¹ Cayo pia Dio inaitjaca nja eenocoma njite jiipai tsakja. ² Mamatsieta canaadalri pia catoan jliaji jiipai njite meetada tsakjan. Cadaocá dalri iitaca jliaji tjewaca-dalri. Njite canani piaca Dio Icaolrini ooni imaimaca iecoe naco. ³ Njite Dio icaite: ''Camarrai, pinaitjacawa,'' icaamitsa camarrai initaacawa. ⁴ Njite Dio icapa matsiadalrica jliaji camarrai. Niini jlienita camarai Cadaocádalri ioya. ⁵ Niini Lricadaa camarrai ipotanao ''jalrewerrico,'' njite jliaji cadaocádalri lricadaa lriipitanao ''deepi.'' Icatsa njaji lrinaitjalrica piyompinakjoite dainoma nacojle, pada jalredaokena. ⁶ Dio icaite: ''Niniotsa pada jienitacada njaji ooni imaimaca, jlienetacarro nja ooni naoyawaaca.'' ⁷ Dio inaitja jliaji lrioyawaaca jlieneta-carro nja ooni, niini lricadaa ooni lrioyawaaca iapjite njite lriicao tsakja. Cayotsa lrinaitjaca. ⁸ Dio icadaa lrioyawaca iipitanao ''eeno coma.'' Icapiatsa lrinaitjalrica piyompinakjoite dainoma nacojle, yamadaa jalredaokena. ⁹ Dio icaite: ''Pjiomi ooni eeno iapjite perri iwacaacawa pafe tsa, jiipai metádalri imotócarro.'' Njite cayotsa lrinaitjaacacao. ¹⁰ Dio icadaa metadari iipitanao ''jiipai,'' njite nja ooni iwacaacalrio Lricadaa lripitanao ''macapawan.'' Njite lricapa matsiacatsa njaji lrinaitjalri. ¹¹ Dio icaite: ''Jiipai icadacaotsa malritsi jipolreperri imotoa jiipai ricó, malritsi ishocae iekje, jaico isjocape inaca ishi paapanaope, njite njaji jaico irsocape iinaca njite narsoatsa neeshi nainaca ricó, cayotsaotsa pjiomi njaji jaicotjedaa naoyawaca.'' Njite cayotsa lrinaitjaca. ¹² Jiipai imotoeta pjiomi malritsi, malritsi irsocape iekje coshoca naoyawaca, Njite jaico irsocape iinaca njite neshi nerricoda nacoana coshocatsa naoyawaaca. Dio icapa matsiacatsa njaji lrinatjalri. ¹³ Icatsa Dio inaitjalri piyompinakjoite dainoma nacojle, madalrideena jalredaoca. ¹⁴ Dio icaite: ''Niniotsa nja camarrai eeno iecoa nacó jlienetá-carro jaalre werico deepi ioya njite matsia tsakjaotsa nakjenanaatá carro, panjii carro padaa jalredaoca nacó, njite pada oona naco tsakja. ¹⁵ Njaji camarai nacanaotsa eeno iecoa nakjoite jalredaoca nacojle.'' Njite cayotsa lricaite capisho. ¹⁶ Dio inaitja nja yamada camarrai macadalripe, jliaji camarrai macadalri pja lricaná carro jaalre werricó, njite jlaiji camarrai tsodalri pja lricaná-carro deepi ricó. Lrinaitja tsakja nja jiwirsida. ¹⁷ Dio icadaana eeno iecoa nacó nacaná-carro jiipai nacojle, ¹⁸ camarrai italricanaatácarro jaalre werricó njite deepi werricó tsakja, jlienetá-carro camarrai cadaoca dalri ioya. Njite Dio icapa matsia catsa njaji lrinaitjalri. ¹⁹ Icatsa njaji lrinaitjalri piyompinakjoite daica nomajle, Cuatro jalredaoca nacó. ²⁰ Dio icaite: ''Ipakjantaacao ooni macapawan ricó jorre maaficalri caafiperri teecojle perri ioyawaaca sho, njite niini tsakjaotsa wipjiarro iarrajicapeo jiipai iicao eeno initjecoma ricó.'' ²¹ Dio inaitja nja maaficalri macanipe ooni macapawan ricope, lrinaitja nja maaficalri caafiperri teecojlepe naoyawaca ianjicapewa ooni ricó napakjantaacá-carro, njite pjiomi tsakja njaji iarrajicapewa yamapje perri ipje teecojlepe ioyawaca. Njite Dio icapa matsia catsa njaji lrinaitjaji. ²² Njite Dio icadaa iacoti matsiadalri nanaco, lriaco cayó: ''Matsiawatsa keenipeca jia imaimataacácarroa, ipakjantá-carroatsa jliaji ooni macapan. Namaimataaca tsakjaotsa nja wiipjiarro jalredaoca lricó.'' ²³ Icatsa nja lrinaitjalica piyompinakjoite daica nomanajle, cincoena jalredaoca. ²⁴ Dio icaite: ''Niiniotsa maaficalri caafi-perri jiipai naco, njite teecojle peotsa naoyawacana, vaaca tsakja, njaji itsoetaacacape iácawa jiipai naco, maaficalri macanepe jiipai nacope, teecojlepe naoyawaca.'' Njite cayotsa lricaite capisho. ²⁵ Lrinaitja nja maaficalri macanepe jiipai ricope teecojle naoyawacana, nja vaaca teecojle tsacana nacapacana naoya, njite cayo tsakja pjiome nja itsoetaaca cape iácawa jiipai naco teecojlepe naoyawacana. Njite Dio icapa matsoa catsa nja lrinaitjaji. ²⁶ Dios icaite: ''Wanaitjaotsa inaiki caidalritsa wacayosho, cawaopiakje-dalri cayoji wacayosho. jliá-carroatsa ianjíi nanaco njaji copje ooni macapawan ricope, nanaco njaji iarrajicape eeno initacoma ricó, nanaco nja vaaca, pjomi jiipai naco tsakja, njite nanaco pjiomi njaji maaficalri itsoetaaca cape iácawa jiipai naco. ²⁷ Dio inaitja jliaji inaiki caidalritsa lricayosho. Lricayosho dalricatsa lrinaitjacan. Lrinaitja atsia njite iinarro tsakja. ²⁸ Dio icaite iacoti matsiadalri nanaco, cai lriacoji: ''Matsiawatsa keenipeca jia, njite imaimataacaotsao. Ipakjantacaotsa jliaji jalredaoca, jia carroatsa ianjíi lrinaco. Ianjíi watsa nanaco nja copje macaáwan ricope, nanaco nja iarrajicape eeno initacoma ricó, njite nanaco pjiomi njaji caafiperri jiipai nacope.'' ²⁹ Dio icaite: ''Icapa, nocadaa isho jipai imacaiteca rico nja malritsi ishocape iekje, jaico ishocape iinaca njite nainaca rico nashoca neeshi. Matsiawatsa isho inja carroatsa nainaca. ³⁰ Nacoana nja maaficalri jiipai ricoperri, nacoana nja iarracape eeno initjecoma rico njite pjiomi njaji itsoetaacacape iawa jiipai naco, njite pjiomi njaji nonaitjaji caafiperri jishacape icaolreo, Nocadaa nasho pjiomi nja malritsi jipolreperri naijaodao.'' Njite cayotsa lricaite capisho. ³¹ Dio icapa pjiomi njaji lrinaitjanipe njite lricapa matsia catsa pjiomina. Icatsa njaji lrinaitjaji piyompinakjoite daicanomanajle, sei jalredaoca nacó.

¹ Cayotsa Dio itata inaitjaca njaji eenocoma njite jliaji jiipai tsakja, njite pjiomi njaji caafiperri iofaalri lri ricoda. ² Siete jalredaoca naco Dio iwayaketa Lridenjecalre Lrinaitja cádanaco pjiomi njaji Lrinaijalri, niini siete jalredaoca naco lriwafetawa pjiomi lridenjicalre ioya. ³ Dio icaite matsiá lrinaco jliaji siete jalredaoca njite jlienetani, ima jliadaa jalredaoca Lriwafeetao pjiomi Lridenjicalre ioya. ⁴ Cayopiatsa nainitacao njaji eenocoma njite jiipai tsakja, nanaitja caojli piana, wa-Minalri Dio inaitja caojli pia jiipai njite nja eenocoma tsakja. ⁵ Corri piatoa coca pataita paapanaca, corri tsakja malritsi itawiñawa jiipai naco ima corri piacatoa wa-Minalri Dio icada piatoa iiyao jiwacawa jipai nacojle, njite corrin tsakja pacapa piatoa atsia idejicaoda jliaji jiipai lriapaná-carro. ⁶ Mitsa jiipai nakjoite iitacati shodalri jirrawa njite lripotsietaca jliaji jiipai yecoa. ⁷ Dio ipatsica inaikio caalri sho jlitanda jiipai rikjoite, njite lripjiá jlitacolricó caolri caafishopani, njite icamipiena pada caafidalri keena jliaji atsia. ⁸ Jliaji wa-Minalri Dio inaitja apaapji paniapjida jeerri imotokemjete, Eden lrico, njite lricadaa niini jliaji atsia Lrinaitjanda. ⁹ Jliaji waMinalri Dio icadaa nataoñao jiipai rikjoite njaji jaico irsocape iinaca matsiaperri pacapaca irso njite juiwí perri painjaca. Pada nanakjoite icapiatsa jliaji jaico iemalrio pamoyoa paniapji ricó iacada nacaficao njaji inaiki, njite jliaji jaico icadaacada ianjiikjeti matsiadalri nacó njite maatsídalri naco tsakja. ¹⁰ Apapeco iini imoto Eden rikjoite lripotsietá-carro jliaji paniapji. Njite tsa lritsafacao coatro peco carro ooni. ¹¹ Jliaji papeco ooni naapiyawalre lriipitana Pisón. Icatsa jliaji iamarralriwa pjiomi jiipai Havila ricó, nincawa owirro. ¹² Matsia pedalrica nja owirro lrirricodadalri jiipaica. Niiní tsakja bendelio njite jiipada ónice dalri iipitana tsakja. ¹³ Jliaji yamapeco shopa ooni lriipitana Gihón. Jliaji ooni iamarrawa jiipai Cus dalri ricó iipitana. ¹⁴ Jliaji madalripeco shopa ooni lriipitana Tigris, lriamarrawa jeerri imoto kemjeteo Asiria irso. Jliaji ooni coatro peco shopa lriipitana Eufrates. ¹⁵ Wa-Minalri Dio jipa icadaa jliaji inaiki lrirricoda jliaji paniapji Eden ricoda lridenjé carro niini njite lriwapá-carron tsakja. ¹⁶ Jliaji wa-Minalri Dio icaite lrirso jliaji atsia: ''Nanakjoite pjiomi njaji jaicotjeda paniapji ricoda pitaitaotsa pinjacana maifarrocanaatsa. ¹⁷ Mitsa lrinaca nakjoite jliaji jaico icadaacada ianjíikjeti matsiadalri naco njite maatsídalri naco tsakja corri watsa pitaitá-carroca pinjaca, ima coancaojli cadaotsa pinjaca lrinana nakjoite, ajadalri nocaiteca mayamicaotsa´pjia.'' ¹⁸ Njite wa-Minalri Dio icaite: ''Corritsa matsialrica jliwaca catsa jliaji atsia. Nonaitjaotsa apama lricoawalreo lrikitsindata cádani.'' ¹⁹ Jiipai nakjoite wa-Minalri Dio inaitja nacoana nja maaficalri awacadalricope njite njaji iarracape caolri rico. Njite Dio ideena atsia ikjaolre, atsia lricadaa carro neepitanawa. Coca cadaa lricadaa neepitanawa nacoanaa nja maaficalri caafiperri, icatsa neepitanaca pikeetem. ²⁰ Jliaji inaiki icadaa neepitanao pjiomi njaji maaficalri naapirrape njaji inaiki, neepitanao tsakja naj wipjiarro, njite pjiomi njaji maaficalri awacada lricope. Mitsa lrirso jliaji atsia corri pacapa pada lrikitsindao lricoawalrepe. ²¹ Niini wa-Minalri Dio icada talricai kjaidádalri jiwaca lrinaco jliaji atsia lrimaa carró. Lrimaa cadaana toa, Dio imjeco lri parremapji iicao, Jlitá-carro apjewi lriparremapji nakjoite, njite lridia tsenakja lriita lrimjeeco carrom. ²² Lrirso jliaji atsia iparremapjim wa-Minalri Dio jitandam lrioya, dio inaitja apama inarro njite lrideeno atsia ikjaolre. ²³ Niini lricaiteca jliaji atsia: ''Panaya dekja, icatsa shoaji irsocada iapi noapi shopetsa, njite roipe noipe shopetsa. Roipitanaotsa 'atsiana,' ima Dio jitandacano atsia inakjoite.'' ²⁴ Lrikjaote, jliaji atsia lrirsotsa lrimotoca jlinirri jlidoa iipana ioya, jliofaa carro padatsa lriino iapiya, pada carroenatsa nadada. ²⁵ Matsayan piatsa yamadapena, jliaji atsia njite shoaji lriino tsakja, mitsa corrim capaimani cantjana.

¹ Corri pia pacapa pada maaficalri wa-Minalri Dio inaitjaji aapi icayosho, ianjicada coanca jlitaca cocaca lrioma ishati sho. Lriaco inarro irso: ''¿Aja catja, Dio ifarro injaca nanakjoite nja paniati paniapji ricodá dalri?'' ² Njite shoaji inarro iaco aapi irso: ''Wataitjeni wainjaca nainaca nakjoite nja paniati paniapji ricodá, ³ mitsa lrinaca nakjoite jliaji jaico iemalri paniapji ipamoyoaca lricó, Dio icaite. ''Corriotsa itaita injacani corri tsakja itaita inotacan, ima mayami caotsa jia.'' ⁴ Aapi iaco inarro irso: ''Corriotsa mayami carroca jia. ⁵ Ima Dio ianjíi coancaojli cadaotsa injani, itji imjecoacaotsao njite Dio icayosho caotsa jia, ianjíi watsa matsiadalri nacó njite maatsídalri nacó tsakja.'' ⁶ Njite sho inarro rocapa cádanaco jliaji jaico iinaca matsiacatsa painjacan, matsiadalri icapacanaa, njite jliaji jaico lrirso jliaji lricadaa shopa canjíikeca pja, shopa lriinaca nakjoite roinjá-carro. Njite roa tsakja roinirri ishó roinaidalri, njite icaamitsa lrinjacani. ⁷ Icaamitsa natji imjeecoacacao njite matsayanica nacapaacacawa. Icaamina naococa nashowao iguerapje naita shopa nadada. ⁸ Njite njemi wa-Minalri Dio íno iemajiwa paniapji ricó japeeta cádanaco, niini jliaji atsia njite lriino tsa nadawaacaca Lripjeya napecolrico nja jaicolrima paniapji ricope. ⁹ Wa-Minalri Dio iwana jliaji atsia, lriaco lrirso: ''¿Kjerrena pjia?'' ¹⁰ Njite atsia jiepani, lriaco: ''Njomica piemajicao paniapji ricó njite mtsayan capoa njoa nofió piiwana. Cayoshopa nodawaacawa.'' ¹¹ Njite Dio iaco lrirso: ''¿Cocao icaite pirso matsayanca pjia? ¿Capja pinjaca lriinaca nakjoite jliaji jaico noifarronda pinjaca? ¹² Njite atsia jiepani: ''Shoaji iinarro picadanda nokitsindawa, icatsa shoaji ialrica noshon niini noinjacani.'' ¹³ Wa-Minalri Dio iaco rosho shoaji inarro: ''¿Cocao jliaji pinaitjalri?'' Njite shoepacan shoaji inarro: ''Api icashataca njoa niini noinjacani.'' ¹⁴ Njite wa-Minalri Dio iaco aapi irso: ''Coada pinaitja cayo, padatsa pjia maatsídalrica napecolrico njaji maaficalri nataoñaji, njite napecolrico tsakja nja maaficalri awacada lricope. Piwawa sho watsa pianjiwa njite jiipaidope ricope, icatsaotsa nja pinjalrica caafi cádanaco pjia. ¹⁵ Nocadaotsa icoema waaca carro pjia njite sho inarro, caitsakja njaji pinakjoité perri ronakjoité perri iapiya. Inarro inakjoité dalri icayaonitacaotsa pjiwida naco njite pinakjoité dalri icayaonitacaotsa lri tawirswda nacó.'' ¹⁶ Njite Dio icaite rosho rsoaji inarro irso: ''Nocadaotsa icaiyati jorrédalri pirso cádanacoatsa pienipe; icaiyati ricoatsa pimotoeta nja pienipe. Pioma tjaotsa pianjiica piinirri nacó, mitsa jlia watsa ianjíi pinaco.'' ¹⁷ Adan irso Dio icaite: ''Pjimi capoa rosho sho piino, nite pinja capoa lriinaca nakjoite jliaji jaico nocaiterri pirso wadee pinjacani, maatsidalrica jliaji jiipai pikjaote; pidejiotsa idejikjeti jamiñádalri pitaitá-carroatsa pinjaca caidalritsa caafi cádanacotoa pjia. ¹⁸ Doowirri imotoatsa jiipai naco njite coocoña tsakja pishó, njite poinjacaptsa nja jaicotjeda awacada lricoe. ¹⁹ Tiñapecaotsa piecoa naco kjaida capoa pidenjica pitaitá-carro pinjaca peetje, caidalri catsaotsa pjia atee kjerreca pidia tsenakjao jiipai ricojle, ima jiipai nakjoité dalrica jliaji pidada. Jiipai inakjoite dalrica pjia, niini jiipai tsenakjaotsa pidiawa. ²⁰ Jliaji atsia lriwana lriino roipitana naco Eva ima icapiatsa njadoaca njaji inaiki jalredaoca lricoperri. ²¹ WaMinalri Dio inaitja Adan irso njite lriino irso tsakja natsayaniwa. ²² Njite lriaco jliaji wa-Minalri Dio: ''Panaya jliaji atsia cayo caani wacayosho, lrianjíi matsia dalri naco njite maatsi dalri naco tsakja. Niini panaya, corriotsa wacadaa carroca lripiajletaca lricaapi, jlipá-carro lriinaca jliaji jaico corridalritsa icadaa mayamica pja lrinjácarro, njitentja corrinatsa coancaojlica mayamican.'' ²³ Cairsopa, wa-Minalri Dio imotoetani lrioya jliaji paniapji Eden, lridenji carro, lriapaná-carro jliaji jiipai Dio inaitjalritsa njiten. ²⁴ Majle Ikeena Dio imotoetaca jliaji atsia padaanajle lrioya jliaji paniapji, njite lricadaa anjele jeerri imoto keemajle paniapji Eden rico, njite paita matseeta tiyeeta njite lricabococawa kjerreshecatsan, lridanatá-carro jliaji inipo iacada lriikjaolre jliaji jaicó corridalritsa icadaa mayamica pja.

¹ Njité dalri jliaji atsia lridakitaacawa lriino iapiya, njite keenipeno rsopá-carroena roenipe Caín. Ima rocaaite: ''Nomotoeta noenipe atsia Dio ikitsindatá capoa njoa.'' ² Njite romotoeta roenipe iweerriti Abel. Njite Abel, iwapacaitaca oveja, mitsa Caín iapanacaitacan. ³ Njite apapia jalredaoca Caín idee ofrendao lridenjicalre iinaca nakjoite waMinalri irso. ⁴ Njite cadaana Abel. Llridee padapena maaficalri lriwapaji, nanakjoite njaji iinitacape jiicoca njite neethi njaji maaficalri lriinoji. Njite wa-Minalri lricoadatá matsia Abel njite njaji lridenji ofrenda sho, ⁵ mitsa Caín njite njaji lridenji ofrenda sho corri wa-Minalri icoadatá lripjeeya. Niini kerroaca Caín pekirritsa. Maatsi lricapacana. ⁶ Wa-Minalri iaco caín irso: ''¿Coada kerroa pjia? ¿Coada taniatsa picapacanaa? ⁷ Piajintsa pinaitja cadaa matsia nocoadatentja-na, mitsa pinaitja cadaa maatsi, kerroa-watsa pjia pekirritsa njite lricadaotsa pinaitjaca pimatsicanawa, mitsa pirsotsa pirsota pjiametacani.'' ⁸ Caaco Caín lriwerri Abel irso. Niini a cádanacotoana nadejicawa lrico, Caí jiníco yemawa lriinó-carro lriwerri Abel, njite lriinoni. ⁹ Njite caaco waMinalri Caín irso: ''¿Kjerrenaji piwerri Abel? Njite Caí shepani, lriaco: ''Criin noajíi. ¿Capja njoaca jliaji iwapacada nowerri? ¹⁰ Njite wa-Minalri iaco lrirso: ''¿Cocao jliaji pinaitjalri? Piwerri írrana iwanaca Njoa jiipai rikjoite. ¹¹ Panaya jliaji, Nocadaaca maatsí-dalrica pjia jiipai ricó pima capoa lrimjecoca lrinoma lrirrá-carro piwerri írrana pjiá-capoa íinoni. ¹² Piapana cádanacoatsa jiipai ricó corriotsa paniati itaoñácarroca pirso. Yaají cadatsa Ipitojiwa pjia jalredaoca lrico niini maapana caotsa pjia jalredaoca lrico. ¹³ Caín iaco wa-Minalri irso: ''Aima pja njaji imatsicanaati norsolritsa nodeeca nonacoa naoya njaji norsolrina. ¹⁴ Ajádalrica, Pipeecoca njoa lrioya jliaji jiipai jliadaa jecoapica jliaji, corriotsa notaitá-carroca nocapaca pjia niini nodawaaca-cawa pioya. Ipitoji-cadatsaotsa yajicawa njoa niini maapana caotsa njoa jalredaoca lrico, niini cocacaotsa ioketa njoa lriino caotsa njoa.'' ¹⁵ Wa-Minalri iaco: ''Cocacaotsa iino Caín, siete pia watsa nocadaaca jlirrapitaca lricoadao.'' Icatsa Dio icadaaca najíi-carro coanca Caín nacó, niini coca cadaotsa icapa Caín corriotsa lriinó-carrocani. ¹⁶ Ikena Caín iawa Dio icapacawa piani njite lriá lriofawa Nod jipaite ricó (cairsopaca jliaji yaacoti Nod, Yajícadatsawa macadatsa), jeerri imokemjete Edén irso. ¹⁷ Caín idakitaca lriino iapiya njite keenipeca lrirsono. Romotoeta roenipe iipitanao Enoc. Caín inaitja pacoa yacaalre njite lricadaa lriipitanao lrienipe iipitana shotsa, Enoc. ¹⁸ Enoc irso yeenipe, lriipitana Irad. Njite Irad yeenipeca Mehujael. Mejujael yeenipeca Metusael. Metusael yeenipeca Lamec. ¹⁹ Lamec jita yaamama lrinowa: apama ipitana Ada, njite apama ipitana Zila. ²⁰ Jiico Ada ienipe, lriipitana Jabal. Icapiatsa njanirrica njaji yofacapewa pantiitape lricotsa njite ca-vacán perri. ²¹ Jabal iwerri, Jubal. Icapiatsa njanirrica njaji ikjematacape arpa njite ipjiacape flauta. ²² Njite rsoaji Zila, romotoeta roenipe Tubal Caín, yajícada inaitjaca pjiomitsa bronce sho njite tsípalra sho tsakja. Tubal Caín iwedoa, roipitana Naama. ²³ Lamec iaco lriino irso: Ada Zila, jimi noaco, jimi coanca nocaiteca irso; shaa Lemec ininai. Oopi noino pada inaiki lriyoá capoa njoa, pada yempetitoa lriñáa capoa njoa. ²⁴ Siete piape cada naomaca Caín icoada, setenta siete piape pedaotsa naomaca Lamec icoadawa.'' ²⁵ Adán ipieta tsenakja idakitaca lriino yaapiya, niini romotoetaca padekja roenipe. Rocadaa roipitana Set, ima rocaiteca, ''Dio icadaaca tsenakja pada noenipewa Abel yarrontacao, ima Caín iinopoacani. ²⁶ Set irso pada lrienipe, lricadaa lriipitanawa Enós. Jliawajli pia njaji inaki naa matsiadalri Dio irso njite nonomaca Dio iipitana.

¹ Icatsa jliaji neepitana irrocawa njaji Adán inakjoiteperri. Jliadaa pia jalredaoca Dio inaitja caolri njaji inaiki, Lrinaitjana cayotsaji lricayosho. ² Lrinaitja atsia njite iinarro tsakja. Lricadaa yacoti matsiaperri nanaco njite lriajicana inaikinai, lrinaitja cayamiina-na. ³ Adán irso piakena ciento trenta oonia, lrirso tsenakja pada lrienipe caidalritsa lricayosho, lricadaa lripitanao Set. ⁴ Njite Jiico cayami Set, Adán yofawa jalredaoca lrico ochociento oonia. Njite lrirso pja pia aima lrienipe atsianai njite inaitjepe. ⁵ Adán yofaa pia jalredaoca lrico noveciento trenta oonia padenirri, njite lria mayamini. ⁶ Set irso piakena ciento cinco oonia, jiico lrienipe Enos. ⁷ Jiico cayami Enos, Set yofawa jalredaoca lrico ochociento siete oonia, njite lrirso pja pia aima lrienipe atsianai njite inaitjepe. ⁸ Set yofawa noveciento doce oonia jalredaoca lrico, njite lria mayamini. ⁹ Enos yofa cayami noventa oonia jalredaoca lrico, lrirso lrienipe Cainán. ¹⁰ Lrirso lrienipe Cainán, Enos yofawa jalredaoca lrico ochociento kince oonia jalredaoca lrico. Njite lrirso pja pia aima lrienipe atsianai njite inaitjepe. ¹¹ Lriofawa jalredaoca lrico noveciento cinco oonia, njite lria mayamini. ¹² Cainan irsopiakena setenta oonia, lrirso lrienipe Mahalaleel. ¹³ Lrirso cayami lrienipe Mahalaleel, Cainan yofawa jalredaoca lrico ochociento coarenta oonia jalredaoca lrico. Njite lrirso pja pia aima lrienipe atsianai njite inaitjepe. ¹⁴ Cainann yofawa jalredaoca lrico noveciento die oonia padenirri, njite lriá mayamini. ¹⁵ Mahalaleel irso piakena sesenta cinco oonia, lrirso lrienipe jared. ¹⁶ Lrirso cayami lrienipe Jared, Mahalaleel yofawa jalredaoca lrico ochociento trenta oonia. Njite lrirso pja pia aima lrienipe atsianai njite inaitjepe. ¹⁷ Mahalaleel yofawa jalredaoca lrico ochociento noventa cinco oonia padenirri, njite lria mayamini. ¹⁸ Jared irso piakena ciento sesenta do oonia, lrirso lrienipe Enoc. ¹⁹ Lrirso cayami lrienipe enoc, Jared yofawa jalredaoca lrico ochociento oonia. Njite lrirso pja pia aima lrienipe atsianai njite inaitjepe. ²⁰ Jared yofawa noveciento sesenta do oonia padenirri jalredaoca lrico, njite lria mayamini. ²¹ Enoc irso piakena sesenta cinco oonia jalredaoca lrico, lrirso lrienipe Matusalen. ²² Lrirso cayami lrienipe Matusalen, Enoc inaitja cayoji Dio ioma capirso treciento oonia. Njite lrirso pja pia aima lrienipe atsianai njite inaitjepe. ²³ Enoc iofawa jalredaoca lrico treciento sesenta cinco ooni. ²⁴ Enoc inaitja cayoji Dio ioma capirso, njite lriñaawa jalredaoca ioya, ima Dio ideecani caafita. ²⁵ Matusalen irso cayami ciento ochenta siete oonia, lrirso lrienipe Lamec. ²⁶ Lrirso cayami lrienipe Lamec, Matusalen iofawa jalredaoca lrico seteciento ochenta do oonia. Njite lrirso pja pia aima lrienipe atsianai njite inaitjepe. ²⁷ Matusalen iofawa jalredaoca lrico noveciento sesenta nueve oonia, njite lria mayamini. ²⁸ Lamec irso piakena ciento ochenta do oonia jalredaoca lrico, lrirso pada lrienipe. ²⁹ Njite lricadaa lripitanao Noé, ima lricaiteca lrinaco cayoji: ''Icatsa jliaji icadaalriotsa wawafeetacawa wadejicalre ioya pjiomi njaji wanaitjalri wacaapi sho, njaji warsolritsa wanaitjaca wadeji cádanaco jiipai ricó jliaji wa-Minalri icaitenda inaco maatsi.'' ³⁰ Lamec iofawa quiniento noventa cin oonia lrirso cayami lrienipe Noé. Njite lrirso pja pia aima lrienipe atsianai njite inaitjepe. ³¹ Lamec iofawa seteciento setenta siete oonia jalredaoca lrico padenirri, njite lriá mayamini. ³² Noé irso cayami quiniento oonia jalredaoca lrico, lrirso njaji lrienipe Sem, Cam njite Jafet.

¹ Njite wiá nacojlena njaji inaiki namaimataacawa jalredaoca lrico njite aima jiicoca naitonaipe, ² niini njaji Dio yeenipe nacapa matsiadarropeca njaji atsianai iitonaipe. Njite njetaca naninaiwa, coamperricatsa naoma nanakjoite. ³ Niini Lriaco jliaji wa-Minalri: ''Corriotsa Nocaolrini yofáa carroketsa nainai njaji inaikinai caidalriwetsa, ima iipeti catsana, niini ciento vente oonia catsaotsa naofacawa jalredcaoca lrico.'' ⁴ Inaiki macanipe pia njaji yofalriwa jalredaoca lrico jliawajli pia, njite cayo pia tsakja njaji njapodamperri. Namotoa njaji inaiki macanipe njeta cayami nanainaiwa atsianai iitonaipe njaji Dio yeenipe. Narso pia naapiya neenipe atsianai njite inaitjepe tsakja. Icapiatsa njaji inaiki kjaidaperri, njite caconaperricana oopi. ⁵ Njite wa-Minalri icapa aima-caketsa namatsicanaa njaji inaikinai jalredaoca lricoperri, njite icaamitsa nawaopiakje rico-ca nanaitjaca maatsi caidalritsa. ⁶ Njite wa-Minalri idia iwaopia coadaca lrinaitjaca njaji inaikinai jalredaoca lrico, njite caiwí lriaca Lricaolre ricó. ⁷ Niini lriaco jliaji wa-Minalri: ''Njoatjá-caotsa njaji inaikinai Nonaitjaji jalredaoca ioya, coshoca njaji inaiki, njaji maaficalri macanipe, njaji itsoetaacacapewa jiipai ricó, njite njaji yarrajicapewa eeno yeecoa naco, ima caiwica lriaca nonaco nonaitja capoana.'' ⁸ Mitsa Noé ioketa matsiá-carro wa-Minalri icapaca lrirso. ⁹ Cayo pia jliaji Noé. Pada atsia matsiadalri piaca Jliaji Noé, corrin piatsa coca lrimatsicanaa nainai njaji paana inaiki jliawajli pia. Noé inaitjatsa cayoji Dio yooma capirso. ¹⁰ Madalrida pia njaji Noé yeenipe: Sem, Cam njite Jafet. ¹¹ 1Aima-calretsa pia lrimatsicanaa jliaji jalredaoca Dio ipeyajle, njite aima inaiki maatsiperrim. ¹² Dio icapa corriketsa matsia njaji jalredaoca lricoperri, corriketsa matsiaca nawaopiakje njaji inaiki jalredaoca lrico. ¹³ Dio icaite Noé irso: ''Nocapaca lricoá kena nocadaaca njenaana njaji inaikinai, ima maatsiperri minicatsa njaji jalredaoca lricoperri padeenirri. Ajádalri nowayaketa-caotsana jalredaoca iinaitsa. ¹⁴ Pianaitjaotsa pirsowao apafia lancha macafiani jaico cipre sho. Pinaitjaotsa lritawajlewa jliaji lancha njite piñjetaotsa maini sho lriwawa lrico njite lridajite tsakja. ¹⁵ Cayoatsa pianaitjacani: ciento trenta cinco jliwalripaca, ventido metro njite yamaita pja pacaapi lrinacojle lrimacaiteca, njite trece metro lriyenonca njite yamaita pjaa pacaapi lrinacojle. ¹⁶ Pinaitjaotsa lritapjewa jliaji lancha. Madalricomá-dalriotsa pinaitjaca jliaji lancha. pinaitjaotsa papeco ventana yamaita pacaapi lritapje yapjite njite papeco pantinoma lriparrema naco. ¹⁷ Pjimi norso, kjeyenatsa jalredaoca nocadaacarro jlietacao ooni sho jliaji jalredaoca, nowayakeetá-carro pjiomi njaji caafiperri caolri-sho eeno yapjite-perri. Mayamiotsa pjiomi njaji jalredaoca lricoperri. ¹⁸ Mitsa piapiya Nonaitjacaotsa pada yaacoti. Pjiewaotsa arca lrico, pjia njite njaji pienipe, piino njite njaji pirrinonaipe njeewa tsakjaotsa piinai. ¹⁹ Pjietaotsa lancha lrico yamadape pjiomi naoyawaaca njaji caafiperri, caafi-carrotsaotsa piinai, apana atsiana njite apana iinarrona. ²⁰ Njaji wipjiarro yarracapewa nacoamitsa, njite njaji maaficalri macanipe nacoamitsa, njaji yaacapewa nawawasho jiipai rico nacoamitsa tsakja, yaamanapeotsa nacoamitsa njerraotsa piinai wadeotsa mayamicana. ²¹ Piniwaotsa pjiomi njaji paiñjáji, njiteotsa piwakeetana paferrico, piñjá-carroatsa njite naiñjá-carro tsakja njaji maaficalri.'' ²² Njite Noé inaitja pjiomi njaji Dio inaalri lrinaitjaca Cayotsaji Lrinaa capirso lrinaitjaca.

¹ Wa-Minalri iaco Noé irso: Pjiewenawa lancha lrico njite njaji piipaneta tsakja, ima nocapaca mamatsicanaadalrica pjia Nopeyajle njaacoma ipecolrico njaji inaiki. ² Nanakjoite njaji maaficalri matsiaperri piorrocoetaotsa piinaiwa sietena atsiana njite sietena iinarrona. Njite njaji maaficalri corriperritsa matsiaca, yaamanape tsaotsa piorrocoetaca, atsiana njite iinarrona. ³ Njaji wipjiarro iarrajicape eeno iekjoete naco, piorrocoetaotsa sieteapa atsiapa njite sieteapa inarroapa, manacó-carroatsa njaji nanakjoite-perri jalredaoca lrico. ⁴ Ima siete jalredaoca naco nocaotsa iiyao jiwacawa jiipai nacojle. Iiyaotsani coarenta jalredaoca njite coarenta deepi tsakja. Nowayaketaotsa jiipai lricoperri pjiomi njaji caafiperri nonaitjaji.'' ⁵ Noé inaitja pjiomi njaji Dio inaalri lrinaitjaca. ⁶ Noé irsopiakena seiciento oonia jlieta caojli pia jliaji jalredaoca. ⁷ Noé, njaji lrienipe, Noé iino, lrirrinonaipe njeewawa lancha lrico padenirri ima ooni sheteetaca-na. ⁸ Njaji maaficalri matsiaperri njite njaji maaficalri corriperri matsiacana, njaji wipjiarro, pjiomi njaji yaacapewa nawawa sho jiipai nacojle, ⁹ njerracawa yaamadapewa Noé iinai njeewá-carro lancha lrico, Cayotsa Dio inaa capirso pia Noé inaitjaca. ¹⁰ Niini siete jalredaoca shaapodam, ooni sheeteta kena jliaji jiipai. ¹¹ Seiciento oonia nacó Noé shaawajli, yaamapi kerri naco pawalria iniitacarropi naco, diecisiete jalredaoca naco, jliadatsa jalredaoca-ca pjiomi njaji ooni macapeki jiipai ricope namjecoacawa, njite eeno imjecoacawa tsakjao. ¹² Ikena iiyao iinita jiwacawa jiipai nacojle coarenta jalredaoca njite coarenta deepi. ¹³ Njite jliadatsa jalredaoca Noé njite njaji lrienipe, Noé iino, njaji lrirrinonaipe njeewawa lancha lrico. ¹⁴ Njewawa pacoacatsa nainai njaji maaficalri awacada lricope nacoamitsa, cayo tsakja njaji vaaca teecojle-perri naoyawaaca, caitsakja njaji maaficalri yajicapewa nawawa sho jiipai nacojle, coshoca naoyawaaca, cai tsakja njaji wipjiarro coshoca naoyawaacana, pjiomi njaji wipjiarro teecojleperri naoyawaaca. ¹⁵ Yamadape pjiomi njaji caafiperri caolri sho njerrawa Noé iinai lancaha lrico. ¹⁶ Njaji maaficalri jirralriwa apana atsiana njite apana iinarrona nacoanamtsa njaji maaficalri; Njerrawa cayotsa Dio inaa capirso. Ikena Dio iitaca jliaji pantinoma njeewa cayamiwa. ¹⁷ Coarenta jalredaoca shaapodam jlietawa jliaji jiipai ooni sho, lrimotawa jliaji ooni njite lritamo tsakjawa jliaji lancha jiipai ioya. ¹⁸ Ooni iita pjiomi jiipai, njite lancha itamowa ooni yeecoa naco. ¹⁹ Ooni itaoñawa pekirritsa jiipai naco niini pjiomi njaji jiipana yenomperri eeno yapjiteperri ooni iita pjiomina. ²⁰ Ooni imotawa sei metro pja naicao njaji jiipana yenonperri. ²¹ Pjiomi njaji caafiperri yajicapepiawa jiipai nacojle mayamicana: wipjiarro, vaaca, maaficalri awacada lricoperri, njaji maaficadalridape aimaperri yajicapewa, njite pjiomi njaji inaikinai. ²² Pjiomi njaji caafiperri yofacapepiawa jiipai rico, njaji jirsaacapepia icaolrewa njetaco lrico, mayamina. ²³ Niini pjiomi njaji caafiperri yajicapepiawa jiipai nacojle oopi nawayacawa, inaiki nakjoite njite njaji maaficalri macanipe, pjiomi njaji yajicapewa nawawasho tsakja, njaji yarrajicapewa tsakja. Padeenirri nawayacacawa. Icaamitsa Noé njite njaji lriinaiperri, icaamitsa njaji yomjerri. ²⁴ Ciento cincoenta jalredaoca lrirrocawa jliaji ooni jiipai naco.

¹ Dio icapa Noé irso njite njai maaficalri awacada lricope, nja vaaca lancha lricoperri Noé iinai. Niini Dio icadaa caolri ipjiaca jiipai naco, ikena ooni idiaca yorrocowa. ² Naitacawa njaji ooni tjewacaperri jiipai lricope njite eeno iitacawa niini yami ketsa iiyacani. ³ Tacaatsa ooni imotacalre idiaca yorrocowa jiipai yooya, niini ciento cincoenta jalredaoca iwayacacawa, ooni imaimaca idiá yorrocowa. ⁴ Meeta lriicao jliaji lancha lrinaco jliaji jiipana Ararat-dalri iipitana sietepi keerri naco, diecisiete jalredaoca naco lrinacopitsa keerri-ca. ⁵ Meeta cayao pjatoa jliaji ooni diepi keerri nacojle. Lriinita carrodaa lrico jliaji keerri, nainiita namotocao nápolrico njaji jiipana lrima. ⁶ Niini papia nacojlena, coarenta jalredaoca shaapodam Noé imjeco cayami lancha iventanani. ⁷ Lrimotoeta pemajle lancha ioya apaapa waayolri. jliaji waayolri lriawa njite lridia piatowa atee kjerreca meeta matsia jliaji jiipai corrinatsa lridiawa. ⁸ Njite lripieta lrimotoetaca apaapa tsotsobo lriajíicarromtja meeta kena jliaji jiipai, ⁹ mitsa jliaji tsotsobo corrin lrioketa lriema cawantja, niini lridiacawa tsenakja lancha nacojle ima corricatoa meetaca jliaji jiipai. Noé ipiajleta lricaapi jlikjaolre jlietá-carro tsenakja lancha lriconi. ¹⁰ Lriwapa siete jalredaoca jiyapawa njite lrimotoeta tsenakja jliaji tsotsobo lancha ioya. ¹¹ Lridia lriocawa lrikjaolre jliaji tsotsobo dainomajle. Njite lridee jlitaco naco papje olivo ipje walripjaitoa jlitaca. Ikena Noé yaajíi meetakena jliaji jiipai. ¹² Lriwapa siete jalredaoca jiyapawa njite lrimotoeta tsenakja jliaji tsotsobo lancha ioya. Njite jliaji tsotsobo corrinatsa lridietsawa lriderse. ¹³ Niini seiciento uno oonia lrico, pawalria iniita carripi lrico, lriniita cadaa jliaji kerri, meeta piema matsia jliaji ooni jiipai ioya. lrimeeco lancha itapje lricapá-carro pemajle, njite lricapa meeta kena jliaji jiipai. ¹⁴ Njite yaamapi kerri naco pawalria irso, ventisiete jalredaoca nacó lrinacotsa kerri, meetena matsia jliaji jiipai. ¹⁵ Dio icaite Noé irso: ¹⁶ ''Pimotoenawa arca ioya, pjia, piino, pienipe njite njaji pirrinonaipe. ¹⁷ Pimotoita piinaiwa pjiomi njaji maaficalri tecojleperri naoyawaca, nja tsakja njaji wipjiarro, njaji maaficalri, pjiomi njaji yajicaperri nawawasho jiipai naco, aimacarroatsana, narso carroatsa neenipe namaimatá-carro tsenakjawa jiipai iitadao.'' ¹⁸ Niinina Noé imotowa lancha lrikjoite lrienipe iapiya, lriino njite njaji lrirrinonaipe. ¹⁹ Pjiomi njaji maaficalri caafiperri, pjiomi njaji yajicaperri nawawasho jiipai naco, wiipjiarro, pjiomi njaji yajicapewa jiipai naco, coanperrica naoyawaacana namotowa lancha ioya. ²⁰ Noé inaitja apana altar Dio irso. Njite jlipa padapena maaficalri matsiaperri njite njaji yarracape matsiaperritsa lrimjaitá- carrona Dio irso lrinaco jliaji altar. ²¹ Wa-Minalri yemjia lriitan jliaji lrimjaitalri matsiadalri-catsani, niini lriaco lricaolre ricó: ''Corri-natsaotsa nomatsikeetácarroca jliaji jiipai naikjaote njaji inaiki, maatsidalri ikjaore cadaana jliaji nawaopiakje nayempetica nakjoite tsa. Corrim tsakjaotsa coancaojli-ca nowayakeetá-carroca njaji caafiperri cayoji nonaitja capirso. ²² Niini cádanacoatsa jiipai, corriotsa yaamí carroca naapana cawa napania, naniwacawana, niniotsa japerri, nini tsakjaotsa jamódalri, niiniotsa camoy, oniyaa, nini tsakjaotsa jaalrewerrico njite deepi tsakja.''

¹ Njitena Dio icadaa yaacoti matsiaperri Noé naco njite nanaco njaji lrienipe, Lriaco narso: ''Inaitjaotsa yeenipe aima carroatsa shaa, njite ipakjantá-carroatsa jliaji jiipai tsenakja. ² Nafio watsa nacapaca shaa njaji maaficalri caafiperri jalredaoca lricoperri, cayo tsakja njaji wipiarro, pjiomi njaji yajicaperri nawawasho jiipai naco, pjiomi njaji copje ooni lricoperri. Shaa watsa yají nanaco. ³ Pjiomi njaji cananí perri, njaji caafi perritsa, iñjaodati caotsa irsona. Cayoji nocadaa capirsoena yají-carro nanaco njaji jaico, cayo tsakja nocadaaca irso pjiomi njaji. ⁴ Mitsa corriotsa itaita iñjaca njaji maaficalri irsocapetoa nadada icafica, irranatica jliaji nadada icafica nadada lrico cádanacotoani. ⁵ Mitsa lrinaco jliaji irrana, jliaji caafi-dalri inaco-dalri, Nomjeniotsa lricoadawa. Maaficalri cadaa iino pada inaiki, noinoatsa lricoadawa, pada atsia iino cadaa pada inaiki, Nomjeniotsa lricoadawa. ⁶ Coandalricadaa iino pada inaiki lrima capoa lripeecoca lriirrana pjiomi, pada atsia ima tsakjaotsa lripeecoca lriirrana mayami carroni, ima Dio inaitjaca jliaji atsia Lricayosho carroni. ⁷ Njite shaa, inaitja yenipeo aima-carro shaa, ipocotá-carroatsa njite ipakjantá-carro jliaji jiipai.'' ⁸ Njite Dio icaite Noé irso njite narso njaji lrienipe cayoji: ⁹ ''Jimi matsia Norso. Nonaotjacaotsa pada yaacoti piinai njite nainai njaji pjiapodamperrina, ¹⁰ njite nainai njaji maaficalri piinaiperri, wipjiarro iinai, nainai nja vaaca, pjiomi nainai njaji maaficalri jalredaoca lricoperri, pjiomi njaji imotolriwa lancha lrikjoite, pjiomi njaji caafi perri jalredaoca lrico. ¹¹ Nonaitja cayami irso njaji yaacoti, nonaitja yaacoti iinai cayoji, corrinatsaotsa coancaojlica nopieta nowayaketaca njaji caafiperri jalredaoca lricoperri ooni iwapoa sho.'' ¹² Dio yaaco cayoji: ''Icatsa jlinaanaca jliaji yaacoti nonaitjalri ikjaote iapiya, njite naapiya njaji maaficalri inaiperri, naají-carro njaji walricomanai: ¹³ Nocadaaca nojewiate iyadaoca naco, icatsa jlinaanaca jliaji yaacoti nonaitjalri jalredaoca lricoperri iapiya. ¹⁴ Niini Nocadaa cádanacoatsa iyadaoca jipai iicao njite pacapaotsa jliaji jewia iyadaoca nacó, ¹⁵ niniotsa Nowadaotsa noacoami nonaitjalri iinai njite pjiomi njaji caafiperri. Corrinatsaotsa ooni imotá-carroca lriwayaketá-carro njaji jalredaoca lricoperri. ¹⁶ Jewia irroatsa iyadaoca naco, niniotsa Nocapani, njiteotsa Nowaadaotsa jliaji yaacoti pikeetem-dalri Nonaitjalri naapiya pjiomi njaji caafiperri jalredaoca lricoperri.'' ¹⁷ Njite Dio iaco Noé irso: ''Icatsa jlinaanaca jliaji yaacoti Nonaitjalri naapiya pjiomi njaji caafiperri jalredaoca lricoperri.'' ¹⁸ Njaji Noé yeenipe imotolriwa lancha lrikjoite: Sem, Cam njite Jafet. Cam yeenipeca Canaán. ¹⁹ Icatsa njaji madalridade Noé yenipe, njite nanakjoitetsa napakjanta njaji inaiki jalredaoca lrico. ²⁰ Noé inita yapanaca, nini lrinaitjaca paapjio ovapji. ²¹ Noé irra jaico tjedaa yaana niini lridewanaca. Njite jliwa lriorsoawa matsayantsa lriipanapoco lrico. ²² Niini Cam, Canaán jinirri, lricapa matsayanca jlinirri niini lricaiteca narso njaji lripjenai pemajle perri yemawa. ²³ Niini Sem lriwerri Jafet yaapiya njepa pamaca pajleti njite nacadaa nanapa pocoda nacó, naawa njanirri ikjaolre nadajite sho yamadape naitá-carro njanirri idaki matsayan-dalri, njite corrin nacapa njanirri ikjaolre, teecojletsa nacapa lrioya. Corrim nacapa matsayanca njanirri. ²⁴ Caafi cádanacoena Noé lridewanakje ioya, lriaji jliaji lrirri werriti inaitjalri. ²⁵ Niini lriaco: ''Maatsí-dalrica jliaji Canaán. Lrikitsiñape irsoperi, irsoperri caotsana.'' ²⁶ Lricaite tsakja: ''Njite noa matsiadalri wa-Minalri irso, Sem iDiote irso, njite lrirsodalricaotsa jliaji Canaán. ²⁷ Dio icadaotsa macaité-carro pja jlipaite jliaji Jafet naofá-carro matsiatsawa Sem iinai. Njite lrirsodalricaotsa jliaji Canaán." ²⁸ Jlieta cayamiwa jliaji ialredaoca ooni sho, Noé yofawa treciento cincoenta oonia jalredaoca lrico. ²⁹ Noveciento cincoenta oonia padenirri Noé yofacawa jalredaoca lrico, njite mayamini.

¹ Icapiatsa njaji Noé yeenipe inakjoité-perrim, njaji Sem, Cam njite Jafet. Narso pia neenipe jlieta cayami pia jliaji jalredaoca. ² Icapiatsa njaji Jafet yeenipe, Magog, Madai, Javán, Tubal, Mesec njite Tiras. ³ Njaji Gomer yeenipe, Askemaz, Rifat njite Togarmá. ⁴ Njaji Javán yeenipe, Elisa, Tarsis, Quitim njite Dodanim. ⁵ Nanakjoite njaji inaiki, njeena naoyawaaca ooni yaalrapi nakjoite njepaite nacojle, nacoamitsa narsoca naaco teecojlepe naoyawaaca, coanca naapaneta njite naofacawa lrico aimasho. ⁶ Njaji Cam yeenipe, Cus, Mizraim, Fut njite Canaán. ⁷ Njaji Cus yeenipe, Seba, Havila, Sabta, Raama njite Sabteca. Njaji Raama yeenipe, Seba njite Dedán. ⁸ Cus yeenipeca Nimrod, icapiatsa jliaji iinitacada kjaideteca jalredaoca lrico. ⁹ Yajicada pia iwinitaca Dio ipeyajle. Niini lricaiteca jliaji yaacoti: ''Corrim pacapa pada iwinitacada kjaidete Dio ipeyajle, cayoji Nimrod sho.'' ¹⁰ Njaji yacaalre caconaperri lritalricanaca lrico pia icatsa Babel, Erec, Acab njite Calme, jiipai Sinar lrico. ¹¹ Sinar lrikjoite lriawa Asiria lricojle njite lrinaitja njaji yacaalre Nínive, Rehobot, Ir, Cala, ¹² njite Rsén, jliaji yacaalre Nínive ioyawaaca Cala iapiya. Pacoa yacaalre macacoedalri. ¹³ Mizraim, icapiatsa njanirrica njaji ludimitanai, anamitanai, lehabitanai, naftuhimitanai, ¹⁴ patrusimitanai, casluhimitanai (namotolri njiteo njaji filisteonai) njite caftorimitanai. ¹⁵ Canaán yeenipeca Sidón, lrirri pjerriti, lrinacojledatsa Het, ¹⁶ njite njaji jebuseonai, amorreonai, gereseonai, ¹⁷ heveonai, araceonai, sineonai, ¹⁸ arvadeonai, zemareonai, njite njaji hamateonai. Njite naapaneta njaji cananeonai napocotawa naoyawaaca. ¹⁹ Icapiatsa njepaite jinaa yocacawa njaji cananeonai, Sidón nakjoite njite Gerar ikjaolre, teeco Gaza lricojle, Sodoma, Gomorra Adma njite Zeboim ikjaolre, teeco lriocawa Lasa lricojle. ²⁰ Icatsa Cam yeenipenaica njaji, naapaneta, teecojlepe naaco naoyawaaca njepaite rico, nayacalre ricó tsakja. ²¹ Sem irso tsakja lrienipe, Jafet ipjerri. Icapia tsakja naferrimca njaji inaiki Heber lricoperri. ²² Njaji Sem yeenipe, Elam, Asur, Arfaxad, Lud njite Aram. ²³ Njaji Aram yeenipe, Uz, Hul, Geter njite Mas. ²⁴ Arfaxad yeenipeca Sela nite Sela yenipeca Heber. ²⁵ Heber irsopia yamada lrienipe. Pelag jliaji aape, ima jliwajli pia njaji inaiki njeenaca naoyawacana. Njite lriwerri Joctán. ²⁶ Njite Joctán yeenipeca Almodad, Selef, Hazar Mavet, Jera, ²⁷ Adoram, Uzal, Dicla, ²⁸ Obal, Abimael, Seba, ²⁹ Ofir, Havila njite Jobab. Icapiatsa pjiomi njaji Joctán yeenipe. ³⁰ Njepaite initawa Mesa nakjoite Sefar nacojle, jliaji awacada jeerri imotokema nakjoite. ³¹ Icapiatsa Sem yenipenaica, naapaneta naco, narso naaco nacoanam, coanca njepaite naco njite nayacalre naofacawa papocoa. ³² Icapiatsa njaji Noé yeenipe iipaneta inakjoitéperri, coanca naferrinaipe naco, nayacalre naco tsakja. Naoshete piena njenawa njaji inaiki aimadan njite napocotawa pjiomi jalredaoca lrico jlieta cayamiwa.

¹ Jliawajli pia, pjiomi njaji inaiki jalredaoca lricoperri narsoca padatsa naaco, jliaminitsa yaacotica. ² Naacayawa jeerri imotokema nacojle, naoketa pacoa jiipai pacoacaita cawa Sinar lrico njite icatsa naofacawa niini. ³ Naaco narsowaaca: ''Warsa wanaitja torrope-dape njite wamjaitaotsana matsia.'' Narso pia torropedape namjaitampe jiipada ioya, njite maini caalri tsitamperri ioya. ⁴ Naaco: ''Warsa wanaitja wayacalrewa njite aapana panti shoni yenondalri lripolrico yocaotsawa eenolricojle, wacadaa carroatsa caconaperrica weepitana warsowaotsa. Corri cadaotsa wanaitjani icaaminaotsa wapocotacawa pjiomi jalredaoca lrico. ⁵ Niini Dio iorroco icapa jliaji yacaalre nanaitjalri njite jliaji panti shoni yenondalri njaji Adán idakenai. ⁶ Niini wa-Minalri icaite cayoji: Papocotsa njaji inaiki aimadan njite padatsa jliaji naaco, njite opina nainita nadejica. Mikjapantsa jliaji naomalri nanaitjaca, corriotsa nataitá-carroca. ⁷ Warsa waorroco naikjaolre wamanalrietá-carro naoya naaco, niniotsa corriotsa najíi carroca njemica narsowaaca.'' ⁸ Niini Dio icadaa napocotacawa njaji inaiki pjiomi jalredaoca lrico njite yamicana nadejica jliaji yacaalre. ⁹ Njite nacadaa lriipitanawa Babel, ima Dio imanalrietaca naaco niini njite Dio icadaa napocotacawa njitetsa pjiomi jalredaoca lricojle. ¹⁰ Icatsa njaji Sem inakjoite perrica. Sem irso piakena cien oonia lrirsopia lrienipe Arfaxad, yamawalria jlieta cayamiwa jliaji jalredaoca. ¹¹ Lrirso cayami lrienipe Arfaxad, Sem yofawa quiniento oonia jalredaoca lrico. Njite lrirso pja pia lrienipe atsianai njite inaitjepe tsakja. ¹² Arfaxad irsopiakena trenta cinco oonia, lrirso lrienipe Sala. ¹³ Lrirso cayami lrienipe Sala, Arfaxad yofawa coatrociento tre oonia jalredaoca lrico. Njite lrirso pja pia lrienipe atsianai njite inaitjepe tsakja. ¹⁴ Sala irso piakena trenta oonia, lrirso lrienipe Heber. ¹⁵ Sala irso cayami lrienipe Heber, lriofawa coatrociento tre oonia jalredaoca lrico. Njite lrirso pja pia lrienipe atsianai njite inaitjepe tsakja. ¹⁶ Heber irso piakena trenta coatro oonia, lrirso lrienipe Peleg. ¹⁷ Heber irso cayami lrienipe Peleg lriofawa coatrociento trenta oonia jalredaoca lrico. Njite lrirso pja pia lrienipe atsianai njite inaitjepe tsakja. ¹⁸ Peleg irso piakena trenta oonia, lrirso lrienipe Reu. ¹⁹ Peleg irso cayami lrienipe reu, lriofawa dociento noeve oonia jalredaoca lrico. Njite lrirso pja pia lrienipe atsianai njite inaitjepe tsakja. ²⁰ Reu irso piakena trentado oonia, lrirso pia lrienipe Serug. ²¹ Reu irso cayami lrienipe Serug, lriofawa dociento siete oonia jalredaoca lrico. Njite lrirso pja pia lrienipe atsianai njite inaitjepe tsakja. ²² Serug irso piakena trenta oonia, lrirsopia lrienipe Nacor. ²³ Serug irso cayami lrienipe Naco, lriofawa dociento oonia jalredaoca lrico. Njite lrirso pja pia lrienipe atsianai njite inaitjepe tsakja. ²⁴ Nacor irso piakena ventenoeve oonia, lrirso pia lrienipe Taré. ²⁵ Nacor irso cayami lrienipe Taré, lriofawa ciento diecinoeve oonia jalredaoca lrico. Njite lrirso pja pia lrienipe atsianai njite inaitjepe tsakja. ²⁶ Taré irso piakena setenta oonia, lriso lrienipe Abram, Nacor njite Haram. ²⁷ Njaji Taré inakjoite perrim. taré yeenipeca Abram, Nacor njite Harán; njite Harán yeenipeca Lot. ²⁸ Mayami Harán jlinirri Taré irsotsa, jlipaite ricó jiico-carromtsani, Ur lrico Caldeonai lricoda. ²⁹ Abram njite Nacor njeta naninaiwa. Abram iino iipitana Sarai, njite Nacor iino ipitana Milca, apama Harán iito. Harán pia Milca njite Isaca jinirri. ³⁰ Rsoaji Sarai, corri-darro piatsa itaita keenipecano. ³¹ Taré jipa idee lrirri Abram, lridakerri Lot, Harán irrim, njite lrirrino Sarai, Abram iino naacarro Ur lrikjoite Caldeonai jipaite, naocá-carroa Canaán jipaite lricojle. Mitsa Harán jipaite nacojletsa naocawa, icatsa naofacawa niini. ³² Taré yofawa jalredaoca lrico dociento cinco oonia, lria mayamini.

¹ Njite Dio icaiteca Abram irso cayoji: ''Warsa pimotowa piyacalre rikjoite, pikitsiñape ioya, pjinirri iipaneta ioya, piá-carro lrinacojle jliaji jiipai nocañjatalriotsa pirso. ² Ima Nocadacaotsa pacoa yacaalre macacoe njaji pinakjoite perri, Nonaitjaotsa matsia pirso, Nocadaotsa caconaadalrica jliaji piipitana, njite matsia caotsa njaji apana inakinai pinakjoite. ³ Nonaitjaotsa matsia lrirso jliaji inaitjalri pirso matsia, mitsa maatsiotsa nonaitjaca lrirso jliaji inaitjalri pirso maatsi. Matsia watsa pjiomi naapaneta njaji inaiki jalredaoca lricoperri, pikjaote. ⁴ Abram jiepa jliaji Dio icaiterri lrirso lrinaitjá-carro, nini lriawa njiteo lriwerri irri Lot iapiya. Abram irso pia setenta cinco oonia lrimoto caojli lriawa Harán jipaite ioya. ⁵ Abram jipa idee lriino Sarai, lripjerri irri Lot, pjiomi njaji lrirsompe lriwaketaji, njaji lrirsoperri Harán lrico. Namoto njiteo naa-carro Canaán lricojle njite naocawa jiipai Canaán lrico. ⁶ Abram jiyapawa Siquem jipaite lrico lriácarro nirse, jaico lrima Moré lricojle. Jliawajli pia njaji cananeonai naofawa lriricoda jliaji jiipai. ⁷ Wa-Minalri icañjataacawa Abram irso, njite lriaco lrirso: ''Pidakenai irso watsa nocadaotsa jliaji jiipai.'' Njite Abram iwakeeta jiipada niini apána altar Dio irso, ima ninica lricapacani. ⁸ Njité-dalri lriawa jiipana lrima cawa lricojle jeerri imotokema Betel irso, lriocacawa lricotoa lriofawa, jeerri jiewa kema jliaji Betel njite jeerri jiewacawa jliaji Hai, Abram iofawa pamoyoá narso. Abram iwaketa jiipada nirse lrinaitjá-carro altar Dio irso njite lriá matsiadalri wa-Minalri irso niini. ⁹ Njité-dalri lriawa lripeyajle Neguev ikjaolre. ¹⁰ Aima pia maawitacai jalredaoca lrico, Niini Abram iawa Egipto lricojle lriofá-carroto nirse ima pekirridalri piaca jliaji maawitacai jalredaoca lrico. ¹¹ Njite tsomi cádanaco njeeá-carro Egipto lricojle, abram iaco lriino Sara irso: ''Noajindatsa iinarro matsiadarroca pjia. ¹² Nacapaotsa pjia njaji egipcionai njite natatjaotsa: ''Capja piinoca rsoaji, niniotsa nainoca njoa pikjaote, mitsa corriotsa nainó carroca pjia. ¹³ Nini picaiteotsa nowedoaca pjia, matsiá-carroatsa njoa pima, niniotsa corriotsa nainó carroca njoa matsiá capoa pinaitjaca norso.'' ¹⁴ Niini Abram sheewa cádanacoenawa Egipto lrico, njaji egipcionai nacapa matsiadarroca rsoaji Sarai. ¹⁵ Njaji Faraó yeenipenaipe nacapano, njite nacaite matsia ronaco Faraón ipeyajle, njite nadeeno Faraón iipana lricojle. ¹⁶ Faraón icoadata ta matsia Abram Sarai ikjaote, lriá lrirso oveja, buey, borro atsiana njite iinarrona, camello njite lria tsakja lrirso lrirsoperri atsianai njite inaitjepe. ¹⁷ Njite wa-Minalri jirrapiteta Faraón njite njaji lriipaneta tsakja taacapa sho Sarai ikjaote, Abram iino. ¹⁸ Faraón iwana Abram lrikjaolrewa, njite lriaco lrirso: ''¿Coada pinaitja cayoji pinaitja capirso? ¿Coada corrin picaite norso piinoca rsoaji ¹⁹ ¿Coada picaite norso piwedoa catsano, pima carrotsa njotacano noinowano? Arroena rsoaji piino. Pjitano njite piawa ajaiteji.'' ²⁰ Njite Faraón icaite narso njaji lrirsoperri, njitena njaa nameenaca Abram lriá-carro naoya, lriino njite pjiomi njaji lrirsompe.

¹ Abram yaawa Egipto lrikjoite Neguev lricojle, jlia, lriino, pjiomi njaji lrirsompe. Njite Lot yaa tsakja nainai. ² Njite Abram, canaanidalri cani maaficalri sho, palraata sho njite owirro sho tsakja. ³ lria pajawa Neguel lrikjoite Betel ikjaolre, lriofa carrom piatoa oopi, Betel yooya-waaca Hai iapiya. ⁴ Abram iawa lrikjaolre jliaji altar lrinaitjanda oopi. Icatsa lritatjaca Dio iinai niini. ⁵ Njite Lot, yaacadawa jlinirri ipjerri Abram iinai lrirso tsaja aima lriipirra oveja, vaaca njite lrirsoperri. ⁶ Aima capoa njaji narsompe yamadape, jliaji jiipai naocalri toa naofaa niini corrin lricoaca narso naofá-carro ninio yamadapenatjawa. ⁷ Njite njaji iwapacape abram iipirra njite njaji iwapacape Lota iyaape, nainoaca manawa. Njite njaji cananeonai, fereseonai icapiatsa naofacawa lri-ricoda jiipai-ca jliawajli. ⁸ Njite abram iaco Lot irso: ''Corrin nooma maatsica fáa waapiyawaca, corrin tsakja njaji iwapacape waapirra naapiwaca; ima fawaaca catsa jliaji. ⁹ Picapa coanca lriacawa jliaji jiipai pipeeyajle. Warsa feena waoyawaaca. Piá cadaawa inarroemajle, noá watsa pioya atsialriemajle, mitsa piá cadaawa atsialriemajle, noawatsa pioya inarroemajle.' ¹⁰ Ikena Lot jireeta icapa pjiomi lriwaida nacojle, njite lricapa jliaji Jordán inomapiana pacoaca cawa jiipai, lrirsoca aima ooni njite lriocawa Zor nacojle, cayo pacapacani wa-Minalri imatsietanda sho, egipt jipaitena sho. Cayo pia pacapacani lripjeya piatoa wa-Minalri ipeecoca Sodoma njite Gomorra tsakja. ¹¹ Ikena Lot iacawa Jordán inomapiana nacojle pacoaca cawa jiipai pjiomi, jeerri inotokemjeteo. Cayotsa njeenacawa naoyawaaca njaji padpaneeta piatsa. ¹² Abram yofawa Canaán jipaite ricó, njite Lot iofawa napecolrico njaji yacaalre pacoaca-cawa lrico jiipai. Lrinaitja lriipanao tsoomi Sodoma ioya. ¹³ Inaiki maatsí-perri cadana pjiomi njaji Sodoma-perri Dio ipeyajle. ¹⁴ Wa-Minalri iaco Abram irso Lot shena cayaminawa lrioya: ''Icatsa ajaiteji piemalritsa niini, jeerri imotokemajle, jliewa kemajle, atsialriema nacó, inarroema naco jeerri irso. ¹⁵ Pjiomi jliaji jiipai picapalri, nocadaa caotsa pirsoni njite narso njaji pjiapodamperri caidalriwetsa.'' ¹⁶ Njite Nocadaotsa aimaca njaji pidakeenai cayoji jiipai imaimaca sho, ima coca cadaa itaita iniweetaca jiipai imaimaca, nataita peda tsakja naniweetaca njaji pidakeenai. ¹⁷ Pjinico piemaji, picapá-carro coshoca jliwalripaca, njite coshoca lrimacaiteca, ima noacaotsa pirsoni.'' ¹⁸ Ikena Abram idee tsenakja njaji lripanapoco lriá-carroenakja lriofawa tsoomi jaico lrima cawa lricojle Mamre jipaite lrico, Hebrón lricoda. Icatsa lrinaitjaca apana altar niini Dio irso.

¹ Njite papia nacojlena Amrafel shawajli, Sinar italricanaa; Arioc, Elasar italricanaa; Quedorlaomer, Elam italricanaa; njite Tidal, Goyin italricanaa, ² njaji talricanaatinai nanaitja oowi Bera ikjoete, Sodoma italricanaa; Birsa, Gomorra italricanaa; Sinab, Adma italricanaa; Seneber, Zeboim italricanaa, njite Bela italricanaa ikjoete (najirri tsakja Zoar). ³ Njaji cinco talricanaatinai tjewacajle perri iipitana, nawacaacawa pacoacaita cawa lrico jiipai Sinar lrico, (najirri tsakja Manoa Piwadalri). ⁴ Nadeji pia doce walria Quedorlaomer irso, mitsa trece walria lricoena neemana lrikjoete. ⁵ Nini catorce walria nacoena, jliaji Quedolaomer njite njaji talricanaatinai lrinaiperri, náno naderse nainó-carro njaji refaianai Astarot Karmain lrico, zuzitanai Ham lrico, emitanai Save Quiriataim lrico, ⁶ njite njaji horeonai jiipana Seir ipamoyoaca lricoperri, njite lriocawa Parán lrico, tsomirri jalrapocolri ioya. ⁷ Njitedalri nadiawa njite naocawa En Mispat lricojle (najirri tsakja Cades). Naino pjiomi njaji inaiki naofacawa lrico njaji amalecitanai, njaji amorreonai yofacapepiawa Hazezon Tamar lrico. ⁸ Niini njaji Sodoma italricanaa, Gomorra italricanaa, Adma italricanaa, Zeboim italricanaa njite Bela italricanaa namatsietaacawa napia nanaitja-carro oowi ⁹ nanaitjá-carro oowi Quedorlaomer, Elam italricanaa ikjoete, Tidal, Goyin italricanaa ikjoete, Amrafel, Sinar italricanaa ikjoete; Arioc, Elasar italricanaa; coatro poco talricanaatinai cinco poco talricanaatinai ijoete. ¹⁰ Njit jliaji pacoacá-dalri Sidim lricoda, aima piaca lrirsoca talritadape pakjamperri mainiasho, nini napito cadanatja njaji talricanaatinai Sodoma njite Gomorra lricope, njeeco njewao niini. Njite njaji paana caafiperri toa napitowa awacada nacojle. ¹¹ Niini njaji nacoema njepa pjiomi nanaanipem njaji Sodoma njite Gomorra lricoperri, nadee pjiomi naijaope naa carroena njiteo. ¹² Naa carroena njiteo, njepa nadee Lot, Abram iperri irri, yofacadawa Sodoma lrico . Nadee tsakja pjiomi njaji lrirsope. ¹³ Mitsa pada ipito naoya niini lricaiteca Abram irso, hebreo tairri. Abram yofa piacawa jaico lrima lrico Mamre iyaada, amorreo-tairri, Escol njite Aner ikitsin; njite pjiomi njaji Abram inaiperricana. ¹⁴ Abram jimi cádanaco lricoema ideeca jliaji lrikitsinda, ikena lriinaica njaji lrinaikite pjiomi, treciento dieciocho atsianai yajicape inoacacawa oowi ricó, pjiomi jiicó-perri lriipana lrico. Njite lriaca njaapodam Dan nacojle. ¹⁵ Abram sheneta matsia papocope njaji lrinaikite naa-carro nainona deepi ricó, njite-dalri lripinetana Hoba naojle, inarroemajle Damasco irso. ¹⁶ Cayotsa Abram idietaca lrikitsinda Lot, lrinaani, lriyaarroaji, njaji inaitjepe njite pjiomi nja paana inaiki tsakja. ¹⁷ Abram idiawa lriino jliameta cayami Quedorlaomer njite njaji talricanaatinai lriinaiperri. Sodoma italricanaa iawa lrioketaacá-carro Abam iinai pacoacaita cawa lrico jiipai Save-dalri (najirri tsakja Pacoca-dalri Jiipai Talricanaati iyada). ¹⁸ Melquisedec, Salem italricanaa, idee peetje njite jaicotjedaa yaana. Dio yeenondalri pjaaca pjiomi ioya isacerdoten piaca jliaji Melquisedec. ¹⁹ Lricaite yacoti matsiaperri Abram irso, lriaco: ''Matsiadalrica pjia Abram lrikjaote jliaji Dio Yenondalri pjaa pjiomi ioya, Inaitjacada eeno njite jiipai tsakja. ²⁰ Matsiadalrica Jliaji Dio Yenondalri pjaa pjiomi ioya, Jliaji icadaalri picaapi rico njaji picoemanai.'' Ikena Abram iaca diezmoa nanakjoite njaji jlitaji naoya pjiomi. ²¹ Lriaco jliaji Sodoma italricanaa Abram irso: ''Picadaa norso njaji inaiki njite njaji inaaniti pjipena pirsowao.'' ²² Mitsa Abram shepani: ''Nocaitjenina yaacoti ajádalrisho no-Minalri Dio irso, jliaji nenonrse-dalri pjaa pjiomi ioya, Jliaji Inaitjacada eeno njite jalredaoca tsakja, ²³ nocaitecawa corricaotsa njoapa pkjaa tawalrekja, pakja tsapato ipapi, corri pada piyaarro nakjoite, watsentja picaiteca nonaco: ''Njoa jliaji icadaa cayaarroca Abram.'' ²⁴ Corriotsa coca-cá njopalriotsa, icaamitsaotsa njaji iñjaodati naijalrina njaji noyempetite. Picadaa Aner, Escol, njite Mamre jipaca nayadawa.''

¹ Njeyapa cayaminawa pjiomi Dio icaitenialre iocawa Abran ikjaolre jlitapon ricó capisho, lriaco cayoji: ''¡Mafiotsawa, Abram! Njoatsa jliaji pidanaita, icaamitsa njoa itaitacada iaca pirso pjiomi njaji canacaiperri pirso.'' ² Abram shepani: ''No-Minalri, ¿Cocaotsa jliaji pialriotsa norso, ime meenipe catoa njoa, njite Elieze, Damasco lricoda watsa irso nocadaa pjiomi njaji norsolri?'' ³ Abram iaco pja Dio irso: ''Ima corricatoa pia noenipewa, picapa lrirso jliaji iwapacada noopana, icatsa jliaji nomacaodaca irso nonaani.'' ⁴ Jimi coanca wa-Minalri iaco Abram irso: ''Corriotsa jliá carroca jipacadacaotsa njaji pirsompe; jliwatsa jipana jliaji pienipi catsa inocada pidaki nakjoite.'' ⁵ Njite Lrideeni padanajle panti ioya, lriaco lrirso: ''Pjirreta piocapa eeno ikjaolre, piniweeta njaji jiwirsida, picapatja pitaita cadaa piniweetacana. Cayoatsa namaimaca njaji inaiki pinakjoit-eperri.'' ⁶ Abram sheepa jliaji Dio icaiterri lrirso, niini Dio icapa matsiadalrica jliaji Abram. ⁷ Wa-Minalri iaco Abram irso: ''Njoatsa jliaji jitalri pjia Ur caldeonai jipaite ioshete, noácarro pirso jliaji jiipai piyadawa.'' ⁸ Abram iaco wa-Minalri irso: ''No-Minalri, ¿Coajiotsa notaita noajica njoa catsa yofawa anjí? ⁹ Njite Dio iaco Abram irso: ''Pidee norso apana vaaca pamoyoene irsocada madalrida oonia, njite apana carnero irsocada madalrida ooni tsakja, apaapa tsootsobo njite apaapa lrienipe.'' ¹⁰ Lridee pjiomi njaji lriomalri, njite lriyoana yamawajlepena, njite lriorsoetana nacoemawaca naco, mitsa corrin lricadowa nja wipjiarro. ¹¹ Nano mana njaji waayolri nanaco njaji maaficalri mayamperri, mitsa Abram ifieta mana naoya. ¹² Dainoma nakjoite pjatoa, talricai matsinjaadalri jipaca Abram niini lrimaaca, mitsa lrimaa cádanaco cadaoca maatsinádalri jiwa lrinaco. ¹³ Niini Dio icaite Abram irso cayoji: ''Taniaperri caotsa njaji pinakjoite perri naofa cádanacoatsa paana jipaite lricotsa, ima njerrapiteeta caotsana ima narsoperri caotsana coatrociento oonia. ¹⁴ Njoa watsa jirrapiteeta njaji inaiki jirrapiteetalriotsana, njite naawatsa njiteo nayaaroaji pekirrídalri sho. ¹⁵ Mitsa pjia, corrinatsaotsa picapá carroca ima pimaodaca kenaotsa nainai njaji pjinirrinaipe yalrinawa pipjeya. Pekirri-mitsaotsa mayamica pjia. ¹⁶ Njaa watsa idiawa ajerreji njaji coatro coma nacoperri, ima corricatoa lriwayacawa njaji amorreonai imatsicanaa.'' ¹⁷ Njite deepi kena pjiomi, paapi palangana kerradalri, keetakane njite apana camarraita kerradalri jiyapawa nanaco njaji maaficalri lricadowaji. ¹⁸ Jliadaa pia Dio inaitjaca iacoti Abram iinai, lriaco lrirso cayoji: ''Nocadaca jliaji jiipai narso njaji pinakjoite perri panayaperri, lrinakjoite jliaji ooni Egipto dalri, teeco ooni macapeki Eufrate nacojle. ¹⁹ Njepaite njaji quenitanai, cenezeonai, cadmoneonai, ²⁰ hititanai, fereseonai, refaianai, ²¹ amorreonai, cananeonai, gergeseonai njite jebuseonai.''

¹ Njite Sarai, Abram iino, corrin keenipecano lrirso, mitsa rorsopiaca apama rorsodarro, Egipto tadoa, roipitana Agar. ² Niini Sarai iaco Abram irso: ''Picapa coanca corrica wa-Minalri icadaa pjakena noenipeo. Panaya, warsaotsa piá pimaa roinai rsoaji norsodarro. Wadetsantja ronakjoiteca norsoatsa noenipe.'' Abram inaitja jliaji Sarai inaalri lrinaitjaca. ³ Narso cayami piena die walria naofacawa jiipai Canaán lrico Sarai, Abram iino, rocadaa lriinoano rsoaji rorsodarro Agar, Egipto tadoa. ⁴ Abram imaa Agar iapiya njite kjeyatsa keenipeno lrirso. Agar icapa cádanaco keenipecano Abram irso, maatsi rocapaca rominarro irso. ⁵ Lrikjaotena Sarai iaco Abram irso: ''Maatsica rocapaca norso pikjaote. Nocadaa norsodarro piinoano njite rocapa cádanaco keenipecano pirso, maatsi-nakja rocapaca norso. Dio watsa icaite waacanoa lrikjaote, pjiá njite njoá.'' ⁶ Mitsa Abram iaco Sarai irso: ''Picapakje, pjiaca yajíi pirsodarro nacó, niini pinaitja roapiya coancatsa pioma pinatjaca.'' Niinina maatsi Sarai idejica rorso niiní Agar ipiticawa rooya. ⁷ Njite jliaji wa-Minalri iageleni lrioketano tsomi lrioya jliaji ooni jalraamidalri jalrapocolri ricó, jliaji ooni jalraamidalri pjeyapalri paacadanacoa Shur lricojle. ⁸ Njite lriaco rorso: ''Agar, Sarai irsodarro, ¿Kjaite pino, njite kjrreotsa piawa?'' Niini roaco rsoepeacan: ''Nopitocawa rooya rsoaji nominarro Sarai.'' ⁹ Njite wa-Minalri iageleni iaco rorso: ''Pidiawa piminarro ikjaolre njite pjiepaotsano.'' ¹⁰ WaMinalri iageleni icaite pjaa rorso: ''Nomaimatacaotsa njaji pinakjoite-perri, corriotsa coca itaita iniweetaca coshoca namaimaca.'' ¹¹ Wa-Minalri iageleni iaco tsakja rorso: ''Picapa kewedan kena pjia, atsia watsa pienipe, picadaotsa lriipitanao Imael, ima wa-Minalri jimica coanca pjirrapitaca. ¹² Jliaji pienipe cayocaotsani apana maaficalri awacada lriconi sho. Nacoema caotsa pjiomi njaji atsianai njite pjiomi atsianai maatsiotsa nacapaca lrirso; teecoatsa lriofacawa naoya njaji lrikitsiñape. ¹³ Njite rocadaa lriipitanao jliaji WAMINALRI caacolri pia roapiya: ''Pjiá Dio icapacada njoá,'' ima rocaiteca: ''Caafi catoa njoá Lricapa cayami njoá jliaji wa-Minalri.'' ¹⁴ Caishopa nacadaaca lriipitanao jliaji ooni jalramiajai, Beer Lajai Roi; pacapacani Cade njite Beret ioyawaaca. ¹⁵ Jiicokena Abram yeenipe Agar irso njite Abram icadaa lriipitanao jliaji yempeti cayotsa Agar icaite capisho lrirso, Imael. ¹⁶ Abram irso piakena ochentasei oonia Agar jipa caojli pia Imael.

¹ Abram irso piakena noventa nueve oonia lripekirrica nacó, wa-Minalri icatjinataacawa Abram irso njite lriaco lrirso: ''Icatsa Njoa Dio Itaitacaita pjiomidalri naco. Pinaitja matsia Nopeyajle, njite pjiepa tsakjaotsa Njoa. ² Pinaitja cadaa cayó niiniotsa Nonaitja njaji nocaiterrina pirso wanaitja capisho yaacoti, pjia, Njoa. Nocadaotsa aima-carro njaji pinakjoite perri.'' ³ Abram jiwa yorsoawa jiipai nacojle tewacajle lriecoa jiipai naco njite caaco Dio lrirso cayoji: ⁴ Njaji Nonaitjalri, ima njoaca jliaji inaitjalri yaacoti piapiya. Njanirri caotsa pjia njaji inaiki aimadan. ⁵ Corrinatsaotsa Abram-ca pjia, mitsa Abraham nakjaotsa pjia, ima nocadaaca njanirrica pjia njaji inaiki aimadan. ⁶ Aima inaiki imotoatsa pinakjoite, Nocadaotsa nanaitjá-carro nayacalrewa njaji inaiki aimadan, talricanaatinai caotsa njaji pinakjoite-perri. ⁷ Nocadaotsa jliaji yacoti norsolri piapiya njite naapoiya njaji pjiapodamperri, caimitsa naapiya njaji walricomanai warso carroatsa jliaji yaacoti wainaidalri caidalriwenatsa, pi-Diote-carro Njoa njite naDiote tsakja njaji pjiapodamperri. ⁸ Nocadaotsa pirso njite narso njaji pjiapodamperri, jliaji jiipai piofalritsa niini mana, pjiomi jliaji Canaán jipaite, iyadao carroni caidalriwetsa, njite pi-Diote caotsa Njoa.'' ⁹ Njite Dio iaco Abrham irso: ''Njite pjia, pirsotsa pinaitja cayoji Noaco icaite capisho, cayo tsakja njaji pinakjoite-perri, caiminitsa pjiomi njaji walricomanai. ¹⁰ Icatsa Noacoca Nonaitjalri piapiya njite njaji pjiapodamperri, njaji pirsolritsa pinaitjaca: nacoamitsa shaa atsianai irsotsa iyoaca iatsiaca íya. ¹¹ Pjiomi atsianai narsotsa nayoaca natsiaca íya, njite icatsaotsa lritjinaaca jiaji yaacoti warsolri wainaiwaaca. ¹² Pjiomi njaji atsianai irsocapena ocho jalredaoca jiico cayamina irsotsa iyoakena lriatsiaca íya, cayomi tsaotsa pjiomi njaji pinakjoite perrimi. Cayo tskjaotsa njaji apanatsa inaiki pioya mitsa jiicoperri piipana lrico njite njaji irsoperri iwentaji palraata sho pada jiipai nakjoitedalri corripetsa pinakjoiteperrica. ¹³ JLiaji jiicolri piipana lrico, jliaji iwentaji palraata sho irsotsa iyoaca natsiaca íya. Niniotsa ideeca Noaco jinaana idaki nacó corridalriotsa coca itaita shaatjacani. ¹⁴ Coandalri catsa atsia corridalri iyoaca lriatsiaca íya lrirsotsa ipeecocani lrikitsiñape aimadan ioya. Ima lrinaitjaca maatsi lrirso jliaji noacoarromi.'' ¹⁵ Dio icaite tsenakja Abraham irso: ''Njite rsoaji piino Sarai, corrinatsaotsa Sarai-ca roipitanetsa. Sara watsa roipitana panaya. ¹⁶ Matsia watsa nonaitjaa rorso, nocadaotsa rorso pada roenipeo. Nonaitjaotsa matsia rorso, njite njadoa caotsano njaji inaiki aimadan. Talricanaatinai yacaalre irso watsa njaji imotolriotsa ronakjoite.'' ¹⁷ Njite Abraham, jliaji yorsoacadawa tjewacajle lrinoma jiipai naco, lricaa, njite lriaco lricaolre ricó: ''¿Lritaita toantja lrinaitjaca lrienipeo jliaji atsia pekirrinatsa irsocadena cien oonia? ¿Coajintja keenipeca Sara, rorso cadanena noventa oonia ropekirrica nacó?'' ¹⁸ Abraham iaco Dio irso: ''¡Ismael watsa jliaji yofalri Pipjeyajle.'' ¹⁹ Dio iaco lrirso: ''Corrina, Sara, rsoaji piino rsoawatsa yaa pirso pada pienipewa, njite pocadaotsa lriipitanawa Isaac. Nonaitja tsakjaotsa yaacoti lriapiya corridalriotsa iwayacawa nainai njaji jliapodamperri. ²⁰ Njite Ismael nacó, njomintsa pirso lrinacó. Niini panaya Nonaitjaca matsia lrirso, keenipeotsani matsia, njite Nocadaotsa aima-carro tsakja njaji lrinakjoite-perri. Njanirri caotsa njaji doce njewidaapo njaji doce poco perri, niniotsa Nocadaa pacoa yacaalre macacoé dalri jinirricani. ²¹ Mitsa jliaji Noacoarron Isaac irsoatsa nocadan, jliaji yempeti Sara imotoetalriotsa pirso pawalria nacojle, cayo kena tsakjaotsa jalredaoca panaya sho.'' ²² Yami cádanacoena caacoca Dio Abraham iapiya, Dio iawa Abraham ioya. ²³ Ikena Abraham jipa lrirri Ismael, pjiomi njaji jiicolri lriipana lrico, njaji lriwentaji lripalratan sho, pjiomi njaji Abraham iipana lricoperri lriyoá-carro natsiaca íya jliadaa jeecoapi, cayoji Dio inaa capisho lrinaitjaca. ²⁴ Abraham irso piakena noventa nueve oonia lripekirrica nacó nayoa caojli pia lrioya lriatsiaca íyam. ²⁵ Lrirri Ismael irso pia trece oonia nayoa caojli pia lriatsiaca íyam. ²⁶ Padaa nacotsa Abraham njite lrirri Ismael nayoá naoya natsiaca íyami. ²⁷ Pjiomi njaji atsianai Abraham iipana lricoperri nayoa naoya natsiaca íyami lriinai, njaji jiicoperri lriipana lrico, njaji lriwentaji palaraato sho pada jiipai nakjoite-perri.

¹ Roble lrima kemjeteo Mamre iyaape wa-Minalri iawa Abraham iderse, lriofá cádanaco lripananoma nacó jámolri ioya. ² Lrioma cádanaco lricapa yenorserse, lricapa madalrida atsianai inoca lrikjaolre naipo shotsa. Niini lricapa cádanaco ikjoetetsa, jliecoa naikjaolre lricoadatá-carrona njite lricoajawa naikjaolre. ³ Njite lriaco: ''No-Minalri, matsia cadaatsa picapaca norso, mjeyapatsa nooya njite atsantja pimaca jliaji pirsodalri. ⁴ Picadaa noacarro nooma ooni nocotsó-carro jiipa njite iwafeetá-carro jaico yapjite. ⁵ Picadaa nodeeca irso iirao oono ima meetacapa icaolre. Njite dekjena itaitena iaa pjaacawa, ima iocacawa pirsodalri ikjaolre.'' Niini njeepacan: ''Pinaitja cayoji picaite capisho.'' ⁶ Ikena Abraham sheco kjeyawa panti naapanaita lricojle Sara iderse, lriacororso: ''Pidee kjeya coarenta kilo harina matsiadalrina, njite pimatsietani pinaitjá-carro pan.'' ⁷ Njite Abraham shecoa naikjaolre njaji pirraiti corrarra lricope, jlipa apana vaaca émine toa, matsiane, njite lriani lrirsodalri irson lriyaná carroni kjeya. ⁸ Jlipa tsakja vaaca iinia potocoajai njite walriajai, njite jliaji vaaca nayananda, nadee carroena narso naijá-carro. Abraham yemawa nacodapi jaico yapjite naija cadaanatoa. ⁹ Njite naaco lrirso: ''Akjerreo rsoaji piino Sara?'' Njite lriaco: ''Atsanorra wapanaita lrico.'' ¹⁰ Njite lriaco Abraham irso: ''Pawalri nacojleotsa nono pikjaolre, niini pjimi piicao matsia. Rsoaji piino Sara rorsoatsa pada roenipe.'' Mitsa Sara jimitsa jliaji lricaiterri ima roemacawa pantinoma idana ima lridajitjete. ¹¹ Pekipenaina njaji yamadade, Abraham njite Sara, corripienatsa canopaca Sara ima jliyapa piakena rooya keenipecawa njaji inaitjepe. ¹² Niini Sara icaaca ronacowaacatsa, roaco rorsowaaca: ''Nowayacaaca cayaaminawa njite pekirrina tsakja jliaji noinirri ¿Keenipeotsa njoa? ¹³ Njite wa-Minalri iaco Abraham irso: ''¿Coada rocaa rso Sara, njite roaco: ¿Ajádalri norsocaotsa pada noenipe pekirro cayamina njoa?'' ¹⁴ Corrin pacapa pada corridalritsantja lrinaita Lrinaitjaca jliaji pi-Minalri. Nono tsenakjaotsa pawalria nacojle, cayotsa Nocadaa capisho njonaana pirso. Pawalria nacojle, cayokenaotsaji, Sara irsoatsa pada roenipe.'' ¹⁵ Njite Sara idawa roicao rocaite corrica rocaa. Mitsa rofiocawa niini rodawaca roicawa. Mitsa wa-Minalri iaco rorso: ''Ajádalri picaaca.'' ¹⁶ Njite njenico njaji atsianai naacarroenawa njite njerreta nacapa Sodoma ikjaolre. Abraham yaawa nainai lricaité-carro lricadaa carroena naawa. ¹⁷ Mitsa wa-Minalri iaco cayoji: Corrin notaita nodawaca Abraham ioya jliaji nonaitjalriotsa icaamina jliaji, ¹⁸ ima matsiadalrica Abraham, njite jliaca njanirrica njaji pacoa inaiki aimadan, kjaidaperri, njite matsiacaotsa njaji apaana inaikinai lrikjaote. ¹⁹ Noniwanani, lricanantá-carro njaji lrienipe, lriipaneta coancarro naofacawa jliapodami, wadee namaca-ca jliaji wa-Minalri inaalri nanaitjaca, nanaitjá-carro matsia, wa-Minalri itaitá carroatsa inaitjaca Abraham irso cayoji Lricaite capisho lriso.'' ²⁰ Njite wa-Minalri iaco: ''Aima calretsa njaji nacaiterri Sodoma njite Gomorra ikjoete, njite matsinaa-perrica njaji namatsicanaa, ²¹ Noaca nirse nocapá-carro jliaji nacaiterri Norso nakjoete, ajádalri cadaa nanaitjaca. Corricadaa njitenaotsa noajíi.'' ²² Ikena naacawa njaji madalridade Abraham ioya, njite naawa Sodoma ikjaolre, Mitsa corrin Abraham shenacawa lrioya jliaji waMinalri. ²³ Abraham itsoomita pjaani, niini lriaco lrirso: ''¿Piino tsakjaotsa njaji matsiaperri nainaitsa njaji maatsí-perri? ²⁴ Niini cadantja cincoenta inaiki matsiaperri yacaalre. ¿Piinoatsa njaji inaiki, o corri catntja piinocana naikjaote njaji cincoenta inaiki matsiá-perri niiní-perri? ²⁵ Cotsa matsialrica Pinaitja cada cayo, piino cantja njaji matsiaperritsa nainai njaji maatsiperri, matsiaperri icaoñaca cantja namatsianaa njaji maatsiperri, ¡Corritsa matsiatsa Pinaitjaca cayo! Jliaji Icaitecada naacona njaji jalredaoca lricoperri corriotsa lrinaitjá-carroca cayo.'' ²⁶ Wa-Minalri iaco lrirso: ''Niini cadaa cincoenta inaiki matsiaperri Sodoma lrico, corriotsa Noinó-carroca naikjaote njaji matsiaperri.'' ²⁷ Njite Abraham iaco tsenakja: ''¡Picapa pjaa, caacoca njoa no-Minalri iinai, njoa midalritsa, jiipai italre, palripokjoa! ²⁸ ¿Coajintja corricadaa pacapa cincoenta matsiaperri niini? Piinoatsa njaji inaiki yacaalre lricoperri naikjaote njaji cincodee canacairri?'' Njite wa-Minalri iaco: ''Corriotsa noinó-carrona ima niinica coarenta cinco inaiki matsiaperri.'' ²⁹ Caaco tsenakja Abraham wa-Minalri irso: ''¿Njite niini cada coarentatsa?'' Wa-Minalri iaco lrirso: ''Cirrin noinocana naikjaote njaji coarenytadee.'' ³⁰ Njite lriaco: ''Pinaitja matsiacalri, merroa tsaotsa Pjia norso, ima caacoca tsenakja njoa pirso. Ima wadetsa trenta catsa njaji matsiaperri niini.'' Njite Jliepacani. ''Corrin noinocani naikjaote njaji trentadee matsiaperri ninperri.'' ³¹ Caaco tsenakja Abraham wa-Minalri irso, lriaco: ''¡Picapapja caacoca njoa no-Minalri irso!'' Wadeetsanta ninicatsa ventedee tsa.'' Njite Lriaco lrirso: ''Corrin noinocana naikjaote njaji ventedee niiperri. ³² Piketemina lrico lrirso: ''Pinaitja matsiacalri No-Minalri, merroa tsaotsa Pjia noinai, caacoca njoa Pirso pikeetem. Wadetsa die catsa njaji matsiaperri niini-rri.'' ³³ Lritaita catsa caacoca jliaji wa-Minalri Abraham iapiya, lriawa lrioya njite Abraham idiawa lriipana lricojle.

¹ Njaji yamadade ngelenai naoca njeewao Sodoma lrico dainomeenatsa Lot iofa cadana toa yacaalre ipananoma icodapi, niini Lot icapa cádanacona, jlinico lriemao lriá-carro lricoadatana, njite lricajawa jiipai nacojle nakjoete. ² Lriaco: ''Inaitja matsiacalri norso, shaa nominanai, notatja iinai caiwi-ricotsa sheewá-carro irsodalri iipana lricojle,imaotsa niini, njite ocotsoatsa jiipaniini. Tjewenaotsa, icafiawa piyompinaco toa ipietá-carro yaacawa ipeyajle. Mitsa njeepani: ''Corrina, awatsa waa wemaa yacalreecoa lricotsa.'' ³ Mitsa corrin yaamica Lot naoya, niini naca lriinai lriipana lricojle. Lrinaitja injaodati naijao, lrimeerrita tsakja pan meewidalritsa, ikena naijaca. ⁴ Mitsa lripjeyatoa naorsoaca nemaa, njaji atsianai Sodoma lricope nayofieta Lot iipana, atsianai yempetipe toa njite pekipenai tskja, náno pjiomi njaji atsianai yacaalre lricoperri. ⁵ Nawana Lot, naaco lrirso: ''¿Kjerreo njaji atsianai iocalri jiewao pikjaolre oopica? Pimotoeta pemajle warsona, wadakitaacá-carro naapiya.'' ⁶ Niini Lot iawa pantinoma ikjaolre lriitá-carroni. ⁷ Njite lriaco: ''Notatja iinai caiwi-ricotsa wadee maatsi calretsa inaitjaca. ⁸ Norso yaamama inaitjepe mjeyapa capetoa atsia iinai, njaa watsa nomeenaca ikjaolre, inaitja naapiya coan catsa ioma inaitjaca. Mitsa corrin nooma cocacantja inaitja narso njaji atsianai, ima noopana lrico-cana.'' ⁹ Mitsa naaco Lot irso: ''¡Pjiena waoya! Inaikitsa pjia waoya, inocada pada jiipai nakjoite piofá carro wapecolrico, ¡njite panaya pjiá yoma yajica wanaco! Panaya maatsí pjatoa wanaitjaca pirso lrioya jliaji wanaitjalriotsa narso njaji yocalri pikjalre.'' Paa matsinaacana lrikjoete jliaji atsia, Lot ikjoete, wadeepe nadoitaca lripananoma. ¹⁰ Mitsa njaji atsianai napiajleta nacaapi pemajle ikjaolre njite nadietaca Lot naikjaolrewa panti lricojle njite naita pantinoma. ¹¹ Njite njaji inocaperri Lot ikjaolre nainona patjipem sho njaji pemajle-perri panti ioya, pjiomi njaji yempetiapape njite piomi pekipenai tsakja, niini maapjicana naoma cawa tja jliaji pantinoma. ¹² Njite njaji atsianai iaco Lot irso: ''¿Capja niini pjatoa pikitsiñape anjí?'' Pitsiñarrenai cadaa, pienipe, piitonaipe, o coandalricatsa pinakjoite-dalri lri-ricoda yacaalre-ca jliaji. Niini cadaa, pjita ajaiteji. ¹³ Ima icaaminaotsa wapeeco caotsa jliaji yacaalre-ca jliaji. Ima aimaca njaji inaiki icaitecape wa-Minalri irso nanaco njaji inaiki aperri yofawa lriricoda yacaare-ca jliaji nanaitjaca aima maatsirri, niini Lrimeenaca-ca faa wawayakeetá-carroni.'' ¹⁴ Lot yaa caaco naapiya njaji atsianai itatjacape naninaiwa njaji lriitonaipe, lriaco narso: ''Warsa imoto kjeyawa lrioya jliaji yaacalre, ima ikenaotsa wa-Minalri ipeeco caotsa jliaji yacaalre-ca jliaji.'' Mitsa njaji lritsimarrenaipe nawaada lridejita catsana. ¹⁵ Tsoomi cádanacoena jaalre-carroni, njaji atsianai nakjeyapitaca Lot, naaco lirso: ''Kjeyena pjia, warsa pjipa pidee rsoaji piino, njaji yaamamade piitonaipe piinaiperri wadee nañaacawa yacaalre iinaitsa.'' ¹⁶ Mitsam corrin Lot iawa jlida nacotsantja. Niini njaji atsianai njepa ricaapi nakjoite, lriini icaapi nakjoite njite njaji lriitonaipe icaapi nakjoite tsakja, ima kjenaaca Dio icapaca narso. Njepa nadeena padanajle lrioya jliaji yacaalre. ¹⁷ Namotoeta cayamina-ná, pada nanakjoite njaji atsianai iaco: ''¡Warsa jiecoa yomjé-carro shaa! Macaboco tsaotsa icapa shapodamrse, corrin tsakja ioca catoantja iofawa malritsicoa lrico. Shecoatsa mayacan jiipana ikjaolre, niniotsa corri watsa iwayacaacawa.'' ¹⁸ Lot iaco narso: ''¡Corrina nominanani, inaitja norso matsiacalri! ¹⁹ Matsia calretsa inaitja noapiya, njoa irsodalri, njite iyomjeta capoa njoa icanjata nocapa coanca kjenaaca icapaca njoa; mitsa, corrin notaita njoecocawa lrinacojle jliaji jiipana ima nofiocawa wadee catsantja jlipaca njoa jliaji maatsirri njite mayamica njoa. ²⁰ Icapa jliate yacaalre, pacoa yacaalre tsocoetsa. Inaitja matsiacalri icadaa njoecó-carro nodawaaca lri-ricoda, ¿icapjentsa tsocoe catsa jliaji yacaalre?, njite icatsaotsa yomjeca njoa cayó. ²¹ Njite pada nanakjoite iaco lrirso: ''Matsiatsa, njominina pirso, niini corriotsa nowayakeetá-carroca jliaji yacaalre picaiterri inacó. ²² ¡Warsena piawa kjeeyá! Nirseotsa yoomje pjia. Corriotsa cocá-carroca nonaitja toa a kjerrekenaotsa piocawa nirse.'' Niini nacadaaca lriipitanao jliaji yacaalre Zoar ²³ Njite jaalre piakena matsia, Lot ioca cadanenatsa Zoar lricojle. ²⁴ Ikena JLIAJI WAMINALRI icadaa tiyee njite azofre jiwacawa iyao sho eenolrikjoite Sodoma njite Gomorra nacó. ²⁵ Lriwayaketa matsiape njaji yacaalre, pjiomi malritsicoa, njite pjiomi njaji inaiki yacaalre lricoperri pia, pjiomi njaji jaico ninperri pia. ²⁶ Mitsa rsoaji lot iino, ínolri pia jliapoda-mjite, rocaboco rocapa rsoapodamrsewa, niinitsa ropadamawa apana yokirrana. ²⁷ Abraham icafiawa piyompinaco toa njite lriawa lricapá lriema carromi Wa-Minaliri ipeyajle. ²⁸ Njite lricapa Sodoma njite Gomorra ikjaolre, njite pjiomi jliaji jiipai malritsicoa ikjaolre tsakja. Jlimi-kje matsia, lricapa iitacati imotocawa cayoji pamjaita apisho paocanda macaapji camoi ricó. ²⁹ Cayopiatsa Dio iwayaketaca njaji yacaalre malritsicoa lricoperri Lot iofalri pia irricoda. Mitsa Wa-Minalri iwaada Abraham nacó niini lrimotoetaca Lot teeco lrioya jliaji yacaalre lriofalri pia niini lripjeya toa lriwayakeetacana. ³⁰ Mitsa Lot iawa Zoar njiteo lriá carroenakja lriofawa awacada cawajle naapiya njaji yaamama lriitonaipe, ima lrifió pia catsawa lriofaacawa Zoar lricotsa. Niini lriaca lriofawa paapji jalraadalri ricó jiipana nacó, jlia njite njaji lriitonaipe. ³¹ Rsoaji pjerroti iaco rowedoa irso: ''Pekirri kena jliaji fanirri, njite corrin pacapa pada atsia akjerre cantjaji idakitacaoda waapiya cayoji nanaitja capisho pjiomi njaji inaiki. ³² Warsa wadewaneta jliaji fanirri wadakitá carroatsa lriapiya ridewana caapjite, niniotsa wataita wamaimataca fanirri inakjoite-perri.'' ³³ Nini nacadaa njanirri idewanaca jliadaa deepi. Njite rsoaji ipjerroti roa rodakita rsonirri jliadaa; corrin lriaji jliaji ronaitjalri lrirso. ³⁴ Tjewaijlena, rsoaji ipjerroti iaco rowedoa irso: ''Opica deepi noa pia nonaitja nodakisho fanirri iinai. warse tsenakja wacadaa lridewanaca jliadaa deepica jliaji, pjia carroatsa yaa jimao, niniotsa wataita wamaimataca fanirri inakjoite-perri.'' ³⁵ Niini nadewanetaca njanirri jlia deepica, njite rsoaji iwedoati yaa inaitja tsakja rodaki sho rsonirri iinai. Corrin lriaji jliaji ronaitjalri lrirso. ³⁶ Niini njaji yaamama lriitonaipe kewedancana njanirri irsotsa. ³⁷ Rsoaji ipjerroti romotoeta roenipe pada atsiada, rocadaa lripitanao Moab. Icapiena naferrimca njaji moabitanai panaya jliaji. ³⁸ Njite rsoaji iwedoati, romotoeta tsakja pada roenipe atsiada, rocadaa lripitanao Ben-ammi. Icapiena naferrimca njaji amonitanai panaya jliaji.

¹ Ahraham iawa njiteo jiipai Neguev lricojle, njite lriofacawa Cades njite Shur ioyawaaca. Pada inocadatsa naikjaolre jliaji ialri iofaa Gerar lrico. ² Abraham icaite lriino Sara nacó lriwedoa catsano. Niini jliaji talricanaati Gerar lricoda imeenaca njaji lrinaikite naacarro naomano lrirso. ³ Mitsa Dio íno Abimelec ikjaolre jlitapon ricó, njite lriaco lrirso: ''Picapakje, pada atsia mayamdalrim kena pjia, pjita capoa rsoaji iinarro roinirri ioya.'' ⁴ Mitsa Abimelec corri piatoa lrimaaca roapiya, niini lriaco: ''No-Minalri, ¿coadantja piino pacoa inaiki mikjapantsa? ⁵ Jliatsa icaite norso lriwedoa canó, njite rsoatsa icaite ropjerricani. Corrin nonaitja jliaji nocaolre maatsídalri iapiya, ima corricatsa coca noajíi.'' ⁶ Njite Dio icaite lrirso jlitapon ricó: ''Ajádalri, Noanjintsa corrica picaolre maatsídalri yaapiyaca pinaitjani, niini nodaanataca pjia wadee pinaitjaca maatsi Nokjoete. Niini corrin tsakja Nocadaa pinotacano. ⁷ Panaya pidieta lriino jliaji atsia, ima inoparrotacada-cani. Lritatjaotsa Noinai pinacó, njiteotsa nocadaa caaficatsa pjia. Corri cadaa pidieta lrirsono, pianjintsa mayami caotsa pjia njite pjiomi njaji pinaikite.'' ⁸ Abimelec icafiawa piyompinacotoa njite lriwana lrikjaolrewa pjiomi njaji lrirsoperri. Lricaite narso pjiomi coajica, niini nafiocawa pekirritsa njaji atsianai. ⁹ Njite Abimelec iwana lrikjaolrewa Abraham, lriaco lrirso: ''¿Coanshopao jliaji pinaitjalri? ¿Cocao jliaji nomatsicanaa pirso, caicarro pima camatsicanaaca njoa njite njaji nonaikite? Cayoji pinaitja capisho, cotsa matsiaca panaitjaca.'' ¹⁰ Lriaco pja Abraham irso: ''¿Coca ikjaote pinaitjaca cayó?'' ¹¹ Abraham shepani: ''Ima nowaopia corriperri catsa ifiowa Dio iiwana njaji inaiki aerriji, niinintja nainoca njoa noino ikjaote. ¹² Njite ajádalritsa nowedoacano, njonirri iito apama yaapiya njodoa ioya; njite njotaca noinoano. ¹³ Dio jita caojli pia njoa njonirri iipana lrikjoite, njite noajicawa pafe lrikjoite pafe nacojle, niini noaco rorso: akjerrecawajle caotsa waocawaji picaiteotsa pipjerrica njoa'' ¹⁴ Ikena Abimelec jipa idieta Abraham irso rsoaji lriino Sara, njite jlipa tsakja oveja, buey, njite atsianai, inaitjepe lrirsoperri njite lriacana Abraham irso. ¹⁵ Abimelec iaco Abraham irso: ''Picapa coanca njopaite yaacawa. Piomena picapa akjerre catsa pipeyoji piofá-carro niinio.'' ¹⁶ Njite Lriaco Sara irso: ''Piají-carrotsa, noenina pipjerri irso mil monedaitape palraata. Noaca pirso njaji, wadeotsa nawaadaca pinaitjaca maatsi njaji inaiki piinaiperri. nají watsa corrica coca pimatsicanaa.'' ¹⁷ Ikena Abraham itatjaca Dio iinai, njite Dio imatsietaca Abimelec, lriino, njite pjiomi njaji lrirsoperri narsocarro neenipe. ¹⁸ Ima Dio icadaa pia meenipé-carro pjiomi njaji inaitjepe Abimelec iipana lricope, Sara ima.

¹ Wa-Minalri iwapaca rsoaji Sara, cayotsa Lricaite capiso ronacó, Wa-Minalri inaitja Sara iapiya cayoji Lricaite capisho rorso. ² Keenipe Sara Abraham irso pekirro cayaminano, lri-ricodatsa jalredaoca-ca lricaite capisho pia narso. ³ Abraham icada lriipitanao jliaji lrienipe imotolri cayotsa Sara icaite capisho lrirso, Isaac. ⁴ Abraham iyoa lrirri iatsiaca íyam ocho jalredaoca jiicocamini, cayotsa Dio icaite capisho pia lrirso lrinaitjá-carro. ⁵ Abraham irso piakena cien oonia jiico caojli lrirri Isaac. ⁶ Sara icaite cayoji: ''Dio icadaa pia nocaa, pjiomiotsa njaji jimirriotsa nonacó necaa tsakjaotsa noinai.'' ⁷ Roaco pja: ''¡Cocantja icaite Abraham irso Sara iacaotsa nairrao njaji kirraitalrinai! Mitsa keenipeca njoa lrirso pekirro cayamina njoa. ⁸ Lritaoñawa jliaji yempeti njite corrinatsa lrirraca jlidoa inia, Niini Abraham inja naapiya njaji inaiki catiima capoani corriketsa Isaac irra lrinia. ⁹ Sara icaa lriicao jliaji Agar irri rocapa cádanaconi, jliaji Abraham irri Egipto tadoa iapiya. ¹⁰ Niini roaco Abraham irso: ''Pimeenaca roawa rsoaji idejiada warso roenipe yaapiya, ima corriotsa jlia carroca yaají nanaco njaji pirsolri lriinai jliaji nirri Isaac.'' ¹¹ Jliaji rotatjalri lriinai cotsa matsiacalrica lrirso lrienipe ikjaote. ¹² Mitsa Dio icaite Abraham irso: ''Mjetatsa picaolre lrinaco jliaji yempeti, corrin tsakja roikjaote rsoaji pirsodarro. Pinaitjaotsa rorso pjomi nanaco njaji rotatjalri piinai, ima pirri Isaac inakjoiteca náno njaji pinakjoiteperri nocaiterri pirso.'' ¹³ Nocadaa tsakjaotsa aimaca njaji pirsodarro yenipe inakjoiteperri, ima pienipe tsakjani.'' ¹⁴ Abraham icafiawa piyompinacotoa, jlipa pan, ooni lriarroda lricoda, njite lriacani Agar irso, lricadaa roteda nacóni. Lria rorso jliaji yempeti njite lrimeenaca naawa teecoa. Ikena roacawa jalrapocolri ricó Beerseba lricoda. ¹⁵ Lriwayaca cádanaco naoya jliaji ooni nadenda, romaca roenipe apapoco jaico toomopetsa yapjite. ¹⁶ Njite roa pjawa lripeyajle, wadeepe ciem metroca lritecoca lrioya, ima roaco cayoji: ''Corrin nooma nocapaca mayamica noenipe.'' Roofa cadanatoa lricoemjete, ikena roiyaca kjaida. ¹⁷ Dio jimitsa lrirso jliaji yempeti, njite jliaji Dio iageleni lriwana Agar eenolrikjoite, lriaco rorso: ¿Coancao pjia Agar? Mafiotsawa, ima Diomica lrirso jliaji yemepti pimacalri niini. ¹⁸ Pjinicoa, pia piwakje jliaji yempeti pimaiyaketá carroni; ima Nonaitja caotsa lrinakjoite pacoa yacaalre macacoe.'' ¹⁹ Njite romjeco nja rotji, niini rocapaca paapji ooni. Njite roaca ropakjanta roonitewa nirse, njiyte roaca roenipe irrao. ²⁰ Dio piatsa lriinai jliaji yempeti, njite lritaoñawa. Lriofa lritaoñawa jalrapocolri rico niini iyawitacaita matsiadalri cani. ²¹ Lriofa piawa jalrapocolri Parán lricoda, njite jlidoa ioketa lriinoa Egipto lricoda. ²² Niini papia nacojlena caaco Abimelec njite lritsolrodaonai aimadan icapitamani Ficol, Abraham irso, naaco lrirso: ''Piinai catsa Dio pjiomi nanaco njaji pinaitjalri. ²³ Niini panaya pinaitja norso pada iacoti ajádalri sho Dio-nacó, njite corriotsa picashataca njoa lrinaco jliaji yaacoti picaiterri norso panaya, corrin tsakja nainai njaji noenipe, corrin tsakja nainai njaji njoapodamperri. Nooma matsiaca pjia norso, lrirso jliaji jipai piofalri niini cayoji matsia capisho njoa piinai.'' ²⁴ Njite Abraham iaco lrirso: ''Ajaca, nocaiteca pjia yaacoti ajádalri sho.'' ²⁵ Mitsa Abraham icaite Abimelec irso paapji ooniapji ikjaote, Abimelec irsoperri jlitalri pia Abraham ioya. ²⁶ Abimelec iaco lriso: ''Corrin noajíi coca-ca inaitja pirso cayó. Corrin tsakja picaite piaca norso lrinaco jliaji picaiterri norso icaamitoa. Cotsa njominca lrinaco, icaamitoa njomicani.'' ²⁷ Abraham jipa oveja njite buey tsakja njite lriacana Abimelec irso, niini njaji yamada atsianai nanaitja pada yaacoti nainaiwaaca. ²⁸ Abraham sheneta naoya njaji oveja papocoperri siete oveja inarrona. ²⁹ Abimelec iaco Abraham irso: ''¿Coanshopao jliaji pjienitaca sietena cordero inarrona naoya njaji nakitsiñape?'' ³⁰ Abraham iaco lrirso: ''Njaji sietena cordero inarrona pjipaotsa nopjeyana, nocaite shopa njaaca yaají, njoaca jica jliaji ooniapji cajliaji.'' ³¹ Lricadaa lriipitana niini Beerseba, nanaitja capoa yaacoti ajádalri sho njaji yamadade. ³² Nanaitja jliaji yaacoti Beerseba lrico, njite Abimelec lriapiya jliaji lritsolrodaonai aimadan icapitamani Ficol nadiawa filissteonai jipaite ricojle. ³³ Abraham yaapana apana jaico tamarisco Beerseba lrico. Lria matsiadalri Dio mawayacacadalri irso niini. ³⁴ Abraham iofawa njepaite ricó nja paana inaiki aima jalredaoca.

¹ Njite njapodamina njaji Dio iwica Abraham. Dio iaco Abraham irso: ''¡Abraham! Abraham shepani: ''Alri njoaji.'' ² Ikena Dio icaiteca lrirso: ''Pjipa pidee jliaji pienipe apadanalritsa, jliaji pirri Isaac pipeyonda, njite piawa jiipai Moriah lricojle. Piinoatsa nirseni pada ofrenda sho nanaco njaji jiipana ninperri, nocaiterriotsa pirso.'' ³ Niini piyompinacotoa Abraham imotoa, lripápi lriofá carrona borro naco, lridee pja yamada lrirsoperri njite lrirri isaac. Lriyaca tiyeena lrimjaitá-carro ofrenda, ikeena lriacawa Dio icaiterri lrirso akjerrecaji. ⁴ Njite madalridaa nacoena, Abraham jirreta icapa apafe teecoalri. ⁵ Abraham iaco narso njaji lrirsoperri yempetipe toa: ''Atoa iwapa faji borro icodapi, njoa njite jliaji yempeti waa-catoa. Waa catoatsa waa matsiadalri njiite wataita kenaotsa wadiawatsa ikjaolre.'' ⁶ Ikena Abraham jipaca njaji tiyeena namjaitashopa ofrenda njite lricadaana lrirri Isaac nacó lridee-carrona. Abraham jipa idee lricaapi rico tiyeeda njite malriye tsakja; ikena naacawa yamadape. ⁷ Isaac iaco jlinirri Abraham irso: ''Pai, njite jliepani: ''Alri njoaji nirri.'' njite Isaac iaco jlinirri Abraham irso: ''Picapa, anainaji tiyeeda njite tiyeena tsakja, ¿mitsa akjerreo jliaji cordero wamjaitaoda ofrenda sho?'' ⁸ Abraham sheepani: ''Nirri, Dio tsaotsa icadaa waoketaca jliaji cordero wamjaitaoda ofrenda sho.''Ikena naa pjaacawa yamadape.'' ⁹ Naoca cádanacoena Dio icaiterri Abraham irso, ikena jlirretaca apana altar niini, njite lricadaa nja tiyeena altar nacó. Ikena lripapica lrirri Isaac, njite lriorsoetani altar nacó, tiyeena nacó. ¹⁰ Abraham ipiajleta lricaapi njite jlirreta jliaji malriye lriinó-carro lrienipe isaac. ¹¹ Jliada nacó wa-Minalri iageleni iwanacani eenolrikjoite, lriaco lrirso: ''¡Abraham, Abraham! njite Abraham sheepani: ''Alri njoaji.'' ¹² Lriaco lrirso: ''Macadatsa picaapi pienipe nacó, manaitjatsa maatsi lrirso, ima panaya dekja noajíi pjiepaca ajádalri Dio, nocapa cádanaco corrica piifarro Lrioya pienipe apadanalritsa pirsoca.'' ¹³ Abraham jirreta icapa, njite lricapa apana carnero ipaacadawa lritsowa nakjoite jaicoki nacó jliapodjete. Abraham yaa jipani njite lrimjaitani ofrenda sho lrirri iarrontacao. ¹⁴ Njite Abraham icadaaca lriipitanao niini, ''WAMINALRI watsa yaa warso.'' Icatsa lriipitanaca atee panashete, ''Wa-Minalri iawacadate nacoatsa, waoketa.'' ¹⁵ Wa-Minalri iageleni iwana tsenakja Abraham yamapia shopena eenolrikjoite, ¹⁶ Lriaco lrirso: ''Cayo lricaiteca pirso jliaji Wa-Minalri: ''Nocaite yaacoti ajádalri sho norsowaacatsa, pinaitja capoa cayoji notatjá capisho piinai, njite corrin piifarroca nooya pienipe apadanalritsa, ¹⁷ Ajádalri nonaitja caotsa pirso matsia, Nocadaotsa pimaimataaca carroatsa pekiritsa, njite njaji pinakjoite-perri cayoatsana nacayosho njaji jiwirsida eenocoma nacoperri, njite caida manóa inomapí ricope sho, njite njaji pinakjoite-perri njaa watsa yaají nanaco njaji nacoema. ¹⁸ Nanakjoite njaji pinakjoite-perri matsia caotsa pjiomi njaji inaiki jalredaoca lricoperri, pjiepa capoa jliaji nocaiterri pirso.'' ¹⁹ Njite Abraham idiawa naikjaolre njaji lrirsoperri yempetipe toa, njite nadiacawa pacoacatsa Beerseba lricojle, njite lriofaacawa Beerseba lrico. ²⁰ Jliapodamjitena njaji jiyapalrio, nacaite Abraham irso, Milca irsoca yeenipe lripjerri Nacor irso. ²¹ Icapiena njaji, ''Uz, icatsa pjerritica, Buz, iwerriti, njite Quenuel, Aram jinirrina, ²² njite Quesed, Hazo, Pildas, Jidlaf njite Betuel." ²³ Betuel, icatsa Raquel jinirrica. Icapiatsa njaji ochodee Milca yenipeca Nacor irso, Abraham ipjerri. ²⁴ Njite apama lrinarrote, roipitana Reúma, rorso tsakja roenipe Nacor irso, Teba, Gaham, Tahas njite Maaca.

¹ Sara yofa pia ciento ventisiete walria jalredaoca lrico. icapiatsa lriwiaca caaficano. ² Mayami Sara Quiriat Arba lrico, Hebrón lricoda, Canaán jipaite rico. Iinona Abraham njite lriiya Sara nacó. ³ Njite Abraham jinico rooya rsoaji lriino mayandarrom, lriá-carro caaco naapiya njaji Het yeenipenai, lriaco narso: ⁴ ''Inaikitsa njoa ioya inolri yofawa ipecolrico. Inaitja matsiacalri norso, icadaa norso pada jiipai noyadawa notaitá-carro nodawaca rsoaji noino mayamirri nooya.'' ⁵ Njite njepani njaji Het yeenipe Abraham irso: ⁶ ''Pjimi warso, pjia waminalri. Pada caconaadalrica pjia Dio irso wapecolrico. Pidawa rsoaji piino mayandarrom akjerrecawa catsa matsiapja picapaca wa-irrirriapjirre ricó. Corriotsa pada wanakjoite itaita iifarroca pioya irrirri, pitaitá-carro pidawaca rsoaji piino mayandarrom. ⁷ Abraham jinico yemawa njite lricoajawa naikjaolre njaji jiipai iminanai, njaji Het yeenipe. ⁸ Abraham iaco narso: ''Yomacadatsa nodawaca rsoaji piino mayandarrom, jimi norso, caaco shaa noikjaote Efrón yaapiya, Zohar irri. ⁹ Inaa lriwendeca norso jliaji jalradalri Macpela lricoda, ima lriyadacani, njite acaniji jlipaite iwayacacawa nacojle. Ineena lritatjaca noinai cosho catsa lricoada, icadaotsa lriwendeca norso aimawerrico noyada carroni nodawacawa lricoatsa njaji mayanperrimi.'' ¹⁰ Efrón yofaa cadana napecolrico njaji Het yeenipe, niini jliaji Efrón, hitita tairri iaco Abraham irso njemiwerrico pjiomi njaji Hete yeenipe, njite pjiomi njaji inolri yemawa yacaalre inomafe ricó: ¹¹ ''Corrina nominalri, pjimi norso. Noawatsa pirso jliaji jiipai, njite jliaji jalradalri irrirri icodapidalri. Noaca pirsoni nacapa-werricotsa pjiomi njaji noofacawenai lri-ricoda jliaji yacaalre. Noá pirsoni pidawá-carro rsoaji piino mayandarrom.'' ¹² Abraham jinico yemawa njite lricoajawa naikjaolre njaji jiipai iminanai. ¹³ Njite lriaco Efrón irso njemi-werrico pjiomi: Mitsa pjimica norso, pioma cadaa piwendecani, piwendena norso. Nocaoñaotsa pjia cosho catsa lricoada. Pjipena nopalraatani nopjeya, nodawa carroena rsoaji piino mayandarrom.'' ¹⁴ Njite Efrón iaco Abtaham irso cayoji: ¹⁵ ''Pawajle jiipai coateociento dalri palraata icoada, cotsa coca-ca warso. Pidawena rsoaji piino mayandarrom.'' ¹⁶ Abraham sheepatsa Efrón niii lriniweetaca lrirso lricoada jliaji lritatjalri lriinai njemí-werrico njaji Het yeenipe. Lria lrirso coatrociento monedaitape palraata, cayotsa nacadaa capisho palraata icoada njaji iwende caperri. ¹⁷ Niini jliaji jiipai Efrón iyaada pia, Macpela lricoda, tsoomirri Mamre ioya, icatsa jlipaitenaca, irrirri lri-ricoda-dalri, pjiomi njaji jaicolrima lriricoda-dalri, pjiomi njaji jiipai yoocacawa lrico, ¹⁸ Abraham iyaadacani, lriwentanda nacapawerrico njaji Het yeenipe, napeyajle pjiomi njaji inolri yacaalre inomafe lricojle. ¹⁹ Njitedalri dekjena, Abraham idawa lriinomi Sara jalraadalri ricó Macpela lricó, tsoomirri Mamre ioya, Hebrón lrico, Canaán jipaite ricó. ²⁰ Niini jliaji jiipai njite jliaji jlrapeco Abraham iyadenakja, pada nadawacawa lrico mayanperrim lriwentanda naoya njaji Het yeenipe.

¹ Pekirrinatsa Abraham, njite wa-Minalri inaitja aima matsiaperri Abraham irso pjiomi nacó. ² Abraham iaco lrirso jliaji lrirsodalri, jliaji wiadalrina idenjica lriinai, jliaji yajiacada nanaco pjiomi njaji lrirsompe: ''Pjieta picaapi nonaapa pocoda yapjite. ³ Nooma picaiteca norso yaacoti ajádalri sho Wa-Minalri Dio ipeyajle, corricaotsa pjitá carroca nirrinowa nanakjoite njaji cananeonai, njaji noofanipe ipecolrico. ⁴ Piawatsa naikjaolre noyacalre lricojle, nokitsiñape ikjaolre, pidee carroatsa nirri Isaac iinowa njite.'' ⁵ Njite Abraham irsodalri iaco lrirso: ''¿Coajiotsa nonaitjaca corricadaa rooma ronoca noinai rsoaji iinarro lrinacojle jliaji jiipaica jliaji? ¿Capja nodee caotsa pirri Isaac lri-ricoda jliaji jiipai pinolri njite? ⁶ Abraham iaco lrirso: ''Picapaja matsia wadee pimaca lridiáca tsenakja nirse jliaji nirri. ⁷ Jliaji Wa-Minalri Dio eenolricojle-dalri, jliaji jitalri njoa njonirri iipana lrikjoite njite nokitsiñape jipaite rikjoite, jliaji icaitecada norso yaacoti ajádalri sho pekirrí-dalri cayoji: Pinakjoite- perri irsoatsa nocadaa jliaji jiipai, Jliawatsa imeenaca Lri angeleni lria-carro pipjeya, niniotsa pideeca apama inarro nirrinowa njite. ⁸ Mitsa corri cadaa rooma ronoca piinai rsoaji inarro, niniotsa corrinatsa pinaitjá carroca jliaji picaiterri norso yaacoti ajádalri sho pinaitjacaotsa. Icaamitsa corrin nooma pideeca noenipe nirse.'' ⁹ Niini jliaji lrirsodalri sheetaca lricaapi lrinapa pocoda yaapjite njite lricaite lrirso yaacoti ajádalri sho lrinaco jliaji lrinaalri lrinaitjaca. ¹⁰ Jliaji lrirsodalri jlipa diena camello, jlipa tsakja aima regalo lridewape lriinaiwa. Ikena lriacawa Aram Naharaim jipaite nacojle, Nacor iyacalre lricojle. ¹¹ Lricadaa naorsoacawa njaji camello padanajle yacaalre ioya, ooniapji ikjaote. Ima dainomajlekena nanocawena njeta ooni njaji inaitjepe. ¹² Njite lriaco: ''Pjia no-Minalri, notalricanaa Abraham iDiote, picadaa matsiaca lrimotoca norso panaya lrinaco jliaji nocaiterri nominalri Abraham irso nonaitjacaotsa. ¹³ Picapa noamacawa lri-ricoda jliaji ooniapji, njite naitonaipe njaji atsianai aperriji yofawaji, nánoca njeta ooni. ¹⁴ Picadaotsa nonaitjaca cayoji noají-carro. Nocaite cadaa aapama yempeti irso cayoji: ''Pinaitja matsiacalri pia noirrao lrinakjoite jliaji ooni pideeri pipalangana lrico, njiteotsa rsoepa njoa: ''pirrena, njite njoawatsa yaa nairrao njaji picameellon,'' icatsaotsa picadaa shopa noaji rsoaca rsoaji picadanda pirsodalri Isaac iinowa. Niniotsa noajíi Pjiaca ikitsindata njoa matsiacarro lrimotoca norso cayoji nocaiyte capisho nominalri Abraham irso.'' ¹⁵ Njite lripjeya toa yaamica caacocani, Rebeca jinicoa ropolricoita roonite palangana lrico ooniapji rikjoite. Rsoaji Rebeca Betuel iitocano, Milca irri, Nacor iinom, Abraham ipjerri. ¹⁶ Apama inarro yempetitoa njite matsiaparro, corridarro toa jiyapa pada atsia yaapiya. Roorrocoa ooniapji ricojle, ropakjanta ropalangana, njite rsonico njiteo. ¹⁷ Niini jliaji Abraham irsodalri lrikjeyapita lriá-carro rokjoete, lriaco rorso: ''Pinaitja matsiacalri, pia noirrawa jatjamitsa pionite nakjoite.'' ¹⁸ Njite roaco, ''Pirra, nominalri.'' njite rokjeyapita rorrocoetaca ropalangana roá-carro lriirrao. ¹⁹ Njite rotaita cayami roaca lrirrawa, roaco lrirso. ''Noá pjatoa nota ooni noá-carro tsakja nairrao njaji picamelloni, kjerrekenaotsa yaami nairraca.'' ²⁰ Niini rikjeyapita roarro ooni palangana lrikjoite nairra carroda lrico, njite roapja rsota ooni njetacawa lrikjoite. Cayotsa rsotaca ooni nairrá-carro njaji camello. ²¹ Njite jliaji atsia maacotsa lricapacano lricapá-carro rsoacada rsoaji wa-Minalri icadaalrina matsiá-carro jliaji lrialri ikjaote. ²² Njite nairra catoa ooni njaji lricamelloperre, jliaji atsia jlita pada caapirroti njetaco nacope owirrope, irsocada sei gramo jlimiñaca, jlita tsakja lrinaapapi jliwacatsa owirro irsocada ciento die gramo jlimiñaca, ²³ njite lritatja lrimiono: ''¿Cocao iito pjia? pinaitja matsiacalri picaite njomi, ¿Capja lricoa noá-carro nomaa pjinirri iipana lrico jlia deepica jliaji?'' ²⁴ Njite roaco lrirso: Betuel iito njoa, Milca irri, Nacor irso.'' ²⁵ Roaco pja lrirso: Ajatsa, warsoentsa aima naijaope njaji camello, lrikjoen tsakja pimá-carro wainai waapana lrico.'' ²⁶ Niini lricoajawa lriá-carro matsiadalri Dio irso. ²⁷ Lriaco: ''Matsiadalrica jliaji wa-Minalri, nominalri Abraham iDiote, ima corrica lrimaca Lriacoami lricaitecawa corricatsa lrimacá jliaji nominalri. Njite Lrikitsindata njoa nooacarro mayan naikjaolre njaji nominalri ikitsiñape.'' ²⁸ Njite rsoaji yempeti rsoeco rocaite narso njaji rsodoa ikitsiñape lrinaco jliaji rocapalri. ²⁹ Rebeca irso pia pada ropjerri, lriipitana Labán. Labán shecoa lrikjaolre jliaji atsia, yacaalre pemajle inipolrico, ooniapji icodapi. ³⁰ Ima lricapa cádanaco jliaji caapirroti njite njaji nanaapapi lriwedoa jipajica, njite lrimi cádanaco coanca lriwedoa Rebeca icaiteca cayoji: ''icatsa njaji lricaiterrica norso jliaji atsia,'' lriawa lrikjaolre jliaji atsia njite lricapa lriemacawa camello icodapi, iooniapji icodapitsa. ³¹ Njite Labán iaco lrirso: ''Pjiewenawa, pjia matsiadalri Dio inaitjaca irso. ¿Coada piemawa padanajletsa? Nomatsietjenina jliaji panti pimaa carrodawa, njite nayarrowajleo tsakja njaji camello.'' ³² Ikeena jliewawa panti ricojle jliaji atsia, lriorrocoeta njaji camello ideecalre. Naa tsakja malritsi camello injao, naa tsakja ooni lricotso shopa jliipa njite njajipa njaji lriinaiperri. ³³ Nacada lrinjao naijacarroita nacó mitsa lriaco narso: ''Corritsa nojácarroca akjerreca nocaite jimi jliaji norsolritsa nocaiteca jlimio.'' Niini Labán iaco lrirso: ''Picaitena.'' ³⁴ Niini lriaco: ''Abraham irsodalrica njoa.'' ³⁵ Jliaji Dio aima lrinaitjaca matsia nominalri irso niini canaanídalrica panayani. Dio icadaa lrirso aima maaficalri lriipirrao, palraata, owirro, lrirsoperri atsianai njite inaitjepe tsakja, camello njite aima borro tsakja. ³⁶ Njite Sara, nominalri iino, keenipeca lrirso pada atsia pekirro cayaminano, njite nominalri icadaa lrienipe irso pjiomi njaji lriyarro. ³⁷ Njite lrinaa nocaiteca lrirrso yaacoti ajádalri sho Wa-Minalri Dio ipeyajle lricaitecawa norso: corricaotsa pjitá carroca nirrinowa nanakjoite njaji cananeonai, njaji noofanipe ipecolrico. ³⁸ Piawatsa naikjaolre noyacalre lricojle, nokitsiñape ikjaolre, pidee carroatsa nirri Isaac iinowa njite.'' ³⁹ Noaco nominalri irso: Coajiotsa corricadaa rooma ronoca noinai rsoaji inarro. ⁴⁰ Njite lriaco norso: ''Jliaji no-Minalri, Jliaji nonaitjalri irso cayoji lrioma capisho, Jliawatsa imeenaca Lriegeleni lrikitsindatá carroatsa pjia, pitaitá carroatsa pioketaca nirrinowa nanakjoitetsa njaji nokitsiñape, njonirri inakjoite perritsa. ⁴¹ Mitsa piacadawa naikjaolre njaji nokitsiñape njite corrin nacadaa pirso nafiepena nirrinowa. Niniotsa matsiaca pjia lrioya jlliaji yaacoti picaiterri norso yaacoti ajádalri sho pinaitjacaotsa.'' ⁴² Niini noocacawa opica ooniapji icodapi, njite noaco: ''Pjia noMinalri, notalricanaa Abraham iDiote, picadaa matsiaca lrimotoca norso jliaji nonolri ikjaote, ⁴³ picapa noamacawa lri-ricoda jliaji ooniapji, picadaa romoto cádanacoa rsoaji yempetitoa, rsoaji inarro nocaiterriotsa irso cayoji: ''Pinaitja matsiacalri pia noirrao lrinakjoite jliaji ooni pideeri pipalangana lrico, ⁴⁴ njiteotsa rsoepa njoa: ''pirrena, njite njoawatsa yaa nairrao njaji picameellon,'' icatsaotsa no-Minalri, Piniwanandaca nominalri irrinowa.'' ⁴⁵ Njite lripjeya toa yaamica caaco njoa nocaolre ricó, icapa, Rebeca yorrocowa ropalangana yaapiya ooniapji ricó rsotá-carro ooni, niini noaco rrorso: Pinaitja matsiacalri, pia noirrao ooni.'' ⁴⁶ Njite kjeyacalri rorrocoeta roonite ropolricoitanda, njite roaco norso: ''''Pirrena, njite noá tsakjaotsa nairrao njaji camello tsakja.'' ⁴⁷ Notatja njomiono coca rsonirri, niini roaco norso Betuel-ca rsonirri, Nacor irri Milca yaapiya. Ikena norroetaca caapirroti rsotaco naco njite njaji ronaapapi. ⁴⁸ Ikena noaca matsiadalri no-Minalri irso, lriDiote jliaji nominalri Abraham, lridee capoa njoa matsia nokeetá-carro nominalri ikitsinda iito lrirrinowa. ⁴⁹ Niini panaya icaite njomi, itaita cadaa icañata nominalri icapa ipeyo catsani ajádalrisho ikitsinda sho o corrin. Mitsa noma noajica coajicca, notaitá carro nocapa akjerrecaotsa noawaji, noyekemajle o nopatolriemajle. ⁵⁰ Njite Labán, Betuel tsakja naaco lrirso: ''Dio inakjoitedalrica lrino jliaji picaiterri; Corrin wataita wacaiteca ajaca o corrica. ⁵¹ Picapa, arrotsa rsoaji Rebeca. Pjipa pideeno piminalri irrinowa, cayoji Dio icaite capisho. ⁵² Abraham irsodalri jimi cádanaco cayoca lriaco, icaamitsa lriaca matsiadalri Dio irso. ⁵³ Njite jlita njaji inaanitidape palraatape, owirrope, njite tsaaya tsakja lriá-carro Rebeca irso. Lria tsakja inaaniti macoadatsa ropjerri irso njite rsodoa irso tsakja. ⁵⁴ Njite dekjena lrinja, lrirra tsakja, njite njaji lriinaiperri tsakja. Nemaatoa niini, njite tjewaijlena piyompinaco toa nacafiawa, njite lriaco: ''Picadena nodiawa nominalri iderse.'' ⁵⁵ Mitsa Rebeca ipjerri njite rsodoa, naaco lrirso: ''Picadatoa roofaa wainai die jalredaoca toa. Njite dekjena rotaitena roacawa piinai.'' ⁵⁶ Mitsa lriaco natrso: ''Macadatsa nofaa pjacatoa anjí, ima noMinalri icadaa lrimotoca norso mtsia jliaji nonolri ikjaote. Icadena nodiá carrowa nominalri iderse.'' ⁵⁷ Njite naaco: ''Warsa wawana rsoaji yempeti, rsoawatsa icaite coajica.'' ⁵⁸ Nawana Rebeca njite naaco rorso: ''¿Capja piacaotsa lriapiya jliaji atsia? Roaco narso: ''Aja, noaca lriinai.'' ⁵⁹ Ikena nameena rsoaji lriweedoa Rebeca, njiyte rsoaji rorsodarro, naacarro lrinai jliaji Abraham irsodalri njite njaji lriinaiperri. ⁶⁰ Nacadaa rorso yaacoti matsiaperri, naaco cayoji: ''Pjia waweedoa, njadoa caotsa pjia njaji aimadan inaikinai, njite njaji pinakjoite perri nainocaotsa pjiomi njaji maatsiperri icapaca irso. ⁶¹ Njite Rebeca iawa, njite rsoaji rorsodarro njerra naofawa camello nacó, njite naawa lriinai jliaji atsia. Njite jliaji Abraham irsodalri jipa idee Rebeca lriapowa lricojle. ⁶² Isaac iofáa cadanawa Neguev lricó, njite icami piatoa lridiaca lriocawa Beer Lajai Roi lrickjoite. ⁶³ Isaac imoto lriemajiwa dainoma nacojle. Njite jlirreta lricapa aima camello ínoca. ⁶⁴ Rebeca icapani, rocapa cádanacotsa Isaac, rsonico rowatsiawa camello nakjoite. ⁶⁵ Roaco Abraham irsodalri irso: ''¿Kjaiterri jliaji atsia yemajerriwa inolri wakjoete?'' Njite lriaco lrirso: ''Icatsa nominalrica.'' Niini rsopa yamacati roitaaca shopawa. ⁶⁶ Ikena jliaji narsodalri icaite Isaac jimi pjiomi coanca lrinaitjaca. ⁶⁷ Ikena Isaac ideeca rsoaji Rebeca jlidoa Sara iipanaita lricojle. Cayotsa jlitaca lrinoa rsoaji Rebeca, lripeyo pekirritsa rsoaji Rebeca. Cayotsa Isaac jliyapetaca inonaacalri jlidoamcoidoa nacó.

¹ Abraham jita apamenakja lrinowa; roipitana Cetura. ² Njite jiico rorso njaji roenipe, Zimram, Jocsán, Medán, Madián, Isbac njite Súa. ³ Jocsaán yeenipeca Seba njite Dedán. Njite njaji Dudán inakjoite-perri icatsa njaji inaiki aimadan Asur perri, Letús njite Leum perri. ⁴ Njaji Madian yeenipe: Efa, Efer, Hanoc, Abida njite Elda. Icapiatsa pjiomica njaji Cetura inakjoite-perri. ⁵ Abraham icadaa pia lrirri Isaac irso pjiomi njaji lrirsopmpe pia. ⁶ Mitsa lria pia tsakja narso njaji lrienipe apaana nainaiperri njaji inaitjepe lrirsoperri, njite lrimeenaca naawa jeerri imotokemajle, teeco lrirri isaac ioya. ⁷ Cayopia Abraham iwiaca yofacawa jalredaoca lrico: ciento setenta cinco walria. ⁸ Mayami Abraham. Lriofa cayamiwa wiá jalredaoca lrico njite pékirritsani, lriá carroenawa naikjaolre njaji lrikitsiñape mayamirri lripjeya. ⁹ Isaac njite Imael, njaji yaame lrienipe, icatsa njaji idawalrini jalraapeco lrico Macpela ricó,Efrón jipaite ricó, Zohar irri jliaji hitita tairri, jliaji tsomirri Mamre ioya. ¹⁰ Jliaji jiipai Abraham iwenta piani naoya njaji Het ienipenai. Icatsa nadawaca Abraham niini, lriino Sara icodapitsa. ¹¹ Mayami cayami Abraham, Dio inaitja matsia lrirri Isaac irso. Isaac iofá piawa tsoomi Beer Lajai Roi ioya. ¹² Icatsa njaji Imael inakjoiteperrica, jliaji Abraham irri, agar iapiaya rsoaji Egipto tadoa, Sara irsodarro, Abraham iino. ¹³ Icatsa neepitanaca njaji Imael yeenipe, coan piacatsa jiicocana: Nebaiot, el primogénito de Ismael, Cedar, Adbeel, Mibsam, ¹⁴ Misma, Duma, Massa, ¹⁵ Hadar, Tema, Jetur, Nafis njite Cedema. ¹⁶ Icatsa neepitanaca njaji Imael yeenipe, njepaite lrico, naapana lrico; doce poco namaimaca njaji caaconaperri nakitsiñape irso. ¹⁷ Cayo pia lriwiaca Imael yofa piaca jalredaoca lrico: Ciento trenta siete walria. Mayami Imael, lria carroenakja naikjaolre njaji lrikitsiñape mayamirri lripjeya. ¹⁸ Icatsa njepaiteca naofalri irricoda, Havila njite Shur nacojle, tsoomi Egipto ioya, inipo lrico yacadawa Asiria ikjaolre. Corripiatsa matsiaca naofacawa, ima nainoacaji manacawa nakjoetewaaca. ¹⁹ Njite, icatsa njaji Isaac, Abraham irri inacoapanaperrica. Abraham yenipeca Isaac. ²⁰ Isaac irsopiakena corenta walria lripekirrica nacó jlita caojli pia lriinoa Rebeca, Betuel iito, arameo tairri yofacada Padán Aram lrico, njite Labán iwedoa jliaji arameo tairri. ²¹ Isaac itatja Dio iinai lriino nacó, ima corrica rotaita keenipecano njite Dio sheepa jliaji lritatjalri Lriinai, Rebeca nacó, ikena keenipeca rsoaji lriino. ²² Njaji roenipe rowedan lricope toa, nainoacamanawa, niini roaco: ''¿Coada ayo njoaji?'' Njite roa rotatja Dio iinai coadaca cayono. ²³ Njite Dio icaite rorso cayoji: Niinica yamacoa jiipai piwawa lrico, yamacoa inaiki jipaite shenacawa piwawa lrikjoite toa. Kjaida pjaacatoa jliaji pacoa apacoa ioya, njite jliaji ipjerriti, iwerriti irsodalri kenakjaotsani.'' ²⁴ Caiwi cádanacoenano, nacapa niinica yamada njaji roenipe rowawa lrico. ²⁵ Jliaji imotolri iinita, lkeeyoni njite iiraini pjiomi, irraidalri capisho lritsayani. Nacadaa lriipitanao Esaú. ²⁶ Jliapodamtsa, lriwerri imotowa, njite jlipaca lriperri Esaú itawirseda nacó. Nacadaa lriipitanao Jacob. Isaac irsopiakena sesenta walria lripekirrica nacó keenipe caojlina rsoaji lriino. ²⁷ Nataoñawa njaji yempetipe. Jliaji Esaú lriají lriyawitaca, yajicadawa awacada lrico; mitsa lriwerri Jacob pada atsia maconi tsa, panti lricodatsa yofawa. ²⁸ Niini Isaac ipeyo pjaaca Esaú ima lrinjaca lriinai lriwini, mitsa Rebeca ipeyo pjaaca Jacob. ²⁹ Jacob iyana matsia lrinjao. Esaú yoca-cadanawa awacaada lrikjoite, mjaidenatsa maawitacai sho. ³⁰ Niini Esaú iaco Jacob irso: ''Pinaitja matsiacalri pia noijao jliaji piyanan irraidalri, ¡maapji ketsa njoa! Lrikjaote naajicani Edom. ³¹ Jacob iaco lrirso: ''Pivendee peda norso ipjerritiapani.'' ³² Esaú iaco lrirso. Corrinatsa notaitaca jliaji, mayamiketsa njoa. Mikjapantsa norso pjerritica njoa, picapa coajica mayamica njoa maawitacai sho.'' ³³ Jacob iaco tsenakja: ''Picaite peda norso yaacoti ajádalri sho.'' Niini Esaú icaite lrirso yaacoti ajádalri sho, cayotsa Esaú iwendee pjerritiapani Jacob irso. ³⁴ Jacob yaa Esaú injao pan njite lriyanan joiwí dalri comaanape. Esaú injá, lriirra tsakja, njite jlinico lriá-carro pjawa lripjeyajle. Esaú ipeeco lrioyawa jliaji ipjerritiapani.

¹ Njite, maawitacaica njepaite ricó, lrioya tsakja jliaji initalri pia Abraham shawajli. Isaac iawa Abimelec ikjaolre, natalricanaa njaji filisteonai Gerar lricó. ² jite WaMinalri icañjatacawa lrirso njite lriaco lrirso: ''Maatsawa Egipto lricojle; awatsa piawaji Nocaiterriotsa pirso kjerrecaotsa pia piofawaji. ³ Icatoatsa piofacawaji lriricoda jiipaica jliaji njite Njoá tsaotsa piinai njite nonaitjacaotsa pirso matsia anjí; ima noacaotsa pirso jliaji jiipai njite narso njaji pjiapodamperrimi, Nonaitjacaotsa cayoji nocaite capisho pia yaacoti ajádalri sho pjinirri Abrham irso. ⁴ Nocadaotsa aimaca njaji pidakenai cayoji jiwirsida eenocoma yecoa nacoperri, njite noacaotsa pidakenai irso jliaji jiipai. Naikjaote njaji pinakjoite perri matsia caotsa pjiomi njaji inaiki jalredaoca lricoperri. ⁵ Cayoatsa Nonaitjaca ima Abraham shepa noaco matsia njite lrinaitja pjiomi njaji nonaalri lrinaitjaca, njaji yaacoti Nocadaalri lrirso, njaji yacoti coancarro paofacawa matsia njite njaji yaacoti yajicape kjaidaperri.'' ⁶ Niini Isaac iofacawa Gerar lricó. ⁷ Njite njaji atsianai ninperri natatja cádanaconi lriino nacó, lricaite narso lriwedoa-cano; ima lrifioca lricaiteca narso lriino-cano, ima lriwaopia wadee cantja nainocani roikjaote ima matsiadarroca icapacana rsoaji Rebeca. ⁸ Njite wiá cayamina Isaac iofacawa niini, jliaji Abimelec, natalricanaa njaji filisteonai lricoajita lricapa ventana lrico. Lricapa Isaac itiimatetaca rsoaji lriino Rebeca. ⁹ Nini Abimelec iwanaca jlikjaolrewa Isaac, lriaco lrirso: ''Ajádalri piinoca rsoarra, cotsa piwedoa-cano. ¿Coada picaite warso piwedoa catsano? Njite Isaac shepani, lriaco: ''Ima nowaadaca wadecatsa pada ínoca njoa roikjaote jlitá-carro noyano.'' ¹⁰ Abimelec iaco lrirso: ''¿Coada pinaitja warso cayo? Pada nanakjoite njaji atsianai aperriji mjerrapitinatsantja lriaca lrimaa roapiya rsoaji piino, njitenantja pima maatsídalri jiwaca wanacó lrikjaote.'' ¹¹ Niini Abimelec iaco narso pjiomi njaji lrinaikite cayoji: ''Coca cadaotsa inota jliaji atsia o rsoaji lriino, mayamicaotsani.'' ¹² Isaac iapana lri-ricoda jiipai-ca njite lriniwaca lripania iinaca macaapji capisho lripaniapji jliwalria, ima Wa-Minalri inaitja matsia lrirso. ¹³ Njite canaanidalrica Isaac. Caiminitsa lritaoñaca lrinaani nacó niini lrirsoca lrinaani pekirridalri. ¹⁴ Lrirsopia aima oveja, vaaca, aima idejicape lrirso. Njite maatsi nacapaca lrirso njaji fiflisteonai. ¹⁵ Njaji ooni njecaniapji ricope, njecalri pia njaji jlinirri Abraham irsoperri lriofa caojli pia niini, njaji filisteonai naitacani jiipai shona. ¹⁶ Abimelec iaco Isaac: ''Warsenaotsa piawa teeco waoya, ima canaanidalri pjaaca pjia waoya.'' ¹⁷ Isaac iawa njiteo lriá-carroenakja lriofawa Pacoacaitacawa lrico jiipai Gerar lrico. ¹⁸ Isaac ipieta tsenakja jicaca njaji oniapji, jlinirri Abraham inaitjanda pia oopi. Njaji filisteonai naita piacana mayami cayami pia Abraham. Isaac icadaa neepitanao njatsa njaji jlinirri icadaji piatsa narso. ¹⁹ Njaji Isaac irsoperri njeca pacoacaitacawa lrico jiipai paapji oniapji, naoketa niini aima cawa ooni imotocawa. ²⁰ Njaji iwapacape pirraiti Gerar lricoperri nacoitacawa naapiya njaji Isaac iyape, nacaite narso nayadaca jliaji ooni. Isaac icadaa njecaniapji niini Esek, nainoaca capoa lrikjaote lriapiya niini. ²¹ Njite napieta tsenakja njecaca paapji, caitsenakja nacoitacacawa lrikjaote, njite nacadaaca lriipitanao Sitna. ²² JLia njitewa njecá-carro papjio, njite corrinatsa nacoitacawa lrikjaote, niini lricadaaca lriipitanao Rehobot, caishopa lriipita, maminalri cawa, njite lriaco: ''WaMinalri icadaaca wayadawa, icatsaotsa matsiaca faa anjí lri-ricoda jiipaica jliaji.'' ²³ Njite Isaac iawa njiteo Beerseba lricojle. ²⁴ Jliadatsa deepica Dio icañjatacawa lrirso, njite lriaco lrirso: Icatsa pjinirri Abraham iDioteca njoa. Mafiotsawa, ima Njoacatsa piinai njite matsia caotsa nonaitjaca pirso, Nocadaotsa aimaca njaji pidakenai lrikjaote jliaji norsodalri abraham.'' ²⁵ Isaac inaitja apana altar niini, njite icatsa lriaca matsiadalri Dio irso niini. Lrinaitja lripanaita niini njite njaji lrirsoperri njecaca paapji ooniapji. ²⁶ Abimelec iawa Gerar lrikjoite lriapiya jliaji lrikitsindaji Ahuzat njite jliaji lritsolrodaonai icapitama Ficol Isaac ikjaolre. ²⁷ Isaac iaco narso: ''¿Co ada íno noderse maatsi cadana icapaca norso njite shaatsa imenaca noá-carro teeco ioya?'' ²⁸ Njite naaco lrirso: ''Ima wacapaca matsia Dio catsa piinai. Niini wacaite warsocatsa wanaitjaca pada yaacoti ajádalri sho wapiyawaca. Niini warsa wanaitja pada yaacoti warsowaaca panaya. ²⁹ Corriotsa pinaitjá carroca maatsi warso, corrin tsakjaotsa waitjá carroca maatsi pirso, njite matsia calri ricotsa wameenaca pjia piá-carro teecoa matsiatsa. Ajádalri, Dio inaitjandaca irso matsia pjia.'' ³⁰ Isaac inaitja aima injaodati naiñjá-carro, niini naiñja, nairra tsakja. ³¹ Nacafiawa piyompinacotoa njite nanaitja pada yaacoti ajádalri sho naapiyawaca. Isaac imeenaca nadiawa, njite corrin coca nanaitja Isaac irso. ³² Jliadatsa jeecoapi njaji Isaac irsoperri naocawa lriderse njite naaco lrirso naoketakena ooni njecaniapji ricó. ³³ Isaac icada lriipitanawa jliaji njecaniapji Seba, caishopaca lriipitana, yaacoti ajádalri; njite Beerseba lriipitana jliaji yacaalre atee panashete. ³⁴ Esaú irsopiakena coarenta walria lripekirrica nacó jlita lriinoa apama, Judit darro iipitana, Beeri iito, hitita tairri, apama pja, Basemat darro iipitana, Elón iito, hitita tairri. ³⁵ Njaji inaitjepe nadee aima inonacalri Isaac njite Rebeca irso.

¹ Pekirri kena Isaac njite corrinatsa lritaita lricapaca matsia, lriwana lrikjaolrewa lrirri pjerriti, Esaú, lriaco lrirso: ''Nirri.'' njite jliepani: ''Alri njoaji.'' ² Isaac iaco lrirso: ''Pipacapa coanca pekirri kena njoa. Coancadanaco ketsaotsa mayami njoa. ³ Panaya pjipa njaji piwinitashopa, picaapawirre njite piyawitjiapo, piawa awacada lricojle piinó-carro noijao maaficalri. ⁴ Pinaitjaotsa noijao joiwidalri, jliaji nopeyonda noijaca, njiteotsa pidee norsoni noijá-carro njite noija cayamiotsa nocadaotsa pinaco matsiadalri mayamica ipjeya njoa.'' ⁵ Mitsa Rebeca jímitsa coanca Isaac icaite lrirri Esaú irso. Esaú yaawa awacada lricojlre lriinó-carro maaficalri lridé-carro panti ricojle. ⁶ Njite Rebeca iaco rirri Jacob irso: ''Picapakje. Njomi coanca pjinirri iaco pipjerri Esaú irso. cayo lricaitecani: ⁷ Pideotsa norso maaficalri iipe njite pinaitjaotsa noijao cayoji nopeyo capisho nojá-carroatsa njitenaotsa notaita nocaiteca matsia pinaco Dio ipeyajle lripjeyatoa mayamica njoa.'' ⁸ Panaya nirri, pjimi norso njiteotsa pinaitja cayoji nocaite capisho pjia. ⁹ Piá pioma pidee norso corrarra lrikjoite yaamana cabra yenipe; nonaitjá-carroatsa pjinirri injao cayoji lripeyo capisho lrinjaca. ¹⁰ Njite pideotsa pjinirri irso lrinjá-carro, lricadaa carroatsa pinaco matsiadalri mayamica ipjeyani.'' ¹¹ Jacob iaco rorso: ''Jliaji nopjerri Esaú, atsia keyoni njite njoa corrin. ¹² Coajiotsa papai inota cadaa njoa, niniotsa lriwada yacadacatsa icashatani. Niniotsa, lriawerricontja norso matsiadalri, maatsidalri nakjaotsa lricadaa nonaco.'' ¹³ Njite jlidoa iaco lrirso: ''Nirri, nonacoatsa jliwao coandalriada maatsidalri pikjaoté-dalri. Icaamitsa nooma pjiepaca jliaji nocaiterri pirso, piena pioma norsona.'' ¹⁴ Jacob yaa yoma njaji jlidoa itatjalri lriinai, njite ronaitja injaodati joiwí-dalri cayoji jlinirri ipeyo capisho. ¹⁵ Rebeca jipa njaji rirri ipjerriti Esaú itsayan matsiaperripja, roopana lricope lricadaa, rsoetaá-carro rirri iwerriti Jacob nacó. ¹⁶ Rorroeta njaji cabra yeenipe iyami lrinaapa naco njite lrinorsiapji nacó. ¹⁷ Njite roá lrirso jliaji injaodati joiwí-dalri ronaitjanda rirri Jacob irso. ¹⁸ Jacob iawa jlinirri iderse njite lritatjani: ''¿Pai? Njite jliepani: Alritsa njoaji; ¿Kjaiterrio pjia nirri?'' ¹⁹ Njite Jacob sheepani: ''Esaú njoa, pirri ipjerriti; nonaitjenina cayoji picaite capisho norso. Panaya pjinicoena piofawa pinjá-carro nonwinitanda pirso, picadaa carroena nonacó matsiadalri.'' ²⁰ Isaac iaco lrirri irso: ''¿Coajio pinaitjaca kjeya carrocatsa pioketaca piwinio, nirri?'' Njite lriaco jliepacani: ''Ima jliatsa jliaji wa-Minalri Dio icadaa norsoni.'' ²¹ Isaac iaco Jacob irso: ''Pitsoomita njoa nonotá-carro pinaapa, noajícarro ajádalri Esaú-ca pjia.'' ²² Jacob itsoomita jlinirri Isaac, njite jlinirri inota lridada, njite lriaco: ''Jacob iaco shoca jliaji pjemirri, mitsa njaji lrinaapa, Esaú inaapacani.'' ²³ Mitsa corrin Isaac ianjíi Jacob catsani ima keeyoca nja lrinaapa cayotsaji Esaú inaapa sho, niini Isaac icadaa matsiadalri lrinacó. ²⁴ Njite lriaco lrirso: ''¿Ajádalri nirri Esaú-ca pjia?'' Njite jliepacani: ''Aja, Esaú njoa.'' ²⁵ Isaac iaco lrirso: ''Pidee noijao piwini, notaitá-carroatsa nocadaaca pinaco matsiadalri.'' Jacob idee jlinirri inajo njite lriinjacani, Jacob idee lrirrao jaico tjeda yaana njite lrirracani. ²⁶ Njite jlinirri Isaac iaco lrirso: ''Pitsomita njoa nirri njite pitsotso njoa.'' ²⁷ Jacob itsomitani njite lritsotsoni, njite lriemjia lritsayani iitan ikena lricadaaca lrinaco matsiadalri. Isaac iaco cayoji: ''Piají coanca awacada iitan shoca lriitan jliaji nirri, jliaji awacada Dio icadanda inaco matsiadalri. ²⁸ Dio icadaotsa iyao matsiadalri jiwacawa eeno lrikjoite pjipaite nacó, njite piniwacaotsa aima pipania iinaca, aima tsakja comaana njite jaoco tjedaa walriajao tsakja. ²⁹ Pirsoperri caotsa njaji inaiki jalredaoca lricoperri njite njaji macacoe lricoperri nacoaja caotsa pipeyajle. Pjia watsa naminalri njaji piwenaipe, njite nacoajacaotsa pipeyajle njaji pjidoa yeenipe. Coca cadaotsa caaco maatsi pinaco maatsi caotsani; njite njaji caacoperri pinaco matsia, matsia caotsani.'' ³⁰ Njite yaami cádanaco catsa Isaac icadaaca matsiadalri Jacob naco, njite Jacob imoto caacatsa njiteo, jlinirri Isaac ioya, jliaji yaacada iwinita, lripejerri Esaú idia yoocawa lriwini yaapiya. ³¹ Lrinaitja injaodati joiwidalri njite lrideeni jlinirri irsoni. Lriaco jlinirri irso: ''Pai, pjinicoena pinjá-carro maaficalri iipe pirri iwinitanda pirso, picadaa carroenaotsa matsiadalri lrinaco.'' ³² Jlinirri Isaac iaco lrirso: ''¿Cocao pjia?'' Njite Esaú iaco lrirso: ''Njoatsa, pirri ipjerriti Esaú.'' ³³ Njite Isaac itetjewa, njite lriaco lrirso: ''¿Coca tsakjao jliaji iderri norso lriwini? Opina noijani pjiomi lripeyatoa pinoca noderse, nocadaa lrinaco matsiadalri. Ajádalri, matsiacaotsani.'' ³⁴ Esaú jimi cádanaco coanca jlinirri icaiteca lrirso, icaamitsa lriyaca kjaida irroati sho, lriao jlinirri irso: ''Picada tsakja nonaco matsiadalri, paí.'' ³⁵ Isaac shepani: ''Opina lrino noderse jliaji piwerri ishaati sho njite lrideeca pioya jliaji matsialri piyadaope pia.'' ³⁶ Esaú iaco: ''¡Cotsa matsiaca lriipitanaca Jacob!'' Ima yamapia kena lricashataca njoa. Jlita nooya ipjerritiapani, njite panaya, opinakja jlita nooya jliaji matsiadalri noyadape pia tja.'' Lriaco pja jlinirri irso: ''¿Corrin picadaa pada matsiadalri jatjamitsa noyadawa?'' ³⁷ Isaac iaco lrirso: ''Opina nocaiteni jliá-carroatsa piminalri, njite lrirsperricaotsa pjiomi njaji piwenai, njite nocadaa lrirso aima lrinjaope njite lrirraope walrijaipe tsakja. ¿cokenatsantja notaita noaca pirso, nirri?'' ³⁸ Esaú iaco jlinirri irso: ''¿Corrinatsa pirso padetsa matsiadalri norso, paí?'' Picadaa tsakja nonaco matsiadalri, papai. Esaú iyaca kjemá niini. ³⁹ Isaac iaco lrirso: ''Anji piofalri niini corriotsa pirso carroca jiipai matsiadalri, corriotsa iyá-carroca pipania iicao jiwacada eeno lrikjoite. ⁴⁰ Piinocaotsa inaiki pjitá-carro naoya nanaani pitaitá-carro caafica pjia, njite pidejicaotsa piwerri irso. Mitsa piema cádanacoatsa lrikjoete, corrinatsaotsa jliá-carroca iají pinaco.'' ⁴¹ Maatsi pia Esaú icapaca lriwerri Jacob irso lrikjaote jliaji matsiadalri njanirri icadanda lrinaco. Esaú iaco lricaolre ricó: ''Kjeyetsa mayamica papai; niniotsa mayami kenaotsani, noinoatsa jliaji nowerri Jacob.'' ⁴² Niini nacaite Rebeca jimi coanca rirri pjerriti icaiteca. Niini ronaa nawanaca rorso rirri iwerriti Jacob, lriaco lrirso: ''Pjimi matsia, jliaji pipjerri Esaú lricatimataaca jliwacatsa ima lriwaopia lrinó-carro pjia. ⁴³ Panaya nirri, warsa pipítoa nopjerri Lában ikjaolre, Harán lricojle, pjiepa jliaji nocaiterri pirso. ⁴⁴ Pia toatsa piofa nirse, akjerre kenaotsa yaami kerroaca jliaji pipjerri, ⁴⁵ a kjerre kenaotsa yaami kerroacani pikjoete, kjerre kenaotsa yami lriwaopiaca lrinaco jliaji pinaitjalri lrirso. Njitenaotsa nonaa naaca naoma pjia njite. Corrin nooma mayamica shaa papiatsa yamadape.'' ⁴⁶ Rebeca iaco Isaac irso: ''Maatsí noajiacacawa naikjaote njaji Het itonaipe. Jacob jita cadaa lrinowa apama nanakjoite njaji Het itonaipe, caiperri nacayosho njaji inaitjepe faofalri icodapi. Cayo cadaa, maatsiwatsa nofacawa.''

¹ Isaac iwana lrikjaolrewa Jacob, lriaco lrirso: ''Corriotsa pjitá carroca piinowa nanakjoite njaji inaitjepe Canaán lricope. ² Warsaotsa piawa Padán Aram lricojle, Betuel iipana lricojle, pjidoa jinirri; pjitaotsa pinoa nirse, apama nanakjoite njaji Labán itonaipe, pjidoa ipjerri tsa. ³ Jliaji Dio Itaita kjeti iminalri inaitjaotsa pirso matsia, Lricadaotsa aimá-carro pienipe aimá carroatsa njaji pidakenai, pacoa yacaalre macacoe carroatsa shaa, inaiki aimadan. ⁴ Lricadaotsa pirso njaji matsiaperri Lricadaji Abraham irso, pirso, njite narso njaji walricoma pjiapodamperri, piyada carroatsa jliaji jiipai piofalri niini, Dio icadanda Abraham irso.'' ⁵ Ikena Isaac imeenaca Jacob iwa. Jacob iawa Padán Aram lricojle, Labán ierse, Butuel irri jliaji arameo tairri, Rebeca ipjerri, Jacob jidoa. ⁶ Njite Esaú icapa Isaac icadaaca matsiadalri Jacob irso, njite lrimeenacani Padán Aram lricojle, jlitácarro lrinoa njité-darro. Lricapa tsakja Isaac icadaca matsiadalri Jacob irso njite lricaite lrirso wadee jlitaca lrinowa njaji inaitjpe Canaán lricope. ⁷ Esaú icapa tsakja Jacob shepaca jliaji jlinirri njite jlidoa icaiterri lrirso, njite lriacawa Padán Aram lricojle. ⁸ Esaú icapa corrica jlinirri Isaac ipeyo icapaca njaji inaitjpe Canaán lricope. ⁹ Niini lriacawa Imael ikjaolre jlitá-carro apama lrinowa njite, rooya tsakja rsoaji lrino. Jlita lrinowa Mahalat, Abraham idakedoa, Imael iito, Nabaiot iwedoa. ¹⁰ Jacob iawa Beerseba lrikjoite Harán lricojle. ¹¹ Lrioca pafe ricojle njite lrimaa ninitsa, ima deepi ketsa lricao. Jlita pada jiipada ninperri lricadá-carro jliwidarroani, ikena lriorsoa lrimaa niini. ¹² Jlitaponca niini njite lricapa pada pjerra-carrona yemacawa jiipai nakjoite njite lriocawa eeno lricojle, njite njaji Dio iagelenai naorrocoa njite nadia tsenakja njerrawa lrinaco. ¹³ Njite wa-Minalri yemacawa lrinaco njite lriaco lrirso: ''Icatsa pi-Minalrica njoa, Abraham njite pjinirri Isaac iDiote. Jliaji jiipai piorsoalri niini, Nocadaaca pirsoni njite narso njaji pidakeenai. ¹⁴ Cayoatsa njaji pidakenai imaimaca jipai sho, pipocotacaotsawa teecowa jerri imotokemjeteo, jliewa nirse, lriparrema nacojle yamemape. Pinakjoite watsa matsiaca pjiomi njaji inaiki jalredaoca lricoperri. ¹⁵ Njoa tsaotsa piinai, nowapaotsa pjia akjerre catsaotsa piawaji. Nocadaa tsenakjaotsa pidiacawa lrinacojle jliaji jiipai ima corriaotsa nomacaca pjia. Nonaitjaotsa pjiomi njaji nocaiterri pirso.'' ¹⁶ Jacob icafia jlitaponialre ioya, njite lriaco: ''Ajádalri a catsa jliaji wa-Minalri njite corrin noají.'' ¹⁷ Jacob ifiowa niini lriaco: ''¡Cafainaca anjí! Dio iipanacani. Eeno ipananomacan.'' ¹⁸ Jacob icafiawa piyompinacoena njite jlipa jliaji jiipada lricadanda jliwida nacó. Lriwakeeta jiipada niini njite lriarro aceite lrinacó. ¹⁹ Njite lricadaaca lriipitanao niini Betel (Dio iipana), mitsa lriipitana jliaji yacaalre niini nainitanda nacadaaca, Camarrai. ²⁰ Jacob inaitja pada yaacoti ajádalri sho niini, lriaco cayoji: ''Pjia cadatsa noinai njite piwapa cadaa njoa inipo-lrico, picada cadaa noijawa njite notsayaniwa njoetaaca carroa, ²¹ njite nodiaca noocawa njonirri ikjaolre matsiatsawa, niniotsa no Dioteca jliaji no-Minalri. ²² Niniotsa jliaji jiipada nocadalri anji matsiadalri cani. Njite nanakjite njaji pialriotsa norso nodietacaotsa Pirso die pja lrinacojle.''

¹ Ikena Jacob iacawa njite lriocawa njepaite ricojle njaji inaiki yofacapewa jerri imotokema nacojle. ² Njite lrioca cádanaco nirse, teeco panti ioya lricapa papji ooniapji, njite lricapa madalripoco oveja lricodapi jliaji ooni. icatsa njetaca ooni nairrao njaji oveja, njite macadalrica jliaji jiipada naitashopa lrinomafe jliaji ooniapji. ³ Nawacaaca cádanacoenawa pjiomi njaji oveja niini, njaji ivapacapena nadoita mana jliaji jiipada naacarroena nairrao njaji oveja, njite nataita cayami mana naaca nairrawa nadoita tsenakja jliaji jiipada lrinomafe naco jliaji ooniapji naitá carroni. ⁴ Jacob iaco narso: ''¿Nokitsiñape, kjaiteo inoji?'' Njite naaco lrirso: ''Harán lrikjoite wano.'' ⁵ Njite Jacob iaco tsenakja: ''¿Capja yajica jliaji Labán, Nacor irri?'' Njite njeepani: ''Ajatsa, wanjintsa kjaiterrica.'' ⁶ Njite lriaco: ''¿Capja matsiatsani?'' njjite njepacan: ''Aja, matsialritsa, njite, orroteji lriito Raquel inoca, rodeeca njaji oveja.'' ⁷ Njite Jacob iaco: ''Ajádalri, myacan kena jerri. Corritoa jlinaana pawaketacawa catoa njaji oveja. Yaantja naorrao ooni naa-carro tsenakja naija malritsi.'' ⁸ Njite naaco lrirso: ''Corrin wataita waaca nairrao ooni a kjerreca nawacaacawa pjiomi njaji oveja. A kenaotsa piiomiji, njaji atsianai nadota jliaji jiipada ooni imomafe ioya, niini dekjena waa nairrao ooni.'' ⁹ Caacope cadanatoa Jacob naapiya, Raquel iocawa naapiya njaji rsonirri iovejan poco, ima rsoaca iwapana lrirso. ¹⁰ Jacob icapa cádanaco Raquel, Labán iito, jlidoa Rebeca ipjerri, Jacob yaa idoita jliaji jiipada ooniapji inomafe ioya, njite lria nairrao ooni njaji oveja. ¹¹ Jacob itsotsoca Raquel icacoda naco ikena lriiyaca kjaida. ¹² Jacob icaite Raquel irso rsonirri ikitsindacani, lriwedoa Rebeca irri. Niini rsoeco rocaite rsonirri irso. ¹³ Labán jimi cádanaco Jacob nacó, lriwedoa irri, jliecoa lrikjaolre lricoadatá carroni, jlieyoani, lritsotsoni njite lrideeni lriipana lricojlen. Jacob icaite lrikjirri Labán irso pjiomi coajica. ¹⁴ Labán iaco lrirso: ''Ajádalri nonakjoité-dalrica pjia.''Jacob iofaa lriinai lriipana lrico apapi kerri. ¹⁵ Njite papia nacojlena, Labán iaco Jacob irso: ''Ajádalri nonakjoité-dalrica pjia, mitsa corrin matsialrica pidejica norso macoadatsa. ¿Coaji pioma nocaoñaca pjia?'' ¹⁶ Labán irsopia yaamama lritonaipe. Lea rsoaji pjerroti njite rowedoa Raquel. ¹⁷ Rsoaji Lea, matsiaperri piaca njaji rotji, mitsa Raquel, apama inarro matsiaparro njite matsiadarro icapacana. ¹⁸ Njite Jacob ipeyoca rsoaji Raquel, niini Jacob iaco lrikjirri Labán irso: ''Nodejiotsa pirso siete walria piito iwedoati Raquel ikjaote.'' ¹⁹ Njite Labán iaco lrirso: ''Matsia pjatoa noaca pirsono lrioya jliaji noacano pada atsia irsono. Pideji pedena norso.'' ²⁰ Niini Jacob ideji lrikjirri Labán irso siete walria Raquel ikjaote; mitsa lriaji njaji siete walria padaa capishotsa jalredaoca, ima lripeyoca pekirritsa rsoaji Raquel. ²¹ Njite Jacob iaco lrikjirri Labán irso: ''Piena norso rsoaji noino Raquel ima opoikena notaita nodejica roikjaote nofá-carroenaotsa roinai.'' ²² Ikena Labán iwaketa pjiomi njaji inaiki ninperri njite lrinaitja aima injaodati lriñjá-carro naapiya. ²³ Njite deepi ricoena, Labán idee rsoaji lriito Lea Jacob irso. Njite Jacob imaa roapiya jliadaa deepi. ²⁴ Labán jipa yaa rsoaji lrirsodarro Zilpa idejicaoda Lea irso. ²⁵ Njite piyompinacojlena, Jacob icapa, ¡Lea catsa rsoaji Labán yaa lrirso! Nini Jacob iaco lrirso: ''¿Coada pinaitja norso cayoji? Raquel ikjaoteo jliaji nodeji pirso, cotsa Lea ikjaoteca. ¿Coada picashata njoa?'' ²⁶ Njite Labán shepani: ''Faa aperiji, cotsa warsoenca jliaji waacawa njaji waito iwedoati ipjerroti ipjeya toa. ²⁷ Pitaitatoena jliaji paaja semana cainocaapani inacoapana roapiya rsoaji noito, njitenaotsa noa tsakjaotsa rsoaji iwedoati piinowa tsakja, mitsa pideji tsenakjaotsa norso siete walria rocoadawa.'' ²⁸ Jacob iwayaketa jliaji paaja semana lrinaco jliaji cainocaapani inacoapana Lea iapiya. Njite dekjena Labán icadaa rsoaji lriito Raquel Jacob iinowa tsakja. ²⁹ Labán icadaa rsoaji lrirsodarro Bilha idejicaoda Raquel irso. ³⁰ Jacob imaa tsakja raquel iinai. Jacob ipeyo pja Raquel Lea ioya. Njite Jacob ideji tsenakja siete walria Labán irso Raquel ikjaote. ³¹ Njite Dio icapa corrica Jacob ipeyo cantja rsoaji Lea, niini Lricadaa keenipeca rsoaji Lea, mitsa raquel corrin rotaita keenipecano. ³² Keenipe Lea pada atsiada, rocadaa lriipitanao Robén (picapa, pada noenipe). Ima roaco cayoji: ''Ima wa-Minalri icapa coanca njorrapitaca; niniotsa pa panaya lripeyocaotsa njoa jliaji noinirri.'' ³³ Ropieta tsenakja keenipecano pada atsiada. Roaco cayoji: ''Ima Dio jimica corrica napeyondaca njoa, caishopa Lricadaa tsenakja norso pada tsenakja noenipewa,'' rocadaa lriipitanao Simeón (njeminda irso). ³⁴ Njite ropieta tsenakja keenipecano, pada atsiada tsenakja. Roaco cayoji: ''Panaya dekja corriotsa lrimacá-carroca njoa jliaji noinirri, ima norsoca madalrida lrienipe.'' Rocadaa lriipitanao Leví (mamacaaca-capeo). ³⁵ Ropieta tsenakja keenipecano. Roaco cayoji: ''Panaya dekja noaca matsiadalri Dio irso.'' Niini rocadaaca lriipitanao Judá (iá cada matsiadalri). Icaamitsa yami kenipe catoano.

¹ Njite Raquel yaají corrica rotraita keenipeano Jacob irso, niini matsica rocapaca ropjerro irso. Roaco Jacob irso: ''Corricada pinaitja noenipeo, mayamicaotsa njoa.'' ² Njite kerroaca Jacob Raquel irso, lriaco rorso: ''¡Capja Dioca njoa! ¡Cotsa njoaca ifarro kenipeca pjia!'' ³ Njite roaco lrirso: ''Arrorra norsodarro, Bilha. Pimaa roinai, njite jliaji yempeti rorsolriotsa, noyada caotsani, nininaotsa norsoca noenipe ronakjoite.'' ⁴ Raquel icadaa rorsodarro Bilha, Jacob inowa. Njite Jacob imaaca roapiya. ⁵ Keenipe Bilha Jacob irso. ⁶ Niini Raque icaite: ''Dio ikitsindataca njoa. Ajádalri jlimica norso niini lriaca norso pada noenipeo.'' Niini rocadaaca lriipitanao Dan (jliá icaite). ⁷ Keenipe tsenakja Bilha Jacob irso, yamada shopena. ⁸ Njite Raquel icaite: ''Aima njorrapitaca notaitá-carro norsoca noenipe nopjerro Lea ikjoete njite matsiatsa lrimotoca norso.'' Njite Rocadaa lriipitanao Neftalí (nodejirri ikjaote). ⁹ Njite Lea icapa corriquetsa rotaita keenipecano, rsopa rorsodarro Zilpa, roá-carro Jacob inowano. ¹⁰ Njite Zilpa, Lea irsodarro keenipeno Jacob irso. ¹¹ Niini Lea icaite: ''¡Matsiapjaaca njoa! niini rocadaaca lriipitanawa Gad (irsocada matsiadalri). ¹² Zilpa ipieta tsenakja keenipecano Jacob irso, yamada shopena. ¹³ Lea icaite: ''¡Catiimaca njoa! Ima njaji naitonaipe najicaotsa njoa catiimadarro.'' Niini rocadaaca lriipitanao Aser (itiimati). ¹⁴ Rubén iawa naniwa cádanaco napania trigo njite lricapa paana jaicotjedaa awacada lrico. Jlipa lrideena jlidoa Lea irso. Njite Raquel iaco Lea irso: ''Pia norso piinaiwa nanakjoite njaji jaico tjedaa pirri ideji.'' ¹⁵ Njite Lea iaco rorso: ''Aimena pinaitjaca norso maatsirri ima pjitaca nooya noinirri. Njite panaya pioma tsakja nooya njaji jaico tjedaa nirri ideji norso.'' Njite raquel iaco rorso: ''Panaya deepi pedaotsa lrimaaca piinai piacada norso njaji jaicotjeda pirri ideji.'' ¹⁶ Jacob idia yoocawa awacada lrikjoite deepinatsa. Lea imoto lrikjoete rocoadatá-carron, njite roaco lrirso: ''Noinai watsa piomaa panaya deepi, ima nocaoñaca pjia nasho njaji jaicotjetaa nirri ideji.'' Niini Jacob imaaca Lea iinai jliadaa deepi. ¹⁷ Dio jími Lea irso, niini keenipecano Jacob irso cinco shopena roenipe. ¹⁸ Lea icaite cayoji: ''Dio iaca norso nocoadawa, ima nocadaaca rsoaji norsodarro noinirri irso.'' Niini rocadaaca lriipitanao Isacar (caishopaca lriipitana, ''niinica pada nocoadawa.'') ¹⁹ Lea ipieta tsenakja keenipecano, sei shopena roenipe Jacob irso. ²⁰ Ima roaco cayoji: ''Dio icadaaca norso pada matsiadalri. Panayaotsa matsiaca noinirri icapaca norso ima noaca lrirso sei lrienipewa.'' Niini rocada lriipitanao Zabulón (matsiadalricani). ²¹ Njite dalri romotoeta apama inarroda, rocadaa roipitana Dina. ²² Njite Dio iwaada Raquel nacó niini jlimica rorso. Niini Lricadaaca kewedancano. ²³ Niini jiicoca roenipe pada atsiada. roaco cayoji: ''Dio jitaca nooya ipaimanti.'' ²⁴ Njite rocadaaca lriipitanao José (Lritaita pjaaca lriyataca), ima roaco: ''Dio icadaa pjaca norso pada pja noenipeo.'' ²⁵ Raquel imotoeta cayamina José, Jacob iaco Labán irso: Pimenaca noawa teecowa, notaitácarro noacawa njopaite lricojle, noyacalre lricojle. ²⁶ Pia norso njaji noninai njite njaji noenipe, njaji nodejirri pirso ikjaote, njite picadeena noacarroa, piajintsa coanca nodejica pirso.'' ²⁷ Labán iaco lrirso: ''Matsia cadaatsa picapaca norso, piwapa toa, ima noajica nioajikje showaacatsa Dio inaitjaca norso matsia pikjaote.'' ²⁸ Njite lriaco lrirso: ''Picaite njomi coshoapaca pioma nocaoñaca pjia, njiteotsa nocaoñaca pirso.'' ²⁹ Jacob iaco lrirso: ''Piajintsa coanca nodejica pirso, njite coanca matsiaca njaji piwacan njoa capoa iwapa pirsona. ³⁰ Tsopiatsa njaa piipirra jlipjeya pia nonoca piderse, njite panaya picapa coanca aimacana. Dio inaitja matsia pjiomi njaji nodejirri. Njite panaya nomena nowapaca njaji noopaneta tsakja.'' ³¹ Njite Labán iaco: ''¿Coshoapa pioma nocaoñaca pjia?'' Jacob shepani: ''Corriotsa coca pia norso. Picaoña cadaa njoa, icaamitsaotsa nodiaca tsenakja nowapaca njaji pipirra. ³² Picadaa noemaji nocapa njaji pipirra jliadaaca jliaji, njoenitá carroatsa njaji oveja cadapalre perri njite njaji irsocape coandalri catsa namatsikjee nanakjoite njaji cabra. Njite icatsaotsa njaji pialricaotsa nocoadawa. ³³ Njitenaotsa piají matsiacatsa nodejica pirso o corrin pino cádanacoatsa picapa njaji nocoadawa. Picapa cadaotsa cadaotsa niinica apana cabra madapalrene tsa o niini cada oveja corridalritsa iitanica, picaiteotsa noñaite catsana.'' ³⁴ Njite Labán iaco: ''Matsiatsa. Cayó pedaotsa picaite capisho.'' ³⁵ Jliadaa pia Labán jienita njaji cabra atsiana cadapalrepe njite njaji cadanaperri, njite pjiomi njaji cabra inarrona cadapalrene perri, njaji irsocape jaalreperri nanaco, njite pjiomi njaji oveja iitanepe, njite Labán icadaana lrienipe irsona nawapá-carro. ³⁶ Labán icaite Jacob irso nacapaacá-carro madalridaa shaapodam. Niini Jacob iwapa njaji Labán iipirra itemi. ³⁷ Jacob jipa jaicoki walrinepe toa nayoaca jaico álamo ioya, almendro ioya njite derripa tsakja, lripitsia pakjaape njaji jaicoki pacapá-carro njaji jaico pacapácarro jaico jialreca lriipe ricó. Njite pacapaca cadanaperri capisho njaji jaico. ³⁸ Njite lricadaa njaji jaico lripitsiaji napeyajle njaji pirraiti lriwapaji, ooni shecocarrokja lrico nairracawa ooni. Njite kewedanca njaji maaficalri nano cádanaco nairra ooni ³⁹ Njaji pirraiti keenipena napeyajle njaji jaico, njite cadapre minitsa namotocawa neenipe njaji pirraiti, cadanaperri njite amojliaperri tsakja. ⁴⁰ Jacob jienita njaji cordero, mitsa lricadaa nacapá-carro njaji pirrati cadanaperri, njite njaji oveja itanepe naikjaolre njaji Labán ipirra ikjaolre. Niini jlinitaca jliwacatsa lrirsowao njaji pirraiti, corrin lricadaa naacarro Labán iyape iinai. ⁴¹ Jacob icapa cádanaco njaji pirraiti kjaidanipe nanaitjaca neenipeo, Jacob icadaa njaji jaico nairracawa ooni, nacapacawa njaji pirraiti, nanaitjácarro neenipe nacapacawa njaji jaico. ⁴² Mitsa nja cádanaco inaitja yeenipe njaji maafialri mjaidanipetsa, corrin lricadaa napeyajle njaji jaico. Niini njaji maaficalri mjaidanipetsa, icatsa Labán iyapeca. Njite njaji kjaidaperri, icatsa Jacob iyapeca. ⁴³ Njite kjeeya canaanica jliaji Jacob. Lrirso pia aima lriipirra, lrirsoperri atsianai njite inaitjepe, lrirso tsakja aima camello njite borro.

¹ Jacob jimi coanca naacope njaji Labán yeenipe, ima naaco cayoji: ''Jacob jipa faniri ioya pjiomi njaji lriyape, fanirri iyaape nakjoite lrirso lrinaani pekirridalri.'' ² Njite Jacob iapa teecojleca Labán icapacana lrikjoete. ³ Niini Dio iaco Jacob irso: ''Pidienawa pjinirri jipaite nacojle, pikitsiñape ikjaolre, njite njoa catsaotsa piinai.'' ⁴ Jacob icaite Raquel irso njite Lea tsakja naacarro lrikjoete lriwapacawa lricojle nja lripirra ⁵ njite lriaco narso: ''Nocapaca tania shoketsa lricapaca njoa jliaji jinirri, mitsa noinai catsa jliaji njonirri iDiote. ⁶ Icapjentsa coanca nodejica kjaida jinirri irso. ⁷ Lricashata njoa njite die walria lritecojletaca jliaji nocoadawa, mitsa corrin Dio icadaa lrimatsicaca njoa. ⁸ Lricaite cada pia norso: 'Pjiomi njaji maaficalri cadapalre perri piyapecaotsana pidejicalre icoadao, njite pjiomi njaji pirraiti yeenipe namotocawa cadapalrena. O lricaite cadaa: 'Piyapecaotsa njaji cadanaperri pidejiccalre icoada', njite cadanaca namotocawa pjiomi njaji maafialri. ⁹ Cayotsa Dio icadaaca norso njaji maaficalri pjinirri iipirra nakjoite. ¹⁰ Papia nacojle poima cádanaco njaji pirraiti inarrona, nocapa njotaponi ricó njaji chivo nakeenipetaca njaji oveja. Njaji chivo cadanaperri cana, irsocape idapalre tsoperri njite njaji paana irsocape macadalri idapalre. ¹¹ Njite wa-Minalri iageleni iaco norso njotaponi ricó: ''Jacob'', njite njoepacani. ''Alri njoaji.'' ¹² Njite lriaco norso:''Picapa njaji chivo ikenipetalri njaji oveja, cadanaperri, tsoperri idapalre njite macadalripe idapalre. Ima nocapaca coajica Labán inatjaca pjia. ¹³ Icatsa Dio Betel ricodaca Njoa, piarrolri inaco aceite sho, picaitecawa pinaitjaca pada pinaitjaoda norso. Panaya, pjinicoenawa piá-carro lrioya jliaji jiipai lrinacojle jliaji jiipai jiicocarrom pjia.'' ¹⁴ Njite raquel, Lea tsakja naaco lrirso: ''Corrinatsa coca wawapalri wayadawa fanirri iinai. ¹⁵ Corrin fanirri icapaca warso cayoji lriitonaipe sho, lricapaca warso inaiki capishotsa fa lrioya. Lriwendee fa njite jlita waoya pjiomi njaji wayaadape. ¹⁶ Niini pjiomi njaji Dio jitalri fanirri ioya panaya wayapecani weenipe yaapiya. Niini panaya coajicadaa Dio inaa pinaitjaca, pinaitjena. ¹⁷ Njite Jacob jireeta njaji lrienipe, lrininai camello nacó. ¹⁸ Lricada naawa lripeyajle njaji lri-vacan, pjiomi njaji lrirsoji, coshoca njaji vaaca lrwentaji Padán Aram lrico. Ikena lriacawa jlinirri Isaac iderse Canaán jipaite ricojle. ¹⁹ Labán yaa cadana toa iyoá lri-ovejan iiyo, Raquel iñaito rsonirri ioya njaji idolo lrirsompe lriipana lrico. ²⁰ Njite Jacob icashata tsakja Labán, jliaji arameo corri capoa lricaite lrirso lriaca lrioya. ²¹ Niini lrideeca pjiomi njaji lrirsonipe njite lriyoeta kjeya jliaji Ooni, njite lriawa awacada nacocawa Galaad iyada. ²² Njite madalridaa shapodamina nacaite Labán jimi opica Jacob ipitowa. ²³ Niini Labán iinai njaji lrikitsiñape lriá-carro Jacob shapodam. Siete jalredaoca naco lria lrioketan awacada cawa naco Galaad iyada. ²⁴ Niini caacoca Dio Labán irso, arameo tairri jlitapon ricó deepi ricó, lriaco lrirso: ''Picapaotsa pioyawa wadee caacopeca pjia macadatsa Jacob irso.'' ²⁵ Ikena Labán yaa ioketa Jacob. Njite jacob inaitja pia lriipana poco awacada cawa lrico. Njite Labán yaa tsakja imaa nirse tsakja naapiya njaji atsianai lrikitsiñape awacada cawa lrico Galaad jipaite nacó. ²⁶ Labán iaco Jacob irso: ''¿Coanshopao jliaji pinaitjalri, picashata njoa njite pidee njaji noitonaipe padee capisho njaji pacoama oowi rikjoite?'' ²⁷ ¿Coada pipitowa njite picashata njoa, corrin picaite njomi piaca nooya? Matsiantja nocadaaca piawa, wacanta caya canción pandero sho, njite arpa tsakja. ²⁸ Pimaca corrin notsotsoca nacacoda naco njaji nodakenai njite njaji noitonaipe. Corrin matsiaca jliaji pinaitjalri. ²⁹ Norsoca aima inaiki nonaitjá-carro irso maatsi, mitsa jliaji pjinirri iDiote caacoca norso opica deepi njite lriaco norso: ''Picapaotsa pioyawa wadee caacopeca pjia macadatsa Jacob irso.'' ³⁰ Panaya piakenawa pjinirri iipana lricojle, mitsa ¿Coada piñaito njaji no-idolon?'' ³¹ Jacob iaco Labán irso: ''Nonaitja cayo nofio capoa wadee catsa noaji pidietaca nooya njaji piitonaipe jiidati ricó. ³² Coca cadaa jita pioya njaji pi-idolon corriotsa caaficarrocan wiá. Njite nacapá-werrico njaji wakitsiñape, pioma picapa cocaca njaji piyaarro pidietá-carrona.'' Ima corrica Jacob yají Raquel-ca rsoaji iñaito njaji idolo. ³³ Labán shewa icapa Jacob ipana poco lrico, Lea iyada lrico njite nayada lrico njaji yaamama narsoperri, mitsa corrin lrioketana. Lrimoto Lea ipanapoco ioya njite jliewawa Raquel iyada lrico. ³⁴ Raque pia rsoji iderri njaji idolo panti ricope, rsoetana paofacawa camello naco njite nofaa nanaco. Labán yají yomana ropanaita iwawa lricojle mitsa corrin lrioketa. ³⁵ Roaco rsonirri irso. ''Corrin nooma kerroaca pjia nominalri, corrin noawa piderse ima canopaca njoa.'' Niini lriaji tja lriomana mitsa corrin lrioketana. ³⁶ Njite kerroaca Jacob niini caacopeca kjaidani Labán irso: ''¿Coaji nokerroataca pjia, o cocao jliaji nomatsicanaa piso caicarro pinoca pioma njoa irroati ricó? ³⁷ Piomjenina piomi noyarro lrico nite corrin pioketa njaji pi-idolote. Mitsa cocacadaa pioketa piyarro nakjoite, pidee ajerreji nacapá-carro njaji wakitsiñape, nacaité-carro coanca wanaco fa yamada. ³⁸ Vente walria nodejica pirso. Njaji piovejan, pi-cabran corrin neenipe jiwaca naoya njite corrin noijá tsoo nanakjoite njaji pipirra. ³⁹ Njaji yaawi ijáji corrin nodee piaca pirsona ima nocaite nocaoñaca pirsoni. Njaji maaficalri iñacapeo, njaji nañaitolri mana jaalre-werrico o deepiwerico pima nocaoñaca pirsona. ⁴⁰ Nowapa njaji pipirra jaalre-werrico jamolriapi ricó, njite deepi-werrico japerriapji ricó, corrin nomaaca. ⁴¹ Vente walria nodejica pirso piipana lrico. Nodeji catorce walria piitonaipe ikjaote njite sei walria pipirra ikjaote. Die pia pitecojleta nooya picaoña cawa njoa. ⁴² Corricadantja noinaica jliaji Njonirri iDiote, Abraham iDiote, jliaji njonirri Isaac ifiolri iwana, corritsantja cocaca norsolri piinai. Dio icapa coajica pjirrapitetaca njoa idejikjeti sho, njite coajica nodejica kjaida njite picapa coajica Lricoitaca pjia opica deepi.'' ⁴³ Njite Labán iaco Jacob irso: ''Njaji inaitjepe noitonaipecana, njaji yempetipe nodakenaicana, njite njaji maaficalri noyapecana. Noyape pjiomi njaji picapalri. Mitsa corrinatsa coca notaita nonaitjaca nadiá-carro noinai njaji noitonaipe njite njaji nodakenai. ⁴⁴ Niini panaya warsa wanaitja pada yaacoti, pjia, njoa. Nají carroatsa pinaco njite nonacó.'' ⁴⁵ Niini Jacob jipa yemeta pada jiipada jalripani. ⁴⁶ Njite Jacob iaco narso njaji nakitsiñape: ''Iwaketa tsakja jiipada.'' Njite nawaketa jiipada yenon carrona. Ikena naijaca nacodapi njaji jiipada. ⁴⁷ Labán icada lriipitanao Jegar Sahaduta (aima njaji icapacape. Labán yaaco lrico), mitsa Jacob icadaa lriipitanao Galed (aima njaji icapacape. Jacob yaaco lrico). ⁴⁸ Labán icaite cayoji: ''Njaji jiipada, icatsa njaji icapalri pinaco njite nonaco panaya.'' Niini nocadaaca lriipitana Galed. ⁴⁹ Mizpa tsakja najicani, ima Labán icaiteca cayoji: ''Dio watsa icapa waicao pjia njite njoa corri cádanaco wacapaacawa. ⁵⁰ Dio watsa icapa piino cadaa njajinoitonaipe, o pjita cadaotsa apama pja piinowa naoya njaji noitonaipe. Dio watsayají pinaco njite nonaco.'' ⁵¹ Labán iaco tsenakja: Picapa jliaji jiipada apadanalritsa yemacawa njite njaji jiipada wawaketaji, nocadalri waikjaote, pjia njite njoa. ⁵² Jliaji jiipada apadanalritsa yemacawa njite njaji jiipada wawaketaji, icatsa njaji icapalri corricaotsa njoyapa pja naoya pikjaolre, corrin tsakjaotsa pjiyapa pja naoya noikjaolre waitja carrontja maatsi warsowaaca. ⁵³ Jliawatsa jliaji Abraham IDiote, Nacor iDiote, Jlia watsa icaite waacona.'' Njite Jacob icaite yaacoti ajádalri sho jlinirri Isaac iDiote iipitana nacó. ⁵⁴ Jacob iino maaficalri awacada naco njite lriwana njaji lrikitsiñape naijá-carro injaodati lrinaitanda narso. Naijaketsa njite nemaa lriricodatsa jliaji awacada. ⁵⁵ Njite tjewaijena piyompinacotoa Labán icafiawa, lritsotso njaji lridakenai, lriitonaipe njite lricadaa nanaco yacoti matsiaperri. Ikena Labán lridiacawa lriipana lricojle.

¹ Jacon yaa pjawa tsakja njite njaji Dio iagelen nacapacan. ² Jacob icapa cádanacona, lriaco: ''Dio iofa carrojica anji,'' nini lricadaaca lriipitanao niiní Mahanaim (naofacawa yamafe). ³ Jacob imeenaca yaacoti lripjeyao lripjerri Esaú irso, Seir jipaite lricó, Edom iyadacawa lricó. ⁴ Njite lrina nacaiteca cayoji: ''Cayoatsa iaiteca lrirso jliaji nominalri Esaú: Cayoji lricaiteca jliaji poirsodalri Jacob: Noa piacatoa nofawa Labán iderse, njite icaamitoa nodiacawa. ⁵ Norso buey, borro, aima oveja, njite idenjicape norso inaitjepe njite atsianai. Nomeenaca pirso yacoti pirso pjia nominalri, picoadatá-carro njoa. ⁶ Njaji idecape yacoti Esaú irso, nadiá naocawa Jacob iderse, naaco lrirso: ''Waokjeni pipjerri Esaú iderse. Lrino pidaotsa lrioketaacá-carro piapiya njite lridee caotsa coatrociento atsianai lriinaiwa.'' ⁷ Njite Jacob ifiocawa pekirritsa njite corrin lriaji coanca. Niini jlienitaca yamapocoa njaji inaiki yaacapewa lriinai, caitsakja njaji oveja, vaaca, njite nja camello. ⁸ Lriaco cayoji: ''Esaú ioca cadaotsa papoco nacojle njite lriinona, cayo cádanaco njaotsa njaji papoco nataitaotsa napitocawa.'' ⁹ Njite Jacob iaco: ''Pjia noferrim Abraham iDiote njite jliaminitsa njonirri Isaac iDiote tsakja, Jliaji noMinalri icaitecada norso: pidiawa piyacalre lricojlé, pikitsiñape iderse njite nonaitjaotsa pirso matsia.'' ¹⁰ Cotsa cocaca njoa matsiá-carrontja Picapaca norso niini corrica pimaca njoa cayoji pcañjata capisho nocapa, njoa Pirsodalri. Ima icaamitsa norsolrica apaapo-tsa mawapeti njoyoeta caojli pia jliaji ooni Jordán njite panaya norsoca yamapoco njaji inaiki noinaiperri njite njaji nopirra. ¹¹ Pinaitja matsiacalri, macadatsa nopjerri Esaú inoca njoa, ima nofioca lrikjoete, wadee catsa lrinoca lriino njoa njite njaji yempetipe njadoafie. ¹² Mitsa picaite piaca norso: ''Matsia caotsa nonaitjca pirso. Nocadaotsa aimá-carro njaji pidakenai caida macapawan lricope sho, corri-perrinatsa coca itaita iniwetacana.'' ¹³ Jacob iofawa jlia deepica ninitsa. Njite lrimatsieta lriaope macoadatsa lripjerri Esaú irso nanakjoite njaji lrirsolri. ¹⁴ Jlipa dociento cabra, vente cabra atsiana, dociento oveja njite vente carnero, ¹⁵ trentana camello inarrona neenipe fie, coarenta vaaca, diena toro, Vente borro njite vente tsakja borro inarrona. ¹⁶ Lricadana lrirsoperri irso nawapá-carrona, nacoamitsa nawapaca papoco nanakjoite njaji maaficalri. Lriaco narso: ''Warsaotsa yaawa nopjeya njite teecopeotsa yaacawa ioyawaaca naapiya njaji pirraiti.'' ¹⁷ Lricaite matsia lrirsodalri iorso jliaji yaalri napeyajle, cayoji: ''Nopjerri Esaú ioca cádanacoatsa pinacojle njite lritatjaotsa jlimio pjia: ¿Cocao piminalri? ¿Kjereeotsa piawaji? ¿Coca iipirra njaji piderri pipeyajle?'' ¹⁸ Njite picaiteotsa lrirso: ''Pirsodalri Jacob iyapecana. Lriawada macoadatsa nominalri Esaú irso. Alriteji lrinoca fapodjete.'' ¹⁹ Caiminitsa Jacob icaite narso njaji yamapoco, madalripoco njite narso pjiomi ideecape njaji porraiti. Icaiteotsa cayoji: ''Jlia minitsa yacoti icaiteotsa Esaú irso icapa cádanacoatsani. ²⁰ Icaite tsakjaotsa lrirso: ''Ena tsakjaotsa faapodami jliaji pirsodalri Jacob.'' Ima Jacob iwaopiaca cayoji: ''Nomerroata carroatsani nasho njaji noderri lrirso macoada shotsa nomeenacalri nopjeyawa. Niini lricapa cádanacoenaotsa njoa, lricoatadaotsa njoa.'' ²¹ Ikena lrimeenaca lripjeyao njaji lriaope lripjerri Esaú irso. Jacob yofatoa imá jliadaa deepi njapodam jliwacatsa. ²² Jacob icafiawa deepi rico njite jlipa njaji yaamama lrininai, yaamamape njaji narsoperri njite njaji ocede lrienipe. Lrimeenaca naawa pemajle tomoitacawa nacojle lrirso jliaji ooni Jaboc. ²³ Icatsa cayoji Jacob icadaa naawa tomoitacawa lrico ooni njite pjiomi njaji lriyarroaji. ²⁴ Jacob iofa padetsa niini niini pada atsia ino iwiaca lrikjoete tsomi cádanacoena jaalrecani. ²⁵ Njite jliaji atsia lricapa cádanaco corrica lritaita jliamaca Jacob, niini lrinoca kjaida Jacob iiwalre naco njite lrimatsiketa Jacob iiwalre lrinoaca cádanaco lriapiya. ²⁶ Jliaji atsia iaco Jacob irso: ''Ajena pjia, picadena noawa, ima icamikenaotsa jaalrecani.'' Mitsa Jacob iaco lrirso: ''Cotsa nocadaa-carroca piawa a kjereca picadaa nonaco matsiadalri.'' ²⁷ Njite lriaco Jcob irso: ''¿Cocao pipitana?'' Njite Jacob shepani: ''Jacob noipitana.'' ²⁸ Njite jliaji atsia iaco JAcob irso: ''Corrinatsaotsa Jacob-ca pipitana, Irael watsa pipitana panaya. Ima piwiacacawa Dio ikjoete njite atsianai ikjoete njite corrin maapjica pjia.'' ²⁹ Njite Jacob itatja jimioni: ''¿Cocao pipitana.'' Njite jliaji atsia iaco lrirso: ''¿Coada pitatja pjimio noipitana nacó. Icaamitsa lricadaaca matsiadalri Jacob nacó. ³⁰ Jacob icadaa lripitanao niini Peniel (Dio iecoa), ima lricaiteca cayoji: ''Ima nocapaca Dio yecoa njite lricapa tsakja noecoa, mitsa corrin lriino njoa. ³¹ Njite jaalre kena matsaia Jacob iicao jliyapa cadana toa Peniel lrico. Pokjo-pokjo Jacob iacawa ima caiwica lriaji lriiwalre. ³² Caishopa njaji Iraelnai panashete toa, corrin naijaca nayataaca cawa naawalre nacope njaji maaficalri, ima jliaji atsia inoacalriwa Jacob ikjoete imatsica pia Jacob ioyani.

¹ Njite jacob jirreta icapa, njite lricapa Esaú inoca lrikjaolre coatrociento atsianai yaapiya. Jacob sheneta naji lrienipe, njaji lrininai njite njaji narsoperri. ² Lricadaa njaji narsoperri neenipe yaapiya napeyajle, njite Learoenipe yaapiya njapodami, njite Raquel roenipe José yaapiya piketem. ³ Njite Jacob yaawa napjeya pjiomi. Jacob icoajawa jipai nacojle siete pia, caitsa lripjeri iocawa lriderse. ⁴ Esaú jiecoa lricoadatá-carroni, jlieyoani, njite lripatoita lrinacojlewani, njite lritsotsoni. Njite naiya ketsa yamadape. ⁵ Esaú jirreta icapa, njite lricapa njaji inaitjepe njite njaji yempetipe, lriaco Jacob irso: ''¿Coamperrio njaji inaiki pinairri?'' Njite Jacob iaco lrirso: ''Icatsa njaji noenipe Dio icadaji aimasho pirsodalri irso.'' ⁶ Ikena nanoca njaji inaitjepe narsoperri neenipe yaapiya naikjaolre, njite nacoajawa natatlácarro. ⁷ Njapodam Lea ino njite njaji roenipe naikjaolre, njite nacoajawa natatlácarro. Njite pikeetem Raquel ino roenipe yaapiya naikjaolre njite nacoajawa natatlá-carro. ⁸ Njite Esaú iaco: ''¿Coamishopao njaji papoco, papoco nocapalri yaalri pipjeya? Jacob sheepani: ''Matsia carrotsa picapaca norso, njoa pirsodari.'' ⁹ Njite Esaú iaco Jacob irso: ''Corritsa coca canacairri norso nowerri. Pjipa catsa pirsowaona.'' ¹⁰ Mitsa Jacob iaco lrirso: ''Corrina teete, matsia cadatsa picapaca norso, pjipena nopjeyana ima noaca pirsona, ima nocapaca pjia nocapa capisho Dio yeecoa, njite picoadata njoa matsia. ¹¹ Pjipena nopjeya macoadashotsa njaji nodeji pirso, ima Dio iaca norso aimatsa nonaaniwa, njite norso capoa aima nooma noaca aima tsakja poirso nanakjoite.'' Corrin yaamica Jacob niini Esaú jipa lripjeyana. ¹² Njite Esaú iaco lrirso: ''Warsena wawa. Njoa watsa yaawa pipeyajle.'' ¹³ Mitsa Jacob iaco lrirso: ''Corrina nominalri, ima tsope catoa njaji noenipe njite njaji vaaca njite oveja tsakja narsoca neenipe tsonipetoa irracape catoa. Ima wakjeyapita cadaa waaca naapiya padaa tsantja, mayamintja pjiomi njaji maaficalri. ¹⁴ Piena nopjeya nominalri. Njoa pirsodalri, tacaatsa noaca pjiapodam naacatsa njaji maaficalri yalri nopjeya, njite naa caatsakja njaji yempetipe, atee nocaotsa pikjaolre Seir lricojle.'' ¹⁵ Esaú iaco lrirso: ''Nocadaotsa piinai padapena atsianai noinaiperri.'' Mitsa Jacob iaco lrirso: ''¿Coada pinaitja calretsa matsia norso nominalri?'' Lrikjoenina pinaitjaca norso matsia. ¹⁶ Ikena jliadaa Esaú idiacawa Seir lricojle. ¹⁷ Jacob iawa Sucot lricojle. Lrinaitja lripanao niini njite panti nemaa-carrodao njaji lriipirra. Icatsa lriipitanaca niini, Sucot (paofacawa lrico). ¹⁸ Jacob ioca cádanacoa Padán Aram lrikjoite, corritsa coca maatsirri lrikjoete yacaalre Siquem lrico, jliaji yacaalre Canaán jipaite ricó. jliaji awacada tsoomi yacaalre ioya. ¹⁹ Niini lriwentaca jliaji pjepada jiipai narsocawa pia napanaita njaji Hamor yenipe, Siquem jinirri, lriwentani cien monedaita sho palraata. ²⁰ Jlirreta apana altar niini njite lricadaa lripitanao El Elohe Irael, caishopacani ''Dio, icatsa Irael iDiotecan.''

¹ Papia nacojle rsoaji Dina, Lea iito Jacob irso, roa roemaji naapiya njaji ronarrocawenai ninperri. ² Njite Squem, Hamor irri heveo tairri, caconaite yenipe nindalri, lricapa cádanaco Dina jlipa lrideeno njite lridakitaca roapiya corri cadanatsa lriinocano. ³ Siquem ipeyoca Dina, Jacob iito. Lripeyocano lricaolre sho niini caacoca rorso matsiatsa. ⁴ Siquem icaite jlinirri Hamor irso cayoji: ''Pia piweñi noinowa rsoaji inarro yempeti toa.'' ⁵ Njite Jacob jimi coanca nanaitjaca maatsi lrito Dina irso, naa cadanatoa nawapa napirra malritsi coa nacojle njaji lrienipe atsianai, niini macotoa Jacob akjerreca naocawa njaji lrienipe. ⁶ Hamor, Siquem jinirri iá icapa Jacob iderse caacó-carro lriapiyani. ⁷ Nadia naocawa njaji Jacob yeenipe nadejicalre ioya malritsi coa lrikjoite njite nacaite njemi ronaco rsoaji nawedoa. Maatsi najiacacawa njaji atsianai. Kerroacana ima Siquem ipaimanietaca Irael lrinaitja capoa maatsi lridaki sho Jacob iito irso, ima cirri-catsa matsialrica jliaji lrinaitjalri rorso. ⁸ Hamor iaco narso: ''Jliaji nirri Siquem yomaca rsoaji piitoi. Pinaitja matsiacalri picada lriinoano. ⁹ Warsa wanaitja papoco carrotsa fa, niini pia warsonrsoaji pienipe njite jita ininaiwa njaji waitonaipe.'' ¹⁰ Yofaotsa wainai njite idejiwatsa imaodacatsa jliaji fepaite, yofaotsa niini njite iwende watsa pjiomi cocacatsa, njite itaita tsakjaotsa irsoca iyarrope wainai. ¹¹ Siquem iaco Jacob irso njite narso njaji lrienipe: ''Noma matsiaca icapaca norso, niini coca cadatsa itatja noinai noá watsa irso.'' ¹² Itatjena noinai cocacatsa macadalri, coandalri catsa yoma noinai, noá watsa irso coca catsa ioma, mitsa yaaca noinoa rsoaji yemepeti.'' ¹³ Njite naaco njepaca Squem njite Hamor njaji Jacob yeenipe, mitsa jliaji nacaiterri narso ishatitsa, Siquem inaitja capoa maatsi nawedoa irso. ¹⁴ Njite naaco njepacana: ''Corrin wataita wanaitjaca, wa cantja rsoaji wakitsidoa pada irso corri-dalritsa irso Dio jinaana lridaki nacó; ima maatsidalri jiwaca cantja wanaco wanaitja cada cayo. ¹⁵ Icaamitsantja waaca irsono inaitja cada cayoji: Iyoa cadaa iatsiaca íya cayoji wacayosho, njite pjiomi njaji atsianai. ¹⁶ Njite dekja wataita waaca waitonaipe ininaiwa, njite fetaca waninaiwa itonaipe, waofá iinai anji papoco carroenatsa fa pjiomi. ¹⁷ Mitsa corri cadaa sheepa fa iyoaca iatsiaca íya icaamitsa fepaca wadee rsoaji wawedoa waacarro roapiya ajaiteji. ¹⁸ Njite jliaji yacoti nacaiterri matsia Hamor njite Siquem jimica. ¹⁹ Jliaji atsia yempetitoa kjeyacalrim lrinaitjaca jliaji nanaalri nanaitjaca, ima lripeyoca rsoaji Jacob iito, njite Siquem, pada atsia nacapandaca naicaowa njaji jlinirri ikitsiñape. ²⁰ Hamor njite lrirri Siquem naawa yacaalre ipananoma caacocarrona naapiya njaji inaiki nimperri, naaco narso: ²¹ ''Njaji atsianai imaodaca-capetsa wainai, niini warsaotsa icadaa naofá-carro wainai fepaite ricó, nataitá -carro nadejica niini njite nawende tsakja nadejicalre, ima jliaji fepaite macadalri cani, lricoatsa nadejicarroni. Fetaotsa naitonaipe waninaiwa njite wa tsakjaotsa narso waitonaipe. ²² Mitsa naofaotsa wainai njaji atsianai wayacalre ricó papoco carroetsa fa, nayoá cadaa natsiaca íya njaji atsianai, ima njá iyoacape kena natsiaca íyam. ²³ Imaotsa pjiomi njaji na-vacan, na-yarro, piomi napirra wayape caotsana. Niini matsiatsa wanaitjaca cayoji nacaite capisho, naofá-carro wainai. ²⁴ Pjiiomi njaji atsianai nayacalré ricope njeepa jliaji Hamor njite Siquem icaiterri narso. Niini pjiomi najaji atsianai nayoaca natsiaca íyam. ²⁵ Njite madalridaa naco jecoapi, caiwi cádanaco toa naaji nadada naco njaji atsia nayoaji ioya natsiaca íyami, yamada nanakjite njaji Jacob yeenipe, Simeón njite Leví, Dina ipjenaipe, nacoana njepaca namatseetani njite naawa yacaalre ricojle, njite njaji atsianai nimperri corritsa coca nawapa yaacantja ínona, niini njaji Simeón njite Leví iapiya naino pjiomi naji atsianai yacaalre lricoperri. ²⁶ Naino tsakja Hamor njite lrirri Siquem matseeta sho. Njite njepa nadee nawedoa Dina Siquem iipana lrikjoite, icaamitsa nadiacawa njiteo. ²⁷ Njite nja paana Jacob yeenipe naa caikjaolre njaji mayamperrim minatsa njite nadee pjiomi nayarro nayacalrem rikjoite, ima njaji inaiki nanaitja maatsi nakitsidoa irso. ²⁸ Nadee na-vacan, na-ovejani, na borroni narsompe yacaalre ricotsa njite njaji narsolri pia yacaalre iwaida nacojle ²⁹ pjiomi nayarro. Njepa nadee naninai, neenipe tsopetoa tsakja. Nadee tsakja pjiomi njaji naapana lricoperri tsakja. ³⁰ Niini Jacob iaco Simeón njite Leví irso: ''Oopi dekja yaa inaitja nomatsicanao pekirrídalri, imaotsa corrica naoma njoa njaji inaiki waofalri jipaite ricó, njaji cananeonai, njite ferezeonai. Cotsa coca-ca noopaneta imaimaca. Nadia cadaotsa njepacawa papocotsa njite nano naino njoa, icaamitsaotsa nowayacacao njite pjiomi noopaneta.'' ³¹ Mitsa Simeón njite Leví naaco njanirri irso: ''¿Capja matsia piacatsa Siquem inaitja rorso rsoaji waweedoa cwilredarrom capishotsano?''

¹ Dio icaite Jacob irso: ''Pjinico piawa Betel lricojle, piofá-carro niini. Pjirretaotsa apana altar Dio irso, jliaji picapalri pia pipitoji caojli pia pipjerri Esaú ioya.'' ² Niini Jacob icaite narso njaji lriipana lricope njite njaji lriinaiperri pjiomi: ''Ipeeco yooyawa pjiomi njaji idolonai irsompe, imatsietaacawa matsia jiwaacatsa imatsicana ioya, njite sheeta inacoa itsayan walriperri. ³ Warsa wawa ajaiteji Betel lrircojle. Nonaitjacaotsa apana altar Dio irso niini, jliaji ikitsindatalri njoa njorrapita caojli pia, njite noinai catsa akjerrejle catsa noawaji.'' ⁴ Niini naaca Jacob irso pjiomi njaji idolonai narsolri pia nanakjoite perri njaji apaana inaiki, njite njaji njentada njeeni nacope. Jacob jipa idawana jiipai ricó apana jaico macani ipocoda nacó tsoomi Siquem ioya. ⁵ Naacayawa, Dio icadaa ifiokjeti jiwacawa nanaco pjioi njaji inaiki yacaalre nawaipoco ricoperri, niini njaji inaiki corrin napineetaca njaji Jacob inaikite. ⁶ Jacob iocawa Camarrai lricojle, jliaminitsa Betel Canaán jipaite ricó, njite pjiomi njaji inaiki lrinaiperri tsakja. ⁷ Jlirreta jliaji altar nirse njite lricadaa lriipitanao niini ''Jliaji Betel'', ima niini piaca Dio icañjataacawa lrirso lriaji caojli pia lripitojiwa lripjerri Esaú ioya. ⁸ Mayami rsoaji iwapacada Rebeca yenipe, roipitana pia Dévora. Nadawano teeco pja Betel ioya, apana jaico macani icodapi njite nacadaa lripitanao niini Alón Bacut, caishopacani ''Jaico ninicawa inonacalri.'' ⁹ Jacob yaa cadanaco icapa Padán Aram lricojle, Dio icañjatacawa Jacob irso tsenakja njite lricadaa yaacoti matsiaperri lrinaco. ¹⁰ Dio icaite lrirso: ''Jacob-ca jliaji piipitana, mitsa panaya corrinatsaotsa Jacob-ca pjia. Irael watsa piipitana panaya.'' Njite Dio icadaaca lriipítanawa Irael. ¹¹ Dio icaite pja lrirso: Icatsa Dio Kjaidanalrica njoa. Pinaitjaotsa aima pienipe, njite imaimatacawa. Pacoa yacaalre macacoe inotoatsa pinakjoite, njite aima tsakjaotsa yacaalre macacoepe imotoatsa pinakjoite, njite talricanaatinai tsakja. ¹² Jliaji jiipai noalri Abraham njite Isaac irso, noá tsakjaotsa pirsoni, njite narso njaji pjiapodamperri tsakja.'' ¹³ Ikena Dio jirracawa lrioya caacolri pia niini lriapiya. ¹⁴ Jacob iwakeeta jiipada caacó carrom lrirso Dio niini. Lriarro lrinaco lrirranda njite aceite tsakja ofrenda sho. ¹⁵ Jacob icada lripitana niini, caacó carrom lrirso Dio, Betel. ¹⁶ Naawa Betel lrikjoite, njite tsoomi ketjatsana Efrata ioya, lrinitena caiwica roenipe rsoaji Raquel. Aima rsorrapitaca lrikjaote. ¹⁷ Njite matsina cádanaco caiwica rorso, rsoaji iwapacada kenipeno, roaco rorso: ''Mafiotsawa, ima pirsocaotsa pada tsenakja pienipe.'' ¹⁸ Njite tsomiketsa mayami carrono, rocadaa lriipitanao Benoni, mitsa jlinirri lricadaa lriipitanao Benjamín. ¹⁹ Mayami Raquel, njite nadawano inipolrico jacadawa Egrata lricojle, jlia minitsa Belén. ²⁰ Jacob iwaqueeta jiipada Raquel icaonam naco. Icatsa jlinaanaca nadawa carrom Raquel atee panashete. ²¹ Irael yaapjawa njite lrinaitja lria lrinaitja lripanaitawa lripeyajle pja jliaji nanaitjanda yeenondalri njerracawa naco nawapá-carro naapirra. ²² Irael yofá-cádanacotoa lriricoda jiipaica, Ruben yaa imaa Bilha iinai, jlinirri irsodarro, njite Irael yaají jliaji Rubén inaitjalri. Jacob irsopiakena doce lrienipe. ²³ Njaji Jacob yeenipe Lea inaiperri icapiatsa njaji, Rubén jliaji pjerriti, njite Leví, Judá, Isacar, njite Zebulón. ²⁴ Njaji lrienipe Raquel inaiperri, icatsa njaji José njite Benjamín. ²⁵ Njaji lrienipe Bilha irso, Raquel irsodarro, Dan njite Neftalí. ²⁶ Njaji Zilpa, Lea irsodarro yeenipe Jacob irso, icapiatsa njaji, Gad njite Aser. Icapiatsa njaji Jacob yeenipeca pjiomi, njaji jiicolri Padán Aram lrico. ²⁷ Jacob yaawa jlinirri Isaac iderse Mamre rse Quiriat Arba (Hebón) lricoda, Abraham njite Isaac iofá-carrom pia. ²⁸ Isaac iofáa jalredaoca lrico ciento ochenta walria. ²⁹ Mayami Isaac lriá-carro lriwacaacawa nainai njaji lriferrinaipemi. Pekirrinatsa mayamican. Njaji lrienipe Esaú njite Jacob njaji idawani.

¹ Icatsa njaji Esaú inakjoiteperri, najirri tsakja Edom. ² Esaú jita poa inoa njaji cananeo tadoanaipe. Icapiatsa njaji: Ada, Elón hitita tairri iito, Aholibama, Ana iito, Ismael iito, Zibeón idakedoa, heveo tairri, ³ njite Basamet, Ismael iito, Nebaiot iwedoa. ⁴ Esaú irrica Elifaz Ada irso, njite Basemat yeenipe lrirso Reuel. ⁵ Aholibama yeenipe lrirso Jeús, Jalaam njite Coré. Icatsa njaji Esaú yeenipenaica jicolri pia Canaán jipaite ricó. ⁶ Esaú jipa idee njaji lrininaipe, lrienipenaipe, lritonaipe, njite pjiomi njaji yofacape lriinai lriipana lrico, lri-vacan, lri-pirra, pjiomi njaji lrinaani lrirsompe lriwaketaji a cadanacotoa lriofawa Canaán jipaite ricó, lriá-carro teeco pada jipai nacojle lriwerri Jacob ioya. ⁷ Esaú inaitja cayo ima aimaca njaji naapirra naofá.acrro pafetsantja yamadapena. Ima jliaji jiipai naofalri piatoa irricoda corri lricoaca narso naikjaote njaji na-wacan imaimaca. ⁸ Niini jliaji Esaú, naajirri tsakja Edom, lriawa awacada cawa nacojle lriipitana Seir. ⁹ Icatsa njaji Esaú inakjoite-perrica, naferrim njaji edomitanai awacada cawa nacope iofawa Seir lrico. ¹⁰ Icatsa neepitanaca: Elifaz, Ada (Esú iino) irri Esaú irso; Reuel, Basemat (Esú iino). ¹¹ Njite njaji Elifaz yeenipeca, Temán, Omar, Zefo, Gatam njite Quenaz. ¹² Njite Timna, apama Elifaz, Esaú irri inaidarro, rorsoca pada roenipe lrirso, lriipitana Amalec. Icatsa njaji Ada idakenaica, rsoaji Esaú iino. ¹³ Njite icatsa njaji Reuel yenipenaica: Nahat, Zera, Sama njite Miza. Icatsa Basemat idakenaica, rsoaji Esaú iino. ¹⁴ Njaji Aholibama yenipenaica, rsoaji Esaú iino, Ana iito, Zibeón idakedoa: Esaú, Jeús, Jaalam njite Coré. ¹⁵ Icatsa njaji Esaú inakjoiteperri, lripaneta poco: Lrirri pjerriti, Elifaz inakjoiteperri:Temán, Omar, Zefo, Quenaz, ¹⁶ Coré, Gatam njite Amalec. Icatsa njaji Elifaz ipaneta poco inakjoiteperri Edom jipaite ricó. Icatsa Ada idakenaica. ¹⁷ Njaji Reuel poco, Esaú irri: Nahat, Zera, Sama njite Miza. Icatsa njaji Reuel poco inakjoiteperri Edom jipaite ricó. Icatsa njaji Basemat idakenaica, Esaú iino. ¹⁸ Njaji ahilobama poco, Esaú iino: Jeús, Jaalam njite Coré. Icatsa njaji Ahilobama poco inakjoiteperri, rsoaji Ana iito, Esaú iino. ¹⁹ Icatsa njaji Esaú yeenipe poco-ca. ²⁰ Icatsa njaji Seir yeenipenaica, jliaji horeo tairri, njaji jiipai iminanai: Lotán, Sobal, Zibeón, Aná, ²¹ Disón, Ezer njite Disán. Icatsa njaji horeonai poco, njaji yofacapewa Seir lrico, Edom jipaite ricó. ²² Njaji Lotán yeenipe, Horari njite Hemán. Njite Lotán iwedoa roipitana Timna. ²³ Icatsa njaji Sobal yenipeca: Alván, Manahat, Ebal, Sefo njite Onam. ²⁴ Njite Sibeón yeenipe: Aja y Aná. Aná pia jliaji yoketalri ooni imotocawao jalrapocolri ricó, lriajikje pia lriwapa njaji jlinirri Zibeón iborron. ²⁵ Icatsa njaji Aná yeenipe: Disón njite Aholibama, Aná iito. ²⁶ Njaji Disón yeenipe: Hemdán, Esbán, Itrán Njite Querán. ²⁷ Njaji Ezer yeenipe: Bilhán, Zaaván njite Acán. ²⁸ Njaji Disán yeenipe: Uz njite Arán. ²⁹ Icatsa njaji horeonai poco: Lotán, Sobal, Zibeón, njite Aná, ³⁰ Disón, Ezer njite Disán: icatsa njaji horeonai poco, nadana neepitana kjaiterri poco nakjoitecaná Seir jipaite ricó. ³¹ Icapiatsa njaji talricanaatinai italricanaatalrica Edom jipaite ricó lripjeya toa narsoca natalricanaa njaji Iraelnai: ³² Bela, Beor irri; lritalricanaata pia Edom lricó, Dinaba pia lriyacalre iipitana. ³³ Mayami Bela, njite Jobab , Zera irri, Borsa lricoda, italricanaata jliapodam. ³⁴ Mayami Borsa, njite Husam, temanitanai jipaite lrikjoite dalri italricanaataca jliajpodam. ³⁵ Mayami Husam, njite Hadad, Bedad irri, jliaji inolri njaji madianitanai Moab jipaite ricó, italricanaataca jliapodam. Avit pia lriyacalre iipitana. ³⁶ Mayami Hadad, njite Semla, Masreca lricoda italricanaataca jliapodam. ³⁷ Mayami Samla, njite Saúl, Rehobot njitédalri ooni icodapi lricoda italricanaataca jliajpodam. ³⁸ Mayami Saúl, njite Baal Hanán , Acbor irri italricanaataca jliapodam. ³⁹ Mayami Baal Hanán, Acbor irri, njite Hadar italricanaataca jliapodam. Pau pia lriyacalre iipitana. Mehetabel pia lriino ipitana, Madred iito, Mezaab idakedoa. ⁴⁰ Icatsa neepitanaca njaji Esaú iipaneta poco jiwidaapo, coamperri poco inakjoite perri njite njepaite iipitana naofacawa lrico: Timna, Alva, Jetet, ⁴¹ Aholibama, Ela, Pinón, ⁴² Quenaz, Temán, Mibsar, ⁴³ Magdiel njite Iram. Icatsa neepitanaca njaji Edom jiwidaapo, nayacalre iipitana kjerredalri jiipaica naofawaji. Icatsa Esaú-ca jliaji, edomitanai jinirri.

¹ Jacob iofawa lri-ricodatsa jliaji jiipai jlinirri iofá carrom piatsawa, Canaán jipaite ricó. ² Cayo pia Jacob iipaneta inacoapana. José, pada atsia yempetitoa irsocada diecisiete walria lripwkirrica nacó iwapacada jlinirri ípirra lripjerrinaipe ínai. Nainai piacani njaji lriperrinaipe, neenipe njaji jlinirri ininaipe Bilha njite Zilpa. José idia icaite matsia nanaco jlinirri irso. ³ Irael ipeyo pjaaca jliaji lrirri José naoya njaji lripjerrinaipe ina lrienipecani pekirri cayaminani. ⁴ Njite njaji lriperrinaipe nacapa njanirri ipeyo pjáca José naoya pjiomi, niini maatsi nacapaca lrirso njite corrin caaco matsia lrirsona. ⁵ José irso pada jlitapon niini lricaiteca njemio njaji lripjerrinaipe. Njitedalri maatsipja nacapaca lrirso. ⁶ Lriaco narso: Jlimi jliaji njotaponrri. ⁷ Njotapon, wapapica panacope njaji wapania fetaope ínaca, njite, njaji jliaji noyada lriema capisho mayacan, njite, jliaji iyape némawa noyada iwaipoco nacó njite nacoajacawa noyada ikjaolre.'' ⁸ Njaji lripjerrinaipe naaco lrirso: ''¿Capja piwaada pjia caotsa italricanátacaotsa wanaco? ¿Pjiá cantja yájí wanaco?'' Njite mátsi pja nacapaca lrirso jlitapon ikjaote njite nanaco njaji lricaiterri narso. ⁹ Lripieta tsenakja jlitaponca njite lricaite lriperrinaipe irso: ''Jimikje, norso tsenakja pada njotapon: Jliaji jeerri, njite kérri njite once jiwirsida nacoajacawa noikjaolre.'' ¹⁰ Lricaite tsakja jlinirri jimioni cayotsa lricaite capisho narso njaji lripjerrinaipe, njite jlinirri icoitani, lriacolrirso: ''¿Coajidalrio jliaji pjitaponrri? 'Rsoaji pjidoa, njoa njite njaji pipjerrinaipe ajádalriotsa wacoajacaotsa poikjaolre jalredaoca lrico-toa?'' ¹¹ Njaji lriperrinaipe mátsi najiacacawa lrikjaote, mitsa jliaji jlinirri lriwaopia lrinaco lriaolre ricotsa. ¹² Naawa njaji lripjerrinaipe Siquem lricojle nawapá-carro njanirri ípirra nirse. ¹³ Irael iaco José irso: ''¿Capja opica ná nawapa pirraiti Siquem lricojle njaji pipjerrinaipe? Warsaotsa piawa njapodam.'' Njite José iaco lrirso: ''Prontoena njoa noá-carro.'' ¹⁴ Lriaco lrirso: ''Warsa pia picapa matsia cadatsa njaji pipjerrinaipe njite njaji pirraiti, njiteotsa poidia picaite njomi coajicana.'' Cayotsa Jacob imeenaca José iawa teecoa lrioya jliaji pacoacacaita lrikjoite jiipai Hebrón lricoda Siquem lricojle. ¹⁵ Pada atsia icapa José, njite lricapa lriajicawa macadatsa awacada lrico. JLiaji atsia itatja jimio José: ''¿Cocao piaji pioma?'' ¹⁶ José iaco lrirso: ''noajica noona njaji nopjerrinaipe, pinaitja matsiacalri picaite njomi kjerreca ná naofa nawapa njaji pirraiti.'' ¹⁷ Njite lriaco jliaji atsia: ''Opi nawa ajaiteji, njite njomi nacaiteca naacawa Dotán lricojle.'' José iawa Dotán lricojle lripjerrinaipe shapodam, njite lrioketacana Dotán lricojle. ¹⁸ Nacapa José tekjoite toa, njite lripjeyatoa lriocacawa naikjaolre, nanaitja pada iwaopiakjeti nainó carroni. ¹⁹ Naaco narsowaaca njaji lripjerrinaipe: ''Icapa lrinoca waikjaolre jliaji kjetaponrri mana. ²⁰ Niini oanaya, warsaotsa wainoni, njiteotsa wapecoatsa nerricoda njaji irrirriapji aperriji. Njite wacaiteotsa opica apana maaficalri kerroani awacada lricoda íñjani. Wacapa carroatsa coajicaotsa jlitapon nacó.'' ²¹ Rubén jími niini lriyomjetacani naoya. lriaco narso: ''Corrin nóma wainocani.'' ²² Niini Rubén iaco narso: ''Mainotsani. Ipeco-catsani nerricoda njaji irrirriapji jalrapocolri ricope, mitsa corrin ínocantjani icaapisho.'' Cayo lricaiteca lritaitá-carro jlitacani irrirriapji ioya lridieta carroni jlinirri iderse tsenakjan. ²³ Niini José ioca cádanaco lripjerrinaipe iderse, ikena natojloetaca lrioya lritsayan matsiadalri. ²⁴ Njepa napeconi irrirriapji ricó. Jliaji irrirriapji corrin lrirsoca ooni lri-ricoda. ²⁵ Njitedalri naofaketsa naiñja. Njite njerreta nacapa, naomena nacapa papoco imaelitanai ínoca naokjaolre Galaad lrikjoite, nadee camello naco aima pomeniajaipe, tapé tsakja njite mirra, nadeecana Egipto lricojle. ²⁶ Judá iaco narso njaji lrikitsiñape: ''Cotsa cocá-carroca warso waino cadaa jliaji wakitsinda, njite wadawaca lrirrana. ²⁷ Warsa wawende narso njaji imaelitanai, corrin nóma wainocani, ima wawérricani, wanakjoitedalri.'' Njite njeepan njaji paana lrikitsiñape. ²⁸ Njeyapawa njaji madianitanai yácae iwende. Njeta José napeecolri njiteni. Ikena nawendeca José narso njaji imaelitanai venteeta monedaita palraata icoa. Naji imaelitanai nadee José Egipto lricojle. ²⁹ Rubén yá icapa irrirriapji ricojle, mitsa corrinatsa lricapa José niini, njite lritsafá lritsayani. ³⁰ Lriá naikjaolre njaji lripjerrinaipe, njite liaco narso: ''¿Akjerreo jliaji yempeti? Njite ¿a kjerreotsa noawaji?'' ³¹ Naino apana cabra njite naiñjeta lrírranam José itsayanim nacó. ³² Njite nadee nacañjatani njanirri irso, naaco lrirso: ''Alri waoketaca jliaji. Picapatja matsia pirrí José itsayan cadaani o corrin.'' ³³ Jacob icapa jliacatsan njite lriaco: ''Noenipe itsayanimcani. Maaficalri kerroani awacada lricoda iñjacani. Ajádalri paitapenaita lrinaitjaca jliaji noenipe.'' ³⁴ Jacob itsafá lritsayan njite jlieta lrinacoa tsacowanam. Ocho jalredaoca lriiyaca José nacó. ³⁵ Njaji lrienipe njite lritonaipe naatja nacatimatani mitsa corrin lrioma nacatimatacani. Lriaco narso: ''Mayami catsaotsa njoa lriapiya jliaji inonacalri noenipe nacó.'' Jacob íyacatsa José ikjaote. ³⁶ Njaji madianitanai nawende José Egipto lricojle Potifar irso, pada tsolrodao caconaite idejicada Faraón irso, nacapitamacan njaji iwapacape jliaji talricanaati Faraón.

¹ Njite papia nacojlene Judá shenawa naoya njaji lrikitsiñape njite lria lriofawa Hira iinai, Adulám lricoda yofawa. ² Judá icapa nirse apama inarro ape cananeo tairri iito lriipitana Súa. Judá jita ínoa lriito njite lrimá roapiya. ³ Kewedan rsoaji ínarro njite kenipeno pada atsiada, nacadá lrípitanao Er. ⁴ Ropitea tsenakja kénipecano, pada atsiada, rocadaa lrípitanao Onán. ⁵ Ropieta tsenakja kénipecano, njite rocadá lripitanao Sela. Jíconi Quezib lricó. ⁶ Judá ioketa lrirri pjerriti Er ínoa. Roipitana Tamar. ⁷ Jliaji Judá irri pjerriti, Er, pada inaitjacada mátsi Dio ipeyajle. Niini Dio catsa ínoni. ⁸ Njite Judá iaco lrirri Onán irso: ''Pimá watsa pipjerri ínom iapiya. Pinaiytja jliaji pirsolritsa pinaitjaca ima pjerri piaca jliaji roinirrim, pinaitja pada yempeti pipjerri ípitana nacó.'' ⁹ Njite Onán yajíntsa corricaotsa lrienipe shoca jliaji lrienipe rorso. Niini lridakita cádanaco roapiya corrin lricadaa ronaco jliaji lrinaitjashopa roenipeo lripjerri irso. ¹⁰ Njite jliaji lrinaitjalri rorso, corritsa matsialrica Dio ipeyajle, niini Dio íno tsakjani. ¹¹ Njite Judá iaco rirrinomi Tamar irso: ''Madoiyoam catsaotsa piofacawa pjinirri ípana lrico, a kjerreca nirri Sela itaoñawa pikjaolre.'' Ima lrifiocawa: ''Wade catsa mayamican nacayosho njaji lriperrinaipe.'' Tamar yá yofawa rsonirri ínai lripana lricojle. ¹² Mitsa aima jalredaoc shapodamina, rsoaji Súa iito, Judá iino mayamino. Njite jliyapeta cayamina inonacalri, lriawa naikjaolre njaji iyoacape lri-ovejan íyo Timnat lrico, jlia njite lrikitsindaji Hira, jliaji adulamita tairri. ¹³ Njite nacaite Lrirrinomi Tamar irso: ''Piñjawerrimi yacawa naikjaolre njaji iyoacape lri-ovejan íyo Timnat lricojle.'' ¹⁴ Rsota rooyao jliaji tsaya madoiyoanaipe itsayan-waca, ropeco ronaco yamacati njite roñampacawa lrisho. Njite roa rofawa yacaalre Enaím ipananoma lrico, inipo icodapita yacadawa Timnat lricojle. Ima rocapaca Sela itaoña kenawa mitsa corrin naaca roinirriwani. ¹⁵ Judá icapa cádanacono, lriwaopia apama cawilreadorrom-cano roita capoa roecoa. ¹⁶ Lriawa inipólrico roikjaolre njite lriaco rorso: ''Pinaitja matsiacalri pino noderse, picadaa nomá piinai.'' corrin lriaji lrirrinom canó,njite roaco lrirso. ''Cocaotsa piá norso nomá capji piinai?'' ¹⁷ Njite lriaco rorso: ''Noawatsa pirso apana cabra yenipe nanakjoite njaji nópirra.'' Njite rsoepacani: ''Picadaotsa norso pada poinaconda a kjerreca pimenaca norso jliaji cabra yenipe.'' ¹⁸ Lriaco rorso: ''¿Coandalri pioma nocadaaca pirso?'' Njite roaco: ''Pipatjepi pjinaanada lriñadafie, njite pipjeco pjipanda picaapi ricó.'' Njite lriá rorsona, icamitsa lrimáca roinai njite keenipeca lrirsono. ¹⁹ Njite rsonico róa lrioya. Rsota rooyao jliaji yamacati roñampaca shopawa njite rsoeta tsenakja ronacoa jliaji tsaya madoiyoam carrodano. ²⁰ Judá imeenaca jliaji cabra yenipe rorso, rodietá-carro lrirso njaji lrimacaji toa rorso lrinai jliaji lrikitsindaji adulamita, mitsa corrin lricapacano. ²¹ Njite jliaji adulamita itatja jlimiwa njaji atsianai ninperri: ''¿Kjerreo rofawa rsoaji ínarro cawilredarrom idejicada panti macade lrico idejirri pia Enaim lrico inipo cají?'' Njite naaco lrirso. ''Corrin pacapa apama ínarro anjí caidarro idejica picaite capisho.'' ²² Njite lridiawa Judá iderse njite lriaco lrirso: ''Corrin noketano. Njite njaji atsianai nimperri nacaite corrica pacapa apama ínarro caidarro idejica niiní.'' ²³ Njite Judá iaco: Wacadaa pedena rorso njaji rsopalri nooya wadentja ropaimanietaca fá. Ima nomenakjenina tja jliaji cabra yenipe, mitsa corrin picapacano.'' ²⁴ Njite madalripi keerri shapodam nacaite Judá irso opicacawilre rsoaji lri-rinomi njite keenipecano lrikjaote jliaji ronaitjalri. Niini Judá iná nadecano lriderse namjaitá-carrono nirse. ²⁵ Nadeeno njite nacadano pemajletsa, nini romeenaca yacoti roñjawerrim irso: ''Coca iyarro cada njaji, icatsa jliaji ikenipetalrica njoa. Icapatja matsia coca iyadaca jliaji itjinada lriñada fie, njite jliaji ipjecoti.'' ²⁶ Judá icapa lriyapecana njite lriaco. ''Ajádalri matsiadarro pjaca noyano, ima corrica nocada roinirriwa jliaji nirri Sela.'' Corrinatsa lripieta lrimaca roapiya. ²⁷ Njite lrioca kena jlinana keenipe kenano, nacapa yamadaca njaji rowedanrri. ²⁸ Niini kenipe cadanacoenano, pada imotoita lricaapi pemajle, niini rsoaji iwapacada kenipeno rsopa pakja tawalrekja irraikjai ropapí carro lrinaapa naco ima rocaiteca: ''Icatsa jliaji imotolrica iinitawa.'' ²⁹ Mitsa lridia jlieta lricaapi, niini jliaji lriwerri shodalri imotoca lripjeya. Njite rsoaji iwapacada kenipeno, roaco: ''¡Coajio pinaitjaca pimotó carro piinita!'' Niini nacadaca lriipitanao Fares. ³⁰ Njitena lrimotoa jliaji irsocada ipapi tawalrekja irraidalri lricápi nacó, nacada lripitanao Zara.

¹ Naocawa José iapiya Egipto lricojle. Njite Potifar, pada caconaite idejicada Faraón irso, nacapitama njaji iwapacape pada egipcio tairri iwentaca José naoya njaji imaelitanai, njaji iderri nirseni. ² Diotsa José ínai njite lricadaa matsiacani pjiomi nacó. Lriofá piacawa lriminalri ípana lrico. ³ Jliaji lriminalri lricapa Dio catsa lriinai njite matsiaca lrirso pjiomi nanaco njaji lridejirri. ⁴ Niini matsiaca lricapa José irso. Lrideji Potifar irso. Potifar icadaa José-carro yají lriipna lricope, njite pjiomi njaji lrirsompe jliá-carro yají nanaco. ⁵ Niini lricada cayami nakjoitetsa jliá-caro yají lripana nacó njite nanacó pjiomi njaji lrirsompe, Dio icadaa matsiaca njaji lrirsolri jliaji egipcio tairri José ikjaote. Dio icadaa matsiaca pjiomi njaji Potifar ípana lricope njite njaji lrirsolri awacada lrico tsakja. ⁶ Potifar icadaa José-carro yají pjiomi nanaco njaji lrirsolri. Corrin lriwaopia coajica lriipana lrico, icaamitsa lriwaopia lrinacowacatsa cocacaotsa lrinjá. Matsiadalri njite matsiapalrica icapacana napeyondaca nacapaca. ⁷ Njite apapia nacojle jalredaoca rsoaji lriminalri íno yopica rocapaca José irso. Roaco José irso: ''Pino pimá noinai.'' ⁸ Mitsa corrin José shepacawa roapiya, lriaco rorso: ''Jliaji nominalri corrin jlitaca lricaolre njoa capoa iwapa lriipana, njite lricadaa njoá-carro yají nanaco njaji lriipana lricope. ⁹ Corrin pada yají pja nonaco lri-ricoda jliaji panti. Cotsa coca jliaji lrifarrolri nooya, icamitsa pjia lriinó. Corrin notaita nonaitjaca jliaji imatsicanaati pekirridalri noDiote ikjoete. ¹⁰ Caidalrimatsa jalredaoca icoam cayoca roaco mana José irso, lrimá-carro roinai. ¹¹ Papia nacojlena, lriawa lriminalri ípana lricojle lrinaitjá-carro lridejicalre. Njite corrin pacapa pada inaiki niini jliada naco panti ricó. ¹² Rsopa lritsayani nacó njite roaco lrirso: ''Pimáca noinai.'' Icaamitsa lrimacaca lritsayani nínitsa rocapi rico, njite lrimoto jliecoa rooya pemajle. ¹³ Rocapa cádanaco jliecoca rooya pemajle njite lrimaca lritayanalre rocaapi ricotsa, njite lrimoto pemajle, ¹⁴ rowana njaji atsianai idejicape ropana lrico tsakja, roaco narso: ''Icapa coanca Potifar ideca waapana lricojle pada hebreo tairri lricaa carrotsa waicao. Lrino catja jlipaacawa noapiya mitsa njoematjaca lrikjaolre. ¹⁵ Jlimi cadanaco njoemataca lrikjaolre, atsa lrimacaca lritsayanalre nonaco njite lripitoa pemajle.'' ¹⁶ Atsa rocada José itsayanalre rocodapitsa a kjerreca lriminalri idia yocawa pinti ricojle. ¹⁷ Njite roaco lrirso cayoji: ''Jliaji hebreo tairri pidenda waapana lricojle, yomje jlipacawa noapiya. ¹⁸ Nini njoemata cádanaco lrikjaolre, atsa lrimaca lritsayanalre nonaco njite lripitoa pemajle.'' ¹⁹ Niini lriminalri jimi cádanaco lrino icaiteca lrirso: ''icatsa jliaji lrinaitjalrica norso jliaji pirsodalri,'' kerroani pekirritsa. ²⁰ Ikena José iminalri jipa shetani presodapana lricojleni, njetacawa preso njaji Faraón irsoperri pikeetem. Icatsa presoca José niini. ²¹ Mitsa wa-Minalri catsa José iinai, lrinaitja lrirso pada yaacoti José iinai lricaitecawa corricaotsa lrimacacani. Dio icadaa matsiá-carro lricapaca lrirso jliaji iwapaca jliaji presodapana. ²² Jliaji iwapacada njaji presonai, lricadaa José-carro yají nanaco njaji presonai. Jlia yají nanaco pjiomi njaji nanaitjalri niini. ²³ Jliaji iwapacada njaji presonai corrin jlitaca lricaolre José capoa iwapa niini, Ima Dio catsa lriinai.

¹ Njite njapodamjitena njaji, jliaji iwicada talricanaati irraoda njite jliaji inaitjacada pan lrirso nakerroataca jliaji naminalri, Egipto italricanaa. ² Keerroa faraón nakjoete njaji yamadade lrinaikite caaconaperri, jliaji iwicada lrirraoda jiwidaapo njjite lriinai jliaji inaitjacape pan jiwidaapo. ³ Lricadaa presona lriipana lrico jliaji tsolrodaonai icapitamani, lri-ricodatsa jliaji napresotalritsa José. ⁴ Jliaji tsolrodaonai icapitamani lricadaa José idejicaoda lrirso. Nacada presona aima jalredaoca. ⁵ Njaji yamadade atsianai njetaponca, jliaji iwicada talricanaati irraoda njite jliaji inaitjacada pan talricanaati Egipto lricoda irsoperri, nacoamitsa narsoca njetaponialre jliadaa minitsa deepica, njite nacoamitsa njaji njetaponialre narsoca coamishopaca. ⁶ Njite José iawa naikjaolre piyompinaco njite lricapana iinonaca yamadapena. ⁷ Njite lritatjá lrimio njaji caconaperri Faraón irsoperri lricadaji iwapacana lriminalri iipana lrico, lriaco narso: ''¡Coada inonaana nacapacana?'' ⁸ Njite njeepani, naaco: ''Wacoana fa yamadade fetaponca oopica deepi njite corrin coca icaite femi coamishopacan,'' Njite José iaco narso: ''Padatsa Dio iají coamishopaca njaji jitaponti. Icaite jimi norso coanca jitanca.'' ⁹ Jliaji inaitjacape pan jiwidaapo icaite José irso jlitapon. Lriaco lrirso: ''Njotapon ricó nocapa apana ova inana nocoemjete. ¹⁰ Jliaji lrinana lrirsoca nadalrikjaa lriki shoperri. Nataoña cádanacoa njaji lriki narso tsakja nainaca njite njaji lriinaca papocoperri ípecana. ¹¹ Njite njopaca nocaapi ricó jliaji Faraón irracarroda lrirraoda. Njite njopa njaji ova nopitsiocá-carro Faraón irracarroda lrico, njite noacani Faraón icaapi riconi.'' ¹² José icaite narso: ''Caishopaca jliaji pjitaponrro. Njaji madalrikja lriki madalridaa jalredaoca-can. ¹³ 13Madalridaa jalredaoca nacoatsa Faraón imotoetaotsa pjia presodapana ioya, njite lricadaa tsenakjaotsa pidejicalrelrem ricotsa. Picadaa tsenakjaotsa Faraón icaapi ricó lriirraoda, cayotsaji pjia capisho piatsa iwapa lriirraoda. ¹⁴ Mitsa piwaada tsaotsa nonaco matsia cádanacoenaotsa pjia, kjena tsaotsa picapaca norso. Cácoatsa pjia nonaco Faraón irso pimotoetá-carro njoa presodapana ioya. ¹⁵ Ima nadeeca maatsicalri rico njoa hebreonai jipaite rikjoite. Njite corritsa cocaca nomatsicana narso anji nacadaa carrontja njoa presodapana lricó. ¹⁶ Njite jliaji inaitjacape pan jiwidaapo, jlimi cádanaco matsiaca lricaiteca lrikitsinda jiataponialre lrirso, lriaco José irso: ''Njoa tsakja irso pada njotaponiajle, njite, nocapaca nadalrida tseeto keetadaperri pan sho njowida nacó. ¹⁷ Lrinaco jliaji tseeto naicaodalri ninica aima pan naoyawaacaperri matsiaperri merricana Faraón irso, mitsa njaji wipjiarro yarrajicape naijacana tseto lrikjoite njowida nacope.'' ¹⁸ Njite José shepani, lriaco lrirso: ''Caishopaca jliaji pjitaponri. Njaji madalrida tseeto madalrida jalredaocaca. ¹⁹ Madalrida jalredaoca nacoatsa Faraón imotoetaotsa pjia presodapana ioya lripapí-carro pirroa apana jaico nakjoite. Njiite njaji waayolri naijacaotsa pidadam. ²⁰ Njite madalrida jalredaoca sahapodam, Faraón iwaada jicocarromni. Lriwacaacawa lrinjá-carro naapiya njaji lrirsoperri. Lrimotoita njaji Iwapacape lrirraoda jiwidaapo, njite jliaji inaitjacape pan jiwidaapo tsakja nanó-carro nainai njaji paana lrirsoperri. ²¹ Jliaji iwapacada lrirraoda jiwidaapo, lricadaa tsenakja lridejí-carro lrirso lridejicalre ricó tsenakja njite lriaca tsenakja jliwa Faraón iirrao lricaapi ricó. ²² Mitsa lripapi lrirroa jaico njakjoite jliaji inaitjacape pan jiwidaapo, cayotsaji José icaite caoisho pia narso njetapon nacó. ²³ Mitsa jliaji iwapacada Faraón irraope corrinatsa lriwaadaca José nacó, icaamitsa lrimaodaca-ca lrioya.

¹ Njite yamawalria shaapodami Faraón irso jitapon. Lricapa lriemacawa Ooni Nilo icodapi. ² Lricapa sietena vaaca jinicocawa Nilo lrikjoite, matsianepe, képepe njite naiñjaca malritsi ooni icajepi naco. ³ Njite njapodamtsa, pána sietena vaaca jinicoa Nilo lrikjoite, mátsinepe, mépenetsa. Njite naaca nemawa ooni icanjepi naco nacodapitsa njaji pána vaaca. ⁴ Njite njaji vaaca mátsinepetsa, mepeperrimi naijaca njaji vaaca matsianipe, képeperri. Icatsa Faraóin icafiacawa níni. ⁵ Lripieta lrimaaca njite lrirso tsenakja pada jlitapon yamapia shopena. Panayenakja, lricapa sietekja trigo imotocawa apana nakjoitetsa, capeda perri, matsiaperri. ⁶ Njite njapodamtsa siete trigo inana imotoa jiipai rikjoite, orraiperrimitsa, ewaperri ipje caolri jamodalri ipjiaji inocada jeerri imolri njiteo. ⁷ Njaji trigokja orraiperri iñja njaji sietekja trigokja matsiaperri, cainacá-perri. Faraón icafia tsenakja, njite lricapa jlitapon catsa jliaji lricapalri. ⁸ Njite piyompinacojlena jlita lricaolre pekirritsa. Njite lriménaca yacoti nanó-carro pjiomi njaji atsianai malrirrinai njite njaji cajikje-perri Egipto lricope. Faraón icaite njemi njaji jlitapon narso, mitsa corrin pacapa pada itaitacada pia icaite coamishopaca jliaji Faraón jitaponialre. ⁹ Ikena jliaji iwicape coajica Faraón irraope iapiyawanai iaco Faraón irso: ''Panaya nóma nocaiteca pirso pada nomatsicana corridalritsa nocaite pjimio. ¹⁰ Kerroa pia jliaji Faraón naapiya njaji idejicaperri lriso, njite lripeeco njoa naapana lricojle njaji capitamanai iwapacape njaji presonai, njoa njite jliaji inaitjacape pan iapiyawanai tsakja. ¹¹ Warso pia fetapon lriapiya jliada minitsa deepica. Njaji fetaponrri narso piaca coamishopaca nacoanaa. ¹² Niini pia wainai pada yempeti toa hebreo tairri, pada idejicada lrirso jliaji iwapacada njaji presonai. Wacaite jlimi fetapon, njite lricaite femi coamishopaca njhaji fetaponrri wacoana. ¹³ Njite cayotsa lrimotoca warso lricaite capisho warso. Faraón idieta njoa nodejicalre ricó, mitsa jliaji pada opi lripapi lrirroa lriwedalrico nakjoite.'' ¹⁴ Faraón meenaca ná naoma José. Kjeyacalrim namotoitani presodapana ioya. Jlirrita lritsinoma, jlietacawa matsia ikena lriacawa Faraón iderse. ¹⁵ Njite Faraón icaite José irso: ''Norsoca pada njotaponialre, mitsa corrin coca icaite norso coanshopaca. Mitsa njomica pinaco, pacaite cada pjimi pjetaponialre njite picaite parso coanshopaca.'' ¹⁶ José iaco shepaca jliaji Faraón: ''Cotsa njoaca yají, Dio dekjaotsa icaite Faraón irso matsia.'' ¹⁷ Ikena Faraón icaiteca José irso jlitapon: Njotapon ricó nocapa noemacawa Nilo inopami ricó. ¹⁸ Njite nocapa sietena vaaca jinicocawa Nilo lrikjoite, matsianepe, képepe njite naiñjaca malritsi ooni icajepi naco. ¹⁹ Njite njapodamtsa, pána sietena vaaca jinicoa Nilo lrikjoite. mátsinepe, mépenetsa. Corri toa coancaojli catoa nocapa pjiomi Egipto vaaca caiperri mátsinenetsa nacayosho. ²⁰ Njaji vaaca mátsinepetsa mepeperriim naiñjeca njaji pána sietena vaaca matsianipe, kepeperri ínitalri jinicocawa. ²¹ Naiñja cayaminaná, corrin pacapa iñjacape sho kena, ima caicarrom mátsinepe catsana. Icatsa nocafiacawa nini. ²² Njotapon ricó nocapa, sietekja trigo imotocawa apana nakjoitetsa, capeda perri, matsiaperri. ²³ Njite njapodamtsa siete trigo inana imotoa jiipai rikjoite, orraiperrimitsa, ewaperri ipje caolri jamodalri ipjiaji inocada jeerri imolri njiteo. ²⁴ Njaji trigokja orraiperri iñja njaji sietekja trigokja matsiaperri, cainacáperri. Njite noicaite njemi njaji jlitapon narso njaji malrirrinai, mitsa corrin pacapa pada itaitacada icaite coamishopaca jliaji njotaponrri.'' ²⁵ José iaco Faraón irso: ''Yamada njaji pjitaponrri mitsa pada catsa jliaji nanacoapana. Jliaji Dio ínitalrinaotsa inaitjaca, Lricatjinatani Faraón irso. ²⁶ Njaji sietena vaaca matsianipe siete walria cana, njite njaji siete kja trigo matsiakjaipe siete walria tsakja. Padatsa jliaji naomalri nacaiteca. ²⁷ Njaji sietena vaaca mépepem mátsinepetsa jinicolri njapodam siete walria-ca, njite njaji siete trigokja mtsikjaipetsa, caolri jamodalri inicada jeerri imotolri njite imjaitaji siete walria-ca maawitacai. ²⁸ Icatsa njaji nocaterrica Faraón irso. Jliaji Dio initalrinaotsa inaitjaca, Lricadaa Faraón yajícarro. ²⁹ Siete walria watsa nínicawa aima injaodati pjiomi Egipto jipaite ricó. ³⁰ Njite jliapodam, siete walria watsa ninicawa mawitacai pekirri-dalri, njite corrin-natsaotsa coca iwaopia lrinaco jliaji aima caojli pia injaodati Egipto lrico, ima mawitacai imatsiketacaotsa jliaji jiipai padenirri. ³¹ Corriotsa nawada carroketsa aima caojli pia injaodati njepaite ricó lrikjaote jliaji maawitacai inolri watsa jliapodami, ima pekirrídalri caotsa jliaji maawitacai inolri. ³² Yamapia cadaa Faraón jitaponca jliaminitsa cayokena Dio inaitjaca, njite kjeyenatsa Dio inita kenaotsa inaitjaca. ³³ Panaya Faraón irsotsa iomaca pada atsia cajikjedalri, yajicada iwaopiaca matsia lricadaa carroni iwapacaoda pjiomi Egipto lrico. ³⁴ Cayoatsa Faraón inaitja caotsa: lricadaotsa iwapacape icapa pjiomi Egipto jipaite nacó. Picadaotsa njenitaca cinco walrepe njaji nakiníkerre, njite nainaca nakjoite jliaji pawajlepa icatsa njaji iwaketalrica imatsietá-carro. Cayoatsa nanaitjaca siete walria nacó aima cadanacoatsa injaodati. ³⁵ Pinaotsa nawaketaca njaji injaodati panaya aima cadanacoatsa injaodati njite namatsietaotsa naofawa Faraón cawaotsa yají nanaco, nataitá carroatsa naaca narson njaji inaiki yacaalre ricó. Narso tsaotsa nawapacana matsia. ³⁶ Njáotsa njaji injaodati namatsietaotsa naiñja carroatsa maawitacai cádanacoenaotsa pjiomi Egipto jipaite ricó siete walria. Icaamitsaotsa cayó corriotsa nají carroca kjaida jliaji maawitacai njepaite ricó. ³⁷ Njaji yaacoti José icaiterri, matsia Faraón jimica njite pjiomi njaji lrirsoperri. ³⁸ Faraón iaco narso njaji lrirsoperri: ''¿Capja wataita waoketaca pada pja lrioya jliaji, irsocada inaco Dio iajikje?'' ³⁹ Niini Faraón iaco José irso: ''Dio icañjata capoa pirso coajishopaca njaji, njite corrin pacapa pada yajicada iwaopiaca matsia, cajikjédalri caidalriji picayosho. ⁴⁰ Pjia watsa jají lrinaco jliaji talricanaati dapana pjiomi njite njaji nonaikite nanaitja caotsa cayoji picaite capishoatsa. Icaamitsaotsa corrica piají lrinaco jliaji notalricanaaca nacó.'' ⁴¹ Faraón iaco pja José irso: ''Nocadaaca pjia natalricanawa njaji Egipto lricope pjiomi.'' ⁴² Faraón jita lricápirro lritalricanaa itjinada lricadácarroni José icápi nacó. Jlieta lrinacoa tsaya matsiaperri njite lricadá pakja cadena owirrokja irroa lriwedalrico. ⁴³ Lricadá jlirra lriofawa lrinaco jliaji jlieco carrofía lriyarrofiá catsa inacojleda. Njite njaji atsianai nawana lrikjaolre: ''Itoda iorsipada lrikjoete.'' Faraón icadaa talricanaatí-carro lrinacojleda pjiomi Egipto lrico. ⁴⁴ Faraón iaco José: ''Njoa Faraón, nocaite pjia, corrin pacapa pada pioya, njite pjiomi njaji inaiki Egipto lricoperri corriotsa coca itaita inaitjaca cocacan corri cada nacaite pjia.'' ⁴⁵ Faraón icadá Jose ipitanawa ''Zafnat Panea.'' Lricadá lrinoa Asenat, Potifera iito, sacerdote On lricoda. Jose yají icapaji pjiomi Egipto jipaite ricó. ⁴⁶ José irso piakena trenta walria lripekirrica nacó lria caojli pia lriemawa Faraón ipeyajle, Egipto italricanaa. José imoto Faraón ioya lriá-carro lricapaji pjiomi Egipto jipaite ricó. ⁴⁷ Siete walria nacó aima narsoca naijaope. ⁴⁸ Lriwaketa pjiomi njaji injaodati siete walria nacope aima cádanco injaodati Egipto jipaite ricó, njite lricadaa njaji injaodati nerricoda njaji yacaalre Egipto lricope njaji njetaji njepaite rikjoite tsa. ⁴⁹ José iwaketa aima injaodati, jiipai shoperri corrinatsa lritaita lriniwetaca coshoca namaimaca, lrimaimaca ikjaote corrinatsa pataita paniweetaca. ⁵⁰ Yamada pia njaji José yeenipe yamawalria toa ipjeya mawitacai yocacawa nanacojle, lriino Asenat irso, Potifera iito, Sacerdote On lrico. ⁵¹ José icadaa lrirri ipjerriti ípitanao Manasé, ima lricaiteca: ''Ima Dio iñetaca noya pjiomi njaji jirrapitinaperri njite pjiomi njaji njonirri nokitsiñape.'' ⁵² Njite lricadaa lripitanao jliaji iwerriti Efraín, ima lricaiteca cayoji: ''Dio icadaa matsiaca njoa lri-ricoda jliaji jiipai njorrapitalri piatoa niinio.'' ⁵³ Njite lriwayacakena jlinana njaji siete walria aima cawa injaodati Egipto jipaitena lrico. ⁵⁴ Ikena siete walria maawitacai ínitacawa, cayotsaji José icaite capisho. Ima maawitacai pjiomi Egipto lrico, mitsa nawaketa piakena aima iñjaodati pjiomi Egipto lrico. ⁵⁵ Njite nainita cádanacoena njerrapitaca mawitacai njaji Egipto lricope, ikena natatjaca Faraón ínai injaodati caiwi ricotsa. Mitsa Faraón iaco narso: ''Warsa iawa José ikjaolre njite inaitjaotsa pjiomi coajicaotsa lrinaa inaitjaca.'' ⁵⁶ Niini pia maawitacai pjiomi jalredaoca lrico. José iná namjecoca pjiomi njaji nawaketacawa lrico pia iñjaodati lriwendé-carro narso njaji egipcionai. Matsinaa piaca jliaji mawitacai Egipto lrico. ⁵⁷ Pjiomi njaji inaiki jalredaoca lricoperri nawa Egipto lricojle nawentá-carro iñjaodati José ínai, ima matsinaa poiaca jliaji maawitacai pjiomi jalredaoca lrico.

¹ Jacob jími niinica injaodati Egipto lrico, niini lriaco narso njaji lrienipe: ''¡Coada iofawa imaodacatsa! ² Njomi nacaiteca niinica injaodati Egipto. Warsa ya iwenta waijao nirse wadee mayamica fa anji maawitacai sho.'' ³ Ikena nácawa Egipto lricojle nawentá-carro injaodati njaji die perri José ipjerrinaipe. ⁴ Mitsa jliaji jlaji Benjamín, José iwerri, corrin Jacob icadaa iawa nainai njaji lripjerrinaipe, ima wade shocatsa lriají coajicani nainai. ⁵ Njaji Irael yenipenaipe iocawa tsakja nainai njaji iacapewa iwenta, ima maawitacai tsakjana Canaán jipaite ricó. ⁶ José cadana jliaji iajicda nanaco njaji inaiki Egipto lrico. Icatsa jliaji iwendecadaca narso njaji inaiki inocaperri pada jipai nakjoite-perri. Naocawa njaji José ipjerrinaipe njite njewa naorsoawa, tjewacajle necoa jiipai nacojle. ⁷ José icapa njaji lripjerrinaipe njite lriajintsa njácana, mitsa corrin lricadá najíni njite cáco narsoni kjaidasho, lriaconarso: ''''Kjaite inoji?'' Njite naaco lrirso, ''Canaán lrikjoite wano wawentácarro injaodati.'' ⁸ José yají icapaca njaji lripjerrinaipe mitsa corrin nanjini. ⁹ Njite José iwaada lritaponialre lrirsolri pia nanacó njite lriaco narso: ''¡Inoca icapa ipjeya! Yomaca yají coancawaca corrin wawapa fepaite.'' ¹⁰ Njite naaco lrirso: ''Corrina waminalri, fá pirsoperri wanocatsa wawenta wainjao. ¹¹ Padatsa jliaji fanirri. Cotsa cocaca wamatsicana. Cotsa wanoca wacapa waicao jipaie, fá pirsoperri.'' ¹² Mitsa lriaco tsenakja narso: ''Corrina, inocao icapa coancawaca corrin wawapa fepaite.'' ¹³ Njite naacp njepacani: ''Fá pirsoperri, doce wamaimaca, pada atsia yenipeca fá iofacada Canaán jipaite ricó. Jliaji wawerri piketemdalri lriofacawa fanirri ínai, njigte pada wanakjoite opi mayamini.'' ¹⁴ Njite José iaco narso: ''Icatsa jliaji nocaiterrica irso, inocapeca icapa ícao fepaite shaa. ¹⁵ Nini cayoatsa wawica sha. ¹⁶ Faraón icafica nacoatsa, corriotsa idiá carrocawa ajaiteji, aja-dekjaotsa idé cadaa ajerreji jliaji iwerri piketemdalrim. Fetacaotsa preso shaa a kjerrecaotsa waoca wanjí corrica icashataca fá'' ¹⁷ Lricadaa presona madalridaa jecoapi. ¹⁸ Njite José iaco narso madalridaa jecoapi shapodam: ''Ifiocadaca Dio iiwana njoa, niini inaitjaotsa lriaji nonalriotsa inaitjaca. ¹⁹ Mashaperricada atsianaica shá, imacaotsa pada inakjoite presodapana lrico, mitsa shaa pána warsa iketadata itsacon wadee maawitacaica shá iipana lrico. ²⁰ Ideotsa norso iwerri piketemdalri niniotsa noanjí ajadalrica jliaji icaiterri norso njite corriotsa mayami-carroca shá.'' Njite nanaitja cayoji lricaite capisho narsó. ²¹ Njite naaco narsowaca: ''ajádalri fáca irso matsicalri lrinaco jliaji wawerri, wacapá cadana coanca jlirrapitaca lricaite cádanaco caiwi ricotsa wade ferrapitecani njite corrin femica lrirso. Niini panaya ferrapitaca famao jliaji jlirrapitalri pia.'' ²² Njite Rubén shepana: ''Nocaitjen piatja shá, manaitja imatsicanao lrinaco jliaji wawerri, njite corrin jimica norso. Icapena coanca wacaoñaca wama cápji mayamican.'' ²³ Mitsa corrin nají José yajícatsa coanjica nacaiteca, ima ninicatsa pada jimicada lriicao. ²⁴ José jiena naoya lriá-carro lriiya. Lridia tsenakja naikjaolre caacó-carro naapiya, jlipa naoya Simeón njite lripapini nacapatsa. ²⁵ Njite Josá inaa njaji lrirsoperri napakjantá-carro lripjenai itjaconi injaodati shó, lriná tsakja nadietaca napalratani natsacon lricó, lrinaa tsakja naaca naijao tecojletsa naijaope inipolrico. Njite nanaitja cayo. ²⁶ Njaji pjerrinaipe naketadata naborroni injaodati shó njite naawa njiteo. ²⁷ Pada nanakjoite imjeco lritsaconi liá-carro lriborron injao naocalri toa nematoa ninio, njite lricapa lri-ricoda ninicatsa njaji palrata lriwentashopam injaodati. Lricapani lritsacon iwawalrico. ²⁸ Lriaco narso njaji lripjerrinaipe: ''Icapa jliaji nadietaca nopalratani notsacon ricó.'' Njite nafiocawa pekirritsa, nacaboco nacapa narsowaaca, naaco: ''¿Cocao jliaji Dio inaitjalri waapoiya?'' ²⁹ Naocawa njanirri Jacob iderse Canaán jipaite ricojle, njite naaco lrirso: ³⁰ Jliaji atsia, lriminalri jliaji jiipai nindalri, caaco kjaida warso, njite lrikerria wanaco yacapeca icapa icao jliaji jiipai. ³¹ Njite waaco lrirso atsianai ajadalri-perrica fa corrica, cotsantja yaacapeca inocapeca icapa pjipaite. ³² Doce wamaimaca fanirri yenipe. Mayami pada wanakjoite, njite jliaji wawerri piketemdalri atsanica fanirri iinai Canaán jipaite ricó. ³³ Jliaji atsia, lriminalri jliaji jiipai iaco warso: ''Inaitja cada cayoji nocaite capishoatsa irso, niniotsa noanjí atsianai mamatsicana-perrica shá. Imaca noinai pada inakjoite, njite shá pana idena injaopé iipana lricojle wadee mayamica shá mawitacai shó, idienawa shapodamrsewa. ³⁴ Ideotsa norso jliaji iwerri piketemdalri. Inaitja cadaa cayoji nocaite capisho, noaji watsa corrica inocapeca icapa icaowa jliaji jiipai. Njitenaotsa nowataca lrimotoa jliaji ikitsinda, njite dekjenaotsa itaita iwentaca nopaite ricó. ³⁵ Niini njeta cadanaco natsacon ítada, nacapa ninicatsa napalratani lriarroda fie natsacon lricó. Nacapa cádanaco njite njanirri icapa tsakja napalratan narroda fie natsacon lricó, nafiowa pekirritsa. ³⁶ Jliaji njanirri Jacob iaco narso: ''Opi sheneta njoa naoya njaji noenipe. Opi mayami José nooya. Corrin tsakja pacapa Simeón. Njite oanaya ioma ideeca Benjamín nooya. Cotsa matsialrica njaji inaitjalrica norso. ³⁷ Caaco Rubén jlini iapiya,lriaco lrirso cayoji: ''Pinoatsa njaji noenipe yamada corricadaotsa nodieta pirso jliaji pirri Benjamín tsenakja. Picada njoaca yají lrinaco picapá carratsa nodieta catsaotsa pirso tseenakjan.'' ³⁸ Jacob shepani, lriaco lrirso: ''Cotsa ideecarroca noenipe. Opi mayami jliaji lripjerri, niini icamitsa iofalrica noinai. Matsi cadantja jliyapacawa yacayawa inipolrico ialri nirse, njite icamitsantja mayamica, njoa pekirri, jalredalrinatsa itsicolre.''

¹ Pekirrídalri piaca jliaji mawitacai jalredaoca lrico. ² Njite nawaca nainjaca pjiomi jliaji injaodati nadenda pia Egipto lrikjoite, niini njanirri iaco narso: Warsa yaa tsenakja iwenta wainjao. ³ Judá iaco lrirso: ''Jliaji iwapacada jliaji jiipai iaco warso: corriotsa icapá carroca noecoa corricadaa idee norso iwerri. ⁴ Picadaa cada lria wainai jliaji wawerrida, weniotsa wawenta wainjao. ⁵ Mitsa corricadaa picadaa lria wainai jliaji wawerrida cotsa waacarroca, ima jliaji atsia iaco warso: iwapacada jliaji jiipai iaco warso: corriotsa icapá carroca noecoa corricadaa idee norso iwerri.'' ⁶ Njite Irael iaco narso: ''¿Coada calretsa inaitja norso maatsi icaite cádanaco lrirso jliaji atsia irsocatoa pada iwerrida? ⁷ Njite naaco lriso: ''Jliaji atsia lritatja jlimio wanaco njiyte wapaneta nacó tsakja. Lriaco warso: ''¿Capja caaficatoa jinirri? ¿Capja irsocatoa pada iwerri?'' Njite feepani coanca lritatjaca fá. Njite corrin wají lriomaca wainai wawerri. ⁸ Judá iaco njajirri Irael irso: ''Njoawatsa idee jliaji nowerrida. Njite ikena wacao jliaji wadee mayamica fá, pjia njite njaji weenipe. ⁹ Njoawatsa lrioyawajleo. Njoa watsa inai pioma lricoadawa. Corricadaotsa nodietani pikjaolre njite poicapantjani, niniotsa picadaa njoaca irso maatsicalri lrinaco caidalriwetsa. ¹⁰ Corricadantja waica fá, yamapienantja wadiajicawa.'' ¹¹ Njite njanirri Irael iaco narso: ''Cayo cadaa icaite capisho, warsa peda inaitja cayoji: Idee njaji matsiaperritsa warsonipe fepaite ricó itsacon lricó. Idee lrirso jliaji atsia padapena inaniti macoada shotsa. Idee lrirso tapee, mapaa, pomeniajaipe, mirra, cataña inaca njite warse tsakja. ¹² Aimaotsa ideeca palrata, jliaji njetanda itsacon lrico, idieta tsenakja narson. Wadetsa namatada piacatsa. ¹³ Idena jliaji iwerrida. Warsenaiawa lrikjaolre jliaji atsia tsenakja. ¹⁴ Dio kjaidadalri ikitsindataotsa shá kjená carroatsa lricapaca irso jliaji atsia, lridieta carroatsa irso jliaji ikitsinda njite jliaji iwerri Benjamín. Cayo cada peda shenitaca njoa naoya njaji noenipe, cayo pedacaotsa.'' ¹⁵ Njaji Jacob yenipe nadee aima inaaniti macoada shotsa lrirso jliaji atsia, nadee yamapiape icacoa palraata njite nawerrida Benjamín. Naawa Egipto lricojle njite naocakenawa nemawa José ipeyajle. ¹⁶ José icapa cádanaco Nainaica Benjamín, lriaco lrirso jliaji iwapacada lriipana lrico: ''Pidee nopana lricojle njaji atsianai, ino apana maaficalri, njite iyanaotsa, ima njaji atsianai naijacaotsa noinai mayacan cadanaco jerri.'' ¹⁷ Jliaji iwapacada lripana lrico inaitja cayoji José inaa capishoni. lridee njaji atsianai José iipana lricojlna. ¹⁸ Nafiowa njaji atsianai nadee capoana José iipana lricojle. Njite nawada nadeca nirsenanaikjaote njaji palraata njetaji natsacon lrico nano caojli pia nainita, nakerriaca lriona namatsicanawa lripresotá carrona njitenanta lricadana lrirsoperri acrrona, njite jlipaca lrirsowao njaji naborron. ¹⁹ Natsomita jliaji iwapacada José iipana njite caaco lrirsona pantinpoma lrikjoitetsa, naaco lriso: ²⁰ ''Pjia waminalri, wanopia wainita wawentá-carro injaodati. ²¹ Niini waoca cádanaco wemacawa lrico , njite wamjeco wacapa watsacon niini wacapaca nincatsa pjiomi njaji palraata watsacon iwawa lrico wacoanatsa. Niini wanoca wadietá carrona irso njaji palaraata. ²² Wadee pja palraata wawentá-carro tsenakja waijaope. Corrin wanjí cocaca sheta nja palraata watsacon lrico.'' ²³ Niini lriaco narso jliaji iwapacada José iipana: ''Imaodacatsawa, mafietacatsao. Jliatsa pa jliaji iDiote, jliamitsa jliaji jinirrinaipemi iDiote tsakja shetani itsacon lrico, ima njoatsa icoadata pia ioya jliaji icaoñashopa injaope.'' Njite jliaji iwapacada José iipana lridee naikjaolre Simeón. ²⁴ Jliaji iwapacada José iipana lrideena Sosé iipana lricojlena. Lria narso ooni nacotsoshopa njaipa, lria tsakja naborron injao. ²⁵ Njite matsieta njaji nedaji José irsowalrepe mayacanca jeerri ipjeya toa, ima njemica naiñjacaotsa lriinai pacoacatsa. ²⁶ José ioca cádanacoa lriipana lricojle, nadee panti ricojle njaji nadeji lrirso njite nacoajawa lripeyajle jiipai nacojle. ²⁷ Lritatja jlimiona coanca nanaco, njite lriaco: ''Capja matsiatsa jinirri, jliaji atsia pekirrinatsa icaiterri pia inaco? ¿Capja caafi toani?'' ²⁸ Njite naaco njepacani: ''Jliaji pirsodalri fanirri, matsialritsa. Cáfirritsa.'' Njite njewa naorsoawa jiipai nacojle lripeyajle. ²⁹ Jlirreta cádanaco lricapa narso, lricapa Benjamín, lriwerri catsa, jlidoa yenipe, njite lriaco narso: ''¿Icatsa iwerrica jliaji icaiterri norso yacona?'' njite lriaco Benjamín irso: ''Piinaicatsa Dio imatsiaca yempeti.'' ³⁰ Njite José ikjeyapita iawa naoya lrimaacawa lricojle, ima inonaacalri jipacani pekirritsa lricapa cádanaco lriwerri. Lrioma pafe lriá-carro lriiya niini lriacawa lriofa carroji mana lricapa, icatsa lriiyaca niini. ³¹ Lriiya cayami, lricotso lriecoa matsia lrimotó-carro naikjaolre. Jlirsa lricaolre matsia njite lrinaa nayacaca naijawa naiñjá carroena. ³² Njaji idenjicape lrirso nayaca lrinjajo tecojle jliwacatsa, njite tecojle tsakja naiñjaca njaji lrikitsiñape. Naiñja tsakja lrinai njaji egipcionai, mitsa teecojletsa, ima njaji egipcionai corrin nataita naiñjaca nainai njaji hebreonai ima capaimanaca narso naiñja cadaa nainai. ³³ Naofa naiñja lripeyajle. Napjerri iofa ínita njite njaji lriwenaipe jliapodam, jliaji iwerriti narso iofa piketemrse. Njaji atsianai corrin nají coanca nacapa cádanaco jliaji lrinaitjalri naapiya. ³⁴ José imenaca lrinjaope nakjoite narso njaji lrikitsiñape, mitsa lriá aima pja lriwerri Benjamín irso. Nairraketsa njite catiima nacaolre lrikjoete.

¹ José inaaca jliaji iwapacada lriipana lripakjantá-carro natsacon injaodati sho, coshocatsa nataita nadeeca. Lrinaa tsakja jlietaca napalraatan nacoanatsa natsacon lrico. ² Lrinaa jlietaca lrirracarroapa nanaitjanda palaatapesho Benjamín itsacon lrico njite lripalratani lriwenta shopam injaodati. Jliaji iwapacada José iipana lrinaitja cayoji lrinaa capishoni. ³ Tjewaijle piyompinaco, jliaji atsia lrimeenaca nadiawa njaji atsianai naapiya njaji naborron cadecalreperri. ⁴ Naacadanacoena yacaalre ioya, njite corri pjacatoa teeco naacawa, José icaite lrirso jliaji iwapacada lriipana, lriaco lrirso: ''Warsa pia njapodam njaji atsianai, pioca cádanacoatsa naikjaolre picaiteotsa narso cayoji: ''¿Coada inaitja maatsi warso matsia cadana wacoadataca shá? ⁵ Yajintsa icacatsa nominalri irracarroapaca njite lrinoparrotashopaca lripjeyao, corritsa matsialrica jliaji inaitjalri.'' ⁶ Ikena jliaji iwapacada José iipana yaa njapodam njite lriá jlipana, njite lricaite narso cayoji José inácapiosho lricaitecana. ⁷ Niini náco lrirso: ''Coadadao cayo lricaiteca jliaji wamoinalri? Teeco jliyapa naoya njaji lrirsoperri cayo carrontja nanaitjacani. ⁸ Icapa coajica wadieta Canaán lrikjoite njaji palraata waoketaji watsacon lrico . Njite, ¿coaji tsakjantja wataita wañaitoca waminalri ioya lripalratani o lriwirrotecadaa? ⁹ Coandalri cada nanakjoite njaji lrirsoperri waoketaji ioya njaji palrata, lrirsotsa mayamican, njite lrirsoperricaotsa fá.'' ¹⁰ Niini lriaco jliaji José irsodalri: ''Cayo pedaotsa icaite capisho. Coca ioya cadaotsa noketa jliaji pairracarroapa norsodalri caotsani, njite nja paana corriotsa cocaca namatsicanaa.'' ¹¹ Ikena nacoanatsa njaji atsianai nakjeyapita nacadaa natsacon jiipai nacojle njite namjeco nacoanatsa natsacon. ¹² Jliaji José irsodalri inita iomacani napjerri itsacon lrico, njite piketem nawerri itsacon lrico, njite icatsa lrioketaca jliaji pairracarroapa lri tsacon lrico, Benjamín itsacon lñrico. ¹³ Njite njaji atsianai natsafá ntsayan. Njerreta tsenakja naborron ideecalre nadiacarro tsenakja yacaalre lricojle. ¹⁴ Judá njite njaji lriwenaipe naawa José iipana lricojle. Njite corri pia toa Jiosé iaca njite, niiní naorsoacawa jiipai nacojle lripjeyajle. ¹⁵ José iaco narso: ''¿Coada inaitja cayoji inaitja capisho? ¿Capja corrica yají njaji atsianai caiperriji nocayosho nataita nanoparrotaca?'' ¹⁶ Njite Judá iaco lrirso: ''¿Cotsa warsoenica yacoti wacaiteoda pirso, pjia waminalri? ¿Coajintja caacoca fa? ¿Cotsa coan wacaiteca matsia wanacowaaca?''Dio icadaa icapa namatsiacanaa njaji pirsoperri. Picapakje, Pirsoperrica fá, pjia waminalri; njite cayo tsakja jliaji wawerrida ioketalri ioya jliaji pirracarroapa.'' ¹⁷ Njite José iaco lrirso: ''Teeco jliyapaca nooya nonaitjacawa cayoji picaite capisho, mitsa, jliaji atsia noketalri ioya jliaji noirracarroapa, jlia dekjaotsa njopa norsodalri carroatsani, mitsa njaji paana, nataita nadiacawa namaodacatsawa njanirri iderse.'' ¹⁸ Njite Judá itsomita José lricaité-carro lrirso cayoji: ''Nominalri, picadaa pirsodalri iaite pirso pjinacolricotsa padatsa yaacoti, manaitjatsa maatsi pirsodalri irso pirroa lrico ima cayodalrica pjia Faraón shotsa.'' ¹⁹ Pjia waminalri, pitatja pia pjimiwa nainai njaji pirsoperri cayoji: ''¿Capja kjanirriperri catoa shá, o irsotoa pada pjatoa iwerrida? ²⁰ Njite wacaite pirso, pjia waminalri, warsocatoa fanirri pekirrinatsa, njite padatoa wawerrida, lrienipe pekirri cayaminatsani. Yamada pia njaji lrienipe apama perritsa jidoa, niini opica mayami jliaji ipjerriti, niini icaamitsa jliaji iwerriti piketemdalri iofálrica lriinai njite jlinirri ipeyondacani. ²¹ Njite picaite narso njaji pirsoperri nadé-carro picapá-carroni. ²² Mitsa wacaite pirso, pjia waminalri. Jliaji yempeti corrin lritaita lrimacaca jlinirri ima lrinaitja cadaa cayó, icaamitsa mayamica jliaji jlinirri. ²³ Njite picaite narso njaji pirsoperri, corricadaa wadee jliaji wawerrida cirrinatsa wataita wanoca wacapá-carro pjia. ²⁴ Niini wadiá cadanaco waocawa lrikjaolre jliaji pirsodalri njonirri, wacaite jlimi njaji picaiterri warso wawerrida nacó. ²⁵ Niini papia nacojle, fanirri inaa tsenakja fá wanocarro wawenta waijaope ajerreji. ²⁶ Niini waaco lrirso corricaotsa waacarroca corricadaa wawerrida yaa wainai, mitsa lria cadaa wainai weniotsa nirse, ima corrin wataita waaca nirse corricadaa jlia wainai jliaji wawerrida wataitá-carro wacapaca lriecoa jliaji atsia nindalri. ²⁷ Niini lriaco warso jliaji pirsodalri fanirri: ''Yajintsa yamada catsa roenipe rsoaji noino apama. ²⁸ Njite opica mayami noya jliaji ipjerriti, njite noaco norsowaaca coajicapa maaficalri kerroani iwititaca lridadam, njite corrinatsa nopieta nocapacan.' ²⁹ Njite panaya, ideecada noya jliaji, njite coaji cadantjani ioya yacayawa inipolrico, icamitsaotsa mayamica njoa inonacalri shó, njoa jalredalinatsa itsicolre.'' ³⁰ Njite panaya, waoca cádanacoatsa lrikjaolre jliaji pirsodalri fanirri, njite lricapaotsa corrica lridia wainai jliaji yempeti, ima cafica jliaji fanirri lrikjaote, ³¹ niini corricadaa lricapani wainai, icaamitsaotsa mayamicani. Mayamiotsa ininacalri jliaji jalre-dalrinatsa itsicojle wamá. ³² Ima njoa pirsodalri, nocaiteca lrirso noinai carroatsa lrioma lricoada coajicadaa jliaji yempeti, ima noaco lrirso njoacaotsa irso jliaji maatsicalri caidalritsa mayami cadaa pjia, njonirri. ³³ Niini panaya, notatjaca piinai caiwi ricotsa, pjia nominalri picadá-carro njoa carroatsa pirsodalri lrioyawalreo jliaji nowerrida, picadena lridia carroa jliaji yempeti nainai njaji pana lripjenai. ³⁴ Ima, ¿Coajintja nodiacawa njonirri iderse corricada lridia noinai jliaji yempeti? Corrin noma nocapaca coajicaotsa jlirrapitaca pekirritsa jliaji njonirri.''

¹ Njite corrinatsa José itaitaca inonaacalri ikjoete niini lrimeenaca namotó carrotoa lrioya njaji lrirsoperri jlidati ricó. Niini corrin pacapa pada lrirsodalri lricaitjiaca cádanacoa jliacatsa José narso njaji lriperrinaipe. ² José iya kjaida, niini njaji egipcionai njemica njite Faraón iipana lricope njemi tsakja. ³ José icaite narso njaji lriperinaipe: ''Icatsa José-ca njoa. ¿Capja caafi catoa papai?'' Corrin nataita njeepacani kjeya njaji lriperrinaipe ima nafiocawa neema cádanaco lripeyajle. ⁴ Njite lriaco narso: ''Itsomita njoa, inaitja matsiacalri.'' Niini natsomitacani. Njite lriaco José iaco narso: ''Icatsa iwerri José-ca njoa, jliaji iwendentam narso njai Egipto lricope. ⁵ Panaya, corrin nooma capaimanica shaa okerroaca shaa jiwacawaacatsa iwende capoa njoa, ima Dio catsa imeenaca njoa ajerreji ipeyajle noyomjetá-carro shaa. ⁶ Ima yamawalria kena maawitacaica jalredaoca lrico njite canacaitoa cinco walria toa, corriotsa coca yaapana, corrin tsakjaotsa coca iniwa ipania. ⁷ Dio imeenaca njoa yapisheté-carro njoa nokitsindatá-carro, yomje-carrotsa padapena wadentja mayamica pjiomi shaa. ⁸ Niini, corritsa shaaca imeenaca njoa ajerreji, Dio dekja, Lricadaa njoá-carro icadaa Faraón iwaopiakjeo, yajicada lrinaco jliaji talricanaati dapana njite iwapacada tsakja lriinai njaji lrinaikite pjiomi Egipto lrico. ⁹ Warsa idia kjeyawa papai iderse nite icaiteotsa lrirso cayoji: ''Cayo José imemoriani pirso: ''Dio icadaa njoá-carro yají pjiomi Egipto lricó. Nooma pinoca noderse kjeeya wadee wiaca pjia. ¹⁰ Awatsa piofawaji Gosén jipaite ricó, pjia, njaji pienipe, njite njaji pidakenai, pjiomi piipirra, njite pjiomi njaji pirsolri. ¹¹ Njoa watsa icadaa injaope niini, ima canacaitoa cinco walria maawitacai cawa, wdentja mayamica shaa maawitacai sho; pjia, piipaneta njite pjiomi njaji pirsolri. ¹² Pjiomi shaa njite noweerri Benjamin tsakja icapa, njoaca jliaji caacolri irso. ¹³ Icaiteotsa papai irso pjiomi coanca matiaca njoa Egipto lrico njie pjiomi njaji icapalri. Kjeyaotsa ideeca fanirri ajerreji.'' ¹⁴ Lriwatsia jlieyoa lriwerri Benjamín njite lriiya lrinaco, Njite Benjamín iya tsakja José nacó. ¹⁵ Lritsotso nacacoda naco njaji lriperrinaipe njite lriiya nanao. Njite dekjena caacoena lriapiaya njaji lripenaipe. ¹⁶ Njite nacaite Faraón jimi nanaco, naaco: ''Naocacawa José iderse njaji lriperrinaipe.'' Njite catiima Faraón jimica njie njaji lrirsoperri tsakja. ¹⁷ Njite Faraón iaco José irso: ''Picaite narso najji pikitsiñape nacadaa-carro nadeecalre naborron naco nadia-carro naoma jinirri Canaán lricojle. ¹⁸ Ideotsa jinirri, ikitsiñape pjiomi inó-carroatsa nokjaolre. Njite nocadaotsa iofá-carro matsiacawa jiipai Egipto lricó, niniotsa iñjaca matsia.'' ¹⁹ Panaya nocaiteca pjia pinaitjá-carro cayoji: Ideotsa njaji caballo itsoatacape carretafiape Egipto lrikjope idee-carro nini njaji yeenipe njite njaji ininaipe. Jipaotsa idee jliaji jinirri inocarroenawa. ²⁰ Mjetatsa icaolre nanaco njaji irsompe nirse, ima pjiomi jliaji jiipai matsiadalri pja Egipto lrico iyada caní.''' ²¹ Icatsa nanaitjaca cayo njaji Iraelitanai. José iaa narso njaji carretafiape cayo Faraón icaite capisho lrirso njite lriá tsakja naijaope inipo icaoya. ²² Lriá padape natsayaniwa walriperri njetaaca shopawa, Mitsa Benjamín irso lriá trecientoita moneda palraatape njite cinco lritsayaniwa. ²³ Jlinirri irso lrimeenaca Diena borro ideecape inaaniti matsiaperri Egipto lrikjoite, njite die caballo inarrona ideecape lrirso lrinjaope, nadee tsakja pan njite paana pja injaodati jlinirri irso, lrinjaope inipolrico lrino cadanaoenawa. ²⁴ Ikeena lrimeenaca nadiawa njaji lriojerrinaipe. Njite lriaco narso: ''Corriotsa nooma icoitaacacawa yacayawa inipolrico.'' ²⁵ Naawa Egipto lrikjoite njite naocawa Canaán jipaite nacojle njanirri Jacob iderse. ²⁶ Njite nacaite lriso: ''Caafirritsa jliaji José, icatsa talricanaati inacojledacan pjiomi Egipto lrico.'' Njitecorrin lriaji coanca jliaji njanirri corri capoa lrioma jliepaca jliaji nacaiterri lrirso. ²⁷ Njite nacaite jlimi pjiomi coanca José icaiteca narso. Mitsa lricapa cádanaco pjiomi carretafiape pakjamperri neetada yaapiya José imeenacalri lrirso, icaamitsa catiimaca jliaji njanirri Jacob. ²⁸ Niini Iraelicaite cayoji: ''Ajena. Caafirritsa jliaji nirri José. Noatoa nocapani lripjeyaotsa mayamica noa.''

¹ Irael yaawa Beerseba lricojle njite lridee pjiomi njaji lrirsonipe. Nirse lriino maaficalri jliniri Isaac iDIote irso. ² Njite deepi ricó caacoca Dio Irael irso niini pjetaponialre ricó capisho, Lriaco lrirso: ''Jcob, Jacob, njite Jacob shépani: ''Alri njoaji.'' ³ Njite Lriaco lrirso: ''Dio-ca Njoa, caacolri pirso, pjinirri iDiote. Mafiotsa piacawa Egipto lricojle, ima nirse watsa Nomaimata caotsa njaji pinakjoite perri niini pacoa yacalre macacoe caotsana. ⁴ Noawatsa piinai Egipto lricojle, njite Nodieta tsenakjaotsa njaji pidakenai njite. Nirseotsa mayami pjia njite José watsa iita nja pitsi mayami kenaotsa pjia.'' ⁵ Jacob iawa Beerseba lrikjoite. Njaji Irael ienipe nadee njanirri, neenipe, naninai nanaco njaji Faraón njecocarrofiape Faraón imenacaji nadeecarroni. ⁶ Nadee navacan, nayarroaji narsoji a cádanacona Canaán jipaite ricó. Jacob iocawa Egipto lricojle njite pjiomi njaji lrinakjoite perri tsakja. ⁷ Lridee lrinaiwa njaji lrienipe, lridakenai, lridakenai yenipe, lritonaipe, lridakedoanaipe, pjiomi njaji lrinakjoite perri. ⁸ Icatsa neepitanaca njaji Irael yénipe iocalriwa Egipto lricojle, Jacob njite njaji lrienipe: Ruben, Jacob yénipe pjerriti; ⁹ njaji lrienipe Rubén yénipe: Hanoc, Falú y Hezrón njite Carmi. ¹⁰ Njaji Simeón yénipe: Jemuel, Jamín, Ohad, Jaquín, Zohar, njite Saúl, apama Canaán darro yénipe. ¹¹ Njaji Leví yénipe: Gersón, Coat njite Merari. ¹² Njaji Judá yénipe: Er Onán, Sela, Fares njite Zara, (mitsa Er njite On atsa mayamina Canaán jiipaite ricó). Njaji Fares yénipe: Hezrón njite Hamul. ¹³ Njaji Isacar yénipe: Tola, Fúa, Job njite Simrón. ¹⁴ Njaji Sabulón yénipe: Sered, Elón njite Jahleel. ¹⁵ Icatsa njaji Jacob yénipeca Leá irso njaji jícolri Padán Aram lricó, apama roito, Dina. Trenta tre namaimaca padenirri njaji neenipe njite naitonaipe. ¹⁶ Njaji Gad yénipe: Zifión, Hagui, Suni, Ezbón, Eri, Arodi njite Areli. ¹⁷ Njaji Aser yénipe: Imna, Isúa, Isúi, Bería, njite nawedoa Sera. Njite njaji Bería yénipe: Heber njite Malquiel. ¹⁸ Icatsa njaji Zilpa yénipeca Jacob irso, Labán icadanda lrito Lea irso. Diecisiete namaimaca padenirri. ¹⁹ Njaji Jacob yénipe lriino Raquel irso: José njite Benjamín. ²⁰ Njite Egipto lrico jíco njaji José yénipe, Manasé njite Efraín, roapiya rsoaji Asenat, Potifera iito, jliaji sacerdote On lrico. ²¹ Njaji Benjamín yénipe: Bela, Bequer, Asbel, Gera, Naamán, Ehi, Ros, Mupim, Hupim, njite Ard. ²² Icatsa njaji Jacob yénipe lriino Raquel irsoperri, catorce namaimaca padenirri. ²³ Jliaji Dan irri, Husim. ²⁴ Njaji Neftalé yénipe: Jahzeel, Guni, Jezer njite Silem. ²⁵ Icatsa njaji Jacob yénipe Bilha irsoperri, Labán icadanda lriito Raquel irsodarro carrono, siete namaimaca padenirri. ²⁶ Icatsa pjiomica njaji iocalriwa Egipto lricojle Jacob iinai, njaji lrinakjoite perri, maniwetacana njaji lrirrinonaipe, sesentasei padenirrina. ²⁷ Njite naapiya njaji José yénipe jicolri Egipto lricó, niini padenirrina José iipaneta yapiya, setenta namaimaca padenirri. ²⁸ Jacob imeenaca Judá lripjeya José iderse lricañjatá-carro inipo lrirso iacadawa Gosén lricojle, njite naocawa Gosén jipaite lricojle. ²⁹ José imatsieta jlieco carrofia lriacarro Gosén lricojle lrioketáca carroa jlinirri Irael yaapiya. JLosé icapa jlinirri nirse, njite jlieyoaca jlinirri, njite lriiyaca lriteda nacó wiá. ³⁰ Irael iaco José irso: ''Panaya dekja picadenaotsa mayamica njoa, ima nocapjenima piecoa ima caaficatsa pjia.'' ³¹ José iaco narso njaji lrikitsiñape njite narso pjiomi njaji jlinirri iipaneta: ''Nodia watsa nocaite Faraón irso, opoikena iocawa noderse shá nopjerrinaipe njite njaji njonirri iipaneta, njaji yofalri pia Canaán jipaite nacojle. ³² Njajiatsianai yajiapeca iwapaca pirraiti, iwapacapeca vaaca. Nadee pjiomi naapirra njite pjiomi njaji narsonipe. ³³ Niiniotsa Faraón iwana cádanacoatsa lritatjá-carro shá cocaca yaji idejica, ³⁴ icaiteotsa lrirso cayoji: Fa pirsoperri, iwapacapeca vaaca wayempetica nakjoite atee panashéte, ima cayo piaca njaji waferrinaipemi. Cayoatsa icaitecani lricadaa carroatsa iofawa Gosén jipaite ricó, ima Egipto lrico corrin matsia nacapaca narso njaji iwapacape pirraiti.

¹ Ikena José iá icaite faraón irso, lriaco lrirso: Opina njonirri iocawa Canaán jipaite nakjoite naapiya njaji nopjerrinaipe, njite nadee tsakja nápirra njite pjiomi narsonipe, naocawa Gosén jipaite lricó.'' ² José jipa idee cinco lripjerrinaipe lricañjatá-carro Faraón icapa. ³ Faraón iaco narso narso njaji José ipjerrinaipe: ''¿Coca yají idejica?'' njite naaco Faraón irso: Fá pirsoperri, iwapacapeca pirraiti, cayopiatsa nacayoshó njaji waferrinaipemi.'' ⁴ 4Njite naaco pja Faraón irso: ''Wanoca fepaite nakjoite ima aimaca maawitacai nirse, njite corrinatsa coca naiñja njaji waapirra Canaán jipaite ricó. Niini watatjaca piinai caiwi ricotsa picadá-carro waofáwa Gosén jipaite ricó, fá pirsoperri.'' ⁵ Njite Faraón iaco José irso: ''Opi naoca piderse njaji pikitsiñpe, pjinirri njite pipjerrinaipe. ⁶ Picapa coanca lriacawa jliaji Egipto jipaitena. Picadaa pjinirri njite pipjerrinaipe matsia cawa lricó pja jiipai Gosén jopaitena lricó. Niini cadaa pada yajicada iwapaca pirraiti, picadaa lriwapácarro njaji novacan.'' ⁷ Njite José idee jlinirri Jacob Faraón icapá carroni. Jacob icadaa yacati matsiaperri Faraón nacó. ⁸ Faraón iaco Jacob irso: ''¿Closhoena pipekirrica?'' ⁹ Njite Jacobniaco lrirso: ''icaamitsa norsoca ciento trenta walria, mitsa aima njorrapitaca. Njaji noferrinaipemi, aima pjapiatoa naofacawa jalredaoca lrico.'' ¹⁰ Njite Jacob icadaa tsenakja yacoti matsiaperri Faraón nacó njite lridia lrimoto lrioya. ¹¹ Njite José icadaa jiipai naofacawa lrico jlinirri njite lripjerrinaipe. Lricadaa naofawa Egipto jipaite ricó, matsiacawa pja jiipai, Ramses jipaite ricó, cayotsa Faraón icaite capisho José irso. ¹² José yá jlinirri injao, lripjerrinaipe irso njite pjiomi njaji jlinirri iipaneta lricope cosho piaca namaimaca lriipana lrico. ¹³ Corrin pacapa injaodati pjiomi jalredaoca lrico; ima pekirridalrica jliaji maawitacai iocalri nanacó. Meepepeminatsa njaji inaiki Egipto lricó njite Canaán lrico maawitacai ikjaote. ¹⁴ José iniwa aima palaraata naoya njaji egipcionai njite naoya njaji Canaán lricope nacoada njaji injaodati lriwenderri narso. José idee njaji palraata pjiomi Faraón irso talricanaati dapana lrico. ¹⁵ Njite napalraatan iwayaca cádanacoenawa njaji inaiki Egipto lricope njite Canaán lricope tsakja, njaji inaiki Egipto lricoperri náno pjiomi José ikjaolre, naaco lrirso: ''¡Pia waijawa! ¡Macadatsa mayamica fá corri capoenatsa warso palraata! ¹⁶ Njite José iaco narso: corri cadetsa irso palraata, idee norso ivacan noá-carro injaodati ivacan icoada shó.'' ¹⁷ Ikena njaji inaiki nadeeca José irso na-caballolni, na-borron, nápirra pjiomi naijaope icoadawa. José iá narso injaodati jliwalria navacan iacoadao. ¹⁸ Njite jliwalria iwayacakenawa, naa tsenakjawa pawalria initacawa José iderse tsenakja, njite naaco lrirso: ''Corrin wadawaca pioya, pjia waminalri ima opidekja wapalratan iwayacawa pjiomiwa, njite njaji pirraiti warsolri, waminalri iyapenatsa. Corrinatsa coca warso, picapjenjtsa, pjia waminalri. Icaamitsa warsolrica jliaji wadada njite fepaite. ¹⁹ Macadatsa mayamica fá maawitacai shó. Piwenta fá njite fepaite tsakja waijaope icoadao, niniotsa Faraón irsoperri caotsa fá njite lriyada caotsa fepaite. Pia warso wapaniaope wataitá-carro warsoca waijaope niniotsa corrin mayamica fá. corrin tsakjaotsa mapaniana cantja jliaji fepaite, wadee lriwayacacao.'' ²⁰ Niini José iwenta pjiomi jliaji Egipto jipaitena Faraón irso. Pjiomi njaji Egipto lricope nawendeca njepaite ima aima piaca maawitacai narso. Cayotsa Faraón iyadaca pjiomi jliaji jiipai Egipto lricoda. ²¹ Njite pjiomi njaji inaiki Egipto lricoperri, Faraón irsoperri-cana. ²² Icaamitsa corri-rrica José iwentalri piaca njepaite njaji sacerdotenai, ima Faraón yaa piacatsa naijao. Faraón shenita piaca naijaope njaji sacerdotenai, icatsa jliaji naiñjalrica. Niini corrin nawendeca njepaite. ²³ Njite José iaco narso: ''Yajenina opikena nowenta shá njite jipaite faraón irso. Alri noaca irso paniati yaapaná-carro jliaji jiipai. ²⁴ Iniwa cádanacoenaotsa ipania, cinco wajle nakjoite ikinkerre ioya, Yaawatsa Faraón irso pawajle ínaca nakjoite, njite njaji coatro wajle nakjoite, jitaotsa ipaniawa njite inñjaope iipana lrico yénipe yápiya.'' ²⁵ Njite naaco lrirso: ''Opi piyomjeta fá. Niini pioma cadaa, picadaa Faraón irsoperrí-carro fá'' ²⁶ Ikena José idana papje paperra nanacoapana cacoadá-carron talricanaati irsoni, njite matsia lrimotoca cayó, niini jliaminitsa paperra narsolrica atée panashete toa. Naaca Faraón irso pawajle ínaca nakjoite pjiomi. Icaamitsa corri-rrica Faraón iyadaca njepaite njaji sacerdotenai. ²⁷ Irael iofawa Egipto jipaite ricpo, Gosén lrico. Njaji lridakenai narso aima nanaani niini. Narso aima neenipe niini aima-cana. ²⁸ Jacob iofawa Egipto jipaite ricó diecisiete walria, niini Jacob iofawa jalredaoca lrico ciento trenta siete walria padenirri. ²⁹ Njite tsómi cádanacoena jlianaa jliaji Irael, lriwana lrikjaolrewa lrirri José, lriaco lrirso: ''Matsia cadatsa picapaca norso, pjieta picaapi nonaapa pocoda yapjite, njite picaite norso yacoti ajádalri shó jliaji notatjalriotsa piinai. Pinaitja matsiacalri madawa tsaotsa njoa Egipto lrico. ³⁰ Mayami cádanacoenaotsa njoa, pideotsa njoa teeco Egipto ioya pidawá carroatsa njoa nacodapitsa njaji noferrinaipemi.'' Njite José shepani, lriaco lriso: ''Nonaitjaotsa cayoji picaite capishó.'' ³¹ Irael iaco lrirso: Picaite norso ajádalri shó. Njite José icaite lrirso yaacoti ajádalri shó. Ikena Irael iorsoeta jliwida lriorsoa-carroita jiwida nacojle.

¹ Njite njapodamina njaji jiyapalrio, a papia nacojle pada icaite José irso, caifiaca jlinirri. Niini José jipa idee njaji lrienipe, Manasé njite Efraín. ² Njite nacaite cádanaco Jacob jími lrirri José iocacawa nirse lricapá carroni, Irael ikjaidatacawa njite jlinico lriofawa lriorsoacarrocoa nacó. ³ Jacob iaco José irso: ''Jliaji Dio Itaitakjeti Iminalri icañjataca piacawa norso yacaalre Camarray coa lrico, Canán jipaite ricó njite Lricadaa nonaco matsiadalri ⁴ njite lriaco norso: Nocadaotsa aima carroatsa pienipe niniotsa nocada imaimatacawa. Nocadaotsa pinakjoite perri aima yacaalre macacoepe. Nocadaotsa pinakjoite perri irso jiipai nayada carroni caidalriwenatsa. ⁵ Njaotsa njaji yamada pienipe jícolri pirso Egipto lrico lripjeya toa nonoca piderse, noyape caotsana. Efraín njite Manasé. Cayoji noyape capisho Benjamín njite Simeón. ⁶ Njite njaji jícolriotsa pirso njapodamina, icatsaotsa piyape kenana; njite narsoatsa njepaite nayadao tecojle nainai njaji pipjerrinaipe. ⁷ Njiteotsa njoa, nono caojli pia Padam lrikjoite, inonacalri pekirridalri jipa njoa niini mayami cádanaco nooya Raquel nono cayao inipolrico Canaán jipaite lrico, tsomi piaketja waocá-carro Efrata lrico (Belén). Icatsa nodawacano níini, inipolrico yacadawa Efrata lricojle.'' ⁸ Irael icapa cádanao José yénipe, lriaco: ''¿Coca yénipe njarra?'' ⁹ Njite José shepani: ''Noenipe njarra, paí. Dio icadaji norso anjí.'' Njite Irael iaco lrirso: ''Pidee norsona nocadá-arro nanaco matsiadalri.'' ¹⁰ Njite corri pienatsa matsia Irael icapaca lripekirrica ikjaote. Niini José itsomitana nja lrienipe jlinirri ikjaolre, Irael itsotsona njite jlieyoana. ¹¹ Irael iaco José irso: ''Corri pienatsa nowaada nocapacaotsa nopieta piecoa nirri, mitsa Dio icadaa nocapa tsakja njaji pienipe.'' ¹² José iorrocoita njaji lrienipe naferrin ipoita nakjoite, njite jliwa lriorsoawa tjewacajle lriecoa jiipai nacojle. ¹³ José jipa yamadape lrienipe, lricadaa Efraín atsialriemajle lrirso, njite Manasé Inarroemajle, niini Efraín yemawa inarroema nacojle Irael irso njite Manasé yemawa atsialriemanacojle lrirso, cayo lricadaaca nemawa lricodapi. ¹⁴ Niini Irael icadaa lriyekema Efraín jiwida naco njite lricadaa lricapi inarroema Manasé jiwida naco. Manasé-ca jliaji ipjerriti njite Efraín-ca jliaji iwerriti. ¹⁵ Irael icadaa yacoti matsiaperri José nacó: ''Jliaji DIo, nanaitjalri irso matsia njaji nonirrinaipemi Abraham, Isaac, jliatsa jliaji Dio iwapalri njoa matsia atee panashéte toa, ¹⁶ jliaji angele iwapalri njoa pjiomi maatsídalri ioya, Lricadaotsa matsiadalri nanaco njaji yempetipe. Naikjaote njaji yempetipe-ca njaji nawada caotsa noipitana njaji inaiki, njite nawaada tsakjaotsa Abraham njite Isaac tsakja. Nataoñaotsawa njite aimacaotsa jalredaoca lricona.'' ¹⁷ José icapa cádanaco jlinirri icadaaca lricaapi atsialriema Efraín jiwida nacó, corrin lripeyo lricapaca. Niini jlipaca jlinirri icaapi jlieEfraín jiwida nakjoite Manasé jiwida nacojle. ¹⁸ José iaco jlinirri irso: ''Cotsa caicarra pai, picadaa picadaa picapi ipjerriti jiwida nacó.'' ¹⁹ Mitsa corrin jlinirri shepani, niini lriaco lrirso: ''Noajintsa nirri, noajintsa. Mitsa caconaite catsacaotsa jliaji ipjerriti, aima tsakjaotsa njaji inaiki lrinakjoite perri, mitsa caconaite pjacaotsa jliaji iwerriti njite aima pjaotsa yacaalre macacoeperri imotolriotsa lrinakjoite. ²⁰ Irael icadaa matsiaperri nanaco jliada, lriaco nanaco cayoji: ''Njaotsa njaji Iraelnai aimadan namotoita caotsa yaacoti matsiaperri iipitana ikjaote, cayoatsa nacaiteca: ''Dio inaitjaotsa pirso matsia cayoji Efraín icayosho njite Manasé icayosho tsakja.'' Cayotsa Irael icadaa Efra´pin Manasé ipeyajle. ²¹ Irael iaco José irso: ''Mayami ketsaotsa njoa pioya nirri, mitsa inai catsaotsa Dio, njite lridieta tsenakjaotsa shá jinirrinaipe jipaite nacojle. ²² Noawatsa pirso jliji corridalritsa noá narso njaji pipjerrinaipe, noaca pirso jliaji awacada njotanda naoya njaji amorreonai noinoaca caojli pia nakjoete nomatsenan sho njite noyawitjiapo-sho tsakja.''

¹ Njite jacob iwaketaca njajji lrienipe, lriaco narso: Itsomita njoa nocaiecarro jimi jliaji icapalriotsa apjotsate. ² Itsomita jimicarro, shá Jacob yénipe. Jími coanca lricaiteca irso jinirri Irael. ³ Rubén, nirri pjerriti, njoidaca pjia, noinitje noatsiaca nacó, pjia nacapanda pjia nafionda nacapaca irso njite kjaideteca pjia. ⁴ Mitsa corrin piaji coanca kerroa cádanaco pjia cayoji ooni itarracá sho. Niini corrinatsa pjia carroca napeyajle ima pimaaca roapiya rsoaji pjinirri iino njite opi pinaitja maatsi lrirso pidee capoa lrinacojle ipainanti. ⁵ Simeón njite Leví padatsana nawaopiakje. Íinocapeca inaiki namatsetan shó. ⁶ Corrin nooma pacoacaca njoa nacayosho, corrin tsakja nooma njomica cocaca nacaiterri nawacaaca cádanacoa, ima corritsa caidalri icanaca njoa. Ime nérroa lrico, naino njaji inaiki; njite joiwi capoatsa nainoca naino njaji maaficalri. ⁷ Matsidalri catsaotsa jliaji nérroa, ima aimadalrica jliaji nérroa. Corriotsa naofá-carroca papocotsawa, kjerrecawajle catsaotsa naofawa nainai njaji Iraelnai. ⁸ Judá, Matsia nacaiteca poanco njaji pikitsiñape. Pjiametacaotsa njaji picoema. Njite njaji pikitsiñape nacoajá caotsa pipeyajle. ⁹ Pjia nirri Judá, yaawi yénipeca pjia ima piemaca piwini nacó . Pjiwa piorsoawa njite pidietacawa yaawi sho. Njite ¿cocantja itaita idejitaca jliaji yaawi? ¹⁰ Corriotsa coá-carroca jitaotsa pioya jliaji talricanatiapani, corrin tsakja jliaji pjipajico, pjia naapiyawalri, a kjerrecaotsa lriocawa jliaji talricanaati ajádalri njite pjiomi njaji inaiki njépacaotsa lriaco. ¹¹ Jliaji ipapicada lriborron ova inaná matsiani nacó, njite lricotsoca njaji lritsayani ova yána lrico, njite lritsayanalre lrianá walrijao ricó. ¹² Ita perrica njaji lritji lrirra capoa aima ova yána njite jalreperrica lrietsa vaaca ínia shó. ¹³ Zabolón iofá caotsawa manoá yalrapi rico, njite napatocaotsa njaji iita macafiapope lrinewate ricó. Njite jlipaite jiná iocacaotsawa Sidón nacojle. ¹⁴ Kjaidadalrica jliaji Isacar, cayoji borro kjaidani shó. ¹⁵ Lrioketaotsa jiipai matsiadalri lriwafetá-carro. Lrideotsa niini lridecalre jamiñaperri njite pada irsodalri caotsani. ¹⁶ Dan, icatsaotsa jliaji icaitecadaca naacona njaji lrikitsiñape matsiá carrona ima papococa nanakjoite njaji Irael poco. ¹⁷ Api-ca jliaji Dan iwapacadaca inipolrico lrimjoá-carro caballo jiipa niniwa jliwá-carro jliaji jiecojicada lrinaco. ¹⁸ Nowapaca Pjia no-Mnalri piyomjetá-carro njoa. ¹⁹ Keñaite perri yácaotsa Gad ikjoete, mitsa jlia tsaotsa ifietana. ²⁰ Matsiaperri paniati itaoña caotsa Aser jipaite ricó. Nainjaotsa matsia talricanaatinai iñjacapisho. ²¹ Pirraiti madanata canadalri shocaotsa jliaji Neftalí, matsiaperricaotsa njaji lrienipe. ²² Jaico íki cainacaneca jliaji José, jaicoki aimadalri iinaca yemacada tsoomi onipao ioya. Lriki jirracawa panti iwai nacó. ²³ Njaji ínocape yawitjiocoti sho neemaotsa lrikjoete, nayawitaotsani njite yaamícarrocana lrioya. ²⁴ Mitsa corriotsa nataitá carroca lrikjoete, ima kjeya pjaaca naoya ima jliaji Itaitakjetinalri Jacob iMinalri ikitsindatacani, Jliatsa jliaji Iwapacadacan, Irael Idanatashoona. ²⁵ Pjinirri iDiote ikitsindata caotsa pjia, njite jliaji Dio Itaitakjetinalri inaitjaotsa pirso matsia lrisho jliaji matsiadalri eenolricojledalri nakoiote dalri, njite njaji matsiaperri tjewacajle dalri nacoda tsakja. Matsiawatsa keenipecana njite matsia tsakjaotsa nataoñacana. ²⁶ Aima pia matsiaperri narso pia njaji njonirrinaipemi, njite njoa, pjinirri norso pja aima matsiaperri naoya. Njaji pipjerrinaipe njeta pioya pjiomi, mitsa panaya nocadáca pinaco aima matsiaperri cayoji jiipana yenonne shó. ²⁷ Yaawi yoomacada shoca injaoca jliaji Benjamín. Piyompinaco lriino, lrinjá-carro jliwa catsa, mitsa dainoma nacojle lriá nainjao njaji lrikitsiñape. ²⁸ Icatsa njaji doce poco-ca Irael inakjoite perri. Icatsa njaji yaacoti matsiaperri icaiterri nanaco njaji lrienipe. Lricadaa pada yaacoti matsiadalri narso nacoanaa. ²⁹ Njite lricaite coancaotsa nanaitjaca maami cadanacoenaotsani, lriaco narso: ''Kjeyenatsa jalredaoca noá-carro njapodan njaji njonirrinaipe. Idawaotsa njoa noferrinaipemi icodapi lri-ricoda jliaji jalrapeco Efrón, hitita tairri jipaite ricó, ³⁰ lri-ricoda jliaji jalrapeki Macpela jipaite ricó, tsoomidalri Mamre ioya Canaán jipaite ricó, jliaji jiipai Abraham iwentalri Efrón, hitita tairri ioya nadawá carron niini. ³¹ Icapiatsa nadawaca Abraham njite Sara tsakja niini; Isaac tsakja, lriino Rebeca tsakja, niini minitsa nodawa pia tsakja Lea. ³² Jliaji irrirri njite jliaji jiipai ninidalri nawenta piani naoya njaji Het-nai.'' ³³ Jacob itaita cayami caacocs narso njaji lrienipe coajica, icaamitsa lripiajletaca jlipa lriorsoa carroita lricó, njite jlirsa lricaolrewa jalripa pikeetem, njite icaamitsa Jacob iacawa naikjaolre njaji lripjedaperrim pia.

¹ Inonaaca lricaolre pekirritsa jliaji José njji jliwaca lriorsoawa jlinirri yecoa nacojle, lriiya lrinaco njite lritsotso lriecoa nacó. ² José icaite narso njaji lrirsoperri itapecaperri matsietá-carro jlinirri idadami nadawá-carro. Niini njaji itapecaperri namatsiet Irael idadami. ³ Coarenta jalredaoca lriwiaca nadejica namatsietá-carro matsia pjiomi. Njite njaji Egipconai naiyaca lrinaco sesenta jalredaoca. ⁴ Yaami cádanacoena naiyaca lrinacó, caco José narso njaji caconaperri Fraón iyape, lriaco narso: Matsia cadatsa icapaca norso, inaitja matsiacalri caaco sha noikjaote Faraón irso cayoji: ⁵ 'Jliaji njonirri icadaa nocaiteca lrirso yaacoti ajádalri sho cayoji: ''Pino noikjaolre, picapa mayami kenaotsa njoa. Pidawaotsa njoa lri-ricoda jliajia irri nonaitjanda norsowao Canaán jipaite ricó, Icatsa nirse nooma idawaca njoa.'' Niini panaya, icadaa noá-carro nodawa njonirri nirse, notaita cayaminaotsa nodiawatsa ajerreji noocao.'' ⁶ Njite Faraón shepani: ''Warsa pia pidawa pjinirri nirse cayoji lrinaa capisho pinaitjaca lrirso yaacoti ajádalri sho.'' ⁷ José yaawa Canaán lricojle lridawá-carro jlinirri idadam. Pjioi njaji caconaperri Faraón iyape naawa José iinai, njaji icadaacape yaacoti Faraón irso lriipana lricope tsakja, pjiomi njaji caconaperri Egipto lricope tskja, ⁸ njaji José iipaneta, perrinaipe, njajinirrim iipaneta tsakja. Mitsa njaji neenipe njite naapirra corrin nadeecana, namacana Gosén jipaitena lricotsana. ⁹ Nadee tsakja njaji carretafiape njite njaji ideecapena. Aima inaiki njaji yalriwa lriinai. ¹⁰ Naoca cadanacoa namatsietacawa lrico trigo Atad jipaite ricó Jordán pemajle, inona nacaolre pekirritsa nacaolre ricó. Icatsa José inaitja tsenakja inonacalri-yaapani siete jalredaoca jlinirri ikjaote. ¹¹ Njaji jiipai iminanai, cananeonai, nacapa cadanaco inonacana pekirritsa Atad jipaite ricó, niini naaco: ''Inonaaca pekirritsa njaji Egipto lricope.'' Niini nacadaaca lriipitanao nini abel Mizraim, caishopacani, ''Inonácarrom njaji egipcionai,'' Jordán pemajle. ¹² Njaji Jacob yeenipe nanaitja cayoji lrinaa capisho piana. ¹³ Njaji lrienipe nadeeni Canaán jipaite ricó njite nadawani jalrapeko ricó awacada Macpela ricó, tsomi Mamre ioya. Abraham iwenta piaca jliaji irrirri njite pjiomi jliaji jiipai lriwaida nacoda nadawa carodao njaji mayamperrim. Lriwenta piacani Efrón ioya ioya jliaji hitita-tairri. ¹⁴ Nataita cayamina nadawaca njajinirrim, José idiawa Egipto lricojle, naapiya njaji lriperrinaipe njite pjiomi njai yaacape lriinai nadawá-carro jlinirri. ¹⁵ Njite njaji José ipjerrinaipe nacapa cádanaco mayamica naoya jliaji njanirri, naaco cayoji: ''¿Coajiotsa kerroacadaa José wanacojle njite lriomaotsa lricoadawa wainai jlikjaote jliaji wanaitjalri lrirso?'' ¹⁶ Niini nawanaca José naikjaolrewa, naaco lrirso: ''Cayo pia lriaco jliaji pjinirri mayamica ipjeyan: ¹⁷ Cayoatsa icaiteca josé irso: ''Pinaitja matsiacalri picadaa jliyapa pioya jliaji maatsirri nanaitjalri pirso njaji pipjenaipe, ima nanaitja piaca pirso maatsi.'' Panaya picadaa jliyapaca pioya jliaji maatsirri nanaitjalri pirso njaji pjinirri iDiote irsoperri.'' José iyaca caicadanaco jlimica nacaiteca. ¹⁸ Njite njaji lriperrinaipe nawa naorsoawa jiipai nacojle lripeyajle. Naaco lrirso: ''Picapa pirsoérrica faa.'' ¹⁹ Mitsa José iaco narso: ''Corrin nooma ifiocawa. ¿Capja Dio-ca njoa? ²⁰ Ima shaa ioma piatja inaitjaca norso maatsi, mitsa Dio inaitja matsia lrinakjoite, nataitá-carro yomjeca aima inaiki, cayotsaji icapa capisho panaya. ²¹ Niini corrin noma ifiocawa. Nokitsindataotsa shaa njite njaji yeenipe tsoperritoa.'' Lricatiimata nacaolre ima caacocani matsia yaacoti matsiadalri sho. ²² José iofawa Egipto lrico, njite njaji jlinirri ikitsiñape. Lriofá jalredaoca lrico ciento die walria. ²³ José icapa njaji Efraín yeenipe nakjoite madalricoma lridakenai. Lricapa tsakja njaji Maquir yeenipe, Manasé yeenipe, njaji José icadaji cayoji lrienipe sho catsana. ²⁴ José iaco narso njaji lrikitsiñape: ''Tsowenatsa norso jalredaoca mayami carroena njoa; mitsa noajintsa Dio imenaca caotsa pada ikjaolre lridee carroatsa shaa Egipto lrikjoite lrinacojle jliaji jiipai Lricaiterri yaacoti ajádalri sho Abraham irso, Isaac Irso njite Jacob irso Lriacaotsa narson.'' ²⁵ Niini José inaa nanaitjaca pada yaacoti ajádalri sho njaji Iraelnai. Lriaco narso: ''Ajádalri Dio imenaca caotsa pada ikjaolre. Niini cayo cadanacoenaotsa irsotsaotsa ideeca njaji noapipem ajaiteji.'' ²⁶ Mayami José, ciento die walria lripekirrica nacó. Namatsieta matsia lridadami njite njeetani lriarrona lrico Egipto lrico.

¹ Icatsa neepitanaca njaji Irael yénipe inolri Jacob iinai Egipto lricojle, nacoanamitsa naapaneta yaapiya: ² Rubén, Simeón, Leví, Judá, ³ Isacar, Zabulón, Benjamín, ⁴ Dan, Neftalí, Gad njite Aser. ⁵ Setenta namaimaca padenirri njaji inolri pia Jacob iinai Egipto lrico. Njite José icoadatana Egipto lricona. ⁶ Mitsa José, lripjerrinaipe njite pjiomi njaapoco oopi mayamicana. ⁷ Aima neenipe njaji Iraelnai, namaimataacawa aimasho njite kjaidá-perricana; napakjanta jliaji jiipai naofalri ninio. ⁸ Njite padenakja talricanaati walridalri ínita iytalricanaataca Egipto lrico, pada corridalri piatsa yají José nacó. ⁹ Niini lriaco narso njaji lrinaikite: ''Icapa, njaji Iraelnai aimadancana njite kjaidaperri pjaaca waoyana. ¹⁰ Panaya, warsotsa wapaca coajica wanaitjaca naapiya ima namaimataacacawa kjeyao, wadeetsa wacoema ino íino fa njitentja nemaca wakjoete wacoema yapiya njitentja naawa lrioya jliaji fepaite.'' ¹¹ Ikena nacadaaca naapiyawelreo njaji iraelitanai njerrapiteeta carrona idejikjeti kjaidaperri sho. Njaji Iraelitanai nanaitja lriyacalreo jliaji Faraón. Nanaitja jliaji yacaalre Pitón njite Ramsés. ¹² Mitsa njaji iraelitanai corrin yamica namaimataacacawa. Niini njaji egipcionai nafioca naiwana njaji iraelitanai. ¹³ Egipcionai icadaa nadejica kjaida njaji iraelitanai. ¹⁴ Nacadaa njerrapitaca pekirritsa idejikjeti sho. Nacadaa nanaitja nerroeta shopao ladrillo njite nanaitja tsakja ladrillo. Nanaitja tsakja idejikjeti idejikjeti kjaidaperri nakinkerre ricó. Pjiomi jliaji idejikjeti nanaalri nanaitjaca, idejikjeti jamiñaérricana. ¹⁵ Niini jliaji talricanaati Egipto lricoda icaite narso njaji iwapacape keenipeca njaji hebreo tadoanaipe; Sifra roipitana rsoaji apama njite Puá rsoaji apama. ¹⁶ Lriaco narso: ''Iwapaotsa icapa keenipe cadanacoatsa njaji hebreo tadoanaipe, atsia cada neenipe, inoatsani, mitsa ínarro cadaa, icaotsa caaficano.'' ¹⁷ Mitsa njaji iwapacape keenipeca njaji inaitjepe nafiowa Dio iiwana, corrin nanaitja cayoji talricanaati inaa capisho nanaitjaca. Njite nacadaa catsa caafica njaji neenipe atsiadape. ¹⁸ Niini jliaji talricanaati Egipto lricoda iaco narso njaji iwapacape njaji kenipeperri: ''¿Coada corrin iino njaji neenipe atsiadape?'' ¹⁹ Njite njeepacani, naaco lrirso jliaji talricanaati: Njaji hebreo tadoanaipe, cotsa cayocana nacayosho njaji egipcio tadoanaipe. Njaji inaitjepe kjaidaperricana, keenipena lripjeyatoa waocaca naikjaolre keenipe cádanacona.'' ²⁰ Dio iwapa njaji inaitjepe iwapacaperri njaji kenipeperri. Nataoña pjawa njaji iraelitanai njite kjaida pjaacana. ²¹ Ima njaji inaitjepe iwapacaperri njaji kenipeperri nafiocawa Dio iwana. Njite Dio icadaa neenipewa. ²² Faraón iaco narso njaji lrinaikite pjiomi: ''Ipecoatsa oni ricojle pjiomi njaji neenipe atsiadape, mkitsa icadaacatsa njaji inaitjepedape.''

¹ Ape atsia Leví nakjoite dalri jita inoa apama leví tadoa tsakja. ² Njite kewedanca rsoaji inarro lrirso niini rsopaca pada roenipe atsiada. Njite rocapa matsiadalrica jliaji kirraitalri, niini rodawacani madalripi kerri. ³ Njite corri cadanacoetsa rotaitetsa rodawacani, ikena romatsieta pada tseeto njite romainita matsa maini shó lritamó carrotsa ooni ricó, njite rsoeta jliaji yempeti lri-ricoda. Njite roa rsoawa jliaji tseeto Ooni Nilo inomapi ricó jaicoapo lrima ipecolrico. ⁴ Njite roaco yempeti ipjerroda irso roema carro tekjoitetsa rocapá-carro coancaotsani. ⁵ Faraón iito iorroco ipita nirse naji cadana toa lrinomapiana ricó njaji rorsoperri. Njite rocapa jliaji tseeto ooni inomapi ricó jaicoapo lrima ipecolrico njite romeenaca njaji rorsoperri naacarro njetan. ⁶ Namjeco cádanaco jliaji tseeto nacapa ninica pada kirraitalri íyacada. Njite kjenaa Faraón iito icapaca lrirso, niini roaco: ''Jliaji kirraitalri, neenipeca njaji hebreonai.'' ⁷ Njite rsoaji kirraitalri ipjerro iaco rorso rsoaji Faraón iito: ''¿Capja pioma noaca noma apama hebreo tadoa rotaoñá-carro pirsoni?'' ⁸ Njite rsoaji Faraón iito iaco rorso: ''Warsa pia pioma.'' Niini rsoaji yempeti roá rooma roatsa rsoaji kirraitalri jidoatsa. ⁹ Rsoaji Faraón iito iaco rorso rsoaji kirraitalri jidoa: Pideotsa jliaji kirraitalri piwapá carroatsa norsoni, njite nocaoña watsa pjia piwapa caapjini.'' Niini rsopaca jliaji kirratalri rowapá carroni. ¹⁰ Njite lritaoña pjakenawa, ikena rodeecani Faraón iito irso niini rocadaacani roenipe shó rsoaji Faraón iito. Rocadaa lripitanao Moise ima roaco: ''Ima njotacani ooni rikjoiten.'' ¹¹ Njite atsiakena Moise. A papia nacojle, lria lricapa naikjaolre njaji lrikitsiñape njite lricapa coajica nadejica iñakjeti ricó. Lricapa coajica pada Egipto tairri ínoca pada hebreo tairri, pada lrikinda nakjoite dalri. ¹² Niini Moise ioma icapa matsia lriwaipoco nacó njite lricapa corrica coca pacapa. Níni lriinoca jliaji egipcio tairri njite jlica lridawá-carro lridakim caida lricó. ¹³ Tjewaijle lriá tsenakja lricapa naderse, njite, lricapa, yamada hebreonai inoacacawa. Njite lriaco lrirso jliaji iinocada lrikitsinda: ''¿Coada pinoacawa pikitsinda yaapiyatsa?'' ¹⁴ Njite jliaji atsia shepani, lriaco Moise irso: ''¿Cocao icadaa pjiá-carro fewidaapo, o pjiá-carro yají wanaco? ¿O pjiomaca piinoca njoa piino capisho jliaji egipcio tairri?'' Niini Moise ifiocawa jlimi cádanaco cayó, niini lriaco lrirsowaaca: ''Opina nají jliaji nonaitjalri.'' ¹⁵ Faraón jimi cádanaco jliaji Moise inaitjalri, lrioma piatja lriinoca Moise. Mitsa Moise ipitoa Faraón ioya Madian jipaite ricojle. Lrioca lriofawa ooni njecaniapji icodapi niini. ¹⁶ Njite jliaji sacerdote Madian lricoda, lrirso pia sietema lriito-naipe. Njite naoca nirse njetá-carro ooni na-pakjantá-carro nacadaa carroda ooni narso njaji njanirri nápirra. ¹⁷ Njite náno njaji paana iwapacape pirrati tsakja, njite njecoetana njiteo, mitsa Moise idanatana lrikitsindatá carrona. Lriarro tsakja ooni nápirra írrao. ¹⁸ Njaji inaitjepe walridarrope nadia naocawa njanirri Reuel iderse, njite lriaco narso: ''¿Coada idiá yocawa yenon catoa jeerri?'' ¹⁹ Njite naaco lrirso: ''Pada egipcio tairri iyomjeta fá naoya njaji paana iwapacape pirraiti, njite jlita ooni waapirra irrao tsakja.'' ²⁰ Njite lriaco narso njaji lriitonaipe: ''Njite, ¿A kjerreoniji? ¿Coada corrin ideni? Iwanani lriñjá-carro wainai.'' ²¹ Njite Moise shepatsa lriofá-carro lriipana lrico jliaji atsia, njite lriaca Moise iinowa lriito Sefora. ²² Keenipe Sefora Moise irso, Moise icadaa lripitanao Gersón; lriaco, inocadatsa njoa pada jiiai nakjoite pada jipaite ricó.'' ²³ Njite aima walria jiyapawa, njite maymica jliaji talricanaati Egipto ricoda. Njite njaji Iraelitanai corrinatsa nataita lrikjoete jliaji idejikjeti matsinaadalri nanaitjalri. Niini nawanaca kjaida pada ikitsindatá carrona, njite Dio jimica narso coajica nadejica pada irso. ²⁴ Dio jimi cadanaco coajica njerrapitaca lriwaopia lrinaco jliaji yaacoti lrirsolri pia Abraham, Isaac njite Jacob iapiya. ²⁵ Niini Dio icapaca coanca njerrapitaca njaji iraelitanai njite Lriají coanca njerrapitaca.

¹ Moise iñjawerri lriipitana Jetro, icapiatsa Madian isacerdoteni. Njite papia nacojle Moise idee iwapa njaji lriñjawerri iipirra, niini lrideecana teeco jalrapocolri ricojle, lriocawa Horeb nacojle, jliaji Dio iawacadate. ² Icatsa Dio iangeleni imoto lrikjaolre tiyee ricó jaico poco lrikjoite, Moise ioma icapa matsia coanca kerraca jliaji jaico poco, mitsa corrim lrimacawa. ³ Niini Moise iaco: ''Nocapatoa matsia coadaca corrin lrimacawa jliaji jaico poco.'' ⁴ Niini Dio icapa cádanaco Moise itsomitaca jliaji jaoco poco lricapá-carro matsia, Dio iwana lrikjaolre jaico poco lrikjoite, lriaco lrirso: ''Moise, Moise.'' njite Moise shepani, lriaco: ''Alri njoaji.'' ⁵ Njite Dio iaco lrirso: ''¡Atsa piemaorra! Pjita pioyao njaji pitsapatoni, ima jliaji pipjoalri inacó njoenitandaca norsowaoni.'' ⁶ Lriaco pja lrirso: ''Icatsa pjinirrinaipemi iDioteca Njoa, Abraham iDiote, Isaac iDiote njite Jacob iDiote tsakja.'' Njite Moise itaca lriecoa ima lrifioca lricapaca Dio irso. ⁷ Wa-Minalri iaco Moise irso: ''Nocapaca coanca njerrapitaca njaji nonaikite aimadan iofalriwa Egipto lrico. Njite Njomica coajica nawanaca naoma capoa nakitsindatacana. Noají coajica njerrapitaca. ⁸ Niini Nonoca nowatacá carrona Egipto jiida ioya njite Nodee carrona pada jiipai matsiadalri nacojle, macádalri, naoketacawa lricoatsa iniati njite mapáa tsakja-, njepaite ricojle njaji cananeonai, hititanai, amorreonai, ferezeonai, heveonai njite jeboseonai. ⁹ Naokjenina noikjaolre coajica njemataca noikjaolre njaji Iraelnai. Njite Nocapa coajica egipcionai jirrapitetacana. ¹⁰ Niini panaya Nomeenacaca pjia Faraón iderse pimotoitá-carro njaji nonaikite aimadan, njaji Iraelnai Egipto ioya. ¹¹ Mitsa Moise iaco Dio irso: ''¿Cocao njoa, notaitá-carro noacawa faraón iderse njotá-carro njaji Iraelnai Egipto lrikjoite?'' ¹² Njite Dio shepani: ''Njoa catsaotsa piinai, Njite cayoatsa pianjí Njoaca jliaji imeenacalri pjia. Pimotoita kenaotsa njaji nonaikite aimadan Egipto lrikjoite, icatsatsa lrinaco jliaji awacadaca yaawatsa norso matsiadalri.'' ¹³ Moise iaco Dio irso: Noa cádanacoatsa naikjaolre njaji Iraelnai, njite nocaite narso, Jliaji iferrinaipe iDiote imeenaca njoa iderse, njite natatja cadaa njoa, ¿Cocao Lriipitana? ¿Coajiotsa njoepacana?'' Dio icaite lrirso: ''NJOACA JLIAJI CAAFIDALRI. ¹⁴ Picaiteotsa narso, JLIAJI CAAFIDALRI imeenaca njoa ikjaolre.'' ¹⁵ Dio icaite tsakja Moise irso: Picaiteotsa narso njaji iraelitanai, JLIAJI WAMINALRI, na-Diote njaji iferrinaipemi, Abraham iDiote, Isaac iDiote njite Jacob iDiote tsakja, imeenaca njoa iderse. Icatsa Noipitanaca jliaji caidalriwetsa, cayoatsa Nofaacawa njewida lrico caidalriwenatsa nanaco njaji walricomanai. ¹⁶ Piawa njite piwaketaotsa njaji pekipenai Irael lricoperri. Picaiteotsa narso cayoji: na-Diote njaji iferrinaipemi, Abraham iDiote, Isaac iDiote njite Jacob iDiote tsakja, imoto noikjaolre, njite Lriaco norso: ''Ajádalritsa Nocapaca coajica Egipto lricope inaitjaca shá. ¹⁷ Njite nocaite norsowaaca Njotacaotsa shá naoya njaji jirrapitetalri shá, Nodeecaotsa shá Egipto lrikjoite njepaite lricojle njaji cananeonai, hititanai, amorreonai, ferezeonai, heveonai njite jeboseonai, niinicawa iniati njite mapáa tsakja.'' ¹⁸ Njemiotsa pirso. Niiniotsa pjia, njite njaji pekipenai Irael lricoperri yaawatsa talricanaati Egipto lricoda iderse, njite icaiteotsa lrirso cayoji, ''Jliaji wa-Minalri, na-Diote njaji hebreonai, Lrino waderse. Niini wacaogtsa madalridaa icoa jalredaoca itecoca ajaiteni jalrapocolri ikjaolre, wataitá-carro wainoca maaficalri wa-Minalri Diuo irso.'' ¹⁹ Mitsa noaji corricaotsa Egipto italricanaa icadaotsa yaacawa, icamitsaotsa Nocadaa cadaotsa jlirrapitaca. ²⁰ Nopiajletacaotsa nocaapi egipcionai ikjoete noamá-carro nakjoete, nacapá-carro njaji manaitja canaperri nonaitjalriotsa nacapao. ²¹ Nocada caotsa matsiaca nacapaca irso njaji egipcionai, Nocadaotsa naacarro irso aima inaaniti macoadatsa nacada cadanacoenaotsa yaawa, wadee caikje catsa yaacawa naoya. ²² Nacoanatsa njaji inaitjepe natatjaotsa nainai njaji inaitjepe Egipto lricope njentada owirrodape, palraatape; natatjá tsakjaotsa nainai njaji nacodapiperri o naofanipe iinai iipana lrico na-tsaayaniwa. shetaotsana yénipe, iitonaipe nacó. Icatsaotsa ideeca naoya njaji egipcionai nanaani pjiomi.''

¹ Njite Moise shepani, lriaco: ''¿Miotsa corrin cadaa njeepa njoa, corrin njemica norso, o nacaite cadaa norso corrica nocapa jliaji wa-Minalri?'' ² Njite wa-Minalri Iaco Moise irso: ''¿Cocao jliaji pirsolri picaapoi ricó?'' Moise iaco lrirso: ''A paapo jaicoapo.'' ³ Njite wa-Minalri iaco lrirso: ''Pipeeco jliwao jiipai nacojle.'' Moise ipeconi jiipai nacojlen, njite lripadamacawa jliaji jaicoapo aapi sho. Moise ipito lrioya. ⁴ Njite wa-Minalri Iaco Moise irso: ''Pjipa piocaapi shó lriitipi nakjoite.'' Njite Moise jipani lriitipi nakjoite. Njite lripadamao jaicopo sho tsenakjan lricaapi ricó. ⁵ ''Icatsaotsa pinaitjalrica nataitá carroatsa njeepaca picapaca jliaji iMinalri, iferrinaipe iDiote, Abraham iDiote, Isaac iDiote, Jacob iDiote tsakja.'' ⁶ Wa-Minalri iaco pja lrirso: ''Panaya, pjieta picaapi pitsayanalre ricó.'' Njite Moise sheta lricaapi lritsayanalre ricó. Lridia cádanaco jlita njiteni, lricapa catserreca lricaapi pjiomi, jaalreni itamana shó. ⁷ Wa-Minalri iaco: ''Pjieta tsenakja picaapi pitsayanalre ricó.'' Njite Moise sheta lricaapi lritsayanalre ricó, njite jlita cádanco njiten, lricapa matsia catsa lricaapi tsenakjan, cayotsa lridaki icapacana shó. ⁸ Wa-Minalri iaco lrirso: Corri cadaa njeepa pjia, corri cadaa njemi pirso picadaa cádanaco nacapa Njoida, pinitanda picadaaca nacapa, a pedaotsa njeepa Nopieta cádanaco nonaitjaca manaitja canaadalri. ⁹ Corri cadaotsa njeepa nopieta cádanaco nocadaaca nacapa Njoida manaitja canadalri, njite corrin tsakja njemi pirso, pjitaotsa ooni lriamarralri njjiteo piarró-carro jiipai nacojle. Jliaji ooni pjitalriotsa lripadamacaotsa írranatiwa jiipai nacó.'' ¹⁰ Njite Moise iaco wa-Minalri irso: ''No-Minalri, cotsa matsiaca caacoca njoa, corrin oopica, corrin tsakja panaya caaco cádanaco pjia norso, njoa pirsodalri. tárraca cácoca njoa, corrin noaji caacoca kjeyantja.'' ¹¹ Wa-Minalri iaco lrirso: ''¿Cocao jliaji inaitjalri nanoma njaji inaiki? ¿Cocao icadaa maacó carro njaji inaiki, corrí-carro njemi, matjí carrona, o nacapá-carro? ¿Capja corrica Dioca Njoa? ¹² Niini panaya, warsena piawa, Njoa tsaotsa pinoma iinai, Njoa tsaotsa icaite pinoma irso cocacaotsa picaiterri.'' ¹³ Mitsa Moise icaite: ''No-Minalri, pinaitja matsiacalri pimeenaca pada nooya, coajidalri catsa pioma pimeenaca.'' ¹⁴ Njite Kerroa Dio Moise irso, Lriaco lrirso: ''¿Coan catsakjao jliaji pipjerri Aarón, jliaji Levita tairri? Nonjinda matsiaca caacocani, lrinoatsa lricapa piderse, njite catimaotsani pekirritsa lricapa cádanaco pjia. ¹⁵ Pjia watsa icaite njaji yacoti Lrirso lricaiteoda, njite Njoa watsa icaite irso cocacaotsa njaji inaitjalri. ¹⁶ Jlia watsa caaco narso njaji inaki pinacó. Pinoma shocaotsani, cayoatsa pjia lrirso Njoá capisho pirso. ¹⁷ Pjipaotsa pidee jliaji jaicoapo. Lrishoatsa pinaitja njaji manaitja canáperri.'' ¹⁸ Njite Moise idoa ioyacawa lriñjawerri Jetro iderse, lriaco lrirso: ''Picadaotsa njoa nodiá-carro naderse njaji nokitsiñape Egipto lricojle, nocapá-carro caafi cadatsana.'' Njite Jetro iaco Moise irso: ''Pienawa pimaodacatsa.'' ¹⁹ Wa-Minalri iaco Moise irso Madian lricó: ''Pidienawa Egipto lricojle, ima pjiomi njaji iomacape pia iinoca pjia opina mayamina pjiomi.'' ²⁰ Ikena Moise idee rsoaji lriino, njji lrienipe; njite lricadaa naofawa borro nacóna. Opi Moise iawa Egipto lricojle njite lrideeca lrijaicaopote lricaapi ricó. ²¹ WaMinalri iaco Moise irso: ''Pioca cádanacoa Egipto lricojlena, Picadaotsa Faraón icapa njaji manaitja canaperri ima Nocadaaca jídati picaapi ricó. Mitsa nocadaotsa tárraca lricaolre niní corriotsa lricadá-carroca naawa njaji inaiki aimadan. ²² Picaiteotsa Faraón irso cayoji: Cayó Lricaiteca jliaji Wa-Minalri: Noenipe pjerritica jliaji Irael, ²³ Niini Nocaiteca pirso: ''Picadaa lriá carroa jlia nirri ipjerriti, lritaitá-carro lriaca matsiadalri Norso. Mitsa corri capoa picadaa lriá carroa, Nocadaa caotsa maayamica jliaji pirrí ipjerriti.'' ²⁴ Njite naacayao toa inipolrico, Dio ioketaacawa Moise iapiya deepi ricó, njite wadeepe lriinocani. ²⁵ Njite Séfora jipa pada jiipada nakematanda malriye sho, njite royoá roenipeda íya lri-atsiaca nacoda, njite rocadaani Moise jiipa naco. Njite roaco: ''Ajádalrica noinirrica pjia lrikjaote jliaji írranati.'' ²⁶ Niini Dio imáca Moise. Njite roaco: ''Írranati ínirrica pjia circuncisión ikjaote.'' ²⁷ Wa-Minalri iaco Aarón irso: ''Warsa piawa jalrapocolri lricojle, nirseotsa picapa Moise.'' Aarón iá lriderse njite lricapani piyompinaco toa Dio iawacadate nacojle, njite lritsootsoni. ²⁸ Moise iaco Aarón irso pjiomi njaji iacoti Dio inalri lricaiteca lrirso, njite pjiomi njaji manaitja canaperri Lrinaalri lrinaitjaca. ²⁹ Ikena Moise njite Aarón iawa njite nawaketa pjiomi njaji caconaperri pekipenai iraelitanai. ³⁰ Aarón icaite narso pjiomi njaji yaacoti WaMinalri inaalri Moise icaiteca. Lricadaa tsakja nacapa Dio jiida nacapá-carro njaji inaiki. ³¹ Njite njaji inaiki njeepani. Njite njemi cádanaco Dio icapaca narso njaji iraelitanai, coanca njerrapitaca, ikena nayamheta njewidaa nácarro Lrirso matsiadalri.

¹ Njite njapodamina pjiomi njaji jiyapalrio, Moise njite Aarón iawa Faraón iderse, njite naaco lrirso: ''Cayo lricaiteca jliaji Waminalri, na-Diote njaji Iraelnai: Picadaa naawa njaji nonaikite aimadan, ná-carro nacatimataacawa Noapiya nirse, jalrapocolri ricó.'' ² Faraón iaco narso: ''¿Kjaiterrio jliaji IMINALRITI? ¿Coajintja njoepaca jliaji Lricaiterri norso nocadá-carro naawa njaji iraelitanai? Cotsa noajindaca jliaji IMINALRI; njite njoa, corriotsa nocadá-carro naawa.'' ³ Njite naaco lrirso: ''NaDiote njaji hebreonai inon waikjaolre. Picadaa waawa madalridaa jecoapi jalrapocolri lricojle wainó-carro maaficalri waMinalri irso, wadee lriinoca fáa maatsidalri shó o matseeta shó.'' ⁴ Mitsa jliaji Egipto italricanaa iaco lrirso: ''Pjia Moise njite Aarón, ¿Coada ioma ideeca njaji inaiki nadejicalre ioya? Warsa idiawa idejicalre nacojle.'' ⁵ Lriaco pja narso: ''Aima hebreonai panaya fepaite ricó, njite shá ima kjapantsa yaami nadejica.'' ⁶ Jliadatsa jecoapi, Faraón inaa njaji iwapacape njaji idejicaperri lrirso njite narso njaji icapacape coajica nadejica, lriaco narso: ⁷ ''Panaya jliaji, corrinatsa yaa carroca narso malritsi napatsica shopa jipaipe. Icaotsa naacarro naoma narsowao njawacatsa nanaitjashopa. ⁸ Njite narsotsa nanaitjaca jliaminitsa namaimaca nanaitja capisho manatsa, wadee tsó pjaaca nanaitjaca lrioya, ima inoperricana, niini naoma nocadaaca naawa naacarro naino maaficalri na-Diote irso. ⁹ Icadaotsa nadejicalreo aima pja lrioya jliaji narsolrina wadentja nawaopiajica pada nacojle, njite wadee njemica coanca nacashataca njaji.'' ¹⁰ Ikena naacawa njaji naapiyawalre njaji idejicaperri njite njaji icapacape coajica nadejica nacaié-carro narso njaji inaiki aimadan idejicaperri, naaco narso: ''Cayoji Faraón icaiteca: ''Corrinatsa waacarroca irso malritsi ipatsica shopa jipaidape. ¹¹ 11Jiwaca tsaotsa irsotsa yaaca ioma irsowaona, njite irsotsa inaitjaca pacoacatsa namaimaca cayotsa inaitja capisho manatsa.'' ¹² Niini pjiomi njaji inaiki aimadan napocotacawa pjiomi Egipto lrico naomá-carro narsowao malritsi. ¹³ Njite njaji iwapacape nadejica, naaco narso: ''Iwayaketa idejica, cayotsa wacaojli pia irso malritsi idejicarro.'' ¹⁴ Njaji iwapacape nadejica, Faraón irsoperri, nañá mana njaji iraelitanai iwapacape nadejica, njajtsa njaji nacadaji nawapá-carro njaji idejicaperri. Njajim iwapacape nadejica naaco narso njaji narsoperri: ''¿Coada corrinatsa inaitjaca jliaminitsa namaimaca njaji jipaidape inaitja capisho pia mana, daicayena njite opica?'' ¹⁵ Niini njaji iraelitanai iwapacape njaji idejicaperri naawa Faraón iderse natatjá-carro coadaca njerrapitetana, naaco lrirso: ''¿Coada picadaa njerrapita calretsa njaji pirsoperri cayoji picadaa capisho nadejica?'' ¹⁶ Corrinatsa naaca malritsi pirsoperri irso, njite nanaa fá wanaitjá-carro pja torropepe. Njite fá pirsoperri, iwapacape njaji idejicaperri nañáca fa, mitsa njatsa irso maatsicalri njaji pinaikite.'' ¹⁷ Mitsa Faraón iaco narso: ''¡Ínoperrinca shá! ¡Ínoperrinca shá! Ima iaco cayoji: Picadaa wáwa, wá-carro waino maaficalri wa-Minalri Irso. ¹⁸ Warsena yáa idenji. Corrinatsa nadee carroca malritsi irso inaitjashopao torropepe, njite irsotsa inaitjaca jliaminitsa namaimaca inaitja capisho mana.'' ¹⁹ Njite njaji iraelitanai iwapacape icapa njaji idejicaperri, maatsi najiacacawa njemi cádanaco narsocatsa nanaitjaca jliaminitsa torropepe imaimaca jalredaoca icoam. ²⁰ Njite naoketaacacawa Moise njite Aarón iapiya, neemacawa talricanaati dapana pemajle nadia cádanaco namotoa Faraón ioya. ²¹ Naaco Moise irso njite Aarón irso tsakja: ''Wa-Minalri icadaacaotsa jirrapitaca, ima oopica icadaa maatsica Faraón icapaca warso njite njaji lrirsoperri. Oopi icadaa matseta lricapi ricó lriinó-carro fáa.'' ²² Njite Moise yá itatja Dio iinai, lriaco: ''No-Minalri, ¿Coada pima njerrapitaca njaji pinaikite aimadan? ¿Coada pimeenaca njoa ajerreji? ²³ Nono cayami caaco njoa Faraón irso piipitana nacó, icaamitsa jlirrapitetaca njaji pinaikite, njite corritoa pjitaca njaji pinaikite ajaiteji.''

¹ Njite wa-Minalri iaco Moise irso: ''Panayaotsa picapa coajicaotsa Nonaitjaca Faraón irso, picapaotsa jliaji Nocaiterri, niniotsa lricadaa iacarroa lricapa kjetena Njoida. Njoida ikjaote Lricadaotsa imotó-carro jlipaite ioya.'' ² Dios icaite Moise irso cayoji: ''Icatsa IMINALRICA Njoa. ³ Nocadaa Abraham, Isaac njite Jacob tsakja nacapá-carro njoa Dio kjaidádalri shó; Mitsa corrin pia najíica Njoá Noipitana nacó, IMINALRITI, corrin najíca jliaji Noipitana. ⁴ Nonaitja pia tsakja pada yaacoti naapiya, nocaitecawa Noca narso Canaán jípaite, jliaji jiipai naofalri irricoda corri-cadanatsa nayadacani, najicawa lrico pia macádatsa. ⁵ Njite, Njominina tsakja coajica njeemataca njaji iraelitanai, Egipto lricoperri jirrapiteta capoana-na, niini nowaadaca coajica jliaji yaacoti Norsolri pia naapiya. ⁶ Niini picaiteotsa narso njaji iraelitanai, cayoji: ''Icatsa Iminalrica njoa. Njotacaotsa sháa lrioya jliaji egipcionai icada-cawa jirrapitaca, Njotaotsa shá nacaapi ioya. Nocadaotsa njerrapitaca Njoida shó, icatsaotsa cayó noyomjetaca shá. ⁷ Niniotsa Nonaikite aimadanca sha njite iDiote caotsa Njoa. Icatsa iMinalri Dioca Njoa, njite yanjiotsa Njoaca jliaji jitalri shá nacaapi ioshete njaji egipcionai. ⁸ Nodecaotsa shá lri-ricoda jliaji jiipai nocaiterri yaacaoti ajádalri shó Abraham irso, Isaac irso njite Jacob irso tsakja. IMINALRICA Njoa, niini iyadacaotsa jliaji jiipai.'' ⁹ Njite Moise icaite tjá njaji yaacoti narso njaji iraelitanai, mitsa corrin naoma njemica lrirso ima kerroacana naikjaote njaji idenjikjeti nananitjalri. ¹⁰ Dio icaite Moise irso: ¹¹ ''Warsa piawa Faraón iderse, Egipto italricanaa lricadá-carro naawa njaji iraelitanai jlipaite ioya.'' ¹² Njite Moise iaco Dio irso: ''¿Coajintja Faraón jimica norso, njácatja njaji iraelitanai corrica naoma njemica norso, njite corrin tsakja notaita caacoca njoa matsia?'' ¹³ Wa-Minalri inaa Moise njite Aarón tsakja naa-carro caacona naapiya njaji iraelitanai njite Faraón iinai tsakja, jliaji Egipto italricanaa, jlitá-carro njaji iraelitanai Egipto jipaite ioya. ¹⁴ Icatsa neepitanaca njaji njanirrinaipe jiwidaapo: njaji Rubén yénipe, Irael irrí pjerriti: Hanóc, Falú, Hezrón njite Carmi. Icapiatsa njaji Robén iipaneta inakjoité-perrica. ¹⁵ Njaji Simeón yénipe: Jemuel, Jamín, Ohad, Jaquín, Zohar, njite Saúl, roenipe rsoaji Canaán darro. Icapiatsa njaji Simeón iipaneta inakjoité-perrica. ¹⁶ Nanineta tsakja anjí njaji Leví yénipenaipe. Leví yofá pia ciento trenta siete walria jalredaoca lrico. icapiatsa lrienipenaica njaji: Gersón, Coat njite Merari. ¹⁷ Njaji Gersón yénipe: Libni njite Simei. ¹⁸ Coat iofawa ciento trenta tré walria jalredaoca lrico. Icapiatsa lrienipeca njaji: Amram, Izhar, Hebrón njite Uziel. ¹⁹ Njaji Merari yénipe: Mahli njite Musi. Icatsa njaapococa njaji Leví inakjoité-perri naapaneta yaapiya. ²⁰ Amram jita inoa jlinirri iwedoa tsa, njite rorsoca yamada roenipe rorso, Moise njite aarón. Amram iofawa ciento trenta siete walria jalredaoca lrico, njite mayamini. ²¹ Njaji Izhar yénipe: Coré, Nefeg njite Zicri. ²² Njaji Uziel yénipe: Misael, Elzafán njite Sitri. ²³ Aarón jita inoa Eliseba, aminadab iito, Nasón iwedoa. Njite icatsa njaji roenipeca lrirso: Nadab, Abiú, Eleazar njite Itamar. ²⁴ Njaji Coré yánipe: Asir, Elcana njite Abiasaf. Icatsa njaji Core iipaneta pococa. ²⁵ Njite Eleazar, Aarón irrí, jita inoa Futiel iito. Njite Finees-ca roenipeca lrirso. Icatsa levitanai jinirrinaipe iipaneta jiwidapoca njaji, naapiya njaji nanakjoitéperrim. ²⁶ Njaa minítsa njaji Aarón njite Moise tsakja njaji wacapalrina inacó, Dio icaitejí irso: ''Yaa jita njaji iraelitanai Egipto jipaite rikjoite papocope njaapodawaaca. ²⁷ Aarón njite Moise tsakja caacona Faraón irso, jliaji Egipto italricanaa, lricadaacarro nadee njaji iraelitanai Egipto jipaite ioya. ²⁸ Caaco caojli pia wa-Minalri Moise irso Egipto jipaite ricó, ²⁹ Lriaco pia lrirso cayoji: ''Icatsa IMINALRICA Njoa. Picaiteotsa lrirso jliaji Faraón, Egipto italricanaa, pjiomi njaji Nocaiterri pirso.'' ³⁰ Mitsa Moise iaco Dio irso: ''Cotsa matsiaca caacoca njoa, ¿Coajintja Faraón jimica norso?

¹ Wa-Minalri iaco moise irso: ''Nocadaca dio capisho pjia Faraón irso. Njite pipjerri Aarón, Nocadacani inoparrotacaita sho. ² Picaiteotsa pjiomi njaji nonaalri Picaiteca. Njite pipjerri Faraón, lricaiteotsa Faraón irso lricadá-carro naawa jlipaite ioya njuaji Iraelnai. ³ Mitsa Notarrata caotsa Faraón icaolre ricó niní Nocada caotsa nacapa aima manaitja canaaperri nonaitjanda Njoida shó Egipto jipaite ricó. ⁴ Corriotsa Faraón jimí-carroca irso, niniotsa nocadaa nacapaca njoida njaji Egipto lricope, njerrapita caotsa lrikjaote. Cayoatsa njotáca papocope njapodawaca njaji nonaikite aimadan kjaidá-perri, njaji Irael inakjoite-perri, naacarro Egipto lrikjoite. ⁵ Njaji Egipto lricoperri nanjí watsa Dio-ca Njoa nacapa capoa Njoida njite njoida shó njotaca njaji iraelitanai naoya.'' ⁶ Moise njite Aarón nanaitja cayó; cayoji Dio inaa capisho nanaitjaca. ⁷ Moise irso pia ochenta walria lri-pekirrica naco njite Aarón irso pia ochenta tre walria lri-pekirrica naco naa caojli pia caacona Faraón irso. ⁸ WaMinalri iaco Moise njite Aarón: ⁹ ''Faraón inaa cadaa shá inaitjá-carro manaitja canaadalri, picaiteotsa Aarón irso: ''Pjipa pipeeco pjipajico lripadamá-carro apiwa Faraón icapá-carro.'' ¹⁰ Ikena Moise njite Aarón naawa Faraón iderse, njite nanaitja cayoji Dio inaa capisho nanaitjaca. Aarón ipeeco jlipajico Faraón icapá-carro njite njaji lrirsoperri, njite jliaji Aarón jipajico ipadamawa apiwa. ¹¹ Njite Faraón inaa nawanaca lrikjaolrewa njaji atsianai lrirsoperri canjikje-perri njite njaji malrirrinai. Njite nanaitja tsakja namalrirrica sho cayotsa Arón inaitja capisho. ¹² Nacoamitsa njaji atsianai napeeco njepajico, njite napadamawa apiwa. Mitsa jliaji Aarón jipajico injaca nayarrona njaji malrirrinai. ¹³ Mitsa tarraca Faraón lricaolre naoya, corrin jlimica narso, cayotsa wa-Minalri icaite capisho narso. ¹⁴ Wa-Minalri iaco Moise njite Aarón irso: ''Tarraca Faraón icaolre ricó, niini corrin lricadaa naawa njaji inaiki aimadan. ¹⁵ Pia watsa tjewa piyompinaco Faraón iderse lria cadanacoatsawa oni canjerse. Piema watsa onicanje ricó picapaaca carroatsa lriapiya, pjipaotsa picaapi ricó jliaji pjiecote ipadamalri apiwa. ¹⁶ Picaiteotsa lrirso: jliaji NOMINALRI, na-Diote njaji hebreonai, lrimeenaca njoa piderse nocaité-carro pirso jliaji yacoti: ''Picadaa naawa njaji nonaikite, ná-carro naa matsadalri Norso jalrapocolri ricojle. Mitsa corrin pioma pjiepaca jliaji yaacoti.'' ¹⁷ Njite cayo Lricaiteca jliaji wa-Minalri: ''Lrikjaote jliaji picapalriotsa piajíwatsa Dio-ca Njoa. Noñá watsa Ooni Nilo nacó lrisho jliaji jaicoapo norsolri nocaapi ricó, njite lripadamacaotsa írranatiwa jliaji ooni. ¹⁸ Mayamiotsa njaji copje ooni ricope niini éco caotsa jliaji ooni namá. Corriotsa nataitá carroca nairra jliaji ooni lrinakjoite njaji egipcionai.'' ¹⁹ Njite Dio icaite Moise irso: ''Picaite Aarón irso cayoji: Pjipa jliaji pjipajico njite pipiajleta picaapi lrisho Egipto ionite cawa nacojle, ooni macapeki nacó, onipaokja nacó, nadanatacawa naco ooni, pjiomi nacadaacawa lrico ooni, napadama carroatsa írranatiwa. Pinaitjaotsa cayó niini carraotsa írranati pjiomi Egipto jipaite ricó, írranati tsakjaotsa nairra carroapa lrico nanaitjanda jaico shó njite nanaitjanda jiipada shó tsakja. ²⁰ Moise njite Aarón nanaitja cayoji Dio inaa capisho nanaitjaca. Aarón jirreta lrijaicoapote njite lriñáca ooni naco, Faraón icapa cadanatsa njite njaji lrirsoperri. Niini lripadamacawa írranatiwa jliaji ooni. ²¹ Mayami pjiomi njaji copje ooni ricope, ikena eecoca jliaji ooni. Corrin kjerre nairra ooni njaji egipcionai njite írranati minitsa pjiomi Egipto jipaite ricó. ²² Mitsa njaji malrirrinai Egipto lricope nanaitja tsakja cayó namalrirrica shó, niini tarraca Faraón lricaolre naoya, corrin jlimica Moise njite Aarón irso, cayotsa wa-Minalri icaite capisho narso coaji caotsani. ²³ Njite Faraón idiawa lriipana lricojle. Corrin coadaca lrirso jliaji lricapalri. ²⁴ Njaji egipcionai njecaca oniapji tsoomi ooni macapeki ioya nataitá-carro nairraca ooni, ima corrica nataita nairraca ooni lrioya jliaji macapeki. ²⁵ Siete jalredaoca jiyapawa waMinalri imatsiketa cayami naoya jliaji ooni.

¹ Njite caaco tsenakja wa-Minalri Moise irso, ''Pia picaite Faraón irso cayoji: Picadaa naawa njaji nonaikite aimadan nácarro naa Norso matsiadalri. ² Corri cadaa picadaa naawa, Nomatsiketa caotsa pjiomi pjipaite paitsi shó. ³ Pakjamiotsa ooni paitsi shó. Njenicoatsa njite iipana lricojle, imaacawa lrico, pjiomi iamaki ricó. Njeewa tsakjaotsa irsoperri iipana lrico. Cayo tsakjaotsa pjiomi njaji inaikite, iyanacawa lrico, ipalangana lrico tsakja inaitja shopa injao. ⁴ Nanaitjaotsa maatsi pirso njaji paitsi, coshoca narso njaji pirsoperri.'' ⁵ Wa-Minalri iaco Moise irso: ''Picaite Aarón irso: Pipiajleta picaapi njite jliaji pjiecote naikjaolre njaji ooni macapeki, oonipaokja nacojle, ooni nadanatanda nacojle, paitsi imotó carroatsa Egipto jipaite nacojle pjiomi. ⁶ Ikena Aarón ipiajletaca lricaapi naikjaolre njaji ooni Egipto lricope njite paitsi imaimaca jinicoa ooni rikjoite njite napakjantaacawa pjiomi Egipto ijipaite ricó. ⁷ Mitsa njaji malrirrinai nanaitja tsakja cayo namalrirrica sho: nacadaa paitsi imotoa Egipto ijipaite nacojle ⁸ Njite Faraón iwana lrikjaolre Moise njite Aarón, lriaco narso: ''Itatjá Dio iinai jlitá-carro nooya njite naoya njaji nonaikite nja paitsi. Njite dekjaotsa nocadaa naawa njaji inaiki aimadan, nácarro naino Lrirso maaficalri. ⁹ Moise iaco Faraón irso: ''Pjia irso matsiacalri picaité-carro norso coancaojlica pioma notatjaca Dio pinaco, pirsoperri inaco njite njaji pinaikite, Jlitá-carro nja paitsi pioya, piipana ioya njite nadiá-carro naofawa ooni ricojle. ¹⁰ Njite Faraón iaco lrirso: ''Tjewena.'' Moise sheepani: ''Cayo pedaotsa picaite capishó, pitaitá carroatsa pianjíi corrica pacapa apada lricayosho jliaji wa-Minalri Dio. ¹¹ Naawatsa pioya njaji njaji paitsi, piipana ioya njite naoya njaji pinaikite. A tsaotsa naofawa ooni ricó. ¹² Moise njite Aarón nadiá namotoa Faraón ioya. Njite Moise itatjaca Dio iinai nanaco njaji paitsi Lricadaaji Faraón irso. ¹³ Moise inaitja cayoji wa-Minalri inaa capishoni: Mayami njaji paitsi naapana lrico, talricanaati dapana lrico macada awacada lrico. ¹⁴ Njaji inaiki nawaketana aima shó njite eecoca pjiomi jliaji jiipai. ¹⁵ Mitsa Faraón icapa cádanaco matsia kena pjiomi, lritarrata lricaolre njite corrin jlimi Moise irso njite Aarón, cayotsa Dio icaite capisho. ¹⁶ Wa-Minalri iaco Moise irso: Picaite Aarón irso: pipiajleta pjiecote njite piñaawatsa jiipai italre nacojle napadama carroatsa tothonwa pjiomi Egipto ijipaite nacojle.'' ¹⁷ Njite nanaitja cayó: Aarón ipiajleta lricaapi njite jliecolre. Lriñá jiipai italre nacó. Naocawa tothon nanaco njaji inaiki njite nanaco nja maaficalri. Pjiomi jiipai italre ipadamao tothonwa pjiomi Egipto ijipaite nacojle ¹⁸ Njaji malrirrinai naoma tja nanaitja tsakja tothon namalrirrica shó, mitsa corrin nataita. Aima pia tothon nanaco njaji inaiki njite nanaco njaji maaficalri. ¹⁹ Njaji malrirrinai naaco Faraón irso: ''Dio jiidatsa jliaji.'' Mitsa tarraca Faraón icaolre naoya, corrin lrioma jlimica narso. Cayotsa Dio icaite capisho Faraón inaitja caotsa. ²⁰ Wa-Minalri iaco Moise irso: ''Pia watsa tjewa piyompinaco Faraón iderse lria cadanacoatsawa ooni canjerse. Picaite lrirso: Cayo lricaiteca wa-Minalri: ''Picadaa naawa njaji Nonaikite nácarro naa norso matsiadalri. ²¹ Corri cadaotsa picadaa naawa njaji nonaikite aimadan, Nomeenacaotsa pikjaolre dolrio imaimaca, pinaikite nacojle naapana lricó. Pakjamiotsa dolrio imaimaca egipcionai iipana lrico, njite pakjamiotsana dolrio sho pjiomi Egipto jipaite ricó. ²² Mitsa jliadá watsa jeecoapi, nowapaotsa jliaji jiipai Gosen, jliaji jiipai naofalri irricoda njaji nonaikite aimadan, corriotsa dolrio imaimaca iocacawa nanacojle. Nonaitja cayó yají-carro Njoaca IMINALRITI iofalri lri-ricoda jliaji jiipai. ²³ Njoenitacaotsa njaji nonaikite naoya njaji pinaikite. Tjewenaotsa icapa jliaji nonaitjalri Njoida shó.'' ²⁴ Wa-Minalri inaithja cayo, njite aima dolrio iocawa Faraón iipana lricojle, njite lrirsoperri iipana naco tsakja. Pjiomi Egipto jipaite ricó pakjanca dolrio shó, njite namatsikeetaca jliaji jiipai namaimaca shó. ²⁵ Faraón iwana Moise njite Aarón lrikjaolrewa, lriaco narso: ''Warsena iawa inó-carro maaficalri Dio irso fepaite ricó.'' ²⁶ Moise iaco lrirso: ''Cotsa matsialrica waso wanaitjacani atsaji, ima waino cadaa maaficalri wa-Minalri Dio irso cotsa matsialrica icapacan, shá Egipto lricope, corrin waoma iinoca faa jiipada shó lrikjaote. ²⁷ Corrin, madalridaa watsa jécoapi waacawa jalapocolri ricó, nirse watsa waa waino maaficalri wa Diote irso, ima coyoca Lrinaa wanaitjaca.'' ²⁸ Faraón iaco shepacan: ''nocadeniotsa iawa iácarro íno maaficalri IMINALRI Dio irso jalrapocolri ricojle. Corriotsa itaita iacawa teecoa njite itatjawatsa Dio nonaco. ²⁹ Moise iaco lrirso: ''Nomoto catsaotsa pioya notatjaotsa Dio pinaco naa carroatsa pioya nja dolrio imaimaca, pioya pjia Faraón, pirsoperri njite njaji pinaikite tjewena. Mitsa corrin nooma picashataca fá wadentja corrica picadaa waacawa wainó-carro maaficalri Dio irso. ³⁰ Moise imoto Faraón ioya njiyte lritatja Dio lrinaco. ³¹ Dio inaitja cayoji Moise itatja capisho lriinai. Lricadaa naawa njaji dolrio imaimaca Faraón ioya, lrirsoperri ioya njite lrinaikite ioya tsakja. Corrinatsa coca pacapa. ³² Mkitsa Faraón itarrata lricaolre tsenakja, corrin lricadaa naawa njaji inaiki aimadan.

¹ Njite WAMINALRI iaco Moise irso: ''Warsa piawa Faraón iderse picaité-carro lrirsco cayiji, Cayo lricaiteca jliaji wa-Minalri, naDiote njaji hebreonai: ''Picadaa naawa njaji Nonaikite aimadan nataitá-carro naaca Norso matsiadalri.'' ² Mitsa corricadaa naawa, pífarro cadaa náwa, ³ niniotsa wa-Minalri icadaotsa njerrapitá-carro ipoati sho njaji ivacan, icaballoni, iborroni, iovejani, iipirra pjiomi papocoperri neemacawa lrico. ⁴ Corriotsa wa-Minalri imatsiketá-carroca naapirra njaji Iraelnai nacayosho njaji egipcionai iyape. Corriotsa mayami-carroca naapirra njaji irraelitanai. ⁵ Njite wa-Minalri icadaa narso jalredaoca; niini Lriaco: ''Tjewenaotsa nonaitja cayo lrinaco jliaji jiipai.'' ⁶ Tjewaijlena wa-Minalri inaitja cayoji Lricaite capishó. Mayami pjiomi navacan njaji egipcionai. Corrin mayamica apana navacan nakjoite njaji iraelitanai. ⁷ Faraón yaji icapaji, njite lricapa corrica aana iraelitanai ivacan mayamica. Mitsa tarraminicatsa Faraón icaolre ricó, corrin lricadaa naawa njaji iraelitanai. ⁸ Njite wa-Minalri iaco Moise njite Aarón irso: Pjia, Moise, pjipaotsa picaapi ricó tiyewarrom, njite pipecoatsa caolri ricojle Faraón icapatsa. ⁹ njaji pipecolriotsa caolri ricojle napadama-caotsawa jiipai italre sho pjiomi Egipto lricó. Nanota cádanacoatsa nadada nacó njaji inaiki njite maaficalri nacó tsakja iyaoniti imotocaotsa nanaco, pjiomi Egipto lricó.'' ¹⁰ Ikena Moise njite Aarón njepa nacaapi ricó tiyewarrom njite neemawa Faraón ipyajle. Njite Moise ipeeco caolri rocojle jliaji tiyewarrom. Niini ikena nama iyaoniti imotocawa nadada naco njaji inaiki njite nanaco njaji maaficalri. ¹¹ Njaji malrirrinai corrin nataita Moise ikjoete ima iyaoniti imotocawa nadada nacó njite nanaco padenirri njaji egipcionai. ¹² WaMinalri icadaa taarraca Faraón icaolre rico, corrin jlimica Moise njite Aarón irso. Cayotsa wa-Minalri icaite capisho pia Moise irso Faraón nacó. ¹³ Njite wa-Minalri iaco Moise irso: ''Picafiawatsa deepitoa piá-carroatsa Faraón iderse piyompinaco toa, piemaotsa lripeyajle njite picaite lrirso cayoji: ''Cayo lricaiteca jliaji wa-Minalri, na-Diote njaji Hebreonai: ''Picadaa naawa njaji Nonaikite aimadan nataitá-carro naaca Norso matsiadalri.'' ¹⁴ Corri cadaa pjiepa Njoá, njorrapiteeta caotsa pjia ima Nomeenaca-cá pinaco, pirsoperri nacó, pinaikite naco pjiomi njorrapiteta shopa shá. Nonaitjaca cayó piají-carro corrica pacapa pada anjí jalredaoca lricó cayodalri Nocayoshó. ¹⁵ Njoida shó Notaita nonaitjaca njaji maatsiperri nainó-carro pjia njite njaji pinaikite aimadan iwayacá carroa jalredaoca ioya. ¹⁶ Mitsa nocadaa cafitsa pia picapá carro Njoida njite nají-carro nonaco njaji jalredaoca lricoperri. ¹⁷ Corritoa yami piemaca nonaikite aimadan ikjoete, corritoa picadaa naacawa. ¹⁸ Tewaotsa nocadaa iyao jiwacawa jipadadape shoperri, matsina-perri paotsa naoya njaji pjimirri piapa coaji piaca jlipepeda jiwa piacawa Egipto nacó. ¹⁹ Niini pirsotsa pjietaca njaji pi-vacan, pjiomi njaji pirsonipe pemajle pafe ricojle taimicawa yapjipe. Niniotsa pjiomi njaji inaiki, maaficalri yemalritsa pemajle mayamicaotsana iiyao jipadadape shoperri jiwa cádanacoa.'' ²⁰ Niini pjiomi njaji Faraón irsoperri shepacape jliaji yacoti Dio icaiterri narso, nakjeyapita nadeeca taimi cawa yapjite njaji narsoperri njite naapirra tsakja. ²¹ Mitsa njaji corri perritsa shepa jliaji Dio icaiterri narso corrin nawakeetaca taimi cawa yapjite njaji narsoperri njite njaji navacan, atsa nacadana pemajletsana. ²² Njite wa-Minalri iaco Moise irso: ''Pjirreta picaapi eeno ikjaolre iiyao jipadadape jiwá carroa nanaco njaji inaiki, maaficalri naco njite paniati naco awacada nacope tsakja pjiomi Egipto jipaite nacojle.'' ²³ Mise jirrepa lripjeco eeno ikjaolre, njite wa-Minalri icadaa colrocolroda-cani, lricadaa eeno iperronialre jiwacawa jiipai nacojle njite iiyao jipadadpe tsakja. Iiyao jipadadape jiwacawa pjiomi Egipti jipaite nacó. ²⁴ Lricadaa iiyao jipadadape njite eeno iperronialre iiyao jipadadape iapiya kjaidaperri. Corri piatsa coancaojli pia pacapa caidalri Egipto lrico nacadaa cayamiwa pacoa yacaalre macacoecani. ²⁵ Iiyao jipadadape jiwacawa pjiomi Egipto jipaite ricó; pjiomi njaji pemajleperri, inaiki, maaficalri naco. jliaji iiyao jipadadape imatsiketaca pjiomi pjiomi paniati, jaico tsakja awacada lricope. ²⁶ Njite Gosen lrico, naofacawa njaji iraelitanai, corrin iiyao jipadadape jiwacawa nanaco. ²⁷ Faraó ivana Moise njite Aarón lrikjaolrewa, lriaco narso: ''Oopo dekja camatsicanaaca njoa. ajádalrica jliaji wa-Minalri icaiterri, niini njoa njite njaji nonaikite oopi wamatada. ²⁸ Pitatja Dio iinai yaamí-carro njaji eenó njite iiyao jipadadape kjaidaperri. Nocadeniotsa iá carroa, corri-natsaotsa iofá carroketsa anjí.'' ²⁹ Moise iaco lrirso: ''Nomoto kenaotsa yacaalre ioya, njorretaotsa nocaapi no-Minalri ikjaolre. Niniotsa yamiotsa eenocani njite corrinatsaotsa pacapá carroca iiyao jipadadape. Niniotsa pianjiwatsa Dio iyadaca jliaji jiipai. ³⁰ Mitsa pjia njite njaji poinaikite, noajintsa corricaotsa inaitja matsia wa-Minalri Dio irso.'' ³¹ Njite njaji napaniapji jeerriwai njite cebada tsakja oopi matsina, ima icami piena cainaca catja njaji cebada njite jipolre pia catoa njaji jerriwai. ³² Mitsa nja trigo njite nja lripanalri corrin maatsicana ima wia perri pjaaca ipecana. ³³ Moise idia cádanaco imotoa Fraón ioya yacaalre lrikjoite, lri-piajleta lricaapi wa-Minalri ikjaolre, njite ikena yaamica eenocani, yami tsakja iiyao jipadadape jiwacawa njite corrina tsakja iiyacani. ³⁴ Faraón icapa cádanaco yami kena iiyacani, corrinatsa iiyao jipadadape jiwacawa, corrinatsa enocani, lripieta lrinaitjaca lrimatsicanawa, lritarrata lriaolre tsenakja, cayó tsakja njaji lrirsoperri. ³⁵ Tárraca Faraón icaolre ricó. Corrin lricadaa naawa njaji iraelnai aimadan. Cayotsa wa-Minalri icaite capisho Moise irso Faraón inaitja caotsa.

¹ Njite wa-Minalri iaco Moise irso: ''Pia pjenawa faraón iderse, njoatsa icadaa tarrá-carro lricaolre njite nacaolre njaji lrirsoperri. Nonaitja cayó Nocañjatá-carro nacapa njoida. ² Nonaitja tsakja cayó icaité-carro narso njaji pienipe njite pidakenai irso tsakja njaji nonaitjalri, coajica njorrapiteteca njaji Egipto lricope, coajica nonaitjaca aima nacapaca macapacanaperri njoida inakjoiteperri. Nají-carro njoaca Njoaca jliaji IMINALRITI.'' ³ Niini Moise iawa Aarón iapiya Faraón iderse, naaco lrirso: ''Jliaji wa-Minalri, na DIote njaji hebreonai, icaite cayoji: ''¿Coancaojli pjenaotsa piaji kjaidadalrica pioya Njoa? Picadena naawa njaji nonaikite naacarro naa Norso matsiadalri.'' ⁴ Mitsa corricadaa picadaa naawa njaji Nonaikite, pjimi piicao matsia, tjewenaotsa nocadaa tacapa pjipaite ricó pjiomi. ⁵ Naitacaotsa pjiomi jiipai yeecoa nacó namaimaca shó. Naiñjacaotsa pjiomi njaji ipania iyao tarradalripe jiwalri pia imacaji. Naiñja tsakjaotsa pjiomi njaji jaico awacada lricope. ⁶ Napakjanta caotsa piipana lrico, pirsoperri iipana lrico njite naapana lrico pjiomi njaji Egipto lricoperri, corri piatsa piferrinaipemi, iferrinaipemi cayoji picapa capishoatsa, corri piatsa nacapa caidalriji nacapa cayami jliaji jalredaoca atee panashete.'' Icaamitsa Moise njite Aarón iawa Faraón ioya. ⁷ Njaji Faraón irsoperri iaco lrirso lriso: ''¿Coancaojli pjenaotsa yaami lrimaca wacapaca jliaji atsia? Poicadena naawa njaji oiraelitanai naa carroena naa matsiadalri na-Minalri Dio irso. ¿Capja corrica piají coajiketsa maatsica jliaji fepaite Egipto lricod?'' ⁸ Njite lrinaa nawaaca lrikjaolrewa Moise njite Aarón, njite lriaco narso: ''Warsena iawa yaacarro matsiadalri iMinalri Dio irso. Mitsa, kjaitenai watsa njaji yaalriwa?'' ⁹ Moise iaco lrirso: ''Pjiomiotsa waacawa, wadeotsa pjiomi njaji yempetiapapetoa, pekipenai, weenipe, waitonaipe. Wadeotsa waapira pjiomi, ima wacatima taacacaotsawa wa-Minalri iinai.'' ¹⁰ Faraón iaco lrirso: ''Iinai catsaotsa jliaji iMinalri akjerrecawajle cadaa yawaji, coacaojli kenaotsa nocadaa yaawa naapiya njaji yénipe tsoperritoa. Noajintsa yomaca inaitjaca norso maatsi. ¹¹ ¡Corrin! icaamitsaotsa yaalrica piinai njaji atsianaitsa, yaacarro yaa matsiadalri iMInalri irso, icamitsaotsa njaji yaalrica piinai.'' Njite lrinaa namotoitaca Moise njite Aarón lrioshete. ¹² Njite wa-Minalri iaco Moise irso: ''Pipiajleta picaapi Egipto jipaite ikjaolre nanó carroatsa nja tacaapa jlipaitena nacojle, naiñjá-carro pjiomi njaji lripaniana imotocape lrinaco, naiñjá-carro pjiomi njaji iyao macadalripene imacaji.'' ¹³ Ikena Moise ipiajletaca jlipajico Egipto jipaitena ikjaolre, njite waMinalri imeenaca caolri jérri imotolri njiteo lrinacojle jliaji jiipai Egipto lricoda jliadaa jalredaoca njite lridepitena tsakja. Njite piyompinacojlena, njewenawa njaji tacaapa lridempena jliaji caolri inocada Jeerri imotolri njiteo. ¹⁴ Njaji taacapa njewacawa pjiomi Egipto jipaite nacó niini namatsicaca pjiomi jliaji jiipai. Corri piatsa pacapa pia aima tacaapa jiwacawa jiipai nacjle cayó, njite corrin tsakjaotsa pacapá carrocaotsa njapodam. ¹⁵ Cadaocatsa pacapa naorsoacawa jiipai nacó namaimaca ikjaote. Naiñja pjiomi njaji jaico, jaico iinaca iyao macadalripe imacaji. Corrin pacapa jaico Egipto lrico corriperrintja naiñjaca njaji tacaapa. Naiñjaca pjiomi njaji jaicopje. ¹⁶ Niini kjeyacalrim Faraón iwanaca Moise njite Aarón, lriaco narso: ''Nonaitjaca maatsia iMinalri Dio ikjoete njite ikjoete tsakja. ¹⁷ Panaya, icada jliyapaca ioya jliaji nonaitjalri irso maatsi njite itatja Dio iinai Lricadá-carro jlienitá-carro nooya jliaji mayamicalri.'' ¹⁸ Icaamitsa Moisé iacawa Faraón ioya njite lritatja Dio iinai. ¹⁹ Wa-Minalri icadaa caolri jeerri imoto kema nakjoite lripjiá-carro njite lriwakeetaca pjiomi njaji tacaapa lripeecó carrona Manoá Irraiyajá lricó; corrin lrimacaca pada tacaapa Egipto jipaite nacó. ²⁰ Mitsa wa-Minalri icadaa tárraca Faraón icaolre ricó, corrin lricadaa naacawa njaji Iraelnai. ²¹ Njite Dio iaco Moise irso: ''Pjirreta picaapi eeno ikjaolre cadaocá carroatsa pjiomi Egipto jipaite nacó, cadaoca matsinadariotsa, nataitanda nanotaca nacaapi shón.'' ²² Moise jirreta lricaapi eeno ikjaolre, ikena cadaocadalri matsinadalri jiwacawa Egipto nacó pjiomi. Madalridaa jalredaoca cadaocaca naicao. ²³ Corrin coajica nacapaca; corrin pada imotocawa naapana ioya madalridaa jalredaoca nacó. Mitsa, nanaco njaji Iraelnai, corrin cadaocaca naicao naofacawa lrico. ²⁴ Faraón iwana Moise njite lriaco lrirso: ''Warsena iawa iá-carro matsiadalri wa-Minalri irso. pjiomi iipaneta nataita naaca piinai, mitsa njaji iipirra corrin itaita ideecana.'' ²⁵ Mitsa Moise iaco lrirso: ''Piotsotsa picadaaca wadeeca waapirra ima warsotsa wainoca maaficalri wamjaitaoda wa-Minalri Dio irso. ²⁶ Warsotsa wadeeca wavaca, corrin coca wataita wamacaca nanakjoite, warsotsa wadeecana waacarro matsiadalri wa-Minalri Dio irso nashó. Corrin wají coajicaotsa waaca matsiadalri wa-Minalri Dio irso ikjerreca waocaca walri nirse.'' ²⁷ Mitsa wa-Minalri icadaa tárraca Faraón icaolre ricó, corrin lricadaa naacawa njaji Iraelnai. ²⁸ Njite Faraón iaco Moise irso: ''¡Warsa pjiena nooya! Nooma piajica pada nacó, corrinatsa nooma pipietaca picapaca njoa, ima coancaojli cadaotsa pipoieta picapaca noecoa, mayamiotsa pjia.'' ²⁹ Njite Moise shepani, lriaco: ''Ajádalri jliaji picaiterri. Corrinatsa nocapá carroca piecoa nopieta.''

¹ Njite wa-Minalri iaco Moise irso: ''Nini toatsa padetsa maatsidalri nocadalriotsa Faraón nacó njite pjiomi Egipto lrico. Jliapodam dekja Faraón icadaotsa iawa ajaiteji. Jlia tsaotsa imeenaca iawa jaiteji. ² Picaite narso njaji pinaikite aimadan, naacarroatsa nataja nacodapiperri iinai pjiomi patjepi palraatape njite owirroipe tsakja.'' ³ Wa-Minalri icadaa njaji egipcionai matsiá-carro nacapaca narso njaji iraelitanai. Njite njaji caconaperri Faraón irsoperri nacapa caconaiteca Moise napeyajle, cayo minitsa nacaiteca lrinaco pjiomi njaji Egipto lricoperri. ⁴ Moise iaco wa-MInalri irso: ''Cayo Lricaiteca jliaji wa-Minalri: Njoyapacaotsa pamoyoa deepi Egipto lrico. ⁵ Njite mayami caotsa Egipto lricó pjiomi njaji pjerritinaipe, Fraón yénipe nakjoite, jliaji talricanaatiope, atee roenipe rsoaji kjenadarro narsodarro idaitacada nainjao njite navacan yeenipe initacanaa imotocawa tsakja. ⁶ Aimaotsa pjemica naiyaca pjiomi Egipto jipaite naco, corri piatsa coan caojli piatoa pacapa caidalri oopi, njite corrin tsakjaotsa pacapá carroatsa caidalri tsenakja. ⁷ Njite naikjaolre njaji Iraelnai corriotsa apana tsiino icoitaca nakjoete, corrin nakjoeteca njaji atsianai o maaficalrica. Niniotsa nacapa corrica pacoaca-cá Dio icapaca narso njaji egipcionai nacayosho njaji Iraelnai. ⁸ Faraón njite njaji lrirsoperri nanoatsa natoda naorsipada norso. Nacaiteotsa cayoji: ''Warsena iawa, pjia njite njaji pinaikite aimadan pjiomi naacarro pjiapodam. Jliapodamina noawatsa nlrioya.'' Kerroa lridiaca lrimotowa Faraón ioya. ⁹ Wa-Minalri iaco Moise irso: ''Corriotsa Faraón jimí carroca pirso. Nooma capoa nacapaca Njoida njaji Egipto lricoperri pjiomi.'' ¹⁰ Moise njite Aarón nanaitja aima manaitja-canaaperri Faraón icapa. Mitsa wa-Minalri icadaa taarraca Faraón icaolre ricó, corrin lricadaa naawa jlipaite ioya njaji iraelitanai.

¹ Caaco wa-Minalri Molise irso njite Aarón irso tsakja Egipto jipaite ricó, Lriaco: ² ''Icatsa keerri-ca jliaji pawalria initacarropica irso. ³ Icaite narso njaji Iraelnai iwacaaca capewa cayoji: ''Die jalredaoca naco lrinacopi-ca jliaji narsotsa njepaca apana oveja inarrona o apana cabra atsiana pamoyoanina narsowao nacoana njaji naapaneta. ⁴ Mitsa, tsoo cadatsa njaji padapaneta naiñjá-carro apana cordero, jliaji atsia lrirsotsa lriaca lricodapidalri irso jlipá-carro tsakja lriñjao lripe nakjoite jliaji cordero o cabra yénipena aima pjá. Lrirsotsa jlipaca aima pjatsa lricoá-carro naiñjaca pjiomi. ⁵ Njaji cordero o cabra yénipena jipalriotsa narsotsa matsiaperri catsana, apana atsiana pawalria dalri ipekirrica. Jipa apana cordero o apana cabraatsiana. ⁶ Inoatsana catorce jalredaoca nacó lrinacopi-ca jliaji. Njite pjiomi njaji Iraelnai iwacaacacapewa nataita nainoca njaji maaficalri patsimpi nacojle. ⁷ Njite nérrana shó iñjeta caotsa pjiomi pantinomakja nacó lrinaco jliaji panti iñjalriotsa irricoda neepe njaji maaficalri inojí. ⁸ Jliadaotsa deepi imitsirriotsa neepe tiyé ricón iñjá-carroatsana. Iñjacaotsana peetje mewite sho njite malritsi jiipiti-perri sho tsakja. ⁹ Corriotsa itaita iñjaca iñaatsana oiyananda cantja. Imitsirriotsana tiyé ricó pjiomi njewida fie, njaipa fie njite neshapi fie tsakja. ¹⁰ Corriotsa imacá-carro lriitepem lrinakjoite tjewaijle icaona. Niini cadatoa lriitepem irsotsa imjaitacana tjewajle piyompinacó. ¹¹ Cayoatsa iñjacana: ipápi taimi inacoa icorreyani, shetaotsa itsapatoni, jipaotsa imawapeti icaapi ricó. Irso tsaotsa iñjacana kjeya. Ima iñjaca njaji maaficalri wa-Minalri nacope. ¹² Cayo lricaiteca jliaji wa-Minalri: Noá watsa pjiomi Egipto jipaite ricó deepi ricó noinó-carro pjiomi pjerritinaipe nanakjoite njaji atsianai njite njaji maaficalri tsakja Egipto jipaite ricoperri. Nocadaotsa njerrapita pjiomi njaji dionai Egipto lricoperri. Njoaca jliaji IMINALRITI. ¹³ Njaji írranati ipananoma nacope icatsa Noajishopaca inaco, Nocapa cádanacoatsa njoyapa catsaotsa ioya. Corriotsa coca maatsirri imatsiketalriotsa shá noino cadanacoatsa njaji Egipto lricope. ¹⁴ Caidalriwetsa iwadacaotsa jliadaadalri, cayo tsakjaotsa njaji shapodamperri. Icatiima-taaca caotsa lrikjaote wa-Minalri irso. Caidalri tsaotsa iwaadacani wadeotsa imaodacaca lrioya, coshoca njaji walricoma shapodamperri. ¹⁵ Iñjaotsa peetje mewitetja jliada jeecoapi. Lrinita cadaawa jitaotsa iipa lrikjoite pjiomi njaji molroi iipana ioya, ima coca cadaotsa iñja molroi jliada nacó jitacaotsa ioyaona shá Iraelnai. ¹⁶ Lriinita cadaawa njite siete jalredaoca nacó, shenita caotsa Norsowao iwacaacawa niini. Corriotsa idejí carroca jliada, icaamitsaotsa iyanaca inñjá carro pjiomi. Icamitsaotsa inaitjalrica jliadaa jecoapi. ¹⁷ Irsotsa iwaadaca injacarroa peetje mewidalri ima jliadaaca jalredaoca nomotoitaca njaji inaiki aimadan pikitsiñape papocope naoyawaaca, njaji kjaidaperri Egipto ioya. Caidalritsaotsa nanaitjaca njaji walricomanai. Yacaoti kjaidadalrica irso jiaji yácoti caidalriwetsa. ¹⁸ Irsotsa injaca peetje mewidalritsa patsimpi naco catorce jalredaoca nacó lrinacopi jliaji keerri pawalria inita carropi nacó atee venti ono jalredaoca nacojle lrinacopi nacots. ¹⁹ Corriotsa irso carroca molroipe iipana lrico siete jalredaoca. Coca cadaotsa iñja peetje mojloi fieda jitaotsani ioya, sha Iraelnai, pacoaca tsakjaotsa jliaji inocadatsa ikjaolre o jicodalri jipaite ricó. ²⁰ Corri watsa itaitaca iñjaca irsocada mojloi. Akjerre cawajle cada iofawaji, irsotsa iñjaca peetje mamojli-nadalritsa ²¹ Njite Moise iwaketa njaji pekipenai caconaperri Iraelitanai, lriaco narso: ''Warsa yaa iniwana oveja o cabra yénipe cadaa lricoadalri iñjaca iipaneta yaapiya njite iinoatsa jliaji cordero Pascoa icaonada. ²² Njite jipaotsa papoco isopo iki, jipaotsa yapjoetani írranati ricó lriarroapji ricoda. Iñjetaotsa jliaji írranati pantinomakja nacó lriparrema nacope njite lriicaodalri. Corriotsa itaitá carroca imotocawa iipana ioya akjerreca jaalre matsia tjewaijlena. ²³ Ima wa-Minalri jiyapacaotsa lriinó-carro njaji egipcionai. Niini Lricapa cádanacoatsa njaji írranati pantinoma njite pantinomakja nacó, Jliyapaotsa ipananoma nacó mitsa corriotsa Lricadaa carroca jiaji imatsiketa cada inaitjaca maatsi iinoca shá iipana lrico. ²⁴ Iwaadacaotsa jliaji jiyapalriio caidalritsa, Njite njaji walricomanai narsotsaotsa nawaadacani caidalriwetsa ima yácoti kjaidadalrica narsoni. ²⁵ Niini njewa cáda nacoetaotsawa lri-ricoda jliaji jiipai wa-Minalri icaiterri Lriaca narso, irsotsa iwadacani iacawa Lriso matsiadalri. ²⁶ Yénipe itatjá cádanacoatsa shá coadaca inaitja jliaji yaacawa matsiadalri Diio irso, ²⁷ nini icaiteotsa njemio: ''Painoca jliaji maaficalri wa-Maninalri i-Pascuan lrico, ima wa-Minalri jiyapa pia-catsawa naapana ioya njaji iraelitanai lriino caojli njaji egipcionai. Cayotsa Lrimanacotaca njaji Iraelnai.'' Icaamitsa natodaca naorsipada naacarro matsiadalri Dio irso. ²⁸ Njaji Iraelnai naawa njite nanaitja cayoji Dio inaa capishó nanaitjaca ima cayo lrinaaca Moise njite Aarón icaitecana nanaitjá-carro. ²⁹ Pamoyoa deepe wa-Minalri jiyapawa pjiomi Egipto jipaite ricó njite Lriino pjiomi neenipe pjerritinaipe, Faraón yénipe pjerriti nakjoite, jliaji yofacada lriinai lritalricanaatacawa nacó, atee neenipe pjerritinaipe njaji presó-perri njite navacan yénipe pjerriti tsakja. ³⁰ Faraón, njaji lrirsoperri, njite pjiomi njaji Egipto lricope nacafiawa deepi ricó. Jliadaa dépi naiya caiwi ricotsa njaji Egipto lricope, ima corri piatsa pacapa padapana panti corricawatsa mayami neenipe ³¹ Fraraón iwana Moise njite Aarón tsakja jliada dépi, lriaco narso: ''Warsa jinicoa pjiomi yácarroa noyacalre ioya, shá njite pjiomi njaji iraelitanai yaacarro yáa matsiadalri Dio irso, cayoji icaite capisho inaitja caotsa. ³² Ideotsa ivacan, iovejani, yaacarro inaitja cayoji icaite capisho inaitjaca, itatjá tsakjaotsa nonacó.'' ³³ Njaji egipcionai nakjeyapitana naacarro naoya, ima naaco: ''Corri cadaotsa naawa mayami caotsa pjiomi fá.'' ³⁴ Njite njaji iraelitanai njepa nadaitampe mamojloi-naperritsa. Njite njaji natsipalraapipe, natsayan shotsa napapina nawaakjé-carro nadee. ³⁵ Njaji Iraelnai aimadan nanaitja cayoji Moise inaa caposho nanaitjaca. Natatjá nainai njaji egipcionai patjepi, shentadati palraatape njite owirrope tskja; natatja tsakja nainai natsayaniwa. ³⁶ Dio tsa icadaa caponca njaji egipcionai nainai njaji Iraelnai. Niini njaji Egipto lricope naa narso njaji Iraelnai pjiomi cocacatsa natatjalri nainai. Cayotsan Iraelnai idee pjiomi nanaani njaji egicionai. ³⁷ Iraelitanai iawa Ramsé nakjoite Sucot nacojle. Seiciento mil atsianai pia namaimaca, maniwetacam njaji inaitjpe njite njaji yempetipe. ³⁸ Naatsakja nainai njaji corripetsa Iraelnaica, nadee tsakja navacan njite naovejani, aima naapirra. Namerrita naijao petje mewiperritsa njaji nadeji Egipto lrikjoite toa. ³⁹ Nakjeyapita capoa namotoitacana Egipto ioya nini corrin coajica nanaitjaca naijao nadeope. ⁴⁰ Iraelitanai iofa piawa Egipto lrico coatrociento trenta walria oonia. ⁴¹ Cotrociento trenta walria iwayaca cádanacoa, namoto Egipto lrikjoite papocopeo njaji kjaidaperri Dio inaikite. ⁴² Jia deepica corrin coca imáa, Nawapá-carro Dio jitacana Egipto lrikjoite. Icatsa deepica jliaji nawaadalriotsa njaji Iraelnai caidalriwenatsa naapiya njaji walricomanai. ⁴³ Wa-Minalri iaco Moise njite Arón irso: ''Cayoatsa inaitjaca jliaji Pascua: corriotsa nataitaca naiñjaca Pascua njaji corripetsa Iraelca. ⁴⁴ Mitsa pjiomi njaji Iraelnai irsoperri, nawentaji palraata shó, nataitaotsa naiñjacani nayoá cayami natsiaca íyam. ⁴⁵ Njaji corripetsa Iraelca, njite njaji narsoperri corrin nataita naiñjaca pada injaodati Pascua inacoapana dalri nacó. ⁴⁶ Irsotsa iñjacani panti ricó, corrin pemajleca panti ioya. Corrin itaita itsokjoaca naapi njaji maaficalri. ⁴⁷ Pjiomi njaji Iraelnai narsotsa nacatimataacawa nawaadacarroa lrico. ⁴⁸ Njaji corripetsa Iraelnaica, njite naoma naiñjaca iinai Pascua wa-Minalri nacoda, pjiomi njaji atsianai lrikitsiñape nakjoite narsotsa nayoaca natsiaca iya, niini dekjena nataita naiñjaca nainai Pascua. Cayoatsana nacayosho njaji jicoperri Iraelnai jipaite ricó. Njaji corri perritsa iyoá natsiaca íya, corrin nataita naiñjaca Pascua iñjaodape nacó. ⁴⁹ Pacoaca tsakja jliaji yácati kjaidadalri narsowalre njaji jicoperri njepaite ricó njite narso njaji inocapetsa iderse.'' ⁵⁰ Njaji Iraelnai nanaitja cayoji Dio inaa capishó nanaitjaca ima cayo lrinaaca Moise njite Aarón icaitecana nanaitjá-carro. ⁵¹ Jliadatsa jalredaoca wa-Minalri jita njaji iraelitanai Egipto lrikjoite papocope njaji Lrinaikite kjaidaperri.

¹ Caaco Dio Moise irso, Lriaco lrirso: ² Pjienitaotsa Norso pjiomi njaji pjerritinaipe Irael lricope, atsianai njite maaficalri tsakja, ima noyapecana.'' ³ Moise iaco narso njaji inaiki aimadan: ''Iwadaotsa jliada jalredaocaca jliaji, wa-Minalri jita ccdáa shá Egipto ioya, narsoperri cawa pia shá narsó. Kjaidadalri capoa jliaji Dio niini jlitaca shá njite. Corriotsa iñjá carroca petje kewidalri. ⁴ Imotoatsa Egipto lrikjoite jliadaa jalredaocaca jliaji, kérri Abib nacó. ⁵ Wa-minalri ideekenaotsa shá cananeonai jipaite lricojle, hititanai, amorreonai, heveonai njite jeboseoanai jipaite nacojle, jliaji jiipai wa-Minalri icaiterri yácoti ajadalri shó narso njaji iferrinaipe lriacaotsa irso, jliaji jiipai matsia cawa patawiñaca vaaca njite matsiacawa paapanaca, niniotsa irsotsa inaitjaca jliaji iacawa matsiadalri lrinacopi keérrica jliaji. ⁶ Siete jalredaoca watsa iñjaca petje mewidalritsa; siete jalredaoca nacó icatimataacawa wa-Minalri iipitana nacó. ⁷ Irsotsa iñjaca petje mewidalritsa siete jalredaoca; corriotsa cocá carroca irsoatsa petj kewidalri inakjoite. Corriotsa irsó carroca mojloi iipana lrico, corrin tsakja jipaite jinaa iocacawa lrico. ⁸ Jliada jalredaoca picaiteotsa pienipe irso: ''Wa-Minalri inaitjalri noikjaote nomoto caojli pia Egipto lrikjoite. ⁹ Cayoji pinaapapi capisho o cayoji pada catjinaadalri piekjoete nacodalri, cayoatsa jliaji yácoti kjaidadalri pirsolriotsa picaitepeca inaco wa-Minalri icadanda pirso, ima Jlída shó Jlita pjia Egipto lrikjoite. ¹⁰ Niini oonia icoam pirsotsa piwaadacani jlinaana lricó, pirsotsa pinaitjacani ima yácoti kjaidadalricani pirsoni. ¹¹ Wa-Minalri idee cadanacoenaotsa pjia Canaán jipaite ricojle, cayoji Lricaite capisho piferrinaipe irso, njite Lriá cadanacoenaotsa pirso jliaji jiipai, ¹² pirsoatsa piaca wa-Minalri irso pjiomi njaji pjerritinaipe, coshocaotsa nanakjoite njaji maaficalri. Pjiomi njaji atsianape initacape imotocawa wa-Minalri iyapecana. ¹³ Jliaji borro yénipe initacana imotocawa pirsotsa piaca apana cordero lricoadawa yomjé-carroni. Mitsa corri cadaa piyomjetani, icaamitsa pjitaca pokjomi lrinorsiapji nacó mayamí-caroni. Nacoamitsa njaji pienipe yénipe pjerritinaipe narsotsa náca nacoadawa. ¹⁴ Pienipe itatja cádanacoatsa pjia coanshopaca jliaji, picaiteotsa cayoji: ''wa-Minalri jiida kjaidadalri shó Jlita njoá Egipto lrikjoite, narsoperri cawa pia njoa narsó. ¹⁵ Kjerroa pia Faraón njite corri pia lricadaa wamoto njiteo. Wa-Minalri iino poia pjiomi nénipe pjerritinaipe Egipto jipaite ricope; pjerriti naipe inaiki iyape njite njaji maaficalri. Caishopa noino Dio irso pjiomi maaficalri yénipe atsianape pjerritinaipe, njite norsotsa noaca nacoadawa nanaco njaji noenipe yénipe pjerritinaipe.'' ¹⁶ Cayoji pinaapapi capisho o cayoji pada catjinaadalri piekjoete nacodalri, ima wa-Minalri jída kjaidadalri shó Jlita faa Egipto lrikjoite. ¹⁷ Faraón icadaa caojli piena naawa njaji Iraelnai aimadan, corrin Dio icadaa naawa inipolrico njepaite ricodalri njaji filisteonai tsoomcawa pjatja. Ima Dio icaite: ''Wadee nadiacawa Egipto lricojle njaji nonaikite aimadan oowicalri ikjaote.'' ¹⁸ Niini Lricadaca naawa inipolrico iyofiacadawa jliaji Manoá Írraidalri jalrapocolri ricó. Namotoa Egipto lrikjoite njaji iraelitanai aimadan papcope, nadee nanacoa nainoaca shopawa. ¹⁹ Moise idee nainaiwa Jose yapipemi, ima Jose icadaa nacaiteca yácoti ajádalri shó njaji iraelinai pia, lricaite cádanaco cayoji: ''Noajintsa Dio jitacaotsa shá ajaiteji, niini cayo cadanacoenaotsa ideotsa noapipemi inaiwa.'' ²⁰ Itraelitanai iawa Sucot lrikjoite njite naa nemá Etam inomapiana lricojle jalra pocolri ricó. ²¹ Wa-Minalri iá napjeya iyadaoca lricó Lricañjatá-carro narso inipo. Njite tiyé jalripádalri cani narso deepi ricó lricaná carro narso naapowa. Icatsa Lrinaitjaca narso nataitá-carro naacawa jaalrewe-ricó njite deepi ricó tsakja. ²² Corrin wa-Minalri shenitaca naoya jliaji iyadaoca jalrewerrico njite corrin tsakja jliaji tiyé jalripá-dalri deepi ricó.

¹ Caaco wa-Minalri Moise irso: ² ''Picaite narso njaji iraelitanai aimadan nadiá-carro njapodamrsewa naacarro nemá Pi Hahirot icoenjete, Migdol njite manoá ioyawaaca, Baal Zefón icoemjete. Icatsaotsa iáca inaitja ípanaitawa lricoemjete. ³ Niniotsa Faraón icaiteotsa iraelitanai nacó: ''Corriotsa nají kjerreca naawa njaji iraelitanai. Oopipa manalrena jalrapocolri ricó. ⁴ Notarrataotsa Faraón icaolre ricó nini lripineta caotsa shá. Naotsa norso matsiadalri lrikjaote jliaji nonaitjalri Faraón irso njite njaji lri tsolrodaonai aimadan. Njaji egipcionai nainjiwatsa Njoaca JLIAJI IMINALRITI.'' Nanaitja napanaita njaji Iraelnai cayotsa Wa-Minalri icaite capisho narso. ⁵ Nacaite cádanaco Egipto itaricanaa irso oopica napitoa njaji iraelitanai, ikena Faraón njite njaji lrirsoperri teecojlenakja nawaopiakje nakjoete. Naaco narsowaaca: ''¿matsilri pjaaca fáa, icapa coajica wacadaaca naawa njaji iraelitanai, niini cokenatsaotsa idenji warso?'' ⁶ Ikena Faraón imatsieta jlieco carrona njite lridee lrinaiwa njaji tsolrodaonai aimadan lrinaiperri. ⁷ lridee tsakja seiciento njecocarrofiape lriniwanaji njite paana pja njeecocarrofiape tsakja Egipto lricope, njite njaji caconaperri iawa nanaco. ⁸ JLIAJI IMINALRITI itarrata Faraón icaolre ricó, Egipto italricanaa, niini jliaji talricanaati ipinietaca njaji iraelitanai. Mitsa njaji iraelitanai namoto njiteo Dio jiida shó. ⁹ Njaji egipcionai ipinieta njaji iraelitanai na caballon nacó, njecocarrofiape, tsolrodaonai jiecocape caballo nacó, pjiomi njaji lri tsolrodaonai aimadan. Naa naoketa njaji iraelitanai ioca capetoa iofawa Manoá icoemjete Pi Hahirot icodapi, Baal Zefón icodapi-dalri. ¹⁰ Faraón itsomita cádanaco, njaji iraelitanai njerreta nacapa yenonrse, njite nacapa egipcionai ínoca njapodam; njite nafiocawa pekirritsa, niini njemataca kjaida Dio ikjaolre njaji iraelitanai. ¹¹ Naaco Moise irso: ''¿Capja corri piaca pacapa nadawa cawa pja Egipto lrico niini pideeca fa mayamí-carro fa jalrapocolri ricó? ¿Coada maatsi pinaitjaca warso pjita capoa fa Egipto lrikjoite? ¹² Wacaitjen piatja pjia Egipto lricotoa: ''Picadaa catsa fa wadejí-carro narso njaji egipcionai.'' Matsia pja pia wadejica egipcionai irso lrioya jliaji mayamica fa jalrapocolri ricó.'' ¹³ Moise iaco narso njaji inaiki, ''Corrin noma ifiocawa. manitsa yeemacawa njite icapá carroatsa coajicaotsa Dio iyomjetaca shá panaya. Njaji egipcionai icapalri panaya, corrina-tsaotsa ipietá carrocaotsa icapacana. ¹⁴ JLIAJI IMINALRITI, JLIA watsa inoacawa ikjaote, njite shá corritsaotsa cocá-carrocaotsa inaitjaca.'' ¹⁵ Njite JLIAJI IMINALRITI iaco Moise irso, ¿pjia, Moise, coada caidapetsaji piwanaca njoa? Picaite njaji Iraelnai ná-carro napeyajlewa. ¹⁶ Pjirreta jliaji pjipajico, njite piñjata Manoá nacojle pjienitácarron yamema, nataitá-carroatsa nayoetaca pemajle njaji inaiki jiipai metá-dalri ricótsa. ¹⁷ Njite pirsotsa pianjí Notarratacaotsa nacaolre ricó njaji egipcionai niiniotsa naacaotsa shaapodami. Naawatsa norso matsiadalri lrikjaote jliaji Nonaitja-lriotsa Faraón irso, njaji lri-tsolrodaonai aimadan , njeco carrofiape njite njaji atsianai yaacapewa caballo nacó. ¹⁸ Niiniotsa naají Njoaca JLIAJI IMINALRITI njaji egipcionai naacadanacoatsa matsiadalri Norso lrikjaote jliaji Nonaitjalri Faraón irso, narso njaji njeco carrofiape njite narso njaji atsianai yácape caballo nacó. ¹⁹ Jliaji Dio iageleni, njite jliaji tiyé jalripadalri yálriwa napeyajle njaji Iraelnai icarsawa njiteo lriá carroenakjawa njapotjete. ²⁰ Lriawa naoyawaaca njaji Iraelnai njite njaji egipcionai. Iyadaoca cadaoca-dalrica narso njaji egipcionai, mitsa camarraicani deepi riccó narso njaji iraelitanai, niini corrin natsomitaacawa deepi ricó. ²¹ Moise ipiajleta lricaapi Manoá ikjaolre. JLIAJI IMINALRITI icada ooni imjecoacawa caolri kjaidadalri shó iinocada jeerri imotolri njiteo depjite. Cayotsa Dio imjecoca jliaji ooni. ²² Njaji Iraelnai naawa ooni ipamoyoaca lrico jiipai metá-dalri naco. Panti iwai-shoca narso jliaji ooni atsiajliemajle njite inarroema naco tsakja. ²³ Njaji egipcionai naawa njapodam. Napinetana Manopa ipamoyoaca lrico tsakja, pjiomi njaji Faraón icaballon, njeco carrofiape, njite njaji atsianai iacape caballo nacó. ²⁴ Njite jaalreca ikjaolre nacojlena, Dio icapa naikjaolre njaji tsolrodao aimadan egipcionai tiyé jalripá-dalri nakjoite njite iyadaoca nakjoite, niini Lrimanalrietaca nawapiakje njaji egipcionai. ²⁵ Njeco carrofiape jiipa irocawa jotojotópalri ricó njite jirrapitinaca narso njaji shecocape nanaco ná-carro kjeyawa. Niini naaco njaji egipcionai, ''warsa wapito naoya njaji Iraelitanai, ima JLIAJI IMINALRITI inoacacawa naikjaote wakjoete.'' ²⁶ JLIAJI IMINALRITI iaco Moise irso, ''pipiajleta picaapi mnoá naccojle lriitá-carro njaji egipcionai, neeco carrofiape njite njaji atsianai iácapewa caballo nacó.'' ²⁷ Ikena Moise ipiajletaca lricaapi Manoá nacojle, niini jliaji ooni jlidiá lritacacawa tsenakja jaalre cádanacoenawa. Napitotjawa njaji egipcionai Manoá ipamoyoaca lrikjoite, njite JLIAJI IMINALRITI lricadaa naacarroa lripamoyoaca lrico. ²⁸ Lridiá lritaacawa jliaji ooni njite lriitaca njaji Faraón sheco carrofiape, njaji atsianai yacapewa caballo nacó, njite pjiomi njaji tsolrodaonai aimadan iacapewa njapodam njaji njeco carrofiape Manoá lricojle. Corrin yomje pada. ²⁹ Njite cadana njaji iraelitanai naawametadalri ricotsa Manoá ipamoyoaca lricó. Njite panti iwai shoca narso jliaji ooni nayekema nacojle njite inarroema nacojle tsakja. ³⁰ Cayotsa Dio iyomjetaca njaji Iraelnai jliadaa jecoapi naoya njaji egiocionai, njite njaji Iraelnai nacapa nadadami njaji egipcionai Manoá inomapi nacojle. ³¹ Njite njaji Iraelnai, nacapa cádanaco Dio jída nakjoete njaji egipcionai, ikema naaca matsiadalri Dio irso, njite nacadaa nacaolre Lrinaco JLIAJI IMINALRITI njite lrirsodalri Moise nacó.

¹ Njite Moise icantaca naapiya njaji Iraelnai aimadan wa-Minalri irso, cayo naaco nacantaca: ''No-cantaca no-Minalri irso, ima Jliametacana matsiadalri shó; Lripeeco ooni macapawan ricojle nja caballo njite njaji shecojicape nanacó. ² No-cantaca lrinaco jliaji no-Minalri yaacada norso jidaati, njite jliatsa jliaji iyomjetacadaca njoa. Noaca Lrirso matsiadalri ima icatsa noDioteca, njorreta Lripitana jliaji njonirri iDiote. ³ Oowi kjaidadalrica jliaji no-Minalri, icatsa Lriipitanaca, IMINALRITI. ⁴ Lripeeco manoá lricojle Faraón shecoji carrofiape njite njaji lri-tsolrodaonai aimadan. Njaji tsolrodaonai caconaperri Faraón iniwanaji, oopi naticomawa Manoá Irraidalri ricó. ⁵ Ooni itacana; njite nawirriñawa ooni itjewacaca lricó jiipada capishona. ⁶ Pjia noMinalri matsiadalri, jliaji Picaapi atsialriemadalri kjaidadalricani niini pinaitja matsia lrishó, no-Minalri, opi Pimatsiketa njaji picoema. ⁷ Jidaati mataita canadalri shó pjiameta njaji jinicolriwa Pikjoete. Picadaa Pírroa jiwaca nanaco niini lrimjaitacana tidoapapje shó. ⁸ Pipjiá cádanaco caolri pjitaco shó piwaketaca pjiomi njaji ooni, njite manitsa nerrocawa njaji oniñokja; njite corrinatsa ooni imotocawa ooni macapawan lrikjoite. ⁹ Lriaco jliaji wacoema: ''Nopinetaotsana, noawatsa njopana njite nowatsa warsowaaca njaji njotaji naoya; nonaitjaotsa narso cayoji nooma capisho nonaitjaca, njotaotsa nomatsetani njite nowayaketa caotsana nocaapi shó. ¹⁰ Mitsa Pipjiacana Picaolrini shó njite icaamitsa ooni iitacana, nawirriñawa mocafe shó tjewacacawa ricó. ¹¹ Corrin pacapa pada, wa-Minalri Picayoshó-dalri napecolrico njaji apana dionai, kjaidadalri, mamatsicanaa dalritsa nanda irso matsiadalri Pimatsiaca ima, inaitjacada manaitja canadalri. ¹² Pipiajleta naikjaolre picaapi piyekema dalri, njite icaamitsa jiipai iñjacana. ¹³ Matsia capoa Pjia pidee matsiatsa njaji pinaikite aimadan Piyomjetaji. Pjiida kjaidadalri sho Pideena piipana matsiadalri ricó, Piofacawa lricojle. ¹⁴ Njaji apana inaiki njemiotsa pinaco, njite natetjecaotsa, njite njaji filisteonai nafiocaotsawa pekirritsa. ¹⁵ Nafiocaotsawa njaji Edom lricoperri iapiyawalri; natetjecaotsa njaji tsolrodaonai Moab lricope; njite napocotacaotsawa njaji inaiki Canaán lricope iofawa. ¹⁶ Nafiocaotsa pekirritsa njaji inaiki nacapa capoa Pjiida, paafe tsaotsa naofacawa jiipada shó a kjerrecaotsa njeyapawa pjiomi njaji Pinaikite aimadan, No-Minalri, njaji inaiki piyomjetaji. ¹⁷ Pidecana Picadá-carro naofawa jiipana nacó Poicadanda narso, Pinaitjacawa lrico Piipana, No-Minalri, piofacarrodao, Pinaitjandatsa No-Minalri picaapi shó. ¹⁸ Caidalriwenatsa pitalricanaataca. ¹⁹ Ima njaji Faraón icaballon perre oopi njewawa ooni lricojlena nacarretan yaapiya njite njaji inaiki idejicape piana. Waminalri icadaa ooni iitacana. Mitsa njaji iraelitanai naawa metacawa lricotsa jiipai macapawan ipamoyoaca lricó. ²⁰ Rsoaji inoparrotacada Miriam, aarón iwedoa, rsopa nakjematanda tambor shoperri njite pjiomi njaji inaitjepe njepa tsakja tambor roinai, njite narrapaca roinai. ²¹ Miriam icanta naapiya: Icanta wa-Minalri irso, Ima Jliametacana matsia. Lripeeco nja caballo njite njaji shecojicape nanaco manoá lricojle.'' ²² Njite Moise ideecana napeyajlewa Manoá irraidalri nakjoite. Naawa jalrapocolri Shur ikjaolre. Naawa madalridaa jecoapi jalrapocolri ricojle njite corrin naoketaca ooni. ²³ Njite naocawa Mara lricojle, mitsa corrin nataita nairraca ooni níni ima jipitíajai-cani. Niini nacadaaca lriipitanao niini, Mara. ²⁴ Niini kerroacana Moise irso njaji inaiki, naaco lrirso: ''¿Cocaotsa wairra?'' ²⁵ Moise iatatja Dio iinai, njite Dio icañjata lricapa apana jaico. Moise ipeeco jlaij jaico ooni ricojle ikena potiyaca jlaiji ooni nataitá carroena nairraca. Icatsa niinica Dio icadaa kena narso njaji yaacoti kjaidaperri , icatsakja Dio iwicawa piana niinina. ²⁶ Dio icaite narso: ''Jimi cadaotsa matsia jliaji iMinalri Dio icaiterri irso, njite inaitja cayoji lricaite capisho Lripeyajle, iwapa jimi matsia iicao coajica nacaiteca njaji yacoti Nocadaalri irso inaitjá-carro cayoji nacaite capoisho njaji yaacoti kjaidaperri, corriotsa nocadaa carroca inaco njaji maatsiperri nocadaalri nanaco njaji Egipto lricope, ima Njoa iMinalri nomatsietaotsa shá naoya.'' ²⁷ Njite njaji inaiki aimadan naocawa Elim nacojle, niinicawa doce onipaokja njite setenta manakjepi. Icatsa naacatoa naofawa niinio tsoomi ooni icodapi.

¹ Njaji inaiki aimadan naawa Elim nakjoite njite naoca pjiomi njaji Iraelnai jalrapocolri ricó Sin lricodalri, jliaji Elim njite Sinai ioyawaaca-dalri, yamanja semana nacó, yaamapi kerri shapodam namoto cayamiwa Egipto lrikjoite. ² Njite pjiomi njaji Iraelnai caacopedana Moise ikjoete njite Aarón ikjoete tsakja jalrapocolri ricó, ³ naaco narrso: ''Matsiatsantja a-catsa Dio íno fa Egipto lricotsa waofa cádanaco wayanan icodapi waiñja cádanaco peetje akjerreca kepinaape fa matsia. Mitsa shá ideeca fa jalrapocolri ricojle inó-carro fa maawitacai sho pjiomi faa.'' ⁴ Njite Dio icaite Moise irso: ''Nocadaotsa peetje jiwacawa eenolrokjoite íyao shó irso. Njaji inaiki aimadan naniwaotsa naiñjawa lricoatsa naiñjaoda padaa jecoapi jalredaoca icoam nowí-carro nocapa njeepa catsa Noaco o corrin. ⁵ Sei jalredaoca nacó dekjaotsa narsotsa naniwaca yamadaa icoa lrioya jliaji naniwalri jalredaoca icoam, njite nayanacaotsa njaji nadeerri.'' ⁶ Njité-dalri Moise njite Aarón icaite njaji inaiki aimadan iraelitanai: ''Dainoma watsa yají wa-Minalrica jliaji jitalri shá Egipto lrikjoite. ⁷ Piyompinaco watsa icapa Dio imatsiaca, Jlimintsa irso caacope cádanaco shá Lrikjoete. Cotsa cocaca fá caacoperri shá warso.'' ⁸ Moise icaite pjaa narso: ''Yají watsa lrinaco jliaji wa-Minalri Lriá cádanacoatsa irso ipeti dainomajle njite peetje piyompinaco njite mapji tsaotsa iñjaca, ima Jlimintsa coajica caacopedaca shá Lrikjoete. Cotsa coca noa Aarón iapiya. Cotsa wakjoeteca jliaji icaitepeji, wa-Minalri ikjoete dekja.' ⁹ Moise iaco Aarón irso: ''Picaite narso njaji iraelitanai iofacapewa papocope: ''Itsomita jliaji wa-Minalri, ima Jlimjica coajica icaitepejican.'' ¹⁰ Njite cáco cádanacotoa aarón narso njaji papocoperri iraelitanai, nacapa cádanaco jalrapocolri ikjaolre njite, nacapaca Dio imatsiaca melremelredalri iyadaoca nacó. ¹¹ Njite caacoca Dio Moise irso, Lriaco: ¹² ''Njominina coajica nacaiteca njaji Iraelnai. Caaco pjia narso cayoji: ''Jliada dainoma-ca jliaji iñjaaotsa ipeti, njite piyompinaco iñjawatsa peetje atee kepinapeca shá. Niniotsa yajíwatsa icacatsa IMINALI Dio-ca Njoa.'' ¹³ Niini dainomajlena corrowao imaimaca iorroco naikjaolre njite pakjamina nemaacawa lrico. Piyompinacotoa itamana jiwao nemacawa iwaida nacó. ¹⁴ Yami cádanacoena jliaji itamana, ikena njepaacacawa matsia njaji itamana jiwalri jiipai iecoa nacó. ¹⁵ Nacapa cádanacona njaji Iraelnai, naaco narsowaaca: ''+Cocao njaji?''Corri piatsa nanjí cocacana. Moise iaco narso: ''Icatsa peetjeca njarra wa-Minalri icadaji irso iñjá-carro. ¹⁶ Icatsa Dio icateca nanaco cayoji: ''Irsotsa iniwaca itsowawa icoanamitsa, lricoatsa itaitacawa iñjaca pjiomi. Yamaitapeotsa jipaca icoana coshoapacatsa imaimaca iipana lrico. ¹⁷ Njite njaji Iraelnai aimadan nanaitja cayó. padapena jipa aima pja padape jipa tsopatsa. ¹⁸ Njite nawi cádanacoena njaji injaodati njepalri, coshoca njaji jipacape aima pja njite njaji jipalri tsopjatsa, njite lricoatsa naiñjaca matsia pjiomi njaji naapana lricope. Ima naniwaca lricoatsa narsowao. ¹⁹ Moise iaco pja narso: ''Corriotsa pada itaita icadaca lrinakjoite tjewaijle icaona.'' ²⁰ Mitsa, corrin njemica Moise irso. Padapena nacadatoa nanakjoite tjewaijle icaona, mitsa keshenca naoyana icaamitsa matsicana. Niini kerroaca Moise narso. ²¹ Naniwa naiñjao piyompinaco icoami. Nacoamitsa njaji inaiki naniwaca lricoatsa naiñjaca padaa jecoapi. Jamo cádanacoena jeerri naicao icamitsa nacodocawa. ²² Vierne lrico, njaji inaiki naniwa yamapiape lrioya jliaji naniwalri mana, cotroitape padape inaiki irso, njite njaji njewidapoco naa nacaite Moise irso jliaji nanaikite inaitjalri. ²³ Moise iaco narso: ''Cayo lricaiteca jliaji wa-Minalri: ''Sábado tjewa, wawafetacawa pjiomi, waacawa matsiadalri wa-Minalri irso. Imerritaotsa njaji irsolritsa imerritaca, njite iyanaotsa njaji irsolritsa iyanaca. Pjiomi njaji netemi, tecojletsaotsa icadaacana tjewaijle ipia.'' ²⁴ Njite nacadaa tecojletsa njaji tewaijle ipaope, cayotsa Moise icaite capisho narso. Corrin maatsicana, corrin tsakja keshenca naoyana. ²⁵ Moise iaco narso: ''Iñjenaotsa jliaji iñjaope panaya, ima fenitandaca jliaji jalredaoca wawafetá-carro njite wá-carro matsiadalri wa-Minalri irso. Yaa cadantja ioma petje panaya, corritsa ioketá-carroca panaya. ²⁶ Sei jalredaoca idiajicawa iniwa iñjaope, mitsa siete jalredaoca nacó icatsa wawafeta carroda can. Njite jliadaa jecoapi corriuotsa pacapá carroca peetje iniwaoda.'' ²⁷ Padapena natja naoma peetje nawafeta carroda lrico, mitsa corrin coca naoketa. ²⁸ Njite Dio icaite Moise irso: ''¿Coancaojli pjenaotsa pa njeepa noaco njite nanaitja cayoji noaco kjaidaperri icaite capisho? ²⁹ Wa-Minalri iicadaa padaa jalredaoca iwafetá-carro. Niini vierne nakjoite lricadaa iniwá-carro peetje yanadaa icoa. Caishopa corrin coca itaita imotocawa iofacawa lrikjoite sábado lricó.'' ³⁰ Niini njaji inaiki nawafetawa sábado lrico. ³¹ Njaji Iraelnai nacadaa lriipitanao jliaji peetje, ''maná.'' Jaalredalricani cayoji mjeti papeetanda matsia njite lrijoica cayoji mjetita panaitjanda mapa idon fie. ³² Moise icaite pjaa narso: ''Cayo wa-Minalri inaa wanaitjaca: ''Imatsietaotsa paita peetje macaite maná-pe nacapá carroatsa njaji inaiki aimadan walricomanai, nacapá carroatsa njaji inakjoité-perri jliaji peetje Nokeñjawalri pia isho shá jalrapocolri ricó, Njota cayami Egipto jipaite lrikjoite.'' ³³ Moise iaco Aarón irso: ''Ioma pada lriarrodao jliaji peetje macaite njite shetaotsa lri-ricodan. Pimatsietaotsani matsia Dio ipeyajle nacapá carroatsa njaji walricomanai fapodamperrim.'' ³⁴ Njite lrinaitja cayotsaji Dio icaite capisho Moise irso, Aarón imatsietani lricodapitsa jliaji nacadaacawa njaji yaacoti kjaidaperri nanaitjashopa yaacoti nainaiwaaca, patowa lrico. ³⁵ Iraelitanai iñja maná coarenta walria nacó akjerreca naocawa pada jiipai nacojle caminalri-perrina, naiñja maná akjerreca naocawa jiipai Canaán jinaa iocacawa. ³⁶ Coatro kilo icoa jliaji peetje maná-pe namatsietalri pia.

¹ Pjiomi njaji iraelita poco naawa jalrapocolri Sin nakjoite, nanaitja cayoji Dio inaa capisho nanaitjaca. Naoca naofaa Refidim lricó, mitsa niini corrin pacapa ooni nairro njaji inaiki. ² Niini njaji inaiki nacaite Moise-ca irso maatsicalri, naaco lrirso: ''Pioma wairrao ooni.'' Moise iaco narso: '' ¿Coada kerroa shá noinai? ¿Coada iometa jliaji wa-Minalri?'' ³ Njaji inaiki naoma nairrao ooni matsiná, niini cacocana Moise ikjoete, naaco lrirso: ''¿Coada pjita fá Egipto lrikjoite piinó-carro, weenipe njite wápirra meeta capoa wacaolre?'' ⁴ Njite Moise iwana Dio ikjaolre: ''¿Coaji nonaitjaca naapiya njaji inaiki aimadan. Njite wadeepena nainoca njoa jiipada shó?'' ⁵ JLIAJI IMINALRITI iaco Moise irso: ''Warsa piawa napjeya njaji inaki aimadan, njite pidee padapena pekipenai Irael lricoperri piinaiwa. Pideewatsa jliaji pipjeeco piñashopa pia ooni. ⁶ Áwatsa noa Nowapa pjia pipeyajle lrinaco jliaji jiipada Horeb lricoda, piñá watsa jliaji jiipada niiniotsa ooni imotocawa lrioya irrá carroatsa.'' Cayotsa Moise inaitjaca nacaptsa njaji pekipenai Iraelita. ⁷ Lricadaa lripitanao niini Masah (iwikjeti) njite Meribá (icaitepekjeti) nacaitepeji capoa njaji iraelitanai njite naometa capoa wa-Minalri nacaite cádanaco cayoji: ''¿Capja wainaica wa-Minalri o corrin?'' ⁸ Njite papoco tsolrodaonai amalecita íno nakjoete njaji Iraelnai Refaín lrico nainó carrona. ⁹ Njite Moise iaco Josué irso: ''Piniwana apepena atsianai njite piá pinoacawa Amalec ikjoete. Tjewaotsa noa noemawa jiipana ípolrico nacó njite njopaotsa nocaapi ricó jliaji Dio ijaicoapote.'' ¹⁰ Josué inoacawa Amalec ikjoete cayotsaji Moise inaa capishoni, Moise jirra cadana wa jiipana nacojle Aarón yapiya njite Hur tsakja nainai. ¹¹ Moise jirreta cadaa nja lrinaapa, Irael shameta nacoema; njite lriorrocoeta cada nja lrinaapa lriwafetá-carrotoa, Amalec yametana. ¹² Maapji cádanaco Moise inaapalrico, Aarón njite Hur njepada pada jiipada nacadaacarro Moise iofá carrodao. Njite Aarón, Hur yaapiya njerreta Moise inaapa lricó, pada jirreta peema njite pada jirreta tsakja pema. Icatsa cayoji yenonrse catsa mananitsa njaji Moise inaapa akjerreca deepi naicao. ¹³ Cayotsa Josué shametaca njaji Amalecnai matseeta sho. ¹⁴ JLIAJI IMINALRITI iaco Moise irso: ''Pidanaotsa njaji paperra lrico njite pilee watsa Josué jimí-carro, ima corrinatsaotsa cocá carroca yají Amalec nacó eeno yapjite.'' ¹⁵ Njite Moise jirreta apana yenondalrida jiipada njite lricadaa lriipitanao ''Notjinaadaca JLIAJI IMINALRITI,.' ¹⁶ Lriaco cayoji: ''Ima jliaji wa-Minalri jirretaca Lrinaapa pema lriofa carroda nackjoite, Lrinaitja caotsa oowi Amalec ikjoete caidalriwetsa.''

¹ Jetro, sacerdote madian lricó, Moise iñjawerri, jlimica pjiomi coajica Dio inaitjaca Moise ikjaote njite lrikitsiñape Iraelnai aimadan ikjaote tsakja. Jlimica wa-Minalri jitaca njaji Iraelnai Egipto lrikjoite. ² Jetro, Moise iñjawerri, jlipa lridee rsoaji Sefora, Moise iino, ima Moise imeenaca piacano rsonirri iipana lricojle, ³ lridee tsakja njaji yamada lrienipe; Gersón lriipitana jliaji pada, ima Moise icaite piaca: ''Ima tekjoite-dalrica njoa njepaite ricó njaji apanatsa inaiki.'' ⁴ Eliezer lriipitana jliaji pada, ima Moise icaite piaca: ''Noferrinaipemi iDioteca jliaji ikitsindatalri njoa. Lriyomjetaca njoa Faraón imatsetani ioya.'' ⁵ Jetro, Moise iñjawerri, iocawa Moise iderse naapiya njaji lrienipe njite lriito, Moise iino naofacawa lricotoa jalrapocolri ricó Dio iawacada nacojle. ⁶ Lriaco Moise irso: ''Njoa, piñawerri Jetro, nonoca piderse naapiya njaji pienipe njite piino.'' ⁷ Moise imoto icoadata lriñjawerri, lricoajawa lrikjaolre, njite lritsootsoca lricacoda nacó. Natatjacawa narsowaaca coajicana njite njewawa pantita lricojle. ⁸ Moise icaite lriñjawerri irso coajica Dio inaitjaca Faraón irso njite egipcionai irso matsiá-carro njaji Iraelnai, njite pjiomi njaji jirrapitinaaperri njeyapalri inacó nano cayawa inipolrico, njite coajica wa-Minalri iyomjetana. ⁹ Catiima Jetro jimica nanaco njaji matsiaperri wa-Minalri inaitjalri Iraenai ikjaote, coajica Lriyomjetacana naoya njaji egipcionai. ¹⁰ Jetro icaite: ''Waaca matsiadlri WAMINALRI irso, ima Lriyomjetaca shá egipcionai ioya njite Faraón ioya tsakja, njite Lriwataca njaji aimadan egipcionai ioya. ¹¹ Panaya dekja noají kjaidadalri pjaaca jliaji IMINALRITI naoya njaji idolonai, njite Dio iyomjeta njaji Lrinaikite Iraelnai naoya njaji egipcionai jirrapiteta kjeti ioya.'' ¹² Jetro, Moise iñjawerri, idee ofrenda lrimjaitanda njite lriino maaficalri Dio irso. Aarón njite pjiomi njaji pekipenai caconaperri Irael lricope náno naiñja Dio ipeyajle Moise iñjawerri iapiya. ¹³ Njite tjewaijle, Moise iofá jími narso njaji inaiki aimadan njite lricaité-carro naacona. Njaji inaiki aimadan neemawa Moise iwaida nacó, piyompinaco nakjoite atee deepi nacojle. ¹⁴ Njite Moise iñjawerri icapa cádanaco jliaji Moise inaitjalri naikjaote njaji inaiki aimadan, lriaco lrirso: ''¿Cocao jliaji pinaitjalri naapiya njaji inaiki aimadan? ¿Coada pideji pjiwacatsa njite njaji inaiki aimadan natsomita pjia piyompinaco nakjoite atee deepi nacojle?'' ¹⁵ Moise iaco lriñjawerri irso: ''Njaji inaiki aimadan náno noderse natatjá-carro njemio naicaowa coaji carro Dio ikitsindatana. ¹⁶ Nainoaca cádanacoa nakjoete waaca, náno noderse. Njite nocaiteca coajica nanacó, njite nocanantana njaji Dio inaalri wanaitjaca njite njaji Lriaco kjaidáperri. ¹⁷ Njite Moise iñjawerri iaco lrirso: ''Cotsa matsialrica pirso cayoji pinaitja capishó. ¹⁸ Kjeyaotsa maapjica pjia njite njaji inaiki aimadan piinaiperri. Aima calretsa jliaji idejikjeti pinaitjalri. Cotsa pitaitá carroca pjiwacatsa lrikjoete jliaji idenjikjeti. ¹⁹ Pjimiotsa norso nocaiteca pjia, njite Dio watsa ikitsindataca pjia, ima pjiaca jliaji naoyawalre njaji inaiki aimadan Dio ipeyajle, pjienaotsa icaite namatsicanaa njaji inaiki Dio irso. ²⁰ Icaamitsaotsa picanantacana lrinaco jliaji Dio inaalri wanaitjaca njite njaji Lriaco kjaidá-perri. Pirsotsa picanantacana coajica nanaitjaca matsia njite jliaji idenjikjeti narsolritsa nanaitjaca. ²¹ Njite piniwanaotsa njaji atsianai nanakjoite njaji inaiki aimadan canjikjé-perri, inaitjacape matsia Dio irso, ajádalri-perri, corri perri icapa matsia apjetsida irsotsa naoya nja paana. Picadaotsana njewidapó carrona nanaco njaji mil perri inaiki, apepena cien nacó, cincoenta nacó njite die nacó tsakja. ²² Njaotsa icaite namatsicanaa nanacó njaji inaiki aimadan nanaitjalri jalredaoca icoam, mitsa njaji matsinaa perri pjá pjiá watsa icaite nanacó. Njaji imatsicanaati corri perri matsinarri, njatsa icaiteca coajica nanacó. Niniotsa corrin watsa jirrapitina-calre pirso, ima nakitsindataca pjia njaji inaiki pidejicalre ricó. ²³ Pinaitja cadaa cayo, njite Dio inaa pinaitjacani, pitaitaotsa lrokjoete jliaji idenjikjeti, njite catiimawatsa nadiacawa njaji inaiki naapana lricojlé. ²⁴ 4Moise jimi lriñjawerri irso njite lrinaitja cayoji lricaite capisho lrirso. ²⁵ Moise iniwana atsianai canjikjé-perri nanakjoite njaji Iraelnai njite lricanaadana njewidaapoa njaji mil perri inaiki, cien nacó, cincoenta nacó njite die inaiki nacó tsakja. ²⁶ Nacaite namatsicanaa nacó njaji inaiki, njaji tsodalripetsa. Njaji imatsicanaati pekirri-dalri pja nadeeni Moise ikjaolre, mitsa njatsa icaite namatsicanaa naco tsodalripetsa nanaco njaji inaiki aimadan. ²⁷ Jliapodamina Moise icadaa lriñjawerri idiawa, niini Jetro idiacawa jlipaite lricojle.

¹ Madalripi kerri shapodam namoto cayami Egipto jipaite lrikjoite njaji Iraelnai, naocawa jalrapocolri Sinaí lricoda. ² Naawa Refidin lrikjoite naocá carroa jalrapocolri Sinaí lricojle, njite naoca naofatoa lricodapi jliaji jiipana. ³ Moise jirrawa lrinaco jliaji jiipana, njite caacoca Dio lrirso lrinakjoite jliaji jiipana. lriaco lrirso: ''Picaiteotsa narso njaji Jacob ípaneta, njaji Iraelnai aimadan: ⁴ Icapjenina coajica Nonaitjaca narso njaji Egipto lricope, njite cadaana nodeeca shá pérri inapje nacó Nodee-carro shá Noikjaolrewa. ⁵ Njite panaya, jími cadaa noaco, shepa jliaji nocaterri irso njite inaitja inaitja cayoji noaco icaite capisho yaapiya, niniotsa noyarrope imatsiaca caotsa shá nanakjoite njaji paana inaiki imaimaca jalredaoca lricoperri, ima Noyaarropeca pjiomi njaji jalredaoca lricoperri. ⁶ Papoco sacerdotenai kjaidá perrica sha njite pacoa inaiki shenitaacacapewa Norso. Icatsaotsa njaji yaacoti pirsolriotsa picaiteca narso njaji nonaikite Iraelnai.'' ⁷ Njite Moise iwakeeta njaji pekipenai caconaperri narso njaji inaiki aimadan. Lricaite jlimi narso pjiomi njaji yácoti Dio inaalri lricaiteca narso. ⁸ Njite pjiomi njaji inaiki njeepani pacoaca, naaco. ''Wanaitjaotsa pjiomi njaji wa-Minalri inaalri wanaitjaca.'' Njite Moise iawa Dio ikjaolre lricaité-carro Jlimi coajica naaco njaji inaiki aimadan. ⁹ JLIAJI IMINALRITI iaco Moise irso: ''Nonoatsa pikjaolre iyadaoca lricó njemí carroatsa njaji inaiki aimadan caaco cádanacoatsa Njoa piapiya, njeepá carro tsakjaotsa pjia caidalriwetsa.'' Njite Moise icaite Dio irso coajica naaco njaji inaiki aimadan. ¹⁰ JLIAJI IMINALRITI iaco Moise irso: ''Pidiá picaite njaji inaiki aimadan. Panaya njite tjewena, pienitaotsana Norsona, njite pinaotsa nacotsoca natayani. ¹¹ Matsia carroenaotsana madalridaa nacó jalredaoca, ima madalridaa nacó Njoá, IMINALRI, noorroco caotsa lrinaco jliaji Jiipana Sinai. ¹² Pikjenanataotsa lriwaida nacó jliaji jiipana naocacawa njaji inaiki. Picaiteotsa narso: ''Icapaotsa itsoomitaca jliaji Jiipana o inotaca jliaji jliipoco. Ima coca cadalotsa inotani lrirsotsa mayamicani. ¹³ Corriotsa inótá carroca jliaji inaiki. Irsotsa iinocani jiipada sho o iyawitacani. Maaficalri cada o inaiki cadaa lrirsotsa mayamicani. Njemi cádanacoatsa trompoeta imaolrena kjaida njite jalripa, icatsaotsa narsotsa natsomitaca jiipana ipocoda nacó.'' ¹⁴ Moise iorrocawa jiipana nakjoite naikjaolre njaji inaki aimadan. Jlienita pjiomina Dio irso njite nacotsoco natsayan matsia. ¹⁵ Moise iaco narso: ''Imatsietacaotsawa madalridaa jalredaoca ipia; corriotsa imaa carroca ininai iapiya.'' ¹⁶ Madalridaa jalredaoca nacoena, ikeena eenoca niini njite eeno iperronialre tsakja njite iyadaoca cadaocá-dalri iñampaca jliaji Jiipana, njite trompeta imaolrena kjemadalri njite jalripadalri tsakja. Pjiomi njaji inaiki aimadan natetjecawa nemaacawa lrico. ¹⁷ Moise idee njaji inaiki aimadan pemajle nemacawa ioya naacarro nacoadata Dio, njite naoca nemawa Jiipana ipocoda nacó. ¹⁸ Itacati rico lrimawa jliaji Jiipana Sinai padenirri ima Dio iorrococa niiniwa tiyé keetacadalri ricó. Iitacati jirra njitewa cayoji yocandati imacapishoa, njite canani kjaida jliaji Jiipana. ¹⁹ Njite kjaidacayao cádanaco trompeta imaolrena, Caaco Moise, njite Dio shepani njemicawa pjiomi. ²⁰ JLIAJI IMINALRITI iorrocowa lripolrico nacó jliaji Jiipana, njite Lrinaa Moise jirracawa lrikjaolre. Njite Moise iá lriderse. ²¹ JLIAJI IMINALRITI iaco Moise irso: ''Pidia picaite njaji inaiki aimadan wadee natsomitaca nacapá-carro Njoa, wadee mayamica aima nanakjoite. ²² Picadaa natsomita Njoa njaji sacerdotenai njenitaaca carroa Norso, pinaa namatsietaaca-cawa nacoadatácarro Njoa, niini corriotsa noincana.'' ²³ Moise iaco Dio irso: ''Njaji inaiki aimadan corrin nataita natsoomitaca jliaji Jiipana, ima Pinaa piaca njoa nokjenanaatá-carro lriwaida nacó jliaji jiipana njoenitá carro Pirsona.'' ²⁴ JLIAJI IMINALRITI iaco lrirso: ''Warsena piawa naikjaolre njaji inaiki aimadan, njite pideotsa piinaiwa jliaji pipjerri Aarón, njite macadatsa njeyapa jliaji pikjenanatanda njaji sacerdotenai nanó-carro Noderse. Mitsa njeyapa cadani Noinoatsana.'' ²⁵ Cayotsa Moise iorroco naikjaolre njaji inaiki aimadan.

¹ Njite Dio icaite cayoji: ² ''Icatsa pi-Minalri Dio-ca njoa, jitalri pjia Egipto jipaite rikjoite, lrioya jliaji icadalri lrirsodalri-carro pjia. ³ Corriotsa pirsó carroca apana dionai teecojle Nóya. ⁴ Corriotsa pinaitjá carroca idolonai njenapjiam njai eenolicojlé perri, o jiipai nacojlé perri o njenapiam cadaa njaji ooni ricóperri. ⁵ Corrin itaita icoajacawa naikjaolre yaacarrontja narso matsiadalri, ima Njoa, pi-Minalri Dio, Dio cakerriakjédalrica Njoa. Noajintja namatsiacanaa njaji naferrinaipemi niini nocadaaca njerrapitaca namaysicanaa ikjaote njaji neenipe madalricoma njite njaji coatro coma tsakja njaji corriperri pia ioma Njoa. ⁶ Mitsa matsia nocapaca narso njaji aimadan icoadatacaperri napeyo capoa Njoa njite nanaitja cayoji nonaa capisho nanaitjaca. ⁷ Macaitetsa IMINALRI Dio ípitana nacó mikjapantsa, ima njorrapitetacaotsa jliaji icaitecada Noipitana nacó midalri ikjaotetsa. ⁸ Mamawadaca tsaotsa lrioya jliaji jalredaoca pawafeta carroda lrico, shenitaotsani norsowalreo. ⁹ Sei jalredaoca pirso pidejícarro. ¹⁰ Mitsa siete jalredaoca nacó piwafetawa, pjienitanda Norsowaoni, Njoa, piMInalri Dio. Corriotsa pinaitjá carroca pada idejikjeti jliadaa jalredaoca-ca, corrin pjiaca, pirrí cantja, piitó, pirsodalri, pirsodarro, pivacan catntja, corrin jliaca jliaji inocada pada jiipai nkjoite yofacada iinai. ¹¹ Ima sei jalredaoca nacó Njoa, IMINALRI, nonaitja pia njaji eenocoma, jiipai, macapawan njite pjiomi lriitada, njite nowafetacawa siete jalredaoca nacó. Niini Njoa, IMINALRI, nocaite matsiadalrica jliadaa pawafeta carrodao njite njoenitacan Norsowaoni. ¹² Pinaitja matsia pjinirri, pjidoa irso irso, yofá carroatsa aima jalredaoca jecoapi ricó, lrinaco jliaji jiipai nocadaalri irso Njoa, IMINALRI Dios. ¹³ Mainotsa inaiki. ¹⁴ Manaitjatsa maatsi idada irso. ¹⁵ Mañaitotsa. ¹⁶ Macashatsa pikitsinda nacó. ¹⁷ Makemitsa pikitsinda irsonda lriipana lrico; makemitsa pikinda iino, corrin tskja lrirsodalri, corrin tsakja lrirsodarro, corrin tsakja lridejishopa buey, corrin tsakja lriborron, o coandalricatsa njaji lrirsonipe.'' ¹⁸ Pjiomi njaji inaiki nacapa jliaji caolri kjaidadalri njite eeno iperronialre, njemi tsakja trompeta imaolrena, nacapa tsakja itacati imotocawa lrioya jliaji jiipana. Niini nacapa cádanacon, nafiowa, natetjewa njite teecotsa neema lrioya. ¹⁹ Naaco Moise irso: ''Picaitenaotsa femi coajica, njite fepaotsa coanjica picaiteca warso; corrin wataita femica caacoca Dio, ima femi cadantjani icaamitsa mayamica fa.'' ²⁰ Mitsa Moise iaco narso njaji inaiki: ''Mafietacatsawa, ima Dio inoca waikjaolre lriwí-carro faa, wafió-carro lriiwana yaamí-carro wanaitjaca maatsi.'' ²¹ Niini njaji inaiki neemawa teecotsa lrioya, mitsa Moise itsoomita jliaji cadaocadalri Dio iwapalri niini. ²² Njite Dio icaite Moise irso: ''Cayoatsa picaite njaji iraelitanai: ''Shatsa icapa coajica caacoca Njoa irso eeno lrikjoite. ²³ Manaitjatsa irsowao idolonai Nooya inaitjanda owirro shó, palrata shó tsakja. ²⁴ Inaitjaotsa Norso altar nashotsa njaji jalredaoca lricoperri, inocarroatsa Norso maaficalri nanaco ofrenda imjaitaji, ofrenda iofácarro matsia yapiyawaaca, oveja njite buey tsakja. Nonaitjaotsa matsia irso akjerrecawajle catsa ioma iwaadaca njoa inaitjá carro matsia Noipitana nacó. ²⁵ Norrocoatsa ikjaolre njite nonaitjacaotsa irso matsia. Jiipada sho cadaa inaitja jliaji altar, mamatsietatsana idejishopa shó, ima imatsieta cadaana, corrinatsa matsiá carrocan. ²⁶ Corriotsa inaitjá carroca jirracarrona lrinaco jliaji No-altarni; wadentja iñjataca idaki lrinaco.''

¹ Icatsa njaji yácoti kjaidaperri picadalriotsa narso: ² Iwenta cadaa pada hebreo-tairri irsodalri carroni, sei walria watsa lridejica irso, njite siete walria nacó icaamitsaotsa yaamica irsodalricani, lritaita lriaca lriminalri ioya, njite corritsa coca lricaoñaca niini. ³ Mainoite cadatsani, lrimotoatsa jliwacatsa; mitsa cainoite cadaani, lriinoi imoto tsakjaotsa lriinai. ⁴ Njite lriminalri cadaa jliaji yaa lrinoa, njite keenipeno lrirso atsia o iinarro, rsoaji lriino njite njaji lrienipe lriminalri iyapecana, niini lrirsotsa lrimotocawa jliwacatsa. ⁵ Mitsa jliaji lrirsodalri icaite cadaa: ''Nopeyoentsa nominalri, noino njite njaji noenipe; corritsa noá carroca ajajiteji,'' ⁶ niniotsa jliaji lriminalri lrirsotsa lrideecani Dio ikjaolren, njite lricadaa jlieni pantinomakja nacojle lritoda carro jolromi jlieni. Niniotsa corrinatsa yamí carroca lridejica lrirso. ⁷ Ape ivende cadaa lriito narso-darro carrono, corriotsa romotó carroca lrioya jliaji rominalri nacayosho njaji atsianai. ⁸ Njite corri cadaa matsiano lrirso jliaji iwentalrino lriinowa, lritaita lricadaacano nawentá carrono lrioya, mitsa corrin lritaita lrivendeeca narso njaji apaanatsa inaiki, ima corricatsa matsiaca lrinaitjacano cayoji lrinaitja capishono. ⁹ Lricadaa cadano lrirri jitá carrono lriinowa, lrirsotsa jlipacano cayoji lriito capoishono. ¹⁰ Njite jlita cadaa apama lrinowa, corrin lritaita lrimenataca rooya roijaope, rotsayani, lrirsotsa lrimaaca tsakja roinai. ¹¹ Mitsa corri cadaa lrinaitja njaji madalrida yácoti, icamitsaotsa matsiaca rsoaji ínarro, rotaita roaca lrioya njite corrin rocaoña roá-carro njiteo. ¹² Coca cadaa iñaa kjaida ápe njite mayamini lrikjaote, jliaji iinocadani lrirso tsakja mayamicani. ¹³ Mitsa lriino cadaani corri cadanatsa lriomacalreca, niniotsa nomatsietaotsa lripia pafe lriacawa lridawaacawa. ¹⁴ Pada iinocadaa lricodapidalri ima lrinaitjaca cayoji lriwaopia capisho lrinaco, irsotsa jipacani, iinó carroni, corritsa coadaca lria cadawa lriemawa Dio ialtar icodapi. ¹⁵ Coandalri cadaa iñaa jlinirri o jlidoa cadaa lrirsotsa mayamican. ¹⁶ Coca cadaa jipa jidati ricó pada inaiki lridawá carroni njite lrivendeeni, o naoketa cadaa jliaji inaiki lriipana lricó, jliaji inaiki inaitjacada cayó lrirsotsa mayamicani. ¹⁷ Coca cadaa imotoita yácoti matsidalri lrinirri ikjoete o jlidoa ikjoete, lrirsotsa mayamicani. ¹⁸ Nainoaca cadawa njaji atsianai njite ape iinocada lricoema jiipada shó o lricaapi shó, mitsa corrin mayami jliaji lriinonda, mitsa corrin lritaita lriemacawa; ¹⁹ njite lridia matsiani tamjia, njite lriemajiwa lripjeco nacó, jliaji atsia iinocadamni lrirsotsa lricaoñaca lrirso njaji jalredoaca corri capoa lritaita lridejica, njite lricaoña tsakja lrirso matsiá carroni a kjerreca matsiani. Niniotsa corriotsa caikjaolrenaacani lrikjaote. ²⁰ Pada atsia iinocada lrirsodalri lripjeco shó njite mayamini lrikjaote, jliaji atsia, irsotsa jirrapiteetacani. ²¹ Mitsa caafi cadaa jliaji lrirsodalri padaa o yamadaa, corrinatsa jirrapiteetá carroca jliaji lriminalri ima lriwentandacani lrirsowao. ²² Nainoaca cadawa njaji atsianai njite nañaa aapama ínarro kewedan-darro njite ropeeco roenipe lrikjaote, mitsa corrin coaji cantjano, jliaji atsia caikjaolrenaadalri lrirsotsa lricaoñacano coajica cadaa lricaiteca lrinaco jliaji roinirri, niini lrirsotsa lricaoñaca coshoca nacaiteca njaji icaitecape naacona njaji inaiki. ²³ Mitsa matsinaa cadaano, niniotsa pjiaca yají coajica, lrirsotsa lricadaaca lricafica pada icafica ikjaote, ²⁴ lritjí, pada itjí ikjaote; lrietsa, pada yétsa ikjaote; lricaapi, pada icaapi ikjaote; jliipa, pada jiipa ikjaote, ²⁵ pada imjaita cadaa pada, narso tsakja namjaitacani, lriyá cada pada, narso tsakja nayoá cani, lriino cadani amolreni, narso tsakja nainocani aamolreni. ²⁶ Pada iino cada witsami lrirsodalri o lrirsodarro itjí, icaamitsa lrirsotsa lricadaaca lriáca lrioya ima lrimatsicaca lritjí. ²⁷ Jlita cada lrirsodalri o lrirsodarro yétsa, icaamitsa lrirsotsa lricadaaca lriáca lrioya ima lrimatsicaca lrietsa lrioya. ²⁸ Apana buey itoda cadaa lritsowa shó ape atsia o apama ínarro, irsotsa iinoca jliaji buey jiipada shó, corrin itaita injaca lriipe; njite corrin coca lrikjaolrena jliaji lriminalrim. ²⁹ Mitsa caidalri cada piatsa lritodaca njaji inaiki lritsowa shó oopi ricotsa, njite nacaite lriminalri irso, njite corrin lricorrarratani, njite lriino cadaa pada atsia o ínarro cadaa, inoatsa jliaji maaficalri jiipada shó, njite jliaji lriminalri lrirso tsakja mayamicani. ³⁰ Mitsa jliaji buey iminalrim, lritaita cadaa lricaoñaacacawa wadee nainocani, lrirsotsa lricaoñaca coshoca natatjaca lriinai njaji icaitecape naacona. ³¹ Jliaji buey, lritoda cadaa pada yénipe o lriito, jliaji buey iminalri lrirsotsa lricaoñaca cayoji lricaite capisho jliaji yácoti kjaidadalri lrinacoapana. ³² Jliaji buey, lritoda cadaa pada narsodalri o narsodarro, jliaji buey iminalri lrirsotsa lricaoñaca trentaita sho moneda palraata, njite lrirsotsa lriinoca jliaji maaficalri jiipada shó. ³³ Ape atsia jica cadaa paapji oniapji njite corrin lriita matsia lrinomafe, njite apana buey o apana borro jiwa lri-ricoda, ³⁴ jliaji jicacada oniapji lrirsotsa lricaoñaca lricoadao jliaji maaficalri. Lrirsotsa lriaca palraata lrirso jliaji maaficalri iminalri, njite jliaji maaficalri mayamdalrim lriyadacani jliaji icaoña cadani. ³⁵ Pada ibueyni iinocada ape ibueyni, njaji yamadade narsotsa navendeca jliaji apana iinocadani, njite naaca narsowaaca lricoada, narso tsakja naaca narsowaaca jliaji buey mayandalrim. ³⁶ Mitsa caidalri cada piatsa lritodaca njaji inaiki lritsowa shó oopi ricotsa, njite nacaite lriminalri irso, njite corrin lricorrarratani, jliaji lriminalri lrirsotsa lriaca apana buey lricoadawa, njite jliaji maaficalri mayamni lriaca lrirso jliaji caikjaolrenaalri.

¹ Ape iñaito cadaa apana buey o apana oveja, njite lriinoni o lriwendeni, niniotsa lrirsotsa lridietaca cincona buey apana icoada njite coatrona oveja apana oveja ocoadao. ² Naoketa cadaa pada keñaitedalri lrimatsiketaca jliewá-carro, njite nañaacani o nainoni lrikjaote jliaji lrinaitjalri, corriotsa camatsicanaa carroca jliaji iinocadani. ³ Mitsa jaalrecadaa lriicao, niini dekja narsotsa njerrapiteetaca jliaji iinocada jliaji keñaitedalri. Njite jliaji keñaitedalri lrirsotsa lricaoñaca jliaji lriñaitolri, njite corricadaa lrirso lricaoñashopa, narsotsa nawendeecani coshoca nacoada njaji lriñaitolri. ⁴ A cada jliaji maaficalri caafitsa lriipana lrico, buey cadaa, borro cadaa, oveja cadaa, lrirsotsa lricaoñaca yamapiape lricoadawa. ⁵ Ape idee cadaa njaji lrivacan naiñjá-carro paapji malritsiapji ricó o lrikinkerre ricó, mitsa corrin lriwapaca njaji lrivacan njite naiñjaca ape ivacaapjirre lricotsa, jliaji vaaca iminalri lrirsotsa lrimatsietaca lricoadawa nasho njaji matsiaperripja lrirsolri lrivacaapjirre ricó o lrinikerre ricó. ⁶ Pada iwaca cadaa tiyé njite jliaji tiyé lriawa njite lrimjaita paniati iinaca, paniata ipananaa, paniapji walriapjipe o lrimjaita pjiomina, jliaji imjaitacada lrirsotsa lricaoñaca jliaji lrinaitjalri. ⁷ Ape icadaa cadaa lripalraatani o lriyarroaji lricodapidalri iwapá-carro lrirsonjite nañaito lrioya lriipana lrikjoite, njite naoketa cadaa jliaji inaitocadan, jliaji keñaitedalri lrirsotsa lricaoñaca yamapiape lricoadawa jliaji lriñaitolri. ⁸ Corri cadaa naoketa jliaji keñaitedalri, jliaji panti iminalri irsotsa iacawa naikjaolre njaji icaite caperri naacona nacapá-carro jliacatsa iñaito lricodapí dalri iyárro. ⁹ Coadalri catsa imatsicanaati ikjaote, buey cadaa, borro cadaa, ovejacadaa, tsaaya cadaa o coandalri catsa iñaawa njite pada icaite lriljaote: ''Noyadaca jliaji.'' Yamadape narsotsa naacawa naikjaolre njaji icaitecape naacona. Coca cadaa naokjeta imatsicanaa njaji icaitecape naacona, lrirsotsa lricaoñaca yamapiape lricodapidalri irso. ¹⁰ Ape atsia icada cadaa lricodapidalri irso apana borro, apana buy, apana oveja o coajidalricatsa maaficalri lriwapá-carrotoa lrirsoni, njite jliaji maaficalri lriá mayamini o pokjoncani o nañaitocani njite corrin coca icapan, ¹¹ yamadape narsotsa nanaitjaca yácoti ajádalri shó Dio ipeyajle, nacaitecawa corricatsa coca nanakjoite iñaito jliaji nacodapidalri iyárro nacó. Jliaji naminalri corriotsa lriomá-carro nacoadawa lriinai, njite jliaji nañaitolri ioya corriotsa lridietá carroca nacoadawa. ¹² Mitsa nañaito cadaa lrikjaolrena, lrirsotsa lricaoñaca lricoadao lrirso. ¹³ Njite caiñjacana cadaa lrikjaolrena jliaji maaficalri, njite lrirso pada icapacada lriinai. Corriotsa lricaoña carroca lrikjaote jliaji cañjacanaalri. ¹⁴ Ape jita cadatoa lricodapidalri iinai ípirra njite pokjoncani lrikjaolrena njite mayamini corri cadanatsa lriminalri icapan, jliaji caikjaolrenalri lrirsotsa lridietaca lricoadawa. ¹⁵ Mitsa lriminalri jliaji maaficalri icapacadaatsa, corriotsa lricaoñá-carroca lricoadao; lridee cadaa piani lridejicalre icoadawa, icaamitsa lricaoñaca lridejicalre nacó. ¹⁶ Ape atsia ipeyoaca cadaa apama ínarro corri-darro toa jiyapawa ape iapiya, njite lridakita roapiya, lrirsotsa jlitaca lrinoano njite lrirsotsa lricaoñaca rocoadawa cayji nacaite capisho. ¹⁷ Mitsa corri cadaa rsonirri ioma lriacano lrirso jliaji iomacadano, lriaji atsia lrirsotsa lricaoñaca palraata sho coshoca lricoada jliaji rodaki corridalri piatoa yají atsia. ¹⁸ Corriotsa icadaacarroca caafi rsoaji malrirri. ¹⁹ Coca cadaa idakita maaficalri iapiya, lrirsotsa mayamican. ²⁰ Coca cadaa iino maaficalri padatairritsa dio lrioya jliaji wa-Minalri, narsotsa mainocani. ²¹ Corriotsa itaita imatsiketaca jliaji pada jiipai nacoda, corrin tsakja itaita jirrapitetaca, ima cayo pia tsakja shá njepaite ricojle njaji Egipto lricope. ²² Manaitjatsa maatsi madoiyoanaipe, corrin tsakja njaji mjanirrinaipemi. ²³ Jirrapiteeta cadanana njite natatja noinai Njoa, JLIAJI IMINALRITI, Njomiotsa narso. ²⁴ Kerroatsa Njoa pekirritsa njite nonoatsani matseta shó, niniotsa madoiyoa naninai njite mjanirri neenipe. ²⁵ Yá cadatoa ipalrantan pada nonaikite aimadan inakjoitedalri kjenaadalritsa, mjeta tjaotsa lrioya lrinacopja jliaji palraata cayoji nanaitja capisho njaji yaacape toa palraata. ²⁶ Lricadaa cadatoa pirso lritsayanalre lricaiteshopa lricaoña caotsa pjia, pidietaotsa lrirsoni deepi ipjeya toa, ²⁷ Ima corri cadaa lrirso lritsayanalre japerri ioyadalri, corriotsa cocashoca lridanataacawa japerri ioya lrimaa cádanacoena. Njite lritatja cádanacoatsa Noinai Nokitsindatá carroni, Njomiotsa lrirso ima kjenaadalrica icapa pada irso Njoa. ²⁸ Macaitetsa yácoti maatsidalri Dio nacó, corrin tsakja njaji talricanaati iwapacape shá. ²⁹ Iniwa cádanacoatsa ipia iinaca yáwatsa Norso njaji initanda iniwaca, njite njaji initanda jitaca jaico tjedaa yáana tsakja. Wadeotsa iwapa catoa. Yá watsa norso njaji yénipe pjerritinaipe. ³⁰ Cayo tsakjaotsa njaji ípirra buey njite njaji oveja. Siete jalredaoca watsa najicatoa njadoa iinai, njite ocho jalredaoca nacó irsotsa iaca Norsona. ³¹ Nonaikite aimadanca shá shenitaaca capeo Norso. Corriotsa itaita iñjaca maaficalri caiñjacanaadalri; icadaotsa tsiino iñjaona.

¹ Macashatatsa pada nacó mikjapantsa. Maomatsa pikitsindao jliaji inaiki maatsidalritsa pidaanatá-carro lriinai lríshaa. ² Manaitjatsa maatsi nanaitja capisho njaji aimadan. Maomaytsa cayoca pjia nacayosho. Nadee cada pjia talricanaati ikjaolre picaité-carro yácoti padsa nacó, macadaatsa natecojletaca piwaopiakje njaji aimadan. ³ Maatsa ape ikjoete kjenadalri capoatsani. ⁴ Pioketa cadaa apana buey, o apana borro manalredalrim pjiponda iyaada, pirsotsa pidietaca lrirsoni. ⁵ Picapa cadaa pjiponda iborroni jiwacawa jiipai nacojle jamiña capoa lrideecalre, pirsotsa pikitsindatacani wadee ninicatsa pimacani. ⁶ Nadee cadaa caaconacaawa lricojle pada atsia kjenaadalritsa piyacalre rikjoite, pirsotsa pikitsindatacani. ⁷ Pjiena naoya njaji icaite cape ishatitsa apada nacó nainó-carron jliaji mamatsicanaa-dalritsa, ima corriotsa kjená carroca Nocapaca lrirso jliaji inaitjacada maatsi pada irso. ⁸ Mjepatsa napalraatani njaji icaoñacape shá inaitjá-carro maatsi ape corridalritsa irso imatsicanaa, ima njaji cayoperri lricadaaca matji capishona niini corritsa coadaca narso nanaitja cadaa matsi lrirso jliaji mamatsicanaa-dalritsa irso. ⁹ Mjerrapitetatsa idejikjeti matsinaperri sho njaji apana inaiki ioya, ima yajintsa coajica paofa cádanaco pada jipaite ricotsa, ima cayo piaca shá Egipto jipaite ricó. ¹⁰ Sei walria watsa idejica apapji ikiníkerre lricó, njite iniwaotsa ipania pjiomi. ¹¹ Njite siete walria nacó picadaotsa lriwafetacawa jliaji jiipai, corriotsa piapanaca lri-ricoda, njite nataitá-carro tsakja naiñjaca njite njaji kjenaperri piyacalre ricope, njite naiñjá-carro tsakja njaji maaficalri nanakjoite njaji namacajipe njaji inaiki. Cayo tsakjaotsa inaitjaca ovapji sho njite olivoapji sho tsakja. ¹² Sei jalredaoca watsa pidejica, njite siete jalredaoca nacó pirsotsa piwafetacawa. Pinaitja cayó nataitá csrroatsa nawafetacawa njaji maaficalri pidejishopa, buey njite pi.borron tsakja, nawafetá-carro tsakja njaji pirsoperrim yénipe njite njaji apaanatsa inaiki pioya. ¹³ Piwapa pjimi matsia njaji nocaiterri pirso. Manomatatsa neepitana njaji idolonai, njite macadatsa njemica idolonai iipitana pinoma lrikjoite. ¹⁴ Madalripia watsa pawalria icoam icatiimataacawa noikjaote. ¹⁵ Icatimataacawa inja cádanacoatsa njaji peetje mewidalritsa. Cayotsa nonaa capisho pinaitjaca. Siete jalredaoca watsa corricawatsa inñja peete keewidalri, Abib ikerrina lrico ima icapiatsa lrinacopi keerrica imoto piawa Egipto lrikjoitel niini icacatsa jlinaanaca Nocadaalri irso inaitja-carro. Corriotsa inó-carroca Noikjaolre icaapi yapiyatsa. ¹⁶ Njite icatimataacawa tsakja inita cádanacoatsa iniwaca ipania initanda iniwaca ikinikerre lrikjoite. Njite icatimataacawa tsakja yami cadanacoena iniwaca pjiomi njaji ipania ikinikerre lrikjoite, pawalria iwayaca cádanacoenawa. ¹⁷ Pjiomi njaji atsianai narsotsa nánoca Nopeyajle, Njoa na-Minalri, madalripia pawalria nacó. ¹⁸ Madetsa norso njaji maaficalri nerrana fie njite njaji peetje narsotsa meewicana, njite macadatsa neeti tjewaijle icaona. ¹⁹ Ideotsa Noopana lricojle, Njoa IMINALRI Dio njaji ipania iinaca matsiaperri toa initanda iniwaca. Mayana tsaotsa cabra yénipe tsoni toa jlidoa ínia lricotsa. ²⁰ Nomeencaotsa Noajeleni jlia carroatsa pipeyajle lriwapá-carro pjia piacayawa inipolrico, njite lrideecarro pjia Nomatsietalri pipiá nirse. ²¹ Piomaotsa picapani matsia njite pjiepaotsani coancada lriaco pirso. Maometa tsaotsani, ima lriino caotsa pjiomi njaji inaitjacape maatsi. Ima lriinaica Noipitana. ²² Ajádalri cadaa pjimi caotsa lrirso, njite pinaitja njaji Nocaiterri pirso, niniotsa nacoema caotsa Njoa njaji jipondatacape pjia, yemacada nakjoete njaji yemacaperri pikjoete. ²³ Jliaji Noajeleni lriacaotsa pipeyajle njite lrideecaotsa pirso njaji amorreonai, hititanai, cananitanai, fereceonai, hetitanai, njite jeboseonai. Njoa watsa iinona. ²⁴ Macoajatsawa nadiote ipeyajle,maatsa matsiadalri narso cayoji nacayoshó. Irso tsaotsa ipeecocana matsiajerri, ipeeco tsakjaotsa pjiomi njaji neema carrona nanaitjanda jiipada shó. ²⁵ Padatsa Njoa irso yaa matsiadalri, Njoa IMINALRI Dio. Pinaitja cadaa cayó, Nocadaotsa capedaca irso iñjaope, irrfaope tsakja. Corriotsa nocadaa carroca iyaami ipoati shó. ²⁶ Corriotsa meenipeca apama ínarro pjipaite ricó, corrin tsakjaotsa neenipe jiwacawa naoya. Wiá watsa yofacawa jalredaoca lricó. ²⁷ Nocadaotsa nafioca noiwana njaji inaiki pjiyapalriotsa jipaite ricó. Njite Nocadaotsa napitocawa pipjeya njaji inaiki. ²⁸ Nomeenacaotsa aini pipeyajle naikjaolre njaji heveonai, cananeonai, hititanai napitó-carro ipjeya. ²⁹ Corriotsa Njotá carroca ioyana pawalria nacotsa, wadetsantja maaficalri kenakja yofá niiniwa ipjeya. ³⁰ Tacaatsaotsa Nomotoetacana ioya, lricoa catsaotsa aimaca yénipe yofacaope njepaite ricó. ³¹ Nocadaotsa irso jliajijiipai Manoá írraidalri ioyawacadari lriapiya jliaji Manoá nayada njaji filisteonai, njite jalrapocolri nakjoite atee Oni Éufrate nacojle. Nocadaotsa shametaca pjiomi njaji inaiki jalredaoca lricope. Pjia tsaotsa ipeeco pioya njaji inaiki. ³² Manaitjatsa yácoti naapiya, corrin tsakja nadiote yaapiya. ³³ Macadatsa naofacawa iinai jipaite ricó, namadaotsa inaitjaca imatsicanawa Nokjoete. Yaa cadaotsa matsiadalri narso icamitsaotsa iwayacacawa.''

¹ Njite jliaji IMINALRITI icaite Moise irso lriá-carro Lriderse, njite Lrinaa lrideeca Aarón, Nadab, Abiú njite setenta pekipenai caconaperri Irael lricoperri, naacarro matsiadalri Norso tekjoitetsa. ² KIcaamitsa Moise itaita itsoomitaca Njoa. Corrin dekja nataita nja paana, corrin tsakja nataita njerracawa njaji inaiki aimadan. ³ Moise yaa icaite njaji yácoti wa-Minalri icaiteji lrirso narso njaji inaiki aimadan, lricaigte gtsakja njemi coajica lrinaaca yácoti kjaidaperri nacó. Njite pjiomi njaji inaiki aimadan naaco lrirso pacoacatsa pjiomi: ''Wanaitjaotsa pjiomi njaji wa-Minalri icaiterri warso.'' ⁴ Njitedalri Moise idana pjiomi njaji waMinalri icaiteji. Njite piyompinacotoa Moise inaitja apana altar jiipana itajida nacó, njite lricadaa docena jiipada yemawa pkjawa, ima nacaite nanaco njaji doce poco Iraelnai. ⁵ Njite lrimeenaca padape yempetipetoa nainó-carro maaficalri Dio irso imaodacakjeti nacoda, niini nainoca Lrirso buey. ⁶ Moise iwaketa pamoyoa lrirranami njite lricadaani poncherapi ricó, njite lriitem pamoyoa lriwitsicani altar nacó. ⁷ Njite Moise jliaji Paperra nadanacawa njaji yácoti kjaidaperri lrilee carroni kjemá narso njaji inaiki aimadan, njite naaco lrirso: ''Wanaitjeniotsa pjiomi njaji wa-Minalri icaiterri. Fetaotsa lriaco matsia.'' ⁸ Njite Moise iwaketa njaji írranati njite iwitsicaca nanaco njaji inaiki aimadan. Lriaco narso: ''Icatsa jliaji írranati Dio inaitjashopa yácoti yaapiya, Lriaca irso yácoti Lrinaitjaoda yaapiya nasho njaji lricaiterri.'' ⁹ Njitedalri Moise, Aarón, Nadab, Abiú njite njaji setenta pekipenai caconaperri Irael lricoperri njerrawa jiipana nacó. ¹⁰ Pjiomi njaji nacapaca Iraelnai iDiote. Nacapa jlipa yapjite lripjoacawa, pacoa nanaitjanda jiipada zafiro shó, jalraamidalri eeno shodalritsa icapacanaa. ¹¹ Corri kerroaca Dio narso njaji caconaperri Iraelitanai. Nacapa Dio, njite naiñja, nairra tsakja. ¹² JLIAJI IMINALRITI iaco Moise irso: ''Pjirrawa Noderse jiipana nacojle njitre piofatoatsa nirsewa. Noá carroatsa pirso njaji jipadaitape, njaji yácoti kjaidaperri njite njaji yácoti inaitjaope Nodanaji irso, picananta carroatsana.'' ¹³ Niini Moise jirrawa lrirsodalri Josué yaapiya lrinaco jliaji jiipana Dio iyada. ¹⁴ Moise icaite pia narso njaji pekipenai caconaperri: ''Atsaotsa iwapa fa a kjerreca wadia waocawa ikjaolre. Aaón njite Hur watsa iofaa yaapiya. Coca cadaa irso pada yácoti pada ikjoete, picadaa watsa naaca naikjaolre.'' ¹⁵ Ikena Moise jirracawa lrinaco jliaji jiipana, njite iyadaoca iitacani. ¹⁶ Njite Dio imatsiaca melremelredalri iorrocowa lrinaco jliaji jiipana Sinai, njite iyadaoca iitacani sei jalredaoca. Njite siete jalredaoca naco, Dio ina Moise iyadaoca lrikjoite. ¹⁷ Tiyee kjaidadalri shoca Dio icapacana jiipana ipolrico nacó natjí ricó njaji iraelitanai. ¹⁸ Moise shewa iyadaoca lricó njite jlirrawa jiipana nacó. Moise iofawa jiipana nacó coarenta jalredaoca njite coarenta deepi.

¹ Caaco JLIAJI IMINALRITI Moise irso, Lriaco lrirso: ² ''Picaite narso njaji iraelitanai njepá-carro Norso pada ofrenda coandalri catsa nanakjoite pomenápe icaolre ricó nanaitjá-carro. Pjia watsa jipa njaji ofrenda Noikjaote. ³ Njite, icatsaotsa njaji ofrenda nalriotsa pirso: owirro, palraata, njite bronce; ⁴ yamacati jipolrémaca eeno, amolremaca, njite iiraimaca; jerriwaikjape matsiaperri, cabra iiyo, ⁵ carnero íya idatanda írraidalri shó, maaficalri íyam matsiaperri, njite jaico acacia tsakja; ⁶ lámpara iitadao kerosen iglesia icamarrao, aceite pomeniajaipe waijeta shopao njite incienso pomení-perri icaona; ⁷ jiipada ónice, njite ppana pja jiipada matsiaperri, irroetaope sacerdotenai itsaya nacó njite jliaji nacadnda natsayan icóda nacó. ⁸ Picadaa nanaitjaca Norso noopapanao, Nofá-carroatsa napecolrico. ⁹ Pirsotsa pinaa nanaitjaca cayoji nocañjata capisoatsa picapa jlinaana jliaji Noopana njite naicaona njaji lriitada tsakja. ¹⁰ PInaitja tskjaotsa pada patowa jaico acacia sho. Paita metro njite die centimetro pja lrinacojle jliwalripaca, sesenta sei centimetro lrimacaiteca, njite sesenta sei tsakja lriyenonca. ¹¹ Piñjetaotsa owirro matsiadalri shó lridanjite nacó njite lriwawalrico tsakja, njite pinaitjaotsa lrinomapikjao owirro sho lrinomapi nacó. ¹² Pinaitjaotsa lrirso coatro jlieni poco owirro shó, njite pirroetaotsana lritojiwi nacó nacoanáa lrinaco jliaji patowa, yamapoco pema njite cayo tsakja pema. ¹³ Pirraotsa yaamana jaico acaciapo njite piñjetaotsa nanaco owirro shó. ¹⁴ Pjietaotsa njaji jaicoapo patowa sheni naco pema, njite pema tsakja iwakje shopani. ¹⁵ Niinipetsaotsa njaji jaico patowa sheni nacó, corriotsa jitá carroca lrioyana. ¹⁶ Picadaotsa patowa iwawalrico njaji yácoti kjaidaperri wanaitjashopa yácoti Nocadalriotsa pirso. ¹⁷ Pinaitjaotsa lripanaitawa jliaji inocawa maficalri imatsicanaa ikjaote owirro matsiadalri shó. Paita metro njite die centimetro pja lrinacojle jliwalripaca, sesenta sei centimetro lrimacaiteca. ¹⁸ Pinaitja tsakjaotsa yaamana querobinai owirro sho iñanda martillo shó picadaope yemawa lripanaita nacó jliaji iinocawa maaficalri imatsicana ikjaote. ¹⁹ Pinaitjaotsa apana querobin lripanaita nacó jliaji iinocawa maaficalri imatsicana ikjaote, njite apana pema nacó. Picadaotsa lrirroa lrinacotsa jliaji lripanaita nacó jliaji iinocawa maaficalri imatsicana ikjaote. ²⁰ Njaji querobinai narsotsa njerretaca yenonrse njaji nanapje, naitá-carro jliaji iinocawa maaficalri imatsicana ikjaote nanapje shó. Njaji querobinai narsotsa neemacawa nakjoetewaaca njite nacapaca lrinacojle jliaji iinocawa maaficalri imatsicana ikjaote. ²¹ Icadaotsa lripanaita jliaji iinocawa maaficalri imatsicana ikjaote patowa iicao, njite lriwawalrico jliaji patowa picadaotsa njaji yácoti kjaidaperri Nocadaalri pirso. ²² Icatsaotsa caacoca Njoa piapiya, lripanaita nakjoite jliaji iinocawa maaficalri imatsicana ikjaote, napecolrikjoite njaji kerobinai yémalriwa lrinaco jliaji patowa yácoti kjaidaperri yárroda, Nocaité-carro pirso pjiomi njaji nonaalri picaiteca narso njaji Irael yénipenaipe. ²³ Pinaitja tsakjaotsa paita mesa jaico acacia shó. Noventa centimetro watsa jliwalripaca , njite coarenta cinco centimetro lrimacaiteca njite sesenta cinco centimetro lriyenonca. ²⁴ Piñjetaotsa lridajite nacó njite lriwawalrico owirro matsiadalri shó. Pinaitjsa tsakjaotsa lrinomapiwa matsia owirro matsiadalri shó. ²⁵ Pinaitja tskjaotsa lrinomapiana nacó jliaji mesa papoco lrinomakjawa ocho centimetro imacaiteca, njite pinaitjaotsa lrinomapikja nacoda owirro shó. ²⁶ Pinaitjaotsa coatro jlinacolrico poco owirro shó, picadaotsana nanaco njaji natonjiwi nacó, naacawa njaji lricawaapa. ²⁷ Njerroatsa njaji jlinacolrico lrinomapi nacó pataitacawa pjeetaca jaico nerricoda njaji jlinacolrico padeecarroni. ²⁸ Pirra tsakjaotsa jaico acaciana, njite piñjetaotsa nanaco owirro shó itaita carroatsa iwakjeca jliaji mesa nasho. ²⁹ Pinaitjaotsa owirro shó njaji jaicofipe, njite nacamorriashopa tsakja; pinaitja tsakja poncherapipe njite taza macaapipe nacadaa carrodao nairraoda nanakjoite njaji ofrenda. ³⁰ Caidalritsaotsa picadaaca jliaji peetje icaitecada níinica Njoa Nopeyajle mesa nacó. ³¹ Pinaitja tsakjaotsa lampara jirricona owirro matsiaperri shó piñanda martillo shó. Njite pinaitjaotsa lriemacawa, lricawapa, lriiwi shoperri, copadape shoperri njite njaji lriwawalricoperri owirro sho, njite picadaotsana pada capishotsa pjiomina. ³² Jliaji lampara jirricona lrirsoatsa sei lrinaapa; Madalrina pema, madalrina tsakja pema. ³³ Nacoana njaji lrinaapa narsoatsa madalrida jaico almendro iiwi shoperri, cawawalricoperri njite njaji lriwidape lriwawalriperri. ³⁴ Jliaji lampara icawapa lrirsoatsa coatro jaico almendro iiwi shoperri, cawawalricoperri njite njaji lriwidape lriwawalriperri. ³⁵ Pirroetaotsa njaji jaico iiwi shoperri nayataaca-cawa nacoana njaji lamparana inaapa. ³⁶ Jliaji lampara jirricona, naapiya njaji lrinaapa narsotsa apanatsa pjiomi, corridalritsa payatandacan, caishopa owirro minitsa pjiomini nañanda icapacanao martillo shó. ³⁷ Njite pinaitjaotsa siete lampara picadaopena lrinaco, nacaná-carro lrinakjoitena jliaji lampara jirricona. ³⁸ Njaji nerrocawa njaji lampara njite naofacawa narsotsa owirro minicatsa pjiomi. ³⁹ Trentatre kilo sho owirro pinaitjaotsa pjiomi jliaji lampara jirricona njite pjiomi njaji lrinacoperri iawa. ⁴⁰ Picapaotsa matsia piicao pinaitjá-carro cayotsaji Nocañjata capisho picapa lrinaco jiipana naco pia.

¹ Pinaitjaotsa jliaji iwaaca carrodawa die maki sho nanaitjanda jeerriwai shó, yamacati jipolreperri sho, amolreperri njite írraiperri tsakja irsocape querobinai nanaco. Jliaji idejikjeti njaa inaitjani njaji yajicapetsa idejica matsia. ² Pacoacaogsa njawalripaca njaji yamacatimaca, doce metro njite pamoyoa pja paita inacojle njawalripaca, njite do metro namacaiteca. ³ Cinco yamacatimaca nayataaca watsa matsia nanacowaaca, cayo tsakja pema. ⁴ Inaitjaotsa njenio njaji yamacati nanomapi nacó pemajlete yamacati jipolre-perri shó. Cayominitsa inaitjaca njaji papoco yamacati tsakja. ⁵ Pinaitjaotsa cincoenta njenio nanaco njaji papoco yamacati, njite cayó tsakjaotsa nanaco njaji papoco piketemperri, matsia catsaotsa nerrocawa nakjoetewaaca. ⁶ Pinaitja tsakja owirro shó cincoentafi ipatoetashona matsia nanacowaaca, pacapá carroatsa pada capishotsa pjiomi. ⁷ Pinaitjaotsa once maca iñaji cabra iiyo shó lritapjewa jliaji iwacaaca carrodao. ⁸ Trece metro perri njite pamoyoa pja paita naco njawalripaca nacoanaa, njite yamaita metro namacaiteca. Pacoaca watsa namacaiteca pjiomi. ⁹ Iyataotsa matsia nanacowaaca njaji cinco maca; cayo tsakjaotsa inaitjaca njaji sei maca. Itsikji watsa jliaji sei maca shopa lriekjoete jliaji lritapje ¹⁰ Pinaitjaotsa cincoenta sheniti nanomapi nanaco njaji iniitacape irrocawa yamacati, njite cincoenta tsakja nanaco njaji papoco. ¹¹ Pinaitja tsakjaotsa bronce shó cincoenta ipatoitacape nanaco njaji njeeni, niniotsa pacapacana pada capishotsa pjiomi. ¹² Jalripa paaca jliaji yamacati lritapje icaonadalri, niniotsa jliaji lrimacanda pjaa icadaa catsaotsa lrirroa lriiwapji naco jliaji iwacaaca carrodawa. ¹³ Niniotsa matsiaca lritsipjenaapi jliaji iwacaaca carrodawa yameema, coarenta cinco centimetro pema cayo tsakja pema. Matsiawatsa lritaacacawa. ¹⁴ Pinaitjaotsa lridanawa carnero íyam shó nañjetanda írraidalri shó lritawajle icaona jliaji corricawatsa pacap imatsicanaati, njite pamaca maaficalri íyam matsiaperri nakjoiote iitashopa lriicao. ¹⁵ Pirraotsa capatsipe njaji jaico acacia, piemetaotsa mayacan nemawa pirroetashopa njaji yamacati matsiaperri iwacaaca carrodao icaona. ¹⁶ Coatro metro njite pamoyoa pja lrinaco paita naco njawalripaca, sesenta cinco centimetro namacaiteca. ¹⁷ Pinaitjaotsa nawedawa njaji jaico matsia carroatsa nayataacawa nanacowaaca. Caiminitsa inaitjaca pjiomi njaji jaico iwacaaca carrodawa icaona. ¹⁸ Pirraotsa vetetaita atsialriema icaona, ¹⁹ Pinaitjaotsa palratape sho coarenta poco neema carronawa njaji jaico capatsitaperri. Vente namaimaca njaji lripje niniotsa yamapocope watsa apana lrimacarrona icaona, irsocape matsia nawedawa. ²⁰ Pinaitja tsakjaotsa venteta jaico capatsitaperri inarroema naco icaona lrirso jliaji iwacaaca carrodawa, ²¹ njite njaji nanaitjaji palrataitape sho coarenta poco nema carronawa. ²² Njite lridajitjete icaona lrirso jliaji panti, jeerri shewa kemajle, inaitjaiotsa seita jaico capitsiperri. ²³ Pirraotsa yamaita lritojiwi icaona lrirso jliaji panti iwacaaca carrodawa. ²⁴ Picadaotsa nemawa pacoaca napocoda nacó njaji jaico capatsiperri. Njite pinaitja njenacolricowa njewidana naco nepapi carrona inaco. Caiminitsa inaitjaca njaji panti tijiwi. ²⁵ Pirraotsa ochona jaico capatsitaperri, njite dieciséi nemacarro poco. Yamapoco apana icaona nanaitjaji palraatape shó. ²⁶ Pimatsieta cincona jaico acia cocolriedeo. Cinco pema icaona nemacarronao njaji panti ipje, ²⁷ cinco cocolriede pema icaona lrirso jliaji panti nawacaaca carrodaw, njite cincona tsakja jeerri shewa kema icaona lrirso jliaji panti nawacaaca carrodawa. ²⁸ Njite njaji cocolriede pamoyoaperri narso njaji jaico capatsiperri, narsotsa njeyapa pjaacawa pema nacojle. ²⁹ Iñjetaotsa nanaco njaji jaico owirro shó. Inaitjaotsa njenacolricowa owirro shó, icatsaotsa njaji napapi carronawa njaji cocolriede, njite iñjeta tsakjaotsa njaji cocolriede owirro shó. ³⁰ Inaitjaotsa jliaji Panti Iwacaaca carrodawa cayotsaji Nocaite capisho pirso jiipana nacojle. ³¹ Inaitjaotsa pamaca yamacati tawalrekja jipolredalri shó, amolredalri njite írraidalri tsakja. Inaitjaotsa nanaco querobinai. Njaotsa inaitja njaji inaiki cayeca perritsa. ³² Icadaotsa njerroa coatrona jaico acacia naco iñjetampe owirro shó. Njaji jaico narsotsa narsoca irroetacawana inaitjaji owirro shó, njite coatro poco nema carronao nanaitjaji palraatape shó. ³³ Irroetaotsa njaji yamacatimaca nanaco njaji nerrocawa, inaitjaji owirro shó, njite imatsietaotsa lriofawa jliaji patowa yácoti kjaidaperri iarroda lridanamjite jliaji yamacati. Jliaji yamacati, icatsaotsa jliaji lrioyawaaca dalrica jliaji patawajle matsiacawa lrioya jliaji corricawatsa pacapa imatsicanaati. ³⁴ Icadaotsa jliaji iarrocawa írranati imatsicanaa ikjaote lricao jliaji patowa yácoti kjaidaperri yárroda, jliaji icadaalri corricawatsa pacapa imatsicanaati. ³⁵ Icadaotsa jliaji mesa pemajletsa lrioya jliaji yamacatimaca. Jliaji lampara jirricoda icadaotsa lriemawa lricoemjeteo, atsialriema nacojle lrirso jliaji iwacaaca carrodawa. Inarroemjete watsa lriemawa jliaji mesa. ³⁶ Pinaitja tsakjaotsa pamaca iitashopa lripananoma jliaji panti. Yamacati jipolremaca shoatsa inaitjani, amolrema shó njite írraimaca sho tsakja, njite inaitjaotsa lrinomapio jerriwai iwanikjasho matsia. ³⁷ Irraotsa cincona jaico acacia iñjetampe owirro shó, irroeta-carro jliaji yamacati Njaji irroetashopana, inaitjaotsana owirro shó, njite inaitjaotsa cinco poco nema carronawa bronce shó.

¹ Pinaitjaotsa apana altar jaico acacia shó irsocada coatro lriecoa pacoaca, do mdetro njite paita pja pacaapi lrinacojle namacaiteca pacoaca, njite paita metro njite trenta centimetro pja lrinacojle lriyenonca. ² Pinaitjaotsa natsowao natojiwi nacó, irrocapeotsa taimi lrinaco apana capishotsa pjiomi, njite piñjetaotsana bronce shó. ³ Pinaitjaotsa pjiomi njaji nadejishopa niini bronce shó, nacada carrodao palripokjoa njite njeta shopa tsakja, poncherapipe, keetsane nacapocoita shopa ipeti njite njeta shopa tiyemjen. ⁴ Pinaitja tsakjaotsa corrarra shodalri lrirsó bronce shó. Pinaitjaotsa jlinacolricoa bronce shó njite picadaa papocope lritojiwi nacó. ⁵ Picadaotsa jliaji corrarra shodalri altar inomapi yapjite, lripamoyoaca nakjoite lripocoda ikjaolre. ⁶ Imatsietaotsa jliecolrewa jliaji altar jaico acacia shó, njite piñjetaotsana bronce shó. ⁷ Shetaotsa njaji jaico corrarra jinacolrico yamema lrirso jliaji altar, itaita shopa iwakjecani. ⁸ Jaico sho watsa inaitja jliaji altar, njite irsocada iwawalrico. Cayoatsa pinaitjacani picapa capisho jiipana nacó. ⁹ Pirsotsa pinaitjaca lriyacalrecoa jliaji iwacaaca carrodawa. Njite atsialriemajle, lrirsotsa lrirsoca lridanawa yamacatimaca matsiadalri}, jeerriwai maca, irsocada coarenta coatro metro jiwalripaca. ¹⁰ Njaji yamacatimaca narsotsa narsoca napjewa, yemacapewa vente poco nacó nemacarronawa nanaitjanada bronce shó. Njaji jaico narsotsa narsoca namawacawana njite njaji njenacolrico nanaitjaji palraata shó. ¹¹ Inarroemjete niini tsakjaotsa pamaca yamacatimaca irsocada coarenta coatro metro jliwalripaca iwacaaca carroda iwai, vente lripje njite vente tsakja lriema carrona nanaitjanada bronce shó. Njaji namawata shopa nanacope njaji lripje njite njaji njenacolrico irsotsa inaitjacana palraatape shó. ¹² Njite lriyacalrecoa jiwalripaca nacó, jeerri shewa kemajle lrirsotsa lrirsoca pamaca yamacatimaca irsocada ventido metro jiwalripaca, njite die lripje njite die tsakja neema carrona. ¹³ Cayo tsakja jeerri imoto kema nacojle, lrirsotsa lrirsoca pamaca irsocada ventido metro jliwalripaca. ¹⁴ Jeerri imoto kemajle watsa pjewacawa lrirso jliaji yacalrecoa. Pema nacojle lrirsoatsa pamaca yamacatimaca sei metro dalri njite sesenta centimetro pja lrinacojle, njite madalrina lripje njite madalripoco neema carrona. ¹⁵ Cayo tsakja pema, lrirsoatsa pamaca yamacatimaca sei metro dalri njite sesenta centimetro pja lrinacojle, njite madalrina lripje njite madalripoco neema carrona. ¹⁶ Jliaji lrinomafe macapeki lrirsotsa lrirsoca pamaca yamacatimaca irsocada ocho metro njite ochenta centimetro pja lrinacojle jliwalripaca. Inaitjawatsani jeerriwai shó, jamacati jipolreperri shó, amolreperri njite írraiperri, matsiadalri inomakja, pada cayekjete inaitjanda matsia. lrirsotsa lrirsoca coatro lripje njite coatro poco tsakja neema carrona. ¹⁷ Pjiomi njaji lripje narsotsa narsoca namawata carrona njite njenacojlrico nanaitjaji palraatape shó, njite neema carropoco nanaitjaji bronce shó. ¹⁸ Jliaji yacalrecoa lrirsoatsa coarenta coatro metro jliwalripaca, ventido metro lrimacaiteca, njite yamaita metro njite vente centimetro lriyenonca. Njaji yamacatimaca nanaitjaji jeerriwaikja shó, njite broncepe njaji neema carrona. ¹⁹ Njawacatsa bronceitape njaji nadejishopa lri-ricoda jliaji paanti matsiadalri, njite bronceitape tsakja njaji napje, jliaji panti njite lriyacalrecoa ipje tsakja. ²⁰ Pirsotsa pinaaca njaji Iraelnai nadé-carro jaico oliva iiti matsiajai napitsiocanda matsia. Ikerratacaotsa caidalritsa jliaji lampara nasho nja aceite. ²¹ Aarón njite njaji lrienipe, njaa watsa imatsieta jliaji lampara, kerrá carroni depjite Dio ipeyajle, lridamjite jliaji yamacati idaanatacada jliaji patowa yácoti kjaidaperri iarrona. Yácoti kjaidadalrica narso njaji Iraelnai nanaitjaoda caidalriwenatsa, cayo minitsaotsa njanji walricomanaipe nanakjoite njaji Iraelnai.

¹ Piwana pipjerri Arón njite njaji lrienipe Nadab, Abiú, Eleazar njite Itamar, nataita carroatsa nadejica Norso sacerdotenai shó njaji iraelitanai. ² Pinaitjaotsa pipjerri Aarón itsayaniwa, pada tsaya pjienitanda Norso. Njaji tsaya icatsa lriaconawacan. ³ Caacoatsa pjia naapiya njaji cajikjeperri nacaolre rikjoite, njaji nocadaji noajikje shó najikjewa, nataitá carroatsa nanaitjaca Aarón itsayaniwa njite njenitacana Norso lridejí-carro sacerdote shó. ⁴ Cayoatsa jliaji tsaya nanaitjalri, pada nacodaita nacoda, pamaca iitacada nacóda, pamaca pajlretimaca, tsana neñaji matsia, pamaca tsapewa shodalri, njite pakjaa naawalre ricoda. Icatsa njaji tsayape narsolritsa njenitaca norsowaona. Icatsaotsa njaji pipjerri Aarón irsowalrepe njite njaji lrienipe, nataitá carroatsa nadejica norso sacerdotenai shó. ⁵ Njaji kayekjaperri narsotsa nadejica jérriwai sho, owirro, tawalre jipolreperri, amolreperri njite írraiperri. ⁶ Nanaitjaotsa jliaji nacodaita nacoda owirro shó, tawalrekja jipolreperri shó, amolreperri, írraiperri, njite jérriwai nawanikja matsia. Pada kayekjete watsa jliaji idejirrin. ⁷ Lrirsoatsa yamemacani irrocaope nateda nacó,napapinda watsa lritojiwi nacó lridajitjete. ⁸ Njite jliaji naawalre nacoda, cayo tsakjaotsa nanaitjacani lricayoshotsa jliaji nacodaita nacoda, nanaitjaotsani nacodaita nacoda jipadam, jérriwaikja matsiaperri nawají matsia, owirro shó, tawalrekja jipolreperri shó, amolreperri, írraiperri. ⁹ Pjipaotsa yamada jiipada ónice njite pidanaotsa nanaco neepitana njaji Irael yeenipenai doce perri. ¹⁰ Idana sei neepitana pada jiipada nacó, njite sei tsakja pada nacó, pjerriti nakjoite njite lriocawa piketemdalri nacojle. ¹¹ Pada yajicada idejica patjepi, icatsa jliaji idanalricaotsa njaji iipitanati nanaco njaji jiipada, cayoji irrocada capisho lrinacó, icatsaotsa neepitana njaji Irael yénipe irrocawa nanacó. ¹² Picadaotsa nerrocarrodawa njaji jiipada owirro shó. Irroetaotsa njaji jiipada lritedaita naco jliaji irrocadawa lricodaita naco jliaji tsaya, Dio iwaada carroatsa caidalritsa njaji Irael yenipenaipe. Aarón idejiwatsa lriteda nacó neepitana njaji Iraelnai Dio ipeyajle lriwaada carrotsana. ¹³ Pinaitja nerrocarrodawa owirro shó. ¹⁴ Pinaitjaotsa yamakja cadenakjape piwanikjape matsia neeñadawa, njite pipapiotsana nanaco njaji nerrocawawa. ¹⁵ Pinaitjaotsa pada nacoda nacoda irroa, nerroetaoda nacaite cádanacoatsa coajica. Jliaji inaitjalrini pada yajicada idejica, cacoadadalri lricayoshotsa jliaji irrocadawa nanacó. Pinaitjaotsa owirro shó, tawalrekja jipolreperro shó, amolre perri, írraiperri njite jérriwaikja matsiaperri shó. ¹⁶ Pinaitjaotsani coatro-dalri jiwalripaca pacoaca. Yamawajlé-dalri patsikjica. Ventido centi metro jiwalripaca, njite cayo tsakja lrimacaiteca. ¹⁷ Pirroetaotsa coatrokja jiipada matsiaperri lrinaco. Pakja nacó pirroetaotsa pada jiipada robí, pada topacio, njite pada esmeralda. ¹⁸ Yamakja nacó pirroetaotsa pada jiipada torqueza, pada zafíro, njite pada diamante. ¹⁹ Madalrikja nacó pirroetaotsa pada jiipada jacinto, pada ágata, njite pada amatista. ²⁰ Njite coatrokja nacó pirroetaotsa pada jiipada berilo. pada ónice, njite pada jaspe. Picadaotsa nerroa narropoco lrico owirrodalri. ²¹ Picadaotsa nerroa cayotsa náno capisho neepitana njaji Irael yénipe, pakjatsa naawa neepitana nacó. Nacoanam njaji jiipada narsotsa narsoca lripe ricó pada iipitanati nanakjoite njaji Irael yénipe. ²² Pinaitjaotsa cadenakjape lriiñadawa jliaji nacoda nacoda owirro shó. ²³ Pinaitjaotsa yamapoco jlinacolricoa njite pirroetaotsana natojiwi naco ²⁴ Njite pirroetaotsa njaji yamakja cadenakjape natojiwi naco tsakja jliaji nacoda nacodalri. ²⁵ Pirroetaotsa njaji cadenakjape iwanikja matsia nanaco njaji nerrocawa, njite pirroetenaotsa nanaco njaji nateda nacope lriecoa nacó jliaji nacoda nacódalri. ²⁶ Pinaitjaotsa yamapoco jinacolricoti owirro shó, njite pirroetaotsana natojiwi nacó corricawa toa pacapa lrinaco jliaji nacodaita nacoda, tsoomi lrinomapi ioya pacapa kema nacojle. ²⁷ Pinaitjaotsa yamapoco tsakja jinacolricoti pja njite pjietaotsana natojiwi nacó pacapa kema nacó, lriicao jliaji napapinada naawalre nacó. ²⁸ Pipapiotsa lriñada jipolrekjai shó jlinacolrico nakjoite jlinacolrico yaapiya jliaji nacodaita nacoda irroa, nataitá carroatsa nerrocawa naawalrekja nacó, nañaji jérriwaikja shó. Cayoatsa pinaitjacani wadee jliwacawa jliaji nacoda nacodadalri lrioya jliaji irrocadawa nacodaita nacó. ²⁹ Aarón sheewa cadanacoatsawa lri-ricowajle jliaji njenitanda Dio irso, lrirsotsa lridejica neepitana njaji Irael yénipe lricaolre ricó lrinaco jliaji lricodaita nacoda lriá cádanaco lricaite coajicaotsa, caidalritsaotsa lricadaaca Dio iwaadacana. ³⁰ Picadaotsa Urim njite Turim lrinaco jliaji nacodaita nacóda lriá cádanacoatsa lricaite coajica. a carroatsa nerroa Aarón icaolre nacó lriá cádanacoatsa Dio ipeyajle. Aarón watsa jliaji idejirri njaji lritaita shopa lricaiteca coajica nanacojle njaji inaiki aimadan Iraelnai, ima aca nacaolre Aarón nacó lriá cádanacoa Dio ipeyajle. ³¹ Pinaitjaotsa tsaayana nacodaita nacoda yapjiteda yamacati amolremaca shó pjiomi. ³² Pinaitjaotsa lrinomao njeta cawa njewida. Pinaitjaotsa lrinomakjawa matojledadalri nañajikja taimi wadee tserrencani. Pada yajicada íñaca icatsaotsa jliaji inaitjalrini. ³³ Lrinomakja iwawalricojle, pirsotsa pinaitjaca matojledaperri yamacati jipolremaca shó, amolre perri njite tawim peri irraiperri sho pjiomi lrinomapiana. ³⁴ Pirroetaotsa pada kjemádarro owirrodalri njite lripjeyatsa pada matojledadalri, caimitsa pinaitjaca pjiomi lrinomapi naco jliaji tsaayana. ³⁵ Aarón icadaotsa lrinacoa jliaji tsayana jliewa cádanacoatsa Dio iofacawa lricojle lriá cádanacoatsa lrinaitja sacerdotenai idejicalre, niniotsa kjemaca njaji kjemadarrope jiewa cadanacoa njite lridia cádanaco lrimotoa, njaji inaiki aimadan njemí catsaotsani, wadentja mayamican. ³⁶ Lrinaitjaotsa paita owirroita njite lridanacaotsa lrinacó, nacayosho njaji nerrocarrodape. ''Matsiadalri caotsa wa-Minalri irso.'' ³⁷ Pipapiotsani jipolrekjai sho, lrinaco jliaji tsapewa shone, lripjeyacawajle. ³⁸ Lrirsotsa lrirrocawa Aarón iibonen nacó lriecoa nacó kema, cayoatsa lrideeca namatsicanaa njaji Iraelnai, corridalritsa nanaitja matsia nadee cádanaco ofrenda, niini lrirsotsa lrideeminicatsan lriekjoete nacó Dio itaitá-carro icoadataca njaji ofrenda. ³⁹ Pinaitjaotsa tsaaya jalripadalri jérriwaikjape shó, njite pakja naawalrekja nacoda tsakja jérriwaikjape sho lrinaitjanda jliaji yajicada íñaca matsia. ⁴⁰ Njite narso njaji Aarón yénipe pinaitjaotsa natsayanalre jalripadalripe, naawalrekja nacoda njite pakja caacona carrodana. ⁴¹ Pjietaotsa lritsayaniwa jliaji pipjerri Aarón, njite njaji lrienipe tsakja. Piarroatsa aceite nanacó, pikepitanatacaotsana njite pjienitawatsana Norsowaona, nataitá carroatsa nadejica norso sacerdotenai shó. ⁴² Pinaitjaotsa napjitedao wadee mapjiteda catsa najicawa, lriitaotsana nawalre nakjoite teeco nacotsipa nacojke. ⁴³ Aarón njite njaji lrienipe narsotsa nanacocana njeewa cádanacoatsa nawacaaca carroda lricojle, njite natsoomita cádanacoatsa jliaji altar nadejícarro lri-ricó wajle jliaji mamatsicana caawa. Narsotsa nanaitjaca cayó wadee camatsicanaacana, wadenantja mayamicana. Yácoti kjaidadalrica Aarón irso lrinaitjaoda caidalriwetsa njite njaji lrinakjoite-perri.

¹ Cayoatsa pinaitjaca pjienitá carrona Norsowao nadejí-carro Norso sacerdotenai shó. Pjipaotsa apana toro pamoyoani toa, yaamana carnero mamatsikepetsa, ² petje mewipetsa njite peetje jipandape meewipe tsakja njite ikefietaotsana aceite ricó. Pjipa tsakjaotsa petje jalritaperritsa mewipetsa piñjetanda aceite shó. Pinaitjaotsa njaji petjetape trigope shó nawititaji matsia. ³ Picadaotsana pada lricotsa tseeto pjiomi, pideotsana tseeto fiena picadaa carrona toro icodapi njite njaji carnero. ⁴ Pikepitanataotsa Aarón njite njaji lrienipe iwacaaca carroda ipananoma lrico. Picotsoatsa Aarón njite njaji lrienipe ooni shó. ⁵ Pjipaotsa njaji tsaaya sacerdote carroda Aarón, pjietaotsa lrinacó jliaji tsaaya jalripadalri matsiadalri, tsayana nacodalri jipolremaca, Lricoda nacodalri yapjiteda njite lricoda nacódalri. Pipapi lrinomakja naco joplre kjai maca shó namatsietanda matsia. ⁶ Picadaotsa lribonen jliwida nacó njite jliaji kerrete lrinacodalri jliaji lribonen. ⁷ Pjipaotsa jliaji aceite iñjetashopa njite piarroatsa jliwida nacó, cayoatsa piniwanaca Norsoni. ⁸ Pideotsa njaji lrienipe njite pjietaotsa nanaco natsayanalrewa. ⁹ Pipapiotsa naawalrekja Aarón nacó njite nanaco njaji lrienipe, njite picalrapi njewida nacó nabonewa. Cayotsaotsa pjienitacana sacerdote carrona caidalriwtsa, ima cayoca lricaiteca nanaco jliaji yácoti kjaidadalri. Cayoatsa pjienitaca Aarón njite njaji lrienipe nadejí-carro Norso. ¹⁰ Njite pideotsa jliaji toro iwacaaca carrodawa ipananoma lrico, njite Aarón njite njaji lrienipe nacadaotsa nacaapi toro jiwida nacó. ¹¹ Njite lripananoma lricotsa jliaji iwacaaca carrodawa pinoatsa jliaji toro, Nocapacawa, Njoa IMINALRI. ¹² Njte pjipaotsa toro irrana nakjoite njite piñjetaotsa picapjiwida shó altar itsowa nacó, njite njaji lriitepem piarroatsa altar itajida nacó. ¹³ Njite pjitaotsa pjiomi jliaji írranati lrishapi ricope, lrishopana iiti, njite njaji lritepe nacope, pjiomi njaji lriiti lriwawalricope, njite pimjaitaotsa altar nacó. ¹⁴ Mitsa njaji lriipe, lriyam, lriisha pimjaitaotsana pemajle lrioya jliaji iofacawa lricotoa. Icatsa ofrendaca imatsicanaa ikjaotedalri. ¹⁵ Pjipa tsakjaotsa apana carnero njite Aarón njite njaji lrienipe nacadaotsa nacaapi jliwida nacó. ¹⁶ Pinoatsa jliaji carnero, njite pjipaotsa lrírrana piwitsicá-carro lrinaco jliaji altar. ¹⁷ Picadowaotsa jliaji carnero pawajlepe, picotsoatsa njaji lrishapipe njite njaji lricotsipa, njite pjipaotsana jliwida fie picadaa carroatsa altar nacó. ¹⁸ Niniotsa pimjaita pjiomi jliaji carnero. Icatsa pada ofrenda Norsodalri, Njoa IMINALRI. Matsia watsa lriitan jirracawa Norso. Pada ofrenda imjaitanda tiyee ricó Norso. ¹⁹ Njite pjipaotsa jliaji apana carnero, njite jliaji Aarón njite njaji lrienipe nacadaotsa nacaapi lrinaco. ²⁰ Pinoatsa jliaji carnero, njite pjipaotsa lrírrana nakjoite. Njite pñjetaotsa jlieni nacó atsialriema nacó, njite njeeni naco tsakja njaji lrienipe atsialriemjete tsakja. Njite piñeta tsakjaotsa lricaapi makjewi nacó njite jlipjewida makjewi naco tsakja atsiakriemaperri. Njite njaji lritepem piwitsicaotsa altar yecoa nacó nacoanatsa. ²¹ Pjitaotsa njaji írranati altar nacope njite jliaji aceite naijeta shopa njite piarroatsa pjiomini Aarón nacó, lritsayan nacó, lrienipe nacó njite natsayan nacó. Cayoatsa pjienitaca Aarón Norsó, cayo tsakja njaji lritsayan njite njaji lrienipe njite lrienipe itayan tsakja cayo lricayoshó. ²² Pjipaotsa lriiti jliaji carnero lriitipi nacope, lrishapi ricope, lrishopa nacope, lritepe nacope, pjiomi njaji irrocape nanacó njite lricotsipa atsialriemadalri, ima icacatsa carneroca njoenitsahopa jliaji sacerdote Norsowao. ²³ Njite pjitaotsa tseeto lrikjoite jliaji pideji Dio ipeyajle paita peetje meewidalritsa, paita peetje jipandane trigope njite paita peetje jalritadalritsa meewidalritsa. ²⁴ Picadaotsa pjiomi Aarón irso njite narso njaji lrienipe, pinaotsa nañocotacani ofrenda sho Nopeyajle, njoa IMINALRI. ²⁵ Njite pjipaotsa napjeya pimjaitá carroatsa altar nacó ima ifrendacani imjaitanda. Pomení-dalri caotsa iitan Norso; pada ofrenda inaitjanda tiyé ricó Norso. ²⁶ Pjipaotsa jliaji carnero icóda Aarón iyarrona ioya ikepitanata cádanconi, njite iñocota caotsani Nopeyajle ima ofrendacani Norsódalri, Njoa IMINALRI. Njite icatsaotsa jliaji piyarrowajleca, piñá-carro. ²⁷ Pjienitaotsa Norso lricóda njite lricotsipa jliaji carnero piñocotaji Nopeyajle pikepitanata cádanaco sacerdotewa Aarón njite njaji lrienipe, njite picadaotsa narso naiñjá-carro. ²⁸ Caidalri matsaotsa naaca Aarón irso, lrinakjoite jliaji maaficalri nainolri mana Dio irso matsoa shopana Lriapiya. Icatsa njaji Iraelitanai yaalrica nakitsindata shopa Aarón njite njaji lrienipe. ²⁹ Njaji Aarón itjayani matsiaperri, imatsieta-catsaotsana narso njaji jliapodamperrimi. Nakepitanata cádanacoatsana Norsowaona sacerdote carrona, narsotsa njeetaca jliaji tsaaya nanacoa. ³⁰ Coandalricatsa jimao irsoca jliaji tsaya nanakjoite njaji lrienipe, njite jlewa cadaotsa Noopana lrico, lridejí-carro Norso niiní, lri-ricowajle jliaji njoenitanada Norso, lrirsotsa jlietaca lrinacoa siete jalredaoca. ³¹ Pjipaotsa jliaji carnero ikepitanata shopami njaji sacerdotenai Norsowalre iyaná carroatsani Noyarrowajle ricó. ³² Njiteotsa Aarón njite njaji lrienipe naiñjacaotsani peetje fie nacadalri tseeto lricó lripananoma lrico jliaji nawacaaca carrodawa. ³³ Nañjaotsa njaji iñjaodati nacadaji ofrenda shó naikjaote napíyo shopa naoya namatsicana, matsiaperri carrona njite njenitá-carrona sacerdote carrona. Corriotsa coca pja itaita iñacana ima matsiaperri iñjaopecana. ³⁴ Niini cada pjatoa lriitemi tjewaijle, pirsotsa pimjaitacani. Corrin itaita iñjaca lrinakjoite ima matsiadalri cani. ³⁵ Picadaotsa Aarón njite njaji lrienipe nanaitjá-carro cayotsaji Nocaite capishoi pirso. Siete jalredaoca watsa lriwiaca jliaji inaitjalri shenitá carrona sacerdotewa. ³⁶ Inoatsa apana toro jalredaoca icoam Aarón njite njaji lrienipe imatsicana ikjaote. Njite piio tsakjaotsa apana maaficalri pimatsietá-carro jliaji altar imatsicanaati ioya. Njite piarrowatsa aceite lrinacó pjienitá-carro Norsowaoni. ³⁷ Siete jalredaoca watsa piinoca maaficalri lrinaco jliaji altar imatsicanaai ikjaote, cayoatsa pinaitjaca pjienitá-carroni Norson. Niini, coca cada inota jliaji altar, icaamitsaotsa jlienitaacacawa Dio irso. ³⁸ Jalredaoca icoam, corrin itaita imatadaca, inoatsa Norso yaamana cordero pawalriaperri ipekirrica. ³⁹ Inoatsa apana piyompinacó njite apana dainomajle. ⁴⁰ Lriinaitsa jliaji apana cordero initana iinoca, picadaotsa yamada kilo harina matsiadalri pikewitanda apjeco litro aceite olivope ricó, njite piarroatsa lrinaco ofrenda shó apjeco litro yaicotjeda yánaa. ⁴¹ Njite jiaji apana cordero, pinoatsani dainomajle. Cayotsa pinaitjacani pinaitja capisho jliaji apana piyompinaco, jlia minitsa harina, njite jaico tjedaa yánaa. Ofrenda imjaitanda tiyé ricó Norsoni, pomení-perri iitan Norsó. ⁴² Caidalritsaotsa jalredaoca icoam inaitja caotsa jliaji ofrenda imjaitanda Norso, cayo tsakjaotsa nanaitjacaotsa njaji walricomanai. Awatsa inaitjani pjewacawa lricó lrirso jliaji iwacaaca carrodawa lrico, Nopeyajle, njoa IMINALRI, noketaacalriotsa yaapiya caacó-carro Njoa irsó. ⁴³ Icatsaotsa nirse Noketaacacawa naapiya njaji iraelitanai, lri-ricowajle jliaji Njoenitanda Norsowao Nomatsia ikjaote. ⁴⁴ Njoenitaca Norsowao jliaji Noyarrowajle njite jliaji altar naofá-carro noinai fawacatsa. Njoenita tsakja Norsowao Aarón njite njaji lrienipe nadejí-carro Norso sacerdotenai shó. ⁴⁵ Nofawatsa napecolrico njaji iraelitanai njite na-Diote caotsa Njoa. ⁴⁶ Najíwatsa na-MINALRI Dioca Njoa, jliaji jitalrina Egipto lrikjoite, notaitá-carro Nofaca napecolrico. Icatsa Njoa IMINALRI Dio.

¹ Inaitjaotsa apana altar imjaita carroatsa lrinaco incienso. Inaitjaotsani jaico acacia shó. ² Inaitjaotsani coatro dalri yécoa. Yamaita pacaapi jliwalripaca, yamaita pacaapi tsakja lrimacaiteca njite coatro pacaapi lriyenonca. Njite njaji lritsowa apetsaotsa irroa lrinaco ³ Iñjetaotsa owirro matsiadalri shó pjiomi lridaki, njite lriipana, lritsowa tsacka. Njite inaitjaotsa lridanao owirro shó. ⁴ Inaitjaotsa lrinomapi yapjite yamemape yamapoco jlinacojlico owirro shó ipapi carrona. Njaji jlinacolrico, sheta carrona jaico iwakje carro idee cadanacon. ⁵ Inaitjaotsa njaji iwakje carrona jaico acacia shó njite iñjetaotsa nanaco owirro shó. ⁶ Icadaotsa lriemawa jliaji altar imjaitacarrona incienso lricodapi jliaji patowana yacoti kjaidaperri yarroda, lridanam jliaji yamacati idanatacadana. Lripanaita icao jliaji idanataita jliaji patowana yacoti kjaidaperri yarroda, naarrocawa maaficalri írrana nacó, Noketacalriotsa iinai ninio. ⁷ Aarón irsotsaotsa imjaitaca incienso pomeniperri piyompinaco icoam. Lrimjaitaotsana lrimatsieta cádanaco lámpara. ⁸ Aarón iyata cádanaco lámpara dainomajle, icatsa lrimjaitaca tsenakja incienso lrinaco jliaji altar. Caidalritsa irsotsa imjaitacana nopjeyajle, Njoa IMINALRI. Caidalritsaotsa nanaitjaca njaji walricomanai pinakjoiteperri, njaji inaiki aimadan. ⁹ Corriotsa imjaita carroca padatairri incienso lrinaco jliaji imjaita carrona incienso, corrin tsakja coadalrica ofrenda, corrin tsakja ofrenda comaana naco. Márrotsa lrinaco coadalrica irraoda lrinaco icadanda ofrenda shó. ¹⁰ Aarón irsotsa iinoca maaficalri namatsicana ikjaote njaji inaiki lrinaco jliaji altar inciensona papiátsa pawalria icoami. Lrinaitjaotsa cayó nasho njaji írranati nanakjoite njaji maaficalri nacadaji ofrenda shó namatsicanaa ikjaote. Caidalritsaotsa nanaitjaca njaji sacerdotenai iapiyawalre walricomanai pinakjoiteperri, njaji inaiki aimadan. Jliaji ofrenda inaijalri, irsotsa inaitjaca Norsowalreo catsa, Njoa IMINALRI.'' ¹¹ Dio icaite Moise irso: ¹² ''Piniwetaca icoam namaimaca njaji iraelitanai, narsotsa nacaoñacacawa nanacowaca nacoamitsa njaji inaiki Dio irso. Wadee maatsidalri jiwacawa nanaco naniweta cayaminana. ¹³ Pjiomi njaji naniwetaji narsotsa nacaoñaca cinco gramo palraata, nawinda matsia jimiñaca cayoji njamiñata capisho Dio iipana lrico, pamoyoa die gramo irso. Jliaji cinco gramo, icatsa ofrenda Noyadaoca, Njoa IMINALRI. ¹⁴ Iniwetaotsa njaji irsocapena ventewalria napekirrica nacó ipeyajle, njite pjiomi njaji narsotsa naaca Norso, njaji ofrenda nocaiterri inaco. ¹⁵ Njaji inaiki ná cádanaco Norso jliaji ofrenda nacoadao, njaji cananíperri naawatsa cinco gramo palraata, njite njaji kjenaperritsa tsopjatsa naaca. ¹⁶ Jipaotsa njaji palraata nanda njaji iraelitanai nacoada nacowaacatsa, njite icaotsa idejí cádanaco jliaji panti iwacaaca carroda lrico. Icatsa pada Wa-Minalri iwada carrodao coanpiaca nacaoñacacawa njaji lrinaikite aimadan.'' ¹⁷ Wa-Minalri iaco Moise irso: ¹⁸ "Pirsotsa pinaitjaca apana ooni yarrodao broncepe shó njite lriema carronao bronce shó tsakja, icada carrodao ooni icotsoaca carrodao. Picadaotsa lriemao iwacaaca carroda lrico ioyawaaca lriapiya jliaji altar, njite pikjantaotsan ooni shó. ¹⁹ Aarón njite njaji lrienipe narsotsa nacotsoca nacaapi njite njaipa tsakja lri-ricoda. ²⁰ Shewa cádanacoa iwacaaca carroda lrico o itsoomita cádanaco jliaji altar idejí-carro Norso imjaitá-carro ofrenda, irsotsa icotsocacawa ooni shó wadee mayamica shá. ²¹ Narsotsa nacotsoca njaipa njite nacaapi wadee mayamicana. Pada yaacoti kjaidadalrica Aarón irso caidalriwenatsa njite narso njaji jliapodamperri lrinakjoite-perri.'' ²² Wa-Minalri iaco Moise irso: ²³ ''Piomaotsa njaji pomeniperri: cinco mil quiniento gramo icoa mirra yána, do mil seteciento cincoenta gramo icoa jaico idope pomeniperri njite potiyadalri, do mil seteciento cincoenta gramo icoa tidoapa potiyaperri njite matsiaperri iitan, ²⁴ cinco mil quiniento gramo icoa casiape, nawinda matsia jimiñaca cayoji njamiñata capisho Dio iipana lrico, njite wadeepe coatro litro aceite njetanda jaico oliva ioya. ²⁵ Pikewitaotsa njaji piniwalri cayoji lrinaitja capisho jliaji inaitjacada pomeniajai, pinaitjá carroatsa panja aceite matsiadalri pjienitanda Norso.'' ²⁶ Piarroatsa lrisho jliaji aceite jliaji panti iwacaacalri niinio, cayo tsakja jliaji patowana yacoti kjaidaperri iarrona, ²⁷ mesa tsakja, pjiomi njaji idejishopa, jliaji lámpara aimadalri jitaco njite pjiomi njaji lrinacoperri, jlia tsakja jliaji altar imjaita carrona incienso, ²⁸ jlia tsakja jliaji altar namjaita carrona ofrenda njite pjiomi lrinacoperri, jlia tsakja jliaji ooni yarroda njite jliaji lriema carrona. ²⁹ Cayoatsa shenetacana matsia carroatsa Norsowaona. Coca cadaotsa inótana matsiadalri tsakjaotsan nainaini. ³⁰ Piarroatsa aarón nacó njite nanacó tsakja njaji lrienipe, njite pjienitacana teecojle nadejícarro norso sacerdotenai shó norsoná. ³¹ Icaiteotsa narso njaji iraelitanai cayoji: Jliaji aceite-ca jliaji njoenitandaca wa-Minalri irso, caidalri catsaotsa nanaitjaca njaji walricomanai njaji pinakjoite-perri aimadan ³² Maijeta tsaotsa lrisho inaiki idaki nacó, corrin tsakjaotsa itaita inaitjaca padao lricayosho nasho minitsa njaji nanaitsashopa jliaji aceite, ima Dio shenitandacana lrirsowaona, njite iwaopia Dio shenitandaca lrirsowao. ³³ Cocacadaotsa inaitja pomeniajai lricayoshodalri jliaji, o coca cadaa inñjeta pada idada nacó, irsotsa shenitaca jliaji inaiki ioyawani teecojle ikitsiñape ioya.'' ³⁴ Dio icaite Moise irso: ''Pjitaotsa pomeniperri nanakjoite njaji jaoco, estacte, jaico catsotani pomenidalri iitan njite gálbano tsakja, pacoacaotsa namaimaca njaji pomeniperri, potiyaperri tsakja njite pikewitaotsana incienso jliwacadalri shó. ³⁵ Pinaitjaotsani incienso shó, piomaotsa pada yajicada inaitjaca pomeniajaipe lrinaitjá carroni, lrimatsietanda yokirra shó, njite picadaotsani teecojletsan. ³⁶ Pitodaotsa matsiana. Njite picadaotsani lripeyajle jliaji patowana yaacoti kjaidaperri iarrona ipeyajle, jliaji icadanda lri-ricoda jliaji panti iwacaacacawa lricó, Nocapaaca cawaotsa piapiya niinio. Picadaotsa matsiadalrica jliaji pjienitanda Norsowao. ³⁷ Jliaotsa jliaji incienso inaitjalri, corriotsa inaitjá carroca jlipepe iyadawa nashotsa njaji inaitjashopa jliaji, ima njoenitandaca Norsowaona. ³⁸ Coca cadaotsa inaitja jlipepe lrirsowao lripomenitaca shopawa, irsotsa shenitaca imaimaca ioya.''

¹ Caaco jliaji IMINALRITI Moise irso: ² ''Nowanaca Bezalel, Uri irrí, Ir irrí, Judá poco inakjoité-dalri. ³ Noaca Bezalel irso Nocaolrini Nakjoite, cajikjé carroni, kjeyashopa lriajica lrirsó-carro yajikjeti lridí-carro pjiomitsa carrapina idejicalre, ⁴ lridejícarro nacapacanaa nacó njaji najicalre, lridejí-carro tsaja owirrodape shó, palraatape shó njite bronce shó. ⁵ Lriyoá-carro njite lriroetá-carro jiioada, lrinaitjá-carró nacapacanao jaoco sho, njite lridejí-carro pjiomi coca catsa. ⁶ Njite Noniwana tsakja Aholiab, Ahisamac irri, Dan poco inakjoite-dalri. Nocadaa iyecati narso nacaolre pjiomi njaji cayekjaperri nataitá carroatsa nadejica pjiomi jliaji Nonaalri nanaitjaca. ⁷ Nanaitjaotsa jliaji panti nawacaaca carrodawa, patowa yácoto kjaidaperri yarroda, nainocawa inaco maaficalri namatsicana ikjaote patowa icaodalri, njite pjiomi njaji lriitada jliaji nawacaaca carrodawa: ⁸ mesa njite njaji nadejishopa lrinacó, lampara jirricona njite njaji lrinacoperri, ⁹ jliaji altar incienso icaonada, altar namjaitacawa ofrenda njite pjiomi njaji lricaonaperri, ooi yaarona njite lriofacawa nacó tsakja. ¹⁰ Njaa tsakja njaji tsaya neñaji matsia: tsaya njenitaji sacerdote Aarón irso njite lrienipe iyape, Njoenitaji Norso nadejí-carro sacerdote shó. ¹¹ Jlia tsakja jliaji aceite nañjeta shopa nanacó njite jliaji incienso joiwí-dalri iitan Dio ipana lrico icaonada. Njaji cayecaperri nanaitjaotsa pjiomi njaji nocaiterri Nanaijacaotsa cayotsaji Nocaite capishó. ¹² Caaco JLIAJI IMINALRITI Moise irsó: ¹³ ''Picaiteotsa njaji iraelitanai narso catsa Nawafetacawa Sabado lrico ima yácoti kjaidadalrican, ima icacatsa pada iwadashopacani panaya nakjoite njite njaji walricomanai, yají carroatsa IMINALRICA jliaji shenitalri shá Lrirsowawa. ¹⁴ Niini irsotsa shepaca iwafetacawa Sabado lricó. Irsotsa yajica shenitandaca irsowawani, yaacawa matsiadalri Dio irso. Coca cada imacoadataca icamitsa lrirsotsa mayamicani. Pjiomi njaji corri-perri iwafetawa jliadaa nacó njite icaamitsa nadedica corrinatsa Duo iyapecana. ¹⁵ Sei jalredaoca watsa idejica, mitsa siete jalredaoca nacó icaamitsa iwafetacawa, padaa jalredaoca, jalredaoca shenitanda Dio irso, yaacarro lrirso matsiadalri. Coca cada ideji jliadaa icamitsa mayamicani. ¹⁶ Niniotsa njaji iraelitanai, narsotsaotsa Nawefetacawa Sabado lrico. Yácoti kjaidadalrica narso narsocawa nanaitjacani caidalriwetsa, njaji panayaperri njite njaji walricomanai. ¹⁷ JLiaji nawafetacawa Sabado lricó, pada najishopa njaji iraelitanai Dio inaitja piaca njaji eenolricojle-perri njite jalredaoca lricoperri sei jalredoca nacó, njite siete jalredaoca nacó lriwayaketa lridejicalre niini lriwafetacawa.'' ¹⁸ Yaami cayanina caacoca Dio Moise irso Jiipana Sinai nacójle, Dio yaa Moise irso yamaita jipadaita lridanaji inaco lricapjiwida sho catsa njaji yácoti kjaidaperri, lrinaitjashopa naapiya yácoti.

¹ Nacapa cádanaco corrica Moise idia iorroco kjeeya naikjaolre njaji inaiki aimadan jiipana nakjoite, ikena naacaw Aarón ikjaolre, naaco lrirso: ''Warsena pino, pinaitjá-carro warso wadiotewa lriacarro wapjeya, ima jliaji atsia Moise, jliaji jitacada fá Egipto jipaite rikjoite, corrinatsa wanjí kjerrecani.'' ² Njite Aarón iaco narso: ''Jita napatjepi narsolri njaji ininai, iitonaipe, yenipenai njite yaawatsa norsona.'' ³ Pjiomi njaji inaiki njeta naoyao njentada owirrope narsompe njeeni nacó, njite nadeena Aarón irso. ⁴ Jlipa naoyana njite lricodoetana tiyé ricó njite lriarro pada lricó vaken jinaapjia ricó. Njite njaji inaiki aimadan iaco: ''Shá Iraelnai, icatsa idioteca jliaji jitalri shá Egipto jipaite rikjoite.'' ⁵ Njite Aarón icapa cadanaco nanaitjalri njaji inaiki aimadan, lrinaitja apana altar lrirsowalre jliaji vaacana njite lrinaitja pada yácoti, lriaco cayoji: ''Tjewaotsa wanaitja wacatiima taaca-carroa wa-Minalri nacó.'' ⁶ Njite njaji inaiki aimadan nacafiawa tjewaijle piyompinaco toa njite nadee ofrenda imaodacakjeti naco. Ikena naofá naiñja, nairra tsakja, njite njenico neemao narrapá-carro najotaacá-carro macadatsa. ⁷ Njite JLIAJI IMINALRITI icaite Moise irso: ''Warsena pidiawa kjeyawa, oma njaji inaiki aimadan, njajji pjitaji Egipto jipaite rikjoite, oopi namatsicaacawa. ⁸ Kjeya namacaca jliaji Nonaalri nanaitjaca. Oopi nanaitja apana vaken njite naino maaficalri naacarro lrirso matsiadalri. Njite nacaite cayoji: ''Irael, icatsa idioteca jliaji jitatalri shá Egipto jipaite rikjoite.'' ⁹ Njite Dio icaite Moise irso: ''Nocapa narso njaji inaiki aimadan. Picapa coji-perricana, paana inaiki aimadan padalreperrimi. ¹⁰ Corrin Nooma piyamitaca Njoa naoya. Noirroa jiwacawa nakjoete matsinaa pekirridalri, nowayacaketá carrona. Pinakjoite nakjaotsa Nonaitjaawatsa pacoa yacaalre macacoe.'' ¹¹ Mitsa Moise iomatsa imerroataca jliaji lri-MINALRI Dio. Lriaco lrirso: ''No-Minalri, ¿Coada kerroa pjia nakjoete njaji Pinaikite aimadan, njaji pjitaji Egipto jipaite rikjoite pjiida manaitja canaadalri shó. ¹² Piwayaketa cadaa njaji Pinaikite aimadan, nacaiteotsa pinaco njaji egipcionai: Jlitana Egipto lrikjoite lriinó carrona awacada nacojle, lriwayaketá carrona jalredaoca ioyana. Jena kerroaca Pjia nakjoete njaji Pinaikite aimadan, pitecojleta piwaopiakje piomacawa piinoca njaji pinaikite aimadan. ¹³ Piwaada njaji yácoti Picaiteji pirsoperri Abraham, Issac njite Jacob irso , njaji picaiteji yácoti ajadalri sho, cayocaotsa neenipe imaimaca jiwirsida eeno yecoa nacope shó, njite picaite piacaotsa nanakjoite perri irso pjiomi jliaji jiipai picaiteji narso. Nayada caotsani caidalriwetsa.'' ¹⁴ Niini corrinatsa Dio jirrapiteetaca njaji Lrinaikite aimadan cayoji Lricaite capisho nanacó. ¹⁵ Njite Moise idia yorrocoa jiipana nakjoite, lridee njaji yamaita nerrocawa njaji yácoti kjaidaperri. Nadana nanaco yamemape, lriekjoete njite lridajitjete. ¹⁶ Dio piatsa inaitja njaji lridanaope inaco, njite jliá minitsa idana njaji yácoti lrinacoperri. ¹⁷ Josué jimi cádanaco coajica nawanetaacawa njaji inaiki aimadan, lriaco Moise irso: ''Pjemica paa capishoa oowi rico anji waofacawa lricó.'' ¹⁸ Mitsa Moise iaco lrirso: ''Corritsa njomica nacantaca njama capoa nacoema, corrin tsakja inonaa coapana, icaamitsa njomirri nacantaca. ¹⁹ Moise itsomita jliaji naofacawa toa, njite lricapa jliaji vaken nanaitjanda njite narrapajica njaji inaiki aimadan. Kerroa Moise pekirritsa. Ikena lriocaca njewao lricaapi rikjoite njaji yamaitade yácoti kjaidaperri irrocawao llripocoda nacó jliaji jiipana. ²⁰ Jlipa jliaji vaken nanaitjanda njaji inaiki aimadan, lrimjaitani njite lriwititani matsia lritaipenatsa, njite lriarro ooni ricojle. Ikena lrica nairraoni njaji Iraelnai. ²¹ Njite Moise itatja jimio Aarón iinai, lriraco: ¿Cocao namatsicanaa pirso njaji inaiki aimadan, ima pimaca nanaitjaca namatsicanawa pekirridalri?'' ²² mNjite Aarón shepani: ''Merroatsa pjia nokjoete nominalri, piajintsa coanperrica inaikica njaji, ipeyocapeca inaitjaca maatsirri. ²³ Naaco norso: ''Pinaitjá warso wadiotewa lriacarro wapjeyajle, ima jliaji atsia Moise, jliaji jitacada fá Egipto jipaite rikjoite, corrinatsa wanjí a kjerrecani.'' ²⁴ Niini noaco narso, ''coca cadaa irso owirro nanacoperri jlitaca lrioyaoni.'' Naa norso njaji owirro njite nocodoetani tiyee ricó, njitena lrimotoa jliaji vaken.'' ²⁵ Moise icapa corriketsa pataita njaji inaiki, Corri piaca Aarón itaita yemaca nakjoete, njite naoma necaaca lrikjoete njaji lricoema shoperritsa. ²⁶ Njite Moise yemawa pjewacawa lrirso jliaji naofacawa toa, lriaco narso: ''Pjiomi njaji iomacapetoa jliaji WAMINALRI, íno noikjaolre. Njite pjiomi njaji Levitanai naaca Moise ikjaolre. ²⁷ Njite lriaco narso: Cayo lricaiteca jliaji wa-Minalri, na Diote njaji Iraelnai: Icoanantsa shaa atsianai, jita imatsetani njite yaawa napanaitepe lrico nacoana njaji ikitsiñape, nakitsiñapeji, nacodapoperri ikjaolre iinocarrfona matseeta shó.'' ²⁸ Njaji Levitanai nanaitja cayoji Moise inaa capishona. Naino tre mil inaiki jliadaa. ²⁹ Njite Moise iaco narso njaji Levitanai: ''Idejicaotsa WAMINALRI irso panaya, ima iaca nakjoete njaji yénipe, ikitsiñape tsakja, niniotsaDio iáwatsa irso matsiadalri lrikjaote.'' ³⁰ Tjewaijlena Moise iaco narso njaji inaiki aimadan: ''Opi inaitja imatsicanao pekirridalri. Panayaotsa njorracawa wa-Minalri iderse, wadetsantja jliitaca ioya jliaji imatsicanaati inaitjalri.'' ³¹ Moise iawa Dio ikjaolre, njite lriaco lrirso: ''No-Minalri, njaji inaiki aimadan oopi nanaitja namatsicanai pekirridalri, ima nanaitjaca apana vaken owirrona. ³² Niini panaya, picadaa jliyapaca pioya namatsicanaa; corri cadaa pinaitja, pjiata noipitana lrioya jliaji paperra pidanalri.'' ³³ JLIAJI IMINALRITI iaco Moise irso: ''Pjiomi njaji inaiki inaitjalri imatsicanao nokjoete, njoata caotsana nopaperran ioya. ³⁴ Panaya pidienawa, pidee njaji nonaikite lrinacojle jliaji nocaiterri pirso, Picapaotsa noajele iáwatsa pipjeya. Coancaojli cadaotsa njorrapiteetana, namatsicanaa ikjaote watsa nonaitja cayona.'' ³⁵ Niini Dio imeenaca naikjaolre pada maatsidalri lrikjaote jliaji vaken natatjalri, aarón inaitjalri narsó.

¹ JLIAJI IMINALRITI iaco Moise irso: ''Warsa pjena piawa naapiya njai inaiki pjitaji Egipto jipaite lrikjoite. Yaawa lrinacojle jliaji jiipai nocaiterri pia yácoti ajádalri sho Abraham irso, Isaac irso njite Jacob, nocaite cádanaco narsó: ''Nocaite cádanaco Noacaotsani narsi njaji pinakjoité-perri.'' ² Nomeenacaotsa Noajeleni ipeyajle, njite jlitacaotsa njepaite ioya njaji cananeonai, amorreonai, hititanai, ferezeonai, heveonai njite njaji jeboseonai. ³ Yaawatsa lrinacojle jliaji jiipai matsiadalri, matsiacawa pataoñaca vaaca, njite capanianacawa tsakja. Corriotsa Noácarroca iinai, ima tarraperrica jiwida lricoca shá. Noino daotsa shaa inipolricó. ⁴ Njaji inaiki njemi cádanaco njaji yácoti inonaperri, inonaana njite corrin njeeta nanacoa patjepi. ⁵ Dio iaco pia Moise irso: ''Picaite narso njaji iraelitanai: ''Tarrá-perrica jiwidalrico-ca sha. Noá cadantja ínai caidatsaji, Noinontja shá. Niini panaya jita yoyawa ipatjepi nowaopia- carro coajicaotsa nonaitja yaapiya.'' ⁶ Niini njaji iraelitanai corrin njeeta nanaco patjepoi shoperri Jiipana Horeb nakjoite. ⁷ Moise inaitja pada pana pantita pemajle lrioya jliaji naofacawa, teeco lrioya. Lricadaa lriipitanao, panti nawacaaca carrodao. Pjiomi njaji itatjcape Dio iinai coca catsa naawa lri-ricoda jliaji pantipoco, teecodalri naoya. ⁸ Moise yaa cádanacoa lri-ricoda jliaji pantiita, pjiomi njaji inaiki na neemawa pantita ipananoma lricojle, nacapa Moise irso a kjerreca jlienawa pantita lricó. ⁹ Moise sheewa cadanaco manawa lri-ricoda jliaji pantida, pada iyadaoca jalripadalri yorroco manawa pantida ipananoma iicao, njite caacoca Dio Moise iapiya. ¹⁰ Njite njaji inaiki nacapa cádanaco mana jliaji iyadaoca pantida ipananoma iicao, njenico manawa naacarro matsiadalri lrirso nacoanaa. ¹¹ Caaco cádanaco mana Dio Moise yaapiya nacapaaca manawa nakjoete waaca, cayoji caaco capisho pada lrikitsindaji yaapiya. Njite Moise idia manawa naofacawa lrico toa, Mitsa jliaji lrirsodalri Josué, Nun irri, pada yempetitoa, lriofa manawa lri-ricoda jliaji pantida. ¹² Moise iaco Dio irso: ''Pjimi norso, cayo pia picaiteca norso: ''Pidee njaji inaiki piinaiwa,'' Mitsa corrin picaite njoa cocacaotsa pimeenaca yaawa noinai. Njite picaite, ''Noajintsa pjia matsia, matsia Nocapaca pjia.'' ¹³ Matsia cadaa picapaca njoá, picañjata nocapa Piapowa notaitá-carro pja noajica Pjia njite matsia-carro minitsa picapaca norso. Njite piwaopia pinaikite aimadan-ca njaji. ¹⁴ Njite Dio sheepani: ''Njoá tsaotsa yaawa piinai, njite Nocadaotsa piwafetá-carro.'' ¹⁵ Noise iaco Dio irso: ''Corri cadatsa Pjiatsa yaawa wainai, mjetatsa fa ajaiteji. ¹⁶ Ima corri cadaa pjiatsa wainai, ¿coajintja noají njite njaji pinaikite aimadan yaji watsa matsia catsa fa pipeyajle? Pino cadatsa wainai niniotsa wataita teecojleca fáa naoya njaji apaana inaiki jalredaoca lricoperri.'' ¹⁷ Wa-MInalri iaco Moise irso: ''Nonaitjeniotsa jliaji pitatjalri noinai, matsia capoa nocapaca pirso, njite Noají capoa matsia pjia.'' ¹⁸ Njite Moise iaco Lrirso: ''Pinaitja matsiacalri picañjata nocapa pimatsiaca melremelredalri.'' ¹⁹ JLIAJI IMINALRITI iaco: ''Nocadaotsa jliyapawa pipeyajle jliaji kjena shopa nocapaca shá, njite Nocaiteotsa jimi noipitana ''IMINALRITI'' pipeyajle. Kjenaa watsa Nocapaca lrirso jliaji Nomanda nocapaca kjenaa irso, corriotsa nonaitjá-carroca maatsi lrirso jliaji kjenaadalritsa Nocapaca irso. ²⁰ Mitsa wa-Minalri iaco lrirso: ''Corriotsa picapá carroca noecoa, corritsa cafí carroca jliaji icapacada Njoa.'' ²¹ Lriaco pja JLIAJI IMINALRITI: ''Alriji apafe Nocodapi; piemaotsa lrinaco jliaji Jiipada macádalri. ²² Jliyapa cadana toatsa jliaji Nomatsiaca Melremelredalri, Nocadaotsa pjia jiipada ipatakja lricó njite Noitacaotsa piicao Nocaapi shó a kjerreca Njoyapawa. ²³ Njite Njotaotsa nocaapi pioya, niniotsa picapa nodajite, mitsa corriotsa picapa Noecoa.''

¹ JLIAJI IMINALRITI iaco Moise irso: ''Pimatsieta yamaita jiipada nacayosho-perritsa njaji paana pia. Nodaná carroatsa nanaco njaji yácoti nodanaji pia nanaco njaaca paana pia, njaji pimakjalri. ² Pimatsietaacawa piyompinaco pirrá carroatsa lrinaco jliaji Jiipana Sinai, piema carroatsa Nopeyajle Jiipana ipolricó. ³ Madeetsa piinai pikitsindao. Macadatsa náno njaji inaiki jiipana icodapi. Corrin tsakjaotsa nataita nadeeca naapirra naiñjá-carro jiipana ikjoemjete.'' ⁴ Moise imatsieta yamaita jiipada nacayoshotsa njaji paana pia, njite lricafiawa piyompinaco toa jlirrá carroa Jiipana Sinai nacó, cayotsaji Dio inaa capisho lrinaitjaca. Moise idee njaji jiipada lricaapi ricó. ⁵ Dio iorrocowa iyadaoca nacó njite lriemawa Moise icodapi njite lricaite lrirso lriipitana cayoji: ⁶ Jliyapawa lricoemjete, lriaco ''JLIAJI IMINALRITI, JLIAJI IMINALRITI jiyapawa lricoemjete njite jliemata cayoji: ''IMINALRITI, IMINALRITI, jliaji Dio kjenaitetsa icapaca njite merroadalritsa, merroadalritsa kjeya njite pakjandalri ipeyokjeti, corridalritsa itecojleta yaaco, ⁷ corrin Lrimaodaca lriacoam ioya naoya njaji walricomanai caidalriwetsa, jliyapeta naoya namatsicana. Mitsa corritsa Lrimaodacaca namatsicana ioya njaji camatsicanaaperri. Lricadaotsa njerrapoitaca njaji neenipe njanirri imatsicanaa ikjaote, njite neenipe yénipe nacó, njaji madalricoma njite njaji coatro coma tsakja.'' ⁸ Kjeya Moise iorrocoetaca jliwida jiipai nacojle lriá-carro lrirso matsiadalri. ⁹ Njite lriaco: ''Matsia cadaa picapaca norso, pjia No-Minalri, pinaitja matsiacalri pino wainai. Ajádalri tarraperrica jiwida njaji inaiki aimadan. Pjiyapeta waoya pjiomi wamatsicanaa, njite picoadata piyarropé-carro fa.'' ¹⁰ JLIAJI IMINALRITI iaco lrirso: ''Picapakje, icaminaotsa Nonaitjaca pada yácoti piapiya. Nonaitjaotsa matsiadalri macapa canadalri napeyajle njaji inaiki aimadan, corridalritsa nacapa njaji inaiki jalredaoca lricoperri.Pjiomi njaji inaiki inakjoite-perri icapaotssa jliaji Nonaitjalriotsa, ima cafainadalritsa jliaji Nonaitalri iapiya. ¹¹ Pjiepaotsa jliaji Nonaalri pinaitjaca panaya. Kjeyenatsa Nopeecó-carro ipeya njaji amorreonai, cananeonai, hititanai, ferezeonai, heveonai, njite jeboseonai. ¹² Icapatsa ioyawa wadeotsa inaitjaca yaacoti naapiya njaji inaiki jiyapalriotsa niiniwa, wadeotsa nama kenakja inaitjaca imatsicanaawa naofa capoa iinai. ¹³ Mitsa, ipeecoatsa njaji altar narsolri, njite njaji jiipada caconaperri narso, ipeeco tsakjaotsa njaji Asera iemacarrona. ¹⁴ Corrin itaita iaca matsiadalri pada tairri dio irso, ima Njoá, IMINALRI, ''Cakerriakjé'' dalri iipitana, cakerriakje-dalrica Njoa. ¹⁵ Niini icapatsa ioyawa wadeotsa inaitjaca yaacoti naapiya njaji inaiki jalredaoca lricoperri, ima cayocana nacayosho njaji cawilreperrim narso njaji nadiote aimadan njite nainoacawa mayami nadiote irso. Njitenantja nainaica shá iñjá carro-nainai lrinakjoite jliaji nainonda nadiote irso, ¹⁶ njite jita tsakjantja irrinowa naitonaipe njite cawilre tsakjantja njaji itonaipe nadiote irso, njite nama tsakja cawilreca njaji yénipe nadiote irso aimadan. ¹⁷ Manaitjatsa irsowawa idiotewa inaitjaji icodoetanda tsipalra shó. ¹⁸ Corriotsa imaodacá carroca lrioya jliaji Icatimataaca-cawa lrioya jliaji iñjacawa Petje Meewi-perritsa. Cayotsas nonaa capisho pjia, siete jalredaoca watsa iñjaca peetje mewiperitsa jlinaana lricó, keerri Abib nacó, ima keerri Abib naco piaca imotowa Egipto lrikjoite. ¹⁹ Pjiomi njaji jiicolriotsa iinaita Noyaapecana, coshoca njaji vaaca, buey njite oveja tsakja. ²⁰ Njite jliaji borro yénipe initacana imotocawa irsotsa iwentacani apana cordero shó, mitsa corri cadaa icaoña lricoadawa, iesotsa ipokjontaca lrinorsiapji. Irsotsa icaoñaca nanaco njaji yénipe pjerritinaipe. Corrin coca itaita ínoca Noderse lricaapi yápiyatsa. ²¹ Sei jalredaoca watsa ideji, Mitsa iwafetawatsa siete jalredaoca nacó. Imoyeta cádanaco jiipai o imiwa cádanaco ipania, irsotsa iwafetacawa. ²² Irsotssa iwadaca jliaji Icatiimatacawa inita cádanaco iniwaca ipania trigo, njite iwayaketa cádanacoatsa iniwaca ipania pawalria iwayaca cádanaco. ²³ Pjiomi njaji atsianai, narsotsa nánoca Nopeyajle, Njoa IMINALRI, na-Diote njaji Iraelnai, madalripia watsa pawalria nacó. ²⁴ Nodewatsa njaji inaiki aimadan pacoa nacope pipeyajle njite Nomacaiteca jipaite jinaana. Corriotsa coca ioma sheewaca jipaite ricó ino cádanacoatsa Noikjaolre, Njoa IMINALRI Dio, Madalri pia watsa inaitjaca pawalria nacó. ²⁵ Corrin itaita iaca Norso neerrana naco njaji maaficalri inoji Norso mojloi fie, Corrin itaita icadaaca lritem jliaji ipeti iñjanda Iwacaaca carroa lrico Pascoa lricó tewaijle icaona. ²⁶ Ideotsa Noopana lricojle nanakjoite njaji ipanai iinaca matsiaperri initaji iniwaca. Corrin itaita iyanaca cabra yenipe jlidoa inia nacotsa.'' ²⁷ JLIAJI IMINALRITI iaco Moiose irso: ''Pidana njaji yácoti, ima Njoatsa icaite njaji yácaoti ajádalri shó Nocaiterri, njite Nonaitjaca pada yácoti piapiya njite Irael yapiya tsakja.'' ²⁸ Moise iofaa Dio iinai nirse coarenta jalredaoca njite coarenta deepi; corrin tsoo lriñjaca corrin tsakja lrírra ooni. Lridana nanaco njaji jipadaita njaji yácoti nanaitjashopa yácoti, njaji die yácoti Panaitjaope. ²⁹ Moise idia cádanaco iorrocoa Jiipana Sinai nakjoite naapiya njaji yamaitade nerrocawa njaji yácoti nanaitjashopa yácoti lricaapi ricó, corrin lrianjí cacanalreca lriecoa nacó caaco cayami Dio yapiya. ³⁰ Aarón njite njaji Iraelitanai nacapa cádanaco Moise, cacanalreca lriekjoa nacó, corrin naoma natsomitacani nafio capoa lriiwana. ³¹ Mitsa Moise iwana Aarón njite njaji iraelitanai jiwidaapo naacarro lrikjaolre. Njitew caacoca Moise napiya. ³² Njitena pjiomi njaji Iraelnai aimadan naawa Moise iderse, njite lricaite njemi njaji yácoti nanaitjaope Dio icadaji Jiipana Sinai nacó. ³³ Yaami cayami caacoca Moise naapiya, lrirroeta pamaca yamacati lriecoa nacó. ³⁴ Moise iaca icoam Dio ipeyajle caacó-carro Lriapiya, jlita mana lrioyao jliaji yamacati lriecoa nacoda akjerreca lrimoto njitewa. Lrimoto cádanaco lricaite narso njaji iraelitanai cocaca Dio inaa lricaiteca narso. ³⁵ Iraelitanai icapa cádanaco melremelreca Moise iecoa nacó, lriita mana lriecoa yamacati shó tsenakja akjerreca lridia jliewawa caacócarro Dio yaapiya tsenakja.

¹ Moise iwaketa pjiomi njaji Irael poco, lriaco narso: ''Icatsa njaji yácpti wa-Minalri inaalrica inaitjaca. ² Irso sei jalredaoca idenjí-carro, mitsa siete jalredaoca nacó, sábado lricó, ikatsa jliaji shenitandaca iá-carro matsiadalri Dio irso, iwafetpa-carro. Cocacadaotsa idenjí lri-rcoda jalredaocaca irsotsa icadaaca mayamini. ³ Corriwatsa itaita iwacaca tiyé iipana lrico iyanácarro iipana lrico lri-ricoda jliaji jalredaoca iwafeeta carroda lricó.'' ⁴ Caaco Moise narso pjiomi njaji Iraelitanai poco, lriaco narso cayoji, icatsa njaji DIo inaalri wanaitjaca. ⁵ Pjiomi shá pomená-perri icaolre ricó, idee ofrenda wa-Minalri irso, owirro, palraata, bronce, ⁶ yamacatí jipolremape, amolre-perri, njite maaficalri íyo írraiperri, njite jérriwaikja matsiaperri; cabra itsicolre tsakja; ⁷ carnero íyam idatanda írraidalri, maaficalri íyam matsiaperri, jaico acacia, ⁸ kerosen lampara ítadao nacanashopa Dio iipana lrico, pomeníperri aceite icaonawa naaroshopa nañjetashopa, njite incienso pomeníperri, ⁹ jiipada ónice, njite paana pja jiipada cacoada perri nerroetaope sacerdotenai itsayan icóda nacópe. ¹⁰ Pjiomi njaji atsianai cayecaperri nanoatsa nanaitjá-carro njaji Dio inaalri shá inanacó, ¹¹ jliaji panti iwacaaca carrodawa lritapje yaapiya, lriwaiwa, njepaaca carronao, jaico nerrocawao, napjee, tipjí, topji yema-carronao; ¹² jliaji patowa njite njaji jaico pawakje carronao, jliaji lripanaita iinocawa maaficalri imatsicana ikjaote nite jñiaji yamacati iitacada naofacawa lricó. ¹³ Nadee jliaji mesa nasho njaji jaico pawakje shopani, pjiomi njaji lrinacó-perri, njite peetje icaitecada niinica Dio; ¹⁴ jliaji lampara jirricona njite njaji lricaonaperri, nadee tsakja lampara njite lriitadape, ¹⁵ nade incienso njite njaji nawakje shopani, aceite naiñjeta shopao njite incienso pomení-dalri; nawacaaca carrodao ipananomao irrocadawa yenonjiteo; ¹⁶ jliaji altar namjaita carrona maaficalri nite jliaji lridaana corrarra shodalri njite njaji jaico nawakje carronaoni, nja tsakja njaji nadejishopa niini, njite jliaji ooni yárrona macaapi njite lriofa carronao tsakja. ¹⁷ Nadee tsakja njaji cortina naita shopa lriyacalrecoa jliaji nawacaaca carrodao, njaji jaico njite nema-carronao, njite cortina lripananomao, ¹⁸ nadee tsakja topji nawacaaca carrodao ipananoma icaona njite lricaona jliaji lriyacalreecoa ipananoma, njite neeñadao napapishopana. ¹⁹ Nadee tsakja tsaya nanaitjanda matsia nadejishopa Dio iipana lricó, njaji tsaaya matsiaperri sacerdote Aarón irso njite narso njaji lrienipe nadejí-carro sacerdotenai shó.'' ²⁰ Njite pjiomi njaji iraelitanai naawa Moise ioya. ²¹ Pjiomi njaji pomenáperri icaikre ricó nadee-carro ofrenda Dio irso nanaitjá-carro jliaji nawacaaca carrodao, pjiomi njaji nadejishopao niini, njite nanaitjashopa njaji tsaaya matsiaperri. ²² Naapjiomiwa, atsianai njite inaitjepe tsakja, pjiomi njaji pomená-perri icaikre ricó. Nadee nanaapapi, shentadati, caapirroti, nanaapa pocoda nacope, pjiomi nanaitjaji owirro sho nadeecana. Pjiomi njaji inaiki nadeeca ofrenda Dio irso aima shó. ²³ Pjiomi njaji irsocape pia yamacati jipolremaki, amolremaki, írraimaki, jérriwai matsiaperri, cabra itsicolre, carnero íyam nairraitanda, njite maaficalri íyam matsiaperri, nadeena. ²⁴ Pjiomi njaji iomacape iaca palraata, bronce, nadeena ofrendawa Dio irso, caitsakja njaji irsocape jaico acacia nadejishopa cocacatsa, nadee tsakjana. ²⁵ Pjiomi njaji inaitjepe yajicape íñaca nadee tsakja njaji nañanimaca yamacati jipolreperri, amolreperri, írraiperri, naña tsakja jérriwaimaca. ²⁶ Pjiomi njaji inaitjepe yajicape íñaca, néña cabra itsicolre. ²⁷ Njaji njewidaapo naa jiipada ónice paana pja jiipada matsiaperri nerroetaope sacerdotenai itsayan icoda nacó; ²⁸ nadee pomeniajaipe, njite kerosen lamapara iitadao, aceite najetashopa tsakja, njite incienso pomeniperri tsakja. ²⁹ Njaji iraelitanai nadee ofrenda Dio irso nacaolre rikjoite, pjiomi njaji atsianai njite njaji inaitjepe inaitjepe pomenáperri nacaolre ricó, nadee pjiomi njaji nadejishopa jliaji Dio inaalri nadejica Moise nakjoite. ³⁰ Moise iaco narso njaji iraelitanai: ''Dio iniwana Bezalel, Uri irri, Jur idakerri, Judá poco inakjoite dalri, ³¹ Njite Dio ipakjantacani Lricaolrini shó, Lriajikje shó, iyecati shó, njite pomená carroni, ³² lridejí-carro coandalricatsa idejikjeti, cayecadalri idejica owirri shó, palraata shó, bronce shó; ³³ Nayoá-carro njite nacadaa jiipada njite yajicañpe idejica jaico shó matsiá, yajicape inaitjaca coandalricatsa icapacanaa nadejicalre nacó. ³⁴ Dio icadaa Bezalel irso njite Aholiab irso, Ahisamac irri, Dan inakjoité-perri nají-carro nacanantaca. ³⁵ Lricadaa tsakjana carrapiná carrona, nadaná-carro nadejicalre ricó, nacapa canaa nacó, nanomapikja tsakja yamacatio jipolreperri, amolreperri, rraiperri njite jérriwai shó tsakja, njite yajicape íñaca tsakja. Cayeca-perri pjiomi nacó, yajicape inaitjaca nacapacana pjiomi njaji nanaitjalri.

¹ Ikena Bezalel, Aholiab njite pjiomi njaji inaiki cayeca-perri Dio icadaji irso nayekawa nají-carro coajica nadejica pjiomi cocacatsa nadejirri niini Dio iipana lrico. Naa nirsewa ndejí-carro jliaji idejikjeti cayoji Dio inaa capisho nadejica. ² Moise iwana lrikjaolrewa Bezalel, Aholiab njite pjiomi njaji inaiki cayecaperri Dio icadaji irso iyecati, njaji pomenaperri icaolre ricó naacarro nanaitja jliaji idejikjeti. ³ Njepa Moise ioya pjiomi njaji ofrenda itraelitanai yaaji nanaitjashopa jliaji Dio iipana. Njaji inaiki nadee minitoa Moise irso na-ofrendani piyompinaco icoami nacaolre rikjoite-dalri. ⁴ Njite nano pjiomi njaji inaiki cayecaperri ideji jliaji Dio iipana, nano nadejirri njiteo. ⁵ Njaji cayeca-perri iaco Moise irso: ''Njaji inaiki, aima calretsa nadeeca njaji wadejishopa wa-Minalri inaalri wanaitjaca.'' ⁶ Njite Moise inaa nayamita njai inaiki wadee nadee pjaaca ofrenda nanaitja shopa Dio iipana. Njite njaji inaiki yami nadeeca ofrenda nadejishopa. ⁷ Lricoa narsoca nwayaketa shopa nadejica jliaji nadejirri. ⁸ Njite pjiomi njaji cayeca-perri nanakjoite nadeji jliaji nawacaaca carrodawa die yamacatimaca sho nanaitjaji jérriwai sho, tawalrekja neñaji jipolreperri, amolreperri, njite irraiperri sho njite nanaitja tsakja nanaco querobinai jinapjiami. Icatsa Bezalel idejicalreca, pada cayecá-dalri idejica. ⁹ Njaji yamacati-maca narso doce metro njite pamoyoa pja paita naco njawalripaca njite yamaita metro namacaiteca, Caimitsa pjiomi njaji yamacati-maca. ¹⁰ Bezalel iyata matsia nanacowaaca njaji cinco maca yamacati-maca, njite cayo tsakja lrinaitjaca njaji paana cinco maca tsakja. ¹¹ Lripapi matsia neeñada shó jipolreperri shó njewidana nacojle njaji papoco yamacati-maca, cayo tsakja lrinaitjaca njaji papoco-perri tsakja. ¹² Cincoenta wajle lripapica njaji yamacati initacape irrocawa, njite cincoenta wanle tsakja lripapica nawayacacawa njaji papoco yamacati-maca. Niini njaji lripapi shopana matsiacana nakjoete waaca. ¹³ Njite lrinaitja tsakja cincoenta jinacolricoti owirro shó lripapí-carro nanaco lriyatá-carro njaji yamacati-maca, niini pada sho catsa pacapa pjiomi jliaji nawacaaca carrodawa. ¹⁴ Bezalel inaitja nawacaaca carrodawa cabra íyo shó; lrinaitja once-maca namaimaca. ¹⁵ Trece metro njite pamoyoa pja lrinacojle paita nacó njawalripaca njite yamaita metro namacaiteca. Caiminitsa pjiomi njaji oncemaca. ¹⁶ Lriyata cinco maca papoco nacó njite sei maca papoco nacó. ¹⁷ Cincoenta wajle lripapica njewidana nacó njaji papoco, njite cincoenta wajle nacó tsakja nawayacacawa njaji papoco tsakja. ¹⁸ Bezalel inaitja cincoenta jinacolricoti narso bronce shó lriyata shopana pada carrotsa pjiomina. ¹⁹ Lrinaitja tsakja yamacatimaca carnero iyam shó naijetanda iiraidalri shó njite maaficalri iya matsiaperri shó naita shopa j,iaji nawacaaca carodawa. ²⁰ Bezalel inaitja tsakja jaico acacia sho njaji nemetashopa jliaji nawacaaca carrodawa. ²¹ Nacoana njaji jaico narso pia coatro metro njite pamoyoa pja paita nacojle njawalripaca njite sesenta sei centimetro namacaiteca. ²² Nacoana njaji nerrocarronape narsoca njenacolrico nayata shopana. Cayominitsa lrinaitjaca pjiomi njaji jaico nawacaaca carrona icaona. ²³ Cayo lrinaitjaca pjiomi nawacaaca carrodawa icaona: Ventena lripje atsialriemacawa. ²⁴ Bezalel inaitja palraatape sho coarenta poco neema carronape njaji ventena lripjee. Yamapocope apana icaona yemacarronawa. ²⁵ Lrinaitja tsakja ventena lripje pema icaona lrirso jliaji nawacaaca carrodawa inarroema kema lrirso jliaji nawacaaca carrodawa, ²⁶ njite lrinaitja tsakja palraatape shó njaji coarenta poco neema carrodao njaji lripje, yamapoco apana icaona. ²⁷ Njite lriwapji icaona jliaji nawacaaca carrodawa, jeerri shewa kema nacojle, Bezalel inaitja sei lripjewa. ²⁸ Lrinaitja yaamana lritojiwi icaona lrirso jliaji nawacaaca carrodawa. ²⁹ Njaji lripje lritojiwi nacope yaamanape lricadaacana, teecope naoyawaaca napocoda naco mitsa, matsia dekja nerrocawa njewidana nacó. ³⁰ Ocho namaimaca njaji lripje, njite diesisei njaipoco, yamapoco apada lripje icaona. ³¹ Njite Bezalel inaitja jaico acacia shó lricoajaiwa, cincona pema icaona lrirso jliaji nawacaaca carrodawa, ³² cinco tsakja coajai pema icaona, cinco tsakja lriwapji icaonacawa, jeerri shewa kema nacojle. ³³ Lrinaitja lricoajaiwa pamoyoadalri icaonada jiyapacada pjaawa lriparrema nacojle yamemape. ³⁴ Lriñjeta nanaco nja coajai owirro shó. Lrinaitja njenacolrico owirro shó, yerrocawa njaji coajai jalripape njite lriñjetana owirro shó tsakjana. ³⁵ Bezalel inaitja njaji yamacatimaca jipolremacape, amolremaca, írraimaca njite jérriwaimaca tsakja, lrinaitja tsakja querobinai jinapjia nanacó, pada yajicadaca idejicana. ³⁶ Lrinaitja coatrona napjewa njaji yamacatimaca jaico acacia shó, njite lriñjeta owirro shó. Lrinaitja coatro narropocowa palraatape shó njite coatro mawapeti nanacope njaji topjí. ³⁷ Lrinaitja tsakja pamaca lriitashopa lripananomao jliaji nawacaaca carrodawa, lrinaitja jipolremaca, amolremaca, írraimaca, njite jérriwai shó, pada yajicada idejicana jliaji inaitjalri. ³⁸ Lrinaitja tsakja cincona lripje irsocape mawapeti, njite lriñjeta nanaco pjiomi owirro shó. Njite lrinaitja njaji cinco jliipoco bronce shó.

¹ Bezalel inaitja patowa jaico acacia sho. Paita metro njite die centimetro pja lrinacojle jliwalripaca, sesenta sei centimetro lrimacaiteca njite sesenta sei centimetro lriyenonca. ² Liñjeta lridajite nacó njite lriwawalrico owirro matsiadalri sho. Lrinaitja tsakja lrinomapikjawa owirro sho. ³ Lrinaitja tsakja coatro jlinacolricowa owirro sho njite lricadaa padape lritojiwi nacó, yamapoco pema njite yamapoco tsakja ema. ⁴ Lríirra yaamana jaico acaciapo njite lriiñjeta nanaco owirro shó. ⁵ Jieta njaji jaicoapo patowa sheni naco pema, njite pema tsakja nataitá-carro nadeecani. ⁶ Lrinaitja lripanaitawa nainocawa maficalri namatsicanaa ikjaote owirro matsiadalri shó. Paita metro njite die centimetro pja lrinacojle jliwalripaca, sesenta sei centimetro lrimacaiteca. ⁷ Bezalel inaitja tsakja yaamana querobinai owirro sho lriñanda martillo shó lripanaita yamaitape icaona jliaji nainocawa maaficalri namatsicana ikjaote. ⁸ Apana querobin lripanaita icaona pema nainocawa maaficalri namatsicana ikjaote, njite apana pema nacó. Irrocapetsa lrinacotsa jliaji lripanaita nainocawa maaficalri namatsicana ikjaote. ⁹ Njaji querobinai njerreta yenonrse nanapje, naitá-carro jliaji nainocawa maaficalri namatsicana ikjaote. Njaji querobinai neemacawa nakjoetewaaca njite nacapaca lrinacojle jliaji nainocawa maaficalri namatsicana ikjaote. ¹⁰ Bezalel inaitja tsakja paita mesa jaico acacia shó. Noventa centimetro watsa jliwalripaca , njite coarenta cinco centimetro lrimacaiteca njite sesenta sei centimetro lriyenonca. ¹¹ Lriñjetani owirro sho njite lrinaitja lrimomakjawa owirro sho tsakja lriecoeta nacó. ¹² Lriinaitja tskja lrinomapianawa jliaji mesa ocho centimetro imacaiteca, irsocada owirrokja lrinomapikja nacó. ¹³ Lrinaitja coatro jlinacolrico poco owirro shó, njite lri-roetana mesa itonjiwi nacó, naacawa njaji lricawaapa. ¹⁴ Njerroatsa njaji jlinacolrico lrinomapi nacó pataitacawa pjeetaca jaico pataita-carro padeecani. ¹⁵ Lrírra jaico acaciana, njite lriñjeta nanaco owirro shó nataita shopa nadeeca jliaji mesa. ¹⁶ Lrinaitja owirro shó njaji mesa nacope, njaji parrotoitape, nacamorriashopa, poncherapipe, taza macaapipe naarró caro njaji ofrenda. ¹⁷ Lrinaitja tsakja lampara jirricona owirro matsiaperri shó lriñanda martillo shó. Njite lrinaitja lriema carronawa, lricawapa, lriiwi shoperri, copadape shoperri njite njaji lriwawalricoperri owirro sho. Pjiomi nerroacacawa pada shotsa. ¹⁸ Jliaji lampara jirricona lrirsoca lrirsoca sei lrinaapa; madalrida pema, madalrida tsakja pema. ¹⁹ Nacoana njaji lrinaapa narsoca madalrida jaico almendro iiwi shoperri, cawawalricoperri njite njaji lriwidape lriwawa lricoperri. Cayominitsa pjiomi njaji sei lrinaapa jliaji lampara jirricona. ²⁰ Jliaji lampara jirricona lrirso coatro jaico almendro iiwi shoperri, cawawalricoperri njite njaji lriwidape lriwawalriperri. ²¹ Lricadaa pia nerrocarronawa njaji lampara inaapa yamema, nayataac-cawa jlirricona nacó. Caiminitsa lrinaitjaca pjiomi nayataacacawa njaji lrinapa pjiomi niini pacapacana apana capishotsa pjiomi. ²² Njaji lriiwi shoperri njite njaji lampara inaapa apanacatsa pjiomina, lrinaitjanda owirro matsiadalri sho lripatsicanda martillo sho. ²³ Bezalel inaitja jliaji lampara jirricona, njaji siete lrinaapa, njaji nerrocawa njite lriparratoitalre owirro matsiaperri sho. ²⁴ Trentatre kilo owirro matsiaperri sho lrinaitja pjiomi jliaji lampara jirricona njite pjiomi njaji lrinacoperri iawa. ²⁵ Bezalel inaitjaotsa apana altar jaico acacia shó irsocada coatro lriecoa pacoaca-perri, do mdetro njite paita pja pacaapi lrinacojle namacaiteca pacoaca, njite paita metro njite trenta centimetro pja lrinacojle lriyenonca. Njite njaji lritsowa irrocape lrinacotsa. ²⁶ Lriñjeta jliaji altar namjaita-carrona incienso owirro matsiadalri shó, lriwawa lricó, lriecoa njite lritsowa. Lrinaitja pja lrinomapiwa owirro sho. ²⁷ Lrinaitja jlinacolricoa owirro sho njite lrirroetana lrinomapi yapjite nacó. Icatsa njeetaca njaji jaico lrinaco lrico nadeecarro jliaji altar. ²⁸ Lrimatsieta matsia njaji jaico acacia njite lriñjeta nanaco owirro sho. ²⁹ Lrinaitja tsakja aceite naiñjeta shopa nanaco njaji inaiki njenitanda lricaona. Lrinaitja tsakja incienso jliwacadalritsa pomenídalri, ima yajicadaca inaitjaca pomeniperri.

¹ Bezalel inaitja apana altar namjaita carrona ofrenda jaico acacia shó. irsocada coatro lriecoa pacoaca-dalri irsocada coatro metro njite paita pja pacaapi lrinacojle namacaiteca pacoaca, njite paita metro njite trenta centimetro pja lrinacojle lriyenonca. ² Lrinaitja buey itsowa shoperri natojiwi nacó, irrocape taimi lrinaco apana capishotsa pjiomi, njite lriñjeta lrinaco bronce shó. ³ Lrinaitja pjiomi njaji nadejishopa niini bronce shó, nacada carrodao palripokjoa njite njéta shopa tsakja, poncherapipe, keetsane nacapocoita shopa ipeti njite njeta shopa tiyemjen. ⁴ Lrinaitja tsakja corrarra shodalri bronce shó. Njite lricada jliaji corrarra shodalri altar inomapi yapjite, lripamoyoaca nakjoite lripocoda ikjaolre. ⁵ Lrinaitja coatro poco jlinacolricoa bronce shó njite picadaa papocope lritojiwi nacó. njeta carronawa jaico. ⁶ Bezalel Imatsieta jliecolrenawa jliaji altar jaico acacia shó njite lriñjeta nanaco bronce shó. ⁷ Jlieta njaji jaico altar jinaco-lrico yamema nataita shopa nadeecani. Lrinaitja jliaji altar cawawa lricolri nasho njaji jaico capatsí-perri. ⁸ Bezalel inaitja tsakja paapji oniapji bronce shó njite lriofa carronawa bronce sho tsakja. Lrinaitja jliaji oniapji nacanaalre sho njaji inaitjepe idejicape lripananoma jliaji nawacaaca carrodawa. ⁹ Lrinaitja tsakja yacalrecoa jliaji iwacaaca carrodawa. Njaji yamacatimaca matsia-perri jérriwai maca, irsocape coarenta coatro metro jiwalripaca. ¹⁰ Njaji yamacatimaca narso vente napjewa, njite vente poco nemacarronawa nanaitjanada bronce shó. Njaji jaico narso namawacawana njite njaji njenacolrico nanaitjaji palraata shó. ¹¹ Cayo tsakja inarroema nacojle, ninipia tsakja yamacatimáca coarenta cinco metro jliwalripaca, vente lripje, njite vente tsakja neema carropoco broncepe, narso tsakja namawa-cawana njite njenacolrico nanaitjaji palraatape shó. ¹² Njaji yamacatimacaite jeerri shewa kemajle narsoca ventido metro njawalripaca, die topji njite die neema carropoco. Njaji namawa-cawana njite njenacolrico nanaitjaji palraatape shó pjiomina. ¹³ Jliaji yacalrecoa lrirso tsakja ventido metro njite pamoyoa pja paita nacojle jérri imotokema nacojle. ¹⁴ Ventido metro njite pamoyoa pja paita nacojle njaji yamacati-máca jérri imoto kemajle nacojle pjewacawa lrirso jliaji yacalrecoa, madalrina lripje njite madalripoco neema carropoco. ¹⁵ Cayo tsakja pema pje cawa lrirso, lrirso njaji yamacati-máca sei metro perri njite sesenta centimetro pja lrinacojle, njite madalrina lripje njite madalripoco neema carrona. ¹⁶ Pjiomi njaji yamacati-máca lriwaipe nanaitjaji jérriwaikja matsiaperri shó. ¹⁷ Njaji namawata carrona njite njenacojlrico nanaitjana palraatape shó, njite njaji lripje njite njaji neema carropoco nanaitjana bronce shó. Pjiomi njaji yacalreecoa ipje naiñjeta nanaco palraatape shó pjiomi. ¹⁸ Jliaji pjewa cawa lrirsoca ocho metro njite ochenta centimetro pja lrinacojle jliwalripaca. Nanaitjana jliaji yamacati-máca jipolredalri shó, amolreperri shó, írraiperri shó njite jérriwai nañaji shó, ocho metro njite ochenta centimetro pja lrinacojle jliwalripaca, njite yamaita metro njite paita pacaapi jliyenonca, cayotsa nacayosho njaji yamacati-máca yacalrecoa shoperri. ¹⁹ Lrirsopia coatro nemacarropoco nanaitjanda bronce shó, njaji njenacolrico njite njaji mawapeti nanaitjana palraatape shó. ²⁰ Nanaitja pjiomi njaji yacalreecoa ipje njita nawacaaca carrodawa bronce shó. ²¹ Moise inaacalre nacó njite coaji piaca Itamar, sacerdote Aarón irri idejica naapiya, njaji levitanai naniveta matsia pjiomi njaji nadejishopa jliaji Nawacaaca carrodawa, lriofacawa jliaji yácati yárroda. ²² Bezalel, urim irri, Hur irri, Judá inakjoitedalri, lrinaitja pjiomi njaji Dio inaalri Moise idejica. ²³ Aholiab, Ahisamac irri, Dan poco inakjoite dalri icatsa jiaji idejirri Bezalel iinai. Icatsa jliaji idanacada nanaco njaji nadejicalre, cayekjaite, yajicada idejica nanaco njaji yamacati jipolreperri, amolreperri, írraiperri njite jérriwai nañaji shó. ²⁴ Pada tonelada njaji owirro naanji njaji inaiki ofrenda sho nanaitja shopa jliaji Dio iipanawa, cayotsa náwi capisho njamiñaca njaji naaji nawacaaca carrodawa icaona. ²⁵ Njaji inaiki aimadan nacadaa madalrida tonelada njite pamoyoa pja pada nacojle, cayotsa náwi capisho njamiñaca njaji naaji nawacaaca carrodawa icaona. ²⁶ Naniweta pjiomi njaji atsianai irsocape vente walria nakjoite, niini naniwetaca tre mil quiniento cincoenta padenirri, nacoana njaji atsianai naaca cinco gramo njite pamoyoa pja padana cojle padenirri, cayotsa náwi capisho njamiñaca njaji naaji nawacaaca carrodawa icaona. ²⁷ Madalrida tonelada njite treciento kilo pja lrinacojle palraatape nacodoeta jliipoco icaona jliaji Dio iipana njite njaipoco tsakja njaji yamacati-máca ípje jiipoco. Cien namaimaca njaji jliipoco, trenta tre kilo nacadaa papoco icaona. ²⁸ Njite lriitepem sho, Bezalel inaitja njaji mawapeti topji nacope njite njaji njenacolrico njite lriita tsakja pjiomi njewidana njaji topji. ²⁹ Njaji bronce nacadampe ofrenda shó yamada tonelada njite treciento coarenta kilo pja lrinacojle padenirri. ³⁰ Nasho njaji bronce nanaitja nawacaaca carrodawa jiipoco, altar bronce-dalri, lri-corrarrani, pjiomi njaji nadejishopa lrinacó jliaji altar. ³¹ Nanaitja tsakja lriyacalrecoa jiipoco pjiomi, pjewacawa jiipoco, pjiomi lripje icaona jliaji nawacaaca carrodawa, pjiomi njaji lriwaida nacope jliaji panti iyacalrecoa.

¹ Nanaitja jliaji Aarón itsayaniwa tawalrekja jipolrekjape sho, amolrekjai, írraikjai shó neñjaji matsia lridejishopa lri-rico wajle jliaji njenitanda Dio irso. Nananaitja njaji tsaya Aarón irso lridejishopa lri-rico wajle jliaji njenitanda Dio irso, cayotsa waMinalri Inaa capisho Moise inaitjaca. ² Bezalel inaitja jliaji nacodamaki owirromaca, jipolredalri, amolreperri, iraidalri shó njite jérriwai nawanikja matsia. ³ Nañá capatsita njaji owirro njite nayoana pakjaape napapishopa nasho njaji tawalrekja jipolreperri, amolreperii, írraiperri njite jérriwai matsiakjaipe, pada cayekjeté-dalri idejicalre. ⁴ Nanaitja nateda nacoda yaawa lrirso jliaji nacodamaca yameemape. ⁵ Jliaji lrirrocawa cayotsa nanaitjani nacodamaca icayoshotsa, atsa lriyataacawa lrinacotsa jliaji nacodamaca. Nanaitja jérriwaikja shó, owirro, jipolrekjaipe shó, amolreperri njite írraiperri, cayotsaji Moise inaa capisho Moise inaitjaca. ⁶ Namatsieta matsia njaji jiipada ónice, njite nerrocawa nacó owirro shó, nadana njeepe rico neepitana njaji Irael yénipe doce-perri. ⁷ Bezalel irroeta njaji jiipada lritedacawa jliaji tsaya nacodamaca Dio iwaada carrotsa nanakjoite njaji Iraelnai; cayotsaji Moise inaa capisho Moise inaitjaca. ⁸ Jliaji cayecadalri idejica inaitja jliaji nacoda nacóda. Lrinaitja owirro sho, tawalrekja jipolredalri shó, amolredalri, irraidalri njite jérriwaikja matsiadalri sho. ⁹ 9Pacoadadalri jiwalripaca lrimacaiteca yaapiya; ventido jliwalripaca njigte cayo tsakja lrimacaiteca, yamemadalri. ¹⁰ Nerroeta lrinaco coatrokja jiipada matsiaperri. Pakja nacó pirroetaotsa pada jiipada robí, pada topacio, njite pada esmeralda. ¹¹ Yamakja nacó pirroetaotsa pada jiipada torqueza, pada zafíro, njite pada diamante. ¹² Madalrikja nacó pirroetaotsa pada jiipada jacinto, pada ágata, njite pada amatista. ¹³ Njite coatrokja nacó pirroetaotsa pada jiipada berilo. pada ónice, njite pada jaspe. Picadaotsa nerroa narropoco lrico owirrodalri. ¹⁴ Nerroeta njaji jiipada coajica naawa neepitana njaji Irael yénipe, coajica neepitana yaawa, nadana neepe naco njaji jiipada icaapirroti nacoda capishó. Icatsa neepitanaca njaji doce poco Iraelnai. ¹⁵ Nanaiotja cadenakjape lriiñadawa jliaji nacoda nacóda owirro shó. ¹⁶ Nanaitja yamapoco jlinacolricoa owirro shó, njite yamada nerrocawa owirro sho tsakja njite nerroetana natojiwi naco jliaji nacoda nacóda. ¹⁷ Nerroeta yamakja cadena owirrokjape jlinacolrico lritojiwi nacoda jliaji nacodaita nacóda. ¹⁸ Nerroeta nanacowaaca njaji neeñada natojiwi nacope shó nerrocawa nacojle. Nerroeta njaji nateda nacope jliaji tsaya nacodamaca nacó. ¹⁹ Nanaitja yamapoco jinacolricoti owirro shó, njite nerroetana lritojiwi nacó jliaji nacodaita nacoda, tsoomi lrinomapi ioya pacapa kema nacojle. ²⁰ Nanaitja yamapoco pja jinacolricoti owirro shó njite nerroetana tjewakjete lrirso jliaji nateda nacope pacapa kema nacó jliaji nacodamaca, tsoomi lriyataaca cawa nacojle, lriiwalre iicao nañanada matsia. ²¹ Nerroeta jlinacolrico nakjoite jliaji nacodamaca nacoda lriñada jipolrekjai shó, lriiwalre iicao, Nanaitja cayo wadee jliwacawa lrirrocawa ioya. Cayotsa nanaitja Dio inaa capisho Moise irso lrinaitjá-carro. ²² Bezalel inaitja jliaji tsaya nacodamaca amolremaca sho pjiomi. Pada kayecádalri idejica. ²³ Nanaitja lrinomao rinjeta cawa njewida. Lrirsopia lrinomakja matojledadalri nañajikja taimi wadee tserrencani. ²⁴ Njite jlipoco inomapi nacó nanaitja matojledaperri jipolreperri shó, amolreperri, tawalre irraiperri njite jérriwaikja sho. ²⁵ Nanaitja kjemadarrope owirro shó njite nacadana napecolrico njaji matojledaperri lrinomapi nacó jlipoco naco jliaji tsaayana. ²⁶ Nacadaa pada kjemádarro owirrodalri njite lripjeyatsa pada matojledadalri, caimitsa pinaitjaca pjiomi lrinomapi naco jliaji Aarón tsaayanalre. Cayotsa Dio inaa capisho Moise. ²⁷ Nanaitja gtsakja ipajleti jérriwai sho Aarón irso njite njaji lrienipe. ²⁸ Neña tsakja pamaca jérriwi sho nañampa shopa njewida. Nanaitja tsakja narso napjitedao jérriwai shó, ²⁹ Nanaitja tsakja naawalre nacoda jérriwai sho jipolreperri, amolreperi njie irraiperri. Lrinaitatja jliaji yajicada idejicani. Cayotsa Dio inaa capisho Moise inaitja ca. ³⁰ Nanaitja jliaji njewida nacoda naaconaoda matsiadalri owirro matsiaperri shó, nadana lrinaco, lriipe ricó cayoji, ''Mamatsicanaatsa Dio irso.'' ³¹ Napapi lripamoyoaca naco jliaji yamacati njewida nacoda pakja jipolrekjai shó. Cayotsa Dio inaa capisho Moise inaitja ca. ³² Cayotsa nataita nanaitjaca jliaji nawacaaca carrodao njaji iraelitanai. Njaji iraelitanai nanaitja pjiomi jliaji idejikjeti. ³³ Nanaitjatsa pjiomi njaji Dio inaalri Moise irso. Nadee jliaji nawacaaca carrodao Moise irso, njite pjiomi njaji nadejishopa niini, nerro-carrodao, nanomakjaa, napje, njeepoco; ³⁴ lritapje carnero iyam irraioperri, lriwai vaaca iyam, njite lriwaiwa jliaji patowa yácoti kjaidaperri yarroda, ³⁵ njite lriipana jliaji patoiwa nainocawa maaficalri namatsicana ikjaote. ³⁶ Nadee jliaji mesa, pjiomi njaji nadejishopa, njite jliaji peetje nacadanda Dio ipeyajle, ³⁷ lampara jirricoda, lampara nanacowaacaperri njite pjiomi njaji lrinacoperri, lriitada tsakja; ³⁸ altar owirrodalri, aceite naiñjetashopa nanaco, incienso pomenídalri, njite jliaji irrocadawa pantinoma nacó lrirso jliaji nawacaaca crroda lricó; ³⁹ altar nanaitjanda bronce shó, njaji lridaanape, njaji nadeshopa lrinacó njite ooni yaarodana macani njite lriofá carrona. ⁴⁰ Nadee tsakja lriwaiwa lripananomao irocapetsawa jliaji yacalreecoa, nerro carronawa njite neema carronao, nadee tsakja lripananoma irrocadawa, napapishopani njite naparrá carrona inacó; njite pjiomi njaji nadeshopa nawacaaca carrodao lricó. ⁴¹ Nadee njaji neñaji matsia nadejishopa Dio iyarrowajle ricó, njite njaji Aarón iyapewa njite lrienipe, nadejishopa sacerdote shó. ⁴² Cayotsa nadeji piaca pjiomi njaji idejikjeti njaji Iraelitanai cayotsaji Dio inaa capisho Moise inaitjaca. ⁴³ Moise icapa masia pjiomi njaji idejikjeti nanaitjalri, njite nanaitja caná matsia cayotsaji Lrinaa capisho nanaitjaca, cayotsa nanaitjaca. Njité-dalri DIo icadaa iacoti matsiaerri nanacó.

¹ Njite jliaji IMINALRITI icaite Moise irso: ² ''Lrinaco jliaji keerri pawalria inita carropi nacó irsotsa imatsietaca jliaji panti iwacaaca carrodawa lricó, jliaji panti iwacaaca cawa lricoatsa Dio iapiya. ³ Shetaotsa jliaji patowana icadaacawa lrico njaji yaacoti kjaidaperri lri-ricoda jliaji panti, njite pirsotsa pidanatacani pamaca yamacati macamaki shó. ⁴ Shetaotsa jliaji mesa icadaa carroatsa memawa matsia njaji lriitada nimperri. Pidee tsakjaotsa jliaji lámpara iema carrona pimatsietá carroatsa lrinaco njaji lámpara. ⁵ Picadaotsa jliaji altar piñjetanda owirro shó imjaita carrona incienso lripeyajle jliaji patowana yacoti kjaidaperri yárrona, njite pidanataotsa yamacati macaki shó jliaji iwacaacacawa. ⁶ Picadaotsa jliaji altar imjaita carrona ofrenda pjewacawa lrico, lri-ricoda jliaji iwacaaca cawa lrico. ⁷ Icadaotsa ponchera macaapi iwacaaca cawa lrico ioyawaaca lriapiya jliaji altar, njite ipakjantaotsani ooni shó. ⁸ Pinaitjaotsa apafe jalramicawa lriwaida nacó, njite picadaotsa lrirroa jliaji yamacatimaca pjewacawa lrico lri-ricoda jliaji jalramicawa lrico. ⁹ Pjipaotsa jliaji aceite piñjeta carroatsa lrinaco jliaji iwacaaca cawa lrico njite pjiomi njaji iwawa lricope. Pjienitaotsa pjiomina Norsowaona; icatsaotsa matsia-cana pjiomi. ¹⁰ Piñjeta tsakjaotsa lrinaco jliaji altar pamjaita carrona ofrenda njite pjiomi njaji padejishopa niini. Pjienitaotsa pjiomina Norsowaona; icatsaotsa matsia-cana pjiomi Norso. ¹¹ Pirsotsa piñeta tsakja lrinaco jliaji ponchera macaapi bronceapi, njite lriema carrona tsakja njite pjienitaotsa Norso. ¹² Pideotsa Aarón njite njaji lrienipe iwacaaca cawa ipananoma lrico, picotsocarroatsana ooni sho niini. ¹³ Pjietaotsa Aarón itsayaniwa jliaji tsáya Njoenitanda Norsowao, piñjetaotsa lrinaco aceite njite pjienitaotsani lridejní-carro Norso sacerdote shó. ¹⁴ Pideotsa norso njaji lrienipe njite pjietatsa nanaco tsayana. ¹⁵ Piñjeta tsakjaotsa nanaco aceite shó cayotsa pinaitja capisho njanirri nadenjí-carro norso sacerdote shó. Jliaji piniwana cana sacerdote carrona, caiperri catsaotsana caidalriwetsa pjiomi njaji walricomanai nanakjoite perri.'' ¹⁶ Moise inaitja pjiomi njaji cayoji WAMINALRI inaa capisho lrinaitjaca. ¹⁷ Niini jliaji panti nawacaaca cawa lrico namatsietani lriniita cadaa jliaji walripi kérri pawalria inita carropi nacó yamawalria nacó. ¹⁸ Moise yemeta jliaji panti nawacaaca cawa lrico, lrimatsieta topji yapowao, lriemeta njaji topji, lrirroeta cojai iorsoá carropi, lrirroeta njaji lrishepi, lriemeta matsia njaji topji pamoyoá perri njite pjiomi lriema carrona taimi. ¹⁹ Lripeeco lritapjeo lrinaco jliaji panti nawacaaca cawa lrico njite lridanata pamoyoá yamacati macamaki shó cayoji WAMINALRI inaa capisho Moise inaitjaca. ²⁰ Jlipa njaji jipadaitape lridanacawa njaji yácoti kjaidaperri nanaitja shopa yaacoti narsowaaca njite jlietana lri-ricoda jliaji patowana, jlieta tsakja lrirso jliaji patowa njaji jaico nawakje shopa, lrirroeta tsakja nainocawa maaficalri namatsicana ikjaote iipana lriicao jliaji patowana. ²¹ Jlieta jliaji patowana nawacaaca cawa lrico. Lrirroeta jliaji yamacati lridanatá-carro jliaji patowana, Cayoji WAMINALRI inaa capisho lrinaitjaca. ²² Jlieta tsakja jliaji mesa nawacaaca cawa lrico, atsialriemajle lrirso jliaji panti, lridanamjle jliaji yamacati idanatacada jliaji patowana. ²³ Lricadaa naofawa matsia njaji pan mesa nacó WAMINALRI ipeyajle, cayotsa WAMINALRI inaa capisho Moise inaitjaca. ²⁴ Jlieta tsakja jliaji lámpara aimadalri jitaco lri-ricoda jliaji panti nawacaaca cawa lrico, mesa icoemjete, inarroema nacojle lrirso jliaji panti. ²⁵ Lrikerrata njaji lánpara WAMINALRI ipeyajle, cayotsa WAMINALRI inaa capisho Moise inaitjaca. ²⁶ Jlieta tsakja jliaji altar naiñjetanda inaco owirro shó lriwawa lricojle jliaji lridanatanda yamacatimaca shó. ²⁷ Lrimjaita lrinaco incienso pomeniperri, cayotsa WAMINALRI inaa capisho lrinaitjaca. ²⁸ Lricada yamacatimaca irroa pjewacawa lrico lrirso jliaji nawacaaca carrodao. ²⁹ Lricadaa jliaji altar namjaita carrona ofrenda pjewacawa lrico lrirso jliaji nawacaaca carrodao. Lrimjaita lrinaco ofrenda, lrimjaita tsakja comaana lrinacó, cayotsa WAMINALRI inaa capisho lrinaitjaca. ³⁰ Lricadaa tsakja jliaji ponchera macaapi nawacaaca carroda ipamoyoaca lriapiya jliaji altar, njite lripakjanta oonishoni nacotsoacá-carro. ³¹ Moise, Aarón njite njaji lrienipe nacotso njaipa njite nacaapi tsakja ponchera lricó. ³² Caimitsa nanaitjaca njeewaca icoam lri-ricoda jliaji panti nawacaaca carroda lrico, njite naaca icoam altar nacojle. Nacotsoacawa njawaca waacatsa, cayotsa WAMINALRI inaa capisho Moise inaitjaca. ³³ Moise imatsieta matsia jliaji jalramicawa lriwaida nacó jliaji panti nawacaaca caroda lrico njite jliaji altar. Lricadaa yamacatimaca irroa pjewacawa lrico lrirso jliaji jalrawerrico. Cayotsa Moise iwayaketa jliaji idenjikjeti. ³⁴ Ikena iyadaoca iitaca jliaji panti nawacaaca cawa lrico, njite Dio imatsiaca melremelredalri ipakjantaca lri-ricoda jliaji panti nawacaaca cawa lrico. ³⁵ Corrin Moise itaita sheewaca lr-ricoda ima iyadaoca irrocawa lrinaco, njite Dio imatsiaca melremelredalri ipakjantaca lri-ricoda jliaji panti nawacaaca cawa lrico. ³⁶ Jliena cadanaco mana jliaji iyadaoca lrioya jliaji panti, njaji Iraelnai naawa napeyajle naapowa lrico. ³⁷ Mitsa corri cadaa jliena lrioyajliaji panti, corrin nataita naacawa. Icaamitsa nawapaca akjerreca jliena mana lrioya. ³⁸ Ima jliaji iyadaoca Dio iyada yofacawa lrinaco jliaji panti jaalrewerricó, njite deepi ricó lrinaitjacawa tiyee kerradalri shó, caidalritsani napeyajle njaji iraelitanai nácadanacotoawa.

¹ Dio iwana Moise nawacaaca-carroda lrikjoite, lriaco lrirso: ² ''Picaite narso njaji Iraelnai cayoji: ''Pada inakjoite idee cadaa ofrenda Dio irso nanakjoite njaji ípirra, o ivacan cadaa. ³ Apana vaaca imjaitanda cadaa jliaji iofrendani, lrirsotsa lriaca apana vaaca atsiana corridalritsa irso imatsica. Lrirsotsa lrinaitjacani pjewacawa lrirso jliaji nawacaacacarrodawa, Dio itaitá carroatsa icoadatani. ⁴ Lrirsotsa lricadaaca lricaapi jliwida nacó jliaji maaficalri lrimjaitanda, niniotsa cacoadaca lrirsoni lrimatsicana ikjaote. ⁵ Njite lrirsotsa lriinoca jliaji toro Dio ipeyajle. Njaji sacerdotenai, Aarón yénipe, nadee lrírranapemi njite nawitsica-cana lrinaco jliaji altar yemalriwa lripananoma jiaji nawacaacacarrodawa. ⁶ Njite lrirsotsa lricólraca lriyam jliaji ofrenda lrimjaitanda njite lriyoatsani pawajlepeni. ⁷ Njiteotsa njaji sacerdote Aarón yénipe nawacaotsa tiyé altar nacó, njetaotsa tiyeena kerrá-carro jliaji tiyé. ⁸ Njaji sacerdotenai, Aarón yénipe, nacadaotsa njaji nacadowaji pawajlepe, jlwidam njite lriiti. Nacadaotsa naorsoawa matsia nanacowaaca tiyeena kerraperri nacó alatar nacope. ⁹ Njite njaji lrisapikjape njite njaji lricotsipami narsotsa njepacani ooni shó. Njite njaji sacerdotenai namjaitaotsa pjiomi njaji altar nacope ima ofrenda namjaitandacani. Matsiawatsa noajica lriitan; pada ofrenda namjaitanda Norso tiyéricó. ¹⁰ Ípirra nakjoite cadaa jliaji ofrenda, oveja cadaa o cabra cadaa, lrirsotsa icadaa apana atsiana marsocadalritsa imatsikje. ¹¹ Lrirsotsa lriinocani atsialriema nacojle lrirso jliaji altar Dio ipeyajle, njaji sacerdotenai, Aarón yénipe, nawitsica caotsa lrírranapemi sho altar naco padenirri. ¹² Njite narsotsa nacadowaacani, jliwida fie njite lriiti tsakja, njiteotsas njaji sacerdotenai nacadaotsana tiyé kerraperri nacó, altar nacope. ¹³ Njite njaji lrishapikjape njite njaji lricotsipami narsotsa njepacani ooni shó. Njite njaji sacerdotenai nacadaotsa pjiomina, njite namjaitaotsana altar naco. Ima ofrenda namjaitandaca. Matsia watsa lriitan Dio irso; pada ofrenda namjaitanda lrikjaote Norso tiyé ricó. ¹⁴ Njite yaa cada iofrendani nanakjoite njaji yarrajicape imjaitanda Dio irso, irsotsa ideeca Lrirso apapa potooca o apapa tsootsobo walriapalritoa. ¹⁵ Jliaji sacerdote lrirsotsa lrideecani altar nacojle, jlipaotsa pokjomi lrinorsiapji, njite lrimjaitani altar nacó. Njite lrírranapemi lrirsotsa lriarroca altar icodapi. ¹⁶ Lrirsotsa jlitaca lrioya lriñjañjiarroda pjiomi lriitada yaapiya, njite lripeeconi jérri imotokemajle lrirso jliaji altar, lripatjacawao njaji tiyepokjoa. ¹⁷ Lrirsotsa lrimjecocani lripje nakjoite, mitsa corrin lritaita lricadowaacani pjiomi. Ikena dekja jliaji sacerdote lritaita lrimjaitacani nanaco njaji tiyena kerraperri altar nacope. Ima ofrenda namjaitandaca. Matsia watsa lriitan Dio irso; pada ofrenda namjaitanda lrikjaote Dio irso tiyé ricó.

¹ Pada idee cadaa pada ofrenda Dio irso, lrirsotsa lrideeca lri ofrendani trigope natodanda matsia, njte lrirsotsa lriarroca aceite lrinaco, njite lricadaa pja incienso lrinaco. ² Njite lrirsotsa lrideecani narso njaji sacerdotenai, Aarón yénipe, nininaotsa pada sacerdote jipaotsa lricaapi ricó jliaji natodanda trigope lridenda, irsocada aceite njite incienso tsakja. Njite jliaji sacerdote lrimjaitacaotsa jliaji ofrenda altar nacó lricaite shopa Dio irsowalrepeca jliaji ofrenda. Matsia watsa lriitan Dio irso; pada ofrenda namjaitanda Dio irso tiyé ricó. ³ Njite njaji ofrenda iitepem Aarón iyapecana naapiya njaji lrienipe. Njenitanda matsia Dio irso nanakjoite njaji ofrenda namjaitanda Lrirso tiyé ricó. ⁴ Pia cada pada ofrenda paniati ínaca nakjoite meewidalritsa imerritanda poalri ricó, lrirsotsa inaitjacani peetje patsimitetsa natodanda matsia nakewitanda aceite fie, tarrete cadaa mewidalritsa, lrirsotsa iñjetaca aceite shó. ⁵ Njite imerrita cada jliaji iofrenda paniati natodanda matsia patsieta carroapi tsipalraapi ricó, meewi-dalritsa, irsotsa ikewitaca aceite shó. ⁶ Pirsotsa piyoacani pamoyoape njite yarro aceite lrinaco. Icatsa ofrenda napania ínaca nakjoite. ⁷ Piyana cada piofrenda patsieta carroapi ricó, pirsotsa pikefietaca jliaji trigope matsiadalri aceite fie. ⁸ Icatsa njaji ofrenda trigope, pikewitaji matsia piderri Dio irso, njite pideeni sacerdote irso, lridee carroenaotsana altar nacojle. ⁹ Njiteotsas jliaji sacerdote jlipaotsa padapena nanakjoite njaji ofrenda napania ínaca nakjoite ofrenda lrikjaotenaadari, Njite lrimjaitaotsana altar nacó. Pada ofrenda namjaitanda tiyé ricó, njite joiwi watsa lriitan Dio irso. ¹⁰ Njite njaji ofrenda iitepem Aarón iyapecana naapiya njaji lrienipe. Njenitanda matsia Dio irso nanakjoite njaji ofrenda namjaitanda Lrirso tiyé ricó. ¹¹ Corrin itaita iaca ofrenda Dio irso irsocada mojloi, ima corrin itaita imjaitaca ofrenda tiyé ricó Dio irso mojloipe o corrin tsakja mapaa. ¹² Icadaotsa njaji ofrenda Dio irso ipania iinaca nakjoite initanda iniwaca, mitsa corritsa icadaoda cantja pomenidalri jirracawa Dio irso altar nakjoite. ¹³ Irsotsa ipiwataca njaji iofrendani ipania iinaca nakjoite yokirra shó. Corrin itaita iaca ifrendan Dio irso mayokirranaadalritsa, ima yokirraca jliaji icadaalri iwaadaca jliaji yacoti Dio inaitjalri iapiya. Pjiomi njajiiofrendani lrirsotsa lrirsoca yokirra. ¹⁴ Yaa cadaa ofrenda IMINALRI irso ipania ínaca inakjoite initaji iniwaca, yaa watsa njaji matsiapetsa, imerritaji tiyé ricó njite iwititaji ipeecó-carro iñjawati ricó. ¹⁵ Njite ipecoatsa aceite njite incienso lrinaco. Icatsa ofrenda ipania iinaca nakjoite. ¹⁶ Njitenaotsa jliaji sacerdote lrimjaitaotsa lrinacope jliaji ofrenda iwititaji aceite fieda njite incienso tsakja ofrenda lrinakjoité-dalri. Icatsa ofrenda nanaitjanda Dio irso namjaitanda tiyé ricó.

¹ Pada íno cadaa apana maaficalri lrípirra nakjoite ofrenda Dio ipeyajle namaodacá-carro naofacawa naapiyawaaca, atsiana cadaa o ínarrona, lrirsotsa lriomaca apana maaficalri corridalritsa irso imatsica. ² Lricadaotsa lricaapi jliwida nacó jliaji lridenda ofrenda, njite lrirsotsa lriinocani nawacaaca-carroda ipananoma lrico. Njite njaji sacerdotenai, Aarón yénipe nawitsicacaotsa lrirrana altar nacó pjiomi. ³ Jliaji inaiki lriá tsakjaotsa ofrenda imaodaca kjeti nacoda apana maaficalri lrimjaitanda Dio irso. Pjiomi lriiti lriwawa lricopte, ⁴ njaji lritepe, njaji lriiti lrinapji nacope, lrishopana tsakja. njetaotsa pjiomina. ⁵ Njaji Aarón yénipe namjaitaotsana altar nacó lrinaitsa jliaji ofrenda lrimjaitanda, nacadanda tiyee ricó altar nacope. Pomeni watsa neetan wa-Minalri irso; pada ofrenda nanaitjanda Lrirso tiyé ricó. ⁶ Pada íno cadaa apana maaficalri lrípirra nakjoite ofrenda Dio irso namaodacá-carro naofacawa naapiyawaaca; atsiana cadaa o ínarrona, lrirsotsa lriomaca apana maaficalri corridalritsa irso imatsica. ⁷ Apana cordero cadaa jliaji lriinolri, lrirsotsa lriino cani Dio ipeyajle. ⁸ Él podrá su mano sobre la cabeza de su ofrenda y la matará en la puerta de la tienda de reunión. Luego los hijos de Aarón el sacerdote rociará su sangre sobre los lados del altar. ⁹ Lriino caotsa jliaji maaficalri imaodaca kjeti nacó lrimjaitanda tiyé ricó Dio ipyajle. Lriiti, njite lriiti lritipi nacope lrirsotsa lriyoacani tsoomi lrinapji ioya, njite pjiomi lriiti lrishapi nacope njite njaji lriwawa lricope, ¹⁰ njaji lritepe, njaji lriiti lrinapji nacope, lrishopana tsakja.jetaotsa pjiomina. ¹¹ Njite jliaji sacerdote lrimjaitaotsana altar nacó ofrenda injaodati namjaitanda Dio irso. ¹² Apana cabra cadaa jliaji lriinolri, lrirsotsa lriino cani Dio ipeyajle. ¹³ Él podrá su mano sobre la cabeza de su ofrenda y la matará en la puerta de la tienda de reunión. Luego los hijos de Aarón el sacerdote rociará su sangre sobre los lados del altar. ¹⁴ Jliaji atsia lrimjaitaotsani Dio irso. Jlitaotsa pjiomi lriiti lrishapi nacope, njite pjiomi njaji lriwawa lricoperri. ¹⁵ Jlitaotsa njaji lritepje, lriiti nanacope lrinjapi nacope, lrishopana naapiya njaji lritepe. ¹⁶ Jliaji sacerdote imjaitaotsa altar nacó pada ofrenda injaodati nacó namjaitanda, joiwí-carro lriitan. Pjiomi njaji lriiti Dio iyape-cana. ¹⁷ Pada yácoti irso inaitjaoda caidalriwenatsa coshoca njaji walricomanai nanakjoite njaji aimadan pinakjoité-perri kjerrecawajleca yowafaji, Corrin itaita injaca írranati corrin tsakja neeti.''

¹ Caaco JLIAJI IMINALRITI Moise irso cayoji: ² ''Picaite njaji inaiki aimadan Iraelnai: ''Pada inaitja cadaa lrimatsicana corri cadanatsa lriomacalreca, lrinaitja cadaa njaji corripetsa Dio inaa inaitjaca, njaji lrifarroji inaitjaca, lrirsotsa lrinatjaca cayoji: ³ Sacerdote cadaa jliaji inaitjalri imatsicanao, lrimenakja maatsídalri inoca nanacojle njaji inaiki aimadan Iraelnai, lrirsotsa lrideeca lrimatsicana ikjaote apana toro pamoyoani toa marsocadalritsa imatsica Dio irso imatsicanaati ikjaote ⁴ Lrirsotsa lrideeca jliaji toro Dio ipeyajle iwacaaca, carroda ipananoma lricó, lricadaa lricaapi jliwida nacó, njite lriino jliaji toro Dio ipeyajle. ⁵ Jliaji naniwananda sacerdotewa jlipaotsa lrirrana inacope jliaji maaficalri njite lrideeni nawacaaca-carroda ipananoma lricojle. ⁶ Jliaji sacerdote jlietaotsa lricaapi írranati ricó lriwitsicá-carro Dio ipjeyajle siete piape, jliaji yofalriwa yamacati idanami, corricawatsa pacapa imatsicanaati. ⁷ Njite jliaji sacerdote lriarroatsa lrinacope lritsowa nacó jliaji altar namjaitacawa incienso pomení-dalri iitan Dio irso, jliaji yemalriwa nawacaaca-carroda lricó, njite njaji lritepem toro írranami lriarroatsani lritajida naco jlaji altar namjaitacawa ofrenda, jliaji yemalriwa pjewacawa lrirso jliaji nawacaaca-carrodawa. ⁸ Lriyoá watsa pjiomi toro iiti lricadanda ofrenda sho lrimatsicana ikjaote, njaji lriiti lriwawalricope, pjiomi njaji lriyapi nacope, ⁹ njaji lritepe, njaji lriiti lrinapji nacope, lrishopana tsakja. Jlitaotsa lritepe njite njaji lrishopana pjiomi. ¹⁰ Lriyoa watsa pjiomina, cayoji lriyoá capisho lrioya jliaji toro ofrenda imaodacakjeti nacoda, njite jliaji sacerdote imjaitaotsa njaji lrinaco jliaji altar namjaitacawa ofrenda. ¹¹ Njite jliaji toro iyami, lripe iitem, jliwida, jlipa, lrishapi, lrimatsicanda, ¹² pjiomi njaji toro lrinacope, lrideewatsana pemajle lrioya jliaji yofacawa lrico napiyocawa lrico matsia Norso, naacawa napatja lriwayolremi; icatsa namjaitaca nirsena tiyeena nacó. Narsotsa namjaitacana napatjacawa pjiomi njaji namjaitaji iwayolrepemi. ¹³ Nanaitja cadaa namatsicanawa padenirri njaji inaiki aimadan iraelitanai corri cadanatsa naomacalreca, njite njaji iwacaaca-capewa corrin naanjí camatsicanaacana nanaitja capoa nanakjoite njaji corriperritsa Dio inaa nanaitjaca, njite caikjaolrenaacana lrikjaote, ¹⁴ niini naoca cadaa nají jliaji namatsicanaa, njaji inaiki aimadan narsotsa nainoca apana toro pamoyoani toa ofrendawa namatsicanaa ikjaote njite nadeeni nawacaaca-carroda ipananoma lrico. ¹⁵ Njite njaji pekipenai caconaperri nacadaa nacaapi toro jiwida nacó Dio ipeyajle, njite naino jli toro Lripeyajle. ¹⁶ Jliaji naniwananda sacerdotewa jlipaotsa lrirrana inacope jliaji toro njite lrideeni nawacaaca-carroda ipananoma lricojle. ¹⁷ Jliaji sacerdote jlietaotsa lricaapi írranati ricó lriwitsicá-carro Dio ipjeyajle siete piape, jliaji yofalriwa yamacati idanam, corricawatsa pacapa imatsicanaati. ¹⁸ Njite jliaji sacerdote lriarroatsa lrinacope lritsowa nacó jliaji altar namjaitacawa incienso pomení-dalri iitan Dio irso, jliaji yemalriwa nawacaaca-carroda lricó, njite njaji lritepem toro írranami lriarroatsani lritajida naco jlaji altar namjaitacawa ofrenda, jliaji yemalriwa pjewacawa lrirso jliaji nawacaaca-carrodawa. ¹⁹ Jliyoá watsa lrioya pjiomi lriiti njite lrimjaitacaotsana altar nacó. ²⁰ Icatsa lrirsolritsa lrinaitjaca lrisho jliaji toro. Cayotsaji lrinaitja capisho lrisho jliaji toro ofrenda namatsicanaa ikjaote-dalri, njite jliaji sacerdote lrinoca jliaji maaficalri namatsicana ikjaote njaji inaiki aimadan, nininaotsa Jliyapeta Lrioya namatsicanaa. ²¹ Njite lrideewatsa jliaji toro pemajle naofacawaq ioya cayotsaji lrinaitja capisho lrisho jliaji lrinitaana. Icatsa ofrendaca namatsicana ikjaote njaji aimadan ²² Pada talricanaati inaiki irso inaitja cadaa lrimatsicanao corri cadanatsa lriomacalreca, lrinaitja capoa coajidalri catsa nanakjoite njaji Dio ifarrolri inaitjaca, njite camatsicanaani lrikjaote, ²³ njite lriaji cádanaco camatsicanaacani, lrirsotsa lrideeca ofrendawa lriinócarro apana cabra atsiana, corri -dalritsa irso imastica. ²⁴ Lricadaotsa lricaapi jliwida nacó jliaji maaficalri njite lriinoni nainocawa njaji ofrenda namjaitanda Dio ipeyajle. Icatsa ofrenda imatsicanaati ikjaote. ²⁵ Jliaji sacerdote lripotsietawatsa lricapjiwida lrirranami ricó jliaji maaficalri njite lriñjetaotsa altar itsowa nacó namjaitacawa ofrenda, njite lriarrowatsa pjiomi lrirranami lritajida nacó jliaji altar. ²⁶ Lrimjaitaotsa pjiomi njaji lrirranapemi altar nacó, cayoji lrinaitja capisho lrisho jliaji maaficalri ofrenda imaodacakjeti nacoda. Sacerdote inoca jliaji maaficalri lrimatsicana ikjaote jliaji talricanaati, icatsa cayoji matsiaca lrimatsicana ioya jliaji talricanaati. ²⁷ Coandalri catsa inaiki inaitja imatsicanao corri cadanatsa lriomacalreca, lrinaitja capoa coajidalri catsa nanakjoite njaji Dio ifarrolri inaitjaca, njite camatsicanaani lrikjaote, ²⁸ njite jliwacatsa yanjí camatsicanaacani, lrirsotsa lrideeca ofrendawa lriinó-carro apana cabra inarrona, corri -dalritsa irso imastica ²⁹ Lricadaotsa lricaapi jliwida nacó jliaji maaficalri njite lriinoni nainocawa njaji ofrenda namjaitanda Dio ipeyajle. ³⁰ Jliaji sacerdote lripotsietawatsa lricapjiwida lrirranami ricó jliaji maaficalri njite lriñjetaotsa altar itsowa nacó namjaitacawa ofrenda, njite lriarrowatsa pjiomi lrirranami lritajida nacó jliaji altar. ³¹ Lriyoá watsa pjiomi lriiti, cayoji lriyoá capisho lriiti jliaji nainonda ofrenda imaodacakjeti nacoda. Sacerdote imjaitaotsana altar nacó pomení-carro lriitan Dio irso. Sacerdote íno jliaji maaficalri lrimatsicanaa ikjaote jliaji atsia, njite matsiacani lrimatsicana ioya. ³² Lride cadaa apana cordero lri ofrendaniwa lrimatsicanaa ikjaotenadalri, lrideotsa apana inarrona matsini idaki ricó. ³³ Lricadaotsa lricaapi jliwida nacó jliaji maaficalri njite lriinoni nainocawa njaji ofrenda namjaitanda Dio ipeyajle. ³⁴ Jliaji sacerdote lripotsietawatsa lricapjiwida lrirranami ricó jliaji maaficalri njite lriñjetaotsa altar itsowa nacó namjaitacawa ofrenda, njite lriarrowatsa pjiomi lrirranami lritajida nacó jliaji altar. ³⁵ Lriyoa watsa lrioya pjiomi lriiti, cayoji lriyoá capishó lriiti jliaji cordero nainonda ofrendawa imaodacakjeti nacó, njite sacerdote imjaitaotsana nanaco njaji ofrenda Dio iyarrope namjaitanda Lrirso. Jliaji sacerdote íno jkliaji maaficalri lrimatsicana ikjaote jliaji atsia njitenaotsa matsiacani lrimatsicana ioya.

¹ Nawana cadaa pada lricaité-carro pada yácona lricapanda ikjaote lrinaco o jliminda coajica, njite corrin jliepa lriácarro lricaite lrinacó, icaamitsa lrinaitjaca lrimatsicanawa niiní camatsicanaacani lrikjaote. ² Aape inota cadaa pada corridalritsa matsiadalricani, maaficalri corridalritsa pataita panotacani, maaficalri kerroani cadaa o nápirra idadami, o lridadami pia jliaji maaficalri yanjicadawa iwawa sho jiipai nacó, lrinotani corri cadanatsa lriomacalreca, icaamitsa maatsidalri tsakjani njite camatsicanaacani lrikjaote. ³ Aape inota cadaa pada imatsica, coandalricatsa maatsidalri lrinacó, corri cadanatsa lriomacalreca, icaamitsa camatsicanaacani lrikjaote lrianjí cádanaco lrinacó. ⁴ Aape icaite cadaa yácoti ajádalri lrinoma shó kjeyacalrim lrinaitjá-carro maatsí o lrinaitjá-carro matsia, o coandalri ikjaote lriaco yácoti ajádalri, njite corrin lrianjí jlida nacó, mitsa lrianjí lrinaco jliapodamina, icaamitsa camatsicanaacani naikjaote. ⁵ Camatsicanaa cadaa pada naikjaote njaji imatsicanaati, lrirsotsa lricaiteca lrioyawa njaji imatsicanaati lrinaitjalri. ⁶ Njite lrirsotsa lrideeca pada ofrenda Dio irso lrinaitja capoa maatsi apana lrípirra inarrona, oveja cadaa o cabra cadaa, pada ofrenda lrinaitja capoa maatsí, njite jliaji sacerdote lriino caotsa jliaji maaficalri lrimatsicanaa ikjaote. ⁷ Corri cadaa lritaita lriwentaca apana cordero, lritaita lrideeca ofrenda lrimatsicana ikjaote yamapa potocadape o yamapa tsootsobo walriapalripe toa Dio irso, apaapa lrimatsicana ikjaote njite apaapa lrimjaitaoda ofrendawa. ⁸ Lrirsotsa lrideecana sacerdote irsoni, jlienaotsa icadaa lriinita apaapa ofrendawa lrimatsicanaa ikjaote, lripokjo watsa lrinorro mitsa corrin lritaita jlitaca dacami lridaki ioya. ⁹ Njiteotsa lriwitsica lrirranami jliaji ofrenda lrimatsicana ikjaote altar icodapi nacó, njite lricadaa lrírrana itepem altar ipocoda nacó. Icatsa ofrenda imatsicanaati ikjaote. ¹⁰ Njite jliaji apaapa lrirsotsa lricadaaca oferenda lrimjaitanda, cayoji lricaite capisho idananda lricó, njite jliaji sacerdote lrinocaotsa lrioyawalre nacó, lrikjaote jliaji imatsicanaati lrinaitjalri, njite icaamitsa matsiaca jliaji inaiki. ¹¹ Mitsa corri cada aape itaita iwentaca yamaapa potocadape o yamaapa tsotsobo yénipe, lridee pedaotsa yamada kilo trigope matsiadalri ofrenda lrimatsicanaa ikjaote. Corriotsa lritaita lrikewitaca aceite shó o lricadaacantja incienso lrinacó, ima pada ofrenda lrimatsicanaa ikjaote. ¹² Lrirsotsa lrideecani sacerdote irson, njite jliaji sacerdote jipaotsa lricaapi ricó lrinakjoite jliaji ofrenda lrikjaote-dalri njite lrimjaitani altar nacó, nanacó njaji ofrenda namjaitanda Dio irso tiyé ricó. Icatsa ofrenda imatsicanaati ikjaote. ¹³ Jliaji sacerdote lrirsotsa lrinaitjaca pada ioyawalrewa coandalri catsa imatsicanaati ikjaote lrinaitjalri, njite icaamitsa mamatsicanaaca jliaji inaiki. Njite njaji ofrenda itepemi nayadaca njaji sacerdotenai, coshoca njaji ofrenda napania iinaca nakjoite.'' ¹⁴ Njité-dalri caaco jliaji IMINALRITI Moise irso: ¹⁵ ''Pada imacoadata cada pada yácoti njite lriawa nakjoete njaji wa-Minalri inaaniperre, mitsa corrin lriomacalreca, niini lrirsotsa lrideeca ofrenda lrimatsicana ikjaoten wa-Minalri irsó. Apana ofrenda jliaji carnero marsocadalritsa idapalre lrípirra nakjoite-dalri; Once kilo njite coatro gramo pja lrinacojle palraatape, pada ofrenda lrimatsicanaa ikjaote. ¹⁶ Jliaji inaiki lrirsotsa lricaoñaca lrinaitja capoa maatsi nakjoete njaji Dio inanipe jlienitaji lrirsowaawa, njite lrirsotsa lria pjaca lrinacojle sacerdote irso. Njite jliaji sacerdote lriinoca jliaji cordero lrimatsicana ikjaote, njite icaamitsa mamatsicanaaca jliaji inaiki. ¹⁷ Pada inaitja cada lrimatsicanawa lrinaitja capoa njaji Dio ifarrolri panaitjaca, njite corrin lriaji lrinacó, icaamitsa camatsicanaacani lrikjaote, njite lrirsotsa lricaoñaca jliaji maatsirri lrinaitjanda. ¹⁸ Lrirsotsa lrideeca apana carnero madaprene tsa teeco lritaoñacawa ioya, irsocada lricoada cayotsaji nacadaa capishó, icatsa jliaji ofrenda lriderri sacerdote irso lrimatsicana ikjaote. Ikena jliaji sacerdote iinoca jliaji maaficalri lrimatsicana ikjaote, njite matsiacani lri matsicana ioya. ¹⁹ Pada ofrenda imatsicanaati ikjaote, ima camatsicanaadalri cani Dio ipeyajle.''

¹ Caaco JLIAJI IMINALRITI Moise irso cayoji: ² Pada inaitja cadaa imatsicanawa njite lrimacoadataca njaji yácoti Dio icadaji, lricashata capoa lricodapidalri, lricada capoatoa lriyarro lrirso, o lrinaitja capoa coají-carro jlitaca lrioya lriyárro o lriñaitocani, o jlirrapiteetacani idejikjeti shó, ³ o lrioketa cada pada lriyarromi iñaacadam lrioya njite lridawa lricaoni, njite lridiota lrinaco jiaji lrishá, o coajidañri catsa lrimatsicnaa, ⁴ niini camatsicanaacani lrikjaote jliaji imatsicanaati, lrirsotsa lridietaca jliaji lriñaite o jlitanda jidaatí ricó, o lrimanalrieta capoa lrioya lriyarro, o jiwacadami lrioya. ⁵ O coandalri nacó cada lricashata, lrirsotsa lridietaca pjiomi njite lrirsotsa lriá pjaaca lrinacojle jliaji lridewerri inacó, jliadatsa najíca lrinaitjaca maatsi. ⁶ Njite lrirsotsa lrideeca lri-ofrendani lrimatsicanaa ikjaote Dio irso: apana carnero nataoñanda nakjoite matsiani pjiomi irsocada icoada cayotsa lricoada capisho, pada ofrenda imatsicanaati ikjaote sacerdote irso. ⁷ Sacerdote inoatsa jliaji maaficalri lrikjaote-naadalri Dio ipeyajle, nininaotsa matsiacani lrioya jliaji mátsirri icadalri camatsicanaacani.'' ⁸ Caaco tsenakja JLIAJI IMINALRITI Moise irso, Lriaco lrirso: '' ⁹ Pinaa watsa Aarón njite njaji lrienipe, cayoji: icatsa njaji yácoti kjaidadalri nanaco njaji ofrenda imjaitanda: Irsotsa icadaaca jliaji ofrenda imjaitanda altar nacó depjite atee tjewaijle piyompinaco, njite macadaotsa yalrimica jliaji tiyee altar nacoda. ¹⁰ Sacerdote shetaotsa lritsayani jérriwai máca, njite lriapjiteda jérriwai máca tsakja. Njite yami kena lrimacawa jliaji ofrenda altar nacoda, sacerdote jitaotsa pjiomi lriwayolremi tiyé imacaji altar nacó, njite lricadaotsa altar icodapi. ¹¹ Jlitaotsa njaji lritsayani njite jlietaotsa padenakja lridé-carro njaji lriwayojlemi pemajle naofacawa ioya, apafe napiyocawa lrico. ¹² Corriotsa yalrimí carroca jliaji tiyé altar nacoda. Sacerdote shetaotsa lripawa piyompinacó icoami. Lrimatsietaotsa njaji ofrenda namjaitaji lrinaco, cayoji Dio icaite capishó, njite lrimjaita watsa lrinaco pjiomi njaji maaficalri iiti ofrenda imaodaca kjeti nacoda. ¹³ Corriotsa yalrimí carroca jliaji tiyé altar nacóda. Lrirsotsa kerracani caidalritsa. ¹⁴ Cayoatsa njaji yácoti kjaidaperri nanaco njaji ofrenda oaniatai ínaca nacó. Njawatsa njaji Aarón yénipe nadee watsana Dio ikjaolre, altar ipeyajle. ¹⁵ Sacerdote jipaotsa lricaapi ricó pema harina matsiadalri nanakjoite njaji ofrenda ipania ínaca, aceite nakjoite, njite incienso nakjoite tsakja, nakewitaji paniati ínaca ricotsa, ikenaotsa lrimjaitana altar nacó pomení-carro lriitan jirracawa njiteo, pada ofrenda shó naikjaote. ¹⁶ Aarón njite njaji lrienipe iñjaotsa nanacope njaji ofrenda. Narsotsa nanaitjaca naiñjawa meewitsa naiñjá-carro mamatsicanaa cawa tsa. Lriyacalre coa lrico jliaji nawacaaca-carrodawa. ¹⁷ Narsotsa njaitacani meewi tsa. Noaca irsoni nanakjoite njaji ofrenda namjaitanda inacope Norso. Njeitanda teecojle cayoji nacayosho njaji ofrenda namatsicana ikjaote caikjaolrenaa cádanacona. ¹⁸ Icatsaotsa piyaadaca, pjia Aaró caidalriwenatsa naapiya njaji atsianai pjiapodamperrimi pinakjoite-perri, jitanda nanakjoite njaji ofrenda Dio iyaapepe, namjaitanda Lrirso. Coca cadaa inotana, njenitaacacawa Lrirso tsakja ¹⁹ Niini caaco tsenakja JLIAJI IMINALRITI Moise irso, Lriaco: ²⁰ ''Icatsaotsa njaji ofrenda Aarón irsolritsa iaca naapiya njaji lrienipe Dio irso naniwa cádanaco neepipe sacerdoté carrona: naa watsa yamada kilo harina matsiadalri pjaa ofrenda shó paniati ínaca nakjoite, naa watsa pamoyoa piyompinaco njite pamoyoa dainoma jle. ²¹ Ikewitaotsani aceite ricó njite inaitjaotsani natsieta carroapi ricó, njite matsia kenaotsani lri-ricoda, pjietaotsa jliaji inaiki iniwananda. Njite pomaca kenani picadowaots jliaji ofrenda paniati ínaca capisho, pomení-carro lriitan Dio irsó. ²² Cayoatsa lrinaitjaca jliaji sacerdotenai yapiyawalri, Aarón inakjoité-dalri lricadaa cádanaco pada jimawa lriarrontacao. Lritaitja cayoji DIo inaa capisho nanaitjaca caidalriwetsa, njite lrirsotsa lricadaa lrimacawa pjiomi Dio ipeyajle. ²³ Pjiomi njaji ofrenda paniati ínaca nakjoite lrianda jliaji sacerdote lrirsotsa lrimjaitaca pjiomini. Corrin nataita nailjacani. ²⁴ Caaco tsenakja JLIAJI IMINALRITI Moise irso, Lriaco: ²⁵ Caaco pjia Aarón irsó njite narso njaji lrienipe cayoji: ''Cayoatsa njaji yácoti kjaidaperri nanaco njaji ofrenda imatsicanaati nacó. Njaji ofrenda imatsicanaati nacó irsotsa ínocana namjaitacawa nacó njaji ofrenda Dio ipeyajle. Njenitanda teecojletsa. ²⁶ Jliaji sacerdote imjaitacada namatsicanaa ikjaote icatsa jliaji irsolritsa iñjacani. Lrirsotsa lrinñjacani lriyacalrecoa lrico jliaji nawacaaca-carrowa lricó. ²⁷ Cocadaa inota jliaji maaficalri ípe irsotsa shenitacani Dio irso, njite írranati iwitsia cadaa natsayan nacó, lrirsotsa lricotsoca jliaji tsaaya lriwitsia cawa nacó, njenitacawa matsiacawa lricó. ²⁸ Njite jliaji nayana carroapi ricó torropedalri, lrirsota lribolrontacani. Mitsa bronceapi cada, lrirsotsa lricotsoca, lridaita matsia óni matsiajai ricó njite jliatja matsia ²⁹ Coandalri catsa atsianai nanakjoite njaji sacerdotenai nataita naiñjaca nanacope, ima teecojlé-dalricani. ³⁰ Mitsa coandalri catsa ofrenda namatsicanaa ikjaote, nadenda írranami nawacaaca-carroda lricó nainonda namatsicanaa ikjaotenadalri njenitanda matsiadalri ricó, corrin nataita naiñjacani. Narsotsa namjaitaca pjiomi.

¹ Icatsa cayoji jliaji yácoti kjaidadalri imatsicanaati ikjaote. Shenitanda caatsa teecojle. ² Nainoatsa jliaji maaficalri ofrenda imatsicanaati ikjaotenadalri nainocawatsana, njite narsotsa nárroca lrírranami altar nacó. ³ Pjiomi njaji lriiti lriitipi nacope, lriwawa lricope, ⁴ njaji lritepe njhite njaji lriiti nanacope, tsomiperri nainjapi ioya, njite njaji lrishopa naapiya njaji lritepe, narsotsa njetacana ⁵ Jliaji sacerdote lrirsotsa lrimjaitacana altar nacó pada ofrenda namjaitanda tiyé ricó Dio irsó. Icatsa ofrenda imatsicanaati ikjaotená-dalrica. ⁶ Njaji atsianai nanakjoite njaji sacerdotenai nataita naiñjaca lrinacope jliaji maaficalri nainonda. Narsotsa naiñjaca njenitanda lrico teecojle ima njenitandaca jliaji naiñjalri. ⁷ Jliaji ofrenda imatsicanaati ikjaote caishocatsani lricayosho jliaji ofrenda camatsicanaa cádanaco pada. Jlia minitsa yácoti kjaidaperrica naicaona yamadape. Sacerdote iyaadaca jliaji lriipe iinocadani namatsicanaa ikjaote. ⁸ Jliaji sacerdote imjaitacada jliaji ofrenda coajidalri catsa iyáda, lritaita jlipaca lrirsowao lriyam jliaji maaficalri ofrenda. ⁹ Njaji ofrenda ipania ínaca imerritaji poalri ricó, iyananda itsieta carroapi ricó o merritandan lri-ricoapitsa lriyadacani jliaji sacerdote idérrini. ¹⁰ Njaji ofrenda ipania ínaca inacope meetapena o ikewitaji aceite shó, nayadapecana nacoanaa njaji Aarón yénipe. ¹¹ 1Icatsa yácoti kjaidadalri nanaco njaji ofrenda imaodacakjeti nacó, naajipe njaji inaiki Dio irso. ¹² Pada yaacada ofrenda lriashopa matsiadalri, lrirso peda lriaca apana pan jipandadalri meewidalritsa cacoadádalri lrirso, mitsa lrikewitandacni aceite shó, lriwitsica aceite lrinaco, njite nasho njaji harinape matsiaperri lrikewitanda aceite shó. ¹³ Lriashopa matsiadalri, lrirsotsa lriaca ofrenda imaodacakjeti nacó iinai apana pan jipandani keewidalri. ¹⁴ Lricadaotsa padape nanakjoite njaji cacoadaperri ofrenda shó lrideji Dio irso. Nayadacani njaji sacerdotenai iwitsicacaérri irranati lrinaco jliaji ofrenda imaodacakjeti nacó altar nacó. ¹⁵ Jliaji inaiki ideecada jliaji ofrenda imaodacakjeti nacó lria shopa matsiadalri, lrirsotsa lriñjaca lriipe jliaji ofrenda lriinonda jliadaa lriinocani. Corrin lritaita lricadaaca lrinacope tjewaijle icaona. ¹⁶ Mitsa lria cada jliaji ofrenda cacoadádalri pada ikjaote, lria cadaa jliaji ofrenda lrioma capoatsa lriacani lricaolre rikjoite, narsotsa naiñjaca lriipe jliadatsa nainocani, njite njaji lriitepemi nataita naiñjaca tjewaijle. ¹⁷ Mitsa lriofa cadaa pjatoa lrinakjoite jliaji nainonda madalridaa nacojle narsotsa namjaitacani. ¹⁸ Coca cadaa iñja lriipe jliaji maaficalri nainonda ofrendawa imaodacakjeti nacó madalridaa nacojle, corrinatsa matsia carrocani, corrina tsakja cacoadá carroca lrirso jliaji iinolrini. Cadofialré-dalri kenatsan, njite jliaji inaiki iñjacadani lrideeca lrinacoa lrimatsicana ikjaotenadalri. ¹⁹ Corritsa coca itaita iñjaca jliaji ípeti inotacada pada maatsidalritsa. Irsotsa imjaitacani, Mitsa njaji ipeti matsiaperritsa itaita ijacani. ²⁰ Pada inaiki maatsidalritsa iñjacada lriipe jliaji maaficalri ofrenda imaodacakjeti nacó Dio iyadatsa, jliaji inaiki irsotsa shenetaca yoyawani, corrinatsa ikindacani. ²¹ Cocacadaa inota pada maatsidalritsa, inaiki iyada cadaa, o maaficalri iyada cadaa o pada maatsidalritsa cadofiakjé-dalri, njite lriñjacada lriipe jliaji maaficalri ofrenda imaodacakjeti nacó Dio iyadatsa, jliaji inaiki irsotsa shenetaca yoyawani, corrinatsa inakjoité-dalri cani.'' ²² Caaco jliaji IMINALRITI Moise irso, Lriaco cayoji: ²³ ''Picaite narso njaji Iraelnai cayoji: ''Corrin itaita iñjaca buey iiti, oveja iiti cadaa, o cabra iiti cadaa. ²⁴ lriti jliaji maaficalri corridalritsa nainondaca, o lriiti jliaji maaficalri yaawi inondami, itaita idejica pada lrishó, mitsa corrin itaita iñjacani. ²⁵ Coandalri cadaa inaiki iñja maaficalri iiti pada inaiki inonda njite lrimjaitani tiyé ricó Dio irso, jliaji inaki irsotsa shenitaca yoyawani, corrinatsa inakjoitédalrica yajicani. ²⁶ Corrin itaita iñjaca nairrana njaji maaficalri o kepirre cadaa a kjerrecawajle catsa iofawaji. ²⁷ Cocacadaa iñja írranati, irsotsa shenitaca yoyawa jliaji inaiki.'' ²⁸ Caaco jliaji IMINALRITI Moise irso, Lriaco cayoji: ²⁹ ''Picaite narso njaji Iraelnai cayoji: Coca cadaa íno maaficalri ofrenda imaodacakjeti nacó Dio irsolrirsotsa lridee tsakja lrinacope Dio iorso tsakja. ³⁰ Jliaji ofrenda irsotsa imjaitacani Dio irso, jiwacatsa irsotsa ideecani. Lrirsotsa lrideeca lriiti njite lricodaita tsakja, jlirretá-carro lricodaita ofrenda jlirredanda Dio ipeyajle. ³¹ Jliaji sacerdote imjaitaotsa lriiti altar nacó, mitsa jliaji lricodaita Aarón iyadacani lrienipe yápiya. ³² Irsotsa yáca lripoita pema atsialriemakema sacerdote irso ofrenda shó idenda teecojletsa lrioya jliaji inonda ofrenda imaodacakjeti nacó. ³³ Jliaji sacerdote, pada nanakjoite njaji Aarón yénipe, jliaji iderriotsa írranati imaodacakjeti nacoda njite lriiti tsakja, icatsaotsa iyadaca jliaji maaficalri ofrenda icotsipami itsialriema kema. ³⁴ Ima Nocoadatacani nakjoete njaji Iraelnai, jliaji ofrenda maaficalri icodaita njerretanda, njite jliaji lricotsipam nanda, njite nacadaana sacerdote Aarón irso njite narso njaji lrienipe nayadawa. ³⁵ Icatsa njaji Aarón iyadape naapiya njaji nanakjoite njaji ofrenda namjaitaji tiyé ricó Dio irso, cayo piatsa Moise icaiteca lricaite cádanacona nadejí-carro Dio irso sacerdote shó. ³⁶ Icatsa nayadapeca njaji sacerdotenai Dio icaiteji nácarro narso njaji Iraelnai aimadan, jliadaa pia lriniwanacana sacerdote carrona. Icatsaotsa njaji nayadapeca caidalriwetsa naapiya njaji walricomanai. ³⁷ Icatsa yácoti kjaidaperrica nanaco njaji ofrenda namjaitaji, napania ínaca nakjoite, namatsicana ikjaote, caikjaolrena cádanacona, nacadaaca cádanacona, njite nanaco njaji ofrenda imaodacakjeti nacó, ³⁸ icatsa njaji yácoti Dio icaiteji Moise irso Jiipana Sinai nacó jliadaa pia lrinaaca nadeeca na ofrendani Dio irso jalrapocolri ricó.

¹ Caaco JLIAJI IMINALRITI Moise irso cayoji: ² Piinai Aarón njite njaji lrienipe tsakja, pidee njaji tsaaya njite aceite parronda nanaco, jliaji toro ofrenda imatsicanaati ikjaotenaadalri, yaamana carnero, njite njaji peetje mewi-perritsa tseetoda lrico. ³ Piwaketa njaji inaiki iwaketaaca-carroda ipananoma lricó.'' ⁴ Moise inaitja cayotsaji Dio inaa capisho lrinaitjaca, njite njaji inaiki nawacaacawa nawacaaca-carroda ipananoma lricó. ⁵ Njite Moise iaco narso njaji iwacaacalrio: ''Icatsa cayoji IMINALRITI inaa wanaitjaca.'' ⁶ Moise idee Aarón njite njaji lrienipe njite lricotsona ooni shó. ⁷ Jlieta Aarón irso lri tsayan jalripadalri njite lripapi lritsayan nacó lriiwalre ipapi nacakjaidalri, jlieta lrinacó lri tsayan nacódalri njite jlieta lrirso lricodaita nacódalri, njite lripapi jliaji lricodaita nacódalri lrinacoa lrisho jliaji lripapi nañanikja matsia. ⁸ Lricadaa tsakja lrinacó njaji lriteda nacópe írroa, njite lricadaa nanaco njaji lriteda nacoperri njaji lriajishopa coajica najirrica Urim njite jliaji pada lriipitana Turim. ⁹ Lricadaa jliwida ncó jliaji yamacatí tsopewa sho dalri, njite lriecoa nacó lricadaa jliaji capatsite owirroita caacona carrodani, cayotsaji Dio inaa capisho lrinaitjaca. ¹⁰ Moise jipa jliaji aceite naiñjeta shopa inaiki nacó, lriarro nawacaaca-carroda nacó njite nanaco njaji lriitada niini jlienitana Dio irsowawa. ¹¹ Jliarro aceite siete piape altar nacó, cayotsa lriniwanaca jliaji altar njite pjiomi njaji nadejishopa niini, njite jliaji ooni yárroda njite lriofacawa naco tsakja, jlienita pjiomina Dio irso ¹² Njite lrinacope jliaji aceite narronda nanaco lriarroni Aarón jiwida nacó njite cayotsa jlienitacani lridejicalre nacó. ¹³ Moise idee njaji Aarón yénipe njite jlieta nanaco natsayaniwa jalripadalri. Lripápi naawalre nacó naawalrekja njite lriñampa njewidanacó jérriwai máca sho njewida nacó, cayotsaji Dio inaa capisho lrinaitjaca. ¹⁴ Moise inaa nadeeca jliaji toro ofrenda imatsicanaati ikjaotenaadalri, njite Aarón, njaji lrienipe tsakja nacadaa nacaapi jliwida nacó jliaji toro nadenda imatsicanaati ikjaotenaadalri. ¹⁵ Moise inaa nainocani, njite jlipa lrirrana inacope lricaapi ricó lriarró-carro altar itsowa nacó wadee camatsicanaa shocani, lriarro tsakja írranati altar itajida nacó njite lricadaa jliaji alatar Dio iyadá-carroni lriinó-carro maaficalri lrinacó namatsicanaa ikjaotenadalri. ¹⁶ Njite Moise jita pjiomi njaji lriiti lrishapi nacope, lrishopana iiti, njite lritepe lriiti fie, njite lrimjaitana altar nacó. ¹⁷ Njite njaji toro iitepemi, lriyami, lripem njite lrimatsicanda lrimjaitani pemajle lrioya jliaji naofacawa lricó, cayotsaji DIo inaa capisho lrinaitjaca. ¹⁸ Njite Moise inaa nadeeca tsakja jliaji carnero, ofrenda namjaitaoda, njite Aarón, njaji lrienipe nacadaa nacaapi carnero jiwida nacó. ¹⁹ Lriino jliaji maaficalri njite lriarro lrirranami altar nacó pjiomi. ²⁰ 0Lricadowa jliaji carnero njite lrimjaita jliwidam, njaji lricadowaji njite lriiti tsakja. ²¹ Lricotso matsia njaji lrishapi, lripoita ooni shó, njite lrimjaita pjiomina altar nacó. Pada ofrenda namjaitanda cani, icadacada joiwi iitan ima namjaitandaca tiyé ricó Dio irso, cayotsaji Dio inaa capisho Moise inaitjaca. ²² Njite Moise idee jliaji apana carnero, jliaji carnero nakeepinatashopana, njite Aarón njite njaji lrienipe nacadaa nacaapi jliwida nacó. ²³ Moise iino jliaji maaficalri njite jlípa lrírrana inacope, lriñjeta Aarón sheni atsialriema nacó, jlipjewida makjewi nacó, lricaapjiwida makjewi nacó tsakja atsielriema nacó pjiomi. ²⁴ Njite lridee njaji Aarón yénipe, njite lriñjeta njeeni atsialriema nacó, njaipjewida makjewi nacó, nacaapjiwida makjewi nacó tsakja atsielriema nacó pjiomi. Njite Moise iwitsica írranati altar naco padenirri. ²⁵ Moise jita njaji lriiti, lriitipi iiti, pjiomi lriiti lrishapí nacope, lrishopana iiti, njaji lritepe lriiti fie njite lricotsipa atsialriemá-dalri. ²⁶ Jlita tsakja pan meewi-perritsa lrioya jliaji tseeto nacadanda Dio ipeyajle, jlipa njite njaji pan meewi-perritsa nayoají, jlipa tsakja paana pan lriñjetampe írranati shó njite paita peetje jalritaite-tsa, njite lricadaana nanacó njaji maaficalri iiti njite lricotsipa nacó. ²⁷ Moise icadaana Aarón irso lrienipe yapiya njerretá-carro Dio ipeyajle ofrenda njerretanda Dio ipeyajle. ²⁸ Nataita cayamina, Moise jita naoyani lrimjaitá-carrona altar nacó ima ofrenda namjaitandacani. Pada ofrenda lrimjaitanda lrikepitanata shopana niini matsiadalrica iitan. Ofrenda namjaitanda tiyé ricó Dio irsó. ²⁹ Njite Moise jipa lricodaita jliaji maaficalri jlirretani ima ofrenda njerretandaca Dio ipeyajle. Icatsa njaji carnero inacope Moise idejirri isho lrikeepitanata cádanaco njaji sacerdotenai, cayotsaji Dio inaa capisho lrinaitjaca. ³⁰ Moise jipa aceite inacope naiñjetshopa inaiki inaco njite lrírrana inacope altar nacóda; lriwitsica Aarón nacó, lri tsayan nacó, lrienipe nacó njite na-tsayan nacó. Cayotsa lrikepitanata Aarón, njaji lrienipe njite njaji na-tsayani Dio ipeyajle. ³¹ Niini Moise iaco Aarón irso njite njaji lrienipe: ''Hiyana lripe jliaji maaficalri iwacaaca-carroda ipananoma lricó, icatsaotsa iñjaca niní peetje mewidalri shó lri-ricodadalri jliaji tseeto wakeepinatashopa sha, cayotsa nonaa capisho pinaitjaca, inma nocaiteca, ''Aarón njite lrienipe watsa iñjana.'' ³² Njite njaji lripe inacope imacaji njite njaji peetje inacope tsakja imjaitaotsana. ³³ Yofa toatsa iwacaaca-carroda ipananoma lricó siete jalredaoca, akjerre kenaotsa wakepitanatacawa jinaana yoocawa matsia irsó. Ima jliaji IMINALRITI watsa ikepitanata sha siete jalredaoca. ³⁴ Jliaji wanaitjalri irso jliadaa jecoapi, jliaji IMINALRITI inaa wanaitjaca wapiyó-carro ioya imatsicanaa. ³⁵ Yofaotsa iwacaaca-carroda ipananoma lricó siete jalredaoca njite siete deepi. Shepaotsa jliaji wa-Minalri inaalri inaitjaca, ima corri cadaa sheepa, mayami caotsa shá.'' ³⁶ Aarón njite njaji lrienipe nanaitja pjiomi cayoji Dio inaa capisho nananitjaca Moise nakjoite.

¹ Ocho jalredaoca nacó, Moise iwanena Aarón njite njaji lrienipe, lriwana tsakja njaji pekipenai caconaperri Irael lricope. ² Lriaco Aarón irso: ''Pjipa apana vaaca pamoyoanina nanakjoite njaji papocope ofrendawa imatsicanaati ikjaote, njite apana cordero marsocadalritsa idapalre ofrendawa pamjaitaoda, njite wadee carroni Dio ipeyajle. ³ Caaco pjia narso njaji inaiki Iraelnai, picaite narso cayoji: ''Jipa apana cabra atsiana ofrendawa imatsicana ikjaote yaamana vaaca padaperri oonia ipekirrica, marsocapetsa imatsicaa, ofrenda pamjaitaoda; ⁴ pidee tsakjaotsa apana buey njite apana cordero ofrenda imaodacakjeti inaona wainoada Dio ipeyajle, njite paniati ínaca nakjoite aceite fieda, ima panaya watsa Dio icañjataacawa ipeyajle.'' ⁵ Nini nadeeca pjiomi njaji Moise inalri nadeeca nawacaaca-carroda ipananoma lricó, njite náno nawacaacawa pjiomi njaji Iraelnai nacodapi njite neemawa Dio ieyajle. ⁶ Njite Moise iaco narso: ''Icatsa njaji Dio inaalri inaitjaca; Lritaitá-carro Lricañjata icapa Lrimatsiaca melremelredalri.'' ⁷ Moise iaco Arón irsó: ''Pitsomita jliaji altar picadá-carro pi-ofrendani imatsicanaati ikjaote-naadalri njite pi-ofrendani pimjaitanda, pjiá-carrotsa ipiyoacawa pimatsicana ioya, njite pipiyó-carro tsakja namatsicanaa ioya njaji inaiki, cayoji Dio inaa capisho.'' ⁸ Ikena Aarón itsoomita jliaji altar njite lriino jliaji vaken ofrenda imatsicanaati lri matsicanaa ikjaotetsa. ⁹ Njite njaji lrienipe nadee lrirso vaken írranami, njite Aarón sheeta lricaapjiwida írranati ricó lriñjetá-carro altar itsowa nacó, njite lriarro tsakja írranati altar itajida nacó. ¹⁰ Njite lrimjaita altar nacó njaji lriiti, lritepe njite lrishopana ofrenda imatsicanaati ikjaotenadalri, cayotsaji Dio inaa capisho Moise inaitjaca. ¹¹ Lriipe njite lriya, lridee lrimjaita pemajle naofacawa ioya. ¹² Aarón iino jliaji maaficalri ofrenda namjaitaoda, njite njaji lrienipe naa lrirso lrirranami lriwitsicá-carro altar nacó padenirri. ¹³ Njite naa lrirso jliaji maaficalri namjaitaoda, nacadowajina jliwida fie njite lrimjaitana altar nacó. ¹⁴ Njite lricotso matsia ooni sho nja lrishapikjaape njite lricotsipa, lricadaana nanaco njaji ofrenda lrimjaitaji altar nacó lrimjaitá-carrona. ¹⁵ Njite Aarón iino jliaji apana chivo naikjaotenadalri njaji Iraelitanai, jlipa jliaji chivo naikjaotenadalri njaji Iraelitanai lriinó-carroni namatsicana ikjaote, lrinaitja cayoji lrinaitja capisho jliaji lrinitanda lrinoca. ¹⁶ Lridee jliaji ofrenda lrimjaitanda njite lrinaitja cayoji Dio inaa capisho nanaitjaca. ¹⁷ lridee tsakja jliaji ofrenda napania iinaca; jlipa pakjami lricaapi ricó njite lrimjaitana altar nacó, nainaitsa njaji ofrenda namjaitanda piyompinacó. ¹⁸ Lriino jliaji buey njite jliaji cordero, jliaji maaficalri nainonda maaficalri imaodacakjeti nacoda, nayada njaji inaiki. Njaji lrienipe naa lrirso lrirranami, lriwitsicá-carro altar nacó. ¹⁹ Mitsa nayoá toro iiti njite cordero iiti lriitipi nacoda, lrishapi iiti, lritepe njite lrishopana tsakja. ²⁰ Nadee pjiomi njaji nayoaji nacadaa carrona nacodaita iinaitsa njaji maaficalri, njitena Aarón imjaita njaji lriiti altar nacó. ²¹ Aarón jirreta njaji nacodaita njite lricotsipa lriyekema-dalri ofrenda njerretanda Dio irso, cayotsaji Moise inaa capisho nanaitjaca. ²² Njite Aarón ipiajleta njaji lricaapi naikjaolre njaji inaiki aimadan lricaité-carro nanaco matsiadalri; icamitsa yamica lrinaitjaca jliaji ofrenda imatsicanaati ikjaote-dalri, ofrenda lrimjaitanda nacó, njite jliaji ofrenda imaodacakjeti nacó. ²³ Moise njite Aarón, njeewawa nawacaaca carroda iwawa lricojle, njite nadia namoto njiteo niini nacadaaca matsiadalri nanaco njaji inaiki, ikena Dio imatsiaca melremelre-dalri icañjatacawa narso njaji inaiki. ²⁴ Tiyé imotoa lrioshete jliaji IMINALRITI niini lrimjaitaca pjiomi jliaji ofrenda namjaitanda njite njaji maaficalri iiti altar nacoda. Njaji inaiki nacapa cádanaconi, nawana kjaida njite natoda neecoa sho jiipai nacojle.

¹ Nadab njite Abiú, Aarón yénipe, njepa nacoana nawaca carroda tiyé, niini nawacaca tiyé lri-ricoda njite nacadaa lrinacó incienso. Njite-dalri nawaca tiyé Dio irso mitsa corrin Lricoadaca naoyani ima corrica Lritatjandaca naoyani ofrenda shó. ² Niini tiyé imotocawa Dio yoshete njite lrimjaitacana, icaamitsa mayamicana Dio ipeyajle. ³ Njite Moise iaco Aarón irso: ''Icatsa lricaiterrica jliaji wa-Minalri lricaite cádanaco cayoji: ''Nocadaotsa nacapa nomatsiaca narso njaji itsomitacape Njoa. Naawatsa matsiadalri norso pjiomi njaji inaiki aimadan.'' Corritsa coca Aarón icaite. ⁴ Moise iwana Misael njite Elzafán, njaji Usiel, Aarón ikjirri yénipe, lriaco narso: ''Ino idee njaji ikitsin teeco lrioya jliaji waofacawa njite lrioya jliaji wawacaaca-carrodawa.'' ⁵ Niini natsomitacana nadee-carro nadadami, njite narsocatoa nanaco natsayani sacerdote carrodana. Nadee teeco lrioya jliaji naofacawa cayotsa Moise inaa capisho nanaitjaca. ⁶ Njite Moise iaco Aarón irso, njite narso njaji lrienipe Eleazar njite Itamar: ''Macadatsa itsicojle irroa, corrin tskjaotsa itsafaaca itsayani, wdeotsa mayamica sha, wadee kerroaca JLIAJI IMINALRITI nakjoete njaji iwacaacacapewa. Mitsa njaji ikitsiñape njite pjiomi njaji Iraelnai nja dekja itaita íyaca naikjaote njaji IMINALRITI imjaitalri. ⁷ Corrin itaita imotocawa iwacaaca-carroda ipananoma lricó wade mayamica shá, ima a catoa inaco jliaji aceite wa-Minalri iyada.'' Njite nanaitja cayoji Moise icaite capisho narso. ⁸ Caaco JLIAJI IMINALRITI Aarón irso cayoji: ⁹ ''Mairra tsaotsa jaico tjedaa yaaná o irraodati capoanjai, pjia njite njaji pienipe piinaiperri toa, sheewa cádanaco iwacaaca-carrodawa, niniotsa corriotsa mayamí-carroca shá. Cayo mitsaotsa inaitjaca caidalriwetsa naapiya njaji walricomanai, njaji pinaikite aimadan. ¹⁰ Cayoatsa inaitjaca pají-carro njaji shenitaaca-capewa Norso naoya njaji corriperritsa shenitaacawa Norso, coshoca njaji matsiaperri njite njaji corripetsa matsiaperrica, ¹¹ pitaitá carroatsa picanantca nanaco njaji irsolritsa inaitjaca Dio icadaalri inaitjá-carro Moise nakjoite.'' ¹² Caaco Mlolise Aarón irso njite Itamar irso tsakja, njaji lrienipe piketemperri: ''Pjipa njaji ofrenda itepemi yanipe ipania inakjoitepe imjaitanda Dio irso, njite piñjaotsa mewitsa altar icodapi, ima matsiadalri pjaaca jliaji injaodati. ¹³ Pirsotsa pinjacani corricawatsa pacapa imatsicanaati, ima pirsowalreca naapiya njaji pienipe nanakjoite njaji ofrenda Dio irsowalrepe namjaitanda tiyé ricó, icatsa jlia Lrinaalri nocaiteca pirsó. ¹⁴ Nacodaita njite napoita njaji maaficalri nañocotanda Dio ipeyajle, pirsotsa piñjaca mamatsicana-cawatsa, Dio icoadatacawa njiteo. Pjia njite njaji pienipe atsianai njite njaji inaitjepe narsotsa nainjaca piinai nanakjoite, ima nacadaji pirsowalrepe teecojletsa naapiya njaji pienipe nanakjoite njaji maaficalri nainoji ofrenda imaodacakjeti nacó nacadaji njaji Iraelnai aimadan. ¹⁵ Jliaji nacodaita njite njaji nacotsipam nañocotanda narsotsa nadeeca nainaitsa njaji lriiti nacodoetanda tiyé ricó, nadee-carro nañocota Dio ipeyajle. Icatsaotsa piyaapeca caidalriwetsa naapiya njaji pienipe cayoji IMINALRI icaite capishó.'' ¹⁶ Njite Moise itatja jimio coanca lrinaco jliaji ofrenda cabra atsiana nacó namatsicana ikjaoté-dalri, njite lriají opikena namjaitani. Niini kerroaca Moise Eleazar njite Itamar yaapiya, njaji Aaró yénipe piketemperri; lriaco narso: ¹⁷ ''¿Coada corrin iñja lriipe jiaji ofrenda imatsicana ikjaoté-dalri wawacaaca-carroda icodapi, mamatsicanaa-cawatsa, ima wa-Minalri yaa kena irso jlitá-carro namatsicanaa njaji inaiki iwacaacacapewa, naita shopa njaji imatsicanaati Dio ipeyajle? ¹⁸ Icapa corrin ideeca lrirranapemi wawacaaca-carroda lricó, irsopienantja iñjacani wawacaaca-carroda lricó icodapi, cayoji nonaa capisho pia shá.'' ¹⁹ Njite Aaró shepa Moise: ''Picapa, opica njaji inaiki nanaitja naofrenda namatsicanaa ikjaote njite naofrenda namjaitaji Dio ipeyajle, icatsa cayo noyapaca opica. Noiñja cadantja njaji ofrenda namatsicanaa ikjaote, ¿matsia piantja Dio icapaca norso?'' ²⁰ Niini Moise jimi cadanaco cayo, lridiá catiimani.

¹ Caaco jliaji IMINALRITI Moise njite Aarón irso, vcayoji: ² ''Caaco shá narso njaji aimadan Iraelnai cayoji: ''Icatsaotsa njaji caafiperri itaitalriotsa iñjaca nanakjoite pjiomi njaji maaficalri jalredaoca lricoperri. ³ Itaita iñjaca njaji maaficalri botamperri itsota njite idiacape imotoita naiñjanda nawawa lrikjoite nanoma lricojle tsenakja neñjacotá-carro pja. ⁴ Mitsa, niini tsakja njaji maaficalri botamperri itsota njite idiacape imotoita naiñjanda nawawa lrikjoite nanoma lricojle tsenakja neñjacotá-carro pja corri-perritsa itaita iñjaca, caiperri camello shó, namotoita tja naiñjanda nawawa lrikjoite nanoma lricojle tsenakja neñjacotá-carro pja mitsa corrin botamperrica itsona. Niini corritsa matsiadalrica jliaji camello iñjá-carro. ⁵ Corrin tsakja itaita iñjaca conejo tsooni, namotoita tja naiñjanda nawawa lrikjoite nanoma lricojle tsenakja neñjacotá-carro pja mitsa corrin botamperrica itsona. Niini corritsa matsiadalricani iñjá-carro. ⁶ Cayo tsakja jliaji conejo macani, namotoita tja naiñjanda nawawa lrikjoite nanoma lricojle tsenakja neñjacotá-carro pja mitsa corrin botamperrica itsona. Niini corritsa matsiadalricani iñjá-carro. ⁷ Jliaji cootsi, yamaitja tja njaji lritsota mitsa corrin namotoita naiñjanda nawawa lrikjoite nanoma lricojle tsenakja neñjacotá-carro pja, niini corritsa matsiadalricani iñjá-carro. ⁸ Corrin itaita iñjaca neepe njaji maaficalri, corrin tsakja itaita in+otaca nadada mayandalrim. Maatsíperri catsana irso. ⁹ Njaji caafiperri ooni ricoperri itaitalritsa iñjaca. Njaji irsocape nañopje njite cafí-perri, macapawan lricoperri o tsoopeki lricoperri. ¹⁰ Mitsa pjiomi njaji caafiperri ooni ricoperri corriperri irsó nañopje njite corrin tsakja nafí yofacape macapawan lrico o tsoopeki lrico, pjiomi njaji cananiperri yajicapewa ooni ricó irsotsa imenataca ioyawana pjiomi. ¹¹ Imenataji capoa yoyawana, corrin itaita iñjacana corrin tsakja; iménata tsakjaotsa yoyawa nadadam mayamperrimi. ¹² Pjiomi njaji corri-perritsa irso nañopje, njite corrin tsakja narso nafí, njaji ooni lricoperri, irsotsa imenataca yoyawana. ¹³ Icatsa njaji yarrajicaperri corripetsa itaita iñjacana: pérri, wayolri, ¹⁴ terre-trrepalri, perriapape, ¹⁵ pjiomi njaji terremalri poco, ¹⁶ bocócolri catsowani, njaji capjepe macanipe, caacoe, njite pjiomi njaji jaawa ioyawacaperri. ¹⁷ Shenita tsakja ioyawa njaji awado, popolri macani, njite tsonipe tsakja, ¹⁸ popolri jalreni icoda, njite macowe tsakja, wayolri jalreni, ¹⁹ maalri, thawa, calracalra, piitirri. ²⁰ Pjiomi njaji yarrajicape irsocape coatro jiipa, yajicapewa jiipai nacó, irsotsa imenatacana ioyawana. ²¹ Mitsa njaji yarrajicape irsocape coatro jiipa naashopa mitsa iwatsiacape jiipai nacó, itaita iñjacana. ²² Itaita tsakja iñjaca pjiomi njaji iwatsiajicapewa jiipai nacó, njaji piito ioyawacaperri. ²³ Mitsa njaji paana yarrajicapewa irsocape coatro njaipa irsotsa imenataca yoyawana. ²⁴ Inota cada nanakjoite njaji mayami cádanacona maatsicaotsa shá, papienirri dainoma nacojhle matsia watsa shá. ²⁵ Coca cadaa inotana mayami cayaminana, narsotsa nacotsoca natsayani njite maatsicana atee dainoma nacojle. ²⁶ Njaji maaficalri corriperri yamemam natsota matsia, corrin tsakja namotoita naiñjaoda nawawa lrikjoite nañjacotá-carro tsenakja, corri watsa matsiaca irsona. Njite coca cadaa inotani maatsi tsakjaotsani. ²⁷ Njaji maaficalri catsotá-perri yoopatacape yaacapewa coatro sho njaipa, maatsiperrica irsona. Coca cada inota nadada njaji mayamikenana maatsi watsana dainoma nacojle. ²⁸ Coadalri cadaa jipa idee nadadam mayandalrim minatsa lrirsotsa lricotsoca lritsayani njite maatsi catoatsani atee dainoma nacojle. Maatsiperrica njaji maaficalri irso. ²⁹ Njaji maaficalri itsoetaaca-capewa yaacapewa jiipai nacó, njaji: walritsi, jírri, catsirri, ³⁰ doopo, yoana, jíwe, yocanacana. ³¹ Pjiomi njaji maaficalri itsoetaaca-capewa wawasho, maatsiperri catsana irso. Coadalri cadaa jipa idee nadadam mayandalrim minatsa lrirsotsa lricotsoca lritsayani njite maatsi catoatsani atee dainoma nacojle. ³² Mayami cadaa nanakjoite njite njewao condalri nacotsa, maatsi catoatsa jliaji njewalri inacó, jaicoita cadaani, yamacati, maaficalri íyam cadaa o tsacom cadaa. Coadao cadana, irsotsa yapjoetacana ooni ricóna; maatsi catoatsani atee dainoma nacojle. Niininaotsa matsiana. ³³ Njite njaji nanaitjaji caalri shó, njite njaji maaficalrikjaape jiwa cadaa nanacó maatsicaotsa pjiomi neetada fie. Irsotsa ibolrontacana. ³⁴ Niini cada pada yarrodati maatsidalri keetadádalri njite lriitada jiwa cadaa coca naco catsa o iñjaodati nacó cadaa matsiadalritsa, o piotsa lrimatsicani. Lrimatsica pjiomi njaji lri-ricodaperri. ³⁵ Pjiomi maaficalriapape maatsiperri inacope inotaji, maatsicaotsani, poalri cadaa, nayana carroda cadaa. Irsotsa ibolrontacani. Maatsidalri cani niini maatsiperri tsakjana irsó. ³⁶ Ooni yarrocawa cadaa, ooni yárroda cadaa matsiadalritsa, njite njewa cadaa nanaco nanakjoite njaji maaficalrikjape maatsiperritsa ooni ricó, icamitsa maatsicana. ³⁷ Pjiomi maaficalriapape maatsiperri inacope njewa cadawa nanaco njaji paniati iishí, corriotsa namatsicá carroca. ³⁸ Mitsa yarro cadaa ooni paniati iishí nacó njite maaficalriapape maatsiperri inacope jiwa nanacó, icaamitsa maatsicana ioya. ³⁹ Mayami cadaa apana maaficalri itaitaji iñjaca, njite coca cadaainota jliaji mayamdalrim icaamitsa maatsicani, njite matsia watsani dainoma nacojle. ⁴⁰ Coca cadaa iñja jliaji mayamdalrimi lrirsotsa lricotsoca lritsayani njite matsia watsani dainoma nacojle.Coca cadaa jirreta idee jliaji mayamdalrimi lrirsotsa lricotsoca lritsayani njite matsia watsani dainoma nacojle. ⁴¹ Irsotsa imenataca ioyawa pjiomi njaji maaficalri yaacapewa nawawa shó, corrin itaita iñjacana. ⁴² Pjiomi njaji yaacaéwa nawawa shó, pjiomi yacapewa cotro njaipa shó, o aima cadaa pja njaipa njaji yacapewa jiipai nacó, corrin itaita iñjacana, irsotsa imenataca ioyawana. ⁴³ Macadatsa maatsica sha naikjaote njaji maaficalri maatsiperritsa yacaéwa jiipai nacojle. ⁴⁴ Ima IMINALRI Dio-ca Njoa. Irsotsa shenitaacacawa maatsiperri ioya, niini shenitacawa matsidalri ioya, ima Shenitaaca cadawa maatsidalri ioya-ca Njoá. Macadatsa maatsica sha naikjaote njaji maaficalri maatsiperritsa yacaéwa jiipai nacojle. ⁴⁵ Ima icatsa IMINALRITI-ca Njoá, jitalri shá Egipto jipaite rikjoite, iDiote-carro Njoá. Irsotsa shenitaacacawa maatsiperri ioya, ima shetitaaca cawa maatsidalrica Njoá. ⁴⁶ Icatsa njaji yácoti kjaidaperri nanacó njaji maaficalri, kepirre, njite pjiomi njaji caafiperri cananiperri ooni ricópe, njite pjiomi njaji yacapewa nawawa shó jiipai nacó, ⁴⁷ itaitá-carro yajica coanperrica njaji maaficalri matsiaperri njite njaji maaficalri maatsiperri, njite njaji caafiperri itaitaji iñjaca njite njaji caafiperri corri perritsa itaita iñjaca."

¹ Caaco JLIAJI IMINALRITI Moise irso: ² ''Picaite narso njaji inaiki aimadan Iraelnai cayoji: Kewedan cadaa apama ínarro njite jíco rooya pada atsiada, niniotsa maatsi catoano siete jalredaoca, cayotsaji maatsi capishono canopa cádanacono kérri icoamdalri. ³ Njite ocho jalredaoca naó narsotsa nayoaca lriatsiaca íya jkliaji yémpeti. ⁴ Mitsa rsoaji jlidoa rorsotsa rowapaca trenta tre jalredaoca matsiá-carrono roirranarromi. Corrin rotaita ronotaca cocacani njenitanda, corrin tsakja rotaita rsoewacawa nawacaaca carroda lricó a kjerreca matsiano. ⁵ Mitsa ínarroda cada roenipe, yamanja semana watsa maatsi cano cayotsaji maatsi capishono canopa cádanacono kérri icoamdalri. Mitsa rsoaji rsodoa rorsotsa rowapaacawa sesenta sei jalredaoca matsiá carrono ⁶ Njite yaami cayamina maatsicano, roenipe atsiada o ínarroda ikjaote, rorsotsa rodeeca apana cordero pawalria-dalri ipekirrica romjaitanda ofrendawa, njite apaapa tsootsobo emine toa o yamaapa potocadape ofrenda romatsicanaa ikjaote, lrirso jliaji sacerdote nawacaaca-carroda ipananoma lricó. ⁷ Niiniotsa lriino caotsana DIo irso, lriinoca njaji maaficalri romatsicanaa ikjaote, nininaotsa matsiacano roirranaa sahapodam. Icatsa yácotica ronaco rsoaji ínarro roenipiarrom, atsiada cadaa o ínarroda cadaa. ⁸ Mitsa corri cadaa rotaita rowentaca apana cordero, niini pedaotsa rodeeca yamaapa potocadape o yamaapa tsootsobo emipe toa, namjaitaoda jliaji apaapa, njite ofrenda romatsicanaa ikjaote jliaji apaapa, jliaji sacerdote inoatsana romatsicanaa ikjaote matsiá carrono.''

¹ Caaco JLIAJI IMINALRITI Moise irso njite Aarón irso tsakja cayoji: ² ''Pada irso cadaa lriyapa nacó colrotodpá-dalri, o cafícani, o lritserre jaalredalri njite capoá-dalri irrenati cani lridaki iyapa nacó, irsotsa ideecani Aarón irso, jliaji sacerdotenai yápiyawalre, o dapa lrienipe, njaji sacerdotenai. ³ Njite jliaji sacerdote lricapaotsa matsia jliaji ipoati lriya nacoda. Jaalre cadaa njaji lriiyo carrena cawani, njite tjewaca cadaa lriawa jliaji lrirrená lríya nacoda, njite cayo cadani pada irrenati cafainadalri. Njite sacerdote icapa cayaminani, lriwacatsa jliaji carrená-dalri lrirsotsa lricaitiacacawa maatsí-dalri cani. ⁴ Jaalrédalri cadaa jliaji lritserre lríya nacoda, njite corrin tjewacaca jliaji lrirrena, corrin tsakja jaalreca nja lríyo lritserre nacope, jliaji sacerdote lrirsotsa jlietacani panti ricó siete jalredaoca lrirrena ikjaote. ⁵ Siete jalredaoca nacó, jliaji sacerdote lrirsotsa lricapaca coankenani lrirrená nacó, corri cadetsa lritaoñawa lridaki nacó. Corri cadetsa lritaoñawa, jliaji sacerdote lrirsotsa jlieta tsenakjani panti ricó siete jalredaoca tsenakja. ⁶ Jliaji sacerdote lricapa tsenakjani corri cadetsa lritserre itaoñawa jliaji carrená-dalri, corri cadetsa lritaoñawa lrirsó, jliaji sacerdote icaoteotsa lrinaco matsiadalri kenani. Catitidalri piacatsa njaji imotolri lridaki nacó. Lrirsotsa lricotsoca lritsayani, njite ikena matsiakenani. ⁷ Mitsa Lrititin itaoña cadawa lríya nacó lricañjataaca cayaminawa sacerdote irso matsiá carroni, lrirsotsa lridiaca tsenakjawa sacerdote ikjaolre. ⁸ Jliaji sacerdote icapaotsa lrititín itaoña cadawa lríya nacó, namoto cadapjawa lrirso, cayo cadani, jliaji sacerdote lrirsotsa lricaiteca lrinaco maatsí-dalricani. Lrirsoca pada irrenati capoadalri. ⁹ Pada irso cadaa pada irrenati capoadalri lridaki nacó, irsotsa ideeca jliaji inaiki sacerdote ikjaolre. ¹⁰ Njite jliaji sacerdote lricapaotsa matsia jliaji ipoati lriya nacoda. Colrotoda jaalre-dalri cadaa jliaji lríya nacoda, jaalre cada njaji lriiyo carrena cawani, o corri cada lriawacawa colrotoda cawani. ¹¹ Cayo cadani pada irrenati cafainadalri cani nadaki nacoda, jliaji sacerdote icaiteotsa lrinaco maatsí-dalri cani. Corriotsa lriitá carroca lriicao, ima opikena maatsini. ¹² Njite lría cadawa jliaji lritserre jaalredalri pjiomi lridaki naco, jliwida nakjoite atee jliipa nacojle, lriá cadanacoa sacerdote ikjaolre, ¹³ jliaji sacerdote icapaotsa matsiani jaalre cada lridaki naco pjiomi. Cayo cadani, jliaji sacerdote icaoteotsa lrinacó corricatsa lrtserre inaitja maatsi lrirso. Jaalre cadaa lridaki jliaji inaiki lritserre imá, cotsa maatsí-dalri cani. ¹⁴ Mitsa cayaonipena cadani, icaamitsaotsa maatsí-dalri caní. ¹⁵ Kérrana cadaa sacerdote icapa lriyaoni ricó jliaji carrená-dalri, lrirsotsa lricaiteca lrinacó matsídalri cani lriyaoni lrikjaote. Ima pada irrenati capoadalrica jliaji lrirsolri. ¹⁶ Mitsa jaalre cadaa lridiacawa jliaji lriyaoni, jliaji inaiki lrirsotsa lriacawa sacerdote ikjaolre tsenakja. ¹⁷ Jliaji sacerdote lrirsotsa lricapaca matsiáni jaalre cadenakja matsia jliaji iyaoniti pia. Cayo cadani, jliaji sacerdote lrirsotsa lricaiteca lrinaco ópi kema matsiá jliaji inaiki. ¹⁸ Cayaoni pia cada pada inaiki lridada nacó njite lriawacawa lrioya, ¹⁹ njite colrotodacani jaalredalri lriyaoniarrom ricó o cayanalre cadani, o írracani lrirso, lrirsotsa lricañjatacani sacerdote irso. ²⁰ Jliaji sacerdote icapaotsa matsiá tjeewaca cadaa lriacawa lridaki nacó, njite jaalre cadaa lríyo lri-ricodape, njite cayo cadaa, jliaji sacerdote lrirsotsa lricaiteca lrinaco ópica maatsini. Lrirsoca pada irrenati capoadalri, lritaoña cadawa lriyaoniarrom lricó pia. ²¹ Mitsa matsia cadatsa sacerdote icapaca lriyaoniarromi, corrin jaalreca nja lríyo, corritsa cayaonicani tjeewaca, icaamitsa lriawaca matsia, niini jliaji sacerdote lrirsotsa jlietacani paanti ricó siete jalredaoca. ²² Njite lripocota cada pjawa lridaki nacó, jliaji sacerdote lricaiteotsa lrinaco ópica maatsini. ²³ Mitsa corri cadetsa lritaoñawa, corrin lripocotawa, lriyaoniarrom catsani njite jliaji sacerdote lricaiteotsa lrinaco matsiadalri catsani. ²⁴ Pada ima cádawa lridaki nacó njite lridia lriawacawa lrimakje, mitsa jaalreni irraipjerrina tsakja, o jaalreca niini, ²⁵ niniotsa jliaji sacerdote icapaotsa matsiá tjeewaca cadaa lriacawa lridaki nacó, njite jaalre cadaa lríyo lri-ricodape, njite cayo cadaa, jliaji sacerdote lrirsotsa lricaiteca lrinaco ópica maatsini. Lrirsoca pada irrenati capoadalri lrimacawa lrico ima lritaoñaca lrirso. ²⁶ Mitsa sacerdote icapa cadaa matsia corrica pacapa lríyo jalreperri lri-ricoda, corrin tsakja cayaonini tjewaca, lriawacawa matsiatsawa, jliaji sacerdote lrirsotsa jlietacani panti ricó siete jalredaoca. ²⁷ Siete jalredaoca nacó, jliaji sacerdote lrirsotsa lricapacani tsenakjan. Lritaoña cadawa lrirso, jliaji sacerdote lricaiteotsa lrinacó ópica maatsini. Lrirsoca pada ipoati capoadalri. ²⁸ Mitsa corri cadaa lritaoña lrirso, lriawaca lrioya matsiatsa, icaamitsa caapowamca lrirso lriyaoniarromi, niini jliaji sacerdote icaiteotsa lrinaco matsiadalri catsani. caapowam catsa lrirso lriyaoniarromi. ²⁹ Pada atsia o ínarro cadaa irso pada irrenáti njewida nacó catjiná-dalri, ³⁰ jliaji sacerdote irsotsa icapacani matsia jliaji inaiki capoadalri cadaa jliaji irrenati lrirsolri tjeewacadalri yaawa, o orraiperrimi cadaa njaji itsicolreti lrinacope, cayo cadani, jliaji sacerdote lrirsotsa lricaiteca lrinaco maatsidalrica jliaji inaiki lrikjaote jliaji lrirsolri. Ima weeca narsoni, pada irrenáti njewida nacope catjinaadalri. ³¹ Mitsa matsia cadatsa sacerdote icapacani lrioya jliaji lriwekjerre jliwida nacoda, corricatsa tjewacadalri cani, ítaperri catsa njaji lritsicolre, jliaji sacerdote shetaotsani panti ricó siete jalredaoca jliapiya jliaji irrenáti lrirsolri. ³² Siete jalredaoca nacó jliaji sacerdote icapa tsenakjaotsa coajikena jliaji irrenáti corri cadetsa lritaoñawa. Matsia cadatsa njaji itsicolreti, corri cadaa tjeewacaca lriawa jliaji irrenati lríya nacoda, ³³ niini narsotsa nayoaca lritsicolre, mitsa corrin nataita nayoaca njaji lritsicolre lriyaoni ricope njite sacerdote sheta catani panti ricó lriyaoni yaapiya siete jalredaoca pja. ³⁴ Siete jalredaoca nacó, jliaji sacerdote lricapa tsenakjani corri cadetsa lri-rena itaoñawa lridaki nacó. Corri cadetsa pacapa tjeewaca lríya nacó, jliaji sacerdote icaoteotsa lrinaco matsiadalri kenani. Catitidalri piacatsa njaji imotolri lridaki nacó. Jliaji inaiki irsotsa lricotsoca lritsayani, njite ikena matsiakenani. ³⁵ Mitsa lritaoña cadaa lrirso jliaji weedalri jliwida nacó sacerdote icate cayami pienatja matsiadalri kenani, ³⁶ niini jliajin sacerdote irsotsa icapaca tsenakjani, lritaoña cadawa jliwida naco jliaji weedalri, corrinatsa lriomá carroca lrioya lritsicolre orraiperrimi. Icaamitsa lricaiteca lrinaco maatsidalricani. ³⁷ Mitsa corri cadetsa sacerdote icapa lritaoñaca lrirso jliaji lriwekjerre, njite itaperrica njaji lritsicolre, opikena matsiani lrioya. Niini matsiadalri kena, sacerdote irsotsa icaiteca lrinaco matsiadalri kenani. ³⁸ Pada atsia o apama ínarro irsocada jaalre-perri nadaki nacó, ³⁹ niini jliaji sacerdote irsotsa icapacani matsiá corri cadatsa matsinaadalri cani, pada imoto cadatsao. Corriotsa maatsí-dalri cani. ⁴⁰ Pada atsia itsicolre jiwa cadawa lrida ioya, icaamitsa capolré cani, cotsa maatsídalri cani. ⁴¹ Njite lritsicolre lriecoa icaoperri jiwa, icaamitsa capolrécani lriecoa nacó, mitsa matsiadalri cani. ⁴² Mitsa lrirso cadaa lripólre nacó lriwekjerre irraiperri, lrirsoca irrenáti capoadalri imotocape lrinacó. ⁴³ Jliaji sacerdote irsotsa icapacani matsia irraidalri cadaa jaalredalri ricó lripolré nacoda, cayocaniji paapacapem shó padaki nacó. ⁴⁴ Cayo cadani, lrirsoca pada irrenáti capoadalri nini maatsidari cani. Jliaji sacerdote irsotsa icaiteca lrinaco maatsidalri cani lrikjaote jliaji ireenáti lrirsolri. ⁴⁵ Jliaji inaiki carrenadalri cayó lrirsotsa jlietaca lritsayani tserre-tserrédalri, lrirsotsa lricadaaca lri-tsicolre írro catsawa lriitácarrotsa lriecoa njite lriwana kjaida: ¡Maatsí-dalrica njoá, maatsí-dalrica njoá! ⁴⁶ Lrirso cadatsa njaji lriyaonipena capoaperri maatsí-dalri catsani. Maatsí-dalri cani lritaita capoa lritaoñaca lrirso jliaji lrirsolri, lrirsotsa lriofacawa jliwacatsa, teeco lrioya jliaji naofacawa pjiomi. ⁴⁷ Donirro cadaa pada natsayan nacóda, tawalrekjá-dalri, jérriwaikjadalri cadaa, ⁴⁸ o coadalricatsa nawanikja o neñaji tawalrekja, o jérriwaikja, o maaficalri íya cadaa ⁴⁹ donirro cadaana jipolre-perri o irrapjirriadalri njaji imotolri nanacó njaji narsolri, maatsidalrica jliaji narsolri ipocota cadawa; irsotsa ideecani sacerdote ikjaolreni. ⁵⁰ Sacerdote icapaotsa matsia njaji napapí lrirsocadaa maatsídalri; lrirsotsa jlienitacani siete jalredaoca. ⁵¹ Siete jalredaoca nacó lrirsotsa lricapaca lripieta jliaji napapí lritaoña cada minitsa njaji donirróperri lrinacope. Lritaoña cadawa, maatsí-dalrica jliaji írrolrio lrinacó, niini maatsí-dalrica jliaji napapí. ⁵² Lrirsotsa lrimjaitaca pikeetemi jliaji napapí ima lrirsoca lripoa maatsí-dalritsa lrinacó. ⁵³ Mitsa corri cadaa nataoñawa njaji donirro-perri nanaco njaji napapí, ⁵⁴ icamitsaotsa lrinaaca lriminalri icotsocani njite jlienitani siete jalredaoca pja tsenakja. ⁵⁵ Njite lricotso cayamina jliaji napapí, jliaji sacerdote lricapa tsenakjaotsani matsia. Caicarrom cadatoani, corri cadanatja nataoña pjaawa, icaamitsa maatsicani. Njite lrirsotsa lrimjaitaca jliaji ipapí, cotsa coadaca a kjerrecawa catsa lrirso jliaji lridonirroca. ⁵⁶ Mitsa tecojle cadaa pjena lricapacanaa jliaji donirrodalri ipapiti nacoda lricotso cayaminani, lritaita lriyoaca jliaji donirrocawa ipapiti nacoda. ⁵⁷ Njite corri cadaa yami donirroca jliaji ipapiti nañaji tawalrekja sho, o jérriwaikja shó, o maaficalri íyam shó icaamitsa imjaitacani ima lrirsoca maatsídalri. ⁵⁸ Matsia cadena jliaji tsaya o ipapiti nañaji tawalrekja sho, o jérriwaikja shó, o maaficalri íyam shó nacotso cayaminani, ipieta tsenakja icotsocani matsiá-carro dekjenani. ⁵⁹ Icatsa yácoti kjaidadalrica nanaco njaji tsayape o napapí nañaji tawalrekja sho, o jérriwaikja shó, o maaficalri íyam shó, itaitá-carro icaiteca matsiadalri cani.

¹ Caaco JLIAJI IMINALRITI Moise irso, lriaco: ² ''Cayoatsa njaji yácoti kjaidaperri nanaco njaji inaiki irsocape natserre jálreperri nadada nacó jliadaa jécoapi matsia kenana. Lrirsotsa lriacawa sacerdote ikjaolre. ³ Jliaji sacerdote imotoatsa naofacawa ioya lricapá-carro matsia kena jliaji inaiki irsocada pia iyamikje capoadalri lridada nacó. ⁴ Njite jliaji sacerdote inaa watsa jliaji carrenaadalri pia lrid-carro yamaapa caafiperri yarracapeo matsiaperri, jaico cedrona, tawalrekja írraikjai njite paniatida pomenidalri iitan. ⁵ Sacerdote inaa watsa lriinó-carro apaapa nanakjoite njaji lrideji ooni matsiajai ricó yarropetida lricoda. ⁶ Njite jliaji sacerdote jipaotsa caafitsa jliaji wipjiarro lridenda, jaico cedrona, tawalrekja írraikjai njite paniatida pomenidalri iitan, njite lriapjoeta caotsa pjiomina lrírranam lricó jliaji wipjiarro lrinonda ooni matsiajai ricó. ⁷ Njite sacerdote iwitsicacaotsa siete piape lrinaco jliaji inaiki icotsoaca cadawa lrirrena ioya, njiteotsa sacerdote icaiteotsa lrinaco matsiadalri kenani. Njite sacerdote icadaotsa lriawa jliaji wipjiarro caafitsa awacada lricojle. ⁸ Njite jliaji carrená-dalri pia lricotsoatsa njaji lritsayani, lritsicolre, njite lripitaotsa ooni ricó matsia, niininaotsa matsia kenani. Njitenaotsa lritaita jliewacawa naofacawa lrico, mitsa corritoatsa lritaita jliewa catoa lripanaita lricó, lriofatoatsa pemajle lrioya siete jalredaoca. ⁹ Ocho jalredaoca nacó lriyoá watsa lricolre, jlirritaotsa lritsinoma njite lritjiweyo. Lrirsotsa jlirritaca lrioyawa pjiomi lridada íyo, lrirsotsa lricotsocacawa ooni ricó, lricotso lritsayan pjiomi; njite dekjenaotsa matsiani. ¹⁰ Ocho jalredaoca nacó lrirsotsa lrideeca yamana cordero atsiana matsiani petsa, apana cordero inarrona pada oniadarro ipekirrica, matsiani tsa, once kilo harinape matsiadalri aceite fiedalri ofrenda paniati inaca nacoda, njite pada taza aceite tsakja. ¹¹ Jliaji sacerdote idejirri matsiá-carro jliaji inaiki, lricadaotsa lriemao jliaji inaiki nacodapi njaji lriderri Dio ipeyajle nawacaaca-carroda ipananoma lricó. ¹² Jliaji sacerdote jipaotsa apana cordero atsiana lriinó-carro ofrenda lrimatsicanaa ikjaote, njite lricadaa tsakjaotsa jliaji aceite, jlirretaotsa jliaji ofrenda ima ofrenda njerretandaca Dio ipeyajle. ¹³ Lrirsotsa lriinoca jliaji cordero atsiana nainocawa njaji ofrenda namjaitaoda imatsicanaati ikjaote, nawaaca-carroda lrico, njite jliaji ofrenda imatsicanaati ikjaote lriyadacan jliaji sacerdote, cayotsaji lricayosho jliaji ofrenda caikjaolrena cádanacona, ima njenitandaca matsiadalri shó. ¹⁴ Sacerdote jipaotsa irranati inacope lriñjetá-carro jlieni rico jliaji inaiki imatsietacalriwa lrimatsicana ioya, lriñjeta tsakjaotsa lricaapjiwida makjewi nacó, njite jliipjewida makjewi nacó tsakja atsialriema-perri. ¹⁵ Njite sacerdote yarroatsa jliaji aceite taza lricoda lricaapi inarroema lrico, ¹⁶ njite lriapjoeta watsa lricaapjiwida atsialriemadalri aceite ricó inarroema lricodalri, njite lriwitsicacaotsa lrinacope lricapjiwida sho siete piape Dio ipeyajle. ¹⁷ Njite sacerdote jipaotsa aceite inacope lricaapi ricó njite lricaotsani jlieni ricó atsialriemadalri jliaji atsia imatsietaaca cádawa lrirrena ioya, lricadaa tsakjaotsa lricaapjiwida nacó makjewi njite lriipjewida makjewi naco tsakja atsialriema minitsa pjiomi. Lrirsotsa lricadaaca jliaji aceite lrinaco jliaji írranati ofrenda nacoda imatsicanaati ikjaotedalri. ¹⁸ Jlite lriitepem jliaji aceite, sacerdote icadaotsani jliwida nacó jliaji ipiyoacalriwa lrirrena ioya, njite sacerdote ipiyoatsa lrimatsicana Dio ipeyajkle. ¹⁹ Njite jliaji sacerdote icadaotsa jliaji ofrenda imatsicanaati ikjaote njite lripiyoatsa lrimatsicanaa lrioya jliaji imatsietaacalriotsa lrirrena ioya, lriino cayami jliaji ofrenda namjaitanda. ²⁰ Njitena sacerdote ideotsa jliaji ofrenda namjaitanda njite jliaji ofrenda napania ínaca inacope altar nacó. Sacerdote ipiyoatsa lrimatsica jliaji inaiki, ikenaotsa matsiakenani. ²¹ Mitsa, kjenadalri cadatsa jliaji atsia njite corrin lricoa lrirso lriinó-carro njaji maaficalri, lrirso peda lrideeca apana cordero atsiana ofrenda shó lrimatsicanaa ikjaotenaadari jlirretá carroni, lripiyoacá-carroa lrimatsicana ioya lriwaca-waacatsa, njite lridee tsakjaotsa yamada kilo harinape matsiapedalri aceite fieda ofrenda shó napania iinaca nacoda, njite apjeco aceite, ²² lridee tsakjaotsa yamapa potocadape o yamaapa tsootsobo yénipe, njaji lritaitajitsa lrioketaca; apaapa nanakjoite lrimatsicanaa ikjaotenaadalri, njite jliaji apaapa ofrenda lrimjaitaoda watsa. ²³ Ocho jalredaoca nacoatsa lrirsotsa lrideecana sacerdote irso lripiayoaca shopawa, nawacaaca-carroda ipananoma lricó, Dio ipeyajle. ²⁴ Njite sacerdote jipaotsa jliaji cordero ofrenda icaonada, njite jliaji aceite olivape, njite jlirretawatsana yénonrse Dio ipeyajle. ²⁵ Njite lriinoatsa jliaji cordero ofrenda imatsicanaati ioyadalri, njite jlitaotsa lrírrana nakjoite njite lricadaotsa jlieni ricó jliaji ipiyoacacadawa, lricaapjiwida makjewi nacó njite jlipjewida makjewi nacó tsakja, atsialriema minitsa pjiomi. ²⁶ Njite sacerdote yarroatsa aceite inacope lricaapi inarroema lrico, ²⁷ njite lriapjoeta watsa lricaapjiwida atsialriemadalri aceite ricó inarroema lricodalri, njite lriwitsicacaotsa lrinacope lricapjiwida sho siete piape Dio ipeyajle. ²⁸ Njite jliaji sacerdote icadaotsa aceite inacope lricaapi lricoda jlieni ricó jliaji ipiyoacacadawa, lricaapjiwida makjewi nacó njite jlipjewida makjewi nacó tsakja, atsialriema minitsa pjiomi, atsa lriñjeta nanaco minatsa lriñjetacawa irranati imatsicanaati ikjaotenaadalri. ²⁹ Njite jliaji lriitepem jliaji aceite lricadaotsa jliwida nacó jliaji ipiyoacacadawa lripiyócarroatsa lrimatsicanaa lrioya Dio ipeyajle. ³⁰ lrirsotsa lrideeca apaapa nanakjoite njaji potocadape o tsootsobo yénipe, njaji lritaitajitsa lrioketaca ³¹ apaapa, ofrenda lrimatsicanaa ikjaote njite jliaji apaapa ofrenda lrimjaitanda, nainaitsa njaji ofrenda paniati ínaca nacoda. Njite sacerdote ipiyoatsa lrimatsicanaa jliaji ipiyoaca cádawa Dio ipeyajle. ³² Icatsa njaji yácoti kjaidaperri naicaoda njaji inaiki irsocape itserre capoa-perri nadada nacó, njaji corrí-perri itaita icaoñaca maaficalri napiyoaca shopawa.'' ³³ Caaco JLIAJI IMINALRITI Moise irso njite Aarón irso, Lriaco narso: ³⁴ Ioca cádanacoenaotsa Canaán jipaite ricojle, jliaji nocadanda irso, njite nocada cadaa donirroca iipana lriricoda jliaji jiipai nocadanda irso, ³⁵ jliaji panti iminalri lrirsotsa lriaca lricate lrinaco sacerdote irso. Lricaiteotsa cayoji: ''Donirroca paají jliaji noopana.'' ³⁶ Njite jliaji sacerdote inaa toatsa namotoca lrioya jliaji panti lripeya jliewaca lricapa lridonirroca jliaji pantí, wadentja maatsica pjiomi njaji panti-ricope. Jliapodamina sacerdote sheewawa pani ircó lricapá-carro. ³⁷ Lriomaotsa lricapa matsia nerrocadawa panti iwai nacó njaji nonirró-perri, jipolré -perri cadana o irraipishia cadaana nerrocawa pantiwai nacó. ³⁸ Njite lrirso cadaa lridonirroca jliaji panti sacerdote imotoatsa lrioya njite lriitaca panti-ipananoma siete jalredaoca. ³⁹ Ocho jalredaoca shapodam sacerdote idia tsenakjaotsa icapa jliaji panti lripocotá cadawa jliaji lridonirroca lriwai nacó jliaji panti. ⁴⁰ Njite cay- cadaa, sacerdote inaa watsa njetaca jliaji jiipada nerrocawa njaji maatsiperri napeecó-carro pemajle lrioya jliaji nayacalre napeecocawa njaji matsiperri. ⁴¹ Narsotsa njerritaca panti-iwai idaa, njite njetaotsa jliaji maatsidalri irrocawa njerritandena nadee-carro napeeco pemajle lrioya jliaji yacaalre napecocawa njaji maatsí-perri. ⁴² Njite nerroetaotsa paana jiipada walriperri nárrontacao njaji maatsiperrimi, njite nadaata tsenakjaotsa jliaji panti caalri walriperri shó. ⁴³ Njite donirro cadaa lripieta jliaji panti-iwai namatsieta cayami piena pjiomi jliaji panti, ⁴⁴ sacerdote idia tsenakjaotsa shewawa panti lricó lricapá-carro napocota cadawa njaji panti idonirroca. Cayo cadaa, ikenaotsa lrijica maatsídalrica jliaji imotolriwa panti nacó, nininaotsa maatsidalrica jliaji panti. ⁴⁵ Narsotsa napeecoca jliawawa jliaji panti. Njite narsotsa nadee napeeco pjiomi njaji lrinacoperri jiipada, jaico, pjiomi njaji nacaalrita shopami pemajle lrioya jliaji yacaalre napeeco cawa lrico njaji maatsiperri. ⁴⁶ Coca cadaa sheewawa lri-ricoda jliaji panti sacerdote inaa caojli piatoa naitacani maatsi catoani atee dainoma nacojle. ⁴⁷ Njite cocadaa imaa lri-ricoda jliaji panti lrirsotsa lricotsoca lritsayani, caitsakja jliaji ijacada pia lri-ricoda jliaji panti lricotsoca lritsayani. ⁴⁸ Sacerdote sheewa cadaa lri-ricoda jliaji panti lricapá-carro corri ketsa pacapa lrimatsica jliaji panti nadia cayami namatsietani, njite corri cadetsa pacapa, nininaotsa lricaite matsia kena jliaji panti. ⁴⁹ Njite sacerdote irsotsa jipaca yamaapa wipjiarro lripiyoshopa jliaji panti, jaico cedrona, tawalrekja írraikjai njite paniati papocodalri. ⁵⁰ Lriinoatsa apaapa nanakjoite njaji wipjiarro ooni matsiajai caalriapi ricoda. ⁵¹ Jlipaotsa jliaji jaico cedrona, tawalrekja írraikjai, njite jliaji wipjiarro cafiaparro, njite lriapjoetaotsana roirrana lrico jliaji wipjiarro lrinonda, ooni matsiajai lricoda, njite lriwitsicaca siete piape panti nacó. ⁵² Lrimatsiteaotsa jliaji panti wipjiarro írrana shó njite ooni matsiajai shó, wipjiarro cafidarro shó, jaico cedrona shó, paniatida poco njite tawalrekja írraokjaidalri. ⁵³ Mitsa lricadaotsa roawa rsoaji wipjiarro cafiaparro pemajle lrioya jliaji yacaalre awacada lricó. Icatsa lrinaitjaca cayo lripiyó-carro jliaji panti, njite ikena matsiacani. ⁵⁴ Icatsa yácoti kjaidaperri nanaco njaji ipoati capoaperri nadada nacope njite njaji imalri mana weecana nadaki nacó, ⁵⁵ tsaya nacó cadaa njite panti nacope, ⁵⁶ íshacadao, caacaiperri naco, njite itserreti jaalré-perri, ⁵⁷ inaitá-carro yají maatsidalri cada jliaji narsolri njite coanca matsiakenani lrimatsica ioya lridada nacoda o paiti-iwai ioya.

¹ Caaco jliaji IMINALRITI Moise irso Njite Aarón irso tsakja, Lriaco narso: '' ² Icaiteotsa narso njaji Iraelnai aimadan cayoji: ''maatsidalri yaa cadawa pada atsia ioya, maatsi capoa lridaki ricó, icaamitsa maatsídalri-cani. ³ Lrima jliaji maatsiajai imotolri lridaki ioya. Lriá cada lrioya o corri cadetsa lriá lrioya, mitsa maatsi-dalri cani. ⁴ Jliaji lricoacawa lrico, njite pjiomi njaji lriofacawa nacó maatsiperricana. ⁵ Coca cadaa inota lriamaki lrirsotsa lricotsoca lritsayani njite lrirsotsa lricotsoacacawa ooni ricó, njitenaotsa matsiacani dainoma nacojle. ⁶ Cocacada iofawa lriofacawape naco jliaji aatsia maatsidalritsa idaki ricó, jliaji inaiki lrirsotsa lricotsoca lritsayani njite lrirsotsa lricotsoacacawa ooni ricó, njitenaotsa matsiacani dainoma nacojle. ⁷ Coca cadaa inota lridada jliaji atsia maatsidalritsa idaki ricó, lrirsotsa lricotsoca lritsayani njite lrirsotsa lricotsoacacawa ooni ricó, njitenaotsa matsiacani dainoma nacojle. ⁸ Jliaji inaiki maatsidalritsa idaki ricó jliwita cada lrinaco jliaji matsiadalritsa, jliaji inaiki lrirsotsa lricotsoca lritsayani njite lrirsotsa lricotsoacacawa ooni ricó, njitenaotsa matsiacani dainoma nacojle. ⁹ Jliaji inaiki maatsidalritsa idaki ricó lriofa cadaa lrinaco jliaji naofá carrona caballo nacó, icaamitsa maatsi catsakjani. ¹⁰ Coca cadaa inota lriyárro jliaji maatsidalritsa idaki ricó, icaamitsa maatsicani atee dainoma nacojle, njite cocacadaa idee njaji lriyarroaji lrirsotsa lricotsoca lritsayani njite lrirsotsa lricotsoacacawa ooni ricó, njitenaotsa matsiacani dainoma nacojle. ¹¹ Coandalri catsa maatsi idaki ricó njite lrinota cada pada inaiki corri cadana toa lricotso lricaapi, jliaji inaiki lrinotanda lrirsotsa lricotsoca lritsayani njite lrirsotsa lricotsoacacawa ooni ricó, njitenaotsa matsiacani dainoma nacojle. ¹² Jliaji maatsidalritsa idaki ricó lrinota cadaa pada tsipada lrirsotsa lribolrontacani, mitsa jaicoita cada njaji parrato lrirsotsa lricotsocani. ¹³ Matsia cadena jliaji maatsidalri pia idaki ricó, lrirsotsa lriniwetaca lrirsowao siete jalredaoca matsiácarroni; njite lrirsotsa lricotsoca lritsayani njite lricotso lridada tarracacawa lrico ooni. Njitenaotsa matsiani lrimatsicana ioya. ¹⁴ Njite ocho jalredaoca nacojle lrirsotsa lrideeca Dio ipeyajle nawacaaca-carroda ipananoma nacojle yamaapa potocadape o yamaapa tsootsobo yénipe; icatsa lriacana sacerdote irso. ¹⁵ Jliaji sacerdote lrirsotsa lrideecana, apaapa lricadaotsa ofrenda imatsicanaati ikjaote njite jliaji apaapa lrimjaitaoda, njite jliaji sacerdote lrirsotsa lriinocani Dio ipeyajle lrimatsicanaa ikjaote. ¹⁶ Lriatsiaca yaana yarro cada pada atsia ioya, jliaji atsia lrirsotsa lricotsoca matsia pjiomi lridada ooni ricó; njite matsia watsani dainoma nacojle. ¹⁷ Lrirsotsa lricotsoca lritsayani lrinotaacacawa lrisho njite lridada tsakja; njite matsiacani dainoma nacojle. ¹⁸ Aape atsia njite apama ínarro nemaa cadaa yamadape njite nadakitaacawa, narsotsa napitaca yamadape ooni ricó; njite matsiawatsana dainomajle. ¹⁹ Canopa cadaa apama ínarro, siete jalredaoca watsa maatsicano, coca cadaa inotano maatsiwatsani atee dainoma nacojle. ²⁰ Pjiomi njaji ronotalri cayo cadanacotoano maatsi-perri watsan, cayo tsakja njaji baaco rofánipe naco, maatsi tsakjaotsana. ²¹ Cocadaa inota roaamaki lrirsotsa lricotsoca lritsaayani njite lricotsoacawa ooni ricó; njite matsiawatsa jliaji inaiki dainoma nacojle. ²² Coca cadaa inota njaji rofacawa naco lrirsotsa lricotsoca lritsaayani njite lricotsoacawa ooni ricó; njite matsiawatsa jliaji inaiki dainoma nacojle. ²³ Lrinita cadaa roamaki o rofacawa naco, matsiawatsa jliaji inaiki dainoma nacojle. ²⁴ Coca cadaa imaa roapiya njite ronopaa inotani, niniotsa maatsica jliaji inaiki siete jalredaoca. Pjiomi njaji aamaco ronotaji maatsicana. ²⁵ Wiá cadaa kerranaca rsoaji ínarro ronopa ricó, o canopa cadano corri cadanatoa rsonaana toa, niini maatsi caotsano a kjerreca yaami kérrana naco ima corrica yaami lriaca rooya. Maatsí-darro cano. ²⁶ Pjiomi ro-ámaki rocoá cawa lrico kérrana cádanaco, icatsaotsa njaji rocoa cawa lrico-ca, o njaji rofacawa naco kérrana cadanacono, maatsicana roirrana ikjaote. ²⁷ Coca cadaa inota njaji maatsiperritsa; lrirsotsa lricotsoca lritsaayani njite lricotsoacawa ooni ricó; lrirsotsa lricotsoca lritsaayani njite lricotsoacawa ooni ricó; njite matsiawatsa jliaji inaiki dainoma nacojle. ²⁸ Mitsa yaami cadena roirrana yáca rooya, rorsotsa roniweetaca rorsowao siete jalredaoca, njite jliapodamina icaamitsa matsiakenano. ²⁹ Njite ocho jalredaoca nacojle rorsotsa rodeeca Dio ipeyajle nawacaaca-carroda ipananoma nacojle yamaapa potocadape o yamaapa tsootsobo yénipe; icatsa roacana sacerdote irso. ³⁰ Jliaji sacerdote lrirsotsa lrideecana, apaapa lricadaotsa ofrenda imatsicanaati ikjaote njite jliaji apaapa lrimjaitaoda, njite jliaji sacerdote lrirsotsa lriinocani Dio ipeyajle romatsicanaa ikjaote, írranati yácapoa pia rooya. ³¹ Icatsa cayoji irsotsa yenitaca njaji inaiki aimadan Iraelnai maatsi cadanacona, wade mayamicana namatsicanaa ikjaote, namatsica capoa jliaji iwacaaca-carrodawa, Nofacawa lrico iinai ipecolrico. ³² Icatsa yácoti nanaco njaji írranato yálri ioya, o lrimatsicaa yáa cadaa lrioya jliaji atsia icadaacada maatsicani, ³³ yácoti tsakja narso njaji atsianai o ínarro cadaa namatsicaa yá cadaa naoya, njite lrirso jliaji imaacada roapiya rsoaji ínarro canopá-darro.

¹ Caaco JLIAJI IMINALRITI Moise irso mayami cayami njaji Aarón yénipe, mayamina natsomita capoa Dio majicatsa. ² Lriaco JLIAJI IMINALRITI Moise irso: ''Picaite pipjerri Aaró irso wadee lríno catoa mamatsicanaa caawa lrico yamacati máca idanamdalri coan cádanaco catsantja lrioma, lriipana nacó jliaji patowana nárrocawa írranati namatsicanaa ikjaotenaa-dalri. Ima jliewa cadaa, mayamiotsan, ima norroco caotsa nirse iyadaoca lricó lripanaita nacó jliaji nárrocawa írranati namatsicanaa ikjaotenaa-dalri. ³ Cayoatsa Aarón irsotsa inaitjaca lritaitá carroatsa jliewacawa lri-ricowajle jliaji mamatsicanaa-cawatsa. Lrirsotsa lrideeca apana toro pamoyoeni toa ofrenda imatsicanaati ioyadalri, njite apana carnero ofrenda lrimjaitaoda. ⁴ lrirsotsa jlietaca lrinacoa jliaji tsaya jalripadalri jérriwai-maca, njite jlieta tsakjaotsa lriapjiteda jérriwai-maca tsakja, njite jliaji yamacati jérriwai-maca jliwida nacóda. Lrirsotsa lricotsoacawa matsia ooni ricó jlietá carroenaotsa njaji lritsayani, ⁵ Lrirsotsa jlitaca nainai njaji Iraelnai yaamana chivo ofrenda imatsicanati ioyadalri njite apana cordero ofrenda lrimjaitaoda. ⁶ Njite Aarón irsotsa ideeca njaji ofrenda imatsicanati ikjaotenadalri, lrimatsica ikjaotenadalritsa lritaitá-carro lripiyoacacawa lrimatsicana ioya njite lriipaneta ioya tsakja. ⁷ Njite lrideotsa njaji yaamana chivo Dio ipeyajle nawacaaca-carroda ipananoma lricó. ⁸ Njite Aarón irsotsa ipeecoca nanaco njaji yaamanade chivo lriajishopa, apana wa-Minalri nacó njite apana Aarón ipiyoaca shopawa lrimatsicana ioya. ⁹ Niini lrirsotsa lrideeca jliaji chivo lriajishopa nacó Dio irso, niini lrínocaotsani ofrenda imatsicanaati ikjaote-naadalri. ¹⁰ Njite jliaji apana chivo lriajishopa jiwanda inacó lrirsotsa lrideeca caafitsani Dio ipeyajle, lridee-carro lriino napiyo shopa namatsicanaa teeco jalrapocolri ricójle. ¹¹ Njite Aarón irsotsa ideeca jliaji toro ofrenda imatsicanaati ikjaotenaadalri, lrimatsicana ikjaotetsa. Lrirsotsa lrinaitjaca ipiyoaca kjeti lrimatsicana ikjaotetsa njite lriipaneta ikjaote tsakja, niini lriinoca jliaji toro ofrenda lrimatsicana ikjaotetsa. ¹² Aarón irsotsa jitaca altar nakjoite tiyemjen kerraperritsa jlitashopatsana Dio ipeyajle, njite lricaapi ricó lrirsotsa jlipaca incienso pótiyaoerri nawititanda matsia, lridé-carro pjiomina yamacati máca idanamrse. ¹³ Nirsena, lrirsotsa lricadaacana tiyé ricó Dio ipeyajle incienso iitaca itaitá carroatsa itaca lripanaita jliaji narrocawa írranati napiyo shopa imatsicanaati nanacodalri njaji yácoti nadananda nanaitja shopa yácoti. Lrirsotsa lrinaitjaca cayo wadee mayamica. ¹⁴ Njite lrirsotsa jlipaca toro írrana nakjoite lriwitsicá-carro lricapjiwida shó lripanaita nacó napiyocawa namasticana ioya. Lriwitsicaotsa lricapjiwida shó lrinacó siete piape ¹⁵ Njite lrirsotsa lriinoca jliaji chivo ofrenda namatsicana ikjaote njaji inaiki njite lridee lrirranami yamacati máca idanamrse. Njite lrinaitjaotsa niini cayotsaji lrinaitja capisho toro írranam shó: lriarroatsa riwitsicá-carro lricapjiwida shó lripanaita nacó jliaji napiyocawa namasticana írranati shó, njite lriwitsica tsakjaotsa lripanaita yekjoete nacó napiyocawa namasticana ioya. ¹⁶ Lrirsotsa lrinaitjaca ipiyokjeti lrikjaote jliaji mamatsicanaa wajle namatsicana ikjaote njaji inaiki Iraelnai, namjepacan ikjaote njite natsicanaa ikjaote tsakja. Lrinaitjaotsa cayo nawacaaca carroda ipananoma lrico, Dio iofacawa lrico napecolrico, nacapa cawa njaji inaiki inaitjacape maatsiperri. ¹⁷ Corriotsa coca itaita yofacawa iwacaaca-carroda lricó Aarón sheewa cádanacoatsa corricawatsa pacapa imatsicanaati lricó a kjerreca lritaita lrinaitjaca jliaji ipiyokjeti imatsicanaati, lrimatsicana waaca nacotsa, lriipaneta nacó njite nanaco njaji inaiki aimadan Iraelnai padenirri. ¹⁸ lrimotoatsa lrioya jliaji altar Dio ipeyajlédalri yemawa, njite lrirsotsa jlipaca toro írrana inacope njite chivo lrírrana inacope lripiyí-carroni njite lrirsotsa lriñjetaca altar itsowa nacó njite lripocoda nacó tsakja. ¹⁹ Njite lricaapjiwida shó lrirsotsa lriwitsicaca lrinacó siete poiape lripiyó-carro matsia, jlienitá-carro Dio irsowaoni, namatsicanaa ioya njaji inaiki Iraelnai. ²⁰ Lritaita cayamiotsa lripiyoca jlitawajle jliaji mamatsicanaa cawatsa, Altar njite nawacaaca-carrodawa, lrirsotsa lrideeca caafitsa jliaji apana chivo. ²¹ Aarón icadaotsa nja lricaapi yamemape chivo jiwida nacó njite lricaoteotsa pjiomi namatsicana njaji inaiki aimadan Iraelnai, coanca mjepacacana, pjiomi njaji namatsicana. Icatsa cayoji lricadaaca njaji imatsicanaati chivo jiwida nacó, njite lrimeenaca pada inaiki lridé-carroni teeco jalrapocolri ricojle. ²² Jliaji chivo lrideeca lrinacoa pjiomi namatsicanaa njaji inaiki maminalrinaa lricojle cawa. Icatsa nirse, jliaji atsia ideecada jliaji chivo lrimacaca nirseni lriácarroa. ²³ Njite-dalri Aarón idia tsenakjaotsawa nawacaaca carroda klricojle jlitá-carro lrioya njaji tsaya jérriwai máca jlietalri jliewaca ipeya mamatsicanaa cawa lricojle, icatsa lricadaaca njaji lritsayani. ²⁴ Lrirsotsa lricotsoacacawaricó mamatsicanaa cawa lricó jlietá-carro njai lritsayani jlietanda manatsa; njité-dalri lrirsotsa lridiaca lrimotoa lricadacarro ofrenda lri ofrendani lrimjaitanda njite nayada njaji inaiki aimadan, ofrenda namjaitanda tsakja, icatsa cayoji lripiyo lrimatsicanaa njite namatsicanaa njaji inaiki. ²⁵ Lrirsotsa lrimjaitaca njaji maaficalri iiti imatsicanaati ikjaotenadalri alatar nacó. ²⁶ Njite jliaji atsia ideecadam jliaji chivo ideecadan namatsicanaa lrirsotsa lricotsoca lritsayani njite lridada tsakja ooni shó; njite lritaita cayami lricotsoacacawa, lritaitena lridiacawa naofacawa lricó. ²⁷ Njaji ofrenda imatsicanaati ikjaotenaperri jliaji toro, njite jlia chivo, njetanda ioya írrana napiyó-carro imatsicanaati ioya jliaji mamatsicanaa cawa lricó, irsotsa ideecana pemajle iofacawa ioya. Nirseotsa imjaita pjiomi, lriya, lriipe njite pjiomi lrimatsica. ²⁸ Jliaji atsia imjaitacadana lrirsotsa lricotsoca lritsayani njite lridada ooni shó, njite dekjena lritaita lridiacawa iofacawa lricojle. ²⁹ Pada yácoti irso inaitjaoda caidalriwenatsa siete kérri nacó, die jalredaoca nacó lrinacopi minitsa kérrica, irsotsa yajiacacawa kjenaperri catsa shá, corrin itaita idejica niini, jliaji yofacada ínai tekjoite-dalri lrirsotsa lrinaitjaca tsakja cayotsa icayosho. ³⁰ Ima jliada jalredaoca-ca Aarón ipiyoatsa imatsicana, maopitjape carroatsa shá imatsicanaa ioya, matsiaperri carroatsa shá Dio ipeyajle. ³¹ Iwafeta carrodaca jliadaa jalredaoca padenirri shá, irsotsa yajiacacawa kjenaperri catsa shá, corrin tsakja itaita idejica. Pada yácoti irso inaitjaoda caidalriwenatsa. ³² Jliaji sacerdote yápiyawanai, jliajiAarón yénipe nacadalri lriarrontacao, lrinaitjaotsa jliaji ipiyokjeti njite jlietaotsa njaji tsaya jérriwai mácape matsiaperri, icatsa tjani tsaya njenitajica lricaona. ³³ Lrirsotsa lrinaitjaca jliaji ipiyokjeti lrirso jliaji patawajle mamatsicanaa cawa tsa; nawacaaca-carrodawa ikjaote tsakja, altar ikjaote tsakja, naikjaote tsakja njaji sacerdotenai njite naikjaote njaji inaiki iwacaaca capewa. ³⁴ Pada yácoti pirsó, pirsocawatsa pinaitjaca ipiyokjeti namatsicana ikjaote njaji inaiki Irael lricoperri, papiatsa pawalria nacó.'' Nanaitja cayoji Dio inaa capoisho pia Moise inaitjaca.

¹ Caaco JLIAJI IMINALRITI Moise irso cayoji: ² ''Pocaite Aarón irso, narso njaji lrienipe, njite narso pjiomi njaji Iraelnai aimadan. Picaite narso njaji IMINALRI inaalri inaitjaca: ³ Pada inaiki iino cadaa apana buey, cordero cadaa o cabra cadaa iofacawa lrico o pemajle lrioya Dio irso, ⁴ mitsa corri cadaa lrideeni nawacaaca-carroda ipananoma nacó, lricadá-carro ofrenda shó Dio irso lriipana icoemjete, icaamitsaotsa maatsicani lrima capoa lripeecoca lrírrana jliaji maaficalri. Jliaji atsia irsotsa shenitacani ioyawani, corrinatsa inakjoité carrocani. ⁵ Caishopa pjiomi njaji Iraelnai aimadan narsotsa nadeeca njaji maaficalri nainoji Dio ipeyajle iwacaaca-cawa ipananoma lricó, lrirso jliaji sacerdote, inócarroni ofrendawa Dio irso imaodacakjeti nacó, wadee ínocana akjerre-cawajle catsa. ⁶ Njite jliaji sacerdote iwitsicacaotsa írranati Dio i-altarni nacó njite lripananoma jliaji iwacaaca-carrodawa; njite lrimjaitaotsa neeti pomenícarro lriitan Dio irso. ⁷ Njaji inaiki aimadan corrinatsa nataita nainoca maaficalri narso njaji idolonai, njaji icadaalrina cawilreperrim shó. Yácoti kjaidaperri irso caidalriwenatsa pjiomi njaji shapodamperrimi. ⁸ Picaiteo narso: Coajidalri catsa atsia iraelita, o coajidalri catsa pada tekjoité-dalri yofácada iinai, lride cadaa pada ofrenda namjaitanda, ⁹ njite corrin lridee jliaji lrinonda nawacaaca-carrodawa ipananoma lricó Dio irso, jliaji atsia irsotsa shenitaca ioyawani, corrinatsa inakjoité-dalricani. ¹⁰ Coajidalri catsa atsia iraelita, o coajidalri catsa pada tekjoité-dalri yofácada iinai, naiñja cadaa írranati, Noemacaotsa lrikjoete jliaji inaiki, naiñja cadaa írranati; corriotsa Nocadá-carroca lriofawa lrikitsiñape iinai. ¹¹ Ima nacafca njaji maaficalri iofawa nérrana lricó. Njite Nocadaa irso nérrana iitashopa imatsicana altar nacó wadee mayamica shá, nérrana inaitja matsia icafca irso. ¹² Caishopa nocaite narso najji Iraelnai inaiki aimadan corrin pada inakjoite itaita iñjaca írranati, corrin tsakja jliaji inocada tekjoite yofacada ipecolrico, corrin lritaita lriñjaca írranati. ¹³ Corrin pada inakjoite itaita iñjaca írranati, corrin tsakja jliaji inocada tekjoite yofacada ipecolrico inocape maaficalri o kepirre cadaa, corrin nataita naiñjacani cayotsa teji; narsotsa nacadaaca nerrana yarroa jiipai nacojle. ¹⁴ Ima jliaji írranati icatsa nacafica pjiomi njaji caafiperri. Caishopa nocaite narso njaji Iraelnai inaiki aimadan wasdee naiñjaca írranati. ''Corrin itaita iñjaca nérrana njaji maaficalri, ima jliaji írranati icatsa nacafica pjiomi njaji caafiperri. Coca cadaa iñja írranati irsotsa shenitaca ioyawani, corrinatsa inakjoité-dalri cani. ¹⁵ Coca cadaa nanakjoite njaji iraelitanai o pada jiipai nakjoite-dalri yofacada iinai iñja maaficalri mayandalrim jiwaacatsa o yáawi inondami, lrirsotsa lricotsoca lritsayani njite lripita matsia lrioyawa ooni ricó, niniotsa matsia caotsani atee dainomajle. ¹⁶ Mitsa corri cadaa lricotso lritsayani njite corrin lripita lrioyawa, niini pedaotsa lridee caotsa lrimatsicatsa lrinacó.

¹ Caaco JLIAJI IMINALRITI Moise itrso cayoji: ² ''Picaite narso njaji iraelitanai cayoji: ''Icatsa Iminalri Dio-ca Njoa. ³ Corrin itaita inaitjaca cayoji nanaitjaca capisho njaji inaiki Egipto lricoperri, yofá carrom piatoa; Manaitja tsakjaotsa cayoji nanaitja capisho njaji inaiki Canaán lricoperri, jliaji jiipain nodérri shá ikjaolre. Madejitsa cayoji nadeji capishó. ⁴ Irsotsa sheepaca noaco, inaitja cayoji nonaa capisho inaitjaca, itaitá-carroatsa yofacawa matsia naikjaote nja yácoti, ima Iminalri Dio-ca Njoa. ⁵ Niini irsotsa shepaca noaco njite inaitja njaji yácoti nonaalri inaitjaca. Pada shepa cadaa cayoji nocaite capisho, matsia watsa lriofacawa. Ima IMINALRI-ca Njoa. ⁶ Corrin pada itaita idakitaca lrikitsinda iinai tsa. Ima IMINALRI-ca Njoa. ⁷ Mamacadawalreta tsa jinirri idakita capoa roapiya rsoaji jidoa tsa. ¡Jidoa cano! Mamacadawalretatsa jidoa. ⁸ Corrin itaita imaaca jinirri ininai yaapiya; corrin itaita imacadawalretaca jinirri ininai cayó. ⁹ Corrin itaita idakitaca ikitsidoa yapiya, ikitsidoa canaa cada jidoa ima o jinirri ima cadaa, nataoñanda iipana lricó o teeco iipana ioya. Corrin itaita idakitaca naapiya njaji ikitsidoanaipe. ¹⁰ Corrin itaita idakitaca yénipe iitonaipe yapiya oiitonaipe iito yaapiya. Ima itaitjaca ipainiwa macadalri. ¹¹ Madakitatsa roapiya rsoaji pjinirri iito apama inaidarro. Pikitsidoa cano niini corrin pitaita pidakitaca roapiya. ¹² Corrin itaita idakitaca jinirri ikitsidoanaipe yapiya. Icoirro cana jinirri ikjaote. ¹³ Corrin itaita idakitaca jidoa ikitsidoanaipe yapiya. Jidoa-nai cana ikjaote. ¹⁴ Mamacadawalretatsa jinirri iwerri iino idakita capoa roapiya. Matsomitatsano iwaopiakje matsidalritsa yápiya; jidoamina yajicano. ¹⁵ Madakitatsa roapiya rsoaji pirrino. Pirri iinocano; madakitatsa roapiya. ¹⁶ Madakitatsa roapiya rsoaji pikitsin iino; pikitsin iinocano. ¹⁷ Madakitatsa apama yapiya njite roito yaapiya tsakja, corrin tsakja rirri iito yapiya, o roito iito yapiya cantja. Ima rokitsiñape catsana, ima corritsa matsiaca cayo cada panaitjaca. ¹⁸ Madakitatsa roapiya rsoaji piino iwedoa pjita capoantja pinowano caafi cadanatoa ropjerro, rsoaji pjitanda pinoa piinita ¹⁹ Madakitatsa roapiya rsoaji inarro ronopa lricó. Maatsidarro cano cayo cádanacotoano. ²⁰ Madakitatsa picodapidalri iinoi yapiya wadee pimacadawalretaaca cawa pjiwacatsa roapiya lrikjaote. ²¹ Corrin itaita iaca pada nanakjoite njaji pienipe namjaitá-carro, nainó-carro Moloc irso, ima corrin itaita imacadawalretaca iDiote iipitana. Icatsa IMINALRI Dio-ca Njoa. ²² Madakitatsa ape atsia yapiya inarro capishontani. Corrin matsia panaitjaca cayó. ²³ Madakitatsa apana maaficalri yapiya wade pimacadawalretaaca cawa pjiwacatsa lrikjaote. Corrin tsakja apama inarro itaita iwaopiaca idakitaca apana maaficalri yapiya. Ima macadawalre catsa jliaji romalri ronaitjaca. ²⁴ Mamacadawalretaaca tsawa jiwacatsa nanaco njaji nocaiterrina, ima naikjaote njaji cayoperri namacadawalretaacawa njaji apana inaiki aimadan, njaji inaiki aimadan Nopecolriotsa ipeshete. ²⁵ Njaji inaiki jalredaoca lricoperri namacadawalretaacawa , niini Nopeeco cana namatsicana ikjaote, cayoji ape icatja capisho lriñjaoda lrioya. ²⁶ Niini pjia, pirsotsa pjiepaca Noaco, pinaitja cayoji nonaa capisho pinaitjaca, corrin pitaita pinaitjaca pada nanakjoite njaji mapeyo canaperritsa; corrin shaca sha iraelitanai, corrin tsakja njaji inocape pada jipai nakjoiteperri yofacape iinai, ²⁷ Icatsa njaji imatsicanaati nanaitjalri njaji inaiki jalredaoca lricoperri, njaji inaiki yofalri pia anjí ipjeyatoa niininamatsiketaca jliaji jiipai namatsicanaa sho. ²⁸ caishopa, icapaotsa yoyawa wadee jiipai icatjaca sháa tsakja imatsiketa cayamini imatsicanaa sho, cayoji lricatja capisho njaji inaiki ipjeyaperri. ²⁹ Cocadaa inaita padapena nanakjoite njaji mapeyocanaperritsa, njaji inaitjacape cayo, irsotsaotsa jpeecoca ioyawana, corrin natsaotsa ikjaoté-dalricani. ³⁰ Cayoshopa irsotsa inaitjaca cayoji nonaa capisho sha, wadee inaitjaca njaji mapeyocanaperritsa, njaji nanaitjalri pia anji njaji yofalri pia ipjeya, wadee namatsiketaca sha njaji maatsiperrimi nanaitja pialri. Icatsa IMINALRI Dio-ca Njoa.''

¹ Caaco JLIAJI IMINALRITI Moise itrso cayoji: ² ''Picaite narso njaji iraelitanai cayoji: '' Irsotsa shenitaacacawa maatsidalri ioya, ima Icacatsa Iminalri Dio-ca Njoa corridalritsa irso imatsicanaa. ³ irsotsa icacoadataca jinirri, njite jidoa tsakja, irsotsa sheepaca iwafetacawa iwafeta carroa lrico. Icatsa Iminalri Dio-ca Njoa. ⁴ Maomatsa irsowao njaji idolonai miperritsa, manaitja tsakja irsowao tsipalra sho idiotewa. Icatsa Iminalri Dio-ca Njoa. ⁵ Iino cádanaco maaficalri Dio irso imaodaca kjeti nacó, irsotsa inaitjaca lrirso matsiani lritaitá-carroatsa lricoadatacani. ⁶ Irsotsa iñjacani jliadatsa inocani o tjewaijlena. Njite niini cada pjatoa lriitemi madalridaa nacojlena, irsotsa imjaitacani. ⁷ Iñja cadani madalridaa naco pjatoa, opina maatsini. Corrinatsa itaita icoadatacani. ⁸ Mitsa coca cadaa iñjani lrirsotsa lrideeca lrimatsicanaatsa lrinacoa ima lrimacoadataca jliaji njenitanda piatsa Dio irso. Irsotsa ipeecoca ioyawani wadee lriofacatoa iinai. ⁹ Iniwa cádanacoatsa ipanai iinaca yapananda jipaite ricó, maniwatsa pjiomi njaji lrinomapi ricoperri, wadee iniwa tsakja pjiomi njaji jiwacaperri ioya. ¹⁰ Maniwatsa pjiomi nainica njaji ipania ova, njaji jiwacapemi icadenana, maniwatsana. icadaotsana napia njaji kjenaperri njite narso njaji tekjoiteperri ínoca. Icatsa Iminalri Dio-ca Njoa. ¹¹ Mañaitotsa. Macashatatsa. Macashatatsa irsowaaca. ¹² Ma Diotatsa Noipitana nacó ishati mikjapantsa, mamatsiketatsa IMINALRI Dio iipitana. Icatsa Iminalri Dio-ca Njoa. ¹³ Mainoetatsa picodapídalri piñaitócarro lriyarro. Lridejicalre icoada jliaji piinaida idejica pirso pirsotsa picaoñacani jliadatsa, wadee picaoñaca tjewaijleani. ¹⁴ Corrin pitaita picaiteca yácoti maatsiperritsa mjenacolricodalrim nacó, corrin tsakja pitaita picadaaca jiipada matjidalrim ipia jliwácarroa. Icaamitsa pirsotsa pifiocawa Dio iiwana. Icatsa Iminalri Dio-ca Njoa. ¹⁵ Macaitetsa ishatitsa pada nacó. Mamenatatsa apada kjena capoatsani, corrin tsakja picaiteca matsia pada nacó caconaadalri capoatsani. Mitsa, picaite cadaa picodapidalri naco, picaite ajádalri naco. ¹⁶ Majitsa picaitepenji ishati tsa piofawenai irso, mitsa, pirsotsa piwapaca jliaji picodapídalri wadee nainocani. Icatsa Iminalri Dio-ca Njoa. ¹⁷ Merroatsa picapaca pikitsinda irso picaolre rikjoite. Caacoatsa pjia kjaida matsiacalri ricó picodapidalri irso lrimatadanda ikjaote wadee pacoaca capjia lrimatsicana nacó. ¹⁸ Maomatsa picoadawa, corrin tsakja pimatsietaca irroati pinacoa piofacawerri ikjoete, matsia pja pipeyoca jliaji picodapidalri cayoji pipeyoaca capishó pjiwacawaacatsa. Icatsa Iminalri Dio-ca Njoa. ¹⁹ Irsotsa inaitjaca cayoji noaco icaite capisho. Makewitatsa nanaikica njaji maaficalri apaana maaficalri yapiya. Makewitatsa njaji paniati ishí yapana cádanaco jipaite ricó. Manaitjatsa itsayaniwa aipaperri ioyawaaca yamacati. ²⁰ Coca cadaa idakita apama irsodarro yempeti toa yapiya roinirriope iweñandena, mitsa corridarrotoa lricaoñandacano lricadaa carroena roawa jliaji rominalri, irsotsa jirrapiteetaca jliaji atsia inaitjalri rorso maatsi. Njite corrin itaita ínoca rsoaji inarro ima rominalri inaidarro catoano. ²¹ Pada atsia irsotsa ideeca lri-ofrendaniwa apana carnero lrimatsicana ikjaote iwacaaca carroda ipananoma lricó. Ofrenda lrimatsicanaa ikjaotedalri. ²² Njite jliaji sacerdote ipiyoatsa lrioya lrimatsicana lrinaitjalri lrisho jliaji carnero ofrenda lrimatsicanaa ikjaote Dio ipeyajle. Niininaotsa matsiacani naoya njaji imatsicanaati lrinaitjaji, icaamitsa njeyapacawa lrioya. ²³ Sheewa cádanacoenaotsa jipaite ricó njite yaapana pjiomi paniati paiñjanda iinaca, njite cainaca cádanaoenana corri toatsa itaita carrocatoa iñjaca nainaca. ²⁴ Madalriwalria watsa corricawa itaita iñjaca nainaca. Mitsa coatro walria nacoena shenitaotsa njaji nainica, paana ofrenda iashopa matsiadalri Dio irso. ²⁵ Njite cinco walria nacoena itaitena iñjaca ipania iinaca, iwapa capoa wiá aimaotsa nainaca njaji ipania. Icatsa IMINALRI Dio-ca Njoa. ²⁶ Corrin itaita iñjaca maaficalri iipe kerranadalritoa. Matatjatsa malrirrinai iinai coajicaotsa ipeya, njite corrin tsakja itaita imanalrietaca pada iwaopiakje malrirricalri ricó. ²⁷ Manaitjatsa nacayosho njaji apana inaiki maatsiperri, njaji jirritacape natsicolre njeeni icaoperri, o nayoaca natsinoma iwaipoco. ²⁸ Mayoatsa idada nacó mayamperrimi ikjaote o idanaca njenapjiami idada nacó. Icatsa IMINALRI Dio-ca Njoa. ²⁹ Mamacadawalretatsa iitonaipe icaaacarrona cawilreperrim shó, njitenantja cawilre tsakja njaji inaiki naikjaote njite napakjantanta jalredaoca imatsicanaati shó. ³⁰ Irsotsa iwafetacawa iwafeeta carrodaa lricó inaitjá-carro matsia iwacaaca-carroda lrico. Icatsa IMINALRI Dio-ca Njoa. ³¹ Maatsa naikjaore njaji caacoperri napiya njaji mayamperrimi o icaojleti iinai. Maomatsana ima namatsiketa caotsa sha. Icatsa IMINALRI Dio-ca Njoa. ³² Irsotsa jinicoca yemawa lripeyajle jliaji pekirrina, irsotsa icacoadataca njaji pekipenai. Irsotsa ifiocawa Dio iwana. Icatsa Iminalri Dio-ca Njoa. ³³ Pada tekjoite-dalri iofá cadaa ipecolrico jipaite ricó, manaitjatsa maatsi lrirso. ³⁴ Irsotsa icapaca lrirso jliaji tekjoite-dalri ikitsinda iraelita shotsa jiico capisho jipaite ricotsa, yofacada iinai, irsotsa ipeyocani ipeyoaca capishotsa jiwacawaacatsa, ima tekjoité-perri poiaca sha Egipto jipaite ricó. Icatsa IMINALRI Dio-ca Njoa. ³⁵ Macashatsa iwi cadanacoatsa jliwalripaca, jlimiñaca, o lrimaimaca. ³⁶ Irsotsa irsoca matsiaperri njaji jimiñatashopa, iwishopa njamiñaca, iwishopa namaimaca matsiaperri. Icatsa IMINALRI Dio-ca Njoa. ³⁷ Irsotsa shepaca noaco, pjiomi njaji yácoti kjaidaperri irsitsa inaitjaca. Icatsa IMINALRI Dio-ca Njoa.

¹ Caaco JLIAJI IMINALRITI Moise irso cayoji: ² ''Picaiteotsa narso njaji Iraelnai aimadan: ''Coandalri cada nanakjoite njaji iraelitanai inaiki aimadan, o pada nanakjoite njaji inocape pada jiipai nakjoite yofacaperri Iraelnai ipecolrico naa cadaa neenipe Moloc irso, ajádalri Nocaiteca lrirsocatsa mayamican. Njaji inaiki narsotsa nainocani jiipada shó. ³ Njite Noema tsakjaotsa lrikjoete jliaji atsia inaitja cada cayó, corriotsa nainai carroca njaji pinaikite aimadan ima lriaca lrienipe Moloc irso, ima lrimatsiketaca jliaji nofa carroda njoenitanda Norsowao, njite lrimacoadataca jliaji Noipitana matsiadalri. ⁴ Pada idawa cada lriicao jliaji yaa cada lrienipe Moloc irso, njite corrin nainoni, ⁵ Njoatsaotsa yema lrikjoete jliaji atsia njite njaji lrikitsiñape poco, Noinoatsani njite pjiomi njaji yaacape maatsidalrim shapodan, ima cawilre shocana Moloc iinai. ⁶ Njite njaji inaitjaacacapewa caacó-carro naapiya njaji mayamperrimi, o njaa cada njaji caacó-perri icaojletim yaapiya naomá-carro nainai naají-carro coajica, Noema caotsa nakjoete; njite nowayaketa caotsana naoya njaji pinaikite aimadan. ⁷ Niini icadaacawa Norso jiwaacatsa shenitaacá carroa Norsowawa, ima Iminalri Dio-ca Njoa. ⁸ Irsotsa sheepaca noaco njite inaitja cayoji nacaite capisho. Njoaca jliaji IMINALRITI, shenitalri sha lrirsowawa. ⁹ Pjiomi njaji maatsiperritsa caacoca njanirri nacó, njadoa nacó tsakja narsotsa mayamicana. Caaco capoa maatsi jlinirri nacó njite jlidoa nacó lrirso lrimatsicana niini lrirsotsa mayamicani. ¹⁰ Jliaji atsia idakitacada ape atsia íno yaapiya, lriino jliaji atsia lricodapidalri yofawa, jliaji atsia cawilredalrim njite rsoaji cawilredarrom narsotsa mayamicana yamadape. ¹¹ Jliaji atsia imaacada jlinirri íno yaapiya, opi lrimacadawalreta jlinirritsa. Jliaji lrirri, njite jlinirri iino, ajádalri narsotsa mayamicana yamadape. ¹² Ape imaa cadaa lri-riino yapiya, ajádalri narsotsa mayamicana yamadape. Nanaitja capoa jliaji imatsicanaati macadawalretsa, niini camatsicanaaperri cana, lrikjaote, narsotsa mayamicana. ¹³ Ape atsia imaa cadaa lriatsiakjawerri yaapiya, ínarro capisho, yamadape nanaitja namatsicanao mapeyo-canaadalritsa,. Njaji yamadape narso namatsicanao, niini ajádalri narsotsa mayamicana. ¹⁴ Ape atsia jitacada lrinoa apama, njite jlita tsakja lrinoa rsoaji lriino jidoa, pada imatsicanaatica jliaji nanaitkalri. Narsotsa namjaitaca pjiomina, wadee niinica imatsicanaati ipecolricó. ¹⁵ Ape atsia inaitja cadaa lridaki shó maaficalri yaapiya, ajádalri irsotsa ínoca jliaji atsia njite jliaji maaficalri. ¹⁶ Apama ínarro itsoomita cadaa apana maaficalri rodakitá-carro lriapiya, ajádalri irsotsa ínoca rsoaji ínarro njite jliaji maaficalri. Camatsicanaaperricana lrikjaote jliaji nanaitjalri niini narsotsa mayamicana. ¹⁷ Ape atsia imaa cadaa lriwedoa yaapiya o lripjerro cadaa, o lriwedoacana jlinirri iito o jlidoa iito yaapiya, nanaitja pada imatsicanaati capaimanaadalri. Lrikjaote jliaji nanaitjalri irsotsa ipeecocani yoyawani, corritsa inakjoite-dalricani lrimaa capoa lrikitsinda yaapiya. Lrirsotsa jlirrapitaca lrimatsicana ikjaote. ¹⁸ Ape atsia imaa cadaa apama ínarro yaapiya canopá cadaanano, opi lricapa roirrana imotolri rooya; lrikjaote njaji yamadape irsotsa shenitaca ioyawana, corrinatsa inakjoité-perricana yanjicana. ¹⁹ Corrin itaita imaaca jidoa ikitsidoa yaapiya, corrin tsakja jinirri ikitsidoa yaapiya, ima inaitjacantja maatsi ikitsiñape irso. Wadee irsotsa jirrapitaca lrikjaote jliaji inaitjalri. ²⁰ Pada atsia imaa cadaa lri coirri yaapiya, oopi lrimacadawalretaca lrikjirri. Mayami cádanacona njorrapiteeta caotsa yamadapena, njite corriotsa narsó carroca neenipe jipacaopentja nanaanipemi njaji njanirri. ²¹ Ape jita cada lriinowa lrikitsin ínotsa, caafi cadanatoani, oopi nanaitja namatsicanao capaimanaadalri, oopi lrimacadawalreta lrikitsin, njite corriotsa narsó carroca neenipe jipacaopentja nanaanipemi njaji njanirri. ²² Cayoshopa irsotsa iwaadaca njaji noaco, njaji yácoti nocadalri irso; irsotsa shepaca noaco matsia wadee lricatjaca sha jliaji jiipai Nodérri sha ikjaolre. ²³ 23Corriotsa nooma inaitjaca cayoji nanaitja capisho njaji inaiki Nopecolriotsa ipeyajle, corrin nanaitja cayoji nooma capisho niini corrin Noomana ²⁴ Nocaite pienina irso: ''Shaa watsa irso jliaji jiipai; Noca irsoni yofá-carro lri-ricoda jliaji jiipai matsiacawa pataoñaca vaaca njite capanianacawa tsakja. Icatsa IMINALRI Dio-ca Njoa, jliaji shenitalri shaa naoya njaji apaana inaiki aimadan. ²⁵ Irsotsa yanjica njaji maaficalri matsiaperri njite njaji maatsiperri nanakjoite njaji kepirre. Corrin itaita imatsicaacawa naikajote njaji maaficalri o kepirre matsiperritsa o nasho njaji maaficalri yácapewa nacóda shó jiipai nacó, njaji njoenitalri ioya maaficalri maatsiperri shó.'' ²⁶ Irsotsa shenitaacacawa maatsidalri ioya, ima Njoa, jliaji IMINALRITI, sheniitacada maatsiperri ioya, njite njoenitanipeca shaa naoya njaji apaana inaiki, noyarropé-carro shaa. ²⁷ Ape atsia, o ínarro cadaa caaco naapiya njaji mayamperrimi icaolrini, ajádalri narsotsa mayamicana. Njaji inaiki aimadan narsotsa nainocana jiipada shó. Namatsicana ikjaote narsotsa mayamicana.

¹ JLIAJI IMINALRITI iaco Moise irso: ''Caacoca pjia narso njaji sacerdotenai, njaji Aarón yénipe, picaite narso cayoji: ''Corriotsa imatsicaaca cawa inota capoa nadada njaji ikitsiñape mayamdalrim, ² najatsa dekja naikjaote cadaa njaji lrikitsiñape catsa: jlidoa, jlinirri, lrirri, lriito, lripjerri o lriwerri, ³ lriwedoa lriipana lricoda mjeyapa cadarrotoa atsia yapiya, ima corri catoa rorsoca roinirri, naikjaote dekja lritaita lrimatsicaca lrimatsiaca tioa. ⁴ Mitsa naikjaote njaji corri-perritsa lrikitsiñape catsa corrin lritaita lrimatsicaaca-cawa. ⁵ Jliaji sacerdote corrinlritaita lriyoaca lritsicolre, corrin tsakja lritsinoma, corrin tsakja nataita nayoaca nadada. ⁶ Narsotsa njenitaaca-cawa na-Diote irso maatsidalri ioya, corrin nataita namacoadataca na-Diote iipitana, ima njaji sacerdotenai nadeewatsa na-MINALRI irso ofrenda injaodati nacó, jliaji peetje Dio iyapepe, caishopa njaji sacerdotenai narso njenitaaca cawa maatsidalrio ioya. ⁷ Corrin nataita njetaca nainowa cawilredarrom, njepanda maatsicalri ricó o nainirri imacandam, ima shenitaaca capecawa Dio irso. ⁸ Pjienitana pjiomi maatsidalri ioya, ima njaaca idee jliaji peetje ofrenda pi-Diote irso. Niini narsotsa njeenacawa maatsiperri ioya, ima Njoa, IMINALRITI, icatsa Njoa jliaji icadaalri njenacawa maatsidalri ioya. ⁹ Nadakita cadaa atsianai iinai njaji sacerdotenai iitonaipe naoma capoatsa cawilreperrim shocana, romaotsa maatsica jliaji rsonirri sacerdote. Narsotsa namjaitacano. ¹⁰ Jliawatsa jliaji sacerdotenai yapiyawanai nanakjoite njaji lriweenai, narronda jiwida nacó aceite matsiajai nakepitanatashopani, jliaji nacadanda jlietá-carro natsayani njaji sacerdotenai yapiyawanai, corriotsa lricadaa carroca lritsicolre irrocawa, corrin tsakja lritaita lritserrentaca lritsayani inonacalri ikjaote. ¹¹ Corrin lritaita jliewacawa ninicawa iwinanati, wadee maatsicani lrikjaote, corrin jlinirri o jlidoa ikjaote cadaa. ¹² Jliaji sacerdotenai iminanani corrin lritaita lrimacaca lridejicawa nawacaaca-carroda lricodalri, corrin lritaita lrima cantja maatsica jliaji lri-Diote iofacawa lrico, ima nakepitanatandaca sacerdotenai iminanai carroni lrisho jliaji aceite Dio iyarroaja narronda jliwida nacó. Icatsa IMINALRI-ca Njoa. ¹³ Jliaji sacerdotenai iminananai lrirsotsa jlitaca lriinowa apama mjeyapa cadarrotoa ape yapiya. ¹⁴ Corrin lritaita jlitaca rsoaji madoiyoam, roinirri imacandam, o apama cawilredarrom, corrin tsooca. Icaamitsa jlitaca lrinowa nanakjoitetsa njaj lrinaikica inakjoite-perri, ¹⁵ wadee lrima maatsica njaji lrienipe jlita cadaa lrinowa paanatsa inaiki, ima icatsa Njoa IMINALRI, jliaji shenitalri shaa maatsidalri ioya.'' ¹⁶ Caaco jliaji IMINALRITI cayoji: ¹⁷ ''Caaco pjia Aarón irso, picaite lrirso cayoji: ''Njaji irsocape imatsica nadada nacó nanakjoite njaji pinakjoité-perri, corriotsa nataita carroca nadeeca ofrenda injaodati nacó piDiote irso, coshoca njaji walricomanai. ¹⁸ Njaji atsianai irsocape imatsica nadada nacó Corrin nataita natsoomitaca Dio, njaji matjiperrim, maapiperrim, matsilriperrimi icapacanaa, ¹⁹ mapiperrimi icawapa o nanaapa, ²⁰ njaji irsocape icolrin nadajite nacó, njaji taniaperritsa meepecana, njaji mataoña caperritsa, maatsiperrimi itji ricó, o irsocape irrenati, icaiyati, catserreperrimi, o maatsiperri ipecolrico. ²¹ Njaji atsianai sacerdote Aarón inakjoiteperri irsocape imatsica nadada nacó, corrin nataita natsoomitaca Dio nadeecarro lrirso ofrenda injaodati nacó. ²² Lritaitatsa dekja lriñjaca njaji iñjaodati Dio irsowalrepe, njaji iñjaodati njenitaji maatsiperri ioya. ²³ Mitsa, corrin lritaita jliewacawa yamacati máca idanam nacojle, o jliewa cantja tsoomi altar ioya, ima lrirsoca lrimatsica lridada nacó, wadee lrimatsicaca jliaji Nofacawa matsiadalri, icatsa IMINALRI Dio-ca Njoa, jliaji icadalri shenacawa maatsiperri ioya.'''' ²⁴ Niini caacoca Moise lripjerri Aarón irso njite narso njaji lrienipe, narso tsakja njaji Iraelnai aimadan.

¹ 1JLIAJI IMINALRITI iaco Moise irso: ² ''Caaco pjia Aarón irso njite narso njaji lrienipe, pinaotsa nawapaca matsia njaji matsiaperri nadeji Norso njaji Iraelnai aimadan, njaji njenitaji Norso. Corrin nataita namatsiketaca Noipitana. Icatsa Iminalri Dio-ca Njoa. ³ Picaite narso: ''Njaji pinakjoite-perri coshoca njaji walricomanai natsomita cadaa njaji matsiaperri njenitaji Dio irso njaji Iraelnai aimadan, maatsi cadatoa jliaji itsomitalri, irsotsa ipeecoca Nooya jliaji inaiki. Icatsa Iminalri Dio-ca Njoa. ⁴ Njaji Aarón inakjoite-perri irsocape itserre nadada nacó, o caacai cadaa coancawaca nadada nacó, corrin nataita naiñjaca njaji maaficalri nainoji Dio irso a kjerreca matsiani naoya. Coca cadaa inota apada inota cadam pada mayamdalrim, o lrinota cadaa pada iarrocadam ioya lridaki ricoda, ⁵ o lrinotaca cadaa njaji maaficalri iacapewa nawawa sho jiipai nacó, icadalri maatsicani, o pada icadaa cadaa maatsicani, conadalricatsa maatsiperri, ⁶ jliaji sacerdote inotacada coandalricatsa maatsiperri, maatsi catoatsani papienirri dainomajle. Corri toatsa lritaita lriñjaca njaji njenitaji Dio irsó, a kjerreca lricotsoacacawa ooni ricó. ⁷ Jérri shewa kenawa, icatsaotsa matsiacani lrimatsicana ioya. Jliapodamina lritaita lriñjaca njaji iñjaodati njenitaji matsiá-carro, ima naiñjaope cana. ⁸ Corrin lritaita lriñjaca njaji maaficalri mayamirri jiwaacatsa o yawi inonda, wadee lrimatsicaaca cawa jliwacatsa naikjaote. Icatsa IMINALRI-ca Njoa. ⁹ Njaji sacerdotenai narsotsa nanaitjaca cayoji Nonaa capishona. Maatsi watsana nanaitja cadaa namatsicanao njite mayamicana nanaitja capoa maatsi Noipitana itrso. Icatsa IMINALRI-ca Njoa icadaalri shenacawa maatsiperri ioya. ¹⁰ Corrin pada sacerdote iipaneta ioya itaita iñjaca njaji injaodati matsiaperri nayapepe, nja cantja njaji nainaiperri, nja cantja njaji narsoperri cantja. ¹¹ Mitsa sacerdote iwenta cadaa pada inaiki lrirsodalrí carroni lripalratan shó catsa, jlia dekja itaita iñjaca njaji injaodati njenitanda Dio irso. coshoca njaji sacerdote iipaneta, njaji lrienipe lriipana lricoperri, nataitatsa naiñjaca nanakjoite ¹² Apama sacerdote iito yofá cadaa ape iinai corridalritsa sacerdote cani, corrin rotaita roiñjaca tsoo nanakjoite njaji nacadanji ofrenda njenitanipe Dio irso. ¹³ Mitsa madoiyoam cadano, o roinirri imacanda cadano, njite corrin rorso roenipe, njite rodia rofaa rsonirri iipana lrico cayoji oopi shó, rotaitatsa roiñjaca rsonirri sacerdote injaope. Mitsa njaji corri perritsa lriipaneta nakjoite, corrin nataita naiñjaca lriñjaope. ¹⁴ Pada iñja cadaa pada iñjaodati njenitanda Dio irso corri capjitetsa lrianjí, lrirsotsa lridietaca lricoadawa lrirso jliaji sacerdote, mitsa lrirsotsa lricada pjaaca lrinacojle lritaitá-carro lridietaca lrirso. ¹⁵ Njaji inaiki Iraelnai corrin nataita namacoadataca njaji njenitaji Dio irso, njaji njerretanda Dio ipeyajle, ¹⁶ njite njatsa idee jliaji imatsicanaati nanacoa lrikjaote jliaji maatsirri nanaitjalri naiñja capoa jliaji injaodati njenitanda Dio irso, ima Icatsa IMINALRI-ca Njoa icadaalri shenacawa maatsiperri ioya. ¹⁷ Caaco JLIAJI IMINALRITI Moise irso: ¹⁸ ''Caaco pjia Aarón irso njite narso njaji lrienipe, njite narso pjiomi njaji Iraelnai pjiomi. Picaite narso cayoji: ''Conadalri iraelita o pada inocada tekjoite yofacada iinai, naino cádanaco maaficalri Dio irso, nacaoña-carro pada naomanda, pada ofrenda nacaokre rikjoite-dalri, o nadeeca Dio ipeyajle pada ofrenda namjaitanda, ¹⁹ njite cacoadá.carro narsoni, narsotsa nadeeca maaficalri atsiana marsocapetsa imatsica, vaaca cadaa, oveja cadaa, o cabra cadaa. ²⁰ Corrin itaita ideeca Dio irso njaji maaficalri irsocape imatsica. Corriotsa Nocoadatá carroca ioyana. ²¹ Coca cadaa iino apana maaficalri Dio irso imaodaca kjeti nacoda lrípirra nakjoite, nacaoña-carro pada naomanda, pada ofrenda nacaokre rikjoite-dalri, njite cacoadá carro narsoni, narsotsa nadeeca maaficalri marsocapetsa imatsica. Corritsa lritaita lrirsoca lrimatsica lridada nacó. ²² Corrin itaita iinoca maaficalri matjidalrim, pokjomdalrim, macawaapadalrim, catopani idada nacó, cayaonidalrim, o cafídalrim lrimatsica ima. Corrin itaita iinocani Dio irso imjaitá carroni tiyé shó. ²³ Itaita ideeca ofrenda sho icaolre rikjoitedalri apana buey o apana cordero maatsine tsa o tsooni toa, mitsa corriotsa cacaodá carroca irso jliaji ofrenda cayoperri icaoñá-carro pada iomanda. ²⁴ Corrin itaita iinoca maaficalri Dio irso njaji irsocape maatsitsa yeefe, capatsiperri, cayaonidalri o njetanda yooya yeefe. Manaitjatsa cayo jipaite ricó. ²⁵ Pada corridalritsa Irael cani corrin lritaita lrideeca Dio ipeyajle njaji injaodati. Njaji maaficalri irsocape imatsica, corriotsa matsiá carroca irsona'' ²⁶ Caaco jliaji IMINALRITI Moise irso cayoji: ²⁷ Jiico cadaa apana vaken, oveja cadaa, cabra cadaa, lrirsotsa lriofacawa jlidoa iinai siete jalredaoca. Njite, ocho jalredaoca shapodamina, matsiena iinoca ofrenda imjaitanda tiyé ricó Dio irso. ²⁸ Mainotsa apana vaaca, oveja cadaa roenipeda lrico jliadaa minitsa jalredaoca. ²⁹ Iino cadaa apana maaficalri ofrenda yaa shopa matsiadalri Dio irso, irsotsa inaitjaca matsia. ³⁰ Irsotsa iñjacani jliadatsa iino cani.Corrin itaita icadaaca lrinakjoite tjewaijle inaona. Icatsa Iminalri Dio-ca Njoa. ³¹ Niini, irsotsa sheepaca Noaco, inaitjaca cayoji Noaco icaite capishó. Icatsa Iminalri Dio-ca Njoa. ³² Corrin itaita imacoadataca Noipitana matsiadalri mamatsicanaadalri. Narsotsa naají njaji aimadan Iraelnaai teecodalrica maatsidalri ioya jliaji Noipitana. Icatsa Iminalri-ca Njoa, jliaji shenitalri sha maatsidalri ioya. ³³ jliaji nitalri shaa Egipto jipaite ioya iDioté-carro Njoa. Icatsa Iminalri-ca Njoa.''

¹ Caaco Dio Moise irso: ² ''Picaite njaji Iraelnai aimadan cayoji: ''Icatsa njaji icatimataacalriwa ikjaote wa-Minalri nacó, irsotsa yajica shenitandaca wa-Minalri irso. ³ Itaita idejica sei jalredaoca, mitsa irsotsa Iwafetacawa siete Jalredaoca nacó padaa, iwacaaca cawa shenitanda Norso. Corrin itaita iwafetacawa ima iwafeta carroa cani Dio nacó a kjerre cawajle catsa yofawaji. ⁴ Icatsa njaji icatimaaca carroa wa-Minalri ikjenanatanda irso, jliaji iwacaaca carroa shenitanda irsotsa yajica njenaana: ⁵ Jliaji wa-Minalri i-Pascuani irsotsa inaitjacani catorce jalredaoca nacó pawalria lriniita carropi nacó, dainoma nakjoite. ⁶ Njite tjewaijletsa lrinacopitsa kérrica, quince jalredaoca nacó, icatsa Icatimataaca-carroa Iñjacawa Peetje Meewidalritsa Dio irso. Siete jalredaoca watsa iñjaca peetje meewi-pwrritsa. ⁷ Shenitaotsa irsowaawa jliadaa initaca iwacaaca carroatsawa; corriotsa idejí-carro catoa jliadaa. ⁸ Irsotsa ideeca pada ofrenda iñjaodati nacó Dio irso siete jalredaoca. Njite siete jalredaoca nacó icatsa iwacaacawa shenitanda Dio irso, corriotsa idejí-carro catoa jliadaa.'' ⁹ JLIAJI IMINALRITI iaco Moise irso cayoji: ¹⁰ ''Poicaiteotsa narso njaji Iraelnai aimadan cayoji: ''Yooca cádanacoenaotsa lri-ricoda jliaji jiipai Nocadalriotsa irso, njite iniwakenaotsa ipania niini, irsoatsa ideeca ipanaia ínaca inacope initanda iniwaca sacerdote irso. ¹¹ Jlirretaotsa jliaji ipanai inakjoite-dalri initanda iniwaca Dio ipeyajle, Lricapácarro, Lricoadá-carro ípitana nacó. Padaa shapodamina iwafeta carroa ioya sacerdote jirretacani nopeyajlé Nocapácarron. ¹² Jliada jliaji jirretaca ipania nakjoite initandaca iniwaca Nopeyajle Nocapá carroni, irso tsaotsa ideeca Norso ofrenda apana cordero pawalriadalri ipekirrica corri-dalritsa irso imatsica imjaitá-carro IMINALRITI irso. ¹³ Idee tsakjaotsa ofrenda coatro kilo harina matsiadalri ikewitanda aceite fie, pada ofrenda imjaitanda IMINALRITI irso, joiwícarro lriitan, njite idee tsakja pada lritro njite pamoyoá pjaa pada ioya jaico tjeda yána. ¹⁴ Corri toatsa iñjá carroca peetje, corrin tsakja trogo imerritaji o walripetoa jliadaa ideeca njaji ofrenda i-Diote irso. Pada yácoti kjaidadalrica irso caidalriwetsa atee narso njaji walricomanai a kjerre cawajle cadaa yofawaji. ¹⁵ Jliapodamina ideeca njaji ofrenda ipanai inacope initanda iniwaca inakjoite, tjewaijlena lrioya jliaji jalredaoca iwafeta carroa iniwetaotsa siete semana matsia. ¹⁶ 16Iniwetaotsa cincoenta jalredaoca iwafeta carroa shapodam siete jalredaocadalri. Icatsaotsa ideeca Dio ipeyajle ofrenda ipania inakjoitepe walriperri. ¹⁷ 7Irsotsa ideeca iipana lrikjoite yaamana pan macanipe, itaitjaji coatro kilo sho harina matsiaperri. Ikewitaotsa jliaji harina matsiadalri njite inaitjaotsni poalri ricó. Pada ofrenda Dio irso ipania inacope inakjoité-perri Dio irso. ¹⁸ Idee tsakjaotsa lricoemawa sietena cordero pawalria-perri ipekirrica marsocapetsa imatsica, apana toro walrine toa njite yaamana carnero. Imjaitaotsa njaji ofrenda IMINALRITI irso, niini njaji ofrenda paniati ínaca sho, njite njaji jaico tjedaa yána njite, pada ofrenda imjaitanda nacadaotsa joiwí lriita IMINALRI irso. ¹⁹ Irsotsa ínoca apana cabra yénipetoa atsiana, icatsa ofrenda imatsicanaati ikjaotedalri, njite yámana cordero pawalriaperri toa ipekirrica, icatsa ofrenda imaodacakjeti nacó. ²⁰ Jliaji sacerdote lrirsotsa lriparsetacana nainaitja njaji peetje initaji yáca IMINALRI irso, ofrenda sho Lrirso nainai njaji yámana cordero. Paana ofrenda matsiaperri njenitanda Dio irso sacerdote iñjaoda. ²¹ Irsotsa icaiteca lrinaco jliadatsa jalredaoca. Iwacacaotsawa teecojle, njite corriotsa itaita inaitjacatoa idejicalre jliada. Pada yácoti kjaidadalrica irso caidalriwetsa atee narso njaji walricomanai a kjerre cawajle catsa yá yofawaji. ²² Iniwa cádanacoatsa ipania jiaite ioya, maniwa tsaotsa pjiomi njaji lrinomapi nacope, corri tsakja iniwá carroca njaji jiwacapewa naoya njaji iniwacaperri. Icadaa catsana narsowalreo njaji kjená-perri njite narso njaji inocaperri pada jiipai nakjoite. Icatsa IMINALRI Dio-ca Njoa.'' ²³ Caaco Dio Moise irso: ²⁴ ''Picaite njaji Iraelnai aimadan cayoji: ''Siete kérri nacó, lriniita cádanaco jliaji kérri, iwafeta carrodaca padenirri, ipjia watsa trompeta iwaaca carroni, iwacaaca-carrodawa teecojle-dalri. ²⁵ Corritoatsa idejí carroca jliadaa jecoapica, irsotsa imjaitaca maaficalri yáwada Dio irso.'' ²⁶ Njite caaco JLIAJI IMINALRITI Moise irso cayoji: ²⁷ Njite die jalredaoca nacó siete kérri nacodatsa Jliadaa jliaji jalredaoca iinoca maaficalri imatsicana ikjaote. Teecojlé dalritsa iwacaacawa, njite irsotsa yajiacacawa kjenaperri catsa shá njite idee pada ofrenda imjaitanda Dio irso. ²⁸ Corrin itaita idejica jliadaa ima icatsa Jalredaoca-ca iinocawaca maaficalri Imatsicanaa ikjaote, iinoca maaficalri imatsicana ikjaotetsa iMINALRI Dio ipeyajle. ²⁹ Jliaji corridalri kjena yajiacacawa jliadaa jecoapica, icaamitsa corrica inakjoitedalri ketsani. ³⁰ Coca cadaa ideji jliada jecoapica, Njoa, IMINALRIti, noino caotsani naoya njaji lrikitsiñape. ³¹ Corritoatsa idejí carroca jliadaa jecoapica. Pada yácoti kjaidadalrica irso caidalriwetsa atee narso njaji walricomanai a kjerre cawajle cadaa yofawaji. ³² Jliadaa jecoapi, icatsa iwafetacawaca padenirri shá, njite irsotsa icadaacawa kjenaperri sho noeve jalredaoca nacó lrinaco minitsa kérrica dainoma nacojle. Dainoma nakjoite jliada nacoda atee tjewaijle dainoma tsenakja, icatsa iwafetacawa, ijalredaocate Iwafetá-carro. ³³ Caaco Dio Moise irso: ³⁴ ''Picaite njaji Iraelnai aimadan cayoji: Quince jalredaoca nacó lrinacopitsa kérrica icatsa Icatimataaca Carrodawa iwada carroa coaji piaca yofacawa pantitape lrico Dio nacó. Siete jalredaoca watsa iwaadacani. ³⁵ Iwacacaotsawa teecojle jliadaa initaca, njite corriotsa itaita inaitjacatoa idejicalre jliada. ³⁶ Siete jalredaoca watsa yáca ofrenda imjaitanda Dio irso. Njite ocho jalredaoca nacó irsotsa iwacaacawa tecojle, njite imjaitaotsa maaficalri Dio irso. Padenirriotsa iwacaacawa, njite corritoatsa ideji carroca jliadaa. ³⁷ Icatsa njaji icatimataaca carroa wa-Minalri ikjenanataji Lrirsowawa, njaji irsolritsa icaiteca inacó shenitandaca imjaitá-carro maaficalri Dio irso, ofrenda imjaitanda, ofrenda ipania nakjoitepe, ínocawa maaficalri njite ofrenda jaicotjeda yána tsakja, icadaji jalredaoca icoam. ³⁸ Njaji icatimataaca carroa teecojlé dalri naoya njaji jalredaoca Iwafeta carroa Dio nacó njite njaji icadaji lrirso, pjiomi njaji inaitjaoda lrirso, njite pjiomi njaji ofrenda icadaji icaolre rikjoite Dio irso. ³⁹ Cayoji lriapana nacó, Quince jalredaoca nacó, siete kérri nacopi Icatimataaca Carrodawa iwada carroa coaji piaca yofacawa pantitape lrico Dio nacó, iniwa cayamina ipania inaca ikinikerre ioya, siete jalredaoca watsa icatimataacawa. Jliadaa lrinitacawa irsotsa iwafetacao padenirri, njite cayo tsakjaotsa ocho jalredaoca nacó, iwafetaotsa padenirri. ⁴⁰ Lrinita cadaawa, iniwaotsa ipania ínaca nakjoite njaji matsiaperri pja, yaawapje, jaicoki matsinipe macanipe, njite lriida itaoñacape óni ricó, njite icatimataacawa siete jalredaoca. ⁴¹ siete jalredaoca pawalria icoam, cayo minitsa inaitjaca iMINALRI irso. Pada yácoti kjaidadalrica irso caidalriwetsa atee narso njaji walricomanai a kjerre cawajle catsa yá yofawaji. Irsotsa inaitjaca jliaji icatimataaca carroa siete jalredaoca nacó siete kérri naco. ⁴² Yofawatsa pantitape lrico siete jalredaoca. Pjiomi njaji Iraelitanai catsa narsotsa naofacawa pantitape lrico siete jalredaoca, ⁴³ naají carroatsa njaji shapodamperrimi njaji walricomanai, coajipiaca Nonaitjaca naofá-carro pantitape lrico njaji Iraelnai Njota caojli piana Egipto jipaite ioya. Icatsa IMINALRI Dio-ca Njoa.'' ⁴⁴ Icatsa cayoji Moise icaite narso njaji inaiki aimadan iraelitanai nanaco njaji nacatima taaca carroa Dio ikjenanataji lrirsowawa.

¹ Caaco jliaji IMINALRITI Moise irso cayoji: ² ''Pinaa njaji inaiki Iraelnai nadé-carro natodanda aceite njetanda oliva ioya, matsiadalri, lampara iitada icaona, kerrá-carro caidalritsa. ³ Pemajle lrioya jliaji yamacati lriofacawa lrico jliaji nanaitja shopa yácacoti naapiya nawacaaca carroda lricó, Aarón irsotsa iwacaca jliaji camarray dainoma nakjoite atee piyompinacó nacojle Dio ipeyajle caidalritsa. Icatsa yácoti irso inaitjaoda caidalriwenatsa coshoca njaji walricomanai iyacalre ricope. ⁴ Jliaji sacerdote yapiyawanai lrirsotsa lrikerrataca jliaji camarrai owirrona caidalritsa Dio ipeyajle. ⁵ Jipaotsa harina matsiadalri inaitjá carroni poalri ricó, inaitjaotsa doce namaimaca macanipe, ideecape coatro kilope harina nacoanaa. ⁶ Icadaotsa naorsoawa yamakjawa, sei pema, sei tsakja pema, mesa owirroita nacó Dio ipeyajle. ⁷ Icadaotsa incienso nacó njaji pan iorsoalriwa yamakjape ofrenda matsiaperri shó. Narsotsa namjaitaca njaji incienso Dio irso. ⁸ Caidalritsa nawafeta carroa lricó, jliaji sacerdote yapiyawanai lrirsotsa lricadaaca njaji pan Dio ipeyajle naikjaotenaaperri njaji Iraelnai, nawaadá-carro jliaji yácoti narsolri caidalriwetsa. ⁹ Arón njite njaji lrienipe, icatsa njaji itaitalriotsa ideeca njaji ofrenda, njite naiñjacaotsa mamatsicana cawatsa, ima nadendaca ofrenda inacope Dio irso, namjaitanda lrirso.'' ¹⁰ Papia nacojle, apama Iraelita irri, pada egipcio yápiya, lricoitacawa pada iraelita yápiya naofacawa lricó. ¹¹ Jliaji iraelita yénipe caaco maatsitsa Dio iipitana nacó, maatsiperri yácoti lricaiteca Lrinacó, niini njaji inaiki nadeecani Moise ipeyajle. Selomit pia roipitana rsoaji jlidoa, Dibri iito, Dan poco inakjoitedarro cano. ¹² Njepani njite nacadaa iwapacaodani a kjerreca Dio icaiteca narso coajicaotsa nanaitjaca lriapiya. ¹³ Njite caaco jliaji IMINALRITI Moise irso cayoji: ¹⁴ ''Pjipa pidee jliaji atsia caacopedalri maatsitsa Dio nacó pemajle lrioya jliaji iofacawa. Pjiomi njaji jicaperri coajica lricaite piaca narsotsa nacadaaca nacaapi jliwida nacó, njiteotsa njaji inaiki iwacaaca capewa narsotsa nainocani jiipada shó. ¹⁵ Irsotsa icaiteca narso njaji Iraelnai cayoji: Coca cadaa caaco matsitsa iDiote nacó lrirsotsa jlirrapitaca ikjaote. ¹⁶ Jliaji cacopedalri dofenaa Dio iipitana nacó, irsotsa iinocani. Pjiomi njaji iwacaacalriwa narsotsa nainocani jiipada sho, coshoca njaji inocapetsa pada jipai nakjoite o iraelita cadan. Coca cadaa caaco matsitsa Dio iipitana nacó, lrirsotsa mayamican. ¹⁷ Coca cadaa iino pada inaiki, irso tsakja iinocani. ¹⁸ Coca cadaa iino pada ípirra, lrirsotsa lricaoñaca lrirso apana maaficalri sho tsakja. ¹⁹ Coca cadaa iino lricodapidalri coancawa catsa lridaki nacó, irsotsa inaitjaca lrirso cayotsaji lrinaitja capisho lricodapidalri irsoni: ²⁰ jlita cada tocomni, irso tsakja itokjontacani, lrimatsica cadaa lritji, irso tsakja imatsiketaca lritji, lrima cadaa lripeecoca lrietsa, irso tsakja ipeecoca lrietsa. Irsotsa inaitjaca lrirso cayotsaji lrinaitja capisho lricodapidalri. ²¹ Coca cadaa iino pada iipirra lrirsotsa lricaoñacani, njite coca cadaa iino pada inaiki, irso tsakja iinocani. ²² Jliaminitsa yácotica lrirso jliaji iraelita njite lrirso jliaji inocada yofaa ipecolrico tekjoitedalri, ima Iminalri Dio-ca Njoa.'' ²³ Niini caacoca Moise narso njaji iraelitanai aimadan, niini njaji iraelitanai nadee pemajle naofacawa ioya jliaji inaiki caacopedalri maatsi Dio nacó. Nainoni jiipada sho. Njite njaji aimadan iraelitanai nadee nanacoa jliaji yácoti Dio icadaalri narso Moise nakjoite

¹ Caaco jliaji IMINALRITI Moise irso jiipana Sinai nacó cayoji: ² Caaco pjia narso njaji aimadan Iraelnai: Pjiewa cadenaotsa lri-ricoda jliaji Noalri irso, jliaji jiipai lrirsotsa lriwafetacawa Dio irso. ³ Sei walria watsa piapana pjipaite ricó, sei walria watsa pimatsieta matsia pipania njite piniwa njaji lriinaca. ⁴ Mitsa siete walria naco, jliaji jiipai lrirsotsa lriwafetacawa Dio irso corridalritsa itaita inaodacaca ioya. Corrin pitaita pidejica pjipaite ricó o pikiníkerre lrico. ⁵ Corrin pitaita piniwaca piniwaca nainaca njaji paniati imotolri njajwaacatsa, corrin tskja nainaca njaji jaico tjeda ínaca imotocape jiwaacatsa. Jliaji jiipai lrirsotsa lriwafetacawa matsia pjiomi. ⁶ Pjiomi njaji paniati ínaca imotolri niini pitaita piñjaca, njaji pirsoperri atsianai njite inaitjepe, njaji pinaikite idejicape picaoñaji irso, njite njaji inocaperri yofacape piinai tsakja, nataita naiñjaca njiteperri. ⁷ Coshoca njaji pi-vacan, pípirra padenirri nataita naiñjaca njiteperri. ⁸ Piniwetaotsa siete walria lriwafetacawa jliaji jiipai, siete piape siete walria, niniotsa coarenta noeve walria watsa padenirri jliwafetacawa jliaji jiipai. ⁹ Njite pipjia watsa trompeta kjaida pjiomitsa die jalredaoca nacó sietepi nacó. Nainocawa maaficalri imatsicana ikjaote, icatsaotsa ipjiaca trompeta pjiomi iyacalre ricó. ¹⁰ Njite cincoenta walria nacó pjienitaotsani Dio irso njite icaiteotsa pjiomi iofacawa lricó, narso pjiomi njaji inaiki corrica pjiaca yanjí nanacó. Icatsa calramica pjia pada yajicawa pia pinacó, njite pjiomi njaji narsoerri njite njaji irsocape pia pada jipaite narsotsa nadietacana naminanai catsa irsona. ¹¹ Cincoenta walria nacó pidietaca jliaji jiipai lriminalri irso. Corrin pitaita piapana lri-ricoda jliaji jiipai o pinaa cantja naapanaca pirson. Pitaita piñjaca nainaca nakjoite njaji imotocapetsa njawaacatsa, njite piniwa nainaca njaji paniati mitsa corrin pitaita pipiyoca naapjite. ¹² Corri capoa pjiaca yanjí lrinaco jliaji jiipai, pjienitanda pirsowawa. Pirsotsa pinjaca nainaca njaji imotocapewa teecojletsa lrioya jliaji pjipaite. ¹³ Pirso cadaa pada iyárro pirsotsa pidietaca pjiomi njaji pirsonipe naminanai irso catsa ima padietacawaca pjiomi njaji parsonipe. ¹⁴ Piwende cadaa pjipaite picodapi-dalri irso, o piwenta cadaa jiipai pada iinai, macashatatsa pada lrikjaote ¹⁵ Piwenta cadaa picodapidalri iinai jlipaitemi, pirsotsa piwaopiaca jliaji matsiadalri lrinaitjalri pirso cadalri walria caotsa pidejiotsa jliaji jiipai njite cadalripia caotsa piniwaca nainaca njaji paniati njite a kjerreca lriocacawa jlinaana jliaji jiipai lriwafeetá-carro. Cayo tsakja jliaji picodapidalri iwende cadam pirso. Lrirsotsa lriwaopiaca nanacó. ¹⁶ Aima walria icoá cadaa lridejica jliaji jiipai lripjeya watsa lriwafetacawa jliaji jiipai, aima pjaotsa lricoada, mitsa tsoo cada pjatsa lridejicaotsa niini atee lripieta watsa lriwafetacawa jliaji jiipai, tsoo pja tsakjaotsa lricoada, ima corricaotsa lriapaná carroca aima walria lriwafetenaotsa jliaji jiipai. ¹⁷ Macashataacatsawa lrikjaote, matsia pja inaitjaca matsia iDiote irso, ima icatsa Iminalri Dio-ca Njoa. ¹⁸ Cayoshopa pirsotsa pjiepaca noaco nodanaji pirso, pinaitja cayoji noaco icaite capishó. Niniotsa piofa watsa pimaodaca pjipaite ricó. ¹⁹ Kepena watsa pirso pipania, kepinaa watsa piñjaca, njite pimaodacaotsa pjiofacawa niiní. ²⁰ Picaite watsa pá: ''¿Cocaotsa waiñja siete walria nacó? Ima corri watsa wataita waapanaca corrin tsakja wataita waniwaca wapania. ²¹ ''Nomeenacaptsa Nomatsiaca pinacojle siete walria naco, niniotsa cainaca caotsa pirso njaji pipaniá niniotsa piniwaca madalriwalria icoa. ²² Ocho walria naco piapana tsenakjaotsa, niini piñja catsaotsa njaji pipania iinaca njite njaji piwaketaji pia. Piwapa cadana nainaca njaji pipania noeve walria nacope, cayo cadana toa, pitaita piñaca njaji piwaketaji pia. ²³ Corrin pitaita piwendeca jliaji jiipai pada irsoenakja piketemtja, ima noyadaca jliaji jiipai. Inocapetsa pjiomi shá, kjeyaperritsa yofacawa Njopaite ricó. ²⁴ Pirsotsa piwaopiaca, jliaji lriminalrim lritaita jliaji jiipai lritaita lriwentaca tsenakjani pioyani coancadanaco catsa lrioma, o njaa cadaa njaji lripanetami piwentajim ioya. ²⁵ Kjena capoa jliaji pikitsinda Iraelita niini lriwende pia pirso jliaji jlipaitemi, pada lrikitsinda catsa itaita iwendaca pioyani lriwendendam pia pirso. ²⁶ Pada atsia corridalritsa irso ikitsiñape itaita cada iwentaca jlipaitemi, mitsa lrirso cadaa lriwenta shoopani, ²⁷ lritaita lriniwetaca cadalriwalriaca lrirsoca niini jliaji lriwendenda irsoni njite lricaoña lrirso pjiomi, icatsa lritaita lridietaca lrirsowawa jlipaitemi tsenakja. ²⁸ Mitsa corri cadaa lritaita lri caoñaca lridietá-carro lrirsowaawa, icaamitsa lriyada catoa jliaji iwenta cadam lrioya, a kjerreca lriocawa jliaji pawalria nadietacawa naminanai irso pjiomi njaji narsonipe pada iyaada. Icatsa jliwalria lrico nadietacawa naminanai irso pjiomi njaji narsonipe pada iyaada lrirso jliaji iwendecada, jliá-carro tsenakja lriminalri jliaji jiipai lripieta. ²⁹ Pada iwende vcadaa lriipana lri-ricodá-dalri jliaji yacaalre cawaidalri, lritaita lripieta lriwentaca tsenakjani pawalria shapodami. Pawalria shapodamina lritaita lridiaca lriwenta tsenakjani. ³⁰ Corri cadaa lriwenta jliaji lriipanami pawalria matsia shapodami, lri-ricodadalri jliaji panti taimí-dalri, niniotsa jliaji panti lriyadacani pikeetem jliaji iwentacadan, corritsa lridietá carrocani lri-ricowalria jliaji nadietacawa naminanai irso iwendecapemi. Nayada catsaotsa njaji walriconanai. ³¹ Mitsa njaji panti corri perritsa irso nadaana nawaida nacó ima nadejicawa lricocana. Nja dekja nataita napietaca nawentaca nayaadá- carro tsenakja, o nadietaca narso lrioca cadanacoa jliaji pawalria nadietacawa naminanai irso njaji narsonipe pada iyárro. ³² Mitsa, naapana njaji levitanai nayacañre ricope nataita dekja nadietacana coan cadanaco catsa naoma. ³³ Jliaji levita corridalri iwenta tsenakja jliaji panti lriwendendami, jliaji panti kjerre cawa catsa lriemawa nadietaotsa lrirsoni lri-rico walria jliaji nadieta cawa narsompe naminanai irsoni, ima naapana njaji Levitanai nayacalre ricope nayada catsana nainai njaji Iraelnai. ³⁴ Mitsa jliaji njepaite tsoomi-perri nayacalre ioya corrin nataita nawendecana, ima njepaiteca caidalriwetsa njaji Levitanai. ³⁵ Njite kjena cada calretsa pada yofacawerri, corrin lrirso mitsa lriwenta shopa lriñjawa, pitaita pikitsindatacani pikitsindata capisho pada inocadatsa o pada tekjoité-dalri yofacadawa iinai. ³⁶ Maomatsa lriinai picoadawa o pjitaca lrioya cocacani jliida ikjaote, corrin tsooca; matsia pja inaitjaca matsia Dio irso lriofá-carro piinai jliaji pikitsinda. ³⁷ Corrin pitaita pia catoa lrirso pipalraatan nakjoite piomá carrontja lricaoñaca pirso lrinacojlé pja, o piwende cantja lrirso piñjaoda pjitá-carro lrioya palraata pjaa. ³⁸ Icatsa IMINALRI Dio-ca Njoa, JLiaji jitalri shá Egipto jipaite rikjoite, niini Noaca irso jliaji jiipai Canaan iyada, njite pji Diote-ca Njoa. ³⁹ Kjena cada jliaji piofacawerri njite lriwendiacawa pirso, corrin pitaita picadaaca lridejica cayoji pirsodalri capisho. ⁴⁰ Pjipaotsani pjipa capisho njaji pinaikite idejicape pirso picaoñají. Ima kjeya catsaotsa lridejica pirso. Icamitsaotsa yami lridejica pirso a kjerreca lriocawa jliwalria jliaji nadietacawa njaji narsompe naminanai irso. ⁴¹ Icaamitsaotsa lriaca teeco pioya, njite njaji lrienipe tsakja, nadia carroatsa nakitsiñape ikjaolre njanirrimi jipaite nacojle. ⁴² Norsoperri capoana njaji Njotaji Egiptonai jipaite rikjoite. Corriotsa coca itaite iwendeca pada irsoperri carrona. ⁴³ Corrin itaita yajica nanaco maatsicalri ricó, pinaitja matsia pi Diote irso. ⁴⁴ Nanakjoite njaji apana inaiki iofacapewa icodapi, njaa dekja pitaita piwentaca piroperri carrona, atsianai njite inaitjpe. ⁴⁵ Itaita tsakja iwentaca irsoperriwa nanakjoite njaji pada jiipai nakjoite-perri iofacapewa ipecolrico, neenipe jicoperri jiaite ricó. Nja dekja pitaita piwentaca pirsowaona. ⁴⁶ Itaita yaaca yénipe irso nanakjoite njaji inaiki iwentaji irsoperri carrona nayaadá-carro njaamao, neenipe nakjoite tsakja.Nanakjoite dekja itaita iwentaca irsowao, mitsa corrin itaita icadaaca njerrapitaca njaji ikitsiñape tsa Iraelnai. ⁴⁷ Mitsa capalratan cadaa pada inocada tekjoite lriofá-carrotoa iinai ipecolrico, njite pada ikitsinda Irael kjena capoani lriwendiacawa lrirso lrirso jliaji padatsa inaiki, o lrikitsiñape irso jliaji inocadatsa pada jiipai nakjoite, ⁴⁸ lriwenta cayamina jliaji inocada pada jiipai nakjoite, pada lrikitsinda iraelita itaita iwentacani lrioya jliaji iwentacada toani tsenakja. ⁴⁹ Jlinirrim cadaa, o jlinirrim yénipe cadaa itaita iwentacani tsenakja, ima lri kitsinda catsani. Mitsa lrioketa cadaa aima palraata lritaita lricaoñaacacawa. ⁵⁰ Lritaita caacoca lriapiya jliaji atsia iwentacadani; nataita naniweetaca cadalri walria jiyapawa lriwenta cayamini atee lriocawa jliwalria jliaji nadietacawa njaji narsonipe naminanai irso. Naniwetaotsa lricoa jliaji nacapñalri narsoérri idejicaperri narso, njite cosho walriaca lritaita lrideji catoa lrirso jliaji iwentacadani. ⁵¹ Aima cadatoa jamolri lripjeya lriocá-carroa jliaji nadietacawa nanaani naminanai irso, lrirsotsa lricaoñaca njaji jamolri jliapodamperri, lritaitá-carro lricaoñaacacawa, coshoca walria lriofa piaca lriinai jliaji iwenta cadan pia. ⁵² Mitsa tsoomi cadenatsa lripjeya lriocá carro jliaji jamolri nadietacawa nanaani naminanai irso, lrirsotsa caacoca lriapiya jliaji iwentacadan pia naikjaote njaji jamolri canacairri lriocá carroa jliaji nadietacawa nanaani naminanai irso, ikenaotsa lricaoñaaca-cawa coshowalriaca lriofa piaca niinio. ⁵³ Pirsotsa pjipacani nacayoshotsa njaji inaiki idejicape pirso picaoñaji jamolri icoami. Pirsotsa pianjí corrica picadaa lridejica maatsicalri ricó. ⁵⁴ Mitsa corri cadaa lricaoñaaca-cawa, icaamitsa lriwapaca a kjerreca lriocawa jliwalria jliaji nadietacawa njaji narsolri naminalri irso, jlia njite njaji lrienipe tsakja. ⁵⁵ Idenjicaperrica Norso njaji Iraelnai aimadan, Norso-perri cana njaji Njotaji Egipto jipaite rikjoite. Icatsa IMINALRI Dio-ca Njoa.

¹ ''Corrin itaita inaitjaca idolonai, corrin tsakja itaita inaitjaca njenapjiami, o jirreta cantja jiipada iwaada capoa matsiadalri cani, corrin itaita yemetaca njenapjiami nayoanda jipaite ricó icoanjá-carro napeyajle, Ima icacatsa Iminalri Dio-ca Njoa. ² Irsotsa iwaadaca iwafeta carroda njite inaitjaca matsia nofacawa lricó. Icacatsa Iminalri-ca Njoa. ³ Sheepa cadaa noaco, njite inaitja cadaa cayoji noaco icaite capisho irso, ⁴ niniotsa nocadaotsa iyao jiwacawa jlinaana lrico; aimaotsa nainaca njaji ipania, njite cainaca tsakjaotsa aima njaji jaico cainacaperri mana. ⁵ Aimaotsa iniwaca ipania, niniotsa corri catoatsa yami imatsietaca njaji ipania iinaca, nja nakjaotsa cainaca njaji ova, aima tsakjaotsa cainacaca njaji ova njite yaapanaca jinanenakja iocawa ikjaolre. Aimaotsa irsoca injaope njite imaodacaotsa yofacawa a kjerrecawajle catsa inaitja iipana jipaite ricó. ⁶ Nocadaotsa imaodacá carrotsa yofawa jipaite ricó; imaotsa imaodacatsa. Nocadaotsa naawa teeco ioya njaji maaficalri kerroaperri. Corriotsa cocá carroca íno iino sha. ⁷ Ipinietaotsa njaji icoema, njite sha watsa ínona imatsetan shó. ⁸ Cinco tsa inakjoite ifietaotsa teeco njaji ciende icoema, njite cien inakjoite ipinetaotsa die mil icoema; shaa tsaotsa iino matseeta sho njaji icoema. ⁹ Matsia watsa Nocapaca irso, Nocadaotsa matsia keenipeca sha imaimataca carroatsawa; Njite nocadaotsa jliaji yácoti nonaitjalri yáapiya. ¹⁰ Itaitaotsa iñjaca njaji injaodati imatsietanda aima jalredaoca. Irsotsa injaca njaji injaope imatsietanda ima iomacaotsa a kjerreca imatsieta njaji walriperri ipania iinaca. ¹¹ Nocadaotsa Nopana ipecolrico, njite corriotsa Nomacá carroca sha. ¹² Noemajiwatsa ipecolrico njite iDiote caotsa njoa, njite Nonaikite aimadan caotsa shaa. ¹³ Icatsa Iminalri Dio-ca Njoa, jliaji jitalri piaca sha Egipto jipaite rikjoite corri carroenatsa narsoperrica sha. Njota piaca Mjotomi ioya jliaji ipapirri pialri sha, njite Nocadaa yanjicawa matsia, mayacan. ¹⁴ Mitsa corri cadaa sheepa njoa, njite corrin inaitja njaji nonaalri inaitjaca, ¹⁵ imenata cadaa njaji Noaco kjaidaperri, njaji Nocaite shopa coajica yofacawa matsia, icaamitsa imjepataca njaji yácoti kjaidaperi, njite imacoadataca jliaji yácoti Nonaitja pialri iinai, ¹⁶ inaitja pjiomi njaji nocaiterri inaco, niini pedaotsa Nonaitja irso cayoji: Nocadaotsa aima maatsiperri inaco matsinaperri, irrenati imaimaca, ipoati imatsicacape itji njite nacadaotsa mayamica sha. Mikjapan watsa yaapanaca ima icoema watsa njaji injalriotsa ioyana. ¹⁷ Jiponda caotsa Njoa, njite icoema shametacaotsa shá. Njaji atsianai maatsiperri icapaca irso icatsaotsa njaji italricanaatalri catsa inaco, njite ipitocaotsa naoya corri cadanatsa coca ipineta shá. ¹⁸ Corri cadaa sheepa noaco, Njorrapiteeta caotsa shá siete piape, aimaotsa jirrapitaca imatsicanaa ikjaote. ¹⁹ Njorrapiteeta caotsa shá ima padalreca shá kjaidaperri capoa yajiacacawa. Corriotsa iyao jiwá carroca inacó, niniotsa corriotsa itaitá carroca yapanaca jipaite ima tarracani bronce shó. ²⁰ Mikjapaniotsa idejica, ima corriotsa iniwá carroca ipania iinaca, corrin tsakjaotsa cainacá carroca njaji jaico cainacá perri pia. ²¹ Inaitja cadaa njaji yema shopa Nokjoete, corri ioma jimica Norso, Njorrapiteta caotsa shá siete piape pja lrinacojle jliaji jirrapitalrinainaco, naikjaote njaji imatsicana. ²² Nomenacaotsa ikjaolre maaficalri kerroaperri, njite nadee caotsa ioya maatsicalri rico njaji yénipe, naiñjaotsa ivacan, njite nawayaketacaotsa shá. Njite corrin natsaotsa coca yemajiwa yápowa lricó. ²³ Njite cayo cadanatja jiyapacawa, njite corri minitoa shepa, njite inaitja minitsa imatsicana yemá-carro Nokjoete, ²⁴ cayo peda tsakjaotsa Njoa, Noema caotsa ikjoete, njite Nocada pjaotsa jirrapita siete piape pja imatsicanaa ikjaote. ²⁵ Nodee watsa aima oowinai ikjoete jirrapiteetalriotsa shá imenata capoa Noaco. Nawacaacaotsa iyacalre ricó, njite nomeenacaotsa ikjaolre ipoati, njite nocadaotsa shá icoema icaapi ricó. ²⁶ Njota cádanacoatsa ioya injaope, die inaitjepe watsa inaitja injaoda paapi ricotsa poalri, njite naawatsa injajo pawajlepetsa. Iñja tjaotsa mitsa corriotsa kepinaa carroca shá. ²⁷ Njite cayo cadanatja jiyapacawa, njite corri minitoa shepa, njite inaitja minitsa imatsicana yemá-carro Nokjoete, ²⁸ Noema pedaotsa ikjoete irroati ricó, njite Nocada pjaotsa jirrapita siete piape pja imatsicanaa ikjaote. ²⁹ Iñjacaotsa yénipe atsianai, njite inaitjepe dape iipe. ³⁰ Nopecoatsa njaji idiote iipana yenondalripe nacope, nowayaketaotsa ioya njaji incienso ialtarni, njite nopecoatsa idadam mayamperrim nanaco njaji i-idoloni mayamperrim, njite Njoa tsaotsa jliaji maatsirri icapaca irso. ³¹ Nocadaotsa teecojle iyacalre icapacana njite nopeecoatsa njaji pantidape iacawa matsiadalri idolonai irso. Corriotsa joiwí carrica noanjí i-ofrendan iitann. ³² Nomatsiketaotsa jipaite. Njaji icoema, yofacape iyacalre rico, nafio watsa pekirritsa nacapa cádanacoatsa coajica Nomatsiketaotsa jipaite. ³³ Nocadaotsa padapena yaacawa inaikinai jipaite ricojle. Nomeenacaotsa icoema nainó-carro shá. Maminalri caotsa jipaite, njite lriwayacacaotsawa jliaji iyacalre. ³⁴ Njiteotsa lriwafetacawa jliaji jiipai cayotsa lricaite capisho jliaji yácoti kjaidadalri lrinaco jliaji jalredaoca pawafeta carroda lricó, cayo cádanaco imacaca jipaite, njite icoema tsa njaji iofawalri toa jipaite ricó. Icatsaotsa lriwafetacawa jliaji jiipai, matsia watsa lriwafetacawa. ³⁵ Matsia watsa lriwafetacawa jliaji jiipai maminalri cádanaco toani, ima corri piatsa lriwafetacawa niini cádanaco piatoa yofawa. ³⁶ Njite adapena inakjoite yofacape toa icoema jipaite ricó, Nocadaotsa iofió-carro icaolre ricó, atee jliaji panapje kjemadalri caolri ipjianda nafietaotsa shá, njite ipito caotsa cayoji napineta capisho sha matseeta shó. Shecoatsa jiwao corri cadanatsa coca ipoineta shá. ³⁷ Yocacawatsa jiwacatsa cayoji paana ipineta capisho shá matseeta shó, corri cadanatsa coca ipineta shá. Corriotsa kjaidaca shá yemá-carrontja jiponda ikjoete. ³⁸ Nawayaketacaotsa shá njaji apana inaiki, mayamicaotsa shá jipondape jipaite ricó. ³⁹ Njite njaji inacope, nawayacacaotsawa namatsicanaa ikjaotetsa, naofacawa nacoema jipaite ricó, njite njanirrinaipemi imatsicanaa ikjaote nawayaca tsakjaotsawa caytsa nacayisho. ⁴⁰ Najiwatsa nanaitjaca maatsi Norso, coshoca njaji njanirrinaipemi pia, coaji piaca neemaca Nokjoete nanaitja capoa maatsi Norso. ⁴¹ Njite Noema caotsa nakjoete njite node caotsana nacoema jipaite ricojle, njite kjenaa cadaa nanjiaca cawa nacaolre taaradalri ricó, njite maaco cadatsa nacoadataca jliaji jirrapitakjeti namatsicana ima, ⁴² nininaotsa Nodia watsa nowaopia lrinaco jliaji yácoti nonaitjalri pia Jacob yapiya, Isaac yapiya njite Abraham iapiya tsakja; njite nodia watsa nowaopia lrinaco jliaji jiipai. ⁴³ Namaca caotsa njepaite, niniotsa matsia watsa lriwafetacawa jliaji jiipai jlinaana lrico lriwafetacawa. Njite nacaoña caotsa namatsica ikjaote tsa namenata capoa njaji Noaco, corrin nacoataca nanacoa Noaco kjaidaperri. ⁴⁴ Njite cayo cadana toa, a cádanaco toana nacoema jipaite ricó, corriotsa Nopeeco carrocana, corrin tsakjaotsa nowayaketa cana pjiomi, Nowayaketá carrontja jliaji yácoti Norsolri nainai, ima icatsa Naminalri Dio-ca Njoa. ⁴⁵ Mitsa, Nodia watsa nowaopia lrinaco jliaji yácoti nonaitjalri pia naferrinaipemi yaapiya oopi, njaji Njotanipe pia Egipto jipaite lrikjoite, njite njaji apaana inaiki aimadan naanjí pia lrinaco, Njoá-carro na-Diote. Icatsa IMINALRITI-ca Njoá." ⁴⁶ Icatsa Noacoca njaji, yácoti kjaidaperrica njaji, Dio inaashopana, Lrinaitjanda naapiyatsa njaji inaiki aimadan Iraelnai jiipana Sinai naco Moise nakjoite.

¹ Caaco wa-Minalri Moise irso cayoji: ² ''Picaite narso njaji inaiki aimadan Iraelnai cayoji: ''Pada icaoña cadaa Dio irso lrikjaote jliaji lritatjanda lriinai, cayoatsa inaitjaca. ³ Icatsa nacpadaca njaji atsianai irsocape vente walria napekirrica nakjoite atee nanaco njaji irsocape sesenta walria napekirrica, yaawatsa cincoenta moneda palrataitape, cayoji iwacaaca carrodawa icadaa capishó. ⁴ Njite nanaco njaji inaitjepe cayoperri tsakja ipekirrica, irsotsa yaaca trenta monedaitape palraata, cayoji iwacaaca carrodawa icadaa capishó. ⁵ Njite njaji cinco walria ipekirrica nakjoite atee vente walria ipekirrica, narsotsa naaca nacoada vente moneda palraata, njite njaji inaitjepe, die moneda palraatape. ⁶ Njite njaji kirraitalri apapi kérri nacope atee cinco walria ipekirrica, narsotsa naaca nacoadawa cinco moneda palraatape, njite njaji inaitjepedape, madalrita monedaitape. ⁷ Njaji sesenta walria ipekirrica ipeyajle, njaji atsianai, quince monedaitape nacoada, njite njaji inaitjpe, die monedaitape nacoada. ⁸ Mitsa jliaji inaiki icadaaca cadawa corricadaa lritaita lricaoñaacacawa cayó, lrirso peda lrideeca sacerdote ikjaolre jliaji inaiki icadaaca-cadawa, njitena jliaji sacerdote lricaiteotsa coshocaotsa lricoada jliaji inaiki lrirsolritsa lricaoñaca lricoadawa. ⁹ Pada yoma cadaa ínoca maaficalri Dio irso, njite Dio icoadata lrioya, niini irsotsa shenitaca jliaji maaficalri Lrirso. ¹⁰ Jliaji inaiki corrin lritaita lritecojletaca jliaji maaficalri apana shó, apana matsiane yaapiya aapana maatsine sho. Cayo cada lrinaitja, njaji maaficalri lrirsotsa jlienitacana yámanape. ¹¹ Mitsa, maatsi cadatsa jliaji maaficalri, corridalritsa pataita paaca Dio irso, jliaji inaiki lrirsotsa lrideeca jliaji maaficalri sacerdote ipeyejleni. ¹² Jliaji sacerdote yajiwatsa lrioma lriají-carro coshoapaca lricoada jliaji maaficalri nawentalri niini, njite coshoapa cadaa, icatsaotsa lricoadaca. ¹³ Njite jliaji sacerdote yoma cadaa iwentaca jliaji maaficalri, niniotsa jlirreta pjaaca lricoada tamjia lricoada yooyádalri. ¹⁴ Pada shenita cadaa lriipana lriá-carro macoadatsa Dio irso, jliaji sacerdote lricadaotsa lricoada matsiadalri sho o maatsidalri shotsa. Njite coají-dalri cada lricoada, icatsa lricoadaca. ¹⁵ Mitsa jliaji panti iminalrim pia shenitacadan lriipana lrioma tsenakja lriwentacani, lrirsoatsa lricadaa pjaca lricoada lrinacojle lriwentá carroni, cayotsa lridieta tsenakja lriipanamo lrirsowawa. ¹⁶ Pada atsia shenita cadaa jlipaite nakjoite, niniotsa lricoada jliaji jiipai coshoca namaimaca njaji paniati paapanalri lri-ricoda, treciento setenta kilo cebadape cincoenta moneda palrataitape nacoada. ¹⁷ Jlienita cadaa jlipaite lri-rico walria nadieta cawa naminanai irso njaji narsompe, caycarrom watsa lricoada. ¹⁸ Mitsa jlienita cadani jliwalria jliaji nadieta cawa naminanai irso njaji narsompe, jliaji sacerdote lricapaotsani, lriniwetaotsa cosho walria catoa canacai lriocá-carro jliwalria jliaji nadieta cawa naminanai irso njaji narsonipe, njitenaotsa lricaite coshoapaca lricoada jliaji jiipai, mitsa lrirsotsa lridieta pjacatsa lricoada. ¹⁹ Njite jliaji atsia shenitacadam jlipaite lrioma tsenakja lriwentacani, lrirsotsa lriá pjaaca lricoada lrinacojle, icatsa cayoji lritaita lriyadaca tsenakjani. ²⁰ Mitsa corri cadaa lridieta jlipaite, o lriwendee cadani pada irso, corrinatsa lritaita lriwentacani lripieta. ²¹ Niniotsa, lrioca cádanacoatsa jliwalria jliaji nadieta cawa naminanai irso njaji narsompe, naawatsa Dio irso njenitanda Lrirso, cayoatsana nacosho njaji nacadaaji ajádalri DIo irso. Niniotsa sacerdote iyadacani. ²² Pada atsia shenita cadaa jlipaite jipadatsa lriwentanda, mitsa corri cadatsa nayadaca lriinai njaji lriipaneta, ²³ jliaji sacerdote lricapaotsani, lriniwetaotsa cosho walria catoa canacai lriocá-carro jliwalria jliaji nadieta cawa naminanai irso njaji narsonipe, njite jliaji atsia lrirsotsa lricaoñaca lricoada liácarro Dio irso jliaji jlienitanda Lrirso. ²⁴ Njite lrioca cadanacoa jliwalria jliaji nadietacawa naminanai irso njaji narsonipe, jliaji atsia iwentacadami jliaji jiipai, lrirso jliaji jiipai iminalri irso. ²⁵ Pjiomi lricoada, jliaji sacerdote lrirsotsa lricadaacani cayotsaji iwacaaca carroda icadaa capisho, die gramo pja paitape moneda icoana. ²⁶ Corri dekja pada itaita shenitaca njaji maaficalri initacape jiicoca njajdoa ioya, ima njaji initacaperri imotocawa Dio iyarrope-cana; buey cadaa, oveja cadaa, Dio iyarrope-cana. ²⁷ Mitsa maatsine cada jliaji maaficalri, jliaji lriminalri lritaita lriwentaca tsenakjani, mitsa lrirsotsa lria pjaaca lricoada inacojle. Mitsa corri cadaa lriminalri iwentani, lrirso peda lriwendeecani apada irso cayotsaji lricoada shotsa. ²⁸ Mitsa coca cadaa shenita pada lricadaoda Dio irso, nanakjoite njaji lrirsolri, inaiki o maaficalri cadaa, o lriipaneta jipaite cadaa, lritaita lriwendecani o lridiaca lriwenta lrirsowawa tsenakjani. Ima njaji icadanda Dio irso matsiá-perrica njaji icadaalri Lrirso. ²⁹ Corrin pada itaita icaoñaca jliaji inaiki Dio inanda nainoca. Irsotsa nainoca jliaji inaiki. ³⁰ 0Pjiomi njaji pada die nakjoite-perri lripaniana jliaji jiipai, njaa cadaa njaji itaoñacape njawacatsa o nainaca njaji jaico, Dio iyapecana. Dio shenitaji lrirsowawa. ³¹ Pada atsia ioma cdaa iwentaca lrirsowawa njaji pada die nakjoiteperri lricadaji. lrirsotsa lricaoña pjaaca pamoyoa nanacó. ³² Nanakjoite njaji diena pirraiti, jliaji iwapacaitana iniwetaji jliecote shó, apana nanakjoite irsotsa shenitacan Dio irsó. ³³ Jliaji iwapacaita maaficalri corrin lritaita lriniwanaca coandalri cadaa matsiani, o maatsine, corrin tsakja lritaita lritecojletaca apana maaficalri apan shoenakja. Cayo cada lrinaitjaca, lrirsotsa lricadaaca yaamanape jlienitaji DIo irso. Corrinatsa lritaita lripieta lriwentacani.'' ³⁴ Icatsa njaji yácoti kjaidaperri Dio icadaji Moise irso Jiipana nacó Sinai narso njaji inaiki aimadan Irael.

¹ Caaco JLIAJI IMINALRITI Moise irso nawacaaca-carroda lrico jalrapocolri ricó Sinai, lrinita cadaawa jiaji yaamapi kérri pawalria initacawa, yamawalria shapodam namoto cayamiwa Egipto jipaite lrikjoite njaji Iraelnai. Dio icaite narso cayoji: ² ''Iniwetaotsa pjiomi njaji atsianai Iraelnai pjiomi nanaikica nacó, njanirrinaipe iipaneta nacó. Iniwetaotsa nacoana njaji atsianai ³ itrsocape vente walria napekirrica ipeyajle, Pjiomi njaji itaita capena inoacacawa tsolrodao sho Iraelnai irso. Pjia njite Aarón yaapiya idanaotsa namaimaca njaji atsianai tsolrodaope coca iinai caotsa icadaana. ⁴ Pada atsia nanaikica nakjoite, pada jiwidaapo naapaneta nakjoite dalri, icatsaotsa jliaji icadalri caotsa naapiyawalrioca. Nacoana njaji njewidaapo, icatsaotsa jliaji iderrica njaji lrinaikite nainoacá-carro nanaikica poco naco. ⁵ Icatsa neepitanaca njaji atsianai jiwidaapoti inoacalriotsa piinai: Roben poco nakjoite, ⁶ Elizur, Sedeur irri; Simeo poco nakjoite, Selumiel, Zurisadai irri, ⁷ Judá poco nakjoite, Naasón, Aminadab irri; ⁸ Isacar poco nakjoite, Natanael, Zuar irri; ⁹ Zabolón poco nakjoite, Eliab, Helón irri; ¹⁰ Efraín poco nakjoite, jliaji José irri, Elisama, Amiud irri; Manasé poco nakjoite, Gamaliel, Pedazor irri; ¹¹ Benjamín poco nakjoite, Abidán, Gedoni irri. ¹² Dan poco nakjoite, ¹³ Ahiezer, Amisadai irri; Aser poco nakjoite, Pagiel, Ocrán irri; ¹⁴ Gad poco nakjoite, Eliasaf, Deuel irri; ¹⁵ njite Neftalí poco nakjoite, Ahira, Enán irri.'' ¹⁶ Icatsa neepitanaca njaji atsianai nakepitanataji njaji inaiki aimadalri. Icatsa njaji yajirrica njanirrinaipemi poco nacó. Icatsa njaji Iraelnai poco jiwidaapoca. ¹⁷ Moise Aarón yaapiya iwaketa nja atsianaica njaji, nadaná-carro neepitana, ¹⁸ njite nawaketa tsakja njaji atsianai Irael lricoperri lriniita cadaawa jliaji yaamapapi kérri nacó pawalria initacarropi, nadana neepitana pjiomi njaji atsianai irsocape vente walria napekirrica nacó ipeyajle, cocaca nanaikica njite kjaiterrica naferrinaipemi oopi. ¹⁹ Cayotsa Moise idana neepitana pjiomi jalrapocolri Sinai lrico, cayotsaji Dio inaa capisho piani. ²⁰ Nanakjoite njaji Roben poco, Irael irri ipjerriti, naniwetana neepitana nacó, pjiomi njaji vente walria perri ipekirrica nakjoite, itaitacapena yaacawa oowi ricó, coshoapacana njaapoco nakjoite njite naapaneta nacó tsakja oopi. ²¹ Naniwetana coarenta sei mil quiniento namaimaca njaji Roben poco. ²² Nanakjoite njaji Simeo poco, naniwetana neepitana nacó, pjiomi njaji vente walria perri ipekirrica nakjoite, itaitacapena yaacawa oowi ricó, coshoapacana njaapoco nakjoite njite naapaneta nacó tsakja oopi. ²³ Naniwetana cincoenta noeve mil treciento namaimaca njaji simeo poco. ²⁴ Nanakjoite njaji Gad poco, naniwetana neepitana nacó, pjiomi njaji vente walria perri ipekirrica nakjoite, itaitacapena yaacawa oowi ricó, coshoapacana njaapoco nakjoite njite naapaneta nacó tsakja oopi. ²⁵ Naniwetana coarenta cinco mil seiciento cincoenta atsianai njaji Gad poco. ²⁶ Nanakjoite njaji Judá poco, naniwetana neepitana nacó, pjiomi njaji vente walria perri ipekirrica nakjoite, itaitacapena yaacawa oowi ricó, coshoapacana njaapoco nakjoite njite naapaneta nacó tsakja oopi. ²⁷ Naniwetana setenta coatro mil seiciento atsianai njaji Judá poco. ²⁸ Nanakjoite njaji Isacar poco, naniwetana neepitana nacó, pjiomi njaji vente walria perri ipekirrica nakjoite, itaitacapena yaacawa oowi ricó, coshoapacana njaapoco nakjoite njite naapaneta nacó tsakja oopi. ²⁹ Naniwetana cincoenta coatro mil coatrociento atsianai njaji Isacar poco. ³⁰ Nanakjoite njaji Zabolon poco, naniwetana neepitana nacó, pjiomi njaji vente walria perri ipekirrica nakjoite, itaitacapena yaacawa oowi ricó, coshoapacana njaapoco nakjoite njite naapaneta nacó tsakja oopi. ³¹ Naniwetana cincoenta siete mil coatrociento atsianai njaji Zabolon poco. ³² Nanakjoite njaji Efrain poco, naniwetana neepitana nacó, pjiomi njaji vente walria perri ipekirrica nakjoite, itaitacapena yaacawa oowi ricó, coshoapacana njaapoco nakjoite njite naapaneta nacó tsakja oopi. ³³ Naniwetana coarenta mil quiniento atsianai njaji Efrain poco. ³⁴ Nanakjoite njaji Manasé poco, Jose irri, naniwetana neepitana nacó, pjiomi njaji vente walria perri ipekirrica nakjoite, itaitacapena yaacawa oowi ricó, coshoapacana njaapoco nakjoite njite naapaneta nacó tsakja oopi. ³⁵ Naniwetana trenta do mil dociento atsianai njaji Manase poco. ³⁶ Nanakjoite njaji Bejamin poco, naniwetana neepitana nacó, pjiomi njaji vente walria perri ipekirrica nakjoite, itaitacapena yaacawa oowi ricó, coshoapacana njaapoco nakjoite njite naapaneta nacó tsakja oopi. ³⁷ Naniwetana trenta cinco mil coatrociento atsianai njaji Bejamin poco. ³⁸ Nanakjoite njaji Dan poco, naniwetana neepitana nacó, pjiomi njaji vente walria perri ipekirrica nakjoite, itaitacapena yaacawa oowi ricó, coshoapacana njaapoco nakjoite njite naapaneta nacó tsakja oopi. ³⁹ Naniwetana sesenta do mil seteciento atsianai njaji Dan poco. ⁴⁰ Nanakjoite njaji Aser poco, naniwetana neepitana nacó, pjiomi njaji vente walria perri ipekirrica nakjoite, itaitacapena yaacawa oowi ricó, coshoapacana njaapoco nakjoite njite naapaneta nacó tsakja oopi. ⁴¹ Naniwetana coarenta un mil quiniento atsianai njaji Aser poco. ⁴² Nanakjoite njaji Neftali poco, naniwetana neepitana nacó, pjiomi njaji vente walria perri ipekirrica nakjoite, itaitacapena yaacawa oowi ricó, coshoapacana njaapoco nakjoite njite naapaneta nacó tsakja oopi. ⁴³ Naniwetana cincoenta tre mil coatrociento atsianai Neftali Judá poco. ⁴⁴ Moise, Aarón yaapiya naniweta pjiomi njaji atsianai, njite doce atsianai nanakjoite njaji doce poco Irael lricope naapiyawanaiwa. ⁴⁵ Niini naniwetaca pjiomi njaji atsianai Irael lricoperri, njaji vente walria perri ipekirrica nakjoite, itaitacapena yaacawa oowi ricó, naniwetana naapaneta nacó nacoanaa. ⁴⁶ Naniwetana seiciento tre mil quiniento atsianai. ⁴⁷ Mitsa njaji atsianai Levi poco nakjoite-perri corrin naniwetana, ⁴⁸ Ima Dio icaite Moise itso cayoji: ⁴⁹ ''Corriotsa piniwetá carroca njaji Levi poco, corrin tsakja pitaita piniwetacana nainai njaji Iraelnai aimadan. ⁵⁰ Mitsa picadaotsana nja carroatsa iwapa jliaji iwacaac-carroda lriofacawa lrico njaji yácoti kjaidaperri nonaitjashopa yaapiya yácoti, pjiomi njaji lriwawa lricope jliaji panti. Nja watsa idee njaji inaitjashopa jliaji panti iwacaac-carroda, njaji lriitada tsakja. Nawapaotsa jliaji iwacaaca-carroda njite nanaitjaotsa pantidape lriwaida nacó. ⁵¹ Icarseta cádanacoatsa jliaji panti iwacaaca-carrodawa apafe lricojle, njaji Levitanai nakejloá watsani, njite nemeta tsenakjaotsani a kjerrecaw- jle cada lriemawa tsenakja. Ccoca cadaa itsomita jliaji panti iwacaac-carroda corridalritsa inakjoite dalrican mayami caotsani. ⁵² Njite njaji Irael poco nanaitja cadaa naapanaitawa, narsotsa neemetaca a kjerrecawajle cadaa nacapa lriemacawa jliaji naowite jinanapje. ⁵³ Mitsa njaji Letita poco, nemetaotsa napanapoco lriwaida nacotsa jliaji panti iwacaaca-carroda iwaida nacó, naofacawa lrico njaji yácoti kjaidaperri wadee noirra jiwacawa nanaco njaji Iraelnai aimadan.Levitanai watsa njaji iwalriotsa jliaji panti iwacaaca-carroda lrico, naofacawa lrico njaji yhácoti kjaidaperri nonaitjashopa yápiya yácoti.'' ⁵⁴ Njaji Iraelnai nanaitja pjiomi njaji. Nanaitjatsa cayoji Dio inaa capisho nanaitjaca Moise nakjoite.

¹ Caaco tsenakja Dio Moise irso njite Aarón irso tsakja. Lriaco narso: ² ''Nacoana njaji Iraelitanai narsotsa nanaitjaca napanaitawa njenanapje iwaida nacó, naferrinaipemi iipaneta jinanapje. Naofawatsa iwacaaca-carroda iwaida nacó yamemape. ³ Njaji inaitjalriotsa ipanaitawa jérri imotokema nawacaaca-carroda irso, Judá poco, nanaitjaotsa napanaitawa njenaanapje yapjite. Naasón, Aminadab irri, icatsaotsa njewidaapoca njaji Judá poco. ⁴ Setenta coatro mil seiciento namaimaca njaji Judá poco. ⁵ Njite Nacodapitsa njaji Judá poco, Isacar poco watsa inaitja napanaitawa. Natanael, Zuar irri watsa njewidaapo njaji tsolrodaonai aimadan narso njaji Isacar poco. ⁶ Cincoenta coatro mil coatrociento atsianai namaimaca njaji tsolrodaonai. ⁷ Njite Isacar icodapitsa, Zabolón poco watsa inaitja napanaitawa. Eliab, Helón irri watsa naapiyawalri njaji Zabolón itsolrodaonai aimadan. ⁸ Cincoenta siete mil coatrociento atsianai namaimaca njaji tsolrodaonai. ⁹ Pjiomi namaimaca njaji Judá poco iofacawa lrico ciento ochenta sei mil coatrociento namaimaca. Icatsaotsa njaji inaitjalriotsa iofacawa napjeya. ¹⁰ Njite jérri iparrema nacó pema Robén poco watsa inaitja napanaitawa, njenanapje yapjite. Elisur, Sedeur irri watsa njewidaapo njaji Robén poco. ¹¹ Coarenta sei mil quiniento atsianai namaimaca. ¹² Njite Robén poco icodapitsa, Simeón poco watsa itaitja naapana poco. Njite Selumiel, Zurisadai irri watsa njewidaapo. ¹³ Cincoenta nueve mil treciento atsianai namaimaca. ¹⁴ Nacodapitsa Gad poco watsa inaitja napanaita poco. Njite Elisaf, Deuel irri watsa njewidaapo njaji Gad poco. ¹⁵ Coarenta cinco mil seiciento cincoenta atsianai namaimaca. ¹⁶ Pjiomi njaji naniwetaji nainai njaji Robén poco naofacawa lricó, coshoca namaimaca nacoanaa, cinto cincoenta un mil coatrociento cincoenta namaimaca. Icatsaotsa njaji yofalriotsa nanacojleda. ¹⁷ Njite njaji Levitanai naawatsa napjeya, napecollrico njaji napanaitape, njite nadeeca njaji nanaitjashopa nawacaaca-carroda lrico. Njaji coatro poco naawatsa njapodawaaca, cayotsaji nacadaa capisho neemawa, njenaanapje icodapitsa. ¹⁸ Njaji Efraín poco, nanaitja napanaita poco njenanapje yapjitetsa. Elisama, Amiud irri icatsa jliaji njewidaapo. ¹⁹ Coarenta mil quiniento atsianai namaimaca. ²⁰ Njite nacodapitsa naofawa njaji Manasee poco. Njite Gamaliel-ca jliaji njewidaapo, Pedasur irí. ²¹ Trenta do mil atsianai namaimaca. ²² Njite njapodamtsa, nja watsa njaji Benjamin poco. Abidán, Gedeoni irri watsa naapiyawalri. ²³ Trenta cinco mil coatrociento namaimaca njaji atsianai. ²⁴ Pjiomi njaji naniwetaji Efraín poco iinaiperri ciento ocho mil cien. Icatsa njaji yofalriwa madalripoco nacó. ²⁵ Njite pema lriparrema nacojle, atsialriema nacojle Dan poco watsa inaitja ipana poco. Ahieser, Amisadai irri watsa njewidaapo. ²⁶ Sesenta do mil seteciento atsianai namaimaca. ²⁷ Njaji Aser poco watsa yofawa nacodapi. Pagiel, Ocrán irri watsa naapiyawalrio. ²⁸ Coarenta un mil quiniento atsianai namaimaca. ²⁹ Nanacojledatsa njaji Neftalí poco. Ahira, Enan irri watsa naapiyawalri. ³⁰ Cincoenta tre mil coatrociento atsianai namaimaca. ³¹ Pjiomi njaji nawiwetaji nainai njaji Dan poco ciento cincoenta siete mil seiciento atsianai. Icatsaotsa njaji imotolriotsa pikeetem, njenanapje icodapoitsa. ³² Icatsa njaji Iraelitanai, naniwetaji coshoca naapaneta lrico. Naniwetaji njaapoco naofacawa lrico, njite icapiatsa namaimaca seiciento tre mil quiniento cincoenta padenirri. ³³ Mitsa Moise njite Aarón corrin naniweta njaji levita poco nainai njaji Iraelnai, ima cayo piacatsa Dio inaa piaca Moise inaitjaca. ³⁴ Njaji Iraelitanai nanaitja pjiomi njaji Dio inaalri nanaitjaca Moise nakjoite. Nacoanamtsa naofawa njenanapje icodapitsa. Naa manawa naofacawa lrkjoite papocotsawa coajica nanaikica, cayotsaji coaji piaca nánoca njaji naferrinaipemi.