẹdẹ ikwhumhi ava ali idibo Ijesu ava evhese li ee gaa la ayọ. ³Ipitẹ ọọ wẹ, “Mhi liegbe la kee gbe ifẹ.” Eẹ li, eyẹ lia yee.” Li e rhọ danọ kwulo ọkọ ni e rhọ lẹẹ gbe ifẹ, ama oni ẹliyọsẹ oyọ kwu e vha mẹ apfẹ nwu pee.⁴Ogbe o ke lẹẹ gbe, Ijesu ọ mugha ukhomhi ekhashẹ, ama khi idibo ọli e vha yẹsẹ khi Ijesu lọ. ⁵Ijesu ọọ wẹ, “Inọghọdọ emọse, vhavha mhọli emeni vha lee?” Eẹ li obhoo.” ⁶Ọọ wẹ, “Vha pfi aga lo obọ obita oni ọkọ, vha laa mẹ ẹtsẹkẹ nwuno.”E ke pfi aga lo oni okẹ, eni e nwuno e vha dobẹẹ tsua wẹ lasele rharhi khi eni ipfẹ e maa bu.⁷Ọni odiboi ọli ni Ijesu ọ nwumaa mhọli ighọli, ọọ li Ipitẹ, “Ọnọmhọli khi ọna,” abhi Ipitẹ ọ ke rhọ suọ khi ẹẹ khi ọnọmhọli lọ, ọ nyanya rhi awulu sọ rharhi ede na vyiẹnẹvyiẹnẹ lọ kpọ sọ, lọ rhọ da pfilo okẹ. ⁸Eni idibo ọli ni e kpọẹ e lono elemhi oni ọkọ rharhi khi e vha kpọ nuẹ shi igbogbo, rhẹmhi o liabhi imali ogwho, li e rhọ ẹẹ chi oni aga vhi okẹ lasele ni o vọ ipfẹ. ⁹Abhi e ke rhọ chi ọli lasele e mẹ inyamhi erhẹ khi a rhi afẹ nya vhọ, ali ukphakpha.¹⁰Ijesu ọọ wẹ, “Vha te eni ifẹ ni vha nwunono eyọ rhọ bhẹ.” ¹¹Isamoni Ipitẹ lọ ke shele bhui wẹ a nu wẹ chi ọli bhẹ vhi eso igbogbo, rhẹmhi o vọ ifẹ, ikpamhi ishila le vha la egbhọ elele; e gaa bu ama oni aga o vha khyiọlọa.¹²Ijesu ọọ wẹ, “Vha bhale a le emenale ẹlẹvyiogbe. a vha mẹ odibo ọli ni ọ jilẹ mhila li, “Ogwho u kyia” e yẹsẹ khi Ọnọmhọli lọ. ¹³Ijesu ọ bhale a rhue oni ukphakpha, ọ rhi ọli na wẹ, ali oni afẹ. ¹⁴Utozesẹ khi ona ni Ijesu ọ rhi egbe ọli khasẹ ni ọ rhọ te egwhuli vule ena.¹⁵Abhi e ke rhọ le emenale ẹlẹuvyiogbe pfuse, Ijesu ọọ li Isamọni Ipitẹ, ni omyi Ijọni, u mhọli ighọli mhẹ dala ena?” Ipitẹ ọọ li, ‘’Ee’’ Ọnọmhọli u yẹsẹ khi mhi mhọli ighọli ẹ. “Ijesu ọọ li, “Rhi emenale ni isumha mhẹ le” ¹⁶Ijesu ọ gwe mhila ọli utozeva, “Isamọni, omyi Ijọni, wẹ khi u mhọli ighọli mhẹ dala ena?” Ipitẹ ọọ li, ‘’Ee’’ Ọnọmhọli; “U yẹsẹ khi mhi mhọli ighọli ẹ.”Ijesu ọọ li, “Rhi emenale ni isumha mhẹ le.”¹⁷Ọ gwe mhilali utozesẹ, Isamọni omyi Ijọni u mhọli ighọli mhẹ?” oni ingme oo ke khekhe Ipitẹ egbea rharhi khi Ijesu ọ mhila li itesẹ, “U mhọli ighọli mhẹ?” Ọ ke sọ vhọ, “Ọnọmhọli, u yẹsẹ ẹtsẹkẹ kwu, u yẹsẹ khi mhi mhọli ighọli ẹ.” Ijesu ọ ke ẹẹ li rhi emenale ni isumha mhẹ le. ¹⁸Egbegbingme mhi gwu khasẹ vhẹ, abhi u rhọ kyili ọnọghọdọ, ghyiẹ lọgwho li u sọnọ ede, u jee obhoni o ghọli ẹ; ama u kha ke kyili ọkyiọjọ, rhẹmhi u ke a nise obọa ọgbọ ọvhese ọ nwu ẹ obọ, ọ sọnọ ẹ ede ọ rhi ẹẹ je obhoni ọ vha ghọli ẹ.¹⁹Irẹmhi Ijesu ọ ngme ena khi lẹ rhọ khasẹ uvhali egwhi ni Ipitẹ ọ lẹẹ gwhu khi o kẹ rhi eghọghọ ni Ishinẹgba. Ijesu ọ ke ngme ona pfuse, ọọ li Ipitẹ, “ Rhọ khẹ mhẹ.”²⁰Ipitẹ ọ ke pfi alo oshimhi ọ mẹ khi ọni odibo Ijesu ni ọ mhọli ighọli, khi ọ rhẹ khẹ wẹwẹ lẹ khi ọni odibo ọli ni ọ kee de vhesẹshi Ijesu vhi egbe ogbẹlẹ ni e lẹẹ le emenale ikposhimhi ni ọ li, Ọnọmhọli, “Ọgwho ọ la rhẹ dẹẹ?” ²¹Abhi Ipitẹ ọ ke rhọ mẹ ọ, ọọ li Ijesu, “Ọnọmhọli, see ọni ọmọse ọna ọ ke laa li?”²²Ijesu ọọ li, “O kha rhẹ ghọli mhẹ khi mhi ẹẹ li khi ọ mugha nee apfishi na mhi rhaa bhẹ, mhi ghyi ẹgbeoli vhẹ ni o la vhọ? Rhọ khẹ mhẹ,” ²³Abhi ọ ke rhọ ngme ona oo ga iteteva eni inyọgwho ni e gaa myie suọ, khi ẹẹ khi ọni odibo ọli ọyọ, khi ọ vha laa gwhu. Ama Ijesu ọ vha ẹẹ khi ọ vha laa gwhu. Ama ọọ khi o kha ghọli lẹ khi rhẹmhi lia li ẹẹ khi ọ mugha khẹ lẹ apfishi ni lẹẹ rhọ laa bhẹ, oni ogwho o de vhẹ?”²⁴Mhẹmhẹ Ijọni, mhẹmhẹ khi ọni ọ odib ọli ni ọ myie ọtsẹ shi eni ẹtsẹkẹ ena kwu, ni ọ kẹkẹ wẹ shi ekẹ. Eyẹ yẹsẹ khi ọtse na mhi myie khi ingmagyhie lọ. ²⁵Ijesu ọ gbe ikhanya nebu evhese ni a vha kẹkẹ shi ekẹ, a kha ẹẹ li khi a kẹkẹ wẹ shi ekẹ lọ, oni agbona kwu o vha kha lọsẹ eni ebe ni a kha kẹkẹ wẹ shi.